༄༅། ། རྒྱ་གར་སྐད་དུ། ཨཱརྱ་ཁ་གརྦྷ་ཨཥྚོཏྟ་ར་ཤ་ཏ་ཀ་ནཱ་མ་དྷཱ་ར་ཎཱི་མནྟྲ་ ས་ཧི་ཏ། བོད་སྐད་དུ། འཕགས་པ་ནམ་མཁའི་སྙིང་པོའི་མཚན་བརྒྱ་རྩ་བརྒྱད་པ་གཟུངས་སྔགས་དང་བཅས་པ། འཕགས་པ་ནམ་མཁའི་སྙིང་པོ་ཞལ་རས་རྒྱ་ཆེ་ཞིང་སྤྱན་གྱི་འོད་འཕྲོ་བས་ནམ་མཁའི་དཀྱིལ་དྲི་ཞིམ་པར་མཛད་པ་ལ་ཕྱག་འཚལ་ལོ། ། ནམ་མཁའི་སྤྱོད་ ཡུལ་ཅན་སའི་དཀྱིལ་འཁོར་ཐམས་ཅད་སྣང་བར་མཛད་པ་ལ་ཕྱག་འཚལ་ལོ། ། ཨོཾ་སྭ་སྟི་ཀ་མཱ་ལཱཀྵི་བི་པུ་ལ་སམྦྷ་བ། དྷརྨ་དྷཱ་ཏུ་གོ་ཙ་ར་སྭཱ་ཧཱ། གཟུངས་འདི་བརྗོད་མ་ཐག་ཏུ་ངན་སོང་དང་ངན་འགྲོ་ཐམས་ཅད་ནི་རབ་ཏུ་ཞི་བར་གྱུར། ས་ཡང་གཡོས་པར་གྱུར། རྔ་བོ་ ཆེ་དག་གི་སྒྲ་ཡང་གྲག་པར་གྱུར། སངས་རྒྱས་ཐམས་ཅད་ཀྱིས་ཀྱང་ལེགས་སོ་ཞེས་བྱ་བ་བྱིན་ནོ། ། དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་བཀའ་སྩལ་པ། ཀྱེ་འཁོར་གྱི་དཀྱིལ་འཁོར་ན་འཁོད་པའི་སེམས་ཅན་རྣམས་ནམ་མཁའི་སྙིང་པོའི་སྙིང་པོ་དཀྱིལ་ འཁོར་མངོན་སུམ་པ་རྣམས་ཀྱི་སྭཱ་ཧཱའི་མཆོག་གི་གཟུངས་འབྱུང་བར་ཤིན་ཏུ་དཀའ་བ། བསོད་ནམས་ཆེན་པོ་སྡིག་པ་དང་ཉོན་མོངས་པ་ཐམས་ཅད་སྲེག་པ། བྱང་ཆུབ་སེམས་དཔའ་ཐམས་ཅད་ཀྱི་མ།

རིན་པོ་ཆེའི་ཕུང་པོར་གྱུར་པ་འདི་ཉོན་ཅིག་དང་། འདི་ཐོས་པས་ དྲི་མ་མེད་པར་འགྱུར་ཞིང་ལེགས་པར་ཁྲུས་བྱས་པར་འགྱུར་ལ་ཤིན་ཏུ་རྣམ་པར་དག་པར་འགྱུར་རོ། ། པདྨ་ལྟ་བུར་འགྱུར་ཏེ་འཁོར་བའི་འདམ་གྱིས་མི་གོས་སོ། ། ཉི་མ་ལྟ་བུར་འགྱུར་ཏེ་སེམས་ཅན་ཐམས་ཅད་སྣང་བར་བྱེད་དོ། ། ཟླ་བ་ལ་བུར་འགྱུར་ཏེ་སེམས་ ཅན་ཐམས་ཅད་རབ་ཏུ་སིམ་པར་བྱེད་དོ། ། ནམ་མཁའ་ལྟ་བུར་འགྱུར་ཏེ་ངན་སོང་གི་སྡུག་བསྔལ་ཐམས་ཅད་ཀྱིས་མི་གོས་སོ། ། ས་གཞི་ལྟ་བུར་འགྱུར་ཏེ་མཐོ་དམན་མེད་དོ། ། ལྷུན་པོ་ལྟ་བུར་འགྱུར་ཏེ་སེམས་ཅན་ཐམས་ཅད་ཀྱིས་བསྐྱོད་པར་མི་ནུས་སོ། ། ཐར་པ་ལྟ་བུར་འགྱུར་ཏེ་བདེ་བ་དང་སྡུག་བསྔལ་གྱིས་མི་གོས་སོ། ། དེ་ལ་སོགས་པ་ཡོན་ཏན་སྟོང་ཕྲག་བགྲང་བ་ཚད་མེད་གྲངས་མེད་པ་དག་ཐོབ་པར་འགྱུར་ཏེ། ཉན་པ་དང་། འཆང་བ་དང་། ཀློག་པ་དང་། བརྗོད་པ་དང་། སྟོན་པ་ཙམ་དང་། བཟླས་བརྗོད་ བྱས་པ་ཙམ་གྱིས་གང་ཅི་ཡང་རུང་སྟེ། དེའི་འདོད་པ་དང་། སྨོན་པ་དང་། རེ་བ་དེ་དག་འགྲུབ་པར་འགྱུར་རོ། ། བཟླས་བརྗོད་བྱས་པ་ཙམ་གྱིས་ཀྱང་ཆར་ཆེས་པ་དང་། ཆར་མི་འབབ་པ་དང་། སྡང་བས་དཀྲུགས་པ་དང་། མི་ནད་དང་། རྨི་ལམ་ངན་པ་དང་།

གནོད་པ་འབྱུང་བ་དང་། འཇིག་པའི་དུས་དང་། འཆི་བ་དང་། ཆོམ་རྐུན་དང་། དགོན་པ་དང་། གཡུལ་འགྱེད་པ་དང་། གཅན་གཟན་དང་། མུ་གེའི་སྡུག་བསྔལ་རྣམས་ལས་ཡོངས་སུ་སྲུང་བར་བྱེད་ལ། བདེ་བ་དང་། འབྱོར་པ་དང་། ཅི་འདོད་ པ་དང་། ། ཅི་ལ་དགའ་བ་ཐམས་ཅད་ཀྱང་འགྲུབ་པར་འགྱུར་རོ། ། དེ་ནས་འཁོར་དེ་དག་ཐམས་ཅད་ཀྱིས་ཧ་ཧ་ཞེས་ཅ་ཅོ་དང་ག་ཞ་བཏོན་ཏེ། སྒྲ་རིང་ཞེས་བྱས་ནས་གོས་དང་། རྒྱན་སྣ་ཚོགས་བསྐྱོད་དེ་སྙིང་ནས་ཕྱག་འཚལ་ནས། བྱང་ཆུབ་སེམས་ དཔའ་ཐམས་ཅད་ལ་དབང་བྱེད་པ། འཕགས་པ་ནམ་མཁའི་སྙིང་པོའི་མཚན་བརྒྱ་རྩ་བརྒྱད་པའི་བསྔགས་པ་རྒྱ་མཚོའི་བསྟོད་པ་ཡང་དག་པར་བརྗོད་པ། ནམ་མཁའི་སྙིང་པོ་སྲིད་གསུམ་སེམས་ཅན་མཆོག ། འབྱོར་ལྡན་བློ་གྲོས་རིན་ཆེན་རྒྱ་མཚོ་མངའ། ། སེམས་ཅན་དག་པ་བླ་མེད་རིན་ཆེན་མཆོག ། ཐར་པའི་ས་བོན་འཁོར་བའི་སྡུག་བསྔལ་སེལ། ། ཀུན་མཁྱེན་ཚུལ་མཁྱེན་ལེགས་དང་ལེགས་མིན་མཁྱེན། ། ཐར་མཁྱེན་ཆོས་མཁྱེན་བདེ་དང་མི་བདེ་མཁྱེན། ། ལམ་མཁྱེན་གཅེས་མཁྱེན་དགེ་དང་མི་དགེ་མཁྱེན། ། དུས་མཁྱེན་དགེ་མཁྱེན་སྟོབས་དང་སྟོབས་མིན་མཁྱེན། ། འགྲོ་མཆོག་ཆོས་མཆོག་སེམས་ཅན་ཡོན་ཏན་མཆོག །

