༄༅༅། ། རྒྱ་གར་སྐད་དུ། ཤྲཱི་བུདྡྷ་ཀ་པཱ་ལ་ནཱ་མ་ཡོ་གི་ནཱི་ཏནྟྲ་རཱ་ཛ། བོད་སྐད་དུ། དཔལ་སངས་རྒྱས་ཐོད་པ་ཞེས་བྱ་བ་རྣལ་འབྱོར་མའི་རྒྱུད་ཀྱི་རྒྱལ་པོ། དཔལ་སངས་རྒྱས་ཐོད་པ་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་ འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེའི་དཀྱིལ་འཁོར་ཆེན་པོ་རྒྱན་དང་ལྡན་པའི་དབུས་སུ་དེ་བཞིན་གཤེགས་པ་ཐམས་ཅད་དང་། རྣལ་འབྱོར་མ་རྣམས་དང་ལྷན་ཅིག་ཏུ་བཞུགས་ཏེ། འཕགས་པ་ཀུན་དགའ་བོ་ལ་སོགས་པ་འདོད་ཆགས་ དང་བྲལ་བའི་གཙོ་བོ་རྣམས་དང་། འཕགས་པ་སྤྱན་རས་གཟིགས་དབང་ཕྱུག་ལ་སོགས་པའི་བྱང་ཆུབ་སེམས་དཔའ་བྱེ་བ་ཕྲག་བརྒྱད་ཅུ་དང་ཡང་ཐབས་ཅིག་ཏུ་བཞུགས་སོ། ། དེ་ནས་བཅོམ་ལྡན་འདས་ཀྱིས་རྡོ་རྗེའི་ཚིག་གིས་རྡོ་རྗེ་ཆེན་པོའི་གནས་སུ་རྒྱུད་ཐམས་ཅད་དང་སྔགས་ཡང་ དག་པར་བཤད་ནས། དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་དང་པདྨོ་ཡང་དག་པར་སྦྱར་བས་བཙུན་མོའི་བྷ་གར་ཡོངས་སུ་མྱ་ངན་ལས་འདས་སོ། ། དེ་ཡོངས་སུ་མྱ་ངན་ལས་འདས་པ་མཐོང་ནས། བྱང་ཆུབ་སེམས་དཔའ་ཐམས་ཅད་དང་། རྣལ་འབྱོར་མ་ཐམས་ ཅད་རྨད་དུ་གྱུར་ཏེ་གཅིག་ལ་གཅིག་ལྟ་ཞིང་།

ཨེ་མའོ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་དཀྱིལ་འཁོར་ཆེན་པོ་རྒྱན་དང་ལྡན་པའི་དབུས་སུ་ཇི་ལྟར་ཡོངས་སུ་མྱ་ངན་ལས་འདས། ། དེ་ནས་རྣལ་འབྱོར་མ་སྣ་ཚོགས་སྡེ་མ་ལ། བྱང་ཆུབ་སེམས་དཔའ་སེམས་ དཔའ་ཆེན་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། ། ལྷ་མོ་སེམས་ཅན་བསོད་ནམས་དམན་པ་རྣམས་ནུས་པ་ལ་ཞོན་པར་འགྱུར་བའི་ཐབས་ཅུང་ཟད་མཆིས་སམ། གསུངས་པ། རྣལ་འབྱོར་གྱི་རྒྱུད་ལ་བྱེ་བ་ཕྲག་དྲུག་ཉིད་དོ། ། རྣལ་འབྱོར་མའི་རྒྱུད་ལ་ནི་བྱེ་བ་ཕྲག་བཅུ་དྲུག་ཉིད་ དོ། ། མདོ་སྡེ་སོ་སོ་ལ་ནི་བྱེ་བ་ཕྲག་བརྒྱད་ཅུའོ། ། དེ་བཞིན་དུ་ཕ་རོལ་ཏུ་ཕྱིན་པའི་ཐེག་པ་ལ་ནི་བྱེ་བ་ལ་བསྒྲེས་པའི་འབུམ་ཕྲག་ལྔའོ། ། འདི་དག་ཐམས་ཅད་ནི་ཐུབ་པའི་དབང་པོས་གསུངས་སོ། ། སྔགས་དང་བྲལ་ན་ནི་རྒྱུད་ཀྱི་ནུས་པ་མི་སྣང་སྟེ། རྒྱུད་ལ་ལར་ནི་ཅི་ ནས་སྔགས་བྱེ་བ་བཟླས་པར་གསུངས་སོ། ། བསོད་ནམས་འབྲིང་པོ་རྣམས་ཀྱིས་ནི་སྔགས་འབུམ་བཟླས་པས་མྱུར་བར་འགྲུབ་པར་གསུངས་སོ། ། བསོད་ནམས་ཆེ་བས་ཁྲི་བཟླས་པས་ཤིན་ཏུ་མྱུར་བར་འགྲུབ་བོ། ། དེ་ལྟར་རྡོ་རྗེ་ཅན་ཆེན་པོ་རྒྱུད་ཀྱི་བདག་པོའི་གཙོ་བོས་གསུངས་ སོ། །

བསོད་ནམས་ཆུང་བའི་སེམས་ཅན་རྣམས་ཀྱིས་ནི་བྱེ་བ་བཟླས་པར་གསུངས་སོ། ། སེམས་ཅན་འབད་རྩོལ་ཆུང་བ་རྣམས་ཀྱིས་ནི་འབུམ་བཟླས་པར་བདག་སྨྲའོ། ། སེམས་ཅན་སྒོམ་པ་ལ་ཞེན་པ་རྣམས་ཀྱིས་ནི་ཁྲི་ཁོ་ན་བཟླས་པར་བྱའོ། ། སེམས་ཅན་འདོད་ཆགས་ ལ་ཞུགས་པ་རྣམས་ཀྱི་བཟླས་པ་ཇི་ལྟར་ལགས། བླུན་པོ་དང་ལྐུགས་པའི་རིགས་ཅན་རྣམས་ཀྱི་སྔགས་ཀྱི་གྲངས་ཇི་ལྟར་ལགས། ། ཤིན་ཏུ་དམིགས་པའི་སྔགས་ཀྱི་བཟླས་པ་ཇི་ལྟར་ལགས། འདི་ལྟར་ཕན་ཚུན་སྨྲ་བས་བཟླས་ན་དངོས་གྲུབ་གཞན་དུ་ཡང་འགྱུར་རོ། ། གལ་ཏེ་ དམན་པའི་སེམས་ཀྱིས་ཉོན་མོངས་བཞིན་པས་བཟླས་པ་དེའི་ཚེ་བསྐལ་བ་སྐར་མ་ལྟ་བུ་བྱེ་བར་ཡང་དེ་ལ་དངོས་གྲུབ་མེད་དོ། ། དེ་ལྟར་ཐོས་ནས་རྣལ་འབྱོར་མ་སྣ་ཚོགས་སྡེ་མ་བཅོམ་ལྡན་འདས་ཀྱི་ཞལ་ལ་ལྟ་བར་བྱེད་ཅིང་ཟུར་མིག་དང་བཅས་པའི་ཆགས་པས་བལྟས་ཏེ། ཤིན་ཏུ་ཁྲོ་བས་འཇིགས་པར་བྱེད་ཅིང་སྙིང་རྗེའི་ཐུགས་འཁྲུགས་པས་བདུད་ཀྱི་དཔུང་རབ་ཏུ་བཅོམ་མོ། ། དེ་ལྟར་བཞུགས་པའི་ལྷ་མོ་ཆེན་མོ་རྒྱུད་ཐམས་ཅད་ཀྱི་བདག་པོའི་དབང་ཕྱུག་ལ་དེ་ནས་དེས་གཟིགས་པ་ཙམ་གྱིས་བཅོམ་ལྡན་འདས་ཀྱི་དབུ་ལས་སྔགས་ཕྱུང་ངོ་། ། ཨོྃ་བུདྡྷེ་ སིདྡྷེ་སུ་སིདྡྷེ།

ཨ་མྲྀ་ཏ་ཨ་ར་ཛེ་བུདྡྷ་ཀ་པཱ་ལ་སྒོ་ཊ་ནེ་སྤོ་ཊ་ཡ་ཏྲཱ་ས་ཡ་ཧོ་ཧཱུྃ་ཕཊ། དེ་ལྟར་སྔགས་ཀྱི་མཆོག་སོན་པས་ས་རིམ་པ་བདུན་གྱི་འོག་ཏུ་ཆུད་པའི་ཀླུ་རྣམས་བཅོམ་པར་བྱས་ཤིང་ཕྱེ་མར་བྱས་ནས་སླར་འོངས་ཏེ་སྣ་ཚོགས་སྡེ་མའི་ཞལ་དུ་ཞུགས་ཏེ། པདྨའི་ནང་ནས་བྱུང་ནས་སླར་ ཐོད་པར་ཞུགས་སོ། ། སྔགས་འདིའི་མཐུས་ཀླུ་རྣམས་ཞིག་སྟེ། སྐྲག་ཅིང་རྡུལ་འབྱུང་བར་འགྱུར་རོ། ། ནོར་རྒྱས་ལ་སོགས་པའི་རྫུ་འཕྲུལ་ཆེན་པོའི་ཀླུ་ཐམས་ཅད་ལྷགས་ཏེ། སྟོབས་ཀྱིས་རྒྱུ་དང་། དུང་སྐྱོང་དང་། འཇོག་པོ་དང་། མཐའ་ཡས་དང་། པདྨ་དང་། པདྨ་ ཆེན་པོ་ལ་སོགས་པ་ཀླུ་ཆེན་པོ་རྣམས་དང་། གཞན་གང་ཡང་རུང་བ་དུག་ལས་བྱུང་བ་ཐམས་ཅད་ཀྱང་ལྷགས་སོ། ། རྣལ་འབྱོར་མ་སྣ་ཚོགས་སྡེ་མ་ལ་ཁ་ཕྱོགས་ཏེ་ཀླུ་ཐམས་ཅད་ཀྱིས་ཞུས་པ། ལྷ་མོ་བཀའ་སྩོལ་ཅི་ཞིག་བགྱི་ཞེས་སྨྲའོ། ། གསུངས་པ་ གང་ཡང་སངས་རྒྱས་ཉམས་སུ་མྱོང་བ་དེ་ལྟར་གྱིས་ཤིག ། དེ་ལྟར་ཐོས་པ་ཙམ་གྱིས་དཀྱིལ་འཁོར་ཆེན་པོ་རྒྱན་དང་ལྡན་པའི་དབུས་སུ་བཅོམ་ལྡན་འདས་ཀྱི་ཐོད་པ་ཁ་ཕྱེ་སྟེ་གླེགས་བམ་བྱུང་ངོ་། ། ནམ་མཁའ་ལ་སྒྲ་བྱུང་ངོ་། ། ལྷ་མོ་ལྷ་ཚོགས་སྡེ་མ་ཟུང་། ། སེམས་ཅན་ཀུན་ ལ་ཕན་འདོགས་མ། །

རྒྱུད་འདི་རྒྱལ་པོ་ཆེན་པོ་སྟེ། ། རྣལ་འབྱོར་མ་ཡི་གོང་ན་མེད། ། སངས་རྒྱས་ཐོད་པ་ཞེས་བྱ་བ། ། སེམས་ཅན་ཀུན་ལ་ཕན་བྱེད་པའོ། ། དེ་ལྟར་ཐོས་ནས་སྣ་ཚོགས་སྡེ་མས་གླེགས་བམ་ཡང་དག་པར་བཟུང་སྟེ། ། ཕྱག་ན་རྡོ་རྗེ་ལ་ཉེ་བར་གཏད་དོ། ། ཕྱག་ན་རྡོ་རྗེས་རྒྱུད་འདི་ཟུང་། ། སེམས་ཅན་ཀུན་ལ་བདེ་འབབ་པ། ། རྣལ་འབྱོར་མ་ཡི་དངོས་གྲུབ་ཀུན། ། འབྲས་བུ་མྱུར་དུ་སྟེར་བྱེད་པའོ། ། མནན་དང་སྤར་བ་ཡེ་ཤེས་ཆེ། ། གོང་ན་མེད་པ་རྙེད་དཀའ་བ། ། གསང་བ་མཆོག་གི་ཉམས་དགའ་བ། ། ལུས་ཀུན་ལ་ནི་ རྣམ་པར་གནས། ། ནམ་མཁའ་ལྡིང་དང་ཆར་དབབ་དང་། ། དངུལ་ཆུ་བཅུད་ཀྱིས་ལེན་པ་དང་། ། བསྐྲད་དང་དབང་དུ་བྱ་ཉིད་དང་། ། རྨོངས་དང་མངོན་སྤྱོད་ཉིད་དང་ནི། ། དཔུང་ལ་སོགས་པ་རེངས་ཉིད་དང་། ། དུས་སུ་ཟིན་པ་བཟློག་པ་དང་། ། ཕུར་བུས་གདབ་དང་ གསད་པ་དང་། ། རྟག་ཏུ་སྒྲུབ་པ་བྱེད་པ་དང་། ། སྣ་ཚོགས་སྔགས་རིམ་ཇི་བཞིན་དང་། ། ཇི་བཞིན་རྣལ་འབྱོར་མ་བསྐྱེད་དང་། ། དཔལ་ཆེན་ཧེ་རུ་ཀ་ཡི་ནི། ། བསྐྱེད་པ་དང་ནི་གནས་རྒྱུ་དང་། ། དངོས་དང་དངོས་མེད་སྤྲོས་མེད་དང་། ། སྲིད་པར་སྤྱོད་ཅིང་གོས་མེད་ དང་། ། དགོངས་པས་བཤད་པ་མཆོག་ཆེན་དང་། །

རྣལ་འབྱོར་མ་ཡི་མཆོག་ཆེན་དང་། ། རྣལ་འབྱོར་མ་ཡི་འདུས་པ་དང་། ། ནུས་པ་རྣམ་པ་མང་གསུངས་པ། ། ཐོས་པ་ཙམ་གྱིས་འགྲུབ་པར་འགྱུར། ། གཟུགས་བརྙན་དག་པ་ཉིད་དང་ནི། ། དེ་བཞིན་བརྟན་པ་ བསྐྱོད་པ་དང་། ། དུར་ཁྲོད་འཇིགས་པ་ཆེ་བཟང་དང་། ། རོ་ལངས་བསྒྲུབ་ལ་སོགས་པ་དང་། ། སྟོབས་པོ་ཆེ་རྣམས་དགུག་པ་དང་། ། དེ་བཞིན་འཇིག་རྟེན་གསུམ་དགུག་དང་། ། རིམས་ཀྱིས་གདུང་བ་འཇིགས་ཆེན་དང་། ། དགྲ་ཡི་ཁ་སོགས་བཅིང་བ་དང་། ། དེ་བཞིན་ གསད་དང་བསླུ་བ་དང་། ། མི་སྣང་བྱེད་པ་མཆོག་དང་ནི། ། མིག་སྨན་དང་ནི་རིལ་བུ་ཉིད། ། བཅུད་ལེན་རལ་གྲི་ཉིད་དང་ནི། ། སངས་རྒྱས་ཐོད་པའི་སྦྱོར་བ་ཡིས། ། ཐོས་པ་ཙམ་གྱིས་འགྲུབ་པར་འགྱུར། ། མི་སྣང་བ་ནི་མཆོག་ཆེན་དང་། ། སྣ་ཚོགས་སྒྱུ་འཕྲུལ་རྣམ་ འཕྲུལ་དང་། ། རང་གི་གཟུགས་ནི་སྒྱུར་བ་དང་། ། གཞན་གྱི་ལུས་ལ་གཞུག་སོགས་དང་། ། སངས་རྒྱས་བྱེ་བས་རབ་བསྲུངས་པའི། ། སངས་རྒྱས་བུ་མོ་མཆོག་ཆེན་རྣམས། ། ཁྲོས་པ་ཙམ་གྱིས་འགུགས་བྱེད་ན། ། གཞན་དག་སྨོས་ལྟ་ཅི་ཞིག་དགོས། ། མིག་ འཕྲུལ་བྱེད་པ་ཉིད་དང་ནི། ། དགེ་མཚན་རྣམ་པ་མང་ཤེས་པ། ། འདོད་པ་ལྔ་ནི་བསྟེན་བཞིན་པས། །

འདི་རུ་འགྲུབ་པར་གདོན་མི་ཟ། ། འཇིགས་ཤིང་འཇོམས་པའི་རྩོད་ཆེན་པོ། ། གཅིག་གིས་འབུམ་ལས་རྒྱལ་བར་བྱེད། ། སྐྱེས་པ་གཅིག་གི་འདོད་ཆེན་གྱིས། ། བུད་ མེད་འབུམ་ཕྲག་འཛག་བྱེད་ཅིང་། ། རྡོ་རྗེར་བྱེད་པ་རྙེད་དཀའ་བ། ། གཅིག་གི་ས་ཐམས་ཅད་འདོད་པ་སྤྱད། ། དེ་ནས་གཞན་ཡང་རབ་བཤད་པ། ། མཁའ་ལྡིང་སྦྱོར་བ་རིམ་ཇི་བཞིན། ། རྒྱུད་ཀུན་ཏུ་ཡང་རྙེད་དཀའ་བ། ། མུ་སྟེགས་རྣམས་ཀྱི་ཡུལ་མིན་པ། ། རྒྱུད་ ཀུན་ཏུ་ཡང་མ་གསུངས་སོ། ། སངས་རྒྱས་ཐོད་པའི་གཞུང་ཇི་བཞིན། ། རྡོ་རྗེ་མགོན་པོས་གསུངས་པ་ཡི། ། མཁའ་ལྡིང་ཤིན་ཏུ་རྨད་བྱུང་བ། ། འཇིག་རྟེན་གསུམ་ན་རྙེད་དཀའ་བའི། ། སྦྱོར་བ་རྣམ་པ་{བཅྭ་,བཅོ་}བརྒྱད་གསུངས། ། ཤ་ལི་ཀི་ཡི་སྦྱོར་བ་དང་། ། རིག་པ་ འཛིན་དང་རྒྱལ་པོ་འགྱེད། ། རྡེ་རྡུང་བུད་མེད་འཕྲོག་པ་དང་། ། ཤིང་བསྣུན་ཞགས་པས་འཆིང་བ་དང་། ། ཁུ་བྱུག་པདྨས་འབྱེད་པ་དང་། ། སྟག་བྱེད་ཆུ་བླུགས་དུང་འབུད་དང་། ། ཐོད་ལོ་ཀོར་འཕྲོག་སྐྱུག་པ་དང་། ། རས་གཡོགས་ཐལ་ལྕག་བརྡབ་པ་དང་། ། ཡིག་གསུམ་ བསམ་གཏན་གྱིས་ནི་གཏམ། ། འདི་རྣམས་ཀྱིས་ནི་དགུག་པར་བྱ། ། མཁའ་ལྡིང་སྦྱོར་བ་{བཅྭ་,བཅོ་}བརྒྱད་པོ། །

འཇིག་རྟེན་གསུམ་ན་རབ་རྙེད་དཀའ། ། སེམས་ཅན་རྣམས་ལ་ཕན་བྱེད་པ། ། རྡོ་རྗེ་མགོན་པོ་ཉིད་ཀྱིས་གསུངས། ། དེ་ནས་གཞན་ཡང་རབ་བཤད་ པ། ། མཆོག་གི་ཡེ་ཤེས་ཇི་བཞིན་པ། ། བྷ་གའི་དབུས་སུ་རྣམ་པར་བཞུགས། ། བདེ་བ་ཆེན་པོ་སྟེར་བྱེད་པ། ། འདི་ཉིད་དུ་ནི་ཀུན་གནས་ཀྱང་། ། བྱིས་པ་རྨོངས་པས་མི་ཤེས་སོ། ། དེར་ནི་བཅུད་དང་བཅུད་ལེན་ཏེ། ། དེ་ཉིད་དུ་ནི་སངས་རྒྱས་བཞུགས། ། དེར་ནི་དཀྱིལ་ འཁོར་བཟང་པོའོ། དེར་ནི་སློབ་མ་དབང་བསྐུར་བའོ། ། དེར་ནི་ཧེ་རུ་ཀ་དཔའ་བོ། ། ཉི་ཤུ་རྩ་བཞིའི་དབང་གཙོའོ། ། དེར་ནི་ནམ་མཁའ་ལྡིང་འཇིགས་པ། ། དེ་ཉིད་དུ་ནི་རོ་ལངས་བསྒྲུབ། ། དེར་ནི་དུར་ཁྲོད་བརྒྱད་པོ་རྣམས། ། སྐད་ཅིག་ཙམ་གྱིས་བསྐྱེད་པའི་རྒྱུ། ། དེར་ ནི་སངས་རྒྱས་བདག་ཉིད་ཆེ། ། སྟོང་ཕྲག་གསུམ་ནི་རྣམ་པར་བཞུགས། ། དེར་ནི་འཇིག་རྟེན་ཁམས་ཀུན་ཏེ། ། དེ་ཉིད་བཅོམ་ལྡན་འདས་ལྷ་མོ། ། སངས་རྒྱས་ལ་སོགས་སྐྱེད་པའི་ཡུམ། ། བྱང་ཆུབ་སེམས་དཔའ་དཔའ་ཆེན་པོ། ། ཤེས་རབ་ཕ་རོལ་ཕྱིན་དཔུང་གཉེན། ། དེ་ཉིད་བསོད་ནམས་ཀུན་སྟེར་མ། ། དེ་ཉིད་ཐར་པ་སྟེར་བྱེད་མ། ། ཕྱག་རྒྱ་ཆེན་པོ་གྲགས་ཆེན་པོ། །

དངོས་གྲུབ་ཀུན་ནི་འདོད་བྱེད་མ། ། མ་དང་ཚ་མོ་སྲིང་མོ་དང་། ། བུ་མོ་བུད་མེད་རབ་བརྟེན་མ། ། ཤེས་རབ་མཉེས་ཤིང་འཇིགས་བྱེད་མ། ། འགྲོ་དྲུག་བདེ་སྡུག་བག་ ཆགས་བཅས། ། འཁོར་བ་མྱ་ངན་འདས་ཉིད་དང་། ། བདག་ཉིད་ཆེན་པོ་དེ་ཉིད་དེ། ། རྣམ་རྟོག་ཀུན་ཏུ་རྟོག་པ་ཉིད། ། དེ་བཞིན་འཆར་དང་ནུབ་པ་དང་། ། ཉིན་མཚན་མལ་སྟན་བཟའ་བ་དང་། ། ངེས་པའི་བརྟུལ་ཞུགས་རྩིས་དང་གྲངས། ། རྣམ་པར་མི་རྟོག་ཡང་དག་རྟོག ། དམན་དང་མཆོག་དང་བར་མ་དང་། ། གཞན་དང་གང་དང་དེ་དང་ནི། ། དེ་ཉིད་བདག་ཉིད་ཆེན་པོ་གཅིག ། སེམས་ཅན་ཀུན་ལ་བདེ་བ་འབབ། ། དེ་ལྟར་ཐོས་ནས་ཕྱག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་རྣམས་དང་། འདོད་ཅན་མ་ལ་སོགས་པ་རི་རབ་ཀྱི་རྡུལ་ཕྲ་རབ་སྙེད་ ཀྱི་རྣལ་འབྱོར་མ་རྣམས་དགའ་བའི་སྤྱན་གདངས་ནས་སྣ་ཚོགས་སྡེ་མ་ལ་ཡང་དང་ཡང་དུ་བཏུད་དེ། འདི་ལྟར་གསོལ་ཏོ། ། ཨེ་མའོ། ། སྣ་ཚོགས་སྡེ་མ་རྣལ་འབྱོར་མ། ། སེམས་ཅན་ཀུན་ལ་བདེ་འབབ་མ། ། གླེགས་བམ་དོན་དང་ལྡན་གང་ཞིག ། དེ་ཀུན་སངས་རྒྱས་བྱིན་ བརླབས་བཤད། ། དེ་ནས་ཕྱག་ན་རྡོ་རྗེའི་ཕྱག་གཉིས་གླང་པོ་ཆེའི་ལག་པ་ལྟར་རབ་ཏུ་བརྐྱང་སྟེ་གླེགས་བམ་ཡང་དག་པར་བླངས་སོ། །

དེ་ནས་སངས་རྒྱས་ཀྱི་བྱིན་གྱི་རླབས་ཀྱིས་ཕྱག་རྒྱ་ཆེན་པོའི་རྡོ་རྗེའི་གནས་སུ་དོན་དང་བཅས་པའི་གཞུང་ཞུ་བར་གྱུར་ཏོ། ། ཕྱག་ན་རྡོ་རྗེའི་ སྙིང་ག་ནས་བྱུང་སྟེ། སྣ་ཚོགས་སྡེ་མའི་ཐུགས་སུ་ངལ་སོས་སོ། ། དེ་ནས་ཕྱག་ན་རྡོ་རྗེ་གནོད་སྦྱིན་གྱི་བདག་པོ་ཆེན་པོས་རྣལ་འབྱོར་མ་ཆེན་མོ་ལ་འདི་ལྟར་གསོལ་ཏོ། ། སྔགས་ཀྱི་བཟླས་པ་གང་ཞིག་ལགས། ། ལས་ཀྱི་ཚོགས་རྣམས་ཇི་ལྟར་འགྲུབ། ། སྔོན་དུ་བསྙེན་ པ་གང་ཞིག་ལགས། ། མཁའ་ལྡིང་འགྲུབ་པའི་ངེས་པ་གང་། ། དངུལ་ཆུ་བཅུད་ལེན་སྣ་ཚོགས་པ། ། དངོས་གྲུབ་སྟེར་བྱེད་གང་ཞིག་ལགས། ། སྤར་དང་མནན་པ་གང་གསུངས་དང་། ། དུས་དང་བྱ་བའི་ངེས་བཅས་དང་། ། དངོས་གྲུབ་ཐོབ་དུས་གང་ཞིག་ལགས། ། སངས་རྒྱས་ཇི་ལྟ་བུ་རུ་བརྗོད། ། དེ་བཞིན་ཐོད་པ་ཇི་ལྟ་བུ། ། སྦྱོར་དང་ལྡན་པའི་ཇི་ལྟ་བུ། ། སྣ་ཚོགས་སྡེ་མའང་ཇི་ལྟ་བུ། ། ཐེག་པ་ཆེན་པོ་ཇི་ལྟ་བུ། ། རྣལ་འབྱོར་མ་ཡི་རྣམ་ངེས་ཅི། ། གསུངས་པ། རྒྱུད་འདིར་སྔོན་དུ་བསྙེན་པ་མེད། ། དེ་བཞིན་ཡུལ་དང་དུས་ ཚེས་དང་། ། གཟའ་དང་རྒྱུ་སྐར་སྦྱོར་མེད་པ། ། བློ་དང་ལྡན་པས་རྟག་ཏུ་བསྟེན། ། དུས་དང་བྱ་བའི་ངེས་མི་བྱ། །

སངས་རྒྱས་ཐོད་པའི་སྦྱོར་བ་ཡིས། ། ཐོས་པ་ཙམ་གྱིས་འགྲུབ་པར་འགྱུར། ། སངས་རྒྱས་རྡོ་རྗེ་ཞེས་སུ་གསུངས། ། ཐོད་པ་གྲུ་གསུམ་ཡང་དག་འབྱུང་། ། སྦྱོར་བ་གསང་བར་གནས་པའི་རྩ། ། དེ་ཡི་སྣ་ཚོགས་ངོ་མཚར་བྱེད། ། སྡེ་ནི་བདེ་ཆེན་ཡེ་ཤེས་སོ། ། འདི་ཉིད་ཐེག་པ་ཆེན་པོ་སྟེ། ། རྣལ་འབྱོར་མ་ཡི་རྩ་ལས་བྱུང་། ། དེ་ནི་རྨད་བྱུང་ཆེ་མཆོག་སྟེ། ། སངས་རྒྱས་ཐོད་པའི་སྦྱོར་བ་ཉིད། ། དེ་ཉིད་ཧེ་རུ་ཀ་དཔའ་བོ། ། འཁོར་བའི་འཇིགས་ལས་སྒྲོལ་བྱེད་པ། ། སངས་རྒྱས་ཐོད་པའི་སྦྱོར་བ་ཡིས། ། སངས་རྒྱས་ཀུན་གྱི་བདེ་བ་འབབ། ། རྣལ་འབྱོར་ཆེན་མོ་སྣ་ཚོགས་བདེ། ། དཔའ་དབང་བདག་མོ་དབང་ཕྱུག་མ། ། དེ་ཡི་ཐོད་པའི་དཀྱིལ་འཁོར་ལ། ། སྔགས་དང་རྒྱུད་ནི་ རྣམ་པར་གནས། ། དེ་ཡི་ཡེ་ཤེས་བཟང་པོ་ནི། ། ལྷན་ཅིག་སྐྱེས་པ་དག་ལས་འབྱུང་། ། དེ་ནི་རིག་པའི་དབང་ལྔ་དང་། ། སངས་རྒྱས་བདུན་གྱི་མཚན་ཅན་ཏེ། ། སྣ་ཚོགས་སྦྱོར་དང་ཚེ་འཕེལ་དང་། ། དངོས་གྲུབ་ཐམས་ཅད་སྒྲུབ་པ་ནི། ། སངས་རྒྱས་ཐོད་པའི་སྦྱོར་བ་ཡིས། ། འགྲུབ་པར་འདིར་ནི་གདོན་མི་ཟ། ། མན་ངག་ལམ་ལས་གང་ཤེས་པ། ། བླ་མའི་དྲིན་ལས་ཤེས་པར་བྱ། །

