༄༅༅། ། རྒྱ་གར་སྐད་དུ། ཤྲཱི་ཛྭ་ལ་ཨགྣི་གུ་ཧྱ་ཏནྟྲ་རཱ་ཛ། བོད་སྐད་དུ། དཔལ་གསང་བ་མེ་འབར་བའི་རྒྱུད་ཀྱི་རྒྱལ་པོ། བཅོམ་ལྡན་འདས་བདེ་བ་ཆེན་པོ་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་བཙུན་མོའི་བྷ་ག་ལ་སྙོམས་པར་བཞུགས་སོ། ། དེའི་ཚེ་འཁོར་འདུས་པའི་ནང་ན་རྡོ་རྗེ་ཕག་མོས་གསོལ་པ། རྣལ་འབྱོར་གང་ལགས་འཕོ་བ་གང་། ། འཆི་བ་གང་ལགས་ཤི་བ་གང་། ། རོ་ནི་གང་ལགས་རོ་ཆེན་གང་། ། དེ་བཞིན་ཤི་བ་ཆེན་ པོ་གང་། ། ཐལ་བ་གང་ལགས་ཐལ་ཆེན་གང་། ། ཚ་ཚ་གང་ལགས་ཚ་ཚ་ཡི། ། ཆེན་པོ་གང་ལགས་གནས་ནི་གང་། ། བཅོམ་ལྡན་འདས་ཀྱིས་བཤད་དུ་གསོལ། ། བཅོམ་ལྡན་འདས་ཀྱིས་བཀའ་སྩལ་པ། ། ཐབས་དང་ཤེས་རབ་སྙོམས་འཇུག་ལ། ། རྣལ་འབྱོར་ཞེས་ནི་གསུངས་པ་ ཡིན། ། དུས་མིན་ལྷ་ནི་གསོད་པ་སྟེ། ། དང་པོར་འཕོ་བའི་རྟགས་དང་ཡང་། ། དུས་ཚོད་ངེས་པར་ཤེས་བྱ་སྟེ། ། བར་ཆད་མེད་པའི་ཏིང་འཛིན་གྱིས། ། འཁྲུལ་འཁོར་བཅས་ཏེ་ཁྱད་པར་གྱིས། ། འབྲས་བུ་འབྱུང་བར་འཕོ་བར་ངེས། ། ཁམས་དང་འབྱུང་བ་སོ་སོར་ཐིམ། ། སྲོག་གི་ རྩོལ་བ་ལ་ཐིམ་སྟེ། །

རྩོལ་བ་རྣམ་ཤེས་ལ་ཐིམ་པའི། ། སྐད་ཅིག་དང་པོ་འཆི་བ་སྟེ། ། རྡོ་རྗེ་ཅན་སོགས་རིགས་བཞི་དང་། ། རྣམ་སྣང་ཐ་དད་བྲལ་བ་ཡི། ། སྐད་ཅིག་དང་པོ་ཤི་བ་སྟེ། ། དེ་ནས་ཞག་བདུན་བར་དུ་གཞག ། ལུས་ཀྱི་མཁའ་འགྲོ་མྱ་ངན་འདས། ། དེ་ནི་ཤི་བ་ ཆེན་པོར་གྲགས། ། ལུས་ནི་ཏ་ལའི་མགོ་བོ་འདྲ། ། འདི་ཉིད་རོ་ཞེས་གསུངས་པ་སྟེ། ། ཡེ་ཤེས་དབབ་དང་ཡེ་ཤེས་བརྟན། ། མཁའ་སྤྱོད་ས་སྤྱོད་ས་འོག་སྤྱོད། ། སྤྱི་བོ་མགྲིན་པ་སྙིང་ག་རུ། ། དྲི་ཡི་ཐིག་ལེ་གསུམ་བྱས་ཏེ། ། སྐུ་གསུང་ཐུགས་སུ་བྱིན་གྱིས་བརླབ། ། ཐོག་མར་དྲི་ཞིམ་སྣ་ ཚོགས་ཀྱིས། ། ཁྲུས་བྱས་གནས་ནི་བཅུ་གཉིས་སུ། ། དྲི་ཡི་ཐིག་ལེ་བཅུ་གཉིས་བྱ། ། དཔའ་བོ་མཁའ་འགྲོས་བྱིན་གྱིས་བརླབ། ། གཞན་ཡང་རྒྱན་ལ་སོགས་པ་ཀུན། ། དངོས་སུ་གནས་པས་རབ་ཏུ་ངེས། ། རི་མོར་བྲིས་པ་འབྲིང་པོ་སྟེ། ། དྲི་ཡི་ཐིག་ལེ་ཐ་མར་ངེས། ། གཡས་བརྐྱང་ལ་ སོགས་འདུག་སྟངས་ཀྱིས། ། ཧེ་རུ་ཀར་གྲགས་ཆེན་པོར་བཞེངས། ། རང་རིག་བདག་པོ་གང་ཡིན་པ། ། ཧེ་རུ་ཀ་རུ་ངེས་པ་དང་། ། དེ་ལ་དུས་དྲུག་མཆོད་པས་མཆོད། ། འདི་དག་རོ་ནི་ཆེན་པོ་སྟེ། ། འཆི་བ་ཞེས་ནི་རྣམ་རྟོག་སྟེ། །

མཁའ་སྤྱོད་གནས་སུ་འཁྲིད་པར་བྱེད། ། རང་བཞིན་བསྲེགས་ པ་ཐལ་བ་སྟེ། ། རྩ་བའི་དཀྱིལ་འཁོར་ལ་བརྟེན་ནས། ། ཆོས་སྐུ་གཟུགས་བརྙན་རིམ་བཞིན་བརྩིག ། ཡང་ན་བུམ་པ་ལྟ་བུ་ཡི། ། གཞལ་ཡས་ཁང་པ་བརྩེག་མར་བརྩིག ། མི་འཆི་བཅུ་ཕྱེད་སྙིང་པོ་དང་། ། ཙནྡན་གུར་ཀུམ་ལ་སོགས་པའི། ། དྲི་ཡིས་བྱུགས་ཤིང་བསྒོ་བར་བྱ། ། ཙནྡན་དམར་ པོ་ལ་སོགས་པའི། ། དྲི་ཞིམ་ལྡན་པའི་ཤིང་བུ་འམ། ། ཡང་ན་འབྲས་བུ་ཡོད་པ་ཡི། ། བུད་ཤིང་ཚད་དང་མཐུན་པ་ཡིས། ། ཐབ་ཁུང་ཆེན་པོར་རྫོགས་པར་བརྩིག ། བླ་མ་དམ་པ་མཉེས་བྱས་ལ། ། ཞལ་ནས་ཡང་དག་ཤེས་པར་བྱ། ། ཟུར་བཞི་རྒྱལ་པོ་ཆེན་པོ་བཞི། ། ཕྱོགས་བཞི་མི་འཇིགས་སེང་གེ་ བརྒྱད། ། ཀ་བ་བཞི་དང་གདུང་བཞིར་ལྡན། ། ཆོ་ག་ཡོངས་སུ་རྫོགས་པ་དང་། ། རིག་པའི་དཀྱིལ་འཁོར་གཞུག་པ་དང་། ། སྔར་གྱི་དབང་ཐོབ་རྫོགས་པར་བསྐུར། ། དེ་ནས་རྒྱུན་གཞག་མེ་སྦར་ཏེ། ། མེ་ལྷ་ལ་སོགས་གཞན་དང་འདྲ། ། དེ་ནས་རིག་པ་དེ་ཉིད་ཀྱང་། ། མེ་ཡི་ཁང་པ་མཛེས་པ་རུ། ། རང་ བཞིན་སྤྱན་དྲངས་བཞུགས་སུ་གསོལ། ། མེ་མཆོད་སྡིག་པ་བསྲེག་པ་ཡི། ། སྔགས་དང་རྫས་སོགས་གཞན་དང་འདྲ། ། མེ་དང་དུ་བ་རླུང་སོགས་ཀྱི། །

