༄༅༅། ། འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་ཉི་ཤུ་རྩ་བརྒྱད་པ་སྟེ་ཁྱིམ་བདག་དཔས་བྱིན་གྱིས་ཞུས་པ། བམ་པོ་གཅིག་པ། རྒྱ་གར་སྐད་དུ། ཨཱརྱ་བཱི་ར་དཏྟ་གྲྀ་ཧ་པ་ཏི་པ་རི་པྲྀཙྪཱ་ནཱ་མ་མ་ཧཱ་ཡཱ་ ན་སཱུ་ཏྲ། བོད་སྐད་དུ། འཕགས་པ་ཁྱིམ་བདག་དཔས་བྱིན་གྱིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན། དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་ རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ། ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ ཏུ་རྣམ་པར་གྲོལ་བ། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་དུ་སེམས་པ།

མངོན་པར་ཤེས་པས་མངོན་པར་ཤེས་པ་ཤ་སྟག་སྟེ། གང་ཟག་གཅིག་མ་གཏོགས་པ་ནི་འདི་ལྟ་སྟེ། ཚེ་དང་ལྡན་པ་ཀུན་དགའ་བོའོ། ། བྱང་ཆུབ་སེམས་དཔའ་ལྔ་བརྒྱ་ཐམས་ཅད་ ཀྱང་གཟུངས་ཐོབ་པ། ཏིང་ངེ་འཛིན་ཐོབ་པ་ཤ་སྟག་དང་ཐབས་ཅིག་ཏུ་བཞུགས་ཏེ། དེའི་ཚེ་གྲོང་ཁྱེར་ཆེན་པོ་མཉན་ཡོད་ན་ཁྱིམ་བདག་དཔས་བྱིན་ཞེས་བྱ་བ་ཕྱུག་པ། ནོར་ཆེ་བ། བདག་དབང་བ་མང་བ། ནོར་དང་ཡོ་བྱད་མང་བ། ནོར་དང་། འབྲུ་དང་། མཛོད་དང་། བང་བའི་ཚོགས་མང་བ། གླང་པོ་ཆེ་དང་། རྟ་དང་། རྔ་མོ་དང་། ར་ལུག་དང་། བ་ལང་མང་བ། བྲན་ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་མང་བ། དབྱིག་དང་། གསེར་དང་། ནོར་བུ་དང་། མུ་ཏིག་དང་། བཻ་དཱུརྱ་དང་། དུང་དང་། མན་ཤེལ་དང་། བྱི་རུ་དང་། ས་ལེ་སྦྲམ་དང་། དངུལ་མང་བ་ཞིག་གནས་པ་དེ་ཁྱིམ་བདག་ལྔ་བརྒྱ་ཙམ་དང་ལྷན་ཅིག་ཏུ་འདུས་ཏེ་འདུག་པར་གྱུར་ཏོ། ། དེ་དག་འདུས་ཏེ་འཁོད་པའི་ཚེ་བར་སྐབས་སུ་འདི་ལྟ་བུའི་གཏམ་རྗོད་དེ། ཀྱེ་གྲོགས་པོ་དག་སངས་རྒྱས་ འབྱུང་བ་རྙེད་པར་དཀའ། མིར་སྐྱེ་བ་རྙེད་པར་དཀའ། དལ་བ་ཕུན་སུམ་ཚོགས་པ་རྙེད་པར་དཀའ། དེ་བཞིན་གཤེགས་པའི་བསྟན་པ་ལ་དད་པ་རྙེད་པར་དཀའ།

རབ་ཏུ་བྱུང་བ་རྙེད་པར་དཀའ། དགེ་སློང་གི་དངོས་པོ་རྙེད་པར་དཀའ། ནན་ཏན་བྱེད་པ་རྙེད་པར་དཀའ། སེམས་ཅན་གང་དག་བྱས་པ་གཟོ་ཞིང་བྱས་པ་ཤེས་ལ་གང་དག་བྱས་པ་ཆུང་ངུ་ཡང་ཆུད་མི་གཟོན་ན་མང་པོ་ལྟ་ཅི་སྨོས་ཏེ། དེ་དག་ཆེས་རྙེད་པར་དཀའ། དེ་བས་ཀྱང་སེམས་ཅན་གང་དག་དེ་བཞིན་གཤེགས་པའི་བསྟན་པ་ལ་ཡིད་ཆེས་པ་དེ་དག་ཆེས་རྙེད་པར་དཀའ། དེ་ བས་ཀྱང་སེམས་ཅན་གང་དག་དེ་བཞིན་གཤེགས་པའི་བསྟན་པ་ལ་ཡིད་ཆེས་ནས་ནན་ཏན་གྱིས་སྒྲུབ་པ་དེ་དག་ཆེས་རྙེད་པར་དཀའ། དེ་བས་ཀྱང་སེམས་ཅན་གང་དག་དེ་བཞིན་གཤེགས་པའི་བསྟན་པ་ལ་མཛེས་པ་དེ་དག་ཆེས་རྙེད་པར་དཀའ། འཁོར་བ་ལས་གྲོལ་བ་རྙེད་པར་ དཀའ་ན། ཅི་བདག་ཅག་ཉན་ཐོས་ཀྱི་ཐེག་པས་ཡོངས་སུ་མྱ་ངན་ལས་འདའ་བར་བྱའམ། འོན་ཏེ་རང་སངས་རྒྱས་ཀྱི་ཐེག་པས་སམ། འོན་ཏེ་ཐེག་པ་ཆེན་པོ་བླ་ན་མེད་པས་ཡོངས་སུ་མྱ་ངན་ལས་འདའ་བར་བྱ་ཞེས་འཐུན་པར་འདུས་ཏེ་འཁོད་པ་དེ་དག་ཐམས་ཅད་དེ་ལྟ་ བུའི་དཔྱོད་པ་སྐྱེས་ནས་བདག་ཅག་ཐེག་པ་ཆེན་པོ་བླ་ན་མེད་པས་ཡོངས་སུ་མྱ་ངན་ལས་འདའ་བར་བྱ་བ་ནི་མཆོག་ཡིན་གྱི། ཉན་ཐོས་ཀྱི་ཐེག་པས་ནི་མ་ཡིན། རང་སངས་རྒྱས་ཀྱི་ཐེག་པས་ནི་མ་ཡིན་ནོ་སྙམ་མོ། །

དེ་ནས་ཁྱིམ་བདག་དཔས་བྱིན་ཁྱིམ་བདག་ལྔ་བརྒྱ་ ཙམ་དེ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ་ལྷན་ཅིག་ཏུ་གྲོང་ཁྱེར་ཆེན་པོ་མཉན་ཡོད་ནས་བྱུང་སྟེ། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་ མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། ། དེ་ནས་བཅོམ་ལྡན་འདས་ཀྱིས་མཁྱེན་བཞིན་དུ་ཁྱིམ་བདག་དཔས་བྱིན་དང་། ཁྱིམ་བདག་ལྔ་བརྒྱ་ཙམ་དེ་དག་ལ་བཀའ་སྩལ་པ། ཁྱིམ་ བདག་ཁྱེད་དོན་གང་གི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཐད་དུ་ལྷགས། དེ་ནས་ཁྱིམ་བདག་དཔས་བྱིན་དང་། ཁྱིམ་བདག་ལྔ་བརྒྱ་ཙམ་དེ་དག་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་ བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས་དུས་གཅིག་ཅིག་ན།

བདག་ཅག་ཁྱིམ་བདག་ལྔ་བརྒྱ་ཙམ་གཅིག་ཏུ་འདུས་ཏེ་མཆིས་པར་གྱུར་ནས་དེའི་ཚེ་བདག་ཅག་འདུས་ཏེ་ མཆིས་པ་ཐམས་ཅད་བར་སྐབས་སུ་འདི་ལྟ་བུའི་བཀའ་མཆིད་བརྗོད་པ་བྱུང་སྟེ། ཀྱེ་གྲོགས་པོ་དག་སངས་རྒྱས་འབྱུང་བ་རྙེད་པར་དཀའ། མིར་སྐྱེ་བ་རྙེད་པར་དཀའ། དལ་བ་ཕུན་སུམ་ཚོགས་པ་རྙེད་པར་དཀའ། དེ་བཞིན་གཤེགས་པའི་བསྟན་པ་ལ་དད་པ་རྙེད་པར་དཀའ། རབ་ ཏུ་བྱུང་བ་རྙེད་པར་དཀའ། དགེ་སློང་གི་དངོས་པོ་རྙེད་པར་དཀའ། ནན་ཏན་བྱེད་པ་རྙེད་པར་དཀའ། སེམས་ཅན་གང་དག་བྱས་པ་གཟོ་ཞིང་བྱས་པ་ཤེས་ལ་གང་དག་བྱས་པ་ཆུང་ངུ་ཡང་ཆུད་མི་གཟོན་ན་མང་པོ་ལྟ་ཅི་སྨོས་ཏེ་དེ་དག་ཆེས་རྙེད་པར་དཀའ། དེ་བས་ཀྱང་སེམས་ཅན་གང་དག་ དེ་བཞིན་གཤེགས་པའི་བསྟན་པ་ལ་ཡིད་ཆེས་པ་དེ་དག་ཆེས་རྙེད་པར་དཀའ། དེ་བས་ཀྱང་སེམས་ཅན་གང་དག་དེ་བཞིན་གཤེགས་པའི་བསྟན་པ་ལ་ཡིད་ཆེས་ནས་ནན་ཏན་གྱིས་སྒྲུབ་པ་དེ་དག་ཆེས་རྙེད་པར་དཀའ། དེ་བས་ཀྱང་སེམས་ཅན་གང་དག་དེ་བཞིན་གཤེགས་པའི་ བསྟན་པ་ལ་མཛེས་པ་དེ་དག་ཆེས་རྙེད་པར་དཀའ། འཁོར་བ་ལས་གྲོལ་བ་རྙེད་པར་དཀའ་ན། ཅི་བདག་ཅག་ཉན་ཐོས་ཀྱི་ཐེག་པས་ཡོངས་སུ་མྱ་ངན་ལས་འདའ་བར་བྱའམ། འོན་ཏེ་རང་སངས་རྒྱས་ཀྱི་ཐེག་པས་སམ།