སངས་རྒྱས་ཐོད་པའི་རྒྱུད་ཆེན་པོ་རྣལ་འབྱོར་མ་རྣམས་ཀྱི་གོང་ན་མེད་པ་གསང་བའི་ཡང་ཤིན་ཏུ་གསང་བ་ཞེས་བྱ་བ་ལས་དངོས་གྲུབ་ཐམས་ཅད་དང་ཡེ་ཤེས་གཏན་ལ་དབབ་ པ་དང་། ཐོད་པ་ཁ་ཕྱེ་བ་ལས་གླེགས་བམ་བྱུང་བའི་ལེའུ་སྟེ་དང་པོའོ། ། ། ། དེ་ནས་ཡང་དག་རབ་བཤད་པ། ། སྔགས་ལེའུ་ཇི་བཞིན་གསུངས་པ་སྟེ། ། མཁའ་འགྲོ་མ་མོ་འབྱུང་བོ་རྣམས། ། སྔགས་གང་གིས་ནི་འགྲུབ་འགྱུར་བ། ། དེ་ནི་བདག་གིས་རབ་བཤད་ཀྱིས། ། ཁྱོད་ཀྱིས་དད་པ་བརྟན་པས་ཉོན། ། ཨོྃ་བུདྡྷ་ཀ་པཱ་ལི་ནི་ཏ་ཊ་སྥོ་ཊ་ཡ་སརྦྦ་ཤུ་བྷ་པྲ་དཱ་ཡི་ནི་ཧཱུྃ་ཕཊ། སྤོས་དབུལ་བའི་སྔགས་སོ། ། ཨོྃ་བུདྡྷ་ཀ་པཱ་ལི་ནི་མ་ཊ་མ་ཊ་ཕ་སྭཱ་ཧཱ། མེ་ཏོག་དབུལ་བའི་སྔགས་སོ། ། ཨོྃ་མ་ཧཱ་ཀ་པཱ་ལ་བཛྲི་བ་ར་བ་ར་ཏ་ཊ་ཏ་ཊ་སྟ་ཊ་ཡ་སྟ་ཊ་ཡ་མ་ཊ་མ་ཊ་ཧཱུྃ་ཧེ་ ཧྲཱིཿསྭཱ་ཧཱ། དྲི་འབུལ་བའི་སྔགས་སོ། ། ཨོྃ་བུདྡྷ་ཀ་པཱ་ལི་ནི་གྲྀཧྞ་གྲྀཏྣ་གྲྀཧྞཱ་པ་ཡ་གྲྀ་ཧྷཱ་པ་ཡ་བར་བ་ར་ཏ་ཊ་ཏ་ཊ། སྟ་ཊ་ཡ་སྟ་ཊ་ཡ་མ་ན་ཧཱུྃ་ཧཱུྃ་ཧཱུྃ་སྭཱ་ཧཱ། མར་མེ་དབུལ་བའི་སྔགས་སོ། ། ཨོྃ་བུདྡྷ་ཀ་པཱ་ལི་ནི། གྲྀཧྞ་གྲྀཧྞ་གྲྀཧྞཱ་པ་ཡ་གྲྀཧྞཱ་པ་ཡ་ཁ་ཁ་ཧཱུྃ། ལྷ་བཤོས་དབུལ་བའི་ སྔགས་སོ། །

ཨོྃ་མ་ཧཱ་ཀ་པཱ་ལི་ནི་བཛྲ་དྷ་རྨྨ་དྷ་རྨྨེ་མེ་གྷེ་བ་རེ་པྲ་བ་རེ་བ་ར་བ་ར་ཀ་ར་ཀ་ར་ཏ་ཊ་ཏ་ཊ་ཧ་ཧེ་སྭཱ་ཧཱ། གོས་དཔུལ་བའི་སྔགས་སོ། ། ཨོྃ་ཧཱྃ་ཧཻྃ་ཧཽཾ་ཧེྃ་ཧྃ་ཧྃ་ཧཱ། གོ་ཆའི་སྔགས་སོ། ། ཨོྃ་བུདྡྷ་ཀ་པཱ་ལི་ནི་ཨ་ཁྃ་ཀྲོ་དྷུཾ་ཤྲཱིཾ་ཨཿ། ཨཱ་ཧཱུྃ་ཧཱུྃ་ཧཱུྃ་ཕཊ། སྤྱན་དྲང་བའི་སྔགས་སོ། ། ཨོྃ་ མ་ཧཱ་ཀ་པཱ་ལ་བཛྲི་ཎི་གཙྪ་གཙྪ་ཨུཏ་ཏིཥྛ་ཨུ་ཏ་ཏིཥྛ་ཛ་ཛ་ཛ་ཧ་ཛེྃ་ཛེྃ་ཛེྃ། ཏྲཻ་ལོ་ཀྱྃ་པི་ཊ་པཱ་ཎི་ཧཱུྃ་ཕཊ། གཤེགས་སུ་གསོལ་བའི་སྔགས་སོ། ། ཨོྃ་མ་ཧཱ་ཀ་པཱ་ལ་བཛྲེ་ཙི་ཏྲེ་སུ་ཙི་ཏྲེ་ཨ་ལཱཾ་བ་ནེ་ཕྲིན་ཡཱ། སརྦྦ་བྷཱུ་ཏ་ན་མཱ་ར་ཎ་ཀཱི་ལ་ཡ་སརྦྦ་དུཥྚཱན་ཨུཙྩཱ་ཊ་ཡ་སརྦྦ་བིགྷྣཱཾ་བི་ཏྲཱ་པི་ཡ་བྷ་ག་པ་ཏི་ ཡ་ཀྵ་རཱ་ཀྵ་ས་བི་ཤཱ་ཙཱ་ན་ཤོ་ཥ་ཡ་ཏ་ཊ་ཡས་བྟ་པཱ་ཏཱ་ལ་ག་ཏཱ་ན། ས་ར་ས་ར། པྲ་ས་ར་པྲ་ས་ར། ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ། འབྱུང་པོ་ཐམས་ཅད་པའི་གཏོར་མའི་སྔགས་སོ། ། འབྲས་སཱ་ལུ་བླངས་ཏེ་འོ་མས་བཀྲུས་ལ་བུ་མོ་གཞོན་ནུ་མས་དེ་ཤིན་ཏུ་ཞི་བར་བཏགས་ལ། དེ་ཡང་ ཤེས་རབ་ཅན་གྱིས་གཟུགས་བརྙན་བྱས་ཏེ། ཞལ་གཅིག་ཕྱག་བཞི་གཞུང་བཞིན་ཅང་ཏེའུ་དང་། ཁ་ཊྭཱཾ་ག་དང་། རལ་གྲི་དང་། ཐོད་པ་འཛིན་པའོ། །

དེ་ནས་རོ་བསྲེགས་པའི་སོལ་བ་ཕྱེ་མར་བྱས་ལ་རྡོ་རྗེ་གཙུག་གིས་མཉེ་བར་བྱའོ། ། དེ་ནས་དེས་གཟུགས་བརྙན་ལ་བྱུག་ པར་བྱའོ། ། མེ་ཏོག་དཀར་པོས་མཆོད་པ་བྱས་ཏེ། སངས་རྒྱས་ཐོད་པའི་རྣལ་འབྱོར་བས་ཧེ་རུ་ཀའི་རྣམ་པའི་སྦྱོར་བས་སྔགས་བརྒྱ་རྩ་བརྒྱད་བཟླས་པར་བྱའོ། ། ཨོྃ་མ་ཧཱ་བཛྲ་ཧེ་རུ་ཀེ་བཛྲེ། དྷ་ར་དྷ་ར། དྷུ་རུ་དྷུ་རུ། མ་ཧཱ་ཛྙཱ་ན་སྥོཊ་ཎེ། ཤཱིགྷྲཾ་སཱ་ད་ཡ་སྟཾ་བྷ་ཡ་ཀཱི་ལ་ཡ་ཧཱུྃ་ ཕཊ། སྔགས་འདི་ཆུ་ལ་ལན་བདུན་དུ་མངོན་པར་བཟླས་ཏེ། གཟུགས་བརྙན་དེ་བཀྲུ་བར་བྱའོ། ། ཆུ་དེས་རང་གི་གདོང་བཀྲུས་ན་མི་སྣང་བར་བྱེད་དེ། ལྷ་རྣམས་ཀྱིས་ཀྱང་རྙེད་པར་དཀའོ། ། ནགས་ཀྱི་ནང་དུ་སྟག་གིས་ཀྱང་མི་མཐོང་ངོ་། ། གཞན་དག་གིས་ཀྱང་དེ་ མཐོང་བར་མི་འགྱུར་རོ། ། སྲོག་ཆགས་འབུམ་གྱི་ནང་དུ་སོང་ན་ངོ་མཚར་སྣ་ཚོགས་བྱེད་དོ། ། གང་གིས་ཀྱང་མི་མཐོང་ངོ་། ། ལྷའི་བུ་མོ་འཕྲོག་ཅིང་ལྷ་རྣམས་ཀྱིས་ཀྱང་མི་མཐོང་ངོ་། ། འོ་མས་གདོང་བཀྲུས་པ་ཙམ་གྱིས་ནི་མཐོང་བར་འགྱུར་རོ། ། གཟུགས་བརྙན་དེའི་སྙིང་གར་ ཤིང་འབའ་བོ་ལས་ཕུག་སྟེ། དུར་ཁྲོད་ཀྱི་མེ་ལ་འབའ་བོལ་དང་ཚངས་པ་རྡོ་རྗེས་རབ་ཏུ་སྦར་ལ། དེའི་ཐལ་བ་ཡང་དག་པར་བླངས་ཏེ།

ཁམ་ཕོར་དུ་གཞག་པར་བྱའོ། ། ཡང་ན་པདྨའི་སྣོད་དུའོ། ། སྔགས་འདི་བརྒྱ་རྩ་བརྒྱད་དུ་མངོན་པར་བཟླས་པར་བྱའོ། ། ཨོྃ་བུདྡྷ་ ཀ་པཱ་ལི་ནི་ཏྲཱཾ་ཧཱུྃ། ཨོྃ་བཛྲ་པི་ལི་སི་ནཱི་ཧྲཱིཿཧཱུྃ། ཨོྃ་ཀཱ་མི་ནཱི་ཁྃ་ཧཱུྃ། ཨོྃ་པཱ་ཏཱ་ལ་སཱི་ནཱཾ་ཨཱཿཧཱུྃ། ཨོྃ་ཙི་ཏྲཿསེ་ནཱ་ས་མ་ཡཱ་དྷིཥྛ་ཡ་ཧྲཱིཿཧཱུྃ། སྔགས་འདི་དག་ནི་སངས་རྒྱས་རྣམས་ཀྱིས་ཀྱང་ཤིན་ཏུ་རྙེད་པར་དཀའོ། ། ཐལ་པ་དེ་དང་རྡོ་རྗེ་གཙུག་གིས་ལུས་བྱུག་པར་བྱས་ ན་ཇི་སྲིད་དུ་ལུས་ལ་མཚོན་ཆས་ཕོག་པ་དེ་སྲིད་དུ་མི་ཚུགས་སོ། ། སླར་ཞིང་དགྲ་ཐམས་ཅད་ཀྱི་མགོ་བོ་འཆད་པར་འགྱུར་རོ། ། གང་སྡང་བ་ལ་བལྟས་ན་དེ་ལོང་བར་འགྱུར་རོ། ། གང་ཞིག་སྡང་བའི་སེམས་འཛིན་པ་ན་དེ་སྨྱོ་བར་འགྱུར་རོ། ། ཐལ་བ་དེ་ཉིད་དང་མར་ཁུ་བཟང་ པོས་མིག་བྱུགས་ན་དཔག་ཚད་སྟོང་མཐོང་བར་འགྱུར་རོ། ། གང་ཅི་ཡང་རུང་བའི་སའི་འོག་ན་གནས་པའི་གཏེར་དཔག་ཚད་སྟོང་གི་འོག་ཏུ་སོན་པའི་དངུལ་དང་གསེར་དང་། རིན་པོ་ཆེ་གང་ན་ཡོད་པ་དེ་ཐམས་ཅད་ལ་སྲིན་ལག་གིས་སྡིགས་མཛུབ་བྱས་པ་ཙམ་གྱིས་ཐམས་ ཅད་མདུན་དུ་ལྷགས་ཏེ་གསོལ་བ་འདེབས་སོ། །

ཀྱཻ་སངས་རྒྱས་ཐོད་པའི་རྣལ་འབྱོར་པ་གཏེར་ལོང་ལ་སེམས་ཅན་གྱི་དོན་གྱིས་ཤིག ། དེས་གཏེར་བླངས་ན་གང་འདོད་པ་དེ་བྱེད་དེ། ཐལ་བ་དེས་བྱེད་དོ། ། ཐལ་བ་དེ་དང་གོ་རོ་ཙ་ན་ལྷན་ཅིག་བསྣོས་ཏེ། མཛུབ་མོས་མཉེས་ པས་དཔུང་གི་ཚོགས་ལངས་པ་མཛུབ་མོ་བསྐོར་བ་ཙམ་གྱིས་འབུམ་ཕྲག་སྟོང་གི་དཔུང་རྣམས་ཁ་སྦུབ་ཏུ་ལྷུང་བར་འགྱུར་རོ། ། གང་འདོད་པ་དེ་བྱེད་དོ། ། བཀྲུས་པ་ཙམ་གྱིས་ལངས་པར་འདི་ཐེ་ཚོམ་མེད་དོ། ། ཐལ་བ་དེ་དང་ཞ་ཉེའི་ཕྱེ་མ་དང་བསྣོས་ཏེ་གཅིག་ཏུ་བྱས་ལ། ། རྡོ་ རྗེའི་གཙུག་རྗེས་སུ་བྱིན་ཏེ་ཁབ་ལེན་གྱི་ལྕགས་ཀྱི་ཕྱེ་མ་བསྲེ་ཞིང་གསེར་གྱི་ཕྱེ་མ་ཡང་ཅུང་ཟད་བསྲེ་བར་བྱའོ། ། རྡོ་རྗེའི་ཆུའི་ཁུ་བ་དང་ལྷན་ཅིག་ཏུ་བསྣོས་ཏེ་ཟངས་མའི་སྣོད་དུ་ཉི་མ་བདུན་གྱི་བར་དུ་གཞག་གོ། ། དེ་ནས་མཁྲིས་པ་ཆེན་པོ་མཉེས་ཏེ་རྟའི་ཁྲག་དང་ལྷན་ཅིག་ཏུ་བསྣོས་ལ་ ཡང་སྣོད་དེ་ཉིད་དུ་ཉི་མ་གསུམ་གཞག་པར་བྱའོ། ། དེ་ནས་བཏོན་ཏེ་ལྕགས་གསུམ་གྱི་སྣོད་དུ་གཞག་པར་བྱའོ། ། ཟངས་མའི་སྣོད་དུ་བཞག་པ་དེ་མེའི་ནང་དུ་བཅུག་ན་གསེར་དང་དངུལ་དུ་འགྱུར་བར་སོ་མ་ཉི་མེད་དོ། །

སྲང་གཅིག་ཀྱང་སྲང་སྟོང་གི་རིན་ཐང་དུ་འགྱུར་ཏེ་རིན་པོ་ཆེ་དང་ འདྲ་བར་འགྱུར་རོ། ། གསེར་དེ་མ་ཤ་གཅིག་དང་དངུལ་སྲང་གཅིག་བསྲེས་ཏེ་མེ་ལ་བཞུན་སྲང་སུམ་བརྒྱའི་རིན་ཐང་གི་ཚད་དུ་འགྱུར་བར་འདི་ལ་ཐེ་ཚོམ་མེད་དོ། ། འདི་ལྟ་བུའི་སྦྱོར་བ་ནི་སངས་རྒྱས་རྣམས་ཀྱིས་ཀྱང་རྙེད་པར་དཀའོ། ། འཇིག་རྟེན་དབང་ཕྱུག་ལ་སོགས་པའི་བྱང་ཆུབ་ སེམས་དཔའ་གྲགས་པ་ཆེན་པོ་སྙིང་རྗེ་དང་ལྡན་པའི་བདག་ཉིད་ཆེན་པོ་སྟོབས་ཆེ་བ་དེ་རྣམས་ཀྱང་སྦྱིན་པར་མི་ནུས་སོ། ། འདི་ཡི་སྦྱོར་བ་རྙེད་དཀའ་བ། ། སངས་རྒྱས་ཐོད་པའི་རྒྱུད་དུ་གསུངས། ། རྒྱུད་གཞན་རྣམས་སུ་སྦས་པ་ཡིན། ། འདུས་སོགས་རྣལ་འབྱོར་རྒྱུད་དུ་ནི། ། སྦྱོར་བ་རྣམ་པ་མ་གསུངས་ པ། ། གང་ཚེ་སྔོན་དུ་བསྙེན་དེའི་ཚེ། ། དེ་ཡི་སྦྱོར་བས་ཅི་ཞིག་བྱ། ། བསོད་ནམས་དམན་པའི་སེམས་ཅན་གང་། ། མཚམས་མེད་ལྔ་ནི་བྱེད་པ་ཡང་། ། སངས་རྒྱས་ཐོད་པའི་སྦྱོར་བ་ཡིས། ། འདི་ལྟའི་སྦྱོར་བ་འགྲུབ་པར་འགྱུར། ། དངོས་པོ་དེ་ཡིས་བློ་ཆེན་རྣམས། ། སེམས་ཅན་ དོན་ལ་གཅིག་ཏུ་བརྩོན། ། སྲང་གཅིག་གིས་བསྲེས་བྱེ་བའི་རིན། ། སྦྱོར་བ་ཀུན་ཏུ་རྙེད་པར་དཀའོ། ། སྦྱོར་བ་གླེགས་བམ་ལ་མ་བྲིས། །

བླ་མའི་དྲིན་ལས་ཤེས་པར་བྱ། ། བླ་མས་དངོས་གྲུབ་བླ་མས་མཐར། ། བླ་མ་སྟོན་པ་རྣམ་ཀུན་པ། ། དེས་ན་སློབ་མ་བློ་ཆེན་གྱིས། ། འབད་པས་བླ་མ་མཉེས་པར་བྱ། ། ཐལ་བ་དེ་ཉིད་ཀྱིས་ལུས་བལྟ་བའི་དོན་དུ་བུ་མོའི་མགོ་ལ་བླུགས་ཏེ་རྡོ་རྗེ་གཙུག་གིས་བུ་མོ་བཀྲུའོ། ། ཡང་ཐལ་བས་ཐིག་ལེ་བྱས་ལ། ཚངས་པས་རྡོ་རྗེས་མཎྜལ་གྲུ་བཞི་བྱས་ཏེ། དེའི་དབུས་སུ་བུ་མོ་གཞག་པར་བྱའོ། ། བདུག་སྤོས་ལྔས་བདུགས་ཤིང་ སངས་རྒྱས་ཐམས་ཅད་ཀྱིས་བྱིན་གྱིས་བརླབས་ན་བུ་མོ་ལ་འབབ་པར་འགྱུར་ཏེ། འདས་པ་དང་། མ་འོངས་པ་དང་ད་ལྟར་བྱུང་བ་སྟོན་ཏོ། ། བུ་དོན་གྱིས་འབྲས་བུ་ལ་སྔགས་འདི་ལན་བདུན་དུ་མངོན་པར་བསྔགས་སོ། ཨོྃ་བུདྡྷ་ཀ་པཱ་ལི་ནི་དེ་ཏི་དེ་ཧཱི་ད་དཱ་པ་ཡ་ང་དཱ་པ་ཡ་ཧེ་ཧེ་བྷ་ག་བ་ཏི་ཤཱི་ གྷྲྃ་ཁཌྒཾ་ད་རི་ཧི་བུདྡྷ་ཀ་པཱ་ལ་བཛྲ་སྱ་ཡ་ཛྙ་མ་ལཾ་གྷ་ཡ་ཧཱུྃ་སྟྃ་ཧྲཱི་ཕཊ་ཨ་ཕཊ། ཡུངས་ཀར་བསྣུན་པ་ཙམ་གྱིས་ནི། ། བུ་མོ་གྲགས་ཆེན་མ་ནི་རྒོད། ། དེ་ཡི་ཁ་ནས་རལ་གྲི་བདུན། ། འབྱུང་བ་ལ་ནི་ཐེ་ཚོམ་མེད། ། སངས་རྒྱས་ཐོད་པའི་རྣལ་འབྱོར་པས་སྐད་ཅིག་མ་དེ་ཉིད་ལ་འགྲུབ་པར་ འདིར་སོམ་ཉི་མེད་དོ། །

དེ་ལྟར་རལ་གྲི་གཅིག་གྲུབ་པས་བྱེ་བ་བརྒྱ་སྟོང་གི་རིག་འཛིན་གྲུབ་པས་བསྐོར་བར་འགྱུར་རོ། ། འདི་ལྟ་བུའི་སྦྱོར་བ་ནི་འཇིག་རྟེན་གསུམ་ན་ཡང་རྙེད་པར་དཀའོ། ། བུ་མོ་བཀྲུས་པ་ཙམ་གྱིས་རྣལ་མར་འགྱུར་རོ། ། དེའི་ཐལ་བ་ལྕགས་གསུམ་ གྱིས་དཀྲིས་ཏེ་རིལ་བུ་བྱས་ནས་ཁར་བཅུག་པ་ཙམ་གྱིས་ནི་མི་སྣང་བར་འགྱུར་རོ། ། ཤེས་རབ་ཅན་གྱིས་སུམ་ཅུ་པ་ཡང་བསྐོར་རོ། ། སངས་རྒྱས་ཐམས་ཅད་ཀྱིས་ཀྱང་མི་གཟིགས་སོ། ། རིལ་བུ་ལག་པར་བླངས་པས་དངོས་པོ་གང་དང་གང་ལ་རེག་པ་ཙམ་གྱིས་དེ་དབང་དུ་འགྱུར་རོ། ། ཐལ་བའི་སྦྱོར་བ་འདི་དག་ནི། ། སངས་རྒྱས་ཀྱིས་ཀྱང་རྙེད་པར་དཀའ། ། ཨོྃ་བུདྡྷ་ཀ་པཱ་ལ་ཛཿཧཱུྃ་ཁཾ་རྃ་ཨ། འཇིག་རྟེན་གསུམ་བསྒྲུབ་པའི་སྔགས་སོ། ། ཨོྃ་བུདྡྷ་ཀ་པཱ་ལི་ནི་ཧྲཱིཿཧཱུྃ། དགྲ་བརླག་པའི་སྔགས་སོ། ཨོྃ་མ་ཧཱ་ཀ་པཱ་ལ་བཛྲི་ཁ་ཁ་ཁཱ་ཧི་ཁཱ་ཧི་སརྦ་དུཥྛྣ་གྷ་གྷ་གྙཱ་ཏ་ལ་ གྟཱ་ཏ་ཡ་སརྦྦ་ཤ་ཏྲུྃ་ཨོྃ་ཧ་ཏྲཱྃ་ཧཱུྃ་ཕཊ། བསྐྲད་པའི་སྔགས་སོ། ། སངས་རྒྱས་ཐོད་པའི་རྒྱུད་ཆེན་པོ། རྣལ་འབྱོར་མ་རྣམས་ཀྱི་གོང་ན་མེད་པ་གསང་བའི་ཡང་ཤིན་ཏུ་གསང་བ་ཞེས་བྱ་བ་ལས་ཐལ་བའི་སྦྱོར་བ་དང་ལས་སྣ་ཚོགས་གཏན་ལ་དབབ་པ་དང་།

སྔགས་ཀྱི་ལེའུ་སྟེ་ གཉིས་པའོ། ། ། ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་སྣ་ཚོགས་སྡེ་མ་ལ་བཏུད་དེ་འདི་སྐད་ཅེས་གསོལ་ཏོ། ། སེམས་ཅན་དོན་ལ་གཅིག་བརྩོན་པ། ། ལེགས་སོ་བཅོམ་ལྡན་འདས་ལྷ་མོ། ། འདི་ལྟའི་རབ་ཏུ་སྦྱོར་ཞེས་པ། ། རྒྱུད་ གཞན་དག་ཏུ་མ་གསུངས་ཤིང་། ། སངས་རྒྱས་ཀུན་གྱིས་རབ་སྦས་པ། ། དེ་ནི་འབད་དེ་གསལ་བར་མཛོད། ། ལྷ་མོ་ཆེན་མོ་ཁྱོད་ཀྱིས་གསུངས། ། ལྷ་ཡི་ལེའུ་ནི་ཇི་ལྟ་བུ། ། སངས་རྒྱས་ཐོད་པའི་རྣལ་འབྱོར་མའི། ། རྒྱུད་དུ་ལྷ་རྣམས་དུ་ཞིག་གསུངས། ། དེ་རུ་གཟུགས་ ནི་ཇི་ལྟ་བུ། ། གུས་པ་ཡིས་ནི་ཉན་པར་འཚལ། ། གསུངས་པ། རྃ་ལས་ཉི་མ་བསམ་པར་བྱ། ། ཉི་མའི་སྟེང་དུ་ཧཱུྃ་བྱུང་བའི། ། རྡོ་རྗེ་ནག་པོ་སྲེག་པའི་བདག ། རྡོ་རྗེ་དེ་ཉིད་འོད་ཟེར་གྱིས། ། རབ་དྲ་བས་མཚམས་བཅིང་ངོ་། ། དེ་བཞིན་རྡོ་རྗེ་ནག་གྱུར་པའི། ། རྡོ་རྗེའི་ས་ གཞི་བསམ་པར་བྱ། ། རྡོ་རྗེའི་ས་གཞིའི་དབུས་ཆུང་པར། ། ཨེ་ཡི་རྣམ་པ་བདག་ཉིད་ཆེ། ། གྲུ་གསུམ་ཁམས་གསུམ་བདག་ཉིད་ཅན། ། ཡི་གེ་ལྃ་གྱུར་ས་ཡི་ནི། ། དཀྱིལ་འཁོར་གྲུ་བཞི་རབ་སེར་པོ་འོ། ། དེ་ཡི་དབུས་ནས་ས་བོན་ནི། །

ཡི་གེ་ཨོྃ་སྟེ་ཆོས་བདག་ཉིད། ། ཨོྃ་ལས་བྱུང་བའི་འཁོར་ལོ་ན། ། རྩ་རྣམས་ཀུན་གྱི་རང་བཞིན་ཅན། ། རྣལ་འབྱོར་མ་ནི་རྣམ་པར་བཞུགས། ། རྩ་ནི་དྲུག་ཅུ་ལ་རྒྱན་དང་། ། སྤྲུལ་པ་དྲུག་ཅུ་རྩ་བཞི་འདབ། ། དེས་ན་རྩ་བརྒྱ་ཉི་ཤུའོ། ། རྡོ་རྗེ་སྐུ་ཡི་བདག་ཉིད་ཆེ། ། ཤེས་རབ་ཅན་གྱིས་དེ་ལྟར་བསམ། ། དེ་ ཡི་དབུས་གནས་ས་བོན་ནི། ། བྃ་དཀར་ཡི་གེ་ལས་བྱུང་བ། ། ཆུ་ཡི་དཀྱིལ་འཁོར་ཟླུམ་པོའོ། ། རྩ་རྣམས་ཐམས་ཅད་ཆུ་ཡི་ནི། ། དཀྱིལ་འཁོར་ལ་ནི་ཐིམ་པར་འགྱུར། ། སླར་ཡང་བསམ་པར་བྱ་བ་ནི། ། རྃ་དམར་ལས་བྱུང་མེ་དཀྱིལ་འཁོར། ། གྲུ་གསུམ་འབར་ བའི་བདག་ཉིད་ཅན། ། རབ་ཏུ་འབར་བཞིན་པ་ཡི་ནི། ། རྩ་བའི་འཁོར་ལོ་ཡང་དག་བལྟ། ། དེ་ནས་བསམ་པར་བྱ་བ་ནི། ། ཡྃ་གྱུར་རླུང་གི་དཀྱིལ་འཁོར་ནི། ། ཟླ་བ་ཕྱེད་པའི་རྣམ་འདྲ་སྔོ། ། རྩ་རྣམས་རབ་ཏུ་གཡོ་བའི་གཟུགས། ། ཐིམ་གྱུར་འཁོར་ལོའི་རིག་པར་ གསུངས། ། དེ་དག་ཐམས་ཅད་ཐིམ་འགྱུར་བ། ། དེ་ཡི་དབུས་གནས་རྣལ་འབྱོར་པ། ། དེ་ལྟར་ཤེས་པར་བྱེད་གང་ཞིག ། སངས་རྒྱས་ཐོད་པའི་རྣལ་འབྱོར་པས། ། དེ་ནས་ཟླ་བ་བསམ་པར་བྱ། ། ཟླ་བའི་སྟེང་དུ་ཉི་མའོ། ། དེ་ཡི་དབུས་ཚུད་ས་བོན་ནི། །

ཧཱུྃ་དང་ཨ་ ཡི་རང་བཞིན་ནོ། ། ཡི་གེ་ཀ་ཡིས་ཧ་བརྒྱན་ཏེ། ། ཀ་ནི་ཧ་ལ་ཐིམ་པར་འགྱུར། ། མི་ཕྱེད་པ་ཡི་ཧ་དང་ཧཱུྃ། ། གཉི་གའི་བདག་ཉིད་ཅན་བལྟའོ། ། ཧ་ནི་མི་ཤིགས་ཤེས་རབ་ཀྱི། ། བདག་ཉིད་ཨུ་དང་ཐིག་ལེ་དག ། གཉི་ག་གཅིག་ཏུ་གྱུར་པ་ནི། ། ཡི་གེ་ཧཱུྃ་གི་མཆོག་ པ་ལྟའོ། ། ཧཱུྃ་ལས་བྱུང་བའི་འོད་ཟེར་རྣམས། ། དེ་ཡིས་བདེ་བ་ཆེ་བསྐུལ་ཏེ། ། བ་མོ་ལྟ་བུའི་རི་བོང་ཅན། ། ཉི་མར་ལྷན་ཅིག་ཞུ་གྱུར་ཅིང་། ། དཀྱིལ་འཁོར་གཉི་ག་གཅིག་གྱུར་པ། ། ཉི་མའི་མཆོག་ཏུ་བལྟ་བར་བྱ། ། ཡང་ནི་ཧཱུྃ་བྱུང་འོད་ཟེར་དེས། ། རྩ་བའི་ འཁོར་ལོ་ཐམས་ཅད་ལ། ། རེག་མ་ཐག་པའི་མོད་ལ་ནི། ། རྩ་བའི་འཁོར་ལོ་ལས་འབབ་འགྱུར། ། ཞུ་བདེ་ཡིས་ས་བོན་བཀྲུ། ། ཧཱུྃ་གྱུར་པ་ལས་རྡོ་རྗེ་སྟེ། ། དབུས་སུ་དེ་ཉིད་ཀྱིས་བྱིན་བརླབས། ། ས་བོན་རྡོ་རྗེ་ལས་བྱུང་བ། ། དཔའ་བོ་ཁྲག་འཐུང་ མདོག་སྔོན་པོ། ། ཞལ་གཅིག་པ་ལ་ཕྱག་བཞི་པ། ། གཙོ་བོ་ཧཱུྃ་ཞེས་འདོན་པ་སྟེ། ། སྐྱིལ་ཀྲུང་ཕྱེ་པའི་གར་གྱིས་གནས། ། གཉི་གའང་ཁྲོ་བའི་བདག་ཉིད་ཅན། ། སྟག་གི་པགས་པའི་ན་བཟའ་མནབས། ། མགོ་བོ་རློན་པའི་ཕྲེང་བ་འཆང་། ། བསྲེགས་སུ་མཆོད་ཕྱིར་ ཐོགས་པ་ཡི། །

