༄༅། ། རྒྱ་གར་སྐད་དུ། ཨཱརྱ་ཨ་གྲ་པྲ་དཱི་པ་དྷཱ་ར་ཎཱི་བི་དྱཱ་རཱ་ཛཱ། བོད་སྐད་དུ། འཕགས་པ་རིག་སྔགས་ཀྱི་རྒྱལ་པོ་སྒྲོན་མ་མཆོག་གི་གཟུངས། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་ འདུན་ཆེན་པོ་དང་། ལྷ་དང་མི་འབུམ་ཕྲག་དུ་མ་དང་། བྱང་ཆུབ་སེམས་དཔའ་འབུམ་ཕྲག་དུ་མ་དང་ཐབས་ཅིག་ཏུ་བཞུགས་ཏེ། ཡོངས་སུ་བསྐོར་ཅིང་མདུན་གྱིས་བལྟས་ནས་ཆོས་སྟོན་ཏོ། ། སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་བྱེ་བ་བརྒྱ་ཕྲག་སྟོང་འདས་པ་ན་ འཇིག་རྟེན་གྱི་ཁམས་མེ་ཏོག་མཐའ་ཡས་ཞེས་བྱ་བ་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྒྲོན་མ་མཆོག་ཅེས་བྱ་བ་དེ་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པ་དེས་བྱང་ཆུབ་སེམས་དཔའ་འོད་ཆེན་པོ་དང་། འོད་ དཔག་མེད་ཅེས་བྱ་བ་བྱང་ཆུབ་སེམས་དཔའ་གཉིས་འཇིག་རྟེན་གྱི་ཁམས་མི་མཇེད་འདིར་བཏང་ངོ་། །

དེ་ནས་བྱང་ཆུབ་སེམས་དཔའ་དེ་གཉིས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ག་ལ་བ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་ པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་གོ། ། ཕྱོགས་གཅིག་ཏུ་འདུག་ནས་བྱང་ཆུབ་ སེམས་དཔའ་དེ་གཉིས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས་སངས་རྒྱས་ཀྱི་ཞིང་བྱེ་བ་ཕྲག་འབུམ་འདས་པ་ན་འཇིག་རྟེན་གྱི་ཁམས་མེ་ཏོག་མཐའ་ཡས་ཞེས་བགྱི་བ་དེ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་སྒྲོན་མ་མཆོག་ཅེས་བགྱི་བ་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྒྲོན་མའི་མཆོག་དེས་བདག་ཅག་གཉིས་འཇིག་རྟེན་གྱི་ཁམས་མི་ མཇེད་འདིར་བཏང་སྟེ།

བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྒྲོན་མའི་མཆོག་དེས་བཅོམ་ལྡན་འདས་ལ་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། འཚོ་འམ། སྟོབས་དང་བདེ་བ་དང་ ཁ་ན་མ་ཐོ་བ་མ་མཆིས་པ་ལ་རེག་པར་གནས་སམ་ཞེས་སྟུན་གསོལ་ལོ། ། འདི་སྐད་ཅེས་ཀྱང་གསུང་ངོ་། ། འདི་ན་མིའམ། མི་མ་ལགས་པའམ། འབྱུང་པོའམ། ཤ་ཟའམ། གནོད་སྦྱིན་ནམ། སྲིན་པོའམ། གྲུལ་བུམ་མམ། གྲུལ་བུམ་གྱི་སྡེ་དཔོན་ ནམ། རྒྱལ་པོ་འམ། བློན་པོ་ཆེན་པོའམ། ཆོམ་རྐུན་ནམ། སྦྲུལ་ལམ། སྲིན་བུའམ། སྲིན་བུ་ལུ་ཏའམ། སྦྲང་བུ་ལྕགས་ཕྱེའམ། ཉེ་བའི་ཉོན་མོངས་པ་གང་ཡང་རུང་བ་དག་འཚེ་བར་བགྱིད་པ་འགའ་ཡང་མ་མཆིས་སམ་ཞེས་གསུང་ངོ་། ། སེམས་ ཅན་རྣམས་ཀྱི་དོན་དང་། སྨན་པ་དང་། བདེ་བ་དང་། མདངས་དང་ལྡན་པར་བགྱི་བ་དང་། གཟི་བརྗིད་དང་ལྡན་པར་བགྱི་བ་དང་། གྲགས་པ་དང་ལྡན་པར་བགྱི་བ་དང་། ཡོན་ཏན་དང་ལྡན་པར་བགྱི་བ་དང་། སྟོབས་དང་ལྡན་པར་བགྱི་བ་དང་། མདོག་ དང་ལྡན་པར་བགྱི་བ་དང་། བསྲུང་བ་དང་། སྦ་བ་དང་།

