༄༅༅། ། འཕགས་པ་ཐབས་ཀྱི་ཞགས་པ་པདྨོའི་ཕྲེང་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། ། འཕགས་པ་ཐབས་ཀྱི་ཞགས་པ་པདྨོ་ཕྲེང་གི་དོན་བསྡུས་པ། དེ་ནས་བཅོམ་ལྡན་འདས་དཔལ་ཀུན་རིག་རྣམ་པར་སྣང་མཛད་ལ་བཅོམ་ལྡན་འདས་དཔལ་རྡོ་རྗེ་ སེམས་དཔས་རིག་པའི་བྱིན་བརླབས་ལས་བྱུང་བའི་མཆོད་པ་རྒྱ་ཡོངས་སུ་མ་ཆད་པའི་གཞལ་ཡས་ཁང་དང་། བླ་རེ་དང་། རྒྱལ་མཚན་དང་། བ་དན་དང་། གདུགས་དང་། སྒེག་མོ་ལ་སོགས་པ་ནང་གི་མཆོད་པ་བཞི་དང་། བདུག་སྤོས་ལ་སོགས་པའི་ཕྱིའི་མཆོད་པ་བཞིས་མཆོད་ དེ། ། ལན་གསུམ་དུ་བསྐོར་བ་བྱས་ནས་སོ་སོ་མ་ཡིན་པའི་རིག་པའི་འདུད་པས་ཕྱག་འཚལ་ཏེ་སྤྱན་སྔར་འདུག་ནས་འདི་སྐད་ཅེས་གསོལ་ཏོ། ། བཅོམ་ལྡན་འདས་ཀྱིས་དུས་གསུམ་དུ་གཤེགས་པའི་སངས་རྒྱས་བཅོམ་ལྡན་འདས་ཀྱིས་མཁྱེན་པའི་སངས་རྒྱས་བཅོམ་ལྡན་འདས་ རྣམས་ཀྱི་སྤྱོད་ཡུལ་ཉན་ཐོས་དང་ཐུན་མོང་མ་ལགས་པ་ཐབས་གང་གིས་རྟོགས་པ་དེ་ཚེ་འདི་ཉིད་ལ་ཐམས་ཅད་མཁྱེན་པའི་གོ་འཕང་ཐོབ་པའི་དོན་དུ་བཤད་དུ་གསོལ། དེ་སྐད་ཅེས་གསོལ་པ་དང་། ཅང་མི་གསུང་བར་འཛུམ་པ་མཛད་དེ། འདི་སྐད་ཅེས་བཀའ་སྩལ་ཏོ། ། སེམས་ དཔའ་ཆེན་པོ་ཉོན་ཅིག །

དོན་འདི་དང་ཕྱི་ནང་གི་ཆོས་ཐམས་ཅད་འདྲ་སྟེ་བདེན་པ་གཉིས་སུ་འདུས་སོ། ། བདེན་པ་གཉིས་ལ་ཡང་ཚུལ་འདི་ལྟར་ཤེས་པར་བྱའོ། ། བདེན་གཉིས་རྒྱུ་དང་འབྲས་བུའི་ཚུལ། ། དེ་བཞིན་ཉིད་ལ་གནས་བཅས་ན། ། ཕྱི་ནང་སྣོད་བཅུད་རྣམ་པར་དག ། བྱེད་ སྤྱོད་ཐམས་ཅད་ཚོགས་གཉིས་འགྱུར། ། ཕ་རོལ་ཕྱིན་བཅུ་རྫོགས་པ་སྟེ། ། ས་བཅུ་རིམ་གྱིས་བགྲོད་པ་ལ། ། མཉམ་ཉིད་རིག་པའི་རྡོ་རྗེ་ཡིས། ། ས་རྣམས་མཉམ་པ་ཉིད་དུ་སྦྱོར། ། རྡོ་རྗེ་ལྟ་བུའི་ཡེ་ཤེས་ཀྱིས། ། ཆོས་ཀུན་སྒྱུ་མར་རིག་པའི་ཕྱིར། ། དངོས་དང་དངོས་མེད་བག་ཆགས་ བསྲེགས། ། ཡང་ན་ཡེ་ཤེས་མེ་ཞེས་བྱ། ། རྒྱུ་དང་འབྲས་བུའི་རྣམ་སྨིན་ནི། ། མེད་མིན་རྒྱུ་འབྲས་མཐུན་པས་འགྲུབ། ། དེ་བཞིན་མཉམ་ཉིད་ཡེ་ཤེས་ཀྱིས། ། རིག་པས་ཚོགས་སུ་འགྱུར་བས་སོ། ། ལམ་གྱི་ནང་ན་ཉེ་ལམ་བདེ་རྫོགས་པ། ། ཐབས་ཀྱི་ནང་ན་མ་ནོར་དམ་པ་སྟེ། ། བསྒྲུབས་ན་ཚེ་འདིས་སངས་རྒྱས་ཆེ་བ་ཡང་། ། བླང་དོར་མེད་པའི་སྐུ་གསུམ་རྡོ་རྗེས་འཐོབ། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་བདེན་པ་གཉིས་བསྟན་པའི་ལེའུ་སྟེ་དང་པོའོ། ། ། །

སེམས་དཔའ་ཆེན་པོ་དམ་ཚིག་འདི་དག་ནི་བདག་དང་གཞན་ལ་ཕན་ པའི་ཕྱིར་ངས་བཤད་དོ། ། གཏི་མུག་ཞེ་སྡང་ང་རྒྱལ་དང་། ། འདོད་ཆགས་ཕྲག་དོག་ཆེན་པོ་ནི། ། བསྲུང་བ་མེད་པའི་སྡོམ་པ་ཅན། ། དེ་ནི་དམ་ཚིག་རྡོ་རྗེ་ཡིན། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་དམ་ཚིག་བསྟན་པའི་ལེའུ་སྟེ་གཉིས་པའོ། ། ། ། སེམས་ དཔའ་ཆེན་པོ་དབང་འདི་དག་ནི། ། རང་རིག་པའི་རྩལ་གྱིས་འཐོབ་བོ། ། ཐབས་དང་ཤེས་རབ་དབང་ཆེན་ཏེ། ། རྡོ་རྗེ་དྲིལ་བུ་རིག་པས་འཛིན། ། མྱ་ངན་འདས་དང་འཁོར་བ་ཡི། ། ཆོས་ལ་འདོད་བཞིན་དབང་བྱེད་དོ། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་དབང་ གི་ལེའུ་སྟེ་གསུམ་པའོ། ། ། ། སེམས་དཔའ་ཆེན་པོ་མཆོད་པའི་མཆོག་ནི་འདི་ལྟར་རིག་པར་བྱའོ། ། བདག་མཆོད་ཀུན་མཉེས་ཐམས་ཅད་འདྲོངས། ། ཀུན་ལ་ཕན་པའི་སྨན་ཡིན་ཏེ། ། རྣལ་འབྱོར་བདག་ཉིད་ཆེན་པོ་ཡིས། ། ཐམས་ཅད་བཟའ་ཞིང་བརྒྱན་པར་བྱ། ། འཕགས་ པ་ཐབས་ཀྱི་ཞགས་པ་པདྨོ་ཕྲེང་ལས་མཆོད་པའི་ལེའུ་སྟེ་བཞི་པའོ། ། ། ། ཀུན་དུ་འོད་ཀྱི་ས་ལས་འདས། ། པདྨའི་སྤྱན་དུ་གྱུར་པ་ན། ། རིག་པའི་བྱིན་བརླབས་ཆེན་པོ་ལས། ། རང་འབྱུང་དཀྱིལ་འདུ་འཕྲོ་ཡི་ཚུལ། །

ཡི་གེ་འཁོར་ལོ་ཚོགས་ཆེན་ཏེ། ། མཚན་དང་དཔེ་ བྱད་ཀུན་ལས་གྲོལ། ། རྔམ་ཞིང་གཏུམ་པའི་གཟུགས་ཅན་དང་། ། མགྱོགས་མ་མགྱོགས་མའི་ཕོ་ཉར་ལྡན། ། དེ་ནི་ཐིག་ལེ་རྡོ་རྗེ་ཡིན། ། འདི་ཞེས་གང་ཟག་བདག་མེད་པར། ། རྟོགས་པར་བྱ་ཕྱིར་ངས་བཤད་དེ། ། མཁས་པས་དེ་ལ་འབྱོར་པར་གྱིས། ། འཕགས་ པ་ཐབས་ཀྱི་ཞགས་པ་པདྨོ་ཕྲེང་ལས་ཏིང་ངེ་འཛིན་གྱི་དཀྱིལ་འཁོར་གྱི་ལེའུ་སྟེ་ལྔ་པའོ། ། ། ། དེ་ན་སེམས་དཔའ་ཆེན་པོ་སྤྱོད་ཡུལ་ཐམས་ཅད་ནི་འདི་ལྟར་རིག་པར་བྱའོ། ། ཆེན་པོ་ལྔ་ཡང་དེ་བཞིན་གཤེགས། ། གཅིག་ལའང་ལྔ་ལྔར་རིག་པར་གྱིས། ། ཁམས་གསུམ་བདག་ཉིད་ཡིན་པ་སྟེ། ། སྐུ་གསུམ་ཞེས་ཀྱང་དེ་ལ་བྱ། ། ཡེ་ཤེས་ལྔ་དང་འགྲོ་བ་ལྔ། ། མཉམ་པས་སོ་སོ་དབྱེར་མེད་དེ། ། སྔགས་དང་ཕྱག་རྒྱ་དབང་བསྒྱུར་ན། ། སྤྱོད་ཡུལ་ཀུན་དུ་མཎྜལ། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་ གཟུགས་བརྙན་གྱི་དཀྱིལ་འཁོར་གྱི་ལེའུ་སྟེ་དྲུག་པའོ། ། ། ། སེམས་དཔའ་ཆེན་པོ་ཞེས་རྡོ་རྗེ་སེམས་དཔའ་ཐོས་ནས་བཤད་དོ། ། རྒྱལ་བའི་རྒྱལ་བ་རྣམས་ཀྱི་སྐུ། ། སྣ་ཚོགས་ཅིར་ཡང་སྣང་མོད་ཀྱི། ། ཀུན་དུ་རིན་ཆེན་ལྟ་བུ་སྟེ། ། དོན་དང་ལས་ཡིན་བསྒོམས་པས་འགྲུབ། །

དབུ་མིག་རྣ་བ་སྨ་ལྕེ་ལ། ། ཨོྃ་ཞེས་བྱ་བ་ལྔ་བཞག་སྟེ། ། གཙོ་བོ་ལྔ་དང་གཙོ་མོ་ལྔ། ། སྦྱོར་བའི་ཚུལ་དུ་བསྒོམ་པར་བྱ། ། ལག་པ་གཡས་པའི་སོར་མོ་ལ། ། ཧཱུྃ་ཞེས་བྱ་བ་ལྔ་བཞག་སྟེ། ། སེམས་དཔའ་ལྔ་དང་སེམས་མ་ལྔ། ། སྦྱོར་བའི་ཚུལ་དུ་བསྒོམ་པར་བྱ། ། ལག་པ་གཡོན་པའི་སོར་ མོ་ལ། ། ཏྲཱྃ་ཞེས་བྱ་བ་ལྔ་བཞག་སྟེ། ། སེམས་དཔའ་ལྔ་དང་སེམས་མ་ལྔ། ། སྦྱོར་བའི་ཚུལ་དུ་བསྒོམ་པར་བྱ། ། རྐང་པ་གཡོན་པའི་སོར་མོ་ལ། ། ཧྲཱིཿཞེས་བྱ་བ་ལྔ་བཞག་སྟེ། ། སེམས་དཔའ་ལྔ་དང་སེམས་མ་ལྔ། ། སྦྱོར་བའི་ཚུལ་དུ་བསྒོམ་པར་བྱ། ། རྐང་པ་གཡོན་པའི་སོར་མོ་ ལ། ། ཨཱཿཞེས་བྱ་བ་ལྔ་བཞག་སྟེ། ། སེམས་དཔའ་ལྔ་དང་སེམས་མ་ལྔ། ། སྦྱོར་བའི་ཚུལ་དུ་བསྒོམ་པར་བྱ། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་ལྷའི་མཚན་ཉིད་དང་དཀྱིལ་འཁོར་དགོད་པའི་རིམ་པ་བསྟན་པའི་ལེའུ་སྟེ་བདུན་པའོ། ། ། ། སེམས་དཔའ་ཆེན་པོ་ ཉོན་ཅིག་ཅེས་རྡོ་རྗེ་སེམས་དཔའ་ལ་བོས་ནས་བཤད་དོ། ། རྣལ་འབྱོར་རིག་འཛིན་མར་ལྡན་པས། ། ལྔ་ཞིང་ལྔ་དང་འབྱོར་པ་ཡི། ། ཚོམ་བུ་ལྔ་ཡི་ལྷ་བསྒོམས་ན། ། ཐམས་ཅད་བདག་ཉིད་ཆེན་པོར་འགྱུར། ། རིན་ཆེན་པདྨའི་དཀྱིལ་འཇམ་འདི། །

འཛུམ་པའི་མདངས་ཀྱིས་འབུལ་ ལགས་ཀྱིས། ། དགྱེས་པའི་རྡོ་རྗེ་རབ་གསོར་ནས། ། བྱང་ཆུབ་སེམས་སྤྲིན་དབབ་པར་གསོལ། ། རྡོ་རྗེ་གསོར་བའི་དགའ་མཆོག་འདི། ། འཛུམ་ཞིང་འཁྱིལ་པའི་གནས་སུ་གསོར། ། མི་དམིགས་བདེ་དང་འཕྲོ་བ་ནི། ། རྡོ་རྗེ་འཛིན་མར་ལྡན་ལས་བྱུང་། ། རྣལ་འབྱོར་རིག་འཛིན་ མར་ལྡན་པས། ། ན་བཟའ་དང་ནི་ཞལ་ཟས་རྣམས། ། གྲུབ་པའི་རྫས་སུ་དབང་བསྐུར་ནས། ། གསོལ་ན་དངོས་གྲུབ་མཆོག་ཏུ་འགྱུར། ། རྣལ་འབྱོར་རིག་འཛིན་མར་ལྡན་པས། ། གླུ་དང་ཚིག་གི་སྒྲ་རྣམས་ཡིན། ། གསུང་གི་ངོ་བོར་བྱིན་བརླབས་ཏེ། ། བསྒྲགས་ནས་དངོས་གྲུབ་མཆོག་ ཏུ་འགྱུར། ། རྣལ་འབྱོར་རིག་འཛིན་མར་ལྡན་པས། ། བྲོ་དང་གར་གྱིས་བསྐྱོད་བྱས་ཏེ། ། འོད་ཀྱི་འདུ་འཕྲོ་བྱིན་གྱིས་བརླབ། ། དངོས་གྲུབ་མཆོག་ཀྱང་འཐོབ་པར་འགྱུར། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་དངོས་གྲུབ་སྒྲུབ་པའི་ལེའུ་སྟེ་བརྒྱད་པའོ། ། ། ། དེ་ནས་བཅོམ་ ལྡན་འདས་དེ་དག་གི་སྐུ་དང་གསུང་དང་ཐུགས་རྡོ་རྗེ་ལས་འདི་ཕྱུང་ངོ་། ། ཨོྃ་བཛྲ་བཻ་རོ་ཙ་ན་ཨོྃ། ཨོྃ་སཏྭ་བཛྲ་ཧཱུྃ། ཨོྃ་རཏྣ་བཛྲ་ཏྲཱྃ། ཨོྃ་དྷརྨ་བཛྲ་ཧྲཱིཿ། ཨོྃ་ཀརྨ་བཛྲ་ཨཱཿ། ཨོྃ་བཛྲ་ཨཀྵོ་བྷྱཿཧཱུྃ།