འོན་ཏེ་ཐེག་པ་ཆེན་པོ་བླ་ན་མེད་པས་ཡོངས་སུ་མྱ་ངན་ ལས་འདའ་བར་བྱ་ཞེས་བཀའ་མཆིད་བགྱིས་སོ། ། བཅོམ་ལྡན་འདས་དེའི་ཚེ་བདག་ཅག་ཐམས་ཅད་འདི་ལྟ་བུའི་རྟོག་པ་སྐྱེས་ཏེ། བདག་ཅག་ཐེག་པ་ཆེན་པོ་བླ་ན་མེད་པས་ཡོངས་སུ་མྱ་ངན་ལས་འདའ་བར་བྱ་བ་ནི་མཆོག་ལགས་ཀྱི། ཉན་ཐོས་ཀྱི་ཐེག་པས་ནི་མ་ལགས། རང་ སངས་རྒྱས་ཀྱི་ཐེག་པས་ནི་མ་ལགས་པ་སྙམ་བགྱིད་དེ། བཅོམ་ལྡན་འདས་བདག་ཅག་ཆོས་ཀྱི་སྐྱེས་འདི་དང་ཆས་ཏེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཐད་དུ་མཆིས་ན། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་ པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འཚལ་བས་ཇི་ལྟར་བསླབ་པར་བགྱི། བདེ་བར་གཤེགས་པ་ཇི་ལྟར་བསླབ་པར་བགྱི། ཇི་ལྟར་གནས་པར་བགྱི། ཇི་ལྟར་བསྒྲུབ་པར་བགྱི། དེ་ནས་བཅོམ་ལྡན་འདས་ཀྱིས་ཁྱིམ་བདག་ དཔས་བྱིན་དང་། ཁྱིམ་བདག་ལྔ་བརྒྱ་ཙམ་དེ་དག་ལ་ལེགས་སོ་ཞེས་བྱ་བ་བྱིན་ཏེ། ཁྱིམ་བདག་རྣམས་ལེགས་སོ་ལེགས་སོ། །

ཁྱིམ་བདག་རྣམས་ཁྱེད་འདི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ནས་དེ་བཞིན་གཤེགས་པ་དགྲ་བཅོམ་པ་ ཡང་དག་པར་རྫོགས་པའི་སངས་རྒྱས་ཀྱི་ཐད་དུ་ལྷགས་པ་ཁྱེད་ཡང་ལེགས་སོ། ། ཁྱིམ་བདག་རྣམས་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་ འཚང་རྒྱ་བར་འདོད་པས་ཇི་ལྟར་བསླབ་པར་བྱ་བ་དང་། ཇི་ལྟར་གནས་པར་བྱ་བ་དང་། ཇི་ལྟར་བསྒྲུབ་པར་བྱ་བ་ངས་ཁྱེད་ལ་བཤད་དོ། ། བཅོམ་ལྡན་འདས་དེ་བཞིན་ནོ་ཞེས་གསོལ་ཏེ། ཁྱིམ་བདག་དཔས་བྱིན་དང་། ཁྱིམ་བདག་ལྔ་བརྒྱ་ཙམ་དེ་དག་བཅོམ་ལྡན་འདས་ཀྱི་ལྟར་ ཉན་པ་དང་། བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་བཀའ་སྩལ་ཏོ། ། ཁྱིམ་བདག་རྣམས་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འདོད་པས་སེམས་ཅན་ཐམས་ ཅད་ལ་སྙིང་རྗེ་ཆེན་པོའི་སེམས་བསྐྱེད་པར་བྱ། ཀུན་ཏུ་བསྟེན་པར་བྱ། ངེས་པར་བསྟེན་པར་བྱ། བསྒོམ་པར་བྱ། མང་དུ་བྱའོ། །

ཁྱིམ་བདག་རྣམས་བྱང་ཆུབ་སེམས་དཔའ་སེམས་དཔའ་ཆེན་པོ་དེས་ལུས་ལ་ཆགས་པར་མི་བྱ། སྲོག་ལ་ཆགས་ པར་མི་བྱ། དེ་བཞིན་དུ་ནོར་དང་། འབྲུ་དང་། ཁྱིམ་དང་། ཆུང་མ་དང་། བུ་དང་། བུ་མོ་རྣམས་ལ་ཆགས་པར་མི་བྱ། བཟའ་བ་དང་། བཏུང་བ་དང་། བགོ་བ་དང་། བཞོན་པ་དང་། མལ་ཆ་དང་། མེ་ཏོག་དང་། བདུག་པ་དང་། སྤོས་དང་། བྱུག་ པ་དང་། ཕྲེང་བ་རྣམས་ལ་ཆགས་པར་མི་བྱ། ཡོ་བྱད་ཐམས་ཅད་ལ་ཆགས་པར་མི་བྱའོ། ། དེ་ཅིའི་ཕྱིར་ཞེ་ན། ཁྱིམ་བདག་རྣམས་སེམས་ཅན་དག་ནི་ཕལ་ཆེར་ལུས་དང་སྲོག་ལ་ཆགས་པར་གྱུར་ནས་སྡིག་པའི་ལས་རྣམས་བྱེད་དེ། དེ་དག་སྡིག་པའི་ལས་བྱས་ ཤིང་བསགས་པ་དེས་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེའོ། ། སེམས་ཅན་ཐམས་ཅད་ལ་སྙིང་རྗེ་ཆེན་པོའི་སེམས་བསྐྱེད་དེ། ལུས་དང་སྲོག་ལ་མ་ཆགས་པར་བྱས་ན་བདེ་འགྲོ་རྣམས་སུ་སྐྱེའོ། ། ཁྱིམ་བདག་རྣམས་དེ་ལྟ་བས་ན་བྱང་ ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་སེམས་ཅན་ཐམས་ཅད་ལ་སྙིང་རྗེ་ཆེན་པོའི་སེམས་བསྐྱེད་དེ། ལུས་ལ་ཆགས་པར་མི་བྱ། སྲོག་ལ་ཆགས་པར་མི་བྱ།

དེ་བཞིན་དུ་ནོར་དང་། འབྲུ་ དང་། ཁྱིམ་དང་། ཆུང་མ་དང་། བུ་དང་བུ་མོ་རྣམས་ལ་ཆགས་པར་མི་བྱ། བཟའ་བ་དང་། བཏུང་བ་དང་། བགོ་བ་དང་། བཞོན་པ་དང་། མལ་ཆ་དང་། མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་རྣམས་ལ་ཆགས་པར་མི་བྱ། ཡོ་བྱད་ཐམས་ཅད་ལ་ཆགས་ པར་མི་བྱ། བདོག་པ་ཐམས་ཅད་ཡོངས་སུ་གཏང་བར་ཡོངས་སུ་གཏང་བ་མང་བ་དང་། རྣམ་པར་སྨིན་པ་ལ་རེ་བ་མེད་པར་བྱ། ཚུལ་ཁྲིམས་རྣམ་པ་གསུམ་ཡོངས་སུ་དག་པར་ཚུལ་ཁྲིམས་ཀྱི་སྡོམ་པ་ལ་གནས་པར་བྱ། སེམས་ཅན་ཐམས་ཅད་ཀྱིས་ཉེས་པ་བྱས་པ་ལ་ཇི་མི་སྙམ་པར་བཟོད་པ་དང་ དེས་པ་ཕུན་སུམ་ཚོགས་པར་བྱ། ལུས་དང་སྲོག་ལ་མི་ལྟ་བར་བརྩོན་འགྲུས་ཀྱི་གོ་ཆ་ཆེན་པོ་བགོ་བར་བྱ། རྣམ་པར་མི་གཡེང་བའི་སེམས་ཀྱིས་སེམས་རྩེ་གཅིག་ཏུ་བྱ། བདག་དང་། སེམས་ཅན་དང་། སྲོག་དང་། གསོ་བ་དང་། སྐྱེས་བུ་དང་། གང་ཟག་དང་། ཤེད་ལས་ སྐྱེས་དང་། ཤེད་བུར་ལྟ་བ་དང་བྲལ་བས་ཤེས་རབ་ཀྱིས་རྣམ་པར་དཔྱད་པ་ལ་མཁས་པར་བྱ། དེས་སྦྱིན་པ་སྦྱིན་ན་སེམས་ཅན་ཐམས་ཅད་ཡིད་ལ་བྱས་ཏེ་སྦྱིན་པ་སྦྱིན་པར་བྱ། སེམས་ཅན་ཐམས་ཅད་ཡིད་ལ་བྱས་ཏེ་ཚུལ་ཁྲིམས་བསྲུང་བར་བྱ།

སེམས་ཅན་ཐམས་ཅད་ཡིད་ལ་བྱས་ཏེ་བཟོད་ པ་བསྒོམ་པར་བྱ། སེམས་ཅན་ཐམས་ཅད་ཡིད་ལ་བྱས་ཏེ་བརྩོན་འགྲུས་བརྩམ་པར་བྱ། སེམས་ཅན་ཐམས་ཅད་ཡིད་ལ་བྱས་ཏེ་བསམ་གཏན་ལ་མཉམ་པར་གཞག་པར་བྱ། སེམས་ཅན་ཐམས་ཅད་ཡིད་ལ་བྱས་ཏེ་ཤེས་རབ་བསྒོམ་པར་བྱ། སེམས་ཅན་ཐམས་ཅད་ཡིད་ལ་བྱས་ཏེ་ ཐབས་ལ་མཁས་པ་བསླབ་པར་བྱའོ། ། དེ་ནས་ཁྱིམ་བདག་དཔས་བྱིན་དང་། ཁྱིམ་བདག་ལྔ་བརྒྱ་ཙམ་དེ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་ཅག་ནི་ལུས་ལ་ལྟ་ཞིང་གནས་པ་ལགས། སྲོག་ལ་ལྟ་ཞིང་གནས་པ་ལགས། དེ་ བཞིན་དུ་ནོར་དང་། འབྲུ་དང་། ཁྱིམ་དང་། ཆུང་མ་དང་། བུ་དང་། བུ་མོ་རྣམས་ལ་ལྟ་ཞིང་གནས་པ་ལགས། བཟའ་བ་དང་། བཏུང་བ་དང་། བགོ་བ་དང་། བཞོན་པ་དང་། མལ་ཆ་དང་། མེ་ཏོག་དང་། སྤོས་དང་། བདུག་པ་དང་། ཕྲེང་བ་དང་། བྱུག་པ་རྣམས་ལ་ ལྟ་ཞིང་གནས་པ་ལགས། ཡོ་བྱད་ཐམས་ཅད་ལ་ལྟ་ཞིང་གནས་པ་ལགས་ན། བཅོམ་ལྡན་འདས་ཇི་ལྟར་བྱང་ཆུབ་སེམས་དཔའ་སོ་སོར་རྟོག་ཅིང་ལུས་ལ་མི་ལྟ་བ་ལགས། བདེ་བར་གཤེགས་པ་ཇི་ལྟར་སྲོག་ལ་མི་ལྟ་བ་ལགས། དེ་བཞིན་དུ་ནོར་དང་། འབྲུ་དང་། ཁྱིམ་དང་། ཆུང་ མ་དང་། བུ་དང་། བུ་མོ་རྣམས་ལ་མི་ལྟ་བ་ལགས།

