ལས་ཀྱི་ཆོ་ག་མཐོང་ནས་ནི། ། རྟག་ཏུ་ཕྱག་རྒྱ་མཁའ་མཉམ་པ། ། ཕྱག་རྒྱ་དེ་ཉིད་རྟག་ཏུ་བྲི། ། དེ་ཡི་དཀྱིལ་དུ་རྡོ་རྗེ་བྲི། ། ཤར་དུ་འཁོར་ལོ་ཡང་དག་ བྲི། ། དེ་ལྟ་བུ་ལ་སོགས་པ་བལྟ། ། ཕྱག་མཚན་ཀུན་ཏུ་ཞལ་དང་མཚུངས། ། དེ་ལ་འདི་ཡི་དགང་གཟར་ནི། ། དེ་ཡི་ཡུ་བའི་ཚད་དུ་བྱ། ། ཁྲུ་གང་དང་ནི་ལྡན་པར་བྱ། ། དེ་ཡི་དཀྱིལ་འཁོར་རྩེ་མོ་ནི། ། སོར་བཞི་པོ་ལ་ཟླུམ་པོར་བྱ། ། གཏིང་དུ་སོར་གཉིས་ཟབ་པ་ལ། ། དེ་ལ་སོར་ཕྱེད་མཆུར་བྱས་པའོ། ། བླུགས་གཟར་པདྨའི་འདབ་འདྲ་བའི། ། ཁ་ནི་མཐེ་བོའི་ལྟོ་གང་ལ། ། དེ་ལ་སོར་གཅིག་ཙམ་ཟབ་པ། ། རྒྱུད་འདི་རུ་ནི་རབ་ཏུ་བསྔགས། ། དཀྱིལ་འཁོར་དུ་ནི་མ་ཞུགས་དང་། ། མཚམས་མེད་ལྔ་ནི་བྱས་པ་དང་། ། སེམས་ཅན་སྲོག་ནི་ གཅོད་པ་དང་། ། ཉ་དང་ཤ་ནི་མངོན་ཟ་དང་། ། ཆང་ལ་མངོན་པར་དད་པ་དང་། ། ཆད་ལྟའི་བརྟུལ་ཞུགས་འཛིན་པ་དང་། ། མངོན་པར་དབང་ནི་མ་བསྐུར་དང་། ། ཀུན་ཏུ་འཁྱམ་ཞིང་ལྡོམ་བུ་དང་། ། གྲོང་གི་གླ་མི་བྱེད་པས་ཀྱང་། ། གཤིན་རྗེའི་གཤེད་རྒྱུད་མངོན་ གཞོལ་ན། ། ནག་པོའི་ཚིག་ནི་ཇི་ལྟ་བར། ། གྲུབ་པར་འདི་ལ་ཐེ་ཚོམ་མེད། ། དེ་ནས་བྱམས་པ་ལ་སོགས་ཀྱིས། །

རྡོ་རྗེ་ངེས་པ་འདི་མཐོང་ནས། ། རྡོ་རྗེ་བྱང་ཆུབ་སེམས་དཔའ་ཀུན། ། མི་སྨྲ་བར་ནི་སྡོད་པར་གྱུར། ། དེ་ལ་འདི་ནི་རྡོ་རྗེ་དབབ་པའི་ཆོ་གའོ། ། འབྱུང་བཞིའི་ས་བོན་ ཆེན་པོ་ཡིས། ། འཁོར་ལོ་བཞི་ནི་རབ་བསྒྲུབ་བྱ། ། གནས་བཞིར་རབ་ཏུ་སྦྱོར་བ་བསམ། ། ནམ་མཁའ་ལ་ནི་གཡོ་བར་བྱེད། ། རྐང་པ་དག་གི་འོག་ཏུ་ཡྃ། ། ལྟེ་བར་རྃ་སྟེ་སྙིང་གར་ལྃ། ། མགོ་བོ་ལ་ནི་ཡི་གེ་བྃ། ། ཡི་གེ་ཡ་ནི་ནག་ཆེན་པོ། ། དྲག་ལ་རྔམ་པ་རབ་འགྱུར་བའི། ། གྲུ་ གསུམ་སྲེག་པའི་མེ་ལྟར་འབར། ། ཉི་མའི་དཀྱིལ་འཁོར་ལྟ་བུར་དམར། ། རྡོ་རྗེ་ས་གཞི་འཛིན་བཟོད་པའི། ། སེར་པོ་ཆེན་པོ་གྲུ་བཞི་པ། ། རི་རབ་རི་ཡིས་མནན་པ་ཡི། ། ནོར་འཛིན་དེ་ནི་བསྒོམ་པར་བྱ། ། དཀར་པོ་ཟླུམ་པོ་བསིལ་ཆེན་པོ། ། སྤྲིན་བཞིན་དུ་ནི་ཆར་བ་འཛིན། ། རྒྱ་མཚོ་དུ་མ་ཆུས་གང་བའི། ། གངས་ཀྱི་རི་བོ་ལྟར་བསིལ་བའི། ། གནས་བཞི་རུ་ནི་སྦྱོར་བས་ན། ། ཁར་ནི་སྣང་བ་མཐའ་ཡས་ཏེ། ། སློབ་མ་རྡོ་རྗེ་བསྒོམ་པར་བྱ། ། མྱུར་བ་རུ་ནི་འབེབས་པར་བྱེད། ། དེ་ལ་འདི་ནི་སྤྲོ་བའི་ཆོ་གའོ། ། རྡོ་རྗེ་ཆོས་ནི་མགོན་ཆེན་པོ། ། སྣང་བ་ མཐའ་ཡས་བདེ་བ་ཆེ། །