ཨོྃ་བཛྲ་སཏྭ་ཧཱུྃ། ཨོྃ་བཛྲ་རཱ་ཛ་ཧཱུྃ། ཨོྃ་བཛྲ་རཱ་ག་ཧཱུྃ། ཨོྃ་བཛྲ་སཱདྷཱུ་ཧཱུྃ། ཨོྃ་བཛྲ་རཏྣ་སཾ་བྷ་བ་ཏྲཱྃ། ཨོྃ་ བཛྲ་རཏྣ་ཏཱྃ། ཨོྃ་བཛྲ་སཱུ་རྱ་ཏྲཱྃ། ཨོྃ་བཛྲ་དྷྭ་ཛ་ཏྲཱྃ། ཨོྃ་བཛྲ་ཧཱ་ས་ཏྲཱྃ། ཨོྃ་བཛྲ་ཨ་མི་ཏཱ་བྷ་ཧྲཱིཿ། ཨོྃ་བཛྲ་ཏཱིཀྵཱ་ཧྲཱིཿ། ཨོྃ་བཛྲ་ཙཀྲ་ཧྲཱིཿ། ཨོྃ་བཛྲ་པཱ་ཤ་ཧྲཱིཿ། ཨོྃ་བཛྲ་ཨ་མོ་གྷ་སིདྡྷི་ཧཱ། ཨོྃ་བཛྲ་ཀརྨ་ཧཱ། ཨོྃ་བཛྲ་རཀྵ་ཧཱ། ཨོྃ་བཛྲ་ཡཀྵ་ཧཱ། ཨོྃ་བཛྲ་མུཥྚི་ཧཱ། ཧོཿ བཛྲེ་ཤྭ་ར་དྷཱ་ཏུ་ཨོྃ། ཨོྃ་བཛྲ་བུདྡྷ་ ལོ་ཙ་ན་ཧཱུྃ། ཨོྃ་བཛྲ་མཱ་མ་ཀཱི་ཏྲྃ། ཨོྃ་བཛྲ་པཎྜ་རཱ་བ་སི་ནཱི་ཧཱ། ཨོྃ་བཛྲ་ས་མ་ཡ་ཏཱ་རཱ་ཧཱ། ཨོྃ་བཛྲ་ལཱ་སྱཻ་ཧཱུྃ། ཨོྃ་བཛྲ་དྷཱུ་པེ་ཧཱུྃ། ཨོྃ་བཛྲ་ཨྃ་ཀུ་ཤ་ཧཱུྃ། ཨོྃ་བཛྲ་དེ་ཤྭ་རེ་བྷྱཿདེ་ཧཱུྃ། ཨོྃ་བཛྲ་མཱ་ལེ་ཏྲཱྃ། ཨོྃ་བཛྲ་བུཥྤེ་ཏྲཱྃ། ཨོྃ་བཛྲ་པཱ་ཤ་ཏྲཱྃ། ཨོྃ་བཛྲ་རཏྣ་ར་ཏི་ཏྲཱྃ། ཨོྃ་བཛྲ་གཱི་ཏྱི་ཧྲཱིཿ། ཨོྃ་བཛྲ་ཨཱ་ ལོ་ཀེ་ཧྲཱིཿ། ཨོྃ་བཛྲ་སྥོ་ཊ་ཧྲཱིཿ། ཨོྃ་བཛྲ་ནྲྀ་ཏྱེ་ཧཱ། ཨོྃ་བཛྲ་གནྡྷེ་ཧཱ། ཨོྃ་བཛྲ་གྷཎྜ་ཧཱ། ཨོྃ་བཛྲ་ར་ཏི་ཧཱ། ཨོྃ་བཛྲ་མུཥྚི་ཧཱུྃ། ཨོྃ་བཛྲ་མུཥྚི་ཏྲཱྃ། ཨོྃ་བཛྲ་མུཥྚི་ཧྲཱིཿ། ཨོྃ་བཛྲ་མུཥྚི་ཧཱ།

འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་སྔགས་ཀྱི་ལེའུ་སྟེ་དགུ་པའོ། ། ། ། སེམས་དཔའ་ ཆེན་པོ་ཉོན་ཅིག་ཅེས་རྡོ་རྗེ་སེམས་དཔའ་ལ་བོས་ནས་བཤད་དོ། ། ལྷ་དང་ལྷ་མོའི་ངང་ཉིད་དུ། ། ཡན་ལག་ལྔ་ལ་འབྱོར་བས་ན། ། བསྐྱོད་པ་ཐམས་ཅད་ཕྱག་རྒྱ་ཡིན། ། དེ་སྐད་དཔའ་བོས་བཀའ་སྩལ་ཏོ། ། དེ་ལ་ཕྱག་རྒྱའི་མཚན་ཉིད་ནི། ། ཐབས་དང་ཤེས་རབ་ངང་ཉིད་དུ། ། ལག་གི་ འདུ་བྱེད་བསྒོམས་ནས་ནི། ། ཐལ་མོ་དམ་སྦྱར་རྩ་བསྣོལ་གཤིབས། ། རྡོ་རྗེ་ཐལ་མོར་བཀའ་སྩལ་ཏོ། ། སོར་མོ་ནང་དུ་བསྣོལ་ནས་བཀན། ། གུང་མཛུབ་མཐེ་བོ་མཐེ་ཆུང་རྣམས། ། སོ་སོར་རྩེ་སྤྲད་ཕྱིར་བཀྱེད་དེ། ། སྲིན་ལག་གཤིབས་བསྒྲེང་དམ་ཚིག་རྒྱ། ། རྐང་སོར་ གཡས་ཀྱིས་གཡོན་པ་མནན། ། ལག་མཐིལ་གཡས་ཀྱིས་གཡོན་པ་མནན། ། མཐེ་བོ་རྩེ་སྤྲད་པང་དུ་བླང་། ། རྣམ་པར་སྣང་མཛད་རྒྱ་ཆེན་ཡིན། ། རྡོ་རྗེ་ཁུ་ཚུར་བཅངས་པ་ལས། ། གཡས་ཀྱི་མཛུབ་མོ་གཡོན་གྱིས་བཟུང་། ། ཚོགས་པས་གཅིག་ལ་གཅིག་བཟུང་བ། ། འདི་ནི་སྦྱོར་ བའི་རྒྱ་མཆོག་གོ། ། མཐེ་བོ་གཉིས་དང་མཐེབ་ཆུང་གཉིས། ། སོ་སོར་རྩེ་སྤྲད་ཟླུམ་པོ་སྟེ། ། ལྷག་མ་འོད་འཕྲོ་རྟིང་ཕྱེ་བ། ། མི་བསྐྱོད་པ་ཡི་ཕྱག་རྒྱ་ཡིན། །

རྟིང་སྤྲད་གུང་མོ་རྩེ་སྦྱར་ཏེ། ། མཛུབ་མོ་ཚིགས་བཅག་གུང་ལ་སྦྱར། ། སྲིན་མཐེབ་རྩེ་སྤྲད་མཐེ་ཆུང་སྦ། ། རིན་ཆེན་འབྱུང་བའི་ ཕྱག་རྒྱ་ཡིན། ། གུང་མཛུབ་སྲིན་ལག་རྩེ་སྤྲད་དེ། ། མཐེ་ཆུང་ངོས་ལ་སྦྱར་བར་བྱ། ། མཐེ་བོ་རྩེ་སྤྲད་ཟླུམ་པོ་སྟེ། ། སྣང་བ་མཐའ་ཡས་ཕྱག་རྒྱ་ཡིན། ། ཐལ་མོ་སྦྱར་ནས་སོ་སོར་བགྲད། ། བསྐྱོད་ནས་འཁོར་ལོ་ལྟར་བྱས་ཏེ། ། གློག་གི་ཕྲེང་བས་འཁོར་བར་བྱ། ། དོན་ཡོད་གྲུབ་པའི་ཕྱག་རྒྱ་ ཡིན། ། ཕྱག་རྒྱའི་རྒྱལ་པོ་འདི་དག་ནི། ། ཐུགས་ཀར་བཅིང་ཞིང་ཉིད་དུ་མོས། ། འདུ་འཕྲོ་སྒྲོལ་ཞིང་མཁའ་ལ་དགྲོལ། ། ལས་དང་ཐུན་མོང་ཉིད་དུ་བཤད། ། རྡོ་རྗེ་དྲིལ་བུ་བཟུང་ནས་ནི། ། ཐུགས་ཀར་རང་ནི་དཀུར་བརྟེན་ནས། ། གཅུ་ཐབས་ཟུར་གྱིས་ལྟ་བ་ནི། ། རྡོ་རྗེ་སེམས་དཔའི་རྒྱ་ ཆེན་ཡིན། ། ལག་པ་བསྣོལ་ནས་ཁུ་ཚུར་བཅང་། ། གུང་མོ་གཉིས་ནི་བརྐྱང་བར་བྱ། ། མཛུབ་མོ་ལྕགས་ཀྱུ་ལྟར་བྱས་པ། ། རྡོ་རྗེ་རྒྱལ་པོ་རྒྱ་ཆེན་ཡིན། ། ལག་པ་ཁུ་ཚུར་བཅངས་པ་ལས། ། གཡོན་གྱི་མཐེབ་མཛུབ་རྩེ་སྤྲད་དེ། ། གཡས་ཀྱི་གུང་མོ་བརྐྱང་ནས་གདེང་། ། རྡོ་རྗེ་ འདོད་པའི་རྒྱ་ཆེན་ཡིན། ། ལག་པ་གཉིས་ཀྱི་སོར་མོ་རྣམས། །

སོ་སོའི་གུང་མོ་ཚིགས་དང་པོར། ། ངོས་བཞི་ནས་ནི་རྩེ་མོ་གཟུགས། ། རྡོ་རྗེ་ལེགས་པའི་རྒྱ་ཆེན་ཡིན། ། རྟིང་སྦྱར་གུང་མོའི་རྩེ་སྤྲད་དེ། ། མཐེབ་མཛུབ་སྲིན་ལག་ཚིགས་བཅག་སྟེ། ། དག་དུ་མཛེས་པ་ མཐེ་ཆུང་སྦས། ། རྡོ་རྗེ་རིན་ཆེན་རྒྱ་ཆེན་ཡིན། ། མཐེ་བོ་མཐེ་ཆུང་རྩེ་སྤྲད་ནས། ། ལུ་གུ་རྒྱུད་དུ་སྦྲེལ་བར་བར་བྱ། ། ལྷག་མ་འོད་ལྟར་བྱས་ན་ནི། ། རྡོ་རྗེ་ཉི་མའི་རྒྱ་ཆེན་ཡིན། ། ལག་ངར་གཡོན་པ་བསྒྲེང་ནས་ནི། ། རྡོ་རྗེ་ཁུ་ཚུར་བཅངས་པ་ལས། ། གཡས་པ་གྲུ་མོར་ གཟུང་བར་བྱ། ། རྡོ་རྗེ་རྒྱལ་མཚན་རྒྱ་ཆེན་ཡིན། ། གཡོན་གྱི་སྟེང་དུ་གཡས་བཞག་ནས། ། སོར་མོའི་ཚིགས་བཅག་སྤྲད་བྱས་ཏེ། ། ཁ་ཡི་ཐད་ཀར་གཟུང་བར་བྱ། ། རྡོ་རྗེ་བཞད་པའི་རྒྱ་ཆེན་ཡིན། ། གཡོན་གྱི་སོར་མོའི་རྩེ་རྣམས་ཡིན། ། མ་ཕྲད་ཙམ་དུ་བསྡུས་ པ་ལས། ། གཡས་ཀྱིས་འབྱེད་པ་ལྟར་བྱས་པ། ། རྡོ་རྗེ་ཆོས་ཀྱི་རྒྱ་ཆེན་ཡིན། ། གཡས་ཀྱི་ལག་ངར་སྒྲེང་བ་ལ། ། མཐེ་བོ་མཐེ་ཆུང་རྩེ་སྤྲད་དེ། ། ལྷག་མ་གསུམ་ཡང་བསྒྲེང་བར་བྱ། ། གཡོན་པའི་ཁུ་ཚུར་དཀུར་བརྟེན་པ། ། རྡོ་རྗེ་རྣོན་པོའི་རྒྱ་ཆེན་ཡིན། ། ལག་པ་ རྒྱ་གྲམ་རྩེ་བསྣོལ་ནས། །

མཐེ་བོ་གཉིས་ཀྱི་རྩེ་སྤྲད་དེ། ། བསྐོར་བ་ལྟ་བུར་བྱས་པ་ནི། ། རྡོ་རྗེ་འཁོར་ལོའི་རྒྱ་ཆེན་ཡིན། ། སོར་མོ་ནང་དུ་བསྣོལ་བ་ལས། ། གུང་མོ་རྩེ་སྤྲད་མཛུབ་སྦྱར་ཏེ། ། མཐེ་བོས་གུང་མོ་མནན་པ་ནི། ། རྡོ་རྗེ་སྨྲ་བའི་རྒྱ་ཆེན་ཡིན། ། ལག་པའི་མཁྲིག་མ་བསྣོལ་བ་ལས། ། གུང་མོ་གཉིས་ཀྱི་ཚིགས་དང་པོར། ། ངོས་བཞིར་ས་ཡི་སོར་མོ་བརྟེན། ། རྡོ་རྗེ་ལས་ཀྱི་ཕྱག་རྒྱ་ཡིན། ། ལག་པ་གཉིས་ཀྱི་སོར་མོ་རྣམས། ། ཕན་ཚུན་ཐགས་སུ་བཏགས་པ་ལས། ། མཐེ་བོ་གཉིས་ནི་བསྒྲེང་བར་ བྱ། ། རྡོ་རྗེ་བསྲུང་བའི་ཕྱག་རྒྱ་ཡིན། ། རྡོ་རྗེ་ཁུ་ཚུར་བཅངས་པ་ལས། ། མཛུབ་མོ་གཉིས་ནི་བསྒྲེང་ནས་ཀྱང་། ། ཁ་འགྲམ་གཉིས་སུ་གཟུང་བར་བྱ། ། རྡོ་རྗེ་གནོད་སྦྱིན་རྒྱ་ཆེན་ཡིན། ། རྡོ་རྗེ་ཁུ་ཚུར་བཅངས་པ་ལས། ། བསྣོལ་ཏེ་ཁ་ནི་སྦྱར་ནས་ཀྱང་། ། ཐུགས་ཀར་དམ་དུ་གཟུང་བར་བྱ། ། རྡོ་རྗེ་ཁུ་ཚུར་རྒྱ་ཆེན་ཡིན། ། རིགས་ཀྱི་ཕྱག་རྒྱ་བསྒོམ་ནས་ནི། ། ལག་གི་འདུ་ཤེས་འདི་དག་གིས། ། འདུ་འཕྲོ་མོས་པ་བསྐྱེད་ནས་ནི། ། བཅིང་ཞིང་མཁའ་ལ་དགྲོལ་བར་བྱ། ། མཐེ་བོ་མཐེ་ཆུང་ནང་དུ་སྤྲད། ། གུང་མོ་རྩེ་སྦྱར་བཞི་ཡང་བསྒྲེང་། །