བཟའ་བ་དང་། བཏུང་བ་དང་། བགོ་བ་དང་། བཞོན་པ་དང་། མལ་ཆ་དང་། མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་རྣམས་ལ་མི་ལྟ་བ་ལགས། ཡོ་བྱད་ཐམས་ཅད་ལ་མི་ལྟ་བ་ལགས། དེ་ནས་ བཅོམ་ལྡན་འདས་ཀྱིས་ཁྱིམ་བདག་དཔས་བྱིན་དང་། ཁྱིམ་བདག་ལྔ་བརྒྱ་ཙམ་དེ་དག་ལ་འདི་སྐད་ཅེས་བཀའ་སྩལ་ཏོ། ། ཁྱིམ་བདག་རྣམས་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་ལུས་འདི་ལ་རྣམ་པ་དུ་མར་སོ་སོར་བརྟག་པར་བྱའོ། ། རྣམ་པ་དུ་ མ་གང་ཞེ་ན། འདི་ལྟ་སྟེ། ལུས་འདི་མཐར་གྱིས་གྲུབ་པ་དང་། མཐར་གྱིས་འཇིག་པ་དང་། རྡུལ་ཕྲ་རབ་བསགས་པ་དང་། ཁོང་སྟོང་དང་། གྱེ་གུ་ཅན་དང་། བུ་ག་དགུ་དང་། སྤུའི་ཁུང་བུ་ནས་ཟག་པ་དང་། གྲོག་མཁར་ལྟར་སྦྲུལ་གདུག་པའི་གནས་སུ་གྱུར་པ་དང་། སྦྲུལ་གདུག་པ་ལྟར་བྱས་པ་མི་གཟོ་བ་དང་། མ་སྐྱེས་དགྲའི་སྤྲེའུ་ལྟར་གྲོགས་ལ་འཁུ་བ་དང་། བཤེས་གཉེན་ངན་པ་ལྟར་འདྲིད་པའི་བདག་ཉིད་ཅན་དང་། དབུ་བ་རྡོས་པ་ལྟར་རང་བཞིན་གྱིས་ཉམ་ཆུང་བ་དང་། ཆུའི་ཆུ་བུར་ལྟར་བྱུང་ནས་འཇིག་ཅིང་འཇུ་བ་དང་། སྨིག་རྒྱུ་ལྟར་ སླུ་བའི་བདག་ཉིད་ཅན་དང་། ཆུ་ཤིང་ལྟར་བཤིག་ན་སྙིང་པོ་མེད་པ་དང་།

སྒྱུ་མ་ལྟར་སླུ་བའི་བདག་ཉིད་དང་། རྒྱལ་པོ་ལྟར་བགོ་བླག་མང་བ་དང་། དགྲ་ལྟར་གླགས་ལྟ་བ་དང་། རྐུན་པོ་ལྟར་ཡིད་བརྟན་དུ་མི་རུང་བ་དང་། གཤེད་མ་ལྟར་རྗེས་སུ་ཆགས་པ་མེད་པ་དང་། མི་མཛའ་བ་ལྟར་མི་ཕན་པར་འདོད་པ་དང་། གསོད་པ་ལྟར་ཤེས་རབ་ཀྱི་སྲོག་གི་བར་ཆད་བྱེད་པ་དང་། ཕྱིར་རྒོལ་བ་ལྟར་དགེ་བའི་ཕྱོགས་ཀྱི་ཆོས་ཀྱི་བར་ཆད་བྱེད་པ་དང་། གྲོང་སྟོང་ལྟར་བདག་དང་བྲལ་བ་དང་། རྫ་མཁན་གྱི་སྣོད་ལྟར་མཐར་འཇིག་པ་དང་། སྤྱང་ལྟར་མི་གཙང་ བ་སྣ་ཚོགས་ཀྱིས་ཡོངས་སུ་གང་བ་དང་། སྦང་མའི་སྣོད་ལྟར་མི་གཙང་བ་ཟག་པ་དང་། སྦྲུལ་དང་། མི་དང་། ཁྱིའི་རོ་ལྟར་དྲི་མི་ཞིམ་པ་དང་། ངན་སྐྱུགས་ཀྱི་ཁུང་བུ་ལྟར་མི་གཙང་བའི་འབྱུང་གནས་དང་། རྨ་ལྟར་བསྐྱོད་མི་བཟོད་པ་དང་། ཟུག་རྔུ་ལྟར་གནོད་པའི་ བདག་ཉིད་ཅན་དང་། རྗེ་བོ་སྡང་བ་ལྟར་བསྙེན་པར་དཀའ་བ་དང་། ཁང་རྙིང་ལྟར་བཅོས་ལེགས་བྱ་ཞིང་བསྟེན་པ་དང་། གྲུ་རྙིང་ལྟར་བཅོས་ལེགས་བྱ་ཞིང་སྤྱད་པ་དང་། བུམ་པ་སོ་མ་བཏང་བ་ལྟར་ནན་ཏན་གྱིས་བག་བྱ་དགོས་པ་དང་། གྲོགས་པོ་མི་སྲུན་པ་ལྟར་རྟག་ཏུ་རྗེས་ སུ་བསྲུང་དགོས་པ་དང་། ཆུ་འགྲམ་གྱི་ཤིང་ལྟར་གཡོ་ཞིང་འགུལ་བ་དང་།

ཆུ་ཀླུང་ཆེན་པོའི་རྒྱུན་ལྟར་མཐར་མཆི་བའི་རྒྱ་མཚོ་ལ་ཐུག་པ་དང་། བློ་བུར་བའི་ཁྱིམ་ལྟར་སྡུག་བསྔལ་ཐམས་ཅད་ཀྱི་གནས་སུ་གྱུར་པ་དང་། མགྲོན་པོ་མེད་པའི་གནས་ཁང་ལྟར་ཡོངས་སུ་གཟུང་བ་ མེད་པ་དང་། བཙོན་སྲུངས་ལྟར་གསུག་གིས་བསྒྲུབ་པར་བྱ་བ་དང་། མཐའ་འཁོབ་ཀྱི་གྲོང་ཁྱེར་ལྟར་རྟག་ཏུ་གནོད་པ་འབྱུང་བ་དང་། བྱེ་མའི་གྲོང་ཁྱེར་ལྟར་རྟག་ཏུ་འཇིག་པའི་བདག་ཉིད་ཅན་དང་། མེ་ལྟར་ཆོག་མི་ཤེས་པ་དང་། རྒྱ་མཚོ་ལྟར་དགང་དཀའ་བ་དང་། སྦྲུལ་གྱི་ གཟེབ་ལྟར་ནན་ཏན་གྱིས་བག་བྱ་བ་དང་། བྱིས་པ་ཆུང་ངུ་ལྟར་རྟག་ཏུ་ཡོངས་སུ་བསྐྱང་དགོས་པ་དང་། སྣོད་ཆག་པ་ལྟར་རྟག་ཏུ་བག་བྱ་དགོས་པ་དང་། ཡུལ་ངན་པ་ལྟར་རྟག་ཏུ་གནོད་པ་འབྱུང་བ་དང་། ཟས་དུག་ཅན་ལྟར་རྟག་ཏུ་ཡོངས་སུ་སྤང་བར་བྱ་བ་དང་། རེ་ཤིག་དགོས་ པའི་ཕྱིར་སྣོད་བརྙན་མ་ལྟ་བུ་དང་། ཁུར་བཀུར་བའི་ཕྱིར་ཤིང་རྟ་ལྟ་བུ་ཡིན་པ་འབའ་ཞིག་བློས་གཟུང་བར་བྱའོ། ། ཁྱིམ་བདག་རྣམས་གཞན་ཡང་བྱང་ཆུབ་སེམས་དཔས་ལུས་འདི་ཐོག་མ་དང་ཐ་མའི་རྒྱུ་ལ་སོ་སོར་བརྟག་པར་བྱའོ། ། ཕ་མའི་ཁུ་ཆུ་དང་ཁྲག་འདུས་པ་ལས་འབྱུང་ སྟེ། འདི་ལ་ཁུ་ཆུ་དང་ཁྲག་ནི་ལུས་ཀྱི་ཐོག་མའི་རྒྱུ་ཡིན་ནོ། །

ཐ་མའི་རྒྱུ་ནི་ཟས་འཇུ་བ་ལ་སོགས་པ་སྟེ། ཁམ་གྱིས་བཟའ་བའི་ཟས་ཟོས་མ་ཐག་ཏུ་བད་ཀན་གྱི་གནས་སུ་འགྲོའོ། ། བད་ཀན་གྱི་གནས་སུ་ཕྱིན་ནས་བད་ཀན་གྱིས་རྐྱང་རྐྱང་པོར་བྱས་ཏེ་ཤིན་ཏུ་མི་གཙང་བར་འགྱུར་རོ། ། དེའི་འོག་ཏུ་མཁྲིས་པའི་གནས་སུ་འགྲོ་སྟེ། མཁྲིས་པའི་གནས་སུ་ཕྱིན་ནས་ཞུ་ཞིང་སྐྱུར་པོར་གྱུར་ཏེ། རླུང་གི་གནས་སུ་འགྲོའོ། ། ཞུ་སྟེ་རླུང་གི་གནས་སུ་ཕྱིན་ནས་རླུང་གིས་ཚིགས་མ་ལོགས་ཤིག ། དངས་མ་ལོགས་ཤིག་ཏུ་རྣམ་པར་འབྱེད་དེ། ཚིགས་མ་ལས་ནི་གཅིན་དང་། ངན་སྐྱུགས་ལ་སོགས་ཏེ་དྲི་མ་རྣམས་འབྱུང་། དངས་མ་ལས་ནི་ཁྲག་ཏུ་འགྱུར་ཏེ། ཁྲག་ལས་ཤའོ། ། ཤ་ལས་ཚིལ་ལོ། ། ཚིལ་ལས་རུས་པའོ། ། རུས་པ་ལས་རྐང་ངོ་། ། རྐང་ལས་ཁུ་ཆུའོ། ། ཁུ་ཆུ་ལས་ལུས་འདི་ལྟ་སྟེ། དེ་ལྟར་ཐོག་མ་དང་ཐ་མའི་རྒྱུ་མི་གཙང་བའི་ཕྱིར་ལུས་མི་ གཙང་བར་བྱང་ཆུབ་སེམས་དཔས་བསམ་པར་བྱའོ། ། ལུས་ལ་མི་གཙང་བར་ལྟ་བ་ན་བྱང་ཆུབ་སེམས་དཔས་འདི་སྙམ་དུ་བསམ་པར་བྱ་སྟེ། ལུས་ཞེས་བྱ་བ་འདི་ནི་རུས་པ་སུམ་བརྒྱ་དྲུག་ཅུས་ཁོག་པ་བསླང་བ། ཤིང་ངན་པའི་ཁྱིམ་ལྟར་ཚིགས་སུམ་ བརྒྱས་སྦྱར་བ། རྩའི་དྲ་བ་བཞི་བརྒྱས་གླགས་པ།