གསུངས་ཤིག་འདོད་ཆགས་ཆོས་ཆེན་པོ། ། དགེ་དང་མི་དགེ་ལེགས་པར་དྲི། ། ཁྲུ་གང་ནས་ནི་བརྩམས་ནས་ནི། ། ཇི་སྲིད་ཁྲུ་ནི་སྟོང་གི་བར། ། སློབ་མ་ཆེན་པོ་འཕར་བར་འགྱུར། ། དེ་ནི་དབབ་པའི་ཆོ་གའོ། ། འཇིགས་གཟུགས་རི་མོའི་མཚན་ཉིད་ནི། ། དེ་ནས་ཡང་དག་བཤད་པར་བྱ། ། ས་ནི་འཇམ་པོ་བླངས་བྱས་ལ། ། བརྟུལ་ཞུགས་ཅན་གྱིས་བཟླས་པ་བྱ། ། སྲན་གྲེའུ་འོ་མ་དེ་བཞིན་ཤ ། བུ་རམ་ཏིན་ནི་ནི་ལ་སོགས། ། སྣུམ་དང་ནིམ་པའི་འོ་མ་དང་། ། ན་ཏི་དེ་བཞིན་ཛ་གེ་སར། ། དང་པོར་དཀར་པོར་བྲི་བར་བྱ། ། ཁ་དོག་གཞན་ གྱིས་དེ་ནས་བསྒོམ། ། རྡོ་རྒྱུས་དང་ནི་བཙག་དག་ལས། ། རྒྱ་སྐྱེགས་ལྟ་བུའི་མདོག་ཏུ་འགྱུར། ། ཡུང་བ་དེ་དང་རམས་དག་ལས། ། དེ་བཞིན་ཁ་དོག་ལྗང་གུར་འགྱུར། ། སྔོན་པོ་དག་ནི་རམས་ཀྱིས་བྱ། ། དེ་བཞིན་དུ་བས་ནག་པོའོ། ། ལྡོང་རོས་ཀྱིས་ནི་སེར་པོ་སྟེ། ། དམར་པོ་དེ་བཞིན་ མཚལ་གྱིས་སོ། ། དེ་ལ་བིལ་བའི་སྙིང་པོ་བཞག ། ཧ་ཅང་ཉུང་དང་མང་བ་མིན། ། མང་ན་ནག་པོར་འགྱུར་བ་སྟེ། ། ཉུང་ན་དེ་བཞིན་འཐུལ་བར་འགྱུར། ། གཟུགས་ནི་ཁྲོ་དང་ཞི་བའོ། ། མཚན་ཉིད་དག་ནི་བཤད་པར་བྱ། ། རོལ་བ་ཞི་བར་གསུངས་ པ་སྟེ། །

ཁྲོ་བོ་སྦོམ་ལ་ཐུང་བར་བཤད། ། སྣ་ནི་སོར་བཞི་བྱ་བ་སྟེ། ། དཔྲལ་བ་ཀོས་ཀོ་མཆུ་དེ་བཞིན། ། མགྲིན་པ་འགྲམ་པ་དེ་བཞིན་མཚན། ། སོར་བཞི་དག་ཏུ་བྱ་བ་ཡིན། ། ཉི་ཤུ་རྩ་བཞི་ལག་པ་ལ། ། གྱེན་དུ་སོར་ནི་ཉི་ཤུ་ཡིན། ། ལག་པ་རྐང་པ་གདོང་ཇི་ལྟར། ། མིག་ ནི་མཐེ་བོང་གང་ཙམ་སྟེ། ། རྣ་བ་གཉིས་ལ་སོར་གཉིས་བསྒྲགས། ། འབྲས་བུ་གཉིས་ལ་དེ་བཞིན་བཞི། ། མཆུ་ནི་སོར་གཉིས་བསྡོམས་པའོ། ། ལྟེ་བ་སོར་གཅིག་ཟབ་པ་ཡིན། ། ལུས་ནི་མགྲིན་པ་བོར་བ་ཡི། ། གདོང་ནི་གསུམ་འགྱུར་ལུས་ལ་དགོད། ། རལ་པ་ཅོད་པན་ དེ་ཡི་ཚད། ། རིན་ཆེན་ཅོད་པན་སོར་དྲུག་པའོ། ། རལ་པ་གཅིག་མ་རབ་སྒྲུབ་ཐབས། ། དེ་ནས་ཡང་དག་བཤད་བྱ་བ། ། གནོད་སྦྱིན་མོ་ནི་སྒྲུབ་འདོད་པས། ། རལ་པ་གཅིག་མ་རབ་སྒྲུབ་ཐབས། ། ཕྱག་གཉིས་པ་ལ་ཞལ་གཅིག་སྟེ། ། གྲི་གུག་དང་ནི་ཐོད་པ་ལ། ། ཤིན་ཏུ་ སྦོམ་ལ་མདོག་སྔོ་བ། ། དཀྱིལ་འཁོར་དབུས་སུ་བསྒོམ་པར་བྱ། ། ཛམྦྷ་ལ་ནི་ཤར་དུ་བསྒོམ། ། བ་སུ་དྷ་ར་ལྷོ་ཕྱོགས་སུ། ། ཆུ་དབང་ནུབ་ཏུ་དགོད་པར་བྱ། ། བྱང་དུ་རྣ་ཆ་ཀོས་ཀོ་འཕྱང་། ། མེ་ལ་སོགས་པའི་མཚམས་དག་ཏུ། ། གནོད་སྦྱིན་མོ་བཞི་རབ་བསྒོམ་བྱ། །