བསྐྱབ་པའི་སླད་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྒྲོན་མའི་མཆོག་དེས་གཟུངས་ཀྱི་གསང་སྔགས་གཞི་འདི་དག་ཀྱང་བསྐུར་ཏེ། འདི་ལྟ་སྟེ། ཛྭ་ ལེ་ཛྭ་ལེ། ཛྭ་ལེ་ག་ཏེ། ཧུཀྐུ། མུཀྐུ། སཾ་མ་ཏེ། མ་ཧཱ་སཾ་མ་ཏེ། མ་ཧཱ་ཛྭ་ལེ། ཛྭ་བ་ལ་མེ། ས་ཧེ་ས་ཧེ། མ་ཧཱ་ཛྭ་ལེ། ཨུཀྐེ་མུཀྐེ། ཤ་མེ། སཾ་མ་ཏེ། མ་ཧཱ་སཾ་མ་ཏེ། མ་ཧཱ་ཤ་མེ་སྭཱ་ཧཱ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་བ་ཀུན་དགའ་བོ་ལ་ བཀའ་སྩལ་པ། ཀུན་དགའ་བོ་ཁྱོད་ཀྱིས་གསང་སྔགས་གཞི་འདི་དག་ཟུང་ཤིག ། ལོང་ཤིག ། ཆོངས་ཤིག ། ལྷོགས་ཤིག ། ཀུན་ཆུབ་པར་གྱིས་ཤིག ། གཞན་དག་ལ་ཡང་རྒྱ་ཆེར་རབ་ཏུ་སྟོན་ཅིག ། ཀུན་དགའ་བོ་སངས་རྒྱས་འབྱུང་བ་རྙེད་པར་དཀའོ། ། གཟུངས་ཀྱི་གསང་སྔགས་གཞི་འདི་དག་རྙེད་པར་དཀའོ། ། ཀུན་དགའ་བོ་གཟུངས་ཀྱི་གསང་སྔགས་གཞི་དག་འཛིན་པ་ཡང་ཤིན་ཏུ་རྙེད་པར་དཀའོ། ། ཀུན་དགའ་བོ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་གཟུངས་ཀྱི་གསང་སྔགས་གཞི་འདི་དག་འཛིན་པ་ དང་། ལེན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བྱེད་པ་དང་།

གཞན་དག་ལ་ཡང་རྒྱ་ཆེར་རབ་ཏུ་སྟོན་པ་དེ་ནི་ཚེ་རབས་བདུན་དུ་ཚེ་རབས་དྲན་པར་འགྱུར་རོ། ། ཚེ་འདི་ཉིད་ལ་ཡང་སྔོན་གྱི་ལས་མ་གཏོགས་པར་གཞན་གྱི་གནོད་པ་ཐམས་ཅད་ལས་ ཡང་དག་པར་འདའ་བ་དང་། འགྲོ་བ་ཐམས་ཅད་དང་རྗེས་སུ་མཐུན་པར་འགྱུར་རོ། ། ཀུན་དགའ་བོ་གཟུངས་ཀྱི་གསང་སྔགས་གཞི་འདི་དག་ནི་སངས་རྒྱས་བྱེ་བ་ཕྲག་བདུན་ཅུ་རྩ་བདུན་གྱིས་གསུངས་ཏེ། གང་གཟུངས་ཀྱི་གསང་སྔགས་གཞི་ འདི་དག་ལས་འདའ་བར་བྱེད་པ་དེ་ནི་དེ་དག་ཐམས་ཅད་ལ་འཁུས་པ་ཡིན་ནོ། ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མ་ཕམ་པ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་ འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་གིས་ཀྱང་སེམས་ཅན་རྣམས་ཀྱི་དོན་དང་། སྨན་པ་དང་། བདེ་བ་དང་། མདངས་དང་ལྡན་པར་བགྱི་བ་དང་། གཟི་བརྗིད་དང་ ལྡན་པར་བགྱི་བ་དང་། གྲགས་པ་དང་ལྡན་པར་བགྱི་བ་དང་། ཡོན་ཏན་དང་ལྡན་པར་བགྱི་བ་དང་། སྟོབས་དང་ལྡན་པར་བགྱི་བ་དང་། མདོག་དང་ལྡན་པར་བགྱི་བ་དང་། བསྲུང་བ་དང་། སྤ་བ་དང་།

བསྐྱབ་པའི་སླད་དུ་གཟུངས་ཀྱི་གསང་ སྔགས་གཞི་འདི་རྣམས་བརྗོད་པར་བགྱིའོ། ། འདི་ལྟ་སྟེ། ཨཏྟེ། བཏྟེ། ནཏྟེ། ཀུ་ནཏྟེ། པུ་ཀ་སེ། ཀུ་པུ་ཀ་སེ། ཀ་སེ། ཨ་ན་ཀ་སེ། ནཱ་མ་ཀ་སེ། ཨ་ནུ་ཏ། པྲཱ་ནུ་ཏ། ཁ་ཛེ། མ་ཧཱ་ཁ་ཛེ། ས་ད་པ་ཕེ། ཏ་ཌ་ཕེ། ཏུ་ཌ་ ཕེ། ཧི་ལི་མི་ལི། ཏི་ལེ་སྭཱ་ཧཱ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་པོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་གཟུངས་ཀྱི་གསང་སྔགས་འདི་འདི་དག་ཟུང་ཤིག ། ལོང་ཤིག ། ཆོས་ཤིག ། ལྷོགས་ཤིག ། ཀུན་ ཆུབ་པར་གྱིས་ཤིག ། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ཅིག ། ཀུན་དགའ་བོ་སངས་རྒྱས་འབྱུང་བ་རྙེད་པར་དཀའོ། ། གཟུངས་ཀྱི་གསང་སྔགས་གཞི་འདི་དག་རྙེད་པར་དཀའོ། ། ཀུན་དགའ་བོ་གཟུངས་ཀྱི་གསང་སྔགས་གཞི་འདི་ དག་འཛིན་པ་ཡང་ཤིན་ཏུ་རྙེད་པར་དཀའོ། ། ཀུན་དགའ་བོ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་གཟུངས་ཀྱི་གསང་སྔགས་གཞི་འདི་དག་འཛིན་པ་དང་། ལེན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བྱེད་པ་དང་། གཞན་དག་ ལ་ཡང་རྒྱ་ཆེ་རབ་ཏུ་སྟོན་པ་དེ་ནི་ཚེ་རབས་བཅུ་གཉིས་སུ་ཚེ་རབས་དྲན་པར་འགྱུར་རོ། །