ཤ་སྤར་ཚད་ལྔ་བརྒྱས་གཡོགས་པ། སྡོམ་རྩ་དྲུག་གིས་ཁེབས་པ། རྩ་བདུན་བརྒྱས་གང་བ། རྒྱུས་པ་བདུན་བརྒྱས་འབྲེལ་བ། ཆུ་བ་བཅུ་དྲུག་གིས་བརྟེན་པ། ཆུ་བ་གཉིས་ཀྱིས་ཁྱབ་པར་དཀྲིས་པ། རྒྱུ་མ་འདོམ་ཕྱེད་ དང་བཞིས་ནང་ཁྲོལ་བྱས་པ། ལོང་ཀ་དང་། ཕོ་བ་དང་འབྲེལ་བའི་གཉེ་མ་རིམ་པ་བཅུ་དྲུག་ཏུ་འཁྱིལ་བ། རྩ་ཕྲན་ཉིས་སྟོང་ལྔ་བརྒྱས་སྐར་ཁུང་བྱས་པ། གཤིས་བརྒྱ་རྩ་བདུན་གྱིས་སྣོད་ཆག་པ་ལྟར། ཤིག་ཤིག་པོར་གྱུར་པ། སྤུའི་ཁུང་བུ་བྱེ་བ་བརྒྱ་སྟོང་ཕྲག་བརྒྱད་ཅུས་ རྩ་ལྟར་ཁེབས་པ། དབང་པོ་ལྔའི་བུ་ག་དགུ་ཡོད་པ། གནས་བདུན་དང་ལྡན་པ། མི་གཙང་བས་ཡོངས་སུ་གང་བ། ཀླད་པ་སྙིམ་པ་གང་དང་། ཚིལ་སྙིམ་པ་གང་དང་། ཞག་སྙིམ་པ་གསུམ་དང་། བད་ཀན་སྙིམ་པ་དྲུག་དང་། མཁྲིས་པ་སྙིམ་པ་དྲུག་དང་། རླུང་ གིས་མཐའ་དག་དྲངས་པ་དང་། ཁྲག་བྲེ་གང་དང་། ངན་སྐྱུགས་ཕུལ་གང་དང་། དེ་དག་ཐམས་ཅད་ཀྱིས་བང་བ་བར་ཆད་ཅན་ལྟར་སོ་སོར་ཡོངས་སུ་གང་བ། པགས་པ་རིམ་པ་བདུན་གྱིས་ཀུན་ནས་བསྐོར་བ། རོ་བྲོ་བ་དྲུག་གིས་གསོ་བ། ལུས་ཀྱི་མེ་ལ་ངན་སྐྱུགས་ཀྱི་སྦྱིན་སྲེག་ བྱེད་པ། རྟག་ཏུ་མཐར་འཛག་པ། ལུས་ཀྱི་ཡན་ལག་དེ་དག་ཐམས་ཅད་ཀྱིས་བལྟ་ན་མི་སྡུག་པ།

དྲི་ང་བ། རྣག་གི་རང་བཞིན་ཡིན་ན་འདི་ལ་སུ་ཞིག་གུས་པར་བྱེད་དེ། སྐད་ཅིག་དགོས་པའི་ཕྱིར་སྣོད་བརྙན་མ་ཙམ་དུ་ཟད་པ་དང་། ཁུར་བཀུར་བའི་ཕྱིར་ཤིང་རྟ་ལྟ་བུ་ འབའ་ཞིག་ཡིན་པར་ཆོས་ཀྱི་བློས་གཟུང་བར་བྱའོ། ། དེ་ལ་འདི་སྐད་ཅེས་བྱ་སྟེ། འདི་ལྟར་མི་གཙང་ཕུང་པོའི་ལུས་ལ་ནི། ། གཟུགས་མངོན་ང་རྒྱལ་ཅན་གང་གུས་བྱེད་པ། ། བྱིས་པའི་བློ་ཅན་དེ་ནི་མངོན་བཞིན་དུ། ། མི་ཤེས་ངན་སྐྱུགས་བུམ་པ་ཐོགས་ཤིང་འགྲོ ། དེ་ཡི་ སྣ་ནས་རྣག་གི་རྣམ་པ་འཛག། ། ཁ་ནས་དྲི་མི་ཞིམ་པ་རྟག་ཏུ་འབྱུང་། ། མིག་རྡུལ་ཆགས་ཤིང་སྐྱེ་བོ་སྲིན་བུ་ཅན། ། དེ་ལ་སུ་ཞིག་ཆགས་ཤིང་གུས་པར་བྱེད། ། དཔེར་ན་བྱིས་པ་སོལ་བ་ཐོགས་ནས་སུ། ། འདི་ནི་དཀར་པོར་བྱ་ཞེས་འདར་བྱེད་ཀྱང་། ། དཀར་པོའི་དངོས་པོར་ མི་འགྱུར་ཟད་པར་འགྱུར། ། བྱིས་བློ་ཕྱིན་ཅི་ལོག་གི་ང་རྒྱལ་ཅན། ། དེ་ལྟར་མི་གང་གཙང་སྦྲའི་བློ་གྲོས་ཅན། ། ང་ཡིས་ལུས་འདི་གཙང་མར་བྱ་ཞེས་ཏེ། ། བསྐུས་ཕྱིས་འབབ་སྟེགས་བརྒྱར་ནི་ཁྲུས་བྱས་ཀྱང་། ། འཆི་བདག་དབང་གིས་ཟད་འགྱུར་གཙང་མི་འགྱུར། ། དེ་ནས་ བཅོམ་ལྡན་འདས་ཀྱིས་ཡང་ཁྱིམ་བདག་དཔས་བྱིན་དང་།

ཁྱིམ་བདག་ལྔ་བརྒྱ་ཙམ་དེ་དག་ལ་བཀའ་སྩལ་པ། ཁྱིམ་བདག་རྣམས་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ འདོད་པས་རྣམ་པ་བཞི་བཅུ་རྩ་བཞིས་ལུས་ལ་བརྟག་པར་བྱ་སྟེ། རྣམ་པ་བཞི་བཅུ་རྩ་བཞི་གང་ཞེ་ན། འདི་ལྟ་སྟེ། ཁྱིམ་བདག་རྣམས་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་ལུས་ཡིད་དུ་མི་འོང་བ་དང་། རང་བཞིན་གྱིས་མི་འཐུན་པ་སྟེ། སྨད་པར་བརྟག་པར་ བྱ། བྱང་ཆུབ་སེམས་དཔས་ལུས་རྣག་ཟག་པ་སྟེ། དྲི་མི་ཞིམ་པར་བརྟག་པར་བྱ། བྱང་ཆུབ་སེམས་དཔས་ལུས་མཐར་འཇིག་པ་སྟེ། སྙིང་པོ་མེད་པར་བརྟག་པར་བྱ། བྱང་ཆུབ་སེམས་དཔས་ལུས་རྒྱུས་པའི་བོག་རེས་སྦྲེལ་བ་སྟེ། ཉམ་ཆུང་བར་བརྟག་པར་བྱ། བྱང་ ཆུབ་སེམས་དཔས་ལུས་མི་གཙང་བ་ཟག་པ་སྟེ། མི་གཙང་བར་བརྟག་པར་བྱ། བྱང་ཆུབ་སེམས་དཔས་ལུས་ཡང་དག་པ་མ་ཡིན་པ་སྟེ། སྒྱུ་མ་ལྟ་བུར་བརྟག་པར་བྱ། བྱང་ཆུབ་སེམས་དཔས་ལུས་སྐྱེ་བོ་མི་མཁས་པ་བྱིས་པ་སོ་སོའི་སྐྱེ་བོ་རྣམས་འཁྲུག་པར་བྱེད་པར་ བརྟག་པར་བྱ། བྱང་ཆུབ་སེམས་དཔས་ལུས་འཇིག་པ་དང་། བུ་ག་དགུའི་སྒོ་ནས་འཛག་པར་བརྟག་པར་བྱ།

བྱང་ཆུབ་སེམས་དཔས་ལུས་འདོད་ཆགས་ཀྱི་མེས་ཀུན་ཏུ་འབར་བར་བརྟག་པར་བྱ། བྱང་ཆུབ་སེམས་དཔས་ལུས་ཞེ་སྡང་གི་མེས་ཚིག་པར་བརྟག་པར་བྱ། བྱང་ ཆུབ་སེམས་དཔས་ལུས་གཏི་མུག་གི་མེས་མེ་ལྕེ་གཅིག་ཏུ་གྱུར་པར་བརྟག་པར་བྱ། བྱང་ཆུབ་སེམས་དཔས་ལུས་འདོད་ཆགས་དང་། ཞེ་སྡང་དང་། གཏི་མུག་རྣམས་ཀྱིས་ལྡོངས་པར་བརྟག་པར་བྱ། བྱང་ཆུབ་སེམས་དཔས་ལུས་འདོད་ཆགས་ཀྱི་དྲ་ བས་ཁེབས་ཤིང་སྲེད་པའི་དྲ་བར་ཆུད་པར་བརྟག་པར་བྱ། བྱང་ཆུབ་སེམས་དཔས་ལུས་ཀུན་ནས་བུ་གས་ཡོངས་སུ་གང་བས་བུ་གའི་གནས་སུ་བརྟག་པར་བྱ། བྱང་ཆུབ་སེམས་དཔས་ལུས་ནད་བཞི་བརྒྱ་རྩ་བཞེས་གཙེས་པར་བརྟག་པར་བྱ། བྱང་ཆུབ་སེམས་དཔས་ལུས་སྲིན་བུའི་ རིགས་བརྒྱད་ཁྲི་བཞི་སྟོང་གི་གནས་སུ་བརྟག་པར་བྱ། བྱང་ཆུབ་སེམས་དཔས་ལུས་འཆི་བའི་ཆོས་ཉིད་ཡིན་པས་མི་རྟག་པར་བརྟག་པར་བྱ། བྱང་ཆུབ་སེམས་དཔས་ལུས་ཆོས་ལ་རྨོངས་པས་བེམས་པོ་ཡིན་པར་བརྟག་པར་བྱ། བྱང་ཆུབ་སེམས་དཔས་ལུས་མཐར་ གྱིས་འགྲུབ་ཅིང་ཐ་མར་འཇིག་པས་བུམ་པ་ལྟ་བུར་བརྟག་པར་བྱ། བྱང་ཆུབ་སེམས་དཔས་ལུས་མྱ་ངན་གྱིས་གནོད་པ་མང་པོས་གང་བས་ཉམ་ཐག་པར་བརྟག་པར་བྱ།

