༄༅། ། རྒྱ་གར་སྐད་དུ། བཛྲ་མནྟྲ་བྷི་རུ་སནྟི་མ་ར་ཏནྟྲ་ནཱ་མ། བོད་སྐད་དུ། དྲག་སྔགས་འདུས་པ་རྡོ་རྗེ་རྩ་བའི་རྒྱུད་ ཅེས་བྱ་བ། བཅོམ་ལྡན་འདས་མཐུ་སྟོབས་ཀྱི་བདག་པོ་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྡོ་རྗེ་འཛིན་པ་ཆེན་པོ་ཉིད། རི་རབ་ཆེན་པོའི་ཡང་སྟེངས། ལྕང་ལོ་ཅན་གྱི་གནས་མཆོག ། རབ་ཏུ་བརྒྱན་པའི་ཕོ་བྲང་ཆེན་ པོ་ན། ཡུམ་ཆེན་མོ་འབྱུང་བ་ལྔའི་བདག་མོ་དང་། གཉིས་སུ་མེད་པར་སྙོམས་པར་ཞུགས་ཏེ། སྐུ་ལས་འོད་ཟེར་སྣ་ཚོགས་རབ་ཏུ་སྤྲོས་ནས། འཇིག་རྟེན་གྱི་ཁམས་ཀྱི་གདུག་པ་ཅན་དང་། དྲེགས་པ་ཅན་དང་། གཟི་བརྗིད་ཅན་དང་། དྲག་ཤུལ་ཅན་ལ་སོགས་པ་ དག་གིས་གནས་ཐམས་ཅད་རབ་ཏུ་གཡོ་ཞིང་བསྐྱོད་པར་མཛད་པས། དེ་དག་གི་སྡེ་དཔོན་དང་བཅས་འཁོར་དང་གཡོག་ཏུ་བཅས་པ་རྣམས། རླུང་གི་ཤུགས་ཀྱིས་བསྐྱོད་པ་བཞིན་དུ་ལྷགས་པ་ནི་འདི་ལྟ་སྟེ། གཤིན་རྗེ་ཚེ་བདག་ནག་པོ་ཆེན་པོ་ཡུམ་དང་བཅས་པ་ དང་། བདུད་ནག་པོ་ཆེན་པོ་མེའི་ཁ་རླངས་ཅན་དང་། ཡུམ་བདུད་མོ་ནག་མོ་ཁྲག་འཛག་མ་དང་། སྲིན་པོའི་རྒྱལ་པོ་གསོད་བྱེད་ནག་པོ་ཡུམ་དང་བཅས་པ་དང་། གནོད་སྦྱིན་ཆེན་པོ་གང་བ་བཟང་པོ་དང་།

ཡུམ་གནོད་སྦྱིན་མོ་ཤ་ཟ་རལ་གཅིག་མ་དང་། ལྷའི་རྒྱལ་པོ་དབང་ ཕྱུག་ཆེན་པོ་དང་། རུ་ཏྲའི་བདག་པོ་ཐར་པ་ནག་པོ་དང་། རྨུ་རྗེ་བཙན་པ་རྒྱལ་པོ་ཆེན་པོ་དང་། ཕྱི་རོལ་ལྷའི་བདག་པོ་ཀཱ་ལ་ནག་པོ་དང་། ཁྱབ་འཇུག་ཆེན་པོ་ཀུན་དུ་རྒྱུ་བ་དང་། ཀླུའི་བདག་པོ་གཞོན་ནུ་གཏུམ་པོ་དང་། ལྷའི་རྒྱལ་པོ་ལི་ཕྱིན་ཆེན་པོ་དང་། གནོད་སྦྱིན་ཆེན་ པོ་ལག་རྒྱུ་བ་དང་། བདག་ཉིད་ཆེན་པོ་རྡོ་རྗེ་མཛེས་པ་དང་། ཀླུ་བདུད་ཆེན་པོ་ཡམ་ཤུད་དམར་པོ་དང་། གཞན་ཡང་ལྷ་དང་། ཀླུ་དང་། ལྷ་མ་ཡིན་དང་། ཟ་བྱེད་དང་། {ཡི་དགས་,ཡི་དྭགས་}དང་། འབྱུང་པོའི་ཚོགས་དང་། ཕོ་ཉའི་ཚོགས་འཇིགས་པར་བྱེད་པ་བསམ་གྱིས་མི་ཁྱབ་པ་ རབ་ཏུ་འདུས་སོ། ། དེ་ནས་བཅོམ་ལྡན་འདས་ཀྱིས་གདུག་བྱེད་ཆེན་པོའི་འཁོར་དེ་དག་རབ་ཏུ་འདུལ་བར་མཁྱེན་ནས། དུར་ཁྲོད་ཆེན་པོའི་དཀྱིལ་འཁོར་མངོན་པར་སྤྲུལ་པར་མཛད་དེ། ནམ་མཁའི་དབྱིངས་ཀྱི་དཀྱིལ་འཁོར་དག ། གཟུགས་སུ་བརྙན་པ་རབ་ཏུ་འཇིགས། ། སྒྲ་ནི་མི་སྙན་དྲག་ཅིང་གཏུམ། ། དྲི་ནི་མི་ཞིམ་རུལ་མྱགས་གསུང་། ། རོ་ནི་ཁ་སྐྱུར་ཚ་བར་བྲོ། ། རེག་བྱ་ཚ་རྩུབ་མི་གདུག་སྤྱོད། ། ཞེ་སྡང་ཆེན་པོའི་མེ་འབར་ཞིང་། །

ང་རྒྱལ་ཀེང་རུས་བྲག་ཏུ་གཏམས། ། གཏི་མུག་མུན་ནག་རབ་ཏུ་འཐིབས། ། འདོད་ཆགས་ཁྲག་གི་ ཆུ་ཆེན་འབྲུག ། ཕྲག་དོག་རླུང་ནི་རབ་ཏུ་འཁྲུགས། ། སྟི་ར་ཆེན་པོའི་ལོངས་སྤྱོད་ལ། ། སྟག་གཟིག་གཅན་གཟན་ཅེ་སྤྱང་དང་། ། ཀཱང་ཀ་དུར་བྱ་འདབ་ཆགས་ཚོགས། ། ཤ་ཟ་ཁྲག་འཐུང་རུས་པ་འཇོམས། ། བམ་དང་རུལ་དང་མྱགས་པ་དང་། ། བྱེ་དང་ བྲལ་དང་གཞིག་པ་དང་། ། ཟོས་དང་འཐོར་དང་རབ་ཏུ་འཐོར། ། བྲུལ་དང་ཟགས་དང་བརླག་པ་དང་། ། རྩོད་དང་རྒོད་དང་གླལ་བ་དང་། ། འཇིགས་ཤིང་གདུག་དང་རྔམ་པ་དང་། ། རོལ་བའི་ལོངས་སྤྱོད་རབ་ཏུ་སྤྲུལ། ། ཀུན་ཀྱང་གདུག་པའི་སེམས་འཆང་ ཞིང་། ། གསོད་གཅོད་ཤག་གཏུབ་ལུས་ཀྱི་ལས། ། ཚིག་རྩུབ་བརླང་བའི་ང་རོར་འབྱིན། ། ཁྲོས་པའི་བརྟུལ་ཞུགས་དྲག་པོ་ཡིས། ། མ་ལུས་འདུལ་ཞིང་ཚར་གཅོད་པའི། ། མངོན་པར་གཅོད་ལ་རབ་ཏུ་བཀོད། ། འདི་ལྟར་མཐོང་ཞིང་སྣང་གྱུར་པ། ། ཀུན་རྫོབ་ཙམ་ དུ་སྣང་བ་ལས། ། སེམས་ཅན་གཅིག་གི་བ་སྤུ་ལ། ། ཅུང་ཟད་གནོད་པ་ཡོད་མེད་དེ། ། རང་གི་རྣམ་རྟོག་བདེ་བར་སྤྱོད། ། ངེས་པའི་དེ་ཉིད་ཁོ་ནའོ། ། ཆོ་འཕྲུལ་ཆེན་པོ་བསྟན་པའི་གླེང་གཞིའི་ལེའུ་སྟེ་དང་པོའོ། ། ། །

དེ་ནས་སངས་རྒྱས་ཐམས་ཅད་ཀྱིས། ། རྡོ་རྗེ་ འཆང་བའི་རྒྱལ་པོ་ཡིས། ། དུས་གསུམ་རྒྱལ་བ་སྲས་བཅས་ཀྱིས། ། ཐོག་མ་མེད་པའི་དུས་ཉིད་ནས། ། མ་ལུས་བསྟན་པ་བསྲུང་མཛད་པའི། ། གསང་བདག་ཆེན་པོར་དབང་བསྐུར་ཕྱིར། ། གནོད་སྦྱིན་ལག་ན་རྡོ་རྗེ་འཆང་། ། ལྔ་བརྒྱའི་གྲོགས་དང་བཅས་པ་ཡིས། ། སོ་སོ་གཙོ་ཆེན་མདུན་ཉིད་ནས། ། རང་གི་སྟན་ལས་རབ་ཏུ་ལངས། ། མངོན་དུ་སྤྱོད་པའི་སྤྲུལ་པ་མཛད། ། ཐུགས་ཀྱི་གནས་པའི་ས་བོན་ལས། ། ཕྱོགས་བཅུ་ནམ་མཁའི་མཐར་ཐུག་ཀུན། ། ལྗང་ནག་རླུང་གིས་རབ་ཏུ་དཀྲོགས། ། ཁྲག་གི་རྦ་ཀློང་འཁྲུག་ཅིང་གཡོ། ། ཤ་རུས་གཏམས་པའི་ས་གཞི་ལས། ། བསྐལ་པའི་མེ་རི་རབ་ཏུ་འབར། ། བྷནྡྷ་འབར་བའི་གཞལ་ཡས་ཁང་། ། གདུག་ཅིང་འཇིགས་སུ་རུང་བ་ནི། ། སྟོབས་ཆེན་རྣམས་ཀྱང་ཉེར་མི་སྤྱོད། ། ཕྲིན་ལས་མ་ལུས་རྫོགས་མཛད་ལུས། ། ཕྱི་ནང་མཐའ་དབུས་ཀུན་ལ་ཁྱབ། ། བསྟན་ལ་རབ་སྡང་ཕ་རོལ་པོས། ། ཕུང་པོ་ཞབས་ཀྱི་གདན་དུ་བཏིང་། ། འོད་གདན་གཙང་མ་གསུམ་དང་བཅས། ། ཆེ་བ་མཆོག་གི་སྐུར་མཛད་དེ། ། རིག་ཅན་མཐར་གནས་དབུར་མནན་ཅིང་། ། སྟོང་པ་{བཅྭ་,བཅོ་}བརྒྱད་དག་ཅིང་སྣང་། ། ཕྱག་གིས་དྲེགས་པའི་ལྷ་བརྒྱད་བསྒྲལ། །

བྷནྡྷ་ཙིཏྟ་གཡས་གཡོན་བསྣམས། ། ཐུགས་ཀྱི་དབང་རྟགས་དང་པོས་གཟུང་། ། ཐུགས་རྗེ་མི་འགྱུར་མཐིང་ནག་མདོག ། མི་འཇིགས་རིག་པར་མནན་པའི་ཞབས། ། བདུད་བཞི་ཕྱོགས་དང་བཅས་པ་གནོན། ། མ་ལུས་དབང་དུ་སྡུད་པའི་ཕྱིར། ། རལ་པ་ཁམ་ནག་སྲིད་རྩེར་ འབར། ། འབར་བའི་སྤྱན་གྱིས་ཁམས་གསུམ་གཟིགས། ། གདངས་པའི་ཤངས་ཀྱིས་སྲིད་གསུམ་རྔུབ། ། ཤངས་ཀྱི་རླུང་སྒྲས་སྟོང་གསུམ་ཁྱབ། ། རྣོ་དཔལ་ཚེམས་ཀྱིས་གདུག་པ་སྒྲོལ། ། ལྗགས་འདྲིལ་རྐན་སྒྲ་དྲག་པོར་བརྡེབས། ། ཁྲོ་གཉེར་འོད་ཀྱིས་དབང་དུ་སྡུད། ། དཔའ་བའི་ཆས་ཀྱིས་རབ་ཏུ་བརྒྱན། ། བསྲུང་བའི་ལྷ་རྣམས་སྐུ་ལ་རྫོགས། ། སྟོབས་ལྡན་དེ་ཉིད་མཉེས་མཛད་པའི། ། འབྱུང་བ་ཆེ་ལ་དབང་སྒྱུར་མ། ། དབུ་གསུམ་ཕྱག་དྲུག་ཞབས་བཞི་མ། ། གྲི་གུག་ཏྲི་ཤཱུལ་བདུད་རྩི་གཡས། ། བྷནྡྷ་ཞིང་ཆེན་གཡང་གཞི་གཡོན། ། གཙོ་བདག་ཚུལ་འཛིན་རབ་ཏུ་སྒེག ། དགྱེས་མཛད་རབ་ཏུ་རོལ་པ་ལས། ། འདུལ་བྱེད་སྤྲུལ་པ་རབ་ཏུ་འཕྲོ། ། ཕྱོགས་བཅུ་འཇིག་རྟེན་ཁམས་ཀུན་གྱི། ། གཏུམ་པོ་གདུག་པའི་ཚུལ་འཆང་བའི། ། དྲག་སྔགས་བདག་པོ་མ་ལུས་ཀུན། ། རང་ཉིད་སོ་སོའི་འཁོར་བཅས་པའི། ། བརྟེན་དང་གནས་ལ་རེ་རེར་སྣང་། །

རང་དབང་མེད་པར་འདུད་ཅིང་གཡོ། ། ཨོྃ་བཛྲ་སརྦ་དུཥྚཱ་ན་ཨེ་ཀ་ཡ་མ་མ་བྷེ་ར་བྷ་གྲྀ་ཧྞ་ཧཱུྃ་ཕཊ། བདུད་དང་གཤིན་རྗེ་སྲིན་པོ་དང་། ། གནོད་སྦྱིན་ལྷ་དང་ལོག་ལྟ་ཅན། ། རྨུ་རྗེ་ཆེ་དང་ཕྱི་རོལ་ཕྱོགས། ། གདུག་བྱེད་མཁའ་ལ་རྒྱུ་བ་དང་། ། བྱོལ་ སོང་ལྟོས་འགྲོ་ལུས་འཛིན་དང་། ། ང་རྒྱལ་འཆང་དང་སྤྲུལ་པ་ཅན། ། མཐའ་འཁོབ་གནས་མཐའ་མ་ལུས་རྒྱུ། ། ལྷ་བདུད་མི་མ་ཡིན་གྱི་གནས། ། ཁ་བ་ཅན་དུ་ཕྱོགས་ཤིང་བསྲེག ། ལས་ཀྱི་ལུས་ཀྱི་ནུས་པ་འབྱིན། ། མ་ལུས་པ་རྣམས་ཐམས་ཅད་ཀུན། ། ཤུགས་ དག་རླུང་གིས་བསྐྱོད་པ་བཞིན། ། རབ་ཏུ་འདར་ཞིང་མདུན་དུ་གནས། ། ཐུགས་རྗེ་བདག་པོས་དགོངས་མཛད་ཀྱང་། ། གཏུམ་རྔམ་འཇིགས་བྱེད་ཆེན་པོའི་སྐུ། ། གསང་ཚིག་དྲག་པོ་གསུང་གི་སྒྲས། ། མ་ལུས་ཚིམ་པར་བཀའ་སྩལ་པ། ། ཨེ་མ་འཇིག་རྟེན་ཁམས་ ཀུན་གྱི། ། དྲག་སྔགས་བདག་པོ་དྲེགས་པ་ཅན། ། སྔོན་གྱི་རྡོ་རྗེ་འཆང་ཆེན་དང་། ། རང་གི་བཀའ་ལས་མ་འདའ་བར། ། ཁྱེད་རྣམས་རང་གི་འཁོར་དང་བཅས། ། སོ་སོའི་ལུས་དང་བཏགས་པའི་མིང་། ། རིགས་དང་བརྟེན་དང་བྱེད་པའི་ལས། ། སྡེ་དང་ཆ་ལུགས་ལོངས་སྤྱོད་རྣམས། ། འཇིགས་བྱེད་གནས་འདིར་མྱུར་དུ་སྟོན། །