རྡོ་རྗེ་འཛིན་ལྟར་རྟིང་སྤྲད་པ། ། རྡོ་རྗེ་འཛིན་པའི་ཕྱག་རྒྱ་ཡིན། ། རྟིང་སྦྱར་མཐེབ་མཛུབ་རྩེ་སྦྱར་ཏེ། ། མཛུབ་མོའི་མིག་ཏུ་མཐེ་ཆུང་དྲང་། ། ལྷག་མ་རྩེ་གསུམ་ལྟར་བྱས་པ། ། རྡོ་རྗེ་སྤྱན་གྱི་ཕྱག་རྒྱ་ ཡིན། ། ལག་ངར་གཡོན་པ་བསྒྲེང་ནས་ཀྱང་། ། སོར་མོ་ཨུཏྤལ་ལྟར་བྱས་པ། ། གཡས་ཀྱི་སོར་མོ་གཟུང་བར་བྱ། ། རྡོ་རྗེ་སྒྲོལ་མའི་ཕྱག་རྒྱ་ཡིན། ། རྐང་པ་གཉིས་ཀྱི་པུས་མོ་དང་། ། ལག་པ་གཉིས་ཀྱི་གྲུ་མོ་རྣམས། ། སྤྲད་ནས་ལག་པ་ གདེངས་པ་ནི། ། ཀུན་དུ་བཟང་མོའི་ཕྱག་རྒྱ་ཡིན། ། རྡོ་རྗེ་ཁུ་ཚུར་དཀུར་བརྟེན་ནས། ། ལྡན་པ་གཡས་སུ་བྱོ་བ་ལས། ། ཆགས་པའི་མིག་གིས་ལྟ་བ་ནི། ། རྡོ་རྗེ་སྒེག་མོའི་ཕྱག་རྒྱ་ཡིན། ། གཡོན་པ་སྐོང་སྐོང་པོ་བྱས་ཏེ། ། གཡས་པས་གྲུ་ མོ་བཟུང་ནས་ཀྱང་། ། བསྐོར་ཞིང་སོར་མོ་འཕྲོ་བ་ནི། ། རྡོ་རྗེ་བདུག་པའི་ཕྱག་རྒྱ་ཡིན། ། ལག་པ་གཉིས་ནི་རྒྱབ་སྦྱར་ནས། ། རྡོ་རྗེ་ཁུ་ཚུར་བཅངས་པ་ལས། ། མཐེ་ཆུང་སྦྲེལ་ནས་མཛུབ་མོ་བསྒྲེང་། ། རྡོ་རྗེ་ལྕགས་ཀྱུ་མ་ཡི་རྒྱ། ། མཐེ་ཆུང་ ལུ་གུ་རྒྱུད་དུ་སྦྲེལ། ། སོར་མོ་རྣམས་ནི་སོ་སོར་བསྒྲེང་། ། ཐལ་མོ་བཀན་ཏེ་ལྟ་བ་ནི། །

རྡོ་རྗེ་སྒྲོལ་མའི་ཕྱག་རྒྱ་ཡིན། ། སྲིན་ལག་དང་ནི་མཐེ་བོ་གཉིས། ། སོ་སོར་རྩེ་མོ་སྤྲད་པ་ལས། ། འཕྲལ་བའི་ཐད་ཀར་དྲངས་པ་ཡི། ། རྡོ་རྗེ་ཕྲེང་བའི་ཕྱག་རྒྱ་ཡིན། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་ཕྱག་རྒྱའི་ལེའུ་སྟེ་བཅུ་པའོ། ། ། ། དེ་ནས་དཀྱིལ་འཁོར་གྱི་ལྷ་དང་ལྷ་མོ་རྣམས་ལ་ཕྱག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་བརྒྱད་དང་འཁོར་ཕལ་མོ་ཆེས་དབྱངས་མཐུན་པར་བསྟོད་པ། ཨོྃ་ཕྱོགས་བཅུའི་འཇིག་རྟེན་རབ་འབྱམ་ན། ། རྒྱལ་བ་གང་བཞུགས་འཁོར་དང་བཅས། ། བླ་མེད་ལྷ་དང་ལྷ་མོ་ཡི། ། གྲུབ་པའི་བྱིན་བརླབས་བསམ་མི་ཁྱབ། ། སེམས་དཔའ་བཅུ་དྲུག་རིགས་ཀྱི་གཙོ། ། སེམས་མ་བཅུ་དྲུག་རིགས་ཀྱི་ཡུམ། ། མཐུ་ ཆེན་ཁྲོ་བོ་ཁྲོ་མོ་དང་། ། ཕོ་ཉར་འཇིག་རྟེན་སྐྱོང་བར་ལྡན། ། ཨོཾ་སྔོན་གྱི་ཐུགས་དམ་ཆེན་པོ་ནི། ། འཇིག་རྟེན་མ་ལུས་ཐམས་ཅད་ཀུན། ། རྒྱལ་བའི་ཞིང་དུ་སྦྱོར་བས་ན། ། ཕྱག་རྒྱ་ཆེན་པོར་བདག་སྦྱོར་ཅིག ། ཨོྃ་དཔའ་བོ་ཆེན་པོ་མཐུ་ལྡན་རྣམས། ། ཐུགས་རྗེ་ཆེན་ པོའི་བྱིན་བརླབས་ཀྱིས། ། བདག་གི་ལྷག་པའི་བསམ་པ་རྣམས། ། གྲུབ་པར་བྱིན་གྱིས་བརླབ་ཏུ་གསོལ། །

ཨོྃ་ཁམས་གསུམ་ཞིང་དུ་སྦྱོར་ལ་ཕྱག་འཚལ་ལོ། ། དམིགས་མེད་ཆོས་ཀྱི་སྐུ་ལ་ཕྱག་འཚལ་ལོ། ། ལོངས་སྤྱོད་རྫོགས་པའི་སྐུ་ལ་ཕྱག་འཚལ་ལོ། ། ཅིར་ཡང་སྤྲུལ་པའི་ སྐུ་ལ་ཕྱག་འཚལ་ལོ། ། ཞེས་བསྟོད་ནས་ཉིད་ཀྱི་ཐུགས་ཀར་ཞུགས་ཏེ། ། རོལ་པར་ཁྲོ་བོའི་ཏིང་ངེ་འཛིན་ལ་སྙོམས་པར་ཞུགས་ཏེ་ཁྲོ་བོའི་རྟོག་པ་བཤད་དོ། ། དེ་ནས་བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ལག་ན་རྡོ་རྗེས་འདི་སྐད་ཅེས་གསོལ་ ཏོ། ། བཅོམ་ལྡན་འདས་ད་ལྟར་དང་མ་འོངས་པའི་དུས་ན། གཅེར་བུ་བ་དང་ཀུན་དུ་རྒྱུ་ལ་སོགས་པས་སོ་སོའི་རིག་སྔགས་ཀྱི་ལས་ཀྱིས་མ་ཧཱ་དེ་བ་ལ་སོགས་པ་འཇིག་རྟེན་གྱི་ལྷ་དང་། གནོད་སྦྱིན་མཐུ་བོ་ཆེ་དང་། ཕྲ་མེན་མ་ཐམས་ཅད་བསྐུལ་ ནས་སེམས་ཅན་རྣམས་ཀྱི་སྲོག་གི་བར་ཆད་བགྱིད། འཚེ་བར་བགྱིད། ཤིན་ཏུ་སྡུག་བསྔལ་བར་བགྱིད། དེ་ལ་ཐབས་གང་གིས་བཟློག་པར་བགྱི། སྦྱོར་བ་གཅད་པར་བགྱི། བཀའ་སྩལ་པ། ལག་ན་རྡོ་རྗེ་ཉོན་ཅིག ། འདི་ནི་དེ་བཞིན་ གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་པོས་སྔོན་ཆད་བཤད་དེ། ལག་ན་རྡོ་རྗེ་ཁྱོད་ཉིད་ཀྱིས་བྱས་པའི་གསང་སྔགས་དང་།

སྲིད་པ་ཟད་པར་བྱས་པའི་གསང་སྔགས་ཐམས་ཅད་ཀྱང་ཟློག་པར་བྱེད་དོ། ། གནོན་པར་བྱེད་ དོ། ། སྦྱོར་བ་གཅོད་པར་བྱེད་པ་ཀུན་དུ་རྒྱུ་ལ་སོགས་པ་གཞན་ལྟ་ཅི་སྨོས། ། དེ་ནས་བཅོམ་ལྡན་འདས་ཀྱིས་རྡོ་རྗེ་མཚོན་ཆའི་ཏིང་ངེ་འཛིན་ལ་སྙོམས་པར་ཞུགས་ནས་སྐུ་དང་གསུང་དང་ཐུགས་རྡོ་རྗེ་ལས་གསང་སྔགས་ཟློག་ཅིང་གནོན་པ་དང་། ། སྦྱོར་བ་ གཅོད་པ་ཞེས་བྱ་བ་འདི་གསུངས་སོ། ། ཨོྃ་བཛྲ་ཛྭ་ལ་བཛྲ་ཧཱུྃ། མནྟྲ་སུྃ་བྷ་ནི། ཨོྃ་བཛྲ་ཛྭ་ལ་ཧཱུྃ། ཨོྃ་བྲཱུྃ་ཧཱུྃ་བྲཱུྃ་ཏྲཱུྃ་བྲཱུྃ་ཧཱུྃ་བྲཱུྃ་ཧྲཱྃཿ བྲཱུྃ་ཨཱ་བྲཱུྃ། འདི་གསུངས་མ་ཐག་ཏུ་ཕྱོགས་བཅུ་ནས་མཚོན་ཆའི་ཆར་ཆེན་པོ་ཕབ་སྟེ་ལག་ན་རྡོ་རྗེ་ཉིད་ཀྱང་། ཁས་སྦུབ་ཏུ་འགྱེལ་ནས་ཁྲག་སྐྱུག་པར་གྱུར་ཏོ། ། ལྷ་དང་གནོད་སྦྱིན་ཐམས་ཅད་ཀྱང་བརྒྱལ་ཏེ་ལུས་དུམ་བུ་དུམ་བུར་ཆད་པར་གྱུར་ཏོ། ། དེ་ནས་བཅོམ་ལྡན་འདས་ཀྱིས་དེ་དག་གི་སྦྱོར་བ་ཆད་པར་རིག་ནས་སླར་བསླང་སྟེ། ཨོཾ་བཛྲ་སཏྭ་རཱ་ཛ་ཛྷ། དེ་ནས་ བཅོམ་ལྡན་འདས་ཀྱིས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་ཁྱོད་ཀྱིས་ཀྱང་འདི་ལས་འདའ་བར་མ་བྱེད་ཅིག །

ཁྱོད་ཀྱི་འཁོར་ཐམས་ཅད་ཀྱང་འདི་ལས་འདའ་བར་བྱེད་ན་ཐམས་ཅད་བརླག་པར་འགྱུར་རོ། ། དེ་བཞིན་དུ་ལག་ན་རྡོ་རྗེ་ཁྱོད་ ཀྱིས་ཀྱང་ལྷ་དང་གནོད་སྦྱིན་ཐམས་ཅད་ལ་བསྒོ་ཤིག ། དེ་ནས་ལག་ན་རྡོ་རྗེས་གསོལ་པ། བཅོམ་ལྡན་འདས་འདི་ན་སྲིད་པ་གསུམ་ཐམས་ཅད་འདུལ་བར་བགྱིད་པ། མཐུ་བོ་ཆེ་ཐམས་ཅད་འདུལ་བར་བགྱི་བ། མཐུ་བོ་ཆེ་ཐམས་ཅད་ཀྱི་ང་རྒྱལ་གཅོག་ པ་བདག་ལགས་ཏེ། ཇི་ལྟར་བཅོམ་ལྡན་འདས་ཤཱཀྱ་ཐུབ་པས་མཐུ་སྟོབས་དང་ལྡན་པའི་སླད་དུ་བདག་གི་མིང་ཡང་ལག་ན་རྡོ་རྗེ་ཞེས་བཏགས་ན་འདིར་རྡོ་རྗེ་སེམས་དཔའ་བཅོམ་ལྡན་འདས་ཀྱི་བྱིན་བརླབས་ཀྱིས་སྔགས་འདི་སྨྲས་པས་བདག་ ཀྱང་ཁྲག་ཏུ་སྐྱུག་ཅིང་འགྱེལ་བར་གྱུར་ན་གཞན་ལྟ་ཅི་སྨོས། ། འདི་ནི་འདའ་བར་དཀའོ། ། དེ་བཞིན་དུ་ལྷ་དང་གནོད་སྦྱིན་རྣམས་ལ་ཡང་བསྒོའོ། ། དེ་ནས་བཅོམ་ལྡན་འདས་ཀྱིས་མ་འོངས་པའི་དུས་ན་གསང་སྔགས་འདི་སྒྲུབ་པའི་ཆོ་ག་བཤད་དོ། ། མྃ་ལས་ཉི་མའི་དཀྱིལ་འཁོར་དུ། ། དཔལ་ཆེན་ཁྲག་འཐུང་སྤྱན་དྲང་ངོ་། ། སྐུ་ནི་དུད་ཀ་ཆེན་པོ་ལ། ། དབུ་སྐྲ་ཁམ་ནག་རལ་པ་ཅན། ། དབུ་གསུམ་པ་ལ་ཕྱག་དྲུག་སྟེ། ། དམར་དང་དུད་ཀ་གནག་པ་ཡིན། ། གཡས་ཀྱི་གསུམ་ན་ཐོགས་པ་ནི། །