ཚེ་འདི་ཉིད་ལ་ཡང་སྔོན་གྱི་ལས་མ་གཏོགས་པར་གཞན་གྱི་གནོད་པ་ཐམས་ཅད་ལས་ཡང་དག་པར་འདའ་བ་དང་། འགྲོ་བ་ཐམས་ཅད་དང་རྗེས་སུ་མཐུན་པར་འགྱུར་རོ། ། ཀུན་དགའ་བོ་གཟུངས་ཀྱི་གསང་སྔགས་གཞི་འདི་དག་ནི་སངས་རྒྱས་བྱེ་བ་ཕྲག་བརྒྱད་ཅུ་རྩ་གཉིས་ཀྱིས་གསུངས་ཏེ། གང་གཟུངས་ཀྱི་གསང་སྔགས་གཞི་འདི་དག་ལས་འདའ་བར་བྱེད་པ་ནི་དེ་དག་ཐམས་ཅད་ལ་འཁུས་པ་ཡིན་ནོ། ། དེ་ནས་འཇམ་དཔལ་གཞོན་ ནུར་གྱུར་པ་སྟན་ལས་ལངས་ཏེ། བླ་གོས་ཕྲག་བ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས་ བདག་གིས་ཀྱང་སེམས་ཅན་རྣམས་ཀྱི་དོན་དང་། སྨན་པ་དང་། བདེ་བ་དང་། མདངས་དང་ལྡན་པར་བགྱི་བ་དང་། གཟི་བརྗིད་དང་ལྡན་པར་བགྱི་བ་དང་། གྲགས་པ་དད་ལྡན་པར་བགྱི་བ་དང་། ཡོན་ཏན་དང་ལྡན་ པར་བགྱི་བ་དང་། སྟོབས་དང་ལྡན་པར་བགྱི་བ་དང་། མདོག་དང་ལྡན་པར་བགྱི་བ་དང་། བསྲུང་བ་དང་། སྦ་བ་དང་། བསྐྱབ་པའི་སླད་དུ་གཟུངས་ཀྱི་གསང་སྔགས་གཞི་འདི་རྣམས་བརྗོད་པར་བགྱིའོ། ། འདི་ལྟ་སྟེ། ཨཀྑེ། པཀྑེ། ན་ཛི་ཏེ། ནཱ་གཱ་ས་རེ། ན་ཧི་ལེ།

ཛ་ཧི་ལེ། ཛ་ཧི་ལ་བ་ཏེ། ཙཎྜཱིལ་བ་ཏེ་སྭཱ་ཧཱ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་གཟུངས་ཀྱི་གསང་སྔགས་གཞི་འདི་དག་ཟུང་ཤིག ། ལོང་ཤིག ། ཆོངས་ཤིག ། ལྷོགས་ཤིག ། ཀུན་ཆུབ་པར་ གྱིས་ཤིག ། གཞན་དག་ལ་ཡང་རྒྱ་ཆེར་རབ་ཏུ་སྟོན་ཅིག ། ཀུན་དགའ་བོ་སངས་རྒྱས་འབྱུང་བ་རྙེད་པར་དཀའོ། ། གཟུངས་ཀྱི་གསང་སྔགས་གཞི་འདི་དག་རྙེད་པར་དཀའོ། ། ཀུན་དགའ་བོ་གཟུངས་ཀྱི་གསང་སྔགས་གཞི་འདི་དག་ འཛིན་པ་ཡང་ཤིན་ཏུ་རྙེད་པར་དཀའོ། ། ཀུན་དགའ་བོ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་གཟུངས་ཀྱི་གསང་སྔགས་གཞི་འདི་དག་འཛིན་པ་དང་། ལེན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བྱེད་པ་དང་། གཞན་དག་ལ་ཡང་ རྒྱ་ཆེར་རབ་ཏུ་སྟོན་པ་དེ་ནི་ཚེ་རབས་བཅུ་གསུམ་དུ་ཚེ་རབས་དྲན་པར་འགྱུར་རོ། ། ཚེ་འདི་ཉིད་ལ་ཡང་སྔོན་གྱི་ལས་མ་གཏོགས་པ་གཞན་གྱི་གནོད་པ་ཐམས་ཅད་ལས་ཡང་དག་པར་འདའ་བ་དང་། འགྲོ་བ་ཐམས་ཅད་དང་རྗེས་སུ་མཐུན་པར་འགྱུར་རོ། ། ཀུན་དགའ་ བོ་གཟུངས་ཀྱི་གསང་སྔགས་གཞི་འདི་དག་ནི་སངས་རྒྱས་བྱེ་བ་ཕྲག་བརྒྱད་ཅུ་ར་གཉིས་ཀྱིས་གསུངས་ཏེ།

