༄༅༅། ། རྒྱ་གར་སྐད་དུ། ཨཱརྱ་སཱུརྱ་གརྦྷ་ནཱ་མ་མ་ཧཱ་བཻ་བུ་ལྱཾ་སཱུ་ཏྲ། བོད་སྐད་དུ། འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་ གཅིག་ན། བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་ཏེ། གང་དག་ཕྱོགས་བཅུའི་སངས་རྒྱས་ཀྱི་ཞིང་གཞན་གྲངས་མེད་དཔག་ཏུ་མེད་པ་དག་ནས་དེར་ལྷགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད། དཔག་ཏུ་མེད། བརྗོད་དུ་མེད་པ་དག་གིས་ཡོངས་སུ་བསྐོར་ཅིང་མདུན་གྱིས་བལྟས་སོ། ། དེ་བཞིན་དུ་ཕྱོགས་བཅུའི་སངས་རྒྱས་ཀྱི་ཞིང་གཞན་དང་གཞན་དག་ནས་དེར་འདུས་ཏེ་ལྷགས་པའི་ཉན་ཐོས་ཆེན་པོ་གྲངས་མེད། དཔག་ཏུ་མེད། བརྗོད་དུ་མེད་པ་དག་གིས་ཀྱང་ཡོངས་སུ་བསྐོར་ཅིང་མདུན་གྱིས་ བལྟས་སོ། ། དེ་བཞིན་དུ་ཕྱོགས་བཅུའི་སངས་རྒྱས་ཀྱི་ཞིང་གཞན་དང་གཞན་དག་ནས་འདིར་ལྷགས་པ་བརྒྱ་བྱིན་དང་། ཚངས་པའི་དབང་པོ་དང་། ལྷའི་དབང་པོ་དང་། ཀླུའི་དབང་པོ་དང་། གནོད་སྦྱིན་གྱི་དབང་པོ་དང་། དྲི་ཟའི་དབང་པོ་དང་། ལྷ་མ་ཡིན་གྱི་དབང་པོ་དང་།

ནམ་ མཁའ་ལྡིང་གི་དབང་པོ་དང་། མི་འམ་ཅིའི་དབང་པོ་དང་། ལྟོ་འཕྱེ་ཆེན་པོའི་དབང་པོ་གྲངས་མེད། དཔག་ཏུ་མེད། བརྗོད་དུ་མེད་པ་དག་གིས་ཀྱང་མི་མཇེད་ཀྱི་སངས་རྒྱས་ཀྱི་ཞིང་ཐམས་ཅད་ས་དང་ནམ་མཁའ་ལ་འགྲོ་བའི་ལམ་གང་བར་གྱུར་ཏོ། ། དེ་བཞིན་དུ་འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷ་གཞན་དང་གཞན་དག་དང་། ཀླུ་དང་། གནོད་སྦྱིན་དང་། སྲིན་པོ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་གཞན་དང་། གཞན་གྲངས་མེད་དཔག་ཏུ་མེད་པ་དག་ཀྱང་ལྷགས་ནས། བཅོམ་ལྡན་འདས་ལ་གྱེན་དུ་ལྟ་ ཞིང་། བཅོམ་ལྡན་འདས་རིང་པོ་མི་ཐོགས་པར་མཐར་ཕྱིན་པ། ནམ་མཁའ་ལྟར་སྣང་བ། བྱང་ཆུབ་སེམས་དཔའི་སྤྱོད་པ་རབ་ཏུ་འབྱེད་པ། དབུགས་རྔུབ་པ་དང་། འབྱུང་བ་དྲན་པ་འཆི་བ་མེད་པའི་སྒོ། ཚངས་པའི་གནས་པ་ལུང་བསྟན་པ་སྟོན་པ་ན་ཅང་མི་སྨྲ་བར་འཁོད་དེ་ཐམས་ ཅད་དང་ལྡན་པའི་མི་མཇེད་ཀྱི་སངས་རྒྱས་ཀྱི་ཞིང་ཐམས་ཅད་ས་དང་ནམ་མཁའི་ལམ་གང་བར་གྱུར་ཅིང་། ད་དུང་བཅོམ་ལྡན་འདས་ཀྱི་ཆོས་ཀྱི་ཆར་གྱི་སྟོན་པས་ཚིམ་པར་མ་གྱུར་ནས་ཐལ་མོ་དག་རབ་ཏུ་སྦྱར་ཏེ།

བཅོམ་ལྡན་འདས་ཁོ་ན་ལ་བལྟ་ཞིང་འཁོད་པ་ནི་དཔེར་ན་ ནད་པ་དག་སྨན་པ་ལ་ལྟ་བར་བྱེད་པ་བཞིན་དང་། མུན་པས་ཁེབས་པ་དག་སྣང་བ་ལ་ལྟ་བར་བྱེད་པ་བཞིན་དང་། ཆུ་བོས་ཁྱེར་བ་དག་ཆུ་འགྲམ་དུ་ལྟ་བར་བྱེད་པ་བཞིན་དང་། སྡུག་བསྔལ་བར་གྱུར་པ་དག་སྐྱབས་ལ་ལྟ་བར་བྱེད་པ་བཞིན་ཏེ། དེ་ལྟར་མི་མཇེད་ཀྱི་སངས་རྒྱས་ཀྱི་ ཞིང་ཐམས་ཅད་ས་དང་ནམ་མཁའི་ལམ་བྱང་ཆུབ་སེམས་དཔའ་སེམས་དཔའ་ཆེན་པོ་དག་དང་། ཉན་ཐོས་དག་དང་། དབང་པོ་བརྒྱ་བྱིན་དག་ནས་ལྟོ་འཕྱེ་ཆེན་པོའི་དབང་པོ་དག་གི་བར་དང་། འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷ་གཞན་དང་གཞན་དག་ནས་མི་དང་ མི་མ་ཡིན་པ་རྣམས་གཞན་དང་གཞན་དག་གི་བར་བཅོམ་ལྡན་འདས་ཆོས་དང་ལྡན་པ་ཆོས་ཀྱི་རྒྱལ་པོ་ལ་ལྟ་ཞིང་ཐལ་མོ་རབ་ཏུ་སྦྱར་ཏེ་ཅང་མི་སྨྲ་བར་འཁོད་པར་གྱུར་ཏོ། ། དེའི་ཚེ་ཚངས་པ་ཆེན་པོ་པད་མ་འབར་བའི་དཔལ་ཞེས་བྱ་བ་སངས་རྒྱས་མང་པོ་ལ་ལྷག་པར་བྱ་བ་བྱས་པ་དགེ་ བའི་རྩ་བ་བསྐྱེད་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ། ཆོས་ལ་དམིགས་པའི་བྱམས་པ་ཤིན་ཏུ་ཡོངས་སུ་སྦྱང་བ་བྱས་པར་གྱུར་ཏོ། ། དེ་ནས་ཚངས་པ་ཆེན་པོ་པད་མ་འབར་བའི་དཔལ་སྟན་ལས་ལངས་ཏེ།

བླ་གོས་ཕྲག་པ་གཅིག་ཏུ་གཟར་ནས་ པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་ཚིགས་སུ་བཅད་པ་བརྗོད་པ་འདིས་ཆོས་བཤད་པར་གསོལ་བ་བཏབ་བོ། ། རིང་དུ་གཤེགས་ཤིང་མྱུར་བའི་རྒྱུན་དང་ལྡན། ། ཟད་པ་ལྷུར་མཛད་ མི་གཡོ་འོད་གསལ་བ། ། རྟོགས་པ་ཐམས་ཅད་སྐྱེད་པར་མཛད་པ་པོ། ། ཁྱོད་གསུང་རབ་ཞི་རྒྱུ་སྐར་ཚུལ་མཁྱེན་མཁས། ། དབུགས་རྔུབ་པ་དང་འབྱུང་བ་དྲན་པ་མཁྱེན། ། ཚངས་པའི་གནས་པ་བཞི་པོ་དག་དང་ལྡན། ། སྲིད་པ་གསུམ་པོ་ཇི་ལྟར་དག་འགྱུར་བར། ། སེམས་ཅན་འགྲོ་ བ་སྤོང་བར་མཛད་པ་པོ། ། ཚུལ་གཅིག་ལྡན་པ་ཉིད་ཀྱི་མཁྱེན་མངའ་བ། ། ལྷ་མི་རྣམ་པ་མང་པོ་ཁྲི་དག་ཀྱང་། ། སོམ་ཉི་རྒལ་མཛད་དགེ་བརྙེས་ཆུ་བོ་རྒལ། ། བདེ་འགྲོའི་མཁྱེན་པ་མྱུར་དང་ལྡན་པ་པོ། ། བྱང་ཆུབ་སྤྱོད་དང་སངས་རྒྱས་ཆོས་མངོན་སུམ། ། སེམས་གཡོ་ སེམས་ཅན་ཁ་ཅིག་འདོད་ཀླུང་ལྷུང་། ། མུན་པས་ཁེབས་ཤིང་མིག་དང་མི་ལྡན་པའི། ། སྡུག་བསྔལ་ཐམས་ཅད་བཅོམ་པར་གྱུར་ལགས་པ། ། མ་ཐོས་དགེ་བྲལ་སློབ་དཔོན་མཁས་ལྡན་པའི། ། སྐྱེ་བོ་བྲལ་ལ་མི་དབང་ཐུགས་རྗེ་སྐྱེད། །

མཉམ་པའི་ཆོས་ཉན་སྐྱེ་བའི་ཕ་རོལ་ མཆི། ། སྲིད་པ་གཅོད་པ་བཤད་པར་མཛད་དུ་གསོལ། ། སྐྱེ་ཀླུང་ཕ་རོལ་གཤེགས་ཐུབ་ཐུགས་རྗེས་གསུངས། ། བློ་འཆལ་སྐྱེ་མང་སྲེད་པའི་དྲ་བའི་ལམ། ། དེ་དག་ཐམས་ཅད་ཉོན་མོངས་རྩ་བ་ཅན། ། དེར་ནི་སེམས་ཅན་འཁྱམས་འགྱུར་གཅད་དུ་གསོལ། ། གང་དུ་སྡུག་ བསྔལ་རབ་ཞི་དབང་དྲུག་དང་། ། ཡིད་ཀྱང་ཞི་འགྱུར་སྲེད་སྐྱོན་རྒྱལ་བ་གསུང་། ། སྲེད་པ་བྲལ་བ་སྲེད་རྒྱུ་མི་མངའ་བ། ། སེམས་ཅན་གདུང་བ་དཔལ་ཀུན་བྲལ་གྱུར་པ། ། དེ་སླད་ཐུབ་པ་ཐུགས་བརྩེ་བ་ཡི་རྒྱུས། ། སྲེད་པ་ཡི་ནི་ཆུ་ཀླུང་སྐེམས་མཛད་པ། ། མྱུར་དུ་བདེ་ཞིང་འཆི་ བ་མ་མཆིས་པའི། ། ཆོས་ཀྱང་སྲེད་པ་གཅོད་པ་བཤད་པར་གསོལ། ། དེ་ནས་བཅོམ་ལྡན་འདས་ཀྱིས་ཚངས་པ་པད་མ་འབར་བའི་དཔལ་ལ་འདི་སྐད་ཅེས་བཀའ་སྩལ་ཏོ། ། གང་དག་སྔོན་ཆད་ཕ་རོལ་ཕྱིན། ། སྤྱོད་པ་སྤྱད་ཅིང་སྤྱོད་འགྱུར་བ། ། དེ་དག་ཉན་ཐོས་ཆོས་རྣམས་ལ། ། ནམ་ཡང་དགའ་བར་མི་བྱ་སྟེ། ། སངས་རྒྱས་ཆོས་ལས་ཉམས་འགྱུར་བའི། ། ལྟུང་བ་གཉིས་པ་གཞན་མེད་དེ། ། དེ་ནི་ཡང་དང་ཡང་དུ་ཡང་། ། གཉི་གར་སེམས་ནི་འཇུག་པ་ཡིན། ། ཁྲོ་དང་ཉན་ཐོས་ཆོས་རྣམས་དང་། ། རྐྱེན་གྱི་བྱང་ཆུབ་འཇུག་པ་ཡི། །

ཆོས་གསུམ་རྣམ་པར་ སྤངས་པས་ན། ། སངས་རྒྱས་ཆོས་རྣམས་རྫོགས་པར་འགྱུར། ། སྐྱེ་གནས་བཞི་ལྡན་སེམས་ཅན་འདི། ། སངས་རྒྱས་ཞིང་འདིར་ལྷགས་པ་དག ། ཐམས་ཅད་འདོད་པ་རྟེན་མི་བྱེད། ། ཐམས་ཅད་མི་སྡུག་ཐོབ་པ་ཡིན། ། འདི་ན་སེམས་ཅན་མཁས་པ་གང་། ། བྱང་ཆུབ་ མཆོག་གི་ཕྱིར་ཞུགས་ཤིང་། ། གང་བློ་གཟུངས་དང་བཟོད་པ་ལ། ། བརྩོན་ཞིང་ལེགས་པར་གོམས་བྱས་ལ། ། དབང་པོ་དྲུག་གི་སྒོ་བསྡམས་ཤིང་། ། སྐྱིལ་མོ་ཀྲུང་གིས་དྲན་གཞག་ནས། ། རང་གི་སྤྱོད་ཡུལ་ས་ནོན་པ། ། ཕྱི་མའི་དུས་ཀྱི་དེ་བཞིན་གཤེགས། ། ནོར་བདུན་རབ་ཏུ་རྫོགས་པའང་ཡིན། ། འདིར་ནི་མི་སྡུག་ཚུལ་བཤད་ན། ། ཀུན་གཞི་གང་ཡིན་སེམས་ཅན་གྱི། ། འཆིང་བ་བརྟན་པ་འདིར་བཅད་འགྱུར། ། ངས་ནི་ཆོས་ཀྱི་སེར་སྣ་སྤངས། ། སེམས་ཅན་སྲུང་ཕྱིར་མ་བཤད་དེ། ། འདི་ལ་བྱང་ཆུབ་སེམས་དཔའ་ཡིས། ། བྱང་ ཆུབ་ཕྱིར་སེམས་འདིར་མ་བཏང་། ། ཕྱོགས་བཅུའི་སངས་རྒྱས་དེ་དག་གིས། ། ཆོས་འདི་ཡུན་རིང་གནས་བྱ་ཞེས། ། ས་འདི་ཡོངས་སུ་སྤྱད་མཛད་ཅིང་། ། ས་འདི་བྱིན་གྱིས་བརླབས་པ་ཡིན། ། དེ་བཞིན་དུ་ནི་ཁྱོད་ཀྱིས་ཀྱང་། ། ཞིང་འདི་ལ་ནི་རྩེ་བར་བྱོས། ། དེ་བཞིན་བཟོད་པ་ དག་གིས་རྩེས། །

བསྡམས་ནས་ཡུན་རིང་གནས་པར་བྱོས། ། ཉན་ཐོས་ཐེག་པ་ངས་བཤད་དེ། ། སེམས་ཅན་ཆགས་ལས་ཐར་བྱ་ཞིང་། ། ཕུང་པོ་དག་དང་ཁམས་རྣམས་དང་། ། སྐྱེ་མཆེད་སྟོང་པ་ངས་བཤད་དེ། ། ཞི་གནས་རྣམ་པ་བཅུ་གསུམ་དང་། ། ལྷག་མཐོང་ང་ཡིས་ བཤད་བྱ་སྟེ། ། འདོད་པའི་འཆིང་བས་དམ་བཅིངས་པའི། ། སེམས་ཅན་དེ་ཡིས་རྣམ་དག་འགྱུར། ། སེམས་ཅན་རྣམས་ལ་སྙིང་བརྩེ་བས། ། ཉན་ཐོས་རྣམས་ཀྱི་བདེན་པ་བཞི། ། ཆོས་རྣམས་རྟག་ཏུ་ཡུན་གནས་དང་། ། ཟག་པ་མེད་ཕྱིར་ངས་བཤད་དོ། ། ཉན་ཐོས་བདེན་པས་ འདུལ་བ་ནི། ། སྲིད་པའི་མཚོ་ལས་ངས་བསྒྲལ་ལོ། ། བྱང་ཆུབ་སྤྱོད་པ་ཐམས་ཅད་ཀྱང་། ། ཕྱི་ནས་ཁྱེད་ལ་བསྟན་པར་བྱའོ། ། དེ་ནས་དེའི་ཚེ་ཐམས་ཅད་དང་ལྡན་པའི་མི་མཇེད་ཀྱི་སངས་རྒྱས་ཀྱི་ཞིང་དུ་གཏོགས་པའི་སེམས་ཅན་རྣམས་འདི་སྙམ་དུ་སེམས་ཏེ། ཀྱེ་མ་ད་ལྟར་དེ་བཞིན་གཤེགས་ པ་འདི་ནི་ཉན་ཐོས་ཀྱི་གཏམ་ཡང་དག་པར་རབ་ཏུ་སྟོན་པར་མཛད་ཀྱི། ཐེག་པ་ཆེན་པོའི་གཏམ་ནི་མི་མཛད་དོ་སྙམ་མོ། ། དེ་ནས་དེའི་ཚེ་བྱང་ཆུབ་སེམས་དཔའ་དེ་དག་ཐམས་ཅད་འདི་སྙམ་དུ་སེམས་ཏེ། ཀྱེ་མ་ད་ལྟར་དེ་བཞིན་གཤེགས་པ་འདི་ནི་སངས་རྒྱས་ཀྱི་ཞིང་འདིར་ས་ཡོངས་སུ་སྤྱད་པའི་ ཕྱིར་དང་།

མ་འོངས་པའི་དུས་ན་ཆོས་ཀྱི་ཚུལ་རིང་དུ་གནས་པར་བྱ་བའི་ཕྱིར་དང་། ད་ལྟར་སངས་རྒྱས་ཀྱི་ཞིང་འདིར་གང་དཀོན་མཆོག་གསུམ་གྱི་གདུང་རྒྱུན་མི་འཆད་པར་བྱ་བའི་ཕྱིར་དང་། མ་འོངས་པའི་དུས་ན་ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་མ་དད་པ་རྣམས་མངོན་པར་དད་པར་བྱ་བའི་ཕྱིར་དང་། དད་པ་རྣམས་ཕྱིར་ཞིང་འཕེལ་བར་བྱ་བའི་ཕྱིར་དང་། སེམས་ཅན་ཆོས་ལ་མངོན་པར་བརྩོན་པ་དག་དང་། ཆོས་ལ་གནས་པ་དག་དང་། ཡོན་ཏན་གྱིས་ཕྱུག་པ་དག་དང་། ཚུལ་ཁྲིམས་ཀྱི་དྲི་དང་ཡང་དག་པར་ལྡན་པ་རྣམས་བདེ་བ་ལ་རེག་པ་དང་། རྣམ་པར་ཐོ་འཚམ་པ་མེད་པར་བྱ་བའི་ཕྱིར་དང་། བྱང་གྲོལ་གྱི་བདེ་བ་ཡོངས་སུ་རྫོགས་པར་བྱ་བའི་ཕྱིར་དང་། ཇི་ནས་སངས་རྒྱས་ཀྱི་ཞིང་འདི་ཤིན་ཏུ་ཡོན་ཏན་དག་གིས་ བསྒོ་བར་བྱ་བའི་ཕྱིར་དང་། ཕྱོགས་བཅུ་ན་གནས་པའི་སངས་རྒྱས་ཀྱི་ཞིང་གཞན་ཐམས་ཅད་ཀྱང་བསྒོ་བའི་འོས་སུ་གྱུར་པ་དང་། བླ་མ་ལ་གུས་པ་དང་། ཕྱག་བྱ་བའི་འོས་སུ་གྱུར་པར་བྱ་བའི་ཕྱིར་བདག་ཅག་ནང་དུ་ཡང་དག་པར་འཇོག་པར་བཞེད་པས།

མ་ལ་བདག་ཅག་གིས་ ད་དེ་བཞིན་གཤེགས་པའི་དགོངས་པ་ཡོངས་སུ་རྫོགས་པར་བྱ་སྟེ། བདག་ཅག་ཐམས་ཅད་ཀྱིས་སའི་སྟེང་དུ་སྐྱིལ་མོ་ཀྲུང་གིས་འཁོད་པར་བྱ་ཞིང་། རང་རང་གི་རྣམ་པ་སྣ་ཚོགས་ཀྱི་མཆོག་ཐམས་ཅད་དང་ལྡན་པའི་བཟོད་པ་དང་། གཟུངས་དང་། ཏིང་ངེ་འཛིན་དང་། རྣལ་འབྱོར་ དག་གིས་གནས་པ་དག་ཏུ་བྱ་གོར་མ་ཆག་སྙམ་མོ། ། དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བསྐལ་པ་བརྒྱས་ངེས་པར་བྱུང་བ་དག་དང་། གང་དག་ས་བཅུ་དག་དང་། གང་དག་མི་སྐྱེ་བའི་ཆོས་ཀྱི་བཟོད་པ་ལ་གནས་པའི་བར་དག་དང་། གང་དག་སངས་ རྒྱས་ཀྱི་ཆོས་མ་འདྲེས་པ་{བཅྭ་,བཅོ་}བརྒྱད་ལ་གཞན་ལ་རག་མ་ལས་པའི་ཡེ་ཤེས་ལ་མཁས་པ་དག་དང་། མི་འཇིགས་པ་ཐོབ་པ་དག་གི་བར་དེ་དག་ཐམས་ཅད་ས་སྟེང་འདིར་སྐྱིལ་མོ་ཀྲུང་གིས་འཁོད་པར་གྱུར་ཏོ། ། དེ་བཞིན་དུ་རང་རང་གི་རྣམ་པ་སྣ་ཚོགས་ཀྱི་མཆོག་ཐམས་ཅད་ཀྱི་བཟོད་པ་ དང་། གཟུངས་དང་། ཏིང་ངེ་འཛིན་དག་ལ་མཉམ་པར་གཞག་པ་དག་ཏུ་གྱུར་ཏོ། ། ཡང་དེའི་ཚེ་བསོད་ནམས་ཀྱི་སྟོབས་ཇི་ལྟ་བ་བཞིན་དུ་རྒྱུ་འཐུན་པའི་རྒྱུའི་སྟོབས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མཉམ་པར་གཞོག་པ་དེ་དག་དང་།

བྱང་ཆུབ་ སེམས་དཔའ་ཆེན་པོ་བསམ་གཏན་བྱེད་པ་དེ་དག་ལས་ཁ་ཅིག་གི་ལུས་ལས་འོད་འདི་ལྟ་བུ་བྱུང་སྟེ། དཔེར་ན་མར་མེའི་འོད་ལྟ་བུའོ། ། ཁ་ཅིག་གི་ནི་སྐར་མདའ་དང་མཉམ་པ་དག་གོ། ། ཁ་ཅིག་གི་ནི་བརྒྱ་བྱིན་དང་མཉམ་པ་དག་གོ། ། ཁ་ཅིག་གི་ནི་མི་མཇེད་ཀྱི་བདག་པོ་ཚངས་པ་ དང་མཉམ་པ་ནས་ཁ་ཅིག་གི་ནི་ཟླ་བ་དང་མཉམ་པའི་བར་དག་གོ། ། ཁ་ཅིག་གི་ནི་ཉི་མ་དང་མཉམ་པ་དག་གོ། ། ཁ་ཅིག་གི་ནི་ཉི་མ་གཉིས་དང་མཉམ་པ་དག་གོ། ། ཁ་ཅིག་གི་ནི་ཉི་མ་གསུམ་དང་མཉམ་པ་དག་གོ། ། ཁ་ཅིག་གི་ནི་ཉི་མ་ལྔ་དང་མཉམ་པ་དག་གོ། ། ཁ་ཅིག་གི་ནི་ ཉི་མ་སྟོང་དང་མཉམ་པའི་བར་དག་གོ། ། ཁ་ཅིག་གི་ནི་ལུས་ལས་ནི་ཉི་མ་བྱེ་བ་བརྒྱ་སྟོང་དང་མཉམ་པའི་འོད་དག་བྱུང་སྟེ། མི་མཇེད་ཀྱི་སངས་རྒྱས་ཀྱི་ཞིང་འདི་ཐམས་ཅད་སྔོན་མ་མཐོང་མ་ཐོས་པའི་སྣང་བ་ཆེན་པོ་རྒྱ་ཆེ་བ་དེ་ལྟ་བུས་འཇིག་རྟེན་ཁྱབ་པར་གྱུར་ཏོ། ། དེ་དག་གི་ལུས་ ལས་མཆོག་ཏུ་སེམས་ཅན་གཞན་དག་གི་ལུས་དང་སེམས་ཀྱི་བདེ་བ་ལ་རེག་པ་དང་། དགའ་བ་དང་། རབ་ཏུ་ཚིམ་པར་བྱེད་པ། ནད་ཐམས་ཅད་རབ་ཏུ་ཞི་བར་བྱེད་པ། ལྟ་བ་ངན་པ་ཐམས་ཅད་རབ་ཏུ་ཞི་བར་བྱེད་པ།

ལུས་ཀྱི་གནས་ངན་ལེན་ཐམས་ཅད་རབ་ཏུ་ཞི་བར་བྱེད་ པ། བཀྲེས་པ་དང་སྐོམ་པ་ཐམས་ཅད་རབ་ཏུ་ཞི་བར་བྱེད་པ། འདོད་པ་ཐམས་ཅད་རབ་ཏུ་ཞི་བར་བྱེད་པ། ཁྲོ་བ་ཐམས་ཅད་དང་། འཇིགས་པ་ཐམས་ཅད་དང་། ཉོན་མོངས་པ་དང་། འཆིང་བ་ཐམས་ཅད་རབ་ཏུ་ཞི་བར་བྱེད་པའི་འོད་བྱུང་སྟེ། སངས་རྒྱས་ཀྱི་ཞིང་འདི་ན་སྲིད་ པ་གསུམ་གྱི་བཙོན་རའི་སྡུག་བསྔལ་གྱི་འཇིགས་པ་ཐམས་ཅད་ཀྱི་བར་རབ་ཏུ་ཞི་བར་བྱེད་དོ། ། དེའི་ཚེ་སངས་རྒྱས་ཀྱི་ཞིང་འདི་ན་སེམས་ཅན་ཐམས་ཅད་སངས་རྒྱས་ལ་འབབ་པ་དག་དང་། ཆོས་ལ་འབབ་པ་དག་དང་། དགེ་འདུན་གྱི་ཡོན་ཏན་ལ་དགའ་བ་ལ་མཁས་པ་དག་འཁོད་ པར་གྱུར་ཏོ། ། ཡང་དེའི་ཚེ་སངས་རྒྱས་ཀྱི་ཞིང་འདི་ཕྱོགས་བཅུའི་གང་གཱའི་ཀླུང་གི་བྱེ་མ་སྙེད་ཀྱི་སངས་རྒྱས་ཀྱི་ཞིང་སྟོང་པ་དང་། སྟོང་པ་མ་ཡིན་པ་དག་དང་། ཡོངས་སུ་དག་པ་དང་། ཡོངས་སུ་དག་པ་མ་ཡིན་པ་དག་ན་ཀུན་ནས་ལྷམ་མེ། ལྷན་ནེ། ལྷང་ངེར་ཡང་དག་པར་ སྣང་བ་ནི་འདི་ལྟ་སྟེ། མཚན་མོ་མུན་པ་བྱུང་བ་ན་ཟླ་བ་དང་། ཉི་མ་བརྒྱ་སྟོང་ཤར་ནས་ལྷམ་མེ། ལྷན་ནེ། ལྷང་ངེ་བ་བཞིན་ཏེ།

དེ་ལྟར་དེའི་ཚེ་མི་མཇེད་ཀྱི་སངས་རྒྱས་ཀྱི་ཞིང་ཡང་ཕྱོགས་བཅུའི་གང་གཱའི་ཀླུང་གི་བྱེ་མ་སྙེད་ཀྱི་སངས་རྒྱས་ཀྱི་ཞིང་སྟོང་པ་དང་། སྟོང་པ་མ་ཡིན་པ་དག་ དང་། ཡོངས་སུ་དག་པ་དང་། ཡོངས་སུ་མ་དག་པ་དག་ན་ཀུན་ནས་མཆོག་ཏུ་ལྷམ་མེ། ལྷན་ནེ། ལྷང་ངེར་གྱུར་ཏོ། ། དེ་ནས་སངས་རྒྱས་ཀྱི་ཞིང་དེ་དང་དེ་དག་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཡོད་པ་དང་། གང་དག་བསྐལ་པ་བརྒྱས་ངེས་པར་བྱུང་བ་དག་ དང་། གང་དག་སངས་རྒྱས་ཀྱི་ཆོས་མ་འདྲེས་པ་{བཅྭ་,བཅོ་}བརྒྱད་ལ་གཞན་ལ་རག་མ་ལས་པའི་ཡེ་ཤེས་ལ་མཁས་པ་དག་དང་། མི་འཇིགས་པ་ཐོབ་པའི་བར་དེ་དག་སངས་རྒྱས་ཀྱི་མཐུས་དེ་ནས་ཆས་ཏེ། སེམས་ཀྱི་སྐད་ཅིག་མ་གཅིག་དང་ལྡན་པས་སངས་རྒྱས་ཀྱི་ཞིང་འདིར་ཞུགས་ ནས་གནས་ཇི་ལྟ་བ་བཞིན་ས་སྟེང་དུ་སྐྱིལ་མོ་ཀྲུང་གིས་འཁོད་པར་གྱུར་ཏོ། ། དེ་བཞིན་དུ་རང་རང་གི་དགེ་བའི་ཕྱོགས་ལ་ནན་ཏན་དག་ཏུ་བྱེད་ཅིང་ཇི་ལྟར་དགེ་བའི་ཕྱོགས་ཀྱི་སྟོབས་བསྐྱེད་པ་ཐོབ་པ་དེ་དག་དང་། མི་འཇིགས་པའི་རྒྱུ་དང་རྐྱེན་དང་ལྡན་པ་དེ་དག་གི་ལུས་ལས་དེ་འདྲ་བ་ཁོ་ ནའི་འོད་བྱུང་བར་གྱུར་ཏོ། །

དེ་ནས་བཅོམ་ལྡན་འདས་དགེ་སློང་གི་དགེ་འདུན་གྱིས་ཡོངས་སུ་བསྐོར་ནས་ཉན་ཐོས་ཆེན་པོ་རྣམས་ལ་བཀའ་སྩལ་པ། ཁྱེད་བསམ་གཏན་གྱི་ཡུལ་གྱི་མཐུ་ལ་ལྟོས་ཤིག ། བྱིན་གྱི་རླབས་ཀྱི་རྒྱུས་བདུད་ཐམས་ཅད་ཀྱི་ཡུལ་དང་། ཀླུ་ཐམས་ཅད་ཀྱི་ ཡུལ་ཟིལ་གྱིས་མནན་ནས། སྔོན་གྱི་དེ་བཞིན་གཤེགས་པ་ཐམས་ཅད་ཀྱིས་འདིར་ཆོས་ཀྱི་ཚུལ་དང་། དཀོན་མཆོག་གསུམ་གྱི་གདུང་རྒྱུན་མི་འཆད་པའི་ཕྱིར་དང་། གསལ་བར་མཛད་པའི་ཕྱིར་མི་མཇེད་ཀྱི་སངས་རྒྱས་ཀྱི་ཞིང་འདི་ཐམས་ཅད་ཡོངས་སུ་སྤྱད་པ་མཛད་དོ། ། དེ་བཞིན་ དུ་ད་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་པ། དཔག་ཏུ་མེད་པ་གང་གཱའི་ཀླུང་གི་བྱེ་མ་སྙེད་བསམ་གཏན་དང་། མངོན་པར་ཤེས་པའི་ཡུལ་ལ་རྣམ་པར་རྩེ་བ་དང་ལྡན་པ་དག་གིས་མི་མཇེད་ཀྱི་སངས་རྒྱས་ཀྱི་ཞིང་འདི་ན་ཆོས་ཀྱི་ཚུལ་ཡུན་རིང་དུ་ གནས་པར་བྱ་བའི་ཕྱིར་དང་། གསལ་བར་བྱ་བའི་ཕྱིར་དང་། ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་མ་དད་པ་རྣམས་དད་པར་བྱ་བའི་ཕྱིར་དང་། དད་པ་རྣམས་ཕྱིར་ཞིང་ འཕེལ་བར་བྱ་བའི་ཕྱིར་དང་།

སེམས་ཅན་ཆོས་ལ་མངོན་པར་བརྩོན་པ་དག་དང་། ཆོས་ཀྱིས་གནས་པ་དག་དང་། ཡོན་ཏན་གྱིས་ཕྱུག་པ་དག་དང་། སེམས་ལ་དབང་དང་ལྡན་པར་གྱུར་པ་རྣམས་བདེ་བ་ལ་རེག་པ་དང་། རྣམ་པར་ཐོ་འཚམ་པ་མེད་པར་བྱ་བའི་ཕྱིར་དང་། ངའི་བསྟན་ པ་རབ་ཏུ་མི་འཇིག་པར་བྱ་བའི་ཕྱིར་དང་། བྱང་གྲོལ་གྱི་བདེ་བ་ཡོངས་སུ་རྫོགས་པར་བྱ་བའི་ཕྱིར་ས་ཆེན་པོ་འདི་ཡོངས་སུ་སྤྱད་པར་བྱས་པ་ཡིན་ནོ། ། དོན་དེ་ཉིད་བྱིན་གྱིས་བརླབ་པར་བྱ་བའི་ཕྱིར་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བསམ་གཏན་གྱི་ཡུལ་དག་གིས་ རྣམ་པར་རྩེ་བར་བྱེད་དོ། ། ས་ཕྱོགས་གང་དང་གང་ན་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་འཁོད་ཅིང་བསམ་གཏན་གྱི་ཡུལ་དག་གིས་རྣམ་པར་རྩེན་པར་བྱེད་པ་དེ་དང་དེར་ད་ལྟར་དང་། མ་འོངས་པའི་དུས་ན་ཡང་ཁ་ཅིག་ཏུ་ལ་ལར་ང་འདས་ནས་སེམས་ཅན་འཁོར་བའི་ འཇིགས་པས་སྐྲག་པར་བྱེད་ཅིང་མྱ་ངན་ལས་འདས་པ་འདོད་པ་དག་སྐུ་གདུང་གི་མཆོད་རྟེན་དག་བྱེད་དུ་འཇུག་པར་འགྱུར་ཞིང་། སངས་རྒྱས་ཀྱི་བཞུགས་ཁང་དག་གམ། སངས་རྒྱས་ཀྱི་སྐུ་གཟུགས་དག་གམ། ཆོས་ཀྱི་བཞུགས་ཁང་དག་བྱེད་པར་འགྱུར་རོ། །

ཡང་ན་དེར་གླེགས་ བམ་དུ་བྲི་བ་བྱས་ནས་ངའི་ཆོས་ཀྱི་སྐུ་ཡང་འཆང་བར་འགྱུར་རོ། ། དེར་ཡང་མཆོད་པ་རྣམ་པ་སྣ་ཚོགས་དག་ཀྱང་བྱེད་པར་འགྱུར་ཞིང་། དེར་རིན་པོ་ཆེ་རྣམ་པ་སྣ་ཚོགས་དག་ཀྱང་འབུལ་བར་འགྱུར་ཏེ། འདི་ལྟ་སྟེ། གསེར་དང་། དངུལ་དང་། བཻ་དཱུརྱ་དང་། ཤེལ་དང་། མུ་ཏིག་ དམར་པོ་དང་། རྡོའི་སྙིང་པོ་དང་། སྤུག་དང་། ནོར་བུ་དང་། མུ་ཏིག་དང་། དབྱིག་དང་། དུང་དང་། མན་ཤེལ་དང་། བྱི་རུ་ལ་སོགས་པ་དང་། དར་ཡུག་དང་། དྲིལ་བུ་དང་། ཟ་འུག་དང་། གསོ་རས་བཟང་པོ་དང་། ཡུལ་ཀ་ཤིའི་རས་བཟང་པོ་དང་། དབུ་སྟན་ནང་ཚངས་ ཅན་དང་། གདིང་བ་དང་། གདུགས་དང་། རྒྱལ་མཚན་དང་། བ་དན་དང་། ཆོས་གོས་དང་། མགུར་གྱི་རྒྱན་དང་། ཕྱག་གི་རྒྱན་དང་། སྤོས་དང་། མེ་ཏོག་དང་། བདུག་པ་དང་། རོལ་མོའི་སྒྲ་དང་། ལུས་འདུད་པ་དང་། བླ་མ་དང་། གུས་པ་ཆེན་པོ་དང་། གཅེས་པར་ བྱེད་པ་དག་ཏུ་འགྱུར་རོ། ། དེ་ནས་བཅོམ་ལྡན་འདས་ཀྱིས་དེའི་ཚེ་ཕྱག་སོར་བཅུའི་ཐལ་མོ་སྦྱར་ནས་འདི་སྐད་ཅེས་བཀའ་སྩལ་ཏོ། ། དེ་དག་གི་མཆོད་པ་ནི་དེ་ནས་ང་ཉིད་ཀྱིས་བཞེས་པར་མཛད་དེ།

སེམས་ཅན་དེ་དག་ཐམས་ཅད་ནི་བསམ་པ་ཇི་ལྟ་བ་བཞིན་དུ་ཐེག་པ་གསུམ་གྱིས་ཕྱིར་མི་ ལྡོག་པ་དག་ཏུ་འགྱུར་རོ། ། ས་ཕྱོགས་ལ་ལར་ནི་གཙུག་ལག་ཁང་དང་། གནས་ཁང་དང་། འཆག་ས་དང་། དགོན་པའི་གནས་དང་། སྐྱེད་མོས་ཚལ་དང་། ཀུན་དགའི་ར་བ་དག་རབ་ཏུ་ཤོམ་པར་བྱེད་དོ། ། ཡང་ན་ཉན་ཐོས་ཀྱི་ཆོས་ཀྱི་གནས་པ་རྣམས་ལ་མཆོད་པ་དང་། རིམ་གྲོ་རྣམ་པ་སྣ་ཚོགས་འདི་ལྟ་སྟེ། ཆོས་གོས་དང་། བསོད་སྙོམས་དང་། མལ་ཆ་དང་། སྟན་དང་། ན་བའི་གསོས་སྨན་དང་། ཡོ་བྱད་དག་གིས་བྱེད་པར་འགྱུར་བའམ། བྱེད་དུ་འཇུག་པར་འགྱུར་རོ། ། གཙུག་ལག་ཁང་དང་། འཆག་ས་དང་། དགོན་པའི་གནས་ དེ་དག་ཏུ་ཡང་བཀུར་སྟིར་བྱས་ཏེ་ཆོས་ཉན་པ་དང་། རྣམ་པར་གཏན་ལ་དབབ་པའི་གཏམ་བྱེད་པ་དག་ཏུ་འགྱུར་བའམ། གླེགས་བམ་དག་ཀློག་པར་འགྱུར་རོ། ། གཙུག་ལག་ཁང་དང་། འཆག་ས་ལ་སོགས་པ་དེ་དག་ཏུ་ཡང་ཡོངས་སུ་གཏོང་བ་རྣམ་པ་སྣ་ཚོགས་དག་ཡོངས་ སུ་གཏོང་བར་འགྱུར་ཏེ། འདི་ལྟ་སྟེ། ཞིང་གི་གཞི་འམ། ཁྱིམ་གྱི་གཞིའམ། ཀུན་དགའི་ར་བའི་གཞིའམ། བྲན་དང་། བྲན་མོ་དང་། གླང་པོ་ཆེ་དང་། རྟ་དང་། རྔ་མོ་དང་། བ་ལང་དང་། མ་ཧེ་དང་། བོང་བུ་དང་། ཕྱུགས་གཞན་དག་དང་།

སྣོད་སྤྱད་ཀྱི་ཡོ་བྱད་རྣམ་ པ་སྣ་ཚོགས་དག་དེར་ཡོངས་སུ་གཏོང་བར་འགྱུར་ཞིང་། ངའི་ཉན་ཐོས་ཀྱིས་ཆོས་ཀྱི་གནས་པ་རྣམས་ལོངས་སྤྱོད་པར་བྱ་བའི་ཕྱིར་མལ་ཆ་དང་། སྟན་གྱི་ཡོ་བྱད་རྣམ་པ་སྣ་ཚོགས་དག་སེམས་ཀྱི་རྒྱན་གྱི་དོན་དང་། སེམས་ཀྱི་ཡོ་བྱད་ཀྱི་དོན་དང་། རྣལ་འབྱོར་གྱི་ཚོགས་ ཀྱི་དོན་དང་། བྱང་གྲོལ་གྱི་བདེ་བ་དོན་གྱི་མཆོག་ཐོབ་པར་བྱ་བའི་ཕྱིར་སྔོ་བ་དག་ཏུ་བྱེད་དོ། ། ད་ལྟར་དང་མ་འོངས་པའི་དུས་ན་ངའི་བསྟན་པ་ལ་ཕན་གདགས་པའི་ཕྱིར་ཡོངས་སུ་གཏོང་བ་རྣམ་པ་སྣ་ཚོགས་དག་ཡོངས་སུ་གཏོང་བར་བྱེད་དོ། ། དེ་བཞིན་དུ་སེམས་ཅན་དེ་དག་གི་སྦྱིན་པ་ ལས་བྱུང་བའི་བསོད་ནམས་བྱ་བའི་དངོས་པོ་དེ་དག་ཐམས་ཅད་ལ་ཅི་ནས་ཀྱང་སེམས་ཅན་དེ་དག་འབྲས་བུ་ཆེན་པོར་འགྱུར་བར་བྱ་བའི་ཕྱིར་ང་རྗེས་སུ་ཐུགས་རངས་པར་མཛད་དོ། ། བཞེས་པར་མཛད་དོ། ། སེམས་ཅན་ལོག་པར་ལྟུང་བའི་ཆོས་ཅན་མ་ཡིན་པ་ངན་འགྲོ་གསུམ་རྣམ་ པར་སྤངས་པ་དེ་དག་ཐམས་ཅད་བསམ་པ་ཇི་ལྟ་བ་བཞིན་དུ་ཐེག་པ་གསུམ་གྱིས་ཕྱིར་མི་ལྡོག་པ་དག་ཏུ་འགྱུར་རོ། །

སེམས་ཅན་དེ་དག་ཡུན་ཇི་སྲིད་དུ་འཁོར་བར་འཁོར་བར་འགྱུར་བ་དེ་སྲིད་དུ་ཡང་ལོངས་སྤྱོད་གཉིས་པོ་ཆོས་ཀྱི་ལོངས་སྤྱོད་དང་། ཟང་ཟིང་གི་ལོངས་སྤྱོད་དང་མི་ འབྲལ་བར་འགྱུར་རོ། ། རི་དང་། ནགས་ཁྲོད་དང་། ཤིང་ལྗོན་པ་ཆེན་པོ་དང་། དགོན་པ་དང་། ནགས་འདབ་གང་དུ་ཡང་རུང་སྟེ། ད་ལྟར་དང་མ་འོངས་པའི་དུས་ན་ཐར་པ་དོན་དུ་གཉེར་བ་ཆོས་ཀྱིས་གནས་པའི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་ མ་སྒྲ་བསྐྱུངས་པ་དག་དང་། གཅོམ་བསྐྱུངས་པ་དག་དང་། ནང་དུ་ཡང་དག་འཇོག་གི་ཚུལ་དང་བཅས་པ་དག་དང་། ཚུལ་བཞིན་དུ་ཡིད་ལ་བྱེད་པ་དང་འཚམ་པ་དག་འབྱུང་བར་འགྱུར་ཞིང་། ལྷ་དང་། ཀླུ་དང་། གནོད་སྦྱིན་དག་ཀྱང་གནས་པར་འགྱུར་རོ། ། དགེ་སློང་དག་གདུལ་ བའི་དོན་དུ་བསམ་གཏན་གྱི་ཡུལ་གྱི་མཐུ་ལ་ལྟོས་ཤིག ། བདུད་ཐམས་ཅད་ཀྱི་ཡུལ་དང་། ཀླུ་ཐམས་ཅད་ཀྱི་ཡུལ་ཟིལ་གྱིས་མནན་ནས། སྔོན་གྱི་དེ་བཞིན་གཤེགས་པ་བཞུགས་ཏེ་འཚོ་ཞིང་གཞེས་པ་རྣམས་ཀྱིས་ཆོས་ཀྱི་ཚུལ་རིང་དུ་གནས་པར་བྱ་བའི་ཕྱིར་དང་། དཀོན་མཆོག་ གསུམ་གྱི་གདུང་རྒྱུན་མི་གཅད་པའི་ཕྱིར་སྔོན་ཡང་མི་མཇེད་ཀྱི་སངས་རྒྱས་ཀྱི་ཞིང་འདི་ཡོངས་སུ་སྤྱོད་པ་མཛད་དོ།

། ད་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་པ། དཔག་ཏུ་མེད་པ་གང་དག་ཕྱོགས་བཅུའི་སངས་རྒྱས་ཀྱི་ཞིང་གཞན་གང་གཱའི་ཀླུང་གི་ བྱེ་མ་སྙེད་ནས་ངའི་སངས་རྒྱས་ཀྱི་ཞིང་འདིར་ཞུ་བ་དང་། ཞལ་བལྟ་བ་དང་། ཕྱག་འཚལ་བ་དང་། མཆོད་པ་དང་། བསྙེན་བཀུར་བྱ་བའི་ཕྱིར་དང་། ནམ་མཁའི་མིག་དང་ལྡན་པ། སོ་སོ་ཡང་དག་པར་རིག་པ་བཞི་དང་ལྡན་པ། ཆོས་ཀྱིས་གནས་པ་རྣམས་ཀྱི་བྱང་ཆུབ་སེམས་ དཔའི་སྤྱོད་པ་མཉན་པའི་ཕྱིར་ལྷགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཀྱང་ང་ལ་སྙིང་ཉེ་བའི་ཕྱིར་ཆོས་ཀྱི་ཚུལ་རིང་དུ་གནས་པར་བྱ་བའི་དོན་དང་། དཀོན་མཆོག་གསུམ་གྱི་གདུང་རྒྱུན་མི་གཅད་པའི་དོན་དུ་བསམ་གཏན་གྱི་ཡུལ་གྱིས་ས་སྟེང་དུ་འཁོད་ནས། བདུད་ཐམས་ཅད་ཀྱི་ཡུལ་ཚར་བཅད་པའི་ཕྱིར་དང་། འཁོར་བས་སྐྲག་པ་སྦྱིན་པ་ལ་མངོན་པར་བརྩོན་པའི་སེམས་ཅན་དེ་དག་ལ་སྙིང་བརྩེ་བའི་ཕྱིར་སངས་རྒྱས་ཀྱི་ཞིང་འདི་ཡོངས་སུ་སྤྱོད་པ་དག་ཏུ་བྱེད་དོ། ། ད་ལྟར་དང་མ་འོངས་པའི་དུས་ན་ངའི་བསྟན་པ་འདི་དང་། དམ་པའི་ ཆོས་སམ། དམ་པའི་ཆོས་ཀྱི་གཟུགས་བརྙན་ཡུན་ཇི་སྲིད་གནས་པར་ཆོས་ཀྱིས་གནས་པའི་དགེ་སློང་རྣམས་ལ་ཁྱིམ་དང་།

ཀུན་དགའི་ར་བ་དང་། ཞིང་དང་། བྲན་དང་། བྲན་མོའི་བར་གང་སུ་དག་གིས་དེ་ལྟར་བསྔོས་པ་དེ་ལ་སྡིག་པ་སྤྱོད་པའི་དགེ་སློང་ཚུལ་ཁྲིམས་འཆལ་ པ་གང་དག་ཐ་ན་འདབ་མ་གཅིག་དང་། འབྲས་བུ་གཅིག་དང་། མེ་ཏོག་གཅིག་ཅིག་ཡོངས་སུ་སྤྱོད་པ་དག་ཏུ་བྱེད་ན་དེ་ནི་མི་བླུན་པོ་དེ་ལ་དོན་མ་ཡིན་པ་དང་། ཕན་པ་མ་ཡིན་པར་འགྱུར་ཏེ། དེ་ལ་གནོད་པ་བཞི་ཡང་འབྱུང་བར་འགྱུར་རོ། ། བཞི་གང་ཞེ་ན། ཕྱོགས་ཐམས་ཅད་ དུ་མི་སྙན་པ་ཆེན་པོ་འགྲོ་བ་ཡིན། མཛའ་བོ་དང་། ཉེ་དུ་དང་། སྣག་གི་གཉེན་མཚམས་དང་། མཁན་པོ་དང་། སློབ་དཔོན་དང་། རིམ་གྲོ་པ་སྡུག་ཅིང་ཡིད་དུ་འོང་བ་དག་དང་མྱུར་དུ་འབྲལ་བར་འགྱུར་བ་ཡིན། ནད་ཚབས་ཆེན་པོ་ཡུན་རིང་བ་དག་གིས་ཐེབས་པར་འགྱུར་བ་ ཡིན། དེའི་ཆོས་གོས་དང་ལྷུང་བཟེད་གང་ཡོད་པ་ཡང་འཇིགས་པ་ཆེན་པོ་ལྔས་ཕྲོགས་པར་འགྱུར་བ་ཡིན་ནོ། ། ལྔ་གང་དག་གིས་ཞེ་ན། འདི་ལྟ་སྟེ། རྒྱལ་པོ་དང་། ཆོམ་རྐུན་དང་། མེ་དང་། ཆུ་དང་། བགོ་སྐལ་ལ་སྤྱོད་པ་མི་མཛའ་བ་དང་ལྔ་པོ་དེ་དག་གིས་ སོ། ། དེའི་འཇིག་རྟེན་ཕ་རོལ་གྱི་འདོད་པ་མ་ཡིན་པའི་འབྲས་བུ་བཞི་མྱུར་དུ་འགྲུབ་པར་འགྱུར་བ་ཡིན་ཏེ། བཞི་གང་དག་ཡིན་ཞེ་ན།

ལུས་ཞིག་ནས་སེམས་ཅན་དམྱལ་བ་ཆེན་པོ་མི་བཟད་པར་སྐྱེ་བར་འགྱུར་བ་ཡིན། དེ་གལ་ཏེ་བརྒྱ་ལ་རེས་འགའ་ཞིག་དུས་རིང་ཞིག་འདས་ནས་སེམས་ ཅན་དམྱལ་བ་དེ་ནས་ཤི་འཕོས་ནས་འབྲོག་དགོན་པ་རོ་སྐམ་གྱི་ནང་དུ་དུད་འགྲོ་དང་། {ཡི་དགས་,ཡི་དྭགས་}ཀྱི་རིས་སུ་ལོང་བ་དང་རྐང་ལག་མེད་པ་དག་ཏུ་སྐྱེ་བར་འགྱུར་ཞིང་། དེ་ལོ་བརྒྱ་སྟོང་མང་པོ་དག་ཏུ་བཀྲེས་པ་དང་། སྐོམ་པས་ཡོངས་སུ་གདུང་བ་ཆེན་པོའི་སྡུག་བསྔལ་ཉམས་སུ་མྱོང་བར་ འགྱུར་བ་ཡིན། གལ་ཏེ་བརྒྱ་ལ་རེས་འགའ་ཞིག་དུས་རིང་ཞིག་འདས་ནས་དེ་དག་ཤི་འཕོས་ནས་ལོ་བརྒྱ་སྟོང་མང་པོ་དག་ཏུ་སྦྲུལ་གདུག་པ་ལོང་བ་རྡུལ་ཟ་བ་དག་གི་ནང་དུ་སྐྱེ་བར་འགྱུར་བ་ཡིན། དེ་བརྒྱ་ལ་རེས་འགའ་ཞིག་དེ་ནས་ཤི་འཕོས་ནས་གལ་ཏེ་མི་རྣམས་ཀྱི་ནང་དུ་སྐྱེས་ན། འོན་ ཀྱང་སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པ་སྟོང་པ་དག་ཏུ་མི་ཉིད་འཐོབ་པ་རྙེད་པར་འགྱུར་ཞིང་། མོང་རྟུལ་བ་དང་། ཚུལ་དུ་མི་ཤེས་པར་འགྱུར་བ་དང་། མིག་མ་ཚང་བ་དང་། ལག་པ་མ་ཚང་བ་དང་། རྐང་པ་མ་ཚང་བ་དང་། ཁྱིའི་ལོངས་སྤྱོད་ཀྱི་ཁ་ཟས་ལ་གདུ་ཞིང(རྐྱག་,སྐྱག་)་ཁུང་སའི་ ཁ་ཟས་ཟ་བ་དང་། འདམ་རྫབ་དང་། ཕྱག་དར་ཁྲོད་ན་ཉལ་བ་དང་།

འབྲོག་དང་། དགོན་པ་དང་། ལམ་པོ་ཆེ་རྣམས་ན་འཚོ་བར་འགྱུར་ལ། དེ་དེ་ནས་ཤི་འཕོས་ནས་ཀྱང་ཡང་སེམས་ཅན་དམྱལ་བ་རྣམས་ཀྱི་ནང་དུ་སྐྱེ་བར་འགྱུར་རོ། ། དེ་ཅིའི་ཕྱིར་དེའི་འབྲས་བུ་འདོད་པ་མ་ཡིན་ པ་དེ་ལྟར་ལྕི་བ་འབྱུང་ཞེ་ན། འདི་ལྟར་སྡིག་པ་སྤྱོད་པའི་དགེ་སློང་དེ་ནི་འདི་ལྟར་ཆོས་ཀྱིས་གནས་པ་རྣམས་ལ་ཁྱིམ་དང་། ཞིང་དང་། ཀུན་དགའི་ར་བ་དང་། བྲན་དང་། བྲན་མོ་དང་། ཕྱུགས་དག་གི་བར་བསྔོས་པ་དག་ཕྲོགས་ནས་གང་ཟག་རང་གི་ཡོངས་སུ་ལོངས་སྤྱོད་པས་ ལོངས་སྤྱོད་པར་བྱེད་པའི་ཕྱིར་ཏེ། སྡིག་པ་སྤྱོད་པའི་དགེ་སློང་དེ་ལྟ་བུ་དེ་ནི་དེ་ལྟར་ངོ་མཚར་རྨད་དུ་བྱུང་བའི་སངས་རྒྱས་བཅོམ་ལྡན་འདས་འབྱུང་བ་ཐམས་ཅད་ཀྱི་ཆོས་ཀྱི་ཚུལ་མེད་པར་བྱ་བ་དང་། རྣམ་པར་གཞིག་པ་དང་། རྒྱུན་གཅད་པ་དང་། ནུབ་པར་བྱ་བའི་ཕྱིར་བརྩོན་པ་ཡིན་ ནོ། ། དེ་བཞིན་དུ་དཀོན་མཆོག་གསུམ་གྱི་གདུང་མེད་པར་བྱ་བ་ནས་ནུབ་པར་བྱ་བའི་བར་དུ་བརྩོན་པ་ཡིན་ནོ། ། དེ་ཅིའི་ཕྱིར་ཞེ་ན། འདི་ལྟར་དགེ་བའི་ཕྱོགས་ནི་ཚོགས་དང་ལྡན་པ་ཡིན་ལ། ཆོས་ཀྱི་ཚུལ་དང་དཀོན་མཆོག་གསུམ་གྱི་གདུང་ཡང་དགེ་བའི་ཕྱོགས་ཀྱིས་རབ་ཏུ་ཕྱེ་བ་ ཡིན་ཏེ།

དེའི་ཕྱིར་དེ་ཉིད་ཀྱི་མི་འདོད་པའི་འབྲས་བུ་རྣམ་པར་སྨིན་པ་ལྕི་བ་མངོན་པར་འགྲུབ་པ་ཡིན་ནོ། ། དེ་ནས་གནས་བརྟན་ག་ཡ་འོད་སྲུང་གིས་མཆི་མ་བླགས་ནས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་མི་ཉིད་རྙེད་པ་ནི་མ་ཐོབ་ཀྱང་མི་བསྔོའི། རབ་ཏུ་ བྱུང་ནས་བཟའ་བ་དང་བཏུང་བའི་སླད་དུ་ལོག་པར་སྒྲུབ་པ་ནི་དེ་ལྟ་མ་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ། ག་ཡ་འོད་སྲུང་ཆེན་པོ་དེ་དེ་བཞིན་ནོ། ། ཇི་སྐད་སྨྲས་པ་དེ་བཞིན་ཏེ། གང་དུ་དེའི་སྔོན་གྱི་ལས་རྣམས་ཟད་པ་དག་ཏུ་འགྱུར་བའི་སེམས་ཅན་དམྱལ་ བར་གནས་པ་ནི་སླའི། འདི་ན་གང་གཞན་དུ་སྤྱོད་པ་ནི་དེ་ལྟ་མ་ཡིན་ནོ། ། འོན་ཀྱང་སྐྱེས་བུ་བླུན་པོ་ཁ་ཅིག་མི་ཉིད་ཐོབ་པ་རྙེད་པར་དཀའ་བ་རྙེད་དེ་ལེགས་པར་གསུངས་པའི་ཆོས་འདུལ་བ་གང་ལ་སྡུག་བསྔལ་ཐམས་ཅད་ཟད་པ་དང་། ཟག་པ་ཐམས་ཅད་མཐར་ཐུག་པར་འགྱུར་ བ་ངོ་མཚར་རྨད་དུ་བྱུང་བའི་རབ་ཏུ་འབྱུང་བ་རྙེད་པར་དཀའ་བ་དང་། བསྙེན་པར་རྫོགས་པ་དགེ་སློང་གི་དངོས་པོ་ཐོབ་ནས་འོན་ཀྱང་སྐྱེས་བུ་བླུན་པོ་དེ་དག་གང་གིས་མཆོད་པར་མི་འགྱུར་བ་དང་།

བཟའ་བཏུང་དང་བྲལ་བར་འགྱུར་བ་མི་དགེ་བའི་ཕྱོགས་རྣལ་འབྱོར་ཡིད་ལ་བྱེད་ པ་ཡོངས་སུ་བསམས་ནས་རྒྱལ་རིགས་དང་། བྲམ་ཟེ་དང་། རྗེའུ་རིགས་དང་། དམངས་རིགས་དད་པ་ཅན་དག་གིས་ཁྱིམ་དང་། ཞིང་དང་། ཀུན་དགའི་ར་བ་དང་། སྐྱེད་མོས་ཚལ་དང་། བྲན་དང་། བྲན་མོ་ནས་རྐང་བཞི་པ་དག་གི་བར་དགེ་སློང་ཆོས་ཀྱིས་གནས་པ། ཡོན་ཏན་གྱིས་ཕྱུག་པ་དག་ལོངས་སྤྱོད་པར་བྱ་བའི་ཕྱིར་དང་། དགེ་བའི་ཕྱོགས་དང་འཐུན་པར་བྱ་བའི་ཕྱིར་དེ་ལྟར་བསྔོས་པ་ལ་སྡིག་པ་སྤྱོད་པའི་དགེ་སློང་དེ་མང་དུ་ཐོས་པའི་མཐུའམ། ཁྱིམ་ན་གནས་པའི་མཐུས་དེ་དག་ལ་བསྔོས་པའི་ལོངས་སྤྱོད་དང་། ཉེ་བར་ སྤྱོད་པ་ཕྲོགས་ནས་བདག་ཉིད་ཀྱིས་གང་ཟག་གི་འདུ་ཤེས་ཀྱིས་ཡོངས་སུ་སྤྱོད་པར་བྱེད་དེ། སྐྱེས་བུ་བླུན་པོ་དེའི་ལོག་པར་བསྒྲུབ་པ་དེ་ནི་དེ་ལྟ་བུར་འགྱུར་རོ། ། དེ་ནས་བཅོམ་ལྡན་འདས་ལ་རྒྱལ་པོ་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་གང་ དགེ་སློང་ཆོས་ཀྱིས་གནས་པ། ཡོན་ཏན་གྱིས་ཕྱུག་པ་དག་ལ་དེ་ལྟར་བསྔོས་པའི་ལོངས་སྤྱོད་དང་།

ཉེ་བར་སྤྱོད་པ་ཕྲོགས་ནས་བདག་ཉིད་ཀྱིས་ཡོངས་སུ་སྤྱོད་པར་བགྱིད་པའི་དགེ་སློང་རབ་ཏུ་བྱུང་བའི་མི་འདོད་པའི་འབྲས་བུ་དེ་ལྟ་བུ་འབྱུང་ལགས་ན། དཔེ་ཙམ་དུ་བགྱི་ན་གང་ ཡང་ཁྱིམ་ན་གནས་པར་གྱུར་ལ། དགེ་སློང་ཆོས་ཀྱིས་གནས་པ་རྣམས་ལ་དེ་ལྟར་བསྔོས་པའི་ལོངས་སྤྱོད་དང་། ཉེ་བར་སྤྱོད་པ་ཕྲོགས་ནས་བདག་ཉིད་ཀྱིས་ཡོངས་སུ་སྤྱོད་པར་བགྱིད་ན་དེ་བསོད་ནམས་མ་ལགས་པའི་ཕུང་པོ་ཇི་སྙེད་ཅིག་དང་ལྡན་པར་འགྱུར་བ་ལགས། བཅོམ་ལྡན་འདས་ ཀྱིས་བཀའ་སྩལ་པ། རྒྱལ་པོ་ཆེན་པོ་ཐོང་ཁྱོད་ཀྱིས་སྨྲས་པ་དེས་ཅི་ཞིག་བྱ། གསོལ་པ། བཙུན་པ་བཅོམ་ལྡན་འདས་དགེ་སློང་ཆོས་ཀྱིས་གནས་པ། ཡོན་ཏན་གྱིས་ཕྱུག་པ་དེ་ལྟ་བུ་དག་ལ་ལོངས་སྤྱོད་དང་ཉེ་བར་སྤྱོད་པ་དག་གིས་སྩོལ་བར་ནི་བགྱིད་ཀྱི། འཕྲོག་པར་ནི་མི་བགྱིད་ ལགས་སོ། ། འོན་ཀྱང་སླད་མའི་དུས་ན་རྒྱལ་རིགས་དང་། བྲམ་ཟེ་དང་། རྗེའུ་རིགས་དང་། དམངས་རིགས་མ་དད་པ་འཇིག་རྟེན་ཕ་རོལ་གྱིས་འཇིགས་པར་མི་ལྟ་བ་དག་འབྱུང་བར་འགྱུར་ཞིང་། དགེ་སློང་ཆོས་ཀྱིས་གནས་པ། ཡོན་ཏན་གྱིས་ཕྱུག་པ་དག་ལ་དེ་ལྟར་བསྔོས་ པའི་ལོངས་སྤྱོད་དང་།

ཉེ་བར་སྤྱོད་པ་ཕྲོགས་ནས་བདག་ཉིད་ཀྱིས་ཡོངས་སུ་སྤྱོད་པར་བགྱིད་པ་གང་དག་ལགས་པ་དེ་དག་གི་རྒུད་པར་འགྱུར་བ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་གལ་ཏེ་ངས་ལུང་བོང་ལྟ་བུའི་རྒྱལ་རིགས་དག་ནས། དམངས་ རིགས་དག་གི་བར་དག་ཆོས་ཀྱིས་གནས་པ་ཡོན་ཏན་གྱིས་ཕྱུག་པ་དག་ལ་དེ་ལྟར་བསྔོས་པའི་ལོངས་སྤྱོད་དང་། ཉེ་བར་སྤྱོད་པ་ཕྲོགས་ནས་བདག་ཉིད་ཀྱིས་ལོངས་སྤྱོད་པར་བྱེད་པ་གང་དག་ཡིན་པ་དེ་དག་གི་ལོག་པར་སྒྲུབ་པ་འབྱུང་བ་དེ་བཤད་ན་ནི། དེའི་ཚེ་དེ་དག་ཀྱང་ངའི་ བཀའ་བསྟན་པའི་ཕྲིན་ལས་ཀྱི་སྐབས་ཐོབ་ནས་སྤོང་བ་དག་ཏུ་བྱེད་ལ་ཡིད་ཆེས་པ་དག་ཏུ་མི་བྱེད་དེ། དེ་དག་ནི་ཕུང་བར་འགྱུར་བའི་འཇིགས་པ་ཆེན་པོའི་གནོད་པ་གཉི་ག་དང་ལྡན་པར་འགྱུར་རོ། ། བཅོམ་ལྡན་འདས་ལ་རྒྱལ་པོ་གཟུགས་ཅན་སྙིང་པོས་ལན་གཉིས་སུ་ཡང་འདི་ སྐད་ཅེས་གསོལ་ཏོ། ། བཅོམ་ལྡན་འདས་བསྟན་དུ་གསོལ། བདེ་བར་གཤེགས་པ་བསྟན་དུ་གསོལ། བཙུན་པ་བཅོམ་ལྡན་འདས་གང་དག་འཇིག་རྟེན་ཕ་རོལ་གྱིས་འཇིགས་པར་ལྟ་ཞིང་། བཅོམ་ལྡན་འདས་ཀྱིས་ལེགས་པར་གསུངས་པའི་ཆོས་འདུལ་བ་ལེགས་པར་བསྟན་ པ་ཡང་དག་པར་འཛིན་པ་དང་།

གསལ་བར་བགྱིད་པའི་རྒྱལ་རིགས་ནས་དམངས་རིགས་ཀྱི་བར་དག་གི་རིགས་རྒྱུད་རིགས་བཙུན་པ་དག་འབྱུང་བར་འགྱུར་ལགས་སོ། ། བཅོམ་ལྡན་འདས་དེ་དག་ནི་ཁྱོད་ཀྱི་བཀའི་ཕྲིན་ལས་བསྟན་པ་ཐོས་ནས་སྟོབས་དང་བརྩོན་པ་མཆོག་ཏུ་ ཆེན་པོས་རྒྱལ་བའི་བསྟན་པ་ལེགས་པར་བསྟན་པ་གསལ་བར་བགྱིད་པ་དང་། ཡོངས་སུ་སྐྱོང་བ་དག་ཏུ་འགྱུར་ཞིང་། གང་ཟག་དེ་ལྟར་ཡང་དག་པར་ཞུགས་པ་དག་དང་། ཆོས་ཀྱིས་གནས་པ་དག་དང་། ཡོན་ཏན་གྱིས་ཕྱུག་པ་དག་ལ་ཡང་མཆོད་པ་བགྱིད་པ་དང་། སྲུང་ བ་བགྱིད་པ་དང་། ཡོངས་སུ་སྐྱོང་བར་བགྱིད་པར་འགྱུར་ལགས་སོ། ། ཁྱིམ་ན་གནས་པ་དང་། རབ་ཏུ་བྱུང་བ་དེ་དག་ཀྱང་འཕྲོག་པར་མི་བགྱིད་ལགས་སོ། ། བཙུན་པ་བཅོམ་ལྡན་འདས་ཁྱིམ་ན་གནས་པ་གང་གིས་གང་ཟག་ཆོས་ཀྱིས་གནས་པ་དག་གི་ལོངས་སྤྱོད་དང་ཉེ་བར་ སྤྱོད་པ་ཕྲོགས་ནས་བདག་ཉིད་ཀྱིས་ཡོངས་སུ་སྤྱོད་པར་བགྱིད་པ་དེའི་རྒུད་པར་འགྱུར་བ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་གལ་ཏེ་ངས་མ་འོངས་པའི་དུས་ན་ལུང་བོང་ལྟ་བུའི་རྒྱལ་རིགས་ནས་དམངས་རིགས་ཀྱི་བར་དག་ཆོས་ཀྱིས་གནས་པ།

ཡོན་ཏན་གྱིས་ཕྱུག་པ་དག་ལ་དེ་ལྟར་བསྔོས་པའི་ལོངས་སྤྱོད་དང་ཉེ་བར་སྤྱོད་པ་འཕྲོག་ཅིང་བདག་ཉིད་ཀྱིས་ལོངས་སྤྱོད་པར་བྱེད་པ་གང་དག་ཡིན་པ་དེ་དག་གིས་ལོག་པར་སྒྲུབ་པ་འབྱུང་བ་དེ་བཤད་ན་ནི་དེ་དག་ཀྱང་ངའི་བཀའ་བསྟན་པའི་ཕྲིན་ལས་ཀྱི་སྐབས་ཐོས་ནས་ སྤོང་བ་དག་ཏུ་བྱེད་ལ་ཡིད་ཆེས་པ་དག་ཏུ་མི་བྱེད་དེ། དེ་དག་ནི་ཕུང་བར་འགྱུར་བའི་གནོད་པ་ཆེན་པོའི་གནོད་པ་གཉིས་ཀ་དང་ལྡན་པར་འགྱུར་རོ། ། བཅོམ་ལྡན་འདས་ལ་རྒྱལ་པོ་གཟུགས་ཅན་སྙིང་པོས་ལན་གསུམ་དུ་ཡང་འདི་སྐད་ཅེས་གསོལ་ཏོ། ། བཅོམ་ལྡན་འདས་བསྟན་ དུ་གསོལ། བདེ་བར་གཤེགས་པ་བསྟན་དུ་གསོལ། བཅོམ་ལྡན་འདས་གང་དག་འཇིག་རྟེན་ཕ་རོལ་གྱིས་འཇིགས་པར་ལྟ་ཞིང་། བཅོམ་ལྡན་འདས་ཀྱི་ཆོས་འདུལ་བ་ལེགས་པར་བསྟན་པ་ཡང་དག་པར་འཛིན་པ་དང་། གསལ་བར་བགྱིད་པའི་རྒྱལ་རིགས་ནས་དམངས་རིགས་ཀྱི་ བར་དག་གི་རིགས་རྒྱུད་རིགས་བཙུན་པ་དག་འབྱུང་བར་འགྱུར་ལགས་སོ། ། དེ་དག་གི་ནི་བཅོམ་ལྡན་འདས་ཀྱི་བཀའ་ཕྲིན་ལས་བསྟན་པ་ཐོས་ནས་སྟོབས་དང་བརྩོན་པ་མཆོག་ཏུ་ཆེན་པོས་རྒྱལ་བའི་བསྟན་པ་ལེགས་པར་བསྟན་པ་གསལ་བར་བགྱིད་པར་འགྱུར་ཞིང་། གང་ ཟག་དེ་ལྟར་ཡང་དག་པར་ཞུགས་པ་དག་དང་།

ཆོས་ཀྱིས་གནས་པ་དག་དང་། ཡོན་ཏན་གྱིས་ཕྱུག་པ་དག་ལ་ཡང་མཆོད་པ་བགྱིད་པ་དང་། སྲུང་བ་བགྱིད་པ་དང་། ཡོངས་སུ་སྐྱོང་བར་བགྱིད་པར་འགྱུར་ལགས་སོ། ། ཁྱིམ་ན་གནས་པ་དང་། རབ་ཏུ་བྱུང་བ་དེ་དག་ཀྱང་ འཕྲོག་པར་མི་བགྱིད་ལགས་སོ། ། ཆོས་ཀྱིས་གནས་པ་དེ་དག་གི་ལོངས་སྤྱོད་དང་ཉེ་བར་སྤྱོད་པ་འཕྲོག་པར་མི་བགྱིད་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ལེགས་སོ་ལེགས་སོ། ། ཁྱོད་ཀྱི་སྤོབས་པ་ལེགས་སོ། ། རྒྱལ་པོ་ཆེན་པོ་མ་ འོངས་པའི་དུས་ན་གང་དག་རྒྱལ་རིགས་དང་། བྲམ་ཟེ་དང་། རྗེའུ་རིགས་དང་། དམངས་རིགས་དག་གིས་ཆོས་ཀྱིས་གནས་པ་རྣམས་ལ་ཁྱིམ་གྱི་གཞི་དང་། ཞིང་གི་གཞི་དང་། ཀུན་དགའི་ར་བའི་གཞི་དང་། སྐྱེད་མོས་ཚལ་དང་། བྲན་དང་། བྲན་མོ་དང་། མལ་ཆ་དང་། སྟན་དང་། ན་བའི་གསོས་སྨན་དང་། ཡོ་བྱད་དག་དེ་ལྟར་བསྔོས་པ་དང་། རྐང་པ་བཞི་པའི་བར་བསྔོས་པ་ཡང་འཕྲོག་པར་བྱེད་པའམ། རྐུ་བར་བྱེད་པ་དག་འབྱུང་བར་འགྱུར་ཏེ། རྒྱལ་རིགས་ནས་དམངས་རིགས་ཀྱི་བར་དེ་ཐམས་ཅད་ནི་མཐོང་བའི་ཆོས་ལ་འབྱུང་བ་འདོད་པ་ མ་ཡིན་པའི་ཆོས་ཉི་ཤུ་དང་མྱུར་དུ་ལྡན་པར་འགྱུར་རོ། ། ཉི་ཤུ་གང་དག་ཅེ་ན།

ལྷ་རྣམས་ཀྱིས་ཡོངས་སུ་བཏང་བ་ཡིན། ཕྱོགས་དང་ཕྱོགས་མཚམས་དག་ཏུ་ཡང་དེའི་མི་སྙན་པ་གྲགས་པར་འགྱུར་བ་ཡིན། མཛའ་བཤེས་དང་སྣག་གི་གཉེན་མཚམས་དག་གིས་ཀྱང་དེ་ཡང་ ཡོངས་སུ་གཏོང་བར་འགྱུར་བ་ཡིན། དེའི་དགྲ་བོ་དག་ཀྱང་མང་བར་འགྱུར་བ་ཡིན། ནོར་དང་ནོར་གྱི་ཡོ་བྱད་དག་ལས་ཀྱང་ཡོངས་སུ་ཉམས་པར་འགྱུར་བ་ཡིན། རྣམ་པར་གཡེང་བ་ཡང་མང་བ་ཡིན། ཡན་ལག་མ་ཚང་བར་འགྱུར་བ་ཡང་ཡིན། དེ་གཉིད་མེད་པ་ཡིན། རྟག་ ཏུ་སྲེད་པས་གནོད་པར་འགྱུར་བ་ཡང་ཡིན། དེའི་བཟའ་བ་དང་བཏུང་བ་ཡང་དུག་གི་བྱ་བ་བྱེད་པ་ཡིན། སྡུག་པ་དང་ཡིད་དུ་འོང་བ་དག་དང་མྱུར་དུ་འབྲལ་བ་ཐོབ་པ་ཡིན། རྟག་ཏུ་གཞན་དག་དང་ཐབ་མོ་འབྱུང་བ་ཡིན། ཕ་དང་། མ་དང་། སྤུན་དང་། ཆུང་མ་དང་བུ་མོ་དང་བྲན་དང་། བྲན་མོ་དག་ཀྱང་བསྒོ་བ་བཞིན་མི་བྱེད་པ་ཡིན། དེའི་གསང་སྔགས་གསང་བ་དག་དང་། ནོར་གསང་བ་དང་། སླས་གསང་བ་དང་། དེའི་དངོས་པོ་གསང་བ་རྣམས་ཀྱང་ཐམས་ཅད་གསང་ཤོར་བ་དག་ཏུ་འགྱུར་བ་ཡིན། བགོ་སྐལ་ལ་སྤྱོད་པ་མི་མཛའ་བ་ལ་སོགས་པ་ལྔས་ཀྱང་ ལོངས་སྤྱོད་དག་ཆུད་ཟ་བར་འགྱུར་བ་ཡིན། ནད་ཚབས་ཆེན་པོ་དག་གིས་ཀྱང་མྱུར་དུ་ཐེབས་པར་འགྱུར་བ་ཡིན།

སྨན་དང་རིམ་གྲོ་པ་དང་བྲལ་ཞིང་ཤ་དང་ཁྲག་བསྐམས་ནས་སྡུག་བསྔལ་ཉམས་སུ་མྱོང་བར་འགྱུར་བ་ཡིན། རང་གི་བཤང་གཅི་དག་གི་ནང་དུ་འཆི་བའི་དུས་བྱེད་པར་ འགྱུར་བ་ཡིན་ཏེ། རྒྱལ་པོ་ཆེན་པོ་འདོད་པ་མ་ཡིན་པའི་ལས་ཉི་ཤུ་པོ་དེ་དག་དང་མྱུར་དུ་ལྡན་པར་འགྱུར་རོ། ། གང་དགེ་སློང་ཆོས་ཀྱིས་གནས་པ་རྣམས་ལ་བསྔོས་པའི་ལོངས་སྤྱོད་དང་། ཉེ་བར་སྤྱོད་པ་དང་། ནོར་གྱི་ཡོ་བྱད་འཕྲོག་པར་བྱེད་ཅིང་། བདག་ཉིད་ཀྱིས་ཀྱང་ ཡོངས་སུ་སྤྱོད་པར་བྱེད་པ་དེ་འཆི་བའི་དུས་བྱས་ནས་སེམས་ཅན་དམྱལ་བ་ཆེན་པོ་མནར་མེད་པར་སྐྱེ་བར་འགྱུར་རོ། ། དེ་དེར་ཡང་ཚེ་བསྐལ་པར་ལྕགས་དང་ཟངས་བཞུན་འཐུང་བར་འགྱུར་ཞིང་། ལྕགས་ཀྱི་ཐུ་ལུམ་ཟ་བར་འགྱུར་ལ། མེའི་གོས་དང་། ལོངས་སྤྱོད་དང་། ཉེ་བར་སྤྱོད་པ་སྤྱོད་པར་བྱེད་ཅིང་གནོད་པ་མི་བཟད་པ་ཆེན་པོ་རྣམ་པ་སྣ་ཚོགས་ཉམས་སུ་མྱོང་བར་འགྱུར་བ་ཡིན་ནོ། ། ཚེ་བསྐལ་པ་ཟད་ནས་ཀྱང་དེ་ནས་ཤི་འཕོས་ནས་འབྲོག་དགོན་པ་རོ་སྐམ་དག་གི་ནང་དུ་ལམ་དུ་སྐྱེས་པའི་{ཡི་དགས་,ཡི་དྭགས་}རྣམས་དང་སྐལ་པ་མཉམ་ པར་རྐང་པ་དང་། ལག་པ་དང་། མིག་མ་ཚང་བར་སྐྱེ་བར་འགྱུར་རོ། །

དེར་ཡང་ཕྱོགས་བཞི་ནས་ལངས་པའི་རླུང་ཀུན་ཏུ་ཚ་བ་དག་གིས་ཀུན་ཏུ་གདུང་བར་བྱེད་ཅིང་ས་སྤུ་གྲི་དང་འདྲ་བའི་སྟེང་དུ་དམྱལ་བར་བྱེད། ཡོངས་སུ་དམྱལ་བར་བྱེད་དེ། དེ་དེར་ལོ་བརྒྱ་སྟོང་མང་པོར་ སྡུག་བསྔལ་དེ་ལྟ་བུ་ཉམས་སུ་མྱོང་བར་བྱེད་པ་ཡིན་ནོ། ། དེ་གལ་ཏེ་བརྒྱ་ལ་རེས་འགའ་ཞིག་དེ་ནས་ཤི་འཕོས་ནས་ཀྱང་རྒྱ་མཚོ་ཆེན་པོའི་ནང་དུ་ལུས་དཔག་ཚད་བརྒྱ་པའི་ཤ་ནར་ནར་པོར་སྐྱེ་བར་འགྱུར་རོ། ། སྔོན་གྱི་ལས་ཀྱི་རྒྱུས་དེའི་དཔག་ཚད་ཁོར་ཡུག་གི་ཆུ་ཟངས་བཞུན་མ་ལྟར་ དམར་པོ་འབྱུང་བར་འགྱུར་རོ། ། དེ་དེར་ཡང་ལོ་བརྒྱ་སྟོང་མང་པོར་ཆུའི་ནང་དུ་སེམས་ཅན་དམྱལ་བའི་གནོད་པ་མྱོང་བར་བྱེད་པ་ཡིན་ནོ། ། དེ་དེ་ནས་ཤི་འཕོས་ནས་ཀྱང་འབྲོག་དགོན་པ་ཆེན་པོར་རྫུས་ཏེ་སྐྱེ་བ་ཤ་ནར་ནར་པོ་ཆེན་པོ་རི་དང་མཉམ་པ་འབྱུང་བར་འགྱུར་རོ། ། ཕྱོགས་ བཞི་ཀུན་ཏུ་ཡང་རླུང་ཀུན་ཏུ་ཚ་བ་དག་གིས་ཀུན་ཏུ་སྲེག་པར་བྱེད་དོ། ། དེར་ཡང་ཕྱོགས་བཞི་ནས་{རི་དགས་,རི་དྭགས་}དང་བྱ་དག་ལྷགས་ཏེ་ཡོངས་སུ་ཟ་བ་དག་ཏུ་བྱེད་དོ། །

དེ་བརྒྱ་ལ་རེས་འགའ་དུས་རིང་ཞིག་འདས་ནས་དེ་ནས་ཤི་འཕོས་ནས་ཡང་སེམས་ཅན་དམྱལ་བ་ཆེན་པོ་དག་གི་ནང་དུ་སྐྱེ་ བར་འགྱུར་རོ། ། དེ་ནས་ཀྱང་ཤི་འཕོས་ནས་ཡང་དང་ཡང་དུ་ལོག་པར་སྒྲུབ་པ་ཆེན་པོ་དེ་ལྟ་བུ་ཉམས་སུ་མྱོང་བར་འགྱུར་ཏེ། ཡོངས་སུ་བརྟག་པ་ཉེ་བར་བཟུང་ན། དེ་བརྒྱ་ལམ་ན་རེས་འགའ་ཞིག་མི་རྣམས་དང་སྐལ་བ་མཉམ་པར་སྐྱེས་ན་ཡང་སངས་རྒྱས་ཀྱི་ཞིང་སྙིགས་མ་ལྔ་དང་ ལྡན་པ་དག་ཏུ་མིག་མ་ཚང་བ་དང་། ཚུལ་དུ་མི་ཤིས་པར་སྐྱེ་བར་འགྱུར་རོ། ། རྒྱལ་པོ་ཆེན་པོ་གང་ཆོས་ཀྱིས་གནས་པ་དག་ལ་བསྔོས་པའི་ལོངས་སྤྱོད་དང་ཉེ་བར་སྤྱོད་པ་དང་། ནོར་གྱི་ཡོ་བྱད་འཕྲོག་པར་བྱེད་པ་དེའི་ལོག་པར་སྒྲུབ་པ་དེ་ནི་དེ་ལྟ་བུ་ཡིན་ནོ། ། དེ་ནས་རྒྱལ་པོ་ གཟུགས་ཅན་སྙིང་པོ་མཆི་མ་དག་ཕྱུང་ནས་གསོལ་པ། བཙུན་པ་བཅོམ་ལྡན་འདས་སྐྱེས་བུ་གང་ཟག་དེ་ལྟ་བུ་ནི་སེམས་ཅན་དམྱལ་བ་ན་གནས་པར་མི་བསྔོ་ལགས་ཀྱི། གང་གིས་མི་ཉིད་རྙེད་པ་ཐོབ་ནས་བསོད་ནམས་མ་ལགས་པ་ཆེན་པོ་དེ་ལྟ་བུ་ཀུན་ཏུ་སྤྱོད་པར་འགྱུར་བའི་མི་ ཉིད་རྙེད་པ་ནི་དེ་ལྟ་མ་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ།

རྒྱལ་པོ་ཆེན་པོ་ད་ལྟར་དང་མ་འོངས་པའི་དུས་ན་རྒྱལ་རིགས་ཆོས་ཀྱིས་གནས་པ་ཁྱེད་ཅག་གི་ལག་ཏུ་གང་ཟག་ཡོངས་སུ་གཏད་ཀྱིས་སྲུངས་ཤིག ། ཡོངས་སུ་སྲུངས་ཤིག ། རབ་ཏུ་བྱུང་བའམ། ཁྱིམ་ན་གནས་པ་གང་དགེ་སློང་ཆོས་ཀྱིས་གནས་པ་རྣམས་ལ་དེ་ལྟར་བསྔོས་པའི་ལོངས་སྤྱོད་དང་། ཉེ་བར་སྤྱོད་པ་དང་། ནོར་གྱི་ཡོ་བྱད་འཕྲོག་པར་བྱེད་པ་དེ་ལ་ཁྱེད་ཀྱིས་ཇི་ནས་ཀྱང་ཆོས་དང་འཐུན་པས་ཆད་པས་གཅད་པར་བྱའོ། ། རྒྱལ་པོས་གསོལ་པ། བཙུན་པ་བཅོམ་ ལྡན་འདས་གལ་ཏེ་གང་དག་དགེ་སློང་ཆོས་ཀྱིས་གནས་པ་རྣམས་ལ་དེ་ལྟར་བསྔོས་པའི་ལོངས་སྤྱོད་དང་། ཉེ་བར་སྤྱོད་པ་དང་། ནོར་གྱི་ཡོ་བྱད་འཕྲོག་པར་བྱེད་པའི་ཁྱིམ་ན་གནས་པ་དང་རབ་ཏུ་བྱུང་བ་དེ་དག་ཅི་ནས་ཆོས་དང་འཐུན་པས་ཆད་པས་གཅོད་པར་མི་བགྱིད་ཅིང་། དེ་ ལ་རྒྱལ་པོ་བཏང་སྙོམས་པར་གནས་པར་བགྱིད་ལགས་ན་རྒྱལ་རིགས་དེ་བསོད་ནམས་མ་ལགས་པའི་ཕུང་པོ་ཇི་སྙེད་ཅིག་སྐྱེད་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་གཤེགས་པ་མ་གཏོགས་པར་ཉན་ཐོས་དང་། རང་ རྒྱལ་བ་དག་དང་བཅས་པའི་སེམས་ཅན་ཐམས་ཅད་ཀྱི་བསོད་ནམས་ཇི་སྙེད་ཡོད་པའི་བསོད་ནམས་ཀྱི་ཕུང་པོ་དེ་ལྟ་བུ་དང་།

སེམས་ཅན་གཅིག་ཅིག་ལྡན་པར་གྱུར་ན། སེམས་ཅན་དེ་ཉན་ཐོས་དང་། རང་རྒྱལ་བ་ཐམས་ཅད་ལས་ཆེས་ཁྱད་པར་དུ་འཕགས་པ་དང་། ཆེས་ བསོད་ནམས་དང་ལྡན་པར་འགྱུར་བ་ཡིན་ནམ། རྒྱལ་པོས་གསོལ་པ། བཙུན་པ་བཅོམ་ལྡན་འདས་དེ་དེ་ལྟ་ལགས་སོ། ། བཙུན་པ་བཅོམ་ལྡན་འདས་སེམས་ཅན་དེ་ཆེས་ཁྱད་པར་དུ་འཕགས་པ་ལགས་ཏེ། དེ་གང་ལ་སེམས་ཅན་འཚོ་བ་ཀུན་གྱི་ནང་ན་ཉན་ཐོས་ དང་། རང་རྒྱལ་བ་ཐམས་ཅད་ལས་ཆེས་བསོད་ནམས་དང་ལྡན་པ་ནི་སྐྱེས་བུ་འགའ་ཞིག་འབྱུང་བར་བས་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་གལ་ཏེ་སེམས་ཅན་སྔ་མ་དེ་བསོད་ནམས་ཀྱི་ཕུང་པོ་ཇི་ལྟ་བུ་དང་ལྡན་པའི་བསོད་ནམས་ཀྱི་ཕུང་པོ་ དེ་ལྟ་བུ་དང་སེམས་ཅན་ཐམས་ཅད་ལྡན་པ་དག་ཏུ་གྱུར་ལ། དེ་ལ་གང་སེམས་ཅན་འཚོ་བ་ཐམས་ཅད་ཀྱི་ཡན་ལག་དག་རྣམ་པར་གཅོད་པར་བྱེད་ཅིང་མིག་འབྱིན་པ་དང་། རྣ་བ་དང་། སྣ་དང་། ལག་པ་དང་། རྐང་པ་དག་རྣམ་པར་གཅོད་པར་བྱེད་པའི་སྐྱེས་བུ་འགའ་ཞིག་བྱུང་བར་ གྱུར་ན། རྒྱལ་པོ་ཆེན་པོ་འདི་ཇི་སྙམ་དུ་སེམས། སྐྱེས་བུ་དེ་བསོད་ནམས་མ་ཡིན་པ་སྡིག་པའི་ལས་ཇི་སྙེད་ཅིག་སྐྱེད་པར་འགྱུར།

དེ་ནས་རྒྱལ་པོ་གཟུགས་ཅན་སྙིང་པོ་མཆི་མ་དག་ཕྱུང་ནས་ཅང་མི་སྨྲ་བར་འདུག་གོ། ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་ པོ་ལན་ཐོབ་ཤིག་ལན་ཐོབ་ཤིག ། དེ་ནས་རྒྱལ་པོ་ཆེན་པོ་གཟུགས་ཅན་སྙིང་པོ་ཤུམ་ཞེས་ངུ་བཞིན་དུ་གསོལ་པ། བཙུན་པ་བཅོམ་ལྡན་འདས་གང་སེམས་ཅན་བསོད་ནམས་དང་ལྡན་པ་དེ་ལྟ་བུ་གཅིག་གི་ཡན་ལག་དག་རྣམ་པར་གཅོད་པར་བགྱིད་ཅིང་། མིག་འབྱིན་པ་དང་། རྣ་བ་དང་། སྣ་དང་། ལག་པ་དང་། རྐང་པ་དག་རྣམ་པར་གཅོད་པར་བགྱིད་པའི་སྐྱེས་བུ་དེ་ཡང་བསོད་ནམས་མ་ལགས་པ་སྡིག་པའི་ལས་གྲངས་མ་མཆིས། ཚད་མ་མཆིས། དཔག་ཏུ་མ་མཆིས། དཔེ་མ་མཆིས་པ་སྐྱེད་པར་འགྱུར་བ་ལགས་ན། གང་དེ་ལྟ་བུའི་ བསོད་ནམས་དང་ལྡན་པའི་སེམས་ཅན་ཐམས་ཅད་ཀྱི་ཡན་ལག་དག་རྣམ་པར་གཅོད་པར་བགྱིད་ཅིང་། མིག་འབྱིན་པ་དང་། རྣ་བ་དང་། སྣ་དང་། ལག་པ་དང་། རྐང་པ་དག་རྣམ་པར་གཅོད་པ་ལྟ་ཅི་སྨོས་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ ཆེན་པོ་ད་ལྟར་དང་། མ་འོངས་པའི་དུས་ན་དེ་བཞིན་གཤེགས་པ་འཚོ་བའམ། ཡོངས་སུ་མྱ་ངན་ལས་འདས་པ་ཡང་རུང་སྟེ།

ལྔ་བརྒྱ་པ་ཐ་མ་ལ་དམ་པའི་ཆོས་ཟད་པར་འགྱུར་བའི་བར་དུ་ཁྱིམ་ན་གནས་པ་དང་རབ་ཏུ་བྱུང་བ་གང་ཆོས་ཀྱིས་གནས་པ། ཡོན་ཏན་གྱིས་ ཕྱུག་པ་དག་ལ་དེ་ལྟར་བསྔོས་པའི་ལོངས་སྤྱོད་དང་། ཉེ་བར་སྤྱོད་པ་དང་། ནོར་གྱི་ཡོ་བྱད་དང་། ཞིང་གི་གཞི་དང་། ཁྱིམ་གྱི་གཞི་དང་། ཀུན་དགའི་ར་བ་དང་། སྐྱེད་མོས་ཚལ་དང་། བྲན་དང་། བྲན་མོ་དང་། རྐང་བཞི་པ་དང་། ཆོས་གོས་དང་། བསོད་སྙོམས་ དང་། མལ་ཆ་དང་། སྟན་དང་། ན་བའི་གསོས་སྨན་དང་། ཡོ་བྱད་དག་ཡོད་པ་དེ་ལས་འཕྲོག་གམ་རྐུ་བ་དེ་ལ་རྒྱལ་རིགས་བཏང་སྙོམས་པར་བྱེད་ཅིང་། རབ་ཏུ་བྱུང་བ་དང་། ཁྱིམ་ན་གནས་པ་རྐུན་མ་དེ་དག་ཆད་པ་ཅི་ཡོད་པ་བཞིན་ཆད་པས་གཅོད་དུ་མི་འཇུག་ན་རྒྱལ་ རིགས་དེ་བསོད་ནམས་མ་ཡིན་པ་ཆེས་མང་དུ་སྐྱེད་དོ། ། རྒྱལ་རིགས་ཇི་ལྟ་བ་བཞིན་གྲོང་གི་བླར་བསྐོས་པ་དང་། གྲོང་ཁྱེར་གྱི་བླ་དང་། གྲོང་རྡལ་གྱི་བླ་དང་། ལྗོངས་ཀྱི་བླར་བསྐོས་པ་ཡང་དེ་བཞིན་དུ་བཏང་སྙོམས་པར་བྱེད་ཅིང་། དེ་ལྟར་རྐུ་བའི་སེམས་ཅན་དེ་དག་ཟློག་པར་ མི་བྱེད་ན། དེ་ལྟ་བུའི་གྲོང་གི་བླ་ནས་ལྗོངས་ཀྱི་བླའི་བར་དེ་བསོད་ནམས་མ་ཡིན་པའི་ཕུང་པོ་ཆེས་མང་དུ་སྐྱེད་དོ། །

དེ་ནས་རྒྱལ་པོ་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་རྒྱལ་པོ་ཉིད་ནི་ཤིན་ཏུ་ལྕི་བ་ལགས་སོ། ། རྒྱལ་རིགས་ནི་ བག་མ་མཆིས་པ་མང་པོ་དང་ལྡན་པར་གནས་པ་ལགས་སོ། ། བཙུན་པ་བཅོམ་ལྡན་འདས་གང་ཡང་རྒྱལ་པོ་བག་མ་མཆིས་པར་གནས་ཤིང་། གང་ཟག་ཆོས་ཀྱིས་གནས་པ་དེ་ལྟ་བུ་དག་སྲུང་བར་བགྱིད་པ་དང་། དེ་བཞིན་དུ་དེ་ལྟར་བསྔོས་པའི་ལོངས་སྤྱོད་དང་། ཉེ་བར་སྤྱོད་ པ་འཕྲོག་པའི་སེམས་ཅན་རྣམས་སྡིག་པའི་ལས་དེ་ལས་སླར་ཟློག་པར་བགྱིད་པ་དང་། གྲོང་གི་བླ་ནས་ལྗོངས་ཀྱི་བླའི་བར་ཡང་དེ་བཞིན་དུ་དེ་ལྟར་བསྔོས་པའི་ལོངས་སྤྱོད་དང་། ཉེ་བར་སྤྱོད་པ་དག་རྐུ་བའི་སེམས་ཅན་རྣམས་སྡིག་པའི་ལས་དེ་ལས་སླར་ཟློག་པར་བགྱིད་ན་དེ་བསོད་ ནམས་ཀྱི་ཕུང་པོ་ཇི་སྙེད་ཅིག་སྐྱེད་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་གལ་ཏེ་ངས་སྔར་གསུངས་པ་བཞིན་བསོད་ནམས་ཀྱི་ཕུང་པོ་དེ་ལྟ་བུ་དང་སེམས་ཅན་ཐམས་ཅད་ལྡན་པ་དག་ཏུ་གྱུར་ལ། ཐམས་ཅད་ཀྱང་བཙོན་རར་ བཅུག་ཅིང་བཀྲེས་པ་དང་སྐོམ་པ་དག་གིས་གཟིར་བར་གྱུར་ལ།

དེ་ལ་གང་སེམས་ཅན་ཐམས་ཅད་དེ་ལྟ་བུའི་བསོད་ནམས་དང་ལྡན་པ་དག་བཙོན་ར་དེ་ནས་ཡོངས་སུ་ཐར་བར་བྱེད་ཅིང་། ལོ་བརྒྱ་ཚང་བར་ཡང་སེམས་ཅན་དེ་དག་ཐམས་ཅད་ལ་ཆོས་གོས་དང་། བསོད་སྙོམས་དང་། མལ་ཆ་དང་། སྟན་དང་། ན་བའི་གསོས་སྨན་དང་། ཡོ་བྱད་དག་གིས་རིམ་གྲོ་བྱེད་པའི་སྐྱེས་བུ་འགའ་ཞིག་བྱུང་བར་གྱུར་ན། རྒྱལ་པོ་ཆེན་པོ་འདི་ཇི་སྙམ་དུ་སེམས། ཅི་སྐྱེས་བུ་དེ་གཞི་དེ་ལས་བསོད་ནམས་མང་དུ་སྐྱེད་པར་འགྱུར་རམ། གསོལ་པ། བཙུན་པ་བཅོམ་ལྡན་འདས་ མང་ལགས་སོ། ། བཙུན་པ་བདེ་བར་གཤེགས་པ་སྐྱེས་བུ་དེ་ནི་བསོད་ནམས་ཀྱི་ཕུང་པོ་གྲངས་མ་མཆིས། ཚད་མ་མཆིས། དཔག་ཏུ་མ་མཆིས་པ་སྐྱེད་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བས་ཀྱང་གང་ད་ལྟར་ནས་མ་འོངས་པའི་དུས་ ལྔ་བརྒྱ་པ་ཐ་མའི་བར་ལ་ཆོས་ཀྱིས་གནས་པ། ཡོན་ཏན་གྱིས་ཕྱུག་པ་དག་ལ་དེ་ལྟར་བསྔོས་པ་འཕྲོག་པའི་སེམས་ཅན་རྣམས་སྡིག་པའི་ལས་དེ་ལས་སླར་ཟློག་པར་བྱེད་པའི་རྒྱལ་རིགས་སམ། ལྗོངས་ཀྱི་བླ་དེ་བསོད་ནམས་ཀྱི་ཕུང་པོ་ཆེས་མང་དུ་སྐྱེད་པར་འགྱུར་རོ། ། རྒྱལ་ པོས་གསོལ་པ།

བཙུན་པ་བཅོམ་ལྡན་འདས་གལ་ཏེ་དགེ་སློང་ཆོས་ཀྱིས་གནས་པ་གཅིག་ཅིག་གི་མ་བསྲུངས་ན་དེ་བསོད་ནམས་མ་ལགས་པ་དེ་སྙེད་ཅིག་སྐྱེད་པར་འགྱུར་ལགས་ན། གང་ཡང་གཅིག་གིས་སྲུང་བར་བགྱིད་པ་དེ་བསོད་ནམས་དེ་སྙེད་ཅིག་སྐྱེད་པར་འགྱུར་ལགས་ སམ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་གང་ཟག་གཅིག་གི་ལེན་པ་ངས་མ་གནང་ངོ་། ། གཉིས་ལས་མ་ཡིན། གསུམ་གྱི་མ་ཡིན། བཞིའི་མ་ཡིན་གྱི། རྒྱལ་པོ་ཆེན་པོ་ཕྱོགས་བཞིའི་དགེ་འདུན་གྱི་ཕྱིར་གཙུག་ལག་ཁང་གཅིག་དང་། དགོན་པའི་ གནས་གཅིག་ཏུ་ཡེ་ཉུང་ན་ཡང་དགེ་སློང་ཆོས་ཀྱིས་གནས་པ་ལྔའི་ལེན་པར་ངས་གནང་སྟེ། གཎྜཱི་བརྡུངས་ནས་ཕྱོགས་བཞིའི་དགེ་སློང་བློ་བུར་དུ་ལྷགས་པ་དག་དང་ལྷན་ཅིག་ཏུ་ལོངས་སྤྱོད་པ་དང་། ཉེ་བར་སྤྱོད་པ་དང་། གནས་ཁང་དང་། མལ་ཆ་དང་། སྟན་དང་། བཟའ་བ་ དང་། བཏུང་བ་དང་། ན་བའི་གསོས་སྨན་དང་། ཡོ་བྱད་དག་ལོངས་སྤྱོད་པར་ངས་གནང་ངོ་། ། གལ་ཏེ་གཙུག་ལག་ཁང་གཅིག་དང་། དགོན་པའི་གནས་གཅིག་ཏུ་དགེ་སློང་བརྒྱ་སྟོང་གི་བར་གནས་པར་བྱེད་ན།

དེར་ཡང་གཎྜཱི་བརྡུངས་ནས་ཕྱོགས་བཞིའི་དགེ་སློང་བློ་བུར་ དུ་ལྷགས་པ་དག་དང་ལྷན་ཅིག་ཏུ་སྨན་གྱི་ཡོ་བྱད་ཀྱི་བར་དག་ལ་ལོངས་སྤྱོད་པར་ངས་གནང་ངོ་། ། མ་ཆགས་པ་དག་དང་། མ་བཅིངས་པ་དག་དང་། མ་ཆུམས་པ་དག་དང་། ནམ་གྱི་ཆ་སྟོད་དང་། ནམ་གྱི་ཆ་སྨད་དག་ལ་མི་ཉལ་བའི་སྦྱོར་བ་ལ་རྗེས་སུ་བརྩོན་པ་དག་དང་། འཁོར་བ་ལ་རྒྱབ་ཀྱིས་ཕྱོགས་པ་དག་དང་། མྱ་ངན་ལས་འདས་པ་ལ་ནང་དུ་ཕྱོགས་པ་དག་དང་། གཞན་ལ་མི་སྨོད་པ་དག་དང་། བདག་ལ་མི་སྟོད་པ་དག་དང་། ཆོག་ཤེས་པ་དང་། སྦྱངས་པའི་ཡོན་ཏན་སྤྱོད་པ་དང་། རབ་ཏུ་དབེན་པ་དང་། བརྩོན་འགྲུས་བརྩམས་ པ་དག་དང་། མཉམ་པར་བཞག་པ་དང་། དྲན་པ་ཉེ་བར་གཞག་པ་དག་གིས་གནས་པ་དག་ལོངས་སྤྱོད་པར་ངས་གནང་ངོ་། ། རྒྱལ་པོ་ཆེན་པོ་དགེ་སློང་གི་དགེ་འདུན་གྱི་ནང་ན་སེམས་ཅན་དེ་ལྟ་བུ་དག་གནས་ཏེ། རྒྱལ་པོ་ཆེན་པོ་དགེ་སློང་གི་དགེ་འདུན་གྱི་ནང་ན་སེམས་ཅན་དེ་ ལྟ་བུ་དག་ལ་སེམས་ཅན་རྣམས་ཀྱིས་ལོངས་སྤྱོད་དང་། ཉེ་བར་སྤྱོད་པ་ཡོངས་སུ་བཏང་བས་བསོད་ནམས་ཚད་མེད་པ་སྐྱེད་དོ། ། རྒྱལ་པོ་ཆེན་པོ་གཙུག་ལག་ཁང་ངམ། དགོན་པའི་གནས་གང་ན་དགེ་སློང་ལྔའམ། ལྷག་པར་གནས་ཀྱང་རུང་སྟེ།

ཚུལ་ཁྲིམས་དང་ལྡན་པ་ དག་དང་། ཚུལ་ཁྲིམས་ཡོངས་སུ་དག་པ་དང་། ཁ་ན་མ་ཐོ་བ་ཕྲ་མོ་དག་ལ་ཡང་འཇིགས་པར་ལྟ་བ་དག་གནས་པར་བྱེད་ཅིང་། དེ་བཞིན་གཤེགས་པས་གསུངས་པ་སྟོང་པ་ཉིད་དང་ལྡན་པའི་མདོ་སྡེ་དེ་དག་ཀྱང་སྟོན་པར་བྱེད། ཁ་ཏོན་དུ་བྱེད་ལ། གཞན་ལ་མི་སྨོད་ཅིང་བདག་ ལ་མི་བསྟོད་པ། ཕྲག་དོག་དང་སེར་སྣ་རྣམ་པར་སྤངས་པ། སེམས་ཅན་ཐམས་ཅད་ལ་སྙིང་བརྩེ་བ། ཐར་པ་ལ་མངོན་པར་བརྩོན་པ་དག་གནས་ལ། གཎྜཱི་བརྡུངས་ནས་ལོངས་སྤྱོད་པར་བྱེད་ན་དགེ་སློང་གི་དགེ་འདུན་དེ་ལྟ་བུ་ལས་སེམས་ཅན་རྣམས་བསོད་ནམས་ ཚད་མེད་པ་དེ་ལྟ་བུ་འཛིན་པ་དག་ཏུ་བྱེད་དོ། ། རྒྱལ་པོ་ཆེན་པོ་ཡེ་ཉུང་སྟེ་དགེ་སློང་གི་དགེ་འདུན་ལྔའི་ཚོགས་ཤིག་ཡོད་དུ་ཟིན་ཀྱང་། གལ་ཏེ་ཡང་ཚུལ་ཁྲིམས་ཡོངས་སུ་དག་ཅིང་ངོ་ཚ་ཤེས་པ་དང་། ཁྲེལ་ཡོད་པ་ཕུན་སུམ་ཚོགས་ལ་འཇིག་རྟེན་ཕ་རོལ་གྱི་ཁ་ན་མ་ཐོ་བ་ལ་འཇིགས་ པར་ལྟ་ཞིང་སྦྱངས་པའི་ཡོན་ཏན་དང་། འཕགས་པའི་རིགས་ལ་མངོན་པར་བརྩོན་པ་ཡིན་ན། རྒྱལ་པོ་ཆེན་པོ་དེ་ནི་དགེ་སློང་གི་དགེ་འདུན་རྒྱ་མཚོ་དང་འདྲ་བར་གསུངས་ཤིང་། དེ་ནི་མི་དཔག་ཏུ་མེད་པ་དག་ལ་ཕན་པ་བྱེད་པ་དང་། དོན་བྱེད་པ་དང་།

སེམས་ཅན་ཐམས་ཅད་ཀྱི་ སྡུག་བསྔལ་ཐམས་ཅད་ལས་རབ་ཏུ་རྣམ་པར་ཐར་བར་བྱེད་པ་ཡིན་པར་གསུངས་ན། དགེ་སློང་གི་དགེ་འདུན་བཅུའི་ཚོགས་དང་ཞེས་བྱ་བ་ནས་བརྒྱ་སྟོང་གི་ཚོགས་ཞེས་བྱ་བའི་བར་དག་ལྟ་སྨོས་ཀྱང་ཅི་དགོས། རྒྱལ་པོ་ཆེན་པོ་དགེ་སློང་གི་དགེ་འདུན་གང་ལ་བྲམ་ཟེ་དང་ཁྱིམ་བདག་ ཆེན་པོ་དད་པ་ཅན་དག་རིམ་གྲོ་བྱ་བའི་ཕྱིར་གཎྜཱི་རྡུང་བ་དག་ཏུ་བྱེད་ཅིང་། དེར་ཡང་གལ་ཏེ་དགེ་སྦྱོང་ལྟར་བཅོས་པ་སྡིག་པ་སྤྱོད་པའི་དགེ་སློང་ཉུང་ཡང་རུང་། མང་ཡང་རུང་བ་དག་ཀྱང་འདུ་ལ། དེར་གལ་ཏེ་དགེ་སློང་ཆོས་ཀྱིས་གནས་པ། ཚུལ་ཁྲིམས་ཡོངས་སུ་དག་པ། ངོ་ཚ་ ཤེས་པ་དང་། ཁྲེལ་ཡོད་པ་ཕུན་སུམ་ཚོགས་པ་དགེ་སློང་ལྔ་ཡང་འདུ་ན། རྒྱལ་པོ་ཆེན་པོ་དགེ་སློང་གི་དགེ་འདུན་དེ་ནི་ཆོས་ཚད་མེད་པ་དང་ལྡན་པ་ཡིན་ཞིང་། སྦྱིན་གནས་ཆེན་པོ་དང་། ལྷ་དང་མི་ཐམས་ཅད་ཀྱིས་མཆོད་པར་འོས་པར་འགྱུར་རོ། ། རྒྱལ་པོ་ཆེན་པོ་དེ་ལྟ་ བས་ན་དགེ་སློང་ཆོས་ཀྱིས་གནས་པ་དག་དང་། ཆོས་ཀྱི་ཀུན་དགའ་ལ་དགའ་བ་དག་ཁྱེད་ཀྱི་ལག་ཏུ་ངས་ཡོངས་སུ་གཏད་དོ། ། ཁྱིམ་ན་གནས་པ་དང་རབ་ཏུ་བྱུང་བ་ལ་ལས་དེ་དག་ལ་རྐྱེན་གང་ཡང་རུང་བ་དག་གིས་གཙེས་སམ།

གནོད་པར་བྱས་ན་མི་རུང་གིས། ཁྱེད་ཀྱིས་ སྲུངས་ཤིག། ། ། འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་གཉིས་པ། རྒྱལ་པོ་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་ཅི་དགེ་སློང་སྡིག་པ་སྤྱོད་པ་ཚུལ་ཁྲིམས་འཆལ་ པ་རྣམས་ཀྱིས་དགེ་འདུན་གྱི་ནང་དུ་ལོངས་སྤྱོད་པར་བགྱི་ལགས་སམ། ཆོས་གོས་དང་། བསོད་སྙོམས་དང་། མལ་ཆ་དང་། སྟན་དང་། ན་བའི་གསོས་སྨན་དང་། ཡོ་བྱད་དམ་པ་དག་ཀྱང་ལོངས་སྤྱོད་དང་། ཉེ་བར་སྤྱོད་པར་བགྱི་ལགས་སམ། བཅོམ་ལྡན་འདས་ ཀྱིས་བཀའ་སྩལ་པ། རྒྱལ་པོ་ཆེན་པོ་གང་ཁྱེད་ཀྱི་བློན་པོ་ཆེན་པོ་དང་། སྣ་ཆེན་པོ་ལ་གཏོགས་པ་དང་། རྒྱལ་པོས་བཀྲབས་པ་དང་། ཉུང་རུམ་དང་། རྒྱལ་རིགས་དང་། བྲམ་ཟེ་དང་། ཁྱིམ་བདག་གཞུང་ལུགས་ལས་འགལ་བ་ཉེས་པ་དང་བཅས་པ་ཞིག་ཡོད་ན། གང་ ན་རྒྱལ་པོ་ཆེན་པོའི་དགའ་སྟོན་ནམ་དུས་སྟོན་ཉེ་བར་གནས་པར་གྱུར་པའི་འཁོར་གྱི་ནང་དེར་ཉེས་པ་དང་བཅས་པའི་སྐྱེས་བུ་དེ་འཇུག་པ་དང་། ལོངས་སྤྱོད་པ་དང་། དགའ་བ་དང་། རྩེ་བ་ཉམས་སུ་མྱོང་བར་བྱ་བ་དང་། བདེ་བ་དང་། ཡིད་བདེ་བ་མང་ཞིང་གནས་པར་ནུས་ སམ། རྒྱལ་པོས་གསོལ་པ།

བཙུན་པ་བཅོམ་ལྡན་འདས་མ་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་གང་ཚུལ་ཁྲིམས་འཆལ་པ་སྡིག་པའི་ཆོས་ཀུན་ཏུ་སྤྱོད་པ། ཤིང་རུལ་པ་ལྟ་བུར་གྱུར་པ། དགེ་སྦྱོང་མ་ཡིན་པར་དགེ་སྦྱོང་ དུ་ཁས་འཆེ་བ། ཚངས་པར་སྤྱོད་པ་མ་ཡིན་པར་ཚངས་པར་སྤྱོད་པར་ཁས་འཆེ་བའི་གང་ཟག་དེ་ལྟ་བུ་ནི་འདས་པ་དང་། མ་བྱོན་པ་དང་། ད་ལྟར་གྱི་སངས་རྒྱས་བཅོམ་ལྡན་འདས་ཐམས་ཅད་ལ་གནོད་པ་ཡིན་ཏེ། དེ་ནི་བཅོམ་ལྡན་འདས་ཀྱི་ཉན་ཐོས་མ་ཡིན་ཞིང་བདུད་ཀྱི་ སྟོབས་ཀྱི་རིགས་ཀྱིས་ཟིན་པ་ཡིན་ནོ། ། གང་ཟག་དེ་ནི་ལམ་ཉམ་ང་བ་ལ་གནས་པ་ཡིན་ཏེ། དེ་ནི་ཕྱིས་ཀྱང་ཉན་ཐོས་ཀྱི་དགེ་འདུན་གྱི་ནང་དུ་བགྲང་བ་མ་ཡིན་ནོ། ། དེ་བཞིན་དུ་དེར་འཇུག་པར་བྱ་བ་མ་ཡིན་ཏེ། དགེ་སློང་ཆོས་ཀྱིས་གནས་པ་རྣམས་ལ་བསྔོས་ན་ཐ་ན་ཏིལ་གྱི་ ཕུབ་མ་ཙམ་ཡང་ལོངས་སྤྱོད་པར་འོས་པ་མ་ཡིན་ན། དགེ་འདུན་གྱི་ནང་དུ་ཉེ་བར་ལོངས་སྤྱོད་པར་བྱ་བ་ལྟ་སྨོས་ཀྱང་ཅི་དགོས་ཏེ། དེ་ནི་ཆོས་འདུལ་བ་འདིས་བོར་བ་ཡིན་ནོ། ། རྒྱལ་པོ་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། །

བཙུན་པ་བཅོམ་ལྡན་ འདས་སྤྱོད་པའི་མཚན་ཉིད་ཀྱི་མཚན་མ་གང་དག་གིས་དགེ་སློང་ཚུལ་ཁྲིམས་འཆལ་པ། སྡིག་པའི་ཆོས་ཀུན་ཏུ་སྤྱོད་པ། དགེ་སློང་ཆོས་ཀྱིས་གནས་པ་རྣམས་ཀྱི་ནང་དུ་སླན་ཆད་གནས་པ་དང་། ལོངས་སྤྱོད་དང་། ཉེ་བར་སྤྱོད་པར་བགྱིད་པར་མི་འོས་པར་འཚལ་ལགས། བཅོམ་ ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་རྣམ་པ་འདི་ལྟ་བུས་ཚུལ་ཁྲིམས་འཆལ་པའི་མགོ་འབྱུང་བར་འགྱུར་རོ། ། ཞེས་གང་གིས་ཀྱང་མྱུར་དུ་རྣམ་པར་ཤེས་པར་མི་ནུས་ཏེ། རྒྱལ་པོ་ཆེན་པོ་འདི་ནི་ནང་གི་དང་པོར་སངས་རྒྱས་ལ་མ་གུས་པ་ཡིན་ནོ། ། ཆོས་དང་། དགེ་ འདུན་དང་། མཁན་པོ་དང་། སློབ་དཔོན་དང་། བླ་མའི་གནས་ལྟ་བུ་རྣམས་ལ་མ་གུས་པ་ཡིན། འཕགས་པའི་རིགས་བཏང་བ་ཡིན། རྣལ་འབྱོར་ཡིད་ལ་བྱེད་པ་ལ་ཀུན་དགའ་བ་མ་ཡིན། ངོ་ཚ་ཤེས་པ་དང་། ཁྲེལ་ཡོད་པ་རྣམ་པར་སྤངས་པ་ཡིན། ཁྱིམ་ན་གནས་པ་དང་ འདྲིས་པ་ཡིན། ཚིག་ཀྱལ་པ་སྨྲ་བ་ཡིན། བདག་ལ་བསྟོད་པ་ཡིན། གཞན་ལ་སྨོད་པ་ཡིན། དེ་ལྟ་བུ་དག་ལ་ཀུན་དགའ་བ་ཡིན། སྡིག་པའི་སྙི་ལ་ཆགས་པ་ཡིན། ལམ་ངན་པར་ཞུགས་པ་ཡིན། ཁེངས་པ་ཡིན། ཁ་དྲག་པ་ཡིན། འཕྲལ་གཡར་ཅན་ཡིན། འཕྱར་ པོ་ཡིན། ཁ་ཤིང་ཅན་ཡིན། གཡོ་སྒྱུ་ཅན་ཡིན།

སྒྱུ་བྱེད་པ་ཡིན། དགེ་སྦྱོང་ཡོན་པོ་ཡིན། དགེ་སྦྱོང་གཡོ་ཅན་ཡིན། དགེ་སློང་སྙེ་ལོང་ལྟ་བུ་ཡིན། དགེ་སློང་གི་དགེ་འདུན་མི་འཐུན་པར་འདོད་པར་སྨྲ་བ་ཡིན། རྙེད་པ་དང་། བཀུར་སྟི་དང་། ཚིགས་སུ་བཅད་པ་ལ་མངོན་ པར་དགའ་བ་ཡིན། འདུ་འཛིའི་ཀུན་དགའ་ལ་དགའ་བ་ཡིན་ཏེ། སྡིག་པ་ཅན་གྱི་དགེ་སློང་ཚུལ་ཁྲིམས་འཆལ་པ་དེ་ནི་ཇི་སྲིད་དུ་དེའི་ཚུལ་ཁྲིམས་འཆལ་པའི་མགོ་བྱུང་བར་མ་གྱུར་གྱི་བར་དུ་གང་གིས་ཀྱང་མཚན་མ་དེ་དག་གིས་མྱུར་དུ་ཤེས་པར་མི་ནུས་སོ། ། སྡིག་པ་ཅན་གྱི་དགེ་སློང་ དེ་གང་གི་ཚེ་ཁྱིམ་གྱི་གཞི་དང་། ཞིང་གི་གཞི་དང་། ཀུན་དགའ་ར་བའི་གཞི་དང་། བྲན་དང་། བྲན་མོ་དང་། གླང་པོ་ཆེ་དང་། རྟ་དང་། རྔ་མོ་དང་། བོང་བུ་དང་། ལུག་དག་གང་ཟག་གིར་སྲེལ་བར་བྱེད་ན་དེ་ནི་དེའི་ཚུལ་ཁྲིམས་འཆལ་བའི་མགོ་བྱུང་བ་ཡིན་ཏེ། ཚུལ་ ཁྲིམས་འཆལ་པའི་མགོ་དེས་ནི་སྡིག་པ་ཅན་གྱི་དགེ་སློང་དེ་དགེ་སློང་གི་དགེ་འདུན་གྱི་ནང་ནས་དོར་བ་ཡིན། གནས་པར་བྱ་བ་མ་ཡིན། ལོངས་སྤྱོད་པར་བྱ་བ་མ་ཡིན། དགེ་སློང་གི་དངོས་པོ་ལས་ལྷུང་བ་ཡིན། ཕམ་པར་གྱུར་པ་ཡིན་ཏེ། དགེ་སློང་གི་ཚུལ་ལས་ཀྱང་ཕྱིས་ བསླང་དུ་མེད་པར་འགྱུར་བ་ཡིན་ནོ། །

རྒྱལ་པོ་ཆེན་པོ་མི་གདོལ་པ་གནས་ན་གནས་པར་བྱེད་པ་ནི་སླའི། དགེ་སློང་གདོལ་པ་ཡོངས་སུ་འཛིན་པ་དང་བཅས་པ། རྒྱུད་ཚིག་པ། དོན་ལ་མི་ལྟ་པ། འཇིག་རྟེན་ཕ་རོལ་བཏང་བ། སྙིང་རྗེའི་བསམ་པ་མེད་པ། ཕྱི་ས་ཁུང་ ཆེན་པོ་དང་འདྲ་བ། བདུད་ཀྱི་ལམ་དུ་ཞུགས་པ། ལྷ་དང་མི་རྣམས་ལ་གནོད་པ་བྱེད་པ། དུས་གསུམ་ཐམས་ཅད་ཀྱི་དྲང་སྲོང་ཐུབ་པ་རྣམས་ལ་སླུ་བར་བྱེད་པ། དཀོན་མཆོག་གསུམ་གྱི་གདུང་ཆོས་ཀྱི་མར་མེ་མེད་པར་བྱེད་པ། ཆོས་ཀྱི་རྒྱ་མཚོ་སྐེམས་པར་བྱེད་པ། ཆོས་ སྨྲ་བའི་དབྱེན་བྱེད་པ། སྦྱིན་པ་པོ་དང་སྦྱིན་བདག་རྣམས་ལ་འདྲིད་པར་བྱེད་པ། དགེ་སློང་ཆོས་ཀྱིས་གནས་པ་རྣམས་ལ་ཐོ་འཚམ་པར་བྱེད་པ། དགེ་འདུན་འཐུན་པར་བྱེད་པའི་རྒྱུན་གཅོད་པར་བྱེད་པ་ནི་དེ་ལྟ་མ་ཡིན་ནོ། ། སྡིག་པ་ཅན་གྱི་དགེ་སློང་དེ་ནི་ཡོངས་སུ་འཛིན་པའི་རྐྱེན་ གྱིས་མཐོ་རིས་ཀྱི་ལམ་ལས་རྒྱལ་པོ་ལྡོག་པར་བྱེད་པ་ཡིན་ནོ། ། རྒྱལ་རིགས་དང་། བྲམ་ཟེ་དང་། རྗེའུ་རིགས་དང་། དམངས་རིགས་དང་། སྐྱེས་པ་དང་། བུད་མེད་དང་། ཁྱེའུ་དང་། བུ་མོ་ལྡོག་པར་བྱེད་པ་ཡིན་ནོ། ། ངན་སོང་གི་ལམ་གསུམ་ལ་རབ་ཏུ་གཞོག་ པར་བྱེད་པ་ཡིན་ནོ། །

རྒྱལ་པོ་ཆེན་པོ་སྡིག་པ་ཅན་གྱི་དགེ་སློང་དེ་ཡོངས་སུ་འཛིན་པའི་རྒྱུ་མཚན་གྱིས་ལྷ་དང་། མི་ཇི་སྙེད་ཅིག་མི་སྐྱིད་པར་བྱེད་པར་འགྱུར་བ་ལ་ལྟོས། རྒྱལ་པོ་ཆེན་པོ་དེ་ལྟ་བས་ན་ཡོངས་སུ་འཛིན་པ་དང་བཅས་པའི་དགེ་སློང་དང་། དགེ་སློང་ཆོས་ཀྱིས་ གནས་པ། ཡོན་ཏན་གྱིས་ཕྱུག་པ་དག་དང་ལྷན་ཅིག་ཏུ་ཀུན་དགའ་ར་བ་གཅིག་དང་། གཙུག་ལག་ཁང་གཅིག་ཏུ་གནས་པར་མི་བྱའོ། ། གལ་ཏེ་སྡིག་པ་ཅན་གྱི་དགེ་སློང་དེ་ཁ་དྲག་ཅིང་ངོ་ཚ་ཤེས་པ་དང་ཁྲེལ་ཡོད་པ་རྣམ་པར་སྤངས་ཏེ། དགེ་སློང་དེ་དག་དང་ ལྷན་ཅིག་གནས་པར་བྱེད་ན། དེའི་ཕྱིར་དགེ་སློང་ཆོས་ཀྱིས་གནས་པ་དེ་དག་གིས་བྱམས་པ་དང་ལྡན་ཞིང་ཆོས་དང་འཐུན་པས་དྲན་པར་བྱ་སྟེ། གལ་ཏེ་སྡིག་པ་ཅན་གྱི་དགེ་སློང་དེ་གནས་དེ་ནས་འགྲོ་བ་ལྟ་ན། དེ་ལྟ་ན་ནི་ལེགས། གལ་ཏེ་འགྲོ་བར་མི་བྱེད་ན་དེར་དགེ་སློང་ཆོས་ཀྱིས་གནས་ པ་དེ་དག་དོང་ལ་གྲོང་ཁྱེར་དང་། གྲོང་རྡལ་དང་། གྲོང་དང་། ལྗོངས་དང་། རི་འོར་དེ་དག་ན་རྒྱལ་རིགས་སམ། བྲམ་ཟེའམ། རྗེའུ་རིགས་སམ། དམངས་རིགས་གང་དབང་བྱེད་དུ་འཇུག་པ་དེ་ལ་སྦྲན་པར་བྱའོ། ། གལ་ཏེ་རྒྱལ་རིགས་དང་། བྲམ་ཟེ་དང་། རྗེའུ་རིགས་དང་།

དམངས་རིགས་དེས་སྡིག་པ་ཅན་གྱི་དགེ་སློང་ཡོངས་སུ་འཛིན་པ་དང་བཅས་པ་གནས་དེ་ནས་ཟློག་པར་བྱེད་ན་དེར་ནི་དགེ་སློང་ཆོས་ཀྱིས་གནས་པ་དེ་དག་གིས་གནས་པར་བྱའོ། ། ཇི་སྟེ་རྒྱལ་རིགས་དང་། བྲམ་ཟེ་དང་། རྗེའུ་རིགས་དང་། དམངས་རིགས་དེ་བཟའ་བ་དང་། བཏུང་བ་དང་། རྙེད་པའི་རྒྱུས་སྡིག་པ་ཅན་གྱི་དགེ་སློང་ཡོངས་སུ་འཛིན་པ་དང་བཅས་པའི་ཕྱོགས་བྱེད་པ་ལྟ་ན། དེའི་ཕྱིར་དགེ་སློང་ཆོས་ཀྱིས་གནས་པ་དེ་དག་གིས་ཁྲོ་བ་བསྟན་པར་མི་བྱའོ། ། ཆགས་པ་མ་ཡིན། ང་རྒྱལ་མ་ཡིན་ཏེ། འོན་ཀྱང་ཅང་མི་སྨྲ་བར་གནས་དེ་ནས་འགྲོ་བར་ བྱ་ཞིང་། དགོན་པའི་གནས་སམ། ནགས་ཁྲོད་དམ། རིའམ། རི་བོའི་འོར་གཞན་གང་ན་སྒྲ་གཅོམ་ཆུང་བ་དང་། ནང་དུ་ཡང་དག་འཇོག་དང་འཚམ་པའམ། ཚུལ་བཞིན་དུ་ཡིད་ལ་བྱེད་པ་དང་འཐུན་པ་དེར་གནས་པར་བྱའོ། ། ཡང་རྒྱལ་པོ་གཟུགས་ཅན་སྙིང་པོས་མཆི་མ་ཕྱུང་ ནས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་གང་བཟའ་བ་དང་། བཏུང་བ་དང་། རྙེད་པའི་སླད་དུ་སྡིག་པ་ཅན་གྱི་དགེ་སློང་ཡོངས་སུ་འཛིན་པ་དང་བཅས་པའི་ཕྱོགས་བགྱིད་ཅིང་། དགེ་སློང་ཆོས་ཀྱིས་གནས་པ།

ཡོན་ཏན་གྱིས་ཕྱུག་པ་རྣམས་ཀྱང་གནས་ནས་མཆི་ བར་འགྱུར་བའི་རྒྱལ་རིགས་དང་། བྲམ་ཟེ་དང་། རྗེའུ་རིགས་དང་། དམངས་རིགས་ནི་ཉམས་པ་ལགས་སོ། ། བཙུན་པ་བདེ་བར་གཤེགས་པ་མཆོག་ཏུ་ཉམས་པ་ལགས་སོ། ། དེའི་མི་ཉིད་རྙེད་པ་ནི་རྙེད་པར་དཀའ་བ་ལགས་ཏེ། འཁོར་བ་ན་འཁོར་བར་བགྱིད་པ་དེའི་མི་ཉིད་རྙེད་ པའི་ཐ་མ་ནི་དེ་ལགས་སོ། ། སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ་གྲངས་མ་མཆིས། དཔག་ཏུ་མ་མཆིས་པ་གང་གཱའི་ཀླུང་གི་བྱེ་མ་སྙེད་འཇིག་རྟེན་དུ་འབྱུང་བར་འགྱུར་བས་ཀྱང་། གང་དགེ་སློང་ཆོས་ཀྱིས་གནས་པ་རྣམས་ཀྱི་ཚིག་གུས་པར་མི་ཉན་པའི་ སེམས་ཅན་དེ་ནི་ངན་སོང་རྣམས་ལས་ཡོངས་སུ་ཐར་པར་བགྱི་བའམ། མཐོ་རིས་སུ་གཞག་པར་མི་སྤྱོད་དེ། དེ་ནི་སྡིག་པའི་ལས་དེ་ལྟ་བུ་དང་ལྡན་པར་འགྱུར་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་མ་འོངས་པའི་དུས་ན་ལ་ལར་གང་དགེ་སློང་ཆོས་ ཀྱིས་གནས་པ་རྣམས་ལ་ཤིན་ཏུ་དད་པའི་རྒྱལ་རིགས་དང་། བྲམ་ཟེ་དང་། རྗེའུ་རིགས་དང་། དམངས་རིགས་དག་འབྱུང་བར་འགྱུར་ཏེ། དེ་དག་གི་དོན་དུ་དགོན་པའི་གནས་དག་བྱེད་པར་འགྱུར་རོ། ། གཙུག་ལག་ཁང་དང་།

དགོན་པའི་གནས་དེར་ཡང་ཁྱིམ་གྱི་གཞི་ནས་ ཞིང་གི་གཞི་དང་། བྲན་དང་། བྲན་མོ་དང་། ཀུན་དགའ་ར་བའི་བར་དེ་དག་གི་ལོངས་སྤྱོད་དང་། ཉེ་བར་སྤྱོད་པའི་ཕྱིར་ཡོངས་སུ་གཏོང་བ་བྱེད་པར་འགྱུར་རོ། ། དེ་དག་འཆི་བའི་དུས་བྱས་ནས་ཀྱང་རྒྱལ་རིགས་ཤིང་སཱ་ལ་ཆེན་པོ་ལྟ་བུ་དག་ཏུ་སྐྱེ་བར་འགྱུར་བ་ནས། འདུ་ཤེས་མེད་ འདུ་ཤེས་མེད་མིན་སྐྱེ་མཆེད་ཀྱི་ལྷ་རྣམས་ཀྱི་ནང་དུ་སྐྱེ་བའི་བར་དུ་འགྱུར་རོ། ། སངས་རྒྱས་ཀྱི་ཞིང་ཡོངས་སུ་དག་པ་དག་ཏུ་ཡང་སྐྱེ་བར་འགྱུར་རོ། ། སངས་རྒྱས་བཅོམ་ལྡན་འདས་རྣམས་དང་ཡང་ཕྲད་པར་འགྱུར་བ་ནས་རིང་པོ་མི་ཐོགས་པར་སྦྱིན་པ་པོ་དང་། སྦྱིན་བདག་དེ་དག་བླ་ན་ མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་བར་དུ་འགྱུར་ཏེ། དེ་དག་ནི་ངའི་བསྟན་པ་ལ་དགེ་སློང་ཆོས་ཀྱིས་གནས་པ་རྣམས་ཡང་དག་པར་འཛིན་པར་བྱེད་པར་འགྱུར་བ་ཡིན་ནོ། ། རྒྱལ་པོ་ཆེན་པོ་འདི་ལྟ་སྟེ། གང་ཁྱོད་ཀྱི་བུའམ། སྤུན་ནམ། བཀྲབས་པའམ། སྣ་ཆེན་པོ་ལ་གཏོགས་པ་གང་ཡང་རུང་བ་ཞིག་ཉེས་པ་དང་བཅས་པ་ཡིན་ན།

གང་དང་གང་དུ་རྒྱལ་པོ་ཆེན་པོའི་དུས་སྟོན་ནམ་དགའ་སྟོན་བྱུང་བ་དེར་རྒྱལ་པོ་ཆེན་པོས་དགའ་བ་དང་བདེ་བ་རྣམ་པ་སྣ་ཚོགས་ཉམས་སུ་མྱོང་བར་བྱེད་ན། རྒྱལ་པོ་ཆེན་ པོ་འདི་ཇི་སྙམ་དུ་སེམས། སྐྱེས་བུ་དེ་ཁྱོད་ཀྱི་མདུན་དུ་འདུག་ཅིང་སྐྱིད་པ་དང་རྩེ་བ་མྱོང་བར་བྱེད་པའམ། དགའ་བ་དང་བདེ་བ་རྣམ་པ་སྣ་ཚོགས་ཀྱིས་གནས་པར་བྱེད་ནུས་སམ། རྒྱལ་པོ་ཆེན་པོས་གསོལ་པ། བཙུན་པ་བཅོམ་ལྡན་འདས་མ་ལགས་ཏེ། སྐྱེས་བུ་དེས་བདག་ གི་མདུན་ན་མཆིས་པར་ཡང་རྔོ་མི་ཐོགས་ལགས་ན་སྐྱིད་པ་དང་རྩེ་བ་མྱོང་བར་བགྱིད་པ་ལྟ་སྨོས་ཀྱང་ཅི་འཚལ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་གང་ཟག་གང་ཞིག་གང་ཟག་གིར་བྲན་དང་། བྲན་མོ་སྲེལ་བར་བྱེད་ཅིང་ཁྱིམ་གྱི་གཞི་ནས་ཞིང་གི་ གཞི་དང་། ལུག་དག་གི་བར་སྲེལ་བར་བྱེད་ན། ང་ཡང་དེའི་སྟོན་པ་མ་ཡིན་ལ། དེ་ཡང་ངའི་ཉན་ཐོས་མ་ཡིན་ནོ། ། དུས་གསུམ་དུ་གཤེགས་པའི་ཡང་དག་པར་རྫོགས་པའི་སངས་རྒྱས་ཐམས་ཅད་ལ་ཡང་གནོད་པར་བྱེད་པ་དང་བཅས་པ་ཡིན་ནོ། ། དེ་ནི་ཆོས་ཀྱི་གནས་པ་ རྣམས་ཀྱི་གནས་དེ་ལྟར་བསྔོས་པ་དག་ཏུ་ཆོས་དང་འཐུན་པས་གནས་པར་འོས་པ་མ་ཡིན་ནོ། ། རྒྱལ་རིགས་དང་།

བྲམ་ཟེ་དང་། རྗེའུ་རིགས་དང་། དམངས་རིགས་གང་ཡང་སྡིག་པ་ཅན་གྱི་དགེ་སློང་ཡོངས་སུ་འཛིན་པ་དང་བཅས་པ་དེའི་དོན་བྱེད་པ་དང་། དེ་ནས་འགྲོར་མི་སྟེར་ བའི་རྒྱལ་རིགས་ནས་དམངས་རིགས་ཀྱི་བར་དེ་ནི་དུས་གསུམ་དུ་གཤེགས་པའི་སངས་རྒྱས་བཅོམ་ལྡན་འདས་ཐམས་ཅད་ལ་ཡང་གནོད་པ་བྱེད་པ་དང་བཅས་པ་ཆེན་པོ་ཡིན་ནོ། ། སྦྱིན་པ་མང་པོ་སྦྱིན་པར་བྱེད་དུ་ཟིན་ཀྱང་འོན་ཀྱང་དེ་འཆི་བའི་དུས་བྱས་ནས་མནར་མེད་པའི་སེམས་ཅན་ དམྱལ་བ་ཆེན་པོ་རྣམས་ཀྱི་ནང་དུ་སྐྱེ་བར་འགྱུར་རོ། ། རྒྱལ་པོ་ཆེན་པོ་དེ་ལྟ་བས་ན་བདག་ལ་ཕན་པར་ཡང་དག་པར་རྗེས་སུ་ལྟ་བས་སྡིག་པ་ཅན་གྱི་དགེ་སློང་ཡོངས་སུ་འཛིན་པ་དང་བཅས་པའི་ཕྱོགས་སུ་གནས་པར་མི་བྱའོ། ། དེ་ཅིའི་ཕྱིར་ཞེ་ན། འདི་ལྟར་དེ་ནི་ལྷ་དང་མི་ཐམས་ཅད་ལ་ ཡང་གནོད་པ་དང་། ཕན་པ་མ་ཡིན་པ་དང་། ལོག་པར་ལྟུང་བར་བྱ་བའི་ཕྱིར་ཞུགས་པ་དང་། དཀོན་མཆོག་གསུམ་གྱི་གདུང་མེད་པར་བྱ་བའི་ཕྱིར་ཞུགས་པ་ཡིན་པའི་ཕྱིར་རོ། ། རྒྱལ་པོ་ཆེན་པོ་རྒྱལ་རིགས་སམ། བྲམ་ཟེའམ། རྗེའུ་རིགས་སམ། དམངས་རིགས་ གང་ཞིག་དགེ་སློང་ཆོས་ཀྱིས་གནས་པ་རྣམས་ཀྱི་ཆོས་ཀྱི་ཕྱོགས་ལ་ཡང་དག་པར་གནས་པར་བྱེད་ཅིང་།

སྡིག་པ་ཅན་གྱི་དགེ་སློང་རྣམས་ཀྱི་ཕྱོགས་ལ་མ་ཡིན་ན། དེ་སྦྱིན་པ་མི་སྦྱིན་དུ་ཟིན་ཀྱང་འོན་ཀྱང་དེ་ནི་ཆོས་ཀྱི་ཕྱོགས་ཀྱི་རྒྱུའི་ཕྱིར་དུས་གསུམ་དུ་གཤེགས་པའི་སངས་རྒྱས་ བཅོམ་ལྡན་འདས་ཐམས་ཅད་ཀྱི་སྦྱིན་བདག་དམ་པ་ཡིན་ནོ། ། དེ་ནི་དམ་པའི་ཆོས་རྗེས་སུ་བསྲུང་བའི་ཕྱིར་དམ་པའི་ཆོས་འཛིན་པ་དམ་པ་ཡིན་པར་བལྟ་བར་བྱའོ། ། འཆི་བའི་དུས་བྱས་ནས་ཀྱང་སངས་རྒྱས་ཀྱི་ཞིང་ཡོངས་སུ་དག་པ་རྣམས་སུ་སྐྱེ་བར་འགྱུར་བ་ནས་རིང་པོ་ མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་བར་དུ་འགྱུར་རོ། ། རྒྱལ་པོ་ཆེན་པོ་དེ་ལྟ་བས་ན་རྒྱལ་རིགས་འཚམ་པ་ཁྱོད་ཀྱི་ལག་ཏུ་ཆོས་ཀྱིས་གནས་པ་དང་བསྟན་པ་ངས་ཡོངས་སུ་གཏད་ཀྱིས་ལྔ་བརྒྱ་པ་ཐ་མ་ལ་གནས་ པའི་བར་དུ་ཁྱེད་ཀྱིས་ངའི་ཆོས་ཀྱིས་གནས་པ་དག་ཡང་དག་པར་ཟུང་ཤིག་དང་། དེའི་རྐྱེན་གྱིས་ངའི་ཆོས་ཀྱི་ཚུལ་འདི་དང་། དཀོན་མཆོག་གསུམ་གྱི་གདུང་ཡུན་རིང་དུ་གནས་པར་འགྱུར་ཞིང་། ལྷ་དང་མི་རྣམས་ལ་ཕན་པ་དང་བདེ་བར་འགྱུར་རོ། ། དེ་ནས་བཅོམ་ལྡན་ འདས་ལ་རྒྱལ་པོ་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། །

བཙུན་པ་བཅོམ་ལྡན་འདས་ཞལ་ཏ་པ་ཞེས་བགྱི་ལགས་ན་བཅོམ་ལྡན་འདས་ཇི་ཙམ་གྱིས་ན་ཞལ་ཏ་པར་གདགས་པས་གདགས་པར་མཛད་པ་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་ པོ་དགེ་སློང་གཉིས་ཞལ་ཏ་པར་ངས་གནང་ངོ་། ། གཉིས་གང་ཡིན་ཞེ་ན། གང་ཡང་རྣམ་པར་ཐར་པ་བརྒྱད་ལ་སྒོམ་པའི་དགྲ་བཅོམ་པ་དང་། གང་ཡང་དགེ་སློང་སློབ་པ་རྒྱུན་དུ་ཞུགས་པ་ཡིན་ཏེ། རྒྱལ་པོ་ཆེན་པོ་དགེ་སློང་འདི་གཉིས་ཞལ་ཏ་པའི་ལས་བྱེད་པར་ངས་གནང་ངོ་། ། འདུས་ པ་ཆེན་པོ་ཐེག་པ་ཆེན་པོའི་མདོ་ལས་ལེའུ་བཅུ་གཅིག་པ་སྟེ། ཉི་མའི་སྙིང་པོའི་ལེའུ་ལས་དམ་པའི་ཆོས་བསྲུང་བའི་འདུས་པ་དང་པོ་རྫོགས་སོ། ། ། ། གང་གི་ཚེ་བཅོམ་ལྡན་འདས་རྒྱལ་པོ་གཟུགས་ཅན་སྙིང་པོ་དང་ཐབས་ཅིག་ཏུ་དགེ་ སློང་ཆོས་ཀྱིས་གནས་པ་རྣམས་ཀུན་ཏུ་བསྲུང་བའི་གཏམ་ཡང་ཡང་དག་པར་རྩོམ་པ་མཛད་པ་དེའི་ཚེ་དེའི་དུས་ན། ཤར་ཕྱོགས་སུ་སངས་རྒྱས་ཀྱི་ཞིང་ཚད་མེད་པ་གང་གཱའི་ཀླུང་གི་བྱེ་མ་སྙེད་འདས་པ་དེ་ན་འཇིག་རྟེན་གྱི་ཁམས་ཡོངས་སུ་གདུང་བ་མེད་པ་ཞེས་བྱ་བ་ཡོད་དོ། །

དེ་ན་ དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཙམ་པ་ཀའི་མདོག་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། ། སངས་རྒྱས་ཀྱི་ཞིང་དེ་ན་བཅོམ་ལྡན་འདས་དེ་བཞིན་གཤེགས་པ་ཙམ་པ་ཀའི་མདོག་དེའི་འཁོར་དུ་བྱང་ཆུབ་སེམས་ དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོ་ཞེས་བྱ་བ་ཆོས་ཉན་པའི་ཕྱིར་འདུག་པར་གྱུར་ཏོ། ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོས་གྱེན་དུ་རྣམ་པར་བལྟས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ ཤུགས་ཀྱི་སྙིང་པོས་སྟེང་གི་ནམ་མཁའ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པ་ཤར་ཕྱོགས་ནས་ཆས་ཤིང་ནུབ་ཕྱོགས་སུ་འདོང་བ་དག་མཐོང་བར་གྱུར་ཏོ། ། དེ་ནས་གང་དུ་བྱང་ཆུབ་སེམས་དཔའ་སེམས་དཔའ་ཆེན་པོ་དག་འདོང་བ་ནུབ་ཕྱོགས་སུ་ བལྟས་ནས་ཀྱང་། དེ་ནས་སྣང་བ་ཆེན་པོ་མཐོང་ནས་དེའི་ཚེ་སངས་རྒྱས་ཙམ་པ་ཀའི་མདོག་ག་ལ་བ་དེ་ལོགས་སུ་ཐལ་མོ་སྦྱར་བ་རབ་ཏུ་བཏུད་ནས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་སྟེང་གི་ནམ་མཁའ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་ མ་མཆིས།

དཔག་ཏུ་མ་མཆིས་པ་ཤར་ཕྱོགས་ནས་ཆས་ཤིང་ནུབ་ཕྱོགས་སུ་མཆི་བ་དག་བདག་གིས་མཐོང་ལགས་སོ། ། ནུབ་ཕྱོགས་སུ་སྣང་བ་ཆེན་པོ་ཡང་བདག་གིས་མཐོང་ལགས་ན་འདི་ལ་རྒྱུ་གང་ལགས། དེ་ནས་དེ་བཞིན་གཤེགས་པ་ཙམ་པ་ཀའི་མདོག་གིས་བྱང་ཆུབ་ སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོ་ལ་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་ནུབ་ཕྱོགས་སུ་སངས་རྒྱས་ཀྱི་ཞིང་ཚད་མེད་པ་གང་གཱའི་ཀླུང་གི་བྱེ་མ་སྙེད་འདས་ནས་སྙིགས་མ་ལྔ་དང་ལྡན་པར་གནས་པ་ན། སངས་རྒྱས་ཀྱི་ཞིང་མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ། ཆོས་ཀྱི་ཚུལ་དང་དཀོན་མཆོག་གསུམ་གྱི་གདུང་ཡུན་རིང་དུ་གནས་པར་མཛད་པའི་ཕྱིར་དང་། ཆོས་ཀྱིས་གནས་པ་ཉིད་རྒྱུན་མི་གཅད་པའི་ཕྱིར་ འདུས་པ་ཆེན་པོ་ལ་ཐེག་པ་གསུམ་རྣམ་པར་གཏན་ལ་དབབ་པ་བསྟན་པའི་སྒོའི་ཆོས་ཀྱི་རྣམ་གྲངས་རབ་ཏུ་སྟོན་པར་མཛད་དོ། ། སངས་རྒྱས་ཀྱི་ཞིང་མི་མཇེད་དེར་བདུད་ཀྱི་ཡུལ་རྣམ་པར་གཞིག་པའི་ཕྱིར་དང་། སྟོབས་དང་མི་ལྡན་པར་མཛད་པའི་ཕྱིར་དང་།

ཆོས་ཀྱི་རྒྱལ་མཚན་ བསྒྲེང་བར་མཛད་པའི་ཕྱིར་དང་། ཆོས་ཀྱི་ཚུལ་ཡུན་རིང་དུ་གནས་པར་མཛད་པའི་ཕྱིར་འདུ་བ་མཛད་དེ། དེར་ཡང་དེ་བཞིན་གཤེགས་པ་ཐམས་ཅད་ཀྱིས་རིན་པོ་ཆེའི་ཏོག་ཅེས་བྱ་བའི་གཟུངས་སྔགས་བཤད་ཅིང་སངས་རྒྱས་ཀྱི་ཞིང་ཡང་ལོངས་སྤྱད་པར་མཛད་ནས་སླར་གཤེགས་སོ། ། ཡང་དེ་བཞིན་གཤེགས་པ་ཤཱཀྱ་ཐུབ་པ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། ཉན་ཐོས་ཆེན་པོ་རྣམས་ཀྱི་འདུས་པ་ཆེན་པོ་ཡང་དག་པར་འདུས་པར་མཛད་དེ། སོ་སོ་ཡང་དག་པར་རིག་པ་བཞི་དང་ལྡན་པའི་སྤྱན་གསུམ་དང་། ཚངས་པའི་གནས་པ་དག་ བསྟན་ཀྱང་ད་དུང་འཁོར་སངས་རྒྱས་ཀྱི་ཞིང་མི་མཇེད་ཀྱི་ས་དང་ནམ་མཁའ་མ་འདྲེས་པར་གང་བ་ཞིག་དེ་བཞིན་གཤེགས་པ་ཆོས་དམ་པ་གསུང་བ་ཤཱཀྱ་ཐུབ་པའི་ཆོས་བསྟན་པ་ལ་ངོམས་པ་མེད་དོ། ། དེ་ནས་དེ་བཞིན་གཤེགས་པ་མཆོག་ཏུ་སྙན་པར་གསུང་བ་ཤཱཀྱ་ཐུབ་པ་བསྡུ་བའི་ དངོས་པོ་བཞི་དང་། ཉི་མའི་སྙིང་པོའི་ཆོས་ཀྱིས་གནས་པ་ཉིད་དང་། བདུད་ཀྱི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་དང་། སེམས་ཅན་གྱི་ལས་ཟད་པར་འགྱུར་བའི་གཟུངས་སྔགས་བཤད་པར་བཞེད་ནས་དེ་འདི་སྙམ་དུ་དགོངས་ཏེ།

ཕྱོགས་བཅུའི་སངས་རྒྱས་ཀྱི་ཞིང་ཐམས་ ཅད་ན་ཕ་རོལ་ཏུ་ཕྱིན་པ་དྲུག་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བསྐལ་པ་བརྒྱས་ངེས་པར་བྱུང་བ་ནས་སངས་རྒྱས་ཀྱི་ཆོས་མ་འདྲེས་པ་{བཅྭ་,བཅོ་}བརྒྱད་ལ་གཞན་གྱི་དྲིང་མི་འཇོག་པའི་ཕྱིར་མི་ལྡོག་པ་སྒྲིབ་པ་མེད་པའི་ཡེ་ཤེས་ལ་མཁས་པའི་བར་འཁོད་ པ་དེ་དག་ཐམས་ཅད་སངས་རྒྱས་ཀྱི་ཞིང་མི་མཇེད་འདིར་ཞུགས་པར་གྱུར་ཅིང་། འདིར་འཁོད་ནས་རང་རང་གི་དགེ་བའི་ཕྱོགས་དང་བསམ་གཏན་དག་གིས་རྣམ་པར་སྤྱོད་པར་གྱུར་ལ། དེས་ན་སངས་རྒྱས་ཀྱི་ཞིང་འདིར་ས་ཆེན་པོ་ཤིན་ཏུ་སྐལ་བ་དང་ལྡན་པ་དང་། བཅུད་དང་ལྡན་པ་དང་། ཡོན་ཏན་དང་ལྡན་པ་དང་། དྲན་པ་དང་ལྡན་པ་དང་། བརྩོན་འགྲུས་དང་ལྡན་པ་དང་། གཏོང་བ་དང་ལྡན་པར་སངས་རྒྱས་ཀྱི་ཞིང་གཞན་བཞིན་གྱུར་ཅིག་སྙམ་དགོངས་སོ། ། དེ་ལྟ་བས་ན་ད་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གང་སུ་དག་སངས་རྒྱས་ཀྱི་ཞིང་མི་མཇེད་ དེར་ཞུགས་པ་དེ་དག་དེར་འཁོད་ནས་རང་རང་གི་ཇི་ལྟར་འཚམ་པའི་དགེ་བའི་ཕྱོགས་ཀྱིས་བསམ་གཏན་དག་བྱེད་དེ། སྒོམ་པ་དེ་དག་ལས་ཁ་ཅིག་གིས་ལུས་ལས་ནི་འོད་འདི་ལྟ་བུ་བྱུང་སྟེ། དཔེར་ན་འབྲུ་མར་གྱི་མར་མེ་བཞིན་ནོ། །

ཁ་ཅིག་གི་ལུས་ལས་ནི་འོད་འདི་ལྟ་བུའི་བར་ དག་བྱུང་སྟེ། དཔེར་ན་ཟླ་བ་དང་ཉི་མ་བྱེ་བ་བརྒྱ་སྟོང་ཕྲག་མང་པོའི་འོད་བཞིན་ནོ། ། དེར་བྱང་ཆུབ་སེམས་དཔའ་སེམས་དཔའ་ཆེན་པོ་མང་དུ་འདུས་པ་ད་ལྟར་སྣང་བ་ཆེན་པོས་སངས་རྒྱས་ཀྱི་ཞིང་མི་མཇེད་ཁྱབ་པར་གྱུར་ཏོ། ། ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ནས་ བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ལྷགས་པར་གྱུར་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཀྱང་སྔོན་དེར་མ་ཕྱིན་པ་ཤ་སྟག་དེའི་ཚེ་ཏིང་ངེ་འཛིན་ལས་ལངས་ནས་སངས་རྒྱས་ཀྱི་ཞིང་མི་མཇེད་དེར་ཆས་ཏེ་དེར་དོང་ནས་ཀྱང་སྐྱིལ་མོ་ཀྲུང་གིས་ འཁོད་ཅིང་རང་རང་གི་བསམ་གཏན་རྣམ་པ་སྣ་ཚོགས་དག་གིས་རྩེ་བར་བྱེད་དོ། ། དེར་ཡང་དེ་བཞིན་གཤེགས་པ་ཤཱཀྱ་ཐུབ་པ་ལ་དེ་དག་ཕྱག་འཚལ་བར་བྱེད་དོ། ། བསྙེན་བཀུར་བྱེད་དོ། འདུས་པ་ཆེན་པོ་དེ་ལ་ཡང་ལྟ་བར་བྱེད་དོ། ། དེར་དེ་དག་ཉི་མའི་སྙིང་པོའི་ཆོས་ཀྱིས་གནས་ པ་དང་། ཀླུ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་དང་། སེམས་ཅན་རྣམས་ཀྱི་ལས་ཟད་པར་འགྱུར་བའི་གཟུངས་སྔགས་ཉན་པར་ཡང་བྱེད་དོ། །

རིགས་ཀྱི་བུ་ཁྱོད་ཀྱང་ད་ལྟར་ཏིང་ངེ་འཛིན་ལས་ལངས་པས་རིགས་ཀྱི་བུ་ཁྱོད་ད་མི་མཇེད་ཀྱི་འཇིག་རྟེན་གྱི་ཁམས་སུ་ འགྲོ་བར་བྱའོ། ། རིགས་ཀྱི་བུ་སངས་རྒྱས་ཀྱི་ཞིང་མི་མཇེད་དེ་ན་ནི་སེམས་ཅན་རྣམས་ཤིན་ཏུ་སྲེད་པའི་ཀུན་ཏུ་སྦྱོར་བ་དང་ལྡན་ཞིང་སྲིད་པའི་ལྟུང་ལ་བཏགས་པ་དག་ཡིན་ཏེ། སངས་རྒྱས་ཀྱི་ཞིང་དེ་ན་ནང་ན་ཡང་བུད་མེད་གཟུགས་མི་སྡུག་པ་དང་། ཚུལ་དུ་མི་ཤིས་པ་དང་། མཆོག་ ཏུ་གཟུགས་ཀྱི་རྒྱགས་པས་དྲེགས་པ་དང་། དྲི་ང་བ་དང་། མི་གཙང་བ་དང་། གཙང་སྦྲར་སྤྱོད་པའི་རྒྱགས་པས་དྲེགས་པ་དང་། ངོ་གཉིས་བྱེད་པ་དང་། བདེན་པ་མ་ཡིན་པའི་ཚིག་སྨྲ་བ་དང་། ཚངས་པར་སྤྱོད་པར་ང་རྒྱལ་བྱེད་པ་དང་། བླུན་པ་དང་། མཁས་པར་ང་རྒྱལ་ ཅན་དང་། སེར་སྣ་ཅན་དང་། གཏོང་བར་ང་རྒྱལ་ཅན་དང་། མ་དད་པ་དང་། དད་པར་ང་རྒྱལ་ཅན་དང་། གཡོ་སྒྱུ་ཅན་དང་། སྒྱུ་བྱེད་པ་དང་། དྲང་པོའོ་སྙམ་པའི་ང་རྒྱལ་ཅན་དང་། ཕྲག་དོག་ཅན་དང་། ཕྲག་དོག་མེད་པའོ་སྙམ་པའི་ང་རྒྱལ་ཅན་དང་། གནོད་སེམས་དང་ ལྡན་པའི་སེམས་དང་། བྱམས་པར་ང་རྒྱལ་ཅན་དང་། རྣམ་པར་དབྱེན་བྱེད་པ་དང་། འཐུན་པར་ང་རྒྱལ་ཅན་དང་། ལོག་པར་ལྟ་བ་པ་དང་།

ཡང་དག་པར་ལྟ་བའི་ང་རྒྱལ་ཅན་ཡིན་ཏེ། སྐྱེས་བུ་དམ་པ་མཁས་པ་ཆེན་པོ་རྫུ་འཕྲུལ་དང་ལྡན་པ་མངོན་པར་ཤེས་པས་རྣམ་པར་ རྩེ་བདག་བསམ་གཏན་ཡོངས་སུ་སྦྱོང་བ་བྱས་སུ་ཟིན་ཀྱང་ཡུད་ཙམ་གྱིས་བུད་མེད་ཀྱི་དབང་དུ་འགྱུར་བ་ཡིན་ནོ། ། བུད་མེད་ཀྱི་ཉེས་པས་དགེ་བའི་རྩ་བ་ཐམས་ཅད་ལས་ཡོངས་སུ་ཉམས་པ་དག་དང་། ངན་སོང་བ་དག་དང་། སེམས་ཅན་དམྱལ་བ་པ་དག་ཏུ་འགྱུར་བ་ཡིན་ ནོ། ། རིགས་ཀྱི་བུ་ཁྱེད་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་ངའི་བཀས་ཞུ་བའི་ཕྱིར་ངའི་བཀས་མི་མཇེད་ཀྱི་འཇིག་རྟེན་གྱི་ཁམས་སུ་འགྲོ་བར་སྤྲོ་ན། དེར་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ ལས་ཟད་པར་འགྱུར་བའི་གཟུངས་སྔགས་ལ་ང་དད་པ་སྦྱིན་པར་མཛད་དོ། ། དེར་བདེན་པ་དང་རྗེས་སུ་འཐུན་པའི་གཟུངས་སྔགས་མཐུ་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། གཟུགས་ཀྱི་འདོད་ཆགས་ཐམས་ཅད་ ཀུན་ཏུ་ཟད་པར་བྱེད་པ། གཟུགས་མེད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། ང་རྒྱལ་དང་། ལྷག་པའི་ང་རྒྱལ་དང་། ངའོ་སྙམ་པའི་ང་རྒྱལ་ཐམས་ཅད་ཀུན་ཏུ་ཟད་པར་བྱེད་པ།

ཚོལ་བ་ཐམས་ཅད་ཀུན་ཏུ་ཟད་པར་བྱེད་པ། བརྣབ་སེམས་ཐམས་ཅད་དང་། རྒོད་ པ་ཐམས་ཅད་དང་། མ་རིག་པ་ཐམས་ཅད་ཀུན་ཏུ་ཟད་པར་བྱེད་པ། འཇིག་ཚོགས་ལ་ལྟ་བ་ཐམས་ཅད་དང་། མཐར་འཛིན་པའི་ལྟ་བ་ཐམས་ཅད་དང་། ཐེ་ཙོམ་ཐམས་ཅད་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ཐམས་ཅད་ཀུན་ཏུ་ཟད་པར་བྱེད་པ། རྟག་པར་ ལྟ་བ་ཐམས་ཅད་དང་། ཆད་པར་ལྟ་བ་ཐམས་ཅད་ཀུན་ཏུ་ཟད་པར་བྱེད་པ། སེམས་ཅན་དུ་ལྟ་བ་ཐམས་ཅད་དང་། སྒྲིབ་པར་ལྟ་བ་ཐམས་ཅད་དང་། གསོ་བར་ལྟ་བ་ཐམས་ཅད་དང་། གང་ཟག་ཏུ་ལྟ་བ་ཐམས་ཅད་དང་། བྱེད་པ་པོར་ལྟ་བ་ཐམས་ཅད་དང་། ཚོར་བ་པོར་ ལྟ་བ་ཐམས་ཅད་ཀུན་ཏུ་ཟད་པར་བྱེད་པ། གཟུགས་སུ་ལྟ་བ་ཐམས་ཅད་དང་། སྒྲར་ལྟ་བ་ཐམས་ཅད་དང་། དྲིར་ལྟ་བ་ཐམས་ཅད་དང་། རོར་ལྟ་བ་ཐམས་ཅད་དང་། རེག་བྱར་ལྟ་བ་ཐམས་ཅད་ཀུན་ཏུ་ཟད་པར་བྱེད་པ། རྨད་དུ་བྱུང་བ་ཆེན་པོར་ལྟ་བ་ཐམས་ཅད་དང་། སྐྱེ་ བར་ལྟ་བ་ཐམས་ཅད་དང་། གནས་པར་ལྟ་བ་ཐམས་ཅད་ཀུན་ཏུ་ཟད་པར་བྱེད་པ་འདི་དང་། བདེན་པ་དང་རྗེས་སུ་འཐུན་པའི་བཟོད་པ་གཟུགས་ཀྱི་ཕུང་པོ་ཐམས་ཅད་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པར་བྱེད་པ་ནས།

རྣམ་པར་ཤེས་པའི་ཕུང་པོ་ཐམས་ཅད་ཀྱི་བར་ ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པར་བྱེད་པ། མིག་གི་དབང་པོ་ཐམས་ཅད་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པར་བྱེད་པ་ནས། ཡིད་ཀྱི་དབང་པོ་ཐམས་ཅད་ཀྱི་བར་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པར་བྱེད་པ་ཕུང་པོ་དང་། ཁམས་དང་། སྐྱེ་མཆེད་ཐམས་ཅད་ཀྱི་བར་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པར་བྱེད་པ། སྤོང་བར་བྱེད་པ། ཆོས་ཐམས་ཅད་འདོད་ཆགས་དང་བྲལ་བར་བྱེད་པ། བྱང་གྲོལ་གྱི་བདེ་བ་ཐམས་ཅད་སྟོན་པར་བྱེད་པ་འདི་བསྐུར་བར་མཛད་དོ། ། དེ་ཅིའི་ཕྱིར་ཞེ་ན། དེ་དང་དེ་ན་སེམས་ ཅན་རྣམས་འབྱུང་པོ་དམུས་ལོང་འདྲ་བ་དག་དང་། མཆོག་ཏུ་གླེན་པ་དག་དང་། འབྱུང་པོ་ལུག་དང་འདྲ་བ་དག་དང་། འདོད་པའི་འདོད་ཆགས་ཀྱིས་མྱོས་པ་དག་ཡོད་དེ། བདེན་པ་དང་རྗེས་སུ་འཐུན་པའི་བཟོད་པ་འདི་ནི་སེམས་ཅན་དེ་དག་གི་ལྟ་བ་ཐམས་ཅད་སྤོང་བ་དང་། ལོངས་སྤྱོད་མི་ཟད་པ་ཉིད་བྱེད་པ་ཡིན། བདེན་པ་དང་རྗེས་སུ་འཐུན་པའི་བཟོད་པ་འདི་ནི་ཆོས་ཐམས་ཅད་ཀྱི་གཏེར་བརྟན་པ་ཡིན། བསམ་གྱིས་མི་ཁྱབ་པའི་ཆོས་ལ་བདུད་དང་ཕས་ཀྱི་རྒོལ་བ་ཐམས་ཅད་ཚར་གཅོད་པར་བྱེད་པ།

བདུད་ཐམས་ཅད་ཀྱི་ཡུལ་རྣམ་པར་འཇིག་ པར་བྱེད་པ་ཡིན་ནོ། ། རིགས་ཀྱི་བུ་གཞན་ཡང་བདེན་པ་དང་རྗེས་སུ་འཐུན་པའི་བཟོད་པ་འདི་ནི་བདུད་རྣམས་ཚར་གཅོད་པར་བྱེད་པ་ཡིན། ཀླུ་རྣམས་ཕམ་པར་བྱེད་པ་ཡིན། ལྷ་རྣམས་དགའ་བར་བྱེད་པ་ཡིན། གནོད་སྦྱིན་རྣམས་སྙིང་དགའ་བར་བྱེད་པ་ཡིན། ལྷ་མ་ཡིན་རྣམས་འབྲོས་པར་བྱེད་པ་ཡིན། ནམ་མཁའ་ལྡིང་རྣམས་དངང་བར་བྱེད་པ་ཡིན། མི་འམ་ཅི་རྣམས་དད་པར་བྱེད་པ་ཡིན། ལྟོ་འཕྱེ་ཆེན་པོ་རྣམས་སྐྲག་པར་བྱེད་པ་ཡིན། ཕས་ཀྱི་རྒོལ་བ་རྣམས་འདུལ་བར་བྱེད་པ་ཡིན། རྒྱལ་རིགས་རྣམས་མངོན་པར་དད་པར་ བྱེད་པ་ཡིན། བྲམ་ཟེ་རྣམས་འཇུག་པར་བྱེད་པ་ཡིན། རྗེའུ་རིགས་རྣམས་དགའ་བར་བྱེད་པ་ཡིན། དམངས་རིགས་རྣམས་དགའ་བར་བྱེད་པ་ཡིན། བུད་མེད་འདོད་ཆགས་དང་བྲལ་བར་བྱེད་པ་ཡིན། མང་དུ་ཐོས་པ་རྣམས་སྐྱོ་བར་བྱེད་པ་ཡིན། རྣལ་འབྱོར་སྤྱོད་པ་རྣམས་ མངོན་པར་དགའ་བར་བྱེད་པ་ཡིན། ནད་ཐམས་ཅད་རབ་ཏུ་ཞི་བར་བྱེད་པ་ཡིན། ཐབ་མོ་དང་། མུ་གེ་དང་། དུས་མ་ཡིན་པར་འཆི་བ་དང་། ཕ་རོལ་གྱི་དམག་ཚོགས་དང་། དུས་མ་ཡིན་པའི་རླུང་དང་། དུས་མ་ཡིན་པའི་ཆར་དང་། ཤྭ་དང་། དུས་མ་ཡིན་པའི་ལྷགས་ པ་དང་། དུས་མ་ཡིན་པའི་ཚ་བ་དང་།

དངོས་པོ་ཁ་བ་དང་། ཚ་བ་དང་། རྩུབ་པོ་དང་། ཧྲུད་ཧྲུད་པོ་དང་། རེག་པར་དཀའ་བ་རྣམས་རྣམ་པར་ཞི་བར་བྱེད་པ། སྤྲུག་པར་བྱེད་པ། མདངས་སུམ་འགྱུར་དུ་རྣམ་པར་འཕེལ་བར་བྱེད་པ། དམ་པའི་ཆོས་ཀྱི་ཚུལ་ གསལ་བར་བྱེད་པ་ཡིན། དཀོན་མཆོག་གསུམ་གྱི་གདུང་རྒྱུན་མི་གཅོད་པར་བྱེད་པ་ཡིན། སངས་རྒྱས་ཀྱི་བསྟན་པ་རྟོན་པར་བྱེད་པ་ཡིན། འཁོར་བས་སྐྲག་པ་རྣམས་དབུགས་འབྱིན་པར་བྱེད་པ་ཡིན་པ་ནས། ཟད་པ་ཤེས་པའི་བར་སྐྱེད་པར་བྱེད་པ་ཡིན། མི་སྐྱེ་བ་ཤེས་པ་ རྟོགས་པར་བྱེད་པ་ཡིན། མ་རིག་པའི་མུན་པའི་ཕུང་པོ་ཐམས་ཅད་རབ་ཏུ་འཇོམས་པར་བྱེད་པ་ཡིན། སྡུག་བསྔལ་གྱི་ཁུར་འདོར་བར་བྱེད་པ་ཡིན་ནོ། ། སྱཱད་ཡ་ཐེ་ད་ན། བ་ཡེ་བ་ཡ་པ་རི་བཱ་རེ། བཱ་ཧེ་བཱ་ཧ་པ་རི་བཱ་རེ། པྲཱི་ཐ་བེ། པྲཱི་ཐ་བཱ་པ་རི་བཱ་རེ། ཨཱ་བེ་ཨཱ་བ་པ་རི་བཱ་རེ། ཏེ་ཛེ་ ཏེ་ཛ་པ་རི་བཱ་རེ། མཱ་ལེ་མཱ་ལ་པ་རི་བཱ་རེ། ཁ་གེ་ཁ་ག་པ་རི་པཱ་རི། ཨཱ་ལོ་ཀེ་ཨཱ་ལོ་ཀ་པ་རི་བཱ་རེ། སྠཱ་མེ་སྠཱ་མ་པ་རི་བཱ་རེ། རི་ཛེ་རི་ཛ་པ་རི་བཱ་རེ། སི་ལེ་སི་ལ་པ་རི་བཱ་རེ། ག་མེ་ག་མ་པ་རི་བཱ་རེ། ཨཱ་བོ་པ་ཨ་བོ་པ་པ་རི་བཱ་རེ། མཱ་ལ་མ་ལ་མ། ལ་མ་ལ་མ། རཱ་ལ་རཱ་ལ་མ།

བཱི་ཛྙཱ་ན་ བྷཱུ་ཏ་གྲ་ཧེ། བྷཱུ་ཏ་གྲ་ཧཱ་པ་རི་བཱ་རེ། ཙཀྵུ་གྲ་ཧ་པ་རི་བཱ་རེ། ཤོ་ཏྲ་གྲ་ཧེ། ཤོ་ཏྲ་གྲ་ཧཱ་པ་རི་བཱ་རེ། གྷྲཱ་ཎ་གྲ་ཧེ། གྷྲཱ་ཎ་གྲ་ཧཱ་པ་རི་བཱ་རེ། ཛི་ཧྭཱ་གྲ་ཧེ། ཛི་ཧྭཱ་གྲ་ཧཱ་པ་རི་བཱ་རེ། ཀཱ་ཡ་གྲ་ཧེ། ཀཱ་ཡ་གྲ་ཧཱ་པ་རི་བཱ་རེ། མན་གྲ་ཧེ། མན་གྲ་ཧཱ་པ་རི་བཱ་རེ། སྤརྴ་གྲ་ཧེ། སྤརྴ་གྲ་ཧཱ་པ་རི་བཱ་རེ། བེ་ད་ ནཱ་གྲ་ཧེ། བེ་ད་ནཱ་གྲ་ཧཱ་པ་རི་བཱ་རེ། ཏྲཱིཥྞཱ་གྲ་ཧེ། ཏྲཱིཥྞཱ་གྲ་ཧཱ་པ་རི་བཱ་རེ། ཨུ་པཱ་དཱ་ན་གྲ་ཧེ། ཨུ་པཱ་དཱ་ན་གྲ་ཧཱ་པ་རི་བཱ་རེ། བྷཱ་བ་གྲ་ཧེ། བྷཱ་བ་གྲ་ཧཱ་པ་རི་བཱ་རེ། ཛཱ་ཏི་གྲ་ཧེ། ཛ་ར་མར་ཎ་གྲ་ཧེ། ཛ་ར་མ་ར་ཎ་གྲ་ཧཱ་པ་རི་བཱ་རེ། དུཿཁ་སན་ཏ་པཱ་ན་གྲ་ཧེ། དུཿཁ་སན་ ཏ་པཱ་ན་གྲ་ཧཱ་པ་རི་བཱ་རེ། ཨཱ་ར་པཱ་ར་དྭི་ཛ་གྲ་ཧེ། ཨཱ་ར་པཱ་ར་དྭི་ཛ་གྲ་ཧཱ་པ་རི་བཱ་རེ། ཨ་བརྟ་བི་བརྟ་སྱ། ཨ་བ་ར་མུ་པ་མ་ས་སྱ། བེ་ག་བི་ནི། བརྟི་ཨཱ་རྱ་ར་སྨི་སཾ་བེ་ག་ཤཱན་ཏི་སྭཱ་ཧཱ། རིགས་ཀྱི་བུ་ཉི་མའི་སྙིང་པོའི་ཆོས་ཀྱིས་གནས་པ་ཀླུ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་དང་།

སེམས་ཅན་རྣམས་ཀྱི་ལས་ཟད་པར་འགྱུར་བའི་གཟུངས་འདི་ལ་ངས་དད་པ་སྦྱིན་པར་མཛད་ཅིང་བདེན་པ་དང་རྗེས་སུ་འཐུན་པའི་བཟོད་པ་བསྐུར་བར་མཛད་ཀྱིས་ལོང་ལ་སངས་རྒྱས་ཀྱི་ཞིང་མི་མཇེད་དུ་སོང་ཤིག ། ངའི་བཀས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་གནོད་པ་ ཆུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་ཀྱང་ཞུས་ལ། དེ་ལ་འདི་སྐད་དུ། ཤར་ཕྱོགས་སུ་སངས་རྒྱས་ཀྱི་ཞིང་ཚད་མ་མཆིས་པ་གང་གཱའི་ཀླུང་གི་བྱེ་མ་སྙེད་འདས་པ་དེ་ན་འཇིག་རྟེན་གྱི་ཁམས་ཡོངས་སུ་གདུང་བ་མེད་པ་ཞེས་བགྱི་བ་མཆིས་ སོ། ། སངས་རྒྱས་ཀྱི་ཞིང་དེ་ན་དེ་བཞིན་གཤེགས་པ་ཙམ་པ་ཀའི་མདོག་ཅེས་བགྱི་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། ། དེ་བཞིན་གཤེགས་པ་དེས་ཀྱང་བདག་དེ་ནས་འདིར་བཅོམ་ལྡན་འདས་ལ་ཡོངས་སུ་ཞུ་བའི་སླད་དུ་བཏང་བ་ལགས་ན། བཙུན་པ་བཅོམ་ ལྡན་འདས་ཅི་བསྙུང་བ་མི་མངའ་ལགས་སམ། གནོད་པ་ཆུང་ངམ། ཁྱོད་ཀྱི་འཁོར་བྲོ་འཚལ་བ་མ་མཆིས་ལགས་སམ། གནོད་པ་ཆུང་ངམ། དམ་པའི་ཆོས་ཉན་པར་འཚལ་བ་དག་ལགས་སམ། ཇི་ལྟར་ཐོས་པ་བཞིན་དུ་ཆོས་དང་ལྡན་པ་ལགས་སམ། ཆོས་དེ་ལ་ནན་ཏན་ སྙིང་པོར་བགྱིད་པ་ལགས་སམ།

