BO༄༅༅། ། རྒྱ་གར་སྐད་དུ། སུ་སིདྡྷི་ཀ་ར་མ་ཧཱ་ཏནྟྲ་སཱ་དྷ་ནཽ་པཱ་ཡི་ཀ་པ་ཊ་ལ། བོད་སྐད་དུ། ལེགས་པར་གྲུབ་པར་བྱེད་པའི་རྒྱུད་ཆེན་པོ་ལས་སྒྲུབ་པའི་ཐབས་རིམ་པར་ཕྱེ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། ། བཅོམ་ལྡན་འདས་འཇམ་པའི་དབྱངས་ཡེ་ཤེས་ཀྱི་ སྐུ་ཅན་ལ་ཕྱག་འཚལ་ལོ། ། དེ་ནས་རྡོ་རྗེ་འཆང་ལ་ཡང་། ། སྟོབས་ཆེན་ཁྲོ་བོ་ཆེན་པོ་ཡིས། ། ཞབས་ལ་སྤྱི་བོས་ཕྱག་འཚལ་ཏེ། ། ཐལ་མོ་སྦྱར་ནས་འདི་སྐད་ཞུས། ། བཅོམ་ལྡན་འདས་ལ་བདག་གིས་ནི། ། རིག་པའི་རྒྱལ་པོའི་དཀྱིལ་འཁོར་དང་། ། མཐུ་དང་ཕ་རོལ་ གནོན་པ་དང་། ། འཁོར་གྱི་ཚོགས་འདི་ཐོས་ལགས་ན། ། བཅོམ་ལྡན་ཇི་ལྟར་ཟློས་རྣམས་ལ། ། གསང་སྔགས་དུ་མར་རྣམ་བརྟགས་པའི། ། དངོས་གྲུབ་མང་པོར་ཕྱེ་བ་དག ། དེ་དག་མྱུར་དུ་འགྲུབ་པར་འགྱུར། ། གསང་སྔགས་མཚན་ཉིད་ཇི་འདྲ་ལགས། ། སློབ་དཔོན་ མཚན་ཉིད་ཇི་ལྟ་བུ། ། སྒྲུབ་པ་པོ་ནི་ཅི་འདྲ་དང་། ། དེ་བཞིན་དུ་ནི་སྔགས་གཡོག་གསུངས། ། ཡུལ་ནི་ཇི་ལྟ་བུ་དག་བཞེད། ། གནས་ནི་གང་དག་ལགས་པ་གསུངས། ། གསང་སྔགས་ཟློས་པའི་འདུལ་བ་དང་། ། བསྡམ་པ་དག་ཀྱང་ཇི་ལྟ་བུ། ། མེ་ཏོག་གང་དག་ཤིས་ པ་དང་། ། དྲི་ནི་གང་དག་རབ་ཏུ་བསྒྲགས།
BO། གཏོར་མའི་ལས་ཀྱི་ཆོ་ག་གང་། ། བདུག་པ་མར་མེ་ཇི་ལྟ་བུ། ། ཞི་དང་རྒྱས་དང་དྲག་སྤྱོད་པའི། ། ལས་ཀྱི་དབྱེ་བ་ཅི་འདྲ་ལགས། ། དངོས་གྲུབ་རབ་དང་འབྲིང་དང་ནི། ། ཐ་མ་ཡང་ནི་ཇི་ལྟ་བུ། ། སྤྱན་དྲང་བ་ཡི་ཆོ་ག་དང་། ། མཆོད་པ་ཡང་ནི་ངེས་པ་དང་། ། བསྲུང་བའི་ལས་ལ་སྦྱར་བ་དང་། ། བཟླས་བརྗོད་བགྱི་བ་རྒྱ་ཆེར་གསུངས། ། ཚིམ་པར་བྱ་དང་དབང་བསྐུར་དང་། ། གསང་སྔགས་སྟ་གོན་གནས་པ་དང་། ། ཡོངས་སུ་གཟུང་དང་བསྐང་བ་དང་། ། གཟི་བྱིན་བསྐྱེད་པ་ཇི་ལྟ་བུ། ། སྦྱིན་སྲེག་ལས་ ཀྱི་ཆོ་ག་དང་། ། སྒྲུབ་པའི་ཡན་ལག་ངེས་པ་དང་། ། རྫས་ཀྱི་མཚན་ཉིད་རྒྱས་པ་དང་། ། དེ་བཞིན་རྫས་ཀྱང་གཟུང་བ་དང་། ། སྦྱང་བར་བགྱི་བའི་ཆོ་ག་དང་། ། དེ་བཞིན་ཚད་ནི་ངེས་པ་དང་། ། དེ་དག་སྒྲུབ་པའི་ཆོ་ག་རྣམས། ། མ་ལུས་པར་ནི་བསྒྲགས་པ་གང་། ། བདག་ དང་ཟློས་ལ་ཐུགས་བརྩེའི་ཕྱིར། ། དེ་ཀུན་བཅོམ་ལྡན་འདས་ཀྱིས་གསུངས། ། དངོས་གྲུབ་རྫས་ཀྱི་སྲུང་བ་དང་། ། ཇི་ལྟ་བུར་ཡང་བསྒོ་བ་དང་། ། སྤྱད་པར་བགྱི་བའི་ཆོ་ག་ཡི། ། ངེས་པ་གཙོ་བོས་བདག་ལ་གསུངས། ། ཕྲོགས་པ་སླར་ཡང་དགུག་པ་དང་། ། བསྲུང་ཞིང་ ཕྱིར་ཡང་བཟློག་པ་དང་། །
BOབགེགས་རྣམས་ཀྱི་ནི་སྔ་ལྟས་དག ། རྒྱ་ཆེར་བདག་ལ་བཀའ་སྩོལ་ཅིག ། དངོས་གྲུབ་ལས་ལ་དབང་བསྐུར་དང་། ། དཀྱིལ་འཁོར་གང་དག་བསྒྲུབ་པ་དང་། ། གཞན་ཡང་གསང་ཆེན་མ་ལུས་པ། ། དེ་དག་རྒྱ་ཆེར་བཀའ་སྩོལ་ཅིག ། བྱ་ བའི་ཆོ་ག་འདིར་འཚལ་བའི། ། ཕྱག་རྒྱ་གང་ལགས་གསང་སྔགས་དང་། ། དངོས་གྲུབ་སྒྲུབ་པའི་མཚན་མ་དང་། ། ཟློས་པའི་རྨི་ལམ་གང་ལགས་པ། ། སེམས་ཅན་ཀུན་ལ་ཐུགས་བརྩེའི་ཕྱིར། ། དེ་དག་མྱུར་དུ་བདག་ལ་གསུངས། ། དེ་ནས་དཔལ་ལྡན་རྡོ་རྗེ་ འཆང་། ། རིག་སྔགས་འཆང་ཀུན་གྱིས་བསྟོད་པ། ། བརྩོན་ཆེན་ཁྲོ་བོ་ཆེན་པོ་ལ། ། གཟི་ཆེན་གྱིས་ནི་བཀའ་སྩལ་པ། ། གང་ཕྱིར་ང་ལ་འདི་དྲིས་པ། ། ཁྲོ་བོ་ཆེན་པོ་ལེགས་སོ་ལེགས། ། དེ་ཕྱིར་རྩེ་གཅིག་ཡིད་ཀྱིས་ནི། ། བཟང་པོ་ཆོ་ག་མཆོག་ཀུན་ཉོན། ། རིག་པའི་ རྒྱལ་པོ་བརྩོན་འགྲུས་ཆེ། ། དྲག་ལ་ཅིས་ཀྱང་མི་རྫི་བ། ། ལེགས་པར་གྲུབ་བྱེད་ཅེས་བྱ་བ། ། གསང་སྔགས་ལས་ནི་ཐམས་ཅད་པ། ། སྔགས་རྒྱུད་འདི་ནི་མ་ལུས་པ། ། སྒྲུབ་ཅིང་དེ་བཞིན་སྟོན་པར་བྱེད། ། འདི་དང་ལྡན་པར་གསང་སྔགས་རྣམས། ། བསྙེན་ན་མྱུར་དུ་ འགྲུབ་པར་འགྱུར། ། འདི་ནི་རིགས་རྣམས་ཐམས་ཅད་ཀྱི། །
BOརིག་པའི་རྒྱལ་པོ་མཐུ་ཆེན་ཡིན། ། བསྲུང་དང་ཕྱིར་བཟློག་ལ་སོགས་དང་། ། མཆོད་དང་ཚིམ་པར་བྱ་བ་ཡི། ། ལས་ཀུན་ལ་ནི་འདི་སྦྱོར་བྱེད། ། འདི་ནི་སྟོན་ཅིང་གཞན་བསྐུལ་འདེབས། ། གསང་སྔགས་ ཐམས་ཅད་འགྲུབ་པར་བྱེད། ། ཡང་ན་དེ་ཡི་སྙིང་པོ་ནི། ། ཧཱུྃ་གསུམ་དང་ནི་ལྡན་པ་ཡིས། ། རྒྱུད་ལས་གསུངས་པའི་ཆོ་ག་བཞིན། ། མཁས་པས་བསྲུང་ལ་སོགས་ལ་སྦྱར། ། སྒྲུབ་པ་པོ་ཡིས་དངོས་གྲུབ་ཀྱང་། ། རྒྱུད་རྣམས་མཐོང་ནས་ཐོག་མར་ནི། ། དངོས་ གྲུབ་རབ་འབྲིང་ཐ་མ་ཡི། ། གསང་སྔགས་བྱེ་བྲག་རྣམས་ཤེས་བྱ། ། གང་ཕྱིར་རིགས་ནི་གསུམ་པོ་ཡང་། ། དཀྱིལ་འཁོར་འདིར་ནི་ཀུན་དུ་འདུས། ། དེ་བས་དེར་གསུངས་སྔགས་རྣམས་ཀྱི། ། ཆོ་ག་ཐམས་ཅད་བཤད་པར་བྱ། ། བདེ་བར་གཤེགས་པས་ ཞི་བར་བྱ། ། རྒྱས་པ་པདྨའི་རིགས་སྐྱེས་ཀྱིས། ། རྡོ་རྗེ་རིགས་སྐྱེས་གསང་སྔགས་ཀྱིས། ། དྲག་ཤུལ་སྤྱད་པའི་ལས་རྣམས་བྱ། ། རོ་སྟོད་ལས་བྱུང་མཆོག་ཡིན་ཏེ། ། ལྟེ་བ་མན་ཆད་ཐ་མ་ཡིན། ། བར་གྱི་ལུས་ལས་བྱུང་བ་ཡི། ། སྔགས་ཀྱི་དངོས་གྲུབ་འབྲིང་བསྟན་ཏོ། ། རབ་དང་འབྲིང་དང་ཐ་མ་ཡང་། ། རྣམ་པར་རྟོག་པའི་མཐུ་དག་ལས། ། དངོས་གྲུབ་རྣམས་ལ་གསུམ་རྣམས་སུ། །
BOགསང་སྔགས་ཆོ་ག་མཁས་པས་བཤད། ། མཁས་པས་རིགས་ནི་གསུམ་ཆར་ལ་འང་། ། རབ་ལ་སོགས་པ་བསྟན་པ་དང་། ། ཞི་བ་ལ་སོགས་བྱེ་བྲག་ གིས། ། ལས་ནི་རྣམ་པ་གསུམ་དུ་བྱ། ། དེ་ལ་དངོས་གྲུབ་རབ་ལ་ནི། ། རིག་སྔགས་བདག་པོ་ཡིན་པར་བཤད། ། མཁས་པས་ཤིན་ཏུ་ཐ་མ་ལ། ། མངག་གཞུག་ལ་སོགས་ཤེས་པར་བྱ། ། ཞི་བ་དང་ནི་རྒྱས་པ་དང་། ། གང་ཡང་དྲག་ཤུལ་སྤྱོད་པ་དག ། རིགས་ གསུམ་ལ་ཡང་དེ་དག་ཀུན། ། གསང་སྔགས་དབྱེ་བས་ཤེས་པར་བྱ། ། རིག་སྔགས་རྒྱལ་པོས་རྒྱས་པ་བྱ། ། ཁྲོ་བོ་རྣམས་ཀྱིས་དྲག་ཤུལ་སྤྱད། ། སྤྱན་ལ་སོགས་པས་ཞི་བ་བྱ། ། རང་བཞིན་གསུམ་གྱི་ཆོ་ག་ཡིན། ། གསང་སྔགས་ཚིག་དང་ཡི་གེ་ཡིས། ། མ་སྨོས་པ་ཡང་ ཤེས་བྱ་ཞིང་། ། ལས་གང་སྐུལ་བར་བྱེད་པའི་སྔགས། ། ལས་དེ་སྒྲུབ་པར་ཤེས་པར་བྱ། ། ཞི་བས་ཞི་བའི་ལས་རྣམས་བྱ། ། མཐུ་དང་ལྡན་པས་གསང་སྔགས་ཀྱི། ། དེ་བཞིན་རྒྱས་པའི་ལས་རྣམས་སྤྱད། ། དྲག་པོས་དྲག་ཤུལ་སྤྱད་པར་བྱ། ། ཁྱད་པར་དུ་ནི་ཞི་བའི་ལས། ། རྒྱལ་བས་གསུངས་པས་ཞི་བ་བྱ། ། དཔལ་སྡོམ་རྒྱུད་ལས་གསུངས་པ་ཡི། ། རྒྱས་པའི་ལས་རྣམས་བྱ་བར་ཤིས། ། ཁྲོ་བོ་དྲག་ཤུལ་ཅན་དག་གིས། ། དེ་ལ་སོགས་པ་བསྟན་པ་ཡིས། །
BOལས་ནི་རྣམ་པ་གསུམ་དུ་བསྒྲགས། ། གསང་སྔགས་མང་པོ་ཕལ་ཆེར་ནི། ། སྐུལ་ བའི་ཚིག་དང་ལྡན་པས་ན། ། དེ་དང་དེ་ཡི་ལས་རྣམས་ནི། ། དེ་དག་ཉིད་ཀྱིས་རབ་ཏུ་བྱ། ། རིག་སྔགས་རྒྱལ་པོ་བཅོམ་ལྡན་འདས། ། ལེགས་པར་གྲུབ་བྱེད་ཅེས་བྱ་བ། ། དེ་ནི་དཔལ་ལྡན་ཆེན་མོ་སྟེ། ། ཁྱད་པར་དུ་ནི་ལས་ཀུན་བྱེད། ། རིག་སྔགས་འཆང་ཀུན་གྱིས་ མཆོད་པ། ། དཔལ་ལྡན་རྡོ་རྗེ་འཆང་དེ་ནི། ། རིག་སྔགས་རྒྱུད་རྣམས་ཐམས་ཅད་དང་། ། སྟོན་ཅིང་དེ་བཞིན་སྒྲུབ་པར་བྱེད། ། དེ་ཡི་ཕོ་ཉ་ཆེ་ཆུང་དང་། ། ཁྲོ་བོ་གསང་སྔགས་ཕྱག་བརྙན་བཅས། ། འཁོར་ནི་རྣམ་པ་སྣ་ཚོགས་ཀྱང་། ། ཕ་རོལ་གནོན་པ་སྨད་དུ་ གྲགས། ། ལྷ་ཡི་ཡང་ནི་ལྷ་འདི་ཡི། ། གསང་སྔགས་མང་པོ་གང་གསུངས་པ། ། གཟི་བརྗིད་ཆེ་ཞིང་ཁྱད་པར་འཕགས། ། དེ་ཀུན་ལས་རྣམས་ཐམས་ཅད་བྱེད། ། རྒྱལ་དང་པདྨའི་རིགས་འདིར་ཡང་། ། འདི་ཉིད་རྒྱལ་པོར་བསྐོས་པའི་ཕྱིར། ། དམ་པ་ཡིན་པར་ཤེས་ བྱ་སྟེ། ། འདི་དང་མཚུངས་པ་གཞན་མེད་དོ། ། གསང་སྔགས་ཡི་གེ་ཉུང་ངུ་དང་། ། གང་དག་སྭཱ་ཧཱ་ཨོཾ་ལྡན་པའང་། ། ཞི་བའི་ལས་རྣམས་ཐམས་ཅད་ནི། ། དེ་ཡིས་དེ་དག་མྱུར་དུ་བྱེད། ། ཧཱུྃ་དང་བཅས་ཤིང་ཕཊ་དང་བཅས། །
BOགང་དག་ར་དང་དཀན་ཆགས་ མང་། ། གསང་སྔགས་དེ་དག་དྲག་སྤྱོད་ལ། ། མཁས་པས་ཀུན་དུ་སྦྱར་བར་བྱ། ། མཁས་པས་དེ་ལས་གཞན་པའི་སྔགས། ། དོན་དང་ཚིག་ནི་ཞིར་ལྡན་པས། ། རྒྱས་པའི་ལས་ནི་ཐམས་ཅད་ལ། ། ལེགས་པར་རབ་ཏུ་སྦྱར་བར་བྱ། ། གདོན་སོགས་དབབ་པའི་ལས་ལ་ནི། ། མཁས་པས་ཕོ་ཉ་སོགས་པས་བྱ། ། གསང་སྔགས་གང་དག་དེའི་ལས་བྱེད། ། དེ་དག་དེ་དང་དེར་སྦྱར་རོ། ། ལས་ཀུན་བྱེད་པའི་གསང་སྔགས་ཀྱི། ། ཆོ་ག་ཞིབ་མོ་རྒྱས་གསུངས་པར། ། ཐོག་མར་ལས་ནི་གང་སྨོས་པ། ། དེ་ནི་གཙོ་བོ་ཡིན་པར་བསྟན། ། གླེང་གཞི་དབང་ དུ་མཛད་ནས་ནི། ། གསང་སྔགས་གང་དག་གསུངས་གྱུར་པས། ། དེ་ཉིད་དེ་ལ་གཙོ་བོར་བསྟན། ། ལྷག་མ་གཞན་དུ་ཤེས་པར་བྱ། ། རིགས་དང་རང་བཞིན་མཐུ་རྣམས་དང་། ། ལས་ཀྱང་རྣམ་པར་སྤྱད་ནས་ནི། ། རང་གི་ཡིད་དང་མཐུན་པ་ཡི། ། གསང་སྔགས་ལ་ནི་བསྙེན་ པ་བརྩམ། ། གསང་སྔགས་ཀྱི་མཚན་ཉིད་རིམ་པར་ཕྱེ་བའོ། ། ། ། དེ་ནས་གཞན་ཡང་གཞུང་དག་ལས། ། ཆོ་གའི་རྩ་བར་འདོད་པ་ཡི། ། སློབ་དཔོན་གྱི་ནི་མཚན་ཉིད་དག ། ཇི་སྐད་བསྟན་པ་དེ་བཤད་དོ། ། ཡན་ལག་ཐམས་ཅད་མཚན་དང་ ལྡན། ། དཔལ་ལྡན་གཙུག་ལག་རྣམས་ལ་མཁས། ། ཆོས་ལ་གཅིག་ཏུ་དགའ་བ་དང་། །
BOརང་གི་བསླབ་པ་ལ་ཡང་གནས། ། དེས་ལ་འགྲོགས་ན་བདེ་བ་དང་། ། སྙིང་རྗེའི་བདག་ཉིད་བརྩེ་བ་ཅན། ། ཆོ་རིགས་བཙུན་ཞིང་ང་རྒྱལ་མེད། ། བློ་ལྡན་སྨྲ་མཁས་བཟོད་པ་ཆེ། ། ཐེག་ཆེན་དོན་ལ་ཞུགས་པ་དང་། ། ཟབ་མོའི་དོན་ལ་ལྷག་པར་མོས། ། ཁ་ན་མ་ཐོ་ཆུང་ངུ་ལའང་། ། འཇིགས་པར་ལྟ་ཞིང་ལེགས་བསྡམས་པ། ། གཟུངས་ལ་སོགས་པའི་མདོ་སྡེ་རྣམས། ། ཀློག་པ་ལ་ནི་ལྷག་པར་བརྩོན། ། གསང་སྔགས་སྤྱོད་ལ་བརྩོན་པ་དང་། ། གཙུག་ལག་མན་ངག་ལེགས་པར་སྟོན། ། ལས་རྣམས་འགྲུབ་ཅིང་བཟླས་བརྗོད་ཅན། ། དཀྱིལ་འཁོར་རྣམས་ཀྱི་ལས་ལ་མཁས། ། སྡུག་ཅིང་ལེགས་པར་འགྱེད་པ་དང་། ། ཆེན་པོར་འདོད་ཅིང་འཇུངས་དང་བྲལ། ། དཀྱིལ་འཁོར་ཆེན་པོ་དག་ཏུ་ནི། ། བླ་མས་ཚུལ་བཞིན་ དབང་བསྐུར་ཞིང་། ། བླ་མ་ལ་ནི་ལུང་ཐོབ་པ། ། དེ་ནི་སློབ་དཔོན་ཡིན་པར་བཤད། ། དེ་ཉིད་ཀྱིས་ནི་ཆོ་ག་བཞིན། ། དམ་ཚིག་ལ་སོགས་དཀྱིལ་འཁོར་བྲི། ། གསང་སྔགས་རྣམས་ཀྱི་ཆོ་ག་གང་། ། དེ་ཉིད་ཀྱིས་ནི་བསྟན་པར་འོས། ། དེ་ཡིས་བསྟན་པའི་གསང་སྔགས་ཀུན། ། ཐེ་ཚོམ་མེད་པར་འགྲུབ་པར་འགྱུར། ། གཞན་དུ་ན་ནི་བསྙེན་བྱས་ཀྱང་། ། བཟླས་བརྗོད་ཐམས་ཅད་འབྲས་བུ་མེད། །
BOཇི་ལྟར་དཀོན་མཆོག་གསུམ་དག་དང་། ། རྒྱལ་བའི་སྲས་ལ་ལྟ་བ་ལྟར། ། ཟློས་པས་བླ་མ་མཐུ་ཆེན་ལ། ། དེ་ལྟར་ལྟ་ཞིང་བཀུར་སྟི་བྱ། ། དེ་ནི་ཀུན་ལ་སྐུལ་ བར་བྱེད། ། སྐྱབས་ལ་སོགས་པ་ཡོངས་སུ་འཛིན། ། དེ་ནི་དགེ་བའི་ཕྱོགས་རྣམས་དང་། ། མངོན་པར་མཐོ་བ་ཀུན་གྱི་རྒྱུ། ། སློབ་དཔོན་རྟེན་དང་དངོས་གྲུབ་ནི། ། ཁྱད་པར་ཅན་ཡང་མྱུར་དུ་སྐྱེ། ། བྱང་ཆུབ་འབྲས་བུའི་བར་དུ་ཡང་། ། དེ་ཉིད་རྒྱུ་ཞེས་རབ་ཏུ་གསུངས། ། རིམ་ གྲོ་ལ་སོགས་བསྙེན་པ་ཡིས། ། དེ་ནི་ནམ་ཞིག་མགུ་གྱུར་པ། ། དེ་ཚེ་གསང་སྔགས་རིག་སྔགས་རྣམས། ། ཐེ་ཚོམ་མེད་པར་འགྲུབ་པར་འགྱུར། ། སློབ་དཔོན་གྱི་མཚན་ཉིད་རིམ་པར་ཕྱེ་བའོ། ། ། ། དེ་ནས་གསང་སྔགས་ཟློས་པ་པོ། ། བྱ་བའི་ཆོ་ག་ལ་བརྩོན་པ། ། ཇི་ལྟ་བུ་ཡིས་མྱུར་འགྲུབ་པའི། ། མཚན་ཉིད་གཞན་ཡང་བཤད་པར་བྱ། ། གཙང་ཞིང་དུལ་ལ་བརྟན་པར་ལྡན། ། མ་འཇུངས་བློ་ལྡན་གཡེར་བག་ཆེ། ། སྨྲ་མཁས་མི་འཇིགས་བཤེས་གཉེན་ཅན། ། བཟོད་ལྡན་དྲང་ལ་གཡོ་སྒྱུ་མེད། ། ནད་མེད་པ་ལ་བདེན་པར་སྨྲ། ། བཟོ་ ཞིང་བཤོར་ལ་དར་ལ་བབ། ། དེ་བཞིན་ཡན་ལག་ཚང་བ་ཡི། ། བློ་ལྡན་དེས་ནི་འགྲུབ་པར་ཤིས། ། དཀོན་མཆོག་གསུམ་ལ་གང་དད་ཅིང་།
BO། ཐེག་པ་ཆེན་པོ་ལ་ཡང་བསྒོམ། ། དགེ་བའི་ཕྱོགས་ལ་བརྩོན་འགྲུས་ཅན། ། དེ་ལ་རིག་སྔགས་མྱུར་དུ་འགྲུབ། ། གང་ཞིག་བྱང་ ཆུབ་སེམས་དཔའ་དང་། ། གསང་སྔགས་གུས་ཤིང་རིམ་གྲོ་ཆེ། ། སེམས་ཅན་ཀུན་ལ་སྙིང་བརྩེ་ཅན། ། དེས་ནི་རིག་སྔགས་འབྲས་བུ་ཐོབ། ། གཅིག་པུ་དབེན་པར་དགའ་བ་དང་། ། བདེན་པར་སྨྲ་ཞིང་གཙང་སྦྲ་ཆེ། ། ཞི་ལ་ཡིད་ནི་མི་གཡེང་བ། ། རིག་སྔགས་དངོས་གྲུབ་ཐོབ་ པར་འགྱུར། ། གང་ཞིག་རྡོ་རྗེ་འཆང་བ་ཡི། ། མཐུ་ཆེན་ཐོས་སོ་ཅོག་ན་ཡང་། ། ཕྱིར་ཞིང་དགའ་བྱེད་དེའི་ལག་ན། ། དངོས་གྲུབ་ཐམས་ཅད་མྱུར་བར་གནས། ། ཟས་དང་སྟན་དང་མལ་ཆ་ལ། ། བྱ་བ་ཉུང་ཞིང་འདོད་ཆེན་ཆུང་། ། བརྩོན་ཞིང་ངལ་ནི་མི་ཤེས་པ། ། དེས་ནི་ངེས་ པར་འགྲུབ་པར་འགྱུར། ། ཆོ་ག་རྒྱས་པར་ཀློག་པ་ན། ། གང་ཞིག་ཡིད་ནི་དགར་འགྱུར་བའམ། ། ཡང་ན་བ་སྤུ་ལྡང་འགྱུར་བ། ། དེ་ནི་རིག་སྔགས་འབྲས་བུའི་སྣོད། ། གང་ཞིག་དེ་དང་དེ་བཤད་དེའི། ། རང་བཞིན་གྱུར་ཅིང་ཆགས་སྤངས་ལ། ། རྨི་ལམ་ན་ཡང་དངོས་གྲུབ་ ཐོབ། ། དེ་ལ་ཡང་ནི་དངོས་གྲུབ་ཡོད། ། རིག་སྔགས་དམ་ཚིག་འཆང་བ་ཡི། ། བླ་མ་ལ་ནི་སྟོན་པ་བཞིན། ། གང་ཞིག་གུས་སེམས་ཤེས་རབ་ཅན། །
BOདེ་ཡི་ལག་ན་དངོས་གྲུབ་གནས། ། བརྩམས་ཏེ་འབྲས་བུ་མེད་གྱུར་ཀྱང་། ། གང་ཞིག་རིག་སྔགས་མི་གཏོང་ལ། ། ཡིད་ཀྱང་ སྐྱོ་བར་མི་འགྱུར་བའི། ། བློ་ལྡན་དེས་ནི་དངོས་གྲུབ་ཐོབ། ། སྒྲུབ་པ་པོའི་མཚན་ཉིད་རིམ་པར་ཕྱེ་བའོ། ། ། ། དེ་ནས་གཞན་ཡང་སྒྲུབ་པ་པ་པོའི། ། བྱ་བའི་ཆོ་ག་དག་ལ་ཡང་། ། ཇི་ལྟ་བུ་དག་ཤིས་པ་ཡི། ། སྔགས་གཡོག་དག་གི་མཚན་ཉིད་བཤད། ། རིགས་བཙུན་ཆོས་སྤྱོད་དད་པ་ཅན། ། སེམས་སྟོབས་ཆེ་ལ་རྩོལ་ཕོད་པ། ། བདེན་པར་སྨྲ་ཞིང་གུས་པ་ཆེ། ། ཡན་ལག་མཉམས་མ་སྨད་པ། ། ཧ་ཅང་མི་རིང་མི་སྦོམ་ལ། ། སྐེམ་པོ་མ་ཡིན་མིའུ་ཐུང་མིན། ། ཧ་ཅང་ཁ་དོག་གཅིག་མིན་པའི། ། ནད་མེད་སྔགས་གཡོག་ རབ་ཏུ་ཤིས། ། སྡུག་བསྔལ་ཐམས་ཅད་བཟོད་ཅིང་བརྟན། ། ལས་རྣམས་ཀུན་ལ་རབ་ཏུ་གཟོ། ། བཟོད་དང་ལྡན་ཞིང་དཀའ་ཐུབ་ཅན། ། རྗེས་སུ་མཐུན་ཞིང་དགའ་བར་སྨྲ། ། བློ་ལྡན་དྲང་ཞིང་ང་རྒྱལ་མེད། ། ཕན་ཚུན་འགྲན་པ་དག་ཀྱང་སྤངས། ། མཁས་ཤིང་བྱང་ལ་བྱམས་ པ་ཅན། ། དྲན་པར་ལྡན་ཞིང་གཏོང་ཡང་ཕོད། ། གསང་སྔགས་རིག་སྔགས་དབྱེ་བ་ཤེས། ། གསང་སྔགས་བཟླས་ཤིང་ཤེས་རབ་རྣོ། ། བསྲུང་ལ་སོགས་པའི་ལས་རྣམས་ལ། ། མཁས་པས་སྔགས་ཀྱི་གཡོག་ཏུ་གཟུང་། །
BOལེགས་པར་བསྡམས་ཤིང་དམ་ཚིག་ཤེས། ། བསྟན་པ་ལ་ནི་དགའ་བ་དང་། ། བཟླས་བརྗོད་བྱེད་པའི་བརྡ་ཤེས་པ། ། དད་པ་དེ་ནི་གྲོགས་སུ་འདོད། ། བསམ་པ་བཟང་ཞིང་མི་སྐྱོ་ལ། ། མ་གྲུབ་བར་དུ་མི་གཏོང་ཞིང་། ། སེམས་སྟོབས་ཆེ་བའི་གྲོགས་བསྟེན་ན། ། ཟློས་པ་པོ་ནི་འགྲུབ་པར་འགྱུར། ། ལོངས་སྤྱོད་ཆེན་པོ་ དག་ལ་ཡང་། ། གང་ཞིག་ཆགས་པ་མེད་པ་དང་། ། གུས་ཤིང་ཕན་པར་སྤྲོ་བ་ཅན། ། དེ་ནི་གྲོགས་པོར་ཡོངས་སུ་བསྒྲགས། ། དངོས་གྲུབ་ཀྱི་ནི་རྫས་དག་གིས། ། གཞན་གྱིས་རབ་ཏུ་བྲིད་གྱུར་ཀྱང་། ། ཆུ་གང་གིས་ནི་མི་གཏོང་བ། ། དེས་ནི་གྲོགས་པོ་ནུས་པར་ཤེས། ། གང་ཞིག་གྲུབ་པའི་བར་དུ་ནི། ། དོགས་པ་མེད་པར་འགྲུབ་པ་ལ། ། བྱམས་པར་ཡང་ནི་བྱེད་འགྱུར་བ། ། དེས་ནི་གཡོག་པོ་ནུས་པ་ཡིན། ། ཡུན་རིང་དུ་ནི་འབྲལ་མེད་དམ། ། འཚེ་བ་རྣམ་པ་སྣ་ཚོགས་ཀྱིས། ། གང་ཞིག་སྐྱོ་བར་མི་འགྱུར་བ། ། དེ་ནི་གཅིག་པུ་གཡོག་ཡིན་ནོ། ། སྒྲུབ་པའི་གྲོགས་མཆོག་ཡོན་ཏན་ཡང་། ། དེ་ལྟ་བུར་ནི་ཤེས་པར་བྱ། ། ཁྱད་པར་དུ་ནི་རྒྱུད་རྣམས་དང་། ། དཀྱིལ་འཁོར་དག་ལ་དེ་མཁས་པའོ། ། བློ་ལྡན་གང་ཞིག་སྒྲུབ་པ་བས། ། ཡོན་ཏན་གང་གིས་ལྷག་གྱུར་པ། །
BOསྒྲུབ་པའི་ལས་ཀྱི་ལྷག་མ་རྣམས། ། དེ་ནི་གཅིག་ པུས་བྱེད་པར་ནུས། ། དབང་བསྐུར་ཆོ་ག་སྦྱིན་སྲེག་དང་། ། དྲི་ལ་སོགས་པ་བསད་པ་དང་། ། གང་དག་བསྲུང་ལ་སོགས་པའི་ལས། ། དེ་དག་བློ་ཅན་དེས་བྱའོ། ། དེས་ནི་ཕྱི་ནང་ཐམས་ཅད་ཀྱི། ། སྤྱད་པར་བྱ་བ་གཅེས་པ་ཡང་། ། རྒྱུད་ལས་གསུངས་པའི་ཆོ་ག་ ཡིས། ། ལེགས་པར་རྫོགས་པ་ཉིད་དུ་བྱ། ། བསྒྲུབ་པའི་ལས་ནི་ནར་མ་ལ། ། ཉམས་པར་གྱུར་པ་ཡོད་ན་ཡང་། ། དེ་ཡི་བྱ་བ་ལ་དམིགས་ནས། ། དེས་ནི་དེ་ལ་འཇུག་པར་འགྱུར། ། རྫས་ཀྱི་ལས་རྣམས་གཞན་ལ་ཡང་། ། ཅི་ནས་བར་ཆད་མི་འབྱུང་བར། ། རང་ གི་གཟེངས་བསྟོད་བྱ་བའམ། ། རྫས་ལ་བྲམ་ཞིང་ཅི་ནས་ཀྱང་། ། ཟློས་པ་གཙང་སྦྲ་ཅན་གྱིས་ནི། ། བཟླས་བརྗོད་བཏང་བའི་དུས་ན་ཡང་། ། དེ་ཡིས་དེ་ཡི་སྔགས་བཟླས་པ། ། རྟག་པར་རབ་ཏུ་བརྩོན་པར་བྱ། ། གྲོགས་པོ་ཡིས་ནི་བསྒོམ་པ་ལ། ། མི་སྨྲ་བརྟུལ་ཞུགས་ མི་སྤྱད་དོ། ། དེ་ཡི་བསྡམས་པ་དེ་དག་པས། ། དེ་ཕྱིར་རབ་ཏུ་འཇུག་པར་བྱ། ། དེ་ཡི་ཁ་ཟས་གང་ཡིན་པ། ། དེ་ནི་རྗེས་སུ་སློབ་པས་བཟའ། ། སློབ་དཔོན་མཚན་ཉིད་སྒྲུབ་པ་དང་། ། སྔགས་གཡོག་རྣམས་ཀྱི་མཚན་ཉིད་ནི། ། གང་དག་གསུངས་པ་དེ་དག་ཉིད། །
BOསྒྲུབ་ པའི་གྲོགས་མཆོག་ཡོན་ཏན་དེའོ། ། སྔགས་གཡོག་གི་མཚན་ཉིད་རིམ་པར་ཕྱེ་བའོ། ། ། ། དེ་ནས་གཞན་ཡང་སྒྲུབ་པ་པོས། ། ཡུལ་གང་དག་ཏུ་གནས་ནས་ནི། ། དངོས་གྲུབ་མྱུར་དུ་ཐོབ་འགྱུར་བའི། ། གནས་ཀྱི་མཚན་ཉིད་བཤད་པར་བྱ། ། གང་དུ་བདུད་བཞི་ བཏུལ་ནས་ནི། ། བཅོམ་ལྡན་མངོན་པར་སངས་རྒྱས་ནས། ། རྨད་བྱུང་གོ་འཕང་བརྙེས་འགྱུར་བ། ། དངོས་གྲུབ་མང་པོ་ཀུན་གྱི་མཆོག ། ཆུ་བོ་ནེ་ར་ཉྫ་ནའི་འགྲམ། ། ཡིད་དུ་འོང་ཞིང་འཚེ་མེད་པ། ། དེ་ཡི་དངོས་གྲུབ་ཞིང་མཆོག་ཏུ། ། བཅོམ་ལྡན་འདས་ནི་ཉིད་ཀྱིས་གསུངས། ། དེར་ནི་བདུད་ནི་མང་པོས་ཀྱང་། ། གནོད་པར་བྱ་བར་མི་ནུས་ཏེ། ། དེ་བས་དེར་ནི་ལས་རྣམས་ཀུན། ། སྒྲུབ་པ་པོས་ནི་བརྩིས་ཏེ་བརྩམ། ། གང་དུ་ཆོས་རྣམས་བསྟན་པ་དང་། ། ཐུབ་པ་ཞི་བར་གཤེགས་པ་དང་། ། སེམས་ཅན་སྨིན་པར་བྱ་བའི་ཕྱིར། ། གང་དུ་སྐྱེ་བ་ བསྟན་པ་ཡི། ། གནས་དེར་དངོས་གྲུབ་རྣམ་གསུམ་དུ། ། ཡོངས་སུ་བསྒྲགས་པ་གང་ཡིན་དེ། ། བརྟན་ཞིང་མྱུར་དུ་བགེགས་རྣམས་ནི། ། ཞི་བར་ཡང་ནི་འགྱུར་བ་ཡིན། ། སངས་རྒྱས་རྣམས་དང་དེའི་སློབ་མ། ། སྐལ་བ་ཆེན་པོ་བཞུགས་བཞུགས་པ། ། བསོད་ནམས་ཅན་གྱི་ གནས་གང་ཡང་། །
BOདེར་ཡང་འགྲུབ་པར་ཡོངས་སུ་བསྒྲགས། ། ཆུ་མིག་སྣ་ཚོགས་དང་ལྡན་ཞིང་། ། ལྗོན་ཤིང་རྣམ་པ་མང་པོས་བརྒྱན། ། མེ་ཏོག་འབྲས་བུ་མོད་པའི་རི། ། དངོས་གྲུབ་ཕྱིར་ནི་ཡོངས་སུ་བསྒྲགས། ། དགོན་པ་དག་གི་ཕྱོགས་གང་ན། ། མེ་ཏོག་འབྲས་བུ་ ཆུ་མང་ཞིང་། ། ཡིད་ཀྱང་མངོན་པར་དགའ་འགྱུར་བ། ། དེ་དག་ཏུ་ནི་དངོས་གྲུབ་བཤད། ། རྩྭ་གནས་གང་ན་{རི་དགས་,རི་དྭགས་}ཚོགས། ། བཀྲ་ཤིས་དགའ་མགུར་སྤྱོད་པ་དང་། ། གདུག་པའི་སྦྲུལ་རྣམས་མེད་པ་ཡི། ། གནས་དེ་ཟློས་པ་རྣམས་ལ་ཕན། ། གང་ན་ལུས་ཅན་རྣམས་ལ་ནི། ། ལྷགས་པ་ལ་སོགས་གནོད་མེད་ལ། ། ཤིན་ཏུ་ཡང་ནི་དགའ་འགྱུར་བ། ། གནས་དེ་དངོས་གྲུབ་ཕྱིར་བསྟན་ནོ། ། ཐེལ་སྡིངས་ཟོམ་དང་རི་རྩེ་དང་། ། རི་འོར་གཡའ་ཆུ་སིལ་མ་ཅན། ། ཁྱད་པར་དུ་ནི་ལྡན་པའི་རི། ། ལྷག་པར་དངོས་གྲུབ་ཕྱིར་བསྟན་ཏོ། ། ནེའུ་སེང་ཉམས་དགའ་མང་པོ་ དང་། ། མེ་ཏོག་མང་ཞིང་ཡམ་སྲེག་ཤིང་། ། གནས་གང་དག་ན་ཡོད་པ་ཡི། ། གནས་དེ་དངོས་གྲུབ་ཕྱིར་བསྒྲགས་སོ། ། རིང་བསྲེལ་ཅན་གྱི་མཆོད་རྟེན་དང་། ། རི་བོ་རྣམས་དང་མཚོ་འགྲམ་དང་། ། རི་བོ་རྣམ་པ་སྣ་ཚོགས་དང་། ། ནགས་ཚལ་རྒྱུན་ལུགས་མེད་པ་དང་། །
BOདུ་བ་ཡོད་ པའི་དུར་ཁྲོད་དང་། ། འབབ་ཆུ་དག་དང་མཚེའུ་དག་དང་། ། ཆུ་ཀླུང་འགྲམ་ན་ཉམས་དགའ་བར། ། ཕྱུགས་ལྷས་གསེང་མ་སྔོན་པོ་དང་། ། ལྗོན་ཤིང་ཀུན་ནས་ཟླུམ་པ་དང་། ། མཚན་གཅིག་ལམ་གྱི་བཞི་མདོ་དང་། ། རྫིང་དང་ལུ་མར་བཅས་པ་དག ། དངོས་གྲུབ་ཕྱིར་ནི་ཡོངས་སུ་ བསྒྲགས། ། ཡུལ་ནི་གང་དང་གང་དག་ཏུ། ། མི་ཡི་གཙོ་བོས་ཀུན་སྤྱད་པར། ། ཁྱད་པར་དུ་ནི་འགྲུབ་གསུངས་ཕྱིར། ། དེར་ནི་ངེས་པར་འགྲུབ་པར་འགྱུར། ། གང་དང་གང་ན་སངས་རྒྱས་ཀྱི། ། བསྟན་པ་རྣམས་ནི་མཆོད་པ་ཡི། ། ཡུལ་དེ་དངོས་གྲུབ་ཕྱིར་གསུངས་ཏེ། ། གཞན་དག་ཡོན་ཏན་ཆུང་ཞེས་བྱ། ། གང་དང་གང་ན་སྐྱེ་བོ་ནི། ། དགེ་ཞིང་འཕགས་པ་མང་བ་དག ། དེ་དང་དེར་ནི་འགྲུབ་འདོད་པའི། ། སྒྲུབ་པ་པོ་དེས་ས་དེར་གནས། ། ཇི་ལྟར་དཀྱིལ་འཁོར་དག་གི་གནས། ། རིགས་ཀྱི་བྱེ་བྲག་ཡོན་ཏན་ལས། ། རྣམ་པར་དབྱེ་བ་རབ་ བསྒྲགས་པ། ། དེ་བཞིན་དངོས་གྲུབ་དག་ལའང་ཤིས། ། དངོས་གྲུབ་སྒྲུབ་པའི་བདག་ཉིད་ནི། ། གང་དུ་ཡིད་ནི་དགའ་འགྱུར་བ། ། དེ་ཉིད་དུ་ནི་སྦྱང་བ་ཡི། ། རིམ་པས་ལས་རྣམས་བརྩམ་པར་བྱ། ། གནས་ཀྱི་མཚན་ཉིད་རིམ་པར་ཕྱེ་བའོ། ། ། ། དེ་ནས་གཞན་ཡང་ གང་ཞིག་གིས། །
BOགནས་ན་ཟློས་པ་པོ་རྣམས་ཀྱིས། ། དངོས་གྲུབ་མྱུར་དུ་ཐོབ་འགྱུར་བའི། ། གསང་སྔགས་ཟློས་པའི་འདུལ་བ་བཤད། ། སྒྲུབ་པས་གསང་སྔགས་ཐམས་ཅད་དང་། ། ལྷ་རྣམས་དག་ནི་ཐམས་ཅད་དང་། ། ཟློས་པ་བདག་ཉིད་ཆེན་པོ་ལ། ། མཁས་པས་ ཞེ་སྡང་མི་བྱའོ། ། མཁས་པས་གསང་སྔགས་ཆོ་ག་དང་། ། གསང་སྔགས་རང་བཟོ་མི་བྱ་ཞིང་། ། རང་བཞིན་ངན་པའི་མི་དག་ལ། ། བརྙས་པར་ཡང་ནི་མི་བྱའོ། ། བླ་མ་དཀྱིལ་འཁོར་སྟོན་པ་དང་། ། སྤྱོད་པ་ངན་པར་གྱུར་ན་ཡང་། ། ངག་གམ་ཡང་ན་ཡིད་ཀྱིས་སུ། ། ནམ་ཡང་སྨད་པར་མི་བྱའོ། ། མཁས་པས་རིག་སྔགས་དག་ལ་ནི། ། ཁྲོས་ནས་མནན་དང་བཅིང་བ་དང་། ། བཅད་པ་དང་ནི་ཚར་གཅད་དང་། ། དྲག་སྤྱོད་དེ་དང་དེ་མི་བྱ། ། གཞན་གྱིས་རྗེས་སུ་མ་གནང་བར། ། གསང་སྔགས་གཟུང་བར་མི་བྱ་སྟེ། ། བསྙེན་བཀུར་མ་ བྱས་པ་ལ་ཡང་། ། ཆོ་ག་ཤེས་པས་སྔགས་མི་སྦྱིན། ། རྒྱུད་ཤེས་མཁས་པས་གསང་སྔགས་དང་། ། ཕྱག་རྒྱ་ཆོ་ག་ཞིབ་མོ་དང་། ། རྒྱུད་དང་དཀྱིལ་འཁོར་བཤད་པ་དང་། ། དཀྱིལ་འཁོར་མ་ཞུགས་ལ་མི་སྦྱིན། ། མཚོན་ཆ་འདྲ་བ་ཐམས་ཅད་དང་། ། དེ་བཞིན་སེམས་ཅན་འདྲ་ བ་དང་། ། ཕྱག་རྒྱ་སྣ་ཚོགས་འདྲ་བ་དང་། ། བཟའ་བར་མི་བྱ་འགོང་མི་བྱ། །
BOསྒྲུབ་པ་པོ་ནི་བློ་ཅན་གྱིས། ། དམན་རྣམས་སྨད་པར་མི་བྱ་སྟེ། ། མི་གཙང་བས་ཀྱང་རེག་མི་བྱ། ། རྐང་པས་ཀྱང་ནི་མི་འགོང་ངོ་། ། ཐེག་པ་ཆེན་པོ་པ་དག་དང་། ། ཤེས་རབ་ཅན་ གྱིས་བརྩད་མི་བྱ། ། བྱང་ཆུབ་སེམས་དཔའ་མཐུ་ཆེན་དག ། ཐོས་ནས་སུན་ནི་མི་དབྱུང་ངོ་། ། སྔགས་ཀྱི་སྒྲུབ་པ་པོ་དག་དང་། ། ལྷན་ཅིག་ནམ་ཡང་འགྲན་མི་བྱ། ། ཉེས་པ་ཆུང་ངུ་དག་ལ་ནི། ། ཁྲོས་ནས་དྲག་ཤུལ་སྤྱད་མི་བྱ། ། ཟློས་པ་ཆོ་ག་ལ་གནས་པ། ། གླུ་གར་རྩེད་ མོ་མི་བྱ་སྟེ། ། མཛེས་པར་བྱ་ཕྱིར་ཕྲེང་བ་དང་། ། ཁ་དོག་བཅང་བར་མི་བྱའོ། ། འགོང་བ་དང་ནི་མཆོང་བ་དང་། ། རྒྱུག་པ་དང་ནི་རྩབ་ཧྲལ་དང་། ། ལུས་ལས་བྱུང་བའི་གནས་ངན་ལེན། ། ཐམས་ཅད་ཡོངས་སུ་སྤང་བར་བྱ། ། བདེན་པའི་ཆོས་ལ་གནས་པ་ཡིས། ། ལོག་པར་ལྟུང་དང་ འགྱུར་དང་རྩུབ། ། དབྱེན་གྱི་ཚིག་ཀྱང་སྤང་བ་དང་། ། དོན་མེད་གཏམ་ཡང་མི་བྱའོ། ། མུ་སྟེགས་ཅན་དང་གནས་པ་དང་། ། རྩོད་པ་དག་ཀྱང་མི་བྱའོ། ། གདོལ་པ་ལ་སོགས་རིགས་ངན་དང་། ། གསང་སྔགས་ཟློས་པ་སྨྲ་མི་བྱ། ། བློ་ཅན་བཟླས་བརྗོད་བྱེད་པ་ན། ། སྔགས་གཡོག་ གཅིག་པུ་མ་གཏོགས་པར། ། གཞན་དང་ལྷན་ཅིག་དགོས་མེད་པར། །
BOའགའ་དང་ཡང་ནི་སྨྲ་མི་བྱ། ། འབྲུ་མར་དག་གིས་ལུས་མི་བསྐུ། ། ཏིལ་ཡང་བཟའ་བར་མི་བྱའོ། ། ལ་ཕུག་སྒོག་པ་ཚྭ་དག་དང་། ། ཆང་སྐྱུར་རྣམ་པ་ཐ་དད་དང་། ། ཅུང་པེང་དང་ནི་སྲན་རིལ་དང་། ། དེ་བཞིན་ མ་ཤའི་སྲན་མ་དང་། ། ཏིལ་གྱི་ཅུང་པེང་ལ་དུ་དག ། དངོས་གྲུབ་འདོད་པས་རྣམ་པར་སྤང་། ། ལོག་འདྲེན་དག་གི་ཟས་ཀུན་དང་། ། གཏོར་མའི་ཁ་ཟས་ཐམས་ཅད་དང་། ། ཀྲི་ས་ར་དང་འོ་ཐུག་དང་། ། གསང་སྔགས་ཟློས་པས་རྣམ་པར་སྤང་། ། ཤིང་རྟ་ལ་སོགས་བཞོན་པ་དང་། ། པདྨ་ལ་སོགས་བརྫི་མི་བྱ། ། ཁ་ཟས་ལྷག་མ་བོར་བ་ལ། ། རྐང་པས་ཀྱང་ནི་རེག་མི་བྱ། ། སྒེག་པའི་ཆོ་ག་ཐམས་ཅད་དང་། ། ལྷམ་དང་གདུགས་དག་འཆང་བ་དང་། ། ལུས་ཀྱི་བྱ་བྱེད་ཐམས་ཅད་དང་། ། གསང་སྔགས་ཟློས་པས་རྣམ་པར་སྤང་། ། རྐང་པས་རྐང་པ་ཉེད་པ་དང་། ། ལག་པས་ལག་པ་མཉེ་མི་བྱ། ། བཤང་གཅི་དག་ནི་ཆུར་མི་དོར། ། དེ་དང་ཉེ་བར་དོར་མི་བྱ། ། སྙིམ་པ་ཁོ་ནར་མི་བཟའ་སྟེ། ། འཁར་བའི་སྣོད་དུ་བཟའ་མི་བྱ། ། ལོ་མའི་རྒྱབ་ཏུ་འང་བཟའ་མི་བྱ། ། མཁས་པས་ཆགས་པའི་ཟས་མི་བཟའ། ། ཁྲི་རྣམས་དང་ནི་ཁྲིའུ་དག་ལ། ། སྒྲུབ་པོ་བློ་ལྡན་མི་གཙང་བ། ། གཞན་དང་ཉལ་བར་མི་བྱ་སྟེ། །
BOགན་རྐྱལ་ཁ་སྦུབ་ཏུ་འང་མིན། ། ཡང་དང་ཡང་དུ་མི་བཟའ་སྟེ། ། ཧ་ཅང་ཆུང་དང་ཆེར་མི་བཟའ། ། མི་བཟའ་བར་ཡང་མི་བྱ་ལ། ། གང་དག་དོགས་པའང་མི་བཟའོ། ། ངོ་མཚར་རྣམས་ལ་དགའ་མི་བྱ། ། ལྟད་ མོ་ཀུན་ལ་མི་བལྟ་ཞིང་། ། བུད་མེད་ཀུན་ལ་འཇོལ་ཉོག་ལ། ། ཞེན་པའི་སེམས་ཀྱིས་ཆགས་མི་བྱ། ། སྔགས་ཟློས་ཆོ་ག་ལ་གནས་པས། ། ལུས་དང་ངག་དང་ཡིད་ཀྱིས་ཀྱང་། ། ཟས་དང་དེ་བཞིན་སྤྱོད་པ་ལ། ། མ་བསྡམས་པར་ནི་ཡོང་མི་བྱ། ། སྔགས་ཟློས་ཁྱིམ་པ་མཁས་ པ་ཡིས། ། ཁ་དོག་བསྒྱུར་བའི་གོས་མི་བགོ། ། དེ་བཞིན་རྙིངས་དང་དྲི་མ་ཅན། ། གོས་གཅིག་པར་ནི་ཡོང་མི་བྱ། ། བདག་ལ་སྨད་པར་མི་བྱ་ཞིང་། ། རང་ལ་མི་དགར་མི་བྱ་སྟེ། ། སྐྱོ་བར་ཡང་ནི་མ་གྱུར་དང་། ། ནན་གྱིས་འགོང་བར་མི་བྱའོ། ། བཀའ་ལན་སྩལ་པ་མ་ གཏོགས་པ། ། བདག་གིས་གསང་སྔགས་གཏང་མི་བྱ། ། གཏི་མུག་བློས་ནི་མི་སྨད་ཅིང་། ། བསྒྲིམ་པ་ལྷོད་པར་མི་བྱའོ། ། ཡིད་ནི་གཞན་དུ་མ་གྱུར་དང་། ། བསམ་པ་མང་པོ་མ་ཡིན་དང་། ། མི་གཙང་ཆགས་པའི་སེམས་མེད་པར། ། ཟློས་པ་པོས་ནི་གསང་སྔགས་གདོན། ། གདོན་གྱི་ལས་རྣམས་མི་བྱ་ཞིང་། ། བསྲུང་དང་སླར་བཟློག་མི་བྱའོ། །
BOརང་གི་སྔགས་སམ་གཞན་གྱིས་ཀྱང་། ། ཟློས་པས་དུག་གི་ལས་མི་བྱ། ། སྒྲུབ་ལ་དགོས་པ་མ་གཏོགས་པར། ། གསང་སྔགས་གཞན་དུ་སྤྱད་མི་བྱ། ། འགྲན་པ་དང་ནི་སད་ཕྱིར་ཡང་། ། བདག་གིས་གསང་ སྔགས་མི་སྦྱར་རོ། ། བློ་ལྡན་གྱིས་ནི་དུས་གསུམ་བཟླས། ། དུས་གསུམ་དུ་ནི་ཁྲུས་བྱས་ཏེ། ། མཚོ་ལ་སོགས་པའི་ཆུ་ལ་ནི། ། སྔགས་ཀྱིས་བཏབ་སྟེ་བཀྲུ་བར་བྱ། ། ཨོྃ་ཧ་ན་བཛྲི་བཛྲེ་ན་ཧ། ས་ལ་ལན་གསུམ་བཟླས་པ་ནི། ། རོ་སྟོད་བསྐུ་ལ་སོགས་པ་དང་། ། ལུས་ ཀྱི་བྱ་བ་ཀུན་བྱས་ཏེ། ། སྒྲུབ་པ་པོས་ནི་ཁྲུས་བྱའོ། ། ཨོྃ་བཛྲ་ཏཱ་ར་ཧཱུྃ། ལས་རྣམས་ཀུན་ལ་བློ་ཅན་གྱིས། ། སྔགས་འདི་ཆུ་ལ་བཏབ་པ་ཡིས། ། ཐོག་མ་བསལ་བར་བྱས་ནས་སུ། ། དེ་ནས་ལས་རྣམས་བརྩམ་པར་བྱ། ། ན་མོ་བཛྲཱ་ཡ། ཧཱུྃ་ཧ་ན་དྷུ་ན་མ་ཐ་བི་ ངྷཱནྶ་ཡ་ཨུཏ་ས་ར་ཡ་ཕཊ། དེ་ནས་མཁས་པས་ཆུ་ལ་ནི། ། ལག་པས་ད་ཀྲུག་ཅིང་བཟླས་པར་བྱ། ། ཡིད་ལ་གཙང་མར་གྱུར་བར་དུ། ། གསང་སྔགས་འདི་ཡང་བརྗོད་པར་བྱ། ། ན་མོ་ར་ཏྣ་ཏྲ་ཡཱ་ཡ། ནམ་ཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་ ཀྲོ་དྷཱ་ཡ། མ་ཧཱ་དྃཥྚོཏྐཊ་བྷཻ་ར་བཱ་ཡ། ཏདྱ་ཐཱ། ཨོྃ་ཨ་མྲྀ་ཏ་ཀུཎྜ་ལི། ཁ་ཁ་ཁཱ་ཧི་ཁཱ་ཧི། ཏིཥྛ་ཏིཥྛ།
BOབནྡྷ་བནྡྷ། ཧ་ན་ཧ་ན། ད་ཧ་ད་ཧ། གརྫ་གརྫ། བི་སྥོ་ཊ་ཡ་བི་སྥོ་ཊ་ཡ། སརྦ་བིགྷ་བི་བི་ནཱ་ཡ་ཀྃ ། མ་ཧཱ་ག་ཎ་བ་ཏི་ཛཱི་བི་ཏཱནྟ་ཀ་རཱ་ཡ་སྭ་ཧཱ། གསང་སྔགས་བཟླས་པའི་ཆུ་དེ་ཡིས། ། དེ་ནས་ཁྲུས་ནི་ཅི་དགར་བྱ། ། ཁྲུས་བྱེད་ཚེ་ན་སྔགས་འདི་ནི། ། ཡིད་ཀྱིས་ཡང་དང་ཡང་དུ་བཟླས། ། ཨོྃ་ཨ་མྲྀ་ཏེ་ཧཱུྃ་ཕཊ། ཁྲུས་བྱས་ཟིན་ནས་འདི་ཉིད་ཀྱིས། ། ཆུ་ལ་ཕྱིར་ཡང་བཟླས་ནས་ནི། ། སྤྱི་བོར་སྙིམ་པ་གསུམ་བླུགས་ཤིང་། ། ཁྲུས་ཚེ་སྒྲུབ་པོས་མི་སྨྲ་བྱ། ། དེ་ནས་གསང་ སྔགས་འདི་ཟློས་ཤིང་། ། སྤྱི་གཙུག་དག་ཀྱང་བཅིང་བར་བྱ། ། ཨོྃ་སུ་སིདྡྷི་ཀ་རི་སྭཱ་ཧཱ། དེ་ནས་ཉེ་རེག་ཡང་བྱས་ནས། ། ལས་ཀུན་བྱེད་པའི་གསང་སྔགས་ཀྱིས། ། ནན་ཏན་དུ་ནི་བསྲུང་བྱས་ཏེ། ། ཟློས་ཤིང་རང་གི་རིག་སྔགས་བཀྲུ། ཨོྃ་ཀཱི་ལི་ཀཱི་ལ་བཛྲ་ཧཱུྃ་ཕཊ། ཅི་ཙམ་འདོད་པར་ བཟླས་ནས་སུ། ། མཁས་པས་ལྷ་ཡི་གནས་སུ་འགྲོ། ། དེ་ཡི་བར་དུ་མི་ཁྲོ་ཞིང་། ། འདོད་ཆགས་ཅན་དུ་མི་བྱའོ། ། ལྷ་ལ་གཞོལ་བའི་ཡིད་ཀྱིས་སུ། ། མ་ཡེངས་པར་ཡང་འགྲོ་བར་བྱ། ། སྡོམ་པ་དག་ནི་གཟུང་བ་དང་། ། ནན་ཏན་དུ་ནི་དམ་ཚིག་བསྲུང་། ། བཟླས་བརྗོད་ཆོ་ག་མཁས་ པ་ཡིས། །
BOབཟླས་བརྗོད་བྱ་ལ་བརྩོན་པ་དང་། ། རྟག་ཏུ་དཀྱིལ་འཁོར་བྱ་བ་དང་། ། གླེགས་བམ་དག་ཀྱང་རྟག་ཏུ་བཀླག ། མཁས་པས་མཆོད་རྟེན་རྟག་ཏུ་གདབ། ། དགེ་བའི་ཕྱོགས་ཀྱང་རྟག་ཏུ་བྱ། ། སྒྲུབ་པ་པོ་ནི་བློ་ཅན་གྱིས། ། དུས་གསུམ་དུ་ཡང་སྐྱབས་སུ་འགྲོ། ། དུས་ གསུམ་དུ་ཡང་སྡིག་པ་བཤགས། ། དུས་གསུམ་བྱང་ཆུབ་སེམས་ཀྱང་བསྐྱེད། ། རྒྱུད་མཐོང་ཆོ་ག་ཤེས་པ་ཡིས། ། དུས་གསུམ་དུ་ཡང་སྨོན་ལམ་གདབ། ། ཆོ་གར་སྤྱད་པ་དེ་དང་དེ། ། ཇི་ལྟར་འདོད་པར་ཅི་ནུས་བྱ། ། རྟག་ཏུ་གཏོང་ལ་བརྩོན་པ་དང་། ། འཇུངས་བྲལ་ སྙིང་རྗེ་ལྡན་པ་དང་། ། རྟག་ཏུ་བཟོད་ཅིང་བྱམས་པར་ལྡན། ། རྟག་ཏུ་བརྩོན་འགྲུས་ལྡན་པར་བྱ། ། རྗེས་སུ་དྲན་པ་དྲུག་རྣམས་ཀྱང་། ། བསམ་པ་ངེས་པས་རྟག་ཏུ་བསྒོམ། ། རྣམ་པ་སྣ་ཚོགས་ཆོས་མཉན་ནས། ། མོས་པ་རྣམ་པར་སྤྱད་པར་བྱ། ། གསང་སྔགས་ཆོ་ ག་ཞིབ་བཀླག་ཅིང་། ། སྔགས་དང་ཕྱག་རྒྱ་རྣམས་ཀྱང་མཆོད། ། ཆོ་ག་ལས་ནི་འབྱུང་བ་བཞིན། ། བློ་དང་ལྡན་པས་དཀྱིལ་འཁོར་བྲི། ། ཡང་དག་ལྟ་བ་ངེས་གྱུར་ཅིང་། ། བྱང་ཆུབ་སེམས་ནི་བརྟན་བྱས་ལ། ། དགེ་སློང་ལ་སོགས་འཁོར་བཞི་རྣམས། ། མཁས་པས་ རྟག་ཏུ་གཟུང་བར་བྱ། །
BOདམ་ཚིག་ཕྱག་རྒྱ་བཅིངས་ནས་སུ། ། རང་གི་གསང་སྔགས་རྒྱུད་རྣམས་བསྟན། ། མཁས་པས་གསང་སྔགས་ལུང་གི་རྣམས། ། ཐམས་ཅད་ཡང་དག་རྒྱས་པར་བྱ། ། སྒྲུབ་པ་པོས་ནི་ཚེས་བརྒྱད་དང་། ། བཅུ་བཞི་དང་ནི་{བཅྭ་,བཅོ་}ལྔ་དང་། ། ཆོ་འཕྲུལ་ གྱི་ནི་ཟླ་ཕྱེད་ལ། ། ཁྱད་པར་དུ་ནི་མཆོད་པར་བྱ། ། བཟླས་བརྗོད་སྦྱིན་སྲེག་མཆོད་པ་དང་། ། དེ་བཞིན་སྡོམ་པ་གཟུང་བུ་དང་། ། ཁྱད་པར་དུ་ཡང་བསོད་ནམས་ལ། ། གུས་ཤིང་མངོན་པར་བརྩོན་པར་བྱ། ། མཁས་པས་སྔགས་ནི་འདི་ཉིད་ཀྱིས། ། བརྒྱ་འམ་ཡང་ན་སྟོང་ དག་ཏུ། ། མངོན་པར་བསྔགས་པ་བྱས་པ་ཡིས། ། ལས་ཀྱི་རྡོ་རྗེ་རྟག་ཏུ་བཅང་། ། ཨོྃ་དྷུ་ན་བཛྲ་ཧ། གནམ་ལྕགས་ཕོབ། པའི་ཤིང་དག་གམ། ། ནིམ་པའམ་དུར་ཁྲོད་མགལ་དུམ་མམ། ། ཙནྡན་དག་གམ་གཞན་ཡང་རུང་། ། རྡོ་རྗེ་རྩེ་མོ་གསུམ་པ་བྱ། ། ལེགས་པར་ གྲུབ་བྱེད་ཅེས་བྱ་བ། ། དེ་ནི་བློ་ལྡན་ལག་གཡོན་གྱིས། ། བཟླས་བརྗོད་སྦྱིན་སྲེག་ལ་སོགས་པའི། ། ལས་ལ་དེ་ནི་གཟུང་བར་བྱ། ། རྡོ་རྗེ་དེ་ནི་བཅངས་པ་ཡིས། ། བགེགས་དང་ལོག་འདྲེན་ཐམས་ཅད་དང་། ། གང་དག་གནོད་པ་བྱེད་པ་རྣམས། ། ཤིན་ཏུ་སྐྲག་ནས་འབྱར་བར་ འགྱུར། ། དེ་ཡང་གསང་སྔགས་དེ་ཉིད་ཀྱིས། །