བྱང་ཆུབ་སེམས་དཔས་ལུས་ཐ་མར་རྒ་ཤིར་འགྱུར་བས་རྟོན་པ་མེད་པར་བརྟག་པར་བྱ། བྱང་ཆུབ་ སེམས་དཔས་ལུས་གཡོ་དང་སྒྱུའི་ཉེ་བར་སྤྱོད་པ་དག་གིས་གླགས་པར་བརྟག་པར་བྱ། བྱང་ཆུབ་སེམས་དཔས་ལུས་དགང་དཀའ་བས་སའི་གཏིང་ལྟ་བུར་བརྟག་པར་བྱ། བྱང་ཆུབ་སེམས་དཔས་ལུས་དགའ་བའི་གཟུགས་དང་། བདེ་བའི་གཟུགས་ལ་ཞེན་པས་མེ་ལྟ་ བུར་བརྟག་པར་བྱ། བྱང་ཆུབ་སེམས་དཔས་ལུས་འདོད་པའི་ཡོན་ཏན་ལྔ་པོ་དག་གིས་ཆོག་མི་ཤེས་པར་བརྟག་པར་བྱ། བྱང་ཆུབ་སེམས་དཔས་ལུས་རྗེས་སུ་ཆགས་པ་དང་། ཁོང་ཁྲོ་བ་དག་གིས་འཇོམས་པར་བརྟག་པར་བྱ། བྱང་ཆུབ་སེམས་དཔས་ལུས་བསྟི་སྟང་དང་། གནོད་ པ་མྱོང་བས་མི་བརྟན་པར་བརྟག་པར་བྱ། བྱང་ཆུབ་སེམས་དཔས་ལུས་ཆུ་ཀླུང་གི་རྒྱུན་བཞིན་དུ་གཞན་དང་གཞན་འབྱུང་བས་རྐྱེན་གཞན་དང་གཞན་དུ་བརྟག་པར་བྱ། བྱང་ཆུབ་སེམས་དཔས་ལུས་ཚུལ་བཞིན་མ་ཡིན་པ་རྣམ་པ་སྣ་ཚོགས་ཡིད་ལ་བྱེད་པའི་རྣམ་པར་རྟོག་པ་དག་ གིས་ཡིད་ཀྱི་སེམས་པ་ཡིན་པར་བརྟག་པར་བྱ། བྱང་ཆུབ་སེམས་དཔས་ལུས་ཐ་མར་དུར་ཁྲོད་ལ་ཐུག་པས་བྱས་པ་མི་གཟོ་བར་བརྟག་པར་བྱ། བྱང་ཆུབ་སེམས་དཔས་ལུས་སྤྱང་ཀི་དང་། ཅེ་སྤྱང་དང་། ཁྱི་རྗེན་ཤ་ཟ་བ་དག་གི་ཟས་སུ་བརྟག་པར་བྱ།

བྱང་ ཆུབ་སེམས་དཔས་ལུས་རུས་པ་དང་། རྒྱུས་པའི་བོག་རེས་སྦྲེལ་བས་འཁྲུལ་འཁོར་ལྟ་བུར་བརྟག་པར་བྱ། བྱང་ཆུབ་སེམས་དཔས་ལུས་བཤང་བ་དང་། གཅི་བ་དང་། མཆིལ་མ་དང་། སྣབས་དང་། རྣག་དང་། ཁྲག་གིས་ཡོངས་སུ་གང་བ་སྟེ། བལྟ་ བའི་འོས་མ་ཡིན་པར་བརྟག་པར་བྱ། བྱང་ཆུབ་སེམས་དཔས་ལུས་ཟས་དང་སྐོམ་ལས་བྱུང་བ་སྟེ། རང་གི་ཁ་ན་ལས་པ་མ་ཡིན་པར་བརྟག་པར་བྱ། བྱང་ཆུབ་སེམས་དཔས་ལུས་མི་རྟག་པ་སྟེ། ཤིན་ཏུ་ཟད་པའི་ཆོས་ཉིད་ཡིན་པས་དོན་མེད་པའི་གླགས་པས་གླགས་ པར་བརྟག་པར་བྱ། བྱང་ཆུབ་སེམས་དཔས་ལུས་ཕྱིར་རྒོལ་བ་མང་པོ་འབྱུང་བས་དགྲ་ལྟ་བུར་བརྟག་པར་བྱ། བྱང་ཆུབ་སེམས་དཔས་ལུས་ཡང་དང་ཡང་དུ་སྡུག་བསྔལ་མྱོང་བས་གསོད་པ་ལྟ་བུར་བརྟག་པར་བྱ། བྱང་ཆུབ་སེམས་དཔས་ལུས་སྡུག་བསྔལ་གསུམ་གྱིས་གཙེས་ཏེ། གསུམ་གང་ཞེ་ན། འདི་ལྟ་སྟེ། འདུ་བྱེད་ཀྱི་སྡུག་བསྔལ་ཉིད་དང་། འགྱུར་བའི་སྡུག་བསྔལ་ཉིད་དང་། སྡུག་བསྔལ་གྱི་སྡུག་བསྔལ་ཉིད་ཀྱིས་ཏེ་སྡུག་བསྔལ་གྱི་སྣོད་ཡིན་པར་བརྟག་པར་བྱ། བྱང་ཆུབ་སེམས་དཔས་ལུས་ཕུང་པོ་ལྔ་མངོན་པར་གྲུབ་པས་སྡུག་བསྔལ་གྱི་གོང་བུ་ ཡིན་པར་བརྟག་པར་བྱ།

བྱང་ཆུབ་སེམས་དཔས་ལུས་རྐྱེན་ཐ་དད་པ་ལས་བྱུང་བས་བདག་མེད་པ་དང་། བདག་པོ་མེད་པར་བརྟག་པར་བྱ། བྱང་ཆུབ་སེམས་དཔས་ལུས་སྐྱེས་པ་དང་། བུད་མེད་དང་བྲལ་བས་སྲོག་མེད་པར་བརྟག་པར་བྱ། བྱང་ཆུབ་སེམས་དཔས་ལུས་ཕུང་ པོ་དང་། ཁམས་དང་། སྐྱེ་མཆེད་རྣམས་ཀྱིས་སྟོང་པར་བརྟག་པར་བྱ། བྱང་ཆུབ་སེམས་དཔས་ལུས་རྨི་ལམ་ལྟ་བུ་སྟེ། གསོག་ཏུ་བརྟག་པར་བྱ། བྱང་ཆུབ་སེམས་དཔས་ལུས་སྒྱུ་མ་ལྟ་བུ་སྟེ། ཡང་དག་པ་མ་ཡིན་པར་བརྟག་པར་བྱ། བྱང་ཆུབ་སེམས་དཔས་ལུས་ སྨིག་རྒྱུ་ལྟ་བུ་སྟེ། འཁྲུལ་པར་བྱེད་པར་བརྟག་པར་བྱ། བྱང་ཆུབ་སེམས་དཔས་ལུས་བྲག་ཅ་ལྟ་བུ་སྟེ། སླུ་བར་བརྟག་པར་བྱ། བྱང་ཆུབ་སེམས་དཔས་ལུས་མིག་ཡོར་ལྟ་བུ་སྟེ། སླུ་བའི་བདག་ཉིད་དུ་བརྟག་པར་བྱ་སྟེ། ཁྱིམ་བདག་རྣམས་བྱང་ཆུབ་ སེམས་དཔའ་སེམས་དཔའ་ཆེན་པོས་རྣམ་པ་བཞི་བཅུ་རྩ་བཞི་པོ་དེ་དག་གིས་ལུས་ལ་བརྟག་པར་བྱའོ། ། དེ་ལྟར་རྟོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ལ་ལུས་སུ་འདུན་པ་དང་། ལུས་ལ་དགའ་བ་དང་། ལུས་བདག་གིར་བྱེད་པ་དང་། ལུས་ལ་སྲེད་ པ་དང་། ལུས་ལ་གནས་པ་དང་། ལུས་ལ་ཞེན་པ་གང་ཡིན་པ་དེ་དག་ཐམས་ཅད་སྤོང་ངོ་། །

སྲོག་ལ་སྲོག་ཏུ་འདུན་པ་དང་། སྲོག་ལ་དགའ་བ་དང་། སྲོག་བདག་གིར་བྱེད་པ་དང་། སྲོག་ལ་སྲེད་པ་དང་། སྲོག་ལ་གནས་པ་དང་། སྲོག་ལ་ཞེན་པ་གང་ཡིན་པ་དང་། དེ་ བཞིན་དུ་ནོར་དང་། འབྲུ་དང་། ཁྱིམ་དང་། ཆུང་མ་དང་། བུ་དང་། བུ་མོ་དང་། བཟའ་བ་དང་། བཏུང་བ་དང་། བགོ་བ་དང་། བཞོན་པ་དང་། མལ་ཆ་དང་། མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་རྣམས་དང་། ཡོ་བྱད་ཐམས་ ཅད་ཀྱི་བར་དག་ལ་འདུན་པ་དང་། དགའ་བ་དང་། བདག་གིར་བྱེད་པ་དང་། སྲེད་པ་དང་། གནས་པ་དང་། ཞེན་པ་གང་ཡིན་པ་དེ་དག་ཐམས་ཅད་སྤོང་སྟེ། དེ་ལུས་དང་སྲོག་ལ་མི་ལྟའོ། ། དེ་བཞིན་དུ་ནོར་དང་། འབྲུ་དང་། ཁྱིམ་དང་། ཆུང་མ་དང་། བུ་དང་། བུ་མོ་དང་། བཟའ་བ་དང་། བཏུང་བ་དང་། བགོ་བ་དང་། བཞོན་པ་དང་། མལ་ཆ་དང་། མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་རྣམས་ལ་མི་ལྟ་བར་ཕ་རོལ་ཏུ་ཕྱིན་པ་དྲུག་མྱུར་དུ་ཡོངས་སུ་རྫོགས་པར་བྱེད་དོ། ། ཁྱིམ་བདག་རྣམས་ བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །

དེ་ནས་བཅོམ་ལྡན་འདས་ཀྱིས་ལུས་རྒྱ་ཆེར་ཡོངས་སུ་བསྟན་པའི་ཕྱིར་དེའི་ཚེ་ཚིགས་སུ་བཅད་ པ་འདི་དག་བཀའ་སྩལ་ཏོ། ། མི་ཉིད་ཤིན་ཏུ་རྙེད་དཀའ་རྙེད་པ་ལ། ། ལུས་ཀྱི་ཕྱིར་ནི་སྡིག་པ་མ་བྱེད་ཅིག ། འདི་ནི་དུར་ཁྲོད་པ་སྟེ་ཅེ་སྤྱང་ཟས། ། ལུས་ཀྱི་ཕྱིར་ནི་ཡ་ངར་མ་འཇུག་ཅིག ། གཡོ་ལྡན་ལུས་ལ་སྲེད་པ་བསྐྱེད་ནས་ནི། ། བྱིས་པ་རྟག་ཏུ་རྣམ་པར་རྨོངས་ཏེ་འཁྱམ། ། ལུས་འདི་བྱས་པ་མི་གཟོ་དངོས་ཡིན་པས། ། ཉིན་དང་མཚན་དུ་སྡུག་བསྔལ་ཚོར་བ་མྱོང་། ། རྟག་ཏུ་ནད་འདྲ་སྡུག་བསྔལ་འཁྲུལ་འཁོར་ཏེ། ། ལུས་འདི་ངན་སྐྱུགས་རྣམས་དང་མཆིལ་མས་གང་། ། བཀྲེས་དང་སྐོམ་པས་རྟག་ཏུ་མངོན་པར་གཙེས། ། མཁས་པ་སུ་ཞིག་ལུས་ ལ་སྲེད་པ་སྐྱེད། ། ལུས་ནི་ས་གཏིང་འདྲ་སྟེ་ཆོག་མི་ཤེས། ། གཤེད་མ་མི་མཛའ་འདྲ་ཡང་བྱིས་པས་གསོ། ། ལུས་ཀྱི་ཆེད་དུ་སྡིག་པའི་ལས་ཀྱང་བྱེད། ། དེ་ཕྱིར་དེ་དག་སྡུག་བསྔལ་ཚོར་བ་མྱོང་། ། ལུས་འདི་རྡོ་རྗེ་ལྟ་བུར་སྲ་མ་ཡིན། ། ལུས་ཀྱི་ཆེད་དུ་སྡིག་པ་མ་བྱེད་ཅིག ། འཆི་བར་རྟོགས་ནས་བསོད་ནམས་མྱུར་དུ་བྱོས། ། དེ་བཞིན་སངས་རྒྱས་བསྟན་ལ་དད་པ་སྐྱེད། ། ཟས་དང་སྐོམ་དང་བྱུག་པ་གོས་རྣམས་ཀྱིས། །