ལམ་མཆོག་སྔགས་མཆོག་ཚུལ་དང་ཚུལ་མིན་མཆོག ། རྒྱན་མཆོག་ཆོས་མཆོག་འཛིན་དང་འཛིན་མིན་མཆོག ། དག་མཆོག་རྟོགས་མཆོག་ མཆོག་དང་མཆོག་མིན་མཆོག ། ཞི་རབ་སྙིང་རྗེའི་རབ་སྟེ་འཁོར་གྱི་རབ། ། འོད་རབ་ཐར་པའི་རབ་སྟེ་རྟེན་གྱི་རབ། ། རྒྱ་རབ་སྔགས་ཀྱི་རབ་སྟེ་ཐུགས་བརྩེའི་རབ། ། མཉམ་རབ་སེམས་ཅན་རབ་སྟེ་གསུམ་རིག་རབ། ། ལེགས་སྒྲོན་མཆོག་སྒྲོན་སྟོབས་དང་སྟོབས་མིན་ སྒྲོན། ། ཐར་སྒྲོན་རིགས་སྒྲོན་རྒྱལ་དང་རྒྱལ་མིན་སྒྲོན། ། དགེ་སྒྲོན་གཟི་སྒྲོན་ནོར་བུའི་འོད་ཀྱི་སྒྲོན། ། རྒྱུ་སྐར་ཟླ་བའི་བརྒྱན་ལས་ཤར་བའི་སྒྲོན། ། མཆོག་འོད་ཡོན་ཏན་ཀུན་གྱི་འོད་ཟེར་འོད། ། ལེགས་འོད་ཐར་པའི་ཕོ་བྲང་རྟེན་གྱི་འོད། ། འོད་ཆེན་གཏི་མུག་རབ་ཏུ་ འབྱེད་པའི་འོད། ། རྡོ་རྗེའི་འོད་འབར་བདེ་བའི་འོད་འཆང་བ། ། རྡོ་རྗེའི་དབང་པོ་འདྲེན་དབང་སེམས་ཅན་དབང་། ། རིན་ཆེན་འོད་ཀྱི་དཀྱིལ་འཁོར་བརྒྱན་དབང་པོ། ། རྒྱལ་དབང་རྒྱལ་བའི་སྟོབས་རྒྱུན་ཚད་མེད་དབང་། ། དཔའ་བོ་རིག་སྔགས་འཆང་དབང་སྲིད་ གསུམ་དབང་། ། རྡོ་རྗེ་བཟང་པོ་རྡོར་འོད་རྡོ་རྗེ་འབར། ། རྡོ་རྗེ་སེམས་དཔའ་རྡོ་རྗེ་འབར་བས་བརྒྱན། །