སྟི་ རའི་དབྱུག་པ་ཆེན་པོ་དང་། ། དུང་ཆེན་དམར་གྱིས་བཀང་བ་ལ། ། རྡོ་རྗེས་དཀྲུག་ཅིག་འཐུང་བར་བརྟག ། གཡོན་གྱི་གསུམ་ན་ཐོགས་པ་ནི། ། སྟི་རའི་རྒྱུ་མའི་ཞགས་པ་དང་། ། ཁྱུང་གི་ཁྲག་ཆེན་ཐོགས་པ་དང་། ། སྟི་ར་ཕྲ་མོའི་གསུས་པ་ནས། ། ཀློ་སྙིང་ནང་གྲོལ་འདྲེན་ཅིང་ཟ། ། གཙུག་ཏུ་རྣམ་པར་སྣང་མཛད་ཉིད། ། ཨོྃ་ཕྲག་གཡས་ལ་ཨཀྵ་བྷྱཿཧཱུྃ། ། གཡོན་རཏྣ་སམྦྷ་བ་ཏྲཱྃ། ། རྐང་གཡས་ཨ་མོ་གྷ་སིདྡྷི་ཨཱཿ། ། གཡོན་ན་ཨ་མི་ཏཱ་བྷ་སྟེ། ། ཧྲཱིཿ བྷུྃ་ལས་རྡོ་རྗེ་འཁོར་ལོ་ལ། ། རྡོ་རྗེ་རྣམས་ ནི་རིག་སྔགས་བརྟག ། ཀཽ་རི་དང་ནི་ཙཽ་རི་དང་། ། པྲ་མོ་ཧ་དང་བཻཏྟ་ལི། ། གཞན་ཡང་བྱཱ་གྷྲྀ་མུ་ཁཱ་དང་། ། སིདྷ་ལ་སོགས་མགྱོགས་མ་རྣམས། ། སྟི་ར་ལ་ནི་འབྲི་ཚུགས་སུ། ། བལྟ་ཞིང་རྟོད་པའི་ཚུལ་བཞིན་གནས། ། ཧ་ཧ་དེ་ནས་སྐད་ ཅིག་ལ། ། རིག་སྔགས་ཉིད་དང་རྦོད་གཏོང་བཅས། ། དགུག་པའི་ཕོ་ཉར་བརྟག་པར་བྱ། ། རས་སམ་གྲོ་གའམ་རྩ་རྣམས་ལ། ། ཁྲོ་བོའི་གཟུགས་སུ་བྲིས་པ་འམ། ། ཡང་ན་སྐུད་པ་ནག་པོས་བཅིང་། ། ཧ་ཧ་གད་མོ་ཆེན་པོ་དང་། ། རྡོ་རྗེ་ སྐུལ་བའི་གླུ་བླངས་ཏེ། ། ཕོ་ཉ་རྣམས་ལ་མངག་པར་བྱ། ། དེ་ནས་རིག་སྔགས་བཟུང་ནས་ཀྱང་། །

རྩ་ཡི་གཟུགས་ལ་གནས་པ་དང་། ། འཁོར་ལོ་ལ་སོགས་མཚོན་ཆ་ཡིས། ། དེ་དག་ཕྱེ་མར་བརླག་པར་བྱ། ། བཛྲ་ཙ་ཀྲ་ཧཱུྃ། ཕྱེ་མར་ དེ་དག་གཏུབས་ནས་ནི། ། ཐོད་པ་གཞུ་དང་བཅས་པ་ཡིས། ། ཧོམ་ཁུང་གྲུ་གསུམ་སྒོ་ཅན་དུ། ། རྃ་ཞེས་བྱ་བའི་མེ་སྤར་ཏེ། ། དྲང་སྲོང་འཁོར་བཅས་གཡབ་མོས་བོད། ། རིག་སྔགས་བསྲེག་པར་བྱ། ། དེ་ལྟར་ལྷ་དང་བདག་སྦྱར་ན། ། རྣམ་ལྔའི་ཆས་དང་ལྡན་པར་བྱ། ། མ་མོ་ཆེན་མོ་ཤ་ལ་སྤྱོན། ། འབྱུང་པོའི་ཤ་ནི་ཟན་པས་ཞིམ། ། འབྱུང་པོའི་ཁྲག་ནི་ཆང་བས་ཞིམ། ། མ་མོ་ཆེན་མོ་ཁྲག་ལ་སྤྱོན། ། གླུ་དང་གར་དང་གད་རྒྱངས་ཀྱིས། ། སོ་སོར་མཆོད་དེ་བསྒྲུབ་པར་ བྱ། ། ཟིན་པའི་སེམས་ཅན་གང་ཡང་རུང་། ། དེ་དག་སྐུད་པ་ནག་པོས་བཅིང་། ། དེ་ཡང་དུམ་བུར་བཅད་པར་བྱའོ། ། དེ་ནས་མི་དེ་སྔ་མ་བཞིན། ། ཚེ་གནས་བྱ་ཕྱིར་འབྲུ་ལྔ་ཡིས། ། གནས་ལྔ་དག་ཏུ་རྣམ་བཀོད་དོ། ། བྲིད་ པའི་སེམས་ཅན་བསྲུང་བར་བྱ། ། ཚ་ཞིང་རྩུབ་པའི་ཤིང་དང་ནི། ། ཤ་དང་ཆང་དང་ཡོ་བྱད་རྣམས། ། གནག་ཅིང་ཚ་བར་རྣམ་སྦྱར་ཏེ། ། ལྷ་ཆེན་རྣམས་ལ་མཆོད་པར་བྱ། ། དེ་ནས་ལས་རྣམས་གྲུབ་པ་དང་། ། ཧ་ཧ་ལ་སོགས་གད་མོ་ དང་། ། གླུ་དང་རྡོ་རྗེ་དབྱུག་པ་ཡིས། །

ལྷ་རྣམས་བདག་ལ་ཐིམ་པར་བྱ། ། འདི་ནི་བདག་ཉིད་བསྲུང་བ་དང་། ། ལས་རྣམས་ཐམས་ཅད་གྲུབ་པར་བྱེད། ། ཤར་ཕྱོགས་ན་ཕྲ་མེན་མ་ཀཽ་རི་ཁ་དོག་སྔོན་མོ་ཕྱག་གཉིས་པ་སྟེ། ། གཡོན་བྷན་དྷ་ ཙནྡན་དམར་གྱིས་བཀང་བ་ཐོགས་པ། ། གཡས་ན་ཞིང་ཆུང་ངུའི་དབྱུག་པ་ཐོགས་པ། ཨོྃ་བཛྲ་གཽ་རཱི་ཛཿཛཿཧཱུྃ་ཞེས་སྟོང་རྩ་བརྒྱད་བཟླས་ཏེ་བཅོལ་ན་སངས་རྒྱས་ཀྱང་དགུག་ནུས་ན་གཞན་ལྟ་ཅི་སྨོས། ཆེ་གེ་མོ་ཞིག་ཁུག་ཅིག་ཅེས་བཅོལ་ ནས་གཏོར་མ་དང་ཙནྡན་དམར་ཆེན་ཨརྒྷ་ལ་ཨོྃ་རུ་ལུ་རུ་ལུ་ཧཱུྃ་བྷྱོ་ཞེས་བརྗོད་ཅིང་ཨརྒྷ་ལན་གསུམ་དུ་བསྒྲེང་ངོ་། ། ལྷོ་ཕྱོགས་ན་ཙཽ་རི་ཁ་དོག་སེར་མོ་ཕྱག་ན་མདའ་གཞུ་འགེངས་པ། ཨོྃ་བཛྲ་ཙཽ་རཱི་ཧཱུྃ་ཛཿཞེས་སྟོང་རྩ་བརྒྱད་བཅོལ་ན་ཕྱག་ན་རྡོ་ རྗེའི་མཐུ་ཡང་རྡུལ་ཙམ་ཡང་མེད་པར་རྐུ་ནུས་ན་གཞན་ལྟ་ཅི་སྨོས། ནུབ་ཕྱོགས་ན་པྲ་མོ་ཧ་དམར་མོ་ཕྱག་ན་ཆུ་སྲིན་གྱི་རྒྱལ་མཚན་ཐོགས་པ། ། ཨོྃ་བཛྲ་པྲ་མོ་ཧ་ཧཱུྃ་ཛཿཞེས་སྟོང་རྩ་བརྒྱད་བཟླས་ཏེ་བཅོལ་ན་ཕྱག་ན་རྡོ་རྗེ་ཡང་རང་གི་མཐུ་བཞག་ནས་དབང་དུ་ འོང་ན་གཞན་ལྟ་ཅི་སྨོས། ། བྱང་ཕྱོགས་ན་བཻ་ཏྟ་ལི་ཁ་དོག་ནག་མོ་ཕྱག་གཡོན་ཞིང་ཆུང་ངུ་འཛིན་ཅིང་ཟབ། གཡས་ན་རྡོ་རྗེ་འཕྱར་བ།

ཨོྃ་བཛྲ་བཻ་ཏྟ་ལི་ཧཱུྃ་ཛཿཞེས་སྟོང་རྩ་བརྒྱད་བཟླས་ཏེ་བཅོལ་ན་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་ ཀྱང་འགྲུབ་ན་འཇིག་རྟེན་གྱི་བསྒྲུབ་པ་ཕྲན་ཚེགས་ལྟ་ཅི་སྨོས། ཤར་ལྷོའི་མཚམས་ན་པུཀྐ་སི་ཁ་དོག་དམར་སེར་ཕྱག་གཉིས་ཞིང་ཆུང་ངུའི་བ་སུ་ཏ་འདྲེན་ཅིང་ཟ་བ། ཨོྃ་བཛྲ་པུཀྐ་སི་ཧཱུྃ་ཛཿཞེས་སྟོང་རྩ་བརྒྱད་བཟླས་ཏེ་བཅོལ་ན་ཕྱག་ན་རྡོ་རྗེ་ཡང་འཆིང་ཞིང་ འདྲེན་པར་ནུས་ན་གཞན་བཅིང་ཞིང་ཟ་བ་ལྟ་ཅི་སྨོས། ལྷོ་ནུབ་ཀྱི་མཚམས་ན་གྷསྨ་རི་ཁ་དོག་ལྗང་གུ་ཕྱག་གཡོན་ན་བྷན་དྷ་ཙནྡན་དམར་པོས་བཀང་བ་རྡོ་རྗེས་དཀྲུག་ཅིང་གསོལ་བ། ཨོྃ་བཛྲ་གྷསྨ་རི་ཧཱུྃ་ཛཿཞེས་སྟོང་རྩ་བརྒྱད་བཟླས་ཏེ་བཅོལ་ན་ཕྱག་ན་ རྡོ་རྗེ་ཡང་མྱོས་པར་ནུས་ན་གཞན་ལྟ་སྨོས་ཀྱང་ཅི་དགོས། ནུབ་བྱང་གི་མཚམས་ན་བཛྲ་ཀརྨ་ཁ་དོག་ལྗང་གུ་ཞིང་ཆུང་ངུ་ལག་པ་གཉིས་ཀྱིས་བཟུང་སྟེ་སྙིང་ག་ནས་ཟ་བ། ཨོྃ་བཛྲ་ཀརྨ་ཧཱུྃ་ཛཿཞེས་སྟོང་རྩ་བརྒྱད་བཟླས་ཏེ་བཅོལ་ན་ལས་གང་བྱ་བ་ཐམས་ཅད་ འགྲུབ་བོ། ། བྱང་ཤར་གྱི་མཚམས་ན་ཙཎྜ་ལི་ཁ་དོག་སེར་སྐྱ་ཕྱག་གཡས་ན་ཞིང་ཆུང་ངུའི་བྷནྡྷ་འཛིན་པ། གཡོན་གྱིས་ཞིང་དབྱུག་འཛིན་པ།

ཨོྃ་བཛྲ་ཙཎྜ་ལི་ཧཱུྃ་ཛཿཞེས་སྟོང་རྩ་བརྒྱད་བཟླས་ཏེ་བཅོལ་ན་ཟམ་དང་མ་ནིང་ཡང་རྒྱུད་འཕེལ་བར་བྱེད་ན་དབང་པོ་ ཚང་ཞིང་ཉམས་པ་མེད་པ་ལ་རྒྱུད་འཕེལ་ཞིང་ཚེ་དང་དབང་ཐང་འཕེལ་བར་བྱ་བ་ལྟ་ཅི་སྨོས་ཏེ། ཕྲ་མེན་མ་འདི་རྣམས་ཕྲིན་ལས་སྐུལ་བའི་ཚེ་ཨརྒྷ་དང་གཏོར་མ་དབུལ་བ་ནི་གོང་དུ་སྨོས་པ་བཞིན་དུ་བགྱིའོ། ། ཁྲོས་ན་ཐམས་ཅད་ཕྱག་ན་ཏྲི་ཤཱུ་ལ་འབར་བ། གཡོན་ རྔེའུ་ཆུང་བསྣམས་པ། གདན་མེ་སྨུག་ནག ། སྐུའི་ཁ་དོག་ནག་མོ་ལ་ཁྲག་དང་ཞག་དང་ཐལ་བའི་ཐིག་ལེས་ཚོམ་བུར་བྱས་ཤིང་བསུ་ཏས་རྐེད་པ་བཅིངས་པ། གསེར་གྱི་པགས་པ་གོ་ཟུར་བགོས་པ་སྲོད་ཏ་ཨ་ཛ་ནས་ལུས་བརྒྱན་ཏེ་གཅེར་བུའི་ཚོགས་སྨུག་ གནག་འབར་བ། གཡོན་རྔེའུ་ཆུང་བསྣམས་པ། གཡས་མེ་སྨུག་ཀུན་ཀ་ཁ་དོག་ནག་མོ་ལ་འཇིག་རྟེན་གྱི་ཁམས་བསྲེགས་ཤིང་། ཟད་པར་བྱས་ནས་སླར་དཔལ་ཆེན་པོའི་སྐུ་ལ་ཐིམ་པར་བྱའོ། ། དེ་ནི་ཕྱི་རིམ་བཤད་པར་བྱའོ། ། ཤར་ཕྱོགས་སུ་སིདྷ་མུ་ཁ་ཁ་ དོག་སེར་མོ་ཞིང་ཆུང་ཁ་ན་ཐོགས་པ། ལག་པ་གཡས་གཡོན་བསྣོལ་བ། སེང་གེའི་མགོ་ཅན། ལྷོ་ཕྱོགས་ན་བྱཱ་གྷྲི་མུ་ཁ་ཁ་དོག་དམར་མོ་ལག་པ་གཉིས་བསྣོལ་ཏེ་མདུན་ན་ཞིང་གནས་པ་ལ་ལྟ་བ།

སྟག་གི་མགོ་ཅན་ནུབ་ ཕྱོགས་སུ་སྲིན་གླ་མུ་ཁ་ཁ་དོག་ནག་མོ་ལག་པ་གཉིས་ཞིང་ཆུང་ངུ་འཛིན་ཅིང་ལྕེས་ལྡག་པ་ཝ་མགོ་ཅན། བྱང་ཕྱོགས་ན་ཤྭ་ན་མུ་ཁ་ཁ་དོག་མཐིང་ག་ཞིང་ལག་པ་གཉིས་ཀྱིས་ཁོང་དྲལ་ཏེ་ལྟ་བ་ཁྱི་མགོ་ཅན། ཤར་ལྷོའི་མཚམས་སུ་ཀྲྀ་ཌྷ་མུ་ཁ་ཁ་ དོག་དམར་གནག་ཞིང་ཆུང་ངུའི་བ་སུ་ཏ་ཁ་ན་ཐོགས་པ། ལག་པ་གཡས་བྷན་དྷ་གཡོན་གྲི་ཐོགས་པ་བྱ་རྒོད་ཀྱི་མགོ་ཅན། ལྷོ་ནུབ་མཚམས་ན་ཀངྐ་མུ་ཁ་ཁ་དོག་དཀར་དམར་ཕྲག་པ་གཡོན་པ་ལ་ཞིང་ཁེལ་ཞིང་རྐང་པ་ནས་བཟུང་བ། གཡས་པ་ མགོ་འཛིན་པ། བྱ་ཀངྐའི་མགོ་ཅན་མཆུ་རིང་ཐོར་ཏོ་གུག་ཟེ་བ་དམར་མོ། ། ནུབ་བྱང་མཚམས་ན་ཀཱ་ཀ་མུ་ཁ་ཁ་དོག་ནག་མོ། བྱ་རོག་གི་མགོ་ཅན་མཆུས་ཞིང་ཐོགས་པ། ལག་པ་གཡོན་པས་པདྨ་བྷན་དྷ་འཛིན་པ། བྱང་ཤར་མཚམས་སུ་ཨཱུ་ལཱུ་ཀ་ མུ་ཁ་ཁ་དོག་སྣ་ཚོགས་ལག་པ་གཡོན་པ་དུང་ཆེན་ཁྲག་གིས་བཀང་བ་ལ་འཐུང་བ་ལ་གཡས་པ་རྡོ་རྗེ་ལྕགས་ཀྱུ་འཛིན་པ། འུག་པའི་མགོ་ཅན། ནང་རིམ་འུག་པའི་འཁོར་གྱིས་བསྐོར། དེའི་ཕྱི་རིམ་བྱ་རོག་གི་འཁོར་གྱིས་བསྐོར། དེའི་ཕྱི་རིམ་བྱ་ཀང་ཀ་མཆུ་ {རིངས་ཀྱི་,རིང་གི་}འཁོར་གྱིས་བསྐོར། དེའི་ཕྱི་རིམ་བྱ་རྒོད་ཀྱི་འཁོར་གྱིས་བསྐོར།