ཆོས་ཀྱིས་གནས་པ་དང་ལྡན་པར་གནས་ལགས་སམ། ཁྱོད་ཀྱི་སངས་རྒྱས་ཀྱི་ཞིང་འདིར་བདུད་ཀྱི་ཡུལ་དང་། ཀླུའི་ཡུལ་བཅོམ་ལགས་སམ། སངས་རྒྱས་གཅིག་གི་ཡུལ་ལགས་སམ། འདིར་ཁྱོད་ཀྱིས་ཆོས་ཀྱི་འཁོར་ལོ་ཐོགས་པ་མ་མཆིས་ པར་བསྐོར་བར་མཛད་ལགས་སམ། གང་ལ་ལ་སངས་རྒྱས་ཀྱི་ཡུལ་འདིར་ཆོས་མ་ལགས་པའི་འཁོར་ལོ་སྐོར་བ་དེ་ལ་ཡང་དེ་བཞིན་གཤེགས་པ་ཙམ་པ་ཀའི་མདོག་དེས་ཉི་མའི་སྙིང་པོའི་ཆོས་ཀྱིས་གནས་པ་ཀླུ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་དང་། སེམས་ཅན་ རྣམས་ཀྱི་ལས་ཟད་པར་འགྱུར་བའི་གཟུངས་སྔགས་འདི་ལ་དད་པ་གནང་སྟེ། དེ་ནས་ཀྱང་བདེན་པ་དང་རྗེས་སུ་འཐུན་པའི་གཟུངས་སྔགས་མཐུ་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཀུན་ཏུ་ཟད་པར་བགྱིད་པ། གཟུགས་ཀྱི་འདོད་ཆགས་ཐམས་ཅད་ཀུན་ ཏུ་ཟད་པར་བགྱིད་པ། གཟུགས་མེད་པའི་འདོད་ཆགས་ཀུན་ཏུ་ཟད་པར་བགྱིད་པ་ནས། མ་རིག་པའི་མུན་པའི་ཕུང་པོ་ཐམས་ཅད་རབ་ཏུ་འཇོམས་པའི་བར་བགྱིད་པ་དང་། སྡུག་བསྔལ་གྱི་ཕུང་པོའི་ཁུར་འདོར་བར་བགྱིད་པ་འདི་བསྐུར་ལགས་སོ་ཞེས་གསོལ་ ཅིག ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོ་དེས་འདི་སྐད་ཅེས་གསོལ་ཏོ།

། བཙུན་པ་བཅོམ་ལྡན་འདས་བདེན་པ་དང་རྗེས་སུ་འཐུན་པའི་བཟོད་པ་ཡོན་ཏན་དང་། ཕན་ཡོན་དང་བཅས་པ་བདག་གིས་བཟུང་ལགས་ན། བཙུན་པ་ བཅོམ་ལྡན་འདས་སངས་རྒྱས་ཀྱི་ཞིང་མི་མཇེད་དུ་མཆི་བ་ལ་འཇིགས་པ་འབའ་ཞིག་མཆིས་ལགས་སོ། ། དེ་ཅིའི་སླད་དུ་ཞེ་ན། ད་ལྟར་བཅོམ་ལྡན་འདས་ལས་བདག་གིས་མངོན་དུ་ཐོས་ཤིང་མངོན་དུ་བཟུང་ལགས་ཏེ། འདི་ལྟར་སངས་རྒྱས་ཀྱི་ཞིང་མི་མཇེད་དེ་ན་སེམས་ཅན་ རྣམས་འདོད་ཆགས་ཀྱི་ཤས་ཆེ་བ་དམུས་ལོང་དང་འདྲ་བ་དག་ལགས་ཏེ། དེ་ན་བུད་མེད་ཀྱང་གཟུགས་མི་སྡུག་པ་དང་། ཚུལ་དུ་མི་ཤིས་པ་དང་། མཆོག་ཏུ་གཟུགས་ཀྱི་རྒྱགས་པས་དྲེགས་པ་ནས་སེམས་ཅན་རྣམས་བསམ་གཏན་ལ་རབ་ཏུ་སྤྱོད་པ་བགྱིས་པ། མངོན་པར་ ཤེས་པས་རྣམ་པར་རྩེ་བ། སྐྱེས་བུ་དམ་པ་མཁས་པ་ཆེན་པོ་དག་ཀྱང་ལྷག་པར་བུད་མེད་ཀྱི་དབང་དུ་འགྱུར་བ་ལགས་སོ། ། བུད་མེད་ཀྱི་ཉེས་པས་དགེ་བའི་རྩ་བ་ཐམས་ཅད་ལས་ཡོངས་སུ་ཉམས་པ་དག་དང་། ངན་སོང་བ་དག་དང་། སེམས་ཅན་དམྱལ་བའི་བར་འབྱུང་ ཞིང་འབྱུང་བར་འགྱུར་བའི་སླད་དུའོ། །

དེ་ནས་བཅོམ་ལྡན་འདས་དེ་བཞིན་གཤེགས་པ་ཙམ་པ་ཀའི་མདོག་དེས་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོ་ལ་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་ཁྱོད་ནི་བདག་གི་དོན་དུ་སྨྲ་བ་མ་ཡིན་ཞིང་བདག་ལ་ ཕན་པའི་ཕྱིར་ཞུགས་པ་མ་ཡིན་ནོ། ། རིགས་ཀྱི་བུ་ཁྱོད་ནི་སེམས་ཅན་ཐམས་ཅད་ཀྱི་དོན་དུ་སྨྲ་བ་ཡིན་ཞིང་ཁྱོད་ནི་སེམས་ཅན་ཐམས་ཅད་ལ་ཕན་པའི་ཕྱིར་ཞུགས་པ་ཡིན་ནོ། ། རིགས་ཀྱི་བུ་སངས་རྒྱས་ཀྱི་ཞིང་མི་མཇེད་ན་དེ་བཞིན་གཤེགས་པ་ཤཱཀྱ་ཐུབ་པའི་འཁོར་ན་དགེ་བསྙེན་དྲི་ མ་མེད་པར་གྲགས་པ་ཞེས་བྱ་བ་སྣང་བ་གང་ཡིན་པ་དེ་ཡང་སུ་ཡིན། དེ་ནི་ཁྱོད་ཉིད་མ་ཡིན་ནམ། དེ་ཅང་མི་སྨྲ་བར་གྱུར་ཏོ། ། དེ་བཞིན་གཤེགས་པ་ཙམ་པ་ཀའི་མདོག་ང་ཡང་སངས་རྒྱས་ཀྱི་ཞིང་དེ་དང་། སངས་རྒྱས་ཀྱི་ཞིང་བྱེ་བ་ཕྲག་བརྒྱ་སྟོང་གྲངས་མེད་པ་འདིའི་བར་དུ་ སེམས་ཅན་ཡོངས་སུ་སྨིན་པར་བྱ་བའི་ཕྱིར་ལ་ལར་ཁ་ཅིག་ཏུ་ནི་ཚངས་པའི་ལུས་བྱད་དུ་ཀུན་ཏུ་སྣང་ངོ་། ། སེམས་ཅན་ཡོངས་སུ་སྨིན་པར་བྱ་བའི་ཕྱིར་ཁ་ཅིག་ཏུ་ནི་དབང་ཕྱུག་གི་ལུས་བྱད་དུ་ཀུན་ཏུ་སྣང་ངོ་། ། ལ་ལར་ནི་དགེ་སྦྱོང་གི་ལུས་བྱད་དང་།

ལ་ལར་ནི་བརྒྱ་བྱིན་གྱི་ལུས་ བྱད་དང་། ལ་ལར་ནི་ལྷའི་ལུས་བྱད་དང་། ལ་ལར་ནི་ཀླུའི་དབང་པོའི་ལུས་བྱད་དང་། ལ་ལར་ནི་ལྷ་མ་ཡིན་གྱི་དབང་པོའི་ལུས་བྱད་དང་། ལ་ལར་ནི་ནམ་མཁའ་ལྡིང་གི་དབང་པོའི་ལུས་བྱད་དང་། ལ་ལར་ནི་མི་འམ་ཅིའི་དབང་པོའི་ལུས་བྱད་དང་། ལ་ལར་ནི་ཤེད་ལས་སྐྱེས་ ཀྱི་དབང་པོའི་ལུས་བྱད་དང་། ལ་ལར་ནི་རང་སངས་རྒྱས་ཀྱི་ལུས་བྱད་དང་། ལ་ལར་ནི་ཉན་ཐོས་ཀྱི་ལུས་བྱད་དང་། ལ་ལར་ནི་རྒྱལ་རིགས་ཀྱི་ལུས་བྱད་དང་། ལ་ལར་ནི་བྲམ་ཟེའི་ལུས་བྱད་དང་། ལ་ལར་ནི་ཁྱིམ་བདག་གི་ལུས་བྱད་དང་། ལ་ལར་ནི་བུད་མེད་ཀྱི་ལུས་བྱད་དང་། ལ་ལར་ནི་ཁྱེའུའི་ལུས་བྱད་དང་། ལ་ལར་ནི་བུ་མོའི་ལུས་བྱད་དང་། ལ་ལར་ནི་དུད་འགྲོའི་སྐྱེ་གནས་ཀྱི་ལུས་བྱད་དང་། ལ་ལར་ནི་{ཡི་དགས་,ཡི་དྭགས་}ཀྱི་ལུས་བྱད་དང་། ལ་ལར་ནི་སེམས་ཅན་དམྱལ་བའི་ལུས་བྱད་དུ་ཀུན་ཏུ་སྣང་ངོ་། ། དེ་ལྟ་མོད་ཀྱི་འཁོར་འདི་ན་གང་དག་ང་དང་ཐབས་ ཅིག་ལྷན་ཅིག་ཏུ་སྙོམས་པར་འཇུག་པར་མཛད་ཅིང་བཞེངས་པར་ཡང་མཛད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱད་ཁྲི་ཡོད་དོ། ། འཁོར་འདི་ན་བྱང་ཆུབ་སེམས་དཔའ་ཁ་ཅིག་བློ་གཡོ་བ་དག་དང་།

བློ་རྒྱུད་རྣམ་པར་མི་གནས་པ་དག་ཀྱང་ཡོད་དེ། དེ་བཞིན་ གཤེགས་པ་ཤཱཀྱ་ཐུབ་པ་ལ་བལྟ་བ་དང་། ཕྱག་འཚལ་བ་དང་། བསྙེན་བཀུར་བྱ་བ་དང་། འདུས་པ་ཆེན་པོ་དེ་ལ་ཡང་བལྟ་བ་དང་། དེ་བཞིན་གཤེགས་པ་ཤཱཀྱ་ཐུབ་པ་དེ་ལས་ཀྱང་འདུས་པ་ཆེན་པོ་མཉན་པར་མཆོག་ཏུ་འདོད་པར་གྱུར་ཏོ། ། བྱང་ཆུབ་སེམས་དཔའ་དེ་ དག་ཀྱང་ང་ཁོ་ན་དང་ཐབས་ཅིག་ཏུ་དེ་ཉིད་དུ་འདོང་བར་འདོད་དེ། དེར་དེ་དག་འདོད་པའི་འདོད་ཆགས་ཀྱི་རྒྱུས་སླུ་བར་གྱུར་ན་མི་རུང་ཞིང་དེར་ངའི་སྐྱེས་བུ་དམ་པ་མ་ཡིན་པའི་བྱེད་པ་འགྲོ་བར་གྱུར་ན་མི་རུང་བས། དེ་དག་གི་དོན་དུ་ངས་བཤད་དོ། ། ཡང་དེ་ བཞིན་གཤེགས་པ་ཙམ་པ་ཀའི་མདོག་གིས་བྱང་ཆུབ་སེམས་དཔའ་ཉི་མའི་ཤུགས་ཀྱི་སྙིང་པོ་ལ་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་མ་འཇིགས་ཤིག་མ་འཇིགས་ཤིག ། སྐྱེས་བུ་དམ་པ་ཁྱེད་ལ་འདི་ལྟ་སྟེ། གཟུངས་སྔགས་གང་གིས་སྲིད་པ་གསུམ་གྱི་བཙོན་རར་ ཐམས་ཅད་དུ་མངོན་པར་མི་དགའ་བའི་འདུ་ཤེས་ཅན་དང་། མཚན་མ་མེད་པའི་ཏིང་ངེ་འཛིན་རྣམ་པར་ཐར་པའི་སྒོ་ལ་རེག་ནས་རྫོགས་པར་བྱས་ཏེ་གནས་པ་དང་། མི་གཡོ་བའི་ཏིང་ངེ་འཛིན་ལ་འཇུག་པ་དང་།

མགོ་མཉམ་དུ་ཡོངས་སུ་མྱ་ངན་ལས་འདས་པར་འགྱུར་བའི་ གཟུངས་སྔགས་ཉི་མ་སྣང་བའི་པད་མ་ཞེས་བྱ་བ་ལུས་ཀྱི་ཚོར་བ་ཐམས་ཅད་སྒྲུབ་པར་བྱེད་པ། ལུས་ཀྱི་འདུ་ཤེས་ཐམས་ཅད་སྒྲུབ་པར་བྱེད་པ། དུལ་བའི་ས་སྒྲུབ་པར་བྱེད་པ། རྣམ་པར་གྲོལ་བ་སྒྲུབ་པར་བྱེད་པ། སྲིད་པའི་རྒྱ་མཚོ་ཡོངས་སུ་གཅོད་པ་སྒྲུབ་པར་བྱེད་པ། དཀོན་ མཆོག་གསུམ་གྱི་གདུང་གི་གགས་ལྡོག་པ་སྒྲུབ་པར་བྱེད་པ། བྱམས་པ་ཆེན་པོ་སྒྲུབ་པར་བྱེད་པ། སྙིང་རྗེ་ཆེན་པོ་སྒྲུབ་པར་བྱེད་པ། ཤེས་རབ་རྣམ་པར་གྲོལ་བ་ཐམས་ཅད་སྒྲུབ་པར་བྱེད་པ། བདུད་བཞི་དང་ཕས་ཀྱི་རྒོལ་བ་ཐམས་ཅད་འདུལ་བ་སྒྲུབ་པར་བྱེད་པ། ཟད་པ་ ཤེས་པ་དང་མི་སྐྱེ་བ་ཤེས་པ་སྒྲུབ་པར་བྱེད་པ། ལོངས་སྤྱོད་དང་། ཚེའི་འདུ་བྱེད་ཐམས་ཅད་དང་། ཞི་བ་དང་། གཏན་དུ་ཡོངས་སུ་མྱ་ངན་ལས་འདས་པ་སྒྲུབ་པར་བྱེད་པ་ངས་སྦྱིན་པར་མཛད་དོ། ། རིགས་ཀྱི་བུ་གང་ལ་ལ་ཉི་མ་སྣང་བའི་གཟུངས་སྔགས་འདི་སེམས་རྩེ་ གཅིག་པས་ཉན་པར་བྱེད་ན། འདོད་ཆགས་ལ་སོགས་པའི་ཉོན་མོངས་པ་ཐམས་ཅད་སྲབ་མོར་བྱེད་དོ། ། འཆི་བའི་དུས་བྱས་ནས་ཀྱང་ལྷ་རྣམས་ཀྱི་ནང་དུ་ཚེ་རབས་བདུན་འཁོར་བར་བྱེད་ཅིང་ཚེ་རབས་དྲན་པར་ཡང་འགྱུར་ལ།

དེར་འདོད་པ་རྣམས་ཀྱིས་ཀྱང་གོས་པར་མི་འགྱུར་ རོ། ། དེ་རྣམས་ཀྱི་ནང་དུ་ལྷའི་དྲང་སྲོང་དུ་འགྱུར་ཞིང་ལྷ་རྣམས་ཀྱིས་མཆོད་པའི་འོས་སུ་འགྱུར་རོ། ། དེ་དེ་ནས་ཤི་འཕོས་ནས་མི་རྣམས་ཀྱི་ནང་དུ་ཚེ་རབས་བདུན་འཁོར་བར་བྱེད་ཅིང་འདིར་འདོད་པ་རྣམས་ཀྱིས་རྗེས་སུ་གོས་པར་ཡང་མི་འགྱུར་རོ། ། འདིར་མི་རྣམས་ཀྱི་ནང་ དུ་མིའི་དྲང་སྲོང་དུ་འགྱུར་ཞིང་ལྷ་དང་མི་ཐམས་ཅད་ཀྱིས་ཕྱག་བྱ་བའི་འོས་སུ་གྱུར་པ་དང་། མཆོད་པའི་འོས་སུ་འགྱུར་རོ། ། གང་ལ་ལ་ཉི་མ་སྣང་བའི་གཟུངས་སྔགས་སེམས་རྩེ་གཅིག་པས་ལན་བདུན་གྱི་བར་དུ་ཉན་པར་བྱེད་ན་དེ་འཆི་བའི་དུས་བྱས་ནས་ལྷ་རྣམས་ཀྱི་ནང་དུ་ལན་ བདུན་གྱི་བར་དུ་དྲང་སྲོང་མངོན་པར་ཤེས་པ་ལྔ་དང་ལྡན་པར་འགྱུར་ཞིང་ལྷ་ཐམས་ཅད་ཀྱིས་ཕྱག་བྱ་བའི་འོས་དང་མཆོད་པའི་འོས་སུ་འགྱུར་རོ། ། དེ་འདིར་མི་རྣམས་ཀྱི་ནང་དུ་ལན་བདུན་དུ་དྲང་སྲོང་མངོན་པར་ཤེས་པ་ལྔ་དང་ལྡན་པར་འགྱུར་ཞིང་ལྷ་དང་། ཀླུ་དང་། གནོད་ སྦྱིན་དང་། ལྷ་མ་ཡིན་དང་། མི་དང་། མི་མ་ཡིན་པ་རྣམས་ཀྱིས་ཕྱག་བྱ་བའི་འོས་དང་། མཆོད་པའི་འོས་སུ་འགྱུར་རོ། །

རིགས་ཀྱི་བུ་གང་ལ་ལ་ལྷ་རྣམས་ཀྱི་ནང་དུ་ཡང་ལྷའི་འདུས་པ་རྣམས་ལ་གཟུངས་སྔགས་ཉི་མ་སྣང་བའི་པད་མ་ཞེས་བྱ་བ་འདི་ལན་བདུན་དུ་རྗོད་པར་ བྱེད་ལ། དེ་དག་ཀྱང་སེམས་རྩེ་གཅིག་པས་ཉན་པར་བྱེད་ན་ལྷ་དང་ལྷ་མོ་དེ་དག་ཐམས་ཅད་ཀྱང་འདོད་པའི་ཡོན་ཏན་ལྔ་པོ་ཐམས་ཅད་ལ་མི་ལྟ་བའི་སེམས་དང་ལྡན་པར་འགྱུར་ཞིང་། བསམ་གཏན་ལ་མངོན་པར་དགའ་བར་འགྱུར་རོ། ། གལ་ཏེ་ལ་ལ་འདིར་རྒྱལ་པོ་རྣམས་ སམ། རྒྱལ་རིགས་རྣམས་སམ། བྲམ་ཟེ་རྣམས་སམ། རྗེའུ་རིགས་རྣམས་སམ། དམངས་རིགས་རྣམས་ཀྱི་རྣ་གུང་དུ་ལན་བདུན་དུ་རྗོད་པར་བྱེད་ལ། གལ་ཏེ་དེ་དག་ཀྱང་སེམས་རྩེ་གཅིག་པས་ཉན་པར་བྱེད་ན་དེ་དག་ཐམས་ཅད་འདོད་པའི་ཡོན་ཏན་ལྔ་པོ་ཐམས་ཅད་ལ་ མི་ལྟ་བའི་སེམས་དང་ལྡན་པ་དང་། བསམ་གཏན་ལ་མངོན་པར་དགའ་བར་འགྱུར་རོ། ། རིགས་ཀྱི་བུ་བུད་མེད་གང་ལ་ལ་གཟུངས་སྔགས་ཉི་མ་སྣང་བའི་པད་མ་ཞེས་བྱ་བ་འདི་ཉན་པར་བྱེད་ཅིང་ཉིན་ཞག་བདུན་དུ་ལས་གཞན་མི་བྱེད་པར་རྣམ་པར་སེམས་པར་བྱེད་དམ། ལྕེས་ཁ་ཏོན་དུ་བྱེད་ན་དེའི་རིས་འཐུན་པ་ལ་འདོད་ཆགས་ལ་སོགས་པའི་ཉོན་མོངས་པ་ཐམས་ཅད་བསྲབས་པར་འགྱུར་རོ། ། འདི་ནི་དེའི་བུད་མེད་འཐོབ་པའི་ཐ་མ་ཡིན་ནོ། །

བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། ། དེ་ཕྱིས་ཀྱང་བླ་ན་མེད་པའི་ཡོངས་སུ་མྱ་ངན་ལས་འདས་ཀྱི་བར་དུ་རང་གི་སྨོན་ལམ་མ་གཏོགས་པར་འཁོར་བ་ན་འཁོར་བའི་ཚེ་བུད་མེད་འཐོབ་པ་རྙེད་པར་མི་འགྱུར་རོ། ། རིགས་ཀྱི་བུ་གང་ལ་ལ་གཟུངས་སྔགས་ཉི་མ་སྣང་བའི་པད་མ་ཞེས་བྱ་བ་འདིས་ལན་བདུན་དུ་རྩི་གྲང་མོ་ ལས་བྱ་བས་ནས་རྔ་བོ་ཆེའམ། དུང་ལ་བྱུགས་ནས། རྔ་བོ་ཆེ་དེ་རྡུང་བར་བྱེད་དམ། དུང་འབུད་པར་བྱེད་ན་གང་དང་གང་དུ་དེ་དག་གི་སྒྲ་འགྲོ་བ་དེ་དང་དེར་མི་རྣམས་ལ་བྱད་སྟེམས་ཐམས་ཅད་ཀྱི་རྒྱུ་མེད་པར་འགྱུར་རོ། ། དེར་སྨན་གྱི་སྦྱོར་བ་འགྲོ་བ་དང་། ཕོ་ཉ་དང་། ཡིག་འབྲུ་ དང་། ཡིད་ལ་བྱེད་པ་དང་། ལུས་འགྱུར་བ་དང་། ཚུལ་འཆོས་པ་དང་། འཆིང་བ་དང་། ལུས་དང་། སྙིང་གི་ཀུན་ཏུ་གདུང་བ་མཐོང་བར་མི་འགྱུར་རོ། ། ལས་སྒྲུབ་པ་མེད་པར་འབྲས་བུ་འགྲུབ་པར་འགྱུར་ཏེ། རིགས་ཀྱི་བུ་གཟུངས་སྔགས་ཉི་མ་སྣང་བའི་པད་མ་ཞེས་བྱ་བ་ འདི་ནི་དེ་ལྟར་རྫུ་འཕྲུལ་ཆེ་བ་ཡིན་ནོ། ། ཏད་ཡ་ཐཱ། སིད་དྷ་མ་ཏེ། བི་ལོ་ཀ་མ་ཏེ། ཨེ་ལེ་ཀེ་ཏེ་རེ་ཥེ། རཱུ་ཙི་སུ་རཱུ་ཙི། བུད་དྷེ་བི་བུད་དྷེ། མ་ཧཱ་བུད་དྷེ།

ཨུན་མད་ཏེ། ཨུན་མད་ཏ། པྲ་ཏི་ཥེ་དྷ་ནེ། ར་ག་དྷུ་ར་ག་དྷུ་བ་པྲ་ཏི་ཥེ་དྷ་ནེ་བིན་དུ། བིན་དུ་མ་ཏེ། ཙི་ཊ་ཙི་ཊ་པྲ་ཏི་ཥེ་དྷ་ནི། ཨརྐ་ཙན་དྲ་ཨ་དྷེ། ཧ་ཏ་ཙིད་ཏི་ཧ་ཏ་ནི་རྨི། ཧ་ཏ་ཀཱ་མ་བེ་གེ ། ཧ་ཏ་པཽ་ན་བྷ་བི་ར་ཛེ། ཧ་ཏ་ཙཀྵུ་ས་མ་ཏེ། ཧ་ཏ་བི་ཏ་མ་བུད་དྷེ། ཧ་ཏ་ཡཱ་གྲེ། ཧ་ཏ་བི་ས་མཱ་གྲེ། ཧ་ཏ་སུ་མུ་དྲ་ཙ་བེ། ཧ་ཏ་བི་ཏ་མཱ་ར་ཛེ། ཧ་ཏ་ཏི་ཏེ། ཧ་ཏ་དྷརྨ་ཙ་ཙ་ཏེ། ཧ་ཏ་དྷརྨ་རཱ་ཛེ། ཧ་ཏ་བ་ཧུ་རཱ་ཛེ། ཧ་ཏ་པ་ བརྫ་མ་ཏི། ཧ་ཏཽགྷ་རབྨི། ཧ་ཏ་དྷརྨ་སིད་དྷི། ཧ་ཏ་སརྦ་ཨུ་པ་དྷ་ན་ཛྙཱ་ཛྙཱ་ཛྙཱ། བི་ཛྙཱ་ཛྙཱ་ཛྙཱ། རི་བི་ཛྙཱ་ཛྙཱ་ཛྙ། སརྦ་མཱརྒ་ཛྙ་ཛྙཱ། ཨེ་ཥ་ཨནྟ་སང་སཱ་ར་དུཿཁེ་སྭཱ་ཧཱ། རིགས་ཀྱི་བུ་འདོད་པའི་ཆུ་བོ་ཐམས་ཅད་ཀུན་ཏུ་སྐེམས་པར་བྱེད་པ། ངེས་པར་འབྱུང་བའི་ཕ་རོལ་དུ་འགྲོ་བའི་གཟུངས་ སྔགས་འདི་བཟུང་ནས་མི་མཇེད་ཀྱི་འཇིག་རྟེན་གྱི་ཁམས་སུ་སོང་ཤིག ། ཁྱོད་ཀྱིས་འདོད་པའི་བདུད་ཀྱི་མཆིལ་པ་ཐམས་ཅད་དང་། ཕ་རོལ་གནོན་པ་དང་། ཡུལ་ལ་བརྩོན་པའི་ཕ་རོལ་གནོན་པས་ཕ་རོལ་གནོན་པ་བྱེད་དུ་ཟིན་ཀྱང་།

སུས་ཀྱང་ཁྱོད་ཀྱི་ལུས་སམ་སེམས་ལ་ འདོད་པའི་ཀུན་ཏུ་སྦྱོར་བ་དག་གིས་གོས་པར་བྱེད་མི་ནུས་ན་གཟུངས་སྔགས་འདི་ཇི་ལྟར་ཐོས་པ་བཞིན་དུ་སངས་རྒྱས་ཀྱི་ཞིང་མི་མཇེད་དུ་སོང་ནས་ཀྱང་སྦྱོར་བ་བྱོས་ཤིག ། དེར་གལ་ཏེ་བདུད་བྱེ་བ་ཕྲག་བརྒྱ་གསང་སྔགས་ཀྱི་སྦྱོར་བ་ཐམས་ཅད་དང་། སྨན་གྱི་སྦྱོར་བ་ཐམས་ཅད་ དང་། ཆོས་ཀྱི་སྦྱོར་བ་ཐམས་ཅད་དང་། ལྷ་དང་། མི་གཞན་དག་གིས་འདོད་པའི་དྲི་ང་བ་དག་གིས་གོས་པར་བྱ་བ་ལྟ་ཅི་སྨོས། དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོ་ལ་སོགས་པ་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ ཕྲག་མང་པོ་དང་། ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དང་། ལྷ་དང་། མི་རྣམས་ངོ་མཚར་རྙེད་ཅིང་རྨད་དུ་བྱུང་བ་རྙེད་པར་གྱུར་ནས་འདི་སྐད་ཅེས་གསོལ་ཏོ། ། སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་གཟིགས་པ་དང་། མངའ་བརྙེས་པ་ནི་ངོ་མཚར་ལགས་སོ། ། མཆོག་ཏུ་ངོ་མཚར་ལགས་ཏེ། འདོད་པས་ཀུན་ཏུ་གདུང་བ་རྣམ་པར་འཇིག་པར་བགྱིད་པའི་གཟུངས་སྔགས་འདི་ནི་བདག་ཅག་གིས་སྔོན་མ་ཐོས་ལགས་སོ། ། དེ་ནས་འཁོར་དེར་ལྷའི་བུ་མོ་དང་།

མིའི་བུ་མོ་བརྒྱད་ཁྲི་བཞི་སྟོང་གིས་བསྙེན་བཀུར་བྱས་ནས་གཟུངས་སྔགས་འདི་ཐོས་ པར་གྱུར་ཏོ། ། ཐོས་མ་ཐག་ཏུ་དེ་དག་གི་མོ་མཚན་ནུབ་པར་གྱུར་ཅིང་། ཕོ་མཚན་བྱུང་བར་གྱུར་ཏེ། ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། ། དེ་ནས་དེ་བཞིན་གཤེགས་པ་ཙམ་པ་ཀའི་མདོག་གིས་མེ་ཏོག་ཙམ་པ་ཀའི་ ཕྲེང་བ་བཞེས་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོ་ལ་འདི་སྐད་ཅེས་བཀའ་སྩལ་ཏོ། ། ཀྱེ་རིགས་ཀྱི་བུ་མེ་ཏོག་ཙམ་པ་ཀའི་ཕྲེང་བ་འདི་དང་། གཟུངས་སྔགས་ཉི་མ་སྣང་བའི་པད་མ་ཞེས་བྱ་བ་འདི་དང་། བདེན་པ་དང་རྗེས་སུ་འཐུན་པའི་བཟོད་པ་ དེ་ཟུང་ཤིག ། འདོད་པ་གློག་གི་འོད་ལྟ་བུ་སེལ་བར་བྱེད་པ་འདི་གཉིས་དང་། ཆོས་ཀྱི་སྒོ་མོ་དེར་ཁྱེར་ལ་ངའི་བཀས་དེ་བཞིན་གཤེགས་པ་ཤཱཀྱ་ཐུབ་པ་ལ་གནོད་པ་ཆུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་ཀྱང་ཞུས་ ལ། དེ་ལ་འདི་སྐད་དུ་ཁྱོད་ལ་དེ་བཞིན་གཤེགས་པ་ཙམ་པ་ཀའི་མདོག་ཞུ་བར་མཛད་ལགས་ཏེ། བཙུན་པ་བཅོམ་ལྡན་འདས་ཅི་བསྙུང་བ་མི་མངའ་ལགས་སམ། གནོད་པ་ཆུང་ངམ། ཁྱོད་ཀྱི་འཁོར་གུས་པར་ཉན་ལགས་སམ།

ཆོས་འཚལ་བ་ལགས་སམ། ཆོས་ཀྱིས་ གནས་པ་ལགས་སམ། ཆོས་ལ་བརྩོན་པ་ལགས་སམ། སངས་རྒྱས་ཀྱི་ཡུལ་ཐམས་ཅད་ན་ཉོན་མོངས་པ་སེལ་བར་བགྱིད་པ་དེ་དག་དང་། ཆོས་ཀྱི་སྒོ་ལ་དེ་བཞིན་གཤེགས་པ་དེས་དད་པ་སྩལ་ཏེ། དེ་ནས་འདོད་པ་གློག་གི་འོད་ལྟ་བུ་སེལ་བར་བགྱིད་པ། ཆོས་ཀྱི་སྒོའི་ གཟུངས་སྔགས་མཐུ་སྟོབས་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཀུན་ཏུ་ཟད་པར་བགྱིད་པ། གཟུགས་ཀྱི་འདོད་ཆགས་ཐམས་ཅད་ཟད་པར་བགྱིད་པ་ནས། མ་རིག་པའི་མུན་པའི་ཕུང་པོ་ཐམས་ཅད་རབ་ཏུ་འཇོམས་པའི་བར་བགྱིད་པ། སྡུག་བསྔལ་ གྱི་ཁུར་འདོར་བར་བགྱིད་པ་བསྐུར་ལགས་སོ་ཞེས་གསོལ་ཅིག། ། ། འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་གསུམ་པ། དེས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་དེ་བཞིན་འཚལ་ལགས་སོ། ། ཡང་དེའི་ཚེ་བྱང་ཆུབ་སེམས་དཔའ་བརྒྱད་ཁྲིས་ཚིག་འཐུན་པར་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་བལྟ་བ་དང་། ཕྱག་བགྱི་བ་དང་། མཆོད་པ་དང་། བསྙེན་བཀུར་བགྱི་བ་དང་། འདུས་པ་ཆེན་པོ་དེ་ལ་ཡང་བལྟ་བའི་ སླད་དུ། བདག་ཅག་ཀྱང་མཆི་བར་འཚལ་ཏེ།

དེ་བཞིན་གཤེགས་པ་དེ་ལས་འདུས་པ་ཆེན་པོ་སངས་རྒྱས་ཀྱི་ཡུལ་ཐམས་ཅད་ན་ཉོན་མོངས་པ་སེལ་བར་བགྱིད་པའི་ཆོས་ཀྱི་སྒོ་བདག་ཅག་གིས་མཉན་པར་བགྱིད་ལགས་སོ། ། དེ་ནས་དེ་བཞིན་གཤེགས་པ་ཙམ་པ་ཀའི་མདོག་ དེས་དེ་དག་ལ་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་དག་ཐམས་ཅད་ལྷན་ཅིག་འཐུན་པར་ཐམས་ཅད་ཚངས་པ་ཆེན་པོའི་ལུས་བྱད་དང་། རྟགས་དང་། མདོག་དང་། དབྱིབས་དང་། སྤྱོད་ལམ་གྱིས་དེང་ཤིག ། དེ་ནས་དེའི་ཚེ་བྱང་ཆུབ་སེམས་དཔའ་ཉི་མའི་ཤུགས་ ཀྱི་སྙིང་པོ་ལ་སོགས་པ་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་ཐམས་ཅད་ཚངས་པ་ཆེན་པོའི་ལུས་བྱད་དང་། མདོག་དང་། རྟགས་དང་། དབྱིབས་དང་། སྤྱོད་ལམ་དུ་ལུས་དག་མངོན་པར་སྤྲུལ་ནས། དེ་བཞིན་གཤེགས་པ་ཙམ་པ་ཀའི་ མདོག་གི་ཞབས་གཉིས་ལ་མགོ་བོས་ཕྱག་འཚལ་ཏེ། ལན་གསུམ་དུ་བསྐོར་བ་བྱས་ནས་དེ་ནས་ཆས་ཏེ་ཡུད་ཙམ་གྱིས་སངས་རྒྱས་ཀྱི་ཞིང་མི་མཇེད་འདིར་ཕྱིན་ཏོ། ། སྐྱེས་བུ་དམ་པ་དེ་དག་ཕྱིན་པ་ཙམ་གྱི་མོད་ལ་སངས་རྒྱས་ཀྱི་ཞིང་མི་མཇེད་འདི་ཐམས་ཅད་དུ་བཅོམ་ལྡན་འདས་ ལ་མཆོད་པ་བྱ་བའི་ཕྱིར་མེ་ཏོག་ཙམ་པ་ཀའི་ཆར་མངོན་པར་འབེབས་པར་གྱུར་ཏོ། །

དེ་དག་ཡུལ་མ་ག་དྷཱའི་ཞིང་ག་ལ་བ་དང་། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ག་ལ་བ་དེར་ཉེ་བར་དོང་ངོ་། ། དོང་ནས་ཀྱང་བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ ཏེ་ཕྱོགས་གཅིག་ཏུ་འཁོད་དོ། ། བཅོམ་ལྡན་འདས་ནི་དེའི་བར་དུ་ཡང་རྒྱལ་པོ་གཟུགས་ཅན་སྙིང་པོ་དང་ཐབས་ཅིག་ཆོས་ཀྱིས་གནས་པའི་གཏམ་ཀུན་ཏུ་སྤྱོད་པར་མཛད་དོ། ། དེའི་ཚེ་ལྷོ་ཕྱོགས་ན་གྲོང་ཁྱེར་ཆུ་དང་རྒྱར་དཔག་ཚད་གཅིག་ཡོད་པ་བྱེ་མ་དག་གིས་ཡོངས་སུ་གང་བ་དེ་སྙེད་ཀྱི་ སངས་རྒྱས་ཀྱི་ཞིང་འདས་པ་དེ་ན་འཇིག་རྟེན་གྱི་ཁམས་སྙིགས་མ་ལྔས་སྙིགས་མའི་རྒྱལ་མཚན་ཞེས་བྱ་བ་ཡོད་དེ། སངས་རྒྱས་ཀྱི་ཞིང་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་དབང་གི་རྒྱལ་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་ སྟོན་ཏོ། ། འཁོར་དེར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་ཆེ་ཞེས་བྱ་བ་འདུས་ཏེ་འདུག་པར་གྱུར་ཏོ། ། དེས་སྟེང་གི་ནམ་མཁའ་ལ་བྱང་ཆུབ་སེམས་དཔའ་གྲངས་མེད་དཔག་ཏུ་མེད་པ་ལྷོ་ཕྱོགས་ཀྱི་ཕྱོགས་ཆ་ནས་བྱང་ཕྱོགས་སུ་འགྲོ་བ་དག་མཐོང་ངོ་། །

དེ་ནས་གོང་དུ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་འདོང་བའི་ཕྱོགས་དེ་ལ་བལྟས་ཏེ། དེས་དེར་སྣང་བ་ཆེན་པོ་མཐོང་ནས་དེ་བཞིན་གཤེགས་པ་རི་དབང་རྒྱལ་པོ་ལ་ཡོངས་སུ་ཞུས་སོ་ཞེས་བྱ་བ་ནས། དེ་བཞིན་གཤེགས་པ་རི་དབང་རྒྱལ་པོ་དེས་བྱང་ ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་ཆེ་ལ་འདི་སྐད་ཅེས་བཀའ་སྩལ་ཏོ་ཞེས་བྱ་བའི་བར་སྔ་མ་བཞིན་ནོ། ། རིགས་ཀྱི་བུ་འདི་ལྟ་སྟེ། གྲོང་ཁྱེར་ཆུ་དང་རྒྱར་དཔག་ཚད་གཅིག་ཡོད་པ་བྱེ་མ་དག་གིས་ཡོངས་སུ་གང་བར་གྱུར་པའི་བྱེ་མའི་འབྲུ་དེ་དག་ཇི་སྙེད་ཡོད་པའི་སངས་ རྒྱས་ཀྱི་ཞིང་ཇི་སྙེད་འདས་པ་དེ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དོ། ། དེ་ན་དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། ། དེ་ན་ད་ལྟར་འདུས་པ་ཆེན་པོ་ཡོད་དེ། དེ་ན་དེ་བཞིན་གཤེགས་པ་དེ་ཆོས་ཀྱི་ཚུལ་ཡུན་རིང་དུ་ གནས་པར་མཛད་པའི་ཕྱིར་དང་། དཀོན་མཆོག་གསུམ་གྱི་གདུང་རྒྱུན་མི་གཅད་པའི་ཕྱིར་དང་། ཆོས་ཀྱིས་གནས་པ་ཉིད་རྒྱུན་མི་གཅད་པའི་ཕྱིར་དང་། བདུད་ཀྱི་ཡུལ་རྣམ་པར་འཇིག་པར་མཛད་པའི་ཕྱིར་དང་།

ཆོས་ཀྱི་རྒྱལ་མཚན་བསྒྲེང་བར་མཛད་པའི་ཕྱིར་ཐེག་པ་གསུམ་ རྣམ་པར་གཏན་ལ་དབབ་པ་བསྟན་པའི་སྒོའི་ཆོས་ཀྱི་རྣམ་གྲངས་རབ་ཏུ་སྟོན་ཏོ། ། དེ་བཞིན་གཤེགས་པ་དེ་དག་ཐམས་ཅད་ཀྱང་རིན་པོ་ཆེའི་ཏོག་ཅེས་བྱ་བའི་གཟུངས་སྔགས་བཤད་ནས་གཤེགས་སོ་ཞེས་བྱ་བ་ནས། དེ་བཞིན་གཤེགས་པ་ཤཱཀྱ་ཐུབ་པ་དེས་བྱང་ཆུབ་སེམས་དཔའ་ སེམས་དཔའ་ཆེན་པོ་རྣམས་དང་། ཉན་ཐོས་ཆེན་པོ་རྣམས་ཀྱི་འདུས་པ་ཆེན་པོ་ཡང་དག་པར་འདུས་པར་མཛད་ནས་སོ་སོ་ཡང་དག་པར་རིག་པ་བཞི་དང་ལྡན་པའི་སྤྱན་གསུམ་དང་། ཚངས་པའི་གནས་དག་བསྟན་ཀྱང་ད་དུང་འཁོར་སངས་རྒྱས་ཀྱི་ཞིང་མི་མཇེད་ས་དང་སྟེང་གི་ ནམ་མཁའ་མ་འདྲེས་པར་གང་ཞིག་དེ་བཞིན་གཤེགས་པ་མཆོག་ཏུ་སྙན་པ་གསུང་བ་ཤཱཀྱ་ཐུབ་པའི་ཆོས་བསྟན་པ་ལ་ངོམས་པ་མེད་དོ་ཞེས་བྱ་བའི་བར་ཇི་སྐད་སྔར་གསུངས་པ་བཞིན་ནོ། །

རིགས་ཀྱི་བུ་ཁྱོད་ངའི་བཀས་དེ་བཞིན་གཤེགས་པ་ཤཱཀྱ་ཐུབ་པ་ལ་ཞུ་བའི་ཕྱིར་མི་མཇེད་ཀྱི་ འཇིག་རྟེན་གྱི་ཁམས་སུ་འགྲོ་བར་སྤྲོ་ན་དེར་ཉི་མའི་ཤུགས་ཀྱི་སྙིང་པོའི་ཆོས་ཀྱིས་གནས་པ་ཀླུ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་ཟད་པར་འགྱུར་བའི་གཟུངས་སྔགས་ལ་ངས་དད་པ་སྦྱིན་པར་མཛད་དོ། ། དེར་སྟོང་པ་ཉིད་དང་རྗེས་སུ་ འཐུན་པའི་གཟུངས་སྔགས་མཐུ་སྟོབས་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། གཟུགས་ཀྱི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། གཟུགས་མེད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། ང་རྒྱལ་ དང་། ལྷག་པའི་ང་རྒྱལ་དང་། ངའོ་སྙམ་པའི་ང་རྒྱལ་ཐམས་ཅད་ཀུན་ཏུ་ཟད་པར་བྱེད་པ་ཞེས་བྱ་བ་ནས་ཟད་པ་ཤེས་པ་སྐྱེད་པའི་བར་བྱེད་པ། མི་སྐྱེ་བ་ཤེས་པ་རྟོག་པར་བྱེད་པ། མ་རིག་པའི་མུན་པའི་ཕུང་པོ་ཐམས་ཅད་རབ་ཏུ་འཇོམས་པར་བྱེད་པ། སྡུག་བསྔལ་གྱི་ཁུར་ཐམས་ ཅད་འདོར་བར་བྱེད་པ་འདི་བསྐུར་བར་མཛད་དོ། ། ཏད་ཡ་ཐཱ། དྷུ་མ་ཏེ། དྷུ་མ་ཏེ། ཨཀྵི་དྷུ་མ་ཏེ། པྲ་བྷཱ་ས་དྷུ་མ་ཏེ། སརྦཱ་ཀཱ་ཤ་དྷུ་མ་ཏེ། ཨ་བ་བཱི་ཀྵ་ཁ་ག ། བི་མཱ་ན་ཁ་ག །

ཨ་བ་མོ་ཧ་ཁ་ག ། ཨ་ན་ནྱ་ཁ་ག ། བྱ་བ་བྲིད་ཏི་ཁ་ག ། ཨ་རོ་ཙ་ན་ཁ་ག ། ཨ་ནི་མཱ་ཁ་ ག ། ལོ་ཀ་ཁ་ག ། ཤི་ཁི་ཁ་ག ། པི་ཏི་མི་ར་ཁ་ག ། ན་མོ་ཁ་ག ། ཨཀྵི་ཁ་ག ། ཤྲོ་ཏྲ་ཁ་ག ། གྷྲཱ་ཎ་ཁ་ག ། ཛི་ཧྭཱ་ཁ་ག ། ཀཱ་ཡ་ཁ་ག ། མ་ན་ཁ་ག ། རཱུ་པ་ཁ་ག ། ཤཔྟ་ཁ་ག ། གནྡྷ་ཁ་ག ། ར་ས་ཁ་ག ། སྤརྴ་ཁ་ག ། དྷརྨ་ཁ་ག ། ཙཀྵུ་རྡྷཱ་ཏུ་ ཁ་ག ། རཱུ་པ་དྷཱ་ཏུ་ཁ་ག ། ཙཀྵུརྦི་ཛྙཱ་ན་དྷཱ་ཏུ་ཁ་ག ། ཡཱ་པད་མ་ན་དྷཱ་ཏུ་ཁ་ག ། དྷརྨ་དྷཱ་ཏུ་ཁ་ག ། མན་བི་ཛྙཱ་ན་དྷཱ་ཏུ་ཁ་ག ། པྲིཐྭཱིདྷཱ་ཏུ་ཁ་ག ། ཨ་པ་དྷཱ་ཏུ་ཁ་ག ། ཏེ་ཛོ་དྷཱ་ཏུ་ཁ་ག ། བཱ་ཡུདྷཱ་ཏུ་ཁ་ག ། ཙ་ཏུ་ར་ཨ་ནུ་སྨྲྀཏྱུ་པ་སྠཱ་ན་ཁ་ག ། ཡཱ་བ་ད་བེ་ཎི་ཀ་ཁ་ག ། ཡཱ་བད་ མཱརྒ་ཁ་ག ། ཨ་བྷིཀྵི་པ། ཨ་ན་ན་ན། བ་ན་ན། ས་མུ་དྲ་ན་ན། སརྦ་ཀ་ར་ན་ན། སརྦ་སཾ་སྐ་ར་བི་ཤེ་ཥ་ན་ན། ཨ་ཀིན་ཙ་ན་ན་ན། ཀྵ་ཏ་ཀྵ་ཏ། ཨི་ལི་མི་ལི། ཨི་ཨི་ཨི་ཨི་ལི་མི་ལེ་སྭཱ་ཧཱ། རིགས་ཀྱི་བུ་སྟོང་པ་ཉིད་དང་རྗེས་སུ་འཐུན་པའི་གཟུངས་སྔགས་དེ་ནི་ འདི་ཡིན་ཏེ། མཐུ་སྟོབས་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། གཟུགས་ཀྱི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ་ཞེས་བྱ་བ་ནས།

སྡུག་བསྔལ་གྱི་ཁུར་འདོར་བར་བྱེད་པའི་བར་ཡིན་ནོ། ། ལོང་ལ་ སངས་རྒྱས་ཀྱི་ཞིང་མི་མཇེད་དུ་སོང་ཤིག ། ངའི་བཀས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་གནོད་པ་ཆུང་ངམ་ཞེས་བྱ་བ་ནས། གང་ལ་ལ་སངས་རྒྱས་ཀྱི་ཡུལ་འདིར་ཆོས་མ་ལགས་པའི་འཁོར་ལོ་བསྐོར་བ་དེ་ལ་ཡང་དེ་བཞིན་གཤེགས་པ་རི་དབང་རྒྱལ་པོ་དེས་ཉི་མའི་སྙིང་པོའི་ཆོས་ ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་དང་། སེམས་ཅན་རྣམས་ཀྱི་ལས་ཟད་པར་འགྱུར་བའི་གཟུངས་སྔགས་འདི་ལ་དད་པ་སྩོལ་བར་མཛད་ཅིང་ཞེས་བྱ་བའི་བར་དང་། དེ་ནས་ཀྱང་སྟོང་པ་ཉིད་དང་རྗེས་སུ་འཐུན་པའི་གཟུངས་སྔགས་མཐུ་སྟོབས་ཆེ་ བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། གཟུགས་ཀྱི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ་ཞེས་བྱ་བ་ནས། སྡུག་བསྔལ་གྱི་ཁུར་ཐམས་ཅད་འདོར་བར་བྱེད་པ་འདི་བསྐུར་ལགས་སོ་ཞེས་བྱ་བའི་བར་སྔ་མ་བཞིན་ནོ། ། དེ་ནས་བྱང་ཆུབ་ སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་ཆེས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་སྟོང་པ་ཉིད་དང་རྗེས་སུ་འཐུན་པའི་གཟུངས་སྔགས་ཀྱི་ཡོན་ཏན་གྱི་ཕན་ཡོན་དང་།

སྟོང་པ་ཉིད་ཀྱི་ཕན་ཡོན་བདག་གིས་བཟུང་ལགས་ན་བཙུན་པ་བཅོམ་ལྡན་འདས་སངས་ རྒྱས་ཀྱི་ཞིང་མི་མཇེད་དེར་མཆི་བ་ལ་བདག་འཇིགས་ལགས་སོ། ། བཙུན་པ་བཅོམ་ལྡན་འདས་དེ་ཅིའི་སླད་དུ་ཞེ་ན། ད་ལྟར་བཅོམ་ལྡན་འདས་ལས་བདག་གིས་མངོན་དུ་ཐོས་ཤིང་མངོན་དུ་བཟུང་ལགས་ཏེ། འདི་ལྟར་སངས་རྒྱས་ཀྱི་ཞིང་མི་མཇེད་དེ་ན་སེམས་ཅན་རྣམས་མཆོག་ཏུ་ འདོད་ཆགས་ཀྱི་ཤས་ཆེ་བ་ཞེས་བགྱི་བ་ནས། བུད་མེད་ཀྱི་ཉེས་པས་དགེ་བའི་རྩ་བ་ཐམས་ཅད་ལས་ཡོངས་སུ་ཉམས་པ་དག་དང་། ངན་སོང་བ་དག་དང་། སེམས་ཅན་དམྱལ་བ་པའི་བར་འབྱུང་ཞིང་འབྱུང་བར་འགྱུར་བའི་བར་གྱི་སླད་དུའོ། ། དེ་ནས་དེ་བཞིན་གཤེགས་པ་རི་དབང་རྒྱལ་པོ་ དེས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་ཆེ་ལ་འདི་སྐད་ཅེས་བཀའ་སྩལ་ཏོ། ། ནམ་མཁའ་ལ་རྐྱེན་གསུམ་ཡོད་དེ། གསུམ་གྱིས་ཁྱབ་པས་རྣམ་པར་མཛེས་སོ། ། གངས་ནི་གདུང་བར་མི་བྱེད་དོ། ། ཆུ་ཀླུང་དག་ལ་ཆུ་སྐམ་པར་མི་འགྱུར་རོ། ། རྐྱེན་ གསུམ་པ་དག་ལ་མཁས་པ་དང་། བཟོད་པ་དང་། བསྡམས་པས་ལུས་ཁྱབ་པ་ནི་ལུང་གིས་མ་རིག་པའི་ཆུ་བོས་ཀྱང་དབང་པོ་དྲུག་གདུང་བར་མི་བྱེད་དོ། ། བྱིས་པས་སྨྲས་པ།

རྐྱེན་གསུམ་གྱིས་ཆུ་བོ་དག་ལས་ཐར་བར་བྱེད་ཅིང་སེམས་ཅན་མེད་པ་དང་། ཕུང་པོའི་ཁུར་ འདོར་བའི་ཆོས་སྟོན་པར་བྱེད་དོ། ། ཁྱོད་ཀྱིས་མི་སྐྱེ་བའི་ཆོས་ལ་བཟོད་པ་རྣམ་པ་བཅུ་གསུམ་རབ་ཏུ་བསྒོམས་པ་ཡིན་ཞིང་འཇིགས་པ་ཐམས་ཅད་སྤངས་པ་ཡིན་ན། ཅིའི་ཕྱིར་ཁྱོད་འཇིགས་སོ་ཞེས་སྨྲ་བར་བྱེད། ཁ་ཅིག་ཏུ་ནི་ཁྱོད་ཚངས་པའི་ལུས་བྱད་ཀྱིས་སངས་རྒྱས་ ཀྱི་ཞིང་དག་ན་སེམས་ཅན་རྣམས་ཐར་བར་བྱེད་དོ། ། ཁ་ཅིག་ཏུ་ནི་དབང་ཕྱུག་ཆེན་པོ་དང་། ཁ་ཅིག་ཏུ་ནི་བརྒྱ་བྱིན་དང་། ཁ་ཅིག་ཏུ་ནི་སྲེད་མེད་ཀྱི་བུ་དང་། ཁ་ཅིག་ཏུ་ནི་ལྷའི་ལུས་བྱད་དང་། ཁ་ཅིག་ཏུ་ནི་གནོད་སྦྱིན་དང་། ཀླུའི་དབང་པོ་དང་། ལྷ་མ་ཡིན་དང་། ཁ་ཅིག་ ཏུ་ནི་འཁོར་ལོས་སྒྱུར་བའི་ལུས་བྱད་དང་། ཁ་ཅིག་ཏུ་ནི་སྨན་པའི་ལུས་བྱད་དང་། རྒྱལ་རིགས་ཀྱི་ལུས་བྱད་དང་། དེ་བཞིན་དུ་ཁ་ཅིག་ཏུ་ནི་བྲམ་ཟེའི་ལུས་བྱད་དང་། ཁ་ཅིག་ཏུ་ནི་ཉན་ཐོས་ཀྱི་ལུས་བྱད་དང་ཞེས་བྱ་བ་ནས། ཁ་ཅིག་ཏུ་ནི་སངས་རྒྱས་ཀྱི་ཞིང་མང་པོར་བློན་ པོའི་བར་གྱི་ལུས་བྱད་དུ་ཀུན་ཏུ་སྣང་བར་བྱེད་དེ།

སངས་རྒྱས་ཀྱི་ཞིང་ཉོན་མོངས་པ་ཅན་དག་ཏུ་དུས་རྟག་ཏུ་སངས་རྒྱས་ཀྱི་ཞིང་ཡོངས་སུ་དག་པར་བྱེད་པ་ཡིན་ན་ཅི་སྟེ་སེམས་ཅན་རྣམས་ཡོངས་སུ་སྨིན་པར་བྱེད་པའི་དོན་དུ་འཇིགས་པའི་ཚིག་སྨྲ་བར་བྱེད། རིགས་ཀྱི་བུ་ཁྱོད་ལ་མི་ཟད་ པའི་སྦུབས་ལུང་བསྟན་པ་ཞེས་བྱ་བ་སེམས་ཀྱི་ཚོར་བ་སྒྲུབ་པ། ཐམས་ཅད་མཁྱེན་པའི་ཡེ་ཤེས་ཡང་དག་པར་འདུ་བ། བདུད་བཞི་འདུལ་བར་བྱེད་པ་སྒྲུབ་པ། དཀོན་མཆོག་གསུམ་གྱི་གདུང་གི་གགས་མེད་པར་སྒྲུབ་པ། ཀླུའི་ཡུལ་ཐམས་ཅད་རྣམ་པར་འཇིག་པར་བྱེད་པའི་འོད་ ཟེར་སྒྲུབ་པ། སེམས་ཅན་རྣམས་ཀྱི་ལས་ཐམས་ཅད་ཟད་པར་འགྱུར་བ་སྒྲུབ་པ། བྱམས་པ་ཆེན་པོ་དང་སེམས་ཅན་ཡོངས་སུ་སྨིན་པར་བྱེད་པ་སྒྲུབ་པ། སྙིང་རྗེ་ཆེན་པོ་དང་བསམས་བཞིན་དུ་ངན་འགྲོར་སྐྱེ་བ་དང་། སེམས་ཅན་ཡོངས་སུ་སྐྱོབ་པ་སྒྲུབ་པ། སེམས་ཅན་ཐམས་ཅད་ཀྱི་སེམས་ཡང་དག་པར་དགའ་བར་བྱེད་པ་སྒྲུབ་པ། སེམས་ཅན་ཐམས་ཅད་ཀྱི་ལམ་ངན་པ་དང་། ལྟ་བ་ངན་པ་དང་། འདོད་པ་ངན་པ་དང་། སྨོན་ལམ་ངན་པ་དང་། ཐེག་པ་ངན་པ་ཕྱིར་ལྡོག་པར་བྱེད་པ་སྒྲུབ་པ། སེམས་ཅན་ཐམས་ཅད་ངན་ འགྲོ་ལས་ངེས་པར་རྣམ་པར་ཐར་བར་བྱེད་པ་སྒྲུབ་པ།

བུད་མེད་ཐམས་ཅད་ཡོངས་སུ་ཐར་བར་བྱེད་ཅིང་སེམས་ཅན་སྐྱེས་བུ་འཐོབ་པ་སྒྲུབ་པ། ཆོས་ཀྱི་ཕུང་པོ་ཐམས་ཅད་ཟད་མི་ཤེས་པ་སྒྲུབ་པ། སེར་སྣ་ཐམས་ཅད་སེལ་བར་བྱེད་པ་སྒྲུབ་པ། ཏིང་ངེ་འཛིན་གྱི་ཕུང་པོ་དང་ མངོན་པར་ཤེས་པ་ཐམས་ཅད་མི་ཟད་པ་སྒྲུབ་པ། སེམས་ཅན་ཐམས་ཅད་དད་པར་བྱེད་པ་དང་། བྱང་ཆུབ་སེམས་དཔའི་ལམ་ལ་གཞོག་པར་བྱེད་པ་སྒྲུབ་པ། ཉན་ཐོས་དང་རྐྱེན་གྱི་ཐེག་པ་སྒྱུར་བ་སྒྲུབ་པ་ཞེས་བྱ་བ་ནས། བླ་ན་མེད་པའི་ཡོངས་སུ་མྱ་ངན་ལས་འདས་པའི་བར་སྒྲུབ་ པ་འདི་ནི་མི་ཟད་པའི་སྦུབས་ལུང་བསྟན་པ་ཞེས་བྱ་བ་ཡིན་ཏེ། སེམས་ཅན་རྣམས་ཐོས་པ་ཙམ་གྱི་མོད་ལ་ལས་ཀྱི་སྒྲིབ་པ་དང་། སེམས་ཅན་གྱི་སྒྲིབ་པ་དགེ་བའི་རྩ་བ་ཐམས་ཅད་ཀྱི་བགེགས་བྱེད་པ། འཕངས་པ། ཡོངས་སུ་མ་སྤྱད་པ། མ་ཟད་པ། མ་སྦྱངས་པ་གང་གཱའི་ ཀླུང་གི་བྱེ་མའི་ཚད་སྙེད་ཀྱང་མ་ལུས་པར་ཟད་པར་འགྱུར་ཏེ། འབྲས་བུ་འགྲུབ་པར་མི་འགྱུར་རོ། ། མཚམས་མེད་པའི་ལས་རྣམས་དང་། དམ་པའི་ཆོས་སྤོང་བའི་ལས་རྣམས་དང་། འཕགས་པ་ལ་སྐུར་པ་འདེབས་པའི་ལས་རྣམས་ནི་མ་གཏོགས་སོ། །

རིགས་ཀྱི་བུ་གང་ ལ་ལ་མི་ཟད་པའི་སྦུབས་ལུང་བསྟན་པ་ཞེས་བྱ་བ་འདི་ལན་ཅིག་ཙམ་སེམས་རྩེ་གཅིག་པས་ཉན་པར་བྱེད་ན་དེ་ལ་དགའ་བ་དང་། དད་པ་དང་། ཉེ་བར་རྟོག་པ་ཀུན་ཏུ་སྐྱེད་པར་བྱེད་དོ། ། དེའི་ལས་ཀྱི་སྒྲིབ་པ་དང་། སེམས་ཅན་གྱི་སྒྲིབ་པ་དགེ་བའི་རྩ་བ་ཐམས་ཅད་ཀྱི་བགེགས་བྱེད་ པ། འཕངས་པ། ཡོངས་སུ་མ་སྤྱད་པ། མ་ཟད་པ། མ་སྦྱངས་པ་གང་གཱའི་ཀླུང་གི་བྱེ་མ་སྙེད་ཀྱང་མ་ལུས་པར་ཟད་པར་འགྱུར་རོ་ཞེས་བྱ་བ་ནས་འབྲས་བུ་འགྲུབ་པར་མི་འགྱུར་བའི་བར་དུ་འགྱུར་རོ། ། དེ་དགེ་བའི་རྩ་བ་ཇི་ལྟ་བུ་ཀུན་ཏུ་སྤྱོད་ཀྱང་རུང་། གལ་ཏེ་སྦྱིན་པའི་ཕ་རོལ་ ཏུ་ཕྱིན་པ་ཀུན་ཏུ་རྩོམ་པར་བྱེད་ན་ཡང་དེ་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། ། བྱང་ཆུབ་སེམས་དཔའ་དང་། རྐྱེན་གྱི་རྒྱལ་བ་དང་། དགྲ་བཅོམ་པ་ཐམས་ཅད་ཀྱིས་ཀྱང་བྱིན་གྱིས་བརླབས་པར་འགྱུར་རོ། ། དེའི་ཁྱིམ་ལོངས་སྤྱོད་ཟད་མི་ཤེས་པར་ ཡང་འགྱུར་རོ། ། ལུས་དང་། ངག་དང་། ཡིད་སེར་སྣའི་དྲི་མ་དང་བྲལ་བས་སྣོད་ཡིན་ཞིང་། སྣོད་དུ་གྱུར་པའི་སྦྱིན་གནས་ལ་བརྙས་པ་མེད་པའི་སེམས་ཀྱིས་མི་དམིགས་པའི་ཚུལ་གྱིས་སྦྱིན་པ་བྱིན་པར་བྱེད་ན།

ཐ་ན་ཡན་ལག་གི་དམ་པ་མགོ་ཡོངས་སུ་གཏོང་བར་བྱེད་ན་ཡང་ དེ་ལ་ལྷ་དང་ལྷ་མ་ཡིན་དུ་བཅས་པའི་འཇིག་རྟེན་སུས་ཀྱང་བར་ཆད་བྱ་བར་མི་ནུས་ཏེ། མཚམས་མེད་པ་དང་། འཕགས་པ་ལ་སྐུར་པ་འདེབས་པ་དང་། དམ་པའི་ཆོས་སྤོང་བར་བྱེད་པ་ནི་མ་གཏོགས་སོ། ། གལ་ཏེ་ཡང་དེ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱེད་ པ་ན་དེ་འདི་ལྟ་བུ་རྩོམ་པར་བྱེད་དེ། འཕགས་པ་དགྱེས་པ་དང་། འཕགས་པས་བྱིན་གྱིས་བརླབས་པ་དང་། རྣམ་པར་དག་པའི་ཚུལ་ཁྲིམས་དང་། བཟོད་པ་དང་། ངེས་པ་ལ་གནས་པར་བྱེད་ན་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་ཐམས་ཅད་ཀྱིས་དད་པར་ བྱ་བའི་འོས་སུ་གྱུར་པ་དང་། ཕྱག་བྱ་བའི་འོས་སུ་གྱུར་པ་དང་། རྒྱལ་རིགས་དང་། བྲམ་ཟེ་དང་། རྗེའུ་རིགས་དང་། དམངས་རིགས་ཐམས་ཅད་ཀྱིས་ཕྱག་བྱ་བའི་འོས་སུ་གྱུར་པ་ཡིན། གཞན་ལ་མི་སྨོད་པ་ཡིན། བདག་ལ་མི་སྟོད་པ་ཡིན་ཞིང་རྙེད་པ་དང་བཀུར་སྟི་ལ་ལྷག་ པར་ཆགས་པ་མེད་པས་ཉིན་མཚན་འདས་པར་བྱེད་དོ། ། བདེ་བར་གཉིད་ཀྱིས་ལོག་པ་དང་། བདེ་བར་སད་པར་འགྱུར་རོ། ། གནོད་པ་ཆུང་བ་དང་། བཟའ་བ་དང་། བཏུང་བ་མོད་ཅིང་མང་བ་དང་། སྙིང་རྗེ་ལ་གནས་པ་དང་།

སེམས་ཅན་ཐམས་ཅད་ལ་ཕན་པར་འདོད་པ་ དང་། རྩོལ་བ་དོན་ཡོད་པར་འགྱུར་རོ། ། ཕྱི་མའི་དུས་ན་འཆི་བའི་ཚེ་ཕྱོགས་བཅུ་ནས་སངས་རྒྱས་བཅོམ་ལྡན་འདས་དག་མཐོང་བར་འགྱུར་ཞིང་དེ་དག་ཀྱང་དེ་ལ་སྐྱེས་བུ་དམ་པ་ལེགས་སོ་ལེགས་སོ། ། ཁྱོད་ཚུལ་ཁྲིམས་སྐྱོན་མེད་པ་ཡིན་གྱིས་ངེད་ཀྱི་ཞིང་ ཡོངས་སུ་དག་པ་དག་ཏུ་ཚུར་ཤོག ། དེར་ངེད་ཀྱིས་ཁྱོད་ས་བཅུ་ལ་རྣམ་པར་གཞག་པར་བྱའོ་ཞེས་ལུང་སྟོན་པར་འགྱུར་རོ། ། དེ་སངས་རྒྱས་མཐོང་བའི་རྒྱུས་འཕགས་པའི་དགའ་བ་དང་། དད་པ་སྐྱེ་བར་འགྱུར་རོ། ། དེ་འཆི་བའི་དུས་བྱས་ནས་ཀྱང་སངས་རྒྱས་ཀྱི་ཞིང་ཡོངས་ སུ་དག་པ་སྟོང་པ་མ་ཡིན་པ་དག་ཏུ་སྐྱེ་བར་འགྱུར་རོ། ། དེ་དེར་ཡང་མྱུར་དུ་ས་བཅུ་འཐོབ་པར་འགྱུར་རོ། ། དེ་ས་བཅུ་ལ་གནས་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། ། སྐྱེས་བུ་དེ་མི་ཟད་པའི་སྦུབས་ལུང་བསྟན་པ་འདི་ ཐོས་པ་ཙམ་གྱི་མོད་ལ་དེ་གལ་ཏེ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་གོམས་པར་བྱེད་ན་དེ་འདི་ལྟ་སྟེ། སྦྱིན་པ་དང་། སྙན་པར་སྨྲ་བ་དང་། དོན་བྱེད་པ་དང་། དོན་འཐུན་པས་བརྩོན་འགྲུས་དང་། སྟོབས་དང་། སྤྲོ་བ་དང་། བློ་དང་།

ཕ་རོལ་གནོན་པ་དམ་པ་དེ་ལྟ་བུ་དང་ལྡན་ པར་འགྱུར་རོ། ། ལྷའི་དབང་པོ་དང་། ཀླུའི་དབང་པོ་དང་། གནོད་སྦྱིན་གྱི་དབང་པོ་དང་། ལྷ་མ་ཡིན་གྱི་དབང་པོ་དང་། ནམ་མཁའ་ལྡིང་གི་དབང་པོ་དང་། མི་འམ་ཅིའི་དབང་པོ་དང་། ལྟོ་འཕྱེ་ཆེན་པོའི་དབང་པོ་དང་། མིའི་དབང་པོ་ཐམས་ཅད་ཀྱིས་དད་པར་བྱ་བའི་འོས་ སུ་གྱུར་པ་ཡིན། མཆོད་པའི་འོས་སུ་གྱུར་པ་དང་། ཕྱག་བྱ་བའི་འོས་སུ་གྱུར་པ་ཡིན། དྲན་པར་བྱ་བའི་འོས་སུ་གྱུར་པ་ཡིན། མངོན་པར་དགའ་བར་བྱ་བའི་འོས་སུ་གྱུར་པ་དང་། རབ་ཏུ་སྲུང་བའི་འོས་སུ་གྱུར་པ་ཡིན་པ་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ མངོན་པར་རྫོགས་པར་འཚང་རྒྱ་བའི་བར་དུ་འགྱུར་རོ། ། སྐྱེས་བུ་དེ་མི་ཟད་པའི་སྦུབས་ལུང་བསྟན་པ་འདི་ཐོས་པ་ཙམ་གྱི་མོད་ལ་གལ་ཏེ་བཟོད་པའི་ཕ་རོལ་ཏུ་ཕྱིན་པ་ལ་གོམས་པར་བྱེད་ན་དེ་སེམས་ཅན་ཐམས་ཅད་དང་བྲལ་བ་དང་། མི་དམིགས་པ་དང་ལྡན་པ་དང་། འཕགས་པས་བྱིན་ གྱིས་བརླབས་པ་དང་། ཆོས་ལ་དམིགས་པའི་བཟོད་པ་དེ་ལྟ་བུ་འཐོབ་པར་འགྱུར་ཏེ།

དེས་ཀྱང་དེའི་ཡན་ལག་དང་ཉིང་ལག་དག་ཕྱུང་ཞིང་བཅད་ན་ཡང་སེམས་ཀྱི་སྐད་ཅིག་གཅིག་ཀྱང་ཁྲོ་བ་སྐྱེད་པར་མི་འགྱུར་ཞིང་ཁྲོ་བ་ཐམས་ཅད་སྤངས་པར་འགྱུར་རོ། ། ལྷའི་དབང་པོ་ཐམས་ ཅད་ནས་མིའི་དབང་པོ་ཐམས་ཅད་ཀྱི་བར་གྱིས་དད་པར་བྱ་བའི་འོས་སུ་གྱུར་པ་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་བར་དུ་འགྱུར་རོ། ། དེ་བཞིན་དུ་སྐྱེས་བུ་དེ་མི་ཟད་པའི་སྦུབས་ལུང་བསྟན་པ་འདི་ཐོས་པ་ཙམ་གྱི་མོད་ ལ་གལ་ཏེ་བསམ་གཏན་གྱི་ཕ་རོལ་ཏུ་ཕྱིན་པ་ལ་གོམས་པར་བྱེད་ན་མྱུར་དུ་འཕགས་པས་བྱིན་གྱིས་བརླབས་པ་དང་། ཆོས་ལ་དམིགས་པའི་བསམ་གཏན་དང་། རྣམ་པར་ཐར་པ་དང་། གཟུགས་མེད་པའི་སྙོམས་པར་འཇུག་པ་དང་། ཏིང་ངེ་འཛིན་གྱི་སྒོ་དང་། གཟུངས་ ཀྱི་སྒོ་དང་། བཟོད་པའི་སྒོ་དེ་ལྟ་བུ་བྱེ་བ་ཕྲག་བརྒྱ་སྟོང་ཐོབ་པར་འགྱུར་རོ། ། དུས་ཐམས་ཅད་དུ་སངས་རྒྱས་ཐམས་ཅད་ཀྱིས་དགོངས་པར་འགྱུར་རོ། །

དེ་ལྷའི་དབང་པོ་ཐམས་ཅད་ནས་མིའི་དབང་པོ་ཐམས་ཅད་ཀྱི་བར་གྱིས་བསམས་པར་འགྱུར་ཞིང་དད་པར་བྱ་བའི་འོས་ སུ་གྱུར་པ་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་བར་དུ་འགྱུར་རོ། ། རིགས་ཀྱི་བུ་གང་ལ་ལ་མི་ཟད་པའི་སྦུབས་ལུང་བསྟན་པ་ཞེས་བྱ་བ་འདི་ལན་ཅིག་ཙམ་སེམས་རྩེ་གཅིག་པས་ཉན་པར་བྱེད་ན་དེ་ལ་ལྷག་པར་ཡང་དགའ་ བ་དང་། དད་པ་དང་། ཉེ་བར་རྟོག་པ་ཀུན་ཏུ་སྐྱེད་པར་བྱེད་དོ། ། དེ་ལས་ཀྱི་སྒྲིབ་པ་དང་། སེམས་ཀྱི་སྒྲིབ་པ་དང་། ཆོས་ཀྱི་སྒྲིབ་པ་དང་། ཉོན་མོངས་པའི་སྒྲིབ་པ་དགེ་བའི་རྩ་བ་ཐམས་ཅད་ཀྱི་བགེགས་བྱེད་པ། འཕངས་པ། སོ་སོར་མ་རྟེན་པ། མ་ཟད་པ། མ་ སྦྱངས་པ་གང་གཱའི་ཀླུང་གི་བྱེ་མ་སྙེད་ཀྱང་མ་ལུས་པར་ཟད་པར་འགྱུར་ཏེ། དེ་ལ་འབྲས་བུ་འགྲུབ་པར་མི་འགྱུར་རོ། ། མཚམས་མེད་པ་བྱེད་པ་དང་། དམ་པའི་ཆོས་སྤོང་བར་བྱེད་པ་དང་། འཕགས་པ་ལ་སྐུར་པ་འདེབས་པར་བྱེད་པའི་ལས་རྣམས་ནི་མ་གཏོགས་སོ། ། དེ་གང་ གི་ཚེ་འཕགས་པ་རྣམས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གོམས་པར་བྱེད་ན་དེ་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། ། བྱང་ཆུབ་སེམས་དཔའ་དང་།

རང་རྒྱལ་བ་དང་། དགྲ་བཅོམ་པ་ཐམས་ཅད་ཀྱིས་བྱིན་གྱིས་བརླབས་པར་ འགྱུར་རོ། ། དབེན་པ་ལ་མངོན་པར་དགའ་བར་འགྱུར་རོ། ། གང་དག་གིས་དེ་ལ་འཕགས་པའི་ཤེས་རབ་ཀྱི་དབང་པོ་ལེགས་པར་སྦྱང་བར་བྱས་པ་དང་། ཤིན་ཏུ་མཐར་ཕྱིན་པར་འགྱུར་བའི་ཆོས་དེ་ལྟ་བུ་དག་དེའི་སེམས་དང་སེམས་ལས་བྱུང་བ་དག་གི་ནང་དུ་སྐྱེ་བར་འགྱུར་རོ། ། དེ་ཆོས་ཐམས་ཅད་ལ་ཞུགས་པར་འགྱུར་ཞིང་ཐེ་ཙོམ་མེད་པ་དང་ཐེ་ཙོམ་ལས་རྒལ་བར་འགྱུར་རོ། ། ལྷ་དང་ལྷ་མ་ཡིན་དུ་བཅས་པའི་འཇིག་རྟེན་གྱིས་མི་རྫི་བར་འགྱུར་རོ། ། དེ་ལྷའི་དབང་པོ་ཐམས་ཅད་དང་། གནོད་སྦྱིན་གྱི་དབང་པོ་དང་། ལྷ་མ་ཡིན་གྱི་དབང་པོ་དང་། ནམ་ མཁའ་ལྡིང་གི་དབང་པོ་དང་། མི་འམ་ཅིའི་དབང་པོ་དང་། མིའི་དབང་པོ་ཐམས་ཅད་ཀྱིས་དད་པར་བྱ་བའི་འོས་སུ་གྱུར་པ་དང་། དྲན་པར་བྱ་བའི་འོས་སུ་གྱུར་པ་དང་། མངོན་པར་དགའ་བར་བྱ་བའི་འོས་སུ་གྱུར་པ་དང་། མཆོད་པ་བྱ་བའི་འོས་སུ་གྱུར་པ་དང་། ཕྱག་བྱ་ བའི་འོས་སུ་གྱུར་པ་དང་། རབ་ཏུ་བསྲུང་བའི་འོས་སུ་གྱུར་པ་ཡིན་ནོ། ། དེ་ཕྱི་མའི་དུས་ན་འཆི་བའི་ཚེ་ཕྱོགས་བཅུ་ཀུན་ཏུ་གོམས་པའི་སངས་རྒྱས་བཅོམ་ལྡན་འདས་དག་མཐོང་བར་འགྱུར་རོ། །

སངས་རྒྱས་བཅོམ་ལྡན་འདས་དེ་དག་ཀྱང་དེ་ལ་ཕྱག་རྐྱོང་བར་མཛད་ཅིང་དེ་ལ་ འདི་སྐད་དུ་སྐྱེས་བུ་དམ་པ་ངེད་ཀྱི་སངས་རྒྱས་ཀྱི་ཞིང་ཡོངས་སུ་དག་པར་ཚུར་ཤོག ། དེར་གནས་པར་བྱོས་ཤིག ། དེར་ངེད་ཀྱིས་རིགས་པས་ས་བཅུ་ལ་གཞག་པར་མཛད་དོ་ཞེས་ཀྱང་གསུང་བར་འགྱུར་རོ། ། དེ་སངས་རྒྱས་མཐོང་བ་དང་། འཕགས་པའི་དགའ་བ་དང་། དད་ པ་དེས་འཆི་བའི་དུས་བྱས་ནས་སངས་རྒྱས་ཀྱི་ཞིང་ཡོངས་སུ་དག་པ་སྟོང་པ་མ་ཡིན་པ་དེ་དག་ཏུ་སྐྱེ་བར་འགྱུར་རོ། ། དེ་དེར་ཡང་ས་བཅུ་འཐོབ་ཅིང་རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། ། རིགས་ཀྱི་བུ་མི་ཟད་པའི་ སྦུབས་ལུང་བསྟན་པ་ཆེན་པོ་འདི་ནི་དེ་ལྟར་ཕན་ཡོན་ཆེ་བ་ཡིན་ནོ། ། སངས་རྒྱས་ཀྱི་ཞིང་ཡོངས་སུ་དག་པ་ཐམས་ཅད་ནས་སྨད་ཅིང་བོར་བ་མཚམས་མེད་པ་བྱེད་པ་དང་། དམ་པའི་ཆོས་སྤོང་བ་དང་། འཕགས་པ་ལ་སྐུར་པ་འདེབས་པ་དང་། ལྟུང་བའི་རྩ་བ་བྱུང་བའི་སེམས་ ཅན་གང་མི་ཟད་པའི་སྦུབས་ལུང་བསྟན་པ་ཆེན་པོ་འདི་ཐོས་ནས་བྱམས་པའི་སེམས་དང་ལྡན་པ་དང་། སེམས་ཅན་ཐམས་ཅད་ལ་སྙིང་བརྩེ་བའི་སེམས་དང་ལྡན་པ་དང་། མཉམ་པའི་སེམས་དང་ལྡན་པ་དང་།

ཕྲ་མ་མི་བྱེད་པའི་སེམས་དང་ལྡན་པ་དང་། ཚིག་ཀྱལ་པ་མི་ སྨྲ་བའི་སེམས་དང་ལྡན་པས་ལོ་བདུན་དུ་གནས་པར་བྱེད་ཅིང་རྟག་ཏུ་སངས་རྒྱས་རྗེས་སུ་དྲན་པ་སྒོམ་པར་བྱེད་ལ། ཉིན་ལན་གསུམ་མཚན་ལན་གསུམ་དུ་ཆོས་གོས་ཕྲག་པ་གཅིག་ཏུ་བགོས་ནས་པུས་མོའི་ལྷ་ང་གཉི་ག་ས་ལ་བཙུགས་ཏེ། ཐལ་མོ་སྦྱར་ནས་མངོན་དུ་སངས་ རྒྱས་ཡིད་ལ་བྱེད་པས་མི་ཟད་པའི་སྦུབས་ལུང་བསྟན་པ་འདི་དྲན་པར་བྱེད་ན་ལོ་བདུན་འདས་ནས་དེའི་ལས་དྲག་པོ་ཐམས་ཅད་མ་ལུས་པར་ཟད་པར་འགྱུར་ཞིང་སྦྱངས་པར་འགྱུར་ཏེ། རིགས་ཀྱི་བུ་མི་ཟད་པའི་སྦུབས་ལུང་བསྟན་པ་ཆེན་པོ་འདི་ནི་དེ་ལྟར་རྫུ་འཕྲུལ་ཆེ་བ་ཡིན་ ནོ། ། འདིར་དབང་ཕྱུག་ལ་མངོན་པར་འདོད་པའི་བུད་མེད་གང་ཞིག་མི་ཟད་པའི་སྦུབས་ལུང་བསྟན་པ་འདི་ཐོས་ནས་ཟླ་བ་བདུན་དུ་ཉིན་ལན་གསུམ་མཚན་ལན་གསུམ་པུས་མོའི་ལྷ་ང་གཉི་ག་ས་ལ་བཙུགས་ཏེ། ཐལ་མོ་སྦྱར་ནས་མདུན་དུ་མངོན་དུ་སངས་རྒྱས་ཡིད་ལ་བྱེད་པས་མི་ཟད་ པའི་སྦུབས་ལུང་བསྟན་པ་འདི་དྲན་པར་བྱེད་ན་བུད་མེད་དེ་རིས་འཐུན་པར་དབང་ཕྱུག་ཆེན་པོ་ཐོབ་པར་འགྱུར་རོ། །

ཕྱིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་རང་གི་སྨོན་ལམ་མ་གཏོགས་པར་འཁོར་བར་བུད་མེད་ཀྱི་དངོས་པོ་འཐོབ་པར་མི་འགྱུར་རོ། ། ཁྱོད་ མངོན་པར་འདོད་པའི་བུད་མེད་གང་ཞེས་བྱ་བ་ནས་རིགས་མངོན་པར་འདོད་པའི་བུད་མེད་གང་ཞེས་བྱ་བའི་བར་དང་། ནོར་མངོན་པར་འདོད་པའི་བུད་མེད་གང་ཞེས་བྱ་བའི་བར་དང་། མངལ་ན་བུ་ཡོད་པའི་ཁུར་གྱིས་སྐྱོ་བའི་བུད་མེད་གང་ཞེས་བྱ་བའི་བར་དང་། བུ་མངོན་པར་ འདོད་པའི་བུད་མེད་གང་ཞེས་བྱ་བའི་བར་དེ་ཁྲུས་བྱས་ནས་བྱི་འཆོར་པ་སྲུང་བར་བྱེད་ཅིང་ཉིན་ལན་གསུམ་དབེན་པར། མཚན་ལན་གསུམ་དབེན་པར་པུས་མོའི་ལྷ་ང་གཉི་ག་ས་ལ་བཙུགས་ཏེ་ཐལ་མོ་སྦྱར་བ་རབ་ཏུ་བཏུད་ནས་མདུན་དུ་མངོན་དུ་སངས་རྒྱས་ཡིད་ ལ་བྱེད་པས་མི་ཟད་པའི་སྦུབས་ལུང་བསྟན་པ་ཆེན་པོ་འདི་དྲན་པར་བྱེད་ན་བུད་མེད་དེ་བུ་ཇི་ལྟ་བུ་འདོད་པ་དེ་ལྟ་བུ་འབྱུང་བར་འགྱུར་རོ། ། བླ་ན་མེད་པའི་ཡོངས་སུ་མྱ་ངན་ལས་འདས་པའི་བར་དུ་ཡང་རང་གི་སྨོན་ལམ་མ་གཏོགས་པར་དེའི་བུད་མེད་འཐོབ་པའི་ཐ་མ་ཡིན་ནོ། །

མི་ཟད་པའི་སྦུབས་ལུང་བསྟན་པ་ཆེན་པོ་འདི་ནི་དེ་ལྟར་དོན་ཆེ་བ་དེ་ལྟར་ཕན་ཡོན་ཆེ་བ་སྟེ་ཁྱེད་ཀྱིས་སྔོན་མ་ཐོས་པ་ཡིན་ནོ། ། ཏད་ཡ་ཐཱ། ཤ་ར་ཎ་བྱ་ཡ། ཤིཀྵ་བྱ་ཡ། སྨྲྀཏི་བྱ་ཡ། བྲ་ཧྨ་ཎི་བྱ་ཡ། རྀདྡྷིབྱ་ཡ། ཨིནྡྲཱི་ཡ་བྱ་ཡ། བ་ལ་བྱ་ཡ། བོ་དྷྱངྒ་བྱ་ཡ། ས་མཱ་དྷི་བྱ་ཡ། དྷཱ་ར་ ཎཱི་བྱ་ཡ། ཀྵཱན་ཏི་བྱ་ཡ། བྷྱ་ན་བྱ་ཡ། ཨ་རཱུ་པ་བྱ་ཡ། ཨ་ནི་ན་ཛ་བྱ་ཡ། མཱརྒ་བྱ་ཡ། ཨ་བི་ཛྙཱ་བྱ་ཡ། པྲ་ཏི་ས་མ་བིད་བྱ་ཡ། བྷཱུ་མི་བྱ་ཡ། བིདྱཱ་བྱ་ཡ། མ་ཧཱ་མཻ་ཏྲི་བྱ་ཡ། མ་ཧཱ་ཀཱ་རུ་ཎཱ་བྱ་ཡ། པྲཱི་ཐྭཱི་བྱ་ཡ། ས་ཏྭ་བྱ་ཡ། དྷ་རྨ་བྱ་ཡ། ཏ་མོ་བྱ་ཡ། ཨ་ལོ་ཀ་བྱ་ཡ། པྲ་ཏི་བྷ་ས་བྱ་ཡ། པྲ་ཏི་ཤྲུད་ཀ་བྱ་ཡ། ག་ག་ན་བྱ་ཡ། མ་རུ་ཏ་བྱ་ཡ། ཤཱུ་ནྱ་ཏཱ་བྱ་ཡ། པྲ་ཎི་ཧི་ཏ་བྱ་ཡ། ཨ་ནི་མིཏྟ་བྱ་ཡ། རུ་ཏ་བྱ་ཡ། གྷོ་ཥ་བྱ་ཡ། ཀིན་ཙ་ནཱ་བྱ་ཡ། ཨ་བྷི་ས་མ་ཡ་ཨ་ནཱུ་ན། ཨ་པ་ཧ། ཙ་ཙ་ཙ་ཙ། ཙཱ་རཱ་ཙ། ཙ་ར་བི་མུ། ཙ་བི་ཙཀྵ་ཙ། ཀུ་ཙ་ཙཱ་ ར་བི་མུ། བྱ་ཡ་བི་མུ། ཀྵ་ཡ་བི་མུ། ཨ་ས་མུ་དྲ། ཙ་ར་བི་མུ། ཙྪ་ད་བི་མུ། ཨཱ་ཀཱ་ཤ་བི་མུ། བྱུ་པ་ཤ་མ་བི་མུ། ཨ་ནཱ་བྷ་ས་བི་མུ། ཨ་ཧ་ཏ་བི་མུ། ཨཱ་ར་པཱ་ར་བི་མུ། ཨ་ར་པ་ར་བི་མུ།

ཨུ་པ་ཤ་མ་ས་ལི་ལ་བི་མུ་སྭཱ་ཧཱ། རིགས་ཀྱི་བུ་མི་ཟད་པའི་སྦུབས་ལུང་བསྟན་ པ་ཆེན་པོ་དེ་ནི་འདི་ཡིན་ཏེ། ཡོན་ཏན་ཆེ་བ། དོན་ཆེ་བ། ཕན་ཡོན་ཆེ་བ། སེམས་ཅན་ཐམས་ཅད་དབང་དུ་བྱེད་པ། སེམས་ཅན་ཐམས་ཅད་ལ་ཕན་པར་བྱེད་པ། སེམས་ཅན་ཐམས་ཅད་འཁྲུ་བར་བྱེད་པ། སྣང་བར་བྱེད་པ། ཉེ་བར་ཞི་བར་བྱེད་པ་ཡིན་ནོ། ། ལོང་ལ་ ངའི་བཀས་དེ་བཞིན་གཤེགས་པ་ཤཱཀྱ་ཐུབ་པ་ལ་ཞུ་བའི་ཕྱིར་མི་མཇེད་ཀྱི་འཇིག་རྟེན་གྱི་ཁམས་སུ་སོང་ཤིག ། དེ་ནས་ཐམས་ཅད་དང་ལྡན་པའི་འཁོར་དེ་ངོ་མཚར་ཐོབ་ཅིང་ཤིན་ཏུ་དགའ་བ་ཐོབ་ནས་འདི་སྐད་ཅེས་གསོལ་ཏོ། ། སངས་རྒྱས་བཅོམ་ལྡན་འདས་རྣམས་ཀྱི་སྒྲིབ་པ་ མི་མངའ་བའི་ཡེ་ཤེས་གཟིགས་པ་དང་། ལུང་བསྟན་པ་གང་གིས་སེམས་ཅན་རྣམས་ཀྱི་ལས་ཀྱི་སྒྲིབ་པ་དགེ་བའི་རྩ་བ་ཐམས་ཅད་ལ་བགེགས་བགྱིད་པ་ཆུང་ངུ་དང་། འབྲིང་དང་། ཆེན་པོ་སྲ་བ་དག་མ་ལུས་པར་བས་པར་འགྱུར་ཞིང་མྱུར་དུ་བྱང་གྲོལ་གྱི་བདེ་བ་ཡང་རྗེས་ སུ་འཐོབ་པར་འགྱུར་བའི་ལུང་བསྟན་པ་ཆེན་པོ་དེ་ལྟ་བུ་དེ་བཞིན་གཤེགས་པས་བསྟན་པ་ནི་ངོ་མཚར་ལགས་སོ། ། དེའི་ཚེ་བྱང་ཆུབ་སེམས་དཔའ་སྤོས་ཀྱི་གླང་པོ་ཆེས་ཆེད་དུ་བརྗོད་པ་འདི་ཆེད་དུ་བརྗོད་དོ། །

འཇིག་རྟེན་ཐམས་ཅད་སྒྲོལ་བགྱིད་པ། ། མི་ཟད་སྦུབས་ བཤད་ཇི་ལྟ་བར། ། སེམས་ཅན་དག་གི་ལས་རྣམས་ཀུན། ། ཟད་བགྱིད་གཉིས་པ་མ་མཆིས་སོ། ། འཁོར་བ་རང་གིས་ལས་གང་དག ། བགྱིས་པ་རྣམས་ནི་རིང་དུ་སྤོང་། ། སྡུག་བསྔལ་ཀུན་ལས་གྲོལ་འགྱུར་ཞིང་། ། བསོད་ནམས་གཟི་བརྗིད་ལྡན་པར་འགྱུར། ། སྲིད་པའི་རྒྱ་མཚོ་སྐེམས་བགྱིད་ཅིང་། ། སྡིག་པ་ཐམས་ཅད་འཇོམས་པར་བགྱིད། ། གང་ན་འདྲེན་པ་བཞུགས་འགྱུར་བའི། ། ཞིང་དག་ཏུ་ནི་མྱུར་འགྲོ་བགྱིད། ། སྡུག་བསྔལ་སྣོད་ཀྱི་འཁོར་བ་ན། ། ཉེས་དམིགས་མང་པོ་མཐོང་ནས་ཀྱང་། ། ཉོན་མོངས་ཐམས་ ཅད་སེལ་བགྱིད་ཅིང་། ། བྱང་ཆུབ་དམ་པ་ཐོབ་པར་འགྱུར། ། སེམས་ཅན་གང་ཚུལ་འདི་ཉན་ན། ། ཐུབ་པར་དཀའ་བར་འགྱུར་བ་ལགས། ། དེ་བས་བཀུར་སྟི་བགྱིས་ནས་མཉན། ། དཔལ་ཀུན་ཐོབ་པར་བགྱིས་པ་ལགས། ། བཙུན་པ་བཅོམ་ལྡན་འདས་མི་ཟད་པའི་ སྦུབས་ལུང་བསྟན་པ་ཆེན་པོ་འདི་བདག་གིས་བཟུང་ལགས་ཏེ། མི་མཇེད་ཀྱི་འཇིག་རྟེན་གྱི་ཁམས་སུ་བདག་མཆི་ལགས་སོ། །

ཡང་དེའི་ཚེ་འཁོར་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་དག་ལས་ལངས་ནས་རིང་པོ་མ་ལོན་པ་གྲངས་མེད་དཔག་ཏུ་མེད་པ་ དག་གིས་ཚིག་འཐུན་པར་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་བདག་ཅག་ཀྱང་དེ་བཞིན་གཤེགས་པ་ཤཱཀྱ་ཐུབ་པ་ལ་བལྟ་བ་དང་། ཕྱག་བགྱི་བ་དང་། མཆོད་པ་དང་། བསྙེན་བཀུར་བགྱི་བ་དང་། འདུས་པ་ཆེན་པོ་བལྟ་བ་དང་། ཉི་ མའི་སྙིང་པོའི་ཆོས་ཀྱི་རྣམ་གྲངས་སྔོན་ཆད་མ་ཐོས་པ་ཉན་པར་འཚལ་ལགས་ན་བཅོམ་ལྡན་འདས་དེར་བདག་ཅག་མཆི་བར་གནང་བར་མཛད་དུ་གསོལ། དེ་ནས་དེ་བཞིན་གཤེགས་པ་རི་དབང་རྒྱལ་པོ་དེས་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་དག་ཐམས་ཅད་ ལྷན་ཅིག་འཐུན་པར་བརྒྱ་བྱིན་གྱི་ཆ་བྱད་དང་། སྤྱོད་ལམ་དང་། རྟགས་དང་། དབྱིབས་དག་དང་། དབང་ཕྱུག་ལ་དབང་བས་དེང་ཤིག ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་ཆེ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་ དཔག་ཏུ་མེད་པ་ཐམས་ཅད་དང་ལྷན་ཅིག་ཏུ་ཐམས་ཅད་འགྲོགས་ཤིང་འཐུན་པར་བརྒྱ་བྱིན་གྱི་ཆ་བྱད་དང་། སྤྱོད་ལམ་དང་། རྟགས་དང་། དབྱིབས་དག་དང་།

དབང་ཕྱུག་ལ་དབང་བར་བདག་ཉིད་མངོན་པར་སྤྲུལ་ནས་བཅོམ་ལྡན་འདས་དེ་བཞིན་གཤེགས་པ་རི་དབང་ རྒྱལ་པོའི་ཞབས་གཉིས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ཏེ་དེ་ནས་ཆས་སོ། ། དེ་དག་ཡུད་ཙམ་གྱིས་མི་མཇེད་ཀྱི་འཇིག་རྟེན་གྱི་ཁམས་འདིར་ཕྱིན་ཏེ། དེ་དག་ཕྱིན་པའི་མོད་ལ་སངས་རྒྱས་ཀྱི་ཞིང་མི་མཇེད་འདིར་བཅོམ་ལྡན་འདས་ཤཱཀྱ་ཐུབ་པ་དེ་ ལ་མཆོད་པའི་ལས་བྱ་བའི་ཕྱིར་སྤོས་ཀྱི་ཆར་ཆེན་པོ་མངོན་པར་རབ་ཏུ་ཕབ་སྟེ། འདི་ལྟ་སྟེ། ཙན་དན་གོར་ཤིར་ཥ་དང་། ཙན་དན་སྦྲུལ་གྱི་སྙིང་པོ་དང་། ཏ་མ་ལའི་འདབ་མ་དང་། ཨ་ག་རུ་དང་། རྒྱ་སྤོས་དང་། དུས་ཀྱི་རྗེས་སུ་འབྲང་བའི་ཙན་དན་གྱི་ཕྱེ་མའི་ཆར་མངོན་པར་ རབ་ཏུ་ཕབ་བོ། ། དེ་དག་དེ་བཞིན་གཤེགས་པ་ཤཱཀྱ་ཐུབ་པ་ག་ལ་བ་དེར་དོང་སྟེ་ཕྱིན་ནས་ཀྱང་ཐམས་ཅད་བརྒྱ་བྱིན་གྱི་ཆ་བྱད་ཀྱིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། ། བཅོམ་ལྡན་ འདས་ནི་དེའི་བར་དུ་ཡང་རྒྱལ་པོ་གཟུགས་ཅན་སྙིང་པོ་དང་ཐབས་ཅིག་ཆོས་ཀྱིས་གནས་པའི་གཏམ་ཀུན་ཏུ་སྤྱོད་པར་མཛད་དོ། །

ཡང་དེའི་ཚེ་ནུབ་ཕྱོགས་ལོགས་ཀྱི་ཕྱོགས་ཆ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གང་གཱའི་ཀླུང་བཞི་བཅུ་རྩ་གཉིས་ཀྱི་བྱེ་མ་སྙེད་འདས་ པ་དེ་ན། སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པར་གནས་པ་སྙིང་པོའི་རྒྱལ་མཚན་ཞེས་བྱ་བ་ཡོད་དོ། ། སངས་རྒྱས་ཀྱི་ཞིང་སྙིང་པོའི་རྒྱལ་མཚན་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་དཔལ་བརྩེགས་རྒྱལ་པོ་ཞེས་བྱ་ བ་བཞུགས་ཏེ། འཚོ་ཞིང་གཞེས་ལ་འཁོར་བཞི་པོ་རྣམས་ཀྱི་བསམ་པ་ཇི་ལྟ་བ་བཞིན་དུ་སེམས་ཅན་རྣམས་ལ་ཆོས་ཀྱང་སྟོན་ཏོ། ། འཁོར་དེ་ན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་སྙིང་པོ་དཔལ་ཞེས་བྱ་བ་ཆོས་མཉན་པའི་ཕྱིར་འདུས་ཏེ་འདུག་པར་ གྱུར་ཏོ། ། དེས་ཀྱང་གྱེན་དུ་རྣམ་པར་བལྟས་སོ། ། དེས་སྟེང་གི་ནམ་མཁའ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པ་ནུབ་ཕྱོགས་ཀྱི་ཕྱོགས་ཆ་ནས་ཤར་ཕྱོགས་སུ་འགྲོ་བ་དག་མཐོང་ངོ་། ། དེས་གང་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ དེ་དག་འདོང་བའི་ཤར་ཕྱོགས་ལ་རྣམ་པར་བལྟས་ཏེ།

དེས་དེར་སྣང་བ་ཆེན་པོ་མཐོང་ནས་དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོ་ལ་ཡོངས་སུ་ཞུས་སོ་ཞེས་བྱ་བ་ནས། དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོ་དེས་བྱང་ཆུབ་སེམས་དཔའ་ སེམས་དཔའ་ཆེན་པོ་སྣང་བའི་སྙིང་པོ་དཔལ་ལ་འདི་སྐད་ཅེས་བཀའ་སྩལ་ཏོ་ཞེས་བྱ་བའི་བར་དང་། རིགས་ཀྱི་བུ་ཤར་ཕྱོགས་ཀྱི་ཕྱོགས་ཆ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གང་གཱའི་ཀླུང་བཞི་བཅུ་རྩ་གཉིས་ཀྱི་བྱེ་མ་སྙེད་འདས་ནས་སྙིགས་མ་ལྔ་དང་ལྡན་པར་ གནས་པ་དེ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་སངས་རྒྱས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བ་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་ཏོ་ཞེས་བྱ་བའི་བར་དང་། དེའི་ཚེ་དེ་ན་འདུས་པ་ཆེན་པོ་ཡོད་དེ། དེ་ན་དེ་བཞིན་ གཤེགས་པ་དེ་ཆོས་ཀྱི་ཚུལ་དང་དཀོན་མཆོག་གསུམ་གྱི་གདུང་རིང་དུ་གནས་པར་མཛད་པའི་ཕྱིར་དང་། ཆོས་ཀྱིས་གནས་པ་ཉིད་རྒྱུན་མི་གཅད་པའི་ཕྱིར་དང་། བདུད་ཀྱི་ཡུལ་རྣམ་པར་འཇིག་པར་མཛད་པའི་ཕྱིར་དང་།

ཆོས་ཀྱི་རྒྱལ་མཚན་བསྒྲེང་བར་ མཛད་པའི་ཕྱིར་ཐེག་པ་གསུམ་རྣམ་པར་གཏན་ལ་དབབ་པ་བསྟན་པའི་སྒོའི་ཆོས་ཀྱི་རྣམ་གྲངས་རབ་ཏུ་སྟོན་ཏོ། ། དེར་དེ་བཞིན་གཤེགས་པ་ཐམས་ཅད་གཤེགས་ནས་རིན་པོ་ཆེའི་ཏོག་ཅེས་བྱ་བའི་གཟུངས་སྔགས་བཤད་ནས་ཀྱང་དེ་དག་གཤེགས་པར་མཛད་དོ། ། ཡང་དེ་བཞིན་གཤེགས་པ་ཤཱཀྱ་ཐུབ་པ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། ཉན་ཐོས་ཆེན་པོ་རྣམས་ཀྱི་འདུས་པ་ཆེན་པོ་ཡང་དག་པར་འདུས་པར་མཛད་དེ། དེར་སོ་སོ་ཡང་དག་པར་རིག་པ་བཞི་དང་ལྡན་པའི་སྤྱན་གསུམ་དང་། ཚངས་པའི་ གནས་པ་དག་བསྟན་ཀྱང་ད་དུང་འཁོར་སངས་རྒྱས་ཀྱི་ཞིང་མི་མཇེད་ས་དང་ནམ་མཁའི་ལམ་ཐམས་ཅད་མ་འདྲེས་པར་གང་བ་ཞིག་དེ་བཞིན་གཤེགས་པ་མཆོག་ཏུ་སྙན་པར་གསུང་བ་ཤཱཀྱ་ཐུབ་པའི་ཆོས་བསྟན་པས་ངོམས་པ་མེད་དོ་ཞེས་བྱ་བའི་བར་ཇི་ལྟར་སྔར་གསུངས་པ་ བཞིན་ཏེ། རིགས་ཀྱི་བུ་ཁྱོད་ངའི་བཀས་དེ་བཞིན་གཤེགས་པ་ཤཱཀྱ་ཐུབ་པ་ལ་ཞུ་བའི་ཕྱིར་མི་མཇེད་ཀྱི་འཇིག་རྟེན་གྱི་ཁམས་སུ་འགྲོ་བར་སྤྲོ་ན།

དེར་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ ལས་ཟད་པར་འགྱུར་བའི་གཟུངས་སྔགས་ལ་ངས་དད་པ་སྦྱིན་པར་མཛད་དོ། ། དེར་སྨོན་པ་མེད་པ་དང་རྗེས་སུ་འཐུན་པའི་བཟོད་པ་མཐུ་སྟོབས་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། གཟུགས་ཀྱི་འདོད་ཆགས་ཐམས་ ཅད་ཀུན་ཏུ་ཟད་པར་བྱེད་པ། གཟུགས་མེད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། ང་རྒྱལ་དང་། ལྷག་པའི་ང་རྒྱལ་དང་། ངའོ་སྙམ་པའི་ང་རྒྱལ་ཐམས་ཅད་ཀུན་ཏུ་ཟད་པར་བྱེད་པ་ཞེས་བྱ་བ་ནས། ཟད་པ་ཤེས་པ་སྐྱེད་པའི་བར་བྱེད་པ། མི་སྐྱེ་བ་ཤེས་ པ་རྟོགས་པར་བྱེད་པ། མ་རིག་པའི་མུན་པའི་ཕུང་པོ་ཐམས་ཅད་རབ་ཏུ་འཇོམས་པར་བྱེད་པ། སྡུག་བསྔལ་གྱི་ཁུར་འདོར་བར་བྱེད་པ་འདི་བསྐུར་བར་མཛད་དོ། ། ཏད་ཡ་ཐཱ། ཤ་ན་ཤ་བ། མ་ཤ་ན་ཤ་བ། ཨ་བཀྵ་ཤ་བ། ཀྵུ་ཀྵུ་ཏ་ཤ་བ། ཙཀྵུ་ཤ་བ། ཤྲོ་ ཏྲ་ཤ་བ། གྷྲཱ་ཎ་ཤ་བ། ཛི་ཧྭ་ཤ་བ། ཀཱ་ཡ་ཤ་བ། མ་ན་ཤ་བ། ཀྵུ་བྷ་བི་དྷ། ཙཀྵུ་པྲ་ཏི་བི་ཤ་བ། ཤྲོ་ཏྲ་ཨ་བྷ་ཀྵ་བྷ། གྷྲཱ་ཎ་ཏེ་ཛ་ཀྵ་བྷ། ཛི་ཧྭ་བཱ་ཡུ་ཀྵ་བྷ། ཀཱ་ཡ་ཀྲ་མ་ཀྵ་བྷ། མ་ན་ཨོ་ཛ།

ཨཱ་ལོ་ཀ་ཛྙཱ་ཡཀྵ་བྷ། བཱི་ཛ་སང་ཀྲ་མ་ཀྵ་བྷ། ཨང་ག་ར་ཁ་ག་ ཀྵ་བྷ། ས་མཱ་རོ་པ་བྱ་ཡཀྵ་བྷ། ཤ་མ་ཀ་ན་ཀྵ་བྷ། ཀྵ་ཡ་ཀ་ར་ས་ཀྵ་བྷ། ཤཱ་ན་ཏ་བྱ་ཏྱ་སྠ་ཀྵབྷ། ན་ཏོ་ཏཻ་ཏ་ཏོ་ན། ཨ་ཙ་ནཻ་ན་ན་ཏོ་ན། ན་གྷ་བ་ན་ཡི་ན་ཏོ་ན། ཨེ་ཤ་ཨེ་བཱན་ཏོ་དུ་ཁ་སྱ་སྭཱ་ཧཱ། རིགས་ཀྱི་བུ་སྨོན་པ་མེད་པ་དང་རྗེས་སུ་འཐུན་པའི་གཟུངས་སྔགས་དེ་ ནི་འདི་ཡིན་ཏེ། མཐུ་སྟོབས་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། གཟུགས་ཀྱི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ་ཞེས་བྱ་བ་ནས། སྡུག་བསྔལ་གྱི་ཁུར་ཐམས་ཅད་འདོར་བར་བྱེད་པའི་བར་ ཡིན་ནོ། ། ལོང་ལ་མི་མཇེད་ཀྱི་འཇིག་རྟེན་གྱི་ཁམས་སུ་སོང་ཤིག ། ངའི་བཀས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་གནོད་པ་ཆུང་ངམ། བསྐྱོད་པ་ཡང་ངམ། སྟོབས་དང་། བདེ་བར་རེག་པ་ལ་གནས་སམ་ཞེས་ཀྱང་ཞུས་ལ། དེ་ལ་འདི་སྐད་དུ་ནུབ་ ཕྱོགས་ཀྱི་ཕྱོགས་ཆ་ན་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གང་གཱའི་ཀླུང་བཞི་བཅུ་རྩ་གཉིས་ཀྱི་བྱེ་མ་སྙེད་འདས་པ་དེ་ན་སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པར་གནས་པ། སྙིང་པོའི་རྒྱལ་མཚན་ཞེས་བགྱི་བ་མཆིས་སོ། །

སངས་རྒྱས་ཀྱི་ ཞིང་སྙིང་པོའི་རྒྱལ་མཚན་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་དཔལ་བརྩེགས་རྒྱལ་པོ་ཞེས་བགྱི་བ་བཞུགས་ཏེ། འཚོ་ཞིང་གཞེས་ལ་འཁོར་བཞི་པོ་རྣམས་ཀྱི་བསམ་པ་ཇི་ལྟ་བ་བཞིན་དུ་སེམས་ཅན་རྣམས་ལ་ ཆོས་ཀྱང་སྟོན་ཏོ། ། དེ་བཞིན་གཤེགས་པ་དེས་ཀྱང་བདག་དེ་ནས་འདིར་བཅོམ་ལྡན་འདས་ལ་ཡོངས་སུ་ཞུ་བའི་སླད་དུ་བཏང་བ་ལགས་ན། བཙུན་པ་བཅོམ་ལྡན་འདས་ཅི་སྙུང་བ་མི་མངའ་ལགས་སམ། གནོད་པ་ཆུང་ངམ། ཁྱོད་ཀྱི་འཁོར་བྲོ་ འཚལ་བ་མ་མཆིས་ལགས་སམ། དམ་པའི་ཆོས་ཉན་པར་འཚལ་བ་དག་ལགས་སམ། ཇི་ལྟར་ཐོས་པ་བཞིན་དུ་ཆོས་དང་ལྡན་པ་ལགས་སམ། ཆོས་དེ་ལ་ནན་ཏན་སྙིང་པོར་བགྱིད་པ་ལགས་སམ། ཆོས་ཀྱིས་གནས་པ་དང་ལྡན་པར་གནས་ལགས་སམ། ཁྱོད་ཀྱི་སངས་རྒྱས་ཀྱི་ཞིང་འདིར་བདུད་ཀྱི་ཡུལ་དང་། ཀླུའི་ཡུལ་བཅོམ་ལགས་སམ། སངས་རྒྱས་གཅིག་གི་ཡུལ་ལགས་སམ། འདིར་ཁྱོད་ཀྱི་ཆོས་ཀྱི་འཁོར་ལོ་ཐོགས་པ་མ་མཆིས་པར་སྐོར་བར་མཛད་ལགས་སམ།

གང་ལ་ལ་སངས་རྒྱས་ཀྱི་ཡུལ་འདིར་ཆོས་མ་ ལགས་པའི་འཁོར་ལོ་སྐོར་བ་དེའི་སླད་དུ་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་དཔལ་བརྩེགས་རྒྱལ་པོ་དེས་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་དང་། སེམས་ ཅན་རྣམས་ཀྱི་ལས་ཟད་པར་འགྱུར་བའི་གཟུངས་སྔགས་འདི་ལ་དད་པར་སྩོལ་བར་མཛད་ཅིང་། དེ་ནས་ཀྱང་སྨོན་པ་མེད་པ་དང་རྗེས་སུ་འཐུན་པའི་གཟུངས་སྔགས་མཐུ་སྟོབས་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། གཟུགས་ ཀྱི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ་ཞེས་བྱ་བ་ནས་སྡུག་བསྔལ་གྱི་ཁུར་ཐམས་ཅད་འདོར་བར་བྱེད་པ་འདི་དེས་བསྐུར་ལགས་སོ་ཞེས་བྱ་བའི་བར་གསོལ་ཅིག་ཅེས་བྱ་བ་སྔ་མ་བཞིན་ནོ། ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་སྙིང་པོ་དཔལ་ དེས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་སྨོན་པ་མེད་པ་དང་རྗེས་སུ་འཐུན་པའི་གཟུངས་སྔགས་ཀྱི་ཕན་ཡོན་བདག་གིས་བཟུང་ལགས་ན་བཙུན་པ་བཅོམ་ལྡན་འདས་སངས་རྒྱས་ཀྱི་ཞིང་མི་མཇེད་དེར་མཆི་བ་ལ་འཇིགས་པ་འབའ་ཞིག་མཆིས་ལགས་སོ། །

དེ་ཅིའི་སླད་དུ་ཞེ་ན། ད་ལྟར་བཅོམ་ལྡན་འདས་ལ་བདག་གིས་མངོན་དུ་ཐོས་ཤིང་མངོན་དུ་ཡོངས་སུ་བཟུང་ལགས་ཏེ། འདི་ལྟར་སངས་རྒྱས་ཀྱི་ཞིང་མི་མཇེད་དེ་ན་སེམས་ཅན་རྣམས་མཆོག་ཏུ་ལྟ་བ་མི་ཟད་པས་སྡུག་བསྔལ་ཐོབ་པར་གྱུར་པ་མཆོག་ཏུ་འདོད་ཆགས་ཀྱི་ཤས་ཆེ་ བ། དམུས་ལོང་དང་འདྲ་བ་དག་ལགས་ཏེ་ཞེས་བྱ་བ་ནས། བུད་མེད་ཀྱི་ཉེས་པས་དགེ་བའི་རྩ་བ་ཐམས་ཅད་ལས་ཡོངས་སུ་ཉམས་པ་དག་དང་། ཡུད་ཙམ་ཁོ་ནས་མནར་མེད་པར་འཆི་བར་འགྱུར་བའི་སླད་དུའོ་ཞེས་བྱ་བའི་བར་སྔ་མ་བཞིན་ནོ། ། དེ་ནས་དེ་བཞིན་ གཤེགས་པ་ཡེ་ཤེས་དཔལ་བརྩེགས་རྒྱལ་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་སྙིང་པོ་དཔལ་ལ་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་ལན་ཐོབ་ཤིག་ལན་ཐོབ་ཤིག ། འོ་ན་ཁྱོད་ཀྱིས་ཞག་དགུ་ལ་གླིང་བཞི་པ་བར་མའི་སངས་རྒྱས་ཀྱི་ཞིང་ མི་མཇེད་དེར་བྱའི་རྒྱལ་པོ་ནམ་མཁའ་ལྡིང་གི་ཆ་བྱད་ཀྱིས་རྒྱ་མཚོ་ཆེན་པོར་ཀླུ་བྱེ་བ་ཕྲག་དྲུག་ཅུ་རྩ་བཞི་འཇིགས་པར་ཀུན་ཏུ་བསྟན་པའི་རྐྱེན་གྱིས་སྐྱབས་གསུམ་དུ་འགྲོ་བ་ལ་རྣམ་པར་མ་བཀོད་དམ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་དུ་མ་བཅུག་ གམ།

དེས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་དེ་དེ་ལྟ་ལགས་སོ། ། ཇི་སྐད་གསུངས་པ་དེ་ལྟ་ལགས་ཏེ། བདག་གིས་ཀླུ་བྱེ་བ་ཕྲག་དྲུག་ཅུ་རྩ་བཞི་པོ་དེ་དག་འཇིགས་པར་ཀུན་ཏུ་བསྟན་པའི་རྐྱེན་གྱིས་བྱང་ཆུབ་ཀྱི་བར་ལ་རབ་ཏུ་བཀོད་ལགས་སོ། ། རིགས་ཀྱི་བུ་འོ་ན་ཁྱོད་ཀྱིས་གླིང་བཞི་པ་བར་མ་དེ་ན་གང་ན་ཆར་པ་མེད་པ་དེར་གང་བསྟན་པ་ལས་དེ་ན་གནས་པའི་ཀླུ་ཐམས་ཅད་འཁྲུག་པར་འགྱུར་ཞིང་། དེ་དག་འཁྲུགས་ནས་ཀྱང་ཞག་བདུན་དུ་ཆར་པ་མངོན་པར་རབ་ཏུ་འབེབས་པར་བྱེད་པའི་གླང་པོ་ཆེའི་ཀླུ་ཆེན་པོ་དག་དང་། རྟའི་ཀླུ་ཆེན་པོ་དང་། སྦྲུལ་གྱི་ཀླུ་ཆེན་པོ་དག་མ་བསྟན་ཏམ། དེས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་དེ་དེ་ལྟ་ལགས་ཏེ། སྔོན་གྱི་སྨོན་ལམ་གྱི་བྱེ་བྲག་གིས་ལགས་སོ། ། བཅོམ་ལྡན་འདས་དེས་བཀའ་སྩལ་པ། ངས་ཁྱོད་དེར་མངགས་ན་དེ་ཇི་ལྟར་ ཁྱོད་དངང་བར་བྱེད། བྱང་ཆུབ་སེམས་དཔའ་དེས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་འདི་ལྟ་སྟེ། རིན་པོ་ཆེའི་གཏེར་ཆེན་པོ་ཞིག་མཆིས་པར་གྱུར་ལ།

དེ་ནས་སྐྱེས་བུ་མཁས་པའི་རང་བཞིན་ཅན་ལ་ལ་དེར་མཆིས་ནས་སེན་མོ་དག་གིས་ རྐོ་བར་བགྱིད་ན་དེ་ཇི་ལྟ་ཇི་ལྟར་སེན་མོ་དག་གིས་རྐོ་བར་བགྱིད་པ་དེ་ལྟ་དེ་ལྟར་རིན་པོ་ཆེའི་ཕུང་པོ་ཆེན་པོ་ཆེས་མང་དུ་རྙེད་པར་འགྱུར་རོ། ། བཙུན་པ་བཅོམ་ལྡན་འདས་དེ་དེ་བཞིན་དུ་མཁས་པས་དེ་བཞིན་གཤེགས་པའི་གཏེར་ཡང་ཚིག་དེ་ལྟ་བུ་དག་གིས་ཇི་ལྟ་ཇི་ལྟར་ཕྱུང་བ་དེ་ ལྟ་དེ་ལྟར་དེ་ནས་ཆོས་རིན་པོ་ཆེ་རིན་ཐང་མ་མཆིས་པ་ཆེས་ཕལ་ཆེར་འཐོབ་པར་འགྱུར་ལགས་པས་དེར་སེམས་ཅན་ཡོངས་སུ་སྨིན་པར་བགྱི་བའི་སླད་དུ་ཆོས་ཀྱི་ཕྱག་རྒྱ་གང་གིས་དེ་བཞིན་གཤེགས་པའི་སྟོབས་སྐྱེད་པས། དེར་བདག་གིས་སེམས་ཅན་ཆེས་མང་པོ་ཡོངས་ སུ་སྨིན་པར་བགྱིད་པའི་ཆོས་ཀྱི་ཕྱག་རྒྱ་ཆེས་མང་དུ་དེ་བཞིན་གཤེགས་པ་ལས་བདག་ཡོངས་སུ་ཚོལ་བར་བགྱིད་ལགས་སོ། ། དེ་ནས་དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་སྙིང་པོ་དཔལ་ ལ་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་ངས་ལུང་བསྟན་པ་ཆེན་པོ་རིག་སྔགས་ཀྱི་རྟེན་ཅེས་བྱ་བ་ཁྱོད་ལ་སྦྱིན་པར་མཛད་དོ། ། ། །

འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་བཞི་པ། ཏད་ཡ་ཐཱ། ས་ཏྲི་ར་ཎ་ཤ་མ། ས་མུ་ད་ཐཱ་ན་ཤ་མ། ཨ་བརྫ་ན་ཤ་མ། སྭ་རྃ་ག་ཤ་ས་མ། སྃ་ཡོ་ག་ཤ་མ། བན་དྷ་ན་ཤ་མ། ས་མ་བི་ས་ར་ཤ་མ། བཱ་ཏཱི་ན་ཤ་མ། ས་མཱ་ཀྲ་མ་ཤ་མ། ཨ་བིདྱཱ་ཤ་མ། སྃ་སྐཱ་ར་ཤ་མ། བི་ཛྙཱ་ན་ཤ་མ། ནཱ་མ་རཱུ་པ་ཤ་མ། ཥ་ཌཱ་ཡ་ཏ་ན་ཤ་མ། སྤརྴ་ཤ་མ། བེ་ད་ན་ཤ་མ། ཏྲྀཥྞཤ་མ། ཨུ་པཱ་ད་ན་ཤ་མ། བྷ་བ་ཤ་མ། ཛཱཏི་ཤ་མ། ཛ་རཱ་མ་ར་ཎ་ཤ་མ། ཡཱ་བད་སརྦ་མ་ནུ་ཥྱ་ཤ་མ། ཡཱ་བད་སརྦ་ཏྲཻ་དྷཱ་ཏུ་ཀསྃ་སྐྲྀཏ་ཤ་མ། ཨཱ་ར་པཱ་ར་ཤ་མ། འདི་ནི་རིག་སྔགས་ཀྱི་རྟེན་ལུང་སྟོན་པ་ཆེན་པོ་ཡིན་ཏེ། ལུང་ བསྟན་པ་དེས་ན་དེར་སེམས་ཅན་རྣམས་ཀྱིས་ཐོས་པ་ཙམ་གྱིས་སྲེད་པ་ཆུང་ངུ་དང་། འབྲིང་དང་། རབ་དང་། སྲིད་པའི་རྒྱུ་ཉོན་མོངས་པ་རྣམས་རབ་ཏུ་ཞི་བར་འགྱུར་ཞིང་གཟུགས་དང་། གཟུགས་མེད་པའི་སྲིད་པའི་རྒྱུ་བྱེད་པའི་ཉོན་མོངས་པ་རྣམས་རབ་ཏུ་ཞི་བར་ འགྱུར་བ་ཡིན་ནོ། ། ཉོན་མོངས་པ་གང་གཱའི་ཀླུང་གི་བྱེ་མ་སྙེད་ཀྱང་བསྙིལ་བར་འགྱུར་རོ། ། འགྲོ་བ་ལྔ་ལུས་དང་། ངག་དང་།

ཡིད་ཀྱི་ཉེས་པར་སྤྱོད་པ་སྔོན་ཆད་བྱས་པ་འབྲས་བུ་མཐར་མ་ཕྱིན་པ་དང་མ་སྦྱངས་པ་ཐམས་ཅད་ཀྱང་ལྡོག་པར་འགྱུར་རོ། ། རིག་སྔགས་ ཀྱི་རྟེན་ལུང་སྟོན་པ་འདི་གང་གིས་རིས་འཐུན་པར་སེམས་རྩེ་གཅིག་པས་མཉན་ནས་ཉིན་ཞག་བདུན་དུ་ལས་གཞན་མི་བྱེད་པར་ཆོས་འདི་རྣམ་པར་སྒོམ་པར་བྱེད་ན་དགེ་བའི་ཕྱོགས་ཐམས་ཅད་ལས་ཡོངས་སུ་ཉམས་པར་བྱེད་པ་དང་། བགེགས་བྱེད་པ་དང་། ནོར་ཡོངས་སུ་ ཉམས་པར་བྱེད་པ་དང་། སྡུག་པའི་དངོས་པོ་དང་བྲལ་བར་བྱེད་པ་དང་། ལུས་ལ་ཀུན་ཏུ་གནོད་པར་བྱེད་པ་དང་། སེམས་ཀུན་ཏུ་འཁྲུག་པར་བྱེད་པ་དང་། དགེ་བ་ཐམས་ཅད་ལ་མངོན་པར་མི་དགའ་བར་བྱེད་པ་དང་། མི་དགེ་བ་ཐམས་ཅད་ལ་མངོན་པར་དགའ་བར་ བྱེད་པའི་སྡིག་པའི་ལས་དེ་དག་ཐམས་ཅད་མ་ལུས་པར་འབྲས་བུ་མི་སྒྲུབ་པར་ཟད་པར་འགྱུར་ཏེ། མཚམས་མེད་པ་བྱེད་པ་དང་། དམ་པའི་ཆོས་སྤོང་བ་དང་། འཕགས་པ་ལ་སྐུར་པ་འདེབས་པ་དང་། ལྟུང་བའི་རྩ་བ་བྱུང་བ་ནི་མ་གཏོགས་སོ། ། དེ་དགེ་བའི་རྩ་བ་དེ་ལྟ་ བུ་ཀུན་ཏུ་སྤྱོད་པར་བྱེད་དེ། གལ་ཏེ་སྦྱིན་པའི་ཕ་རོལ་ཏུ་ཕྱིན་པ་ཀུན་ཏུ་རྩོམ་པར་བྱེད་ན་དེ་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། ། བྱང་ཆུབ་སེམས་དཔའ་དང་།

རྐྱེན་གྱི་རྒྱལ་བ་དང་། དགྲ་བཅོམ་པ་ཐམས་ཅད་ཀྱིས་ཀྱང་བྱིན་གྱིས་བརླབས་པར་ འགྱུར་རོ། ། དེའི་ཁྱིམ་ལོངས་སྤྱོད་ཟད་མི་ཤེས་པར་ཡང་འགྱུར་རོ་ཞེས་བྱ་བ་ནས་སྔར་གསུངས་པ་བཞིན་ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ལ་གོམས་པར་བྱེད་ན་ལྷ་དང་། ལྷ་མ་ཡིན་དུ་བཅས་ པའི་འཇིག་རྟེན་གྱིས་མི་རྫི་བར་འགྱུར་རོ་ཞེས་བྱ་བའི་བར་དང་། དེ་ལྷའི་དབང་པོ་ཐམས་ཅད་དང་ཞེས་བྱ་བ་ནས། མིའི་དབང་པོ་ཐམས་ཅད་ཀྱི་བར་གྱིས་དད་པར་བྱ་བའི་འོས་སུ་གྱུར་པ་ཡིན། དྲན་པར་བྱ་བའི་འོས་སུ་གྱུར་པ་དང་། མངོན་པར་དགའ་བར་བྱ་བའི་འོས་སུ་ གྱུར་པ་དང་། མཆོད་པའི་འོས་སུ་གྱུར་པ་དང་། ཕྱག་བྱ་བའི་འོས་སུ་གྱུར་པ་དང་། རབ་ཏུ་བསྲུང་བའི་བར་གྱི་འོས་སུ་གྱུར་པ་ཡིན་ནོ། ། དེ་ཕྱི་མའི་དུས་ན་འཆི་བའི་ཚེ་ཕྱོགས་བཅུ་ཀུན་ཏུ་སངས་རྒྱས་བཅོམ་ལྡན་འདས་དག་མཐོང་བར་འགྱུར་རོ། ། སངས་རྒྱས་ བཅོམ་ལྡན་འདས་དེ་དག་ཀྱང་དེ་ལ་ཕྱག་རྐྱོང་བར་མཛད་ཅིང་དེ་ལ་འདི་སྐད་དུ། སྐྱེས་བུ་དམ་པ་དག་འོངས་པ་ལེགས་སོ། ། ཚུར་ངེད་ཀྱི་སངས་རྒྱས་ཀྱི་ཞིང་ཡོངས་སུ་དག་པར་གནས་པར་བྱོས་ཤིག །

དེར་ངེད་ཀྱིས་ཁྱོད་ས་བཅུ་དག་ལ་གཞག་པར་མཛད་དོ་ཞེས་ཀྱང་ གསུང་བར་འགྱུར་རོ། ། དེ་སངས་རྒྱས་མཐོང་བ་དང་། འཕགས་པའི་དགའ་བ་དང་། དད་པ་དེས་འཆི་བའི་དུས་བྱས་ན་སངས་རྒྱས་ཀྱི་ཞིང་སྟོང་པ་མ་ཡིན་པ་དེ་དག་ཏུ་སྐྱེ་བར་འགྱུར་ཏེ། དེ་དེར་ཡང་ས་བཅུ་ཐོབ་པར་བྱེད་ཅིང་རིང་པོ་མི་ཐོགས་པར་བླ་ན་མེད་པ་ཡང་དག་པར་ རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། ། རིགས་ཀྱི་བུ་རིག་སྔགས་ཀྱི་རྟེན་ལུང་སྟོན་པ་ཆེན་པོ་འདི་ནི་དེ་ལྟར་དོན་ཆེ་བ་ཡིན་ནོ། ། རིགས་ཀྱི་བུ་སངས་རྒྱས་ཀྱི་ཞིང་མི་མཇེད་དེ་ན་སེམས་ཅན་རྣམས་ནི་ངེས་པར་འབྱེད་པའི་ཆ་དང་འཐུན་པའི་དགེ་བའི་རྩ་བ་ཐམས་ ཅད་ལས་ཡོངས་སུ་ཉམས་པ་དག་ཡིན་ནོ། ། དེ་ཅིའི་ཕྱིར་ཞེ་ན། འདི་ལྟར་དེ་དག་ནི་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ནས་བོར་བ་དག་ཡིན་ཞིང་མཚམས་མེད་པ་བྱེད་པ་དག་དང་། དམ་པའི་ཆོས་སྤོང་བ་དག་དང་། འཕགས་པ་ལ་སྐུར་པ་འདེབས་པ་དག་ དང་། ལྟུང་བའི་རྩ་བ་བྱུང་བ་དག་ཡིན་པའི་ཕྱིར་རོ། ། དེ་དག་ཐམས་ཅད་ཀྱིས་ངན་སོང་གསུམ་དུ་ཡུན་རིང་པོར་སྡུག་བསྔལ་རྣམ་པ་སྣ་ཚོགས་རབ་ཏུ་དྲག་པོ་རབ་ཏུ་རྩུབ་པོ་ཉམས་སུ་མྱོང་ངོ་། །

དེ་དག་ངན་སོང་གསུམ་ལས་ཡོངས་སུ་ཐར་བ་དང་། ཡོངས་སུ་དག་པས་ དགེ་བ་བཅུའི་ལས་ཀྱི་ལམ་ཡང་དག་པར་བླངས་པའི་རྒྱུ་དང་། དེ་བཞིན་གཤེགས་པ་ཤཱཀྱ་ཐུབ་པའི་སྔོན་གྱི་སྨོན་ལམ་གྱི་རྒྱུས་དེ་དག་གིས་སངས་རྒྱས་ཀྱི་ཞིང་དེར་མི་ཉིད་རྙེད་པ་ཐོབ་བོ། ། གང་དེ་དག་གི་སྔོན་གྱི་དད་པའི་དབང་པོ་ནས་ཤེས་རབ་ཀྱི་དབང་པོའི་བར་དང་། སྦྱིན་པ་དང་ལྡན་པ་ལ་གོམས་པ་ནས་ཤེས་རབ་དང་ལྡན་པ་ལ་གོམས་པའི་བར་དང་། སྨོན་ལམ་ལ་གོམས་པ་དང་། འཁོར་བ་ལ་ཡོངས་སུ་སྐྱོ་བ་ལ་གོམས་པ་དང་། བྱང་གྲོལ་གྱི་བདེ་བ་ལ་གོམས་པ་དང་། ཚངས་པའི་གནས་པ་སྒོམ་པ་ལ་གོམས་པ་སྔོན་ཆད་བྱས་ པར་གྱུར་པ་དེ་དག་ཐམས་ཅད་ནི་ངན་སོང་གི་སྡུག་བསྔལ་ཉམས་སུ་མྱོང་བ་ལ་གོམས་པས་མ་ལུས་པར་བརྗེད་དོ། ། མ་ལུས་པར་བརྗེད་ནས་ཀྱང་སངས་རྒྱས་ཀྱི་ཞིང་དེར་སྐྱེས་ཏེ། ད་དུང་ཡང་ཉེས་པར་སྤྱོད་པ་ཐམས་ཅད་ཀྱི་རྒྱུས་དེ་དག་གཟུགས་མི་སྡུག་པ་དག་དང་། ཚུལ་དུ་མི་ཤིས་པ་དག་དང་། ཡན་ལག་དང་བྲལ་བ་དག་དང་། བཟའ་བ་དང་། བཏུང་བ་དང་། གོས་དང་། མལ་ཆ་དང་། རྒྱན་དང་བྲལ་བ་དག་ཏུ་གྱུར་ཏོ། ། དེ་དག་དེར་ཡང་ཚེ་ཐུང་བ་དག་དང་། ཡིད་གཞུངས་པ་ཆུང་བ་དག་དང་། བློ་ཆུང་བ་དག་ དང་།

ལོངས་སྤྱོད་དང་ཉེ་བར་སྤྱོད་པ་ཆུང་བ་དག་དང་། དགེ་བའི་རྩ་བ་ཆུང་བ་དག་དང་། བསོད་ནམས་ཆུང་བ་དག་དང་། གྲུབ་པ་ཆུང་བ་དག་དང་། བྱ་བ་ཆུང་བ་དག་དང་། བྱ་བ་ངན་པ་ལ་ཞུགས་པ་དག་དང་། ལྟ་བ་ངན་པས་ཟིན་པ་དག་དང་། བསྟན་བཅོས་ ངན་པ་ལ་དད་པ་དག་དང་། སྨོན་ལམ་ངན་པ་དང་ལྡན་པ་དག་དང་། ནད་མང་བ་དག་ཡིན། རྣམ་པར་གཡེང་བ་མང་བ་དག་ཡིན། འཇུག་པ་ལ་སྦྱོར་བ་མང་བ་དག་དང་། ཉེས་པར་སྤྱོད་པ་གསུམ་མང་བ་དག་དང་། ལྟད་མོ་དག་དང་། ལྟས་ངན་པ་དག་དང་། གཟུ་ལུམས་ཅན་དག་དང་། རྩུབ་པ་དག་དང་། ཞེ་སྡང་དང་ལྡན་པ་དག་དང་། མི་དགེ་བ་བཅུའི་ལས་ཀྱི་ལམ་དང་ལྡན་པ་དག་དང་། དཀོན་མཆོག་གསུམ་འགོག་པར་བྱེད་པ་དག་ཡིན་ཏེ། སངས་རྒྱས་ཀྱི་ཞིང་དེ་ན་སེམས་ཅན་ནི་ཕལ་ཆེར་ངན་སོང་གསུམ་དུ་འགྲོ་བ་དག་ ཡིན་ནོ། ། རིགས་ཀྱི་བུ་དག་དེར་རིག་སྔགས་ཀྱི་རྟེན་ལུང་སྟོན་པ་ཆེན་པོ་འདི་དེ་དག་གིས་ཐོས་པ་ཙམ་གྱི་མོད་ལ་དེ་དག་ངེས་པར་འབྱེད་པའི་ཆ་དང་འཐུན་པའི་དགེ་བ་དག་གི་ཀུན་ཏུ་སྦྱོར་བས་ངན་སོང་གི་ལམ་དག་ལས་སྒྲོལ་བར་བྱེད་དོ། ། དེ་དག་སྔོན་ བྱས་པའི་དད་པའི་དབང་པོ་ལ་གོམས་པས་དགའ་བར་འགྱུར་བ་ནས།

ཤེས་རབ་ཀྱི་དབང་པོའི་བར་ལ་གོམས་པས་དགའ་བར་འགྱུར་བའི་བར་དང་། སྨོན་ལམ་དང་། འཁོར་བའི་སྐྱོན་དང་། ཚངས་པའི་གནས་པ་བསྒོམ་པ་གོམས་པ་ལ་དགའ་བར་འགྱུར་བ་ཡིན་ནོ། ། ཐོས་པ་ཙམ་གྱིས་དེ་དག་གི་ཚེ་འཕེལ་བར་འགྱུར་རོ། ། ནད་མེད་པ་འཕེལ་བ་དང་། ལོངས་སྤྱོད་དང་ཉེ་བར་སྤྱོད་པ་འཕེལ་བ་དང་། དགེ་བའི་བྱ་བ་འཕེལ་བ་དང་། དགེ་བའི་རྩ་བ་ཡང་དག་པར་སྒྲུབ་པ་འཕེལ་བ་དང་། ཤེས་རབ་འཕེལ་བ་དང་། བྱམས་པ་འཕེལ་ བ་ནས། བཏང་སྙོམས་ཀྱི་བར་འཕེལ་བ་དང་། ལེགས་པར་བྱས་པའི་ལས་འཕེལ་བ་མཆོག་ཏུ་འགྱུར་རོ། ། ཐོས་པ་ཙམ་གྱིས་དེ་དག་ཐམས་ཅད་ཡང་དག་པའི་ལྟ་བ་དང་ལྡན་པར་འགྱུར་རོ། ། གང་དག་རིག་སྔགས་ཀྱི་རྟེན་ལུང་བསྟན་པ་ཆེན་པོ་འདི་བཀུར་སྟིར་བྱས་ ཏེ་ཉན་པར་བྱེད་ཅིང་ཉིན་ཞག་བདུན་དུ་ལས་གཞན་མི་བྱེད་པར་སེམས་རྩེ་གཅིག་པས་ཆོས་འདི་དག་རྣམ་པར་སྒོམ་པར་བྱེད་པའི་སེམས་ཅན་དེ་དག་ནི་དགེ་བ་བཅུའི་ལས་ཀྱི་ལམ་དང་ལྡན་པ་དག་དང་། ལེགས་པར་སྤྱོད་པ་གསུམ་དང་ལྡན་པ་དག་དང་། དཀོན་མཆོག་གསུམ་ ལ་སྐྱབས་དང་། སྨོན་ལམ་གྱི་ཤུགས་ལ་མངོན་པར་དགའ་བ་དག་དང་། ཆོས་ཀྱིས་གནས་པ་དག་དང་།

དཀོན་མཆོག་གསུམ་གྱི་གདུང་གསལ་བར་བྱེད་པ་དག་ཏུ་འགྱུར་ཏེ། སེམས་ཅན་གང་དག་དེར་སྔོན་གྱི་སྐྱེ་གནས་མྱོང་བར་འགྱུར་བ་མཚམས་མེད་པ་བྱེད་པ་ནས་ ལྟུང་བའི་རྩ་བ་བྱུང་བའི་བར་དག་ནི་མ་གཏོགས་སོ། ། དེ་ནས་ཤི་འཕོས་ནས་ཀྱང་སངས་རྒྱས་ཀྱི་ཞིང་མི་མཇེད་འདིར་སྐྱེས་ཤིང་སྐྱེ་བར་འགྱུར་བ་དག་ཡིན་ཏེ། གང་དག་གི་སྡིག་པའི་ལས་རབ་ཏུ་ཆེན་པོའི་འབྲས་བུ་རྣམ་པར་སྨིན་པར་སྔོན་ཆད་ཡོངས་སུ་མ་སྤྱད་པའི་སེམས་ཅན་ དེ་དག་གིས་རིག་སྔགས་ཀྱི་རྟེན་ལུང་སྟོན་པ་ཆེན་པོ་འདི་ཐོས་ན་ཡང་ཡོན་ཏན་དེ་ལྟ་བུ་དེ་དག་ཐོབ་པར་འགྱུར་རོ། ། ཐོས་པ་ཙམ་གྱིས་མོད་ལ་ཡང་དེ་དག་གི་ལས་ཀྱི་སྒྲིབ་པ་དཔག་ཏུ་མེད་པ་མ་ལུས་པར་ཡོངས་སུ་ཟད་པར་འགྱུར་རོ། ། སེམས་ཅན་དེ་དག་གིས་ཀྱང་དེར་ ཆོས་ཀྱི་རྣམ་གྲངས་འདི་མཐའ་དག་བྲི་བར་བྱའོ། ། ཡང་དག་པར་རྫོགས་པའི་སངས་རྒྱས་བདུན་པོ་དག་གི་སངས་རྒྱས་ཀྱི་སྐུ་གཟུགས་བདུན་ཡང་བྱའོ། ། དེ་བཞིན་གཤེགས་པ་ཤཱཀྱ་ཐུབ་པའི་ཉན་ཐོས་ཀྱི་དགེ་འདུན་ཆོས་ཀྱིས་གནས་པ་རྣམས་ཀྱི་ཀུན་དགའི་ར་བ་ ཡང་བྱའོ། ། དེར་སྦྱིན་བདག་ཀྱང་རབ་ཏུ་གཞག་པར་བྱའོ། ། དུས་དུས་སུ་གསོ་སྦྱོང་གི་སྡོམ་པ་ལ་ཡང་མངོན་པར་བརྩོན་པར་བྱའོ། །

ཆོས་མཉན་པར་བྱའོ། ། དེར་སེམས་ཅན་གང་དག་དཀོན་མཆོག་གསུམ་ལ་དགའ་བ་དང་། མཆོག་ཏུ་དགའ་བ་ཆེན་པོ་དེ་ལྟ་བུ་ འཐོབ་པའི་གནས་དེ་ཡོད་དེ། དེ་དག་གིས་གང་བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོར་ངན་སོང་གསུམ་དུ་སྡུག་བསྔལ་དྲག་པོ་རྣམ་པ་སྣ་ཚོགས་མྱོང་བར་འགྱུར་བ་དེ་ཡང་རིས་འཐུན་པ་འདི་ཉིད་ལ་མི་འདོད་པའི་འབྲས་བུ་མངོན་པར་འགྲུབ་པར་འགྱུར་རོ། ། ཁ་ཅིག་ལ་ ནི་ཡུན་རིང་དུ་ནད་འབྱུང་སྟེ། དེས་དེའི་སྔོན་གྱི་མི་དགེ་བའི་ལས་འཕངས་པ་དག་ཀྱང་ཡོངས་སུ་ཟད་པར་འགྱུར་རོ། ། ཁ་ཅིག་གི་ནི་ཡན་ལག་བཅད་པས་ཡོངས་སུ་ཟད་པར་འགྱུར་རོ། ། ཁ་ཅིག་གི་ནི་ནོར་ཟད་པས་ཡོངས་སུ་ཟད་པར་འགྱུར་རོ། ། ཁ་ཅིག་གི་ནི་འཁོར་ ཞིག་པས་ཡོངས་སུ་ཟད་པར་འགྱུར་རོ། ། ཁ་ཅིག་གི་ནི་ལོངས་སྤྱོད་དང་ཉེ་བར་སྤྱོད་པ་དང་བྲལ་བས་ཡོངས་སུ་ཟད་པར་འགྱུར་རོ། ། ཁ་ཅིག་གི་ནི་འཁོར་དང་། བྲན་དང་། ལུས་ལ་གནོད་པ་བྱེད་པ་དང་། བཙོན་རར་གཞག་པས་ཡོངས་སུ་ཟད་པར་འགྱུར་རོ། ། ཁ་ཅིག་ གི་ནི་མི་སྙན་པ་དང་། ཉེས་པར་སྨྲས་པའི་ཚིག་ཐོས་པས་ཡོངས་སུ་ཟད་པར་འགྱུར་ཏེ། རིས་འཐུན་པ་ལ་དེ་དག་གིས་མི་དགེ་བའི་ལས་སྔོན་བྱས་པ་རྣམས་ཡོངས་སུ་ཟད་པར་འགྱུར་རོ། །

རིགས་ཀྱི་བུ་རིག་སྔགས་ཀྱི་གཞི་ལུང་སྟོན་པ་ཆེན་པོ་འདི་ནི་དེ་ལྟར་དོན་ཆེ་བ་ཡིན་ ནོ། ། ཏད་ཡ་ཐཱ། ཁ་ག་པ་རི་ཙྪེ་ད། གརྦྷ་ཀྵ་སེ། གརྦྷ་རེ་བིདྱཱ། པྲ་བྷ་ག་ཀྵེ། ཀྵ་བ་ཡོ་གེ། པྲ་ཏི་ཧཱ་རེ། ཤ་མ་ན་སི་ཀ་ཐེ། ས་མ་མེ་གྷ་ཛུཥྚེ། ཨཀྵ་ཡ་ཏ་ཏེ། ཀྵ་བྷ་བ་ཛེ། ནི་ན་ད་ན་ཛྷུ་ཥེ། ས་མཱ་གྲ་ཛྷུ་ཥེ། ཨདྷྱ་ཤ་ཡ་ཛྷུ་ཥེ། བི་པྲ་བྷ་ཛྷུ་ ཥེ། ཤཻ་ཀྵ་ཛྷུ་ཥེ། སཏྱ་ཛ་བ་ཛྷུ་ཥེ། སཻ་ནྱ་ཛ་བ་ཛྷུ་ཥེ། ས་ལི་ལ་གུ་ཧྱ་ཛྷུ་ཥེ། ས་ལ་གུ་ཧྱ་བྱཱ་ཀྵེ། པ་ཎ་གྷོ་ཥེ། ས་དཱ་ན་ཀོ་ནེ། སརྦ་དྷ་ནན་ཐྱེ། བཱི་ཏ་པྲ་པྲྀཏ་ཏེ། ཨུ་པ་ཀྲ་མ་ཎ་ཐེ། ཨ་ན་ཙྪ་དྱ་པྲ་ཁེ། པྲ་ཏི་ཀྲ་མ་ན ། ས་ཁ་ཐྱེ་ཤེ ། ས་ལོ་ཙ་ན་བ་མེ། ཀྲོ་དྷ་དྷ་རེ་ཀཱ་ཤ་ ས་ཤེ ། ཨཱ་ཀཱ་ཤ་ཁ་གེ ། ན་ཡ་ཀུཉྫེ། བི་དྱཱ་བ་ནེ། ཀླཱ་ན་བ་ནེ། ཨུ་པ་བ་ནེ། ས་མེ་མ་ཀཱ་རེ། ཤཱ་ར་ཡ་བ་ནེ། མེ་གྷ་ཛྷུ་ཥེ། ཧ་རི་ཀོ་ན། བ་ན་ཡ་ན་མུ་ཁེ། ས་ར་ཀྵ་ཀོ་ལེ། ན་རཱ་ཡ་ན་ཛྷུ་ཥེ། ཨིན་དྲ་བས་ནེ། ཨོ་ཨ། ཨ་བ་ཨཱ། ཨ་ར་བ་ཧ། ཛ་རཱ། ཨ་བ་ རཱ་བ། ས་མེ་གྷ་དུཿཁེ་ན་སྟི་ར་ཎི་ནིརྦཱ་ཧེ་སྭཱ་ཧཱ། རིགས་ཀྱི་བུ་རིག་སྔགས་ཀྱི་རྟེན་ལུང་སྟོན་པ་ཆེན་པོ་འདི་ནི་ཡོན་ཏན་ཆེ་བ། ཕན་ཡོན་ཆེ་བ།

སེམས་ཅན་ཐམས་ཅད་ལ་ཕན་པ་བྱེད་པ་དང་། ཁྲུས་བྱེད་པ། སྣང་བར་བྱེད་པ། དྲན་པར་བྱེད་པ། ཉེ་བར་ཞི་བར་བྱེད་པ་ཡིན་ཏེ། དེ་ལ་གང་དག་སེམས་རྩེ་གཅིག་པས་ཉན་པར་བྱེད་ཅིང་ཇི་ལྟར་བསྟན་པ་བཞིན་དུ་སྒྲུབ་པར་བྱེད་པའི་སེམས་ཅན་དེ་དག་ནི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། ། བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་དང་། རྐྱེན་གྱི་རྒྱལ་བ་ ཐམས་ཅད་དང་། དགྲ་བཅོམ་པ་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། ། དེ་དག་ཐམས་ཅད་ནི་ལྷའི་དབང་པོ་ནས། མིའི་དབང་པོའི་བར་གྱིས་བསམས་པ་དང་། དད་པར་བྱ་བའི་འོས་སུ་གྱུར་པ་དང་། ཕྱག་བྱ་བའི་འོས་སུ་གྱུར་པ་དང་། མཆོད་པའི་འོས་ སུ་གྱུར་པ་ཡིན་ནོ། ། ཤིན་ཏུ་བསྲུང་བར་བྱ་བའི་འོས་སུ་གྱུར་པ་ཡིན་ནོ། ། སེམས་ཅན་དེ་དག་ནི་ཕྱི་མའི་དུས་ན་འཆི་བའི་དུས་ཀྱི་ཚེ་རྣམ་པར་ཤེས་པ་ཐ་མ་ལ་ཕྱོགས་བཅུ་ཀུན་ནས་མདུན་ན་སངས་རྒྱས་བཅོམ་ལྡན་འདས་རྣམས་མཐོང་བར་འགྱུར་ཏེ། སངས་རྒྱས་བཅོམ་ལྡན་འདས་ དེ་དག་ཀྱང་དེ་ལ་ཕྱག་རྐྱོང་བར་མཛད་ཅིང་འདི་སྐད་དུ། ཀྱེ་ཡོན་ཏན་གྱིས་ཕྱུག་པ་དག་ཚུར་ཤོག །

ངེད་ཀྱི་སངས་རྒྱས་ཀྱི་ཞིང་ཡོངས་སུ་དག་པར་གནས་པར་གྱིས་ཤིག ། དེང་ངེད་ཀྱིས་ཁྱོད་ས་བཅུ་དག་ལ་གཞག་པར་བྱའོ་ཞེས་ཀྱང་གསུང་བར་མཛད་དོ། ། དེ་སངས་རྒྱས་ མཐོང་བའི་དགའ་བ་དང་། མཆོག་ཏུ་དགའ་བ་དང་། དད་པ་འཕགས་པ་དེས་འཆི་བའི་དུས་བྱས་ནས་ཀྱང་སངས་རྒྱས་ཀྱི་ཞིང་སྟོང་པ་མ་ཡིན་པ་དག་ཏུ་སྐྱེ་བར་འགྱུར་ཞིང་དེ་དེར་ཡང་ས་བཅུ་དག་ཐོབ་པར་འགྱུར་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་ པར་རྫོགས་པར་འཚང་རྒྱ་སྟེ། རིག་སྔགས་ཀྱི་རྟེན་ལུང་སྟོན་པ་ཆེན་པོ་འདི་ནི་སེམས་ཅན་རྣམས་ཀྱི་ལས་ཟད་པར་བྱ་བ་དང་། རྣམ་པར་དག་པ་ཐོབ་པར་བྱ་བ་དང་། བྱང་གྲོལ་གྱི་བདེ་བ་ཐོབ་པར་བྱ་བའི་ཕྱིར་དེ་ལྟར་དོན་ཆེ་བ་དང་། ཕན་ཡོན་ཆེ་བ་ཡིན་གྱིས་ལོང་ལ་མི་ མཇེད་ཀྱི་འཇིག་རྟེན་གྱི་ཁམས་སུ་སོང་ཤིག ། ངའི་བཀས་དེ་བཞིན་གཤེགས་པ་ཤཱཀྱ་ཐུབ་པ་ལ་ཞུས་ཤིག ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་སྙིང་པོ་དཔལ་དེས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་དེ་ལྟར་འཚལ་ ལགས་སོ། །

ཡང་དེའི་ཚེ་འཁོར་དེར་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པས་ཀྱང་ཚིག་འཐུན་པར་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་བདག་ཅག་ཀྱང་དེ་བཞིན་གཤེགས་པ་ཤཱཀྱ་ཐུབ་པ་ལ་བལྟ་བ་དང་། ཕྱག་ བགྱི་བ་དང་། བསྙེན་བཀུར་བགྱི་བ་དང་། འདུས་པ་ཆེན་པོ་དེ་ཡང་བལྟ་བ་དང་། ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་བགྱིད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་བས་པར་འགྱུར་བའི་གཟུངས་སྔགས་ཐོས་པར་འཚལ་ཏེ། བདག་ ཅག་ཀྱང་ཏིང་ངེ་འཛིན་གྱི་རྣལ་འབྱོར་ལས་ལངས་ནས་རིང་པོ་མ་ལགས། སྔ་མ་ཡང་ཀུན་ཕྱིན་ལགས་ན་བཙུན་པ་བཅོམ་ལྡན་འདས་འཇིག་རྟེན་གྱི་ཁམས་མི་མཇེད་དེར་བདག་ཅག་ཀྱང་མཆི་བར་གནང་བར་མཛད་པར་གསོལ། དེ་ནས་དེ་བཞིན་གཤེགས་པ་ཡེ་ཤེས་དཔལ་ བརྩེགས་རྒྱལ་པོ་དེས་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་དག་ཁྱེད་ཅག་ཐམས་ཅད་ལྷན་ཅིག་འཐུན་པར་སྲེད་མེད་ཀྱི་བུའི་མདོག་དང་། རྟགས་དང་། གཟུགས་དང་། དབྱིབས་དང་། སྤྱོད་ལམ་དང་། ཆ་བྱད་ཀྱིས་ཁྱེད་དེང་ཤིག ། བཙུན་ པ་བཅོམ་ལྡན་འདས་དེ་ལྟར་འཚལ་ལགས་སོ་ཞེས་ཀྱང་གསོལ་ཏེ།

བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་སྙིང་པོ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་དང་ལྷན་ཅིག་ཏུ་སྲེད་མེད་ཀྱི་བུའི་མདོག་དང་། རྟགས་དང་། གཟུགས་ དང་། དབྱིབས་དང་། སྤྱོད་ལམ་དང་། ཆ་བྱད་དུ་བདག་ཉིད་མངོན་པར་སྤྲུལ་ནས་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོའི་ཞབས་གཉིས་ལ་མགོ་བོས་ཕྱག་འཚལ་ཏེ། ལན་གསུམ་དུ་བསྐོར་བ་བྱས་ནས་དེ་ནས་ཆས་ཏེ་ཡུད་ཙམ་ གཅིག་གིས་སངས་རྒྱས་ཀྱི་ཞིང་མི་མཇེད་འདིར་ཕྱིན་ཏོ། ། སངས་རྒྱས་ཀྱི་ཞིང་མི་མཇེད་འདིར་དེ་དག་ཕྱིན་པ་ཙམ་གྱི་མོད་ལ་སངས་རྒྱས་ཀྱི་ཞིང་མི་མཇེད་ཐམས་ཅད་དུ་བཅོམ་ལྡན་འདས་ལ་མཆོད་པའི་ལས་བྱ་བའི་ཕྱིར་འཛམ་བུའི་ཆུ་བོའི་གསེར་གྱི་ཆར་པ་མངོན་པར་རབ་ཏུ་ཕབ་ བོ། ། དེ་དག་གླིང་བཞི་པ་བར་མ་འདི་ག་ལ་བ་དང་། ཡུལ་མ་ག་དྷཱའི་ཞིང་ག་ལ་བ་དེ་ལོགས་སུ་དོང་སྟེ། དོང་ནས་ཀྱང་བཅོམ་ལྡན་འདས་ཤཱཀྱ་ཐུབ་པའི་ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། ། བཅོམ་ལྡན་འདས་ནི་ད་དུང་ཡང་རྒྱལ་པོ་ གཟུགས་ཅན་སྙིང་པོ་དང་ཐབས་ཅིག་ཆོས་ཀྱིས་གནས་པའི་གཏམ་རབ་ཏུ་མཛད་དོ། །

ཡང་དེའི་ཚེ་བྱང་ཕྱོགས་ན་སངས་རྒྱས་ཀྱི་ཞིང་གང་གཱའི་ཀླུང་བརྒྱད་ཅུའི་བྱེ་མ་སྙེད་འདས་པ་དེ་ན་སངས་རྒྱས་ཀྱི་ཞིང་སྤོས་ཐམས་ཅད་ཡང་དག་པར་འཕགས་པ་ཞེས་བྱ་བ་ཡོད་དེ། སངས་རྒྱས་ ཀྱི་ཞིང་སྙིགས་མ་ལྔ་དང་ལྡན་པར་གནས་པ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་མེ་ཏོག་གི་སྙིང་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། ། འཁོར་དེར་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་ སྙིང་པོ་ཞེས་བྱ་བ་ཆོས་མཉན་པའི་ཕྱིར་འདུས་པར་གྱུར་ཏེ་འདུག་གོ། ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོས་སྟེང་གི་ནམ་མཁའ་ལ་བལྟས་སོ། ། དེས་ཀྱང་དེར་ནམ་མཁའ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ ཏུ་མེད་པ་བྱང་ཕྱོགས་ཀྱི་ཕྱོགས་ཆ་ནས་ལྷོ་ཕྱོགས་སུ་འདོང་བ་དག་མཐོང་བར་གྱུར་ཏོ། ། དེས་ལྷོ་ཕྱོགས་སུ་རྣམ་པར་བལྟས་ཏེ་སྣང་བ་ཆེན་པོ་མཐོང་ནས་དེས་དེ་བཞིན་གཤེགས་པ་དཔལ་མེ་ཏོག་གི་སྙིང་པོ་ག་ལ་བ་དེ་ལོགས་སུ་ཐལ་མོ་སྦྱར་བ་རབ་ཏུ་བཏུད་ནས་འདི་སྐད་ཅེས་ གསོལ་ཏོ། །

བཙུན་པ་བཅོམ་ལྡན་འདས་བདག་ཏིང་ངེ་འཛིན་གྱི་རྣལ་འབྱོར་ལས་ལངས་ནས་རིང་པོར་མ་ལགས་ཏེ། བདག་གིས་ནི་སྟེང་གི་ནམ་མཁའ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མ་མཆིས། དཔག་ཏུ་མ་མཆིས་པ་བྱང་ཕྱོགས་ཀྱི་ཕྱོགས་ ཆ་ནས་ལྷོ་ཕྱོགས་སུ་མཆི་བ་དག་མཐོང་ལགས་སོ། ། བཙུན་པ་བཅོམ་ལྡན་འདས་ལྷོ་ཕྱོགས་སུ་རྣམ་པར་བལྟས་ཏེ་སྣང་བ་ཆེན་པོ་མཐོང་ནས་བདག་འདི་སྙམ་དུ་སེམས་ཏེ། འདི་ལ་རྒྱུ་ནི་གང་ལགས་སྙམ་ལགས་སོ། ། དེ་ནས་དེ་བཞིན་གཤེགས་པ་དཔལ་མེ་ཏོག་གི་ སྙིང་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་སངས་རྒྱས་ཀྱི་ཞིང་འདི་ནས་ལྷོ་ཕྱོགས་ཀྱི་ཕྱོགས་ཆ་ན་སངས་རྒྱས་ཀྱི་ཞིང་གང་གཱའི་ཀླུང་བརྒྱད་ཅུའི་བྱེ་མ་སྙེད་འདས་ནས་སངས་རྒྱས་ཀྱི་ཞིང་མི་མཇེད་ ཅེས་བྱ་བ་ཡོད་དོ། ། འདི་ལྟར་སྙིགས་མ་ལྔ་དང་ལྡན་པར་གནས་པ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ལ་འདུས་པ་ཆེན་པོ་ལ་ཆོས་ཀྱི་ཚུལ་ཡུན་རིང་དུ་གནས་པར་བྱ་ བའི་ཕྱིར་དང་།

དཀོན་མཆོག་གསུམ་གྱི་གདུང་གི་ཆོས་ཀྱིས་གནས་པ་རྒྱུན་མི་གཅད་པར་བྱ་བའི་ཕྱིར་ད་ལྟར་ཐེག་པ་གསུམ་གྱི་རྣམ་པར་གཏན་ལ་དབབ་པ་བསྟན་པའི་སྒོའི་ཆོས་ཀྱི་རྣམ་གྲངས་རབ་ཏུ་སྟོན་ཏོ། ། སངས་རྒྱས་ཀྱི་ཞིང་མི་མཇེད་དེར་བདུད་ཀྱི་ཡུལ་རྣམ་པར་ གཞིག་པ་དང་། དྲི་མ་མེད་པར་མཛད་པའི་ཕྱིར་དང་། ཆོས་ཀྱི་རྒྱལ་མཚན་བསྒྲེང་བར་མཛད་པའི་ཕྱིར་དང་། ཆོས་ཀྱི་ཚུལ་ཡུན་རིང་དུ་གཞག་པའི་ཕྱིར་སངས་རྒྱས་ཀྱི་འདུས་པ་ཆེན་པོ་བྱུང་བར་གྱུར་ཏོ། ། དེར་ཡང་དེ་བཞིན་གཤེགས་པ་ཐམས་ཅད་ ཀྱིས་རིན་པོ་ཆེའི་ཏོག་གི་གཟུངས་སྔགས་གསུངས་ཏེ། སངས་རྒྱས་ཀྱི་ཞིང་ཡང་ཡོངས་སུ་སྤྱད་ནས་གཤེགས་སོ། ། དེ་བཞིན་གཤེགས་པ་ཤཱཀྱ་ཐུབ་པ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། ཉན་ཐོས་ཆེན་པོ་རྣམས་ཀྱི་འདུས་པ་ཆེན་པོ་ཡང་ དག་པར་སྒྲུབ་པར་མཛད་དེ། སོ་སོ་ཡང་དག་པར་རིག་པ་བཞི་དང་ཡང་དག་པར་ལྡན་པ་མིག་གསུམ་པའི་ཚངས་པའི་གནས་པ་བསྟན་ཀྱང་དེ་ན་ད་དུང་སངས་རྒྱས་ཀྱི་ཞིང་མི་མཇེད་ས་དང་ནམ་མཁའ་གང་བ་ཞིག་དེ་བཞིན་གཤེགས་པ་ཤཱཀྱ་ཐུབ་པ་མཆོག་ཏུ་སྙན་པར་གསུང་བའི་ཆོས་ བསྟན་པས་ཚིམ་པར་མ་གྱུར་ཏོ། །

མཆོག་ཏུ་སྙན་པ་གསུང་བ་ཤཱཀྱ་ཐུབ་པ་དེ་ཡང་བསྡུ་བའི་དངོས་པོ་བཞི་དང་། ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་ཟད་པར་བྱེད་པའི་གཟུངས་སྔགས་ བཤད་པར་བཞེད་དོ། ། དེ་བཞིན་གཤེགས་པ་དེ་འདི་སྙམ་དུ་དགོངས་ཏེ། ཕྱོགས་བཅུ་དང་། སངས་རྒྱས་ཀྱི་ཞིང་ཐམས་ཅད་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་སུ་དག་བསྐལ་པ་བརྒྱས་ངེས་པར་འབྱུང་བ་ཞེས་བྱ་བ་ནས་གང་དག་སྲིད་པ་ཐ་མ་པ་སངས་ རྒྱས་ཀྱི་ཆོས་མ་འདྲེས་པ་{བཅྭ་,བཅོ་}བརྒྱད་ལ་གཞན་གྱི་དྲིང་མི་འཇོག་པ་སྒྲིབ་པ་མེད་པའི་ཡེ་ཤེས་ལ་མཁས་པ་དག་འདིའི་ཚེ་སངས་རྒྱས་ཀྱི་ཞིང་མི་མཇེད་དུ་འཇུག་པར་གྱུར་ཅིག ། འདིར་འཁོད་ནས་ཀྱང་རང་རང་གི་དགེ་བའི་ཕྱོགས་ཀྱི་བསམ་གཏན་དག་གིས་གནས་པར་གྱུར་ཅིག ། འདི་ལྟར་སངས་རྒྱས་ཀྱི་ཞིང་འདིར་ས་ཆེན་པོ་ལྷག་པར་མཐུ་དང་ལྡན་པ་དང་། བཅུད་དང་ལྡན་པ་དང་། ཡོན་ཏན་དང་ལྡན་པ་དག་ཏུ་གྱུར་ཅིག ། འདི་ལྟར་འདིར་སངས་རྒྱས་ཀྱི་ཞིང་གཞན་བཞིན་དུ་ཐམས་ཅད་དྲན་པ་དང་ལྡན་པ་དག་དང་། བརྩོན་འགྲུས་དང་ལྡན་པ་དག་ དང་། གཏོང་བ་དང་ལྡན་པ་དག་དང་།

ཤེས་རབ་དང་ལྡན་པ་དག་ཏུ་གྱུར་ཅིག ། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་གང་སུ་དག་ཕྱོགས་བཅུའི་སངས་རྒྱས་ཀྱི་ཞིང་དག་ནས་ཡང་དག་པར་ཞུགས་པ་དེ་དག་ཀྱང་སངས་རྒྱས་ཀྱི་ཞིང་མི་མཇེད་འདིའི་ནང་དུ་ ཆུད་པར་གྱུར་ཅིག ། དེ་ཉིད་དུ་འཁོད་ནས་ཀྱང་རང་རང་གི་དགེ་བའི་ཕྱོགས་ལ་སྟོབས་ཇི་ལྟ་བ་དང་། ཇི་ལྟར་འཚམ་པ་བཞིན་དུ་འཁོད་ནས་བསམ་གཏན་བྱེད་པར་གྱུར་ཅིག་སྙམ་དགོངས་སོ། ། བསམ་གཏན་བྱེད་པ་དེ་དག་ཁ་ཅིག་གི་ལུས་ལས་འོད་འདི་ལྟ་བུ། དཔེར་ ན་འབྲུ་མར་གྱི་མར་མེ་ལྟ་བུ་བྱུང་ངོ་ཞེས་བྱ་བ་ནས་ཁ་ཅིག་གི་ལུས་ལས་འོད་འདི་ལྟ་བུ། དཔེར་ན་ཟླ་བ་དང་ཉི་མ་བྱེ་བ་ཕྲག་བརྒྱ་སྟོང་མང་པོའི་འོད་ལྟ་བུ་བྱུང་ངོ་ཞེས་བྱ་བའི་བར་དུ་སྦྱར་རོ། ། དེ་ན་ད་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདུས་པས་སངས་རྒྱས་ ཀྱི་ཞིང་མི་མཇེད་དེ་སྣང་བ་ཆེན་པོས་ཁྱབ་པར་གྱུར་ཏོ། ། ད་ལྟར་གང་དག་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ན་སྙོམས་པར་ཞུགས་པར་གྱུར་ལ། སྔོན་ཆད་དེར་ཕྱིན་པ་ནི་མ་ཡིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་དེ་ལྟར་ཏིང་ངེ་འཛིན་ ལས་ལངས་ནས་སངས་རྒྱས་ཀྱི་ཞིང་མི་མཇེད་དེར་ཆས་སོ། །

དེར་ཕྱིན་ནས་ཀྱང་དེ་བཞིན་གཤེགས་པ་དེ་མཐོང་བར་འགྱུར་རོ། ། འདུས་པ་ཆེན་པོ་དེ་ཡང་མཐོང་བར་འགྱུར་རོ། ། གཟུངས་སྔགས་ཆེན་པོ་དེ་ཡང་ཐོས་པར་འགྱུར་རོ། ། སྐྱིལ་མོ་ཀྲུང་དུ་འདུག་ ནས་རང་རང་གི་དགེ་བའི་ཕྱོགས་ཀྱི་བསམ་གཏན་རྣམ་པ་སྣ་ཚོགས་ཀྱིས་རྩེ་བར་འགྱུར་རོ། ། རིགས་ཀྱི་བུ་ཁྱོད་ཀྱང་ད་ལྟར་ཏིང་ངེ་འཛིན་ལས་ལངས་ཀྱིས་རིགས་ཀྱི་བུ་ཁྱོད་ཀྱིས་ཀྱང་སངས་རྒྱས་ཀྱི་ཞིང་མི་མཇེད་དེར་འགྲོ་བར་བྱའོ། ། རིགས་ཀྱི་བུ་སངས་རྒྱས་ཀྱི་ཞིང་མི་ མཇེད་དེ་ན་ཡང་སེམས་ཅན་དག་མཆོག་ཏུ་ཚེ་ཐུང་བ་དག་ཡིན། ནད་མང་བ་དག་ཡིན། བློ་ཆུང་བ་དག་ཡིན། དགེ་བའི་རྩ་བ་ཀུན་ཏུ་སྤྱོད་པ་ཆུང་བ་དག་ཡིན། བསོད་ནམས་ཆུང་བ་དག་ཡིན། དགེ་བའི་རྩ་བའི་བྱ་བ་ཚོལ་བ་ཆུང་བ་དག་ཡིན། འཇིག་རྟེན་ཕ་རོལ་ལ་ འཇིགས་པར་མི་ལྟ་བ་དག་ཡིན། ལོངས་སྤྱོད་དང་ཉེ་བར་སྤྱོད་པ་ཆུང་བ་དག་ཡིན། འདོད་པ་ལ་ཆུམས་པ་དག་ཡིན། མི་དགེ་བ་སྤྱོད་པ་དག་ཡིན། ཕྲག་དོག་དང་ལྡན་པ་དག་ཡིན། ངོ་ཚ་ཤེས་པ་དང་ཁྲེལ་ཡོད་པ་དག་སྤངས་པ་ཡིན་ཏེ། དེ་དག་ ཕལ་ཆེར་མི་དགེ་བ་བཅུའི་ལས་ཀྱི་ལམ་ཡང་དག་པར་བླངས་པས་ངན་སོང་དུ་འགྲོ་བ་དག་ཡིན་ནོ། ། དེ་ཅིའི་ཕྱིར་ཞེ་ན།

དེ་ན་གང་དག་འདྲེན་མར་སྤྱོད་པའི་སེམས་ཅན་ཡོད་པ་དེ་དག་འཆི་བའི་དུས་བྱས་ནས་དེ་ཉིད་དུ་སྡིག་པ་བྱེད་པའི་གནོད་སྦྱིན་ཞེས་བྱ་བ་ནས། སྡིག་པ་བྱེད་ པའི་ལུས་སྲུལ་པོ་ཞེས་བྱ་བའི་བར་དག་ཏུ་སྐྱེ་བར་འགྱུར་ཏེ། སྡིག་པ་བྱེད་པའི་གནོད་སྦྱིན་ཞེས་བྱ་བ་ནས། ལུས་སྲུལ་པོ་ཞེས་བྱ་བའི་བར་དེ་དག་ཀྱང་དེར་སའི་བཅུད་ཀྱི་མདངས་ཕྲོགས་ནས་ཡོངས་སུ་སྤྱོད་པར་བྱེད་དོ། ། འབྲུ་དང་། སྨན་དང་། མེ་ཏོག་དང་། འབྲས་ བུ་དང་། འདབ་མ་དང་། རོ་རྣམས་ཀྱི་མདངས་ཕྲོགས་ནས་ཀྱང་ཡོངས་སུ་སྤྱོད་པར་བྱེད་དོ། ། དེས་ན་སྟོབས་དང་ལྡན་པ་དག་ཡིན་ནོ། ། དེར་དེ་དག་མངལ་ན་གནས་པའི་མི་རྣམས་ཀྱི་མདངས་དག་འཕྲོག་པར་བྱེད་དོ། ། མི་རྣམས་སྐྱེས་པ་ཙམ་གྱི་མོད་དག་ལ་མྱུར་དུ་ མདངས་འཕྲོག་པར་བྱེད་དོ། ། འོ་མའི་མདངས་དག་ཀྱང་འཕྲོག་པར་བྱེད་དོ། ། བཟའ་བ་དང་བཏུང་བའི་མདངས་དག་ཀྱང་འཕྲོག་པར་བྱེད་དོ། ། དེར་དེ་དག་གིས་མི་མངལ་དུ་ཞུགས་པའི་མདངས་ཕྲོགས་ཤིང་སྐྱེས་པ་ཙམ་གྱིས་མོད་ལ་མདངས་ཕྲོགས་པས་དེ་དག་ཀྱང་མདངས་ ལ་མི་རེག་ཅིང་བཟའ་བ་དང་བཏུང་བ་ཉམས་པ་ཡོངས་སུ་སྤྱད་ཟིན་པ་ལ་ཡོངས་སུ་སྤྱོད་པར་བྱེད་དེ།

རྒྱུ་དེས་དེ་ན་མི་རྣམས་མཆོག་ཏུ་ན་བ་དག་དང་། ཚེ་ཐུང་བ་དག་དང་། དྲན་པ་ཉམས་པ་དག་དང་། དགེ་བའི་རྩ་བ་ཐམས་ཅད་ལས་ཡོངས་སུ་ཉམས་པ་དག་དང་། བསོད་ ནམས་དང་བྲལ་བ་དག་དང་། འཇིག་རྟེན་ཕ་རོལ་ལ་འཇིགས་པར་མི་ལྟ་བ་དག་དང་། ལོངས་སྤྱོད་དང་ཉེ་བར་སྤྱོད་པ་དང་བྲལ་བ་དག་དང་། འདོད་པ་ལ་ཆུམས་པ་དག་དང་། ཀུན་སྤྱོད་པ་མི་གཙང་བ་དག་ཡིན་ཞེས་བྱ་བ་ནས་མི་དགེ་བ་བཅུའི་ལས་ཀྱི་ལམ་ཡང་དག་པར་ བླངས་པས་ངན་སོང་དུ་འགྲོ་བ་དག་ཡིན་ནོ་ཞེས་བྱ་བའི་བར་ཡིན་ནོ། ། རིགས་ཀྱི་བུ་སྔོན་ང་བྱང་ཆུབ་སེམས་དཔར་གྱུར་པའི་སྨོན་ལམ་འདི་ལྟ་བུར་གྱུར་ཏེ། འདི་ལྟར་ང་བྱ་བ་ལ་བརྩོན་པ་དང་། སྤྲོ་བ་དང་། བརྟུལ་བ་བརྟེན་པར་གྱུར་ཏོ། ། སྔོན་གྱི་ཡང་དག་པར་རྫོགས་པའི་ སངས་རྒྱས་གང་དག་བཞུགས་པར་ངས་བསྙེན་བཀུར་བྱས་སོ། ། ངས་ཐབས་གང་གིས་བུད་མེད་སྦྲུམ་པ་བསྲུང་བར་ནུས་པ་ཡང་ཡོངས་སུ་ཞུས་སོ། ། ངའི་བརྩོན་འགྲུས་གང་གིས་མ་བདེ་ལེགས་སུ་འགྱུར་བ་དང་། མངལ་ན་ཡོད་པ་བདེ་ལེགས་སུ་འགྱུར་བ་ ཡོངས་སུ་ཞུས་སོ། ། ལྷའམ། ཀླུའམ། གནོད་སྦྱིན་ནམ། སྲིན་པོའམ། ནམ་མཁའ་ལྡིང་ངམ། མི་འམ་ཅིའམ། ལྟོ་འཕྱེ་ཆེན་པོའམ། གྲུལ་བུམ་མམ།

{ཡི་དགས་,ཡི་དྭགས་}སམ། ཤ་ཟའམ། སྲུལ་པོའམ། ལུས་ སྲུལ་པོའམ། མདངས་འཕྲོག་པའམ། བརྗེད་བྱེད་དམ། རིམས་ཉིན་གཅིག་པའམ། ཉིན་གཉིས་པའམ། ཉིན་གསུམ་པའམ། ཉིན་བཞི་པའམ། རོ་ལངས་གང་ཡང་དུག་གམ། སྔགས་ཀྱི་སྦྱོར་བའམ། སྨན་གྱི་སྦྱོར་བས་ལུས་དང་། སེམས་ལ་གནོད་ པ་བྱ་བར་མི་ནུས་པ་ཡོངས་སུ་ཞུས་སོ། ། གང་གིས་ཀྱང་མའམ། མངལ་ན་ཡོད་པ་དང་། སྐྱེས་མ་ཐག་པ་དང་། འོ་མ་འཐུང་བ་དང་། བཟའ་བ་དང་། བཏུང་བ་ཡོངས་སུ་སྤྱོད་པ་ལ་གནོད་པར་བྱ་བར་མི་ནུས་པར་ཡོངས་སུ་ཞུས་སོ། ། གང་གིས་ཀྱང་མདངས་ འཕྲོག་པའམ། ལུས་དཀྲུག་པའམ། ཁམས་དཀྲུག་པའམ། སེམས་དཀྲུག་པར་བྱ་བར་མི་ནུས་པར་ཡོངས་སུ་ཞུས་སོ། ། གང་གི་ཕྱིར་སེམས་ཅན་དེ་དག་ཐ་མལ་པར་མངལ་ན་གནས་པར་ཡོངས་སུ་ཞུས་སོ། ། ལུས་དང་སེམས་ལ་རྣམ་པར་ཐོ་མ་བཙམས་པས་བདེ་ བར་མའི་མངལ་ནས་གནོད་པ་མེད་པར་འབྱུང་བ་ཡོངས་སུ་ཞུས་སོ། ། བདེ་བར་འོ་མ་འཐུང་བ་ཡོངས་སུ་ཞུས་སོ། ། བདེ་བར་བཟའ་བ་དང་བཏུང་བ་ཡོངས་སུ་སྤྱད་པ་ཡོངས་སུ་ཞུས་སོ། ། གནོད་པ་ཆུང་བ་དང་། ཚེ་རིང་བ་དང་། བློ་དང་ལྡན་པ་ཞེས་བྱ་བ་ནས་དགེ་བ་ བཅུའི་ལས་ཀྱི་ལམ་ཡང་དག་པར་བླངས་པའི་བར་དང་། སྦྱིན་པ་དང་། དུལ་བ་དང་།