ཁྱེད་རྣམས་འདི་ལས་འདའ་བྱེད་ན། ། ང་ཡི་སྲོག་གི་དམ་ཚིག་གིས། ། ཁྱེད་ཀྱི་ལུས་སེམས་སྲོག་དང་བཅས། ། མ་ལུས་གཏན་ནས་བརླག་པར་བྱ། ། ཞེས་བཀའ་སྩལ་ནས། དྲག་སྔགས་ ཀྱི་ཚོགས་འདི་དག་ཀྱང་བཀའ་སྩལ་ཏོ། ། ཨོྃ་སརྦ་དུཥྚཱནྟ་ཀ་ཧ་ན་ད་ཧ་པ་ཙ་ཧཱུྃ་ཕཊ། ཡ་མ་རཱ་ཛ་མྲྀ་ཏ་ག་སྱ་མ་མ། ཀྵེ་ཏ་མཱ་ར་ཡ་ཧྲིང་ཧྲིང་ཛཿཛཿ། དུ་ཕྲག་རཱ་ཛ་དུག་དུན་མ་ཏིང་མཱ་ར་ཡི་ཧྲིང་ཧྲིང་ཛཿ ཛཿ། རཀྴ་རག་མོ་མ་མ་ར་ཏི་ཀ་མཱ་ར་ཡ་ཧྲིང་ཧྲིང་ཛཿཛཿ། ཡཀྵ་ཨ་པ་སྨ་ར་རཀྴ་མི་ རུ་ཤམ་པ་མཱ་ར་ཡ་ཧྲིང་ཧྲིང་ཛཿཛཿ། མ་ཧཱ་དེ་བ་ཤྭ་ར་རཱ་ཛ་མཱ་ར་ཡ་ཧྲིང་ཧྲིང་ཛཿཛཿ། མ་ཏྲངྐ་རུ་ཏྲ་ཀཱ་ལ་མཱ་ར་ཡ་ཧྲིང་ཧྲིང་ཛཿཛཿ། མུན་མུན་པ་ཙ་ཙིཏྟ་མཱ་ར་ཡ་ཧྲིང་ཧྲིང་ཛཿཛཿ། ཏིརྟི་ཀ་མ་ཏེ་མ་ཧཱ་དེ་བ་མཱ་ར་ཡ་ཧྲིང་ཧྲིང་ཛཿཛཿ། བིཥྚུ་ཕི་ཏྲ་རོཀྟི་ཛ་མཱ་ར་ཡ་ཧྲིང་ཧྲིང་ཛཿཛཿ། ནཱ་ག་རཱ་ཛ་ ཀུ་མ་ཙནྡྡྷ་མཱ་ར་མ་ཧྲིང་ཧྲིང་ཛཿཛཿ། རཱ་ཛ་བྷུ་ལོང་ཨེ་ས་ཡ་མཱ་ར་ཡ་ཧྲིང་ཧྲིང་ཛཿཛཿ། མ་ཧཱ་ཁུ་ལོ་ས་བྷོ་མཱ་ར་ཡ་ཧྲིང་ཧྲིང་ཛཿཛཿ། བཛྲ་སཱ་དྷུ། སོ་ཨཾ་ཙ་མཱ་ར་ཡ་ཧྲིང་ཧྲིང་ཛཿཛཿ། ཨ་བྷི་ཤུ་ཏྲཾ་ལི་མཱ་ར་ཡ་ཧྲིང་ཧྲིང་ཛཿཛཿ། ནྲྀ་ཧུར་ཐུམས་ཛཿ།

ཤ་ཏྲུྃ་མཱ་ར་ཡ་རྦད་ཅེས་བརྗོད་ ཅིང་སྐུ་འཇིགས་བྱེད་འབར་བ་ནི་སླར་ཡང་འཇིགས་སུ་རུང་བར་བསྟན་ཏོ། ། སངས་རྒྱས་ཐམས་ཅད་ཀྱི་ཞིང་ཁམས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་མ་རུངས་པའི་སྒྲ་ཆེན་པོ་དང་། འོད་དང་གློག་འབར་བ་དང་རླུང་གི་ཤུགས་དྲག་པོས་གང་ བར་གྱུར་ཏོ། ། བདུད་དང་གཤིན་རྗེ་ལ་སོགས་པའི་ཕྱོགས་བཅུའི་དྲེགས་པ་ཅན་རྣམས་ཀྱང་རང་རང་གི་འཁོར་དང་བཅས་ཏེ། རབ་ཏུ་འདུས་ནས་རང་རང་གི་རིགས་ཀྱི་དྲེགས་པ་དག་ཕུལ་ཏེ། བཅོམ་ལྡན་འདས་ཉིད་ཀྱི་མདུན་དུ་ཉེ་བར་གྱུར་ནས། བཀའ་རབ་ཏུ་བསྒྲུབ་ པར་བརྩོན་པར་གྱུར་ཏོ། ། དྲག་སྔགས་འདུས་པ་རྩ་བའི་རྒྱུད་ལས་བྱིན་བརླབས་ཆེན་པོས་དབང་དུ་བསྡུ་བའི་ལེའུ་སྟེ་གཉིས་པའོ། ། ། ། དེ་ནས་བཅོམ་ལྡན་འདས་ལ་འཇིག་རྟེན་གྱི་ཁམས་ཀྱི་བདུད་ཀྱི་རྒྱལ་པོ་མེའི་ཁ་རླངས་ཅན་ཞེས་བྱ་བ། མདོག་ནག་པོ། ཁ་ནས་མེ་འབར་བ། ལག་ན་ཁྲམ་ཤིང་དང་བདུད་ཞགས་ནག་པོ་ཐོགས་པ། ཞིང་ལྤགས་ཀྱི་གོས་གྱོན་པ། ཡུམ་བདུད་མོ་ནག་མོ་ཁྲག་འཛག་མ་ཞེས་བྱ་བ། ལག་ན་ཁྲམ་ཤིང་དང་ཐོད་པ་རློན་པ་ཐོགས་ཤིང་། གོས་སུ་མི་ལྤགས་གྱོན་པ། བདུད་རྟ་ནག་པོ་ལ་ཁྱོ་ ཤུག་གཉིས་ཆར་ཞོན་ནས།

བཅོམ་ལྡན་འདས་ཀྱི་སྤྱན་སྔར་བདུད་ཀྱི་རིགས་ཀྱི་ལྷའི་ཚོགས་དང་བཅས་ནས་རིངས་པར་ལྷགས་སོ། ། དེ་བཞིན་དུ་འཆི་བདག་གཤིན་རྗེ་ཞེས་བྱ་བ། ། མདོག་ནག་ཐོད་པ་གྲི་གུག་འཛིན། ། ཆུང་མ་གཤིན་རྗེ་ཟ་བྱེད་མ། ། གྲི་གུག་ཐོད་པ་ཕྱག་ གིས་འཛིན། ། ཁྱོ་ཤུག་ཞིང་ལྤགས་རློན་པ་བགོས། ། མ་ཧེ་ཆུ་གླང་ཞོན་ནས་ནི། ། གཤིན་རྗེ་ཕོ་མོའི་ཚོགས་དང་བཅས། ། འགལ་བྱེད་གཟོར་ཞིང་མྱུར་དུ་ལྷགས། ། སྲིན་པོ་གསོད་བྱེད་ཡབ་ཡུམ་ཡང་། ། མདོག་ནག་ཞིང་གི་པགས་པ་བགོས། ། རལ་གྲི་གྲི་གུག་གཡས་ ཀྱིས་བཟུང་། ། གཡོན་གྱིས་མི་མགོ་ཐོད་ཁྲག་ཐོགས། ། སྟག་དང་སེང་གེ་ཞོན་པ་སྐྱོད། ། སྲིན་པོའི་ཚོགས་བཅས་མྱུར་དུ་འཁོད། ། གནོད་སྦྱིན་གང་བ་བཟང་པོ་དང་། ། ཆུང་མ་ཤ་ཟ་རལ་གཅིག་དང་། ། མཐིང་ནག་མགྱོགས་བྱེད་རྟ་ལ་ཞོན། ། ཞིང་ལྤགས་གྱོན་ཏེ་ཕྱག་ གཉིས་ཀྱིས། ། རལ་གྲི་དར་ནག་ཞིང་ལྤགས་བཟུང་། ། གནོད་སྦྱིན་ཚོགས་དང་བཅས་ཏེ་འཁོད། ། དྲག་སྔགས་བདག་པོའི་སྡེ་དཔོན་ཏེ། ། ཤར་ལྷོ་ནུབ་བྱང་ཕྱོགས་དག་གི། ། གནས་སུ་གཙོ་ལ་འདུད་ཅིང་འཁོད། ། དབང་ཕྱུག་ཆེན་པོ་ཞེས་བྱ་བ། ། འཇིག་རྟེན་ལྷ་ ཡི་སྔགས་དག་གིས། ། དཀར་པོ་བ་དན་ཤེལ་གྲི་ཐོགས། །

དར་དཀར་གོས་ཅན་གནམ་རུ་ཞོན། ། དྲེགས་པ་ལྷ་ཡི་བདུད་འཁོར་བཅས། ། རིངས་པར་བཅས་ཏེ་ཤར་ཕྱོགས་འཁོད། ། ཐར་པ་ནག་པོ་ཞེས་བྱ་བ། ། མདོག་ནག་མཆོད་གཏོར་དུག་ཐུན་འཛིན། ། དོམ་ ནག་ཞོན་ཏེ་ཞིང་ལྤགས་བགོས། ། སྡེ་དང་བཅས་ཏེ་ལྷོ་ཕྱོགས་འཁོད། ། རྨུ་རྗེ་ནག་པོ་ཞེས་བྱ་བ། ། དར་ནག་དང་ནི་ཞགས་པ་ཐོགས། ། བེར་ནག་གྱོན་ཏེ་རྨུ་རྟ་ཞོན། ། རང་གི་སྡེ་དང་ནུབ་ཕྱོགས་འཁོད། ། མུ་སྟེགས་ནག་པོ་ཆེན་པོ་ཡང་། ། ཁ་ཊྭཱཾ་ དང་ནི་ཏྲི་ཤཱུལ་བཟུང་། ། མི་ལྤགས་བགོས་ཞིང་མ་ཧེ་ཞོན། ། རང་གི་སྡེ་བཅས་བྱང་དུ་འཁོད། ། ཁྱབ་འཇུག་རོག་ཏི་ཞེས་བྱ་བ། ། མཐིང་ནག་ཁྲམ་ཤིང་དགྲ་སྟ་འཛིན། ། སྤྲིན་ནག་བགོས་ཤིང་འབྲུག་སྔོན་ཞོན། ། གཟའ་བདུད་འཁོར་བཅས་སྟེང་ཕྱོགས་འཁོད། ། ཀླུ་རྒྱལ་སོག་མ་མེད་ཅེས་པ། ། གོས་ནག་སྦྲུལ་ལྤགས་ན་བཟའ་ཅན། ། བུམ་པ་དང་ནི་རུས་སྦལ་འཛིན། ། ཆུ་སྲིན་ཞོན་ཏེ་ཀླུ་ཚོགས་བཅས། ། འོག་གི་ཕྱོགས་སུ་འཁོད་ཅིང་འདུག ། གཞན་ཡང་ལི་བྱི་ལག་དགུ་དང་། ། ཐེ་སེ་གཙོ་དང་ཡམ་ཤུད་ཀྱི། ། སོ་སོའི་ སྔགས་ཀྱི་བདག་པོ་དག ། དཀར་སེར་དམར་པོའི་མདོག་ལྡན་ཞིང་། ། ཤེལ་གྲི་ཐོགས་ཤིང་ལག་དགུ་འགྱེད། །

དར་དམར་མདུང་{རིངས་,རིང་}ལག་གིས་འཛིན། ། རྟ་དཀར་བྱ་རྒོད་ར་སྐྱེས་དང་། ། རྟ་དམར་ཞོན་ཏེ་ཞིང་ལྤགས་བགོས། ། སོ་སོའི་སྡེ་དང་གཡོག་བཅས་ ཤིང་། ། ཕྱོགས་ཀྱི་སྒོ་བཞིར་གནས་བཅས་འཁོད། ། གཞན་ཡང་ལྷ་ཀླུ་གནོད་སྦྱིན་དང་། ། མ་མོ་གཤིན་རྗེ་སྲིན་པོ་བདུད། ། རུ་ཏྲ་མུ་སྟེགས་འགོང་ཐེ་དང་། ། གིང་རྨུ་གཟའ་དང་རྒྱན་བྲན་སྨན། ། སྣང་སྲིད་ལྷ་སྲིན་དྲེགས་པ་ཅན། ། དེད་དཔོན་ཆེན་པོ་རྣམས་ཀྱི་འཁོར། ། ཕྱི་དང་ནང་དང་གསང་བ་དང་། ། ཡང་གསང་དང་ནི་དྲག་པོ་དང་། ། བཏགས་ཤིང་ཆགས་པ་སྨས་པ་དང་། ། ལས་བྱེད་ཤན་པ་ཐོར་ཤོང་དང་། ། ཆེ་གྲགས་རྩལ་དང་མ་མོ་དང་། ། མུན་ཐིབས་སྟོང་འཁྲུགས་སྲོག་གཅོད་དང་། ། གླེན་ཞིང་དབང་ཆེ་ལ་སོགས་རྣམས། ། བཅོམ་ ལྡན་རྡོ་རྗེ་འཆང་བ་ཡི། ། བཀའ་བཞིན་རྗེས་སུ་སྒྲུབ་བྱེད་པས། ། མ་ཐོགས་དུར་ཁྲོད་གནས་ཆེན་དུ། ། འདར་ཞིང་མྱུར་བའི་ཤུགས་དང་བཅས། ། རང་གི་ནུས་པ་རབ་བསྟན་ཏེ། ། བཀའ་ཉན་གསུང་བསྟོད་རྗེས་འབྲངས་གནས། ། དེ་ལྟར་འཁོད་པའི་འཇིག་རྟེན་ པའི་དྲེགས་པའི་བདག་པོ་སྔགས་ཀྱི་སྟོབས་དང་ལྡན་པ་དེ་དག་གིས། རང་རང་གི་འཁོར་དང་། རིགས་ཀྱི་སྡེ་དང་། མཐུ་དང་།

ལོངས་སྤྱོད་ཀྱི་ཁྱད་པར་དག་ཀྱང་། བཅོམ་ལྡན་འདས་ཀྱི་སྤྱན་སྔར་བསྟན་ནས། འདི་སྐད་ཅེས་ཀྱང་གསོལ་ཏོ། ། བཅོམ་ལྡན་འདས་རྡོ་རྗེ་ འཛིན་པ་ཆེན་པོ། ། བདག་ཅག་ལ་སོགས་པ་འཇིག་རྟེན་གྱི་ཁམས་ན་གནས་པའི། མ་རུངས་པའི་ཚོགས་གདུག་པ་ཅན་སྡང་བ། གནོད་པ་དང་། ཤུགས་པ་དང་། འཚོ་བ་དང་རྩོད་པའི་བསམ་པ་དང་ལྡན་ཞིང་། བྱམས་པ་དང་། སྙིང་རྗེ་དང་། ཕན་པའི་སེམས་སྐྱེ་བར་ མི་ནུས་པ་རྣམས་ཀྱིས་ཏེ། རང་རང་གི་ཁམས་དང་། བྱེད་པ་དང་། རིགས་དང་། ལས་ཀྱི་བྱ་བ་དང་། རྟེན་དང་། ནུས་པ་དང་། དབང་གི་ཁྱད་པར་དག་དང་། མཐུན་པའི་བསྟན་པ་མི་བཟད་པ་སྟོབས་དང་ལྡན་པ་དག་བཀའ་སྩལ་བར་གསོལ་ཞེས་གསོལ་ཏོ། ། དྲག་སྔགས་ འདུས་པ་རྩ་བའི་རྒྱུད་ལས་ཚོགས་ཀྱི་དཀྱིལ་འཁོར་རབ་ཏུ་བཀོད་པའི་ལེའུ་སྟེ་གསུམ་པའོ། ། ། ། དེ་ནས་རྡོ་རྗེ་འཛིན་པ་ཡིས། ། སྐུ་ཡི་ཆེ་བ་རབ་སྟོན་ཅིང་། ། གསུང་གི་སྙིང་པོས་གནད་སྐུལ་ཏེ། ། ཐུགས་ཀྱི་དགོངས་པ་གཙོར་མཛད་ནས། ། འཇིག་རྟེན་དྲེགས་པ་ ཅན་དང་མཐུ་སྟོབས་ཅན། ། འདུས་པའི་འཁོར་ལ་བཀའ་སྩལ་པ། ། ཧཱུྃ་འཇིག་རྟེན་དྲེགས་པའི་ཚོགས་ཆེན་རྣམས། ། ང་ཡི་བཀའ་བཞིན་ཉན་པར་བགྱི། ། ང་ནི་ཆོས་སྐུ་བདེ་ཆེན་ཏེ། །

ཡེ་ནས་མ་བཅོས་ལྷུན་གྱིས་གྲུབ། ། སྣང་བའི་སྐུ་ལ་དངོས་པོ་མེད། ། ཡེ་ཤེས་ སྐུ་སྟེ་སྐུ་ཡི་མཆོག ། ང་ནི་སྔགས་གསུང་མཐུ་ཆེན་ཏེ། ། ཡེ་ནས་ཐ་སྙད་སྒྲ་དང་བྲལ། ། བརྗོད་པའི་གསུང་ལ་འཛིན་པ་མེད། ། མ་འགགས་གསུང་སྟེ་གསུང་གི་དཔལ། ། ང་ནི་བདེན་པའི་ཐུགས་མཆོག་སྟེ། ། ཡེ་ནས་མཚན་མེད་ཡང་དག་བྲལ། ། གཉིས་མེད་ཐུགས་ ལས་རྩོལ་བ་མེད། ། སྐྱེ་མེད་ཐུགས་ཏེ་ཐུགས་ཀྱི་དཔལ། ། ང་ནི་ཡོན་ཏན་ཚོགས་ཆེན་ཏེ། ། ལྷུན་གྱིས་གྲུབ་ཅིང་བསམ་མི་ཁྱབ། ། སྨོན་མེད་དགོས་པ་མ་ལུས་འབྱུང་། ། དངོས་གྲུབ་ཆེན་པོ་བསྐྱེད་པའི་གཞི། ། ང་ནི་ཕྲིན་ལས་མཛད་པའི་སྟེ། ། ཡོངས་རྫོགས་བརྩོན་ པའི་བདག་ཉིད་ཅན། ། ཞི་རྒྱས་དབང་དང་མངོན་དུ་སྤྱོད། ། སྣ་ཚོགས་གཞན་དོན་ལྷུན་གྱིས་རྫོགས། ། འཇིག་རྟེན་སྔགས་བདག་དྲེགས་པ་ཅན། ། གཙོ་ཆེན་དབང་སྒྱུར་ཁྱེད་རྣམས་ཀྱང་། ། ང་དང་དུས་གསུམ་སངས་རྒྱས་ཀྱི། ། ཐུགས་དང་ཡེ་ཤེས་ གཉིས་སུ་མེད། ། གསུང་དང་དབྱེ་བ་ཡོད་མ་ཡིན། ། སྐུ་ལ་སོ་སོར་མི་བལྟ་སྟེ། ། ཡོན་ཏན་མཉམ་པ་ཉིད་དུ་རྫོགས། ། ཕྲིན་ལས་གཅིག་སྟེ་ཐུན་མོང་བསྒྲུབ། ། ཐོག་མ་མེད་ནས་ད་ལྟའི་བར། ། ཉོན་མོངས་ལས་ཀྱི་རྒྱུ་འབྲས་ཀྱིས། །