གང་གཟུངས་ཀྱི་གསང་སྔགས་གཞི་འདི་དག་ལས་འདའ་བར་བྱེད་པ་དེ་ནི་དེ་དག་ཐམས་ཅད་ལ་འཁུས་པ་ཡིན་ནོ། ། དེ་ནས་བཅོམ་ལྡན་འདས་ཀྱིས་དགེ་སློང་ རྣམས་ལ་བཀའ་སྩལ་པ། དགེ་སློང་དག་ངས་ཀྱང་སེམས་ཅན་རྣམས་ཀྱི་དོན་དང་། ཕན་པ་དང་། བདེ་བ་དང་། མདངས་དང་ལྡན་པར་བྱ་བ་དང་། གཟི་བརྗིད་དང་ལྡན་པར་བྱ་བ་དང་། གྲགས་པ་དང་ལྡན་པར་བྱ་བ་དང་། ཡོན་ཏན་དང་ལྡན་པར་ བྱ་བ་དང་། སྟོབས་དང་ལྡན་པར་བྱ་བ་དང་། མདོག་དང་ལྡན་པར་བྱ་བ་དང་། བསྲུང་བ་དང་། སྦ་བ་དང་། བསྐྱབ་པའི་ཕྱིར་གཟུངས་ཀྱི་གསང་སྔགས་གཞི་རྣམས་བཤད་དོ། ། འདི་ལྟ་སྟེ། ཨཊྚེ། བཊྚེ། ནཊྚེ། ཀུ་ན་ཊྚེ། ཊ་ཀེ། ཨེ་ཌ་ཀེ། ཏ་ཏ་བེ། ཏུ་ཊ་བེ། ར་ཊ་ཀེ། ལོ་ལེ། ཧུ་ལེ། ཧི་ལེ། མི་ལེ། ཏི་ལེ། ཤཱི་ལེ། ཤཱི་ལ། ཨཌྷེ། བ་ཌྷེ། ན་ཌྷེ། ཀུ་ན་ཌྷེ། ཨ་ཌ་པ་ཏཱི། བ་ཎ་བ་ཏཱི། ཀ་སེ་ཀ་སེ་ཀ་སེ། ཕ་སེ་ཕ་སེ་ཕ་སེ། མ་ཧཱ་ཕ་སེ་ཕ་སེ་སྭཱ་ཧཱ། དེ་ནས་བཅོམ་ལྡན་འདས་ ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་གཟུངས་ཀྱི་གསང་སྔགས་གཞི་འདི་དག་ཟུང་ཤིག ། ལོང་ཤིག ། ཆོངས་ཤིག ། ལྷོགས་ཤིག ། ཀུན་ཆུབ་པར་གྱིས་ཤིག ། གཞན་དག་ལ་ཡང་རྒྱ་ཆེར་རབ་ཏུ་སྟོན་ཅིག །

ཀུན་དགའ་བོ་སངས་རྒྱས་འབྱུང་བ་རྙེད་པར་དཀའོ། ། གཟུངས་ཀྱི་གསང་སྔགས་གཞི་འདི་དག་རྙེད་པར་དཀའོ། ། ཀུན་དགའ་བོ་གཟུངས་ཀྱི་གསང་སྔགས་འདི་དག་སྟོན་པ་ཡང་ཤིན་ཏུ་རྙེད་པར་དཀའོ། ། ཀུན་དགའ་བོ་རིགས་ཀྱི་བུའམ། རིགས་ཀྱི་བུ་མོ་ གང་ལ་ལ་གཟུངས་ཀྱི་གསང་སྔགས་གཞི་འདི་དག་འཛིན་པ་དང་། ལེན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བྱེད་པ་དང་། གཞན་དག་ལ་ཡང་རྒྱ་ཆེར་རབ་ཏུ་སྟོན་པ་དེ་ནི་ཚེ་རབས་བཅུ་བཞིར་ཚེ་རབས་དྲན་པར་འགྱུར་རོ། ། ཚེ་འདི་ཉིད་ལ་ཡང་སྔོན་ གྱི་ལས་མ་གཏོགས་པར་གཞན་གྱི་གནོད་པ་ཐམས་ཅད་ལས་འདའ་བ་དང་། འགྲོ་བ་ཐམས་ཅད་དང་རྗེས་སུ་མཐུན་པར་འགྱུར་རོ། ། ཀུན་དགའ་བོ་གཟུངས་ཀྱི་གསང་སྔགས་གཞི་འདི་དག་ནི་སངས་རྒྱས་བྱེ་བ་ཕྲག་བརྒྱད་ཅུ་རྩ་བཞིས་གསུངས་ཏེ། གང་གཟུངས་ཀྱི་ གསང་སྔགས་གཞི་འདི་དག་ལས་འདའ་བར་བྱེད་པ་དེ་ནི་དེ་དག་ཐམས་ཅད་ལ་འཁུས་པ་ཡིན་ནོ། ། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་དག་གིས་གཟུངས་ཀྱི་གསང་སྔགས་གཞི་འདི་དག་ཤིང་སྐམ་པོ་གཤེར་བག་མེད་པ་ལ་བསྲུང་བ་བྱས་ཏེ། ཡོངས་སུ་ བསྐྱབ་པ་དང་། ཡོངས་སུ་གཟུང་བ་དང་། བཅིང་བ་དང་། ཞི་བ་དང་།