BOམཁས་པས་རྟག་ཏུ་མཆོད་པར་བྱ། ། ཙནྡན་དམར་པོས་བསྐུས་ནས་ནི། ། བཞག་སྟེ་མངོན་པར་སྔགས་ཀྱིས་བཟླས། ། ལས་ཀྱི་རྡོ་རྗེ་ཞེས་བྱ་བ། ། འདི་ནི་རྨད་ཀྱི་ལས་ཀྱང་བྱེད། ། འདི་ནི་སྒྲུབ་པ་པོ་ རྣམས་ལ། ། གཅིག་ཏུ་གཅེས་སྤྲས་བྱེད་པར་བསྒྲགས། ། སྒྲུབ་པ་བཟླས་བརྗོད་བྱེད་པ་ན། ། རིག་སྔགས་འདི་ནི་བརྒྱར་བཟླས་པའི། ། སྤོས་ཀྱིས་བྱུགས་པའི་གདུ་བུ་དག ། རྟག་ཏུ་ལག་ལ་གདགས་པར་བྱ། ། ཨོྃ་ཀུ་ལནྡྷ་རཱི་བནྡྷ་བནྡྷ་ཧཱུྃ་ཕཊ། རིག་སྔགས་ཕྱག་རྒྱ་ཆེན་པོ་ འདི། ། མཱ་མ་ཀཱི་ཞེས་བྱ་བར་གྲགས། ། རིག་སྔགས་ཐམས་ཅད་སྒྲུབ་པ་དང་། ། དེ་བཞིན་བྱིན་སྐྱེད་སྐྱོང་བར་བྱེད། ། འདིས་ནི་བསྲུང་བ་ལ་སོགས་པའི། ། ལས་རྣམས་ཐམས་ཅད་བྱར་ཡང་རུང་། ། འདི་ནི་རིག་སྔགས་ཐམས་ཅད་དང་། ། རྡོ་རྗེ་འཛིན་པའི་ཡུམ་ཡིན་ནོ། ། ཕྱག་ན་རྡོ་རྗེའི་རིགས་ལས་ནི། ། རུ་དྲཱ་ཀྵ་ཡི་གདུ་བུ་བྱ། ། བགྲང་ཕྲེང་ལ་སོགས་དབྱེ་བ་ཡིས། ། རིག་སྔགས་གཞན་ལ་འང་ཤེས་པར་བྱ། ། གཙུག་ཏོར་པདྨའི་རིགས་དག་ལ། ། རིག་སྔགས་ཆེན་མོ་སྤྱན་དང་ནི། ། གོས་དཀར་ཅན་ནི་གང་ཡིན་པ། ། དེ་ཡིས་དེ་ཡི་ མདུན་དུ་བཟླས། ། ཨོྃ་རུ་རུ་སྥུ་རུ་ཛྭ་ལ་ཏིཥྛ་སིདྡྷ་ལོ་ཙ་ནི།
BOསརྦ་ཨརྦ་སཱ་དྷ་ནི་སྭཱ་ཧཱ། དཀོན་མཆོག་གསུམ་ལ་ཕྱག་འཚལ་ལོ། ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་ལ་ཕྱག་འཚལ་ལོ། ། མཐོང་བ་དང་ནི་ཐོས་པ་དང་། ། རེག་པ་དང་ནི་ དྲན་པའང་རུང་། ། བདག་ནི་སེམས་ཅན་ཐམས་ཅད་ཀྱི། ། ནད་རྣམས་ཀུན་གྱི་གསོས་གྱུར་ཅིག ། ཏདྱ་ཐཱ། ཀ་ཊེ། བི་ཀ་ཊེ། ནི་ཀ་ཊེ། ཀ་ཊ། བི་ཀ་ཊ། ཀ་ཊྃ། ཀ་ཊེ་བྷ་ག་བ་ཏི་བི་ཛ་ཡེ་སྭཱ་ཧཱ། འདི་དག་ཉིད་ཀྱིས་དེ་ལ་ནི། ། བགེགས་ཀྱིས་ཟིལ་གྱིས་ནོན་མི་འགྱུར། ། དེ་དག་བརྗོད་ པས་མྱུར་དུ་ནི། ། དངོས་གྲུབ་ཐོབ་ཅིང་གཙང་བར་འགྱུར། ། རིགས་ཀྱི་སྙིང་པོ་འབྲུ་གསུམ་པས། ། སོ་སོ་བཟླས་བརྗོད་བྱས་པ་ཡིས། ། ཀུ་ཤ་ཡི་ནི་བསང་བྱེད་ཀྱང་། ། སྲིན་ལག་ལ་ནི་གདགས་པར་བྱ། ། ཛི་ན་ཛིཀ་ཨཱ་རོ་ལིཀ། བཛྲ་དྷྲྀཀ ། མཆོད་དང་བཟླས་བརྗོད་སྦྱིན་སྲེག་ལ། ། དེ་ནི་ རྟག་ཏུ་བཅང་བར་བྱ། ། སྒྲུབ་པ་པོས་ནི་འབད་པ་ན། ། འདིས་ན་ལག་པ་གཙང་བར་འགྱུར། ། བུ་མོས་བཀལ་བའི་སྐུད་པ་ནི། ། ལེ་བརྒན་རྩིའམ་གུར་གུམ་དུ། ། བཙོས་པ་བཟླས་བརྗོད་སྟོང་བྱས་ཏེ། ། དེ་ནས་མདུད་པ་བདུན་བོར་ནས། ། སོད་ལ་རིག་སྔགས་འདི་ཡིས་ནི། ། རང་གི་རྐེད་པར་བཅིང་བར་བྱ། །
BOའདིས་ནི་ཟློས་པ་པོ་དག་ག ། ཁུ་ཆུ་རྟག་ཏུ་བཀག་པར་འགྱུར། ། ཨོྃ་ཧ་ར་ཧ་ར་བནྡྷ་ནི་ཤུ་ཀྲ་དྷ་ར་ཎཱི་སིནྡྷ་ཨརྠ་སྭཱ་ཧཱ། བཟླས་བརྗོད་སྦྱིན་སྲེག་ཆོ་ག་ལ། ། རྟག་ཏུ་སྟོད་གཡོགས་བགོ་བར་བྱ། ། ཉལ་དང་འཕྲེས་ལ་ཉེས་པ་མེད། ། དེ་ཡང་མངོན་པར་ བསྔགས་པར་བྱ། ། ཕྱི་རོལ་སར་ནི་ཤིང་གི་ལྷམ། ། རྟག་ཏུ་ཡང་ནི་བགོ་བར་བྱ། ། ལྷ་དང་བླ་མ་མཆོད་གནས་ཀྱི། ། གནས་དག་ཏུ་ནི་རྣམ་པར་སྤང་། ། གང་དག་རྟག་ཏུ་བརྩོན་པ་ཡིས། ། ཟློས་པ་དངོས་གྲུབ་འདོད་པ་དེས། ། ལུས་དང་ངག་ཡིད་འཇུག་པ་ཡིས། ། རྟག་ཏུ་མཆོད་ གནས་མཆོད་པར་བྱ། ། མཆོད་རྟེན་མཐོང་ན་ཕྱག་བྱ་ཞིང་། ། དགེ་སློང་མཐོང་ནའང་ཕྱག་བྱའོ། ། ལྷ་དག་མཐོང་ནའང་རིམ་གྲོ་བྱ། ། བླ་མ་མཐོང་ནའང་མཆོད་པར་བྱ། ། ཟབ་མོའི་ཆོས་ནི་བཤད་པ་དག ། ཐོས་ནས་དད་པ་བསྐྱེད་པར་བྱ། ། བྱང་ཆུབ་སེམས་དཔའ་ཁྱུ་མཆོག་གི། ། མཐུ་ལ་རབ་ཏུ་དགའ་བར་བྱ། ། སྔགས་ཀྱི་ལས་རྣམས་སྣ་ཚོགས་པ། ། ཐོས་ནས་ཡིད་ནི་སྤྲོ་བར་བྱ། ། སྒྲུབ་པོ་དངོས་གྲུབ་འདོད་པས་ནི། ། བློ་དང་ལྡན་པས་བརྩོན་འགྲུས་བསྐྱེད། ། འདི་བྱའོ་འདི་ནི་མི་བྱའོ་ཞེས། ། རིག་སྔགས་འདུལ་ལས་སྨོས་པ་དང་། ། བསླབ་པའི་སྡོམ་པ་ཉིད་ ལ་ཡང་།
BO། ཟློས་པས་རྟག་ཏུ་རྣམ་པར་བསམ། ། རང་གི་བདེ་ལ་ཆགས་པ་དག ། ཉིན་མཚན་དུ་ཡང་སྤང་བར་བྱ། ། འདི་དག་བྱས་ནས་འདི་བྱའོ་ཞེས། ། མི་གཡེལ་བར་ནི་གྱུར་པར་བྱས། ། ཉིན་པར་བག་མེད་བྱས་པ་དག ། མཚན་མོ་སོ་སོར་བཤགས་པར་བྱ། ། ནུབ་མོ་བྱས་ན་ནང་པར་ བཤགས། ། ལེགས་པར་བྱས་ལ་མངོན་དགའ་བྱ། ། བཟླས་བརྗོད་སྦྱིན་སྲེག་གཙང་སྦྲ་བྱ། ། རིག་སྔགས་མཆོག་དང་རང་སྡོམ་དང་། ། རིག་སྔགས་འདུལ་བ་དག་ལ་ཡང་། ། སྒྲུབ་པ་པོས་ནི་ནན་གྱིས་གནས། ། རིག་སྔགས་ཀྱི་འདུལ་བ་རིམ་པར་བྱེ་བའོ། ། ། ། ཞི་བ་དང་ནི་རྒྱས་ པ་དང་། ། དྲག་ཤུལ་སྤྱད་པ་ཉིད་གསུངས་པ། ། ཀུན་ལ་བྱེ་བྲག་མེད་པར་ནི། ། ངས་ནི་རྣམ་པ་གསུམ་དུ་བསྒྲགས། ། གསང་སྔགས་ཁ་ཅིག་འཕགས་པ་སྟེ། ། དེ་ལ་ཁ་ཅིག་ལྷ་ཡི་ཡིན། ། ཁ་ཅིག་ས་བླའི་ཡིན་པར་གསུངས། ། ཐམས་ཅད་རིགས་ནི་གསུམ་ དུ་འདུས། ། དེ་རྣམས་མེ་ཏོག་སྣ་ཚོགས་ནི། ། ཐང་ལས་སྐྱེས་དང་ཆུ་ལས་སྐྱེས། ། ཇི་ལྟར་ཕྱེ་བ་བློ་ཅན་གྱིས། ། མངོན་པར་བསྔགས་ཏེ་དབུལ་བར་བྱ། ། གཙང་ཞིང་གཙང་མར་སྐྱེས་པ་ཡི། ། ལྷ་རྫས་ཀྱི་ནི་མེ་ཏོག་འདི། ། བདག་གི་དད་པས་དབུལ་ལགས་ཀྱིས། ། བཞེས་ ནས་བདག་ལ་དགྱེས་པར་མཛོད། ། ཨོྃ་ཨཱ་ཧ་ར་ཨཱ་ཧ་ར།
BOསརྦ་བིདྱཱ་དྷ་ར་པཱུ་ཛི་ཏེ་སྭཱ་ཧཱ། མེ་ཏོག་དཀར་པོ་དྲི་ཞིམ་པ། ། སངས་རྒྱས་བཅོམ་ལྡན་འདས་ལ་དབུལ། ། མེ་ཏོག་དཀར་པོ་ཆུ་སྐྱེས་རྣམས། ། འཕགས་པ་སྤྱན་རས་གཟིགས་ལ་དབུལ། ། རབ་ཏུ་དྲི་ཞིམ་སྣ་ཚོགས་པ། ། ཕྱག་ན་རྡོ་རྗེ་ཉིད་ལ་དབུལ། ། མ་སྨོས་པ་ནི་གཞན་རྣམས་ལ། ། གང་ཡང་རུང་བ་ཐམས་ཅད་དབུལ། ། སྣ་མ་པདྨ་པ་ཏ་ལ། ། ནཱ་ག་གེ་སར་ཙམ་པ་ཀ། ། བ་ཀུལ་ཀུ་མུད་སཱ་ལུ་དང་། ། མ་ལི་ཀུ་ཡ་ཡུ་ཏི་ཀ། ། ཀུ་ར་བ་ཀ་ཤེ་པ་ལི། ། ཀ་དྃ་མ་དུ་བུནྟི་ཀ། ། དྲི་ན་ཤུལ་ཡཾ་ཨ་ཤོ་ཀ། ། ཀླུ་ཤིང་མེ་ཏོག་པུ་ན་ཀ། ། ན་བ་མ་ལི་ད་མ་ན། ། ཨ་མྲའི་དོག་པ་ཀ་ཐ་ར། ། མུ་ཙུ་ཀུཎྜ་ཀཉྩ་ན། ། ཤིང་གི་ཨུཏྤལ་སྤྲིན་ཏྲི་ཀ། ། ཨུཏྤལ་ཏ་ཀར་ཀུཾ་ཌ་དང་། ། གཞན་ཡང་ཀ་ར་བཱི་ར་སོགས། ། གྲོང་དང་དགོན་པ་དག་དང་ནི། ། ཆུ་སྐྱེས་ཐང་སྐྱེས་མང་པོ་དང་། ། འདི་ལ་སོགས་པའི་ མེ་ཏོག་དག ། ཆོ་ག་བཞིན་དུ་ཤེས་བྱ་སྟེ། ། རིགས་དང་ལས་ཀྱི་དབྱེ་བ་ཡིས། ། ལྷ་རྣམས་མཆོད་ལ་མཁས་པས་སྦྱར། ། སྣ་མ་ཏ་ཀར་ཀུནྡ་དང་། ། དེ་བཞིན་མ་ལི་ཡུ་ཏི་ཀ ། ནཱ་ག་གེ་སར་འདི་དག་རྣམས། ། དེ་བཞིན་གཤེགས་པའི་རིགས་ལ་གསུངས། ། ཨུཏྤལ་ཀུ་མུ་ད་པདྨ་དང་། ། ས་ལ་བྲྀཏྟི་ཤེ་པའི། །
BOདེ་བཞིན་ཏ་ཀར་པུ་ན་ཀ། ། འདི་དག་པདྨའི་རིགས་ལ་ཤིས། ། ནི་ལོཏྤལ་ལ་སོགས་དང་། ། པྲི་ཡང་ཀུ་ཡི་དོག་པ་དང་། ། གང་གཞན་རུང་བར་བསྒྲགས་པ་སྟེ། ། འདི་དག་རྡོ་རྗེའི་རིགས་ལ་གསུངས། ། ཁྱད་པར་དུ་ནི་དྲི་ཞིམ་དང་། ། ཁ་དོག་དཀར་སོགས་དབྱེ་ བ་ཡིས། ། ཞི་བ་ལ་སོགས་ལས་རྣམས་ལ། ། མེ་ཏོག་ཐམས་ཅད་སྦྱར་བར་བྱ། ། ཞི་བ་ལ་ནི་མངར་བ་མཆོག ། དྲག་ཤུལ་སྤྱོད་ལ་ཁ་བ་སྟེ། ། དེ་ལས་གཞན་པ་རོ་ཅན་དག ། རྒྱས་པའི་ལས་ལ་ཤེས་པར་བྱ། ། ད་ཚ་གེལ་པ་སྡོང་པོ་དང་། ། དེ་བཞིན་ཁྲི་ཤིང་ལྡུམ་བུ་དག ། ལྷབ་ ལྷུབ་རྣམས་དང་ཤིང་ལོ་དང་། ། མེ་ཏོག་རྣམ་པ་སྣ་ཚོགས་དག ། ས་བླ་པ་ལ་ཤིས་པ་ཡིན། ། སྣ་མ་དེ་བཞིན་གཤེགས་རིགས་ལ། ། པདྨ་པདྨའི་རིགས་ལ་ཤིས། ། ཨུཏྤལ་སྔོན་པོ་རྡོ་རྗེ་ཡི། ། རིགས་ལ་མཆོག་ཏུ་བསྒྲགས་པ་ཡིན། ། དྲི་དང་ཁ་དོག་མཆོག་གི་རྣམས། ། མཆོག་གི་ལས་ལ་ཤེས་པར་བྱ། ། དམན་ཅིང་ཤིན་ཏུ་དམན་པ་དང་། ། ལྷག་མའི་ལས་ལ་ཤེས་པར་བྱ། ། དོག་པ་རྣམ་པ་སྣ་ཚོགས་དང་། ། ཁྲི་ཤིང་མེ་ཏོག་གང་ཡིན་པ། ། དེ་ལ་མོ་ཡི་མིང་ཅན་གྱི། ། རིག་སྔགས་གང་ཡང་རུང་བ་དགྱེས། ། ཀར་བཱི་དམར་པོ་འམ། ། ཡང་ ན་དཀར་པོ་ཁྱད་པར་དུ། །
BOཁྲོ་བོ་རྣམས་དང་ཕོ་ཉ་མོ། ། གཟི་བརྗིད་ཅན་རྣམས་ཐམས་ཅད་དགྱེས། ། ས་ལ་ཀི་ལ་ཀུ་ཏ་ཛ། ། ཀནྱི་ཀ་ར་ཨ་སན་མཆོག ། བིལ་བའི་མེ་ཏོག་ཀ་ཐ་ར་ན། ། ལས་ཀུན་བྱེད་པ་ཐམས་ཅད་དང་། ། མེ་ཏོག་ཕྲེང་རྒྱུད་མང་པོ་དང་། ། ཐམས་ཅད་ ལས་རྣམས་ཀུན་ལ་འདོད། ། སྦྱོར་བ་འདི་དག་ཉིད་ཀྱིས་ནི། ། སིལ་མ་བཀྲམ་པའང་ཤེས་པར་བྱ། ། མེ་ཏོག་རིགས་ནས་མ་སྨོས་དང་། ། ཚེར་མ་ཅན་དང་དྲི་དཀུ་དང་། ། ཁ་དང་ཚ་བ་ལས་བྱུང་དང་། ། ཁ་དོག་ངན་པ་རྣམ་པར་སྤང་། ། ཨ་དྷི་མུཀྟ་མང་གོ་ལ། ། ནི་བ་ལ་ སོགས་སྨད་པ་དང་། ། ཛ་བ་དང་ནི་ཀེ་ཊ་ཀའི། ། མེ་ཏོག་ཁྱད་པར་དུ་ཡང་སྤང་། ། ཤ་མ་མེ་ཏོག་པྲི་ཡང་ཀུ། ། འབྲས་ཡོས་ཏིལ་དང་ལེ་བརྒན་རྩི། ། དུར་བ་ལ་སོགས་ཐམས་ཅད་ནི། ། གསང་སྔགས་ཐམས་ཅད་བཞེད་པ་ཡིན། ། གང་དུ་གཞན་རྣམས་མ་རྙེད་ན། ། འབྲས་ཀྱི་འབྲུ་ ནི་ར་ངས་པའང་རུང་། ། གཅིག་རྐྱ་ཐུབ་པ་འདི་ཡིས་ཀྱང་། ། མཆོད་པ་ལེགས་པར་བྱ་བར་བཤད། ། གཞན་གྱི་མེ་ཏོག་གཞན་དག་ལ། ། བྱེའུ་རུག་དན་ཏ་མེ་རུ་པ། ། ཏ་མ་ལ་ཀྲིཥྞ་མ་ལ་ཀི། ། མ་དུ་ལུང་ག་ཨརྫ་ཀ ། མེ་ཏོག་ལ་སོགས་ལོ་མའང་དབུལ། ། བ་ལ་ཀ་ལ་སོགས་རྩ་ བ་དང་། ། ལི་ཤི་ལ་སོགས་འབྲས་བུ་དག །
BOམཆོད་པའི་ཕྱིར་ནི་མེ་ཏོག་ཏུ། ། ཆོ་ག་བཞིན་དུ་རབ་ཏུ་དབུལ། ། གཞན་གྱི་མེ་ཏོག་གཞན་དག་ལ། ། གང་ཚེ་མ་འབྱོར་ནས་དབུལ་བ། ། དེ་ཚེ་རང་རིག་གསང་སྔགས་ཀྱིས། ། དེ་ལ་ཡང་ནི་མངོན་པར་བསྔགས། ། བློ་ལྡན་རྒྱུད་ལ་མཁས་པ་ཡིས། ། མ་འབྱོར་ན་ནི་མཐོང་བ་དང་། ། ཐོས་པ་དང་ནི་བྱས་པ་ཡིན། ། མཆོད་པ་གང་ཡང་རུང་བ་བྱ། ། མཆོད་པ་རྒྱ་ཆེར་འབྱོར་ན་ཡང་། ། ཡིད་ལ་གུས་པ་བསྐྱེད་ནས་ནི། ། ཐལ་མོ་སྤྱི་བོར་ལེགས་སྦྱར་ཏེ། ། མཆོད་པ་ཐམས་ཅད་འབྱུང་བར་བྱ། ། ཐེ་ ཚོམ་མེད་པར་བློ་ཅན་གྱིས། ། སེམས་ཀྱིས་རབ་ཏུ་བསྒྲིམས་ནས་ནི། ། རབ་ཏུ་བསྒྲིམས་ཏེ་གང་བྱས་པ། ། མཆོད་པ་དེ་ནི་ཁྱད་པར་ཅན། ། མེ་ཏོག་གི་མཚན་ཉིད་རིམ་པར་ཕྱེ་བའོ། ། ། ། དྲི་ནི་གང་དག་རུང་བ་དང་། ། གསང་སྔགས་ཀུན་ལ་ཤིས་པ་དང་། ། ཟློས་པ་ རྣམས་ལ་དགོས་པ་ཡི། ། དྲི་ཡི་རྫས་རྣམས་བཤད་པར་བྱ། ། གླ་སྒང་ཀུ་ཏྲ་ན་ཊ་དང་། ། རུ་རྟ་ཨུར་ཤིང་བ་ལི་ཀ ། ཨ་གར་རྒྱ་སྤོས་ཤ་རི་བཱི། ། གུར་གུམ་ཙནྡན་བརྞ་ཀ ། བཏྟྲ་ད་ར་སྒྲོན་ཤིང་སྤྲྀབ། ། ཤུག་པ་ཏི་ལ་པརྞི་ཀ ། ལི་ཤི་ཤིང་ཚ་ཀ་ལི་ཡ། ། ཐང་ཤིང་ཨརྫུ་བྲི་ ཡང་ཀུ། ། སཽ་ར་ནྡ་ད་ལ་བ་ག ། ཤི་ལ་བ་ལུ་དེ་བ་དང་། །
BOགསེར་ཕྲོམ་ཤ་ཐི་ཀ་པི་ཐ། ། ཀ་ཊུ་ཀ་དང་ཕ་ལི་ནི། ། ན་ལི་ཤི་བ་ཙམ་པི་དང་། ། སུ་བརྞ་དང་ཤ་ཀ་ལ། ། མ་དུ་ལུང་ག་ཤུན་པར་བཅས། ། བལ་བུ་སྤང་སྤོས་པུ་པྲི་ན། ། མཁན་པ་མུ་ར་བུ་རུ་བ། ། ཀེ་ཤི་ཏ་མལ་བུ་ ན་ག ། སུག་སྨེལ་བྱ་ཁྲ་ན་ཁ་དང་། ། འུ་སུ་བ་སྤི་ལ་བ་ལི། ། ཤ་ཏ་པུཥྤ་ཧ་རེ་ཎུ། ། ཛཱ་ཏི་ཕ་ལ་ཀ་ཀོ་ལ། ། ཀ་ཏུ་པ་ལ་ཙ་རོང་ཀ། སོའུ་ནི་ཡ་དང་དྷ་མ་ཀ ། ཙནྡན་དུ་རུས་པྲ་ཏ་ར། ། ཐང་ཆུ་དང་ནི་ར་ས་དང་། ། གེ་སར་ལ་སོགས་བསྡུས་པ་ལས། ། དྲི་སྦྱོར་བ་ཡི་རྒྱུད་ཤེས་པས། ། བདག་ཉིད་ཇི་ལྟར་འདོད་བཞིན་སྦྱར། ། མེ་ཏོག་འབྲས་བུ་ཐང་ཆུར་བཅས། ། རྒྱལ་བའི་རིགས་ལ་སྦྱར་བར་བྱ། ། ཤུན་པ་སྙིང་པོ་ལ་སོགས་ཅན། ། སྦྱར་བ་པདྨའི་རིགས་ལ་བསྟན། ། སྡོང་བུ་རྩ་བ་ལ་སོགས་ལས། ། སྦྱར་བ་རྡོ་རྗེའི་རིགས་ལ་གསུངས། ། བྱེ་བྲག་ཏུ་ནི་མ་ཕྱེ་ བ། ། ལས་ཀུན་བྱེད་པ་ཐམས་ཅད་ལའོ། ། དེ་བཞིན་གཤེགས་པའི་རིགས་ལ་ནི། ། ཨ་གར་མཆོག་ནི་གཅིག་པུ་དབུལ། ། པདྨ་ཅན་ལ་བློ་ཅན་གྱིས། ། ཙནྡན་དཀར་པོ་གཅིག་པུ་དབུལ། ། གུར་གུམ་གཅིག་པུ་ཁྱད་པར་དུ། ། ཕྱག་ན་རྡོ་རྗེ་ཅན་ལ་དབུལ། ། འདི་དག་ གཅིག་རྐྱ་ཐུབ་པ་སྟེ། ། ག་པུར་གྱིས་ནི་བསྒོ་བར་གསུངས།
BO། རྡོ་རྗེ་འཆང་བ་ཐམས་ཅད་ལ། ། ཙནྡན་དམར་པོ་བཞེད་པ་ཡིན། ། པྲི་ཡང་ཀུ་ལ་སོགས་པའི་དྲི། ། རིག་སྔགས་མོ་ཡི་མིང་ཅན་དགྱེས། ། སྤང་སྤོས་སུག་སྨེལ་འབྲུ་སྦྱར་བ། ། རིག་པའི་རྒྱལ་མོ་རྣམས་ལ་ བསྒྲགས། ། ཙནྡན་གུར་གུམ་ཨ་ཀ་རུ། ། རིག་པའི་རྒྱལ་པོ་ཐམས་ཅད་ལའོ། ། ཤུག་པ་དག་ལ་སྦྱར་བ་ཡིས། ། མངག་གཞུག་རྣམས་ལ་ཤིས་པ་ཡིན། ། གཞན་རྣམས་ལ་ནི་ཕལ་གཞན་གྱིས། ། བྱས་ན་ལྷག་པར་དགྱེས་པར་འགྱུར། ། རིགས་གསུམ་ དག་ནི་ཐམས་ཅད་ཀྱི། ། སྤྱི་ཡི་ལས་རྣམས་ཐམས་ཅད་ལ། ། ཨ་གར་ནག་པོ་གཅིག་པུ་ཉིད། ། ཁྱད་པར་དུ་ནི་རབ་ཏུ་ཤིས། ། ཁ་དོག་དཀར་པོ་ཞི་བ་ལ། ། རྒྱས་པ་ལ་ནི་སེར་པོ་འཕྲོད། ། དྲག་ཤུལ་སྤྱོད་ལ་བསུང་མེད་དང་། ། ཁ་དོག་དམར་པོ་རབ་ཏུ་ཤིས། ། དངོས་གྲུབ་ཆེན་པོ་རྣམས་ལ་དྲི། ། ཐང་ཆུ་འབྲས་བུ་དང་སྦྱར་བའོ། ། འབྲིང་ལ་མེ་ཏོག་སྙིང་པོ་རྣམས། ། ཕལ་ལ་ཕལ་པ་རྣམས་ཀྱིས་བྱ། ། སྲོག་ཆགས་དང་ནི་ཆང་དག་གམ། ། ཚྭ་དང་རྒྱ་སྐྱེགས་དག་དང་ནི། ། དཀུ་བ་དག་གི་དྲི་འདི་རྣམས། ། སྦྱར་བར་ཡང་ནི་མི་བྱའོ། ། ཕྱེ་མ་ དང་ནི་བྱུག་པ་དང་། ། དེ་བཞིན་བསྒོ་བར་བྱ་བ་ལ། ། བསྟན་པ་འདི་ཡི་ཚུལ་གྱིས་ནི། ། ཁ་དོག་རྣམས་ཀྱང་ཤེས་པར་བྱ།
BO། གཙང་ཞིང་གཙང་མ་ལས་བྱུང་བའི། ། ལྷ་རྫས་དམ་པའི་དྲི་འདི་དག ། བདག་གི་དད་པས་དབུལ་ལགས་ཀྱིས། ། བཞེས་ནས་བདག་ལ་དགྱེས་ པར་མཛོད། ། ཨཱ་ཧ་ར་ཨཱ་ཧ་ར། སརྦ་བིརྱཱ་དྷ་ར་པཱུ་ཛི་ཏེ་སྭཱ་ཧཱ། སྒྲུབ་པ་པོ་དང་སྔགས་འདི་དང་། ། རང་གི་སྔགས་ཀྱིས་ཡོངས་བཟླས་ནས། ། བསངས་པའི་དྲི་ནི་ལྷ་རྣམས་ལ། ། ཆོ་ག་བཞིན་དུ་དབུལ་བར་བྱ། ། གཞན་གྱི་དྲི་དང་གཞན་དག་ལ། ། གང་ཚེ་མ་འབྱོར་ནས་ དབུལ་བ། ། དེ་ཚེ་རང་རིག་གསང་སྔགས་ཀྱིས། ། དེ་ལ་ཡང་ནི་མངོན་པར་བསྔགས། ། དྲིའི་མཚན་ཉིད་རིམ་པར་ཕྱེ་བའོ། ། ། ། རིགས་གསུམ་རྣམས་ཀྱི་སྤྱིར་ཡང་ནི། ། ཙནྡན་ཨ་ཀར་གུར་གུམ་གྱིས། ། བདུག་སྤོས་ཐམས་ཅད་རིམ་བཞིན་ དུ། ། རེ་རེ་དག་ལ་སོ་སོར་དགྱེས། ། ཤི་རི་བེ་སྟ་སྲ་རྩི་པོག ། ས་ར་གུ་གུལ་ས་ལི་ཀི། ། ག་པུར་ཅེ་པོག་ལྷ་མ་ཀ། སྦྲང་རྩི་གུ་ཏ་གི་རི་ཙན། ། བུ་ར་མ་གླ་སྒང་ཨ་རུ་ར། ། དུ་རུས་ཨ་ཀར་བྷ་ལ་ཀ། ཙནྡན་སྒྲོན་ཤིང་ཐང་ཤིང་དང་། ། པ་རི་པེ་ལ་ན་ལ་ཀི། ། ཁ་ར་སྤང་ སྤོས་ཨུ་ཤི་ར། ། འབྲས་བུའི་རིགས་སུ་གཏོགས་ལ་སོགས། ། སྦྱོར་བ་རྣམ་པ་སྣ་ཚོགས་དག ། གསང་སྔགས་བདུག་སྤོས་ཕྱིར་གསུངས་སོ། ། དེ་ལ་ཤི་རི་བྷེ་ཏ་ཀ། །
BOལྷ་དང་བཅས་པའི་གསང་སྔགས་ཀྱིས། ། གནོད་སྦྱིན་རྣམས་ནི་གུ་གུལ་འདོད། ། ཅེ་པོག་ལ་ནི་རིག་སྔགས་ དགྱེས། ། གསང་སྔགས་ཕལ་པ་ཐམས་ཅད་ནི། ། སྲ་རྩི་པོག་ལ་ལྷག་པར་དགྱེས། ། ཕོ་ཉ་མོ་རྣམས་སཱ་ལི་ཀི། ། མངག་གཞུག་རྣམས་ལ་ར་ས་གསུངས། ། ཐང་ཆུ་བདུན་གྱི་བདུག་སྤོས་ནི། ། དོན་ཀུན་གྲུབ་པར་ཤེས་པར་བྱ། ། ཞི་བ་ལ་སོགས་ལས་རྣམས་ལ། ། ཐམས་ ཅད་དུ་ནི་སྦྱར་བར་བྱ། ། མཆོག་ལ་ཐང་ཆུའི་བདུག་པ་སྟེ། ། སྙིང་པོ་རྣམས་ནི་འབྲིང་ལ་གསུངས། ། ལྷག་མ་རྫས་ཀྱི་བདུག་སྤོས་ནི། ། ཕྲན་ཚེགས་ཀྱི་ནི་ལས་རྣམས་ལ། ། ག་པུར་དུ་རུས་ཨ་ག་རུ། ། གསུམ་ནི་དྲི་ཞིམ་མཆོག་ཅེས་བྱ། ། དྲི་ཞིམ་ལྔ་ནི་དེ་རྣམས་ལ། ། ཙནྡནདང་ནི་བུ་རམ་མོ། ། ར་ས་དང་ནི་ཞོས་བསྣན་ན། ། དྲི་ཞིམ་རྣམ་པ་བདུན་ཞེས་བྱ། ། བདུག་སྤོས་དམ་པ་དེ་གསུམ་ནི། ། ལས་རྣམས་ཀུན་ལ་གཙོ་བོར་གསུངས། ། གསང་སྔགས་ཕྲན་ཚེགས་ཐམས་ཅད་ལ། ། བུ་ར་མ་སྦྲང་རྩི་ཨ་རུ་རའི། ། བདུག་སྤོས་དེ་དག་སྦྱར་ ན་ནི། ། པདྨ་རྣམས་དང་འཕྲོད་པར་འགྱུར། ། བུ་རམ་རྡོ་རྗེ་ཨ་རུ་ར། ། ཁ་ར་སྦྲང་རྩི་པོག་དང་ལྔའི། ། བདུག་སྤོས་ཞི་བ་ལ་སོགས་པའི། ། ཆོ་ག་ཀུན་ལ་སྦྱར་བར་བྱ། །
BOའབྱོར་ན་གང་ཡང་རུང་བ་ཡི། ། དྲི་ཞིམ་གཅིག་རྐྱ་ཐུབ་པ་དབུལ། ། ཡང་ན་རྫས་རྣམས་ཅི་ འབྱོར་ལས། ། བདུག་སྤོས་སུ་ནི་སྦྱར་བར་བྱ། ། བློ་ལྡན་གྱིས་ནི་རྣམ་པ་འདིས། ། རིགས་དང་མི་རིགས་རྣམས་དཔྱད་དེ། ། དྲི་ཞིམ་རྫས་ལས་སྦྱར་བ་ཡི། ། བདུག་སྤོས་ཆོ་ག་བཞིན་དུ་དབུལ། ། རིལ་བུ་གོང་བུ་ཕྱེ་མ་དང་། ། རེང་བུ་དང་ནི་རྣམ་པ་བཞི། ། བདུག་སྤོས་རིགས་ སུ་ཤེས་བྱས་ནས། ། ལས་རྣམས་སོ་སོར་སྦྱར་བར་བྱ། ། ཞི་བ་ལ་ནི་རིལ་བུ་མཆོག ། རྒྱས་པ་ལ་ནི་གོང་བུ་མཆོག ། དྲག་ཤུལ་སྤྱོད་ལ་ཕྱེ་མ་ཡིས། ། ཐམས་ཅད་ལ་ནི་རེང་བུ་ཤིས། ། བུ་རམ་གྱིས་ནི་རི་ལུ་བྱ། ། སྦྲང་རྩི་སོགས་པས་གོང་བུ་བྱ། ། ཕྱེ་མ་རྣམས་ནི་ཐང་ཆུས་ བསྲེ། ། རེང་བུ་མར་དང་ལྡན་པ་ཤིས། ། བློ་ལྡན་གྱིས་ནི་ངན་པ་དང་། ། སེན་མོ་རྒྱ་སྐྱེགས་ཐམས་ཅད་དང་། ། དཀུ་བ་དང་ནི་ཆང་སོགས་ཀྱིས། ། བདུག་སྤོས་སྦྱར་བར་མི་བྱའོ། ། དྲི་ཡི་རྒྱས་པ་ལྷ་ཡི་ཟས། ། ནགས་ཚལ་བཅུད་ནི་ཡིད་འོང་འདི། ། བདག་གི་དད་པས་ འབུལ་ལགས་ཀྱིས། ། བདུག་སྤོས་འདི་ནི་བཞེས་སུ་གསོལ། ། ཨཱ་ཧ་ར་ཨཱ་ཧ་ར། སརྦ་བིདྱཱ་དྷ་ར་པཱུ་ཛི་ཏེ་སྭཱ་ཧཱ། སྒྲུབ་པོས་དང་པོ་སྔགས་འདི་དང་། །
BOརང་རིག་སྔགས་ཀྱིས་ཡོངས་བཟླས་ནས། ། བསངས་པའི་བདུག་སྤོས་ལྷ་རྣམས་ལ། ། ཆོ་ག་བཞིན་དུ་དབུལ་བར་བྱ། ། གཞན་ གྱི་བདུག་སྤོས་གཞན་དག་ལ། ། གང་ཚེ་མ་འབྱོར་ན་དབུལ་བ། ། དེ་ཚེ་རང་རིགས་སྔགས་ཀྱིས་ནི། ། དེ་ལ་ཡང་ནི་མངོན་པར་བསྔགས། ། བདུག་སྤོས་ཀྱི་མཚན་ཉིད་རིམ་པར་ཕྱེ་བའོ། ། ། ། དེ་ནས་གཞན་ཡང་གསང་སྔགས་ཀྱི། ། ལྷ་ནི་མ་ལུས་པ་དག་ལ། ། ཇི་ ལྟར་བྱས་ན་མཉེས་འགྱུར་བའི། ། མར་མེའི་ཆོ་ག་དོན་བཞིན་བཤད། ། གསེར་རམ་དངུལ་ལམ་ཟངས་མའམ། ། ལྕགས་སམ་ཡང་ན་ཁམ་པ་ལས། ། མར་མེ་བླུགས་པའི་སྣོད་བྱས་ན། ། གསང་སྔགས་ཡོངས་སུ་མཉེས་པར་འགྱུར། ། ལས་རྣམས་བཤད་པའི་བྱེ་བྲག་གིས། ། ཤིང་བལ་དང་ནི་རས་གསར་དང་། ། དུ་གུ་ལ་དང་གསོ་རས་དང་། ། དེ་ལ་སོགས་པའི་སྙིང་པོ་བྱ། ། ཞི་བ་ལ་སོགས་བྱེ་བྲག་གིས། ། དེ་ཡི་མར་ནི་དྲི་ཞིམ་པ། ། འབྲུ་མར་བསུང་ཅན་ཡིད་འོང་བའམ། ། ཡང་ན་དྲི་ཞིམ་མར་གྱིས་བྱ། ། དྲི་ཞིམ་ཤིང་ལས་བྱུང་བའི་མར། ། ཞི་བའི་ལས་ལ་ཤེས་པར་བྱ། ། ཏིལ་མར་གྱིས་ནི་རྒྱས་པ་ལ། ། དྲག་པོ་ལ་ནི་ཡུངས་མར་ཤིས། ། རིག་སྔགས་ཀུན་ལ་ཟར་མའི་མར། ། འབྲས་བུ་ལས་བྱུང་གསང་སྔགས་ལ། ། ཁ་བའི་ཤིང་ལས་བྱུང་བའི་མར། །
BOཕལ་པ་རྣམས་ལ་ཡོངས་སུ་ བསྒྲགས། ། ཤ་ཟ་རྣམས་ལ་ཉ་ཡི་མར། ། གནོད་སྦྱིན་རྣམས་ལ་ཚིལ་བུར་བཤད། ། ཤིན་ཏུ་དམན་པ་གཞན་རྣམས་ལ། ། བྷ་ལ་ཏ་ཀ་ལ་སོགས་མར། ། དུར་ཁྲོད་པ་ནི་ཐམས་ཅད་དང་། ། རོ་ལངས་ལ་སོགས་དངོས་གྲུབ་ལ། ། ཁྱད་པར་དུ་ནི་ཚིལ་ཆེན་གྱི། ། སྣུམ་ནི་རྗེས་ སུ་མཐུན་པ་ཡིན། ། ལས་རྣམས་དག་ནི་ཐམས་ཅད་ལ། ། དམར་སེར་བ་མར་མཆོག་ཏུ་གསུངས། ། ཡང་ན་རྒྱུད་ལས་གསུངས་པ་བཞིན། ། བ་ཡི་ཁ་དོག་རྣམས་ལ་བརྟག ། སྨན་རྣམས་ལས་ནི་བྱུང་བའི་མར། ། དེ་ཀུན་རྒྱས་པའི་ལས་ལ་གསུངས། ། དྲི་ཞིམ་ཐམས་ཅད་ ཞི་བ་ལ། ། དྲག་སྤྱོད་ལ་ནི་དྲི་ང་རྣམས། ། ཆོ་ག་འདི་ཡི་ཚུལ་གྱིས་ནི། ། མཐོང་ངམ་མ་མཐོང་ཐ་དད་པས། ། མཁས་པས་གསང་སྔགས་ཐམས་ཅད་ལ། ། མར་མེའི་ཕྱིར་ནི་སྦྱར་བར་བྱ། ། གདོན་རྣམས་འཇོམས་ཤིང་བཀྲ་ཤིས་ལ། ། དགེ་ཞིང་མུན་པ་རྣམ་སེལ་འདི། ། བདག་ གིས་དད་པས་འབུལ་ལགས་ཀྱིས། ། མར་མེ་འདི་ནི་བཞེས་སུ་གསོལ། ། ཨཱ་ལོ་ཀ་ཡ་ཨཱ་ལོ་ཀ་ཡ། སརྦ་བིདྱཱ་དྷ་ར་པཱུ་ཛི་ཏེ་སྭཱ་ཧཱ། སྒྲུབ་པོས་དང་པོར་སྔགས་འདི་དང་། ། རང་གི་སྔགས་ཀྱིས་ཡོངས་བཟླས་ནས། ། བསངས་པའི་མར་མེ་ལྷ་རྣམས་ལ། ། ཆོ་ག་བཞིན་དུ་དབུལ་བར་བྱ། །
BOགཞན་གྱི་མར་མེ་གཞན་དག་ལ། ། གང་ཚེ་མ་འབྱོར་ནས་དབུལ་བ། ། དེ་ཚེ་རང་རིག་གསང་སྔགས་ཀྱིས། ། དེ་ལ་ཡང་ནི་མངོན་པར་བསྔགས། ། མར་མེའི་མཚན་ཉིད་རིམ་པར་ཕྱེ་བའོ། ། ། ། ཇི་ལྟ་བུ་དག་ལྷ་རྣམས་ལ། ། ཕུལ་ན་དངོས་གྲུབ་ཐོབ་འགྱུར་བའི། ། ལྷ་བཤོས་ ལས་ཀྱི་ཆོ་ག་ཀུན། ། སྔ་མ་བཞིན་དུ་བཤད་པར་བྱ། ། རྩ་བ་རྡོ་གུ་འབྲས་བུ་བཅའ། ། ཅུང་པེང་ལ་སོགས་བཟའ་བ་ཡིན། ། ཚོད་མར་བཅས་པའི་ཁ་ཟས་དག ། མདོར་ན་བཟའ་བ་ཡིན་པར་བཤད། ། ཐུག་པ་དང་ནི་སྐོམ་རྣམས་ནི། ། བཏུང་བ་རྣམ་པ་སྣ་ཚོགས་ཏེ། ། དེ་ལྟར་རྣམ་པ་ བཞི་པོ་ཀུན། ། གཏོར་མ་ལས་ཀྱི་ཆོ་ག་བཤད། ། བི་ཛ་པཱུ་ར་གཅིག་པུ་ནི། ། གསང་སྔགས་ཀུན་ལ་རབ་ཏུ་ཤིས། ། དེ་བཞིན་སེའུ་ཨ་མྲ་དག ། རིགས་གསུམ་ལ་ཡང་ཤེས་པར་བྱ། ། ཞི་བ་ལ་ཡང་མངར་བ་དབུལ། ། མངར་སྐྱུར་དག་ནི་རྒྱས་པ་ལ། ། འབྲས་བུ་སྣ་ཚོགས་རོ་གཞན་ ཅན། ། དྲག་ཤུལ་སྤྱོད་པ་དག་ལ་དབུལ། ། ན་རི་ཀེ་ལ་ཏ་མ་ལམ། ། བིལ་བ་དང་ནི་ནིམ་པའམ། ། དེ་བཞིན་སྨད་པར་བྱ་བ་རྣམས། ། གསང་སྔགས་ཀུན་ལ་དབུལ་མི་བྱ། ། དངོས་གྲུབ་ཆེན་པོ་དག་ལ་ནི། ། མང་ལ་རིན་ཆེན་ཞིམ་པ་བསྒྲགས། ། འབྲིང་ལ་ཞིམ་པ་བར་མ་ལ། ། ཐ་མ་ དག་ནི་ཐ་མ་ལའོ། །
BOའབྲས་བུ་མོ་ཡི་མིང་ཅན་ལ། ། རིག་སྔགས་ཐམས་ཅད་ལྷག་པར་དགྱེས། ། ནགས་ཀྱི་འབྲས་བུ་མི་ཁ་བ། ། རིག་པའི་རྒྱལ་པོ་རྣམས་ལ་ཤིས། ། ཁྲོ་བོ་རྣམས་ལ་བིལ་བ་སྟེ། ། བ་ཏ་ལས་བྱུང་གནོད་སྦྱིན་ལ། ། དཔལ་མོ་ཀུན་ལ་ཀ་པི་ཏ། ། བི་ཡ་ལ་ཛ་མངག་ གཞུག་ལ། ། ལྷག་མ་རྣམ་པ་སྣ་ཚོགས་པ། ། ལྷག་མ་བཞེད་པ་རྣམས་ལ་སྦྱར། ། གྲོང་དང་དགོན་པའི་རྡོ་གུ་ནི། ། ཞིམ་ཞིང་རོ་དང་ལྡན་པ་དང་། ། བི་དྷ་རི་ཡི་རྡོ་གུ་རྣམས། ། དེ་དག་ལས་རྣམས་ཀུན་ལ་བསྔགས། ། གང་དག་ཤིན་ཏུ་མངར་བ་དང་། ། མི་རྣམས་ལྷག་པར་སྲེད་པ་ དང་། ། རི་ལས་སྐྱེས་པའི་རྡོ་གུ་ནི། ། ཁྱད་པར་དུ་ནི་མངར་བ་དང་། ། བི་དང་རི་དང་ཀ་ཤེ་དྲུ། ། བ་ཡང་སེ་དང་ཀུ་ཀུ་ཊི། ། མོན་པའི་དོ་བ་སྨིན་པ་དག ། རྒྱལ་བའི་རིགས་ལ་དབུལ་བར་བྱ། ། ཆུ་ལས་སྐྱེས་པའི་རྡོ་གུ་རྣམས། ། པདྨའི་རིགས་ནི་ཀུན་ལ་ཤིས། ། སྨན་གྱི་རྡོ་གུ་ཐམས་ཅད་ དང་། ། ཁ་བ་དང་ནི་ཚ་བ་དང་། ། དོ་བདག་ནི་ཐམས་ཅད་ཀྱང་། ། ལག་ན་རྡོ་རྗེ་ཉིད་ལ་དབུལ། ། ཡང་ན་ལས་ཀྱི་བྱེ་བྲག་ལས། ། དྲི་དང་ཁ་དོག་རོར་ལྡན་པའི། ། རྡོ་གུ་རྣམས་ནི་ཅི་རིགས་པར། ། ཞི་བ་ལ་སོགས་དབུལ་བར་བྱ། ། ར་བ་དང་འབྲིང་དང་ཐ་མ་ཡི། །
BOདངོས་གྲུབ་རྣམས་ནི་སོ་སོ་ ལ། ། ཡོན་ཏན་རབ་འབྲིང་ཐ་མ་ཡི། ། རྡོ་གུ་རྣམས་ནི་དབུལ་བར་བྱ། ། རྡོ་གུ་བཞིན་དུ་རྩ་བ་ཡང་། ། ཞི་ལ་སོགས་པའི་ལས་རྣམས་དང་། ། རིགས་དང་དངོས་གྲུབ་དག་ལ་ཡང་། ། ཅི་རིགས་པར་ནི་དབུལ་བར་བྱ། ། སྒོག་པ་དང་ནི་ལ་ཕུག་དང་། ། ཁ་བ་དང་ནི་བསྐ་བ་དང་། ། རོ་མེད་ པ་དང་ངན་པ་དག ། གསང་སྔགས་རྣམས་ལ་མི་དབུལ་ལོ། ། པུ་བ་ས་ཏི་ཨུ་ལོ་པི། ། བ་ད་ཀི་ཡི་རིགས་རྣམས་དང་། ། ཧང་ཚོས་རྣམས་ཀྱི་རྣམ་པ་དང་། ། འབྲུ་ཡི་ཆན་ནི་སྣ་ཚོགས་དང་། ། ཚག་ཚོག་རྣམ་པ་སྣ་ཚོགས་དང་། ། ཧྭགས་དང་བཟའ་བ་སྣ་ཚོགས་ དང་། ། ལ་དུ་དང་ནི་ཞུའུ་ཏེའུ་དང་། ། ཕིན་ཏ་ཀོ་ཤ་ཕེ་ན་ཀ། ། ཚིལ་ལ་བར་ཏ་ཨ་ཤོ་ཀ། ། ཁུར་བ་གུ་ཏ་པིཎྜ་ཀ། ། ཤ་སྐུལ་སྣུམ་ཁུར་པུརྞ་དང་། ། མ་ཤ་བུ་བ་བི་དག་དྷ། ། པུར་ཤ་བར་ཏ་ལ་བ་ནི། ། གར་བྷོད་ཀ་རིའི་རིགས་རྣམས་དང་། ། ཁྱིམ་བྱ་ངང་པར་མ་ཀ ། སིཀྟ་པྲེའུ་ འོལ་བའི་དབྱིབས། ། ཤི་རི་པུརྞ་བི་སྟ་ཀ། ། པང་གི་ཟང་གི་ཟོམ་ཤང་དང་། ། བུ་ར་མ་པུ་པ་ཁ་རྫུ་ཀ། ། བུ་བ་ཁྲ་བོ་གརྟ་དང་། ། ཟུར་གསུམ་བུ་རམ་བར་པ་ཏ། ། པི་ན་རྩི་ཡི་ནི་རིགས་རྣམས་དང་། ། ང་ང་རྒྱལ་བུང་བའི་གོང་བུ་དང་། །
BOམར་གྱི་པུརྞ་སརྫ་ཀ། ། ཀ་མོ་ཏི་ཀི་ཧོན་དོན་ དང་། ། བེ་རེག་དང་ནི་ཤ་ཏ་པ། ། {རི་དགས་,རི་དྭགས་}བྱ་དང་ཉ་འདྲ་དང་། ། ཀརྞ་པྲི་ཏི་སྣ་ཚོགས་དང་། ། གཟིག་དང་ཆུ་ཡི་གླང་པོའི་དབྱིབས། ། དེ་བཞིན་ཀར་ཀ་པིཎྜ་ཀ ། ཕྲེང་བུ་བྷ་ལ་གྷརྟ་དང་། ། ཤིབ་ཏི་ཀ་དང་གླང་རྣ་དང་། ། བུ་རམ་འབྲུ་མར་ལས་བྱས་པ། ། འདི་ལ་སོགས་པ་བཟའ་ བ་རྣམས། ། རིགས་དང་ལས་དོན་དངོས་གྲུབ་ལ། ། ཅི་རིགས་པར་ནི་དབུལ་བར་བྱ། ། ཞི་ལ་པི་ཏ་ཀ་བསྔགས་ཏེ། ། གྲོ་ལས་བྱས་པ་རྒྱས་པ་ལ། ། མ་ཤ་ཏི་སོགས་ལས་བྱས་པ། ། དྲག་ཤུལ་སྤྱོད་པ་རྣམས་ལ་བསྔགས། ། ཁ་ཟས་འདི་དག་ཐམས་ཅད་དང་། ། བཟའ་དང་ བཅའ་བའི་ཁྱད་པར་རྣམས། ། རྟོགས་ནས་གསང་སྔགས་ལྷ་རྣམས་ལ། ། ཐམས་ཅད་དབུལ་བ་ཉིད་དུ་བྱ། ། ཤྲི་པེ་ཏ་ནི་པདྨའི་རིགས། ། ལ་དུ་རྡོ་རྗེ་ཅན་ལ་སྟེ། ། གནོད་སྦྱིན་རྣམས་ལ་བུ་པ་ཤིས། ། བུད་མེད་སྲེད་ལ་རིག་སྔགས་རྣམས། ། ཆོ་ག་ཞིབ་མོའི་རྗེས་འབྲངས་ཏེ། ། གསང་ སྔགས་དབྱེ་བའང་ཤེས་བྱས་ནས། ། གང་གཞན་འཇིག་རྟེན་པ་ལ་སོགས། ། ཅུང་ཟད་ཙམ་ཡང་དབུལ་བར་བྱ། ། སྭ་སྟི་ཨུ་ལོ་པུ་པ་རྣམས། ། རིགས་གསུམ་ལ་ནི་རིམ་བཞིན་དབུལ། ། ལྷག་མའང་གཞན་ལ་ཅི་རིགས་པར། །
BOགཞི་བཏིང་ནས་ནི་དབུལ་བར་བྱ། ། སཱ་ལུ་དང་ནི་བཅུ་དྲུག་པ། ། ཇུ་ཙེ་དང་ནི་ཁྲེ་དག་དང་། ། འོ་ཐུག་ལེགས་པར་བཅོས་པ་ཡི། ། ཆན་དག་དེར་ནི་དབུལ་བར་བྱ། ། སྲན་ཚོད་ལ་སོགས་སྣ་ཚོགས་པ། ། དྲི་ཞིམ་ཡིད་དུ་འོང་བ་དང་། ། ལེགས་པར་ཡོངས་སུ་བྱས་པ་ཡིས། ། ཚོད་མ་དག་ཀྱང་དབུལ་བར་བྱ། ། ནས་དང་ནས་མངར་འབྲས་ཆན་ དག ། གཙོ་བོ་ལ་ནི་ཡོངས་སུ་བསྒྲགས། ། གང་གཞན་ཅུང་ཟད་དམན་པ་དང་། ། འབྲིང་ལ་སཱ་ལུ་བཅུ་དྲུག་པ། ། གཙོ་བོ་ཞི་བའི་ལས་ཡིན་ཏེ། ། འབྲིང་པོ་དག་ནི་རྒྱས་པའོ། ། དམན་པ་དྲག་ཤུལ་གསུངས་པ་ལ། ། ལྷ་བཤོས་རིམ་པ་བཞིན་དུ་སྦྱར། ། ལས་ཅི་འདྲ་ བར་རིགས་དེ་ཤེས། ། རིགས་ཅི་འདྲ་བར་དངོས་གྲུབ་སྟེ། ། གསང་སྔགས་དབྱེ་བའི་རིམ་པ་ཡིས། ། འདིར་ནི་ཆོ་ག་ཐམས་ཅད་སྤྱད། ། ཞི་བ་ལ་ནི་དང་པོར་བསྔགས། ། རྒྱས་པ་ལ་ནི་མངར་སྐྱུར་ཏེ། ། ཁ་དང་ཚ་དང་བསྐ་སོགས་ཀྱི། ། ཚོད་མ་དྲག་པོའི་ལས་ལའོ། ། ཞི་བ་ ལ་ནི་འོ་ཐུག་གསུངས། ། ཀྲྀ་ས་ར་ནི་དྲག་སྤྱོད་ལ། ། ཞོ་དང་འབྲས་ཐུག་ལ་སོགས་པ། ། གཞན་རྣམས་ཐམས་ཅད་རྒྱས་ལ་ཤིས། ། བཟའ་བའི་རིགས་ནི་སྣ་ཚོགས་པ། ། ཕལ་ཆེར་གྲོང་དང་དགོན་པ་ཡི། ། ཅུང་ཟད་ཅིག་ནི་འདིར་བཤད་དེ། །
BOམ་ལུས་པ་དང་རྒྱས་པར་ནི། ། གཞན་དག་ལས་ཀྱང་ཤེས་པར་བྱ། ། འཇིག་རྟེན་དག་ན་གང་བཟང་དང་། ། བདག་ཉིད་སྲེད་པ་གང་ཡིན་པ། ། དེ་དག་ཐམས་ཅད་སངས་རྒྱས་ལ། ། བློ་དང་ལྡན་པས་ཐོག་མར་དབུལ། ། གསང་སྔགས་རྣམས་ཀྱི་བཟའ་བ་དང་། ། ཟས་ཉིད་གང་དང་གང་གསུངས་པ། ། བློ་དང་ལྡན་པས་ དེ་ཉིད་དབུལ། ། གཞན་དུ་བྱས་ན་གྲུབ་མི་ཐོབ། ། གང་དག་འགལ་དང་མ་སྨོས་དང་། ། གང་དག་ཅུང་ཟད་ངན་པའི་རྣམས། ། དེ་དག་ཐམས་ཅད་དྲག་སྤྱོད་ལ། ། ཁྱད་པར་དུ་ནི་དབུལ་བར་གསུངས། ། དྲི་དང་བདུག་སྤོས་མར་མེ་དང་། ། མེ་ཏོག་དང་ནི་ལྷ་བཤོས་དང་། ། ཐམས་ཅད་ ཆོ་ག་འདི་ཉིད་ཀྱི། ། ཞི་བ་ལ་ཡང་བཤད་པ་ཡིན། ། གསང་སྔགས་རྣམས་ཀྱི་རང་བཞིན་དང་། ། མཐུ་དང་ལས་དོན་རིག་བྱས་ནས། ། དེ་ཡི་བཤོས་དང་ཁ་ཟས་རྣམས། ། ཇི་ལྟར་རིགས་པར་དབུལ་བར་བྱ། ། སྭ་སྟི་ཀ་དང་ཨུ་ལོ་པའི། ། བཟའ་བ་ཅི་འབྱོར་བུ་རམ་ཅན། ། ལག་ པན་རྩ་བའི་འབྲས་བུ་དང་། ། འོ་ཐུག་དག་ནི་འདོད་པ་ཡིན། ། ཐམས་ཅད་འདོད་ཅེས་བྱ་བ་ཡི། ། གཏོར་མ་དོན་ཀུན་སྒྲུབ་བྱེད་པ། ། གསང་སྔགས་ཀུན་ལ་ཤེས་པར་བྱ། ། དྲག་ཤུལ་སྤྱོད་ལ་མ་ཡིན་ནོ། ། དེ་དག་ཉིད་ལས་ཅི་འབྱོར་པ། ། ཁ་དོག་ སྣ་ཚོགས་པ་ཞེས་བྱ། །
BOགང་གཞན་ཅུང་ཟད་ཀྱིས་གླགས་པ། ། གཏོར་མ་སྣ་ཚོགས་པ་ཞེས་བྱ། ། དང་པོ་དེ་དག་གཉིས་ལས་ནི། ། སྣ་རེ་ལས་ཀྱང་མ་བྱས་པ། ། གཞན་ཡང་ཅི་སྙེད་པ་བསྣན་པ། ། གཏོར་མ་རྒྱ་ཆེན་ཞེས་སུ་གསུངས། ། འབྲས་ཆན་ཞོ་དང་འོ་མ་མར། ། མིང་ནི་དཀར་གསུམ་པ་ཞེས་གསུངས། ། འབྲས་ཆན་འོ་མ་སྦྲང་རྩི་མར། ། ལྡན་པའི་གཏོར་མ་མངར་གསུམ་ཡིན། ། ས་ཡ་ལི་དང་ལིང་ཀ་ལ། ། སྲན་ཅན་ཏིལ་གྱི་པི་སྟ་ཀ ། ལག་པན་རྩ་བ་འབྲས་བུ་དང་། ། ཅུང་ཟད་ཅུང་ཟད་ཀྱིས་བསྣན་ནས། ། མེ་ཏོག་འབྲས་ཡོས་ཆུ་ དང་བཅས། ། འདབ་མར་བཅས་པའི་གཏོར་མ་ནི། ། གསང་སྔགས་ཀུན་གྱི་གཏོར་མ་སྟེ། ། དེ་མིང་འབྱུང་པོ་ཐམས་ཅད་པའོ། ། འོ་ཐུག་འབྲས་ཡོས་སྭ་སྟི་ཀ ། མར་དང་སྦྲང་རྩི་ནས་འོ་ཐུག ། པི་ཛ་པཱུ་ར་དེ་དག་རྣམས། ། རྟག་པར་ཞི་བའི་ལྷ་བཤོས་སོ། ། ཞོ་དང་ ལག་པ་ན་འབྲས་ཐུག་དང་། ། བུ་རམ་ལ་དུ་ཨུ་ལོ་པི། ། ཤྲི་བེ་སྟ་ལ་སོགས་པའི་ཟས། ། རྟག་པར་རྒྱས་པའི་ལྷ་བཤོས་སོ། ། འབྲས་མར་ཆན་དང་ཀོ་ཏྲ་བ། ། བཟའ་བ་ཏིལ་ཆན་པུ་བར་བཅས། ། སྲན་ཆན་དང་ནི་ཀྲི་ས་ར། ། དེ་དག་རྟག་པར་དྲག་སྤྱོད་ལའོ། ། འབྲས་བུ་རྩ་བ་སཱ་ལུ་ ཅན། ། བཏུང་བ་མངར་བ་སྦྲང་རྩི་དང་། ། བཟའ་བ་མང་པོ་བུ་རམ་ཅན། །
BOདེ་དག་གནོད་སྦྱིན་གཏོར་མ་ལའོ། ། ཚོད་མར་བཅས་པའི་ཟས་རྣམས་དང་། ། སྐོམ་དང་པུརྞ་བྷྲྀ་སྟ་ཀ། ། འབྲས་བུ་སྣ་ཚོགས་ལྡན་པ་ཡིས། ། ལྷ་བཤོས་རིག་སྔགས་ཀུན་ལ་ཤིས། ། གང་ཡང་མང་པོས་ བསྔགས་པ་དང་། ། ཞིམ་ཞིང་ཀུན་སྲེད་ཕལ་ཆེ་བ། ། དེ་དག་བསྒྲུབ་པ་མཆོག་དག་དང་། ། དམ་པ་རྣམས་ལ་དབུལ་བར་བྱ། ། དོན་རྣམས་མང་པོ་ཕྱེ་བ་ནི། ། ཆོ་ག་བསྟན་པ་འདི་དག་ལས། ། རིགས་དོན་དངོས་གྲུབ་བྱེ་བྲག་ལ། ། ཟློས་པ་ཅི་རིགས་ཤེས་པར་བྱ། ། ཐོག་མར་འདབ་མ་ གཙང་མའམ། ། ལོ་མ་བཀྲུས་པའི་གཞི་བཏིང་ནས། ། ཆོ་གའི་བྱེ་བྲག་ཤེས་པ་ཡིས། ། ཕྱི་ནས་ལྷ་བཤོས་དབུལ་བར་བར་བྱ། ། པདྨའི་ལོ་མའམ་པ་ལ་ཤ། ། འོ་མ་ཅན་ཤིང་ལས་སྐྱེས་པའམ། ། ཡང་ན་རས་ནི་སར་པའང་རུང་། ། ཞི་བའི་གདིང་བར་བསྔགས་པ་ཡིན། ། ཆུ་སྐྱེས་འདབ་མ་ཐམས་ཅད་དང་། ། ལྗོན་ཤིང་ལོ་མ་གཙང་མའམ། ། ཁུར་སྐྱ་ས་ལ་བཏིང་བ་དང་། ། ཆུ་ཤིང་ལོ་མ་རྒྱས་པ་ལའོ། ། ཨརྒ་བྷ་ལ་ཏ་ཀ་དང་། ། ལྗོན་ཤིང་ཁ་བོའི་ལོ་མའམ། ། མཁས་པས་གང་ཡང་རུང་བ་དག ། དྲག་པོའི་དོན་དུ་གདིང་བར་བྱ། ། ལོ་འདབ་ མོ་ཡི་མིང་ཅན་རྣམས། ། རིག་སྔགས་རྣམས་ཀྱིས་གདིང་བར་བྱ། ། མངག་གཞུག་རྣམས་ལ་རྩྭ་དག་དགྲམ། །