ཀུ་ཏལ་ཀྱེ་ ཧེ་ནི་གྱི་ཧྃ། ། བ་སུ་དྷ་རི་ཆོ་ག་བཞིན་དགོད། ། དེར་ནི་སྒོ་བ་རྣམ་བསྒོམས་ཏེ། ། ཐོ་བ་ལ་སོགས་མཉམ་པར་རོ། ། འཁོར་ལོ་སྔ་མ་མཐོང་བ་བཞིན། ། དེ་བཞིན་མདོག་ནི་རབ་སྦྱར་བྱ། ། ཕྱག་མཚན་བདག་ནི་ལྟར་འཛིན་པ། ། མཁས་པས་ཕྱི་ནས་སྔགས་བཟླས་ཏེ། ། ཨོཾ་ཨེ་ཀ་ ཛཊཱི་བ་སུདྷཱ་རི་ཎི་སྭཱ་ཧཱ། ། པུཀྐ་སཱི་ནི་རབ་སྒྲུབ་ཐབས། ། དེ་ནས་ཡང་དག་བཤད་པར་བྱ། ། གང་ཞིག་བསྒོམས་པ་ཙམ་གྱིས་ནི། ། འཇིག་རྟེན་གསུམ་ལ་འཚེ་ནུས་པ། ། སྐུ་མདོག་སེར་པོ་ཞལ་བཞི་པ། ། ཕྱག་བཞི་བོང་བུ་ལ་བཅིབས་པ། ། པུཀྐ་སཱི་ཡི་ལུས་བསྒོམ་བྱ། ། ཞགས་པ་ཐོ་བ་མདའ་དག་དང་། ། བརྟུལ་ཞུགས་ཅན་གྱིས་གཞུ་བཅས་བསྒོམ། ། ཨོཾ་པུཀྐ་སཱི་ཨཾ་ཞེས་སྔགས་བརྗོད་དོ། ། འཇམ་པའི་རྡོ་རྗེའི་དཀྱིལ་འཁོར་ནི། ། དེ་ནས་ཡང་དག་བཤད་བྱ་བ། ། དེ་ཡི་མོད་ལ་མི་སྣང་བར། ། འཇམ་པའི་རྡོ་རྗེ་གྲགས་འགྱུར་བ། ། འབར་ བའི་གསེར་འོད་འདྲ་བ་ཡི། ། སེར་པོ་ཞལ་གསུམ་ཕྱག་དྲུག་པ། ། གཞོན་ནུའི་གཟུགས་ནི་འཛིན་པའི་མགོན། ། མི་མཐོང་བྱ་བའི་དོན་དུ་བསྒོམ། ། ཤར་དུ་མཛེས་མ་དགོད་པར་བྱ། ། དེ་བཞིན་ལྷོ་རུ་སྐྲ་ཅན་མ། ། ནུབ་ཏུ་སེར་པོ་བསྒོམ་པར་བྱ། །

བྱང་དུ་ཉེ་བའི་སྐྲ་ཅན་མ། ། ཐམས་ཅད་ཕྱག་ན་རལ་གྲི་དང་། ། འཁོར་ལོ་ལ་སོགས་གཞན་ལ་དགོད། ། ཐམས་ཅད་ཞལ་གསུམ་ཕྱག་དྲུག་པ། ། སྣ་ཚོགས་རྒྱན་གྱིས་བརྒྱན་པའོ། ། ས་བོན་ཡི་གེ་མཾ་ལས་བྱུང་། ། དཀྱིལ་འཁོར་གྱི་ནི་དབུས་ན་བཞུགས། ། ཐམས་ཅད་ཞབས་ནི་གཡོན་བརྐྱང་བས། ། རི་བོང་ ཅན་གྱི་གདན་ལ་བཞུགས། ། འོད་ཟེར་ཅན་དང་རི་ཁྲོད་མ། ། དེ་བཞིན་ནོར་འཛིན་སྐུལ་བྱེད་མ། ། མེ་ལ་སོགས་པའི་མཚམས་བཞི་རུ། ། བསྡུས་པ་དགོད་བྱ་སྙིང་པོ་ལའོ། ། མྱ་ངན་མེད་དང་ཡལ་འདབ་དང་། ། འབྲས་ཀྱི་སྙེ་མ་དབྱིག་པའོ། ། སེར་དང་ལྗང་དང་ཡང་སེར་པོ། ། དཀར་པོའི་ལུས་ནི་བསྒོམ་པར་བྱ། ། ཀུན་ཀྱང་ཞལ་གསུམ་ཕྱག་དྲུག་པ། ། དཀྱིལ་འཁོར་དག་ཏུ་གདབ་པར་བྱ། ། ཐོ་བ་ལ་སོགས་སྒོ་བ་བཞི། ། བསྒོམས་ན་མཐོང་བར་མི་འགྱུར་རོ། ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་ རྒྱུད་ལས་འཇམ་པའི་རྡོ་རྗེ་སྒྲུབ་པའི་ཐབས་ཞེས་བྱ་སྟེ་རིམ་པར་ཕྱེ་བ་བཅུ་བཞི་པའོ། ། ། ། འཕགས་པ་ཛི་གུ་ལིའི་སྒྲུབ་ཐབས། ། དེ་ནས་ཡང་དག་བཤད་པར་བྱ། ། གང་ཞིག་བསྒོམ་པ་ཙམ་གྱིས་ནི། ། ཆུ་ཡི་སྟེང་ནས་འགྲོ་འགྱུར་བ། །