བདེ་ལེགས་སུ་འགྱུར་བ་བྱས་ན་ཤིང་དེ་ལས་ལྕུ་གུ་དང་། ལོ་མ་དག་ཀྱང་སྐྱེ་བར་འགྱུར་ཏེ། མེ་ཏོག་དང་འབྲས་བུ་རྣམས་ཀྱང་མངོན་པར་འགྲུབ་པར་འགྱུར་ན། མིར་གྱུར་པ་ལྟ་ཅི་སྨོས། ན་མཿསརྦ་བུདྡྷེ་བྷྱཿསིདྡྷྱནྟུ་དྷཱ་ར་ཎཱི། མནྟྲ་པཱ་ད་ནི་སྭཱ་ཧཱ། དེ་ནས་བཅོམ་ལྡན་འདས་ཀྱིས་ཡང་དགེ་སློང་རྣམས་ལ་བཀའ་སྩལ་པ། དགེ་སློང་དག་སེམས་ཅན་རྣམས་ཀྱི་དོན་དང་། ཕན་པ་དང་། བདེ་བ་དང་། མདངས་དང་ལྡན་པར་བྱ་བ་དང་། གཟི་ བརྗིད་དང་ལྡན་པར་བྱ་བ་དང་། གྲགས་པ་དང་ལྡན་པར་བྱ་བ་དང་། ཡོན་ཏན་དང་ལྡན་པར་བྱ་བ་དང་། སྟོབས་དང་ལྡན་པར་བྱ་བ་དང་། མདོག་དང་ལྡན་པར་བྱ་བ་དང་། བསྲུང་བ་དང་། སྦ་བ་དང་། བསྐྱབ་པའི་ཕྱིར་གཟུངས་ཀྱི་གསང་ སྔགས་གཞི་གཞན་དག་ཀྱང་བཤད་པར་བྱའོ། ། འདི་ལྟ་སྟེ། ཨ་ཏྟེ། མཏྟེ། པ་ཀེ ། པཱ་ར་ཀེ ། པེ་ཀེ་ཌཱ། དྲ་མ་ཏི། ཏ་ར་མ་ཏི། ཊུ་ཌ་མ་ཊི། ཊུ་ཌ་མ་ཊི། ཊུ་ཌ་ཊུ་རེ། སུ་རེ། ཧི་ལེ། མུ་ལེ། ཏི་ལེ་སྭཱ་ཧཱ། དེ་ནས་བཅོམ་ལྡན་ འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་གཟུངས་ཀྱི་གསང་སྔགས་གཞི་འདི་དག་ཟུང་ཤིག ། ལོང་ཤིག ། ཆོངས་ཤིག ། ལྷོགས་ཤིག ། ཀུན་ཆུབ་པར་གྱིས་ཤིག །

གཞན་དག་ལ་ཡང་རྒྱ་ཆེར་རབ་ཏུ་སྟོན་ ཅིག ། ཀུན་དགའ་བོ་སངས་རྒྱས་འབྱུང་བ་རྙེད་པར་དཀའོ། ། གཟུངས་ཀྱི་གསང་སྔགས་གཞི་འདི་དག་རྙེད་པར་དཀའོ། ། ཀུན་དགའ་བོ་གཟུངས་ཀྱི་གསང་སྔགས་གཞི་འདི་དག་འཛིན་པ་ཡང་ཤིན་ཏུ་རྙེད་པར་དཀའོ། ། ཀུན་དགའ་བོ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་གཟུངས་ཀྱི་གསང་སྔགས་གཞི་འདི་དག་འཛིན་པ་དང་། ལེན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བྱེད་པ་དང་། གཞན་དག་ལ་ཡང་རྒྱ་ཆེར་རབ་ཏུ་སྟོན་པ་དེ་ནི་ཚེ་རབས་ཉི་ཤུ་རྩ་གཅིག་ཏུ་ཚེ་རབས་དྲན་པར་ འགྱུར་རོ། ། ཚེ་འདི་ཉིད་ལ་ཡང་སྔོན་གྱི་ལས་མ་གཏོགས་པར་གཞན་གྱི་གནོད་པ་ཐམས་ཅད་ལས་འདའ་བ་དང་། འགྲོ་བ་ཐམས་ཅད་དང་རྗེས་སུ་མཐུན་པར་འགྱུར་རོ། ། གང་ལ་ལ་ཞིག་ལ་བསྲུང་བ་བྱས་ན་དེ་ལ་ཡང་འབྱུང་པོ་ཐམས་ཅད་ཀྱིས་མི་ཚུགས་ སོ། ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་ཐམས་ཅད་ཀྱིས་མི་ཚུགས་སོ། ། སྦྲུལ་དང་། སྲིན་བུ་དང་། སྲིན་བུ་ལུ་ཏ་ དང་། སྦྲང་བུ་ལྕགས་ཕྱེ་ཐམས་ཅད་ཀྱིས་མི་ཚུགས་སོ། ། རིམས་རླུང་དང་། མཁྲིས་པ་དང་།

