BO༄༅༅། རྒྱ་གར་སྐད་དུ། ཤྲཱི་བཛྲ་སིདྡྷ་ཛཱ་ལ་སྃ་བ་ར་ཏནྟྲ་རཱ་ཛ། བོད་སྐད་དུ། དཔལ་རྡོ་རྗེ་གྲུབ་པ་དྲ་བའི་སྡོམ་པའི་རྒྱུད་ཀྱི་རྒྱལ་པོ། དཔལ་རྡོ་རྗེ་མཁའ་འགྲོ་ལ་ཕྱག་འཚལ་ལོ། ། འདི་སྐད་ བདག་གིས་ཐོས་པ་དུས་གཅིག་ན། བཅོམ་ལྡན་འདས་དགའ་ལྡན་གྱི་གནས་རིན་པོ་ཆེའི་ཁང་{བཟངས་ཀྱི་,བཟང་གི་}ནང་ན་བྱང་ཆུབ་སེམས་དཔའ་བྱམས་པ་དང་། དགའ་བའི་འོད་དང་། དྲི་མ་མེད་པའི་འོད་ལ་སོགས་པ་དཔའ་བོ་དང་རྣལ་འབྱོར་མའི་འཁོར་དཔག་ཏུ་མེད་པ་དང་། དེ་བཞིན་གཤེགས་ པ་ཐམས་ཅད་ཀྱི་དེ་ཁོ་ན་ཉིད་བཙུན་མོའི་བྷ་ག་ལ་སྙོམས་པར་བཞུགས་པའི་དུས་སུ་རིགས་སྒྱུ་མའི་དབང་དུ་མཛད་དེ་ཐམས་ཅད་ཀྱིས་ལྷའི་ཕྱི་ནང་གསང་བ་བླ་ན་མེད་པའི་མཆོད་པས་མཆོད་པའི་དུས་སུ་བྱང་ཆུབ་སེམས་དཔའ་བྱམས་པས་བཅོམ་ལྡན་འདས་ཀྱི་ཞབས་ལ་མགོ་བོས་ ཕྱག་འཚལ་ཏེ། ཐལ་མོ་སྦྱར་ནས་གསོལ་པ། མགོན་པོ་ཐུགས་རྗེ་ཆེ་ལྡན་པ། ། དེ་ཉིད་དོན་དམ་གང་ཡིན་པ། ། དཔལ་དང་རྡོ་རྗེ་དོན་དང་ནི། ། དྲ་བ་སྡོམ་པ་རྒྱུད་ཀྱི་དོན། ། དེས་བསྟན་སྡོམ་པ་གང་ཡིན་པ། ། དེ་ཉིད་བདག་ལ་བཤད་དུ་གསོལ། ། བཅོམ་ལྡན་འདས་ཀྱིས་བཀའ་སྩལ་པ། ། བྱམས་པ་ལ་སོགས་འཁོར་རྣམས་ཀུན། །
BOཕྱི་རོལ་དོན་ལ་གཡེངས་པའི་སེམས། ། ནང་དུ་བསྡུས་ལ་རྩེ་གཅིག་ཉོན། ། དཔལ་ནི་གཉིས་མེད་ཡེ་ཤེས་ཏེ། ། དེ་ཉིད་མཆོད་པའི་འོས་ཡིན་ལ། ། གཉིས་མེད་བདེ་བས་མཆོད་པར་བྱ། ། རྡོ་རྗེ་ཞེས་བྱ་ཡེ་ཤེས་ལྔ། ། གཟུང་འཛིན་རྟོག་པས་མི་ཕྱེད་ཕྱིར། ། རྡོ་རྗེ་ཞེས་ནི་བསྟན་པ་ཡིན། ། དེ་ཉིད་དོན་ལ་རྩེ་གཅིག་པས། ། ཆོས་སྐུ་རྡོ་རྗེ་འཆང་ཆེན་པོའི། ། ས་ནི་ངེས་པར་འཐོབ་པའོ། ། དྲ་བ་ཞེས་པ་མང་པོའི་དོན། ། ཀུན་རྫོབ་གཞན་རིག་ཏུ་བསྟན་པས། ། གྲངས་མང་རྒྱ་ཆེར་བསྟན་པ་ནི། ། ནམ་མཁའ་དང་མཚུངས་སྡོམ་པའི་དོན། ། ནམ་མཁའ་ དང་མཚུངས་རང་རིག་ནི། ། སེམས་ཀྱི་དེ་ཉིད་སྟོང་པའི་རོ། ། སྐད་ཅིག་དེ་ཡི་རྒྱུན་ཉིད་ལ། ། རྒྱུད་ཅེས་བྱ་བར་བསྟན་པ་ཡིན། ། དཔལ་རྡོ་རྗེ་གྲུབ་པ་དྲ་བའི་སྡོམ་པའི་རྒྱུད་ལས་མཚན་གྱི་རྒྱུད་བསྟན་པའི་ལེའུ་སྟེ་དང་པོའོ། ། ། ། དེ་ནས་གཞན་ཡང་ང་ཡིས་བཤད། ། ཡེ་ཤེས་སྐྱེ་བའི་ རྒྱུ་དང་གནས། ། རྐྱེན་དང་དེ་བཞིན་དམིགས་པའི་ཡུལ། ། བྱེ་བྲག་མིང་གི་རྣམ་གྲངས་དང་། ། དོན་གྱི་རྣམ་གྲངས་གང་ཡིན་དང་། ། ཕན་ཡོན་དང་ནི་འབྲས་བུ་དང་། ། དོན་དམ་དེ་ཉིད་ཆོས་ཀྱི་དབྱིངས། ། དེ་ཉིད་འདིར་ནི་བཤད་པར་བྱ། །
BOརྒྱུ་ནི་རང་རིག་ཡེ་ཤེས་ཏེ། ། རྒྱུ་མེད་རྒྱུ་ཡི་རང་བཞིན་ ཅན། ། རང་རིག་སྒྱུ་མར་བྱུང་བ་ནི། ། བདེ་ཆེན་འཁོར་ལོ་ནས་བརྩམས་ཏེ། ། འཁོར་ལོ་བཞིའམ་བརྒྱད་གཉིས་བཤད། ། དེ་བཞིན་ཉི་ཤུ་རྩ་བཞི་སྟེ། ། ཡེ་ཤེས་སྐྱེ་བའི་རྟེན་ཡིན་ལ། ། གནས་ནི་དེ་དང་མཉམ་པའི་རྩ། ། གྲོགས་ནི་ཡེ་ཤེས་རླུང་ཡིན་ཏེ། ། ཡེ་ཤེས་རླུང་གི་བཞོན་པ་ལ། ། ཞོན་ནས་དེ་ཉིད་བྱུང་བ་ཡིན། ། གྲངས་ནི་སྔ་མ་ལྟར་ཤེས་བྱ། ། ངོ་བོ་ཐིག་ལེ་ཉིད་ཡིན་ཏེ། ། ཐིག་ལེ་མདུད་པའི་གྲངས་སུ་ཤེས། ། དེ་ཡི་ཕན་ཡོན་གང་ཡིན་པ། ། གཟུང་འཛིན་རྣམ་པར་རྟོག་པ་ཡིས། ། ཕྱིན་ཅི་ལོག་ཏུ་བརྟགས་པ་ཡི། ། རྣམ་པར་རྟོག་པ་སྤོང་བ་ཡིན། ། འབྲས་བུ་རྡོ་རྗེ་ འཆང་ཆེན་པོའི། ། ས་ནི་ངེས་པར་ཐོབ་པའོ། ། དཔལ་རྡོ་རྗེ་དྲ་བའི་སྡོམ་པའི་རྒྱུད་ལས་ཡེ་ཤེས་ཀྱི་རྒྱུ་དང་གནས་ལ་སོགས་པའི་ལེའུ་སྟེ་གཉིས་པའོ། ། ། ། དེ་ནས་གཞན་ཡང་བཤད་བྱ་བ། ། འཁོར་ལོ་རྣམས་ཀྱི་དབྱེ་བ་ནི། ། བདེ་ཆེན་འཁོར་ལོའི་འདབ་མ་ནི། ། སུམ་ ཅུ་རྩ་གཉིས་གྲངས་ཡིན་ནོ། ། དེ་ནས་ལོངས་སྤྱོད་འཁོར་ལོ་ནི། ། འདབ་མ་བཅུ་དྲུག་དག་ཏུ་བསྟན། ། ཆོས་ཀྱི་འཁོར་ལོ་འདབ་མ་བརྒྱད། །
BOསྤྲུལ་པའི་འཁོར་ལོའི་འདབ་མ་ནི། ། དྲུག་ཅུ་རྩ་བཞི་དག་ཡིན་ནོ། ། བདེ་ཆེན་འཁོར་ལོ་སོར་བཞི་སྟེ། ། ལོངས་སྤྱོད་འཁོར་ལོ་སོར་བཅུ་དྲུག ། ཆོས་ཀྱི་འཁོར་ལོ་སོར་བཅུ་གཉིས། ། སྤྲུལ་པའི་འཁོར་ལོ་སོར་བཅུ་དྲུག ། བདེ་ཆེན་འཁོར་ལོའི་ལྟེ་བ་རུ། ། ཧྃ་ནི་དཀར་པོ་ཐུར་བལྟས་བསམ། ། ལོངས་སྤྱོད་འཁོར་ལོའི་ལྟེ་དབུས་སུ། ། ཨོཾ་ནི་དམར་པོ་གྱེན་བལྟས་བསམ། ། ཆོས་ཀྱི་འཁོར་ལོའི་ལྟེ་དབུས་སུ། ། ཧཱུྃ་ནི་སྔོན་པོ་ཐུར་བལྟས་ བསམ། ། སྤྲུལ་པའི་འཁོར་ལོའི་ལྟེ་དབུས་སུ། ། ཨཱཿནི་དམར་བོ་གྱེན་བལྟས་བསམ། ། དང་པོའི་འཁོར་ལོའི་འདབ་མ་ལ། ། དབྱངས་ཀྱི་ཡི་གེ་བཅུ་དྲུག་ནི། ། ལུགས་འབྱུང་ལུགས་མིན་དགོད་པར་བྱ། ། ལོངས་སྤྱོད་འཁོར་ལོའི་འདབ་མ་ལ། ། དབྱངས་ཡིག་བཅུ་དྲུག་རིམ་བཞིན་ དགོད། ། ཆོས་ཀྱི་འཁོར་ལོའི་འདབ་མ་ལ། ། ལཱྃ་མཱྃ་པཱྃ་ཏཱྃ། ། ཡི་གེ་འདི་རྣམས་གཡོན་ནས་དགོད། ། ཨོྃ་ཏྲཱི་ཧྲཱི་ཨ། ། མཚམས་ནས་གཡས་སུ་དགོད་པར་བྱ། ། སྤྲུལ་པའི་འདབ་མ་བཞི་རྩིབས་ལ། ། གསལ་བྱེད་ཡི་གེ་སུམ་ཅུ་གཉིས། ། ལུགས་འབྱུང་ལུགས་ལས་བཟློག་ཚུལ་དགོད། ། སྐུ་གསུང་ཐུགས་ཀྱི་རྩ་གསུམ་ནི། ། དབུས་ནས་དྲང་པོར་གནས་པ་སྟེ། །
BOཧཱུྃ་ནི་དཀར་པོ་ཐུར་བལྟས་པ། ། མར་གྱི་རྩེ་ལ་ཐུག་པར་དགོད། ། གཡས་ན་ཐབས་ཀྱི་རྩ་གནས་ཏེ། ། ཀཱ་ལི་སུམ་ཅུ་རྩ་གཉིས་ནི། ། ཐབས་ལ་ལན་གསུམ་བསྐོར་བྱས་ན། ། ལུགས་འབྱུང་འོག་ཏུ་ཁ་བལྟས་དགོད། ། གཡོན་ན་ཤེས་རབ་རྩ་གནས་ལ། ། མ་མོ་དབྱངས་ཡིག་བཅུ་དྲུག་ནི། ། གྱེན་ལ་བལྟས་པ་དགོད་པར་བྱ། ། སྒལ་ཚིགས་ལ་གནས་སྲོག་ལ་བརྟེན། ། རྩ་གསུམ་འདུས་པའི་གནས་དེར་ནི། ། རིན་ཆེན་དང་འདྲ་འདུད་པ་ནི། ། དགུ་པོར་གནས་པ་བྱ་གདོང་ཚུལ། ། ཆོས་ཀྱི་ དབྱིངས་ཀྱི་དབང་ཕྱུག་མ། ། བདེ་བ་རེག་སྟེར་མ་ནི་བཞུགས། ། གཞན་ཡང་རྐྱེན་གྱི་འཁོར་ལོ་གཉིས། ། གྲུ་གསུམ་གནས་སུ་ཡི་གེ་རྃ། ། དེ་ནི་ཡོངས་སུ་གྱུར་པ་ལས། ། མེ་ཡི་འཁོར་ལོ་གྲུ་གསུམ་པ། ། ཚད་ནི་སོར་གསུམ་ཉིད་ཡིན་ཏེ། ། ལྟེ་བར་རཾ་ནི་དམར་པོ་བསམ། ། འདབ་མ་གསུམ་ ལ་ཨོྃ་ཨཱཿཧཱུྃ། ། གྲུ་གསུམ་ཟུར་ལ་དགོད་བྱ་བ། ། རྡོ་རྗེ་རྩེ་གསུམ་བསམ་པར་བྱ། ། རླུང་གི་གནས་སུ་ཡི་གེ་ཡྃ། ། དེ་ཉིད་ཡོངས་སུ་གྱུར་པ་ལས། ། མདོག་ནག་གཞུ་ཡི་དབྱིབས་འདྲ་ལ། ། ཚད་ནི་སོར་བཞི་ཉིད་ཡིན་ནོ། ། དབུས་སུ་འདབ་མ་ལྔ་ཡིན་ཏེ། ། ལྟེ་བར་ཡཾ་ནི་ནག་པོ་ བསམ། ། འདབ་མ་ལྔ་ལ་དྷ་ལྔ་དགོད། །