སེར་པོ་ཞལ་གསུམ་ཕྱག་དྲུག་པ། ། ས་བོན་ཕུཿལས་ཡང་དག་བྱུང་། ། སྐུ་ཆེན་ཕྱག་ན་སྦྲུལ་བསྣམས་པ། ། རྨ་བྱ་ལ་ནི་ཞོན་པ་དགོད། ། ཤར་དུ་རྨ་བྱ་དགོད་པར་བྱ། ། དེ་བཞིན་ལྷོ་རུ་ཁྲོ་གཉེར་ཅན། ། ནུབ་ཏུ་རི་ཁྲོད་ལོ་མ་ཅན། ། བྱང་དུ་རྡོ་རྗེ་ལྕགས་སྒྲོག་མ། ། རྨ་བྱའི་སྒྲོ་དང་སྤྱི་བླུགས་དང་། ། ལོ་མ་དང་ནི་ལྕགས་ སྒྲོག་མ། ། དེ་དག་རྣམ་པར་བསྒོམ་པར་བྱ། ། སེར་དང་དམར་དང་དེ་བཞིན་ལྗང་། ། ཁ་དོག་སྔོན་པོ་དབྱེ་བ་ཉིད། ། མཁས་པས་འདི་ལྟར་བསྒོམ་པར་བྱ། ། དེ་བཞིན་སྔགས་འདི་དག་ཀྱང་བཟླས། ། ཨོཾ་ཕུཿཛཿ། ཐོ་བ་ལ་སོགས་སྒོ་རུ་དགོད། ། མེ་ཏོག་ལ་སོགས་ མཚམས་སུ་དགོད། ། ཛྃ་གུ་ལི་ཡི་སྦྱོར་བ་ཡིས། ། ཆུ་ཡི་སྟེང་ནས་རྟག་ཏུ་འགྲོ། ། ཀུ་རུ་ཀུལླེ་རབ་སྒྲུབ་ཐབས། ། དེ་ནས་ཡང་དག་བཤད་པར་བྱ། ། གང་གིས་བསྒོམས་པ་ཙམ་གྱིས་ནི། ། ཀླུ་ཡི་བུ་མོ་རབ་འགུགས་པ། ། ཁ་དོག་དམར་པོ་ཞལ་བཞི་པ། ། ཕྱག་བརྒྱད་དང་ ནི་རབ་ཏུ་ལྡན། ། ཧྲཱིཿཡི་ས་བོན་ལས་བྱུང་བས། ། ཀླུ་ནི་འགུགས་པར་བྱེད་པ་ཡིན། ། ཕྱག་བརྒྱད་དུ་ནི་ཀླུ་དགོད་དེ། ། མཐའ་ཡས་ལ་སོགས་ཀླུ་རིགས་བརྒྱད། ། ལུས་ནི་སྦྲུལ་གྱིས་རབ་ཏུ་བརྒྱན། །

བརྟུལ་ཞུགས་ཅན་གྱིས་མཛེས་མ་བསྒོམ། ། སྔགས་ནི་ཨོཾ་ཀུ་རུ་ ཀུལླེ་ཧྲཱིཿཕུཿསྭཱ་ཧཱ། དེ་ནས་གསང་བ་བཤད་པར་བྱ། ། བསྡུས་ནས་ཡིན་གྱི་རྒྱས་པ་མིན། ། གང་ཞིག་ཤེས་པ་ཙམ་གྱིས་ནི། ། ལྷ་ཡི་བུ་མོ་འགུགས་བྱེད་པ། ། ཕྱག་གཉིས་པ་ལ་ཞལ་གཅིག་སྟེ། ། ཕྱག་ན་མདའ་དང་གཞུ་བསྣམས་པ། ། ལུས་ནི་སེར་པོ་ཆེན་པོ་ཡི། ། རྡོ་རྗེ་ལུས་མེད་བསྒོམ་པར་བྱ། ། ཤར་དུ་དགའ་མ་བསྒོམ་པར་བྱ། ། ལྷོ་རུ་འདོད་པས་མཛེས་མ་བསྒོམ། ། ནུབ་ཏུ་འདོད་པའི་ལྷ་མོ་བསྒོམ། ། བྱང་དུ་འདོད་པའི་ལྕགས་ཀྱུའོ། ། འདོད་པའི་ལྷ་མོ་ཐམས་ཅད་ཀྱི། ། ཕྱག་ཏུ་མདའ་དང་གཞུ་བསྒོམ་བྱ། ། སེར་དང་དམར་དང་དེ་ བཞིན་ལྗང་། ། དམར་སྐྱ་དག་ནི་བསྒོམ་པར་བྱ། ། མཚམས་རྣམས་སུ་ནི་རྟག་དགོད་པ། ། མི་འགག་དེ་བཞིན་མཚམས་ཀྱི་བདག ། གཡི་དང་སྤྲེའུའི་རྒྱལ་མཚན་ནི། ། སྒོ་ཡི་ཕྱོགས་ཀྱི་བཤད་པར་བྱ། ། འདོད་པ་འགྱིང་དང་འགྱིང་བག་ཅན། ། དྲན་དང་དེ་བཞིན་མདའ་ གྲི་ཅན། ། ལྷ་རྣམས་དེ་དག་ཐམས་ཅད་ཀྱི། ། དབུ་ལ་གཤིན་རྗེའི་གཤེད་པོ་བསྒོམ། ། བུད་མེད་ཀྱི་ནི་པདྨ་རུ། ། རྡོ་རྗེ་ལུས་མེད་བསྒོམ་པར་བྱ། ། ཡི་གེ་ཧྲཱིཿལས་ཡང་དག་བྱུང་། ། ཀུན་ཏུ་འཁོར་བར་རྣམ་པར་འཕྲོ། །