BOའདབ་མ་སྔོན་པོ་ས་ལ་དགྲམ། ། སློབ་པ་པོས་ཀྱང་ཆོ་ག་འདིས། ། རབ་དང་འབྲིང་དང་ཐ་མ་ལ། ། ས་གཞི་བསྐུས་ཤིང་བསྟན་ནས་སུ། ། ཅི་རིགས་སུ་ནི་བྱ་བར་བཤད། ། ཉེ་རེག་ཁྱད་པར་དུ་བྱས་ནས། ། ལྷ་བཤོས་ལས་རྣམས་བརྩམ་པར་བྱ། ། ལྷ་བཤོས་ལས་ལ་ཐོག་མར་ནི། ། སྭ་སྟི་ཀ་དག་བྲིམ་པར་བྱ། ། རྩ་བ་རྡོ་གུ་འབྲས་བུ་དང་། ། དེ་ཡི་འོག་ཏུ་བཏུང་བ་རྣམས། ། དེ་ནས་བཟའ་བ་མང་པོ་སྟེ། ། དེའི་འོག་ཟས་རྣམས་དབུལ་བར་བསྒྲགས། ། ཐ་མར་ཞོ་དང་འོ་མ་སྟེ། ། འདི་དག་ལྷ་བཤོས་ཆོ་གར་བཤད། ། ཆོ་ག་འདིས་ནི་མ་སྨོས་པའི། ། ལྷག་མའང་ཁོང་དུ་ཆུད་པར་བྱ། ། དཀྱིལ་འཁོར་དག་དང་སྒྲུབ་པ་ལ། ། ལྷ་བཤོས་ནན་ཏན་བསྐྱེད་དེ་བྱ། ། དེས་ན་མཁས་པས་ལྷ་བཤོས་དག ། མི་ངན་པ་དང་རྒྱ་ཆེར་བྱ། ། བསྙེན་ པའི་དུས་ན་ཅི་ནུས་དང་། ། ཅི་སྐད་བསྟན་དང་ཅི་སྙེད་པའི། ། གཏོར་མའི་ལས་ནི་བྱ་བར་བསྟན། ། དུས་ཚིགས་དག་ལ་བཟང་པོར་བྱ། ། གང་དག་བསྲེག་བྱའི་རྫས་རྣམས་དང་། ། བདག་གི་ཁ་ཟས་གང་ཡིན་ལས། ། ཐོག་མར་དེ་ཡི་ཕུད་དབུལ་ཏེ། ། ཆོ་ག་ཤེས་པས་བཟླས་བརྗོད་ བྱ། ། ཇི་སྐད་བསྟན་པའི་ལྷ་བཤོས་དང་། ། རྫས་ཀྱི་རིགས་རྣམས་ཅི་འབྱོར་པ། །
BOམཁས་པ་རྣམས་ཀྱིས་ཕུལ་ནས་ཀྱང་། ། ཉིན་གཅིག་བཞིན་དུ་བཟླས་བརྗོད་བྱ། ། ལྷ་བཤོས་དབུལ་བ་གསང་སྔགས་ཀྱི། ། ཞལ་ཟས་ཡིན་པར་བཤད་པས་ན། ། དེས་ནི་རྟག་ཏུ་ཁ་ཟས་ སྦྱིན། ། དེ་ཕྱིར་ཟློས་པ་དག་གིས་དབུལ། ། རྩ་བ་རྡོ་གུ་འབྲས་བུ་དང་། ། ལྷ་བཤོས་ཅུང་ཟད་ཅི་སྙེད་པ། ། དུས་གསུམ་དུ་ཡང་གསང་སྔགས་ལ། ། ཕུལ་ནས་དངོས་གྲུབ་ཐོབ་པར་འགྱུར། ། གལ་ཏེ་ཟློས་པས་གསང་སྔགས་ལ། ། མཆོད་པའི་བཤོས་རྣམས་ མ་ཕུལ་ན། ། དེ་ཚེ་རྩུབ་ཅིང་མདོག་ངན་ལ། ། བཀྲེས་པ་དག་གིས་གདུངས་པར་འགྱུར། ། ལྷ་བཤོས་མེད་ན་དེ་ཡི་སེམས། ། རྟོག་པ་དག་ཀྱང་མང་པོར་འགྱུར། ། ལྷ་རྣམས་འགྲུབ་པར་མི་འགྱུར་ཞིང་། ། བགེགས་རྣམས་ཀྱིས་ཀྱང་ཟིལ་གྱིས་གནོན། ། དེ་བས་ནན་ཏན་ ཆེར་བསྐྱེད་དེ། ། གསང་སྔགས་འཁོར་དང་བཅས་པ་ལ། ། དུས་ཚིགས་དག་ལ་ཅི་འབྱོར་བའི། ། ལྷ་བཤོས་ལེགས་པར་དབུལ་བར་བྱ། ། བསྙེན་པའི་དུས་ན་ཟློས་པ་པོས། ། ཁང་པའི་ཕྱི་རོལ་ཁོར་ཡུག་ཏུ། ། ལྷ་རྣམས་ཀུན་ལ་འབྱུང་པོ་ཡི། ། གཏོར་མ་གུས་པར་དབུལ་ བར་བྱ། ། གང་དག་འགལ་དང་མི་ཤིས་དང་། ། གང་དག་ངན་ཅིང་སྨད་པ་དང་། ། གཞན་དག་མི་གཙང་གྱུར་པའི་རྫས། ། ལྷ་བཤོས་ཕྱིར་ནི་ཐམས་ཅད་སྤང་། །
BOཐམས་ཅད་དང་ནི་ལས་ཀུན་ལ། ། ལག་པན་རྒྱ་ཆེན་དབུལ་བར་བྱ། ། ལྷ་རྣམས་ཀུན་ལ་དབུལ་བའི་བཤོས། ། གསང་སྔགས་ཀྱིས་ནི་མངོན་པར་བསྔགས། ། སྨན་རྣམས་བཅུད་ནི་ཡི་གར་འོང་། ། སྔགས་ཀྱི་ཟས་ཀྱི་བཅུད་འདི་དག ། བདག་གི་དད་པས་འབུལ་ལགས་ཀྱིས། ། བཞེས་ནས་བདག་ལ་དགྱེས་པར་མཛོད། ། ཨཱ་ཧ་ར་ཨཱ་ཧ་ར། སརྦ་བིདྱཱ་དྷ་ར་པཱུ་ཛི་ཏེ་སྭཱ་ཧཱ། སྒྲུབ་པོས་དང་ པོར་སྔགས་འདི་དང་། ། རང་གི་སྔགས་ཀྱིས་ཡོངས་བཟླས་ནས། ། བསངས་པའི་ལྷ་བཤོས་ལྷ་རྣམས་ལ། ། ཆོ་ག་བཞིན་དུ་དབུལ་བར་བྱ། ། གཞན་གྱི་ལྷ་བཤོས་གཞན་དག་ལ། ། གང་ཚེ་མ་འབྱོར་ནས་དབུལ་བ། ། དེ་ཚེ་རང་རིག་གསང་སྔགས་ཀྱིས། ། དེ་ལ་ཡང་ནི་མངོན་ པར་བསྔགས། ། གཏོར་མའི་ཆོ་ག་རིམ་པར་ཕྱེ་བའོ། ། ། ། ཞི་བ་དང་ནི་རྒྱས་པ་དང་། ། དེ་བཞིན་དྲག་ཤུལ་སྤྱོད་པ་སྟེ། ། མདོར་ན་ལས་ནི་རྣམ་གསུམ་དུ། ། གསང་སྔགས་ཀུན་ལ་བསྒྲགས་པ་ཡིན། ། ལས་ནི་རྣམ་པ་གསུམ་ཆར་གྱི། ། དངོས་གྲུབ་གང་གིས་མྱུར་ བ་དང་། ། ངེས་པར་འགྲུབ་པར་འགྱུར་བ་ཡི། ། ཆོ་ག་དེ་དག་འདིར་བཤད་དོ། ། བྱམས་པའི་དྲན་པ་ཉེར་བཞག་ནས། ། དཀོན་མཆོག་གསུམ་ལ་གཅིག་ཏུ་གཞོལ། ། ཞི་བར་གྱུར་པས་ཞི་བ་ཡི། །
BOབཟླས་པའམ་ཡང་ན་སྦྱིན་སྲེག་བྱ། ། ཟླ་བ་ཡར་གྱི་ཚེས་གཅིག་ནས། ། ལས་རྣམས་རབ་ཏུ་བརྩམ་པར་བྱ། ། བྱེ་བྲག་ཏུ་ནི་སྲོད་ལ་སྟེ། ། དེ་ནི་ཞི་བའི་ལས་ཀྱི་དུས། ། གནས་གཙང་མ་ཡི་ལྷ་རྣམས་དག ། དེ་ན་ཀུན་དུ་གཟིགས་པས་ན། ། ལས་རྣམས་མྱུར་དུ་འགྲུབ་པར་འགྱུར། ། དེ་བས་དེར་ནི་ཀུན་བརྩམ་མོ། ། དཀར་པོའི་གོས་ནི་བགོས་ནས་སུ། ། ཀུ་ཤའི་ཁྲེས་ཀྱི་སྟན་འདུག་ནས། ། བྱང་ཕྱོགས་ཁ་བལྟས་གཙང་ཞི་བས། ། ཞི་བའི་ཆོ་ག་བཤད་པར་བྱ། ། བ་ཡི་ལྕི་བ་མ་ལྷུང་བས། ། དུས་གསུམ་དག་ཏུ་དེར་བསྐུས་ལ། ། མེ་ཏོག་དཀར་པོ་སིལ་མ་དག ། བཀྲམ་པ་བྱས་ན་རབ་ཏུ་ཤིས། ། ནས་དང་འོ་ཐུག་ཞོ་དག་དང་། ། འབྲས་ ཡོས་དག་གམ་ཏིལ་དག་གམ། ། དུར་བའམ་ཀུ་ཤ་སྔོན་པོའམ། ། པྲི་ཡང་ཀུ་ཡི་མེ་ཏོག་གམ། ། སཱ་ལུའི་ཆན་ནམ་གེ་སར་རམ། ། ཡང་ན་མེ་ཏོག་དཀར་བོའམ། ། ཤ་མའི་ཡམ་སྲེག་ཤིང་དག་གམ། ། ཡང་ན་དྲི་ཞིམ་ཐང་ཆུའང་རུང་། ། མཆོད་སྦྱིན་དག་གི་ལྗོན་ཤིང་ངམ། ། འོ་མར་ བཅས་ཤིང་ལོ་མ་ཅན། ། ཡམ་ཤིང་རྩེ་མོ་ལས་སྐྱེས་རློན། ། སྦྲང་རྩིའམ་ཡང་ན་མར་ཡང་རུང་། ། རྟོག་པ་ལས་གསུངས་ཆོ་ག་ནི། ། དེ་དང་དེ་ལ་སོགས་པ་སྤྱད། ། ཞི་བའི་ལས་ལ་བློ་ཅན་གྱིས། །
BOལྗོན་ཤིང་འོ་མ་ཅན་གྱི་མེ། ། རྒྱུན་བཞག་མི་ལ་བླངས་ནས་སུ། ། མེ་ནི་ཆོ་ག་བཞིན་ བྱས་ཏེ། ། ཞི་བའི་ལས་ལ་བསྲེག་བྱིན་ན། ། དངོས་གྲུབ་རབ་ཏུ་སྟེར་བར་འགྱུར། ། འོ་མ་ཅན་གྱི་ཡམ་ཤིང་གི། ། མེ་ལ་ཡམ་ཤིང་མཐོ་གང་ཙམ། ། འོ་མ་སྦྲང་རྩི་མར་བཏགས་ཏེ། ། ཞི་བའི་ལས་ལ་སྦྱིན་སྲེག་བྱ། ། དགོན་པའི་བ་ལང་ལྕི་བ་དང་། ། དེ་བཞིན་ཤ་མའི་བུད་ཤིང་ བཟང་། ། ཡང་ན་ལྗོན་ཤིང་དྲི་ཞིམ་པའི། ། བུད་ཤིང་ཞི་བའི་ལས་ལ་ཤིས། ། ས་གཞི་དཀར་ལ་བརྐོས་པ་ཡིས། ། ཞུགས་ཐབ་ཀུན་དུ་ཟླུམ་པོ་ལ། ། ཁྲུ་གང་ཙམ་གྱི་ཚད་དུ་བྱ། ། ཟབས་སུ་སོར་ནི་བཅུ་གཉིས་པ། ། དེ་ཡི་སྟེང་དུ་ཁ་རན་ནི། ། རབ་མཉམ་སོར་བཞིའི་ཚད་ཙམ་གདགས། ། དེ་ཡི་ཞབས་སུ་འཁོར་ལོ་བཞག ། དེ་ཡང་འཕང་དུ་སོར་གཅིག་པའོ། ། པདྨའི་སྐྱིལ་ཀྲུང་དུ་འདུག་སྟེ། ། བློ་ཡིས་བསྒོམ་པ་བྱས་ནས་སུ། ། མཆོད་པ་ལ་སོགས་ལེགས་བྱས་ཏེ། ། དེ་ནས་ཞི་བའི་ལས་བྱའོ། ། དང་པོར་སྟོན་པ་ཐུབ་ཆེན་དང་། ། ཤེས་རབ་ ཕ་རོལ་ཕྱིན་པ་དང་། ། ཉན་ཐོས་འདོད་ཆགས་བྲལ་རྣམས་དང་། ། བྱང་ཆུབ་སེམས་དཔའ་རྣམས་ལ་མཆོད། ། བྱམས་མ་དེ་བཞིན་གཤེགས་མཛོད་(སྦུ་,སྤུ་)། ། རིག་སྔགས་གཞན་གྱིས་མི་ཐུབ་མ། །
BOདགའ་བོ་ཞེས་བྱ་ཀླུ་རྒྱལ་གཉིས། ། གནས་གཙང་རིགས་ཀྱི་ལྷ་ རྣམས་དང་། ། འདི་དག་ལས་ལ་དགོད་བྱ་ཞིང་། ། ཞི་ལ་རྟག་ཏུ་མཆོད་པར་བྱ། ། དེ་ནས་མེ་ཏོག་དྲི་ལ་སོགས། ། ལེགས་པར་བཞག་སྟེ་ལས་རྣམས་བྱ། ། དུས་མིན་འཆི་དང་ནད་རྣམས་དང་། ། ཡམས་ཀྱི་ནད་དང་གནོད་པ་དང་། ། དེ་བཞིན་བགེགས་དང་ནད་འགོ་ རྣམས། ། ཞི་བར་བྱེད་པས་ཞི་ཞེས་བྱ། ། རང་གི་སེམས་ནི་མཉམ་གཞག་སྟེ། ། ཡིད་ལ་དགའ་བ་བསྐྱེད་ནས་སུ། ། རྒྱས་པ་དག་གིས་རྒྱས་པ་ཡི། ། བཟླས་པའམ་ཡང་ན་སྦྱིན་སྲེག་བྱ། ། ཟླ་བ་ཉ་ལ་ཀུན་བརྩམ་སྟེ། ། ཕྱི་མའི་ཉ་ཡི་བར་དུ་བྱ། ། རྒྱས་པའི་ཆོ་ག་བསྟན་པ་ ཡིས། ། དེ་སྲིད་བར་དུ་ལས་བྱའོ། ། རྒྱས་པ་དག་གི་ལས་རྣམས་ལ། ། བྱེ་བྲག་ཏུ་ནི་སྔ་དྲོ་ཤིས། ། ལས་དེ་གྲུབ་པའི་ལྷ་རྣམས་ནི། ། དེ་ནི་བྱིན་གྱིས་རློབ་པར་མཛད། ། ལྷ་རྣམས་མ་ལུས་པ་དག་ཀྱང་། ། དེ་ཡི་དུས་སུ་རྒྱུ་བས་ན། ། ལས་སུ་བྱ་བ་ཐམས་ཅད་ནི། ། དུས་ དེ་ཁོ་ནར་རབ་ཏུ་ཤིས། ། ནང་པར་དུས་ན་ལྷ་རྣམས་ནི། ། ཡིད་དགར་གྱུར་ན་མཆོག་སྦྱིན་མཛད། ། དེ་ལྟ་བས་ན་མཁས་པ་ཡིས། ། ལྷག་པར་དེ་ཚེ་བརྩམ་པར་བྱ། ། གོས་དཀར་ཟུང་གཅིག་བགོས་ནས་སུ། ། བཀྲ་ཤིས་སྐྱིལ་མོ་ཀྲུང་བྱས་ཏེ།
BO། ཤར་ཕྱོགས་ཁ་བལྟས་དགའ་བཞིན་ དུ། ། རྒྱས་པའི་ཆོ་ག་བསྒྲིམས་ཏེ་སྤྱད། ། ས་གཞི་བྱུག་པ་སྤོས་ཞིམ་བཅས། ། དུས་གསུམ་དུ་ནི་བསྐུ་བར་བྱ། ། མེ་ཏོག་སིལ་མ་སྣ་ཚོགས་ཀྱིས། ། དེར་ནི་རབ་ཏུ་དགམ་པར་བཤད། ། ཟས་མཆོག་དག་གི་གོང་བུ་ནི། ། མངར་གསུམ་དག་དང་ལྡན་པའམ། ། སྦྲང་རྩི་ མར་དང་ཞོ་སྦྱར་བའི། ། ཏིལ་ནག་དག་གམ་མར་དང་ཞོ། ། ཤ་ཏ་པུཥྤ་བིལ་བ་དང་། ། སཱ་ལུ་ཡི་ནི་འབྲས་དག་དང་། ། ནཱ་ག་གེ་སར་པདྨ་དང་། ། ཀརྞི་ཀ་ར་མར་དང་བཅས། ། ལག་པན་དང་ནི་འབྲུ་ཀུན་དང་། ། དེ་བཞིན་མཆོད་སྦྱིན་ཡམ་སྲེག་ཤིང་། ། དེ་དག་ལ་སོགས་རྫས་ རྣམས་ཀྱིས། ། རྒྱས་པའི་སྦྱིན་སྲེག་ཚུལ་བཞིན་བྱ། ། རྒྱལ་རིགས་ཁྱིམ་ནས་བླངས་པའི་མེའམ། ། ཡང་ན་རྒྱལ་པོའི་ཁྱིམ་ནས་བླངས། ། དགོན་པའི་མེ་འམ་མེ་ཆེན་པོ། ། རྒྱས་པའི་ཆོ་ག་དག་ལ་ཤིས། ། ཡམ་ཤིང་སྦོམས་སུ་ཆག་གང་པ། ། སྲིད་དུ་ཁྲུ་གང་ཙམ་ གྱི་ཚད། ། ཞོ་མར་འོ་མ་ལས་བཏགས་ནས། ། རྒྱས་པའི་ཆོ་ག་དག་ལ་བསྲེག ། ཡམ་སྲེག་ཤིང་དུ་གང་བསྟན་པ། ། དེ་དག་ཉིད་ལས་མེ་བུད་དོ། ། ཡང་ན་མེ་ཏོག་འབྲས་བུ་ཤིང་། ། བུད་ཤིང་ཕྱིར་ནི་རབ་ཏུ་ཤིས། ། ཞུགས་ཐབ་ས་གཞི་དམར་པོ་ལ། །
BOརྒྱར་ནི་ཁྲུ་དོ་ཙམ་ གྱི་ཚད། ། གྲུ་བཞི་པ་ལ་ཁ་རན་ཅན། ། ཟབས་སུ་ཁྲུ་གང་ཙམ་དུ་བྱ། ། ཁ་རན་མཐོ་གང་ཚད་ཙམ་ལ། ། ཁ་དོག་དམར་པོའི་སས་ཀྱང་བསྐུ། ། པདྨའི་ཕྱག་རྒྱ་མཛུབ་གང་བ། ། འཕང་དུ་སོར་བཞི་ཡོད་པ་བྱ། ། དགོས་པའི་དོན་ནི་གང་ཡིན་པ། ། དེ་ཉིད་ཡིད་ལ་ལྷུར་བསམས་ ཏེ། ། ཆོ་ག་ཐོག་མར་བཤད་པ་དག ། བྱས་ནས་རྒྱས་པའི་ལས་བྱའོ། ། ཕྱག་ན་པདྨའི་མཐུ་ཆེན་དང་། ། དོན་གྲུབ་པ་ཡང་མཆོད་པ་བྱ། ། རིག་སྔགས་འཆང་དང་གནོད་སྦྱིན་དང་། ། དཔལ་གྱི་ལྷ་མོ་ཐམས་ཅད་དང་། ། ཚངས་དང་བྱང་ཆུབ་སེམས་དཔའ་དང་། ། རིག་པའི་ བདག་མོ་མཐུ་ཆེན་དང་། ། འཕྲོག་མ་རིག་སྔགས་ཆེན་མོ་དག ། རྒྱས་པའི་ལས་ལ་མཆོད་པ་བྱ། ། དེ་ལ་སོགས་པ་བློ་ཅན་གྱིས། ། ཆོ་ག་བཞིན་དུ་མཆོད་ནས་ཀྱང་། ། བདག་ཉིད་མངོན་པར་དབང་བསྐུར་ཏེ། ། རྒྱས་པའི་ལས་རྣམས་བརྩམ་པར་བྱ། ། གང་ཞིག་ཚེ་དང་ལང་ཚོ་དང་། ། བྱིན་དང་མཐུ་སྟོབས་འཕེལ་བྱེད་དང་། ། ཡོན་ཏན་དག་དང་འདོད་དོན་གང་། ། སྒྲུབ་བྱེད་དེ་ནི་རྒྱས་ཞེས་བྱ། ། མཆོག་དང་ཁྲོ་བ་ལ་གནས་ཏེ། ། དེ་ནས་འདུན་པ་བརྟན་པོ་ཡིས། ། གསང་སྔགས་དྲག་པོ་བཟླས་པའམ། ། སྦྱིན་སྲེག་བྱ་བས་དགྲ་བོ་གཞོམ། །
BOཚེས་གྲངས་དག་ དང་རྒྱུ་སྐར་དང་། ། སྨྱུང་བར་གནས་པར་བྱ་མི་དགོས། ། ཁྲོས་པ་བརྟན་པར་བྱས་ནས་ནི། ། མོད་ལ་དྲག་ཤུལ་སྤྱོད་པ་བརྩམ། ། ཁྱད་པར་དུ་ནི་མར་ངོ་འམ། ། མར་གྱི་དུས་ཚིགས་དག་གིས་ནི། ། ཉི་མའི་གུང་ངམ་ནམ་ཕྱེད་ན། ། དྲག་ཤུལ་སྤྱོད་པ་ བརྩམ་པར་བྱ། ། གང་གི་ཕྱིར་ནི་{ཡི་དགས་,ཡི་དྭགས་}དང་། ། ཤ་ཟ་འབྱུང་པོ་སྲིན་པོའི་ཚོགས། ། དྲག་པོ་རྣམས་ཀྱིས་བྱིན་རློབ་པ། ། དེ་ཕྱིར་དེས་ན་ལས་རྣམས་འགྲུབ། ། དུས་དེ་ན་ནི་དྲག་པོའི་ལས། ། འགྲུབ་པར་འགྱུར་ཕྱིར་རབ་ཏུ་ཤིས། ། ཡང་ན་གང་ཚེ་ཁྲོས་གྱུར་པ། ། དེ་ཚེ་ཉིད་ན་ ལས་བརྩམ་མོ། ། གང་ཕྱིར་གསང་སྔགས་དྲག་པོའི་ལྷས། ། ཁྲོས་པ་ཉིད་ན་བྱིན་རློབ་པ། ། དེ་ཕྱིར་ཁྲོ་བ་བསྐྱེད་ནས་སུ། ། དྲག་ཤུལ་སྤྱོད་པའི་ལས་བྱའོ། ། རབ་ཏུ་དྲག་པོའི་ལས་རྣམས་ལ། ། དམར་པོའི་གོས་ནི་བགོ་བའམ། ། སྔོན་པོའམ་ཡང་ན་ཆུས་བརླན་པ། ། ཁྲག་གིས་ སྦགས་པ་དག་ཀྱང་བཤད། ། དེ་ནི་མིག་བགྲད་ཁྲོ་གཉེར་བསྙེར། ། སོ་ཡང་ཤིན་ཏུ་གཙིགས་ནས་ནི། ། རྐང་པས་རྐང་པ་མནན་ནས་སུ། ། ལྷོ་ཕྱོགས་ཁ་བལྟས་འདུག་པར་བྱ། ། རང་གི་ལུས་དང་ངག་དང་ནི། ། ཡིད་རྣམས་ཀྱིས་ཀྱང་སྲན་བཙུགས་ཏེ། །
BOགསང་སྔགས་མངོན་ སུམ་བཞིན་བསྒོམས་ནས། ། དྲག་ཤུལ་སྤྱོད་པའི་ལས་བྱའོ། ། དེར་ནི་དུས་གསུམ་དག་ཏུ་ཡང་། ། ནག་པོའི་ས་ཡིས་བསྐུ་བའམ། ། བོང་བུ་རྔ་མོ་ལ་སོགས་པའི། ། རྟུག་པའམ་དུར་ཁྲོད་ཐལ་བས་བསྐུ། ། མེ་ཏོག་དྲི་(ངའ་,ངའི་)སིལ་མའམ། ། ཡང་ན་དྲི་མེད་པ་དག་དགྲམ། ། མེ་ཏོག་སྔོན་པོ་དམར་པོའམ། ། འབྲུའམ་ཡང་ན་ཕུབ་མས་དགྲམ། ། ཡུངས་ཀར་འབྲུ་ཙམ་ཚ་བའམ། ། རང་གི་ཁྲག་གམ་ལན་ཚྭའམ། ། སྐྱེ་ཚེ་ནིམ་པའི་ལོ་མའམ། ། རྐང་རྗེས་སའམ་ཐལ་བའམ། ། བོད་བུ་ལ་སོགས་རྟུག་པའམ། ། སྐྲ་གཏུབས་པའམ་བྱ་རྟུག་གམ། ། ཁྲ་ལ་སོགས་པའི་སྒྲོའམ་ཚིལ། ། གཅིན་ནམ་ཡང་ན་ཚེར་མའམ། ། གྱོ་མོའི་དུམ་བུའམ་རུས་ཕྱེའམ། ། དེ་བཞིན་ཤ་ཆེན་ལ་སོགས་པའམ། ། ཀ་པིད་དར་འམ་ནིམ་པའམ། ། ཡང་ན་དུར་ཁྲོད་མགལ་དུམ་མམ། ། ཚེར་མ་ཅན་གྱི་ཤིང་རྣམས་དང་། ། སེང་ལྡེང་གི་ནི་ཡམ་ སྲེག་ཤིང་། ། ཆོ་ག་བཞིན་དུ་བློ་ཅན་གྱིས། ། དྲག་ཤུལ་སྤྱད་ཕྱིར་སྦྱིན་སྲེག་བྱ། ། དགྲ་ཡི་མིང་ནས་བརྗོད་ནས་ནི། ། དུག་ཅན་ཀུན་དང་ལན་ཚྭ་ཀུན། ། ཁྲག་དང་ལྡན་པར་སྦྱར་བྱས་ཏེ། ། དྲག་ཤུལ་སྤྱོད་པའི་སྦྱིན་སྲེག་བྱ། ། དུར་ཁྲོད་དག་ན་འབར་བའི་མེའམ། །
BOཡང་ ན་གདོལ་པའི་ཁྱིམ་ནས་བླང་། ། རུས་པའམ་རྡོ་ལས་ཕྱུང་བ་དག ། དྲག་ཤུལ་སྤྱོད་པའི་ལས་ལ་ཤིས། ། གདུག་པ་བཤགས་པའི་ཡམ་སྲེག་ཤིང་། ། རྩེ་གཉིས་རྣོན་པོར་བྱས་པ་ལ། ། དུག་ཁྲག་ཡུངས་མར་གྱིས་བསྐུས་པ། ། སོར་བཅུ་པ་ཡི་ཚད་དུ་བྱས། ། བུད་ཤིང་ ཁ་དང་ཚ་བ་དང་། ། དྲི་ཞིམ་པ་ཡི་སྐམ་ཤིང་ངམ། ། ཡང་ན་དྲག་པོའི་ལས་རྣམས་ལ། ། དུར་ཁྲོད་ནས་ཕྱུང་ཅི་ཡང་རུང་། ། ཁ་དོག་ནག་པོའི་ས་དག་ལ། ། ཞུགས་ཐབ་གྲུ་གསུམ་ཕར་བལྟས་པ། ། སོར་ནི་ཉི་ཤུའི་ཚད་དུ་བྱ། ། ཟབས་སུ་ཁྲུ་ཕྱེད་ཚད་དུ་གསུངས། ། ཁ་རན་སོར་ ནི་གསུམ་པ་ལ། ། ཐལ་བ་དག་གིས་བསྐུ་བར་བྱ། ། ཞབས་སུ་རྡོ་རྗེ་སོར་བརྒྱད་པ། ། འཕང་དུ་སོར་གཅིག་ཡོད་པ་བཞག ། ཐལ་བ་སོལ་བ་ཕུབ་མ་སོགས། ། ཡང་ན་ལན་ཚྭ་སྐྱེ་ཚེ་སོགས། ། སྦྱིན་སྲེག་དག་གི་རྫས་རྣམས་ལ། ། དགྲ་བོ་དག་གི་གཟུགས་བྱས་ལ། ། གཟུགས་དེ་རང་གི་མིང་སྨོས་ནས། ། གཏུབ་ཅིང་གཏུབ་ཅིང་སྦྱིན་སྲེག་བྱ། ། ཡང་ན་དེ་ཡི་སྙིང་ག་རུ། ། མན་ནས་སྦྱིན་སྲེག་ལས་རྣམས་བརྩམ། ། སྦྱིན་སྲེག་བཞིན་དུ་བཟླས་བརྗོད་ལའང་། ། དྲག་པོའི་གཟུགས་བརྙན་མནན་ཏེ་བྱ། ། ཡང་ན་རྟོག་པ་ལས་གསུངས་པའི། ། ཆོ་གའི་ལས་བཞིན་བསྒྲུབ་པར་བཤད།
BO། གང་ཞིག་ཡིད་ལ་བསམས་པའི་དོན། ། དེ་ལ་བསྟན་ནས་བརྩམ་བྱ་སྟེ། ། ཐམས་ཅད་ཆོ་གའི་རྗེས་མཐུན་པར། ། ཆོ་ག་བྱས་ནས་དྲག་ཤུལ་སྤྱད། ། ཕྱག་ན་རྡོ་རྗེ་རབ་གཏུམ་དང་། ། ཁྲོ་བོ་རྣམས་ནི་གང་འདོད་པ། ། གཡོག་འཁོར་ དག་ནི་ཐམས་ཅད་ཀྱང་། ། དྲག་པོ་གཟི་བརྗིད་འཕགས་པ་དང་། ། རིག་པའི་རྡོ་རྗེ་ལྕགས་ཀྱུ་མ། ། ཁྲོ་བོ་རྡོ་རྗེ་ཐོག་ཐོག་དང་། ། འཆི་མེད་ཚེ་དང་མིག་བརྒྱ་པ། ། ཀླུ་དང་གྲུལ་བུམ་སྲིན་པོ་དང་། ། དེ་ལ་སོགས་པ་བློ་ཅན་གྱིས། ། དྲག་ཤུལ་སྤྱོད་པའི་ལས་དག་ལ། ། ཆོ་ག་ བཞིན་དུ་སྔར་མཆོད་དེ། ། བསྲུང་བ་བྱས་ནས་བརྩམ་པར་བྱ། ། ལས་གང་ཡན་ལག་ཉམས་བྱེད་དང་། ། གང་ཡང་བསྐྲད་པར་བྱ་བ་དང་། ། དབྱེ་བར་བྱ་བ་གང་ཡང་རུང་། ། ནད་ཀྱིས་འདེབས་བྱེད་གང་ཡིན་དང་། ། ཕུང་བར་བྱ་དང་གདུང་བྱ་དང་། ། མི་ དགར་འགྱུར་བ་གང་ཡང་རུང་། ། ཡང་ན་གསད་པའི་ལས་གང་ཡིན། ། དེ་དག་དྲག་ཤུལ་སྤྱོད་པར་བཤད། ། དེ་ལྟར་དེའི་ལས་མཁས་པ་ཡིས། ། བདེ་བར་གཤེགས་པའི་བཀའ་སྨོད་དང་། ། རང་བཞིན་ངན་དང་སྡང་བ་དང་། ། དཀོན་མཆོག་གསུམ་ལ་གནོད་བྱེད་དང་། ། ལོག་པར་ལྟ་དང་སྡིག་ཅན་དང་། ། ཚུལ་ཁྲིམས་འཆལ་དང་རྒོལ་བ་དང་། ། བླ་མ་ལ་འཁུ་དེ་དག་ལ།
BO། ཕན་ཕྱིར་ཁྲོ་བ་བསྐྱེད་དེ་བྱ། ། རྟོག་པ་མང་པོ་ལས་གསུངས་པའི། ། ལུས་དང་ལྡན་པའི་སྦྱོར་བ་དང་། ། ཁྲོ་བོ་མངག་གཞུག་ཕོ་ཉ་མོ། ། དྲག་པོའི་ཚོགས་ཀྱིས་དྲག་ ཤུལ་སྤྱོད། ། སེམས་ཅན་འཕོངས་ལ་ཞི་བ་བྱ། ། བདེ་བར་གནས་ལ་རྒྱས་པ་སྟེ། ། གང་དག་དྲག་ཤུལ་སྤྱོད་པའི་ལས། ། དེ་དག་དགྲ་ལ་སྤྱད་པར་བྱ། ། མཁས་པས་ས་བླའི་གསང་སྔགས་ཀྱིས། ། དྲག་ཤུལ་སྤྱོད་པ་སྤྱད་པར་བྱ། ། ཆོ་ག་ཞིབ་མོ་བརྩམ་བྱ་སྟེ། ། སྡང་དང་གཡོ་ སྒྱུ་ཅན་ལ་སྤྱད། ། ངེས་པར་མྱོང་འགྱུར་ལས་མང་པོ། ། བདག་གིས་དང་དུ་བླང་དགོས་ཞེས། ། དེ་ཡིས་ཉེས་པ་བྱས་པ་ཀུན། ། ཚེ་འདི་ཉིད་ལ་སྨིན་པར་བྱ། ། དེ་ལྟར་གསང་སྔགས་ལྷ་རྣམས་ཀྱང་། ། ངན་སྤྱོད་རྣམས་ལ་བརྩེ་བའི་ཕྱིར། ། དེ་ལ་སོགས་པའི་ཐབས་རྣམས་ཀྱིས། ། ངན་སོང་དག་ལས་འབྱིན་པར་མཛད། ། དགྲ་ལ་གནོད་པ་བྱ་བ་ཡང་། ། ཉེས་དང་འཚམ་པར་བྱ་དགོས་པ། ། ཉེས་པ་ཆུང་ངུ་བྱས་པ་ལ། ། འཆི་བར་འགྱུར་བ་མི་བརྩམ་མོ། ། ཁྲོས་པའི་དབང་གིས་བྱས་པ་ཡི། ། སྙིང་ཚིམ་ནས་ནི་མོད་ལ་ཡང་། ། ཞི་བར་བྱ་ཕྱིར་ཞི་བ་ཡི། ། སྔགས་ ཀྱིས་ཞི་བའི་ཆོ་ག་བྱ། ། ཡང་ན་དེ་ཡི་མེ་ཉིད་ལ། ། གསང་སྔགས་དེ་ཉིད་ཁོ་ན་ཡི། །
BOབསྐུལ་ཚིག་ཡོངས་སུ་བརྗོད་ནས་སུ། ། འོ་མས་ཞི་བའི་སྦྱིན་སྲེག་བྱ། ། མཁས་པས་བདེ་གཤེགས་ཆོས་ཉིད་དང་། ། བྱང་ཆུབ་སེམས་ནི་དྲན་བྱ་སྟེ། ། གཟུ་ལུམས་ཅན་དང་སྡིག་ཅན་ལ། ། དེ་ མ་ཐག་ཏུ་ཞི་བ་བྱ། ། ཞི་བ་མཆོད་རྟེན་རིང་བསྲེལ་ཅན། ། པདྨའི་རྫིང་བུར་རྒྱས་པ་སྟེ། ། ཟློས་པ་པོས་ནི་ཁྱད་པར་དུ། ། དུར་ཁྲོད་དག་ཏུ་དྲག་ཤུལ་སྤྱད། ། ཞི་བ་དང་རྒྱས་པ་དང་། ། དྲག་ཤུལ་སྤྱོད་པའི་ཆོ་ག་རིམ་པར་ཕྱེ་བའོ། ། ། ། གང་དག་སྟེང་དུ་འགྲོ་བའི་ལས། ། དེ་ཀུན་ རབ་ཏུ་ཤེས་པར་བྱ། ། གང་གཞན་ཅུང་ཟད་མི་སྣང་བ། ། དེ་དག་འབྲིང་གི་ཆོ་གར་བཤད། ། གང་དག་འདི་ནས་ས་པའི་ལས། ། དེ་དག་ཐམས་ཅད་ཐ་མར་བཤད། ། དེ་བས་རབ་འབྲིང་ཐ་མ་ཡི། ། ལས་རྣམས་ཀྱི་ནི་བྱེ་བྲག་ད་བྱེ། ། རབ་དང་འབྲིང་དང་ཐ་མ་ཡི། ། དངོས་གྲུབ་ ལས་ཀྱི་དབྱེ་བ་ལས། ། སྟེང་དང་བར་སྣང་ས་པ་དག ། གནས་ནི་རྣམ་པ་གསུམ་དུ་བཤད། ། རིག་སྔགས་འཆང་དང་ནམ་མཁར་འགྲོ། ། སྣ་ཚོགས་གཟུགས་ཀྱི་དངོས་གྲུབ་དང་། ། དེ་བཞིན་མངོན་ཤེས་མཐོང་བ་དང་། ། ཞི་བའི་བློ་དང་ཡེ་ཤེས་ཐོབ། ། བསྟན་བཅོས་ཀུན་ ཤེས་བློ་དག་དང་། ། སྨྲ་མཁས་ཐོས་པ་འཛིན་པ་དང་། །
BOརོ་ལངས་གྲུབ་དང་མངོན་ཕྱོགས་དང་། ། གནོད་སྦྱིན་མོ་ལ་སོགས་གྲུབ་དང་། ། ས་སྟེངས་རྒྱལ་སྲིད་ཡིད་བཞིན་ནོར། ། གཏེར་ཆེན་དག་ནི་གཉིས་པ་སྟེ། ། དེ་དག་ལ་སོགས་བསྟན་པ་རྣམས། ། རིག་སྔགས་དངོས་ གྲུབ་རབ་ཡིན་ནོ། ། མི་སྣང་སྟོབས་དང་བརྩོན་འགྲུས་དང་། ། ཕུག་གི་དངོས་གྲུབ་བཅུད་ཀྱིས་ལེན། ། མངག་གཞུག་ལྷ་མིན་དངོས་གྲུབ་དང་། ། ཤ་ཟ་ས་ལ་བྷཉྫི་ཀ ། མང་དུ་ཐོས་པའི་ཤེས་ཐོབ་དང་། ། རྐང་མགྱོགས་པ་ཡི་དངོས་གྲུབ་དང་། ། དེ་དག་ལ་སོགས་དངོས་ གྲུབ་རྣམས། ། འབྲིང་པོའི་ནང་ནས་རབ་ཏུ་བསྟན། ། འགྲོ་བ་ཐམས་ཅད་དགའ་བ་དང་། ། འཇིག་རྟེན་པ་རྣམས་དབང་བསྐུར་དང་། ། དྲག་ཤུལ་སྤྱོད་པའི་ཆོ་ག་ནི། ། བསྐྲད་པ་ལ་སོགས་ཐམས་ཅད་དང་། ། གང་གཞན་ཅུང་ཟད་ཕལ་གྱི་རྣམས། ། མཁས་པས་ཐ་མར་རིག་ པར་བྱ། ། རྫས་འབར་བ་ལས་རབ་ཏུ་འགྱུར། ། དུ་བ་ཉིད་ལས་འབྲིང་དུ་འགྱུར། ། དྲོད་ལས་དངོས་གྲུབ་ཐ་མར་འགྱུར། ། དེ་ལྟར་དངོས་གྲུབ་རྣམ་གསུམ་པོ། ། འཕགས་གསུངས་གསང་སྔགས་མཐུ་ཆེན་གྱིས། ། དངོས་གྲུབ་རབ་ནི་འགྲུབ་པར་གྲགས། ། ལྷ་ཡི་སྔགས་ཀྱིས་ འབྲིང་པོ་གྲུབ། ། ས་བླས་ཐ་མ་འགྲུབ་པར་གསུངས། ། དེ་བཞིན་གཤེགས་པའི་རིག་པ་ཡི། །
BOསྔགས་ཀྱིས་དངོས་གྲུབ་ཆེན་པོ་འཐོབ། ། པདྨ་འཛིན་པས་གསང་སྔགས་ཀྱིས། ། དངོས་གྲུབ་འབྲིང་པོ་ཐོབ་པར་བཤད། ། རྡོ་རྗེ་འཛིན་པས་གསུངས་པ་ཡིས། ། དངོས་གྲུབ་ཐ་མ་འགྲུབ་པར་བསྒྲགས། ། རབ་ཀྱི་ཐ་མ་གང་ཡིན་པ། ། དེ་དང་ཐ་མའི་རབ་མི་མཉམ། ། དངོས་གྲུབ་ལྷག་མ་གཉིས་པ་ཡང་། ། ཆོ་གའི་རིམ་པ་དེ་ཉིད་དོ། ། འབྲས་བུའི་ཡོན་ཏན་བསྟན་པ་ཡི། ། ཆེ་བའི་བྱེ་བྲག་རྣམ་གསུམ་ལས། ། ར་བ་དང་འབྲིང་དང་ཐ་མ་ ཡི། ། བྱེ་བྲག་དེ་དག་རབ་ཏུ་བསྒྲགས། ། སངས་རྒྱས་བྱང་ཆུབ་སེམས་དཔའ་ཡིས། ། གསུངས་པའི་གསང་སྔགས་གང་ཡིན་པ། ། དེ་ལས་དངོས་གྲུབ་རབ་འབྱུང་བ། ། ཐ་མ་དག་ལ་ཡོད་པར་འགྱུར། ། རྒྱས་པར་གསུངས་པའི་གསང་སྔགས་ལས། ། ཁ་ཅིག་ལས་ གཅིག་བྱེད་པའང་ཡོད། ། དེ་དག་གི་ནི་ལས་དེ་ཡང་། ། ར་བ་དང་འབྲིང་དང་ཐ་མར་བཤད། ། ཁ་ཅིག་དེ་ལྟར་རིམ་མེད་པར། ། དངོས་གྲུབ་རྣམས་ནི་འབྱུང་འགྱུར་ཏེ། ། འདམ་ལས་པདྨ་སྐྱེ་བ་དང་། ། ཙནྡན་ཤིང་ལས་མེ་འབྱུང་བཞིན། ། རབ་དང་འབྲིང་དང་ཐ་མ་ལ། ། ལུས་ཀྱི་དངོས་གྲུབ་རབ་ཡིན་ནོ། ། རྫས་ལས་གྲུབ་པ་འབྲིང་ཡིན་ཏེ། ། ལོངས་སྤྱོད་དངོས་གྲུབ་ཐ་མའོ། ། ཐ་མའི་གསང་སྔགས་ཟློས་པ་ནི། །
BOལ་ལས་རབ་ཏུ་བསྙེན་བྱས་ན། ། དངོས་གྲུབ་གཞན་ལས་བླངས་ནས་ནི། ། མཆོག་ཀྱང་རབ་ཏུ་སྟེར་བར་འགྱུར། ། རབ་ལའང་ལ་ ལ་ཞིག་གིས་ནི། ། མ་བསྒྲིམས་པར་ཡང་བསྙེན་བྱས་ན། ། སྔགས་ཀྱི་དངོས་གྲུབ་ཐ་མ་སྩོལ། ། དེ་བས་བསྙེན་པ་རབ་ཏུ་གཅེས། ། ལྷ་རྣམས་ལ་ཡང་དབུལ་པོ་ཡོད། ། {ཡི་དགས་,ཡི་དྭགས་}ལ་ཡང་མཐུ་ཆེན་ཡོད། ། དེ་བཞིན་དངོས་གྲུབ་དག་ལ་ཡང་། ། རྣམ་པ་སྣ་ཚོགས་ཡོད་ པར་འགྱུར། ། རབ་འབྲིང་ཐ་མ་རེ་རེ་ལའང་། ། དངོས་གྲུབ་རྣམ་པ་གསུམ་དུ་དབྱེ། ། གསང་སྔགས་རྣམས་ཀྱི་མཐུ་ཤེས་ནས། ། བསྙེན་པ་ལས་ནི་དངོས་གྲུབ་བརྩམ། ། དངོས་གྲུབ་དབྱེ་བའི་མཚན་ཉིད་རིམ་པར་ཕྱེ་བའོ། ། ། ། ཟློས་པས་དང་པོ་ལྷ་ཁང་དུ། ། ཞུགས་ཏེ་མཉམ་ པར་བཞག་ནས་ནི། ། ལྷ་ལ་མངོན་དུ་ཕྱོགས་འདུག་སྟེ། ། ཐལ་མོ་སྦྱར་བས་ཕྱག་འཚལ་ནས། ། རྗེས་སུ་མཐུན་པའི་མེ་ཏོག་དང་། ། སྤོས་ཀྱི་ཆུ་ནི་གཙང་མ་ཡིས། ། མཆོད་ཡོན་{གོ་རིམས་,གོ་རིམ་}བཞིན་བཤམས་ནས། ། བདུག་སྤོས་ཀྱིས་ཀྱང་རབ་བདུགས་ཏེ། ། ལན་བདུན་བཟླས་ ནས་མཆོད་ཡོན་དེས། ། ལྷ་རྣམས་དག་ནི་སྤྱན་དྲང་ངོ་། ། གསང་སྔགས་སྤྱན་ནི་དྲངས་ནས་ཀྱང་། ། དེ་ཡི་འོག་ཏུ་མཆོད་པ་བྱ། །
BOགསེར་དང་དངུལ་དང་ཟངས་མ་དང་། ། རྡོ་བ་དང་ནི་ཤིང་གིའམ། ། ཁམ་པའམ་དུང་ངམ་ཉ་ཕྱིས་སམ། ། དེ་བཞིན་ལོ་མ་སྐྱོངས་པའང་རུང་། ། ཞི་དང་རྒྱས་དང་དྲག་སྤྱོད་དང་། ། རབ་དང་འབྲིང་དང་ཐ་མ་ཡི། ། ལས་དང་དངོས་གྲུབ་རྣམས་ལ་ནི། ། རིགས་པའི་སྣོད་རྣམས་སྦྱར་བར་བྱ། ། ཁ་དོག་ཡོན་ཏན་བཤད་པ་ལས། ། གཞན་དང་གཞན་ཡང་ཅི་རིགས་པའི། ། སྣོད་རྣམས་ཅི་ལྟར་འདོད་པ་ནི། ། འདོད་ཡོན་ཕྱིར་ནི་རབ་ཏུ་ སྦྱར། ། ཞི་བའི་མཆོད་ཡོན་ནས་དང་བཅས། ། ཏིལ་དང་བཅས་པ་རྒྱས་པ་ལ། ། ཐམས་ཅད་དང་ནི་འགལ་བའི་ཕྱིར། ། ཀོ་ཏྲ་པར་བཅས་དྲག་སྤྱོད་ལ། ། ཞི་བའི་མཆོད་ཡོན་འོ་མ་ཅན། ། རྒྱས་པ་ལ་ནི་ཞོ་ཅན་ནོ། ། བ་ཡ་གཅིན་ནམ་ཡང་ན་ཁྲག ། དྲག་ཤུལ་སྤྱོད་པའི་ དོན་དུ་ཤིས། ། རབ་དང་འབྲིང་དང་ཐ་མ་ཡི། ། ལས་རྣམས་ཀུན་ལ་འབྲས་ཡོས་ཤིས། ། སྤོས་དང་མེ་ཏོག་ཀུ་ཤ་ཏིལ། ། ཆུ་རྣམས་བྱེ་བྲག་མེད་པར་བཟང་། ། མཆོད་ཡོན་ཕྱིར་ནི་ཟངས་ཀྱི་སྣོད། ། ལས་རྣམས་ཀུན་ལ་རབ་ཏུ་ཤིས། ། འདི་མ་འབྱོར་གྱིས་བདག་ལ་ནི། ། བཟོད་མཛོད་ཅི་འབྱོར་བས་ཀྱང་བྱ། ། སྔགས་རྒྱུད་ལས་གསུངས་ཐམས་ཅད་ཀྱང་། ། རིག་པའི་རྒྱལ་པོས་རིམ་བཞིན་དུ། ། སྤྱན་དྲང་ཆོ་ག་བྱ་བར་བཤད། །
BOཡང་ན་གང་རྗེས་གང་འབྲང་བའི། ། སྔགས་རྒྱུད་བདག་པོ་གང་ཡིན་དང་། ། རིག་སྔགས་རྒྱལ་མོ་གང་ཡིན་པ། ། དེ་གཉིས་ ཀྱིས་ནི་ཡོངས་བཟླས་ན། ། དེ་ནས་དེ་ཡིས་མངོན་པར་བསྔགས། ། རིགས་གསུམ་ལ་ཡང་དེ་བཞིན་དུ། ། ཐམས་ཅད་སྤྱན་ནི་དྲང་བར་བྱ། ། གང་དག་རང་རྒྱུད་ལས་གསུངས་པ། ། དེ་དག་ལ་ནི་དེ་ཉིད་བཤད། ། བཞུད་ཅིག་ཞེས་ནི་བདག་པོའི་བཀའ། ། ཟློས་པས་རབ་ཏུ་བསྒྲགས་ ནས་བཞུད། ། སྤྱན་ཡང་དྲངས་མ་ཐག་ཏུ་ནི། ། གསང་སྔགས་དགྱེས་ནས་འབྱོན་པར་འགྱུར། ། ལ་ལ་ཆོ་ག་གང་ཡིན་ལས། ། སྤྱན་དྲངས་སླར་གཤེགས་བཤད་པ་དག ། དེ་དག་གསོལ་བའི་ལས་བྱས་ནས། ། རབ་ཏུ་དགྱེས་ནས་དེ་བཞིན་མཛད། ། རིག་སྔགས་ རྒྱལ་མོས་རིག་སྔགས་རྣམས། ། སྤྱན་དྲང་བ་ཡི་ཆོ་ག་བྱ། ། རིག་སྔགས་རྒྱལ་པོས་གསང་སྔགས་རྣམས། ། གཞན་རྣམས་ལ་ནི་གཉིས་ཀས་སོ། ། ལན་ཅིག་བཟླས་སམ་ལན་གསུམ་བཟླས། ། ཡང་ན་ལན་བདུན་མངོན་པར་བསྔགས། ། གསང་སྔགས་བྱེ་བྲག་རྣམས་ཤེས་ནས། ། ཉི་ཤུ་རྩ་གཅིག་ཏུ་ཡང་བཟླས། ། མཆོད་ཡོན་ཆོ་ག་བཞིན་བཟླས་ནས། ། བདུག་སྤོས་དག་གིས་རབ་ཏུ་བདུག ། གུས་པས་པུས་མོ་གཉིས་བཙུགས་ནས། ། ལས་བྱེད་བཅས་པའི་ལག་པས་དབུལ། ། དད་པ་དང་ནི་དམ་ཚིག་གིས། །
BOཚུར་གཤེགས་ཚུར་གཤེགས་བཅོམ་ ལྡན་འདིར། ། བདག་གི་མཆོད་ཡོན་དེ་བཞེས་ལ། ། མཆོད་པས་བདག་ལ་དགྱེས་པར་མཛོད། ། གསང་སྔགས་གང་དག་གཅིག་པུ་ལ། ། དྲག་ཅིང་གཏུམ་ལ་ཕ་རོལ་གནོན། ། དེ་ནི་རང་གི་སྔགས་ཉིད་ཀྱིས། ། སྤྱན་དྲང་བ་ཡི་ཆོ་ག་བྱ། ། གང་ཡང་ཕལ་པ་ཁ་ཅིག་དང་། ། གང་ ཡང་འཁོར་དུ་གྱུར་པ་དག ། དེ་དག་རང་གི་སྔགས་ཉིད་ཀྱིས། ། སྤྱན་དྲང་ཆོ་ག་བྱ་བར་བཤད། ། རིག་སྔགས་རྒྱལ་དང་གསང་སྔགས་རྣམས། ། མདོར་ན་སོ་སོའི་གསང་སྔགས་སམ། ། ཐམས་ཅད་ལ་ཡང་སྙིང་པོ་ཡིས། ། སྤྱན་དྲང་བ་ནི་མཆོག་ཏུ་བཤད། ། མདོར་ན་མཁས་ པས་མཆོད་ཡོན་དང་། ། སྤྱི་ཡི་རིགས་ཀྱི་སྙིང་པོ་ཡིས། ། ཚུར་གཤེགས་ཞེས་ནི་སྤྱན་དྲང་བ། ། འདི་ནི་གསང་བར་རབ་ཏུ་བསྒྲགས། ། རབ་ཏུ་དད་པས་ཕྱག་བྱ་སྟེ། ། གསོལ་བ་ཡང་དང་ཡང་བྱས་ནས། ། གསང་སྔགས་རྣམས་དང་རིག་སྔགས་དག ། མཁས་པས་གུས་པས་སྤྱན་ དྲང་ངོ་། ། ཟློས་པས་མཉམ་གཞག་ལག་པ་གཉིས། ། སྤྱི་བོར་བཞག་པའི་མཆོད་ཡོན་དག ། གསང་སྔགས་མཆོག་ལ་ཕུལ་ན་ནི། ། འོན་ཏང་སྤྱན་ནི་དྲང་བར་འགྱུར། ། བར་མ་དག་ལ་བྲང་ཁ་ནས། ། ཕལ་པ་རྣམས་ལ་ལྟེ་བ་ནས། ། མཆོད་ཡོན་ཚུལ་བཞིན་བཟླས་དབུལ་བ། ། སྤྱན་དྲང་ཆོ་ག་རིག་པར་བྱ། །
BOམཆོད་ཡོན་སྔགས་ཀྱི་བཟླས་པ་ཡིས། ། རི་མོའམ་ཡང་ན་གཟུགས་དག་ལ། ། གསང་སྔགས་གང་དག་འགྲེང་སྣང་བ། ། དེ་ལ་འགྲེང་སྟེ་སྤྱན་དྲང་བ། ། འདུག་པ་ལ་ནི་འདུག་ནས་སོ། ། བཟུར་བ་ལ་ནི་བཟུར་ནས་སོ། ། སྤྱན་དྲང་ཕྱིར་ནི་ མཆོད་ཡོན་དག ། ཆོ་ག་བཞིན་དུ་དབུལ་བར་བགྱི། ། གསང་སྔགས་ལ་ལའི་གནས་དག་ནི། ། གང་དང་གང་གི་ཕྱོགས་ཡན་པ། ། ཕྱོགས་དེར་ཐོག་མར་བལྟས་ནས་ནི། ། མཆོད་ཡོན་བཟླས་ཏེ་དེར་ཕྱོགས་ལ། ། ལས་དེ་ཕྱོགས་སུ་བལྟས་ནས་ནི། ། དེ་ནས་མཆོད་ཡོན་དབུལ་ བར་བྱ། ། འདི་ནི་སྤྱན་དྲང་ཆོ་ག་གཞན། ། གསང་བའི་དམ་པ་བཤད་པ་ཡན། ། ཐལ་སྦྱར་མཆོད་ཡོན་མེ་ཏོག་དང་། ། ཡིད་ཀྱིས་སམ་ནི་ཆུས་ཀྱང་རུང་། ། མཁས་པས་སྤྱན་དྲང་ཆོ་ག་ནི། ། གང་དུའང་རུང་བར་མདུན་དུ་བྱས། ། གསང་སྔགས་ཀུན་གྱི་ཆོ་ག་འདིར། ། སྔགས་དང་ཕྱག་ རྒྱར་ལྡན་པ་ཡིས། ། སྤྱན་དྲང་ཆོ་གར་གསུངས་པ་དག ། འདི་ནི་ཀུན་གྱི་སྤྱི་ཡིན་ནོ། ། སྒྲུབ་པོས་སྔོན་དུ་བསྙེན་པ་དང་། ། མཆོད་པ་ལ་སོགས་ལས་རྣམས་དང་། ། ལས་ཀྱི་ཆོ་ག་བྱེད་པས་ན། ། སྤྱན་དྲང་བ་ནི་ཡིད་ཀྱིས་བྱ། ། ཇི་ལྟར་མཐུན་པའི་ཆོ་ག་བཞིན། ། སྤྱན་དྲང་ཆོ་ག་བཤད་ པ་ནི། ། ཐམས་ཅད་དོན་བྱེད་ཕྱིར་གསུངས་ཏེ།
BO། ཕྲན་ཚེགས་དག་ལ་ཕལ་གྱིས་བྱ། ། ཟློས་པས་སྤྱན་ནི་དྲངས་ནས་ཀྱང་། ། ཆོ་ག་བཞིན་དུ་མཉེས་བྱས་ནས། ། གསང་སྔགས་ཀྱི་ནི་ལྷ་རྣམས་ཀྱང་། ། ཕན་འདོགས་ལ་སོགས་ཐམས་ཅད་མཛད། ། སྤྱན་དྲང་བའི་ཆོ་ག་རིམ་ པར་ཕྱེ་བའོ། ། ། ། སྒྲུབ་པ་པོས་ནི་ལས་ཀུན་ལ། ། ལྷ་རྣམས་སྤྱན་དྲངས་བྱས་ནས་ནི། ། གསང་སྔགས་རིམ་པར་ཕྱེ་བ་བཞིན། ། ཆོ་ག་ཤེས་པས་མཆོད་པ་བརྩམ། ། བདེ་བར་གཤེགས་སོ་བཅོམ་ལྡན་འདས། ། ཚུར་གཤེགས་འདིར་ནི་བཞུགས་སུ་གསོལ། ། བདག་གི་ མཆོད་པ་བཞེས་ནས་ཀྱང་། ། ཐུགས་ཀྱིས་ཐུགས་དཔག་མཛད་དུ་གསོལ། ། བདག་ནི་གུས་དང་ལྡན་ནོ་ཞེས། ། ལྷ་ལ་ཡང་དང་ཡང་གསོལ་ནས། ། གསང་སྔགས་སྒྲུབ་པས་དུས་གསུམ་དུ། ། ཆོ་ག་འདིས་ནི་མཆོད་པ་བྱ། ། སྔོན་གྱི་སྔགས་རྒྱུད་ལུང་གིས་ནི། ། ཐོག་མར་དྲི་ རྣམས་དབུལ་བར་བྱ། ། དེ་ནས་མེ་ཏོག་རྗེས་མཐུན་པའོ། ། དེ་ནས་བདུག་སྤོས་རབ་ཏུ་བསྒྲགས། ། དེ་ནས་ལྷ་བཤོས་རྗེས་མཐུན་པའོ། ། མར་མེ་ཐ་མར་རབ་ཏུ་སྦྱར། ། ཁྲོ་བོའི་རྒྱལ་པོས་བསངས་པའི་རྫས། ། གཙང་ཞིང་ངན་པ་མ་ཡིན་པ། ། རྗེས་ སུ་མཐུན་ཞིང་ཡོན་ཏན་ཅན། ། བློ་དང་ལྡན་པས་གུས་པས་དབུལ། ། སོ་སོ་ཡི་ནི་གསང་སྔགས་ཀྱིས། །
BOརེ་རེ་ལ་ཡང་མངོན་བསྔགས་ནས། ། མཆོད་པའི་ཡན་ལག་ཅི་དགར་དབུལ། ། སོ་སོ་སོ་སོར་མཆོད་ཡོན་དབུལ། ། ཆེ་གེ་མོ་འདི་བཞེས་ཤིག་ཅེས། ། རྫས་ཀྱི་མིང་ ནས་ཕྱུང་སྟེ་དབུལ། ། མ་འབྱོར་ན་ཡང་གཟུགས་བརྙན་རྣམས། ། བྱས་ནས་མཆོད་ཡོན་དབུལ་བར་བྱ། ། གུས་དང་མཆོད་ཡོན་ཕུལ་བ་ཡིས། ། ཆོ་ག་ཐམས་ཅད་རྫོགས་པར་འགྱུར། ། ཐལ་སྦྱར་མཆོད་ཡོན་བློས་མཆོད་དང་། ། ཆོ་གའི་ཡན་ལག་ཉིད་དང་གཞིའོ། ། མཆོད་པའི་ཆོ་ག་ཐམས་ཅད་ལ། ། ཇི་ལྟར་རིགས་པར་སྦྱར་བར་བྱ། ། རྣམ་པ་ཀུན་ལས་མཁས་པ་ནི། ། རྟག་ཏུ་ཅི་ནུས་པས་ཀྱང་རུང་། ། ཆོས་ཀྱི་ཐོག་མར་ཡིད་འགྲོ་ཞེས། ། ཐུབ་པ་ཆེན་པོས་བཀའ་སྩལ་པས། ། ཡིད་ཀྱི་མཆོད་པ་ཁྱད་པར་ཅན། ། ལེགས་པ་ཉིད་དུ་བརྩམ་ པར་བྱ། ། མཆོད་པའི་རིམ་པར་ཕྱེ་བའོ། ། ། ། ཡིད་ནི་རབ་ཏུ་མཉམ་བཞག་ནས། ། ཆོ་ག་ལྷག་མ་བྱ་བར་བཤད། ། སྒྲུབ་པ་པོས་ནི་ཐོག་མ་རུ། ། ཁྲོ་བོའི་རྒྱལ་པོས་བསྐྲད་པར་བྱ། ། ཡང་ན་རིག་སྔགས་སོ་སོ་ཡི། ། ལས་ཀུན་བྱེད་པའི་རིག་སྔགས་ཀྱིས། ། ན་མོ་རཏྣ་ཏྲ་ཡཱ་ཡ། ནམཤྩཎྜ་བཛྲ་པཱ་ཎ་ཡེ། མ་ཧ་ཡཀྵ་སེ་ནཱ་པ་ཏ་ཡེ། ནམཤྩཎྜ་བཛྲ་ཀྲོ་དྷཱ་ཡ། ། ཨོྃ་ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན།
BOཨ་མྲྀ་ཏེ་ཧཱུྃ་ཕཊ་སྭཱ་ཧཱ། ཨོཾ་ཏྲཾ་བནྡྷ་སྭཱ་ཧཱ། ན་མོ་མ་ཧཱ་ཤྲི་ཡཻ། ཨོཾ་ཤ་མེ་སམ་ཡེ་སཽ་མེ་སིདྡྷི་སིདྡྷ་སཱ་དྷ་ཡ་ཤི་བེ་ཤི་བཾ་ཀ་རི། ཨཱ་བ་ཧ་ སརྦ་ཨརྠ་སཱ་དྷ་ནི་སྭཱ་ཧཱ། རིགས་གསུམ་གྱི་ལས་ཐམས་ཅད་བྱེད་པའི་གསང་སྔགས་སོ། ། ཁྲོ་བོའི་གསང་སྔགས་རྒྱར་བཅས་པས། ། མེ་ཏོག་ལ་སོགས་རྣམ་པར་བསང་། ། ལག་པ་གཡོན་པར་བཞག་པའི་ཆུས། ། ཐོག་མ་ཉིད་དུ་བསང་གཏོར་བྱ། ། བདག་པོའི་སྔགས་ ཀྱིས་བྱ་བའམ། ། ཡང་ན་རིགས་ཀྱི་སྙིང་པོས་བྱ། ། མདོར་ན་གསང་སྔགས་ཐམས་ཅད་ཀྱང་། ། ཕྱག་རྒྱར་བཅས་པས་བསང་བར་བྱ། ། བདག་ཉིད་རྣམ་པར་སྦྱང་བའི་ཕྱིར། ། སྤོས་ཆུས་ལག་མཐིལ་བླུགས་པ་ལ། ། བལྟ་ཞིང་དེ་ཡི་སྙིང་པོ་བཟླས། ། རང་གི་སྤྱི་བོར་བསང་ གཏོར་བྱ། ། སྟན་ཡང་རྣམ་པར་སྦྱང་བའི་ཕྱིར། ། ལས་ཀུན་བྱེད་པའི་གསང་སྔགས་སམ། ། ཡང་ན་ཁྲོ་བོའི་རྒྱལ་པོ་ཡིས། ། སྤོས་ཀྱི་ཆུས་ནི་བསང་གཏོར་བྱ། ། ལན་བདུན་བཟླས་བརྗོད་བྱས་པའི་ཆུས། ། ས་ཕྱོགས་ཀུན་དུ་བསང་གཏོར་བྱ། ། བསང་བ་དང་ནི་སྦྱང་བ་ དག ། གསང་སྔགས་འདིས་ནི་བྱས་པར་འགྱུར། ། ཨོྃ་ཀཱི་ལི་ཀཱི་ལ། བཛྲཱི་བཛྲཱི་བྷུར་བནྡྷ་བནྡྷ་ཧཱུྃ་ཕཊ། དེ་ནས་སྟེང་དུ་བློ་ཅན་གྱིས། །