ཡང་དག་པར་སྡོམ་པ་ལ་མངོན་པར་དགའ་བ་དང་། འཇིག་རྟེན་ཕ་རོལ་ལ་འཇིགས་པར་ལྟ་བ་ཡིན་པ་དག་ཀྱང་ཡོངས་སུ་ཞུས་སོ། ། ངས་གསང་སྔགས་གང་དག་ དང་། སྨན་གང་དག་གིས་སེམས་ཅན་དེ་ལྟ་བུ་དག་ཡོངས་སུ་སྨིན་པར་མཛད་པར་སྤྱོད་པའི་གསང་སྔགས་དེ་དག་ནི་གང་ཡིན། སྨན་དེ་དག་ནི་གང་ཡིན་ཞེ་ན། གཟུངས་སྔགས་གང་གིས་ངས་སེམས་ཅན་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པ་ཡོངས་སུ་སྨིན་པར་མཛད་པ་ དང་། ཕ་རོལ་ཏུ་ཕྱིན་པ་དྲུག་ལ་བཀོད་པ་རིག་པ་ཡོད་པའི་སྦུབས་ཞི་བ་གསང་སྔགས་ཀྱི་གཞིའི་གཟུངས་སྔགས་ལུང་བསྟན་པ་ཆེན་པོ་འདི་སྔོན་གྱི་ཡང་དག་པར་རྫོགས་པའི་སངས་རྒྱས་དེ་དག་གིས་ཀྱང་ང་ལ་བསྟན་པར་གྱུར་ཏོ། ། རྟག་ཏུ་བརྩོན་འགྲུས་དང་། བརྟུལ་བ་བརྟན་ པ་ངས་རྟག་པར་རྒྱུན་དུ་ཚེ་རབས་དེ་དང་དེ་དག་ཏུ་མངལ་ན་བུ་ཡོད་པའི་བུད་མེད་ལ་རིག་པ་ཡོད་པའི་སྦུབས་ཞི་བ་གཟུངས་སྔགས་གསང་སྔགས་ཀྱི་གཞི་རིག་སྔགས་འདིས་བསྲུང་བ་བྱས་སོ། ། བུད་མེད་དེ་མངལ་ན་བུ་ཡོད་པ་དང་བཅས་ཏེ་སྐྱབས་གསུམ་ལ་རྣམ་པར་གཞག་གོ། ། ཕྱིན་ཆད་ཀྱང་ལྷའམ་ཞེས་བྱ་བ་ནས། བདུད་དམ། བརྗེད་བྱེད་དམ། མི་དང་།

མི་མ་ཡིན་པ་ཞེས་བྱ་བའི་བར་གྱིས་མའི་མངལ་ན་བུ་ཡོད་པ་དང་བཅས་ཏེ་རྣམ་པར་ཐོ་བཙམས་པའམ། རྣམ་པར་གཙེ་བའམ། ལུས་དཀྲུག་པའམ། ཁམས་དཀྲུག་པའམ། སེམས་ དཀྲུག་པར་བྱ་བར་མི་ནུས་སོ། ། ལྷ་དང་ལྷ་མ་ཡིན་དུ་བཅས་པའི་འཇིག་རྟེན་གྱི་བར་གྱིས་ཀྱང་མདངས་འཕྲོག་པའམ། སྨན་དང་སྔགས་ཀྱི་སྦྱོར་བ་བྱ་བར་མི་ནུས་སོ། ། དེ་དག་གིས་མངལ་ན་བུ་ཡོད་པའི་མ་རྣམ་པར་ཐོ་མ་བཙམས་པ་དང་། མངལ་ན་བུ་གནས་པ་ཡང་སྔོན་ གྱི་ཚེ་རབས་དྲན་པར་འགྱུར་རོ། ། ཉིང་མཚམས་སྦྱོར་བའི་ལུས་ཀྱི་དབང་པོ་ཐམས་ཅད་ཡོངས་སུ་རྫོགས་པ་དང་། གཟུགས་བཟང་བ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་དག་དང་། ཤིན་ཏུ་བློ་དང་ལྡན་པ་དག་བདེ་ལེགས་སུ་མའི་ལྟོ་ནས་བྱུང་ ཞིང་བརྗེད་ངས་པ་མེད་པའི་སེམས་དང་ལྡན་པ་དག་ཏུ་གྱུར་ཏོ། ། དེ་དག་སྐྱེས་པ་ཙམ་གྱི་མོད་ལ་ཡང་ལྷ་སྟོབས་དང་ལྡན་པ་དབང་ཆེ་བར་གྲགས་པ་རེ་རེ་ལ་ཡང་འཁོར་བརྒྱ་སྟོང་ཡོད་པ་དག་བསྲུང་བ་དང་། རྗེས་སུ་སྦ་བར་བྱེད་པར་ཀུན་ཏུ་གནས་སོ། ། དེ་དག་མི་དང་མི་ མ་ཡིན་པ་ཞེས་བྱ་བའི་བར་གང་གིས་ཀྱང་རྣམ་པར་ཐོ་བཙམ་པའམ། རྣམ་པར་གཙེ་བའམ། ལུས་དཀྲུག་པའམ། ཁམས་དཀྲུག་པའམ།

སེམས་དཀྲུག་པར་བྱ་བར་མི་ནུས་སོ། ། མདངས་བླང་བར་ཡང་མི་ནུས་སོ། ། གསང་སྔགས་དང་། སྨན་གྱིས་ཀྱང་ རྣམ་པར་ཐོ་བཙམ་པར་མི་ནུས་སོ། ། གང་གི་ཕྱིར་སེམས་ཅན་དེ་དག་མཆོག་ཏུ་གཟུགས་དང་ལྡན་པ་དང་། ཚེ་རབས་དྲན་པ་དང་། འཇིག་རྟེན་ཕ་རོལ་ལ་འཇིགས་པར་ལྟ་བ་དང་། བྱམས་པའི་སེམས་དང་ལྡན་པ་དང་། སྙིང་རྗེ་ཆེན་པོ་དང་ལྡན་པ་དང་། གཏོང་བ་ དང་ལྡན་པ་དང་། ཚུལ་ཁྲིམས་ལ་རྗེས་སུ་དགའ་བ་དང་། བཟོད་པ་དང་། ཡོན་ཏན་དང་ལྡན་པ་དང་། བརྩོན་འགྲུས་དང་ལྡན་པ་དང་། དབེན་པ་ལ་དགའ་ཞིང་བསམ་གཏན་ལ་མངོན་པར་བརྩོན་པ་དང་། དགེ་བའི་བཤེས་གཉེན་ལ་མངོན་པར་དགའ་བ་དག་དང་། དེ་ཐོབ་པར་བྱེད་པའི་སྡུག་བསྔལ་ཡང་དག་པར་ཟད་པར་འགྲོ་བ་འཕགས་པའི་ངེས་པར་འབྱིན་པའི་ཤེས་པ་དང་ལྡན་པ་དག་ཏུ་གྱུར་ཏོ། ། སེམས་ཅན་ཉེ་བར་ཞི་བ་ལ་གནས་པ་ཉོན་མོངས་པ་ཆུང་བ་དེ་ལྟ་བུ་དེ་དག་ལ་ལྷ་དང་། ཀླུ་དང་། གནོད་སྦྱིན་རྣམས་ཀྱིས་རིམ་གྲོ་བྱ་ བར་བརྩོན་པ་དག་ཡིན་ཏེ། མི་དེ་དག་ཀྱང་མཆོག་ཏུ་འཁོར་བ་ལ་སྐྱོན་དུ་བལྟ་བ་དང་། བྱང་གྲོལ་གྱི་བདེ་བ་འདོད་པ་དག་ཏུ་གྱུར་ཏེ། །

དེ་དག་གིས་གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན་དེ་དག་རིས་འཐུན་པ་དེ་ཉིད་ཀྱིས་མྱུར་དུ་བྱང་ཆུབ་ ཀྱི་སེམས་མ་བརྗེད་པར་བྱང་ཆུབ་སེམས་དཔའི་ཏིང་ངེ་འཛིན་ཐོབ་པར་གྱུར་ཏོ། ། ཅི་སྟེ་རང་སངས་རྒྱས་ཀྱི་ཐེག་པ་ལ་སེམས་བསྐྱེད་ན་དེ་དག་མྱུར་དུ་སྐྱེ་བ་དང་། འཇིག་པ་དང་། རྗེས་སུ་འཐུན་པའི་བཟོད་པ་ཐོབ་པར་གྱུར་ཏོ། ། ཅི་སྟེ་སེམས་ཅན་དེ་དག་ཀྱང་ཉན་ཐོས་ཀྱི་ཐེག་པ་ ལ་སེམས་སྐྱེད་པར་བྱེད་ན་སེམས་ཅན་དེ་དག་རིས་འཐུན་པ་ཉིད་ཀྱིས་བདེན་པ་དང་རྗེས་སུ་འཐུན་པའི་བཟོད་པ་ཐོབ་པར་བྱེད་དོ། ། སེམས་ཅན་དེ་དག་ཐམས་ཅད་ཀྱང་ངན་སོང་གསུམ་དང་བྲལ་བ་དང་མཐོ་རིས་སུ་འགྲོ་བ་དག་ཏུ་གྱུར་ཏོ། ། རིགས་ཀྱི་བུ་ངས་ཐབས་ ལ་འཇུག་པའི་སྦྱོར་བ་ལ་བརྟུལ་བ་དེས་སེམས་ཅན་དག་ཡོངས་སུ་སྨིན་པར་བྱས་ཤིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་ཡང་དག་པར་བསྒྲུབས་སོ། ། རིགས་ཀྱི་བུ་རིག་པ་ཡོད་པའི་སྦུབས་ཞི་བ་ལུང་བསྟན་པ་ཆེན་པོ་འདི་ནི་དེ་ལྟར་དོན་ཆེ་བ་ཡིན་ནོ། །

རིགས་ ཀྱི་བུ་ངས་སེམས་ཅན་ནད་པ་གང་དག་མཐོང་བ་དེ་དག་ལ་རིག་པ་ཡོད་པའི་སྦུབས་ཞི་བ་ལུང་བསྟན་པ་ཆེན་པོ་འདིས་སྨན་སིང་ཧ་ཀྵིར་ལ་བྲམས་ནས་ནད་པ་ལ་བྱིན་ནད་ཐམས་ཅད་རབ་ཏུ་ཞི་བར་གྱུར་ཏོ། ། གང་ན་སྨན་སིང་ཧ་ཀྵིར་མེད་པར་ཡང་ངས་དེའི་མདུན་དུ་བཟའ་བ་དང་། བཏུང་བ་གང་ཡིན་པ་ལ་རིག་པ་ཡོད་པའི་སྦུབས་ཞི་བ་ལུང་བསྟན་པས་བྲམས་ནས་ནད་པ་ལ་བྱིན་ནད་ཐམས་ཅད་རབ་ཏུ་ཞི་བར་གྱུར་ཏོ། ། གལ་ཏེ་དེ་ཡང་མེད་པར་གྱུར་ན་ངས་སྨན་བཀྲུས་ཏེ་བོར་བ་ལ་རིག་པ་ཡོད་པའི་སྦུབས་ཞི་བའི་གསང་སྔགས་ཀྱི་གཞི་དག་གིས་བྲམས་ནས་ ནད་པ་ལ་བྱིན་ནད་ཐམས་ཅད་རབ་ཏུ་ཞི་བར་གྱུར་ཏོ། ། རིགས་ཀྱི་བུ་ངས་ཐབས་ལ་འཇུག་པའི་སྦྱོར་བ་ལ་བརྟུལ་བ་དེས་སེམས་ཅན་རྣམས་ཡོངས་སུ་སྨིན་པར་བྱས་ཤིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་ཡང་དག་པར་བསྒྲུབས་སོ། ། གང་ན་ཤིང་ལྗོན་པ་དག་ མེ་ཏོག་དང་འབྲས་བུ་མི་སྐྱེ་བ་དེར་ཡང་ངས་རིག་པ་ཡོད་པའི་སྦུབས་ཞི་བ་གསང་སྔགས་ཀྱི་གཞི་ཆེན་པོ་དག་གིས་ཆར་པའི་ཆུ་ལ་བྲམས་ནས་ཤིང་དག་ལ་བཏབ་ན་ཤིང་དེ་དག་ལོ་མང་པོར་ཆུ་མེད་ཀྱང་མེ་ཏོག་དང་འབྲས་བུ་དག་དང་ལྡན་པར་གྱུར་ཏོ། ། དེ་བཞིན་དུ་བུ་རམ་ཤིང་ དང་།

རྒུན་འབྲུ་དག་དང་། འབྲུ་དང་། སྨན་དག་གི་བར་དག་ལ་ཡང་བྱས་སོ། ། གང་ན་ཆར་མི་འབབ་ཅིང་ཆུ་མེད་པ་དེར་ཡང་ངས་རུ་སྦལ་གྱི་སྙིང་ལ་རིག་པ་ཡོད་པའི་སྦུབས་ཞི་བ་གསང་སྔགས་ཀྱི་གཞི་འདིས་བྲམས་ནས་ཤིང་ཙམ་པ་ཀའི་འདབ་མས་དཀྲིས་ཏེ། ཀླུ་མཚོའི་ འགྲམ་དུ་བཞག་ན་ཆར་ཆེན་པོ་དང་། ཆུ་ཆེན་པོའི་ཚོགས་བྱུང་བར་གྱུར་ཏོ། ། དེར་ཆུ་ཆེན་པོ་བྱུང་བས་སེམས་ཅན་རྣམས་ཀྱི་ཁྱིམ་དང་། ཞིང་དང་། ཀུན་དགའ་ར་བའི་བར་ཆུད་ཟ་བར་གྱུར་ན་དེར་ཡང་ངས་སྦྲུལ་གྱི་རྒྱལ་པོའི་ནོར་བུ་ལ་རིག་པ་ཡོད་པའི་སྦུབས་ཞི་བའི་ གསང་སྔགས་ཀྱི་གཞི་འདིས་བྲམས་ནས་ཀླུའི་གནས་སུ་བཞག་ན་ཆར་ཆུ་རབ་ཏུ་ཞི་བར་གྱུར་ཏོ། ། གང་ན་དུས་མ་ཡིན་པར་རླུང་དང་། ཉི་མ་དང་། དུས་མ་ཡིན་པའི་སྤྲིན་དང་། མུན་པ་དང་། རྡུལ་གྱི་ཆར་པ་དང་། གྲང་བ་དང་། དྲོ་བ་དང་། དུས་ཕྱིན་ཅི་ལོག་ཏུ་འབྱུང་ བའི་བར་དང་། དམག་ཚོགས་དང་། ཟླ་བ་དང་། ཉི་མ་དང་། གཟའ་དང་། རྒྱུ་སྐར་དང་། ཟླ་བ་དང་། ཟླ་བ་ཕྱེད་པ་དང་། དུས་ཚིགས་དང་།

ལོ་རྣམས་ཡང་དག་པར་འབྱུང་བ་མ་ཡིན་པའི་བར་ལ་ངས་སྙིང་རྗེས་སེམས་ཅན་རྣམས་ཀྱི་ཆེད་དུ་ཞག་བདུན་པ་གཅིག་ གི་ཉིན་མཚན་དུ་ཁྲུས་བྱས་ནས་འོ་མ་དང་འབྲས་ཆན་གྱི་ཁ་ཟས་ཟ་ཞིང་ཚངས་པའི་གནས་པ་བསྒོམ་པ་ལ་མངོན་པར་དགའ་བས་རིག་པ་ཡོད་པའི་སྦུབས་ཞི་བ་ལུང་བསྟན་པ་འདི་ལས་གཞན་མི་བྱེད་པར་བརྗོད་དེ། ཉིན་བདུན་པ་ལ་གལ་ཏེ་ཡུལ་ཡོངས་སུ་མ་བསྐྱངས་ན་དེར་ངའི་ མདུན་དུ་རང་གི་དམ་བཅས་པས་མི་གནས་པ་ཡིན་ནོ། ། དེར་ཡང་ངས་རྩི་ལྕམ་པ་སྦྲུལ་གྱི་སྙིང་དང་བཅས་པ་ལ་རིག་པ་ཡོད་པའི་སྦུབས་ཞི་བ་ལུང་བསྟན་པ་ཆེན་པོ་འདིས་བྲམས་ཤིང་སྐྱུགས་སྨན་མ་ད་ནའི་འབྲས་བུ་དག་དང་བསྲེས་ཏེ། ལྷ་རྟེན་སར་བཞག་པས་དེས་དུས་མ་ཡིན་པའི་ རླུང་དང་། ཉི་མ་དང་། སྤྲིན་དང་། མུན་པ་དང་། རྡུལ་གྱི་ཆར་པ་དག་དང་། གྲང་བ་དང་། དྲོ་བ་ཐམས་ཅད་ཞི་བར་གྱུར་ཏོ། ། ཡང་དག་པའི་དུས་ཚིགས་དང་། ཟླ་བ་དང་། ཉི་མ་དང་། གཟའ་དང་། རྒྱུ་སྐར་དང་། ཟླ་བ་དང་། ཟླ་བ་ཕྱེད་པ་དང་། ལོ་ ཡང་དག་པར་བྱུང་བར་གྱུར་ཏོ། ། རིགས་ཀྱི་བུ་དེས་ན་གང་ན་སེམས་ཅན་དགེ་མཚན་དང་། བཀྲ་ཤིས་དང་། སོ་སོར་ལྡན་པ་དག་དང་།

ལྟ་བ་ཕྱིན་ཅི་ལོག་ཏུ་གྱུར་པའི་བར་གྱི་སེམས་ཅན་དེ་དག་ལ་ངས་རིག་པ་ཡོད་པའི་སྦུབས་ཞི་བ་ལུང་བསྟན་པ་ཆེན་པོ་འདིའི་ཆོས་བསྟན་ ཏོ། ། གང་དང་གང་དུ་སེམས་ཅན་རྣམས་ཀྱིས་ཐོས་པ་དེ་དང་དེར་ཡང་ཉོན་མོངས་པ་ཆུང་ངུ་དག་ཏུ་གྱུར་ཏོ། ། དགེ་མཚན་དང་། བཀྲ་ཤིས་དང་། ལྟ་བ་ངན་པ་ཐམས་ཅད་སྤངས་ཏེ། དེ་ཕྱིན་ཆད་དགེ་བའི་ལས་དང་ཡང་དག་པར་ལྡན་པ་ལེགས་པར་ བྱས་པའི་ལས་ཀྱི་མཐའ་དང་། སྨོན་ལམ་དག་མང་བ་ངེས་པའི་ཕུང་པོ་དག་ཏུ་གྱུར་ཏོ། ། རིགས་ཀྱི་བུ་དེ་བཞིན་དུ་ངས་ཐབས་ལ་འཇུག་པའི་སྦྱོར་བ་ལ་བརྟུལ་བ་དེས་སེམས་ཅན་རྣམས་ཡོངས་སུ་སྨིན་པར་བྱས་ཤིང་ཕ་རོལ་ཏུ་ཕྱིན་པ་དྲུག་གི་བར་ཡོངས་སུ་རྫོགས་པར་བྱས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་པར་རྫོགས་པར་སངས་རྒྱས་སོ། ། རིག་པ་ཡོད་པའི་སྦུབས་ཞི་བ་ལུང་བསྟན་པ་ཆེན་པོ་འདི་ནི་དེ་ལྟར་སེམས་ཅན་རྣམས་ལ་གཅེས་སྤྲས་བྱེད་པ་ཡིན་ནོ། ། དེ་ལྟར་ཕན་ཡོན་མང་བ་ཡིན་ཏེ། སེམས་ཅན་ཐམས་ཅད་ ལ་ཕན་པར་བྱེད་པ། ནད་ཐམས་ཅད་རབ་ཏུ་ཞི་བར་བྱེད་པ། བུད་མེད་སྦྲུམ་མ་ཐམས་ཅད་སྲུང་བར་བྱེད་པ། རབ་ཏུ་ཐར་བར་བྱེད་པ། ཉོན་མོངས་པ་ཐམས་ཅད་རབ་ཏུ་ཞི་བར་བྱེད་པ། ཕུང་པོ་དང་།

ཁམས་ཐམས་ཅད་ཡོངས་སུ་ཤེས་པར་བྱེད་པ། ཆོས་ཐམས་ཅད་ རྣམ་པར་འབྱེད་པར་བྱེད་པ། ཐབས་ཐམས་ཅད་ཡང་དག་པར་སྟོན་པར་བྱེད་པ། བྱང་གྲོལ་གྱི་བདེ་བ་ཐམས་ཅད་ཡོངས་སུ་རྟོགས་པར་བྱེད་པ། སེམས་ཅན་ཐམས་ཅད་རབ་ཏུ་དད་པར་བྱེད་པ། ཆོས་ཐམས་ཅད་ཀྱི་བདེ་བ་ལ་འཇུག་པར་བྱེད་པ། བདུད་དང་ཕས་ཀྱི་རྒོལ་བ་ ཐམས་ཅད་ཆོས་དང་འཐུན་པས་ཚར་གཅོད་པར་བྱེད་པ། བདུད་ཀྱི་ཡུལ་ཐམས་ཅད་ངེས་པར་འདུལ་བར་བྱེད་པ་ཡིན་ནོ། ། རིགས་ཀྱི་བུ་རིག་པ་ཡོད་པའི་སྦུབས་ཞི་བ་ལུང་བསྟན་པ་ཆེན་པོ་འདི་ནི་བདུད་རྣམས་ཚར་གཅོད་པར་བྱེད་ཅིང་ཉོན་མོངས་པ་རྣམས་ཕམ་པར་བྱེད་པ་ཡིན་ཏེ། ལྷ་རྣམས་ དགའ་བར་བྱེད་པ། གནོད་སྦྱིན་རྣམས་ཡང་དག་པར་མགུ་བར་བྱེད་པ། ལྷ་མ་ཡིན་རྣམས་རྣམ་པར་འཇོམས་པར་བྱེད་པ། ནམ་མཁའ་ལྡིང་རྣམས་དངང་བར་བྱེད་པ། མི་འམ་ཅི་རྣམས་དད་པར་བྱེད་པ། ལྟོ་འཕྱེ་ཆེན་པོ་རྣམས་རྒྱབ་ཀྱིས་ཕྱོགས་པར་བྱེད་པ། འཐབ་པ་དང་། འཐབ་མོ་དང་། མུ་གེ་དང་། འཆི་བ་དང་། ནད་དང་། ཕ་རོལ་གྱི་དམག་ཚོགས་དང་། དུས་མ་ཡིན་པའི་རླུང་དང་། ཆར་པ་དང་། ནད་ཐམས་ཅད་རྣམ་པར་ཞི་བར་བྱེད་པ། གྲང་བ་དང་། དྲོ་བ་དང་། ཁ་བ་དང་། ཚ་བ་དང་། རྩུབ་པ་དང་། ཧྲུད་ཧྲུད་པོ་དང་།

རེག་པར་ དཀའ་བའི་དངོས་པོ་རྣམས་རབ་ཏུ་ཞི་བར་བྱེད་པ། ཆོས་ཐམས་ཅད་ཀྱི་ཆོས་ཀྱི་ཚུལ་འབར་བར་བྱེད་པ། སངས་རྒྱས་ཀྱི་བསྟན་པ་སྟོན་པར་བྱེད་པ། དཀོན་མཆོག་གསུམ་གྱི་གདུང་རྒྱུན་མི་འཆད་པར་བྱེད་པ། འཁོར་བས་སྐྲག་པ་རྣམས་དབུགས་འབྱིན་པར་བྱེད་པ། ཟད་པ་ ཤེས་པ་སྐྱེད་པར་བྱེད་པ། མི་སྐྱེ་བ་ཤེས་པ་རང་གི་མངོན་སུམ་དུ་བྱེད་པ། མ་རིག་པའི་མུན་པའི་ཕུང་པོ་ཐམས་ཅད་རབ་ཏུ་འཇིག་པར་བྱེད་པ། སྡུག་བསྔལ་གྱི་ཁུར་འདོར་བར་བྱེད་པ་ཡིན་ནོ། ། རིག་པ་ཡོད་པའི་སྦུབས་ཞི་བ་ལུང་བསྟན་པ་ཆེན་པོ་འདི་ཡིན་ཏེ། ཏད་ཡ་ཐཱ། མ་ནཱ་ཀྵ། ཨ་བཱ་ཀྵ། གྷ་སཱ་ཀྵ། ཛ་ནེ་ཀྵ། མརྨ་ནཱ་ཀྵ། ཀྵ་བཱ་ཀྵ། མ་ཎ་ཌཱ་ཀྵ། ན་ཊཱ་ཀྵ། ན་ད་ར་ཧུ། བི་ས་ནཱ་ད། ཁ་ག་ནཱ་ད། ཨ་ཏ་ན་ཊ། ཀུ་ན་ཊ། པ་རི་ཀུ་ན་ཊ། ནཱ་ཊ་ནཱ་ཊ། པ་རི་ཀ་ནཱ་ཊ། ཨུད་ཏ་ར་ནཱ་ཊ། བི་ནཱ་ཊ། ཀུཉྫ་ནཱ་ཊ། ཙ་བཱཾ་བ་ར་ནཱ་ཊ། ཁ་ གྷ་མ་བྷ་ནཱ་ཊ། པུ་ཤྐར་ནཱ་ཊ། སིང་ཧ་རུ་དྲ་ནཱ་ཊ། ས་མ་ལ་ནཱ་ཊ། ཤི་རི་ཀུ་ས་ཀླཽ་ནཱ་ཊ། ཏ་ལ་མ་རུ་ཏ་ཁ་བ། ཏེ་ཧུ་ཀྵ་བ་ཏི་རཀྵ་དཱ་མ་ར་ཛུ་བ་ཧ། ན་པུ་ཏི་ས་ན་ཏི་ར་ན་ཛ་བ། ཨ་མོ་ཧོ་ར་ག་ཛ་ལ། ཨ་ཏྲི་མཱ། ཨ་ཏྲི་ནཱ། ར་བ། ཨ་ཏྲི་ནཱ་ཀྵ། ཨ་བ་ཧཱ། མཱརྒ་ཏྲི་ནཱ་ཀྵ།

ཨེ་ ཥ་ཨེ་བ་ན་ཏོ་དུཿཁ་སྱ་སྭཱ་ཧཱ། བཅོམ་ལྡན་འདས་ཀྱིས་བསྟན་པ་འདི་བསྟན་པ་ན་འཁོར་དེར་སྲོག་ཆགས་བྱེ་བ་ཕྲག་དྲུག་ཅུ་ནི་རྗེས་སུ་འཐུན་པའི་བཟོད་པ་ཐོབ་པར་གྱུར་ཏོ། ། དཀྲིགས་པ་ཕྲག་དྲུག་ཅུ་དག་ཀྱང་སྐྱོན་མེད་པ་ལ་ཞུགས་པར་གྱུར་ཏོ། ། རིགས་ཀྱི་བུ་རིག་པ་ཡོད་པའི་ སྦུབས་ཞི་བ་ལུང་བསྟན་པ་ཆེན་པོ་འདི་དེ་བཞིན་གཤེགས་པ་ཤཱཀྱ་ཐུབ་པ་ལ་ངས་ཁྱོད་ཀྱི་ལག་ནས་བསྐུར་ཏོ། ། དེར་ཡང་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་ཟད་པར་འགྱུར་བའི་གཟུངས་སྔགས་ ལ་ང་དད་པ་སྦྱིན་པར་མཛད་དོ། ། རིག་པ་ཡོད་པའི་སྦུབས་ཞི་བ་འདི་ལོང་ལ་སངས་རྒྱས་ཀྱི་ཞིང་མི་མཇེད་དེར་སོང་ཤིག ། ངའི་བཀས་དེ་བཞིན་གཤེགས་པ་ཤཱཀྱ་ཐུབ་པ་ལ་གནོད་པ་ཆུང་ངམ། བསྐྱོད་པ་ཡང་ངམ། བདེ་བ་ལ་རེག་པར་གནས་སམ་ཞེས་ཀྱང་ ཞུས་ཤིག ། འདི་སྐད་དུ་བྱང་ཕྱོགས་ན་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གང་གཱའི་ཀླུང་བརྒྱད་ཅུའི་བྱེ་མ་སྙེད་འདས་པ་དེ་ན་སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པ་སྒྲ་ཐམས་ཅད་ཡང་དག་པར་འཕགས་པ་ཞེས་བྱ་བ་ཡོད་དེ།

སངས་རྒྱས་ཀྱི་ཞིང་དེ་ན་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་མེ་ཏོག་གི་སྙིང་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། ། དེ་བཞིན་གཤེགས་པ་དེས་སངས་རྒྱས་ཀྱི་ཞིང་དེ་ནས་བཅོམ་ལྡན་འདས་ལ་ཡོངས་སུ་ཞུ་བའི་སླད་དུ་བདག་མངགས་པ་ ལགས་ན་བཙུན་པ་བཅོམ་ལྡན་འདས་ཅི་བསྙུང་བ་མི་མངའ་ལགས་སམ། གནོད་པ་ཆུང་ལགས་སམ། ཁྱོད་ཀྱི་འཁོར་བྲོ་འཚལ་བ་དག་མ་མཆིས་ལགས་སམ། གནོད་པ་དག་ཆུང་ལགས་སམ། དམ་པའི་ཆོས་ཉན་པར་འཚལ་བ་དག་ལགས་སམ། ཇི་ལྟར་ཆོས་ཐོས་ པ་བཞིན་དུ་ཆོས་དེ་ལ་ནན་ཏན་སྙིང་པོར་བགྱིད་པ་དག་ལགས་སམ། ཆོས་ཀྱིས་གནས་པ་དག་གིས་གནས་པར་བགྱིད་པ་ལགས་སམ། ཁྱོད་ཀྱི་སངས་རྒྱས་ཀྱི་ཞིང་འདི་ན་བདུད་ཀྱི་ཡུལ་དང་། ཀླུའི་ཡུལ་བཅོམ་ལགས་སམ། ཁྱོད་ཀྱི་སངས་རྒྱས་ཀྱི་ཡུལ་གཅིག་པུ་ལགས་ སམ། འདི་ན་ཐོགས་པ་མ་མཆིས་པར་ཆོས་ཀྱི་འཁོར་ལོ་རབ་ཏུ་བསྐོར་ལགས་སམ།

གང་སུ་དག་སངས་རྒྱས་ཀྱི་ཞིང་འདིར་འཁོར་ལོ་བསྐོར་བར་མཛད་པ་དེ་དག་གི་ཆེད་དུ་དེ་བཞིན་གཤེགས་པ་དཔལ་མེ་ཏོག་གི་སྙིང་པོ་དེས་འདིར་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་ རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་འབྱང་བའི་གཟུངས་སྔགས་ལ་དད་པ་སྩོལ་བར་མཛད་ཅིང་དེ་ནས་རིག་པ་ཆེན་པོ་ཡོད་པའི་སྦུ་བས་ཞི་བ་ལུང་བསྟན་པ་ཆེན་པོ་མཐུ་ཆེ་བ། ཕན་ཡོན་ཆེ་བ་འདི་བསྐུར་ལགས་ཏེ། སེམས་ཅན་ཐམས་ཅད་ལ་ཕན་ པར་བགྱིད་པ། ནད་ཐམས་ཅད་རབ་ཏུ་ཞི་བར་བགྱིད་པ། ཉོན་མོངས་པ་ཐམས་ཅད་རབ་ཏུ་ཞི་བར་བགྱིད་པ་ཞེས་བྱ་བ་ནས། སྡུག་བསྔལ་གྱི་ཁུར་འདོར་བར་བགྱིད་པ་ཞེས་བྱ་བའི་བར་རིག་པ་ཡོད་པའི་སྦུབས་ཞི་བ་ལུང་བསྟན་པ་ཆེན་པོ་འདི་བསྐུར་ལགས་སོ་ཞེས་ཀྱང་གསོལ་ ཅིག ། དེ་ན་ཐམས་ཅད་དང་ལྡན་པའི་འཁོར་དེ་ངོ་མཚར་ཐོབ་ཅིང་རྨད་དུ་བྱུང་བ་ཐོབ་ནས་འདི་སྐད་ཅེས་གསོལ་ཏོ། ། སངས་རྒྱས་བཅོམ་ལྡན་འདས་རྣམས་ཀྱི་ཆོས་ཐམས་ཅད་ལ་མ་ཐོགས་པའི་ཡེ་ཤེས་དང་གཟིགས་པ་ནི་ངོ་མཚར་ཏོ། ། མཆོག་ཏུ་ངོ་མཚར་ཏོ། །

དེ་ལྟ་ ལགས་པས་ད་ལྟར་དེ་བཞིན་གཤེགས་པས་བདག་ཅག་ལ་མངོན་མ་ཐོས་པ་འདི་ལྟར་ཟབ་པའི་རིག་པ་ཡོད་པའི་སྦུབས་ཞི་བ་ལུང་བསྟན་པ་ཆེན་པོ་སེམས་ཅན་ཐམས་ཅད་ལ་ཕན་པར་བྱེད་པ་འདི་ཁོ་ན་བསྟན་ཏོ། ། གང་ལ་ཡོན་ཏན་འདི་ལྟ་བུ་གྲངས་མེད་དཔག་ཏུ་མེད་པ་དེ་དག་ མཆིས་པ་འདི་ལ་མཁས་པ་བྱང་ཆུབ་ཚོལ་བར་བྱེད་པ་སུ་ཞིག་མངོན་པར་བརྩོན་པར་མི་བགྱིད། དེ་ནས་བྱང་ཆུབ་སེམས་དཔའ་ནམ་མཁའི་སྙིང་པོས་འདི་སྐད་ཅེས་གསོལ་ཏོ། ། སེམས་ཅན་གང་སུ་དག་འཁོར་བས་སྐྲག་ཅིང་བྱང་གྲོལ་གྱི་བདེ་བ་མངོན་པར་འཚལ་བ་ནི་ བཅོམ་ལྡན་འདས་ཀྱི་མཚན་ཡོངས་སུ་བསྒྲགས་པ་དང་རིག་པ་མཆིས་པའི་སྦུབས་ཞི་བའི་གཟུངས་སྔགས་ཀྱི་མིང་ཡོངས་སུ་བསྒྲགས་པ་ན་དགའ་བ་དང་། མཆོག་ཏུ་དགའ་བ་དང་། གུས་པར་སེམས་ཅན་རྣམས་ཀྱི་རྙེད་པ་ཆེན་པོ་དང་། དགེ་བའི་ཕྱོགས་རྣམ་པར་འཕེལ་ བར་འགྱུར་ལགས་སོ། ། དེ་ནས་དེ་བཞིན་གཤེགས་པ་དཔལ་མེ་ཏོག་གི་སྙིང་པོས་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་དེ་དེ་བཞིན་ནོ། ། ཁྱོད་ཀྱིས་ཇི་སྐད་སྨྲས་པ་དེ་བཞིན་ཏེ། རིགས་ཀྱི་བུ་ང་བྱང་ཆུབ་སེམས་དཔའ་གྱུར་ཏེ་བརྩོན་པ་འདིས་སྤྱད་པ་སྤྱོད་པ་ན་སྨོན་ ལམ་འདི་ལྟ་བུ་བཏབ་བོ། །

བདག་བྱང་ཆུབ་ཐོབ་ནས་སེམས་ཅན་གང་སུ་དག་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ན་སྦྱིན་པ་ལ་བརྩོན་པའི་བསམ་པ་ཅན་ཞེས་བྱ་བ་ནས། ཤེས་རབ་ལ་བརྩོན་པའི་བསམ་པ་ཅན་ཞེས་བྱ་བའི་བར་དག་གིས་བདག་གི་མིང་སྒྲོགས་ པར་བྱེད་ཅིང་སེམས་ཅན་ཐམས་ཅད་ཀྱིས་སེམས་པར་བྱེད་ན་གལ་ཏེ་དེ་དག་ལ་ལྷ་དང་ལྷ་མ་ཡིན་དུ་བཅས་པའི་འཇིག་རྟེན་ན་སེམས་ཅན་ལ་ལ་ཕ་རོལ་ཏུ་ཕྱིན་པ་དེ་དང་དེ་དག་གི་བར་ཆད་བྱེད་པར་ནུས་པ་ཞིག་ཡོད་ན་སེམས་ཅན་དེ་དག་གི་དགེ་བའི་ཕྱོགས་འཕེལ་བ་བརྒྱ་ སྟོང་དུ་མར་གྱུར་ཅིག ། སྔོན་གྱི་ལས་ཀྱི་འབྲས་བུའི་རྒྱུ་ནི་མ་གཏོགས་སོ། ། བདག་ཀྱང་རེ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མ་གྱུར་ཅིག ། གང་ཡང་བུད་མེད་བུ་ལ་མངོན་པར་དགའ་བ་ཞེས་བྱ་བ་ནས། བུའི་ཁུར་ གྱིས་སྐྱོ་བ་ཞེས་བྱ་བའི་བར་དང་། གང་བུད་མེད་སྦྲུམ་པ་ཞེས་བྱ་བའི་བར་བདག་ལ་ཕྱག་འཚལ་བར་བྱེད་ཅིང་། སེམས་ཅན་ཐམས་ཅད་ཀྱིས་དགའ་བ་དང་། གུས་པ་དང་། དད་པས་བདག་གི་མིང་ཡོངས་སུ་སྒྲོགས་པར་བྱེད་ལ། གལ་ཏེ་མའམ་མངལ་ན་ཡོད་པ་དེ་ལ་ མིའམ་མི་མ་ཡིན་པ་སྡང་བའི་སེམས་ཀྱིས་རྣམ་པར་ཐོ་འཚམ་པར་བྱེད་དམ། སྨན་དང་།

གསང་སྔགས་ཀྱི་སྦྱོར་བས་ཀྱང་རུང་སྟེ། ལུས་ཀུན་ཏུ་འཁྲུག་པར་བྱེད་དམ། སེམས་ཀུན་ཏུ་འཁྲུག་པར་བྱེད་དམ་ཞེས་བྱ་བ་ནས་བཙས་པ་ཙམ་གྱི་བར་ལ་ཡང་ཐ་ན་ཡུད་ཙམ་གཅིག་ ཙམ་ཡང་རྣམ་པར་ཐོ་འཚམ་པར་བྱེད་ན། བདག་རེ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མ་གྱུར་ཅིག་ཅེས་སྔོན་ང་བྱང་ཆུབ་སེམས་དཔར་གྱུར་པའི་སྨོན་ལམ་དེ་ལྟ་བུ་བཏབ་བོ། ། དེ་བཞིན་དུ་ད་ལྟར་ཡང་སེམས་ཅན་གང་དག་ སངས་རྒྱས་ཀྱི་ཞིང་ཐམས་ཅད་ན་སྡུག་བསྔལ་དེ་ལྟ་བུས་གཟིར་བ་དག་ཀྱང་ཞེས་བྱ་བ་ནས། ཇི་ལྟར་སྔར་བསྟན་པ་བཞིན་སེམས་ཅན་ཐམས་ཅད་ཀྱིས་དགའ་བ་དང་། གུས་པ་དང་། དང་བས་བདག་གི་མིང་ཡོངས་སུ་སྒྲོགས་པར་བྱེད་པ་ཐམས་ཅད་སྡུག་བསྔལ་དེ་དག་ལས་ཡོངས་ སུ་གྲོལ་བར་འགྱུར་ཏེ་གཞན་དུ་མ་ཡིན་ནོ། ། སྦྱངས་པ་མ་ཡིན་ན་སྔོན་གྱི་ལས་ཀྱི་འབྲས་བུའི་རྒྱུ་ནི་མ་གཏོགས་སོ། ། ། ། འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་ལྔ་པ། དེས་འདི་སྐད་ཅེས་གསོལ་ཏོ། ། བཙུན་ པ་བཅོམ་ལྡན་འདས་སངས་རྒྱས་ཀྱི་ཞིང་མི་མཇེད་ནི་ངོ་མཚར་ལགས་ཏེ། དེ་ན་སེམས་ཅན་རྣམས་མཆོག་ཏུ་སྡང་བ། གཟུ་ལུམས་ཅན།

རྩུབ་པ། ཕྲག་དོག་དང་ལྡན་པ། སྙིང་བརྩེ་བ་མ་མཆིས་པ། བགྱིས་པ་མི་གཟོ་བ། ཚིག་རྩུབ་པོར་སྨྲ་བ། ལོག་པར་ལྟ་བ་ དག་ལགས་པས་དེར་ཁ་ཅིག་གིས་བདག་ལ་རྣམ་པར་ཐོ་བཙམས་ན་མི་རུང་སྟེ། བདག་མཆིས་པས་ཅི་ལ་ཡང་མི་སྨན་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདི་ནི་གནས་མ་ཡིན་ཞིང་གོ་སྐབས་མེད་དོ། ། སུས་དམིགས་པ་མེད་པའི་ཚངས་ པའི་གནས་པ་ལེགས་པར་བསྒོམས་ཤིང་ལེགས་པར་ཡིད་ལ་བྱས་པར་གྱུར་པ་དེ་ལ་ནི་བདུད་བྱེ་བས་ཀྱང་རྣམ་པར་ཐོ་འཚམ་པའམ། བར་ཆད་བྱེད་པར་ནུས་པ་འདི་ནི་གནས་མེད་དོ། ། རིགས་ཀྱི་བུ་ཁྱོད་ཀྱིས་ཡུན་རིང་པོ་ནས་དམིགས་པ་མེད་པའི་ཚངས་པའི་གནས་པ་ཤིན་ཏུ་ བསྒོམས་ཤིང་ལེགས་པར་ཡིད་ལ་བྱས་ཟིན་གྱིས་མ་འཇིགས་ཤིག ། རིགས་ཀྱི་བུ་ཁྱོད་ལ་གསང་སྔགས་གང་དག་གིས་སྡང་བ་ཐམས་ཅད་དད་པར་འགྱུར་བ་དང་། རྨོངས་པར་འགྱུར་བ་དང་། གང་གིས་བཟོད་པ་དང་། དྲན་པ་དང་། རབ་ཏུ་དང་བ་ཐོབ་པར་བྱེད་པའི་གཟུངས་ སྔགས་དམིགས་པ་མེད་པའི་ཚངས་པའི་གནས་པའི་རྒྱུ་འཐུན་པ་བྱམས་པ་ཆེན་པོ་སྦྱིན་པར་མཛད་དོ། ། ཏད་ཡ་ཐཱ། བོ་བྲི་ཧ། བུ་བུ་ལ། ཨི་ལ་བ་ར། ཨི་ལ་ས་ཧ། ཧ་ཊྱ་ཊྱ་ག་ག་ནཱ་ཀྵ། ཤ་མ་ཤ་མ། མི་ཏྲ་མི་ཏྲ།

ཙཀྲ་བར་ཏི་ཏི་ལེ། སཱ་ག་ར་ཏི་ལེ། དུརྦྷ་ལི། ཧི་ཧི་ལེ། ཧ་བ་ཧེ་ན་རཱ་ཛ་ནེ། ཡ་བ་ན་མི་ཏྲེ། ཀྵཱ་ན་ཏི་མི་ཏྲེ། མི་ཏྲ་རླ་མེ། མི་ཏྲ་ཁ་གྷ། སརྦ་ས་ཏོ་ཛ་མི་ཏྲེ། སརྦ་ཀྲ་མ་མི་ཏྲེ། མ་ན་བརྟ་མི་ཏྲེ། དྷི་ཏི་ཤ་ར་མི་ཏྲེ་སྭཱ་ཧཱ། རིགས་ཀྱི་བུ་སྡང་བ་ཞི་བར་བྱེད་པ་དང་། རྨོངས་པར་བྱེད་པའི་གསང་སྔགས་ཀྱི་གཟུངས་སྔགས་ འདིས་ཙམ་པ་ཀའི་འབྲུ་མར་ལ་ལན་བདུན་བཟླས་བརྗོད་བྱས་པས་ལག་པ་གཉིས་བསྐུས་ན་སྡང་བ་ཐམས་ཅད་དད་པར་བྱེད། རྨོངས་པར་བྱེད་ཅིང་སྡང་བའི་སྦྲུལ་དག་དང་། སྡང་བའི་གནོད་སྦྱིན་དང་། གྲུལ་བུམ་དང་། སྲུལ་པོ་དང་། བདུད་བྱེ་བ་བརྒྱ་སྟོང་ཡང་རུང་སྟེ། སྡང་ བའི་སེམས་དང་ལྡན་པའི་སེམས་ཅན་དེ་དག་གིས་ཅི་ཡང་བྱེད་པར་མི་ནུས་སོ། ། གལ་ཏེ་སྡང་བའི་སེམས་དང་ལྡན་པ་ཐམས་ཅད་ཀྱིས་གླིང་བཞི་པ་གང་བར་གྱུར་ཀྱང་སྐྱོར་ཆུ་གཅིག་གིས་ཐམས་ཅད་དེའི་མོད་ཁོ་ན་ལ་མེད་པར་འགྱུར་རོ། ། གལ་ཏེ་ཆུ་རྙོག་པ་ ཅན་གྱིས་རྒྱ་མཚོ་བཞི་ཡོངས་སུ་གང་བར་གྱུར་ཀྱང་རུང་། སྐྱོར་ཆུ་གཅིག་ཁོ་ནས་རབ་ཏུ་དང་བར་བྱེད་དེ། འདི་ལ་ཐེ་ཙོམ་མེད་ཀྱིས་ལོང་ལ་འཇིག་རྟེན་གྱི་ཁམས་མི་མཇེད་དུ་སོང་ཤིག །

ཡང་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པས་ ཚིག་འཐུན་པར་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་བདག་ཅག་ཀྱང་དེ་བཞིན་གཤེགས་པ་ཤཱཀྱ་ཐུབ་པ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བ་དང་། འདུས་པ་ཆེན་པོ་བལྟ་བ་དང་། ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་འབྱང་བའི་གཟུངས་སྔགས་དེ་ཡང་མཉན་པར་འཚལ་ལགས་ན། བཙུན་པ་བཅོམ་ལྡན་འདས་གལ་ཏེ་དེར་བདག་ཀྱང་མཆིར་གནང་བ་ལྟ་ན་སངས་རྒྱས་ཀྱི་ཞིང་མི་མཇེད་དུ་བདག་ཅག་མཆི་ལགས་ སོ། ། དེ་ནས་དེ་དག་ལ་བཅོམ་ལྡན་འདས་དེ་བཞིན་གཤེགས་པ་དཔལ་མེ་ཏོག་གི་སྙིང་པོ་དེས་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་དག་ཁྱེད་ཐམས་ཅད་སོ་སོ་ནས་གླིང་བཞི་པའི་འཁོར་ལོས་སྒྱུར་བའི་ཆ་བྱད་དང་། རྟགས་དང་། དབྱིབས་དང་། ཡོ་བྱད་དང་། སྤྱོད་ལམ་གྱིས་ལྷན་ཅིག་འཐུན་པར་དེང་ཤིག ། དེ་ནས་བྱང་ཆུབ་སེམས་དཔའ་བྱེ་བ་ཕྲག་བརྒྱད་ཅུ་པོ་དེ་དག་ཐམས་ཅད་གླིང་བཞི་པའི་འཁོར་ལོས་སྒྱུར་བའི་ཆ་བྱད་དང་། རྟགས་དང་། དབྱིབས་དང་། ཡོ་བྱད་དང་།

སྤྱོད་ལམ་མངོན་པར་སྤྲུལ་ནས་བྱང་ཆུབ་སེམས་དཔའ་ ནམ་མཁའི་སྙིང་པོ་ལ་སོགས་པ་ཐམས་ཅད་དེ་བཞིན་གཤེགས་པ་དཔལ་མེ་ཏོག་གི་སྙིང་པོའི་ཞབས་གཉིས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས་ནམ་མཁའ་ལ་འཁོད་དོ། ། བྱང་ཆུབ་སེམས་དཔའ་སེམས་དཔའ་ཆེན་པོ་རེ་རེས་ཀྱང་རིན་པོ་ཆེ་ལས་བྱས་ པའི་པད་མ་འདབ་མ་སྟོང་པ་བདུན་བདུན་དང་། དཔུང་གི་ཚོགས་ཡན་ལག་བཞི་པ་ཡང་མངོན་པར་སྤྲུལ་ཏོ། ། སྤྱོད་ལམ་དེ་ལྟ་བུས་དེ་ནས་ཆས་ཏེ། དེ་དག་ཐམས་ཅད་སྐད་ཅིག་ཐང་ཅིག་གཅིག་གིས་སངས་རྒྱས་ཀྱི་ཞིང་མི་མཇེད་འདིར་འཁོད་དེ། བཅོམ་ལྡན་འདས་དེ་བཞིན་ གཤེགས་པ་ཤཱཀྱ་ཐུབ་པ་དང་། བྱང་ཆུབ་སེམས་དཔའ་རྣམས་ལ་མཆོད་པའི་ལས་བྱ་བའི་ཕྱིར་སངས་རྒྱས་ཀྱི་ཞིང་མི་མཇེད་ཐམས་ཅད་དུ་ཁ་ཅིག་གིས་ནི་གསེར་གྱི་ཕྱེ་མའི་ཆར་མངོན་པར་རབ་ཏུ་ཕབ་བོ། ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དང་། བྱང་ཆུབ་ སེམས་དཔའ་རྣམས་ལ་མཆོད་པའི་ལས་བྱ་བའི་ཕྱིར་ཁ་ཅིག་གིས་ནི་དངུལ་གྱི་ཕྱེ་མའི་ཆར་མངོན་པར་རབ་ཏུ་ཕབ་བོ། ། ཁ་ཅིག་གིས་ནི་སྤོས་ཀྱི་ཕྱེ་མའི་ཆར་མངོན་པར་རབ་ཏུ་ཕབ་བོ། ། ཁ་ཅིག་གིས་ནི་མུ་ཏིག་གི་ཆར་མངོན་པར་རབ་ཏུ་ཕབ་བོ། །

ཁ་ཅིག་གིས་ནི་གསེར་སྐུད་དག་མངོན་པར་ རབ་ཏུ་ཕབ་བོ། ། ཁ་ཅིག་གིས་ནི་མུ་ཏིག་གི་དོ་ཤལ་དག་མངོན་པར་རབ་ཏུ་ཕབ་བོ། ། ཁ་ཅིག་གིས་ནི་དཔུང་རྒྱན་གྱི་རྒྱན་དག་མངོན་པར་རབ་ཏུ་ཕབ་བོ། ། ཁ་ཅིག་གིས་ནི་རས་དང་། རས་བཅོས་བུ་དང་། གདུགས་དང་། རྒྱལ་མཚན་དང་། བ་དན་གྱི་ཆར་མངོན་པར་ རབ་ཏུ་ཕབ་སྟེ། དེ་དག་ཐམས་ཅད་ཀྱིས་སངས་རྒྱས་ཀྱི་ཞིང་མི་མཇེད་འདི་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་པར་གྱུར་ཏོ། ། ཐེག་པ་ཆེན་པོ་འདུས་པ་ཆེན་པོའི་མདོ་ཉི་མའི་སྙིང་པོའི་ལེའུ་ལས། ཕོ་ཉའི་ལེའུ་སྟེ་གཉིས་པ་རྫོགས་སོ། ། ། ། རྒྱལ་པོ་གཟུགས་ཅན་སྙིང་པོས་སྔོན་མ་མཐོང་བ་ཚངས་པ་ཆེན་པོ་དང་། བརྒྱ་བྱིན་དང་། སྲེད་མེད་ཀྱི་བུ་དང་། གླིང་བཞི་པའི་འཁོར་ལོས་སྒྱུར་བ་གྲངས་མེད་དཔག་ཏུ་མེད་པ་མཐོང་ནས་མཆོག་ཏུ་ངོ་མཚར་དུ་གྱུར་ཏེ། སྟན་ལས་ལངས་ནས་ཧ་ཅང་ཡང་ཐག་མི་རིང་བར་འདུག་ གོ། ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཕོ་ཉ་བཞི་པོ་དེ་དག་འཁོར་དང་བཅས་ཏེ། དེ་བཞིན་གཤེགས་པ་ཤཱཀྱ་ཐུབ་པ་ག་ལ་བ་དེ་ལོགས་སུ་ཐལ་མོ་སྦྱར་བ་རབ་ཏུ་བཏུད་ནས་འཁོད་དོ། །

དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ ཉི་མའི་ཤུགས་ཀྱི་སྙིང་པོས་ཀྱང་དེ་བཞིན་གཤེགས་པ་ཤཱཀྱ་ཐུབ་པ་ག་ལ་བ་དེ་ལོགས་སུ་མེ་ཏོག་ཙམ་པ་ཀའི་ཕྲེང་བ་དག་གཏོར་ཏེ་དེའི་ཚེ་ཚིགས་སུ་བཅད་པ་འདི་དག་ཀྱང་གསོལ་ཏོ། ། རྐང་གཉིས་དམ་པ་འགྲོ་བའི་སྣང་བ་འཛིན། ། ལྟ་བ་ཉམས་པའི་འགྲོ་བའི་ལམ་སྩོལ་ བ། ། མཉམ་ཉིད་ལྡན་པ་འགྲོ་ལ་ཕན་མཛད་ཁྱོད། ། བདུད་དང་ཀླུ་རྣམས་མྱུར་དུ་འདུལ་མཛད་ཁྱོད། ། གདུལ་དཀའ་འགྲོ་བ་ཉོན་མོངས་ཐར་མཛད་ཁྱོད། ། ཆོས་འདིར་སྣང་བ་ཡུན་རིང་འབར་མཛད་ཁྱོད། ། བསམ་གཏན་སྒོ་འདི་དག་གིས་སྐྱེས་མཆོག་ལྡན། ། ཞིང་ མང་ཐམས་ཅད་ཤིན་ཏུ་མཛེས་པར་མཛད། ། རྒྱལ་བ་སྐྱེས་མཆོག་སྐྱེ་བོ་མཁས་དགུ་ལ། ། རྒྱང་རིང་ནས་ནི་ཞིང་འདི་བརྗོད་པར་མཛད། ། འགྲོ་བའི་ཆོས་ཀྱི་དུས་འདི་དཀའ་བ་སྟེ། ། དེ་མཐོང་བདག་འདིར་ཆོས་ཆེད་ཚོགས་སུ་མཆིས། ། འགྲོ་བ་མིར་སྐྱེ་བ་ནི་རྙེད་པར་དཀའ། ། ཤིན་ཏུ་རིང་ནས་མིར་སྐྱེ་རྙེད་ནས་ཀྱང་། ། ཉོན་མོངས་ཆེན་པོས་ཟིན་གྱུར་ཐུབ་ཁྱོད་ནི། ། རབ་མྱུར་ཉོན་མོངས་དྲ་བ་གཅོད་མཛད་ལགས། ། སྡུག་བསྔལ་མཚོ་དང་ཉོན་མོངས་ཀླུང་ལྷུང་བ། ། ཁྱོད་ཀྱིས་གླང་ཆེན་ལྟ་བུར་འགྲོ་བ་བསྒྲལ། །

རྒྱལ་བས་ཕན་ཚུན་བདག་ཅག་ཕོ་ཉར་ མངགས། ། ཁྱོད་ཀྱིས་ཆོས་ཀྱི་གཏེར་ལ་ཡི་རང་མཛད། ། བཙུན་པ་བཅོམ་ལྡན་འདས་ཤར་ཕྱོགས་ན་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གང་གཱའི་ཀླུང་དཔག་ཏུ་མ་མཆིས་པའི་བྱེ་མ་སྙེད་འདས་པ་དེ་ན་འཇིག་རྟེན་གྱི་ཁམས་མ་དྲོས་པ་ཞེས་བགྱི་བ་མཆིས་སོ། ། སངས་ རྒྱས་ཀྱི་ཞིང་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཙམ་པ་ཀའི་མདོག་ཅེས་བགྱི་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། ། དེ་བཞིན་གཤེགས་པ་དེས་བདག་འདིར་མངགས་ལགས་ཏེ། དེ་བཞིན་གཤེགས་པ་དེ་ཁྱོད་ཉི་མའི་སྙིང་པོའི་ ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་འབྱང་བའི་གཟུངས་སྔགས་འདི་འཆད་པ་ལ་དད་པ་སྦྱིན་པར་མཛད་ཅིང་གནོད་པ་ཆུང་ངམ། བསྐྱོད་པ་ཡང་ངམ། སྟོབས་དང་བདེ་བ་ལ་རེག་པ་ལ་གནས་སམ་ཞེས་ཀྱང་ཞུ་བར་མཛད་ ལགས་ན་བཅོམ་ལྡན་འདས་ཅི་བསྙུང་བ་མི་མངའ་ལགས་སམ། གནོད་པ་ཆུང་ལགས་སམ། ཁྱོད་ཀྱི་འཁོར་བྲོ་འཚལ་བ་མ་མཆིས་ལགས་སམ། གནོད་པ་ཆུང་ལགས་སམ། ཆོས་ཉན་པར་འཚལ་བ་དག་ལགས་སམ།

ཇི་ལྟར་ཆོས་ཐོས་པ་བཞིན་དུ་ཆོས་དེ་ལ་ནན་ཏན་ སྙིང་པོར་བགྱིད་པ་དག་ལགས་སམ། ཆོས་ཀྱིས་གནས་པས་གནས་པར་བགྱིད་པ་ལགས་སམ། ཁྱོད་ཀྱི་སངས་རྒྱས་ཀྱི་ཞིང་འདི་ན་བདུད་ཀྱི་ཡུལ་དང་ཀླུའི་ཡུལ་བཅོམ་ལགས་སམ། ཁྱོད་ཀྱི་སངས་རྒྱས་ཀྱི་ཡུལ་གཅིག་པུ་ལགས་སམ། འདི་ན་ཐོགས་པ་མ་མཆིས་པར་ འཁོར་ལོ་སྐོར་ལགས་སམ། སངས་རྒྱས་ཀྱི་ཡུལ་འདི་ན་གང་སུ་དག་འཁོར་ལོ་སྐོར་བར་འགྱུར་བ་དེ་དག་གི་དོན་དུ་དེ་བཞིན་གཤེགས་པ་ཙམ་པ་ཀའི་མདོག་དེ་ཁྱོད་དང་ཉི་མའི་སྙིང་པོའི་ཆོས་ཀྱིས་གནས་པ། ཀླུའི་ཡུལ་འཇིག་པའི་འོད་ཟེར་གྱི་ལེའུ་གཟུངས་སྔགས་འདི་ལ་དད་ པ་སྦྱིན་པར་མཛད་ལགས་སོ། ། དེ་ནས་བདེན་པ་དང་རྗེས་སུ་འཐུན་པའི་གཟུངས་སྔགས་མཐུ་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཟད་པར་བགྱིད་པ། གཟུགས་ཀྱི་འདོད་ཆགས་ཐམས་ཅད་ཟད་པར་བགྱིད་པ། གཟུགས་མེད་པའི་འདོད་ཆགས་ ཐམས་ཅད་ཟད་པར་བགྱིད་པ། ང་རྒྱལ་དང་། ལྷག་པའི་ང་རྒྱལ་དང་། ངའོ་སྙམ་པའི་ང་རྒྱལ་ཐམས་ཅད་ཟད་པར་བགྱིད་པ་འདི་ཡང་བསྐུར་ལགས་སོ་ཞེས་བྱ་བ་ཇི་ལྟར་སྔར་བཤད་པ་བཞིན་ཏེ། བདེན་པ་དང་རྗེས་སུ་འཐུན་པའི་བཟོད་པ་འདི་ནི་བདུད་རྣམས་ཚར་གཅོད་པ།

ཀླུ་ རྣམས་ཕམ་པར་བགྱིད་པ། ལྷ་རྣམས་དགའ་བར་བགྱིད་པ། གནོད་སྦྱིན་རྣམས་ཚིམ་པར་བགྱིད་པ། ལྷ་མ་ཡིན་རྣམས་རྣམ་པར་འཇོམས་པར་བགྱིད་པ། རྗེའུ་རིགས་རྣམས་དགའ་བར་བགྱིད་པ། དམངས་རིགས་རྣམས་མཆོག་ཏུ་དགའ་བར་བགྱིད་པ། བུད་མེད་རྣམས་ འདོད་ཆགས་དང་བྲལ་བར་བགྱིད་པ། མང་དུ་ཐོས་པ་རྣམས་སྐྱོ་བར་བགྱིད་པ། རྣལ་འབྱོར་སྤྱོད་པ་རྣམས་མངོན་པར་དགའ་བར་བགྱིད་པ། ནད་ཐམས་ཅད་རབ་ཏུ་ཞི་བར་བགྱིད་པ། འཐབ་པ་དང་། འཐབ་མོ་དང་། མུ་གེ་དང་། དུས་མ་ཡིན་པའི་ནད་དང་། ཕ་རོལ་ གྱི་དམག་ཚོགས་དང་། རླུང་དང་། ཆར་པ་དང་། ཆུ་བོ་དང་། གྲང་བ་དང་། དྲོ་བ་ཐམས་ཅད་རྣམ་པར་ཞི་བར་བགྱིད་པ། ཁ་བ་དང་། ཚ་བ་དང་། རོ་མི་བྲོ་བ་དང་། རྩུབ་པ་དང་། ཧྲུད་ཧྲུད་པོ་དང་། རེག་པར་དཀའ་བའི་དངོས་པོ་རྣམས་རབ་ཏུ་ཞི་ བར་བགྱིད་པ། ཆོས་ཀྱི་ཚུལ་འབར་བར་བགྱིད་པ། ཆོས་ཀྱི་ཚུལ་རྒྱུན་མི་འཆད་པར་བགྱིད་པ། སངས་རྒྱས་ཀྱི་བསྟན་པ་སྟོན་པར་བགྱིད་པ། འཁོར་བས་སྐྲག་པ་རྣམས་དབུགས་འབྱིན་པར་བགྱིད་པ། ཟད་པ་ཤེས་པ་སྐྱེ་བར་བགྱིད་པ། མི་སྐྱེ་བ་ཤེས་པ་རྟོགས་པར་བགྱིད་ པ། མ་རིག་པའི་མུན་པའི་ཕུང་པོ་ཐམས་ཅད་རབ་ཏུ་འཇོམས་པར་བགྱིད་པ།

སྡུག་བསྔལ་གྱི་ཁུར་འདོར་བར་བགྱིད་པ། སྲེད་པའི་ཀླུང་སྐེམས་པར་བགྱིད་པ་འདི་ཡང་བསྐུར་ལགས་ཏེ། ཏད་ཡ་ཐཱ། བཱ་ཡེ་བ་ཡ་པ་རི་བཱ་རེ། བ་ཧེ་བ་ཧ་པ་རི་བཱ་རེ། པྲྀ་ཐ་བི་པ་རི་བཱ་རེ། ཨ་བེ་ཨ་བ་པ་རི་བཱ་རེ། ཏེ་ཛེ་ཏེ་ཛ་པ་རི་བཱ་རེ། མ་ལེ་མ་ལ་པ་རི་བཱ་རེ། ཁ་གྷེ་ཁ་གྷ་པ་རི་བཱ་རེ། ཨཱ་ལོ་ཀེ་ཨཱ་ལོ་ཀ་པ་རི་བཱ་རེ། སྠ་མེ་སྠ་མ་པ་རི་བཱ་རེ། རཱ་ཛེ་རཱ་ཛ་པ་རི་བཱ་རེ། སི་ལི་སི་ལ་པ་རི་བཱ་རེ། ག་མེ་ག་མ་པ་རི་བཱ་རེ། ཨ་བོ་ཙ་ཨ་བོ་ཙ་པ་རི་བཱ་རེ། མ་ལ་མ་ལ་ལ་མ་ལ་མེ་ ལ་མ། རཱ་ལ་རཱ་ལ་ལ་མ། བིདྱཱ་ཛྙཱ་ན་མ་བྷུ་ཏཾ་ག་མེ། བྷུ་ཏང་ག་མ་པ་རི་བཱ་རེ། ཙཀྵུ་གྲ་ཧེ། ཙཀྵུ་གྲ་ཧ་པ་རི་བཱ་རེ། ཤོ་ཏྲ་གྲ་ཧེ། ཤོ་ཏྲ་གྲ་ཧ་པ་རི་བཱ་རེ། གྷྲཱ་ཎ་གྲ་ཧེ། གྷྲཱ་ཎ་གྲ་ཧ་པ་རི་བཱ་རེ། ཛི་ཧྭ་གྲ་ཧེ། ཛི་ཧྭ་གྲ་ཧཱ་པ་རི་བཱ་རེ། ཀཱ་ཡ་གྲ་ཧེ། ཀཱ་ཡ་གྲ་ཧ་པ་རི་བཱ་རེ། མ་ན་གྲ་ཧེ། མ་ན་གྲ་ཧ་པ་རི་བཱ་རེ། སྤར་ཤ་གྲ་ཧེ། སྤར་ཤ་གྲ་ཧ་པ་རི་བཱ་རེ། བེ་ད་ན་གྲ་ཧེ། བེ་ད་ན་གྲ་ཧ་པ་རི་བཱ་རེ། ཏྲི་ཥྞཱ་གྲ་ཧེ། ཏྲི་ཥྞཱ་གྲ་ཧ་པ་རི་བཱ་རེ། ཨུ་པཱ་དཱ་ན་གྲ་ཧེ། ཨུ་པཱ་དཱ་ན་གྲ་ཧ་པ་རི་བཱ་རེ། བྷཱ་བ་གྲ་ཧེ། བྷཱ་བ་གྲ་ཧཱ་པ་རི་བཱ་རེ།

ཛཱ་ཏི་གྲ་ཧེ། ཛཱ་ ཏི་གྲ་ཧ་པ་རི་བཱ་རེ། ཛ་ར་མ་ར་ཎ་གྲ་ཧེ། ཛ་ར་མ་ར་ཎ་གྲ་ཧཱ་པ་རི་བཱ་རེ། དུཿཁ་སན་ཏ་པཱ་གྲ་ཧེ། དུཿཁ་སན་ཏ་པཱ་གྲ་ཧ་པ་རི་བཱ་རེ། ཨཱ་རཱ་པཱ་རཱ་དྷྭ་ཛེ་གྲ་ཧེ། ཨཱ་རཱ་པཱ་རཱ་དྷྭ་ཛ་གྲ་ཧ་པ་རི་བཱ་རེ། ཨཱ་རཱ་པཱ་རཱ་དྭི་ཛ་གྲ་ཧེ། ཨཱ་རཱ་བཱ་རཱ་དྭི་ཛཾ་གྲ་ཧཱ་པ་རི་བཱ་རེ། ཨ་བརྟ་བི་བརྟ་སྱ། ཨ་བ་ར་མུ་པ་མཱ་སྭ་སྱ། བེ་ག་བི་ནི་བརྟ། ཨཱ་རྱ་ར་སྨི་ས་མ་བེ་ག་ཤཱ་ན་ཏི་སྭཱ་ཧཱ། བཙུན་པ་བཅོམ་ལྡན་འདས་དེ་བཞིན་གཤེགས་པ་ཙམ་པ་ཀའི་མདོག་དེས་བདེན་པ་དང་རྗེས་སུ་འཐུན་པའི་བཟོད་པ་བསྐུར་བ་ནི་འདི་ལགས་སོ། ། བཅོམ་ལྡན་འདས་ཀྱིས་ཀྱང་ལེགས་སོ་ ཞེས་བྱ་བ་གནང་ངོ་། ། སངས་རྒྱས་ཀྱི་ཞིང་མི་མཇེད་དུ་ཐམས་ཅད་དང་ལྡན་པའི་འཁོར་ལྷགས་པས་ཀྱང་ལེགས་སོ་ཞེས་བྱ་བ་བྱིན་ཏེ། བསམ་གཏན་ལ་སྙོམས་པར་ཞུགས་པ་དག་ནི་མ་གཏོགས་སོ། ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཉི་མའི་ ཤུགས་ཀྱི་སྙིང་པོ་ལ་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་འདིར་ང་སྟན་འདི་ཉིད་ལ་བཞུགས་བཞིན་སེམས་ཅན་རྣམས་ལ་དོན་དང་བཅས་པ། ཚིག་འབྲུ་དང་བཅས་པ། ལྷག་ཆད་མེད་པའི་བདེན་པ་དང་།

རྗེས་སུ་འཐུན་པའི་བཟོད་པ་རྒྱ་ཆེར་སྟོན་པར་ མཛད་དོ། ། རིགས་ཀྱི་བུ་དེ་བཞིན་གཤེགས་པ་ཙམ་པ་ཀའི་མདོག་གིས་གང་ཁྱོད་འདིར་འོང་བའི་ཚེ་བསྲུང་བའི་ཕྱིར་བྱིན་པ་ལུས་ཀྱི་ཁྱད་པར་ཐམས་ཅད་སྒྲུབ་པ་ཞེས་བྱ་བ་ནས། ཤིན་ཏུ་ཡོངས་སུ་མྱ་ངན་ལས་འདས་པ་སྒྲུབ་པ་ཞེས་བྱ་བའི་བར་ཉི་མའི་སྤྱན་པད་མའི་སྦུ་གུའི་ གཟུངས་སྔགས་དེ་ཁྱོད་ཀྱིས་ཀྱང་སྟོན་ཅིག ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོས་འདི་སྐད་ཅེས་གསོལ་ཏོ། ། སྱཱད་ཡ་ཐེ་དན། སིད་དྷ་མ་ཏེ། བི་ལོ་ཀ་མ་ཏེ། ཨེ་ལེ་གེ་ཏ་རི་ཤེ ། རུ་ཙེ་སུ་རུ་ཙེ། བུད་དྷེ། བི་བུད་ དྷེ། མ་ཧཱ་བུད་དྷེ། ཨུན་མད་ཏེ། ཨུན་མད་ཏ་པྲ་ཏི་ཥེ་དྷ་ནེ། ར་ག་དྷྲུ་བ་པྲ་ཏི་ཥེ་དྷ་ནེ། བིན་དུ་བིན་དུ་མ་ཏེ། ཙི་ཏ་ཙི་ཏ་བ་ཏི་ཥེ་དྷ་ནེ། ཨརྐེ་ཙན་དྲ་ཨརྡྷེ། ཧ་ཏ་ཙི་ཏི། ཧ་ཏ་ནི་རྨི། ཧ་ཏ་ཀཱ་མ་བེ་གེ ། ཧ་ཏ་པཽ་ན་བྷ་བི་ར་ཛེ། ཧ་ཏ་ཙཀྵུ་ས་མ་ཏེ། ཧ་ཏ་ བི་མ་ཏ་མུ་དྲེ། ཧ་ཏ་ཡཱ་གྷེ། ཧ་ཏ་ཡཱ་གྷེ། ཧ་ཏ་ས་མུ་དྲ་ཛ་བེ། ཧ་ཏ་བི་མ་ན་རཱ་ཛེ། ཧ་ཏ་ཧི་ཏེ། ཧ་ཏ་ཙི་ཏ་ཊེ། ཧ་ཏ་དྷརྨ་རཱ་ཛེ། ཧ་ཏ་བ་ཧུ་རཱ་ཛེ། ཧ་ཏ་བརྫ་མ་ཏི། ཧ་ཏ་ཨུ་པ་ག་མ་ཏེ། ཧ་ཏ་རོ་པ་རསྨི།

ཧ་ཏ་དྷརྨ་སིད་དྷི། ཧ་ཏ་སརྦོན་མ་ད། ཛྙཱ་ཛྙཱ་ཛྙཱ། བི་ཛྙཱ་ཛྙཱ་ཛྙཱ། སརྦ་མཱརྒ་ཛྙཱ་ཛྙཱ། ཨེ་ཥོ་ན་ད་སྃ་ས་ར་དུཿཁེ་སྭཱ་ཧཱ། བཙུན་པ་བཅོམ་ལྡན་འདས་དེ་བཞིན་གཤེགས་པ་ཙམ་པ་ཀའི་མདོག་དེས་བདག་ཆས་པའི་དུས་ཀྱི་ཚེ་བསྲུང་བའི་སླད་དུ་ཉི་མའི་སྤྱན་པད་མའི་གཟུངས་སྔགས་སྩལ་བ་ནི་འདི་ ལགས་སོ། ། དེ་ནས་བཅོམ་ལྡན་འདས་ཤཱཀྱ་ཐུབ་པས་ཚེ་དང་ལྡན་པ་སྙན་པ་ལ་བཀའ་སྩལ་པ། སྙན་པ་ཁྱོད་ཀྱིས་ཉི་མའི་སྙིང་པོའི་སྤྱན་པད་མའི་གཟུངས་སྔགས་འདི་ཟུང་ཤིག ། སྙན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ རྒྱས་རྣམས་འཇིག་རྟེན་དུ་འབྱུང་བ་རྙེད་པར་དཀའོ། ། དེ་བས་ཀྱང་ཉི་མའི་སྤྱན་པད་མའི་གཟུངས་སྔགས་འདི་ཆེས་རྙེད་པར་དཀའོ། ། རིགས་ཀྱི་བུ་དེ་བཞིན་གཤེགས་པའམ་དེ་བཞིན་གཤེགས་པའི་ཉན་ཐོས་ཀྱིས་ཀྱང་རུང་། གང་གིས་ཀྱང་རིའི་རྒྱལ་པོ་རི་རབ་ བམ། རྒྱ་མཚོ་ཆེན་པོའི་ཡོན་ཏན་དང་། ཕན་ཡོན་ནི་བརྗོད་པར་ནུས་སོ། ། ཉི་མའི་སྤྱན་པད་མའི་གཟུངས་སྔགས་འདིའི་ཡོན་ཏན་དང་ཕན་ཡོན་ནི་བསྐལ་པའམ། བསྐལ་པ་ལས་ལྷག་པར་ཡང་རུང་སྟེ་བརྗོད་པར་མི་ནུས་སོ། ། ཉི་མའི་སྤྱན་པད་མའི་ གཟུངས་སྔགས་འདི་ནི་དེ་ལྟར་ཟབ་པ་ཡིན་ནོ། །

རིགས་ཀྱི་བུ་ཁྱོད་ཀྱིས་ཉི་མའི་སྤྱན་པད་མའི་གཟུངས་སྔགས་འདི་ཟུང་ཤིག ། ཀུན་ཆུབ་པར་གྱིས་ཤིག ། འཁོར་བཞི་པོ་དེ་དག་ལ་ཡང་རྒྱས་པར་ཡང་དག་པར་རབ་ཏུ་སྟོན་ཅིག་དང་། དེར་སེམས་ཅན་རྣམས་འདོད་ པའི་འདོད་ཆགས་ཐམས་ཅད་སྤོང་བར་འགྱུར་རོ་ཞེས་བྱ་བ་ནས། ཟག་པ་ཐམས་ཅད་ཟད་པ་དང་། བྱང་གྲོལ་གྱི་བདེ་བ་དང་ལྡན་པའི་བར་དུ་ཡང་འགྱུར་རོ། ། དེ་ནས་དེའི་ཚེ་བྱང་ཆུབ་སེམས་དཔའ་སྤོས་ཀྱི་གླང་པོ་ཆེས་འདི་སྐད་ཅེས་གསོལ་ཏོ། ། ཤིང་གི་རྒྱལ་ པོའི་དྲུང་དུ་བདུད་ནི་གཅིག་པུ་ཁྱོད་ཀྱིས་བཅོམ། ། བྱང་ཆུབ་རབ་མཆོག་དམ་པ་ཡང་ནི་གཅིག་པུས་བརྙེས་པ་ལགས། ། ལྷ་དང་མི་དང་གནོད་སྦྱིན་གཅིག་པུ་ཁྱོད་ཀྱིས་དབང་དུ་མཛད། ། རྒྱལ་བ་ཉི་མ་རབ་གྲོལ་ཡེ་ཤེས་མཆོག་གི་འོད་ཟེར་ལགས། ། འདི་ན་མུ་ སྟེགས་གཞན་ནི་གཅིག་པུས་འོད་དང་བྲལ་མཛད་པ། ། འཇིག་རྟེན་ཀུན་ན་སྲིན་བུ་མེ་ཁྱེར་དག་ལ་ཉི་ལྟར་མཛེས། ། ཐུབ་པ་འདུས་ན་སེམས་ཅན་བསྒྲལ་བའི་དོན་ཀྱང་མཛད་ལགས་ཏེ། ། དཀོན་མཆོག་གསུམ་གྱི་གདུང་དང་ཆོས་ཚུལ་ཡུན་རིང་གནས་པར་མཛད། ། ཁྱོད་གཅིག་པུ་ལ་མཆོད་ཕྱིར་བྱང་ཆུབ་སེམས་དཔའ་རྣམས་ལྷགས་པ། །

དགེ་དང་བྱང་ཆུབ་ཡོངས་སུ་བཙལ་ཕྱིར་ཆོས་དོན་གཉེར་བ་ལགས། ། རྒྱལ་བ་ཁྱོད་ནི་སྡུག་བསྔལ་ཐམས་ཅད་གཅོད་པའི་ཆོས་སྟོན་པ། ། ཁྱོད་ནི་ཡེ་ཤེས་བྱང་ཆུབ་སྤྱོད་པ་རབ་མཆོག་ སྟོན་པར་མཛད། ། གཅིག་པུས་ཞི་འགྱུར་བདུད་རྩིས་སེམས་ཅན་རྣམས་ཀྱང་ཞི་མཛད་པ། ། ཡང་སྲེད་མ་མཆིས་མཛད་སླད་སྲོག་ཆགས་ཁྲག་ཁྲིག་སྒྲོལ་བ་ཁྱོད། ། ཟག་པ་ཟད་ཅིང་ལྟ་དང་བྲལ་བ་ཉོན་མོངས་སྤངས་གྱུར་པ། ། གང་ན་མྱ་ངན་བྱེད་མེད་ཞི་ བའི་གྲོང་ཁྱེར་གཤེགས་པ་ཁྱོད། ། འདི་ནི་འཇིག་རྟེན་ཀུན་ཏུ་ཁྱོད་གཅིག་སྨན་དང་མཚུངས་ལགས་ཏེ། ། རྒྱལ་བ་རྣམས་ཀྱིས་ཁྱོད་ལ་ཞུ་བའི་སླད་དུ་ཕོ་ཉར་མངགས། ། རིག་པའི་རྒྱ་མཚོ་ཐུགས་རྗེ་མཉམ་པས་གནས་པར་མཛད་པ་པོ། ། ཐུབ་པ་ཟླ་བའི་ ཆོས་དང་གསན་ནས་གཟུངས་ཀྱང་བསྐུར་བ་ལགས། ། བཙུན་པ་བཅོམ་ལྡན་འདས་ལྷོ་ཕྱོགས་ན་སངས་རྒྱས་ཀྱི་ཞིང་འདི་ནས་དཔེར་བགྱི་ན་གྲོང་ཁྱེར་རྒྱར་དཔག་ཚད་ཙམ་མཆིས་པ། བྱེ་མས་གཏམས་པ་དེ་སྙེད་ཀྱི་སངས་རྒྱས་ཀྱི་ཞིང་དག་འདས་ནས། སྙིགས་མ་ ལྔ་དང་ལྡན་པ་དེ་ན་འཇིག་རྟེན་གྱི་ཁམས་སྙིགས་མའི་རྒྱལ་མཚན་ཞེས་བགྱི་བ་མཆིས་ཏེ། དེ་ན་དེ་བཞིན་གཤེགས་པ་རི་དབང་རྒྱལ་པོ་ཞེས་བྱ་བ་བཞུགས་ཏེ།

འཚོ་ཞིང་གཞེས་ལ་ཆོས་ཀྱང་སྟོན་ཏོ། ། དེ་བཞིན་གཤེགས་པ་དེས་བདག་འདིར་མངགས་ ལགས་ཏེ། དེ་བཞིན་གཤེགས་པ་དེ་ཁྱོད་ཉི་མའི་སྙིང་པོའི་ཆོས་ཀྱིས་གནས་པ། ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ། སེམས་ཅན་རྣམས་ཀྱི་ལས་འབྱང་བའི་གཟུངས་སྔགས་འདི་འཆད་པ་ལ་དད་པ་སྦྱིན་པར་མཛད་ཅིང་གནོད་པ་ཆུང་ ངམ། བསྐྱོད་པ་ཡང་ངམ། སྟོབས་དང་བདེ་བ་ལ་རེག་པར་གནས་སམ་ཞེས་ཀྱང་ཞུ་བར་མཛད་ལགས་ན། བཙུན་པ་བཅོམ་ལྡན་འདས་ཅི་བསྙུང་བ་མི་མངའ་ལགས་སམ། གནོད་པ་ཆུང་ལགས་སམ། ཁྱོད་ཀྱི་འཁོར་བྲོ་འཚལ་བ་མ་ མཆིས་ལགས་སམ། གནོད་པ་ཆུང་ལགས་སམ། དམ་པའི་ཆོས་ཉན་པར་འཚལ་བ་དག་ལགས་སམ། ཇི་ལྟར་ཆོས་ཐོས་པ་བཞིན་དུ་ཆོས་དེ་ལ་ནན་ཏན་སྙིང་པོར་བགྱིད་པ་དག་ལགས་སམ། ཆོས་ཀྱིས་གནས་པས་གནས་པར་བགྱིད་པ་དག་ལགས་སམ། ཁྱོད་ཀྱི་སངས་རྒྱས་ཀྱི་ཞིང་འདི་ན་བདུད་ཀྱི་ཡུལ་དང་། ཀླུའི་ཡུལ་བཅོམ་ལགས་སམ། ཁྱོད་ཀྱི་སངས་རྒྱས་ཀྱི་ཡུལ་གཅིག་པུ་ལགས་སམ། འདི་ན་ཐོགས་པ་མ་མཆིས་པར་ཆོས་ཀྱི་འཁོར་ལོ་བསྐོར་ལགས་སམ།

སངས་རྒྱས་ཀྱི་ཡུལ་འདི་ན་གང་སུ་ དག་འཁོར་ལོ་སྐོར་བར་འགྱུར་བ་དེ་དག་གི་དོན་དུ་དེ་བཞིན་གཤེགས་པ་རི་དབང་རྒྱལ་པོ་དེ་ཁྱོད་དང་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་འབྱང་བའི་གཟུངས་སྔགས་འདི་ལ་དད་པ་སྦྱིན་པར་ མཛད་ལགས་སོ། ། དེ་ནས་སྟོང་པ་ཉིད་དང་རྗེས་སུ་འཐུན་པའི་གཟུངས་སྔགས་མཐུ་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཟད་པར་བགྱིད་པ། གཟུགས་ཀྱི་འདོད་ཆགས་ཐམས་ཅད་དང་། གཟུགས་མེད་པའི་འདོད་ཆགས་ཐམས་ཅད་ཟད་ པར་བགྱིད་པ། ང་རྒྱལ་དང་། ལྷག་པའི་ང་རྒྱལ་དང་། ངའོ་སྙམ་པའི་ང་རྒྱལ་ཐམས་ཅད་ཟད་པར་བགྱིད་པ་ཞེས་བགྱི་བ་ནས། ཇི་ལྟར་སྔར་བཤད་པའི་བར་དང་། སྡུག་བསྔལ་གྱི་ཁུར་འདོར་བར་བགྱིད་པའི་བར་འདི་ཡང་བསྐུར་ལགས་ཏེ། ཏད་ཡ་ཐཱ། དྷུ་ མ་ཏེ། དྷུ་མ་ཏེ། ཨཀྵི་དྷུ་མ་ཏེ། པྲ་བྷཱ་ས་དྷུ་མ་ཏེ། སརྦཱ་ཀཱ་ཤ་དྷུ་མ་ཏེ། ཨ་བཻ་ཁ་གྷ། བཻ་མེ་ཏ་ཁ་གྷ། ཨ་བཻ་ཀྵ་ཁ་གྷ། ཨ་མོ་ཧ་ཁ་གྷ། ཨ་ན་ནྱ་ཁ་གྷ། བྱཱ་བྲཱིཏྟི་ཁ་གྷ། སྃ་རུ་ཙ་ཁ་གྷ། ཨ་ནཻ་མ་ཁ་གྷ། ལོ་ཙ་ན་ཁ་གྷ། ཤི་ཁི་ཁ་གྷ། བི་ཏི་མི་ར་ཁ་གྷ། ཨུ་ཀྵོ་མ་ཁ་གྷ། ཨུ་རོ་ཁ་གྷ།

ཨཀྵི་ཁ་གྷ། ཡཱ་བད་མ་ནོ་ཁ་གྷ། རཱུ་བ་ཁ་གྷ། ཡཱ་བད་བི་ཛྙཱ་ན་ཁ་གྷ། ཙཀྵུ་དྷཱ་ཏུ་ཁ་གྷ། ཡཱ་བད་མ་ནོ་བི་ཛྙཱ་ན་དྷཱ་ཏུ་ཁ་གྷ། པྲྀ་ཐ་བཱི་དྷཱ་ཏུ་ཁ་གྷ། ཡཱ་བད་བི་ཛྙཱ་ན་དྷཱ་ཏུ་ཁ་གྷ། ཙ་ཏུ་སྨྲྀ་ཏྱུ་པ་སྠ་ན་ཁ་གྷ། ཡཱ་བད་ཨཱ་བོ་ན་ཀ་ཁ་གྷ། དུཿཁ་ཁ་གྷ། ཡཱ་བད་མཱརྒ་ཁ་གྷ། བི་པ་བ་ན། བི་ཀྵ་པ། ཨ་ནན་ས་མུ་དྲ་ནན། སརྦ་ཀཱ་ར་ནན། སརྦ་སང་སྠ་ནན། བི་ཤཱུ་པ་ནན། ཨ་ཀིན་ཙ་ན་ནན། ཀྵ་བྷ་ཀྵ། ཨི་ལེ་ཨི་ཨི་ལེ། ཨི་ཨི་ལེ་མི་ལེ་སྭཱ་ཧཱ། བཅོམ་ལྡན་འདས་དེ་བཞིན་གཤེགས་པ་རི་དབང་རྒྱལ་པོས་ཁྱོད་ལ་སྟོང་པ་ཉིད་དང་རྗེས་སུ་འཐུན་པའི་གཟུངས་སྔགས་བསྐུར་བ་ནི་འདི་ལགས་སོ། ། དེ་ནས་བཅོམ་ལྡན་འདས་ཤཱཀྱ་ཐུབ་པས་ལེགས་སོ་ཞེས་བྱ་བ་གནང་ངོ་། ། སངས་རྒྱས་ཀྱི་ཞིང་མི་མཇེད་དུ་ཐམས་ ཅད་དང་ལྡན་པའི་འཁོར་ལྷགས་པས་ཀྱང་ལེགས་སོ་ཞེས་བྱ་བ་བྱིན་ཏེ། བསམ་གཏན་དང་ལྡན་པ་དག་ནི་མ་གཏོགས་སོ། ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་ཆེ་ལ་འདི་སྐད་ཅེས་བཀའ་སྩལ་ཏོ། ། རིགས་ ཀྱི་བུ་འདིར་ང་སྟན་འདི་ཉིད་ལ་བཞུགས་བཞིན་དུ་སེམས་ཅན་རྣམས་ལ་དོན་དང་བཅས་པ། ཚིག་འབྲུ་དང་བཅས་པ།

ལྷག་ཆད་མེད་པའི་སྟོང་པ་ཉིད་དང་རྗེས་སུ་འཐུན་པའི་གཟུངས་སྔགས་རྒྱ་ཆེར་སྟོན་པར་མཛད་དོ། ། རིགས་ཀྱི་བུ་དེ་བཞིན་གཤེགས་པ་རི་དབང་ རྒྱལ་པོས་གང་ཁྱོད་འདིར་འོང་བའི་ཚེ་བསྲུང་བའི་ཕྱིར་བྱིན་པ་མི་ཟད་པའི་སྦུབས་ཀྱི་ལུང་བསྟན་པ་སེམས་ཅན་རྣམས་ཀྱི་སེམས་དང་ཚོར་བ་སྒྲུབ་པ་ཡང་དག་པར་འདུ་བ། ཐམས་ཅད་མཁྱེན་པའི་ཡེ་ཤེས་ཐོབ་པ་དང་། བདུད་བཞི་འདུལ་བ། སྒྲུབ་པའི་གནས་དང་། ཆོས་ཀྱི་ཚུལ་དང་། དཀོན་མཆོག་གསུམ་གྱི་གདུང་སྒྲུབ་པ། མི་ཟད་པའི་སྦུབས་ཀྱི་ལུང་བསྟན་པའི་བར་དེ་ཁྱོད་ཀྱིས་ཀྱང་སྟོན་ཅིག ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་ཆེས་འདི་སྐད་ཅེས་གསོལ་ཏོ། ། ཏད་ཡ་ཐཱ། ཤ་ར་ཎ་བྱཱ་ཡ། ཤི་ཀྵ་བྱཱ་ཡ། སྨྲྀ་ཏི་བྱཱ་ཡ། པྲ་ཧཱི་ ན་བྱཱ་ཡ། རྀདྡྷིབྱཱ་ཡ། ཨི་ན་དྲཱི་ཡ་བྱཱ་ཡ། བ་ལ་བྱཱ་ཡ། བོ་དྷྱཱང་བྱཱ་ཡ། ས་མཱ་དྷི་བྱཱ་ཡ། དྷཱ་ར་ཎཱི་བྱཱ་ཡ། ཀྵཱན་ཏི་བྱཱ་ཡ། དྷྱ་ན་བྱཱ་ཡ། ཨ་རཱུ་པ་བྱཱ་ཡ། ཨ་ནི་ན་ཛ་བྱཱ་ཡ། མཱ་རྒ་བྱཱ་ཡ། ཨ་བྷི་ཛྙཱ་བྱཱ་ཡ། པྲ་ཏི་སྃ་བིད་བྱཱ་ཡ། བྷཱུ་མི་བྱཱ་ཡ། བིདྱཱ་ བྱཱ་ཡ། མ་ཧཱ་མཻ་ཏྲི་བྱཱ་ཡ། མ་ཧཱ་ཀ་རུ་ཎ་བྱཱ་ཡ། པྲྀ་ཐི་བཱི་བྱཱ་ཡ། ས་ཏྭ་བྱཱ་ཡ།

དྷརྨ་བྱཱ་ཡ། ཏ་མ་བྱཱ་ཡ། ཨཱ་ལོ་ཀ་བྱཱ་ཡ། པྲ་ཏི་བྷཱ་ས་བྱཱ་ཡ། པྲ་ཏི་ཤྲུཏྐ་བྱཱ་ཡ། ག་ག་ན་བྱཱ་ཡ། མཱ་ར་བྱཱ་ཡ། ཤཱུ་ནྱ་ཏཱ་བྱཱ་ཡ། པྲ་ཏཱི་ཏྱ་བྱཱ་ཡ། ཨ་པྲ་ཎི་ཧི་ཏ་བྱཱ་ཡ། ཨ་ ནི་མིད་ཏ་བྱཱ་ཡ། རུ་ཏ་བྱཱ་ཡ། གྷོ་ཥ་བྱཱ་ཡ། ཨ་ཀིན་ཙན་བྱཱ་ཡ། ཨ་བྷི་ས་མ་ཡ་ཨ་ནུ་ནུ། ཨ་ནོ་ན། ཨ་བ་ཧ། ཙ་ཙཱ་ར། ཙ་ཙ་ཙཱ་ར་བི་མུ། ཙ་ཙ་ཙ་ཀྵ། ཙ་ཙ་ཙ་ར་བི་མུ་བྱཱ་ཡ། བི་མུ་ཀྵ་ཡ། བི་མུ་ཨཱ་པ་བྱཱ་ཡ། བི་མུ་ཨ་ས་མུ་དྲ་ཙ་ར་བི་མུ། ཙྪེ་ད་བི་མུ། ཨཱ་ཀཱ་ཤི་བ་མུ། བྱུ་པ་ཤ་མ་བི་མུ། ཨ་ནཱ་བྷ་ས་བི་མུ། ཨ་ཧ་ཧ་བི་མུ། ཨ་པཱ་ར་བི་མུ། ཨུ་པ་ཤ་མ། ས་ལི་ལ་བི་མུ་སྭཱ་ཧཱ། བཙུན་པ་བཅོམ་ལྡན་འདས་དེ་བཞིན་གཤེགས་པ་རི་དབང་རྒྱལ་པོ་དེས་བདག་ཆས་པའི་དུས་ཀྱི་ཚེ་བདག་བསྲུང་བའི་སླད་དུ་མི་ཟད་པའི་སྦུབས་ ཀྱི་གཟུངས་སྔགས་སྩལ་བ་ནི་འདི་ལགས་སོ། ། དེ་ནས་བཅོམ་ལྡན་འདས་ཤཱཀྱ་ཐུབ་པས་ཚེ་དང་ལྡན་པ་ཀུན་ཤེས་ཀཽ་ཌི་ནྱ་ལ་བཀའ་སྩལ་པ། ཀཽ་ཌི་ནྱ་ཁྱོད་ཀྱིས་མི་ཟད་པའི་སྦུབས་ཀྱི་གཟུངས་སྔགས་འདི་ཟུང་ཤིག ། ཀཽ་ཌི་ནྱ་དེ་བཞིན་གཤེགས་པ་དགྲ་བཅོམ་པ་རྣམས་འཇིག་རྟེན་དུ་ འབྱུང་བ་རྙེད་པར་དཀའོ། །

དེ་བས་ཀྱང་མི་ཟད་པའི་སྦུབས་ཀྱི་ལུང་བསྟན་པ་འདི་ཆེས་རྙེད་པར་དཀའོ། ། རིགས་ཀྱི་བུ་དེ་བཞིན་གཤེགས་པའམ་དེ་བཞིན་གཤེགས་པའི་ཉན་ཐོས་ཀྱིས་ཀྱང་རུང་བསྐལ་པ་བརྒྱ་སྟོང་གིས་སེམས་ཅན་ཐམས་ཅད་ཀྱི་སེམས་ཀྱི་སྐད་ཅིག་བགྲང་བར་ནུས་སོ། ། གང་ དག་མི་ཟད་པའི་སྦུབས་ཀྱི་གཟུངས་སྔགས་འདིར་མུན་པ་མེད་པར་འཇུག་པས་ཞུགས་པའི་སངས་རྒྱས་ཀྱི་ཆོས་མ་འདྲེས་པ་{བཅྭ་,བཅོ་}བརྒྱད་པོ་དེ་དག་ནི་གང་གིས་ཀྱང་བགྲང་བར་མི་ནུས་སོ། ། ཀཽ་ཌི་ནྱ་དེ་ལྟ་བས་ན་མི་ཟད་པའི་སྦུབས་ཀྱི་ལུང་བསྟན་པའི་ཆོས་འདི་ཇི་ལྟར་ཐོས་པ་འཁོར་བཞི་པོ་དག་ ལ་ཡང་རྒྱས་པར་ཡང་དག་པར་རབ་ཏུ་སྟོན་ཅིག་དང་། དེ་དག་ཆོས་དེ་ཐོས་པས་ལས་ཐམས་ཅད་ཟད་པ་ཐོབ་པར་འགྱུར་བ་ནས་སྤོབས་པ་ཐོགས་པ་མེད་པ་དག་དང་། སྤོབས་པ་གཅད་དུ་མེད་པ་དག་དང་། སྤོབས་པ་རྒྱུན་མི་འཆད་པའི་བར་དག་ཐོབ་པར་འགྱུར་ཞིང་ཁམས་གསུམ་ལས་ཁྱད་ པར་དུ་འཕགས་པའི་དེ་བཞིན་གཤེགས་པ་དག་ཏུ་ཡང་འགྱུར་རོ། །

ཡང་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་སྙིང་པོའི་དཔལ་དེ་བཞིན་གཤེགས་པ་ཤཱཀྱ་ཐུབ་པ་ག་ལ་བ་དེ་ལོགས་སུ་ཐལ་མོ་སྦྱར་བ་རབ་ཏུ་བཏུད་ནས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། ། འགྲོ་དྲུག་སྡུག་བསྔལ་གྱིས་ཁྲིད་ཅིང་། ། ཉོན་མོངས་ནད་ཀྱིས་ཀུན་ཏུ་གཡེངས། ། ཁྱོད་ནི་མཁས་པ་མགོན་གྱུར་ཁྱོད། ། རྒལ་ནས་འགྲོ་བ་སྒྲོལ་མཛད་ཁྱོད། ། དབང་པོ་དྲུག་ལ་རྨོངས་གྱུར་ཅིང་། ། བདུད་ཀྱི་ཞགས་པས་ཉེར་ཟིན་ལ། ། ཡང་དག་ལམ་ནི་སྟོན་པ་ཁྱོད། ། འཇིག་ རྟེན་ན་ནི་རབ་རྙེད་དཀའ། ། ཡན་ལག་དྲུག་ལྡན་ཁྱིམ་གྱི་གཞི། ། མཁས་པའི་མི་རྣམས་ཀྱིས་སྤངས་ལ། ། ཁྱོད་ནི་འཇིག་རྟེན་ཀུན་གྱི་གཉེན། ། ཆོས་ཀྱི་མུ་གེ་འཇིག་མཛད་པ། ། མངོན་ཤེས་དྲུག་ལྡན་སྒོམ་བྱེད་ལ། ། བདེན་པ་གསུང་བ་དྲང་སྲོང་ཆེ། ། སེམས་ཅན་འཁོར་བར་ ཞུགས་པ་རྣམས། ། འཆིང་བ་དམ་ལས་གྲོལ་མཛད་ཁྱོད། ། ཁྱོད་ཀྱི་སྔགས་ལ་དད་ནས་སུ། ། ཞིང་འདིར་ཡང་ནི་ལྷགས་པ་ལགས། ། འདིར་ནི་འཇིག་རྟེན་མགོན་པོ་ཡིས། ། བདག་ཅག་ཕོ་ཉར་མངགས་ཀྱིས་གསོན། །

བཙུན་པ་བཅོམ་ལྡན་འདས་ནུབ་ཕྱོགས་ན་སངས་རྒྱས་ཀྱི་ ཞིང་འདི་ནས་སངས་རྒྱས་ཀྱི་ཞིང་གང་གཱའི་ཀླུང་བཞི་བཅུ་རྩ་གཉིས་ཀྱི་བྱེ་མ་སྙེད་འདས་ནས། དེ་ན་འཇིག་རྟེན་གྱི་ཁམས་སྙིང་པོའི་རྒྱལ་མཚན་ཞེས་བགྱི་བ་མཆིས་སོ། ། སངས་རྒྱས་ཀྱི་ཞིང་དེ་ན་དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོ་ཞེས་བགྱི་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་ སྟོན་ཏོ། ། དེ་བཞིན་གཤེགས་པ་དེས་བདག་སངས་རྒྱས་ཀྱི་ཞིང་འདིར་མངགས་ལགས་ཏེ། དེ་བཞིན་གཤེགས་པ་དེ་ཁྱོད་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་འབྱང་བའི་གཟུངས་སྔགས་འདི་འཆད་པ་ལ་དད་ པ་སྦྱིན་པར་མཛད་ཅིང་གནོད་པ་ཆུང་ངམ། བསྐྱོད་པ་ཡང་ངམ། སྟོབས་དང་བདེ་བ་ལ་རེག་པར་གནས་སམ་ཞེས་ཀྱང་འདྲི་བར་མཛད་ལགས་ན་བཙུན་པ་བཅོམ་ལྡན་འདས་ཅི་བསྙུང་བ་མི་མངའ་ལགས་སམ། གནོད་པ་ཆུང་ལགས་སམ། ཁྱོད་ཀྱི་འཁོར་བྲོ་ འཚལ་བ་མ་མཆིས་ལགས་སམ། གནོད་པ་ཆུང་ལགས་སམ། དམ་པའི་ཆོས་ཉན་པར་འཚལ་ལགས་སམ། ཇི་ལྟར་ཆོས་རྗེས་སུ་ཐོས་པ་བཞིན་དུ་ཡང་ཆོས་དེ་ལ་ཡང་ནན་ཏན་སྙིང་པོར་བགྱིད་པ་དག་ལགས་སམ།

ཆོས་ཀྱིས་གནས་པས་གནས་པར་བགྱིད་ལགས་སམ། ཁྱོད་ ཀྱི་སངས་རྒྱས་ཀྱི་ཞིང་འདི་ན་བདུད་ཀྱི་ཡུལ་དང་ཀླུའི་ཡུལ་བཅོམ་ལགས་སམ། ཁྱོད་ཀྱི་སངས་རྒྱས་ཀྱི་ཡུལ་གཅིག་པུ་ལགས་སམ། འདི་ན་ཐོགས་པ་མ་མཆིས་པར་འཁོར་ལོ་སྐོར་ལགས་སམ། སངས་རྒྱས་ཀྱི་ཞིང་འདི་ན་གང་སུ་དག་འཁོར་ལོ་སྐོར་བར་འགྱུར་བ་དེ་དག་གི་དོན་དུ་དེ་བཞིན་ གཤེགས་པ་ཡེ་ཤེས་དཔལ་བརྩེགས་རྒྱལ་པོ་དེ་ཁྱོད་དང་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་འབྱང་བའི་གཟུངས་སྔགས་འདི་ལ་དད་པ་སྦྱིན་པར་མཛད་ལགས་སོ། ། དེ་ནས་སྨོན་པ་མེད་པའི་རྗེས་སུ་འཐུན་ པའི་གཟུངས་སྔགས་མཐུ་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཡང་དག་པར་ཟད་པར་བགྱིད་པ། གཟུགས་ཀྱི་འདོད་ཆགས་ཐམས་ཅད་དང་། གཟུགས་མེད་པའི་འདོད་ཆགས་ཐམས་ཅད་ཡང་དག་པར་ཟད་པར་བགྱིད་པ། ང་རྒྱལ་དང་། ལྷག་པའི་ང་རྒྱལ་དང་། ངའོ་སྙམ་པའི་ང་རྒྱལ་ཐམས་ཅད་ཡང་དག་པར་ཟད་པར་བགྱིད་པ་འདི་ཡང་བསྐུར་ལགས་ཏེ་ཞེས་བགྱི་བ་ནས་མ་རིག་པའི་མུན་པའི་ཕུང་པོ་ཐམས་ཅད་རབ་ཏུ་འཇོམས་པར་བགྱིད་པ།

སྡུག་བསྔལ་གྱི་ཁུར་འདོར་བར་བགྱིད་པ་ཞེས་བགྱི་བའི་བར་དུ་ཇི་ལྟར་སྔར་བཤད་པ་བཞིན་ནོ། ། ཏད་ ཡ་ཐཱ། ཤ་ན་ཤ་ར། ཤ་མ་ན་ཤ་བ། ཨ་པཀྵ་བ་ཤ ། ཙཀྵུ་བྷ་བ་ཤ་བ། ཤོ་ཏྲ་ཤ་བ། གྷྲཱ་ཎ་ཤ་བ། ཛི་ཧྭ་ཤ་བ། ཀཱ་ཡ་ཤ་བ། མ་ནཱ་ཤ་བ། ཀྵ་ཏི་བིདྱ་ཙཀྵུ་པྲྀ་ཐབཱི་ཀྵ་བྷ། ཤྲོ་ཏྲ་ཨ་བ་ཀྵ་བྷ། ཛི་ཧྭ་བཱ་ཡུ་ཀྵ་བྷ། མ་ན་ཨོ་ཛ་ཀྵ་བྷ། ཨཱ་ལོ་ཀ་ཛྙཱ་ན་ཀྵ་བྷ། བཱི་ཛ་སང་གྲ་མ་ཀྵ་བྷ། ཨང་ཀུ་ར་ཁ་གྷ་ཀྵ་བྷ། ཤ་མ་ཀ་རུ་ཀྵ་བྷ། ཀྵ་ཡ་རཱ་ས་ཀྵ་བྷ། ཤཱན་ཏི་བྱ་སྲ་ཀྵ་བྷ། ན་ཏོ་ན་ཏཻ་ན་ཏོ་ན་ཨ་བ་ནྱེ་ར་ཏོ་ན། ན་ཡཱ་བ་ན་ཡི་ན་ཏོ་ན་ཨེ་ཥ་ཨན་ཏ་དུཿཁ་སྱ་སྭཱ་ཧཱ། བཙུན་པ་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོ་དེས་སྨོན་པ་མེད་པའི་རྗེས་ སུ་འཐུན་པའི་གཟུགས་སྔགས་བསྐུར་བ་ནི་འདི་ལགས་སོ། ། བཅོམ་ལྡན་འདས་ཀྱིས་ཀྱང་ལེགས་སོ་ཞེས་བྱ་བ་གནང་ངོ་། ། བསམ་གཏན་དང་ལྡན་པ་རྣམས་མ་གཏོགས་པ་སངས་རྒྱས་ཀྱི་ཞིང་མི་མཇེད་ཀྱི་ནང་དུ་གཏོགས་པའི་སེམས་ཅན་ཐམས་ཅད་དང་ལྡན་པ་རྣམས་ཀྱིས་ཀྱང་ ལེགས་སོ་ཞེས་བྱ་བ་བྱིན་ནོ། །

དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་སྙིང་པོའི་དཔལ་ལ་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་ང་སྟན་འདི་ཉིད་ལ་བཞུགས་བཞིན་སེམས་ཅན་རྣམས་ལ་དོན་བཟང་པོ། ཚིག་འབྲུ་བཟང་པོ་ལྷག་ ཆད་མེད་པ། སྨོན་པ་མེད་པ་དང་རྗེས་སུ་འཐུན་པའི་གཟུངས་སྔགས་འདི་རྒྱ་ཆེར་སྟོན་པར་མཛད་དོ། ། རིགས་ཀྱི་བུ་དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོས་གང་ཁྱོད་ལ་འདིར་འོང་བའི་ཚེ་བྱིན་པ་རིག་སྔགས་ཀྱི་རྟེན་གྱི་ལུང་བསྟན་པ་དེ་ཁྱོད་ཀྱིས་ཀྱང་སྟོན་ཅིག ། ལུང་བསྟན་པ་དེས་ནི་འདིར་སེམས་ཅན་རྣམས་ཀྱི་སྲེད་པ་ཆུང་ངུ་དང་། འབྲིང་དང་། ཆེན་པོའི་ཉོན་མོངས་པ་སྲིད་པའི་རྒྱུ་རྣམས་རབ་ཏུ་ཞི་བར་འགྱུར་རོ། ། དེ་བཞིན་དུ་གཟུགས་དང་གཟུགས་མེད་པའི་ཉོན་མོངས་པ་སྲིད་པའི་རྒྱུ་རྣམས་ཞི་བར་འགྱུར་རོ། ། བསྐལ་པ་གང་གཱའི་ ཀླུང་གི་བྱེ་མ་སྙེད་ཀྱང་བསྙིལ་བར་འགྱུར་རོ། ། ལས་འབྱང་བ་དང་། དགེ་བའི་ཕྱོགས་ཐམས་ཅད་ཡོངས་སུ་རྫོགས་པའི་བར་དུ་ཡང་འགྱུར་རོ། ། བཙུན་པ་བཅོམ་ལྡན་འདས་དེ་བཞིན་ཏེ་བསྟན་པར་བགྱི་ལགས་སོ། ། ཏད་ཡ་ཐཱ། བེ་ག་པ་རི་ཙྪེ་ད། གརྦྷ་ས་ཀྵ་སེ།

གརྦྷ་རེ་བིདྱཱ་པྲ་བྷ་ག་ཀྵེ་ ཀྵ་ཡ། ཡོ་གེ་པྲ་ཏི་ཧ་རེ་ཤ་མན་ན་སི་ཀ་ཐེ། ས་མ་མེ་གྷ་ཛྷ་ཥེ། ཨ་ཀྵ་ཡ། ན་ཏེ་ཀྵ་བྷ་བ་ཛེ། ནིད་དྷ་ཛྷ་ཥེ། ས་མ་ན་ཛྷ་ཥེ། ཨ་དྷྱ་ཤ་ཡ་ཛྷ་ཥེ། བི་པྲ་བྷ་ཛྷ་ཥེ། ཤཻཀྵ་ཛྙ་ཥེ། སེ་ནྱ་ཛ་བ་ཛྷ་ཥེ། ས་ལི་ལ་གུ་ཧྱ་ཛྷ་ཥེ། ས་ལི་གུ་ཧ་བྷཻ་ཀྵི་པ་ན་ཀོ་ཤེ། སཱ་དྷ་ན་ཀོ་ནོ་སི་བ་དྷ་ན་ན་ཐྱེ། བི་ཏ་པྲ་ བིད་ཏེ། ཨུ་པ་ཀྲ་མ་པ་ཐེ། ཨ་ན་ཙྪེ་དྱ་པྲ་ཁེ། པྲ་ཏི་ཀྲ་མེ་ན། ས་ཀང་ཐྱ་ཤཻ་ས་ལོ་ཙ་ན་བ་མེ། ཀྲོ་དྷ་དྷ་རེ། ཀཱ་མ་ས་ཤེ། ཨཱ་ཀཱ་ཤ་ཁ་གེ་ནཱ་ག་ཀུན་ཛེ། བིདྱ་བ་ནེ། ཀླ་ན་བ་ནེ། ཨུ་ཙ་བ་ནེ། ས་མ་མ་ཀེ་རེ། ཤ་རི་ཡ་བ་ནེ། མེ་གྷ་ཛ་བེ་ཧ་རི་ཀོ་ནོ་བ། ན་ཡ་ན་མུ་ ཁེ། སཱ་ར་ཀྵ་ཀོ་ལེ། ན་རཱ་ཡ་ཎ་ཙ་རེ། ཨིན་དྲ་བཱ་ས་ནེ། ཨོ་ཨ། ཨ་བ་ཨ། ཨ་རཱ་བ་ཨཱ། བ་ར་ཨ་བཱ་ར། སཱ་ར་མེ་གྷ། དུཿཁ་ན་སྟི་ར་ནི་ནིརྦཱ་ཧེ་སྭཱ་ཧཱ། བཙུན་པ་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོ་དེས་བདག་ཆས་པའི་དུས་ཀྱི་ཚེ་བསྲུང་ བའི་སླད་དུ་རིག་སྔགས་ཀྱི་རྟེན་གྱི་ལུང་བསྟན་པ་སྩལ་བ་ནི་འདི་ལགས་སོ། ། དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ།

ཤ་ར་དྭ་ཏིའི་བུ་ཁྱོད་ཀྱིས་རིག་སྔགས་ཀྱི་རྟེན་གྱི་གཟུངས་སྔགས་འདི་ཟུང་ཤིག ། ཤ་ར་དྭ་ཏིའི་བུ་དེ་ བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཇིག་རྟེན་དུ་འབྱུང་བ་རྙེད་པར་དཀའོ། ། དེ་བས་ཀྱང་རིག་སྔགས་ཀྱི་རྟེན་གྱི་གཟུང་སྔགས་འདི་ཆེས་རྙེད་པར་དཀའོ། ། ཤ་ར་དྭ་ཏིའི་བུ་དེ་བཞིན་གཤེགས་པའམ་དེ་བཞིན་གཤེགས་པའི་ཉན་ཐོས་ཀྱིས་ ཀྱང་རུང་བསྐལ་པ་བརྒྱས་གླིང་བཞི་པའི་འཇིག་རྟེན་གྱི་ཁམས་ཀྱི་སའི་ཁམས་ཐམས་ཅད་ཀྱི་རྡུལ་ཕྲ་རབ་རྣམས་བགྲང་བའམ་མཐའ་རྟོགས་པར་ནུས་སོ། ། རིག་སྔགས་ཀྱི་རྟེན་གྱི་གཟུངས་སྔགས་འདིའི་མཐའ་ནི་བསྐལ་པ་བརྒྱ་སྟོང་གིས་ཀྱང་བརྗོད་པར་མི་ནུས་སོ། ། རིག་སྔགས་ཀྱི་རྟེན་གྱི་ ལུང་བསྟན་པ་འདི་ནི་དེ་ལྟར་ཟབ་པ་ཡིན་ནོ། ། ཤ་ར་དྭ་ཏིའི་བུ་ཁྱོད་ཀྱིས་རིག་སྔགས་ཀྱི་རྟེན་གྱི་གཟུངས་སྔགས་འདི་ཡང་ཟུང་ཤིག ། ཀུན་ཆུབ་པར་བྱོས་ཤིག ། འཁོར་བཞི་པོ་དག་ལ་ཡང་རྒྱས་པར་སྟོན་ཅིག ། ཡང་དག་པར་རབ་ཏུ་སྟོན་ཅིག་དང་། དེ་ཐོས་པས་ཀྱང་སེམས་ཅན་དེ་ དག་གི་སྲེད་པ་ཆུང་ངུ་དང་། འབྲིང་དང་། ཆེན་པོ་སྲིད་པའི་རྒྱུ་རྣམས་དང་།

གཟུགས་དང་གཟུགས་མེད་པ་ན་སྤྱོད་པའི་ཉོན་མོངས་པ་སྲིད་པའི་རྒྱུ་རྣམས་རབ་ཏུ་ཞི་བར་འགྱུར་རོ། ། བསྐལ་པ་གང་གཱའི་ཀླུང་གི་བྱེ་མ་སྙེད་ཀྱང་རྒྱབ་ཀྱིས་ཕྱོགས་པར་འགྱུར་རོ། ། བུད་མེད་མཚམས་མེད་པ་བྱེད་ པའི་ལས་ཀྱི་སྒྲིབ་པ་སྲིད་པའི་རྒྱུ་རྣམས་ཟད་པར་འགྱུར་ཞིང་ལྷག་མ་མེད་པའི་བར་དུ་ཡང་འགྱུར་རོ། ། ཟག་པ་ཐམས་ཅད་ཟད་པ་དང་། བྱང་གྲོལ་གྱི་བདེ་བ་དང་ལྡན་པའི་བར་དུ་ཡང་འགྱུར་རོ། ། ཡང་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་བཅོམ་ལྡན་འདས་ ག་ལ་བ་དེ་ལོགས་སུ་ཐལ་མོ་སྦྱར་བ་རབ་ཏུ་བཏུད་ནས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། ། ཁྱོད་ནི་དེད་དཔོན་གཅིག་པུ་ལགས། ། ཆོས་རྣམས་ཀུན་ལ་ངེས་པ་སྟེ། ། མཐོང་བའི་གུས་པ་སྐྱེས་པ་ཡིས། ། བཤེས་གཉེན་དཔལ་ཡང་ཉེ་བར་འཛིན། ། མེ་ཏོག་གཅིག་དང་ བདུག་པ་ཡིས། ། དེ་བཞིན་གཤེགས་ལ་མཆོད་བགྱིས་ན། ། ཡན་ལག་ཀུན་གྱི་མཆོག་ལྡན་པའི། ། བཤེས་གཉེན་སྡུག་པ་ཉེ་བར་འཛིན། ། ཚོགས་ནི་ཆེན་པོ་བསྡུས་པ་ཡང་། ། དུས་གཅིག་ཏུ་ནི་འདིར་མཛད་པས། ། ལྷ་རྣམས་ཐམས་ཅད་བསྔགས་བགྱིད་ཅིང་། ། བཤེས་ གཉེན་དཔལ་ཡང་ཉེ་བར་འཛིན། །

དེར་ནི་འཇིག་རྟེན་མགོན་པོ་ཡིས། ། འདི་ནི་ལན་ཅིག་ཁོ་ན་བསྟན། ། རྟག་ཏུ་ལྷ་མིན་ཤེས་རབ་ལྡན། ། བཤེས་གཉེན་དཔལ་ཡང་ཉེ་བར་འཛིན། ། དཔལ་གྱི་མེ་ཏོག་སྙིང་པོ་ནི། ། དཔལ་རྣམས་ཀུན་གྱིས་ཀུན་ཏུ་བརྒྱན། ། དེ་ཡིས་ཤཱཀྱའི་དཔལ་ཞུ་བར། ། བདག་ཅག་ ཕོ་ཉར་མངགས་པ་ལགས། ། བཙུན་པ་བཅོམ་ལྡན་འདས་བྱང་ཕྱོགས་ཀྱི་ཕྱོགས་ཆ་ན་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གང་གཱའི་ཀླུང་བརྒྱད་ཅུའི་བྱེ་མ་སྙེད་འདས་ནས་སྙིགས་མ་ལྔ་དང་ལྡན་པ་དེ་ན་འཇིག་རྟེན་གྱི་ཁམས་སྤོས་ཐམས་ཅད་ཡང་དག་པར་འཕགས་པ་ཞེས་བགྱི་བ་མཆིས་སོ། ། སངས་རྒྱས་ཀྱི་ཞིང་ དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་མེ་ཏོག་གི་སྙིང་པོ་ཞེས་བགྱི་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། ། དེ་བཞིན་གཤེགས་པ་དེས་བདག་འདིར་མངགས་ལགས་ཏེ། དེ་བཞིན་གཤེགས་པ་དེ་ཁྱོད་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་ པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་འབྱང་བའི་གཟུངས་སྔགས་འདི་འཆད་པ་ལ་དད་པ་སྦྱིན་པར་མཛད་ཅིང་གནོད་པ་ཆུང་ངམ། བསྐྱོད་པ་ཡང་ངམ། སྟོབས་དང་ལྡན་ནམ།

བདེ་བ་ལ་རིག་པར་གནས་སམ་ཞེས་ཀྱང་ཞུ་བར་མཛད་ལགས་ན་བཙུན་པ་བཅོམ་ལྡན་འདས་ཅི་བསྙུང་བ་མི་མངའ་ ལགས་སམ། གནོད་པ་ཆུང་ལགས་སམ། ཁྱོད་ཀྱི་འཁོར་བྲོ་འཚལ་བ་མ་མཆིས་སམ། གནོད་པ་ཆུང་ལགས་སམ། དམ་པའི་ཆོས་ཉན་པར་འཚལ་བ་དག་ལགས་སམ། ཇི་ལྟར་ཆོས་རྗེས་སུ་ཐོས་པ་བཞིན་དུ་ཆོས་དེ་ལ་ནན་ཏན་སྙིང་པོར་བགྱིད་པ་དག་ལགས་ སམ། ཆོས་ཀྱིས་གནས་པས་གནས་པར་བགྱིད་པ་དག་ལགས་སམ། ཁྱོད་ཀྱི་སངས་རྒྱས་ཀྱི་ཞིང་འདི་ན་བདུད་ཀྱི་ཡུལ་དང་། ཀླུའི་ཡུལ་བཅོམ་ལགས་སམ། ཁྱོད་ཀྱི་སངས་རྒྱས་ཀྱི་ཡུལ་གཅིག་པུ་ལགས་སམ། འདི་ན་ཐོགས་པ་མ་མཆིས་པར་ཆོས་ཀྱི་འཁོར་ ལོ་སྐོར་ལགས་སམ། སངས་རྒྱས་ཀྱི་ཞིང་འདི་ན་གང་སུ་དག་འཁོར་ལོ་སྐོར་བར་འགྱུར་བ་དེ་དག་གི་དོན་དུ་དེ་བཞིན་གཤེགས་པ་དཔལ་མེ་ཏོག་གི་སྙིང་པོ་ཁྱོད་དང་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་ རྣམས་ཀྱི་ལས་འབྱང་བའི་གཟུངས་སྔགས་འདི་ལ་དད་པ་སྦྱིན་པར་མཛད་ལགས་སོ། ། དེ་ནས་ཞི་བ་རིག་པ་མཆིས་པའི་སྦུབས་ཞི་བའི་གཟུངས་སྔགས་མཐུ་ཆེ་བ། ཕན་ཡོན་ཆེ་བ། སེམས་ཅན་ཐམས་ཅད་ལ་ཕན་པར་བགྱིད་པ། ནད་ཐམས་ཅད་རབ་ཏུ་ཞི་བར་ བགྱིད་པ།

ཉོན་མོངས་པ་ཐམས་ཅད་འདུལ་བར་བགྱིད་པ། ཕུང་པོ་དང་སྐྱེ་མཆེད་ཐམས་ཅད་ཡོངས་སུ་ཤེས་པར་བགྱིད་པ། ཆོས་ཐམས་ཅད་རྣམ་པར་འབྱེད་པར་བགྱིད་པ། ཐབས་ཐམས་ཅད་ཡང་དག་པར་སྟོན་པར་བགྱིད་པ། བྱང་གྲོལ་གྱི་བདེ་བ་ཐམས་ཅད་ ཡོངས་སུ་མྱོང་བར་བགྱིད་པ། སེམས་ཅན་ཐམས་ཅད་རབ་ཏུ་དད་པར་བགྱིད་པ། ཆོས་ཐམས་ཅད་ཀྱི་བདེ་བ་ལ་འཇུག་པར་བགྱིད་པ། བདུད་དང་ཕས་ཀྱི་རྒོལ་བ་ཐམས་ཅད་ཆོས་དང་འཐུན་པས་ཚར་གཅོད་པར་བགྱིད་པ། བདུད་ཀྱི་ཡུལ་ཐམས་ཅད་རྣམ་པར་འཇིག་ པར་བགྱིད་པ་འདི་ཡང་བསྐུར་ལགས་ཏེ། རིག་པ་མཆིས་པའི་སྦུབས་ཞི་བ་ལུང་བསྟན་པ་ཆེན་པོ་འདི་ནི་བདུད་རྣམས་ཚར་གཅོད་པར་བགྱིད་པ། ཕས་ཀྱི་རྒོལ་བ་རྣམས་ཕམ་པར་བགྱིད་པ། ལྷ་རྣམས་དགའ་བར་བགྱིད་པ། གནོད་སྦྱིན་རྣམས་ཡང་དག་པར་མགུ་བར་ བགྱིད་པ། ལྷ་མ་ཡིན་རྣམས་རྣམ་པར་འཇོམས་པར་བགྱིད་པ། ནམ་མཁའ་ལྡིང་རྣམས་ཡང་དག་པར་མགུ་བར་བགྱིད་པ། མི་འམ་ཅི་རྣམས་དད་པར་བགྱིད་པ། ལྟོ་འཕྱེ་ཆེན་པོ་རྣམས་རྒྱབ་ཀྱིས་ཕྱོགས་པར་བགྱིད་པ། ཕས་ཀྱི་རྒོལ་བ་རྣམས་འདུལ་བར་ བགྱིད་པ། རྒྱལ་རིགས་རྣམས་མངོན་པར་དགའ་བར་བགྱིད་པ། བྲམ་ཟེ་རྣམས་འཇུག་པར་བགྱིད་པ། རྗེའུ་རིགས་རྣམས་རབ་ཏུ་འཇོམས་པར་བགྱིད་པ།

དམངས་རིགས་རྣམས་མཆོག་ཏུ་དགའ་བར་བགྱིད་པ། བུད་མེད་འདོད་ཆགས་དང་བྲལ་བར་བགྱིད་པ། བུད་མེད་སྦྲུམ་པ་བདེ་ལེགས་སུ་ཡོངས་སུ་ཐར་བར་བགྱིད་པ། མང་དུ་ཐོས་པ་རྣམས་དྲན་པར་བགྱིད་པ། རྣལ་འབྱོར་སྤྱོད་པ་རྣམས་མངོན་པར་དགའ་བར་བགྱིད་པ། ནད་ཐམས་ཅད་རབ་ཏུ་ཞི་བར་བགྱིད་པ། འཐབ་པ་དང་། ཐབ་མོ་དང་། མུ་གེ་དང་། མི་ངས་ དང་། ནད་དང་། ཕ་རོལ་གྱི་དམག་ཚོགས་དང་། དུས་མ་ཡིན་པའི་རླུང་དང་། ཆར་པ་དང་། ཆུ་བོ་དང་། གྲང་བ་དང་། དྲོ་བ་དང་། ཁ་བ་དང་། ཚ་བ་དང་། རྩུབ་པ་དང་། ཧྲུད་ཧྲུད་པོ་དང་། འདུས་ཏེ་རེག་པར་དཀའ་བ་རྣམས་རྣམ་པར་ཞི་བར་བགྱིད་པ། ཆོས་ ཀྱི་ཚུལ་འབར་བར་བགྱིད་པ། སངས་རྒྱས་ཀྱི་བསྟན་པ་རྟོན་པར་བགྱིད་པ། དཀོན་མཆོག་གསུམ་གྱི་གདུང་རྒྱུན་མི་འཆད་པར་བགྱིད་པ། འཁོར་བས་སྐྲག་པ་རྣམས་དབུགས་འབྱིན་པར་བགྱིད་པ། ཟད་པ་ཤེས་པ་སྐྱེད་པར་བགྱིད་པ། མི་སྐྱེ་བ་ཤེས་པ་རང་གི་ མངོན་སུམ་དུ་བགྱིད་པ། མུན་པའི་ཕུང་པོ་རྣམ་པར་འཇིག་པར་བགྱིད་པ། སྡུག་བསྔལ་གྱི་ཁུར་འདོར་བར་བགྱིད་པ། མཐུ་ཆེ་བ་ལགས་སོ། ། ཏད་ཡ་ཐཱ། མ་ནཱ་ཀྵ་ཨ་ནཱ་ཀྵ། གྷ་ས་ཀྵ། ཛ་ལ་ཀྵ། མཱ་ནཱ་ཀྵ། ཀྵ་བ་ཀྵ། མན་དྷཱ་ཀྵ། ན་ཌ་ཀྵ།

ན་ཌ་ར་ར་ཧུ་བི་ ས་ནཱ་ཏ། ཁ་གྷ་ནཱ་ཊ། ཨཱ་ཊ་ནཱ་ཊ་ཀུ་ནཱ་ཊ། པ་རི་ཀུ་ས་ནཱ་ཊ། ནཱ་ཊ་ནཱ་ཊ། པུ་རི་ཀྵ་ནཱ་ཊ། ཨུ་ཊ་ར་ནཱ་ཊ། ཀ་བི་ནཱ་ཊ། ཀུན་ཛ་ནཱ་ཊ། ཨ་མ་ཁ་ནཱ་ཊ། ཙ་བ་མ་བྷ་ནཱ་ཊ། ཁ་ག་མ་བྷ་ནཱ་ཊ། པུ་ཀྵ་ར་ནཱ་ཊ། ཧི་ས་དུ་དྲཱ་ནཱ་ཊ། ས་མ་ལ་ཡ་ནཱ་ཊ། ཤི་ར་ཀུ་མང་ཀཽ་ཏ་ཊ་ མ་ཏུ་གུ་ར་བ། ཏྭེ་ཧུ་ཀྵ། བ་ནི་ར་ཛཱུ། དྷྭ་ན་མ་ར་ཛཱུ། བ་གྷ་ན་པུ་ཏེ། ས་ན་ཏི་ར་བ་ཛ་བ། མ་ཧོ་ར་ག་ཛ་ལ། ཨ་ཏྲི་ནཱ། ཨ་ཏྲི་ནཱ། ཨ་ཏྲི་ནཱ་ན་བ། ཨ་ཏྲི་ནཱ་ཀྵ། ཨ་བ་ཧ་མཱརྒ་ཏྲི་ནཱ་ཀྵ། ཨེ་ཥོ་ན་ཏཽ་དུཿཁ་བྷ་ར་སྱ་སྭཱ་ཧཱ། བཙུན་པ་བཅོམ་ལྡན་ འདས་དེ་བཞིན་གཤེགས་པ་དཔལ་མེ་ཏོག་གི་སྙིང་པོས་རིག་པ་མཆིས་པའི་སྦུབས་ཞི་བ་ལུང་བསྟན་པ་ཆེན་པོ་མཐུ་ཆེ་བ་ཕན་ཡོན་ཆེ་བ་འདི་འདིར་བསྐུར་བ་ལགས་སོ། ། དེ་ནས་བཅོམ་ལྡན་འདས་ཤཱཀྱ་ཐུབ་པས་ལེགས་སོ་ཞེས་བྱ་བ་གནང་ངོ་། ། བསམ་གཏན་ལ་བརྩོན་པ་རྣམས་ མ་གཏོགས་པ་སངས་རྒྱས་ཀྱི་ཞིང་མི་མཇེད་དུ་ལྷགས་པའི་སེམས་ཅན་ཐམས་ཅད་དང་ལྡན་པ་རྣམས་ཀྱིས་ཀྱང་ལེགས་སོ་ཞེས་བྱ་བ་བྱིན་ནོ། ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །

རིགས་ ཀྱི་བུ་ང་སྟན་འདི་ཉིད་ལ་བཞུགས་བཞིན་དུ་སེམས་ཅན་རྣམས་ལ་རིག་པ་ཡོད་པའི་སྦུབས་ཞི་བའི་གཟུངས་སྔགས་དོན་དང་བཅས་པ། ཚིག་འབྲུ་དང་བཅས་པ། ལྷག་ཆད་མེད་པ་འདི་རྒྱ་ཆེར་སྟོན་པར་མཛད་དོ། ། རིགས་ཀྱི་བུ་དེ་བཞིན་གཤེགས་པ་དཔལ་མེ་ཏོག་གི་ སྙིང་པོ་དེས་གང་ཁྱོད་ཆས་པའི་དུས་ཀྱི་ཚེ་གསང་སྔགས་གང་དག་གིས་སྡང་བ་ཐམས་ཅད་དད་པར་འགྱུར་བའི་གཟུངས་སྔགས་སྡང་བ་ཞི་བར་བྱེད་པ་དང་། གཉིད་ཀྱིས་ལོག་པར་བྱེད་པ་དང་། དམིགས་པ་མེད་པའི་ཚངས་པའི་གནས་པའི་རྒྱུ་འཐུན་པ་བྱིན་པ་དེ་ཁྱོད་ཀྱིས་ ཀྱང་སྟོན་ཅིག ། བཙུན་པ་བཅོམ་ལྡན་འདས་དེ་བཞིན་དུ་བསྟན་པར་བགྱི་ལགས་སོ། ། ཏད་ཡ་ཐཱ། བོ་པྲྀ་ཧ་བུ་བུ་བུ་ར། ཏ་ལ་ར་བ་ཨི་ལ་ས་ཧ། ཧ་ཌུ་ཧ་ཊུ། ག་ག་ནཱ་ཀྵ་ཤ་མ་མི་ཏྲ། ཙ་ཀྲ་བརྟི་ཏི་ལེ་སཱ་ག་ར། ཏི་ལེ་དཱུ་ན་ཧི་ལེ། ཧི་ལེ་ཧ་བ་ཧེ། ན་ར་ཛ་ཊེ། ཡ་བ་ན་མི་ཏྲེ། ཀྵི་ཏི་མི་ཏྲེ། པར་མི་ཏྲེ། ཤི་ཁི་མི་ཏྲེ། མ་རུ་ཏྲ་མི་ཏྲེ། ཁ་ག་མི་ཏྲེ། སརྦ་ཨུ་ཛ་མི་ཏྲ། སརྦ་ཀཱ་མ་མི་ཏྲེ། མ་ན་པ་རུ་མི་ཏྲེ། དྷ་ན་ཤྭ་ར་མི་ཏྲེ་སྭཱ་ཧཱ། ཀྱེ་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོས་སྡང་བ་ཞི་བར་བྱེད་པ།

གཉིད་ཀྱིས་ལོག་པར་བྱེད་པའི་ བསྟན་པ་འདི་བཤད་པ་ན་སྡང་བའི་སྦྲུལ་ཐམས་ཅད་རང་གི་གནས་སུ་དོང་ནས་གཉིད་ཀྱིས་ལོག་པར་གྱུར་ཏེ། གང་དག་བཟོད་པ་ཐོབ་པ་རྣམས་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་རྣམས་ནི་མ་གཏོགས་སོ། ། སྲིད་པ་ ན་གང་དག་སྡང་བའི་གནོད་སྦྱིན་རྣམས་དང་། གང་དག་སྡང་བའི་ལྷ་མ་ཡིན་རྣམས་དང་ཞེས་བྱ་བ་ནས་སྡང་བའི་ནམ་མཁའ་ལྡིང་རྣམས་ཞེས་བྱ་བའི་བར་དང་། སྡང་བའི་མི་འམ་ཅི་རྣམས་ཞེས་བྱ་བའི་བར་དང་། {ཡི་དགས་,ཡི་དྭགས་}རྣམས་ཞེས་བྱ་བའི་བར་དང་། ཤ་ཟ་ རྣམས་ཞེས་བྱ་བའི་བར་དང་། སྲུལ་པོ་རྣམས་ཞེས་བྱ་བའི་བར་དང་། གང་དག་སྡང་བའི་ལུས་སྲུལ་པོ་རྣམས་ཞེས་བྱ་བའི་བར་དེ་དག་རང་རང་གི་གནས་སུ་དོང་ནས་གཉིད་ཀྱིས་ལོག་པར་གྱུར་ཏེ། བྱང་ཆུབ་སེམས་དཔའ་བཟོད་པ་ཐོབ་པ་རྣམས་དང་། ཕྱིར་མི་ལྡོག་པ་ རྣམས་ནི་མ་གཏོགས་སོ། ། གང་དག་སྡང་བའི་མི་གཟུ་ལུམས་ཅན་དང་། རྩུབ་པ་དང་། སྙིང་བརྩེ་བ་མེད་པ་དང་། ཕན་ཚུན་མི་འཐུན་པ་དང་། རྟག་ཏུ་ཁྲོ་བ་སྤྱོད་པ་དང་། འཇིག་རྟེན་ཕ་རོལ་གྱིས་འཇིགས་པར་མི་ལྟ་བ་དང་། མཚམས་མེད་པ་བྱེད་པ་དང་། དམ་ པའི་ཆོས་སྤོང་བར་བྱེད་པ་དང་།

འཕགས་པ་ལ་སྐུར་པ་འདེབས་པ་དང་། མི་དགེ་བའི་རྩ་བ་དང་ལྡན་པ་དེ་དག་ཀྱང་སྡང་བ་ཞི་བར་བྱེད་པ། གཉིད་ཀྱིས་ལོག་པར་བྱེད་པའི་བསྟན་པ་འདི་ཐོས་པས་ཐམས་ཅད་མཆོག་ཏུ་བྱམས་པའི་སེམས་དང་ལྡན་པ་དག་དང་། སྙིང་རྗེའི་ སེམས་དང་ལྡན་པ་དག་དང་། སྙིང་བརྩེ་བའི་སེམས་དང་ལྡན་པ་དག་དང་། འཁོན་མེད་པའི་སེམས་དང་ལྡན་པ་དག་དང་། མི་འཁྲུགས་པའི་སེམས་དང་ལྡན་པ་དག་དང་། ཆོས་ལ་དམིགས་པའི་སེམས་དང་ལྡན་པ་དག་དང་། འཇིག་རྟེན་ཕ་རོལ་གྱིས་འཇིགས་པའི་ སེམས་དང་ལྡན་པ་དག་དང་། དཀོན་མཆོག་གསུམ་ལ་ལྷག་པར་གུས་པའི་སེམས་དང་ལྡན་པ་དག་དང་། ཆོས་ལ་དམིགས་པའི་སེམས་དང་ལྡན་པ་དག་དང་། ཞི་བའི་སེམས་དང་ལྡན་པ་དག་ཏུ་གནས་པར་གྱུར་ཏོ། ། གསོལ་པ། བཙུན་པ་བཅོམ་ལྡན་འདས་དེ་ བཞིན་གཤེགས་པ་དཔལ་མེ་ཏོག་གི་སྙིང་པོ་དེས་བདག་ཆས་པའི་དུས་ཀྱི་ཚེ་བསྲུང་བའི་སླད་དུ་གང་སྡང་བ་ཞི་བར་བགྱིད་པའི་གཟུངས་སྔགས་སྩལ་བ་ནི་འདི་ལགས་སོ། ། དེ་ནས་དེ་བཞིན་གཤེགས་པ་ཤཱཀྱ་ཐུབ་པས་ཚེ་དང་ལྡན་པ་མཽད་ གལ་གྱི་བུ་ལ་བཀའ་སྩལ་པ།

མཽད་གལ་གྱི་བུ་ཁྱོད་ཀྱིས་སྡང་བ་ཞི་བར་བྱེད་པ་གཉིད་ཀྱིས་ལོག་པར་བྱེད་པའི་གཟུངས་སྔགས་དམིགས་པ་མེད་པའི་ཚངས་པའི་གནས་པའི་རྒྱུ་འཐུན་པ་འདི་ཟུང་ཤིག ། མཽད་གལ་གྱི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་ པར་རྫོགས་པའི་སངས་རྒྱས་རྣམས་འཇིག་རྟེན་དུ་འབྱུང་བ་རྙེད་པར་དཀའོ། ། དེ་བས་ཀྱང་སྡང་བ་ཞི་བར་བྱེད་པ་གཉིད་ཀྱིས་ལོག་པར་བྱེད་པའི་གཟུངས་སྔགས་དམིགས་པ་མེད་པའི་ཚངས་པའི་གནས་པའི་རྒྱུ་འཐུན་པ་འདི་ཆེས་རྙེད་པར་དཀའོ། ། མཽད་གལ་གྱི་བུ་ སྡང་བ་ཞི་བར་བྱེད་པ་གཉིད་ཀྱིས་ལོག་པར་བྱེད་པ་འདི་ནི་བསྐལ་པ་བརྒྱ་སྟོང་དུ་ལས་གཞན་མི་བྱེད་པར་བསྟན་ཀྱང་ལྷ་དང་བཅས་པའི་འཇིག་རྟེན་དང་། ཐ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ས་ལ་གནས་པ་རྣམས་ཀྱིས་ཀྱང་རུང་གང་གིས་ཀྱང་དོན་གཟུང་བར་ མི་ནུས་སོ། ། དེ་བཞིན་གཤེགས་པ་ཉིད་ནི་མ་གཏོགས་ཏེ། དེ་ལྟར་ཟབ་ཅིང་དེ་ལྟར་དོན་ཆེ་བ་ཡིན་ལ་དེ་ལྟར་ཕན་ཡོན་ཆེ་བ་ཡིན་ནོ། ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ལམ་དང་། བསམ་པ་ཡོངས་སུ་རྫོགས་པར་བྱེད་པ་ཡིན་ཞིང་སེམས་ཅན་ ཡོངས་སུ་སྨིན་པར་བྱེད་པའི་སྙིང་རྗེ་ཆེན་པོ་ཡང་ཐོབ་པར་བྱེད་པའོ། །

མཽད་གལ་གྱི་བུ་དེ་ལྟ་བས་ན་སྡང་བ་ཞི་བར་བྱེད་པ་གཉིད་ཀྱིས་ལོག་པར་བྱེད་པའི་གཟུངས་སྔགས་འདི་ཟུང་ཤིག ། དུས་དུས་སུ་སེམས་ཅན་རྣམས་ལ་རྒྱ་ཆེར་ཡང་དག་པར་རབ་ཏུ་སྟོན་ཅིག ། སེམས་ཅན་ གང་དག་ཉན་པར་བྱེད་པ་དེ་དག་ཀྱང་ཐོས་པ་ཙམ་གྱིས་ཡོན་ཏན་དང་ཕན་ཡོན་མང་པོ་ཐོབ་པར་འགྱུར་རོ། ། ཁྲོ་བ་མང་པོ་མི་འདོད་པ་མྱོང་བར་འགྱུར་བ་ལས་ཀྱི་རྣམ་པར་སྨིན་པའི་འབྲས་བུ་རྣམས་མེད་པར་འགྱུར་རོ། ། མི་སྣང་བར་འགྱུར་རོ། ། འཁོར་བའི་སྐྱོན་མང་པོ་རྣམ་པར་ཤེས་ པར་འགྱུར་རོ། ། དགེ་བའི་རྩ་བ་མང་པོ་སྐྱེད་པར་འགྱུར་རོ། ། བསོད་ནམས་མང་པོ་སོ་སོར་འཛིན་པར་བྱེད་དོ། ། དགེ་བའི་བཤེས་གཉེན་མང་པོ་ལ་སྟེན་པར་བྱེད་དོ། ། སྙེན་པར་བྱེད་དོ། ། བསྙེན་བཀུར་བྱེད་དོ། ། དེས་ན་དེ་དག་བླ་ན་མེད་པ་ཡང་དག་པར་ རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། ། མཽད་གལ་གྱི་བུ་གཟུངས་སྔགས་འདི་ནི་ཆོས་ཀྱི་མར་མེ་འབར་བར་བྱེད་པ། དཀོན་མཆོག་གསུམ་གྱི་གདུང་མི་ཆད་པར་བྱེད་པ་ཡིན་ནོ། ། འདུས་པ་ཆེན་པོ་ཐེག་པ་ཆེན་པོའི་མདོ་ཉི་མའི་སྙིང་པོའི་ལེའུ་ལས། གཟུངས་ སྔགས་ཀྱི་ལེའུ་སྟེ་གསུམ་པའོ། ། ། །

དེ་ནས་བཅོམ་ལྡན་འདས་ཀྱིས་ཕོ་ཉ་བཞི་པོ་དེ་དག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་ལ་ཡང་བཀའ་སྩལ་པ། རིགས་ཀྱི་བུ་དག་སངས་རྒྱས་ཀྱི་ཞིང་འདིར་རང་རང་གི་དགེ་བའི་ཕྱོགས་ཀྱིས་ གནས་པར་བྱོས་ཤིག ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་འཁོར་དང་བཅས་ཏེ། གནས་ཇི་ལྟ་བ་བཞིན་དུ་སྐྱིལ་མོ་ཀྲུང་གིས་འཁོད་ནས་ཇི་ལྟར་འཚམ་པ་བཞིན་དུ་བཟོད་པའི་གཟུངས་ལ་སྙོམས་པར་འཇུག་པ་ཤིན་ཏུ་བསྒོམས་པ་དག་གིས་སྙོམས་ པར་ཞུགས་སོ། ། སྙོམས་པར་ཞུགས་པ་དེ་དག་ཁ་ཅིག་གི་ལུས་ལས་འོད་འདི་ལྟ་བུ་བྱུང་སྟེ། དཔེར་ན་འབྲུ་མར་གྱི་མར་མེ་བཞིན་ནོ། ། ཁ་ཅིག་གི་ནི་དཔེར་ན་ཟླ་བ་དང་ཉི་མ་བྱེ་བ་བརྒྱ་སྟོང་གི་འོད་བཞིན་པའི་བར་དུའོ། ། ཡང་དེའི་ཚེ་ཚེ་དང་ལྡན་པ་ཀུན་ཤེས་ཀཽ་ཌི་ནྱས་ འདི་སྙམ་དུ་སེམས་ཏེ། སངས་རྒྱས་ཀྱི་མཐུས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་གིས་ཞུ་བ་ཇི་ལྟ་བུས་དེ་བཞིན་གཤེགས་པ་གཟུངས་སྔགས་བཞི་པོ་ཐམས་ཅད་རྒྱ་ཆེར་ཡང་དག་པར་རབ་ཏུ་སྟོན་པར་མཛད་པ་དང་། སངས་ རྒྱས་ཀྱི་ཞིང་མི་མཇེད་དུ་ཇི་ལྟར་ལྷགས་པའི་སེམས་ཅན་རྣམས་ཉན་པར་བྱེད་པ་དང་།

ཐེ་ཙོམ་ཐམས་ཅད་སྤོང་བར་འགྱུར་བ་དང་། ཆོས་ཐམས་ཅད་ལ་སྣང་བ་ཐོབ་པ་དང་། ལྟད་མོ་དང་བྲལ་བ་དང་། སོམ་ཉི་ལས་རྒལ་ཅིང་ཐེ་ཙོམ་ལས་རྒལ་བར་འགྱུར་བ་དང་། མྱུར་དུ་ སྐྱོན་མེད་པར་འཇུག་པ་དང་། ལོག་པར་མི་ལྟུང་བའི་ཆོས་ཅན་དང་། མཐོ་རིས་ལ་གཞོལ་བར་འགྱུར་བ་དེ་ལྟ་བུར་ཞུ་བར་བྱའོ་སྙམ་མོ། ། དེ་ནས་ཚེ་དང་ལྡན་པ་ཀུན་ཤེས་ཀཽ་ཌི་ནྱས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་རབ་ ཏུ་བཏུད་ནས་ཅང་མི་སྨྲ་བར་འདུག་གོ། ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་ཤེས་ཀཽ་ཌི་ནྱ་ལ་བཀའ་སྩལ་པ། ཀཽ་ཌི་ནྱ་ཅི་དེ་བཞིན་གཤེགས་པ་ལ་ཁྱོད་ཞུ་བ་ཞུ་བར་འདོད་དམ། གསོལ་པ། བཙུན་པ་བཅོམ་ལྡན་འདས་དེ་བཞིན་ནོ། ། བཙུན་པ་ བདེ་བར་གཤེགས་པ་དེ་བཞིན་ཏེ། བཙུན་པ་བཅོམ་ལྡན་འདས་གལ་ཏེ་ཞུ་བ་ཞུས་པ་ལུང་བསྟན་པའི་སླད་དུ་བདག་ལ་སྐབས་ཕྱེ་ན་བཙུན་པ་དེ་བཞིན་གཤེགས་པ་ལ་བདག་ཞུ་བ་འགའ་ཞིག་ཞུ་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཌི་ནྱ་དེ་ བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཁྱོད་གང་དང་གང་འདོད་པ་ཞུས་ཤིག་དང་།

ངས་ཞུ་བ་ཞུས་པ་དེ་དང་དེ་ལུང་བསྟན་པས་ཇི་ལྟར་ལྷ་དང་བཅས་པའི་འཇིག་རྟེན་གྱིས་མངོན་སུམ་དུ་འགྱུར་བ་ལྟར་ཁྱོད་ཀྱི་སེམས་རངས་པར་ བྱའོ། ། དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་ཤེས་ཀཽ་ཌི་ནྱས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་ཀྱིས་གང་ཟག་གི་ཟླ་ནི་སྲེད་པའོ་ཟླ་ནི་སྲེད་པའོ་ཞེས་གསུངས་ལགས་ན། ཇི་ཙམ་གྱིས་དེ་བཞིན་གཤེགས་པ་གང་ཟག་གི་ཟླ་སྲེད་པ་ལགས་པར་ འདོགས་པས་འདོགས་པར་མཛད་ལགས། ཇི་སྐད་དུ་དེ་བཞིན་གཤེགས་པས་སྐྱེས་བུའི་ཟླ་སྲེད་པ་ནི་ཡུན་རིང་པོར་ཡང་དང་ཡང་འཁོར་ཞིང་ཡང་དང་ཡང་མངལ་ལེན་པར་བྱེད་དོ་ཞེས་གསུངས་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཌི་ནྱས་གང་ཁྱོད་སྐྱེ་བོ་ མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བའི་ཕྱིར་ཞུགས་ཤིང་དུས་དང་འཚམ་པར་ཞུ་བ་ཞུས་པ་ལེགས་སོ་ལེགས་སོ། ། ཀཽ་ཌི་ནྱ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་བཤད་དོ། ། བཙུན་པ་བཅོམ་ལྡན་འདས་དེ་བཞིན་ནོ་ཞེས་གསོལ་ནས། ཚེ་ དང་ལྡན་པ་ཀུན་ཤེས་ཀཽ་ཌི་ནྱས་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །

ཀཽ་ཌི་ནྱ་སྲེད་པ་ཞེས་བྱ་བ་ནི་སྲེད་པ་གསུམ་མོ། ། གསུམ་གང་ཞེ་ན། འདོད་པའི་སྲེད་པ་དང་། གཟུགས་ཀྱི་སྲེད་པ་དང་། གཟུགས་མེད་ པའི་སྲེད་པའོ། ། ། ། འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་དྲུག་པ། གཞན་ཡང་སྲེད་པ་ནི་གསུམ་སྟེ། འབྱུང་བའི་སྲེད་པ་དང་། འཇིག་པའི་སྲེད་པ་དང་། ཆོས་ཀྱི་སྲེད་པའོ། ། ཀཽ་ཌི་ནྱ་དེ་ལ་འདོད་པའི་སྲེད་ པ་རྣམས་གང་ཞེ་ན། འདོད་པ་རྣམས་ཞེས་བྱ་བ་ནི་འཁྲིག་པ་དང་ལྡན་པའི་སྤྲོད་པ་སྟེ། གང་ལ་བག་མེད་པ་རྣམས་འདོད་པའི་བདེ་བའི་སྦྱོར་བ་ལ་བརྩོན་ཞིང་དམན་པའི་རང་བཞིན་ཅན་གྱི་མི་དག་དགའ་བར་བྱེད་ཅིང་། སེམས་ཅན་རྣམས་འདོད་ཆགས་ཀྱིས་ཡོངས་སུ་གདུང་བས་ གདུངས་ནས་འདོད་ཆགས་ཀུན་འབྱུང་བས་མི་དགེ་བ་བཅུའི་ལས་ཀྱི་ལམ་ཡང་དག་པར་བླངས་ཏེ་གནས་པར་བྱེད་པའོ། ། རྒྱུ་དེ་དང་རྐྱེན་དེས་སེམས་ཅན་དམྱལ་བ་རྣམས་སྣང་ངོ་། ། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་། གནོད་སྦྱིན་དབུལ་པོ་ཉིད་སྣང་ངོ་། །

འདོད་ཆགས་ཀྱི་རྒྱུས་སེམས་ཅན་རྣམས་འགྲོ་བ་ལྔ་དང་ལྡན་པའི་འཁོར་བར་སྡུག་བསྔལ་གྱི་ཚོར་བ་མི་བཟད་པ་རྩུབ་པ་རྣམ་པ་སྣ་ཚོགས་ཉམས་སུ་མྱོང་བར་འགྱུར་རོ། ། སྐྲག་པར་མི་འགྱུར་རོ། ། དེ་དག་ངོ་ཚ་ཤེས་པ་དང་། ཁྲེལ་ཡོད་པ་སྤངས་ཤིང་དགེ་བའི་རྩ་བ་དང་བྲལ་ བས་བརྒྱ་ལམ་ན་རེས་འགའ་མི་ཉིད་རྙེད་པར་འགྱུར་རོ། ། དེ་དག་འདོད་ཆགས་ཀྱི་རྒྱུས་ཡང་དང་ཡང་དུ་ལུས་དང་ངག་དང་། ཡིད་ཀྱི་ཉེས་པར་སྤྱོད་པའི་ལས་རྣམ་པ་སྣ་ཚོགས་ཞེས་བྱ་བ་ནས་མཚམས་མེད་པའི་ལས་རྣམས་ཞེས་བྱ་བའི་བར་ཀུན་ནས་སློང་བར་བྱེད་དོ། ། དེ་དག་ཡང་ དང་ཡང་དུ་དུས་ཡུན་རིང་པོར་ངན་སོང་རྣམས་སུ་ཚོར་བ་རྩུབ་པ་མི་བཟད་པ་ཉམས་སུ་མྱོང་བར་འགྱུར་རོ། ། ཐམས་ཅད་ཀྱང་འདོད་ཆགས་ཀྱི་རྒྱུ་དང་འདོད་ཆགས་ཀྱི་གཞིས་འདོད་ཆགས་ཀྱི་བག་ལ་ཉལ་གྱི་ལྟུང་བ་བརྟགས་པ་དག་ཡིན་ཏེ། དེའི་ཕྱིར་དེ་བཞིན་གཤེགས་པ་འདོད་ཆགས་ སྤངས་པའི་ཕྱིར་ཆོས་སྟོན་ཏོ། ། འདོད་པ་རྣམས་ཀྱི་ཉེས་དམིགས་ཡང་དག་པ་ཇི་ལྟ་བ་བཞིན་དུ་མཐོང་བར་མཛད་དོ། ། སེམས་ཅན་དེ་དག་འདོད་པ་རྣམས་ཀྱི་ཉེས་དམིགས་ཤེས་ནས་ཡང་དག་པ་ཇི་ལྟ་བ་བཞིན་དུ་སོ་སོར་རྟོགས་པར་བྱེད་དེ།

དཔེར་ ན་འདོད་པ་རྣམས་ནི་མི་སྡུག་པ་དག་གོ། ། ཀིམ་པ་ཀའི་འབྲས་བུ་ལྟ་བུ་དག་གོ། ། འདོད་པ་རྣམས་ནི་མེ་མདག་གི་ཕུང་པོ་ལྟ་བུ་དག་གོ། ། དུག་གི་བུམ་པ་ལྟ་བུ་དག་གོ། ། འདོད་པ་རྣམས་ནི་མནམ་ཕྱི་ས་དང་འདྲ་བ་དག་གོ། ། འདོད་པ་རྣམས་ནི་སྤུ་གྲིའི་སོ་ལྟ་བུ་དག་གོ། ། ཆོམ་རྐུན་ལྟ་བུ་དག་གོ། ། གདོལ་པའི་ཁྱིམ་ལྟ་བུ་དག་གོ། ། ལྕགས་ཀྱི་ཐུ་ལུམ་འབར་བ་ལྟ་བུ་དག་གོ། ། སེར་བ་འབབ་པ་ལྟ་བུ་དག་གོ། ། སྦྲུལ་གདུག་པ་ལྟ་བུ་དག་གོ། ། དགྲ་དང་འདྲ་བ་དག་གོ། ། དགོན་པའི་ལམ་ལྟ་བུ་དག་གོ། ། སྲིན་མོའི་གླིང་ལྟ་བུ་དག་གོ། ། གཤེད་མ་ལྟ་བུ་དག་གོ། ། ཕྱག་དར་ལྟ་བུ་དག་གོ། ། འདོད་པ་རྣམས་ནི་དུར་ཁྲོད་ལྟ་བུ་དག་ཏུ་ཤེས་ཤིང་འདོད་པ་ལ་ཆགས་པ་དང་། འདོད་པ་ལ་ཞེན་པ་དང་། འདོད་པའི་ཡོངས་སུ་གདུང་བ་དང་། འདོད་པའི་ཀུན་འབྱུང་བ་དང་། འདོད་པ་རྣམས་ཀྱི་ཉེས་དམིགས་ཤེས་ཏེ། དེ་ ལ་འདོད་པ་རྣམས་ལ་ཉེས་དམིགས་སུ་ཤེས་པས་སྐྱོ་ཞིང་ཆོས་ཀྱི་བསམ་པ་བསྒོམ་པ་དང་། བསླབ་པ་འཛིན་པ་ལ་མངོན་པར་དགའ་བས་གནས་པར་བྱེད་དོ། ། ཆོས་ཡོངས་སུ་ཚོལ་བ་དང་། ཆོས་ཀྱི་ཀུན་དགའ་ལ་དགའ་བས་དགའ་བ་དང་། ཆོས་ཀྱི་ནོར་བསགས་པ་དང་།

ཆོས་ཀྱི་སེམས་རྣམ་པར་དག་པ་དང་། ཆོས་ཀྱི་ལམ་དང་ཡང་དག་པར་ལྡན་པ་དང་། ཆོས་ལ་གཞོལ་བ་དག་ཏུ་འགྱུར་རོ། ། དེ་དག་འཆི་བའི་དུས་ཀྱི་ཚེ་ཆོས་རྗེས་སུ་དྲན་ཞིང་ཆོས་ཀྱི་རོའི་རྣམ་པར་སྨིན་པ་ཆོས་ཀྱིས་བརླན་པའི་སེམས་ཀྱིས་གནས་པ་དེ་དག་གང་དང་གང་དུ་ རྣམ་པར་ལྟ་བར་བྱེད་པ་དེ་དང་དེར་ཕྱོགས་ཐམས་ཅད་ན་སངས་རྒྱས་བཅོམ་ལྡན་འདས་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པ་ཚོགས་ཆེན་པོའི་འཁོར་དང་བཅས་པ་མཐོང་བར་འགྱུར་རོ། ། ཆོས་ཐོས་པར་འགྱུར་རོ། ། དེ་དག་ཆོས་དེ་ཐོས་པས་ཀྱང་ཡིད་མཆོག་ཏུ་ རངས་ཏེ། དེ་བཞིན་གཤེགས་པ་ལ་ལྟ་བར་བྱེད་དོ། ། དེ་དག་འཆི་བའི་དུས་བྱས་ནས་ངན་སོང་སྤངས་ཤིང་སངས་རྒྱས་ཀྱི་ཞིང་སྟོང་པ་མ་ཡིན་པ་རྣམས་སུ་སྐྱེ་བ་དག་ཏུ་འགྱུར་རོ། ། དེར་དེ་དག་ཡོན་ཏན་གྱིས་ཕྱུག་པ་དང་། དུལ་བ་དང་། ཡང་དག་པར་སྡོམ་པ་ལ་མངོན་ པར་དགའ་ཞིང་བསམ་གཏན་དང་མངོན་པར་ཤེས་པས་རྣམ་པར་རོལ་པ་བྱང་གྲོལ་གྱི་བདེ་བ་ཕུན་སུམ་ཚོགས་པ། བྱམས་པ་ཆེན་པོ་དང་། སྙིང་རྗེ་ཆེན་པོས་བརྒྱན་པ། སེམས་ཅན་ཐམས་ཅད་ཡོངས་སུ་སྨིན་པར་མཛད་པ། སངས་རྒྱས་ཀྱི་ཞིང་ཡོན་ཏན་གྱིས་རྣམ་ པར་བརྒྱན་པ་རྣམས་དང་ལྷན་ཅིག་འཕྲད་པར་འགྱུར་རོ།

། དེར་དེ་དག་དང་ལྷན་ཅིག་ཕྲད་པས་དེ་དག་གི་བག་ཆགས་ཀྱི་ཉིང་མཚམས་སྦྱོར་བའི་ཉོན་མོངས་པ་རྣམས་ཡོངས་སུ་ཟད་པར་འགྱུར་རོ། ། དེར་དེ་དག་ཡོན་ཏན་དེ་ལྟ་བུ་དག་གིས་ཀྱང་ཤིན་ཏུ་བརྒྱན་པར་འགྱུར་ཏེ། དཔེར་ན་ཟ་མ་ཏོག་ལ་ལར་སྤོས་ཀྱི་རྣམ་པ་སྣ་ཚོགས་དག་བཅུག་པར་གྱུར་ཅིང་། ཟ་མ་ཏོག་དེར་ཡང་རྒྱན་རྣམ་པ་སྣ་ཚོགས་དག་གཞག་པར་གྱུར་ན་རིང་པོ་མི་ཐོགས་པར་དེ་དག་གི་དྲི་ཅི་འདྲ་བར་གོས་དང་རྒྱན་དེ་དག་ཀྱང་དེ་འདྲ་བའི་དྲི་རབ་ཏུ་འབྱིན་པར་བྱེད་དོ། ། རིང་པོ་མི་ ཐོགས་པར་སྤོས་ཀྱི་རྣམ་པ་དེ་དག་གིས་གོས་པར་ཡང་འགྱུར་ལ་ཁ་དོག་ཏུ་ཉེ་བར་འགྲོ་བར་ཡང་མི་འགྱུར་རོ། ། ཀཽ་ཌི་ནྱ་དེ་བཞིན་དུ་སེམས་ཅན་གང་དག་འདོད་པ་རྣམས་ལ་ཉེས་དམིགས་སུ་ཤེས་པས་ཞེས་བྱ་བ་ནས་དེ་དག་འཆི་བའི་དུས་ཀྱི་ཚེ་ཞེས་བྱ་བའི་བར་དང་། སངས་རྒྱས་ བཅོམ་ལྡན་འདས་མཐོང་ཞིང་དེ་དག་འཆི་བའི་དུས་བྱས་ནས་ངན་སོང་གསུམ་སྤངས་ཤིང་སངས་རྒྱས་ཀྱི་ཞིང་སྟོང་པ་མ་ཡིན་པ་རྣམས་སུ་སྐྱེ་བ་དག་ཏུ་འགྱུར་རོ། ། ཞེས་བྱ་བའི་བར་དང་། དེར་དེ་དག་ཡོན་ཏན་དེ་ལྟ་བུ་དག་གིས་ཀྱང་ཡང་དག་པར་བརྒྱན་པར་འགྱུར་ཏེ་ཞེས་བྱ་བའི་ བར་དང་།

དེ་དག་རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། ། ཀཽ་ཌི་ནྱ་དེ་ལྟ་བས་ན་བདག་གི་དོན་དང་། གཞན་གྱི་དོན་དང་། གཉི་གའི་དོན་ཡང་དག་པར་མཐོང་བའི་རིགས་ཀྱི་བུའམ་ རིགས་ཀྱི་བུ་མོས་སྐྱེས་བུ་དམ་པ་དག་ལ་བསྟེན་པར་བྱའོ། ། བསྙེན་པར་བྱའོ། ། བསྙེན་བཀུར་བྱའོ། ། དེ་དག་ལ་ཡང་གང་འདོད་པ་རྣམས་ཀྱི་རོ་མྱང་བ་དང་། ཉེས་དམིགས་དང་། ངེས་པར་འབྱུང་བ་ཡོངས་སུ་དྲི་བར་བྱའོ། ། དེར་དེ་ དག་ཆོས་ཐོས་ནས་གང་གི་ཕྱིར་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་བར་དུ་འགྱུར་རོ། ། སྐྱེས་བུ་དམ་པ་རྣམས་ཞེས་བྱ་བ་ནི་སངས་རྒྱས་དང་། བྱང་ཆུབ་སེམས་དཔའ་རྣམས་དང་། རྐྱེན་གྱི་རྒྱལ་བ་རྣམས་ དང་། དགྲ་བཅོམ་པ་རྣམས་དང་། ད་ལྟར་འཇིག་རྟེན་དུ་སྟོན་པ་ང་བྱུང་ངོ་ཞེས་བྱ་བ་ནས་སངས་རྒྱས་བཅོམ་ལྡན་འདས་སོ་ཞེས་བྱ་བའི་བར་ཡིན་ཏེ། ང་ནི་སེམས་ཅན་ཐམས་ཅད་ལ་ཕན་པར་བཞེད་པ། སྡུག་བསྔལ་ཐམས་ཅད་ལས་རབ་ཏུ་ཐར་བར་བཞེད་པ། འདོད་པའི་སྐྱོན་ཐམས་ཅད་རབ་ཏུ་སྟོན་པར་བཞེད་པ་ཡིན་ནོ། །

དེ་བས་ན་འདིར་ཁྱེད་ཇི་སྙེད་ལྷགས་པ་ཐམས་ཅད་ང་གཞན་མ་ཡིན་པར་གསུང་བ། མི་མཉམ་པ་མེད་པར་གསུང་བ། བྱམས་པར་གསུང་བ། སྙིང་རྗེ་བར་གསུང་བ། སེམས་ཅན་ཐམས་ཅད་ལ་ཕན་པར་མཛད་པ་ ལས་འདོད་པ་རྣམས་ཀྱི་ཉེས་དམིགས་ཡང་དག་པ་ཇི་ལྟ་བ་བཞིན་ཉོན་ཅིག ། མཉན་ནས་ཀྱང་ཚུལ་བཞིན་དུ་ཡིད་ལ་བྱོས་ཤིག་དང་། ཕྱིས་ངན་སོང་གསུམ་པོ་ཐམས་ཅད་ལས་ཡོངས་སུ་ཐར་བར་འགྱུར་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་ པར་འཚང་རྒྱ་བར་འགྱུར་རོ། ། ཡང་དེའི་ཚེ་སངས་རྒྱས་ཀྱི་ཞིང་མི་མཇེད་ཐམས་ཅད་དུ་གཏོགས་པའི་སེམས་ཅན་དེ་དག་ཐམས་ཅད་ཀྱིས་མགྲིན་གཅིག་ཏུ་འདི་སྐད་ཅེས་གསོལ་ཏོ། ། བཅོམ་ལྡན་འདས་ཀྱིས་འདོད་པ་རྣམས་ཀྱི་ཉེས་དམིགས་གང་བདག་ཅག་གིས་སེམས་རྩེ་གཅིག་ པས་ཐོས་པར་འགྱུར་བ་བཤད་དུ་གསོལ། ཐོས་ནས་ཀྱང་སྟོབས་ཇི་ལྟ་བ་བཞིན་དུ་བསྒྲུབ་པར་བགྱི་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ། རྐྱེན་བཞིས་སེམས་ཅན་དག་གི་འདོད་པ་རྣམས་འབྱུང་སྟེ། བཞི་གང་ཞེ་ན། གཟུགས་ཀྱི་འདོད་ཆགས་དང་། དབྱིབས་ ཀྱི་འདོད་ཆགས་དང་། རེག་པའི་འདོད་ཆགས་དང་། རྣམ་པར་གྲོལ་བ་མ་ཡིན་པའི་རྩེ་བའི་འདོད་ཆགས་ཀྱིས་སོ། །

དེ་ལ་གཟུགས་ཀྱི་འདོད་ཆགས་གང་ཞེ་ན། གཟུགས་ཀྱི་འདོད་ཆགས་ཞེས་བྱ་བ་ནི་མཁས་པ་དུས་སུ་འབྱུང་བ་ཆེན་པོ་བཞི་དག་ལ་མཁས་པ་ནི་ཟད་པའི་ ཚུལ་དང་། བདག་མེད་པའི་ཚུལ་དང་། སེམས་ཅན་མེད་པའི་ཚུལ་གྱིས་སོ་སོར་རྟོགས་པར་བྱེད་ན། འོན་ཀྱང་བྱིས་པ་ཕྱིན་ཅི་ལོག་ལ་ཡང་དག་པར་རྟེན་པ་རྣམས་ནི་རྣམ་པར་བརྟག་པ་དག་ལ་འདི་ནི་བུད་མེད་ཀྱི་གཟུགས་སོ། ། འདི་ནི་སྐྱེས་པའི་གཟུགས་སོ། ། འདི་ ནི་ངན་པའོ། ། འདི་ནི་བཟང་པོའོ། ། འདི་ནི་དགའ་བར་བྱེད་པའོ། ། འདི་ནི་མི་འདོད་པའོ་ཞེས་ཉེ་བར་རྟོག་པར་བྱེད་དོ། ། དེ་ལ་འདོད་པའི་སྐྱེས་བུ་སྨྱོན་པ་རྣམས་ནི་བུད་མེད་ཀྱི་གཟུགས་དག་མཐོང་ནས་དེ་ལ་མཚན་མར་འཛིན་པ་དག་ཡིན། མངོན་རྟགས་སུ་འཛིན་པ་ དག་ཡིན་ནོ། ། དེ་ལ་དེ་དག་འདོད་པའི་གཞི་དང་། འདོད་པ་ལ་འདུན་པ་དང་། འདོད་པ་ལ་ལྷག་པར་ཆགས་པ་མ་བྱུང་བ་སྐྱེད་པར་བྱེད་པས་དེ་དག་དགེ་བའི་རྩ་བ་ཐམས་ཅད་ལས་ཡོངས་སུ་ཉམས་པར་འགྱུར་རོ། ། མཁས་པ་ཐམས་ཅད་ཀྱིས་རྣམ་པར་སྤོང་ བར་བྱེད་པར་འགྱུར་རོ། ། ལུས་དང་། ངག་དང་། ཡིད་མ་བསྲུངས་པས་ཉེས་པར་སྤྱོད་པ་ཐམས་ཅད་དང་ཕྲད་པར་འགྱུར་རོ། །

དེ་དག་འདོད་པ་རྣམས་ལས་ངེས་པར་འབྱུང་བར་མི་ལྟ་ཞིང་ངན་སོང་གསུམ་དང་ཡང་དག་པར་ལྡན་པ་ཡིན་ཏེ། འཆི་བའི་དུས་བྱས་ནས་ སེམས་ཅན་དམྱལ་བ་རྣམས་སམ། དུད་འགྲོ་རྣམས་སམ། {ཡི་དགས་,ཡི་དྭགས་}རྣམས་སུ་སྐྱེ་བར་འགྱུར་རོ། ། དེར་འདོད་པའི་རྒྱུ་དང་། འདོད་པའི་རྐྱེན་དང་། འདོད་པའི་གཞིས་དུས་ཡུན་རིང་པོར་སྡུག་བསྔལ་གྱི་ཚོར་བ་རྩུབ་པ་ཚ་བ་མི་བཟད་པ་མྱོང་བར་འགྱུར་རོ། ། དེར་མཁས་ པ་རྣམས་ནི་བུད་མེད་དང་སྐྱེས་པར་ཤེས་ནས་མི་སྡུག་པའི་འདུ་ཤེས་སྐྱེད་པར་བྱེད་དོ། ། སྐྲ་མེད་པ་དང་། པགས་ཤུན་དང་། རྒྱུས་པ་དང་། ཤ་དང་། ཁྲག་མེད་པ་དང་། རུས་པ་དང་། མིའི་ཐོད་པ་དཀར་པོ་ཡིད་ལ་བྱེད། ཀུན་ཏུ་སྟེན་པར་བྱེད་ཅིང་དེ་སྒོམ་པར་བྱེད། ལན་མང་དུ་བྱེད་དོ། ། བུད་མེད་ཀྱི་གཟུགས་ལ་ཇི་ལྟ་བར་སྐྱེས་པའི་གཟུགས་ལའང་དེ་བཞིན་ནོ། ། མདུན་དུ་ཇི་ལྟ་བར་ཐག་རིང་དུའང་དེ་བཞིན་ནོ། ། ཐག་རིང་དུ་ཇི་ལྟ་བུར་མདུན་དུའང་དེ་བཞིན་ནོ། ། གཞན་ཇི་ལྟ་བར་བདག་གི་ཡང་དེ་བཞིན་དུ་རུས་ པའི་ཕུང་པོ་དཀར་པོ་དང་། སྐྲ་མེད་པ་དང་། པགས་ཤུན་དང་། རྒྱུས་པ་དང་། ཤ་དང་། ཁྲག་མེད་པར་ཡིད་ལ་བྱས་ཤིང་རིག་པར་བྱས་ལ།

ལན་མང་དུ་བྱས་པས་དེར་སེམས་ཤིན་ཏུ་གནས་པ་ཡིན། ཤིན་ཏུ་བསྒོམས་པ་དང་། ཤིན་ཏུ་ཡིད་ལ་བྱས་པ་ཡིན་ཏེ། འདི་ནི་སེམས་ཀྱི་ཉོན་མོངས་པའི་ཀློང་ཡང་དག་པར་གཅོད་པ་དང་པོའོ། ། ཡང་རུས་གོང་གི་ཕུང་པོ་དེ་ཉིད་ལ་སེམས་ཡང་དག་པར་གཏོད་པར་བྱེད་དེ། སྨིན་མཚམས་སུ་རྒྱ་ཤུག་ཙམ་དེ་ལ་དྲན་པ་གཞོག་པར་བྱེད་ཅིང་སེམས་སྒོམ་པར་བྱེད། ལན་མང་དུ་བྱེད་དོ་ཞེས་ བྱ་བ་ནས་དེའི་སེམས་ཤིན་ཏུ་གནས་པ་ཡིན་ཏེ་ཤིན་ཏུ་བསྒོམས་པ་དང་། ཤིན་ཏུ་ཡིད་ལ་བྱས་པའི་བར་ཡིན་ནོ། ། དེ་ལ་དེའི་སེམས་ཤིན་ཏུ་སྦྱངས་པ་ཡིན། ལུས་ཤིན་ཏུ་སྦྱངས་པ་ཡིན་ཏེ། ཇི་ལྟར་སེམས་ཤིན་ཏུ་སྦྱངས་པ་ཡིན་ཞེ་ན། ཐམས་ཅད་ཀྱི་ཐམས་ཅད་དུ་ རྣམ་པར་ཞི་བར་བྱེད་དོ། ། དེ་ཅུང་ཟད་ཡིད་ལ་བྱེད་པ་ཡིན། དེ་ཅུང་ཟད་ཡང་དག་པར་ཤེས་པ་ཡིན། དེ་ཅུང་ཟད་དམིགས་པར་བྱེད་པ་ཡིན་ཏེ། འདི་ནི་ཞི་གནས་དང་རྗེས་སུ་འཐུན་པ་ཉོན་མོངས་པའི་ཀློང་རྣམ་པར་གཅོད་པ་དང་། འདོད་ཆགས་རྣམ་པར་གཅོད་ པའི་ཆོས་ཀྱི་སྒོ་གཉིས་པའོ། ། ཇི་ལྟར་ལུས་ཤིན་ཏུ་སྦྱངས་པ་ཡིན་ཞེ་ན། དེ་བཞིན་དུ་སྒོམ་པའི་དབུགས་རྔུབ་པ་དང་དབུགས་ཕྱུང་བ་རྣམ་པར་ཞི་བར་བྱེད་ཅིང་འཇུག་པར་ཡང་མི་བྱེད།

འབྱུང་བར་མི་བྱེད་དོ། ། དེ་ལུས་དང་སེམས་ཤིན་ཏུ་སྦྱངས་ཤིང་ཞི་གནས་ལ་རྗེས་སུ་བརྩོན་ པ་འགོག་པ་ལ་དམིགས་པ་ཡིན་ཏེ། འདི་ནི་འགོག་པ་ལ་དམིགས་པའི་ཉོན་མོངས་པའི་ཀློང་རྣམ་པར་གཅོད་པའི་ཆོས་ཀྱི་སྒོ་གསུམ་པ་ཡིན་ནོ། ། ཡང་གང་གི་སེམས་རྒོད་པ་མྱུར་དུ་ཞི་གནས་དང་འཐུན་པར་བྱུང་བ་དེ་མགོ་ཐོད་ཀྱི་མཚོགས་མར་རྒྱ་ཤུག་གི་འབྲས་བུ་ཙམ་ལ་གནས་ གཅིག་ཏུ་སེམས་ཉེ་བར་གཏོད་པར་བྱེད་ཅིང་སྒོམ་པར་བྱེད། ལན་མང་དུ་བྱེད་དོ། ། དེར་བུ་གའི་བར་དུ་མཐོང་བར་བྱེད་ཅིང་སྒོམ་པར་བྱེད། ལན་མང་དུ་བྱེད་དོ། ། དེར་ཡང་བྱེ་མའི་འབྲུ་ཙམ་གྱི་རུས་གོང་གི་ཕྱེ་མར་བྱེད། མཐོང་བར་བྱེད་ཅིང་རིམ་པ་དེ་གཉིས་པ་དང་། གསུམ་པ་ ཞེས་བྱ་བ་ནས་མགོའི་ཐོད་པ་ཐམས་ཅད་རུས་གོང་གི་ཕྱེ་མའི་བར་དུ་ཡང་དག་པར་རྗེས་སུ་མཐོང་བར་བྱེད་དོ། ། དེ་དག་ཀྱང་རླུང་གིས་ཁྱེར་བར་ཡང་དག་པར་རྗེས་སུ་མཐོང་བར་བྱེད་པ་ནས་ཐམས་ཅད་ནམ་མཁའ་སྟོང་པ་ཉིད་དུ་མཐོང་བའི་བར་དུ་བྱེད་དོ། ། དེ་ལ་ལུས་ཤིན་ཏུ་ སྦྱངས་པ་དང་། སེམས་ཤིན་ཏུ་སྦྱངས་པ་འདི་ནི་ཞི་གནས་ལ་རབ་ཏུ་བརྩོན་པ་དང་། འགོག་པ་ལ་དམིགས་པ་དང་།