ལུས་འདི་ཇི་སྲིད་ཡུན་རིང་བསྙེན་བཀུར་ཏེ། ། བརྟན་པར་བྱས་ཀྱང་འཇིག་པར་འགྱུར་ཡིན་ན། ། འདི་ལ་འབད་པ་དོན་མེད་ཅི་ ཕྱིར་བྱ། ། བསྐལ་པ་བརྒྱར་ཡང་ཤིན་ཏུ་རྙེད་དཀའ་བ། ། ཐུབ་པའི་འབྱུང་འདི་ཁྱེད་ཀྱིས་རྙེད་པ་ལ། ། སངས་རྒྱས་བསྟན་ལ་དེ་བཞིན་དད་པ་སྐྱེད། ། ཤིན་ཏུ་འཇིགས་པའི་ངན་འགྲོར་མ་འགྲོ་ཤིག ། ལོ་སྟོང་བྱེ་བར་སུ་ཞིག་འཚོ་གྱུར་པ། ། དེས་ཀྱང་ཆགས་པ་ཡོངས་སུ་སྤང་བྱ་ན། ། སུ་ཞིག་ལོ་བརྒྱ་ཐུབ་པར་མི་འགྱུར་བ། ། དེ་ཕྱིར་དགའ་བ་མི་རྙེད་སྨོས་ཅི་དགོས། ། མ་བསྡམས་མི་རྣམས་ཁ་ཅིག་འདི་སྐད་དུ། ། མིར་རྙེད་ཤིན་ཏུ་དཀའ་བ་རྙེད་པ་ལ། ། གཞོན་ཚེ་རྩེད་མོ་དག་དང་དགའ་བྱ་ཞིང་། ། ནོར་བཙལ་བདེ་བ་མྱོང་བར་བྱ་ཞེས་ཟེར། ། ནོར་ཚོལ་བ་ལ་བདེ་བ་ག་ ལ་ཡོད། ། བསྲུང་བའི་ཕྱིར་ཡང་སྡུག་བསྔལ་མྱོང་བར་འགྱུར། ། དེ་ཕྱིར་མཁས་པས་ཆགས་པ་ཡོངས་སྤངས་ལ། ། ངན་ངོན་ཙམ་གྱིས་ཆོག་ཤེས་ཐོབ་པར་བྱོས། ། ལོངས་སྤྱོད་སྒྱུ་མ་འདྲ་ཞིང་རྨི་ལམ་མཚུངས། ། འདི་དག་བྱིས་པའི་སྐྱེ་བོ་འདྲིད་པ་ཡིན། ། སྐད་ཅིག་འབྱུང་ཞིང་ སྐད་ཅིག་འཇིག་པར་འགྱུར། ། མཁས་པ་སུ་ཞིག་ལོངས་སྤྱོད་སྲེད་པ་སྐྱེད། །

སྒྱུ་མ་འདྲ་ཞིང་གར་མཁན་ལྟ་དང་མཚུངས། ། དྲི་ཟའི་གྲོང་ཁྱེར་སྣ་ཚོགས་ཅི་འདྲ་བ། ། ལོངས་སྤྱོད་དེ་དག་འདི་འདྲ་བྱིས་པ་འདྲིད། ། དེ་ལྟར་ལོག་པ་ཚོལ་ཞིང་བྱིས་པ་འཁྱམ། ། སྡུག་ བསྔལ་བརྒྱ་ཡིས་ལོངས་སྤྱོད་བཙལ་བཙལ་བ། ། ལུས་ལ་གནོད་པ་མཚུངས་མེད་བསྐྱེད་བྱས་ནས། ། རྒྱལ་པོའི་མཐུ་ཡིས་དེ་དག་ཕྲོགས་གྱུར་པ། ། དེ་དག་ལ་ནི་མཁས་གང་དགའ་བ་སྐྱེད། ། བུ་དང་ཆུང་མའི་དབང་དུ་མི་འགྱུར་བར། ། རྒྱལ་པོས་ཉེས་པ་བྱུང་བའི་ནོར་ཕྲོགས་པ། ། ཉེས་པ་དེ་དག་འདི་འདྲ་རིག་ནས་སུ། ། མཁས་པ་རྣམས་ནི་ཁྱིམ་ལ་སྲེད་མི་སྐྱེད། ། རྟག་ཏུ་བརྣབ་ཅིང་ལོངས་སྤྱོད་ཚོལ་བྱེད་པ། ། དེ་ནི་ཕ་དང་མ་ལ་མི་གུས་ཤིང་། ། བུ་དང་ཆུང་མ་རྣམས་ལ་མི་བྱམས་པར། ། དེ་དག་རྟག་ཏུ་ཆགས་ལ་འཇུག་པར་བྱེད། ། བདག་གི་ལོངས་སྤྱོད་ འགྲིབ་པར་འགྱུར་འོང་ཞེས། ། བརྣབ་མོ་བྱས་གཟོ་ནམས་ཀྱང་རྙེད་མི་འགྱུར། ། གཡོ་དང་སྒྱུས་ནི་ནོར་རྣམས་ཚོལ་བྱེད་པ། ། བརྣབ་མོ་དག་ལ་མཁས་པ་ཡིད་མི་རྟོན། ། སེམས་ཅན་བརྣབ་མོ་གཡོ་ལྡན་འདྲིད་པ་ཉིད། ། ཡིད་གཞན་སེམས་ལ་ཚིག་གིས་དགའ་བར་བྱེད། ། ཡིད་བརྟན་ ཀྱང་ནི་དེ་ལ་ཡིད་མི་རྟོན། །

འོན་ཀྱང་བུ་འདྲར་སྡུག་པར་སྟོན་པར་བྱེད། ། སེམས་ཅན་བརྣབ་མོ་འཇིག་རྟེན་གང་རྒྱུ་བ། ། སྨན་དང་བསྟན་བཅོས་དག་ལ་མཁས་སྟོན་ཅིང་། ། སྨད་འཚོང་ལྟ་བུར་ཚིག་གིས་འདྲིད་བྱེད་ལ། ། ཁོང་ནས་མི་བདེ་ཤིན་ཏུ་རྩུབ་པ་ཡིན། ། བརྣབ་མོ་དག་ལ་མཛའ་ བོ་ནམས་ཀྱང་མེད། ། ཉེ་དུ་མེད་ཅིང་སྙིང་སླེབས་གྲོགས་ཀྱང་མེད། ། འོན་ཀྱང་དེ་དག་ནོར་ཕྱིར་སྟེན་པར་བྱེད། ། སྐྱེ་བོ་བརྣབ་ལ་མཁས་པ་ཡིད་མི་རྟོན། ། བརྣབ་མོ་ལོངས་སྤྱོད་ཆེད་དུ་བྱ་མིན་བྱེད། ། ཤིན་ཏུ་མི་བཟད་སེམས་ནི་ཀུན་ཏུ་སྐྱེད། ། དེ་ཕྱིར་མཁས་པས་ཡང་དག་རྟོགས་ བྱས་ལ། ། ངན་ངོན་ཅི་ཡང་རུང་བས་ཆོག་ཤེས་གྱིས། ། གསེར་དང་མུ་ཏིག་ནོར་བུ་བྱི་རུ་དང་། ། ལས་དགེས་དེ་དག་ལྦུ་བ་ལས་ཀྱང་འབྱུང་། ། དེ་དག་སྒྱུ་མའི་རང་བཞིན་མ་རྟོགས་ནས། ། དེ་དག་ཕྱིར་ནི་འཐབ་ཅིང་རྩོད་པ་བྱེད། ། བྱམས་པ་ཞེས་བྱ་གང་ཞིག་འདིར་འབྱུང་སྟེ། ། དེ་ བཞིན་གཤེགས་པ་དེ་ནི་འབྱུང་བའི་ཚེ། ། ས་འདི་གསེར་གྱིས་རབ་ཏུ་གང་བར་འགྱུར། ། དེ་ཡི་ཚེ་ན་དེ་ནི་ག་ལས་འབྱུང་། ། འདོད་པའི་ཡོན་ཏན་ལྔ་དག་འབྱུང་བ་སྟེ། ། {བརྫུན་,རྫུན་}པའི་ཆོས་ཅན་འཁྲུལ་བྱེད་རྨོངས་པར་བྱེད། །

དཔེར་ན་སོས་ཀའི་ཉི་མ་གུང་དུས་ན། ། སྨིག་རྒྱུར་ ཆུར་སྣང་འདོད་པ་དེ་བཞིན་ནོ། ། བསྐལ་པ་གཅིག་ལོན་ནས་ནི་འཇིག་རྟེན་འདི། ། ནམ་མཁའི་རང་བཞིན་ནམ་མཁར་འགྱུར་བར་འོང་། ། ལྷུན་པོ་དག་ཀྱང་འཚིག་ཅིང་རྣམ་པར་འཇིག ། དེ་དག་གང་ནས་འོངས་ཤིང་གང་དུ་འགྲོ། ། ཆུ་མིག་མཚེའུ་དང་རྫིང་དང་རྒྱ་མཚོ་རྣམས། ། དེ་ དག་མེད་འགྱུར་སྐམས་འགྱུར་འབྱུང་བར་འགྱུར། ། དེ་བཞིན་འདོད་པ་གསོག་སྟེ་སྙིང་པོ་མེད། ། མཁས་པ་སུ་ཞིག་དེ་ལ་དགའ་བར་བྱེད། ། མཁས་པ་གང་དག་བློ་ཡི་སྟོབས་ལྡན་པ། ། དེ་དག་རྟག་ཏུ་ཁྱིམ་གྱི་སྐྱོན་ལ་རྟོག ། འདི་ལ་རོ་མྱོང་བྱེད་པ་སུ་ཡོད་ན། ། འདི་དག་ཅི་ ཕྱིར་ཁྱིམ་ནི་སྤོང་མི་བྱེད། ། འདྲེན་མའི་ལས་ཀྱིས་ལོངས་སྤྱོད་ཚོལ་བྱེད་ཅིང་། ། བུ་དང་དེ་བཞིན་ཆུང་མ་གསོ་བར་བྱེད། ། ཤིན་ཏུ་སྡུག་བསྔལ་གྱུར་པ་དེ་དུས་ན། ། བུ་དང་ཆུང་མ་སྐྱབས་སུ་འགྱུར་མ་ཡིན། ། ཇི་ལྟར་སྣ་ཚོགས་ལས་བྱས་བླངས་པ་བཞིན། ། བུ་དང་ཆུང་མ་ དག་ཀྱང་འདོར་བར་འགྱུར། ། བདག་ཉིད་གཅིག་པུས་སྡུག་བསྔལ་མྱོང་བར་འོང་། ། དེ་དག་དེ་ཚེ་བདག་གི་སྐལ་མི་ལེན། ། མྱ་ངན་རྣམས་ཀྱིས་བདེ་ཕྱིར་དེ་དག་བླངས། །