བསླུས་ཤིང་གཡེངས་པ་བསྒོམ་པར་བྱ། ། མྱོས་ ནས་བདེ་བའི་འདོད་ཡིད་ཀྱིས། ། དམར་པོའི་གོས་ཀྱིས་ཡོངས་དཀྲིས་ཏེ། ། རྐང་པའི་དྲུང་དུ་ལྷུང་བར་འགྱུར། ། དེར་ནི་སྔགས་ཀྱང་བཟླས་པར་བྱ། ། ཡི་གེ་ཨོཾ་ནི་རིང་པོར་དྲང་། ། ཡི་གེ་སྭཱ་ཧཱ་མཐའ་མར་སྦྱིན། ། ཡི་གེ་སི་ཏིའི་སྔགས་བཟླས་བྱ། ། ཆེ་གེ་མོ་ཞིག་བདག་དབང་ འགྱུར། ། ཐམས་ཅད་དུ་ནི་བསྒོམས་བྱས་ན། ། ནག་པོའི་ཚིག་ནི་ཇི་བཞིན་གྱིས། ། རྣལ་འབྱོར་འདོད་པས་དེ་འཐོབ་འགྱུར། ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་ལུས་མེད་རྡོ་རྗེའི་སྒྲུབ་ཐབས་རིམ་པར་ཕྱེ་བ་སྟེ་{བཅྭ་,བཅོ་}ལྔ་པའོ། ། ། ། ཧེ་རུ་ཀ་ཆེན་སྒྲུབ་པའི་ཐབས། ། དེ་ནས་ཡང་དག་བཤད་པར་བྱ། ། རྣལ་འབྱོར་འཁོར་བར་བཅིངས་པ་ལ། ། གང་ཞིག་ཤེས་པས་མྱུར་གྲོལ་བ། ། ཕྱག་གཉིས་པ་ལ་ཞལ་གཅིག་སྟེ། ། ཁ་དོག་སྔོན་པོ་ཕྱེད་གར་ཅན། ། རྡོ་རྗེ་ཕྱག་ཏུ་བསྒོམ་པར་བྱ། ། གཞན་ཡང་ཐོད་པ་བསྒོམ་ པར་བྱ། ། སྤྱན་གསུམ་སྐྲ་ནི་གྱེན་དུ་འགྲེང་། ། ཕྱག་རྒྱ་ལྔ་ཡིས་རྣམ་པར་བརྒྱན། ། ཁ་ཊྭཱྃ་ག་ནི་གཡོན་ཕྱོགས་སུ། ། ཕྲེང་བ་དག་གིས་རྐང་པ་བརྒྱན། །

ས་བོན་ཧཱུྃ་ལས་ཡང་དག་བྱུང་། ། {ཡི་དགས་,ཡི་དྭགས་}ལ་གནས་རྟག་ཏུ་དགོད། ། སངས་རྒྱས་ལྔ་རུ་རབ་སྦྱོར་བ། ། ཐོད་པ་ལྔ་ནི་ དབུ་ལའོ། ། ཅོད་པན་ལ་ནི་མི་བསྐྱོད་བསྒོམ། ། ཧེ་རུ་ཀར་གྲགས་བསྒོམ་པར་བྱ། ། ཤར་དུ་ཆོས་ཀྱི་འཁོར་ལོ་མ། ། སངས་རྒྱས་བྱང་ཆུབ་ལྷོ་རུའོ། ། འདོད་པ་ཀུན་གྱི་འཁྲིས་མ་ནུབ། ། བྱང་དུ་ཧེ་རུ་ཀ་ཉིད་འདྲ། ། རྒྱན་ཀུན་གྱིས་ནི་རྣམ་བརྒྱན་པའི། ། ཁ་དོག་སྣ་ཚོགས་ རྣམ་པར་དགོད། ། གཟུགས་མཛེས་{ཡི་དགས་,ཡི་དྭགས་}ལ་བཞུགས་པ། ། གཏི་མུག་ཐམས་ཅད་ཉེར་འཇོམས་བྱེད། ། ཆོས་འཁོར་ཨ་ཤྭཏྠའི་དབྱུག་པ། ། དེ་བཞིན་ཡིད་བཞིན་ནོར་བུའི་ཤིང་། ། ལྷ་མོ་རྣམས་ཀྱི་ཕྱག་གཡས་སུ། ། རྡོ་རྗེ་ཡང་ནི་བསྒོམ་པར་བྱ། ། ཆོས་ཀྱི་འཁོར་ལོ་ ཐམས་ཅད་ལ། ། ཐོད་པའི་སྣོད་ནི་གཡོན་པ་ལ། ། སྤྱན་མ་མཱ་མ་ཀཱི་སྒྲོལ་མ། ། གོས་དཀར་ཡིད་དུ་འོང་བ་རྣམས། ། མེ་ལ་སོགས་པའི་མཚམས་བཞི་རུ། ། འཁོར་ལོ་ཕྱི་རོལ་གཤིན་གཤེད་དོ། ། ཤེས་རབ་མཐར་བྱེད་རྟ་མགྲིན་དང་། ། འཁྱིལ་བར་བཅས་པ་བསྒོམ་ པར་བྱ། ། འཁོར་ལོ་ཡི་ནི་སྒོ་སྲུངས་ཏེ། ། ཆོ་གའི་ལས་ནི་མཐོང་བས་སོ། །

