༄༅༅། ། རྒྱ་གར་སྐད་དུ། གི་རི་ཨཱ་ནན་ད་སཱུ་ཏྲ། བོད་སྐད་དུ། རིའི་ཀུན་དགའ་བོའི་མདོ། འཕགས་པ་དཀོན་མཆོག་ གསུམ་ལ་གུས་པས་ཕྱག་འཚལ་ལོ། ། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་མཉན་ཡོད་རྒྱལ་བྱེད་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། ། དེའི་ཚེ་དེའི་དུས་ན་ཚེ་དང་ལྡན་པ་རིའི་ཀུན་དགའ་བོ་ནད་དམ་པོ་སྡུག་བསྔལ་བས་གཟིར་ཏོ། ། དེ་ནས་ཚེ་དང་ལྡན་ པ་ཀུན་དགའ་བོ་བཅོམ་ལྡན་འདས་ག་ལ་བ་དེར་སོང་ཞིང་ཉེ་བར་སོང་ནས་བཅོམ་ལྡན་འདས་ལ་ཕྱག་བྱས་ནས་ཕྱོགས་གཅིག་ཏུ་འདུག་གོ། ། ཕྱོགས་གཅིག་ཏུ་འདུག་ནས་ཡང་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཙུན་པ་ཚེ་དང་ལྡན་པ་རིའི་ཀུན་དགའ་བོ་ ནད་དམ་པོ་སྡུག་བསྔལ་བས་གཟིར་ཏོ། ། བཙུན་པ་བཅོམ་ལྡན་འདས་ལེགས་པར་མཛད་དུ་གསོལ། དགེ་སློང་ཚེ་དང་ལྡན་པ་རིའི་ཀུན་དགའ་བོ་ག་ལ་བ་དེར་གཤེགས་ལ་རྗེས་སུ་བརྩེ་བས་གཤེགས་པར་ཞུ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། དེར་ ཡང་ཀུན་དགའ་བོ་ཁྱོད་དགེ་སློང་རིའི་ཀུན་དགའ་བོའི་ཐད་དུ་སོང་ལ་འདུ་ཤེས་བཅུ་བཤད་པར་གྱིས་ཤིག །

རྣམ་པར་ཤེས་པ་དང་ལྡན་པའི་གནས་སུ་སྨྲ་བར་གྱིས་ཤིག ། གཞན་ཡང་དགེ་སློང་རིའི་ཀུན་དགའ་བོས་འདུ་ཤེས་བཅུ་ཐོས་ནས་ནད་ཀྱིས་གཟིར་བའི་གནས་རྣམས་ལ་སོ་སོར་རིག་པར་ འགྱུར་རོ། ། བཅུ་གང་ཞེ་ན། མི་རྟག་པའི་འདུ་ཤེས་དང་། བདག་མེད་པའི་འདུ་ཤེས་དང་། མི་གཙང་བའི་འདུ་ཤེས་དང་། བར་དུ་གཅོད་པའི་འདུ་ཤེས་དང་། སྤོང་བའི་འདུ་ཤེས་དང་། འདོད་ཆགས་དང་བྲལ་བའི་འདུ་ཤེས་དང་། འགོག་པའི་འདུ་ཤེས་དང་། འཇིག་རྟེན་ཐམས་ཅད་ལ་ མངོན་པར་མི་དགའ་བའི་འདུ་ཤེས་དང་། འདུ་བྱེད་ཐམས་ཅད་ལ་མི་རྟག་པའི་འདུ་ཤེས་དང་། འབྱུང་བ་དང་རྔུབས་པ་རྗེས་སུ་དྲན་པའི་འདུ་ཤེས་སོ། ། མི་རྟག་པའི་འདུ་ཤེས་དུ་ཞེ་ན། འདི་ནི་ཚེ་དང་ལྡན་པ་ཀུན་དགའ་བོ། ། དགོན་པ་འམ། ཤིང་དྲུང་ངམ། ཁང་པ་སྟོང་པར་སོང་ལ་འདི་ནི་སོ་སོར་རིག་ པར་བྱའོ། ། གཟུགས་མི་རྟག་པ་དང་། ཚོར་བ་མི་རྟག་པ་དང་། འདུ་ཤེས་མི་རྟག་པ་དང་། འདུ་བྱེད་མི་རྟག་པ་དང་། རྣམ་པར་ཤེས་པ་མི་རྟག་པ་སྟེ་འདི་རྣམས་ལ་ཉེ་བར་ལེན་པའི་ཕུང་པོ་ལྔ་པོ་མི་རྟག་པར་བལྟ་བར་བྱའོ། ། དེ་ལ་མི་རྟག་པའི་འདུ་ཤེས་སྟོན་ཅིག ། ཀུན་དགའ་བོ་བདག་མེད་པའི་འདུ་ ཤེས་དུ་ཞེ་ན།

འདི་ནི་དགེ་སློང་ཀུན་དགའ་བོ། ། དགོན་པ་འམ། ཤིང་དྲུང་ངམ། ཁང་པ་སྟོང་པར་སོང་ལ་འདི་ནི་སོ་སོར་རིག་པར་བྱའོ། ། མིག་བདག་མེད་པ་དང་། གཟུགས་བདག་མེད་པ་དང་། རྣ་བ་བདག་མེད་པ་དང་། སྒྲ་བདག་མེད་པ་དང་། སྣ་བདག་མེད་པ་དང་། དྲི་བདག་མེད་པ་དང་། ལྕེ་ བདག་མེད་པ་དང་། རོ་བདག་མེད་པ་དང་། ལུས་བདག་མེད་པ་དང་། རེག་བྱ་བདག་མེད་པ་དང་། ཡིད་བདག་མེད་པ་དང་། ཆོས་བདག་མེད་པ་སྟེ། འདི་རྣམས་ནི་ནང་གི་དྲུག་དང་ཕྱིའི་སྐྱེ་མཆེད་དྲུག་བདག་མེད་པའོ། ། བདག་མེད་པ་ལ་ལྟ་ཞིང་བསམ་པར་བྱའོ། ། ཀུན་དགའ་བོ་བདག་མེད་པ་འདི་རྣམས་སྟོན་ ཅིག ། ཀུན་དགའ་བོ་མི་གཙང་བའི་འདུ་ཤེས་ནི་དགེ་སློང་ཀུན་དགའ་བོ་འདི་ནི་ལུས་འདི་ཉིད་ལ་སྤྱི་གཙུག་ནས་འོག་གི་རྐང་མཐིལ་གྱི་བར་གྱི། པགས་པའི་ཕྱི་ཤུན་གྱི་བར་གང་བར་རྣམ་པ་སྣ་ཚོགས་པའི་མི་གཙང་བ་སོ་སོར་བརྟག་པར་བྱའོ། ། ལུས་འདི་ལ་སྐྲ་དང་། བ་སྤུ་དང་། སེན་མོ་དང་། སོ་དང་། པགས་པའི་ཕྱི་ཤུན་དང་། ཤ་དང་། ཆུ་བ་དང་། རུས་པ་དང་། རྐང་མར་དང་། མཁལ་མ་དང་། སྙིང་དང་། མཆེར་པ་དང་། གློ་བ་དང་། སུལ་མང་དང་། ཕོ་བ་དང་། རྒྱུ་མ་དང་། རྒྱུ་མའི་གཉེ་མ་དང་། ལྒང་པ་དང་། རྟུག་པ་དང་།

མཁྲིས་པ་དང་། བད་ཀན་ དང་། ཚིགས་དང་། ཁྲག་དང་། རྔུལ་དང་། ཚིལ་དང་། མཆི་མ་དང་། ཞག་དང་། མཆིལ་མ་དང་། སྣབས་དང་། ཆུ་སེར་དང་། གཅིན་དང་། {གླད་པ་,ཀླད་པ་}སྟེ་མི་གཙང་བའི་རྫས་སུམ་ཅུ་རྩ་གཉིས་སོ། ། ལུས་འདི་ལ་མི་གཙང་བར་བལྟ་བར་བྱའོ། ། ཀུན་དགའ་བོ་མི་གཙང་བ་འདི་རྣམས་ བསྟན་པར་གྱིས་ཤིག ། ཀུན་དགའ་བོ་བར་དུ་གཅོད་པ་རྣམས་དུ་ཞེ་ན། དགེ་སློང་ཀུན་དགའ་བོ་འདི་ནི་དགོན་པའམ། ཤིང་དྲུང་ངམ། ཁང་སྟོང་དུ་སོང་སྟེ་འདི་རྣམས་སོ་སོར་བརྟག་པར་བྱའོ། ། ལུས་འདི་ནི་སྡུག་བསྔལ་མང་བ་དང་། བར་དུ་གཅོད་པ་མང་བ་སྟེ། ལུས་འདི་ལ་རྣམ་པ་དུ་མའི་ ནད་འབྱུང་ངོ་། ། འདི་ལྟ་སྟེ། མིག་གི་ནད་དང་། རྣ་བའི་ནད་དང་། སྣའི་ན་དད་དང་། ལྕེའི་ནད་དང་། ལུས་ཀྱི་ནད་དང་། མགོ་བོའི་ནད་དང་། རྣ་བའི་ནང་གི་ནད་དང་། ཁའི་ནད་དང་། སོའི་ནད་དང་། གློ་དང་། དབུགས་མི་བདེ་བ་དང་། པི་ན་སོའི་ནད་དང་། ཚ་རིམས་དང་། ལྟོ་བའི་ནད་དང་། བརྒྱལ་བ་དང་། གཞོགས་ཕྱེད་ན་བ་དང་། གཟེར་བ་དང་། གསུད་པ་དང་། མཛེ་དང་། ཤ་འབྲས་དང་། འབྲུམ་བུ་ཕྲ་མོ་དང་། གཅོང་ནད་དང་། བརྗེད་བྱེད་ཀྱི་ནད་དང་། བས་ལྡགས་དང་། གཡན་པ་དང་། ལུས་ཟ་བ་དང་།

རཤྐས་དང་། བི་ཙར་ཙི་ཀ་དང་། ཁྲག་མཁྲིས་དང་། མ་དྷུ་ མེ་ཧ་དང་། ཨྃ་ག་དང་། སི་ལ་ཀ་དང་། མཚན་མར་རྡོལ་བ་དང་། མཁྲིས་པ་འཁྲུགས་པའི་ནད་དང་། བད་ཀན་འཁྲུགས་པའི་ནད་དང་། རླུང་འཁྲུགས་པའི་ནད་དང་། འདུས་པའི་ནད་དང་། དུས་སུ་ཟས་ཡི་ཁར་མི་འོང་བའི་ནད་དང་། མི་མཉམ་པའི་ནད་འཁྲུགས་པ་དང་། ཨ་ཨུ་པ་ཀ་སྨྲི་ ཀའི་ནད་དང་། ལས་ཀྱི་རྣམ་པར་སྨིན་པའི་ནད་དང་། གྲང་བ་དང་། དྲོ་བ་དང་། བཀྲེས་རྔབ་དང་། སྐོམ་པ་དང་། འཁྲུ་བ་དང་། ཆུ་ནད་སྟེ། ལུས་ཀྱི་ནད་འདི་རྣམས་ནི་བར་དུ་གཅོད་པར་བལྟ་ཞིང་བསྒོམ་པར་བྱའོ། ། ཀུན་དགའ་བོ་འདི་ནི་བར་དུ་གཅོད་པར་བསྟན་པར་བྱའོ། ། ཀུན་དགའ་བོ་སྤོང་བའི་འདུ་ཤེས་རྣམས་དུ་ཞེ་ན། དགེ་སློང་ཀུན་དགའ་བོ་འདི་ནི་འདོད་པ་ལས་སྐྱེས་པ་སྟེ། མི་གནས་པར་དོར་བར་བྱའོ། ། རྣམ་པར་གཞིག་པ་དང་། གོམས་པར་མི་བྱེད་པ་དང་། མི་བསྒོམ་པར་འགྲོ་བ་དང་། རྣམ་པར་འཚེ་བའི་རྣམ་རྟོག་ལས་སྐྱེས་པ་དང་། མི་གནས་པ་སྟེ་དོར་བར་བྱའོ། ། རྣམ་པར་གཞིག་པ་དང་། གོམས་པར་མི་བྱེད་པ་དང་། མི་བསྒོམ་པར་འགྲོ་བ་སྟེ་སྐྱེས་ཤིང་སྐྱེས་པའི་སྡིག་པ་མི་དགེ་བའི་ཆོས་མི་གནས་པ་སྟེ་དོར་བར་བྱའོ། ། རྣམ་པར་གཞིག་པ་དང་།