གནས་ངན་ལེན་གྱི་ཕུང་པོར་སྨིན། ། ང་རྒྱལ་ དྲེགས་པའི་ལུས་ངག་སེམས། ། སྟོབས་དང་ནུས་པ་དཔག་མེད་རྫོགས། ། ཆེ་བཙན་དབང་ཕྱུག་ལྡན་གྱུར་ཀྱང་། ། ཡང་དག་ངེས་པའི་དོན་མ་རྟོགས། ། དོན་དམ་བདེན་པ་ཁོང་མི་ཆུད། ། སྤྲོས་བྲལ་དགེ་ལ་བློ་མ་ཕྱོགས། ། རང་རིག་རྒྱལ་བའི་སྟོབས་མ་རྙེད། ། སྐྱེ་མེད་དབྱིངས་ ཀྱི་རྩལ་མ་ཤར། ། བདེ་ཆེན་གནས་ཀྱི་གདེང་མ་ཐོབ། ། མཚོན་མེད་བཅུད་ཀྱི་རོ་མ་མྱོས། ། ཆོས་ཉིད་སྐུ་ཡི་གཟུགས་མ་མཐོང་། ། ཡེ་ཤེས་གློང་གི་སྒོམ་ཕྱེད། ། དེ་བས་རིགས་ཀྱི་བུ་རྣམས་ཀྱིས། ། རང་གི་གནས་ལ་རབ་ཏུ་རྟོགས། ། ལུས་ལ་བདག་ཏུ་ཡོད་མ་འཛིན། ། ངག་ ལ་བརྗོད་པར་མ་སྨྲ་ཅིག ། སེམས་ལ་དངོས་པོར་གང་མ་རྟོག ། གནས་ཡུལ་རིགས་ཁམས་སྡེ་དང་དཔུང་། ། བརྟེན་རྫས་ལོངས་སྤྱོད་དབང་སྐལ་རྣམས། ། ང་དང་ང་ཡིར་གཟུང་བྱ་མིན། ། ཐུན་མོང་དང་ནི་ཐ་དད་གཅིག ། དེ་དག་མ་ལུས་སྟོང་པ་སྟེ། ། སྟོང་པ་ཉིད་ཀྱང་དེ་དག་ གོ། ། དེ་ལས་གུད་ན་གཞན་མེད་དེ། ། གཞན་ལས་གུད་ནའང་དེ་མེད་ཅིང་། ། མ་སྐྱེས་མ་འགགས་མཚན་ཉིད་མེད། ། མ་ཕྲི་མ་བསྣན་མ་བསླད་ཅིང་། ། མ་བཅོས་མ་བསྒྱུར་མ་བྱུང་ལ། ། མ་སྐྱེས་མ་བསྒྲུབས་མ་བཤད་པའི། །

དོན་ཆེན་དེ་ནི་རང་ཉིད་ལས། ། ཕྱི་ནང་སྔ་ཕྱི་ སྟེང་དང་འོག ། ཕྱོགས་མཚམས་འཁོར་འདས་ལུས་དང་སེམས། ། ཀུན་ནས་རྙེད་པ་མ་ཡིན་ཏེ། ། འདི་ནའང་ཡོད་པ་མ་ཡིན་ནོ། ། ཤ་ཁྲག་པགས་དང་རུས་པ་དང་། ། སྙིང་དང་གློ་བ་སྣོད་རྣམས་དང་། ། དབང་པོ་ཡན་ལག་བཅས་པ་ལ། ། བདེ་ཆེན་དམ་པ་དེ་མི་གནས། ། དེ་ལས་གཞན་ནའང་གནས་མིན་ཏེ། ། གནས་མ་གྲུབ་ལ་གནས་ཞེས་བརྗོད། ། གནས་ཡོད་མཉམ་ན་དེར་རྟོགས་ཤིག ། ཅི་འདྲ་ཅི་ཞིག་ཇི་ལྟ་བུ། ། གང་ནས་འོངས་ཤིང་གང་དུ་སོང་། ། གང་ན་འདུག་ཅིང་ཅི་ཞིག་བྱེད། ། དབྱིབས་དང་ཁ་དོག་མིང་དང་མཚན། ། རིགས་དང་ཁམས་ལ་རབ་ཏུ་རྟོགས། ། དེ་ལ་དེ་ཡིས་དེར་བལྟས་པས། ། མཐོང་བ་མེད་པ་བལྟ་བ་ཡི། ། གང་ལ་གང་གིས་གར་བསྒོམས་པས། ། བསྒོམ་དང་བྲལ་ལ་སྒོམ་ཞེས་བྱ། ། ཅི་ལ་སུ་ཞིག་སྤྱིར་སྤྱོད་པས། ། སྤྱོད་དགུ་མི་གནས་སྤྱོད་པ་ཆེ། ། སུ་ལས་སུས་ཐོབ་ཅི་ བསྒྲུབས་པས། ། མ་གྲུབ་རང་གནས་འབྲས་བུ་སྟེ། ། མ་ལུས་མེད་ཅིང་རྣམ་པ་ཡི། ། ཡོན་ཏན་ཡོངས་རྫོགས་དབང་ཕྱུག་གོ། ། ཞི་དང་རྒྱས་དང་མངོན་དུ་སྤྱོད། ། དབང་དུ་བསྡུ་བ་ཕྲིན་ལས་ཡིན། ། རང་ལ་རྫོགས་ཤིང་རང་གིས་གྲུབ། ། ཐག་ཆོད་པ་དང་བསྟན་པ་དང་། །

ཚད་ ལྡན་མཐར་ཕྱིན་ལ་བཟླ་དང་། ། འདས་དང་མ་འདས་སྟོན་པ་དང་། ། བཤད་དང་ཉན་དང་སྡུད་པ་དང་། ། གནས་དུས་ཡོན་ཏན་སྐྱོན་རྣམས་ནི། ། རང་གི་དེ་ཉིད་རྟོགས་པས་འགྲུབ། ། ཅེས་བཀའ་སྩལ་ཏོ། ། དྲག་སྔགས་འདུས་པ་རྩ་བའི་རྒྱུད་ལས་དོན་དམ་པའི་གནས་ཉེ་ བར་བསྟན་པའི་ལེའུ་སྟེ་བཞི་བའོ། ། ། ། དེ་ནས་རྡོ་རྗེ་འཛིན་པ་ཡིས། ། དགོས་པ་ཆེན་པོ་འདི་གསུངས་ཏེ། ། ཡེ་ནས་མ་བྱུང་མ་སྐྱེས་པའི། ། ཆོས་ཉིད་དོན་གྱི་སྙིང་པོ་ནི། ། གཟུང་འཛིན་མཐའ་བྲལ་དོན་རྟོགས་ཏེ། ། ང་བདག་འཛིན་པའི་རྣམ་རྟོག་གིས། ། དྲེགས་ཤིང་གཟིར་བའི་རུ་ཏྲ་དེ། ། མ་བསྒྲལ་བ་ནི་ཉེས་པ་སྟེ། ། ཐབས་དང་ཤེས་རབ་སྙིང་རྗེ་གསུམ། ། མཐུན་ཞིང་མཚུངས་ལྡན་སྲས་ཀྱིས་བསྒྲལ། ། དམ་པའི་དོན་དེ་མ་རྟོགས་པར། ། དངོས་པོར་སྤྱད་པས་འཁོར་བར་ལྟུང་། ། མཁས་རྟོགས་ལྡན་པས་སྤྱད་པ་ཡིས། ། འཕགས་ པ་མཉེས་ཤིང་སེམས་ཅན་སྒྲོལ། ། ཚོགས་ཉིད་རྫོགས་ཏེ་སྐུ་གསུམ་ཐོབ། ། རྣམ་རིག་མཐོང་བས་ལ་ཐག་བཅད། ། བརྟུལ་ཞུགས་དྲག་པོས་བསྒྲུབ་པ་བརྩམ། ། དབང་དུ་བསྡུ་དང་གདུལ་བའི་ཕྱིར། ། འཇིག་རྟེན་ལས་ཀྱིས་བསྡུས་པའི་རྒྱུད། ། ང་དང་སྟོན་པ་རྣམས་ ཀྱིས་བཤད། །

ཆོས་དབྱིངས་རང་གནས་དུར་ཁྲོད་དུ། ། རིག་པ་འཛིན་པ་རྣམས་ཀྱིས་ནི། ། སངས་རྒྱས་བསྟན་པའི་དོན་དུ་སྡུད། ། སྙིགས་མ་རབ་ཏུ་བདོ་བའི་དུས། ། བསྡོད་ཅིང་བཙུགས་ལས་ལྟོས་པའི་ཆོས། ། སྐྱོན་དང་ཡོན་ཏན་ཚུལ་དུ་འབྱུང་། ། བསྟན་པ་འཇིག་བྱེད་ལས་ངན་ཅན། ། དྲག་སྔགས་སྟོབས་ཀྱིས་བསྒྲལ་བྱས་ནས། ། རྫོགས་པའི་སངས་རྒྱས་ཐོབ་པར་འགྱུར། ། དཀྱིལ་འཁོར་གནས་པའི་རྟེན་ཡིན་ནོ། ། ལྷ་དང་སྔགས་དང་ཏིང་ངེ་འཛིན། ། རྫས་རྣམས་རྒྱུ་དང་རྐྱེན་དུ་འགྱུར། ། ལིང་ག་ཉའོ་དམིགས་ པའི་རྟེན། ། མིང་རུས་བྱང་བུས་རྣམ་ཤེས་དང་། ། བླ་ཚེ་འཁོར་བའི་རྟེན་ཡིན་ཏེ། ། འགུགས་འདྲེན་གྱིས་ནི་དེ་དག་འགུགས། ། ཕོ་ཉས་ལས་ཀུན་སྒྲུབ་པར་བྱེད། ། སྔགས་དང་རྫས་ཀྱི་དཔལ་སྐྱེད་ཅིང་། ། ཐུན་རྫས་རྣམས་ཀྱིས་མྱོས་པ་དང་། ། རེངས་ལྐུགས་མཚོན་འབེབས་ རྡུལ་དུ་རློགས། ། གནད་དུ་འབེབས་ཤིང་སྙིང་ནས་འདྲེན། ། ལྷ་དང་འབྱེད་ཅིང་རྩ་བ་གཅོད། ། བྱང་ཆུབ་སེམས་ཀྱི་དངོས་པོ་ནི། ། དོན་པོ་ཁྲག་གི་ལན་བུའི་མགོ། ། ཀུན་གཞི་ཏིལ་འབྲུ་ཙམ་ཞིག་གནས། ། རྩ་བ་རླུང་གནས་འདྲ་བས་ཏེ། ། ཕུར་བ་མེ་སྦལ་ལྟ་བུ་ཡིས། ། བསྡུས་ཤིང་བསྲེགས་ཏེ་གཅད་པ་ཡིས། །

དམིགས་པ་རྟེན་དང་བྲལ་བར་བྱས། ། བཀྲག་དང་གཟི་མདངས་རང་ལ་འདུས། ། ཕྲིན་ལས་རྣམ་བཞིས་གཟི་བ་ལ། ། དགེ་སྡིག་ངོ་བོ་ཉིད་དུ་མཉམ། ། ལྟ་སྤྱོད་ལྡན་པས་ཞིང་བཅུས་ཏེ། ། ཕ་རོལ་བླ་མེད་གནས་སུ་བསྒྲལ། ། བར་མ་དོ་ཡི་རྣམ་ཤེས་ནི། ། ཧཱུྃ་དང་ཕཊ་ཀྱི་འཕྲོ་འདུ་ཡིས། ། སྦྱང་དང་སྤར་བའི་ལས་རྣམས་བྱ། ། ཕྱོགས་བཅུ་རྒྱལ་བའི་སྲས་སུ་བསྐྱེད། ། ཕུང་པོ་ལྷག་མ་ཙམ་ཉིད་ནི། ། རྟེན་གསུམ་གྱིས་ནི་རབ་ཏུ་སྦྱང་། ། ཆོས་སྐུའི་གཟུགས་བརྙན་བསྟན་པར་བྱ། ། འདིས་ནི་ཕ་རོལ་བླ་ ན་མེད། ། སྤྲུལ་པ་དུས་གསུམ་སངས་རྒྱས་དང་། ། རྒྱལ་སྲས་བྱང་ཆུབ་སེམས་དཔའ་ཡི། ། སྤྱོད་པ་རླབས་ཆེན་སྤྱད་པའོ། ། ཞེས་བཀའ་སྩལ་ཏོ། ། དྲག་སྔགས་འདུས་པ་རྩ་བའི་རྒྱུད་ལས་སྒྲོལ་བའི་ཏིང་ངེ་འཛིན་གྱི་དམིགས་པའི་ལེའུ་སྟེ་ལྔ་པའོ། ། ། ། དེ་ནས་རྡོ་རྗེ་ འཛིན་པ་ཡིས། ། ལས་ཀྱི་བྱེ་བྲག་འདི་གསུངས་ཏེ། ། ཐོག་མར་འདི་ལ་ཤིས་པའི་གནས། ། དུར་ཁྲོད་ཆུ་གླིང་རི་ཡི་སུལ། ། ཁྲོས་ཤིང་གདུག་པའི་གནས་དེ་རུ། ། རབ་ཏུ་མནག་ཅིང་གདེང་ལྡན་པས། ། དམ་ཚིག་ལྡན་པའི་སྒྲུབ་པོ་སྟེ། ། ཡོངས་སུ་རྫོགས་པའི་སློབ་ མ་ཡིས། ། སྔོན་དུ་བླ་མ་མཉེས་བྱས་ཤིང་། །

ལྷག་པའི་ལྷ་ཉིད་སྟོབས་དང་ལྡན། ། རྡོ་རྗེ་འཛིན་པ་ཧེ་རུ་ཀ། ། ཉེ་དང་ལྡན་པ་གཉིས་སུ་མེད། ། ཚད་དང་ལྡན་པར་གྱུར་པ་སྟེ། ། ཡང་དག་ངེས་པའི་རྟགས་མཐོང་ནས། ། རབ་ཏུ་འབད་པར་བྱ་བ་ནི། ། སྨིན་འབྱོར་གདུག་ཅིང་ ཤིས་པའི་ས། ། ལས་ལ་མངག་པ་དེ་དག་ལ། ། དྲེགས་པ་གཙོ་འཁོར་དམིགས་པའི་རྟེན། ། འདོམ་གང་ལ་སོགས་ཚད་དང་ལྡན། ། ལྟེ་བ་ལས་ནི་འཁོར་ལོའི་རྩིབས། ། བཞི་འམ་དྲུག་གམ་བརྒྱད་དུ་འགོད། ། བར་ཁྱམས་ཕྱོགས་བཞིར་སྒོ་བཞིར་བཅས། ། རིམ་པ་ གསུམ་གྱི་ཐོད་ཕྲེང་ལྡན། ། རང་གི་རིགས་ལ་སྔགས་པ་ཡི། ། དབྱིབས་དང་ཁ་དོག་རྒྱན་དང་རྟགས། ། ཐམས་ཅད་ལྡན་པ་ཉིད་དུ་བྱ། ། དྲེགས་པ་ཅན་རྣམས་སྐུ་ཡི་རྟེན། ། བྲིས་སམ་བརྐོས་སམ་བརྩིགས་པ་དག ། རང་གི་གནས་སུ་མཛེས་པར་དགོད། ། གསུང་གི་ སྙིང་པོའང་དེ་བཞིན་ནོ། ། ཐུགས་རྟེན་རང་རང་ཕྱག་ཆ་འམ། ། སྔོན་ནས་བསགས་པའི་རྫས་ཡིན་ནོ། ། རང་སྔགས་བསགས་པའི་འཁོར་ལོ་དང་། ། མཐུན་གཟུགས་སྲོག་གི་རྒྱལ་མཚན་རྣམས། ། ནང་དུ་མཚོན་པའི་རྟེན་དུ་གཟུགས། ། དེ་དག་ཙིཏྟ་སོ་སོ་རུ། ། དམིགས་པའི་ སྙིང་པོ་དྲིལ་ཏེ་གཞུག ། གསང་ཞིང་སྦས་པའི་རྟེན་དུ་འགྱུར། ། དེ་ཡི་བྱང་ཤར་ཕྱོགས་མཚམས་སུ། །