ཤིན་ཏུ་བཞད་པས་འཇིགས་ཆེ་བའི། ། གཙོ་བོ་སྙིང་རྗེའི་བདག་ཉིད་བལྟ། ། དཔུང་རྒྱན་མགུལ་དོ་འཁོར་གདུབ་དང་། ། གཅེར་བུ་རུས་པའི་སྐ་རགས་འཆང་། ། གཡེར་ཀར་བཅས་པའི་རྐང་གདུབ་ཅན། ། མ་ལུས་བདུད་རྣམས་འཇོམས་པར་བྱེད། ། རལ་པའི་ཅོད་པན་ཡང་དག་ལྡན། ། སངས་རྒྱས་རྣམ་པ་ལྔ་ཡིས་བརྒྱན། ། ཟླ་བ་ཕྱེད་པ་འཛིན་པའི་ལྷ། ། དབུ་ལ་སྣ་ཚོགས་རྡོ་རྗེས་མཚན། ། འཁོར་ལོ་རྣ་ཆ་གདུ་བུ་དང་། ། ཕྱག་རྒྱ་རྣམ་པ་ལྔ་ཡིས་མཚན། ། ཐལ་བའི་རྡུལ་ཅན་འཇིགས་པར་བྱེད། ། ཐོད་པ་གཏི་མུག་ གིས་བརྒྱན་པའི། ། དཔའ་བོ་འཁོར་བ་སྒྲོལ་བྱེད་པ། ། བྱང་ཆུབ་ས་བོན་རང་བཞིན་ནོ། ། གཙོ་ཆེན་དེ་ཡི་ཤེས་རབ་མ། ། སྣ་ཚོགས་སྡེ་མ་རྣལ་འབྱོར་མ། ། གཅེར་བུ་མགོ་བོའི་ཕྲེང་བ་སྤངས། ། རྒྱན་མེད་མཆོད་ཕྱིར་ཐོགས་མེད་མ། ། བདེ་བ་ཀུན་གྱི་གཟུགས་ཅན་མ། ། ཕྱག་གཉིས་ སྐྲ་ནི་གྲོལ་བ་མོ། ། ཧེ་རུ་ཀ་ལ་འཁྱུད་གནས་མ། ། དེ་ལྟར་ཕ་རོལ་ཕྱིན་ལྷ་མོ། ། ཁ་དོག་དམར་པོ་རྣམ་གསལ་མ། ། ཞལ་ནི་ཤིན་ཏུ་རྣམ་འགྱུར་བ། ། ཅུང་ཟད་མཆེ་བ་གཙིགས་འཇིགས་མ། ། གཡས་ན་ཅང་ཏེའུ་གྲི་གུག་སྟེ། ། གཡོན་ན་ཁ་ཊྭཱཾ་ཐོད་པའོ། ། རང་གི་ལུས་ སྐྱེས་འོད་ཟེར་གྱིས། །

རྩ་ཡི་འཁོར་ལོ་བསྐུལ་བར་བྱ། ། དེ་ཡིས་བསྐུལ་བ་ཙམ་གྱིས་ནི། ། རྩ་ཡི་འཁོར་ལོའི་རང་བཞིན་ལས། ། འཛག་འགྱུར་འདིར་ནི་ཐེ་ཚོམ་མེད། ། འཛག་པ་དེ་ལས་རྣལ་འབྱོར་མ། ། བརྒྱད་པོ་བུ་མོ་རྣམས་ཀྱི་མཆོག ། མཆོད་པ་སྣ་ཚོགས་ འཛིན་པ་ཡིས། ། མགོན་པོ་ཧེ་རུ་ཀ་མཆོད་དོ། ། རྡོ་རྗེ་མགོན་པོའི་ཤར་གནས་པ། ། རྡོ་རྗེ་མཆེ་བ་མ་ཡིས་ནི། ། ཐོད་པ་ཁྲག་གིས་བཀང་བཟུང་སྟེ། ། གཟི་བརྗིད་ཆེན་པོ་གསོལ་བར་མཛད། ། རྡོ་རྗེ་ཕོ་ཉ་བདག་ཉིད་ཆེ། ། དབང་ལྡན་དུ་ནི་ཅང་ཏེའུ་བརྡུང་། ། རྡོ་རྗེ་གདོང་ མ་དྲི་སྣོད་དང་། ། མེ་ཡི་ཕྱོགས་སུ་རྣམ་པར་གནས། ། རྡོ་རྗེ་ཅན་མ་གྲགས་ཆེན་མོ། ། མཆོད་ཡོན་སྣོད་བཅས་བདེ་ན་བྲལ་ན། ། རྡོ་རྗེ་གཙིགས་མ་ལྷོ་ཡི་ནི། ། ཕྱོགས་ན་རྔ་བོ་ཆེ་འཛིན་གསུངས། ། རླུང་དུ་རྡོ་རྗེ་ལྟེ་བ་མ། ། རི་བོང་ཅན་གྱི་སྣོད་འཛིན་ནོ། ། ནུབ་ཏུ་རྡོ་རྗེ་ འཇིགས་མ་ནི། ། ཅེ་སྤྱང་ཕྱག་ན་འཛིན་པར་གསུངས། ། བྱང་དུ་འདོད་ཆགས་རྡོ་རྗེ་མ། ། ལྷ་མོའི་ཆགས་པས་གཙོ་བོ་མཆོད། ། དེ་ལྟར་ཧེ་རུ་ཀ་བསམས་ནས། ། རྣལ་འབྱོར་མ་ནི་བརྒྱད་ཀྱིས་མཆོད། ། སྣ་ཚོགས་ཟས་དང་སྣ་ཚོགས་སྐོམ། ། སྣ་ཚོགས་རོལ་མོ་ མཆོག་གསུངས་དང་། །

དྲི་ཞིམ་ལྔ་དང་མེ་ཏོག་སྤོས། ། འདི་དག་གིས་ནི་གཙོ་བོ་མཆོད། ། མཆོད་ཡོན་ཞལ་བསིལ་དེ་བཞིན་ཁྲུས། ། གླུ་ཡི་མཆོག་ནི་རྣམ་མང་པོས། ། མགོན་པོ་ཁྲག་འཐུང་བདག་ཉིད་ཆེ། ། འདི་དག་གིས་ནི་མཆོད་པར་བྱ། ། དཔའ་བོ་ རྫོགས་པར་མཐོང་ནས་ནི། ། རྩ་ཡི་འཁོར་ལོ་ལས་ནི་འཛག ། འཛག་པ་དེ་ལས་རྣལ་འབྱོར་མ། ། རྣམ་མང་བརྩེ་བ་ཆེར་ལྡན་པ། ། བདེར་གཤེགས་ཀུན་གྱིས་བྱིན་བརླབས་མ། ། སྣ་ཚོགས་རྒྱན་གྱིས་རྣམ་པར་བཀླུབས། ། སྣ་ཚོགས་པ་ཡི་ན་བཟའ་མནབས། ། གཟུགས་ ནི་ལང་ཚོ་གཞོན་པས་བརྒྱན། ། ལོ་ནི་བཅུ་དང་གཉིས་ལོན་པ། ། ཕྱག་གཡས་བྱང་ཆུབ་སེམས་བཀང་བའི། ། བུམ་པ་ཨ་མྲའི་ལྕུག་བཅས་བསྣམས། ། ཞལ་ནི་རབ་བཞད་དང་བ་ཡིས། ། ཧེ་རུ་ཀ་ནི་རྒྱལ་གྱུར་ཅིག ། རྒྱལ་གྱུར་ཅིག་ཅེས་འདི་ལྟར་སྨྲ། ། མགོན་པོས་ མདུན་དུ་བལྟས་ནས་ནི། ། དབང་བསྐུར་མཆོག་སྟེ་གསོལ་བ་གདབ། ། བརྩེ་དང་ལྡན་པའི་གྲགས་ཆེན་མོ། ། འཁོར་བའི་འདམ་དུ་བྱིང་བ་བདག ། དབང་བསྐུར་བ་ཡིས་བདག་བསྒྲལ་ཕྱིར། ། རྡོ་རྗེ་རྣལ་འབྱོར་མས་ཁྲུས་ཤིག ། དཔེར་ན་བུ་ཚ་མེད་པའི་ཁྱིམ། ། ཤི་བ་ ཙམ་གྱིས་སྟོང་པ་ཉིད། ། དེ་བཞིན་དབང་དང་བྲལ་ན་ནི། ། ཡེ་ཤེས་ཀུན་གྱིས་སྟོང་པ་ཉིད། །

དཔེར་ན་པི་བང་སྦྱོར་ཀུན་ཚོགས། ། རྒྱུད་དང་བྲལ་ན་བརྡུང་མི་རུང་། ། དེ་བཞིན་དབང་དང་བྲལ་ན་ནི། ། སྔགས་དང་བསམ་གཏན་འགྲུབ་མི་འགྱུར། ། རྨོངས་པ་གང་ ཞིག་དབང་མེད་པར། ། བདག་ནི་དབང་བསྐུར་ཞེས་སྨྲ་བ། ། ཇི་སྲིད་སངས་རྒྱས་བཞུགས་ཀྱི་བར། ། སློབ་མར་བཅས་ཏེ་དམྱལ་བར་འགྲོ། ། དེ་ལྟར་ཤེས་བྱ་རྣལ་འབྱོར་མས། ། སླར་ཡང་བདག་ལ་དབང་བསྐུར་ཅིག ། ཡང་དང་ཡང་དུ་ཕྱག་འཚལ་ཏེ། ། ཐལ་མོ་སྦྱར་ནས་ གསོལ་བ་གདབ། ། གལ་ཏེ་དབང་བསྐུར་མེད་ན་ནི། ། ཧེ་རུ་ཀ་ཡི་བདག་གྱུར་ཅིང་། ། དེ་ནས་རྣལ་འབྱོར་མ་དེ་རྣམས། ། རྒྱལ་གྱུར་རྒྱལ་གྱུར་ཞེས་སྨྲ་ཞིང་། ། བཅོམ་ལྡན་དབང་བསྐུར་ཁྲུས་གསོལ་ལོ། ། ཕྱི་ནང་གསང་བར་བཅས་པ་ཡི། ། དབང་བསྐུར་ཙམ་གྱིས་ནམ་ མཁའ་ཡི། ། ཁམས་ནས་རྔ་ཡི་སྒྲ་གྲག་ཅིང་། ། མེ་ཏོག་ཙནྡན་ཆར་འབབ་འགྱུར། ། དེ་ནས་རྣལ་འབྱོར་མ་དེ་རྣམས། ། རྩ་བའི་འཁོར་ལོ་ལ་ནི་ཐིམ། ། སངས་རྒྱས་ཐོད་པའི་རྒྱུད་རྣལ་འབྱོར་མའི་གོང་ན་མེད་པ་གསང་བའི་ཡང་ཤིན་ཏུ་གསང་བ་ཞེས་བྱ་བ་ལས་ལྷ་བསྐྱེད་པ་དང་། དབང་བསྐུར་བའི་ལེའུ་སྟེ་གསུམ་པའོ། ། ། །

དེ་ནས་ནོར་རྒྱས་ལ་སོགས་པའི་ཀླུ་རྣམས་ཀྱིས་ཕྱག་ན་རྡོ་རྗེ་ལ་ཕྱག་བྱས་ནས་འདི་སྐད་ཅེས་གསོལ་ཏོ། ། ཅི་ཡི་ཕྱིར་ན་བདག་ཅག་རྣམས། ། འོད་ཟེར་གྱིས་ནི་འཚལ་ཏེ་མཆིས། ། བཅོམ་ལྡན་བདག་ལ་བཤད་དུ་གསོལ། ། དེ་ནས་ ཕྱག་ན་རྡོ་རྗེ་གནོད་སྦྱིན་གྱི་བདག་པོ་ཆེན་པོས་རྣལ་འབྱོར་མ་སྣ་ཚོགས་སྡེ་མ་ལ་འདི་སྐད་ཅེས་གསོལ་ཏོ། ། ནོར་རྒྱས་ལ་སོགས་བདག་ཉིད་ཆེ། ། ཀླུ་རྣམས་ཅི་ཕྱིར་དགུག་པ་ལགས། ། རྣལ་འབྱོར་ཆེན་པོ་བདག་ལ་གསུངས། ། དེ་ནས་སྣ་ཚོགས་སྡེ་མའི་སྙིང་གི་འོད་ཟེར་གྱིས་ ཀླུ་ཐམས་ཅད་ཀྱི་སྙིང་གདང་སྤྱི་བོའི་མཐར་ཐུག་པར་ཞུགས་ཏེ། ཚིམ་པར་བྱས་ནས་སླར་ལོག་གོ། ། དེ་ནས་ཀླུ་དེ་རྣམས་ཐམས་ཅད་ཀྱིས་ཕྱག་འཚལ་ཏེ། འདི་སྐད་ཅེས་གསོལ་ཏོ། ། ལྷ་མོ་བཀའ་ནི་ཅི་ཞིག་གསོལ། ། ཀྱཻ་ལགས་ཇི་ལྟ་བུ་ཞིག་བགྱི། ། གསུངས་ པ། མུ་སྟེགས་ལ་སོགས་མཁའ་ལྡིང་སྔགས། ། ཡེ་ཤེས་ལས་བྱུང་ཇི་ལྟ་བུ། ། དུས་སུ་ཟིན་པ་ཇི་ལྟར་ཡིན། ། ཇི་ལྟར་དུག་ནི་སྐྱེ་བར་འགྱུར། ། སྦྲུལ་གྱིས་ཟིན་པ་ཙམ་གྱིས་ནི། ། སླར་ཡང་སེམས་ཅན་འཆི་འགྱུར་ཞིང་། ། ཞུས་པ། ཁྱབ་འཇུག་དབང་ཕྱུག་ སོགས་ལྷ་དང་། ། ཚངས་པ་ཚངས་པ་མདུན་ན་འདོན། །

དེ་རྣམས་ལ་ནི་འཆི་འཕོ་མཆིས། ། དུག་གི་ཉེས་པས་གནོད་པར་འགྱུར། ། དེ་ལྟར་དུས་སུ་ཟིན་ཅེས་སྨྲ། ། སྦྲུལ་གྱི་དུག་ནི་སེལ་བ་མེད། ། དེ་བཞིན་སྦྲུལ་ལ་དུག་ནི་ཡོད། ། སྦྲུལ་ཟིན་འཚོའམ་མི་ འཚོ་བ། ། བདེ་བྱེད་ལ་སོགས་རྫུ་འཕྲུལ་ཆེའི། ། ལྷ་དེ་རྣམས་ནི་དེ་ལྟར་སྨྲ། ། སྟོན་པ་སྟོང་ཉིད་ངེས་གསུང་བ། ། བཅོམ་ལྡན་རྡོ་རྗེ་འཆང་བས་གསུངས། ། ཆོས་རྣམས་ཐམས་ཅད་སྟོང་པ་ལ། ། སྦྲུལ་གྱི་དུག་ནི་ཇི་ལྟར་ཡོད། ། གང་གིས་འཛིན་ཅིང་གང་ཞིག་འཛིན། ། དུས་དང་དུས་མིན་ཇི་ལྟར་འགྱུར། ། ཇི་ལྟར་སྤྱོད་ཅིང་ཇི་ལྟར་བསྡུ། ། གང་ཕྱིར་འཛིན་ཅིང་གང་དུ་འཛིན། ། སེམས་ཅན་དུག་ཟིན་མི་འཆི་བ། ། སྟོང་ཉིད་སྨྲ་བའི་ངེས་པ་ཡིན། ། འདོད་ཆགས་གཏི་མུག་སྟོང་པ་ཉིད། ། གྲགས་ཆེན་ཡུལ་ནི་སྟོང་པ་ཉིད། ། ཡུལ་གྱི་རང་ བཞིན་དྲི་མ་མེད། ། དྲི་མ་དང་བྲལ་ཇི་ལྟར་དུག ། སྦྲུལ་གྱིས་ཀྱང་ནི་ཅི་ཞིག་བྱེད། ། ཐ་མལ་པ་ཡི་ཡུལ་ནི་སྦྲུལ། ། ཡུལ་གྱི་ཉེས་པ་དུག་ཉིད་དོ། ། ལྷ་རྣམས་ཡུལ་རྣམས་ཀྱིས་ནི་བསྒྲིབས། ། ཐམས་ཅད་དུས་སུ་ཟིན་པ་ཡིན། ། ཡུལ་གྱི་ཉེས་པ་སྦྱངས་པ་ཉིད། ། སྟོན་ པ་ལོངས་སྤྱོད་གོས་མི་འགྱུར། །

སངས་རྒྱས་ཐོད་པའི་རྣལ་འབྱོར་བས། ། འདོད་ཀུན་ཉེ་བར་ལོངས་སྤྱོད་བྱ། ། རི་སྐེགས་སྦྱོར་བ་རྙེད་དཀའ་དང་། ། སངས་རྒྱས་ཐོད་པའི་སྦྱོར་ལྡན་པས། ། འདིར་ནི་ཀླུ་རྣམས་ཐམས་ཅད་ལྷགས། ། དེ་ཕྱིར་རབ་ངེས་ལྷ་མོ་ཀྱེ། ། དུས་ཟིན་ཐ་ཆེམ་ མེད་པ་རུ། ། བློ་མེད་མུ་སྟེགས་ཅན་དེ་སྨྲ། ། འདི་ལྟར་སྨྲས་ཏེ་ཀླུ་རྣམས་ཀྱིས། ། སྣ་ཚོགས་སྡེ་ལ་ཕྱག་འཚལ་ཏེ། ། རང་རང་གི་ནི་གནས་སུ་དོང་། ། དེ་ནས་བཅོམ་ལྡན་འདས་མས་ཡུལ་གྱི་ཉེས་པ་སྤོང་བའི་སྔགས་གསུངས་པ། ཨོྃ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱ་ཏྨ་ཀོ྅ཧྃ། ། སྟོང་དང་སྟོང་མིན་མཐའ་དག་བཅས། ། སྒྱུ་མ་རྨི་ལམ་ལྟ་བུར་གཅིག ། འཇིག་རྟེན་མཐའ་དག་{བརྫུན་,རྫུན་}གྱིས་བཅིངས། ། ཀྱཻ་ལགས་བཤས་མོ་འདི་ལྟར་ལྟོས། ། དེ་ནས་ཕྱག་ན་རྡོ་རྗེ་གནོད་སྦྱིན་གྱི་བདག་པོ་ཆེན་པོས་བཅོམ་ལྡན་འདས་མའི་ཞབས་ལ་སྤྱི་བོས་གཏུགས་ ཏེ། འདི་སྐད་ཅེས་གསོལ་ཏོ། ། རི་སྐེགས་སྦྱོར་བ་རྙེད་དཀའ་བ། ། ལྷ་མོ་ཡིས་ནི་བཤད་དུ་གསོལ། ། སེམས་ཅན་དོན་ལ་གཅིག་ཏུ་འབད། ། དེ་རུ་བདག་ལ་ལྟད་མོ་མཆིས། ། གསུངས་པ། དཀྱིལ་འཁོར་མེད་པར་སྦྱིན་མི་བྱ། ། སློབ་མ་བསྡུ་བར་མི་བྱའོ། །

གཙོ་བོས་ཇི་ ལྟར་གསུངས་པ་ཡི། ། དཀྱིལ་འཁོར་ལས་ནི་སྨྲ་བར་བྱ། ། མཐོ་ལྔ་པ་ཡིས་བཟུང་སྟེ། ། ཁོར་ཡུག་ཏུ་ནི་གྲུ་བཞིའོ། ། དེ་ཡི་ཕྱེད་ཀྱི་ཟླུམ་པོ་ལ། ། བརྒྱུད་ལས་འདམ་སྐྱེས་འདབ་མ་བརྒྱད། ། ཨོྃ་ཧཱུྃ་ཧྲཱིཿཧཱུྃ་ཁྃ་ཧཱུྃ་ཨ་ཧཱུྃ་ཏིཥྛ་ཏིཥྛ་བཛྲ་ས་མ་ཡ་ཨ་དྷིཥྛ་ཡེད། ས་སྦྱང་བའི་སྔགས་ སོ། ། བཛྲ་ཧེ་རུ་ཀ་བཛྲ་ས་མ་ཡ་ཧྲི་སརྦྦ་དུཥྚ་ས་མ་ཡ་མུ་དྲཱ་པྲ་བྷྃ་ཛ་ཧ་ཧཱུྃ་རུ་ལུ་རུ་ལུ་བྷྱོ་ཧཱུྃ་ཧཱུྃ་ཕཊ། ས་སྦྱང་བའི་དུས་སུ་གཏོར་མ་གཏང་བའི་སྔགས་སོ། ། ཨོཾ་སརྦྦ་ཏ་ཐཱ་ག་ཏ་ཨ་དྷིཥྛཱ་ན་ཨི་དམ་སཱུ་ཏྲ་ཏིཥྛ་མཱ་ཙ་ལ་ཧེ་ཧེ་བུདྡྷ་ཀ་པཱ་ལ་བཛྲ་ཧེ་རུ་ཀ་ཧཱུྃ་ཧཱུྃ་ཋ་ཋ། སྔགས་འདིས་ལན་བདུན་དུ་ སྲད་བུ་ལ་མངོན་པར་བསྔགས་པར་བྱའོ། ། ཐིག་སྐུད་ཀྱི་སྔགས་སོ། ། གྲུ་བཞི་པ་ལ་སྒོ་བཞི་པ། ། རྟ་བབས་བཞི་དང་ཡང་དག་ལྡན། ། ཁ་ཁྱེར་སྣམ་བུ་སྤངས་པ་ལ། ། བ་དན་རྣམ་པ་བརྒྱད་ཀྱིས་བརྒྱན། ། སངས་རྒྱས་ཐོད་པའི་སྦྱོར་བ་ཡིས། ། རྡུལ་ཚོན་གཞན་དང་ འདྲེས་མེད་པའི། ། རྡུལ་ཚོན་དམར་པོར་རྫོགས་པར་བྱ། ། དེ་རུ་བུམ་པ་བཞི་པོ་རྣམས། ། གྲྭ་དང་གྲྭ་རུ་རྣམ་པར་བཞག ། བུམ་པར་མཚན་མ་བྲི་བྱ་བ། ། ཐོད་པ་དང་ནི་ཁ་ཊྭཱྃ་ག། །

གྲི་གུག་དང་ནི་ཅང་ཏེའུ་དང་། ། ཅང་ཏེའུ་གནས་སུ་རྡོ་རྗེ་བྲི། ། རྡོ་རྗེའི་སྟེང་དུ་འདམ་སྐྱེས་ཏེ། ། དེ་ལྟར་བུམ་པར་བྲི་བྱས་ནས། ། ཆུ་ཡིས་ཡོངས་སུ་དགང་བར་བྱ། ། བུམ་པ་ལ་ནི་རས་ཀྱིས་བརྒྱན། ། རིན་ཆེན་རྣམ་པ་ལྔ་གཞུག་ཅིང་། ། བུམ་པར་ཀུན་ནས་འབྲུ་ལྔ་དང་། ། ཨ་མྲའི་ལྕུག་མས་དག་པ་པར་བྱ། ། དེ་ནས་འོ་མའི་སྣོད་བཞག་སྟེ། ། རྡོ་རྗེ་སློབ་དཔོན་བློ་ཆེན་གྱིས། ། སངས་རྒྱས་ཐོད་པའི་སྦྱོར་དང་ལྡན། ། པདྨའི་སྟེང་དུ་ཉི་མ་སྟེ། ། ཉི་མའི་སྟེང་དུ་ཧཱུྃ་ཡིག་བསམ། ། ཧཱུྃ་གྱུར་པ་ལས་རྡོ་རྗེ་ནི། ། སྔོན་པོ་ཧཱུྃ་གི་བདག་ཉིད་སྐྱེས། ། ཧཱུྃ་དང་རྡོ་རྗེ་བྱུང་དཔའ་བོ། ། ཧེ་རུ་ཀ་ནི་བདག་ཉིད་ཆེ། ། སྐུ་མདོག་སྔོན་པོ་ཕྱག་བཞི་པ། ། གཙོ་བོ་ཆེན་པོ་ཞལ་གཅིག་པ། ། གཡས་ན་གྲི་གུག་ཐོད་པ་སྟེ། ། གཡོན་ན་ཁ་ཊྭཱྃ་རྡོ་རྗེའོ། ། སྐུ་ལ་མི་ཡི་རུས་པས་བརྒྱན། ། ཀླུ་རྣམས་སྐྲག་པར་བྱེད་པ་པོ། ། སྐྱིལ་ཀྲུང་ཕྱེད་པའི་གར་གྱིས་བཞུགས། ། གཅེར་བུ་འཇིགས་བྱེད་རང་བཞིན་ཏེ། ། ཞལ་གྱི་མཆེ་བ་ཅུང་ཟད་གཙིགས། ། དབུ་སྐྲ་སེར་ཞིང་གྱེན་དུ་འབར། ། ཐོད་པས་སྤྱི་བོ་བརྒྱན་བྱས་པ། ། ས་འོག་བདུན་ནི་འཁྲུག་པར་བྱེད། །

དཔའ་བོ་དེ་ལྟར་བསམ་པར་བྱ། ། ཕྱིས་ནི་ཕྱོགས་ཀྱི་འདབ་མ་ལ། ། ཨོྃ་དང་ཧཱུྃ་དང་ཁྃ་དང་སྭ། ། ཡི་གེ་ཡོངས་སུ་གྱུར་པ་ལས། ། རྣལ་འབྱོར་མ་ནི་རྣམ་པ་བཞི། ། སྣ་ཚོགས་སྡེ་མ་འདོད་ཅན་མ། ། ས་ འོག་གནས་མ་རབ་བཟང་མ། ། ལྷ་མོ་དེ་དག་མདོག་སྔོན་མོ། ། གྲགས་ཆེན་ཞལ་གཅིག་ཕྱག་བཞི་མ། ། ཉི་མའི་དཀྱིལ་འཁོར་རྣམ་པར་བཞུགས། ། གཡོན་བརྐྱང་བ་ཡི་ཞབས་ཀྱིས་བཞུགས། ། གཡས་ན་གྲི་གུག་ཐོད་པ་འཛིན། ། གཡོན་ན་ཁ་ཊྭཱྃ་ཅང་ཏེའུ། ། རུས་རྒྱན་ ལྷ་མོ་ཀུན་འཇིགས་མ། ། ཞལ་གྱི་མཆེ་བ་ཅུང་ཟད་གཙིགས། ། སྟག་གི་པགས་པའི་ན་བཟའ་མནབས། ། སྐྲ་ནི་སེར་པོ་གྱེན་དུ་འབར། ། ཐོད་པའི་ཕྲེང་བས་སྤྱི་བོར་བརྒྱན། ། དེ་རྣམས་མགོ་རྒྱུས་ཕྲེང་བ་ཅན། ། ལྷ་མོའི་འོད་ཟེར་སྤྲོས་གྱུར་པས། ། ཀླུ་རྣམས་སྐྲག་པར་མཛད་ པ་མོ། ། ཕྱོགས་ཀྱི་འདབ་བཞུགས་ཆེར་བཞད་མའོ། ། བློ་ལྡན་མཚམས་ཀྱི་འདབ་བཟང་ལ། ། ཉི་མ་བཞི་ལ་ཧཱུྃ་ཡིག་བཞི། ། ཧཱུྃ་ཡིག་སོ་སོར་གྱུར་པ་ལས། ། ཆང་འཚོང་མ་དང་འབྱུང་པོ་མ། ། བཞིན་བཟང་ནམ་མཁར་འགྲོ་མ་སྟེ། ། མཚམས་ཀྱི་འདབ་མར་གནས་ལྷ་མོ། ། ཁ་དོག་སེར་མོ་གྲགས་ཆེན་མོ། ། ཐམས་ཅད་ན་བཟའ་སེར་པོ་མནབས། །

གཡས་བརྐྱང་བ་ཡི་ཞབས་ཀྱིས་གནས། ། ཞལ་གཅིག་མ་ལ་ཕྱག་བཞི་མ། ། ཀླུ་བརྒྱད་རྒྱན་བྱས་ལྷ་མོ་ནི། ། གཡས་ན་གྲི་གུག་ཅང་ཏེའུ་འཛིན། ། གཡོན་ན་ཁ་ཊྭཱྃ་ཐོད་པའོ། ། སྐུ་ལས་ འོད་ཟེར་སེར་པོ་འཕྲོ། ། ཤིན་ཏུ་སྒེག་པའི་ཉམས་དང་ལྡན། ། ཅུང་ཟད་མཆེ་བ་གཙིགས་པའི་ཞལ། ། ཐམས་ཅད་གར་བྱེད་སྐྲ་སེར་མ། ། ཀླུ་རྣམས་སྐྲག་པར་སྐྱེད་བྱེད་མ། ། མཚམས་ཀྱི་ཆ་རུ་རྣམ་པར་གནས། ། དེ་ནས་བསམ་པར་བྱ་བ་ནི། ། སློབ་དཔོན་ཧེ་ རུ་ཀས་རང་གི་ལུས་ལས་སྐྱེས་པའི་འོད་ཀྱིས་ཕྱོགས་བཅུར་བཞུགས་པའི་དེ་བཞིན་གཤེགས་པ་རྣམས་ལ་ཡང་དག་པར་རེག་པར་བྱས་ནས་སླར་ལོག་སྟེ། དེ་བཞིན་གཤེགས་པ་རྣམས་ལ་ཡང་དག་པར་རེག་པའི་འོད་ཟེར་ལས་ལྷ་མོའི་ཚོགས་ཡང་དག་པར་སྤྲོས་པས་ཧེ་རུ་ཀ་དང་རྣལ་འབྱོར་ བརྒྱད་ལྷན་ཅིག་ཏུ་བཀྲུས་སོ། ། བཀྲུས་པ་ཙམ་གྱིས་དེ་བཞིན་གཤེགས་པ་རྣམས་ཅོད་པན་དུ་གྱུར་ཏོ། ། དཀྱིལ་འཁོར་རྫོགས་པར་མཐོང་ནས་ནི། ། སློབ་དཔོན་བདག་ཉིད་ཆེན་པོ་ཡིས། ། ཕྱིས་ནི་གཏོར་མ་གཏང་བར་བྱ། ། ཁྱད་པར་དུ་ནི་འོ་མའོ། ། སངས་རྒྱས་ཐོད་པའི་སྦྱོར་ལྡན་ པའི། ། ཤེས་རབ་ཅན་གྱིས་ཆང་བཏུང་ཞིང་། ། མར་མེ་བཞི་ནི་དབུལ་བར་བྱ། །