BOརིག་པའི་རྒྱལ་པོ་འདི་འདོན་ཅིང་། ། བདུག་པས་ལྷ་རྣམས་བསང་བ་དང་། ། བཅིང་བ་དང་ནི་སྦྱང་བར་བྱ། ། ཨོྃ་སུ་སིདྡྷི་ཀ་ར་ཛྭ་ལ་ཧི་ཨ་ནནྟ་མཱུརྟ་ཡེ། ཛྭ་ལ་ཛྭ་ལ། བནྡྷ་བནྡྷ། ཧ་ན་ཧ་ན་ཧཱུྃ་ཕཊ། ཐམས་ཅད་སྤྱིའིའོ། ། ཨོྃ་ཛྭ་ལ་ཧཱུྃ། དེ་བཞིན་གཤེགས་པའི་རིགས་ལའོ། ། ཨོྃ་པདྨ་ནི་བྷ་ག་བ་ཏི། མོ་ཧ་ཡ། ཛ་གད་མོ་ཧ་ནི་སྭཱ་ཧཱ། པདྨའི་རིགས་ལའོ། ། དེ་ནས་བློ་དང་ལྡན་པ་ཡིས། ། རིགས་ཀྱི་སྙིང་པོ་ཡོངས་བཟླས་པའི། ། སྤོས་ཆུས་ ཁོ་ར་ཁོར་ཡུག་ཏུ། ། ཐམས་ཅད་དུ་ནི་ཕྱོགས་བཅིང་བའོ། ། རིག་སྔགས་རྒྱལ་པོའི་སྙིང་པོའམ། ། བདག་གི་རིག་སྔགས་རྒྱལ་པོའམ། ། རང་གི་གསང་སྔགས་མངག་གཞུག་པས། ། ཕྱོགས་བཅིང་བ་ནི་གུས་པར་བྱ། ། བྷྲཱུ་ཨོྃ་ཨ་མྲྀ་ཏོདབྷ་བ་ཧཱུྃ་ཕཊ། ན་མོ་ར་ཏྣ་ཏྲ་ཡཱ་ཡ། ནམ་ཤྩཎྜ་ བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཨོཾ་སུམྦྷ་ནི་སུམྦྷ་ཧཱུྃ། གྲྀཧྞ་གྲྀཧྞ་ཧཱུྃ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུྃ། ཨཱ་ན་ཡ་ཧོ་བྷ་ག་བན་བིདྱཱ་རཱ་ཛ་ཧཱུྃ་ཕཊ་སྭཱ་ཧཱ། རིགས་གསུམ་གྱི་རིག་པའི་རྒྱལ་པོའི་སྔགས་སོ། ། དེ་དག་ཉིད་ཀྱི་སྙིང་པོ་ཡིས། ། ར་བ་རྣམས་ཀྱང་རབ་ཏུ་སྦྱར། ། རིགས་ཀྱི་ རིག་སྔགས་རྣམས་ཀྱིས་ནི། །
BOལྷ་རྣམས་ཡོངས་སུ་བསྲུང་བར་བྱ། ། ལས་རྣམས་ཀུན་ལ་ཐམས་ཅད་དུ། ། བགེགས་ལ་སོགས་པ་བསལ་བ་ལས། ། རྣམ་པར་རྟོག་པའི་ཆོ་ག་ཡིས། ། བདུད་རྩི་ཐལ་སྦྱོར་རབ་ཏུ་སྦྱར། ། ཁང་པའི་ཁོ་ར་ཁོར་ཡུག་ཏུ། ། དྲ་བ་ར་བ་ཕུར་བུ་དག ། ཀཱི་ལི་ཀཱི་ལ་བདུད་རྩི་ཞེས། ། ཁྲོ་བོ་གཉིས་ནི་རྟག་ཏུ་སྦྱར། ། བསྲུང་བའི་གསང་སྔགས་ཐ་དད་པ། ། ཆོ་ག་ལས་བསྟན་གང་ཡིན་པ། ། དེ་ཉིད་འདིར་ནི་སྦྱར་བར་བྱ། ། ཡང་ན་གང་ལ་དད་པའང་རུང་། ། བཅོམ་ལྡན་སྤྱན་ནི་གང་ཡིན་དང་། ། གོས་དཀར་ཅན་ མ་གང་ཡིན་དང་། ། རིག་སྔགས་མཱ་མ་ཀཱི་གང་ཡིན། ། དེ་དག་ཐོག་མར་ཡོངས་སུ་བཟླས། ། དེས་ནི་བདག་དང་ལྷ་ཡང་བསྲུང་། ། སྡིག་པ་ཐམས་ཅད་བྱང་བར་འགྱུར། ། བགེགས་རྣམས་སྨ་ཡང་འབེབས་པ་དང་། ། བསམས་པའི་འབྲས་བུ་མངོན་དུ་འགྱུར། ། རིག་སྔགས་ མཱ་མ་ཀཱི་གཅིག་པུ། ། རྒྱལ་དང་པདྨའི་རིགས་ལ་ཡང་། ། བློ་ཅན་བདག་གི་གཟུངས་སུ་འདོད། ། ཐམས་ཅད་ལ་ཡང་རབ་ཏུ་སྦྱར། ། ཆོ་ག་ལས་བཤད་གསང་སྔགས་ཀྱིས། ། བསྲུང་བའི་ལས་རྣམས་བརྩམ་དུའང་རུང་། ། ཡང་ན་དཔའ་བོ་གཅིག་པུ་ཡིས། ། ཐམས་ ཅད་ཆོ་ག་བཞིན་དུ་བྱ། ། དེ་ལྟར་གསང་སྔགས་ཐམས་ཅད་ནི། ། དཀྱིལ་འཁོར་ལས་བཤད་ཆོ་ག་བཞིན། །
BOབསྙེན་པའི་ཚེ་ཡང་ཟློས་པ་པ་པོས། ། མ་ལུས་པ་ལས་ཤེས་པར་བྱ། ། གང་ཡང་རིགས་བདག་གསང་སྔགས་སམ། ། རིགས་ཀྱི་སྙིང་པོ་གང་ཡིན་པའམ། ། གསང་སྔགས་ ཀུན་གྱི་རྒྱལ་པོའམ། ། གང་ཡང་སྔགས་རྒྱུད་རྒྱལ་པོའམ། ། ལས་ཀུན་བྱེད་པའི་གསང་སྔགས་ནི། ། གསུམ་ག་ལ་ཡང་དེ་དག་གིས། ། རང་རིགས་ལས་ལ་བྱེ་བྲག་ཏུ། ། ཟློས་པ་པོས་ནི་བྱ་བར་རིགས། ། བསྲུང་དང་སྤྱན་དྲང་སྦྱང་བ་དང་། ། བཅིང་དང་ཕྱིར་བཟློག་མནན་པ་ དང་། ། དགང་དང་གཞིལ་བར་བྱ་བ་དང་། ། ཚར་གཅད་པ་དང་བསྐུལ་བ་དང་། ། དེ་ལ་སོགས་པའི་ལས་རྣམས་ཀུན། ། རིགས་གསུམ་དག་ནི་ཐམས་ཅད་དང་། ། དངོས་གྲུབ་དག་ལ་དེ་དག་གིས། ། སྒྲུབ་པ་པོས་ནི་ཐམས་ཅད་བྱ། ། བདག་གི་གསང་སྔགས་བདག་ཉིད་ཀྱང་། ། སྙིང་པོ་དེ་དག་ཉིད་ཀྱིས་བསྲུང་། ། གཙུག་ཕུད་གོས་དང་བསང་བྱེད་ལ། ། མདུད་པ་བོར་ཏེ་བདུན་གསུམ་བཟླས། ། སྙིང་གར་མཐེ་བོ་རྩེ་བཙུགས་ཏེ། ། བདག་ཉིད་བསྲུང་བའི་ཕྱིར་བཟླས་སོ། ། ཡང་ན་ཐལ་བའམ་ཡུངས་ཀར་ཆུས། ། བདག་ཉིད་བསྲུང་བར་སྤྱད་པར་བྱ། ། དྲག་པོ་ཡི་ནི་ལས་རྣམས་ལ། ། བདག་པོའི་སྔགས་ཀྱིས་བསྲུང་བ་བྱ། ། སྒྲུབ་པ་པོས་ནི་ཞི་བ་ལའང་། ། གསང་སྔགས་དྲག་པོས་ནན་ཏན་བྱ། །
BOལྷ་རྣམས་བྱིན་གྱིས་རློབ་པ་ཡང་། ། བདག་གིས་སྔགས་ཀྱིས་མཛད་པར་འགྱུར། ། བདག་གིས་སྔགས་ལ་འཇིགས་དོགས་ན། ། བསྲུང་བ་བདག་པོས་བྱ་བར་བཤད། ། སྒྲུབ་པ་པོ་ནི་བློ་ཅན་གྱིས། ། གཉིས་ཀར་རྟག་པར་ལས་རྣམས་ལ། ། བདག་ཉིད་བསྲུང་བའི་ཆོ་ག་དག ། གཙང་མས་ལྷག་པར་ལེགས་པར་བྱ། ། ལྷ་ཡི་ཁང་པའི་ཕྱི་རོལ་དུ། ། གཅིག་པུ་ཅི་དགར་སྤྱོད་པ་ན། ། ལྷ་རྣམས་ཡོངས་སུ་ བསྲུང་བའི་ཕྱིར། ། བདག་ཉིད་བཞིན་དུ་ཀུན་དུ་སྤྱད། ། ཕྱི་རོལ་ཆགས་ལ་སོགས་པ་དང་། ། ནམ་ཡང་གང་དག་མི་གཙང་བར། ། ཁྲོ་བོ་འཆོལ་པའི་གསང་སྔགས་ཀྱིས། ། དེ་ཚེ་བསྲུང་བར་བྱ་བར་བཤད། ། ན་མོ་བཛྲཱ་ཡ། ཨོྃ་བཛྲ་ཀྲོ་དྷ་མ་ཧཱ་བ་ལ་ཧ་ནད་ཧ་པ་ཙ་བི་དྷ་ན་ས་ཡ་ ཨུཙྪུཤྲ་ཀྲོ་དྷ་ཧཱུྃ་ཕཊ། ཁྲུས་བྱེད་ཚེ་ན་བགེགས་ཀྱི་དགྲས། ། བསྲུང་བ་རྟག་ཏུ་བྱ་བར་བཤད། ། ཟན་ཟའི་ཚེ་ན་བདག་པོས་བསྲུང་། ། ཉལ་ཚེ་རིགས་ཀྱི་རིག་སྔགས་ཀྱིས། ། རིགས་གསུམ་ལ་ཡང་རྟག་པར་ནི། ། བགེགས་རྣམས་ཀུན་གྱིས་གླགས་གྱུར་ལ། ། རིག་སྔགས་ རྒྱལ་པོ་ཞེས་བྱ་བ། ། དེས་ནི་བསྲུང་བ་བྱ་བར་བཤད། ། བསྲུང་བའི་རིམ་པར་ཕྱེ་བའོ། ། ། ། ཨོྃ་ཨེ་ཀ་ཛྭ་ལ་བཛྲ་པཱ་ཎི་ཧཱུྃ། ས་མ་ཡ་མ་ནུ་སྨ་ར་ཧཱུྃ་ཕཊ་སྭཱ་ཧཱ།
BOདེ་ལ་སོགས་པ་མ་ལུས་པ། ། དེ་ལྟར་བསྲུང་བ་བྱས་ནས་ནི། ། བདག་གི་ཡིད་ནི་མཉམ་བཞག་སྟེ། ། བཟླས་བརྗོད་ བྱ་བ་ཀུན་དུ་བརྩམ། ། ཀུ་ཤ་སྔོན་པོའི་རྩྭ་སྟན་ནི། ། འཕང་དུ་སོར་བཞི་ཡོད་པ་ལ། ། མཉམ་ཞིང་ཞེང་དུ་མཐོ་གང་བ། ། སྲིད་དུ་སོར་ནི་བཅུ་དྲུག་བྱ། ། སྔོན་དུ་བསྙེན་པའི་བཟླས་བརྗོད་ཚེ། ། དེ་དག་ཐམས་ཅད་བྱ་བར་གསུངས། ། དེ་དག་མ་འབྱོར་ཀུ་ཤའི་རྩྭའམ། ། ཡང་ན་འཇག་ མ་སྔོན་པོའང་རུང་། ། ལས་ཀྱི་བྱེ་བྲག་ཇི་ལྟ་བར། ། ཤིང་ལས་བྱས་པའི་སྟན་ཡང་རུང་། ། དེ་ཡི་ཚད་དུ་ལེགས་བཞོགས་པའི། ། ཤིང་གི་ཁྲིའུ་འང་རབ་ཏུ་ཤིས། ། འདབ་མ་གཙང་མ་དེ་དང་དེ། ། ཁྱད་པར་དུ་ནི་ལས་ཀུན་ལ། ། མན་ངག་བསྟན་པ་དེ་ཡིས་ནི། ། ལོ་མའི་སྟན་ ཡང་བཤད་པ་ཡིན། ། མཆོག་ལ་སོགས་པའི་བྱེ་བྲག་གིས། ། སྤྱི་ཡི་ལས་རྣམས་ཐམས་ཅད་དང་། ། སྐྱིལ་ཀྲུང་བཀྲ་ཤིས་བཟང་པོ་སྟེ། ། དེ་དག་འདུག་ཐབས་གསུམ་ཡིན་ནོ། ། མཁས་པས་དེར་ཡང་འདུག་ནས་ནི། ། མཆོད་པའི་ཆོ་ག་ལེགས་བྱས་ ནས། ། བློ་ཡིས་གུས་པ་རབ་བསྐྱེད་དེ། ། བཅོམ་ལྡན་དེ་བཞིན་གཤེགས་པ་བསྟོད། ། དེ་ནས་ཆོས་དང་དགེ་འདུན་ལ། ། དེ་ནས་སྤྱན་རས་གཟིགས་དབང་ཕྱུག ། དེ་ནས་རིག་པའི་རྒྱལ་པོ་ཆེ། །
BOརྡོ་རྗེ་འཆང་བ་བསྟོད་པར་བྱ། ། མགོན་པོ་ཐུགས་རྗེ་ཆེ་ལྡན་པ། ། ཐམས་ཅད་ མཁྱེན་པ་སྟོན་པ་པོ། ། བསོད་ནམས་ཡོན་ཏན་རྒྱ་མཚོའི་ཞིང་། ། དེ་བཞིན་གཤེགས་ལ་ཕྱག་འཚལ་ལོ། ། དག་པས་འདོད་ཆགས་བྲལ་བར་འགྱུར། ། དགེ་བས་ངན་སོང་ལས་གྲོལ་བ། ། གཅིག་ཏུ་དོན་དམ་མཆོག་གྱུར་པ། ། ཞི་གྱུར་ཆོས་ལ་ཕྱག་འཚལ་ལོ། ། གྲོལ་ནས་གྲོལ་ བའི་ལམ་ཐོབ་པ། ། བསླབ་པ་དག་ལ་རབ་ཏུ་གནས། ། ཞིང་གི་དམ་པ་ཡོན་ཏན་ལྡན། ། དགེ་འདུན་ལ་ཡང་ཕྱག་འཚལ་ལོ། ། སངས་རྒྱས་ཀུན་གྱིས་རབ་ཏུ་བསྔགས། ། ཡོན་ཏན་དམ་པ་ཀུན་བསགས་པ། ། སྤྱན་རས་གཟིགས་ཞེས་མཚན་གསོལ་བ། ། རྟག་པར་བརྩེ་ལ་ ཕྱག་འཚལ་ལོ། ། སྟོབས་པོ་ཆེ་ལ་དྲག་ཤུལ་ཅན། ། རིག་སྔགས་རྒྱལ་པོ་དགེ་བ་དག ། གདུལ་དཀའ་བདག་འདུལ་བ་བོ། ། རྡོ་རྗེ་འཛིན་ལ་ཕྱག་འཚལ་ལོ། ། དེ་ལྟར་གུས་པར་ཐལ་སྦྱར་ནས། ། རྒྱལ་སྲས་གཞན་ཡང་བསྟོད་པ་ནི། ། བྱང་ཆུབ་སེམས་དཔའི་གཞུང་གིས་ བསྟོད། ། དེ་ནས་སྡིག་པ་སོ་སོར་བཤགས། ། འཇིག་རྟེན་དག་གི་ཕྱོགས་ཀུན་ན། ། དེ་བཞིན་གཤེགས་པ་གང་བཞུགས་དང་། ། དགྲ་བཅོམ་བྱང་ཆུབ་སེམས་དཔའ་དག ། དེ་དག་བདག་ལ་དགོངས་སུ་གསོལ། ། ཚེ་རབས་གང་ཡང་རུང་བ་ན། །
BOབདག་གིས་སྡིག་པ་གང་བགྱིས་ དང་། ། སྔོན་གྱི་ཚེ་རབས་གཞན་དག་དང་། ། ཚེ་རབས་འདི་དང་འཁོར་བ་ན། ། འདོད་ཆགས་དབང་དང་བླུན་པ་དང་། ། ཁྲོ་བ་དག་གིས་འཁྲུགས་གྱུར་ཏེ། ། སངས་རྒྱས་ཆོས་དང་དགེ་འདུན་ནམ། ། བླ་མ་དག་དང་ཕ་མ་དང་། ། དགྲ་བཅོམ་བྱང་ཆུབ་སེམས་དཔའ་དང་། ། སྦྱིན་ གནས་གང་ཡང་རུང་བ་དང་། ། དེ་ལ་གཞན་པའི་སེམས་ཅན་དག ། ཡོན་ཏན་ལྡན་དང་མི་ལྡན་ལ། ། སྡིག་པའི་ལས་རྣམས་གང་བགྱིས་དང་། ། གང་ཡང་བགྱིད་དུ་སྩལ་བ་དང་། ། གང་ཡང་ཅུང་ཟད་ཡི་རང་བ། ། བག་མེད་པས་ནི་ཕྲ་མོ་ཡང་། ། ལུས་ངག་ཡིད་ཀྱིས་བགྱིས་པ་ རྣམས། ། དེ་དག་མ་ལུས་བློས་བསྡུས་ནས། ། རྫོགས་པའི་སངས་རྒྱས་སྲས་བཅས་པ། ། བདག་གིས་ད་ནི་མངོན་སུམ་བཞིན། ། རབ་ཏུ་གུས་པས་ཕྱག་འཚལ་ལོ། ། སྐྱོ་བའི་ཡིད་དུ་གྱུར་པ་ཡིས། ། ཐལ་མོ་སྦྱར་ཏེ་ནོངས་པའི་རྣམས། ། ཡང་དང་ཡང་དུ་སོ་སོར་བཤགས། ། བདག་གིས་ མི་དགེ་བགྱིས་པའི་རྣམས། ། རྫོགས་སངས་རྒྱས་ཀྱིས་མཁྱེན་པ་བཞིན། ། དེ་ལྟར་བདག་གིས་སོ་སོར་བཤགས། ། སླན་ཆད་དེ་ལྟར་ཡོང་མི་བགྱིད། ། སྲོག་ཆགས་སྡུག་བསྔལ་ཞི་བྱའི་ཕྱིར། ། བདག་ཉིད་ཇི་སྲིད་འཚོ་བར་དུ། ། སངས་རྒྱས་ཆོས་དང་དགེ་འདུན་ལ། །
BOགུས་པར་ཡང་ དག་སྐྱབས་སུ་མཆི། ། དེ་ཡི་ཡོན་ཏན་གུས་བསྒྲགས་ཏེ། ། ས་ལ་མགོ་བོས་གཏུགས་ནས་ནི། ། དཀོན་མཆོག་གསུམ་ལ་བློ་ཅན་གྱིས། ། དེ་ལྟར་གུས་པས་སྐྱབས་སུ་འགྲོ། ། དེ་ནས་མཆོག་གི་ས་བོན་གང་། ། ཐར་པ་བདུད་རྩི་འབྲས་བུ་སྦྱིན། ། ཤིན་ཏུ་བསྒོམས་ནས་མཆོག་གྱུར་པ། ། དངོས་གྲུབ་ཕྱིར་ནི་དེ་བསྐྱེད་དོ། ། སེམས་ཅན་ཁམས་ནི་མཐའ་ཡས་པའི། ། སྡུག་བསྔལ་ཉེ་བར་ཞི་བ་དང་། ། ངན་འགྲོ་རྣམས་ལས་བསྒྲལ་བ་དང་། ། ཉོན་མོངས་རྣམས་ལས་དགྲོལ་བའི་ཕྱིར། ། སྲིད་པ་མི་བདེ་དོག་པ་ན། ། སྡུག་བསྔལ་སྣ་ཚོགས་ཅི་མཆིས་པ། ། དེ་ལྟས་ཡོངས་སུ་ བསྐྱབ་པའི་ཕྱིར། ། བདག་གིས་བྱང་ཆུབ་སེམས་བསྐྱེད་དོ། ། སེམས་ཅན་ཕོངས་པ་ཐམས་ཅད་ཀྱི། ། སྐྱབས་སུ་བདག་ཉིད་རྟག་ཏུ་ཤོག ། བདག་ནི་མགོན་མེད་རྣམས་ཀྱི་མགོན། ། རྟེན་མེད་རྣམས་ཀྱི་རྟེན་དུ་བདག ། སྐྱབས་མེད་རྣམས་ཀྱི་སྐྱབས་འགྱུར་ཞིང་། ། སྡུག་བསྔལ་བདེ་ བར་བྱེད་པ་དང་། ། བདག་ནི་སེམས་ཅན་ཐམས་ཅད་ཀྱི། ། ཉོན་མོངས་ཞི་བར་བྱེད་པར་ཤོག ། དགེ་བའི་ལས་རྣམས་གང་དང་གང་། ། འདི་དང་གཞན་དུ་བསགས་པ་རྣམས། ། བསོད་ནམས་ཡེ་ཤེས་ཞེས་བྱ་བའི། ། ཚོགས་ནི་རྣམ་པ་གཉིས་སུ་ཤོག །
BOཕ་རོལ་ཕྱིན་པ་དྲུག་སྒོ་ ནས། ། བདག་གིས་བརྩོན་འགྲུས་གང་བརྩམས་པ། ། དེ་ཡང་སེམས་ཅན་མ་ལུས་པ། ། ཐམས་ཅད་ལ་ནི་ཕན་པར་ཤོག ། ཚེ་ཡི་མཐའ་ཀླས་བྱེད་པ་དང་། ། གང་ཡང་ཅུང་ཟད་བྱེད་འགྱུར་བ། ། མདོར་ན་སེམས་ཅན་ཐམས་ཅད་ཀྱི། ། ཉོན་མོངས་ཐམས་ ཅད་ཞི་བ་དང་། ། གྲོལ་བར་བྱ་བའི་ཕྱིར་འབད་ཅིང་། ། བྱང་ཆུབ་རབ་ཏུ་དགའ་བརྩོན་ནོ། ། དེ་ནས་རྫོགས་པའི་བྱང་ཆུབ་སེམས། ། ཆོ་ག་བཞིན་དུ་ཀུན་དུ་བསྐྱེད། ། སེམས་ཅན་ཀུན་ལ་སྙིང་རྗེ་དང་། ། བྱམས་པ་ཉེ་བར་གནས་པར་བྱ། ། སེམས་ནི་ལེགས་པར་སྦྱང་བའི་ཕྱིར། ། སྣ་ཚོགས་ཐབས་ཀྱིས་རྗེས་དྲན་དྲུག ། ནང་གི་བདག་ཉིད་ཞི་བ་ཡིས། ། བསམ་པ་གཅིག་ཏུ་བསྒོམ་པར་བྱ། ། སྔོན་གྱི་རྒྱལ་བའི་སྲས་རྣམས་ཀྱིས། ། སྨོན་ལམ་ཇི་ལྟར་མཛད་པ་བཞིན། ། བདག་ཀྱང་དགེ་བའི་སེམས་ཀྱིས་སུ། ། དེ་བཞིན་དུ་ནི་སྨོན་ལམ་འདེབས། ། ཆོས་ཀྱི་ ལོངས་སྤྱོད་སྣ་ཚོགས་ལ། ། མཉམ་པར་བཞག་ནས་ཡི་རང་ངོ་། ། སེམས་ཅན་ཐམས་ཅད་བདེ་བ་དང་། ། ཞི་ཞིང་ནད་ཀྱང་མེད་པར་ཤོག ། བདག་ནི་བྱ་བ་ཀུན་ནུས་ཤིང་། ། ཡོན་ཏན་དང་ཡང་ལྡན་པར་ཤོག ། ནོར་ལྡན་གཏོང་ཕོད་ཤེས་རབ་ཅན། ། བཟོད་ལྡན་དགེ་ལ་དད་པ་ དང་། །
BOསེམས་ཅན་ཚེ་རབས་ཐམས་ཅད་དུ། ། སྐྱེ་བ་དྲན་ཞིང་བརྩེར་ལྡན་ཤོག ། དེ་ནས་ཐལ་མོ་མཉམ་སྦྱར་ནས། ། བླ་མ་ལ་ནི་ཕྱག་འཚལ་ནས། ། རིག་སྔགས་རྒྱལ་པོ་དྲན་བྱས་ཏེ། ། མཁས་པས་ཆོ་ག་འདི་དག་བྱ། ། སྔགས་ཀྱི་ནོར་བུ་བླངས་ནས་ནི། ། ལག་པའི་སྙིམ་པར་ བཅུག་ནས་སུ། ། རིག་སྔགས་རྒྱལ་པོ་ལན་ཅིག་བསམ། ། དེ་ནས་གསང་སྔགས་འདི་བཟླས་སོ། ། ན་མོ་རཏྣ་ཏྲ་ཡཱ་ཡ། ནམཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཨོྃ་ཀི་རི་ཀི་རི་རཽ་དྲི་ནི་སྭཱ་ཧཱ། རྡོ་རྗེའི་རིགས་ལའོ། ། ན་མོ་རཏྣ་ཏྲ་ཡཱ་ཡ། ཨོྃ་ཨདྡྷུ་ཏེ་བི་ཛ་ཡ་སིདྡྷི་སིདྡྷ་ར་ཏེ་སྭཱ་ཧཱ། དེ་བཞིན་གཤེགས་པའི་རིགས་ལའོ། ། ན་མོ་རཏྣ་ཏྲ་ཡཱ་ཡ། ནམ་ཨརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། ཨོྃ་ཨ་མི་ཏ་ག་མེ། ཤྲི་ཡེ་ཤྲི་ཡ་ནི་ལི་སྭཱ་ཧཱ། པདྨའི་རིགས་ལའོ། ། མཐེ་བོང་དང་ནི་སྲིན་ལག་གིས། ། ལས་རྣམས་ཀུན་ལ་ནོར་བུ་དང་། ། མཁས་པས་དྲག་པོའི་ལས་ རྣམས་ལ། ། མཛུབ་མོས་དྲང་བར་རབ་ཏུ་བསྒྲགས། ། རྒྱལ་བའི་རིགས་ལ་བོ་དེ་ཙེ། ། སྔགས་ཀྱི་ནོར་བུར་རབ་ཏུ་བསྒྲགས། ། པདྨའི་རིགས་ལ་པདྨའི་སྙིང་། ། རྡོ་རྗེའི་རིགས་ལ་རུ་ད་ཀྵ། ། རིགས་གསུམ་དག་ནི་ཐམས་ཅད་ལ། །
BOནོར་བུ་དེ་དག་རབ་ཏུ་བསྒྲགས། ། བཟླས་ བརྗོད་བྱེད་པའི་ལས་ཀུན་ལ། ། དེ་དག་དགེ་ཞིང་མཆོག་ཏུ་བཤད། ། ལུང་ཏང་ཏ་ལའི་འབྲས་བུ་དང་། ། དུང་དང་ཁམ་པ་ལས་བྱུང་དང་། ། ཤེལ་དང་མུ་ཏིག་བ་སོ་དང་། ། དེ་བཞིན་བྱི་རུ་ནོར་བུ་དང་། ། ས་བོན་རྣམ་པ་སྣ་ཚོགས་དང་། ། ལྦུ་མ་དག་གི་ཕྲེང་བའང་རུང་། ། སྔགས་ཀྱི་ནོར་ བུ་དེ་དག་རྣམས། ། ཆོ་ག་འདི་ལས་རབ་ཏུ་བསྒྲགས། ། རིགས་དང་བྱེ་བྲག་ལ་སོགས་ལས། ། གཅེས་ཤིང་ཁ་དོག་ཅི་ལྟ་བར། ། མཁས་པས་འདི་ལྟར་རིག་པར་བྱ། ། དྲག་ཤུལ་སྤྱོད་ལ་ཁྱད་པར་དུ། ། རུས་པ་སྣ་ཚོགས་ཤིས་པ་ཡིན། ། དེ་ནས་གསང་སྔགས་གཞན་གྱིས་ཀྱང་། ། དངོས་གྲུབ་འདོད་པས་མངོན་པར་བསྔགས། ། གཅིག་ནི་སྦྱང་བའི་གསང་སྔགས་ཏེ། ། གཉིས་པ་འགྲུབ་ཕྱིར་ཤེས་པར་བྱ། ། ཨོྃ་ན་མོ་བྷ་ག་བ་ཏེ། སིདྡྷེ་སཱ་དྷ་ཡ་སཱ་དྷ་ཡ། སིདྡྷཱརྠ་སྭཱ་ཧཱ། དེ་བཞིན་གཤེགས་པའི་རིགས་ལའོ། ། ཨོྃ་བ་སུ་མ་ཏི་ཤྲི་ཡེ་སྭཱ་ཧཱ། པདྨའི་རིགས་ལའོ། ། ཨོྃ་བཛྲ་ཨ་ཅི་ཏཉྫ་ཡེ་སྭཱ་ཧཱ། རྡོ་རྗེའི་རིགས་ལའོ། ། སྔགས་ཀྱི་ནོར་བུའི་རིག་སྔགས་རྣམས་སོ། ། ཕྱག་རྒྱ་སྔགས་ཀྱི་ནོར་བུ་དག ། ཆོ་ག་བཞིན་དུ་བླངས་ནས་ནི། ། ནོར་བུ་སྙིང་གར་བཟུང་ནས་སུ། །
BOབཟླས་བརྗོད་རབ་ཏུ་བརྩམ་པར་བྱ། ། གུས་པས་དཀོན་མཆོག་ གསུམ་པོ་དང་། ། བྱང་ཆུབ་སེམས་དཔའ་རྣམས་དང་ནི། ། རིག་སྔགས་ཚོགས་ནི་མཐའ་དག་ལ། ། ཕྱག་བྱས་དེ་འོག་བཟླས་བརྗོད་བརྩམ། ། ཡིད་ཀྱིས་གསང་སྔགས་ལྷ་རྣམས་ནི། ། ཡང་ནས་ཡང་དུ་མངོན་བསམས་ཏེ། ། རྟོག་པ་ངན་པ་རྣམས་བསལ་ནས། ། མཁས་པས་ བཟླས་བརྗོད་བརྩམ་པར་བྱ། ། ཞི་བ་དང་ནི་རྒྱས་པ་ལ། ། ཨོཾ་དང་བཅས་ཤིང་ཕྱག་དང་བཅས། ། ལྷག་པར་ཞི་བའི་སེམས་ཀྱིས་ནི། ། བློ་ཡིས་བཟླས་བརྗོད་དལ་བུས་བྱ། ། དྲག་ཤུལ་ཅན་གྱི་སེམས་ཀྱིས་ནི། ། ཧཱུྃ་དང་བཅས་ཤིང་ཕཊ་དང་བཅས། ། བཟླས་བརྗོད་གཞན་ གྱིས་ཐོས་བྱ་བ། ། དྲག་ཤུལ་སྤྱོད་པ་རབ་ཏུ་ཤིས། ། མཁས་པས་གསང་སྔགས་ཡི་གེ་རྣམས། ། {བཅྭ་,བཅོ་}ལྔ་མན་ཆད་གྲངས་རྣམས་ལ། ། སྤྱིར་ནི་ཡི་གེ་དུ་ཡོད་པ། ། དེ་སྙེད་འབུམ་ཕྲག་བཟླས་བརྗོད་བྱ། ། ཡི་གེ་སུམ་ཅུ་རྩ་གཉིས་ལ། ། བཟླས་བརྗོད་སུམ་འབུམ་ བྱ་བར་བཤད། ། དེ་བས་ཡི་གེ་མང་བ་ལ། ། སྔོན་དུ་བསྙེན་པ་ཁྲི་བྱའོ། ། རིགས་དང་ལས་དང་གསང་སྔགས་དག ། མཁས་པས་ལེགས་པར་ཤེས་བྱས་ནས། ། རྗེས་སུ་མཐུན་པའི་བརྩོན་པ་ཡིས། ། སྔོན་དུ་བསྙེན་པ་བརྩམ་པར་བྱ། ། ཤིན་ཏུ་མཆོག་གི་ལས་རྣམས་ནི། །
BOབཟླས་ བརྗོད་ཁྱད་པར་ཅན་གྱིས་འགྲུབ། ། སྔོན་དུ་བསྙེན་པ་མེད་པར་ཡང་། ། ལས་རྣམས་ཕལ་ནི་འགྲུབ་པར་འགྱུར། ། གསང་སྔགས་དག་ནི་ཐམས་ཅད་ཀྱི། ། དངོས་གྲུབ་རྣམས་ནི་ཐམས་ཅད་ལ། ། ཐོག་མར་བཟླས་བརྗོད་བཅུ་ཆ་བཅུ་ཆ་བྱ། ། དེ་ནས་དེ་ལ་སྟ་གོན་གནས། ། དེ་ལྟར་སྟ་གོན་ གནས་བྱས་པས། ། ལྷ་ཡང་སྟ་གོན་མཛད་གྱུར་ན། ། དེ་ཚེ་ཟློས་པས་ཆོ་ག་བཞིན། ། དེ་ཡི་འོག་ཏུ་བཟླས་བརྗོད་བརྩམ། ། གང་ཞིག་མཚན་མའམ་ཚིག་གིས་ནི། ། བཟླས་བརྗོད་བྱེད་པ་མི་བཞེད་ན། ། བསྙེན་པ་ཡང་དང་ཡང་བྱས་ནས། ། ལན་གསུམ་བར་དུ་སྟ་གོན་གནས། ། རིག་སྔགས་བསྙེན་པས་མཉེས་གྱུར་ན། ། ཟློས་པ་པོ་ལ་དགོངས་ནས་སུ། ། གང་གིས་དང་པོར་བཀའ་སྩལ་པ། ། དེ་དག་མྱུར་དུ་འགྲུབ་པར་འགྱུར། ། ཟློས་པ་བློ་དང་ལྡན་པ་ཡིས། ། ལན་གསུམ་སྟ་གོན་གནས་བྱས་ཀྱང་། ། གང་དག་དགོངས་པ་མི་འཛིན་པའི། ། ལྷ་དེ་ནམ་ ཡང་མི་བཟླས་སོ། ། གཙང་མའི་གནས་སུ་གཙང་སྦྲ་ཅན། ། མཉམ་པར་བཞག་སྟེ་ལེགས་འདུག་ནས། ། ཅི་སྲིད་ཡིད་ནི་མི་སྐྱོ་བར། ། དེ་སྲིད་བར་དུ་བཟླས་བརྗོད་བྱ། ། ཆོ་ག་བཤད་པ་ཐམས་ཅད་ལ། ། ལུས་ཀྱི་གཙང་སྦྲ་བྱས་ནས་སུ། ། སྔ་དྲོ་མེལ་ཚེ་ཐུན་གཅིག་དང་། །
BOཕྱི་དྲོ་མེལ་ཚེ་ཐུན་གཅིག་བཟླས། ། ཉི་མའི་གུང་ལ་ཐུན་ཕྱེད་མ། ། ཡང་ན་ཐུན་གྱི་སུམ་ཆ་བཟླས། ། ཡང་ན་ཐུན་གྱི་བཞི་ཆའམ། ། ཡང་ན་མཁས་པས་ཅུང་ཟད་བཟླས། ། མཚན་མོ་སྲོད་དང་ཐོ་རངས་ལ། ། མེལ་ཚེ་ཐུན་ནི་ཕྱེད་ཕྱེད་དུ། ། གང་ཞིག་མཁས་པས་བཟླས་བྱས་པ། ། དེ་ནི་ལྷག་པར་མཆོད་པར་འགྱུར། ། དྲག་ཤུལ་སྤྱོད་པའི་ལས་ཀུན་དང་། ། མི་སྣང་བ་ལ་སོགས་པ་དང་། ། དུར་ཁྲོད་དག་གི་ལས་རྣམས་ལ། ། རྟག་ཏུ་མཚན་མོ་བཟླས་པ་བཟང་། ། ཉིན་པར་བཟླས་བརྗོད་གང་བཤད་པ། ། དེ་དག་སྦྱིན་སྲེག་མཚན་མོ་བྱ། ། མཚན་མོ་བཟླས་བརྗོད་ གང་བཤད་པ། ། དེ་དག་སྦྱིན་སྲེག་ཉིན་པར་བྱ། ། གང་ཞིག་བཟླས་པའི་མཇུག་ཏུ་ནི། ། སྦྱིན་སྲེག་བྱེད་པ་དེ་མཆོག་གོ། ། གསང་སྔགས་ཀུན་ལ་དང་པོར་རམ། ། བསྲེག་བྱ་ཡོད་ན་གཉིས་ཀར་བྱ། ། མཁས་པས་གང་ཞིག་ཉིན་རེ་ཞིང་། ། ཟས་ཀྱི་ཕུད་ལ་སྲེག་བྱེད་པ། ། དེས་ནི་ཐ་ མའམ་བར་དག་ཏུ། ། ཁྱད་པར་མེད་པར་བྱ་བར་བཤད། ། དེ་ལྟར་བྱས་ན་རིག་སྔགས་རྣམས། ། ཕལ་ཆེར་ཡོངས་སུ་དགྱེས་པར་འགྱུར། ། ཆོ་ག་འདི་དག་ཉིད་ཀྱིས་ནི། ། སྦྱིན་སྲེག་བྱེད་པའི་བཟླས་བརྗོད་བཤད། ། བཟླས་བརྗོད་བྱེད་པས་ཁྲོ་མི་བྱ། །
BOཡུལ་གྱི་བདག་ཉིད་དགའ་མི་བྱ། ། ཞུམ་དང་མི་དགའ་འཇིགས་པ་དང་། ། འཛུམས་དང་ང་རྒྱལ་ཡོངས་སུ་སྤང་། ། ཟློས་ཚེ་ཅི་ཡང་མི་སྨྲ་ཞིང་། ། ཡན་ལག་འགྱུར་བར་མི་བྱའོ། ། ཀུན་རྟོག་རླུང་གིས་བསྐྱོད་ནས་ནི། ། ཅི་ཡང་རུང་བ་མི་བསམ་མོ། ། ཟློས་པོ་བཟླས་བརྗོད་བྱེད་པའི་ཚེ། ། རིག་སྔགས་ལྷ་ནི་མ་གཏོགས་ པ། ། བསྒོམ་པ་མཆོག་ཏུ་གྱུར་པ་དང་། ། རྣམ་རྟོག་བཟུང་ནས་མི་བསམ་མོ། ། ཟློས་པོས་བཟླས་བརྗོད་ཟིན་པ་དང་། ། རིགས་ཀྱི་བདག་པོའི་གསང་སྔགས་སམ། ། རིགས་ཀྱི་ལྷ་མོ་གང་ཡིན་པ། ། དེ་དག་བཟླས་ཏེ་བསྲུང་བ་བྱ། ། བཟླས་བརྗོད་གྲངས་བཞིན་བྱས་པའམ། ། ཡང་ན་ལྷག་པར་བྱས་ཀྱང་རུང་། ། གསོལ་བ་གདབ་པའི་ཚུལ་གྱིས་སུ། ། དེ་ནི་གུས་པར་དབུལ་བར་བྱ། ། མཁས་པས་རིག་སྔགས་ཟློས་པའི་ཚེ། ། སྦྲིད་པ་ལུད་པ་ལ་སོགས་བྱུང་། ། ཉེ་རེག་བྱས་ཏེ་ཕྱག་འཚལ་ཏེ། ། གཞི་ནས་ཀུན་དུ་བརྩམ་པར་བྱ། ། བཟླས་བརྗོད་ཀྱི་ནི་ བགེགས་རྣམས་དང་། ། མཁས་པས་བཟླས་བརྗོད་སྐྱོན་རྣམས་ལ། ། སླར་ཡང་གྲངས་ཀྱི་ཐོག་མ་ནས། ། ཀུན་དུ་བརྩམ་པར་བྱ་བར་བཤད། ། སྔགས་ཀྱི་ནོར་བུའི་ཐོག་མ་དང་། ། ཐ་མར་རྟག་ཏུ་སྒྲུབ་པ་པོས། ། གུས་པར་གསང་སྔགས་ལྷ་དག་ལ། །
BOབློ་དང་ལྡན་པས་ཕྱག་ བྱའོ། ། སྔགས་ཀྱི་ནོར་བུ་རྫོགས་པའི་ཚེ། ། རི་མོའི་གཟུགས་སམ་སྐུ་གཟུགས་སམ། ། མཆོད་རྟེན་དག་གམ་དེའི་གདན་རྣམས། ། མིག་གིས་ཀུན་དུ་བལྟ་བར་བྱ། ། བཟླས་པས་ངལ་ན་ཡང་དང་ཡང་། ། བསམ་གཏན་ལམ་གྱི་མན་ངག་དང་། ། ཐབས་ནི་རྣམ་པ་ཐ་ དད་པས། ། བློ་ཅན་སེམས་ནི་སྤྲོ་བ་བསྐྱེད། ། བློ་ལ་སྐྱོན་མེད་བྱས་ནས་ནི། ། གསང་སྔགས་ཡི་གེ་དག་པ་ལ། ། མཉམ་པར་བཞག་སྟེ་རྩེ་གཅིག་ཏུ། ། བཟླས་བརྗོད་དུས་གསུམ་དག་ཏུ་བྱ། ། མཁས་པས་དུས་གསུམ་ཁོ་ནར་ཡང་། ། ཁྲུས་བྱས་ནས་ནི་བཟླས་བརྗོད་བྱ། ། མཆོད་ པ་ལ་སོགས་ཆོ་ག་ཀུན། ། དུས་གསུམ་དག་ཏུ་བྱ་བར་བཤད། ། དུས་གསུམ་དག་ཏུ་སྔགས་པ་ཡིས། ། གོས་ནི་རྣམ་པ་གསུམ་པོ་དག ། བཀྲུ་བའམ་བདུག་པར་བྱ་བའམ། ། ཡང་ན་བསང་གཏོར་དག་ཀྱང་བྱ། ། ཉལ་དང་ཁྲུས་བྱེད་མ་གཏོགས་པར། ། སྔགས་པས་མཐང་ གོས་མི་སྤང་ཞིང་། ། དཀར་ལ་ཤིན་ཏུ་འཇམ་པོ་དེ། ། ཉིན་རེ་བཞིན་དུ་བཀྲུ་བར་བྱ། ། ལྷ་ལ་དགོས་པའི་སྣོད་རྣམས་ཀྱང་། ། ཉིན་རེ་ལན་རེ་བཀྲུ་བར་བྱ། ། མེ་ཏོག་རྙིང་པ་དུས་གསུམ་དུ། ། རྟག་པར་ཡང་ནི་ཕྱག་པར་བྱ། ། ཤེས་རབ་ཕ་རོལ་ཕྱིན་སོགས་ཀྱི། ། གླེགས་བམ་ མཇུག་ཏུ་བཀླག་པ་དང་། །
BOམཆོད་རྟེན་དག་དང་དཀྱིལ་འཁོར་ཡང་། ། དུས་གསུམ་དག་ཏུ་དེ་བཞིན་བྱ། ། སྔོན་དུ་བསྙེན་པའི་བཟླས་བརྗོད་དག ། དང་པོར་གྲངས་བཞིན་ཚང་བ་ལས། ། མི་ནུས་ན་ནི་དུས་གཅིག་གམ། ། དུས་གཉིས་སུ་ནི་ཆོ་ག་བསྒོམ། ། གང་ཡང་བགེགས་ ཀྱིས་བརླམས་པ་དང་། ། ནད་རྣམས་ཀྱིས་ནི་གཟིར་བའམ། ། ལྷོད་པ་དང་ནི་བག་མེད་པའམ། ། ལུས་དང་སེམས་ནི་སྐྱོ་བའམ། ། ཆོ་ག་ཅི་སྐད་བཤད་པ་དག ། བཤད་པའི་དུས་ལས་འདས་པ་དང་། ། མ་བསྡམས་པ་དང་མི་གཙང་བས། ། གང་དག་བཟླས་བརྗོད་བྱེད་པ་ནི། ། བཟླས་པའི་གྲངས་ནི་བཤད་པ་ལ། ། མཁས་པས་དེ་དག་མི་སྦྱར་གྱི། ། ཆོ་ག་བཞིན་དུ་བཟླས་པ་དང་། ། མཉམ་གཞག་བཟླས་བརྗོད་དེ་དང་སྦྱར། ། སྦྱིན་སྲེག་ལས་ཀྱི་གྲངས་རྣམས་དང་། ། སྤྱན་དྲང་བ་ཡི་ཆོ་ག་ལ། ། སྔགས་ཀྱི་ནོར་བུ་མ་རྫོགས་པ། ། བཟླས་བརྗོད་གྲངས་ སུ་མི་གཞུག་གོ། ། དཀྱིལ་འཁོར་དག་ཏུ་ཆོ་ག་བཞིན། ། གང་གིས་གསང་སྔགས་སྟོང་བཟླས་དང་། ། ཉི་མ་ཟླ་བ་གཟས་ཟིན་ཚེ། ། བསྙེན་པ་དེ་ནི་ཐེ་ཚོམ་མེད། ། གཙུག་ཏོར་ཅན་གྱི་གནས་ཀུན་དང་། ། མཆོད་རྟེན་ཆེན་པོ་དག་དང་ནི། ། ཆོ་འཕྲུལ་ཆེན་པོའི་ཟླ་ཕྱེད་ལ། ། བཟླས་ པ་དེ་ནི་མཆོག་ཏུ་བཤད། ། བླ་མ་མགུ་བར་གྱུར་པ་ལས། །
BOརིག་སྔགས་བཟླས་པ་གང་ཐོབ་དང་། ། གང་ཡང་ཉིད་ཀྱིས་བཀའ་སྩལ་པ། ། དེ་དག་མྱུར་དུ་འགྲུབ་པར་འགྱུར། ། གང་ཡང་གནས་ཡུལ་ཡོན་ཏན་ཅན། ། མཆོད་སོགས་ཁྱད་པར་ཅན་དག་དང་། ། རང་གི་སེམས་ནི་དང་བ་ ལས། ། རིག་པ་མྱུར་དུ་བཀའ་སྩོལ་ཏེ། ། མྱུར་དུ་འགྲུབ་ཀྱང་མི་ཐོགས་པར། ། ངེས་པར་ཉམས་པར་འགྱུར་ཞེས་གསུངས། ། དེ་བས་བསྙེན་པ་རྫོགས་བྱས་ནས། ། དངོས་གྲུབ་ཕྱིར་ནི་འབད་པར་བྱ། ། བསྙེན་པའི་ཚེ་ནི་ཅི་རིགས་པར། ། དངོས་གྲུབ་ཕྱིར་ནི་ལྷ་རྣམས་ལ། ། ལྷ་ཁང་ གི་ནི་ཕྱི་རོལ་དུ། ། དུས་མཚམས་དག་ལ་མཆོད་པ་བྱ། ། དུས་མཚམས་དག་ལ་རིག་སྔགས་རྣམས། ། བྱེ་བྲག་ཏུ་ནི་མཆོད་པར་བྱ། ། རྟག་ཏུ་དགེ་བའི་ཕྱོགས་རྣམས་དང་། ། དེ་བཞིན་དུ་ནི་སྡོམ་པ་གཟུང་། ། བུམ་པ་བཀྲ་ཤིས་ལྡན་པ་ལ། ། སྤོས་ཀྱི་ཆུ་ལ་སོགས་པས་ བཀང་། ། རྡོ་རྗེ་ཁྲོ་བོས་མངོན་བསྔགས་ཏེ། ། དབང་བསྐུར་དོན་དུ་སྦྱར་བར་བྱ། ། དེ་མ་འབྱོར་ན་མཆོད་ཡོན་སྣོད། ། མེ་ཏོག་རྣམས་དང་ཆུས་བཀང་སྟེ། ། བགེགས་རྣམས་རྣམ་པར་བསལ་བའི་ཕྱིར། ། དབང་བསྐུར་དེ་ནི་ཉེ་བར་སྦྱར། ། བྱེ་བྲག་ཏུ་ནི་ལྷ་བཤོས་དབུལ། ། བྱེ་བྲག་ ཏུ་ནི་སྦྱིན་སྲེག་བྱ། ། མར་མེའི་ཆོ་ག་བྱེ་བྲག་ཏུ། །
BOས་ཡི་བྱི་དོར་དེ་བཞིན་བྱ། ། གལ་ཏེ་ཟློས་ཚེ་གློ་བུར་དུ། ། སྣ་ཚོགས་པ་ཡི་འོད་བྱུང་ན། ། དེ་ཚེ་དངོས་གྲུབ་མྱུར་བར་ངེས། ། བཀྲེས་པས་ཅུང་ཞིག་ནད་ལས་ཐར། ། ཤེས་པ་ཁྱད་པར་ཅན་ཡང་འབྱུང་། ། ལྷག་པར་གཟི་མདངས་ ཆེ་བསྟན་པ། ། གསང་སྔགས་བཟླས་པའི་མཚན་ཉིད་ཡིན། ། མཚན་མོ་རྨི་ལམ་དགེ་བ་དང་། ། བདེན་པ་རྣམས་ནི་མཐོང་བ་དང་། ། བཟླས་བརྗོད་བྱེད་ལ་དགའ་བ་ནི། ། གསང་སྔགས་བཟླས་པའི་མཚན་ཉིད་ཡིན། ། ངལ་བ་ཆུང་ཞིང་དྲི་ཞིམ་དང་། ། གཏོང་ཕོད་ཡོན་ཏན་ལྷུར་ལེན་ ཅིང་། ། ལྷ་ལ་ལྷག་པར་གུས་པ་ནི། ། གསང་སྔགས་བཟླས་པའི་མཚན་ཉིད་ཡིན། ། གསང་སྔགས་བཟླས་པའི་རྗེས་ལ་ཡང་། ། བྱེ་བྲག་ཏུ་ནི་མཆོད་པ་བྱ། ། ལྷ་རྣམས་ལ་ནི་ཅི་རིགས་པར། ། སྦྱིན་སྲེག་དག་ཀྱང་བརྩམ་པར་བྱ། ། བསྙེན་པ་ཚུལ་བཞིན་ རྫོགས་བྱས་ནས། ། རིག་སྔགས་བསྒྲུབ་པར་བྱ་བའི་ཕྱིར། ། མཁས་པས་ཇི་ལྟར་མཐོང་བ་བཞིན། ། སྟ་གོན་གནས་པ་རབ་ཏུ་བྱ། ། གནས་གཅིག་ཏུ་ནི་ཕྱེད་བཟླས་ནས། ། གང་ཞིག་གཞན་ལ་བཟླས་བྱས་པ། ། བཟླས་པ་ཐམས་ཅད་རྫོགས་གྱུར་ཀྱང་། ། དེ་དག་ཐམས་ཅད་ དོན་མེད་འགྱུར། ། དེ་ལྟའི་གླགས་ལ་ཆོ་ག་བཞིན། ། ཚིག་འབུམ་ལྷག་པར་བཟླས་བརྗོད་བྱ། །
BOབདག་པོས་སྟོང་དུ་བཟླས་བྱ་འམ། ། ཡང་ན་བསྙེན་པ་སླར་བརྩམ་མོ། ། བག་མེད་པས་ནི་ལན་འགའ་ཞིག ། གསང་སྔགས་ལྷ་གཞན་བཟླས་བྱས་ན། ། ཡིད་ཀྱིས་གསོལ་བ་གུས་ བྱས་ནས། ། བཟླས་བརྗོད་སླར་ཡང་བརྩམ་པར་བྱ། ། མི་གཙང་ཆོ་ག་མི་ལྡན་པས། ། རིག་སྔགས་བག་མེད་བཟླས་གྱུར་ན། ། དེ་ལ་རིག་སྔགས་བདག་པོའི་སྔགས། ། ལན་བདུན་ཡོངས་སུ་བཟླས་བརྗོད་བྱ། ། ཟློས་པོས་ཟླ་བ་ཕྱེད་ཕྱེད་ཅིང་། ། ཉིན་ཞག་གཅིག་ཏུ་སྨྱུང་བྱས་ ནས། ། ཟླ་ཕྱེད་མཚམས་སུ་བ་ཡི་ལྔ། ། བརྒྱ་རྩ་བརྒྱད་དུ་བཟླས་པ་བཏུང་། ། དེས་ནི་གསང་སྔགས་ཟློས་པ་པོ། ། ཟླ་ཕྱེད་དག་ཏུ་དགའ་འགྱུར་ཞིང་། ། བཟའ་བ་མིན་སོགས་གང་ཟོས་པ། ། དེ་དག་ཐམས་ཅད་རྣམ་པར་སྤང་། ། ན་མོ་བྷ་ག་བ་ཏེ་ཨུཥྞཱི་ཥཱ་ཡ། ཨོྃ་བི་ཤུདྡྷེ་བི་ ར་ཛེ་ཤི་བེ་ཤཱནྟི་ཀ་རི་སྭཱ་ཧཱ། དེ་བཞིན་གཤེགས་པའི་རིགས་ལའོ། ། ཨོྃ་ཡ་ཤོ་ཛེ་སྭཱ་ཧཱ། པདྨའི་རིགས་ལའོ། ། ན་མོ་ར་ཏྣ་ཏྲ་ཡཱ་ཡ། ནམ་ཤྩཎྜ་བཛྲ་པཱ་ཎ་ཡ། མ་ཧཱ་ཡཀྵ་སེནཱ་པ་ཏ་ཡེ། ཨོཾ་ཤི་ཁི་ཤི་ཁི་ནི་ར་མ་ལེ་པྲ་བྷེ། པྲ་བྷ་སཱ་རེ། ཏེ་ཛེ་ཏེ་ཛོ་བ་ཏི་སྭཱ་ཧཱ། རྡོ་རྗེའི་རིགས་ལའོ། ། དམར་སེར་བ་ཡི་འོ་མ་དང་། ། བ་ཡི་ཞོ་དང་བ་ཡི་མར། །
BOབ་གཅིན་བ་ཡི་ལྕི་བ་རྣམས། ། སོ་སོར་མངོན་པར་བསྔགས་པ་དང་། ། ཀུ་ཤ་ལན་བརྒྱར་བསྔགས་པ་ཡི། ། ཀུ་ཤའི་ཆུན་དང་ལྡན་བྱས་ཏེ། ། ཤར་བལྟས་མི་སྨྲ་ཙོག་ཙོག་པོར། ། འདུག་ནས་འབྲིང་ལ་སྲང་གསུམ་ ཙམ། ། བ་ལ་ཤ་ཡི་ལོ་མར་བཏུང་། ། ཡང་ན་མཆོད་ཡོན་སྣོད་བཤད་པ། ། གང་ཡང་རུང་བ་ཅིག་ཏུ་བཏུང་། ། དེ་ནི་དེ་ཡི་ཆོ་གར་བསྟན། ། ཟློས་ཚེ་གལ་ཏེ་བློ་བུར་དུ། ། ཅུང་ཟད་བྱའམ་མི་བྱའམ། ། ལྷ་ཉིད་ཀྱིས་ནི་བཀའ་སྩལ་ན། ། བློ་དང་ལྡན་པས་དེ་དག་བརྟག ། བསྲུང་བ་བྱས་ཏེ་བརྟགས་ནས་སུ། ། བྱ་བ་མིན་པ་དེ་མི་བྱ། ། བཀའ་ལུང་རིགས་པར་གང་སྩལ་པ། ། དེ་དག་དངོས་གྲུབ་འདོད་པས་བྱ། ། ཟློས་པ་རྨི་ལམ་ངན་མཐོང་ན། ། རིགས་ཀྱི་བདག་པོ་བརྒྱ་བཟླས་སོ། ། དེ་ཡི་ཉིན་པར་དེ་མ་བཟླས། ། བཟླས་བརྗོད་གྲངས་སུ་མི་གཞུག་ གོ། ། གྲངས་ཀྱི་བཟླས་བརྗོད་ཐམས་ཅད་ལ། ། ལྷག་པར་གྱུར་ལ་ཉེས་པ་མེད། ། དེར་ནི་དེ་ཡིས་མི་འགྲུབ་ལ། ། གྲངས་སྐོངས་པ་ལ་མི་ཕན་ནོ། ། མདོར་ན་ཟློས་པ་པོ་རྣམས་ཀྱིས། ། བཟླས་བརྗོད་ཆོ་ག་གང་གསུངས་པ། ། ཆོ་ག་དེ་དག་ཉིད་ཀྱིས་ནི། ། རིག་སྔགས་བསྙེན་ ནས་འགྲུབ་པར་འགྱུར། ། བཟླས་བརྗོད་ཀྱི་ཆོ་ག་རིམ་པར་ཕྱེ་བའོ། ། ། །
BOདེ་ནས་གཞན་ཡང་ཟློས་པ་པོའི། ། གསང་སྔགས་ལྷ་ནི་གང་ཞིག་གིས། ། མྱུར་དུ་མཉེས་པར་འགྱུར་བ་ཡི། ། ཚིམ་པར་བྱ་བའི་ཆོ་ག་བཤད། ། དུས་མཚམས་དག་གམ་ཚེས་གཞན་ལ། ། ཁྲུས་རྫིང་བཟང་པོས་ཁྱད་པར་དུ། ། མགོ་ལ་སོགས་པ་བཀྲུས་ནས་སུ། ། དང་པོ་མཆོད་པའི་ཆོ་ག་བྱ། ། ཡིད་ལ་གསང་སྔགས་བརྗོད་ནས་སུ། ། སྣ་མའི་མེ་ཏོག་བརྒྱ་ལ་ནི། ། རེ་རེ་ལ་ཡང་མངོན་བསྔགས་ཏེ། ། བློ་དང་ལྡན་པས་རིགས་གསུམ་མཆོད། ། ལན་གྲངས་ཉི་ ཤུ་རྩ་གཅིག་གམ། ། ཡང་ན་ལན་བདུན་རིམ་བཞིན་དུ། ། གསང་སྔགས་ཡི་གེ་རྗེས་མཐུན་པར། ། ལྷ་རྣམས་ལ་ནི་མངོན་པར་མཆོད། ། དེ་ནས་དྲི་ལ་སོགས་པ་དང་། ། དྲི་ཞིམ་བསྒོས་པའི་བདུག་སྤོས་གསོལ། ། ལྷ་བཤོས་ཅི་སྐད་བསྟན་པ་དབུལ། ། ཞོ་དང་བུ་རམ་བྱེ་བྲག་ ཏུའོ། ། ཚུལ་བཞིན་སྦྱིན་སྲེག་ལས་བྱས་ཏེ། ། ཡམ་སྲེག་ཤིང་གིས་མེ་བུས་ལ། ། མཆོད་སྦྱིན་གྱིས་ནི་ཡམ་སྲེག་ཤིང་། ། མར་ལ་བཏགས་པ་དང་པོར་བརྒྱ། ། དེ་ནས་ཏིལ་དང་ཞོ་དང་མར། ། སྦྲང་རྩི་བསྲེས་པ་བརྒྱ་ལྷག་དབུལ། ། དེ་ནས་མར་དང་ཞོ་སྦྱར་བའི། ། སཱ་ལུའི་ འབྲས་ཆན་སྲེག་བླུགས་བརྒྱ། ། བ་ཡི་འོ་མ་ཟས་མཆོག་དང་། ། མར་བཅས་སྲེག་བླུགས་བརྒྱ་ཕུལ་ཏེ། །
BOམཇུག་ཏུ་མཆོད་ཡོན་བཀང་ནས་སུ། ། ལན་བརྒྱར་བཟླས་ཏེ་དབུལ་བར་བྱ། ། ཆོ་ག་དེ་ལྟར་ཉིན་གཅིག་གམ། ། བདུན་ནམ་ཉི་ཤུ་རྩ་གཅིག་ གམ། ། ཡང་ན་ཉིན་གསུམ་དུས་གསུམ་དུ། ། ཡང་ན་ཉི་མ་ལྔར་བྱས་ནས། ། རིག་སྔགས་བཅད་དད་མ་ཕྲལ་བའམ། ། བགག་པའམ་ཕུར་བུས་བཏབ་པའམ། ། བྲི་བ་དང་ནི་ལྷག་པའང་རུང་། ། བགག་པའམ་ཕུར་བུས་བཏབ་པའམ། ། གཟིར་བ་ལྷག་པར་ཚིམ་པར་འགྱུར། ། སྦྱིན་སྲེག་ཡན་ལག་དེ་རྣམས་ལས། ། གཅིག་གིས་ཉིན་མཚམས་བསྲེག་བྱིན་ན། ། ཞག་གསུམ་གྱིས་ནི་ཚིམ་འགྱུར་ཏེ། ། ལྷ་རྣམས་རབ་ཏུ་དགྱེས་པར་འགྱུར། ། སྤོས་ལ་གཟུགས་བརྙན་ལེགས་བྱས་ཏེ། ། མེ་ཏོག་མ་ཏ་ལི་ཡིས་མཆོད། ། དུས་གསུམ་བཟླས་བརྗོད་ བརྒྱ་བྱས་ཏེ། ། མཇུག་ཏུ་ཤིང་གི་ཐང་ཆུས་བདུག ། པདྨ་ལ་སོགས་འོ་མ་ལ། ། བཞག་སྟེ་མཚན་མོ་ར་བ་མཆོད་དེ། ། ནང་པར་མཆོད་ཅིང་བཟླས་བརྗོད་ནས། ། ཆུ་ཀླུང་ཆེན་པོར་བསྐུར་བར་བྱ། ། ཆོ་ག་འདི་དག་བྱས་པ་ཡིས། ། ལྷ་རྣམས་ཡོངས་སུ་དགྱེས་པར་འགྱུར། ། དགྱེས་པར་གྱུར་ནས་དངོས་གྲུབ་ནི། ། ཆེན་པོ་མྱུར་དུ་སྩོལ་བར་མཛད། ། ལྷ་ཚིམ་པར་བྱ་བའི་ཆོ་ག་རིམ་པར་ཕྱེ་བའོ། ། ། ། གསེར་རམ་དངུལ་ལམ་ཟངས་ཀྱིའམ། ། ཁམ་པའི་བུམ་པ་སར་པ་ལ། །
