पराञ्चि खानि व्यतृणत् स्वयंभूस् तस्मात् पराङ् पश्यति नान्तरात्मन् / कश्चिद् धीरः प्रत्यग् आत्मानम् ऐक्षद् आवृत्तचक्षुर् अमृतत्वम् इच्छन् // KअU_४.१ //

पराचः कामान् अनुयन्ति बालास् ते मृत्योर् यन्ति विततस्य पाशम् / अथ धीरा अमृतत्वं विदित्वा ध्रुवम् अध्रुवेष्व् इह न प्रार्थयन्ते // KअU_४.२ //

येन रूपं रसं गन्धं शब्दान् स्पर्शींश् च मैथुनान् / एतेनैव विजानाति किम् अत्र परिशिष्यते //

एतद् वै तत् // KअU_४.३ //

स्वप्नान्तं जागरितान्तं चोभौ येनानुपश्यति / महान्तं विभुम् आत्मानं मत्वा धीरो न शोचति // KअU_४.४ //

य इमं मध्वदं वेद आत्मानं जीवम् अन्तिकात् / ईशानं भूतभव्यस्य न ततो विजुगुप्सते //

एतद् वै तत् // KअU_४.५ //

यः पूर्वं तपसो जातम् अद्भ्यः पूर्वम् अजायत / गुहां प्रविश्य तिष्ठन्तं यो भूतेभिर् व्यपश्यत //

एतद् वै तत् // KअU_४.६ //

या प्राणेन संभवति अदितिर् देवतामयी / गुहां प्रविश्य तिष्ठन्तीं या भूतेभिर् व्यजायत //

एतद् वै तत् // KअU_४.७ //

अरण्योर् निहितो जातवेदा गर्भ इव सुभृतो गर्भिणीभिः / दिवेदिव ईड्यो जागृवद्भिर् हविष्मद्भिर् मनुष्येभिर् अग्निः //

एतद् वै तत् // KअU_४.८ //

यतश् चोदेति सूर्यो अस्तं यत्र च गच्छति / तं देवाः सर्वे अर्पितास् तद् उ नात्येति कश्चन //

एतद् वै तत् // KअU_४.९ //

यद् एवेह तद् अमुत्र यद् अमुत्र तद् अन्व् इह / मृत्योः स मृत्युम् आप्नोति य इह नानेव पश्यति // KअU_४.१० //

मनसैवेदम् आप्तव्यं नेह नानास्ति किंचन / मृत्योः स मृत्युं गच्छति य इह नानेव पश्यति // KअU_४.११ //

अङ्गुष्ठमात्रः पुरुषो मध्य आत्मनि तिष्ठति / ईशानो भूतभव्यस्य न ततो विजुगुप्सते //

एतद् वै तत् // KअU_४.१२ //

अङ्गुष्ठमात्रः पुरुषो ज्योतिर् इव अधूमकः / ईशानो भूतभव्यस्य स एवाद्य स उ श्वः //

एतद् वै तत् // KअU_४.१३ //

यथोदकं दुर्गे वृष्टं पर्वतेषु विधावति / एवं धर्मान् पृथक् पश्यंस् तान् एवानु विधावति // KअU_४.१४ //

यथोदकं शुद्धे शुद्धम् आसिक्तं तादृग् एव भवति / एवं मुनेर् विजानत आत्मा भवति गौतम // KअU_४.१५ //

// इति चतुर्थी वल्ली //

पुरम् एकादशद्वारम् अजस्यावक्रचेतसः / अनुष्ठाय न शोचति विमुक्तश् च विमुच्यते //