འབྲས་བུ་བཞི་ཡང་དབུལ་བྱ་ཞིང་། ། དེ་ནས་སློབ་མ་བློ་ཆེན་གྱིས། ། རས་ཟུང་གསུམ་ནི་དབུལ་བར་བྱ། ། དེར་ནི་གདན་ཡང་བསྟབས་པར་བྱ། ། སློབ་དཔོན་བདག་ཉིད་ཆེན་པོ་ཡིས། ། དེ་རུ་ རྣལ་འབྱོར་མ་མཆོད་དོ། ། བློ་གྲོས་ཆེན་པོ་ཐུགས་དགྱེས་པས། ། སྣ་ཚོགས་ཟས་དང་སྣ་ཚོགས་སྐོམ། ། དཔའ་བོ་རྣལ་འབྱོར་མ་ཚིམ་བྱ། ། མགུ་བར་སེམས་པའི་ཡིད་ཀྱིས་ནི། ། འཁོར་ལོ་ཁྱད་པར་ཆེ་བྱ་སྟེ། ། ཕྱིས་ནི་སློབ་དཔོན་བརྩེ་ཆེན་བདག ། ཕྱི་རོལ་ས་རུ་བྱུང་ ནས་ནི། ། བདེ་བ་ཡི་ནི་གདན་བཞུགས་ཏེ། ། སློབ་མས་མཎྜལ་གསུམ་བྱས་ལ། ། བླ་མ་མེ་ཏོག་སྣ་ཚོགས་མཆོད། ། ཞབས་ལ་སྤྱིས་གཏུགས་འདི་སྐད་གསོལ། ། སྟོན་པ་བཅོམ་ལྡན་བླ་མ་ཀྱི། ། སེམས་ཅན་དོན་ལ་གཅིག་བརྩོན་པ། ། ནམ་མཁའ་ལྡིང་བཟང་སྦྱོར་བ་དང་། ཤ་རི་ཀ་ཡི་སྦྱོར་བ་འཚལ། ། དུས་སུ་ཟིན་པ་བཟློག་པ་ཡིན། ། སེམས་ཅན་དོན་ནི་བཟང་པོ་འཚལ། ། སངས་རྒྱས་ཐོད་པའི་རྣལ་འབྱོར་པས། ། སྟོན་པ་ཆེན་པོས་དེ་དག་གསུངས། ། བདག་གི་ཐེ་ཚོམ་བཟློག་པ་དང་། ། སེམས་ཅན་དོན་ནི་མཐར་ཐུག་བགྱི། ། བརྟན་པ་དང་ ནི་རྒྱུ་བ་དང་། ། ཡན་ལག་སྐྱེས་དང་བཅོས་མ་ཡི། ། དུག་རྣམས་དུག་མེད་པར་བགྱི་ཞིང་། །

སེམས་ཅན་ཐམས་ཅད་འཚོ་བགྱི་པ། ། བླ་མ་ཆེན་པོ་དེ་དག་གསུངས། ། དེ་ནས་སློབ་དཔོན་བརྩེ་བ་ཡིས། ། བྱིན་གྱིས་བརླབ་པའི་ཐུགས་ཀྱིས་ནི། ། ཁྲག་འཐུང་གོ་འཕང་གནས་པ་ཡི། ། སློབ་མ་ལ་ནི་སོ་ཤིང་སྦྱིན། ། སོ་ཤིང་སྔགས་ནི་སྦྱིན་པར་བྱ། ། ཨོྃ་ཧཱུྃ་ཧེ་བྷ་ག་བ་ཏི་མུ་ལྃ་པ་རི་ཤུདྡྷྃ་ཀུ་རུ་སྭཱ་ཧཱ། ལན་བདུན་མངོན་པར་བསྔགས་བྱས་ལ། ། སོ་བྲུད་ནས་ནི་ཁ་བཤལ་ཏེ། ། སློབ་མ་ལྷག་པར་གནས་པར་བྱ། ། རང་གི་ལག་པ་བྱུག་བྱ་ཞིང་། ། མེ་ཏོག་གིས་ཀྱང་ དཀྲི་བར་བྱ། ། མགྲིན་པ་ལག་པར་ཟླ་བ་བསམ། ། ཟླ་བའི་ཟེར་གྱིས་ཕྱོགས་བཅུ་ཡི། ། སངས་རྒྱས་སྤྱན་དྲངས་གདོན་མི་ཟ། ། སངས་རྒྱས་ཚོགས་ཀུན་ཟླ་བར་བལྟ། ། གྲགས་ཆེན་ཐམས་ཅད་རབ་ཞུགས་ཤིང་། ། ཟླ་བ་ཞུ་བར་གདོན་མི་ཟ། ། སློབ་དཔོན་བསྒོམས་པའི་ ནུས་པ་ཡིས། ། སློབ་མའི་མགོ་རུ་ལག་བཞག་སྟེ། ། ལྷག་པར་གནས་པའི་གསང་སྔགས་བཟླས། ། ཨོཾ་སརྦྦ་བུདྡྷ་ཨ་ཏྲ་ཨ་མུ་ཀ་སྱ་ཀཱ་ཡ་མ་དྡྷིཥྛ་ན། ཡནྟུ་མ་ཙ་ལ་མ་ཙ་ལ་ཏིཥྛ་ཏིཥྛ་ཧ་ར་ཧ་ར། བི་དྷ་ར་བི་དྷ་ར། དྷ་ར་དྷ་ར། ཏྲ་བ་ཏྲ་བ་བྷོ་བྷ་ག་ཝཱནྟཱ་སརྦྦ་བུདྡྷ་ཀ་པཱ་ལི་བཛྲ་སྱ་ཀ་ཏཾ་མ་ ལ་ཡ་ཤཱི་གྷྲཾ་ཀུ་རུ་ཀུ་རུ་ཧཱུྃ་ཧཱུྃ་ཧ་ཧ།

སྔགས་འདིས་ལན་བདུན་དུ་བཟླས་པས་ལྷག་པར་གནས་པར་བྱའོ། ། སངས་རྒྱས་དེ་དག་ཐམས་ཅད་ཀྱིས་དེའི་ལུས་ལ་ཡང་དག་པར་བྱིན་གྱིས་རློབ་པར་འགྱུར་རོ། ། ལྷག་པར་གནས་པ་ཙམ་གྱིས་རྫུ་འཕྲུལ་ཆེན་པོའི་ཀླུ་རྣམས་སྐྲག་ཅིང་དུག་གི་བུམ་ པ་ཡང་འདོར་རོ། ། ནོར་རྒྱས་ལ་སོགས་པའི་ཀླུ་སྟོབས་པོ་ཆེ་རྣམས་དཔྱོད་པར་འགྱུར་རོ། ། ཨེ་མའོ་སངས་རྒྱས་ཀྱིས་གསུངས་པའི། ། ལྷག་པར་གནས་པ་ཙམ་གྱིས་ནི། ། འདི་ལྟའི་སྡུག་བསྔལ་ཐོབ་འགྱུར་ན། ། མཁའ་ལྡིང་རྟོགས་པའི་སེམས་ཅན་གྱིས། ། བདག་ནི་ཇི་ལྟར་ འགྲོ་བར་འགྱུར། ། དེ་མ་ཐག་ཏུ་སློབ་དཔོན་གྱིས། ། དཀྱིལ་འཁོར་ནང་དུ་མེ་ཏོག་ནི། ། རྣམ་པ་སྣ་ཚོགས་དབུལ་བར་བྱ། ། སྣ་ཚོགས་སྤོས་དང་ལྷ་བཤོས་དབུལ། ། དུང་ཆོས་ཟངས་ཆོས་སྣོད་དག་ནི། ། མཉྫིའི་སྟེང་དུ་གཞག་པར་བྱ། ། མཆོད་ཡོན་གྱི་ནི་དན་ཆེད་དུ། ། བུམ་པ་རྣམས་ལ་ལྷག་གནས་བྱ། ། ཁྲག་འཐུང་གོ་འཕང་གནས་པ་ཡིས། ། རྣལ་འབྱོར་མ་བརྒྱད་བསྐོར་བ་ཡི། ། ཁྲག་འཐུང་རྣམ་པར་སྤྱན་དྲངས་ཏེ། ། དཀྱིལ་འཁོར་ཇི་བཞིན་ཡང་དག་ལྡན། ། མདོག་དང་མཚན་མར་ལྡན་པ་ཡི། ། དེ་བཞིན་གཤེགས་ རྣམས་ས་བོན་གྱི། ། འོད་ཟེར་གྱིས་ནི་རྣམ་པར་བསམ། །

བདག་ཉིད་ཆེན་པོ་གྲགས་ཆེན་པོ། ། བུམ་པ་རུ་ནི་ཞུགས་ཙམ་གྱིས། ། དམ་ཚིག་དཀྱིལ་འཁོར་ཞུ་བར་འགྱུར། ། རྣལ་འབྱོར་ལྡན་པའི་སེམས་དང་ནི། ། སློབ་དཔོན་གྱིས་ནི་འདི་ལྟར་བལྟ། ། དེ་ནས་ཟངས་ མའི་སྣོད་དུ་ཆུ་བླུགས་ཤིང་དུང་ཕོར་ཆུས་བཀང་སྟེ། ། མནྫིའི་སྟེང་དུ་གཞག་པར་བྱའོ། ། ཡང་ཕྱིར་བྱུང་ནས་སློབ་མའི་དོན་དུ་བདག་ཉིད་ཀྱིས་རས་ཀྱིས་མིག་དགབ་པར་བྱའོ། ། རས་གསུམ་གོན་པར་གྱུར་པའི་སློབ་མ་ཕྱིས་དཀྱིལ་འཁོར་གྱི་སྒོར་བཞག་ལ་ཆུས་གཏོར་ཏེ་སྔགས་ བཟླའོ། ། ཨབྷིཥིཉྩ་ནྷུ་མཱཾ་སརྦ་ཡོ་གི་ནི་མ་ཀུ་ཏོ་ཨ་ཏྲ་ཨ་ཏིཥྛ་ཡནྟུ། ཨ་ཙནྟུ་ཧཱུྃ་སྭཱ་ཧཱ། ཅོད་པན་བྱིན་གྱིས་བརླབ་པའི་སྔགས་སོ། ། དེ་ནས་སློབ་དཔོན་གྱིས་ཀྱཻ་ཁྱོད་སུ་ཞེས་སྨྲའོ། ། སློབ་མས་བདག་ནི་རྒྱལ་བའི་སྲས་ཞེས་སྨྲའོ། ། དེའི་རྗེས་སུ་དཀྱིལ་འཁོར་གྱི་དབུས་ སུ་མེ་ཏོག་ལན་གསུམ་དུ་གཏོར་ལ། མིག་རས་བསལ་ཏེ། དཀྱིལ་འཁོར་མཆོད་པར་བྱའོ། ། ཨོྃ་ཧེ་རུ་ཀ་བཛྲ་བུཥྤ་ཡཾ་པྲ་ཏཱི་ཙྪ་ཧཱུྃ། དབུས་སུའོ། ། ཨོྃ་ཅི་ཏྲ་སེ་ནཱ་པུཥྤ་ཡཾ་པྲ་ཏཱིཙྪ་ཧཱུྃ། ཤར་དུའོ། ། ཨོྃ་ཀཱ་མི་ནཱི་པུཥྤ་ཡཾ་པྲ་ཏཱི་ཙྪ་ཧཱུྃ། ལྷོའི་འོ། །

ཨོྃ་པཱ་ཏཱ་ལ་བཱ་སི་ཞི་པུཥྤ་ཡཾ་པྲ་ ཏཱི་ཙྪ་ཧཱུྃ། ནུབ་ཏུའོ། ། ཨོྃ་སུ་བྷ་དྲེ་པུཥྤ་ཡཾ་པྲ་ཏཱིཙྪ་ཧཱུྃ། བྱང་དུའོ། ། ཨོྃ་ཤོ་ཎྞི་ནི་པུཥྤ་ཡཾ་པྲ་ཏཱི་ཙྪ་ཧཱུྃ། མེར་རོ། ། ཨོྃ་བུདྷཱི་ནི་པུཥྤ་པྲ་ཏཱི་ཙྪ་ཧཱུྃ། བདེན་བྲལ་དུའོ། ། ཨོྃ་ཙ་ཏུ་ར་བྷ་དྲ་པུཥྤ་པྲ་ཏཱི་ཙྪ་ཧཱུྃ། རླུང་ངོ་། ། ཨོྃ་ཨཱ་ཀཱ་ཤ་བཱ་སི་ནི་པུཥྤ་པྲ་ཏཱི་ཙྪ་ཧཱུྃ། དབང་ལྡན་དུའོ། ། དེ་ནས་དཀྱིལ་ འཁོར་གྱི་ལྷའི་སྐུ་མདོག་ཇི་ལྟ་བ་དང་། མཚན་མ་ལ་སོགས་པ་དེ་བཞིན་དུ་སློབ་མ་ལ་བསྟན་པར་བྱའོ། ། ཡང་དུང་ཕོར་བླངས་ཏེ་ཆུ་བཏུང་བར་བྱའོ། ། དེ་འཐུངས་པ་ཙམ་གྱིས་ཀླུ་ཐམས་ཅད་སྐྲག་ཅིང་སྐྱོ་བས་དུག་སྐྱུགས་པར་འགྱུར་རོ། ། བརྟན་པ་དང་གཡོ་བའི་དུག་གང་ཡིན་པ་ དང་། གཞན་ཡང་སྦྱར་བ་དང་། ཉེ་བར་སྦྱར་བའི་དུག་གང་ཡིན་པ་དང་། མདའ་དུག་དང་། བྱུག་པའི་དུག་དང་། དགྲ་རྣམས་ཀྱིས་གང་སྦྱར་བ་དང་། ། བུད་མེད་རྣམས་ཀྱིས་གང་སྦྱར་བའི་དུག་དེ་རྣམས་ཉེ་བར་འཕོ་བར་འགྱུར་རོ། ། གལ་ཏེ་ཀླུ་ཡིས་ཟིན་པ་ཡང་། ། དེ་རུ་དེ་ནི་ངེས་ བར་འགྲོ། ། གཞན་ཡང་སྦྲུལ་གྱི་དུག་ཀྱང་རུང་། ། ཆུ་ནི་འཐུངས་པ་ཙམ་གྱིས་ཀྱང་། ། དེ་དག་ཐམས་ཅད་འཆི་བར་འགྱུར། །

དེ་ཡི་ཕྱིར་ན་དུག་གི་ཆུ། ། འདི་རུ་བཏུང་བར་ཐེ་ཚོམ་མེད། ། དེ་ནས་སློབ་མ་དྲི་བར་བྱ། ། འདིར་ནི་ཤ་ལི་ཀར་བྱེད་ཅིང་། ། མཁའ་ལྡིང་ཤེས་ པའི་སློབ་དཔོན་འགྱུར། ། བསམ་པ་རྣམ་པར་དག་ཤེས་ནས། ། ཕྱིས་ནི་བཀས་གནང་སྦྱིན་པར་བྱ། ། སྟོང་ངམ་བརྒྱ་རུ་གསོལ་བ་གདབ། ། དེ་ནས་སྔགས་ཀྱི་མན་ངག་སྦྱིན། ། ཇི་སྲིད་སྤྲུལ་གྱིས་ཟིན་དུས་དང་། ། ཇི་སྲིད་མཁའ་ལྡིང་རིགས་ཡོད་པར། ། དེ་སྲིད་དེ་དང་ དེ་ལས་ཀྱང་། ། ཇི་སྲིད་དུས་སུ་ཟིན་མེད་པར། ། སངས་རྒྱས་ཐོད་པའི་རྣལ་འབྱོར་པས། ། དེ་སྲིད་འབད་རྩོལ་བྱ་བ་མིན། ། དུས་ཟིན་འཆི་བའང་ཤེས་བྱ་སྟེ། ། ནམ་མཁའ་ལྡིང་གི་བྱ་བ་བྱ། ། དུས་སུ་ཟིན་ནོ་ཞེས་སྨྲ་བ། ། དེ་སྲིད་རྣལ་འབྱོར་ཆེ་འདི་ཡིས། ། དེ་རུ་ལས་ ནི་བརྩམ་པར་བྱ། ། བདག་ཉིད་ཧེ་རུ་ཀར་གྱུར་ཅིང་། ། རྣལ་འབྱོར་མ་བརྒྱད་ཡང་དག་ལྡན། ། བློ་ལྡན་སྔོན་གསུངས་གསང་སྔགས་ཀྱིས། ། ཕྱིས་ནི་གཏོར་མ་སྦྱིན་པར་བྱ། ། དེར་རྗེས་དཀྱིལ་འཁོར་བྱས་ནས་ནི། ། སྔོན་དུ་གསུངས་པའི་གསང་སྔགས་ཀྱིས། ། གནས་ དགུ་རུ་ནི་མཆོད་པར་བྱ། ། མཁས་པ་ཡིས་ནི་མཆོད་བྱས་རྗེས། ། མཉམ་པར་བཞག་པས་ལས་རྣམས་བརྩམ། །

གང་དུ་རྫུ་འཕྲུལ་ཆེ་ཀླུ་ཡོད། ། དེ་རུ་སེམས་བཟང་འོད་ཟེར་སྤྲོ། ། ཀླུ་རྣམས་ཀྱི་ནི་སྙིང་སྐམས་པས། ། ཅི་ཞིག་བགྱིའོ་ཞེས་ནི་སྨྲ། ། གསུངས་པ། ལྷ་ མོ་སྣ་ཚོགས་སྡེ་མ་ཡིས། ། སངས་རྒྱས་ཐོད་པར་སྔོན་དུ་གསུངས། ། ཀྱེ་ཀྱེ་གྲགས་པ་ཆེ་བའི་ཀླུ། ། སོང་སྟེ་འདིར་དུས་ཟིན་གྱུར་པའི། ། དུས་ཟིན་འཛིན་པ་བཟུང་བ་མེད། ། དུག་མེད་སྦྲུལ་ཡང་མེད་པའོ། ། གང་ཕྱིར་དོགས་པས་རྨོངས་གྱུར་པ། ། དེ་ཕྱིར་སྐྱེ་བོ་རྣམས་ འཆིར་འགྱུར། ། དེ་ནས་འོད་ཟེར་སླར་ལོག་སྟེ། ། སྙིང་ག་རུ་ནི་ཐིམ་པར་འགྱུར། ། ཡང་ནི་སེམས་ནི་མཉམ་གཞག་པའི། ། སློབ་དཔོན་གྱིས་ནི་ངོ་མཚར་བསྟན། ། དེ་ནས་ས་ལ་མ་ལྷུང་བའི། ། ལྕི་བ་བླངས་ཏེ་འདབ་ཆགས་རི་སྐེགས་གཉིས་བྱ་ཞིང་སྣོད་དཀར་ པོ་བྱས་ཏེ། རོ་བསྲེགས་པའི་སོལ་བ་ལ་གཞག་པར་བྱའོ། ། རོ་བསྲེགས་པའི་སོལ་བ་ལས་སྣག་ཚ་བྱས་ཏེ། སེམས་ཅན་གྱི་དོན་རིག་པས་དབེན་པར་སྔགས་བྲི་བར་བྱའོ། ། ཨོཾ་བུདྡྷ་ཀ་པཱ་ལི་ནི་ཧྲི་ཏཏྛ་པ་ཡབྷོ་ཤ་ལི་ཀ་ན་ཡ་ནཱ་བུདྡྷ་ཀ་པཱ་ལ་བཛྲ་སྱ་ཨཱཛྙཱ་མ་ལྃ་གྷ་ཡ་ཧཱུྃ་ཧཱུྃ་ས་རནྟུ་ སརྦྦ་ད་ཌཱི་ཀ་ཕ་ཏི་ཀ་ཙེ་ཏེ།

མནྔྷུ་གྷི་དི་སརྦྦ་ཛི་ཨི་ན་སུ་ནནྟི་བ་ཡ་ག་རེ་རེ་ཀར་ཀོ་ཊ་ཀ་པྲ་བྷཱི་ཏ་ཡ་ནཱ་ག་རཱ་ཛ་ན་སྤུ་ཏནྟི་མུརྡ་ན་རེ་རེས་སྤྱ། ཨ་བས་སྤྱ་མ་ཙ་ལ་ཧ་མ་བུ་ལ་ཧ་ཛ་ཨི་ཙ་ལ་ཧ་བུ་ལ་ཧ་རེ་རེ་བྷ་རུ་ཀྲི་པྲ་བྷཱི་ཏ་ཡནཱ་ག་རཱ་ཛ་ན་ཨུ་ཧ་པུ་ཊ་ཊ་མུ་དྷི་པྲ་ན་ཛ་ཨི་ཞེས་པ་ནི་ཤ་ལི་ཀའི་སྙིང་པོའི་ སྔགས་སོ། ། དེ་ནས་བློ་ཆེན་རྣལ་འབྱོར་པས། ། སེམས་ནི་ཤིན་ཏུ་མཉམ་གཞག་པས། ། ཡོངས་རྫོགས་ཤ་ལི་ཀ་བྱས་ལ། ། ཕོ་དང་མོ་རུ་བརྟག་པར་བྱ། ། སྣག་ཚ་ཡིས་ནི་བྲི་བར་བྱ། ། མིག་གི་སྔོན་དུ་མི་གཞག་ཅིང་། ། ཤ་ལི་ཀ་བཟང་པོས་ཕྱོགས་བལྟ། ། དེ་ ནས་ལྕུག་མ་སྔགས་ཀྱིས་བསྔགས། ། ཨོྃ་ཧཾ་ཧ་ལ་ཁྱབ་འཇུག་གི་ས་བོན་ནོ། ། ཨོྃ་བྃ་ཚངས་པའི་ས་བོན་ནོ། ། ཨོྃ་སྃ་ཞེས་པ་ནི་ཞི་བྱེད་ཀྱི་ས་བོན་ནོ། ། ཨོྃ་ཧ་ཧ་ཧ་ཧ་ཧ་ཧ་ཧྃ་སྭཱ་ཧཱ། མངག་པའི་སྔགས་སོ། ། འདི་ལྟ་བུ་ཡི་སྔགས་ཀྱི་མཆོག ། སྟོང་གསུམ་ན་ཡང་རྙེད་པར་དཀའ། ། ལན་བདུན་བསྔགས་པ་ཙམ་གྱིས་ནི། ། འགྲོ་བར་འདིར་ནི་ཐེ་ཚོམ་མེད། ། ཀླུ་རྣམས་སྐྲག་པར་བྱེད་པ་ཡི། ། མཁའ་ལྡིང་ཉམས་དགའ་སོང་ནས་ནི། ། ཀླུ་ཡི་གནས་སུ་ཞུགས་དེའི་ཚེ། ། མཁའ་ལྡིང་བྱེ་བའི་སྟོབས་དང་ལྡན། །

{རིངས་,རིང་}ནས་ཀྱང་ནི་གཤོག་རླུང་གིས། ། སྟོབས་ པོ་ཆེ་ཡི་ཀླུ་རྣམས་སྐྲག ། མཐོ་རིས་མི་ཡུལ་ས་འོག་དང་། ། གང་ཡང་གཞན་ན་གནས་པ་དང་། ། གཞན་ཡང་རུང་སྟེ་དེ་ཐམས་ཅད། ། སྐྲག་ནས་ཅི་བགྱི་ཞེས་ནི་སྨྲ། ། ཀླུ་གང་གིས་ཟིན་པ་དེ་གལ་ཏེ་ཡང་ཤིན། བདག་ཉིད་ཆེན་པོ་ཤ་ལི་ཀ་མཐོང་མ་ཐག་ལོང་བར་འགྱུར་རོ། ། ཀླུ་དང་སྦྲུལ་དེ་དག་གིས་ཤ་ལི་ཀ་ལ་འདི་སྐད་གསོལ་ཏོ། ། ཀྱཻ་ཤ་ལི་ཀ་གཞན་དུ་གསུང་བར་མ་མཛད་ཅིག ། དེ་ལྟར་ཐོས་ནས་ཤ་ལི་ཀ་མགུ་བའི་སེམས་ཀྱིས་དུག་གིས་ཟིན་པའི་མདུན་དུ་སྦྲུལ་ལོང་བ་ཁྱེར་ཏེ་འཇོག་གོ། ། དེ་ནས་སློབ་དཔོན་གྱིས་བལྟས་ཏེ། སའི་གོང་བུ་བླངས་ ལ་ཤ་ལི་ཀ་མངག་པའི་སྔགས་ཀྱིས་སྦྲུལ་ལོང་བ་ལ་བསྣུན་ན། ། སྐད་ཅིག་དེ་ཉིད་ལ་དེའི་མིག་འབྱེ་བར་འདིར་སོམ་ཉི་མེད་དོ། ། དུས་སུ་ཟིན་པ་འབྱེལ་ཏེ་ཤི་བ་སྦྲུལ་གྱིས་མཐོང་ནས་དེའི་ལུས་ལ་འགྲོ་བ་དང་འོང་བར་བྱེད་པས་དུས་སུ་ཟིན་པ་དུག་མེད་པར་འགྱུར་ཞིང་། དགའ་བའི་སེམས་ ཀྱིས་ལྡང་ངོ་། ། ཟིན་པ་ལངས་པ་ཙམ་ཉིད་ན་ཤ་ལི་ཀས་སྦྲུལ་བཟུང་སྟེ་མི་སྣང་བར་འགྱུར་རོ། ། སྐད་ཅིག་མ་དེ་ཉིད་ལ་སློབ་དཔོན་གྱིས་སྟོང་པ་ཉིད་ཀྱི་ཡེ་ཤེས་བསྒོམ་པར་བྱའོ། །

སྟོང་པ་དྲི་མེད་ཀུན་རང་བཞིན། ། ཆོས་རྣམས་སྟོང་པའི་རང་བཞིན་ཀྱཻ། ། གང་གིས་འཛིན་ཅིང་ གང་ཞིག་འཛིན། ། མཐའ་དག་སྒྱུ་མའི་རང་བཞིན་ཀྱཻ། ། དངོས་པོ་མ་ལུས་པ་མཐའ་དག་དང་དུག་ཀྱང་སྟོང་པ་ཉིད་དུ་སངས་རྒྱས་ཐོད་པའི་རྒྱུད་ལས་གསུངས་ཏེ། ཞག་ཉི་ཤུ་རྩ་གཅིག་གི་མཐར་ཐུག་པར་ཇི་སྲིད་དུ་ལུས་མ་ཞིག་པ་དེ་སྲིད་དུ་སློབ་དཔོན་གྱིས་ཡང་དག་པར་བརྩམ་པར་ བྱའོ། ། དེ་ལྟར་སློབ་མ་ལ་རྗེས་སུ་གནང་བ་བྱིན་ནས་ཕྱིས་ལུང་བསྟན་པར་བྱའོ། ། དེས་ལན་བརྒྱ་འམ་སྟོང་དུ་གསོལ་བ་བཏབ་ནས། དུག་འཇོམས་པའི་སྔགས་བསྟན་པར་བྱའོ། ། ཨོྃ་བུདྡྷ་ཀ་པཱ་ལི་ནི་ཨ་ཧཱུྃ། ། དུག་བཟའ་བའི་སྔགས་སོ། ། དེ་ནས་གཞན་ཡང་དོན་དུ་ གཉེར་བའི་སེམས་ཅན་དེ་རྣམས་ཐམས་ཅད་ལ་དཀྱིལ་འཁོར་བསྟན་ཏེ། དུང་ཕོར་གྱི་ཆུ་འཐུངས་པ་དེས་ན་དུག་མེད་པར་འགྱུར་ཏེ། སྦྲུལ་གྱིས་མི་འཛིན་ནོ། ། གལ་ཏེ་འཛིན་ན་དེའི་ཚེ་ཀླུ་འཆི་བར་འདིར་ཐེ་ཚོམ་མེད་དོ། ། དེ་ལྟར་སློབ་མ་ཤ་ལི་ཀའི་སྦྱོར་བ་ལ་མངོན་པར་བརྩོན་པ་ལ་ བཀས་གནང་བ་བྱིན་ཏེ། གྲོང་གང་དུ་གནས་པ་དེར་དུག་གིས་འཛིན་པ་མེད་དོ། ། གལ་ཏེ་ཡོད་ན་དེའི་ཚེ་ཀླུ་འཆི་བར་འགྱུར་རོ། །