བད་ཀན་དང་། འདུས་པ་དང་། དུས་ཚིགས་འགྱུར་བ་ལས་བྱུང་བ་ཐམས་ཅད་ཀྱིས་མི་ཚུགས་སོ། ། ཞག་གཅིག་པའམ། ཞག་གཉིས་པའམ། ཞག་ གསུམ་པའམ། ཞག་བཞི་པའམ། ཞག་བདུན་པའམ། ཟླ་བ་ཕྱེད་པའམ། ཟླ་བ་གཅིག་པའམ། ལོ་གཅིག་པའམ། ནད་རྒྱུན་{རིངས་སམ,རིང་ངམ}། སྐད་ཅིག་པ་རྣམས་ཀྱིས་མི་ཚུགས་སོ། ། འབྲས་སམ། ཕོལ་མིག་གམ། རྐང་ཤུའམ། ལྷོག་པའམ། མེ་དཔལ་ལམ། ཤུ་བའམ། ཁྱི་རྔོའམ། གཡན་པའམ། མཛེ་ཐམས་ཅད་དམ། ལྷོག་པ་ཐམས་ཅད་དམ། གཤེད་བྱེད་ཐམས་ཅད་དམ། སྒྱུར་བའི་ལས་ཐམས་ཅད་དམ། བྱད་ཐམས་ཅད་དང་། རོ་ལངས་ཐམས་ཅད་ཀྱིས་ཀྱང་མི་ཚུགས་སོ། ། ཀུན་ དགའ་བོ་གཟུངས་ཀྱི་གསང་སྔགས་གཞི་འདི་དག་ནི་སངས་རྒྱས་བྱེ་བ་ཕྲག་དགུ་བཅུ་རྩ་དགུས་གསུངས་ཏེ། གང་གཟུངས་ཀྱི་གསང་སྔགས་གཞི་འདི་དག་ལས་འདའ་བར་བྱེད་པ་དེ་ནི་དེ་དག་ཐམས་ཅད་ལ་འཁུས་པ་ཡིན་ནོ། ། ཀུན་དགའ་བོ་གཟུངས་ཀྱི་གསང་སྔགས་གཞི་འདི་ དག་ནི་རྒྱལ་པོའི་ཕོ་བྲང་ན་འདུག་ན་ཡང་ཡིད་ལ་བྱའོ། ། ཆོམ་རྐུན་གྱི་ནང་ན་འདུག་ན་ཡང་ཡིད་ལ་བྱའོ། ། སྲིན་པོའི་ནང་ན་འདུག་ན་ཡང་ཡིད་ལ་བྱའོ། ། གཅན་གཟན་ཁྲོ་བོའི་ནང་ན་འདུག་ན་ཡང་ཡིད་ལ་བྱའོ། ། འབྲོག་དགོན་པའི་ནང་ན་འདུག་ན་ཡང་ཡིད་ལ་བྱའོ། །

ཀླུང་དང་བགྲོད་དཀའ་བ་ན་འདུག་ན་ཡང་ཡིད་ལ་བྱའོ། ། མེའི་ནང་ན་འདུག་ན་ཡང་ཡིད་ལ་བྱའོ། ། ཆུའི་ནང་ན་འདུག་ན་ཡང་ཡིད་ལ་བྱའོ། ། དེ་ཡིད་ལ་བྱས་པ་དེ་རྣམས་ལས་འཇིགས་པ་དེ་དག་ཐམས་ཅད་མི་འབྱུང་ངོ་། ། དེས་དུག་ཟོས་པ་ཐམས་ཅད་ཀྱང་ཁ་ཟས་ཉིད་ དུ་འགྱུར་རོ། ། ཀུན་དགའ་བོ་གཟུངས་ཀྱི་གསང་སྔགས་གཞི་འདི་དག་འཛིན་པ་ནི་འབྱུང་པོ་ཐམས་ཅད་ཀྱིས་མི་ཚུགས་སོ། ། {ཡི་དགས་,ཡི་དྭགས་}ཐམས་ཅད་དང་། སྲུལ་པོ་ཐམས་ཅད་དང་། གཤེད་བྱེད་ཐམས་ཅད་དང་། སྒྱུར་བའི་ལས་ཐམས་ཅད་དང་། བྱད་ ཐམས་ཅད་དང་། མི་དང་མི་མ་ཡིན་པ་ཐམས་ཅད་ཀྱིས་མི་ཚུགས་ཏེ། ཀུན་དགའ་བོ་མདོར་ན་དེ་ལ་གཞན་གྱི་གནོད་པ་ཐམས་ཅད་ཀྱིས་མི་ཚུགས་སོ། ། ཀུན་དགའ་བོ་གསད་པའི་རིགས་པ་ནི་ཆད་པས་བྲལ་བར་འགྱུར་རོ། ། ཆད་པས་གཅད་ པའི་རིགས་པ་ནི་བརྡེགས་པས། བརྡེགས་པའི་རིགས་པ་ནི་བརྒྱད་པས། བརྒྱད་པའི་རིགས་པ་ནི་བསྡིགས་པས། བསྡིགས་པའི་རིགས་པ་ནི་མིག་ཚུགས་སུ་བལྟས་པས་ཐར་བར་འགྱུར་རོ། ། ཀུན་དགའ་བོ་གཟུངས་ཀྱི་གསང་སྔགས་གཞི་འདི་དག་གིས་ གང་ལ་བསྲུང་བ་བྱས་པའམ། ཡོངས་སུ་བསྐྱབ་པ་བྱས་པའམ། ཡོངས་སུ་བཟུང་བའམ། བཅིངས་པའམ།