ཉོན་མོངས་པའི་ཀློང་རྣམ་པར་གཅོད་པའི་ཆོས་ཀྱི་སྒོ་བཞི་པའོ། ། དེ་ནས་ཚེ་དང་ལྡན་པ་ཀཽ་ཌི་ནྱས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་ འདས་ཅི་ལགས། འདུས་བྱས་ཀྱི་དབྱིངས་ཀྱི་ཡེ་ཤེས་མ་ཚང་བ་མ་མཆིས་པ་རྣམ་པར་དབེན་པའི་རྟེན་ནམ་མཁའི་དབྱིངས་ཀྱི་ཡང་དག་པའི་མཐའ་ཅན་ལགས་སམ། རིགས་ཀྱི་བུ་དེ་བཞིན་ནོ། ། འདུས་བྱས་ཀྱི་དབྱིངས་ཀྱི་ཡང་དག་པའི་མཐའ་ནི་ནམ་མཁའ་དང་འདྲ་སྟེ། འདི་ ནི་ཡང་དག་པར་རང་གིས་མཐོང་བར་བྱ་བ་ལ་འཇུག་པའོ། ། ཀུན་ཤེས་ཀཽ་ཌི་ནྱས་ཞུས་པ། བཙུན་པ་བཅོམ་ལྡན་འདས་ཅི་ལགས་ནམ་མཁའ་རང་གི་ཤེས་པ་ལགས་སམ། འོན་ཏེ་གཞན་གྱི་ཤེས་པ་ལ་མངོན་པར་འཇུག་པ་ལ་མཁས་པ་ལགས། བཅོམ་ལྡན་འདས་ ཀྱིས་བཀའ་སྩལ་པ། ཆོས་ཐམས་ཅད་ཀྱི་དབྱིངས་ལ་འཇུག་པས་འདུས་བྱས་ཀྱི་དབྱིངས་ཐམས་ཅད་རང་གི་ཤེས་པ་ལ་འཇུག་པར་བྱའོ། ། ཇི་ལྟ་ཞེ་ན། གང་གཟུགས་ཤིན་ཏུ་རྣམ་པར་དག་པ་ལ་རྣམ་པར་སྒོམ་པར་བྱེད་པ་དེ་དེ་བཞིན་གཤེགས་པ་མཐོང་བར་འགྱུར་རོ། ། གང་མགོའི་ཐོད་པའི་རུས་པའི་ཕྱེ་མ་མཐོང་ནས་ཐམས་ཅད་རླུང་གིས་ཁྱེར་བར་མཐོང་བ་དེས་གཟུགས་ཐམས་ཅད་རྣམ་པར་བཤིག་པ་ཡིན་ཏེ།

མིག་གི་རྣམ་པར་ཤེས་པ་ལ་གཟུགས་སུ་སྣང་བ་ཅི་ཡང་སྣང་བར་མི་འགྱུར་རོ། ། དེ་ནམ་མཁའ་སྟོང་པ་ཡིད་ལ་བྱེད་ཅིང་སྒོམ་ པར་བྱེད། ལན་མང་དུ་བྱེད་དེ། ཕྱོགས་དང་ཕྱོགས་མཚམས་ཐམས་ཅད་དུ་ནམ་མཁའ་བཻ་དཱུརྱའི་མདོག་ལྟར་དག་པ་ཡང་དག་པར་རྗེས་སུ་མཐོང་ངོ་། ། དེའི་ཡིད་ལ་དེ་བཞིན་གཤེགས་པའི་གཟུགས་འབྱུང་སྟེ། དེས་ནམ་མཁའ་དེ་ལ་ དེ་བཞིན་གཤེགས་པའི་གཟུགས་མཐོང་ངོ་། ། དེ་གང་གི་ཚེ་ཕྱོགས་གང་དང་གང་དུ་ལྟ་བར་བྱེད་པའི་ཕྱོགས་དང་ཕྱོགས་མཚམས་ཐམས་ཅད་དུ་དེ་བཞིན་གཤེགས་པའི་གཟུགས་མཐོང་ངོ་། ། ཡང་དེ་བཞིན་གཤེགས་པའི་མཚན་གྱིས་བརྒྱན་པར་མིག་གི་རྣམ་པར་ཤེས་ པ་འབྱུང་ངོ་། ། དེ་ཕྱོགས་དང་ཕྱོགས་མཚམས་ཐམས་ཅད་དུ་གང་དང་གང་དུ་ལྟ་བར་བྱེད་པ་དེ་དང་དེ་ཉིད་དུ་སངས་རྒྱས་ཀྱི་སྐུ་རིལ་གྱིས་མཚན་སུམ་ཅུ་རྩ་གཉིས་ཀྱིས་བརྒྱན་པ། འོད་འདོམ་གང་བ། ཤིང་ནྱ་གྲོ་དྷ་ལྟར་ཆུ་ཞེང་གབ་པ་འབའ་ཞིག་མཐོང་ངོ་། ། གལ་ཏེ་ རིས་འཐུན་པར་ངེས་པར་འབྱེད་པའི་ཆ་དང་འཐུན་པའི་དགེ་བའི་རྩ་བ་བསགས་པར་གྱུར་པ་ཞིག་ན་དེ་འདི་སྙམ་དུ་སེམས་ཏེ། གང་དེ་བཞིན་གཤེགས་པ་ལ་སུས་ནམ་མཁའ་ཀུན་ཏུ་སྐྱེད།

གང་དུ་དེ་ཡོངས་སུ་ཟད་པར་འགྱུར་བ་བདག་གིས་ཞུ་གོར་མ་ཆག་སྙམ་མོ། ། དེ་འདི་སྙམ་དུ་དེ་བཞིན་གཤེགས་པ་ལ་བདག་གིས་ཞུས་ཟིན་ནོ་སྙམ་ཡང་སེམས་སོ། ། དེ་བཞིན་གཤེགས་པ་ཡང་དེ་ལ་འདི་སྐད་ཅེས་བཀའ་སྩལ་ཏོ། ། ནམ་མཁའ་རྟོག་པར་གསུངས་པ་སྟེ། ། རྟོག་པ་དེ་ནི་ཡོད་མ་ཡིན། ། ནམ་མཁའི་མིང་དང་རྟོག་པ་དག ། དེ་དག་ཐམས་ ཅད་དངོས་པོ་མེད། ། ཆོས་རྣམས་ཐམས་ཅད་ཅི་ཡང་མེད། ། འགྱུར་བ་མེད་ཅིང་མཚན་ཉིད་མེད། ། མཚན་ཉིད་མེད་པར་བརྟགས་པ་ཡིས། ། མཚན་གཞི་ཀུན་ལས་རབ་ཏུ་གྲོལ། ། བསྟན་པ་དེ་ཐོས་ནས་མྱུར་དུ་ཕྱིར་མི་འོང་བའི་འབྲས་བུ་འཐོབ་བོ། ། དེའི་གཟུགས་ཀྱི་འདོད་ ཆགས་འདོད་པ་རྣམས་ནི་ལྷག་མ་མ་ལུས་པར་འགྱུར་རོ། ། དེ་བཞིན་དུ་གཟུགས་མེད་པའི་འདོད་ཆགས་དང་། མ་རིག་པ་དང་། ང་རྒྱལ་དང་། རྒོད་པ་ལྷག་མ་མ་ལུས་པར་འགྱུར་རོ། ། ཡང་སུ་ལ་རིས་འཐུན་པར་ངེས་པར་འབྱེད་པའི་ཆ་དང་འཐུན་པའི་དགེ་བའི་རྩ་བ་རྣམས་ མེད་པ་དེ། གལ་ཏེ་སངས་རྒྱས་ཀྱི་སྐུ་མཐོང་ན་དེ་འདི་སྙམ་དུ་སེམས་ཏེ། གང་དེ་བཞིན་གཤེགས་པའི་ཚད་བདག་གིས་གཟུང་བ་གོར་མ་ཆག་སྙམ་མོ། །

དེ་གལ་ཏེ་ཕྱོགས་ཐམས་ཅད་དུ་ལྟ་བར་བྱེད་ན་ཐམས་ཅད་དུ་ནམ་མཁའ་ཐམས་ཅད་ལ་དེ་བཞིན་གཤེགས་པ་མཐོང་ བར་འགྱུར་ཏེ། ཆུང་ངུར་ལྟ་བར་བྱེད་ན་དེ་བཞིན་གཤེགས་པ་ཆུང་ངུ་ཉིད་དུ་མཐོང་ངོ་། ། ཚད་མེད་པར་ལྟ་བར་བྱེད་ན་དེ་བཞིན་གཤེགས་པ་ཚད་མེད་པར་མཐོང་ངོ་། ། དེ་འདི་སྙམ་དུ་སེམས་ཏེ། དེ་བཞིན་གཤེགས་པ་འདི་ག་ལས་གཤེགས་སྙམ་མོ། ། དེ་འདི་སྙམ་དུ་སེམས་ ཏེ། དེ་བཞིན་གཤེགས་པ་འདི་ག་ལས་ཀྱང་མ་གཤེགས་སོ། ། གང་དུ་ཡང་མ་བཞུད་དོ། ། དེ་གང་དུ་ཡང་དེ་བཞིན་གཤེགས་པ་བཞུད་པ་མི་དམིགས། བྱོན་པ་མི་དམིགས་སོ། ། ཡང་དེ་འདི་སྙམ་དུ་སེམས་ཏེ། ལུས་ཀྱི་རྒྱུ་ཁམས་གསུམ་པ་འདི་ནི་སེམས་ཙམ་པས། སུས་ཇི་ལྟར་རྣམ་པར་བརྟགས་པ་དེ་བཞིན་དུ་མཐོང་ངོ་། ། བདག་གིས་རང་གི་སེམས་ཀྱིས་སངས་རྒྱས་སུ་བྱེད་དོ། ། བདག་གི་སེམས་ཀྱིས་སངས་རྒྱས་མཐོང་ངོ་། ། བདག་གི་སེམས་ཉིད་སངས་རྒྱས་སོ། ། བདག་གི་སེམས་ཉིད་ལུས་སོ། ། སེམས་ཉིད་ཀྱང་ནམ་མཁའོ། ། བདག་གི་སེམས་ཀྱི་རྣམ་པར་རྟོག་པས་སངས་རྒྱས་མཐོང་ངོ་། ། སེམས་ཀྱིས་སེམས་མི་ཤེས་སོ། ། སེམས་ཀྱིས་སེམས་མི་མཐོང་ངོ་། ། སེམས་སུ་འདུ་ཤེས་པ་རྣམས་ནི་ཤེས་པ་མེད་པའོ། །

སེམས་སུ་འདུ་ཤེས་པ་རྣམས་ནི་ལྡོག་པའོ། ། ལྡོག་པ་ནི་སྙིང་པོ་མེད་པའོ། ། ཆོས་དེ་དག་ནི་ཤེས་པ་མེད་པའི་ཕྱིར་ཡང་དག་པར་བྱུང་བའོ། ། སུས་སྔོན་བྱང་ཆུབ་ཏུ་སེམས་བསྐྱེད་ཅིང་ཤེས་རབ་གང་གིས་སྟོང་པར་རྟོགས་པ་དེ་ཡང་རང་བཞིན་གྱིས་སྟོང་པའོ་སྙམ་ནས་དམིགས་པ་ཡིད་ལ་བྱེད་པ་དེས་ད་ལྟར་གྱི་སངས་རྒྱས་མངོན་དུ་བཞུགས་པའི་ཏིང་ངེ་འཛིན་འཐོབ་བོ། ། འོན་ཀྱང་ཡང་ཉན་ཐོས་ཀྱི་ཐེག་པ་པ་ཡིན་ཏེ། དེ་ལྟར་མཚན་མ་མེད་པའི་གཟུགས་ཐམས་ཅད་རྣམ་པར་བསྒོམས་པས་ངེས་པར་འབྱེད་པ་ཡོངས་སུ་དག་པ་ཡིན། འདོད་ཆགས་དང་བྲལ་བ་ཡོངས་སུ་དག་པ་ཡིན། མ་རིག་པ་ཡོངས་སུ་དག་པ་ཡིན་ནོ། ། དེ་ལ་སྟོང་པ་ཉིད་ཀྱི་བསམ་ པས་ནི་སྟོང་པ་ཉིད་དང་རྗེས་སུ་འཐུན་པའི་བཟོད་པ་རྣོན་པོ་འཐོབ་སྟེ། ཕྱིས་ཀྱང་དེའི་འབྲས་བུ་འཐོབ་པར་དཀའ་བ་མེད་དོ། ། གལ་ཏེ་ཡང་ནམ་མཁའ་སྟོང་པ་ལ་རྣམ་པར་སྒོམ་པར་བྱེད་ན་ལུས་ཤིན་ཏུ་སྦྱངས་པ་ཡིན། སེམས་ཤིན་ཏུ་སྦྱངས་པ་ཡིན་ ཏེ། དེར་སྟོང་པ་ཉིད་ཀྱི་རྣམ་པར་ཐར་པའི་སྒོ་འཐོབ་བོ། ། དེའི་འབྲས་བུ་རྗེས་སུ་འཐོབ་པར་དཀའ་བ་ཡང་མེད་དེ་འདི་ནི་སྟོང་པ་ཉིད་ལ་རབ་ཏུ་བརྩོན་པ།

འགོག་པ་ལ་དམིགས་པའི་ཉོན་མོངས་པའི་རྦ་རླབས་རྣམ་པར་གཅོད་པའི་ཆོས་ཀྱི་སྒོ་ལྔ་པའོ། ། བཅོམ་ལྡན་ འདས་ཀྱིས་བསྟན་པ་འདི་བཤད་པ་ན་འཁོར་དེ་ལས་ལྷ་དང་མི་བྱེ་བ་བརྒྱ་སྟོང་ཕྲག་དགུ་བཅུ་རྩ་དགུ་ནི་དེ་བཞིན་དུ་རྗེས་སུ་འཐུན་པའི་བཟོད་པ་ཐོབ་པར་གྱུར་ཏོ། ། སྟོང་ཕྲག་བརྒྱད་ཅུ་རྩ་བཞི་ནི་དེར་སྟོང་པ་ཉིད་དང་རྗེས་སུ་འཐུན་པའི་བཟོད་པ་ཐོབ་པར་གྱུར་ཏོ། ། དེ་བཞིན་དུ་ སྲོག་ཆགས་སྟོང་ཕྲག་དྲུག་ཅུ་ནི་དེར་སྟོང་པ་ཉིད་ཀྱི་ཏིང་ངེ་འཛིན་གྱི་རྣམ་པར་ཐར་པའི་སྒོ་ཐོབ་པར་གྱུར་ཏོ། ། སྲོག་ཆགས་སྟོང་ཕྲག་ཉི་ཤུ་ནི་དེར་ད་ལྟར་གྱི་སངས་རྒྱས་མངོན་དུ་བཞུགས་པའི་ཏིང་ངེ་འཛིན་ཐོབ་པར་གྱུར་ཏོ། ། སེམས་ཅན་དཔག་ཏུ་མེད་པས་ཀྱང་རྒྱུན་ དུ་ཞུགས་པའི་འབྲས་བུ་ཐོབ་བོ། ། དགེ་སློང་བརྒྱ་སྟོང་ཕྲག་བརྒྱད་ཅུ་རྩ་བཞི་ཡང་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་བར་གྱུར་ཏོ། ། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཌི་ནྱ་གཞན་ཡང་སུ་མགོའི་ཐོད་པ་དེ་ལ་སེམས་ཡང་དག་པར་གནས་པར་ མི་བྱེད་ཅིང་རབ་ཏུ་དད་པར་མི་བྱེད། མོས་པར་མི་བྱེད་པ་དེས་ཀྱང་དུར་ཁྲོད་དུ་འགྲོ་བར་བྱའོ། །

དེས་དེར་མི་རོ་རྣམ་པ་སྣ་ཚོགས་པ་མཐོང་ཞིང་ཁ་ཅིག་ནི་རྣམ་པར་སྔོས་པ། ཁ་ཅིག་ནི་རྣམ་པར་རྣགས་པ། ཁ་ཅིག་ནི་རྣམ་པར་དམར་བ། ཁ་ཅིག་ནི་རྣམ་པར་ཟོས་པ་དང་། བམ་པ་དང་། ཤ་ཁྲག་མེད་པ་དང་། དཀར་ཞིང་རབ་ཏུ་དཀར་ལ་དུང་གི་མདོག་ལྟ་བུའི་རུས་གོང་དུ་མཐོང་བར་འགྱུར་རོ། ། དེ་ཐམས་ཅད་ལ་ཡང་དང་ཡང་དུ་སོ་སོར་བརྟག་པར་བྱ་སྟེ། གང་དང་གང་དུ་དེའི་སེམས་ཤིན་ཏུ་ཡང་དག་པར་གནས་ཤིང་མི་གཡོ་ལ། རྣམ་པར་གཡེང་ བར་མི་འགྱུར་བ་དེ་ཡིད་ཀྱིས་བཟུང་ནས་ཡིད་ལ་བྱ་ཞིང་བསྒོམ་པར་བྱས་ན་ཟག་པ་ཐམས་ཅད་ཟད་པར་འགྱུར་བའི་བར་དུ་ཐམས་ཅད་འགྱུར་རོ། ། སེམས་ཅན་སུ་ལྷག་པའི་ང་རྒྱལ་ཅན་ཡིན་པ་དེས་ནི་ཤི་ནས་རིང་པོ་མ་ལོན་པའི་མི་རོ་རྣམ་པར་སྔོས་པ་དག་ཚུལ་བཞིན་དུ་བཟུང་ནས་ ཡིད་ལ་བྱ། བྱིན་གྱིས་བརླབ་པར་བྱ། བསྒོམ་པར་བྱའོ། ། ཇི་ལྟར་ཡིད་ལ་བྱས་པ་དེ་ལྟར་བདག་གི་ལུས་ལ་ཡང་དག་པར་མཐོང་བར་འགྱུར་རོ། ། འདི་ལ་བྱེ་བྲག་ཅི་ཡོད་དེ། ཇི་ལྟར་དེ་རྣམ་པར་སྔོས་པའམ།

རྣམ་པར་རྣགས་པ་དེ་བཞིན་དུ་བྱེ་བྲག་མེད་པར་བདག་ གི་ལུས་ཀྱང་གཞན་གྱི་ལུས་ཀྱི་རོ་དང་མཚུངས་པར་ཡང་དག་པར་རྗེས་སུ་མཐོང་ཞིང་དེ་བདག་གི་ལུས་དེ་ལ་སྒོམ་པའི་སྦྱོར་བ་ལ་རྗེས་སུ་བརྩོན་པས་གནས་སོ་ཞེས་བྱ་བ་ནས་ལུས་འདི་ཐམས་ཅད་རྣགས་པའི་བར་དུ་ཡང་དག་པར་རྗེས་སུ་མཐོང་ངོ་། ། རྣམ་པར་དམར་བར་ཡང་དག་ པར་རྗེས་སུ་མཐོང་ངོ་། ། སྲིན་བུའི་རིགས་རྣམས་ཀྱིས་ལྟོ་གང་བར་ཡང་དག་པར་རྗེས་སུ་མཐོང་ངོ་། ། རང་གི་ལུས་རྣམ་པ་ཐམས་ཅད་དང་ལྡན་པ་སྲིན་བུའི་རིགས་རྣམས་ཀྱིས་གང་ཞིང་ཟ་བར་ཡང་དག་པར་རྗེས་སུ་མཐོང་ངོ་ཞེས་བྱ་བ་ནས་ཤ་ཁྲག་མེད་པ་དང་། དཀར་ཞིང་རབ་ཏུ་དཀར་ལ་དུང་གི་མདོག་ལྟ་བུའི་རུས་གོང་དང་། རུས་པའི་ཕུང་པོ་རྒྱུས་པ་དང་འབྲེལ་བའི་བར་དུ་ཡང་དག་པར་རྗེས་སུ་མཐོང་སྟེ། དེ་ཡིད་ལ་བྱེད་ཅིང་དེ་ལ་བྱིན་གྱིས་རློབ་པར་བྱེད། དེ་ལ་སྒོམ་པར་བྱེད་དོ། ། ཉིན་པར་ཇི་ལྟ་བར་མཚན་མོ་ཡང་དེ་བཞིན་ནོ། ། མཚན་ མོ་ཇི་ལྟ་བར་ཉིན་པར་ཡང་དེ་བཞིན་ཏེ། འགྲོ་བ་དང་། འགྲེང་བ་དང་། འདུག་པ་དང་། ཉལ་བ་ན་རང་གི་ལུས་དེ་ཡང་རུས་གོང་གི་ཕུང་པོ་དཀར་ཞིང་རབ་ཏུ་དཀར་ལ་དུང་གི་མདོག་ལྟ་བུ་དང་། རྒྱུས་པ་དང་།

པགས་ཤུན་དང་འབྲེལ་བར་ཡིད་ལ་བྱེད་ཅིང་བྱིན་ གྱིས་རློབ་པར་བྱེད་ཅིང་སྒོམ་པར་བྱེད་དེ། དཔེར་ན་མིག་བཙུམས་པས་ཡང་དག་པར་རྗེས་སུ་མཐོང་བ་བཞིན་ནོ། ། ཇི་ལྟར་བདག་གི་ལུས་ལ་ཡང་དག་པར་རྗེས་སུ་མཐོང་བ་དེ་བཞིན་དུ་གང་དང་གང་དུ་ལྟ་བར་བྱེད་པ་སའི་རྣམ་པ་དང་། ཤིང་དང་། མི་དང་། དུད་འགྲོའི་ སྐྱེ་གནས་པ་གང་ཅི་མཐོང་བ་ཐམས་ཅད་དུ་རུས་པའི་ཕུང་པོ་དཀར་ཞིང་རབ་ཏུ་དཀར་ལ་དུང་གི་མདོག་ལྟ་བུ་དང་། རྒྱུས་པ་དང་འབྲེལ་བ་དེ་ལྟ་བུར་ཡང་ཡང་དག་པར་རྗེས་སུ་མཐོང་ངོ་། ། གང་དུ་ཆགས་པར་བྱེད་ཅིང་འགྲོ་བར་བྱེད་པ་ཐམས་ཅད་དེ་ རུས་པའི་ཕུང་པོ་ལ་རྐང་པ་གཉིས་ཀྱིས་འགྲོ་ཞིང་ལྡོག་པས་རུས་པའི་ཕུང་པོ་ལ་གནོན་པར་བྱེད་ཅིང་འདུག་པར་བྱེད། ཉལ་བར་བྱེད་དེ། དཔེར་ན་དེའི་མི་སྡུག་པའི་འདུ་ཤེས་ཤིན་ཏུ་བསྒོམས་ཤིང་ཤིན་ཏུ་ཡིད་ལ་བྱས་ལ། ཤིན་ཏུ་ནན་ཏན་བྱས་པ་བཞིན་ནོ། ། དེའི་རིས་ འཐུན་པས་འདོད་པའི་འདོད་ཆགས་ཐམས་ཅད་སྤངས་པར་འགྱུར་ཏེ། རིས་འཐུན་པ་གཞན་ལ་མ་ཡིན་ནོ། ། འདི་ནི་སྟོང་པ་ཉིད་དང་རྗེས་སུ་འཐུན་པའི་གཟུངས་སྔགས་ཡིན་ཏེ།

དེ་ནི་ཡང་ཕྱོགས་བཞིའི་རླུང་འདུས་ནས་རུས་པའི་ཕུང་པོ་མ་ལུས་པར་རྣམ་པར་ ཕྱེ་མར་བྱེད་དོ། ། རྣམ་པར་འཇིག་པར་བྱེད་དོ། ། ཇི་ལྟར་རང་གི་ལུས་ཀྱི་རུས་པའི་ཕུང་པོ་ལ་རླུང་འདུས་ནས་མ་ལུས་པར་རྣམ་པར་ཕྱེ་མར་བྱེད་ཅིང་རྣམ་པར་འཇིག་པར་བྱེད་པ་དེ་བཞིན་དུ་རླུང་འདུས་ནས་གཟུགས་ཀྱི་ལུས་ཐམས་ཅད་དང་། ས་ཐམས་ཅད་མ་ ལུས་པར་ཕྱེ་མར་བྱེད་ཅིང་རྣམ་པར་འཇིག་པར་བྱེད་དོ་ཞེས་བྱ་བ་ནས་བདག་གམ་གཞན་ཡང་རུང་དེའི་མིག་སྔར་གཟུགས་སུ་སྣང་བ་ཅི་ཡང་མི་འབྱུང་སྟེ། ནམ་མཁའ་བཻ་དཱུརྱ་ལྟ་བུར་སྟོང་པར་བརྗོད་པར་བྱ་བ་ལ་མོས་པར་བྱེད་ཅིང་ནམ་མཁའ་ལ་བྱིན་གྱིས་རློབ་པར་བྱེད། སྒོམ་པར་བྱེད། ལན་མང་དུ་བྱེད་དོ། ། ཇི་ལྟར་དེ་འདི་སྙམ་དུ་སེམས་ཏེ། ཡང་དཔྱོད་པར་བྱ་བའི་ཕྱིར་ནམ་མཁའི་ཁ་དོག་སེར་པོ་ཡིད་ལ་བྱེད་ཅིང་ཁ་དོག་སེར་པོར་རབ་ཏུ་སྦྱོར་བར་བྱེད། བྱིན་གྱིས་རློབ་པར་བྱེད། སྒོམ་པར་བྱེད་པ་དེ་བཞིན་དུ་ནམ་མཁའ་ཐམས་ཅད་སེར་པོར་མོས་པར་བྱེད་དོ། ། ཁ་དོག་སེར་པོ་ལ་ཇི་ལྟ་བ་དེ་བཞིན་དུ་ཁ་དོག་དམར་པོ་དང་། དེ་བཞིན་དུ་ཁ་དོག་དཀར་པོ་དང་། བཙོད་ཀ་ཞེས་བྱ་བ་ནས་ཤེལ་གྱི་ཁ་དོག་གི་བར་ལ་མོས་པར་བྱེད་དོ། །

དེ་བཞིན་དུ་ཡང་གཟུགས་སུ་སྣང་བ་དང་། ས་ཐམས་ཅད་ལ་ཆུ་ཁ་དོག་སྔོན་པོར་བྱིན་གྱིས་རློབ་པར་ བྱེད་ལ་ཞེས་བྱ་བ་ནས། ཁ་དོག་སྔོན་པོར་མོས་པར་བྱེད་དོ་ཞེས་བྱ་བའི་བར་དང་། དེ་བཞིན་དུ་ཁ་དོག་སེར་པོ་ལ་ཞེས་བྱ་བ་ནས་ཁ་དོག་དམར་པོ་དང་། དེ་བཞིན་དུ་ཁ་དོག་དཀར་པོ་དང་། དེ་བཞིན་དུ་ཁ་དོག་ལེ་བརྒན་དང་། དེ་བཞིན་དུ་ཤེལ་གྱི་ཁ་དོག་གི་བར་དུ་ས་ཐམས་ ཅད་ལ་ཆུར་ཡིད་ལ་བྱེད་དོ། ། ཡང་དག་པར་རབ་ཏུ་ཤེས་སོ། ། རབ་ཏུ་སྦྱོར་བར་བྱེད་དོ། ། སའི་ཁམས་ཐམས་ཅད་ལ་ཆུ་ཤེལ་གྱི་ཁ་དོག་ལྟ་བུར་བྱིན་གྱིས་རློབ་པར་བྱེད་ཅིང་ཕྱིས་ཀྱང་ས་སོར་བཞི་ཙམ་དུ་བྱིན་གྱིས་རློབ་པར་བྱེད་དོ། ། དེས་རྐང་པའི་མཐེ་བོས་རེག་པར་བྱེད་ཅིང་ གང་འདོད་པ་གཡོ་བར་བྱེད། རབ་ཏུ་གཡོ་བར་བྱེད། འགུལ་བར་བྱེད། ཀུན་ཏུ་རབ་ཏུ་འགུལ་བར་བྱེད་པ་ནས་གང་འདོད་པ་དང་། ཇི་ཙམ་དུ་འདོད་པ་དེ་ཙམ་དུ་རབ་ཏུ་གཡོ་བར་བྱེད་དོ་ཞེས་བྱ་བའི་བར་དུའོ། ། དེ་འགུལ་བར་བྱེད་པ་ན་ཡང་ས་ཆེན་པོ་རི་དང་བཅས་ པ་འདི་འགུལ། གཡོ། འཁྲུག ། རབ་ཏུ་ལྡེག་གོ། ། གཞན་ཡང་ཆུ་དེ་ལ་ཁ་དོག་སྣ་ཚོགས་པའི་མེ་ཏོག་ཨུད་པ་ལ་དང་། པད་མ་དང་། ཀུ་མུ་ཏ་དང་།

པད་མ་དཀར་པོ་རྣམས་ཡིད་ལ་བྱེད་དོ། ། ཡང་དག་པར་ཤེས་སོ། ། རབ་ཏུ་སྦྱོར་བར་བྱེད་དོ། ། བྱིན་གྱིས་རློབ་པར་བྱེད་དོ། ། ཕྱོགས་བཞིར་སེར་བུ་བསིལ་བ་རབ་ཏུ་དད་པ་དག་ཏུ་མོས་པར་བྱེད་དོ། ། དེ་དེར་འཆག་པར་བྱེད། འདུག་པར་བྱེད། ཉལ་བར་ཡང་བྱེད་དོ། ། ཡང་ཕྱོགས་བཞིར་ཁ་དོག་སྣ་ཚོགས་པའི་རི་ཆེན་པོ་རྣམས་སུ་བྱིན་གྱིས་རློབ་པར་བྱེད་ ཅིང་། དེའི་སྟེང་དུ་འཆག་པར་བྱེད། གནས་པར་བྱེད། འདུག་པར་བྱེད། ཉལ་བར་ཡང་བྱེད་དོ། ། གཞན་ཡང་དེ་སྤོང་བར་བྱེད་ཅིང་། ནམ་མཁའ་དག་པ་དེ་ཉིད་ཡིད་ལ་བྱེད་དོ། ། ཡང་དག་པར་ཡིད་ལ་བྱེད་དོ། ། ཡང་དག་པར་ཤེས་སོ། ། རབ་ཏུ་སྦྱོར་བར་ བྱེད་དོ། ། ནམ་མཁའ་དག་པར་བྱིན་གྱིས་རློབ་པར་བྱེད་དོ། ། རང་གི་ལུས་ཡང་བར་ཡིད་ལ་བྱེད་དོ། ། ཡང་བར་རབ་ཏུ་སྦྱོར་བར་བྱེད་དོ། ། ཡང་བར་བྱིན་གྱིས་རློབ་པར་བྱེད་དེ། དཔེར་ན་ཤིང་བལ་གྱི་འདབ་མའམ་རས་བལ་གྱི་འདབ་མ་རླུང་ཆུང་ངུས་འདེགས་པར་བྱེད། འཇོག་པར་བྱེད། ཁྱེར་བར་བྱེད་པ་དེ་བཞིན་དུ་དེ་ལུས་འདི་ཉིད་ལ་ཡང་བར་ཡིད་ལ་བྱེད་དོ་ཞེས་བྱ་བ་ནས་ཡང་བར་བྱིན་གྱིས་རློབ་པར་བྱེད་དོ་ཞེས་བྱ་བའི་བར་དང་།

རླུང་དང་ཕྲད་ནས་ནམ་མཁའ་ལ་གནས་པའི་བར་དུ་ཡིན་ཏེ། དེ་ནམ་མཁའ་ལ་ འཆག་པར་བྱེད། འདུག་པར་བྱེད། གནས་པར་བྱེད། ཉལ་བར་ཡང་བྱེད་དོ། ། མེའི་ཁམས་ལ་སྙོམས་པར་འཇུག་པར་བྱེད་དེ། དེའི་ལུས་ལས་འོད་འཕྲོ་བ་ཁ་དོག་སྔོན་པོ་དང་། སེར་པོ་དང་། དམར་པོ་དང་། ལེ་བརྒན་དང་། ཤེལ་གྱི་ཁ་དོག་ལྟ་བུ་ རྣམ་པ་སྣ་ཚོགས་རབ་ཏུ་འབྱུང་བར་བྱེད་དོ། ། དེའི་ལུས་ཀྱི་སྟོད་ནས་མེ་འབར་བར་བྱེད་ཅིང་། ལུས་ཀྱི་སྨད་ནས་ཆུ་གྲང་མོའི་རྒྱུན་དག་འབབ་པར་བྱེད་རབ་ཏུ་འབབ་པར་བྱེད་དོ། ། ལུས་ཀྱི་སྨད་ནས་མེ་འབར་བར་བྱེད་ཅིང་། ལུས་ཀྱི་སྟོད་ནས་ཆུ་གྲང་མོའི་རྒྱུན་དག་འབབ་ པར་བྱེད། རབ་ཏུ་འབབ་པར་བྱེད་དོ། ། དེ་བཞིན་དུ་སའི་སྟེང་དུ་འབྱུང་བར་ཡང་བྱེད་པ་ནས་ཉི་མ་དང་ཟླ་བ་དག་ལ་ཡང་ལག་པས་ཉུག་པར་བྱེད་དོ་ཞེས་བྱ་བའི་བར་དང་། ཚངས་པའི་འཇིག་རྟེན་གྱི་བར་དུ་ལུས་ཀྱིས་དབང་སྒྱུར་བར་བྱེད་དོ་ཞེས་བྱ་བའི་བར་ དུའོ། ། དེ་ཉིད་སྤངས་ཏེ་ཡང་གཟུགས་ཅི་འདྲ་བ་དང་ཇི་སྙེད་པ་ཡང་ན་ནི་སྔོན་པོ་དང་། ཡང་ན་ནི་སེར་པོ་དང་། དམར་པོ་དང་། དཀར་པོ་དང་། ལེ་བརྒན་དང་།

ཡང་ན་ནི་ཤེལ་གྱི་ཁ་དོག་ལྟ་བུར་ཡིད་ལ་བྱེད་ཅིང་དེ་འདྲ་བ་དང་དེ་སྙེད་ཁོ་ན་མཐོང་བར་བྱེད་དོ། ། དེ་འདི་ སྙམ་དུ་སེམས་ཏེ། དེ་བཞིན་གཤེགས་པ་ཉིད་ལ་བལྟའོ་སྙམ་ན་དེས་དེ་བཞིན་གཤེགས་པ་ཉིད་མཐོང་ངོ་། ། དེས་ཕྱོགས་གང་དང་གང་ཁོ་ནར་ལྟ་བར་བྱེད་པའི་ཕྱོགས་ཐམས་ཅད་དུ་དེ་བཞིན་གཤེགས་པ་མཐོང་ངོ་། ། གལ་ཏེ་དེ་བཞིན་གཤེགས་པའི་གཟུགས་ཆུང་ངུ་ཡིད་ ལ་བྱས་ན་ཆུང་ངུ་ཉིད་མཐོང་ངོ་། ། གལ་ཏེ་ཚད་མེད་པ་ཡིད་ལ་བྱས་ན་ཞེས་བྱ་བ་ནས་ནམ་མཁའ་ཐམས་ཅད་དུ་དེ་བཞིན་གཤེགས་པ་འབའ་ཞིག་མཐོང་ངོ་ཞེས་བྱ་བའི་བར་དང་། དེ་འདི་སྙམ་དུ་སེམས་ཏེ། གང་དུ་ཡང་དེ་བཞིན་གཤེགས་པ་བྱོན་པའམ་བཞུད་པ་མེད་དོ་ཞེས་བྱ་ བའི་བར་དང་། ཁམས་གསུམ་ཐམས་ཅད་ཀྱི་ལུས་ཀྱི་རྒྱུ་ནི་སེམས་འབའ་ཞིག་གོ་ཞེས་བྱ་བ་དང་། ཇི་ལྟར་རྣམ་པར་བརྟགས་པ་དེ་བཞིན་དུ་མཐོང་སྟེ། བདག་གིས་རང་གི་སེམས་ཀྱི་ཁ་དོག་ཐ་དད་པ་དང་། གཟུགས་ཐ་དད་པ་དང་། རྫུ་འཕྲུལ་ཐ་དད་པ་རྣམ་ པ་སྣ་ཚོགས་པ་མཐོང་ངོ་། ། བདག་གི་སེམས་ནི་གཟུགས་ཐ་དད་པ་དང་། རྫུ་འཕྲུལ་ཐ་དད་པ་དང་། ཁ་དོག་ཐ་དད་པ་དང་། འཇུག་པ་ཐ་དད་པ་དང་། རྣམ་པར་རྟོག་པ་ཐ་དད་པའོ། ། སེམས་ནི་སྣ་ཚོགས་སུ་གྲུབ་པའོ། །

སེམས་ནི་ནམ་མཁར་འདྲེས་པའོ། ། སེམས་ནི་རླུང་དུ་ཡང་དག་པར་བརྗོད་པའོ། ། རླུང་ཐམས་ཅད་ཀྱང་དངོས་པོ་མེད་པའོ་སྙམ་སྟེ། འདི་ནི་སོ་སོའི་སྐྱེ་བོ་དང་ཐུན་མོང་བའི་བདེན་པ་དང་རྗེས་སུ་འཐུན་པའི་གཟུངས་སྔགས་ཀྱི་དོན་ཡིན་ཏེ། གང་དེ་བཞིན་གཤེགས་པ་ཙམ་པ་ཀའི་མདོག་གིས་ང་ལ་ཉི་མའི་ཤུགས་ཀྱི་ སྙིང་པོའི་ལག་ནས་བསྐུར་བ་ཡིན་ནོ། ། དེ་ལ་སོ་སོའི་སྐྱེ་བོ་དང་ཐུན་མོང་མ་ཡིན་པའི་བདེན་པ་དང་རྗེས་སུ་འཐུན་པའི་གཟུངས་སྔགས་ཀྱི་དོན་གང་ཞེ་ན། དེ་ནི་གཟུགས་ཀྱི་འདོད་ཆགས་དང་དབྱིབས་ཀྱི་འདོད་ཆགས་སྤངས་པའོ། ། དེ་འདི་སྙམ་དུ་སེམས་ཏེ། ནམ་མཁའ་ འདི་ནི་གཟུང་དུ་མེད་ཅིང་བརྗོད་དུ་མེད་པའོ། ། དེ་བཞིན་དུ་སེམས་ཀྱང་བརྗོད་དུ་མེད་པ་སྟེ། གཉི་ག་ཡང་བརྗོད་དུ་མེད་པའོ། ། ཕུང་པོ་འདི་དག་ནི་ཡོངས་སུ་གདུང་བ་དང་བཅས། འཁྲུག་པ་དང་བཅས། འདྲིད་པ་དང་བཅས། སླུ་བ་དང་བཅས་པ་ཡིན་པས་མ་ལ་བདག་ གིས་རྣམ་པ་ཐམས་ཅད་དུ་ཀུན་ཏུ་རྟོག་པའི་སེམས་སྤངས་ན། གང་ནམ་མཁའ་ཡང་སྤངས་པར་འགྱུར་ཞིང་། རྟོག་པ་ཐམས་ཅད་ལས་ཡང་དག་པར་བྱུང་བའི་དཔྱོད་པ་ཡང་སྤངས་པར་འགྱུར་གོར་མ་ཆག་སྙམ་མོ། ། འོན་ཀྱང་དེ་སེམས་དང་པོས་ནམ་མཁའ་ལ་ དམིགས་ནས།

དེ་ཡང་མངོན་པར་རིག་པར་བྱ་སྟེ། རྣམ་པར་རིག་པ་ཐམས་ཅད་སྤངས་ཤིང་སྐྱེད་པར་ཡང་མི་བྱེད་དོ། ། སེམས་སྐྱེད་པ་འགག་ལ་དེའི་མ་སྐྱེས་པ་ཡང་སྐྱེད་པར་མི་བྱེད་དོ། ། དེ་ལྟར་ན་རྒྱུ་དེ་འགགས་ན་སེམས་ཀྱང་འགག་པས་ལུས་དང་། ངག་ དང་། ཡིད་ཀྱི་འདུ་བྱེད་ཤིན་ཏུ་སྦྱངས་པའི་འགོག་པའི་སྙོམས་པར་འཇུག་པ་ལ་འཇུག་པར་བྱེད་དེ། དེ་འགོག་པས་ཉིན་ཞག་གཅིག་འདའ་བར་བྱེད་དོ། ། ཇི་ལྟར་བསམས་པ་བཞིན་འགོག་པ་ལ་སྙོམས་པར་འཇུག་པས་མཚུངས་པ་དེ་ མ་ཐག་པའི་སེམས་དང་པོ་ལྡང་བའི་བར་དུ་བསྐལ་པ་བརྒྱ་སྟོང་མང་པོའི་བར་ཡང་འདའ་བར་བྱེད་དོ། ། སེམས་གཉིས་པས་ནི་དེའི་ཟག་པ་ཐམས་ཅད་ཡོངས་སུ་ཟད་པ་དང་། ཚེ་ཡང་ཡོངས་སུ་ཟད་པར་འགྱུར་བས་མགོ་མཉམ་དུ་ཡོངས་སུ་མྱ་ངན་ལས་འདས་པར་ བྱེད་དེ། འདི་ནི་སོ་སོའི་སྐྱེ་བོ་དང་ཐུན་མོང་མ་ཡིན་པ་ཟག་པ་མེད་པའི་བདེན་པ་དང་རྗེས་སུ་འཐུན་པའི་གཟུངས་སྔགས་ཀྱི་དོན་ཡིན་ནོ། ། དེ་ལ་སོ་སོའི་སྐྱེ་བོ་དང་ཐུན་མོང་བ་དང་། སོ་སོའི་སྐྱེ་བོ་དང་ཐུན་མོང་མ་ཡིན་པའི་བདེན་པ་དང་རྗེས་སུ་འཐུན་པའི་གཟུངས་སྔགས་ཀྱི་ དོན་གང་ཞེ་ན། འདི་ལྟར་དེ་འདི་སྙམ་དུ་སེམས་ཏེ།

གཟུགས་ཇི་ལྟ་བུར་རྣམ་པར་བརྟགས་པ་དེ་ལྟ་བུ་ཁོ་ནར་མཐོང་ངོ་། ། སེམས་ནི་སེམས་ཉིད་དང་གཟུགས་ཉིད་ཡིན་ཏེ། དེའི་ཕྱིར་བདག་གིས་ནམ་མཁའ་དག་པ་ཉིད་ལ་བརྟག་པར་མི་བྱའོ་སྙམ་མོ། ། དེ་གཟུགས་ ཐམས་ཅད་སྤང་བར་འདོད་དེ། དེ་ལྟར་དེའི་གཟུགས་ཀྱི་འདུ་ཤེས་ཐམས་ཅད་སྤངས་ནས་དེ་ནམ་མཁའ་མཐའ་ཡས་སོ་སྙམ་ནས་ནམ་མཁའ་མཐའ་ཡས་སྐྱེ་མཆེད་དུ་རྫོགས་པར་བྱས་ཏེ་གནས་པ་འདི་ནི་སོ་སོའི་སྐྱེ་བོ་དང་ཐུན་མོང་བའི་ཏིང་ངེ་འཛིན་ཏོ། ། གང་ཡང་དེ་འདི་ སྙམ་དུ་སེམས་ཏེ། བདག་གི་གཟུགས་ནི་ནམ་མཁའ་སྟེ། བདག་གིས་ནམ་མཁའ་གཟུགས་སུ་མཐོང་ངོ་། ། ནམ་མཁའི་མཚན་ཉིད་ཅི་ཞེ་ན། ནམ་མཁའ་ནི་གོ་འབྱེད་པའི་མཚན་ཉིད་དོ། ། འོན་ཀྱང་ནམ་མཁའ་ནི་རླུང་གིས་ཁྱབ་པའོ། ། རླུང་དེ་ཡང་འབྱུང་བ་ཆེན་ པོ་བཞི་ལས་གྱུར་པའོ། ། བདག་གི་གཟུགས་ཀྱང་འབྱུང་བ་ཆེན་པོ་བཞི་ལས་གྱུར་པ་ཡིན་ཏེ། གཉི་ག་མཚན་ཉིད་མཚུངས་སོ་སྙམ་མོ། ། དེ་འདི་སྙམ་དུ་སེམས་ཏེ། ཅི་འབྱུང་བ་རྣམས་འབྱུང་བ་ཆེན་པོའི་ངོ་བོ་དག་ཡིན་ནམ་སྙམ་ཞིང་། དེ་འདི་སྙམ་དུ་སེམས་ཏེ། གཉི་ག་ སྤྱིའི་མཚན་ཉིད་དུ་འབྱུང་བ་དག་མ་ཡིན་ནོ་སྙམ་མོ། ། དེ་ཅིའི་ཕྱིར་ཞེ་ན།

ཆོས་ཐམས་ཅད་རང་བཞིན་གྱི་ངོ་བོ་ཉིད་ཀྱིས་སྟོང་པ་ཡིན་པའི་ཕྱིར་རོ། ། དེ་བཞིན་དུ་རང་གི་ངོ་བོ་ཡང་གཞན་གྱི་དངོས་པོས་སྟོང་པ་དང་། སྐྱེ་བ་མེད་པ་དང་། འགག་པ་མེད་པ་དང་། འབྱུང་བ་ མེད་པ་དང་། གཞི་མེད་པ་ཡིན་ནོ། ། དེ་དེ་ལྟར་སོ་སོར་རྟོག་པ་ན་དེ་བཞིན་གཤེགས་པ་ཡིད་ལ་འབྱུང་ངོ་། ། དེས་ནམ་མཁའ་ཐམས་ཅད་དུ་དེ་བཞིན་གཤེགས་པ་གཅིག་མཐོང་ངོ་། ། དེས་དེ་ལྟར་མཐོང་བས་ཕྱིར་མི་འོང་བའི་འབྲས་བུ་འཐོབ་བོ། ། འདི་ནི་སོ་སོའི་སྐྱེ་ བོ་དང་ཐུན་མོང་བ་བདེན་པ་དང་རྗེས་སུ་འཐུན་པའི་གཟུངས་སྔགས་ལས་རྣམ་པར་གྲོལ་བའི་སྐྱེ་མཆེད་དང་པོའོ། ། གཞན་ཡང་དེ་འདི་སྙམ་དུ་སེམས་ཏེ། གང་ནམ་མཁའ་མཐའ་ཡས་སྐྱེ་མཆེད་འདིས་གནས་པ་དེ་ཅི་རང་གི་ངོ་བོའི་མཚན་ཉིད་ཡིན་ནམ། འོན་ཏེ་དེ་ཉིད་ ནམ་མཁའ་ཡིན་སྙམ་ཞིང་། དེ་འདི་སྙམ་དུ་སེམས་ཏེ། ནམ་མཁའི་མཚན་ཉིད་དག་པ་ནི་བདག་གི་བདག་ཡིན་གྱི། བདག་གི་ངོ་བོའི་མཚན་ཉིད་ནི་མ་ཡིན་ནོ་སྙམ་ནས་དེ་ནམ་མཁའ་མཐའ་ཡས་མུ་མེད་པ་ཇི་སྙེད་ཡིད་ལ་བྱེད་པ་དེ་སྙེད་ཀྱིས་བདག་ཡང་དག་པར་ཤེས་ཏེ། འདི་ནི་དེའི་སོ་སོའི་སྐྱེ་བོ་དང་ཐུན་མོང་བའི་ཏིང་ངེ་འཛིན་ཏོ། ། དེ་འདི་སྙམ་དུ་སེམས་ཏེ།

ནམ་མཁའ་ཐམས་ཅད་ནི་བདག་གི་བདག་ཡིན་ན། འོ་ན་ཅི་ནམ་མཁའ་ལ་ངོ་བོ་གཞན་ཡོད་དམ། གང་གི་ཚེ་དེ་བཞིན་གཤེགས་པ་ཡིད་ལ་བྱེད་པ་ན་དེ་བཞིན་གཤེགས་པ་རྣམས་ ཀྱིས་ཇི་ལྟར་བསྟན་སྙམ་མོ། ། དེ་ལྟར་དེ་བཞིན་གཤེགས་པ་ཇི་སྙེད་ཡིད་ལ་བྱེད་པ་དེ་སྙེད་ཡང་དག་པར་རྗེས་སུ་མཐོང་ཞིང་། མཐོང་བ་ཙམ་གྱི་མོད་ལ་ཁ་ཅིག་འབྲས་བུ་དང་པོ་དེ་ལ་གནས་པར་བྱེད་ཅེས་བྱ་བ་ནས་ཉོན་མོངས་པ་ཐམས་ཅད་སྤངས་པའི་དགྲ་བཅོམ་པ་ཉིད་ཀྱི་བར་དུ་མངོན་ དུ་བྱེད་དེ། འདི་ནི་སོ་སོའི་སྐྱེ་བོ་དང་ཐུན་མོང་བ་བདེན་པ་དང་རྗེས་སུ་འཐུན་པའི་གཟུངས་སྔགས་ལས་རྣམ་པར་གྲོལ་བའི་སྐྱེ་མཆེད་གཉིས་པའོ། ། ཡང་དེ་འདི་སྙམ་དུ་སེམས་ཏེ། ནམ་མཁའ་དག་པ་རབ་ཏུ་དང་བ་རྙོག་པ་མེད་པ་བདག་གི་བདག་ཇི་སྙེད་པ། ཅི་བདག་གི་ དགེ་བའི་སེམས་ཉོན་མོངས་པ་ཐམས་ཅད་སྤངས་པ་གཞི་མེད་པ་ཡིན་ནམ་སྙམ་མོ། ། དེ་འདི་སྙམ་དུ་སེམས་ཏེ། སྣང་བ་ཆེན་པོ་བྱེད་པ་འཕགས་པའི་ལམ་ཡན་ལག་བརྒྱད་པ་དེ་ནི་ཉོན་མོངས་པ་ཐམས་ཅད་ལས་རྣམ་པར་གྲོལ་བའོ་སྙམ་མོ། །

དེ་ཇི་ལྟར་ ཉོན་མོངས་པ་ཐམས་ཅད་ལས་རྣམ་པར་གྲོལ་བ་འཕགས་པའི་ལམ་ཡན་ལག་བརྒྱད་པ་ཡིད་ལ་བྱེད་པ་བཞིན་སྐད་ཅིག་དེ་ཉིད་ལ་ཁ་ཅིག་རྒྱུན་དུ་ཞུགས་པའི་འབྲས་བུ་ལ་གནས་པར་བྱེད་ཅེས་བྱ་བ་ནས་ཁ་ཅིག་དགྲ་བཅོམ་པ་ཉིད་ཀྱི་བར་དུ་མངོན་དུ་བྱེད་དེ། འདི་ནི་སོ་སོའི་སྐྱེ་བོ་དང་ ཐུན་མོང་བ་བདེན་པ་དང་རྗེས་སུ་འཐུན་པའི་གཟུངས་སྔགས་ལས་རྣམ་པར་གྲོལ་བའི་སྐྱེ་མཆེད་གསུམ་པའོ། ། གཞན་ཡང་དེ་འདི་སྙམ་དུ་སེམས་ཏེ། དེ་ལྟར་བདག་གི་རྟོག་པ་རྣམས་ནི་དོན་མེད་པ་སྒྲུབ་པ་ཡིན་ཏེ། གང་བདག་གིས་གཟུགས་ལ་རྣམ་པར་བརྟག་པས་གནས་པར་ མི་བྱའོ། ། གང་ན་གཟུགས་ཡོད་པ་དེ་ན་འདུ་ཤེས་ཐ་དད་པ་ཡོད་དོ། ། དེ་ན་ཐོགས་པའི་འདུ་ཤེས་ཡོད་དོ། ། དེ་ན་རྒ་ཤི་ཡོད་པས་བདག་གིས་རྒ་ཤི་རྣམ་པར་གཅད་པའི་ཕྱིར་སེམས་སྒོམ་མོ། ། ནམ་མཁའི་འདུ་ཤེས་སུ་ཡང་མོས་སོ་སྙམ་མོ། ། ཡང་དེ་ནམ་མཁའི་འདུ་ ཤེས་ཡིད་ལ་བྱེད་ཅིང་དེ་ཡང་དག་པར་ཤེས་པར་བྱེད་ལ། དེ་ལ་རབ་ཏུ་སྦྱོར་བར་བྱེད། དེ་ལ་མོས་པར་བྱེད་དེ།

དེ་ནམ་མཁའ་ཤིན་ཏུ་ཡོངས་སུ་དག་པ་ཇི་སྙེད་པ་ཐམས་ཅད་ལ་བདག་ཉིད་ཀྱིས་མངོན་པར་བརྗོད་པ་དང་མོས་པར་བྱེད་ཅིང་རྫོགས་པར་བྱས་ཏེ་གནས་ པ་འདི་ནི་སོ་སོའི་སྐྱེ་བོ་དང་ཐུན་མོང་བ་བདེན་པ་དང་རྗེས་སུ་འཐུན་པའི་གཟུངས་སྔགས་ཡིན་ཏེ། འདི་ནི་སོ་སོའི་སྐྱེ་བོ་དང་ཐུན་མོང་བའོ། ། ཡང་དེ་འདི་སྙམ་དུ་སེམས་ཏེ། འདི་ནི་བདག་གི་བདག་ཤིན་ཏུ་ཡོངས་སུ་དག་པ་ཡིན་ཏེ། དེ་ནམ་མཁའ་ཐམས་ཅད་ལ་ད་དུང་བདག་གི་རྟོག་ པ་རྣམས་ཀུན་ཏུ་སྤྱོད་པར་བྱེད་དོ། ། གང་བདག་གི་བདག་གིས་ནམ་མཁའ་ལ་བརྟག་པར་བྱའོ། ། བདག་གི་འདུ་ཤེས་ནི་ནམ་མཁའ་ཡིན་ནོ་སྙམ་མོ། ། འོན་ཀྱང་འདུ་ཤེས་ཐམས་ཅད་ནི་སྡུག་བསྔལ་གྱི་སྒྲར་གསུངས་ཏེ། འདི་ནི་ཀུན་འབྱུང་བ་དང་སྡུག་བསྔལ་ཐམས་ཅད་ཀྱི་འགོག་ པ་དང་ཞི་བ་ཡིན་ཏེ། སུས་དེ་ལ་སྡུག་བསྔལ་བ་དང་ཀུན་འབྱུང་བ་འགོག་པར་ཡང་དག་པར་རྗེས་སུ་མཐོང་བ་དེའི་དུས་ན་ཁ་ཅིག་རྒྱུན་དུ་ཞུགས་པའི་འབྲས་བུ་ལ་གནས་པ་ནས་ཁ་ཅིག་དགྲ་བཅོམ་པ་ཉིད་ཀྱི་བར་ལ་གནས་པ་འདི་ནི་སོ་སོའི་སྐྱེ་བོ་དང་ཐུན་མོང་བ་བདེན་པ་དང་རྗེས་སུ་འཐུན་ པའི་གཟུངས་སྔགས་ལས་རྣམ་པར་གྲོལ་བའི་སྐྱེ་མཆེད་བཞི་པའོ། ། ཡང་དེ་འདི་སྙམ་དུ་སེམས་ཏེ།

འོ་ན་ནམ་མཁའ་བསྒོམ་པར་བྱ་བའི་ཕྱིར་ལན་མང་དུ་གནས་པར་བྱའོ། ། གང་ནམ་མཁའ་ཐམས་ཅད་ནི་བདག་གི་བདག་ཡིན་ཏེ། ནམ་མཁའ་ལ་མོས་པར་བྱའོ། ། རྣམ་ པར་ཤེས་པ་ཡོངས་སུ་བཙལ་བར་བྱའོ་སྙམ་ནས་ནམ་མཁའ་ཇི་ཙམ་པར་དེའི་རྣམ་པར་ཤེས་པ་མཉམ་པར་སྣང་ངོ་། ། དེའི་ནམ་མཁའི་འདུ་ཤེས་ཀྱང་སྤངས་ཤིང་ནམ་མཁའ་མཐའ་ཡས་མུ་མེད་པ་ཇི་སྙེད་པ་དེ་སྙེད་ཀྱི་རྣམ་པར་ཤེས་པ་ཐམས་ཅད་ཀུན་ཏུ་སྣང་སྟེ། ། འདི་ནི་སོ་ སོའི་སྐྱེ་བོ་དང་ཐུན་མོང་བ་བདེན་པ་དང་རྗེས་སུ་འཐུན་པའི་གཟུངས་སྔགས་སོ། ། དེ་ལ་གནས་པ་འདི་སྙམ་དུ་སེམས་ཏེ། བདག་གི་རྣམ་པར་ཤེས་པའི་འདུ་ཤེས་འདི་ནི་རྟོག་པ་དང་། སྡུག་བསྔལ་བ་དང་། ཀུན་འབྱུང་བ་ཞེས་བྱ་བ་ནས་དེ་ཉིད་རྣམ་པར་ཤེས་པ་ཕྱིན་ཅི་ ལོག་གི་བར་ཡིན་ནོ་སྙམ་མོ། ། འོན་ཀྱང་བདག་གི་ཕྱིན་ཅི་ལོག་འདི་ནི་དགག་པར་བྱའོ། །

གནས་སྐབས་གང་དུ་སྡུག་བསྔལ་ཞེས་བྱ་བ་ནས་འགོག་པའི་བར་དུ་ཡིད་ལ་བྱེད་པའི་གནས་སྐབས་དེ་ན་ཁ་ཅིག་འབྲས་བུ་དང་པོ་ལ་གནས་སོ་ཞེས་བྱ་བ་ནས་ཁ་ཅིག་དགྲ་བཅོམ་པ་ཉིད་ཀྱི་ བར་ལ་གནས་པ་འདི་ནི་སོ་སོའི་སྐྱེ་བོ་དང་ཐུན་མོང་བ་བདེན་པ་དང་རྗེས་སུ་འཐུན་པའི་གཟུངས་སྔགས་ལས་རྣམ་པར་གྲོལ་བའི་སྐྱེ་མཆེད་ལྔ་པའོ། ། དེ་འདི་སྙམ་དུ་སེམས་ཏེ། བདག་གི་རྣམ་པར་ཤེས་པའི་འདུ་ཤེས་འདི་ནི་རྟོག་པ་དང་། ཟུག་རྔུ་དང་། འབྲས་དང་། ནད་ ཉིད་ཡིན་ཏེ། གང་བདག་གིས་རྣམ་པར་ཤེས་པའི་འདུ་ཤེས་དེ་ཡང་སྤང་བར་བྱ་གོར་མ་ཆག་གོ་སྙམ་ནས་ནམ་མཁའི་འདུ་ཤེས་དེ་ཡང་སྤངས་ཤིང་རྣམ་པར་ཤེས་པའི་འདུ་ཤེས་ཀྱང་སྤོང་བར་བྱེད་དོ། ། དེ་ཅི་ལ་ཡང་དམིགས་པར་མི་བྱེད་དོ། ། དེའི་ཚེ་འདུ་ཤེས་མེད་པ་ལ་སྙོམས་ པར་ཞུགས་པ་ཡིན་ཏེ་སུ་ལ་སྔར་འདི་བྱུང་བ་ནི་སོ་སོའི་སྐྱེ་བོ་དང་ཐུན་མོང་བའི་ཏིང་ངེ་འཛིན་ཏོ། ། དེ་བཞིན་དུ་རྣམ་པར་ཤེས་པ་ནི་ཟུག་རྔུ་དང་། འབྲས་དང་། ནད་རྣམས་ཡིན་ཏེ། གང་བདག་གིས་མེད་པ་ཉིད་ཡིད་ལ་བྱ་གོར་མ་ཆག་སྙམ་མོ། ། ཅི་ཞིག་མེད་ཅེ་ན། འདུ་ཤེས་ཐམས་ཅད་བདག་གམ་བདག་གི་མེད་དོ། ། བདག་དེས་བདག་དང་འདུ་ཤེས་ཀྱང་སྤང་བར་བྱ་སྟེ།

དེ་ནི་མྱ་ངན་ལས་འདས་པ་ཡིན་ནོ། ། གནས་སྐབས་གང་དུ་མྱ་ངན་ལས་འདས་པ་ཡིད་ལ་བྱས་པའི་གནས་སྐབས་དེར་ཁ་ཅིག་རྒྱུན་དུ་ ཞུགས་པའི་འབྲས་བུ་ལ་གནས་པ་ནས་ཁ་ཅིག་དགྲ་བཅོམ་པ་ཉིད་ཀྱི་བར་ལ་གནས་པ་འདི་ནི་སོ་སོའི་སྐྱེ་བོ་དང་ཐུན་མོང་བ་བདེན་པ་དང་རྗེས་སུ་འཐུན་པའི་གཟུངས་སྔགས་ལས་རྣམ་པར་གྲོལ་བའི་སྐྱེ་མཆེད་དྲུག་པའོ། ། ཡང་སུ་ཞིག་འདི་སྙམ་དུ་སེམས་ཏེ། རྣམ་པར་ཤེས་པའི་ ཏིང་ངེ་འཛིན་གྱི་རིམ་པ་ཤིན་ཏུ་ཡོངས་སུ་དག་པ་ཉོན་མོངས་པ་ཅི་ཡང་མེད་པའི་སེམས་ཀྱིས་གནས་པར་བྱའོ་སྙམ་ནས་དེ་མི་རྟོག་པའི་ཚུལ་གྱིས་ཅི་ཡང་མེད་པའི་སེམས་ཀྱིས་གནས་པར་བྱེད་དེ། གནས་སྐབས་གང་དུ་མི་རྟག་པའི་འདུ་ཤེས་ཡིད་ལ་བྱེད་པའི་གནས་སྐབས་དེར་དེ་རྒྱུན་དུ་ ཞུགས་པའི་འབྲས་བུ་མངོན་དུ་བྱེད་པ་ནས་དགྲ་བཅོམ་པ་ཉིད་ཀྱི་བར་མངོན་དུ་བྱེད་པ་འདི་ནི་སོ་སོའི་སྐྱེ་བོ་དང་ཐུན་མོང་མ་ཡིན་པ་བདེན་པ་དང་རྗེས་སུ་འཐུན་པའི་བཟོད་པའི་གཟུངས་སྔགས་ལས་རྣམ་པར་གྲོལ་བའི་སྐྱེ་མཆེད་བདུན་པའོ། ། སུ་ཞིག་འདི་སྙམ་དུ་སེམས་ཏེ།

བདག་གི་རྣམ་ པ་ཐམས་ཅད་དུ་ཅི་ཡང་མེད་པའི་ཤེས་པ་ཡང་དག་པར་སྤངས་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་རྫོགས་པར་བྱས་ཏེ་གནས་པར་བྱའོ་སྙམ་ནས་དེ་ཅི་ཡང་མེད་པའི་སྐྱེ་མཆེད་ཐམས་ཅད་སྤངས་ཏེ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཡིད་ལ་བྱེད་ཅིང་ཡང་དག་པར་མི་ཤེས། རབ་ཏུ་སྦྱོར་བར་མི་བྱེད། བྱིན་གྱིས་རློབ་པར་མི་བྱེད། སྒོམ་པར་མི་བྱེད། སྒྲུབ་པར་མི་བྱེད་པ་འདི་ནི་སོ་སོའི་སྐྱེ་བོ་དང་ཐུན་མོང་མ་ཡིན་པ་བདེན་པ་དང་རྗེས་སུ་འཐུན་པའི་གཟུངས་སྔགས་ལས་རྣམ་པར་གྲོལ་བའི་སྐྱེ་མཆེད་བརྒྱད་པའོ། ། དེས་ནི་འདོད་པའི་འདོད་ཆགས་དང་གཟུགས་ ཀྱི་འདོད་ཆགས་ཐམས་ཅད་དང་། དབྱིབས་ཀྱི་འདོད་ཆགས་དང་། རེག་པའི་འདོད་ཆགས་དང་། རྣམ་པར་གྲོལ་བ་མ་ཡིན་པའི་རྩེ་བའི་འདོད་ཆགས་ཐམས་ཅད་སྤོང་བར་འགྱུར་རོ། ། འཕགས་པའི་གང་ཟག་རྣམས་ཀྱི་ནི་ལྷག་མ་མེད་པར་འགྱུར་རོ། ། སོ་སོའི་སྐྱེ་བོ་རྣམས་ ཀྱི་ནི་ཉམ་སྨད་པར་འགྱུར་ཏེ། རྐྱེན་གྱི་དབང་གིས་ཕྱིས་སྐྱེ་བར་འགྱུར་ཞིང་ངན་སོང་གི་རྒྱུར་འགྱུར་རོ། ། འདི་ནི་བདེན་པ་དང་རྗེས་སུ་འཐུན་པའི་གཟུངས་སྔགས་ཀྱིས་དོན་གླེང་གཞི་དང་བཅས་པ་རྒྱས་པ་དང་བཅས་པ་ཡིན་ཏེ།

གང་དེ་བཞིན་གཤེགས་པ་ཙམ་པ་ཀའི་མདོག་གིས་ ང་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོའི་ལག་ནས་བསྐུར་བ་མཐུ་ཆེ་བ། ཕན་ཡོན་ཆེ་བ་ཡིན་ནོ། ། འདུས་པ་ཆེན་པོ་འདི་ངས་བཤད་པ་ལ་དད་པ་སྦྱིན་པར་མཛད་པ་ཡིན་ནོ། ། འདོད་པའི་འདོད་ཆགས་ཐམས་ཅད་ཡང་དག་པར་ཟད་པར་བྱེད་པ་ གཟུགས་ཀྱི་འདོད་ཆགས་ཐམས་ཅད་དང་། གཟུགས་མེད་པའི་འདོད་ཆགས་ཐམས་ཅད་དང་། ང་རྒྱལ་དང་། ལྷག་པའི་ང་རྒྱལ་དང་། ང་རྒྱལ་ལས་ཀྱང་ང་རྒྱལ་ཐམས་ཅད་དང་། ཕྲག་དོག་ཐམས་ཅད་ཡང་དག་པར་ཟད་པར་བྱེད་པ། ཡོངས་སུ་ཚོལ་བ་ཐམས་ཅད་དང་། བརྣབ་ སེམས་ཐམས་ཅད་དང་། རྒོད་པ་ཐམས་ཅད་དང་། མ་རིག་པ་ཐམས་ཅད་དང་། འཇིག་ཚོགས་ལ་ལྟ་བ་དང་། ཐེ་ཙོམ་དང་། ཚུལ་ཁྲིམས་དང་། བརྟུལ་ཞུགས་མཆོག་ཏུ་འཛིན་པ་ཐམས་ཅད་དང་། རྟག་པར་ལྟ་བ་དང་། ཆད་པར་ལྟ་བ་དང་། སེམས་ཅན་ དུ་ལྟ་བ་དང་། སྲོག་ཏུ་ལྟ་བ་དང་། གསོ་བར་ལྟ་བ་དང་། གང་ཟག་ཏུ་ལྟ་བ་ཐམས་ཅད་དང་། བྱེད་པ་པོ་དང་། ཚོར་བ་པོར་ལྟ་བ་ཐམས་ཅད་དང་། གཟུགས་སུ་ལྟ་བ་ཐམས་ཅད་ཅེས་བྱ་བ་ནས་རེག་པར་ལྟ་བ་ཐམས་ཅད་ཅེས་བྱ་བའི་བར་དང་། སྐྱེ་བར་ལྟ་བ་ ཐམས་ཅད་དང་།

འབྱུང་བ་ཆེན་པོར་ལྟ་བ་ཐམས་ཅད་ཡོངས་སུ་ཤེས་པར་བྱེད་པ་ཞེས་བྱ་བ་ནས་ཕུང་པོ་དང་། ཁམས་དང་། སྐྱེ་མཆེད་ཐམས་ཅད་རྡུལ་མེད་པར་བྱེད་པའི་བར་དང་། བྱང་གྲོལ་གྱི་བདེ་བ་ཐམས་ཅད་སྟོན་པར་བྱེད་པ་ཡིན་ནོ། ། རིམ་པ་དེས་ནི་བདུད་ རྣམས་ཚར་གཅོད་པར་བྱེད་པ། ཀླུ་རྣམས་ཕམ་པར་བྱེད་པ། ལྷ་རྣམས་དགའ་བར་བྱེད་པ། གནོད་སྦྱིན་རྣམས་མགུ་བར་བྱེད་པ། ལྷ་མ་ཡིན་རྣམས་རྣམ་པར་འཇོམས་པར་བྱེད་པ། ནམ་མཁའ་ལྡིང་རྣམས་དངང་བར་བྱེད་པ། མི་འམ་ ཅི་རྣམས་དད་པར་བྱེད་པ། ལྟོ་འཕྱེ་ཆེན་པོ་རྣམས་སྐྲག་པར་བྱེད་པ། ཕས་ཀྱི་རྒོལ་བ་རྣམས་འདུལ་བར་བྱེད་པ། རྒྱལ་རིགས་རྣམས་མངོན་པར་དགའ་བར་བྱེད་པ། བྲམ་ཟེ་རྣམས་འཇུག་པར་བྱེད་པ། རྗེའུ་རིགས་རྣམས་དགའ་བར་བྱེད་པ། དམངས་རིགས་རྣམས་ མཆོག་ཏུ་དགའ་བར་བྱེད་པ། བུད་མེད་འདོད་ཆགས་དང་བྲལ་བར་བྱེད་པ། མང་དུ་ཐོས་པ་རྣམས་སྐྱོ་བར་བྱེད་པ། རྣལ་འབྱོར་སྤྱོད་པ་རྣམས་མངོན་པར་དགའ་བར་བྱེད་པ། ནད་ཐམས་ཅད་རབ་ཏུ་ཞི་བར་བྱེད་པ། འཐབ་པ་དང་། ཐབ་མོ་དང་། མུ་གེ་དང་། ནད་དང་། དུས་མ་ཡིན་པའི་ཕ་རོལ་གྱི་དམག་ཚོགས་དང་། དུས་མ་ཡིན་པའི་རླུང་དང་། ཆར་པ་དང་། ཆུ་བོ་དང་། གྲང་བ་དང་། དྲོ་བ་དང་།

ཁ་བ་དང་། ཚ་བ་དང་། རྩུབ་པ་དང་། རོ་མེད་པ་དང་། རེག་པར་དཀའ་བའི་དངོས་པོ་རྣམས་རྣམ་པར་ཞི་བར་བྱེད་པ། ཆོས་ཀྱི་ཚུལ་ འབར་བར་བྱེད་པ། དཀོན་མཆོག་གསུམ་གྱི་གདུང་རྒྱུན་མི་འཆད་པར་བྱེད་པ། སངས་རྒྱས་ཀྱི་བསྟན་པ་སྟོན་པར་བྱེད་པ། འཁོར་བར་སྐྲག་པ་རྣམས་དབུགས་འབྱིན་པར་བྱེད་པ། ཟད་པ་ཤེས་པ་སྐྱེད་པར་བྱེད་པ། མི་སྐྱེ་བ་ཤེས་པ་རྟོགས་པར་བྱེད་པ། མ་རིག་པའི་ཕུང་ པོ་རབ་ཏུ་འཇོམས་པར་བྱེད་པ། སྡུག་བསྔལ་ཐམས་ཅད་འདོར་བར་བྱེད་པ་ཡིན་ཏེ། འདི་ནི་བདེན་པ་དང་རྗེས་སུ་འཐུན་པའི་བཟོད་པ་ཡིན་ནོ། ། བསྟན་པ་འདི་བཤད་པ་ན་དེར་ལྷ་དང་མི་གྲངས་མེད་དཔག་ཏུ་མེད་པ་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་ཉེ་བའི་ ཉོན་མོངས་པ་དང་བྲལ་བ་ཐོབ་བོ། ། དེའི་ཚེ་ཁྲག་ཁྲིག་ཕྲག་དགུ་བཅུ་རྩ་དྲུག་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ཏོ། ། དེའི་ཚེ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་ནི་བདེན་པ་དང་རྗེས་སུ་འཐུན་པའི་གཟུངས་སྔགས་འདི་ཐོབ་པར་གྱུར་ཏོ། །

དེའི་ཚེ་ སེམས་ཅན་གྲངས་མེད་དཔག་ཏུ་མེད་པ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཅིང་ཕྱིར་མི་ལྡོག་པར་ཡང་གྱུར་ཏོ། ། སྟོང་ཕྲག་སུམ་ཅུ་རྩ་གཉིས་ནི་མི་སྐྱེ་བའི་ཆོས་རྣམས་ལ་བཟོད་པ་ཐོབ་པར་གྱུར་ཏོ། ། ལྷ་དང་། ཀླུ་དང་། གནོད་སྦྱིན་དང་། སྲིན་ པོ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། {ཡི་དགས་,ཡི་དྭགས་}དང་། གྲུལ་བུམ་དང་། ཤ་ཟ་དང་། མི་དང་མི་མ་ཡིན་པ་ཐམས་ཅད་ཀྱིས་ལེགས་སོ་ཞེས་བྱ་བ་གསོལ་ཏེ། བཙུན་པ་བཅོམ་ལྡན་འདས་ཁྱོད་ཀྱིས་དགེ་བར་ གསུངས་པ་ལེགས་སོ། ། སངས་རྒྱས་བཅོམ་ལྡན་འདས་རྣམས་ཀྱི་ཐོགས་པ་མ་མཆིས་པའི་ཡེ་ཤེས་མཐོང་བ་ནི་ངོ་མཚར་ལགས་སོ། ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ལ་སུ་ཞིག་འདུན་པ་སྐྱེད་པར་མི་བགྱིད་ལགས། འདི་ལྟར་དེ་བཞིན་གཤེགས་པ་ནི་ སེམས་ཅན་ཐམས་ཅད་ཀྱི་མིག་ཏུ་གྱུར་པ། ཡེ་ཤེས་སུ་གྱུར་པ། སྡུག་བསྔལ་ཐམས་ཅད་ཉེ་བར་ཞི་བར་བགྱིད་པར་གྱུར་པ། བདེ་བ་ཐམས་ཅད་སྦྱིན་པར་མཛད་པ། འཁོར་བའི་གཟིངས་སུ་གྱུར་པ་ལགས་སོ། །

དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་ཤེས་ཀཽ་ཌི་ནྱས་ འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་གང་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོས་གཟུངས་སྔགས་ཉི་མའི་མིག་བསྟན་པ་བསྲུང་བ་ཆེན་པོ་མ་འདྲེས་པ་ཐམས་ཅད་སྒྲུབ་པ་ཞེས་བགྱི་བ་ནས་ཤིན་ཏུ་ཡོངས་སུ་མྱ་ངན་ལས་འདས་པ་སྒྲུབ་ པ་ཞེས་བགྱི་བའི་བར་དང་། གཟུངས་སྔགས་གང་གིས་སྐྱེས་བུ་དམ་པ་རྣམས་སྲིད་པ་གསུམ་གྱི་བཙོན་ར་ཐམས་ཅད་དུ་མངོན་པར་མི་དགའ་བའི་འདུ་ཤེས་དང་། མཚན་མ་མེད་པའི་ཏིང་ངེ་འཛིན་གྱི་རྣམ་པར་ཐར་པའི་བདེ་བ་ལ་རེག་པར་བགྱིས་ནས་མི་གཡོ་བའི་ཏིང་ངེ་འཛིན་ལ་ འཇུག་ཅིང་མགོ་མཉམ་པ་ཉིད་དུ་འགྱུར་བ་དང་། སུས་ཐོས་པ་དེའི་ཉོན་མོངས་པ་འདོད་ཆགས་ལ་སོགས་པ་བསྲབས་པར་འགྱུར་ཞིང་། དེ་ལྷ་རྣམས་ཀྱི་ནང་དུ་ཚེ་རབས་བདུན་འཁོར་བར་འགྱུར་བ་དང་། ལྷའི་དྲང་སྲོང་དུ་འགྱུར་བ་དང་། དེའི་སེམས་འདོད་པ་རྣམས་ ཀྱིས་གོས་པར་མི་འགྱུར་བ་དང་། ལྷ་ཐམས་ཅད་ཀྱིས་མཆོད་པའི་འོས་སུ་གྱུར་པ་དང་། དེ་དེ་ནས་ཤི་འཕོས་ནས་འདིར་མི་རྣམས་ཀྱི་ནང་དུ་ཚེ་རབས་བདུན་འཁོར་བར་འགྱུར་བ་དང་།

དེའི་སེམས་འདོད་པ་རྣམས་ཀྱིས་གོས་པར་མི་འགྱུར་བ་དང་། མིའི་ དྲང་སྲོང་དུ་འགྱུར་བ་དང་། ལྷ་དང་མི་ཐམས་ཅད་ཀྱིས་མཆོད་པའི་འོས་སུ་གྱུར་པ་དང་། ཕྱག་བགྱི་བའི་འོས་སུ་གྱུར་པར་འགྱུར་བ་དེ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཌི་ནྱ་མི་དགའ་བར་མ་བྱེད་ཅིག་ཆོག་གོ། ། ཀཽ་ཌི་ནྱ་ཉི་མ་དང་ལྡན་པའི་གཟུངས་ སྔགས་འདི་ཉན་ཐོས་དང་རང་རྒྱལ་བ་རྣམས་ཀྱིས་མ་ཡིན་ནོ། ། ཉི་མའི་མིག་པད་མའི་གཟུངས་སྔགས་འདི་ནི་སངས་རྒྱས་ཀྱི་ཆོས་མ་འདྲེས་པ་{བཅྭ་,བཅོ་}བརྒྱད་ཀྱི་རྒྱུ་འཐུན་པ་དག་ཡིན་ནོ། ། ཀཽ་ཌི་ནྱ་གལ་ཏེ་ངས་བསྐལ་པ་བརྒྱ་སྟོང་དུ་ཉི་མའི་མིག་གི་གཟུངས་སྔགས་འདིའི་དོན་བསྟན་ཀྱང་བསྐལ་ པ་བརྒྱ་སྟོང་ནི་ཟད་པར་འགྱུར་གྱི་རྒྱ་ཆེར་དོན་ཐམས་ཅད་བརྗོད་པར་མི་ནུས་སོ། ། འདི་ལ་ལྷ་དང་བཅས་པའི་འཇིག་རྟེན་རྨོངས་པར་ཡང་འགྱུར་རོ། ། འདི་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཉིད་མ་གཏོགས་པར་མངོན་སུམ་པ་གཞན་ གང་ཡང་མེད་དོ། ། ཉི་མའི་མིག་གི་གཟུངས་སྔགས་འདི་ནི་དོན་དཔག་ཏུ་མེད་པ་མཐོང་བར་དཀའ་བ། རྟོགས་པར་དཀའ་བ་ཡིན་ནོ། ། དེ་བཞིན་དུ་མི་ཟད་པའི་སྦུ་བུ་དང་།

དེ་བཞིན་དུ་རིག་སྔགས་ཀྱི་རྟེན་དང་། དེ་བཞིན་དུ་སྡང་བ་ཞི་བར་བྱེད་པ། གཉིད་ཀྱིས་ལོག་པར་བྱེད་པའི་ གཟུངས་སྔགས་ནི་དོན་དཔག་ཏུ་མེད་ལ་མཐོང་བར་དཀའ་བ་ཁོང་དུ་ཆུད་པར་དཀའ་བ་ཡིན་ཏེ། འདི་ལ་དེ་བཞིན་གཤེགས་པ་རྣམས་ཉིད་མ་གཏོགས་པར་མངོན་སུམ་པ་གཞན་གང་ཡང་མེད་དོ། ། ཀཽ་ཌི་ནྱས་གསོལ་པ། བཙུན་པ་བཅོམ་ལྡན་འདས་གང་དེ་བཞིན་གཤེགས་པ་རི་དབང་ རྒྱལ་པོ་དེས་སྟོང་པ་ཉིད་དང་རྗེས་སུ་འཐུན་པའི་གཟུངས་སྔགས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་ཆེའི་ལག་ནས་བསྐུར་བ་བཤད་པར་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཌི་ནྱ་དེ་བཞིན་ཏེ། གང་དེ་བཞིན་གཤེགས་པ་རི་དབང་རྒྱལ་པོས་ འདིར་ང་ལ་བསྐུར་བ་འདུས་པ་འདིར་ངས་བཤད་པ་ལ་དད་པ་སྦྱིན་པར་མཛད་པ་སྟོང་པ་ཉིད་དང་རྗེས་སུ་འཐུན་པའི་གཟུངས་སྔགས་ལྷ་དང་བཅས་པའི་འཇིག་རྟེན་གྱི་མདུན་དུ་ངས་བཤད་པར་བྱའོ། ། འདི་ལྟར་འདི་ནི་འདིར་ངས་བཤད་ན་སེམས་ཅན་གྲངས་མེད་དཔག་ཏུ་མེད་པའི་དོན་བྱེད་ པ་ཡིན་ཞིང་འདིར་སེམས་ཅན་རྣམས་ཀྱིས་མངོན་སུམ་དུ་གྱུར་པར་འགྱུར་རོ། །

ཀཽ་ཌི་ནྱ་དེའི་ཕྱིར་ཁྱོད་ཅེས་བྱ་བ་ནས་བཅོམ་ལྡན་འདས་དེས་དེ་ལ་འདི་སྐད་ཅེས་བཀའ་སྩལ་ཏོ་ཞེས་བྱ་བའི་བར་ཏོ། ། ཀཽ་ཌི་ནྱ་འདི་ལ་སེམས་ཅན་གང་དག་འདོད་ཆགས་ཀྱི་རྒྱགས་པས་མྱོས་ཤིང་ངེས་པར་ འབྱུང་བར་མི་ལྟ་བས་གནས་པ་དེ་དག་ཡུན་རིང་པོར་འཁོར་བར་བྱེད་པར་འགྱུར་རོ། ། ཡུན་རིང་པོར་ངན་སོང་གསུམ་དུ་སྡུག་བསྔལ་གྱི་ཚོར་བ་རྩུབ་པ་མི་ཟད་པ་མྱོང་བར་འགྱུར་རོ། ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྙིང་རྗེ་ཆེན་པོ་སྐྱེས་ཏེ། དེ་ནས་བྱང་ ཆུབ་སེམས་དཔའ་སེམས་དཔའ་ཆེན་པོ་སྙིང་རྗེའི་སྟོབས་ཆེན་པོ་དང་། བརྩོན་འགྲུས་དང་། བརྩོན་པ་དང་། བརྟུལ་བ་ཆེན་པོས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་ཚོལ་བར་བྱེད་དོ། ། དེ་དག་མྱུར་དུ་མངོན་པར་རྫོགས་པར་འཚང་རྒྱའོ། ། སེམས་ཅན་རྣམས་ངན་སོང་གསུམ་ལས་བསྒྲལ་བའི་ཕྱིར་ངེས་པར་འབྱེད་པ་དང་། ངེས་པར་འབྱིན་པ་དང་། གཅེས་སྤྲས་བྱེད་པས་ཡང་དག་པར་སྡུག་བསྔལ་ཟད་པར་འགྲོ་བར་བྱ་བའི་ཕྱིར་ཆོས་སྟོན་ཏོ། །

སེམས་ཅན་གང་དག་ཆོས་བསྟན་པ་དེ་ཉན་པར་བྱེད་ཅིང་སྡུག་ བསྔལ་ལས་ངེས་པར་འབྱུང་བར་ལྟ་བ་དེ་དག་འབྲས་བུ་དང་པོ་ཐོབ་པར་བྱེད་དོ་ཞེས་བྱ་བ་ནས་འབྲས་བུ་བཞི་པའི་བར་དུ་ཐོབ་པར་བྱེད་དོ། ། ཡང་ན་གལ་ཏེ་གང་དག་སེམས་ཅན་ཐམས་ཅད་ཀྱི་དོན་དུ་བླ་ན་མེད་པའི་ཡེ་ཤེས་ཡོངས་སུ་བཙལ་བར་བྱ་བའི་ཕྱིར་འཁོར་བའི་སྡུག་བསྔལ་ འཇིགས་སུ་རུང་བ་རྣམས་ལ་སྤྲོ་བར་བྱེད་པ་དེ་དག་བླ་ན་མེད་པའི་ཡེ་ཤེས་རྗེས་སུ་ཐོབ་ནས་སེམས་ཅན་རྣམས་འདོད་པ་དག་ལ་ངེས་པར་འབྱུང་བར་བྱ་བའི་ཕྱིར་ཆོས་སྟོན་པར་མཛད་དེ། དཔེར་ན་ད་ལྟར་ང་བཞིན་ནོ། ། ཀཽ་ཌི་ནྱ་དེ་ལ་རེག་པའི་འདོད་ཆགས་གང་ཞེ་ན། སེམས་ཅན་ གང་དག་གཅིག་ལ་གཅིག་ལུས་ཀྱིས་རེག་པས་རེག་པར་གྱུར་པ་དེ་དག་བདེ་བའི་ཚོར་བ་མྱོང་བས་སྡུག་བསྔལ་སྐྱེ་བར་བྱེད་དོ། ། སྡུག་བསྔལ་སོ་སོ་ཡང་དག་པར་མྱོང་བར་བྱེད་དོ། ། དཔེར་ན་སྦྲུལ་གདུག་པ་གཏུམ་པོ་ཁ་ཅིག་ལྟ་བས་སེམས་ ཅན་རྣམས་གསོད་པར་བྱེད། ཁ་ཅིག་དབུགས་ཙམ་གྱིས་སེམས་ཅན་རྣམས་གསོད་པར་བྱེད་དོ། ། ཁ་ཅིག་རེག་པ་ཙམ་གྱིས་སེམས་ཅན་རྣམས་གསོད་པར་བྱེད།

ཁ་ཅིག་སྦྱོར་བ་ཙམ་གྱིས་སེམས་ཅན་རྣམས་གསོད་པར་བྱེད་པ་དེ་བཞིན་དུ་སེམས་ཅན་ཁ་ཅིག་ ནི་མཐོང་བ་ཙམ་གྱིས་དགེ་བའི་རྩ་བ་ཐམས་ཅད་ཆུད་གསོན་པར་བྱེད་ཅིང་རབ་ཏུ་སྲེག་པར་བྱེད་དོ། ། ཁ་ཅིག་ནི་གཅིག་ལ་གཅིག་ལུས་ཀྱིས་རེག་པས་དགེ་བའི་རྩ་བ་ཐམས་ཅད་ཆུད་གསོན་ཅིང་རབ་ཏུ་སྲེག་པར་བྱེད་དོ། ། ཁ་ཅིག་ནི་འཇུག་པ་ཙམ་གྱིས་དགེ་བའི་རྩ་བ་ཐམས་ ཅད་ཆུད་གསོན་ཅིང་རབ་ཏུ་སྲེག་པར་བྱེད་དོ། ། ཁ་ཅིག་ནི་འཁྲིག་པ་དང་ལྡན་པའི་ཀུན་ཏུ་སྦྱོར་བའི་རེག་པ་ཙམ་གྱིས་སྡུག་བསྔལ་སྐྱེད་པར་བྱེད་ཅིང་དེ་དག་སྡུག་བསྔལ་སོ་སོ་ཡང་དག་པར་མྱོང་བར་བྱེད་དོ། ། ཀཽ་ཌི་ནྱ་དེ་ལ་རེག་པའི་འདོད་ཆགས་ལས་ངེས་པར་ འབྱུང་བ་གང་ཞེ་ན། ཀཽ་ཌི་ནྱ་འདི་ན་རུས་པའི་ཕུང་པོ་གཟུགས་གསལ་བ་ལ་སོ་སོར་བརྟག་པར་བྱའོ། ། ཇི་ལྟར་ཞེ་ན། གང་དུ་གཟུགས་འདོད་པ་སྡུག་པ། ཕངས་པ། ཡིད་དུ་འོང་བ། འདོད་པ་དང་ལྡན་པ། ཆགས་པར་འགྱུར་བ་རྣམས་མཐོང་ནས་དེ་ལ་བྱང་གྲོལ་གྱི་བདེ་བ་ འདོད་པ་དེ་འདི་ལྟར་སོ་སོ་ཡང་དག་པར་སློབ་པར་བྱེད་དེ། གཟུགས་འདི་ནི་འབྱུང་བ་ཆེན་པོ་བཞི་ལས་གྱུར་པ། འཇིག་ཅིང་རྣམ་པར་འཇིག་ལ་རྣམ་པར་ཕྱེ་མར་འགྱུར་བའི་ངོ་བོ་ཉིད་དོ། ། ཇི་ལྟར་ཞེ་ན།

དེ་ན་རུས་པའི་ཕུང་པོ་སྐྲ་མེད་པ་དང་། ཤ་དང་། སེན་མོ་དང་། ཁྲག་ མེད་པ་དང་། སྟོང་པ་དང་། ཤིན་ཏུ་དཀར་ཞིང་དུང་གི་མདོག་ལྟ་བུ་དང་། རྒྱུས་པས་འབྲེལ་བར་ཡིད་ལ་བྱེད། ཡང་དག་པར་ཤེས་པར་བྱེད། རབ་ཏུ་སྦྱོར་བར་བྱེད། བྱིན་གྱིས་རློབ་པར་བྱེད་དེ། དེས་དེ་ཁོ་ན་བཞིན་དུ་ཡང་དག་པ་ཇི་ལྟ་བ་བཞིན་མཐོང་ངོ་། ། དེ་དེ་ ལ་སྟེན་ཅིང་སྒོམ་ལ་ལན་མང་དུ་བྱེད་པ་ན་མཚན་མོ་ཇི་ལྟ་བར་ཉིན་པར་ཡང་དེ་བཞིན་དུ་ཡང་དག་པར་རྗེས་སུ་མཐོང་ཞིང་། དེ་འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་སྐྱེད་དོ། ། དེ་འདི་སྙམ་དུ་སེམས་ཏེ། བདག་ནི་རྒ་ཤིའི་འཇིགས་པས་གནོད་པར་གྱུར་ པ་ཡིན་པས་གང་བདག་གིས་རྒ་ཤིའི་རྔ་བོ་ཆེ་འདི་མ་ལུས་པར་གཅག་གོར་མ་ཆག་སྙམ་མོ། ། ཇི་ལྟར་བདག་གིས་རྒ་ཤིའི་རྔ་བོ་ཆེ་མ་ལུས་པར་གཞིག་པར་ནུས་ཞེ་ན། གང་བདག་གིས་རུས་པའི་ཕུང་པོ་འདི་ལ་ཤིན་ཏུ་སོ་སོར་བརྟག་པར་བྱས་པས་མ་ལུས་པར་གཞིག་པར་བྱ་གོར་ མ་ཆག་སྙམ་ནས་དེ་ཐམས་ཅད་དང་ལྡན་པའི་རུས་པའི་ཕུང་པོ་འདི་ལ་སོ་སོར་རྟོག་པར་བྱེད་དེ། གང་དེ་ཐམས་ཅད་ལ་དཀར་པོའི་འདུ་ཤེས་ཡིད་ལ་བྱེད་པ་འདི་ནི་དེའི་ཞི་གནས་སུ་འགྱུར་རོ། །

དེ་འདི་ནི་བདག་གི་མགོའི་རུས་པའོ་ཞེས་བྱ་བ་ནས་དེ་བཞིན་དུ་འདི་ནི་བདག་གི་རྐང་པའི་མཐེ་བོའི་ རུས་པའོ་ཞེས་བྱ་བའི་བར་དུ་དེ་ལྟར་སོ་སོར་རྟོག་པར་བྱེད་ཅིང་རྒ་ཤིའི་རྔ་བོ་ཆེ་འདི་གཞིག་པར་བྱ་བའི་ཕྱིར་བདག་གིས་གནས་གང་དུ་ལྷག་མཐོང་གིས་བརྩམ་པར་བྱ་སྙམ་མོ། ། དེ་འདི་སྙམ་དུ་སེམས་ཏེ། ཁ་དང་སྣ་གཉིས་ཀྱི་རླུང་འདུས་པས་རྒ་ཤིའི་རྔ་བོ་ཆེ་རང་གི་རུས་པའི་ཕུང་པོ་འདི་ མ་ལུས་པར་གཞིག་པར་བྱའོ་སྙམ་ནས་དེ་སྣའི་རྩེ་མོར་རླུང་འདུས་པས་ཡང་དག་པར་རྩོམ་པར་བྱེད་དེ། རྡུལ་ཕྲ་རབ་ཙམ་དུ་རུས་པ་འཇིག་པར་བྱེད་དོ། ། རླུང་གིས་འཕྱར་བར་བྱེད་དོ། ། སྦྱོར་བ་དེས་རང་གི་རུས་པའི་ཕུང་པོ་ཐམས་ཅད་འཇིག་པར་འགྱུར་རོ། ། ཇི་ལྟར་རང་གི་རུས་ པའི་ཕུང་པོ་ཐམས་ཅད་ལྷག་མ་མེད་པར་རླུང་གིས་ཁྱེར་བར་གྱུར་པ་བཞིན་དེའི་རང་གི་ལུས་དེ་ལ་གང་རུས་པའི་འདུ་ཤེས་བྱུང་བ་དེ་སྤངས་ཤིང་དེར་དེ་ལ་སྟོང་པར་སྣང་སྟེ། འདི་སྟོང་པ་ཉིད་ཀྱི་ཡན་ལག་དང་པོའོ། ། ། ། འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་ པོ་ཞེས་བྱ་བའི་མདོ། བམ་པོ་བདུན་པ། གཞན་ཡང་དེ་ལ་བདག་ནང་སྟོང་པ་ཉིད་དུ་སྣང་ངོ་། །

དེ་ལ་ཕྱི་རོལ་ནི་གཟུགས་ཀྱི་འདུ་ཤེས་སུ་འགྱུར་རོ། ། དེ་འདི་སྙམ་དུ་སེམས་ཏེ། བདག་གིས་རླུང་འདུས་པ་དེས་གཟུགས་སྣང་བ་ཐམས་ཅད་རྣམ་པར་གཞིག་པར་བྱའོ་ སྙམ་ནས་དེ་དེ་ལྟར་རླུང་འདུས་པས་ཕྱི་རོལ་གྱིས་གཟུགས་སྣང་བ་གང་ཅི་ཡང་རུང་བ་ཐམས་ཅད་རླུང་གིས་རྣམ་པར་འཇིག་པར་བྱེད་དོ། ། དེ་རྣམ་པ་ཐམས་ཅད་དུ་ནང་ངམ་ཕྱི་རོལ་གྱི་གཟུགས་སྣང་བ་ཐམས་ཅད་སྤངས་ནས་བྱེ་བྲག་ཏུ་ཡིད་ལ་བྱེད་པ་འདི་ནི་ སྟོང་པ་ཉིད་ཀྱི་ཡན་ལག་གཉིས་པའོ། ། ཡང་དེ་འདི་སྙམ་དུ་སེམས་ཏེ། བདག་གིས་གཟུགས་སྣང་བ་གང་སྤངས་པ་ཐམས་ཅད་ནི་བདག་ལ་སྟོང་པར་སྣང་གི་གཞན་ནི་མ་ཡིན་ནོ། ། དེས་ན་བདག་གི་རླུང་དུ་ཀུན་ཏུ་རྟོག་པའི་སེམས་འདི་ཡང་ཤིན་ཏུ་རྣམ་པར་གྲོལ་བ་མ་ ཡིན་པས་དེ་བདག་གིས་སྤང་བར་བྱའོ། ། ཆོས་ནི་གང་དུ་ཡང་འོང་བ་མེད། གང་དུ་ཡང་འགྲོ་བ་མེད་དེ། དེ་དེ་ལྟར་འགྲོ་བ་མེད་པའི་ཚུལ་ལམ། བདག་ཉིད་འགྲོ་བའི་ཚུལ་གྱིས་རྟོག་པ་སྤོང་བར་བྱེད་དེ་འདི་ནི་སྟོང་པ་ཉིད་ཀྱི་ཡན་ལག་གསུམ་པའོ། ། ཡང་དེ་འདི་སྙམ་དུ་ སེམས་ཏེ། ཅི་འདུས་བྱས་ཐམས་ཅད་ལ་དེ་ཁོ་ན་ཡང་དག་པ་ཅི་ཡང་ཡོད་དམ་སྙམ་ནས་དེ་ཡང་དག་པ་མངོན་སུམ་དུ་གྱུར་པ་དེ་ཤེས་པར་བྱས་ཏེ།

ཀུན་འབྱུང་བའི་ཆོས་གང་ཅི་ཡང་རུང་བ་ཐམས་ཅད་འགོག་པའི་ཆོས་སུ་རིག་པར་བྱས་ནས་དེས་ཁམས་གསུམ་པ་ཐམས་ ཅད་མེད་ཅིང་ཡང་དག་པ་མ་ཡིན་པར་ཤེས་ཏེ། དེའི་འདུ་བྱེད་ཤིན་ཏུ་སྦྱངས་ཤིང་ཞི་བར་འགྱུར་བ་འདི་ནི་སྟོང་པ་ཉིད་ཀྱི་ཡན་ལག་བཞི་པའོ། ། ཁ་ཅིག་ནི་འདིར་འབྲས་བུ་དང་པོ་ལ་གནས་པར་བྱེད་དོ། ། ཁ་ཅིག་ནི་རྗེས་སུ་འཐུན་པའི་བཟོད་པ་སྒོམ་པར་བྱེད་དོ། ། ཁ་ཅིག་ ནི་དུས་དང་རྐྱེན་ཇི་ལྟ་བ་བཞིན་དུ་བྱང་ཆུབ་ལ་རེག་པར་བྱེད་དོ། ། གང་རྟོག་པ་དང་དཔྱོད་པ་འབའ་ཞིག་རྣམ་པར་ཞི་བར་བྱ་བའི་ཕྱིར་བརྩོན་པ་ནི་རྣམ་པར་ཞི་བར་འགྱུར་རོ། ། དེ་འགོག་པའི་སྙོམས་པར་འཇུག་པ་ལ་འཇུག་པར་བྱེད་དེ། དེ་བསམ་པ་ཇི་ལྟ་བ་བཞིན་དུ་འགོག་ པས་ཉིན་ཞག་གཅིག་འདའ་བར་བྱེད་དོ་ཞེས་བྱ་བ་ནས་བསྐལ་པ་དཔག་ཏུ་མེད་པའི་བར་དུ་འདའ་བར་བྱེད་དོ། ། དང་པོ་དེ་ལངས་མ་ཐག་ཏུ་སྐད་ཅིག་མ་གཉིས་པ་ལ་ཉོན་མོངས་པ་ཟད་པ་ན་ཚེ་ཡང་ཟད་པར་གྱུར་ནས་དེ་མགོ་མཉམ་པར་ཡོངས་སུ་མྱ་ངན་ལས་འདས་པར་བྱེད་དོ། ། འདི་ནི་ སྟོང་པ་ཉིད་དང་རྗེས་སུ་འཐུན་པའི་གཟུངས་སྔགས་བརྒྱད་པ་ཡིན་ཏེ།

སོ་སོའི་སྐྱེ་བོ་དང་ཐུན་མོང་མ་ཡིན་པ་བདེན་པ་དང་རྗེས་སུ་འཐུན་པའི་གཟུངས་སྔགས་མཐུ་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཡང་དག་པར་ཟད་པར་བྱེད་པ། གཟུགས་དང་གཟུགས་ མེད་པའི་འདོད་ཆགས་ཐམས་ཅད་ཡང་དག་པར་ཟད་པར་བྱེད་པ་ཞེས་བྱ་བ་ནས་སྡུག་བསྔལ་གྱི་ཁུར་འདོར་བར་བྱེད་པ་ཞེས་བྱ་བའི་བར་ཡིན་ནོ། ། དེ་ནི་དེ་བཞིན་གཤེགས་པ་རི་དབང་རྒྱལ་པོས་ང་ལ་སྟོང་པ་ཉིད་དང་རྗེས་སུ་འཐུན་པའི་གཟུངས་སྔགས་བྱང་ཆུབ་སེམས་དཔའ་ སེམས་དཔའ་ཆེན་པོ་སྤོས་ཀྱི་གླང་པོ་ཆེའི་ལག་ནས་བསྐུར་བ་དང་འདུས་པ་འདི་ལ་ངས་བཤད་པ་ལ་དད་པ་སྦྱིན་པར་མཛད་པ་ཡིན་ནོ། ། བསྟན་པ་འདི་བཤད་པ་ན་དེར་སེམས་ཅན་བྱེ་བ་འབུམ་ཕྲག་དགུ་བཅུ་རྩ་གཉིས་འབྲས་བུ་དང་པོ་ལ་གནས་པར་གྱུར་ཏོ། ། འབུམ་ཕྲག་ དྲུག་ཅུ་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། ། སྔོན་ལས་བྱས་པའི་སེམས་ཅན་ཁྲག་ཁྲིག་འབུམ་ཕྲག་དགུ་བཅུ་རྩ་དགུ་ནི་སྟོང་པ་ཉིད་དང་རྗེས་སུ་འཐུན་པའི་གཟུངས་སྔགས་ཐོབ་པར་གྱུར་ཏོ། ། སྲོག་ཆགས་བརྒྱད་ཁྲི་ནི་རང་བྱུང་ཅན་གྱི་གཟུངས་ སྔགས་ཐོབ་པར་གྱུར་ཏོ། །

དེར་སེམས་ཅན་དཀྲིགས་ཕྲག་དྲུག་ཅུས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། ། དེ་ནས་ཐམས་ཅད་དང་ལྡན་པའི་འཁོར་དེས་ལེགས་ སོ་ཞེས་བྱ་བ་གསོལ་ཏེ། ལྷ་རྫས་ཀྱི་མེ་ཏོག་དང་སྤོས་ཀྱི་ཆར་མངོན་པར་རབ་ཏུ་བབ་པར་གྱུར་ཏོ། ། དེ་ནས་ཡང་བཅོམ་ལྡན་འདས་ལ་ཚེ་དང་ལྡན་པ་ཀཽ་ཌི་ནྱས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོ་ དེས་སྨོན་པ་མེད་པ་དང་རྗེས་སུ་འཐུན་པའི་གཟུངས་སྔགས་གང་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་དཔལ་སྙིང་པོའི་ལག་ནས་བསྐུར་བ་དང་། འདུས་པ་ཆེན་པོ་ལུང་བསྟན་པ་ཆེན་པོ་འདི་ལ་དད་པ་སྦྱིན་པར་མཛད་པ་བཤད་པར་གསོལ། བཅོམ་ལྡན་ འདས་ཀྱིས་བཀའ་སྩལ་པ། ཀཽ་ཌི་ནྱ་དེ་དེ་བཞིན་ནོ། ། ཀཽ་ཌི་ནྱ་དེ་དེ་བཞིན་ཏེ། ཀཽ་ཌི་ནྱ་འཁོར་འདི་ལ་སྨོན་པ་མེད་པ་དང་རྗེས་སུ་འཐུན་པའི་གཟུངས་སྔགས་ངས་བཤད་པར་བྱའོ། ། ཀཽ་ཌི་ནྱ་འཁོར་འདི་ན་སེམས་ཅན་གང་དག་སྔོན་ཡོངས་སུ་ སྦྱང་བ་བྱས་པ་དང་ཆོས་འདི་ཀུན་ཏུ་ཤེས་པར་ནུས་པ་དག་ཡོད་དོ། །

ཀཽ་ཌི་ནྱ་དེའི་ཕྱིར་ཉོན་ལ་ཞེས་བྱ་བ་ནས་བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ་ཞེས་བྱ་བའི་བར་དུའོ། ། ཀཽ་ཌི་ནྱ་འདི་ན་སེམས་ཅན་གང་དག་མ་མོས་ཤིང་འདོད་ཆགས་དང་ཡང་དག་པར་ རྗེས་སུ་འབྲེལ་བ་དག་ཡོད་དེ། དེ་དག་ངེས་པར་འབྱུང་བ་རབ་ཏུ་མི་ཤེས་ཤིང་། དེ་དག་ངེས་པར་འབྱུང་བར་མི་ལྟ་བས་ཡུན་རིང་པོར་འཁོར་བར་འཁོར་བར་འགྱུར་རོ་ཞེས་བྱ་བ་ནས་ཡིད་ཀྱིས་ཀུན་ཏུ་རྟོག་པའི་འདོད་ཆགས་ལས་ངེས་པར་འབྱུང་བ་གང་ཞེ་ན་ཞེས་བྱ་བ་དང་། འདི་ལ་ ཇི་ལྟར་ཡང་དག་པར་བསླབ་པར་བྱ་ཞེ་ན་ཞེས་བྱ་བའི་བར་དུའོ། ། འདོད་པའི་འདོད་ཆགས་དང་། གཟུགས་ཀྱི་འདོད་ཆགས་དང་། གཟུགས་མེད་པའི་འདོད་ཆགས་དང་། དབྱིབས་ཀྱི་འདོད་ཆགས་དང་། རེག་པའི་འདོད་ཆགས་དང་། མོས་པའི་འདོད་ཆགས་དང་། ཡིད་ཀྱི་ཀུན་ཏུ་རྟོགས་པའི་འདོད་ཆགས་གང་ཅི་ཡང་རུང་བ་དེ་ཐམས་ཅད་ནི་འདུ་བྱེད་ཀྱི་འབྱོར་འབྲེལ་གྱི་རྐྱེན་ལས་འབྱུང་ན། སུས་འདུ་བྱེད་དེ་དག་མངོན་པར་འདུས་བྱས་ཤིང་སུ་ཞིག་ནི་མངོན་པར་འདུ་བྱེད་ཅེ་ན། རླུང་གིས་མངོན་པར་འདུས་བྱས་པའོ། ། བདག་གི་ལུས་ དང་། ངག་དང་། ཡིད་ཀྱི་འདུ་བྱེད་དེ་དག་དང་རླུང་ཡང་རྣམ་པར་གཞིག་པར་བྱའོ། །

རླུང་དེ་དག་ནི་ཁ་དང་སྣ་དག་ནས་འཇུག་ཅིང་འབྱུང་སྟེ། རླུང་དེ་དག་གིས་མངོན་པར་འདུས་བྱས་སོ། ། རླུང་དེ་དག་ཉིད་ཀྱིས་ལུས་འདི་རྣམ་པར་གཏོར་ཞིང་རྣམ་པར་གཞིག་པར་ བྱའོ་སྙམ་ནས་དེ་དེ་ལྟར་སེམས་ལ་དབུགས་རྔུབ་པར་བྱེད་དེ། དབུགས་གང་དག་འཇུག་པར་བྱེད་པ་དེ་དག་ནི་ཤ་དང་ཁྲག་སྐེམས་པར་བྱེད་དོ། ། མེད་པར་བྱེད་དོ། ། གང་དག་འབྱུང་བར་བྱེད་པ་དེ་དག་ནི་ཤ་དང་ཁྲག་དེ་ལུས་ཀྱི་ཕྱི་རོལ་དུ་འདོར་བར་བྱེད་དོ་ཞེས་བྱ་བ་ནས་ལུས་ཐམས་ ཅད་བུ་གར་གྱུར་པར་མཐོང་བའི་བར་དང་། རྨའི་སྒོ་ཐམས་ཅད་ནས་དབུགས་འཇུག་ཅིང་འབྱུང་ལ་སྐྲ་དང་། སེན་མོ་དང་། ཤ་དང་། ཁྲག་གཞི་ནས་འབྱིན་ཅིང་ལུས་ཀྱི་ཕྱི་རོལ་དུ་འདོར་བར་བྱིན་གྱིས་རློབ་པར་བྱེད་པའི་བར་དང་། ཤ་དང་ཁྲག་ཐམས་ཅད་མ་ལུས་པར་ལུས་ ཐམས་ཅད་ལ་མི་མཐོང་བར་བྱེད་པའི་བར་དང་། རུས་གོང་གི་ཕུང་པོ་སྟོང་ཞིང་དཀར་ལ་དུང་གི་མདོག་ལྟ་བུ་དང་། རྒྱུས་པས་འབྲེལ་བར་ཡང་དག་པར་རྗེས་སུ་མཐོང་བར་བྱེད་ཅིང་ཡིད་ལ་བྱེད། སྒོམ་པར་བྱེད་ལ་དེ་ཉིད་བྱིན་གྱིས་རློབ་པར་བྱེད་པའི་བར་དང་།

གང་དེ་ལ་ སྔར་འདོད་པའི་འདོད་ཆགས་ཀྱི་སེམས་དང་རྗེས་སུ་འབྲེལ་བར་བྱུང་བ་དེ་སེམས་མཉམ་པར་གཞག་པ་ལ་ཉམས་དམས་པར་འགྱུར། བསྲབས་པར་འགྱུར་ཞིང་དེ་བཞིན་དུ་གཟུགས་ཀྱི་འདོད་ཆགས་དང་། གཟུགས་མེད་པའི་འདོད་ཆགས་དང་། དེ་བཞིན་དུ་དབྱིབས་ཀྱི་འདོད་ ཆགས་དང་། དེ་བཞིན་དུ་རེག་པའི་འདོད་ཆགས་དང་། དེ་བཞིན་དུ་མོས་པའི་འདོད་ཆགས་དང་། ཀུན་ཏུ་རྟོག་པའི་འདོད་ཆགས་འགོང་བར་འགྱུར་ཞིང་བསྲབས་པར་འགྱུར་རོ་ཞེས་བྱ་བའི་བར་དུའོ། ། གང་གི་ཚེ་ཡང་དེའི་སེམས་མཉམ་པར་མ་བཞག་པ་ན་ཡང་དང་ ཡང་དུ་རྐྱེན་ཇི་ལྟ་བུ་རྙེད་པ་དེ་ལྟ་བུ་དེ་ཆུ་ཚོད་གཅིག་ཙམ་དུ་གཟུགས་ཁ་ཅིག་ལ་ཞེས་བྱ་བ་ནས། རེག་པ་ཁ་ཅིག་ལ་ཞེས་བྱ་བའི་བར་ལ་རྣམ་པར་ཉམས་པར་འགྱུར་རོ། ། དེ་འདི་སྙམ་དུ་སེམས་ཏེ། བདག་གི་རིས་འཐུན་པས་འདོད་ཆགས་གཞི་དང་བཅས་པ་གང་ཡིན་པ་དེ་བཅད་ ལ་མ་ལུས་པར་བྱ་བ་ཡིན་ནོ། ། དཔེར་ན་དྲུངས་ནས་ཕྱུང་བ་མ་ཡིན་པའི་ཤིང་བཅད་པ་ནི་ཕྱིས་ཀྱང་སྐྱེ་བར་འགྱུར། དེ་བཞིན་དུ་སྲེད་པའི་བག་ལ་ཉལ་མ་བཏོན་པ་སྡུག་བསྔལ་རྣམ་པ་སྣ་ཚོགས་ཕྱི་ཕྱིར་སྐྱེད་དེ། དེ་ཉིད་ལ་སྒོམ་པར་བྱེད་དེ།

ཇི་ལྟར་རང་གི་ལུས་ལ་ཀེང་རུས་དཀར་ ཞིང་དུང་གི་མདོག་ལྟ་བུ་རྒྱུས་པས་འབྲེལ་བ་ཡང་དག་པར་རྗེས་སུ་མཐོང་བར་བྱེད་པའི་བར་དུའོ། ། དེ་བཞིན་དུ་གཟུགས་སྣང་བ་གང་ཅི་ཡང་རུང་། སེམས་ཅན་ནམ། སེམས་ཅན་མ་ཡིན་པ་ཡང་རུང་སྟེ། མིག་སྔར་སྣང་བར་གྱུར་ན་དེས་ཐམས་ཅད་དུ་དེ་ལྟ་བུར་ཐམས་ཅད་ཀེང་རུས་ མདོག་དཀར་པོ་རྒྱུས་པས་འབྲེལ་བར་ལྷག་ཆད་མེད་པར་ཡང་དག་པར་རྗེས་སུ་མཐོང་ངོ་། ། དེ་ལས་དེའི་སེམས་རྣམ་པར་གཡེང་བར་ཡང་མི་བྱེད་དེ། འདི་ནི་དེའི་ཞི་གནས་ཡིན་ནོ། ། དེའི་ཚེ་ཡང་འདི་ལྟར་སོ་སོར་ཡང་དག་པར་སློབ་པར་བྱེད་དེ། འདི་ ནི་མགོའི་ཐོད་པའི་རུས་པའོ། ། འདི་དག་ནི་སོ་རྣམས་སོ། ། འདི་ནི་མགྲིན་པའོ་ཞེས་བྱ་བ་ནས་འདི་དག་ནི་རྐང་པའི་མཐེ་བོའི་རུས་པ་རྣམས་སོ་ཞེས་བྱ་བར་དེའི་ལྷག་མཐོང་དང་མཚུངས་པར་ལྡན་པའི་སེམས་ཀྱི་བསམ་གཏན་སྒྲུབ་པར་བྱེད་དོ། ། དེ་ཅིའི་ཕྱིར་ཞེ་ན། བསམས་ བཞིན་དུ་བསམ་གཏན་སྒྲུབ་པར་བྱེད་པའི་ཕྱིར་རོ། ། གང་དུ་དེའི་སེམས་ཤིན་ཏུ་ཡང་དག་པར་གནས་ཤིང་རབ་ཏུ་དང་བར་གྱུར་ན་དེས་དེ་བསྒོམ་པར་བྱ་སྟེ།

ལྷག་མཐོང་གཅིག་པུ་ལ་སེམས་ཤིན་ཏུ་ཡང་དག་པར་གནས་ཤིང་རབ་ཏུ་དང་བར་གྱུར་ན་ཡང་དེས་དེ་བསྒོམ་པར་བྱའོ། ། ལྷག་མཐོང་གཅིག་པུ་ལ་སེམས་ཤིན་ཏུ་ཡང་དག་པར་གནས་ཤིང་རབ་ཏུ་དང་བར་གྱུར་ན་དེས་འདི་ལྟར་བསྒོམ་པར་བྱ་སྟེ། རུས་པའི་ཕུང་པོ་སོ་སོར་ཐ་དད་པར་རུས་པ་རྣམས་ལ་སོ་སོར་བརྟགས་ཤིང་བཤིག་ལ་སོ་སོར་བརྟགས་ནས་རྣམ་པར་ཕྱེ་མར་བྱས་ཏེ་སོ་སོར་བརྟག་གོ། ། དེར་རུས་གོང་གི་ཕྱེ་མ་རྣམས་ལ་སེམས་ཀྱི་འདུ་འཕྲོད་གང་ཡིན་པ་དེ་རྒྱུ་མེད་པ་མ་ཡིན་པ་དང་། ཟད་པ་དང་འཇིག་པའི་མཚན་ཉིད་དུ་སོ་སོར་བརྟག་པར་བྱའོ། ། དེ་ལྟར་ལྷག་མཐོང་དང་རྗེས་སུ་འཐུན་པའི་བཟོད་པ་མངོན་པར་རྟོགས་པར་འགྱུར་བ་ཡིན་ནོ། ། གཟུགས་སྣང་ བ་ཐམས་ཅད་ལ་ཆགས་པ་མེད་པའི་རུས་གོང་གི་ཕྱེ་མ་ཤིན་ཏུ་དཀར་པོ་ལ་འདུ་འཕྲོད་ཀྱི་རྒྱུ་གང་། སེམས་མགྱོགས་པ་དང་ཀུན་ཏུ་མགྱོགས་པ་ལ་སོ་སོར་རྟོག་པ་འབྱུང་བ་འདི་ནི་སྐྱོ་བ་དང་རྗེས་སུ་འཐུན་པའི་བཟོད་པ་མངོན་པར་རྟོགས་པར་འགྱུར་བ་ཡིན་ནོ། ། གཟུགས་ཐམས་ཅད་ལ་ ཆགས་པ་མེད་པའི་རུས་གོང་གི་ཕྱེ་མ་ཤིན་ཏུ་དཀར་པོ་ངོ་བོ་ཉིད་མེད་པ་ལ་འདུ་འཕྲོད་ཀྱི་རྒྱུ་དང་།

སེམས་མགྱོགས་པ་དང་ཀུན་ཏུ་མགྱོགས་པ་ལ་སོ་སོར་རྟོག་པ་བདག་མེད་པ་དེ་ནི་འཇིག་པ་དང་རྗེས་སུ་འཐུན་པའི་བཟོད་པ་མངོན་པར་རྟོགས་པར་འགྱུར་བ་ཡིན་ནོ། ། གཟུགས་སྣང་བ་ ཐམས་ཅད་ལ་ཆགས་པ་མེད་པའི་རུས་གོང་གི་ཕྱེ་མ་ཤིན་ཏུ་དཀར་པོ་དག་ལ་བརྗོད་དུ་མེད་པ་དང་། སྣུམ་པ་མེད་པ་དང་། གཟུང་བ་མེད་པ་དང་། མཉམ་པར་གནས་པ་མ་ཡིན་པ་དང་། ཅི་ཡང་མེད་པ་འདི་ནི་ཞི་བའི་ཞི་གནས་དང་རྗེས་སུ་འཐུན་པའི་བཟོད་པ་ མངོན་པར་རྟོགས་པར་འགྱུར་བ་ཡིན་ནོ། ། དེས་བཟོད་པ་ཐོབ་པར་བྱ་བའི་ཕྱིར་དུས་གསུམ་གྱི་འདོད་ཆགས་དག་འདོད་ཆགས་ལས་ཡང་དག་པར་སྒྲོལ་བ་དང་། ཡང་དག་པར་ལྡང་བར་བྱེད་པ་དང་། རྣམ་པར་རྟོག་པ་མཉམ་པ་དང་། རྟེན་མཉམ་པ་དང་། དུས་ གསུམ་གྱི་མཐའ་སྤོང་བར་འགྱུར་ཞིང་སྲེད་པ་གསུམ་གྱི་མཐའ་སྤོང་བ་དང་། ཁམས་གསུམ་པའི་སྲིད་པ་ལྡོག་ཅིང་ཉེ་བར་ཞི་བ་དང་། དྲི་མ་གསུམ་སྤོང་བ་དང་། རྣམ་པར་ཐར་པའི་སྒོ་གསུམ་ཐོབ་པར་འགྱུར་ཞིང་ཀུན་ཏུ་སྦྱོར་བ་གསུམ་སྤངས་ནས་རྒྱུན་དུ་ཞུགས་པའི་འབྲས་བུ་ ཐོབ་པར་འགྱུར་རོ། ། གཞན་ཡང་ཡང་དག་པར་མཚན་གྱི་གཞི་མེད་པའི་ཆོས་རྣམས་བསྒོམ་པ་ལ་བརྩོན་པ་ནི་དགྲ་བཅོམ་པའི་འབྲས་བུ་ལ་གནས་པར་འགྱུར་རོ། །

གཞན་ཡང་སུས་གཟུགས་སྣང་བ་ཐམས་ཅད་དག་ཅིང་དཀར་ལ་དུང་གི་མདོག་ལྟ་བུ་ཆགས་པ་མེད་པ། རྒྱུས་པ་དང་འབྲེལ་བའི་རུས་གོང་གི་ཕུང་པོ་ཡང་དག་པར་རྗེས་སུ་མཐོང་ན་ནི་དེར་དེའི་སེམས་ཤིན་ཏུ་ཡང་དག་པར་གནས་པར་གྱུར་ཏེ། འགྲོ་བ་དང་། གནས་པ་དང་། འདུག་པ་དང་། ཉལ་བ་ན་དེ་ཉིད་ཡིད་ལ་བྱའོ། ། དེས་དེ་ཉིད་ཡིད་ལ་བྱས་ཤིང་དེ་ཉིད་བསྒོམས་ལ་དེ་ ཉིད་བྱིན་གྱིས་བརླབས་ན་དེ་ལྟར་དེའི་ཞི་གནས་ཤིན་ཏུ་བསྒོམས་ཤིང་ཤིན་ཏུ་སྦྱང་བ་བྱས་པའི་བར་དུ་འགྱུར་རོ། ། དེའི་ཚེ་རྣལ་འབྱོར་པ་ཕྱི་ནང་བདག་མེད་པ་སྟོང་པ་ཉིད་ལ་འཇུག་སྟེ། གཟུགས་ཐམས་ཅད་ཀྱི་རུས་གོང་གི་ཕུང་པོ་ལ་གལ་ཏེ་སྔོན་པོའི་འདུ་ཤེས་བྱུང་ན་དེར་རུས་གོང་ གི་ཕུང་པོ་སྔོན་པོ་ཡང་དག་པར་རྗེས་སུ་མཐོང་ངོ་ཞེས་བྱ་བ་ནས་གལ་ཏེ་ཤེལ་གྱི་མདོག་ལྟ་བུ་ཡིད་ལ་བྱེད་ན་དེས་གཟུགས་སྣང་བ་ཐམས་ཅད་རུས་གོང་གི་ཕུང་པོ་ཤེལ་གྱི་མདོག་ལྟ་བུའི་བར་དུ་ཡང་དག་པར་རྗེས་སུ་མཐོང་ངོ་། ། དེར་དེའི་རྣམ་པར་རྟོག་པ་འབྱུང་སྟེ། ཅིའི་ཕྱིར་འདི་གཟུགས་ སྣང་བ་ཐམས་ཅད་རུས་གོང་གི་ཕུང་པོ་དཀར་པོར་ཡང་དག་པར་སྣང་། ཅིའི་ཕྱིར་ཤེལ་གྱི་མདོག་ལྟ་བུའི་བར་དུ་ཡང་དག་པར་སྣང་སྙམ་མོ། །

དེ་འདི་སྙམ་དུ་སེམས་ཏེ། འདི་དག་ཐམས་ཅད་སེམས་ཀྱི་བྲག་ཅ་ཡིན་པའི་ཕྱིར་གསོབ་ལ་{བརྫུན་,རྫུན་}པ་ སྟེ་ཐམས་ཅད་སེམས་སྣང་བ་ཡིན་ནོ། ། སུས་དེ་ལྟར་ཤེས་པ་དེ་འཇིག་རྟེན་ཐམས་ཅད་ཀྱི་སྦྱིན་གནས་ཡིན་ཞིང་མཆོད་པར་འོས་པ་ཡིན་ནོ། ། ཀཽ་ཌི་ནྱ་འདི་ནི་མངོན་པར་མི་དགའ་བའི་འདུ་ཤེས་དང་ཟས་ལ་མི་འཐུན་པའི་འདུ་ཤེས་མ་གཏོགས་པར་སྨོན་པ་མེད་པ་དང་རྗེས་སུ་ འཐུན་པའི་བཟོད་པའི་དོན་ཡིན་ནོ། ། དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོས་གང་ང་ལ་བསྐུར་བ་ཡིན་ནོ། ། དེ་ལ་བྱང་ཆུབ་སེམས་དཔའ་སེམས་ཀྱི་བློ་གྲོས་བཟང་པོས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་ཉན་ཐོས་ཞི་གནས་ཀྱི་ བསམ་པ་ཅན་སུས་དེ་ལྟར་བསྒོམས་ན་མི་སྡུག་པ་སྒོམ་པར་བགྱིད་པ་ལགས། དེར་མཚན་མ་གང་དག་འབྱུང་བ་ལགས། བཅོམ་ལྡན་འདས་ཀྱིས་བཀའ་སྩལ་པ། སུས་འདོད་ཆགས་ཟད་པར་བྱ་བའི་ཕྱིར་གང་མི་སྡུག་པ་སྒོམ་པར་བྱེད་པ་དེའི་འཕྲལ་བར་སེམས་ གཏད་པར་བྱའོ། ། དེའི་མཚན་མ་འདི་དག་འབྱུང་སྟེ། ཇི་སྲིད་དུ་མི་སྡུག་པའི་སེམས་ཀྱིས་སོ་སོར་རྟོག་པར་འགྱུར་བ་དེ་སྲིད་དུ་དེའི་ལུས་ཐམས་ཅད་གཡོ་ཞིང་ཀུན་ཏུ་གདུང་བར་འགྱུར་རོ། །

འདི་ནི་དེའི་མཚན་མ་ནང་གི་དང་པོ་ཡིན་ནོ། ། ཇི་སྲིད་དུ་ཡང་དང་ཡང་དུ་སྒོམ་པར་ བྱེད་པ་དེའི་རང་གི་ལུས་ཀྱི་གནས་སོ་ཅོག་ཏུ་འདི་སྙམ་བྱེད་དེ། ཕྱར་བ་རྩུབ་པོས་རེག་པ་བཞིན་ནོ་སྙམ་པ་འདི་ནི་དེའི་མཚན་མ་གཉིས་པའོ། ། ཡང་ཕྱི་ཕྱིར་སེམས་རྣམ་པར་གཡེང་བ་མེད་པར་སྒོམ་པར་བྱེད་པ་དེའི་ལུས་ཐམས་ཅད་རབ་ཏུ་སིམ་པར་འགྱུར་ཏེ། ལུས་ཐམས་ཅད་ ལ་འོ་མས་བཏབ་པ་བཞིན་ནོ་སྙམ་པ་འདི་ནི་དེའི་སེམས་རྩེ་གཅིག་པ་ཉིད་ཀྱི་ཞི་གནས་ཀྱི་མཚན་མ་ཡིན་ཏེ། དེ་དགའ་བ་དང་བདེ་བ་འདི་ཡང་མཚན་མ་མེད་པའི་ཚུལ་གྱིས་སྤོང་བར་བྱེད་དོ། ། དེ་ཡང་དེའི་ངེས་པར་འབྱེད་པ་ཡོངས་སུ་དག་པར་བྱ་བའི་ཕྱིར་སེམས་འདོད་ཆགས་ཀྱིས་ཉེ་ བར་ཉོན་མོངས་པ་ཡོངས་སུ་གཏུགས་ཤིང་མ་རིག་པས་ཉེ་བར་ཉོན་མོངས་པའི་ཤེས་རབ་རྣམ་པར་དག་ན་དེ་ལུས་ཐམས་ཅད་རུས་གོང་གི་ཕུང་པོ་ལ་སྡུག་བསྔལ་གྱི་རྣམ་པ་ཤེས་པ་ཞེས་བྱ་བ་ནས་ཞི་བའི་རྣམ་པ་ཞེས་བྱ་བའི་བར་དུ་སོ་སོར་རྟོག་པར་བྱེད་དོ། ། དེ་བཞིན་དུ་དེའི་ལུས་ཐམས་ཅད་ལས་ དྲོ་བ་འབྱུང་བར་འགྱུར་ཏེ། འདི་ནི་དེའི་ཞི་གནས་ཡོངས་སུ་རྫོགས་པ་ཡིན་ནོ། ། དྲོ་བར་གྱུར་པའི་དགེ་བའི་རྩ་བ་དང་།

སྔ་ཕྱི་མེད་པའི་བདེ་བ་འཇུག་པས་སེམས་ཡོངས་སུ་དག་པར་འགྱུར་རོ། ། བདག་ཉིད་ལྷར་གྱུར་པ་བཞིན་དུ་ཡང་དག་པར་ཤེས་སོ། ། ཡང་རུས་གོང་གི་ཕུང་པོ་དེ་ཉིད་ལ་ རྣམ་པ་བཞིར་སོ་སོར་རྟོག་པས་རང་གི་འཕྲལ་བ་ན་མར་མེའི་མེ་ལྕེ་མཐོང་ངོ་། ། དེ་མ་རིག་པ་ལས་ཡང་དག་པར་འདས་པར་བྱ་བའི་ཕྱིར་ཆེས་ལན་མང་དུ་རང་གི་རུས་གོང་གི་ཕུང་པོ་ལ་ཡང་དང་ཡང་དུ་རྣམ་པ་བཞིར་རྟག་ཏུ་སྣང་བ་དེ་ལྟ་བུར་ཡོངས་སུ་རྟོག་པས་སེམས་དང་སེམས་ལས་བྱུང་ བའི་ཆོས་རྣམས་ཀྱི་འཇིག་པ་མི་མཐོང་ངོ་། ། དེ་ལྟར་འཁོར་ཞིང་མི་གནས་པ་ཉིད་ནི་དཔེར་ན་ཉི་ཟེར་གྱི་རྡུལ་བཞིན་དུ་འཁོར་བར་བྱེད་དོ། ། ཇི་ལྟར་འདུས་བྱས་ཀྱི་དངོས་པོ་ཐམས་ཅད་ལ་འདུ་ཤེས་མཆོག་གིས་མཐོང་བ་དེ་བཞིན་དུ་འདུས་བྱས་ཀྱི་ཆོས་ཐམས་ཅད་ལ་བདག་མེད་པ་ཞེས་ བྱ་བ་ནས་འགོག་པའི་ཆོས་ཀྱི་བར་ཡང་དག་པ་ཇི་ལྟ་བ་བཞིན་དུ་ཤེས་ཏེ། དེ་ནི་དེའི་རྩེ་མོའི་དགེ་བའི་རྩ་བ་ཐོབ་པའོ། ། ཡང་རང་གི་ལུས་ལ་མེ་ཤི་བ་དང་ཀུན་ཏུ་རབ་ཏུ་འབར་བར་ཡང་དག་པར་རྗེས་སུ་མཐོང་ངོ་། ། ཕྱོགས་ཐམས་ཅད་དུ་སྣང་བ་ཆེན་པོ་ཡང་དག་པར་རྗེས་སུ་མཐོང་ ངོ་། ། དེ་ནི་དེའི་བསམ་གཏན་དང་པོའི་སའི་ལམ་ཡིན་ཏེ།

དེ་བཞིན་དུ་གཟུགས་ན་སྤྱོད་པའི་དགེ་བའི་རྩ་བ་རྣམས་དང་། གཟུགས་ན་སྤྱོད་པའི་འབྱུང་བ་ཆེན་པོ་རྣམས་ཐོབ་པར་འགྱུར་རོ། ། དེ་བཞིན་དུ་གཟུགས་ན་སྤྱོད་པའི་བདེ་བ་ཆེན་པོས་ལུས་ཐམས་ཅད་ཁྱབ་པར་འགྱུར་ རོ། ། དེ་བཞིན་དུ་དེའི་སྙིང་ག་ནས་ཀྱང་ཉི་མའི་འོད་ཟེར་དག་འབྱུང་ངོ་། ། ཕྱོགས་གང་དང་གང་མཐོང་བ་དང་ཡིད་ཀྱིས་བརྟགས་པ་ཐམས་ཅད་དུ་ཉི་མའི་དཀྱིལ་འཁོར་གྱི་འོད་ཟེར་རྣམས་ཀྱིས་ཁྱབ་པར་མཐོང་ངོ་། ། འོད་ཟེར་དེ་རྣམས་ལ་ཡང་སྨོན་པ་མེད་པའི་ཚུལ་གྱིས་སྒོམ་ པར་བྱེད་དེ། དེ་དེའི་ཚེ་སྲིད་པ་གསུམ་པོ་ཐམས་ཅད་ལ་སྨོན་པ་མེད་པའི་སེམས་ཡིན་ནོ། ། དེ་དེའི་ཚེ་ཚུལ་གཅིག་པའི་འཕགས་པའི་བདེན་པ་བཞི་ལ་མི་དམིགས་པའི་ཚུལ་གྱིས་སྟོང་པ་ཉིད་ལ་བརྩོན་པར་གནས་སོ། ། དེའི་ལུས་ཐམས་ཅད་ལས་ ཀྱང་དྲོ་བ་འབྱུང་ངོ་། ། སྤྱི་བོ་ནས་ཀྱང་དྲོ་བ་ཁ་དོག་སྣ་ཚོགས་འབྱུང་ངོ་། ། སྤྱི་བོའི་སྟེང་དུ་གདུགས་གནས་པར་འགྱུར་བ་འདི་ནི་རྩེ་མོའི་དགེ་བའི་རྩ་བ་ཡིན་ནོ། ། ཡང་མི་དམིགས་པའི་ཚུལ་གྱིས་བདེན་པ་དང་རྗེས་སུ་འཐུན་པའི་བཟོད་པ་ལ་ཡོངས་སུ་རྟོག་པར་བྱེད་དེ། དེའི་ཚེ་འཕགས་ པའི་བདེན་པ་བཞི་མངོན་པར་རྟོགས་པར་འགྱུར་རོ། །

རིགས་ཀྱི་བུ་འདི་ནི་ཉན་ཐོས་ཀྱི་མི་སྡུག་པ་སྒོམ་པ་ཡིན་ཏེ། མི་སྡུག་པ་ཤིན་ཏུ་བསྒོམས་པ་དེས་ཞི་གནས་ཐོབ་པར་འགྱུར་རོ། ། དེ་ལ་མཚན་མ་འདི་དག་འབྱུང་སྟེ། མཚན་མ་དེ་དག་དང་དད་པ་དེ་ལྟ་བུ་དག་གིས་འཕགས་ པའི་ལམ་ཡན་ལག་བརྒྱད་པའི་བར་ལ་གནས་ཤིང་ཉོན་མོངས་པ་ཐམས་ཅད་སྤོང་བ་དང་དགྲ་བཅོམ་པ་ཉིད་ལ་རེག་པར་འགྱུར་རོ། ། རིགས་ཀྱི་བུ་དེ་ལྟ་བས་ན་ཁྱོད་ཀྱིས་སངས་རྒྱས་ཀྱི་ཞིང་འོད་ཟེར་གྱིས་རྒྱལ་བར་ཉན་ཐོས་ཀྱི་ཐེག་པ་པའི་གང་ཟག་རྣམས་ལ་ཡིད་ལ་བྱེད་པ་དེ་ལྟ་བུ་ སྟོན་ཅིག ། མི་སྡུག་པ་བསྟན་པ་འདི་བཤད་པ་ན་དེར་སེམས་ཅན་དཔག་ཏུ་མེད་པ་བདེན་པ་དང་རྗེས་སུ་འཐུན་པའི་བཟོད་པ་ཐོབ་པ་ནས་དེར་སེམས་ཅན་དཔག་ཏུ་མེད་པ་བདེན་པ་མཐོང་བའི་བར་དུ་གྱུར་ཏོ། ། དེ་ནས་བཅོམ་ལྡན་འདས་ཀྱིས་གཞན་ཡང་ཀུན་ཤེས་ཀཽ་ཌི་ནྱ་ལ་འདི་སྐད་ཅེས་བཀའ་སྩལ་ཏོ། ། ཀཽ་ཌི་ནྱ་གལ་ཏེ་ཐམས་ཅད་ཚུལ་གཅིག་ཅིང་བསམ་པ་གཅིག་པར་གྱུར་ན་གང་གིས་ཟག་པ་རྣམས་ལས་སེམས་རྣམ་པར་གྲོལ་བར་འགྱུར་བའི་ཆོས་གཅིག་ཁོ་ན་སེམས་ཅན་རྣམས་ལ་བསྟན་པར་བྱའོ། ། ཇི་སྲིད་དུ་སེམས་རྣམ་པར་མ་ཞི་བ་དེ་སྲིད་དུ་སྲིད་པའི་འབྲས་དང་། ནད་དང་། ཟུག་རྔུ་དང་།

ཡང་སྲིད་པ་སྣ་ཚོགས་ཀུན་ནས་སློང་ཞིང་འགྲོ་བ་སྣ་ཚོགས་བྱེད་པས་གང་བདག་གིས་རང་གི་སེམས་བསྡུ་བར་བྱ་ཞིང་སེམས་ཀྱི་མཚན་མ་གཟུང་བར་བྱ་གོར་མ་ཆག་སྙམ་ཞིང་རུས་གོང་གི་ཕུང་པོ་འདི་ཇི་ལྟར་སེམས་ཀྱི་འདུ་འཕྲོད་སྐྱེད་པར་བྱེད་པའི་རྒྱུ་དེ་ལ་རྣམ་པར་རྟོག་པར་བྱེད་པ་འདི་ནི་ལྷག་པའི་ སེམས་ཀྱི་སྐྱོན་མེད་པ་ཐོབ་པ་དང་པོ་ཡིན་ཏེ། ངན་ངོན་མ་ཡིན་པར་ཐོབ་པ་ཡིན། མཐོང་བའི་ཆོས་ལ་བདེ་བར་གནས་པར་འགྱུར་ཞིང་ཕྱིར་མི་ལྡོག་པར་འགྱུར་བ་ཡིན་ནོ། ། གཞན་ཡང་དེ་འདི་སྙམ་དུ་སེམས་ཏེ། རྐྱེན་གང་དག་གིས་སེམས་ཀྱི་འདུ་འཕྲོད་ཀྱི་རྒྱུ་འབྱུང་བའི་རྐྱེན་དེ་དག་ བསྡུས་ནས་འཇིག་པའི་ཚུལ་གྱིས་སྡུད་པར་བྱེད་པ་འདི་ནི་ལྷག་པའི་སེམས་ཀྱིས་མཐོང་བའི་ཆོས་ལ་བདེ་བར་གནས་པ་སྐྱོན་མེད་པ་ཐོབ་པ་གཉིས་པ་ཡིན་ཏེ། ངན་ངོན་མ་ཡིན་པར་ཐོབ་པ་དང་། དཀའ་བ་མེད་པར་ཐོབ་པ་ཡིན་ནོ། ། ཡང་དེ་འདི་སྙམ་དུ་སེམས་ཏེ།

བདག་གི་སེམས་འདི་ཇི་ སྲིད་དུ་རྐྱེན་གྱི་འདུ་འཕྲོད་ཀྱི་རྒྱུ་ལ་རྒྱུག་པར་བྱེད་པ་དེ་སྲིད་དུ་ལུས་དང་སེམས་ཀྱི་བདེ་བས་མྱོས་པས་གནས་པར་འགྱུར་བས་གང་བདག་གིས་ལུས་དང་སེམས་ཀྱི་བདེ་བ་ནུབ་པར་བྱ་གོར་མ་ཆག་གོ་སྙམ་ནས་དེ་འདི་ལྟར་སོ་སོ་ཡང་དག་པར་སློབ་པར་བྱེད་དེ། བདག་གི་སྐྱོན་གྱི་འདུ་འཕྲོད་ཀྱི་རྒྱུ་ འདི་ནི་རུས་གོང་གི་ཕུང་པོ་དྲན་པས་ལུས་དང་སེམས་ཀྱི་བདེ་བ་ཡང་དག་པར་འབྱུང་བའོ། ། གང་བདག་གིས་དེ་མངོན་པར་དོར་བར་བྱ་གོར་མ་ཆག་གོ་སྙམ་ནས་དེ་མིག་གི་རྣམ་པར་ཤེས་པ་བྱུང་བ་ཞེས་བྱ་བ་ནས་ཡིད་ཀྱི་རྣམ་པར་ཤེས་པའི་བར་བྱུང་བ་སྐྱེ་བ་དང་འཇིག་པའི་ཚུལ་གྱིས་ནུབ་པར་ བྱེད་པ་འདི་ནི་ལྷག་པའི་སེམས་ཀྱི་མཐོང་བའི་ཆོས་ལ་བདེ་བར་གནས་པར་འགྱུར་བ་གསུམ་པ་ཡིན་ཏེ། སྐྱོན་མེད་པར་ཐོབ་པ་དང་། དཀའ་བ་མེད་པར་ཐོབ་པ་དང་། ངན་ངོན་མ་ཡིན་པར་ཐོབ་པ་ཡིན་ནོ། ། གཞན་ཡང་དེ་འདི་སྙམ་དུ་སེམས་ཏེ། བདག་ཆོས་ཀྱི་དབྱིངས་ཐམས་ཅད་ངེས་པར་ འབྱུང་བ་དང་། ཟད་པ་དང་། རང་བཞིན་དག་པ་དང་། ངོ་བོ་ཉིད་མེད་པ་དང་། ཞི་བའི་ཚུལ་གྱིས་གནས་པར་བྱའོ། ། ཇི་ལྟར་ཞེ་ན།

སེམས་ཀྱི་མཚན་ཉིད་ཐམས་ཅད་རྣམ་པར་ཞི་བའི་ཚུལ་གྱིས་གནས་པར་བྱའོ་སྙམ་ནས། དེ་སེམས་ཀྱི་མཚན་ཉིད་ཐམས་ཅད་པའི་རྒྱུ་བ་རྣམ་པར་ཞི་བ་དང་སེམས་ཞི་ བར་གནས་པ་འདི་ནི་ལྷག་པའི་སེམས་ཀྱི་མཐོང་བའི་ཆོས་ལ་བདེ་བར་གནས་པ་དང་སྐྱོན་མེད་པ་ཐོབ་པ་བཞི་པ་ཡིན་ཏེ། དཀའ་བ་མེད་པར་ཐོབ་པ་དང་། ཚེགས་མེད་པར་ཐོབ་པ་ཡིན་ནོ། ། ལྷག་པའི་སེམས་ཀྱི་ཆོས་བཞི་པོ་དེ་དག་དང་ལྡན་པ་ནི་ཏིང་ངེ་འཛིན་གྱི་སྒོར་འཇུག་པ་འབུམ་ཕྲག་ བརྒྱད་ཅུ་རྩ་བཞི་མཐོང་ངོ་། ། དེ་ཕྱིར་མི་འོང་བའི་འབྲས་བུ་ལ་གནས་པར་འགྱུར་བ་ནས་དགྲ་བཅོམ་པ་ཉིད་ཀྱི་བར་ལ་གནས་པར་འགྱུར་རོ། ། དགེ་སློང་དེ་གཉི་གའི་ཆ་ལས་རྣམ་པར་གྲོལ་བ་ཡིན་ཞིང་མཐུ་ཆེ་བ་ནུས་པ་ཆེ་བ་ཡིན་ནོ། ། ཀཽ་ཌི་ནྱ་གལ་ཏེ་ཡང་སེམས་ཅན་ ཐམས་ཅད་ཚུལ་གཅིག་ཅིང་དད་པ་གཅིག་ལ་བསམ་པ་གཅིག་པར་འགྱུར་དུ་ནི་འདི་ལྟར་སེམས་ཅན་རྣམས་བསམ་པ་ཐ་དད་པའི་ཕྱིར་ཏེ། དེ་ལྟ་བས་ན་དེ་བཞིན་གཤེགས་པ་ཚིག་ཐ་དད་པའི་ཆོས་ཀྱི་སྒོ་བསྟན་པ་དང་བརྗོད་པ་རྣམས་ཀྱིས་ཆོས་སྟོན་ཏོ། ། བཅོམ་ལྡན་འདས་ཀྱིས་སེམས་ཅན་ འདུ་ཤེས་ཐ་དད་པ་ཕྱིན་ཅི་ལོག་པ་རྣམས་ལ་བཀའ་སྩལ་པ། ཁྱེད་ཀྱི་མི་རྟག་པའི་འདུ་ཤེས་ཀྱང་རུང་།

སྡུག་བསྔལ་གྱི་འདུ་ཤེས་ཀྱང་རུང་། བདག་མེད་པའི་འདུ་ཤེས་ཀྱང་རུང་། རྣམ་པར་བམ་པའི་འདུ་ཤེས་ཀྱང་རུང་། རྣམ་པར་རྣགས་པའི་འདུ་ཤེས་ཀྱང་རུང་། རྣམ་པར་སྔོས་པའི་འདུ་ཤེས་ ཀྱང་རུང་། རྣམ་པར་ཟོས་པའི་འདུ་ཤེས་ཀྱང་རུང་། རྣམ་པར་འཐོར་བའི་འདུ་ཤེས་ཀྱང་རུང་སྟེ། དེ་ཐམས་ཅད་དོན་ནི་འདིར་གསུངས་པ་ཡིན་ནོ། ། ཀུན་ཤེས་ཀཽ་ཌི་ནྱས་གསོལ་པ། བཅོམ་ལྡན་འདས་ཇི་ལྟར་མངོན་པར་མི་དགའ་བའི་འདུ་ཤེས་བསྒོམ་པར་བགྱི་བ་དང་། ཇི་ལྟར་ཟས་ལ་ མི་འཐུན་པའི་འདུ་ཤེས་བསྒོམ་པར་བགྱི་བ་བཤད་པར་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཌི་ནྱ་ཆོག་གོ། ། ཞིང་འདི་ན་བྱང་གྲོལ་གྱི་བདེ་བ་ཐོབ་པར་བྱ་བའི་ཕྱིར་ཆོས་ཀྱི་རྗེས་སུ་འཐུན་པའི་ཆོས་སྒྲུབ་པ་ཡང་གཞན་དུ་ཡིན་ལ། འཇིག་རྟེན་གྱི་ཁམས་དེ་དག་ན་སེམས་ཅན་རྣམས་བྱང་ གྲོལ་གྱི་བདེ་བ་ཐོབ་པར་བྱ་བའི་ཕྱིར་ཆོས་ཀྱི་རྗེས་སུ་འཐུན་པའི་ཆོས་སྒྲུབ་པའི་སེམས་ཅན་གྱི་བསམ་པ་དག་ཀྱང་གཞན་དུ་ཞུགས་པ་ཡིན་ཞིང་སྤྱོད་པ་གཞན་དང་སྦྱོར་བ་གཞན་གྱི་མངོན་པར་རྟོགས་པ་ཡིན་ནོ། ། ཀཽ་ཌི་ནྱ་གལ་ཏེ་ངས་བཤད་ན་ཚུལ་དེ་ལྟ་བུ་དེ་རབ་ཏུ་ཤེས་པར་འགྱུར་བའི་སྐྱོན་མེད་པ་དག་ ལ་ཞུགས་པ་དག་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མ་གཏོགས་པར་སེམས་ཅན་གཞན་གང་དག་ཡོད་པ་དེ་དག་འདི་ལ་ཀུན་ཏུ་རྨོངས་པར་འགྱུར་རོ། ། ཀཽ་ཌི་ནྱས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ ཤེས་དང་ཟས་ལ་མི་འཐུན་པའི་འདུ་ཤེས་བཤད་པར་གསོལ། བཙུན་པ་བདེ་བར་གཤེགས་པ་བཤད་པར་གསོལ། དེ་ཐོས་པས་སེམས་ཅན་རྣམས་དགེ་བའི་རྩ་བ་རྣམ་པ་སྣ་ཚོགས་སྐྱེད་པར་འགྱུར་ལགས་སོ། ། སེམས་ཅན་མ་རིག་པས་བསྒྲིབས་པ་རྣམས་དང་། སྲེད་པའི་ཀུན་ ཏུ་སྦྱོར་བ་ཅན་རྣམས་དང་། སྲེད་པའི་ལྟུང་བ་ཐོགས་པ་རྣམས་དང་། འཁོར་བར་ཀུན་ཏུ་རྒྱུག་ཅིང་འཁོར་བ་རྣམས་ཀྱི་སྔོན་གྱི་མཐའ་མི་མངོན་ལགས་ཏེ། དེར་དེ་དག་མངོན་པར་དགའ་ལགས་སོ། ། དེ་ཅིའི་སླད་དུ་ཞེ་ན། ཟས་ཀྱི་ཀུན་ཏུ་སྦྱོར་བའི་རྒྱུ་དང་འཁྲིག་པ་དང་ལྡན་པའི་ཀུན་ཏུ་སྦྱོར་ བའི་སླད་དུ་སྟེ། ཆོས་ཀྱི་ཚུལ་དེ་ལྟ་བུ་དེ་མ་ཐོས་པས་འགྲོ་བ་ལྔའི་འཁོར་བར་བྱིང་ཞིང་རྟག་ཏུ་སྡུག་བསྔལ་གྱིས་ཉེན་པར་གནས་ལགས་སོ། ། བཅོམ་ལྡན་འདས་ནི་སེམས་ཅན་ཐམས་ཅད་ལ་བདེ་བར་བཞེད་པ། སེམས་ཅན་ཐམས་ཅད་ལ་ཐུགས་བརྩེ་བ་ཐུགས་རྗེ་ཆེན་པོ་བརྙེས་པ་ལགས་ན།

བཙུན་པ་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོ་དེས་གང་སྐྱེ་བོ་མང་པོ་ལ་སྨན་པ་དང་། ལྷ་དང་མི་རྣམས་ཀྱི་བར་ལ་སྨན་པའི་སླད་དུ་བསྐུར་བ་སྨོན་པ་མ་མཆིས་པ་དང་རྗེས་སུ་འཐུན་པའི་གཟུངས་སྔགས་ཀྱི་དོན་ཐམས་ཅད་ཡོངས་སུ་རྫོགས་པར་བཤད་པར་གསོལ། བཙུན་པ་བཅོམ་ལྡན་འདས་འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་བཤད་པར་གསོལ། སེམས་ཅན་རྣམས་ཀྱིས་དེ་ཐོས་པས་འདོད་པ་རྣམས་ལས་ལྡོག་པར་འགྱུར་ལགས་སོ། ། བཙུན་པ་བཅོམ་ལྡན་འདས་ཟས་ལ་མི་འཐུན་པའི་འདུ་ཤེས་བཤད་པར་གསོལ། དེ་ཐོས་པས་ སེམས་ཅན་གང་དག་རོ་ལ་ཆུམས་པ་རྣམས་ལྡོག་པར་འགྱུར་ལགས་སོ། ། སེམས་ཅན་གང་དག་གིས་འདོད་པ་རྣམས་ལ་ཉེས་དམིགས་སུ་འཚལ་བ་དང་། རོ་རྣམས་ལ་ཉེས་དམིགས་སུ་འཚལ་བའི་སེམས་ཅན་དེ་དག་འཁོར་བའི་ཕ་རོལ་ཏུ་དགའ་བ་དག་པ་དང་། སྲིད་པའི་འཆིང་བ་ལས་གྲོལ་ བར་བལྟ་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཌི་ནྱ་དེ་དེ་བཞིན་ནོ། ། ཇི་སྐད་ཁྱོད་ཀྱིས་སྨྲས་པ་དེ་བཞིན་ཏེ།

ཇི་ལྟར་བྱང་ཆུབ་སེམས་དཔའ་སྣང་བ་དཔལ་གྱི་སྙིང་པོས་ང་ལ་ཡིད་ལ་བྱེད་པ་བརྗོད་པ་བཞིན་ལྷ་དང་བཅས་པའི་འཇིག་རྟེན་གྱི་མདུན་དུ་འཇིག་རྟེན་ཐམས་ཅད་ལ་ མངོན་པར་མི་དགའ་བའི་འདུ་ཤེས་ངས་བཤད་པར་བྱའོ། ། ཟས་ལ་མི་འཐུན་པའི་འདུ་ཤེས་ཀྱང་ངས་བཤད་པར་བྱའོ། ། ཀཽ་ཌི་ནྱ་དེའི་ཕྱིར་ཁྱོད་ཀྱིས་ཉོན་ལ་ཞེས་བྱ་བ་ནས་བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ་ཞེས་བྱ་བའི་བར་དུའོ། ། ཀཽ་ཌི་ནྱ་གང་དུ་མངོན་པར་ མི་དགའ་བ་དེ་བསྐྱེད་པར་བྱ་བའི་འཇིག་རྟེན་གང་ཞེ་ན། འཇིག་རྟེན་ནི་གཉིས་ཏེ། སེམས་ཅན་གྱི་འཇིག་རྟེན་དང་། འདུ་བྱེད་ཀྱི་འཇིག་རྟེན་ནོ། ། དེ་ལ་སེམས་ཅན་གྱི་འཇིག་རྟེན་གང་ཞེ་ན། སེམས་ཅན་རྣམས་ཞེས་བྱ་བ་ནི་གང་དག་འགྲོ་བ་ལྔ་པོ་སེམས་ཅན་དམྱལ་བ་དང་། དུད་འགྲོ་དང་། {ཡི་དགས་,ཡི་དྭགས་}དང་། ལྷ་དང་། མི་རྣམས་ཀྱི་ནང་དུ་སྐྱེས་པ་རྣམས་སོ། ། འདོད་པའི་ཁམས་ན་ནི་སྲིད་པ་མངོན་པར་གྲུབ་པ་ཉི་ཤུའོ། ། གཟུགས་ཀྱི་ཁམས་ན་ནི་བཅུ་དྲུག་གོ། ། གཟུགས་མེད་པའི་ཁམས་ན་ནི་སྲིད་པ་མངོན་པར་གྲུབ་པ་བཞི་སྟེ། སེམས་ཅན་གྱི་འཇིག་རྟེན་ནི་དེ་ཙམ་མོ། །

དེ་ལ་འདོད་པའི་ཁམས་ཀྱི་སྲིད་པ་མངོན་པར་ གྲུབ་པ་ཉི་ཤུ་གང་ཞེ་ན། སེམས་ཅན་དམྱལ་བ་ཆེན་པོ་བརྒྱད་དེ་རེ་རེ་ལ་ཡང་འཁོར་བཅུ་དྲུག་གོ། ། བརྒྱད་གང་ཞེ་ན། དུས་གསུམ་པའི་ཡང་སོས་ཞེས་བྱ་བ་འཁོར་བཅུ་དྲུག་པ་དང་། ཐིག་ནག་དང་། བསྡུས་གཞོམ་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། སེམས་ཅན་ དམྱལ་བ་མནར་མེད་པ་ཞེས་བྱ་བ་འཁོར་བཅུ་དྲུག་པའོ། ། སེམས་ཅན་གང་དག་ལུས་དང་། ངག་དང་། ཡིད་ཀྱིས་ཉེས་པར་སྤྱད་པའི་རྒྱུས་དེ་དག་ཏུ་སྐྱེས་ཤིང་སྐྱེ་བར་འགྱུར་བ་དེ་དག་དེར་སྡུག་བསྔལ་གྱི་ཚོར་བ་རྩུབ་པ་མི་བཟད་པ་ཚ་བ་ཆེན་པོ་མྱོང་བར་འགྱུར་རོ། ། དེ་དག་གིས་དེར་མིག་གིས་ གཟུགས་གང་ཅི་མཐོང་ཡང་རུང་། ཐམས་ཅད་ཡིད་དུ་མི་འོང་བར་མཐོང་གི་ཡིད་དུ་འོང་བར་མ་ཡིན། ཡིད་དུ་མི་འཐད་པར་མཐོང་གི་ཡིད་དུ་འཐད་པར་མ་ཡིན། གཟུགས་མི་སྡུག་པར་མཐོང་གི་གཟུགས་སྡུག་པར་མ་ཡིན། གཟུགས་མི་ལེགས་པར་མཐོང་གི་གཟུགས་ལེགས་པར་མི་མཐོང་སྟེ། དེ་ ལྟ་བས་ན་གཞི་དེས་དེ་དག་དེར་སྡུག་བསྔལ་གྱི་ཚོར་བ་རྩུབ་པ་མི་བཟད་པ་ཚ་བ་ཆེན་པོ་མྱོང་བར་འགྱུར་རོ། །

དེ་དག་གིས་དེར་རྣ་བས་སྒྲ་གང་ཅི་ཐོས་ཀྱང་རུང་ཞེས་བྱ་བ་ནས་སྣས་དྲི་གང་ཅི་མནམས་ཀྱང་རུང་ཞེས་བྱ་བ་དང་། ལྕེས་རོ་གང་ཅི་མྱངས་ཀྱང་རུང་ཞེས་བྱ་བ་དང་། ལུས་ཀྱིས་རེག་བྱ་གང་ཅི་རེག་ཀྱང་རུང་ ཞེས་བྱ་བ་དང་། ཡིད་ཀྱིས་ཆོས་རྣམས་གང་ཅི་རྣམ་པར་ཤེས་ཀྱང་རུང་ཞེས་བྱ་བའི་བར་ཐམས་ཅད་ཡིད་དུ་མི་འོང་བར་ཡིན་གྱི་ཡིད་དུ་འོང་བར་མ་ཡིན། ཡིད་དུ་མི་འཐད་པར་ཡིན་གྱི་ཡིད་དུ་འཐད་པར་མ་ཡིན། གཟུགས་མི་སྡུག་པར་ཡིན་གྱི་གཟུགས་སྡུག་པར་མ་ཡིན། གཟུགས་མི་ ལེགས་པར་ཡིན་གྱི་གཟུགས་ལེགས་པར་མ་ཡིན་ནོ། ། ལུས་རབ་ཏུ་འབར་བ་དང་། ལྕགས་ཀྱི་ཐུ་ལུམ་ཟ་བ་དང་། ལྕགས་དང་ཟངས་འཐུང་བ་དག་ཡིན་ཏེ། གཞི་དེས་དེ་དག་དེར་སྡུག་བསྔལ་གྱི་ཚོར་བ་རྩུབ་པ་མི་བཟད་པ་ཚ་བ་ཆེན་པོ་མྱོང་བར་འགྱུར་རོ། ། ཇི་སྲིད་དུ་གང་འདིར་སྔོན་ཆད་ མི་རྣམས་ཀྱི་ནང་དུ་མིར་གྱུར་པ་དང་། འཐུན་པའི་ལུས་ཀྱིས་ཉེས་པར་སྤྱོད་པ་སྤྱད་པ་དང་། ངག་དང་། ཡིད་ཀྱིས་ཉེས་པར་སྤྱོད་པ་སྤྱད་པ་དེ་དག་གི་སྡིག་པའི་ལས་དེ་ཟད་པར་མ་གྱུར་ཅིང་སྦྱངས་པར་མ་གྱུར་པ་དེ་སྲིད་དུ་དེ་དག་དེ་ནས་ཤི་འཕོ་བར་མི་འགྱུར་རོ། །

ཀཽ་ཌི་ནྱ་ལྟོས་སེམས་ཅན་ བདེ་བ་འདོད་པར་གྱུར་ལ་སྡུག་བསྔལ་དང་མི་འཐུན་པར་བྱེད་པ་སུ་ཞིག་སེམས་ཅན་དམྱལ་བ་དེ་ལ་དགའ་བར་སེམས་ཤིང་འདོད་པ་སྐྱེད་པར་བྱེད། འདི་ནི་ཉེས་པར་སྤྱད་པ་སྤྱོད་པའི་འགྲོ་བ་དང་པོ་སྟེ། དེ་ལ་མཁས་པས་མངོན་པར་མི་དགའ་བའི་འདུ་ཤེས་བསྐྱེད་པར་བྱའོ། ། ཀཽ་ཌི་ནྱ་དེ་ལ་ མཁས་པས་ཇི་ལྟར་དུད་འགྲོའི་སྐྱེ་གནས་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞེ་ན། ཀཽ་ཌི་ནྱ་དུད་འགྲོ་རྣམས་ཀྱི་ལུས་འདི་ལྟར་མཆོག་ཏུ་ཕྲ་མོ་ཐོབ་པ་དག་ཡོད་དེ། འདི་ལྟ་སྟེ། སྐྲའི་རྩེ་མོའི་མཐའ་ལྔ་བཅུའི་ཆར་ཕྱེ་བ་ཙམ་མོ། ། ཁ་ཅིག་ནི་ཉི་ཟེར་གྱི་རྡུལ་ཙམ་མོ་ཞེས་བྱ་བ་ནས་ ཁ་ཅིག་ནི་རྒྱ་ཤུག་གི་ཚད་དོ་ཞེས་བྱ་བའི་བར་དུའོ། ། ཁ་ཅིག་ནི་ལུས་དཔག་ཚད་ཁྲིའི་བར་དུ་ཐོབ་པ་དང་ཐོབ་པར་འགྱུར་བ་དག་གོ། ། ཁ་ཅིག་གི་སྲོག་ནི་ཡུད་ཙམ་ཅིག་ཐུབ་བོ་ཞེས་བྱ་བ་ནས་ཁ་ཅིག་གི་ཚེ་བསྐལ་པ་གཅིག་ཐུབ་བོ་ཞེས་བྱ་བའི་བར་དུའོ། ། དེར་དེ་དག་ལ་ཆོས་བྱེད་པ་མེད་དོ། ། དགེ་བ་བྱེད་ པ་མེད་དོ། ། དེར་དེ་དག་ངོ་ཚ་ཤེས་པ་དང་། ཁྲེལ་ཡོད་པ་སྤངས་པ་དག་དང་། སྙིང་རྗེ་མེད་པར་ཞུགས་པ་དག་དང་། སྙིང་བརྩེ་བ་མེད་པ་དག་དང་།

རྟག་པར་སྡུག་བསྔལ་གྱིས་གཟིར་བ་དག་དང་། རྟག་ཏུ་སྐྲག་པ་དག་དང་། གཅིག་ལ་གཅིག་ཟ་བ་དག་དང་། མི་དགེ་བའི་ལས་ཀྱི་ལམ་ཐམས་ ཅད་དང་ཡང་དག་པར་ལྡན་པ་དག་དང་། གཏི་མུག་གི་མུན་ཁྲོད་དུ་ཞུགས་པར་གྱུར་པས་ངན་འགྲོར་འགྲོ་བ་དག་དང་བདེ་འགྲོར་འགྲོ་བ་དག་ཀྱང་སྤྱོད་ཡུལ་མ་ཡིན་པ་ལ་དགེ་བའི་ལས་བྱེད་པར་སེམས་ཕྱིན་ཅི་ལོག་ཏུ་གྱུར་པ་དག་ཡིན་ནོ། ། མཁས་པ་སུ་ཞིག་ དེ་ལྟ་བུའི་གཏི་མུག་གི་མུན་ཁྲོད་དུ་རྟག་པར་སྡུག་བསྔལ་གྱིས་གཟིར་བའི་དུད་འགྲོའི་སྐྱེ་གནས་དེ་ལ་དགའ་བར་སེམས་ཤིང་འདོད་པ་སྐྱེད་པར་བྱེད། འདི་ནི་ཉེས་པར་སྤྱད་པ་སྤྱོད་པའི་འགྲོ་བ་གཉིས་པ་སྟེ། དེ་ལ་མཁས་པས་མངོན་པར་མི་དགའ་བའི་འདུ་ཤེས་བསྐྱེད་པར་བྱའོ། ། ཀཽ་ཌི་ནྱ་ དེ་ལ་མཁས་པས་ཇི་ལྟར་{ཡི་དགས་,ཡི་དྭགས་}ཀྱི་འགྲོ་བའི་སྐྱེ་གནས་ལ་ཡང་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞེ་ན། ཀཽ་ཌི་ནྱ་གང་དག་གི་ལུས་མཐོ་གང་ཙམ་ཡོད་པའི་{ཡི་དགས་,ཡི་དྭགས་}དག་ཡོད་དེ། ཁ་ཅིག་ནི་མི་གང་ཙམ་མོ། ། ཁ་ཅིག་ནི་དཔག་ཚད་སྟོང་ཡོད་པའི་བར་གྱི་ལུས་ཐོབ་ལ་དེ་ དག་ཀྱང་གཅེར་བུ་དང་། རྩུབ་པ་དག་དང་། ནག་པོ་དག་དང་།

ལུས་མཆོག་ཏུ་སྐེམ་ཞིང་ཤ་ཁྲག་དང་བྲལ་བ་དག་དང་། རྟག་པར་བཀྲེས་ཤིང་སྐོམ་པས་གཟིར་བ་དག་དང་། བཟའ་བཏུང་དང་བྲལ་བ་དག་དང་། མེའི་དབུགས་རྔུབ་པ་དང་དབུགས་འབྱུང་བ་དག་དང་། གཅིག་ལ་ གཅིག་རབ་ཏུ་སྡང་བའི་སེམས་དང་ལྡན་པ་དག་དང་། སྙིང་རྗེ་མེད་པར་ཞུགས་པ་དག་དང་། རྟག་པར་ལུས་དུབ་པ་དང་། སྤྲིན་བསིལ་བ་དང་བྲལ་བ་དག་ཡིན་ནོ། ། ཁ་ཅིག་གི་ཟས་ནི་ལྕགས་དང་ཟངས་ཡིན་ནོ། ། ཁ་ཅིག་གི་ནི་ལྕགས་ཀྱི་ཐུ་ལུམ་རྣམས་སོ། ། ཁ་ཅིག་གི་ནི་རྣག་ ཁྲག་ཚ་བའོ། ། ཁ་ཅིག་གི་ནི་རྡུལ་ཀུན་ཏུ་ཚ་བའོ། ། ཁ་ཅིག་གི་ནི་ཕྱི་ས་ཀུན་ཏུ་ཚ་བའོ། ། ཁ་ཅིག་གི་ནི་གཅིན་བསྐོལ་བའོ། ། ཁ་ཅིག་གི་ནི་རླུང་ཀུན་ཏུ་ཚ་བའོ། ། ཁ་ཅིག་ནི་རྩ་བ་དང་། འདབ་མ་དང་། མེ་ཏོག་དང་། འབྲས་བུ་དང་། ཤིང་ལས་བྱས་པའི་ཁ་ཟས་རབ་ཏུ་འབར་བའོ། ། དེ་ཡང་དཀའ་བས་རེས་འགའ་ནན་གྱིས་རྙེད་པར་འགྱུར་རོ། ། {ཡི་དགས་,ཡི་དྭགས་}ཁ་ཅིག་གི་ཚེའི་ཚད་ནི་ལོ་སྟོང་ཐུབ་བོ། ། ཁ་ཅིག་གི་ཚེའི་ཚད་ནི་ལོ་སྟོང་ཕྲག་བརྒྱའི་བར་དུ་ཐུབ་སྟེ། རྟག་པར་བདེ་བ་དང་བྲལ་བ་དག་དང་། སྡུག་བསྔལ་གྱིས་གཟིར་བ་དག་དང་།

མ་རིག་པའི་མུན་པར་ཞུགས་ པ་དག་ཡིན་ན་མཁས་པ་སུ་ཞིག་{ཡི་དགས་,ཡི་དྭགས་}རྣམས་ལ་དགའ་བ་སྐྱེད་པར་བྱེད། འདི་ནི་ཉེས་པར་སྤྱད་པ་སྤྱོད་པའི་འགྲོ་བ་གསུམ་པ་སྟེ། དེ་ལ་མཁས་པས་མངོན་པར་མི་དགའ་བའི་འདུ་ཤེས་བསྐྱེད་པར་བྱའོ། ། ཀཽ་ཌི་ནྱ་དེ་ལ་མཁས་པས་ཇི་ལྟར་མིའི་འཇིག་རྟེན་འདི་ལ་མངོན་པར་ མི་དགའ་བའི་འདུ་ཤེས་བསྐྱེད་པར་བྱ་ཞེ་ན། མིའི་འཇིག་རྟེན་འདི་ནི་སེམས་ཅན་རྣམས་སྡུག་བསྔལ་གྱིས་གཟིར་བ་དག་ཡིན་ཏེ། རྒ་བའི་སྡུག་བསྔལ་དང་། ན་བའི་སྡུག་བསྔལ་དང་། འཆི་བའི་སྡུག་བསྔལ་དང་། མི་སྡུག་པ་དང་ཕྲད་པའི་སྡུག་བསྔལ་དང་། སྡུག་པ་དང་བྲལ་བའི་ སྡུག་བསྔལ་དང་། རྣམ་པ་སྣ་ཚོགས་ཡོངས་སུ་ཚོལ་བའི་སྡུག་བསྔལ་དང་། འཁྲུག་པ་དང་། ཁྲོ་བ་དང་། ཕྲག་དོག་དང་། སེར་སྣ་དང་། ཕྲ་མ་སྨྲ་བ་དང་། ཚིག་རྩུབ་པོ་སྨྲ་བ་དང་། བརྣབ་སེམས་དང་། གྲང་བ་དང་། དྲོ་བ་དང་། གཅིག་ལ་གཅིག་ཀུན་ཏུ་གནོད་པར་བྱེད་པའི་སྡུག་ བསྔལ་གྱིས་གཟིར་བ་དག་ཡིན། དུས་རྟག་ཏུ་མིའི་འཇིག་རྟེན་འདི་ན་སེམས་ཅན་རྣམས་འཆི་བ་རྗེས་སུ་དྲན་པས་སྡུག་བསྔལ་བ་དང་། ཚེ་ཐུང་བ་ཉིད་ཀྱི་སྡུག་བསྔལ་དང་།

འཇིག་རྟེན་ཕ་རོལ་དུ་འགྲོ་བ་རྗེས་སུ་དྲན་པའི་སྡུག་བསྔལ་གྱིས་གཟིར་བ་དག་ཡིན་ན་མཁས་པ་སུ་ཞིག་མིའི་ འཇིག་རྟེན་ལ་འདོད་པ་སྐྱེད་པར་བྱེད་ཅིང་དགའ་བར་སེམས། འདི་ནི་སྤེལ་མའི་འགྲོ་བ་བཞི་པ་སྟེ། དེ་ལ་མཁས་པས་མངོན་པར་མི་དགའ་བའི་འདུ་ཤེས་བསྐྱེད་པར་བྱའོ། ། ཀཽ་ཌི་ནྱ་དེ་ལ་མཁས་པས་ཇི་ལྟར་ལྷའི་འཇིག་རྟེན་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞེ་ན། འདོད་པ་ ན་སྤྱོད་པའི་ལྷ་དྲུག་པོ་དེ་དག་ན་ཡང་སེམས་ཅན་རྣམས་འདོད་པ་ལ་སྲེད་པའི་སྡུག་བསྔལ་རྣམས་ཀྱིས་གཟིར་བདག་ཡིན། འགེད་པ་དང་། ལོངས་སྤྱོད་དང་། ཉེ་བར་སྤྱོད་པའི་སྡུག་བསྔལ་རྣམས་ཀྱིས་གཟིར་བ་དག་ཡིན། སྔོན་ཆད་དགེ་བའི་རྩ་བ་བསགས་པ་མཐར་གྱིས་ཡོངས་སུ་ཟད་ པའི་སྡུག་བསྔལ་རྣམས་ཀྱིས་གཟིར་བ་དག་ཡིན། ཡོངས་སུ་ཚོལ་བའི་སྡུག་བསྔལ་རྣམས་ཀྱིས་གཟིར་བ་དག་ཡིན། སྡུག་པ་དང་བྲལ་བའི་སྡུག་བསྔལ་རྣམས་ཀྱིས་གཟིར་བ་དག་ཡིན། བསོད་ནམས་ཡོངས་སུ་ཟད་པས་འཆི་འཕོ་བའི་སྡུག་བསྔལ་རྣམས་ཀྱིས་གཟིར་བ་དག་ཡིན། ཡང་དང་ཡང་དུ་ངན་སོང་གི་སྡུག་བསྔལ་རྣམས་ཀྱིས་གཟིར་བ་དག་ཡིན་ཏེ།

འདི་ནི་འདོད་པ་ན་སྤྱོད་པའི་ལྷ་རྣམས་ལ་མངོན་པར་མི་དགའ་བའི་འདུ་ཤེས་ལྔ་པ་ཡིན་ནོ། ། འདི་ནི་རྣམ་པ་ལྔ་པ་ཡིན་ཏེ། མཁས་པས་འདོད་པའི་ཁམས་འདི་ཐམས་ཅད་ལ་མངོན་པར་མི་ དགའ་བའི་འདུ་ཤེས་བསྐྱེད་པར་བྱའོ། ། ཀཽ་ཌི་ནྱ་དེ་ལ་མཁས་པས་ཇི་ལྟར་གཟུགས་ན་སྤྱོད་པའི་ལྷ་རྣམས་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞེ་ན། སེམས་ཅན་གང་དག་གཟུགས་ན་སྤྱོད་པ་བཅུ་དྲུག་ཡོད་པ་དེ་དག་ཀྱང་ལྷའི་རིས་རྣམས་ཀྱི་ནང་ན་འཇིག་རྟེན་པའི་བསམ་ གཏན་དག་སྒོམ་པར་བྱེད་དེ། དེ་དག་ཐམས་ཅད་ཟག་པ་དང་བཅས་པའི་སྡུག་བསྔལ་རྣམས་ཀྱིས་ཡོངས་སུ་མ་གྲོལ་བ་ཡིན། སྡུག་བསྔལ་མང་པོས་གཟིར་བ་ཡིན། ལྷག་མ་དང་བཅས་པའི་འགྲོ་བ་ཉིད་ཀྱི་སྡུག་བསྔལ་རྣམས་ཀྱིས་གཟིར་བ་ཡིན། ཕ་རོལ་ལ་མི་ལྟ་བ་རྣམས་ཡིན། ངེས་པར་འབྱུང་བར་མི་ལྟ་བ་རྣམས་ཡིན། ངན་སོང་གི་སྡུག་བསྔལ་རྣམས་ལས་ཡོངས་སུ་མ་གྲོལ་བ་ཡིན་ཏེ། སྡུག་བསྔལ་དེ་དག་གིས་གཟིར་བ་ཡིན་ན་མཁས་པ་སུ་ཞིག་དེ་དག་ལ་དགའ་བར་སེམས་ཤིང་འདོད་པ་སྐྱེད་པར་བྱེད། མཁས་པས་དེ་ལྟར་གཟུགས་ཀྱི་ཁམས་དེ་ལ་མངོན་ པར་མི་དགའ་བའི་འདུ་ཤེས་བསྐྱེད་པར་བྱའོ། །