མཚན་མ་མཁས་པས་བརྟག་བྱ་སྟེ། ། བཀྲ་ཤིས་རྟགས་རྣམས་བྱུང་ན་ལེགས། ། མེད་ན་སྡིག་པ་བསྲེག་པར་བྱ། ། དུང་ལ་སོགས་པ་ བྱུང་ན་རབ། ། མ་བྱུང་ན་ཡང་ཆོ་ག་རྣམས། ། རྫོགས་པ་ལས་བྱུང་རུས་པ་རྣམས། ། འདི་ནི་ཐལ་བ་ཆེན་པོ་སྟེ། ། དེ་ལས་གཞན་པ་ཐལ་བར་གསུངས། ། དེ་ནས་རུས་བ་ཞག་གསུམ་ནི། ། གུར་ཀུམ་ལ་སོགས་དྲིས་གཏོར་ཏེ། ། རུས་པའི་མཚན་མ་བརྟག་བྱ་སྟེ། ། ཁ་དོག་དབྱིབས་དང་དྲི་དང་རོ། ། བླ་མའི་ཞལ་ནས་ཤེས་པར་བྱ། ། གདོན་བསལ་ཁྲུས་བྱ་རུས་པ་བརྡུང་། ། མཉམས་དུམ་བུ་གཅིག་པ་ལ། ། དྲི་སོགས་བསྒོས་པའི་ནང་དུ་སྟེ། ། དཀྱིལ་འཁོར་ཡོངས་སུ་རྫོགས་པ་ཡི། ། སྟེང་དུ་སེང་གེའི་ཁྲི་དག་ལ། ། སེང་གེ་རྒྱལ་ཆེན་འོག་གི་རྒྱན། ། སྟེང་ནས་གདུགས་དང་རྒྱལ་མཚན་ཏེ། ། གནས་དེར་རུས་པ་གཞག་བྱས་ལ། ། མེ་ཏོག་བྱས་ནས་ཞག་ལྔ་རུ། ། བསྙེན་པ་བྱས་ཏེ་དྲུག་པ་ལ། ། གདུང་བྱུང་སྟ་གོན་བདུན་པ་ལ། ། ཚ་ཚ་རབ་ཏུ་གནས་པར་བྱ། ། དང་པོར་རོ་བསྲེགས་དུས་སུ་ཡང་། ། ཤི་བ་དང་པོ་ནས་བཟུང་སྟེ། ། ཞག་ལྔ་རོ་ཡི་བསྙེན་པ་སྟེ། ། དྲུག་པ་རོ་ཡི་སྟ་གོན་ནོ། ། བདུན་ པ་དུར་ཁྲོད་རབ་ཏུ་གནས། ། དང་པོར་སྣང་བ་གཉིས་པར་རོ། །

གསུམ་པ་རུས་པ་མྱ་ངན་འདས། ། མྱ་ངན་འདས་པ་རྣམ་པ་གསུམ། ། གཞན་ལ་མེད་ཅིང་རང་ལ་མེད། ། དམན་ལ་མེད་ཅིང་དེ་རྗེས་མེད། ། ཐབས་སུམ་གསུངས་ཤེས་རབ་ཀྱི། ། རྩ་རྒྱུད་བཤད་རྒྱུད་ཕྱི་མ་དང་། ། ཕྱི་མའི་ཕྱི་མར་མ་ གསུངས་པའོ། ། མྱ་ངན་འདས་པ་རྣམ་པ་གསུམ། ། བདུད་རྩི་སྒྲོན་མ་ར་ལི་ཡི། ། རྒྱུད་དུ་ཁྱོད་ལ་ང་ཡིས་བཤད། ། དེ་ནས་ཚ་ཚའི་རིམ་པ་ཡང་། ། སྣང་བ་རྒྱལ་པོ་ལ་སོགས་ལ། ། མཐུན་པའི་གཏམ་གྱིས་ས་སོགས་བླང་། ། མི་སྣང་ས་བདག་ལ་སོགས་ལ། ། གཏོར་མ་མེ་ཡིས་ས་སོགས་བླང་། ། དེ་ནས་སྐུད་པ་རྣམ་ལྔ་ཡང་། ། ཕན་པ་རྡོ་རྗེ་ཅན་དང་ཡང་། ། གཟི་བརྗིད་གར་དང་རྡོ་རྗེ་རྒྱལ། ། སྲད་བུས་ས་གཟུངས་སྦྱང་སོགས། ། ཆོ་ག་གཞན་དང་མཐུན་པར་བྱ། ། དུར་ཁྲོད་གནས་སུ་རྩ་བ་ཡི། ། དཀྱིལ་འཁོར་ཆེན་པོ་བཞེངས་པར་བྱ། ། ལྷ་གྲངས་དུ་ཡོད་གཏོར་མ་གཏང་། ། སྦྱིན་སྲེག་དག་ གིས་ཞི་བྱས་ཏེ། ། གཅིག་གམ་ལྔའམ་བདུན་ནམ་ནི། ། ཉི་ཤུ་རྩ་གཅིག་བརྒྱ་རྩ་བརྒྱད། ། ཅི་ནུས་པར་ནི་གདབ་པར་བྱ། ། དུས་ནི་མཚན་མོ་ཤེས་པ་སྟེ། ། དང་པོ་ལ་ནི་དཀྱིལ་འཁོར་གྱིས། ། ཕྱག་རྒྱ་ཆེན་པོ་རྫོགས་པ་སྟེ། ། གསུམ་པ་བཞི་པ་གཉིས་པ་དག །

ཆོས་ ཀྱི་སྐུ་ཡི་གཟུགས་བརྙན་གདབ། ། བུམ་དབང་ས་ལ་གདབ་པ་སྟེ། ། གསང་དབང་ས་དང་ཆུ་ལ་གདབ། ། གསུམ་པ་མེ་དང་རླུང་ལ་གདབ། ། བཞི་པ་ནམ་མཁར་གསུངས་པའོ། ། དང་པོ་འཕོ་བས་མ་ལྷུང་ལ། ། གཉིས་པ་རོ་བསྲེག་མ་ལྷུང་བའོ། ། གསུམ་པ་ཚ་ཚས་མ་ལྷུང་ན། ། འཆི་ བསླུ་བའི་དམ་པ་སྟེ། ། སྲིད་པའི་འཆི་བ་ལས་གྲོལ་ངེས། ། དམན་པའི་འཕོ་བ་ལ་སོགས་པས། ། ལྷུང་ཞིང་འཆི་བ་ཁོ་ནར་ངེས། ། དེ་བས་སྲིད་ལས་གྲོལ་འདོད་པས། ། བླ་མ་དམ་པ་རབ་མཉེས་ཏེ། ། འཕོ་བ་ལ་སོགས་གདམས་ངག་བླང་། ། རྒྱུད་འདི་གཏད་ཀྱིས་ལེགས་པར་ཟུང་། ། དེའི་ ཚེ་འཇིག་རྟེན་གྱི་ཁམས་ཀྱི་ས་ཆེན་པོ་ཡང་གཡོས་པར་གྱུར་ཏོ། ། མཆོད་པ་སྣ་ཚོགས་པའི་ཆར་ཡང་བབ་བོ། ། དཔའ་བོ་དང་མཁའ་འགྲོ་མ་དང་དུར་ཁྲོད་ན་གནས་པའི་རོ་ལངས་ཆེན་པོ་ཐམས་ཅད་རྒྱུད་ཀྱི་དོན་ལ་རྗེས་སུ་ཡི་རངས་པར་གྱུར་ཏོ། ། དཔལ་གསང་བ་མེ་འབར་བའི་རྒྱུད་ཀྱི་རྒྱལ་པོ་ རྫོགས་སོ། ། ། ། པཎྜི་ཏ་ག་ཡ་དྷ་ར་དང་། ལོཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ། །