གོམས་པར་མི་བྱེད་པ་དང་། མི་བསྒོམ་པར་འགྲོ་བ་སྟེ། ཀུན་ དགའ་བོ་འདི་ནི་སྤོང་བའི་འདུ་ཤེས་སོ། ། ཀུན་དགའ་བོ་འདོད་ཆགས་དང་བྲལ་བའི་འདུ་ཤེས་དུ་ཞེན། དགེ་སློང་ཀུན་དགའ་བོ་འདི་ནི་དགོན་པའམ། ཤིང་དྲུང་ངམ། ཁང་སྟོང་དུ་སོང་སྟེ་སོ་སོར་བརྟག་པར་བྱའོ། ། འདི་ནི་ཞི་བ་དང་། གྱ་ནོམ་པ་གང་འདི་ནི་འདུས་བྱས་ཐམས་ཅད་གནས་ པ་དང་། སྐྱེ་བ་དང་། བསྒྱུར་བ་དང་། སྲེད་པ་ཟད་པ་དང་། འགོག་པ་དང་། མྱ་ངན་ལས་འདས་པའོ། ། ཀུན་དགའ་བོ་འདི་ནི་འགོག་པའི་འདུ་ཤེས་སོ། ། ཀུན་དགའ་བོ་འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དུ་ཞེན། དགེ་སློང་ཀུན་དགའ་བོ་འདི་ནི་ གང་ཞིག་འཇིག་རྟེན་པ་ཐབས་དང་ཉེ་བར་སྐྱེ་བ་དང་། རྟོག་པ་དང་། གནས་པ་དང་། བག་ལ་ཉལ་བ་བོར་ཏེ་དགའ་བ་མི་བསྐྱེད་པར་རོ། ། ཀུན་དགའ་བོ་འདི་ནི་འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་སུ་བསྟན་པར་བྱའོ། ། ཀུན་དགའ་བོ་འདུ་བྱེད་ཐམས་ཅད་མི་ རྟག་པའི་འདུ་ཤེས་དུ་ཞེ་ན། དགེ་སློང་ཀུན་དགའ་བོ་འདི་ནི་འདུ་བྱེད་ཐམས་ཅད་ལ་ཞེན་པ་མེད་པ་དང་། སྤོང་བ་དང་། སྐྱུག་བྲོ་བ་སྟེ།

ཀུན་དགའ་བོ་འདི་ནི་འདུ་བྱེད་ཐམས་ཅད་མི་རྟག་པའི་འདུ་ཤེས་སུ་བསྟན་པར་བྱའོ། ། ཀུན་དགའ་བོ་དབུགས་རྔུབས་པ་དང་དབྱུང་བ་རྗེས་སུ་དྲན་པ་ དུ་ཞེ་ན། དགེ་སློང་ཀུན་དགའ་བོ། དགོན་པའམ། ཤིང་དྲུང་ངམ། ཁང་སྟོང་དུ་སོང་སྟེ་འདུག་ལ་སྐྱིལ་ཀྲུང་བཅས་ཏེ་ལུས་དྲང་པོར་བསྲངས་ལ་ཁ་གྱེན་དུ་བལྟས་ལ་རྗེས་སུ་དྲན་ཅིང་གནས་པར་བྱའོ། ། དེ་ནས་དབུགས་ཐུང་ངུ་ཕྱུང་ན་དབུགས་ཐུང་ངུ་ཕྱུང་ངོ་སྙམ་དུ་ཡང་ དག་པར་ཤེས་སོ། ། དབུགས་རིང་དུ་རྔུབས་པའམ་ཐུང་ངུ་རྔུབས་ན་རྔུབས་སོ་སྙམ་དུ་ཡང་དག་པར་ཤེས་སོ། ། དབུགས་རིང་དུ་ཕྱུང་ན་དབུགས་རིང་དུ་མཐོང་ངོ་སྙམ་དུ་ཡང་དག་པར་ཤེས་སོ། ། དབུགས་ཐུང་བའམ་ཐུང་ངུ་ཕྱུང་ན་དབུགས་ཐུང་ངུ་ཕྱུང་ངོ་སྙམ་དུ་ཡང་དག་པར་ཤེས་སོ། ། དབུགས་ཐུང་བའམ་ཐུང་ངུ་རྒྱུས་ན་ཐུང་ངུ་བལྟ་བ་དང་ཡང་དག་པར་ཤེས་སོ། ། ལུས་ཀྱི་ཐམས་ཅད་ཡང་དག་པར་མྱོང་ཞིང་དབུགས་ཐུང་ངུ་རྒྱུས་སོ་ཞེས་བསླབ་པར་བྱས་ཏེ། ལུས་ཀྱི་ཡང་དག་པར་མྱོང་ཞིང་བལྟ་ཞིང་བསླབ་པར་བྱའོ། ། ལུས་ཀྱི་འདུ་བྱེད་ཤིན་ཏུ་སྦྱངས་ནས་དབུགས་ཐུང་ ངུ་རྔུབས་ན་རྔུབས་པ་ལ་བལྟ་ཞིང་བསླབ་པར་བྱའོ་སྙམ་དུ་ཡང་དག་པར་ཤེས་སོ། །