ང་ཡིས་སྔར་བཤད་རྒྱུད་ཉིད་ལ། ། ཨེ་དབྱིབས་བཞི་དང་བརྒྱད་ཅུ་གཉིས། ། ཁྲུ་གང་འཛུབ་གང་ཐུར་དུ་བརྐོ། ། གདུག་ཅིང་དྲག་པོའི་རྫས་ཀྱིས་བྱུག ། གདུག་ཅིང་ བསྲེག་པའང་དེ་ཡིས་སོ། ། དེ་ཉིད་དགོད་པའི་རྫས་རྣམས་ནི། ། རྒྱུད་མེད་གཟུགས་ངན་ཀ་པཱ་ལ། ། སེང་ལྡེང་གསེར་ཤིང་ཡན་ལག་སྐྱེས། ། དཔལ་ལྡན་དྲག་པོའི་ཕུར་པ་དང་། ། ཤེལ་ནག་གནམ་རུ་གནག་པོ་དང་། ། གི་ལིང་དཀར་དང་གདོང་དམར་དང་། ། ཟླ་མི་གཅིག་དང་ སྲིད་ཤིང་དང་། ། ཙ་ར་ཀ་དང་མགྲིན་སྙན་དང་། ། ས་སྤྱོད་ཆུ་སྤྱོད་རྣམས་ཀྱི་ལུས། ། ཕྱི་ནང་བར་དང་གསང་བས་བརྒྱན། ། བསྲེག་ཆེན་སྤྱི་ཡི་མཉེས་པའི་རྫས། ། རྒྱན་ལྡན་གཟུགས་དང་རྔ་གླིང་སྒྲས། ། བསུང་ཆེན་དྲི་དང་ཤ་ཁྲག་རོ། ། ཚ་རྩུབ་རེག་དང་འབྲུ་ བཅུད་བཤོས། ། ཤ་ཆེན་དམ་རྫས་བདུད་རྩིའི་ཚོགས། ། རབ་ཏུ་བསྟར་ཞིང་འབད་པས་སྦྱར། ། དཔའ་ཞིང་རྟུལ་ཕོད་སྐྱེས་བུ་ཡིས། ། ང་ཡི་སྔོན་གྱི་ཕྲིན་ལས་བཞིན། ། ཁྲོ་ལ་ཁྲོས་པས་ཞི་མཛད་དེ། ། ཐ་མས་གནས་པའི་འབྱུང་ཆེན་ལྔ། ། དྲག་པོ་སྔགས་ཀྱི་འབྱུང་བར་ བསྒོམ། ། ཀེང་རུས་འབར་བའི་རི་རབ་བམ། ། དུར་ཁྲོད་འཇིགས་པའི་གཞལ་མེད་ཁང་། ། བྷན་དྷ་གནས་རིགས་གསུམ་གྱིས་བརྩིགས།

། སྟི་ར་གསར་རྙིང་ཚོགས་ཀྱིས་གཏམས། ། རཀྟ་དམར་པོ་བྲུབ་ཅིང་འབབ། ། ཚིལ་ཆེན་དུད་པ་འཁྱིལ་ཞིང་འཕྱུར། ། དབང་པོ་དོན་ སྙིང་འཕྱོ་ཞིང་འབྲུལ། ། བདུད་རྩི་བཤང་གཅི་དྲི་བསུང་ལྡན། ། ཡན་ལག་ཉིང་ལག་རྐང་ཞིང་སྙིལ། ། ཤུན་དང་པགས་པ་བརྒྱངས་ཤིང་འཕྱར། ། ཕྱོགས་བཞི་མཚམས་དང་སྟེང་དང་འོག ། གཅུས་དང་འཕྱང་བ་བསྐུམ་དང་བརྒྱངས། ། རྒྱལ་མཚན་དང་ནི་ཟ་ར་ཚགས། ། བ་དན་བླ་རེ་ལྷབ་ལྷུབ་དང་། ། ཕུར་པ་དང་ནི་ལྟབ་མ་དང་། ། ཡོལ་ཀོ་ཀ་མ་ལ་གཏམས་ནི། ། རབ་ཏུ་མཛེས་པའི་རྒྱན་གྱིས་བརྒྱན། ། གཞལ་ཡས་འབར་བ་དེ་འདྲ་བ། ། རབ་ཏུ་སྔགས་པ་འདི་ལས་བཤད། ། དྲེགས་པའི་བདག་པོ་ཡུམ་དང་བཅས། ། སྦྱོར་ཞིང་དགོས་པ་དེ་ ཉིད་ཀྱིས། ། བདག་གི་རང་བཞིན་ཡོངས་སུ་བསྐྱེད། ། འཕྲོ་དང་ཆས་ཀྱི་ཁྱད་པར་དང་། ། བསྡུ་དང་རང་གི་གནས་སུ་བརྟག ། སྐུར་གྱུར་གང་གི་མཚན་ཉིད་ངོ་བོ་དང་། ། བྱང་ཆུབ་སེམས་ཀྱི་བྱ་བ་ཡིས། ། ཡུམ་དང་བཅས་པ་ཡོངས་སུ་རྫོགས། ། དེ་ཡི་ལས་ཀྱང་སྔར་བཞིན་དུ། ། རྒྱལ་མཛད་རང་གི་ཕྱག་རྟེན་དུ། ། དམིགས་པ་མྱུར་ལྷགས་དེ་ཡི་འཁོར། ། བདུད་དང་གཤིན་རྗེ་སྲིན་པོ་དང་། ། གནོད་སྦྱིན་དྲག་པོའི་ཀླུ་དང་ལྷ། །

རང་རང་ཆུང་མར་བཅས་པ་དག ། ངས་བཤད་བཞིན་དུ་འཇིགས་པར་བསམ། ། སྒོ་བཞིར་གནས་པ་དེ་དག་སྟེ། ། ལྷ་ དང་མ་མོ་རྒྱལ་པོ་གིང་། ། བཙན་འགོང་རྨུ་དང་མུ་སྟེགས་དང་། ། རང་གི་སྡེ་དང་དཔུང་དུ་བཅས། ། མ་ལུས་དྲེགས་པ་ཅན་གྱི་ཚོགས། ། འདི་ལས་རབ་བརྗོད་གང་ཡིན་པ། ། དེ་ཉིད་དུ་ནི་གསལ་བར་བྱ། ། ང་ཡི་སྐུ་དང་གསུང་དང་ཐུགས། ། ཡེ་ཤེས་རིགས་ཀྱི་དབང་བསྐུར་ ཞིང་། ། བྱིན་གྱིས་བརླབས་ནས་རྒྱས་བཏབ་སྟེ། ། དེ་ལ་རང་བཞིན་གནས་པ་བསྟིམ། ། ཡོངས་རྫོགས་སྐུ་ཡིས་བསྟན་པ་བསྒྲུབ། ། ཕྱག་འཚལ་མཆོད་པ་འབུལ་ཞིང་བསྟོད། ། རབ་ཏུ་མཉེས་པ་རྒྱ་ཆེར་བྱ། ། ཕྱི་དང་ནང་དང་གསང་བ་ཡིས། ། བསྡུ་དང་སྦྱོར་དང་སྒྲོལ་བ་ དང་། ། གནས་དང་རིང་དང་རིམ་པ་དང་། ། བསྐྱེད་དང་དབབ་པ་མཉེས་པ་ཡི། ། གནས་ལུགས་ལྷུན་གྲུབ་མ་བཅོས་པས། ། དྲག་སྔགས་རོལ་བ་མ་འགགས་སྤྱོད། ། རང་གི་ལས་ལ་སྦྱར་བ་ནི། ། བདུད་ཀྱི་ཁྲམ་དང་གཤིན་རྗེའི་ལྟོ། ། སྲིན་པོའི་དམར་དང་གནོད་སྦྱིན་བྱད། ། ལྷ་ཡི་ཆད་དང་མ་མོའི་རིམས། ། གཟའ་ཡི་ཀི་ཀང་ཀླུ་ཡི་དུག ། ཚེ་ཆད་པ་དང་ཁྲི་མོན་བཅུག ། གཅན་གཟན་འཛུམས་དང་ལྕགས་སྒྲོག་ཚུད། ། ནད་དང་མཚོན་ཉིད་ཁོང་ཞུགས་དང་། །

དུག་འཐུངས་ཐོག་བབས་བཞིན་དུ་དྲག ། ཐར་ཞེས་བྱ་བ་གདགས་སུ་མེད། ། བདུད་ ནི་མ་བརྟགས་སྲོག་ལ་རྒོལ། ། གཤིན་རྗེ་འཁོར་བའི་འཁོར་ལོས་གཅོད། ། སྲིན་པོ་རལ་གྲིའི་སོ་ཡིས་འགེམས། ། གནོད་སྦྱིན་གནམ་ལྕགས་ཐོག་གིས་འཇོམས། ། ལྷ་ནི་འདོད་པའི་མདུང་གིས་སོར། ། མ་མོ་དཔག་མེད་མདའ་བཞིན་འབིགས། ། གཟའ་བདུད་ སྟོབས་ཆེན་སྒྱོགས་ཀྱིས་བརྡེག ། ཀླུ་ནི་ས་འོག་རལ་གྲི་སོགས། ། ཐམས་ཅད་འདུལ་ཞིང་གཅོད་པའི་སྔགས། ། མུན་པ་གླིང་འཁྲུགས་བདུད་ཀྱི་སྐད། ། ངུ་འབོད་ལྟ་བུ་གཤིན་རྗེ་སྟེ། ། རོ་ལེན་དུར་བ་སྲིན་པོས་(འགྲེན,འགྲན)། ། ལྕེ་མདུད་དྲག་པོ་གནོད་སྦྱིན་ནོ། ། བཀའ་ཆད་ དྲག་སྩལ་ལྷ་ཡི་དམོད། ། ངུ་འབོད་གདུང་བ་མ་མོ་སྟེ། ། འབྲུག་སྒྲ་གློག་འབྱིན་གཟའ་བདུད་དོ། ། ཀླུ་ཡིས་སྦྲུལ་ནག་དུག་གིས་འཇོམས། ། འཇིག་རྟེན་ལྷ་སྲིན་རང་སྒྲ་ཡིས། ། ཕལ་པ་རྣམས་ལ་དམོད་པར་བྱེད། ། དེ་ནི་དྲག་སྔགས་དམོད་པའོ། ། ཞེས་བཀའ་སྩལ་ཏོ། ། དྲག་སྔགས་འདུས་པ་རྩ་བའི་རྒྱུད་ལས་དམོད་པ་ཉེ་བར་བསྒྲུབ་པའི་ལེའུ་སྟེ་དྲུག་པའོ། ། ། ། དེ་ནས་རྡོ་རྗེ་འཛིན་པ་ཡིས། ། སོ་སོའི་དྲག་སྔགས་དམོད་པ་བསྟན། ། ཕུང་བཤིག་བདུད་ཀྱི་དྲག་སྔགས་ནི། །

རབས་ཆང་ནག་པོའི་ཐོད་པ་རུ། ། ཤེལ་ ནག་སྙིང་དུ་ཉའོ་སྩལ། ། དུར་ཁྲོད་རས་ནག་རྒྱ་ཡིས་གདབ། ། ཚོན་སྣ་ལྔ་འམ་ནག་པོས་བཅིངས། ། གྲི་ལྕགས་སྦུག་མ་སྲོག་རྩར་གཞུག ། ཡུངས་ཀར་ཡུངས་ནག་ཏིལ་ནག་དང་། ། སྐེ་ཚེ་ཤང་ཚེ་ཟི་ར་དང་། ། ཟངས་ལྕགས་རྡོ་ཡི་ཕྱེ་མ་དང་། ། དུག་ཁྲག་ངར་དང་བཅས་པ་ རྣམས། ། མུ་སུ་ར་ཡི་ཐོད་པར་བསྡུ། ། བདུད་ཀྱི་སྲོག་ཏིག་སྔགས་ཀྱིས་མངག ། བདུད་པོ་ནག་པོ་ཁ་མུན་དེ་བ་མི་ལ་ཆོ། ཀ་ལ་མུ་ཏྲི་མཱ་ར་ཡ། དགྲ་བོ་སྙིང་ལིང་ཙིཏྟ་རྦུད། ནྲྀ་བཟླུམ་ཁྱིགས། བྲམ་བྲམ་རོ་ལ་འདུས། ཟེར་སྤྲུགས། རོ་སྤྲུགས། བདུད་རྗེས་ཆོད། བདུད་ མོས་རོལ། བདུད་བུས་གཏོར། བྃ་ཁྱིགས། པྲ་མ་ནི། ཤ་ཏྲུྃ་མཱ་ར་ཡ་རྦད། མུན་པ་གླིང་ཁྲུགས་ཞེས་བྱ་བ། ། མ་འོངས་བདུད་ཀྱི་རང་སྐད་དེ། ། རྟག་ཏུ་བརྗོད་ཅིང་སྦུག་མར་བྲབ། ། གང་ལ་དམིགས་པ་དེ་མྱུར་དུ། ། སྣང་སྲིད་བདུད་ཀྱིས་སྲོག་ནས་འདྲེན། ། མི་ནག་གོ་མཚོན་ བཅས་པ་དང་། ། སྔགས་ནག་བུད་མེད་མོན་དང་རྡོ། ། ཁྱི་ནག་རྟ་ནག་བྱ་ནག་དང་། ། རྒོད་ནག་དྲེ་ནག་ཤེལ་ནག་དང་། ། རི་ནག་མཚོ་ནག་ཤེལ་ནག་ཚོགས། ། དམག་དང་འཁྲུག་དང་འཐབ་པ་དང་། ། ཁྲིད་དང་གསོད་དང་ཤ་བ་དག །

ལས་བྱེད་གྲུབ་པའི་རྟགས་སུ་འགྱུར། ། དེ་ནས་ཉའོ་བསྟབས་ཤིང་བསྒྲལ། ། གྲི་མཚོན་ཕུར་བ་རྣམས་ཀྱིས་གཏུབ། ། ལྷག་མ་བདུད་རྩི་ཤ་ཁྲག་སྦྱར། ། ཀུ་ཀུ་ནག་པོའི་ཟས་སུ་སྦྱིན། ། རོལ་པར་མི་བྱེད་བསྐྱར་ལ་བསྒྲུབ། ། རུ་ཏྲས་མྱོས་ཤིང་འཐིབ་ནས་འཆི། ། འཆི་བདག་གཤིན་རྗེའི་དྲག་སྔགས་ནི། ། རྒྱུད་མེད་ཕོ་ མོ་ཀ་པཱ་ལ། ། ཟ་མ་ཏོག་ཏུ་ཁ་སྦྱར་ལ། ། ནང་དུ་དེ་ཉིད་ཙིཏྟ་གཞུག ། ཕོ་ཐོད་སྟེང་ནས་སྤྱི་བོར་ཕུག ། བཅིང་དང་དགབ་པ་དྲང་བ་དག ། སྔར་བཤད་རྫས་ཀྱིས་བྲབ་ཅིང་བརྡེག ། ཡ་མ་མེ་ཏཀྵེ། ར་ཙ་ས་ཏོ་མེ། རུ་ཙ་ན་ཡོ་ནི། རོ་མ་ཙ་ནི། ས་མ་རཱ་ཛ། མུ་ཀ་སྙིང་ཁྲག་རྩལ་ རྦད། ཡ་མ་དབུགས་ལ་རྡུབས། རོ་ཙ་ཡ་མ་རཱ་ཛ། རཱ་ཛ་བྃ་རིལ་རྦད། ཡ་མ་རཱ་ཛཿཧྲི་སྙིང་གོང་ཆོད། ཡ་མ་སྙིང་། ཡ་མ་ཁྲག ། ཡ་མ་དུ་བྃ་རིལ་རྦད། གཤིན་རྗེ་བསྡུས་ཤིང་དྲིལ་བའི་སྔགས། ། རབ་ཏུ་བསྔགས་ཏེ་ཙིཏྟར་བྲག ། ཤ་ཁྲག་ཆེན་པོས་མཉེས་པར་བྱ། ། གསོད་བྱེད་ནག་པོའི་ཚོགས་རྣམས་ཀྱིས། ། དོན་སྙིང་རློན་པར་སྟེར་བ་དང་། ། སྙིང་དང་ཐོད་པ་འཕར་བ་འབྱུང་། ། དེ་ནས་ལས་ལ་སྦྱར་བྱས་ན། ། གང་ལ་དམིགས་པ་མྱུར་དུ་སྒྲོལ། ། གཏུམ་ཁྲོ་སྲིན་པོའི་དམོད་པ་ནི། །