འདི་ན་དེ་དག་སྡུག་བསྔལ་མྱ་ངན་འགྱུར། ། སྲིད་གསུམ་འཇིགས་པ་འདི་ན་བཤེས་ཀྱང་མེད། ། དེ་ བཞིན་བུ་དང་ཆུང་མ་རྩ་ལག་མེད། ། ཕ་མ་སྤུན་དང་བུ་དང་ཆུང་མ་དང་། ། བྲན་དང་ནོར་དང་རྩ་ལག་ཚོགས་ཀྱི་རྣམས། ། ཤི་བའི་གཤིན་ཕྱིར་དེ་དག་འགྲོ་བ་མེད། ། ལས་རྣམས་རྗེས་སུ་འབྲང་ཞིང་བྱིས་པ་འགྲོ། ། ལས་ནི་རྗེས་སུ་འབྲང་ཞིང་མི་ཀུན་འདོང་། ། ལས་ཀྱིས་ གནས་པ་འཇིག་རྟེན་རྣམ་པར་རྒྱུ། ། སྐྱེ་འདི་ལས་ཀྱི་བདག་ཉིད་རིག་གྱུར་ནས། ། མཁས་པ་དག་ནི་དགེ་བའི་ལས་རྣམས་བྱེད། ། མནར་མེད་སོང་ཚེ་དེ་དག་སྐྱབས་མིན་པས། ། ཕ་མ་སྤུན་དང་སྙིང་སྡུག་བུ་རྣམས་དང་། ། རྩ་ལག་ཉེ་དུ་སྣག་གི་གཉེན་མཚམས་དང་། ། དེ་དག་ ཆེད་དུ་མཁས་པ་སྡིག་མི་བྱེད། ། ལས་དེ་ཡོངས་སུ་ཟད་པ་མ་གཏོགས་པར། ། རབ་ཏུ་མི་བཟད་འཇིགས་ལས་མི་མི་འགྲོལ། ། དེ་ཕྱིར་སྡིག་པས་འཇིགས་པའི་མི་རྣམས་ཀྱིས། ། བསྒྲིམས་ཏེ་སྡིག་པ་ཡོངས་སུ་སྤང་བར་བྱ། ། ཇི་ལྟར་ལས་རྣམས་བྱས་པ་ མ་གཏོགས་པར། ། གཤིན་རྗེ་དང་ནི་གཤིན་རྗེའི་རང་རྟ་དང་། ། མཛའ་བཤེས་དག་དང་རྩ་ལག་ཚོགས་དང་སྤུན། ། ཕ་མ་བུ་དང་ཆུང་མ་སྲུང་མི་བྱེད། ། ཁྱོད་ཀྱིས་མི་ཡི་ལུས་ནི་ཐོབ་གྱུར་ལ། །

ཐོབ་ནས་སྡིག་པ་སྤང་བ་མ་བྱས་པས། ། ཀྱེ་མ་ད་ལྟར་སྡུག་བསྔལ་མི་བཟད་ མྱོང་། ། འདི་ནི་མི་དགེའི་ལས་ཀྱི་རྣམ་སྨིན་ཡིན། ། ལས་ཀྱི་རྣམ་པར་སྨིན་ལ་ཡིད་མ་ཆེས། ། ཁྱོད་ནི་རང་གི་སེམས་ཀྱིས་མི་དགེ་བྱས། ། འདི་ལ་ངས་ནི་ཅི་ཡང་མ་ལན་ཞེས། ། དེ་ལ་ཆོས་རྒྱལ་གཤིན་རྗེ་དེ་སྐད་སྨྲ། ། རང་གིས་ལས་བྱས་རང་ལ་རྣམ་པར་སྨིན། ། རང་གི་ལས་ ཀྱིས་ཁྱོད་ནི་འདིར་འོངས་ཀྱིས། ། ཇི་ལྟར་སྔོན་ཆད་མི་འདོད་ལས་བྱས་པ། ། སྡུག་བསྔལ་དེ་ནི་ཉིད་ཀྱིས་མྱོང་བར་གྱིས། ། དེ་ཚེ་ཕ་མ་རང་གི་ཆུང་མ་རྣམས། ། སྡུག་བསྔལ་ཉེན་པ་ཡོངས་སུ་ཐར་མི་བྱེད། ། ལེགས་པའི་ལས་བྱས་པས་ནི་གྲོལ་བར་འགྱུར། ། དེ་ལྟར་ཁྱིམ་ནི་ ཡོངས་སུ་སྤང་བར་བྱ། ། ཁུ་སྒོ་དབྱུག་པ་ལྟུང་གི་ཆད་པ་རྣམས། ། སུ་ཞིག་སྤོང་འདོད་ཞི་བ་དོན་གཉེར་བས། ། ཁྱིམ་ལ་འཇིགས་པར་གྱིས་ཏེ་སྤང་བྱོས་ལ། ། འཇིག་རྟེན་མཁས་པའི་བསྟན་ལ་ཆོས་སྤྱོད་ཅིག ། ཁྱིམ་ནི་རབ་འབར་སྡུག་བསྔལ་མང་པོའི་རྩ། ། སེམས་ལས་བྱུང་ བ་རྣམས་ཀྱིས་རྟག་ཏུ་འབར། ། མེ་མུར་འོབས་འདྲ་འཇིགས་པར་བྱེད་པ་ལ། ། མཁས་པ་སུ་ཞིག་དེ་ལ་སྲེད་པ་སྐྱེད། ། ཁྱིམ་གནས་བུ་དང་ཆུང་མའི་མྱ་ངན་བྱེད། །

ཁྱིམ་གནས་དེ་བཞིན་ལོངས་སྤྱོད་མྱ་ངན་བྱེད། ། ཉེས་པ་འདི་དང་གཞན་ཡང་དཔག་མེད་དེ། ། དེ་ལྟས་ཁྱིམ་ནི་ ཡོངས་སུ་སྤང་བར་བྱ། ། འདྲེན་པ་རྣམས་ཀྱི་བསྟན་ལ་དགའ་བྱེད་པ། ། མ་བཏབ་མ་རྨོས་བདེ་དང་ཡིད་བདེའི་རྒྱུ། ། སྡུག་བསྔལ་མང་པོའི་རྩ་བ་ཁྱིམ་འདི་ལ། ། བླུན་པོ་དགའ་ཡི་མཁས་པ་གཞར་མི་དགའ། ། པགས་པ་ཆུ་རྒྱུས་ཤ་དང་རུས་པའི་ལུས། ། འདི་ནི་ང་ཡི་ཆུང་མ་ འདུ་ཤེས་བསྐྱེད། ། བྱིས་པ་རྨོངས་པ་འདོད་ཆགས་སྐྱེད་པར་བྱེད། ། བུད་མེད་སྒྱུ་མ་ལྟ་བུར་ཡོང་མ་ཤེས། ། ཤེས་རབ་ལྡན་པས་ཁྱིམ་གྱི་ཉེས་རིག་ནས། ། དེ་ཕྱིར་འདོད་པའི་དགའ་བ་ཀུན་སྤངས་ཏེ། ། ཆོས་ལ་སྨན་གྱི་འདུ་ཤེས་བཞག་བྱས་ནས། ། མ་ཆགས་ཁྱིམ་ནས་མྱུར་དུ་ འབྱུང་བར་བྱེད། ། དེ་ནས་ཁྱིམ་བདག་དཔས་བྱིན་དང་། ཁྱིམ་བདག་ལྔ་བརྒྱ་ཙམ་དེ་དག་གིས་ཆོས་ཀྱི་རྣམ་གྲངས་འདི་ཐོས་ནས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། ། དེ་དག་བཟོད་པ་ཐོབ་ནས་མཆོག་ཏུ་དགའ་བ་དང་མགུ་བར་གྱུར་ཏེ་དེའི་ཚེ་ཚིགས་སུ་བཅད་པ་འདི་དག་ གསོལ་ཏོ། ། སངས་རྒྱས་ཆོས་ལ་འདོད་གྱུར་ནས། ། གང་དག་གིས་ནི་སེམས་བསྐྱེད་པ། ། ཀྱེ་མ་རྙེད་པ་རྙེད་པ་ཆེ། ། འདི་ནི་རྙེད་པ་ཀུན་གྱི་མཆོག །

བྱང་ཆུབ་སེམས་ནི་དགའ་བ་སྟེ། ། སེམས་ཅན་ཐམས་ཅད་བདེ་བགྱིད་པའི། ། སེམས་འདིར་སུ་དག་དགའ་སྐྱེད་པ། ། དེ་ དག་འཚོ་བ་ལེགས་པར་འཚོ། ། སེམས་ཅན་ཀུན་ལ་ཕན་བགྱིད་པའི། ། སེམས་འདི་གང་དག་བསྐྱེད་གྱུར་པ། ། དེ་དག་སེམས་ཅན་ཐམས་ཅད་དགའ། ། དེ་དག་མཐོང་ན་དགའ་བར་འགྱུར། ། བྱང་ཆུབ་སེམས་ལ་སུ་དགའ་བ། ། དེ་དག་ལུས་ནི་གསེར་འདྲ་ཞིང་། ། མཚན་ གྱིས་ཤིན་ཏུ་སྤྲས་པ་དང་། ། འཇིག་རྟེན་སྣང་བར་བྱེད་པར་འགྱུར། ། བྱང་ཆུབ་སེམས་ནི་སེམས་ཆེ་སྟེ། ། སེམས་ཀུན་ནང་ན་དགེ་བ་མཆོག ། ཡོན་ཏན་ཐམས་ཅད་ཕུན་སུམ་ཚོགས། ། ནད་ཀུན་རབ་ཏུ་ཞི་བར་བགྱིད། ། སེམས་ཅན་བསོད་ནམས་ཆུང་ངུ་རྣམས། ། བྱང་ཆུབ་ སེམས་ནི་འདོད་མི་བགྱིད། ། འཁོར་བ་ལ་ནི་མི་རྟོག་པ། ། བྱང་ཆུབ་སེམས་ཀྱིས་སྐྱོ་བར་འགྱུར། ། བྱང་ཆུབ་སེམས་ཀྱི་བསོད་ནམས་གང་། ། དེ་ལ་གལ་ཏེ་གཟུགས་མཆིས་ན། ། ནམ་མཁའི་ཁམས་ནི་ཀུན་གང་སྟེ། ། དེ་ནི་དེ་བས་ལྷག་པར་འགྱུར། ། གང་གཱའི་བྱེ་མའི་ གྲངས་སྙེད་ཀྱི། ། སངས་རྒྱས་ཞིང་རྣམས་མི་གང་གིས། ། རིན་ཆེན་དག་གིས་རབ་བཀང་སྟེ། ། འཇིག་རྟེན་མགོན་ལ་ཕུལ་བ་བས། ། གང་གིས་ཐལ་མོ་སྦྱར་བགྱིས་ཏེ། ། བྱང་ཆུབ་ཏུ་ནི་སེམས་བཏུད་ན།