BOམེ་ཏོག་རིན་ཆེན་འབྲས་བུ་རྩྭ། ། འབྲུ་དང་སྤོས་ཀྱི་ཆུས་བཀང་ནས། ། མགུལ་པར་རས་ནི་སར་པས་བཅིང་། ། ལྡུམ་བུ་སར་པས་ཁ་བརྒྱན་ཏེ། ། རང་གི་རིག་སྔགས་བདག་པོའམ། ། ཡང་ན་རིགས་ཀྱི་རིག་སྔགས་ཀྱིས། ། ལན་བརྒྱར་བཟླས་ནས་དང་པོ་དེས། ། ལྷ་ཉིད་མངོན་པར་དབང་བསྐུར་རོ། ། གསེར་ལ་སོགས་པའི་གཟུགས་བརྙན་ལ། ། རྒྱན་ ཕྲེང་ན་བཟའ་ལེགས་བརྒྱན་ཏེ། ། རིག་སྔགས་ཁྲི་ལ་བཞག་ནས་སུ། ། དབང་བསྐུར་ཕྱིར་ནི་མཆོད་པ་བྱ། ། མེ་ཏོག་སོགས་པས་མཆོད་བྱས་ཏེ། ། བཟླས་བརྗོད་སྦྱིན་སྲེག་དག་གིས་མཆོད། ། ཆོ་ག་འདིས་ནི་རིག་སྔགས་དག ། མཐུ་ནི་རབ་ཏུ་ཆེ་བར་འགྱུར། ། རིག་སྔགས་མཐུ་དང་ ལྡན་གྱུར་ན། ། དངོས་གྲུབ་ཆེན་པོ་མྱུར་དུ་སྩོལ། ། དུས་མཚམས་དག་ལ་རིག་སྔགས་རྣམས། ། སྤྱན་དྲང་མཆོད་པ་བྱས་ནས་ནི། ། མཆོད་ཡོན་མངོན་པར་བསྔགས་པ་ཡིས། ། དབང་བསྐུར་བ་ཡང་བྱ་བར་བཤད། ། ཉིན་རེ་ཁྲུས་བྱེད་ཚེ་ན་ཡང་། ། དབང་བསྐུར་ཕྱིར་ནི་གུས་ པ་རུ། ། བློ་དང་ལྡན་པས་སྙིམ་པའི་ཆུ། ། བདུན་ནམ་ཡང་ན་གསུམ་གྱིས་བྱ། ། མར་དང་འོ་མ་ལ་སོགས་པས། ། དབང་བསྐུར་ཕྱིར་ནི་ལེགས་བཀྲུས་ནས། ། རིག་སྔགས་གཟིར་བ་རྒྱས་གྱུར་ཅིང་། །
BOའདིས་ནི་ལྷག་པར་ཚིམ་པར་འགྱུར། ། ལྷ་དབང་བསྐུར་བའི་ཆོ་ག་རིམ་ པར་ཕྱེ་བའོ། ། ། ། དུས་མཚམས་དག་ལ་སྨྱུང་བྱས་ནས། ། ནུབ་གཅིག་གམ་ནི་ནུབ་གསུམ་དུ། ། གཙང་ཞིང་གོས་དཀར་གསར་བགོས་ཏེ། ། ཟློས་པ་སྟ་གོན་གནས་པར་བྱ། ། དུས་མཚམས་མིན་ཡང་དགོས་ཡོད་ན། ། ཡར་གྱི་ངོ་ཡི་ཚེས་བཟང་ལ། ། ཞི་བའི་ མཆོག་གི་གསང་སྔགས་ཀྱིས། ། སྟ་གོན་གནས་པར་རབ་ཏུ་བྱ། ། སྐྱུ་རུ་ར་སོགས་ཁྲུས་རྩི་དང་། ། དྲི་ཞིམ་སྤོས་ཆུས་ཁྲུས་བྱས་ཏེ། ། ཉེ་རེག་བྱས་ནས་སྲོད་ལ་ནི། ། སངས་རྒྱས་སྤྱན་དྲང་མཆོད་པ་བྱ། ། དེ་ནས་ལྷག་པར་མངོན་བསྔགས་པའི། ། མཆོད་ཡོན་ཆོ་ག་བཞིན་ དུ་དབུལ། ། དེ་ནས་ཙནྡན་དཀར་པོ་དང་། ། སྣ་མའི་མེ་ཏོག་ཁ་འབུས་དང་། ། མ་ལ་ཏ་ཡི་ཕྲེང་བ་ལ། ། བདུག་པས་བདུགས་ལ་མཆོད་པ་བྱ། ། གཏོར་མ་མང་ཞིང་བཟང་བ་དང་། ། ཞོ་དང་བཅས་པ་དབུལ་བར་བྱ། ། དེ་ནས་མར་གྱི་སྦྱིན་སྲེག་ནི། ། ཚུལ་བཞིན་བརྒྱ་རྩ་ བརྒྱད་བྱས་ཏེ། ། གསང་སྔགས་ལས་དང་རྗེས་མཐུན་པར། ། ས་རྫ་ར་སའི་སྲེག་བླུགས་དབུལ། ། བུ་མོས་བཀལ་བའི་སྐུད་པ་ལ། ། མདུད་པ་བདུན་བོར་ལན་བདུན་བསྔགས། ། དཔུང་པ་གཡོན་པ་ལ་བཅིངས་ལ། ། ཀུ་ཤའི་ལོ་མ་བཏིང་བ་ལ། །
BOདེ་ཉིད་ཀྱིས་ནི་གློ་ཕབ་སྟེ། ། བཀའ་ལུང་གསོལ་བ་བཏབ་ནས་ནི། ། རང་གི་ལྷ་ཡི་ཚུལ་འདྲ་བར། ། སེམས་ཀྱིས་ལེགས་པར་བསམ་བྱས་ཏེ། ། ཡིད་ལ་གསང་སྔགས་འདོན་བཞིན་དུ། ། ཀུ་ཤ་སར་པ་ཁྲེས་ཀྱི་སྔས། ། མེ་ཏོག་མང་པོས་བཀླུབས་པ་ལ། ། ཅི་ལྟར་བདེ་བར་ཉལ་བར་བྱ། ། གལ་ཏེ་གཉིད་ལོག་རྨི་ ལམ་ན། ། བསྟན་པར་གཏོགས་པའི་ལྷ་མཐོང་ངམ། ། སོ་སོར་རིག་པའི་གཟུགས་དག་གམ། ། ཡང་ན་རིག་སྔགས་བདག་པོའང་རུང་། ། དཀོན་མཆོག་གསུམ་ལས་གཅིག་ཙམ་མམ། ། དེ་དག་ལ་ནི་མཆོད་ལ་སོགས། ། རྒྱལ་སྲས་རྫུ་འཕྲུལ་ཆེན་ པོའམ། ། འཁོར་ནི་རྣམ་པ་བཞི་རྣམས་སམ། ། བདག་ཉིད་ཆོ་ག་སྤྱོད་པའམ། ། ཡང་ན་གོས་ཀྱིས་སྤུད་པ་དག ། མཐོང་ན་དངོས་གྲུབ་ཉེར་འགྱུར་བར། ། སྒྲུབ་པ་པོས་ནི་ཤེས་པར་བྱ། ། རི་དང་གླང་པོ་འབབ་ཆུ་དང་། ། རྒྱ་མཚོ་དང་ནི་འབྲས་བུ་ཤིང་། ། ངང་མོ་ལ་ སོགས་བྱ་རྣམས་དང་། ། སེང་གེ་ལ་སོགས་{རི་དགས་,རི་དྭགས་}སོགས། ། ཁྱུ་མཆོག་བཀྲ་ཤིས་རྟ་ལ་སོགས། ། བུ་མོ་བཟང་མོ་བརྒྱན་པ་དང་། ། བུམ་པ་ལ་སོགས་བཀྲ་ཤིས་པ། ། རྣམ་པ་སྣ་ཚོགས་གཡས་ནའོ། ། ནོར་དང་གོས་རྣམས་རྙེད་པ་དང་། ། དེ་ལ་སོགས་པ་རྣམ་དག་པའི། ། རྨི་ལམ་བཟང་པོ་མཐོང་ན་ནི། །
BOབློ་ཅན་འགྲུབ་པར་ཤེས་པར་བྱ། ། ཞོ་དང་འོ་མ་འབྲས་ཡོས་མ་ར། ། མེ་ཏོག་འབྲས་བུ་རྩ་བ་དང་། ། ཡང་ན་གྲུབ་པའི་རྫས་ཀྱང་རུང་། ། རྨི་ལམ་དག་ན་རྙེད་པའམ། ། དེ་འདྲའི་རྣམ་པ་མཐོང་གྱུར་ན། ། རིག་སྔགས་འགྲུབ་པར་གསུངས་པས་ན། ། དེ་ནས་བློ་དང་ལྡན་པ་ཡིས། ། བསྙེན་པའམ་སྒྲུབ་པའི་ལས་རྣམས་བརྩམ། ། གལ་ཏེ་སྔགས་ཀྱི་ནོར་བུའམ། ། སྒྲུབ་པའི་རྫས་རྣམས་ཐོབ་ན་ནི། ། དེ་ནས་བསྙེན་པའམ་སྒྲུབ་པ་ཡི། ། ལས་རྣམས་མྱུར་དུ་བརྩམ་པར་བྱ། ། གོས་དང་ཁྲུས་དང་རྒྱན་དག་གིས། ། བདག་ཉིད་ བརྒྱན་པ་མཐོང་ན་ནི། ། དེ་ཚེ་བསྙེན་པའམ་སྒྲུབ་པ་ཡི། ། ལས་རྣམས་རབ་ཏུ་བརྩམ་པར་བྱ། ། རང་གི་རིག་སྔགས་ཚུལ་བཞིན་དུ། ། མཆོད་པ་བྱས་ནས་རིགས་ཡུམ་གྱིས། ། སྣ་མའི་མེ་ཏོག་བརྒྱ་དག་དང་། ། རས་ཟུང་དག་གིས་མཆོད་པར་བྱ། ། ཙནྡན་གྱི་ནི་བདུག་སྤོས་ཀྱིས། ལན་བརྒྱད་ཉིན་དུ་བདུགས་ནས་ནི། ། དེ་ནས་ལྷ་ཉིད་རྨི་ལམ་དུ། ། ཅི་རིགས་པར་ནི་བཀའ་ལན་སྩོལ། ། ཨུ་ཤི་ར་ཡི་གཟུགས་བརྙན་ནི། ། གྲོག་མཁར་ས་ཡི་སྣོད་དུ་བཞག ། མཆོད་ཅིང་ཡོངས་སུ་ཚིམ་བྱས་ནས། ། ལན་བརྒྱད་དག་ཏུ་མངོན་པར་བསྔགས། ། དེ་ནི་འོ་མའི་ ནང་དུ་འམ། །
BOཡང་ན་སྦྲང་རྩིའི་ནང་དུ་གཞུག ། དུས་གསུམ་དག་ཏུ་ལེགས་མཆོད་ནས། ། སྲོད་ལ་ཡང་ནི་གསོལ་བ་གདབ། ། རྣམ་པ་འདི་དག་ཉིད་ཀྱིས་ཀྱང་། ། ཡོངས་སུ་དགྱེས་པ་སྐྱེས་གྱུར་ནས། ། དེ་ལྟར་བྱ་འམ་མི་བྱ་བ། ། ལྷ་ཉིད་བཀའ་ལན་གསོལ་བར་མཛད། ། སྨྱུང་བྱས་འདོད་པའི་དུས་མཚམས་ལ། ། རིག་སྔགས་ཆོ་ག་བཞིན་མཆོད་ལ། ། ཐང་ཆུ་རྣམ་པ་བདུན་དག་དང་། ། ཤིང་གི་སྙིང་པོ་རྣམ་པ་ལྔས། ། སྦྱིན་སྲེག་བརྒྱ་རྩ་བརྒྱད་བྱ་བ། ། ཡང་ན་བཟླས་བརྗོད་གྲངས་དག་གིས། ། བྱས་ན་རིག་སྔགས་ཉིད་ཀྱིས་ནི། ། མྱུར་བ་ཉིད་ དུ་བཀའ་སྩོལ་ཏོ། ། དེ་ལྟར་རིག་པ་སྟ་གོན་གནས། ། ངེས་ཤིང་མྱུར་དུ་འགྲུབ་པར་འགྱུར། ། སྟ་གོན་གནས་པའི་ཆོ་ག་འདི། ། རྒྱས་པར་རབ་ཏུ་བསྒྲགས་པ་ཡིན། ། སྟ་གོན་གནས་པའི་ཆོ་ག་རབ་ཏུ་གསང་བའི་རིམ་པར་ཕྱེ་བའོ། ། ། ། སློབ་མས་དཀྱིལ་འཁོར་ཕྱག་ བྱས་ནས། ། ཁྱད་པར་དུ་ནི་ཡོན་ཕུལ་ཏེ། ། བླ་མའི་ཁ་ནས་མངོན་སུམ་དུ། ། རིག་སྔགས་ཡོངས་སུ་གཟུང་བར་བྱ། ། སྙིམ་པ་མེ་ཏོག་གིས་བཀང་ནས། ། གུས་ཤིང་རིམ་གྲོ་བསྐྱེད་བྱས་ཏེ། ། བླ་མས་ཐོག་མར་ལན་གསུམ་བཟླས། ། རང་གིས་ལན་གསུམ་བཟླས་ཏེ་གདོན། ། དེ་ནས་ཡི་གེ་མང་པོའི་སྔགས། །
BOགི་ཝང་དག་གིས་ཤོག་ཤོག་ལ། ། ཇི་སྐད་བསྟན་བཞིན་མངོན་བྲིས་ཏེ། ། དེ་ནས་ཅི་བདེར་ཁ་ཏོན་བསླབ། ། བླ་མ་ཡོངས་སུ་མགུ་བ་ལས། ། དུས་མཚམས་དག་གམ་ཚེས་གཞན་ལ། ། རིག་སྔགས་བརྟགས་ནས་བྱིན་པ་དག ། ཆོ་ག་བཞིན་དུ་ གུས་པར་མནོད། ། སློབ་མས་ལེགས་པར་མནོད་པ་དེ། ། རིང་པོར་མི་ཐོགས་འགྲུབ་པར་འགྱུར། ། མ་བསྙེན་པར་ཡང་དེ་ལ་དེ། ། རྟག་ཏུ་འགོ་ཞིང་ཉེ་བར་གནས། ། ཡང་ན་གསེར་ལ་སོགས་པ་ཡི། ། བུམ་པ་གསར་ཞིང་གཙང་ལ་བཟང་། ། སྐྱོན་ཀུན་རྣམ་པར་སྤངས་པ་ལ། ། བཀྲ་ཤིས་ངོ་མཚར་དག་ཀྱང་བྱས། ། དེ་ལ་སྤོས་ཆུ་འབའ་ཞིག་མེད། ། ཁྱད་པར་དུ་ནི་བཤམ་བྱས་ནས། ། གཙང་མར་བྱས་ཏེ་ནུབ་གཅིག་གམ། ། ནུབ་གསུམ་དུ་ནི་སྨྱུང་བྱས་ཏེ། ། སྲོད་ལ་རབ་ཏུ་བརྩམ་བྱས་ནས། ། ཆོ་ག་འདི་དག་སྤྱད་པར་བྱ། ། གསང་སྔགས་རིག་སྔགས་ གདམས་པ་དག ། གྲོ་ག་ལ་སོགས་ཤོག་ཤོག་ལ། ། གི་ཝང་དག་གིས་མཉམ་བྲིས་ཏེ། ། ཤོག་ཤོག་རྣམས་ནི་ལྷན་ཅིག་གཞུག ། རིག་སྔགས་རྒྱལ་པོས་ལེགས་པར་ནི། ། དྲི་དང་མེ་ཏོག་བདུག་མཆོག་དང་། ། དེ་བཞིན་ལྷ་བཤོས་མར་མེ་དང་། ། སྦྱིན་ སྲེག་ལས་ཀྱིས་མཆོད་པ་བྱ། ། དེ་ནི་ཆོ་ག་འདི་དག་གིས། ། ནུབ་གསུམ་སྟ་གོན་གནས་པ་ལ། །
BOབདེན་པ་དང་ནི་དམ་ཚིག་གིས། ། ཁྱད་པར་དུ་ནི་གསོལ་བ་གདབ། ། ལན་བརྒྱར་བསྔགས་ནས་ཡང་དང་ཡང་། ། བདུག་སྤོས་དག་གིས་རབ་བདུགས་ཏེ། ། དྲི་ཞིམ་ཁྲུས་བྱས་ གཙང་བྱས་ནས། ། ཕྱག་བྱས་ཡིད་ལ་བསམས་ནས་སུ། ། བསང་བྱེད་བཅས་པའི་ལག་པ་ཡིས། ། དེ་ལས་གཅིག་ནི་དབྱུང་བར་བྱ། ། དེ་ཤེས་ནས་ནི་ཕྱག་འཚལ་ཏེ། ། གུས་པར་སྤྱི་བོའི་སྟེང་དུ་བཞག ། ཤེས་རབ་ཅན་གྱིས་སྔགས་དེ་བསྒྲུབ། ། དེ་ཉིད་དེ་ལ་མྱུར་དུ་ འགྲུབ། ། ཤེས་རབ་ཅན་གྱིས་གཞན་མི་སྒྲུབ། ། བསྒྲུབས་ན་ཡང་ནི་འཆི་བར་འགྱུར། ། གང་ཞིག་བསྒྲུབས་ནས་བྱིན་པ་དག ། ཆོ་ག་བཞིན་དུ་དེ་མནོས་ན། ། སྒྲུབ་པ་པོ་ཡི་ལྷ་ཡིན་ཏེ། ། དེ་ལ་དེ་ནི་འགྲུབ་པར་ཤེས། ། རིག་སྔགས་ཡིད་ཀྱིས་གསོལ་བཏབ་ནས། ། ལན་ བརྒྱར་ཡོངས་སུ་བཟླས་བརྗོད་དེ། ། འདི་ནི་ཁྱེར་ཅིག་ཁྱེར་ཅིག་ཅེས། ། མེ་ཏོག་དྲི་ཞིམ་དག་གིས་སྦྱིན། ། བཅོམ་ལྡན་འདི་ལ་བསྙེན་པ་དང་། ། འདི་ལ་རབ་ཏུ་འགོ་བར་མཛོད། ། བཅོམ་ལྡན་བདག་གིས་གཟུང་ལགས་ཀྱིས། ། བདག་ལ་འགོ་བར་མཛོད་ཅེས་བྱ། ། སློབ་དཔོན་ དང་ནི་སློབ་མ་ཡིས། ། རིག་སྔགས་སྦྱིན་ཞིང་ཡོངས་བཟུང་བའི། ། ཆོ་ག་འདི་ལྟར་བྱས་ན་ནི། ། ལྷ་ཉིད་རབ་ཏུ་འགྲུབ་པར་འགྱུར།
BO། མཁས་པས་རིག་སྔགས་འགྲུབ་པ་ཀུན། ། གྲུབ་པ་ཉིད་དུ་ཤེས་པར་བྱ། ། རྣམ་པ་དེ་ལྟར་རྫས་དག་དང་། ། ཚུལ་བཞིན་ཐོབ་པས་བསྙེན་ མི་དགོས། ། ཟློས་པ་སྒྲུབ་པ་པོ་དག་གིས། ། རིག་སྔགས་ཚུལ་བཞིན་བཟླས་པ་ཡིས། ། བསྙེན་པ་ཚད་བྱས་གང་བྱིན་པ། ། དེ་ཡང་མ་བསྙེན་འགྲུབ་པར་འགྱུར། ། དངོས་གྲུབ་ཕྱིར་ནི་གསང་སྔགས་ཡོན། ། མེ་ཏོག་འབྲས་བུ་རྩ་བ་དང་། ། གདུ་བུ་གོས་དང་གསེར་ དང་ཞོ། ། འབྲུ་དང་ནོར་བུ་བུ་མོ་དང་། ། མལ་ཆ་རྣམས་དང་ལྷམ་དག་དང་། ། རྒྱན་གྱི་རྣམ་པ་ཐམས་ཅད་དང་། ། སྒྲུབ་པའི་ཡོ་བྱད་རྣམས་དང་ནི། ། གླང་པོ་བ་ལང་རྟ་ལ་སོགས། ། བཀུར་སྟི་རྣམ་པ་དུ་མ་དང་། ། བདག་གི་བདོག་པ་མཐའ་དག་དབུལ། ། གུས་པར་ཕྱག་བྱས་ ཐལ་སྦྱར་ནས། ། བདག་ཉིད་ཀྱང་ནི་དབུལ་བར་བྱ། ། དེ་ལྟར་ཆོ་ག་ཤེས་པ་ཡིས། ། རྣམ་པ་སྣ་ཚོགས་ཅི་རིགས་པར། ། བླ་མ་ལ་ནི་ཡོན་ཕུལ་ནས། ། དེ་ནས་གསང་སྔགས་ནོད་པར་བྱ། ། རིག་སྔགས་ཡོངས་སུ་གཟུང་བའི་རིམ་པར་ཕྱེ་བའོ། ། ། ། སྒྲུབ་པ་པོས་ནི་ཆོ་ག་ འདིས། ། ལྷག་དང་ཆད་པ་ཤེས་བྱས་ནས། ། མཐོང་དང་མ་མཐོང་ལས་དག་གིས། ། རིག་སྔགས་ཡོངས་སུ་བཀང་བར་བྱ། ། གསང་སྔགས་ཡན་ལག་ལྷག་ཆད་གང་། །
BOརྨི་ལམ་དག་ཏུ་མཐོང་ན་ནི། ། དེ་དག་བཀང་བའི་ཆོ་ག་འདི། ། གསང་སྔགས་ཟློས་པ་དག་གིས་བྱ། ། གལ་ཏེ་འདིར་ཡང་ལ་ལ་ཞིག ། ཡི་གེ་ལྷག་གམ་ཆད་པ་ཡི། ། དོགས་པ་སྐྱེས་ན་མཁས་པ་ཡིས། ། གསང་སྔགས་བཀང་བའི་ཆོ་ག་བྱ། ། ཤོག་ཤོག་དག་ལ་གི་ཝང་གིས། ། གསང་སྔགས་ཡི་གེ་ཚང་བར་བྲི། ། ཆོ་ག་བཞིན་དུ་མཆོད་བྱས་ཏེ། ། རིག་སྔགས་རྒྱལ་པོ་མངོན་པར་ བསྔགས། ། རིག་སྔགས་རྒྱལ་པོར་བཅས་པ་ཡིས། ། མཆོད་སྦྱིན་ཡམ་སྲེག་ཤིང་མེ་ལ། ། སྔགས་ཀྱིས་མར་གྱི་སྲེག་བླུགས་ནི། ། ཅིག་ཅར་ལན་བརྒྱར་བསྲེག་པར་བྱ། ། རིག་སྔགས་ཁྲི་ལ་བཞག་ནས་སུ། ། གསོལ་བ་བཏབ་སྟེ་མངོན་པར་མཆོད། ། རིག་སྔགས་ཀྱི་ནི་ བདག་པོ་དང་། ། རིག་སྔགས་ཡིད་དབང་ཕྱུག་མ་དང་། ། བདེ་གཤེགས་སྲས་བཅས་ཕྱག་བྱས་ཏེ། ། བཀང་བའི་ཕྱིར་ནི་གསོལ་བཏབ་ནས། ། རིག་སྔགས་དྲན་བཞིན་ཀུ་ཤ་ཡི། ། སྟན་ལ་ཤར་ཕྱོགས་ཁ་བལྟས་ཉལ། ། རིག་སྔགས་རྒྱལ་པོས་དེ་ཉིད། ། མཚན་མོ་དག་ནི་ ངེས་པར་ཡང་། ། ཡི་གེ་གསལ་བ་དེ་དག་དང་། ། སྨྱུ་གུ་ཡང་ནི་དེ་ཉིད་དང་། ། གི་ཝང་དག་ཀྱང་དེ་ཉིད་ཀྱིས། ། ཤོག་ཤོག་ཀྱང་ནི་དེ་ཉིད་ལ། ། གསང་སྔགས་ཆད་པ་རབ་ཏུ་སྐོང་། ། ལྷག་པ་དག་ཀྱང་མཉམ་པར་མཛད། །
BOགསང་སྔགས་མ་ཉམས་མཉམ་པ་དག ། འབའ་ ཞིག་འདྲི་བར་མི་མཛད་ལ། ། གསང་སྔགས་རིག་སྔགས་མ་ཚང་བ། ། ངེས་པར་འདི་ཡིས་སྐོང་བར་མཛད། ། ཡང་ན་ཡིག་འབྲུ་མ་ཚང་བ། ། རྨི་ལམ་དག་ཏུ་སྟོན་པར་མཛད། ། གསང་སྔགས་ཟློས་པ་པོ་དག་གིས། ། བསྲུང་བའི་ཆོ་ག་བྱས་ཏེ་བྱ། ། རིག་སྔགས་ ཡོངས་སུ་བཀང་བའི་རིམ་པར་ཕྱེ་བའོ། ། ། ། རིག་སྔགས་དག་ནི་ཐམས་ཅད་ཀྱང་། ། སྦྱིན་སྲེག་ལས་ཀྱིས་གཟི་བྱིན་བསྐྱེད། ། སྦྲང་རྩི་འོ་ཐུག་མར་དག་གམ། ། ཡང་ན་ཏིལ་དང་མར་བསྲེས་པའམ། ། མར་བཏགས་མེ་ཏོག་སྦྱིན་སྲེག་གམ། ། ས་རྫ་ར་སའི་སྦྱིན་སྲེག་ དང་། ། མར་དང་ཐང་ཆུའི་སྦྱིན་སྲེག་གིས། ། གསང་སྔགས་གཟི་བྱིན་ཆེ་བར་འགྱུར། ། བ་ཡི་རྣམ་ལྔ་ཇོས་ནས་སུ། ། རི་ཡི་རྩེ་མོར་ཅི་རིགས་པར། ། མེ་ཏོག་འབུམ་དག་དབུལ་བྱས་ནས། ། དེས་ནི་ལྷ་ཉིད་གཟི་བྱིན་སྐྱེ། ། ཉིན་གསུམ་དུ་ནི་དུས་གསུམ་དུ། ། དྲི་ཞིམ་དྲི་དང་ བདུག་སྤོས་དང་། ། མེ་ཏོག་དག་ཀྱང་ཕུལ་ན་ནི། ། གསང་སྔགས་གཟི་བྱིན་ཆེ་བར་འགྱུར། ། ཤིང་གི་སྙིང་པོའི་སྒྲོན་མ་དག ། སྦར་ཞིང་ཞག་བདུན་དུས་གསུམ་དུ། ། བཟླས་བརྗོད་བྱས་ན་གསང་སྔགས་རྣམས། ། གཟི་བྱིན་ཆེ་བའི་མཆོག་ཏུ་འགྱུར། །
BOདེ་ལྟར་བཟླས་དང་སྦྱིན་སྲེག་ དང་། ། མཆོད་པ་དག་དང་ལྷ་བཤོས་ཀྱང་། ། འདོད་པ་པོས་ནི་ཁྱད་པར་དུ། ། ལྷ་རྣམས་ཐམས་ཅད་གཟི་ཆེན་འགྱུར། ། ལྷ་གཟི་བྱིན་བསྐྱེད་པའི་ཆོ་ག་རིམ་པར་ཕྱེ་བའོ། ། ། ། གང་ཞིག་གསང་སྔགས་ཟློས་པ་དག ། དངོས་གྲུབ་ཆེན་པོ་མྱུར་ཐོབ་པའི། ། སྦྱིན་སྲེག་ ཆོ་ག་མ་ལུས་པ། ། དེ་དག་ཅི་བཞིན་སྤྱད་པར་བྱ། ། ལྷ་ཡི་གནས་ཀྱི་ཕྱི་རོལ་དུ། ། དེ་ཡི་མདུན་དུ་མི་རིང་བར། ། ཅི་ལྟར་རིགས་པས་ཡོངས་བརྟགས་ལ། ། ཆོ་ག་འདི་དག་ཀུན་དུ་སྤྱད། ། དབུས་སུ་མེ་ཡི་ཐབ་བརྐོ་བ། ། གྲུ་བཞི་ལྷམ་པ་ཁ་ཁྱེར་ཅན། ། ཁྲུ་གང་ཟབས་སུ་ཁྲུ་བྱེད་ པ། ། ཡང་ན་ཐབ་ཁུང་ཟླུམ་པོར་བྱ། ། དེ་ནས་ཡམ་ཤིང་ལ་སོགས་པས། ། ཡོ་བྱད་དགོས་པ་ཐམས་ཅད་དག ། གཡས་ཕྱོགས་སུ་ནི་གཞག་པར་བྱ། ། གཡོན་དུ་ཆུ་ཡི་སྣོད་བཞག་གོ། ། དེ་ནས་ལས་ཀུན་བྱེད་པ་ཡི། ། སྔགས་ཀྱིས་དེ་དག་བསང་གཏོར་ཏེ། ། འདུག་ནས་ མཁས་པས་གསང་སྔགས་རྣམས། ། ཡིད་ལ་བསམས་ཏེ་སྤྱན་ཡང་དྲང་། ། མཆོད་ཡོན་ཡོངས་སུ་བཟླས་པ་ཡང་། ། དེ་དག་རྣམས་ལ་ཕུལ་ནས་སུ། ། མེ་ཏོག་གཅིག་གིས་རིག་སྔགས་དེ། ། དེ་ཉིད་དུ་ནི་བཞུགས་སུ་གསོལ། ། དེ་ནས་མེ་ནི་བསང་བའི་ཕྱིར། །
BOཁྲོ་བོའི་ རྒྱལ་པོས་བསང་གཏོར་ནས། ། ཆོ་ག་ལས་སྨོས་ཤིང་དག་གིས། ། ཐབ་བཅུག་ཤེས་རབ་ཅན་གྱིས་སྦར། ། མེ་འབར་རིག་ནས་དང་པོར་ནི། ། གསང་སྔགས་དག་གིས་གཉེར་བར་བྱ། ། ཚུར་བྱོན་ཚུར་བྱོན་འབྱུང་པོ་ཆེ། ། ལྷ་ཡི་དྲང་སྲོང་བྲམ་ཟེའི་མཆོག ། སྲེག་བླུགས་ཞལ་ ཟས་བཞེས་ནས་ཀྱང་། ། འདི་ཉིད་དུ་ནི་བཞུགས་སུ་གསོལ། ། ཨོྃ་ཨགྣ་ཡེ་ཧ་བྱ་ཀ་བྱ་པཱ་ཧ་ནཱ་ཡ་སྭཱ་ཧཱ། དེ་ལྟར་དང་པོར་མེ་གཉེར་ནས། ། སྲེག་བླུགས་གསུམ་ཡང་བསྲེག་པར་བྱ། ། ཨོྃ་ཨགྣ་ཡེ་ཧ་བྱ་ཀ་བྱ། བ་ཧ་ན་ཡཱ་དཱི་བྱ་དི་པཱ་ཡ་སྭཱ་ཧཱ། དེ་ནས་མཁས་པས་གཡས་ཕྱོགས་ ནས། ། བསྐོར་ཅིང་བསངས་ནས་རང་གི་ནི། ། སྔགས་ཀྱིས་མར་ལ་སོགས་པ་ལས། ། སྲེག་བླུགས་གསུམ་ཡང་བསྲེག་པར་བྱ། ། སྒྲུབ་པས་སྦྱིན་སྲེག་ཐམས་ཅད་ལ། ། ཁྲོ་བོ་ཀཱི་ལི་ཀཱི་ལ་གང་། ། དེ་ཡི་ཕྱག་རྒྱས་སྦྱིན་སྲེག་ལ། ། མེ་ལ་སོགས་པ་བསང་བར་བྱ། ། ཨོཾ་ཀཱི་ལི་ཀཱི་ལི་བཛྲ་བྷཱི་མ་ རཽ་དྲི་པ་ཏྲི་ཏ། མ་ཧཱ་ཀྲོ་དྷ་བི་ཛ་ཡ་ནི་ཀྲྀནྟ་ཧཱུྃ་ཕཊ་བནྡྷ་བནྡྷ་སྭཱ་ཧཱ། དེ་ནས་ཡམ་སྲེག་ཤིང་དག་བསྲེག ། དེ་ནས་ཡམ་ཤིང་མེ་ལ་མར། ། དེ་ནས་ཏིལ་དང་འབྲས་ཆན་ཏེ། ། ཆོ་ག་དེ་དག་མདོར་བསྡུས་པའོ། ། བ་ལ་ཤ་དང་ནྱ་གྲོ་དྷ། །
BOཔླཀྵ་སེང་ལྡེང་ཨརྒ་དང་། ། བེའུ་ཀང་ཀ་དང་ཨ་མྲ་དང་། ། ཀརྨྨ་ རི་དང་ཤ་མི་དང་། ། ཨ་པ་མརྒ་ལས་བྱུང་དང་། ། ཨུ་དུམ་ཨ་ཤྭཏྠར་བཅས་པ། ། ཡམ་ཤིང་བཅུ་གཉིས་དག་ཏུ་བསྟན། ། སར་པ་དག་ལས་མཛུབ་གང་ཙམ། ། ལས་རྣམས་ཀུན་ལ་བསྲེག་བྱ་སྟེ། ། ལས་རྣམས་ཀུན་ལ་ཐོར་ཏོ་གཉིས། ། བརྟགས་ནས་རྩེ་མོས་བསྲེག་པར་བྱ། ། བཟང་ལ་ དྲང་ཞིང་གསར་པ་ལ། ། སྤོས་ཆུས་བསང་གཏོར་བྱས་པ་ལ། ། ཞི་བའི་བསྲེག་བྱ་ཅུང་ཟད་གང་། ། རྒྱས་པའང་གང་དག་ཡིན་པ་དང་། ། བདག་ཟས་ཅུང་ཟད་གང་ཡིན་པ། ། དེ་དག་ལས་རྣམས་ཀུན་ལ་བསྲེག ། ཉིན་རེའམ་ཡམ་སྲེག་ཤིང་དག་ལ། ། བདག་གི་ཟས་ཀྱང་རྟག་ཏུ་བསྲེག ། སྔགས་དང་ཇི་ལྟར་རྗེས་མཐུན་པར། ། སྦྱིན་སྲེག་བྱས་ནས་ཁ་ཟས་བཟའ། ། བཟླས་བརྗོད་ཆོ་ག་ཇི་ལྟར་གསུངས། ། སྦྱིན་སྲེག་ལ་ཡང་དེ་ལྟར་བསྒྲགས། ། ལག་པས་པུས་མོའི་ནང་རོལ་ནས། ། སྦྱིན་སྲེག་དག་ནི་བརྩམ་པར་བྱ། ། རིག་སྔགས་ཐམས་ཅད་གཟི་བསྐྱེད་ ཕྱིར། ། དུ་རུས་འབྲུ་མར་སྦྱར་བ་ལ། ། བཏགས་པའི་ཨ་ཀར་དུམ་བུ་ནི། ། སོར་བཞི་བསྲེགས་པས་བསང་བར་བཤད། ། ཡང་ན་རྟག་ཏུ་གུ་གུལ་ནི། ། མར་སྦྱར་སྦྱིན་སྲེག་རབ་ཏུ་ཤིས། ། ཡང་ན་གསང་སྔགས་བྱེ་བྲག་ལ། །
BOས་ལ་ཐང་ཆུའི་བྱེ་བྲག་ཤིས། ། སྔགས་འགྲུབ་ཆོ་ག་ཤེས་པ་ ཡིས། ། སྦྱིན་སྲེག་ཆོ་ག་ཐམས་ཅད་ལ། ། དང་པོར་བདག་པོ་བཞུགས་གསོལ་ནས། ། དེ་ཡི་འོག་ཏུ་སྦྱིན་སྲེག་བརྩམ། ། སྔགས་འགྲུབ་ཆོ་ག་ཤེས་པ་ཡིས། ། སྦྱིན་སྲེག་ཆོ་ག་ཐམས་ཅད་ལ། ། དང་པོར་རིགས་ཀྱི་རིག་སྔགས་ཀྱིས། ། བསྲུང་བ་བྱས་ཏེ་ལས་རྣམས་བརྩམ། ། སྔགས་ འགྲུབ་ཆོ་ག་ཤེས་པ་ཡིས། ། སྦྱིན་སྲེག་ཆོ་ག་ཐམས་ཅད་ལ། ། ལས་མཐར་རིགས་ཀྱི་སྙིང་པོ་ཡིས། ། གཟི་བྱིན་བསྐྱེད་པ་བརྩམ་པར་བྱ། ། སྔགས་འགྲུབ་ཆོ་ག་ཤེས་པ་ཡིས། ། སྦྱིན་སྲེག་ཆོ་ག་ཐམས་ཅད་ལ། ། ཐོག་མ་དང་ནི་ཐ་མར་ཡང་། ། མར་གྱི་དགང་བླུགས་རྟག་ཏུ་བསྲེག ། སྔགས་འགྲུབ་ཆོ་ག་ཤེས་པ་ཡིས། ། སྦྱིན་སྲེག་ཆོ་ག་ཐམས་ཅད་ལ། ། རིགས་བདག་རིག་སྔགས་སྙིང་པོ་བཟླས། ། ཐ་མར་མཆོད་ཡོན་དབུལ་བར་བྱ། ། དཀྱིལ་འཁོར་དག་ལ་སྦྱིན་སྲེག་གི། ། ཆོ་ག་མ་ལུས་བསྒྲགས་པ་ཡིས། ། ཆོ་ག་དེ་ཡིས་འདིར་ཡང་ནི། ། སྦྱིན་སྲེག་ལས་ རྣམས་བྱ་བར་བཤད། ། ལག་མཐིལ་ཆུ་ལ་བཟླས་པས་ནི། ། ལན་གསུམ་དུ་ཡང་འཐོར་འཐུང་བྱ། ། སྦྱིན་སྲེག་བྱས་པའི་ཐ་མར་ནི། ། རང་གི་རིག་སྔགས་ཉིད་ཀྱིས་ཀྱང་། ། བསང་གཏོར་ལན་གསུམ་བྱ་བར་བཤད། །
BOདེ་འོག་མེ་ལ་ཀུན་བསྲེགས་ནས། ། སྤྱན་དྲང་རིག་སྔགས་ དེ་ཉིད་ཀྱིས། ། བཞུད་ཅིག་བཞུད་ཅིག་ཅེས་བྱས་ཏེ། ། དེ་ཡི་འོག་ཏུ་སླར་བཏང་ངོ་། ། གསང་སྔགས་ཡི་གེའི་རྗེས་མཐུན་པར། ། མཇུག་ཏུ་བཟླས་བརྗོད་བརྩམ་པར་བྱ། ། དེ་ལྟར་སྦྱིན་སྲེག་ཐམས་ཅད་ཀྱི། ། ཆོ་ག་མདོར་བསྡུས་བཤད་པ་ཡིན། ། སྦྱིན་སྲེག་གི་ཆོ་ག་རིམ་ པར་ཕྱེ་བའོ། ། ། ། དེ་ནས་གཞན་ཡང་གང་དག་གིས། ། བསྡུས་ནས་རིག་སྔགས་ཐམས་ཅད་ཀྱི། ། གསང་སྔགས་ཆོ་ག་རྩོམ་འགྱུར་བའི། ། ཆོ་ག་ཡན་ལག་བསྡུ་བ་བཤད། ། དགོས་པའི་ཡོ་བྱད་ཐམས་ཅད་ནི། ། ཐོག་མ་ཉིད་དུ་ཀུན་བསྡུས་ཏེ། ། དེ་ནས་བསྙེན་པའམ་སྒྲུབ་ པ་དག ། བློ་དང་ལྡན་པས་བརྩམ་པར་བྱ། ། དྲི་ཞིམ་དེ་ནི་དེ་དང་དེ། ། དེ་བཞིན་བདུག་སྤོས་རྣམ་པ་དང་། ། སྙིང་པོ་ཐང་ཆུ་རིགས་རྣམས་དག ། ཁྱད་པར་དུ་ནི་གསོག་པར་བྱ། ། ཡུངས་ཀར་ས་རྫ་ར་ས་དང་། ། དུག་དང་ལན་ཚྭ་སྐེ་ཚེ་དང་། ། ཏིལ་དང་འབྲུ་མར་བ་མར་དང་། ། བུམ་པ་དང་ནི་ཟངས་ཀྱི་སྣོད། ། འབྲུ་དང་རིན་ཆེན་སྣ་ལྔ་དང་། ། སྨན་རྣམས་དང་ནི་སྦྲང་རྩི་དང་། ། དེ་བཞིན་བུ་མོས་བཀལ་བ་ཡི། ། ཚོན་སྣ་ལྔ་ཡི་སྲད་བུ་དང་། ། མར་མེའི་དོན་དུ་ཀོང་བུ་དང་། །
BOཤིང་བལ་མར་མེའི་སྙིང་པོ་དང་། ། ཁམ་ཕོར་དང་ནི་ཚོན་རྩིའི་རྩིའི་རྫས། ། དེ་བཞིན་ སེང་ལྡེང་ཕུར་བུ་དང་། ། མཆོད་སྦྱིན་གྱི་ནི་ཡམ་ཤིང་དང་། ། ནིམ་པའི་དགང་གཟར་བླུགས་གཟར་དང་། ། གི་ཝང་དང་ནི་ཨུར་མོའི་ལྕགས། ། ཙནྡན་དམར་པོ་ཉིད་དང་ནི། ། གོས་དང་གསང་སྲེལ་སྲད་བུ་དང་། ། {རི་དགས་,རི་དྭགས་}ནག་པོའི་པགས་པ་གསར། ། ནས་དང་འབྲས་ ཡོས་པྲི་ཡང་ཀུ། ། ཙནྡན་དཀར་དང་ཤིང་གི་ལྷམ། ། མུཉྫ་ཀུ་ཤ་ཤ་ཏ་པུས། ། མེ་ཏོག་སྣོད་ནི་ཤིས་པ་དང་། ། མཆོད་པའི་ཡོ་བྱད་མཆོག་དང་ནི། ། དེ་བཞིན་བགྲང་ཕྲེང་ལ་སོགས་དང་། ། དེ་དག་ལ་སོགས་བློ་ཅན་གྱིས། ། ནོར་དང་སྒྲུབ་པའི་ཡན་ལག་རྣམས། ། ཐམས་ཅད་ ཐོག་མར་ཡོངས་བསྡུས་ནས། ། དེ་ཡི་འོག་ཏུ་ལས་རྣམས་བརྩམ། ། སྒྲུབ་པའི་ཡན་ལག་གསོག་པའི་ཆོ་ག་རིམ་པར་ཕྱེ་བའོ། ། ། ། དེ་ནས་སྒྲུབ་པའི་རྫས་རྣམས་ཀྱི། ། མཚན་ཉིད་གང་དག་གསུངས་པ་ཀུན། ། སྔགས་ཟློས་པ་ཡི་དངོས་གྲུབ་ཕྱིར། ། དེ་དག་མདོར་བསྡུས་ བཤད་པར་བྱ། ། ཡིད་བཞིན་ནོར་བུ་བུམ་པ་བཟང་། ། ནོར་གྱི་ཆར་འབབ་གསེར་ཆེན་དང་། ། འཁོར་ལོ་ལྡོང་རོས་རལ་གྲི་སྟེ། ། འདི་དག་དངོས་གྲུབ་བདུན་ཡིན་ནོ། །
BOཕལ་ཆེར་སྤྱི་ཡིན་ཁྱད་པར་འཕགས། ། ཆེ་ལ་མཆོག་གི་མཆོག་ཡིན་ཏེ། ། དེ་ཡི་བསོད་ནམས་ཕུང་ཆེན་དང་། ། རྒྱལ་སྲིད་དག་ཀྱང་ཐོབ་པར་འགྱུར། ། གཞན་ཡང་དངོས་གྲུབ་དམ་པ་ནི། ། གཙུག་ཏོར་པདྨ་རྡོ་རྗེ་གསུམ། ། རིགས་དང་རིགས་ཀྱི་བྱེ་བྲག་ལས། ། ཕལ་ཆེར་ཡོངས་སུ་བསྒྲགས་པ་ཡིན། ། གསང་སྔགས་གང་ཡང་རུང་བ་ཡིས། ། གང་ཡང་རུང་བའི་དངོས་གྲུབ་ཀྱང་། ། མངོན་པར་ཤེས་པ་ལྷག་རྟོག་པ། ། གཙོ་བོ་ཡིན་པར་ཡོངས་སུ་བསྒྲགས། ། གསེར་དང་དངུལ་ལ་སོགས་པ་ལས། ། ཡུ་བ་ཁྲུ་གང་ཙམ་བྱས་ལ། ། དེ་སྟེང་རིན་ཆེན་ཆེན་པོ་ནི། ། གཅིག་པུ་བཞག་པའམ་ནོར་བུ་ནི། ། པདྨ་ར་ག་དག་པའམ། ། ཡང་ན་ཤེལ་ལས་བྱུང་བའང་རུང་། ། ཁྲིའུའི་སྟེང་དུ་ལེགས་བཞག་ནས། ། སྒྲུབ་པ་པོས་ནི་མཚན་མོ་བསྒྲུབ། ། གསང་སྔགས་སྟ་གོན་ཆོ་ག་དང་། ། བདག་ཉིད་དབང་བསྐུར་གང་བཤད་པ། ། དེ་ཡི་རང་བཞིན་ཆོ་ག་དེས། ། བུམ་པ་བཟང་པོ་བསྒྲུབ་པར་གསུངས། ། གསེར་དག་དང་ནི་དངུལ་དག་དང་། ། རིན་ཆེན་སྣ་ ཚོགས་ལ་སོགས་པ། ། དཔག་ཚད་ལྔ་ཡི་ཁོར་ཡུག་ཏུ། ། ནོར་ནི་ཆར་བཞིན་འབབ་པར་གསུངས། ། མི་ཟད་པ་ཡི་གཏེར་ཆེན་ནི། ། གསེར་ལ་སོགས་པས་གང་བ་སྟེ། ། སྦྱིན་དང་ལོངས་སྤྱོད་ལ་སོགས་པ། །
BOསྤྱད་ཅིང་ཕྱུང་ཡང་མི་ཟད་པའོ། ། ཨུར་མོའི་ལྕགས་ཀྱི་འཁོར་ལོ་ནི། ། མཛུབ་གང་ཙམ་ལ་རྩིབས་དྲུག་པ། ། ཤིན་ཏུ་གཟུགས་ལེགས་རྣོ་བདར་བ། ། མྱུར་དུ་འགྲུབ་ཅིང་ཆེན་པོར་འགྱུར། ། ཉི་མ་འཆར་ཀའི་གཟུགས་འདྲ་ཞིང་། ། གསེར་ནི་བཙོ་མའི་མདོག་ལྟ་བུ། ། ཀ་ར་བི་རའི་མདོག་འདྲ་ཞིང་། ། ལྡོང་རོས་དག་ནི་མཆོག་ཏུ་བཤད། ། རལ་གྲི་མཐེའུ་ ཆུང་མཐོ་དོ་བ། ། འཕན་མེད་ཞེང་དུ་སོར་བཞི་ཚད། ། བདར་བ་ཙ་ཤའི་འདབ་མ་འདྲ། ། འགྲུབ་ཕྱིར་བ་སོའི་དངོ་ཅན་ནོ། ། ཕྱག་རྒྱ་བྲི་བའི་ཆོ་ག་བཞིན། ། གཙུག་ཏོར་ཕྱག་རྒྱ་གསེར་ལས་བྱས། ། ཡིད་བཞིན་ནོར་བུའི་ཡུ་བ་བྱས། ། ཆེ་ལ་བཞག་སྟེ་བསྒྲུབ་པར་བྱ། ། པདྨ་ཙནྡན་ལས་ བྱས་པའི། ། དེ་བཞིན་གསེར་སོགས་ལས་བྱས་པ། ། མཐོ་གང་བ་ལས་སྡོང་བུ་དངུལ། ། འདབ་བརྒྱད་སྙིང་པོ་མཛེས་པར་བྱ། ། རྡོ་རྗེ་ཨུར་མོའི་ལྕགས་བྱས་པའམ། ། ཡང་ན་ཙནྡན་དམར་པོའང་རུང་། ། ལྕགས་གསུམ་ལས་བྱས་སོར་བཅུ་དྲུག ། གཉིས་ཀ་རྩེ་མོ་གསུམ་པར་བྱ། ། བ་བླ་ཡོན་ཏན་འཕགས་པ་དག ། གསེར་གྱི་གྱིམ་ཕག་འདྲ་བ་ཡི། ། སུལ་གྱིས་གང་ཞིག་ལྗིད་ཆེ་བ། ། ཁ་དོག་བཟང་པོ་འགྲུབ་ཕྱིར་མཆོག ། སེར་སྐྱ་དག་ལས་བྱུང་བ་ཡི། །
BOགི་ཝང་ཁ་དོག་སེར་པོའོ། ། བཙག་ནི་ཡུག་སྣམ་གསེར་མདངས་ཅན། ། མེ་ཏོག་བམྡུའི་མདོག་འདྲ་ བའོ། ། གྲོག་མཁར་བརྩེགས་པ་འདྲ་བ་ལ། ། བཙག་ན་ཨུཏྤལ་སྔོན་པོའི་མདོག ། ཤིན་ཏུ་འཇམ་པོ་འདི་འདྲ་བ། ། ཆུ་རྒྱུན་ལས་བྱུང་ཨཉྫ་ནའོ། ། རས་ཕྲན་གཙང་མ་འཇམ་པོ་ནི། ། ཁོ་ལག་ཆེ་ལ་གུར་གུམ་བཙོས། ། དགོན་པའི་ཕྱུགས་ཀྱི་ལྕི་བ་ཡི། ། ཐལ་བ་ག་བུར་གྱིས་ བསྒོས་པའོ། ། མཆོད་ཕྱིར་ཐོགས་ཀྱི་སྲད་བུ་དཀར། ། ཕྲ་ཞིང་སུམ་བསྒྲིལ་ལེགས་བཀལ་བའམ། ། ཡང་ན་གསེར་གྱི་སྐུད་པ་ནི། ། ལེགས་བསྙོད་སུམ་བསྒྲིལ་ཡོན་ཏན་ཅན། ། སྣ་མའི་མེ་ཏོག་ཕྲེང་བ་ནི། ། བུ་མོས་བཀལ་སྐུད་ལས་བརྒྱུས་པའོ། ། ཤྲི་པ་ཎ་ཡིས་ཤིང་གི་ ལྷམ། ། ཡམ་ཤིང་ལེགས་བཞོགས་མཐེབ་རྟེན་ཅན། ། རྨ་བྱའི་གདུགས་ནི་སྨྱུག་མ་ཡི། ། ཡུ་བ་རིང་པོ་གསེར་ལ་བཏགས། ། མདུང་རྩེ་གསུམ་དང་དབྱུག་ཐོ་ཐོགས། ། ཐམས་ཅད་རང་གི་མཚན་ཉིད་ལྡན། ། བསྒྲུབས་ན་མྱུར་དུ་འགྲུབ་པའི་ཕྱིར། ། མཚོན་ཆ་རྣམས་ནི་རབ་ ཏུ་ཤིས། ། འདི་ནི་ཆོ་ག་ལས་གསུངས་པའི། ། བསྒྲུབ་བྱའི་རྫས་རིགས་གང་ཡིན་པ། ། དེ་དག་མཚན་ཉིད་འཇིག་རྟེན་ལས། ། ཁྱད་པར་དུ་ནི་ཉེ་བར་བརྟག ། དེ་བཞིན་དངོས་གྲུབ་མང་པོ་ཡིས། །
BOབསྒྲུབ་བྱའི་རྫས་ནི་སྣ་ཚོགས་པ། ། དེ་བས་དེ་དག་བདག་བློ་དང་། ། གཙུག་ ལག་བློ་ཡིས་ཡོངས་སུ་བརྟག ། ནད་མེད་མདངས་བཟང་ལུས་མ་ཉམས། ། གཟུགས་བཟང་རྨ་མེད་དར་ལ་བབ། ། བདག་ཉིད་ཤི་བར་གྱུར་པའི་རོ། ། རོ་ལངས་དངོས་གྲུབ་ཕྱིར་ནི་མཆོག ། ཡང་ན་ལས་ཀྱི་བྱེ་བྲག་ལས། ། རིགས་ངན་དག་ཀྱང་རབ་ཏུ་ཤིས། ། རོ་ལངས་བ་སྒྲུབ་ པ་དག་ལ་ནི། ། འཇིགས་མེད་མཆོག་སྟེ་དེས་ངེས་སོ། ། རྫས་ཀྱི་མཚན་ཉིད་ཀྱི་ཆོ་ག་རིམ་པར་ཕྱེ་བའོ། ། ། ། ཡོ་བྱད་ཀུན་དང་ལྡན་པ་ཡིས། ། ཅི་རིགས་པར་ནི་མཆོད་བྱས་ནས། ། བསྒྲུབ་པའི་རྫས་རྣམས་ཡོངས་གཟུང་བ། ། དུས་མཚམས་དག་ལ་སྔ་དྲོ་བྱ། ། གསང་ སྔགས་ཉེ་བར་གྱུར་ནས་ནི། ། གང་ཚེ་བཀའ་ལུང་གསལ་ཤེས་པ། ། དེ་ཚེ་བསྒྲུབ་པའི་རྫས་གཟུང་བ། ། མཁས་པ་དག་གིས་ལེགས་པར་བྱ། ། ཁྲུས་བྱས་གཙང་ཞིང་སྨྱུང་བྱས་ཏེ། ། བཀྲ་ཤིས་ངོ་མཚར་དག་བྱས་ནས། ། བློ་དང་ལྡན་པས་བདག་ཉིད་ཀྱིས། ། བསྒྲུབ་པའི་རྫས་རྣམས་ཡོངས་སུ་གཟུང་། ། འབྱུང་ཁུང་དག་ནས་ཅི་མཐོང་བ། ། ལན་ཅིག་སྨྲ་བ་འཇིགས་མེད་པས། ། ཁ་ཐབས་བཞིན་དུ་ཉོས་པ་ཡི། ། བསྒྲུབ་པའི་རྫས་ནི་ཡོངས་སུ་གཟུང་། ། གང་ཚེ་སྒྲུབ་པའི་དུས་དག་ཏུ། །
BOགསང་སྔགས་ཉེ་བར་གྱུར་ཤེས་པ། ། དེ་ཚེ་བློ་དང་ལྡན་པ་ཡིས། ། བསྒྲུབ་པའི་རྫས་རྣམས་ཡོངས་སུ་གཟུང་། ། ཡང་ན་མཁས་པས་རྫས་དག་ནི། ། རྣམ་མང་གཟུགས་དང་ལྡན་པ་དག ། ལུང་གིས་དག་པར་རྣམ་ཤེས་པ། ། དེ་དག་ཆོ་ག་བཞིན་དུ་གཟུང་། ། རྫས་བཟང་གང་ཡང་རུང་བ་དག ། ཆོ་ག་བཞིན་དུ་ ཡོངས་བཟུང་ནས། ། དེ་མ་ཐག་ཏུ་ར་བ་བསྒྲིམས་ཏེ། ། བློ་དང་ལྡན་པས་སྒྲུབ་པ་བརྩམ། ། རྫས་ཡོངས་སུ་གཟུང་བའི་ཆོ་ག་རིམ་པར་ཕྱེ་བའོ། ། ། ། དེ་ནས་བསྒྲུབ་པའི་རྫས་རྣམས་ཀུན། ། ཅི་རིགས་པར་ནི་རྣམ་པར་སྦྱང་། ། བརྟག་པར་བྱ་བ་སྲ་བ་རྣམས། ། བ་ཡི་ སྣ་ལྔས་སྦྱང་བར་བསྒྲགས། ། བ་ཡི་རྣམ་ལྔ་ཆ་མཉམ་པས། ། ལྡོང་རོས་དག་ནི་བཏག་པར་བྱ། ། འོ་མ་གཙང་མ་མང་པོ་ཡིས། ། བ་བླ་ལེགས་པར་བཏག་པར་བྱ། ། བ་གཅིན་མང་པོས་ལི་ཁྲི་སྟེ། ། མར་མང་རྣམས་ཀྱིས་གི་ཝང་ངོ་། ། འོ་མ་ཁ་དོག་ལྡན་པའི་རྫས། ། ཨཉྫ་ན་ནི་འབའ་ཞིག་གོ། ། རལ་གྲི་འཁོར་ལོ་ལ་སོགས་རྫས། ། བ་ཡི་ལྕི་བ་ཆུ་མང་བས། ། ཤིང་དང་སེམས་ཅན་ལ་སོགས་རྫས། ། ཐམས་ཅད་བ་ཡི་གཅིན་དང་ཆུས། ། {རི་དགས་,རི་དྭགས་}ནག་པོའི་པགས་ལ་སོགས། ། བ་ཡི་གཅིན་དང་བསྐ་བས་བཀྲུ། ། དེ་ལྟར་རྫས་རྣམས་ བཀྲུས་ནས་ནི། །
BOསྤོས་ཆུ་དག་གིས་བཤལ་བར་བྱ། ། བ་ཡི་གཅིན་དང་བཅས་པ་ཡི། ། ཏིལ་དང་ཆུ་ཡིས་མ་ལུས་བཤལ། ། རྫས་དང་མཐུན་པའི་སྦྱང་བ་ནི། ། འཇིག་རྟེན་ནི་གང་གྲགས་པ། ། དེ་དག་གིས་ནི་རྫས་སྦྱང་བའམ། ། ཡང་ན་ཐམས་ཅད་སྤོས་ཆུས་བྱ། ། ལས་ཀུན་བྱེད་ པའི་གསང་སྔགས་སམ། ། རིགས་དང་རིགས་ཀྱི་སྙིང་པོ་ཡི། ། གསང་སྔགས་རྫས་དང་མཐུན་པ་ཡིས། ། ཐམས་ཅད་སྦྱང་བར་བྱ་བར་གྲགས། ། ཐམས་ཅད་རིགས་ཀྱི་རིག་སྔགས་ཀྱིས། ། བསང་གཏོར་བྱས་ན་དག་པར་བཤད། ། དང་པོ་བ་ཡི་རྣམ་ལྔས་བྱ། ། དེ་ཡི་རྗེས་ལ་ཏིལ་ གྱི་ཆུས། ། ཐམས་ཅད་རབ་ཏུ་སྦྱང་བར་བྱ། ། རྫས་སྦྱང་བའི་ཆོ་ག་རིམ་པར་ཕྱེ་བའོ། ། ། ། རྒྱན་དང་མཚོན་ཆ་གོས་ལ་སོགས། ། རྫས་ཀྱི་རིགས་སུ་གཏོགས་པ་ཀུན། ། ཕལ་ཆེར་འཇིག་རྟེན་གྲགས་པ་ཡི། ། ཚད་ཀྱང་གྲགས་པ་ཉིད་དུ་ཟད། ། ལྡོང་རོས་དག་ནི་བཏགས་ པ་ལས། ། དངོས་གྲུབ་ཕྱིར་ནི་སྲང་ལྔའོ། ། འབྲིང་པོ་ལ་ནི་སྲང་གསུམ་སྟེ། ། ཐ་མ་དག་ལ་སྲང་གཅིག་གོ། ། གི་ཝང་དག་ནི་སྲང་གཅིག་ཚད། ། བ་བླ་དག་ནི་སྲང་གཉིས་སོ། ། ཨཉྫ་ན་ནི་ཞོ་དྲུག་སྟེ། ། བ་མར་ལ་ནི་སྲང་བདུན་ནོ། ། ཐལ་བ་ལ་ནི་སྲང་ལྔ་སྟེ། ། གུར་གུམ་ལྡོང་ རོས་དག་དང་མཉམ། །
BOམི་སྣང་བ་ལ་བཤད་པ་ཡི། ། རིལ་བུ་སྣ་ཚོགས་ཡང་བྱས་ཏེ། ། བྱེ་བྲག་ཏུ་ནི་གྲངས་བདུན་ནམ། ། ཉི་ཤུ་གཅིག་གི་བར་དུ་ཤིས། ། ཡང་ན་དགོས་པའི་དབང་གིས་སུ། ། རྫས་རྣམས་ཚད་ནས་ལྷག་གྱུར་ཀྱང་། ། བློ་དང་ལྡན་པས་སྒྲུབ་པ་ལ། ། དེ་ཡི་ཚད་ དུ་རྫས་རྣམས་གཟུང་། ། སྔགས་རྒྱུད་གཞན་ལས་ཅི་གསུངས་དང་། ། རང་གི་ཆོ་ག་ལས་གསུངས་དང་། ། འཇིག་རྟེན་དག་ན་གང་ཤིས་པ། ། དེ་དང་དེ་དག་ཡོངས་སུ་གཟུང་། ། སྔོན་དུ་བསྙེན་པའི་ཚད་དང་ནི། ། གྲོགས་པོ་རྣམས་ཀྱི་ཚད་དག་དང་། ། རིག་སྔགས་ཀྱི་ནི་སྣང་བ་ ལས། ། རྫས་ཀྱི་ཚད་ཀྱང་ཤེས་པར་བྱ། ། རབ་དང་འབྲིང་པོ་ཐ་མ་ཡི། ། དངོས་གྲུབ་དག་གི་བྱེ་བྲག་ལས། ། རབ་དང་འབྲིང་དང་ཐ་མ་ཡི། ། རྫས་ཀྱི་ཚད་ཀྱང་བཤད་པ་ཡིན། ། རྫས་ཀྱི་ཚད་ཀྱི་ཆོ་ག་རིམ་པར་ཕྱེ་བའོ། ། ། ། དེ་ནས་གཞན་ཡང་གང་ཞིག་གིས། ། དངོས་ གྲུབ་མྱུར་དུ་ཐོབ་འགྱུར་བའི། ། རྫས་སྒྲུབ་པ་ཡི་ཆོ་ག་དག ། གསང་ཆེན་རྒྱས་པར་བཤད་པར་བྱ། ། སྒྲུབ་པའི་ཕྱིར་ནི་དགོས་པ་རྣམས། ། ཐོག་མར་ཡིད་ལ་ལེགས་བསམས་ཏེ། ། བློ་དང་ལྡན་པས་ཡོ་བྱད་ནི། ། ཐམས་ཅད་ལེགས་པར་བསོག་པར་བྱ། ། སྦྱིན་སྲེག་ ལས་ཀྱི་ཆོ་ག་ཡིས། །
BOགསང་སྔགས་ཡོངས་སུ་ཚིམ་བྱས་ཏེ། ། དབང་བསྐུར་ཆོ་ག་གསུངས་པའང་བྱ། ། དེ་ནས་བསྒྲུབ་པ་བརྩམ་པར་བྱ། ། དང་པོར་དཀྱིལ་འཁོར་བྲིས་ནས་སུ། ། ཆོ་ག་བཞིན་དུ་ལེགས་མཆོད་དེ། ། དེར་ནི་བདག་ཉིད་ཚུལ་བཞིན་དུ། ། དབང་བསྐུར་ནས་ནི་ལས་རྣམས་བརྩམ། ། དེ་ནས་གཞན་ཡང་ཟློས་པ་དག ། དངོས་གྲུབ་ཕྱིར་ནི་དབང་བསྐུར་བའི། ། དཀྱིལ་འཁོར་ལས་རྣམས་ཀུན་བྱེད་པ། ། གང་དག་རབ་ཏུ་བསྒྲགས་བཤད་པ། ། རིག་པའི་རྒྱལ་པོའི་དཀྱིལ་འཁོར་གྱི། ། ཆོ་ག་གང་དག་སྔར་བསྟན་པ། ། དེས་ནི་ས་གཞི་སྦྱང་ལ་སོགས། ། ཐམས་ཅད་དེ་བཞིན་ཁོ་ནར་བྱ། ། ཁྲུ་ལྔའམ་བདུན་ནམ་བརྒྱད་པ་ལ། ། གྲུ་བཞི་པ་ལ་སྒོ་བཞི་པ། ། གྲྭ་བཞི་ལྡན་པར་རྣམ་བརྟགས་པ། ། ནུབ་ཏུ་སྒོ་གཏོད་སྒོ་ཁྱུད་ཅན། ། དེ་ཡི་ཚད་ཀྱི་ཕྱེད་ཀྱི་ཆས། ། དཀྱིལ་འཁོར་ཕྱི་རིམ་བསྐོར་བ་དག ། ཚོན་ རྩི་སྣ་ལྔའི་ཕྱེ་མ་ཡིས། ། དཀྱིལ་འཁོར་ལེགས་པར་བྲི་བར་བྱ། ། མཁས་པས་དེ་ཡི་ནུབ་ཕྱོགས་སུ། ། གྲུ་བཞི་ཡིས་ནི་བར་བཅད་ནས། ། ཁྲུ་ལྔའམ་བཞི་འམ་གསུམ་པ་ལ། ། གྲྭ་བཞི་ཤར་དུ་སྒོ་ཡང་གདོད། ། ཆོ་ག་བཟང་པོ་ཀུན་ལ་ཡང་། ། སྒྲུབ་པོས་མངོན་པར་དབང་ བསྐུར་ཕྱིར། ། རྩ་བའི་དཀྱིལ་འཁོར་ཚད་དག་གི །