དེ་དག་ཐམས་ཅད་ཀྱང་ཞིང་མང་པོ་གསར་རྙིང་སྤུངས་པའི་སྟེང་ན་ཞིང་ལ་རྟོད་པའི་ཕྱིར་འཐབ་པའི་ཚུལ་སྟོན་པ་ཤ་སྟག་གོ། ། དེ་དག་གི་སྙིང་པོ་འདི་རྣམས་སོ། ། ཧཱུྃ་ཧ་ཧེ་ཕཊ་ཧཱུྃ། འདི་ ཀུན་འབྲུ་རེ་རེ་ཡང་ལན་བཞི་བཞི་བརྗོད་དོ། ། ཧཱུྃ་གིས་གཙོ་བོ་བསྐྱེད། ཧས་ནང་གི་ལྷ་མོ་བསྐྱེད། ཧེས་ཕྱིའི་ལྷ་མོ་བསྐྱེད། ཕཊ་ཀྱིས་ཐམས་ཅད་ཁྲོས་པར་བསྐུལ། ཧཱུྃ་གིས་ཐམས་ཅད་ཀྱི་ཡེ་ཤེས་ཀྱི་འོད་ཟེར་འབར་བས་ཕྱོགས་བཅུར་ཁྱབ་པར་བགྱིའོ། ། ལྷ་མོ་བློ་ ལྡན་ཚོགས་ཀྱི་བདག ། ཧེ་རུ་དཔལ་ལ་ཕྱག་འཚལ་ལོ། ། སློབ་དཔོན་ལ་ནི་བརྙས་བྱེད་དང་། རྣལ་འབྱོར་བར་དུ་གཅོད་པ་དང་། དམ་ཚིག་གཉེན་པོ་དྲལ་བ་དང་། རྡོ་རྗེ་སྤུན་ལ་འཁུ་བྱེད་རྣམས། ། ཁྱེད་ཀྱིས་རྡུལ་དུ་བརླགས་ནས་ནི། ། གནོད་སེམས་མ་ལུས་གཏན་ནས་ ཕྱུང་། ། དཔལ་ཆེན་པོ་སྟན་དང་ག་ནའི་གནས་སུ་ཚོགས་ཆེན་པོ་ལ་གཤེགས་པའི་ཚེ་སྐུ་གསུང་ཐུགས་ཀྱི་ཁྲོ་བོའི་གཟི་བྱིན་གྱིས་གདུག་པ་ཐམས་ཅད་གཏན་ནས་འབྱིན་ཅིང་ལོངས་སྤྱོད་ཆེན་པོ་འགྱིང་ཞིང་འགྱིང་བའི་གླུ་བླངས་ཏེ་ཐམས་ཅད་དགྱེས་བར་མཛད་པའི་དབྱངས་ འདིས་དགྱེས་པར་མཛད་དོ། ། རྡོ་རྗེ་པདྨོའི་ཕྱག་རྒྱ་དཔྲལ་བར་བཅིངས་ཏེ།

ཕྱར་ནས་མཆོང་ཞིང་འཁོར་ཐམས་ཅད་གཅེར་བུར་བྱུང་ནས་སྐྲ་བཤིག་ཅིང་བརྒྱུགས་ཏེ། སྔགས་འདི་གསུངས་སོ། ། ཨོྃ་ཨེ་ཨཱ་ར་ལི་ཧོཿཧྲིྃཧྲིྃ་ཧྲིྃ་ཧྲིྃ། དེ་ནས་ཚོགས་སུ་གཤེགས་ནས་འཁོར་ ཐམས་ཅད་ལ་སྤྱན་བགྲད་པས་གཟིགས་ཤིང་འཛུམ་པའི་བརྡ་ཧ་ཧ་སྃ་སྃ་སྒྲ་ཕྱུང་སྟེ། འཁོར་ཐམས་ཅད་ཀྱིས་མགྲིན་གཅིག་ཏུ་དབྱངས་འདིས་གཙོ་བོ་ལ་བསྟོད་དོ། ། ཨེ་མའོ་ཆོས་ཀྱི་དོན་བྱུང་བ། ། ཆོས་དོན་དག་པ་བདག་མེད་པ། ། ནམ་མཁའ་དང་ནི་མཉམ་པའི་ གནས། ། རྡོ་རྗེ་རྒྱལ་ལ་ཕྱག་འཚལ་ལོ། ། ཞེས་བསྟོད་པས་གཙོ་བོ་མཉེས་ནས་འཁོར་ཐམས་ཅད་ལ་གཟིགས་ཤིང་དམ་སྩལ་བའི་དབྱངས་འདི་གསུངས་སོ། ། ཁ་ག་ལྱ་ཤ་ཏ་བ་ཀ ། ཨ་ལ་ལ་ཧོཿ། མ་ཧཱ་པཉྩ་ཨ་མྲྀ་ཏ། ཁ་རྃ་ཡོ་གི་ནི། ཁ་རྃ་ཊཱ་ཀི་ནི། ཨ་ལ་ལ་ཧོཿ། བྷ་ག་པཱན་ཁ་ཁ་ཁ། ལྷ་མོ་རྣམས་རྔ་རྡུང་། དབྱངས་ལེན། རྒྱུད་གསུམ་གྱི་ཚིག ། ཏེ་གྷེྃ་ཏེ་གྷེྃ། ཏེ་གྷེྃ། ཏེ་གྷེྃ། ཏེ་གྷེྃ་ཏེ་གྷེྃ། གྷེྃ་གྷེྃ་གྷེྃ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་རིག་སྔགས་གཅོད་པའི་ལེའུ་སྟེ་བཅུ་གཅིག་པའོ། ། ། ། སེམས་ དཔའ་ཆེན་པོ་ཉོན་ཅིག ། བསྐལ་བའི་མེ་ལྟར་འབར་བ་ཡི། ། འོད་ཟེར་འདུ་འཕྲོའི་ཀློང་དཀྱིལ་ན། །

ཁྲོ་བོ་ཆེན་པོ་རྣམས་བཞུགས་པ། ། བརྐྱང་བསྐུམ་ཚུལ་གྱིས་གནས་པ་སྟེ། ། དབུས་ཀྱི་ཁྲག་འཐུང་ཆེན་པོ་ནི། ། དབུ་དགུ་ཕྱག་ཀྱང་{བཅྭ་,བཅོ་}བརྒྱད་དེ། ། གཤོག་པ་རྡོ་རྗེ་གཏམས་ པ་གདེངས། ། ཞབས་ཀྱང་བརྒྱད་དུ་རྣམ་པར་བསྟན། ། དེ་ཡི་དཀྱིལ་འཁོར་ཁྲོ་བོ་ནི། ། དབུ་གསུམ་ཕྱག་དྲུག་གཤོག་པ་ཅན། ། ཞབས་དྲུག་རྡོ་རྗེའི་བྲག་སྟེང་ན། ། འཇིག་རྟེན་སྐྱོང་བས་འདུད་ཚུལ་ལོ། ། དེ་ཡི་ཕོ་ཉ་བཀའ་ཉན་ནི། ། རྡོ་རྗེ་ཕྲ་མེན་གཏུམ་བག་ ཅན། ། འཇིགས་པའི་གཟུགས་ཅན་མང་པོ་སྟེ། ། དེ་དག་ཅིར་ཡང་འགྲུབ་པར་བྱེད། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་ཁྲོ་བོའི་དཀྱིལ་འཁོར་ཐམས་ཅད་ཀྱི་ལེའུ་སྟེ་བཅུ་གཉིས་པའོ། ། ། ། རྡོ་རྗེ་སྲིན་མོ་ཆེན་མོ་ནི། ། འཇིགས་བྱེད་ཆེན་མོར་སྣང་ བ་སྟེ། ། ཕྱག་ཀྱང་སྲིན་མོ་ཆེན་པོ་ལྟར། ། མཐུན་ཏེ་ཞབས་ཀྱང་དེ་དང་འདྲ། ། དེ་ལྟ་བུ་ཡི་དཀྱིལ་འཁོར་དུ། ། རིན་ཆེན་མེ་ཏོག་བོར་ནས་ནི། ། ལྕགས་ལ་བབ་པའི་ལྷ་དེ་ནི། ། གཉེར་ན་འགྲུབ་པར་ཐེ་ཚོམ་མེད། ། དགེ་དང་མི་དགེའི་ཆོས་རྣམས་ལ། ། ལྷག་པར་ བསྟེན་པར་མི་བྱ་སྟེ། ། མཉམ་ཉིད་རིག་པའི་ཀླུང་ཞུགས་ནས། ། ཅི་ལ་ཐོགས་པ་མེད་པར་སྤྱོད། །

རྡོ་རྗེ་དབྱུག་པ་བླངས་ནས་སུ། ། གཡབ་མོ་ལྔ་ཡང་གཡབ་པར་བྱ། ། དེ་ནས་དཀྱིལ་འཁོར་བཞུགས་པར་བརྟག ། མཆོད་པ་ཆེན་པོ་དབུལ་བར་བྱ། ། སེ་གོལ་གཏོགས་ པ་ཙམ་གྱིས་ཀྱང་། ། མགྱོགས་མས་ཕྱོགས་བཅུ་གར་ཡང་ཕྱིན། ། དེ་ལ་ཞོན་ནས་འགྲོ་བྱེད་པ། ། བྱ་རོག་མགོ་ཅན་ལ་སོགས་ཀུན། ། སྦེད་བྱེད་མ་ཡིས་སྦས་པ་ནི། ། མཐུ་ཆེན་ལྷ་སྲིན་གང་གིས་ཀྱང་། ། དེ་ལ་མཐོང་བར་མི་ནུས་ན། ། གཞན་གྱིས་མཐོང་བར་ག་ལ་ནུས། ། སྐུལ་བྱེད་ལས་ནི་གཞན་འདེབས་ཡིན། ། མགྱོགས་མའི་ལས་ནི་ཕྱིན་པར་འགྲོ། ། གསོད་མའི་ལས་ནི་གྲུབ་པ་ཡིན། ། སོ་སོར་མ་བསྒྲུབས་ཉིད་འགྲོ་མ། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་རྡོ་རྗེ་སྲིན་མོའི་ལེའུ་སྟེ་བཅུ་གསུམ་པའོ། ། ། ། ཨོཾ་བཛྲ་ ཀྲོ་དྷ་ས་མ་ཡ་ཧཱུྃ། ཨོྃ་བཛྲ་ཀྲོ་དྷ་ས་མ་ཡ་ཕཊ། ཨོྃ་བཛྲ་ཀྲོ་དྷ་ས་མ་ཡ་སྟྭྃ། ཨེ་ཧྱེ་ཧི་བྷ་ག་བཱན་ཛཿཧཱུྃ་བྃ་ཧོཿ། རུ་ལུ་རུ་ལུ་རུ་ལུ་ཧཱུྃ། ཨོྃ་བཛྲ་ཀྲོ་དྷ་ཤྲཱི་ཧེ་རུ་ཀ་ཧཱུྃ། ཨ་ཨ་ཨ་ཧཱུྃ་ཕཊ། ཨོྃ་བཛྲ་ཀྲོ་དྷ་ཧཱུྃ་ཀཱ་ར་ཧཱུྃ། གརྫ་གརྫ་གརྫ་ཧཱུྃ་ཕཊ། ཨོྃ་བཛྲ་ཀྲོདྷ་བི་ཛ་ཡ་ཧཱུྃ། ཧ་ན་ཧ་ན་ཧ་ ན་ཧཱུྃ་ཕཊ། ཨོྃ་བཛྲ་ཀྲོ་དྷ་ནཱི་ལ་དཎྜ་ཧཱུྃ། ད་ཧ་ད་ཧ་ད་ཧ་ཧཱུྃ་ཕཊ།

ཨོྃ་བཛྲ་ཀྲོ་དྷ་ཡ་མཱནྟཱ་ཀ་ཧཱུྃ། བ་ཙ་པ་ཙ་པ་ཙ་ཧཱུྃ་ཕཊ། ཨོྃ་བཛྲ་ཀྲོ་དྷ་ཨཱརྱ་ཙ་ལ་ཧཱུྃ། བནྡྷ་བནྡྷ་བནྡྷ་ཧཱུྃ་ཕཊ། ཨོྃ་བཛྲ་ཀྲོ་དྷ་ཏ་ཡ་གྲཱི་བ་ཧཱུྃ། ཧུ་ལུ་ཧུ་ལུ་ཧུ་ཧཱུྃ་ཕཊ། ཨོྃ་བཛྲ་ཀྲོ་དྷ་ཨ་པ་རཱ་ཛི་ཏ་ཧཱུྃ། ཏིཥྛ་ཏིཥྛ་ཏིཥྛ་ཧཱུྃ་ཕཊ། ཨོྃ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལི་ཧཱུྃ། ཙྪིནྡ་ཙྪིནྡ་ཙྪིནྡ་ཧཱུྃ་ཕཊ། ཨོྃ་བཛྲ་ཀྲོ་དྷ་ཏྲཻ་ལོ་ཀྱ་བི་ཛ་ཡ་ཧཱུྃ། བྷིནྡ་བྷིནྡ་བྷིནྡ་ཧཱུྃ་ཕཊ། ཨོྃ་བཛྲ་ཀྲོ་དྷ་མེ་ཧཱ་བ་ལ་ཧཱུྃ། སྥོ་ཊ་སྥོ་ཊ་སྥོ་ཊ་ཧཱུྃ་ཕཊ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་ཁྲོ་བོ་བཅུའི་རྩ་བའི་སྔགས་དང་ལས་ཀྱི་སྔགས་རིལ་ འདུས་པའི་ལེའུ་སྟེ་བཅུ་བཞི་པའོ། ། ། ། ཨོཾ་བཛྲ་ཀྲོ་དྷེ་ཧཱུྃ། ཧ་ལ་ཧ་ལ་ཧ་ལ་ཧ་ལ་ཧ་ཧཱུྃ། ཨོྃ་བཛྲ་ཀྲོ་དྷ་ཧཱུྃ། རུ་ལུ་རུ་ལུ་རུ་ལུ་རུ་ལུ་རུ་ལུ་ཧཱུྃ། མ་མ་མ་མ་ཧཱུྃ། བྷྱོ་བྷྱོ་བྷྱོ་བྷྱོ་བྷྱོ་ཧཱུྃ། ཛཿཛཿཛཿཧཱུྃ་ཧཱུྃ་ཧཱུྃ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་རྡོ་རྗེ་སྲིན་མོའི་སྔགས་ ཀྱི་ལེའུ་སྟེ་བཅོ་ལྔ་པའོ། ། ། ། མཉམ་པ་ཉིད་དུ་རྟོགས་བྱས་ནས། ། བསྐུལ་ཞིང་གསིགས་པ་ཐམས་ཅད་ཀྱང་། ། ཕྱག་རྒྱ་ཡིན་ཞེས་རྒྱལ་པོས་བཤད། །