གཞན་ཡང་གཟུགས་ཀྱི་ཁམས་དེ་ན་སེམས་ཅན་གང་དག་ཟག་པ་མེད་པའི་བསམ་གཏན་དང་ཡང་དག་པར་ལྡན་ཞིང་ཡོངས་སུ་གྲོལ་བ་མ་ཡིན་པར་གནས་པ་འཕགས་པའི་ལམ་གྱི་ཚེ་སྡུག་བསྔལ་རྣམས་ཀྱིས་གཟིར་བ་ཡིན་ཞིང་། དེ་ཡོངས་ སུ་རྫོགས་པ་ཀུན་ཏུ་ཚོལ་བའི་སྡུག་བསྔལ་རྣམས་ཀྱིས་གཟིར་བ་ཡིན། ས་མ་ལུས་པ་ཐམས་ཅད་ཀྱི་ཏིང་ངེ་འཛིན་ལ་དབང་མི་བྱེད་པའི་སྡུག་བསྔལ་རྣམས་ཀྱིས་གཟིར་བ་དག་ཡིན་ཏེ། དེ་དག་རང་རྒྱལ་བ་དང་ཐུན་མོང་བའི་ཏིང་ངེ་འཛིན་ལ་དབང་སྒྱུར་བ་མེད་པ་ཉིད་ཀྱི་སྡུག་བསྔལ་ རྣམས་ཀྱིས་གཟིར་བ་ཡིན་ནོ། ། དེ་དག་དེ་བཞིན་གཤེགས་པའི་སྤྱོད་ཡུལ་ལ་དབང་སྒྱུར་བ་མེད་པ་ཉིད་ཀྱི་སྡུག་བསྔལ་རྣམས་ཀྱིས་གཟིར་བ་ཡིན་ནོ། ། དེ་ན་གང་དག་མགོ་མཉམ་དུ་ཡོངས་སུ་མྱ་ངན་ལས་འདས་པར་བྱེད་པ་དེ་དག་ཐམས་ཅད་སྡུག་བསྔལ་དེ་རྣམས་ཀྱིས་གཟིར་བ་ཡིན་ ནོ། ། མཁས་པས་དེ་ལྟར་གཟུགས་ཀྱི་ཁམས་དེ་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱའོ། ། ཀཽ་ཌི་ནྱ་དེ་ལ་མཁས་པས་ཇི་ལྟར་གཟུགས་མེད་པའི་ཁམས་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞེ་ན།

གཟུགས་མེད་པའི་རིས་ཀྱི་ལྷའི་གནས་བཞི་པོ་དེ་དག་ན་ཡང་ སེམས་ཅན་རྣམས་ཟག་པ་དང་བཅས་པའི་ཏིང་ངེ་འཛིན་རྣམས་དང་ལྡན་པ་ཡིན་ཏེ། དེ་དག་ཐམས་ཅད་ཟག་པ་དང་བཅས་པའི་སྡུག་བསྔལ་རྣམས་ལས་ཡོངས་སུ་མ་གྲོལ་བ་དག་ཡིན། སྡུག་བསྔལ་དེ་རྣམས་ཀྱིས་གཟིར་བ་དག་ཡིན། དེ་དག་སློབ་པ་དང་མི་སློབ་པའི་ས་ཐམས་ཅད་ ལ་དབང་སྒྱུར་བ་མེད་པ་དག་ཡིན། སྡུག་བསྔལ་དེ་རྣམས་ཀྱིས་གཟིར་བ་དག་ཡིན། ཆོས་མི་ཐོས་པའི་སྡུག་བསྔལ་རྣམས་ཀྱིས་གཟིར་བ་དག་ཡིན། སྲེད་པ་ཐམས་ཅད་གཏན་དུ་བཅད་པ་ལ་དབང་སྒྱུར་བ་མེད་པ་ཉིད་ཀྱི་སྡུག་བསྔལ་རྣམས་ཀྱིས་གཟིར་བ་དག་ཡིན། དེ་ནས་འཆི་འཕོ་ བའི་ཆོས་ཀྱི་རྣམ་པ་དང་། ལྷག་མ་དང་བཅས་པར་འགྲོ་བ་ཉིད་ཀྱི་སྡུག་བསྔལ་རྣམས་ཀྱིས་གཟིར་བ་དག་ཡིན། ངན་སོང་ཐམས་ཅད་ཀྱི་སྡུག་བསྔལ་རྣམས་ལས་ཡོངས་སུ་མ་གྲོལ་བ་དག་ཡིན་ནོ། ། སྡུག་བསྔལ་དེ་རྣམས་ཀྱིས་གཟིར་བ་དག་ཡིན་ཏེ། མཁས་པས་དེ་ལྟར་གཟུགས་ མེད་པའི་ཁམས་དེ་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱའོ། ། རྣམ་པ་བརྒྱད་པོ་དེ་དག་གིས་སྲིད་པ་གསུམ་གྱི་བཙོན་ར་ཐམས་ཅད་དུ་སྲིད་པ་མངོན་པར་གྲུབ་པ་ཡིན་ནོ། །

མཁས་པས་དེ་ལྟ་བུ་དང་ཡང་དག་པར་ལྡན་པའི་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞིང་འདུན་པ་ དྲག་པོས་འཕགས་པའི་ལམ་ཡན་ལག་བརྒྱད་པ་བསྒོམ་པར་བྱ་སྟེ། ཀཽ་ཌི་ནྱ་འདི་ནི་འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་སོ། ། འདུ་བྱེད་ཀྱི་འཇིག་རྟེན་ལ་མངོན་པར་མི་དགའ་བའི་འདུ་ཤེས་གང་ཞེ་ན། འདུ་བྱེད་གསུམ་ཞེས་བྱ་སྟེ། འདི་ལྟ་སྟེ། ལུས་ཀྱི་འདུ་བྱེད་དང་། ངག་གི་ འདུ་བྱེད་དང་། ཡིད་ཀྱི་འདུ་བྱེད་དོ། ། དེ་ལ་ལུས་ཀྱི་འདུ་བྱེད་གང་ཞེ་ན། དབུགས་རྔུབ་པ་དང་། དབུགས་འབྱུང་བ་རྣམས་ནི་ལུས་ཀྱི་འདུ་བྱེད་རྣམས་ཞེས་བྱའོ། ། དེ་ལ་ངག་གི་འདུ་བྱེད་གང་ཞེ་ན། རྟོག་པ་དང་། དཔྱོད་པ་རྣམས་ནི་ངག་གི་འདུ་བྱེད་རྣམས་ཞེས་བྱའོ། ། དེ་ལ་ཡིད་ཀྱི་འདུ་བྱེད་རྣམས་གང་ ཞེ་ན། རྣམ་པར་ཤེས་པ་དང་སེམས་པའོ། ། འདི་དག་ནི་ཡིད་ཀྱི་འདུ་བྱེད་རྣམས་ཞེས་བྱའོ། ། འདུ་བྱེད་གསུམ་པོ་འདི་དག་ནི་སེམས་ཅན་རྣམས་ཀྱི་མཚན་ཉིད་མཉམ་པ་རྣམས་སོ། ། མཁས་པས་ཇི་ལྟར་འདུ་བྱེད་རྣམས་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞེ་ན། མཁས་ པས་གང་དབུགས་རྔུབ་པ་དང་།

དབུགས་འབྱུང་བ་རྣམས་ཀྱི་མཚན་མ་ལ་གསར་པ་དང་རྙིང་པའི་ཚུལ་དང་། བསིལ་བའི་རྣམ་པ་དང་། དྲོ་བའི་རྣམ་པ་དང་མི་འཐུན་པའི་ཚུལ་གྱིས་ཉེ་བར་རྟོག་པར་བྱའོ། ། ལུས་འབྱུང་བ་ཐམས་ཅད་ཀྱི་དབུགས་རྔུབ་པ་དང་། ལུས་ཐམས་ཅད་ཀྱི་དབུགས་འབྱུང་ བ་དང་། རྨའི་སྒོ་རྣམས་ཀྱི་མཚན་མ་ལ་ཡང་ཉེ་བར་བརྟགས་ནས་འདུ་བྱེད་འདི་རྣམས་ནི་མ་བྱུང་བ་ལས་ཡང་དག་པར་བྱུང་བ་དག་གོ། ། བྱུང་ནས་མེད་པར་གྱུར་པ་དག་གོ། ། ཐམས་ཅད་གློག་ལྟ་བུ་དག་གོ་སྙམ་ཞིང་ཐམས་ཅད་དུ་ཟད་པར་འདུ་ཤེས་པར་ཡིད་ལ་བྱེད་ཅིང་དངོས་པོ་མེད་པར་འདུ་ཤེས་ པར་ཡིད་ལ་བྱེད་དོ། ། གང་དུ་ཐ་དད་པར་རྟོག་པར་བྱེད་ན་རྣམ་པར་རྟོག་པ་ཐམས་ཅད་འབྱུང་སྟེ། རྟོག་པ་རྣམས་ལ་ཟད་པའི་འདུ་ཤེས་དང་དངོས་པོ་མེད་པའི་འདུ་ཤེས་འབྱུང་ངོ་། ། ཆོས་དེ་ཉིད་ལ་གང་བསིལ་བའི་འདུ་ཤེས་དང་། དྲོ་བའི་འདུ་ཤེས་དང་། མི་འཐུན་པའི་འདུ་ཤེས་དང་། དེ་བཞིན་དུ་ སར་པ་དང་རྙིང་པའི་འདུ་ཤེས་ཀྱང་རུང་འདུ་ཤེས་དང་སེམས་པ་དེ་དག་ལས་འབྱུང་སྟེ། ཐམས་ཅད་དུ་ཟད་པར་འདུ་ཤེས་པ་དང་དངོས་པོར་འདུ་ཤེས་པར་འགྱུར་རོ། ། དེ་འདུ་བྱེད་ཐམས་ཅད་ལ་ཟད་པར་འདུ་ཤེས་པ་དང་། འཇིག་པར་འདུ་ཤེས་པ་དང་།

འདོད་ཆགས་དང་བྲལ་བར་འདུ་ཤེས་པ་ དང་། འགོག་པ་ལ་དམིགས་པར་འདུ་ཤེས་པར་འགྱུར་རོ། ། དེ་འདུ་བྱེད་ཐམས་ཅད་ཀྱི་སྔོན་གྱི་མཐའ་དང་ཕྱི་མའི་མཐའ་མཐོང་བས་ཐམས་ཅད་དུ་ཟད་པར་འདུ་ཤེས་པ་ཞེས་བྱ་བ་ནས་འགོག་པ་ལ་དམིགས་པར་འདུ་ཤེས་པའི་བར་དུ་འགྱུར་རོ། ། སུས་དེ་ལྟར་འདུ་བྱེད་རྣམས་ལ་དམིགས་ པ་ཤིན་ཏུ་ཡོངས་སུ་སྦྱང་བ་བྱས་པར་གྱུར་པ་དེ་འདུ་བྱེད་ཐམས་ཅད་ལ་མི་བརྟན་པར་འདུ་ཤེས་པ་དང་། རབ་ཏུ་འཇིག་པར་འདུ་ཤེས་པ་དང་། ཡིད་མི་བརྟན་པར་འདུ་ཤེས་པ་དང་། མི་རྟག་པར་འདུ་ཤེས་པ་དང་། དངོས་པོ་མེད་པར་འདུ་ཤེས་པ་དང་། བདག་མེད་པར་འདུ་ཤེས་པར་འགྱུར་རོ། ། དེ་ལྟ་བུར་ ཡང་དག་པར་བརྩོན་པའི་སེམས་དང་ལྡན་པ་དེ་ཡང་དག་པ་ཇི་ལྟ་བ་བཞིན་ཤེས་ནས་འདུ་བྱེད་ཐམས་ཅད་ལ་མངོན་པར་མི་དགའ་བར་འདུ་ཤེས་པར་འགྱུར་རོ། ། དེ་བཞིན་དུ་ཡང་སོ་སོར་བརྟགས་པའི་འགོག་པ་ལ་དམིགས་པའམ་སོ་སོར་བརྟགས་པ་མ་ཡིན་པའི་འགོག་པ་ལ་དམིགས་པས་ དུས་གསུམ་ལ་རྗེས་སུ་སེམས་པར་བྱེད། ཀུན་ཏུ་སྦྱོར་བ་ཐམས་ཅད་སྤོང་བར་བྱེད། མཐོང་བ་རྣམ་པར་དག་པར་བྱེད།

འཁོར་བའི་རྒྱུན་སྤོང་བར་བྱེད་ཅིང་ཡང་དག་པ་ཉིད་སྐྱོན་མེད་པར་ཞུགས་ནས་རྒྱུན་དུ་ཞུགས་པའི་འབྲས་བུ་ཐོབ་པར་བྱེད་དོ། ། ཀཽ་ཌི་ནྱ་མཁས་པ་ནི་དེ་ལྟར་རྣམ་པ་ཐམས་ ཅད་དུ་འདུ་བྱེད་ཀྱི་འཇིག་རྟེན་ལ་མངོན་པར་མི་དགའ་བའི་འདུ་ཤེས་སྐྱེད་པར་བྱེད་དོ། ། ཀཽ་ཌི་ནྱ་འདི་ནི་མངོན་པར་མི་དགའ་བའི་འདུ་ཤེས་ཀྱི་སྦྱོར་བའི་དམིགས་པའོ། ། དེ་ལ་ཆོས་གོས་ལ་མི་འཐུན་པའི་འདུ་ཤེས་གང་ཞེ་ན། ཀཽ་ཌི་ནྱ་མཁས་པས་གང་གི་ཚེ་ཆོས་གོས་མཐོང་ངམ། རེག་གམ། ཤམ་ཐབས་སུ་བྱེད་དམ། གྱོན་པར་བྱེད་དམ། བཞག་གམ། སྦས་ཀྱང་རུང་སྟེ་དེ་ཐམས་ཅད་དུ་འདི་ནི་མིའི་པགས་པའོ། ། དེ་ལ་ཁྲག་གིས་བསྐུས་པའོ། ། ཁྲག་འཛག་པའོ། ། མཆོག་ཏུ་དྲི་མི་ཞིམ་པའོ། ། ཐམས་ཅད་ཀྱིས་སྐྱོན་བགྲང་བར་བྱའོ། ། སྲིན་བུ་དང་སྦྲང་བུས་གང་བའོ། ། མཛངས་པ་ རྣམས་ཀྱིས་མངོན་པར་དགའ་བར་བྱ་བ་མ་ཡིན་པའོ་ཞེས་དེ་ལྟ་བུར་འདུ་ཤེས་པར་འགྱུར་རོ། ། མཁས་པ་དེ་ལྟར་ཆོས་གོས་ལ་མངོན་པར་མི་དགའ་བའི་འདུ་ཤེས་སྐྱེད་དོ། ། ཀཽ་ཌི་ནྱ་མཁས་པས་ཇི་ལྟར་ཟས་ལ་མི་འཐུན་པའི་འདུ་ཤེས་བསྐྱེད་པར་བྱ་ཞེ་ན། མཁས་པས་གང་ཟས་བླངས་ པར་གྱུར་ན་དེ་ཟས་འདི་ཡང་ནང་གྲོལ་ལོ། །

སྐྲ་དང་པགས་པ་མེད་ཅིང་རྣག་དང་ཁྲག་གིས་བསྐུས་པ་སྲིན་བུ་དང་། སྦྲང་བུས་ཡོངས་སུ་བསྐོར་བའོ། ། སྣོད་འདི་ནི་མི་མགོའི་ཐོད་པ་མཆོག་ཏུ་དྲི་ང་བ་སྐྱོན་དུ་བགྲང་བར་བྱའོ་ཞེས་དེ་ལྟ་བུར་འདུ་ཤེས་སྐྱེད་དེ། གལ་ཏེ་འབྲས་ཅན་ཞིག་ལེན་ན་མི་རོ་སྲིན་ བུས་གང་བའོ། ། ཞེས་དེ་ལྟ་བུར་འདུ་ཤེས་པར་འགྱུར་རོ། ། གལ་ཏེ་ཆུ་ཞིག་ལེན་ན་དེ་འདི་ནི་མིའི་ཁྲག་མཆོག་ཏུ་སྐྱོན་དུ་བགྲང་བར་བྱའོ་ཞེས་བྱ་བ་དང་། དེ་བཞིན་དུ་ཕྱེ་དག་ལ་འདི་ནི་མིའི་རུས་པའི་ཕྱེ་མའོ་ཞེས་བྱ་བ་དང་། དེ་བཞིན་དུ་ཁུར་སྐྱལ་འདི་ནི་མིའི་པགས་པའོ་ཞེས་དེ་ལྟར་འདུ་ཤེས་པར་འགྱུར་རོ། ། དེ་བཞིན་དུ་ཤ་ཁུ་དང་། ཐུག་པ་དང་། ཚོད་མ་དང་། སྲན་ཚོད་ཀྱང་རུང་སྟེ། དེ་ལ་འདི་ནི་མིའི་ཁྲག་གོ། ། འདི་ནི་མིའི་ཀླད་པའོ་ཞེས་བྱ་བ་དང་། དེ་བཞིན་དུ་སྔ་སྔོ་ལ་འདི་ནི་མིའི་སྐྲའོ། ། འདི་ནི་མིའི་སོའོ་ཞེས་བྱ་བ་དང་། དེ་བཞིན་དུ་ཤ་ལ་འདི་ནི་མིའི་ཤའོ་ཞེས་བྱ་བ་དང་། དེ་བཞིན་དུ་ ལི་ཁར་དང་། བུ་རམ་དང་། རྒུན་ཆང་དང་། བལ་པོ་སེའུའི་ཁུ་བ་ལ་འདི་ནི་མིའི་ཁྲག་གོ། ། མིའི་ཀླད་པའོ། ། མིའི་བད་ཀན་ནོ། །

མིའི་རུས་པའི་རྐང་ངོ་ཞེས་བྱ་བ་དེ་ལྟ་བུར་འདུ་ཤེས་སྐྱེད་དེ། ཀཽ་ཌི་ནྱ་མཁས་པས་དེ་ལྟར་ཟས་ལ་མི་འཐུན་པའི་འདུ་ཤེས་བསྐྱེད་པར་བྱའོ། ། ཀཽ་ཌི་ནྱ་མཁས་ པས་ཇི་ལྟར་ཁྱིམ་མམ། གནས་ཁང་ངམ། ཁང་པ་བརྩེགས་མར་འཇུག་པའི་ཚེ་འཇིགས་པའི་འདུ་ཤེས་བསྐྱེད་པར་བྱ་ཞེ་ན། གྲོང་ཁྱེར་ཆེན་པོ་སྒོ་བཞི་པ་འདིར་ཞུགས་པས་བདག་སྲེག་གོ། ། འཇུག་པ་ན་ཤིང་ལ་མེར་འདུ་ཤེས་པ་དང་། འཇིམ་པ་ལ་མིའི་ཤར་འདུ་ཤེས་པ་དང་། རི་མོ་ལ་ མིའི་ཁྲག་ཏུ་འདུ་ཤེས་པ་དང་། མལ་ཆ་ལ་མིའི་པགས་པ་ཉིད་དུ་འདུ་ཤེས་པ་དང་། སྟན་ལ་མིའི་རུས་གོང་གི་ཕུང་པོ་འམ། མི་རོར་བྱིན་གྱིས་རློབ་པར་བྱེད་པ་དེ་ལྟ་བུར་འདུ་ཤེས་པ་འཇུག་པར་བྱའོ། ། རྩིའི་རྣམ་པ་དེ་ལྟ་བུ་ལ་སོ་སོར་སྟེན་པར་བྱེད་པ་ན་ཡང་ཆོས་དེ་དག་ཡིད་ལ་བྱའོ། ། ཀཽ་ཌི་ནྱ་མཁས་པ་དེ་ལྟ་བུར་འདུ་ཤེས་པ་ནི་འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་ཐོབ་པར་འགྱུར་རོ། ། སུ་འཇིག་རྟེན་ཐམས་ཅད་ལ་མངོན་པར་མི་དགའ་བར་འདུ་ཤེས་པར་འགྱུར་བ་དེ་ཡོན་ཏན་དང་ཕན་ཡོན་ཅི་ཐོབ་ཅེ་ན། དེ་རྗེས་སུ་འཐུན་པའི་བཟོད་པ་ གསུམ་ཐོབ་པར་འགྱུར་རོ། ། གསུམ་གང་ཞེ་ན།

སྨོན་པ་མེད་པ་དང་རྗེས་སུ་འཐུན་པའི་བཟོད་པ་དང་། སྟོང་པ་ཉིད་དང་རྗེས་སུ་འཐུན་པའི་བཟོད་པ་དང་། མཚན་མ་མེད་པ་དང་རྗེས་སུ་འཐུན་པའི་བཟོད་པའོ། ། འཇིག་རྟེན་གྱི་བཟོད་པ་གསུམ་པོ་དེ་དག་ཐོབ་པས་ཕན་ཡོན་ཐོབ་པར་བྱེད་ དེ། དེའི་སེམས་སྟོང་པ་ཉིད་ཀྱི་ལྟ་བ་ལ་འཇུག་པར་བྱེད་དོ། ། དེ་སྐྱེ་བ་དང་འཇིག་པའི་ཚུལ་གྱིས་མངོན་པར་འདུ་བྱེད་པ་མེད་པ་ལ་ཡིད་འཇུག་པར་བྱེད་དོ། ། དེ་ཕུང་པོའི་རང་བཞིན་ལ་མི་རྟག་པ་དང་། སྡུག་བསྔལ་བ་དང་། སྟོང་པ་ཉིད་དང་བདག་མེད་པའི་སྟོང་པ་ཉིད་ཡང་དག་པར་རྗེས་སུ་མཐོང་ ངོ་། ། ཁམས་རྣམས་ཞེས་བྱ་བ་ནས་སྐྱེ་མཆེད་རྣམས་ཞེས་བྱ་བའི་བར་ཡང་དག་པར་རྗེས་སུ་མཐོང་ངོ་། ། བདེན་པ་རྣམས་ཞེས་བྱ་བའི་བར་དང་། རྟེན་ཅིང་འབྲེལ་བར་འབྱུང་བ་ཞེས་བྱ་བའི་བར་ལ་ཆོས་ཐམས་ཅད་ཀྱི་རང་བཞིན་དང་མི་རྟག་པ་ཉིད་ཡང་དག་པར་རྗེས་སུ་མཐོང་ངོ་། ། སྡུག་ བསྔལ་ཉིད་དང་བདག་མེད་པ་ཉིད་ཀྱི་སྟོང་པ་ཉིད་ཡང་དག་པར་རྗེས་སུ་མཐོང་ངོ་། ། དེ་རྒྱུན་དུ་ཞུགས་པའི་འབྲས་བུ་འཐོབ་བོ་ཞེས་བྱ་བ་ནས་དགྲ་བཅོམ་པ་ཉིད་ཀྱི་བར་འཐོབ་སྟེ། ཀཽ་ཌི་ནྱ་འདི་ནི་མི་སློབ་པའི་རྣམ་པར་གྲོལ་བ་མཉམ་པར་གཞག་པའོ། །

ཀཽ་ཌི་ནྱ་འཇིག་རྟེན་ཐམས་ ཅད་ལ་མངོན་པར་མི་དགའ་བའི་འདུ་ཤེས་འདི་ནི་སེམས་ཅན་རྣམས་ཀྱི་གཅེས་སྤྲས་བྱེད་པའོ། ། འདོད་པའི་འདོད་ཆགས་ཐམས་ཅད་ཡང་དག་པར་སྤོང་བར་བྱེད་པའོ། ། གཟུགས་ཀྱི་འདོད་ཆགས་ཐམས་ཅད་དང་། གཟུགས་མེད་པའི་འདོད་ཆགས་ཐམས་ཅད་ཡང་དག་པར་སྤོང་ བར་བྱེད་པའོ། ། ང་རྒྱལ་དང་། རྒོད་པ་དང་། ཐེ་ཙོམ་དང་། མ་རིག་པའི་མུན་པ་ཐམས་ཅད་སྤོང་བར་བྱེད་པའོ། ། ལྷག་མ་མེད་པའི་སའི་བར་ལ་འཇོག་པར་བྱེད་པའོ། ། དོན་ཐམས་ཅད་ཡོངས་སུ་རྫོགས་པ་སྨོན་པ་མེད་པ་དང་རྗེས་སུ་འཐུན་པའི་གཟུངས་སྔགས་དེ་བཞིན་གཤེགས་ པ་ཡེ་ཤེས་དཔལ་བརྩེགས་རྒྱལ་པོས་གང་ང་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བ་དཔལ་གྱི་སྙིང་པོའི་ལག་ནས་བསྐུར་ཞིང་། འདུས་པ་ཆེན་པོ་འདི་ལ་ངས་བཤད་པ་ལ་དད་པ་སྦྱིན་པར་མཛད་པ་འདི་ནི་མཐུ་ཆེ་བ་ཕན་ཡོན་ཆེ་བའོ། ། འདོད་པའི་འདོད་ཆགས་ཐམས་ ཅད་དང་གཟུགས་ཀྱི་འདོད་ཆགས་ཐམས་ཅད་དང་། གཟུགས་མེད་པའི་འདོད་ཆགས་ཐམས་ཅད་ཡང་དག་པར་ཟད་པར་བྱེད་པའོ། ། ང་རྒྱལ་ཐམས་ཅད་ཡང་དག་པར་ཟད་པར་བྱེད་པའོ། ། ཟད་པ་ཤེས་པ་དང་མི་སྐྱེ་བ་ཤེས་པའི་བར་དུ་བྱེད་པའོ། ། མི་སྐྱེ་བའི་ཡེ་ཤེས་མཐོང་བར་ བྱེད་པའོ། །

མ་རིག་པའི་མུན་པའི་ཕུང་པོ་ཐམས་ཅད་རབ་ཏུ་འཇོམས་པར་བྱེད་པའོ། ། རྣམ་པར་འཇིག་པར་བྱེད་པའོ། ། སྡུག་བསྔལ་གྱི་ཁུར་ཐམས་ཅད་འདོར་བར་བྱེད་པའོ། ། བདུད་རྣམས་ཚར་གཅོད་པར་བྱེད་པའོ། ། ཕས་ཀྱི་རྒོལ་བ་རྣམས་ཕམ་པར་བྱེད་པའོ། ། ལྷ་རྣམས་ ཐམས་ཅད་དགའ་བར་བྱེད་པའོ། ། གནོད་སྦྱིན་ཐམས་ཅད་མགུ་བར་བྱེད་པའོ། ། ལྷ་མ་ཡིན་རྣམས་རྣམ་པར་འཇོམས་པར་བྱེད་པའོ། ། ནམ་མཁའ་ལྡིང་རྣམས་དངང་བར་བྱེད་པའོ། ། མི་འམ་ཅི་རྣམས་དད་པར་བྱེད་པའོ། ། ལྟོ་འཕྱེ་ཆེན་པོ་རྣམས་དངང་བར་བྱེད་པའོ། ། ཕས་ཀྱི་རྒོལ་བ་རྣམས་ངེས་པར་ཐུལ་བར་བྱེད་པའོ། ། རྒྱལ་རིགས་རྣམས་མངོན་པར་དད་པར་བྱེད་པའོ། ། བྲམ་ཟེ་རྣམས་འཇུག་པར་བྱེད་པའོ། ། རྗེའུ་རིགས་རྣམས་དགའ་བར་བྱེད་པའོ། ། དམངས་རིགས་རྣམས་མཆོག་ཏུ་དགའ་བར་བྱེད་པའོ། ། བུད་མེད་རྣམས་འདོད་ཆགས་དང་བྲལ་ བར་བྱེད་པའོ། ། མང་དུ་ཐོས་པ་རྣམས་སྐྱོ་བར་བྱེད་པའོ། ། རྣལ་འབྱོར་སྤྱོད་པ་རྣམས་མངོན་པར་དགའ་བར་བྱེད་པའོ། ། འཇིག་རྟེན་ཐམས་ཅད་རབ་ཏུ་ཞི་བར་བྱེད་པའོ། ། འཐབ་པ་དང་། ཐབ་མོ་དང་། མུ་གེ་དང་། ནད་དང་། དུས་མ་ཡིན་པའི་ཕ་རོལ་གྱི་དམག་ཚོགས་དང་། དུས་མ་ཡིན་ པའི་རླུང་དང་།

ཆར་པ་དང་། ཆུ་བོ་དང་། གྲང་བ་དང་། དྲོ་བ་དང་། ཁ་བ་དང་། ཚ་བ་དང་། རྩུབ་པ་དང་། རོ་མི་བྲོ་བ་དང་། རེག་པར་དཀའ་བའི་དངོས་པོ་ཐམས་ཅད་རྣམ་པར་ཞི་བར་བྱེད་པའོ། ། ཆོས་ཀྱི་ཚུལ་འབར་བར་བྱེད་པའོ། ། དཀོན་མཆོག་གསུམ་གྱི་གདུང་རྒྱུན་མི་འཆད་པར་བྱེད་པའོ། ། སངས་རྒྱས་ཀྱི་བསྟན་པ་སྟོན་པར་བྱེད་པའོ། ། འཁོར་བས་སྐྲག་པ་རྣམས་དབུགས་འབྱིན་པར་བྱེད་པ་སྟེ། འདི་ནི་སྨོན་པ་མེད་པ་དང་། རྗེས་སུ་འཐུན་པའི་གཟུངས་སྔགས་ཡིན་ནོ། ། བསྟན་པ་འདི་བཤད་པ་ན་སེམས་ཅན་ལྷ་དང་མི་གྲངས་མེད་དཔག་ཏུ་མེད་པ་ནི་ཆོས་རྣམས་ལ་ཆོས་ཀྱི་ མིག་རྡུལ་མེད་ཅིང་དྲི་མ་དང་བྲལ་བ་ཐོབ་པར་གྱུར་ཏོ། ། དཀྲིགས་ཕྲག་དགུ་བཅུ་རྩ་བརྒྱད་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། ། དེའི་ཚེ་ཁྲི་ཕྲག་བརྒྱད་ནི་སྨོན་པ་མེད་པ་དང་རྗེས་སུ་འཐུན་པའི་གཟུངས་སྔགས་འདི་ཐོབ་པར་གྱུར་ཏོ། ། དེའི་ཚེ་སེམས་ཅན་ གྲངས་མེད་དཔག་ཏུ་མེད་པས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཅིང་ཕྱིར་མི་ལྡོག་པར་གྱུར་ཏོ། ། དེའི་ཚེ་འབུམ་ཕྲག་ལྔ་བཅུ་རྩ་བརྒྱད་ནི་མི་སྐྱེ་བའི་ཆོས་རྣམས་ལ་བཟོད་པ་ཐོབ་པར་གྱུར་ཏོ། ། ལྷ་དང་།

ཀླུ་དང་། གནོད་སྦྱིན་དང་། སྲིན་པོ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། {ཡི་དགས་,ཡི་དྭགས་}དང་། ཤ་ཟ་དང་། གྲུལ་བུམ་དང་། མི་དང་། མི་མ་ཡིན་པ་ཐམས་ཅད་ཀྱིས་ལེགས་སོ་ཞེས་བྱ་བ་གསོལ་ཏེ། བཙུན་པ་བཅོམ་ལྡན་འདས་ལེགས་སོ་ལེགས་སོ། ། སངས་རྒྱས་བཅོམ་ལྡན་འདས་རྣམས་ཀྱི་ཐོགས་པ་མ་མཆིས་པའི་ཡེ་ཤེས་གཟིགས་ པ་ནི་ངོ་མཚར་ལགས་སོ། ། མཆོག་ཏུ་ངོ་མཚར་ལགས་སོ། ། བཙུན་པ་བཅོམ་ལྡན་འདས་འདི་ལྟར་དེ་བཞིན་གཤེགས་པ་རྣམས་སེམས་ཅན་ཐམས་ཅད་ཀྱི་བསམ་པ་མཁྱེན་པ་ལགས་སོ། ། དབང་པོ་ལ་མཁས་པའི་ཕ་རོལ་ཏུ་ཕྱིན་པ་ལགས། སེམས་ཅན་ཐམས་ཅད་ལ་ཆོས་ཀྱི་རོས་ཚིམ་པར་ མཛད་པ་ལགས། འཕགས་པའི་ལམ་ཡན་ལག་བརྒྱད་པ་སྟོན་པར་མཛད་པ་ལགས། སྡུག་བསྔལ་ཐམས་ཅད་ཉེ་བར་ཞི་བར་མཛད་པ་ལགས་པས་སུ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ལ་དད་པ་མི་སྐྱེད་པ་ལགས། ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་ མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་རྣམས་ཀྱིས་ཐལ་མོ་རབ་ཏུ་སྦྱར་ནས་མགྲིན་གཅིག་ཏུ་འདི་སྐད་ཅེས་གསོལ་ཏོ། །

བཙུན་པ་བཅོམ་ལྡན་འདས་གང་དང་གང་དུ་བདེན་པ་དང་རྗེས་སུ་འཐུན་པའི་གཟུངས་སྔགས་འདི་བསྟན་པ་ཐ་ན་གླེགས་བམ་དུ་ཆུད་པ་ལ་ཡང་རུང་སྟེ། དེ་ དང་དེར་བདག་ཅག་གིས་བརྩོན་པ་ལྷུར་བླང་བའི་ཐབས་ཐམས་ཅད་ཀྱིས་བཀུར་སྟིར་བགྱིའོ། ། རི་མོར་བགྱིའོ། ། མཆོད་པར་བགྱིའོ། ། ཆོས་སྨྲ་བ་དང་ཆོས་ཉན་པ་དེ་དག་དང་། གནས་དེ་དག་ལ་སླར་རྒོལ་བ་ཐམས་ཅད་ཀྱིས་མི་རྫི་བར་ཡོངས་སུ་བསྐྱང་བར་བགྱིའོ། ། བསྲུང་བར་ བགྱིའོ། ། སྦ་བར་བགྱིའོ། ། ནོར་གྱི་ཕུང་པོ་ཐམས་ཅད་ཀྱིས་མི་ཕོངས་པར་བགྱིའོ། ། རྟག་པར་སྣོད་དུ་གྱུར་ཅིང་སྦྱིན་གནས་སུ་གྱུར་ལ། ཚོགས་པ་རྣམས་ནད་མ་མཆིས་པ་དང་། ལོངས་སྤྱོད་དང་ཉེ་བར་སྤྱོད་པས་དགའ་ཞིང་རྩེ་སྟེ། མཆོག་ཏུ་དགའ་བ་མང་ལ་ཆོས་འཚལ་ཞིང་ཆོས་ཀྱིས་ གནས་པ་དག་དང་། ཆོས་རྗེས་སུ་བསྲུང་བར་བགྱིའོ། ། བཅོམ་ལྡན་འདས་ཀྱིས་བཀའ་སྩལ་པ། ཁྱེད་གང་དག་ཆོས་ཀྱི་ཚུལ་དང་དཀོན་མཆོག་གསུམ་གྱི་གདུང་རྒྱུན་མི་གཅད་པར་བྱ་བའི་ཕྱིར་ཞུགས་པ་ནི་སངས་རྒྱས་ཀྱི་བསྟན་པ་ལ་སྦྱིན་བདག་ཁྱེད་ལེགས་སོ་ལེགས་སོ། ། ། ། འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་བརྒྱད་པ།

ཡང་དེའི་ཚེ་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་རབ་ཏུ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ ཏོ། ། བཙུན་པ་བཅོམ་ལྡན་འདས་དེ་བཞིན་གཤེགས་པ་དཔལ་མེ་ཏོག་གི་སྙིང་པོ་དེས་གང་བྱང་ཆུབ་སེམས་དཔའ་ནམ་མཁའི་སྙིང་པོའི་ལག་ནས་འདིར་ཡིད་ལ་བྱེད་པ་བསྐུར་ཞིང་། ལུང་བསྟན་པ་ཆེན་པོ་ཉི་མའི་སྙིང་པོ་ལ་དད་པ་སྦྱིན་པར་མཛད་པ། རིག་པ་མཆིས་ པའི་སྦུབས་ཞི་བ་སྡང་བ་གཉིད་ཀྱིས་ལོག་པར་བགྱིད་པའི་གཟུངས་སྔགས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ལྷ་དང་བཅས་པའི་འཇིག་རྟེན་གྱི་མདུན་དུ་བཤད་པར་བྱའོ། ། ཤཱ་རིའི་བུ་དེའི་ཕྱིར་ཁྱོད་ཉོན་ལ་ཞེས་བྱ་བ་ནས་བཅོམ་ ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ་ཞེས་བྱ་བའི་བར་དུའོ། ། ཤཱ་རིའི་བུ་འདི་ལྟར་དེ་བཞིན་གཤེགས་པ་དཔལ་མེ་ཏོག་གི་སྙིང་པོ་དེ་དེ་ལྟ་བུའི་ཐག་རིང་པོ་ནས་འདིར་ཁྱེད་ཀྱི་བསམ་པ་དང་བག་ལ་ཉལ་བ་མཁྱེན་ནས་འདིར་སངས་རྒྱས་ཀྱི་ཞིང་འདི་ན་ ཁྱེད་བདག་ཏུ་འདུ་ཤེས་པ་དང་། སེམས་ཕྱིན་ཅི་ལོག་པ་དང་། འཁོར་བའི་འདམ་ལ་ཀུན་ཏུ་རྨོངས་པ་དང་།

ལམ་ཡན་ལག་བརྒྱད་པ་ལ་རྣམ་པར་རྨོངས་པས་གཟུངས་སྔགས་དེ་ལྟ་བུ་འདིར་བསྐུལ་བ་ཡིན་ནོ། ། ཇི་ལྟར་བདག་མེད་པ་ཡིན་ཡང་འོན་ཀྱང་འདི་ན་ སེམས་ཅན་བྱིས་པ་རྣམས་བདག་ཡོངས་སུ་བཙལ་བར་སེམས་ཕྱིན་ཅི་ལོག་པ་དག་ཡིན་ནོ། ། ཤཱ་རིའི་བུ་མཁས་པ་ཇི་ལྟར་བདག་ཡོངས་སུ་ཚོལ་བར་བྱེད་ཅེ་ན། ཇི་ལྟར་བདག་མེད་པ་བཞིན་དུ་བདག་ཉིད་ཀྱིས་མངོན་སུམ་དུ་འགྱུར་རོ། ། ཤཱ་རིའི་བུ་མཁས་པས་འདི་ ལ་འདི་ལྟར་བདག་ཡོངས་སུ་བཙལ་བར་བྱ་སྟེ། སེམས་ཅན་འདི་རྣམས་ནི་རང་གི་ལུས་ལ་བདག་ཏུ་འདུ་ཤེས་པ་དག་ཡིན་པས་ལུས་འདི་ཉིད་ལ་ཚུལ་བཞིན་དུ་སོ་སོར་བརྟག་པར་བྱའོ། ། ཇི་ལྟར་ཞེ་ན། དབང་པོ་ཁོ་ནར་མིག་ལ་སོ་སོར་བརྟག་པར་བྱའོ། ། འདི་ལྟར་ཡང་ དག་པར་བརྟག་པར་བྱ་སྟེ། འདི་ལྟར་གནས་མལ་སྣ་ཚོགས་ལ་སྐྱིལ་མོ་ཀྲུང་དུ་འདུག་ནས་དབང་པོ་ཐམས་ཅད་བསྡམས་པའི་རང་གི་སེམས་ཀྱིས་འདི་ལྟར་བརྟག་པར་བྱའོ། ། བདག་གི་མིག་གཡས་པ་འདི་ནི་འབྱུང་བ་ཆེན་པོ་བཞི་ལས་གྱུར་པ། རྒྱུས་པས་འབྲེལ་ པ་ཆུས་གང་བ་ཡིན་ཏེ། སྒྱུར་བར་བྱེད་པ་གཞན་གང་ཡང་མེད་ཀྱི་རླུང་རྣམས་ཡིན་ནོ། །

གང་དག་མིག་གི་དབང་པོར་ཞུགས་ནས་སྐོར་བར་བྱེད་ཅིང་སྒྱུར་བར་བྱེད་པ་དེ་དག་ཀྱང་རླུང་རྣམས་སོ། ། ཡོངས་སུ་སྦྱོང་བར་བྱེད་ཅིང་འབྱུང་བར་བྱེད་པ་དེ་དག་ནི་ནམ་མཁའ་ ལ་རྟེན་པ་དག་གོ། ། ནམ་མཁའ་དེ་ཡང་གཟུང་བ་མེད་པ། བརྗོད་དུ་མེད་པ། བདག་མེད་པའོ། ། ཇི་ལྟར་ནམ་མཁའ་བདག་མེད་པ་དེ་བཞིན་དུ་རླུང་དེ་དག་ཀྱང་བདག་མེད་པའོ། ། གང་དག་མིག་གི་དབང་པོ་ལ་འཇུག་ཅིང་སྐོར་བར་བྱེད། སྒྱུར་བར་བྱེད། ཡོངས་སུ་སྦྱོང་ བར་བྱེད། འབྱུང་བར་བྱེད་པ་དེ་དག་ཀྱང་གཟུང་བ་མེད་པ། བརྗོད་དུ་མེད་པ། བདག་མེད་པ། དམིགས་པ་དང་བྲལ་བ་དག་གོ། ། དེ་བཞིན་དུ་གང་མིག་གི་དབང་པོ་ལ་སའི་ཁམས་སྲ་བ་ཉིད་ཤིང་ནྱ་གྲོ་དྷའི་ས་བོན་ཙམ་ཡོད་པ་ཡང་མིག་ཐམས་ཅད་ལ་ཚུལ་བཞིན་དུ་ ཡིད་ལ་བྱེད་པ་སྐྱེ་བས་སོ་སོར་བརྟགས་ནས་དེ་བདག་ཏུ་མི་དམིགས་སོ། ། དེ་ལ་བདག་ཉིད་ཀྱིས་ནེམ་ནུར་མེད་པར་འགྱུར་རོ། ། དེ་ལ་སའི་ཁམས་ལ་བདག་མེད་དེ། ཁམས་དེ་ཡང་གཟུང་བ་མེད་པ་བདག་མེད་པར་དམིགས་སོ། ། དེ་བཞིན་དུ་དེ་ལ་ཆུའི་ཁམས་ལ་སོ་སོར་ རྟོག་པར་བྱེད་དོ་ཞེས་བྱ་བ་ནས་དེ་བཞིན་དུ་མེའི་ཁམས་ཀྱི་བར་ལ་སོ་སོར་རྟོག་པར་བྱེད་དོ། །

དེ་ལྟར་མིག་གི་བར་ལ་སོ་སོར་བརྟགས་པས་མིག་གི་འབྱུང་བ་ཆེན་པོ་རྣམས་ལ་བདག་མེད་པར་བདག་ཉིད་ཁོ་ནས་ནེམ་ནུར་མེད་པར་འགྱུར་རོ། ། དེ་འདི་སྙམ་དུ་ཡང་སེམས་ ཏེ། མིག་དང་གཟུགས་ལ་བརྟེན་ནས་རེག་པའི་བདག་ཏུ་གྱུར་ན་མི་རུང་ངོ་སྙམ་ནས་དེ་རླུང་དེ་ཡང་ནམ་མཁའི་ངོ་བོར་ཡང་ཚུལ་བཞིན་དུ་སོ་སོར་བརྟགས་ཏེ་དེ་ཐམས་ཅད་དུ་གང་དུ་ཡང་བདག་མི་དམིགས་སོ། ། བརྟེན་ནས་རྣམ་པར་ཤེས་པ་འབྱུང་བ་ཡང་རྐྱེན་རྣམས་མེད་ན་མི་འབྱུང་སྟེ། མིག་དང་ གཟུགས་ལ་རྟེན་ཅིང་མིག་གི་རྣམ་པར་ཤེས་པ་འབའ་ཞིག་འབྱུང་ཞིང་གཟུགས་རྣམས་ཀྱི་རྐྱེན་གྱིས་འབྱུང་ངོ་། ། གྲོགས་རྣམ་པར་ཤེས་པས་མིང་དང་གཟུགས་སོ། ། དེ་ལས་བྱུང་བའི་སྐྱེ་མཆེད་དྲུག་ལས་རེག་པ་དང་། ཚོར་བ་མྱོང་བ་དང་། སྲེད་པ་ལྷག་པར་ཆགས་པ་དང་། ལེན་པ་དང་། སྲིད་པ་དང་། སྐྱེ་བ་དང་། རྒ་ཤིའོ། ། དེས་ཆོས་འདི་དག་ཐམས་ཅད་ནི་མིག་གི་རྣམ་པར་ཤེས་པ་ལ་ཡང་དག་པར་བརྟེན་པའོ། ། མིག་གི་རྣམ་པར་ཤེས་པ་དེ་ཡང་ཤར་ཕྱོགས་ནས་འོངས་པ་མ་ཡིན། ལྷོ་ ཕྱོགས་ནས་མ་ཡིན། ནུབ་ཕྱོགས་ནས་མ་ཡིན། བྱང་ཕྱོགས་ནས་མ་ཡིན། སྟེང་ནས་མ་ཡིན། འོག་ནས་མ་ཡིན་ཏེ།

སྐད་ཅིག་མ་གང་ལ་མིག་གི་རྣམ་པར་ཤེས་པ་བྱུང་བའི་སྐད་ཅིག་དེ་ཡང་འགགས་སོ། ། སྐད་ཅིག་མ་གཉིས་ལ་ཉེ་བར་མི་གནས་ ཏེ། འགགས་པས་གང་དུ་ཡང་འགྲོ་བ་མེད་དོ། ། བསགས་པ་མེད་དོ། ། ཆོས་དེ་དག་དང་འདི་དག་ཐམས་ཅད་ནི་རྐྱེན་ལས་འབྱུང་བར་སྐྱེའོ། ། རྐྱེན་མ་ཚང་བས་འགག་གོ། ། གང་རྐྱེན་ལ་རག་ལས་པ་དེ་བདག་མེད་དོ། ། རྐྱེན་དེ་དག་ཀྱང་བྱེད་པ་པོ་མེད་པ། ཚོར་བ་པོ་མེད་པ། སློང་བ་པོ་མེད་པ། ཀུན་ནས་སློང་བ་པོ་མེད་པའོ། ། དེ་བདག་མེད་པ་ཡིན་ཏེ། གང་བདག་མེད་པ་དེ་བདག་དང་བདག་གིས་སྟོང་པའོ། ། དེ་ཅིའི་ཕྱིར་ཞེ་ན། མིག་གི་རང་བཞིན་དེ་ཡིན་པའི་ཕྱིར་ཏེ། ཐེར་ཟུག་ཏུ་གནས་པ་མ་ཡིན་པ་དང་། འཇིག་པ་མེད་པའི་ཕྱིར་དེ་ལ་བདག་གམ་བདག་གི་མེད་དོ་སྙམ་མོ། ། འདི་ལ་ཇི་ལྟར་ཆོས་ཐམས་ཅད་ལེན་པ་མེད་པ་དང་། འདོར་བ་མེད་པ་དང་། ཉན་ཐོས་རྣམས་ཀྱིས་བྱས་པ་མ་ཡིན་པ་དང་། རང་རྒྱལ་བ་རྣམས་ཀྱིས་མ་ཡིན་པ་དང་། དེ་བཞིན་གཤེགས་པ་རྣམས་ ཀྱིས་མཛད་པ་མ་ཡིན་ཏེ། ངོ་བོ་ཉིད་ཐམས་ཅད་ཀྱི་མིག་བདག་མེད་པའོ། ། གང་བདག་མེད་པ་དེ་སྟོང་པའོ། ། མི་དམིགས་པའི་ཚུལ་གྱིས་ཆོས་ཐམས་ཅད་སྟོང་པའོ། །

དེ་བཞིན་དུ་མཚན་མ་མེད་པའི་རྣམ་པར་ཐར་པའི་སྒོའི་བར་དུ་བསྒོམས་པས་ཆགས་པའི་གཞི་ སྤོང་བར་འགྱུར་ཞིང་དེའི་རྒྱུ་ལས་བྱུང་བ་ཉོན་མོངས་པ་ཐམས་ཅད་ཀྱང་སྤོང་བར་འགྱུར་རོ། ། དེའི་ཚེ་ཁ་ཅིག་ནི་བདེན་པ་དང་པོ་མངོན་པར་རྟོགས་པར་འགྱུར་རོ། ། ཁ་ཅིག་ནི་བདེན་པ་བཞི་པའི་བར་མངོན་པར་རྟོགས་པར་འགྱུར་རོ། ། རྣ་བ་ཞེས་བྱ་བ་ནས་སྣ་དང་ལྕེའི་བར་ལ་ཡང་ དེ་བཞིན་ནོ། ། ཡང་དེ་ལུས་ཐམས་ཅད་ལ་ཚུལ་བཞིན་དུ་ཡིད་ལ་བྱེད་པས་སོ་སོར་རྟོག་པར་བྱེད་དེ། ཁ་ཅིག་ནི་དང་པོར་སྤུ་གཅིག་ལ་ལྔ་བཅུར་རྣམ་པར་བཅད་དེ། བཅུར་བཤིག་པ་ལའོ། ། གང་དག་རྟེན་པའི་སྤུ་ཐམས་ཅད་ལ་ཡང་དེ་བཞིན་ཏེ། དེ་ལ་བདག་ཉིད་ ཀྱིས་ནེམ་ནུར་མེད་པར་འགྱུར་རོ། ། སྤུ་གང་ལ་ཡང་བདག་མི་དམིགས་སོ། ། མདོག་གི་པགས་པ་དང་། ཤ་དང་། ཁྲག་དང་། བད་ཀན་དང་། རྒྱུས་པ་དང་། རྒྱུ་མ་དང་། ཀླད་པ་དང་། རུས་པ་དང་། རྐང་དང་། དྲོ་བ་ཉིད་ལ་ཡང་དེ་བཞིན་ནོ། ། རླུང་ གྱེན་དུ་རྒྱུ་བ་དག་དང་། ཐུར་དུ་རྒྱུ་བ་དག་དང་། བླང་བ་མེད་པ་དང་། དོར་བ་མེད་པའི་རླུང་རྣམས་ལ་ཡང་དེ་བཞིན་དུ་ཇི་ལྟར་སྔར་བཤད་པ་བཞིན་དུ་དམིགས་པ་ཡིད་ལ་བྱེད་པ་སྟེ།

ལུས་འདི་ལ་དེ་ལྟར་སོ་སོར་རྟོག་པར་བྱེད་དོ། ། སེམས་ཀྱི་བར་ལ་ཚུལ་བཞིན་དུ་ཡིད་ ལ་བྱེད་པས་དེ་ལྟར་སོ་སོར་རྟོག་པར་བྱེད་དོ། ། ཇི་ལྟ་ཞེ་ན། ཡིད་ལ་རྟེན་ལ་ཆོས་རྣམས་ལ་ཡང་རྟེན་ཅིང་ཡིད་འབྱུང་ངོ་། ། གྲོགས་རྣམ་པར་ཤེས་པས་མིང་དང་། གཟུགས་དང་། སྐྱེ་མཆེད་དང་། འདུས་པའི་རེག་པ་དང་། ཚོར་བ་མྱོང་བ་དང་། སྲེད་པ་ལྷག་པར་ ཆགས་པ་ཉིད་དང་། ལེན་པ་དང་། སྲིད་པ་དང་། སྐྱེ་བ་དང་། རྒ་ཤིའོ། ། ཆོས་འདི་དག་ཐམས་ཅད་ནི་ཡིད་ཀྱི་རྣམ་པར་ཤེས་པ་ལ་ཡང་དག་པར་རྟེན་ནས་འབྱུང་ངོ་། ། ཡིད་ཀྱི་རྣམ་པར་ཤེས་པ་དེ་ཡང་ཤར་ཕྱོགས་ནས་འོངས་པ་མ་ཡིན་ནོ་ཞེས་བྱ་བ་ནས་འོག་ནས་ འོངས་པ་མ་ཡིན་ནོ་ཞེས་བྱ་བའི་བར་ཡིན་ཏེ། སྐད་ཅིག་མ་གང་ཁོ་ན་ལ་རྐྱེན་གྱི་འདུ་འཕྲོད་ཀྱི་རྒྱུས་ཡིད་ཀྱི་རྣམ་པར་ཤེས་པ་བྱུང་བའི་སྐད་ཅིག་དེ་ཡང་འགག་གོ། ། སྐད་ཅིག་མ་གཉིས་པ་ལ་ཉེ་བར་མི་གནས་ཏེ། འགགས་པ་གང་དུ་ཡང་འགྲོ་བ་མེད་དོ། ། བསགས་ པ་མེད་དོ། ། ཆོས་འདི་དག་ཐམས་ཅད་ནི་རྐྱེན་ལས་ཡང་དག་པར་བྱུང་བར་སྐྱེའོ། ། རྐྱེན་མ་ཚང་བས་འགག་གོ། ། ཐམས་ཅད་རྐྱེན་ལ་རག་ལས་པ་ཡིན་ཏེ། དེ་དག་བདག་མེད་དོ། ། རྐྱེན་དེ་ཡང་བྱེད་པ་པོ་དང་།

ཚོར་བ་པོ་དང་། སློང་བ་པོ་དང་། ཀུན་ ནས་སློང་བ་པོ་མི་དམིགས་པ་ཉིད་པས་དེས་ན་དེ་དག་བདག་མེད་པ་ཡིན་ཏེ། གང་བདག་མེད་པ་དེ་བདག་དང་བདག་གིས་སྟོང་པའོ། ། དེ་ཅིའི་ཕྱིར་ཞེ་ན། ཡིད་ཀྱི་རང་བཞིན་དེ་ཡིན་པའི་ཕྱིར་ཏེ། ཐེར་ཟུག་ཏུ་གནས་པ་མ་ཡིན་པ་དང་། འཇིག་པ་མེད་པའི་ཕྱིར་དེ་ལ་ བདག་གམ་བདག་གི་མེད་དོ་སྙམ་མོ། ། ཆོས་ཐམས་ཅད་སྐྱེ་བ་དང་འཇིག་པའི་ཆོས་ཉིད་ཡིན་ཏེ། འདི་ལ་ལེན་པ་མེད་དོ། ། འདོར་བ་མེད་དོ། ། དེ་ཉན་ཐོས་རྣམས་ཀྱིས་བྱས་པ་མ་ཡིན་ནོ། ། རང་སངས་རྒྱས་རྣམས་ཀྱིས་མ་ཡིན་ནོ། ། དེ་བཞིན་གཤེགས་པ་རྣམས་ ཀྱིས་མཛད་པ་མ་ཡིན་ཏེ། རང་བཞིན་དང་ངོ་བོ་ཉིད་ཀྱིས་ཡིད་བདག་མེད་པའོ། ། གང་བདག་མེད་པ་དེ་སྟོང་པའོ། ། མི་དམིགས་པའི་ཚུལ་གྱིས་ཆོས་ཐམས་ཅད་བདག་མེད་པའོ། ། གང་བདག་མེད་པ་དེ་སྟོང་པའོ། ། དེ་བཞིན་དུ་མཚན་མ་མེད་པའི་རྣམ་པར་ཐར་ པའི་སྒོའི་བར་དུ་བསྒོམས་པས་ཆགས་པའི་གཞི་རྣམས་སྤོང་བར་འགྱུར་ཞིང་དེའི་རྒྱུ་ལས་བྱུང་བ་ཉོན་མོངས་པ་རྣམས་སྤོང་བར་འགྱུར་རོ། ། དེའི་ཚེ་ཁ་ཅིག་ནི་བདེན་པ་དང་པོ་མངོན་པར་རྟོགས་པར་འགྱུར་རོ། ། ཁ་ཅིག་ནི་བདེན་པ་བཞི་པའི་བར་མངོན་པར་རྟོགས་པར་འགྱུར་ རོ། །

མཁས་པས་འདིར་དེ་ལྟར་བདག་ཡོངས་སུ་བཙལ་ནས་མི་དམིགས་པའི་ཕྱིར་ཇི་ལྟར་བདག་མེད་པ་བཞིན་རང་གི་མངོན་སུམ་དུ་འགྱུར་རོ། ། ཤཱ་རིའི་བུ་མཁས་པ་སྟོང་པ་ཉིད་ཀྱིས་གནས་པས་གནས་ཤིང་སྨོན་པ་མེད་པ་དང་། མཚན་མ་མེད་པའི་གནས་པས་ གནས་ནས་དབང་པོ་བརྒྱ་བྱིན་ཐམས་ཅད་ཀྱིས་ཕྱག་བྱ་བའི་འོས་སུ་གྱུར་པ་དང་། མཆོད་པའི་འོས་སུ་གྱུར་པ་དང་། མངོན་པར་སྲུང་བའི་འོས་སུ་གྱུར་པ་དང་། རྗེས་སུ་དྲན་པར་བྱ་བའི་འོས་སུ་གྱུར་པ་དང་། དད་པར་བྱ་བའི་འོས་སུ་གྱུར་པ་ཡིན་ནོ། ། དབང་པོ་ཚངས་ པ་ཞེས་བྱ་བ་ནས་ལྷའི་དབང་པོ་ཞེས་བྱ་བའི་བར་དང་། ཀླུའི་དབང་པོ་དང་། གནོད་སྦྱིན་གྱི་དབང་པོ་དང་། ལྷ་མ་ཡིན་གྱི་དབང་པོ་དང་། ནམ་མཁའ་ལྡིང་གི་དབང་པོ་དང་། མི་འམ་ཅིའི་དབང་པོ་དང་། ལྟོ་འཕྱེ་ཆེན་པོའི་དབང་པོའི་བར་རྣམས་ཀྱིས་ཕྱག་བྱ་བའི་འོས་ སུ་གྱུར་པ་དང་། མཆོད་པའི་འོས་སུ་གྱུར་པ་དང་། མངོན་པར་བསྲུང་བའི་འོས་སུ་གྱུར་པ་དང་། རྗེས་སུ་དྲན་པར་བྱ་བའི་འོས་སུ་གྱུར་པ་ཡིན་ནོ། ། མིའི་དབང་པོ་ཐམས་ཅད་ཀྱིས་ཀྱང་དད་པར་བྱ་བའི་འོས་སུ་གྱུར་པའི་བར་དུ་ཡིན་ནོ། །

ཤཱ་རིའི་བུ་རིག་པ་ཡོད་ པའི་སྦུབས་ཞི་བའི་གཟུངས་སྔགས་དེ་ནི་དེ་བཞིན་གཤེགས་པ་དཔལ་མེ་ཏོག་གི་སྙིང་པོས་ང་ལ་གང་བྱང་ཆུབ་སེམས་དཔའ་ནམ་མཁའི་སྙིང་པོའི་ལག་ནས་བསྐུར་ཞིང་འདུས་པ་ཆེན་པོ་ཉི་མའི་སྙིང་པོ་ངས་བཤད་པ་ལ་དད་པ་སྦྱིན་པར་མཛད་པ་ཡིན་ནོ། ། རིག་པ་ཡོད་ པའི་སྦུབས་ཞི་བའི་གཟུངས་སྔགས་དེ་ནི་མཐུ་ཆེ་བ་ཕན་ཡོན་ཆེ་བའོ། ། སེམས་ཅན་ཐམས་ཅད་ལ་ཕན་པར་བྱེད་པའོ། ། ནད་ཐམས་ཅད་རབ་ཏུ་ཞི་བར་བྱེད་པའོ། ། ཉོན་མོངས་པ་ཐམས་ཅད་འདུལ་བར་བྱེད་པའོ། ། ཕུང་པོ་དང་། ཁམས་དང་། སྐྱེ་མཆེད་ཐམས་ཅད་ ཡོངས་སུ་ཤེས་པར་བྱེད་པའོ། ། ཆོས་ཐམས་ཅད་རྣམ་པར་འབྱེད་པར་བྱེད་པའོ། ། ཐབས་ཐམས་ཅད་ཡང་དག་པར་སྟོན་པར་བྱེད་པའོ། ། བྱང་གྲོལ་གྱི་བདེ་བ་ཐམས་ཅད་ཡོངས་སུ་འབྱེད་པར་བྱེད་པའོ། ། སེམས་ཅན་ཐམས་ཅད་དད་པར་བྱེད་པའོ། ། ཆོས་ཐམས་ ཅད་ཀྱི་བདེ་བ་ལ་འཇུག་པར་བྱེད་པའོ། ། བདུད་དང་ཕས་ཀྱི་རྒོལ་བ་ཐམས་ཅད་ཆོས་དང་འཐུན་པས་ངེས་པར་ཐུལ་བར་བྱེད་པའོ། ། བདུད་ཀྱི་ཡུལ་ཐམས་ཅད་འཇིག་པར་བྱེད་པའོ། ། བདུད་རྣམས་ཚར་གཅོད་པར་བྱེད་པའོ། ། ཕས་ཀྱི་རྒོལ་བ་རྣམས་ཕམ་པར་བྱེད་ པའོ། ། ལྷ་རྣམས་དགའ་བར་བྱེད་པའོ། །

གནོད་སྦྱིན་རྣམས་ཡང་དག་པར་མགུ་བར་བྱེད་པའོ། ། ལྷ་མ་ཡིན་རྣམས་རྣམ་པར་འཇོམས་པར་བྱེད་པའོ། ། ནམ་མཁའ་ལྡིང་རྣམས་མགུ་བར་བྱེད་པའོ། ། མི་འམ་ཅི་རྣམས་དད་པར་བྱེད་པའོ། ། ལྟོ་འཕྱེ་ཆེན་པོ་རྣམས་ རྒྱབ་ཀྱིས་ཕྱོགས་པར་བྱེད་པའོ། ། རྒྱལ་རིགས་རྣམས་མངོན་པར་དགའ་བར་བྱེད་པའོ། ། བྲམ་ཟེ་རྣམས་འཇུག་པར་བྱེད་པའོ། ། རྗེའུ་རིགས་རྣམས་རབ་ཏུ་སིམ་པར་བྱེད་པའོ། ། དམངས་རིགས་རྣམས་མཆོག་ཏུ་དགའ་བར་བྱེད་པའོ། ། བུད་མེད་ འདོད་ཆགས་དང་བྲལ་བར་བྱེད་པའོ། ། བུད་མེད་སྦྲུམ་མ་བདེ་ལེགས་སུ་ཡོངས་སུ་ཐར་བར་བྱེད་པའོ། ། མང་དུ་ཐོས་པ་རྣམས་དྲན་པར་བྱེད་པའོ། ། རྣལ་འབྱོར་སྤྱོད་པ་རྣམས་མངོན་པར་དགའ་བར་བྱེད་པའོ། ། ནད་ཐམས་ཅད་རབ་ཏུ་ཞི་བར་བྱེད་པའོ། ། འཐབ་ པ་དང་། ཐབ་མོ་དང་། མུ་གེ་དང་། མི་ངས་དང་། ནད་དང་ཕ་རོལ་གྱི་དམག་ཚོགས་དང་། དུས་མ་ཡིན་པའི་རླུང་དང་། ཆར་པ་དང་། ཆུ་བོ་དང་། གྲང་བ་དང་། དྲོ་བ་ཐམས་ཅད་དང་། ཁ་བ་དང་། ཚ་བ་དང་། ཧྲུད་ཧྲུད་པོ་དང་། རྩུབ་པ་དང་། རེག་ པར་དཀའ་བའི་དངོས་པོ་ཐམས་ཅད་རྣམ་པར་ཞི་བར་བྱེད་པའོ། ། ཆོས་ཀྱི་ཚུལ་འབར་བར་བྱེད་པའོ། ། སངས་རྒྱས་ཀྱི་བསྟན་པ་སྟོན་པར་བྱེད་པའོ།

། དཀོན་མཆོག་གསུམ་གྱི་གདུང་རྒྱུན་མི་འཆད་པར་བྱེད་པའོ། ། འཁོར་བས་སྐྲག་པ་རྣམས་དབུགས་འབྱིན་པར་བྱེད་པའོ། ། ཟད་པ་ཤེས་པ་སྐྱེད་པར་བྱེད་པའོ། ། མི་སྐྱེ་བ་ཤེས་པ་རང་གི་མངོན་སུམ་དུ་བྱེད་པའོ། ། མ་རིག་པའི་མུན་པའི་ཕུང་པོ་རྣམ་པར་འདུལ་བར་བྱེད་པའོ། ། སྡུག་བསྔལ་གྱི་ཁུར་འདོར་བར་བྱེད་པའོ། ། ཞི་བ་རིག་པ་ཡོད་པའི་སྦུབས་ལུང་བསྟན་པ་ཆེན་པོ་འདི་ནི་སེམས་ ཅན་རྣམས་ཀྱི་ལས་འབྱང་བ་དང་། བདུད་ཀྱི་ལམ་ལས་ཡང་དག་པར་འདས་པ་དང་། སངས་རྒྱས་ཀྱི་ཡུལ་ལ་འཇུག་པར་བྱེད་པའོ། ། ཆོས་ཐམས་ཅད་ལ་དབང་སྒྱུར་བར་བྱེད་པའོ། ། སངས་རྒྱས་ཀྱི་ཆོས་མ་འདྲེས་པ་{བཅྭ་,བཅོ་}བརྒྱད་ཀྱི་བར་གྱི་ཕ་རོལ་ཏུ་འགྲོ་བ་དང་ ཆོས་ཀྱི་འཁོར་ལོ་རབ་ཏུ་སྐོར་བར་བྱེད་པའོ། ། ཆོས་ཀྱི་ཆར་རབ་ཏུ་འབེབས་པར་བྱེད་པའོ། ། སེམས་ཅན་ཐམས་ཅད་ཡོངས་སུ་སྨིན་པར་བྱེད་པའོ། ། བླ་ན་མེད་པའི་ཡོངས་སུ་མྱ་ངན་ལས་འདས་པར་བྱེད་པ་སྟེ། འདི་ནི་རིག་པ་ཡོད་པའི་སྦུབས་ཞི་བ་ལུང་བསྟན་པ་ ཆེན་པོ་ཡིན་ནོ། །

བཅོམ་ལྡན་འདས་ཀྱིས་བསྟན་པ་འདི་བཤད་པ་ན་གང་དུ་སེམས་ཅན་དེ་ལྟ་བུ་རྣམས་ཀྱི་ལས་ཀྱི་སྒྲིབ་པ་སྔོན་འཕངས་ཤིང་ཡོངས་སུ་མ་ཟད་པའི་ལྷ་དང་མི་གྲངས་མེད་པ་དཔག་ཏུ་མེད་པ་དག་ནི་དེར་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་ བྲལ་བ་ཐོབ་པར་གྱུར་ཏོ། ། སེམས་ཅན་དཀྲིགས་ཕྲག་འབུམ་གྱིས་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། ། དེའི་ཚེ་ཁྲི་ཕྲག་བདུན་ཅུ་ནི་ཞི་བ་རིག་པ་ཡོད་པའི་སྦུབས་ཀྱི་གཟུངས་སྔགས་འདི་ཐོབ་པར་གྱུར་ཅིང་ཐེག་པ་གསུམ་ལས་ ཕྱིར་མི་ལྡོག་པར་ཡང་གྱུར་ཏོ། ། དེའི་ཚེ་ལྷ་དང་མི་གྲངས་མེད་དཔག་ཏུ་མེད་པ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་ཤིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་ཡང་གྱུར་ཏོ། ། དེའི་ཚེ་བརྒྱད་ ཁྲི་བཞི་སྟོང་ནི་མི་སྐྱེ་བའི་ཆོས་རྣམས་ལ་བཟོད་པ་ཐོབ་པར་གྱུར་ཏོ། ། སངས་རྒྱས་ཀྱི་ཞིང་མི་མཇེད་ཐམས་ཅད་ཀྱི་སེམས་ཅན་རྣམས་ཀྱིས་གཟུངས་སྔགས་བཞི་པོ་བདེན་པ་དང་། རྗེས་སུ་འཐུན་པ་དང་། སྟོང་པ་ཉིད་དང་རྗེས་སུ་འཐུན་པ་དང་། སྨོན་པ་ མེད་པ་དང་རྗེས་སུ་འཐུན་པ་དང་།

ཞི་བ་རིག་པ་ཡོད་པའི་སྦུབས་ཀྱི་གཟུངས་སྔགས་དེ་དག་གི་དོན་བསྟན་པ་ཐོབ་ནས་དེའི་ཚེ་སེམས་ཅན་གྲངས་མེད་དཔག་ཏུ་མེད་པ་དག་གི་འདོད་པའི་འདོད་ཆགས་ཐམས་ཅད་དང་། གཟུགས་ཀྱི་འདོད་ཆགས་ཐམས་ཅད་ དང་། དབྱིབས་ཀྱི་འདོད་ཆགས་དང་། རེག་པའི་འདོད་ཆགས་དང་། མོས་པའི་འདོད་ཆགས་དང་། གཟུགས་མེད་པའི་འདོད་ཆགས་ཐམས་ཅད་ཡོངས་སུ་ཟད་དོ། ། འདོད་ཆགས་པ་རྣམས་ཀྱི་ཉེས་དམིགས་ཀྱང་རང་གི་མངོན་སུམ་དུ་གྱུར་ཏོ། ། ཁ་ ཅིག་གིས་ནི་མི་སྡུག་པའི་དགེ་བའི་རྩ་བ་བསྐྱེད་དོ། ། ཁ་ཅིག་གིས་ནི་སྐྱེ་མཆེད་དྲུག་གོ། ། ཁ་ཅིག་གིས་ནི་ཟིལ་གྱིས་གནོན་པའི་སྐྱེ་མཆེད་དོ། ། ཁ་ཅིག་གིས་ནི་ཟད་པར་གྱི་སྐྱེ་མཆེད་དོ། ། ཁ་ཅིག་གིས་ནི་དབུགས་རྔུབ་པ་དང་དབུགས་འབྱུང་བ་དྲན་པའོ། ། ཁ་ཅིག་གིས་ ནི་ཞི་གནས་སོ། ། ཁ་ཅིག་གིས་ནི་ལྷག་མཐོང་ངོ་། ། ཁ་ཅིག་གིས་ནི་བསམ་གཏན་དང་པོའོ། ། ཁ་ཅིག་གིས་ནི་བསམ་གཏན་ཁྱད་པར་ཅན་ནོ། ། ཁ་ཅིག་གིས་ནི་བསམ་གཏན་བཞི་པའི་བར་རོ། ། ཁ་ཅིག་གིས་ནི་གཟུགས་མེད་པའི་སྙོམས་ པར་འཇུག་པ་རྣམས་སོ། ། ཁ་ཅིག་གིས་ནི་བདེན་པ་དང་རྗེས་སུ་འཐུན་པའི་བཟོད་པའོ། ། ཁ་ཅིག་གིས་ནི་རིགས་ཀྱི་སའོ། །

ཁ་ཅིག་གིས་ནི་བརྒྱད་པའི་ཆོས་རྣམས་སོ། ། ཁ་ཅིག་གིས་ནི་ཉན་ཐོས་དང་ཐུན་མོང་བའི་དགེ་བའི་རྩ་བ་རྣམས་སྐྱེད་དོ། ། ཁ་ཅིག་གིས་ནི་རང་སངས་རྒྱས་དང་ཐུན་མོང་བའོ། ། ཁ་ཅིག་གིས་ནི་ཐམས་ཅད་མཁྱེན་པའི་ཡེ་ཤེས་དང་། ཐུན་མོང་བའི་ཏིང་ངེ་འཛིན་དང་། བཟོད་པ་དང་། གཟུངས་ཀྱི་དགེ་བའི་རྩ་བ་རྣམས་སྐྱེད་དོ། ། དེའི་ཚེ་བུད་མེད་གང་དག་སེམས་རྩེ་གཅིག་པ་ དང་། བུད་མེད་ཀྱི་དངོས་པོ་སྐྱོན་དུ་བགྲང་བའི་སེམས་ཀྱིས་ཚུལ་བསྟན་པ་འདི་ཐོས་པ་དེ་ལས་མིའི་བུད་མེད་དཀྲིགས་ཕྲག་དགུ་བཅུ་རྩ་གཅིག་གི་མོ་མཚན་ནུབ་པར་གྱུར་ཅིང་ཕོ་མཚན་ཡང་བྱུང་བར་གྱུར་ཏོ། ། ལྷའི་བུ་མོ་བྱེ་བ་ཕྲག་དགུ་བཅུ་རྩ་དགུ་དང་། ཀླུའི་བུ་མོ་ བརྒྱད་ཁྲི་བཞི་སྟོང་སྙེད་དང་། གནོད་སྦྱིན་གྱི་བུ་མོ་བརྒྱད་ཁྲི་དྲུག་སྟོང་སྙེད་དང་། ལྷ་མ་ཡིན་གྱི་བུ་མོ་བརྒྱད་ཅུ་རྩ་བཞི་སྙེད་དང་། ནམ་མཁའ་ལྡིང་གི་བུ་མོ་བདུན་ཁྲི་སྙེད་དང་། མི་འམ་ཅིའི་བུ་མོ་དཀྲིགས་ཕྲག་བཅུ་གཉིས་སྙེད་དང་། ལྟོ་འཕྱེ་ཆེན་པོའི་བུ་མོ་ སྟོང་སྙེད་དང་། {ཡི་དགས་,ཡི་དྭགས་}མོ་དཀྲིགས་ཕྲག་དགུ་བཅུ་སྙེད་དང་།

ཤ་ཟ་མོ་དཀྲིགས་ཕྲག་བཞི་བཅུ་རྩ་གཉིས་སྙེད་ཀྱི་བུ་མོ་མོ་མཚན་ནུབ་པར་གྱུར་ཅིང་ཕོ་མཚན་བྱུང་བར་གྱུར་ཏོ། ། གང་བུད་མེད་སྦྲུམ་པ་དེ་ཡང་ངས་ལུས་དང་སེམས་ཀྱི་བདེ་བ་མཆོག་ལ་ཡང་དག་པར་གཏད་དེ། ཐ་ན་དུད་ འགྲོའི་སྐྱེ་གནས་སུ་གཏོགས་པ་ཡང་རུང་། ཐོ་འཚམ་པ་མེད་པའི་ལུས་དང་ལྡན་པ་དང་། འཁྲུག་པ་མེད་པའི་སེམས་དང་ལྡན་པར་ཁྱེའུའམ་བུ་མོ་བཙས་པར་གྱུར་ཏོ། ། བཙས་ནས་ཀྱང་དབང་པོ་ཚང་བ་དང་། གཟུགས་མཆོག་དང་ལྡན་པ་དང་། དྲན་ པ་དང་ལྡན་པ་དང་། ཚེ་རབས་དྲན་པ་དང་། དཔའ་བ་དང་། སྲན་ཐུབ་པ་དང་། ཤེས་རབ་དང་ལྡན་པར་གྱུར་ཏོ། ། གང་སྦྲུམ་པ་བཙའ་བར་མི་བྱེད་པ་དེའི་ནད་ཐམས་ཅད་ངས་རབ་ཏུ་ཞི་བར་བྱས་སོ། ། མངལ་ན་ཡོད་པ་དེ་ཡང་ཚུལ་དེ་ལྟ་བུའི་བདེ་བ་དང་ཡང་ དག་པར་ལྡན་པར་བྱས་ཏེ། ལུས་དང་སེམས་ཀྱི་བདེ་བ་དང་ཡང་དག་པར་ལྡན་པར་བྱས་ནས་ཀྱང་དེ་ཕྱིས་བདེ་བ་མཆོག་གིས་ཁྱེའུ་དང་བུ་མོ་བཙས་ཏེ། གཟུགས་མཆོག་དང་ལྡན་པ་དང་། དྲན་པ་མཆོག་དང་ལྡན་པ་དང་། ཚེ་རབས་དྲན་པ་དང་། དཔའ་བ་དང་། སྲན་ ཐུབ་པ་དང་། ཤེས་རབ་དང་ལྡན་པའི་བར་དུ་གྱུར་ཏོ། ། དེ་ནས་ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་།

མི་འམ་ཅི་དང་། ལྟོ་འཕྱེ་ཆེན་པོ་དང་། {ཡི་དགས་,ཡི་དྭགས་}དང་། ཤ་ཟ་དང་། གྲུལ་བུམ་དང་། སྲུལ་པོ་དང་། མི་དང་། མི་མ་ཡིན་པ་དེ་དག་ཐམས་ཅད་ཀྱིས་ཀྱང་ལེགས་སོ་ཞེས་བྱ་བ་གསོལ་ཏེ། བཅོམ་ལྡན་འདས་ལེགས་སོ་ལེགས་སོ། ། དེ་བཞིན་གཤེགས་པས་ད་ལྟར་སྔོན་མ་ཐོས་པའི་ཆོས་ཀྱི་འཁོར་ལོ་རབ་ཏུ་བསྐོར་བ། སེམས་ཀྱི་ཡོངས་སུ་རྟོག་པའི་ལས་ཀྱི་ སྒྲིབ་པ་ཡང་དག་པར་འབྱང་བ། འཁོར་བ་ལས་སྒྲོལ་བ། སྲིད་པར་འགྲོ་བ་ཐམས་ཅད་ཡོངས་སུ་འབྱང་བ། བདུད་རྩིའི་བྱང་གྲོལ་གྱིས་ཡང་དག་པར་ཚིམ་པར་མཛད་པ་ནི་མཆོག་ཏུ་ངོ་མཚར་ལགས་སོ། ། སེམས་ཅན་ཡོངས་སུ་སྨིན་པ་ཐམས་ཅད་ཀུན་ཏུ་ སྲུང་བ་དང་། རྙོག་པའི་དངོས་པོ་ཐམས་ཅད་ཡོངས་སུ་འབྱང་བ་དང་། ཤེས་རབ་མཆོག་གི་མིག་ཐོབ་པར་བགྱི་བ་དང་། དཀོན་མཆོག་གསུམ་གྱི་གདུང་རྒྱུན་མི་གཅད་པའི་སླད་དུ། དེ་བཞིན་གཤེགས་པས་ད་ལྟར་སངས་རྒྱས་ཀྱི་ཡུལ་ཐམས་ཅད་ སྣང་བར་མཛད་པའི་ཆོས་ཀྱི་ཆར་རབ་ཏུ་ཕབ་ལགས་ཏེ། དེ་བཞིན་གཤེགས་པ་ལ་བདག་ཅག་གིས་རྔོ་ཅི་ཐོགས་པར་མཆོད་པ་བགྱི་ལགས་སོ། །

བཅོམ་ལྡན་འདས་ལ་མཆོད་པའི་ལས་བྱ་བའི་ཕྱིར་ཏིང་ངེ་འཛིན་ལ་བརྩོན་པ་རྣམས་མ་གཏོགས་པར་ལྷ་ཐམས་ ཅད་ཅེས་བྱ་བ་ནས་ལུས་སྲུལ་པོའི་བར་གྱིས་ཀྱང་ལྷ་རྫས་ཀྱི་རོལ་མོའི་སྒྲ་དང་ཕེག་རྡོབ་པའི་སྒྲ་འབྱུང་བར་བྱེད་དོ། ། ལྷ་རྫས་ཀྱི་གསེར་གྱི་ཕྱེ་མའི་ཆར་མངོན་པར་རབ་ཏུ་ཕབ་བོ་ཞེས་བྱ་བ་ནས་ལྷ་རྫས་ཀྱི་མེ་ཏོག་དང་། སྤོས་དང་། བདུག་པ་དང་། རས་བཅོས་བུ་དང་། ཆོས་གོས་དང་། རྒྱན་དང་། ལྷ་རྫས་ཀྱི་མེ་ཏོག་ཕྲེང་གི་བར་གྱི་ཆར་མངོན་པར་རབ་ཏུ་ཕབ་བོ། ། བཅོམ་ལྡན་འདས་ཇི་ལྟར་ཉི་མ་ཤར་བ་ལ་ཡང་མཆོད་པའི་ལས་བྱ་བའི་ཕྱིར་རིན་པོ་ཆེའི་མེ་ཏོག་དང་། སྤོས་དང་། བདུག་པ་དང་། རས་ བཅོས་བུ་དང་། ཕྲེང་བ་རྣམས་གཏོར་ཏོ། ། འཕགས་པ་འདུས་པ་ཆེན་པོ་ཐེག་པ་ཆེན་པོའི་མདོ་ཉི་མའི་སྙིང་པོའི་ལེའུ་བཅུ་གཅིག་པ་ལས་ལས་འབྱང་བའི་ལེའུ་སྟེ་བཞི་པའོ། ། ། ། དེ་ནས་དེ་སྙེད་ཀྱི་ལྷའི་དབང་པོ་འཁོར་དང་བཅས་པ་ཐམས་ཅད་དང་། ཀླུའི་ དབང་པོ་འཁོར་དང་བཅས་པ་ཐམས་ཅད་དང་། གནོད་སྦྱིན་གྱི་དབང་པོ་འཁོར་དང་བཅས་པ་ཐམས་ཅད་དང་། ལྷ་མ་ཡིན་གྱི་དབང་པོ་དང་། ནམ་མཁའ་ལྡིང་གི་དབང་པོ་དང་། མི་འམ་ཅིའི་དབང་པོ་དང་།

ལྟོ་འཕྱེ་ཆེན་པོའི་དབང་པོ་དང་། {ཡི་དགས་,ཡི་དྭགས་}ཀྱི་ དབང་པོ་དང་། ཤ་ཟའི་དབང་པོ་འཁོར་དང་བཅས་པ་ཐམས་ཅད་དང་། ལུས་སྲུལ་པོའི་དབང་པོ་འཁོར་དང་བཅས་པ་ཐམས་ཅད་ཀྱིས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་རབ་ཏུ་བཏུད་ནས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་གང་ དང་གང་དུ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། དད་པ་དང་ལྡན་པའི་རིགས་ཀྱི་བུའམ། རིགས་ཀྱི་བུ་མོ་མི་སྡུག་པ་སྔོན་དུ་གཏོང་བ་ཚུལ་དེ་ལྟ་བུས་ཞེས་བགྱི་བ་ནས་འགོག་པའི་སྙོམས་པར་འཇུག་པའི་བར་གྱི་ཚུལ་གྱིས་ གནས་པར་བགྱིད་ལ། ཇི་ལྟར་སྔར་བཤད་པའི་དགེ་བའི་ཕྱོགས་ཡིད་ལ་བགྱིས་པས་གནས་པར་བགྱིད་ན་དད་པ་དང་ལྡན་པའི་རིགས་ཀྱི་བུ་མོའི་བར་འཁོར་དང་བཅས་པ་ཐམས་ཅད་ལ་ཡང་རང་གི་རིས་ཀྱི་སྟོན་པའི་འདུ་ཤེས་གཟུང་བར་བགྱིའོ། ། ལུས་དང་སེམས་དང་ཡིད་ཀྱིས་ སེམས་ཅན་ཐམས་ཅད་ལ་རིམ་གྲོའི་སྤྱོད་པ་བགྱིའོ། ། ཆོས་གོས་དང་། བསོད་སྙོམས་དང་། མལ་ཆ་དང་། ན་བའི་གསོས་སྨན་དང་། ཡོ་བྱད་རྣམས་ཀྱིས་མི་བྲེལ་བར་བགྱིའོ། ། ཀུན་ཏུ་འཁྲུག་པའི་འཇིགས་པ་{བཅྭ་,བཅོ་}ལྔ་ལས་ཡོངས་སུ་ཐར་བར་བགྱིའོ། །

{བཅྭ་,བཅོ་}ལྔ་གང་ཞེ་ན། ལུས་ཀྱི་ཀུན་ཏུ་འཁྲུག་པའི་འཇིགས་པ་ལས་ཡོངས་སུ་ཐར་བར་བགྱིའོ། ། བོང་བ་དང་། དབྱུག་གུ་དང་། མཚོན་ཆ་དང་། དུག་དང་། རྡོ་དང་། སེམས་ཅན་སྡང་བ་དང་། རྩུབ་པ་དང་། དད་པ་མ་མཆིས་པ་རྣམས་ལས་ཡོངས་སུ་ ཐར་བར་བགྱིའོ། ། ཁམས་ཀུན་ཏུ་འཁྲུག་པའི་འཇིགས་པ་ལས་བསྲུང་བར་བགྱིའོ། ། ཇི་ལྟར་འཐུན་པའི་བཟའ་བ་དང་། བཏུང་བ་དང་། སྨན་དང་། ཡོ་བྱད་ཀྱི་གཞི་ལས་རིམ་གྲོ་བ་དང་། ཉེ་དུ་དང་། སྦྱིན་པ་པོ་དང་། སྦྱིན་བདག་ཡོངས་སུ་མི་ཉམས་པའི་ཆོས་ ཅན་རྣམས་ནད་དང་དགྲའི་ཀུན་ཏུ་འཁྲུག་པའི་འཇིགས་པ་དང་། འབྱུང་པོ་ཐམས་ཅད་དང་། དགྲ་ཐམས་ཅད་ཀྱི་ཀུན་དུ་འཁྲུག་པའི་འཇིགས་པ་ལས་བསྲུང་བར་བགྱིའོ། ། དུག་གི་ཀུན་ཏུ་འཁྲུག་པའི་འཇིགས་པ་དང་། རྒྱལ་པོའི་ཀུན་ཏུ་འཁྲུག་པའི་འཇིགས་པ་དང་། ནང་གི་དམག་ཚོགས་དང་། ཕ་རོལ་གྱི་དམག་ཚོགས་དང་། མུ་གེའི་ཀུན་ཏུ་འཁྲུག་པའི་འཇིགས་པ་ལས་ཡོངས་སུ་བསྲུང་བར་བགྱི་སྟེ། ཀུན་ཏུ་འཁྲུག་པའི་འཇིགས་པ་{བཅྭ་,བཅོ་}ལྔ་པོ་དེ་དག་གོ། ། གང་དག་ད་ལྟར་དང་མ་འོངས་པའི་དུས་ན་དམ་པའི་ཆོས་ལྟར་བཅོས་ པ་ལ་གནས་པའི་བར་གྱི་དགེ་སློང་དང་། དགེ་སློང་མ་དང་། དགེ་བསྙེན་དང་།

དགེ་བསྙེན་མ་དང་། དད་པ་དང་ལྡན་པའི་རིགས་ཀྱི་བུའམ། རིགས་ཀྱི་བུ་མོ་དེ་དག་དང་། གང་དག་མི་སྡུག་པ་སྔོན་དུ་གཏོང་བའི་ཚུལ་དེ་ལྟ་བུས་ཞེས་བགྱི་བ་ནས་འགོག་པའི་ སྙོམས་པར་འཇུག་པའི་བར་གྱི་ཚུལ་གྱིས་གནས་པར་བགྱིད་ལ། ཇི་སྐད་སྔར་བཤད་པ་བཞིན་ནམ་གྱི་ཆ་སྟོད་དང་ནམ་གྱི་ཆ་སྨད་ལ་མི་ཉལ་བར་སྦྱོར་བ་ལ་རྗེས་སུ་བརྩོན་པར་གནས་པར་བགྱིད་པ་འཁོར་དང་བཅས་པ་དེ་དག་ཐམས་ཅད་དང་། གང་དུ་གནས་པའི་ཡུལ་ འཁོར་དང་། གྲོང་རྡལ་དང་། ལྗོངས་དང་། རི་འོར་དང་། གྲོང་དང་། རྒྱལ་པོའི་ཕོ་བྲང་འཁོར་དེ་དག་དང་། དགོན་པའི་གནས་དེ་དག་རང་གི་རིས་ཀྱི་ཁྱིམ་ཁོལ་གྱི་ཁྱིམ་གྱི་བར་བཞིན་དུ་གཟུང་བར་བགྱིའོ། ། ཀུན་ཏུ་འཁྲུག་པའི་འཇིགས་ པ་{བཅྭ་,བཅོ་}ལྔ་པོ་དེ་དག་ལས་ཡོངས་སུ་བསྲུང་བར་བགྱིའོ། ། སླར་བཟློག་པར་བགྱིའོ། ། གང་དུ་དེ་ལྟ་བུའི་དགེ་བ་ལ་བརྩོན་པ་ཐ་ན་གང་ཟག་གཅིག་ཅིག་གནས་པར་བགྱིད་ཀྱང་རུང་། དེར་ཐ་ན་ཉིན་ཞག་གཅིག་ཅིག་གནས་པར་བགྱིད་ཀྱང་རུང་སྟེ། ཡུལ་འཁོར་ དེ་དག་རང་གི་རིས་ཀྱི་ཁྱིམ་ཁོལ་གྱི་ཁྱིམ་གྱི་བར་བཞིན་དུ་གཟུང་བར་བགྱིའོ། ། ཀུན་ཏུ་འཁྲུག་པའི་འཇིགས་པ་{བཅྭ་,བཅོ་}ལྔ་ལས་ཡོངས་སུ་བསྲུང་བར་བགྱིའོ།

། ཡོངས་སུ་བསྐྱང་བར་བགྱིའོ། ། སྦྱིན་པ་པོ་དང་། སྦྱིན་བདག་རྒྱལ་རིགས་དང་། བྲམ་ཟེ་དང་། རྗེའུ་ རིགས་དང་། དམངས་རིགས་དང་། སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དེ་དག་ཀྱང་རང་གི་རིས་ལགས་པར་གཟུང་བར་བགྱིའོ། ། ཀུན་ཏུ་འཁྲུག་པའི་འཇིགས་པ་{བཅྭ་,བཅོ་}ལྔ་པོ་དེ་དག་ལས་རྗེས་སུ་བསྲུང་བར་བགྱིའོ། ། ཡོངས་སུ་བསྐྱང་བར་བགྱིའོ། ། གང་དག་དེ་ལྟ་བུའི་དགེ་བའི་ཕྱོགས་ལ་བརྩོན་པའི་གང་ཟག་རྣམས་ལ་གནས་ཁང་དང་། གཙུག་ལག་ཁང་དང་། ཀུན་དགའ་ར་བ་དང་། གནས་དང་། ཆོས་གོས་དང་། བསོད་སྙོམས་དང་། མལ་ཆ་དང་། ན་བའི་གསོས་སྨན་དང་། ཡོ་བྱད་རྣམས་ཀྱིས་ བཀུར་སྟི་དང་། མཆོད་པ་དང་། རིམ་གྲོ་བགྱིད་པ་དག་ཀྱང་ཀུན་ཏུ་འཁྲུག་པའི་འཇིགས་པ་དེ་ལྟ་བུ་དེ་དག་ལས་བསྲུང་བར་བགྱིའོ། ། ཡོངས་སུ་བསྐྱང་བར་བགྱིའོ། ། གང་ཡང་བུད་མེད་སྦྲུམ་པ་གང་ཟག་དེ་ལྟ་བུ་དག་ལ་བཀུར་སྟི་བགྱིད་པ་དེ་ལ་དུས་རྟག་ཏུ་རྣམ་པར་ མི་འཚེ་བའི་ཆོས་ཅན་དང་། ནད་མ་མཆིས་པ་དང་། མཆོག་ཏུ་དགའ་བ་མང་བར་བདག་ཅག་གིས་བསྲུང་བར་བགྱིའོ། ། ཡོངས་སུ་བསྐྱང་བར་བགྱིའོ། །

ཡང་གང་དང་གང་དུ་དེ་ལྟ་བུར་ཚུལ་བཞིན་ཡིད་ལ་བགྱིད་པ་ལ་བརྩོན་པའི་གང་ཟག་ལ་སྙིང་བརྩེ་བར་གསོལ་ བ་འདེབས་པར་བགྱིད་པ་དག་དང་། དེའི་མིང་བརྗོད་པར་བགྱིད་པ་དག་དང་། སྐུད་པ་བཏགས་པའམ། ཀུན་ཏུ་བསྲུང་བ་བགྱིད་པའམ། མི་དགེ་བ་ལས་སླར་བཟློག་པའམ། དགེ་བ་ལ་སྦྱོར་དུ་སྩལ་བ་འང་རུང་སྟེ། སེམས་ཅན་དེ་དག་ཀྱང་ཀུན་ ཏུ་འཁྲུག་པའི་འཇིགས་པ་{བཅྭ་,བཅོ་}ལྔ་པོ་དེ་དག་ལས་བདག་ཅག་གིས་རྗེས་སུ་བསྲུང་བར་བགྱིའོ། ། ཡོངས་སུ་བསྐྱང་བར་བགྱིའོ། ། མི་དང་མི་མ་ལགས་པའི་སེམས་ཅན་གང་དག་དེ་ལྟ་བུའི་དགེ་བའི་ཕྱོགས་ལ་ཚུལ་བཞིན་དུ་ཡིད་ལ་བགྱིད་པར་བརྩོན་པའི་གང་ཟག་ རྣམས་ཀྱི་ཚིག་མི་ཉན་ཞིང་། མི་བགྱི་བར་སེམས་པ་དག་དང་། གང་དག་དེ་དག་ལ་གཤེ་བར་བགྱིད་པའམ། ཕན་པ་མ་ལགས་པ་དང་། དོན་མ་ལགས་པ་དང་། བར་དུ་ཉམས་པ་དང་། གནོད་སེམས་སུ་བགྱི་བའི་སླད་དུ་རྟུལ་བར་བགྱིད་པའི་སེམས་ཅན་ དེ་དག་གི་ཐད་དུ་བདག་ཅག་གིས་མི་དང་མི་མ་ཡིན་པ་དག་གཏང་བར་བགྱིའོ། ། དེ་ལ་བཟོད་པར་མི་བགྱིའོ། ། གང་དག་དེ་ལྟ་བུའི་དགེ་བའི་ཕྱོགས་ལ་ཚུལ་བཞིན་དུ་ཡིད་ལ་བགྱིད་པར་བརྩོན་པའི་གང་ཟག་རྣམས་ཀྱི་ཚིག་མི་མཉན་ཞིང་མི་བགྱི་བར་སེམས་པ་དག་དང་།

གང་དག་དེ་དག་ལ་གཤེ་བར་བགྱིད་པའམ། དོན་མ་ལགས་པ་དང་། ཕན་པ་མ་ལགས་པ་དང་། གནོད་སེམས་དང་། བར་དུ་ཉམས་པར་བགྱི་བའི་སླད་དུ་རྟུལ་བར་བགྱི་བའི་སེམས་ཅན་དེ་དག་ནི་གནོད་པ་{བཅྭ་,བཅོ་}ལྔ་པོ་འདི་དག་དང་ལྡན་པར་འགྱུར་ལགས་སོ། ། {བཅྭ་,བཅོ་}ལྔ་གང་ཞེ་ན། མྱུར་དུ་ནད་ཀྱི་སྡུག་བསྔལ་དང་། ལོངས་སྤྱོད་ཀྱི་སྡུག་བསྔལ་དང་། ཉེ་བར་སྤྱོད་པ་ལས་ཡོངས་སུ་ཉམས་པའི་སྡུག་བསྔལ་དང་། ཡན་ལག་དང་ཉིང་ལག་གཅོད་པའི་སྡུག་བསྔལ་དང་། འཁོར་སྡུག་པ་དང་བྲལ་བའི་སྡུག་བསྔལ་དང་། དབང་ཕྱུག་ལས་རྒུད་པའི་སྡུག་བསྔལ་དང་། གནས་ཀྱི་སྡུག་བསྔལ་དང་། དགྲས་རྫི་བའི་སྡུག་བསྔལ་དང་། རྟག་ཏུ་སེམས་ཀུན་ཏུ་འཁྲུག་པའི་སྡུག་བསྔལ་དང་། ཡུལ་འཁོར་གྱི་སྡུག་བསྔལ་དང་། རྒྱལ་རིགས་ཀྱི་ཀུན་ཏུ་འཁྲུག་པའི་སྡུག་བསྔལ་དང་། ཆོམ་རྐུན་གྱི་ཀུན་ཏུ་འཁྲུག་པའི་སྡུག་བསྔལ་དང་། བུད་མེད་ཀྱི་ཀུན་ཏུ་འཁྲུག་པའི་སྡུག་བསྔལ་དང་། མྱུར་དུ་ཚེ་ཟད་པ་དང་། འཆི་བའི་སྡུག་བསྔལ་ལགས་སོ། ། སེམས་ཅན་དེ་དག་ནི་གནོད་པ་དེ་དག་དང་མྱུར་དུ་ལྡན་པར་འགྱུར་ལགས་ སོ། །

སེམས་ཅན་གང་དག་དེ་ལྟ་བུའི་ཚུལ་བཞིན་དུ་ཡིད་ལ་བགྱིད་པ་ལ་བརྩོན་པ་རྣམས་ཀྱི་ཚིག་མི་མཉན་ཞིང་། མི་བགྱིད་པར་སེམས་པ་དང་། དེ་དག་ལ་ཡང་གཤེ་བར་བགྱིད་པའམ། དོན་མ་ལགས་པ་དང་། ཕན་པ་མ་ལགས་པ་དང་། གནོད་ སེམས་དང་། བར་དུ་ཉམས་པར་བགྱི་བའི་སླད་དུ་བརྟུལ་བར་བགྱིད་པའི་སེམས་ཅན་དེ་དག་སྐྲག་ནས་བདག་ཅག་ལ་སྐྱབས་སུ་མཆིས་ཀྱང་རུང་། གསང་སྔགས་སྣ་ཚོགས་སྒྲུབ་པའི་ཡོ་བྱད་ཀྱིས་རིམ་གྲོ་བགྱི་བར་བརྩོན་པར་བགྱིས་སུ་ལགས་ཀྱང་དེ་དག་གི་དོན་ དུ་བདག་ཅག་གིས་རིམ་གྲོའི་བསྙེན་བཀུར་བླང་བར་མི་བགྱིའོ། ། དེ་དག་གི་སྐྱབས་མི་བགྱིའོ། ། དེ་དག་གི་བགྱི་བ་མི་སྒྲུབ་པོ། ། དོན་བསྒྲུབ་པར་མི་བགྱིའོ། ། ཕུང་ཀྲོལ་གྱི་ལྷའམ། ཀླུ་ནས་ལུས་སྲུལ་པོའི་བར་སྡང་བ་སྙིང་བརྩེ་བ་མ་མཆིས་པ། བགྱིས་པ་མི་ གཟོ་བ། འཇིག་རྟེན་ཕ་རོལ་ལ་འཇིགས་པར་མི་ལྟ་བ་གང་དག་འབྱུང་བར་འགྱུར་བ་དེ་དག་དེ་ལྟ་བུའི་དགེ་བའི་ཕྱོགས་ལ་ཚུལ་བཞིན་དུ་ཡིད་ལ་བགྱིད་པར་བརྩོན་པ་དགོན་པ་དང་། ནགས་དང་། བས་མཐའ་དང་། རི་ཁྲོད་དང་། དུར་ཁྲོད་དང་། ཤིང་དྲུང་དང་། ཀུན་ དགའི་ར་བ་དང་། གཙུག་ལག་ཁང་དང་། གནས་ཁང་དང་།

འཆག་སའི་གནས་ན་གནས་པའི་གང་ཟག་རྣམས་ཀྱི་ཐ་དད་དུ་སྡང་བའི་སེམས་དང་ལྡན་པ་དང་། རྣམ་པར་ཐོ་འཚམ་པའི་སེམས་དང་ལྡན་པ་དང་ཉེ་བར་མཆི་བར་བགྱིད་ཅིང་། དེ་ལྟ་བུའི་གང་ཟག་ རྣམས་ཀྱི་ལུས་ཀུན་ཏུ་འཁྲུག་པའམ་སེམས་ཀུན་ཏུ་འཁྲུག་པར་བགྱིད་ལ། མདངས་འཕྲོག་པར་བགྱིད་ཅིང་ཐ་ན་དེ་ལྟ་བུའི་གང་ཟག་རྣམས་ཀྱི་རིམ་གྲོ་པ་དང་། སྦྱིན་བདག་གང་དག་ལགས་པ་དེ་དག་ལ་ཡང་ལྷའམ། ཀླུ་ནས་ལུས་སྲུལ་པོའི་བར་སྡང་བ། བགྱིས་པ་མི་གཟོ་ བ། འཇིག་རྟེན་ཕ་རོལ་ལ་འཇིགས་པར་མི་ལྟ་བ་དག་གིས་ལུས་ཀུན་དུ་འཁྲུག་པ་དང་། སེམས་ཀུན་ཏུ་འཁྲུག་པར་བགྱིད་ཅིང་མདངས་འཕྲོག་པར་བགྱིད་ལ། སྔོན་གྱི་ལས་ཀྱི་རྐྱེན་མ་གཏོགས་ལགས་ཏེ། གལ་ཏེ་ལྷ་དང་། ཀླུ་ནས་ལུས་སྲུལ་པོའི་བར་དེ་དག་ བདག་ཅག་གིས་སོ་སོར་མ་བཟློག་གམ། སླར་མ་བཟློག་གམ། ནོངས་པ་ཅི་མཆིས་པའི་ཆད་པ་ལ་མ་བཀོད་པར་གྱུར་ན་དུས་གསུམ་དུ་གཤེགས་པའི་དེ་བཞིན་གཤེགས་པ་ཐམས་ཅད་བདག་ཅག་གིས་བསླུས་པར་གྱུར་ཅིག ། བདག་ཅག་འཁོར་བ་ན་འཁོར་བའི་ ཚེ་དེ་ལྟ་བུའི་ཉན་ཐོས་ཀྱི་སྤྱོད་ཡུལ་ལམ། རང་རྒྱལ་བའི་སྤྱོད་ཡུལ་ལམ། དེ་བཞིན་གཤེགས་པའི་སྤྱོད་ཡུལ་གྱི་ཡང་རུང་སྟེ་སྣོད་དུ་མ་གྱུར་ཅིག །

བྱང་གྲོལ་གྱི་བདེ་བ་ཐོབ་པར་མ་གྱུར་ཅིག ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དག་འདི་ལྟར་ ཡང་ཁྱེད་དུས་གསུམ་དུ་གཤེགས་པའི་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་ཚུལ་འབར་བར་བྱེད་པ་དང་། དཀོན་མཆོག་གསུམ་གྱི་གདུང་རྒྱུན་མི་གཅད་པར་བྱ་བའི་ཕྱིར་ཞུགས་པ་ལེགས་སོ་ལེགས་སོ། ། ཁྱེད་ཀྱིས་དེ་ལྟར་བྱོས་ཤིག ། དེ་ལྟར་བྱས་ན་དུས་གསུམ་དུ་ གཤེགས་པའི་དེ་བཞིན་གཤེགས་པ་ཐམས་ཅད་ལ་ཁྱེད་ཀྱིས་མཆོད་པ་དང་། རིམ་གྲོ་བྱས་པར་འགྱུར་རོ། ། རིགས་ཀྱི་བུ་དག་གང་ལ་ལ་བརྩོན་པ་དང་བརྟུལ་བ་དེ་ལྟ་བུས་ལེགས་པར་གསུངས་པའི་ཆོས་འདུལ་བ་རྗེས་སུ་སྲུང་བར་བྱེད་པ་དང་། དེ་ལྟར་ཞུགས་ཤིང་ཆོས་ ཀྱིས་གནས་པའི་གང་ཟག་རྣམས་ལ་རྗེས་སུ་སྲུང་བར་བྱེད་པའི་རིགས་ཀྱི་བུ་དེ་འཁོར་བར་འཁོར་བ་ན་དཔལ་དམ་པ་ལ་ཉེ་བར་སྤྱོད་པར་འགྱུར་རོ། ། དེ་ལ་འཁོར་བའི་སྡུག་བསྔལ་འབྱུང་བར་མི་འགྱུར་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་ པར་འཚང་རྒྱ་བར་འགྱུར་རོ། ། དེ་ལྟ་བས་ན་སྡུག་བསྔལ་དང་མི་འཐུན་པ་བདེ་བ་འདོད་པ་ཁྱེད་ཀྱིས་དེ་ལྟར་བྱོས་ཤིག །

འདི་ལྟར་ཁྱེད་ལེགས་པར་བྱས་པའི་ལས་ཀྱི་མཐའ་ལ་ཞུགས་པ་ནི་ཁྱེད་ཡང་ལེགས་སོ་ལེགས་སོ། ། ཡང་དེའི་ཚེ་མི་མ་ཡིན་པའི་འབྱུང་པོ་མདངས་དང་ ཁྲག་ཟ་བ་གང་དག་ཡིན་པ་གྲངས་མེད་དཔག་ཏུ་མེད་པ་དེ་དག་གིས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་བདག་ཅག་ནི་མི་མ་ལགས་པ། མདངས་འཚལ་བ། ཤ་ཁྲག་འཚལ་བ་དག་ལགས་ཏེ། བདག་ཅག་གིས་དེ་ བཞིན་གཤེགས་པའི་ཉན་ཐོས་རྣམས་ལ་རྣམ་པར་ཐོ་བཙམ་པར་མི་བགྱིའོ། ། བཙུན་པ་བཅོམ་ལྡན་འདས་ད་ལྟར་བཅོམ་ལྡན་འདས་ཀྱིས་ཇི་སྐད་བསྟན་པ་བཞིན་ཉན་ཐོས་གང་དག་དེ་ལྟ་བུའི་མི་སྡུག་པའི་སྦྱོར་བ་རྣལ་འབྱོར་ཡིད་ལ་བགྱིད་པས་གནས་པའི་གང་ཟག་ དེ་ལྟ་བུ་དག་གལ་ཏེ་བདག་ཅག་གིས་རྣམ་པར་ཐོ་བཙམས་པར་གྱུར་ན་བདག་ཅག་དད་པ་ཅན་མ་ལགས་པར་གྱུར་ཅིག ། དབང་པོ་ཐམས་ཅད་ཀྱི་སྤྱོད་ཡུལ་རྣམས་སུ་མཆི་བར་མི་ནུས་པར་གྱུར་ཅིག ། གང་ཟག་དེ་ལྟ་བུ་དག་ནི་བདག་ཅག་གིས་ཀྱང་བསྲུང་བར་བགྱིའོ། ། དེ་དག་གི་རིམ་གྲོ་པ་དང་སྦྱིན་བདག་གང་དག་ལགས་པ་དེ་དག་ཀྱང་བསྲུང་བར་བགྱིའོ། ། ཡོངས་སུ་བསྐྱང་བར་བགྱིའོ། །

དེ་བཞིན་གཤེགས་པའི་ཉན་ཐོས་ཆོས་ཀྱིས་གནས་པ་མི་སྡུག་པའི་སྦྱོར་བ་ཡིད་ལ་བགྱིད་པས་གནས་པ་དག་ཡང་དག་པར་འཛིན་པར་ བགྱིད་པ་གཙུག་ལག་ཁང་དང་། གནས་དང་། ཀུན་དགའི་ར་བ་དང་། ཆོས་གོས་དང་། བསོད་སྙོམས་དང་། མལ་སྟན་དང་། བྲོ་འཚལ་བའི་གསོས་སྨན་གྱི་ཡོ་བྱད་རྣམས་ཀྱིས་ཡང་དག་པར་འཛིན་པར་བགྱིད་པ་གང་དག་ལགས་པ་དེ་དག་བདག་ཅག་གིས་ བསྲུང་བ་དང་། བསྐྱབ་པ་དང་། སྦ་བར་བགྱིའོ། ། ཡོངས་སུ་བསྐྱང་བར་བགྱིའོ། ། བཅོམ་ལྡན་འདས་ཀྱིས་བཀའ་སྩལ་པ། བཞིན་{བཟངས་,བཟང་}དག་ལེགས་སོ་ལེགས་སོ། ། ཁྱེད་ཀྱིས་དེ་ལྟར་བྱོས་ཤིག ། ཡང་དེའི་ཚེ་སའི་ལྷ་མོ་བརྟན་མས་འདི་སྐད་ཅེས་ གསོལ་ཏོ། ། བཙུན་པ་བཅོམ་ལྡན་འདས། བཅོམ་ལྡན་འདས་ཀྱི་ཉན་ཐོས་ཆོས་ཀྱིས་གནས་པ་དེ་ལྟ་བུའི་མི་སྡུག་པའི་སྦྱོར་བས་རྣལ་འབྱོར་ལ་བརྩོན་པར་གནས་པར་བགྱིད་པ་གང་དག་ལགས་པ་དེ་དག་གི་ལུས་ལ་བདག་གིས་རྒྱ་ཆེན་པོའི་སའི་བཅུད་ཀྱི་མདངས་ གཏང་བར་བགྱི་སྟེ། དེས་ཆོས་ཀྱིས་གནས་པ་དེ་ལྟ་བུའི་ཏིང་ངེ་འཛིན་ལ་མངོན་པར་བརྩོན་པ་དེ་དག་ཤིན་ཏུ་གཟི་བརྗིད་དང་ལྡན་པ་དང་། ཁ་དོག་དང་ལྡན་པ་དང་། དྲན་པ་དང་ལྡན་པ་དང་། བརྩོན་འགྲུས་དང་ལྡན་པ་དང་།

ཤེས་རབ་དང་ལྡན་པར་འགྱུར་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ། སྦྱིན་པ་ཆེན་པོ་དང་ལྡན་མ་གང་ཁྱོད་ངའི་སྲས། ཐུགས་ཀྱི་སྲས། ཞལ་ནས་སྐྱེས་པ། ཆོས་དང་ལྡན་པ། ཆོས་ཀྱི་སྤྲུལ་པ་དག་དེ་ལྟ་བུའི་བསོད་སྙོམས་ཀྱིས་ཡང་དག་པར་ཚིམ་པར་བྱེད་པ་ལེགས་སོ་ལེགས་སོ། ། སྦྱིན་པ་ཆེན་པོ་དང་ཡང་དག་པར་ལྡན་པ་དེས་ཁྱོད་ཐེག་པ་ཆེན་པོ་ཡོངས་སུ་རྫོགས་པར་བྱེད་པར་འགྱུར་རོ། ། ཡང་དེའི་ཚེ་དཔལ་ལྷ་མོ་ཆེན་མོས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་བདག་གིས་ཀྱང་དེ་ལྟ་བུའི་ཆོས་ཀྱིས་གནས་པ་རྣམས་ཀྱིས་སྦྱིན་ པ་པོ་དང་། སྦྱིན་བདག་གང་དག་ལགས་པའི་སྦྱིན་པ་པོ་དང་། སྦྱིན་བདག་དེ་དག་གི་དགའ་སྟོན་དང་། ནོར་དང་། འབྲུ་དང་། ཤིང་ཏོག་དང་། ཉེ་བར་སྤྱོད་པ་དང་། ལོངས་སྤྱོད་རྣམས་མ་ཚང་བ་མ་མཆིས་པར་བགྱིའོ། ། མི་སྡུག་པའི་སྦྱོར་བས་ཞེས་ བགྱི་བ་ནས་འགོག་པའི་སྙོམས་པར་འཇུག་པ་ཡིད་ལ་བགྱིད་པའི་བར་གྱིས་ཉིན་མཚན་འདའ་བར་བགྱིད་པ་གང་དག་ལགས་པ་དེ་དག་གཙུག་ལག་ཁང་དང་། གཞི་དང་། གནས་དང་། ཆོས་གོས་དང་། བསོད་སྙོམས་དང་། མལ་སྟན་དང་། བྲོ་འཚལ་བའི་ གསོས་སྨན་གྱི་ཡོ་བྱད་རྣམས་ཀྱིས་འཛིན་པར་བགྱིད་པ་དང་།

ཡང་དག་པར་འཛིན་པར་བགྱིད་པ་དང་། ཡོངས་སུ་སྐྱོང་བར་བགྱིད་པ་དེ་དག་གི་ཡོ་བྱད་ཐམས་ཅད་ཕུན་སུམ་ཚོགས་པ་དང་། ཉེ་བར་སྤྱོད་པ་དང་། ལོངས་སྤྱོད་པ་དང་། ལུས་དང་སེམས་ཀྱི་བདེ་ བ་དང་། ཡིད་བདེ་བ་དང་། མཆོག་ཏུ་དགའ་བ་མང་བར་བདག་གིས་ཡང་དག་པར་གཟུང་བར་བགྱིའོ། ། སྣོད་དུ་གྱུར་པའི་སྦྱིན་གནས་རྣམས་དང་མ་བྲལ་ཞིང་ལྷན་ཅིག་འགྲོགས་སུ་སྩལ་བར་བགྱིའོ། ། ཆོས་ལ་མངོན་པར་དགའ་བའི་སེམས་དང་ལྡན་པ་ དང་། སྙིང་བརྩེ་བའི་སེམས་དང་ལྡན་པ་དང་། ལོག་པར་མི་ལྟུང་བའི་སེམས་དང་ལྡན་པ་དང་། བྱམས་པའི་སེམས་དང་ལྡན་པ་དང་། སྙིང་རྗེའི་སེམས་དང་ལྡན་པ་དང་། མི་ཉམས་པའི་ཆོས་ཅན་དུ་ཡང་དག་པར་བསྒྲུབ་པར་བགྱིའོ། ། བཅོམ་ལྡན་འདས་ཀྱིས་བཀའ་སྩལ་པ། སྦྱིན་པ་ཆེན་པོ་ལ་ཡང་དག་པར་རྟེན་པ་ལེགས་སོ་ལེགས་སོ། ། ཁྱོད་བརྩོན་པའི་བརྟུལ་བ་དེས་ཐེག་པ་ཆེན་པོ་རྣམ་པར་འཕེལ་བར་བྱེད་པར་འགྱུར་རོ། ། ཡང་དེའི་ཚེ་གསང་བ་པའི་བདག་པོ་ལག་ན་རྡོ་རྗེས་འདི་སྐད་ཅེས་གསོལ་ ཏོ། ། བཙུན་པ་བཅོམ་ལྡན་འདས་འདུས་པ་ཆེན་པོའི་ལེའུ་འདི་བཤད་པ་ན། བཅོམ་ལྡན་འདས་ཀྱིས་བསྟན་པ་ཡང་དག་པར་འཛིན་པ་ཡོངས་སུ་སྐྱོང་བ་དང་།

ཡོ་བྱད་དང་ཡང་དག་པར་ལྡན་པའི་སྦྱིན་པ་པོ་དང་། སྦྱིན་བདག་མང་པོ་གང་དག་མཆིས་པའི་རྐྱེན་དེས་ སངས་རྒྱས་ཀྱི་ཞིང་འདིར་ཆོས་ཀྱི་ཚུལ་ལ་ཡུན་རིང་དུ་འབར་ཞིང་མི་ཉམས་པའི་ཆོས་ཅན་དུ་འགྱུར་ལགས་སོ། ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་སྨྲས་པ། ཀྱེ་གསང་བ་པའི་བདག་པོ་ཅི་ནམ་མཁའ་ཡོངས་སུ་ཉམས་པ་མངོན་ནམ། སྨྲས་པ། གནས་ ལ་སྒྲོ་བཏགས་པ་མེད་པའི་ཕྱིར་རོ། ། སྨྲས་པ། ཅི་ཆོས་རྣམས་ཀྱི་ཡང་དག་པར་འདུ་བ་མངོན་ནམ། སྨྲས་པ། ཅི་ཡང་དག་པའི་མཐར་ཐུག་པའི་ཕྱིར་མི་མངོན་ནོ། ། སྨྲས་པ་ཅི་ཡང་དག་པའི་མཐའ་དང་ནམ་མཁའ་མི་འདྲ་བར་མངོན་ནམ། སྨྲས་པ། འདི་ནི་ཐ་མི་དད་པ་ ཉིད་དེ། ཐ་མི་དད་པ་ཉིད་ཀྱི་ཕྱིར་མི་འདྲ་བའོ། ། སྨྲས་པ་ཅི་ནམ་མཁའ་དང་ཆོས་རྣམས་མི་འདྲའམ། སྨྲས་པ་ཅི་མི་གཡོ་བ་དང་མི་སྐྱེ་བའི་ཆོས་ཀྱི་དབྱིངས་སུ་འཇུག་པས་མི་འདྲ་བ་མེད་པ་ཉིད་དོ། ། སྨྲས་པ་རིགས་ཀྱི་བུ་ཅི་འདུས་བྱས་དང་འདུས་མ་བྱས་ཀྱི་ཆོས་རྣམས་ཀྱི་ཐ་ དད་པ་ཉིད་མི་མངོན་ནམ། སྨྲས་པ།

ཇི་ལྟར་ཡང་དག་པའི་མཐའ་དང་དེ་བཞིན་ཉིད་ཐ་མི་དད་པ་ཉིད་ཡིན་པ་དེ་བཞིན་དུ་འདུས་བྱས་ཀྱི་ཆོས་རྣམས་ནམ་མཁར་སྒྲོ་བཏགས་པ་ཉིད་ཀྱི་ཕྱིར་ཐ་མི་དད་པ་ཉིད་དོ། ། སྨྲས་པ་ཅི་ཡང་དག་པའི་མཐའ་དེ་བཞིན་དུ་འདུས་བྱས་ཀྱི་ཆོས་རྣམས་ ཡིན་ནམ། འོན་ཏེ་འདུས་མ་བྱས་ཀྱི་ཆོས་རྣམས་ཡིན། སྨྲས་པ། སྟོང་པ་ཉིད་སྒྲོ་བཏགས་པ་ཉིད་ཀྱི་ཕྱིར་ཡང་དག་པའི་མཐའ་དང་། དེ་བཞིན་ཉིད་དུ་འདུས་བྱས་དང་འདུས་མ་བྱས་དང་ཡང་དག་པར་ལྡན་པ་མ་ཡིན་ནོ། ། ཡང་སྨྲས་པ། ཅི་སྟོང་པ་ཉིད་དུ་ཡང་དག་ པར་འདུ་བ་ཡིན་ནམ། སྨྲས་པ། ཐེར་ཟུག་ཏུ་གནས་པ་མ་ཡིན་པ་དང་། རང་བཞིན་སྟོང་པ་ཉིད་དང་། འཇིག་པ་མེད་པ་ཉིད་ཀྱི་ཕྱིར་ཆོས་ཐམས་ཅད་ཡང་དག་པར་འདུ་བ་སྟོང་པ་ཉིད་དོ། ། འདི་ལ་གང་སྟོང་པ་ཉིད་ཅེས་བྱ་བའི་དངོས་པོ་ཡང་མི་དམིགས་སོ། ། རིགས་ཀྱི་བུ་ཇི་ལྟར་ངོ་བོ་ཉིད་ངོ་བོ་ཉིད་ཀྱིས་སྟོང་པ་དང་། མཚན་གྱི་གཞི་མཚན་གྱི་གཞིས་སྟོང་པ་དང་། མཚན་གྱི་གཞི་མེད་པ་མཚན་གྱི་གཞིས་སྟོང་པ་ཡིན་པ་དེ་བཞིན་དུ་ཚུལ་དེས་ཆོས་ཐམས་ཅད་ཤེས་པར་བྱའོ། ། དེ་ཅིའི་ཕྱིར་ཞེ་ན། དེ་ལྟར་བརྗོད་དུ་མེད་པའི་ཕྱིར་ ཆོས་ཐམས་ཅད་སྟོང་པ་ཉིད་ཀྱི་ཕྱིར་རོ། །

འདི་ལྟར་ཆོས་ཐམས་ཅད་ཀྱི་དེའི་ངོ་བོ་ཉིད་ཉན་ཐོས་རྣམས་ཀྱིས་བྱས་པ་མ་ཡིན་ནོ། ། རང་རྒྱལ་བ་རྣམས་ཀྱིས་མ་ཡིན་ནོ། ། དེ་བཞིན་གཤེགས་པ་རྣམས་ཀྱིས་མཛད་པ་མ་ཡིན་ཏེ། དེ་ལྟར་ཡང་དག་པའི་མཐའ་དང་། དེ་ བཞིན་ཉིད་དང་། འདུས་བྱས་དང་། འདུས་མ་བྱས་ཀྱི་ཆོས་ཉིད་ཐམས་ཅད་ནམ་མཁའ་དང་ཡང་དག་པར་ལྡན་པ་ཉིད་ཀྱི་ཕྱིར་མི་འདྲ་བ་མེད་པ་ཉིད་ནི་ཐ་མི་དད་པ་ཡིན་པར་ཤེས་པར་བྱའོ། ། བསྟན་པ་འདི་བཤད་པ་ན་སྔོན་སྟོང་པ་ཉིད་ཀྱི་ཚུལ་ལ་ཡོངས་སུ་སྦྱང་བ་བྱས་པའི་སེམས་ ཅན་དཔག་ཏུ་མེད་པ་ནི་སྔོན་གྱི་མི་དགེ་བའི་ལས་ཀྱི་སྒྲིབ་པ་ཟད་ཅིང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་ཐོབ་པར་གྱུར་ཏོ། ། སེམས་ཅན་ཁྲག་ཁྲིག་ཕྲག་དགུ་བཅུ་རྩ་གཉིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་ཤིང་ཕྱིར་ མི་ལྡོག་པའི་ཆོས་རྣམས་ལ་གནས་པར་གྱུར་ཏོ། ། འཕགས་པ་འདུས་པ་ཆེན་པོ་ཐེག་པ་ཆེན་པོའི་མདོ། ཉི་མའི་སྙིང་པོའི་ལེའུ་བཅུ་གཅིག་པ་ལས་ཀུན་ཏུ་བསྲུང་བའི་ལེའུ་སྟེ་ལྔ་པ་རྫོགས་སོ། ། ། ། ཡང་དེའི་ཚེ་རྒྱལ་པོ་གཟུགས་ཅན་སྙིང་པོ་དགའ་བ་དང་ མཆོག་ཏུ་དགའ་བ་དམ་པ་སྐྱེས་ཏེ་འདི་སྐད་ཅེས་གསོལ་ཏོ། །

བཙུན་པ་བཅོམ་ལྡན་འདས་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གཏན་ལ་མངོན་པར་བརྩོན་པ་རྣམས་ཀྱིས་སངས་རྒྱས་ཀྱི་ཞིང་མི་མཇེད་གཏམས་ཞིང་སྔོན་མ་ མཐོང་མ་ཐོས་པའི་སྣང་བ་ཆེན་པོས་ཁྱབ་པ་དེ་ལྟ་བུ་ནི་ངོ་མཚར་ལགས་སོ། ། བཙུན་པ་བདེ་བར་གཤེགས་པ་མཆོག་ཏུ་ངོ་མཚར་ལགས་ཏེ། སངས་རྒྱས་ཀྱི་ཞིང་འདི་དང་མཚམས་གཞན་གྱི་ཁོར་ཡུག་ཆེན་པོའི་རི་མ་གཏོགས་པར་གཡར་སྔར་གཞན་ཅི་ཡང་ གདའ་བར་མི་འགྱུར་ལགས་སོ། ། བཙུན་པ་བཅོམ་ལྡན་འདས་གང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྣང་བས་སངས་རྒྱས་ཀྱི་ཞིང་མི་མཇེད་འདི་ཐམས་ཅད་མཐོང་ལགས་ན་དེ་བཞིན་གཤེགས་པ་སྙོམས་པར་ཞུགས་པའི་སྣང་བ་ཇི་ལྟ་བུར་འགྱུར་བ་ ལགས། ཅི་དེ་བཞིན་གཤེགས་པའི་སྣང་བས་བདག་ཅག་གིས་སངས་རྒྱས་ཀྱི་ཞིང་གཞན་གྱི་ཡོན་ཏན་བཀོད་པ་མཐོང་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་དེ་བཞིན་ཏེ། དེ་བཞིན་གཤེགས་པ་རང་གི་སྤྱོད་ཡུལ་ན་བཞུགས་སོ། ། དེ་བཞིན་གཤེགས་པ་བསོད་ནམས་ཆེན་པོའི་རྒྱན་གྱིས་མངོན་པར་བརྒྱན་པ།

སྔོན་གྱི་ཚོགས་བསགས་པའི་དགེ་བའི་རྩ་བ་དང་སྔོན་གྱི་བྱང་ཆུབ་སེམས་དཔའི་སྤྱོད་པའི་རྒྱུ་འཐུན་པའི་བྱང་ཆུབ་སེམས་དཔར་གྱུར་པའི་རྒྱུ་འཐུན་པའི་རང་གི་གནས་སངས་རྒྱས་ཀྱི་རྣམ་པར་ སྨིན་པས་མངོན་པར་གྲུབ་པ་མཐའ་ཡས་པར་བསྟན་པ། དེ་བཞིན་གཤེགས་པའི་རྣམ་པར་འཕྲུལ་པ་མ་ཆགས་པའི་སྤྱོད་ཡུལ་གྱིས་བྱིན་གྱིས་བརླབས་པ། ཡེ་ཤེས་གསལ་བ་བསྐྱེད་པར་འཇུག་པའི་བློ་གྲོས་དང་ཡང་དག་པར་ལྡན་པ། ཡེ་ཤེས་ཀྱི་ཕ་རོལ་ཏུ་གཤེགས་ པ་ལས་རབ་ཏུ་སྐྱེས་པ། ཕྱི་མའི་མཐའི་བསྐལ་པར་ཡང་དག་པར་བསྒྲུབས་པ། སངས་རྒྱས་ཀྱི་སྤྱོད་ཡུལ་ཚད་མེད་པ་ལ་གནས་པ། ཆོས་ཀྱི་འཁོར་ལོ་ཤིན་ཏུ་བསྐོར་བ། ཆོས་ཐམས་ཅད་ལ་དབང་སྒྱུར་བ་བརྙེས་པའི་རྒྱུ་འཐུན་པ། སེམས་ཅན་ཐམས་ཅད་ཀྱི་ དབང་པོ་མཆོག་དང་མཆོག་མ་ཡིན་པ་མཁྱེན་པ་དང་། ཡོངས་སུ་སྨིན་པར་མཛད་པ་ལ་མཁས་པ། བག་ཆགས་ཡང་དག་པར་བཅོམ་པས་སངས་རྒྱས་ཀྱི་མཛད་པ་ལྷུན་གྱིས་གྲུབ་པ་ཡང་དག་པར་བསྟན་པ་ན་བཞུགས་སོ། ། རྒྱལ་པོ་ཆེན་པོ་དེས་ན་ཕྱོགས་ བཅུ་ཀུན་ཏུ་འཇིག་རྟེན་གྱི་ཁམས་གྲངས་མེད་པ་དཔག་ཏུ་མེད་པ་ཁྱོད་ཀྱིས་མཐོང་བར་འགྱུར་རོ། །

དེ་བཞིན་དུ་དེ་བཞིན་གཤེགས་པ་གྲངས་མེད་པ་དཔག་ཏུ་མེད་པ་བཞུགས་ཤིང་གཞེས་པ་བྱང་ཆུབ་སེམས་དཔའ་རྣམས་དང་། ཉན་ཐོས་ཀྱི་ཚོགས་ཀྱིས་ཡོངས་སུ་བསྐོར་ བ་དང་བཅས་པ་ཁྱོད་ཀྱིས་མཐོང་བར་འགྱུར་རོ། ། དེ་ནས་རྒྱལ་པོ་གཟུགས་ཅན་སྙིང་པོ་དང་སྲོག་ཆགས་བྱེ་བ་མང་པོ་གཞན་དག་གིས་ཀྱང་ཚིག་འཐུན་པར་འདི་སྐད་ཅེས་གསོལ་ཏོ། ། བཅོམ་ལྡན་འདས་ཀྱིས་བདག་ཅག་ལ་སངས་རྒྱས་ཀྱི་ཡུལ་ཉིད་ཀྱི་སྤྱོད་ཡུལ་བསོད་ ནམས་ཆེན་པོའི་རྒྱན་གྱི་རྒྱུ་འཐུན་པ་བསྟན་དུ་གསོལ། བདག་ཅག་ལ་སངས་རྒྱས་ཀྱི་མཛད་པ་ལྷུན་གྱིས་གྲུབ་པའི་བར་ཡང་དག་པར་བསྟན་དུ་གསོལ། བཅོམ་ལྡན་འདས་ཀྱིས་དེ་བཞིན་གཤེགས་པའི་སྤྱོད་ཡུལ་ཡང་དག་པར་བསྟན་པ་གནང་བར་མཛད་དུ་གསོལ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་ཤེས་ཀཽ་ཌི་ནྱ་ལ་བཀའ་སྩལ་པ། ཀཽ་ཌི་ནྱ་ཉན་ཐོས་ཆེན་པོ་རྣམས་དང་། ཁྱིམ་ན་གནས་པ་དང་། རབ་ཏུ་བྱུང་བ་གང་དག་ཡིན་པ་ཐམས་ཅད་རང་གི་དགེ་བའི་ཕྱོགས་ཀྱི་ནང་དུ་ཡང་དག་འཇོག་ལ་གནས་པར་བྱོས་ཤིག ། ང་ ཡང་རང་གི་སངས་རྒྱས་ཀྱི་སྤྱོད་ཡུལ་གྱི་ནང་དུ་ཡང་དག་འཇོག་ལ་གནས་པར་མཛད་དོ། ། ཡང་དེའི་ཚེ་ལྷ་དང་། ཀླུ་དང་། གནོད་སྦྱིན་ནས་མི་དང་།

མི་མ་ཡིན་པའི་བར་གང་དག་ཡིན་པ་དང་། བདེན་པ་མཐོང་བ་གང་དག་ཡིན་པ་དང་། རྗེས་སུ་འཐུན་པའི་བཟོད་པ་ ཐོབ་པ་གང་དག་ཡིན་པ་དང་། ཐེག་པ་གསུམ་ལས་ཕྱིར་མི་ལྡོག་པ་གང་དག་ཡིན་པ་དང་། དཀོན་མཆོག་གསུམ་ལ་མངོན་པར་དད་པ་གང་དག་ཡིན་པ་དེ་དག་ཐམས་ཅད་སྐྱིལ་མོ་ཀྲུང་དུ་འཁོད་ནས་སྙོམས་པར་ཞུགས་སོ། ། དེ་ནས་བཅོམ་ལྡན་འདས་སངས་རྒྱས་ ཐམས་ཅད་ཀྱི་ཡུལ་གྱི་སྤྱོད་ཡུལ་ལ་ཤེས་རབ་ཀྱིས་ནམ་མཁའ་ཁྱབ་པར་བྱེད་པ། མཁས་པ་མང་པོ་ཐམས་ཅད་ཡང་དག་པར་ཚིམ་པར་བྱེད་པ་ཉི་མ་དང་ཟླ་བ་ལྟ་བུ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་ནི་ཉན་ཐོས་དང་རང་རྒྱལ་ བ་ཐམས་ཅད་ཀྱི་སྤྱོད་ཡུལ་མ་ཡིན་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཀྱི་སྤྱོད་ཡུལ་མ་ཡིན་པ་དང་། སེམས་ཅན་ཐམས་ཅད་ཀྱིས་ཤེས་པའི་སྤྱོད་ཡུལ་མ་ཡིན་ཏེ། དེ་སངས་རྒྱས་བཅོམ་ལྡན་འདས་ཐམས་ཅད་ཀྱི་སྤྱོད་ཡུལ་གྱི་ ཡུལ་མཁྱེན་པ་ནི་མ་གཏོགས་སོ། ། དེའི་ཚེ་བཅོམ་ལྡན་འདས་ཏིང་ངེ་འཛིན་ལ་སྙོམས་པར་ཞུགས་ནས་སངས་རྒྱས་ཀྱི་ཞིང་མི་མཇེད་འདི་ཐམས་ཅད་དང་། གླིང་བཞི་པ་བྱེ་བ་ཕྲག་བརྒྱ་དང་། རིའི་རྒྱལ་པོ་རི་རབ་བྱེ་བ་ཕྲག་བརྒྱ་དང་།

ཉི་མ་དང་ཟླ་བ་བྱེ་བ་ཕྲག་བརྒྱ་སྙེད་ དང་། སྲིད་པའི་རྩེ་མོའི་ལྷའི་གནས་བྱེ་བ་ཕྲག་བརྒྱ་སྙེད་ཡོད་པ་དེ་དག་ཐམས་ཅད་དེ་བཞིན་གཤེགས་པའི་སྐུ་ལ་ཆུད་པར་ཡང་དག་པར་སྣང་ངོ་། ། ཐམས་ཅད་དང་ལྡན་པའི་སངས་རྒྱས་ཀྱི་ཞིང་མི་མཇེད་ཐམས་ཅད་དེ་བཞིན་གཤེགས་པའི་སྐུ་ལ་གནས་པར་ཡང་དག་ པར་སྣང་ངོ་། ། སངས་རྒྱས་ཀྱི་ཞིང་མི་མཇེད་འདིར་གཏོགས་པའི་སེམས་ཅན་སེམས་ཅན་དམྱལ་བའམ། དུད་འགྲོའི་སྐྱེ་གནས་པའམ། གཤིན་རྗེའི་འཇིག་རྟེན་པའམ། ལྷའམ། མི་གང་དག་ཡིན་པ་དེ་དག་ཐམས་ཅད་ཀྱི་ལུས་དང་སེམས་ཀྱི་སྡུག་བསྔལ་གྱི་ཉོན་མོངས་པ་ཡང་ ཐམས་ཅད་ཀྱི་ཐམས་ཅད་དུ་རྒྱུན་ཆད་དོ། ། དེ་དག་ཐམས་ཅད་ཀྱིས་ལུས་དང་སེམས་ཀྱི་བདེ་བ་འདི་ལྟ་བུ་ཐོབ་པར་གྱུར་ཏེ། དཔེར་ན་བསམ་གཏན་གཉིས་པའི་ཞི་གནས་ཐོབ་པའི་དགེ་སློང་སྙོམས་པར་ཞུགས་པ་བཞིན་ནོ། ། བྱང་ཆུབ་སེམས་དཔའ་ཐམས་ཅད་ཀྱིས་ཏིང་ ངེ་འཛིན་ལས་ལངས་ཏེ་ལངས་པ་དེ་དག་ཐམས་ཅད་ཀྱི་རང་གི་ལུས་ལ་སྣང་བ་ནུབ་པར་གྱུར་ཏོ། ། ཉན་ཐོས་ཐམས་ཅད་དང་སེམས་ཅན་གང་སུ་དག་སྙོམས་པར་ཞུགས་པ་དེ་དག་ཐམས་ཅད་ཏིང་ངེ་འཛིན་ལས་ལངས་ཏེ།

དེ་དག་ཐམས་ཅད་ལུས་དང་སེམས་ ཀྱི་བདེ་བ་དེ་ལྟ་བུ་དང་ཡང་དག་ལྡན་པར་གྱུར་ཏོ། ། དེ་དག་ཐམས་ཅད་ངོ་མཚར་ཐོབ་ཅིང་རྨད་དུ་བྱུང་བ་ཐོབ་སྟེ། དབང་པོ་ཚིམ་ནས་དེ་དག་དེ་བཞིན་གཤེགས་པའི་སྐུའི་ནང་དུ་གནས་ཤིང་འཁོད་ནས་བཅོམ་ལྡན་འདས་ཀྱི་སྐུའི་བ་སྤུའི་ཁུང་བུ་ལ་བལྟས་ཏེ། དེ་དག་ཐམས་ཅད་ཀྱིས་འདི་ལྟར་བཅོམ་ལྡན་འདས་ཀྱི་སྐུའི་བ་སྤུའི་ཁུང་བུ་གཅིག་ནས་འོད་ཟེར་འདི་ལྟ་བུ་བྱུང་བ་དེ་ལྟ་བུ་མཐོང་བར་གྱུར་ཏེ། དཔེར་ན་ཉི་མ་དང་ཟླ་བ་གང་གཱའི་ཀླུང་གི་བྱེ་མ་སྙེད་དང་། ནོར་བུ་རིན་པོ་ཆེ་ཆེན་པོ་གང་གཱའི་ཀླུང་གི་བྱེ་མ་སྙེད་ཀྱི་སྣང་ བ་དང་། བྱང་ཆུབ་སེམས་དཔའ་ས་བཅུ་པ་གང་གཱའི་ཀླུང་གི་བྱེ་མ་སྙེད་ཀྱི་འོད་ཟེར་གྱི་སྣང་བ་བཞིན་ནོ། ། བཅོམ་ལྡན་འདས་ཀྱི་བ་སྤུའི་ཁུང་བུ་རེ་རེ་ནས་ཀྱང་འོད་དེ་ལྟ་བུ་བྱུང་སྟེ། བཅོམ་ལྡན་འདས་ཀྱི་སྐུ་ལས་འོད་ཟེར་རབ་ཏུ་བྱུང་བ་དེ་དག་གིས་ཕྱོགས་བཅུའི་སངས་རྒྱས་ ཀྱི་ཞིང་ཐམས་ཅད་སྣང་བ་ཆེན་པོས་རྒྱས་པར་གང་བར་གྱུར་ཏོ། །

སངས་རྒྱས་ཀྱི་ཞིང་སྟོང་པ་མ་ཡིན་པ་གང་དག་ན་སངས་རྒྱས་བཅོམ་ལྡན་འདས་བཞུགས་ཤིང་གཞེས་པའི་སངས་རྒྱས་བཅོམ་ལྡན་འདས་དེ་དང་དེ་དག་གིས་ཐམས་ཅད་དང་ལྡན་པའི་སངས་རྒྱས་ཀྱི་ ཞིང་མི་མཇེད་ཐམས་ཅད་འདི་ལྟ་བུའི་དབྱངས་བརྗོད་པས་ཀུན་ཏུ་གང་བར་མཛད་དོ། ། ཤཱཀྱ་སེང་གེ་མི་ཡི་མཆོག ། བྱམས་དང་ཐུགས་རྗེའི་རྒྱུ་འཐུན་པ། ། སེམས་ཅན་ཀུན་ལ་ཕན་མཛད་པ། ། བསོད་ནམས་ལས་གྲུབ་པ་ལ་ལྟོས། ། སེམས་ཅན་ ཀུན་ལ་ཐུགས་བརྩེའི་ཕྱིར། ། སངས་རྒྱས་སྤྱོད་ཡུལ་སྟོན་པར་མཛད། ། ཐུགས་རྗེས་འོད་ཟེར་བཀྱེ་བས་ནི། ། ཞིང་རྣམས་ཐམས་ཅད་གསལ་བར་གྱུར། ། རེ་རེས་ཞིང་ནི་རྒྱས་གྱུར་པ། ། གནས་ཀུན་གསལ་བ་མཐོང་ནས་སུ། ། བྱང་ཆུབ་མཆོག་ནི་ཡོངས་ཚོལ་ ཞིང་། ། སེམས་ཀྱི་མཆོག་ཀྱང་སྐྱེད་པར་བྱེད། ། གང་དག་ལུས་ཅན་རྫུ་འཕྲུལ་འཐོབ། ། དེ་དག་ཐམས་ཅད་མྱུར་དུ་ལྷགས། ། ཤཱཀྱ་སེང་གེ་མི་མཆོག་ལ། ། ཁྱེད་ཀྱིས་བསྐོར་བ་བྱས་ནས་ཀྱང་། ། གང་དག་རྫུ་འཕྲུལ་མ་ཐོབ་ཀུན། ། རྒྱང་མ་ནས་ནི་ཕྱག་འཚོལ་ ལ། ། བྱང་ཆུབ་ཏུ་ནི་སེམས་བསྐྱེད་དང་། ། མི་ཡི་སྐྱེས་མཆོག་རྣམས་སུ་འགྱུར། །

སངས་རྒྱས་བཅོམ་ལྡན་འདས་དེ་དག་གི་རང་རང་གི་སངས་རྒྱས་ཀྱི་ཞིང་ནས་དབྱངས་ཀྱིས་གོ་བར་མཛད་ནས། ཐུགས་རྗེའི་དབང་གིས་སེམས་ཅན་རྣམས་ཡོངས་ སུ་སྨིན་པར་མཛད་པའི་ཕྱིར་དེ་བཞིན་གཤེགས་པ་ཤཱཀྱ་ཐུབ་པའི་དགོངས་པ་དང་སྨོན་ལམ་ཡོངས་སུ་བསྐང་བའི་ཕྱིར་དང་། དེའི་ཡོན་ཏན་བརྗོད་པའི་ཕྱིར་དེ་བཞིན་གཤེགས་པ་རེ་རེ་ཡང་བྱང་ཆུབ་སེམས་དཔའ་དང་། དེ་བཞིན་དུ་ཉན་ཐོས་ཆེན་པོ་གང་གཱའི་ཀླུང་གི་ བྱེ་མ་སྙེད་ཕྲག་དུ་མ་དང་། ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། དྲི་ཟ་དང་། མི་འམ་ཅི་དང་། ལྟོ་འཕྱེ་ཆེན་པོ་གང་གཱའི་ཀླུང་གི་བྱེ་མ་སྙེད་ཕྲག་དུ་མས་མདུན་དུ་བདར་ཅིང་ཡོངས་སུ་བསྐོར་ཏེ། དེ་དག་རང་རང་གི་ སངས་རྒྱས་ཀྱི་ཞིང་རྣམས་ནས་རྫུ་འཕྲུལ་གྱིས་ཡང་དག་པར་ཞུགས་ནས་སངས་རྒྱས་ཀྱི་ཞིང་མི་མཇེད་འདིར་གཤེགས་ཏེ། བཅོམ་ལྡན་འདས་ཀྱི་སྐུ་ལ་ལན་གསུམ་བསྐོར་བ་མཛད་ནས་སངས་རྒྱས་བཅོམ་ལྡན་འདས་དེ་དག་གི་འཁོར་གྱི་སེམས་ཅན་གང་དག་ཡིན་ པ་དེ་དག་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ལ་སྐོར་བ་བྱེད་ཅིང་དེ་ལྟ་བུའི་མཆོད་པ་བྱེད་པར་གྱུར་ཏོ། །

ཡང་རང་རང་གི་སངས་རྒྱས་ཀྱི་ཞིང་དག་ཏུ་ཡང་དོང་ངོ་། ། དེའི་དུས་ན་སེམས་ཅན་གང་དག་སངས་རྒྱས་ཀྱི་ཞིང་མི་མཇེད་དུ་བཅོམ་ལྡན་འདས་ཀྱི་ སྐུ་ལ་ཆུད་པ་དེ་དག་ཐམས་ཅད་ཀྱིས་ཕྱོགས་བཅུ་ཀུན་གྱི་སངས་རྒྱས་ཀྱི་ཞིང་ཐམས་ཅད་ཀྱི་ཡོན་ཏན་བཀོད་པའི་དེ་བཞིན་གཤེགས་པ་འཁོར་དང་བཅས་པ་རྣམས་མཐོང་ངོ་། ། དེ་དག་ཐམས་ཅད་ཀྱིས་དེ་ནས་ཡང་དག་པར་ཞུགས་པ་འཁོར་དང་བཅས་པ་རྣམས་དང་། བཅོམ་ལྡན་འདས་ཤཱཀྱ་ཐུབ་པ་ལ་བསྐོར་བ་མཛད་ཅིང་གཤེགས་པ་དང་། རང་རང་གི་སངས་རྒྱས་ཀྱི་ཞིང་དུ་འཇུག་ཅིང་རྡོ་རྗེའི་གདན་ལ་བཞུགས་ཏེ་ཆོས་སྟོན་པ་མཐོང་ངོ་། ། ཇི་ལྟར་སངས་རྒྱས་བཅོམ་ལྡན་འདས་དེ་དག་རང་རང་གི་སངས་རྒྱས་ཀྱི་ཞིང་དག་ཏུ་རང་རང་གི་ གདན་ལ་བཞུགས་ནས་རང་རང་གི་འཁོར་ལས་བརྩམས་ཏེ། དེ་བཞིན་གཤེགས་པ་ཤཱཀྱ་ཐུབ་པའི་བསྔགས་པ་དང་། ཡོན་ཏན་དང་། གྲགས་པ་དང་། ཤེས་རབ་དང་། བསོད་ནམས་དང་། བརྩོན་འགྲུས་དང་། ཐུགས་རྗེ་དང་།

སེམས་ཅན་ཡོངས་སུ་སྨིན་ པར་མཛད་པ་བསྟན་པ་བཞིན་དེར་སངས་རྒྱས་ཀྱི་ཞིང་རེ་རེར་ཡང་སེམས་ཅན་གྲངས་མེད་དཔག་ཏུ་མེད་པ་གང་གཱའི་ཀླུང་གི་བྱེ་མ་སྙེད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། ། རང་རང་གི་ལུང་བསྟན་པ་ཐོབ་པར་གྱུར་ཏོ། ། རང་སངས་རྒྱས་ཀྱི་ཐེག་པ་ལ་ཡང་དེ་བཞིན་ནོ། ། ཉན་ཐོས་ཀྱི་ཐེག་པ་ལ་ཡང་དེ་བཞིན་ནོ། ། འདིར་བཅོམ་ལྡན་འདས་ཀྱི་སྐུ་ལ་ཆུད་པ་གང་དག་ཡིན་པ་ཐམས་ཅད་ཀྱིས་ཀྱང་མཐོང་ངོ་། ། ལུང་བསྟན་པ་ཡང་ཐམས་ཅད་ཀྱིས་ཐོས་སོ། ། སྙིགས་མ་ལྔའི་སངས་རྒྱས་ ཀྱི་ཞིང་སྟོང་པ་དག་ན་སེམས་ཅན་གང་དག་ཡོད་པའི་བདེ་བ་དང་སྡུག་བསྔལ་གྱི་ཚོར་བ་ཅི་འདྲ་བ་མྱོང་བ་དག་ཀྱང་འདིར་བཅོམ་ལྡན་འདས་ཀྱི་སྐུ་ལ་ཆུད་ཅིང་འཁོད་པ་རྣམས་ཀྱིས་མཐོང་ངོ་། ། དེའི་ཚེ་སྙིགས་མ་ལྔའི་འཇིག་རྟེན་གྱི་ཁམས་སྟོང་པ་དག་ན་སེམས་ཅན་གང་ དག་ཡོད་པ་དེ་དག་ཐམས་ཅད་ཀྱིས་ཀྱང་སྣང་བ་དེ་མཐོང་ནས་དེ་བཞིན་གཤེགས་པ་ཤཱཀྱ་ཐུབ་པ་ཡང་མཐོང་སྟེ། སངས་རྒྱས་བཅོམ་ལྡན་འདས་བགྲང་བ་ལས་འདས་པ་དང་།

དེ་བཞིན་གཤེགས་པ་རེ་རེ་ཡང་སེམས་ཅན་བགྲང་བ་ལས་འདས་པ་དག་དང་ཐབས་ ཅིག་ཏུ་འདིར་དེ་བཞིན་གཤེགས་པ་ཤཱཀྱ་ཐུབ་པ་ལ་བསྐོར་བ་མཛད་པ་མཐོང་ངོ་། ། དེའི་ཚེ་སེམས་ཅན་དེ་དག་ཐམས་ཅད་མཆོག་ཏུ་དགའ་བའི་དམ་པ་སྐྱེས་ཏེ། ཐམས་ཅད་སྡུག་བསྔལ་གྱི་ཚོར་བ་རྒྱུན་ཆད་དོ། ། སྙིགས་མ་ལྔའི་སངས་རྒྱས་ཀྱི་ཞིང་སྟོང་པ་དེ་དག་ན་ བྱང་ཆུབ་སེམས་དཔའ་སེམས་དཔའ་ཆེན་པོ་ས་བཅུ་པ་གང་དག་སེམས་ཅན་ཡོངས་སུ་སྨིན་པར་བྱ་བའི་ཕྱིར་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་སངས་རྒྱས་ཀྱི་ཞིང་གང་ན་སངས་རྒྱས་ཀྱིས་འདུལ་བའི་སེམས་ཅན་དག་ཡོད་པ་དེར་སངས་རྒྱས་ཀྱི་སྐུ་བྱད་ ཀྱིས་སངས་རྒྱས་ཀྱི་ཞིང་མི་མཇེད་ཐམས་ཅད་དབྱངས་དང་། ངག་དང་། སྒྲ་བརྗོད་པ་གཅིག་གིས་གོ་བར་མཛད་དོ། ། དགེ་བའི་དོན་དུ་ཞིང་གཅིག་ཏུ། ། ངེད་ཅག་ཐམས་ཅད་གཤེགས་པ་ཡིན། ། སངས་རྒྱས་རྣམས་ནི་མི་བཞུགས་ན། ། སུས་ ཀྱང་དཔལ་ཆེན་མི་འཐོབ་བོ། ། ཁྱེད་ཅག་གིས་ནི་བྱང་ཆུབ་ཏུ། ། གཅིག་ཏུ་སེམས་ནི་གཞོལ་བྱས་ན། ། ཁྱེད་ཅག་ཕྱིན་ཅད་འཁོར་བར་ནི། ། སྡུག་བསྔལ་སྐྱེ་བར་མི་འགྱུར་རོ། ། ཤཱཀྱ་ཁྱུ་མཆོག་མཆོད་པ་དང་། ། དེ་ལ་བསྐོར་བ་བྱ་བའི་ཕྱིར། །

འདི་ལྟར་ ཁྱེད་ཅག་ཐམས་ཅད་ནི། ། ང་དང་ཐབས་ཅིག་མྱུར་དུ་འདེང་། ། ། ། འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་དགུ་པ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཀྱང་སངས་རྒྱས་ཀྱི་སྐུ་བྱད་ ཀྱིས་རེ་རེ་ཞིང་སེམས་ཅན་རྫུ་འཕྲུལ་དང་ལྡན་པ་གང་གཱའི་ཀླུང་གཅིག་གི་བྱེ་མ་སྙེད་དང་ལྷན་ཅིག་ཏུ་དེ་ནས་ཆས་ཏེ། དེ་བཞིན་གཤེགས་པ་ཤཱཀྱ་ཐུབ་པ་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཤཱཀྱ་ཐུབ་པ་ལ་སེམས་ཅན་དེ་དག་གིས་རིན་པོ་ཆེ་སྣ་ ཚོགས་ནས་རོལ་མོའི་སྒྲ་དང་། གར་དང་གླུ་སྣ་ཚོགས་པའི་བར་གྱིས་མཆོད་པ་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་བོ། ། ཁ་ཅིག་གིས་ནི་རྐྱེན་གྱི་ཐེག་པར་སྨོན་ལམ་བཏབ། ཁ་ཅིག་གིས་ནི་ཉན་ཐོས་ཀྱི་ཐེག་པར་སྨོན་ ལམ་བཏབ་སྟེ། ཐམས་ཅད་ཀྱང་བསམས་པ་ཇི་ལྟ་བ་བཞིན་དུ་ཕྱིར་མི་ལྡོག་པར་གྱུར་ཏོ། ། དེའི་ཚེ་དེ་དག་ཆོ་ག་བཞིན་དུ་ཏིང་ངེ་འཛིན་དང་། བཟོད་པ་དང་། གཟུངས་ཐོབ་སྟེ། དགེ་བའི་རྩ་བ་རྣམ་པ་སྣ་ཚོགས་བསྒྲུབས་ནས་རང་གི་ཞིང་དུ་དོང་སྟེ།

བྱང་ཆུབ་སེམས་ དཔའ་སེམས་དཔའ་ཆེན་པོ་ཁ་ཅིག་ནི་རང་རྒྱལ་བའི་ལུས་བྱད་ཀྱིས་ཞེས་བྱ་བ་ནས་ཁ་ཅིག་ནི་ཉན་ཐོས་ཀྱི་ལུས་བྱད་ཀྱིས་ཞེས་བྱ་བའི་བར་དང་། ཁ་ཅིག་ནི་ཚངས་པའི་ལུས་བྱད་དང་། ཁ་ཅིག་ནི་བརྒྱ་བྱིན་གྱི་ལུས་བྱད་ཀྱིས་ཞེས་བྱ་བ་ནས་ཁ་ཅིག་ནི་རྒྱལ་པོ་ཆེན་པོ་བཞིའི་ ལུས་བྱད་ཀྱིས་ཞེས་བྱ་བའི་བར་དང་། ཁ་ཅིག་ནི་སྲེད་མེད་ཀྱི་བུའི་ལུས་བྱད་དང་། ཁ་ཅིག་ནི་དབང་ཕྱུག་ཆེན་པོའི་ལུས་བྱད་ཀྱིས་ཞེས་བྱ་བའི་བར་དང་། ཁ་ཅིག་ནི་ཀླུའི་ལུས་བྱད་ཀྱིས་ཞེས་བྱ་བའི་བར་དང་། ཁ་ཅིག་ནི་གནོད་སྦྱིན་གྱི་ལུས་བྱད་ཀྱིས་ཞེས་བྱ་བའི་བར་ དང་། ཁ་ཅིག་ནི་ལྷ་མ་ཡིན་གྱི་ལུས་བྱད་ཀྱིས་ཞེས་བྱ་བའི་བར་དང་། ཁ་ཅིག་ནི་འཁོར་ལོས་སྒྱུར་བའི་ལུས་བྱད་ཀྱིས་ཞེས་བྱ་བའི་བར་གྱིས་སངས་རྒྱས་ཀྱི་ཞིང་གང་དག་ན་སེམས་ཅན་ཉན་ཐོས་ཀྱིས་འདུལ་བའི་བར་དུ་ཡོད་པའི་སངས་རྒྱས་ཀྱི་ཞིང་དེ་དག་ཏུ་བྱང་ཆུབ་ སེམས་དཔའ་སེམས་དཔའ་ཆེན་པོ་ས་བཅུ་པ་རྣམས་སེམས་ཅན་ཡོངས་སུ་སྨིན་པར་བྱ་བའི་ཕྱིར་ཞུགས་ཏེ། དེར་ཉན་ཐོས་ཀྱི་ལུས་བྱད་ཀྱི་བར་གྱིས་སེམས་ཅན་རྣམས་ལ་ཆོས་སྟོན་ཏོ། །

སངས་རྒྱས་ཀྱི་ཞིང་དེར་ཡང་སེམས་ཅན་ཐམས་ཅད་ཀྱིས་སྣང་བ་དེ་མཐོང་སྟེ། དེ་བཞིན་གཤེགས་པ་ཤཱཀྱ་ཐུབ་པ་ཡང་མཐོང་ནས་སེམས་ཅན་དེ་དག་ཤིན་ཏུ་དགའ་བ་དང་མཆོག་ཏུ་དགའ་བ་སྐྱེས་ཤིང་དབང་པོ་རྣམས་ཚིམ་སྟེ། ཐམས་ཅད་སྡུག་བསྔལ་གྱི་ཚོར་བ་རྒྱུན་ཆད་དོ། ། དེ་དག་ལ་བདེ་བའི་ཚོར་བ་ཡང་བྱུང་ངོ་། ། སངས་རྒྱས་ཀྱི་ཞིང་དེར་ གང་ཉན་ཐོས་ཀྱི་ལུས་བྱད་ཀྱིས་ཆོས་སྟོན་པ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་ཏེ། དེས་བསོད་ནམས་ཆེན་པོ་བསགས་པའི་དགེ་བའི་རྩ་བས་འདི་ལྟ་བུའི་དབྱངས་དང་སྒྲ་བརྗོད་པས་སངས་རྒྱས་ཀྱི་ཞིང་དེ་ཐམས་ཅད་གོ་བར་བྱེད་པ་ འདི་སྐད་ཅེས་སྨྲས་སོ། ། སྡིག་པའི་སེམས་ནི་གཞོམ་པར་བྱོས། ། སྡིག་པའི་ལྟ་བ་སྤོང་བར་བྱོས། ། གང་དུ་འཇིག་རྟེན་མི་འཇུག་པའི། ། འཁོར་བའི་ཕ་རོལ་འདོང་བར་བྱོས། ། ཁྱེད་ཅག་སྡིག་པའི་སེམས་ཀྱིས་སུ། ། ངེས་པར་འབྱུང་བར་མི་ལྟ་བས། ། རྒ་ བ་དང་ནི་འཆི་བའི་ལུས། ། འཁོར་བར་རིང་པོར་ཞུགས་པ་ཡིན། ། སྟོན་པ་མཐོང་བ་རྙེད་པར་དཀའ། ། དལ་བ་འདི་འདྲ་རྙེད་པར་དཀའ། ། ཆོས་ཐོས་པ་ཡང་རྙེད་པར་དཀའ། ། དགེ་བྱེད་རབ་ཏུ་རྙེད་པར་དཀའ། ། དེ་ལྟར་ཁྱེད་ཀྱིས་གུས་བྱས་ཏེ། །

བྱང་ཆུབ་ཏུ་ ནི་འདུན་པ་སྐྱེད། ། སྡུག་བསྔལ་ཀུན་ལས་ཐར་གྱིས་ལ། ། འཇིག་རྟེན་འདྲེན་པར་འགྱུར་བར་བྱོས། ། རྟག་པ་དང་ནི་ཆད་པའི་བློས། ། ཆོས་གཉིས་མྱུར་དུ་སྤངས་ནས་ནི། ། འདུ་བྱེད་ཐམས་ཅད་བདག་མེད་ལ། ། ཚུལ་བཞིན་དུ་ནི་རྟག་པར་ བྱོས། ། ཀུན་འབྱུང་སྲེད་དང་སྡུག་བསྔལ་ཡང་། ། ཡེ་ཤེས་ཆུ་ཡིས་བཀྲུ་བར་བྱོས། ། ཤཱཀྱ་སེང་གེ་མཆོད་པའི་ཕྱིར། ། ཐམས་ཅད་ལྷན་ཅིག་མྱུར་དུ་འདོང་། ། དེ་ནས་བྱང་ཆུབ་སེམས་དཔའ་དེ་དག་ཉན་ཐོས་ཀྱི་ལུས་བྱད་ཀྱི་བར་གྱིས་བྱང་ཆུབ་སེམས་ དཔའ་རེ་རེ་ཞིང་བྱང་ཆུབ་སེམས་དཔའ་དང་། སེམས་ཅན་རྫུ་འཕྲུལ་དང་ལྡན་པ་གང་གཱའི་ཀླུང་གི་བྱེ་མ་སྙེད་ཚད་མེད་པ་དང་ལྷན་ཅིག་ཏུ་རང་རང་གི་སངས་རྒྱས་ཀྱི་ཞིང་ནས་ཆས་ཏེ། འདིར་དེ་བཞིན་གཤེགས་པ་ཤཱཀྱ་ཐུབ་པ་འཁོར་དང་བཅས་པ་ལ་ལན་གསུམ་བསྐོར་ བ་བྱས་ནས་བཅོམ་ལྡན་འདས་ཤཱཀྱ་ཐུབ་པ་ལ་དེ་དག་གིས་རིན་པོ་ཆེ་སྣ་ཚོགས་དང་། རས་བཅོས་བུ་སྣ་ཚོགས་དང་། ཆོས་གོས་སྣ་ཚོགས་དང་། རྒྱན་དང་རྒྱན་གྱི་ལྷབ་ལྷུབ་སྣ་ཚོགས་དང་། གདུགས་དང་། རྒྱལ་མཚན་དང་། བ་དན་སྣ་ཚོགས་དང་། མེ་ཏོག་སྣ་ཚོགས་དང་། སྤོས་ སྣ་ཚོགས་དང་། རོལ་མོའི་སྒྲ་སྣ་ཚོགས་དང་།

བསྟོད་པ་སྣ་ཚོགས་དང་། གླུ་སྣ་ཚོགས་དང་། གར་སྣ་ཚོགས་ཀྱིས་མཆོད་པ་བྱས་སོ། ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་རང་རང་གི་སངས་རྒྱས་ཀྱི་ཞིང་དུ་ཕྱིན་ནས་རང་རང་གི་སྟན་དག་ལ་ འཁོད་དོ། ། དེ་བཞིན་དུ་རང་རང་གི་འཁོར་རྣམས་ལ་དེ་བཞིན་གཤེགས་པ་ཤཱཀྱ་ཐུབ་པའི་བསྔགས་པ་དང་གྲགས་པ་ནས་སེམས་ཅན་ཐམས་ཅད་ཡོངས་སུ་སྨིན་པར་མཛད་པའི་ཡོན་ཏན་གྱི་ཕན་ཡོན་གྱི་བར་བརྗོད་པར་གྱུར་ཏེ། དེ་ནས་སངས་རྒྱས་ཀྱི་ཞིང་དེ་དག་ན་ འཁོར་དེའི་སེམས་ཅན་གྲངས་མེད་པ་དཔག་ཏུ་མེད་པ་ཡོད་པ་དེ་དག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། ། དེ་བཞིན་དུ་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པར་ཡང་སེམས་བསྐྱེད་དེ། ཐམས་ཅད་ཀྱང་ཕྱིར་ མི་ལྡོག་པར་གྱུར་ཏོ། ། དེའི་ཚེ་དེ་དག་གིས་ཏིང་ངེ་འཛིན་དང་། གཟུངས་དང་། བཟོད་པ་སྣ་ཚོགས་ཐོབ་ནས་དགེ་བའི་རྩ་བ་རྣམས་བསྐྱེད་དོ། ། སེམས་ཅན་ཐམས་ཅད་ཀྱིས་སངས་རྒྱས་ཀྱི་ཞིང་མི་མཇེད་འདིར་གང་བཅོམ་ལྡན་འདས་ཀྱི་སྐུ་ལ་ཆུད་པར་གྱུར་པའི་ བཀོད་པ་དེ་ལྟ་བུ་ཡང་མཐོང་ངོ་། །

དེ་དག་ཐམས་ཅད་དེ་བཞིན་གཤེགས་པའི་ཡོན་ཏན་རྣམས་ལ་ངོ་མཚར་ཐོབ་ཅིང་རྨད་དུ་བྱུང་བ་ཐོབ་བོ། ། དེའི་ཚེ་གང་དག་སྔོན་ཆད་སེམས་མ་བསྐྱེད་པའི་སེམས་ཅན་གང་གཱའི་ཀླུང་གི་བྱེ་མ་སྙེད་གྲངས་མེད་པ་དཔག་ཏུ་མེད་པ་ དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། ། དེ་བཞིན་དུ་རང་སངས་རྒྱས་ཀྱི་ཐེག་པ་དང་། དེ་བཞིན་དུ་ཉན་ཐོས་ཀྱི་ཐེག་པར་ཡང་སེམས་དག་བསྐྱེད་དེ། དེ་དག་ཐམས་ཅད་ཕྱིར་མི་ལྡོག་པའི་ས་ཐོབ་པར་གྱུར་ཏོ། ། དེ་ བཞིན་དུ་འཁོར་ལོས་སྒྱུར་བའི་ལུས་བྱད་ཀྱིས་ཞེས་བྱ་བའི་བར་དང་། ཕྱིར་མི་ལྡོག་པའི་ས་ཐོབ་པར་གྱུར་ཏོ་ཞེས་བྱ་བའི་བར་དུ་ཡིན་ཏེ། སེམས་ཅན་ཡོངས་སུ་སྨིན་པར་མཛད་པའི་ཕྱིར་ཇི་ལྟར་བཅོམ་ལྡན་འདས་ཆོ་འཕྲུལ་ཆེན་པོ་སངས་རྒྱས་ཐམས་ཅད་ཀྱི་ཡུལ་གྱི་རྒྱུ་ འཐུན་པར་ཏིང་ངེ་འཛིན་དེ་ལྟ་བུ་ལ་སྙོམས་པར་ཞུགས་པ་བཞིན་ནོ། ། འདུས་པ་ཆེན་པོ་ཉི་མའི་སྙིང་པོའི་ལེའུ་བཅུ་གཅིག་པ་ལས་ལེའུ་དྲུག་པའོ། ། ། །

དེ་ནས་བདུད་སྡིག་ཅན་གྱིས་དེ་བཞིན་གཤེགས་པ་འཁོར་དང་བཅས་པ་ཉིད་ཀྱི་ཕོ་བྲང་ན་དེ་ བཞིན་གཤེགས་པའི་དབྱིངས་ན་བཞུགས་པ་མཐོང་ནས་མཆོག་ཏུ་ཡིད་མི་བདེ་སྟེ་ལུས་ཐམས་ཅད་ནས་རྡུལ་འཐོན་ཞིང་མཆི་མ་དག་བྱུང་ནས་མི་དགའ་བར་གྱུར་ཏོ། ། དེ་ནས་བདུད་སྡིག་ཅན་གྱིས་གནས་ཐམས་ཅད་དུ་རྒྱུ་བར་བྱེད། ། རྣམ་པར་རྒྱུ་བར་བྱེད། འཇུག་པར་ བྱེད། འབྱུང་བར་བྱེད། ལྡང་བར་བྱེད། རྒྱུག་པར་བྱེད། ཀུན་ཏུ་རྒྱུག་པར་བྱེད། གླལ་བར་བྱེད། འཛུམ་པར་བྱེད། ཤུགས་རིང་དུ་འབྱིན་པར་བྱེད། ཁ་ལ་ལྕེས་ལྡག་པར་བྱེད། མིག་འཛུམས་པར་བྱེད། ལག་པ་གཉིས་རྐྱོང་ཞིང་སྐུམ་པར་བྱེད། མགོ་ ལ་ལག་པ་གཉིས་ཀྱིས་རྡོབ་པར་བྱེད། མགྲིན་པ་དང་ནུ་མ་ལ་མཉེད་པར་བྱེད་དེ། དེ་མཐོང་བས་བདུད་ཀྱི་གནས་ན་གནས་པའི་སེམས་ཅན་ཐམས་ཅད་གནོད་པ་དང་། མངོན་པར་མི་དགའ་བ་དང་། ཡིད་མི་བདེ་བར་གྱུར་ཏོ། ། དེ་ནས་བདུད་ཤོར་བ་ནམ་ མཁའི་ཤིང་ཞེས་བྱ་བ་དེས་བདུད་སྡིག་ཅན་ལ་ཚིགས་སུ་བཅད་པས་དྲིས་པ། འཁྲུག་སེམས་ཡིད་རབ་མི་བདེ་བས། ། ཅི་སླད་དེ་ལྟར་ཁྱོད་རྒྱུག་ཅིང་། ། ཀུན་ལ་དགའ་བར་མི་དགོངས་པས། ། གང་དུ་ཡང་ནི་དགྱེས་མི་མངའ། །

བདུད་སྡིག་ཅན་གདོང་མཆི་མ་ དང་བཅས་པས་འདི་སྐད་ཅེས་སྨྲས་སོ། ། གཽ་ཏ་མ་སྟོབས་ཅན་མཐོང་ནས་ནི། ། ང་ཡི་སྙིང་ནི་རྣམ་གས་ནས། ། ལུས་ཀུན་ནས་ནི་རྡུལ་འཐོན་ཅིང་། ། གདོང་ཡང་མཆི་མས་གང་བ་ཡིན། ། སེམས་ཅན་ཐམས་ཅད་འཐུན་པ་རུ། ། ཇི་ལྟར་ཐོས་པ་བཞིན་དུ་དེར། ། ཚོགས་ཆེན་རིལ་གྱིས་དོང་བས་ན། ། ང་ཡི་ཡུལ་ནི་སྟོངས་པར་བྱས། ། ནམ་མཁའ་དང་ནི་མཚུངས་པའི་ཡུལ། ། ཕྱོགས་བཅུ་ནས་ནི་ལྷགས་པ་ཡིས། ། དེ་ལ་བསྐོར་བ་བྱས་ནས་སུ། ། བྱེ་བ་མང་པོས་ཡོངས་སུ་བསྐོར། ། བདུད་རྣམས་ཐམས་ཅད་འཁོར་ བཅས་ཏེ། ། དེ་ལ་ཡང་ནི་སྐྱབས་སོང་བས། ། ང་ཡི་དཔུང་ནི་མ་མཐོང་སྟེ། ། གང་ནའང་ང་ཡི་ཕྱོགས་མེད་དོ། ། དེ་ནས་བདུད་སྡིག་ཅན་ལ་བདུད་ཤོར་བ་ནམ་མཁའི་ཤིང་དེས་འདི་སྐད་ཅེས་སྨྲས་སོ། ། བདག་ཅག་ཐམས་ཅད་འཁོར་བཅས་ཏེ། ། གོ་ཆ་སྲ་བ་དག་བགོས་ནས། ། རལ་གྲི་འཁོར་ལོ་མདའ་བོ་ཆེས། ། དེ་ཡི་ལུས་ནི་ཕྱེ་མར་རླག ། སྡིག་ཅན་གྱིས་སྨྲས་པ། དེ་ལ་ཡང་ནི་སྐྱབས་སོང་ཞིང་། ། དེར་ཡང་རང་ཉིད་སོང་བས་ན། ། དེ་ལ་དམག་ནི་ཡང་དག་ཕུལ། ། ང་ནི་བཅིང་བ་དམ་པོས་བཅིངས། ། དེ་ ནས་བདུད་ཤོར་བ་ནམ་མཁའི་ཤིང་དེས་སྨྲས་པ། ཐབས་རྣམས་ཀུན་གྱིས་ཅི་བགྱིས་ཀྱང་།

། དགྲ་ནི་དབང་དུ་མི་འགྱུར་ཏེ། ། མཛའ་བོའི་གཟུགས་ཀྱིས་བསླུས་བགྱིས་ན། ། དེ་ལྟ་ན་ནི་གསད་པར་ནུས། ། སྡིག་ཅན་གྱིས་སྨྲས་པ། མཛའ་བོའི་གཟུགས་ཀྱིས་དེར་འགྲོ་ བར། ། འདི་ལྟར་བདག་གིས་དེ་བསམས་ནས། ། རང་གི་མགུལ་ན་དྲི་ང་བའི། ། རོ་མྱགས་འཇིགས་སུ་རུང་བ་མཐོང་། ། ནམ་མཁའི་ཤིང་གིས་སླར་སྨྲས་པ། ། བདུད་དང་ཀླུ་དང་བསམ་གཏན་པའི། ། ཡུལ་གསུམ་དག་ཏུ་བཤད་པ་ལ། ། བདག་ཅག་གི་ནི་ཡུལ་ བཅོམ་ཡང་། ། ཀླུ་རྣམས་ཀྱི་ནི་ཡུལ་བརྟན་ནོ། ། ཀླུ་དེ་དག་ཀྱང་གཟི་བརྗིད་ཆེ། ། དམག་རྣམས་མང་ཞིང་སྟོབས་ཀྱང་ཆེ། ། དེ་དག་གི་ནི་ཡུལ་མཆིས་པ། ། ཀུན་ཏུ་གཞན་གྱིས་མི་ཐུབ་ལགས། ། འདོད་པའི་ཁམས་ན་གང་སུ་དག ། ཀླུ་ཡི་བདག་པོ་གནས་ གྱུར་པ། ། དེ་དག་རྣམས་ལ་གཽ་ཏ་མ། ། ཐལ་བར་རླག་པར་མྱུར་དུ་བསྒོ། ། སྡིག་ཅན་གྱིས་སྨྲས་པ། ཀྱེ་བསོད་ནམས་ཤེས་རབ་ཆེན་པོ་ཅན། ། ཀླུ་ཡི་གནས་སུ་ཉིད་སོང་ལ། ། གཽ་ཏ་མ་དང་དམག་འགྱེད་པར། ། ཐམས་ཅད་ལ་ནི་ཁྱོད་ཀྱིས་བསྒོ། ། དེས་ སྨྲས་པ། དེ་བཞིན་དུ་བགྱིའོ་ཞེས་ནས་དམག་བརྒྱ་སྟོང་གོ་བགོས་པ་དེ་དག་ལ། ལག་པ་བསྒྲེང་སྟེ་བསྒྲགས་པ་ནི། ། ཀླུ་ཡི་རྟེན་དུ་བདག་ཅག་འདེང་། །

གཽ་ཏ་མ་དང་དམག་འགྱེད་ཅིང་། ། སྲོག་དང་བྲལ་བར་བྱེད་དུ་གཞུག ། དེར་ནི་བདག་ཅག་གྲོགས་བྱ་བར། ། ཐམས་ཅད་ལ་ནི་བསྒོ་བར་བྱ། ། དེ་ན་འཁོད་པ་དེ་དག་ཀྱང་གང་དུ་ཡང་། སུ་ཡང་འགྲོ་བར་མ་ནུས་པ་དང་། ཤོར་བ་ནམ་མཁའི་ཤིང་དེ་གདོང་མཆི་མ་དང་བཅས་ཤིང་སྤུ་ཟིང་ཞེས་བྱེད་པར་གྱུར་ཏེ། ཐལ་མོ་རབ་ཏུ་སྦྱར་བ་བྱས་ནས་སྡིག་ཅན་ལ་སྨྲས་པ། བདག་ཅག་ གིས་ནི་གང་དུ་ཡང་། ། མཆི་བར་བགྱི་བའི་རྔོ་མ་ཐོགས། ། སྒྱུ་འཕྲུལ་བརྟན་པ་གཽ་ཏ་མ། ། དྲང་སྲོང་གི་ནི་སྒྱུ་ལགས་སོ། ། བདག་ཅག་ཐམས་ཅད་རྐང་པ་བཅིངས། ། ལུས་རྣམས་ཀུན་ལ་རྡུལ་ཡང་བྱུང་། ། གང་གིས་དགྲ་ལས་ཁྱེད་རྒྱལ་བར། ། གཞན་ཞིག་ ཀྱང་ནི་མཛད་པར་གསོལ། ། བདུད་སྡིག་ཅན་ཇེ་སྡུག་བསྔལ་ཞིང་ཡིད་མི་བདེ་ནས་མྱ་ངན་དུ་གྱུར་པ་དེ་འདི་ལྟ་བུའི་བློ་སྐྱེས་ཏེ། གང་བདག་གིས་ཀླུའི་རྟེན་ཐམས་ཅད་དུ་གང་ཀུན་ཏུ་སྨྲ་བར་བྱེད་པ་དང་། མངོན་པར་མི་དགའ་བ་སྐྱེད་པར་བྱེད་པ་དང་། ཀླུ་ཐམས་ཅད་ཀུན་ དུ་གཤེ་བར་བྱེད་པའི་བདུད་ཀྱི་སྟོབས་དེ་ལྟ་བུ་ཡང་དག་པར་རྗེས་སུ་དྲན་པར་བྱ་གོར་མ་ཆག་སྙམ་མོ། ། དེ་ནས་དེའི་ཚེ་བདུད་སྡིག་ཅན་གྱིས་ཀླུའི་རྟེན་ཐམས་ཅད་དུ་ཤ་སྦྲང་དང་།