BOཕྱེད་ཀྱི་ཚད་དུ་དཀྱིལ་འཁོར་བྱ། ། ས་གཞི་ཤར་དུ་གཞོལ་བ་ལ། ། ནུབ་བམ་བྱང་དུ་སྒོ་གཏོད་དོ། ། ཀུན་ཀྱང་བྱང་དུ་གཞོལ་ན་ནི། ། ནུབ་ཏུ་སྒོ་ཡང་གཏོད་པར་གསུངས། ། ཀུན་དུ་ཐིག་ནི་བཏབ་ནས་ཀྱང་། ། ཚོན་སྣ་གཅིག་ གིས་བྲི་བྱ་སྟེ། ། ཕྱི་རོལ་གྱི་ནི་གྲྭ་བཞི་རུ། ། རྡོ་རྗེ་རྩེ་མོ་གསུམ་པ་བྲི། ། གསང་སྔགས་ཀུན་ལ་ཐོག་མར་ནི། ། དབུས་སུ་པདྨའི་སྙིང་པོར་བཅས། ། འདབ་མ་བརྒྱད་པ་བྲིས་ནས་ཀྱང་། ། དེ་ནས་བཀྲ་ཤིས་རྣམས་ཀྱིས་བརྒྱན། ། སྒོ་རྣམས་ཀུན་དུ་རྡོ་རྗེ་དང་། ། གྲྭ་རྣམས་སུ་ནི་བུམ་ པ་དགོད། ། ཕྱི་རོལ་དཀྱིལ་འཁོར་དག་ལ་ཡང་། ། ཆོ་ག་དེ་བཞིན་བྱ་བར་བཤད། ། དབང་བསྐུར་བ་ཡི་དཀྱིལ་འཁོར་དུ། ། བུམ་པ་གང་བ་བཞི་རྣམས་ནི། ། གྲུ་ཡི་རི་མོའི་ནང་རོལ་དུ། ། ངེས་པ་ཉིད་དུ་གཞག་པར་བྱ། ། དབུས་སུ་གསང་སྔགས་ཟློས་པ་པོའི། ། རིག་ སྔགས་རྒྱལ་པོ་གང་ཡིན་པ། ། དེ་ཡི་ཕྱག་རྒྱ་བྲིས་ནས་སུ། ། དེ་ཡི་སྟེང་དུ་བུམ་པ་བཞག ། ཇི་ལྟར་རིགས་ལ་རྣམ་བསྟན་པའི། ། ཕྱག་རྒྱ་གཙུག་ཏོར་པདྨ་དང་། ། རྡོ་རྗེ་འདི་གསུམ་རིམ་བཞིན་དུ། ། རབ་ཏུ་གསང་བའི་དམ་པ་ཡིན། ། ཕྱག་རྒྱ་རྣམས་ལ་མ་གོམས་ན། །
BOལས་ཀུན་བྱེད་ པའི་གསང་སྔགས་སམ། ། ཡང་ན་ལྷ་རྣམས་ཀུན་གྱི་ཕྱིར། ། ཡུངས་ཀར་སྟེང་དུ་བུམ་པ་བཞག ། སྣམ་བུའི་ཆ་ནི་ལེགས་ཕྱེ་ནས། ། ཤར་དུ་བཅོམ་ལྡན་ཕྱག་རྒྱ་བཞག ། དེ་ཡི་གཡོན་དུ་སྙིང་པོའོ། ། གཡས་སུ་རིགས་ཀྱི་ཡུམ་བཞག་གོ། ། དེ་བཞིན་བྱང་དུ་ཆོ་ག་བཞིན། ། པདྨ་འཆང་ བ་གཞག་པར་བྱ། ། ལྷོར་ནི་ཕྱག་ན་རྡོ་རྗེ་སྟེ། ། ནུབ་ཏུ་ཚངས་པ་དྲག་པོའོ། ། གྲྭ་གཉིས་ཀྱི་ནི་ངོས་དག་ཏུ། ། ཀུན་དགའ་བོ་དང་རབ་འབྱོར་དང་། ། མདུང་ཐུང་དང་ནི་མཆེ་བ་དང་། ། རིག་སྔགས་གསང་སྔགས་ཚོགས་རྣམས་དགོད། ། གྲྭ་གཉིས་ཀྱི་ནི་ངོས་དག་ཏུ། ། དོན་གྲུབ་པ་ དང་མཐུ་ཆེན་དང་། ། དཔལ་མོ་དང་ནི་གོས་དཀར་ཅན། ། རིག་སྔགས་གསང་སྔགས་ཚོགས་རྣམས་དགོད། ། གྲྭ་གཉིས་ཀྱི་ནི་ངོས་དག་ཏུ། ། རྡོ་རྗེ་རྡོ་རྗེ་དབྱུག་པ་དང་། ། རྡོ་རྗེ་ཁུ་ཚུར་གནམ་ལྕགས་མ། ། རིག་སྔགས་གསང་སྔགས་ཚོགས་རྣམས་དགོད། ། གྲྭ་གཉིས་ཀྱི་ནི་ངོས་དག་ཏུ། ། དྲག་ པོའི་ལོར་ནི་དྲག་མོ་དང་། ། ཚངས་པའི་གློར་ནི་དཔལ་ཆེན་དང་། ། སྣ་ཚོགས་ལྷ་ཡི་ཚོགས་རྣམས་བྲི། ། སྔོན་བཞིན་ཕྱི་རོལ་དཀྱིལ་འཁོར་དུ། ། ཕྱོགས་མཚམས་སྐྱོང་བའི་ལྷ་ལ་སོགས། །
BOཕྱོགས་སྐྱོང་{གོ་རིམས་,གོ་རིམ་}བཞིན་དུ་དགོད། ། ལྷག་མ་མ་སྨོས་པ་ཡང་དགོད། ། ཀླུ་རྒྱལ་དགའ་བོ་ བསྙེན་དགའ་བོ། ། སྒོ་ཡི་ངོས་སུ་གཞག་པར་བྱ། ། མཛེས་དགའ་ཉེ་མཛེས་ཕྱི་རོལ་སྒོར། ། མདུན་དུ་བདུད་རྩི་ཐབ་སྦྱོར་བཞག ། དཀྱིལ་འཁོར་སྔ་མའི་ཆོ་ག་བཞིན། ། མཆོད་སོགས་ཆོ་ག་གང་ཡིན་པ། ། དེ་དག་བྱས་ནས་སྦྱིན་སྲེག་ལས། ། རྣམ་གསུམ་ཚུལ་བཞིན་ལེགས་པར་ བརྩམ། ། བགེགས་རྣམས་གཞོམ་ཕྱིར་དྲག་ཤུལ་སྤྱོད། ། རང་གི་འབྱོར་ཕྱིར་རྒྱས་པར་བྱ། ། ཞི་བའི་ཆེད་ཏུ་ཞི་བ་སྟེ། ། ཇི་ལྟར་མཐོང་བཞིན་བྱ་བར་གསུངས། ། རིགས་གསུམ་དག་གི་སྤྱི་ལ་ཡང་། ། ལས་ཀུན་བྱེད་པའི་གསང་སྔགས་སམ། ། ཡང་ན་ཐབ་སྦྱོར་བྱེད་པ་ཡི། ། བགེགས་རྣམས་ལ་ནི་དྲག་ཤུལ་སྤྱད། ། སྙིང་པོ་ཉིད་ཀྱིས་རྒྱས་པ་སྟེ། ། ཞི་བའི་རིགས་ཀྱི་རིག་སྔགས་ཀྱིས། ། ཡང་ན་ཀུན་ལ་ལས་ཀུན་པའམ། ། སོ་སོ་ཡི་ནི་ཆོ་གས་བྱ། ། དཀྱིལ་འཁོར་བཤད་པའི་ཆོ་ག་བཞིན། ། མཁས་པས་སྒོ་ཡི་གཡས་ རོལ་དུ། ། མར་སོགས་སྦྱིན་སྲེག་རྫས་དག་ལས། ། སྦྱིན་སྲེག་གི་ནི་ལས་བྱའོ། ། ལས་རྣམས་གསུམ་པོ་དག་ལ་ཡང་། ། མཁས་པས་གསང་སྔགས་རྣམ་གསུམ་གྱིས། ། རིམ་པ་བཞིན་དུ་བརྒྱ་བརྒྱའམ། །
BOཡང་ན་ལྷག་པར་སྦྱིན་སྲེག་བྱ། ། རིག་སྔགས་བདག་ པོར་བཅས་པ་རྣམས། ། ཚིམ་པར་བྱ་ཕྱིར་སྒྲུབ་པ་པོས། ། རིགས་དང་རིགས་ལ་སྦྱིན་སྲེག་བརྒྱ་འམ། ། ཡང་ན་སོ་སོར་བདུན་བདུན་བྱ། ། སྒྲུབ་པའི་རིག་སྔགས་གང་ཡིན་དེ། ། རང་གི་བདག་པོའི་མདུན་དུ་བཞག ། འཕྲོག་མ་དང་ནི་རི་མཁར་མ། ། དུང་ཅན་མ་དང་ལྷ་མོ་ དྲག ། རལ་པ་གཅིག་མའམ་ཕྱོགས་བཞིན་དུ། ། མཆོད་པར་འདོད་པས་མཆོད་པ་བྱ། ། ལྷ་རྣམས་ཐམས་ཅད་ལེགས་མཆོད་དེ། ། སྦྱིན་སྲེག་ཅི་དགར་བྱས་ནས་ནི། ། སྔར་བཀོད་པ་ཡི་བུམ་པ་ལ། ། རང་གི་སྔགས་ཀྱིས་མངོན་པར་བསྔགས། ། ལྷ་ཡི་མདུན་ན་གང་འདུག་པ། ། གཅིག་ནི་རང་གི་སྔགས་ཀྱིས་བཟླས། ། དཀྱིལ་འཁོར་དབུས་ན་གང་འདུག་པ། ། རིག་པའི་རྒྱལ་པོས་བཟླས་བརྗོད་བྱ། ། སྒོ་ཡི་དྲུང་ན་གང་འདུག་པ། ། རྡོ་རྗེ་ཁྲོ་བོས་བཟླས་བརྗོད་བྱ། ། སྙིང་པོའི་རིགས་ཀྱི་རིག་སྔགས་ཀྱིས། ། ཤར་གྱི་གྲྭ་གཉིས་བཟླས་བརྗོད་བྱ། ། ལས་ཀུན་ བྱེད་པའི་གསང་སྔགས་དང་། ། དེ་བཞིན་གསང་སྔགས་གཞན་ཀུན་གྱིས། ། ནུབ་ཀྱི་གྲྭ་གཉིས་འདུག་པ་ཡི། ། བུམ་པ་ལ་ནི་ཚུལ་བཞིན་བཟླས། ། དཀྱིལ་འཁོར་གྱི་ནི་ལྷ་རྣམས་ཀུན། ། བཟླས་ཤིང་ཚུལ་བཞིན་སྦྱིན་སྲེག་ནས། །
BOཅི་ནུས་པར་ནི་ལེགས་མཆོད་དེ། ། དེ་ནས་ རབ་ཏུ་བསྐོར་བར་བྱ། ། དབང་བསྐུར་ཆེད་དུ་ཆོ་ག་གང་། ། དཀྱིལ་འཁོར་དག་ཏུ་ཀུན་བཤད་པ། ། བཀྲ་ཤིས་ལ་སོགས་དེ་དག་ནི། ། འདིར་ཡང་ནན་ཏན་བསྐྱེད་དེ་བྱ། ། བུམ་པ་བཟང་པོ་རིན་ཆེན་བཅས། ། འབྲུ་དང་བཅས་ཤིང་སྨན་དང་བཅས། ། མེ་ཏོག་འབྲས་བུ་ལོ་མར་ བཅས། ། ཆུར་བཅས་མགུལ་ཆིངས་ཕྲེང་བ་ཅན། ། དེ་ཡི་ལས་རྣམས་ཐམས་ཅད་ལ། ། དང་པོར་དབང་ནི་བསྐུར་བར་གསུངས། ། ཟློས་པ་པོ་ཡི་གྲོགས་པོ་ནི། ། སྨྱུང་བར་གནས་པ་དབང་བསྐུར་རོ། ། ཡང་ན་རང་གི་བླ་མ་ནི། ། ལུང་ལ་ལྷག་པར་མཁས་པས་བྱ། ། ཡོན་ཏན་ལྡན་ཞིང་དཀའ་ཐུབ་ཅན། ། མཁས་པས་ལས་འདི་བྱེད་དུ་གཞུག ། དང་པོ་བགེགས་རྣམས་བསལ་བའི་ཕྱིར། ། དབང་བསྐུར་བ་ནི་རབ་ཏུ་སྦྱར། ། བར་དུ་བར་མ་དག་གིས་ནི། ། མཇུག་ཏུ་རང་གིས་བཟླས་པར་བྱ། ། ཡུངས་ཀར་བཟླས་བརྗོད་བྱས་པ་དང་། ། གི་ཝང་དྲི་དང་བདུག་སྤོས་སོགས། ། སྲད་བུ་གདུ་བུ་གོས་རྣམས་ཀྱང་། ། འདིར་ནི་ཀུན་དུ་བཅང་བར་བྱ། ། དབང་བསྐུར་ཟིན་ནས་བདག་ཉིད་ཀྱིས། ། ཞི་བའི་སྦྱིན་སྲེག་ལས་བྱས་ནས། ། དོགས་པ་མེད་པར་ཆོ་ག་བཞིན། ། སླར་ཡང་གཤེགས་སུ་གསོལ་བར་བྱ། ། ཡང་ ནས་ཕྱོགས་མཉམ་བཟང་བར། །
BOསྟེགས་བུ་ཁྲུ་དོ་གྲུ་བཞི་ལ། ། ཚོན་སྣ་གཅིག་གིས་རྒྱས་པ་དང་། ། ཆུང་ངུར་ལེགས་པར་བྲི་བར་བྱ། ། ཕྱག་རྒྱ་གསུམ་པོ་ཕྱོགས་བཞིན་དུ། ། དེ་བཞིན་ནུབ་ཏུ་མདུང་རྩེ་གསུམ། ། དེ་ཡི་དབུས་ཀྱི་བུམ་པ་ཡིས། ། དབང་བསྐུར་ཕྱིར་ནི་ སྔོན་བཞིན་བྱ། ། མདོར་བསྡུས་ཆོ་ག་འདི་ཡིས་ཀྱང་། ། བདག་ཉིད་དབང་བསྐུར་བྱས་པར་འགྱུར། ། དེ་ལྟར་བྱས་ན་བགེགས་མེད་པ། ། འདི་ནི་ཟློས་པའི་གསང་ཆེན་ཡིན། ། ལྷ་རྣམས་བྱིན་གྱིས་རློབ་པ་དང་། ། བགེགས་རྣམས་རབ་ཏུ་ཞི་བར་འགྱུར། ། ཚེ་དང་བསོད་ནམས་ མངོན་པར་འཕེལ། ། སྡིག་པ་རྣམ་པར་བྱང་བར་འགྱུར། ། དེ་ཕྱིར་ཟློས་པ་ཚུལ་ཤེས་པས། ། ཆོ་ག་རྒྱས་པ་ཤེས་བྱས་ནས། ། བསྒྲུབ་པའི་ཕྱིར་ནི་དབང་བསྐུར་བ། ། གསང་བ་འདི་ནི་ཀུན་དུ་སྤྱད། ། དབང་བསྐུར་བའི་ཆོ་ག་རིམ་པར་ཕྱེ་བའོ། ། ། ། དེ་ནས་གཞན་ཡང་སྔགས་ སྒྲུབ་པས། ། ཉིན་རེ་ཞིང་ཡང་དུས་གསུམ་དུ། ། སྔགས་དང་རྗེས་སུ་མཐུན་པ་ཡི། ། སྦྱིན་སྲེག་ལས་ནི་གསུངས་པ་བརྩམ། ། ཆོ་ག་བཞིན་དུ་ཏིལ་ནག་དང་། ། ཞོ་དང་སྦྲང་རྩི་མར་སྦྱར་རམ། ། ལག་པན་གྱི་ནི་སྦྱིན་སྲེག་བྱ། ། ཞག་གྲངས་ཉི་ཤུ་རྩ་གཅིག་གམ། ། ཞག་ བདུན་ཡང་ན་ཟླ་གཅིག་ཏུ། །
BOགསང་སྔགས་དངོས་གྲུབ་རྗེས་མཐུན་པར། ། ཆོ་ག་འདི་ནི་བྱ་བར་བསྟན། ། དེ་ལ་བདུག་ཅིང་བསང་གཏོར་བྱ། ། ཡིད་ལ་བཟླས་ཤིང་བལྟ་བར་བྱ། ། བསང་བྱེད་བཅས་པའི་ལག་པ་ཡིས། ། གསང་སྔགས་བཟླས་ཤིང་བྲིམ་པར་ བྱ། ། གི་ཝང་ཆུ་དང་ཡུངས་ཀར་གྱིས། ། བྱེ་བྲག་ཏུ་ཡང་བསང་གཏོར་བྱ། ། རྫས་ལ་དུས་ཚིགས་དུས་ཚིགས་སུ། ། ཇི་ལྟར་རིགས་པར་མཆོད་པར་བྱ། ། ཡར་གྱི་ངོ་ལ་སྒྲུབ་འོས་པ། ། མཁས་པས་ཟླ་བ་ཉ་ལ་བྱ། ། མར་གྱི་ངོ་ལ་སྒྲུབ་འོས་པ། ། མར་གྱི་ངོ་ཡི་བཅུ་བཞི་ལ། ། མཁས་པས་རིགས་ཀྱི་རིག་སྔགས་ཀྱིས། ། རྫས་རྣམས་བྱིན་ནི་བསྐྱེད་པར་བྱ། ། དྲི་དང་བདུག་སྤོས་ཕྲེང་སོགས་ཀྱིས། ། ཁྱད་པར་དུ་ནི་མཆོད་པར་བྱ། ། ལག་ངར་གདུ་བུ་བཏགས་པ་ཡིས། ། ལག་མཐིལ་དྲི་ཡིས་བསྐུས་པ་ཡིས། ། ལག་པས་མཚན་གཅིག་ཐལ་བྱུང་ དུ། ། ཉི་མ་ཤར་གྱི་བར་དུ་བཟླས། ། དེ་ཉིད་ཀྱི་ནི་ནུབ་མོ་ཡང་། ། སོ་སོའི་རིགས་ཀྱི་གསང་སྔགས་ནི། ། རྫས་རྣམས་བྱིན་སྐྱེད་བྱེད་པ་འདིས། ། དུས་གསུམ་དུ་ནི་བརྒྱ་བརྒྱ་བཟླས། ། དེ་ལྟར་བློ་དང་ལྡན་པ་ཡིས། ། རྫས་དེ་ཡོངས་སུ་བཟུང་བ་ནས། ། མ་གྲུབ་བར་དུ་ དུས་གསུམ་བཟླས། ། དེ་ལྟར་བྱས་ན་འགྲུབ་པར་འགྱུར། །
BOཨོྃ་ཏེ་ཛ་ཏེ་ཛ་ས་ནི་སིདྡྷི་སཱ་དྷ་ཡ་ཧཱུྃ་ཕཊ། དེ་བཞིན་གཤེགས་པའི་རིགས་ལའོ། ། ཨོྃ་དཱི་བྱ་དཱི་བྱ། དཱི་པ་ཡ་ཨཱ་བི་ཤ་མ་ཧཱ་ཤྲི་ཡེ་སྭཱ་ཧཱ། པདྨའི་རིགས་ལའོ། ། ཨོྃ་ཛྭ་ལ་ཛྭ་ལ། ཛྭ་ལ་ཡ་བནྡཱུ་རི་ཧཱུྃ་ཕཊ། རྡོ་རྗེའི་རིགས་ ལའོ། ། ཀ་ར་བི་ར་དམར་པོའམ། ། མེ་ཏོག་མ་ལ་ཏི་ཡང་རུང་། ། ཡང་ན་ཡུངས་ཀར་དག་གིས་བྱ། ། རྫས་ལ་ལེགས་པར་འཕང་བར་བྱ། ། ཐོག་མ་བར་རམ་མཐའ་མར་རམ། ། མཚན་མ་བྱུང་བའི་ཚེ་ན་ཡང་། ། སྒྲུབ་པ་བརྩོན་པའི་བར་བར་དུ། ། འཕངས་ན་རྫས་ཀྱི་བྱིན་ བསྐྱེད་འགྱུར། ། དུས་དེ་རྣམས་སུ་ཆོ་ག་བཞིན། ། སྤོས་ཆུ་བཟླས་བརྗོད་བྱས་པའམ། ། མར་ལ་སོགས་པས་ཅི་རིགས་བྱ། ། བསང་གཏོར་བྱས་པས་བྱིན་བསྐྱེད་དོ། ། གལ་ཏེ་རྫས་རྣམས་མ་གྲུབ་ན། ། ཆོ་ག་དེ་ཉིད་བྱ་བ་བཤད། ། ཡང་ན་དཀྱིལ་འཁོར་འདི་བྲིས་ ནས། ། ཆོ་ག་ཤེས་པས་བྱིན་བསྐྱེད་དོ། ། ཚོན་རྩི་སྣ་ལྔའི་ཕྱེ་མ་ཡིས། ། དཀྱིལ་འཁོར་སྔ་མ་བཞིན་དུ་བྲི། ། གྲུ་བཞི་པ་ལ་སྒོ་གཅིག་པ། ། ཁྲུ་བཞི་པ་ཡི་ཚད་དུ་བྱ། ། དང་པོར་ཤར་དུ་འཁོར་ལོ་དང་། ། ངོས་སུ་ཆོས་གོས་ལྷུང་བཟེད་བཞག ། དེ་ནས་བྱང་དུ་པདྨ་དང་། ། རིལ་བ་སྤྱི་བླུགས་དབྱུག་པ་བཞག །
BOདེ་བཞིན་ལྷོར་ནི་འཁོར་ལོ་དང་། ། ངོས་སུ་དབྱུག་ཏོ་བུམ་པ་བཞག ། ཕྱག་རྒྱ་ཐམས་ཅད་སྟེགས་བུ་ལ། ། བཞག་ཅིང་ཁ་དོག་དཀར་པོར་བྱ། ། རང་གི་ཕྱག་རྒྱ་བཀོད་ནས་སུ། ། རྫས་ནི་སྣོད་དང་བཅས་པ་བཞག ། དེ་སྟེང་བཞག་པའི་ རྫས་ལ་ནི། ། སྔགས་ཀྱིས་སྔོན་བཞིན་བྱིན་བསྐྱེད་དོ། ། དེ་བཞིན་གཤེགས་པའི་མདུང་ཐུང་དང་། ། རིག་སྔགས་གྲུབ་པའི་སྤྱན་དང་ནི། ། གསང་སྔགས་དབང་ཕྱུག་གཟི་བརྗིད་གཏེར། ། དེ་བཞིན་གཞན་གྱིས་མི་ཐུབ་པ། ། ཕྱག་དྲུག་པ་དང་རྟ་མགྲིན་དང་། ། སྒྲོལ་མ་ལྷ་ མོ་ཟླ་བ་དང་། ། རྡོ་རྗེ་ལྕགས་ཀྱུ་ཁུ་ཚུར་དང་། ། ངོས་སུ་ཀི་ལི་གནོད་མཛེས་དང་། ། རིག་སྔགས་ཆེན་མོ་མཱ་མ་ཀཱི། ། གོས་དཀར་ཅན་མ་གང་ཡིན་དང་། ། རིག་སྔགས་གཞན་གྱིས་མི་ཐུབ་མ། ། དེ་དག་ནུབ་ཀྱི་ཕྱོགས་སུ་དགོད། ། བགེགས་རྣམས་ཐམས་ཅད་སེལ་བྱེད་པ། ། བདུད་རྩི་ཐབ་སྦྱོར་གཞག་པར་བྱ། ། སྒོ་ཡི་ཕྱོགས་སུ་རང་གི་རྒྱ། ། སྔ་མ་བཞིན་དུ་ཆོ་གས་མཆོད། ། ཕྱོགས་ཆའི་དབྱེ་བ་ཤེས་པ་ཡིས། ། {གོ་རིམས་,གོ་རིམ་}བཞིན་དུ་གྲྭ་ཀུན་དུ། ། ལས་ཀུན་བྱེད་པའི་གསང་སྔགས་དང་། ། ལུས་ངན་པོ་ཡང་རིམ་བཞིན་དུ། ། རྫས་ཀྱི་ཁྲི་ཡི་ཤར་ ཕྱོགས་སུ། །
BOབསྒྲུབ་པར་བྱ་བའི་ལྷ་ཉིད་གཞག ། རིགས་དང་རིགས་ཀྱི་ཕྱག་རྒྱ་ནི། ། སྣ་ཚོགས་ཅི་འདོད་པ་ཡང་གཞག ། སོ་སོ་ཡི་ནི་གསང་སྔགས་ཀྱིས། ། ཆོ་ག་བཞིན་དུ་སྤྱན་དྲངས་ནས། ། མཆོད་པའི་ཆོ་ག་ཐམས་ཅད་ནི། ། དཀྱིལ་འཁོར་སྔར་བསྟན་བཞིན་དུ་ བྱ། ། རིག་སྔགས་སོ་སོར་ཇི་ལྟ་བར། ། གསང་སྔགས་གསུངས་པའམ་རིག་སྔགས་ཀྱིས། ། ཁྱད་པར་དུ་ནི་སྦྱིན་སྲེག་བྱ། ། དེ་ནས་ཆོ་ག་འདི་དག་བྱ། ། དང་པོ་སྦྱིན་སྲེག་ལས་དག་གིས། ། རྫས་རྣམས་ལེགས་པར་བྱིན་ཡང་བསྐྱེད། ། ཀུན་ལ་རིགས་ཀྱི་རིག་སྔགས་ཀྱིས། ། བསྔགས་ཤིང་མཇུག་ཏུ་བསང་གཏོར་བྱ། ། མཱ་མ་ཀཱི་ཡི་སྙིང་པོ་དང་། ། རིགས་དབང་ཡི་གེ་བཞི་བཅས་པ། ། དེ་དག་གིས་ནི་བྱེ་བྲག་ཏུ། ། བྱིན་བསྐྱེད་ཆོ་ག་བྱ་བར་བཤད། ། ན་མོ་ལོ་ཀ་དྷ་ཏྲ་ཡེ། ནམཿཤྃ་ཀ་རེ། ཤཱནྟི་ཀ་རེ། གྷུཊྚ་གྷུཊྚ་གྷུཊྚིཊི་ནི། གྷུཊྚ་ཡེ། གྷུཊྚི་ནི་ སྭཱ་ཧཱ། མཱ་མ་ཀཱི་ཡི་རིག་སྔགས་སོ། ། ཨོྃ་ཀུ་ལནྡྷ་རི་བནྡྷ་བནྡྷ་ཧཱུྃ་ཕཊ། མཱ་མ་ཀཱིའི་སྙིང་པོའོ། ། ཨོྃ་བཛྲ་ཧཱུྃ་དྷ། རིག་པའི་དབང་པོའི་འོ། ། ཨོྃ་ཛྭ་ལ་ཛྭ་ལ་ཡཱ། རྒྱལ་བ་རྣམས་ཀྱིའོ། ། སིདྡྷི་སཱ་དྷ་ཡ། བར་མ་རྣམས་ཀྱིའོ། ། དཱི་པྱ་དཱི་པ་ཡཱ།
BOགསང་སྔགས་བར་མ་རྣམས་ཀྱི་ཡིན་ཏེ། རྫས་གཟེངས་བསྟོད་པའོ། ། ཕཊ་ཅེས་བྱ་བ་ནི་ཐམས་ཅད་ལའོ། ། གཟི་བརྗིད་ལྡན་པས་རྫས་ནང་དུ། ། ཕྱི་བཤོལ་མ་མཛད་བཞུགས་ནས་སུ། ། ཀུན་གྱི་གཟི་བརྗིད་སྤེལ་བ་དང་། ། བྱིན་རླབས་ཅན་དུ་མཛད་དུ་གསོལ། ། དེ་ལ་སོགས་པའི་ཚིག་གི་རྣམས། ། ཟློས་བུ་དང་ ནི་མ་འདྲེས་དང་། ། བསྣོར་བ་ཡིས་ཀྱང་ཅི་འདོད་པ། ། མཁས་པས་རྫས་ཀྱི་བྱིན་བསྐྱེད་དོ། ། ཀ་ར་བཱི་རའི་མེ་ཏོག་ནི། ། དམར་པོ་དག་དང་ཡུངས་ཀར་དང་། ། དེ་ནས་སྣ་མའི་མེ་ཏོག་གིས། ། རིམ་པ་བཞིན་དུ་རྫས་བྱིན་བསྐྱེད། ། ཐོག་མར་དྲི་ཡིས་བྱུག་པར་བྱ། ། དེ་ནས་མེ་ ཏོག་ཡུངས་ཀར་གྱི། ། བདུག་སྤོས་ཀྱིས་ཀྱང་རྣམ་པར་བདུག ། སྤོས་ཆུ་ཡིས་ཀྱང་བསང་གཏོར་བྱ། ། དུས་གསུམ་དུ་ནི་སྤོས་ཀྱི་ཆུས། ། རང་སྔགས་བདག་པོའི་གསང་སྔགས་ཀྱིས། ། བསང་གཏོར་བྱ་ཞིང་རང་སྔགས་ཀྱིས། ། སྐབས་སྐབས་སུ་ནི་བཟླས་བརྗོད་བྱ། ། ཉི་ མ་ཤར་གྱི་བར་དུ་ཡང་། ། བྱིན་བསྐྱེད་པ་ཡི་ཆོ་ག་བྱ། ། ཆོ་ག་འདིས་ནི་རིག་སྔགས་རྣམས། ། ཟློས་པ་པོ་ལ་མྱུར་དུ་འགྲུབ། ། དེ་ལྟར་བྱིན་ནི་བསྐྱེད་པའི་རྫས། ། བརྟན་ཞིང་མྱུར་དུ་འགྲུབ་པར་འགྱུར། །
BOསྒྲུབ་པའི་རྫས་ནི་ཉུང་ངུས་ཀྱང་། ། དངོས་གྲུབ་ཆེན་པོ་སྟེར་བར་འགྱུར། ། མངོན་ པར་འཕེལ་ཞིང་གཟི་བྱིན་དང་། ། རྣམ་པར་དག་པ་མངོན་དུ་འགྱུར། ། ཆོ་ག་འདི་ཡིས་རྫས་རྣམས་ལ། ། རྟག་ཏུ་བྱིན་ཡང་བསྐྱེད་པར་བྱ། ། བསྒྲུབ་པར་བྱ་བའི་ལས་རྣམས་ཀུན། ། ཡོངས་སུ་བཟུང་བ་བྱས་ནས་ཀྱང་། ། ཆོ་ག་གསང་བར་བསྟན་པ་འདིས། ། རྫས་རྣམས་ཀུན་གྱི་ བྱིན་ཡང་བསྐྱེད། ། རྟག་ཏུ་དུས་དང་དུས་མཚམས་ལ། ། དེ་ལྟ་བུར་ནི་བྱིན་བསྐྱེད་དེ། ། དེ་ནས་ཕྱིས་ནི་མཚན་གཅིག་ཏུ། ། བསྒྲུབ་ལ་ལེགས་པར་བརྩམ་པར་བྱ། ། རྫས་བྱིན་བསྐྱེད་པའི་ཆོ་ག་རིམ་པར་ཕྱེ་བའོ། ། ། ། དེ་ནས་གཞན་ཡང་ཅི་མཐོང་བའི། ། དུས་བཟང་ཡོན་ ཏན་ལྡན་པ་ལ། ། བ་སྒྲུབ་པའི་ཕྱིར་ནི་མཁས་པ་ཡིས། ། ཆོ་ག་བཞིན་དུ་བརྩམ་པར་བྱ། ། དགུན་ཟླ་ཐ་ཆུང་ས་སྟོན་ཟླ་འབྲིང་། ། དཔྱིད་ཟླ་ར་དང་འབྲིང་པོ་དང་། ། དབྱར་ཟླ་ར་བ་ཉ་དག་ལ། ། སྒྲུབ་པ་ཆེན་པོ་བརྩམ་པར་བྱ། ། དབྱར་ཟླ་ར་བ་རྟག་ཏུ་འབབ། ། དཔྱིད་ཟླ་འབྲིང་པོ་རླུང་གི་ འཁོར། ། དཔྱིད་ཟླ་ར་བ་སྣ་ཚོགས་བགེགས། ། དགུན་ཟླ་ར་བ་བགེགས་མེད་དོ། ། སྟོན་ཟླ་འབྲིང་པོ་གློག་འགྱུ་ཞིང་། ། སྒྲ་ཆེན་རྣམས་ཀྱང་འབྱུང་བར་འགྱུར། །
BOབགེགས་ནི་འགྲུབ་པའི་མཚན་མ་བས། ། དེ་ལྟར་དེ་དག་བརྟག་པར་བྱ། ། ཟླ་བ་ལྔ་པོ་དེ་དག་ལ། ། དངོས་གྲུབ་རབ་ནི་འགྲུབ་ པར་བྱ། ། ཞི་བ་ཡི་ནི་ལས་རྣམས་ཀྱང་། ། དེ་དག་ཉིད་ལ་ལེགས་པར་བརྩམ། ། ལྔ་པོ་མར་གྱི་ཟླ་ཕྱེད་ཀྱི། ། དུས་ཚིགས་རྣམས་སུ་གང་བསྒྲགས་པ། ། དེ་ལ་འབྲིང་དང་ཐ་མ་ཡི། ། དངོས་གྲུབ་བསྒྲུབ་པར་རབ་ཏུ་ཤིས། ། ཟླ་བ་གཟའ་ཡིས་ཟིན་པའི་ཚེ། ། རྫས་ཀྱི་དམ་པ་བསྒྲུབ་ པར་བྱ། ། ཉི་མ་གཟས་ཟིན་ཚེ་ན་ཡང་། ། མཁས་པས་ལས་རྣམས་བསྒྲུབ་པར་བྱ། ། ཚེས་ལྔ་དང་ནི་ཚེས་བདུན་དང་། ། ཚེས་གཅིག་དང་ནི་ཚེས་གསུམ་དང་། ། ཚེས་གྲངས་བཅུ་གསུམ་དག་ལ་ཡང་། ། ལས་རྣམས་ཐམས་ཅད་བྱ་བར་ཤིས། ། ཚེས་གྲངས་སྐར་མ་དང་ལྡན་ན། ། མཆོག་ཏུ་འགྱུར་བར་ཤེས་པར་བྱ། ། ཕལ་དག་ལ་ནི་བྱེ་བྲག་ཏུ། ། སྐར་མ་རྒྱལ་ནི་ཀུན་ལ་ཤིས། ། གཟའ་དང་ཡུད་ཙམ་བྱེད་པ་དང་། ། དྲག་པོ་དྲག་པོའི་ལས་ལའོ། ། རང་གི་ཆོ་གས་གསུངས་པའམ། ། ལྷ་རྣམས་ཀྱིས་ནི་བསྐུལ་བའང་རུང་། ། ཆོ་འཕྲུལ་གྱི་ནི་ཟླ་ཕྱེད་ལ། ། ལས་རྣམས་ཐམས་ཅད་རབ་ཏུ་ཤིས། ། བཀའ་ལུང་སྩལ་བའི་ཚེས་གྲངས་སམ། ། ཚེས་གྲངས་བཅུ་གསུམ་པ་ཡང་རུང་། ། ཞི་བ་ཕལ་ཆེར་སྟོན་ངོ་ལ། །
BOདེ་བཞིན་རྒྱས་པ་དགུན་ངོ་ལ། ། དཔྱིད་སྨད་དྲག་ཤུལ་ཆོ་ག་བཞིན། ། བསྒྲུབ་པ་དག་ནི་རབ་ཏུ་ཤིས། ། དཔྱིད་སྟོད་ལས་ རྣམས་ཐམས་ཅད་བྱ། ། དབྱར་གྱི་ངོ་ལ་ལས་རྣམས་བྱ། ། སྟོན་དང་དགུན་དང་དཔྱིད་སྨད་ནི། ། འབྲིང་དང་རབ་དང་ཐ་མའོ། ། གསུམ་དུ་ཕྱེ་བ་དེ་ལ་ཡང་། ། གསུམ་གསུམ་དག་ཏུ་དབྱེ་བར་བཤད། ། དུས་གསུམ་དག་གི་དངོས་གྲུབ་ཀྱང་། ། ཕལ་ཆེར་རྣམ་ པ་གསུམ་དུ་བཤད། ། དང་པོ་སྲོད་ཀྱི་དུས་ལས་ཏེ། ། འབྲིང་པོ་ནམ་གྱི་ཕྱེད་ནའོ། ། རབ་ཀྱི་དུས་ནི་ནང་པར་ཏེ། ། དེར་ནི་དངོས་གྲུབ་རིམ་བཞིན་འགྱུར། ། ཞི་དང་དྲག་ཤུལ་རྒྱས་པ་ཡི། ། དུས་ཀྱང་དེ་དག་ཡིན་པར་བསྒྲགས། ། ཐ་མ་འབྲིང་དང་རབ་རྣམས་ཀྱི། ། ཆོ་གའི་རིམ་པ་ དེ་དག་ཉིད། ། ར་བ་དང་འབྲིང་དང་ཐ་མ་ཡི། ། དངོས་གྲུབ་རྣམས་ཀྱི་མཚན་མ་ལ། ། རིམ་པ་ཅི་ལྟར་མཐོང་བ་བཞིན། ། བྱེ་བྲག་རྣམ་གསུམ་ཤེས་པར་བྱ། ། ཉི་མ་ཟླ་བ་གཟས་ཟིན་ལ། ། དུས་ནི་གང་ཡང་ངེས་པ་མེད། ། དྲག་ཤུལ་སྤྱོད་པ་ཁྱད་པར་དུ། ། གཟས་ཟིན་ཚེ་ནི་བྱ་ བར་བཟང་། ། རབ་ལ་སོགས་པའི་བྱེ་བྲག་ལས། ། ཞག་གསུམ་ཡང་ན་ཞག་གཉིས་སམ། ། ཡང་ན་ཞག་གཅིག་ཏུ་ཡང་རུང་། ། སྨྱུང་བར་བྱ་བར་བ་ཏུ་བཤད། །
BOསྒྲུབ་པའི་དུས་རིམ་པར་ཕྱེ་བའོ། ། ། ། དེ་ནས་གཞན་ཡང་རྟོག་པ་ལས། ། ཇི་སྐད་བསྟན་པའི་ཆོ་ག་ བྱ། ། ངལ་བར་ཐལ་བའི་སྐྱོན་ཡོད་པས། ། སྨྱུང་བར་བྱ་བ་མི་ཤིས་སོ། ། དེ་ཡི་བར་དུ་སྒྲུབ་པ་པོས། ། བསྙེན་པ་དང་ནི་མཆོད་པ་དང་། ། སྦྱིན་སྲེག་ཆོ་ག་བསྟོད་པ་དང་། ། དགེ་བ་དག་ལ་བརྩོན་པར་བྱ། ། ལན་བརྒྱར་མངོན་པར་བསྔགས་པ་ཡི། ། བུ་མོས་བཀལ་བའི་སྐུད་པ་ནི། ། མང་དུ་བསྒྲིལ་ཅིང་སྤོས་བསྐུས་པ། ། མདུད་པ་བདུན་ནི་བོར་བ་ལ། ། སྒྲུབ་པ་པོས་ནི་གསང་སྔགས་འདིས། ། བརྒྱ་རྩ་བརྒྱད་དུ་བཟླས་བརྗོད་ནས། ། སྲོད་ལ་རྐེད་པར་བཅིངས་ན་ནི། ། ཁུ་ཆུ་དགག་པ་བྱས་པར་འགྱུར། ། ཨོྃ་ཛ་ཡེ་ཀུ་མཱ་རི་ཤུ་ཀྲ་བནྡྷ་ནི་སྭཱ་ཧཱ། ཨོྃ་རཀྵ་ཀུ་རུ་ཀུ་རུ་གི་ན་ སྭཱ་ཧཱ། ཨོྃ་ཀུ་ལནྡྷ་རི་བནྡྷ་བནྡྷ་ཧཱུྃ་ཕཊ་སྭཱ་ཧཱ། བདེ་གཤེགས་སྔགས་པ་གཞོན་ནུ་མས། ། པདྨ་འཛིན་ལ་ཀུ་རུང་གིས། ། རྡོ་རྗེའི་རིགས་ལ་མཱ་མ་ཀཱིས། ། ཆོ་ག་བཞིན་དུ་ཁུ་ཆུ་དགག ། ཚུར་སྤྱོན་ཚུར་སྤྱོན་བརྟུལ་ཞུགས་བཟང་། ། བདག་གི་ལུས་ལ་མྱུར་ཞུགས་ནས། ། རྐང་གི་ བར་དུ་གནས་ནས་སུ། ། འདིར་ནི་ཡུན་རིང་རྒྱུ་བར་མཛོད། ། རིག་སྔགས་བཤད་པ་འདི་གསུམ་ནི། །
BOཐམས་ཅད་ཀྱི་ནི་སྤྱིར་ཡིན་ནོ། ། ཁ་ཅིག་ཏུ་ནི་རྟོག་པ་ལས། ། གསུངས་པའི་སྔགས་ཀྱིས་ཆོ་ག་བྱ། ། དཀྱིལ་འཁོར་དག་ནི་འདྲི་བ་དང་། ། བསྙེན་པ་དང་ནི་དུས་ཚིགས་ དང་། ། བྱིན་བསྐྱེད་ལ་སོགས་ཆོ་ག་ཡང་། ། ཉི་མ་རེ་རེ་བཅིང་བར་བྱ། ། ཐོག་མར་ལན་བརྒྱ་བསྔགས་པ་ཡི། ། མིག་སྨན་གྱིས་ནི་གཉིད་ཀྱང་བསལ། ། བསྒྲུབ་པའི་ཚེ་ཡང་མིག་སྨན་དེ། ། ལེགས་པར་བསྐུ་བར་བྱ་བར་བསྒྲགས། ། སུག་སྨེལ་ག་པུར་སྲོ་ཏན་ཙ། ། ཤིང་ ཚ་ཏ་ཀར་པི་པི་ལིང་། ། ཁ་ར་ཏ་ཡི་ཁ་ཆུར་སྦྱར། ། གཉིད་དང་སྙོམ་དང་འཇིགས་པ་སེལ། ། འཐོར་འཐུང་ཡང་དང་ཡང་བྱས་ཏེ། ། ཁ་གདོང་བཀྲུས་ནས་མིག་བཀྲུའོ། ། མིག་སྨན་བསྐུས་པའི་མིག་དེས་ནི། ། བསྒྲུབ་པའི་ཚེ་ན་བགེགས་ཀྱང་མཐོང་། ། ཨོྃ་ཛྭ་ལ་ལོ་ཙ་ནི་སྭཱ་ཧཱ། དེ་བཞིན་གཤེགས་པའི་རིགས་ལའོ། ། ཨོྃ་བི་ལོ་ཀི་ན་སྭཱ་ཧཱ། པདྨའི་རིགས་ལའོ། ། ཨོྃ་བནྡུ་ནི་རི་དྷི་བ་ཏེ་སྭཱ་ཧཱ། རྡོ་རྗེའི་རིགས་ལའོ། ། རིགས་གསུམ་གྱི་མིག་སྨན་བསྐུ་བའི་རིག་སྔགས་སོ། ། ངལ་དང་རྨྱ་བ་བསལ་བའི་ཕྱིར། ། སྤོས་ཀྱི་ཆུ་ནི་ཁྱོར་གང་ཙམ། ། དྲི་ཞིམ་བདུན་ བདུན་བཟླས་པ་དག ། ཁྱོར་བ་ཉིད་ཀྱིས་བཏུང་བར་བྱ། ། དེ་ནས་ཉེ་རེག་བྱས་ནས་ནི། །
BOབློ་དང་ལྡན་པས་མཚན་མ་བརྟག ། མཚན་མ་བཟང་པོ་མཐོང་ནས་ནི། ། བསྒྲུབ་པ་གུས་པས་བརྩམ་པར་བྱ། ། འཁོར་ལོ་དུང་དང་ལྕགས་ཀྱུ་ཉ། ། གཡུང་དྲུང་པདྨ་རྒྱལ་མཚན་དང་། ། བཀྲ་ཤིས་བུམ་པ་གང་བ་དང་། ། དཔལ་བེའུ་རྡོ་རྗེ་ཕྲེང་བ་དང་། ། བུ་མོ་རྒྱན་གྱིས་བརྒྱན་པ་དང་། ། སྦྲུམ་མའམ་པང་ན་བུ་ཐོགས་དང་། ། ན་ཆུང་དགའ་ཞིང་རྒྱགས་པ་དག ། གང་ཞིག་དེ་ཡིས་འགྲུབ་པར་སྟོན། ། བྲམ་ཟེ་གོས་དཀར་གྱོན་པ་དང་། ། ཤིང་རྟ་གླང་པོ་རྟ་དག་ དང་། ། རྩ་རྡོག་འབྲས་བུ་སྣ་ཚོགས་དང་། ། ངོ་མཚར་ཆེ་ཞིང་མཐོང་བ་དག ། འབྲུག་གི་སྒྲ་ནི་གྲག་པ་དང་། ། རིག་བྱེད་དབྱངས་དང་རྒྱལ་བའི་སྒྲ། ། དུང་དང་རྔ་དང་རྫ་རྔ་ཡི། ། སྒྲ་རྣམས་འགྲུབ་ཕྱིར་རབ་ཏུ་ཤིས། ། རྨ་བྱ་ཁྲུང་ཁྲུང་ངང་མོ་དང་། ། ནེ་ཚོ་ལ་སོགས་བྱ་རྣམས་ ཀྱི། ། སྒྲ་སྙན་རྣམས་ནི་ཀུན་ཐོས་ནས། ། དངོས་གྲུབ་སྦྱིན་པའི་ལས་བརྩམ་མོ། ། སྨོན་ལམ་བཀྲ་ཤིས་ཐམས་ཅད་དང་། ། བསོད་ནམས་དགའ་དང་བདེ་ལེགས་ཚིག ། ཡིད་དུ་འོང་བའི་ཚིག་གི་རྣམས། ། ཐོས་ནས་འགྲུབ་པ་ཤེས་པར་བྱ། ། གློག་དང་སྤྲིན་ དང་ཆར་འབབ་དང་། ། སེར་བུ་མེ་ཏོག་ཆར་འབབ་དང་། ། འཇའ་དང་དྲི་ནི་ཞིམ་པོ་སྟེ། །
BOམཚན་མ་འདི་དག་ལྷ་ཡི་ཡིན། ། བར་སྣང་ལས་བྱུང་མཚན་མ་ནི། ། ཐམས་ཅད་འབྲིང་པོར་ཤེས་པར་བྱ། ། ས་ལས་བྱུང་བའི་མཚན་མ་དག ། དེ་དག་ས་པའི་ཡིན་པར་བཤད། ། ལྷ་དག་ གིས་ནི་དངོས་གྲུབ་རབ། ། བར་སྣང་དག་གི་འབྲིང་པོར་འགྱུར། ། ས་པ་དག་གི་དངོས་གྲུབ་ཕལ། ། གསུམ་ལའང་གསུམ་གསུམ་དག་ཏུ་དབྱེ། ། དེ་དག་ལ་སོགས་མཚན་མ་རྣམས། ། དངོས་གྲུབ་ཕྱིར་ནི་རབ་ཏུ་བསྒྲགས། ། མདོར་ན་གསང་སྔགས་ཐམས་ཅད་ལ། ། དེ་ ལས་བཟློག་པས་མི་འགྲུབ་བོ། ། དང་པོར་མཚན་མ་བཟུང་ནས་ནི། ། སེམས་ཀྱང་རབ་ཏུ་དགའ་བྱས་ཏེ། ། ཡོངས་སུ་མགུ་བའི་བསམ་པ་ཡིས། ། དེ་ནས་བསྒྲུབ་པ་བརྩམ་པར་བྱ། ། བསྒྲུབ་པའི་མཚན་མ་རིམ་པར་ཕྱེ་བའོ། ། ། ། དཀྱིལ་འཁོར་གྱི་ནི་རྒྱུད་ཀུན་དང་། ། ཡང་ན་བསྒྲུབ་པ་དག་ལའང་རུང་། ། ཚེས་གྲངས་ཡུད་ཙམ་བྱེད་པ་དང་། ། མཚན་མའང་རྒྱས་པར་ཤེས་བྱས་ནས། ། མི་བཟང་བ་ལ་མར་དག་གི། ། རིགས་ཀྱི་རིག་པས་སྦྱིན་སྲེག་བྱ། ། དེ་ནས་ལས་རྣམས་བརྩམ་བྱས་ནས། ། འོན་ཏམ་དངོས་གྲུབ་ཐོབ་པར་འགྱུར། ། གནས་ གང་དག་ཏུ་རིམ་པ་བཞིན། ། དཀྱིལ་འཁོར་དག་ནི་མངོན་བྲི་ཞིང་། ། དེ་ཉིད་དུ་ནི་སྒྲུབ་པ་ཡི། ། དེ་ཡི་རིམ་པ་བཤད་པ་ཡིན། །
BOརི་ལ་སོགས་པའི་གནས་རྣམས་སུ། ། དངོས་གྲུབ་ཆེན་པོ་ཐོབ་པར་བསྒྲགས། ། མཚོ་ལ་སོགས་པར་འབྲིང་རྣམས་འཐོབ། ། གཞན་དག་ཏུ་ནི་ ཕལ་རྣམས་སོ། ། སྔགས་དང་རྗེས་སུ་མཐུན་ནས་སུ། ། བཟླས་བརྗོད་བྱེད་པས་ལས་རྣམས་བརྩམ། ། གཞན་དུ་བསྒྲུབ་པར་བྱས་ན་ནི། ། དངོས་གྲུབ་མྱུར་དུ་མི་འཐོབ་བོ། ། རིང་བསྲེལ་ཅན་གྱི་མཆོད་རྟེན་ཀུན། ། བདེ་གཤེགས་ཀུན་གྱི་གསང་སྔགས་འགྲུབ། ། མཆོད་རྟེན་ཆེན་ པོ་ཉམས་དགའ་བ། ། བྱང་ཆུབ་ཆེན་པོ་གྲུབ་གནས་དང་། ། དེ་བཞིན་བལྟམ་ལ་སོགས་པ་བརྒྱད། ། དེ་ན་བགེགས་ནི་ཡོད་མ་ཡིན། ། ལས་ཀྱི་ཆོ་ག་ཐམས་ཅད་དང་། ། མཐུན་པ་དག་ཀྱང་དེ་ན་ཡོད། ། དེར་ནི་བདུད་ཀྱིས་བགེགས་བྱ་བར། ། ནམ་ཡང་ནུས་པ་མ་ཡིན་ ནོ། ། དེ་བས་གསང་སྔགས་ཐམས་ཅད་ཀྱང་། ། དེར་ནི་ངེས་པར་འགྲུབ་པར་གསུངས། ། འདིར་ནི་དྲག་ཤུལ་སྤྱོད་པའི་ལས། ། དུར་ཁྲོད་དག་ཏུ་བྱ་བར་ཤིས། ། ཡང་ན་ཤིང་གཅིག་པ་དག་གམ། ། ཁང་སྟོང་མཚན་མ་གཅིག་པའང་རུང་། ། འབབ་ཆུའི་འགྲམ་ནི་ཐམས་ ཅད་དུ། ། རིག་སྔགས་བསྒྲུབས་ན་འགྲུབ་པར་གསུངས། ། སྐྱེད་མོས་ཚལ་དུ་གནོད་སྦྱིན་མོ། ། ཀླུ་ཡི་བདག་པོ་མཚོ་རྣམས་སུ། ། ཁང་སྟོང་དུ་ནི་ལོངས་སྤྱོད་ཕྱིར། །
BOམངག་གཞུག་གྲོང་སྲང་ལ་སོགས་པར། ། ཕུག་གི་གསང་སྔགས་ཕུག་རྣམས་སུ། ། བསྒྲུབས་ན་མྱུར་དུ་འགྲུབ་ པར་འགྱུར། ། སྔགས་རྣམས་མྱུར་དུ་འགྲུབ་པའི་ཕྱིར། ། ཆོ་ག་གསང་བ་འདི་གསུངས་སོ། ། མན་ངག་བསྟན་པ་འདི་ཉིད་ཀྱིས། ། གནས་རྣམས་གཏན་ལ་དབབ་པར་བྱ། ། གང་ཡང་རུང་བའི་གནས་གཅིག་ཏུ། ། དཀྱིལ་འཁོར་ཆོ་ག་གསུངས་པའམ། ། བཟླས་བརྗོད་ས་ཡི་ཆོ་ ག་ཡིས། ། དང་པོར་ས་ནི་སྦྱང་བར་བྱ། ། ལྷ་ཡི་གནས་ནི་རྣམ་དག་པར། ། བྱིན་གྱིས་རློབ་ཅིང་བཞུགས་འགྱུར་བས། ། བསྒྲུབ་པ་ལ་ནི་བྱེ་བྲག་ཏུ། ། ཆོ་ག་གཞན་ཡང་འདི་དག་བཤད། ། ཙནྡན་དམར་པོས་བསྐུས་པ་ཡི། ། སེང་ལྡེང་ཕུར་བུ་མཛུབ་གང་པ། ། རྣོན་པོར་བྱས་པ་ བཞི་དག་ལ། ། སྐུད་པ་དམར་པོ་དག་གིས་དཀྲིས། ། རྡོ་རྗེ་ཕུར་བུས་ལན་གྲངས་བརྒྱར། ། མངོན་པར་བཟླས་བརྗོད་བྱས་པ་དག ། གནས་སམ་ཁྱིམ་དག་ཏུ་ཡང་རུང་། ། ཁུ་ཚུར་གྱིས་ནི་ཕྱོགས་བཞིར་གདབ། ། དང་པོར་ལས་ཀུན་བྱེད་སྔགས་སམ། ། ཡང་ན་བགེགས་ཀྱི་ དགྲས་ཀྱང་རུང་། ། ཡུངས་ཀར་དག་ལ་སོགས་པ་ཡིས། ། ལེགས་པར་ཀུན་དུ་བསལ་བར་བྱ། ། བ་དན་དཀར་པོ་གཅིག་ལ་ནི། ། རིག་སྔགས་རྒྱལ་པོས་མངོན་བསྔགས་ཏེ། ། སྨྱུག་མ་རིང་པོའི་ཡུ་བ་ལ། །
BOབཏགས་ཏེ་དང་པོ་ཤར་དུ་གཟུགས། ། རྡོ་རྗེ་ར་བས་བསྔགས་པ་ ཡི། ། ལྕགས་ཀྱུའི་ཕྱེ་མས་ར་བ་བྱ། ། རྡོ་རྗེ་དྲ་བའི་གསང་སྔགས་ཀྱིས། ། ལན་བརྒྱར་བསྔགས་པའི་ཕྱེ་མ་ཡིས། ། ཁོར་ཡུག་ཏུ་ནི་རྡོ་རྗེ་ཕྲེང་། ། བྲིས་ན་རྡོ་རྗེ་དྲ་བར་འགྱུར། ། དཀྱིལ་འཁོར་ནང་གི་དང་པོ་ཡི། ། སྒོ་ཀར་བདུད་རྩི་ཐབ་སྦྱོར་གྱིས། ། རྡོ་རྗེའི་ ཕྱག་རྒྱ་བསྲུང་བའམ། ། ཡང་ན་གཞན་གྱིས་མི་ཐུབ་པས། ། དཀྱིལ་འཁོར་གཉིས་པ་བསྲུང་བ་ནི། ། འཕྲོག་མ་སོགས་པས་བྱ་བར་འདོད། ། རིགས་གསུམ་དག་གི་སྤྱི་ལ་ཡང་། ། ཆོ་ག་འདི་ནི་རབ་ཏུ་བསྒྲགས། ། ཆོ་ག་གསུམ་པོ་འདི་དག་ནི། ། ཐུབ་དཀའ་བར་ཡང་ཡོངས་སུ་ བསྒྲགས། ། རེ་རེའམ་ཡང་ན་ཀུན་གྱིས་ཀྱང་། ། བསྒྲུབ་པའི་ཚེ་ན་བགེགས་ཀུན་སེལ། ། རྫས་བསྒྲུབ་པ་ན་བསྲུང་བའི་ཕྱིར། ། ཆོ་ག་གསང་བ་འདི་གསུངས་ཏེ། ། མདོར་བསྡུས་པ་ལ་དོན་ཡང་ཆེ། ། རིམ་པ་བཞིན་དུ་རབ་ཏུ་གཅེས། ། མཁས་པས་རིན་ཆེན་ལ་སོགས་པས། ། ས་གཞི་སྙིང་པོ་ཅན་དུ་བྱ། ། ཐབ་ཁུང་ལ་ཡང་ཅི་རིགས་པར། ། རྫས་བཞག་པ་ཡི་འོག་ཏུའང་རུང་། ། དྲི་གཙང་ཁང་ངམ་ཁང་{བཟངས་སུ,བཟང་དུ}། ། བསང་གཏོར་བྱས་པ་དག་གསུངས་པས། ། དེར་ནི་ས་བརྐོ་མི་དགོས་ཀྱི། །
BOཆོ་ག་དེ་ལྟར་ཕྱི་རོལ་དུའོ། ། བདག་ཉིད་ཀྱིས་ནི་ཆོ་ག་ བཞིན། ། བརྟགས་ཤིང་བྱས་པའི་ཁང་པར་ནི། ། བྱེ་བྲག་ཏུ་ནི་ལས་བརྩམས་ན། ། དེར་ནི་མྱུར་དུ་འགྲུབ་པར་འགྱུར། ། ཁུང་དག་ཏུ་ནི་བསྒྲུབ་པ་མིན། ། ས་ཕྱོགས་དོག་པར་མི་བྱའོ། ། ཁང་རུལ་དུ་ཡང་བློ་ཅན་གྱིས། ། བསྒྲུབ་པ་བརྩམ་པར་མི་བྱའོ། ། དེ་ནས་དད་པའི་ ཡིད་ཀྱིས་སུ། ། སྲོད་ལ་གསང་སྔགས་ལྷ་ཡི་རྣམས། ། མཐོང་བ་བཞིན་དུ་གུས་བྱས་ཏེ། ། སྟ་གོན་གནས་པ་ལེགས་པར་བྱ། ། རིགས་གསུམ་གྱི་ནི་རིག་སྔགས་ལྷ། ། བདག་པོར་བཅས་པ་གང་བཞུགས་དང་། ། སྔགས་རྒྱུད་འདི་ལ་ལྷ་རྣམས་ནི། ། གང་དག་ཡོངས་སུ་བསྒྲགས་ པ་དང་། ། གསང་སྔགས་ལྷ་ནི་གང་དག་ཅིག ། བདག་ཉིད་ཉོན་མོངས་ཆེན་པོ་ཡིས། ། ཆོ་ག་འདི་བཞིན་བསྙེན་པ་དང་། ། བཟླས་བརྗོད་སྦྱིན་སྲེག་གིས་མཉེས་པ། ། ཞག་བདུན་ན་ནི་སྒྲུབ་པའི་ཚེ། ། བྱིན་གྱིས་རློབ་ཅིང་གཤེགས་སུ་གསོལ། ། འདི་ན་ལྷ་དང་འབྱུང་པོ་དང་། ། འཁོར་རྣམས་དང་ནི་བཅས་པ་དག ། ཅི་ནུས་པར་ནི་མཆོད་བྱས་པས། ། མཆོད་པ་ལ་ནི་ཕན་འདོགས་རྣམས། ། ཡོངས་སུ་མཉེས་ཤིང་ཀུན་འདུས་ནས། ། བདག་ལ་དངོས་གྲུབ་མྱུར་གནས་མཛོད། ། དེ་ལྟར་གུས་པར་ཉིན་རེ་ཞིང་། །
BOཚིག་གིས་ཀྱང་ནི་ཕྱོགས་བཞིར་བརྗོད། ། ཉིན་རེའམ་ཞག་རེ་བྲི་བྱས་པས། ། གསང་སྔགས་སྟ་གོན་གནས་པར་བྱ། ། མཆོད་ཡོན་དག་དང་མེ་ཏོག་དང་། ། བདུག་པ་དྲི་ཞིམ་དག་ཀྱང་དབུལ། ། སྒྲུབ་པ་པོས་ནི་ཆོ་ག་འདིས། ། སྲོད་ཀྱི་དུས་སུ་བྱ་བར་བཤད། ། སྒྲུབ་པ་པོ་ཡི་ཆོ་ག་འདིས། ། རྫས་ཀྱང་སྟ་གོན་གནས་པར་བྱ། ། ལག་པས་ལེགས་པར་བྲིམ་པ་དང་། ། བདུག་པ་དག་གིས་ལེགས་པར་བདུག ། ཡང་ན་གཟའ་སྐར་བྱེད་པ་དག ། བཟང་པོ་ལ་ནི་སྨྱུང་བྱས་ཏེ། ། དཀྱིལ་འཁོར་བྲིས་ནས་རྫས་ཀྱི་རྣམས། ། སྟ་གོན་གནས་པའི་ཆོ་ག་བྱ། ། ས་ནི་སྒྲུབ་པར་བྱེད་པའམ། ། གསང་ སྔགས་སྒྲུབ་པས་ཞག་གསུམ་ན། ། ཡོ་ལང་ཆུང་ངུ་དག་གིས་བྱ། ། བཟླས་བརྗོད་བྱེད་པས་དཀྱིལ་འཁོར་བྲི། ། ཕྱེ་མ་སྣ་ཚོགས་ཉིད་ཀྱིས་ཀྱང་། ། དཀྱིལ་འཁོར་སྣ་ཚོགས་ཟླུམ་པོ་ལ། ། ཕྱི་རོལ་རིམ་པ་གཉིས་པས་བསྐོར། ། སྒོ་གཅིག་བཏོད་པ་བྲི་བར་བྱ། ། དེ་ཡི་དབུས་ སུ་ཁྲུ་དོ་པའི། ། པདྨ་འདབ་མ་བརྒྱད་པ་བྲི། ། དཀྱིལ་འཁོར་ལྷག་མ་ཚད་དག་ནི། ། ཅི་ལྟར་དགའ་བ་ཉིད་དུ་བྱ། ། དེར་ནི་བདག་པོ་གསུམ་དག་དང་། ། ནུབ་ཏུ་བདུད་རྩི་ཐབ་སྦྱོར་བཞག ། དཀྱིལ་འཁོར་གཉིས་པའི་ནུབ་ཕྱོགས་སུ། །
BOདབང་ཕྱུག་ཆེན་པོ་ཆུང་མར་བཅས། ། གཅིག་ ཏུ་གཟི་བརྗིད་ཕུང་པོ་སྟེ། ། གཅིག་ཏུ་ཡང་ན་སྒྲུབ་པའི་སྤྱན། ། གཅིག་ཏུ་དཔའ་མོ་ཆེན་མོ་སྟེ། ། ཕྱག་དྲུག་མ་ཡང་གཅིག་ཏུ་བྲི། ། གཅིག་ཏུ་རིག་སྔགས་མཱ་མ་ཀཱི། ། རིག་སྔགས་རྒྱལ་སྙིང་གཅིག་ཏུ་བྲི། ། ཁྲོ་བོ་ཀཱི་ལི་གཅིག་ཏུ་སྟེ། ། གཅིག་ཏུ་རྡོ་རྗེ་ལྕགས་ཀྱུ་མ། ། དེ་ལྟར་བསྟན་ པ་དེ་དག་ཀུན། ། སྙིང་པོའི་དཀྱིལ་འཁོར་དག་ཏུ་དགོད། ། ལས་ཀུན་བྱེད་པའི་གསང་སྔགས་རྣམས། ། ཕྱི་རོལ་ཕྱོགས་སུ་རིམ་པ་བཞིན། ། དེ་ལྟར་བཀོད་ནས་ཕྱི་རོལ་སྒོར། ། གཞན་གྱིས་མི་ཐུབ་པ་ཡང་བྲི། ། དེ་ནས་ཕྱོགས་མཚམས་སྐྱོང་བ་དང་། ། འདོད་པའི་ལྷ་རྣམས་ བྲི་བར་བྱ། ། དེ་ནས་སོ་སོའི་གསང་སྔགས་ཀྱིས། ། རིམ་པ་བཞིན་དུ་སྤྱན་ཡང་དྲང་། ། བདག་པོ་རྣམས་ནི་སྙིང་པོ་ཡིས། ། དེ་ཡི་འོག་ཏུ་མཆོད་པར་བྱ། ། པདྨའི་དབུས་སུ་རང་སྔགས་ཀྱིས། ། རྫས་ནི་ལེགས་པར་བཞག་སྟེ་མཆོད། ། བུམ་པ་གང་བ་དེ་སྟེང་ དུ། ། ཆོ་ག་བཞིན་དུ་རྫས་བཞག་གོ། ། ཡང་ན་གབ་ཚེའམ་ཁམ་ཕོར་དག ། མེ་ཏོག་ལ་སོགས་བླུགས་པ་བཞག ། དེ་ནས་ལག་པས་བྲིམ་བྱ་ཞིང་། ། རང་གི་རིག་སྔགས་ཡོངས་བཟླས་པའི། ། མེ་ཏོག་བརྒྱའམ་སྟོང་དག་གིས། །