མདོ་ཙམ་དུ་ནི་འདི་ལྟར་བརྟག ། ལག་པ་ཐལ་སྦྱར་གྱེན་དུ་བསྒྲེང་། ། རྐང་པ་མཐིལ་སྦྱར་ཐུར་དུ་གཟུགས། ། ཚིགས་ ཆེན་བཞི་ཡང་གཅག་པར་བྱ། ། མགོ་དང་མཚན་ཡང་སྙིང་པོར་བརྟག ། རྡོ་རྗེ་རྩེ་གཅིག་རྩེ་དགུ་དང་། ། བཅུ་གཅིག་ཏུ་ཡང་རྣམ་བརྟགས་ཏེ། ། འདི་ནི་ཁྲག་འཐུང་ཆེན་པོ་ཡི། ། ཕྱག་རྒྱ་ཡིན་པར་དཔའ་བོས་བཤད། ། ལག་པ་ཐལ་སྦྱར་གྱེན་དུ་བསྒྲེང་། ། རྐང་པ་ཕྲལ་ནས་ བརྐྱང་བསྐུམ་ཞིང་། ། གོམ་པའི་སྟབས་ཀྱིས་གར་བྱེད་པ། ། འདི་ནི་ཧཱུྃ་གི་རྒྱ་ཆེན་ཡིན། ། རྐང་པ་ཕྲལ་མཐིལ་ཐུར་དུ་གཟུགས། ། ལག་པ་ཕྲལ་ནས་གར་བྱེད་ཅིང་། ། སྟབས་སུ་མཆོད་པར་བྱེད་པ་ནི། ། འདི་ནི་སྟོབས་ཆེན་ཕྱག་རྒྱ་ཡིན། ། རྐང་པ་གཡོན་གྱིས་གཡས་ལ་འཁྱུད། ། ལག་པ་གར་ཐབས་བསྐོར་ནས་ཀྱང་། ། ཐལ་མོ་དྲག་ཏུ་བརྡབས་པ་ནི། ། རྣམ་པར་རྒྱལ་བའི་ཕྱག་རྒྱ་ཡིན། ། ལག་པ་གཡས་གཡོན་མཐེ་བོ་ཡིས། ། མཐེའུ་ཆུང་སེན་མོའི་མཐིལ་དུ་གནོན། ། གདངས་པའི་ཐབས་སུ་བསྒྲེང་བ་ནི། ། དབྱུག་སྔོན་ཅན་གྱི་ཕྱག་རྒྱ་ཡིན། ། ལག་པ་གཡས་པའི་ཁུ་ཚུར་གྱིས། ། རྡེག་པའི་ཐབས་སུ་གདེངས་པ་དང་། ། གཡོན་པ་དཀུ་ལ་བརྟེན་པ་ནི། ། གཤིན་རྗེ་འཇོམས་པའི་ཕྱག་རྒྱ་ཡིན། །

ལག་པ་གཡས་པའི་ཐལ་མོ་ཡིས། ། གདབ་པའི་ཐབས་སུ་གདེངས་པ་དང་། ། གཡོན་གྱིས་འཛིན་ པ་ལྟར་བྱས་པ། ། མི་གཡོ་མགོན་གྱི་ཕྱག་རྒྱ་ཡིན། ། ལག་པ་ཐལ་མོ་སྦྱར་ནས་ནི། ། གུང་མོ་རྒྱབ་ཏུ་བསྣོལ་བར་བྱ། ། མཐེ་བོ་གཉིས་ཀྱང་ཕྲལ་ཏེ་བསྒྲེང་། ། སྤྱི་བོར་བཞག་པ་གྲེ་བའི་རྒྱ། ། རྐང་པ་གཡས་པ་ཐུར་དུ་གཟུགས། ། ལག་པ་གཡས་པ་གྱེན་དུ་བསྒྲེང་། ། གཡོན་ པའི་རྐང་པ་ལག་ཕྱར་བའི། ། གཞན་གྱིས་མི་ཐུབ་ཕྱག་རྒྱ་ཡིན། ། ལག་པ་གཡས་གཡོན་དཀུར་བརྟེན་ཏེ། ། རྐང་པ་གཤིབས་ཏེ་མཆོངས་པ་ནི། ། བདུད་རྩི་འཁྱིལ་པའི་ཕྱག་རྒྱ་ཞེས། ། དཔའ་བོ་ཆེན་པོས་ཡང་དུ་བཤད། ། ལག་པ་གཡས་གཡོན་བསྣོལ་བ་དང་། ། རྐང་པ་ བརྐྱང་བསྐུམ་བྱས་པ་ནི། ། ཁམས་གསུམ་རྒྱལ་བའི་ཕྱག་རྒྱ་ཞེས། ། མགོན་པོ་དཔའ་བོས་ཡང་དུ་བཤད། ། ལག་པ་གཡས་གཡོན་སྤྲུགས་པ་དང་། ། ལུས་ཀྱང་དྲག་ཏུ་གསིགས་པ་ནི། ། རྡོ་རྗེ་ཕྲ་མེན་མ་རྣམས་ཀྱི། ། ཕྱག་རྒྱ་ཡིན་པར་འདྲེན་པས་བཤད། ། ཕྱག་རྒྱ་འདི་དག་ བཅིངས་ནས་ནི། ། སྟབས་ཆེན་དྲག་ཏུ་མཆོངས་བྱས་ན། ། ཁམས་གསུམ་དག་ལས་མཆོངས་པར་འགྱུར། ། གཞན་ཡང་གོ་འཕང་ཐམས་ཅད་ཀུན། ། གྲུབ་པར་གྱུར་ཏེ་ཐེ་ཚོམ་མེད། །

རིག་པའི་སྐྱེས་བུ་ཆེན་པོས་བཤད། ། འཕགས་པ་ཐབས་ཀྱི་ཞགས་པ་ པདྨོ་ཕྲེང་ལས་ཕྱག་རྒྱའི་ལེའུ་སྟེ་བཅུ་དྲུག་པའོ། ། ། ། འཁོར་ལོ་ཆེན་པོའི་རྩིབས་བརྒྱད་པའི། ། དཀྱིལ་དུ་ཁྲག་འཐུང་སྤྱན་དྲངས་ཏེ། ། མདུན་དུ་ཧཱུྃ་ཡང་སྤྱན་དྲང་ངོ་། ། རྒྱབ་ཏུ་སྟོབས་ཆེན་སྤྱན་དྲངས་ནས། ། འཁོར་ལོ་རྩིབས་ཀྱི་སྟེང་དག་ཏུ། ། བཅུ་པོ་རྣམས་ཀྱང་ {གོ་རིམས་,གོ་རིམ་}བཞིན། ། སོ་སོའི་གནས་སུ་སྤྱན་དྲངས་ཏེ། ། དམར་གྱི་ཨརྒྷ་གསོལ་ནས་ནི། ། མཆོད་ཡོན་གཞན་ཡང་དབུལ་བར་བྱ། ། རྡོ་རྗེ་དབྱངས་ཀྱིས་བསྟོད་བྱས་ཏེ། ། དེ་ནས་ལས་རྣམས་བསྒྲུབ་པར་བྱ། ། ཞེ་སྡང་རྡོ་རྗེ་འཁོར་བཅས་པས། ། འཇིག་རྟེན་ཁམས་ནི་རབ་ འབྱམ་ཀུན། ། ཁྲོས་པས་ཡུད་ཙམ་རླག་མཛད་དེ། ། བརླག་པར་མ་གྱུར་གང་ཡང་མེད། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་ལས་ཀྱི་ལེའུ་སྟེ་བཅུ་བདུན་པའོ། ། ། ། རྡོ་རྗེ་ཕྲ་མེན་སྦྱོར་བ་ཡིས། ། ཡུད་ཙམ་གྱིས་ནི་དེ་བཀུག་ནས། ། རྟོད་པའི་ཚུལ་དུ་རབ་བསྟབས་ ན། ། ལྷ་ཡང་རུང་སྟེ་བརླག་པར་འགྱུར། ། འུག་པའི་མགོ་ཅན་ལ་སོགས་པའི། ། ཕྲ་མེན་མ་རྣམས་སྦད་བྱས་ཏེ། ། མིག་དང་རྣ་བ་སྣ་དང་ལྕེ། ། དེ་ཡི་སེམས་འཕྲོགས་བསྒོམ་ཉམས་འགྱུར། །

ཕྲ་མེན་རྣམས་ནི་སྦད་བྱས་ཏེ། ། དེ་ཡི་སྒྲུབ་པའི་བར་གཅོད་ཅིང་། ། གསང་ སྟེ་འཁྲུལ་པར་བསྒོམ་བྱས་ན། ། སྒྲུབ་པ་ཉམས་ཤིང་འབྱེ་བར་འགྱུར། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་དྲག་པོའི་ལས་ཀྱི་ལེའུ་སྟེ་{བཅྭ་,བཅོ་}བརྒྱད་པའོ། ། ། ། ཧོམ་ཁུང་ཟུར་གསུམ་གདེངས་པ་ལ། ། རྡོ་རྗེ་མདའ་གཞུ་ལྡན་བྱས་ཏེ། ། ཐོད་པ་དག་གིས་རྣམ་པར་ བརྒྱན། ། སྤྱན་དྲངས་བསྲེགས་ན་ལྷ་ཡང་འཆི། ། ཕྲ་མེན་མངགས་ཏེ་བཀུག་ནས་ནི། ། ཐབ་ཀུན་བསྲེགས་ན་མོད་ལ་འཆི། ། བསུར་དང་བསྲེས་པའི་ཤ་རྣམས་ཀྱིས། ། ལྷ་རྣམས་ཐམས་ཅད་མཆོད་པར་བྱེད། ། རྡོ་རྗེ་གླུ་ནི་བླངས་ནས་སུ། ། འབྱུང་པོའི་ཤ་ནི་ཤིན་ཏུ་ཞིམ། ། འབྱུང་པོའི་ ཁྲག་ནི་ཤིན་ཏུ་ཞིམ། ། འབྱུང་པོའི་རུས་པ་ཞིམ་པ་སྟེ། ། གསོལ་ཏེ་ཐམས་ཅད་དགྱེས་པར་མཛོད། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་དྲག་པོ་ཧོམ་གྱི་ལེའུ་སྟེ་བཅུ་དགུ་པའོ། ། ། ། ལྕགས་སམ་ནག་པོའི་ཤིང་རྣམས་ལ། ། མགོ་བོ་རྒྱ་མདུང་རྩེ་ཟུར་གསུམ། ། ཁྲོ་ བོ་ཁྲོ་མོ་རྣམས་བསྒོམས་ཏེ། ། བཏབ་ན་ལྷ་ཡང་བརླག་པར་འགྱུར། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་དྲག་པོའི་ཕུར་པའི་ལེའུ་སྟེ་ཉི་ཤུ་པའོ། ། ། །

ལྕགས་ཕྱེ་དུག་དང་རྡོ་ཕྱེ་དང་། ། ཁྲག་ལས་སྤྲུས་ཏེ་བསྲེས་པ་དང་། ། མུད་གའི་ཚན་དང་སྦྱོར་བ་དག ། སྦྱོར་ བས་གཏོར་ན་དེ་བརླག་འགྱུར། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་དྲག་པོའི་གཏོར་མའི་ལེའུ་སྟེ་ཉི་ཤུ་གཅིག་པའོ། ། ། ། ཁྲོ་མོའི་དཀྱིལ་འཁོར་གཏུན་ཁུང་དུ། ། ཁྲོ་བོའི་ཐོ་བས་བརྡུངས་པ་ཡི། ། རྡོ་རྗེ་གཏུན་ཕྲུགས་བསྒོམ་བྱས་ན། ། ལྷ་ཡང་རུང་སྟེ་བརྡུངས་ པར་འགྱུར། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་དྲག་པོའི་སྦྱོར་བའི་ལེའུ་སྟེ་ཉི་ཤུ་གཉིས་པའོ། ། ། ། དྲག་པོའི་ལས་ཀྱིས་བསྒྲུབས་པའི་རྣམས། ། འཁོར་བའི་ལམ་ལྔ་སྒོ་བཅད་ནས། ། རྣམ་ཤེས་ཧཱུྃ་གིས་བསྡུས་གཏུམས་ཏེ། ། འོག་མིན་ བླ་མེད་གནས་མཆོག་ན། ། གཙོ་བོ་ལྔ་དང་གཙོ་མོ་ལྔ། ། སེམས་དཔའ་དང་ནི་སེམས་མ་དང་། ། ཁྲོ་བོ་དང་ནི་ཁྲོ་མོ་རྣམས། ། སྦྱོར་བའི་ལྷུམས་སུ་ཕཊ་ཀྱིས་འཕང་། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་གནས་བསྟབས་པའི་ལེའུ་སྟེ་ཉི་ཤུ་གསུམ་པའོ། ། ། ། ཟླ་གམ་དཀྱིལ་འཁོར་རྩིབས་བརྒྱད་པ། ། ཁྲོ་བོ་ཁྲོ་མོ་སྤྱན་དྲངས་ཏེ། ། མཆོད་པ་གླུ་ལ་སོགས་པས་མཆོད། ། དེ་ནས་ལས་རྣམས་བརྩམ་པར་བྱ། ། ཆགས་པའི་རྡོ་རྗེ་འཁོར་བཅས་པ།