དེ་ལྟར་ཐོས་ནས་སློབ་མ་རྡོ་རྗེའི་སྦྱོར་བ་དང་ལྡན་པའི་སེམས་ཀྱིས་གང་ཅི་ཡང་རུང་བའི་ཡོན་དེར་དབུལ་བར་བྱའོ། ། དེ་ནས་ཕྱི་རོལ་གྱི་སར་བྱུང་ སྟེ་གཏོར་མ་གཏང་བར་བྱའོ། ། དེ་ནས་སློབ་དཔོན་གྱིས་དཀྱིལ་འཁོར་གྱི་སྔགས་ཀྱིས་གཤེགས་སུ་གསོལ་ཏེ། ། ཨོྃ་བུདྡྷ་ག་པཱ་ལི་ནི་ཧྲཱིཿཨུ་ཏིཥྛ་གཙྪ་ཧཱུྃ་གཙྪ་ཧཱུྃ་ཕཊ། དཀྱིལ་འཁོར་གཤེགས་སུ་གསོལ་བའི་སྔགས་སོ། ། དེ་ནས་ཡང་དག་བཤད་པར་བྱ། ། ཆུ་ ཡི་སྦྱོར་བ་བླ་མེད་པ། ། གང་གིས་བྱིན་པ་ཙམ་གྱིས་ནི། ། དུག་གིས་ཟིན་པ་འཚོ་བར་འགྱུར། ། ཉི་མ་བདུན་ན་འཆི་བ་དང་། ། གཞན་ཡང་དུག་གིས་ཉམས་པ་རྣམས། ། ཆུ་ནི་བྱིན་པ་ཙམ་གྱིས་ནི། ། འདི་རུ་འཚོ་བར་ཐེ་ཚོམ་མེད། ། སྔགས་འདིས་དཀྱིལ་འཁོར་བྱས་ནས་ ནི། ། གནས་དགུ་རྣམས་སུ་མཆོད་པར་བྱ། ། དུང་ཕོར་ཆུ་ཡིས་བཀང་བྱས་པ། ། དཀྱིལ་འཁོར་དབུས་སུ་གཞག་པར་བྱ། ། དེ་ནས་བརྩེ་བ་ཆེན་པོ་ཡི། ། བདག་ཉིད་རྣལ་འབྱོར་པ་ཡིས་ནི། ། རང་གི་ལག་པ་གཡོན་པ་ལ། ། ཟླ་བ་ཡི་ནི་ཁྱད་པར་བསམ། ། བཅུ་དྲུག་ཆ་ལས་ ཡོངས་རྫོགས་པའི། ། དྲི་མེད་དགེ་བའི་ལུས་ཅན་ཏེ། ། དེའི་དབུས་ས་བོན་མི་ཤིགས་དགེ ། ཁ་དོག་དཀར་པོའི་ལུས་ཅན་ནོ། །

ལག་དེས་སྣོད་ཀྱི་ཁ་བཅད་དེ། ། དེ་ནས་གསང་སྔགས་བཟླ་བར་བྱ། ། ཨོཾ་སརྦྦ་པིཥ་ཧ་ར་ཧ་ར་ཧཱུྃ་ཧཱུྃ་ཕཊ་ཕཊ་སྭཱ་ཧཱ། སྔགས་འདིས་ལན་བདུན་ གྱི་བར་དུ་མངོན་པར་བསྔགས་ཏེ། མི་ཤིགས་པ་དང་ལྷན་ཅིག་ཟླ་བ་ཞུ་བར་གྱུར་ནས་ཆུའི་ནང་དུ་ཐིམ་སྟེ། ཆུ་དང་ཟླ་བ་གཅིག་ཏུ་འདྲེས་པས་ཤིན་ཏུ་དཀར་པོར་འགྱུར་རོ། ། གལ་ཏེ་དུག་གིས་ཟིན་པ་མ་ཤིན་དེའི་ཚེ་ཆུ་བླུད་དོ། ། ཡང་ན་ཤི་བ་ཡིན་ན་མགོ་ནས་རྐང་པའི་མཐར་ཐུག་ པར་ལན་གསུམ་གསུམ་དུ་ཆུ་རྒྱུན་མི་འཆད་པར་བླུགས་ན་ལངས་པར་འདིར་ཐེ་ཚོམ་མེད་དོ། ། དེ་ནས་ཆུ་བླུད་ན་རྣལ་མར་འགྱུར་རོ། ། སངས་རྒྱས་ཐོད་པའི་རྒྱུད་རྣལ་འབྱོར་མའི་གོང་ན་མེད་པ་གསང་བའི་ཡང་ཤིན་ཏུ་གསང་བ་ཞེས་བྱ་བ་ལས་ཤ་ལི་ཀའི་སྦྱོར་བ་དང་། ཆུའི་སྦྱོར་བའི་ལེའུ་ སྟེ་བཞི་པའོ། ། ། ། དེ་ནས་ཡང་དག་རབ་བཤད་པ། ། ཤིན་ཏུ་རྙེད་དཀའི་བཅུད་ལེན་ལེའུ། ། དེ་བཞིན་གཤེགས་པའི་སྙིང་པོ་མཆོག ། རྣལ་འབྱོར་མ་ཡི་གོང་ན་མེད། ། གཞོན་ནུ་མ་དང་ཤ་རི་ཀ། ། གྲུབ་མ་བྱིས་པ་ཅན་མ་དང་། ། དེ་བཞིན་ཐོད་{བཟངས་,བཟང་}ཅན་ མའོ། ། འདི་དག་སྨན་ནི་ཆེན་པོ་ལྔ། ། སངས་རྒྱས་ལྔས་ཀྱང་རྙེད་པར་དཀའ། ། འདི་དག་ཟོས་པ་ཙམ་གྱིས་ནི། །

བསྐལ་བ་བྱེ་བར་དེ་འཚོའོ། ། གཞོན་ནུ་མ་ནི་ཟླ་དྲུག་ཏུ། ། དེ་བཞིན་ཤ་རི་ཀ་ཟླ་གསུམ། ། གྲུབ་མ་ཟླ་བ་གཅིག་ཏུའོ། ། བྱིས་ཅན་མ་ནི་ཟླ་ཕྱེད་གཉིས། ། ཐོད་པ་ཅན་ཡང་ཟླ་བར་ཏེ། ། ཚེ་འཕེལ་བ་ཡི་མཆོག་ཡིན་ནོ། ། བྱ་རོག་མ་ནི་བྱ་རོག་གཟུགས། ། གླང་པོ་མ་ནི་ངང་པའི་གཟུགས། ། དྲོད་མ་དྲོད་ཀྱི་གཟུགས་ཅན་ཏེ། ། སྡོབ་སངས་དཀར་མོ་སྔོན་མོའི་མིག ། ཁ་སྦྱར་སྦྱོར་བའི་དུས་སུ་ནི། ། མིག་ལས་བྱུང་བའི་རྫས་ གང་ཡིན། ། སྨན་དེའི་མིང་ནི་གཞོན་ནུ་མ། ། འདི་རུ་བསྟན་པར་སོམ་ཉི་མེད། ། དེ་ཡི་པདྨ་ལས་བྱུང་རྫས། ། རྩ་ཡི་ནང་ན་རྣམ་པར་གནས། ། གེ་སར་སྦས་པའི་སྤྱོད་ཡུལ་ཏེ། ། སྨན་ནི་ཤ་རི་ཀ་རུ་གསུངས། ། མེ་ཏོག་ལྡན་པའི་བུ་མོ་གང་། ། ཁ་དོག་ནག་མོས་རབ་ མཛེས་མ། ། གང་དུ་ཐབས་ཤེས་གཉིས་འདུས་པ། ། དེ་ཡི་ཁ་སྦྱར་སྦྱོར་ལས་བྱུང་། ། སྨན་དེའི་མིང་ནི་གྲུབ་མར་བཤད། ། སངས་རྒྱས་ཐོ་པའི་སྦྱོར་བ་ཡིས། ། བུད་མེད་རབ་མཛེས་མཉམས་དང་། ། དབང་པོ་གཉིས་ཀྱི་སྦྱོར་བ་ཡིས། ། མི་ཕྱེད་ཉེ་བར་སྤྱད་པ་ཡི། ། དེ་ ལས་དང་པོར་བྱུང་བའི་རྫས། ། སྨན་དེ་བྱིས་པ་ཅན་ནོ་ཞེས། ། བདག་ཉིད་ཆེན་པོའི་ལྷ་མོས་གསུངས། །

ལྷན་ཅིག་སྐྱེས་དག་བྱུང་བའི་རྫས། ། མཆོག་ཆེན་མར་ཁུ་དག་དང་ནི། ། བསྲེ་འགྱུར་འདིར་ནི་ཐེ་ཚོམ་མེད། ། སྨན་དེའི་མིང་ནི་ཐོད་ཅན་མོའོ། ། ཟླ་བ་ཉི་མའི་སྦྱོར་ བ་ཡིས། ། བྱ་བར་འདིར་ནི་ཐེ་ཚོམ་མེད། ། ཟླ་བས་ཟླ་བར་ཉི་མས་ཉིར། ། དེ་ལུས་སྐྲ་དཀར་གཉེར་མ་ཞི། ། ཇི་སྲིད་སངས་རྒྱས་བཞུགས་ཀྱི་བར། ། དེ་ཡི་ཚེ་ནི་རྒྱས་པར་འགྱུར། ། སྨན་འདི་གྲུབ་པ་ཙམ་གྱིས་ནི། ། དག་པའི་ལུས་སུ་འབྱུང་བར་འགྱུར། ། དངོས་པོ་གང་ དང་གང་ཡང་རུང་། ། ལྕགས་དང་ཟངས་མའི་སྣོད་དག་ལ། ། དངུལ་ནི་བྱུགས་པ་ཙམ་གྱིས་ནི། ། དངུལ་དང་གསེར་དུ་འགྱུར་བ་ཡིན། ། དེ་ནས་ཡང་དག་རབ་བཤད་པ། ། དགོངས་བཤད་ཤིན་ཏུ་རྙེད་དཀའ་བ། ། རྒྱུད་གཞན་དུ་ནི་རབ་སྦས་པ། ། འབད་པས་དེ་འདིར་ རབ་གསལ་བྱ། ། དྲི་ཆུ་ཡེ་ཤེས་རྡོ་རྗེ་སྟེ། ། དྲི་ཆེན་རྡོ་རྗེ་བཟང་པོ་ཉིད། ། ཁྲག་ནི་མར་མེ་རྡོ་རྗེ་ཡིན། ། ཁུ་བ་རྡོ་རྗེའི་ཐབས་བྱུང་ཉིད། ། ཤ་ནི་ཆོས་ཀྱི་རྡོ་རྗེ་ཡིན། ། དེ་ལྔ་རྣལ་འབྱོར་མ་ཡི་མཆོག ། གང་གི་དམ་ཚིག་རྙེད་དཀའ་བའི། ། ཐབས་འདིར་བདག་ གིས་བཤད་པར་བྱ། ། བ་ལང་ཤ་ནི་འབར་བ་སྟེ། ། ཁྱི་ཡི་ཤ་ལ་སྤྲོ་བར་གསུངས། ། རྟ་ཡི་ཤ་ལ་བཟའ་བར་བཤད། །

གླང་པོའི་ཤ་ལ་ཞུ་བར་གསུངས། ། ཤ་ཆེན་ལ་ནི་བཟང་པོར་བཤད། ། དེ་ལྔ་རྣལ་འབྱོར་མཆོག་ཏུ་གསུངས། ། རྣལ་འབྱོར་རྣལ་འབྱོར་མ་ལྡན་པར། ། གལ་ཏེ་གཅིག་ཏུ་བྱེད་ནུས་པ། ། དེ་ཆེ་རྣམ་རྟོག་དེ་ཐམས་ཅད། ། འཇིག་འགྱུར་འདིར་ནི་ཐེ་ཚོམ་མེད། ། ཟན་ལ་བསོད་ནམས་ཞེས་བྱ་སྟེ། ། ཚོད་མ་ལ་ནི་སྡིག་པ་ཉིད། ། རོ་ལ་ཤིན་ཏུ་རྙེད་དཀའ་གསུངས། ། བྱིས་པ་ལ་ནི་འགལ་བ་ཉིད། ། གཡུང་མོ་ལ་ནི་བཟང་མོར་ གསུངས། ། རུས་པའི་ཕྲེང་ལ་རྫས་ཞེས་བྱ། ། སྐྱེས་བུ་ལ་ནི་རྡོ་རྗེར་གསུངས། ། བུད་མེད་ལ་ནི་སྣོད་བཟང་ཉིད། ། དབང་པོ་གཉིས་ཀྱི་རབ་སྦྱོར་ལ། ། གཟི་བརྗིད་ཕྲེང་ཆེན་དེ་བཤད་དོ། ། རབ་ཆགས་ཤིན་ཏུ་མཐོང་བ་ཉིད། ། འཁྱུད་པ་ལ་ནི་ཆོས་ཞེས་བརྗོད། ། འདྲི་ བ་ལ་ནི་མར་མེའོ། ། ཤིན་ཏུ་འདྲི་ལ་མེ་ཞེས་བྱ། ། འགྲོ་བ་ལ་ནི་ཕྲེང་ཅན་མ། ། འོང་ལ་ཤིན་ཏུ་ཕྲེང་ཅན་མ། ། མྱུར་བ་ལ་ནི་བྱུག་ཅེས་བྱ། ། དཔའ་བ་ལ་ནི་བཟང་དེ་བརྗོད། ། པདྨ་རྩེ་འཇོ་ཕྲེང་ཅན་མ། ། སྔགས་ཀྱིས་མཚན་མ་རབ་ངེས་ཞེའོ། ། ལྗགས་ལ་ལྕེ་འོག་ཅེས་བྱ་སྟེ། ། སོ་ལ་བཟའ་བསྣལ་བ་དེ། ། མིག་ལ་རོལ་རྩེད་མུ་ཏིག་རྣ། ། གསང་བའི་ཡུལ་ལ་རྙེད་དཀའ་ཞེའོ། །

འདི་དག་བཤད་དོ་ལག་ཆེན་པོ། ། འཇིག་རྟེན་གསུམ་ན་རབ་རྙེད་དཀའ། ། སངས་རྒྱས་ཐོད་པའི་རྣལ་འབྱོར་པ། ། མེད་པར་ཕན་ཚུན་སྨྲ་མི་བྱ། ། འོན་ཀྱང་བཤད་ཆེན་དེ་ ཉིད་འདི། ། གཅིག་ལ་གཅིག་གིས་སྨྲ་བར་བྱ། ། རྒྱུད་རྣམས་ཐམས་ཅད་དུ་སྦས་པ། ། རྒྱུད་འདི་རུ་ནི་གསལ་བར་བྱས། ། ཉེ་འདུན་གྲོང་མཐའ་ལྷན་ཅིག་ཞེའོ། ། འདུས་པ་ཕྱི་རོལ་ཞེས་སུ་གསུངས། ། ཉེ་བའི་འདུས་པ་ནང་དེ་བཞིན། ། གནས་ལ་འབྲས་བུ་ཞེས་སུ་ གསུངས། ། ཉེ་བའི་གནས་ལ་ཤིང་ཉིད་དོ། ། གྲོང་མཐའ་ལ་ནི་ས་བོན་གསུངས། ། ཉེ་བའི་གྲོང་མཐའ་མྱུ་གུའོ། ། ཚོགས་པ་ལ་ནི་སྡོང་བུར་གསུངས། ། གཅིག་པུ་ལ་ནི་འདབ་མ་སྟེ། ། སྟོང་པ་ལ་ནི་རྩ་བཞིའོ། ། དེ་ལྟར་དགོངས་པས་བཤད་པ་ནི། ། བདེ་གཤེགས་ རྣམས་ཀྱིས་མི་མཁྱེན་ནོ། ། སྤྱན་མ་ལ་སོགས་རྣལ་འབྱོར་མ། ། རྣམས་ཀྱིས་ཁོང་དུ་མི་ཆུད་ཅིང་། ། བྱང་ཆུབ་སེམས་དཔའི་ཡུལ་མིན་ཞིང་། ། བླ་མ་གུས་པའི་རྣལ་འབྱོར་པས། ། སྤྲོས་པ་ཐམས་ཅད་སྤངས་ནས་ནི། ། རྫས་ལ་ཆགས་པར་མི་བྱའོ། ། ཤིན་ཏུ་སོང་སྒོམ་ རྣལ་འབྱོར་པ། ། འདོད་ཆགས་ཞེ་སྡང་ཕྲག་དོག་མེད། ། གཏི་མུག་དང་ནི་ང་རྒྱལ་སྤངས། ། ཉོན་མོངས་ཐམས་ཅད་རྣམ་པར་སྤངས། །

ཟ་འཐུང་དེ་བཞིན་གླུ་ལེན་ན། ། ཤིན་ཏུ་སྤྲོས་པ་སྤང་བར་བྱ། ། བདེ་བས་དགའ་བ་ཉིད་དང་ནི། ། ཤེས་རབ་ཐབས་ཀྱིས་བདག་ཉིད་ གསུངས། ། བླ་མེད་དེ་ཉིད་ཟླ་ཕྱེད་ཀྱིས། ། འགྲུབ་པར་ཐེ་ཚོམ་མེད་པའོ། ། ཀྱཻ་ལགས་གྲོགས་མོ་འགྲོ་ཀུན་གང་། ། མཐའ་དག་དྲི་མ་མེད་པ་ཡི། ། བལྟ་དང་བྲལ་ལ་སྐྱེ་བོ་ལྟོས། ། གསོག་གསོབ་རང་བཞིན་{བརྫུན་,རྫུན་}བསླུ་བ། ། པད་རྩའི་གྲིབ་མ་ལྟ་བུར་ལྟོས། ། དབང་ པོ་ལྔ་ནི་སྒྱུ་འདྲ་ཞིང་། ། ལྔ་ཕུང་དག་པའི་རང་བཞིན་གྱིས། ། རྣལ་འབྱོར་འདི་ནི་བསྒོམས་པས་འགྲུབ། ། སངས་རྒྱས་ཐོད་པའི་རྒྱུད་རྣལ་འབྱོར་མའི་གོང་ན་མེད་པ་གསང་བའི་ཡང་ཤིན་ཏུ་གསང་བ་ཞེས་བྱ་བ་ལས་སྨན་བཟང་པོ་དང་། དགོངས་པ་བཤད་པའི་ལེའུ་སྟེ་ལྔ་པའོ། ། དེ་ནས་ཡང་དག་རབ་བཤད་པ། ། དཀྱིལ་འཁོར་འཇིགས་པ་མཆོག་གསང་བར། ། ཐབས་དང་ཤེས་རབ་སྒྲུབ་པ་ཡིས། ། གང་གིས་སློབ་མ་དབང་བསྐུར་བ། ། ཤེས་རབ་པདྨའི་ནང་དབུས་སུ། ། དཔག་ཚད་བྱེ་བའི་དཀྱིལ་འཁོར་ལ། ། སུམ་བརྩེགས་དག་པའི་བདག་ཉིད་ལུས། ། འཁོར་བའི་འཇིགས་པ་ལས་སྐྱོབ་པ། ། དཀྱིལ་འཁོར་དེ་ཡི་དབུས་གནས་པར། ། མཁས་པས་སློབ་མ་བཟང་དབང་བསྐུར། ། གལ་ཏེ་བྱང་ཆུབ་བླ་མེད་འདོད། །

ཕྱི་ཡི་དཀྱིལ་འཁོར་བྱ་བ་མིན། ། ལྷ་རྣམས་བཤིག་པ་ཙམ་གྱིས་ནི། ། སྡིག་པ་ཆེན་པོ་སྐྱེ་བར་འགྱུར། ། དེས་ ན་རྡུལ་ཚོན་ཙམ་གྱིས་ནི། ། དེ་བཞིན་ལྷ་རྣམས་དག་མི་འགྱུར། ། རྡོ་རྗེ་འཁོར་ལོ་རིན་ཆེན་དང་། ། དེ་བཞིན་པདྨ་རལ་གྲི་ཉིད། ། བྱས་ནས་སླར་ཡང་འཇིག་བྱེད་པ། ། སྐྱེས་བུ་ཐ་ཤལ་དམྱལ་བར་འགྲོ། ། གང་གིས་སངས་རྒྱས་སྤྱན་དྲངས་ཤིང་། ། གང་གིས་ གཤེགས་སུ་གསོལ་བ་ཡིས། ། རྡོ་རྗེ་སེམས་དཔའ་བྱོན་པ་དང་། ། དེ་བཞིན་གཤེགས་པ་བྱོན་པ་རྣམས། ། གང་ནའང་བྱོན་པ་མ་ཡིན་ནོ། ། དྲི་མ་མེད་ཅིང་དག་པའི་ལུས། ། གང་གིས་སྤྱན་དྲངས་གཤེགས་སུ་གསོལ། ། དེ་ཉིད་ཀྱིས་ན་བརྟག་མེད་པར། ། དེ་ བཞིན་གཤེགས་པ་རྣམས་ཕྱག་བྱ། ། ལོ་བཅུ་གཉིས་པའི་བུ་མོ་ནི། ། ཚུལ་ཁྲིམས་མཉམས་ཆགས་ཆུང་བའི། ། ཐོས་དང་ལྡན་ཞིང་གྲགས་ཆེན་མོ། ། ནད་མེད་སྙིང་རྗེ་དང་ལྡན་མ། ། སེམས་ཅན་དོན་ལ་གཅིག་ནན་ཏན། ། དགོད་ཅིང་པདྨའི་སྤྱན་དང་ལྡན། ། ཟླ་བའི་ཆ་འདྲ་གདོང་མཛེས་མ། ། མུ་ཅོར་མི་སྨྲ་བརྟན་ཞིང་དུལ། ། དེས་ན་སློབ་མ་བློ་ཆེན་པོ། ། ཤིན་ཏུ་དད་པའི་སེམས་དང་ལྡན། ། འདོད་མེད་དབང་པོ་དུལ་བ་དང་། ། ཆགས་དང་ཆགས་བྲལ་རྣམ་པར་སྤངས། །

སེམས་ཅན་དོན་ལ་ཤིན་ཏུ་སྦྱོར། ། གཏི་མུག་ཞེ་སྡང་ ཕྲག་དོག་སྤངས། ། སངས་རྒྱས་ཀུན་གྱིས་བྱིན་གྱིས་བརླབས། ། དེ་རྣམས་ལ་ནི་དེ་ཉིད་བཤད། ། གསང་བ་ཕྱི་ཡི་ལྔ་དང་ནི། ། བདུན་དང་བཅུ་བཞིར་བཤད་པ་དང་། ། གཉི་ག་གཅིག་ཏུ་འདུས་པའོ། ། གསང་བའི་དེ་ཉིད་བཤད་པར་བྱ། ། སློབ་མ་ལེགས་དང་ལྡན་ པ་དང་། ། བརྩེ་ལྡན་སེམས་གཞན་མེད་པ་ཡིས། ། གསེར་ནི་འབུམ་ཕྲག་བཅུ་དྲུག་དང་། ། ས་གཞི་ཡུལ་འཁོར་ལྡན་པ་དང་། ། གླང་པོ་བུད་མེད་དམ་པ་དང་། ། རལ་གྲི་འཁོར་ལོ་རྟ་དང་ནི། ། ཡོངས་འདྲེན་སྐྱེས་བུ་རིན་ཆེན་རྣམས། ། སྦྱོར་དང་ལྡན་པའི་སེམས་ཀྱིས་ ནི། ། དེར་ནི་བླ་མ་དབུལ་བར་བྱ། ། ཤིན་ཏུ་དྲི་མེད་སེམས་ཀྱིས་ནི། ། དེ་ནས་འདིར་ནི་གསོལ་བ་གདབ། ། འཁོར་བའི་འདམ་དུ་བྱིང་བ་བདག ། དཔུང་གཉེན་ཁྱོད་ཀྱིས་བསྒྲལ་དུ་གསོལ། ། བདག་ནི་རྩོལ་ཆུང་སྐལ་དམན་ཞིང་། ། སངས་རྒྱས་ཆོས་ནི་རྣམ་པར་སྤངས། ། ཀྱཻ་ ཀྱེ་སྟོན་པ་བླ་མ་ཆེ། ། མགོན་པོ་ཁྱོད་ཀྱིས་བརྩེ་བར་མཛོད། ། དེ་ལྟར་གསོལ་འདེབས་ཚིག་གསན་ནས། ། དེ་རུ་བླ་མ་མི་གསུངས་བཞུགས། ། མན་ངག་འདི་ཡི་ཆ་དག་ནི། ། གླེགས་བམ་རྣམས་ལས་སྤྱོད་ཡུལ་མིན། ། བླ་མའི་ཞལ་ལས་ཤེས་པར་བྱ། །

དཀྱིལ་འཁོར་གང་ལ་ གང་གིས་བརྒྱན། ། མཚན་མའི་དོན་གཞན་གར་བཀོད་ཀྱེ། ། སུ་ཡིས་སངས་རྒྱས་སྤྱན་དྲངས་ཀྱེ། ། འགྲོ་བ་{བརྫུན་,རྫུན་}འདྲའི་སོམ་ཉིར་ལྷུང་། ། མཐའ་དག་སྟོང་པ་གོས་མེད་ཀྱེ། ། ཆུ་ནང་ཟླ་བ་ཅི་འདྲ་བ། ། དེ་འདྲའི་དཀྱིལ་འཁོར་པད་དབུས་གནས། ། ཀྱེ་ལགས་རྣལ་འབྱོར་ མ་ཚོགས་ལྟོས། ། དེར་ནི་ཧེ་རུ་ཀ་གཅིག་དང་། ། ཐམས་ཅད་སྐྱེད་པར་བྱེད་པ་ཡིན། ། འགྲོ་ཀུན་རྨི་ལམ་བསླུ་བས་ན། ། གཏི་མུག་ལས་ནི་བསྐྱེད་པ་ལྟོས། ། སངས་རྒྱས་ཐོད་པའི་རྒྱུད་རྣལ་འབྱོར་མའི་གོང་ན་མེད་པ་གསང་བའི་ཡང་ཤིན་ཏུ་གསང་བ་ལས་དཀྱིལ་འཁོར་ འཇིགས་པ་བྲི་བ་དང་། སློབ་མ་དབང་བསྐུར་བའི་ལེའུ་སྟེ་དྲུག་པའོ། ། ། ། དེ་ནས་ཡང་དག་རབ་བཤད་པ། ། རི་དང་ཕུག་དང་ཚང་ཚིང་ངམ། ། ཡང་ན་དུར་ཁྲོད་དག་ན་ནི། ། གདོད་ནས་གྲུབ་པའི་གནས་སུའམ། ། འོན་ཏེ་རྒྱ་མཚོའི་འགྲམ་དག་ཏུ། ། ཕྱི་ཡི་དཀྱིལ་འཁོར་བླ་ མེད་བྲི། ། རྡུལ་ཚོན་སྔོན་པོ་ནི་རོ་བསྲེགས་པའི་སོལ་བ་ལས་བྱའོ། ། རྡུལ་ཚོན་དམར་པོ་ནི་དུར་ཁྲོད་ཀྱི་སོ་ཕག་ལས་བྱའོ། ། རྡུལ་ཚོན་ལྗང་ཁུ་ནི་ནིམ་པའི་འདབ་མ་ལས་བྱའོ། ། རྡུལ་ཚོན་དཀར་པོ་ནི་མིའི་རུས་པའི་ཕྱེ་མ་ལས་བྱའོ། །

རྡུལ་ཚོན་སེར་པོ་ནི་ཡུང་བའི་ཕྱེ་མ་ལས་བྱའོ། ། དེ་ལྟར་ རྡུལ་ཚོན་ལྔ་རྣམས་ཀྱིས། ། མཁས་པས་དཀྱིལ་འཁོར་བྲི་བར་བྱ། ། ཕོ་བྲང་རིགས་གསུམ་ཟླུམ་པོ་ལ། ། རྡོ་རྗེ་གསུམ་གྱིས་ཡོངས་སུ་བསྐོར། ། ཕྱི་རོལ་གྲུ་བཞི་ལྷམ་པ་ཡི། ། སྒོ་བཞིར་རྟབ་བས་རྣམས་ཀྱིས་བརྒྱན། ། བ་དན་རྣམ་པ་བཞི་ཡིས་བརྒྱན། ། དྲ་བ་དྲ་བ་ཕྱེད་པས་ སྤྲས། ། ཕྱི་རོལ་ཁ་ཁྱེར་དག་པ་དང་། ། རིན་ཆེན་ཕ་གུར་ཡང་དག་ལྡན། ། པདྨ་ཉི་མ་ཉི་ཤུ་ལྔའི། ། གདན་རྣམས་ཀྱིས་ནི་ཤིན་ཏུ་མཛེས། ། དེ་ཡི་དབུས་ཆུད་ས་བོན་ནི། ། ཡི་གེ་ཧཱུྃ་གི་རང་བཞིན་སྔོ། ། སྐད་ཅིག་ཙམ་གྱིས་ཧེ་རུ་ཀ། ། སྐུ་མདོག་སྔོན་པོ་གྲགས་ཆེན་པོ། ། གཡས་ན་ཅང་ཏེའུ་གྲི་གུག་སྟེ། ། གཡོན་ན་ཁ་ཊྭཱྃ་ཐོད་པའོ། ། སྐྱིལ་ཀྲུང་ཕྱེད་པས་འཇིགས་ཆེན་པོ། ། ཞལ་གྱི་མཆེ་བ་ཅུང་ཟད་གཙིགས། ། རལ་པའི་ཅོད་པན་གྱིས་བརྒྱན་ཅིང་། ། སངས་རྒྱས་ལྔ་ཡི་ཅོད་པན་ཅན། ། དབུ་ལ་སྣ་ཚོགས་རྡོ་རྗེ་མནན། ། ཟླ་བ་ ཕྱེད་པ་འཛིན་པའི་ལྷ། ། སྐུ་ལ་ཐལ་བའི་རྡུལ་གྱིས་བྱུགས། ། དཔའ་བོ་ཕྱག་བཞི་ཕྱག་མཚན་འཆང་། ། ཤིན་ཏུ་ཧཱུྃ་སྒྲོགས་འཇིགས་བྱེད་པ། ། གར་གྱི་སྟབས་ཀྱིས་རྣམ་པར་བཞུགས། །