གཤིན་རྗེའི་གཤེད་ནག་པོའི་རྒྱུད་ལས་ཧེ་རུ་ཀ་བསྒྲུབ་པའི་རིམ་པར་ཕྱེ་བ་སྟེ་བཅུ་དྲུག་པའོ། ། ། ། རྣམ་པ་ལྔ་ནི་བསྒོམས་བྱས་ལ། ། སངས་རྒྱས་གཟུགས་ནི་བསྒོམ་པར་བྱ། ། སངས་རྒྱས་གཟུགས་ནི་བསྒོམ་པ་ཡིས། ། མཁས་པས་འཁོར་ལོ་བསྒོམ་པར་བྱ། ། གྲུ་བཞི་ཡི་ནི་སྦྱོར་བ་ཡིས། ། འཁོར་ལོ་བསྐྱེད་པར་བྱ་བ་སྟེ། ། ཙརྩི་ཀཱ་སོགས་གླུ་དང་ནི། ། དྲུག་པ་སྐྱེས་སོགས་ལེན་པར་བྱེད། ། སྙིང་རྗེ་ཁྲོས་པའི་དད་སྒྲོལ་བཞེངས། ། ཁམས་གསུམ་ ཀུན་གྱི་གཏི་མུག་སོལ། ། དད་སྒྲོལ་གསོལ་བས་མ་བཞུགས་བཞེངས། ། བདུད་འདི་དག་ལས་རྒྱལ་བར་མཛོད། ། འཇིག་རྟེན་མགོན་པོ་སྟོང་ཉིད་ཇི་སྟེ་བཞུགས། ། དད་སྒྲོལ་འཇིག་རྟེན་བསོད་ནམས་ཀྱིས་བཞེངས་ཤིག ། བྱང་ཆུབ་འདོད་པའི་འཇིག་རྟེན་མགྲོན་བོས་ནས། ། ཁྱོད་ནི་སྟོང་པ་ཉིད་ལ་སེམས་པར་བྱེད། ། ཇི་ལྟར་སྐར་མདའ་འཕོ་བ་བཞིན། ། བྱང་ཆུབ་སེམས་ལ་ཞུགས་པར་གྱུར། ། རྡོ་རྗེ་འཆང་རང་ངོ་བོ་ཉིད། ། སྙིང་རྗེ་དང་ནི་འདོད་ཆགས་སེམས། ། དང་པོར་བསྒོམ་པ་རྣལ་འབྱོར་ཏེ། ། གཉིས་པ་རྗེས་ཀྱི་རྣལ་འབྱོར་ཡིན། ། གསུམ་པ་ཤིན་ ཏུ་རྣལ་འབྱོར་ཏེ། ། བཞི་པ་རྣལ་འབྱོར་ཆེན་པོའོ། །

རྡོ་རྗེ་སེམས་དཔའ་རྫོགས་པ་ཡིན། ། རྣལ་འབྱོར་ཡིན་པར་འདི་ལྟར་འདོད། ། དེ་ནི་རྒྱུ་མཐུན་ལྷ་ཡི་སྐུ། ། རྗེས་ཀྱི་རྣལ་འབྱོར་ཡིན་པར་གྲགས། ། འཁོར་ལོ་ཐམས་ཅད་ཡོངས་རྫོགས་པ། ། ཤིན་ཏུ་རྣལ་འབྱོར་ཡིན་པར་ གྲགས། ། སྐུ་དང་གསུང་དང་ཐུགས་རྣམས་དང་། ། ལྷ་ཡི་མིག་སོགས་བྱིན་རླབས་དང་། ། ཡེ་ཤེས་འཁོར་ལོ་གཞུག་པ་དང་། ། བདུད་རྩི་མྱང་བ་དག་དང་ནི། ། མཆོད་དང་བསྟོད་པ་ཆེན་པོ་དག ། རྣལ་འབྱོར་ཆེན་པོ་ཞེས་བྱའོ། ། སློབ་དཔོན་ལ་ནི་བརྙས་མི་བྱ། ། བདེ་གཤེགས་ བཀའ་ལས་འདའ་མི་བྱ། ། དེ་བཞིན་སྤུན་ལ་ཁྲོ་བ་དང་། ། ཉེས་པ་བསྒྲག་པར་མི་བྱའོ། ། བྱང་ཆུབ་སེམས་ཀྱང་གཏང་མི་བྱ། ། བདག་གཞན་ཆོས་ལ་སྨད་མི་བྱ། ། སེམས་ཅན་ལ་ནི་བྱམས་པ་དག ། ནམ་ཡང་གཏང་བར་མི་བྱའོ། ། ཡོངས་སུ་མ་སྨིན་སེམས་ཅན་ལ། ། གསང་ བ་དག་ནི་བསྟན་མི་བྱ། ། བདག་སོགས་ཕུང་པོ་བརྙས་མི་བྱ། ། གྲོང་པའི་ཆོས་ནི་སུན་མི་གདོན། ། གདུག་ལ་བྱམས་པ་རྟག་ཏུ་སྤང་། ། ཆོས་ལ་ཚད་གཞལ་བར་མི་བྱ། ། སེམས་ཅན་དད་པ་ཅན་མི་བསླུ། ། རྟག་ཏུ་དམ་ཚིག་བསྟེན་པར་བྱ། ། བུད་མེད་ཤེས་རབ་རང་ བཞིན་ལ། ། སྨོད་པ་ཉེས་པ་དེ་བཞིན་ནོ། །