སྦྲང་བུ་མཆུ་{རིངས་,རིང་}དང་། སྦྲང་བུ་གདུག་པ་རྣམས་སྤྲུལ་ཏོ། ། ཐམས་ཅད་ དྲི་ང་བས་བཀང་ངོ་། ། རྡུལ་དབྱུང་བ་དང་མངོན་པར་མི་དགའ་བར་བྱས་སོ། ། དེ་བཞིན་དུ་ཀླུ་དང་། ཀླུ་ཆེན་པོ་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་ཐམས་ཅད་མངོན་པར་མི་དགའ་ནས་དེ་དག་ཐམས་ཅད་ཀྱིས་རྣམ་པར་བལྟས་ཏེ། བདག་ཅག་ལ་ ཅོ་འདྲི་བར་བྱེད་པ་སུ་ཡིན་སྙམ་ན་དེ་དག་གིས་མ་ཤེས་ཤིང་མ་མཐོང་ངོ་། ། གླིང་བཞི་པ་འདིའི་ཀླུ་དང་། ཀླུ་ཆེན་པོ་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་གང་དག་ཡིན་པ་དེ་དག་ཐམས་ཅད་ཀྱང་ཁྲོ་བས་ཟིལ་གྱིས་ནོན་ནས་དེ་དག་ཐམས་ཅད་ཀྱིས་ ཀྱང་རང་གི་གནས་བོར། ཀླུའི་རྒྱལ་པོ་དགའ་བོ་དང་ཉེ་དགའ་གཉིས་འཁོར་བརྒྱ་སྟོང་ཕྲག་དུ་མས་ཀྱང་རང་གི་གནས་བོར་ནས་རིའི་རྒྱལ་པོ་རི་རབ་ཀྱི་འདབ་ན་རི་ཁ་ལ་ཏི་ཡ་ཞེས་བྱ་བ་ཡོད་དེ། རི་ཁ་ལ་ཏི་ཡ་དེའི་རྩེ་མོ་ན་དྲང་སྲོང་ཐུབ་པ་རྣམས་ཀྱི་གནས་ཀྱི་རྟེན་ཀུན་ རྟེན་ཅེས་བྱ་བ་རྒྱར་དཔག་ཚད་བཞི་ཁྲི་པ་ལྷ་རྫས་ཀྱི་རིན་པོ་ཆེ་སྣ་བདུན་གྱིས་བརྒྱན་པ་བཞི་ཡོད་པ། དྲང་སྲོང་ཐུབ་པའི་གནས་དེར་སྐྱབས་ཀྱི་དོན་དུ་རྟེན་ཅིང་ཞུགས་སོ། །

དེར་དེ་དག་ཞུགས་མ་ཐག་ཏུ་འདི་ལྟ་བུའི་ལུས་ཆུང་ངུར་གྱུར་ཏེ། དཔེར་ན་མིག་སྨན་བསྐུ་བའི་ཐུར་ མ་བཞིན་ནོ། ། དེ་དག་ཀྱང་རང་ཁྲོས་པའི་མཐུས་རེ་རེ་ཡང་འདི་ལྟ་བུའི་ལུས་རི་རབ་ཙམ་དུ་ཡང་དག་པར་ཤེས་ཏེ། དེ་དག་གིས་སྐད་འབྱིན་ཀྱང་མ་ནུས་སོ། ། དེ་ནས་འགྲོ་བར་ཡང་མ་ནུས་ཏེ། མྱ་ངན་ཆེན་པོ་དང་ཁྲོས་པས་ཟིལ་གྱིས་ནོན་ནས་དེར་འཁོད་དོ། ། དེ་བཞིན་ དུ་ཀླུའི་རྒྱལ་པོ་ཆེན་པོ་རྒྱ་མཚོ་འཁོར་བྱེ་བ་བརྒྱ་སྟོང་ཕྲག་དུ་མ་དང་། དེ་བཞིན་དུ་ས་སྲུང་གི་བུ་ཞེས་བྱ་བའི་བར་དང་། དེ་བཞིན་དུ་ཤིན་ཏུ་བརྟན་པ་ཞེས་བྱ་བའི་བར་དང་། དེ་བཞིན་དུ་འཇོག་པོ་ཞེས་བྱ་བའི་བར་དང་། དེ་བཞིན་དུ་མ་དྲོས་པ་ཞེས་བྱ་བའི་བར་དང་། དེ་བཞིན་དུ་ བཏང་བཟུང་ཞེས་བྱ་བའི་བར་དང་། དེ་བཞིན་དུ་རྒྱ་མཚོས་བྱིན་ཞེས་བྱ་བའི་བར་དང་། དེ་བཞིན་དུ་ཆུ་ལྷས་བྱིན་ཞེས་བྱ་བའི་བར་དང་། དེ་བཞིན་དུ་ཁྱིམ་བདག་གིས་བྱིན་ཞེས་བྱ་བའི་བར་དང་། དེ་བཞིན་དུ་ཆུ་བས་བྱིན་ཞེས་བྱ་བའི་བར་དང་། དེ་བཞིན་དུ་ཆུ་སོག་མ་ མེད་ཀྱིས་བྱིན་ཞེས་བྱ་བའི་བར་དང་། དེ་བཞིན་དུ་རི་བོས་བྱིན་ཞེས་བྱ་བའི་བར་དང་། དེ་བཞིན་དུ་བ་ལང་མགོ་ཞེས་བྱ་བའི་བར་དང་།

དེ་བཞིན་དུ་རྒྱན་སྐྱེས་ཞེས་བྱ་བའི་བར་དང་། དེ་བཞིན་དུ་ཨེ་ལའི་འདབ་མ་ཞེས་བྱ་བའི་བར་དང་། དེ་བཞིན་དུ་ལག་པའི་ཚིགས་ མི་མངོན་པ་ཞེས་བྱ་བའི་བར་དང་། དེ་བཞིན་དུ་སྒྲ་བསགས་ཞེས་བྱ་བའི་བར་དང་། དེ་བཞིན་དུ་མཚོ་གྱད་ཅེས་བྱ་བའི་བར་དང་། དེ་བཞིན་དུ་སྟོབས་ཀྱིས་རྒྱུ་ཞེས་བྱ་བའི་བར་དང་། དེ་བཞིན་དུ་ཏི་སེའི་གངས་མཐོ་བ་ཞེས་བྱ་བའི་བར་དང་། དེ་བཞིན་དུ་ཆུའི་ཤུགས་ཞེས་ བྱ་བའི་བར་དང་། དེ་བཞིན་དུ་གཙུག་ཕུད་སྔོན་པོ་ཞེས་བྱ་བའི་བར་དང་། དེ་བཞིན་དུ་གསེར་སེར་སྐྱ་ཞེས་བྱ་བའི་བར་དང་། དེ་བཞིན་དུ་རྩྭ་སྔོན་པོ་ཞེས་བྱ་བའི་བར་དང་། དེ་བཞིན་དུ་གཤེ་བའི་ཤིང་ཞེས་བྱ་བའི་བར་དང་། དེ་བཞིན་དུ་མིག་གསལ་ཞེས་བྱ་བའི་བར་དང་། དེ་བཞིན་ དུ་གླང་པོ་ཟད་ཅེས་བྱ་བའི་བར་དང་། དེ་བཞིན་དུ་རྣོན་པོས་བྱིན་ཞེས་བྱ་བའི་བར་དང་། དེ་བཞིན་དུ་གནས་ན་རྒྱུ་ཞེས་བྱ་བའི་བར་དང་། དེ་བཞིན་དུ་གཤོལ་ངན་ཞེས་བྱ་བའི་བར་དང་། དེ་བཞིན་དུ་ཨེ་ལའི་གདོང་ཞེས་བྱ་བའི་བར་དང་། དེ་བཞིན་དུ་མིག་དམར་ཞེས་བྱ་བའི་ བར་དང་། དེ་བཞིན་དུ་ཡིད་འཕྲོག་ཅེས་བྱ་བའི་བར་དང་། དེ་བཞིན་དུ་རབ་མཆོག་ཅེས་བྱ་བའི་བར་དང་།

དེ་བཞིན་དུ་འཛམ་བུའི་གླིང་འདི་ན་ཀླུའི་རྒྱལ་པོ་ལྔ་ཁྲི་དྲུག་སྟོང་གང་དག་ཡིན་པའི་བར་དེ་དག་ཐམས་ཅད་ཀླུའི་རྒྱལ་པོ་རེ་རེ་ཡང་འཁོར་བརྒྱ་སྟོང་ཕྲག་དུ་མ་དྲང་སྲོང་ཐུབ་ པའི་གནས་དེར་སྐྱབས་ཀྱི་དོན་དུ་རྟེན་ཅིང་ཞུགས་སོ། ། གླིང་བརྒྱད་ཁྲི་བཞི་སྟོང་ནས་གླིང་རེ་རེ་ནས་ཀྱང་ཀླུ་ཆེན་པོ་བརྒྱ་སྟོང་ཕྲག་དུ་མས་རང་རང་གི་གནས་བོར་ནས་གནས་རྟེན་དེར་སྐྱབས་ཀྱི་དོན་དུ་རྟེན་ཅིང་ཞུགས་སོ། ། དེ་བཞིན་དུ་བྱང་གི་སྒྲ་མི་སྙན་ནས་ཀླུའི་རྒྱལ་པོ་ལུས་འབིགས་ པའི་ཁབ་ཅེས་བྱ་བ་དང་། ཀླུའི་རྒྱལ་པོ་རྒྱུ་བ་ཆེན་པོ་ཞེས་བྱ་བ་དེ་གཉིས་རེ་རེ་ཡང་ཀླུ་དང་། ཀླུ་ཆེན་པོ་དང་། ཀླུའི་རྒྱལ་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང་ལྷན་ཅིག་ཏུ་ཡོངས་སུ་བསྐོར་ཅིང་དྲང་སྲོང་ཐུབ་པའི་གནས་དེར་སྐྱབས་ཀྱི་དོན་དུ་བརྟེན་ཏོ། ། ཤར་གྱི་ལུས་འཕགས་ཀྱི་གླིང་ནས་ཀླུའི་རྒྱལ་པོ་ཟླ་བ་སྲུང་ཞེས་བྱ་བ་དང་། ཀླུའི་རྒྱལ་པོ་དབྱིག་གཏོང་ཞེས་བྱ་བ་དེ་གཉིས་རེ་རེ་ཡང་ཀླུ་དང་། ཀླུ་ཆེན་པོ་དང་།

ཀླུའི་རྒྱལ་པོ་བྱེ་བ་བརྒྱ་སྟོང་ཕྲག་དུ་མས་ལྷན་ཅིག་ཡོངས་སུ་བསྐོར་ཅིང་མདུན་དུ་བདར་ཏེ་དྲང་སྲོང་ཐུབ་པའི་ གནས་རྟེན་དེར་སྐྱབས་ཀྱི་དོན་དུ་རྟེན་ཅིང་ཞུགས་སོ། ། བ་ལང་སྤྱོད་ཀྱི་གླིང་ནས་ཀླུའི་རྒྱལ་པོ་རིན་པོ་ཆེའི་ཕྲེང་བ་ཅན་ཞེས་བྱ་བ་དང་། ཀླུའི་རྒྱལ་པོ་བ་ལང་གི་འོད་ཀྱི་ཕྲེང་བ་ཅན་ཞེས་བྱ་བ་དེ་གཉིས་རེ་རེ་ཡང་ཀླུ་དང་། ཀླུ་ཆེན་པོ་དང་། ཀླུའི་རྒྱལ་པོ་བྱེ་བ་ཁྲག་ཁྲིག་ བརྒྱ་སྟོང་ཕྲག་དུ་མས་ལྷན་ཅིག་ཏུ་མདུན་དུ་བདར་ཞིང་དྲང་སྲོང་ཐུབ་པའི་གནས་དེར་སྐྱབས་ཀྱི་དོན་དུ་ཞུགས་སོ། ། ཡང་དེའི་ཚེ་གླིང་བཞི་པ་འདི་དང་གླིང་གཞན་བརྒྱ་སྟོང་ཕྲག་བརྒྱད་ཅུ་ན་ཀླུ་དང་། ཀླུ་ཆེན་པོ་དང་། ཀླུའི་སྐྱེ་གནས་པ་ཀླུ་སྒོ་ང་ལས་སྐྱེས་པ་དང་། ཀླུ་མངལ་ ནས་སྐྱེས་པ་དང་། དྲོད་གཤེར་ལས་སྐྱེས་པ་དང་། རྫུས་ཏེ་སྐྱེས་པ་ཕོ་དང་། མོ་དང་། ཁྱེའུ་དང་། བུ་མོ་ཡང་རུང་། གང་སུ་དག་ཡོད་པ་སྐད་ཅིག་དེ་ལ་གང་དེར་བརྟེན་པར་མ་གྱུར་པ་གཅིག་ཀྱང་མེད་དེ། དྲང་སྲོང་ཐུབ་པའི་གནས་དེར་སྐྱབས་ཀྱི་དོན་ དུ་ཞུགས་སོ། ། དེ་དག་ཐམས་ཅད་ཞུགས་མ་ཐག་ཏུ་རེ་རེ་ཡང་འདི་ལྟ་བུའི་ལུས་ཆུང་ངུར་གྱུར་ཏེ།

དཔེར་ན་མིག་སྨན་བསྐུ་བའི་ཐུར་མ་བཞིན་ནོ། ། དེ་དག་ཀྱང་རང་ཁྲོས་པའི་མཐུས་རེ་རེ་ཡང་འདི་ལྟ་བུའི་ལུས་རི་རབ་ཙམ་ཆེན་པོར་ཡང་དག་པར་རྗེས་སུ་མཐོང་ངོ་། ། དེ་ནས་དེའི་ཚེ་བདུད་སྡིག་ཅན་གྱིས་གནས་རྟེན་དུ་ཀླུའི་སྐྱེ་གནས་པ་ཐམས་ཅད་འདུས་པ་དང་། ཐམས་ཅད་ལུས་ཆུང་ངུར་མཐོང་ངོ་། ། དེ་མཐོང་བས་ཤས་ཆེར་འཁྲུགས་ཤིང་ཀུན་ཏུ་འཁྲུགས་ཏེ་སྐྲག་ནས་རང་གི་སྐྱེ་བོ་ལ་འདི་སྐད་ཅེས་སྨྲས་སོ། ། འབྱུང་པོ་ཆེན་པོ་ཀླུ་ རྣམས་ཐམས་ཅད་གཡོས། ། དྲང་སྲོང་གནས་པ་དེར་ནི་འདུས་ནས་སུ། ། ཐམས་ཅད་སྟོབས་དང་གཟུགས་དང་དཔལ་ལས་ཉམས། ། དགེ་སྦྱོང་མདངས་ཀྱི་སྟོབས་ལ་བལྟ་བར་བྱོས། ། དེ་ནས་བདུད་ཤོར་བ་གཞན་ཚུལ་ཁྲིམས་རྟེན་ཞེས་བྱ་བ་དེས་སྨྲས་པ། ཐུགས་མི་དགྱེས་པ་མ་མཛད་བདག་ལ་གསོན། ། ཀླུ་རྣམས་བདག་ཉིད་རྩེ་བ་འདི་ལགས་ཏེ། ། འདི་ལྟར་ཤཱཀྱའི་བུ་ནི་ཕྱེར་རློག་པའི། ། ཚོགས་ཅན་འདུས་པ་ལ་ནི་མངོན་བརྟག་མཛོད། ། སྡིག་ཅན་གྱིས་སྨྲས་པ། བློ་མཆོག་དེར་ནི་མྱུར་དུ་འགྲོ་བར་བྱོས། ། ཀླུ་ཡི་ ཚོགས་ནི་ཐམས་ཅད་སྤྲོ་བར་བྱོས། ། ཇི་སྟེ་ཤཱཀ་བུ་ཚོགས་བཅས་གསད་ནུས་ན། ། ཀླུ་རྣམས་ཀྱི་ནི་ཡུལ་ཡང་མཆོག་ཏུ་འགྱུར། །

དེ་ནས་བདུད་ཤོར་བ་ཚུལ་ཁྲིམས་རྟེན་དེ་བདུད་ཀྱི་གནས་དེ་ནས་སྲོག་ཆགས་བརྒྱད་ཁྲི་དང་ལྷན་ཅིག་ཆས་སོ། ། དེ་ནས་དེ་བཞིན་ གཤེགས་པ་ཤཱཀྱ་ཐུབ་པ་སྔོན་གྱི་སྨོན་ལམ་མཐར་ཕྱིན་པས་དྲང་སྲོང་ཐུབ་པ་ཐམས་ཅད་དབང་དུ་མཛད། སེམས་ཅན་ཐམས་ཅད་ཡོངས་སུ་སྨིན་པར་མཛད། སངས་རྒྱས་ཀྱི་ཡུལ་ཐམས་ཅད་ཀྱི་ཆོ་འཕྲུལ་གྱི་བྱིན་གྱི་རླབས་ཀྱི་རྒྱུ་འཐུན་པ་བཤད་པ་ཡང་དག་པར་བསྟན། བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་སྐྱོ་བར་མཛད། ལྷ་དང་། ཀླུ་དང་། གནོད་སྦྱིན་ཞེས་བྱ་བ་ནས་མི་དང་། མི་མ་ཡིན་ཐམས་ཅད་རབ་ཏུ་དགའ་བར་མཛད། སངས་རྒྱས་ཀྱི་ཞིང་འདི་ཐམས་ཅད་ཤིན་ཏུ་ཡོངས་སུ་སྤྱད་པ་མཛད། སངས་ རྒྱས་ཀྱི་ཞིང་ཡོངས་སུ་དག་པ་ཐམས་ཅད་ཀྱི་ནང་ན་སངས་རྒྱས་ཀྱི་ཞིང་འདི་མཆོག་ཏུ་ཆེས་གཟི་བརྗིད་དང་ལྡན་པ་དང་། ཆེས་སྐལ་བ་དང་ལྡན་པ་དང་། ཆེས་བསོད་ནམས་ཀྱི་ས་བོན་བྱེད་པའི་མདངས་དང་ལྡན་པ་དང་། སངས་རྒྱས་ཀྱི་ཞིང་ཐམས་ཅད་ཀྱི་མཆོད་པར་འོས་པ་ མཛད་དེ། དེ་ནས་དེ་བཞིན་གཤེགས་པས་རྫུ་འཕྲུལ་མངོན་པར་འདུ་མཛད་པ་རྒྱུན་བཅད་དོ། །

དེ་ལ་སངས་རྒྱས་ཀྱི་ཞིང་འདི་ན་སེམས་ཅན་གང་དག་ཡོད་པ་དེ་དག་ཐམས་ཅད་བཅོམ་ལྡན་འདས་ཀྱི་སྐུ་ལ་ཆུད་པར་གྱུར་ཏེ། དེ་དག་ཐམས་ཅད་བཅོམ་ལྡན་འདས་ཀྱིས་ ཤེས་པ་སོ་སོར་སྦྱངས་སོ། ། དེ་བཞིན་གཤེགས་པས་སངས་རྒྱས་ཐམས་ཅད་ཀྱི་ཡུལ་གྱི་རྒྱུ་འཐུན་པའི་ཆོ་འཕྲུལ་གྱི་བྱིན་གྱི་རླབས་ཀྱི་ཏིང་ངེ་འཛིན་གྱི་སྟོབས་རྒྱུན་བཅད་པ་དང་། དེའི་ཚེ་སྔོན་ཇི་ལྟར་བཞུགས་པ་བཞིན་དུ་ཡང་དག་པར་སྣང་སྟེ། དེ་ དེ་ལྟར་ཤིན་ཏུ་ལྷམ་མེ། ལྷན་ནེ། ལྷང་ངེར་བཞུགས་སོ། ། དེ་དེའི་བར་དུ་ཡང་རང་གི་གཟི་བརྗིད་ཀྱི་འོད་ཟེར་རྣམས་ཀྱིས་སངས་རྒྱས་ཀྱི་ཞིང་ཐམས་ཅད་སྣང་བས་ཁྱབ་པར་མཛད་ནས་བཞུགས་སོ། ། བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱ་སྟོང་ཕྲག་དུ་མ་དེ་དག་ ཐམས་ཅད་ངོ་མཚར་ཐོབ་ཅིང་རྨད་དུ་བྱུང་བ་ཐོབ་སྟེ། བཅོམ་ལྡན་འདས་ལ་མེ་ཏོག་དང་། དྲི་དང་། ཕྱེ་མ་དང་། རིན་པོ་ཆེ་དང་། རས་བཅོས་བུ་དང་། ཆོས་གོས་དང་། ཕྱང་འཕྲུལ་དང་། རྒྱན་སྣ་ཚོགས་དང་། རོལ་མོའི་སྒྲ་སྣ་ཚོགས་ཀྱིས་མཆོད་པ་བྱས་ཏེ། བསྐོར་ བ་བྱས་ནས་སྤྱན་སྔར་འཁོད་དོ། ། དེ་བཞིན་དུ་བཅོམ་ལྡན་འདས་ཀྱི་ཉན་ཐོས་རྣམས་ཞེས་བྱ་བ་ནས་དེ་བཞིན་དུ་ལྷ་དང་། ཀླུ་དང་།

གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། གྲུལ་བུམ་དང་། {ཡི་དགས་,ཡི་དྭགས་}དང་། ཤ་ཟ་དང་། སྲུལ་པོ་དང་། ལུས་སྲུལ་པོ་དང་། མི་དང་། མི་མ་ཡིན་པ་ཐམས་ཅད་ཀྱི་བར་དེ་དག་ཐམས་ཅད་ཀྱིས་བཅོམ་ལྡན་འདས་ལ་མེ་ཏོག་དང་། དྲི་དང་། ཕྱེ་མ་དང་། རིན་པོ་ཆེ་སྣ་ཚོགས་དང་། རས་བཅོས་བུ་དང་། ཆོས་གོས་དང་། ཕྱང་འཕྲུལ་དང་། རྒྱན་སྣ་ཚོགས་ཞེས་བྱ་བ་ནས་མཆོད་ པའི་བར་དུ་བྱས་ཏེ། བསྐོར་བ་བྱས་ནས་ཆོས་ཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འཁོད་དོ། ། བདུད་ཤོར་བ་ཚུལ་ཁྲིམས་རྟེན་བདུད་ཀྱི་རིས་བརྒྱད་ཁྲི་དང་དེ་ནས་འཛམ་བུའི་གླིང་འདིར་བབས་ནས། དགེ་སྦྱོང་གཽ་ཏ་མས་སྐུ་ཡངས་པ་ཀུན་ཏུ་བསྟན་པ་ཇི་ལྟར་རྒྱུན་བཅད་ པ་མཐོང་སྟེ། དེ་ཡུལ་མ་ག་དྷཱ་ན་བཞུགས་པར་ཀུན་ཏུ་སྣང་ངོ་། ། དེ་བདག་ཅག་གིས་སྐྲག་པས་སྒྱུའི་སྟོབས་ལས་མ་ཉམས་སམ་སྙམ་ཞིང་། ད་ལྟ་ན་དེར་འཁོར་དང་བཅས་ཏེ་འདུས་པའི་ནང་དུ་འདུག་ན། དེ་བདག་ཅག་གི་ཕྱིར་འདུག་ནས་སྡིག་པ་མི་བྱེད་དམ་སྙམ་སྟེ། གང་ བདག་ཅག་གིས་དེར་དང་པོར་སོང་ནས་འདི་ལ་རྒྱུ་གང་ཡིན་པར་འགྱུར་བ་མཉན་པར་བྱ་གོར་མ་ཆག་སྙམ་མོ། །

དེ་ནས་བདུད་ཤོར་བ་ཚུལ་ཁྲིམས་རྟེན་འཁོར་དང་བཅས་ཏེ་དེ་ནས་བབས་ནས། བཅོམ་ལྡན་འདས་ག་ལ་བ་དེ་ལོགས་སུ་སོང་སྟེ་ཕྱིན་ནས་བཅོམ་ལྡན་ འདས་ཀྱི་སྤྱན་སྔར་འདུག་སྟེ། དེའི་ཚེ་ཡང་དེས་ཚིགས་སུ་བཅད་པ་སྤོབས་པར་བྱས་པ། ཁྱོད་ཀྱིས་ནད་ནི་ཆེན་པོ་དག ། རྒ་ཤིའི་མཚོ་ལས་མ་རྒལ་ཏོ། ། འདི་ལྟར་སེམས་ཅན་སླུ་བྱེད་ན། ། བྱང་གྲོལ་ཏུ་ནི་ཇི་ལྟར་ཞུགས། ། དེ་ནས་བཅོམ་ལྡན་འདས་ཀྱིས་བདུད་ཤོར་བ་ཚུལ་ཁྲིམས་རྟེན་ལ་ ཚིགས་སུ་བཅད་ནས་སླར་བཀའ་སྩལ་པ། ང་ནི་སེམས་ཅན་ཆུ་བོ་རྒལ། ། ང་ལ་ཡང་སྲེད་མེད་པ་ཡིན། ། སེམས་ཅན་རྣམས་ལ་ཐུགས་བརྩེའི་ཕྱིར། ། སྲོག་ཆགས་རྣམས་ལ་ཆོས་སྟོན་ཏོ། ། འཁོར་བར་ཡུན་{རིངས་,རིང་}བརྩམས་ནས་སུ། ། ཁྱོད་ཀྱིས་བྱང་ཆུབ་ ཕྱིར་སྤྱད་དེ། ། མར་མེ་མཛད་ནི་ཚུན་ཆད་དུ། ། སྦྱིན་དང་ཚུལ་ཁྲིམས་ཀུན་ཏུ་བསྒྲུབས། ། སངས་རྒྱས་བྱེ་བ་ཕྲག་སྟོང་པོ། ། དེ་དག་ཁྱོད་ཀྱིས་རི་མོར་བྱས། ། ཐེག་པ་མཆོག་གི་དོན་དུ་ནི། ། ང་ཡིས་ཁྱོད་ལ་ལུང་བསྟན་ཏེ། ། སྦྱངས་པའི་ཡོན་ཏན་ཀུན་ཏུ་སྤྱད། ། མཚན་མ་མེད་པར་རྣམ་པར་བསྒོམས། ། ང་ཡིས་མིག་རྣམས་དག་པ་སྦྱིན། ། སྔོན་གྱི་ཚེ་རབས་དྲན་པར་བྱོས། །

དེ་ནས་བདུད་ཤོར་བ་ཚུལ་ཁྲིམས་རྟེན་སྔོན་གྱི་ཚེ་རབས་དང་། སྨོན་ལམ་དང་། སངས་རྒྱས་རྣམས་ལ་མཆོད་པ་དང་། དགེ་བའི་རྩ་བ་ཐམས་ཅད་ཀྱིས་ བསྐུལ་བས་བཅོམ་ལྡན་འདས་ཀྱི་སྤྱན་སྔར་རྩྭ་བཀྲམ་བ་ལྟ་བུར་འོངས་པར་གྱུར་ཏེ། གདོང་མཆི་མ་དང་བཅས་པས་ཐལ་མོ་རབ་ཏུ་སྦྱར་ནས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་བྱིས་པ་ཇི་ལྟ་བ་དང་། མྱོས་པ་ཇི་ལྟ་བ་དང་། སེམས་འཁྲུག་པ་ཇི་ ལྟ་བ་བཞིན་དུ་ནོངས་པ་འཆགས་ལགས་སོ། ། བཙུན་པ་བཅོམ་ལྡན་འདས་ནོངས་པ་འཆགས་སོ། ། འདི་ལྟར་བདག་གིས་དྲན་ལགས་ཏེ། གྲངས་མ་མཆིས་པ་གཅིག་རྫོགས་པར་བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ཏུ་བརྩོན་པ་ཆེན་པོས་ཕ་རོལ་ཏུ་ ཕྱིན་པ་དྲུག་གི་སྤྱོད་པ་སྤྱད་ལགས་སོ། ། དགེ་བའི་རྩ་བ་ཡོངས་སུ་སྦྱངས་པ་མང་དུ་བགྱིས་ལགས་སོ། ། བཅོམ་ལྡན་འདས་དེ་བཞིན་གཤེགས་པ་འདས་པ་རྣམས་དང་བཞུགས་པ་བརྒྱ་སྟོང་ཕྲག་བྱེ་བ་ལ་བདག་གིས་བསྙེན་བཀུར་བ་དང་བཀུར་སྟི་རྣམ་པ་སྣ་ ཚོགས་བགྱིས་ཏེ་ཆོས་ཀྱང་ཐོས་ལགས་སོ། ། སྨོན་ལམ་ཡང་བཏབ་ལགས་སོ། ། དེ་བཞིན་གཤེགས་པ་འོད་སྲུང་གི་གསུང་རབ་ལ་དགེ་སློང་ལ་ལ་ཉན་ཐོས་ཀྱི་གཏམ་རྗེས་སུ་བསྐུལ་བར་བགྱིད་ལགས་ཏེ།

དེ་ནས་བདག་གིས་མ་བསམས་པར་ཀྱེ་མ་དགེ་སྦྱོང་གི་ལུས་བྱད་ ཀྱིས་གང་ཟག་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ཀྱི་མདུན་དུ་ཉན་ཐོས་ཀྱི་གཏམ་འཆད་པ་འདི་ནི་བདུད་དོ་ཞེས་སྡིག་པ་ཅན་གྱི་ཚིག་བརྗོད་ལགས་ཏེ། དེར་གལ་ཏེ་བདག་གིས་སྡིག་པ་ཅན་གྱི་ཚིག་དེ་མ་སྨྲས་པར་གྱུར་ན་ནི་དེར་བདག་གིས་བླ་ན་མ་མཆིས་པ་ཡང་དག་ པར་རྫོགས་པའི་བྱང་ཆུབ་ཏུ་ལུང་བསྟན་པ་ཐོབ་པར་འགྱུར་ལགས་ན། སུག་ལས་ཀྱི་ལྷག་མ་དེས་བདག་དེ་ནས་ཤི་འཕོས་ནས་བདུད་ཀྱི་གནས་སུ་སྐྱེས་ཏེ། དགུང་ལོ་བྱེ་བ་ཕྲག་ལྔ་བཅུ་རྩ་བདུན་དང་། དགུང་ལོ་བརྒྱ་སྟོང་དག་ཏུ་དེར་བླ་ན་མ་མཆིས་པ་ཡང་དག་པར་རྫོགས་པའི་ བྱང་ཆུབ་ཏུ་བདག་གི་སེམས་བསྐྱེད་པ་གཅིག་ཀྱང་མ་བྱུང་ལགས་ན་ཚངས་པའི་གནས་པ་རྣམས་ལ་ལྟ་སྨོས་ཀྱང་ཅི་འཚལ་ལགས་ཞེས་དེ་བཞིན་གཤེགས་པ་འཁོར་དང་བཅས་པ་ལ་ལན་གཉིས་ཀྱི་བར་དུ་བཟོད་པ་གསོལ་ཏོ། ། ཇི་སྲིད་དུ་སྔོན་གྱི་མཐའི་འཁོར་བར་འཁོར་བ་ དེ་སྲིད་དུ་སླད་ཀྱིས་ཕྱི་མའི་མཐའི་མུར་སེམས་ཅན་དམྱལ་བར་གནས་པར་སྤྲོ་ལགས་ཀྱི། བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ལས་སེམས་ལྡོག་པར་ནི་མི་བགྱིད་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་ལེགས་སོ་ ལེགས་སོ། ། གང་ལ་ལ་སྙིང་རྗེའི་སེམས་ཀྱིས་བྱང་ཆུབ་ཏུ་སེམས་གཞོལ་བར་བྱེད་ན། འདི་ནི་འདྲེན་པ་རྣམས་ལ་མཆོད་པ་མཆོག་དང་ཕུལ་ཡིན་ཏེ། འདྲེན་པའི་སྤྱན་སྔར་ལ་ལ་མར་མེ་རི་རབ་ཙམ་དུ་འབར་བར་བྱེད་ཀྱང་བསོད་ནམས་ཀྱི་ཕུང་པོ་དེ་སྙེད་ཡོངས་སུ་བཟུང་བ་ མ་ཡིན་གྱིས་ཁྱོད་ལོངས་ཤིག ། ང་ལ་སྡིག་པའི་ལས་སྲ་བ་འོར་ཅིག ། ཕུང་པོ་དང་ཁམས་འདི་དག་ལ་སྤྲོས་པ་དང་། མཚན་མ་མེད་པ་དང་། འདུས་བྱས་ཐམས་ཅད་དྲན་པར་བྱོས་ཤིག་དང་། ཁྱོད་ཡོན་ཏན་མཆོག་ཏུ་ཁ་ལོ་སྒྱུར་བར་འགྱུར་རོ། ། དེ་ནས་དེ་ཉིད་ཀྱི་ཚེ་བྱང་ ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་རྟེན་གྱིས་རྗེས་སུ་འཐུན་པའི་ཆོས་རྣམས་ལ་བཟོད་པ་ཐོབ་པར་གྱུར་ཏོ། ། དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་རྟེན་སྟན་ལས་ལངས་ཏེ། བཅོམ་ལྡན་འདས་ལ་རིན་ཐང་མེད་པའི་ མུ་ཏིག་གི་རྒྱན་ཕྲེང་གིས་སྐུ་ལ་གཡོགས་ནས་གསོལ་པ། གང་བདག་ཅག་གིས་ཆོས་ཐམས་ཅད་མྱུར་དུ་རྟོགས་ནས་དབུ་བ་དང་འདྲ་བའི་ལྟ་བ་ཐམས་ཅད་ཡང་དག་པར་འཇོམས་པར་བགྱིད་པ་དང་། བྱང་ཆུབ་ཏུ་ནི་བཟོད་པ་མཆོག་ཐོབ་པར་འགྱུར་བ་དང་།

ཡུན་རིང་ པོ་མི་ཐོགས་པར་སེམས་ཅན་ཐམས་ཅད་ཐར་བར་བགྱིད་པའི་ཆོས་ནི་གང་ལགས། གང་ཞིག་ནི་བྱང་ཆུབ་སེམས་དཔས་སྤང་བའི་སླད་དུ་བསྒོམ་པར་བགྱིད་པ་ལགས། བཅོམ་ལྡན་འདས་ཀྱིས་བཀའ་སྩལ་པ། ཚུལ་ཁྲིམས་རྟེན་མཁས་པས་ཆོས་བཞི་མྱུར་དུ་བསྐྱེད་ པར་བྱ་སྟེ། བཞི་གང་ཞེ་ན། སེམས་ཅན་གྱི་ཕྱིར་སྡུག་བསྔལ་ཚད་མེད་པ་ཐམས་ཅད་ལ་སྤྲོ་བར་བྱ་བ་ཡིན། སངས་རྒྱས་ཀྱི་ཡུལ་གྱི་བསླབ་པ་དཔག་ཡས་པ་གཟུང་བར་བྱ་བ་ཡིན། མ་ཉམས་པར་གཟུང་བར་བྱ་བ་ཡིན། སངས་རྒྱས་ཀྱི་ཆོས་དཔག་ཏུ་མེད་པ་ཐམས་ ཅད་མྱུར་དུ་ཡོངས་སུ་རྫོགས་པར་བྱ་བ་ཡིན་ནོ། ། ཡང་དེའི་ཚེ་ཚུལ་ཁྲིམས་རྟེན་གྱི་འཁོར་བདུད་ཀྱི་སྡེ་བརྒྱད་ཁྲི་བཞི་སྟོང་པོ་དེ་དག་གིས་ལུང་བསྟན་པ་དེ་ཐོས་ནས་དེ་བཞིན་གཤེགས་པ་ལ་དད་པ་དང་དང་བ་མཆོག་སྐྱེས་ཤིང་གུས་པ་སྐྱེས་ནས། བཅོམ་ལྡན་འདས་ ལ་ལྷག་པའི་བསམ་པས་བཟོད་པ་གསོལ་བར་གྱུར་ཏོ། ། དེའི་ཚེ་དེ་དག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་སྟེ། དེ་དག་ཐམས་ཅད་ཀྱིས་བྱང་ཆུབ་ཀྱི་སེམས་མི་བརྗེད་པའི་ཏིང་ངེ་འཛིན་ཐོབ་བོ། །

བཅོམ་ལྡན་འདས་ལ་དེ་དག་ གིས་རང་རང་གི་ལྷ་རྫས་ཀྱི་ཆོས་གོས་དག་སྐུ་ལ་གསོལ་ནས་ཕྱོགས་གཅིག་ཏུ་འཁོད་དོ། ། བདུད་སྡིག་ཅན་གྱིས་མཐོང་སྟེ། མཐོང་ནས་ཀྱང་ཡང་ཤས་ཆེར་འཁྲུགས་ཤིང་སྐྲག་ནས་འདི་སྐད་ཅེས་སྨྲས་སོ། ། དགེ་སྦྱོང་གི་ནི་ལྟོར་ཆུད་པས། ། འཁོར་དེ་དག་དང་བྲལ་བར་གྱུར། ། འདི་ནས་གང་དུ་དོང་བ་ནི། ། ཐམས་ཅད་དེ་ཡི་དབང་དུ་སོང་། ། དེས་སུ་ཡང་ཕྱི་རོལ་དུ་མ་འབྱུང་ཤིག ། བདུད་ཀྱི་སྤྱོད་ཡུལ་འདིར་བདག་ཅག་གནས་པར་བྱའོ་ཞེས་སྨྲས་ནས་མྱུར་དུ་གྲོང་ཁྱེར་གྱི་སྒོ་བཅད་དེ་གབ་ཏུ་བཅུག་གོ། ། དེ་ནས་བཅོམ་ལྡན་འདས་ཀྱིས་ཡང་ཇི་ལྟར་ནམ་མཁའི་སྤྱན་ལས་གསུངས་པ་བཞིན་དུ་དེ་དག་ལ་ཚངས་པའི་གནས་པ་རྣམ་པ་གསུམ་པོ་སེམས་ཅན་ལ་དམིགས་པ་དང་། ཆོས་ལ་དམིགས་པ་དང་། དམིགས་པ་མེད་པ་རྒྱ་ཆེར་བསྟན་པར་ཡང་དག་པར་བརྩམ་པ་མཛད་དོ། ། རི་ཁ་ལ་ཏི་ཡའི་རྩེ་མོ་དྲང་སྲོང་ཐུབ་པའི་གནས་སུ་ཀླུ་གང་དག་རྟེན་ཅིང་འདུས་པ་དེ་དག་ཐམས་ཅད་ཀྱིས་ཀྱང་རང་རང་གི་ལུས་ཆུང་ངུར་མཐོང་སྟེ། དཔེར་ན་མིག་སྨན་བསྐུ་བའི་ཐུར་མ་བཞིན་ནོ། ། ཇི་ལྟར་སྔོན་གྱི་ལུས་བཞིན་དུ་ཡང་བཞག་པར་མ་ནུས་སོ། ། སླར་འབྱུང་ བར་ཡང་མ་ནུས་ཏེ།

དེ་དག་ཐམས་ཅད་འཇིགས་ཤིང་སྐྲག་ལ་སྤུ་ཟིང་ཞེས་བྱེད་པའི་བ་སྤུའི་ཁུང་བུ་བྱུང་ནས། དེ་དག་ཐམས་ཅད་ཀྱིས་དགའ་བོ་དང་ཉེ་དགའ་ལ་རབ་ཏུ་བཏུད་ནས་འདི་སྐད་ཅེས་སྨྲས་སོ། ། གང་གི་ཚེ་བདག་ཅག་གི་གྲོང་དུ་ཤ་སྦྲང་དང་། སྦྲང་བུ་ མཆུ་{རིངས་,རིང་}དང་། སྦྲང་བུ་གདུག་པ་རྣམས་ཀུན་ཏུ་བྱུང་བ་དེའི་ཚེ་བདག་ཅག་གནས་ཐམས་ཅད་བོར་ནས་བསྐྱབ་པའི་ཕྱིར་འདིར་ཞུགས་ནས་འདི་ནས་གང་དུ་ཡང་མཆི་བར་མ་ནུས་ཏེ། ལུས་དག་ཀྱང་ཆུང་ངུར་གྱུར་ལགས་ན་གང་གིས་བདག་ཅག་གནས་སུ་མཆི་བར་ བདག་ཅག་བསྐྱབ་ཏུ་གསོལ། མི་འཇིགས་པ་སྩལ་བར་གསོལ། དགའ་བོ་དང་ཉེ་དགའ་གཉིས་ཀྱིས་ཀྱང་སྨྲས་པ། དགེ་སྦྱོང་འདི་ནི་གཡོ་སྒྱུ་ཅན་གྱིས་བློ། ། ཤཱཀྱའི་བུ་ཕོ་སྒྱུ་མ་བྱེད་པ་ཡིན། ། སངས་རྒྱས་ཞིང་འདིར་ཞུགས་པར་གྱུར་ནས་སུ། ། ལུས་ཀུན་ལ་ ནི་ཐམས་ཅད་ཆུད་པར་གྱུར། ། དེས་ནི་ཀླུ་རྣམས་ཀུན་གྱི་གནས་དག་ཏུ། ། ཤ་སྦྲང་སྦྲང་བུ་མཆུ་{རིངས་,རིང་}སྦྲང་བུ་སྦྲུལ། ། ས་འདི་བསྐྱབ་ཕྱིར་ངེད་ཅག་ལྷགས་གྱུར་ཏེ། ། ཐམས་ཅད་སྟོབས་རྣམས་ལས་ནི་ཉམས་པར་གྱུར། ། གཽ་ཏ་མ་ནི་བློ་གྲོས་གཡོན་ཅན་ ཡང་། ། ལས་དེས་རྫུ་འཕྲུལ་དེ་ལས་ཉམས་གྱུར་ཅིང་། །

དེ་ནི་ལུས་ཀྱང་ཆུང་ངུར་གྱུར་ནས་སུ། ། སྟན་གྱི་སྟེངས་ན་དམངས་ནི་ཀུན་ཏུ་སྣང་། ། དེས་ནི་བདག་ཅག་ལུས་ཀྱང་ཆུང་ངུར་བྱས། ། བཙོན་ར་འདིར་ནི་བཅིངས་པར་གྱུར་ནས་སུ། ། ངེད་ཅག་ཅི་ཡང་བྱེད་ པར་མི་ནུས་ཀྱིས། ། མི་འཇིགས་ལྷ་ལ་ཁྱེད་ཅག་ཕྱག་འཚོལ་ཅིག ། འདོད་པའི་དབང་ཕྱུག་བདུད་སྡིག་ཅན་ལ་ཀླུ་དེ་དག་ཐམས་ཅད་ཀྱིས་ཕྱག་འཚལ་ཏེ་སྨྲས་པ། གང་བདག་ཅག་བཙོན་ར་དེ་ནས་འབྱེར་བ་དང་རང་རང་གི་གནས་རྣམས་སུ་གནས་པར་རྔོ་ཐོགས་པར་བདག་ཅག་ བསྐྱབ་ཏུ་གསོལ། ཀླུའི་རྒྱལ་པོ་ས་སྲུང་གི་བུས་དེ་དག་ལ་འདི་སྐད་ཅེས་སྨྲས་སོ། ། བདུད་དཔུང་བཅས་པ་རང་ཉིད་སྐྲག་ནས་སུ། ། གཽ་ཏ་མ་སྒྱུ་མ་གཡོ་སྒྱུ་ཅན་ལ་སྐྱོ། ། འཁོར་དང་ལྟོ་གོལ་རྣམས་ཀྱང་གཡོ་ཡིས་སུ། ། དེས་ནི་དེ་ཡི་སྐྱེ་བོ་མང་པོ་ཕྲོགས། ། བདུད་ལ་ མཐུ་ནི་ཅི་ཡང་ཡོད་མ་ཡིན། ། འགྲོ་བ་དང་ནི་རྫུ་འཕྲུལ་དེ་ལས་ཉམས། ། གཞན་ལ་ཁྱེད་ཅག་མྱུར་དུ་སྐྱབས་སུ་དེང་། ། ལྷ་རྣམས་ལ་ནི་ཀུན་གྱིས་རྗེད་པར་བྱོས། ། དེ་ནས་ཀླུ་ཐམས་ཅད་ཀྱང་ཁ་ཅིག་ནི་རྒྱལ་པོ་ཆེན་པོ་བཞི་ལ་ཕྱག་འཚལ་བར་བྱེད་དོ། ། ཁ་ཅིག་ནི་བརྒྱ་ བྱིན་ལ་ཕྱག་འཚལ་བར་བྱེད་དོ། །

ཁ་ཅིག་ནི་རབ་འཐབ་བྲལ་ལ་ཕྱག་འཚལ་བར་བྱེད་དོ། ། ཁ་ཅིག་ནི་ཡོངས་སུ་དགའ་ལྡན་ལ་ཕྱག་འཚལ་བར་བྱེད་དོ། ། ཁ་ཅིག་ནི་འཕྲུལ་དགའ་ལ་ཕྱག་འཚལ་བར་བྱེད་དོ། ། ཁ་ཅིག་ནི་ལྷའི་བུ་གཞན་འཕྲུལ་དབང་བྱེད་ལ་ཕྱག་འཚལ་བར་བྱེད་ དོ། ། ཁ་ཅིག་ནི་ཚངས་པ་ཆེན་པོ་ལ་ཕྱག་འཚལ་བར་བྱེད་དོ། ། ཀླུའི་རྒྱལ་པོ་ཐམས་ཅད་ལ་ཀླུའི་རྒྱལ་པོ་རྒྱ་མཚོས་འདི་སྐད་ཅེས་སྨྲས་སོ། ། ལྷ་དང་ལྷ་དབང་འདི་ཀུན་འཁོད་ནས་སུ། ། མཆོད་པ་རྣམ་པ་སྣ་ཚོགས་བྱེད་པ་དང་། ། གཽ་ཏམ་དམངས་ལ་ཐམས་ཅད་སྐྱབས་ གནས་པ། ། ཁྱེད་ཅག་གི་ནི་ཅི་ཡི་ཕྱིར་མ་མཐོང་། ། དཀའ་ཐུབ་དྲག་པོ་དྲང་སྲོང་ཆེན་པོ་དག ། གཞན་རྣམས་ལ་ནི་གྲོགས་དག་ཁྱེད་ཕྱག་འཚོལ། ། རྟས་བསྲུངས་མཐོན་འཕུར་སྐར་མ་དགའ་བ་དང་། ། ངན་སྤོང་བུ་ལ་ཅི་ཕྱིར་ཕྱག་མི་འཚལ། ། དེ་ནས་ཀླུ་ དེ་དག་ཐམས་ཅད་ཁ་ཅིག་ནི་དྲང་སྲོང་རབ་ཏུ་དཔལ་ལྡན་ལ་ཕྱག་འཚལ་བར་བྱེད་དོ། ། ཁ་ཅིག་ནི་བརྟེན་པོ་ལ་ཕྱག་འཚལ་བར་བྱེད་དོ། ། ཁ་ཅིག་ནི་རྟས་བསྲུངས་ལ་ཕྱག་འཚལ་བར་བྱེད་དོ། ། ཁ་ཅིག་ནི་མཐོན་པོར་འཕུར་ལ་ཕྱག་འཚལ་བར་བྱེད་དོ། ། ཁ་ཅིག་ནི་སྐར་མ་ལ་ དགའ་བ་ལ་ཕྱག་འཚལ་བར་བྱེད་དོ། །

ཁ་ཅིག་ནི་དྲང་སྲོང་ངན་སྤོང་གི་བུ་ལ་ཕྱག་འཚལ་བར་བྱེད་དོ། ། མངོན་པར་ཤེས་པ་ལྔ་དང་ལྡན་པ་དེ་དག་ལ་སྐྱབས་སུ་ཉེ་བར་དོང་ངོ་། ། ཡང་དེའི་ཚེ། དྲང་སྲོང་མངོན་པར་ཤེས་པ་ལྔ་དང་ལྡན་པ་དེ་དག་གངས་ཀྱི་ནུབ་ཕྱོགས་ཀྱི་ ངོས་ལ་དྲང་སྲོང་སྐར་མ་ལ་དགའ་བའི་མདུན་ན། ཤཱཀྱ་ཁྱུ་མཆོག་གི་ཡོན་ཏན་བསྔགས་པ་ཉན་ཅིང་འཁོད་དེ། དྲང་སྲོང་དེ་དག་གིས་ཀླུ་ཐམས་ཅད་འོ་དོད་འབོད་པ་ཐོས་སོ། ། ཐོས་ནས་ཀྱང་དྲང་སྲོང་ལྔ་པོ་དེ་དག་སྟན་ལས་ལངས་ཏེ། བྱང་ཆུབ་སེམས་ དཔའ་སེམས་དཔའ་ཆེན་པོ་སྐར་མ་ལ་དགའ་བ་ལ་འདི་སྐད་ཅེས་སྨྲས་སོ། ། བཅོམ་ལྡན་འདས་དྲང་སྲོང་ཐུབ་པའི་གནས་རྟེན་དུ་ཀླུ་ཐམས་ཅད་གནོད་པར་གྱུར་ཅིང་བདག་ཅག་ལ་སྐྱབས་སུ་ཉེ་བར་གནས་པ་གཟིགས་སམ། བཞེངས་ཏེ་དེར་བཞུད་ལ་ཀླུའི་སྡེ་ཐམས་ཅད་ ཡོངས་སུ་ཐར་བར་མཛོད་ཅིག ། དེས་སྨྲས་པ། ཁྱེད་དེང་ཤིག ། ལྷ་དང་། ཀླུ་དང་། གནོད་སྦྱིན་བརྒྱ་སྟོང་ཕྲག་མང་པོ་འདི་དག་ངའི་མདུན་དུ་འཁོད་ནས་ཚངས་པའི་གནས་པ་དམིགས་པ་མེད་པ་ཡོངས་སུ་འདྲི་བར་བྱེད་དེ། ངས་དེ་དག་གི་སེམས་ཡོངས་སུ་མགུ་བར་ བྱའོ། ། དེ་ནས་སྐར་མ་ལ་དགའ་བའི་རྐང་པ་གཉིས་ལ་དྲང་སྲོང་དེ་དག་ཐམས་ཅད་མགོ་བོས་ཕྱག་འཚལ་ཏེ།

ལན་གསུམ་བསྐོར་བ་བྱས་ནས་རྫུ་འཕྲུལ་གྱིས་དོང་སྟེ་དྲང་སྲོང་ཐུབ་པའི་གནས་ཀྱི་གཞི་རྟེན་དུ་འཁོད་དོ། ། དེ་ནས་དེ་དག་ལ་ཀླུ་དེ་དག་མགོ་བོས་ཕྱག་འཚལ་ ཏེ་འདི་སྐད་ཅེས་སྨྲས་སོ། ། ཁྱེད་བསོད་ནམས་ཅན་ཤེས་རབ་དང་ལྡན་པ་ཐབས་ཐམས་ཅད་ཀྱི་ཕ་རོལ་ཏུ་ཕྱིན་པ་དྲང་སྲོང་ཆེན་པོ་ལགས་ན་བདག་ཅག་ཡོངས་སུ་བསྐྱབ་པར་གསོལ། ། བཙོན་རའི་འཇིགས་པ་འདི་ལས་བདག་ཅག་ཡོངས་སུ་དགྲོལ་བར་གསོལ། དེ་ནས་ དྲང་སྲོང་དེ་དག་གིས་འདི་སྐད་ཅེས་སྨྲས་སོ། ། ངེད་ཀྱིས་ནི་ཁྱེད་འདི་ནས་ཡོངས་སུ་གྲོལ་བར་བྱེད་པར་མི་ནུས་སོ། ། ལག་འགྲོའི་བདག་པོ་དག་གངས་ཀྱི་ནུབ་ཕྱོགས་ཀྱི་ངོས་ལ་དྲང་སྲོང་ཐམས་ཅད་ཀྱི་བླ་མ་དབང་ཆེ་བར་གྲགས་པ། ཤེས་རབ་དང་། ཐབས་དང་། གཟི་བརྗིད་ ཆེན་པོས་རྒྱས་པ་སྐར་མ་ལ་དགའ་བ་ཞེས་བྱ་བ་ཡོད་དེ། དེས་ཁྱེད་འདི་ནས་ཡོངས་སུ་གྲོལ་བར་བྱེད་པར་འགྱུར་རོ། ། དེ་ལ་ཕྱག་འཚོལ་ཅིག ། དེ་ཐོས་ནས་ཀླུ་ཐམས་ཅད་དྲང་སྲོང་སྐར་མ་ལ་དགའ་བ་ལ་ཐལ་མོ་རབ་ཏུ་སྦྱར་བ་བྱས་ནས་དབྱངས་གཅིག་གིས་འོ་དོད་བོས་སོ། ། དེ་ ནས་བྱང་ཆུབ་སེམས་དཔའ་དྲང་སྲོང་གི་ཆ་བྱད་ཅན་དྲང་སྲོང་སྐར་མ་ལ་དགའ་བས་ལྷ་དང་། མི་འམ་ཅི་དང་།

གནོད་སྦྱིན་བརྒྱ་སྟོང་ཕྲག་མང་པོས་མདུན་དུ་བདར་ཅིང་ཡོངས་སུ་བསྐོར་ཏེ། དེ་ནས་རྫུ་འཕྲུལ་གྱིས་ཆས་ནས་དྲང་སྲོང་ཐུབ་པའི་གནས་དེར་ཡང་ཕྱིན་པར་གྱུར་ཏེ། དེ་ལ་ ཀླུ་ཐམས་ཅད་མགོ་བོས་ཕྱག་འཚལ་ཏེ་གུས་པ་མཆོག་སྐྱེས་ནས་འདི་སྐད་ཅེས་སྨྲས་སོ། ། གང་བདག་ཅག་རང་གི་གནས་སུ་མཆིས་ནས་དགའ་བར་འགྱུར་བར་བདག་ཅག་ཡོངས་སུ་བསྐྱབ་པར་གསོལ། གནས་འདི་ནས་བདག་ཅག་ཡོངས་སུ་དགྲོལ་བར་གསོལ། དུས་ཤེས་པ། དུས་ལ་བལྟ་བ་དྲང་སྲོང་ཆེན་པོ་དེས་ཀྱང་རྐྱེན་གྱི་དབང་གིས་དེ་དག་ལ་རྒྱུ་སྐར་གྱི་{གོ་རིམས་ཀྱི་,གོ་རིམ་གྱི་}གཏམ་བརྩམས་པ། ཇི་ལྟར་ཐམས་ཅད་ཐར་འགྱུར་བ། ། དེ་བཞིན་དུ་ནི་བཤད་པར་བྱ། ། ཁྱེད་ལ་ཕན་པ་གཞན་མེད་ཀྱིས། ། མཐར་གྱིས་སུ་ནི་མཉན་པར་གྱིས། ། འདིར་ནི་ནབ་ སོ་གང་གནས་པ། ། དེ་ནི་དབྱར་ཟླ་ཐ་{ཆུངས་ཏེ,ཆུང་སྟེ}། ། དེ་ནི་ཉི་མ་ལྷ་ཡིན་ཞིང་། ། ཀླུ་རྣམས་ཀུན་དང་འབྲེལ་པ་ཡིས། ། སྐར་མའི་དཔྱད་ནི་ཕོངས་པ་དང་། ། སྙིང་པོར་དྲང་སྲོང་སྦྱོར་བས་བསྟན། ། གཟའ་དང་རྒྱུ་སྐར་སྐར་མ་རྣམས། ། ནམ་མཁའ་ལ་ནི་སུ་ཡིས་བཞག ། མཁས་ པ་རྣམས་ནི་དགའ་བགྱིད་པ། ། ལོ་སྐོར་ཤེས་པ་བཤད་དུ་གསོལ། ། ཟླ་བ་ཉི་མ་རྒྱུ་སྐར་དང་། །

གཟའ་རྣམས་འགྲོ་བ་ཇི་ལྟར་ལགས། ། ཟླ་བ་རྣམས་ཀྱི་དང་པོར་ནི། ། རྒྱུ་སྐར་གང་ཞིག་འབྱུང་བར་འགྱུར། ། ཟླ་བའི་ཡུད་ཙམ་གང་ཞིག་ལགས། ། {གོ་རིམས་ཀྱང་,གོ་རིམ་ཡང་}ནི་ཅི་འདྲ་ལགས། ། ལྷ་ནི་ཅི་ལགས་རུས་ཅི་ལགས། ། ལྕི་བ་ཅི་ལགས་ཡང་བ་གང་། ། ཕན་པ་ཅི་ལགས་གནོད་པ་ཅི། ། སྟོབས་ཅི་བདག་ལ་མྱུར་དུ་གསུངས། ། གང་གིས་སུ་ནི་མཚན་མོ་འཐོབ། ། ཉི་མའི་མདུན་ན་ཅི་ཞིག་ལགས། ། གྲིབ་མའི་ གོམ་པ་དུ་ཞིག་ཏུ། ། ཉི་མ་འཁོར་བར་བགྱིད་པ་ལགས། ། ཟླ་བ་གང་ལ་ལྷོ་ཕྱོགས་སུ། ། ཉི་མ་བྱང་དུ་ཇི་ལྟར་གནས། ། དྲང་སྲོང་ཁྱོད་ལ་ཀུན་ཞུ་ན། ། བདག་ཅག་ལ་ནི་ཀུན་སྟོན་ཅིག ། ཤེས་རབ་ཆེན་པོས་འཇིག་རྟེན་མཁས། ། སྐར་ལ་དགའ་བས་དེ་སྐད་སྨྲས། ། བསྐལ་པ་བཟང་པོ་ཞུགས་པ་ན། ། སྔོན་ཆད་བྱུང་བ་སྐྱེ་ལགས་འགྲོ། ། དཔལ་ལྡན་གྲོང་ཁྱེར་ལྔ་ལེན་དུ། ། འདོད་པ་སྤངས་ཤིང་ཆོས་དང་ལྡན། ། གཙང་མ་འདོད་ཅིང་རབ་མཁས་པའི། ། མི་རྒྱལ་འབྱོར་བ་ཆེན་པོ་བྱུང་། ། དེ་ཡི་བཙུན་མོ་དམ་པ་ནི། ། འདོད་པ་རྣམས་ལ་ འཆུམས་གྱུར་ནས། ། དེ་ཚེ་ཡུལ་ནི་དབེན་པར་ཡང་། ། གཟུ་ལུམས་ཅན་དང་ལྷན་ཅིག་སྤྱད། ། མངལ་ནི་སྨིན་པར་བྱ་བའི་ཕྱིར། ། ཡང་དང་ཡང་དུ་སྤྱད་ནས་སུ།

། དེ་ཚེ་ཆོས་ཀྱིས་སྦྲུམ་པར་གྱུར། ། མི་སྡུག་པ་ཡི་ཁྱེའུ་ཞིག་བྱུང་། ། བུང་བུའི་མགོ་ལ་བོང་མགྲིན་པོ། ། བོང་རྣ་པོ་ལ་བོང་གདོང་པོ། ། ཐམས་ཅད་རྩུབ་པོ་རལ་པ་ཅན། ། མི་ཡི་ལུས་ནི་ཕྱེད་ཡོད་པ། ། དེ་མཐོང་འཇིགས་ནས་མྱུར་དུ་ནི། ། སྣམ་ཕྱི་སར་ནི་དེ་བོར་རོ། ། རེག་ཏུ་མི་རུང་མི་གཙང་བ། ། དེ་ཕྱིར་སྲིན་མོ་བོང་མོས་བླངས། ། གངས་ཀྱི་གནས་སུ་སོང་ནས་སུ། ། བུ་ལ་ཆགས་པས་གསོས་པ་ཡིན། ། བཅུད་ཀྱིས་ལེན་ནི་འཐུངས་པས་ན། ། དེ་ཚེ་ལྷ་དང་ལྷན་ཅིག་འགྲོགས། ། ཤེས་རབ་ཆེན་པོ་སྐལ་ལྡན་པོ། ། རབ་ཏུ་བརྩོན་ལྡན་སྙིང་རྗེའི་སེམས། ། གཟི་བརྗིད་ཆེན་པོ་བྱམས་པ་ཐོབ། ། སེམས་ཅན་ཀུན་ལ་ཕན་བྱེད་པའོ། ལྷ་ཡི་ཚོགས་ཀྱང་འདུས་ནས་སུ། ། རྔ་བོང་ལ་ནི་ཕྱག་འཚལ་ནས། ། དེ་ལ་ཡང་ནི་སྙིང་བརྩེའི་ཕྱིར། ། གངས་ཀྱི་རི་བོ་སྤྲུལ་པ་བྱས། ། ཤིང་དང་མེ་ཏོག་འབྲས་བུར་ལྡན། ། དྲི་ཞིམ་དགའ་བར་བྱེད་པ་སྟེ། ། སྣ་ཚོགས་རྩི་ཡིས་ཁེབས་པ་ལ། ། བྱ་རྣམས་སྣ་ ཚོགས་རྟེན་པ་ཡིན། ། དེར་ནི་དྲང་སྲོང་རྔ་བོང་དེ། ། རྣམ་པར་དབེན་པར་རྟེན་ནས་སུ། ། ལོ་ནི་དྲུག་ཁྲི་ཐམ་པར་ཡང་། ། རྐང་པ་གཅིག་གིས་དཀའ་ཐུབ་གནས། །

བརྒྱ་བྱིན་ཚངས་པས་ཕྱག་བྱས་ཏེ། ། ལྷ་རྣམས་ཀུན་གྱིས་མངོན་པར་བསྟོད། ། གཟུགས་རྟེན་ ལྷ་རྣམས་ཐམས་ཅད་དང་། ། དེར་ནི་ཚངས་པ་ཉེ་བར་འོངས། ། འདོད་རྟེན་ལྷ་རྣམས་ཐམས་ཅད་དང་། ། དེར་ནི་བརྒྱ་བྱིན་ཉེ་བར་འོངས། ། ཀླུ་དང་གནོད་སྦྱིན་གྲུལ་བུམ་དག ། ཐམས་ཅད་དེར་ནི་ཉེ་བར་ལྷགས། ། འཇིག་རྟེན་གང་སུ་མཁས་པ་ནི། ། དྲང་སྲོང་ཚངས་ པར་སྤྱོད་པ་རྣམས། ། འདོད་པའི་ཁམས་དང་གཟུགས་ཁམས་པ། ། ཐམས་ཅད་དེར་ནི་ཉེ་བར་ལྷགས། ། ཀུན་གྱིས་དྲང་སྲོང་རྔ་བོང་ལ། ། མཆོད་པ་རྣམ་པ་སྣ་ཚོགས་བྱས། ། བཏུད་ནས་ཐལ་མོ་སྦྱར་བྱས་ཏེ། ། བརྒྱ་བྱིན་ཚངས་པས་འདི་སྐད་སྨྲས། ། སྐལ་ ལྡན་ཆེན་པོ་ཀྱེ་ཁྱོད་ནི། ། ཅི་ཕྱིར་དེད་ལ་མངོན་པར་དགའ། ། རེ་བ་ཅི་འདྲ་ཅི་ལ་བསམས། ། ཅི་འདོད་པ་ནི་སྨྲ་བར་གྱིས། ། དྲང་སྲོང་རྔ་བོང་གིས་སྨྲས་པ། ། གཟའ་དང་རྒྱུ་སྐར་སྐར་མ་རྣམས། ། མཁའ་ལ་ཅི་འདྲར་བྱུང་གྱུར་པའི། ། སྔོན་གྱི་བསྐལ་པ་བདག་གིས་ དྲན། ། ཉིན་ཞག་དུ་ནི་རྒྱུ་སྐར་རྣམས། ། རེ་རེ་ནས་ནི་རྒྱུ་བར་བྱེད། ། ཚེ་རབས་ཀུན་ཏུ་རྒྱུ་སྐར་གྱི། ། ཡོན་ཏན་ལས་རྣམས་རྣམ་པར་ཤེས། ། བསྐལ་པ་བཟང་པོ་འདི་ལ་ནི། ། འདི་ནི་ཅི་ཡང་མི་སྣང་ན། །

སྙིང་བརྩེར་གྱིས་དེ་ཁྱོད་ཀྱིས་ནི། ། རྒྱུ་སྐར་{གོ་རིམས་,གོ་རིམ་}ཀུན་ ཞོག་ཤིག ། ཇི་ལྟར་འཇིག་རྟེན་འདིར་གནས་བཞིན། ། དེ་ཡི་ལས་དང་ཡོན་ཏན་གསུངས། ། ཡོན་ཏན་རྒྱ་མཚོས་ཤོད་ཅིག་ཅེས། ། ལྷ་ཡི་ཚོགས་རྣམས་ཀུན་གྱིས་སྨྲས། ། དྲང་སྲོང་རྔ་བོང་གིས་སྨྲས་པ། ། རེ་ཞིག་དང་པོར་སྨིན་དྲུག་ཅེས། ། རྒྱུ་སྐར་ དཀྱིལ་འཁོར་ཐམས་ཅད་ལ། ། ནང་གི་དང་པོར་གཞག་པར་བྱ། ། ཇི་ལྟར་སྨིན་དྲུག་བཞག་པ་བཞིན། ། འདི་ལ་སུ་ཞིག་དད་པ་འབུལ། ། ལྷ་ཡི་བུ་ནི་ཉི་མ་ཡང་། ། སྐར་མ་དྲུག་པོ་སྟོན་པར་བྱེད། ། སྨིན་དྲུག་རྒྱུ་སྐར་དེ་དག་ནི། ། མཁའ་ལ་རྟག་ ཏུ་རྒྱུ་བར་ཤོག ། ཐམས་ཅད་ལྡན་པའི་འཁོར་དགའ་ནས། ། མེ་ལྷ་ཞིག་ནི་སྤྲུལ་པ་བྱས། ། གཟི་བརྗིད་ཆེན་པོ་དྲང་སྲོང་ལྷ། ། མེ་བཞིན་འཇུག་གིས་བུས་སྨྲས་པ། ། བདག་གི་སྲིང་མོའི་བུ་འདི་དག ། གླིང་བཞི་པར་ནི་གནས་པར་ཤོག ། དྲང་སྲོང་རྔ་བོང་སླར་ སྨྲས་པ། ། དང་པོར་སྨིན་དྲུག་དེ་དག་ཡིན། ། རྒྱུ་སྐར་ཆུ་ཡི་རུས་ཅན་ནི། ། གཉིས་པ་ཡང་ནི་ཡིན་པར་བྱ། ། སྐྱེ་དགུའི་བདག་གིས་འདི་སྐད་སྨྲས། ། བདག་གིས་བུ་ལྔ་དབུལ་ལགས་ཏེ། ། རུས་ནི་དྲང་སྲོང་ཆེན་པོ་ཆུ། །

རབ་ཏུ་བརྩོན་ལྡན་སྣར་མ་ལགས། ། ཆུ་ཡི་རུས་ཀྱི་རྒྱུ་སྐར་ནི། ། སྣར་མའི་མིང་གིས་གཉིས་པ་ལགས། ། ཟླ་བའི་བུ་ཕོ་གསུམ་པོ་ནི། ། མིང་ནི་མགོ་ཞེས་བགྱི་བ་ལགས། ། བ་ར་དྭ་ཛའི་རུས་སུ་ནི། ། མགོ་ཞེས་བགྱི་བ་བཞག་པ་ལགས། ། རབ་ཏུ་མི་བཟད་ལག་ཅེས་བྱ། ། ལྷ་དྲག་རྣམས་ཀྱིས་ བསྟན་པ་ལགས། ། ལྗང་སྔོའི་བུ་ཡི་བུ་རུས་སུ། ། དེ་ནི་བཞི་པར་བཞག་པ་ལགས། ། དྲང་སྲོང་བཅས་པའི་ལྷ་ཚོགས་ཀྱིས། ། ཉི་མའི་བུ་ནི་བསྟན་ལགས་ཏེ། ། ནབ་སོ་ལགས་ཤིང་གནས་འཇོག་རུས། ། ཕུར་བུའི་བུ་ནི་གསུམ་ལགས་ཏེ། ། ལག་གི་བུ་ ཡི་རུས་ལགས་ཤིང་། ། རྒྱལ་ཞེས་བགྱི་བར་དེ་དག་བཤད། ། ས་སྲུང་གི་ནི་བུ་ལྔ་པོ། ། བརྟུལ་ཞུགས་སྤྱོད་པ་མཁས་པ་རྣམས། ། མཛའ་བོའི་བུ་ཡི་རུས་ལགས་ཏེ། ། དེ་ལྟར་དེ་དག་རྒྱུ་སྐར་བདུན། ། ཤར་ཕྱོགས་ཁ་འཛིན་རྣམས་སུ་བཞག ། དེ་ཡི་ལས་ དང་{གོ་རིམས་,གོ་རིམ་}དང་། ། སྦྱོར་བ་ཁ་འཛིན་གཞུང་ལས་བསྟན། ། ངས་ཀྱང་ཡང་ནི་ཁྱེད་ཅག་ལ། ། གླིང་བཞི་པ་ནི་གནས་བྱེད་ཅིང་། ། ལས་ནི་ཅི་འདྲ་སྒྲུབ་བྱེད་པ། ། མདོར་ནི་མྱུར་དུ་བཤད་པར་བྱ། ། ཕུར་བུ་ཡི་ནི་བུ་ལྔ་པོ། ། བྱང་གྲོལ་བརྟུལ་ཞུགས་འཆང་བ་དག །

སེར་སྐྱའི་བུ་ཡི་རུས་སུ་ནི། ། ལྷོ་ཡི་ཕྱོགས་སུ་ངས་བཞག་གོ། ། དབྱངས་ཅན་གྱི་ནི་བུ་གཉིས་པོ། ། མིང་གིས་ཀྱང་ནི་གྲེ་ཡིན་ཏེ། ། དྲང་སྲོང་གཽ་ཏ་མ་རུས་སུ་ནི། ། ལྷོ་ཡི་ཕྱོགས་སུ་ངས་བཞག་གོ། ། ལྷ་མོ་ཡི་ནི་བུ་གཉིས་པོ། ། མིང་གིས་ཀྱང་ནི་དབོ་ཡིན་ཏེ། ། ཀཽ་ཌི་ནྱ་ཡི་རུས་སུ་ནི། ། ལྷོ་ཕྱོགས་ཁ་འཛིན་གསུམ་པ་བཞག ། སྡིག་པ་ཡི་ནི་བུ་བསྟན་པ། ། དྲང་སྲོང་ཀཱ་ཏཱའི་བུ་ཡི་རུས། ། ལྷར་བཅས་དྲང་སྲོང་རྣམས་ཀྱིས་དེར། ། མེ་བཞི་ཞེས་ནི་བྱ་བར་བཞག ། དྲི་ཟའི་བུ་ནི་ནག་པ་སྟེ། ། ཀཱ་ཏཱའི་བུ་ཡི་རུས་ཡིན་ནོ། ། ས་རི་དེ་ནི་མ་ཡི་བུ། ། ཀཱ་ཏཱའི་བུ་ཆེན་རུས་ཡིན་ནོ། ། འདིར་ནི་ས་ག་དཔལ་གྱི་བུ། ། ཀཱ་ཏཱའི་བུ་རྒན་རུས་ཡིན་ཏེ། ། དྲང་སྲོང་རྣམས་ཀྱིས་རྒྱུ་སྐར་བདུན། ། ལྷོ་ཕྱོགས་ཁ་འཛིན་རྣམས་སུ་བཞག ། མཛའ་བོའི་བུ་ཡི་བུ་བཞི་པོ། ། དྲག་པོའི་བུ་ཡི་རུས་ཡིན་ཏེ། ། མིང་ གིས་ལྷ་མཚམས་ཞེས་བྱ་བ། ། ནུབ་ཕྱོགས་སུ་ནི་བཞག་པ་ཡིན། ། དབང་པོ་ཡི་ནི་བུ་གསུམ་སྟེ། ། ཟླ་བ་ཀཱ་ཏཱའི་བུ་ཡི་རུས། ། འཇམ་པའི་ལས་ནི་ཐམས་ཅད་ལ། ། གཉིས་པ་སྣྲོན་ནི་བཞག་པ་ཡིན། ། ས་ཡི་ལྷ་མོའི་བུ་གསུམ་སྟེ། །

སྣྲུབས་ནི་ལག་པའི་ བུ་ཡི་རུས། ། རྒྱལ་བའི་ལྷ་མོའི་བུ་བཞི་སྟེ། ། ཀཱ་ཏཱའི་བུ་ཡི་རུས་ཡིན་ནོ། ། ཐམས་ཅད་ལྷ་ཞེས་བྱ་བ་བཞི། ། མཽད་གལ་བུ་ཡི་རུས་ཡིན་ནོ། ། སྣྲུབས་དང་ཆུ་སྟོད་ཆུ་སྨད་གཉིས། ། རྒྱུ་སྐར་གསུམ་པོ་བཞག་པ་ཡིན། ། སྲེད་མེད་བུ་ཡི་བུ་གསུམ་པོ། ། རྒྱུ་སྐར་ རྣམས་ནི་བྱི་བཞིན་འཁོད། ། ཁྱབ་འཇུག་གི་ནི་བུ་གསུམ་སྟེ། ། ཀཱ་ཏཱའི་བུ་ཕོ་དཔལ་གྱི་རུས། ། དེ་ལྟར་དེ་དག་རྒྱུ་སྐར་བདུན། ། ནུབ་ཕྱོགས་ཀྱི་ནི་ཁ་འཛིན་ཡིན། ། ནོར་ལྷའི་བུ་ནི་མོན་གྲུ་སྟེ། ། དྲང་སྲོང་རྣ་བའི་རུས་ཡིན་ནོ། ། ཆུ་ལྷའི་བུ་ནི་གཅིག་པུ་སྟེ། ། དེབ་ རྩེའི་བུ་ཡི་རུས་ཡིན་ཞིང་། ། སྨན་མ་སྤྲུལ་གྱི་ལྷ་མོ་ཡི། ། རྒྱུ་སྐར་མོན་གྲེ་གནས་པ་ཡིན། ། སྡིག་པ་ཡི་ནི་བུ་གཉིས་ཏེ། ། ཁྲུམས་སྟོད་ཅེས་ནི་བྱ་བར་བཤད། ། ཆུ་ཡི་རྣ་བའི་རུས་སུ་ནི། ། གསུམ་པ་འདི་ནི་བཞག་པ་ཡིན། ། ལྷ་ཡི་དྲང་སྲོང་ཆུ་ལྷའི་བུ། ། ཁྲུམས་སྨད་ཅེས་ནི་བྱ་བར་བཤད། ། བྲ་ཉེ་དྲང་སྲོང་རུས་ཡིན་པར། ། བཞི་པ་འདི་ནི་བཞག་པ་ཡིན། ། ལྷ་ཡི་དྲང་སྲོང་རྒྱལ་གྱི་བུ། ། ནམ་གྲུ་ཞེས་བྱ་དེ་བསྟན་ཏེ། ། དྲང་སྲོང་དབང་པོའི་རུས་སུ་ནི། །

ལྔ་པ་འདི་ནི་བཞག་པ་ཡིན། ། དྲི་ཟའི་རྒྱལ་པོའི་ བུ་གསུམ་སྟེ། ། ལྔ་ལེན་བུ་ཡི་རུས་ཡིན་ཞིང་། ། རྒྱུ་སྐར་ཐ་སྐར་ཞེས་བྱ་བ། ། འཇིག་རྟེན་མཁས་པ་རྣམས་ཀྱིས་བཞག ། དྲག་པོའི་བུ་ནི་གསུམ་ཡིན་ཏེ། ། བྲ་ཉེ་ངན་སྤོང་རུས་ཡིན་ནོ། ། རྒྱུ་སྐར་བདུན་པོ་དེ་དག་ནི། ། བྱང་ཕྱོགས་ཁ་འཛིན་རྣམས་སུ་བཞག ། རྒྱུ་སྐར་ཉི་ཤུ་རྩ་བརྒྱད་པོ། ། ཁ་འཛིན་བཞིར་ནི་གཞུང་ལས་བཤད། ། གཏོར་མ་ལས་དང་ཡོན་ཏན་རྣམས། ། མདོར་ན་ང་ཡིས་བཤད་པར་བྱ། ། ཐམས་ཅད་རབ་ཏུ་ཐལ་སྦྱར་འཁོད། ། ལྷ་དང་ཤེད་ལས་སྐྱེས་རྣམས་ཀྱིས། ། དྲང་སྲོང་རྔ་བོང་ལ་ནི་སྨྲས། ། མི་དགེ་ སྔོན་དུ་འགྲོ་བའི་ལས། ། གང་བྱས་ཁྱོད་ནི་མི་སྡུག་སྐྱེས། ། གང་དུ་ཐམས་ཅད་མྱུར་ཟད་འགྱུར། ། འདི་ནི་ལྷ་དང་མི་རྣམས་དང་། ། དྲང་སྲོང་དག་ནི་ཞི་བ་རྣམས། ། ཐམས་ཅད་གཟུགས་ནི་བཟང་པོར་གྱུར། ། རིགས་དང་སྙན་ལྡན་དེ་དག་ཀུན། ། དྲང་སྲོང་རྔ་བོང་ དེ་ལ་ནི། ། བརྒྱ་བྱིན་ལྷན་ཅིག་འཁོད་ནས་སུ། ། འཁོར་ཀུན་རངས་ཏེ་ཐལ་སྦྱར་གྱུར། ། བསམ་པ་གཅིག་ཏུ་སྨྲས་པ་ནི། ། ནམ་མཁའ་འདི་ལ་རྒྱུ་སྐར་ནི། ། གང་ཞིག་དང་པོར་རྒྱུ་བར་བྱེད། ། ཁ་ཟས་སུ་ནི་ཅི་ཟ་ཤོད། །

མི་རྣམས་ཀྱི་ནི་ལས་ཅི་སྒྲུབ། ། ཡུན་ནི་ཇི་སྲིད་ རྒྱུ་བར་བྱེད། ། དྲང་སྲོང་དེ་དག་ཐམས་ཅད་ལ། ། རྔ་བོང་གིས་ནི་ཇི་སྐད་སྨྲས། ། ཇི་ལྟར་ང་ཡིས་བརྗོད་པ་བཞིན། ། འདིར་ནི་ཁྱེད་ཀྱིས་དད་པ་ཕུལ། ། རྒྱུ་སྐར་འདི་ལ་ངས་མཆོག་ཕྱིན། ། དེ་ནི་ཁྱོད་ལ་བརྗོད་པར་བྱ། ། {གོ་རིམས་,གོ་རིམ་}ཤེས་པ་ང་བདག་བཞིན། ། གླིང་ བཞིའི་སེམས་ཅན་ཕན་པའི་ཕྱིར། ། ལོ་སྐོར་ཡང་ནི་ཤེས་པར་བྱ། ། དང་པོར་ཉི་མ་གང་ཡིན་པ། ། ངས་བྱས་པ་ནི་ང་ཡི་མིག ། བུ་དྲུག་གཡོ་ཅན་སེམས་རངས་པ། ། དེ་ནི་ང་ཡིས་དང་པོར་བརྗོད། ། དེ་ཡི་ཕྱིར་ན་སྨིན་དྲུག་ནི། ། རྒྱུ་སྐར་ཚོགས་ནི་ཐམས་ཅད་དུ། ། ནང་གི་གཙོ་བོར་འགྱུར་བར་ཤོག ། ཟླ་བ་ཉ་དང་ཉི་མ་ཡི། ། ཉིན་མཚན་དེ་དག་མཉམ་པར་གནས། ། མཚན་མོ་གཞན་ནི་མུན་ཁྱབ་དང་། ། ཆུ་ལྷ་ཡང་ནི་གནས་པར་འགྱུར། ། འགྲོ་བ་བཟོད་པ་བགྲང་བ་དང་། ། བྲ་ཉེ་གནས་བཞིན་འདི་ལྟར་བཤད། ། མོན་ སྲན་བཅུ་དྲུག་བརྒྱར་བསྒྱུར་ཏེ། ། སྐྱེས་བུ་དང་ནི་བརྒྱད་པ་གཅིག ། བརྒྱད་པ་ཕྲག་ནི་བཅུ་དྲུག་ལ། ། ཆ་ནི་གཅིག་ཏུ་འགྱུར་བ་ཡིན། ། ཆ་ནི་དྲུག་ཅུ་ཐམ་པ་ལ། ། ཡུད་ཙམ་ཅིག་ནི་དེ་ཡིན་ནོ། ། དེ་ཙམ་ཡུད་ཙམ་སུམ་ཅུ་ལ། །

འདིར་ནི་འཇིག་རྟེན་གནས་པ་ ཡིན། ། རི་རབ་གཡས་ནས་བསྐོར་བའི་ཚེ། ། ཡུད་ཙམ་སུམ་ཅུས་འགྲོ་བར་བྱེད། ། འདིར་ནི་མོན་སྲན་ཚོད་མ་ཟ། ། བྱ་བ་ཉུང་ངུ་བསྒྲུབ་པར་གྱིས། ། རྒྱལ་པོ་ནད་པས་འགྲོ་བ་ཀུན། ། ཞག་བཅུ་ཐམ་པ་ཐར་བར་གྱིས། ། རྟག་ཏུ་དད་པས་མཚོན་ཆས་བསྲུངས། ། མཆོག་སྦྱིན་ཁྱོད་ཀྱིས་བུ་སྐྱེ་གང་། ། ཚོར་བ་དབང་པོ་ཐུལ་བ་དང་། ། ཆོས་ཀྱི་བློ་གྲོས་ནབ་སོ་ལ། ། མངལ་དུ་ཉིང་མཚམས་སྦྱོར་བར་འགྱུར། ། འདིར་ནི་གྲེ་ལ་བྱ་བ་མང་། ། ཆུ་སྨད་བྲ་ཉེ་གསུམ་པ་ཡིན། ། མེ་བཞི་སྣར་མ་གྲོ་བཞིན་ནི། ། ནོར་རྒུད་བྱེད་པར་འགྱུར་ བ་ཡིན། ། སྣྲུབས་དང་སྐག་དང་ནམ་གྲུ་ནི། ། ལམ་དག་གི་ནི་རྒྱུ་སྐར་ཡིན། ། ཁྲུམས་སྟོད་དང་ནི་སྣྲོན་དང་ནི། ། རྒྱལ་དང་ཡང་ནི་ཁྲུམས་སྨད་ནི། ། ཕུན་སུམ་ཚོགས་པར་བྱེད་པ་ཡིན། ། མཆུ་དང་ཆུ་སྟོད་ཐ་སྐར་དང་། ། མོན་གྲུ་དང་ནི་སྨིན་དྲུག་དང་། ། དབོ་ཞེས་ བྱ་བ་དག་གིས་ནི། ། བདེ་བ་སྒྲུབ་པར་བྱེད་པ་ཡིན། ། འདིར་ནི་མགོ་དང་ནག་པ་དང་། ། མོན་གྲུ་དང་ནི་མོན་གྲེ་དང་། ། ས་རི་ལག་ནི་རྣམ་དྲུག་གིས། ། གྲོགས་པོ་དང་ནི་གྲོགས་མཆོག་འགྱུར། ། ལྷ་ཡི་དབང་པོས་འདི་སྐད་སྨྲས། །

སྣྲོན་གྱི་ཚེ་ན་ཚེས་གཉིས་ལ། ། ཡུད་ཙམ་སུམ་ཅུར་མི་ཟད་པར། ། བྱ་ཕྱིར་མཁའ་ལ་ཁྱོད་གནས་ཀྱིས། ། ཁྱོད་ཀྱིས་ཀྱང་ནི་ལ་ཕུག་དང་། ། བུ་རམ་ཟས་ལ་གནས་པར་གྱིས། ། ནད་པ་ཞག་ནི་བཅུ་གསུམ་ཁྲོལ། ། ད་ལྟར་སྐྱེ་དགུ་སྐྱེ་བ་མེད། ། ཤིན་ཏུ་ཚུལ་འཆལ་སྙིང་རྗེ་སྤངས། ། མཆོད་སྦྱིན་ དང་ནི་སྐྱེ་བ་དང་། ། སྣྲོན་ལ་སྐྱེ་ཚེ་རྟག་ཏུ་ནི། ། མངལ་དུ་མཚམས་སྦྱོར་བསྲུང་བར་གྱིས། ། ནག་པ་དང་ནི་མོན་གྲུ་དང་། ། མགོ་ལ་གྲགས་པ་མང་དུ་བྱེད། ། བྱི་བཞིན་དང་ནི་གྲེ་དང་དབོ། ། ལས་དག་གི་ནི་རྒྱུ་སྐར་ཡིན། ། ཁྲུམས་སྟོད་དང་ནི་ཁྲུམས་སྨད་ ནི། ། རྒུད་བྱེད་ཆུ་དང་ཆུ་སྟོད་དང་། ། ཐ་སྐར་ཕུན་སུམ་ཚོགས་པར་བྱེད། ། སྣྲུབས་དང་སྐག་དང་ནམ་གྲུ་དང་། ། མོན་གྲེ་མེ་བཞི་སྣར་མ་ནི། ། བདེ་བ་སྒྲུབ་པར་བྱེད་པ་ཡིན། ། བྲ་ཉེ་དང་ནི་གྲེ་དང་ནི། ། ཆུ་སྨད་མཛའ་བོའི་མཆོག་ཏུ་འགྱུར། ། ཁྲུམས་སྟོད་དང་ནི་ས་རི་དང་། ། མོན་གྲུ་དང་ནི་ནབ་སོ་དང་། ། ས་ག་དང་ནི་ལག་ཀྱང་ནི། ། འདིར་ནི་རྣམ་པ་དྲུག་ཏུ་འགྱུར། ། ལྷ་ཡི་དྲང་སྲོང་དེས་གསོབ་ཀྱིས། ། སྣྲུབས་བཤད་པ་ན་ཚེས་གསུམ་ལ། ། ཡུད་ཙམ་སུམ་ཅུར་ནམ་མཁའ་ལ། །

བྱ་བ་ཆེ་ཆུང་ཁྱོད་གནས་ཀྱིས། ། ཟས་ནི་འབྲས་བུ་ལ་ཕུག་དང་། ། བདུག་པ་དང་ནི་མེ་ཏོག་སྟེ། ། ཞག་ནི་སུམ་ཅུར་བདག་ཉིད་ཀྱིས། ། ནད་པ་ཡང་ནི་ཐར་བར་བྱེད། ། གང་ཞིག་སྤྱོད་པར་བྱེད་པས་ནི། ། སྐྱེ་དགུ་མི་སྐྱེ་ནོར་དང་འབྲུ། ། སྐལ་ལྡན་སྐྱེས་བུའི་རྣམ་པ་དང་། ། ས་ལ་ལས་ནི་བྱེད་པར་འགྱུར། ། མགོ་ལ་མངལ་དུ་མཚམས་སྦྱོར་ བ། ། རྟ་དང་ཡང་ནི་རྔ་མོ་དང་། ། གླང་པོ་ཆེ་དང་ཁྱུ་མཆོག་དང་། ། དྲེད་དང་བཅས་པའི་རྣམ་པར་འགྱུར། ། ཆུ་སྟོད་དང་ནི་གྲེ་དང་ནི། ། བྲ་ཉེ་དང་ནི་གསུམ་པ་སྟེ། ། འཇིག་པའི་རྒྱུར་འགྱུར་སྐག་དང་སྣྲུབས། ། དེ་ལ་འཕེལ་བར་བྱེད་པར་འགྱུར། ། ནམ་གྲུ་བགྲང་དང་མཉམ་འགྱུར་ ཏེ། ། མོན་གྲུ་ལས་ཀྱི་རྒྱུ་སྐར་ཡིན། ། ཁྲུམས་སྟོད་ཅེས་ནི་བྱ་བ་ཡང་། ། དེ་ལ་རྒུད་པར་བྱེད་པར་འགྱུར། ། ལྷ་མཚམས་ནབ་སོ་གསུམ་པ་ཡིན། ། ལག་ནི་དེ་ལ་རྒུད་བྱེད་འགྱུར། ། ས་ག་དང་ནི་མོན་གྲེ་ཡང་། ། གསུམ་པ་ཞེས་ནི་བྱ་བ་ཡིན། ། ཐ་སྐར་དེ་ལ་སྒྲུབ་པར་ འགྱུར། ། ཆུ་སྟོད་ཟླ་བ་གཉིས་པ་སྟེ། ། སྣྲོན་དང་རྒྱལ་ཞེས་བྱ་བ་ཡང་། ། དེ་ལ་བདེ་བར་བྱེད་པར་འགྱུར། ། ཁྲུམས་སྨད་ཅེས་ནི་བྱ་བ་ནི། །

གྲོགས་དང་གྲོགས་པོ་མཆོག་ཏུ་འགྱུར། ། དྲུག་པོ་འདི་དག་ལག་དང་ནི། ། གྲོ་བཞིན་སྣར་མ་གསུམ་པ་ཡིན། ། སྨིན་དྲུག་ ཅེས་ནི་བྱ་བ་ཡང་། ། བྱི་བཞིན་དང་ནི་དབོ་ཡིན་ནོ། ། འདིར་ནི་ཁྲོན་པ་ས་རིར་གྱུར། ། མེ་ལྷ་ཡིན་ཏེ་ས་གས་བཤད། ། གླིང་བཞིར་ཚེས་ནི་{བཅྭ་,བཅོ་}ལྔ་ལ། ། ཁྱོད་སྤྱོད་ཡུད་ཙམ་བཞི་བཅུ་ལྔས། ། འགྲོ་བར་བྱེད་ཅིང་བྱ་བ་ནི། ། ཆེན་པོ་མི་ཟད་པ་ཡིས་གནས། ། ཞག་ནི་{བཅྭ་,བཅོ་}ལྔ་ ཐམ་པར་ཡང་། ། ནད་པ་ཡང་ནི་ཐར་བར་གྱིས། ། སུ་ཞིག་ཀྱང་ནི་ཁྱོད་ཀྱི་བུར། ། དག་པར་རྗེས་སུ་སྐྱེ་འགྱུར་བ། ། གཟི་བརྗིད་དང་ནི་དཔལ་དང་ནི། ། ལོངས་སྤྱོད་དགའ་བ་འབར་བར་འགྱུར། ། བུད་མེད་བརྣབ་སེམས་ཤིན་ཏུ་སྲུངས། ། དེ་སྐྱེའི་རྒྱུ་སྐར་ལག་ཡིན་ ནོ། ། དེའི་ལས་རྒྱུ་སྐར་མོན་གྲེ་ཡིན། ། མཆུ་དང་ཐ་སྐར་ཆུ་སྟོད་རྒྱུ། ། སྨིན་དྲུག་ཅེས་ནི་བྱ་བ་ལ། ། དེ་ནི་འཆི་བར་འགྱུར་བ་ཡིན། ། བྱི་བཞིན་དང་ནི་དབོ་ཡང་ནི། ། འདིར་ནི་རྒུད་པར་བྱེད་པ་ཡིན། ། ཁྲུམས་སྟོད་དང་ནི་སྣྲོན་དང་ནི། ། ནབ་སོ་ཡང་ནི་གསུམ་པ་སྟེ། ། ལྷ་མཚམས་ཞེས་ནི་བྱ་བར་ཡང་། ། དེ་ནི་ཕུན་སུམ་ཚོགས་བྱེད་ཡིན། ། ནབ་སོ་ཁྲུམས་སྟོད་སྣྲུབས་དང་ནི། །

ནམ་གྲུ་སྐག་ནི་བདེ་བྱེད་ཡིན། ། གྲེ་དང་ཡང་ནི་ཆུ་སྨད་དང་། ། གསུམ་པ་བྲ་ཉེ་སྒྲུབ་པ་ཡིན། ། མཛའ་བོ་དང་ནི་མཛའ་མཆོག་ཏུ། ། དེ་དག་དེར་ནི་འགྱུར་བ་ ཡིན། ། ནག་པ་སྣར་མ་མོན་གྲུ་བཞིན། ། མགོ་གཉིས་མེ་བཞི་གྲོ་བཞིན་ཡང་། ། འདིར་ནི་དེ་བདུན་ལྷོ་ཕྱོགས་ཀྱི། ། ཁ་འཛིན་ཕྲུགས་ཞེས་བྱ་བ་ཡིན། ། ། ། འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་བཅུ་ པ། མཛའ་བཤེས་ཀྱི་ནི་ལྷ་མོ་ཡིས། ། ཡར་གྱི་ངོ་ཡི་ཚེས་གཅིག་ལ། ། འགྲོ་བར་བྱེད་པའི་{གོ་རིམས་ཀྱང་,གོ་རིམ་ཡང་}། ། ལྷ་མཚམས་ལ་ནི་སྨྲས་པ་ཡིན། ། བྲ་ཉེ་ཚེས་ནི་{བཅྭ་,བཅོ་}ལྔ་ཡི། ། ཉིན་པར་ཡང་ནི་ཡུད་ཙམ་ཡིན། ། མཚན་མོ་ཡང་ནི་དེ་ཙམ་སྟེ། ། ཉིན་མཚན་གཅིག་ལ་ བྲ་ཉེ་ཡིན། ། ཆུ་ཡི་ལྷ་མོ་དེ་ཡང་ནི། ། ཉིན་དང་མཚན་དུ་མཉམ་པ་སྟེ། ། ཡུད་ཙམ་སུམ་ཅུ་ཐམ་པ་ཡིན། ། དེ་ཡི་ལོངས་སྤྱོད་ཐང་ཅིག་ཤོག ། རྒྱལ་པོ་ལེགས་བརྟན་སྙིང་རྗེ་སྤངས། ། འཐུན་པར་ཡུལ་འཁོར་སྐྱོང་བ་བཞིན། ། དེ་བཞིན་དུ་ནི་མི་ཟད་པའི། ། བྲ་ ཉེ་ཡང་ནི་འགྲོ་བར་ཤོག ། འཛམ་གླིང་འདི་ལ་སྟོན་པར་ཤོག ། དེ་བཞིན་ཁྱེད་ཅག་ཐམས་ཅད་ཀྱིས། །

དེ་ལ་དམོད་པ་བོར་བར་གྱིས། ། དེ་བཞིན་འགྲོ་ལ་བསྟན་པར་གྱིས། ། ཀུན་གྱིས་སྨྲས་པ། དེ་བཞིན་རྟག་ཏུ་གྱུར་པར་ཤོག ། མི་ཟད་པ་ཡི་བྱ་ བ་གྱིས། ། ཁྱོད་ཀྱིས་སྤྱོད་པས་གང་སྐྱེ་བ། ། མི་ཡི་ཐུ་བོ་མི་བཟད་འགྱུར། ། དེ་ཡི་མངལ་འཇུག་ཆུ་སྟོད་ཡིན། ། བྲ་ཉེ་ལ་ནི་སྐྱེས་པའི་མི། ། འཆི་བའི་ཚེ་ན་ལྷ་མཚམས་དང་། ། ཁྲུམས་སྟོད་ཅེས་ནི་བྱ་བ་ཡིན། ། འདི་ལ་མཁས་པས་བརྟག་བྱ་སྟེ། ། ས་རི་ མོན་གྲུ་མ་ཡིན་གཞི། ། དམག་འགྲོ་རྩོད་པའི་གནས་དག་གིས། ། བྱ་སྤང་སྤུ་གྲིའི་ལས་མི་བྱ། ། སྣར་མ་མེ་བཞི་བྱི་བཞིན་ནི། ། རྒུད་བྱེད་དགྲ་རྣམས་ཁྱོད་ཀྱིས་གཞོམ། ། ཁྱོད་ཀྱིས་ལས་ནི་ཆེ་ཆུང་ཀུན། ། གྲེ་ཡི་ཚེ་ན་བྱ་བར་གྱིས། ། ཆུ་སྨད་དང་ནི་དབོ་ཡང་ནི། ། ཕུན་སུམ་ཚོགས་པ་བྱེད་པར་བྱེད། ། སྨན་རྣམས་བརྟེན་བྱ་སྦྱིན་དང་དུལ། ། གོས་དང་རྒྱན་གྱི་བྱ་བའང་བརྗོད། ། མགོ་དང་ནག་པ་ཞེས་བྱ་དང་། ། གྲོ་བཞིན་མཆུ་ནི་བདེ་བར་བྱེད། ། ས་ག་ནབ་སོ་མོན་གྲེ་སྟེ། ། དེ་དག་ལམ་འཇུག་སྒྲུབ་པ་ཡིན། ། སྐག་དང་སྣྲུབས་ཞེས་བྱ་བ་ དང་། ། ཐ་སྐར་དང་ནི་མཆུ་དང་གྲེ། ། གྲོགས་པོ་མཆོག་ཏུ་འགྱུར་བ་ཡིན། ། བསྒྲུབ་ཏུ་མི་རུང་ལས་ཀྱང་གྱིས། །

འདི་ཚེ་ཁྲི་བཞོན་གོས་དང་མལ། ། མཛའ་བོ་རྣམས་ལའང་བརྩམ་པར་བྱ། ། ཉི་མའི་བུ་ནི་མིག་དམར་ཏེ། ། དྲང་སྲོང་ཆེན་པོ་དེར་དཔང་བཙུགས། ། བཅུ་ གཉིས་ཁྱིམ་དུས་གནས་དེ་ནས། ། དེར་ཡོད་ལས་འཐུན་གྲིབ་གོམ་དྲུག ། དེར་ནི་དུས་ཀྱང་མཉམ་པ་ཡིན། ། ཉིན་དང་མཚན་ཀྱང་མཚུངས་པ་ཡིན། ། དེ་ཡོད་ཐ་སྐར་མཚན་མོ་གང་། ། ལྷ་མཚམས་ཉིན་པར་གནས་པ་ན། ། ཁྱོད་ཀྱིས་ང་ནི་སྤང་བར་གྱིས། ། མཁའ་ ལ་སྤྱོད་ཅིང་ཁྱོད་ཀྱིས་སྟོན། ། གླིང་བཞི་པ་ནི་མགུ་བྱའི་ཕྱིར། ། འདི་ནི་ཇི་ལྟར་ལྷགས་པ་བཞིན། ། ངས་འདིར་གང་ཞིག་ཡང་དག་བརྗོད། ། ལྷ་ཡི་དྲང་སྲོང་ཀུན་དགའ་གྱུར། ། དེ་བཞིན་ཁྱོད་ནི་ཀུན་དུ་སོང་། ། སྨིན་དྲུག་དེ་བཞིན་མེ་ཡི་ལྷ། ། བདག་ཉིད་གླིང་བཞི་དེར་ གནས་ཤིང་། ། ཁྱོད་ཀྱིས་མེ་བཞིན་མྱུར་བྱ་གྱིས། ། ཡུད་ཙམ་སུམ་ཅུར་ཚལ་དུ་སོང་། ། དེར་གང་མི་ཡི་ཟས་འབྱུང་བ། ། དམ་པའི་གྲགས་དང་ལོངས་སྤྱོད་ཀྱང་། ། ཟླ་ཉ་ཁྱོད་འདིར་ཡང་ལེགས་རྫོགས། ། དེ་ལྟར་ང་ཡིས་ཐོབ་པ་ཡིན། ། ཞག་བཞི་ཐམ་པར་ ནད་པ་ནི། ། མྱུར་བ་ཁོ་ནར་ཐར་བར་གྱིས། ། མངལ་དུ་འཇུག་པ་མེ་བཞི་བསྲུངས། ། ཆུ་སྟོད་འཆི་བར་བྱེད་པ་ཡིན། ། སྐག་ཁྲུམས་སྟོད་སྨད་ནབ་སོ་དང་། །

མོན་གྲེ་འཕེལ་བར་བྱེད་པ་ཡིན། ། ཁྱོད་ཀྱིས་བྱ་བ་འདི་སྤོངས་ཤིག ། དམག་དང་རྩོད་པའི་གནས་འགྲོ་ དང་། ། སྤུ་གྲི་ཡི་ནི་ལས་རྣམས་སོ། ། གྲོ་བཞིན་དང་ནི་ནག་པ་དང་། ། མགོ་ནི་རྒུད་པར་བྱེད་པ་ཡིན། ། ལག་དང་དབོ་ནི་འདིར་འཇོམས་བྱེད། ། བྱེད་པའི་བྱ་བ་འདི་གྱིས་ཤིག ། ཆེ་དང་ཆུང་བ་གང་ཅི་ཡང་། ། སྣར་མས་ཕུན་སུམ་ཚོགས་པར་བྱེད། ། བྱི་བཞིན་ དང་ནི་ནག་པར་བཅས། ། དེར་ནི་བྱ་བ་གང་རྩི་དང་། ། གོམ་པ་སྦྱིན་པ་གོས་དང་མལ། ། དེར་ནི་རྒྱན་གྱིས་བརྒྱན་པར་བྱ། ། ལག་ནི་བདེ་བར་བྱེད་པ་སྟེ། ། མོན་གྲུ་དང་ནི་ས་རི་ཡང་། ། གསུམ་པོ་དག་ནི་དེ་དག་ཡིན། ། ལམ་དུ་འཇུག་པའང་དེ་དག་ཡིན། ། རྒྱལ་ དང་ལྷ་མཚམས་ཁྲུམས་སྟོད་ནི། ། ལས་དག་སྒྲུབ་པར་བྱེད་པ་ཡིན། ། མཆུ་སྣྲུབས་སྐག་དང་ཁྲུམས་སྨད་དང་། ། དེ་དང་དེ་རྣམས་དྲག་བྱེད་གྲོགས། ། སྐལ་བཟང་བག་མ་གཏོང་དང་བཞོན། ། མལ་ཡང་དེར་ནི་དེ་བྱ་སྟེ། ། ཁྱིམ་དང་དུས་ཞེས་བྱ་བ་དང་། ། གཟའ་ རྣམས་བདག་གིས་བརྗོད་པ་ཡིན། ། དེ་ལྟར་བདག་གིས་དུས་ཀུན་བརྗོད། ། ཁྱོད་ཅི་དྲང་སྲོང་ལྷ་མི་དགའ། ། བདག་གིས་བྱེད་དེ་བཤད་པ་བཞིན། ། ལྷ་དབང་དྲང་སྲོང་འཁོར་དང་བཅས། །

མི་ཡིས་ཐལ་སྦྱར་འདི་སྐད་སྨྲས། ། འབྱུང་པོ་ཀུན་ལ་ཕན་པ་ཁྱོད། ། འགྲོ་ བ་ལ་ནི་སྐྱོབ་པ་ཁྱོད། ། དེ་ལྟར་ཤེས་མཉམ་ཇི་བཞིན་ཁྱོད། ། ཡང་སྨྲས་པ། རྔ་བོང་ཅན་གྱི་དྲང་སྲོང་སྟེ། ། སྣར་མ་ཆུ་ཡི་རིགས་ཀྱང་ཡིན། ། ཆུ་ཡི་ལྷ་མོ་ཁྱོད་ཡིན་ན། ། གསུམ་པར་ཡང་ནི་འགྲོ་བར་གྱིས། ། བྱེད་པ་ཆུང་དང་འབྲིང་ཡིན་ཞིང་། ། བཞི་བཅུ་རྩ་ལྔ་ཐམ་ པ་ཡིན། ། ཡུད་ཙམ་དུ་ནི་ཁྱོད་ཀྱིས་འགྲོ། ། དུག་དང་ཤ་ནི་ཟས་ཡིན་ནོ། ། ཁྱོད་ལ་སྤྱོད་པར་བྱེད་པ་ཡིས། ། གང་དག་མི་རྣམས་སྐྱེ་འགྱུར་བ། ། དེ་དག་ཕྱུག་ཅིང་ཆོས་དང་ལྡན། ། ཞག་ལྔ་ནད་པ་མྱུར་དུ་གསོས། ། དེ་འདིར་ཁྱོད་ཀྱིས་བསྟན་པར་གྱིས། ། བྱི་བཞིན་ནམ་གྲུས་མངལ་དུ་འཇུག ། འཆི་བ་སྣྲུབས་དང་མཆུ་བཞིན་ཏེ། ། རྒྱལ་དང་ལྷ་མཚམས་ཁྲུམས་སྟོད་འཕེལ། ། དམག་འགྲོ་བག་མ་གཏོང་བ་ཡི། ། གནས་ནས་འགྲོ་བར་བྱེད་པ་དང་། ། ཉོ་ཚོང་དང་ནི་བཟོ་བྱེད་པ། ། དེ་འདྲ་བ་ཡི་བྱ་བ་སྤོངས། ། ས་རི་མོན་ གྲུ་དེ་དག་འདིར། ། རྒུད་བྱེད་དགྲ་འདིར་གཞོམ་པར་བྱ། ། མེ་བཞི་ལས་ཀྱི་རྒྱུ་སྐར་ཡིན། ། ཆེ་ཆུང་ཐམས་ཅད་འདིར་གྱིས་ཤིག ། མགོ་དང་ནག་པ་གྲོ་བཞིན་ཏེ། ། དེ་དག་ཕུན་སུམ་ཚོགས་པར་བྱེད། །

རྩི་བྱེད་ན་ཡང་དེ་དག་སྟེན། ། དེར་བྱིན་གོས་རྒྱན་སྣ་ཚོགས་སྒྲོགས། ། ནབ་སོ་དང་ནི་ས་ག་དང་། ། མོན་གྲེ་བདེ་བར་བྱེད་པ་སྟེ། ། དེ་དག་ལ་ནི་ལམ་དུ་འཇུག ། སྣྲོན་ནི་སྒྲུབ་པ་བྱེད་པ་ཡིན། ། སྐག་ཅེས་བྱ་བ་ཁྲུམས་སྨད་ནི། ། དྲག་པོའི་ལས་དག་བྱེད་པ་ཡིན། ། ཆུ་སྟོད་ཆུ་སྨད་ཐ་སྐར་དང་། ། བྲ་ཉེ་ཁྲུམས་སྟོད་ཁྲུམས་སྨད་མཛའ། ། དབོས་ནི་སྐལ་བ་བཟང་པོ་སྦྱིན། ། བརྩོན་པ་དང་ནི་བཞོན་པ་དང་། ། མལ་དང་ཁྲི་ནི་བཤམ་པ་ཡང་། ། འདི་ལ་བྱ་བ་དེ་འཇུག་གོ། ། ཡང་སྨྲས་པ། འགྲོ་བ་བཞི་དང་ལྡན་པར་ནི། ། མགོ་ལ་ཁྱོད་ནི་གནས་པར་འགྱུར། ། མི་ཡི་ལས་བྱ་མྱུར་དུ་སྒྲུབས། ། ཡུད་ཙམ་ སུམ་ཅུར་འགྲོ་བར་གྱིས། ། ཞག་བརྒྱད་ནད་པ་མྱུར་དུ་གསོས། ། ཁྱོད་ཟས་ཚོན་ཤ་ཟླ་བའི་ལྷ། ། དེར་ནི་སྐྱེས་དགུ་གང་དག་སྐྱེ། ། དཔའ་ཞིང་འབྱོར་བར་འགྱུར་བ་ཡིན། ། ཁྱབ་འཇུག་བདེན་འདི་ཤིན་ཏུ་བསྲུངས། ། དེ་བྱེད་ཇི་བཞིན་ང་ཡིས་བཤད། ། གྲོ་བཞིན་ཐ་སྐར་ མངལ་དུ་འཇུག ། མཆུ་གཉིས་གྲེ་དབོ་འཆི་བར་བྱེད། ། སྣྲོན་གྱི་ཚེ་ནི་བྱ་བ་འཕེལ། ། སྐག་དང་གཞན་བཅས་ཐོབ་པར་བྱེད། ། ལམ་རིང་རྩོད་དང་གནས་ནས་འགྲོ། ། བྱ་བ་དེ་འདྲ་སྤང་བར་གྱིས། །

ནབ་སོ་རྒུད་པར་བྱེད་པ་སྟེ། ། མོན་གྲེ་ས་ག་བཞིན་དུ་ཤེས། ། གསང་ བའི་གནས་བཞིན་བརྩམ་པར་གྱིས། ། {བརྫུན་,རྫུན་}གཡོ་དམངས་ཀྱིས་འཇོམས་པར་བྱེད། ། ནག་པ་ལས་ཀྱི་རྒྱུ་སྐར་ཏེ། ། འདི་ལ་ཆེ་ཆུང་ཐམས་ཅད་རྩོམ། ། ལག་ནི་ཕུན་སུམ་ཚོགས་པར་བྱེད། ། མོན་གྲུ་ས་རི་གཞན་ཐོབ་བྱེད། ། འདིར་ནི་སྨན་དང་སྦྱིན་འདུལ་ བཞོན། ། རྒྱན་དང་གོས་ཀྱང་ཐོབ་པར་བྱེད། ། རྒྱལ་དང་ལྷ་མཚམས་ཁྲུམས་སྟོད་བདེ། ། དེ་དག་ལམ་དུ་ཤིན་ཏུ་འཕྲོད། ། སྣྲུབས་དང་ནམ་གྲུ་མཆུ་སྒྲུབ་བྱེད། ། འདི་ལ་གཏུམ་པོའི་ལས་ཀྱང་བྱ། ། མེ་བཞི་དགྲ་ཟིན་བྲ་ཉེ་དང་། ། སྣར་མ་དབྱེར་མེད་ཆུ་གཉིས་ བཞིན། ། སྐལ་བཟང་བག་མ་གཏོང་དང་བཞོན། ། མལ་ཀུན་འདིར་ནི་བྱེད་དུ་ཆུག ། ལག་ལྷ་དྲག་མོས་དེ་ཚེ་སྨྲས། ། ཚེས་ལྔ་ལ་ནི་ཁྱོད་གནས་ཏེ། ། ཡུད་ཙམ་བཅོ་ལྔ་ཁྱོད་འགྲོ་བྱེད། ། ཁྱོད་ཀྱི་ཟས་ནི་མར་སར་ཏེ། ། དྲག་ཅིང་མི་བཟད་སྡང་བྱེད་སྒྲུབ། ། ནད་ པ་ཡང་ནི་ཞག་བཅུ་ཡིན། ། ཁྱོད་ལ་སྤྱད་པས་མི་གང་སྐྱེ། ། སྲིད་པ་གསུམ་དུ་མི་ཟད་འགྱུར། ། ནོར་ཚོལ་བྱེད་ཅིང་ཆོམ་པོས་འཆི། ། ཁྱོད་ཀྱི་སྦྱོར་བས་དེ་ཡིན་ནོ། ། མོན་གྲུ་སྣྲུབས་ལ་མངལ་དུ་འཇུག །

ཆུ་དང་ནམ་གྲུས་འཕེལ་བར་འགྱུར། ། དབོ་ཡི་ཚེ་ན་འཆི་ བར་བྱེད། ། ཆུ་གཉིས་བྲ་ཉེ་ཇི་བཞིན་ནོ། ། སྐྱེ་དང་འཇིག་དང་འཕེལ་བ་ཡི། ། བྱེད་པ་དེ་ནི་སྤོང་བར་གྱིས། ། ལྷ་མཚམས་དང་ནི་ཁྲུམས་སྟོད་དེར། ། བྱེད་པ་བསྟན་ནས་རྒུད་པར་བྱེད། ། ས་རི་ལས་ཀྱི་རྒྱུ་སྐར་ཡིན། ། བྱེད་པ་ཆུང་ངུ་ཐམས་ཅད་འཇུག ། ས་ག་དང་ནི་ མོན་གྲེ་དང་། ། ནབ་སོ་ཕུན་སུམ་ཚོགས་པར་བྱེད། ། ཁྲུམས་སྨད་པར་ནི་བདེ་བྱེད་ཡིན། ། སྣྲོན་དང་སྐག་ནི་ལམ་ན་མཉམ། ། གྲེ་ནི་སྒྲུབ་པར་བྱེད་པ་སྟེ། ། ཆུ་སྟོད་ཐ་སྐར་གསུམ་པ་ཡིན། ། མེ་བཞིའི་བར་གཞན་གྲོགས་མཆོག་སྟེ། ། སྨིན་དྲུག་ནག་པ་གྲོ་བཞིན་ དང་། ། བྱི་བཞིན་བག་མ་གཏོང་དང་བཞོན། ། མལ་དང་སྐལ་བ་བཟང་པོར་སྒྲུབ། ། ཉི་མའི་ལྷ་མོ་ནབ་སོས་སྨྲས། ། ཚེས་དྲུག་ལ་ཡང་གནས་པར་འགྱུར། ། སྦྲུལ་ཤ་ཁྱོད་ཀྱི་ཟས་སུ་ཤོག ། ལས་ཀྱང་དྲག་པོར་བྱ་བར་གྱིས། ། ཡུད་ཙམ་བཞི་བཅུ་རྩ་ལྔར་འགྲོ། ། འདིར་ནི་ནད་པ་ཞག་བརྒྱད་ཡིན། ། ཁྱོད་སྤྱད་སུ་ཡང་མི་ནང་སྐྱེ། ། ཞིང་པ་ལོངས་སྤྱོད་ལྡན་པར་འགྱུར། ། རྟ་དང་གླང་ཆེན་ཟད་པར་འགྲོ། ། ནབ་སོས་མངལ་དུ་འཇུག་པར་འགྱུར། ། འདི་ནི་མོན་གྲེའི་ཟས་ཡིན་ཏེ། །

སྨིན་དྲུག་ལ་ནི་འཆི་བར་བྱེད། ། ཁྲུམས་སྨད་རྒུད་པར་བྱེད་པ་ཡིན། ། སྐག་སྣྲོན་ལས་ཀྱི་རྒྱུ་སྐར་ཡིན། ། ས་ག་བརྟུལ་ཞུགས་བསྟན་པ་ཡིན། ། རྒྱལ་ཡང་ཕུན་སུམ་ཚོགས་པར་བྱེད། ། ལག་དང་ལྷ་མཚམས་ཞེས་བྱ་དང་། ། ཁྲུམས་སྟོད་ཀྱང་ནི་བདེ་བར་བྱེད། ། མཆུ་དང་ནམ་གྲུ་བཞིན་དུ་སྟེ། ། དེ་དག་ལམ་དུ་ཞུགས་ན་བཟང་། ། བྲ་ཉེ་ཆུ་སྨད་གྲེ་དང་དབོ། ། སྒྲུབ་བྱེད་ནག་པ་གྲོ་བཞིན་དང་། ། ས་རི་སྣར་མ་མགོ་མོན་གྲུ། ། མི་ཡི་ནང་ཁྱོད་གྲོགས་མཆོག་འགྱུར། ། རྒྱལ་འདིར་ལྷ་མོ་ཕུར་བུ་ཁྱོད། ། ཚེས་བདུན་གནས་ཁྱོད་ཡུད་སུམ་ཅུ། ། འགྲོ་བྱེད་བུ་རམ་སྦྲང་རྩི་ ཟས། ། ཆོས་ལྡན་བྱེད་ཆུད་མྱུར་དུ་སྒྲུབ། ། ནད་ཀྱང་ཞག་ལྔ་ཁོ་ན་སྟེ། ། ཁྱོད་སྤྱད་སུ་ཡང་མི་ནང་སྐྱེ། ། ཚུལ་དགའ་ཆོས་སྨྲས་མདུན་འདོན་བློན། ། ཞིང་རིང་བག་གཏོང་དེ་དག་འཇིག ། ཁྲུམས་སྟོད་དང་ནི་ལྷ་མཚམས་ལ། ། མངལ་དུ་འཇུག་པར་བྱེད་པ་སྟེ། ། དབོ་དང་ཡང་ནི་ཐ་སྐར་དང་། ། ཆུ་སྨད་ལ་ནི་འཕེལ་བར་བྱེད། ། སྣར་མ་ནག་པ་གྲོ་བཞིན་འཆི། ། གསུམ་པོ་དེ་དག་ཤེས་པར་གྱིས། ། མཆུ་སྣྲུབས་ནམ་གྲུ་དེ་དག་གསུམ། ། རྒུད་བྱེད་མཁས་པས་ཤེས་པར་གྱིས། ། ལྷ་མཚམས་བྱེད་པ་ཐམས་ཅད་ལ། །

ལས་ དག་གི་ནི་རྒྱུ་སྐར་ཏེ། ། མཁས་པས་ཤེས་པ་ཁོ་ནར་གྱིས། ། སྣྲོན་ནི་ཕུན་སུམ་ཚོགས་པར་བྱེད། ། ཁྲུམས་སྨད་སྐག་གིས་ཐོབ་བྱེད་གྲེ། ། ཆུ་སྟོད་ཐ་སྐར་གསུམ་པོ་བདེ། ། མེ་བཞི་སྒྲུབ་མིན་དྲུག་དབྱེར་མེད། ། དེ་བཞིན་མཁས་པས་གསུམ་ཤེས་གྱིས། ། ས་རི་ གྲོགས་དང་གྲོགས་མཆོག་སྟེ། ། མགོ་དང་ལག་དང་མོན་གྲུ་བཞིན། ། ས་ག་དང་ནི་མོན་གྲེ་ཡང་། ། དོན་ནི་འབྲས་བུར་བཅས་པ་ཡིན། ། སྦྲུལ་གྱི་ལྷ་མོ་སྐག་འདིར་སྨྲ། ། ཚེས་བརྒྱད་ལ་ནི་ཁྱོད་གནས་ཀྱིས། ། ཡུད་ཙམ་བཅོ་ལྔས་ཁྱོད་འགྲོ་བྱེད། ། གོད་ པའི་ཤ་ནི་ཟས་ཡིན་ནོ། ། འགྲོ་བའི་ནང་དུ་གཤིན་རྗེ་ཡི། ། བྱེད་པ་མི་ཟད་ཁྱོད་གནས་ཀྱིས། ། ཉིན་དེར་ཁྱོད་སྤྱོད་སུ་མིར་སྐྱེ། ། ཁྲོ་ཞིང་སྡིག་པ་ཅན་དུ་འགྱུར། ། ཤིན་ཏུ་མི་སྡུག་ཚུལ་ཁྲིམས་ཉམས། ། ཆོས་གོས་གདིང་བ་ཟད་འགྱུར་ཞིང་། ། ཁྲུམས་སྨད་ཅེས་ བྱ་རབ་མཆོག་ལ། ། མངལ་དུ་འཇུག་པ་སྟོན་པར་བྱེད། ། མེ་བཞི་སྨིན་དྲུག་འཆི་བར་བྱེད། ། མགོ་སྣྲུབས་གྲེ་ནི་རོ་མྱངས་པས། ། རྒུད་བྱེད་ཆུ་སྟོད་ཐ་སྐར་དང་། ། སྣྲོན་ནི་ལས་ཀྱི་རྒྱུ་སྐར་ཡིན། ། སྣྲུབས་དང་ནམ་གྲུ་མཆུ་ཞེས་པ། ། གསུམ་པོ་ཕུན་སུམ་ཚོགས་པར་ བྱེད། །

བྲ་ཉེ་བདེ་བྱེད་གྲོ་དབོ་དང་། ། གྲོ་བཞིན་མཆུ་གཉིས་ཁྱོད་ཐོས་སྒྲུབ། ། ནག་པ་སྣར་མ་མཆུ་གཉིས་དང་། ། མོན་གྲེ་ལྷ་མཚམས་ས་ག་དང་། ། ལག་དང་ནབ་སོ་དེ་དག་གྲོགས། ། ཁྲུམས་སྟོད་ཀྱང་ནི་དེ་བཞིན་ནོ། ། གཤིན་རྗེའི་{ཡི་དགས་,ཡི་དྭགས་}ལྷ་མོས་སྨྲས། ། ཚེས་དགུ་ལ་ནི་ཁྱོད་གནས་ཤིང་། ། ཡུད་ཙམ་སུམ་ཅུར་ཉིན་མཚན་དུ། ། ཏིལ་གྱི་སྦྱར་ཐུག་ཟས་ཡིན་ནོ། ། སེམས་ཅན་བྱེད་པ་ཆུང་འབྲིང་སྒྲུབས། ། ཞག་བརྒྱད་ཐམ་པར་ནད་པ་སོས། ། གང་མའི་བྲ་ཉེ་སུ་མིར་སྐྱེ། ། བསོད་ནམས་བྱེད་པར་བཤད་པ་ཡིན། ། {བརྫུན་,རྫུན་} སྲོག་ཤིན་ཏུ་ཡུན་{རིངས་,རིང་}བསྲུངས། ། སྣྲུབས་ནི་ལས་ཀྱི་རྒྱུ་སྐར་ཡིན། ། འདིར་ཡང་ནམ་གྲུས་མངལ་དུ་འཇུག ། ས་ག་ལ་ཡང་འཆི་བར་བྱེད། ། ལག་ཅེས་བྱ་བ་ཁོ་ན་དང་། ། མོན་གྲེ་ཡང་ནི་གསུམ་པ་ཡིན། ། སྣར་མ་དང་ནི་ནག་པ་དང་། ། གསུམ་པ་གྲོ་བཞིན་འདིར་ དགའ་བྱེད། ། དབོ་དང་བྲ་ཉེ་རྒུད་བྱེད་ཡིན། ། ཆུ་སྨད་ཕུན་སུམ་ཚོགས་པར་བྱེད། ། ཐ་སྐར་དང་ནི་གྲེ་དང་ནི། ། མཆུ་གཉིས་འཕེལ་བར་བྱེད་པ་ཡིན། ། གསུམ་པོ་དེ་དག་ཤེས་པར་གྱིས། ། མེ་བཞི་དང་ནི་བྱི་བཞིན་དང་། ། སྨིན་དྲུག་ཀྱང་ནི་བདེ་བར་བྱེད། །

ས་རི་དེ་ལ་ སྒྲུབ་པ་ཡིན། ། མགོ་གཉིས་དང་ནི་མོན་གྲུ་བཅས། ། དེ་གསུམ་རྗེ་གྲོགས་ཤེས་པར་གྱིས། ། སྣྲོན་རྒྱལ་ལྷ་མཚམས་ཆུ་སྟོད་དང་། ། ནབ་སོ་ལྷག་པར་ཟླ་བའང་ཡིན། ། སྐལ་ལྡན་ལྷ་མོ་གྲེ་ཡིས་སྨྲས། ། ཚེས་བཅུ་ལ་ནི་ཁྱོད་གནས་ཤིག ། བིལ་བ་མར་སར་ཟས་ཡིན་ ཏེ། ། ཡུད་ཙམ་སུམ་ཅུར་ཁྱོད་ཀྱིས་འགྲོ། ། འགྲོ་འདིར་བྱ་བ་ཆུང་ངུ་སྒྲུབས། ། ཞག་བདུན་ནད་པ་ཁྱོད་སྤྱོད་པས། ། སུ་ཞིག་མིར་སྐྱེ་དྲི་དགའ་འདོད། ། གོས་དང་རྒྱན་དག་འདོད་པ་ཡིན། ། བྱེ་བྲག་ཕྱེད་རྣམས་སུ་སྲུང་བ། ། ཐ་སྐར་ལ་ནི་མངལ་འཇུག་ འགྱུར། ། ནབ་སོས་འཆི་མགོ་ཟིན་རོ་མྱང་། ། འཕེལ་བྱེད་སྨིན་དྲུག་རྒུད་པར་བྱེད། ། མེ་བཞིའང་མཁས་པས་མངོན་ཤེས་གྱིས། ། གྲེ་ཞེས་བྱ་དང་བྲ་ཉེ་དང་། ། ཆུ་སྨད་ཅེས་ནི་བྱ་བ་གསུམ། ། ཕུན་སུམ་ཚོགས་བྱེད་ཤེས་པར་གྱིས། ། འདི་ནི་ས་ག་མོན་གྲེ་ཡང་། ། སྒྲུབ་ཡིན་ལག་ལའང་བདེ་བ་སྟེ། ། སྣར་མ་ནག་པ་གྲོ་བཞིན་ཉིན། ། མཁས་པས་གྲོགས་གཉིས་ཤེས་པར་གྱིས། ། རྣམ་པ་དྲུག་ཏུ་འགྱུར་བ་ནི། ། སྐག་དང་ནམ་གྲུ་རྒྱལ་དག་དང་། ། སྣྲུབས་དང་སྣྲོན་ཞེས་བྱ་བ་དང་། ། ཁྲུམས་གཉིས་གང་ཡིན་འདིར་ཡིན་ ནོ། ། ལྷག་པར་ཡང་ནི་དེ་བཞིན་དུ།

། ཐམས་ཅད་ཀྱང་ནི་བགྲང་བར་གྱིས། ། མཁས་པ་བློ་གྲོས་ལྡན་པ་ཡིས། ། རང་གི་ཐམས་ཅད་ཤེས་པར་གྱིས། ། གྲེ་དབོ་ཉི་མའི་ལྷ་མོས་སྨྲས། ། ཚེས་ནི་བཅུ་གཅིག་ཁྱོད་གནས་ཀྱིས། ། ཡུད་ཙམ་བཞི་བཅུ་རྩ་ལྔ་ཡིས། ། ཁྱོད་ནི་རྣམ་པར་གྲོལ་བར་གྱིས། ། མགོ་ཡིས་ལས་ནི་ཆུང་ངུས་ཀྱང་། ། ས་བོན་ཐོབ་ཅིང་བསྐྱེད་བྱ་སྟེ། ། ཞག་བཅུར་ནད་པ་ཞི་བར་གྱིས། ། ཁྱོད་སྤྱད་སྐྱེ་དགུ་གང་འབྱུང་བ། ། བླུན་ཞིང་བསྙེན་གནས་གནས་པ་དང་། ། སྦྱིན་བྲལ་འགྲོ་ལ་སྡང་མི་སྡུག ། དུག་གིས་ འཆི་བར་འགྱུར་བ་སྟེ། ། དེ་ཡི་མངལ་འཇུག་བྲ་ཉེ་ཤོག ། ནམ་གྲུ་མོན་གྲེ་འཕེལ་བར་བྱེད། ། ལག་ཅེས་བྱ་དང་ས་ག་དང་། ། སྣྲོན་ཞེས་བྱ་བ་གསུམ་པ་སྟེ། ། དེ་དག་འཆི་བར་བྱེད་པ་ཡིན། ། ཁྲུམས་སྨད་དང་ནི་རྒྱལ་ཡང་འདིར། ། རྒུད་བྱེད་ཡིན་པར་ཤེས་པར་གྱིས། ། སྣར་མ་དང་ནི་ཆུ་སྨད་ཀྱང་། ། དེའི་ལས་རྒྱུ་སྐར་ཤེས་པར་གྱིས། ། མེ་བཞིའང་ཕུན་སུམ་ཚོགས་བྱེད་ཅིང་། ། བྱི་བཞིན་དང་ནི་སྨིན་དྲུག་ཀྱང་། ། བདེ་བར་བྱེད་པའི་གནས་ཡིན་ཏེ། ། མོན་གྲུ་དང་ནི་མགོ་སྒྲུབ་བྱེད། ། ནབ་སོ་ཁྲུམས་སྟོད་ལྷ་མཚམས་འདིར། ། མཁས་པ་ བཞིན་དུའང་ཤེས་པར་གྱིས། །

གྲོགས་དང་གྲོགས་མཆོག་ཐ་སྐར་ཏེ། ། མཆུ་དང་ནམ་གྲུ་སྐག་དང་བཅས། ། སྣྲུབས་དང་ཁྲུམས་སྟོད་ཅེས་བྱ་བ། ། དྲུག་པོ་དེ་དག་ནམ་མཁའ་ལ། ། ཉི་མའི་ལྷ་མོ་ལྷན་ཅིག་པར། ། མཁས་པ་ཡིས་ནི་ཤེས་པར་གྱིས། ། བཅུ་ གཉིས་ཁྲུ་མྱུར་རྒྱལ་བྱེད་མཁའི། ། དཔལ་ལས་བྱ་བར་མྱུར་མི་བཟད། ། ཡུད་ཙམ་སུམ་ཅུར་འགྲོ་བར་གྱིས། ། སེམས་ཅན་རྣམས་ལ་ཕན་པར་བྱིན། ། ཨེ་མ་ཁྱོད་ཟས་ལྷམ་མཆུ་གཤེར། ། ཞག་ལྔ་ནད་པ་མྱུར་དུ་གསོས། ། དེར་གནས་སྐྱེ་དགུ་གང་སྐྱེ་བ། ། དབང་ཕྱུག་གཙོ་བོ་ནོར་ལྡན་ཡིན། ། ཆོམ་རྐུན་རྣམས་ནི་འདུལ་བྱེད་མཆོག ། སྦྱིན་དང་དུལ་བར་བྱེད་པ་ཡིན། ། མཆོག་སྦྱིན་རྣམ་པ་སྣ་ཚོགས་ཀྱི། ། མཆོད་སྦྱིན་བྱེད་པར་འགྱུར་བ་ཡིན། ། བྱང་ཆུབ་ཀྱི་ནི་ཡན་ལག་བདུན། ། གོ་འཕང་སྲུང་བར་བྱེད་པས་ན། ། དེ་ཡི་གྲགས་པ་མངལ་འཇུག་ཀྱང་། ། སྐག་ཅེས་བྱ་བ་ཁོ་ན་ཡིན། ། ལྷ་མཚམས་འཆི་བར་བྱེད་པ་སྟེ། ། དེ་ཡི་འཕེལ་བྱེད་ནབ་སོ་ཡིན། ། ཁྲུམས་སྟོད་ཅེས་ནི་བྱ་བ་ཡང་། ། ལས་ཀྱི་རྒྱུ་སྐར་དབྱེར་མེད་པའོ། ། ས་རི་མོན་གྲུ་འདིར་རྒུད་བྱེད། ། འདིར་ནི་ མགོ་ཡང་གསུམ་པ་ཡིན། ། ཕུན་སུམ་ཚོགས་བྱེད་འདིར་གྲོ་བཞིན། ། ས་རི་སྣར་མའང་གསུམ་པ་ཡིན།

། མོན་གྲེ་བདེ་བར་བྱེད་པ་སྟེ། ། འདིར་ནི་ས་ག་ལག་གསུམ་པ། ། སྣྲོན་དང་རྒྱལ་ཡང་སྒྲུབ་པ་སྟེ། ། འདིར་ནི་ཁྲུམས་སྨད་གསུམ་པའང་ཡིན། ། གྲོགས་དང་ གྲོགས་མཆོག་འདི་དྲུག་སྟེ། ། ཆུ་སྟོད་མཆུ་དང་ཐ་སྐར་དང་། ། ཆུ་སྨད་ཅེས་ནི་བྱ་བ་དང་། ། གྲེ་དང་བྲ་ཉེ་འཆི་བར་བྱེད། ། དགའ་བྱེད་ལྷ་མོ་ནག་པས་སྨྲས། ། ཁྱོད་མཁའ་མྱུར་སོང་ཡུད་སུམ་ཅུར། ། མི་བཟད་ལས་བྱེད་མྱུར་གནས་ཤིག ། ཡན་ལག་རྨས་པའང་ཁྱོད་ ཀྱིས་བཟའ། ། ཞག་དྲུག་ནད་པ་མྱུར་དུ་གསོས། ། ཁྱོད་ལ་གནས་པས་སྐྱེ་དགུ་སྐྱེ། ། གླུ་དང་རོལ་མོའི་སྒྲ་མཁས་འགྱུར། ། སྦྱིན་དགའ་འདོད་སྤྱོད་མཁས་ལ་སྡུག ། སྣར་མ་དེ་ཡི་མངལ་འཇུག་ཡིན། ། ཐ་སྐར་ཞེས་ནི་བྱ་བ་དང་། ། མཆུ་ནི་འཆི་བར་བྱེད་པ་སྟེ། ། ཆུ་སྟོད་ཅེས་ བྱ་གསུམ་པའང་ཡིན། ། ཁྲུམས་སྨད་འཕེལ་བར་བྱེད་པ་སྟེ། ། སྣྲོན་དང་རྒྱལ་ནི་གསུམ་པའང་ཡིན། ། དེ་ཡི་ལས་ཀྱི་རྒྱུ་སྐར་ནི། ། གྲོ་བཞིན་ཡིན་གྱི་བགྲང་བར་གྱིས། ། འདིར་ནི་མོན་གྲེ་རྒུད་པར་བྱེད། ། ས་ག་འདིར་ལག་གསུམ་པའང་ཡིན། ། མགོ་ ནི་ཕུན་སུམ་ཚོགས་བྱེད་འདིར། ། ས་རི་མོན་གྲུ་གསུམ་པའང་ཡིན། ། འདིར་ཡང་ལྷ་མཚམས་བདེ་བར་བྱེད། །

མགོ་ཞེས་ཀྱང་ནི་བྱ་བ་དང་། ། ཁྲུམས་སྟོད་ཅེས་ནི་བྱ་བ་དང་། ། སྐག་ཀྱང་འདིར་ནི་སྒྲུབ་པ་ཡིན། ། གྲོགས་དང་གྲོགས་མཆོག་སྣྲུབས་ནམ་གྲུ། ། འདིར་ དྲུག་ཆུ་སྨད་སྨིན་དྲུག་དང་། ། བྲ་ཉེ་དང་ནི་དབོ་དང་ཡང་། ། ས་བོན་གྲེ་དང་ས་རི་སྟེ། ། ཕ་མས་འདིར་སྨྲས་གླིང་བཞི་བར། ། མཁའ་ལ་ཁྱོད་སོང་ཚེས་བཅུ་བཞིར། ། ཁྱོད་སྤྱོད་འགྲོ་བའི་གླིང་བཞི་བར། ། ལྔ་ཡུད་དྲག་བྱོས་ཁྱོད་སོང་ཤིག ། མེ་ཏོག་ནས་ཤིན་ཟས་ཡིན་ཏེ། ། ཞག་ལྔར་ནད་པ་མྱུར་དུ་གསོས། ། ཁྱོད་སྤྱད་སྐྱེ་དགུ་སུ་སྐྱེ་བ། ། རྩིས་པ་འབྱོར་རྙེད་ཁྲོ་བར་འགྱུར། ། འདིར་ནི་རྒྱུ་སྐར་ཁྲོ་སྡང་གཡོ། ། སྣར་མ་མེ་བཞི་རྒུད་པར་བྱེད། ། འདིར་ནི་སྨིན་དྲུག་བྱི་བཞིན་དང་། ། གསུམ་པ་དབོ་ནི་ཕུན་སུམ་ཚོགས། ། ས་ག་དང་ནི་ནབ་སོ་ དང་། ། གསུམ་པ་ཁྲུམས་སྟོད་སྒྲུབ་པ་ཡིན། ། འདིར་བདེ་ནག་པ་མགོ་མོན་གྲུ། ། རྣམ་པ་དྲུག་ནི་མཛའ་བོ་ཡིན། ། ནམ་གྲུ་སྣྲོན་མཛའ་ཐ་སྐར་དང་། ། མཆུ་སྣྲུབས་དེ་དག་མཆོག་ཏུ་མཛའ། ། བྱི་བཞིན་ཚངས་པའི་ལྷ་མོས་སྨྲས། ། ཚེས་དྲུག་མཁའ་ལ་ཁྱོད་ཡུད་ སོང་། ། མི་བཟད་བྱ་བ་འབྱུང་བྱའི་ཕྱིར། ། མར་སར་ཡང་ནི་ཁྱོད་ཟོ་ཤིག །

ཁྱོད་ལ་སེམས་ཅན་སུ་གནས་པ། ། དཔའ་ཞིང་སྲན་ཐུབ་འབྱོར་རྒྱལ་གཙོ། ། ཡུལ་འཁོར་གྲོང་འཇོམས་དགྲ་ཐུལ་བ། ། དབོ་ལ་དེ་ནི་མངལ་དུ་འཇུག ། དེ་ལ་འཕེལ་བྱེད་འཆི་བ་མེད། ། དེ་ཡི་རྒྱུ་སྐར་ཀུན་གྲོགས་མཆོག ། གྲོ་བཞིན་ཁྱབ་འཇུག་ལྷ་སྲོང་སྨྲས། ། ངའི་གཡས་ཚེས་བདུན་འདིར་ཁྱོད་སོང་། ། སུམ་ཅུའི་ཡུད་ཤ་བུ་རམ་ཟས། ། འཕྲོག་བྱེད་བྱ་བ་ཆུང་ངུ་སྒྲུབས། ། ཁྱོད་གནས་སྐྱེ་དགུ་སུ་སྐྱེ་བ། ། མཁས་པར་བྱེད་པའི་མཆོག་ཡིན་ཏེ། ། གྲོགས་སྐྱོང་རྣམས་ཀྱིས་མཆོད་པ་ཡིན། ། འདིར་དེ་མེ་བཞིས་མངལ་འཇུག་ཡིན། ། རྒྱལ་ཞེས་བྱ་དང་ལྷ་མཚམས་དང་། ། ཁྲུམས་སྟོད་ལ་ནི་འཕེལ་བར་བྱེད། ། མཆུ་སྣྲུབས་གྲོ་བཞིན་འཆི་བར་བྱེད། ། སྣར་མ་ལས་ཀྱི་རྒྱུ་སྐར་ཡིན། ། ས་རི་མོན་གྲེ་ལག་རྒུད་ བྱེད། ། མོན་གྲུ་མགོ་ཞེས་བྱ་བ་དང་། ། ནག་པ་ཕུན་སུམ་ཚོགས་པར་བྱེད། ། ཁྲུམས་སྟོད་ནབ་སོ་ས་ག་བདེ། ། ནམ་གྲུ་ནབ་སོ་སྣྲོན་སྐག་སྒྲུབ། ། རྣམ་དྲུག་གྲོགས་དང་གྲོགས་མཆོག་སྟེ། ། སྨིན་དྲུག་ཆུ་སྨད་དེ་དག་ཡིན། ། དེ་གཉིས་གསུམ་པ་དབོ་ཡང་ཡིན། ། མོན་གྲུ་དྲང་སྲོང་ནོར་ལྷས་སྨྲས། ། ཚེས་བརྒྱད་ཡུད་ཙམ་སུམ་ཅུར་ཁྱོད། །

བཞིར་སོང་ལས་ཆུང་ཁྱོད་ཁུ་འཐུང་། ། དེར་ནི་ནད་བཏབ་ལོ་གཅིག་གསོས། ། ཁྱོད་གནས་སྐྱེ་དགུ་སུ་སྐྱེ་བ། ། ཁྲོ་ཞིང་རྙེད་གོས་དུས་ཀྱང་སྤངས། ། ནང་མིས་ཡོངས་སྐོར་མཆོད་སྦྱིན་བསྲུངས། ། འདིར་དེའི་མངལ་འཇུག་ནག་པ་ཡིན། ། གྲེ་དང་བྲ་ཉེ་འཆི་བར་བྱེད། ། ཆུ་སྟོད་གསུམ་པར་བགྲང་བར་གྱིས། ། སྣྲོན་སྐག་ནམ་གྲུ་འཕེལ་བར་བྱེད། ། ས་ག་ནབ་སོ་ཁྲུམས་སྟོད་རྒུད། ། ས་རི་དང་ནི་མོན་གྲེ་དང་། ། ལག་ནི་ཕུན་སུམ་ཚོགས་པར་བྱེད། ། ལས་ཀུན་ གཉེན་གྱིས་ཤིན་ཏུ་བསྲུངས། ། དེ་ཡི་མངལ་འཇུག་སྐག་ཡིན་ནོ། ། མོན་གྲེ་ཞེས་ནི་བྱ་བ་དང་། ། ལག་ནི་འཆི་བར་བྱེད་པ་སྟེ། ། མེ་བཞི་དང་ནི་མོན་གྲེ་དང་། ། སྣར་མ་འཕེལ་བར་བྱེད་པ་ཡིན། ། ནམ་གྲུ་དེ་ལས་རྒྱུ་སྐར་ཡིན། ། བྲ་ཉེ་དང་ནི་ཆུ་སྨད་དང་། ། གྲེ་ཞེས་ ཀྱང་ནི་བྱ་བ་ཡང་། ། གསུམ་པ་ཡིན་ཏེ་རྒུད་པར་བྱེད། ། ཆུ་སྟོད་མཆུ་དང་ཐ་སྐར་ནི། ། ཕུན་སུམ་ཚོགས་བྱེད་ནག་པ་དང་། ། མོན་གྲུ་མགོ་ནི་སྒྲུབ་པར་བྱེད། ། བྱི་བཞིན་དབོ་ནི་བདེ་བར་བསྒྲགས། ། རྣམ་དྲུག་གྲོགས་དང་གྲོགས་མཆོག་ཡིན། ། ཁྲུམས་སྟོད་ཁྲུམས་ སྨད་ནབ་སོ་འདིར། ། རྒྱལ་ཞེས་བྱ་དང་ལྷ་མཚམས་དང་། །

ས་ག་འདིར་ནི་སྨྲས་པ་ཡིན། ། ཆུ་སྟོད་གཞི་ཡི་ལྷ་མོས་སྨྲས། ། ཚེས་བཞིའི་མཚམས་ཁྱོད་མཁའ་ལ་སོང་། ། ནྱ་གྲོ་དྷ་ནི་ཟས་ཡིན་ཏེ། ། ཡུད་ཙམ་སུམ་ཅུར་འགྲོ་བར་བྱེད། ། གདབ་མོ་ཆུ་ཡི་ལས་ཕྱིར་ཡིན། བད་ཀན་གྱུར་ནད་ཆུང་བར་འགྱུར། ། ཁྱོད་སྤྱོད་སྐྱེ་དགུ་དེར་སུ་སྐྱེ། ། ཆོས་གནས་བརྩོན་ཐོས་ལོངས་སྤྱོད་ལྡན། ། མཁས་པ་དག་དང་ཕྲད་པ་ཡིན། ། བྱ་བ་ཀུན་ལ་མཁས་པ་ཡིན། ། དེར་སྐྱེའི་རྒྱུ་སྐར་འདིར་མཆུ་ཡིན། ། འདིར་ལས་རྒྱུ་སྐར་ཐ་ སྐར་ཡིན། ། ནག་པ་མགོ་དང་མོན་གྲུ་འཕེལ། ། ས་ག་ཁྲུམས་སྟོད་ནབ་སོ་ནི། ། འདིར་ཡང་འཆི་བར་བྱེད་པ་ཡིན། ། དབོ་ནི་འདིར་ཡང་རྒུད་པར་བྱེད། ། སྨིན་དྲུག་བྱི་བཞིན་གསུམ་པའང་ཡིན། ། འདི་ནི་ཕུན་སུམ་ཚོགས་བྱེད་གྲེ། ། བྲ་ཉེ་ཆུ་སྨད་གསུམ་པའང་ ཡིན། ། ཁྲུམས་དང་ས་རི་མོན་གྲེ་བསྒྲུབ། ། མེ་བཞི་སྣར་མ་གྲོ་བཞིན་བདེ། ། གྲོགས་དང་གྲོགས་འབྲིང་རྣམ་དྲུག་སྟེ། ། ནམ་གྲུ་རྒྱལ་དང་ལྷ་མཚམས་སྐག ། སྣྲོན་དང་འདིར་ནི་ཁྲུམས་སྨད་ཡིན། ། ཆུ་སྨད་དྲང་སྲོང་ཀུན་ལྷས་སྨྲས། ། ཚེས་ལྔར་བཞི་བཅུར་ལྔ་ ཡུད་འགྲོ། ། ཁྱོད་ཆུང་བསྡུ་བྱར་ཁྱོད་ཟས་མངར། ། ཞག་བདུན་ནད་གསོས་སྐྱེ་བ་བསྲུང་། །

ཁྱོད་སྤྱོད་སྐྱེ་དགུ་སུ་སྐྱེ་བ། ། བུ་ལྡན་ཡིན་ཞིང་ནད་ཀྱང་མེད། ། གྲོགས་མང་རབ་ཏུ་འབྱོར་པ་སྟེ། ། མངལ་དུ་འཇུག་པའང་ཆུ་སྟོད་ཡིན། ། མོན་གྲེ་དང་ནི་ལག་དང་ ནི། ། ས་རི་ཁོ་ནས་འཕེལ་བར་བྱེད། ། ཁྲུམས་སྨད་དང་ནི་ལྷ་མཚམས་དང་། ། རྒྱལ་ཡང་འདིར་ནི་འཆི་བྱེད་ཡིན། ། གཤིན་རྗེའི་ལྷ་མོ་ལ་མགོས་སྨྲས། ། རྒྱལ་ཞེས་བྱ་དང་ལྷ་མཚམས་དང་། ། ཁྲུམས་སྨད་བདེ་བར་བྱེད་པ་སྟེ། ། ཐ་སྐར་མཆུ་སྣྲུབས་སྒྲུབ་པ་ཡིན། ། དབོ་ཞེས་ཀྱང་ནི་བྱ་བ་དང་། ། ཆུ་སྨད་སྨིན་དྲུག་གྲོགས་ཀྱང་བྱེད། ། སྣར་མ་བྱི་བཞིན་རྩིས་ནས་ཀྱང་། ། གསུམ་པ་མེ་བཞི་གྲོགས་མཆོག་ཡིན། ། མོན་གྲེ་བྲ་ཉེའི་ལྷ་མོས་སྨྲས། ། གླིང་བཞིའི་མཁའ་ལ་ཁྱོད་སོང་ཤིག ། ཡུད་ཙམ་བཅོ་ལྔར་ཞོ་མར་ཟོ། ། ཞག་བདུན་ ནད་གསོས་ལས་ཀྱང་ཆུང་། ། འདིར་ཁྱོད་གནས་པས་སྐྱེ་དགུ་སྐྱེ། ། ཁྲོ་བར་བྱེད་ཅིང་མེད་པ་ཡིན། ། ཆུ་བྲན་ལ་ནི་བསྲུང་བར་གྱིས། ། མངལ་འཇུག་འདིར་ནི་ས་རི་ཡིན། ། ཐ་སྐར་མཆུ་སྣྲུབས་འཕེལ་བར་བྱེད། ། ཆུ་སྨད་ཅེས་ནི་བྱ་བ་དང་། ། སྨིན་དྲུག་འཆི་བར་བྱེད་པ་སྟེ། ། དབོ་ཡང་གསུམ་པར་ཤེས་པར་བྱ། ། ཁྲུམས་སྨད་རྒྱལ་དང་ལྷ་མཚམས་ནི། །

རྒུད་བྱེད་ལག་ལས་རྒྱུ་སྐར་ཡིན། ། ཁྲུམས་སྟོད་ནབ་སོ་ས་ག་སྟེ། ། དེ་དག་ཕུན་སུམ་ཚོགས་པར་བྱེད། ། སྣྲོན་སྐག་ནམ་གྲུ་བདེ་བར་བྱེད། ། གྲེ་དང་ཆུ་སྟོད་བྲ་ཉེ་སྒྲུབ། ། གྲོ་བཞིན་མགོ་དང་མེ་བཞི་དང་། ། སྣར་མ་བྱི་བཞིན་ གྲོགས་མཆོག་གྲོགས། ། ཁྲུམས་སྟོད་དྲང་སྲོང་གིས་སྨྲས་ཁྱོད། ། ལན་ཆུང་གཡོ་བྱེད་ཡུད་སུམ་ཅུར། ། བཅུ་བཞི་ཚེས་གླིང་བཞི་འདིར་སོང་། ། ཤ་སྲན་ཁྱོད་ཟོ་མེ་ཏོག་བསྣམས། ། དེར་ནི་སེམས་ཅན་གང་དག་སྐྱེས། ། གྱ་གྱུ་གཡོ་རྐུན་བླུན་ཞིང་འཐབ། ། {རི་དགས་,རི་དྭགས་}སྲོག་གཅོད་ཡུད་སུམ་ ཅུར། ། ནད་པ་མྱུར་དུ་ཐར་བྱེད་ཅིང་། ། སྐྱེ་དགུ་དེ་དག་དམག་རྐུན་དང་། ། རྒྱུད་སྒྲ་རྟག་བསྲུངས་ས་ག་ཡང་། ། འདིར་མངལ་འཇུག་ཡིན་བྲ་ཉེ་དང་། ། ཆུ་སྟོད་གསུམ་པ་གྲེ་འདིར་འཕེལ། ། སྣར་མ་བྱི་བཞིན་ཤི་སོས་བྱེད། ། ཐམས་ཅད་བྱ་ཕྱིར་ནབ་སོ་ལག ། རྒུད་བྱེད་ནམ་གྲུ་སྣྲོན་སྐག་བཞིན། ། ཕུན་ཚོགས་ཁྲུམས་སྨད་ལྷ་མཚམས་རྒྱལ། ། ཐ་སྐར་མཆུ་སྣྲུབས་འདིར་བདེ་བྱེད། ། སྨིན་དྲུག་ཆུ་དབོ་གསུམ་པ་སྒྲུབ། ། མོན་གྲུ་མགོ་དང་ནག་པ་གྲོགས། ། གྲོགས་མཆོག་མོན་གྲུ་ལག་ས་རི། ། ཁྲུམས་སྨད་ཉི་མའི་ལྷ་མོ་ ཁྱོད། །

བཅུ་གཅིག་ཚེས་ལ་མཁའ་ལ་སོང་། ། ཡུད་ཙམ་བཞི་བཅུ་རྩ་ལྔར་སོང་། ། {རི་དགས་,རི་དྭགས་}ཤ་གཏོར་ཞག་བདུན་རིམས། ། ཁྱོད་སྤྱད་སྐྱེ་དགུ་སུ་སྐྱེ་བ། ། གླུ་དང་གར་མཁས་ནོར་འབྲུ་མང་། ། རབ་ཏུ་རིག་པའི་ཕ་རོལ་ཕྱིན། ། འདིར་ནི་ཆོས་ཀྱི་སྦྱིན་པ་བྱེད། ། ལྷ་མཚམས་འཕེལ་བྱེད་སྨིན་དྲུག་དང་། ། ཆུ་སྨད་འཆི་བར་བྱེད་པ་སྟེ། ། ནག་པ་མགོ་དང་གྲོ་བཞིན་དང་། ། རྒྱལ་དེའི་ལས་ཀྱི་རྒྱུ་སྐར་ཡིན། ། སྣྲུབས་དང་ཐ་སྐར་མཆུ་རྒུད་བྱེད། ། ནམ་གྲུ་སྐག་འདིར་ཕུན་ཚོགས། ། མེ་བཞི་བྱི་བཞིན་སྒྲུབ་པ་སྟེ། ། བདེ་བར་ བྱེད་པ་ཆུ་སྟོད་གྲེ། ། བྲ་ཉེ་དང་ནི་ནག་པ་དང་། ། ས་རི་མོན་གྲུ་ལག་ཡིན་ནོ། ། ནབ་སོ་དང་ནི་ས་ག་དང་། ། མོན་གྲེ་གསུམ་པ་གྲོགས་མཆོག་ཡིན། ། དྲང་སྲོང་ལྷ་མོ་རྒྱལ་སྨྲས་ཁྱོད། ། མི་ཡི་འཇམ་ཆུང་བྱ་བའི་ཕྱིར། ། བཅུ་བཞིའི་ཚེས་ཡུད་སུམ་ཅུར་སོང་། ། གཏོར་མ་བུ་རམ་མུན་པ་སྲུངས། ། ཞག་ནི་ཉི་ཤུར་ཁྱོད་བསྲུང་བས། ། སྐྱེ་དགུ་སྐྱེ་མཛངས་ནོར་འབྲུ་ལྡན། ། སྦྱོར་དང་རབ་སྦྱོར་བྱ་བ་དང་། ། དབྱིག་རྣམས་དཔག་ཏུ་མེད་པའང་ཡིན། ། དེ་ཡི་མངལ་འཇུག་སྣྲོན་ཡིན་ཏེ། ། མེ་བཞི་སྣར་མ་བྱི་བཞིན་ འཕེལ། །

ས་རི་མོན་གྲུ་ལག་འཆི་བྱེད། ། ལས་ཀྱི་རྒྱུ་སྐར་འདིར་སྐག་ཡིན། ། དབོ་དང་ཆུ་སྨད་སྨིན་དྲུག་བདེ། ། གྲོ་བཞིན་ནག་པ་སྣར་མ་སྒྲུབ། ། ཆུ་སྟོད་གྲེ་བྲ་ཉེ་རྒུད་བྱེད། ། ཐ་སྐར་མཆུ་སྣྲུབས་ཕུན་ཚོགས་བྱེད། ། ནབ་སོ་ས་ག་མོན་གྲེ་གྲོགས། ། རྒྱལ་ དང་ལྷ་མཚམས་གྲོགས་མཆོག་སྟེ། ། ཁྲུམས་སྟོད་དྲང་སྲོང་གིས་སྨྲས་པ། ། དྲི་ཟའི་ལྷ་མོ་ཡུད་སུམ་ཅུར། ། ཚེས་ནི་བཅུ་བཞིར་ཁྱོད་སོང་ཤིག ། མྱུར་བྱའི་གཏོར་མ་ཟན་དྲོན་ཤ། ། འདིར་ཞག་ཉི་ཤུ་ལྔ་ནད་ཡིན། ། སྲོག་ལྡན་འབྲས་དཀར་བརྒྱ་ཡིས་བསྲུངས། ། ཁྱོད་སྤྱད་སྐྱེ་དགུ་སུ་སྐྱེ་བ། ། སྨན་སྦྱོར་བྱེད་པ་སྨན་པ་ཡིན། ། གླུ་གར་རོལ་མོའི་སྒྲ་མཁས་འགྱུར། ། འདིར་དེའི་མངལ་འཇུག་སྣྲུབས་ཡིན་ནོ། ། ནག་པ་མགོ་དང་གྲོ་བཞིན་འཕེལ། ། ནབ་སོ་མོན་གྲེ་ལག་འཆི་བྱེད། ། སྐྱེ་འཆི་འཕེལ་ཉོ་ཚོང་ལམ་འགྱེད། ། ཐལ་ མོ་འདྲེག་མཁན་ལས་རྟག་སྤོངས། ། སྨིན་དྲུག་གྲེ་དབོ་ཆུ་སྨད་གཉིས། ། རྒུད་བྱེད་འདིར་ནི་དགྲ་ཕམ་བྱེད། ། ཁྱོད་ཀྱིས་ལས་དག་ཆེ་ཆུང་བྱས། ། མཆུ་དང་གྲེ་འདི་བརྟན་ཕུན་ཚོགས། ། ཆུ་སྟོད་དང་ནི་བྲ་ཉེ་དང་། ། གསུམ་པ་ཁྲུམས་སྨད་བདེ་བར་བྱེད། །

མེ་བཞི་ སྣར་མ་བདེ་བྱའི་ཕྱིར། ། གསང་བའི་ལམ་དུ་འགྲོ་བ་ཡིན། ། ལག་དང་མོན་གྲུ་ས་རི་སྒྲུབ། ། དྲག་པོའི་ལས་རྣམས་ཀུན་གྱིས་ཤིག ། རྒྱལ་དང་ལྷ་མཚམས་ཁྲུམས་སྟོད་གྲོགས། ། བྱ་བ་སྐལ་བཟང་འདིར་ཆུད་ཟ། ། སྐག་སྣྲོན་གྲོགས་མཆོག་བརྟེན་པ་སྟེ། ། ཁྲུམས་ སྨད་འདིར་ཡང་གསུམ་པ་ཡིན། ། སྐལ་བ་བཟང་དང་བཞོན་པ་དང་། ། མལ་དང་ཤིན་ཏུ་བརྟན་པར་གྱིས། ། དྲུག་བདུན་དེ་དག་ལས་བཞིན་དང་། ། སྣ་ཚོགས་མཁས་པས་ཤེས་ནས་སུ། ། སྔོན་གྱི་བྱ་བ་བཞིན་དུ་གྱིས། ། གཤིན་རྗེའི་ལྷ་ཚེས་བཅུ་བཞིར་ སོང་། ། ཟླ་ཉ་ཟླ་བ་རངས་པའི་ཚེ། ། སྨིན་དྲུག་ཀྱང་ནི་འགྲོ་བར་གྱིས། ། ལྷ་དང་མི་དང་དྲང་སྲོང་རྣམས། ། བྱེད་པ་གང་གིས་སྔར་བསྟན་བཞིན། ། ཞག་ནི་སུམ་ཅུ་ཟླ་བ་རངས། ། ཉིན་དང་མཚན་ནི་མཉམ་པ་སྟེ། ། ཡུད་ཙམ་བཅོ་ལྔ་བཅོ་ལྔ་ཡིན། ། གྲིབ་མའི་ གོམ་དྲུག་འདིར་ཀུན་འཁོར། ། ཐ་སྐར་གྱི་ནི་མཚན་མོ་ཐོབ། ། ཉི་མའི་མདུན་ན་ལྷ་མཚམས་ཏེ། ། ལྷོ་ཕྱོགས་སུ་ནི་ཉི་མ་འཁོར། ། ཞིང་གི་དཀྱིལ་འཁོར་མིག་དམར་ཡིན། ། ཉི་བུ་ལྷ་སྲོང་རབ་སྤྲོ་བྱས། ། ཁྱོད་ཀྱིས་ཟླ་བ་འདི་ལ་ནི། ། རྩྭ་དང་ལག་འགྲོ་གནོད་སྦྱིན་ དང་། །

སྡིག་པ་ལས་སོགས་བསྲུང་བར་གྱིས། ། ཆ་དང་ཆར་ནི་དུས་བཞག་པར། ། སྡིག་པ་ཞེས་བྱ་ཁྱོད་ཕན་སོང་། ། ཕྱོགས་དང་ཕྱོགས་སུ་ལས་བཞག་པར། ། ཁྱོད་ནི་ཡང་དག་ཕན་པར་སོང་། ། མི་འཐུན་འཐུན་དང་འཕེལ་འདི་ཡིན། ། འགྲོ་བ་ལ་ནི་ཕན་ པ་ཡི། ། རྗེས་སུ་འཐུན་པ་བདག་གིས་སུ། ། དང་པོར་བསྡུ་བ་བྱས་འདི་ཡིན། ། དེ་ནས་དྲང་སྲོང་རྔ་བོང་གིས་ཐམས་ཅད་ལ་ཐལ་མོ་རབ་ཏུ་སྦྱར་ཏེ་འཁོར་ལ་གོ་བར་བྱེད་ཅིང་སྨྲས་པ། འདི་ལྟར་བདག་གིས་{གོ་རིམས་ཀྱི་,གོ་རིམ་གྱི་}དང་པོ་དང་། མཚན་མོ་དང་། ཉིན་མོ་དང་། ཟླ་ བ་དང་། ཟླ་བ་ཕྱེད་དང་། རྒྱུ་སྐར་དང་། གཟའ་དང་། དུས་དང་། ཁྱིམ་དང་། གནས་དང་། འགྲོ་བར་བྱེད་པ་དང་། འཁོར་བ་དང་། འགྲོ་བ་དང་། མཐོང་བ་དང་། ཐོས་པ་དང་། རྣམ་པར་ཤེས་པ་དེ་བཞིན་དུ་ད་ལྟར་ཡང་བསྟན་ཅིང་རྣམ་པར་གཞག་ན། ཅི་ ཁྱེད་ཅག་འདི་ལྟར་རྣམ་པར་གཞག་པ་དང་། གདགས་པར་རྒྱུ་སྐར་དང་། གཟའ་ཡོངས་སུ་མགུ་བ་ལ་རྗེས་སུ་ཡི་རང་བར་བྱེད་དམ། འོན་ཏེ་མ་ཡིན། དེ་ནས་དེ་ཉིད་ཀྱི་ཚེ་ལྷ་མ་ཡིན་དང་། མི་དང་། དྲང་སྲོང་དང་། ལྷ་དང་། ལག་འགྲོ་དང་། མི་འམ་ཅིའི་ ཚོགས་ཐམས་ཅད་ཀྱིས་ཐལ་མོ་རབ་ཏུ་སྦྱར་བ་བཏུད་ནས་འདི་སྐད་ཅེས་སྨྲས་སོ། །

ཀྱེ་ཁྱོད་ནི་ལྷ་ཐམས་ཅད་ཀྱི་བླ་མ། ལྷ་དང་ལྷ་མ་ཡིན་དུ་བཅས་པའི་འགྲོ་བའི་ནང་ན་གཙོ་བོ། མཚུངས་པ་མེད་པར་མཁས་ལ་མངོན་པར་རྟོགས་པའི་སྙིང་བརྩེ་བས་བསྐལ་པ་ཕ་རོལ་དྲན་ པའོ། ། སེམས་ཅན་ཐམས་ཅད་ལ་ཕན་པར་འདོད་པའོ། ། དཔལ་ཐམས་ཅད་ཕུན་སུམ་ཚོགས་པའོ། ། ཡོན་ཏན་ཐམས་ཅད་ཀྱི་ཕ་རོལ་ཏུ་ཕྱིན་པའོ། ། དུས་གསུམ་ཐམས་ཅད་མཉམ་པ་ཉིད་དང་ལྡན་པ་ཡིན་ཏེ། འདི་ལྟ་བུའི་མཚན་མོ་དང་། ཉིན་མོ་ དང་། སྐད་ཅིག་དང་། རྒྱུ་སྐར་དང་། གཟའ་དང་། ཟླ་བ་དང་། ཟླ་བ་ཕྱེད་འདོགས་པར་བྱེད་པའི་ཡེ་ཤེས་དེ་ལྟ་བུ་སུ་ལ་ཡོད་པའི་སེམས་ཅན་དེ་ལྟ་བུ་སུ་ཡང་ལྷ་དང་ལྷ་མ་ཡིན་དུ་བཅས་པའི་འགྲོ་བའི་ནང་ན་མེད་པ་ཡིན་ནོ། ། ཇི་ལྟར་ཁྱོད་ཀྱིས་ད་ལྟར་བཏགས་ པ་བཞིན་དུ་བདག་ཅག་ཐམས་ཅད་ཀྱིས་དེར་དད་པ་བྱིན་པ་ཡིན། རྗེས་སུ་ཡང་ཡི་རང་ངོ་། ། ལེགས་ལྡན་ལེགས་སོ། ། སེམས་ཅན་ཐམས་ཅད་ལ་ཕན་པའི་ཕྱིར་རྒྱུ་སྐར་དང་། གཟའ་དང་། ཁྱིམ་དང་། དུས་ཀྱི་ཚོགས་ཀྱིས་ཡོངས་སུ་བསྐོར་བའི་ཟླ་བ་གཉིས་པ་ ལ་ཡང་གདགས་པར་གྱིས་ཤིག ། དྲང་སྲོང་རྔ་བོང་གིས་རབ་ཏུ་སྨྲས་པ། བདག་གི་རྒྱུ་སྐར་སྨིན་དྲུག་བརྗོད། ། ཟླ་བ་ཉ་ཚེ་ཟླ་རངས་འགྱུར། །

སྟོན་ཟླ་ཐ་{ཆུངས་,ཆུང་}ཞེས་བྱ་བ། ། འདི་ནི་རབ་ཏུ་བརྗོད་པ་ཡིན། ། མཚན་མོ་ཡང་ནི་ཡུད་ཙམ་ཅིག ། ཡོངས་སུ་བསྐོར་ཏེ་ སླར་ལྡོག་བྱེད། ། བྲ་ཉེ་དང་ནི་སྨིན་དྲུག་ཀྱང་། ། ལན་གཉིས་ཡོངས་སུ་འཁོར་བར་བྱེད། ། དེ་བས་རྒྱུ་སྐར་ཐམས་ཅད་ཀྱང་། ། ཕྱིར་ཞིང་འཇུག་པར་བྱེད་པ་སྟེ། ། སྣར་མ་གཅིག་པུའང་ཟླ་ངོ་དེར། ། ཚེས་གཅིག་ལ་ནི་མཁའ་ལ་འགྲོ། ། ཇི་ལྟར་སྔར་བྱ་བཤད་པ་ བཞིན། ། དེ་བཞིན་ཁྱོད་ཀྱིས་སྐྱེ་དགུ་སྲུངས། ། དེ་ཙམ་མགོ་ཚེས་གཉིས་ལ་འགྲོ། ། དེ་ཙམ་ལག་ཚེས་གསུམ་ལ་འགྲོ། ། ཚེས་བཞི་ལ་ཡང་ནབ་སོ་སྟེ། ། རྒྱལ་ཡང་ཚེས་ནི་ལྔ་ལ་འགྲོ། ། ཚེས་དྲུག་ལ་ནི་སྐག་གིས་ཚིགས། ། མཆུ་ཡང་ཚེས་ནི་བདུན་ལ་སྲུངས། ། ཚེས་བརྒྱད་ལ་ནི་གྲེ་ཡིན་ཏེ། ། ཚེས་དགུ་ལ་ནི་དབོ་འགྲོ་བྱེད། ། མེ་བཞིའང་ཚེས་ནི་བཅུ་ལ་འཇུག ། ནག་པའང་ཚེས་བཅུ་གཅིག་ལ་འགྲོ། ། ས་རིའང་ཚེས་བཅུ་གཉིས་ལ་གནས། ། ཚེས་བཅུ་གསུམ་ལའང་ས་ག་སྟེ། ། ཚེས་བཅུ་བཞི་ལ་ལྷ་མཚམས་ཡིན། ། ཚེས་བཅོ་ལྔ་ལ་དེ་བཞིན་སྣྲོན། ། འདི་ནི་ཟླ་བ་ཕྱེད་དུ་བཤད། ། ཡར་གྱི་ངོ་ལ་སྣྲུབས་སྒྲུབ་སྟེ། ། ཚེས་གཅིག་ལ་ནི་སྐྱེ་དགུ་སྲུང་། ། ཚེས་གཉིས་ལ་ནི་ཆུ་སྟོད་ཡིན། །

ཚེས་གསུམ་ལ་ནི་ཆུ་སྨད་ཡིན། ། ཚེས་བཞི་ལ་ནི་བྱི་བཞིན་སྲུང་། ། ཚེས་ལྔ་ལ་ནི་གྲོ་ བཞིན་ཡིན། ། ཚེས་དྲུག་ལ་ནི་མོན་གྲུ་ཚིགས། ། ཚེས་བདུན་ལ་ནི་ཆུ་ལྷ་ཡིན། ། ཚེས་བརྒྱད་ལ་ནི་ཁྲུམས་སྟོད་ཡིན། ། ཚེས་དགུ་ལ་ནི་ཁྲུམས་སྨད་ཡིན། ། ཚེས་བཅུ་ལ་ཡང་ནམ་གྲུ་སྲུང་། ། དེ་བཞིན་བཅུ་གཅིག་ཚེས་ཐ་སྐར། ། གཤིན་རྗེའི་ལྷ་མོ་ཚེས་ བཅུ་གཉིས། ། ཚེས་བཅུ་གསུམ་ལ་མེ་ལྷ་མོ། ། ཚེས་བཅུ་བཞི་ལའང་སྣར་མ་ཡིན། ། ཟླ་བ་རངས་ལ་མགོ་བཤད་དོ། ། དགུན་ཟླ་ར་བའི་ཟླ་བ་འདིར། ། ལྷ་ཡི་བླ་མ་ཕུར་བུ་སྟེ། ། འདི་ནི་ལྷན་ཅིག་བྱེད་པར་གཟུང་། ། དེ་བས་གཟའ་ཞེས་བྱ་བར་བཤད། ། དེ་ ཕྱིར་ཉིན་མོ་ཚེས་བཅུ་བཞིར། ། ཡུད་ཙམ་མཚན་མོ་བཅུ་དྲུག་སྟེ། ། སྨིན་དྲུག་གིས་ནི་མཚན་མོ་འཐོབ། ། སྣྲུབས་ཀྱང་ཉི་མའི་མདུན་ན་སྟེ། ། གྲིབ་ཚོད་གོམ་པ་བརྒྱད་ཡིན་ཞིང་། ། ཉི་མ་ཡོངས་སུ་འཁོར་བར་བྱེད། ། ལྷོ་ཕྱོགས་ཉི་མར་ཁ་བལྟས་འཁོར། ། དེ་བཞིན་ དགུན་ཟླ་ར་བ་ཡི། ། ཟླ་འདིར་ཁྱིམ་གཞུར་ཤེས་པར་བྱ། ། མར་གྱི་ངོ་ཡི་ཚེས་གཅིག་ལའང་། ། ལག་ནི་སྒྲུབ་པར་བྱེད་པ་ཡིན། ། ཚེས་གཉིས་ལ་ནི་ནབ་སོ་སྟེ། ། ཚེས་གསུམ་རྒྱལ་དུ་ཤེས་པར་གྱིས། །

འདིར་ཚེས་བཞི་ལའང་སྐག་ཡིན་ཏེ། ། མཆུ་ཡང་ ཚེས་ནི་ལྔ་ལ་འགྲོ། ། ཚེས་དྲུག་ལ་ཡང་གྲེ་ཡིན་ཏེ། ། ཚེས་བདུན་ལ་ཡང་དབོ་ཡིན་བཤད། ། ཚེས་བརྒྱད་ལ་ནི་མེ་བཞི་ཡིན། ། ཚེས་དགུ་ལ་ནི་ནག་པ་གནས། ། ཚེས་བཅུ་ལ་ནི་ས་རི་འགྲོ། ། ཚེས་བཅུ་གཅིག་ལ་ས་ག་འགྲོ། ། ཚེས་བཅུ་གཉིས་ལའང་ལྷ་ མཚམས་ཏེ། ། ཚེས་བཅུ་གསུམ་ལ་སྣྲོན་ཡིན་ནོ། ། ཚེས་བཅུ་བཞི་ལའང་སྣྲུབས་ཡིན་ཏེ། ། ཚེས་བཅོ་ལྔ་ལའང་ཆུ་སྟོད་བཤད། ། ཡར་གྱི་ངོ་ཡི་ཚེས་གཅིག་ལ། ། ཆུ་སྨད་ཀྱང་ནི་རུང་བ་ཡིན། ། ཚེས་གཉིས་བྱི་བཞིན་གྲོ་བཞིན་ཏེ། ། ཚེས་གསུམ་ལ་ནི་ མོན་གྲུ་འགྲོ། ། ཚེས་བཞིར་མོན་གྲེ་འགྲོ་རུང་སྟེ། ། ཚེས་ལྔ་ལ་ནི་ཁྲུམས་སྟོད་ཡིན། ། ཚེས་དྲུག་ལ་ཡང་ཁྲུམས་སྨད་ཡིན། ། ཚེས་བདུན་ལ་ནི་ནམ་གྲུ་འགྲོ། ། ཚེས་བརྒྱད་ལ་ནི་ཐ་སྐར་རུང་། ། ཚེས་དགུར་གཤིན་རྗེའི་ལྷ་མོ་ཡིན། ། ཚེས་བཅུར་སྨིན་ དྲུག་འགྲོར་རུང་སྟེ། ། ཚེས་བཅུ་གཅིག་ལའང་སྣར་མ་ཡིན། ། ཚེས་བཅུ་གཉིས་ལའང་མགོ་ཡིན་ཏེ། ། ཚེས་བཅུ་གསུམ་ལ་ལག་ཀྱང་འགྲོ། ། ཚེས་བཅུ་བཞི་ལ་ནབ་སོ་སྟེ། ། ཟླ་བ་ཉ་ལ་རྒྱལ་ཡང་ཡིན། ། ཟླ་བ་ཉ་བ་འདི་ལ་ཡང་། ། འདིར་ནི་རང་བཞིན་བརྗོད་ པར་བྱ། །