མགོ་བོ་རློན་པའི་ཕྲེང་བ་ཅན། ། མཆོད་ཕྱིར་ཐོད་པ་འཆང་བ་བོ། ། ཐོད་པ་གཏི་མུག་ རྣམ་དག་པ། ། ཕྲེང་བ་བརྒྱུད་པས་བརྒྱན་པའི་ལྷ། ། མགུལ་དོ་དང་ནི་འཁོར་ལོ་དང་། ། རྐང་གདུབ་དང་ནི་དཔུང་རྒྱན་དང་། ། གདུ་བུ་རྐེད་པའི་སྐ་རགས་དང་། ། དཔའ་བོ་རྣ་ཆ་མཆོག་གིས་བརྒྱན། ། འདི་འདྲའི་གཟུགས་ཅན་གཙོ་བོ་ནི། ། ཧཱུྃ་ཞེས་ཟློས་པར་བྱེད་ པའོ། ། དེ་ལས་བྱུང་བའི་རྣལ་འབྱོར་མ། ། ཉི་ཤུ་རྩ་བཞིའི་བདག་ཉིད་རྣམས། ། སྐུ་མདོག་སྔོན་མོ་གྲགས་ཆེན་མོ། ། ཤིན་ཏུ་འཇིགས་པའི་གཟུགས་ཅན་མ། ། ཞལ་གཅིག་ཕྱག་གཉིས་ཐོད་པ་འཆང་། ། སོ་སོ་ཡི་ནི་མིང་ཇི་བཞིན། ། དེ་རྣམས་མིང་ནི་རབ་ཏུ་བཤད། ། ཕྲེང་བཟང་མ། འདོད་ཅན་མ། འཇིགས་མ། ཐུབ་དཀའ་མ། དགེ་བའི་སྐ་རགས་ཅན་མ། གཟུགས་ཅན་མ། རྣམ་རྒྱལ་མ། འབྱུང་གནས་མ། ཐོད་ཅན་མ། མཚོ་ཆེན་མ། བྱེད་མ། གསོད་མ། སྒྲོལ་མ། འཇིགས་མ། མཐོང་མ། མི་ཕམ་མ། དགེ་མ། འཛུར་ བྱེད་མ། དུས་མཚན་མ། གྲགས་ཆེན་མ། མཛེས་སྡུག་མ། ནོར་འཛིན་མ། སྐལ་བཟང་མ། གྲགས་མཐོང་མའོ། ། འདི་ལྟ་བུ་ཡི་དཀྱིལ་འཁོར་མཆོག ། ཁ་དོག་རྣམ་པ་ལྔ་ཡིས་བརྒྱན། ། དེ་ཡི་དབུས་གནས་ལྷ་མོ་ནི། ། ཧེ་རུ་ཀ་ལ་བདེ་སྟེར་མ། །

སྐྱིལ་ཀྲུང་ཕྱེད་ པའི་གར་བྱེད་མ། ། མི་ཡི་རུས་པའི་ཕྲེང་བས་བརྒྱན། ། ལྷ་མོ་འོད་ཟེར་དཔག་དགའ་ཞིང་། ། སྐྲ་སེར་གྱེན་དུ་འབར་བ་སྟེ། ། ཧཱུྃ་གི་བདག་ཉིད་ལས་སྐྱེས་འཇིགས། ། ཞལ་ནས་ཁྲག་ནི་འཐོར་བྱེད་མ། ། དཀར་མོ་ནག་མོ་ལྗང་ཁུ་མ། ། ཐམས་ཅད་ཁུ་བ་ལྡན་གྱུར་མ། ། ལྷ་ཡི་དཀྱིལ་འཁོར་བསྐྱེད་པ་ནི། ། ཉི་ཤུ་རྩ་བཞིའི་བདག་ཉིད་གསུངས། ། བདག་ཉིད་ཧེ་རུ་ཀ་གཟུགས་ལ། ། ཉི་ཤུ་རྩ་བཞིའི་ལྷ་མོས་མཆོད། ། ཐོད་པ་བདུད་རྩི་ལྔས་བཀང་བ། ། ཧེ་རུ་ཀ་ཡིས་བཏུང་བར་བྱ། ། དེ་ཡིས་འཐུངས་པ་ཙམ་གྱིས་ནི། ། འགྲོ་བའི་བླ་མ་བདག་ཉིད་ ཆེ། ། གཙོ་བོ་ལས་གཞན་ཐ་དད་གཟུགས། ། རྣལ་འབྱོར་མ་ཀུན་དེ་དང་འདྲ། ། དེ་ལྟར་ཧེ་རུ་ཀ་མགོན་པོས། ། རྣལ་འབྱོར་མ་ཀུན་སྤྱད་པར་བྱ། ། ཐམས་ཅད་སྤྱད་པས་ཞུ་གྱུར་ཏེ། ། ཉི་མའི་དཀྱིལ་འཁོར་རྣམ་པར་གནས། ། དེ་ནི་ཞུ་བར་མཐོང་ནས་ནི། ། ཤིན་ཏུ་སྲིད་པ་ བསྒྲུབ་པའི་ཕྱིར། ། སྒོ་ཡི་རྣལ་འབྱོར་མ་ཡིས་བསྐུལ། ། ཅི་སྟེ་འཇིག་རྟེན་སྙན་མནན་ན། ། ཅི་ཕྱིར་ཁྱོད་ནི་མི་དགྱེས་གྱུར། ། གལ་ཏེ་ཁྱོད་བདག་ཚིག་གསན་ན། ། མི་དགྱེས་གྱུར་པ་མཐའ་དག་ཐོང་། ། སྲིད་འཇིགས་སྐྱེ་བོ་ཀུན་ལྷུང་བས། །

སྟོང་པའི་ཐུགས་ནི་མ་མཛད་ པར། ། ཉིད་ཀྱི་དགོངས་པ་ཀུན་བསྒྲུབས་ཀྱེ། ། རྣལ་འབྱོར་མ་ཡི་གྲོགས་པོ་བཞེངས། ། གལ་ཏེ་སྔོན་གཙོ་ཚིག་གསན་ན། ། འབྲས་བུ་ཡལ་བར་མ་དོར་ཅིག ། ཁྱོད་མི་སྣང་ན་འགྲོ་བ་ཡི། ། སྐྱེ་བོ་མཐའ་དག་གདུང་བས་ནོན། ། ལོག་པའི་ང་རྒྱལ་མ་མཛད་པར། ། སྟོང་པའི་རང་ བཞིན་སྤངས་ནས་ནི། ། ཁྱོད་ཀྱིས་དངོས་མེད་ཀུན་ཐོང་ལ། ། རྣལ་འབྱོར་མ་ཡི་ཚོགས་ལ་སྤྱོད། ། རྣལ་འབྱོར་མ་ནི་བཞི་པོ་ཡིས། ། འདི་ལྟ་བུ་ཡི་གླུ་ཡིས་བསྐུལ། ། སྔོན་བཞིན་མདོག་དང་མཚན་སོགས་ལྡན། ། ཀུན་ནས་རྣལ་འབྱོར་མ་རྣམས་བསྐོར། ། འཇིགས་པ་འཁོར་བ་ སྒྲོལ་བྱེད་པའི། ། དཔའ་བོ་ཆེན་པོ་འདི་བཞེངས་སོ། ། སངས་རྒྱས་ཐོད་པ་ཞེས་བྱ་བའི་རྣལ་འབྱོར་མའི་རྒྱུད་བླ་ན་མེད་པ་གསང་བའི་ཡང་ཤིན་ཏུ་གསང་བ་ལས། དཀྱིལ་འཁོར་དང་ཧེ་རུ་ཀ་བསྐྱེད་པ་དང་སྒོམ་པའི་ལེའུ་སྟེ་བདུན་པའོ། ། ། ། དེ་ནས་ཡང་དག་རབ་བཤད་བྱ། ། སྦྱིན་ སྲེག་དཀྱིལ་འཁོར་མཆོག་བཟང་པོ། ། ཞི་བ་དང་ནི་རྒྱས་པ་དང་། ། དེ་བཞིན་དབང་དང་མངོན་སྤྱོད་དེ། ། སྦྱིན་སྲེག་རྣམ་པ་བཞི་རུ་གསུངས། ། ཤིང་གི་སྦྱིན་སྲེག་མི་བྱ་ཞིང་། ། འབྲས་དང་འབྲུ་རྣམས་ཀྱིས་ཀྱང་མིན། །

བློ་ལྡན་གལ་ཏེ་ཞི་འདོད་ན། ། མེ་ཏོག་གིས་ནི་སྦྱིན་སྲེག་ བྱ། ། མེ་ཏོག་ལྔ་བོ་མཆོག་ཆེན་དང་། ། འོ་མར་ཡང་དག་ལྡན་པས་བྱ། ། གལ་ཏེ་ཞི་བའི་སྦྱིན་སྲེག་འདོད། ། ཞི་བའི་གཟུགས་སོགས་ལྡན་པ་ཡིས། ། ཞི་བའི་ཐབ་ཁུང་གྲུ་བཞི་པ། ། ཟབས་དང་རྒྱར་ནི་མཐོ་གང་བ། ། ཁ་ལ་རྡོ་རྗེ་རྩེ་ལྔ་པ། ། དཀར་པོ་རྩེ་མོ་འདུས་ པ་བྲི། ། རྡོ་རྗེ་རྩེ་གསུམ་སྔོན་པོ་ནི། ། ཞི་བ་ཧཱུྃ་བདག་འཁོར་བར་ནི། ། དེ་ཡི་དབུས་སུ་འཁོར་ལོ་ལ། ། གྲུ་གསུམ་པ་ཡི་ཡི་གེས་བརྒྱན། ། ཨེ་བྃ་མ་ཡཱ་མཆོག་ཆེན་གྱི། ། ལྟེ་བ་རུ་ནི་བསྐྱེད་པར་གསུངས། ། རྩེ་གསུམ་འཇིགས་པའི་རྡོ་རྗེས་བསྐོར། ། རྡོ་རྗེའི་ནང་དུ་པདྨ་ སྟེ། ། པདྨའི་དབུས་སུ་ཉི་མ་བསམ། ། ཉི་མའི་དབུས་སུ་ཡི་གེ་ཧཱུྃ། ། ཁ་དོག་དམར་པོའི་འོད་ཆེན་པོ། ། མཚམས་དང་མཚམས་སུ་རྡོ་རྗེ་ནི། ། རྩེ་དགུ་སེར་པོ་བྲི་བར་བྱ། ། བདག་ཉིད་ཧེ་རུ་ཀར་བལྟ་སྟེ། ། ཕྱིས་ནི་སྦྱིན་སྲེག་ཡང་དག་བརྩམ། ། ཤེས་རབ་ཅན་གྱིས་མེ་ཡི་ལྷ། ། སྔགས་འདི་ཡིས་ནི་སྤྱན་དྲང་ངོ་། ། ཨོྃ་སརྦྦ་དེ་བཱ་ཧུ་ཏ་པྲ་དྷེ་ནི་ཨྃ་བི་ཀལྦེ་སུ་ད་ཧ་ད་ཧ་ནེ་ད་ཧ་ད་ཧ་ཛྭ་ལ་ཛྭ་ལ། པྲ་ས་ར་པྲ་ས་ར། ཨཱ་གཙྪ་ཨཱ་གཙྪ།

ཡ་ཏྲི་ཀུནྣེ་ཨ་དྷིཥྛ་ཡ། ཨ་དྷིཥྛ་ཡ། ཏིཥྛ་ཏིཥྛ། ཀི་ལི་ཀི་ལི། ཧ་ཧེ་ཧོ་ཧྃ་ཧྲཿཧྲིཿཧཱུྃ་སྭཱ་ཧཱ། མེ་ལྷ་སྤྱན་དྲང་པའི་སྔགས་སོ། ། སངས་རྒྱས་ ཐོད་པའི་སྦྱོར་བ་ཡིས། ། ཤེས་རབ་ཅན་སྔགས་ལན་བདུན་བཟླས། ། སངས་རྒྱས་ཀུན་གྱིས་བྱིན་བརླབས་ཤིང་། ། མདོག་དཀར་དུ་བ་དང་བྲལ་བའི། ། མེ་ལྷ་རྒྱལ་དབང་བྱོན་ནས་ཀྱང་། ། ཐབ་ཁུང་གི་ནི་དབུས་སུ་བཞུགས། ། དེ་ནས་བློ་ལྡན་སྦྱིན་སྲེག་བྱ། ། དེ་རུ་སོལ་བ་གཞུག་ བྱའོ། ། ཨ་ཤྭཏྠ་དང་ནྱ་གྲོ་དང་། ། ཨུ་དུམ་བཱ་ར་ར་ཀ་ཏི། པ་ལ་ཤ་སྟེ་ཤིང་ལྔ་ལས། སོལ་བྱས་དུ་མེད་འབར་བའི་མེ། བློ་ལྡན་ཐབ་ཁུང་དབུས་སུ་གཞུག ། གལ་ཏེ་དངོས་གྲུབ་མཆོག་འདོད་ན། ། པདྨ་བརྒྱ་ནི་རྩ་བརྒྱད་དང་། ། དེ་བཞིན་ཨུཏྤ་ལ་ཉིད་དང་། ། ཀུ་མུ་ད་ དམར་དྲི་ཞིམ་འདྲ། ། ཀ་ར་བཱི་ར་གཞན་ཉིས་འགྱུར། ། བྱས་ཏེ་བསྲེགས་པས་ཞི་བར་གསུངས། ། སྦྱིན་བདག་མདུན་ན་འདུག་པ་ལ། ། དེ་ཚེ་དུ་བ་དབབ་པར་བྱ། ། མཁས་པས་གསང་སྔགས་འདི་བཏོན་ཞིང་། ། པདྨ་མར་སྦགས་བསྲེག་པར་བྱ། ། ཨོྃ་པདྨ་རཱ་ཛེ་ཨགྣི་པྲ་ཎི་ཡ་ ཨ་མུ་ཀ་སྱ་ཤཱནྟིྃ་ཀུ་རུ་སྭཱ་ཧཱ། མཁས་པ་ཡིས་ནི་སྔགས་བཟླས་ཏེ། ། ཨུཏྤལ་འོ་མས་སྦྱིན་སྲེག་བྱ། །

ཨོྃ་གྷ་གྷ་གྷཱ་ཏ་ཡགྷཱ་ཏ་ཡ་ཏེ་ཛོ་རཱ་ཛ་བི་ནཱ་ཡ་ཤཱནྟིྃ་ཀུ་རུ་སྭཱ་ཧཱ། མཁས་པ་བདེ་གཤེགས་ཀུན་བདག་གིས། ། གུར་གུམ་ཀུ་མུད་སྔགས་བསྲེག ། ཨོྃ་སུ་པུཥྤེ་སུ་ཀ་ར་ཙ་ལེ་ཛྭ་ལ་ནཱི་ཡེ་ཤཱནྟིྃ་ ཀུ་རུ་སྭཱ་ཧཱ། གསང་སྔགས་རྒྱལ་པོ་འདི་ཡིས་ནི། ། དྲི་ཞིམ་ཙནྡན་སྦྱིན་སྲེག་བྱ། ། ཨོྃ་དྷ་མེ་མ་ཧཱ་མེ་རཱ་ཛེ་ད་ཧ་ད་ཧ་སརྦ་བིགྷྣྃ་ཤཱནྟིྃ་ཀུ་རུ་སྭཱ་ཧཱ། ཀ་ར་བཱི་ར་དྲི་ཞིམ་མར། ། མཁས་པས་སྔགས་རྒྱལ་བཟླས་ཏེ་བསྲེག ། ཨོཾ་ཀཱ་ལི་སུ་ཀཱ་ལི་ཀ་རཱ་ལ་རཱ་ཏྲི་སརྦྦ་པཱ་པྃ་ད་ཧ་ད་ཧ་ཤནྟི་ཀུ་རུ་སྭཱ་ཧཱ། ། མེ་ཏོག་རེ་རེ་རེ་རེ་ལ། ། གསང་སྔགས་རྒྱལ་པོ་ལན་རེ་བཟླ། ། ཞི་བའི་སྦྱིན་སྲེག་བླ་མེད་པ། ། འཇིག་རྟེན་གསུམ་ན་རྙེད་པར་དཀའ། ། མེ་ནི་འོ་མས་ཞི་བར་བྱ། ། དེ་ནས་གཞན་ཡང་རྒྱས་པ་ཡི། ། སྦྱིན་སྲེག་ཁྱད་པར་བཤད་པར་བྱ། ། རྒྱས་ལ་ཐག་ཁུད་ཟླ་མ་པོ་སྟེ། ། ཆུ་ཡི་དཀྱིལ་ འཁོར་ལྟར་སྣང་བ། ། ཟབས་དང་རྒྱར་ནི་མཐོ་གསུམ་སྟེ། ། ཁ་དོག་སེར་པོར་རྣམ་པར་བསམ། ། དེ་དབུས་རྡོ་རྗེ་རྩེ་དགུ་པ། ། སྔོ་བྲི་དེ་སྟེང་པད་འདབ་བརྒྱད། ། བདག་ཉིད་ཧེ་རུ་ཀ་རྣམ་པ། ། ཁྲོ་བའི་སེམས་ཀྱི་བདག་ཉིད་ཀྱིས། །

ཤིང་བསྲེག་པ་ཡི་སྦྱིན་སྲེག་བྱ། ། གལ་ཏེ་ རྒྱས་པ་མཆོག་འདོད་ན། ། ཨ་མྲ་ཀ་ནྠ་པ་ལ་དང་། ། ཨརྒ་བིལ་བ་དུ་དུ་ར། ། ཤིན་ཏུ་རྙེད་དཀའི་ཤིང་ལྔ་ལས། ། སོར་བཅུ་གཉིས་ཀྱི་ཚད་ཙམ་དུ། ། སློབ་དཔོན་གྱིས་ནི་གཟུང་བར་བྱ། ། མ་གསམ་སྐམས་མ་བཅད་ཅིང་། ། བུ་ག་ཅན་གྱི་ཤིང་སྤང་ངོ་། ། དེ་ཡི་དབུས་སུ་ སངས་རྒྱས་དང་། ། བྱང་ཆུབ་སེམས་དཔའ་ཐམས་ཅད་བསམ། ། རེ་རེ་ལ་ནི་བརྒྱ་རྩ་བརྒྱད། ། བགྲངས་ཏེ་དེ་ནས་སྦྱིན་སྲེག་བྱ། ། བདག་ཉིད་ཧེ་རུ་ཀ་ཡི་ཚུལ། ། སྐུ་མདོག་ནག་པོ་འོད་ཆེན་པོས། ། མར་དང་ཡམ་ཤིང་ཐམས་ཅད་ནི། ། སྔགས་བསྲེགས་འདིར་ནི་ཐེ་ཚོམ་མེད། ཨོཾ་ ག་ག་ནིག་ག་ན་བི་ལོ་ཀ་ནེ་ཧཱུྃ་ཕཊ། ཏེ་ཛོ་རཱ་ཛཱ་པུཥྚིྃ་ཀུ་རུ་སྭཱ་ཧཱ། ཤིང་རྣམས་ཀུན་གྱི་སྔགས་འདི་ཡིས། ། རེ་རེ་བཞིན་དུ་སྦྱིན་སྲེག་བྱ། ། ཕྱིས་ནི་སེར་བོའི་ཚུས་ཞི་བྱ། ། འདི་ལྟའི་རྒྱས་པའི་སྦྱིན་སྲེག་ནི། ། འཇིག་རྟེན་གསུམ་ན་རྙེད་པར་དཀའ། ། རྒྱུད་གཞན་རྣམས་སུ་སྤས་པ་ནི། ། རྒྱུད་འདི་རུ་ནི་གསལ་བར་བྱས། ། དེ་ནས་ཡང་དག་རབ་བཤད་པ། ། དབང་དུ་བྱ་བའི་སྦྱིན་སྲེག་མཆོག ། ཐབ་ཁུང་གྲུ་གསུམ་དམར་པོ་ལ། ། ཟབས་དང་རྒྱར་ནི་སོར་མོ་བརྒྱད། །

དེ་དབུས་པདྨ་འདབ་བརྒྱད་དམར། ། ཟླ་བ་དམར་ལ་སོགས་པས་བརྒྱན། ། གྲྭ་གྲྭ་རུ་ནི་ རྡོ་རྗེ་དམར། ། བདག་ཉིད་ཧེ་རུ་ཀར་བསམ་པ། ། དམར་པོ་ལྟར་སྣང་ཆགས་པའི་བདག ། རྡོ་རྗེ་དམར་པོ་ཐོད་པ་བསྣམས། ། ཡོངས་སུ་གང་བའི་ཁྲག་ཉིད་ཀྱིས། ། ཁམས་གསུམ་པ་ལ་རྗེས་སུ་ཆགས། ། ཨ་ཤོ་ཀ་ཡི་ཡམ་ཤིང་དང་། ། གོ་རོ་ཙ་ནར་ལྡན་པ་ནི། ། བློ་ལྡན་བརྒྱ་རྩ་ བརྒྱད་བསྲེགས་ཏེ། ། ཤིན་ཏུ་མཉམ་གཞག་སྔགས་ནི་གདོན། ། ཨོྃ་ཨ་ཤོ་ཀ་ནི་སུ་ར་ཀེ་ཨ་ནུ་རཱ་ག་ཡ་ཏྲཻ་ལོ་ཀྱ་བ་ཤྃ་ཀ་རཱི་ཏྲཻ་ལོ་ཀྱཾ་བཱ་ཤཱ་མཱ་ན་ཡཱ་ཧྲཱི་སྭཱ་ཧཱ། ཉིན་བདུན་སྦྱིན་སྲེག་བྱས་ཙམ་གྱིས། ། ཁམས་གསུམ་དབང་དུ་འགྱུར་བ་ཡིན། ། ཆུ་ནི་དམར་པོར་མེ་ཞི་བྱ། ། དེ་ནས་ཡང་དག་རབ་བཤད་ པ། ། མངོན་སྤྱོད་དང་ནི་གསད་པ་མཆོག ། ཟླ་བ་ཕྱེད་པའི་ཆ་འདྲའི་ཐབ། ། ཟབས་དང་རྒྱར་ནི་ཁྲུ་གང་ཚད། ། འཇིགས་ཆེན་མདོག་ནི་ལྗང་ཁུའོ། ། གྲྭ་གྲྭ་རུ་ནི་རྡོ་རྗེ་བྲི། ། དབུས་ཀྱིས་གཞི་སྟོང་པ་རུ། ། བློ་ལྡན་ཤ་ལྔས་སྦྱིན་སྲེག་བྱ། ། གསོད་པ་ཡི་ནི་སྦྱིན་སྲེག་མཆོག ། མངོན་སྤྱོད་ གསོད་པ་རུ་ནི་གསུངས། ། དགྲ་ཀུན་བསྣུན་ཅིང་ཟློག་པར་བྱེད། ། དགྲ་བོ་ཐུར་དུ་ཁ་བལྟས་ཤིང་། །

ཁ་ནས་ཁྲག་ནི་སྐྱུག་པ་ཉིད། ། ཤ་ཡི་དབུས་སུ་བསམ་པར་བྱ། ། སེང་ལྡེང་སོལ་བས་མེ་བྱ་སྟེ། ། མེད་ན་འབའ་འབོ་ལ་ཉིད་ཀྱི། ། འབའ་འབོ་ཚེར་མས་ཤ་ཕུག་སྟེ། ། བརྒྱ་རྩ་ བརྒྱད་དུ་སྔགས་ཀྱིས་བསྲེག ། ཨོྃ་མཱ་ར་ཡ་མཱ་ར་ཡ་ཀཱི་ལ་ཡ་ཀཱི་ལ་ཡ་སརྦྦ་ཤ་ཏྲུཾ་ནཱ་ན་ཤ་ཡ་ཧཱུྃ་ཕཊ། བདག་ཉིད་ཧེ་རུ་ཀར་གྱུར་ཅིང་། ། སྐུ་མདོག་སྔོན་པོ་ཐུགས་འཁྲུགས་པས། ། དགྲ་རྣམས་ཐམས་ཅད་བརླག་པར་ནི། ། སྐད་ཅིག་དེ་ལ་ཐེ་ཚོམ་མེད། ། ཕེད་མཛད་འཇིགས་ཤིང་འཇིགས་པར་ བྱེད། ། ཧ་ཧ་ཞེས་མཛད་འཇིགས་པར་མཛད། ། གདུག་པ་ཐམས་ཅད་གསོད་པར་ནི། ། སྦྱིན་སྲེག་ཙམ་གྱིས་ཐེ་ཚོམ་མེད། ། འདི་ལྟའི་བསད་པའི་སྦྱིན་སྲེག་དང་། ། མངོན་སྤྱོད་ཀྱང་ནི་རྙེད་དཀའ་བ། ། རྣལ་འབྱོར་ལྷ་མོས་རྟོགས་མིན་ན། ། སྔགས་སྐྱེས་ཕལ་ལྟ་སྨོས་ཅི་ དགོས། ། དེ་ཕྱིར་སངས་རྒྱས་ཐོད་པ་ཡི། ། རྣལ་འབྱོར་ང་རྒྱལ་དང་བྲལ་བས། ། ཤིན་ཏུ་མཉམ་པར་གཞག་པའི་སེམས། ། ལྷ་རྣམས་ཀྱིས་ཀྱང་རྙེད་པར་དཀའ། ། ལྗང་ཁུའི་ཆུ་ཡིས་མེ་ཞི་བྱ། ། གང་གིས་བསྲེགས་ཤིང་གང་ཞིག་བསྲེགས། ། གང་གི་ཞི་བ་གང་ཞི་བ། ། གང་གིས་ རྣམ་རྟོག་ཀུན་བཅོམ་པ། ། དེ་ཡིས་སེམས་ནི་མགུ་བར་བྱེད། །

སངས་རྒྱས་ཐོད་པ་ཞེས་བྱ་བའི་རྣལ་འབྱོར་མའི་རྒྱུད་བླ་ན་མེད་པ་གསང་བའི་ཡང་ཤིན་ཏུ་གསང་བ་ལས་སྦྱིན་སྲེག་གི་ཆོ་གའི་ལེའུ་སྟེ་བརྒྱད་པའོ། ། ། ། དེ་ནས་ཡང་དག་རབ་བཤད་པ། ། སྤྱོད་པའི་ལེའུ་ཤིན་ཏུ་རྙེད་དཀའ་བ། ། བུད་མེད་ཤིན་ཏུ་མཆོག་གྱུར་དང་། ། རྣལ་འབྱོར་གང་གིས་སྤྱོད་ཀུན་བྱེད། ། དངོས་གྲུབ་བརྒྱད་དང་ཡང་དག་ལྡན། ། དེ་ནས་སྤྱོད་པ་ཡང་དག་བརྩམ། ། སེམས་ཅན་དངོས་གྲུབ་གང་གང་འདོད། ། དེ་དེའི་དངོས་གྲུབ་རྟག་ཏུ་སྟེར། ། ལག་པས་ཐོད་པ་གཟུང་བྱས་ཏེ། ། གཅེར་བུ་སྐྲ་ གྲོལ་གྱུར་པ་ཡི། ། བརྟུལ་ཞུགས་ཅན་གྱིས་སྤྱོད་པས་འཁྱམ། ། གང་དང་གང་ཚེ་དེ་ཚེ་དེར། ། རྟག་ཏུ་སྤྱོད་པ་ཐམས་ཅད་བྱ། ། རྒྱན་རྣམས་ཀུན་ལས་རྣམ་གྲོལ་ཞིང་། ། ནམ་མཁའ་དང་མཚུངས་གྱུར་པ་ཡི། ། ཤེས་རབ་ཅན་གྱིས་ཁྱིམ་ཁྱིམ་དུ། ། སློང་མོ་བྱ་བར་ཐེ་ཚོམ་ མེད། ། ཡིད་དང་མཐུན་པ་ཀུན་བླངས་ན། ། བསམ་གཏན་གནས་སུ་ཐེ་ཚོམ་མེད། ། དགའ་བའི་སེམས་ཀྱིས་བསམས་ནས་ནི། ། རྣལ་འབྱོར་པ་ཡི་སློང་མོ་བླང་། ། ཆོས་ལ་གཞོལ་པའི་རྣལ་འབྱོར་པས། ། ཐོད་པའི་སྟེང་དུ་གཞག་པ་ཡི། ། རྫས་ནི་དེ་ནས་བཟའ་བར་བྱ། ། རྫས་ ནི་ཟོས་མ་ཐག་ཏུ་ཡང་། །

ཁྱིམ་ཁྱིམ་ཐལ་ཕུང་ཤིང་དྲུང་དང་། ། གང་དུ་གང་ཚེ་དེར་དེའི་ཚེ། ། གང་གིས་དགའ་བའི་སེམས་དེ་ཡིས། ། བློ་གྲོས་ཆེན་པོ་གཉིད་ལོག་ཕྲེང་། ། འདི་ལྟའི་སྤྱོད་པའི་སྦྱོར་བ་ཡིས། ། ཕྱག་རྒྱ་ཆེན་པོ་ངེས་པར་ཐོབ། ། དེ་ལྟར་ཡང་རྒྱུད་ལས་གསུངས་པ། ། གང་ དུ་ཇི་ལྟར་དེར་དེ་ལྟར། ། གང་གིས་དེ་ཡིས་སངས་རྒྱས་ཏེ། ། རང་གི་རྣམ་རྟོག་དག་གིས་ཉམས། ། མཐའ་དག་རང་བཞིན་རྣམ་པར་དག ། སངས་རྒྱས་ཐོད་པ་ཞེས་བྱ་བ་རྣལ་འབྱོར་མའི་རྒྱུད་བླ་ན་མེད་པ་གསང་བའི་ཡང་ཤིན་ཏུ་གསང་བ་ལས་སྤྱོད་པའི་ལེའུ་སྟེ་དགུ་པའོ། ། ། ། དེ་ནས་ ཡང་དག་རབ་བཤད་པ། ། གཅིག་ཏུ་སེམས་ཅན་དོན་རབ་ངེས། ། གསེར་དུ་ངེས་པར་བྱེད་པའི་ལེའུ། ། སློབ་དཔོན་ལ་ནི་རབ་དང་བས། ། མུ་ཏིག་དང་ནི་ཉ་ཕྱིས་དང་། ། དངུལ་ཆུ་དང་ནི་བྱི་རུ་ཡིས། ། གང་གིས་སེམས་ཅན་ནོར་ལྡན་འགྱུར། ། འདི་ནི་ཕྱི་ཡི་ སྨན་མིན་ཏེ། ། ཤུན་ལྤགས་ལོ་མ་མ་ཡིན་ཞིང་། ། དངུལ་ཆུ་བཅུད་ལེན་མ་ཡིན་ཏེ། ། མུ་ཟི་ལྷང་ཚེར་མ་ཡིན་ཞིང་། ། ལྕགས་དང་ཞ་ཉེ་ཟངས་མ་མིན། ། ལྕགས་གཞན་དག་ནི་མ་ཡིན་ཏེ། ། གྲུབ་པའི་སྨན་གྱི་མཆོག་ཡིན་ནོ། ། འདི་ལྟ་བུ་ཡི་ཚིག་ཐོས་ནས། །