རྡོ་རྗེ་འོད་ཅན་རྡོར་འཛིན་རྡོ་རྗེ་དྲག ། རྡོ་རྗེ་རྒྱ་ཆེན་རྡོ་རྗེ་རབ་མཆོག་དབང་། ། ན་བཟའ་སྔོ་ཞིང་སྐུ་ཡི་ཆ་ལུགས་སྔོ། ། སྐུ་མདོག་སྔོ་ཞིང་སྔོ་བའི་འོད་ཀྱིས་བརྒྱན། ། རལ་གྲི་རྣོ་འཇེབས་སྔོ་ཞིང་བརྟན་པ་བསྣམས། ། མཁའ་སྔོ་གཞལ་མེད་ཁང་འབར་ནང་ན་བཞུགས། ། ལྷ་ཞལ་དྲི་མེད་ཤིན་ཏུ་མི་བཟད་འབར། ། རབ་ཏུ་དྲག་ལ་འོད་ཟེར་འཕྲོ་ཞིང་འགྱུར། ། སྡིག་སེལ་རྡུལ་ལྟར་འཁྲུག་བྱེད་ཕྲེང་མཆོག་ཅན། ། གློག་གི་སྟོབས་ཀྱི་ སྣང་བས་སྒེག་ལ་བརྟན། ། རལ་གྲི་མཚོན་ཐོགས་དབང་ལྡན་མཐུ་སྟོབས་མཚོན། ། རྡོ་རྗེའི་མཚོན་ཐོགས་མདའ་དང་མདུང་ཐུང་འཇིགས། ། འཁོར་ལོའི་མཚོན་ཐོགས་བཅིབས་པ་རི་དང་འཁྲུལ། ། གསལ་ཤིང་མཚོན་ཐོགས་བགེགས་ཀྱི་སྟོབས་འཇོམས་ པ། ། བདེ་འབྱུང་འཇིག་རྟེན་གསུམ་བདག་རྡོ་རྗེའི་དབྱུག ། སྐུ་རྣམས་ཐམས་ཅད་ཉི་མའི་འོད་ཀྱིས་བརྒྱན། ། གྲགས་པའི་རིགས་སུ་བྱུང་བས་རྒྱལ་པོ་མཛད། ། མུ་ཏིག་ཕྲེང་བས་སྒེག་ཅིང་མཛེས་པར་བགྱིས། ། སྐུ་མཛེས་བརྙེས་ཤིང་ཕུན་སུམ་ཚོགས་པ་ བརྙེས། ། རབ་འབྱམ་མཆོག་བརྙེས་ས་ལ་འཇུག་པ་བརྙེས། ། མཐུ་སྟོབས་ལྷག་པ་བརྙེས་ཤིང་གྲུབ་བརྙེས་ལ། །

རིག་པ་གསུམ་གྱི་སྟོབས་བརྙེས་མཐུ་བརྙེས་པ། ། བདེ་འདྲེན་ཞི་བ་འདྲེན་ཅིང་འོད་འདྲེན་པ། ། ཆ་ལུགས་གསལ་མཆོག་དར་བ་ཆེན་པོ་འདྲེན། ། བྱམས་འདྲེན་ཉི་མ་འདྲེན་ཅིང་སྐྱེ་དགུ་འདྲེན། ། ལེགས་འདྲེན་ཞིང་གི་སྟོབས་འདྲེན་སྙིང་རྗེ་ཅན། ། དྲི་མེད་ཆ་ལུགས་གསལ་བ་ཆ་ལུགས་འབར། ། རྣམ་གྲགས་སྒེག་པས་གྲགས་པའི་བ་དན་ཅན། ། འགྲོ་བའི་སྐབས་འབྱེད་འཇུག་དང་ལྡོག་པ་མཁྱེན། ། ལོངས་ སྤྱོད་གསལ་བར་སྟོན་པའི་སེམས་ཀྱིས་འཇུག ། སྐུ་དམར་སྐུ་མཐོན་སྐུ་མཛེས་སྐུ་བཟང་བ། ། སྐུ་སེར་སྐུ་དཀར་དར་བ་ཆེན་པོའི་སྐུ། ། སྐུ་རོལ་རྡོ་རྗེའི་སྐུ་མངའ་སྤྱན་ལེགས་སྐུ། ། རིགས་སྐུ་རིག་སྔགས་འཆང་བ་རིན་ཆེན་བསྣམས། ། གཙུག་གི་ནོར་བུ་གཙུག་ ཅན་ཅོད་པན་མཆོག ། ཅོད་པན་ཅན་ཏེ་ཆོས་འཛིན་རྡོ་རྗེ་མཆོག ། དཔལ་འཛིན་རིན་ཆེན་དམ་པ་འཆང་བའི་མཆོག ། སྔགས་གཞི་ཕྱག་རྒྱ་འཆང་བ་ཕུན་སུམ་ཚོགས། ། རབ་མཛེས་མཁའ་ལ་གཤེགས་ཤིང་རབ་ཏུ་རྒྱུ། ། སྲིད་གསུམ་ཉི་མ་གཅིག་པུ་ འོད་སྟོང་མངའ། ། རི་རྩེ་འཆར་བ་བདལ་ལེགས་བཀྲ་ཤིས་པ། ། ཡོན་ཏན་མཐུ་སྟོབས་ཁྱད་པར་རྣམ་པར་གྲགས། ། ནོར་བུ་ཆེན་པོ་ནོར་སྡུག་ནོར་བུའི་འོད། །

ཉི་མའི་ནོར་བུ་ཚུལ་སྤྱོད་ནོར་བུ་འབར། ། ཡིད་བཞིན་ནོར་བུ་འགྲོ་ཀུན་མགོན་གཅིག་པུ། ། ནམ་མཁའི་ དཀྱིལ་ན་ནོར་བུ་གཅིག་སྣང་བ། ། སེམས་ཅན་རྣམ་དག་ཡངས་ཤིང་རྣམ་པར་གྲགས། ། སྲིད་གསུམ་སྲུང་མ་གཅིག་པུ་རྒྱལ་སྲས་མཆོག ། ཞི་བ་རབ་ཏུ་ཞི་བ་སྐྱབས་འོས་རྟག ། སྐྱེ་དགུའི་བདག་པོ་པད་བྱུང་པདྨ་སྐྱེས། ། ཀུན་ནས་འོད་བཟང་ལེགས་ བཤད་ཆོས་མངའ་བ། ། དར་བ་ལེགས་བཤད་རབ་དུལ་ལེགས་བཤད་ཕྱག ། བློ་བཟང་འོད་བཟང་བདེ་ལྡན་སྐྱེ་གནས་བཟང་། ། མཁས་རབ་ཞི་རབ་མཆོག་གི་ཆོས་དང་ལྡན། ། ཞི་མཛད་རྒྱལ་འབྱུང་བདེ་བ་འབྱུང་བའི་གནས། ། འོད་ཀྱི་འབྱུང་གནས་ བདེ་མཛད་དབང་དུ་མཛད། ། ལེགས་འབྱུང་ཤེས་རབ་འབྱུང་གནས་སྟོབས་བསྐྱེད་པ། ། སྙིང་རྗེའི་འབྱུང་གནས་བློ་བཟང་རྣམ་གྲགས་མཛད། ། རྣམ་གྲོལ་ངེས་གྲོལ་ཤིན་ཏུ་གྲོལ་བའི་བློ། ། བློ་ཡངས་རྣམ་པར་བཀྲམ་ཞིང་རྣམ་པར་གྲགས། ། ཀུན་ཏུ་ལོངས་ སྤྱོད་སྒོ་སྟེ་བློ་ཡི་མཆོག ། བློ་གྲོས་བརྟན་པ་དཀོན་མཆོག་གསུམ་ལས་བསྒྲུབས། ། སངས་རྒྱས་པདྨ་འདབ་རྒྱས་འདྲ་བའི་ཞལ། ། དག་ཅིང་སྤྱན་ཡངས་ཆ་ལུགས་ཡིད་དུ་འཐད། ། སྙིང་པོ་གསལ་བའི་སྙིང་པོ་བརྟན་ཞིང་དུལ། །