། མཆོད་པ་འདི་ནི་ཁྱད་པར་འཕགས། ། དེ་ལ་མཐའ་ནི་མ་མཆིས་ སོ། ། བྱང་ཆུབ་སེམས་ནི་ཅི་འདྲ་བ། ། དྲང་སྲོང་མཆོག་གིས་བསྟན་མཛད་པའི། ། དེ་འདྲའི་མཆོད་པ་གཞན་མ་མཆིས། ། དཔལ་ཡང་གཞན་ནི་མཆིས་མ་ལགས། ། སྨན་གྱི་དམ་པ་ནད་མ་མཆིས། ། བྱང་ཆུབ་སེམས་ནི་ཡོན་ཏན་ལྡན། ། ནད་ཀུན་ རབ་ཏུ་ཞི་བར་བགྱིད། ། སེམས་ཅན་ཐམས་ཅད་བདེ་བར་བགྱིད། ། མེ་གསུམ་དག་གིས་གདུངས་པ་ཡི། ། སེམས་ཅན་སྡུག་བསྔལ་མཐོང་ནས་ནི། ། བསྐལ་པ་དཔག་ཏུ་མེད་པར་སྤྱོད། ། མཁས་རྣམས་སྐྱོ་བར་ཡང་མི་འགྱུར། ། གང་དག་བྱང་ཆུབ་སྤྱད་སྤྱོད་པ། ། དཔའ་ བོ་སྨན་པའི་རྒྱལ་པོ་འདྲ། ། དེ་དག་སེམས་ཅན་སྡུག་བསྔལ་སྐྱོབ། ། སྐྱོ་བ་རྟག་ཏུ་རྣམ་པར་སྤངས། ། དཔའ་བོ་སངས་རྒྱས་ཆོས་འཚལ་བ། ། འགྲོ་བའི་སྐྱེ་བ་ཐམས་ཅད་དུ། ། སེམས་དེ་འདོར་བར་མི་བགྱིད་ཅིང་། ། དེ་དག་བརྟུལ་ཞུགས་དེ་ཡང་སྟོན། ། སེམས་འདི་ ལ་ནི་གང་དགའ་བ། ། ཤཱཀྱ་སེང་གེ་མི་ཡི་མཆོག ། སངས་རྒྱས་ཅི་འདྲ་དེ་འདྲར་འགྱུར། ། བདག་ཅག་རྙེད་པ་ལེགས་པར་རྙེད། ། དེ་ནས་བཅོམ་ལྡན་འདས་ཀྱིས་དེའི་ཚེ་འཛུམ་པ་མཛད་དོ། །

འདི་ནི་སངས་རྒྱས་བཅོམ་ལྡན་འདས་རྣམས་གང་གི་ཚེ་འཛུམ་པ་མཛད་པ་ན་སངས་ རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ། བཅོམ་ལྡན་འདས་ཀྱི་ཞལ་གྱི་སྒོ་ནས་འོད་འཕྲོ་བ་ཁ་དོག་སྣ་ཚོགས་ཁ་དོག་དུ་མ་བྱུང་བ་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། (ལེབ་རྒན་,ལེ་བརྒན་)དང་། ཤེལ་དང་། དངུལ་གྱི་ཁ་དོག་ལྟ་བུ་དག་ སྟེ། འོད་དེས་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ཁྱབ་པར་བྱས་ནས་ཚངས་པའི་འཇིག་རྟེན་གྱི་བར་དུ་མངོན་པར་བྱུང་སྟེ་ཉི་ཟླ་རྣམས་ཀྱི་གཟི་བརྗིད་ཟད་པར་བྱས་ནས་སླར་ལོག་སྟེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་ དབུའི་གཙུག་ཏུ་ནུབ་བོ། ། དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ ཏོ། ། བཅོམ་ལྡན་འདས་རྒྱུ་མ་མཆིས། རྐྱེན་མ་མཆིས་པར་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཛུམ་པ་མི་མཛད་ན། འཛུམ་པ་མཛད་པའི་རྒྱུ་གང་ལགས། རྐྱེན་གང་ལགས།

དེའི་ཚེ་ཚིགས་སུ་བཅད་པ་འདི་དག་ཀྱང་ གསོལ་ཏོ། ། རྒྱུ་མ་མཆིས་པར་རྣམ་འདྲེན་རྒྱལ་བ་མཆོག ། སངས་རྒྱས་སྐྱོབ་པ་འཛུམ་པ་མི་སྟོན་ན། ། ཅི་སླད་བཅོམ་ལྡན་ཁྱོད་ཀྱིས་འཛུམ་མཛད་པ། ། འཇིག་རྟེན་ཕན་དགོངས་ཐུགས་བརྩེ་བདག་ལ་གསུངས། ། ཁྱོད་ཀྱིས་ཅི་སླད་དེ་རིང་འཛུམ་བསྟན་གསུངས། ། བཀའ་མཆིད་ཆེ་ལྡན་ནོར་མཆོག་སྦྱིན་མཛད་པ། ། དབུལ་པོར་གྱུར་པ་ནོར་དང་ལྡན་པར་མཛོད། ། འཇིག་རྟེན་ལྡོངས་ལ་མྱུར་དུ་མིག་ཀྱང་སྩོལ། ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ ཀྱིས་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་དེ་བཞིན་གཤེགས་པའི་གན་དུ་ལྷགས་པའི་ཁྱིམ་བདག་ལྔ་བརྒྱ་ཙམ་འདི་དག་མཐོང་ངམ། གསོལ་པ། བཅོམ་ལྡན་འདས་མཐོང་ལགས་སོ། ། བདེ་བར་གཤེགས་པ་མཐོང་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱིམ་བདག་ལྔ་བརྒྱ་ཙམ་འདི་དག་གིས་ཆོས་ཀྱི་རྣམ་གྲངས་འདི་ཐོས་ནས་མི་སྐྱེ་བའི་ཆོས་ལ་བཟོད་པ་ཐོབ་སྟེ། ཀུན་དགའ་བོ་ཁྱིམ་བདག་འདི་དག་ཐམས་ཅད་ནི་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། དགེ་བའི་རྩ་ བ་བསྐྱེད་པ།

སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་བསྙེན་བཀུར་བྱས་པ་དག་སྟེ། ཁྱིམ་བདག་འདི་དག་འདི་ནས་ཤི་འཕོས་ནས་ནམ་དུ་ཡང་ངན་འགྲོ་ལོག་པར་ལྟུང་བར་འགྲོ་བར་མི་འགྱུར་ཞིང་ཕྱིས་ཀྱང་ལྷ་དང་མི་རྣམས་ཀྱི་ནང་དུ་བདེ་བ་མྱོང་ནས་མཐར་གྱིས་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པ་མཉེས་པར་བྱེད་ཅིང་ཐུགས་བྱུང་བར་མི་བྱེད་དེ་བསྟི་སྟང་བྱེད་པར་འགྱུར། བཙུན་པར་བྱེད་པར་འགྱུར། རིམ་གྲོ་བྱེད་པར་འགྱུར། མཆོད་པ་བྱེད་པར་འགྱུར་རོ། ། བསྐལ་པ་བཟང་པོའི་སངས་རྒྱས་ བཅོམ་ལྡན་འདས་ཐམས་ཅད་ཀྱང་མཉེས་པར་བྱེད་ཅིང་ཐུགས་བྱུང་བར་མི་བྱེད་དེ་བསྟི་སྟང་བྱེད་པར་འགྱུར། བཙུན་པར་བྱེད་པར་འགྱུར། རིམ་གྲོ་བྱེད་པར་འགྱུར། མཆོད་པ་བྱེད་པར་འགྱུར་རོ། ། སངས་རྒྱས་བཅོམ་ལྡན་འདས་དེ་དག་ལས་ཆོས་ཀྱང་ཉན་ པར་འགྱུར་ཏེ། ཐོས་ནས་ཀྱང་འཛིན་པར་འགྱུར། ཀུན་ཆུབ་པར་བྱེད་པར་འགྱུར། གཞན་དག་ལ་ཡང་རྒྱ་ཆེར་རབ་ཏུ་སྟོན་པར་འགྱུར་རོ། ། དེའི་འོག་ཏུ་བསྐལ་པ་ཉི་ཤུ་རྩ་ལྔ་ན། སངས་རྒྱས་ཀྱི་ཞིང་ཐ་དད་པ་དག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་ རྫོགས་པར་འཚང་རྒྱ་སྟེ།

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་དཔལ་གྱི་སྙིང་པོ་ཞེས་བྱ་བར་མཚན་འཐུན་པར་འཇིག་རྟེན་དུ་འབྱུང་བར་འགྱུར་རོ། ། དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། ། ཀྱེ་མ་ཆོས་ཀྱི་རྣམ་གྲངས་འདི་འདི་ལྟར་རྒྱ་ཆེ་བ་ནི་བཅོམ་ལྡན་འདས་ངོ་མཚར་ཏོ། ། བདེ་བར་གཤེགས་པ་ངོ་མཚར་ཏོ། ། བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ ཕྱིར་ཆོས་ཀྱི་རྣམ་གྲངས་འདི་བྱང་ཆུབ་སེམས་དཔའི་རྣལ་འབྱོར་སྤྱོད་པའི་ས་བསྟན་པ་ཞེས་བྱ་བར་ཟུང་ཤིག ། དཔས་བྱིན་གྱིས་ཞུས་པ་ཞེས་བྱ་བར་ཡང་ཟུང་ཤིག ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང་། དགེ་སློང་དེ་དག་དང་། བྱང་ཆུབ་སེམས་དཔའ་དེ་དག་དང་། ཁྱིམ་བདག་ལྔ་བརྒྱ་ཙམ་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །

འཕགས་པ་དཀོན་མཆོག་ བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ཁྱིམ་བདག་དཔས་བྱིན་གྱིས་ཞུས་པའི་ལེའུ་ཞེས་བྱ་སྟེ་ཉི་ཤུ་རྩ་བརྒྱད་པ་རྫོགས་སོ། ། ། ། རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། ཞུ་ཆེན་གྱི་ལོཙྪ་བ་བན་དེ་ཡེ་ཤེས་སྡེས་བསྒྱུར་ ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ། ། ། །