། འཇིག་རྟེན་ཁམས་ནི་རབ་འབྱམ་ཀུན། ། ཆགས་པས་ཡུད་ལ་དབང་མཛད་དེ། ། དབང་ དུ་མ་གྱུར་གང་ཡང་མེད། ། རྡོ་རྗེ་ཕྲ་མེན་མངགས་ནས་སུ། ། བཀུག་ནས་ཁྲོ་བོ་ཆེན་པོ་ཡིས། ། ཆགས་པའི་ཚུལ་གྱིས་དེ་ལུས་ལས། ། དཔའ་དང་གཟི་བརྗིད་བསྡུས་ནས་འགྲུབ། ། ཕྲ་མེན་རྣམས་ནི་མངགས་ནས་སུ། ། དེ་ཡི་མིག་རྣ་སྣ་དང་ལྕེ། ། ལུས་ངག་སེམས་བསྒྱུར་རྣམས་ བསྒོམས་ན། ། ཀུན་ལ་མཛེས་ཤིང་དགའ་བར་འགྱུར། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་དབང་གི་ལས་བསྟན་པའི་ལེའུ་སྟེ་ཉི་ཤུ་བཞི་པའོ། ། ། ། ཧོམ་ཁུང་ཟླ་གམ་གདེངས་པ་ལ། ། རྡོ་རྗེ་ཞགས་པས་བརྒྱན་པར་བྱ། ། དེ་ནས་ལྷ་རྣམས་སྤྱན་དྲངས་ཏེ། ། མི་ ཕན་རྣམ་རྟོག་བསྲེགས་ན་འགྲུབ། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་དབང་གི་ཧོམ་གྱི་ལེའུ་སྟེ་ཉི་ཤུ་ལྔ་པའོ། ། ། ། ཟངས་སམ་ཁ་དོག་དམར་པོའི་ཤིང་། ། མགོ་བོ་རྒྱ་མདུད་རྩེ་ཟླ་གམ། ། མགོ་ལ་ཁྲོ་བོའི་འཁོར་བསྒོམས་ཏེ། ། བཏབ་ན་ངེས་པར་དེ་དབང་ འགྱུར། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་དབང་གི་ཕུར་པའི་ལས་བཤད་པའི་ལེའུ་སྟེ་ཉི་ཤུ་དྲུག་པའོ། ། ། ། ཟངས་ཕྱེ་དང་ནི་བུ་རམ་དང་། ། དམར་པོའི་འབྲས་ཅན་ལ་སོགས་པ། །

སྦྱར་བས་གཏོར་མ་གཏང་བར་བྱ། ། མཐོང་བས་ ངེས་པར་དེ་དབང་འགྱུར། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་དབང་གི་གཏོར་མའི་ལེའུ་སྟེ་ཉི་ཤུ་བདུན་པའོ། ། ། ། ཁྲོ་མོ་རྣམས་ཀྱི་དཀྱིལ་འཁོར་དུ། ། ཁྲོ་བོའི་དཀྱིལ་འཁོར་བསྒོམས་བྱས་ན། ། ལྷ་ཡང་རུང་སྟེ་དབང་དུ་འགྱུར། ། དེ་ནི་བདེ་ བ་ཆེན་པོ་ཡིན། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་དབང་གི་སྦྱོར་བའི་ལེའུ་སྟེ་ཉི་ཤུ་བརྒྱད་པའོ། ། ། གྲུ་བཞི་དཀྱིལ་འཁོར་རྩིབས་བརྒྱད་པར། ། ལྷ་རྣམས་འཁོར་བཅས་སྤྱན་དྲངས་ཏེ། ། མཆོད་པ་གླུ་ལ་སོགས་པས་མཆོད། ། དེ་ནས་ལས་ རྣམས་བརྩམ་པར་བྱ། ། ང་རྒྱལ་རྡོ་རྗེ་འཁོར་བཅས་པས། ། འཇིག་རྟེན་ཁམས་ནི་རབ་འབྱམ་ཀུན། ། དཔལ་དང་གཟི་བརྗིད་ཆེན་པོ་རྣམས། ། ཡུད་ཙམ་གྱིས་ནི་རྒྱས་པར་མཛོད། ། ཁྲོ་བོ་ཁྲོ་མོ་འཁོར་བཅས་དང་། ། རྡོ་རྗེ་ཕྲ་མེན་འཁོར་བཅས་པས། ། དཔལ་ དང་གཟི་བརྗིད་འཕེལ་བསྒོམས་ན། ། བདག་ཉིད་ཆེན་པོར་དེ་འགྱུར་རོ། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་རྒྱས་པའི་ལས་ཀྱི་ལེའུ་སྟེ་ཉི་ཤུ་དགུ་པའོ། ། ། ། ཧོ་མ་ཁུང་གྲུ་བཞི་གདེངས་པ་ལ། ། རྡོ་རྗེ་འཁོར་ལོས་བརྒྱན་པར་བྱ། ། དེ་ནས་ལྷ་ རྣམས་སྤྱན་དྲངས་ཏེ། །

བསྲེགས་པས་མཆོད་ཅིག་དཔལ་འཕེལ་བསྒོམ། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་རྒྱས་པའི་ཧོམ་གྱི་ལེའུ་སྟེ་སུམ་ཅུ་པའོ། ། ། ། གསེར་རམ་སེར་པོའི་ཤིང་རྣམས་ལ། ། མགོ་བོ་རྒྱ་མདུད་རྩེ་ཟུར་བཞི། ། ལྷ་རྣམས་བསྒོམས་ ཏེ་གདབ་པར་བྱ། ། འདི་ནི་རྒྱས་པའི་ལས་ལ་ཤིས། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་རྒྱས་པའི་ཕུར་པའི་ལེའུ་སྟེ་སུམ་ཅུ་གཅིག་པའོ། ། ། ། གསེར་ཕྱེ་འབྲས་ཅན་སེར་པོ་རྣམས། ། འོ་མ་སྦྲང་རྩི་གཏོར་མ་ནི། ། རྒྱས་པར་འགྱུར་བའི་གཏོར་མ་སྟེ། ། མཁས་པས་རྒྱས་པར་བསྒོམ་ཞིང་སྦྱིན། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་རྒྱས་པའི་གཏོར་མའི་ལེའུ་སྟེ་སུམ་ཅུ་གཉིས་པའོ། ། ། ། ལྷ་མོ་རྣམས་ཀྱི་དཀྱིལ་འཁོར་དུ། ། ལྷ་ཡི་དཀྱིལ་འཁོར་རྫོགས་པར་བསྒོམ། ། བྱང་ཆུབ་སེམས་ནི་འཕྲོ་ བསྒོམས་ན། ། འདི་ནི་རྒྱས་པའི་ལས་འགྲུབ་བོ། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་རྒྱས་པའི་སྦྱོར་བའི་ལེའུ་སྟེ་སུམ་ཅུ་གསུམ་པའོ། ། ། ། ཟླུམ་པོའི་དཀྱིལ་འཁོར་རྩིབས་བརྒྱད་པར། ། ལྷ་རྣམས་འཁོར་བཅས་ སྤྱན་དྲངས་ཏེ། ། དཀར་པོའི་ཡོན་གྱིས་མཆོད་པ་བྱ། ། དེ་ནས་ལས་རྣམས་བརྩམ་པར་བྱ། །

གཏི་མུག་རྡོ་རྗེ་འཁོར་བཅས་པས། ། འཇིག་རྟེན་ཁམས་ནི་རབ་འབྱམ་ཀུན། ། ཡུད་ཙམ་ཉིད་ལ་ཞི་མཛད་དེ། ། ཞི་བར་གྲུབ་ལ་ཕྱག་འཚལ་ལོ། ། ལྷ་རྣམས་འཁོར་བཅས་ཐམས་ཅད་ ཀྱིས། ། འཁྲུག་པ་ཐམས་ཅད་ཞི་མཛད་པར། ། བསྒོམས་ན་ཐམས་ཅད་ཡུད་ཙམ་གྱིས། ། ཞི་བར་འགྱུར་ཏེ་ཐེ་ཚོམ་མེད། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་ཞི་བའི་ལས་ཀྱི་ལེའུ་སྟེ་སུམ་ཅུ་བཞི་པའོ། ། ། ། ཧོམ་ཁུང་ཟླུམ་པོ་གདེངས་པ་ལ། ། རྡོ་རྗེ་པདྨོས་བརྒྱན་པར་བྱ། ། ཕུར་པ་དཀར་པོ་དྲུག་བཏབ་སྟེ། ། སྤྱན་དྲངས་རྡུལ་ཕྱེ་སོགས་པས་མཆོད། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་ཞི་བའི་ཧོམ་གྱི་ལེའུ་སྟེ་སུམ་ཅུ་ལྔ་པའོ། ། ། ། ཕུར་པ་ཁ་དོག་དཀར་པོ་ལ། ། མགོ་པོ་རྒྱ་མདུད་རྩེ་ཟླུམ་པོར། ། ལྷ་རྣམས་བསྒོམས་ལ་གདབ་པར་བྱ། ། འདི་ ནི་ཞི་བའི་ལས་ལ་ཤིས། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་ཞི་པའི་ཕུར་པའི་ལེའུ་སྟེ་སུམ་ཅུ་དྲུག་པའོ། ། ། ། དངུལ་དང་འབྲས་ཆན་དཀར་པོ་རྣམས། ། འོ་མར་སྦྱར་བའི་གཏོར་མ་ནི། ། ཞི་བར་འགྱུར་བའི་གཏོར་མ་སྟེ། ། མཁས་པས་ཞི་བར་བསྒོམས་ཤིང་། ། གཏོར། །

འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་ཞི་བའི་གཏོར་མའི་ལེའུ་སྟེ་སུམ་ཅུ་བདུན་པའོ། ། ། ། ལྷ་མོ་རྣམས་ཀྱི་དཀྱིལ་འཁོར་དུ། ། ལྷ་ཡི་གྲུབ་པ་བསྒོམ་པར་བྱ། ། བྱིན་གྱིས་ཐམས་ཅད་ཞི་བསྒོམས་ན། ། ལྷ་རྣམས་ཀུན་ཀྱང་ཞི་བར་འགྱུར། ། འཕགས་ པ་ཐབས་ཀྱི་ཞགས་པ་པདྨོ་ཕྲེང་ལས་ཞི་བའི་སྤྱོད་པ་ལས་ཀྱི་ལེའུ་སྟེ་སུམ་ཅུ་བརྒྱད་པའོ། ། ། ། མཚན་ཉིད་མེད་པའི་ཕྱག་རྒྱ་དང་། ། དེ་ལས་དངོས་བྱུང་ཕྱག་རྒྱ་རྣམས། ། ངེས་པ་མེད་པར་དཔའ་བོས་བཤད། ། མཁས་པས་ཅི་དགར་བསྒྱུར་ན་འགྲུབ། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་ལས་བསྡུས་པའི་ལེའུ་སྟེ་སུམ་ཅུ་དགུ་པའོ། ། ། ། དྲག་པོས་ཐམས་ཅད་འདུལ་བར་འགྱུར། ། དབང་གིས་འབྱོར་བ་མཆོག་ཀྱང་འགྲུབ། ། རྒྱས་པས་གཟི་བརྗིད་རྣམ་པར་འཕེལ། ། ཞི་བས་བདེ་བའི་མཆོག་ཀྱང་ འགྲུབ། ། འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་ལས་སྒྲུབ་པའི་ཕན་ཡོན་གྱི་ལེའུ་སྟེ་བཞི་བཅུ་པའོ། ། ། ། དཀྱིལ་འཁོར་འདིའི་མཚན་ནི་དབང་ཆེན་བསྡུས་པའི་དཀྱིལ་འཁོར་ཏེ། དེ་ལ་དཀྱིལ་འཁོར་གྱི་གཞི་ཟླུམ་པོར་བྱ་བ་ནི་ཆོས་ཀྱི་དབྱིངས་སྤྲོས་པ་མེད་ པའི་དོན་ནོ། །

འཁོར་ལོ་རྩིབས་ཟུར་ཅན་དུ་བྱ་བ་གཞི་ཟླུམ་པོའི་ནང་ན་གནས་པ་ནི་ཆོས་ཀྱི་དབྱིངས་སྤྲོས་པ་མེད་བཞིན་དུ་བྱིན་གྱིས་བརླབས་ཀྱི་ལྷ་དང་། ལྷ་མོ་དང་། ཁྲོ་བོ་དང་། ཁྲོ་མོ་དང་། ཕོ་ཉ་ལ་སོགས་པ་དང་ཉིད་ཀྱིས་འཕྲོ་བའི་དོན་ནོ། ། རྣམ་པ་གཅིག་ཏུ་ཆོས་ཀྱི་དབྱིངས་རྣམ་པར་ རྟོག་པ་མེད་བཞིན་དུ་ཐམས་ཅད་མཁྱེན་པའི་ཡེ་ཤེས་ཅི་ཡང་མཁྱེན་པ་ལྷུན་གྱིས་གྲུབ་པའི་དོན་ནོ། ། མཐའ་གྲུ་བཞི་བྱ་བ་ནི། ཕྱོགས་བཅུའི་སྣོད་དང་བཅུད་ཀྱི་འཇིག་རྟེན་ཐམས་ཅད་ལ་དབང་བསྒྱུར་བས་བདེ་བ་ཆེན་པོ་རྒྱས་པའི་དོན། དཀྱིལ་ནས་ལྷ་མོ་ལྔ་ཕྱིར་ལྟ་བ། ལྷ་མོ་ནི་དབྱིངས་ ཉིད་ཉེ་བའི་བྱིན་བརླབས་ཏེ། སེམས་དཔས་དབྱིངས་ཉིད་དང་ཉེ་བ་མཐོང་བའི་དོན་ནོ། ། སེམས་དཔའ་ལྔ་ནང་དུ་ལྟ་བ་ནི་དབྱིངས་ཉིད་ཉེ་བ་ལ་ལྟ་བའི་དོན་ནོ། ། སེམས་དཔའ་གཞན་ཕྱིར་ལྟ་བ་ནི། དབྱིངས་ཉིད་ཐམས་ཅད་དུས་རྡོ་ལྟ་བུ་བེམས་པོ་མ་ཡིན་གྱི་མཁྱེན་པའི་ཡེ་ཤེས་དང་ ལྡན་ཞིང་སེམས་དཔའ་ཉིད་དབྱིངས་ལས་མི་གཞན་པའི་ཐ་ཚིག་གོ། །

སེམས་མ་གཞན་ནང་དུ་ལྟ་བ་ནི་མཁྱེན་པའི་ཡེ་ཤེས་དངོས་པོ་ལ་སོགས་པ་ཐམས་ཅད་དུ་རྣམ་པར་རྟོག་པ་མ་ཡིན་གྱི་དབྱིངས་ཉིད་དང་ལྡན་ཞིང་དབྱིངས་ཉིད་ཀྱང་མཁྱེན་པའི་ཡེ་ཤེས་ལས་མི་ གཞན་པའི་ཐ་ཚིག་གོ། ། རྣམ་གཅིག་ཏུ་སེམས་དཔའ་ཕྱིར་ལྟ་བ་ནི་སྣོད་དང་བཅུད་ཀྱི་འཇིག་རྟེན་ཐམས་ཅད་དབང་བསྒྱུར་བའི་དོན། སེམས་མ་ནང་དུ་ལྟ་བ་ནི་སྣོད་དང་བཅུད་ཀྱི་འཇིག་རྟེན་ཐམས་ཅད་དབང་དུ་འདུས་པའི་དོན། སེམས་དཔའ་དང་སེམས་མ་ཕྱི་ནང་ དུ་གཅིག་ལ་གཅིག་གཟིགས་པ་ནི་མཉེས་པར་བྱེད་པའི་ཐ་ཚིག་གོ། ། ཁྲོ་བོ་དང་ཁྲོ་མོ་རིལ་ཕྱིར་ལྟ་བ་ནི་ཕྱིའི་དངོས་པོ་དང་རྒོལ་བ་ལ་སོགས་པ་འཇོམས་ཤིང་འདུལ་བའི་དོན། དེ་ལ་དབྱིངས་ནི་དཔེར་ན་ཉི་མའི་དཀྱིལ་འཁོར་ལྟ་བུའོ། ། མཁྱེན་པའི་ཡེ་ཤེས་ནི། ཉི་མའི་འོད་སྣང་ཞིང་གསལ་བ་ལྟ་བུའོ། ། དེའི་བྱིན་བརླབས་ནི་དྲོ་ཞིང་འཇམ་པ་ལྟ་བུའོ། ། ཕྱིའི་དངོས་པོ་ལ་སོགས་པ་འཇོམས་ཤིང་འདུལ་བ་ནི་རྩི་ཤིང་བསྐམས་པ་དང་ཚིག་པ་ལྟ་བུ་སྟེ། ། ལྷ་མོ་དང་སེམས་མ་ནི་ཆོས་ཀྱི་དབྱིངས་རིག་པའི་དོན་སེམས་ལ་སྣང་བའོ། ། ལྷ་དང་སེམས་ དཔའ་ནི་དབྱིངས་ལ་སྣང་བའི་དོན་མཐོང་བའོ། །