BOདེ་ཡི་འོག་ཏུ་འཕང་བར་བྱ། ། དེ་ནས་གུ་ གུལ་བདུག་སྤོས་ནི། ། མར་དང་སྦྱར་བས་བདུག་པར་བྱ། ། སྤོས་ཆུས་བཟླས་བརྗོད་བྱས་པ་ཡི། ། དེ་ནས་དལ་བུས་བསང་གཏོར་བྱ། ། དེ་ནས་རང་གི་གསང་སྔགས་དང་། ། དཀྱིལ་འཁོར་དུ་བཤད་ཐམས་ཅད་ཀྱིས། ། རེ་རེས་སོ་སོར་བཟླས་པ་དག ། སྦྱིན་སྲེག་ཅི་སྐད་བསྟན་ པའང་བྱ། ། སྦྱིན་སྲེག་བྱ་བའི་མར་དག་གམ། ། ཡང་ན་བ་ཡི་འོ་མས་བྱ། ། མར་དང་སྦྲང་རྩི་ཏིལ་སྦྱར་དང་། ། ལག་པན་གྱིས་ནི་མཇུག་ཏུ་བྱ། ། དེ་ནས་གསང་སྔགས་ཐམས་ཅད་ཀྱིས། ། མཁས་པས་རྫས་ལ་བསང་གཏོར་བྱ། ། དཀྱིལ་འཁོར་ལེགས་པར་བྲི་བ་དང་། ། རྗེས་སུ་མཐུན་པར་བྱིན་བསྐྱེད་དོ། ། ཡིད་ལ་ཡོངས་སུ་ཟློས་བྱེད་ཅིང་། ། ཆོ་ག་ཤེས་པས་ཟློས་བཞིན་དུ། ། རྫས་ལ་མིག་གིས་བལྟ་བར་བྱ། ། དེ་བྱས་སྟ་གོན་གནས་བྱས་འགྱུར། ། སྦྱིན་སྲེག་ཆོ་ག་གཏོར་མའི་རིམ། ། མཆོད་སོགས་གང་ཡིན་དེ་དག་ཀུན། ། བཟླས་བརྗོད་བྱེད་པས་རྒྱས་པར་འདིར། ། རྒྱུད་ལས་བཤད་པ་བཞིན་དུ་བྱ། ། འདི་ནི་རྫས་ལ་སྟ་གོན་དུ། ། གནས་པའི་ཆོ་ག་ཡིན་པར་བསྒྲགས། ། སྟ་གོན་གནས་པའི་རྫས་དེ་ནི། ། མྱུར་དུ་འགྲུབ་པ་ཉིད་དུ་འགྱུར། ། ཆོ་གའི་རིམ་པ་འདི་ཡིས་ནི། །
BOཡོངས་སུ་གཟུང་ བ་དག་ཀྱང་བྱ། ། དངོས་གྲུབ་གཟུང་བ་དག་ཀྱང་བྱ། ། རྫས་ཀྱི་བྱིན་ཡང་བསྐྱེད་པ་དང་། ། ཆོ་ག་འདི་དག་ཉིད་ཀྱིས་ཀྱང་། ། དཀྱིལ་འཁོར་འདི་ཡི་དབུས་སུ་ནི། ། རྫས་རྣམས་སྒྲུབ་པ་དག་ཀྱང་བྱ། ། དཀྱིལ་འཁོར་དམ་པ་འདི་ཉིད་དུ། ། བགེགས་ཀྱང་མྱུར་དུ་ ཞི་བར་འགྱུར། ། རྫས་རྣམས་སྦྱང་བར་བྱ་བ་དང་། ། དབང་བསྐུར་བ་ཡི་ཆོ་ག་ཡིས། ། སྒྲུབ་པ་པོ་རྣམས་དབང་བསྐུར་བའང་། ། དཀྱིལ་འཁོར་འདིར་ནི་རབ་ཏུ་བྱ། ། ལས་ཀུན་བྱེད་པའི་དཀྱིལ་འཁོར་འདིར། ། གསང་ཆེན་གསང་བའི་བདག་པོས་གསུངས། ། དཀྱིལ་འཁོར་འདི་ནི་བྲི་བྱས་ན། ། དངོས་གྲུབ་མྱུར་དུ་ཐོབ་པར་འགྱུར། ། རྫས་སྟ་གོན་དུ་གནས་པའི་ཆོ་ག་རིམ་པར་ཕྱེ་བའོ། ། ། ། རྫས་ནི་ཡོངས་སུ་བཟུང་བྱས་ནས། ། སྒྲུབ་པ་པོས་ནི་དུས་གསུམ་དུ། ། ཁྲུས་དང་མཆོད་པ་སྦྱིན་སྲེག་དང་། ། ལག་པ་ཡིས་ ཀྱང་བྲིམ་པར་བྱ། ། གོས་ནི་ལན་གསུམ་བརྗེ་བ་དང་། ། དུས་མཚམས་དག་ལ་སྨྱུང་བྱས་ཏེ། ། མཆོད་དང་ལྷ་བཤོས་ཆོ་ག་དག ། ཁྱད་པར་དུ་ནི་ལེགས་པར་བྱ། ། དུས་གསུམ་དག་ཏུ་སྡིག་པ་བཤགས། ། བསོད་ནམས་རྗེས་སུ་ཡི་རང་དང་། ། དུས་གསུམ་དག་ཏུ་སྨོན་ ལམ་གདབ། །
BOགླེགས་བམ་དུས་གསུམ་ལན་གསུམ་བཀླག ། དཀྱིལ་འཁོར་ལན་གསུམ་དག་ཏུ་བྱ། ། ལན་གསུམ་དུ་ཡང་སྡོམ་པ་བཟུང་། ། དུས་གསུམ་དུ་ཡང་བསྲུང་བ་བྱ། ། དེ་ལྟར་བྱས་ན་ངེས་པར་འགྲུབ། ། གང་ཚེ་བག་མེད་གྱུར་པ་ཡིས། ། དུས་གསུམ་ དག་གི་ལས་ཉམས་ན། ། དེ་ཚེ་རང་གི་རིག་སྔགས་དེ། ། ཉི་ཤུ་རྩ་གཅིག་བཟླས་བརྗོད་བྱ། ། དེ་ལྟར་ཉིན་རེ་དུས་གསུམ་དུ། ། མཁས་པ་དག་གིས་རྟག་ཏུ་བྱ། ། དེ་ཉམས་ན་ནི་བརླག་འགྱུར་ཞིང་། ། དངོས་གྲུབ་དག་ཀྱང་ཉམས་པར་འགྱུར། ། ལས་ཀྱི་ཀླགས་ལ་ འབུམ་བཟླས་པའམ། ། ཡང་ན་དཀྱིལ་འཁོར་འདི་བྲིས་པས། ། གསང་བའི་ཆོ་ག་དེ་བྱས་ཏེ། ། དེ་ནས་ལས་རྣམས་བརྩམ་པར་བྱ། ། སྔོན་བཞིན་ལེགས་པར་ཐིག་བཏབ་ནས། ། གྲུ་བཞི་པ་ལ་སྒོ་བཞི་པ། ། ཕྱི་རོལ་དཀྱིལ་འཁོར་གྱིས་བསྐོར་བ། ། ཆོ་ག་བཞིན་དུ་ལེགས་ པར་བྲི། ། དབུས་སུ་འཁོར་ལོ་བྲིས་ནས་དེའི། ། ཤར་དུ་འཁོར་ལོས་སྒྱུར་བ་དང་། ། གཟི་བརྗིད་ཕུང་པོ་གཙུག་ཏོར་དཀར། ། རྒྱལ་དང་རྨད་དུ་བྱུང་བ་དགོད། ། མཁས་པས་ངོས་གཉིས་དག་ཏུ་ཡང་། ། བདེ་གཤེགས་མཛོད་སྤུ་མདུང་ཐུང་དང་། ། སངས་རྒྱས་བྱམས་མ་སྤྱན་ དུ་བཅས། ། ཀུན་དགའ་བོ་དང་རབ་འབྱོར་དང་། །
BOདེ་བཞིན་ལྷུང་བཟེད་ཁར་གསིལ་དང་། ། སྒོ་ཀར་ལས་ཀུན་བྱེད་པ་དགོད། ། རིམ་བཞིན་སྒོར་ནི་འཕྲོག་མ་དང་། ། གཞན་གྱིས་མི་ཐུབ་པ་ཡང་དགོད། ། འཁོར་ལོའི་དབུས་སུ་རྫས་རྣམས་ནི། ། ཡང་ན་གསང་ སྔགས་ལྷ་བཞག་སྟེ། ། དེ་ནས་མཆོད་པའི་ཆོ་ག་བྱ། ། སྦྱིན་སྲེག་ཐམས་ཅད་བྱ་བར་གསུངས། ། དཀྱིལ་འཁོར་འདི་ནི་ཕྱག་རྒྱའམ། ། གཏན་དུ་དགོད་པར་རབ་ཏུ་བསྒྲགས། ། སོ་སོའི་ཆོ་གས་སྤྱན་དྲང་བའམ། ། སྤྱི་ཡི་སྙིང་པོས་བྱར་ཡང་རུང་། ། དེར་ནི་རང་གི་རིག་སྔགས་ ཀྱིས། ། སྔ་མ་བཞིན་དུ་མེ་སྦར་ཏེ། ། དེ་ནས་མར་དང་སྦྲང་རྩི་ལས། ། སྦྱིན་སྲེག་བརྒྱ་ནི་རྩ་བརྒྱད་བྱ། ། དེ་ནས་ཞོ་དང་འབྲས་ཆན་དང་། ། ཏིལ་གྱི་སྦྱིན་སྲེག་བརྒྱ་བརྒྱ་བྱ། ། མཁས་པས་མཇུག་ཏུ་བརྒྱ་བཟླས་པས། ། འདི་ནི་ཆོ་ག་གསང་ཆེན་ཡིན། ། དྲི་ཞིམ་ མེ་ཏོག་དྲི་སོགས་ཀྱིས། ། འདིར་ནི་མཆོད་པ་བྱ་བར་གསུངས། ། ཞོ་དང་བུ་རམ་ལེགས་སྦྱར་བའི། ། གཏོར་མ་རྒྱ་ཆེན་དབུལ་བར་བྱ། ། ཆོ་ག་འདི་ཡིས་ལྷ་རྣམས་ནི། ། མྱུར་དུ་ལེགས་པར་ཚིམ་པར་འགྱུར། ། དགྱེས་ནས་རིང་པོར་མི་ཐོགས་པར། ། སྒྲུབ་པ་པོ་ལ་ དངོས་གྲུབ་སྩོལ། ། ཟླ་བ་རེ་རེའམ་ཟླ་ཕྱེད་དམ། ། ཉི་མ་རེ་རེའམ་དུས་མཚམས་ལ།
BO། དབུལ་པོས་ཀྱང་ནི་ཅི་ནུས་པར། ། དཀྱིལ་འཁོར་འདི་ནི་བྲི་བར་བྱ། ། ཆོ་ག་དེ་ལྟར་བྱ་བ་ཀུན། ། དཀྱིལ་འཁོར་འདི་ལའང་ཤེས་པར་བྱ། ། ཅི་ལྟར་དགའ་བའི་ཚད་ཙམ་དུ། ། ཀུན་དུ་ ཟླུམ་པོར་རབ་ཏུ་བྱ། ། དེ་དབུས་པདྨ་བྲིས་ནས་སུ། ། རིག་སྔགས་རྒྱལ་དང་རྟ་མགྲིན་དང་། ། སྣ་ཚོགས་གཟུགས་དང་སྤྱན་གསུམ་པ། ། ཕྱག་བཞི་ཕྱག་དྲུག་བཅུ་གཉིས་ཕྱག ། དེ་བཞིན་འདོད་པ་འབྱོར་བྱེད་དང་། ། གྲགས་དང་ལྡན་པ་དཔལ་མོ་ཆེ། ། སྒྲོལ་མ་ལྷ་མོ་ཟླ་བ་དགོད། ། སྒོ་ཡི་ཕྱོགས་སུ་དཀར་མོ་དང་། ། གོས་དཀར་ཅན་མ་གཞག་བྱ་ཞིང་། ། སྒོ་ཀར་ལས་ཀུན་བྱེད་བཞག་པ། ། འགྲུབ་ཕྱིར་པདྨ་འཆང་བ་ཡི། ། དཀྱིལ་འཁོར་ཆོ་ག་འདི་གསུངས་སོ། ། ཅི་ལྟར་འདོད་པར་དཀྱིལ་འཁོར་ནི། ། གྲུ་བཞི་པར་ཡང་ལེགས་བྲིས་ཏེ། ། སྔོན་ བཞིན་སྙིང་པོའི་དཀྱིལ་འཁོར་དུ། ། རིག་སྔགས་རྒྱལ་པོ་གཞག་པར་བྱ། ། རིག་པ་ཆེན་མོ་མཱ་མ་ཀཱི། ། ཁྲོ་བོ་བདུད་རྩི་ཐབ་སྦྱོར་དང་། ། རིག་པ་ཆེན་པོ་ལྕགས་ཀྱུ་མ། ། དབྱུག་པ་དང་ནི་སྟོབས་པོ་ཆེ། ། རྡོ་རྗེ་ཁུ་ཚུར་རིག་རྒྱལ་མོ། ། གནོད་མཛེས་{གོ་རིམས་,གོ་རིམ་}བཞིན་དུ་ བཞག ། ཁྲོ་ཆེན་ལྷ་ཡི་ཡན་ལག་དང་། ། གོམ་པ་འདོར་བ་ཉིད་དང་ནི། །
BOཁྲོ་མོ་མེ་རྣམས་ངོས་གཉིས་སུ། ། བློ་དང་ལྡན་པས་གཞག་པར་བྱ། ། སྒོ་ཡི་ཕྱོགས་ཀྱི་ནང་རོལ་དུ། ། རྡོ་རྗེ་འཇིགས་བྱེད་མིག་དང་ནི། ། རྡོ་རྗེ་གཞན་གྱིས་མི་ཐུབ་མ། ། སྒོ་ཀར་ལས་ཀུན་བྱེད་པ་ བཞག ། དཀྱིལ་འཁོར་གཉིས་པ་མཆོད་པ་ཡང་། ། ཆོ་ག་སྔ་མ་བཞིན་དུ་བྱ། ། ལྷ་རྣམས་དགའ་བར་འགྱུར་བ་ནི། ། ཕྱག་ན་རྡོ་རྗེས་རབ་ཏུ་བཤད། ། དེ་ནས་ནང་པར་ནམ་ལངས་ནས། ། རྨི་ལམ་བཟང་པོ་རྣམས་དཔྱད་དེ། ། གཙང་ཞིང་ཁྲུས་བྱས་གོས་དཀར་བགོས། ། སྦྱིན་ སྲེག་ལས་ནི་བརྩམ་པར་བྱ། ། ལྷ་རྣམས་ཆོ་ག་བཞིན་མཆོད་དེ། ། བཀྲ་ཤིས་ངོ་མཚར་དག་ཀྱང་བྱ། ། ཆོ་ག་བཞིན་དུ་མེ་སྦར་ནས། ། ཅི་སྐད་གསུངས་པའི་སྦྱིན་སྲེག་བྱ། ། བ་ལང་ལྕི་བས་བྱུགས་ནས་སུ། ། འབྲས་ཡོས་ཀུ་ཤ་སྔོན་པོ་དང་། ། མེ་ཏོག་དཀར་པོ་དྲི་ ཞིམ་པས། ། གནས་དེ་ཁྱད་པར་ཅན་དུ་བཤམ། ། དེ་ཡི་གཡས་ཀྱི་ཕྱོགས་སུ་ནི། ། བུད་ཤིང་ཞོ་དང་ཀུ་ཤ་དང་། ། མར་དང་སྦྲང་རྩི་འབྲས་ཆན་ཏི་ལ། ། བསྲེག་བྱ་ཅུང་ཟད་ཅི་འབྱོར་དགོད། ། གཡོན་དུ་ལེགས་པར་བརྟགས་པ་ཡི། ། མཆོད་ཡོན་སྣོད་ནི་གཞག་པར་བྱ། ། དབུས་ སུ་དགང་གཟར་བླུགས་གཟར་དང་། ། ལེགས་པར་བཞུས་པའི་མར་དག་བཞག །
BOབཞག་ནས་མཁས་པས་ལས་ཀུན་པའི། ། གསང་སྔགས་ཀྱིས་ནི་བསང་གཏོར་བྱ། ། སྔོན་བཞིན་གསང་སྔགས་བདག་པོ་ནི། ། མདུན་དུ་བཞག་སྟེ་མཆོད་བྱས་ནས། ། དེ་ནས་རང་རིགས་སྤྱན་དྲང་སྟེ། ། མཆོད་ཡོན་བཟླས་པས་བཞུགས་སུ་གསོལ། ། བདག་གི་མདུན་དུ་མར་གྱི་སྣོད། ། དག་པར་བྱས་པ་གཞག་པར་བྱ། ། མར་དང་མེ་ཡི་བར་དག་ཏུ། ། བསྒྲུབ་པར་བྱ་བའི་རྫས་བཞག་གོ། ། བདག་དང་མར་དང་བསྒྲུབ་བྱའི་རྫས། ། མེ་དང་གསང་སྔགས་བདག་པོར་བཅས། ། ལྔ་པོ་འདི་དག་{གོ་རིམས་,གོ་རིམ་}བཞིན། ། བློ་དང་ལྡན་པས་ལེགས་པར་དགོད། ། གཡོན་དུ་རིག་སྔགས་བྱིན་བསྐྱེད་མ། ། གཡས་སུ་ལས་ཀུན་བྱེད་པ་སྟེ། ། གནས་དེར་སྔ་མ་བཞིན་དུ་ཡང་། ། བསྲུང་བ་ཐམས་ཅད་རབ་ཏུ་སྦྱར། ། དེ་ནས་ཀུ་ཤ་སར་པ་ཡི། ། གདིང་བདག་ཀྱང་བཀྲམ་ནས་སུ། ། ལྷ་བཤོས་འབྲས་ཡོས་བཀྲ་ཤིས་ཅན། ། སཱ་ལུའི་འབྲས་ཆན་ཞོར་བཅས་དབུལ། ། དེ་ནས་བདུག་སྤོས་དྲི་ཞིམ་པས། ། ཀུན་ནས་རབ་ཏུ་བདུག་པར་བྱ། ། དེ་འོག་ཅི་ལྟར་བསྟན་པ་ཡི། ། སྦྱིན་སྲེག་ལས་ནི་ཅི་དགར་བྱ། ། གསེར་དང་ དངུལ་ཟངས་རྡོ་བའམ། ། དུང་དང་མུ་ཏིག་ཤིང་དག་གམ། ། གྲོག་མཁར་ས་ལས་བྱས་པ་ཡི། ། སྣོད་དུ་རྫས་ནི་གཞག་པར་བྱ། །
BOབྱང་ཆུབ་ཤིང་གི་ལོ་མ་དག ། དེ་ཡི་གདིང་བར་ཤིས་པ་ཡིན། ། འོ་མ་ཅན་གྱི་ཤིང་གིའམ། ། ཡང་ན་ཨརྒའི་ལོ་མའང་རུང་། ། ཆུ་ཤིང་པདྨའི་ འདབ་མའམ། ། ཡང་ན་རས་དཀར་འཇམ་པོའམ། ། དྲི་ཞིམ་ཤིང་ལས་སྐྱེས་པ་ཡི། ། གདིང་བ་ལྔ་པ་འདོད་པ་ཡིན། ། ཕྱེ་མ་ཁུ་བགོས་སོགས་དང་། ། ཅི་རིགས་པར་ནི་གཡོགས་ནས་ཀྱང་། ། ཆོ་ག་ཤེས་པས་མཉམ་བཞག་སྟེ། ། རྫས་ལ་ལེགས་པར་བདུག་པར་བྱ། ། ཡིད་ཀྱིས་རྫས་ཀྱི་བྱིན་བསྐྱེད་ཅིང་། ། མར་གྱི་སྲེག་བླུགས་རྒྱུན་དུ་བསྲེག ། ལེགས་པར་བལྟ་ཞིང་ཆོ་ག་འདིས། ། མཁས་པས་རྫས་ལ་བདུག་པར་བྱ། ། རྫས་ལ་བཟླས་ཤིང་བསང་གཏོར་ནས། ། བླུགས་གཟར་ཆང་བས་བཟུང་ནས་ནི། ། དལ་བུས་མར་གྱིས་ལེགས་ བཀང་སྟེ། ། རྫས་ཀྱི་སྟེང་དུ་དེ་བཟླས་ཤིང་། ། སྲེག་བླུགས་ཟློས་པ་མེ་འབར་བ། ། སྭཱ་ཧཱ་ཞེས་ནི་བརྗོད་བྱ་ཞིང་། ། ཧཱ་ཡི་དབྱངས་ཀྱི་རྒྱུན་བསྲིངས་ཏེ། ། བླུགས་གཟར་རྩེ་མོར་དེ་བདུག་ཅིང་། ། སྟོང་ངམ་ཡང་ན་ལན་གྲངས་བརྒྱར། ། རྫས་རྣམས་ལ་ནི་བདུག་པར་བྱ། ། དེ་ ལྟར་རྫས་ལ་ཡང་དང་ཡང་། ། ཆོ་ག་འདི་ནི་བྱ་བར་གསུངས། ། གསང་སྔགས་ཀྱི་ནི་རང་བཞིན་དང་། ། དངོས་གྲུབ་ཆེ་ཆུང་ཤེས་བྱ་སྟེ། །
BOལན་གྲངས་ཉི་ཤུ་རྩ་གཅིག་ཀྱང་། ། གྲངས་ཀྱི་ཆོ་ག་ཡིན་པར་བཞེད། ། རྫས་ནི་ཟད་པ་མ་གྲུབ་ན། ། མཁས་པས་དེ་ལ་ཉུང་ ཟད་ཅིག ། རིག་སྔགས་བཟླས་ཤིང་བསང་གཏོར་དེ། ། བཞག་ནས་མཆོད་ཅིང་བལྟ་བར་བྱ། ། རབ་ལ་སོགས་པའི་དབྱེ་བ་དང་། ། ལས་ཀྱི་དབྱེ་བ་བསྒྲགས་པ་དག ། དཀྱིལ་འཁོར་དུ་གསུངས་ཆོ་ག་བཞིན། ། འབར་ན་འགྲུབ་པའི་མཚན་མ་ཡིན། ། ཤིན་ཏུ་ཆེན་ པོའི་རྫས་ཀྱི་རྣམས། ། དེ་ཡི་གཡས་སུ་བཞག་པའམ། ། གཡོན་དུ་འོས་པ་གཡོན་དུ་བཞག ། དེར་ནི་དེ་ལ་གཏུག་ཅིང་བྱ། ། སེམས་ཅན་ཀུན་གྱི་མགོ་བོ་ལ། ། ཡང་ན་རང་གི་མགོ་བོ་ཉིད། ། མོད་ལས་བསྒྲུབ་རྫས་ཅི་ཡང་རུང་། ། མཁས་པས་བདུག་པ་བསྔོས་ ཏེ་བྱ། ། བདུག་པའི་ཆོ་ག་འདི་ཡིས་སུ། ། སྔོན་བཞིན་ཕྱེ་ལ་མར་དག་གིས། ། ལ་ལའི་ཕྱིར་བསྔོ་ཁ་ཅིག་ལ། ། བལྟ་ཞིང་སྦྱིན་སྲེག་རབ་ཏུ་བྱ། ། གལ་ཏེ་མར་དག་མ་འབྱོར་ན། ། ཆོ་ག་བཞིན་དུ་འོ་མས་བྱ། ། ཡང་ན་འོ་མ་མར་དང་ནི། ། མཁས་པས་མངར་ གསུམ་དག་གིས་བྱ། ། ཞི་བ་ལ་སོགས་ཁྱད་པར་གྱིས། ། ཁ་ཅིག་ལ་ནི་ཞོ་ཡང་རུང་། ། ཡང་ན་བསྲེག་བྱའི་རྫས་བསྟེན་པས། ། ཅི་ལྟར་རིགས་པར་བདུག་པར་བྱ། ། མཚོན་ཆ་རྣམས་ལ་འབྲུ་མར་གྱིས། ། དྲི་ཞིམ་ཐང་ཆུ་ཨཾ་ཛ་ན། །
BOདུ་རུ་སྐ་སོགས་འབྲུ་མར་གྱིས། ། བདུག་ པའི་ཆོ་ག་བྱ་བར་གསུངས། ། རྫས་ལ་སོགས་པའི་བྱེ་བྲག་ལས། ། རྫས་ནི་རྣམ་པ་སྣ་ཚོགས་དང་། ། དྲི་ཞིམ་ལས་བྱུང་འབྲས་བུ་ཡིས། ། བདུག་པའི་ཆོ་ག་དག་ཀྱང་བྱ། ། ཤ་ཆེན་ལ་སོགས་རྫས་རྣམས་ལ། ། ཚིལ་བུ་དག་གིས་བྱ་བར་བསྒྲགས། ། དེ་ཡི་གཟུགས་ བརྙན་བྱས་ནས་ཀྱང་། ། སོ་སོའི་ཤ་དང་ཚིལ་གྱིས་བྱ། ། ཆོ་ག་བསྟན་པ་འདི་ཡིས་སམ། ། ཡང་ན་སྔར་གསུངས་ཆོ་ག་ཡིས། ། དངོས་གྲུབ་མྱུར་བར་བྱ་བའི་ཕྱིར། ། བདུག་པའི་ཆོ་ག་རྒྱས་པར་བསྟན། ། ཆོ་ག་འདི་ཡིས་རྫས་དག་ལ། ། བདུགས་ནས་དེ་ལ་དབང་ཡང་ བསྐུར། ། དབང་བསྐུར་ནས་ནི་ལྷ་གནས་སུ། ། བཞག་སྟེ་ལེགས་པར་མཆོད་པར་བྱ། ། དེ་ནས་ཆོ་ག་ལས་གསུངས་པ། ། ཐོབ་པར་བྱ་ཕྱིར་གཏོར་མ་བསོག ། བདག་ཉིད་རྒྱས་པར་ཁྲུས་བྱས་ནས། ། ཆོ་ག་འདི་ནི་བརྩམ་པར་བྱ། ། དྲི་ཞིམ་རྣམས་ཀྱིས་དྲིལ་བྱས་ནས། ། དེ་ བཞིན་ཁྲུས་རྩི་སྐྱུ་རུ་རས། ། ཁྲུས་བྱ་ཉི་མ་ཕྱེད་མཚམས་ནས། ། མཁས་པས་རྫས་ལ་ཡོངས་སུ་བཟླས། ། སྐུད་པ་གདུ་བུ་གོས་རྣམས་དང་། ། ཐལ་བ་ཡུངས་ཀར་ཆུ་དག་ལ། ། བསྲུང་བའི་ཕྱིར་ནི་རྫས་འདི་ལ། ། གསང་སྔགས་བཟླས་པ་བརྩམ་ པར་བྱ། །
BOདེ་དག་ཐོག་མར་བཟླས་བརྗོད་དེ། ། ཆོ་ག་འདི་ནི་མྱུར་དུ་བྱ། ། དེ་ཕྱིར་དེ་ཚེ་དགོས་པ་ཀུན། ། ཐོག་མ་ཉིད་དུ་བསྔགས་པར་བྱ། ། མེ་ཏོག་ལ་སོགས་ཅི་འབྱོར་པ། ། ཡོངས་སུ་བསྡུ་བ་བྱས་ནས་ནི། ། ཅི་རིགས་པ་ཡི་གནས་བཞག་སྟེ། ། སྒྲུབ་པའི་སར་ནི་ གནས་པར་བྱ། ། དཀྱིལ་འཁོར་ལས་གསུངས་ཆོ་ག་ཡིས། ། མཁས་པས་དཀྱིལ་འཁོར་བྲིས་ནས་ཀྱང་། ། ཅི་རིགས་པར་ནི་མཆོད་བྱས་ཏེ། ། རྫས་རྣམས་བསྒྲུབ་པ་བརྩམ་པར་བྱ། ། ལས་ཀུན་བྱེད་པའི་གསང་སྔགས་ཀྱིས། ། ཚོན་སྣ་ལྔ་ཡི་སྲད་བུ་ལ། ། ལན་ བརྒྱར་བསྔགས་ནས་དང་པོར་དེས། ། ཕུར་བུ་རྣམས་ལ་བྲེ་བར་བྱ། ། མཁས་པས་ཐབ་སྦྱོར་བཟླས་པ་ཡིས། ། སྒོ་དྲུང་གི་ནི་བུམ་པ་ལ། ། སྲད་བུ་ལྷོད་པར་བཏགས་ནས་སུ། ། དེ་ནས་དེར་ནི་གཞག་པར་བྱ། ། ཐབ་སྦྱོར་བགེགས་རྣམས་སེལ་བྱེད་པའི། ། ཁྲོ་བོ་ཡིད་ ལ་དྲན་བཞིན་དུ། ། སྲད་བུའི་འོག་ནས་འབྱུང་བ་དང་། ། འཇུག་པར་བྱ་བ་འདི་གསུངས་སོ། ། ཡང་ན་མཁས་པས་ཁྲོ་བོ་དེས། ། སྲད་བུ་ལ་ནི་བསྔགས་པའམ། ། བསྲུང་བའི་དོན་དུ་གང་དགའ་བའི། ། རིག་སྔགས་གཞན་གྱིས་བཟླས་ཀྱང་རུང་། ། བསྐྲད་པ་ལ་སོགས་ ཆོ་ག་དག ། སྔར་གསུངས་པ་ཡང་ཤེས་བྱ་ཞིང་། །
BOདཀྱིལ་འཁོར་གྱི་ནི་ཉེ་འཁོར་དུ། ། ཆོ་ག་འདི་དག་བྱ་བར་གསུངས། ། ཕྱོགས་དང་ཕྱོགས་སྐྱོང་ཅི་སྙེད་དང་། ། སོ་སོའི་རིགས་ཀྱི་ལྷ་ཡི་རྣམས། ། ཕྱོགས་དང་{གོ་རིམས་,གོ་རིམ་}ཅི་ལྟ་བར། ། དེ་ཀུན་ཕྱི་རོལ་དག་ཏུ་མཆོད། ། བུམ་པར་རྡོ་རྗེ་བཞག་པའམ། ། ཡང་ན་ལོ་མས་ཁ་བརྒྱན་པ། ། དེ་ལ་སྲད་བུ་བཏགས་ནས་སུ། ། སྒོ་ཡི་ཕྱོགས་སུ་གཞག་པར་བྱ། ། རིགས་དང་རིགས་རྣམས་སོ་སོ་ཡི། ། རིག་པའི་རྒྱལ་པོའི་སྙིང་པོའམ། ། ཡང་ན་ཅི་ལྟར་རིགས་པ་ཡིས། ། རྫས་སྒྲུབ་ཚེ་ན་ཀུན་ནས་བསྲུང་། ། ཡང་ ན་རིགས་ཀྱི་རིག་སྔགས་དང་། ། སོ་སོའི་རིགས་ཀྱི་ཕྱག་རྒྱ་ཡིས། ། བགེགས་རྣམས་ཞི་བར་བྱ་བའི་ཕྱིར། ། བསྒྲུབ་ཚེ་འདིར་ནི་ཐམས་ཅད་བསྲུང་། ། ཕུར་བུ་རྡོ་རྗེ་རྩེ་འདྲའམ། ། ཡང་ན་རྩེ་གཅིག་སྦོམ་པོ་ལ། ། རྡོ་རྗེ་ཕུར་བུས་ལན་བརྒྱ་རུ། ། མངོན་པར་བསྔགས་པ་བྱས་པ་དག ། ལྷ་ ཡི་གནས་ཀྱི་ཕྱི་རོལ་དུ། ། གྲྭ་བཞི་ཀུན་དུ་གདགས་པར་བྱ། ། ཡང་ན་དཀྱིལ་འཁོར་ཕྱི་རོལ་དུ། ། བཏབ་ནས་ལས་རྣམས་རབ་ཏུ་བྱ། ། རྡོ་རྗེ་ཕུར་བུའི་ཆོ་ག་འདི། ། ལས་ཀུན་བྱེད་པར་ཤེས་པར་བྱ། ། བསྒྲུབ་ཚེ་འདིར་བགེགས་འཚེ་མེད་ཅིང་། ། སྒྲུབ་པ་པོ་ཡིས་དངོས་གྲུབ་ཐོབ། །
BOདྲི་ཞིམ་ཕྱེ་མའམ་པིར་དག་གིས། ། སྣ་ཚོགས་ཚོན་གྱི་འདེ་གུ་ཡིས། ། དཀྱིལ་འཁོར་ལེགས་པར་བྲིས་ནས་སུ། ། དེ་ནས་ཆོ་ག་འདི་དག་དང་། ། སོ་སོའི་ཕྱོགས་ཀྱི་རི་མོའི་མཐར། ། རྡོ་རྗེ་རྩེ་གསུམ་བྱ་བར་གསུངས། ། དབུས་ཀྱི་ངོས་རྣམས་དག་ཏུ་ཡང་། ། རྡོ་རྗེ་བསྒྲེངས་པའི་ཕྲེང་ བ་བྱ། ། རྡོ་རྗེ་དྲ་བའི་གསང་སྔགས་ཀྱིས། ། ཆོ་ག་དེ་ནི་བྱ་བར་བསྟན། ། དེ་ཡི་དབུས་སུ་བཞུགས་ནས་སུ། ། རྫས་རྣམས་རབ་ཏུ་བསྒྲུབ་པར་བྱ། ། ཆོ་ག་འདི་ཡིས་ཕྱི་ནང་དུ། ། རྡོ་རྗེའི་ལྟེ་བའི་དྲ་བ་བྱ། ། རྡོ་རྗེ་དྲ་བའི་གསང་སྔགས་ཀྱིས། ། ཤིན་ཏུ་ཐུབ་པར་དཀའ་བར་འགྱུར། ། སྒོ་ཁྱུད་དག་ནི་ཐམས་ཅད་དང་། ། སྒོ་རྣམས་ཀྱི་ནི་མདུན་དག་ཏུ། ། མཁས་པས་རྡོ་རྗེ་བྲིས་ནས་སུ། ། དེ་ནས་ལས་རྣམས་བྱ་བར་བསྒྲགས། ། ཡོ་ལང་ཆུང་ངུས་ཐང་བུ་ལ། ། དཀྱིལ་འཁོར་ལེགས་པར་བྲི་བར་བྱ། ། མདོར་བསྡུས་ཆོ་ག་བྲིས་ནས་སུ། ། རྫས་རྣམས་བསྒྲུབ་པ་ བརྩམ་པར་བྱ། ། ཁྲུ་ལྔའམ་བདུན་ནམ་བརྒྱད་པ་ལ། ། གྲུ་བཞི་པ་ལ་སྒོ་བཞི་པ། ། གསང་སྔགས་དངོས་གྲུབ་རྗེས་མཐུན་པར། ། ཡང་ན་ལྷག་པར་བྱས་ཀྱང་རུང་། ། སྒོ་རྣམས་ཀུན་དུ་རྡོ་རྗེ་དང་། ། གྲྭ་རྣམས་སུ་ནི་བུམ་པ་དགོད། །
BOལས་ཀུན་བྱེད་པའི་བུམ་པ་དག ། སྒོ་དྲུང་དུ་ ནི་གཞག་པར་བྱ། ། དབུས་སུ་ཆོས་ཀྱི་འཁོར་ལོ་དང་། ། ཐོག་མ་རྒྱལ་པོ་ལྔ་རྣམས་དགོད། ། ངོས་སུ་མཆེ་བ་མདུང་ཐུང་དང་། ། སྤྱན་དང་རྒྱལ་བའི་མཛོད་སྤུའོ། ། བདེ་གཤེགས་ཕྱག་རྒྱ་ཐམས་ཅད་དང་། ། སྒོར་ནི་གཞན་གྱིས་མི་ཐུབ་མའོ། ། རབ་འབྱོར་དང་ནི་ཀུན་དགའ་བོ། ། སྙིང་པོའི་དཀྱིལ་འཁོར་ལྷ་རྣམས་ནི། ། ཕྱོགས་ཆ་བསྟན་པ་བཞིན་དུ་དགོད། ། ཕྱི་རོལ་དུ་ནི་ཅི་དགའ་བའི། ། ལྷ་རྣམས་དགོད་པ་བྱ་བར་གསུངས། ། དོན་གྲུབ་པ་དང་མཐུ་ཆེན་དང་། ། འཇམ་དཔལ་དང་ནི་གླང་པོ་ཆེ། ། དཔལ་ལྡན་ཚངས་པ་མེས་པོ་ དང་། ། དེ་བཞིན་དུ་ནི་བརྒྱ་བྱིན་དང་། ། བཅོམ་ལྡན་མངག་གཞུག་སངས་རྒྱས་པའི། ། ལྷ་ནི་དེ་དང་དེ་དག་དང་། ། ཕྱོགས་སྐྱོང་རྣམ་པ་སྣ་ཚོགས་རྣམས། ། ཕྱི་རོལ་དཀྱིལ་འཁོར་དག་ཏུ་བྲི། ། དེ་ནས་དབུས་སུ་གསང་སྔགས་སམ། ། སྙིང་པོའི་དཀྱིལ་འཁོར་རྫས་བཞག་སྟེ། ། མཆོད་པའི་ཆོ་ག་ཐམས་ཅད་དང་། ། སྦྱིན་སྲེག་ལས་ནི་བྱ་བར་བསྒྲགས། ། མདོར་ན་བསྲུང་བའི་ལས་ཀྱི་རྣམས། ། དཀྱིལ་འཁོར་དག་ཏུ་གསུངས་པ་བཞིན། ། བསྒྲུབ་པའི་ཚེ་ན་དེ་དག་ཀུན། ། ཁྱད་པར་དུ་ནི་སྦྱར་བར་བྱ། །
BOདཀྱིལ་འཁོར་ཆོ་ག་བསྟན་པ་འདི། ། དེ་ བཞིན་གཤེགས་པའི་རིགས་ཀྱིས་གསུངས། ། འདིས་ནི་རྫས་རྣམས་བསྒྲུབ་བྱས་ནས། ། ཟློས་པ་པོ་ལ་མྱུར་དུ་འགྲུབ། ། དེར་ནི་ཞུགས་པ་ཙམ་གྱིས་ཀྱང་། ། བགེགས་རྣམས་མེད་པར་གྱུར་པ་དང་། ། ལྷ་རྣམས་ཁྱད་པར་དག་ཏུ་ཡང་། ། བྱིན་གྱིས་རློབ་པ་མཛད་པར་ འགྱུར། ། དེ་བཞིན་གཤེགས་པའི་རིགས་ཀྱི་རྫས་བསྒྲུབ་པའི་དཀྱིལ་འཁོར་གྱི་ཆོ་ག་རིམ་པར་ཕྱེ་བའོ། ། ། ། ཚོན་རྩི་སྣ་ནི་ལྔ་པོ་ཡིས། ། སྔོན་བཞིན་དཀྱིལ་འཁོར་ཐམས་ཅད་བྲི། ། དབུས་སུ་པདྨ་བྲིས་ནས་ཀྱང་། ། དང་པོར་ཤར་གྱི་ཕྱོགས་སུ་ནི། ། འདོད་པ་ སྦྱོར་བྱེད་དགོད་པར་བྱ། ། དེ་ནས་གསང་སྔགས་རྒྱལ་པོ་དྲུག ། དེ་ཡི་འོག་ཏུ་གོས་དཀར་ཅན། ། སྒྲོལ་མ་བདུན་དང་དཔའ་མོ་བདུན། ། རིག་པའི་རྒྱལ་མོ་གྲགས་ལྡན་མ། ། སྒོ་ཀར་རིག་སྔགས་རལ་པ་གཅིག ། རྟ་མགྲིན་ཡང་ནི་དགོད་པར་བྱ། ། ལས་ཀུན་བྱེད་པའི་བུམ་ པ་ཡང་། ། སྒོ་དྲུང་དུ་ནི་གཞག་པར་བྱ། ། སྒོ་ཡི་གྲྭར་ནི་རྡོ་རྗེ་བྲི། ། ཕྱི་རོལ་ཚངས་དང་ལྷ་ཡི་སྤྱན། ། དབང་ཕྱུག་ཆེན་པོ་ལྷ་ཡི་བུ། ། རྒྱལ་སྲས་དྲི་མ་མེད་པ་དང་། ། འོད་ཟེར་ཕྲེང་བས་བརྒྱན་པ་དང་། ། ཀླུ་ཡི་རྒྱལ་པོ་མཐའ་ཡས་དང་། །
BOསྟོབས་ཆེན་མཛེས་པ་ཞེས་དགའ་ དང་། ། རིག་སྔགས་འཆང་གི་རྒྱལ་པོ་ནི། ། བརྩོན་འགྲུས་ཆེན་པོ་དུང་ཅན་དང་། ། སྔོན་བཞིན་ཕྱོགས་མཚམས་སྐྱོང་བ་དང་། ། འདིར་ཡང་རིག་པའི་ལྷ་རྣམས་དགོད། ། དཀྱིལ་འཁོར་སྔ་མའི་ཆོ་ག་བཞིན། ། འདིར་ཡང་ཐམས་ཅད་བྱ་བར་གྲགས། ། བཤད་ པ་འདི་ལ་བརྟེན་ན་ནི། ། བགེགས་རྣམས་ཀུན་གྱིས་ཐུབ་པར་དཀའ། ། པདྨ་རིགས་ཀྱི་རྫས་སྒྲུབ་པའི་དཀྱིལ་འཁོར་གྱི་ཆོ་ག་རིམ་པར་ཕྱེ་བའོ། ། ། ། གྲུ་བཞི་པར་ནི་ཐིག་བཏབ་ནས། ། དང་པོར་དཀྱིལ་འཁོར་བྲི་བར་བྱ། ། དབུས་སུ་རྡོ་རྗེ་བྲིས་ནས་ཀྱང་། ། ཤར་དུ་ རིག་སྔགས་རྒྱལ་པོ་ནི། ། ལེགས་པར་འགྲུབ་བྱེད་ཐོག་མར་དགོད། ། དེ་ནས་དེ་ཡི་ངོས་གཉིས་སུ། ། རིག་སྔགས་རྒྱལ་མོ་གཉིས་བྲིས་ནས། ། རིན་ཆེན་རྡོ་རྗེ་གནམ་ལྕགས་དང་། ། གཡོན་དུ་རྡོ་རྗེ་ཁུ་ཚུར་རོ། ། བཀོད་ནས་དེ་ཡི་ངོས་གཉིས་སུ། ། ཀཱི་ལི་དང་ནི་གནོད་མཛེས་ དགོད། ། རྡོ་རྗེ་རྡོ་རྗེ་དབྱུག་པ་དང་། ། ཐོ་བ་དང་ནི་ལུ་གུ་རྒྱུད། ། རིན་ཆེན་རྡོ་རྗེ་ལྕགས་ཀྱུ་མ། ། མཱ་མ་ཀཱི་ཡང་ཡོངས་སུ་དགོད། ། རྒྱལ་པོ་བློན་སོགས་ཕོ་ཉ་མོ། ། རྡོ་རྗེ་བློ་གྲོས་ལ་སོགས་དང་། ། དབང་ཕྱུག་ཆེན་པོ་ཆུང་མར་བཅས། །
BOནོར་བདག་གནོད་སྦྱིན་ལྷན་ཅིག་ཏུ། ། ལས་ཀུན་བྱེད་པའི་ཕྱི་རོལ་དུའོ། ། ཕྱི་རོལ་ཕྱག་ན་རྡོ་རྗེའི་རིགས། ། འཁྲུངས་འདོད་པ་ཡི་རིག་སྔགས་དང་། ། འབྱུང་པོ་སྲིན་པོ་ཤ་ཟ་དང་། ། གྲུབ་པ་གནོད་སྦྱིན་ལྟོ་འཕྱེ་ཆེ། ། ཕྱོགས་མཚམས་སྐྱོང་བའི་ལྷ་རྣམས་དག ། ཐམས་ཅད་{གོ་རིམས་,གོ་རིམ་}བཞིན་དུ་དགོད། ། དེ་ནས་མཆོད་ པའི་ཆོ་ག་དང་། ། གང་ཡང་བསྲུང་བ་ལ་སོགས་ཀུན། ། སྦྱིན་སྲེག་བསྟན་པ་བཞིན་བྱས་ཏེ། ། ཅི་སྐད་བསྟན་པའི་ལས་རྣམས་བྱ། ། ཟློས་པ་པོས་ནི་དཀྱིལ་འཁོར་དུ། ། སྤྱན་དྲང་བ་ལ་སོགས་པའི་ལས། ། རིག་པའི་རྒྱལ་པོའི་སྙིང་པོའམ། ། ཡང་ན་རྣམ་པར་ཕྱེ་སྟེ་བྱ། ། བུམ་ པ་དགང་བ་ཐམས་ཅད་ནི། ། སྒྲུབ་པར་གསུངས་པའི་ཆོ་ག་དང་། ། བསྒྲུབ་པའི་དཀྱིལ་འཁོར་དུ་བསྟན་པ། ། ཆོ་ག་འདྲ་བར་གསུངས་པ་ཡིན། ། དབང་ཆེན་གྲགས་པའི་སེམས་ཅན་ཀུན། ། དམ་ཚིག་ལས་ནི་མི་འདའ་བས། ། བསྲུང་བར་བྱ་བ་མ་བྱས་ཀྱང་། ། དཀྱིལ་འཁོར་དག་ ཏུ་བསྒྲུབ་པར་བྱ། ། རིག་སྔགས་ཀྱི་ནི་ལྷ་ཡི་རྣམས། ། དམ་ཚིག་གིས་ནི་དཀྱིལ་འཁོར་དུ། ། ལྷག་པར་བྱིན་གྱིས་རློབ་པ་དག ། ཁྱད་པར་དུ་ནི་འབྱུང་བར་འགྱུར། ། རྟག་ཏུ་གུས་པས་མཉེས་བྱ་བའི། །
BOཆོ་ག་འདིས་ནི་དགོངས་འགྱུར་ཞིང་། ། སྒྲུབ་པ་པོ་ དག་འདོད་པ་ཡི། ། དངོས་གྲུབ་ཐམས་ཅད་སྩོལ་བར་མཛད། ། འདིར་ནི་རིགས་ཀྱི་སྙིང་པོ་དང་། ། རིགས་ཀྱི་ཡུམ་དང་རྒྱལ་པོ་དང་། ། སྤྱི་ཡི་བསྲུང་བའི་གསང་སྔགས་ཀྱང་། ། དངོས་གྲུབ་མྱུར་དུ་སྩོལ་བར་མཛད། ། དཀྱིལ་འཁོར་གསུམ་པོ་འདི་དག་ནི། ། གསང་ཆེན་ཡིན་ པར་ཡོངས་སུ་བསྒྲགས། ། རྡོ་རྗེ་རིགས་ཀྱི་ཕོ་ཉ་རྫས་སྒྲུབ་པའི་དཀྱིལ་འཁོར་གྱི་ཆོ་ག་རིམ་པར་ཕྱེ་བའོ། ། ། ། དེ་ནས་གཞན་ཡང་དཀྱིལ་འཁོར་འདི། ། གསང་ཆེན་སྙིང་པོར་གྱུར་པ་སྟེ། ། ཚུལ་བཞིན་རྡོ་རྗེས་མཚན་པ་ཡི། ། དཀྱིལ་འཁོར་ལེགས་པར་བྲི་བར་བྱ། ། དབུས་སུ་རིགས་ཀྱི་རྒྱ་བྲིས་ནས། ། དེ་ལ་རིག་སྔགས་གཞག་པར་བྱ། ། ཡང་ན་བུམ་པ་གང་བ་ནི། ། བཀྲ་ཤིས་སྔོན་བཞིན་བཤད་པ་བཞག ། དེ་སྟེང་ཁམ་ཕོར་ལ་སོགས་པ། ། ཁ་སྦྱོར་ནང་དུ་རྫས་ཀྱང་བཞག ། ཤར་དུ་སངས་རྒྱས་བཅོམ་ལྡན་འདས། ། བྱང་དུ་སྤྱན་ རས་གཟིགས་དབང་ཕྱུག ། ལྷོར་ནི་བཅོམ་ལྡན་རྡོ་རྗེ་འཛིན། ། ནུབ་ཏུ་དྲག་པོ་ནོར་བདག་གོ། ། རིག་པའི་རྒྱལ་པོའི་ཚུལ་དུ་ནི། ། ཐམས་ཅད་ཕྱག་རྒྱའི་སྟེང་དུ་དགོད། ། རིགས་ཀྱི་རིག་སྔགས་གཡས་ཕྱོགས་སུ། །
BOགཡོན་དུ་ལས་རྣམས་ཀུན་བྱེད་པ། ། ནུབ་ཕྱོགས་ ཀྱི་ནི་ངོས་གཉིས་སུ། ། དཀར་ཤམ་མ་དང་དཔལ་མོ་བཞག ། ལྷུང་བཟེད་དང་ནི་ཆོས་གོས་ཀྱང་། ། ཤར་གྱི་གྲྭ་ནི་གཉིས་སུ་བྲི། ། བྱང་ཕྱོགས་ཕྱག་ན་པདྨ་ཡི། ། དབྱུག་པ་དང་ནི་གུཎྜི་བྲི། ། ལྷོ་ཕྱོགས་རྡོ་རྗེ་འཛིན་པ་ཡི། ། རྡོ་རྗེ་དང་ནི་ཐོ་བ་བྲི། ། ནུབ་ཕྱོགས་ཀྱི་ནི་ གྲྭ་གཉིས་སུ། ། རྩེ་གསུམ་ནོར་གྱི་བུམ་པ་བྲི། ། སྒོ་ཀར་གཞན་གྱིས་མི་ཐུབ་མ། ། ཤར་གྱི་ཕྱོགས་སུ་འཕྲོག་མ་བཞག ། ལྷོ་ཡི་ཕྱོགས་སུ་རི་མཁར་མ། ། བྱང་དུ་རལ་པ་གཅིག་མ་བྲི། ། ཕྱི་རོལ་ལྷ་རྣམས་དགོད་པ་ནི། ། མདོར་ན་ཅི་ལྟར་འདོད་པ་བཞིན། ། གསང་ སྔགས་མཆོད་པའི་ཆོ་ག་ཀུན། ། སྔ་མ་བཞིན་དུ་ཡོངས་སུ་བསྒྲགས། ། དཀྱིལ་འཁོར་རབ་ཏུ་གསང་བ་འདི། ། སྒྲུབ་པའི་ཚེ་ན་བགེགས་མེད་བཤད། ། རྫས་རྣམས་ཀུན་དང་ལས་རྣམས་ནི། ། གསང་སྔགས་བདག་གིས་ཅི་དགར་འགྲུབ། ། བཅུག་ནས་འབྱུང་བ་ ཉིད་ཀྱིས་ཀྱང་། ། བགེགས་བྱ་བར་ནི་མི་ནུས་སོ། ། དྲི་དང་མེ་ཏོག་བསུང་ཞིམ་དང་། ། བདུག་སྤོས་མར་མེ་གསལ་བ་དང་། ། བཤོས་ཀྱང་རྣམ་པ་སྣ་ཚོགས་ཀྱིས། ། དེ་ནས་མཆོད་པ་ལེགས་པར་བརྩམ། ། བཟླས་བརྗོད་ཆོ་ག་ལས་གསུངས་དང་། །
BOདཀྱིལ་འཁོར་ དག་ཏུ་ཅི་བསྟན་པ། ། དེ་བཞིན་ཁང་པའམ་དཀྱིལ་འཁོར་དུ། ། མཆོད་པ་ཡི་ནི་ཆོ་ག་བྱ། ། རིག་སྔགས་རྒྱལ་ལ་ལྷ་བཤོས་ནི། ། སྙིང་པོར་གྱུར་པ་སྣ་ཚོགས་དང་། ། མཆོད་པ་སྣ་ཚོགས་གང་ཡིན་པ། ། ཆོ་ག་བཞིན་དུ་བྱ་བར་གསུངས། ། མར་གྱི་མར་མེ་གསལ་ བ་དང་། ། སྙིང་པོ་དག་ཀྱང་གསལ་བར་དབུལ། ། འགོ་བར་བྱ་བའི་ཆེད་དུ་ནི། ། རང་རིག་སྔགས་ལ་མཆོད་ཡོན་དབུལ། ། དེ་ནས་རིག་སྔགས་རྒྱལ་པོ་ཡིས། ། ཡུངས་ཀར་དག་ལ་བསྔགས་ནས་སུ། ། ནད་རིམས་དག་ནི་ཐམས་ཅད་དུ། ། གསང་བའི་བསྲུང་བ་རབ་ཏུ་ བྱ། ། ལས་ཀུན་བྱེད་པའི་རིག་སྔགས་སམ། ། ཡང་ན་བསྲུང་བ་གཞན་ཡང་རུང་། ། ཡུངས་ཀར་ཡོངས་སུ་བཟླས་པ་དག ། རྫས་ཀྱི་དྲུང་དུ་གཞག་པར་བྱ། ། དེ་ཡིས་ཀུན་དུ་གཏོར་བ་ཡིས། ། བགེགས་རྣམས་ལས་ནི་བསྲུང་བར་འགྱུར། ། གཡོན་དུ་རང་གི་ཕྱག་རྒྱ་ བཞག་པའམ། ། རལ་གྲི་མངོན་པར་བསྔགས་པའང་རུང་། ། ཕྱོགས་སྐྱོང་ཕྱོགས་སུ་བཞག་བྱས་ཏེ། ། དེའི་མོད་སྨྱུང་ཞིང་བསྲུང་བ་བྱས། ། སེམས་སྟོབས་ཆེ་ཞིང་གཙང་སྦྲ་ཅན། ། གོས་ཀྱང་དེ་ཡི་ཁ་དོག་ལྡན། ། ལུས་དང་སྟོབས་དང་ལང་ཚོ་དང་། ། གཟུགས་དང་ལྡན་པའི་ སྐྱེས་བུ་ཞིག ། དཔལ་ལ་བཟླས་པའི་རལ་གྲི་འཛིན། །
BOམགུལ་ནས་ཕྲེང་བའི་དོ་ཤལ་འཕྱང་། ། ཡུངས་ཀར་དག་ནི་ཐུ་བར་བླུགས། ། བགེགས་རྣམས་བལྟ་ལ་མཁས་པ་སྟེ། ། ཕྲེང་བ་དང་ནི་ཡུངས་ཀར་དག ། བགེགས་ལ་རབ་ཏུ་འཕེན་པར་ནུས། ། བགེགས་རྣམས་ཀུན་ནས་ འབྱུང་བའམ། ། ཡང་ན་འཇིགས་པ་ཆེན་པོ་ལ། ། འཇིགས་པ་མེད་པར་རལ་གྲིས་བསྡིགས། ། གལ་ཏེ་ཉེ་བར་འོངས་ནས་འདེབས། ། ཡུངས་ཀར་དག་དང་ཕྲེང་བ་སྤོས། ། བགེགས་རྣམས་ཉེ་བར་ཞི་བར་འགྱུར། ། ཡང་ན་རང་གི་གནས་དག་ན། ། ལེགས་ པར་གནས་པའི་རལ་གྲིས་བྱ། ། བསྐོར་བའི་གནས་རྣམས་བོར་ན་ནི། ། སྐབས་དང་གླགས་ནི་རྙེད་འགྱུར་ཞིང་། ། དེ་ལ་བགེགས་ཀྱང་འཇུག་པར་འགྱུར། ། དེ་བས་ནན་ཏན་བསྐྱེད་དེ་བསྲུང་། ། དེ་དག་སྒྲུབ་པའི་ཆོ་ག་ལས། ། བསྲུང་བའི་ལས་ནི་མདོར་བསྡུས་པའོ། ། རྒྱུད་ལས་ གསུངས་པའི་ཡོན་ཏན་ཅན། ། ཕྱོགས་སྐྱོང་རྣམས་ནི་མ་རྙེད་ན། ། ལྕགས་མདའའམ་ཡང་ན་མདའ་ཅན་དག ། བཟླས་ནས་ཕྱོགས་སུ་གཟུགས་པར་བྱ། ། གསང་སྔགས་བཟླས་ཤིང་དཀའ་ཐུབ་ཅན། ། རྒྱུད་འཛིན་ཤེས་པར་ལྡན་པ་ཞིག ། གསང་སྔགས་སྒྲུབ་པའི་གྲོགས་ མཆོག་སྟེ། ། བཟླས་བརྗོད་བྱེད་ཅིང་སྒོ་ཀར་བཞག ། དེས་ནི་བགེགས་ནི་བཟློག་པ་དང་། ། ལས་རྣམས་ཀུན་ལ་འཇུག་པར་བྱ། །
BOརྒྱུད་རྒྱུད་དག་ལས་རང་གི་རྒྱ། ། བསྲུང་བ་ཅིས་ཀྱང་མི་ཚུགས་གང་། ། དེ་དག་བཟླས་ཤིང་མཆོད་བྱས་ནས། ། བདག་ཉིད་ཀྱིས་ནི་བཅང་ བར་བྱ། ། བགེགས་ཆེན་དྲག་པོ་རྣམས་ལ་ནི། ། དེ་དག་གིས་ནི་བཟླས་བྱའམ། ། ཡང་ན་འདོད་པའི་གསང་སྔགས་ཀྱིས། ། བསྔགས་པའི་ཡུངས་ཀར་དག་གིས་བྱ། ། ལྷ་ཡི་དཀྱིལ་འཁོར་ཕྱི་རོལ་དུ། ། གཏོར་མའི་ཆོ་ག་ཅི་རིགས་པར། ། རབ་ཏུ་དང་ཞིང་བཟང་བའམ། ། ཡང་ན་འབྱུང་པོ་ཀུན་ལ་བྱ། ། བསྐྲད་པ་དང་ནི་འོག་བཅིང་དང་། ། སྟེང་ཡང་བཅིང་ཞིང་ཁོར་ཡུག་ཏུ། ། མཚམས་བཅད་ཕྱོགས་ཀྱང་བཅིང་བྱ་ཞིང་། ། རྡོ་རྗེ་དྲ་བ་ར་བ་བྱ། ། རྒྱུད་དང་སློབ་དཔོན་ལུང་དག་གིས། ། རྫས་དང་བདག་དང་ལྷ་ཡང་བསྲུང་། ། གསང་སྔགས་དག་གིས་ ཕྱི་ནང་དུ། ། བགེགས་རྣམས་ཐམས་ཅད་བཟློག་པར་བྱ། ། ཆོ་ག་དེ་དག་ཐམས་ཅད་ནི། ། ཕྱི་དྲོའི་དུས་སུ་བྱ་བར་བཤད། ། ཉི་མ་ནུབ་པར་གྱུར་ནས་ནི། ། རྫས་རྣམས་བསྒྲུབ་པ་བརྩམ་པར་བྱ། ། བློ་དང་ལྡན་པ་ཕྱིར་བྱུང་ནས། ། ཉེ་རེག་ཡང་དང་ཡང་བྱས་ཏེ། ། བདུད་རྩི་ ཐབ་སྦྱོར་བཟླས་བྱས་པའི། ། སྤོས་ཆུ་ཁྱོར་གང་བཏུང་བར་བྱ། ། དཀྱིལ་འཁོར་བདག་པོའི་སྙིང་པོ་ཡིས། ། བཟླས་པའི་མར་ནི་ཅུང་ཟད་བཏུང་། །
BOངལ་དང་སྙོམ་པ་ལ་སོགས་པའི། ། གནོད་པ་ཐམས་ཅད་ཞི་བར་འགྱུར། ། སྟང་ཟིལ་སྦྲང་རྩི་པི་པི་ལིང་། ། སངས་ རྒྱས་སྤྱན་གྱིས་བཟླས་པའམ། ། སྔ་མས་བསྐུས་ན་མྱུར་བར་ནི། ། བགེགས་ལས་བྱུང་བའི་གཉིད་སེལ་ལོ། ། བསྡམས་ཤིང་ཤར་དུ་ཁ་བསྟན་འདུག ། ལྷ་རྣམས་ལ་ཡང་ཕྱག་འཚལ་ནས། ། ཀུན་ལ་ཡིད་ཀྱིས་གསོལ་བཏབ་སྟེ། ། དེ་ནས་སྒྲུབ་ལ་འཇུག་པར་ བྱ། ། མཚན་མ་བཟང་པོ་རྣམ་པ་གསུམ། ། བཟླས་བརྗོད་བྱེད་པས་བཟུང་ནས་ནི། ། རབ་ཏུ་དགའ་བའི་སེམས་ཀྱིས་ནི། ། དེ་ནས་སྒྲུབ་ལ་འཇུག་པར་བྱ། ། མཚན་མ་དག་ནི་ཅི་འདྲ་ལས། ། དངོས་གྲུབ་དག་ཀྱང་དེ་འདྲར་གསུངས། ། དེ་ནས་ཟློས་པའི་མཚན་ མ་ཡིས། ། དངོས་གྲུབ་བསྟན་པ་འདོད་པར་བྱ། ། ལེགས་པར་གྲུབ་བྱེད་ཅེས་བྱ་བ། ། རིག་པའི་རྒྱལ་པོའི་བློ་བསམས་ནས། ། བུམ་པ་སྒོ་ཀར་བཞག་པ་ལ། ། བསྐོར་བ་དག་ཀྱང་གུས་པར་བྱ། ། ལྷ་ཡི་གནས་སུ་ཞུགས་ནས་ནི། ། དེ་ཡི་འོག་ཏུ་ཕྱག་བྱས་ནས། ། འགོ་བར་བྱ་ཕྱིར་ཐམས་ཅད་ལ། ། མཆོད་ཡོན་གྱི་ནི་བྱ་བ་བྱ། ། རིག་སྔགས་རྒྱལ་པོའམ་རྒྱལ་མོའམ། ། ཡང་ན་སྤྱི་ཡི་སྙིང་པོའམ། ། རང་རང་སྔགས་ཀྱིས་ཅི་རིགས་པར། ། སྤྱན་དྲང་བ་ཡི་ཆོ་ག་བྱ། ། དཀྱིལ་འཁོར་དག་ཏུ་བྱ་བ་བཞིན། །