ཕྱག་ན་རྡོ་རྗེ་སྟོབས་པོ་ ཆེས། ། ཞབས་ཀྱི་རྡུལ་གྱི་ཆ་བཏུད་ནས། ། སེམས་དཔའ་གཅིག་ཏུ་དད་བརྟན་པས། ། ལྷ་མོ་ལེགས་སོ་ཞེས་ནི་སྨྲ། ། སྨན་གྱི་མཆོག་ནི་གང་ཡིན་ཞིང་། ། དངོས་གྲུབ་ཀྱང་ནི་ཇི་ལྟ་བུ། ། གུས་པ་ཡིས་ནི་ཉན་པར་འཚལ། ། ལྷ་མོ་ཆེན་མོ་ཁྱོད་ཀྱིས་གསུངས། ། གྲུབ་པའི་ སྨན་གྱི་མཆོག་གང་ལགས། ། གང་གིས་སེམས་ཅན་ནོར་ལྡན་འགྱུར། ། ཚེ་འཕེལ་བ་ལ་བརྩོན་པ་གང་། ། སྔོན་བསྙེན་ལྟོས་པ་མེད་པ་ཡིས། ། སྨན་ཆེན་གྲགས་པས་འགྲུབ་པ་གང་། ། གང་གིས་རྫས་རྣམས་མང་པོར་འགྱུར། ། མོ་ཤམ་བུ་དང་ལྡན་འགྱུར་གང་། ། ཡང་དང་ཡང་དུ་ མི་འཆི་ཞིང་། ། ཤི་ནས་ཡང་དག་འཚོར་འགྱུར་བ། ། ལྷ་མོ་ཆེན་མོ་ཁྱོད་ཀྱིས་གསུངས། ། བཀའ་སྩལ་པ། ཁྱིམ་འདི་ཉིད་དུ་གནས་པ་ཡི། ། སྨན་ཆེན་པོ་ཡིས་འགྲུབ་པ་སྟེ། ། དེ་ཡང་སྣོད་བཟང་མཆོག་ལ་འགྲུབ། ། བྱིས་པ་རྨོངས་པས་མི་ཤེས་སོ། ། བདག་དོན་གཅིག་པུ་ལ་ འབབ་ཅིང་། ། ཀྱེ་མ་གཅིག་ཏུ་དཀའ་འབད་པས། ། ཇི་ལྟར་སེམས་ཅན་དོན་འགྲུབ་འགྱུར། ། སྣོད་བཟང་ལ་ནི་གནས་པའི་བཅུད། ། ཟེའུ་འབྲུ་གསང་བའི་སྤྱོད་ཡུལ་ཏེ། ། རོ་བཅུད་རྩ་ཡི་ནང་གནས་པའི། ། སྨན་ཆེན་རོ་བཅུད་མ་རུ་བརྗོད། །

གང་གིས་ལྕགས་ནི་གསེར་འགྱུར་བ། ། གཅིག་ གིས་ཀྱང་ནི་གྲངས་མེད་འགྱུར། ། འདི་ལྟ་བུ་ཡི་སྨན་ཆེན་མཆོག ། རོ་བཅུད་མ་ནི་དེ་བཞིན་གནས། ། རབ་འབྱོར་ཆོ་ག་སྔོན་འགྲོ་བས། ། སྨན་གྱི་མཆོག་ནི་འགྲུབ་པར་འགྱུར། ། དེར་ནི་ཡང་དག་སྦྱོར་བཤད། ། དད་པ་བརྟན་པ་ཡིས་ནི་ཉོན། ། མེ་ཏོག་ལྡན་པའི་བུད་མེད་གང་། ། གཞོན་ ནུ་ཁ་དོག་ནག་པོ་སྟེ། ། རྒྱུད་འདི་ཐོས་པ་དང་ལྡན་ཞིང་། ། ངོ་ཚ་མེད་ཅིང་ལྟོས་མེད་མ། ། འདོད་པ་ཆུང་ཞིང་སེམས་ཅན་བརྩེ། ། དེ་བཞིན་གཤེགས་པ་རྣམས་བསྟེན་ཅིང་། ། རྟག་ཏུ་རབ་སྦས་བཙོག་མེད་མ། ། འདི་ལྟའི་བུད་མེད་རབ་བླངས་ཏེ། ། སྨན་ཆེན་མཆོག་ནི་ཡང་དག་བརྩམ། ། སྐྱེས་བུ་ཤིན་ཏུ་ཆགས་ཆེ་ཞིང་། ། མྱུར་དུ་བྱང་ཆུབ་སེམས་འབབ་པ། ། གང་ཡིན་དེ་ལ་དངོས་གྲུབ་མེད། ། འདི་ལྟ་བུ་ཡི་སྨན་ཆེན་པོ། ། སངས་རྒྱས་ཀྱིས་ཀྱང་རབ་རྙེད་དཀའ། ། ཤིན་ཏུ་བརྟན་པའི་སེམས་ཀྱིས་ནི། ། བློ་ལྡན་བུད་མེད་དེ་རྣམས་བསྟེན། ། དེ་ལྟར་ཡང་ཞེས་ གསུངས་པ། རབ་ཏུ་བརྟན་པ་གཙོ་བོའི་གནས། ། ཞེས་ནི་སྒྲུབ་པ་པོ་རྣམས་སྨྲ། ། དེ་ཕྱིར་བརྟན་པའི་སེམས་ཀྱིས་ནི། ། སྣོད་བཟང་འབྲས་བུ་བསྐུལ་བར་བྱ། ། དེར་ནི་མེ་ཏོག་ལྡན་བུད་མེད། །

གསེར་གྱི་སྦྱོར་བ་རྙེད་དཀའ་བརྩམ། ། གྲུབ་པའི་བཅུད་ཀྱིས་བྱུགས་པ་ཡི། ། ཟླ་བ་ རང་གི་སྙིང་ཁར་བསམ། ། སྔོན་དུ་རི་ཡི་རྒྱལ་པོས་བརྒྱན། ། དེར་ནི་ཡི་གེ་ཧྲཱིཿས་བོན། ། སེམས་ཅན་དོན་ལ་གཅིག་ཏུ་འབད། ། བློ་ལྡན་དགོས་པ་ཡང་དག་བརྩམ། ། ཟངས་མའི་དངོས་པོ་སྲང་གཅིག་བཅས། ། ཟླུམ་པོ་སྣོད་བཟང་ལ་བཅུག་སྟེ། ། གཡོན་པ་བསྐུམ་ བའི་གཡས་ཟུར་གཞག ། མེད་ན་ལྕགས་ཀྱང་བྱ་བ་ཡིན། ། བརྟན་པའི་སྦྱོར་བའི་སེམས་ཀྱིས་ནི། ། དེ་ནས་བློ་ལྡན་ལས་རྣམས་བརྩམ། ། རི་རབ་ཟླ་བ་ས་བོན་རྒྱལ། ། ཞུ་འགྱུར་ཐེ་ཚོམ་མེད་པ་ཡིན། ། སྣོད་བཟང་དེར་ནི་ངལ་བསོས་པས། ། འབོ་བའི་སྦྱོར་བས་འཛག་པ་ ཉིད། ། བཟང་པོས་མྱུར་དུ་རབ་བླངས་ཏེ། ། མཁས་པ་ཡིས་ནི་བྱུག་པར་བྱ། ། རྡོག་པོ་བྱུགས་པ་ཙམ་གྱིས་ནི། ། མེ་ཡི་ནང་དུ་གཞུག་བྱ་ཞིང་། ། དེ་ནས་ཤེས་རབ་ཅན་བལྟས་ན། ། གསེར་དུ་འགྱུར་བ་ཐེ་ཚོམ་མེད། ། དེ་ནི་མི་ཤ་གཅིག་གིས་ནི། ། སྲང་བརྒྱ་རུ་ནི་འགྱུར་བ་ཡིན། ། དེ་ལྟར་གསེར་གྱི་སྦྱོར་བ་མཆོག ། འཇིག་རྟེན་གསུམ་ནའང་རྙེད་པར་དཀའ། ། གལ་ཏེ་སྨན་ཆེན་ཚད་མིན་ན། ། དེ་ཚེ་སངས་རྒྱས་ཚད་མ་ཡིན། ། རྒྱུད་ཀྱི་རྒྱལ་པོ་ཆེན་པོ་འདིར། །

དངོས་པོ་གང་དང་གང་གསུངས་པ། ། སངས་རྒྱས་ཐོད་པའི་སྦྱོར་བ་ཡིས། ། དེ་དག་ཐམས་ཅད་ བདེན་པར་འགྱུར། ། གང་ཞིག་འདི་ཚད་མིན་སྨྲ་བའི། ། བློ་གྲོས་ཆེན་པོ་ཐོས་ལྡན་པ། ། ཇི་སྲིད་སངས་རྒྱས་བཞུགས་ཀྱི་བར། ། དེ་དག་ཐམས་ཅད་དམྱལ་བར་འགྲོ། ། སྨན་འདི་ཙམ་གྱིས་མ་གྲུབ་ན། ། ཆོས་ཕུང་བརྒྱད་ཁྲི་བཞི་སྟོང་དང་། ། བླ་ མེད་རྣལ་འབྱོར་མ་རྣམས་ཀྱི། ། དེ་དག་ཐམས་ཅད་{བརྫུན་,རྫུན་}པར་འགྱུར། ། མཚམས་མེད་ལྔ་ནི་བྱེད་པ་དང་། ། སེམས་ཅན་སངས་རྒྱས་ཆོས་ལ་འཚེ། ། སྨན་གྱིས་མཆོག་ནི་འགྲུབ་འགྱུར་བ། ། སྡད་ཅིག་དེ་ལ་ཐེ་ཚོམ་མེད། ། སེམས་ཅན་དོན་ལ་གཅིག་ཏུ་འབད། ། སྒོམ་ ལྡན་འགྲུབ་པ་ལྟ་ཡི་སྨོས། ། སྨན་མཆོག་གསེར་དང་དངུལ་དུ་འགྱུར། ། ཇི་སྲིད་སངས་རྒྱས་ཡེ་ཤེས་ཡོད། ། མི་ནི་བསྐལ་བ་བྱེ་བར་འཚོ། ། དེ་ནས་ཡང་དག་རབ་བཤད་པ། ། མོ་ཤམ་རྣམས་ཀྱི་བུ་མེད་པ། ། ཡང་དག་སྦྱོར་བས་བཀྲུས་ཙམ་གྱིས། ། སྐད་ཅིག་དེ་ལ་ བུ་ལྡན་འགྱུར། ། སྔོན་གྱི་གཙོ་བོས་ཇི་སྐད་གསུངས། ། ཁྲུས་ཀྱི་ཆོ་ག་རབ་ཏུ་བཤད། ། ཁ་དོག་ལྔ་ཡི་རྡུལ་ཚོན་ནམ། ། ཡང་ན་རྡུལ་ཚོན་དཀར་པོ་ཡིས། ། དཔག་དཀའ་སྐྲག་པར་བྱེད་པ་ཡི། །

དཀྱིལ་འཁོར་འཇིགས་པ་བྲི་བར་བྱ། ། དེར་ནི་བུམ་པ་ལྟོ་ཆེ་བ། ། ཟླུམ་ པོ་བཞི་ནི་གཞག་པར་བྱ། ། ཤེས་རབ་ཅན་གྱིས་ཆུ་ཡིས་དགང་། ། རས་ཀྱིས་ཀྱང་ནི་དཀྲི་བར་བྱ། ། རང་གི་ཁྲག་གིས་མཚན་མ་བྲི། ། བུད་མེད་མོ་ཤམ་དེ་ཡི་ནི། ། ཁམས་ཀྱི་གཙོ་བོ་བླངས་ནས་ནི། ། མཁས་པས་བུམ་པའི་ཁ་ལ་བྱུག ། དེ་ནས་ཁྲག་འཐུང་གོ་འཕང་ལ། ། གནས་པ་བསྒོམ་པའི་མཆོག་ལྡན་པས། ། ནག་པོ་དམར་མོ་འཇིགས་ཆེན་པོ། ། རྡོ་རྗེ་ཧཱུྃ་ལས་པད་དག་བྱུང་། ། འཇིགས་པའི་མེ་ལྟར་འཇིགས་བྱེད་པ། ། ཞལ་གཅིག་བ་ལ་ཕྱག་བཞི་པ། ། བླ་མ་འཇིགས་པའི་གར་བྱེད་ཅིང་། ། མཁས་པས་ཧཱུྃ་ནི་སྒྲོགས་བཞིན་པ། ། བློ་ལྡན་ བུམ་པའི་ནང་དུ་བསམ། ། དེ་ནས་རལ་གྲི་འཛིན་པ་ཡི། ། སྐྱེས་པ་བཞི་པོ་གྲགས་ཆེན་པོ། ། ཁྲོ་བོ་གཞན་གྱི་སེམས་དང་ལྡན། ། འཇིགས་ཆེན་སྐྱེས་བུ་དེ་རྣམས་ཀྱིས། ། རལ་གྲིས་ནམ་མཁར་བསྣུན་ཅིང་གསོད། ། སངས་རྒྱས་ཐོད་པའི་སྦྱོར་བ་དང་། ། འདི་ལྟ་བུ་ཡི་སྦྱོར་ལྡན་པས། ། དེ་བཞིན་དུ་ནི་བུད་མེད་བཀྲུ། ། སྐད་ཅིག་དེ་ལ་བཀྲུས་ཙམ་གྱིས། ། བུད་མེད་བུ་དང་ལྡན་པར་འགྱུར། །

སངས་རྒྱས་ཐོད་པ་ཞེས་བྱ་བ་རྣལ་འབྱོར་མའི་རྒྱུད་བླ་ན་མེད་པ་གསང་བའི་ཡང་ཤིན་ཏུ་གསང་བ་ལས་སྨན་ཆེན་པོ་ཁྱད་པར་ཅན་དང་། མོ་ཤམ་གྱི་ཁྲུས་ཀྱི་ཆོ་གའི་ལེའུ་སྟེ་བཅུ་ པའོ། ། ། ། དེ་ནས་ཡང་དག་རབ་བཤད་པ། ། མཁའ་ལྡིང་སྦྱོར་ལས་བྱུང་བའི་ལེའུ། ། སྔོན་དུ་གསུངས་པའི་ཆོ་ག་ཡིས། ། མཁས་པས་དཀྱིལ་འཁོར་བྲི་བར་བྱ། ། བློ་ལྡན་ཧེ་རུ་ཀ་དང་ནི། ། ཀུན་ནས་རྣལ་འབྱོར་མ་བརྒྱད་བསྐྱེད། ། མཚན་མ་ཕྱག་སོགས་ སྔོན་གསུངས་བཞིན། ། ཁ་དོག་དཀར་པོ་འབའ་ཞིག་ཉིད། ། ཕྱོགས་ཀྱི་རྣལ་འབྱོར་མ་དཀར་ཞིང་། ། མཚམས་ཀྱི་དམར་པོ་ཉིད་ཡིན་ནོ། ། སྔོན་དུ་གསུངས་པའི་ཆོ་ག་ཡིས། ། མཁས་པས་དཀྱིལ་འཁོར་བྱིན་གྱིས་བརླབ། ། བུམ་པ་རྣམ་པ་བཞི་པོ་ལ། ། སྔོན་གསུངས་ཕྱག་ མཚན་བྲི་བར་བྱ། ། རིག་པ་འཛིན་པའི་སྦྱོར་བ་ཡིས། ། ཕྱིས་ནི་སློབ་མ་རྗེས་སུ་གཟུང་། ། སྔོན་གྱི་ཆོ་གས་གསོལ་བཏབ་སྟེ། ། སྦྱིན་དང་ཚོགས་ཀྱི་འཁོར་ལོ་དང་། ། དེ་ནས་དཀྱིལ་འཁོར་མཆོད་པར་བྱ། ། སླར་ཡང་གསང་སྔགས་འདི་ཡིས་ནི། ། སློབ་མ་རྗེས་སུ་གཟུང་བར་ བྱ། ། ས་སྟེངས་ན་ནི་དུས་ཟིན་ལ། ། ཅུང་ཟད་གསོ་བར་མི་ནུས་ཏེ། ། ནམ་མཁའ་ལྡིང་ཅན་གྱིས་བཏང་ཞིང་། །

དུས་སུ་ཟིན་ཅེས་སྨྲ་བ་ནི། ། སངས་རྒྱས་ཐོད་པའི་རྣལ་འབྱོར་པ། ། བློ་ལྡན་དེ་ནས་ལས་བརྩམ་མོ། ། བདག་ཉིད་ཧེ་རུ་ཀར་གྱུར་ཅིང་། ། ཀུན་ནས་རྣལ་འབྱོར་མ་ བརྒྱད་དེ། ། དེ་ཀུན་སྐུ་ནི་དཀར་པོ་རུ། ། ཆོ་ག་བཞིན་དུ་སྦྱར་བར་བྱ། ། འབྲས་བཏགས་རང་བཞིན་བླངས་ནས་ནི། ། རིག་པ་འཛིན་པ་གཉིས་བྱའོ། ། ཤིན་ཏུ་མཉམ་པར་གཞག་པ་ཡིས། ། དེ་ཡི་ལག་པར་རལ་གྲི་སྦྱིན། ། དེ་ཡི་སྙིང་གར་སྔགས་བཞུགས་པ། ། འདབ་ མ་གང་དང་གང་དེ་ལ། ། མར་ཁུ་ཆེ་བྱས་སྣག་ཚ་དང་། ། མཁས་པས་སྔགས་ནི་བྲི་བར་བྱ། ། ཨོྃ་བུདྡྷ་ཀ་པཱ་ལེ་ནི་ཧྲཱིཿཨོྃ་ཀ་པཱ་ལ་ནི་བཛྲི་ཎི་ཨཿ བི་དྷྭཾ་ས་ཡ་སརྦྦ་ནཱ་ག་ན་ཨུ་ད་པ་ཡ་དྱ་དྷ་ར་ནི། བི་བྷ་བ་ཡ་ཀ་ལ་ད་ཤ་ན། བྷོ་བྷོ་བྷ་ག་པ་ཏི། བུདྡྷ་ཀ་པཱ་ལ་ནཱི། སརྦྦཱ་ན་ཎ་ཀྵ་ཡྃ་ཀ་ རཱི་ཧ་ཧ་ཧ་སྭཱ་ཧཱ། རིག་པ་འཛིན་པའི་སྔགས་སོ། ། དེ་ལྟར་ཡོངས་སུ་རྫོགས་ནས་ནི། ། འདབ་མ་སྙིང་ཁར་གཞུག་པར་བྱ། ། གསང་སྔགས་འདི་དང་ལྕུག་མ་ཡིས། ། ལན་བདུན་བར་དུ་སྤྱན་དྲང་ངོ་། ། ཨོྃ་བུདྡྷ་ཀ་པཱ་ལི་ནི་གྷ་ཊ་གྷ་ཊ། གྷ་ཌ་གྷ་ཌ་ཧྲི་ཧྲི་ ཧཿཧཿ། ཧེ་ཧེཿཧྃ། ལན་བདུན་བསྔགས་པ་ཙམ་གྱིས་ནི། ། རིག་པ་འཛིན་པ་རྣམ་པ་གཉིས། །

བར་སྣང་དུ་ནི་ལྡིང་འགྱུར་ཏེ། ། གཅིག་ནི་དུམ་བུ་དུམ་བུ་རུ། ། ས་ལ་ལྟུང་བ་རུ་ནི་འགྱུར། ། དུས་ཟིན་འདིར་ལངས་ཐེ་ཚོམ་མེད། ། གཞན་ཡང་སྟོར་བ་རྙེད་དཀའ་གང་། ། བད་ སྟེགས་ལ་སོགས་{བཅྭ་,བཅོ་}ལྔ་པོ། ། གླེགས་བམ་ལ་ནི་བྲི་མ་བྱས། ། བླ་མའི་དྲིན་ལས་ཤེས་པར་བྱ། ། སངས་རྒྱས་ཐོད་པ་ཞེས་བྱ་བའི་རྣལ་འབྱོར་མའི་རྒྱུད་བླ་ན་མེད་པ་གསང་བའི་ཡང་ཤིན་ཏུ་གསང་བ་ལས་རིག་པ་འཛིན་པའི་སྦྱོར་བའི་མན་ངག་ངེས་པའི་ལེའུ་སྟེ་བཅུ་གཅིག་པའོ། ། ། ། དེ་ནས་ཕྱག་ན་རྡོ་རྗེས་རྣལ་འབྱོར་མ་སྣ་ཚོགས་སྡེ་མ་ལ་ཡང་དང་ཡང་དུ་ཕྱག་འཚལ་ཏེ། འདི་སྐད་ཅེས་གསོལ་ཏོ། ། རྣལ་འབྱོར་མ་ཡི་གཙོར་གྱུར་པ། ། ཤེས་རབ་ཆེན་པོའི་ལྷ་མོ་ལེགས། ། ཁྱོད་ཀྱིས་གསུངས་པའི་སྦྱོར་བ་གང་། ། འཇིག་རྟེན་ན་ཡང་རྙེད་པར་དགའ། ། བདག་ གིས་རྒྱུད་ཀུན་མཐོང་མོད་ཀྱི། ། སྦྱོར་བ་འདི་དག་རྙེད་པར་དཀའ། ། རྒྱུད་འདིར་ཁྱོད་ཀྱིས་གང་གསུངས་པ། ། སངས་རྒྱས་ཀུན་གྱིས་མ་བཤད་དོ། ། ཨེ་མའོ་སེམས་ཅན་དོན་ལ་བརྩོན། ། ཨེ་མའོ་སངས་རྒྱས་ཀུན་སྐྱེད་མ། ། ཨེ་མའོ་ཕྱག་རྒྱ་ཆེ་ལ་བརྩོན། ། སྔགས་རྣམས་ ཀུན་གྱི་རབ་སྦྱོར་མ། ། ཤིན་ཏུ་རྙེད་དཀའ་གང་ཡིན་དེས། །

རྣལ་འབྱོར་པ་གང་ངོ་མཚར་བ། ། སྣ་ཚོགས་བྱེད་འགྱུར་ལྷ་མོ་གསུངས། ། དང་པོའི་ལེའུ་གང་གང་གསུངས། ། སྦྱོར་དེ་ལྷ་མོས་བདག་ལ་ཤོད། ། འདི་ལྟ་བུ་ཡི་ཚིག་གསན་ནས། ། རྣལ་འབྱོར་མ་ནི་སྣ་ཚོགས་ སྡེ། ། བཞད་ཅིང་ཤིན་ཏུ་བཞད་པ་ཡིས། ། ལྷ་རྣམས་ཅད་སྒྲག་པ་དང་། ། བདུད་སྡེ་ཐམས་ཅད་འབྲོས་པ་དང་། ། བགེགས་རྣམས་ཐམས་ཅད་འཇིག་པར་འགྱུར། ། ཨེ་མའོ་བཞད་པའི་ངེས་པ་ཡིས། ། རྒྱལ་བའི་མཆོག་ཀུན་ངོ་མཚར་རོ། ། གསུངས་པ། རྒྱལ་མཚན་ འཕྱང་བ་བླངས་བྱས་ལ། ། དེ་ཡི་ཤ་ཡང་བླང་བྱ་ཞིང་། ། དེ་ཡི་རྐེད་ཆའི་རུས་པ་ནི། ། བླངས་ནས་ཐ་བ་ཁུང་དུ་ནི་བྱ། ། དེ་ཡི་ཐོད་པའི་རྗེས་བཟུང་སྟེ། ། རྒྱུས་བསྡོང་བུར་བྱས་ཏེ་གཞག ། དེ་ཡི་མར་ཁུས་དགང་བྱ་ཞིང་། ། ཐབ་ཁུང་གྲུ་གསུམ་སྟེང་དུ་གཞག ། གཞན་ཡང་དུད་པ་ འབེབས་པ་དང་། ། ཇི་སྲིད་དུད་པ་ཆགས་ཀྱི་བར། ། སངས་རྒྱས་ཐོད་པའི་རྣལ་འབྱོར་བས། ། གསང་སྔགས་འདི་ནི་བཟླས་པར་བྱ། ། ཨོྃ་བུདྡྷ་ཀ་པཱ་ལི་ནི་བྷ་ར་བྷ་ར། དྷ་དྷ་ར། དྷ་དྷ་ར། དྷ་རཱ་པ་ཡ་དྷ་རཱ་པ་ཡ། ཤོ་ཥ་ཡ། ཤོ་ཥ་ཡ། ཏ་པ་ཡ་ཏ་པ་ཡ།

ཏྲཱྃ་ཏྲཱྃ་ཨོྃ་མྃས་ར་དྷཱ་ཀུ་རུ་ ཀུ་རུ་བྷོ་བྷ་ག་པ་ཏེ་བུདྡྷ་ཀ་པཱ་ལ་སྱ་ཛྙཱ་མ་ལཾ་གྷ་ཡ་ཤཱི་གྷྲཾ་ཀ་ཛ་ལ་པ་ཏཾ། པ་ཏ་ཡ་པ་ཏ་ཡ། ཏྲཱྃ་ཏྲཱྃ་ཨ་ཧཱུྃ་སྟམ་བྷ་ཡ་བྷོ་བྷ་ག་བ་ཏི་ཧཱུྃ་ཨྃ་ཕཊ། འདི་ལྟར་སྔགས་ཀྱི་རྒྱལ་པོ་ཡིས། ། འཇིག་རྟེན་གསུམ་ཡང་སྐེམས་པར་བྱེད། ། འབྱུང་པོ་རོ་ལངས་མཁའ་འགྲོ་མ། ། སྲིན་པོ་ཤ་ ཟ་ལ་སོགས་དང་། ། གཞན་ཡང་རུང་སྟེ་བགེགས་དེ་རྣམས། ། ཐོས་པ་ཙམ་གྱིས་འབྲོས་པར་འགྱུར། ། ཇི་སྲིད་དུད་པ་མ་བབས་པ། ། དེ་སྲིད་སྔགས་ནི་བཟླ་བར་བྱ། ། དུད་པ་བསམ་ཐག་ཏུ་ནི། ། ལག་པ་གཉི་གས་གཟུང་བར་བྱ། ། དེ་ནས་བློ་ཆེན་རྣལ་འབྱོར་པས། ། རོལ་ རྩེད་ཕྲེང་བ་བཏུང་བར་བྱ། ། བུ་མོ་ལོ་ནི་བཅུ་དྲུག་མ། ། ལང་ཚོའི་གཟུགས་ལ་བརྩེ་བ་ཅན། ། འདི་ནི་རྣལ་འབྱོར་པ་ཡིས་སྤྱད། ། གཅིག་ཏུ་སེམས་ཅན་དོན་འབད་པ། ། གཅེར་བུ་སྐྲ་གྲོལ་གྱུར་པ་ཡི། ། མཁས་པས་ཧི་ཧིའི་སྔགས་བཏོན་ཏེ། ། རོལ་རྩེད་ཕྲེང་མ་བཏུང་བར་ བྱ། ། དེ་ཡི་རྗེས་ལ་རྩེ་འཇོ་བརྩམ། ། ཤིན་ཏུ་བཞད་གྱུར་ཕེད་མཛད་པའི། ། བརྩེ་བ་ཆེན་པོའི་ལག་གཡོན་དུ། ། དུད་ཆེན་མཆོག་ནི་གཞག་པར་བྱ། ། སྦྱོར་བ་ལ་ནི་མཁས་པ་ཡིས། ། ཕྱིས་ནི་པགས་ཀྱིས་བྱ་བ་བྱ། །

པདྨ་ལས་བྱུང་རྫས་གང་ཞིག ། དེ་ཉིད་ཀྱིས་ནི་དུད་ པ་མཉེ། ། མིང་མེད་མཐེ་བོས་མེ་ཏོག་སྦྱིན། ། རིལ་བུ་བརྒྱ་དང་རྩ་བརྒྱད་བྱ། ། རིལ་བུ་རེ་རེ་རེ་རེ་ལ། ། གསང་སྔགས་བརྒྱ་དང་རྩ་བརྒྱད་བཟླ། ། ཨོྃ་བུདྡྷ་ཀ་པཱ་ལི་ནི་ཏྲཱྃ་ཧྲཱིཿཧཱུྃ་ཕཊ། འཇིག་རྟེན་གསུམ་ན་རྙེད་དཀའ་ཞིང་། ། རྒྱུད་རྣམས་ཀུན་ཏུ་རྙེད་དཀའ་བ། ། རྣལ་འབྱོར་ མས་ཀྱང་རྙེད་དཀའ་བའི། ། སྔགས་འདི་ཡིས་ནི་དུད་པ་བསྒྲུབ། ། སྲིན་ལག་གི་ནི་སོར་མོ་ཡིས། ། མིག་ལ་དུད་པ་བྱུགས་ཙམ་གྱིས། ། སྟོང་གསུམ་རྡུལ་ཕྲན་ལྟ་བུ་ཡི། ། སངས་རྒྱས་ཐམས་ཅད་མཐོང་བར་འགྱུར། ། དཔག་ཚད་འབུམ་ཕྲག་བརྒྱད་ ཅུ་ཡི། ། སྟེང་དང་འོག་ནི་མཐོང་བར་འགྱུར། ། ལག་པ་གཡོན་པས་མཉེས་ཙམ་གྱིས། ། སྐད་ཅིག་དེ་ལ་རྣལ་མར་འགྱུར། ། མཛུབ་མོས་བྱུགས་བ་ཙམ་གྱིས་ནི། ། རྒྱུ་དང་མི་རྒྱུ་མཐོང་འགྱུར་ཏེ། ། འབྱུང་པོ་{ཡི་དགས་,ཡི་དྭགས་}ཤ་ཟ་དང་། ། གཞན་ཡང་གྲུབ་པ་རྣམས་དང་ནི། ། དཔག་ཚད་བྱ་བ་སྟོང་ཕྲག་གི། ། སྟེང་དང་འོག་ནི་མཐོང་བར་འགྱུར། ། ལག་པ་གཡོན་པས་མཉེས་ཙམ་གྱིས། ། རྣལ་མར་འགྱུར་བར་ཐེ་ཚོམ་མེད། ། གུང་མོས་བྱུགས་པ་ཙམ་གྱིས་ནི། ། ཤིན་ཏུ་ངོ་མཚར་བྱེད་འགྱུར་ཏེ། །