BOབ་དན་ལྔ་ཡིས་མཚན་པའོ། ། རླུང་གིས་དམ་ཚིག་མེ་སྦར་པས། ། དམ་ཚིག་མེ་ཡིས་གཏུམ་མོ་བསྐུལ། ། འཁོར་ལོ་གསུམ་བསྲེགས་རྙིད་པ་ཙམ། ། ཡི་གེ་ཧྃ་ནི་བསྲོས་པ་ཡིས། ། ཧྃ་བཞུ་བདུད་རྩིའི་ཆར་ཡང་བབ། ། ལྟེ་བའི་གནས་སུ་ ཐིག་ལེར་གྱུར། ། རྒྱུན་དུ་འབར་བར་གྱུར་པ་ཡིས། ། རིན་ཆེན་དབྱིབས་འདྲའི་ནང་སླེབས་ནས། ། རང་བཞིན་དགའ་བ་ཉམས་མྱོང་བས། ། རང་གི་སེམས་ཀྱི་སྙིང་པོའི་རོ། ། བཞི་པའི་དཔལ་ལྡན་ཧེ་རུ་ཀ། ། དེ་ཉིད་རྟོགས་པར་གྱུར་པ་ཡིས། ། ཆོས་སྐུ་རྡོ་རྗེ་འཆང་ཆེན་པོའི། ། ས་ ནི་ངེས་པར་ཐོབ་པའོ། ། དཔལ་རྡོ་རྗེ་གྲུབ་པ་དྲ་བའི་སྡོམ་པའི་རྒྱུད་ལས་འཁོར་ལོ་བཞི་བསྟན་པའི་ལེའུ་སྟེ་གསུམ་པའོ། ། ། ། དེ་ནས་གཞན་ཡང་བཤད་བྱ་བ། ། ཡིད་བཞིན་ནོར་བུ་དང་མཚུངས་པའི། ། ངེས་དོན་དུ་ནི་ང་ཡིས་གསུངས། ། དེ་ཡི་དོན་ལ་ཁྱེད་རྣམས་ཀྱིས། ། རྩེ་གཅིག་སེམས་ཀྱིས་ཡིད་ལ་ཟུང་། ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། བྱམས་པ་དང་། དགའ་བའི་འོད་དང་། དྲི་མ་མེད་པའི་འོད་ལ་སོགས་པ་དཔའ་བོ་དང་།
BOརྣལ་འབྱོར་མའི་འཁོར་དཔག་ཏུ་མེད་པ་ཐམས་ཅད་དགའ་ཞིང་མགུ་ནས་རྗེས་སུ་ཡི་རངས་ནས་ལྷའི་ མཆོད་པ་རྣམ་པ་དུ་མས་མཆོད་པ་ནི་ནམ་མཁའ་ལ་རིན་པོ་ཆེའི་ཆར་དང་། སྒེག་པ་དང་། རྒོད་པ་དང་། དགའ་བའི་མཆོད་པའི་རྣམ་པ་དང་། པ་ཊ་ཧ་ལ་སོགས་པའི་མཆོད་པ་དང་། གཞན་ཡང་ལྷའི་མེ་ཏོག་དང་། སྤོས་དང་། མར་མེ་དང་། ཞལ་ཟས་ཀྱི་མཆོད་པ་རོ་བརྒྱ་པ་དང་། བཏུང་བའི་མཆོད་པས་མཆོད་དེ། གཞན་ཡང་ནང་དང་། གསང་བ་དང་། གསང་བའི་གསང་བ་བླ་ན་མེད་པའི་མཆོད་པ་ཆེན་པོ་རྨད་དུ་བྱུང་བས་མཆོད་ནས་ལན་གསུམ་བསྐོར་བ་བྱས་ཏེ། སོ་སོའི་རྫུ་འཕྲུལ་གྱིས་མི་སྣང་བར་གྱུར་ཏོ། ། དཔལ་རྡོ་རྗེ་གྲུབ་པ་དྲ་བ་སྡོམ་པའི་རྒྱུད་ཀྱི་རྒྱལ་པོ་ རྫོགས་སོ། ། ། ། རྒྱ་གར་ཀྱི་མཁན་པོ་ག་ཡ་དྷ་ར་དང་། ལོ་ཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་ཅིང་ཞུས་པའོ། །
Sutraya