ངོ་བོ་ཉིད་ཀྱིས་རྒྱུན་བརྙེས་རབ་གསལ་བ། ། སྤྱན་ཟུར་མངའ་ནི་རབ་ཏུ་གཏང་ལེགས་པ། ། འཇིགས་མེད་ཞལ་རས་སྟོན་གྱི་ཟླ་བ་འདྲ། ། མདུང་ཐུང་བརྒྱ་ཡི་མཚོན་མཆོག་མཚོན་ཆ་རྫོགས། ། དྲག་པོ་འཇིགས་པ་སྡིག་སེལ་གསུམ་ལས་སྐྱེས། ། རབ་དུལ་མཁས་པ་འགྲོགས་དགའ་འདྲིས་པར་སླ། ། རབ་ཏུ་དྲག་ པ་གཉེན་རབ་གསེར་མདོག་ཅན། ། ལྷ་ཆེན་བདེ་བྱེད་གསལ་ཤིང་ཕྱག་ན་བསྣམས། ། སྤྱན་གསུམ་རིག་པ་གསུམ་ལྡན་མེ་གསུམ་སེལ། ། འདོད་བཟང་མེ་ཏོག་མཚོན་ཐོགས་མེ་ཏོག་མདའ། ། ན་བཟའ་བཟང་མནབས་གཡས་འཕེན་ཚབས་ཆེར་འཕེན། ། ལེགས་བྲིས་ སྣ་ཚོགས་མཚོན་ཆ་སྣ་ཚོགས་མངའ། ། ན་བཟའ་སྣ་ཚོགས་སྣ་ཚོགས་རྒྱན་གྱི་དཔལ། ། ཞལ་རས་ཟླ་བ་འོད་ཟེར་རྒྱས་པ་འདྲ། ། ཞལ་མདངས་བསྟན་པས་འཇིག་རྟེན་ཀུན་འབྱོར་མཛད། ། བཞད་པ་ཉི་མའི་འོད་ཟེར་རབ་འཇེབས་མངའ། ། ཞལ་མདངས་རྒྱ་མཚོ་གསལ་ མཛད་ལམ་མེ་བ། ། དབང་ཆེན་རྡོ་རྗེའི་ཐོག་ལགས་འཇིགས་པའི་སྒྲ། ། རྡོ་རྗེ་དྲག་པོ་ནོར་བུ་གཡོ་བ་འཛིན། ། སྒྲ་བརྙན་སྣང་བར་མཛད་པའི་མཐུ་དང་ལྡན། ། བློ་གྲོས་ཆེན་པོ་བློ་གྲོས་རྣོ་བའི་མཆོག ། རྒྱན་འཛིན་དཔལ་འཛིན་རིན་ཆེན་ཞལ་དང་ལྡན། ། རྒྱུ་དང་མི་ རྒྱུ་འགྲོ་བ་ཀུན་གྱི་གནས། །

དེ་བཞིན་གཤེགས་པ་མགོན་སྲས་ཕྲེང་བ་བཟང་། ། སྟོབས་ཆེན་འཇིག་རྟེན་བློ་གྲོས་ངོ་བོ་ཉིད། ། སྐྱེ་དགུའི་བདག་པོ་བཀའ་ལུང་མཉམ་ཞིང་བརྟགས། ། མི་ཡི་མངའ་བདག་མཐོ་རིས་བསྐྱེད་པའི་རྒྱུ། ། སྒྱུ་འདྲ་འདོད་པའི་མདའ་དང་ རྡོ་རྗེ་ཅན། ། མཐུ་སྟོབས་མངའ་ཞིང་སྤྱན་བཟང་སྡུག་པར་ལྡན། ། སྟོན་པ་བཟང་པོ་སྟོང་ཉིད་ལམ་གྱི་སྟེགས། ། གཅེས་གསུམ་འཕེལ་བའི་རྒྱུ་ལ་འཇུག་པ་མཛད། ། བརྟན་པོ་རྒྱུ་ལ་རབ་ཏུ་ངེས་གྱུར་པ། ། དཀྱིལ་འཁོར་དམ་པ་ཀུན་གྱི་སློབ་དཔོན་ལགས། ། གཅིག་ པུ་སྐྱེ་དགུའི་དཀྱིལ་འཁོར་ཆོ་ག་མཁྱེན། ། རྣམ་པར་སྣང་མཛད་ཞིང་གི་གནས་ནས་སྐྱེས། ། དབང་བསྐུར་བརྙེས་ཤིང་ས་བཅུར་ལེགས་པར་གནས། ། གནས་ཆེན་སོན་པ་མཆོག་གནས་གཅིག་པུ་ལགས། ། སྐྱེ་དགུ་རྣམས་ཀྱི་ཉོན་མོངས་སེལ་བ་དང་། སྡིག་འཇོམས་ མཚན་བརྒྱ་རྩ་བརྒྱད་འདི་ཐོས་ནས། ། བདེ་གཤེགས་སྲས་མཆོག་སུ་ཞིག་འདོན་བྱེད་པ། ། འཇིག་རྟེན་ཟླ་བ་གཅིག་ཤར་བཞིན་དུ་སྣང་། ། ནམ་མཁའི་སྙིང་པོ་སེམས་ཅན་གཅིག་པུ་ཡི། ། མདུན་འདུག་ནང་པར་བསྟོད་པ་འདི་བརྗོད་གང་། ། དེ་ནི་སྲིད་གསུམ་ སེམས་ཅན་མཆོག་འགྱུར་ཞིང་། ། དྲི་མའི་གནས་ཀུན་ལས་ཀྱང་ཐར་བར་འགྱུར། །

གཡུལ་དང་འཐབ་རྩོད་ཤིན་ཏུ་མི་བཟད་དང་། ། མུ་གེའི་གནོད་པ་མི་ནད་བྱུང་བ་ན། ། མཁས་པ་སུ་ཞིག་སྔར་ལངས་དད་བསྐྱེད་ནས། ། ནམ་མཁའི་སྙིང་པོ་ལ་ནི་ སྟོད་བྱེད་པ། ། དེ་ནི་འཇིགས་པའི་འབྱུང་གནས་ཐམས་ཅད་དང་། ། སྡུག་བསྔལ་འབྱུང་འདྲེན་སྡིག་པ་རྣམས་ལས་གྲོལ། ། དེ་ནི་ཞི་མཆོག་མཆོག་བདེ་ཀུན་གནས་དང་། ། བདེ་བ་རྒྱ་ཆེན་ངེས་པར་ཐོབ་པར་འགྱུར། ། བདེ་འཐོབ་ལོངས་སྤྱོད་འཕེལ་བར་བྱ་བ་འམ། ། རྒྱལ་སྲིད་འཐོབ་དང་བྱད་གཟུགས་ནོར་འཐོབ་དང་། ། རིགས་འཐོབ་ཡོན་ཏན་ཀུན་གྱི་གཞི་བསྒྲུབ་ཕྱིར། ། བཏོན་ན་འགྲུབ་འགྱུར་འདི་ལ་ཐེ་ཚོམ་མེད། ། དེ་ཕྱིར་ཇི་སྟེ་རྟག་ཏུ་འདོད་བདེ་ཀུན། ། འདོད་ན་འགྲོ་བ་ཀུན་ལ་གཅིག་དཔའ་བ། ། ནམ་མཁའི་སྙིང་པོ་སྲིད་གསུམ་ མགོན་པོ་ལ། ། རྟག་ཏུ་བསྟེན་ཅིང་སྔགས་ཀྱང་བསྟེན་པར་བགྱི། ། འཕགས་པ་ནམ་མཁའི་སྙིང་པོའི་མཚན་བརྒྱ་རྩ་བརྒྱད་པ་གཟུངས་སྔགས་དང་བཅས་པ་རྫོགས་སོ། །