གཉིས་ཀ་མཐོང་ཞིང་ལུས་ཀྱི་འདུ་བྱེད་ཡང་དག་པར་སྦྱངས་ཤིང་རླུང་ཐུང་ངུ་ཕྱུང་ངོ་། ། ཞེས་གནས་ཤིང་བསླབ་པར་བྱའོ། ། གཉིས་ཀ་མཐོང་ཞིང་ལུས་ཀྱི་འདུ་བྱེད་ལ་བལྟ་ཞིང་གནས་པར་བསླབ་པར་ བྱའོ། ། དགའ་བ་ཡང་དག་པར་མྱོང་ཞིང་དབུགས་ཐུང་ངུ་རྒྱུས་སོ་སྙམ་དུ་བསླབ་པར་བྱའོ། ། དགའ་བ་ཡང་དག་པར་མྱོང་ཞིང་བལྟ་ཞིང་བསླབ་པར་བྱའོ། ། བདེ་བ་ཡང་དག་པར་མྱོང་ཞིང་དབུགས་ཐུང་ངུ་རྒྱུས་སོ་སྙམ་དུ་བསླབ་པར་བྱའོ། ། བདེ་བ་ཡང་དག་པར་མྱོང་ཞིང་བལྟ་ཞིང་བསླབ་ པར་བྱའོ། ། སེམས་ཀྱི་འདུ་བྱེད་ཡང་དག་པར་མྱོང་ཞིང་དབུགས་ཐུང་ངུ་རྒྱུས་སོ་སྙམ་དུ་བསླབ་པར་བྱའོ། ། སེམས་ཀྱི་འདུ་བྱེད་ཡང་དག་པར་མྱོང་ཞིང་བལྟ་ཞིང་བསླབ་པར་བྱའོ། ། གཉིས་ཀ་མཐོང་ཞིང་སེམས་ཀྱི་འདུ་བྱེད་ཡང་དག་པར་མྱོང་ཞིང་དབུགས་ཐུང་ངུ་རྒྱུས་ན་རྒྱུས་སོ་སྙམ་དུ་བསླབ་ པར་བྱའོ། ། གཉིས་ཀ་མཐོང་ཞིང་སེམས་ཀྱི་འདུ་བྱེད་ཡང་དག་པར་སྦྱངས་སོ་སྙམ་དུ་བསླབ་པར་བྱའོ། ། སེམས་ཡང་དག་པར་མྱོང་ན་དབུགས་ཐུང་ངུ་རྔུབས་ན་རྔུབས་སོ་ཞེས་བསླབ་པར་བྱའོ། ། སེམས་ཡང་དག་པར་མྱོང་ཞིང་ཡང་དག་པར་སྦྱངས་སོ་སྙམ་དུ་བསླབ་པར་བྱའོ། །

སེམས་མངོན་ པར་དགའ་བ་བསྐྱེད་པ་དང་དབུགས་ཐུང་ངུ་རྒྱུས་པ་ན་རྒྱུས་སོ་ཞེས་བསླབ་པར་བྱའོ། ། སེམས་མངོན་པར་དགའ་བ་བསྐྱེད་པ་དང་ཤིན་ཏུ་སྦྱངས་སོ་སྙམ་དུ་བསླབ་པར་བྱའོ། ། སེམས་ཞི་གནས་ལ་གནས་པས་དབུགས་ཐུང་ངུ་རྒྱུས་ན་རྒྱུས་སོ་སྙམ་དུ་བསླབ་པར་བྱའོ། ། སེམས་ ཞི་གནས་ལ་གནས་པས་ལྷག་མཐོང་དུ་གནས་པར་བསླབ་པར་བྱའོ། ། སེམས་རྣམ་པར་གྲོལ་བས་དབུགས་ཐུང་ངུ་རྒྱུས་ན་རྒྱུས་སོ་ཞེས་བསླབ་པར་བྱའོ། ། སེམས་རྣམ་པར་གྲོལ་བས་ལྷག་མཐོང་ལ་གནས་པར་བསླབ་པར་བྱའོ། ། མི་རྟག་པར་རྗེས་སུ་ལྟ་བས་དབུགས་ཐུང་ངུ་ རྒྱུས་ན་རྒྱུས་སོ་སྙམ་དུ་བསླབ་པར་བྱའོ། ། མི་རྟག་པར་རྗེས་སུ་ལྟ་བས་ལྷག་མཐོང་ལ་གནས་པར་བསླབ་པར་བྱའོ། ། འདོད་ཆགས་དང་བྲལ་བར་རྗེས་སུ་ལྟ་བས་དབུགས་ཐུང་ངུ་རྒྱུས་ན་རྒྱུས་སོ་སྙམ་དུ་བསླབ་པར་བྱའོ། ། འདོད་ཆགས་དང་བྲལ་བར་རྗེས་སུ་ལྟ་བས་ལྷག་མཐོང་ལ་ གནས་པར་བསླབ་པར་བྱའོ། ། འགོག་པ་ལ་རྗེས་སུ་ལྟ་བས་དབུགས་ཐུང་ངུ་རྒྱུས་ན་རྒྱུས་སོ་སྙམ་དུ་བསླབ་པར་བྱའོ། ། འགོག་པ་ལ་རྗེས་སུ་ལྟ་བས་ལྷག་མཐོང་ལ་གནས་པར་བསླབ་པར་བྱའོ། །

སོ་སོར་སྤོང་བ་རྗེས་སུ་ལྟ་བས་དབུགས་ཐུང་ངུ་རྒྱུས་ན་རྒྱུས་སོ་སྙམ་དུ་བསླབ་པར་བྱའོ། ། སོ་ སོར་སྤོང་བར་རྗེས་སུ་ལྟ་བས་ལྷག་མཐོང་ལ་གནས་པར་བསླབ་པར་བྱའོ། ། ཀུན་དགའ་བོ་དབུགས་རྔུབས་པ་དང་དབྱུང་བ་རྗེས་སུ་དྲན་པ་འདི་བཤད་པར་བྱའོ། ། དེར་ཡང་ཀུན་དགའ་བོ་ཁྱེད་རིའི་ཀུན་དགའ་བོའི་གནས་སུ་སོང་ལ། འདུ་ཤེས་བཅུ་པོ་འདི་བཤད་པར་བྱའོ། ། གནས་ གཞན་ཡང་ཡོད་དེ་དགེ་སློང་རིའི་ཀུན་དགའ་བོས་འདུ་ཤེས་བཅུ་པོ་འདི་ཐོས་ན་དེའི་ནད་ཐམས་ཅད་ཞི་བར་འགྱུར་རོ། ། དེ་ནས་ཡང་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལས་མཉན་ཏེ། ཚེ་དང་ལྡན་པ་རིའི་ཀུན་དགའ་བོའི་གནས་སུ་སོང་ནས། ཚེ་དང་ལྡན་པ་རིའི་ ཀུན་དགའ་བོ་ལ། འདུ་ཤེས་བཅུ་སོ་སོར་བཤད་དོ། ། དེ་ནས་ཚེ་དང་ལྡན་པ་རིའི་ཀུན་དགའ་བོས་འདུ་ཤེས་བཅུ་པོ་འདི་རྣམས་ཐོས་ནས་དེའི་ནད་ཐམས་ཅད་ཞི་བར་གྱུར་ཏོ། ། དེའི་ནད་ཐམས་ཅད་ཞི་ནས་ཚེ་དང་ལྡན་པ་རིའི་ཀུན་དགའ་བོ་ལངས་ཏེ། ཚེ་དང་ལྡན་པ་ རིའི་ཀུན་དགའ་བོའི་ནད་ཕྱིས་མེད་པར་གྱུར་ཏོ། ། ཚེ་དང་ལྡན་པ་རིའི་ཀུན་དགའ་བོའི་མདོ་རྫོགས་{སྷོ,སོ}། ། ། ། པཎྚི་ཏ་ཆེན་པོ་ཨཱ་ནནྡ་ཤྲཱིའི་ཞལ་སྔ་ནས།

མང་དུ་ཐོས་པའི་ལོ་ཙཱ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས། སྐད་གཉིས་ སྨྲ་བ་རྣམས་ཀྱི་གདན་ས། གཙུག་ལག་ཁང་ཆེན་པོ་དཔལ་ཐར་པ་གླིང་དུ་བསྒྱུར་ཅིང་ཞུས་ཏེ་གཏན་ལ་ཕབ་པའོ། །