ཞི་བ་དང་བདེ་ལེགས་སུ་འགྱུར་བ་བྱས་པ་གཞན་དུ་འགྱུར་བ་དེ་ནི་གནས་མེད་དེ། ལྷ་དང་བཅས། བདུད་དང་བཅས། ཚངས་པ་དང་ བཅས་པའི་འཇིག་རྟེན་དང་། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་དང་། ལྷ་དང་། མི་དང་། ལྷ་མ་ཡིན་གྱི་ནང་ན་ཡང་ངས་མ་མཐོང་ངོ་། ། དེ་ཅིའི་ཕྱིར་ཞེ་ན། གཟུངས་ཀྱི་གསང་སྔགས་གཞི་འདི་དག་ནི་གནོད་པ་དང་། ནད་འགོ་བ་དང་། འཁྲུག་པ་ ཐམས་ཅད་ལས་ངེས་པར་འབྱུང་བར་བྱིན་གྱིས་བརླབས་པའི་ཕྱིར་རོ། ། དེ་ནས་ཆོས་ཀྱི་རྣམ་གྲངས་འདི་རྫོགས་པའི་རྗེས་ལ་རྒྱལ་པོ་ཆེན་པོ་བཞིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་ཅག་གིས་ཀྱང་ཆོས་ཀྱི་རྣམ་གྲངས་འདི་ རྒྱ་ཆེར་རྒྱས་པར་བགྱི་བ་དང་། ཆོས་སྨྲ་བ་དེ་དག་རྗེས་སུ་ཡོངས་སུ་གཟུང་བ་དང་། དམ་པའི་ཆོས་ཅི་ནས་ཀྱང་ཡུན་རིང་དུ་གནས་པ་དང་། བདུད་ཐམས་ཅད་ཚར་གཅད་པའི་སླད་དུ་གཟུངས་ཀྱི་གསང་སྔགས་གཞི་འདི་རྣམས་རྗེས་སུ་སྩལ་བར་འཚལ་ན། བཅོམ་ལྡན་འདས་ཀྱིས་དེ་ལ་ལེགས་སོ་ཞེས་བགྱི་བ་གནང་བར་མཛད་དུ་གསོལ། དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་ལ་ཐུགས་བརྩེ་བའི་ཕྱིར་ཅང་མི་གསུང་བར་གྱུར་པས་གནང་སྟེ།

རྒྱལ་པོ་ཆེན་པོ་བཞི་པོ་དེ་དག་གིས་ཀྱང་བཅོམ་ལྡན་འདས་ཀྱིས་ཅད་ མི་གསུང་བར་གྱུར་པས་གནང་བར་རིག་ནས་ཆེད་དུ་བརྗོད་པ་ཆེད་དུ་བརྗོད་དོ། ། དེ་ནི་འདི་ལྟ་སྟེ། ད་ནཌྜེ། དེ་ནཌྜེ། མ་ཧཱ་ནཌྜེ། ཛམྦྷ་ནེ། སྟམྦྷ་ནེ། ཊ་ཊེ། ཊ་ཊ་ནེ། མ་ཧཱ་ཊ་ཊ་ནེ། ཀུཊྚེ། ཀུཊྚ་ནེ། མ་ཧཱ་ཀུཊྚ་ནེ། དྷརྨ་ལེ། ཙརྨ་ལེ་སྭཱ་ ཧཱ། བཅོམ་ལྡན་འདས་འདི་དག་ནི་གཟུངས་འདིའི་འཁོར་གྱི་ཚིག་ལྟ་བུར་གདའ་བ་ལགས་ཏེ། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་གཟུངས་ཀྱི་གསང་སྔགས་གཞི་འདི་དག་འཛིན་པ་དང་། བཟླས་ཏེ་བཏོན་ནས་འཆང་བ་དེ་ནི་སྔོན་གྱི་ལས་མ་གཏོགས་ པར་གཞན་གྱི་གནོད་པ་ཐམས་ཅད་ལས་འདའ་བ་དང་། འགྲོ་བ་ཐམས་ཅད་དང་རྗེས་སུ་མཐུན་པར་འགྱུར་རོ། ། དེ་ལ་ནི་དམ་པའི་ཆོས་ཐམས་ཅད་ཡོངས་སུ་གཟུང་བ་ལ་ཡང་བར་ཆད་འབྱུང་བར་མི་འགྱུར་ལགས་སོ། ། དེ་ནས་བཅོམ་ལྡན་འདས་ཀྱིས་རྒྱལ་པོ་ ཆེན་པོ་བཞི་པོ་དག་ལ་གྲོགས་པོ་དག་ཁྱེད་བསྟན་པ་ཡུན་རིང་དུ་གནས་པར་བྱ་བའི་ཕྱིར་ཞུགས་པ་ལེགས་སོ་ལེགས་སོ་ཞེས་བྱ་བ་བྱིན་ནོ། ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་དེ་དག་རྫུ་ འཕྲུལ་ཆེ་བར་འགྱུར་བ་དང་།