ལྷོ་ཡི་ཕྱོགས་སུ་ཕྱིན་ནས་ཀྱང་། ། ཉི་མ་ཡོངས་སུ་འཁོར་བར་བྱེད། ། ཉིན་པར་བཅུ་གསུམ་ཤེས་པར་གྱིས། ། མཚན་མོ་བཅུ་བདུན་འགྲོ་བར་བྱེད། ། མཚན་མོ་ཡང་ནི་མགོར་ཤེས་གྱིས། ། ཉི་མའི་མདུན་དུའང་གྲོ་བཞིན་ཏེ། ། གྲིབ་ཚོད་གོམ་པ་ བཅུ་ཐམ་པ། ། ཉི་མ་ཡོངས་སུ་འཁོར་བར་བྱེད། ། འཇིག་རྟེན་མཁས་པ་རྣམས་ཀྱིས་ཀྱང་། ། འདིར་ནི་སྤེན་པའི་ཞིང་བསྟན་པ། ། འདི་ལ་མགོ་ཡིན་ཤེས་པར་གྱིས། ། ཟླ་བ་གསུམ་པ་རྣམ་གཞག་ནས། ། ཟླ་བ་མར་གྱི་ཚེས་གཅིག་ལ། ། སྐག་ནི་སྒྲུབ་པར་ བྱེད་པ་ཡིན། ། ཚེས་གཉིས་ལ་ནི་མཆུར་ཤེས་གྱིས། ། ཚེས་གསུམ་ལ་ནི་གྲེ་ཡིན་ནོ། ། ཚེས་བཞི་ལ་ནི་དབོ་འགྲོ་སྟེ། ། ཚེས་ལྔ་ལ་ནི་མེ་བཞི་འགྲོ། ། ཚེས་དྲུག་ལ་ནི་ནག་པ་སྒྲུབ། ། ཚེས་བདུན་ལ་ནི་ས་རི་འགྲོ། ། ཚེས་བརྒྱད་ལ་ཡང་ས་ག་སྟེ། ། ཚེས་དགུ་ ལ་ནི་ལྷ་མཚམས་ཡིན། ། ཚེས་བཅུ་ལ་ནི་སྣྲོན་འགྲོ་སྟེ། ། ཚེས་བཅུ་གཅིག་ལ་སྣྲུབས་འཇུག་བྱ། ། ཚེས་བཅུ་གཉིས་ལ་ཆུ་སྟོད་ཡིན། ། ཚེས་བཅུ་གསུམ་ལ་ཆུ་སྨད་ཡིན། ། ཚེས་བཅུ་བཞི་ལ་བྱི་བཞིན་ཏེ། ། ཚེས་བཅོ་ལྔ་ལ་གྲོ་བཞིན་འགྲོ། ། ཟླ་བ་ཡར་གྱི་ ཚེས་གཅིག་ལ། ། མོན་གྲུ་སྒྲུབ་པར་བྱེད་པ་ཡིན། །

ཚེས་གཉིས་ལ་ནི་མོན་གྲེ་སྟེ། ། ཚེས་གསུམ་ལ་ཡང་ཁྲུམས་སྟོད་ཡིན། ། ཚེས་བཞི་ལ་ནི་ཁྲུམས་སྨད་ཡིན། ། ཚེས་ལྔ་ལ་ནི་ནམ་གྲུ་འགྲོ། ། ཚེས་དྲུག་ལ་ནི་ཐ་སྐར་ཚིགས། ། ཚེས་བདུན་གཤིན་རྗེའི་ ལྷ་མོ་ཡིན། ། དེ་བཞིན་ཚེས་བརྒྱད་སྨིན་དྲུག་སྟེ། ། ཚེས་དགུ་ལ་ནི་སྣར་མ་འགྲོ། ། ཚེས་བཅུ་ལ་ཡང་མགོ་ཡིན་ཏེ། ། ལག་ནི་ཚེས་བཅུ་གཅིག་ལ་འགྲོ། ། ཚེས་བཅུ་གཉིས་ལའང་ནབ་སོ་སྟེ། ། ཚེས་བཅུ་གསུམ་ལ་རྒྱལ་ཡང་ཡིན། ། ཚེས་བཅུ་བཞི་ལའང་ སྐག་ཡིན་ཏེ། ། མཆུ་ནི་ཟླ་བ་རབ་རྫོགས་བྱེད། ། དགུན་ཟླ་ཐ་{ཆུངས་,ཆུང་}རང་བཞིན་ཡང་། ། མཐར་གྱིས་ཀྱང་ནི་བརྗོད་པར་བྱ། ། ལྷོ་ཡི་ཕྱོགས་སུ་ཕྱིན་ནས་ཀྱང་། ། ཉི་མ་ཡོངས་སུ་འཁོར་བར་བྱེད། ། མཚན་མོ་བཅོ་བརྒྱད་ཤེས་པར་གྱིས། ། ཉིན་པར་ ཡང་ནི་བཅུ་གཉིས་ཡིན། ། རྒྱལ་ཡང་མཚན་མོ་འཐོབ་པར་བྱེད། ། ཉི་མའི་མདུན་ན་མོན་གྲེ་ཡིན། ། གྲིབ་ཚོད་ཀྱང་ནི་སོར་བཅུ་བདུན། ། ཉི་མ་ཡོངས་སུ་འཁོར་བར་བྱེད། ། སྤེན་པ་ལྷ་ཡི་བླ་མ་དག ། ཞིང་དེར་རབ་ཏུ་བརྗོད་པ་ཡིན། ། འདིར་ཁྱིམ་བུམ་པ་ མཉམ་པ་མེད། ། དཔྱིད་ཟླ་ར་བ་མར་གྱི་ངོར། ། ཚེས་གཅིག་གྲེ་ནི་བསྒྲུབ་པར་བྱ། ། ཚེས་གཉིས་ལ་ནི་དབོ་ཡིན་ནོ། །

ཚེས་གསུམ་ལ་ནི་མེ་བཞི་སྟེ། ། ཚེས་བཞིའི་བར་དུ་ནག་པ་ཡིན། ། ཚེས་ལྔ་ལ་ནི་ས་རི་སྟེ། ། ཚེས་དྲུག་ལ་ནི་ས་ག་ཡིན། ། ཚེས་བདུན་ལ་ནི་ལྷ་མཚམས་ཏེ། ། ཚེས་བརྒྱད་ལ་ནི་སྣྲོན་ཡིན་ནོ། ། ཚེས་དགུ་ལ་ནི་སྣྲུབས་ཡིན་ཏེ། ། ཚེས་བཅུ་ལ་ནི་ཆུ་སྟོད་ཡིན། ། ཚེས་བཅུ་གཅིག་ལ་ཆུ་སྨད་ཡིན། ། ཚེས་བཅུ་གཉིས་ལ་བྱི་བཞིན་ཏེ། ། ཚེས་བཅུ་གསུམ་ལ་གྲོ་བཞིན་ཡིན། ། ཚེས་བཅུ་ བཞི་ལ་མོན་གྲུ་སྟེ། ། ཚེས་བཅོ་ལྔ་ལ་མོན་གྲེ་ཡིན། ། དེ་ནི་ཟླ་བ་ཕྱེད་ཡིན་ནོ། ། ཟླ་བ་ཡར་གྱི་ཚེས་གཅིག་ལ། ། ཁྲུམས་སྟོད་ཅེས་ནི་བྱ་བ་ཡིན། ། ཚེས་གཉིས་ལ་ནི་ཁྲུམས་སྨད་ཡིན། ། ཚེས་གསུམ་ལ་ནི་ནམ་གྲུ་སྟེ། ། ཚེས་བཞི་ལ་ནི་ཐ་སྐར་ཡིན། ། ཚེས་ལྔ་ལ་ནི་བྲ་ཉེ་ཡིན། ། ཚེས་དྲུག་ལ་ནི་སྨིན་དྲུག་སྟེ། ། ཚེས་བདུན་ལ་ནི་སྣར་མ་ཡིན། ། ཚེས་བརྒྱད་ལ་ནི་མགོ་ཡིན་ཏེ། ། ཚེས་དགུ་ལ་ནི་ལག་ཡིན་ནོ། ། ཚེས་བཅུ་ལ་ནི་ནབ་སོ་སྟེ། ། ཚེས་བཅུ་གཅིག་ལ་རྒྱལ་ཡིན་ནོ། ། ཚེས་བཅུ་གཉིས་ལ་སྐག་ ཡིན་ཏེ། ། ཚེས་བཅུ་གསུམ་ལ་མཆུ་ཡིན་ནོ། ། ཚེས་བཅུ་བཞི་ལ་གྲེ་ཡིན་ཏེ། ། ཟླ་རངས་ཚེས་བཅོ་ལྔ་ལ་དབོ། ། འདིར་ནི་དཔྱིད་ཟླ་ར་བ་ཡིས། ། རང་བཞིན་ཡང་ནི་བརྗོད་པར་བྱ།

། བྱང་ཕྱོགས་སུ་ནི་ཁ་བལྟས་ཏེ། ། ཉི་མ་ཡོངས་སུ་འཁོར་ བར་བྱེད། ། ཉིན་པར་བཅུ་གསུམ་ཤེས་པར་གྱིས། ། མཚན་མོ་བཅུ་བདུན་འགྲོ་བར་བྱེད། ། མཆུས་ཀྱང་མཚན་མོ་འཐོབ་པར་བྱེད། ། ཉིན་པར་ཁྲུམས་སྟོད་འགྲོ་བར་བྱེད། ། གྲིབ་ཚོད་སོར་ནི་བཅུ་གཉིས་སུ། ། ཉི་མ་ཡོངས་སུ་འཁོར་བར་བྱེད། ། ཞིང་དེར་ལྷ་ ཡི་བླ་མ་ཡང་། ། རྣམ་པར་གནས་པ་ཁོ་ནར་ནི། ། བཤད་པ་ཡིན་ཏེ་འདིར་ཡང་ནི། ། དེར་ནི་མཚན་མོ་འབྱུང་བ་ཡིན། ། དཔྱིད་ཟླ་འབྲིང་པོའི་ཟླ་ངོ་ཡི། ། དང་པོར་ཚེས་གཅིག་མེ་བཞི་སྟེ། ། ཚེས་གཉིས་ལ་ནི་ནག་པ་ཡིན། ། ཚེས་གསུམ་ལ་ནི་ས་རི་ཡིན། ། ཚེས་བཞི་ ལ་ནི་ས་ག་སྟེ། ། ཚེས་ལྔ་ལ་ནི་ལྷ་མཚམས་ཡིན། ། ཚེས་དྲུག་ལ་ནི་སྣྲོན་ཡིན་ནོ། ། ཚེས་བདུན་ལ་ནི་སྣྲུབས་ཡིན་ནོ། ། ཚེས་བརྒྱད་ལ་ནི་ཆུ་སྟོད་ཡིན། ། ཚེས་དགུ་ལ་ནི་ཆུ་སྨད་ཡིན། ། ཚེས་བཅུ་ལ་ནི་བྱི་བཞིན་ཏེ། ། ཚེས་བཅུ་གཅིག་ལ་གྲོ་བཞིན་ཡིན། ། ཚེས་བཅུ་གཉིས་ལ་མོན་གྲུ་སྟེ། ། ཚེས་བཅུ་གསུམ་ལ་མོན་གྲེ་ཡིན། ། ཚེས་བཅུ་བཞི་ལ་ཁྲུམས་སྟོད་ཡིན། ། ཚེས་བཅོ་ལྔ་ལ་ཁྲུམས་སྨད་ཡིན། ། དེ་ནི་ཟླ་བ་ཕྱེད་ཡིན་ཏེ། ། ཟླ་བ་ཡར་གྱི་ཚེས་གཅིག་ལ། ། ནམ་གྲུ་ཚེས་གཉིས་ཐ་སྐར་ཏེ།

། ཚེས་གསུམ་ལ་ནི་ བྲ་ཉེ་ཡིན། ། ཚེས་བཞི་ལ་ནི་སྨིན་དྲུག་སྟེ། ། ཚེས་ལྔ་ལ་ནི་སྣར་མ་ཡིན། ། ཚེས་དྲུག་ལ་ནི་མགོ་ཡིན་ཏེ། ། ཚེས་བདུན་ལ་ནི་ལག་ཡིན་ནོ། ། ཚེས་བརྒྱད་ལ་ནི་ནབ་སོ་སྟེ། ། ཚེས་དགུ་ལ་ནི་རྒྱལ་ཡིན་ནོ། ། ཚེས་བཅུ་ལ་ནི་སྐག་ཡིན་ཏེ། ། ཚེས་བཅུ་གཅིག་ལ་ མཆུ་ཡིན་ནོ། ། ཚེས་བཅུ་གཉིས་ལ་གྲེ་ཡིན་ཏེ། ། ཚེས་བཅུ་གསུམ་ལ་དབོ་ཡིན་ནོ། ། ཚེས་བཅུ་བཞི་ལ་མེ་བཞི་སྟེ། ། ཚེས་བཅོ་ལྔ་ལ་ནག་པ་ཡིན། ། དཔྱིད་ཟླ་འབྲིང་པོ་ཁོ་ན་ཡི། ། རང་བཞིན་ཡང་ནི་བརྗོད་པར་བྱ། ། བྱང་གི་ཕྱོགས་སུ་ཁ་བལྟས་ཏེ། ། ཉི་མ་ཡོངས་ སུ་འཁོར་བར་བྱེད། ། འདིར་ནི་ཕྱིས་ཀྱང་ཡུད་ཙམ་དག ། ཡོངས་སུ་འཁོར་བར་ཤེས་པར་བྱེད། ། ཡུད་ཙམ་ཡང་ནི་རེ་རེ་ཞིག ། ཉིན་མཚན་དག་ལ་འཇུག་པར་བྱེད། ། ཉིན་པར་བཅུ་བཞི་ཤེས་པར་གྱིས། ། མཚན་མོའང་བཅུ་དྲུག་ཤེས་པར་གྱིས། ། གྲེ་དབོ་མཚན་མོ་ འཐོབ་པར་བྱེད། ། ཉི་མའི་མདུན་ན་ཐ་སྐར་ཡིན། ། གྲིབ་ཚོད་སོར་བརྒྱད་ཉི་མ་འཁོར། ། ཉི་མའི་བུ་ནི་མིག་དམར་ཏེ། ། གཟའ་རྣོ་ཤིན་ཏུ་མི་བཟད་ཡིན། ། ཁྱིམ་ལུག་ལ་ནི་ཡང་དག་གནས། ། དཔྱིད་ཟླ་ཐ་{ཆུངས་,ཆུང་}མར་གྱི་ངོ་། ། དང་པོ་ཚེས་གཅིག་ས་རི་སྟེ། །

ཚེས་ གཉིས་ལ་ནི་ས་ག་ཡིན། ། ཚེས་གསུམ་ལ་ནི་ལྷ་མཚམས་ཡིན། ། ཚེས་བཞི་ལ་ནི་སྣྲོན་ཡིན་ཏེ། ། ཚེས་ལྔ་ལ་ནི་སྣྲུབས་ཡིན་ནོ། ། ཚེས་དྲུག་ལ་ནི་ཆུ་སྟོད་ཡིན། ། ཚེས་བདུན་ལ་ནི་ཆུ་སྨད་ཡིན། ། ཚེས་བརྒྱད་ལ་ནི་བྱི་བཞིན་ཏེ། ། ཚེས་དགུ་ལ་ནི་གྲོ་བཞིན་ཡིན། ། ཚེས་བཅུ་ལ་ནི་མོན་གྲུ་སྟེ། ། ཚེས་བཅུ་གཅིག་ལ་མོན་གྲེ་ཡིན། ། ཚེས་བཅུ་གཉིས་ལ་ཁྲུམས་སྟོད་ཡིན། ། ཚེས་བཅུ་གསུམ་ལ་ཁྲུམས་སྨད་ཡིན། ། ཚེས་བཅུ་བཞི་ལ་ནམ་གྲུ་སྟེ། ། ཚེས་བཅོ་ལྔ་ལ་ཐ་སྐར་ཡིན། ། དེ་ནི་ཟླ་བ་ཕྱེད་ཡིན་ཏེ། ། ཟླ་བ་ཡར་གྱི་ཚེས་ གཅིག་ལ། ། བྲ་ཉེ་སྒྲུབ་པར་བྱེད་པ་ཡིན། ། ཚེས་གཉིས་ལ་ནི་སྨིན་དྲུག་སྟེ། ། ཚེས་གསུམ་ལ་ནི་སྣར་མ་ཡིན། ། ཚེས་བཞི་ལ་ནི་མགོ་ཡིན་ཏེ། ། ཚེས་ལྔ་ལ་ནི་ལག་ཡིན་ནོ། ། ཚེས་དྲུག་ལ་ནི་ནབ་སོ་སྟེ། ། ཚེས་བདུན་ལ་ནི་རྒྱལ་ཡིན་ནོ། ། ཚེས་བརྒྱད་ལ་ནི་ སྐག་ཡིན་ཏེ། ། ཚེས་དགུ་ལ་ནི་མཆུ་ཡིན་ནོ། ། ཚེས་བཅུ་ལ་ནི་གྲེ་ཡིན་ཏེ། ། ཚེས་བཅུ་གཅིག་ལ་དབོ་ཡིན་ནོ། ། ཚེས་བཅུ་གཉིས་ལ་མེ་བཞི་ཡིན། ། ཚེས་བཅུ་གསུམ་ལ་ནག་པ་སྟེ། ། ཚེས་བཅུ་བཞི་ལ་ས་རི་ཡིན། ། ཟླ་རངས་ཚེས་ནི་བཅོ་ལྔ་ལ། ། ས་ག་ཡིན་ཏེ་ས་ག་ ཡི། །

{གོ་རིམས་,གོ་རིམ་}བརྗོད་བྱ་བྱང་ཕྱོགས་སུ། ། ཁ་བལྟས་ཉི་མ་ཡོངས་སུ་འཁོར། ། མཚན་མོ་མཉམ་མཚུངས་རྣམ་པ་སྟེ། ། བཅོ་ལྔ་བཅོ་ལྔར་བཤད་པ་ཡིན། ། ནག་པས་མཚན་མོ་འཐོབ་པར་བྱེད། ། ཉིན་པར་ཡང་ནི་སྨིན་དྲུག་ཡིན། ། གྲིབ་ཚོད་དག་ཀྱང་གོམ་པ་དྲུག ཉི་མ་ཡོངས་སུ་འཁོར་བར་བྱེད། ། ལྷ་མིན་བླ་མ་པ་བ་སངས། ། འདིར་ཡང་ཞིང་ཞེས་གདགས་པ་ཡིན། ། ཁྱིམ་གླང་ཡིན་ཏེ་མཁས་རྣམས་ཀྱིས། ། ཟླ་བ་བདུན་པོ་བཤད་པ་ཡིན། ། དབྱར་ཟླ་ར་བ་མར་གྱི་ངོའི། ། དང་པོ་ཚེས་གཅིག་ལྷ་མཚམས་ སྒྲུབ། ། ཚེས་གཉིས་ལ་ནི་སྣྲོན་ཡིན་ཏེ། ། ཚེས་གསུམ་ལ་ནི་སྣྲུབས་ཡིན་ནོ། ། ཚེས་བཞི་ལ་ནི་ཆུ་སྟོད་ཡིན། ། ཚེས་ལྔ་ལ་ནི་ཆུ་སྨད་ཡིན། ། ཚེས་དྲུག་ལ་ནི་བྱི་བཞིན་ཡིན། ། ཚེས་བདུན་ལ་ནི་གྲོ་བཞིན་ཡིན། ། ཚེས་བརྒྱད་ལ་ནི་མོན་གྲུ་སྟེ། ། ཚེས་དགུ་ལ་ནི་མོན་གྲེ་ ཡིན། ། ཚེས་བཅུ་ལ་ནི་ཁྲུམས་སྟོད་ཡིན། ། ཚེས་བཅུ་གཅིག་ལ་ཁྲུམས་སྨད་ཡིན། ། ཚེས་བཅུ་གཉིས་ལ་ནམ་གྲུ་སྟེ། ། ཚེས་བཅུ་གསུམ་ལ་ཐ་སྐར་ཡིན། ། ཚེས་བཅུ་བཞི་ལ་བྲ་ཉེ་ཡིན། ། ཚེས་བཅོ་ལྔ་ལ་སྨིན་དྲུག་སྟེ། ། དེ་ནི་ཟླ་ཕྱེད་ཟླ་བ་ཡར། ། ཚེས་གཅིག་ ལ་ནི་སྣར་མ་སྒྲུབ། །

ཚེས་གཉིས་ལ་ནི་མགོ་ཡིན་ཏེ། ། ཚེས་གསུམ་ལ་ནི་ལག་ཡིན་ནོ། ། ཚེས་བཞི་ལ་ནི་ནབ་སོ་སྟེ། ། ཚེས་ལྔ་ལ་ནི་རྒྱལ་ཡིན་ནོ། ། ཚེས་དྲུག་ལ་ནི་སྐག་ཡིན་ཏེ། ། ཚེས་བདུན་ལ་ནི་མཆུ་ཡིན་ནོ། ། ཚེས་བརྒྱད་ལ་ནི་གྲེ་ཡིན་ཏེ། ། ཚེས་དགུ་ ལ་ནི་དབོ་ཡིན་ནོ། ། ཚེས་བཅུ་ལ་ནི་མེ་བཞི་སྟེ། ། ཚེས་བཅུ་གཅིག་ལ་ནག་པ་ཡིན། ། ཚེས་བཅུ་གཉིས་ལ་ས་རི་སྟེ། ། ཚེས་བཅུ་གསུམ་ལ་ས་ག་ཡིན། ། ཚེས་བཅུ་བཞི་ལ་ལྷ་མཚམས་ཏེ། ། ཚེས་བཅོ་ལྔ་ལ་སྣྲོན་ཡིན་ནོ། ། དབྱར་ཟླ་ར་བའི་རིམ་བརྗོད་བྱ། ། བྱང་ཕྱོགས་ ཁ་བལྟས་ཉི་མ་འཁོར། ། འཕེལ་བྱེད་ཉིན་པར་བཅུ་དྲུག་ཏུ། ། ཤེས་བྱ་མཚན་མོའང་བཅུ་བཞི་ཡིན། ། ས་གས་མཚན་མོ་འཐོབ་པར་བྱེད། ། ཉི་མའི་མདུན་ན་མགོ་ཡིན་ནོ། ། གྲིབ་ཚོད་གོམ་པ་བཞི་ཡིན་ཏེ། ། དེ་ནི་ཡོངས་སུ་འཁོར་བར་བྱེད། ། དེར་ཞིང་གཟའ་ ལྷག་ཉི་མའི་བུ། ། འཇམ་པོར་བྱེད་པའི་གཟའ་ཡིན་ནོ། ། སྦྱོར་བའི་ཁྱིམ་ཡིན་ཉིན་པར་འགྲོ། ། བརྒྱད་པ་ཡིན་པར་བརྗོད་པ་ཡིན། ། དབྱར་ཟླ་འབྲིང་པོའི་ཚེས་གཅིག་ལ། ། སྣྲུབས་ནི་སྒྲུབ་པར་བྱེད་པ་ཡིན། ། ཚེས་གཉིས་ལ་ནི་ཆུ་སྟོད་ཡིན། ། ཚེས་གསུམ་ལ་ནི་ ཆུ་སྨད་ཡིན། ། ཚེས་བཞི་ལ་ནི་བྱི་བཞིན་ཏེ། །

ཚེས་ལྔ་ལ་ནི་གྲོ་བཞིན་ནོ། ། ཚེས་དྲུག་ལ་ནི་མོན་གྲུ་སྟེ། ། ཚེས་བདུན་ལ་ནི་མོན་གྲེ་ཡིན། ། ཚེས་བརྒྱད་ལ་ནི་ཁྲུམས་སྟོད་ཡིན། ། ཚེས་དགུ་ལ་ནི་ཁྲུམས་སྨད་ཡིན། ། ཚེས་བཅུ་ལ་ནི་ནམ་གྲུ་སྟེ། ། ཚེས་བཅུ་གཅིག་ལ་ཐ་ སྐར་ཡིན། ། ཚེས་བཅུ་གཉིས་ལ་བྲ་ཉེ་སྟེ། ། ཚེས་བཅུ་གསུམ་ལ་སྨིན་དྲུག་ཡིན། ། ཚེས་བཅུ་བཞི་ལ་སྣར་མ་སྟེ། ། ཚེས་བཅོ་ལྔ་ལ་མགོ་ཡིན་ནོ། ། དེ་ནི་ཟླ་བ་ཕྱེད་ཡིན་ཏེ། ། ཟླ་བ་ཡར་གྱི་ཚེས་གཅིག་ལ། ། ལག་ནི་སྒྲུབ་པར་བྱེད་པ་ཡིན། ། ཚེས་གཉིས་ལ་ནི་ ནབ་སོ་ཡིན། ། ཚེས་གསུམ་ལ་ནི་རྒྱལ་ཡིན་ནོ། ། ཚེས་བཞི་ལ་ནི་སྐག་ཡིན་ནོ། ། ཚེས་ལྔ་ལ་ནི་མཆུ་ཡིན་ནོ། ། ཚེས་དྲུག་ལ་ནི་གྲེ་ཡིན་ནོ། ། ཚེས་བདུན་ལ་ནི་དབོ་ཡིན་ཏེ། ། ཚེས་བརྒྱད་ལ་ནི་མེ་བཞི་ཡིན། ། ཚེས་དགུ་ལ་ནི་ནག་པ་སྟེ། ། ཚེས་བཅུ་ལ་ནི་ ས་རི་ཡིན། ། ཚེས་བཅུ་གཅིག་ལ་ས་ག་སྟེ། ། ཚེས་བཅུ་གཉིས་ལ་ལྷ་མཚམས་ཡིན། ། ཚེས་བཅུ་གསུམ་ལ་སྣྲོན་ཡིན་ཏེ། ། ཚེས་བཅུ་བཞི་ལ་སྣྲུབས་ཡིན་ནོ། ། ཟླ་ཉའི་ཟླ་བར་ཆུ་སྟོད་ཡིན། ། བདག་གིས་དབྱར་འབྲིང་རིམ་བརྗོད་བྱ། ། བྱང་ཕྱོགས་བཞིན་གྱི་དཀྱིལ་འཁོར་ བལྟས། ། ཉི་མ་ཡོངས་སུ་འཁོར་བར་བྱེད། །

ཉིན་པར་ཡུད་ཙམ་བཅུ་བདུན་ཏེ། ། མཚན་མོ་ཡང་ནི་བཅུ་གསུམ་ཡིན། ། སྣྲོན་གྱིས་ཀྱང་ནི་མཚན་མོ་འཐོབ། ། ཉིན་པར་བཅས་ན་ནབ་སོ་ཡིན། ། གྲིབ་ཚོད་གོམ་པ་གཉིས་ཡིན་ཏེ། ། ཉི་མ་ཡོངས་སུ་འཁོར་བར་བྱེད། ། ཟླ་བ་ཞེས་བྱ་ཞིང་ཡིན་ཏེ། ། ལག་དང་ཡང་དག་ལྡན་པ་ཡིན། ། འདི་ཁྱིམ་སྦལ་པ་ཞེས་བྱ་བ། ། ཟླ་བ་དགུ་པར་བཤད་པ་ཡིན། ། དབྱར་ཟླ་ཐ་{ཆུངས་,ཆུང་}མར་ངོ་ཡི། ། ཚེས་གཅིག་ལ་ནི་ཆུ་སྨད་སྒྲུབ། ། ཚེས་གཉིས་བྱི་བཞིན་གྲོ་བཞིན་ཏེ། ། ཚེས་གསུམ་ལ་ནི་མོན་གྲུ་ ཡིན། ། ཚེས་བཞི་ལ་ནི་མོན་གྲེ་སྟེ། ། ཚེས་ལྔ་ལ་ནི་ཁྲུམས་སྟོད་ཡིན། ། ཚེས་དྲུག་ལ་ནི་ཁྲུམས་སྨད་ཡིན། ། ཚེས་བདུན་ལ་ནི་ནམ་གྲུ་སྟེ། ། ཚེས་བརྒྱད་ལ་ནི་ཐ་སྐར་ཡིན། ། ཚེས་དགུ་ལ་ནི་བྲ་ཉེ་སྟེ། ། ཚེས་བཅུ་ལ་ནི་སྨིན་དྲུག་ཡིན། ། ཚེས་བཅུ་གཅིག་ལ་སྣར་མ་ ཡིན། ། ཚེས་བཅུ་གཉིས་ལ་མགོ་ཡིན་ནོ། ། ཚེས་བཅུ་གསུམ་ལ་ལག་ཡིན་ནོ། ། ཚེས་བཅུ་བཞི་ལ་ནབ་སོ་ཡིན། ། ཚེས་བཅོ་ལྔ་ལ་རྒྱལ་ཡིན་ཏེ། ། དེ་ནི་ཟླ་བ་ཕྱེད་ཡིན་ནོ། ། ཟླ་བ་ཡར་གྱི་ཚེས་གཅིག་ལ། ། སྐག་ནི་སྒྲུབ་པར་བྱེད་པ་ཡིན། ། ཚེས་གཉིས་ལ་ནི་མཆུ་ཡིན་ནོ། ། ཚེས་གསུམ་ལ་ནི་གྲེ་ཡིན་ཏེ། །

ཚེས་བཞི་ལ་ནི་དབོ་ཡིན་ནོ། ། ཚེས་ལྔ་ལ་ནི་མེ་བཞི་སྟེ། ། ཚེས་དྲུག་ལ་ནི་ནག་པ་ཡིན། ། ཚེས་བདུན་ལ་ནི་ས་རི་སྟེ། ། ཚེས་བརྒྱད་ལ་ནི་ས་ག་ཡིན། ། ཚེས་དགུ་ལ་ནི་ལྷ་མཚམས་ཏེ། ། ཚེས་བཅུ་ལ་ནི་སྣྲོན་ཡིན་ནོ། ། ཚེས་བཅུ་གཅིག་ལ་སྣྲུབས་ཡིན་ཏེ། ། ཚེས་བཅུ་གཉིས་ལ་ཆུ་སྟོད་ཡིན། ། ཚེས་བཅུ་གསུམ་ལ་ཆུ་སྨད་ཡིན། ། ཚེས་བཅུ་བཞི་ལ་བྱི་བཞིན་ཏེ། ། ཟླ་བ་རངས་ལ་གྲོ་བཞིན་ནོ། ། བདག་གིས་དབྱར་ཐའི་རིམ་བརྗོད་བྱ། ། དེ་བཞིན་བྱང་གི་ཕྱོགས་སུ་ནི། ། ཉི་མ་གདོང་ཕྱེད་བལྟས་ཏེ་འཁོར། ། ཉིན་པར་བཅོ་བརྒྱད་ཐོབ་ནས་ཀྱང་། ། མཚན་མོ་ཡང་ནི་བཅུ་གཉིས་ཏེ། ། ཆུ་སྟོད་ཀྱིས་ནི་མཚན་མོ་འཐོབ། ། ཉི་མའི་མདུན་ན་མཆུ་ཡིན་ནོ། ། གྲིབ་ཚོད་གོམ་པ་ཕྱེད་ཡིན་ཏེ། ། ཉི་མ་ ཡོངས་སུ་འཁོར་བར་བྱེད། ། འདིར་ཞིང་ཉི་མ་ལྡན་པ་ཡིན། ། སས་ཀྱང་གཟེར་ནི་གཏོང་བར་བྱེད། ། འདིར་ཁྱིམ་སེང་གེར་ཤེས་པར་གྱིས། ། ཟླ་བ་བཅུ་པོ་བཤད་པ་ཡིན། ། སྟོན་ཟླ་ར་བ་མར་གྱི་ངོའི། ། དང་པོར་ཚེས་གཅིག་མོན་གྲུ་སྒྲུབ། ། ཚེས་གཉིས་ལ་ནི་ མོན་གྲེ་སྟེ། ། ཚེས་གསུམ་ལ་ནི་ཁྲུམས་སྟོད་ཡིན། ། ཚེས་བཞི་ལ་ནི་ཁྲུམས་སྨད་ཡིན། ། ཚེས་ལྔ་ལ་ནི་ནམ་གྲུ་སྟེ། །

ཚེས་དྲུག་ལ་ནི་ཐ་སྐར་ཡིན། ། ཚེས་བདུན་ལ་ནི་བྲ་ཉེ་སྟེ། ། ཚེས་བརྒྱད་ལ་ནི་སྨིན་དྲུག་ཡིན། ། ཚེས་དགུ་ལ་ནི་སྣར་མ་སྟེ། ། ཚེས་ བཅུ་ལ་ནི་མགོ་ཡིན་ནོ། ། ཚེས་བཅུ་གཅིག་ལ་ལག་ཡིན་ཏེ། ། ཚེས་བཅུ་གཉིས་ལ་ནབ་སོ་ཡིན། ། ཚེས་བཅུ་གསུམ་ལ་རྒྱལ་ཡིན་ཏེ། ། ཚེས་བཅུ་བཞི་ལ་སྐག་ཡིན་ནོ། ། ཚེས་བཅོ་ལྔ་ལ་མཆུ་ཡིན་ཏེ། ། དེ་ནི་ཟླ་བ་ཕྱེད་ཡིན་ནོ། ། ཟླ་བ་ཡར་གྱི་ཚེས་ གཅིག་ལ། ། གྲེ་ནི་སྒྲུབ་པར་བྱེད་པ་སྟེ། ། ཚེས་གཉིས་ལ་ནི་དབོ་ཡིན་ནོ། ། ཚེས་གསུམ་ལ་ནི་མེ་བཞི་སྟེ། ། ཚེས་བཞི་ལ་ནི་ནག་པ་ཡིན། ། ཚེས་ལྔ་ལ་ནི་ས་རི་སྟེ། ། ཚེས་དྲུག་ལ་ནི་ས་ག་ཡིན། ། ཚེས་བདུན་ལ་ནི་ལྷ་མཚམས་ཏེ། ། ཚེས་བརྒྱད་ལ་ནི་ སྣྲོན་ཡིན་ནོ། ། ཚེས་དགུ་ལ་ནི་སྣྲུབས་ཡིན་ཏེ། ། ཚེས་བཅུ་ལ་ནི་ཆུ་སྟོད་ཡིན། ། ཚེས་བཅུ་གཅིག་ལ་ཆུ་སྨད་ཡིན། ། གྲོ་བཞིན་བྱི་བཞིན་ཚེས་བཅུ་གཉིས། ། ཚེས་བཅུ་གསུམ་ལ་མོན་གྲུ་སྟེ། ། ཚེས་བཅུ་བཞི་ལ་མོན་གྲེ་ཡིན། ། ཟླ་བ་ཉ་བའི་ཟླ་རངས་ལ། ། ཁྲུམས་སྟོད་ཅེས་ནི་བྱ་བ་ཡིན། ། བདག་གིས་སྟོན་ཟླ་ར་རིམ་བརྗོད། ། ལྷོ་ཕྱོགས་ཉི་མའི་འཁོར་ལོ་ལྡོག ། ཉིན་པར་ཡང་ནི་བཅུ་བདུན་ཏེ། །

མཚན་མོ་ཡང་ནི་བཅུ་གསུམ་ཡིན། ། གྲོ་བཞིན་གྱིས་ཀྱང་མཚན་མོ་འཐོབ། ། ཉི་མའི་མདུན་ན་གྲེ་ཡིན་ཏེ། ། གྲིབ་ ཚོད་དག་ཀྱང་གོམ་པ་གཉིས། ། ཉི་མ་ཡོངས་སུ་འཁོར་བར་བྱེད། ། ཟླ་བུ་གཟའ་ལྷག་ཅེས་བྱ་བ། ། དེར་ནི་ཞིང་ལ་ཡང་དག་གནས། ། དེར་ཁྱིམ་བུ་མོ་བཞག་པ་སྟེ། ། ཟླ་བ་བཅུ་གཅིག་བདག་གིས་བཤད། ། སྟོན་ཟླ་འབྲིང་པོའི་མར་གྱི་ངོའི། ། དང་པོར་ཚེས་ གཅིག་ཁྲུམས་སྨད་སྒྲུབ། ། ཚེས་གཉིས་ལ་ནི་ནམ་གྲུ་སྟེ། ། ཚེས་གསུམ་ལ་ནི་ཐ་སྐར་ཡིན། ། ཚེས་བཞི་ལ་ནི་བྲ་ཉེ་སྟེ། ། ཚེས་ལྔ་ལ་ནི་སྨིན་དྲུག་ཡིན། ། ཚེས་དྲུག་ལ་ནི་སྣར་མ་སྟེ། ། ཚེས་བདུན་ལ་ནི་མགོ་ཡིན་ནོ། ། ཚེས་བརྒྱད་ལ་ནི་ལག་ཡིན་ཏེ། ། ཚེས་ དགུ་ལ་ནི་ནབ་སོ་ཡིན། ། ཚེས་བཅུ་ལ་ནི་རྒྱལ་ཡིན་ཏེ། ། ཚེས་བཅུ་གཅིག་ལ་སྐག་ཡིན་ནོ། ། ཚེས་བཅུ་གཉིས་ལ་མཆུ་ཡིན་ཏེ། ། ཚེས་བཅུ་གསུམ་ལ་གྲེ་ཡིན་ནོ། ། ཚེས་བཅུ་བཞི་ལ་དབོ་ཡིན་ཏེ། ། ཚེས་བཅོ་ལྔ་ལ་མེ་བཞི་ཡིན། ། དེ་ནི་ཟླ་བ་ཕྱེད་ཡིན་ ཏེ། ། ཟླ་ཡར་ཚེས་གཅིག་ནག་པ་སྒྲུབ། ། ཚེས་གཉིས་ལ་ནི་ས་རི་སྟེ། ། ཚེས་གསུམ་ལ་ནི་ས་ག་ཡིན། ། ཚེས་བཞི་ལ་ནི་ལྷ་མཚམས་ཏེ། ། ཚེས་ལྔ་ལ་ནི་སྣྲོན་ཡིན་ནོ། །

ཚེས་དྲུག་ལ་ནི་སྣྲུབས་ཡིན་ཏེ། ། ཚེས་བདུན་ལ་ནི་ཆུ་སྟོད་ཡིན། ། ཚེས་བརྒྱད་ ལ་ནི་ཆུ་སྨད་ཡིན། ། ཚེས་དགུར་བྱི་བཞིན་གྲོ་བཞིན་ཏེ། ། ཚེས་བཅུ་ལ་ནི་མོན་གྲུ་ཡིན། ། ཚེས་བཅུ་གཅིག་ལ་མོན་གྲེ་ཡིན། ། ཚེས་བཅུ་གཉིས་ལ་ཁྲུམས་སྟོད་ཡིན། ། ཚེས་བཅུ་གསུམ་ལ་ཁྲུམས་སྨད་ཡིན། ། ཚེས་བཅུ་བཞི་ལ་ནམ་གྲུ་ སྟེ། ། ཟླ་རངས་ཉ་ཚེ་ཐ་སྐར་ཡིན། ། དེ་ནི་ཟླ་བ་ཕྱེད་ཡིན་ཏེ། ། སྟོན་ཟླ་འབྲིང་པོའི་ངོ་ལ་ནི། ། ལོ་སྐོར་བདག་གིས་བརྗོད་པར་བྱ། ། ལྷོ་ཡི་ཕྱོགས་སུ་ཁ་བལྟས་ཏེ། ། ཉི་མ་ཡོངས་སུ་འཁོར་བར་བྱེད། ། ཉིན་པར་བཅུ་དྲུག་འགྲོ་བྱེད་ཅིང་། ། མཚན་མོ་ཡང་ནི་ བཅུ་བཞི་ཡིན། ། ཁྲུམས་སྟོད་ཀྱིས་ནི་མཚན་མོ་འཐོབ། ། ཉི་མའི་མདུན་ན་ནག་པ་ཡིན། ། གྲིབ་ཚོད་དག་ནི་གོམ་བཞི་སྟེ། ། ཉི་མ་ཡོངས་སུ་འཁོར་བར་བྱེད། ། ལྷ་མིན་བླ་མ་པ་བ་སངས། ། གཟའ་ནི་ཞིང་ལ་རྣམ་པར་གཞག ། འདིར་ཁྱིམ་སྲང་ཞེས་བྱ་བ་ བཞག ། ཟླ་བ་བཅུ་གཉིས་བཤད་པ་ཡིན། ། ཡོངས་སུ་འཁོར་བ་དེ་ཡིས་ནི། ། ལོ་ནི་དེ་ལྟར་འགྲོ་བར་བྱེད། ། མིག་སྟོང་ཡང་དང་ཡང་དུ་ནི། ། འདུས་ཏེ་ཆོས་ཀྱི་ཕྱོགས་ལ་ལྟོས། ། ཁྱོད་ནི་ཤེས་རབ་གཞི་ཡིན་ན། །

ཆོས་མ་ཡིན་པའང་བཟློག་པར་གྱིས། ། ཆོས་གནས་ཚུལ་ཁྲིམས་ཕུན་སུམ་ཚོགས། ། ཐོས་ཕྱུག་མཁས་པ་བསམ་གཏན་པ། ། དེ་དག་ཁྱོད་ཀྱིས་ཆོས་གོས་དང་། ། བཟའ་བཏུང་རྣམས་ཀྱིས་རྗེས་སུ་སྲུངས། ། ཡང་དག་གནས་ཏེ་བརྒྱ་བྱིན་གྱིས། ། རྔ་བོང་ལ་ནི་ཐལ་སྦྱར་ནས། ། རབ་ཏུ་སྨྲས་པ་བདག་ ཅག་གིས། ། བྱ་བ་ཡང་ནི་བསྒོ་བར་གྱིས། ། སྨྲས་པ། ལྷ་ཡི་བླ་མ་ཁྱོད་ཀྱིས་སུ། ། རྟག་པར་ཚངས་པར་སྤྱོད་པ་སྲུངས། ། རིག་སྔགས་སྨན་དང་གསང་སྔགས་རྣམས། ། ཐམས་ཅད་ལ་ནི་བྱ་བ་སྒྲུབས། ། ལས་ཀུན་དྲང་སྲོང་ཟླ་བ་དང་། ། ཟླ་བ་ཆུང་དང་ཞག་ དང་བཞི། ། བཟོ་ཡི་ལས་ཀྱི་མཐའ་ཀུན་ལ། ། གཙོ་བོ་ཡིན་པར་བཀོད་པ་ཡིན། ། དྲག་པོ་དུང་གི་སྣ་ཅན་དང་། ། དགོན་པ་དང་ནི་ལྕི་བ་སྟེ། ། གནོད་སྦྱིན་བཞི་པོ་དེ་དག་ནི། ། མཆོད་སྦྱིན་རིབ་མར་གཙོ་བོར་བཀོད། ། རྒྱ་མཚོ་ཆུ་ལྷ་འཇོག་པོ་དང་། ། རིན་ཆེན་ སྐྱོང་དང་རིང་དུ་འགྲོ། ། ས་ཡིད་ཚེས་དང་ཟླ་སྲུངས་དང་། ། གནས་ཐར་བྱེད་པ་རྒྱ་མཚོ་ནི། ། གཙོ་བོར་གཞག་སྟེ་མ་དྲོས་དང་། ། ཁབ་ཀྱིས་ལུས་འབིགས་ཆུ་ལྷས་བྱིན། ། {རི་དགས་,རི་དྭགས་}འཁྲུགས་པ་ཀླུ་དེ་བཞི། ། ཀླུ་རྣམས་ཀྱི་ནི་གཙོ་བོར་བཀོད། །

ཁྱོད་ནི་དགེ་བ་ རབ་སྐྱེད་པ། ། ནེ་ཙོ་ཡི་ནི་ཁྱབ་བྱེད་པ། ། མཁས་པ་ཞིང་གི་གཙོ་བོ་སྟེ། ། དེ་འདྲ་བ་ནི་ཇི་ལྟ་བུ། ། ཁྱོད་ནི་སྙིང་པོ་ཁོ་ནས་ཀྱང་། ། མེ་ཡི་རྩེ་མོའི་གཙོ་བོ་སྟེ། ། ཁྱོད་ནི་རླུང་དམར་འགུལ་གཡོ་བ། ། རླུང་ཡང་བ་ཡི་གཙོ་བོ་ཡིན། ། རྡོ་རྗེའི་མིག་དང་སེང་གེའི་ མིག ། ལེགས་མཐོང་ལག་ན་མདུང་གསུམ་ཐོགས། ། ལྷ་མོ་བཞི་པོ་དེ་དག་ནི། ། གྲོང་ཁྱེར་གཙོ་བོར་བཀོད་པ་ཡིན། ། གོང་མའི་ཆར་སྐྱེས་རྩིབས་མུ་ཁྱུད། ། འཁོར་ལོ་སྤེན་པ་གནོད་སྦྱིན་བཞི། ། དེ་དག་རིན་ཆེན་བརྟགས་པ་ལ། ། ཉོ་ཚོང་བྱེད་པའི་གཙོ་བོར་ བཀོད། ། ཕྱོགས་མཚམས་སུ་ནི་བཞི་ཡིན་ཏེ། ། བསྲུང་བའི་ཕྱིར་ནི་ཡང་དག་གནས། ། ཡུལ་འཁོར་གྲོང་ཁྱེར་ཐམས་ཅད་དུ། ། བསྲུང་བའི་ཕྱིར་ནི་འབྱུང་པོ་བཀོད། ། དྲང་སྲོང་དག་ནི་ཐམས་ཅད་དང་། ། ལྷ་ཡི་ཚོགས་དང་ཀླུ་རྣམས་དང་། ། ལྷ་མ་ཡིན་ དང་མི་རྣམས་ཀྱི། ། བར་ཡང་རྗེས་སུ་ཡི་རང་བྱེད། ། ལུང་བསྟན་རབ་ཏུ་རྒྱལ་བ་མཆོག ། ཐུབ་པ་ཡི་ནི་གཙོ་བོ་སྟེ། ། ཁྱོད་ནི་སྐྱེ་དང་འགག་པ་དང་། ། ཟས་དང་རོ་དང་མེ་ཏོག་མཆོག ། ཁྱོད་ནི་དྲི་འཕེལ་བྱེད་པ་སྟེ། ། ཤུ་དག་རྫོགས་བྱེད་འབྲས་བུའི་མཆོག །

ཁྱོད་ ནི་ལམ་བདེ་སྐྱེད་པ་སྟེ། ། རྣམ་པར་འཚེ་ལས་རྒྱལ་བའི་གཙོ། ། དགའ་བོ་དང་ནི་ཉེ་དགའ་གཉིས། ། རི་བོ་རྣམས་ཀྱི་གཙོ་བོར་བཀོད། ། ནོར་རྒྱས་བུ་དང་ཐང་ཤིང་ཞིང་། ། ལྕི་མཆོག་མིག་དམར་སྨུགས་བྱེད་སྐེམ། ། ཁྱོད་ནི་དབྱངས་ཅན་ཆུ་ཡི་གཙོ། ། ཁྱོད་ནི་ གྲུབ་དང་ཡིད་འཕྲོག་པ། ། ཟླ་བ་འཕྲོག་པར་བྱེད་པ་སྟེ། ། བཅུད་ཀྱི་ལེན་གྱི་གཙོ་བོ་ཡིན། ། གཟའ་དང་རྒྱུ་སྐར་དུས་ཀྱང་ཡིན། ། ཁྱིམ་རྣམས་ཐམས་ཅད་རྣམ་པར་གཞག ། རྒྱལ་པོ་ཆེན་པོ་བཞི་ཡང་ནི། ། སྐལ་ལྡན་རྒྱུར་ནི་རྣམ་པར་གཞག ། ལུས་ངན་གནོད་སྦྱིན་རྣམས་ ཀྱི་གཙོ། ། གྲུལ་བུམ་རྣམས་ཀྱི་འཕགས་སྐྱེས་པོ། ། ཀླུ་རྣམས་ཀྱི་ནི་མིག་མི་བཟང་། ། དྲི་ཟ་རྣམས་ཀྱི་ཡུལ་འཁོར་སྲུང་། ། ཐམས་ཅད་ཀྱི་གླིང་ཆེན་པོ་བཞི། ། གླིང་གཞན་བརྒྱད་ཁྲི་ཐམས་ཅད་དུ། ། དྲང་སྲོང་རྔ་བོང་གིས་གང་ཡོངས་སུ་སྐྱོང་བ་མ་ བཀོད་པར་བཏང་བའི་གནས་ཅི་ཡང་མེད་དོ། ། དེར་ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དེ་དག་ཐམས་ཅད་ཀྱིས་ཀྱང་ལེགས་སོ་ཞེས་བྱ་བ་བྱས་པར་ གྱུར་ཏོ། །

དྲང་སྲོང་རྔ་བོང་གི་བྱ་བ་དེ་ལ་ཡང་དག་པར་རྗེས་སུ་ཡི་རང་བར་གྱུར་ཏོ། ། བྱ་བ་དེ་ནི་མཆོད་པ་དང་། རིམ་གྲོ་བྱ་བར་སོ་སོར་གནས་པར་གྱུར་ཏོ། ། དེའི་རྗེས་ལ་ཤིན་ཏུ་ཡུན་རིང་ཞིག་ན་དྲང་སྲོང་ཐུབ་པ་ལམ་ཞེས་བྱ་བ་བྱུང་སྟེ། དེས་ཀྱང་སྐར་མའི་ དཔྱད་རབ་ཏུ་བྱས་སོ། ། ཞག་གིས་མི་ཐུབ་པ་དང་། ཤོལ་ཡོད་པ་ཡང་བཤད་དོ། ། ཡང་དེའི་ཚེ་དྲང་སྲོང་ཐུབ་པའི་གནས་རྟེན་ག་ལ་བར་ཀླུ་ཐམས་ཅད་འདུས་ཏེ། དེ་དག་དྲང་སྲོང་སྐར་མ་ལ་དགའ་བ་མཆོག་ཏུ་བླ་མ་ལ་གུས་པ་དང་གཅེས་པར་བྱེད་པ་སྐྱེས་ཏེ། དེ་ལ་མཆོད་པའི་ལས་བྱ་བའི་ཕྱིར་ཅི་ནུས་སུ་བརྩོན་པར་གྱུར་ཏོ། ། འཕགས་པ་འདུས་པ་ཆེན་པོའི་སྡེ་ཐེག་པ་ཆེན་པོའི་མདོ་ལས་ཉི་མའི་སྙིང་པོའི་ལེའུ་བཅུ་གཅིག་པ་རྫོགས་ཏེ། རྒྱུ་སྐར་གྱི་སྦྱོར་བ་རྣམ་པར་གཞག་པའི་ལེའུ་སྟེ་བདུན་པ་རྫོགས་སོ། ། ། ། འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་བཅུ་གཅིག་པ། རྒྱ་མཚོས་སྨྲས་པ། ནམ་མཁའ་ལ་ནི་རྒྱུ་སྐར་ཚོགས། ། ཇི་ལྟར་བཞག་པ་བཞིན་དུ་ནི། ། ཁྱོད་ཀྱིས་སྔོན་གྱི་ཚེ་རབས་དྲན། ། མཁས་ཁྱོད་སྲིད་གསུམ་ཀུན་གྱི་གཙོ། ། ཁྱོད་ཀྱི་སྙིང་རྗེ་བྱམས་པ་དཔེར། །

ཤེས་གསལ་འགྲོ་ལ་སྙིང་བརྩེ་བཞིན། ། ཀུན་དཔལ་འདི་ནས་ཁྱོད་ཀྱིས་ནི། ། ལག་འགྲོ་ཐམས་ཅད་ཐར་བར་གྱིས། ། སྲིད་གསུམ་ཚུལ་བརྟུལ་མཚུངས་མེད་ཁྱོད། ། ལག་འགྲོ་དེ་ཀུན་ཚིམ་བྱེད་ཁྱོད། ། ཁྱོད་ནི་དྲང་སྲོང་ཀུན་གྱི་བླ། ། མི་རྣམས་ཀྱིས་ནི་མཆོད་པར་འོས། ། འགྲོ་བ་ཀུན་དཔལ་ཁྱོད་ལ་ནི། ། ལྷ་དང་ལག་འགྲོ་གནོད་སྦྱིན་ཚོགས། ། རྟེན་གྱི་ཡུལ་རྣམས་ཐམས་ཅད་པ། ། ལག་འགྲོ་མྱུར་དུ་ཐར་བར་གྱིས། ། དེ་ནས་དྲང་སྲོང་སྐར་མ་ལ་དགའ་བ་དཀོན་མཆོག་གསུམ་ལ་མཆོག་ཏུ་ ཡིད་དང་བ་བསྐྱེད་པར་འདོད་ནས་དེ་ལྟ་བུའི་ཀླུའི་ཚོགས་ཐམས་ཅད་ལ་ཤིན་ཏུ་རིགས་པའི་ཚིག་སྙན་པ་དག་གིས་འདི་སྐད་ཅེས་སྨྲས་སོ། ། ཡོན་ཏན་དེ་འདྲ་བདག་ལ་མེད། ། དྲང་སྲོང་རྔ་བོང་བདག་མ་ཡིན། ། ཁྱེད་ཅག་འདི་ནས་ཐར་བྱེད་པར། ། བདག་གིས་ནུས་པ་ མ་ཡིན་ནོ། ། གང་གིས་བསྐལ་པ་དུ་མར་ནི། ། དཀའ་ཐུབ་དཀའ་བ་བཟོད་པ་སྤྱད། ། ཁྱོད་ཅག་ཐར་བར་བྱེད་པ་ཡི། ། དྲང་སྲོང་གཞན་དེ་བལྟ་བར་གྱིས། ། རྟག་ཏུ་བརྩོན་ཞིང་སྦྱིན་པ་བྱིན། ། མཁས་ཤིང་གླང་ཆེན་རྟ་དང་ནི། ། ཤིང་རྟ་བུ་དང་ཆུང་མ་དང་། ། ནོར་ གྱིས་སེམས་ཅན་ཕན་པ་བྱས། ། རྐང་ལག་མགོ་དང་རྣ་བ་དང་། །

མིག་དང་པགས་པ་ཁྲག་དང་ནི། ། བུ་བྲན་བྲན་མོ་བཟའ་བཏུང་མང་། ། མལ་ཆ་ཁ་ཟས་སྔོན་ཆད་བཏང་། ། སྙིང་རྗེ་དང་ནི་བྱམས་པ་ཡིས། ། ཁྱེད་ཅག་ཐར་བྱེད་སྲིད་གསུམ་ན། ། མཚུངས་མེད་ བསམ་གཏན་དགའ་འབྱུང་བ། ། དེ་ནི་དྲང་སྲོང་རྔ་བོང་སྟེ། ། ཀུན་ཏུ་བརྩེ་ཞིང་བྱང་ཆུབ་སེམས། ། སྔོན་ཆད་རིག་བྱེད་ཕ་རོལ་ཕྱིན། ། སེམས་ཅན་མང་པོ་སྡུག་བསྔལ་གྱིས། ། ཉམ་ཐག་པ་ནི་ཐར་བར་བྱས། ། སེམས་ཅན་གཅིག་གི་ཆེད་དུ་ཡང་། ། སྔོན་གྱི་ཚེ་ རབས་དེ་བསྐལ་པར། ། དམྱལ་བར་འགྲོ་བཟོད་དེ་{ཡི་དགས,ཡི་དྭགས}། ། དེ་ནི་འཇིག་རྟེན་སངས་རྒྱས་བྱུང་། ། སེམས་ཅན་སྡུག་བསྔལ་ཉམ་ཐག་ཀུན། ། སྡུག་བསྔལ་མཐར་མཛད་རྔ་བོང་ཡིན། ། སེམས་ཅན་སྨན་ཕྱིར་བརྩོན་འགྲུས་དང་། ། སྙིང་རྗེ་བརྟན་པོས་དེ་ སྲིད་འཁོར། ། རྔ་བོང་དེ་ནི་སྐྱེས་པ་ན། ། རྒྱལ་སྲས་བུ་རམ་ཤིང་བ་ཡི། ། རིགས་སུ་ཟས་གཙང་གི་ནི་སྲས། ། དེས་ནི་བཙས་མ་ཐག་ཏུ་ཁྱབ། ། སྲིད་གསུམ་བདེ་འབྱུང་འཇིག་རྟེན་དཔལ། ། ཡིད་བདེ་རྣམ་པ་སྣ་ཚོགས་དང་། ། ལྷ་དང་ཀླུ་ཡི་བུ་རྣམས་དང་། ། འབྱུང་པོ་གནོད་སྦྱིན་རྒྱལ་པོས་ཁྱབ། ། དེར་ནི་མཆོད་ཕྱིར་ཐམས་ཅད་ལྷགས། ། དེ་ཡིས་གོམ་པ་བདུན་བོར་ཏེ། །

རི་དང་རྒྱ་མཚོར་བཅས་པ་ཡི། ། ས་ནི་ཐམས་ཅད་འཁྲུགས་པར་གྱུར། ། འགྲོ་བ་རྒ་ནད་སྡུག་བསྔལ་དང་། ། འཆི་བས་གཟིར་ལས་ ངས་བསྒྲལ་ཞིང་། ། ཞི་བ་བདེ་བ་མྱ་ངན་མེད། ། སྐམ་ལ་དགོད་ཅེས་ཤཱཀ་སྲས་གསུངས། ། མེ་ཏོག་དྲི་དང་རིན་ཆེན་དག ། ལྷ་ཀླུ་རྣམས་ཀྱིས་གཏོར་གྱུར་ཅིང་། ། འབྱུང་པོའི་ཚོགས་རྣམས་སྣ་ཚོགས་ཀྱིས། ། སྲས་པོ་ལ་ནི་བསྟོད་གྱུར་པ། ། བསྐལ་པ་མང་པོ་དུ་མར་ ཡང་། ། སྔོན་ཆད་ཁྱོད་ཀྱིས་དུལ་བ་དང་། ། སྦྱིན་དང་བསམ་གཏན་དགྱེས་ལ་བརྟེན། ། སེམས་ཅན་ཀུན་ཆེད་སྡུག་བསྔལ་བཟོད། ། འདི་ལ་སྐྱེ་བ་འདི་ཡང་ནི། ། ཐམས་ཅད་ཀྱི་ནི་ཐ་མ་ལགས། ། སྡུག་བསྔལ་ཐམས་ཅད་ཞི་མཛད་པར། ། རིང་པོར་མི་ཐོགས་ ཁྱོད་འཚང་རྒྱ། ། དེས་ཀྱང་དཔའ་བོ་བརྟན་པར་གྱུར། ། མཚུངས་པ་མེད་དེ་བུད་མེད་ཚོགས། ། དྲུག་ཁྲི་ཐམ་པ་སྤངས་ནས་སུ། ། སྤྱོད་པ་རབ་བསྟན་ལོ་དྲུག་སྤྱད། ། གཡོ་སྒྱུ་ཅན་ནི་སྡེར་བཅས་པའི། ། བདུད་ནི་གཅིག་པུས་བཅོམ་ནས་ཀྱང་། ། བྱང་ཆུབ་ཞི་མཆོག་ གཞལ་མེད་བརྙེས། ། མྱ་ངན་མེད་ལམ་དོན་དམ་གཟིགས། ། བྱམས་དང་ཡེ་ཤེས་ཐུགས་རྗེ་ཡིས། ། སེམས་ཅན་ཀུན་དང་མི་མཉམ་ཞིང་། ། འབྱུང་པོ་དག་ནི་ཐམས་ཅད་ལ། །

དེ་ནི་བྱམས་པའི་ཐུགས་མཉམ་པ། ། སེམས་ཅན་གང་ལའང་མཐོ་མི་འཚམ། ། སེམས་ ཅན་ཐམས་ཅད་སྡུག་བསྔལ་ལས། ། ཐར་བར་མཛད་ཅིང་དེ་ཡང་ནི། ། རྣམ་བཅིངས་བཙོན་ར་ཐར་མཛད་པ། ། མ་ག་དྷཱ་ན་དེ་གནས་ཤིང་། ། འགྲོ་བའི་ནང་ན་ཆོས་ཀྱང་སྟོན། ། དེ་ལ་ཁྱོད་ཀྱིས་གསོལ་བ་ཐོབ། ། བྱམས་པའི་ཡིད་ཀྱིས་རྣམ་པར་ལྟོས། ། དྲང་སྲོང་མཆོག་གི་ ཐད་དུ་དེང་། ། འགྲོ་བའི་སྡུག་བསྔལ་ཐམས་ཅད་ལས། ། ཁྱེད་ཅག་ཡོངས་སུ་ཐར་བར་བྱེད། ། རང་ཉིད་ཀྱང་ནི་འདོང་བར་གྱིས། ། དགའ་མཆོག་བདེ་བ་འདོད་རྣམས་ཀྱིས། ། ཕྱིན་ཅད་མཁའ་ལྡིང་ཐམས་ཅད་ལས། ། འཇིགས་པ་ཁྱེད་ལ་མི་འབྱུང་ངོ་། ། རྟག་བདེ་སྡུག་ བསྔལ་བྲལ་དགར་གྱིས། ། བཙོན་ར་འདི་ནི་གཡོ་སྒྱུ་ཅན། ། བདུད་ནི་ཁྱེད་ལ་རྣམ་པར་འཚེ། ། ཇི་ལྟར་ང་ཡིས་བཤད་པ་བཞིན། ། ཐམས་ཅད་ཀྱང་ནི་གཟུང་བར་གྱིས། ། ཡང་དེའི་ཚེ་དྲང་སྲོང་ཐུབ་པའི་གནས་རྟེན་དུ་ཀླུ་དང་། ཀླུ་ཆེན་པོ་ཕོ་དང་། མོ་དང་། ཁྱེའུ་དང་། བུ་མོ་གང་དག་ཐམས་ཅད་འདུས་པ་དེ་དག་ཐམས་ཅད་ཀྱིས་ཐལ་མོ་རབ་ཏུ་སྦྱར་ཏེ་འདི་སྐད་ཅེས་སྨྲས་སོ། ། འཇིག་རྟེན་ཐམས་ཅད་ལས་ཁྱད་པར་དུ་འཕགས་པ། ཆོས་ཐམས་ཅད་ཀྱི་དབང་གི་ཕ་རོལ་ཏུ་ཕྱིན་པ།

སེམས་ཅན་ཐམས་ཅད་ཀྱི་སྡུག་བསྔལ་སེལ་བར་མཛད་ པ། བདེ་བ་ཐམས་ཅད་སྦྱིན་པར་མཛད་པ། དགའ་བ་ཐམས་ཅད་སྐྱེད་པར་མཛད་པ། ཤེས་རབ་ཐམས་ཅད་ཀྱི་ཕ་རོལ་ཏུ་ཕྱིན་པ། རྟག་ཏུ་བྱམས་པའི་ཐུགས་དང་ལྡན་པ། ཐུགས་རྗེ་ཐམས་ཅད་ཀྱིས་ཁྱབ་པ། ཕྲིན་ལས་ཐམས་ཅད་སྒྲུབ་པར་མཛད་པ། ལམ་ ཐམས་ཅད་སྟོན་པ། ཡང་དག་པའི་མིག་གསུང་བ། ལྷ་དང་ཀླུ་རྣམས་ཀྱིས་མཆོད་པ་ལ་ཕྱག་འཚལ་ལོ། ། སྲིད་པ་གསུམ་གྱི་དགྲ་བཅོམ་པ། མཆོད་པ་ཐམས་ཅད་འོས་པ། བདག་ཅག་ཐམས་ཅད་སྡུག་བསྔལ་གྱི་བཙོན་ར་འདིར་འཕངས་ལགས་ན་འདི་ནས་བདག་ ཅག་ཐར་བར་མཛད་པར་གསོལ། ཀླུ་དེ་དག་དང་ལྷན་ཅིག་བདག་ཅག་གནས་པར་བགྱིའོ། ། བཅོམ་ལྡན་འདས་ཀྱིས་ཀླུ་དེ་དག་ཐམས་ཅད་སྔོན་གྱི་ལུས་ཀྱི་གཟུགས་ཇི་ལྟ་བ་བཞིན་དུ་བཀོད་དེ། གནས་དེ་ནས་འགྲོ་བར་མ་ནུས་སོ། ། དེ་དག་ཐམས་ཅད་ཀྱིས་དྲང་སྲོང་སྐར་ མ་ལ་དགའ་བ་ལ་སྨྲས་པ། དེ་བཞིན་གཤེགས་པ་དེ་ནི་བདེན་ཏེ། སེམས་ཅན་ཐམས་ཅད་ལ་བདེ་བར་བཞེད་པ་རྣམ་པར་མི་འཚེ་བའི་ཆོས་ཉིད་ཡིན་ནོ། ། དེ་ལ་བདག་ཅག་སྐྱབས་སུ་ཉེ་བར་གནས་སོ། ། འདི་ནས་མྱུར་དུ་བཞུད་ཅིག ། བདུད་ཀྱི་འཆིང་བ་འདི་ལས་བདག་ ཅག་ཐར་བར་མཛོད་ཅིག ། སྐར་མ་ལ་དགའ་བས་འདི་སྐད་ཅེས་སྨྲས་སོ།

། དེ་བཞིན་གཤེགས་པ་དྲང་སྲོང་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་སྙིང་རྗེ་ཆེན་པོའི་རྒྱུ་འཐུན་པ་ཐམས་ཅད་མཁྱེན་པ་ཐུབ་པ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ ལ་འཁོར་བའི་འཁོར་ལོ་རྣམ་པར་ལྡོག་པར་བྱ་བའི་ཕྱིར་དང་། བྱང་ཆུབ་ཀྱི་ལམ་རྣམ་པར་དག་པར་བྱ་བའི་ཕྱིར་དང་། རྒྱུ་དང་འབྲས་བུའི་སེམས་ཅན་ཡང་དག་པར་བསྟན་པའི་ཕྱིར་ཞེས་བྱ་བ་ནས་སངས་རྒྱས་ཀྱི་སྤྱན་གྱི་བར་དུ་ཐོབ་པར་བྱ་བའི་ཕྱིར་མང་པོར་མ་ བྱུང་བ་ལ་དམིགས་པ་དང་། ཉན་ཐོས་དང་ཐུན་མོང་བ་སེམས་ཅན་ལ་དམིགས་པའི་གནས་པ་མཆོག་བསྟན་ཏོ། ། ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སློབ་དཔོན་ལ་རག་ལས་པ་རྣམས་ལ་རྒྱུ་ལས་ཡང་དག་པར་བྱུང་བ་དང་། སོ་སོར་བརྟགས་པ་ ལ་དམིགས་པ་ཚངས་པའི་གནས་པ་བསྟན་ཏོ། ། ད་ལྟར་དེ་བཞིན་གཤེགས་པ་དེ་ནི་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་གྲངས་མེད་པ་དཔག་ཏུ་མེད་པ་རྡུལ་ཕྲ་རབ་ཀྱི་རྡུལ་སྙེད་ན་ཐེག་པ་བླ་ན་མེད་པའི་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པའི་བྱང་ཆུབ་སེམས་ དཔའ་སེམས་དཔའ་ཆེན་པོ་རྣམས་དང་། སེམས་ཅན་ཐམས་ཅད་འཁོར་བའི་རྒྱ་མཚོ་ལས་བསྒྲལ་བའི་ཕྱིར་དང་།

བདུད་བཞི་གདུལ་བའི་ཕྱིར་དང་། དཀོན་མཆོག་གསུམ་གྱི་གདུང་རྒྱུན་མི་གཅད་པའི་ཕྱིར་ཆོས་ཀྱི་ཆུས་ཁྲུས་མཛད་དོ། ། ད་ལྟར་ཤིན་ཏུ་ཀུན་ཏུ་རྟོག་པའི་ ཉོན་མོངས་པའི་ཚོགས་ཀྱི་སེམས་ཅན་གྱི་ཁམས་ལ་དམིགས་པ་མེད་པ། ཀུན་ནས་ལྡང་བ་མེད་པ། རྒྱུ་བ་མེད་པ། གཞི་མེད་པ། མཚན་ཉིད་མེད་པ། མཚན་མ་མེད་པ། ཆགས་པ་མེད་པ། རྣམ་པར་གཞག་པ་མེད་པ། རྡུལ་མེད་པ། མུན་པ་མེད་པ། སྣང་ བ་མེད་པ། གཟུང་བ་མེད་པ། གསལ་བྱེད་མེད་པ། སྤྱོད་པ་མེད་པ། ཐ་མི་དད་པ་ཉིད་ཅེས་བྱ་བ་ནས་ཕུང་པོ་དང་། ཁམས་དང་། སྐྱེ་མཆེད་དང་། འབྱུང་བ་ཆེན་པོ་ཐམས་ཅད་དང་། མིག་གི་རང་བཞིན་ཚོར་བ་པོ་མེད་པའི་སྲེད་པ་ཞེས་བྱ་བའི་བར་ནས། ཡིད་ཀྱི་ རང་བཞིན་ཚོར་བ་པོ་མེད་པའི་སྲེད་པའི་བར་ལ་སྨོན་པ་མེད་པ་དང་། མངོན་པར་འདུ་བྱེད་པ་མེད་པ་དང་། འཇུག་པ་མེད་པའི་ཆོས་ཀྱི་དབྱིངས་དང་། ཡང་དག་པའི་མཐའ་དང་། འགག་པ་མེད་པ་དང་། དེ་བཞིན་ཉིད་འདྲེས་པ་མེད་པ་དང་། གང་འཇུག་པ་མེད་པའི་ཆོས་ཀྱི་ དབྱིངས་དོན་དམ་པ་སྟོང་པ་ཉིད་དང་། ཕྱིར་མི་ལྡོག་པའི་ཆོས་ཐམས་ཅད་མཉམ་པ་ཉིད་ཀྱིས་སྒྲོལ་བ། ཕྱད་པའི་ཡེ་ཤེས་ཀྱི་སྤྱོད་པ་དང་ལྡན་པ།

ཡང་དག་པར་དམིགས་པའི་དེ་བཞིན་གཤེགས་པ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ ཕྱིན་པ་དྲུག་གི་སྤྱོད་པ་དག་ལ་ཡོངས་སུ་སྦྱང་བ་བྱས་པ། སེམས་ནམ་མཁའ་དང་མཉམ་ཞིང་མཚུངས་པ། མ་ཆགས་པའི་ཡེ་ཤེས་མཉམ་པ་ཉིད་ཐོབ་པ། ལྟ་བ་ཐམས་ཅད་ཀྱི་བག་ཆགས་ཀྱི་ཉོན་མོངས་པ་ཡང་དག་པར་བཅོམ་པ་རྣམས་ལ་ཚངས་པའི་གནས་པ་ དམིགས་པ་མེད་པ་སྟོན་ཏོ། ། ཀྱེ་དྲང་སྲོང་སྐར་མ་ལ་དགའ་བས་བསྟན་པ་འདི་བཤད་པ་ན་ཡང་ཀླུའི་རྒྱལ་པོ་རྒྱ་མཚོ་དང་། ཀླུའི་རྒྱལ་པོ་ལུས་འབིགས་པའི་ཁབ་ཅེས་བྱ་བ་དང་། ཀླུའི་རྒྱལ་པོ་ཟླ་བ་ལ་རྩུབ་པ་ཞེས་བྱ་བ་དང་། ཀླུའི་རྒྱལ་པོ་རིན་ཆེན་སྐྱོང་ཞེས་བྱ་བ་དེ་ དག་བྱང་ཆུབ་ཀྱི་སྤྱོད་པའི་དགེ་བའི་རྩ་བ་སྔོན་བསགས་པའི་སྨོན་ལམ་ཡང་དག་པར་རྗེས་སུ་དྲན་པས་དེ་དག་སྣང་བ་དང་། རྣམ་པར་བསྒྱིངས་པ་དང་ལྡན་པའི་གཟུངས་ཐོབ་པར་གྱུར་ཏོ། ། དེའི་ཚེ་ཀླུ་གཞན་བརྒྱད་ཅུ་རྩ་བཞི་ནི་བྱང་ཆུབ་ཀྱི་སྤྱོད་པའི་དགེ་བའི་རྩ་བ་སྔོན་ བསགས་པའི་སྨོན་ལམ་ཡང་དག་པར་རྗེས་སུ་དྲན་པས་བྱང་ཆུབ་ཀྱི་སེམས་མི་བརྗེད་པའི་ཏིང་ངེ་འཛིན་ཐོབ་པར་གྱུར་ཏོ། ། བྱང་ཆུབ་སེམས་དཔའ་སྐར་མ་ལ་དགའ་བ་ལ་དེ་དག་གིས་འདི་སྐད་ཅེས་སྨྲས་སོ།

། ཁྱོད་བཞུད་ལ་སྙིང་རྗེ་ཆེན་པོ་ཐོབ་པ་གང་གིས་འདིར་བདག་ཅག་ བདུད་ཀྱི་འཆིང་བ་འདི་ལས་ཡོངས་སུ་ཐར་བར་བགྱིད་པའི་དེ་བཞིན་གཤེགས་པའི་སྙིང་རྗེ་ཆེན་པོ་ཐོབ་པ་དེ་ལ་བདག་ཅག་གི་ཚིག་གིས་གསོལ་བ་ཐོབ་ཤིག ། དེ་བཞིན་དུ་བྱའོ་ཞེས་སྨྲས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མ་ལ་དགའ་བ་དྲང་སྲོང་གི་ཆ་བྱད་ ཀྱིས་འཁོར་དྲང་སྲོང་སྟོང་ཕྲག་མང་པོ་དང་དེ་ནས་རྫུ་འཕྲུལ་གྱིས་སོང་ངོ་། ། འཕགས་པ་འདུས་པ་ཆེན་པོའི་སྡེ་ཐེག་པ་ཆེན་པོའི་མདོ་ལས་ཉི་མའི་སྙིང་པོའི་ལེའུ་བཅུ་གཅིག་པ་ལས་བརྒྱད་པའོ། ། ། ། བཅོམ་ལྡན་འདས་ལ་ཀླུ་ཐམས་ཅད་སྐྱབས་སུ་ཉེ་ བར་གནས་པ་བདུད་སྡིག་ཅན་གྱིས་ཐོས་ཏེ། ཤས་ཆེར་འཁྲུགས་ཤིང་སྐྲག་ལ་རྒྱ་ཤུག་གི་འདབ་མ་བཞིན་དུ་ལུས་རབ་ཏུ་འདར་ཞིང་ལུས་རྔུལ་ནས་ལག་པ་གཉིས་བསྒྲེང་སྟེ་འདི་སྐད་ཅེས་སྨྲས་སོ། ། ལག་འགྲོ་རྣམས་ནི་སྐྱབས་སུ་དོང་། ། སྐྱེ་དགུ་ཐམས་ཅད་རྨོངས་གྱུར་ཅིང་། ། འཆི་མེད་ལམ་ལ་གཞོག་བྱེད་པ། ། མི་ཟད་གཡོ་སྒྱུ་ཅན་ལ་ལྟོས། ། དེའི་ཚེ་ན་བདུད་ཀྱི་བུ་མོ་མུན་བྲལ་མ་ཞེས་བྱ་བ་དེས་འདི་སྐད་ཅེས་སྨྲས་སོ། ། སེམས་ཅན་གང་དག་ཐོས་ཙམ་གྱིས། ། དགེ་སྦྱོང་ལ་ནི་སྐྱབས་སུ་ མཆིས།

། གང་དག་དེ་ཡི་ཚིག་ཐོས་ཤིང་། ། དེ་མཐོང་བ་ལྟ་སྨོས་ཅི་འཚལ། ། བརྩོན་འགྲུས་སྣ་ཚོགས་སྦྱོར་བ་ཡིས། ། ཁྱོད་ཀྱིས་ཡུན་ནི་རིང་དུ་གཟིགས། ། བཀའ་མཆིད་སྣ་ཚོགས་ལྷན་ཅིག་མཛད། ། དེ་ཡི་སྒྱུ་ནི་མ་བསླབས་སམ། ། བདུད་ཀྱིས་སླར་ སྨྲས་པ། ། དགེ་སྦྱོང་གཽ་ཏམ་བརྟན་པ་ཡིན། ། རང་བཞིན་མཁས་པ་ཆེན་པོ་སྟེ། ། སྟོང་པའི་ཆོས་ལ་ཡང་དག་ཞུགས། ། རྒལ་ནས་སྐྱེ་དགུ་སྒྲལ་བར་བྱེད། ། མུན་བྲལ་མས་སྨྲས་པ། སྟོང་པ་ལ་ནི་གང་ཞུགས་པ། ། བདུད་རྣམས་བྱེ་བས་མི་བསྐྱོད་དེ། ། བྱང་གྲོལ་ བདེ་བ་སྦྱིན་བགྱིད་པ། ། དེ་ལ་བདག་ནི་སྐྱབས་སུ་མཆི། ། མཚན་ཉིད་མ་མཆིས་ལྡན་པ་ཡི། ། དེ་བཞིན་ཉིད་ལ་གང་རྟེན་ཅིང་། ། ཡེ་ཤེས་ཀྱི་ནི་ཕ་རོལ་ཕྱིན། ། དེ་ལ་བདག་ནི་སྐྱབས་སུ་མཆིས། ། སྒྱུ་དེ་བདག་གིས་བསླབ་པར་བགྱི། ། སེམས་ཅན་ཐམས་ཅད་ རྣམ་པར་དགྲོལ། ། ཆོས་རྣམས་ཀུན་ལ་དབང་སྒྱུར་བའི། ། བླ་མེད་སངས་རྒྱས་འགྲུབ་པར་ཤོག ། བདུད་ཀྱི་བུ་མོ་ལྔ་བརྒྱ་སྙེད་བདུད་ཀྱི་གནས་དེར་འཁོད་ནས་བྱང་ཆུབ་ཏུ་སྨོན་ལམ་བཏབ་པར་གྱུར་ཏེ། བདུད་སྡིག་ཅན་ཤས་ཆེར་འཁྲུགས་ཤིང་དངངས་ཏེ་རྨོངས་ནས་སྟོབས་ ཀྱི་ཤུགས་ཀྱིས་འཆག་སར་ཞུགས་ཏེ།

བདུད་ཀྱི་སྟོབས་ཀྱི་ཤུགས་ཀྱི་ཆོ་འཕྲུལ་གྱིས་བྱིན་གྱིས་བརླབ་པ་དེ་ལྟ་བུ་བྱིན་གྱིས་བརླབས་སོ། ། གང་གིས་དྲང་སྲོང་སྐར་མ་ལ་དགའ་བ་དེ་ནས་སོང་ནས་རིང་པོ་མ་ལོན་པར་དྲང་སྲོང་ཐུབ་པའི་གནས་རྟེན་དེར་བདུད་ཀྱི་གནས་དེ་ ནས་ནམ་མཁའ་ལས་རྡོའི་ཆར་པ་མེ་རབ་ཏུ་འབར་བའི་ཆར་མངོན་པར་རབ་ཏུ་དབབ་པར་བརྩམས་ཏེ། ཀླུ་ཐམས་ཅད་ཐལ་བར་རླག་པར་འདོད་ན། བཅོམ་ལྡན་འདས་ཀྱི་མཐུས་དེར་མེ་ཏོག་གི་ཆར་རྣམ་པ་སྣ་ཚོགས་རབ་ཏུ་བབ་སྟེ། ཀླུ་ཐམས་ཅད་རབ་ཏུ་དགའ་བར་ གྱུར་ཏོ། ། དགའ་ཁྱབ་མས་སྨྲས་པ། ཀྱེ་བདུད་ཀྱི་བུ་མོ་དག་ཁྱེད་ལྟོས་ཤིག ། འཛམ་བུའི་གླིང་དེར་དགེ་སྦྱོང་གཽ་ཏ་མ་ལ་ཀླུ་གང་དག་སྐྱབས་སུ་དོང་བ་དེ་དག་ཐམས་ཅད་ཀྱང་འདི་སྡུག་བསྔལ་མང་པོས་གནོད་པར་བྱེད་ན་གང་དག་འདིར་འཁོད་ནས་དགེ་སྦྱོང་གཽ་ཏ་མ་ལ་སྐྱབས་ སུ་དོང་བ་རང་གི་བུ་མོ་ཁྱེད་ལ་ལྟ་སྨོས་ཀྱང་ཅི་དགོས། བདུད་ཀྱི་བུ་མོས་འདི་སྐད་ཅེས་སྨྲས་སོ། ། སངས་རྒྱས་སྐྱབས་སུ་སེམས་ཅན་སུ་འགྲོ་བ། ། བདུད་རྣམས་བྱེ་བས་གསད་པར་མི་ནུས་ཏེ། ། ཚུལ་ཁྲིམས་ཉམས་ཤིང་བློ་ནི་འཁྲུགས་ཟིན་ཀྱང་། ། དེ་ནི་ངེས་པར་སྐྱེ་ བའི་ཕ་རོལ་འགྲོ། །

སྟོན་པ་ལ་ནི་མེ་ཏོག་གཅིག་གཏོར་ཞིང་། ། བྱང་ཆུབ་སྨོན་ལམ་བརྟན་པོ་བསྐྱེད་པས་ན། ། དེ་ནི་བདུད་རྣམས་དུ་མས་གསད་མི་ནུས། ། ནེམ་ནུར་མེད་པར་འཇིག་རྟེན་སངས་རྒྱས་འགྱུར། ། དེ་ཡིས་བསླབ་པའི་གཞི་ནི་གཅིག་བླངས་ཤིང་། ། ཚིག་གི་དོན་གཅིག་ཙམ་ཡང་ཉན་བྱེད་ལ། ། བྱང་ཆུབ་ཕྱིར་ནི་སེམས་ཀྱང་བསྐྱེད་པ་དེ། ། སེམས་ཅན་ཁ་ལོ་སྒྱུར་འགྱུར་ནེམ་ནུར་མེད། ། ཡབ་ཀླུ་ཚོགས་འདི་མཐོང་སྟེ་སངས་རྒྱས་ཀྱིས། ། དེར་ནི་མེ་ཏོག་ཆར་པ་སྣ་ཚོགས་འབེབས། ། སངས་རྒྱས་ཡུལ་གཅིག་ གིས་ནི་ཁྱོད་ལ་བསྔོས། ། དེར་ནི་ཅི་ཡང་ནུས་པར་མ་གྱུར་ཏོ། ། གང་གིས་སེམས་ཅན་དེ་དག་སྡིག་ཟད་ཅིང་། ། བདག་ཅག་གི་ནི་ལས་ཀྱི་སྒྲིབ་འབྱང་བ། ། ཆེད་དུ་ལུང་བསྟན་པ་ནི་དེར་ཉན་པའི། ། རིག་པ་གཅིག་ཀྱང་དེར་ནི་སྟོན་པས་གསུངས། ། དེ་ནས་བདུད་ སྡིག་ཅན་ཤས་ཆེར་འཁྲུགས་ཤིང་གཤེ་སྟེ། སྡུག་བསྔལ་ཞིང་ཡིད་མི་བདེ་བ་སྐྱེས་ནས་མྱ་ངན་གྱི་ཁང་པར་གཅིག་པུ་འདུག་གོ། ། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མ་ལ་དགའ་བ་བཅོམ་ལྡན་འདས་ཀྱི་ཚངས་པའི་གནས་པ་དམིགས་པ་མེད་ པའི་གཏམ་གྱི་ཐ་མར་མཇུག་ཐོགས་སུ་བཅོམ་ལྡན་འདས་བཞུགས་པ་དེར་ཕྱིན་ཏེ་འདུག་གོ།

། བཅོམ་ལྡན་འདས་ག་ལ་བ་ཞེས་བྱ་བ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མ་ལ་དགའ་བས་འདི་སྐད་ཅེས་གསོལ་ཏོ་ཞེས་ བྱ་བའི་བར་དུའོ། ། བཙུན་པ་བཅོམ་ལྡན་འདས་བཞི་པ་རབ་ཀྱི་མཐའ་གནས་ཡིད་ལ་བགྱིད་པའི་གཟུངས་སྔགས་བཤད་པར་གསོལ། གཟུངས་སྔགས་ཀྱི་གཞི་དེ་དག་གིས་ནི་སྔོན་བདག་ཅག་གཉིས་བྲམ་ཟེའི་ཁྱེའུ་གཉིས་སུ་གྱུར་པ་ན་ལུས་ཀྱི་སླད་དུ་རྒྱལ་པོ་རྒྱལ་གྱི་ལྷ་ ལ་ནོངས་པ་བགྱིས་པས་འགུམ་པ་ལ་ཐུག་སྟེ་བཙོན་རར་སྩལ་ནས། ཟླ་བ་ཕྱེད་ཟས་དང་བྲལ་ཞིང་བཅིང་བ་ལྔས་བཅིངས་ནས་དེ་བཞིན་གཤེགས་པ་མན་དཱ་ར་བའི་བསུང་ལ་ཡིད་ལ་གཞན་མི་སེམས་པར་གསོལ་བ་བཏབ་པ་ལགས་སོ། ། དེ་ནས་དེ་བཞིན་གཤེགས་པ་ མན་དཱ་ར་བའི་བསུང་བདག་ཅག་ལ་ཐུགས་བརྩེ་བས་རང་གི་གནས་ཀྱི་ཤུལ་ཀར་བཞུགས་ནས་སངས་རྒྱས་ཀྱི་ཡུལ་གྱི་རྫུ་འཕྲུལ་གྱི་ཆོ་འཕྲུལ་ལུང་བསྟན་པ་དེ་ལྟ་བུས་བཞི་པ་རབ་ཀྱི་མཐའ་གནས་ཡིད་ལ་བགྱིད་པའི་གཟུངས་སྔགས་བསྟན་ཏེ། སངས་རྒྱས་ཀྱི་མཐུས་ བརྩོན་ར་དེར་བདག་ཅག་གི་རྣ་ལམ་དུ་དོན་དང་བཅས། ཚིག་འབྲུ་དང་བཅས་པར་གྲགས་སོ། །

གསང་སྔགས་ཡིད་ལ་བགྱིད་པ་དེ་དག་གིས་བདག་ཅག་དགའ་བ་དང་དད་པ་ཡང་དག་པར་བསྐྱེད་ནས་དེའི་ཚེ་བདག་ཅག་གི་མཐོང་བའི་ཆོས་ལ་མྱོང་བར་འགྱུར་བ་ཐམས་ ཅད་དང་། སྐྱེས་ནས་མྱོང་བར་འགྱུར་བ་དང་། ལན་གྲངས་གཞན་ལ་མྱོང་བར་འགྱུར་བ་ཐམས་ཅད་དང་། ལས་ཀྱི་སྒྲིབ་པ་ཐམས་ཅད་དང་། ཉོན་མོངས་པའི་སྒྲིབ་པ་དང་། ཆོས་ཀྱི་སྒྲིབ་པ་དང་། སེམས་ཅན་གྱི་སྒྲིབ་པ་དང་། སྦྱིན་པའི་སྒྲིབ་པ་ཞེས་ བགྱི་བ་ནས་ཤེས་རབ་ཀྱི་སྒྲིབ་པ་ཞེས་བྱ་བའི་བར་དང་། ཉེ་བར་སྤྱོད་པ་དང་། ལོངས་སྤྱོད་ཀྱི་སྒྲིབ་པ་དང་། ཚེའི་འདུ་བྱེད་བས་པའི་སྒྲིབ་པ་དང་། བསམས་བཞིན་དུ་སྲིད་པར་སྐྱེ་བའི་སྒྲིབ་པ་དང་། སངས་རྒྱས་ཀྱི་ཞིང་ཡོངས་སུ་དག་པ་རྣམས་སུ་འགྲོ་བའི་སྒྲིབ་ པ་ཡོངས་སུ་བས་ཤིང་། དེར་བདག་ཅག་བཞི་པ་རབ་ཀྱི་མཐའ་གནས་ཡིད་ལ་བགྱིད་པའི་གཟུངས་སྔགས་ཐོས་པ་ཙམ་གྱིས་མོད་ལ་མགྲིན་པ་འཆིང་བ་ལྔ་ལས་གྲོལ་ཏེ། བཙོན་ར་ནས་རྫུ་འཕྲུལ་གྱི་ཡུལ་ཐོབ་པར་གྱུར་ཅིང་། དེ་ནས་ནམ་མཁའ་ལ་ཆས་ནས་བཅོམ་ ལྡན་འདས་དེ་བཞིན་གཤེགས་པ་མན་དཱ་ར་བའི་བསུང་གི་ཐད་དུ་ཉེ་བར་ཕྱིན་ཏོ། ། དེ་ནས་ཤི་འཕོས་ནས་སངས་རྒྱས་ཀྱི་ཞིང་རི་བོའི་འོད་ཅེས་བགྱི་བར་སྐྱེས་ཏེ།

བཅོམ་ལྡན་འདས་དེ་བཞིན་གཤེགས་པ་སྤྲིན་གྱི་མདོག་གི་ཐད་དུ་རབ་ཏུ་བྱུང་ནས་ཞེས་བགྱི་བ་ནས་སླན་ཆད་བསྐལ་ པ་དཔག་ཏུ་མ་མཆིས་པར་སངས་རྒྱས་ཀྱི་ཞིང་སྟོང་པ་རྣམས་སུ་བདག་ཅག་མ་སྐྱེས་སོ་ཞེས་བྱ་བའི་བར་དུའོ། ། དེ་བཞིན་དུ་ད་ལྟར་སངས་རྒྱས་ཀྱི་ཞིང་མི་མཇེད་ཐམས་ཅད་དུ་འདི་དང་འོག་མིན་ལ་ཐུག་པའི་བར་གྱིས་ཐམས་ཅད་སེམས་ཅན་མི་དང་མི་མ་ལགས་པ་ དཔག་ཏུ་མ་མཆིས་པས་ཁྱབ་སྟེ། དེ་དག་ནི་ལས་ཀྱི་སྒྲིབ་པ་དང་། ཉོན་མོངས་པའི་སྒྲིབ་པ་དང་། ཆོས་ཀྱི་སྒྲིབ་པ་དང་། སེམས་ཅན་གྱི་སྒྲིབ་པ་རྣམ་པ་སྣ་ཚོགས་ཀྱིས་ཟིན་ཏོ་ཞེས་བགྱི་བ་ནས་སངས་རྒྱས་ཀྱི་ཞིང་ཡོངས་སུ་དག་པ་རྣམས་སུ་ལས་ཡོངས་སུ་ མ་དག་པ་དག་གིས་བསྒྲིབས་ཏེ་མཆིས་པར་མི་ནུས་པ་ལགས་སོ་ཞེས་བགྱི་བའི་བར་དུའོ། ། སེམས་ཅན་གྱི་ལས་ཀྱི་གཟུངས་སྔགས་ཐོས་མ་ཐག་ཏུ་སེམས་ཅན་རྣམས་ཀྱི་མཐོང་བའི་ཆོས་ལ་མྱོང་བར་འགྱུར་བ་དང་། ལན་གྲངས་གཞན་ལ་མྱོང་བར་འགྱུར་བ་དང་། ལས་ ཀྱི་སྒྲིབ་པ་ཐམས་ཅད་དང་། ཉོན་མོངས་པའི་སྒྲིབ་པ་དང་། ཆོས་ཀྱི་སྒྲིབ་པ་དང་། སེམས་ཅན་གྱི་སྒྲིབ་པ་དང་། སྦྱིན་པའི་སྒྲིབ་པ་ཞེས་བགྱི་བ་ནས་ཤེས་རབ་ཀྱི་སྒྲིབ་པ་ཞེས་བྱ་བའི་བར་དང་།

ཉེ་བར་སྤྱོད་པ་དང་། ལོངས་སྤྱོད་ཀྱི་སྒྲིབ་པ་དང་། དགེ་བ་བཅུའི་ ལས་ཀྱི་ལམ་གྱི་སྒྲིབ་པ་མཆིས་པ་ཐམས་ཅད་དང་། ཐོས་མ་ཐག་ཏུ་སྐྱེ་བའི་སྒྲིབ་པ་དང་། སངས་རྒྱས་ཀྱི་ཞིང་ཡོངས་སུ་དག་པ་དག་ཏུ་འགྲོ་བའི་སྒྲིབ་པ་མཆིས་པ་ཐམས་ཅད་ཡོངས་སུ་བས་པར་འགྱུར་བ་དང་། ཆོས་བསྟན་པ་དེས་སེམས་ཅན་རྣམས་བཟོད་པ་དང་ ཏིང་ངེ་འཛིན་རྣམ་པ་སྣ་ཚོགས་ཐོབ་པར་འགྱུར་བ་དང་། ཇི་སྲིད་འཚོ་བའི་མཐའི་བར་དུ་དེར་འཆི་བའི་དུས་བགྱིས་ནས་སེམས་ཅན་རྣམས་ཇི་ལྟར་བསམ་པ་བཞིན་དུ་སྲིད་པར་སྐྱེ་བ་ལེན་པར་རྔོ་ཐོགས་པར་འགྱུར་བ་དང་། ཚེ་རབས་དྲན་པར་འགྱུར་བ་དང་། རྟག་པར་རྒྱུན་དུ་བརྩོན་འགྲུས་བརྩམས་པ་དང་། དགེ་བ་བཅུའི་ལས་ཀྱི་ལམ་ཡང་དག་པར་ལེན་པ་དང་། ལོག་པར་མི་ལྟུང་བའི་ཆོས་ཅན་རྣམས་སུ་འགྱུར་བ་དང་། ཕ་རོལ་ཏུ་ཕྱིན་པ་དྲུག་ལ་མངོན་པར་བརྩོན་པ་དང་། བསྡུ་བའི་དངོས་པོ་བཞི་ལ་མངོན་པར་བརྩོན་པ་ དང་། ཆོས་ཉན་པ་དང་། དགེ་འདུན་ལ་རིམ་གྲོ་བགྱི་བ་དང་། བསམ་གཏན་གྱིས་རྣམ་པར་རོལ་པ་དང་། མངོན་པར་ཤེས་པ་དང་། ཚངས་པའི་གནས་པ་སྒོམ་པ་ལ་མངོན་པར་བརྩོན་པར་འགྱུར་བ་དང་།

འགྲོ་བ་ཐམས་ཅད་དུ་བླ་ན་མེད་པའི་ཡོངས་སུ་མྱ་ངན་ལས་ འདས་པའི་བར་དུ་ཆོས་དེ་དག་དང་འབྲལ་བར་མི་འགྱུར་བར་བཅོམ་ལྡན་འདས་ད་སེམས་ཅན་ཐམས་ཅད་ལ་ཐུགས་བརྩེ་བའི་སླད་དུ་བཙུན་པ་བཅོམ་ལྡན་འདས་བཞི་པ་རབ་ཀྱི་མཐའ་གནས་ཡིད་ལ་བགྱིད་པའི་གཟུངས་སྔགས་དེ་ལེགས་པར་བཤད་པར་གསོལ། བཅོམ་ལྡན་ འདས་ཀྱིས་བཀའ་སྩལ་པ། རིགས་ཀྱི་བུ་གང་ཁྱོད་སྐྱེ་བོ་མང་པོ་ལ་ཕན་པའི་ཕྱིར་ཞུགས་པ་ལེགས་སོ་ལེགས་སོ་ཞེས་བྱ་བ་ནས་བཅོམ་ལྡན་འདས་ཀྱིས་བཀའ་སྩལ་པ་ཞེས་བྱ་བའི་བར་དུའོ། ། དགེ་སློང་ངམ། དགེ་སློང་མའམ། རིགས་ཀྱི་བུའམ་རིགས་ཀྱི་བུ་མོ་ དད་པ་ཅན་སུ་ལ་ལ་ཐེག་པ་གསུམ་ལས་ཐེག་པ་གང་ཡང་རུང་བས་སྲིད་པའི་རྒྱ་མཚོ་ལས་རྒལ་བར་འདོད་པ་ནི་མྱུར་དུ་ཐེག་པ་དེ་ཡོངས་སུ་རྫོགས་པར་བྱ་བར་འདོད་པ་ཡིན་ལ། སྡུག་བསྔལ་ཐམས་ཅད་འཇོམས་པར་འདོད་པ་ཡིན། ཐོས་པ་ཐམས་ཅད་ཀུན་ཏུ་འཛིན་པར་འདོད་ པ་ཡིན། ལུས་དང་། ངག་དང་། ཡིད་ཀྱི་གནས་ངན་ལེན་ཐམས་ཅད་ལས་ཡོངས་སུ་ཐར་བར་འདོད་པ་ཡིན། བསྟན་པ་བསྲུང་བར་འདོད་པ་ཡིན། སྙན་པ་འདོད་པ་དང་། རྙེད་པ་འདོད་པ་ཡིན། བཟའ་བ་དང་བཏུང་བ་མང་པོ་འདོད་པ་དང་། དབང་ཕྱུག་འདོད་པ་དང་། གཟུགས་འདོད་པ་དང་།

སྟོབས་འདོད་པ་དང་། འཁོར་འདོད་པ་དང་། ནོར་དང་འབྲུ་འདོད་པ་དང་། ཐུ་བོ་འདོད་པ་དང་། མི་དང་མི་མ་ཡིན་ཐམས་ཅད་ཀྱིས་མཆོད་པར་འོས་པར་འདོད་པ་ཡིན། རྟག་ཏུ་ལུས་འདོད་པ་ཡིན། རྟག་ཏུ་ལུས་དང་། ངག་དང་ཡིད་ཀྱིས་ཀུན་ ཏུ་གནོད་པར་འདོད་པ་ཡིན་ཞིང་མྱུར་དུ་བསམ་གཏན་དང་། ཏིང་ངེ་འཛིན་དང་། གཟུགས་མེད་པའི་སྙོམས་པར་འཇུག་པ་དང་། མངོན་པར་ཤེས་པ་དང་། ཚངས་པའི་གནས་པ་དང་། གཟུངས་དང་། བཟོད་པ་རྣམ་པ་སྣ་ཚོགས་བསྒྲུབ་པར་འདོད་པ་ཡིན་ནོ། ། དེ་ལྟར་ ཡང་ལས་ཀྱི་སྒྲིབ་པ་དང་། ཉོན་མོངས་པའི་སྒྲིབ་པ་ཤས་ཆེར་འཕངས་པ་རྣམ་པ་སྣ་ཚོགས་ཀྱིས་ཞེས་བྱ་བ་ནས་སངས་རྒྱས་ཀྱི་ཞིང་ཡོངས་སུ་དག་པར་འགྲོ་བའི་སྒྲིབ་པ་རྣམས་ཀྱིས་བསམས་བཞིན་དུ་སྲིད་པར་སྐྱེ་བ་བླངས་པ་དེའི་བར་གྱིས་མྱུར་དུ་དགེ་བའི་རྩ་བ་རྣམ་ པ་སྣ་ཚོགས་དེ་ལྟ་བུ་དེ་དག་སྒྲུབ་པར་མི་ནུས་ཏེ། ལས་ཀྱི་སྒྲིབ་པ་དེ་ལྟ་བུ་དེ་དག་གིས་ཟིན་པའི་ཕྱིར་རོ། ། གང་ཟག་དེ་ཁྲུས་བྱས་ཏེ་གོས་གཙང་མ་བགོས་ཤིང་། ཁ་ཟས་གཙང་མ་དང་མལ་གཙང་མ་དེར་སྐྱིལ་མོ་ཀྲུང་དམ་འཆགས་པས་ཀྱང་རུང་སྟེ།

རྗེས་སུ་འཐུན་ པའི་ཚེས་བརྒྱད་ལ་སངས་རྒྱས་ཀྱི་སྐུའི་གཟུགས་ཡིད་ལ་བྱེད་པས་གཞན་ཡིད་ལ་མི་སེམས་པར་ཞེས་བྱ་བ་ནས་ལས་གཞན་མི་བྱེད་ཅིང་སེམས་རྣམ་པར་གཡེངས་པ་མ་ཡིན་པའི་བར་གྱིས་རེ་ཤིག་མཚན་གཅིག་གམ་ཞེས་བྱ་བ་ནས་མཚན་བདུན་གྱི་བར་དུ་གནས་པར་བྱེད་ ན་དེས་རང་གི་སྐུ་བྱད་དུ་སངས་རྒྱས་མཐོང་ངོ་ཞེས་བྱ་བའི་བར་དུའོ། ། གལ་ཏེ་སངས་རྒྱས་ཀྱི་སྐུའི་གཟུགས་ཆུང་ངུར་རྟོག་པར་བྱེད་ན་ཆུང་ངུ་ཁོ་ནར་མཐོང་ངོ་། ། ཡང་ན་ཚད་མེད་པར་རྟོག་པར་བྱེད་ན་གཟུགས་ཀྱི་སྐུ་ཚད་མེད་པ་ཡང་དག་པར་རྗེས་སུ་མཐོང་ངོ་། ། དེས་མཚན་ ཐོག་ཐག་མཚན་སུམ་ཅུ་རྩ་གཉིས་མཐོང་ངོ་། ། མཚན་གང་ལས་ཁ་དོག་སྔོན་པོའི་འོད་འཕྲོ་བའི་མཚན་གཅིག་པོ་དེ་ཉིད་ལ་ཡིད་ཀྱིས་རྗེས་སུ་བལྟས་ནས་གསང་སྔགས་འདི་དག་བརྗོད་དོ། ། ཏདྱ་ཐཱ། བི་ཛྲིམ་བྷུ་བི་ཛྲི་མ་བྷ། ཨུད་པཱ་ད། བྱ་ཡ། བི་ཛྲི་མ་བྷ། སྣ་བ་ བ་ར་ཨ་ནུ་ད་ཏ་ཐཱ་ཏཱ་བྷཱུ་ཏ་ཀོ་ཊི་བི་ཛྲིམ་བྷ་སྭཱ་ཧཱ། ཇི་སྲིད་དུ་དེས་ཁ་དོག་སྔོན་པོའི་འོད་འཕྲོ་བ་རྣམ་པར་སྤེལ་ནས་དེ་དག་བྱུང་སྟེ།

རང་གི་མགོའི་སྤྱི་བོར་ཞུགས་པ་དེ་སྲིད་དུ་དེས་མཚན་གཅིག་ལ་རྣམ་པར་མི་གཡེང་བའི་ཡིད་ཀྱི་རྗེས་སུ་བལྟས་ནས་ཚིག་འདི་དག་ བརྗོད་ཅིང་མི་སྐྲག་པར་བྱ། མི་དངང་བར་བྱའོ། ། རང་གི་ལུས་ལ་མེར་རྣམ་པར་བལྟ་བར་བྱ་སྟེ། ཇི་ལྟ་ཞེ་ན། དེས་ཁ་དོག་སྔོན་པོའི་འོད་འཕྲོ་བ་རང་གི་ལུས་ཀྱི་ཡན་ལག་དང་ཉིང་ལག་ཐམས་ཅད་དུ་འགྲོ་བ་མཐོང་ནས་རང་གི་ལུས་ཐམས་ཅད་རབ་ཏུ་འབར་བར་མཐོང་ངོ་ཞེས་བྱ་ བ་ནས་ཐལ་བ་བཞིན་དུ་མཐོང་ངོ་ཞེས་བྱ་བའི་བར་དང་། ཕྱོགས་བཞིར་རླུང་གིས་མ་ལུས་པར་ཁྱེར་བ་སྟོང་པ་བཞིན་དུ་མཐོང་ངོ་ཞེས་བྱ་བའི་བར་དུ་སྟེ། ཕྱོགས་ཐམས་ཅད་དུ་དེ་ལ་གཟུགས་སྣང་བ་གང་ཡང་མི་འབྱུང་བ་འདི་ནི་དེའི་ཐམས་ཅད་སྒྲུབ་པ་ཡིན་ནོ། ། རིགས་ཀྱི་བུ་སུ་ལ་ ལ་སངས་རྒྱས་རྗེས་སུ་དྲན་པ་དེ་ལྟ་བུའི་བཞི་པ་རབ་ཀྱི་མཐའ་གནས་ཡིད་ལ་བྱེད་པའི་གཟུངས་སྔགས་ཤིན་ཏུ་བསྒོམས་ཞིང་མཆོད་སྦྱིན་ལེགས་པར་བྱས་ལ་ཤིན་ཏུ་ཡིད་ལ་བྱས་ན་དེའི་ལས་ཀྱི་སྒྲིབ་པ་ཐམས་ཅད་དང་། ཉོན་མོངས་པའི་སྒྲིབ་པ་དང་། ཆོས་ཀྱི་སྒྲིབ་པ་ཞེས་བྱ་ བ་ནས་མ་ལུས་པའི་བར་དུ་ཡོངས་སུ་བྱང་བར་འགྱུར་རོ། ། མཚམས་མེད་པའི་ལས་རྣམས་དང་། དམ་པའི་ཆོས་སྤངས་པ་རྣམས་དང་།

འཕགས་པ་ལ་སྐུར་པ་འདེབས་པ་རྣམས་ནི་མ་གཏོགས་སོ། ། དེ་འདོད་ན་དེ་ལྟར་ཉིན་མཚན་གཅིག་གིས་སངས་རྒྱས་ཀྱི་གསུང་ཐམས་ ཅད་དང་། ཕྱི་རོལ་པའི་བསྟན་བཅོས་ཐམས་ཅད་དང་། རིག་པའི་གནས་བཅོ་བརྒྱད་དང་། གཞན་ཡང་གང་དག་སྙན་དངགས་སུ་བྱས་པ་རྣམས་དེས་ཐེ་ཚོམ་མེད་པར་ཤིན་ཏུ་ཀུན་ཏུ་འཛིན་པར་འགྱུར་རོ། ། དེ་ཉིན་མཚན་གཅིག་གིས་བསམ་གཏན་བཞི་དང་། གོང་མ་རྫུ་ འཕྲུལ་གྱི་རྐང་པ་དང་། ཚངས་པའི་གནས་པ་བཞི་དང་། སོ་སོ་ཡང་དག་པར་རིག་པ་བཞི་དང་། གཟུགས་མེད་པའི་སྙོམས་པར་འཇུག་པ་བཞི་བསྒོམ་པར་འདོད་ན་དེས་ཤིན་ཏུ་བསྒོམས་པ་ཡིན་ནོ། ། དེ་འདོད་ན་སྐད་ཅིག་གཅིག་གིས་སེམས་ཅན་ཐམས་ཅད་ཀྱི་དུས་གསུམ་ གྱི་འགྲོ་བའི་འཆི་འཕོ་དང་། སྐྱེ་བ་དང་སེམས་ཀྱི་སྤྱོད་པ་རབ་ཏུ་ཤེས་པར་འགྱུར་རོ། ། དེ་འདོད་ན་སྐད་ཅིག་གཅིག་གིས་ནམ་མཁའ་ཐམས་ཅད་རང་གི་ལུས་སམ། སངས་རྒྱས་ཀྱི་སྐུའམ། བརྒྱ་བྱིན་གྱི་བར་རམ། ཚངས་པའི་བར་རམ། སྲེད་མེད་ཀྱི་བུའི་ བར་རམ། དབང་ཕྱུག་ཆེན་པོའི་བར་རམ། རྒྱལ་ཆེན་བཞིའི་བར་རམ། འཁོར་ལོས་སྒྱུར་བའི་བར་རམ། ཆུའི་བར་རམ། མེའི་བར་རམ། སའི་བར་གྱིས་གང་བར་བྱེད་དོ། །

དེ་འདོད་ན་སྐད་ཅིག་གཅིག་གིས་ནམ་མཁའ་ཐམས་ཅད་མེ་ཏོག་གི་བར་དང་། རིན་ པོ་ཆེའི་ཕྲེང་བ་དང་། སྤོས་དང་། གདུགས་དང་། རྒྱལ་མཚན་དང་། བ་དན་དང་། རས་བཅོས་བུ་དང་། ཆོས་གོས་དང་། རྒྱན་རྣམ་པ་སྣ་ཚོགས་ཀྱི་བར་དག་གིས་གང་བར་བྱེད་དོ། ། སུས་བཞི་པ་རབ་ཀྱི་མཐའ་གནས་ཡིད་ལ་བྱེད་པ་སངས་རྒྱས་རྗེས་སུ་དྲན་ པ་དེ་ལྟ་བུ་ཤིན་ཏུ་བསྒོམས་པ་ཡིན་ཞིང་ཤིན་ཏུ་འདྲེས་པར་བྱས་ལ་ཤིན་ཏུ་ཡིད་ལ་བྱས་པ་ཡིན་པ་དེའི་ལས་ཚད་མེད་པ་དེ་ལྟ་བུ་མ་ལུས་པར་བྱང་བར་འགྱུར་རོ། ། དེ་དེ་ལྟར་བསོད་ནམས་དང་། སྟོབས་དང་། བརྩོན་འགྲུས་དང་། ཏིང་ངེ་འཛིན་དང་། གཟུངས་དང་། བཟོད་པ་དང་། རྣམ་པར་རོལ་པ་དང་། མངོན་པར་ཤེས་པ་ཚད་མེད་པར་འགྱུར་རོ། ། དེས་དེ་ལྟར་གང་ཡང་རུང་བ་དག་ཡོངས་སུ་རྫོགས་པར་བྱས་ན་མྱུར་དུ་འཁོར་བ་ལས་རྣམ་པར་ཐར་བར་འགྱུར་ཏེ། མཚམས་མེད་པ་བྱེད་པ་དང་། དམ་པའི་ཆོས་སྤོང་བ་དང་། འཕགས་པ་ལ་སྐུར་པ་འདེབས་པ་རྣམས་ནི་མ་གཏོགས་སོ། ། དེ་ལྟ་ཡིན་ཡང་མཚམས་མེད་པ་བྱེད་པ་དང་། དམ་པའི་ཆོས་སྤོང་བ་དང་།

འཕགས་པ་ལ་སྐུར་པ་འདེབས་པ་དེ་ཡང་བདུན་ཕྲག་བདུན་དུ་བཞི་པ་རབ་ཀྱི་མཐའ་གནས་ཡིད་ལ་བྱེད་པ་སངས་རྒྱས་རྗེས་སུ་ དྲན་པ་འདི་འདིར་ཇི་ལྟར་བསྟན་པ་བཞིན་སྒོམ་པར་བྱེད་ན་བདུན་ཕྲག་བདུན་པོ་དེ་འདས་ནས་ལས་ཀྱི་སྒྲིབ་པ་སུམ་ཆ་མ་ཟད་ཅིང་ལྷག་མ་སྐྱོན་མེད་པར་མ་ལུས་པར་བྱང་བར་འགྱུར་རོ། ། བཞི་པ་རབ་ཀྱི་མཐའ་གནས་ཡིད་ལ་བྱེད་པ་སངས་རྒྱས་རྗེས་སུ་དྲན་པ་སྒོམ་པ་དེ་ལྟ་ བུ་དེ་ནི་དེ་ལྟར་དོན་ཆེ་བ་ཡིན་ནོ། ། སུ་ལ་ལ་བཞི་པ་རབ་ཀྱི་མཐའ་གནས་ཡིད་ལ་བྱེད་པ་སངས་རྒྱས་རྗེས་སུ་དྲན་པ་འདི་དེ་ལྟར་ཐོས་པ་ཙམ་རྣ་ལམ་དུ་ཐོས་ན། དེ་ལ་མིའམ་མི་མ་ཡིན་པའི་བར་དེ་ཉེ་བར་བརྟགས་ནས་དད་པ་དང་། དགའ་བ་དང་། མཆོག་ ཏུ་དགའ་བ་སྐྱེའོ། ། དེ་བཙོན་རའི་འཆིང་བ་དམ་པོ་ལས་ཡོངས་སུ་ཐར་བར་འགྱུར་རོ། ། གང་སུ་དག་སྡུག་བསྔལ་བར་གྱུར་པའི་སེམས་ཅན་ཐམས་ཅད་ཀྱང་སྡུག་བསྔལ་དག་ལས་ཡོངས་སུ་ཐར་བར་འགྱུར་རོ། ། ལོངས་སྤྱོད་ཀྱི་སྡུག་བསྔལ་དང་། ཆད་པ་དང་། བརྡེག་ པ་དང་། གཡང་ས་དང་། མེ་དང་། ཆུ་དང་། དུག་དང་། དགྲ་ཐམས་ཅད་དང་། འབྱུང་པོ་ཐམས་ཅད་དང་། ནད་ཀྱི་འཇིགས་པ་དང་། གནས་ཀྱི་འཇིགས་པ་དང་།

རྒྱལ་པོའི་འཇིགས་པ་དང་ཞེས་བྱ་བ་ནས་བྲན་གྱི་འཇིགས་པ་ཞེས་བྱ་བའི་བར་དང་། ངན་ འགྲོར་འགྲོ་བའི་འཇིགས་པ་ཞེས་བྱ་བའི་བར་ལས་ཡོངས་སུ་ཐར་བར་འགྱུར་རོ། ། བདེ་འགྲོར་འགྲོ་བའི་རྒྱུར་འགྱུར་རོ། ། སུ་སངས་རྒྱས་རྗེས་སུ་དྲན་པ་དེ་ལྟ་བུ་ཐོས་པ་ཙམ་རྣ་ལམ་དུ་གྲགས་ན་དེ་ལ་ཉེ་བར་བརྟགས་ནས་དད་པ་སྐྱེས་ཏེ། དེ་ལྟར་དོན་ཆེ་ཞིང་ཕན་ཡོན་ཆེ་བ་ ཡིན་ན་སུ་ཇི་ལྟར་བསྟན་པ་བཞིན་དེ་བཞིན་དུ་བསྒོམ་པ་ལྟ་སྨོས་ཀྱང་ཅི་དགོས། ཆོས་ཀྱི་རྣམ་གྲངས་འདི་བཤད་པ་ན་སྔོན་ཡོངས་སུ་སྦྱང་བ་བྱས་པ་དཀྲིགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་དྲུག་ནི་སངས་རྒྱས་རྗེས་སུ་དྲན་པའི་ཏིང་ངེ་འཛིན་དེ་ཐོབ་པར་གྱུར་ཏོ། ། ཇི་ ལྟར་སྔར་བཤད་པ་བཞིན་དུ་ཡོན་ཏན་དེ་དག་དང་ཡང་ལྡན་པར་གྱུར་ཏོ། ། དེའི་ཚེ་སྲོག་ཆགས་ཁྲག་ཁྲིག་ཕྲག་བརྒྱད་ཅུ་རྩ་བཞི་ནི་སྡུག་བསྔལ་ལ་ཆོས་ཤེས་པའི་བཟོད་པ་ཐོབ་པར་གྱུར་ཏོ། ། དེའི་ཚེ་སེམས་ཅན་དཔག་ཡས་པ་ཁ་ཅིག་ནི་མཐར་གྱིས་གནས་པའི་སྙོམས་ པར་འཇུག་པའི་རྣལ་འབྱོར་དང་འབྲས་བུ་དང་པོ་ལ་གནས་པར་གྱུར་ཏོ། ། ཁ་ཅིག་ནི་དགྲ་བཅོམ་པ་ཉིད་ཀྱི་བར་ཐོབ་པར་གྱུར་ཏོ། །

དེའི་ཚེ་སེམས་ཅན་དཔག་ཡས་པ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྔོན་མ་བསྐྱེད་པའི་སེམས་བསྐྱེད་དོ། ། མུན་བྲལ་མ་ ལ་སོགས་པའི་བདུད་ཀྱི་བུ་མོ་ལྔ་བརྒྱ་པོ་དེ་དག་ཀྱང་སངས་རྒྱས་ཀྱི་མཐུས་བདུད་ཀྱི་གནས་སུ་འཁོད་བཞིན་སེམས་ཡོངས་སུ་སྦྱང་བའི་སངས་རྒྱས་རྗེས་སུ་དྲན་པའི་ལུང་བསྟན་པ་འདི་ཐམས་ཅད་ཐོས་སོ། ། ཐོས་ནས་ཀྱང་བུད་མེད་ཀྱི་དངོས་པོ་མི་སྣང་བར་གྱུར་ཏེ་སྐྱེས་ པ་ཉིད་ཐོབ་བོ། གང་དག་སྔོན་ཡོངས་སུ་སྦྱང་བ་བྱས་པ་དེ་དག་ཐམས་ཅད་སངས་རྒྱས་རྗེས་སུ་དྲན་པའི་ཏིང་ངེ་འཛིན་དང་ལྡན་པར་གྱུར་ཏོ། ། ཇི་སྐད་བཤད་པ་བཞིན་དུ་ཡོན་ཏན་དེ་དག་དང་ལྡན་པར་གྱུར་ཏོ། ། དེ་དག་ཐམས་ཅད་ཚངས་པ་ཆེན་པོའི་ཆ་བྱད་དུ་བདག་ཉིད་ མངོན་པར་སྤྲུལ་ནས་ཚངས་པ་ཆེན་པོ་རེ་རེ་ཡང་བྱེ་བ་བརྒྱ་སྟོང་ཕྲག་མང་པོས་ཡོངས་སུ་བསྐོར་ཅིང་བྱེ་བ་བརྒྱ་སྟོང་ཕྲག་མང་པོས་མདུན་གྱིས་བལྟས་ཏེ། སིལ་སྙན་དང་། ཕེག་རྡོབ་པ་བྱེ་བ་བརྒྱ་ཕྲག་མང་པོས་ཡོངས་སུ་བསྐོར་ནས་དེ་དག་བདུད་ཀྱི་གནས་བསམ་གྱིས་མི་ཁྱབ་ པ་བཀོད་པ་ནས་བཅོམ་ལྡན་འདས་ཀྱི་ཐད་དུ་བབས་ཏེ། བཅོམ་ལྡན་འདས་དེ་ལ་ལྷ་རྫས་ཀྱི་མེ་ཏོག་དང་། ཕྲེང་བ་དང་། སྤོས་དང་།

བྱུག་པ་དག་དང་། གདུགས་དང་། རྒྱལ་མཚན་དང་། བ་དན་དག་དང་། རིན་པོ་ཆེའི་རས་བཅོས་བུ་དང་། ཆོས་གོས་སྣ་ཚོགས་གཏོར་ ཅིང་མངོན་པར་གཏོར་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། ། འཕགས་པ་འདུས་པ་ཆེན་པོ་ཉི་མའི་སྙིང་པོའི་ལེའུ་བཅུ་གཅིག་པ་ལས་སངས་རྒྱས་རྗེས་སུ་ དྲན་པའི་ལེའུ་སྟེ་དགུ་པ་རྫོགས་སོ། ། ། ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མ་ལ་དགའ་བ་ལ་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་ལག་འགྲོའི་ཚོགས་ཐམས་ཅད་ཀྱི་ཞལ་ཏ་བྱོས་ཤིག་ཅེས་བཅོམ་ལྡན་ འདས་ཀྱིས་བཀའ་སྩལ་པ་དང་། ཉོན་མོངས་པ་མེད་པའི་སེམས་ཀྱིས་གསོལ་པ། བཅོམ་ལྡན་འདས་ཀྱིས་དུས་ལགས་ཀྱིས་གཤེགས་ཤིག ། བཅོམ་ལྡན་འདས་གང་ཁྱོད་ཀྱིས་མཛད་པ་མཛོད་ཅིག ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ གང་དེ་བཞིན་གཤེགས་པས་ལག་འགྲོའི་ལས་བསྟན་པ་བསམ་གྱིས་མི་ཁྱབ་པ་ཡོངས་སུ་འབྱང་བ་ལུང་བསྟན་པ་བཤད་པ་རབ་ཏུ་བསྟན་པའི་དུས་ཡིན་ནོ། ། ཡང་དེའི་ཚེ་ལྷ་ཐམས་ཅད་ཅེས་བྱ་བ་ནས་གྲུལ་བུམ་ཐམས་ཅད་ཅེས་བྱ་བའི་བར་དག་མེ་ ཏོག་དང་།

སྤོས་དང་། རིན་པོ་ཆེ་དང་། རས་བཅོས་བུ་དང་། ཆོས་གོས་དང་། རྒྱན་དང་། སྤུད་པ་དང་། གདུགས་དང་། རྒྱལ་མཚན་དང་། བ་དན་གྱི་ཆར་པ་དག་རབ་ཏུ་འབེབས་ཤིང་སིལ་སྙན་བྱེ་བ་ཁྲག་ཁྲིག་བརྒྱ་སྟོང་གི་རོལ་མོའི་སྒྲ་འབྱིན་པ་ལ་མི་ དང་མི་མ་ཡིན་པ་ཐམས་ཅད་ཀྱིས་བསྔགས་པའི་ཡོན་ཏན་གྱིས་བསྟོད་ནས་བཅོམ་ལྡན་འདས་གདན་ལས་མངོན་པར་བཞེངས་ཏེ་རིའི་རྒྱལ་པོ་རི་རབ་ག་ལ་བར་བྱང་ཕྱོགས་སུ་ཉེ་བར་གཤེགས་སོ། ། འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷ་ཐམས་ཅད་ ཀྱིས་ཀྱང་གང་བཅོམ་ལྡན་འདས་ཉན་ཐོས་ཀྱི་དགེ་འདུན་གྱིས་མདུན་དུ་བདར་ཅིང་བྱང་ཆུབ་སེམས་དཔའི་དགེ་འདུན་གྱིས་ཡོངས་སུ་བསྐོར་ཏེ་རི་རབ་ཀྱི་རྩེ་མོར་གཤེགས་པར་བཞེད་པར་ཤེས་སོ། ། དེ་ལྟར་རིག་ནས་མི་མཇེད་ཀྱི་བདག་པོ་ཚངས་པས་བཅོམ་ལྡན་འདས་ཀྱི་ ཕྱིར་རིན་པོ་ཆེ་སྣ་བདུན་ལས་བྱས་པ་རས་བཅོས་བུ་སྣ་ཚོགས་དང་། ལྷ་རྫས་ཀྱི་རིན་པོ་ཆེའི་མེ་ཏོག་བཀྲམ་པའི་ཐེམ་སྐས་སྤྲུལ་ནས་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་གི་ཐེམ་སྐས་ལས་གཤེགས་པར་གསོལ།

ལྷའི་བུ་གཞན་འཕྲུལ་དབང་ བྱེད་རྣམས་ཀྱིས་ཀྱང་བཅོམ་ལྡན་འདས་ཀྱི་ཕྱིར་འཛམ་བུའི་ཆུ་བོའི་གསེར་གྱི་ཐེམ་སྐས་ཙན་དན་སྦྲུལ་གྱི་སྙིང་པོའི་ཕྱེ་མ་སྣ་ཚོགས་བཀྲམ་པ་དག་སྤྲུལ་ནས་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་ཅག་གི་ཐེམ་སྐས་རྣམས་ལས་གཤེགས་པར་གསོལ། ལྷའི་ བུ་འཕྲུལ་དགས་ཀྱང་བཅོམ་ལྡན་འདས་ཀྱི་ཕྱིར་ལྷ་རྫས་ཀྱི་གསེར་གྱི་ཐེམ་སྐས་ཙན་དན་ས་མཆོག་སྣ་ཚོགས་བཀྲམ་པ་སྤྲུལ་ནས་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་ཅག་གི་ཐེམ་སྐས་ལས་གཤེགས་པར་གསོལ། ལྷའི་བུ་ཡོངས་སུ་དགའ་ལྡན་ གྱིས་བཅོམ་ལྡན་འདས་ཀྱི་ཕྱིར་ལྷ་རྫས་ཀྱི་བཻ་དཱུརྱའི་ཐེམ་སྐས་དུས་ཀྱི་རྗེས་སུ་འབྲང་བའི་ཙན་དན་གྱི་ཕྱེ་མ་སྣ་ཚོགས་བཀྲམ་པ་སྤྲུལ་ནས་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་གི་ཐེམ་སྐས་ལས་གཤེགས་པར་གསོལ། ལྷའི་བུ་རབ་འཐབ་བྲལ་གྱིས་ བཅོམ་ལྡན་འདས་ཀྱི་ཕྱིར་ལྷ་རྫས་ཀྱི་བཻ་དཱུརྱའི་ཐེམ་སྐས་ལྷ་རྫས་ཀྱི་ཕྱེ་མ་སྣ་ཚོགས་བཀྲམ་པ་སྤྲུལ་ནས་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་གི་ཐེམ་སྐས་ལས་གཤེགས་པར་གསོལ།

ལྷ་རྣམས་ཀྱི་དབང་པོ་བརྒྱ་བྱིན་གྱིས་ཀྱང་བཅོམ་ལྡན་ འདས་ཀྱི་ཕྱིར་མུ་ཏིག་དམར་པོའི་ཐེམ་སྐས་ལྷ་རྫས་ཀྱི་ཙན་དན་གྱི་ཕྱེ་མ་སྣ་ཚོགས་དང་། རིན་པོ་ཆེའི་དྲ་བ་སྣ་ཚོགས་ཀྱིས་ཡོངས་སུ་ཁེབས་པ་སྤྲུལ་ནས་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་གི་ཐེམ་སྐས་ལས་གཤེགས་པར་གསོལ། རྒྱལ་པོ་ཆེན་པོ་ བཞིས་ཀྱང་བཅོམ་ལྡན་འདས་ཀྱི་ཕྱིར་ལྷ་རྫས་ཀྱི་རིན་པོ་ཆེ་རྡོའི་སྙིང་པོ་ལས་བྱས་པ་ལྷ་རྫས་ཀྱི་རས་བཅོས་བུ་སྣ་ཚོགས་ཀྱིས་རབ་ཏུ་ཁེབས་པའི་ཐེམ་སྐས་དེ་ཉིད་སྤྲུལ་ནས་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་ཅག་གི་ཐེམ་སྐས་ལས་རི་རབ་ཀྱི་རྩེ་མོར་ གཤེགས་པར་གསོལ། ལྷ་མ་ཡིན་གྱི་དབང་པོ་བཞི་འཁོར་དང་བཅས་པས་ཀྱང་བཅོམ་ལྡན་འདས་ཀྱི་ཕྱིར་ལྷ་རྫས་ཀྱི་སྤུག་གི་ཐེམ་སྐས་ལྷ་རྫས་ཀྱི་གསེར་གྱི་ཕྱེ་མ་སྣ་ཚོགས་ཀྱིས་ཡོངས་སུ་ཁེབས་པ་དེ་ཉིད་དུ་སྤྲུལ་ནས་འདི་སྐད་ཅེས་གསོལ་ཏོ། ། བཅོམ་ལྡན་ འདས་བདག་ཅག་གི་ཐེམ་སྐས་ལས་རི་རབ་ཀྱི་རྩེ་མོར་གཤེགས་པར་གསོལ།

དེ་ནས་བཅོམ་ལྡན་འདས་དེ་དག་ལ་ཐུགས་བརྩེ་ནས་བདག་ཉིད་འདུན་པས་བདག་དང་འདྲ་བའི་སངས་རྒྱས་ཀྱི་སྐུ་དྲུག་སྤྲུལ་ནས་སངས་རྒྱས་བདུན་པོ་དེ་དག་ལྷའི་དབང་པོ་དང་། ལྷ་མ་ ཡིན་གྱི་དབང་པོ་ཐམས་ཅད་ཀྱི་མདུན་དུ་ཉན་ཐོས་ཀྱིས་མདུན་དུ་བདར་ཅིང་བྱང་ཆུབ་སེམས་དཔའི་དགེ་འདུན་གྱིས་ཡོངས་སུ་བསྐོར་ནས་བཅོམ་ལྡན་འདས་བཀོད་པ་ཆེན་པོ་དེ་ལྟ་བུས་རི་རབ་ཀྱི་རྩེ་མོར་གཤེགས་སོ། ། སངས་རྒྱས་བདུན་པོ་དེ་དག་མཆོག་ཏུ་ལྷན་ནེ་ ལྷང་ངེར་རི་རབ་ཀྱི་རྩེ་མོ་ན་བཞུགས་སོ། ། སངས་རྒྱས་ཀྱི་སྐུ་རེ་རེ་ལས་འོད་ཟེར་འདི་ལྟ་བུ་བྱུང་སྟེ། དཔེར་ན་ཟླ་བ་དང་ཉི་མ་བྱེ་བ་ཕྲག་སྟོང་ཤར་བ་བཞིན་ནོ། ། ཀླུ་གང་དག་དྲང་སྲོང་ཐུབ་པའི་གནས་རྟེན་དུ་ལྷགས་པ་དེ་དག་ཐམས་ཅད་ཀྱིས་དེ་མཐོང་ ནས་ལྟད་མོར་གྱུར་ཏེ་གཅིག་ལ་གཅིག་དྲིས་པ། སྣང་བ་ཆེན་པོའི་ནང་ན་རྟེན་པ་རི་རབ་ཀྱི་རྩེ་མོ་ལ་གནས་པ་བདུན་པོ་དེ་དག་ག་ལས་འོངས། དགའ་བོ་དང་ཉེ་དགའ་གཉིས་ཀྱིས་སྨྲས་པ། རི་རབ་རྩེ་ལ་ལྷ་རྣམས་ལྷན་ཅིག་ཚངས་པའི་མདུན་ན་འདོན་པ་འདི་གནས་པ། ཀུན་མཆོག་ལྷ་ཡི་དབང་ཕྱུག་ཤིན་ཏུ་མཁས་པ་རྣམས་ཀྱི་རིག་པའི་ཕ་རོལ་ཕྱིན། །

བདག་ཅག་ལ་ནི་བརྩེ་བས་འདིར་གནས་དཔལ་གྱི་གཟི་བརྗིད་ཀྱིས་ནི་ལོངས་སྤྱོད་བྱེད། ། འཆིང་བ་རྣམས་ལས་ཐར་བར་བྱེད་ཀྱིས་ཀུན་ཀྱང་དེ་ལ་མགོ་བོས་ཕྱག་འཚོལ་ཅིག ། མ་ དྲོས་པས་འདི་སྐད་ཅེས་སྨྲས་སོ། ། དེ་འདི་མ་ཡིན་འདི་བདུད་སྡིག་ཅན་འགྲོ་གཙོ་འདོད་པའི་དབང་ཕྱུག་རྫུ་འཕྲུལ་ཅན། ། ཁྱེད་ལ་སྙིང་བརྩེ་བ་ཡིས་བུ་དང་སྐྱེ་བོས་ཡོངས་བསྐོར་འདི་ནི་གནས་པ་ཡིས། ། འདི་ནི་གང་ཞིག་ལ་ལ་འདོད་ཁམས་སྡུག་བསྔལ་བཀྲེས་ ཤིང་སྐོམ་པའི་ནད་ཀྱིས་འཇིག ། སེམས་ཅན་དེ་ཡང་རབ་ཏུ་ཐར་བྱེད་ཁྱེད་ཅག་མྱུར་དུ་སྡུག་བསྔལ་རྣམས་ལས་ཐར་བར་བྱེད། ། ས་ཡི་དབང་ཕྱུག་གིས་འདི་སྐད་ཅེས་སྨྲས་སོ། ། དེ་ལྟ་མ་ཡིན་འདིར་རྒྱལ་ལྷ་དབང་འཐབ་བྲལ་དགའ་ལྡན་འཕྲུལ་དགའ་གཞན་འཕྲུལ་ བ། ། དེ་དག་ཁྱེད་ལ་སྙིང་བརྩེ་བ་ཡིས་རི་ལ་གནས་ཤིང་ཀླུ་ཡི་ཚོགས་ལ་ལྟ། ། བདག་ཅག་ཡོངས་སུ་སྐྱོབས་ཞེས་ཀུན་གྱིས་གསང་མཐོར་དེ་དག་ལ་ནི་འོ་དོད་བོས། ། དེ་དག་རྟག་ཏུ་བདེ་དང་ལྡན་པས་ཁྱེད་ཅག་བཙོན་ར་དག་ནས་ཞི་བར་བྱེད། ། རྒྱ་མཚོས་སྨྲས་པ། དེ་དག་མ་ཡིན་འདི་ནི་ལྷ་དབང་བརྒྱ་བྱིན་ཚོགས་བཅས་གཟི་བརྗིད་ལྷང་ངེ་བ། །

དེ་ནི་གླིང་བཞིའི་ནང་ན་ཆོས་དང་ལྡན་པ་སུ་ཡོད་བརྩེ་བའི་ཡིད་ཀྱིས་བལྟ། ། ཁྱེད་ཅག་ཐམས་ཅད་བྱམས་པའི་ཡིད་དུ་གྱིས་ལ་ཁྲོ་བ་མྱུར་དུ་དོར་བར་གྱིས། ། དེ་ཡིས་མྱུར་དུ་ལག་འགྲོ་ཐར་ བྱེད་འདི་ནས་འཇིགས་པ་ཀུན་ནས་ཐར་བར་བྱེད། ། ཤིན་ཏུ་བརྟན་གྱིས་སྨྲས་པ། དེ་ལྟ་མ་ཡིན་འདི་ཀུན་གཟུགས་བརྟེན་ལྷ་ཚོགས་བསམ་གཏན་བདེ་ལྡན་གཟི་བརྗིད་ཅན། ། སེམས་ཅན་རྣམས་ཀྱི་ཆེད་དུ་དྲང་སྲོང་འདིར་འཛེགས་འཁོད་ནས་བརྩེ་བས་ཕྱོགས་རྣམས་ སུ། ། མྱུར་དུ་སྲོག་ཆགས་རྣམས་ཀྱི་འགྲོ་བའི་སྡུག་བསྔལ་ཞི་བྱེད་ཆོས་ཆུའི་ཆར་པ་འབེབས། ། ལྷ་ཡི་ཡིད་ཀྱིས་ཐམས་ཅད་དེ་ལ་ཕྱག་འཚོལ་འདི་ནས་བདག་ཅག་ཐར་བར་བྱེད། ། ཀླུ་ལུས་འབིགས་པའི་ཁབ་ཀྱིས་འདི་སྐད་ཅེས་སྨྲས་སོ། ། འདི་ནི་གཟུགས་ན་བརྟེན་པའི་ལྷ་ མིན་བཞི་པོ་འདི་ཀུན་བདུད་ཀྱི་འབྱོར་པ་ཡིན། ། ལུས་ངན་སྐྱེ་མཆོག་བདུད་རྩིའི་སྐོམ་དང་རྒྱུ་བར་བཏགས་པ་འདི་དག་གནས་པ་ནི། ། གནོད་སྦྱིན་སྡེ་དང་བཅས་པས་ཡོངས་བསྐོར་ཕྱོགས་བཞི་སྐྱོང་བྱེད་སྡིག་པའི་སྐྱེ་བོ་སྒྲོལ། ། དེ་དག་གིས་ནི་བདག་ཅག་སེམས་ཅན་གཞན་ མཐོང་འདི་ནས་མྱུར་དུ་ཐར་བར་བྱེད། ། ཀླུ་རིན་ཆེན་སྐྱོང་གིས་འདི་སྐད་ཅེས་སྨྲས་སོ།

། དེ་དག་མ་ཡིན་དེ་ནི་མགོ་བྲེགས་ངུར་སྨྲིག་གོས་ཅན་འཁོད་པར་སྣང་བ་ཡིན། ། དེ་དག་ལ་ནི་ཀུན་ལྟ་ཐལ་མོ་སྦྱར་འཁོད་སྐར་མའི་ནང་ན་ཟླ་བ་བཞིན། ། བདུན་པོ་དེ་དག་ཆེར་བསྒྲུབས་བརྟུལ་ ཞུགས་བརྟན་པ་མགོ་བྲེགས་དག་གིས་མཐོང་བ་ཡིན། ། ངུར་སྨྲིག་གོས་བགོས་མཚན་གྱིས་རབ་བརྒྱན་འགྲོ་བ་ཀུན་གྱིས་མཆོད་པར་འོས་པར་མཐོང་། ། ཀླུ་ལུས་འབིགས་པའི་ཁབ་ཀྱིས་འདི་སྐད་ཅེས་སྨྲས་སོ། ། འདི་ནི་བདག་ཉིད་ཀྱིས་ཀྱང་འཇིག་རྟེན་འདྲེན་པ་ཡིན་ཏེ་ ང་ལ་དེ་ལྟར་སྣང་། ། སེམས་ཅན་རྣམས་ཀྱི་མཉམ་གཉེན་འགྲོ་བ་སྐྱོབ་པ་སྡུག་བསྔལ་རྒྱ་མཚོ་སེལ་བྱེད་པ། ། གང་དག་ལྷན་ཅིག་སྣང་བ་དྲང་སྲོང་གཞན་རྣམས་ཀྱང་ནི་དེ་ཡིས་སྤྲུལ་པ་ཡིན། ། བདག་ཅག་ལ་ནི་བརྩེ་བས་འདིར་གནས་ཁྱེད་ཅག་སྡུག་བསྔལ་རྣམས་ ལས་ཐར་བར་བྱེད། ། དེ་ནས་བཅོམ་ལྡན་འདས་རི་རབ་ཀྱི་རྩེ་མོ་དེ་ལ་བཞུགས་མ་ཐག་ཏུ་རི་རབ་དཔག་ཚད་བརྒྱད་ཅུ་རྩ་བཞིར་འཁོར་བརྒྱ་སྟོང་ཡོད་པར་གྱུར་ཏོ། ། དེ་ནས་འདོད་པ་ན་སྤྱོད་པ་དང་།

གཟུགས་ན་སྤྱོད་པའི་ལྷ་རྣམས་ཀྱིས་བཅོམ་ལྡན་འདས་ཀྱི་སྟེང་དུ་ལྷ་རྫས་ཀྱི་ རིན་པོ་ཆེ་སྣ་བདུན་ལས་བྱས་པའི་ཁང་པ་བརྩེགས་པ་འོག་མིན་གྱི་ལྷའི་གནས་ལ་ཐུག་པའི་བར་མན་ཆད་སྣ་ཚོགས་པ། བལྟ་ན་སྡུག་པ། དཔག་ཚད་བརྒྱ་སྟོང་དུ་མར་སྤྲས་པ་དེ་སྲིད་ཅིག་སྤྲུལ་ཏེ། དེ་ནི་བཅོམ་ལྡན་འདས་ལ་མཆོད་པའི་ལས་བྱ་བའི་ ཕྱིར་ལྷ་རྫས་ཀྱི་རས་བཅོས་བུ་དང་། ཆོས་གོས་དང་། རྒྱན་དང་། སྦུད་པ་དང་། གདུགས་དང་། རྒྱལ་མཚན་དང་། བ་དན་དང་། སྤོས་དང་། མེ་ཏོག་སྣ་ཚོགས་ཀྱིས་ཤིན་ཏུ་བརྒྱན་པར་སྤྲུལ་པ་ཡིན་ནོ། ། དེའི་ཚེ་བཅོམ་ལྡན་འདས་ཀྱིས་ལྷ་རྣམས་ཀྱི་དབང་ པོ་བརྒྱ་བྱིན་ལ་བོས་ཏེ་བཀའ་སྩལ་པ། ཀཽ་ཤི་ཀ་སངས་རྒྱས་ཀྱི་ཞིང་མི་མཇེད་ནི་ང་དང་། སངས་རྒྱས་རྣམས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། ཉན་ཐོས་ཆེན་པོ་རྣམས་དང་། དྲང་སྲོང་རྣམས་དང་། བདུད་རྣམས་དང་། དབང་ཆེ་ བར་གྲགས་པའི་ལྷ་དང་། ཀླུ་དང་། གནོད་སྦྱིན་རྣམས་དང་། མི་དང་། མི་མ་ཡིན་པ་རྣམས་ཀྱིས་ཤིན་ཏུ་ལོངས་སྤྱད་ཟིན་ཏོ། ། དེ་བཞིན་དུ་ད་ལྟར་རི་རབ་འདི་ནི་དེ་བཞིན་གཤེགས་པ་ཉིད་ཀྱིས་ཤིན་ཏུ་ལོངས་སྤྱད་ཟིན་ཏེ།

ཕྱོགས་བཅུའི་སངས་རྒྱས་ཀྱི་ཞིང་ ཐམས་ཅད་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། ལྷ་དབང་ཆེ་བར་གྲགས་པ་རྣམས་ཀྱིས་ཤིན་ཏུ་ལོངས་སྤྱད་ཟིན་ཏོ། ། རི་རབ་ཀྱི་རྩེ་མོ་ན་གནས་པའི་འབྱུང་པོ་ཁྱེད་ལ་ཕན་པ་དང་བདེ་བར་གྱུར་ཅིག ། བཙུན་པ་བཅོམ་ལྡན་འདས་གལ་ཏེ་བདག་ཅག་ ལ་ཐུགས་བརྩེ་བར་མཛད་ན་བཙུན་པ་བཅོམ་ལྡན་འདས། བཅོམ་ལྡན་འདས་ལ་ཕྱག་བགྱི་བ་དང་། བསྙེན་བཀུར་བགྱི་བ་དང་། རི་རབ་ལ་ལོངས་སྤྱད་པར་བགྱི་བའི་སླད་དུ་སངས་རྒྱས་ཀྱི་ཞིང་མི་མཇེད་འདི་ཐམས་ཅད་ན་གལ་ཏེ་ཡང་གང་སུ་དག་བདུད་དམ། བརྒྱ་ བྱིན་ནམ། ཚངས་པའམ། ལྷའི་དབང་པོའམ། ཀླུའི་དབང་པོའམ། གནོད་སྦྱིན་གྱི་དབང་པོའམ། དྲི་ཟའི་དབང་པོའམ། ལྷ་མ་ཡིན་གྱི་དབང་པོའམ། ནམ་མཁའ་ལྡིང་གི་དབང་པོའམ། མི་འམ་ཅིའི་དབང་པོའམ། ལྟོ་འཕྱེ་ཆེན་པོའི་དབང་པོའམ། སེམས་ཅན་དབང་ཆེ་བར་གྲགས་པ། དབང་ཆེ་བར་གྲགས་པ་ལྷའི་དྲང་སྲོང་གི་བར་ཞེས་བགྱི་བ་ནས་མིའི་དྲང་སྲོང་གི་བར་དེ་དག་ཐམས་ཅད་འདིར་ལྷགས་པར་གྱུར་ན་འདིར་བདག་ཅག་ལ་ཤས་ཆེར་ཕན་པ་དང་བདེ་བར་འགྱུར་ལགས་སོ། ། དེར་བཅོམ་ལྡན་འདས་བཞུགས་ ནས་འཛུམ་པ་མཛད་དེ།

དེའི་ཞལ་གྱི་སྒོ་ནས་འོད་ཟེར་ཁ་དོག་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་དང་། ཤེལ་གྱི་ཁ་དོག་ལྟ་བུ་རྣམ་པ་སྣ་ཚོགས་བྱུང་ངོ་། ། འོད་ཟེར་དེ་དག་གཤེགས་ནས་བདུད་ཀྱི་གནས་བྱེ་བ་ཕྲག་བརྒྱ་དང་། བརྒྱ་བྱིན་གྱི་གནས་བྱེ་བ་ཕྲག་བརྒྱ་དང་། ཚངས་པའི་གནས་ཞེས་བྱ་བ་ནས་ལྷའི་དབང་པོ་ཐམས་ཅད་ཀྱི་གནས་དང་། ལྷ་མ་ཡིན་གྱི་གནས་དང་། དྲང་སྲོང་གི་གནས་བྱེ་བ་ཕྲག་བརྒྱའི་སངས་རྒྱས་ཀྱི་ཞིང་འདི་ཇི་སྙེད་པ་ཐམས་ཅད་དུ་འོད་ཟེར་དེ་དག་ཞུགས་སོ། ། དེ་དང་དེ་ དག་ཏུ་སེམས་ཅན་དབང་ཆེ་བར་གྲགས་པ་དབང་ཆེ་བར་གྲགས་པ་བདུད་དམ་ཞེས་བྱ་བ་ནས་དྲང་སྲོང་རྣམས་ཞེས་བྱ་བའི་བར་དུ་མིང་དུ་བཏགས་པ་དེ་དང་དེ་དག་ཐམས་ཅད་ལ་རབ་ཏུ་གོ་བར་མཛད་ནས་བདུད་ཅེས་བྱ་བ་ནས་དྲང་སྲོང་ཞེས་བྱ་བའི་བར་དེ་དང་དེ་དག་དེ་ནས་ཆས་ཏེ་ བཅོམ་ལྡན་འདས་ག་ལ་བ་དང་། སངས་རྒྱས་ཀྱི་སྐུ་དྲུག་པོ་དེ་དག་ག་ལ་བར་སྐད་ཅིག་ཐང་ཅིག་ཡུད་ཙམ་ཅིག་གིས་འདིར་རི་རབ་ཀྱི་རྩེ་མོར་འཁོད་དོ། ། བཅོམ་ལྡན་འདས་ཀྱིས་སྤྲུལ་པ་དག་རྒྱུན་བཅད་ནས་བཀའ་སྩལ་པ།

ངའི་སངས་རྒྱས་ཀྱི་ཞིང་འདི་ན་རིའི་རྒྱལ་པོ་ རི་རབ་བྱེ་བ་ཕྲག་བརྒྱ་ཇི་སྙེད་ཡོད་པ་ཐམས་ཅད་ཀྱི་ནང་ན་རི་རབ་འདི་ནི་མཆོག་དང་ཕུལ་ཡིན་པར་ངས་བཤད་དེ། རི་རབ་འདི་ནི་འདུས་པ་ཆེན་པོ་ཐམས་ཅད་ཀྱིས་ལོངས་སྤྱོད་པ་ཡིན་ཞིང་རི་རབ་ཐམས་ཅད་ཀྱི་རྒྱལ་པོ་ཡིན་ནོ། ། དེ་ཐོས་ནས་བརྒྱ་བྱིན་ཀཽ་ཤི་ཀ་དང་ཞེས་བྱ་བ་ནས་མི་ མཇེད་ཀྱི་བདག་པོ་ཚངས་པ་ཞེས་བྱ་བའི་བར་མཆོག་ཏུ་ཡིད་བདེ་བ་དང་རངས་པ་སྐྱེས་སོ། ། བཅོམ་ལྡན་འདས་ཀྱི་མཐུས་ཀླུའི་རྒྱལ་པོ་ཆེན་པོ་བཞི་པོ་དེ་དག་དྲང་སྲོང་ཐུབ་པའི་གནས་རྟེན་དེ་ནས་སོང་སྟེ། ཀླུའི་རྒྱལ་པོ་རྒྱ་མཚོ་ནི་འདི་ནས་ལྷོ་ཕྱོགས་ཀྱི་རྒྱ་མཚོ་ཆེན་པོའི་ནང་དུ་ མཇུག་མས་འདུག་ནས་རི་རབ་ཀྱི་རྩེ་མོའི་བར་དུ་དེའི་མགོ་བཞག་སྟེ་བཅོམ་ལྡན་འདས་འབའ་ཞིག་ལ་ལྟའོ་ཞེས་བྱ་བ་ནས་ཀླུའི་རྒྱལ་པོ་རིན་ཆེན་སྐྱོང་ཞེས་བྱ་བ་ནུབ་ཕྱོགས་ཀྱི་ཞེས་བྱ་བའི་བར་དང་། ཀླུའི་རྒྱལ་པོ་ལུས་འབིགས་པའི་ཁབ་ནི་བྱང་ཕྱོགས་ཀྱི་ ཞེས་བྱ་བའི་བར་དང་།

ཀླུའི་རྒྱལ་པོ་ཟླ་བ་ལ་རྩུབ་པ་ནི་ཤར་ཕྱོགས་ཀྱི་རྒྱ་མཚོ་ཆེན་པོའི་ནང་དུ་མཇུག་མ་བཞག་ནས་ཞེས་བྱ་བ་ནས་རི་རབ་ཀྱི་རྩེ་མོའི་བར་དུ་དེའི་མགོ་བཞག་སྟེ་བཅོམ་ལྡན་འདས་འབའ་ཞིག་ལ་ལྟའོ་ཞེས་བྱ་བའི་བར་དུའོ། ། ཀླུ་ལྷག་མ་ཁྲག་ཁྲིག་བརྒྱ་སྟོང་ ཕྲག་དཔག་ཏུ་མེད་པ་དེ་དག་ནི་དེ་ནས་འདོང་བར་མ་ནུས་སོ། ། དེ་དག་ཐམས་ཅད་ཀྱིས་གསང་བསྟོད་དེ་འདི་སྐད་ཅེས་སྨྲས་སོ། ། བཙོན་ར་འདི་ནས་བདག་ཅག་ཡོངས་སུ་བསྐྱབ་པར་གསོལ། ཡོངས་སུ་ཐར་བར་མཛད་པར་གསོལ། ཀླུའི་རྒྱལ་པོ་དགའ་བོ་དང་ ཉེ་དགའ་གཉིས་བཅོམ་ལྡན་འདས་རི་རབ་ཀྱི་རྩེ་མོ་ནས་འདིར་གཤེགས་ཤིང་གནས་རྟེན་འདིར་བཞུགས་ནས་ཀླུ་རྣམས་ལ་ཆོས་སྟོན་པར་འགྱུར་རོ་སྙམ་སྟེ། དེ་དག་གཉི་གས་གནས་རྟེན་ནས་རི་རབ་ཀྱི་རྩེ་མོའི་བར་དུ་དེ་སྲིད་ཀྱི་རང་གི་ལུས་སྤྲུལ་ཏོ། ། དེ་ནས་བརྒྱ་ བྱིན་འདི་སྙམ་དུ་སེམས་ཏེ། ཀླུ་དེ་དག་ནི་ལུས་རྩུབ་ཅིང་འདུས་ཏེ་རེག་ན་གདུག་པ་ཡིན་པས་བཅོམ་ལྡན་འདས་ཀྱི་ཞབས་ཀྱི་མཐིལ་དག་རལ་བར་གྱུར་ན་མི་རུང་ངོ་སྙམ་ནས།

དེས་ལག་འགྲོའི་ལུས་ལྷ་རྫས་ཀྱི་རས་བཅོས་བུ་དག་གིས་ཡོངས་སུ་གཡོགས་ཤིང་ མགོ་ལ་ཙན་དན་སྦྲུལ་གྱི་སྙིང་པོ་དང་ཏ་མ་ལའི་ལོ་མའི་ཕྱེ་མས་ཡོངས་སུ་གཡོགས་ཏེ་ལྷ་རྫས་ཀྱི་མེ་ཏོག་དག་མངོན་པར་གཏོར་ཏོ། ། དེ་ནས་བཅོམ་ལྡན་འདས་ཀྱིས་དྲང་སྲོང་ཐུབ་པའི་གནས་རྟེན་དེ་རྒྱར་དཔག་ཚད་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་པར་སྤྲུལ་ ཏོ། ། མི་མཇེད་ཀྱི་བདག་པོ་ཚངས་པས་དེའི་དབུས་སུ་ལྷ་རྫས་ཀྱི་རིན་པོ་ཆེའི་རས་བཅོས་བུ་དང་། རྒྱན་དང་། ནོར་བུ་དང་། རིན་པོ་ཆེ་རྣམས་ཀྱི་གདན་དག་བཏིང་ངོ་། ། དེའི་ཚེ་བཅོམ་ལྡན་འདས་རི་རབ་ཀྱི་རྩེ་མོ་ལ་བཞུགས་ནས་ཀུན་ཤེས་ཀཽ་ཌི་ནྱ་ལ་བཀའ་སྩལ་པ། ཅི་ནས་ཀྱང་སངས་རྒྱས་ཀྱི་ཞིང་མི་མཇེད་ཐམས་ཅད་དུ་ཆུད་པ་ཐམས་ཅད་ཀྱིས་ཐོས་པར་དེ་ལ་སངས་རྒྱས་ཀྱི་ཡུལ་གྱི་ཆོ་འཕྲུལ་གྱི་བྱིན་གྱིས་རླབས་ཀྱི་སྟོབས་དེ་ལྟ་བུས་ཆོས་སྟོན་ཏེ། ཀཽ་ཌི་ནྱ་གང་མིག་གི་སྐྱེ་བ་དང་། གནས་པ་དང་། འབྱུང་བ་དང་། ཉེ་བར་ལེན་པ་ལ་ མངོན་པར་ཞེན་པ་འདི་ནི་སྡུག་བསྔལ་གྱི་སྐྱེ་བའོ། ། འདི་ནི་ནད་དང་སྲིད་པའི་ཡན་ལག་རྣམས་ཀྱི་གནས་པའོ། ། འདི་ནི་རྒ་ཤིའི་འབྱུང་བའོ། ། ཀཽ་ཌི་ནྱ་གང་རྣ་བ་དང་། སྣ་དང་།

ལྕེ་དང་། ལུས་དང་། ཡིད་ཀྱི་སྐྱེ་བ་དང་། གནས་པ་དང་། འབྱུང་བ་དང་། ཉེ་ བར་ལེན་པ་ལ་མངོན་པར་ཞེན་པ་འདི་ནི་སྡུག་བསྔལ་གྱི་སྐྱེ་བའོ། ། འདི་ནི་ནད་དང་། སྲིད་པའི་ཡན་ལག་རྣམས་ཀྱི་གནས་པའོ། ། འདི་ནི་རྒ་ཤིའི་འབྱུང་བའོ། ། ཀཽ་ཌི་ནྱ་གང་མིག་གི་འགོག་པ་དང་། ཉེ་བར་ཞི་བ་དང་། ནུབ་པ་དང་། ཉེ་བར་ལེན་པ་ཉེ་བར་ཞི་བ་ འདི་ནི་སྡུག་བསྔལ་གྱི་འགོག་པའོ། ། འདི་ནི་སྲིད་པའི་ཡན་ལག་རྣམས་ཀྱི་ཉེ་བར་ཞི་བའོ། ། འདི་ནི་རྒ་ཤིའི་ནུབ་པའོ། ། ཀཽ་ཌི་ནྱ་གང་རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་འགོག་པ་དང་། ཉེ་བར་ཞི་བ་དང་། ནུབ་པ་དང་། ཉེ་བར་ལེན་པ་ རྣམ་པར་ཞི་བ་འདི་ནི་སྡུག་བསྔལ་གྱི་འགོག་པའོ། ། འདི་ནི་སྲིད་པའི་ཡན་ལག་རྣམས་ཀྱི་ཉེ་བར་ཞི་བའོ། ། འདི་ནི་རྒ་ཤིའི་ནུབ་པའོ། ། ཆོས་གང་གིས་ང་ལྷ་དང་བཅས་པ་དང་། ཚངས་པ་དང་བཅས་པ་དང་། དགེ་སྦྱོང་དང་། བྲམ་ཟེར་བཅས་པ་དང་། ལྷ་དང་ མིར་བཅས་པའི་སྐྱེ་དགུའི་འཇིག་རྟེན་ན་ཕུལ་ཡིན་པར་གྲགས་པ་དང་། བྱམས་པ་ཆེན་པོས་མཆོག་ཡིན་པར་གྲགས་པ་དང་། སྙིང་རྗེ་ཆེན་པོས་དམ་པ་ཡིན་པར་གྲགས་པ་དང་། འཁོར་བའི་ཕ་རོལ་ཏུ་ཕྱིན་པས་བླ་ན་མེད་པར་གྲགས་པ་དང་།

སྦྱིན་པ་དང་། དུལ་ བ་དང་། ཡང་དག་པར་སྡོམ་པ་རྣམས་ཀྱིས་སེམས་ཅན་ཐམས་ཅད་ལ་སེམས་སྙོམས་པར་གྲགས་པའི་ཆོས་ཀྱི་སྦྱིན་པ་དང་། དུལ་བ་དང་། ཡང་དག་པར་སྡོམ་པ་དང་། ཚངས་པའི་གནས་པ་དང་། འཕགས་པའི་ལམ་ཡན་ལག་བརྒྱད་པ་ཡོངས་སུ་བསྒོམ་པའི་རྒྱུ་འཐུན་ པའི་ཆོས་དེ་ནི་ངས་སེམས་ཅན་ཐམས་ཅད་ལ་རྒྱ་ཆེར་བསྟན་ཏོ། ། གསལ་བར་མཛད་དོ། ། སྟོན་པ་ཐུགས་བརྩེ་བ་ཅན་ཕན་པར་བཞེད་པས་གང་ཉན་ཐོས་རྣམས་ལ་མཛད་པ་ནི་ངས་མཛད་ཟིན་ཏེ། ད་ཁྱེད་ཅག་གིས་བྱ་བ་ཡིན་ནོ། ། རྒ་ཤིའི་མཐར་དབྱུང་ བའི་ཕྱིར་དགོན་པ་རྣམས་དང་། ཤིང་དྲུང་དང་། དུར་ཁྲོད་དང་། རི་དང་། རི་ཁྲོད་དང་། བས་མཐའི་གནས་མལ་དེ་དག་ཏུ་ཕྱིས་འགྱོད་པ་ཅན་དུ་གྱུར་ན་མི་རུང་གིས་སྒོམས་ཤིག ། རྩོལ་ཅིག ། ངེད་ཀྱིས་རྗེས་སུ་བསྟན་པ་ནི་འདི་ཡིན་ནོ། ། བཅོམ་ལྡན་འདས་ཀྱིས་ ཆོས་ཀྱི་རྣམ་གྲངས་འདི་བཤད་པ་ན། སངས་རྒྱས་ཀྱི་ཞིང་མི་མཇེད་འདིའི་གླིང་བཞི་པ་བྱེ་བ་ཕྲག་བརྒྱ་གང་ཡིན་པ་ཐམས་ཅད་དུ་གླིང་བཞི་པ་རེ་རེར་ཡང་སེམས་ཅན་དཀྲིགས་པ་བྱེ་བ་བརྒྱ་སྟོང་ཕྲག་མང་པོ་དེ་དག་གིས་ནི་དགེ་བའི་རྩ་བ་རྣམ་པ་སྣ་ཚོགས་བསྐྱེད་དོ། ། ཁ་ཅིག་ ནི་ཏིང་ངེ་འཛིན་དང་། གཟུངས་དང་།

བཟོད་པ་རྣམས་ལ་རྣམ་པར་གནས་པར་གྱུར་ཏོ། ། དེ་བཞིན་དུ་ཆོས་རྣམས་ལ་ཆོས་ཀྱི་མིག་བསྐྱེད་དོ། ། ཁ་ཅིག་ནི་སེམས་ཅན་དམྱལ་བར་འགྲོ་བའི་ལས་ཀྱི་སྒྲིབ་པ་རྣམས་བྱང་ངོ་ཞེས་བྱ་བ་ནས་ཁ་ཅིག་ནི་སེམས་ཅན་དམྱལ་བ་དང་། དུད་འགྲོའི་བར་དང་། ཁ་ཅིག་གནོད་སྦྱིན་དབུལ་པོ་ཉིད་ཀྱི་བར་དང་། ཁ་ཅིག་ནི་མི་དབུལ་པོ་ཉིད་དུ་འགྲོ་བའི་ལས་ཀྱི་སྒྲིབ་པ་རྣམས་ཡོངས་སུ་བྱང་ངོ་། ། ནད་ཀྱིས་བཏབ་པ་རྣམས་ནི་ནད་མེད་པར་གྱུར་ཏོ། ། སེམས་ཅན་རྣམས་བཙོན་ར་ནས་ཡོངས་སུ་ཐར་བར་གྱུར་ཏོ། ། དེ་ནས་བཅོམ་ལྡན་འདས་ལ་ཀླུའི་རྒྱལ་པོ་རྒྱ་མཚོས་ཚིགས་སུ་བཅད་དེ་གསོལ་པ། དགེ་བ་སྣ་ཚོགས་དྲི་མ་མེད་པའི་གསེར་ཅན་སྤྱོད་པ་རྣམ་དག་ཐུགས་རྗེས་ཕྱུག ། ལྷ་དང་ཤེད་ལས་སྐྱེས་དང་ལག་འགྲོའི་དམ་པ་ཉོན་མོངས་རྙོག་པ་སེལ་མཛད་པ། ། ཚུལ་ཁྲིམས་ཐོས་ རིག་གསུམ་པོ་ཕུན་སུམ་ཚོགས་པ་སེམས་ཅན་ཐམས་ཅད་འཛུད་པའོ། ། ལག་འགྲོའི་ཚོགས་རབ་ཐར་མཛད་ཐུགས་རྗེ་བརྟན་པོ་སྔོན་གྱི་དམ་བཅས་དགོངས་པར་མཛོད། ། གཞན་སེམས་སེམས་ཅན་སླད་དུ་སྡུག་བསྔལ་ཇི་ལྟར་གཏར་བ་བཞིན། ། ལག་འགྲོའི་སྐད་ཅིག་ མཐའ་ཡས་འདིར་རྨོངས་སྡུག་བསྔལ་སྣ་ཚོགས་ཐེབས། །

དགྲ་ཡིས་ཕྱག་བགྱིས་བརྩོན་བརྟན་སྐྱེ་བའི་དགོན་པ་ལས་གྲོལ་བ། ། ཡེ་ཤེས་ཆབ་ཀྱིས་ལག་འགྲོ་ཐམས་ཅད་ཚིམ་པར་མཛད་དུ་གསོལ། ། འཕགས་པ་འདུས་པ་ཆེན་པོ་ཐེག་པ་ཆེན་པོའི་མདོ་ཉི་མའི་སྙིང་ པོའི་ལེའུ་བཅུ་གཅིག་པ་ལས་རི་རབ་ལ་གཤེགས་པའི་ལེའུ་སྟེ་བཅུ་པའོ། ། ། ། འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་བཅུ་གཉིས་པ། དེ་ནས་བཅོམ་ལྡན་འདས་མེ་ཏོག་དང་། རིན་པོ་ཆེ་དང་། ཆོས་གོས་དག་ གི་ཆར་རབ་ཏུ་འབེབས་ཤིང་། སིལ་སྙན་དང་། ཕེག་རྡོབ་པ་དང་། གླུ་དབྱངས་དག་གི་རོལ་མོའི་སྒྲ་འབྱིན་པའི་ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་ཐམས་ཅད་སྡོད་པས་རི་རབ་ཀྱི་རྩེ་མོ་ནས་གཤེགས་ཏེ། བཅོམ་ལྡན་འདས་ཉན་ཐོས་ཀྱི་དགེ་འདུན་ གྱིས་མདུན་དུ་བདར་ཅིང་བྱང་ཆུབ་སེམས་དཔའི་དགེ་འདུན་གྱིས་ཡོངས་སུ་བསྐོར་ནས་དྲང་སྲོང་ཐུབ་པའི་གནས་རྟེན་གྱི་དབུས་སུ་གདན་བཏིང་བ་ཉིད་ལ་བཞུགས་སོ། ། བཅོམ་ལྡན་འདས་ལ་མཆོད་པའི་ལས་བྱ་བའི་ཕྱིར་སྟེང་གི་ནམ་མཁའ་ལ་ལྷ་དང་། ཀླུ་དང་། གནོད་ སྦྱིན་དང་། ལྷ་མ་ཡིན་དང་། མི་འམ་ཅི་ཐམས་ཅད་ཀྱིས་རྒྱན་དང་། ཕྱེ་མ་སྣ་ཚོགས་དང་། མེ་ཏོག་སྣ་ཚོགས་དང་།

རིན་པོ་ཆེ་སྣ་ཚོགས་ཀྱི་ཆར་རབ་ཏུ་ཕབ་བོ། ། བཅོམ་ལྡན་འདས་ལ་ཀླུ་དེ་དག་གིས་ཀྱང་མེ་ཏོག་སྣ་ཚོགས་དང་། དྲི་སྣ་ཚོགས་དང་། རིན་པོ་ཆེ་སྣ་ ཚོགས་དང་། རས་གོས་དང་། རས་བཅོས་བུ་དང་། ཆོས་གོས་དང་། རྒྱན་སྣ་ཚོགས་ཀྱིས་མཆོད་པ་བྱས་ནས་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་སྤྱན་སྔར་ཆོས་མཉན་པའི་ཕྱིར་འཁོད་དོ། ། དེ་ནས་ བཅོམ་ལྡན་འདས་ལ་ཀླུའི་རྒྱལ་པོ་རྒྱ་མཚོས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་སུག་ལས་གང་དག་གིས་སེམས་ཅན་རྣམས་ཀླུའི་སྐྱེ་གནས་སུ་སྐྱེ་ལགས། བཅོམ་ལྡན་འདས་ཀྱིས་བཀའ་སྩལ་པ། ཀླུའི་བདག་པོ་ལས་ཀྱི་སྒྲིབ་པ་བཅུས་སེམས་ ཅན་འབྱུང་པོ་རྣམས་མྱུར་དུ་ཀླུའི་སྐྱེ་གནས་སུ་སྐྱེའོ། ། བཅུ་གང་ཞེ་ན། སེམས་ཅན་གང་དག་ཕ་རོལ་ཏུ་ཕྱིན་པ་དྲུག་ལ་མངོན་པར་བརྩོན་ཞིང་བླ་ན་མེད་པའི་ཐེག་པ་ཡོངས་སུ་ཚོལ་བའི་སེམས་དང་ལྡན་པ་དག་ཡིན་ལ་མྱུར་དུ་འདོད་པ་རྣམས་ལ་ཉེས་དམིགས་ སུ་ལྟ་བ་མ་ཡིན་ཞིང་ཤིན་ཏུ་སྦྱིན་པ་ལ་མངོན་པར་བརྩོན་ལ་ལག་པ་བརྐྱང་བ་དག་ཡོད་དེ། དེ་དག་སྨོན་ལམ་གྱི་དབང་གིས་ཀླུ་རྣམས་ཀྱི་ནང་དུ་སྐྱེའོ། །

ཡང་སེམས་ཅན་གང་དག་བླ་ན་མེད་པའི་ཐེག་པ་ཡོངས་སུ་ཚོལ་བའི་སེམས་དང་ལྡན་ཞིང་སྦྱིན་པའི་ཕ་རོལ་ཏུ་ཕྱིན་པ་ལ་ མངོན་པར་བརྩོན་པ་དག་ཡོད་དེ། དེ་དག་གིས་ཚུལ་ཁྲིམས་ཐམས་ཅད་རྫོགས་པར་སྐྱོན་མེད་པར་བསྲུང་བར་ནི་མ་ནུས་སོ། ། དེ་དག་སེམས་ཅན་དམྱལ་བ་དང་། {ཡི་དགས་,ཡི་དྭགས་}ཀྱི་འཇིགས་པས་སྐྲག་ནས་རང་གི་སྨོན་ལམ་གྱིས་ཀླུ་རྣམས་ཀྱི་ནང་དུ་སྐྱེའོ། ། ཡང་སེམས་ཅན་ གང་དག་བླ་ན་མེད་པའི་ཐེག་པ་ཡོངས་སུ་ཚོལ་བར་བྱེད་ཅིང་ཤིན་ཏུ་ང་རྒྱལ་གྱིས་ཁེངས་པ་དག་ཡོད་དེ། དེ་དག་ང་རྒྱལ་གྱི་མཐུས་རང་གི་སྨོན་ལམ་གྱིས་ཀླུ་རྣམས་ཀྱི་ནང་དུ་སྐྱེའོ། ། ཡང་སེམས་ཅན་གང་དག་བླ་ན་མེད་པའི་ཐེག་པའི་སྤྱོད་པ་ལ་མངོན་པར་བརྩོན་པ་དག་ཡོད་ དེ། དེ་དག་ཤིན་ཏུ་ཁྲོ་བ་མང་ཞིང་སེམས་ཅན་གཞན་རྣམས་ལ་རབ་ཏུ་སྡང་སྟེ། དེ་དག་ཤ་ཁོན་ལ་རྟེན་པས་འཆི་བའི་དུས་ཐ་མར་ཀླུ་རྣམས་ཀྱི་ནང་དུ་སྨོན་ལམ་འདེབས་ཏེ། དེ་དག་སྨོན་ལམ་གྱིས་དེར་སྐྱེའོ། ། ཡང་སེམས་ཅན་གང་དག་ཉན་ཐོས་ཀྱི་ཐེག་པ་དང་ཡང་ དག་པར་ལྡན་ཞིང་སྣོད་དུ་གྱུར་པའི་སྦྱིན་གནས་ཡོངས་སུ་བཙལ་བ་དང་མཆོད་པའི་སེམས་དང་ལྡན་པ་དག་ཡོད་དེ།

དེ་དག་རང་གི་སྨོན་ལམ་གྱིས་ཀླུ་རྣམས་ཀྱི་ནང་དུ་སྐྱེའོ། ། ཡང་སེམས་ཅན་གང་དག་སེར་སྣ་ཅན་དང་ང་རྒྱལ་གྱི་སྐྱོན་དང་ལྡན་པ་དག་ཡོད་དེ། དེ་དག་ལས་དེས་ཀླུ་རྣམས་ ཀྱི་ནང་དུ་སྐྱེའོ། ། ཡང་སེམས་ཅན་གང་དག་ང་རྒྱལ་ལ་མངོན་པར་དགའ་ཞིང་མུ་ཅོར་སྨྲ་ལ་{བརྫུན་,རྫུན་}དུ་སྨྲ་བ་དག་ཡོད་དེ། དེ་དག་ལས་དེས་ཀླུ་རྣམས་ཀྱི་ནང་དུ་སྐྱེའོ། ། ཡང་སེམས་ཅན་གང་དག་སངས་རྒྱས་ལ་གཅེས་པར་བྱེད་པ་མ་ཡིན་པ་མང་བ་དག་ཡིན་ཞིང་། ཆོས་དང་། དགེ་འདུན་དང་། བསླབ་པ་དང་། མཁན་པོ་དང་། སློབ་དཔོན་དང་། བླ་མའི་གནས་ལྟ་བུ་དང་། ཕ་མ་རྣམས་ལ་གཅེས་པར་བྱེད་པ་མ་ཡིན་པ་མང་བ་དག་ཡིན་པ་ཡོད་དོ། ། དེའི་ཚེ་དེ་དག་ང་རྒྱལ་གྱི་རྒྱུ་དང་། ལུས་དང་། ངག་དང་། ཡིད་ཆུང་ངུས་འཁྲུལ་པས་ཀླུ་རྣམས་ ཀྱི་ནང་དུ་སྐྱེའོ། ། ཡང་སེམས་ཅན་གང་དག་ང་རྒྱལ་དང་། གཏི་མུག་གིས་ཟིལ་གྱིས་ནོན་ཅིང་མ་དུལ་ལ་སྐྱོན་མེད་པ་མ་ཡིན་པར་སྤྱོད་པ་དག་ཡོད་དེ། དེ་དག་ཀླུ་རྣམས་ཀྱི་ནང་དུ་སྐྱེའོ། ། ཡང་སེམས་ཅན་གང་དག་ང་རྒྱལ་དང་། ཕྲ་མ་སྨྲ་བ་དང་། ཚིག་རྩུབ་པོ་སྨྲ་བ་ ལ་གོམས་པ་དག་ཡོད་དེ།

དེ་དག་འཆི་བའི་དུས་བྱས་ནས་ཀླུ་རྣམས་ཀྱི་ནང་དུ་སྐྱེ་སྟེ་བཅུ་པོ་དེ་དག་ཡིན་ནོ། ། ཆོས་གཞན་གསུམ་དང་ལྡན་ན་ཀླུ་རྣམས་ཀྱི་ནང་དུ་སྐྱེའོ། ། གསུམ་གང་ཞེ་ན། སེམས་ཅན་གང་དག་ལུས་དང་། ངག་དང་། ཡིད་ཀྱི་ཉེས་པར་སྤྱོད་པ་ ཤིན་ཏུ་དམ་པོ་དག་གིས་སེམས་ཅན་དམྱལ་བ་རྣམས་ཀྱི་ནང་དུ་སྐྱེས་པ་དག་ཡོད་དེ། དེ་དག་དེ་ནས་ཤི་འཕོས་ནས་ཉེས་པར་སྤྱོད་པའི་ལྷག་མ་ཆུང་ངུས་ཀླུ་རྣམས་ཀྱི་ནང་དུ་སྐྱེའོ། ། དེ་བཞིན་དུ་དུད་འགྲོ་རྣམས་དང་། དེ་བཞིན་དུ་{ཡི་དགས་,ཡི་དྭགས་}རྣམས་ནས་ཞེས་བྱ་བའི་བར་དུ་ སྟེ། ཆོས་གསུམ་པོ་དེ་དག་གིས་སེམས་ཅན་རྣམས་ཀླུ་རྣམས་ཀྱི་ནང་དུ་སྐྱེའོ། ། རྒྱ་མཚོས་ཀྱང་གསོལ་པ། བཙུན་པ་བཅོམ་ལྡན་འདས་དེ་དེ་བཞིན་ནོ། ། བཙུན་པ་བདེ་བར་གཤེགས་པ་དེ་དེ་བཞིན་ཏེ། བཙུན་པ་བཅོམ་ལྡན་འདས་འདི་ན་ཀླུ་གང་དག་ལོངས་སྤྱོད་པ་ དང་། ཉེ་བར་སྤྱོད་པའི་དཔལ་དང་ལྡན་པ་ལྷ་དང་འདྲ་བ་དག་མཆིས་པ་ནས་མི་སྨད་རིམས་དང་འདྲ་བ་དག་མཆིས་པའི་བར་དང་། {ཡི་དགས་,ཡི་དྭགས་}དང་འདྲ་བ་དག་མཆིས་པའི་བར་དང་།

གང་དག་དུད་འགྲོའི་སྐྱེ་གནས་པ་དང་འདྲ་བ་དག་མཆིས་པའི་བར་ནས་ཀླུ་གང་དག་སེམས་ ཅན་དམྱལ་བ་དང་འདྲ་བ་དག་གི་བར་མཆིས་ལགས་ཏེ། དེ་དག་སྡུག་བསྔལ་གྱི་ཚོར་བ་མྱོང་བར་འགྱུར་ལགས་སོ། ། དེ་ནས་ཀླུའི་རྒྱལ་པོའི་བུ་པད་མའི་གདོང་ཞེས་བྱ་བས་འདི་སྐད་ཅེས་གསོལ་ཏོ། ། བདག་སུ་ག་ལས་གང་གིས་ཀླུའི་རིགས་སུ་སྐྱེས་ནས་གཟུགས་ མཆོག་ཏུ་ལྷམ་མེ་ཞིང་ལུས་ཀྱིས་རེག་པ་གང་{ཆུང་ཟད་,ཅུང་ཟད་}ཅི་རེག་ཀྱང་ཀུན་ཏུ་ཚིག་ཅིང་འབར་བ་ལགས། བདག་དུས་ཐམས་ཅད་དུ་མཆིལ་ལྷམ་བོར་ནས་གཅེར་བུར་རྒྱུ་བར་བགྱིད་ལགས། བདག་གི་ཕ་མ་དེ་ནི་དཔལ་ཕུན་སུམ་ཚོགས་པའི་ཆེས་ཁྱད་པར་དུ་ འཕགས་པ་མྱོང་སྟེ། དཔེར་ན་གླིང་བཞི་པའི་འཁོར་ལོས་སྒྱུར་བའི་རྒྱལ་པོ་བཞིན་ལགས། བཅོམ་ལྡན་འདས་ཀྱིས་བཀའ་སྩལ་པ། ཀྱེ་ལག་འགྲོ་སྔོན་བྱུང་བ་འདས་པའི་དུས་བསྐལ་པ་སུམ་ཅུ་རྩ་གཅིག་འདས་པ་དེའི་ཚེ་དེའི་དུས་ན། དེ་བཞིན་གཤེགས་པ་ཞེས་བྱ་ བ་ནས་སངས་རྒྱས་བཅོམ་ལྡན་འདས་ཞེས་བྱ་བའི་བར་གཙུག་ཏོར་ཅན་ཞེས་བྱ་བ་འཇིག་རྟེན་དུ་བྱུང་ངོ་། ། དེའི་ཚེ་རྒྱལ་པོ་མེ་ཏོག་བྲལ་ཞེས་བྱ་བ་ཞིག་བྱུང་སྟེ།