དབྱིངས་ཉིད་ལ་སྣང་བ་དང་མཐོང་བའི་བྱིན་བརླབས་ཀྱི་ངང་གིས་དངོས་པོ་དང་རྒོལ་བའི་རང་བཞིན་ལྷུན་གྱིས་འཇོམས་ཤིང་དབྱིངས་སུ་སྦྱོར་བར་འདུལ་བ་ནི། ། ཁྲོ་བོ་དང་ཁྲོ་མོ་ལས་རྣམ་བཞི་རང་བཞིན་དུ་མཛད་ཅིང་ཐུགས་རྗེས་འཇིག་ རྟེན་སྐྱོང་བའི་དོན་ནོ། ། འཇིག་རྟེན་སྐྱོང་བ་ལ་སོགས་པ་ནི་བྱིན་གྱིས་བརླབས་ལས་ཕོ་ཉ་ལྟར་གནས་པ་ཡིན། རྣམ་གཅིག་ཏུ་འཇིག་རྟེན་གྱི་ལྷ་མཐུ་བོ་ཆེ་འཁོར་དུ་འདུས་པར་བསྟན་པའི་དོན་ནོ། ། བཀྲ་ཤིས་བརྒྱད་ནི་ཐམས་ཅད་ལ་དབང་བསྒྱུར་ཞིང་འཁོར་བ་ལ་སྤྱོད་ཀྱང་ཉོན་མོངས་ པའི་འཆིང་བར་མི་འགྱུར་བ་དང་། མྱ་ངན་ལས་འདས་པ་ལ་སྤྱོད་ཀྱང་ཉན་ཐོས་ཀྱི་ཞི་བ་ཕྱོགས་གཅིག་པར་མི་འགྱུར་ཏེ། གང་གིས་ཀྱང་ཟིལ་གྱིས་མི་ནོན་པའི་ཕྱིར་བཀྲ་ཤིས་སོ། ། དེ་ལ་དཔལ་བེའུ་ནི་མཁྱེན་པའི་ཡེ་ཤེས་དང་ལྡན་པའི་བཀྲ་ཤིས་སོ། ། འཁོར་ལོ་ནི་ཐམས་ཅད་ ལ་དབང་བསྒྱུར་བ་དང་། ཆོས་ཀྱི་འཁོར་ལོ་བསྐོར་བའི་བཀྲ་ཤིས་སོ། ། རིན་པོ་ཆེ་ནི་ཟད་མི་ཤེས་པ་དང་ལྡན་པའི་བཀྲ་ཤིས་སོ། ། པདྨོ་ནི་འཁོར་བས་མ་ཟིན་པའི་བཀྲ་ཤིས་སོ། ། གདུགས་ནི་ཉོན་མོངས་པས་མ་གདུངས་པའི་བཀྲ་ཤིས་སོ། །

བུམ་པ་ནི་བདུད་རྩི་མཆོག་དང་ལྡན་ པའི་བཀྲ་ཤིས་སོ། ། དུང་ནི་སྒོ་ཐམས་ཅད་སྤ་དགོང་བར་སྒྲ་སྒྲོགས་པའི་བཀྲ་ཤིས་སོ། ། ཉ་ནི་ལམ་རྒྱུད་ལྔའི་སེམས་ཅན་གྱི་དོན་མཛད་ཀྱང་ཉམ་ང་བ་མེད་པའོ། ། ཀློང་བཞི་ནི་རིགས་ལྔའི་བྱིན་བརླབས་ཡིན་པའམ། ལམ་རྒྱུད་ལྔའི་སེམས་ཅན་ལ་དེ་བཞིན་གཤེགས་པའི་རང་བཞིན་ཡོད་པར་ བསྟན་པའམ། ཐུགས་རྗེས་དེ་དག་གི་དོན་མཛད་པའི་ཐ་ཚིག་གོ། ། རྣམ་གཅིག་ཏུ་ཐམས་ཅད་དབང་དུ་འདུས་པའི་དོན། ། དེ་ལ་གཙོ་མོ་འཁོར་ལྔ་ལྔ་དང་བཙས་པ་ནི་ཅི་ཡང་མི་མཛད་དོ། ། སེམས་དཔའ་སེམས་མ་ཉི་ཤུ་ནི་ཀུན་ལ་བུ་གཅིག་བཞིན་ནོ། ། དེ་ལྟར་བྱས་པའི་ཤུགས་ཀྱིས་ཁྲོ་བོ་དང་ ཁྲོ་མོ་འཁོར་དང་བཅས་པ་ནི་ཕྱི་ནང་ཐམས་ཅད་ཀྱི་དངོས་པོ་ལ་རྔོན་པས་{རི་དགས་,རི་དྭགས་}མཐོང་བ་བཞིན་ནོ། ། དེ་ལྟར་ཞེ་སྡང་གི་ཤུགས་ཀྱིས་ཐམས་ཅད་དབྱིངས་ཉིད་ལ་སྦྱར་རོ། ། འབྱོར་ན་འཁོར་བའི་ཆོས་ལ་སྤྱོད་ཀྱང་ལོངས་སྤྱོད་ཆེན་པོ་སྟེ། ཉོན་མོངས་པའི་འཆིང་བར་མི་འགྱུར་བས་ དེ་ལྟར་སྒྲུབ་པ་ནི་འདོད་ཆགས་སོ། ། ཆོས་ཀྱི་དབྱིངས་ངང་གིས་གསང་བ་ཕྲག་དོག་གོ། ། ཆོས་ཉིད་སྤྲོས་པ་མེད་པས་གཏི་མུག་གོ། །

ཆོས་ཉིད་དེ་ལྟ་བུ་ཁམས་གསུམ་ལས་རྒྱལ་བས་ང་རྒྱལ་ལོ། ། དེ་ལ་གཙོ་བོ་ནི་འཁོར་ལྔའི་བྱིན་བརླབས་ནི་ཐམས་ཅད་ལ་ཁྱབ་མོད་ཀྱི་ཉེ་ བར་ནི་དབུ་དང་། མདུན་དང་། ཐོང་ཀ་ཡན་ཆད། རྒྱབ་མཇུག་ཡན་ཆད་དོ། ། མི་འཁྲུགས་པའི་འཁོར་ལྔའི་བྱིན་བརླབས་ནི་ཕྱག་གཡས་པ་དང་རྩིབ་ལོགས་གཡས་སོ། ། རིན་ཆེན་འབྱུང་ལྡན་འཁོར་ལྔའི་བྱིན་བརླབས་ནི་ཕྱག་གཡོན་དང་རྩིབ་ལོགས་གཡོན་ནོ། ། འོད་དཔག་མེད་ འཁོར་ལྔའི་བྱིན་བརླབས་ནི། ཞབས་གཡོན་ནས་རྐེད་པ་གཡོན་མན་ཆད་དོ། ། དོན་ཡོད་གྲུབ་པ་འཁོར་ལྔའི་བྱིན་བརླབས་ནི་ཞབས་གཡས་རྐེད་པ་གཡོན་མན་ཆད་དོ། ། ཁྲོ་བོ་དང་ཁྲོ་མོ་ཐམས་ཅད་ནི་རིགས་སོ་སོའི་བྱིན་བརླབས་བཞིན་ནོ། ། དེ་ལྟར་འཁོར་ལྔ་པོ་གཅིག་ལ་ཡང་ལྔ་ལྔར་འགྱུར་ཏེ། སྲ་ བའི་བྱ་བ་བྱེད་པ་ཐམས་ཅད་ནི་རྡོ་རྗེའི་རིགས་སོ། ། དྲོ་བའི་བྱ་བ་བྱེད་པ་ཐམས་ཅད་ནི་རིན་པོ་ཆེའི་རིགས་སོ། ། གཤེར་བའི་བྱ་བ་བྱེད་པ་ཐམས་ཅད་ནི་པདྨའི་རིགས་སོ། ། བསྐྱོད་པའི་བྱ་བ་བྱེད་པ་ཐམས་ཅད་ནི་ལས་ཀྱི་རིགས་སོ། ། དེ་རྣམས་ཆ་མཉམ་པ་ལས་སྤྱིར་གྲུབ་པ་ནི་དངོས་སུ་བཞུགས་པ། དེ་བཞིན་ གཤེགས་པའི་རིགས་སོ། །

ཐམས་ཅད་བདག་ཉིད་མའི་འཁོར་ལྔའི་བྱིན་བརླབས་ནི་དབུས་སུ་གྱུར་པ་ཐམས་ཅད་དོ། ། སྲ་བའི་རང་བཞིན་མེད་པ་ནི་ཡངས་པའི་སྤྱན་འཁོར་ལྔའི་བྱིན་བརླབས་སོ། ། དྲོ་བའི་རང་བཞིན་མེད་པ་ནི་མཱ་མ་ཀཱི་འཁོར་ལྔའི་བྱིན་བརླབས་སོ། ། གཤེར་བའི་རང་བཞིན་མེད་པ་ ནི་གོས་དཀར་མོ་འཁོར་ལྔའི་བྱིན་བརླབས་སོ། ། བསྐྱོད་པའི་རང་བཞིན་མེད་པ་ནི་སྒྲོལ་མའི་འཁོར་ལྔའི་བྱིན་བརླབས་སོ། ། དོན་དུ་བྱ་བ་བྱེད་ནུས་པ་སེམས་དཔའོ། ། དེ་བཞིན་དུ་རང་བཞིན་མེད་པ་ནི་སེམས་མའོ། ། དེ་ལྟར་རིག་པ་ནི་ཁྲོ་བོ་དང་ཁྲོ་མོའོ། ། དེ་ལ་བསྡུ་ཞིང་ སྤྲོ་བ་ཡང་ཐམས་ཅད་དེ་ལྟར་བྱའོ། ། ཕྱི་ནང་གི་ཆོས་ཐམས་ཅད་ལ་ཡང་དེ་ལྟར་བལྟའོ། ། དེ་སྐད་ཅེས་དཔལ་རྣམ་པར་སྣང་མཛད་ཀྱིས་བཀའ་སྩལ་པ་ལ་རྡོ་རྗེ་གཞོན་ནུ་སྡེ་འབུམ་ཕྲག་དུ་མ་ཡི་རངས་ཏེ་འདི་སྐད་ཅེས་བསྟོད་དོ། ། ཧཱུྃ། བསྐལ་པའི་མེ་ལྟར་འབར་བ་ཡི། ། འོད་ཟེར་འདུ་འཕྲོ་ ཀློང་དཀྱིལ་ན། ། ཁྲོ་བོ་ཁྲོ་མོ་རྣམས་བཞུགས་པ། ། སྐུ་ནི་ཅིར་ཡང་སྒྱུར་བའི་གཟུགས། ། ཧཱུྃ། དབུ་སྐྲ་ཁམ་གནག་རལ་པ་ཅན། ། གྱེན་དུ་འཁྱིལ་བ་སྲིད་རྩེར་འབར། ། མི་མཉམ་ཁྲོ་གཉེར་སྡང་མིག་ནི། ། ལོག་པར་ལྟ་བ་འདུལ་བའི་མཚན། །

ཧཱུྃ། མཆེ་བ་ཟང་ཡག་གཙིགས་པས་ནི། ། སྐྱེ་ཤི་རྩ་བ་ གཅོད་པའི་ཚུལ། ། སྐུ་གསུང་ཐུགས་ཀྱི་བྱིན་བརླབས་ནི། ། ཕྱག་རྒྱ་སྣ་ཚོགས་ཅིར་ཡང་སྣང་། ། ཧཱུྃ། ཐུགས་རྗེའི་བྱིན་བརླབས་སྤྲིན་ལྟར་འཁྲིགས། ། བྱམས་པའི་འོད་ཟེར་གློག་བཞིན་འགྱུར། ། རྔམ་པའི་སྒྲ་སྐད་འབྲུག་ལྟར་སྒྲོགས། ། སྤྲུལ་པའི་ཐོག་ཐོག་ཆར་བཞིན་འབེབས། ། ཧཱུྃ། སྔོན་གྱི་ ཐུགས་དམ་ཆེན་པོ་ནི། ། ཀླན་ཀ་ཆེན་པོ་བདུད་ལ་ཚོལ། ། ཀྱལ་ཀ་ཆེན་པོ་བགེགས་ལ་མཛད། ། དམ་ཚིག་ཅན་ལ་དངོས་གྲུབ་སྩོལ། ། ཧཱུྃ། ཐུགས་རྗེ་ཆེན་པོའི་བྱིན་བརླབས་ཀྱིས། ། བདག་ལ་བྱིན་གྱིས་རློབ་མཛད་ཅིང་། ། བདག་གིས་ལྷག་པའི་བསམ་པ་རྣམས། ། གྲུབ་པར་བྱིན་གྱིས་བརླབ་ཏུ་ གསོལ། ། འཁྱིལ་ཅིང་རྒྱན་ཡང་འཁྱིལ་བ་ལ། ། སེམས་ཀྱི་ཆོས་པས་སྐུ་མི་མངའ། ། སྒྲ་ལས་འདས་པའི་སྦྱོར་བ་སྟེ། ། བསམ་དང་བྲལ་བའི་ཡེ་ཤེས་ལགས། ། ཧཱུྃ། སྲིད་གསུམ་འཇོམས་པའི་ལྷ་ལ་ཕྱག་འཚལ་ལོ། ། མཉམ་ཉིད་ངང་གིས་ཁྲོ་ལ་ཕྱག་འཚལ་ལོ། ། ཁྲོས་པས་ལོངས་སྤྱོད་མཛད་ལ་ཕྱག་འཚལ་ལོ། ། རྡོ་རྗེ་འདུ་འཕྲོ་ཁྲོ་ལ་ཕྱག་འཚལ་ལོ། ། ཞེས་བསྟོད་དེ། ཉིད་ཀྱི་ཐུགས་ཀར་ཞུགས་ནས་མི་སྣང་བར་གྱུར་ཏོ། །

འཕགས་པ་ཐབས་ཀྱི་ཞགས་པ་པདྨོ་ཕྲེང་རྫོགས་{སྷོ,སོ}། ། ། །