རྣལ་འབྱོར་སློང་མོས་རྒྱུ་མི་བྱ། ། རྣལ་འབྱོར་སྤང་བར་མི་བྱ་སྟེ། ། རྟག་པར་རྒྱུན་དུ་གསང་སྔགས་བཟླ། ། རྟག་ཏུ་དམ་ཚིག་ལ་སོགས་བསྟེན། ། གལ་ཏེ་བག་མེད་བྱུང་གྱུར་ན། ། བླ་མ་དམ་ཚིག་ལ་གནོད་ན། ། དེས་ནི་ དཀྱིལ་འཁོར་བྲི་བྱས་ལ། ། བདེ་གཤེགས་རྣམས་ལ་ཉེས་པ་བཤགས། ། སྙིང་རྗེ་ཅན་གྱིས་མི་བརྟག་པར། ། དད་པས་བླ་མའི་དམ་ཚིག་བསྲུང་། ། ཉེས་པ་མ་ལུས་རྣམ་སྤངས་སེམས་ཀྱིས་ནི། ། བསམ་གཏན་ལ་སོགས་བཟླས་པ་མཆོག་གཞོལ་བར། ། བྱས་ལ་རྟག་ ཏུ་བླ་མ་བླ་མར་བྱ། ། བརྟན་ཞིང་དུལ་ལ་སྙིང་རྗེ་གཅིག་ཏུ་སེམས། ། དད་དང་ལྷག་པའི་བསམ་པས་བཟོད་པ་འཛིན། ། སློབ་མ་བླ་མ་ལ་ནི་གུས་པ་དང་། ། དད་པས་གཤིན་རྗེའི་གཤེད་ལ་གུས་པ་ལ། ། བརྟུལ་ཞུགས་ལྡན་པས་དེ་ནི་ཡོངས་སྦྱིན་བྱ། ། དེ་ནས་བཅོམ་ ལྡན་འདས་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་དགའ་བ་ཆེན་པོའི་ངོ་བོ་རྡོ་རྗེ་འཆང་གི་གསུང་ཉེ་བར་ཐོས་ནས་ཅང་མི་སྨྲ་བར་གྱུར་ཏེ། འདི་ལྟ་བུའི་ཆེད་དུ་བརྗོད་པས་ཆེད་དུ་བརྗོད་དོ། ། བརྟུལ་ཞུགས་མཐར་ཐུག་ཐོད་པ་ཆེན་པོ་ལྟར། ། འཁྲུལ་འཁོར་མཐར་ཐུག་གཤིན་རྗེའི་ གཤེད་ཀྱི་རྒྱུད། ། རྒྱུད་ཀྱི་མཐར་ཐུག་པ་ནི་འདུས་པ་སྟེ། །

བྱུང་བར་མ་གྱུར་འབྱུང་བར་མི་འགྱུར་རོ། ། ཨེ་མའོ་ཞི་བ་ཆེན་པོའི་ཆོས། ། ཨེ་མའོ་ཁྲོ་བོ་འཇིགས་མཛད་པ། ། ཨེ་མའོ་མྱ་ངན་འདས་པའི་མཆོག ། ཨེ་མའོ་འཁོར་བ་ཞི་བ་ཉིད། ། ཨེ་མའོ་ འདི་ནི་རབ་ཏུ་མཚར། ། ཉེས་པ་གང་དེ་ཡོན་ཏན་འགྱུར། ། བྱང་ཆུབ་མེད་ཅིང་མངོན་རྟོགས་མེད། ། དངོས་པོ་མ་ཡིན་བསྒོམ་བྱ་མིན། ། ཁམས་མ་ཡིན་ཞིང་རྣམ་ཤེས་མིན། ། ནམ་མཁའི་ཁམས་དང་མཚུངས་པ་ཉིད། ། ནམ་མཁའ་ལྟ་བུར་བདག་མེད་པ། ། ཆོས་འདི་ བདེ་བ་ཆེན་པོ་སྟེ། ། ས་ཡང་མ་ཡིན་ཆུ་མིན་ཏེ། ། མེ་མིན་རླུང་མིན་ནམ་མཁའ་མིན། ། རྡོ་རྗེ་སེམས་དཔའི་སྦྱོར་བ་ཡིས། ། བསྐྱེད་པ་ཡང་ནི་རབ་གནས་ནས། ། དངོས་པོ་ཐམས་ཅད་དངོས་མེད་བཤད། ། དངོས་པོ་མེད་ཅེས་མ་བསྒྲགས་པ། ། རྣལ་ འབྱོར་སྦྱོར་བ་དང་འབྲེལ་ཕྱིར། ། ཆད་པ་མ་ཡིན་རྟག་པ་མིན། ། ཡན་ལག་མེད་ཅིང་ཁ་དོག་མེད། ། ཐོག་མ་བར་དང་མཐའ་སྤངས་པ། ། དངོས་པོ་ཐམས་ཅད་མེད་པར་འགྱུར། ། མཆོག་ཏུ་དགའ་བའི་མཚན་ཉིད་དོ། ། དེ་ནས་བཅོམ་ལྡན་འདས་ཙརྩི་ཀཱ་ཆེན་པོ་ལ་སོགས་པས་ ཆེད་དུ་བརྗོད་པས་ཆེད་དུ་བརྗོད་དོ། ། བསོད་ནམས་སྡིག་པ་དག་དང་མ་འབྲེལ་བས། ། མཆོག་ཏུ་དགའ་བ་དྲི་མེད་དག་པའི་མགོན། །