མྱུར་ཤིའི་ཐོད་པར་དེ་སྙིང་ནང་། ། དམིགས་པ་རྣམས་ ཀྱི་གཟུགས་བརྙན་དེ། ། མིང་སྔགས་ལྡན་པ་བཙལ་བྱས་ཏེ། ། ལེ་བརྒན་ཁ་དོག་དར་གྱིས་དྲིལ། ། སྔོ་དམར་སྐུད་པའི་དྲ་བར་གཞུག ། སྟི་ར་གསར་པ་ཁ་ཕྱེ་ལ། ། དབང་པོ་དོན་སྙིང་ནང་གྲོལ་གྱི། ། སྲིན་པོ་སྐང་ཞིང་དམོད་པ་བཟླས། ། རག་ཤ་ སྲིན་པོ་ས་མུན་ཛཿ རག་ཤ་རུ་ཏྲ་ཧུར་ཧུར་བྷྱོ། རུ་གཉན་ནག་པོ་དགྲ་ལ་བྷྱོ། དགྲ་བོ་མུ་ལེ་ཤི་ནི་སོད་སོད། ཧབ་ལེ་ཧོབ་ལེ་ཁ་ཐུན་བྷྱོ། རག་ཤ་ཛཿ ཏྲི་ཏ་ཛཿདུ་རུ་དུ་རུ་ཤན་ཛཿ། རག་ཤ་རྦད། ནྲྀ་མཱ་ར་ཡ་སོད། དམོད་པ་རྫས་ལ་བཟླས་ཤིང་བརྡེག ། མི་ནག་ཤན་པའི་ཚོགས་རྣམས་ཀྱིས། ། ཁྲིད་ དང་གསོད་དང་དོན་སྙིང་སྟེར། ། ལས་ལ་སྦྱར་བ་ཚུལ་བཞིན་གྱིས། ། དགྲ་བོའི་དོན་པོ་མྱུར་དུ་སྒྲོལ། ། དྲག་སྔགས་གནོད་སྦྱིན་དྲག་སྔགས་ནི། ། རྟ་དཀར་སྙིང་དང་ཐོད་པ་ནི། ། ཉའོ་གཞུག་པའི་སྣོད་དུ་བསྔགས། ། རག་ཆེན་ལ་ཕུག་མུ་ས་ལ། ། སྙིང་སྣ་ཁྲག་སྣ་ སྦྱར་བས་མཆོད། ། གནོད་སྦྱིན་སྲོག་ཏིག་དམོད་ལ་བརྗོད། ། ཡཀྵ་བ་ཧུ་ད་རི་ཛཿ མ་ག་ལ་བག་ཤ་ཛཿ རུ་རུ་མ་རུ་ཏྲ་མ་ཏི་ཛཿ ཡཀྵ་སྙིང་ལ་ཤད་ཤད་དུ་ཛཿ། ཡཀྵ་སྲོག་ལ་བྲེད་ཐུཾ་ཛཿ། མིང་ཤར་ཚོགས་དང་འོད་དང་སྒྲ། །

རླུང་དམར་དག་དང་བུ་ཡུག་འོང་། ། གསང་བའི་རྫས་ཀྱིས་དྲག་ཏུ་བརྡེག ། ལྷག་མ་བསྲེགས་ཤིང་རླུང་གིས་གཏོར། ། དེ་ཉིད་ཁྲག་ཏུ་སྐྱུགས་ཏེ་སྒྲོལ། ། དྲག་རྩལ་ལྷ་ཡི་དྲག་སྔགས་ནི། ། ལྷ་གཡག་དཀར་པོའི་སྙིང་ནང་དུ། ། བརྣག་པའི་གཟུགས་དང་མིང་རུས་བྲིས། ། སྔོན་དམར་སྐུད་པས་སྐེ་ནས་ གདགས། ། རྗེ་རིགས་ཐོད་པའི་ནང་དུ་གཞུག ། དར་དཀར་གྱིས་ནི་ཁ་བཅད་ལ། ། ཚོན་སྐུད་སྣ་ལྔས་བཅིང་བར་བྱ། ། བྱ་རྒོད་དར་མའི་སྒྲོ་རྩ་ནི། ། སྲོག་རྩར་བཅུག་ལ་དཀྱིལ་དུ་བརྟོལ། ། དཀྱིལ་འཁོར་མདའ་གང་གྲུ་བཞི་ལ། ། དབུས་སུ་གྲུ་གསུམ་ ཐུར་དུ་བྲུ། ། ལྷ་རྡོ་གསུམ་གྱི་སྒྱེད་པོ་ལ། ། གོང་གི་ཐོད་པ་གཞག་པར་བྱ། ། མཐུན་རྫས་བཤོས་གཙང་རྔོན་ཆ་དང་། ། རུ་དཀར་སྙིང་དང་ཤེལ་དཀར་སྙིང་། ། བྱ་དཀར་སྙིང་དང་རུ་མཚོན་དང་། ། བ་དན་དཀར་པོ་རྟེན་དུ་གཟུགས། ། ཡུངས་ཀར་སྔགས་ཀྱི་མདའ་ཆོག་ནི། ། ཐུན་ གྱི་རྫས་སུ་གཞག་པར་བྱ། ། དྲག་སྔགས་སྙིང་གི་ནང་དུ་བྲབ། ། སྟོབས་ལྡན་རྡོ་རྗེ་འཛིན་གསལ་བས། ། ལྷ་རྣམས་འདུས་པའི་སྔགས་རྣམས་སྦྲེང་། ། མ་ཧཱ་དེ་བ་ཏི་ཛཿཏི་ཛཿ། ས་མ་ཕྲ་མ་ན་རག་ཤ་ཀྃ་ཀ་ལ་ཡ་ཧཱུྃ། དེ་བ་རཱ་ཛ་མ་ཧཱ་ནི་ཛཿ།

དགྲ་བོ་མར་ཡ་ཐུན་རྦད་ཐུན་རྦད། ཤག་སེན་ཛཿཛཿ ཤག་སེན་ཛཿཛཿཧཱུྃ་ཧཱུྃ། ཙ་ཏུར་མུ་ཁ་རག་ཤ་མ་ན། ཀང་ཀ་མ་ཡ་ཧཱུྃ། མ་ཧཱ་དེ་བ་ཨ་མུ་ཀ་མཱ་ར་ཡ་སོད། འཇིག་རྟེན་གྲགས་པ་མཐུ་རྩལ་ཅན། ། ལྷ་ཡི་བོད་རྦད་གསད་གསུམ་དྲིལ། ། དྲག་ཏུ་བཟླས་ཤིང་སྙིང་ནས་བྲབ། ། རྟགས་ནི་རྒྱལ་པོ་རྗེ་དཔོན་དང་། ། སྐྱེས་པ་སྟག་ཆས་དར་མ་དང་། ། ཞུབ་ཅན་ཕོ་ཚོགས་འོང་བ་ནི། ། གསོད་གཅོད་བྱེད་དང་སྙིང་འབྱིན་དང་། ། དངོས་སུ་སྙིང་ཕྱུང་འཕང་བ་འོང་། ། རྟགས་བྱུང་སྙིང་ནས་ལིང་ག་དབྱུང་། ། མཚོན་གྱིས་གཏུབ་ལ་མེ་ལ་བསྲེག ། ཐལ་བ་ཉའོ་བྱས་ནས་ནི། ། ཐོད་པར་བཅུག་ལ་ལྷ་རྟེན་ ནམ། ། འཇིག་རྟེན་ལྷ་ཆེན་གནས་སར་མནན། ། ལྷ་ཡི་དལ་ཡམས་དགྲ་ལ་ཕེབས། ། ནད་བདག་མ་མོའི་དྲག་སྔགས་ནི། ། ནྲྀ་དྲིའི་མོ་ཡི་ཐོད་པ་རུ། ། དེ་ཡི་སྙིང་ནང་ལིང་ག་གཞུག ། མཐིང་ནག་དར་གྱིས་ཁ་གཅད་ལ། ། ཐོད་པ་ཚོན་སྐུད་ལྔ་ཡིས་བཅིངས། ། དཀྱིལ་འཁོར་མཐིང་ ནག་གྲུ་གསུམ་དབུས། ། ཐོད་པ་བཅུག་ལ་བསྒྲུབ་པར་བྱ། ། སྨུག་ནག་གསུམ་གྱི་སྙིང་ཁྲག་གིས། ། མ་མོ་འཁོར་དང་བཅས་པ་མཆོད། ། ཡུངས་ཀར་ཡུངས་ནག་སྐེ་ཚེ་སོགས། ། དྲག་པོའི་ཐུན་རྫས་ཚོགས་ཚད་ལ། །

མ་མོ་རྣམས་ཀྱི་དམོད་པའི་སྔགས། ། མ་མ་སྙིང་ཁ་རག ། མ་མ་སྙིང་ཁ་རག ། མ་མ་རཀྴ། མ་མ་རག་ཤ ། ཏྲག་རག་ཤ་སྙིང་ཁྲག་ལ་ཧུ་བས་ཛཿ སྙིང་ཁྲག་རྩ་ལ་དུན་དུན། ཏྲག་རག་ཤ་མ་མ་ཛཿ ཛཿ ངམ་ངམ་དགྲ་སྙིང་རྦད་བུ་ནན་མ་མ་ནྲྀ་སྙིང་ཙིཏྟ་ལ་ཐུན། ཏྲག་རག་ཤ་ཏྲ་རག་ཤ་མོ་ཐུན་ཐུན། མུགས་མུགས་མྱོགས་མྱོགས་ རྦད་རྦད་ཛཿཛཿམ་མ་ཐུན། སྙིང་ཁྲག་ཐུན། ཤ་ཏི་ཏ་མ་མ་རག་མོ། ས་མ་ཡ་བྷྱོ་བྷྱོ། མ་མོའི་སྲོག་ཏིག་བསྡུས་པ་ཡི། ། གསད་པ་ལས་ཀྱི་ངན་སྔགས་འདི། ། གྲི་ལྕགས་ལས་བྱས་སྦུ་གུ་འམ། ། བྱ་རྒོད་སྒྲོ་རྩའི་ནང་ནས་བསྔགས། ། མ་སྲིང་མོན་མོ་ཕལ་མོ་དང་། ། བྱི་མོ་ལ་ སོགས་བུད་མེད་ཚོགས། ། བྱ་ནག་རྒོད་ནག་ཚོགས་ཆེན་ལྷགས། ། དངོས་སུ་ཤ་དང་མགོ་སུག་སྟེར། ། ཙིཏྟ་དངོས་སུ་འཕར་བ་དང་། ། བསད་རྟགས་ཡོངས་སུ་རྫོགས་པ་དང་། ། སྙིང་ལ་ཕུར་བས་གདབ་ཅིང་བསད། ། དུག་ཤིང་མེ་ལ་སྦྱིན་སྲེག་བྱ། ། ཐུན་ཁྲག་ དམིགས་པའི་དགྲ་ལ་འཕང་། ། ཐལ་བ་བསྡུས་ལ་ཉའོ་བྱ། ། དུར་ཁྲོད་དབུས་སུ་གནས་པར་བྱ། ། རིམས་ནད་དག་གིས་དམིགས་པ་སྒྲོལ། ། དྲག་པོའི་གཟའ་ཡི་དྲག་སྔགས་ནི། ། མོན་པ་ནག་པོའི་ར་རོག་པོའི། ། ཐོད་པར་སྙིང་ནང་ལིང་ག་གཞུག །

སྲོག་རྩར་གྲི་ལྕགས་སྦུ་གུ་ གཞུག ། ཡུངས་ཀར་ཡུངས་ནག་ཟངས་ལྕགས་ཕྱེ། ། ཐུན་དུ་སྔགས་ཏེ་ཐོད་པར་བྲབ། ། མཱ་ར་པ་ཤ་མི་ཀི། དུ་རུ་དུ་རུ། མ་ཏི་ཛྭ་ལ་ཏི་ཛཿ ཙ་བ་མ་ནི། རུ་རུ་ར་ཧུ་ལ། ཨ་ཏྲ་ཏ་ཏྲ་པད་མ་ཤ་ར་ཤ་ར་ཤསྟ། ཨ་མུ་ཀ་མུ་ར་རུ་ཕཊ། ཏྲི་ལིང་ཀ་ཤངྐ་དུ་དྲི། ཛཿཛཿཡག་ཤ་ཐུན། བུམ་དྲིལ་ཤི་ནི་བྃ་བྷ་བ་ཧི། ཁ་ཡག་ཁ་དུན་ཏི། རུ་ཏི་ཤུ་ཏི་ཏི་ཏྲིག་ཤུ་ལ་པྲ་ཏི། མཱ་ར་ཡ་ཛཿ། དབང་ཆེན་གཟའ་ཡི་དྲག་སྔགས་འདི། ། དྲག་པོའི་རྫས་ལ་བསྔགས་ཏེ་བརྡེག ། ཤ་རུལ་ཁྲག་རུལ་བཙོས་དང་རྗེན། ། དཀར་གསུམ་དམར་གསུམ་རྫས་ཀྱིས་མཆོད། ། ཉི་ ཟླ་ཀླད་ལ་འཁོར་བ་དང་། ། མོན་པ་ནག་པོ་འོང་བ་དང་། ། སྦྲུལ་ཆེན་གཤོག་ཅན་འཁྱུག་པ་དང་། ། བར་སྣང་འཇའ་ཡིས་ཁེངས་པ་དང་། ། དགྲ་བོ་དངོས་སུ་ཁྲིད་ནས་འོང་། ། རྒོད་དང་{རི་དགས་,རི་དྭགས་}གསོད་པ་དང་། ། དོན་སྙིང་ནང་ཁྲོལ་སྟེར་ཞིང་རོལ། ། དེ་ལྟའི་གསོད་ རྟགས་རྫོགས་པ་དང་། ། སྙིང་དང་ལོང་ཀ་ཧོཾ་མེར་བསྲེག ། ཐུན་རྫས་དགྲ་ཡི་ཡུལ་དུ་གཏོར། ། ཐོད་པ་ཀླུ་ཡི་བརྟན་སར་སྦ། ། ཆུ་འཁྱགས་སེར་བ་དྲག་ཏུ་དབབ། ། ཧུར་ཐུམ་ནད་ཀྱིས་གློ་བུར་འཆི། ། ཁ་ལྐུགས་རྐང་ལག་རེངས་པར་འགྱུར། །

གདུག་པ་ ཀླུ་ཡི་དྲག་སྔགས་ནི། ། ལུང་གསུམ་འདུས་པའི་དབེན་གནས་སུ། ། སྟེགས་བུ་མཐིང་ནག་གྲུ་གསུམ་བྲུས། ། དགྲ་ཡི་ཕ་མེས་མགོ་བོ་འམ། ། ཡང་ན་མཛེ་ཅན་ཐོད་པ་རུ། ། དགྲ་ཡི་མིང་རུས་བྲིས་ཏེ་གཞུག ། གཙང་མའི་སྣོད་དུ་དཀར་གསུམ་དང་། ། མངར་གསུམ་ཀླུ་སྨན་ སྣ་ཚོགས་དང་། ། རྟག་ཏུ་མཆོད་ཅིང་མངག་པར་བྱ། ། ཨོྃ་ནག་པོ་ཏི་པ་ཙ་ཡ། ནཱ་ག་རཱ་ཛཿདགྲ་བོ་ཧེ་ཁུ་ལ་ཕེ་ཤན། ནཱ་ག་ཕོས་ཕོས། ཤིག་ཤིག ། ཧུ་ཡ་ཧུ་ཡ། ཏི་ཡ་ཏི་ཡ། ཏི་པ་ཙ་ཏི་པ་ཙ། ཨ་ཤ་ནག་པོ་ཏི་པ་ཙ་ཡ། ནཱ་ག་རཱ་ཛ་དགྲ་བོ་མཱ་ར་ཡ་རྦད། ཤག་ཏི་རྦད། སྲོག་ཏི་རྦད། སྙིང་ཏི་རྦད། སྙིང་ལ་རིལ་ཤམ་ཤམ་རྦད། ཨོྃ་ཤན་ནག་པོ་ཕེ་རག་ཨུ་ད་ནཱ་ག་རཱ་ཛ་ནཱན། ཐི་ལི་ནཱན། ཕོ་ལི་ནཱན། དྲག་ཏུ་བརྗོད་ཅིང་བསྒྲུབ་པ་ཡིས། ། མེ་ཆེན་འབར་དང་ཆུ་ཆེན་བྲུག ། བ་གླང་སྦལ་སྦྲུལ་སྡོམ་སྡིག་ཚོགས། ། ཤིང་གཅོད་ས་སྙིལ་བྲག་ རལ་སོགས། ། ལུས་ལ་ཤུ་བ་སྐྲང་ལོ་བྱུང་། ། སྟོབས་ལྡན་གཉེན་པོས་དྲག་ཏུ་གཅུན། ། དེ་ནས་བྱང་བལྟས་ཆུ་མིག་ཏུ། ། བ་ལིང་གཏང་ཞིང་བདེན་པ་བརྡར། ། ཐོད་པ་ལིང་གར་བཅས་པ་མནན། ། ཀླུ་རྒྱལ་འཁོར་དང་བཅས་ལ་གཏད། ། ཕུང་པོ་ལྷག་མེད་བཏང་བར་བསམ། །

གནས་སུ་ཕྱིན་ལ་བསྲུང་བར་བྱ། ། དགྲ་ནི་མཛེ་དང་རྨུགས་པས་འཆི། ། སྡེ་བརྒྱད་སོ་སོའི་དྲག་སྔགས་ཀྱིས། ། འཇིག་རྟེན་ལས་ཀྱིས་མནར་བ་ཡི། ། བསྟན་པའི་རུ་ཏྲ་གདུག་པ་ཅན། ། མ་ལུས་རྣམས་ཀྱི་གཤེད་དུ་འགྱུར། ། ཞེས་བཀའ་སྩལ་ཏོ། ། དྲག་སྔགས་འདུས་པ་ རྩ་བའི་རྒྱུད་ལས་དྲེགས་པའི་སྡེ་སོ་སོའི་ལས་ལ་སྦྱར་བ་དྲག་སྔགས་ཀྱི་ལེའུ་སྟེ་བདུན་པའོ། ། ། ། དེ་ནས་རྡོ་རྗེ་འཛིན་པ་ཡིས། ། འཇིག་རྟེན་དྲེགས་པ་ཅན་རྣམས་ཀྱི། ། སོ་སོའི་རིགས་དང་གཏན་ཚིགས་དང་། ། སྡེ་དང་ལས་ཀྱི་བྱེད་པ་བསྟན། ། སྔོན་གྱི་འཇིག་རྟེན་ ཁམས་འདི་ཉིད། ། ཕུང་པོ་ཉོན་མོངས་ལ་བརྟེན་ནས། ། ང་རྒྱལ་དྲེགས་པའི་དབང་གིས་མྱོས། ། རང་གཞན་ཀུན་ལ་འཚེ་ཞིང་རྩོད། ། གནས་ངན་ལེན་གྱིས་ཁ་ཁྲིད་བྱས། ། ལེགས་པའི་ལན་དུ་ཉེས་པར་སྤྱོད། ། མ་རིག་རྩ་བ་ཡན་ལག་གིས། ། གཏི་མུག་མུན་ཐིབས་བདུད་ དང་ཀླུ། ། ང་རྒྱལ་སྟོབས་ཀྱི་དྲེགས་པ་བདག ། ལྷ་དང་རྒྱལ་པོ་གོལ་སར་འགྱུར། ། ཕྲག་དོག་གཟའ་དང་གཤིན་རྗེའི་རིགས། ། འདོད་ཆགས་མ་མོ་གནོད་སྦྱིན་རིགས། ། ཞེ་སྡང་བཙན་དང་སྲིན་པོར་གོལ། ། སྲོག་ལུས་འབྲེལ་པས་བདུད་ཅེས་བྱ། །