རྒྱལ་པོ་མེ་ཏོག་བྲལ་དེས་ཀྱང་དེ་བཞིན་གཤེགས་པ་གཙུག་ཏོར་ཅན་ཉན་ཐོས་དང་། བྱང་ཆུབ་སེམས་དཔའི་ དགེ་འདུན་བརྒྱ་སྟོང་ཕྲག་མང་པོའི་འཁོར་དང་ལྡན་པ་དེ་ལ་ཟླ་བ་གསུམ་དུ་ཡོ་བྱད་ཐམས་ཅད་ཕུལ་ནས་རྟག་ཏུ་ཆོས་མཉན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་བོ། ། བཅོམ་ལྡན་འདས་དེའི་གཙུག་ལག་ཁང་ཡོ་བྱད་ཐམས་ཅད་དང་ལྡན་པ་ཞིག་ ཀྱང་བརྩིགས་སོ། ། རྒྱལ་པོ་མེ་ཏོག་བྲལ་དེའི་བུ་སྲིད་སྒྲུབ་བཅས་ཞེས་བྱ་བ་ཞིག་ཡོད་དེ། དེ་ཤིན་ཏུ་འཁོར་བས་སྐྲག་ནས་བཅོམ་ལྡན་འདས་ཀྱི་ཐད་དུ་རབ་ཏུ་བྱུང་སྟེ་ཕའི་དགེ་འདུན་གྱི་ཀུན་དགའི་ར་བ་དེ་རྗེས་སུ་སྐྱོང་ཞིང་འདུག་གོ། ། དེ་ནས་བཅོམ་ལྡན་འདས་ཀྱི་ཉན་ ཐོས་ཀྱི་དགེ་སློང་གང་དག་གནས་པ་དང་། དེ་ན་གང་དག་བཟའ་བ་དང་། བཏུང་བ་དང་། མལ་ཆ་ལ་ལོངས་སྤྱོད་པར་བྱེད་པ་ཐམས་ཅད་ལ་མེ་ཏོག་བྲལ་གྱི་བུ་དགེ་སློང་སྲིད་སྒྲུབ་བཅས་དེ་ཕྲག་དོག་བྱེད་དོ། ། བཅོམ་ལྡན་འདས་ཀྱི་ཉན་ཐོས་ཀྱི་དགེ་སློང་དེ་དག་ཀྱང་གནས་དེ་ནས་ དོང་ངོ་། ། དེ་ཡང་ཡིད་མཆོག་ཏུ་དགའ་ནས་བདག་ཉིད་ཀྱིས་ཀྱང་ལོངས་སྤྱོད་པར་མི་བྱེད།

གཞན་དག་ལ་ཡང་མི་སྟེར་རོ་ཞེས་བྱ་བ་ནས་དགེ་སློང་དེ་ཡང་འཆི་བའི་དུས་བྱས་ནས་སེམས་ཅན་དམྱལ་བ་ཆེན་པོ་རྣམས་ཀྱི་ནང་དུ་སྐྱེས་སོ་ཞེས་བྱ་བའི་བར་དུའོ། ། དེ་ལོ་ཁྲག་ཁྲིག་བརྒྱ་ སྟོང་ཕྲག་མང་པོར་སེམས་ཅན་དམྱལ་བ་ཆེན་པོའི་ནང་དུ་སྐྱེས་ནས་བཙོས་སོ། ། དེ་དེ་ནས་ཤི་འཕོས་ནས་{ཡི་དགས་,ཡི་དྭགས་}རྣམས་ཀྱི་ནང་དུ་སྐྱེས་ཏེ། ལོ་བརྒྱ་སྟོང་ཕྲག་མང་པོར་དེར་སྡུག་བསྔལ་མྱོང་ངོ་། ། ཕྱིས་ཡང་སེམས་ཅན་དམྱལ་བ་དང་{ཡི་དགས་,ཡི་དྭགས་}རྣམས་ཀྱི་ནང་དུ་སྡུག་ བསྔལ་མྱོང་ངོ་། ། ལག་འགྲོ་འཁོར་བས་སྐྲག་པའི་སེམས་དང་ལྡན་པའི་སྲིད་སྒྲུབ་བཅས་ཞེས་བྱ་བ་རབ་ཏུ་བྱུང་སྟེ། དེ་ནས་ཤི་འཕོས་ནས་དེ་ལྟར་ཡུན་རིང་པོར་ངན་སོང་གསུམ་དུ་སྡུག་བསྔལ་མྱོང་བ་དེ་གཞན་ཞིག་ཡིན་པར་ཁྱོད་སེམས་ན། གཞན་ཡིན་པར་བལྟ་བར་ མི་བྱ་སྟེ། དེ་ལྟར་ལས་ཀྱི་སྒྲིབ་པ་དམ་པོས་ཟིན་པ་ཡང་ཁྱོད་ཡིན་ནོ། ། འདི་ཕན་ཆད་བསྐལ་པ་སུམ་ཅུ་རྩ་གཅིག་ཏུ་ཁྱོད་རྟག་པར་ངན་སོང་གསུམ་གྱི་ནང་དུ་སྐྱེས་སོ། ། དེའི་ལས་ཀྱི་སྒྲིབ་པ་ལྷག་མ་ལུས་པ་དེས་འདིར་ཀླུ་རྣམས་ཀྱི་ནང་དུ་སྐྱེས་པ་ནི་གཞན་མ་ཡིན་གྱི་ཁྱོད་ ཡིན་ཏེ། སྡུག་བསྔལ་གྱི་ཚོར་བ་དེ་ལྟ་བུ་མྱོང་ངོ་།

། གང་ཁྱོད་འདི་ནས་ཤི་འཕོས་ནས་ཕྱིས་ཀྱང་སེམས་ཅན་དམྱལ་བ་དང་། དུད་འགྲོ་དང་། {ཡི་དགས་,ཡི་དྭགས་}རྣམས་ཀྱི་ནང་དུ་རྟག་ཏུ་སྡུག་བསྔལ་གྱིས་གཟིར་བར་འགྱུར་བ་འདི་ནི་གནས་ཡོད་དོ། ། ཀླུའི་བུ་དེ་མཆོག་ཏུ་ཡིད་མི་ དགའ་ནས་རབ་ཏུ་ངུ་ཞིང་བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་བྱིས་པ་ཇི་ལྟ་བ་དང་། རྨོངས་པ་ཇི་ལྟ་བ་དང་། མི་གསལ་བ་དང་། མི་མཁས་པ་ཇི་ལྟ་བ་བཞིན་དུ་ནོངས་པ་སོ་སོར་འཆགས་ལགས་སོ་ནོངས་པ་སོ་སོར་འཆགས་ལགས་སོ། ། བཙུན་པ་བཅོམ་ལྡན་འདས་བདག་གི་བསམ་པས་སྡོམ་པ་གཟུང་བར་བགྱིའོ། ། བདག་དེ་བཞིན་གཤེགས་པའི་དགེ་བསྙེན་ལགས་ཏེ། ཇི་སྲིད་འཚོའི་བར་དུ་སྲོག་གཅོད་པ་སྤངས་པ་ལགས་སོ། ། བདག་བཅོམ་ལྡན་འདས་ལ་སྐྱབས་སུ་མཆིས་པ་ལགས་སོ། ། བཅོམ་ ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། ། ཁྱོད་ལྷག་པའི་བསམ་པས་ང་ལ་སྐྱབས་སུ་སོང་བས་ཁྱོད་ཀྱི་ངན་སོང་ཐམས་ཅད་ཡོངས་སུ་ཟད་དོ། ། འདི་ནས་ཤི་འཕོས་ནས་ཁྱོད་ཀྱིས་བྱམས་པའི་ཚེ་ན་མིའི་རྙེད་པ་ཐོབ་པར་འགྱུར་ཏེ།

བྱམས་ པའི་ཐད་དུ་རབ་ཏུ་འབྱུང་བར་འགྱུར་ཞིང་དགྲ་བཅོམ་པ་ཉིད་ཀྱི་བར་དུ་མངོན་སུམ་དུ་བྱེད་པར་འགྱུར་རོ། ། དེའི་ཚེ་དེའི་དུས་ན་གང་གིས་གཙུག་ཏོར་ཅན་འཁོར་དང་བཅས་པ་ལ་ཟླ་བ་གསུམ་དུ་ཡོ་བྱད་ཐམས་ཅད་ཀྱིས་རིམ་གྲོ་བྱས་པ་དང་། དེའི་ཕྱིར་དགེ་འདུན་གྱི་ཀུན་ དགའ་ར་བ་ཡོ་བྱད་ཐམས་ཅད་ཕུན་སུམ་ཚོགས་པར་བྱས་པའི་རྒྱལ་པོ་མེ་ཏོག་བྲལ་ཞེས་བྱ་བ་གཞན་ཞིག་ཡིན་པར་ཁྱོད་སེམས་ན་དེ་གཞན་ཡིན་པར་ཡང་མི་བལྟ་སྟེ། དེ་ནི་ཀླུའི་རྒྱལ་པོ་རྒྱ་མཚོ་འདི་ཡིན་ནོ། ། འདི་ནི་བསྐལ་པ་སུམ་ཅུ་རྩ་གཅིག་ཏུ་ནམ་ཡང་ངན་འགྲོར་ མ་སྐྱེས་སོ། ། ལྷའི་དཔལ་དང་སྐལ་བ་བཟང་པོ་ཕུན་སུམ་ཚོགས་པ་ཤིན་ཏུ་རྒྱ་ཆེན་པོ་མྱོང་ངོ་། ། འདི་ནི་བླ་ན་མེད་པའི་ཐེག་པའི་ཕྱིར་སྨོན་ལམ་གྱི་དབང་གིས་འདིར་ཀླུ་རྣམས་ཀྱི་ནང་དུ་སྐྱེས་ཏེ། འདིར་དཔལ་དང་སྐལ་བ་བཟང་པོ་དེ་ལྟ་བུ་མྱོང་ངོ་། ། དེ་སྐད་ཅེས་ཐོས་ནས་ཀླུ་ ཐམས་ཅད་སྐྱོ་ཞིང་མཆོག་ཏུ་ཡིད་མི་བདེ་ནས་བཅོམ་ལྡན་འདས་ལ་མཆོག་ཏུ་གུས་པ་སྐྱེས་ཤིང་ཉེ་བར་རྟོག་པས་གཅེས་པར་བྱེད་པར་གྱུར་ཏོ། ། དེའི་ནང་ན་ཀླུ་གཞན་མིག་མེད་པ་ལོང་བ་འབྲས་བུ་ཉམ་ཆུང་བ་ཞེས་བྱ་བ་ཞིག་ཡོད་དེ།

དེས་གསང་བསྟོད་ནས་འོ་དོད་བོས་ཏེ་ གསོལ་པ། སེམས་ཅན་རྣམས་ལ་ཐུགས་བརྩེ་བདག་ཅག་ཡོངས་སུ་བསྐྱབ་པར་གསོལ། ། ཡུན་རིང་བདག་གི་ལུས་ལ་སྡུག་བསྔལ་ཚོར་བ་རབ་མི་བཟད། ། སྲིན་བུ་སྦལ་པ་སྐྱེ་བོ་སྲོག་ཆགས་སྣ་ཚོགས་འཚལ་བར་བགྱིད། ། བཟའ་བ་བཏུང་བ་མ་མཆིས་ ཆབ་ཚན་ནང་ན་བདག་གནས་ལགས། བཅོམ་ལྡན་འདས་ཀྱིས་བཀའ་སྩལ་པ། འཁོར་བ་འཇིག་རྒྱལ་བསྟན་པ་ལ། ། སྔོན་ནི་དགེ་སྦྱོང་ཁྱོད་གྱུར་ཏོ། ། མཁས་ཤིང་གཙང་སྦྲ་སྤྱོད་ལམ་ལྡན། ། དབེན་པ་དག་ཏུའང་སྡིག་པ་བྱེད། ། ལྷན་ཅིག་གནས་པ་དག་ ཀྱང་མང་། ། ཁྱོད་བདག་སྟོན་པ་འདྲ་བར་གྱུར། ། དགྲ་བཅོམ་རྫུ་འཕྲུལ་ཆེན་པོ་ཡང་། ། ཁྱོད་ལ་སློབ་མ་རྣམས་ཀྱིས་བརྗོད། ། རྙེད་དང་བཀུར་སྟི་བྱུང་བ་ནི། ། ཁྱོད་གཅིག་བུ་ཡིས་ལོངས་སྤྱད་ཅིང་། ། ཁྱོད་ཀྱིས་དགེ་སློང་དེས་པ་མཐོང་། ། དེ་དག་ལ་ནི་མི་སྙན་བརྗོད། ། ལྷན་ཅིག་གནས་དེ་མི་དགར་གནས། ། ཁྱོད་ནི་ཚེ་རབས་སྟོང་དག་ཏུ། ། ངེད་ཀྱི་ཟས་སུ་གྱུར་ཅིག་ཅེས། ། དེ་ལྟ་བུ་ཡི་སེམས་བསྐྱེད་དོ། ། ལས་ཀྱི་རྣམ་པར་སྨིན་པ་དེས། ། འདིར་ཡང་ཁྱོད་ནི་ལག་འགྲོར་སྐྱེས། ། ཁྱོད་རང་གི་ཡང་ལྷན་ཅིག་གནས། ། ཕྱི་ཕྱིར་ཟ་ བར་བྱེད་པ་ཡིན། །

ཆུ་ཚན་ནང་ན་གནས་པ་དང་། ། ལོང་བར་དེ་ཡིས་གྱུར་པ་ཡིན། ། ཀུན་ཏུ་འབར་བའི་ལྕགས་དང་ཟངས། ། ཕྱིས་ཀྱང་དམྱལ་བར་ཟ་བར་འགྱུར། ། སྟོབས་མེད་ཡིད་ནི་མི་དགའ་བས། ། ཀླུ་དབང་ཀུན་གྱི་ནང་ན་ངུ་། ། ཉེས་པ་སོ་སོར་བཤགས་ བྱས་ན། ། སྡུག་བསྔལ་རྣམས་ལས་ཡོངས་སུ་གྲོལ། ། དེ་ནས་བཅོམ་ལྡན་གསེར་འདྲ་བའི། ། ཕྱག་གི་མཐིལ་གྱི་དཀྱིལ་འཁོར་རེག ། སྤྱོད་པར་དཀའ་བ་དགོངས་མཛད་ནས། ། སྟོན་པས་འདི་སྐད་བཀའ་སྩལ་ཏོ། ། རྒྱལ་པོ་མིག་{བཟངས་,བཟང་}ང་བྱུང་སྟེ། ། སྔོན་ཚེ་ བདེན་པ་གང་གིས་ངས། ། བྲམ་ཟེ་ལོང་བའི་དོན་དུ་ནི། ། མིག་དག་གཉིས་ཀ་ཕྱུང་བར་གྱུར། ། བདེན་པའི་ཚིག་དེ་ཁོ་ན་ཡིས། ། ཁྱོད་ཀྱིས་དྲི་མེད་མིག་ཐོབ་ཤོག ། ང་ཡི་ལེགས་པར་སྤྱོད་པས་ཁྱོད། ། སྔོན་གྱི་ལས་དེ་བྱང་བར་ཤོག ། ཏདྱ་ཐཱ། ཙཀྵུ་ཁ་བ། ར་ ས་ན་ཁ་བ། ཀརྨ་ཁ་བ། ཨ་ནན་ཛ་ན། བི་ར་ཛ། བ་ར་ཨན་ཏ། ཛྙཱ་མ། ནི་ས་ར་ཎ་ཏྲོ་ཡ། ཨ་ཧེ་ཙན་དྲ་ཌ་ནེ་ཀྲི་མི་ཤུད་དྷེ། ཕ་ལ་ཤུད་དྷེ། ཨ་ཛེ་ཏ་ཛེ། ཏ་ལེ་ཏན་ཏ་ལེ། བ་སེ་དྷ་ས་ཀེ། བ་ས་ཏེ། རཱུ་ར་ཏི། མ་ཧཱ་རཱུ་ར་བི། ཏྲི་རད་ན་བྲ་ཏེ་སྭཱ་ཧཱ།

བཅོམ་ལྡན་ འདས་ཀྱིས་བདེན་པའི་ཚིག་དེ་བཤད་པ་ན་ཀླུ་འབྲས་བུ་ཉམ་ཆུང་བའི་མིག་ཡོངས་སུ་དག་པར་གྱུར་ཏོ། ། ཀླུ་གཞན་སྟོང་ཕྲག་ལྔ་བཅུ་རྩ་གསུམ་གྱི་མིག་ཀྱང་ཡོངས་སུ་དག་པར་གྱུར་ཏོ། ། གཞན་གནོད་སྦྱིན་དང་། གྲུལ་བུམ་དང་། {ཡི་དགས་,ཡི་དྭགས་}དང་། ཤ་ཟ་ དང་། མི་ཁྲག་ཁྲིག་ཕྲག་བརྒྱད་ཅུ་རྩ་བཞི་ནི་སྔོན་གྱི་ལས་ཀྱི་སྒྲིབ་པ་ཟད་ཅིང་མིག་ཡོངས་སུ་དག་པར་གྱུར་ཏོ། ། དེ་ནས་ལྷའི་བུ་མཚམས་{བཟངས་,བཟང་}ཐལ་མོ་རབ་ཏུ་སྦྱར་བ་བྱས་ནས་སྨྲས་པ། འཇིག་རྟེན་འདྲེན་པ་རྣམས་ཀྱི་སྟོབས་ལ་ལྟོས། ། རབ་ཏུ་ལམ་མེད་ རྣམས་ལ་མིག་ཀྱང་བྱིན། ། གལ་ཏེ་སྟོན་པ་འཇིག་རྟེན་མི་འབྱུང་ན། ། སུ་ཡང་འགྲོ་བར་ཤའི་མིག་ཕྱིས་མི་འཐོབ། ། དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་ཤེས་ཀཽ་ཌི་ནྱ་ལ་བཀའ་སྩལ་པ། ཀཽ་ཌི་ནྱ་ཁྱོད་ཀྱིས་གསང་སྔགས་ཆེན་པོའི་ གཞིའི་གཟུངས་སྔགས་མིག་སྒྲུབ་པ་འདི་ཟུང་ཤིག ། ད་ལྟར་དང་མ་འོངས་པའི་དུས་ན་སུ་ལ་ལ་སེམས་ཅན་རྣམས་ཀྱི་སྔོན་གྱི་ལས་ཀྱི་ལྷག་མ་དང་། ཁམས་ཀུན་ཏུ་འཁྲུགས་པ་དང་། གསང་སྔགས་དང་། སྨན་དང་། དུག་གི་སྦྱོར་བས་ལོང་བར་འགྱུར་བ་དང་།

{ཆུང་ཟད་,ཅུང་ཟད་} མཐོང་བར་ཡང་འགྱུར་བ་དེས་མིག་སྒྲུབ་པའི་གཟུངས་སྔགས་འདི་རང་གིས་བཀླག་པར་བྱའོ། ། རང་གི་ལས་སོ་སོར་བཤགས་པར་བྱའོ། ། དེས་སེམས་ཅན་ཐམས་ཅད་ལ་བྱམས་པའི་སེམས་ཀྱིས་སངས་རྒྱས་རྗེས་སུ་དྲན་པ་བསྒོམ་ཞིང་ལས་གཞན་མི་བྱེད་པར་ཞག་ བདུན་ཕྲག་བདུན་དུ་རང་གི་མིག་ལ་བྱབས་ན་མིག་ཡོངས་སུ་དག་པར་འགྱུར་རོ། ། ཡང་སེམས་ཅན་གང་དག་མཚམས་མེད་པའི་ལས་ལྷག་མ་ལུས་པས་ལོང་བར་གྱུར་ཅིང་དམ་པའི་ཆོས་སྤོང་བའི་ལྷག་མ་ལུས་པ་དང་། འཕགས་པ་ལ་སྐུར་པ་འདེབས་པའི་ལྷག་མ་ལུས་ པ་དང་། ཆོས་ཀྱི་སྦྱིན་པའི་སྒྲིབ་པའི་ལྷག་མ་ལུས་པ་དང་། གླེགས་བམ་དུ་བྲིས་པ་རྣམ་པར་འཇིག་པའི་ལྷག་མ་ལུས་པ་དང་། གཞན་གྱི་མིག་རྣམ་པར་འཇིག་པའི་ལས་ཀྱི་ལྷག་མས་ལོང་བར་གྱུར་པ་དེ་དག་གིས་གཟུངས་སྔགས་འདི་ཡི་གེར་འདྲིར་བཅུག་སྟེ། ཡང་ དང་ཡང་དུ་ཀློག་ཏུ་གཞུག་གོ། ། ལས་ཀྱི་སྒྲིབ་པ་བཤགས་པར་བྱའོ། ། གཞན་ཡང་རྒྱ་མཚོའི་ལྦུ་བ་དང་། ཤིང་མངར་དང་། སྨན་ཀ་ཙ་དང་། འབྲས་བུ་གསུམ་དང་།

རུས་སྦལ་གྱི་སྙིང་རྙིང་པ་སྦྲང་རྩི་དང་ལྷན་ཅིག་བཏག་ཅིང་བཙོས་ལ་གསང་སྔགས་འདི་དག་ལན་ སྟོང་རྩ་བརྒྱད་མངོན་པར་བརྗོད་ཅིང་མིག་གི་ཕྱི་རོལ་དུ་བསྐུ་བར་བྱའོ། ། ཞག་བདུན་ཕྲག་བདུན་དུ་ལས་གཞན་མི་བྱེད་པར་སངས་རྒྱས་རྗེས་སུ་དྲན་པ་བསྒོམ་ཞིང་སངས་རྒྱས་ཀྱི་སྐུ་གཟུགས་ཀྱང་བྱས་ན་དེའི་ལས་ཀྱི་སྒྲིབ་པ་མ་ལུས་པར་བྱང་བར་འགྱུར་ཞིང་དེའི་མིག་ཡོངས་ སུ་དག་པར་འགྱུར་རོ། ། གཞན་ཡང་དགེ་སློང་རྣམས་ཀྱི་གནས་དགེ་འདུན་གྱི་ཀུན་དགའ་ར་བ་བྱས་ན་ཡང་དེའི་ལས་ཀྱི་སྒྲིབ་པར་བྱང་བར་འགྱུར་རོ། ། ཕྱིས་ཀྱང་འཁོར་བར་མིག་མ་ཚང་བར་མི་འགྱུར་རོ། ། དེ་ནས་ཐམས་ཅད་དང་ལྡན་པའི་ཀླུའི་འཁོར་དེས་འདི་སྐད་ཅེས་ གསོལ་ཏོ། ། ཐུགས་རྗེ་ཆེན་པོ་དང་ལྡན་པ་དུས་གསུམ་གྱི་སེམས་ཅན་ཐམས་ཅད་ལ་ཕན་པར་མཛད་པ་ནད་ལས་རབ་ཏུ་ཐར་བར་མཛད་པ་ལ་ཕྱག་འཚལ་ལོ། ། དེ་ནས་དེའི་ཚེ་ཀླུ་ཚོན་རྩི་སྔོན་པོས་གསང་བསྟོད་དེ་འདི་སྐད་ཅེས་གསོལ་ཏོ། ། སྡིག་པ་ཐམས་ཅད་ སྦྱོང་བ་ཁྱོད། ། ཁྱོད་ནི་དཀའ་མཛད་དཔལ་ཀུན་ལྡན། ། ཁྱོད་ཀྱིས་ལས་ཀྱང་རབ་ཏུ་མཁྱེན། ། སྲོག་ཆགས་ཀུན་གྱི་རྒྱལ་པོ་ཁྱོད། ། བདག་ནི་ཆུ་དང་རྣམ་བྲལ་ཞིང་། །

ཚ་བའི་ཀླུང་གིས་ཀུན་གདུངས་པའི། ། འབྲོག་དགོན་པ་ན་གནས་པ་ལགས། ། དྲི་མི་ཞིམ་པའི་ གནས་ན་གནས། ། ལོ་ནི་བྱེ་བ་ཕྲག་སྟོང་དུ། ། ཞག་གཅིག་བདག་ལ་བདེ་མ་མཆིས། ། རྟག་པར་འཁོར་དང་ལྷན་ཅིག་ཏུ། ། བདག་ནི་གཞན་གྱིས་བཟའ་བ་ལགས། ། བཅོམ་ལྡན་འདས་ཀྱིས་བཀའ་སྩལ་པ། ། སེམས་ཅན་གང་དག་སྡིག་བྱས་ནས། ། ཕྱིས་ཀྱང་བདག་ ཉིད་བསོད་ནམས་སྒྲུབ། ། ལུས་ཀྱིས་གཎྜཱི་བརྡུངས་ནས་སུ། ། དགེ་སློང་དགེ་འདུན་ཚིམ་བྱེད་ནའང་། ། ལས་ཀྱི་ལྷག་མ་དེ་ཡིས་སུ། ། གང་དང་གང་དུ་སྐྱེས་པར་ནི། ། སྡུག་བསྔལ་ཅི་འདྲ་འབྱུང་འགྱུར་ཞིང་། ། བཟའ་བཏུང་དག་དང་ཡང་དག་ལྡན། ། ཡང་ན་ཀླུ་ཡི་སྐྱེ་ གནས་སུ། ། ལུས་ཀྱིས་སྐྱེ་བར་འགྱུར་བ་ཡིན། ། དེ་ཡི་མགོ་ཡི་ཀླད་པ་དེར། ། ནོར་བུའི་རྒྱལ་པོ་འབྱུང་བར་འགྱུར། ། ཀུན་ཏུ་ཆུ་འབྱུང་ཞེས་བྱ་བ། ། ཆུ་སྦྱིན་བྱེད་པའི་ཀླུར་འགྱུར་རོ། ། གང་ན་ཀླུ་ནི་གནས་བྱེད་པ། ། དེ་ནས་ཆུ་ནི་འབབ་པར་འགྱུར། ། ས་འམ་ནམ་ མཁའ་ལ་ཡང་རུང་། ། གང་དང་གང་དུ་འགྲོ་བ་དེར། ། སེམས་ནི་བསྐྱེད་མ་ཐག་ཏུ་ཡང་། ། ཆུ་ནི་འབྱུང་བར་འགྱུར་བ་ཡིན། ། ཡང་ན་སེམས་ཅན་གང་དག་གིས། ། མི་ཡི་དངོས་པོ་ཐོབ་ནས་སུ། །

སྡིག་པ་རྣམ་པ་སྣ་ཚོགས་བྱས། ། དགེ་འདུན་རིམ་གྲོ་མི་བྱེད་ན། ། དེ་དག་སྡུག་བསྔལ་སྣ་ཚོགས་ནི། ། ངན་སོང་གསུམ་དུ་མྱོང་ནས་ཀྱང་། ། དེ་ཉིད་ཀླུ་ཡི་སྐྱེ་གནས་སུ། ། སྐྱེ་བ་ཐོབ་པར་འགྱུར་བ་ཡིན། ། དེ་ལས་ཀུན་ཏུ་ཆུ་མི་འབྱུང་། ། མགོ་ལ་ནོར་བུ་རིན་ཆེན་མེད། ། སྟོང་པ་སྐོམ་པའི་གནས་དག་ཏུ། ། ཆུ་ མེད་པར་ནི་གནས་པར་འགྱུར། ། སྔོན་འདས་དུས་ན་ཁྱོད་ཀྱིས་ནི། ། རྒྱལ་བ་སྐར་རྒྱལ་བསྟན་པ་ལ། ། དགེ་སློང་དགོན་པ་པར་གྱུར་ཏེ། ། ཕྲག་དོག་སེར་སྣས་གང་བ་ཡིན། ། དགེ་སློང་བློ་བུར་འོངས་མཐོང་ནས། ། ཁྲོ་གཉེར་ཅན་གྱི་བཞིན་བྱས་ནས། ། དེ་དག་ ལ་ནི་སྦྱིན་གཏོང་བྱེད། ། དེ་ལ་ཡང་ནི་མངོན་སུམ་གཤེ། ། དེར་ནི་གང་དག་ཆུར་ཡང་ནི། ། མྱུར་དུ་མི་གཙང་བ་ཡིས་བཀང་། ། འཆག་ས་གནས་ཁང་དག་གི་གནས། ། དྲི་ང་བ་ཡིས་བཀང་བར་གྱུར། ། དགེ་སློང་དེས་པ་འགྲོ་བ་ན། ། བརྒྱད་བཀག་གིས་ ནི་གཤེ་བར་གྱུར། ། དགེ་སློང་དེས་པ་གཞན་དག་ཀྱང་། ། རྒྱང་རིང་བར་ནི་ཡོངས་སུ་སྤངས། ། དེ་ཕྱིར་ཕྲག་དོག་སེར་སྣའི་རྒྱུས། ། མ་ཆོད་པར་ནི་ཁྱོད་གྱུར་ནས། ། དགེ་སྦྱོང་སུ་ཞིག་ལ་ལ་མཐོང་། ། མྱུར་དུ་ཁྲོས་ནས་གཤེ་བར་འགྱུར། །

སྦྱིན་པ་པོ་ལ་ཁྲོ་ བས་གཤེ། ། ངོ་ཚ་ཁྲེལ་ཡོད་རྣམ་པར་སྤངས། ། ལས་ཀྱི་རྣམ་པར་སྨིན་པ་དེས། ། སེམས་ཅན་དམྱལ་བར་སོ་སོར་སྐྱེས། ། ལུས་ནི་བྱེ་བས་སེམས་དམྱལ་དུ། ། སྡུག་བསྔལ་མང་པོ་ཉམས་སུ་མྱོང་། ། {ཡི་དགས་,ཡི་དྭགས་}རྣམས་སུ་དུས་རིང་པོར། ། སྡུག་བསྔལ་ རབ་ཏུ་མི་བཟད་མྱོང་། ། ཁྱོད་ནི་ཀླུ་ཡི་སྐྱེ་གནས་སུ། ། སྐྱེས་ནས་ཤིན་ཏུ་སྡུག་བསྔལ་གྱུར། ། སྟོང་པ་འབྲོག་དགོན་རྫོང་རྣམས་སུ། ། ཆུ་དང་བྲལ་བར་གནས་པ་ཡིན། ། སེམས་ཅན་དམྱལ་བ་རྣམས་སུ་ཁྱོད། ། སྡུག་བསྔལ་ཚོར་བ་ཕྱི་ཕྱིར་མྱོང་། ། ཤིན་ཏུ་ ཡུན་རིང་{ཡི་དགས་,ཡི་དྭགས་}དང་། ། དུད་འགྲོར་སྡུག་བསྔལ་ཚོར་བ་མྱོང་། ། སུ་ཞིག་ཐ་མའི་དུས་ཚེ་གནོད་སེམས་བྱུང་། ། རྟག་ཏུ་ཕྲག་དོག་སེར་སྣ་ཁྲོས་པ་ལ། ། བསམ་གཏན་མི་སྐྱོབ་སངས་རྒྱས་མཆོད་པ་མིན། ། ཚུལ་ཁྲིམས་མི་སྐྱོབ་དགོན་པར་གནས་པ་མིན། ། ཡང་དེའི་ཚེ་ཀླུའི་འཁོར་དེའི་ནང་ན་ཀླུ་{ཡི་དགས་,ཡི་དྭགས་}ལྟ་བུ་བྱེ་བ་ཕྲག་ཉི་ཤུ་རྩ་དྲུག་སྔོན་གྱི་ཚེ་རབས་རྗེས་སུ་དྲན་པར་གྱུར་ཏེ། སྐད་པོ་ཆེར་རབ་ཏུ་ངུ་ཞིང་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་ཅག་ཡོངས་སུ་བསྐྱབ་ཏུ་གསོལ།

བདེ་བར་གཤེགས་པ་བདག་ཅག་ ཡོངས་སུ་བསྐྱབ་ཏུ་གསོལ། སྔོན་གྱི་རྒྱལ་བའི་བསྟན་པ་ལ་བདག་ཅག་གིས་འདྲ་མཚུངས་པར་ལས་ཀྱི་སྒྲིབ་པ་དེ་ལྟ་བུ་འཕངས་ལགས་སོ། ། དེ་ལྟར་ཡུན་རིང་པོར་ངན་སོང་གསུམ་དུ་སྡུག་བསྔལ་མྱོང་ལགས་སོ། ། ད་ལྟར་ཡང་ཀླུ་{ཡི་དགས་,ཡི་དྭགས་}ལྟ་བུ་རྣམས་ཀྱི་ ནང་དུ་རྟག་ཏུ་སྡུག་བསྔལ་དེ་ལྟ་བུས་གཟིར་ལགས་ཏེ། དཔེར་ན་ཀླུ་{ཡི་དགས་,ཡི་དྭགས་}ལྟ་བུ་ཚོན་རྩི་སྔོན་པོ་བཞིན་ནོ། ། བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱིས་ཆུ་ལོང་ལ་དེ་བཞིན་གཤེགས་པའི་ཞབས་ཀྱི་དྲུང་དུ་ཆག་ཆག་ཐོབ་ཤིག་དང་། དེས་ནི་ཁྱེད་ཀྱི་སྡུག་བསྔལ་ ཐམས་ཅད་ཡོངས་སུ་ཟད་པར་འགྱུར་རོ། ། དེ་ནས་ཀླུ་{ཡི་དགས་,ཡི་དྭགས་}ལྟ་བུ་དེ་དག་ཐམས་ཅད་ཀྱིས་ལག་པ་གཉིས་ཀྱིས་ཆུ་བླངས་པ་དང་། ལག་ན་ཆུ་འདུག་པ་དེ་རབ་ཏུ་འབར་རོ། ། དེ་ནས་མེའི་ཕུང་པོ་ཤིང་ཏ་ལ་དྲུག་སྲིད་དུ་འཕགས་ཏེ། ལན་བདུན་གྱི་བར་དུ་དེ་བཞིན་ ནོ། ། ཀླུའི་ཚོགས་དེ་མཆོག་ཏུ་ཡིད་མི་དགའ་ནས་མཆི་མ་དག་ཕྱུང་ངོ་། ། ཐམས་ཅད་དང་ལྡན་པའི་འཁོར་དེ་ཡང་ཡིད་ཀུན་ཏུ་མི་དགའ་ནས་དེ་བཞིན་ནོ། ། བཅོམ་ལྡན་འདས་ཀྱིས་བཀའ་སྩལ་པ། ། ཅི་འདྲ་བ་ཡི་ལས་བྱས་པ། །

དེ་འདྲ་བ་ཡི་འབྲས་བུ་འཐོབ། ། དགེ་བ་ཡིན་ན་བཟང་པོ་སྟེ། ། སྡིག་པ་བྱེད་པའང་སྡིག་ཏོའོ། ། དེ་ནས་{ཡི་དགས་,ཡི་དྭགས་}ལྟ་བུའི་ཀླུ། ། ཁྱེད་ཀུན་འདི་སྐད་ཚིག་སྨྲོས་ཤིག ། བདེན་པ་གང་གིས་སྟོན་པ་ནི། ། སེམས་ཅན་ཀུན་ལ་ཐུགས་སྙོམས་པ། ། བདེན་པའི་ཚིག་དེ་ཁོ་ན་ཡིས། ། ངེད་ཀྱི་ཆུ་ ནི་མ་འབར་ཅིག ། ཀླུ་ཐམས་ཅད་ཀྱིས་འདི་སྐད་ཅེས་སྨྲས་སོ། ། ལན་བརྒྱད་པ་ལ་ལག་པ་གཉིས་ཀྱིས་ཆུ་བླངས་ཏེ་བཅོམ་ལྡན་འདས་ཀྱི་ཞབས་གཉིས་ལ་གཏོར་ནས་ཉེས་པ་ལ་ཉེས་པར་སོ་སོར་བཤགས་སོ། ། བཅོམ་ལྡན་འདས་ཀྱིས་བཀའ་སྩལ་པ། སྡིག་པའི་ ལས་ཀྱི་སྒྲིབ་པ་ཡི། ། ལྷག་མ་ལུས་པ་ཡོངས་སུ་ཟད། ། བྱམས་པའི་ཚེ་ན་ཁྱེད་ཅག་ནི། ། མི་ཡི་སྲིད་པ་ཐོབ་པར་འགྱུར། ། བྱམས་པ་ཡི་ནི་བསྟན་པ་ལ། ། མྱུར་དུ་རབ་ཏུ་འབྱུང་བ་ཐོབ། ། རྣལ་འབྱོར་ལ་ནི་མངོན་བརྩོན་དང་། ། མྱུར་ དུ་དགྲ་བཅོམ་ཐོབ་པར་འགྱུར། ། ཡང་དེའི་ཚེ་བཅོམ་ལྡན་འདས་ཀྱི་མཐུས་ཀླུའི་ཚོགས་དེ་ཇི་ལྟར་ལྷགས་པ་བཞིན་དེ་དག་ཐམས་ཅད་ཀྱིས་སྔོན་གྱི་ཚེ་རབས་དང་། བདག་གི་ལས་དང་། འགྲོ་བ་དང་། སྐྱེ་བ་རྗེས་སུ་དྲན་ཏེ།

འཁོར་དེའི་ནང་ནས་ཀླུ་བརྒྱ་སྟོང་ཕྲག་ མང་པོ་རང་གིས་ཉེས་པར་བྱས་པའི་སྡིག་པའི་ལས་ཀྱིས་རབ་ཏུ་དུས་ནས་ཁ་ཅིག་གིས་འདི་སྐད་ཅེས་གསོལ་ཏོ། ། སྔོན་གྱི་དེ་བཞིན་གཤེགས་པ་རྣམས་ཀྱི་བསྟན་པ་ལ་བདག་ཅག་ཁྱིམ་ན་གནས་པར་གྱུར་ཏེ། ཉེ་དུ་དང་འགྲོགས་པའི་རྐྱེན་དང་། ཆོས་མཉན་ པའི་རྐྱེན་གྱིས་དགེ་སློང་རྣམས་དང་ལྷན་ཅིག་ཏུ་དགེ་འདུན་གྱི་མངོན་དུ་གྱུར་པ་བསྔོས་པའི་མེ་ཏོག་དང་། འབྲས་བུ་དང་། ཁུ་བ་དང་། བཟའ་བ་དང་། བཏུང་བ་ལོངས་སྤྱད་ལགས་སོ་ཞེས་བྱ་བ་ནས་ཁ་ཅིག་གིས་གསོལ་པ། བདག་ཅག་གིས་ཕྱོགས་བཞི་པ་ ལ་བསྔོས་པ་ལོངས་སྤྱད་ལགས་སོ་ཞེས་བྱ་བའི་བར་དུའོ། ། ཁ་ཅིག་གིས་འདི་སྐད་ཅེས་གསོལ་ཏོ། ། བདག་ཅག་གིས་རང་གིས་བསྔོས་པ་ལོངས་སྤྱོད་ལགས་སོ་ཞེས་བྱ་བའི་བར་དུའོ། ། ཁ་ཅིག་གིས་གསོལ་པ། བདག་ཅག་དེ་བཞིན་གཤེགས་པ་རྣམ་པར་ གཟིགས་ཀྱི་ཞེས་བྱ་བའི་བར་དང་། བདག་ཅག་གཙུག་ཏོར་ཅན་གྱི་ཞེས་བྱ་བའི་བར་དང་། བདག་ཅག་འཁོར་བ་འཇིག་གི་ཞེས་བྱ་བའི་བར་དང་། བདག་ཅག་གསེར་ཐུབ་ཀྱི་ཞེས་བྱ་བའི་བར་དུའོ། ། ཀླུ་ཁ་ཅིག་གིས་འདི་སྐད་ཅེས་གསོལ་ཏོ། ། དེ་བཞིན་གཤེགས་ པ་འོད་སྲུང་གི་བསྟན་པ་ལ་བདག་ཅག་ཁྱིམ་ན་གནས་པར་གྱུར་ཏེ།

ཉེ་དུ་དང་འགྲོགས་པའི་རྐྱེན་དང་། ཆོས་མཉན་པའི་རྐྱེན་གྱིས་དེ་བཞིན་དུ་བསྔོས་པའི་དགེ་འདུན་གྱི་མེ་ཏོག་དང་། འབྲས་བུ་དང་། ཁུ་བ་དང་། བཟའ་བ་དང་། བཏུང་བ་དགེ་སློང་རྣམས་ ལ་སྩལ་པ་དེ་བདག་ཅག་གིས་ལོངས་སྤྱད་ལགས་སོ། ། སྡིག་པའི་ལས་དེས་ཀྱང་སེམས་ཅན་དམྱལ་བ་རྣམས་ཀྱི་ནང་དུ་སྡུག་བསྔལ་མི་བཟད་པ་ཆེན་པོ་རྣམ་པ་སྣ་ཚོགས་རབ་ཏུ་མི་བཟད་པ་མང་པོ་ཡང་དང་ཡང་ཉམས་སུ་མྱོང་ལགས་སོ། ། དུད་འགྲོ་དང་ཡི་ དགས་རྣམས་ཀྱི་ནང་དུ་དུས་ཡུན་རིང་པོར་རྟག་ཏུ་སྡུག་བསྔལ་གྱིས་གཟིར་ལགས་སོ། ། ལས་ཀྱི་ལྷག་མ་དེས་བདག་ཅག་ཀླུའི་སྐྱེ་གནས་དམན་པ་འདིར་སྐྱེས་ནས་ཆབ་བསྐོལ་བ་ཀུན་ཏུ་ཚ་བའི་ནང་དུ་བཙོས་ལགས་སོ། ། བྱེ་མ་ཀུན་ཏུ་ཚ་བའི་ནང་དུ་བསྲེགས་ ལགས་སོ། ། བདག་ཅག་གི་ཁའི་སྒོར་ཁ་ཟས་སྩལ་བ་ཡང་ལྕགས་ཀྱི་ཐུ་ལུམ་དུ་གྱུར་ལགས་སོ། ། དེ་བཞིན་དུ་ཁར་བཏུང་བ་སྩལ་བ་ཡང་ལྕགས་དང་ཟངས་སུ་གྱུར་ལགས་སོ། ། གང་དང་གང་དུ་མཆིས་པ་ཐམས་ཅད་དུ་སྡུག་བསྔལ་གྱི་ཚོར་བ་དེ་ལྟ་བུ་མྱོང་ ལགས་ན་བདག་ཅག་ཡོངས་སུ་བསྐྱབ་ཏུ་གསོལ། བཅོམ་ལྡན་འདས་ཀྱིས་བཀའ་སྩལ་པ།

ཀྱེ་ལག་འགྲོ་དག་ཁྱེད་ཀྱིས་དགེ་འདུན་གྱི་ལོངས་སྤྱོད་པ་དེ་ནི་འོས་པ་མ་ཡིན་ཏེ། མཚམས་མེད་པ་དང་ཉེ་བ་ཡིན་ནོ། ། རྣམ་པར་མ་སྨིན་པར་གང་གིས་ཀྱང་མྱུར་ དུ་བཤགས་པར་མི་ནུས་སོ། ། ཀྱེ་ལག་འགྲོ་དག་དེ་ལྟ་ཡིན་ཡང་ཇི་སྲིད་འཚོའི་བར་དུ་སྐྱབས་གསུམ་དུ་འགྲོ་བ་ལ་འཁོད་ཅིག་དང་། དེ་ལྟ་ན་ཁྱེད་ལ་ཕན་པ་དང་བདེ་བར་འགྱུར་རོ། ། རྒྱུ་དེས་དེ་བཞིན་གཤེགས་པས་ཁྱེད་འདོད་པ་བཞིན་འཁོར་བར་གཞོག་པར་མཛད་ དོ། ། དེ་དག་ཐམས་ཅད་གསུམ་ལ་སྐྱབས་སུ་འགྲོ་བ་ལ་ཡང་བཀོད་པར་གྱུར་ཏོ། ། ཡང་འཁོར་དེའི་ནང་ན་ཀླུ་མོ་ལོང་མ་ཞིག་ཡོད་དེ། དེའི་ཁ་སྲིན་བུས་གང་ཞིང་གཅིན་རུལ་པ་ལྟ་བུའི་རྣག་དྲི་ང་བ་ཟག་གོ། ། སྨད་ཀྱི་མཚན་མ་ལ་ཡང་དེ་བཞིན་ནོ། ། དེའི་ལུས་ ཐམས་ཅད་རུལ་ཅིང་རྣག་འཛག་པ་ཕོལ་མིག་དང་སྲིན་བུས་གང་བ་ལ་ཤ་སྦྲང་དང་། སྦྲང་བུ་མཆུ་{རིངས་,རིང་}དང་། སྦྲང་བུ་གདུག་པ་རྣམས་ཀྱིས་ཟ་བར་བྱེད་དོ། ། དེའི་ཚེ་བཅོམ་ལྡན་འདས་ཀྱིས་ཐུགས་རྗེ་ཆེན་པོས་གཟིགས་ཏེ། བཀའ་སྩལ་པ། སྲིང་མོ་ཁྱོད་ཀྱིས་ལུས་ ལ་སྡིག་པའི་ལས་ནི་ཅི་བྱས། ཇི་ལྟ་བུ་ཞིག ། དེས་གསོལ་པ། བཙུན་པ་བཅོམ་ལྡན་འདས་བདག་གི་ཚོར་བ་སྡུག་བསྔལ་ལགས་སོ། །

བཙུན་པ་བཅོམ་ལྡན་འདས་བདག་གི་ཚོར་བ་ཚ་བ་ལགས་ཏེ། གང་ནས་ཀླུའི་སྐྱེ་གནས་དམན་པ་འདིར་སྐྱེས་ པའི་དགུང་ལོ་སྟོང་ཕྲག་སུམ་ཅུ་རྩ་དྲུག་བདག་གིས་མངོན་པར་འཚལ་ལགས་སོ། ། བདག་གི་སྡུག་བསྔལ་གྱི་ཚོར་བ་དེ་ལྟ་བུ་ནི་གདུགས་ཞག་གཅིག་ཀྱང་རྒྱུན་མ་ཆད་ལགས་སོ། ། བཀའ་སྩལ་པ། སྔོན་གྱི་ལས་ཅི་ཞིག་བྱས། དེས་གསོལ་པ། འདི་ནས་ བསྐལ་པ་དགུ་བཅུ་རྩ་གཅིག་པ་ལ་རྒྱལ་བ་རྣམ་པར་གཟིགས་ཀྱི་བསྟན་པ་ལ་མིའི་རྒྱུད་ཀྱི་བུད་མེད་དུ་གྱུར་ལགས་ཏེ། བདག་དེར་འདོད་པའི་དྲེགས་པས་མྱོས་ནས་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་བ་དང་ལྷན་ཅིག་ཏུ་དགེ་འདུན་གྱི་གཙུག་ལག་ཁང་ན་དགེ་འདུན་གྱི་མལ་ཆའི་སྟེང་ དུ་ཡང་དང་ཡང་འཁྲིག་པ་དང་ལྡན་པའི་ཆོས་འདོད་པ་དག་སོ་སོ་ཡང་དག་པར་མྱོང་ལགས་ཏེ། ནོར་གྱི་སླད་དུ་མ་སྐྲག་ལགས་སོ། ། བཅོམ་ལྡན་འདས་དེ་ཚུན་ཆད་བདག་རྟག་ཏུ་ལྷ་དང་མིའི་རྙེད་པ་དང་བྲལ་ལགས་སོ། ། རྟག་ཏུ་ངན་སོང་གསུམ་གྱི་ཚོར་བ་མི་བཟད་པས་རབ་ཏུ་གཟིར་ ལགས་སོ། ། བཀའ་སྩལ་པ། སྲིང་མོ་གང་གི་ཚེ་འདིར་བསྐལ་པ་ཆེན་པོ་འཇིག་པར་གྱུར་པ་དེའི་ཚེ་ཁྱོད་གང་དུ་སོང་། དེས་གསོལ་པ།

སྔོན་གྱི་ལས་ལ་རྟེན་པའི་རླུང་ཆེན་པོ་དེ་དག་གིས་འཕངས་ནས། འཇིག་རྟེན་གྱི་ཁམས་སྙིགས་མ་ལྔ་དང་ལྡན་པ་གཞན་དག་ཏུ་ འཕངས་ལགས་སོ། ། ཡང་གང་གི་ཚེ་དེར་འཇིག་པར་གྱུར་ནས་དེ་ནས་ཡང་འདིར་འཕངས་ལགས་ན། བཅོམ་ལྡན་འདས་ཐུགས་རྗེ་ཆེན་པོས་བདག་ཡོངས་སུ་བསྐྱབ་ཏུ་གསོལ། བདེ་བར་གཤེགས་པ་བདག་ཡོངས་སུ་བསྐྱབ་ཏུ་གསོལ། དེ་ནས་བཅོམ་ལྡན་འདས་ཀྱི་ ཕྱག་གཉི་གས་རྨ་རྩི་སྤོས་དང་སྦྱར་བའི་ཆུ་བཞེས་ཏེ་བདེན་པ་བརྗོད་པར་མཛད་དོ། ། བདེན་པ་གང་གིས་སྔོན་ཐི་བའི་ཕྱིར་ངའི་ལུས་ཆགས་པ་མེད་པར་ཡོངས་སུ་བཏང་བའི་བདེན་པ་དེས་ཁྱོད་ཀྱི་ནད་དེ་དག་ཞི་བར་གྱུར་ཅིག ། ཀླུ་མོ་དེའི་ཁར་བླུགས་ཤིང་ལུས་ལ་གཏོར་བས་ ནད་ཐམས་ཅད་རབ་ཏུ་ཞི་བར་གྱུར་ཏེ། གསུམ་ལ་སྐྱབས་སུ་ཉེ་བར་གནས་པར་གྱུར་ཏོ། ། ཡང་དེ་ཉིད་ན་ཀླུ་གཞན་ཞིག་ལུས་དྲི་ང་ཞིང་སྲིན་བུས་གང་ལ་སྲིན་བུ་སེར་སྐྱས་གང་ནས་དེ་ལས་རྣག་ཁྲག་ཚ་ཞིང་གོར་གོར་པོ་ཟག་པ། སྨྲ་མི་ནུས་པ། མཆོག་ཏུ་སྐྱོན་དུ་བགྲང་ བ་ཞིག་ཡོད་དོ། ། བཅོམ་ལྡན་འདས་ཀྱིས་ཀླུ་དེ་གཟིགས་ནས་བཀའ་སྩལ་པ། ལག་འགྲོ་ཁྱོད་ཀྱིས་སྔོན་མི་དགེ་བའི་ལས་ཅི་ཞིག་བྱས། ཀླུ་དེས་ཁའི་སྒོ་ཕྱེ་ནས་སྲིན་བུའི་རིགས་དང་།

རྣག་ཁྲག་དང་། མེས་གང་བའི་ཁའི་སྒོ་སྦྱང་བྲིམས་ཏེ་སྨྲ་མ་ནུས་སོ། ། དེ་ ནས་བཅོམ་ལྡན་འདས་ཀྱིས་སྐྱོར་ཆུ་ཞིག་བཞེས་ཏེ་བཀའ་སྩལ་པ། རི་བོང་གྱུར་ཏེ་དྲང་སྲོང་ཕྱིར། ། རང་གིས་མེ་ཡི་ནང་བོར་བ། ། བདེན་པའི་ཚིག་དེ་ཁོ་ན་ཡིས། ། ཀླུ་ནི་སྨྲ་བར་ནུས་པར་ཤོག ། སྐྱོར་ཆུ་དེ་ཀླུའི་ཁར་བླུགས་ནས་དེའི་ཁའི་ནང་དུ་མེ་རབ་ཏུ་ཞི་ཞིང་སྲིན་ བུ་དང་རྣག་ཁྲག་ཁའི་ཕྱི་རོལ་དུ་བྱུང་ངོ་། ། ཀླུ་དེ་ཁ་ཡོངས་སུ་དག་པར་གྱུར་ནས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་རྒྱལ་བ་འོད་སྲུང་གི་བསྟན་པ་ལ་བདག་ཞིང་པར་གྱུར་ལགས་སོ། ། བདག་གིས་བཅོམ་ལྡན་འདས་ཀྱི་ཉན་ཐོས་གཞན་ཞིག་ ལ་སྐྱེད་དུ་སྩོལ་ཅིག་དང་། སྟོན་གྱི་དུས་སུ་ཁྱོད་ལ་དབུལ་ལོ་ཞེས་གསེར་ལྔ་བཅུ་ཞིག་གསོལ་བ་བཏབ་ལགས་སོ། ། དེས་བདག་ལ་འགྲོན་བུ་བརྒྱད་ཅུའི་རིན་བཅུ་ཞིག་སྩལ་ཏེ། ལྔ་བཅུར་མ་སྩལ་ལགས་སོ། ། བདག་གིས་དགེ་སློང་དེ་ལ་ཁྲོ་བས་ཟིལ་གྱིས་ནོན་ནས་ འགྲོན་བུ་བརྒྱད་ཅུའི་རིན་བཅུ་བླངས་ཏེ། དེ་ལ་སླར་ཡང་མ་སྩལ་ལགས་སོ། །

གཞན་ཡང་དུས་གཞན་ཞིག་ན་དགེ་སློང་རྣམས་ཀྱི་ཀུན་དགའ་ར་བ་དེར་བདག་མཆིས་ནས་དེར་དགེ་འདུན་གྱི་མངོན་དུ་གྱུར་པ་བསྔོས་པ་ཨ་མྲའི་འབྲས་བུ་བཅུ་གསུམ་པ་ལོངས་སྤྱད་ལགས་ སོ། ། སུག་ལས་ཀྱི་སྒྲིབ་པའི་ལྷག་མ་དེ་ཁོ་ནས་དེ་ནས་ཤི་འཕོས་ནས་འབྲོག་དགོན་པ་སྐམ་པོ་འདིར་ཉི་ཚེ་བའི་སེམས་ཅན་དམྱལ་བ་རྣམས་ཀྱི་ནང་དུ་སྐྱེས་ཏེ། རྟག་ཏུ་བདག་གི་ལུས་སྲིན་བུ་དག་དང་རྣག་ཁྲག་བརྡུས་པས་གང་ལགས་སོ། ། བཀྲེས་པ་དང་སྐོམ་པས་ ཀུན་ཏུ་གཟིར་ནས་སྡུག་བསྔལ་གྱི་ཚོར་བ་མྱོང་ལགས་སོ། ། ཡང་མི་དགེ་བའི་ལས་ཀྱི་རྒྱུ་དེས་བདག་འདི་ནས་ཤི་འཕོས་ནས་ཡང་སེམས་ཅན་དམྱལ་བ་ཆེན་པོ་རྣམས་ཀྱི་ནང་དུ་སྐྱེས་ལགས་སོ། ། དགེ་སློང་དེ་ཡང་ཁྲོ་བ་དང་སེར་སྣའི་རྒྱུ་དེས་འཆི་ བའི་དུས་བགྱིས་ནས་འདིར་ཀླུ་རྣམས་ཀྱི་ནང་དུ་བདག་གི་མཆན་ཁུང་དུ་སྐྱེས་ཏེ། དུས་རྟག་ཏུ་བདག་ལ་གཡོ་བར་བགྱིད་དོ། ། དེ་རྟག་ཏུ་ཁྲོ་བས་ཟིལ་གྱིས་ནོན་ནས་དབུགས་ཚ་བས་བདག་གི་ལུས་ལ་ཡོངས་སུ་གང་བར་བགྱིད་དོ། ། རྒྱུ་དེས་རྟག་པར་རྒྱུན་ཏུ་བདག་ གི་ལུས་སྲིན་བུ་དག་དང་རྣག་ཁྲག་གིས་གང་ལགས་ན་དེ་བཞིན་གཤེགས་པས་བདག་ཡོངས་སུ་བསྐྱབ་ཏུ་གསོལ།

སྦྲུལ་དགྲ་དང་འདྲ་བ་དེ་ལས་བདག་ཡོངས་སུ་ཐར་བར་མཛད་པར་གསོལ། དེ་ནས་ཡང་བཅོམ་ལྡན་འདས་ཀྱིས་ཕྱག་ཏུ་ཆབ་བཞེས་ཏེ་འདི་ སྐད་ཅེས་བཀའ་སྩལ་ཏོ། ། མུ་གེ་དག་ནི་བྱུང་བའི་ཚེ། ། ང་ནི་འདིར་ཡང་ཉར་གྱུར་ཏེ། ། ཤ་དང་ཁྲག་གིས་ཚིམ་བྱས་པས། ། ཁྱེད་ཅག་གཉི་ག་བདེ་བར་ཤོག ། ཆུ་དེས་ཀླུ་ལ་གཏོར་ནས་དེའི་མཆན་ཁུང་ནས་ཀླུའི་བུ་བྱུང་ངོ་། ། གཉི་གས་འདི་སྐད་ཅེས་གསོལ་ ཏོ། ། ཡུན་ཇི་ཙམ་གྱིས་ངན་སོང་དག་ལས་བདག་ཅག་ཐར་བར་འགྱུར། ། བཅོམ་ལྡན་འདས་ཀྱིས་བཀའ་སྩལ་པ། ཀྱེ་ལག་འགྲོ་དག་གང་ཕྱོགས་བཞིའི་དགེ་འདུན་ནས་དགེ་འདུན་གྱི་མངོན་དུ་གྱུར་པ་བསྔོས་པའི་མེ་ཏོག་དང་། འབྲས་བུ་དང་། འདབ་མ་དང་། བཟའ་བ་དང་། བཏུང་བ་དང་། མལ་ཆ་དང་། རྩི་དང་། ཡོ་བྱད་ཀྱང་རུང་། དགེ་འདུན་ལས་གལ་ཏེ་བདག་གིར་ལོངས་སྤྱད་དམ། གཞན་ལ་བྱིན་ན་སྡིག་པའི་ལས་དེ་རྣམ་པར་སྨིན་ཅིང་སོ་སོ་ཡང་དག་པར་མ་མྱོང་བར་སུས་ཀྱང་མྱུར་དུ་ཟད་པར་བྱ་བར་མི་ནུས་ཏེ་འདི་ ནི་མཚམས་མེད་པ་དང་ཉེ་བ་ཤིན་ཏུ་ལྕི་བ་ཡིན་ནོ། ། ལག་འགྲོ་དག་ཁྱེད་ཚུར་ཤེག ། དཀོན་མཆོག་གསུམ་ལ་སྐྱབས་སུ་དེང་ཤིག་དང་།

དེས་ན་ཁྱེད་ཅག་ཆུ་ལ་གནས་པ་དག་ཏུ་འགྱུར་རོ་ཞེས་བྱ་བ་ནས་དཀོན་མཆོག་གསུམ་ལ་སྐྱབས་སུ་རྣམ་པར་བཀོད་དེ་ཆུ་ལ་གནས་པར་ གྱུར་ཏོ་ཞེས་བྱ་བའི་བར་དུའོ། ། བཅོམ་ལྡན་འདས་ཀྱིས་བཀའ་སྩལ་པ། སྤུ་གྲི་རྣོན་པོ་དག་གིས་སུ། ། རང་གི་ཡན་ལག་གཏུབས་པ་སླའི། ། བསྔོས་ཟིན་པ་ཡི་དངོས་པོ་ནི། ། ཁྱིམ་པ་རྣམས་ལ་སྦྱིན་མི་བྱ། ། མེ་ལྕེ་འབར་བ་ལྟ་བུ་ཡི། ། ལྕགས་ཀྱི་ཐུ་ ལུམ་ཟོས་སླ་ཡི། ། དགེ་འདུན་དག་ལས་གལ་ཏེ་ནི། ། དགེ་འདུན་གྱི་ལ་ལོངས་མི་སྤྱད། ། ལྷུན་པོ་དང་ནི་འདྲ་བའི་མེ། ། བླང་བ་བྱས་ཏེ་ཟོས་པ་སླའི། ། ཁྱིམ་པར་གྱུར་པས་དགེ་འདུན་གྱི། ། ལོངས་སྤྱད་པར་ནི་མི་བྱའོ། ། ཐམས་ཅད་དབྱུང་བ་བྱས་པ་དང་། ། གསལ་ཤིང་སྟེང་དུ་བཏེག་པ་སླའི། ། ཁྱིམ་པར་གྱུར་པས་དགེ་འདུན་གྱི། ། ལོངས་སྤྱད་པར་ནི་མི་བྱའོ། ། མེ་མདག་གིས་ནི་གང་བ་ཡི། ། གནས་ཁང་དེར་ནི་ཞུགས་པ་སླའི། ། ཁྱིམ་པས་དགེ་འདུན་གནས་ཁང་དུ། ། མཚན་མོ་གནས་པར་མི་བྱའོ། ། མེ་ ལྕེ་འབར་བ་ལྟ་བུ་ཡི། ། ལྕགས་ཀྱི་ཐུ་ལུམ་བླངས་པ་སླའི། ། རབ་ཏུ་བྱུང་དང་ཁྱིམ་པ་ཡིས། ། དབྱིག་ནི་བླང་བར་མི་བྱའོ། ། འཁོར་ལོ་རྣོན་པོས་བདག་གི་ལུས། །

ཀུན་ཏུ་གཏུབ་པར་བྱས་པ་སླའི། ། ལེགས་པར་གསུངས་པའི་ཆོས་རྣམས་ལ། ། རྒྱགས་ དང་གཤེ་བ་བསྐྱེད་མི་བྱ། ། ལེགས་པར་གསུངས་པའི་ཆོས་ཅན་གྱི། ། མིག་ནི་རང་གི་ཕྱུང་བ་སླའི། ། སེམས་ཅན་དུ་ནི་བགྲང་བ་ལ། ། ཁྲོས་པས་སྐྱེ་དགུ་མི་མངག་གོ། ། ལེགས་པར་གསུངས་པའི་ཆོས་ཅན་གྱི། ། མེ་ཡི་གོས་ནི་གྱོན་པ་སླའི། ། ཚུལ་འཆོས་ པ་དང་མཐུ་ཡིས་སུ། ། ཁྱིམ་པ་ལས་ནི་གོས་མི་བསླང་། ། མེ་འདྲ་བར་ནི་བསྐོལ་བ་ཡི། ། རྩུབ་འགྱུར་ཆུ་ནི་འཐུངས་པ་སླའི། ། རབ་ཏུ་བྱུང་བས་གཡོ་སྒྱུ་ཡིས། ། བཟའ་བཏུང་བསླང་བར་མི་བྱའོ། ། དེའི་ཚེ་བཅོམ་ལྡན་འདས་ཀྱིས་ཀླུ་ཁྲི་བཞི་སྟོང་སྙེད་སྔོན་གྱི་ཉེས་ པར་བྱས་པའི་སྡུག་བསྔལ་གྱི་ཚོར་བ་དེ་ལྟ་བུ་དག་ལས་ཡོངས་སུ་ཐར་བར་མཛད་དེ་སྐྱབས་གསུམ་ལ་ཡང་རྣམ་པར་བཀོད་དོ། ། དེའི་ཚེ་ཀླུ་གཞན་བྱེ་བ་ཕྲག་བརྒྱད་ཅུ་ནི་སྐྱབས་གསུམ་དུ་འགྲོ་བ་དང་། ཐེག་པ་གསུམ་ལ་ངེས་པར་རྣམ་པར་བཀོད་དོ། ། དེའི་ཚེ་བཅོམ་ ལྡན་འདས་ཀྱིས་ཚེ་དང་ལྡན་པ་ཀཽ་ཌི་ནྱ་ལ་བཀའ་སྩལ་པ། ཀཽ་ཌི་ནྱ་སེམས་ཅན་རྣམས་རང་ལ་སླུ་བ་ལ་ལྟོས།

སེམས་ཅན་གང་དག་དབུལ་པོ་ཉིད་ཀྱི་འཇིགས་པས་སྐྲག་ནས་རང་གིས་དགེ་སློང་ཆོས་ཀྱིས་གནས་པ་རྣམས་ལ་ཕན་གདགས་པའི་ ཕྱིར་ཡོ་བྱད་ཀྱི་དངོས་པོ་རྣམ་པ་སྣ་ཚོགས་བསྔོས་ལ། ཁ་ཅིག་གིས་ནི་རང་གིས་ལོངས་སྤྱད་དོ། ། ཁ་ཅིག་གིས་ནི་གཞན་དག་ལོངས་སྤྱད་པར་བྱ་བའི་ཕྱིར་བྱིན། ཁ་ཅིག་གིས་ནི་མཐུས་ཕྲོགས་ནས་ལོངས་སྤྱད་པས་དེ་ལྟར་ཡུན་རིང་པོར་ངན་སོང་གསུམ་དུ་ སྡུག་བསྔལ་བརྟེན་ཏོ། ། ཡང་སེམས་ཅན་གང་དག་དབུལ་པོ་ཉིད་ཀྱིས་འཇིགས་པས་སྐྲག་ནས་འཁོར་བའི་སྲིད་པའི་བཙོན་ར་ཐམས་ཅད་ལས་ཡོངས་སུ་ཐར་བར་བྱ་བའི་ཕྱིར་སྔོན་གྱི་སངས་རྒྱས་བཅོམ་ལྡན་འདས་རྣམས་ཀྱི་བསྟན་པ་ལ་རབ་ཏུ་བྱུང་ངོ་། ། དེ་དག་རབ་ཏུ་བྱུང་ནས་ཆོས་ དང་ལྡན་པའི་རྣལ་འབྱོར་ཡིད་ལ་བྱེད་པ་དང་། ཚིག་འདོན་པ་བཏང་ནས་ཉམས་པར་གྱུར་པ་དེ་དག་ཁ་ཅིག་ནི་དགེ་སློང་ཆོས་ཀྱིས་གནས་པ་རྣམས་ལ་དངོས་པོ་རྣམ་པ་སྣ་ཚོགས་དེ་བཞིན་དུ་བསྔོས་པ་རང་གིས་ཕྲོགས་ཏེ་ལོངས་སྤྱོད་པར་བྱེད་དོ། ། ཁ་ཅིག་གིས་ནི་ཁྱིམ་པ་ རྣམས་ལ་སྦྱིན་པར་བྱེད་དེ། དེ་དག་གཉི་ག་དེ་ལྟར་ཡུན་རིང་པོར་ངན་སོང་གསུམ་དུ་སྡུག་བསྔལ་གྱིས་གཟིར་ཏོ། །

ངས་ཉེས་དམིགས་དེ་ཡང་དག་པར་གཟིགས་ནས་ངའི་ཉན་ཐོས་རྣམས་ལ་དྲན་པར་བྱ་བ་བཅའ་བ་མཛད་དེ། ངའི་ཉན་ཐོས་སུས་ཀྱང་དགེ་སློང་ལ་བསྔོས་ པ་དང་། དགེ་སློང་གི་དགེ་འདུན་ལ་བསྔོས་པའི་མེ་ཏོག་དང་། འབྲས་བུ་དང་། ལོ་མ་དང་། བཅུད་ཁྱིམ་པ་རྣམས་ལ་སྦྱིན་པར་མི་བྱའོ། ། གང་ཟག་གི་འདུ་ཤེས་ཀྱིས་ལོངས་སྤྱད་པར་མི་བྱའོ། ། དགེ་འདུན་ལས་ཕྱི་རོལ་དུ་ཡང་ཉོ་ཚོང་མི་བྱའོ། ། བསྐོར་བ་དང་། བསྒྱུར་བ་དང་། དབྱིག་གི་གཏམ་མི་བྱའོ། ། སེམས་ཅན་རྣམས་ཟང་ཟིང་གིས་ཡོངས་སུ་བསྡུ་བའི་རྐྱེན་གྱིས་ངན་སོང་གི་སྡུག་བསྔལ་དག་ལ་དགོད་པར་མི་བྱའོ། ། སེམས་ཅན་རྣམས་ཆོས་ཀྱིས་བསྡུ་བས་བསྡུ་བར་བྱའོ། ། མི་ཕྱེད་པའི་དད་པ་བཞི་དང་། ཐེག་པ་ གསུམ་དང་། རྣམ་པར་ཐར་པའི་སྒོ་གསུམ་ལ་དགོད་པར་བྱའོ། ། འཕགས་པ་འདུས་པ་ཆེན་པོའི་སྡེ་ཉི་མའི་སྙིང་པོའི་མདོ་ལེའུ་བཅུ་གཅིག་པ་ལས་ཀླུ་སྐྱབས་སུ་འགྲོ་བའི་ལེའུ་སྟེ་བཅུ་གཅིག་པའོ། ། ། ། འཕགས་པ་ཤིན་ཏུ་རྒྱས་པ་ཆེན་པོའི་ སྡེ་ཉི་མའི་སྙིང་པོ་ཞེས་བྱ་བའི་མདོ་བམ་པོ་བཅུ་གསུམ་པ་སྟེ་ཐ་མ། དེ་ནས་བཅོམ་ལྡན་འདས་ལ་གནས་བརྟན་ཀུན་ཤེས་ཀཽ་ཌི་ནྱས་འདི་སྐད་ཅེས་གསོལ་ཏོ། །

བཅོམ་ལྡན་འདས་ལག་འགྲོ་དག་བྱིན་གྱིས་བརླབ་ཏུ་གསོལ། བསམ་གྱིས་མི་ཁྱབ་པའི་ལས་ བསྟན་པའི་སྤྱོད་པ་དང་འབྲེལ་པའི་ཆོས་ཀྱི་རྣམ་གྲངས་ཡུན་རིང་པོར་འབར་བར་མཛད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཇི་སྲིད་དུ་གླིང་བཞི་པ་འདིར་མཆོད་རྟེན་ཆེན་པོ་འདི་དག་རྣལ་འབྱོར་ཡིད་ལ་བྱེད་པ་ལ་མངོན་པར་བརྩོན་པ་ཐམས་ཅད་ཀྱིས་སྟོངས་ པར་མ་གྱུར་པ་དེ་སྲིད་དུ་གླིང་བཞི་པ་འདིར་ཆོས་ཀྱི་རྣམ་གྲངས་འདི་རབ་ཏུ་སྤྱོད་པར་འགྱུར་རོ། ། མཆོད་རྟེན་ཆེན་པོ་གང་དག་ཅེ་ན། འཛམ་བུའི་གླིང་འདི་ན་མཆོད་རྟེན་དྲང་སྲོང་ཐུབ་པའི་གནས་ཀུན་རྟེན་འདི་ནི་སྔོན་ཆད་སྔོན་གྱི་སངས་རྒྱས་དང་། བྱང་ཆུབ་སེམས་དཔའ་དང་། རང་རྒྱལ་བ་དང་། ཉན་ཐོས་མང་པོ་གནས་གནས་ཤིང་མ་འོངས་པའི་དུས་ན་ཡང་གནས་པར་འགྱུར་བ་སྟེ། རྗེས་སུ་བསྟན་པ་ཆེན་པོ་ཡུན་རིང་དུ་གནས་པར་མཛད་པའི་ཕྱིར་དྲང་སྲོང་ཐུབ་པའི་གནས་ཀུན་རྟེན་འདི་ནི་སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ཀྱིས་ ཆུ་ལྷའི་ལག་ཏུ་ཡོངས་སུ་གཏད་པ་མཛད་དོ། ། ངས་ཀྱང་དེ་ཉིད་ཀྱི་ལག་ཏུ་ཡོངས་སུ་གཏད་དེ།

འདི་ཡང་སྤྲོ་བར་འགྱུར་ཞིང་གང་ཟག་ཆོས་ཀྱིས་གནས་པ་རྣལ་འབྱོར་ཡིད་ལ་བྱེད་པ་ལ་མངོན་པར་བརྩོན་པ་དག་ཡོངས་སུ་སྨིན་པར་བྱེད་པར་འགྱུར་རོ། ། གང་དག་གང་ ཟག་ཆོས་ཀྱིས་གནས་པ་རྣམས་ལ་བསྙེན་བཀུར་ལ་མངོན་པར་བརྩོན་པའི་སྦྱིན་པ་པོ་དང་། སྦྱིན་བདག་དེ་དག་ཀྱང་ཡོངས་སུ་སྲུང་བར་འགྱུར་རོ། ། ཀླུའི་རྒྱལ་པོ་ཆུ་ལྷས་གསོལ་པ། བཙུན་པ་བཅོམ་ལྡན་འདས་དེ་དེ་བཞིན་ཏེ། དེ་བཞིན་གཤེགས་པ་འཁོར་བ་ འཇིག་གིས་དྲང་སྲོང་ཐུབ་པའི་གནས་ཀུན་རྟེན་འདི་ཆང་ཁྱིར་ཡོངས་སུ་གཏད་ལགས་སོ། ། གང་དག་གང་ཟག་མཉམ་པ་ཉིད་ལ་མངོན་པར་བརྩོན་པ་ཆོས་ཀྱིས་གནས་པ་རྣམས་ཀྱང་ཆང་ཁྱིར་ཡོངས་སུ་གཏད་ལགས་སོ། ། གང་དག་གང་ཟག་མཉམ་པ་ ཉིད་ལ་མངོན་པར་བརྩོན་པ་ཆོས་ཀྱིས་གནས་པ་རྣམས་ལ་རིམ་གྲོ་ལ་མངོན་པར་བརྩོན་པའི་སྦྱིན་པ་པོ་དང་སྦྱིན་བདག་དེ་དག་ཀྱང་དེ་བཞིན་ལགས་ཏེ། ཇི་སྲིད་དུ་དམ་པའི་ཆོས་འབར་བར་འགྱུར་བ་དེ་ཁོ་ན་བཞིན་དུ་བདག་གིས་གཉི་ག་བསྲུངས་ལགས་སོ། ། དེ་བཞིན་དུ་དེ་ བཞིན་གཤེགས་པ་གསེར་ཐུབ་ཀྱི་བར་དང་། དེ་བཞིན་གཤེགས་པ་འོད་སྲུང་གི་བར་གྱིས་ཀྱང་དེའི་ཆོས་ཀྱི་ཚུལ་འབར་བར་བགྱི་བའི་སླད་དུ་གཏད་ལགས་སོ། །

དེ་བཞིན་དུ་ད་ལྟར་ཡང་བཅོམ་ལྡན་འདས་ཀྱི་བཀས་དྲང་སྲོང་ཐུབ་པའི་གནས་ཀུན་རྟེན་ནས་གང་ཟག་ མཉམ་པ་ཉིད་ལ་མངོན་པར་བརྩོན་པ་ཆོས་ཀྱིས་གནས་པ་རྣམས་ཀྱི་བར་དང་། གང་དག་མཉམ་པ་ཉིད་ལ་མངོན་པར་བརྩོན་པ་ཆོས་ཀྱིས་གནས་པ་རྣམས་ལ་རིམ་གྲོ་དང་བསྙེན་བཀུར་ལ་མངོན་པར་བརྩོན་པའི་སྦྱིན་པ་པོ་དང་། སྦྱིན་བདག་དེ་དག་གི་བར་དག་དང་། ཇི་སྲིད་ དུ་ཉན་ཐོས་དེ་དག་ཡོངས་སུ་འཛིན་པ་མ་མཆིས་པར་གནས་པར་དེ་དག་ཐམས་ཅད་བསྲུང་བར་བགྱི་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ། ལག་འགྲོའི་བདག་པོ་ལེགས་སོ་ལེགས་སོ། ། དེ་ལྟར་བྱིན་གྱིས་བརླབས་པས་ངའི་ཆོས་ཀྱི་ཚུལ་སྦྱིན་བདག་ ཆེན་པོ་དེ་ལྟ་བུ་དག་གིས་ཡུན་རིང་པོར་འབར་བར་བྱེད་པར་འགྱུར་རོ། ། བ་ལང་སྤྱོད་ཀྱི་གླིང་གི་ངོས་ན་རྡུལ་གྱི་རི་དེ་ལ་དྲང་སྲོང་ཐུབ་པའི་གནས་བཀྲ་བ་ནི་ཀླུའི་རྒྱལ་པོ་རིན་པོ་ཆེའི་ཕྲེང་བ་ཅན་ལ་ཆང་ཁྱིར་ཡོངས་སུ་གཏད་དོ་ཞེས་བྱ་བའི་བར་དུའོ། ། ཀླུའི་རྒྱལ་པོ་རིན་པོ་ཆེའི་ཕྲེང་བ་ ཅན་གྱིས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་དེ་དེ་བཞིན་ཏེ།

དེ་བཞིན་གཤེགས་པ་འཁོར་བ་འཇིག་གིས་དེར་དྲང་སྲོང་ཐུབ་པའི་གནས་བཀྲ་བ་དེ་ཆང་ཁྱིར་ཡོངས་སུ་གཏད་ལགས་སོ་ཞེས་བྱ་བ་ནས། ཇི་སྲིད་དུ་ཉན་ཐོས་དེ་དག་ཡོངས་སུ་འཛིན་པ་ མ་མཆིས་པར་གནས་པ་དེ་སྲིད་དུ་བདག་གིས་ཐམས་ཅད་ཡོངས་སུ་བསྐྱང་བར་བགྱི་ལགས་སོ་ཞེས་བྱ་བའི་བར་དུའོ། ། བཅོམ་ལྡན་འདས་ཀྱིས་བཀའ་སྩལ་པ། སྦྱིན་བདག་རྣམས་ཀྱིས་ཡུན་རིང་པོར་འབར་བར་བྱེད་པར་འགྱུར་རོ་ཞེས་བྱ་བའི་བར་དུའོ། ། ཤར་གྱི་ ལུས་འཕགས་ཀྱི་ངོས་ན་ནི་ལང་ག་ཎའི་རི་ལ་དྲང་སྲོང་ཐུབ་པའི་གནས་དྲང་སྲོང་འབྱུང་བ་ནི་ཀླུའི་རྒྱལ་པོ་ཟླ་སྲུང་ལ་ཆང་ཁྱིར་ཡོངས་སུ་གཏད་དོ་ཞེས་བྱ་བ་ནས་དེ་སྲིད་དུ་བདག་གིས་ཡོངས་སུ་བསྐྱང་བར་བགྱི་ལགས་སོ་ཞེས་བྱ་བའི་བར་དུའོ། ། བྱང་གི་སྒྲ་མི་སྙན་གྱི་ངོས་ན་ རྒྱལ་དགའི་རི་ལ་དྲང་སྲོང་ཐུབ་པའི་གནས་སྤོས་བརྩེགས་ནི་ཀླུའི་རྒྱལ་པོ་ལུས་འབིགས་པའི་ཁབ་ལ་ཆང་ཁྱིར་ཡོངས་སུ་གཏད་དེ། གང་ཟག་མཉམ་པ་ཉིད་ལ་མངོན་པར་བརྩོན་པ་ཆོས་ཀྱིས་གནས་པ་རྣམས་ཀྱང་ཆང་ཁྱིར་ཡོངས་སུ་གཏད་དོ། །

དེ་བཞིན་དུ་གང་ཟག་དགེ་ སློང་མཉམ་པ་ཉིད་ལ་མངོན་པར་བརྩོན་པ་ཆོས་ཀྱིས་གནས་པ་རྣམས་ལ་རིམ་གྲོ་དང་བསྙེན་བཀུར་ལ་མངོན་པར་བརྩོན་པའི་སྦྱིན་པ་པོ་དང་། སྦྱིན་བདག་དེ་དག་ཀྱང་ཆང་ཁྱིར་ངས་ཡོངས་སུ་གཏད་དོ། ། ཀླུའི་རྒྱལ་པོ་ལུས་འབིགས་པའི་ཁབ་ཀྱིས་འདི་སྐད་ཅེས་གསོལ་ ཏོ། ། བཙུན་པ་བཅོམ་ལྡན་འདས་དེ་དེ་བཞིན་ཏེ། སྔོན་དེ་བཞིན་གཤེགས་པ་འཁོར་བ་འཇིག་གིས་དྲང་སྲོང་ཐུབ་པའི་གནས་སྤོས་བརྩེགས་དེ་ཡང་ཆང་ཁྱིར་ཡོངས་སུ་གཏད་ལགས་སོ། ། ཆོས་ཀྱིས་གནས་པ་ཡང་དེ་བཞིན་ལགས་སོ། ། གསེར་ཐུབ་ཀྱིས་ཀྱང་དེ་ བཞིན་ལགས་སོ་ཞེས་བྱ་བ་ནས་འོད་སྲུང་གིས་ཀྱང་དེ་བཞིན་ལགས་སོ་ཞེས་བྱ་བའི་བར་དང་། བདག་གིས་ཆོས་ཀྱི་ཚུལ་ཡང་དག་པར་བཟུང་ལགས་སོ་ཞེས་བྱ་བའི་བར་དང་། དེ་བཞིན་དུ་ད་ལྟར་ཡང་བཅོམ་ལྡན་འདས་ཀྱི་བཀས་བདག་གིས་དྲང་སྲོང་ཐུབ་པའི་གནས་སྤོས་ བརྩེགས་ཐམས་ཅད་བསྲུང་བར་བགྱི་ལགས་སོ་ཞེས་བྱ་བའི་བར་དུའོ། ། བཅོམ་ལྡན་འདས་ཀྱིས་བཀའ་སྩལ་པ། ལག་འགྲོའི་བདག་པོ་ལེགས་སོ་ལེགས་སོ། ། དེ་ལྟར་བྱིན་གྱིས་བརླབས་པས་ཆོས་ཀྱི་ཚུལ་སྦྱིན་བདག་ཆེན་པོ་དེ་ལྟ་བུ་དག་གིས་ཡུན་རིང་པོར་འབར་བར་བྱེད་ པར་འགྱུར་རོ། །

དེ་བཞིན་དུ་བ་ལང་སྤྱོད་ཀྱི་གླིང་ན་དྲང་སྲོང་ཐུབ་པའི་གནས་འོད་ཟེར་བྱུང་བ་ཞེས་བྱ་བ་གང་ཡིན་པ་དེ་ནི་ཀླུའི་རྒྱལ་པོ་བ་ལང་མགོ་ལ་ཆང་ཁྱིར་ཡོངས་སུ་གཏད་དོ་ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ་ཞེས་བྱ་བའི་བར་དུའོ། ། དེ་བཞིན་དུ་ཤར་གྱི་ལུས་འཕགས་གླིང་ན་དྲང་སྲོང་ཐུབ་པའི་གནས་པད་མའི་ཤིང་ནྱ་གྲོ་དྷ་ལྟ་བུ་གང་ཡིན་པ་དེ་ནི་ཀླུའི་རྒྱལ་པོ་དབྱིག་གཏོང་ལ་ཆང་ཁྱིར་ཡོངས་སུ་གཏད་དོ་ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ་ཞེས་བྱ་བའི་བར་དུའོ། ། དེ་བཞིན་དུ་བྱང་གི་ སྒྲ་མི་སྙན་གྱི་གླིང་ན་དྲང་སྲོང་ཐུབ་པའི་གནས་སྤོས་བརྩེགས་འོད་ཟེར་ཅེས་བྱ་བ་གང་ཡིན་པ་དེ་ནི་ཀླུའི་རྒྱལ་པོ་གནས་ན་རྒྱུ་ལ་ཆང་ཁྱིར་ཡོངས་སུ་གཏད་དོ་ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ་ཞེས་བྱ་བའི་བར་དུའོ། ། དེ་བཞིན་དུ་རྒྱ་མཚོ་ཆེན་པོའི་ནང་ན་ཀླུའི་ རྒྱལ་པོ་རྒྱ་མཚོའི་གནས་ན་དྲང་སྲོང་ཐུབ་པའི་གནས་ནོར་བུའི་སྙིང་པོའི་འོད་འཕྲོ་བ་གང་ཡིན་པ་དེ་ནི་ཀླུའི་རྒྱལ་པོ་རྒྱ་མཚོ་ལ་ཆང་ཁྱིར་ཡོངས་སུ་གཏད་དོ་ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ་ཞེས་བྱ་བའི་བར་དུའོ། །

དེ་བཞིན་དུ་རི་རབ་ཀྱི་རྩེ་མོ་ན་སུམ་ ཅུ་རྩ་གསུམ་པའི་གནས་ན་དྲང་སྲོང་ཐུབ་པའི་གནས་མེ་ཏོག་རབ་ཏུ་རྒྱས་པའི་སྙིང་པོ་གང་ཡིན་པ་དེ་ནི་ཀླུའི་རྒྱལ་པོ་ས་སྲུང་གི་བུ་ལ་ཆང་ཁྱིར་ཡོངས་སུ་གཏད་དོ་ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ་ཞེས་བྱ་བའི་བར་དུའོ། ། དེ་བཞིན་དུ་འཛམ་བུའི་གླིང་འདི་ན་དགའ་ འཕེལ་ཞེས་བྱ་བ་ནས་དྲང་སྲོང་ཐུབ་པའི་གནས་གནས་བརྟན་གྱི་ཕུག་གང་ཡིན་པ་དེ་ནི་ཀླུའི་རྒྱལ་པོ་ཅེ་སྤྱང་ལ་ཆང་ཁྱིར་ཡོངས་སུ་གཏད་དོ་ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ་ཞེས་བྱ་བའི་བར་དུའོ། ། དེ་བཞིན་དུ་ཡངས་པ་ཅན་ན་དྲང་སྲོང་ཐུབ་པའི་གནས་ ཤིན་ཏུ་བརྟན་པ་ནི་ཀླུའི་རྒྱལ་པོ་ནོར་རྒྱས་ཀྱི་བུ་ལ་ཆང་ཁྱིར་ཡོངས་སུ་གཏད་དོ་ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ་ཞེས་བྱ་བའི་བར་དུའོ། ། དེ་བཞིན་དུ་སེར་སྐྱའི་གནས་ན་དྲང་སྲོང་ཐུབ་པའི་གནས་གསེར་སྒྲོན་དྲི་ཞིམ་ནི་ཀླུའི་རྒྱལ་པོ་མ་དྲོས་པ་ལ་ ཆང་ཁྱིར་ཡོངས་སུ་གཏད་དོ་ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ་ཞེས་བྱ་བའི་བར་དུའོ། །

དེ་བཞིན་དུ་ཡུལ་མ་ག་དྷཱ་ན་དྲང་སྲོང་ཐུབ་པའི་གནས་རྒྱ་ཆེན་ཞེས་བྱ་བ་ནི་ཀླུའི་རྒྱལ་པོ་རི་བོས་བྱིན་ལ་ཆང་ཁྱིར་ཡོངས་སུ་གཏད་དོ་ཞེས་བྱ་བ་ནས་ཡུན་རིང་པོར་ འབར་བར་བྱེད་པར་འགྱུར་རོ་ཞེས་བྱ་བའི་བར་དུའོ། ། དེ་བཞིན་དུ་བཅོམ་བརླག་ན་དྲང་སྲོང་ཐུབ་པའི་གནས་སྟུག་པའི་སྤྲིན་ནི་ཀླུའི་རྒྱལ་པོ་ཅེ་སྤྱང་དང་རྒྱུ་བ་ལ་ཆང་ཁྱིར་ཡོངས་སུ་གཏད་དོ་ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ་ཞེས་བྱ་བའི་བར་དུའོ། ། དེ་བཞིན་དུ་ཡུལ་འཁོར་ཀོ་ས་ལ་ན་དྲང་སྲོང་ཐུབ་པའི་གནས་རྒྱལ་བ་དག་པ་ཞེས་བྱ་བ་ནི་ཀླུའི་རྒྱལ་པོ་སྲིན་བུ་ལ་ཆང་ཁྱིར་ཡོངས་སུ་གཏད་དོ་ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ་ཞེས་བྱ་བའི་བར་དུའོ། ། དེ་བཞིན་དུ་ཕུག་གི་ཕ་རོལ་ན་དྲང་སྲོང་ཐུབ་པའི་གནས་ བཏང་བཟུང་བདེན་པའི་དྲི་ཞེས་བྱ་བ་ནི་ཀླུའི་རྒྱལ་པོ་བཏང་བཟུང་ལ་ཆང་ཁྱིར་ཡོངས་སུ་གཏད་དོ་ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ་ཞེས་བྱ་བའི་བར་དུའོ། །

དེ་བཞིན་དུ་ཡུལ་འཁོར་ས་འཛིན་ན་དྲང་སྲོང་ཐུབ་པའི་གནས་མཐོང་བའི་ལམ་རྒྱགས་ཞེས་ བྱ་བ་ནི་ཀླུའི་རྒྱལ་པོ་ཨེ་ལའི་འདབ་མ་ལ་ཆང་ཁྱིར་ཡོངས་སུ་གཏད་དོ་ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ་ཞེས་བྱ་བའི་བར་དུའོ། ། དེ་བཞིན་དུ་ཁ་ཆེའི་ཡུལ་ན་དྲང་སྲོང་ཐུབ་པའི་གནས་གུར་ཀུམ་གྱི་རྩེ་མོ་ཞེས་བྱ་བ་ནི་ཀླུའི་རྒྱལ་པོ་ཧུ་ལུ་རུ་ལ་ཆང་ཁྱིར་ ཡོངས་སུ་གཏད་དོ་ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ་ཞེས་བྱ་བའི་བར་དུའོ། ། དེ་བཞིན་དུ་ཡུལ་ཆུ་ལེན་ན་དྲང་སྲོང་ཐུབ་པའི་གནས་འོད་ཟེར་བྱེད་པའི་སྙིང་པོ་ཞེས་བྱ་བ་ནི་ཀླུའི་རྒྱལ་པོ་འཕྱང་བ་ལ་ཆང་ཁྱིར་ཡོངས་སུ་གཏད་དོ་ཞེས་བྱ་བ་ནས་ཡུན་རིང་ པོར་འབར་བར་བྱེད་པར་འགྱུར་རོ་ཞེས་བྱ་བའི་བར་དུའོ། ། དེ་བཞིན་དུ་རྒྱ་ཡུལ་ན་དྲང་སྲོང་ཐུབ་པའི་གནས་སྲེད་མེད་ཀྱི་བུའི་འོད་ཅེས་བྱ་བ་ནི་ཀླུའི་རྒྱལ་པོ་རྒྱ་མཚོས་བྱིན་གྱི་ལག་ཏུ་ཆང་ཁྱིར་ཡོངས་སུ་གཏད་དོ་ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ་ཞེས་བྱ་བའི་ བར་དུའོ། །

དེ་བཞིན་དུ་ཁ་ཤའི་ཡུལ་ན་སའི་ནུ་མའི་གནས་རི་གླང་རུའི་དྲུང་ཆུ་བོ་གོ་མ་ཏིའི་ངོགས་ན་དྲང་སྲོང་ཐུབ་པའི་གནས་གོ་མ་སཱ་ལ་གན་དྷ་ཞེས་བྱ་བ་མཆོད་རྟེན་ཆེན་པོའི་གནས་ནི་ཀླུའི་རྒྱལ་པོ་ཁྱིམ་བདག་གིས་བྱིན་གྱི་ལག་ཏུ་ཆང་ཁྱིར་ཡོངས་སུ་ གཏད་དོ་ཞེས་བྱ་བ་ནས་ཡུན་རིང་པོར་འབར་བར་བྱེད་པར་འགྱུར་རོ་ཞེས་བྱ་བའི་བར་དུའོ། ། མཆོད་རྟེན་ཆེན་པོ་དེ་དག་ནི་སྔོན་ཆད་དྲང་སྲོང་ཐུབ་པའི་ཁྱུ་མཆོག་མང་པོ་གནས་ཤིང་སྔོན་ཆད་བྱང་ཆུབ་སེམས་དཔའ་སེམས་དཔའ་ཆེན་པོ་མང་པོ་ཡང་གནས་གནས། སྔོན་ཆད་རང་རྒྱལ་ བ་མང་པོ་ཡང་གནས་གནས། སྔོན་ཆད་ཉན་ཐོས་ཆེན་པོ་མང་པོ་ཡང་གནས་གནས། སྔོན་ཆད་དྲང་སྲོང་མངོན་པར་ཤེས་པ་ལྔ་དང་ལྡན་པ་མང་པོ་ཡང་གནས་གནས་པ་ཡིན་ཏེ། སངས་རྒྱས་ཀྱི་ཞིང་འདིར་གང་དག་སྐྱེས་པ་དེ་དག་ཐམས་ཅད་ཀྱིས་བྱིན་གྱིས་བརླབས་ཤིང་ སེམས་ཅན་འཁོར་བས་སྐྲག་པ་ཡོངས་སུ་སྐྱོ་བ་རྣམས་ཀྱི་དོན་དུ་དགེ་བའི་རྩ་བ་བསྐྱེད་པའི་ཕྱིར་དབང་ཆེ་བར་གྲགས་པ། དབང་ཆེ་བར་གྲགས་པ་ཐམས་ཅད་ཀྱིས་དེ་དག་གི་ལག་ཏུ་ཡོངས་སུ་གཏད་པ་ཡིན་ནོ། །

དེ་བཞིན་དུ་ཕྱོགས་བཅུའི་སངས་རྒྱས་ཀྱི་ཞིང་ གྲངས་མེད་པ་དཔག་ཏུ་མེད་པ་ན་གང་དག་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བྱུང་བ་དེ་དག་ཐམས་ཅད་ཀྱིས་ཀྱང་སེམས་ཅན་རྣམས་ཀྱི་ལས་ཟད་པར་བྱ་བའི་ཕྱིར་མཆོད་རྟེན་ཆེན་པོ་ཉི་ཤུ་པོ་དེ་དག་དགོངས་ཤིང་བསམས་ ལ་བྱིན་གྱིས་བརླབས་སོ། ། དེ་བཞིན་དུ་མ་འོངས་པའི་དུས་ན་དེའི་ཚེ་སངས་རྒྱས་ཀྱི་ཞིང་གྲངས་མེད་པ་དཔག་ཏུ་མེད་པ་དེ་དག་ཏུ་གང་དག་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འབྱུང་བར་འགྱུར་བ་དེ་དག་ཐམས་ཅད་ཀྱིས་ ཀྱང་མཆོད་རྟེན་ཆེན་པོ་ཉི་ཤུ་པོ་དེ་དག་དགོངས་ཤིང་བསམས་པར་འགྱུར་ལ་བྱིན་གྱིས་རློབ་པར་འགྱུར་རོ། ། མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་བའི་ཟླ་བ་གང་དག་འབྱུང་བར་འགྱུར་བ་དེ་དག་ཐམས་ཅད་ཀྱིས་ཀྱང་སེམས་ཅན་གྱི་དོན་དུ་ལས་ཟད་པར་བྱ་ བའི་ཕྱིར་མཆོད་རྟེན་ཆེན་པོ་ཉི་ཤུ་པོ་དེ་དག་ལ་གནས་པར་འགྱུར་ཞིང་བྱིན་གྱིས་རློབ་པར་འགྱུར་རོ། ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་དང་། རང་རྒྱལ་བ་ཐམས་ཅད་དང་། ཉན་ཐོས་ཆེན་པོ་ཐམས་ཅད་དང་།

དེ་བཞིན་དུ་དྲང་ སྲོང་མངོན་པར་ཤེས་པ་ལྔ་དང་ལྡན་པ་རྣམས་ཀྱིས་ཀྱང་སེམས་ཅན་གྱི་དོན་དུ་ལས་ཟད་པར་བྱ་བའི་ཕྱིར་མཆོད་རྟེན་ཆེན་པོ་ཉི་ཤུ་པོ་དེ་དག་ལ་གནས་པར་འགྱུར་ཞིང་བྱིན་གྱིས་རློབ་པར་ཡང་འགྱུར་ཏེ། སེམས་ཅན་དབང་ཆེ་བར་གྲགས་པ་དེ་དག་གི་ལག་ཏུ་ཆང་ཁྱིར་ ངས་ཡོངས་སུ་གཏད་པར་མཛད་དོ། ། དེ་བཞིན་དུ་ད་ལྟར་ཡང་མཆོད་རྟེན་ཆེན་པོའི་གནས་ཉི་ཤུ་པོ་དེ་དག་ཁྱེད་ཀྱིས་ཇི་ལྟར་མིང་ཡོངས་སུ་བཟུང་བ་བཞིན་ངས་ཡོངས་སུ་གཏད་ཀྱིས། སེམས་ཅན་འཁོར་བས་ཡོངས་སུ་སྐྱོ་བ་རྣམས་ཀྱི་དོན་དུ་ཁྱེད་ཀྱིས་དེ་དག་ སྲུངས་ཤིག ། ཆོས་རབ་ཏུ་མི་འཇིག་པར་ཡང་དག་པར་ཟུང་ཤིག ། དེ་ནས་གང་དག་གི་ལག་ཏུ་མཆོད་རྟེན་ཆེན་པོའི་གནས་ཉི་ཤུ་པོ་དེ་དག་ཡོངས་སུ་གཏད་པའི་ཀླུ་དེ་དག་ཐམས་ཅད་ཀྱིས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་བདག་ཅག་ཀླུ་ རྣམས་ནི་རྨུགས་པ་དང་གཉིད་ཀྱི་སྒྲིབ་པས་ཤིན་ཏུ་མྱོས་པ་ལགས་ཏེ། གང་བདག་ཅག་མཚན་གཅིག་གཉིད་ལོག་པ་དེ་ནི་མིའི་ལྟར་བརྩིས་ན་དགུང་ལོ་ཉི་ཤུ་རྩ་གཅིག་འདས་པར་འགྱུར་ལགས་སོ། །

གལ་ཏེ་བདག་ཅག་གཉིད་ཀྱིས་ལོག་ནས་དྲང་སྲོང་ཐུབ་པའི་གནས་ དེ་དག་ཏུ་ལྷའི་ཀུན་ཏུ་འཁྲུག་པ་འགའ་ཞིག་བྱུང་བར་གྱུར་ཏམ། མིའི་ཀུན་ཏུ་འཁྲུག་པའམ། ཞུགས་སམ། ཆབ་ཀྱིས་ཀུན་ཏུ་འཁྲུག་པ་འགའ་ཞིག་བྱུང་བར་གྱུར་ན་མཆོད་རྟེན་ཆེན་པོའི་གནས་དེ་དག་རྣམ་པར་འཇིག་པར་འགྱུར་ལགས་ན་བདག་ཅག་གཉིད་ཀྱིས་ ལོག་ཅིང་མྱོས་པ་དེ་དག་གིས་རབ་ཏུ་འཇིག་པ་དེ་བསལ་བར་རྔོ་མི་ཐོགས་ལགས་ཏེ། དུས་གསུམ་དུ་གཤེགས་པའི་དེ་བཞིན་གཤེགས་པ་ཐམས་ཅད་ལ་བདག་ཅག་ནོངས་པ་བྱུང་བ་ལགས་པར་འགྱུར་ལགས་སོ། ། དེའི་ཚེ་བཅོམ་ལྡན་འདས་ཀྱིས་གནོད་སྦྱིན་གྱི་སྡེ་ དཔོན་ཉི་ཤུ་རྩ་བརྒྱད་པོ་དེ་དག་ལ་བཀའ་སྩལ་པ། རྟག་པར་རྒྱལ་བ་རྣམས་ཀྱིས་དགོངས་པའི་མཆོད་རྟེན་ཆེན་པོའི་གནས་དྲང་སྲོང་ཐུབ་པའི་གནས་ཁྱེད་ཀྱིས་ལོང་ཤིག ། ཆང་ཁྱིར་ཡོངས་སུ་སྐྱོངས་ཤིག ། ཡོངས་སུ་སྲུངས་ཤིག ། དེའི་ཚེ་གནོད་ སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་དྲུག་གིས་ཇི་ལྟར་རྗེས་སུ་འཐུན་པར་སྔོན་ཆད་དྲང་སྲོང་ཐུབ་པའི་གནས་སུ་ཇི་ལྟར་གནས་པར་གྱུར་པ་བཞིན་དུ་ཆང་ཁྱིར་ཡོངས་སུ་བླངས་སོ། ། གོ་མ་སཱ་ལ་གན་དྷའི་གནས་ནི་མ་གཏོགས་ཏེ་མ་བླངས་སོ། །

དེའི་ཚེ་བཅོམ་ལྡན་འདས་ལ་ཀླུའི་ རྒྱལ་པོ་ཁྱིམ་བདག་གིས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་སའི་ནུ་མའི་གནས་རི་གླང་རུའི་དྲུང་ཆུ་བོ་གོ་མ་ཏིའི་ངོགས་གང་ན་དྲང་སྲོང་ཐུབ་པའི་གནས་གོ་མ་སཱ་ལ་གན་དྷ་ཞེས་བགྱི་བ་མཆོད་རྟེན་ཆེན་པོའི་གནས་མཆིས་པ་ནི་ཡོངས་སུ་བསྐྱང་བའི་སླད་ དུ་བདག་གིས་བླངས་ལགས་ན་ས་ཕྱོགས་དེ་ན་ཡུལ་དང་། གྲོང་དང་། གྲོང་ཁྱེར་དང་། གྲོང་རྡལ་མ་མཆིས་ལགས་སོ། ། མི་རྣམས་ཀྱི་གནས་མ་མཆིས་ལགས་ཏེ། ཡུལ་གཞན་ནམ། གླིང་བཞི་པ་གཞན་ནམ། སངས་རྒྱས་ཀྱི་ཞིང་གཞན་གྱི་བྱང་ ཆུབ་སེམས་དཔའ་སེམས་དཔའ་ཆེན་པོ་རྣམས་དང་། རང་རྒྱལ་བ་དང་། ཉན་ཐོས་ཆེན་པོ་རྣམས་དང་། དྲང་སྲོང་མངོན་པར་ཤེས་པ་ལྔ་དང་ལྡན་པ་རྫུ་འཕྲུལ་གྱི་ཕ་རོལ་ཏུ་ཕྱིན་པ་རྣམས་ནི་མ་གཏོགས་ཏེ། དེ་དག་ནི་རྫུ་འཕྲུལ་གྱི་སྟོབས་ཀྱིས་མཆོད་པ་བགྱི་ བའི་སླད་དུ་དྲང་སྲོང་ཐུབ་པའི་གནས་གོ་མ་སཱ་ལ་གན་དྷ་དེར་ལྷགས་ཏེ། དེ་ནས་སླར་ཡང་མཆི་བར་བགྱིད་དོ། ། བཙུན་པ་བཅོམ་ལྡན་འདས་ད་ལྟར་གནོད་སྦྱིན་གྱི་སྡེ་དཔོན་སུ་ཡང་དེ་ཀུན་ཏུ་བསྲུང་བའི་སླད་དུ་སྤྲོ་བར་མ་གྱུར་པ་ལ་གཟིགས།

གནས་དེ་ངན་པར་རྩི་བ་ ཞིག་མ་ལགས་སམ་ཞེས་བདག་ངོ་མཚར་དུ་གྱུར་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ། ལག་འགྲོའི་བདག་པོ་དེ་སྐད་མ་སྨྲ་ཤིག ། ཁ་ཤའི་ཡུལ་ན་བདེན་པ་མཐོང་བ་དང་། དབང་ཆེ་བར་གྲགས་པ་དབང་ཆེ་བར་གྲགས་པ་ཉི་ཁྲི་གནས་པ་གང་ དག་ཡིན་པ་དེ་དག་གིས་དྲང་སྲོང་ཐུབ་པའི་གནས་མཆོད་རྟེན་ཆེན་པོ་གོ་མ་སཱ་ལ་གན་དྷ་ལ་ཉིན་མཚན་དུ་མཆོད་པ་བྱེད་པར་འགྱུར་རོ། ། གཞན་ཡང་ལག་འགྲོའི་བདག་པོ་ཇི་ལྟར་དེ་བཞིན་གཤེགས་པ་འོད་སྲུང་ཡོངས་སུ་མྱ་ངན་ལས་འདས་ནས་སྐྱེ་དགུས་ལོ་ སུམ་སྟོང་ལོན་པ་ན་སའི་ནུ་མའི་གནས་སུ་ཡུལ་འཁོར་ཆེན་པོ་རྡོ་རྩུབ་ཅེས་བྱ་བ་བདེ་བ་དང་དགའ་བར་བྱེད་པ། མི་དང་སྐྱེ་བོ་མང་པོས་གང་བ་ཞིག་བྱུང་བར་གྱུར་ཏོ། ། དེ་ན་དྲང་སྲོང་སྦྱིན་གནས་བསམ་གཏན་ལ་མངོན་པར་དགའ་བ་ཐེག་པ་བླ་ན་མེད་པ་འདོད་པ་ལྔ་ འབུམ་སྙེད་ཀྱི་མང་པོ་གནས་པར་གྱུར་ཏོ། ། དེའི་ཚེ་མི་རྣམས་ཟས་ལ་འཁྲེན་ཏེ། དེ་དག་ཁ་ཟས་ཀྱི་ཕྱིར་དྲང་སྲོང་དེ་དག་ལ་འཁྲིག་པ་དང་ལྡན་པས་མི་སྙན་པར་རྗོད་པར་བྱེད་དོ། ། ཐལ་བ་དང་རྡུལ་གྱིས་འཐོར་བར་བྱེད་དོ། ། དེའི་ཚེ་དྲང་སྲོང་དེ་དག་ཡུལ་འཁོར་ རྡོ་རྩུབ་དེ་ནས་དོང་ངོ་། །

དེ་ནས་སེམས་ཅན་དེ་དག་དྲང་སྲོང་དོང་བ་དེ་དག་ལ་མཆོག་ཏུ་དགའ་ཞིང་ཡི་རངས་པར་གྱུར་ཏོ། ། དེའི་ཕྱིར་དང་པོར་ཁྱོད་ཁྲོས་ཏེ། དེ་དག་གི་ཆུ་ཀུན་ཏུ་ཆད་ནས་ཡུལ་འཁོར་དེར་ཀླུང་དང་། འབབ་ཆུའི་ངོགས་དང་། མཚོ་དང་། མཚེའུ་ དང་། ལུ་མའི་ཆུ་དང་། ཁྲོན་པ་དག་སྐམས་པ་ཁྱོད་ཀྱིས་དྲན་ནམ། ཡུལ་དེར་མེ་ལྷ་ཁྲོས་ཏེ་སེམས་ཅན་དེ་དག་གི་མེ་ཀུན་ཏུ་ཆད་ནས་སེམས་ཅན་དེ་དག་བཀྲེས་པ་དང་སྐོམ་པས་གཟིར་ཏེ། འཆི་བའི་དུས་བྱས་ནས་རིང་པོར་མ་ལོན་པར་དེ་འབྲོག་དགོན་པར་གྱུར་ ཏོ། ། དེ་ལྟར་ཡུན་རིང་པོར་ཡང་དག་པར་གནས་པར་གྱུར་པ་དག་ཀྱང་དེ་བཞིན་ནོ། ། ང་ཡོངས་སུ་མྱ་ངན་ལས་འདས་ནས་ལོ་བརྒྱ་ལོན་པ་དང་། དེར་ཇི་ནས་ཀྱང་སའི་ནུ་མའི་གནས་དེར་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། རི་ བྲགས་རྣམས་གནས་པར་འགྱུར་བ་དང་། སེམས་ཅན་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ཀྱི་ལོངས་སྤྱོད་དང་། ཉེ་བར་སྤྱོད་པའི་གནས་དང་། བདེ་བ་དང་། དགའ་བར་བྱེད་པ་དང་། མི་དང་། སྐྱེ་བོ་མང་པོས་གང་བར་འགྱུར་བར་ང་དེར་གཤེགས་ པར་མཛད་དེ། དྲང་སྲོང་ཐུབ་པའི་གནས་གོ་མ་སཱ་ལ་གན་དྷ་དེ་ཞག་བདུན་ལོངས་སྤྱོད་པར་མཛད་དོ། །

དེའི་ཚེ་བཅོམ་ལྡན་འདས་ཀྱིས་གནོད་སྦྱིན་གྱི་སྡེ་དཔོན་ཆེན་པོ་མིང་ཅན་ལ་བཀའ་སྩལ་པ། མིང་ཅན་ཁྱོད་ཀྱིས་དྲན་ནམ། གསོལ་པ། བཙུན་པ་ བཅོམ་ལྡན་འདས་སྔོན་རི་གླང་རུ་དེ་ལ་ཇི་ལྟར་དེ་བཞིན་གཤེགས་པ་འོད་སྲུང་གིས་སྐྱིལ་མོ་ཀྲུང་གཅིག་གིས་རྣམ་པར་གྲོལ་བའི་བདེ་བས་དགུང་བདུན་འདས་པར་མཛད་དེ། དགུང་བདུན་པོ་དེ་འདས་ནས་ཏིང་ངེ་འཛིན་དེ་ལས་བཞེངས་ཏེ། དྲང་སྲོང་ཐུབ་པའི་གནས་ གོ་མ་སཱ་ལ་གན་དྷ་དེ་ལ་བཞུགས་པ་དང་། དེའི་ཚེ་དེའི་སྲུང་བ་འཛིན་པ་དང་། པྱི་པྱི་ལིང་གི་ཤིང་བསྲུང་བ་གང་དག་ལགས་པ་དང་། དེའི་ཉན་ཐོས་བསྙེན་བཀུར་ལ་མངོན་པར་བརྩོན་པ། ཏིང་ངེ་འཛིན་ལ་མངོན་པར་བརྩོན་པ། ཆོས་ཀྱིས་གནས་པ་རྣམས་ཀྱིས་ སྲུང་བ་འཛིན་པ་དང་། པྱི་པྱི་ལིང་གི་ཤིང་སྲུང་བ་གང་དག་ལགས་པ་བདག་གིས་དྲན་ལགས་སོ། ། དེ་ནས་ཀླུའི་རྒྱལ་པོ་ཁྱིམ་བདག་གིས་བྱིན་གྱིས་གསོལ་པ། བཙུན་པ་བཅོམ་ལྡན་འདས་དེ་བཞིན་དུ་ཡུན་ཇི་སྲིད་དུ་ཉན་ཐོས་དེ་དག་ཡོངས་སུ་འཛིན་པ་མ་མཆིས་ པར་གནས་པ་དེ་སྲིད་དུ་བདག་གིས་བསྲུང་བར་བགྱི་ལགས་སོ། ། གཞན་ཡང་བྱམས་པའི་དུས་ཀྱི་བར་དུ་མཆོད་རྟེན་ཆེན་པོ་གོ་མ་སཱ་ལ་གན་དྷ་དུས་རྟག་ཏུ་ཆབ་དང་། ཞུགས་དང་།

གནོད་སྦྱིན་དང་། གྲུལ་བུམ་གྱིས་ཀུན་ཏུ་འཁྲུག་པ་རྣམས་ལས་བདག་གིས་བསྲུང་ བར་བགྱི་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ། ལག་འགྲོའི་བདག་པོ་ལེགས་སོ་ལེགས་སོ། ། ངའི་ཆོས་ཀྱི་ཚུལ་དེ་ལྟར་ཤིན་ཏུ་བྱིན་གྱིས་བརླབས་པས་གྲོགས་པོ་དང་སྦྱིན་བདག་དེ་ལྟ་བུ་དག་གིས་ཡུན་རིང་པོར་འབར་བར་བྱེད་པར་འགྱུར་རོ། ། ཡང་ དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཕྲག་དྲུག་ཅུ་པོ་གང་དག་ཕྱོགས་བཅུའི་སངས་རྒྱས་ཀྱི་ཞིང་གཞན་དག་ནས་ལུང་བསྟན་པ་ཆེན་པོ་ཉི་མའི་སྙིང་པོ་མཉན་པར་བྱ་བའི་ཕྱིར་ལྷགས་ཤིང་འདུས་པ་དེ་དག་གིས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་ འདས་བདག་ཅག་གིས་ཀྱང་གླིང་བཞི་པ་འདིར་གནས་པར་བགྱི་ལགས་སོ། ། དྲང་སྲོང་ཐུབ་པའི་གནས་མེ་ཏོག་ནས་བ་དན་གྱི་བར་དང་། གསེར་ནས་ས་ལེ་སྦྲམ་གྱི་བར་གྱིས་ཡོངས་སུ་གཏམས་པར་བགྱི་ལགས་སོ། ། ལས་འབྱང་བའི་གཟུངས་སྔགས་ཉི་མའི་ སྙིང་པོ་འདི་བཅང་བར་བགྱི་ལགས་སོ། ། གཞན་དག་ལ་བསྟན་པར་བགྱི་ལགས་སོ། ། ཡང་དག་པར་རབ་ཏུ་བསྟན་པར་བགྱི་ལགས་སོ། །

བཅོམ་ལྡན་འདས་ཀྱིས་ཇི་སྐད་བསྟན་པའི་གཟུངས་སྔགས་དེ་ཡང་ཡིད་ཀྱིས་རྗེས་སུ་བརྟགས་ཏེ་གནས་པར་བགྱི་ལགས་སོ། ། བྱང་ཆུབ་ཀྱི་ལམ་དང་། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བགྱི་བའི་སླད་དུ་བདག་དང་གཞན་གྱི་ལས་ཀྱི་སྒྲིབ་པ་བྱང་བར་བགྱི་ལགས་སོ། ། ད་ལྟར་བདུད་བྱེ་བ་དེ་དག་ལྷགས་ཤིང་ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་ མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་གྲངས་མ་མཆིས་པ། དཔག་ཏུ་མ་མཆིས་པ་དེ་དག་ཀྱང་ལྷགས་ཏེ། བཅོམ་ལྡན་འདས་ཀྱིས་ཀྱང་དྲང་སྲོང་ཐུབ་པའི་གནས་མཆོད་རྟེན་ཆེན་པོའི་གནས་དེ་དག་ཐམས་ཅད་ཀླུ་རྣམས་དང་། གནོད་སྦྱིན་རྣམས་ ཀྱི་སུག་པར་ཆང་ཁྱིར་སྩལ་ལགས་སོ། ། འོན་ཀྱང་འདི་ལ་བདུད་དང་། ལྷ་དང་། མི་འམ་ཅི་དང་། ལྷ་མ་ཡིན་དེ་དག་གི་སེམས་གཞན་དུ་གྱུར་ཏེ། བཅོམ་ལྡན་འདས་ཀྱིས་དྲང་སྲོང་ཐུབ་པའི་གནས་དེ་རྣམས་དག་པ་དག་གི་སུག་པར་ཆང་ཁྱིར་ཡོངས་སུ་གཏད་ ལགས་ཞེས། བཅོམ་ལྡན་འདས་ཀྱིས་ད་ལྟར་དང་། མ་འོངས་པའི་དུས་ན་མི་རྣམས་ཀྱི་བར་གྱིས་མཆོད་རྟེན་ཆེན་པོའི་གནས་དེ་དག་ལ་མི་ཕན་པ་དང་། རབ་ཏུ་འཇིག་པ་དང་།

རྣམ་པར་འཇིག་པར་ཕ་རོལ་གནོད་པར་འགྱུར་བ་དེ་ལྟ་བུ་མ་དགོངས་ན་མི་རུང་ལགས་ སོ། ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། ། མ་འཇིགས་ཤིག ། མ་སྐྲག་ཤིག ། འདིར་སྔོན་གྱི་ཡང་དག་པར་རྫོགས་པའི་སངས་རྒྱས་གང་དག་བྱུང་བར་གྱུར་པ་དེ་དག་གིས་དྲང་སྲོང་ཐུབ་པའི་གནས་མཆོད་རྟེན་ཆེན་ པོའི་གནས་དེ་དག་ཐམས་ཅད་བྱིན་གྱིས་བརླབས་ནས་ཀླུ་རྣམས་དང་། གནོད་སྦྱིན་རྣམས་ལ་ཆང་ཁྱིར་ཡོངས་སུ་གཏད་དོ། ། དེ་བཞིན་དུ་ད་ལྟར་ངས་ཀྱང་དྲང་སྲོང་ཐུབ་པའི་གནས་མཆོད་རྟེན་ཆེན་པོའི་གནས་ཐམས་ཅད་ཀླུ་རྣམས་དང་། གནོད་ སྦྱིན་རྣམས་ཀྱི་ལག་ཏུ་ཆང་ཁྱིར་ཡོངས་སུ་གཏད་དོ། ། དེ་ཅིའི་ཕྱིར་ཞེ་ན། མི་ཁོམ་པ་བརྒྱད་ཐོབ་པ་དེ་དག་གི་ལས་ཀྱི་སྒྲིབ་པ་ཡང་དག་པར་བྱང་བར་བྱ་བ་དང་། བྱང་གྲོལ་གྱི་བདེ་བའི་རྒྱུ་ཡང་དག་པར་བསྐྱེད་པར་བྱ་བ་དང་། སེམས་ཅན་རྣམས་ཀྱི་ཉེ་བར་འཚོ་བའི་ཡོ་ བྱད་ས་བོན་གྱི་ཚོགས་དང་། འབྱུང་བའི་ཚོགས་དང་། སྨན་དང་། ནགས་ཚལ་རྣམས་ཡང་དག་པར་རབ་ཏུ་སྐྱེ་བར་བྱ་བ་དང་། བཟའ་བ་རྣམ་པ་སྣ་ཚོགས་ཡོངས་སུ་སྨིན་པར་བྱ་བ་དང་།

དུས་མ་ཡིན་པའི་རླུང་དང་ཆར་པ་རབ་ཏུ་ཞི་བར་བྱ་བའི་ཕྱིར་དྲང་སྲོང་ཐུབ་པའི་གནས་ མཆོད་རྟེན་ཆེན་པོའི་གནས་དེ་དག་ཀླུ་རྣམས་དང་། གནོད་སྦྱིན་རྣམས་ཀྱི་ལག་ཏུ་ཡོངས་སུ་གཏད་པའི་ཕྱིར་རོ། ། ཡང་གཞན་ཡང་མཆོད་རྟེན་ཆེན་པོའི་གནས་བྱུང་ངོ་ཅོག་དང་། འབྱུང་བར་འགྱུར་བ་གང་དུ་དེ་བཞིན་གཤེགས་པ་བལྟམས་པ་དང་། དཀའ་ཐུབ་ཀྱི་ཚལ་ གང་དུ་བསམ་གཏན་ལ་མངོན་པར་བརྩོན་པ་དང་། གང་དུ་བྱང་ཆུབ་མངོན་པར་རྫོགས་པར་སངས་རྒྱས་པ་དང་། གང་དུ་ཆོས་ཀྱི་འཁོར་ལོ་བསྐོར་བ་ནས་གང་དུ་དེ་བཞིན་གཤེགས་པའི་ཆོས་ཀྱི་སྐུའམ། བཙས་པའི་སྐུ་རབ་ཏུ་བཞག་པའི་བར་དང་། གང་དང་གང་ དུ་དེ་བཞིན་གཤེགས་པའི་ཉན་ཐོས་ཆོས་ཀྱིས་གནས་པ་རྣམས་གནས་པར་གྱུར་པ་དང་། གནས་པར་འགྱུར་བ་ནས་ངའི་ཆོས་ཀྱི་ཚུལ་གནས་པར་འགྱུར་བའི་བར་གྱིས་གནས་དེ་དག་ཐམས་ཅད་ལྷ་དང་བཅས་པའི་འཇིག་རྟེན་གྱི་མཆོད་རྟེན་དག་ཡིན་ནོ། ། ཡང་མཆོད་ རྟེན་ཆེན་པོའི་གནས་དེ་དག་ཀྱང་བདུད་རྣམས་དང་། ལྷ་རྣམས་དང་། ཀླུ་རྣམས་དང་། གནོད་སྦྱིན་རྣམས་དང་། ལྷ་མ་ཡིན་རྣམས་ཀྱི་ལག་ཏུ་ཡོངས་སུ་བསྐྱང་བར་བྱ་བའི་ཕྱིར་ཡོངས་སུ་གཏད་དོ། ། གཞན་ཡང་འབྱུང་པོ་ཐམས་ཅད་རབ་ཏུ་དད་པར་བྱེད་པ་དང་།

ཕྱིར་མི་ལྡོག་པར་བྱེད་པ་གང་འདི་ལུང་བསྟན་པ་ཆེན་པོ་ཏིང་ངེ་འཛིན་མངོན་པར་སྒྲུབ་པ། སོ་སོར་སྡང་བ་ཐམས་ཅད་ཕྱིར་ཟློག་པར་བྱེད་པ་ཞེས་བྱ་བ་ངས་ཁྱེད་ཅག་ལ་སྦྱིན་པར་བྱ་སྟེ། སྔོན་གྱི་དེ་བཞིན་གཤེགས་པ་ཐམས་ཅད་ཀྱིས་གསུངས་ཤིང་བྱིན་གྱིས་བརླབས་ལ་ མངོན་པར་རྗེས་སུ་ཡི་རང་བར་མཛད་པ། སྡང་བ་རྣམས་མངོན་པར་དད་པར་བྱེད་པ། ཕྱིར་ཟློག་པར་བྱེད་པ། དགེ་བ་ལ་ཡང་དག་པར་སྦྱོར་དུ་འཇུག་པ་ཡིན་ནོ། ། དེ་བཞིན་དུ་མ་བྱོན་པའི་དེ་བཞིན་གཤེགས་པ་ཐམས་ཅད་ཀྱིས་ཞེས་བྱ་བ་ནས་མངོན་པར་དད་པར་བྱེད་ ཅིང་ཕྱིར་ཟློག་པར་བྱེད་ལ། དགེ་བ་ལ་ཡང་དག་པར་སྦྱོར་དུ་འཇུག་པའི་བར་དུ་ཡིན་ནོ། ། ལུང་བསྟན་པ་ཆེན་པོ་རྫུ་འཕྲུལ་གྱི་རྐང་པ་བཞིའི་རྒྱུ་འཐུན་པ། མངོན་པར་སྒྲུབ་པའི་བདག་པོ་ཆེན་པོ་སྡང་བ་ཐམས་ཅད་ཕྱིར་ལྡོག་པར་བྱེད་པ་འདི་ནི་བརྟུལ་ཞུགས་ཆེན་པོ་ཡང་དག་ པར་སྒྲོལ་བར་བྱེད་པའོ། ། ཡེ་ཤེས་ཆེན་པོ་ལ་འཇུག་པར་བྱེད་པའོ། ། ཐོས་པ་མང་པོ་ཀུན་ཏུ་འཛིན་པའོ། ། ཐབས་ཆེན་པོ་ཡང་དག་པར་སྒྲོལ་བར་བྱེད་པའོ། ། དགྲ་ཆེན་པོ་ངེས་པར་འདུལ་བར་བྱེད་པའོ། ། སྡང་བ་ཆེན་པོ་རབ་ཏུ་དད་པར་བྱེད་པའོ། །

ནད་ཆེན་ པོ་ལས་རབ་ཏུ་ཐར་བར་བྱེད་པའོ། ། ནད་ཆེན་པོ་ལས་རབ་ཏུ་སྒྲོལ་བར་བྱེད་པའོ། ། འཇིགས་པ་ཆེན་པོ་ཕྱིར་ཟློག་པར་བྱེད་པའོ། ། དགོན་པ་ཆེན་པོ་ལས་ངེས་པར་རྒལ་བར་བྱེད་པའོ། ། བདེན་པ་ཆེན་པོ་མཐོང་བར་བྱེད་པའོ། ། བཟོད་པ་ཆེན་པོ་ལ་རེག་པར་བྱེད་ པའོ། ། ཡེ་ཤེས་ཆེན་པོའི་རྒྱ་མཚོ་ལ་འཇུག་པར་བྱེད་པ་ཡིན་ནོ་ཞེས་བྱ་བ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐམས་ཅད་མངོན་པར་རྫོགས་པར་འཚང་རྒྱ་བར་བྱེད་པའོ་ཞེས་བྱ་བའི་བར་དུའོ། ། ཏདྱ་ཐཱ། ཨཱ་མ་ཨ་བཱ་ས། ཨཱ་མ་བ་རི་བ་ར། སྃ་ ཤྲཱི་ཡ། གམྦྷ་པ་རི་པཱ་སཱ། མི་ཏྲ་མི་ཏྲ། ཤྭཱ་ཡ་མི་ཏྲ། པ་རི་བཱ་སཱ། མི་ཏྲ་ས་མ་ཛྙཱ་ཡ། ནི་ཀ་ཐ་ས་མ་ཛྙཱ་ཡ། ཏྲི་ཤྱང་གྷ་བ། དྲ་བ། རཱ་ཛ། བི་ན་ཤཱ་ཡ། ས་མ་ཤཱ་ཡ། ནིར་ཨན་བྷ་དྲ་མ། བཱ་བཱ་གྲམ། རྀད་དྷི་བི་གྲ་མཎ། ས་མ་ཛྙཱ་ན། ཨ་བ་བརྒ། ན་རཱ་ཡ་ན་བརྒ། ས་མཱ་གྲམ། སརྦ་ཏ་ཐཱ་ག་ཏ་ཨ་དྷིཥྛ་ན་མཱ་རྒ་སྭཱ་ཧཱ། བཞིན་{བཟངས་,བཟང་}དག་འདི་ནི་སངས་རྒྱས་ཐམས་ཅད་ཀྱིས་གསུངས་ཤིང་བྱིན་གྱིས་བརླབས་པ་སྟེ། རྫུ་འཕྲུལ་གྱི་རྐང་པའི་རྒྱུ་འཐུན་པའི་ཏིང་ངེ་འཛིན་ཐམས་ཅད་ མངོན་པར་སྒྲུབ་པ།

སྡང་བ་ཐམས་ཅད་ཕྱིར་ཟློག་པར་བྱེད་པ་ནས་དགེ་བ་ལ་ཡང་དག་པར་སྦྱོར་དུ་འཇུག་པར་བྱེད་པའི་བར་དང་། བརྟུལ་ཞུགས་ཆེན་པོ་ཡང་དག་པར་སྒྲོལ་བར་བྱེད་པ་ནས་བྱང་ཆུབ་ཐམས་ཅད་མངོན་པར་རྫོགས་པར་འཚང་རྒྱ་བར་བྱེད་པའི་བར་ཡིན་ ནོ། ། གང་དང་གང་དུ་ད་ལྟར་དང་། མ་འོངས་པའི་དུས་སུ་དེའི་ཚེ་མཆོད་རྟེན་ཆེན་པོའི་གནས་དེ་དག་ལ་བདུད་དམ། ལྷའམ། ཀླུའམ། གནོད་སྦྱིན་ནམ། སྲིན་པོའམ། ལྷ་མ་ཡིན་ནམ། ནམ་མཁའ་ལྡིང་ངམ། མི་འམ་ཅིའམ། གྲུལ་བུམ་ནས་ མི་དང་མི་མ་ཡིན་པའི་བར་དུ་སུས་ཆུའམ། མེའམ། ཕ་རོལ་གནོན་པ་གཞན་གང་ཡང་རུང་བ་ཞིག་གིས་མི་ཕན་པ་དང་། རབ་ཏུ་འཇིག་པ་དང་། རྣམ་པར་འཇིག་པར་རྟུལ་བར་བྱེད་ན་དེར་ཁྱེད་ཀྱིས་འདི་ལྟར་དུས་གསུམ་དུ་གཤེགས་པའི་དེ་བཞིན་གཤེགས་ པ་རྣམས་ཡིད་ལ་བྱ་ཞིང་སེམས་ཅན་ཐམས་ཅད་ལ་ཡང་བྱམས་པའི་ཡིད་ཀྱིས་ལུང་བསྟན་པ་ཆེན་པོ་ཏིང་ངེ་འཛིན་ཐམས་ཅད་མངོན་པར་སྒྲུབ་པ། སྡང་བ་ཐམས་ཅད་ཕྱིར་ཟློག་པར་བྱེད་པ་འདི་དྲན་པར་བྱས་ན་དེའི་ཚེ་དེ་དག་གི་སེམས་ཀྱི་རྒྱུད་རབ་ཏུ་དད་པར་ བྱེད་པར་འགྱུར་རོ། ། ཕྱིས་ཀྱང་རྣམ་པར་གཞིག་པར་བྱ་བའི་ཕྱིར་རྟུལ་བར་མི་བྱེད་དོ། །

རིགས་ཀྱི་བུ་གང་གིས་ལུང་བསྟན་པ་ཆེན་པོ་ཏིང་ངེ་འཛིན་ཐམས་ཅད་མངོན་པར་སྒྲུབ་པ། སྡང་བ་ཐམས་ཅད་ཕྱིར་ཟློག་པར་བྱེད་པ་འདི་ཐོས་ནས་སྡིག་པའི་སེམས་ཕྱིར་ཟློག་ པར་མི་བྱེད་པ་དང་། ཉེས་པར་བྱས་པའི་ལས་སྤོང་བར་མི་བྱེད་པ་ནི་ལྷ་དང་བཅས་པའི་འཇིག་རྟེན་ནས་སྐྱེ་དགུའི་བར་ལ་ངས་ཡང་དག་པར་རྗེས་སུ་མ་མཐོང་སྟེ། སྔོན་གྱི་ཤ་ཁོན་དང་འདྲེས་པ་ནི་མ་གཏོགས་སོ། ། ཀྱེ་བཅོམ་ལྡན་འདས་ཀྱིས་ལུང་བསྟན་པ་འདི་བཤད་ པ་ན་འཁོར་དེའི་ནང་ནས་ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། {ཡི་དགས་,ཡི་དྭགས་}དང་། གྲུལ་བུམ་དང་། ཤ་ཟ་དང་། མི་དང་། མི་མ་ཡིན་པ་གང་དག་བཅོམ་ལྡན་འདས་ལ་མངོན་པར་དད་པ་དེ་དག་ཐམས་ཅད་བཅོམ་ལྡན་འདས་ལ་ཤིན་ཏུ་དགའ་ བ་དང་། མཆོག་ཏུ་དགའ་བ་དང་། རབ་ཏུ་དད་པ་སྐྱེས་སོ། ། ཡང་དེའི་ཚེ་བཅོམ་ལྡན་འདས་ཀྱི་རྫུ་འཕྲུལ་གྱི་མཐུས་བདུད་སྡིག་ཅན་བདག་གིས་རང་གི་གནས་སུ་ཏིང་ངེ་འཛིན་མངོན་པར་སྒྲུབ་པ་འདི་ཐོས་སོ། ། ཐོས་ནས་ཀྱང་བཅོམ་ལྡན་འདས་ལ་ཤིན་ཏུ་དགའ་ བ་དང་། དད་པ་དང་། གུས་པ་སྐྱེས་ནས་མཆི་མ་དག་ཕྱུང་སྟེ། འཁོར་རྣམས་ལ་འདི་སྐད་ཅེས་སྨྲས་སོ། ། ངའི་ཚིག་ཉོན་ཅིག །

འདི་ནི་དྲང་སྲོང་ཐུབ་པ་རྒྱལ་བའི་མཆོག་བཟོད་པ་དང་། ཡོན་ཏན་དང་། ངེས་པའི་ཚིག་རབ་མཆོག་ཅན་དེ་སྲིན་བུས་གང་ བའི་རིའི་གནས་དམ་པ་ལ་འབར་བ་ལ་ལག་འགྲོ་ཆེན་པོ་དང་། ལྷ་རྣམས་ཀྱིས་བཟོད་པའི་དུས་བསྟན་ཏེ། ང་ཡང་དེར་འགྲོ་ཞིང་མཉམ་པ་མེད་པའི་དགེ་སྦྱོང་ལ་བཟོད་པར་གསོལ་ལོ། ། དེ་ཉིད་ལ་སྐྱབས་སུ་འགྲོའོ། ། མཚུངས་པ་མེད་པའི་སྙིང་བརྩེ་བ་རྣམ་པ་ སྣ་ཚོགས་དང་ལྡན་པ་རྒྱལ་བ་བཟོད་པ་ཅན་དེ་ལ་སྐྱབས་སུ་འགྲོ་བ་ནི་ང་དང་ལྷན་ཅིག་འདོང་བར་བྱོས་ཤིག ། དེའི་ཆོས་བསྟན་དུ་མེད་པ་ཉོན་ཅིག ། ཉོན་མོངས་པའི་དྲ་བ་ཆོད་ཅིག ། རྡུལ་མེད་ཅིང་འཇིགས་པ་མེད་པའི་གྲོང་ཁྱེར་དུ་འཇུག་པར་བྱོས་ཤིག ། དེ་ནས་ བདུད་སྡིག་ཅན་འཁོར་བྱེ་བ་ཕྲག་བརྒྱད་ཅུ་དང་ལྡན་པས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་འདི་སྐད་ཅེས་གསོལ་ཏོ་ཞེས་བྱ་བའི་བར་དུའོ། ། རྐང་གཉིས་དམ་པ་ཤིན་ཏུ་ཞི་མཛད་པ། ། བཟོད་སྟོབས་དེས་མཐུ་ཅན་ལ་བཟོད་པར་གསོལ། ། ཁྱོད་ཀྱི་ཡོན་ཏན་བདག་གིས་ཀུན་ཏུ་འཚལ། ། བདག་གིས་ལོག་པ་གང་བགྱིས་དེ་བཟོད་གསོལ། ། དུས་གསུམ་རྒྱལ་བ་ཀུན་ལ་བདག་ཕྱག་འཚལ། ། ཆོས་དང་དགེ་འདུན་ལ་ཡང་བདག་སྐྱབས་མཆི། །

བླ་མ་བདག་གི་ནོངས་པར་གཟུང་དུ་གསོལ། ། སླན་ ཆད་ཁྱོད་ལ་བདག་འཁྲུག་ཡོང་མི་བགྱིད། ། དེ་ནས་བཅོམ་ལྡན་འདས་ཀྱིས་བདུད་སྡིག་ཅན་ལ་འདི་སྐད་ཅེས་བཀའ་སྩལ་ཏོ། ། ང་ལ་ཁྲོ་མེད་ཉོན་མོངས་ཐམས་ཅད་མེད། ། རྟག་ཏུ་སེམས་ཅན་ཀུན་ལ་སེམས་སྙོམས་ཏེ། ། བདུད་ཁྱོད་ལ་ནི་ སེམས་ཀྱང་དགའ་བ་ཡིན། ། རྒྱལ་བ་བཟོད་པའི་ཐུགས་ལྡན་རྟག་ཏུ་བཟོད། ། དེ་ནས་བདུད་སྡིག་ཅན་མཆོག་ཏུ་དགའ་བ་དང་དད་པ་སྐྱེས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས་བཅོམ་ལྡན་འདས་ འབའ་ཞིག་ལ་བལྟ་ཞིང་འདུག་གོ། ། དེ་ནས་འཁོར་དེའི་ནང་ནས་བདུད་ཀྱི་བུ་འོད་འཕྲོ་རྩུབ་ཅེས་བྱ་བ་བདུད་ཀྱི་ཡུལ་ཐམས་ཅད་དང་ལྷན་ཅིག་ཏུ་བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཙུན་པ་བཅོམ་ ལྡན་འདས་མིག་མིག་ཅེས་བགྱི་བ་ལགས་ན། བཙུན་པ་བཅོམ་ལྡན་འདས་ཅི་གཟུགས་རྣམས་ཀྱི་རྒྱུ་མིག་ལགས་སམ། འོན་ཏེ་མིག་གི་རྒྱུ་གཟུགས་རྣམས་ལགས་པ་ནས་ཅི་ཆོས་རྣམས་ཀྱི་རྒྱུ་ཡིད་ཀྱི་ཁམས་ལགས་སམ། འོན་ཏེ་ཡིད་ཀྱི་རྒྱུ་ཆོས་རྣམས་ཀྱི་ བར་ལགས། ། བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་གཟུགས་རྣམས་ཀྱི་རྒྱུ་ཡང་མིག་མ་ཡིན་ལ། མིག་གི་རྒྱུ་ཡང་གཟུགས་རྣམས་མ་ཡིན་པ་ནས་ཆོས་རྣམས་ཀྱི་རྒྱུ་ཡང་ཡིད་མ་ཡིན་ལ། ཡིད་ཀྱི་རྒྱུ་ཡང་ཆོས་རྣམས་ཀྱི་བར་མ་ ཡིན་ནོ། ། རིགས་ཀྱི་བུ་འོན་ཀྱང་མིག་ནི་མིག་གིས་སྟོང་པའོ། ། དེ་ལྟ་མོད་ཀྱི་མིག་ལ་རྟེན་ཅིང་མིག་གི་རྣམ་པར་ཤེས་པ་སྐྱེའོ། ། དེའི་རྐྱེན་གྱིས་གཟུགས་རྣམས་རབ་ཏུ་ཤེས་པ་ནས་ཡིད་ཀྱི་རྐྱེན་གྱིས་ཡིད་ཀྱི་རྣམ་པར་ཤེས་པ་སྐྱེའོ། ། དེའི་རྐྱེན་གྱིས་ཆོས་རྣམས་ ཀྱི་བར་རྣམ་པར་ཤེས་པའོ། ། མིག་གི་རྣམ་པར་ཤེས་པ་དམིགས་ནས་གང་ནས་ཀྱང་འོང་བ་མེད་དོ། ། གང་དུ་ཡང་འགྲོ་བ་མེད་དོ། ། མིག་ཕྱི་ན་སྡོད་པ་ཡང་མེད་དེ། དུས་གསུམ་དུ་གཏོགས་པ་ཐམས་ཅད་ལ་གང་ལ་ཡང་མི་དམིགས་སོ། ། མིག་ལ་ འབྲི་བ་ཉིད་མེད་དོ། ། གང་བ་ཉིད་མེད་དོ། ། བརྡ་མེད་དོ། ། ཐ་སྙད་མེད་དོ། ། ཡང་དག་པར་འདུ་བ་མེད་དོ། ། གཞི་མེད་དོ། ། དཔེར་ན་སྔ་དྲོའི་དུས་སུ་ཉི་མ་ཤར་བ་ན་སྐར་ཁུང་གང་དང་གང་དུ་ཉི་མའི་འོད་ཟེར་དག་ཞུགས་པ་ནི་ར་བ་ལ་གནས་པ་དག་ཏུ་ཡང་ དག་པར་སྣང་ངོ་། ། ར་བ་ལ་མུན་པ་དང་། སྣང་བ་དང་། རྟོག་པ་ཡང་མེད་དོ། ། ར་བ་གང་ཡིན་པ་དེ་ཉིད་སྣང་བ་ཡང་མ་ཡིན་ནོ། །

ར་བའི་རྐྱེན་གྱིས་སྣང་བ་ཡང་མ་ཡིན་ཏེ། འོན་ཀྱང་དེ་ལ་སྣང་བ་ཡང་ཡོད་དོ། ། སྣང་བ་གང་ཡིན་པ་དེ་ཉིད་ཉི་མ་དང་། ཉི་མ་གང་ཡིན་ པ་དེ་ཉིད་སྣང་བ་ཡང་མ་ཡིན་ནོ། ། ཉི་མ་ནུབ་པ་ན་སྣང་བ་ཡང་མེད་པར་འགྱུར་རོ། ། གང་ན་ཡང་སྣང་བའི་འགྲོ་བ་དང་གཞི་མེད་དེ། འོན་ཀྱང་ཉི་མའི་རྐྱེན་གྱིས་སྣང་བར་རབ་ཏུ་ཤེས་ཤིང་གཟུགས་ཀྱི་སྣང་བ་ལ་རྟེན་པར་ཡང་སྣང་ངོ་། ། དེ་བཞིན་དུ་ནང་གི་སྐྱེ་མཆེད་དྲུག་ པོ་དེ་དག་གི་རྒྱུ་ཡང་ནང་གི་སྐྱེ་མཆེད་དྲུག་པོ་དེ་དག་ཡིན་ནོ་ཞེས་བྱ་བའི་བར་དུའོ། ། ནང་གི་སྐྱེ་མཆེད་རྣམས་ཀྱི་རྒྱུ་ཡང་ཕྱི་རོལ་གྱི་སྐྱེ་མཆེད་རྣམས་མ་ཡིན་ཏེ། ཕན་ཚུན་དུ་བསྡུས་པ་ཉིད་ཀྱི་ཕྱིར་རོ། ། བསྡུས་པ་ལ་ནི་རྣམ་པར་རྒྱུ་བ་མེད་དོ། ། ཡང་དག་པར་འདུ་བ་ མེད་དོ། ། གཞི་མེད་དོ། ། ཕྱི་དང་ནང་གི་སྐྱེ་མཆེད་རྣམས་ལ་རྣམ་པར་ཤེས་པའི་བར་དང་། བརྡ་དང་། རྣམ་པར་རྒྱུ་བ་མེད་དོ། ། ཡང་དག་པར་འདུ་བ་མེད་དོ། ། གཞི་ཡང་མེད་པ་ཉིད་དེ། ཕན་ཚུན་དུ་བསྡུས་པ་ཉིད་ཀྱི་ཕྱིར་དང་། ཡུལ་མ་ཡིན་པ་ཉིད་ཀྱི་ཕྱིར་རོ། ། འོན་ཀྱང་རྣམ་པར་ཤེས་པས་རྣམ་པར་ཤེས་པར་བྱེད་དེ།

འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཡིན་པས་རྣམ་པར་ཤེས་པ་ཡང་འདུ་བྱེད་ཀྱི་རྒྱུ་ལགས་སོ། ། འདུ་བྱེད་རྣམས་ནི་གསུམ་སྟེ། ལུས་ཀྱི་འདུ་བྱེད་དང་། ངག་གི་འདུ་བྱེད་དང་། ཡིད་ཀྱི་འདུ་བྱེད་ དོ། ། དེ་ལ་ལུས་ཀྱི་འདུ་བྱེད་རྣམས་གང་ཞེ་ན། ལུས་ཀྱི་འདུ་བྱེད་རྣམས་ཞེས་བྱ་བ་ནི་དབུགས་རྔུབ་པ་དང་འབྱུང་བ་དག་ཡིན་ཏེ། དེ་དག་ནི་ལུས་ཀྱི་འདུ་བྱེད་རྣམས་སོ། ། དབུགས་རྔུབ་པ་དང་། འབྱུང་བ་དེ་དག་ཀྱང་ཡན་ལག་རྣམས་ལེན་པ་སྟེ། མི་མཉམ་པ་ དང་མཉམ་པ་ཉིད་ཀྱི་ཕྱིར་དང་། མ་ནོར་བ་དེ་བཞིན་ཉིད་ཀྱི་ཕྱིར། གཞན་གང་ཡང་རུང་བའི་སྐལ་བ་མི་མཉམ་པ་ཉིད་དང་། སར་པ་སར་པ་དང་། རྙིང་པ་མེད་པ་ཉིད་དང་། རྣམ་པར་མི་གནས་པའི་མཚན་ཉིད་ དང་། ནམ་མཁའ་དང་མཉམ་པ་དང་། ནམ་མཁའ་ལ་ཀུན་ཏུ་རྒྱུ་བ་དག་ཡིན་ནོ། ། རླུང་གང་ཡིན་པ་དེ་ནི་ནམ་མཁའ་མ་ཡིན་ནོ། ། ནམ་མཁའ་གང་ཡིན་པ་དེ་ཉིད་ཀྱང་རླུང་མ་ཡིན་ཏེ། ཕན་ཚུན་དུ་འདྲེས་པ་ཡིན་ལ་ཕན་ཚུན་སྤྱོད་ཡུལ་ནི་མ་ཡིན་ནོ། ། གཉི་ ག་སྟོང་པ་དང་། བརྗོད་དུ་མེད་པ་དང་། མཚན་ཉིད་དང་བྲལ་བ་དག་ཡིན་ནོ། ། འབྲི་བ་དང་། གང་བ་མེད་པ་དག་ཡིན་ནོ། ། ཕ་རོལ་དང་ཚུ་རོལ་ལ་གནས་པ་དང་།

ཡང་དག་པའི་མཐའ་ཡང་དག་པར་འཕགས་པ་ནི་ལུས་ཀྱི་འདུ་བྱེད་རྣམས་ཡིན་ཏེ། དེ་ལྟ་བས་ ན་རྣམ་པར་ཤེས་པ་ལ་ལུས་ཀྱི་འདུ་བྱེད་རྣམས་གནས་པ་མ་ཡིན་ཏེ། ཚོགས་པ་མེད། རྣམ་པར་རྒྱུ་བ་མེད། ཡང་དག་པར་འདུ་བ་མེད། གཞི་དང་ཡང་དག་པའི་རྗེས་སུ་འབྲེལ་བ་མེད་དོ། ། རྣམ་པར་ཤེས་པ་གཞི་དང་ཡང་དག་པར་རྗེས་སུ་འབྲེལ་པའོ་ཞེས་ བྱ་བའི་བར་ཡང་དེ་བཞིན་ནོ། ། དེ་ལ་ངག་གི་འདུ་བྱེད་རྣམས་ཞེས་བྱ་བ་གང་ཞེ་ན། རྟོག་པ་དང་། དཔྱོད་པ་རྣམས་སོ། ། རྟོག་པ་རྣམས་གང་ཞེ་ན། གང་དག་དབུགས་རྔུབ་པ་འཇུག་པར་བྱེད་པ་དང་། འབྱུང་བར་བྱེད་པ་རྣམས་ཏེ། སེམས་ཀྱིས་རྗེས་སུ་འཐུན་པར་ བྱས་པ་དག་ཡིན་ནོ། ། དེ་ལ་རྟོག་པ་རྣམས་ཀྱིས་རྟོག་པར་བྱེད་པ་ནས་འཇིག་པའི་མཚན་ཉིད་རྣམས་ཀྱིས་རྟོག་པར་བྱེད། ཡོངས་སུ་དག་པ་ལ་རྟོག་པར་བྱེད། རླུང་ལ་རྟེན་པའི་རྟོག་པ་དེ་དག་སྐྱེ་བར་བྱེད། དགག་པའི་བར་དུ་སྟེ། རྟོག་པའི་རླུང་རྣམས་ནི་སྐད་ཅིག་ལ་ འཆེལ་པ་ཡིན་ནོ། ། རླུང་རྣམས་ཀྱང་རྟོག་པ་རྣམས་ཡིན་པར་མི་འགྱུར་ཏེ། གཉི་ག་ཡང་ཕན་ཚུན་དུ་སྤྱོད་ཡུལ་མ་ཡིན་ཞིང་ཕན་ཚུན་དུ་མཚན་ཉིད་དང་བྲལ་བ་ནས་བརྗོད་དུ་མེད་པ་དག་དང་། ནམ་མཁའ་ལྟར་མེད་པ་དག་པའི་བར་དུའོ། །

དེ་ལ་དཔྱོད་པ་རྣམས་གང་ཞེ་ན། དཔྱོད་ པ་གང་དག་གྲང་བའི་རྣམ་པའམ། དྲོ་བའི་རྣམ་པར་ལུས་ཐམས་ཅད་ཀྱི་དབུགས་རྔུབ་པ་དང་འབྱུང་བའི་རླུང་རྣམས་རྒྱུ་བར་བྱེད་པ་ཡིན་ནོ། ། དཔྱོད་པ་དག་གིས་འདུས་ཏེ་རེག་པ་རྣམ་པར་མི་ཤེས་ཏེ། དཔྱོད་པ་དེ་དག་རླུང་རྣམས་དང་ཕན་ཚུན་དུ་སྤྱོད་ཡུལ་མ་ཡིན་ཏེ། ཕན་ ཚུན་དུ་མཚན་ཉིད་དང་བྲལ་བ་ནས་བརྗོད་དུ་མེད་པ་དག་པའི་བར་དུའོ། ། དེ་ལ་ཡིད་ཀྱི་འདུ་བྱེད་རྣམས་གང་ཞེ་ན། ཡིད་ཀྱི་འདུ་བྱེད་རྣམས་ཞེས་བྱ་བ་ནི་འདུ་ཤེས་དང་སེམས་པའོ། ། དེ་ལ་འདུ་ཤེས་གང་ཞེ་ན། སེམས་གང་གིས་ཆོས་དེ་དག་དེ་ལྟར་ཤེས་པ་ནས་གང་གི་ ཚེ་དབུགས་རྔུབ་པ་དེའི་ཚེ་དབུགས་འབྱུང་བ་མེད་དོ་ཞེས་བྱ་བའི་བར་དུ་སྟེ། དེ་ལྟར་འདུ་བྱེད་རྣམས་ལ་འདུ་ཤེས་རྣམ་པར་བསྒོམས་པ་ཡིན་ནོ། ། ཡང་དག་པར་བྱུང་ནས་ཀྱང་འདུ་བྱེད་རྣམས་ཟད་པ་ཡིན་ཏེ། རྗེས་སུ་འཐུན་པར་འདུ་ཤེས་པས་ཀྱང་འདུ་བྱེད་ཀྱི་འདུ་ཤེས་ རྣམ་པར་སྒོམ་པར་བྱེད་པ་འདི་ནི་འདུ་ཤེས་ཞེས་བྱ་སྟེ། འདུ་ཤེས་དེ་ནི་རླུང་རྣམས་ལ་རྟེན་པ་ནས་གཉི་ག་བརྗོད་དུ་མེད་པའི་བར་དུའོ། ། དེ་ལ་སེམས་པ་གང་ཞེ་ན།

སེམས་པ་གང་དག་གིས་ཞེས་བྱ་བ་ནས་འདུ་བྱེད་རྣམས་ལ་འདུ་ཤེས་རྣམ་པར་བསྒོམས་པས་ཡང་དག་ པ་ཉིད་སྐྱོན་མེད་པ་ལ་ཞུགས་ཤིང་སོ་སོའི་སྐྱེ་བོའི་ས་ལས་རྣམ་པར་འདས་པར་བྱེད་དོ་ཞེས་བྱ་བའི་བར་དུ་སྟེ། སྐྱེ་བ་དང་འཇིག་པ་སྒོམ་པ་འདུ་བྱེད་རྣམས་ལས་སེམས་སེལ་བར་བྱེད་པ། རླུང་རྣམས་འཕྲོ་བར་མི་བྱེད་པ་འདི་ནི་སེམས་པ་ཞེས་བྱའོ། ། ཚོར་བ་གསུམ་སྤང་ བའི་ཕྱིར་ཡེ་ཤེས་ཀྱི་རྟེན་མིག་མ་འདྲེས་པ་ཅན་ཞེས་བྱ་བ་ནས། ཡིད་མ་འདྲེས་པ་ཅན་ཞེས་བྱ་བའི་བར་དང་། འཕགས་པ་ཞེས་བྱའོ་ཞེས་བྱ་བའི་བར་དུའོ། ། རིགས་ཀྱི་བུ་དེ་ལྟར་ཡང་གཟུགས་དམིགས་པའི་རྒྱུ་མིག་མ་ཡིན་ནོ། ། མིག་གི་རྒྱུ་གཟུགས་མ་ཡིན་པ་ ནས་ཆོས་རྣམས་ཀྱི་རྒྱུ་ཡིད་མ་ཡིན་ནོ། ། ཡིད་ཀྱི་རྒྱུ་ཆོས་རྣམས་མ་ཡིན་པའི་བར་དུ་སྟེ། གཉི་ག་ཕན་ཚུན་དུ་སྤྱོད་ཡུལ་མ་ཡིན། ཕན་ཚུན་དུ་བརྡར་བཏགས་པ་མ་ཡིན། རྣམ་པར་རྒྱུ་བ་མ་ཡིན། ཡང་དག་པར་གནས་པ་མ་ཡིན། ཡང་དག་པར་འདུ་བ་མ་ཡིན། བརྗོད་དུ་མེད་པ་དག་ཡིན། ཕ་རོལ་དང་ཚུ་རོལ་ལ་གནས་པ་དང་། ཡང་དག་པའི་མཐའ་ལ་ཡང་དག་པར་རྟེན་པ་དག་ཡིན་ནོ། །

ཀྱེ་ཡང་བཅོམ་ལྡན་འདས་ཀྱིས་བསྟན་པ་འདི་བཤད་པ་ན་བདུད་ཀྱི་བུ་འོད་འཕྲོ་རྩུབ་བདུད་ཀྱི་འཁོར་སྔོན་གྱི་རྒྱལ་བ་ ལ་ལྷག་པར་བྱ་བ་བྱས་པ་ཉི་ཁྲི་དང་ལྷན་ཅིག་ཏུ་རྗེས་སུ་འཐུན་པའི་བཟོད་པ་ཐོབ་པར་གྱུར་ཏོ། ། དེའི་ཚེ་ལྷ་དང་མི་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། སེམས་ཅན་དཔག་ཡས་པ་ཡང་བསམ་གཏན་དང་པོ་ལ་གནས་པར་གྱུར་པ་ནས་བསམ་གཏན་བཞི་པའི་བར་ཐོབ་ པར་གྱུར་ཏོ། ། ཁ་ཅིག་ནི་འབྲས་བུ་དང་པོ་ལ་གནས་པར་གྱུར་པ་ནས་འབྲས་བུ་གསུམ་པ་ལ་གནས་པར་གྱུར་པའི་བར་དུའོ། ། ཁ་ཅིག་གིས་ནི་ཉན་ཐོས་ཀྱི་ཐེག་པ་ལ་ས་བོན་བསྐྱེད་པ་ནས་རྐྱེན་གྱི་ཐེག་པ་ལ་ས་བོན་བསྐྱེད་པའི་བར་དུའོ། ། ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་ པའི་བྱང་ཆུབ་ཏུ་སེམས་བསྐྱེད་དོ། ། ཀླུའི་འཁོར་དེའི་ནང་ནས་ཀྱང་ཀླུ་དཀྲིགས་ཕྲག་དྲུག་ཅུས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྔོན་མ་བསྐྱེད་པའི་སེམས་བསྐྱེད་པར་གྱུར་ཏོ། ། སངས་རྒྱས་ཀྱི་ཞིང་མི་མཇེད་ཐམས་ཅད་དུ་ས་ཆེན་པོ་རྣམ་པ་དྲུག་ཏུ་རབ་ཏུ་འགུལ་ཏོ། །

དེར་ཕྱོགས་ བཅུ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ལྷགས་པ་དེ་དག་གིས་བཅོམ་ལྡན་འདས་ལ་མཆོད་པའི་ལས་བྱ་བའི་ཕྱིར་བྱང་ཆུབ་སེམས་དཔའི་ཏིང་ངེ་འཛིན་རྣམ་པ་སྣ་ཚོགས་ཀྱིས་རབ་ཏུ་ཕྱེ་བའི་རིན་པོ་ཆེའི་ཆར་པ་དང་། རས་བཅོས་བུའི་ཆར་པ་དང་། མེ་ཏོག་གི་ཆར་པ་སྣ་ཚོགས་རབ་ཏུ་ཕབ་སྟེ་གསོལ་པ། སྔོན་མ་ཐོས་པའི་འདུས་པ་འདི་དང་། ཏིང་ངེ་འཛིན་བསྟན་པ་འདི་ནི་མཆོག་ཏུ་ངོ་མཚར་ལགས་ཤིང་རྨད་དུ་བྱུང་བ་ལགས་སོ། ། འདི་ནི་ཤཱཀྱ་ཐུབ་པའི་ཆོས་ཀྱི་འཁོར་ལོ་བསྐོར་བ་གཉིས་པ་ལགས་སོ། ། བཙུན་པ་བཅོམ་ལྡན་འདས་བདག་ཅག་གིས་ཀྱང་ཉི་མའི་སྙིང་པོ་ལུང་བསྟན་པ་ཆེན་པོ་ཤིན་ཏུ་རྒྱས་པའི་སྡེའི་མདོའི་གཟུངས་སྔགས་འདི་བཟུང་ནས་རང་རང་གི་སངས་རྒྱས་ཀྱི་ཞིང་རྣམས་སུ་སེམས་ཅན་རྣམས་ལ་རབ་ཏུ་བསྟན་པར་བགྱི་ལགས་སོ། ། དེར་བདུད་དང་། ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། གྲུལ་བུམ་དང་། {ཡི་དགས་,ཡི་དྭགས་}དང་།

ཤ་ཟ་གང་དག་ལྷགས་པ་དེ་དག་གིས་ཀྱང་མཆོག་ཏུ་ངོ་མཚར་ཐོབ་ནས་སིལ་སྙན་རྣམ་ པ་སྣ་ཚོགས་ཀྱི་སྒྲ་འབྱིན་པར་བྱེད་ཅིང་བཅོམ་ལྡན་འདས་ལ་རིན་པོ་ཆེ་སྣ་ཚོགས་དང་། རས་བཅོས་བུ་དང་། ཆོས་གོས་དང་། རྒྱན་དང་། མེ་ཏོག་དང་། ཕྲེང་བ་དང་། དྲི་དང་། བྱུག་པ་སྣ་ཚོགས་ཀྱིས་མཆོད་པ་བྱས་སོ། ། དེ་ནས་བཅོམ་ལྡན་འདས་ལ་ ཀླུའི་རྒྱལ་པོ་རྒྱ་མཚོས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་བདག་ལ་ཐུགས་བརྩེ་བ་ཉེ་བར་བཟུང་སྟེ། བདག་གི་གནས་སུ་རྒྱ་མཚོ་ཆེན་པོར་བསོད་སྙོམས་ལ་གཤེགས་པར་གསོལ། དེར་བཅོམ་ལྡན་འདས་ལས་བདག་འཁོར་དང་བཅས་ པས་ཉི་མའི་སྙིང་པོ་ལུང་བསྟན་པ་ཆེན་པོ་འདི་ཐོག་མ་དང་། བར་དང་། ཐ་མ་འདི་ཐམས་ཅད་མཉན་པར་བགྱི་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ། ལག་འགྲོའི་བདག་པོ་ད་དེ་བཞིན་གཤེགས་པ་རྒྱ་མཚོ་ཆེན་པོར་མི་གཤེགས་སོ། ། གསོལ་ པ། བཙུན་པ་བཅོམ་ལྡན་འདས་སུ་ཞིག་སེམས་རྩེ་གཅིག་པས་ཉི་མའི་སྙིང་པོ་ལུང་བསྟན་པ་ཆེན་པོ་འདི་ཉན་པར་བགྱིད་པའི་རིགས་ཀྱི་བུའམ་རིགས་ཀྱི་བུ་མོས་བསོད་ནམས་མང་པོ་ཇི་སྙེད་ཅིག་སྐྱེད་པར་བགྱིད་ལགས། བཅོམ་ལྡན་འདས་ཀྱིས་བཀའ་སྩལ་པ།

ལག་འགྲོའི་བདག་པོ་སེམས་ཅན་སུ་ལ་ལ་ཞིག་བྱུང་ནས་གླིང་བཞི་པ་འདི་ཐམས་ཅད་རིན་པོ་ཆེ་ཐམས་ཅད་ཀྱིས་ཡོངས་སུ་གང་བར་བྱས་ནས་དེ་བཞིན་གཤེགས་པ་རྣམས་ལ་སྦྱིན་པ་སྦྱིན་པར་བྱེད་པ་དང་། སྐྱེས་བུ་ཅིག་ཤོས་སུ་ཞིག་སེམས་རྩེ་གཅིག་པས་ཉི་མའི་ སྙིང་པོ་ལུང་བསྟན་པ་ཆེན་པོ་འདི་ཐམས་ཅད་ཡོངས་སུ་རྫོགས་པར་ཉན་པར་བྱེད་ན་བསོད་ནམས་ཀྱི་ཕུང་པོ་སྔ་མ་དེས་ནི་བསོད་ནམས་ཀྱི་ཕུང་པོ་ཅིག་ཤོས་འདི་ལ་བརྒྱའི་ཆར་ཡང་ཉེ་བར་མི་འགྲོའོ། ། སྟོང་གི་ཆ་དང་། བྱེ་བ་ཕྲག་བརྒྱ་སྟོང་གི་ཆ་དང་། གྲངས་དང་། ཆ་དང་། དཔེ་ དང་། རྒྱུར་ཡང་མི་བཟོད་དོ། ། ལག་འགྲོའི་བདག་པོ་ཉི་མའི་སྙིང་པོ་འདི་ཐོས་པ་ཙམ་གྱི་བསོད་ནམས་ཀྱི་ཕུང་པོ་ཡང་དེ་ལྟར་ཟབ་པ་ཡིན་ནོ། ། གསོལ་པ། བཙུན་པ་བཅོམ་ལྡན་འདས་གལ་ཏེ་ད་རྒྱ་མཚོ་ཆེན་པོར་མི་གཤེགས་ལགས་ན་བདག་གིས་ ཀྱང་ཉི་མའི་སྙིང་པོ་ལུང་བསྟན་པ་ཆེན་པོ་འདི་མཉན་ནས་ཡི་གེར་བྲིས་ཏེ་བཅང་བར་བགྱི་ལགས་ན་རྒྱ་མཚོ་ཆེན་པོར་དགེ་བའི་ཆོས་ཇི་སྙེད་ཅིག་རྣམ་པར་འཕེལ་བར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ།

ལག་འགྲོའི་བདག་པོ་གང་དང་གང་དུ་ཉི་མའི་ སྙིང་པོ་ལུང་བསྟན་པ་ཆེན་པོ་ཐམས་ཅད་བྲིས་ནས་འཆང་བར་འགྱུར་བ་དེ་དང་དེ་ཉིད་དུ་ཕན་ཡོན་བཅུ་འབྱུང་ངོ་། ། བཅུ་གང་ཞེ་ན། ཁྱིམ་དེ་དང་དེ་ཞེས་བྱ་བ་ནས་ཡུལ་ཞེས་བྱ་བའི་བར་དེར་ནོར་དང་། འབྲུ་དང་། ཉེ་བར་སྤྱོད་པ་དང་། ལོངས་སྤྱོད་མང་པོ་དང་། རིན་པོ་ ཆེ་རྣམ་པ་སྣ་ཚོགས་མ་ཚང་བ་མེད་པར་འགྱུར་རོ། ། གཞན་ཡང་ཁྱིམ་མམ་ཡུལ་གང་ན་ཉི་མའི་སྙིང་པོ་ལུང་བསྟན་པ་ཆེན་པོ་འདི་བྲིས་ནས་མཆོད་པར་འགྱུར་བ་དེ་དང་དེར་མཆོད་རྟེན་ཆེན་པོ་དེ་དག་ན་གང་དག་དེ་ལ་མཆོད་པ་བྱ་བའི་ཕྱིར་གནས་པའི་བྱང་ཆུབ་སེམས་ དཔའ་སེམས་དཔའ་ཆེན་པོ་བྱེ་བ་ཕྲག་དྲུག་ཅུ་པོ་དེ་དག་གིས་ཀྱང་བལྟ་བ་དང་། ཕྱག་བྱ་བ་དང་། མཆོད་པ་བྱ་བ་དང་། བསྙེན་བཀུར་བྱ་བའི་ཕྱིར་ལྷགས་ནས་དེར་འཐབ་པ་དང་། ཐབ་མོ་དང་། མི་ངས་དང་། ནད་དང་། མུ་གེ་དང་། དམག་ཚོགས་གཉི་ ག་དང་། དུས་མ་ཡིན་པའི་རླུང་དང་། ཆར་པ་དང་། ནད་རྣམ་པ་སྣ་ཚོགས་རབ་ཏུ་ཞི་བར་བྱེད་དོ། ། ཡང་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཕྲག་དྲུག་ཅུ་པོ་དེ་དག་ཐམས་ཅད་ཀྱིས་འདི་སྐད་ཅེས་གསོལ་ཏོ། །

བཙུན་པ་བཅོམ་ལྡན་འདས་དེ་བཞིན་ དུ་བགྱི་ལགས་སོ། ། ཁྱིམ་མམ་ཞེས་བྱ་བ་ནས་ཡུལ་འཁོར་གྱི་བར་གང་ན་ཉི་མའི་སྙིང་པོ་ལུང་བསྟན་པ་ཆེན་པོ་འདི་ཡི་གེར་བྲིས་ཤིང་མཆོད་པར་འགྱུར་བ་དེར་བདག་ཅག་གིས་འཐབ་པ་དང་། ཐབ་མོ་དང་། མི་ངས་དང་། ནད་དང་། མུ་གེ་དང་། དམག་ཚོགས་གཉི་ག་དང་ དུས་མ་ལགས་པའི་རླུང་དང་། ཆར་པ་རྣམ་པ་སྣ་ཚོགས་རབ་ཏུ་ཞི་བར་བགྱི་ལགས་སོ། ། བཀའ་སྩལ་པ། གཞན་ཡང་ཁྱིམ་མམ་ཞེས་བྱ་བ་ནས་ཡུལ་འཁོར་ཞེས་བྱ་བའི་བར་གང་ན་ཉི་མའི་སྙིང་པོ་ལུང་བསྟན་པ་ཆེན་པོ་འདི་ཡི་གེར་བྲིས་པར་འགྱུར་བའི་ཡུལ་ འཁོར་ཞེས་བྱ་བའི་བར་དེར་བརྒྱ་བྱིན་དང་། ཚངས་པ་དང་། རྒྱལ་པོ་ཆེན་པོ་བཞི་དང་། གནོད་སྦྱིན་གྱི་སྡེ་དཔོན་ཉི་ཤུ་རྩ་བརྒྱད་འཁོར་དང་བཅས་པ་དང་། ལྷ་མོ་ཆེན་མོ་དཔལ་དང་། ལྷ་མོ་ཆེན་མོ་དབྱངས་ཅན་དང་། སའི་ལྷ་མོ་བརྟན་མ་དང་། སྨན་གྱི་ ལྷ་མོ་གྲུབ་པ་འཁོར་དང་བཅས་པས་ཁྱིམ་ཞེས་བྱ་བ་ནས་ཡུལ་འཁོར་ཞེས་བྱ་བའི་བར་དེར་རྟག་པར་རྒྱུན་དུ་ཉིན་མཚན་དུ་སྲུང་བར་འགྱུར་རོ། ། ཡོངས་སུ་སྐྱོང་བར་འགྱུར་རོ། ། དེའི་ཚེ་བརྒྱ་བྱིན་དང་།

ཚངས་པ་ཞེས་བྱ་བ་ནས་སྨན་གྱི་ལྷ་མོ་གྲུབ་པ་ཞེས་བྱ་བའི་ བར་འཁོར་དང་བཅས་པས་ཀྱང་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་དེ་བཞིན་དུ་བགྱི་ལགས་སོ་ཞེས་བྱ་བ་ནས་གཞན་ཡང་ཞེས་བྱ་བའི་བར་དུ་སྟེ། ཁྱིམ་དང་ཞེས་བྱ་བ་ནས་ཡུལ་འཁོར་ཞེས་བྱ་བའི་བར་གང་ན་ཞེས་བྱ་བ་ནས་ཁྱིམ་དང་ཞེས་ བྱ་བ་ནས། ཡུལ་འཁོར་ཞེས་བྱ་བའི་བར་དེ་དང་དེར་སངས་རྒྱས་མང་པོ་ལ་བསྙེན་བཀུར་བྱས་པ། དབང་ཆེ་བར་གྲགས་པ། དབང་ཆེ་བར་གྲགས་པ། སྦྱིན་པ་དང་། དུལ་བ་དང་། ཡང་དག་པར་སྡོམ་པ་ཕུན་སུམ་ཚོགས་པ་རྣམས་སྐྱེ་བ་ལེན་པར་བྱེད་ དོ། ། གཞན་ཡང་ཁྱིམ་དེ་དང་དེར་སེམས་ཅན་རྣམས་འདོད་པའི་ཡོན་ཏན་ལྔ་ལ་མ་ཆགས་པ་དང་། རྟག་ཏུ་སྦྱིན་པའི་ཕ་རོལ་ཏུ་ཕྱིན་པ་ལ་བརྩོན་པར་འགྱུར་རོ་ཞེས་བྱ་བའི་བར་དུའོ། ། གཞན་ཡང་སྣོད་དུ་གྱུར་པའི་སྦྱིན་གནས་དེ་དག་ཉིད་ལ་མངོན་པར་དགའ་བར་འགྱུར་རོ། ། གཞན་ཡང་དེར་རྟག་པར་རྒྱུན་དུ་ཆོས་ཀྱི་རོ་རྣམ་པ་སྣ་ཚོགས་ཀྱི་ཆར་པས་ཁྱབ་པར་འགྱུར་རོ་ཞེས་བྱ་བའི་བར་དུའོ། ། གཞན་ཡང་དེར་སེམས་ཅན་རྣམས་རྟག་ཏུ་དགེ་བ་བཅུའི་ལས་ཀྱི་ལམ་ཡང་དག་པར་བླང་བ་ལ་མངོན་པར་བརྩོན་པར་འགྱུར་རོ། །

གཞན་ཡང་དེར་སེམས་ཅན་ རྣམས་རྟག་ཏུ་བྱམས་པའི་སེམས་དང་ལྡན་པ་དང་། སྙིང་རྗེའི་སེམས་དང་ལྡན་པ་དང་། འདོད་ཆགས་དང་བྲལ་བའི་སེམས་དང་ལྡན་པར་འགྱུར་རོ། ། གཞན་ཡང་ཁྱིམ་དང་ཞེས་བྱ་བ་ནས་ཡུལ་འཁོར་ཞེས་བྱ་བའི་བར་དེ་དང་དེ་དག་ཏུ་སེམས་ཅན་ རྣམས་ངན་སོང་གསུམ་སྤངས་པ་དང་། མཐོ་རིས་སུ་སྐྱེ་བར་འགྱུར་རོ། ། ལག་འགྲོའི་བདག་པོ་དེ་ལ་ཁྱིམ་དག་དང་ཞེས་བྱ་བ་ནས་ཡུལ་འཁོར་ཞེས་བྱ་བའི་བར་དུ་ང་ལ་མཆོད་པ་བྱ་བའི་ཕྱིར་ཉི་མའི་སྙིང་པོ་ལུང་བསྟན་པ་ཆེན་པོ་འདི་ཡི་གེར་བྲིས་ཤིང་ཡང་དང་ཡང་ཀློག་ པའི་ཁྱིམ་ཞེས་བྱ་བ་ནས་ཡུལ་འཁོར་ཞེས་བྱ་བའི་བར་དེར་ཕན་ཡོན་དེ་དག་འབྱུང་བར་འགྱུར་ན། གང་དག་འདོན་པར་བྱེད་པ་དང་། ཆོས་དེ་དག་ལ་ཡང་དག་པར་སྣང་བར་བྱེད་པ་དང་། ཆོས་ཀྱི་གནས་པས་གནས་པར་བྱེད་པ་ལ་ལྟ་སྨོས་ཀྱང་ཅི་དགོས། བསོད་ནམས་ ཀྱི་ཕུང་པོ་དེ་ནི་ངས་བསྐལ་པ་བརྒྱར་ཡང་བསྟན་པར་སླ་བ་མ་ཡིན་ཏེ། ལག་འགྲོའི་བདག་པོ་ཉི་མའི་སྙིང་པོ་ལུང་བསྟན་པ་ཆེན་པོ་འདི་ནི་དེ་ལྟར་ཟབ་བོ། ། ཉི་མའི་སྙིང་པོ་ལུང་བསྟན་པ་ཆེན་པོ་འདི་ནི་དེ་ལྟར་ཡོན་ཏན་ཆེ་བའོ། ། དེ་ལྟར་ཕན་ཡོན་ཆེ་བའོ། །

བཅོམ་ ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ནས་ལྷགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། བདུད་དང་། ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། ལྷ་མ་ཡིན་དང་། ནམ་མཁའ་ལྡིང་དང་། དྲི་ཟ་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། གྲུལ་བུམ་དང་། {ཡི་དགས་,ཡི་དྭགས་}དང་། ཤ་ཟ་དང་། སྲུལ་པོ་དང་། མི་དང་། མི་མ་ཡིན་པ་དེ་དག་ཡི་རངས་ཤིང་རབ་ཏུ་དགའ་ལ། དགའ་བ་དང་། ཡིད་བདེ་བ་སྐྱེས་ནས་བཅོམ་ ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། ། ། ། འཕགས་པ་འདུས་པ་ཆེན་པོ་ཐེག་པ་ཆེན་པོའི་མདོ་ལས་ཉི་མའི་སྙིང་པོའི་ལེའུ་བཅུ་གཅིག་པ་རྫོགས་སོ། ། ། ། འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ་རྫོགས་སོ། ། ། ། རྒྱ་གར་གྱི་མཁན་པོ་སརྦ་ཛྙཱ་དེ་བ་དང་། བིདྱཱ་ཀ་ར་པྲ་བྷ་དང་། དྷརྨཱ་ཀ་ར་དང་། ལོ་ཙྪ་བ་བན་དེ་བཟང་སྐྱོང་གིས་བསྒྱུར། ཞུ་ཆེན་གྱི་ལོ་ཙྪ་བ་བན་དེ་དཔལ་བརྩེགས་ཀྱིས་ཞུས་ཏེ་གཏན་ལ་ཕབ་པ། ། ། །