དེ་བཞིན་ཉིད་ཀྱི་གཏེར་ཆེན་གཅིག་པུ་དང་། ། ཀུན་ཀྱང་སྙིང་རྗེའི་སེམས་ཀྱིས་མགོན་འདི་ཡོད། ། ཆོས་རྣམས་ངོ་བོ་བདེ་བ་ཆེན་པོའི་ དངོས། ། མཆོག་ཏུ་དགའ་བ་འདི་ཡི་ངོ་བོ་ཉིད། ། དེ་ལ་གཟུགས་མེད་བསོད་ནམས་མེད་ཅིང་སྡིག་པ་མེད། ། སྐྱེ་བ་དང་ནི་འགག་པ་དག་ནི་ཡོད་མ་ཡིན། ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་བྱང་ཆུབ་ཀྱི་སེམས་ ཀྱི་རིམ་པར་ཕྱེ་བ་སྟེ་བཅུ་བདུན་པའོ། ། ། ། དེ་ནས་གཏམ་རྒྱུད་བཤད་པར་བྱ་སྟེ། བཅོམ་ལྡན་འདས་མངོན་པར་བྱང་ཆུབ་པའི་དུས་སུ་བཅོམ་ལྡན་འདས་ཐུབ་པ་ཆེན་པོ་ལ་བྱང་ཆུབ་ཀྱི་བར་དུ་གཅོད་པའི་ཕྱིར་ཤིན་ཏུ་འཇིགས་སུ་རུང་བའི་འཇིགས་པ་ཆེན་པོ་སྟོན་ཅིང་། བདུད་ཀྱི་ དཔུང་ཆེན་པོ་ལྷགས་ཏེ། ། དེའི་དུས་ན་བདུད་ཆེན་པོ་ལས་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བཅོམ་ལྡན་འདས་ཉིད་ཀྱི་སྐུ་གསུང་ཐུགས་རྡོ་རྗེ་རྣམས་ལས་གཤིན་རྗེའི་གཤེད་ཀྱི་ཁྲོ་བོ་ངེས་པར་ཕྱུང་སྟེ། ངེས་པར་ཕྱུང་ནས་ཀྱང་ལག་ན་རྡོ་རྗེ་ཐུབ་པ་ཆེན་ པོའི་བཀའ་བཞིན་བྱེད་པ་ལ།

ཕྱག་ན་རྡོ་རྗེ་ཁྱོད་འདི་ལྟ་བུའི་གཤིན་རྗེའི་གཤེད་ཀྱི་ཁྲོ་བོའི་གཟུགས་སུ་བསྒྱུར་ཏེ། བདུད་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ལྷ་རྣམས་ཀྱང་ཆོམས་ཤིག ། ཆིངས་ཤིག ། རྟོགས་ཤིག་ཅེས་གསུངས་སོ། ། དེའི་དུས་ན་ ཇི་ལྟར་བདག་གིས་བཅོམ་ལྡན་འདས་ཀྱིས་གསུངས་པ་ཐོས་ཏེ། སྐད་ཅིག་ལ་བཟུང་ཞིང་དོན་བཟུང་སྟེ་བསྡུས་ནས་རབ་ཏུ་ཡིད་ལ་བྱས་སོ། ། ཞེས་གསང་བ་ཆེན་པོའི་བདག་པོ་ཆེན་པོ་རྡོ་རྗེ་རིགས་ཀྱི་གཙོ་བོ་ནཱ་ད་ཀུ་བེ་རའི་ཡབ་ཀྱིས་དེ་སྐད་ཅེས་གསུངས་སོ། ། ཨཽཌྱན་གྱི་ཡུལ་ནས་ཡང་ དག་པར་བྱུང་བ་དངོས་གྲུབ་ཐམས་ཅད་སྐྱེད་པར་བྱེད་པ་རྒྱུད་ཀྱི་རྒྱལ་པོ་འབུམ་ཕྲག་བདུན་པ་ལས་ཕྱུང་བ་གཤིན་རྗེའི་གཤེད་ནག་པོའི་རྒྱུད་ལས་ལེའུ་{བཅྭ་,བཅོ་}བརྒྱད་པའོ། ། ། ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ རྫོགས་སོ། ། ། ། རྒྱ་གར་གྱི་མཁན་པོ་ཆེན་པོ་མཁས་པ་དཱི་པཾ་ཀར་ཤྲཱིཛྙཱ་ན་དང་། བོད་ཀྱི་ལོཙྪ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་ཞུས་ཏེ་གཏན་ལ་ཕབ་པ། སླད་ཀྱིས་ལོཙྪ་བ་དགེ་སློང་དར་མ་གྲགས་ཀྱིས་བཅོས་ལ།

དེ་ལས་ཀྱང་དགེ་སློང་ རྡོ་རྗེ་གྲགས་ཀྱིས་བཅོས་སོ། ། ། །