{ཡི་དགས་,ཡི་དྭགས་}གཤིན་ རྗེ་རྡོག་རྣམས་རྗེ། ། ཕྲ་མོར་རྒྱུ་བ་སྣང་ཞིང་དྲེགས། ། དེ་ཡི་དོན་གྱིས་སྲིན་པོར་བྱུང་། ། གང་གིས་གནོད་པ་སྦྱིན་བྱེད་པའི། ། དེ་ཡི་རིགས་དང་མཚན་ཉིད་དོ། ། གང་ལས་བསྐྱེད་པ་མ་མོ་སྟེ། ། སྐྱོད་བྱེད་ནུས་པ་ལྷ་ཡིན་ནོ། ། གདུག་ཅིང་གཏུམ་པས་མི་འཆོར་བ། ། གཟའ་ཞེས་ བྱ་བར་བརྗོད་པ་ཡིན། ། བླུན་ཞིང་མྱོས་པས་ཀླུ་ཞེས་བྱ། ། འགྲོ་བ་རིགས་དྲུག་སོ་སོ་ལ། ། བདུད་དང་ལྷ་དང་ལྷ་མིན་ཏེ། ། གནོད་སྦྱིན་གཟའ་དང་རྒྱུ་སྐར་བཅས། ། རྒྱལ་ཆེན་རིགས་བཞིའི་ལྷ་ཡི་སྡེ། ། མ་མོ་སྲིན་མོ་མི་ཡི་སྡེ། ། གཤིན་རྗེ་{ཡི་དགས་,ཡི་དྭགས་}སྡེ་ཡིན་ཏེ། ། ཀླུ་ནི་བྱོལ་ སོང་སྡེ་ཡིན་ནོ། ། བདུད་རིས་ཕོ་དང་མོ་ཡི་རིགས། ། ཡེ་ནས་གནས་དང་བློ་བུར་བྱུང་། ། འཐབ་དང་མྱོས་དང་དྲེགས་པར་བྱེད། ། སྲེད་དང་ཆགས་པར་བྱེད་པ་སྟེ། ། གཤིན་རྗེ་ལས་དང་ཞི་བས་སྟེ། ། གཟུགས་ཅན་གཟུགས་མེད་དབང་ཅན་དང་། ། དབང་མེད་ཕྱི་དང་ ནང་ཁྱད་པར། ། ལས་ཀྱིས་རབ་ཏུ་བསྒྲིམས་པ་ཡི། ། སྲིན་པོ་ཤ་ཟ་རྒན་མོ་ཅན། ། སྤྲུལ་པ་དང་ནི་གཟུ་ལུམས་ཅན། ། རབ་ཏུ་རྒྱུ་དང་གཅིག་པུ་གནས། ། གནོད་སྦྱིན་གཙོ་དང་འཁོར་གྱིས་བརྟགས། །

གྲོལ་བ་དང་ནི་རང་རྒྱུད་དེ། ། ཐ་དད་རིགས་ནི་{བཅྭ་,བཅོ་}བརྒྱད་དེ། ། གནོད་ཅིང་འཚེ་བའི་བདག་ཉིད་ཅན། ། ལྷ་ནི་འདོད་པའི་གཟུགས་ཅན་དང་། ། གཟུགས་མེད་ལྷ་མ་ཡིན་དུ་གཏོགས། ། རབ་ཏུ་གདུག་རྩུབ་ཆེ་བས་ནི། ། ལྷ་མིན་མི་མ་ཡིན་དུ་གྲགས། ། གང་ལས་བྱུང་དང་གང་ལས་སྲིད། ། གང་གིས་བསྐྱེད་པའི་གཞིར་གྱུར་པ། ། མ་མོ་ཞེས་སུ་གྲགས་པ་སྟེ། ། ལས་དང་ཡེ་ཤེས་བསྡུས་ཤིང་ཕྱེ། ། ཕྲ་དང་རགས་པའི་ཁྱད་པར་གྱིས། ། ཆེ་ཆུང་གཅལ་དང་འཁོར་དུ་སྣང་། ། མཁའ་ལ་རྒྱུ་བའི་དྲག་ཤུལ་ཅན། ། ལས་ཀྱི་ཕུང་པོ་ཁོ་ནའོ། ། རྒྱལ་པོ་བླ་རྗེ་བྲམ་ཟེ་དང་། ། དམངས་དང་ གདོལ་པ་ཅན་རྣམས་ཀྱིས། ། ཉི་ཤུ་རྩ་ལྔའི་ཡན་ལག་འགྱུར། ། ཐ་དད་རིགས་ནི་སྡེ་ཡིན་ནོ། ། འདི་དག་ཐོག་མའི་ལས་ཀྱི་དངོས། ། དངོས་དང་རང་བཞིན་མཚན་ཉིད་ཀྱིས། ། མ་རིག་འཁྲུལ་པའི་གཟུང་འཛིན་བྱུང་། ། བདག་བལྟ་བག་ལ་ཉལ་དུ་གནས། ། གཡོ་ འགུལ་ཕྲ་མོའི་ཀུན་ནས་ལྡང་། ། འཁྲུག་ཅིང་འཚེ་དང་རྩོད་པར་ཤར། ། བསོད་ནམས་ལས་དང་དེ་མ་ཡིན། ། ལས་ཀྱི་མཐའ་གཉིས་གཡང་སར་ལྷུང་། ། གནག་ཅིང་མི་དགེ་ཟག་པར་བཅས། ། ཁ་ན་མ་ཐོ་ལུང་མ་བསྟན། ། ལོག་པ་ལུས་ངག་ཡིད་གསུམ་གྱིས། །

གནས་ ངན་ལེན་པའི་རྒྱུན་ཆགས་འཐུད། ། དུས་གསུམ་ཕྱོགས་དང་བཅས་པ་ཡི། ། རྗེས་སུ་འགྲོ་དང་བཟློག་པ་ཡིས། ། འཁོར་བ་བརྟེན་གཞི་དམ་པོ་བཙུགས། ། སོ་སོར་མ་རིག་སྲོག་ལ་གཅོད། ། ལོངས་སྤྱོད་འཕྲོག་ཅིང་རྣམ་པར་འཚེ། ། གཟི་མདངས་འབྱོར་པ་སྡེ་དང་ བཅས། ། གང་ཡིན་འཇོམས་ཤིང་རླག་ནུས་ལ། ། རྒྱུད་ལ་སྡུག་བསྔལ་སྐྱེད་བྱེད་པ། ། མ་རུངས་ཉེས་པ་འབྱིན་བྱེད་ལས། ། སྲོག་ལེན་ཚེ་འཕྲོག་གཅོད་དང་ཤ། ། མྱོས་འཐིབས་བྱི་ནད་རིམས་དང་ཡམས། ། གཅོག་འགྱེལ་གདུག་པའི་ནད་འབེབས་ཤིང་། ། རྨེ་དང་ འཁྲུག་པ་རྩོད་པ་དང་། ། ཐོར་ཤོད་ལས་དང་དམོད་པ་ཡིས། ། རང་གི་སྡེ་ལས་རེ་རེ་ཡང་། ། ཀུན་ལ་ཁྱབ་པ་བརྒྱད་བརྒྱད་དེ། ། དྲུག་ཅུ་རྩ་དྲུག་ཡན་ལག་བཅས། ། ལས་ཀྱི་དབྱེ་བ་བསམ་མི་ཁྱབ། ། དྲེགས་པའི་བདག་པོ་སོ་སོ་ཡི། ། རང་བཞིན་དགོས་པའི་བྱེ་བྲག་ གིས། ། དུས་གསུམ་སངས་རྒྱས་བསྟན་པ་དག ། ཚུལ་བཞིན་སྲུང་བའི་དམ་ཚིག་ཅན། ། དྲག་སྔགས་ལས་ཀྱི་དམོད་པ་ལ། ། བརྒྱ་དང་བཅུ་གཉིས་བཅུ་དྲུག་གིས། ། ནུས་པ་རྫུ་འཕྲུལ་མཐུ་ལ་སོགས། ། རང་གི་རིགས་ལ་གང་བསྔགས་པ། ། དེ་དང་དེ་ལ་རབ་སྦྱར་ བས། ། ལས་ཀྱི་མཐའ་ལ་གང་དམིགས་པ། །

རྡོ་རྗེ་ཅན་གྱིས་ཡོངས་གྲུབ་སྟེ། ། ང་ཡི་སྟོབས་དང་ནུས་པ་དང་། ། མཐུ་དང་རྫུ་འཕྲུལ་ཡོན་ཏན་ཚོགས། ། ལུས་ངག་ཡིད་ཀྱིས་རབ་འབད་པ། ། གང་ཡིན་དེ་ལ་མངོན་པར་འབྱུང་། ། དེ་ཡི་ཐུན་མོང་ཡོངས་འགྲུབ་ཅིང་། ། མཐར་ཕྱིན་པ་ཡང་ལེན་པར་བྱེད། ། འདི་ལས་མ་འོངས་རྙོག་པ་ཅན། ། ཐེ་ཚོམ་བསྐྱེད་པར་མ་བྱེད་ཅིག ། ང་དང་རྒྱལ་བ་ཐམས་ཅད་ཀྱིས། ། འདི་ནི་རབ་ཏུ་བསྔགས་པའོ། ། ཞེས་བཀའ་སྩལ་ཏོ། ། དྲག་སྔགས་འདུས་པ་རྩ་བའི་རྒྱུད་ལས་དྲེགས་པ་ཅན་གྱི་སྡེ་རིགས་ དབྱེ་བ་བསྟན་པའི་ལེའུ་སྟེ་བརྒྱད་པའོ། ། ། ། དེ་ནས་རྡོ་རྗེ་འཛིན་པ་ཡིས། ། ལས་ལ་སྦྱར་བའི་རིམ་པ་གསུངས། ། དུར་ཁྲོད་ཆུ་གླིང་རི་རྩེ་དང་། ། ཆུ་འདུས་ངམ་གྲོག་འཇིགས་སུ་རུང་། ། ཕུང་ཤུལ་ནགས་ཁྲོད་མ་རུངས་པ། ། དྲེགས་པ་ལས་ཀྱི་གནས་ཡིན་ནོ། ། མི་རུས་མི་གསད་ཕུང་ཤུལ་ས། ། རྡུར་ཟད་ཕེ་ཏ་རུལ་ཆད་ས། ། ས་སྨིན་དྲི་ཆེན་མ་རུངས་ཁྲག ། ལས་ཀྱི་རྟེན་འབྲེལ་དམིགས་པའི་རྫས། ། རྟ་ནག་དྲེ་ནག་མ་ཧེ་དང་། ། ཆུ་གླང་དང་ནི་སྟག་སེང་དང་། ། རྟ་དཀར་ནེ་ལེ་རྒོད་དཀར་དང་། ། དོམ་ནག་དམུ་རྟ་བན་གླང་དང་། ། འབྲུག་ཆེན་རྨ་བྱ་རུས་སྦལ་དང་། ། བྱ་ཁྱི་ཀུ་ཀུ་ཤེལ་དང་མི། །

རྒྱལ་མཚན་ཐོད་པ་སྙིང་དང་ཁྲག ། བདུད་རྩི་འབྲུ་བཅུད་བྱང་ཆུབ་སེམས། ། རང་གཟུགས་སྙིང་པོ་འཁོར་ལོ་བཅས། ། རྒྱན་ལྡན་ཤོས་ཆ་མཐུན་པའི་རྫས། ། དམ་ཚིག་མཆོད་ཅིང་བརྟེན་པའོ། ། སོ་སོར་སྔགས་ པའི་ལས་ཁུང་དུ། ། ཐོད་ངན་འབྲུ་ནག་དུག་ཁྲག་གཡོས། ། རྒྱུ་གསུམ་ཕུ་ས་མཚོན་ཆ་རྣམས། ། གསད་པ་ཐུན་གྱི་རྫས་ཡིན་ནོ། ། རྨེ་ཁྲག་གསུམ་དང་དྲི་ངན་གསུམ། ། སྲོག་ཆགས་གསུམ་དང་རྨེ་རྫས་གསུམ། ། ཐབས་རྫས་གསུམ་དང་བསྲེག་རྫས་གསུམ། ། རྟེན་ས་ གསུམ་དང་དྲིལ་ས་གསུམ། ། བཞུགས་ས་གསུམ་དང་དབབ་ས་གསུམ། ། ཀུན་རྫོགས་རྩོལ་བའི་སྦྱོར་བ་ཡིས། ། ཆུ་དྲག་དབབ་པ་ངེས་པར་འགྲུབ། ། རིགས་སུལ་སྣོད་དང་མཆོད་རྫས་དང་། ། གནས་སྦྱོང་བྱང་ཆུབ་སྲིད་འདོར་བློས། ། ལེགས་སླངས་ཡིད་ཀྱིས་མཐུན་ སྤྱད་པས། ། གང་ལ་དམིགས་པ་དེར་གཏད་པས། ། ཆོས་སྐུའི་གཟུགས་བརྙན་རྟེན་ཁང་ལ། ། སྟེང་འོག་གནས་གསུམ་བདག་པོ་གསུམ། ། རྒྱ་མཚོའི་གཏིང་དང་རི་རབ་ཟུར། ། བར་སྣང་ཁམས་དང་ནམ་མཁའི་དབྱིངས། ། བསྲུང་དང་བཟློག་ དང་གསད་པའི་ལས། ། དམག་དཔུང་བསྡུ་དང་དཔལ་སྐྱེད་དང་། ། རབ་ཏུ་ཁྲོས་དང་སྦྱོར་བ་ཞིག ། ལས་ཀྱིས་ཕ་རོལ་དམོད་པས་བཟློག །

ངན་པའི་ཐོད་པ་སྣ་གསུམ་དང་། ། ཤིས་པ་མ་ཡིན་ས་བརྒྱད་དུ། ། རྟེན་ཅིང་འབྲེལ་པ་འབྱུང་སྦྱོར་བས། ། དམིགས་པའི་ནུས་ སྟོབས་གནོན་པར་བྱེད། ། ཁྱད་པར་ལས་ཀྱི་བྱེ་བྲག་གིས། ། རྒྱལ་པོ་ཡ་རབས་རྗེ་དཔོན་དང་། ། ཆུང་མ་སློབ་དཔོན་མཁན་པོ་དང་། ། རབ་བྱུང་ཁྱིམ་པ་སྔགས་སྤྱོད་དང་། ། ཕྱི་རོལ་ཕྱོགས་དང་ཆོས་ཀྱི་གྲོགས། ། ཆེ་བཙན་དྲེགས་པས་བསྙེམས་པ་དང་། ། ང་རྒྱལ་ལྡན་ཞིང་ སྐལ་བ་བཟང་། ། ཀུན་གྱིས་བཀུར་ཞིང་བརྗོད་པ་དང་། ། སེམས་རྒྱུད་བསྲེལ་དང་ཡུན་གྱིས་དྲིན། ། ཉེ་བར་བསྟན་ཅིང་སློབ་སྦྱོང་གནས། ། ལྷག་པའི་ལྷ་ཡིས་རབ་སྐྱངས་ཏེ། ། ཐུན་མོང་ནུས་པའི་སྟོབས་རྙེད་ཅིང་། ། ཡོན་ཏན་གཅིག་གིས་རབ་བསྡུས་པས། ། ཚར་གཅད་ དཀའ་བའི་ཡུལ་ཡིན་ཏེ། ། མ་ལུས་གང་ལ་བསྔགས་པ་ཡིས། ། ཏིང་ངེ་འཛིན་དང་དམིགས་པའི་གྲོགས། ། རབ་སྔགས་བརྩོན་འགྲུས་ཅན་གྱིས་བསྒྲལ། ། གཞན་ཡང་ཞི་དང་རྒྱས་པ་དང་། ། དབང་དང་མངོན་པར་སྤྱོད་རྣམས་དང་། ། རྡོ་རྗེ་འཛིན་པ་ང་དང་གཞན། ། མཚུངས་ལྡན་རྣམས་ཀྱིས་བཤད་པ་བཞིན། ། ཐོགས་མེད་ནུས་པའི་སྟོབས་ཀྱིས་སྤྱད། ། དེ་དག་གསང་བའི་དམོད་པ་ཡང་། ། དྲེགས་པ་སྡེ་བརྒྱད་སོ་སོ་ཡི། །