BOརང་གི་ཕྱག་རྒྱ་ལེགས་ པར་བསྟན། ། དེ་ལྟར་བྱས་ན་རིག་སྔགས་དང་། ། གསང་སྔགས་མཐུ་ཆེན་བྱིན་གྱིས་རློབ། ། རྫས་ནི་ཁ་ཅིག་རྣམ་བརྟགས་པ། ། ལག་པའི་སྙིམ་པའི་ནང་དུ་གཞུག ། ཁ་ཅིག་མཆོད་ཡོན་སྣོད་དུ་གཞུག ། ཁ་ཅིག་བུམ་པའི་སྟེང་དུའོ། ། གྲོག་མཁར་ས་ཡི་ཁམ་ཕོར་རམ། ། ཡང་ན་ལོ་མ་བཏིང་བར་བཞག ། བསྒྲུབ་བྱ་སྟེགས་བུ་ལ་བཞག་པ། ། གི་ཝང་བསྐུས་པའི་སྣོད་བཅུག་སྟེ། ། བཟླས་པའི་གནས་སུ་བཞག་ནས་སུ། ། ཡུངས་ཀར་དག་གིས་མངོན་བསྲུང་སྟེ། ། བློ་ཅན་ཆོ་ག་ཤེས་པ་ཡིས། ། མེ་ཏོག་ཏ་མ་ལི་ཡིས་མཆོད། ། བརྟན་ པར་བྱ་དང་བསྲུང་བ་དང་། ། བྱིན་བསྐྱེད་པ་ནི་གང་བཤད་པ། ། ཅི་ལྟར་རིགས་པར་རྫས་ལའོ། ། མ་སྟོངས་པར་ནི་བྱ་བའི་རིགས། ། ལྷ་དང་རྫས་ཀྱི་བར་དག་ཏུ། ། ཅི་ཡང་གཞག་པར་མི་བྱའོ། ། རྫས་ཀྱི་གཡས་གཡོན་གཉིས་སུ་ནི། ། བསྲུང་ བའི་རྒྱ་དང་ཡུངས་ཀར་བཞག ། བདུག་སྤོས་མཆོད་ཡོན་གཏོར་མ་དང་། ། ཞོ་དང་མར་མེ་ལ་སོགས་དང་། ། བསྒྲུབ་བྱའི་རྫས་ནི་བཞག་ནས་ཀྱང་། ། དཀྱིལ་འཁོར་བལྟ་བ་གཞག་པར་བྱ། ། རྫས་ལ་མིག་གམ་ལག་པ་ཡིས། ། བལྟའམ་ཡང་ན་བྲིམ་པར་བྱ། ། གཡོ་བའི་ཡིད་ནི་མཉམ་བཞག་སྟེ། ། བློ་དང་ལྡན་པས་ཤུབ་བུར་བཟླས། །
BOའདིར་ཡང་བྱིན་བསྐྱེད་ཆོ་ག་དག ། སྔོན་བཞིན་སྐབས་སྐབས་དག་ཏུ་བྱ། ། དེ་ཡི་མཚན་མོ་ཐོག་ཐག་ནི། ། དེ་བཞིན་རྒྱུན་མི་འཆད་པར་བཟླས། ། མཆོད་ཡོན་ལ་སོགས་ཆོ་ག་ཀུན། ། དུས་ གསུམ་དུ་ཡང་བྱ་བར་བཤད། ། འཐོར་འཐུང་ལ་སོགས་དགོས་པ་ལ། ། དེ་ཚེ་རྗེས་སུ་བསྒྲུབ་པ་བཞག ། སྒྲུབ་པ་པོས་ནི་བསྒྲུབ་པ་ན། ། རྟག་ཏུ་ཉེ་བར་གནས་པར་བྱ། ། སྒྲུབ་པ་པོ་བཞིན་ཆོ་ག་ཡི། ། ལྷག་མ་སྒྲུབ་གྲོགས་མཆོག་གིས་བྱ། ། བགེགས་ཆེན་རྣམས་ ནི་ཟློག་པ་ལ། ། རྗེས་སུ་བསྒྲུབ་པ་དག་གིས་བྱ། ། དེས་མ་ནུས་ན་བདག་ཉིད་ཀྱིས། ། ཡུངས་ཀར་ལ་སོགས་བཟླས་པས་བྱ། ། ཤར་ཕྱོགས་ནས་ནི་ཆར་ཆེན་འབབ། ། འཇིགས་སུ་རུང་བའི་འབྲུག་སྒྲ་སྒྲགས། ། མེ་ཡི་ཕྱོགས་སུ་གློ་བུར་དུ། ། མཚམས་ཀྱི་ སྣང་བ་ནམ་ལངས་བཞིན། ། གཤིན་རྗེའི་ཕྱོགས་ནས་འོང་བ་ནི། ། འཆི་བདག་གཟུགས་ཅན་འཇིགས་འཇིགས་བལྟ། ། རལ་གྲི་ཐོགས་ཤིང་སྒྲ་ཆེན་འབྱིན། ། སྣ་ཆད་ལོ་མ་མི་ཐོད་དུ། ། མི་ཡི་ཁྲག་ནི་འཐུང་བར་བྱེད། ། མགོ་སྐྲ་གྱེན་དུ་བརྫེས་ཤིང་འབར། ། གཅིན་ རྒྱང་ཆར་བཞིན་འབབ་པ་ཡི། ། བསྲུང་བའི་ལས་རྣམས་འཇིག་པར་བྱེད། ། བདེན་བྲལ་ཕྱོགས་ནས་སེམས་ཅན་མང་། །
BOའཇིགས་པའི་གཟུགས་ཅན་ཐ་དད་པའོ། ། ཆུ་ལྷའི་ཕྱོགས་ནས་ལྷ་ཡི་བད་ག ། སྤྲིན་དང་བཅས་པར་འབྲུག་སྒྲ་སྒྲགས། ། རླུང་གི་ཕྱོགས་ནས་ ཚུབ་ཆེན་འབྱུང་། ། གནོད་སྦྱིན་ཕོ་མོ་བྱང་ཕྱོགས་ནས། ། དབང་ལྡན་ཕྱོགས་ནས་ཚོགས་ཀྱི་གཟུགས། ། སྟེང་ནས་མཐུ་ཆེན་ལྷ་རྣམས་འབྱུང་། ། འོག་ན་ས་འགས་གཡོ་བར་བྱེད། ། རྫས་ཀྱི་དངོས་གྲུབ་ཆེན་པོ་ལ། ། དེ་ལ་སོགས་པ་བགེགས་ཀྱི་རྣམས། ། ནམ་ གྱི་ཕྱེད་ན་འབྱུང་བར་འགྱུར། ། དངོས་གྲུབ་ཆེན་པོ་རྣམས་ལ་ནི། ། བགེགས་ཀྱང་ཆེན་པོ་ཉིད་དུ་འགྱུར། ། ཕལ་ལ་རྗེས་སུ་མཐུན་པ་ཡི། ། བགེགས་ནི་རྣམ་པ་སྣ་ཚོགས་འབྱུང་། ། དུས་གསུམ་དག་གི་དངོས་གྲུབ་ནི། ། ཐ་མ་འབྲིང་དང་རབ་ཏུ་བཤད། ། དུས་ བཞིན་བྱུང་ན་རབ་ཏུ་ཤིས། ། དེ་ལ་ཟློས་པ་མི་ཤིས་སོ། ། དྲོ་དང་དུད་འཐུལ་འབར་བ་དག ། འགྲུབ་པའི་མཚན་མར་བསྟན་པ་ཡིན། ། འབར་བ་ལས་ནི་སུམ་ཆར་བཤད། ། དུ་བ་ལ་ནི་རིམ་བཞིན་གཉིས། ། དྲོད་ལས་དངོས་གྲུབ་གཅིག་པུ་སྟེ། ། དེ་ནི་ཐ་མ་ ཡིན་པར་བཤད། ། ཁ་ཅིག་གསང་སྔགས་མཐུ་དག་ལས། ། མྱུར་དུ་འབབ་པར་གྱུར་པའམ། ། གལ་ཏེ་བསྒྲུབ་ཚེ་ཐོག་མར་ནི། ། དངོས་གྲུབ་ཁ་ཅིག་འོད་བྱུང་ནས། ། དེ་ཚེ་རང་རིག་རིག་སྔགས་ཀྱིས།
BO། དངོས་གྲུབ་མནན་པ་བརྩམ་པར་བྱ། ། མིས་ནི་རིག་ སྔགས་རྒྱལ་བ་ཡི། ། སྙིང་པོས་བ་ཡི་གི་ཝང་ངམ། ། ལག་པས་བྲིམ་ན་དངོས་གྲུབ་ནི། ། མནན་པར་འགྱུར་ཞིང་བརྟན་པར་འགྱུར། ། མར་རམ་ཡང་ན་མེ་ཏོག་གམ། ། རྫས་ཀྱི་རིགས་ལ་བཟླས་ཀྱང་རུང་། ། དེ་ལྟར་མན་ནམ་རྫས་རྣམས་ནི། ། སྤྱད་ན་ ཡོན་ཏན་ཐོབ་པར་འགྱུར། ། དང་པོར་གྲུབ་པར་གྱུར་ན་ནི། ། ཐོག་མར་གནས་པར་བྱས་ནས་སུ། ། དེ་ནས་མཚན་མོའི་ལྷག་མ་ལ། ། བློ་ཅན་བཟླས་བརྗོད་ཅི་འདོད་བྱ། ། དངོས་གྲུབ་འབྲིང་པོ་དག་ལ་ཡང་། ། ཆོ་ག་དེ་བཞིན་བྱ་བར་བཤད། ། ནམ་ཕྱེད་དག་ ན་གྲུབ་པ་ནི། ། སྤྱད་པའང་དེ་ཡི་དུས་སུ་བཤད། ། དང་པོ་པ་ནི་སྲོད་ལ་སྟེ། ། འབྲིང་པོ་དག་ནི་ནམ་ཕྱེད་ན། ། དངོས་གྲུབ་རབ་དག་སྤྱད་པ་ནི། ། སྐྱ་རེངས་འཆར་ཀའི་དུས་སུའོ། ། དང་པོ་པ་ནི་ནང་པར་ཏེ། ། ལྷག་མ་གཉིས་ལ་ངེས་པ་མེད། ། འབྲིང་པོ་མཚན་ མོ་སྤྱད་བྱ་བ། ། ནང་པར་སྤྱད་པར་མི་བྱའོ། ། དངོས་གྲུབ་ཐ་མར་གྱུར་པ་དག ། ནང་པར་སྤྱད་པར་དགག་པ་མེད། ། དུས་ལས་འདས་པའི་ངེས་པའམ། ། རིམ་པ་གཞན་ཡང་མི་ཤེས་སོ། ། གང་ཞིག་ནང་པར་མི་སྤྱད་ལ། ། གལ་ཏེ་གནས་པའང་ མ་བྱས་ན། ། དེ་ནི་དམན་མ་བཞིན་བོར་བ། །
BOསྤྱད་ཟིན་པ་ཞེས་བྱ་བར་འགྱུར། ། བསྒྲུབ་པས་བསྐུལ་བའི་རྫས་དག་ལ། ། གསང་སྔགས་གཟི་བརྗིད་ཀུན་ཞུགས་པ། ། དུས་ལས་འདས་པའི་ཉེས་པ་ཡིས། ། ཕལ་ཆེར་ཡོངས་སུ་སྤོང་བར་འགྱུར། ། མནན་པ་དག་ ནི་ཕྱི་ནས་ཡང་། ། གྲུབ་ཀྱི་བར་དུ་རུང་བར་འགྱུར། ། མནན་ཏེ་བཞག་པའི་རྫས་དག་ནི། ། ཅི་ལྟར་འདོད་པ་སྤྱད་པར་བྱ། ། གལ་ཏེ་གྲུབ་པའི་རྫས་དག་ནི། ། ནམ་ཡང་སྤྱད་པར་མ་བྱས་ན། ། དེ་ལས་གཞན་པའི་དུས་མཚམས་ལ། ། བཟླས་པ་ཡང་བྱས་སྤྱད་ པར་བྱ། ། མ་གྲུབ་པ་ཡི་རྫས་དག་ལ། ། ཆོ་ག་དེ་ཉིད་རབ་ཏུ་བསྒྲགས། ། དུས་ཚིགས་དུས་ཚིགས་དག་ལ་ཡང་། ། བྱིན་བསྐྱེད་ལ་སོགས་ཆོ་གས་བསྒྲུབ། ། ལོ་གསུམ་གྱིས་ནི་གང་མ་གྲུབ། ། དེ་ནི་ནམས་ཀྱང་མི་འགྲུབ་བོ། ། མཆོག་ཏུ་གྱུར་པའི་རྫས་ རྣམས་ལ། ། ཆོ་ག་འདི་ནི་ཡོངས་སུ་བསྒྲགས། ། ཟླ་བ་དྲུག་གིས་འབྲིང་པོ་རྣམས། ། དངོས་གྲུབ་ཉེ་བར་འཐོབ་པར་འགྱུར། ། ཆུང་ངུ་རྣམས་ལ་དུས་དག་ནི། ། གང་ཡང་ངེས་པ་མེད་པར་བཤད། ། རི་མོ་ཡི་ནི་ལྷ་རྣམས་ལའང་། ། ཆོ་ག་འདི་ཉིད་བཤད་པ་ཡིན། ། ཡོངས་སུ་ གཟུང་བ་ལ་སོགས་པའི། ། ཆོ་གའང་དེ་ལས་གཞན་པའང་བྱ། ། རྫས་བསྒྲུབ་པའི་ཆོ་ག་རིམ་པར་ཕྱེ་བའོ། ། ། །
BOསེམས་ཅན་སྣང་དང་མི་སྣང་ལས། ། གྲུབ་པའི་རྫས་མ་གྲུབ་པའི་ཚེ། ། གལ་ཏེ་ཕྲོགས་པར་གྱུར་ནས་ནི། ། དཀྱིལ་འཁོར་འདིར་ནི་བྲི་བར་བྱ། ། ཚེས་ གྲངས་མི་དགོས་རྒྱུ་སྐར་མིན། ། སྨྱུང་བར་བྱ་བའང་མེད་པར་གསུངས། ། མཆོག་ཏུ་ཁྲོ་བ་ལ་གནས་ཏེ། ། མོད་ལ་དུར་ཁྲོད་ཐལ་བ་ཡིས། ། གྲུ་གསུམ་ནུབ་ཏུ་སྒོ་གཏོད་པའི། ། དཀྱིལ་འཁོར་འདི་ནི་བྲི་བར་བྱ། ། དེ་ལྟར་བྲིས་ནས་ཕྱི་རོལ་བསྐོར། ། སྒྲུབ་པའི་རིག་སྔགས་ གཞག་པར་བྱ། ། དེ་ནས་ཤར་དུ་བཅོམ་ལྡན་འདས། ། ལེགས་པར་གྲུབ་བྱེད་ཅེས་བྱ་བ། ། དྲག་པོ་གནོད་སྦྱིན་སྡེ་དཔོན་ནི། ། མཐུ་ཆེན་རིག་སྔགས་རྒྱལ་པོ་དང་། ། རྡོ་རྗེ་ཁྲོ་བོ་རྡོ་རྗེ་དབྱུག ། རྡོ་རྗེ་ཁུ་ཚུར་ལྕགས་ཀྱུ་མ། ། རྡོ་རྗེ་ཀཱི་ལི་འཇིགས་བྱེད་གཟུགས། ། སེར་ སྐྱ་དང་ནི་ཐོག་ཐོག་གཟུགས། ། ལུག་རྒྱུད་རྣམ་རྒྱལ་ནག་པོ་དང་། ། དེ་བཞིན་སྒོར་ནི་དགའ་བྱེད་དགོད། ། རྡོ་རྗེ་སྡེ་དང་དཔུང་བཟང་དང་། ། ཁྲོ་བོ་ཆེན་པོར་གྲགས་པ་རྣམས། ། དེ་དག་རིམ་བཞིན་བཀོད་ནས་སུ། ། མཁས་པས་མཆོད་པའི་ཆོ་ག་བཞིན། ། མེ་ཏོག་དམར་ལ་སོགས་ པས་མཆོད། ། གཏོར་མ་ཁྲག་དང་བཅས་པར་གསུངས། ། དྲག་ཤུལ་སྤྱོད་པའི་ཆོ་ག་འདི། །
BOསྔོན་དུ་བསྟན་པ་ཀུན་ཀྱང་བྱ། ། མཁས་པས་རང་གི་རིག་སྔགས་ལྷ། ། སྒོ་ཀར་མངོན་དུ་ཕྱོགས་བཞག་ལ། ། དྲི་ཞིམ་མེ་ཏོག་དག་གིས་ཀྱང་། ། ཆོ་ག་བཞིན་དུ་མཆོད་པར་ བྱ། ། ཕྱི་རོལ་དཀྱིལ་འཁོར་ཅི་དགའ་བར། ། དེ་དང་རྗེས་སུ་མཐུན་བྱ་སྟེ། ། ལྷ་ནི་དྲག་པོ་གང་འདོད་པ། ། མཆོད་པ་དག་ལ་སོགས་པ་བྱ། ། སྙིང་པོའི་དཀྱིལ་འཁོར་དབུས་སུ་ནི། ། དྲག་ཤུལ་སྤྱོད་པའི་ལས་ཀྱི་ཐབ། ། གྲུ་གསུམ་ཁ་རན་ཅན་བྱས་ཏེ། ། སྦྱིན་སྲེག་ལས་ ནི་བརྩམ་པར་བྱ། ། མེ་འབར་ཡམ་ཤིང་སེང་ལྡེང་ངོ་། ། ནིམ་པའམ་དུར་ཁྲོད་ནས་སྐྱེས་པ། ། རང་གི་ཁྲག་ལས་བཏགས་པ་དང་། ། དུར་ཁྲོད་ཐལ་བ་སར་པའམ། ། དུག་ཁྲག་ཡུངས་ཀར་བསྲེས་པ་དང་། ། དེ་ནས་སྐེ་ཚེ་སྲེག་བླུགས་དབུལ། ། རྫས་འཕྲོག་པ་ཡི་ཕྱིར་བསྔོས་ ཏེ། ། གཟུགས་བརྙན་སྟེང་དུ་གནས་པའམ། ། ཡང་ན་གཟུགས་བརྙན་གཏུབ་གཏུབ་ཅིང་། ། མཇུག་ཏུ་སྦྱིན་སྲེག་དག་ཀྱང་བྱ། ། ཁྲོ་བོའི་ཆོ་ག་ཤེས་པ་ཡིས། ། ཆོ་ག་འདི་ནི་བྱ་བར་གསུངས། ། གསང་སྔགས་ཟློས་པས་སྐྲག་གྱུར་ནས། ། རྫས་འཕྲོག་པ་ནི་རིངས་པར་ཡང་། ། འཕྲོགས་པའི་རྫས་ནི་ཁྱེར་ནས་སུ། ། མངོན་དུ་འོངས་ཏེ་སྦྱིན་པར་བྱེད། ། བྱེད་ན་དེ་ལ་མི་འཇིགས་སྦྱིན། །
BOཞི་བ་ཅི་དགར་རབ་ཏུ་བྱ། ། གལ་ཏེ་ཞི་བ་མ་བྱས་ན། ། དེ་ཚེ་མོད་ལ་འཆི་བར་འགྱུར། ། ཡང་ན་མི་སྣང་བ་ཡི་རྣམས། ། དཀྱིལ་འཁོར་སྒོར་ནི་རྫས་ཀྱང་འཇོག ། ཡང་ན་ཟློས་པར་འདོད་པའི་རྣམས། ། རྫས་དག་ལྷག་པར་སྟེར་བར་འགྱུར། ། རྫས་འཕྲོག་པ་མོད་ལ་དགུག་པའི་ཆོ་ག་རིམ་པར་ཕྱེ་བའོ། ། ། ། རྫས་ཕྲོགས་ནས་ནི་རིང་ལོན་ནས། ། དཀྱིལ་འཁོར་འདིར་ནི་བྲི་བར་བྱ། ། རིགས་གསུམ་རྣམས་ ཀྱི་སྤྱི་ཡིན་ཏེ། ། དངོས་གྲུབ་ཕྱིར་ནི་ལས་ཀུན་བྱེད། ། ཐམས་ཅད་དུ་ཡང་རིག་སྔགས་རྒྱལ། ། ལེགས་པར་གྲུབ་བྱེད་ཅེས་བྱ་བ། ། སྙིང་པོའི་དཀྱིལ་འཁོར་དབུས་སུ་ནི། ། ཕྱག་རྒྱ་བྲིས་ཏེ་དགོད་པར་བྱ། ། རྡོ་རྗེ་ཁྲོ་བོ་ཁྲོ་ཆེན་དང་། ། མཱ་མ་ཀཱི་དང་ལྕགས་ཀྱུ་མ། ། རྡོ་རྗེ་ཁུ་ཚུར་རྡོ་རྗེའི་ཏོག ། རྡོ་རྗེ་དབྱུག་པ་ཐོ་བ་དང་། ། འཇིགས་བྱེད་ལུག་རྒྱུད་ཀཱི་ལི་དང་། ། རྡོ་རྗེ་བློ་གྲོས་མི་ཐུབ་མ། ། གསང་སྔགས་ཁྲོ་བོ་ཕོ་ཉ་མོ། ། རྨད་བྱུང་ཕ་རོལ་གནོན་གང་དང་། ། འདོད་པ་འབྱོར་བྱེད་རྟ་མགྲིན་དང་། ། ཕྱག་ན་ཞལ་རས་ཕལ་ཆེན་དང་། ། བཅོམ་ལྡན་སྣ་ཚོགས་གཟུགས་ཅན་དག ། སྙིང་པོའི་དཀྱིལ་འཁོར་དག་ཏུ་དགོད། ། གྲགས་ལྡན་མ་དང་དཔལ་མོ་ཆེ། །
BOདཀར་མོ་དང་ནི་གོས་དཀར་ཅན། ། སྒྲོལ་མ་ཟླ་བ་དཔལ་མོ་གང་། ། རྨད་བྱུང་ཕ་རོལ་གནོན་རྣམས་དང་། ། འཁོར་ལོས་སྒྱུར་སོགས་གཙུག་ཏོར་དང་། ། མཛོད་སྤུ་དང་ནི་བདེ་གཤེགས་སྤྱན། ། མཆེ་བ་མདུང་ཐུང་བྱམས་མ་ཆེ། ། རྨད་བྱུང་ཕ་རོལ་གནོན་གང་དང་། ། གཞན་གྱིས་མི་ཐུབ་ལ་སོགས་པ། ། རིགས་ཀྱི་རིག་སྔགས་བསྟན་པ་དང་། ། ལས་ཀུན་བྱེད་པའི་གསང་སྔགས་དང་། ། ཕྱག་རྒྱ་ཆེན་པོར་གྲགས་པ་དང་། ། ཕྱི་རོལ་བསྲུང་བའི་སྒོ་བ་དང་། ། ཆོ་གར་གཏོགས་པ་གང་ཡིན་པའི། ། སོ་སོའི་རིགས་ཀྱི་མང་ག་གཞུག་པ། ། བརྩོན་འགྲུས་ཆེན་པོ་དགོད་པར་བྱ། ། ཕྱི་རོལ་འཇིག་རྟེན་སྐྱོང་བ་དང་། ། ཚངས་པ་མེས་པོ་ཆེན་པོ་དང་། ། དབང་ཕྱུག་ཆེན་པོ་ཆུང་མར་བཅས། ། ཚོགས་ སྤྱན་ཚོགས་དང་ལྷན་ཅིག་ཏུ། ། མ་མོ་རྣམས་དང་ཀླུ་བདུན་དང་། ། དེ་བཞིན་ལྷ་མིན་བདག་པོ་དང་། ། བསྟན་པ་ལ་ནི་གང་དགའ་བ། ། རྨད་བྱུང་ཕ་རོལ་གནོན་ཀུན་དང་། ། དཀྱིལ་འཁོར་སྔ་མར་གསུངས་པ་ཡི། ། ལྷ་ནི་གང་དང་གང་ཡིན་དང་། ། གསང་སྔགས་ ཆོ་གར་གང་བསྟན་པ། ། དེ་ཀུན་ཕྱི་རོལ་མཆོད་པར་གསུངས། ། དེ་ནས་དེ་ཡི་འོག་ཏུ་ནི། ། ཆོ་གས་སྔོན་བཞིན་མེ་སྦར་ཏེ། ། རྫས་འཕྲོག་གཟུགས་བརྙན་སྤྲ་ཚིལ་ལས།
BO། བྱས་ཏེ་སློབ་མའི་སྟེང་བཞག་ནས། ། སྦྱིན་སྲེག་ཆོ་ག་བྱ་བར་གསུངས། ། དེར་ནི་གློར་ ཡང་བཞག་ནས་སུ། ། མཚོན་ཆ་ཡིས་ནི་གཏུབ་གཏུབ་ཅིང་། ། མཇུག་ཏུ་ཚུལ་བཞིན་བསྲེག་པར་བྱ། ། སྔོན་བཞིན་མཆོད་པའི་ཆོ་ག་དང་། ། གཏོར་མ་ཡི་ནི་ལས་ཀྱང་བསྒྲགས། ། ཕྱག་ན་རྡོ་རྗེའི་རིགས་དེ་ཡི། ། ཆོ་ག་ཀུན་གྱི་དྲག་ཤུལ་སྤྱད། ། དེ་བཞིན་རང་གི་རིག་སྔགས་ ཀྱིས། ། ཆོ་ག་དྲག་ཤུལ་བྱ་བར་གསུངས། ། ཉི་ཤུ་བརྒྱད་ལ་མ་ཐོབ་ན། ། རྫས་ཕྱིར་དགྲ་ལ་དྲག་ཤུལ་སྤྱོད། ། མར་གྱི་ངོ་ཡི་ཚེས་ལྔ་ལ། ། ཆོ་ག་བྱས་པ་དེ་མཆོག་གོ། ། ལྕུག་ལྕག་གིས་ནི་དགྲ་གཞུ་ཞིང་། ། དེ་བཞིན་མེས་ཀྱང་གདུང་བར་བྱ། ། སྣ་ཚོགས་ཚིག་གིས་ བརྒྱན་པ་དང་། ། མདའ་ཡི་ཚེར་མ་རྣོན་པོས་དབུག ། སྐེ་ཚེ་ལན་ཚྭ་བྱུགས་ནས་སུ། ། ཅི་དགའ་བར་ནི་ཡན་ལག་གཏུབ། ། དགྲ་བོ་ལ་ནི་ཆེར་ཁྲོས་པ། ། ཅི་ལྟར་འདོད་པས་ཆད་པས་གཅད། ། དར་རས་དམར་པོས་དཀྲིས་ནས་སུ། ། སྐུད་པ་དམར་པོས་བཅིང་བར་ བྱ། ། མེ་ཏོག་དམར་པོས་མཆོད་བྱ་ཞིང་། ། ཇི་སྲིད་འདུག་གི་བར་དུ་ནི། ། རྫས་ཀྱི་ཕྱིར་ནི་བསྐུལ་བྱ་ཞིང་། ། ཉིན་གཅིག་བཞིན་དུ་བཞུ་བར་བྱ། ། གལ་ཏེ་དེས་ནི་དེ་བྱིན་ན། །
BOདེ་ཚེ་ཆད་པས་གཅད་པ་བཤོལ། ། རྫས་ནི་བསྟན་པ་འདི་དག་གིས། ། ནམ་གྱི་ཕྱེད་ན་སྦྱིན་ སྲེག་བྱ། ། ཀོ་བི་ད་རིའི་ཡམ་སྲེག་ཤིང་། ། འབྲུ་མར་བསྟེགས་པ་མེ་ལ་བསྲེག ། རང་གི་ཁྲག་དང་དུག་དང་བཅས། ། ཡུངས་ཀར་ལན་ཚྭར་བཅས་པ་དང་། ། སྐེ་ཚེ་དེ་ལ་བསྟེགས་པ་ཡི། ། སྦྱིན་སྲེག་བརྒྱ་ནི་རྩ་བརྒྱད་བྱ། ། རྫས་འཕྲོག་པ་ཡི་མིང་དང་ནི། ། རང་ བཞིན་དག་ནི་སྨས་ནས་སུ། ། ཁྲག་དང་སྦྱར་བའི་ལན་ཚྭ་ཡིས། ། ལྷག་པར་སྦྱིན་སྲེག་བྱ་བར་གསུངས། ། གལ་ཏེ་རྫས་ནི་མ་སྟེར་ན། ། བདག་ཉིད་ངན་པ་འདིར་བརྟག་ཅིང་། ། དེ་ཚེ་འཆི་བར་གྱུར་པའི་ལས། ། མ་ལུས་པས་ནི་སྦྱིན་སྲེག་བྱ། ། གང་ཚེ་རྫས་ནི་སྦྱིན་ གྱུར་ཏམ། ། ཡང་ན་སྐྱིན་པ་གཞན་ཡང་རུང་། ། སྒྲུབ་པ་པོ་ལ་འཆགས་བྱེད་ན། ། དེ་ཚེ་མཁས་པས་ཞི་བར་བྱ། ། གལ་ཏེ་ཆུད་ནི་གསན་པའམ། ། བག་མེད་པས་ནི་སྤྱད་གྱུར་པ། ། དེ་ཚེ་སྐྲག་པ་དེ་ལ་ནི། ། སྒྲུབ་པས་མྱུར་དུ་དད་པར་གྱིས། ། འཕགས་ པ་རྡོ་རྗེ་རྣམ་འཇོམས་སམ། ། མྱུར་དུ་ཁྲོ་བོ་ཆེན་པོའམ། ། ཡང་ན་མནོལ་བ་མེད་པ་ཡིས། ། སྦྱིན་སྲེག་ལས་མཐར་མྱུར་དུ་བསྐུལ། ། མཁས་པས་རིགས་གསུམ་དག་གིས་ཀྱང་། ། འཕྲོགས་པ་སླར་ནི་དགུག་པའི་ཕྱིར། །
BOདཀྱིལ་འཁོར་དག་ནི་ཆོ་ག་བཞིན། ། གསང་སྔགས་ འདི་ནི་སྔོན་བཞིན་བྱ། ། ན་མོ་ར་ཏྣ་ཏྲ་ཡཱ་ཡ། ནམཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཨོྃ་ཧ་ར་ཧ་ར་བཛྲ། མ་ཐ་མ་ཐ་བཛྲ། དྷུ་ན་དྷུ་ན་བཛྲ། ཧ་ན་ཧ་ན་བཛྲ། ད་ཧ་ད་ཧ་བཛྲ། པ་ཙ་པ་ཙ་བཛྲ། དྷ་ར་དྷ་ར་བཛྲ། དྷ་ར་ཡ་དྷ་ར་ཡ་བཛྲ། དཱ་རུ་ཎ་དཱ་རུ་ཎ་བཛྲ། དཱ་ ར་ཡ་བི་དཱ་ར་ཡ་བཛྲ། ཙྪིནྡ་ཙྪིནྡ་བཛྲ། བྷིནྡ་བྷིནྡ་བཛྲ་ཧཱུྃ་ཕཊ། ཟློས་པས་གལ་ཏེ་རྫས་རྙེད་དམ། ། ཡང་ན་གཞན་དག་ཐུབ་ཀྱང་རུང་། ། དེ་ནི་སྔོན་བཞིན་དུས་མཚམས་ལ། ། བསྲུང་བར་བྱ་སྟེ་སྦྱར་བར་བྱ། ། གཞན་ཡང་དངོས་གྲུབ་འབྲིང་དག་དང་། ། ཐ་མ་ཅུང་ཟད་ཙམ་ ལ་ཡང་། ། ཆོ་ག་ཤེས་པས་ཅི་རིགས་པར། ། དེ་ཡི་མོད་ལ་སྦྱར་བར་གསུངས། ། བཅོམ་ལྡན་འདས་ཀྱི་སྐུ་སྐལ་དུ། ། རྫས་ཀྱི་ཆ་གཅིག་ཐོག་མར་དབུལ། ། བློ་དང་ལྡན་པས་བླ་མ་ལ། ། ཕྱག་བྱས་ནས་ནི་གཉིས་པ་དབུལ། ། གསུམ་པ་སྔར་གྲུབ་པ་རྣམས་ལ། ། དཀྱིལ་འཁོར་ཕྱི་རོལ་དག་ཏུ་དབུལ། ། བཞི་པ་གྲོགས་པོ་རྣམས་ལ་སྦྱིན། ། ལྔ་པ་བདག་ཉིད་སྤྱད་པར་བྱ། ། དེ་ལའང་སྐལ་བ་ཕྱེད་ཕྱེད་དུ། ། བགོས་ནས་བདག་གིས་ཕྱེད་བསྐུར་བ། ། བརྟག་པར་བྱ་བའི་རྫས་རྣམས་ལ། །
BOཆོ་ག་འདི་དག་བཤད་པ་ཡིན། ། བཅོམ་ ལྡན་སྐུ་སྐལ་བདག་ཉིད་ཀྱིས། ། མཆོད་ཡོན་ཕུལ་ནས་བསྐུར་བར་བྱ། ། སངས་རྒྱས་རྣམས་ལ་སླུ་བའི་ཕྱིར། ། མཆོད་པའི་ཆོ་ག་ལ་སོགས་བཤད། ། བླ་མ་མེད་པར་གྱུར་ན་ནི། ། བླ་མའི་སྐལ་བ་བདག་གིས་བླང་། ། དེ་ལ་ལྷག་པར་གུས་བྱ་བ། ། དེ་ནི་དེ་ཡི་སླུ་བ་ཡིན། ། སྒྲུབ་པ་པོ་ཡིས་ཕྱི་རོལ་དུ། ། མཆོད་ཡོན་དབུལ་ཞིང་གྲུབ་པ་ཁྱེད། ། ཉིད་ཀྱི་རྫས་སྐལ་འདི་བཞེས་ཞེས། ། ཚིག་ནི་ལན་གསུམ་བསྒྲག་པར་བྱ། ། སྔགས་གྲུབ་པ་རྣམས་མེད་ན་ནི། ། དེ་ཡི་སྐལ་བས་སྔགས་ཟློས་པས། ། དོགས་མེད་པ་ཡི་སེམས་ཀྱིས་ནི། ། གྲོགས་ པོ་རྣམས་ལ་སྦྱིན་པར་བྱ། ། གསང་སྔགས་ཟློས་པའི་གྲོགས་རྣམས་ནི། ། གུས་ཤིང་རྟག་པར་དོན་དུ་གཉེར། ། དཀའ་ཐུབ་དག་དང་གྲོགས་བྱེད་པས། ། ཐོག་མ་ཉིད་ནས་གྲུབ་པ་ཡིན། ། དེ་བས་དེ་ཡིས་སྦྱིན་པ་ནི། ། རྫས་ནི་བླང་བར་འོས་པས་ན། ། བདག་ཅག་ སྔོན་ནས་གྲུབ་པ་ཞེས། ། མཐུན་པར་སྨྲ་ཞིང་བླང་བར་བྱ། ། གྲུབ་པའི་རྫས་རྣམས་དེ་ལྟ་བུར། ། བགོ་བར་རབ་ཏུ་བསྒྲགས་པས་ན། ། བདག་རང་ཉིད་ཀྱིས་དེ་རྣམས་ལ། ། རྫས་ནི་རྣམ་པར་བགོ་བར་བྱ། ། གྲུབ་པའི་རྫས་རྣམས་ཁ་ཅིག་ནི། །
BOཅི་རན་ཙམ་དུ་ བགོ་སྟེ་དཔེར། ། ཨཉྫ་ན་ནི་ཐམས་ཅད་དང་། ། གི་ཝང་ལ་སོགས་བཞིན་དུ་བཤད། ། ཆོ་ག་ཤེས་པས་ལ་ལ་ནི། ། ཡིད་ཀྱིས་བགོས་པ་བྱས་ཏེ་དཔེར། ། རལ་གྲི་ལ་སོགས་མཐོང་བ་བཞིན། ། དེ་ལ་ཕན་གདགས་བསམ་པར་བྱ། ། གྲུབ་པའི་རྫས་རྣམས་ཁ་ ཅིག་ནི། ། གཅིག་པུས་སྤྱད་པར་བྱ་སྟེ་དཔེར། ། རས་ལ་སོགས་པ་མཐོང་བ་བཞིན། ། དེ་ལ་ཕན་གདགས་བསམ་པར་བྱ། ། གྲུབ་པའི་རྫས་ཀྱི་བྱེ་བྲག་ལས། ། ཁ་ཅིག་མཉམ་པར་བགོ་སྟེ་དཔེར། ། རིལ་བུ་ལ་སོགས་མཐོང་བ་བཞིན། ། དེ་ལ་ཕྱེད་དུ་བགོ་བ་མེད། ། རྫས་ རྣམས་ལ་ཡང་ཕལ་ཆེར་ཡང་། ། གཅིག་པུས་མང་དུ་བསྐུར་བར་གསུངས། ། སྐལ་བར་ནོར་རམ་མན་ངག་བསྟན། ། རྒྱུད་ལས་གསུངས་པས་ཡིད་ཆེས་བྱ། ། འདི་དག་ཁྱོད་ཀྱིས་བྱོས་ཤིག་ཅེའམ། ། བདག་གི་ནོར་འདི་ཁྱོད་ཀྱིའོ་ཞེས། ། བཟླས་བརྗོད་བྱེད་པས་གྲོགས་པོ་ ལ། ། བགོ་བ་དག་ནི་དེ་ལྟར་བྱ། ། གྲུབ་པར་གྱུར་ན་ཆོ་ག་བཞིན། ། མཁས་པ་དག་གིས་ཕན་འདོགས་པ། ། བདག་ཉིད་ཀྱིས་ནི་ཅི་རིགས་པར། ། གང་ཡང་རུང་བས་རབ་ཏུ་བྱ། ། དངོས་གྲུབ་རྣམ་པ་མང་པོ་དག ། གྲུབ་པས་རྣམ་པར་བགོ་བ་ནི། ། བྱེ་བྲག་ཏུ་ནི་བདག་ཉིད་ ཀྱིས། ། དྲི་མེད་བློ་ཡིས་ཤེས་པར་བྱ། །
BOསྐལ་བ་དབང་བ་མཆོག་གནས་སུ། ། ཟློས་པས་གསོལ་བ་གདབ་པར་བྱ། ། བཀའ་ལུང་གྲུབ་པར་ཤེས་པར་བྱ། ། དེ་ཡི་འོག་ཏུ་བགོ་བར་གསུངས། ། དེ་ལྟར་ཀུན་ལ་ཅི་རིགས་པར། ། ལེགས་པར་བགོ་ བར་བྱ་བར་གསུངས། ། དངོས་གྲུབ་དག་ནི་ཕལ་ལ་ཡང་། ། མདོར་ན་ཆོ་ག་དེ་བཞིན་བྱ། ། གུས་ཤིང་ནོར་དང་མཆོད་པ་བྱ། ། བཀའ་བཞིན་བྱེད་པར་ཕན་འདོགས་པས། ། རྫས་གྲུབ་བླ་མའི་སྐལ་ལ་སོགས། ། སླུ་བ་དག་ནི་དེ་ལྟར་བཤད། ། རང་གི་མཆོད་ཡོན་ ཕུལ་ནས་སུ། ། རྫས་རྣམས་ལེགས་པར་ལུང་བཞིན་བགོ། ། རིག་སྔགས་རྒྱལ་ལ་ཕྱག་བྱས་ནས། ། རིག་རྒྱལ་མོ་ལའང་གུས་བྱས་ཏེ། ། བློ་ཡིས་གསང་སྔགས་ལྷ་རྣམས་ལ། ། གུས་པར་བསམ་སྟེ་སྤྱད་པར་བྱ། ། བློ་ཅན་གྲུབ་ནས་ནམ་མཁའ་ལ། ། ཅི་བདེ་ བར་ནི་འགྲོ་བར་བྱ། ། འོན་ཏམ་གྲུབ་པ་རྣམས་དང་ནི། ། ལྷན་ཅིག་འདུག་ཀྱང་ཅིས་མི་ཚུགས། ། རྟག་ཏུ་རང་གི་ལྷ་ཉིད་ནི། ། ཡིད་ལ་ཡོངས་སུ་བཟླས་པ་དང་། ། བདག་གི་གྲུབ་པའི་རྫས་རྣམས་ལ། ། རྟག་ཏུ་བལྟ་ཞིང་དྲན་བྱས་ན། ། ཕ་རོལ་གནོད་པ་བྱེད་པ་ནི། ། སྡང་བ་རྣམས་ཀྱིས་ཡོངས་མི་ཚུགས། ། མཁས་པས་རིག་སྔགས་བརྒྱ་བཟླས་ནས། ། གྲུབ་པ་རྣམས་ཀྱིས་མཆོད་པར་འགྱུར། །
BOརིགས་ཀྱི་རིག་སྔགས་བཟླས་ན་ནི། ། སྒྲུབ་པོ་འཇིགས་པ་ཀུན་ལས་ཐར། ། གཅིག་ལ་གཅིག་ནི་མཐོང་བ་ན། ། མཁས་པས་ ལེགས་པར་སྨྲ་བར་བྱ། ། ལེགས་པར་འོངས་སམ་བདེའམ་ཞེས། ། མཐོང་ནས་དང་པོར་མངོན་པར་བརྗོད། ། དམ་ཚིག་རིགས་ཀྱི་ཕྱག་རྒྱ་དང་། ། གྲུབ་པའི་རྫས་ཀྱང་བསྟན་པར་བྱ། ། གང་ནས་འོངས་ཞེས་ཟེར་ན་ཡང་། ། དྲིས་པའི་ལན་ཡང་གདབ་པར་བྱ། ། ལྷ་ཡི་གནས་ནི་ཐམས་ཅད་དང་། ། ཤིང་གཅིག་ལམ་གྱི་བཞི་མདོ་དང་། ། དཀའ་ཐུབ་གནས་དང་བྱིན་ཅན་དང་། ། མཆོད་སྦྱིན་པ་དང་བྲམ་ཟེའི་གནས། ། མུ་སྟེགས་ལ་སོགས་གྲུབ་པ་དང་། ། ནམ་ཡང་འདའ་བར་མི་བྱའོ། ། ང་རྒྱལ་གྱིས་ནི་འདས་གྱུར་ན། ། འཁྲུགས་ ནས་མོད་ལ་ལྟུང་བར་འགྱུར། ། བག་མེད་དམ་ཚིག་ཉམས་པ་ཡིས། ། ལྟུང་ངམ་ལྟུང་བར་གྱུར་ཀྱང་རུང་། ། རིག་རྒྱལ་ཉིད་ཀྱིས་བཟླས་ན་ནི། ། དེ་ནས་མོད་ལ་ལྡང་བར་འགྱུར། ། ནམ་མཁའ་གཟུགས་མེད་པ་ལ་ཡང་། ། རབ་ཏུ་གྲུབ་པ་ལྷ་མིག་ཅན། ། རང་གི་ ལས་རྣམས་རིག་འགྱུར་ཏེ། ། རྣལ་འབྱོར་ཅན་རྣམས་འགྲོ་བ་བཞིན། ། དེ་བས་སྔོན་ཆད་སྤྲུལ་པ་ཡིས། ། ལམ་ནས་འགྲོ་དང་འོང་བར་འགྱུར། ། བསོད་ནམས་དབང་གིས་གནས་ཀྱི་ཕྱིར། ། ཁྱིམ་ཡང་ཅི་ལྟར་འདོད་པ་འབྱུང་། །
BOཀུན་ནས་ལྗོན་ཤིང་མང་པོས་བརྒྱན། ། སྣ་ཚོགས་བྱ་རྣམས་འཕུར་ཞིང་ལྡིང་། ། ལྷ་ཡི་བུ་མོ་རྒྱུ་བ་ཡི། ། རྒྱན་གྱི་སྒྲ་ནི་སིལ་ཁྲོལ་ཅན། ། དེ་ཡི་གླུ་གར་སིལ་སྙན་གྱིས། ། མངོན་པར་དགའ་བའི་ཡོན་ཏན་གསལ། ། མེ་ཏོག་བཟང་པོ་གསུམ་གྱིས་ཁྱབ། ། མར་མེའི་འོད་ནི་རབ་ཏུ་གསལ། ། གང་ དང་གང་དུ་ཀུན་བརྟགས་པ། ། དེར་ཡང་དཔག་བསམ་ལྗོན་ཤིང་ཆེ། ། འདོད་པ་ཐམས་ཅད་འབྱོར་པ་ཡི། ། རྨད་དུ་བྱུང་བའི་མཚན་ཉིད་འབྱུང་། ། རིན་ཆེན་རྡོ་ལེབ་ངལ་བསོའི་ཕྱིར། ། ནོར་བུའི་གཞི་ལས་འབབ་ཆུ་ཅན། ། ས་གཞི་ནེའུ་གསིང་གིས་བརྒྱན་པ། ། ཐམས་ཅད་དུ་ཡང་མངོན་པར་འབྱུང་། ། རྒྱན་རྣམས་དང་ནི་གོས་རྣམས་དང་། ། རྩེད་མོ་རྣམས་ཀྱི་ཆ་བྱད་དང་། ། བདུད་རྩི་ལ་སོགས་འབྲས་ལྡན་པའི། ། དཔལ་གྱི་ཤིང་ཡང་དེ་ལས་བྱུང་། ། དེ་ལྟར་གྲུབ་པ་འདོད་པ་རྣམས། ། ཅི་ལྟར་འདོད་པ་ཐམས་ཅད་འགྲུབ། ། གྲུབ་ པར་གྱུར་ནས་དེ་ནས་ནི། ། བསྲུང་བའི་ཕྱིར་ནི་འབད་པ་བྱ། ། དབེན་པའི་སྐྱེད་མོས་ཚལ་དག་གམ། ། རི་རྣམས་ཀྱི་ནི་རྩེ་མོའམ། ། རྒྱ་མཚོ་ཡི་ནི་གླིང་དག་གམ། ། མཚོ་ཆེན་དག་གི་གླིང་མའང་རུང་། ། རང་འཕྲུལ་སྤྲུལ་པ་ལས་བྱུང་བ། །
BOགྲུབ་པར་དགའ་ཕྱིར་ སྤྱོད་པར་བྱེད། ། གྲུབ་པ་གཞན་དང་ལྷན་ཅིག་ཏུ། ། སྔོན་གྲུབ་པ་ཡི་གནས་སུའང་རུང་། ། དེ་ལྟར་གྲུབ་པ་བྱས་ན་ཡང་། ། གལ་ཏེ་གྲུབ་པར་མ་གྱུར་ན། ། རྫས་དེས་བསྲུངས་ཏེ་བཞག་པའམ། ། ཆོ་ག་བཞིན་དུ་གནས་པར་བྱ། ། སྔོན་དུ་བསྙེན་པ་ཅི་ལས་ གསུངས། ། ལྷག་པར་ཡང་ནི་བྱས་ནས་སུ། ། མཁས་པས་རྫས་དེ་སྔ་མ་བཞིན། ། སླར་ཡང་བཟླས་ཏེ་བསྒྲུབ་པར་བྱ། ། འོན་ཀྱང་གལ་ཏེ་རྫས་དེ་ནི། ། བརྒྱ་ལ་གྲུབ་པར་མ་གྱུར་ན། ། བརྩོན་འགྲུས་བརྟན་པར་བསྐྱེད་ནས་ནི། ། དེར་ནི་ཕྱིར་ ཡང་བསྒྲུབ་པར་བྱ། ། གལ་ཏེ་ལན་བདུན་བར་དུ་རྫས། ། བསྒྲུབ་སྟེ་འོན་ཀྱང་མ་གྲུབ་ན། ། གང་གི་ཆོ་ག་འདི་བྱས་པ། ། དེས་ནི་ངེས་པར་འགྲུབ་པར་འགྱུར། ། བསོད་སྙོམས་ཟས་ལ་ཟ་ཞིང་གནས། ། སྒྲུབ་པོ་བཟླས་བརྗོད་བྱེད་ལ་བརྩོན། ། སངས་རྒྱས་རྣམས་ལ་ དད་པ་ཡིས། ། མཆོད་རྟེན་ཆེ་ལ་ཕྱག་བྱའོ། ། གུས་པས་ཤེས་རབ་ཕ་རོལ་ཕྱིན། ། བདུན་ནམ་ཡང་ན་ལན་བརྒྱར་བཀླག ། ཡང་ན་ཡོན་ནི་ཁྱད་པར་ཅན། ། དགེ་འདུན་རྣམས་ལ་དབུལ་བར་བྱ། ། རྒྱ་མཚོར་འབབ་པའི་གླིང་མའམ། ། ཡང་ན་རྒྱ་མཚོ་གླིང་མ་ལ། ། མཆོད་ རྟེན་དག་ནི་ཁྲུ་གང་བ། ། མཁས་པས་གུས་པས་བརྒྱ་བྱས་ཏེ། །
BOརེ་རེའི་མདུན་ནས་འདུག་ནས་ནི། ། བཟླས་བརྗོད་དག་ཀྱང་སྟོང་བྱས་ནས། ། མཆོད་རྟེན་ཐ་མ་འབར་གྱུར་པ། ། མཐོང་ནས་དེས་པར་འགྲུབ་པར་འགྱུར། ། མཚམས་མེད་ལྔ་ནི་བྱས་པས་ཀྱང་། ། སྟོང་དག་ལེགས་ པར་བྱས་ནས་ནི། ། མཆོད་རྟེན་ངེས་པར་འབར་འགྱུར་ཞིང་། ། གདོན་མི་ཟ་བར་འགྲུབ་པར་འགྱུར། ། ཀུན་ལའང་བྱེ་བར་བཟླས་ན་ནི། ། ངེས་བར་འགྲུབ་པར་རྣམ་པར་བསྟན། ། ཉེས་པ་ཆེན་པོ་བྱས་པ་ཡང་། ། ལོ་བཅུ་གཉིས་ཀྱིས་འགྲུབ་པར་འགྱུར། ། ཆོ་ག་བཞིན་དུ་མ་བསྙེན་ པས། ། རིག་སྔགས་དངོས་གྲུབ་མི་སྟེར་ན། ། ཚིམ་པར་བྱ་ཕྱིར་བཤད་པ་ཡི། ། སྦྱིན་སྲེག་དེ་ནི་བརྩམ་པར་བྱ། ། ཡང་ན་ལས་དང་དོན་རྣམས་ཀུན། ། སྒྲུབ་པར་བྱེད་པའི་དཀྱིལ་འཁོར་འདི། ། བྲིས་ནས་དེ་ཡི་ནང་ཉིད་དུ། ། སྦྱིན་སྲེག་རྣམ་པ་བཞི་བྱའོ། ། རི་ཡི་རྩེ་མོ་འམ་ཕྱུགས་ ལྷས་སམ། ། ཡང་ན་གང་གཱའི་གླིང་མའམ། ། ཡང་ན་ས་གཞི་མཉམ་བྱས་པར། ། དཀྱིལ་འཁོར་བཟང་པོ་སྔོན་བཞིན་བྱ། ། འདི་ནི་བློ་དང་ལྡན་པ་ཡིས། ། ཁྲུ་ནི་བརྒྱ་རྩ་བརྒྱད་པར་བྱ། ། དེ་དང་མཉམ་པའི་བུམ་པ་ཡིས། ། ཁོར་ཁོར་ཡུག་ཉེ་བར་བརྒྱན། ། རྟ་བབས་བཟང་ པོ་བཞི་དག་ཀྱང་། ། སྒོ་སྒོ་དག་ཏུ་ཡོངས་སུ་གཟུགས། །
BOཁོར་ཡུག་རྣམ་པར་རྒྱལ་བ་ཡི། ། བ་དན་སྣ་ཚོགས་རྣམས་ཀྱིས་བརྒྱན། ། རྟ་བབས་དག་ཀྱང་རྒྱལ་མཚན་དང་། ། ལོ་མ་སར་པ་དག་གིས་བརྒྱན། ། ཕྲེང་བ་བརྒྱུས་པ་གཤིབས་པ་དག ། བློ་དང་ལྡན་པས་གཅད་ པར་བྱ། ། ཕྱི་རོལ་ཁོ་ར་ཁོར་ཡུག་ཏུ། ། མར་གྱི་མར་མེ་གསལ་བྱ་ཞིང་། ། བདུག་སྤོས་རིགས་ནི་སྣ་ཚོགས་པས། ། རྒྱུན་མི་འཆད་བར་བདུག་པར་བྱ། ། དཀྱིལ་འཁོར་གཉིས་པ་ཁོར་ཡུག་ཏུ། ། ཁྲུ་བདུན་དག་དང་ལྡན་པ་དང་། ། གསུམ་པ་ཁྲུ་ནི་གསུམ་པ་ སྟེ། ། ཆོ་ག་དེ་ལྟར་ཡོངས་སུ་གཟུང་། ། མཆོད་སོགས་ཆོ་ག་གང་ཡིན་དང་། ། དཀྱིལ་འཁོར་ཆོ་ག་སྔོན་བཞིན་བྱ། ། གཞན་ཡང་ཆོ་ག་ལྷག་བར་ནི། ། སྦྱིན་སྲེག་དག་ཀྱང་བྱ་བར་གསུངས། ། དབུས་སུ་རང་གི་རིག་སྔགས་ཀྱིས། ། བུམ་པ་གང་བ་བཞག་ནས་སུ། ། དེ་ཡི་ཕྱོགས་ བཞི་དག་ཏུ་ཡང་། ། སྦྱིན་སྲེག་ཆོ་ག་བཞིན་དུ་བྱ། ། དེ་བཞིན་གཤེགས་པའི་རིགས་རྣམས་ཀུན། ། ཤར་གྱི་ཕྱོགས་སུ་བྲི་བར་བྱ། ། བྱང་ཕྱོགས་སུ་ནི་པདྨའི་རིགས། ། ཆ་དང་མཐུན་པར་ལེགས་པར་བྲི། ། མཁས་པས་ལྷོ་ཡི་ཕྱོགས་སུ་ནི། ། རྡོ་རྗེའི་རིགས་ཀུན་བྲི་བར་བྱ། ། ནུབ་ཀྱི་ཕྱོགས་སུ་དྲག་པོ་དང་། ། གཅིག་པུ་གནོད་སྦྱིན་རིགས་རྣམས་བྲི། །
BOདེ་ཡི་ལྷག་པའི་ཆ་དག་ཀྱང་། ། ནག་རིམ་བཞིན་དུ་ཕྱི་རོལ་བྲི། ། དེ་ཡི་ཕྱི་རོལ་འཇིག་རྟེན་སྐྱོང་། ། གཞན་དག་ཀྱང་ནི་བྱ་བར་བསྒྲགས། ། གསང་སྔགས་ཟློས་པས་དང་པོར་ནི། ། བདག་པོ་ལྔ་ རྣམས་དགོད་པར་བྱ། ། དེ་ནས་རིག་སྔགས་རྒྱལ་པོ་དང་། ། རིག་སྔགས་རྒྱལ་མོར་བསྒྲགས་པ་དང་། ། ལས་ཀུན་བྱེད་པས་གསང་སྔགས་དང་། ། དཀྱིལ་འཁོར་དག་ཏུ་གང་བསྟན་པའི། ། ཕོ་ཉ་ཆེ་ཕྲ་{གོ་རིམས་,གོ་རིམ་}བཞིན། ། དཀྱིལ་འཁོར་དུ་ནི་དགོད་པར་བྱ། ། སྒོ་ཀར་ བགེགས་ཀྱི་སྡེ་དཔོན་དང་། ། ཁྲོ་བོ་བདུད་རྩི་ཐབ་སྦྱོར་དང་། ། ལྷ་མོ་གཞན་གྱིས་མི་ཐུབ་བཞག ། ལྷག་མ་ཅི་དགར་བྱ་བར་བཤད། ། དེ་ལྟར་རྒྱུད་དོན་མཐོང་བ་ཡིས། ། དཀྱིལ་འཁོར་དགོད་པར་བྱས་ནས་ཀྱང་། ། དེར་ནི་སྙིས་པོ་སྤྱན་དྲངས་ཏེ། ། ཆོ་ག་ལྷག་མའང་བྱ་བར་ གསུངས། ། མཁས་པས་ཕྱོགས་བཞི་རིགས་རེལ། ། སྦྱིན་སྲེག་ཆོ་ག་བཞིན་བྱས་ནས། ། ནུབ་ཀྱི་བུམ་བའི་དྲུང་དུ་ནི། ། རང་གི་རིག་སྔགས་སྦྱིན་སྲེག་བྱ། ། འདིར་ནི་སྦྱིན་སྲེག་ཆོ་ག་བཞིན། ། བྱས་ན་ཐམས་ཅད་ཚིམ་པར་འགྱུར། ། དེར་ནི་གཏོར་ མ་རྒྱ་ཆེར་བྱ། ། དེས་ནི་ལྷ་རྣམས་མགུ་བར་འགྱུར། ། དཀྱིལ་འཁོར་འདི་ནི་བྲིས་ནས་ཀྱང་། །
BOབཟླས་བརྗོད་སྦྱིན་སྲེག་ཅི་དགར་བྱ། ། རང་རིགས་རིག་པས་རིག་སྔགས་ལ། ། མར་གྱི་སྦྱིན་སྲེག་དག་ཀྱང་བྱ། ། འོ་ཐུག་མར་དང་སྦྱར་བའམ། ། ཏིལ་ དང་མངར་གསུམ་སྦྱར་བ་ཡིས། ། མཚན་མོའི་ལྷག་མ་རང་རིགས་ཀྱི། ། རིག་པས་རིག་སྔགས་སྦྱིན་སྲེག་བྱ། ། ལས་འདི་དག་གིས་ངེས་པར་ཡང་། ། ལྷ་ཉིད་མྱུར་དུ་འགྲུབ་འགྱུར་ཞིང་། ། ཚིམ་པར་འགྱུར་ཞིང་མཉེས་པར་འགྱུར། ། ལེགས་པར་ཡང་ནི་སྐོངས་ པར་འགྱུར། ། དཀྱིལ་འཁོར་འདི་ནི་བྲིས་ནས་ཀྱང་། ། གསང་སྔགས་རྗེས་མཐུན་སྦྱིན་སྲེག་བྱ། ། ལན་བདུན་ཁོ་ན་བྲིས་ནས་ཀྱང་། ། ཐེ་ཚོམ་མེད་པར་ངེས་པར་འགྲུབ། ། རིག་པའི་རྒྱལ་པོའི་རིག་སྔགས་སམ། ། དེ་བཞིན་རིགས་ཀྱི་རིག་སྔགས་ཀྱིས། ། རིག་སྔགས་ དག་ལ་དྲག་སྤྱད་པ། ། ཐམས་ཅད་བཏུད་དེ་བྱ་བར་གསུངས། ། སྤྲ་ཚིལ་ལས་ནི་གཟུགས་བྱས་ནས། ། དེ་ཡང་རིག་སྔགས་ཀྱིས་བཟླས་ཏེ། ། དྲག་ཤུལ་སྤྱོད་པའི་སྦྱིན་སྲེག་ནི། ། ལས་ཀྱིས་ཆོ་ག་ཐམས་ཅད་བྱ། ། སྐེ་ཚེ་ཡུངས་མར་གྱིས་བླུགས་ན། ། རིམས་ ནད་དྲག་པོས་འདེབས་པར་འགྱུར། ། ཁ་སྦུབ་ཏུ་ནི་བཞག་བྱས་ན། ། ལུས་ལ་སྡུག་བསྔལ་ཚོར་བ་འབྱུང་། ། མི་མཐུན་པ་ཡིས་བརྡེག་པ་དང་། །
BOམེ་ཏོག་གིས་ཀྱང་བསྣུན་པར་བྱ། ། དེ་ཉིད་ལ་ནི་སྤྱོ་པར་གསུངས། ། ཐོ་འཚམ་པ་ཡང་ཅི་དགར་བྱ། ། དཀྱིལ་ འཁོར་འདིར་ནི་གསང་སྔགས་དག ། གདོན་བཞིན་དུ་ནི་ཚར་བཅད་ན། ། ཆོ་ག་ལས་ནི་བསྟན་པ་ཡི། ། དངོས་གྲུབ་དག་ཀྱང་སྩོལ་བར་འགྱུར། ། འདིར་ནི་ལྷ་ཉིད་མངོན་གཤེགས་ནས། ། ཉིད་ཀྱིས་བསྒྲུབ་པ་ཉིད་ལ་ནི། ། དངོས་གྲུབ་མྱུར་དུ་སྦྱིན་པར་འགྱུར། ། བྱིན་ནས་ཞི་བའི་ཆོ་ག་བྱ། ། གལ་ཏེ་ཅི་ཞིག་ལྟར་གྱུར་ན། ། དུག་ཁྲག་ལན་ཚྭ་སྐེ་ཆེ་དང་། ། ཡུངས་ཀར་སྦྱར་ནས་དཀྱིལ་འཁོར་འདིར། ། མཚན་མོ་ལྷག་མ་བསྲེག་པར་བྱས། ། རང་གི་རིག་སྔགས་ལྷ་ཉིད་ནི། ། སྡུག་བསྔལ་བཞིན་དུ་མྱུར་གཤེགས་ ནས། ། ཀྱེ་ཀྱེ་ང་ཡིས་མཆོག་སྦྱིན་ཞེས། ། སྒྲུབ་པ་པོ་ལ་གཅུགས་པར་མཛད། ། གལ་ཏེ་བག་མེད་མ་བྱོན་ན། ། སྒྲུབ་པ་པོས་ནི་ཞག་གསུམ་དུ། ། འཇིགས་པ་མེད་པས་རང་གི་ཤ། ། སྲེག་བླུགས་གསུམ་ནི་དེར་བསྲེགས་ན། ། དེ་ཚེ་ངེས་པར་ མངོན་གཤེགས་ནས། ། སྒྲུབ་པ་པོ་ལ་ཆགས་མཛད་ཅིང་། ། ཅི་འདོད་པ་ཡི་དངོས་གྲུབ་སྩོལ། ། ཉེས་པ་མ་ལུས་བརྗོད་པར་མཛད། ། མཚམས་མེད་ལྔ་ནི་བྱེད་པས་ཀྱང་། ། ཞག་དགུར་ལས་འདི་དེས་བྱས་ན། ། གདོན་མི་ཟ་བར་འགྲུབ་འགྱུར་ བས། །
BOདེ་ཕྱིར་ལེགས་པར་བརྩམ་པར་བྱ། ། ལས་འདི་དོན་ཡོད་བྱ་བའི་ཕྱིར། ། རིག་སྔགས་དག་ལ་རྒོལ་བའི་ཚེ། ། ཟློས་པ་འཇིགས་པ་མེད་པ་དང་། ། བསྲུང་བ་དག་ཀྱང་བྱས་ཏེ་བྱ། ། འདིར་ནི་དངོས་གྲུབ་ལེགས་བྱིན་ན། ། ཆོ་ག་བཞིན་དུ་ཞི་བར་ བྱ། ། ལས་ཀྱི་ཉེས་པ་ཅི་ཡོད་པ། ། དེ་དག་རབ་ཏུ་བསྒྲིམས་ཏེ་གཤེགས། ། གསང་སྔགས་དངོས་གྲུབ་ཐམས་ཅད་ལ། ། དཀྱིལ་འཁོར་འདི་ནི་དམ་པ་ཡིན། ། སྦྱིན་སྲེག་ལས་ལ་བསྟན་པ་ཡི། ། སྦྱིན་སྲེག་རྣམ་གསུམ་བྱ་བར་གསུངས། ། ལས་རྣམས་ཐམས་ ཅད་བྱས་ན་ནི། ། དངོས་གྲུབ་རྣམ་གསུམ་ཐོབ་པར་འགྱུར། ། ཟློས་པ་རང་གི་རིག་སྔགས་དག ། གདོན་བཞིན་ཚར་གཅོད་བྱེད་པ་ན། ། ཉིན་གཅིག་བཞིན་དུ་ཡོ་བྱད་ནི། ། ཤིན་ཏུ་སར་པ་དག་གིས་བྱ། ། མཁས་པས་བསྲུང་བ་བྱས་པ་དག ། བག་ཡོད་པ་ལ་གཅར་བ་དང་། ། རྒྱུད་ཤེས་དཀའ་ཐུབ་ལྡན་པ་ཡིས། ། རིག་སྔགས་ཚུལ་བཞིན་དྲག་ཤུལ་སྦྱད། ། གཞན་དུ་བྱས་ན་ངེས་པར་འཆི། ། ལེགས་པར་གྲུབ་པར་བྱེད་པའི་རྒྱུད་ཆེན་པོ་ལས་བསྒྲུབ་པའི་ཐབས་བསྡུས་པ་རྫོགས་{སྷོ,སོ}། ། ། །
Sutraya