ཕན་ཡོན་ཆེ་བ་དང་བྱིན་ཆེ་བར་འགྱུར་བའི་ཕྱིར་གཟུངས་ཀྱི་ཆོས་ཀྱི་རྣམ་གྲངས་འདི་ཟུང་ཤིག ། ལོང་ཤིག ། ཆོངས་ཤིག ། ལྷོགས་ཤིག ། ཀུན་ཆུབ་པར་གྱིས་ཤིག ། གཞན་དག་ལ་ཡང་རྒྱ་ཆེར་རབ་ཏུ་སྟོན་ཅིག ། གསོལ་པ། བཅོམ་ལྡན་འདས་རྒྱས་པར་བགྱི་བའི་སླད་དུ་བདག་གིས་གཟུང་ལགས་སོ། ། དེ་ནས་བཅོམ་ལྡན་འདས་ཀྱིས་དོན་འདི་ཉིད་རྒྱས་པར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། ། གཟུངས་སྔགས་ཀྱི་ནི་མདོ་སྡེ་འདི། ། སངས་རྒྱས་ཀུན་གྱིས་གསུངས་པ་སྟེ། ། སེམས་ཅན་རྣམས་ལ་ཕན་པའི་ཕྱིར། ། དེ་ནི་ངས་ཀྱང་བཤད་པ་ཡིན། ། གང་ཞིག་གཟུངས་སྔགས་མདོ་སྡེ་འདི། ། འཛིན་ཏམ་ཡང་ན་ཀློག་བྱེད་པ། ། ཚེ་རབས་ཉི་ཤུ་རྩ་གཅིག་ཏུ། ། དེ་ནི་ཚེ་རབས་དྲན་པར་འགྱུར། ། གཟུངས་སྔགས་འདི་རྗོད་བྱེད་དེ་ལ། ། མི་མིན་གང་ཡང་རུང་བ་དང་། ། གནོད་སྦྱིན་གྲུལ་བུམ་སྲིན་པོ་དག ། ནམས་ཀྱང་བར་ཆད་མི་བྱེད་དོ། ། གཟུངས་སྔགས་འདི་རྗོད་བྱེད་དེ་ལ། ། འདོད་ཁམས་དབང་ཕྱུག་གང་ཡིན་པ། ། སྡིག་ཅན་བདུད་ དེ་ནམ་དུ་ཡང་། ། བར་ཆད་བྱེད་པར་མི་འགྱུར་རོ། ། གཟུངས་སྔགས་འདི་འཛིན་བྱེད་དེ་ཡི། ། ཕ་མ་དང་ནི་ཕུ་ནུ་དང་། །

སྲིང་མོ་མཛའ་བཤེས་གཉེན་དག་ཀྱང་། ། ལོག་པར་ལྟུང་བར་མི་འགྱུར་རོ། ། དེ་ཕྱིར་གཟུངས་སྔགས་མདོ་སྡེ་འདི། ། འཇིགས་མེད་གང་ གིས་ཐོས་གྱུར་ནས། ། གཟུངས་སྔགས་འདི་རྗོད་བྱེད་པ་དེས། ། ནམས་ཀྱང་འཇིགས་པར་མི་བྱའོ། ། གཟུངས་སྔགས་འདི་འཛིན་བྱེད་དེ་ཡི། ། བསྐལ་པ་བྱེ་བ་སྟོང་རྣམས་སུ། ། སྒྲིབ་པའི་ལས་ནི་གང་བྱས་པ། ། ཞག་བདུན་གྱིས་ནི་བྱང་བར་འགྱུར། ། བྱང་ ཆུབ་སེམས་དཔའི་བསོད་ནམས་གང་། ། བསྐལ་པ་བྱེ་བར་བསྒྲུབས་པ་ཀུན། ། གཟུངས་སྔགས་འདི་འཛིན་བྱེད་པ་དེས། ། ཞག་བདུན་གྱིས་ནི་ཟིལ་གྱིས་ནོན། ། ཕྱོགས་བཞིའི་འཇིག་རྟེན་སྐྱོང་བ་པོ། ། རྒྱལ་པོ་ཆེན་པོ་བཞི་པོ་དག ། ལུས་ངན་དང་ནི་ཡུལ་ འཁོར་སྲུང་། ། མིག་མི་བཟང་དང་འཕགས་སྐྱེས་པོ། ། ཁ་དོག་ལྡན་ཞིང་གྲགས་དང་ལྡན། ། འཁོར་བཅས་བློན་བཅས་དེ་དག་ཀྱང་། ། གཟུངས་སྔགས་འདི་ནི་རྗོད་བྱེད་པ། ། དེ་ལ་རྟག་ཏུ་སྲུང་བར་བྱེད། ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ ནས། ཚེ་དང་ལྡན་པ་ཀུན་དགའ་བོ་དང་ཉན་ཐོས་ཆེན་པོ་དེ་དག་དང་། འཕགས་པ་བྱམས་པ་དང་། འཇམ་དཔལ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། རྒྱལ་པོ་ཆེན་པོ་བཞི་དང་། ལྷ་དང་།

མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། ། འཕགས་པ་རིག་སྔགས་ཀྱི་རྒྱལ་པོ་སྒྲོན་མ་མཆོག་གི་གཟུངས་རྫོགས་སོ། ། ། །