གལ་གནད་སྙིང་པོ་འདི་དག་གོ། ། ཡ་མ་དུ་ཧ་ན་ཧ་ན་ཏིཥྚ་ཏིཥྚ་རུ་ཏྲ་མ་མ་སོད་སོད། ། ཁ་ཏྲི་ཛ་མ་ཏྲི་ཛཿཛཿ ཤོག་ཏྲི་ཛཿ ཡག་ཤ་ཛཿད་ཧྲི་ཛཿཤ་ཏྲི་པ་ཏྲི་ཛཿ། ཙིཏྟ་པྲ་མ་ཡ་ཨ་མུ་ཀ་སྲོག་ལ་ཛཿཛཿབྷྱོ། ཏྲི་ཙ་པ་ལ་ཨག་ཤུག་མེ། ཨ་བྷི་ཤ། ཨ་བྷི་ཤུ། ཙག་ཀྲ་རག་ཤ་ས་མ་ཡ་དུན་ཐུམ་རིལ་ལི་ལི། མྱགས་མྱགས་མྱོགས། སྲོག་ལ་ཐུན་རྦད། རག་ཤ་སྲོག་ལ་ཕྲིག་ ཕྲིག ། ཨ་པ་ཏི་ལི་ཀི་ནི་ཡ་མ་ཤྲི་ཧྲི་སྟི་བྷྲི་ཏྲི་ཏ་ན་ཀྲོ་མ་རི་པ་ཏྲ་སྲོག་ལ་དུན་བྷྱོ། མ་ཧཱ་ཡག་ཤ་ཐུམ་རིལ་རྦད། མ་རུ་ཙེ་དྷ་ཤ་འགྲིབ་པྲ་མ་ལིང་། གསོད་སྒྲ་གཅོད་བྱེད་འཕྲོག་བྱེད་ཀྱིས། ། མ་ལུས་ལས་ལ་བསྔགས་པར་འགྱུར། ། ནྲྀ་ཧུར་ཐུམས་ཛཿཤ་ཏྲུྃ་མཱ་ར་ཡ་རྦད། ཨ་མུ་ཀ་མཱ་ར་ཡ་ནུ་མ་ཀ་མ་རུ་སོད་སོད། གསད་པ་ཐུན་གྱི་དམོད་པའོ། ། བྱི་ཤ་མི་ཀི་དུ་རུ་མི་ཏྲི་ཀ་ཏ་ཛྭ་ལ་ཨ་ཏ་ཛ་ལ་སྭཱ་ཧཱ། ཙ་པ་ཏི་རཱ་ཧུ་ལ་མ་ཧཱ་ཀྲོ་དྷ་ཀ་པ་ཤར་ཤར་ཏ་ཤ་ར་ཏི་ཧཱུྃ་ཕཊ། བི་ཤུ་ལ་དུ་མ་གི་ཤ་ཛྭ་ལ་ཨན། མ་ཧཱ་ཙནྡྷ་རག་ཤ་ཧྲྀ་ད་ནྲྀ་མ་ཡ་རུ་ཏྲ་ས་ཏྲི་བྱི་ ནཱ་ག་རཱ་ཙ་བེ་ག་ཨ་ནནྟ་རགྴ་ཏི་སནྡྷ་རཀྵི་ན་ཙིཏྟ་བྷ་མི་ཀུ་རུ། མུ་ཧྲི་ཙནྡྷ་དུམ་བུ་དུམ་བུ། ཁ་ལ་རག་ཤ་ཐུམ་རི་ལི་ལི།

མ་མ་ས་མ་ཡ་ཏྲག་རག་ཤ་ཏྲག་རག་ཤ་མ་ཏྲི་ག་ན། མ་ས་ཁ་ཡ་ཀུ་རུ་ཏི་རྩེ་བྷ་ལི་མུ་ཏ་ད་ར་ད་ར། ཏྲི་ཀར་མི་ཏྲི། དུལ་དུལ། སྙིང་ཁྲག་ལ་རིལ་རིལ། རྩ་ལ་ཐུན་ཐུན། ཏྲག་རག་མོ་ཧྲིལ་ཧྲིལ། ཤག་ཤག ། ཤར་ཤར་རྦད། མ་མ་ཙག་ཤ་ཏྲག་ཏུ་ཕྲོམ། ཨ་སེ་ལ་མི་བྱི་རུ་ལུ་རུ་ལུ་མ་མ་ཏྲག་རག་ཤ་ཧྲིལ་ཧྲིལ་ཤར་བྷྱོ། མཱ་ར་ཡ་རཾ་ཧྲིལ་ཤར་བྷྱོ། ཤེལ་ཏྲ་ཧཱུྃ་དྲག་ཏུ་རྩར་ཤུ་ཏི་ཕྲོཾ་ཀར་ཕྲོཾ། ཕྱིར་མ་ཏི་བ་ཤད། མི་ གི་རི་ར་ཧུ་ལ་ཤག་ཤག་ཧྲིལ་ཕོབ། ཁྲག་ལ་ཙ་ར་མུ་ཤ་བྷྱོ། ཏྲག་རམ་ཐུན་ཤག་རིལ་རམ་ཤར་བྷྱོ། བདུད་ཕྲོཾ་ཀར་ཤུ་ཏི་ཕྲོཾ། ནག་ཧྲིལ་སེན་ཤགས་དུ་མ་ཡ་ཧྲིལ་བྷྱོ། པྲ་ཏ་པ་ཤ་ཡ་ཡ་མ་སྙིང་ཡ་མ་སྙིང་ཡ་མ་ཁྲག ། ར་ཧུ་ལ་ཧྲིལ་ཧྲིལ་ཤག་ཤག ། སེར་སེར། ཏུག་ཏུག ། ཡ་ཡ། ཕོབ་ཕོབ། མུ་ཀ་ཡེ། ཀ་པ་ཡེ། ཨ་པ་ཡེ། ཧྲི་སྟི་བྱི་ཀྲིན་ཏེ། ཛ་པ་ཏི་ར་ཧུ་ལ་མ་ཧཱ་ཀྲོ་ཏ་ཀ་བབ་ཏ་ཤར་ཤལ་ཏ་ཏེ་ཧཱུྃ་ཕཊ། ཐིག་ནིག ། ཤུ་ཏི་ཕྲོཾ། བདུད་ཕྲོཾ། མཐོངས་ཕྱེ། ལྕགས་སྒྲོག་ཁྲོལ། མི་རེང་སོད། རྐྱང་རྗེ་རྐྱང་མོ་ཙུ་རུ་ཙུ་རུ། ཧོ་ཧོ། ཕྲོཾ་ ཕྲོཾ། མུ་ར་མུ་ར་ཤ། དུ་རུ་ཕྲོཾ། ཐོག་ཧཱུྃ་ཧཱུྃ་སོད་སོད། རླུང་དང་སྤྲིན་དང་རབ་རྒྱུ་དང་།

ཕྱོགས་དང་རྟགས་ཀྱི་ཚད་ལྡན་པས། དབབ་པའི་སྦྱོར་བ་ཤེས་པར་བྱ། སྟེང་འོག་བར་གསུམ་དྲག་པོའི་ལས། ། གཞུག་དང་གཏོར་དང་བསྲེག་པའི་དང་། ། བསྐོལ་དང་ དགུག་དང་སྦྲེང་བ་དང་། ། བོད་དང་དམོད་དང་གདུང་བ་དང་། ། གཟིར་དང་སྐོར་དང་གཞིག་པ་དང་། ། གཅད་དང་དྲིལ་བའི་ལས་རྣམས་ཀྱིས། ། སྨིན་པའི་ལོ་ཐོག་འཇོམས་པར་བྱེད། ། ནག་པོ་ཏི་པ་ཙ་ཡན་རག་ཤ། ར་ཛ་དྷེ་གུ་ལུ་ཕེ་ཤ་རག་ཤ་ནཱན། ཕོས་ ཕོས། ཤིག་ཤིག ། ཧུ་ཡ་ཧུ་ཡ། ཏིརྱ་ཏིརྱ། ཀཱ་ལ་ནཱ་ག་བནྡྷ་དགྲ་བོ་མཱ་ར་ཡ་ཛཿ། ནག་པོ་ཏི་པ་ཙ་ཡ་ཕེ་ཤ་རག་ཤ་ཛཿ ནཱ་ག་ཀ་ཀ་ལ་ཕེ་ཤ་རག་ཤ་ཛཿཛཿ ཨ་ཤན་ནཱ་ག་ཏི་པ་ཙ་ཡ་དགྲ་བོ་མ་ར་ཡ་ཛཿ། ནཱ་ག་རཱ་ཛ་ཤག་ཏི་སྲོག་ཏི་ལ་རྦད། སྙིང་ལ་རོལ། ཤམ་ཤམ་ རྦད། ཨི་ཤན་ནཱན། ཕེ་ཤ་རག་ཤ་ཨུ་ནཱན། ནཱ་ག་ནཱན་ཐི་ལི་ནཱན། ཕི་ལི་ནཱན། རྩི་རི་ནཱན། ཨ་པར་སོད་རྨག ། དུལ་དུལ་ཀཱ་ལ་རྡུབས་མྱོགས་ཐིབས། མཱ་ར་ཡ་འདུས་འདུས། དྷ་ར་དྷ་ར། དྷུ་རུ་དྷུ་རུ། རུ་རུ། ར་ར། ཏི་ཏི། ཏྲི་མོ་ཏི་ཏི། ག་རུ་ག་ར་གཏོར་ཛ་མ་ར་ཏེ་གད། མན་ཛཿཕེ་ཤན་རག་ཤ་ཨུ་ཏ་ནཱན། བྷ་ཤི་ནི། ཤར་ལེ། ཤུ་རུ་མུ་ལེ། དྷ་ཏ་མ་རེ་ན། ཧུ་ཡ་ཧུ་ཡ། ར་ཏི་ར་ཏི། ཐི་རི་ཤག་ཙག་གི།

ནྲྀ་མཱ་ར་ཏྲི་ཡ་མ་དུ་ཡ་མ་སྙིང་ཡམ་ཁྲག་ཚལ་པ་བྃ་རིལ། ནག་པོ་ཏི་པ་རག་ཤ་ནཱན། ཁུག་རོ་ལ་བྃ། དགྲ་བོ་མཱ་ར་ཡ་ཛཿ། ནག་པོ་ཏི་པ་ ཙ། སྙིང་ལ་ཛཿ། ཤག་ཤན་ནཱན། ཁུག་ཐུམ་རིལ་རྦད། ཙན་དྲི་རག་ཤ་རོ་ལ་ཁུག་ཐུན་ཀཱ་ལ་སྙིང་ལ་ཐུམ་རིལ་རྦད། ཀཱ་ལ་ཤོ་རོ་སྙིང་ལ་ཏྲག་ཤ་ཧ་ར་ཀ། ཨ་མུ་ཀ་མཱ་ར་ཡ་ཐུམ་རིལ་རྦད་ནཱན། ཁུགས་དང་འགྲོ་དང་ལས་བྱེད་པའི། ། རང་གི་རྟགས་དང་ལྡན་པ་ན། ། དམིགས་པའི་ལས་ལ་སྦྱར་བར་བྱ། ། ཟློག་དང་མ་གྲུབ་འཁྱིལ་པ་དང་། ། འབྱམས་དང་སྡུག་དང་ཟད་མཐར་གཏུགས། ། གཉེན་པོ་འདབ་མ་སྣ་སེལ་དང་། ། བསྡུ་དང་སྤོ་དང་མི་ཟད་གཏེར། ། ལོངས་སྤྱོད་ཐུག་པ་མེད་པ་ཡིས། ། དབྱིངས་ཀྱི་ངང་དུ་གཏད་པར་བྱ། ། སྡེ་བརྒྱད་ སོ་སོའི་མིང་གི་སྔགས། ། རང་སྐད་དམོད་པའི་ཡན་ལག་ལ། ། དྷེ་བ་ཨ་བྱི་སརྦ་བྷྱོ་བཟློག ། པྲ་ལ་དུན་རྩེ་ཕོབ། བཛྲ་འགྲིག་ཤོ་ས་མ་ཡ་ཧྲི་བྷྱོ། བ་སན་ཏི་མ་རུ་རུ། ཡ་མ་ཏྲིག་བྷུ་ཏ་ཀྵི་པ་ལོ་ཧཱུྃ། བཟློག་བསྒྱུར་གདུག་པའི་དྲག་སྔགས་ཀྱིས། ། ལས་ཀྱི་མཐའ་སྒྱུར་མ་ ལུས་པར། ། ང་འམ་ང་དང་འདྲ་བ་ཡི། ། རྡོ་རྗེ་འཛིན་པ་གཞན་རྣམས་ཀྱིས། ། ཕྱི་ནང་གསང་བའི་ལས་རྣམས་ཀྱིས། ། གང་ལ་བསྔགས་པ་དེ་དག་སྦྱར། །

གཞན་གྱིས་ཐེ་ཚོམ་མི་བྱ་སྟེ། ། ང་དང་དུས་གསུམ་སངས་རྒྱས་ཀྱིས། ། དེ་ལ་རིག་པར་སྣང་བ་ཡིན། ། ཞེས་ བཀའ་སྩལ་ཏོ། ། དྲག་སྔགས་འདུས་པ་རྩ་བའི་རྒྱུད་ལས་ཕྲིན་ལས་དམིགས་པའི་ཁྱད་པར་ལས་སྦྱར་བའི་ལེའུ་སྟེ་དགུ་པའོ། ། ། ། དེ་ནས་རྡོ་རྗེ་འཛིན་པ་ཡིས། ། ཡོན་ཏན་བསྟོད་པ་འདི་གསུངས་སོ། ། ཧཱུྃ་དུར་ཁྲོད་ཆེན་པོའི་རོལ་པའི་དཀྱིལ་འཁོར་ནས། ། གཏུམ་དྲག་མེ་ལྟར་འབར་བའི་གཞལ་ཡས་ན། ། གདུག་བྱེད་རུ་ཏྲ་སྟི་རའི་ཁྲི་སྟེངས་ན། ། མདངས་ལྡན་ཉི་ཟླ་པདྨའི་གདན་སྟེངས་ན། ། དྲེགས་པའི་བདག་པོ་རྡོ་རྗེ་འཛིན་པའི་གཙོ། ། བཅོམ་ལྡན་དཔལ་ཆེན་སྟོབས་ལྡན་ནག་པོ་ནི། ། སྐུ་མདོག་མཐིང་ནག་རབ་ཏུ་འབར། ། ས་དགུ་རྫོགས་པས་དབུ་དགུ་བསྟན། ། སྟོང་པ་{བཅྭ་,བཅོ་}བརྒྱད་ལྡན་པའི་ཕྱག ། ཞབས་ཀྱིས་བརྗིད་པའི་བདུད་བཞི་གནོན། ། དབུས་མཐིང་གཡས་དཀར་གཡོན་དམར་བས། ། ཁྲོ་ཞིང་བཞད་དང་གཙིགས་པའི་ཞལ། ། རལ་པ་ཁམ་ནག་སྲིད་རྩེར་འབར། ། ཁམས་ གསུམ་མ་ལུས་སྤྱན་གྱིས་གཟིགས། ། ཤངས་ཀྱིས་སྲིད་གསུམ་མ་ལུས་རྔུབ། ། སྙན་གྱིས་སྟོང་གསུམ་འབྲུག་སྒྲས་འགེངས། ། ཚེམས་ཀྱིས་གནོད་གདུག་མ་ལུས་སྒྲོལ། ། ལྗགས་ཀྱིས་གློག་དམར་འཇིག་རྟེན་ཁྱབ། །

ཁྲོ་གཉེར་འོད་ཀྱིས་དབང་དུ་སྡུད། ། ཕྲིན་ལས་ རིགས་ཀྱིས་དབུ་ལ་བརྒྱན། ། {བཅྭ་,བཅོ་}བརྒྱད་ཕྱག་གི་དང་པོ་གཉིས། ། དབང་སྡུད་རྡོ་རྗེ་དྲིལ་བུ་འཛིན། ། གཡས་གཡོན་འོག་མའི་ཕྱག་བརྒྱད་ན། ། དྲེགས་པའི་ལྷ་བརྒྱད་བྷན་དྷ་གཡས། ། ཙིཏྟ་སྲོག་རྩ་གཡོན་ན་བསྣམས། ། འབར་བའི་ཆས་ཀྱིས་སྐུ་ལ་བརྒྱན། ། བསྲུང་ བའི་ལྷ་བརྒྱད་སྐུ་ལ་རྫོགས། ། གཡས་གཡོན་ཞབས་ཀྱིས་དྲེགས་པ་གཟིར། ། མ་རུངས་གདུལ་དཀའ་རྣམས་ཀྱི་གཤེད། ། ལོག་ལྟ་རུ་ཏྲ་འདུལ་བའི་དཔལ། ། འབྱུང་ལྔའི་བདག་མོ་གཉིས་མེད་ཡུམ། ། དབུ་གསུམ་ཕྱག་དྲུག་ཞབས་བཞི་སྦྱོར། ། གྲི་གུག་ཏྲི་ཤཱུལ་བདུད་རྩི་ གཡས། ། བྷན་དྷ་ཞིང་ཆེན་གཡང་གཞི་གཡོན། ། མཐིང་ནག་འོད་ཀྱིས་ཀུན་དུ་ཁྱབ། ། ཆེད་འགའ་རིགས་ཀྱི་སྤྲུལ་པ་འདི། ། དབུ་གསུམ་ཕྱག་དྲུག་ཞབས་བཞིར་བགྲད། ། སྐུ་མདོག་མཐིང་ནག་ཁྲོས་ཤིང་རྔམ། ། ཕྱག་དྲུག་གཡས་གཡོན་དང་ པོ་ཡིས། ། རྡོ་རྗེས་དུང་ཁྲག་དཀྲུག་ཅིང་གསོལ། ། གཡས་གཡོན་གཉིས་ཀྱི་ཕྱག་བཞི་ཡིས། ། ལྷ་བརྒྱད་ཀླུ་བརྒྱད་ཙིཏྟ་རོལ། ། ཡུམ་ཆེན་ཞལ་གཅིག་ཕྱག་གཉིས་མ། ། སྐུ་མདོག་མཐིང་ནག་ཞབས་གཉིས་སྦྱོར། ། གཡས་ཀྱིས་ནམ་མཁའ་སྟོང་ཁམས་ འདེགས། །