ཕེག་བརྡབས་བདུན་གྱི་སྒྲ་ཚད་དུ། ། ནག་པོ་འབར་ བྱེད་རྩེ་མོ་ཡིས། ། སྤྲིན་རྣམས་ཐམས་ཅད་འཐོར་བར་འགྱུར། ། འདི་ལྟའི་དུད་པ་རྙེད་པར་དཀའ། ། ལག་པ་གཡོན་པས་མཉེས་ཙམ་གྱིས། ། སྐད་ཅིག་དེ་ལ་མི་རུ་འགྱུར། ། མཐེ་བོང་གིས་ནི་དུད་པ་ཡི། ། བདག་ཉིད་ཆེན་པོ་བྱུགས་ཙམ་གྱིས། ། གཟུགས་བརྙན་མཚན་ མ་རི་དང་ཤིང་། ། གཞན་དག་གང་ཡང་རུང་པ་རྣམས། ། ཁྲོ་བོའི་ལྟ་བས་བལྟས་ཙམ་གྱིས། ། དུམ་བུ་སྟོང་དུ་འགྱུར་བ་ཡིན། ། གཡོན་པས་མཉེས་པ་ཙམ་གྱིས་ནི། ། རྣལ་མར་འགྱུར་བར་ཐེ་ཚོམ་མེད། ། མཐེའུ་ཆུང་གིས་ནི་མིག་བྱུ་གསན། ། སྐད་ཅིག་དེ་ལ་མི་སྣང་འགྱུར། སངས་རྒྱས་ཀྱིས་ཀྱང་གཟིགས་མི་འགྱུར། ། སྐད་ཅིག་སུམ་ཅུ་གསུམ་དུ་འཁོར། ། མཛོད་དང་བུད་མེད་རྫས་ཉིད་དང་། ། དངོས་པོ་གང་དང་གང་འདོད་པ། ། དུད་པའི་བདག་ཉིད་ཆེན་པོ་ཡིས། ། སྐད་ཅིག་དེ་ལ་འཕྲོག་པར་འགྱུར། ། འདི་ལྟ་བུ་ཡི་དུད་མཆོག་གི། ། སྦྱོར་བ་སྣ་ ཚོགས་ལེགས་པར་བཤད། ། དེ་ནི་མིག་ལ་བྱུགས་ཙམ་གྱིས། ། རང་གི་གཟུགས་ནི་བསྒྱུར་བར་བྱེད། ། དུད་པ་འདི་ནི་བྱུགས་ཙམ་གྱིས། ། རིག་པ་འཛིན་པའི་གཙོ་བོར་འགྱུར། ། བྱ་རོག་འུག་པ་བྱ་རྒོད་དང་། །

སྤྲུལ་དང་ཁྱི་དང་ཅེ་སྤྱང་དང་། ། སྟག་དང་གུང་དང་བྱི་ལ་དང་། ། སྤྲང་བུ་གླང་པོ་བོང་བུ་རུ། ། དེ་ལྟར་དུད་པ་ཆེན་པོ་ཡིས། ། སྣ་ཚོགས་པ་ཡི་ལས་བྱེད་པའོ། ། ཀུན་ལ་ལས་ཀུན་ཡོད་མོད་ཀྱི། ། སྦྱོར་བ་འབའ་ཞིག་རྙེད་པར་དཀའ། ། སྦྱོར་བ་གླེགས་བམ་ལ་མ་བྲིས། ། བླ་མའི་ཞལ་ནས་ཤེས་པར་བྱ། ། དེ་ནས་ཡང་དག་རབ་བཤད་ དེ། ། སྦྱོར་བ་ཤིན་ཏུ་རྙེད་དཀའ་བ། ། སྔགས་དང་རུས་པའི་སྦྱོར་བ་ཡིས། ། རྟག་ཏུ་སྣ་ཚོགས་ལས་བྱེད་དོ། ། གླང་པོའི་རུས་པས་བསད་པའི་སྦྱོར་བ་བྱའོ། ། ཨོྃ་བུདྡྷ་ཀ་པཱ་ལི་ནཱི་ཧྲཱིཿ ཧཱུྃ། རྟ་ཡི་རུས་པས་བསྐྲད་པ་རྙེད་པར་དཀའ་བ་བྱའོ། ། ཨོྃ་བུདྡྷཱ་ཀ་པཱ་ལི་ནཱི་ཁྃ་ཧྲཱིཿ ཧཱུྃ་ ཕཊ། བ་ལང་གི་རུས་པས་དགྲའི་སྙིང་གར་ཕུར་བུ་གདབ་པར་བྱའོ། ། ཨོྃ་བུདྡྷ་ཀ་པཱ་ལི་ནཱི་ཏྲཱྃ་ཧྲཱིཿ ། ཁྱིའི་རུས་པས་རེངས་པ་ཆེན་པོ་བྱ་བར་གསུངས་སོ། ། ཨོཾ་བུདྡྷ་ཀ་པཱ་ལི་ནཱི་ཨཱཿ ཧཱུྃ་ཕཊ། རུས་པ་ཆེན་པོས་ནི་དགུག་པར་བྱའོ། ། ཨོྃ་བུདྡྷ་ཀ་པཱ་ལི་ནཱི་ཧྲཱིཿ བཽ་ཥཊ། བོང་ བུའི་རུས་པས་རྨོངས་པར་བྱའོ། ། ཨོྃ་བུདྡྷ་ཀ་པཱ་ལི་ནཱི་བྲུྃ་ཧཱུྃ། འུག་པའི་རུས་པས་དབང་དུ་བྱའོ། ། ཨོྃ་བུདྡྷ་ཀ་པཱ་ལི་ནཱི་ཏྲཱྃ་ཧྲཱིཿ ཧཱུྃ།

བྱ་རྒོད་ཀྱི་རུས་པས་དབྱེ་བར་བྱའོ། ། ཨོྃ་བུདྡྷ་ཀ་པཱ་ལི་ནཱ་ཧཱཿ ཕཊ་ཧཱུྃ། བོང་བུའི་རུས་པས་རེངས་པར་བྱའོ། ། ཨོྃ་བུདྷཱ་ཀ་པཱ་ལི་ནཱི་ བཛྲི་ཎི་ཏྲྃ། ཅེ་སྤྱང་གི་རུས་པས་གཡུལ་ལས་རྒྱལ་བར་བྱེད་དོ། ། ཨོཾ་བུདྡྷ་ཀ་པཱ་ལི་ནཱི་བྷ་ག་བ་ཏི་དྷ་ར་དྷ་ར་ཧ་ཧེ་ཧོ་ཧ་ཧ། མ་ཧེའི་རུས་པས་དགའ་ཞིང་རྩེ་བས་ལོ་བཅུ་གཉིས་སུ་ཉིན་དང་མཚན་དུ་དེའི་བྱང་ཆུབ་སེམས་མི་ལྟུང་ངོ་། ། ཨོྃ་བུདྡྷ་ཀ་པཱ་ལི་ནཱི་ར་མ་ར་མ་ཀྲི་ཊ་ཀྲི་ཊ་ཧ་ཧ། སྦྲུལ་གྱི་རུས་པས་ཤིང་རྩད་ནས་འདོན་ནོ། ། ཨོྃ་བུདྡྷ་ཀ་པཱ་ལི་ནཱི་ཏ་ཊ་ཏ་ཊ། ཏྲ་ཏ་ཡ་ཏྲ་ཏ་ཡ། མ་ཏ་སྥོ་ཊ་ཡ་སྥོ་ཊ་ཡ། ཨུདྤ་ཊ་ཡ་ཧཱུྃ་ཕཊ། སྟག་གི་རུས་པས་རི་འདེགས་པར་བྱེད་དོ། ། ཨོྃ་བུདྡྷ་ཀ་པཱ་ལི་ནཱི། གྷ་ར་གྷ་ར། མ་ཊ་མ་ཊ་ཏྲ་ཊ་ཡ་ཏྲ་ཊ་ཡ། གྷ་ཊཱ་པ་ཡ་གྷ་ ཊཱ་བ་ཡ། སྥོ་ཊ་སྥོ་ཊ་མོ་ཊ་མོ་ཊ་ཡ་སཾ་ཀྲ་མ་ཡ་ཧྲཱིཿ ཧཱུྃ་ཏྲྃ་ཕཊ། ལྕགས་ཀྱུས་ནི་ནགས་སྟུག་པོ་སྟོང་པར་བྱེད་དོ། ། ཨོྃ་བུདྡྷ་ཀ་བཱ་ལི་ནཱི་བཛྲེ་ནཱ་ཤ་ཡ་མ་ར་ཡ་གྷུ་ཊ་གྷུ་ཊི་ནི་སརྦྦ་བི་ན་ཡ་ཏི་ན་ཧྲི་ཡེ་ཡཾ་ཏ་ཌ་ཡ་བྷི་ཏྲཱ་པ་ཡ་ཙ་མཾ་ཙ་མཾ། བྷྲ་མ་ཡ་བྷྲ་མ་ཡ། བྷོ་བྷ་ག་བ་ཏི་ཨྃ་ཨྃ་ཏ་ཊ་ ཧཱུྃ་ཕཊ།

སེམས་གཅིག་དྲི་མེད་མེ་ལོང་བཞིན། ། གང་བསམས་དེ་ཡང་གཟུགས་བརྙན་དང་། ། རྨི་ལམ་ལྟ་བུར་ཤེས་མོད་ཀྱི། ། འོན་ཀྱང་རྣམ་པར་རྟོག་པས་བཟུང་། ། སངས་རྒྱས་ཐོད་པ་ཞེས་བྱ་བའི་རྣལ་འབྱོར་མའི་རྒྱུད་བླ་ན་མེད་པའི་ གསང་བའི་ཡང་ཤིན་ཏུ་གསང་བ་ལས་སྔགས་སྣ་ཚོགས་ཀྱི་རབ་ཏུ་སྦྱོར་བའི་ལེའུ་སྟེ་བཅུ་གཉིས་པའོ། ། ། ། དེ་ནས་ཡང་དག་རབ་བཤད་པ། ། རྣམ་དག་ལེའུ་རབ་རྙེད་དཀའ། ། ནེ་ནེ་མོ་དང་ཚ་མོ་དང་། ། མ་དང་བུ་མོ་ཆུང་མ་ཉིད། ། གལ་ཏེ་ཕྱག་རྒྱ་ཆེ་འདོད་ ན། ། ཤེས་རབ་ཅན་གྱིས་འདི་དག་སྤྱད། ། གཡུང་མོ་དང་ནི་གར་མཁན་མ། ། ཁྲུས་མཁན་མ་དང་གཏུམ་མོ་ཡི། ། བུ་མོ་ཀོ་བ་བྱེད་པར་གསུངས། ། བློ་དང་ལྡན་པས་འདི་དག་སྤྱད། ། དེ་ལྔ་རྣལ་འབྱོར་མ་ཡི་མཆོག ། དེ་ནས་ཡང་དག་རབ་བཤད་པ། ། མ་དག་པ་ཡི་སེམས་སྦྱང་ཕྱིར། ། མིག་ནི་སྲིང་མོར་གྱུར་པ་སྟེ། ། རྣ་བ་ཚ་མོ་ཉིད་ཡིན་ནོ། ། སྣ་ནི་མ་རུ་འགྱུར་བ་སྟེ། ། ལྕེ་ནི་བུ་མོ་ཉིད་ཡིན་ནོ། ། ཡིད་ནི་ཆུང་མར་འགྱུར་བ་སྟེ། ། ལྔ་པོ་དེ་རྣམས་མཆོག་ལྷ་མོ། ། ཕྱག་རྒྱ་ཆེན་པོ་རབ་སྟེར་མའོ། ། གཏི་མུག་གར་ མཁན་མ་རུ་འགྱུར། ། ཞེ་སྡང་གཡུང་མོ་ཉིད་ཡིན་ནོ། །

འདོད་ཆགས་ཁྲུས་མཁན་མ་ཡིན་ཏེ། ། ང་རྒྱལ་གཏུམ་མོ་ཉིད་ཡིན་ནོ། ། ཕྲག་དོག་ཀོ་བ་བྱེད་མའོ། ། ལྔ་པོ་དེ་རྣམས་བུད་མེད་མཆོག ། གཟུགས་ལས་གཏི་མུག་སྐྱེ་བ་སྟེ། ། སྒྲ་ལས་ཞེ་སྡང་སྐྱེ་བ་ ཡིན། ། དྲི་ལ་ལོངས་སྤྱད་པས་འདོད་ཆགས། ། རོ་ལས་ང་རྒྱལ་ཉིད་ཡིན་ཏེ། ། རེག་བྱ་ལས་ནི་ཕྲག་དོག་སྐྱེ། ། སེམས་ཀྱི་དག་པ་ཉིད་ཡིན་ནོ། ། ད་ཕྱིར་རྣལ་འབྱོར་བློ་ཆེན་གྱིས། ། ཤིན་ཏུ་སྦྱོར་བའི་སེམས་ཀྱིས་ནི། ། སྐྱེས་འདིར་དངོས་གྲུབ་མ་ཐོབ་ཀྱང་། ། སྐྱེ་གཞན་སྲིད་པར་དངོས་གྲུབ་འཐོབ། ། ཇི་ལྟར་དངོས་པོ་མེད་པར་བསྒོམ། ། ཇི་ལྟར་དངོས་པོ་བསྒོམ་པར་བྱ། ། དངོས་པོ་བསྒོམ་བྱ་ཇི་ལྟར་འགྱུར། ། སྲིང་མོའི་གཟུགས་ནི་ཇི་ལྟར་ཡིན། ། དཀར་མོ་ལྗང་ཁུ་སྔོན་མོའི་མདོག ། འདི་ལྟའི་གཟུགས་དང་ལྡན་ པར་ནི། ། དག་པའི་སེམས་ཀྱིས་བལྟ་མི་བྱ། ། ཚ་མོས་ཇི་ལྟར་སྒྲ་ཐོས་པའི། ། སྒྲ་གྲག་པ་ནི་རྣམ་གསུམ་ཉིད། ། འདི་ལྟའི་སྦྱོར་དང་ལྡན་པར་ནི། ། དག་པའི་སེམས་ཀྱིས་མཉན་མི་བྱ། ། རབ་སྦས་སྐྱེད་མ་གང་ཡིན་དེས། ། དྲི་ནི་རྣམ་པ་གསུམ་བལྟས་པ། ། ལྟ་ མིན་ཡིད་དང་ལྡན་པ་ལ། ། ཇི་ལྟར་འདོད་ཆགས་སྐྱེ་བར་འགྱུར། །

ལྕེ་དང་ལྷན་ཅིག་ལོངས་སྤྱོད་རྫས། ། རོ་དྲུག་མྱངས་པ་ཅི་འདྲ་བ། ། མྱངས་པས་ལོངས་སྤྱོད་ལྡན་པ་ཡི། ། མྱངས་པའི་གཟུགས་ནི་ཇི་ལྟ་བུ། ། ཡིད་ཀྱིས་ལོངས་སྤྱོད་དགའ་བདེ་ཉིད། ། ཡིད་ཀྱིས་གཉི་ ག་སྤྱད་པས་བདེ། ། དེར་ནི་རྟག་པ་ཡོད་མ་ཡིན། ། དངོས་པོ་ལས་ནི་དངོས་མེད་ཡོད། ། དངོས་མེད་ལ་ཡང་དངོས་པོ་ཉིད། ། དངོས་དང་དངོས་མེད་གཉི་ག་སྟོང་། ། འདི་དག་སེམས་ཀྱི་དག་པ་ཉིད། ། དེ་ནས་གཞན་ཡང་རབ་བཤད་པ། ། ཕྱི་ཡི་ལུས་ནི་སྦྱང་ཕྱིར་རོ། ། ལྟ་དང་ལྡན་པ་སྙིང་རྗེ་སྟེ། ། འཁྱུད་པ་བྱམས་པར་འགྱུར་བའོ། ། དྲུད་པའི་སྦྱོར་བའི་བདག་ཉིད་ནི། ། དགའ་བ་ཡན་ལག་མ་ཡི་མཆོག ། གཉི་ག་འདུས་ལས་གང་འཇོག་པ། ། དེ་ནི་བདག་གིས་བཏང་སྙོམས་གསུངས། ། དེ་ལྟར་དངོས་པོའི་སྦྱོར་ལྡན་པ། ། ཇི་ལྟར་འདོད་ཆགས་ཀྱིས་འཆིང་འགྱུར། ། མཐོང་བ་ལས་ནི་འདོད་ཆགས་སྐྱེ། ། འཁྱུད་ལས་འབྲས་བུ་ཅུང་ཟད་ཙམ། ། དྲུད་པ་ལས་ནི་དགའ་བ་སྐྱེ། ། ཀུན་གྱི་མཐའ་མར་དགའ་བྲལ་ལོ། ། དེ་ལྟར་དགའ་དང་དགའ་བྲལ་འབྲས། ། ཁམས་གསུམ་པ་ ལས་སྐྱེ་བར་འགྱུར། ། རབ་དགའ་སེམས་ཀྱི་སྦྱོར་བ་ཡིས། ། དངོས་པོ་གསུམ་གྱིས་འཆིང་མི་འགྱུར། ། བཟའ་དང་བཏུང་བ་གང་ཅིའང་རུང་།

། བདེ་བ་འབབ་པའི་ཁ་ཟས་རྣམས། ། དེ་ཀུན་བཤང་དང་གཅི་སོགས་སུ། ། རྣལ་འབྱོར་རིག་པས་རྟག་ཏུ་བརྟག ། གང་ ཅི་རུང་བའི་དགའ་རྩེ་འཇོ། ། འཁྱུད་པ་དང་ནི་འོ་བྱེད་དང་། ། ཉེད་དང་འཚིར་བ་ཉིད་ཀྱིས་ནི། ། ཕྱག་རྒྱ་ཆེན་པོའང་མཐོང་བར་འགྱུར། ། འདི་ལྟའི་བསྒོམ་དང་ལྡན་པས་ནི། ། འདི་རུ་འགྲུབ་པར་ཐེ་ཚོམ་མེད། ། རྣལ་འབྱོར་མ་ལྔས་སངས་རྒྱས་ཀྱི། ། དཔལ་དང་ཕྱག་རྒྱ་ ཆེར་སྟེར་བྱེད། ། རྣལ་འབྱོར་བ་ཡིས་དེ་མཆོད་ན། ། འདོད་པ་རྣམས་ཀྱིས་གོས་མི་འགྱུར། ། ཕྲག་དོག་ལ་སོགས་ཀྱིས་སྦགས་ཀྱང་། ། དེ་ལ་ཉེས་པས་གནོད་པ་མེད། ། རྣལ་འབྱོར་པ་ཡི་མཆོག་དེ་ཉིད། ། སྲིང་བའི་ཉེས་པས་གོས་མི་འགྱུར། ། ཇི་སྲིད་ཁམས་ནི་ཕྱི་མི་གསོར། ། སངས་རྒྱས་སྐུ་སྲིད་སྡིག་དང་བྲལ། ། བྱང་ཆུབ་སེམས་ནི་འཛག་མེད་པ། ། གང་ཚེ་ཕུན་སུམ་ཚོགས་པའི་ཤིང་། ། སངས་རྒྱས་ཐོད་པ་ཞེས་བྱ་བའི་རྣལ་འབྱོར་མའི་རྒྱུད་བླ་ན་མེད་པ་གསང་བའི་ཡང་ཤིན་ཏུ་གསང་བ་ལས་སེམས་རྣམ་ པར་དག་པའི་ལེའུ་སྟེ་བཅུ་གསུམ་པའོ། ། ། ། དེ་ནས་ཡང་དག་རབ་བཤད་པ། ། སྣ་ཚོགས་སྡེ་མས་བསྔགས་པའི་ལེའུ། ། དེ་ལྟར་ཕྱག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་རྣམས་དང་།

རི་རབ་ཀྱི་རྡུལ་ཕྲ་རབ་སྙེད་དང་མཚུངས་པའི་རྣལ་འབྱོར་ བ་རྣམས་སྤྱན་དྲངས་ཤིང་མགུ་བའི་སེམས་ཀྱིས་སྣ་ཚོགས་སྡེ་མ་ལ་བཏུད་དེ་བསྟོད་པ། ། ཨེ་མའོ་བཅོམ་ལྡན་འདས་ལྷ་མོ། ། སངས་རྒྱས་ཐམས་ཅད་སྐྱེད་བྱེད་མ། ། དཔལ་དང་གྲགས་པ་ཆེ་ཞིང་འཇིགས། ། སེམས་ཅན་ཀུན་ལ་ཕན་མཛད་མ། ། ལྷ་མོ་ སྙིང་རྗེ་ཆེ་ལྡན་མ། ། ཕྱག་རྒྱ་ཆེན་པོ་བློ་ཆེན་མ། ། དོན་ཆེན་འབྲས་བུ་སྟོན་མཛད་མ། ། སངས་རྒྱས་ཐོད་པ་ཡི་ནི་རྒྱུད། ། རྡོ་རྗེ་འཆང་གིས་སྦས་པ་དང་། ། སངས་རྒྱས་རྣམས་ཀྱིས་མ་གསུངས་ཤིང་། ། བྱང་ཆུབ་སེམས་དཔའི་ཡུལ་མིན་པ། ། གསུང་གཅིག་གིས་ ནི་གསལ་མཛད་དེ། ། དེ་ནི་ལྷ་མོ་ཁྱོད་ཀྱིས་གསུངས། ། ཨེ་མའོ་སྣོད་ཆེན་ལྷ་མོ་ཁྱོད། ། རྣལ་འབྱོར་མ་ཀུན་བསྡུས་བྱས་པ། ། དེ་བཞིན་གཤེགས་ཀུན་ཡུལ་མིན་པ། ། རྙེད་དཀའི་དངོས་གྲུབ་གང་ཡིན་པ། ། དེ་ནི་ལྷ་མོས་གསལ་བར་མཛོད། ། གསུངས་པ། རྣལ་ འབྱོར་མ་ནི་ཐམས་ཅད་ཉོན། ། བྱང་ཆུབ་སེམས་དཔའ་ཐམས་ཅད་དང་། ། འདོད་ཆགས་བྲལ་དང་བདག་ཆེན་ཉོན། ། སངས་རྒྱས་དེ་བཞིན་གཤེགས་པ་ཉོན། ། ཀླུ་དང་ལྷར་བཅས་མི་རྣམས་ཉོན། ། རྒྱུད་རྒྱལ་འདི་ནི་བཀླགས་ཙམ་གྱིས། ། བསོད་ནམས་གང་ཡིན་ དེ་ཀུན་གྱི། །

བསོད་ནམས་རྗེས་རང་ཡོངས་སུ་བསྔོ། ། ཕྱག་རྒྱ་ཆེན་པོའི་དོན་དུ་ནི། ། སངས་རྒྱས་ཡོན་ཏན་རྣམ་པ་དབུལ། ། སྔགས་དོན་ཟབ་མོ་རྣམས་དང་ནི། ། སྦྱོར་བ་ཤིན་ཏུ་རྙེད་དཀའ་བ། ། གང་ཞིག་གསལ་བྱས་བདག་བཟོད་མཛོད། ། ཤིན་ཏུ་སྦས་ པའི་ཡུལ་དེ་ཡང་། ། སེམས་ཅན་དོན་དུ་གསལ་བྱས་པས། ། རྒྱལ་བའི་མཆོག་རྣམས་བདག་བཟོད་མཛོད། ། དེ་ནས་ཡང་དག་རབ་བཤད་པ། ། སྔགས་ཀྱི་བཟླས་པ་སྟོབས་པོ་ཆེ། ། གལ་ཏེ་དངོས་གྲུབ་མཆོག་འདོད་ན། ། སངས་རྒྱས་ཐོད་སྦྱོར་བཟང་པོ་བཟླ། ། ཨོྃ་ཧྲཱིཿབུདྡྷ་ཧཱུྃ་ཀ་པཱ་ལི་ནཱི་ཨཱཿ། འཇུག་པ་ལ་ཨོྃ། འབྱུང་བ་ལ་ཧྲཱིཿ གནས་པ་ལ་བུདྡྷ། བདེ་བ་ལ་ཧཱུྃ། ནུབ་པ་ལ་ཀ་པཱ་ལི་ནཱི། ལྡང་བ་ལ་ཨཱཿའོ། ། དེ་ལྟར་བཟླས་པ་རབ་རྙེད་དཀའ། ། སངས་རྒྱས་ཐོད་པའི་སྦྱོར་ཆུད་བཟླ། ། དེ་ལྟར་ཡིད་ཀྱི་བཟླས་ལྡན་པས། ། དངོས་གྲུབ་འཐོབ་པར་ཐེ་ཚོམ་མེད། ། ཨོྃ་བུདྡྷ་ཀ་པཱ་ལི་ནཱི་ཨཱཿཧྲཱིཿཧེཿཧཱུྃ་ཕཊ། སྙིང་པོའི་སྔགས་སོ། ། ཨོྃ་བུདྡྷ་ཀ་པཱ་ལི་ནཱི་བཛྲི་ཎི་ཧོ་ཧཱུྃ། ཨ་དུར་ལ་ཀཱེ་ཧཱུྃ་ཕཊ། ཉེ་བའི་སྙིང་པོའི་སྔགས་སོ། ། དེ་ནས་ཡང་དག་རབ་བཤད་པ། ། དབང་དུས་ཆོ་ག་ཇི་བཞིན་དུ། ། སློབ་མ་དད་བརྟན་གང་ཞིག་གིས། །

ཤེས་རབ་མ་ལ་གསོལ་བ་གདབ། ། དྲི་ཞིམ་པ་ཡི་དངོས་པོ་ཡིས། ། མཎྜལ་རྣམ་པ་ལྔ་བྱས་ཏེ། ། སངས་རྒྱས་ཀུན་གྱིས་བརྒྱན་བྱས་པ། ། ལྷ་མོ་ཆེ་ལ་གསོལ་བ་གདབ། ། ཞལ་དུ་བཟའ་བའི་རྫས་མཆོག་བསྟབ། ། རྫས་དེ་རྣམས་ ནི་གསོལ་བ་དང་། ། ཡིད་ནི་ཚིམ་ཞིང་ཐུགས་དགྱེས་སོ། ། ལྷ་མོ་དགྱེས་པར་མཐོང་ནས་ནི། ། ཚིག་འདི་དག་གིས་སྨྲ་བར་བྱེད། ། རྣམ་པར་རྟོག་པ་མང་པོ་ཡིས། ། གཡོགས་པའི་བག་ཆགས་རབ་ལྡན་པ། ། འཁོར་བའི་འདམ་དུ་བྱིང་བ་བདག ། མཛེས་མ་ཁྱོད་ ཀྱིས་སྐྱོབ་པར་མཛོད། ། གྲགས་ཆེན་སྙིང་རྗེ་ལྡན་པ་ཡི། ། ལྷ་མོ་དེ་ནི་ཞི་བར་མཛོད། ། དེར་ནི་རྒྱན་རྣམས་ཐམས་ཅད་དང་། ། ལྷབ་ལྷུབ་རྒྱན་རྣམས་དབུལ་བར་བྱ། ། དད་པ་བརྟན་པའི་སེམས་ཀྱིས་ནི། ། དེ་ནས་བདག་ཉིད་དབུལ་བར་བྱ། ། སྣ་ཚོགས་ཟས་ དང་སྣ་ཚོགས་བཏུད། ། དེ་ཡི་མདུན་དུ་དབུལ་བར་བྱ། ། གང་གིས་ཤེས་རབ་མ་མཉེས་པ། ། སངས་རྒྱས་ཐམས་ཅད་ཀྱིས་ནི་མཆོད། ། འདི་ཉིད་ལ་ནི་སངས་རྒྱས་བཞུགས། ། གཞན་ཡང་དངོས་གྲུབ་གཙོ་བོ་དང་། ། སྙིང་རྗེ་ལྡན་པ་གཞན་གང་ཞིག ། མཁའ་འགྲོ་མ་ཀུན་འདི་ལ་བཞུགས། ། གང་དུ་དབང་པོ་འགགས་གྱུར་པ། ། བདག་རྟོག་རང་བཞིན་ཉམས་པ་སྟེ། །

ཀྱེ་དེ་ལྷན་ཅིག་སྐྱེས་དགར་འགྱུར། ། བླ་མའི་ཞལ་སྔར་གསལ་བར་ཞུས། ། གང་ཞིག་འཆར་དུས་ཚེ་ན་དབང་པོ་དང་། ། ཡུལ་མཉམ་ནུབ་གྱུར་དེ་ལ་ཕྱག་ འཚལ་ལོ། ། མཁས་པ་རྣམས་ཀྱི་སྙིང་སྦས་སུ་སད་པ། ། ཕྱིས་ནི་མངོན་དགའ་རྒྱལ་བའི་མཛེས་སྐུ་གཅིག ། སངས་རྒྱས་ཐོད་པ་ཞེས་བྱ་བའི་རྣལ་འབྱོར་མའི་རྒྱུད་བླ་ན་མེད་པ་གསང་བའི་ཡང་ཤིན་ཏུ་གསང་བ་ལས་སྔགས་ཀྱི་བཟླས་པ་དང་། ཤེས་རབ་མ་ལ་གསོལ་བ་ གདབ་པ་དང་། ། རྒྱུད་ཐམས་ཅད་ཀྱི་གླེང་གཞིའི་ལེའུ་སྟེ་བཅུ་བཞི་པའོ། ། ། ། འདི་གསུངས་ནས་སྣ་ཚོགས་སྡེ་མ་ལ་སོགས་པའི་རྣལ་འབྱོར་མ་ཐམས་ཅད་དང་། ཕྱག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་རྣམས་རང་རང་གི་གནས་ན་འདུག་སྟེ། ཅིའང་མི་གསུང་ བར་བཞུགས་སོ། ། སངས་རྒྱས་ཐོད་པ་ཞེས་བྱ་བའི་རྒྱུད་རྣལ་འབྱོར་མ་ཆེན་མོས་གསུངས་པ་མཆོག་ཏུ་གསང་བ་རྫོགས་སོ། ། ། ། རྒྱ་གར་གྱི་མཁན་པོ་ཤྲཱི་ག་ཡ་དྷ་ར་དང་། བོད་ཀྱི་ལོ་ཙྪ་བ་གྱི་ཇོ་ཟླ་བའི་འོད་ཟེར་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། ། ། །