གཡོན་གྱིས་འཇིག་རྟེན་ས་གཞི་གནོན། ། ཞལ་ནས་འབྱུང་བ་ལྔ་འཆར་མ། ། དཔལ་ཆེན་ཡབ་ཡུམ་བྱིན་རླབས་ལས། ། སྤྲུལ་པའི་དྲེགས་པ་ཕོ་མོ་གཙོ། ། བདུད་མོ་ནག་མོ་ཁ་རླངས་ཅན། ། ཞལ་གཅིག་ཕྱག་གཉིས་སྐུ་མདོག་མཐིང་། ། ཁྲམ་ཤིང་ཏྲི་ ཤཱུལ་གཡས་ན་བསྣམས། ། གཡོན་གྱིས་ཁ་ཊྭཱཾ་ཞགས་པ་འཕེན། ། ན་བཟའ་ཞིང་ལྤགས་རློན་པ་གསོལ། ། ཞབས་གཉིས་གདུག་པའི་སྙིང་གར་གཟིར། ། བདུད་མོ་ནག་མོ་ཁྲག་འཛག་མ། ། ཁྲམ་བྃ་ཐོད་རློན་ཕྱག་ན་བསྣམས། ། སྐུ་ལ་ཞིང་ལྤགས་གསར་པ་ བགོས། ། བདུད་རྟ་ནག་པོ་ཆིབས་སུ་བཅིབས། ། ཞབས་ཀྱིས་དགྲ་བགེགས་བཤུགས་ཀྱིས་སྒྲོལ། ། འཆི་བདག་གཤིན་རྗེ་ནག་པོ་ནི། ། ཞལ་གཅིག་ཕྱག་གཉིས་སྐུ་མདོག་གནག ། ཕྱག་གཡས་ཐོད་ཁྲག་གྲི་གུག་གཡོན། ། བཙུན་མོ་ཡུམ་ཆེན་ཟ་བྱེད་མ། ། གྲི་གུག་ཐོད་པ་ཕྱག་ན་བསྣམས། ། ཡབ་ཡུམ་ཞིང་ལྤགས་རློན་པ་གསོལ། ། མ་ཧེ་ཁྲོས་དང་ཆུ་གླང་བཅིབས། ། ཞབས་ཀྱིས་དགྲ་བགེགས་ཕོ་མོ་གཟིར། ། སྲིན་པོ་གསོད་བྱེད་སྐུ་མདོག་གནག ། ཕྱག་ན་རལ་གྲི་ཐོད་ཁྲག་བསྣམས། ། ཡུམ་ཆེན་གསོད་པར་ བྱེད་མ་ཡང་། ། གྲི་གུག་མི་ཐོད་ཕྱག་ན་བསྣམས། ། ན་བཟའ་ཞིང་ལྤགས་རློན་པ་གསོལ། ། སྟག་སེང་རོལ་པ་ཆིབས་སུ་བཅིབས། །

གནོད་སྦྱིན་གང་བ་བཟང་པོ་ཡང་། ། ཞལ་གཅིག་ཕྱག་གཉིས་སྐུ་མདོག་སྔོ། ། དར་ནག་འཕྱར་ཞིང་ཞིང་ལྤགས་བརྡེག ། ཡུམ་ཆེན་ཤ་ཟ་རལ་གཅིག་མ། ། ཡུམ་གྱི་ཚུལ་འཛིན་སྤྲུལ་པ་མོ། ། ཞིང་ལྤགས་གྱོན་ཏེ་གྱི་ལིང་བཅིབས། ། དྲག་སྔགས་བདག་པོ་ཆེན་པོ་ནི། ། དབང་ཕྱུག་ཆེན་པོ་ལྷ་ཡི་གཙོ། ། མདོག་དཀར་ཤེལ་གྲི་བ་དན་འཕྱར། ། ན་བཟའ་དར་དཀར་བེར་ཆེན་གསོལ། ། ཆིབས་ སུ་གནམ་རུ་དཀར་པོ་བཅིབས། ། ཐར་པ་ནག་པོ་རུ་ཏྲའི་གཙོ། ། མཆོད་གཏོར་དུག་ཐུན་ཕྱག་ན་བསྣམས། ། ཞིང་ལྤགས་གྱོན་ཏེ་དོམ་ནག་བཅིབས། ། དམུ་བདུད་རྗེ་དཔོན་ནག་པོ་ནི། ། དར་ནག་འཕྱར་ཞིང་སྟི་ར་འདྲད། ། བེར་ནག་གསོལ་ཞིང་དམུ་རྟ་བཅིབས། ། མུ་སྟེགས་ ཀཱ་ལ་ཡག་ཤ་ནི། ། མཐིང་ནག་ཁ་ཊྭཱཾ་ཏྲི་ཤཱུལ་འཛིན། ། ཞིང་ལྤགས་བགོས་ཏེ་མ་ཧེ་བཅིབས། ། ཁྱབ་འཇུག་རོག་ཏི་ནག་པོ་ཡང་། ། ཁྲམ་ཤིང་དགྲ་སྟ་ཕྱག་གིས་འཛིན། ། སྤྲིན་ནག་བགོས་ཏེ་འབྲུག་སྔོན་བཅིབས། ། ཀླུ་རྒྱལ་བ་རུ་ཎ་ཡི་རྗེ། ། སེར་ནག་སྦྲུལ་གྱི་ ནམ་བཟའ་གསོལ། ། བུམ་པ་རུས་སྦལ་ཕྱག་གིས་འཛིན། ། ཆིབས་སུ་ཆུ་སྲིན་མགོ་དགུ་བཅིབས། ། རྒྱལ་པོ་ཧར་མཛེས་ཞེས་བྱ་བ། ། མདོག་དཀར་ཤེལ་གྲི་དར་དཀར་འཛིན། །

སྲས་མཆོག་འབར་བ་དམར་པོ་སྟེ། ། མདུང་{རིངས་,རིང་}གཡས་ལ་ཤན་གྲི་གཡོན། ། རྡོ་རྗེ་ མཛེས་པ་མདོག་དམར་པོ། ། རུ་མཚོན་དགྲ་སྟ་ཕྱག་གིས་འཛིན། ། ཁུ་ལེ་ལག་དགུ་འབར་བ་ཡང་། ། མདོག་གསེར་སྤྲུལ་པའི་ལག་དགུ་འགྱེད། ། ཞིང་ལྤགས་བགོས་ཤིང་སྟི་ར་གནོན། ། དྲག་སྔགས་བདག་པོ་གཙོ་འཁོར་ཡང་། ། རང་གི་རིགས་ཀྱི་འཁོར་ འདུལ་བ། ། སོ་སོའི་སྤྲུལ་པ་བསམ་མི་ཁྱབ། ། གཅོད་པར་བྱེད་པ་བདུད་ཀྱི་སྡེ། ། འཆི་བར་བྱེད་པ་གཤིན་རྗེའི་སྡེ། ། གསོད་བྱེད་ཤན་པ་སྲིན་པོའི་སྡེ། ། གདུག་རྩུབ་འཆང་བ་གནོད་སྦྱིན་སྡེ། ། དྲག་རྩལ་ལྡན་པ་ལྷ་ཡི་སྡེ། ། ནད་གདོན་འབེབས་པ་མ་མོའི་སྡེ། ། ནམ་མཁའ་དབང་སྒྱུར་གཟའ་ཡི་སྡེ། ། གླེན་ལྐུགས་གདུག་པ་ཀླུ་ཡི་སྡེ། ། སྡེ་བརྒྱད་དམོད་པའི་དྲག་སྔགས་ཅན། ། མཐུ་དང་རྫུ་འཕྲུལ་བསམ་མི་ཁྱབ། ། འཁོར་དང་སྡེ་རིགས་བརྗོད་མི་ལང་། ། ཕྲིན་ལས་ལོངས་སྤྱོད་མི་ཟད་གཏེར། ། ཡོན་ཏན་ནུས་པ་དཔག་ཏུ་ མེད། ། ཞེ་སྡང་ཅན་ལ་ཁྲོས་པར་སྟོན། ། ང་རྒྱལ་ཅན་ལ་ལྷག་པར་སྟོན། ། འདོད་ཆགས་ཅན་ལ་མི་སྡུག་སྟོན། ། གཏི་མུག་ཅན་ལ་མྱོས་པར་སྟོན། ། སེར་སྣ་ཅན་གྱིས་འཕྲོག་པར་བྱེད། ། ཕྲག་དོག་ཅན་ལ་འཇིགས་པར་སྟོན། །

ཁྱོད་ཀྱིས་མི་འདུལ་ གཅིག་མེད་ཀྱིས། ། མཆོད་ཅིང་བསྐང་བའི་ཐུན་རྫས་བཞེས། ། བཅོལ་ཅིང་གཉེར་བའི་ལས་མཛོད་ཅིག ། བསྟོད་ཅིང་བསྒྲུབ་པས་ལས་མཛོད་དགྱེས་པར་མཛོད། ། དེ་ནས་རང་གི་སྙིང་པོ་དང་། ། འཇིག་རྟེན་དྲེགས་པའི་བདག་པོ་རྣམས། ། སོ་སོའི་སྔགས་ཀྱི་ལས་ ལ་སྦྱར། ། རྡོ་རྗེ་འཛིན་པ་ཆེན་པོ་ཡིས། ། བྱང་ཆུབ་སེམས་ཀྱི་བསམ་པ་ཡིས། ། ལྟོས་དང་རེ་བ་ཀུན་སྤངས་ཏེ། ། སངས་རྒྱས་བསྟན་པ་རབ་དམིགས་ནས། ། དྲག་སྔགས་བདག་པོ་ཉེར་བསྒྲུབས་ན། ། ང་དང་སངས་རྒྱས་ཐམས་ཅད་མཉེས། ། རིག་པ་འཛིན་པའི་ས་ཐོབ་ཅིང་། ། སེམས་ཅན་རྣམས་ཀྱི་སྟོན་པར་འགྱུར། ། ཐུན་མོང་བ་དང་ཉེ་བ་དང་། ། མཆོག་འགྱུར་རིང་བའི་དངོས་གྲུབ་ཀུན། ། དཔའ་བོ་དེ་ལས་མངོན་དུ་འབྱུང་། ། ཡོན་ཏན་མཆོག་གི་སྟོབས་རྙེད་ཅིང་། ། འཇིག་རྟེན་ཆོས་ལས་རབ་བསྔགས་པའི། ། བྱང་ཆུབ་སེམས་དཔའི་སྤྱོད་པ་ དང་། ། ས་ཆེན་པོ་ལ་རྟོགས་པ་ཡི། ། རླབས་ཆེན་རྣམས་ཀྱང་ནུས་པར་སྤྱོད། ། མཐུ་སྟོབས་ནུས་པ་བསྙེམས་པ་ཡིས། ། གཞན་གྱིས་བརྫི་བར་མི་ནུས་ཤིང་། ། རང་གི་དབང་དུ་ཁུགས་པ་དང་། ། བསྒོ་བ་རྩོད་པ་མེད་པར་འགྱུར། ། ཞེས་བཀའ་སྩལ་ཏོ། །

དྲག་ སྔགས་འདུས་པ་རྩ་བའི་རྒྱུད་ལས་བསྟོད་པ་ཡོན་ཏན་བརྗོད་པའི་ལེའུ་སྟེ་བཅུ་པའོ། ། ། ། དེ་ནས་བཅོམ་ལྡན་འདས་རྡོ་རྗེ་འཛིན་པ་ཆེན་པོས། ཉིད་ཀྱི་སྐུ་འཇིགས་བྱེད་ཆེན་པོའི་ལུགས་སུ་སྐུ་སྤྲུལ་ཏེ། ཐུགས་ཆོས་ཉིད་ཞི་བ་ཆེན་པོའི་ཏིང་ངེ་འཛིན་ལ་ སྙོམས་པར་ཞུགས་ནས། སྐུའི་གནས་ཐམས་ཅད་ལས་འོད་ཀྱི་དྲ་བ་དཔག་ཏུ་མེད་པ་ཕྱུང་ནས། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་དྲེགས་པ་ཅན་གྱི་གནས་ཐམས་ཅད་ཁྱབ་པར་མཛད་ནས། ། མ་རུངས་ཤིང་གདུག་པ་དང་གཏུམ་པའི་སེམས་དང་ བསམ་པ་ཐམས་ཅད་ཀྱང་མ་ལུས་པར་ཞི་བ་བྱང་ཆུབ་ཀྱི་སེམས་དང་ལྡན་པར་གྱུར་ཏེ། ཕན་པ་དང་། བདེ་བ་དང་། གནོད་པ་མེད་པ་དང་། བརྩེ་བ་དང་། ཡིད་དགའ་བ་དང་བཅས་པས་ཕྱོགས་དེར་སྣང་བར་གྱུར་ནས། ཐམས་ཅད་ཀྱིས་བཅོམ་ལྡན་ འདས་རྡོ་རྗེ་འཛིན་པ་དེ་ལ་ཕྱག་འཚལ་ཞིང་འདི་སྐད་ཅེས་གསོལ་ཏོ། ། ཀྱེ་མ་བཅོམ་ལྡན་རྡོ་རྗེ་འཆང་། ། ཁྱོད་ཀྱི་བསྟན་པ་གསང་ཆེན་འདི། ། མ་འོངས་པ་ཡི་དུས་དག་ཏུ། ། རབ་ཏུ་རྒྱས་པར་འགྱུར་ཞིག་ན། ། བདག་ཅག་འཇིག་རྟེན་དྲེགས་པ་ ཅན། ། ཞི་བའི་སེམས་སུ་གནས་བྱས་པས། ། རྗེས་སུ་སྤྱོད་པ་གང་ཡིན་པ། ། དེ་ལ་རྒྱས་པ་ཕན་པར་བསྟན། །

ཕྲིན་ལས་དང་ནི་ལྟ་སྤྱོད་ཀྱིས། ། ཁྱབ་པ་དེ་ལས་ཡོངས་རྫོགས་ཤིང་། ། གྲོགས་དང་བྲན་དང་དམངས་བཞིན་དུ། ། གང་གིས་ བསྒོ་བ་དེ་བཞིན་བགྱི། ། དམ་ཚིགས་བསྲུངས་པའི་ཡོན་ཏན་དང་། ། རོལ་པའི་ཏིང་འཛིན་ལྡན་པ་ལ། ། བཀའ་ལས་འདའ་བ་མི་སྤྱོད་ཅིང་། ། གསུང་བཞིན་བསྒྲུབ་པ་རབ་ཏུ་སྤྲོ། ། བཅོམ་ལྡན་རྡོ་རྗེ་འཛིན་ཁྱོད་ཀྱིས། ། ཇི་ལྟར་མངགས་པའི་ལས་རྣམས་ ནི། ། བདག་ཅག་ནུས་པས་མྱུར་དུ་བསྒྲུབ། ། བྱིན་གྱིས་བརླབ་པ་གཙོར་མཛོད་ཅིག ། ཅེས་གསོལ་ནས་རང་རང་གི་གནས་སུ་དེངས་ཤིང་ཕྱིན་པར་གྱུར་ཏོ། ། བཅོམ་ལྡན་འདས་ཀྱིས་འོད་ཟེར་གྱི་བཀོད་པ་རྣམས་རང་གི་འཁོར་གྱི་སྣང་བ་ཐམས་ཅད་ཀྱང་ཉིད་ ཀྱི་སྐུའི་དབྱིངས་སུ་བསྡུས་ཤིང་སྐུ་ཉིད་ཀྱང་ཆོས་ཀྱི་སྐུའི་རང་བཞིན་དུ་གནས་པར་མཛད་དོ། ། དྲག་སྔགས་འདུས་པ་རྩ་བའི་རྒྱུད་ལས་ཕྲིན་ལས་ཀྱི་གཉེར་ཕུལ་བའི་ལེའུ་སྟེ་བཅུ་གཅིག་པའོ། ། ། ། དྲག་སྔགས་འདུས་པ་རྡོ་རྗེ་རྩ་བའི་རྒྱུད་ཅེས་བྱ་བ་རྫོགས་ {སྷོ,སོ}། ། ། ། རྒྱ་གར་གྱི་མཁན་པོ་ཆེན་པོ་སློབ་དཔོན་པདྨ་འབྱུང་གནས་དང་། བོད་ཀྱི་ལོ་ཙྪ་བ་བདག་བཻ་རོ་ཙ་ནས་བསྒྱུར་ཅིང་ཞུས་ཏེ་གཏན་ལ་ཕབ་པ། ། ། །

རྒྱལ་པོ་ཁྲི་སྲོང་ལྡེ་བཙན་གྱི་བླའི་ཕྱག་དཔེ་ལ་ཞལ་བཤུས་པ་ལས་བརྒྱུད་པའོ། ། ། །