BO༄༅༅། ། རྒྱ་གར་སྐད་དུ། ཤྲཱི་མཾ་ར་ཀྟ་ཡ་མཱ་རི་ཏནྟྲ་རཱ་ཛ་ནཱ་མ། བོད་སྐད་དུ། དཔལ་ལྡན་གཤིན་རྗེའི་གཤེད་དམར་པོའི་རྒྱུད་ཀྱི་རྒྱལ་པོ་ཞེས་བྱ་བ། གཤིན་རྗེ་མཐར་བྱེད་དམར་པོ་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་གཅིག་ན། བཅོམ་ ལྡན་འདས་དེ་བཞིན་གཤེགས་པ་ཐམས་ཅད་གཅིག་ཏུ་འདྲེས་པར་གྱུར་པ་བདག་མེད་པའི་བྷ་ག་ལ་བཞུགས་སོ། ། དེ་ལ་མགྲིན་པར་དམ་འཁྱུད་དེ། ། རང་ཉིད་སེམས་ཅན་ཆེད་ཞུས་པ། ། ཀྱཻ་རྡོ་རྗེར་གསུངས་པ་དང་། ། ཐར་པ་དེ་བཞིན་སྡོམ་པར་ཡང་། ། འདུས་པ་ལ་སོགས་ རྒྱུད་དུ་ཡང་། ། སླར་ཡང་ཆེས་མང་དུ་གསུངས་ཀྱང་། ། སེམས་ཅན་བསམ་པ་ཡོངས་རྫོགས་བྱེད། ། ད་ནི་བདག་གིས་རབ་བཤད་བྱ། ། ཁ་ཅིག་རྒྱལ་སྲིད་འདོད་པ་དང་། ། ཚེ་རིང་ནད་མེད་འབྲས་བུ་སྦྱིན། ། ཞི་བ་ལ་སོགས་ལས་རྒྱས་པ། ། གང་ཡང་མངོན་པར་སྤྱད་པ་དང་། ། དགྲ་ཡི་སྡེ་ཉམས་བྱེད་པ་དང་། ། སྐྲོད་དང་འགུགས་དང་གསོད་པ་ཡང་། ། སྣ་ཚོགས་རྒྱུད་རྣམས་སུ་གསུངས་ཀྱང་། ། སྣ་ཚོགས་རྒྱུད་དུ་མ་བརྗོད་པའི། ། འཁྲུལ་འཁོར་འཇིག་རྟེན་གསུམ་རྙེད་དཀའ། ། ཁྱོད་ལ་ཕན་པའི་སྐྱེས་ཀྱི་ཕྱིར། བཤད་བྱ་ལྷ་མོ་གུས་བཅས་ཉོན། །
BOའཁྲུལ་འཁོར་གང་གི་མཐུ་སྟོབས་ཀྱིས། ། རྟག་ཏུ་རྒྱལ་སྲིད་ཐོབ་པ་དང་། ། ཇི་སྲིད་ཉི་མ་ཟླ་བ་བཞིན། ། གལ་ཏེ་འཚོ་བར་འདོད་པ་དང་། ། ཁུ་བ་རེངས་དང་སྡེ་འགུགས་དང་། ། མཁའ་སྤྱོད་ཉིད་དང་མཆོག་ཏུ་མྱུར། ། དེང་འདིར་མིང་གི་སྤྱོད་ཡུལ་དུ། ། དེ་ཡི་སྨན་ནི་བཤད་པར་ བྱ། ། དང་པོར་བྱམས་པ་བསྒོམ་པར་བྱ། ། གཉིས་པར་སྙིང་རྗེ་དེ་བཞིན་ནོ། ། གསུམ་པར་དགའ་བ་བསྒོམ་པར་བྱ། ། བཞི་པར་བཏང་སྙོམས་རྣམ་བསྒོམ་བྱ། ། འཇིག་རྟེན་ཆོས་རྣམས་བརྒྱད་པོ་ནི། ། ཡོངས་བཏང་སྟོང་པར་བསམ་པར་བྱ། ། སླར་ཡང་སྟོང་ཉིད་བྱང་ཆུབ་སྟེ། ། གཉིས་པ་ལ་ནི་ས་བོན་བསྡུ། ། བཞི་པར་ཡི་གེ་དགོད་པའོ། ། ར་ཡིག་ལས་བྱུང་ཉི་མ་ལ། ། ཧཱུྃ་བྱུང་སྣ་ཚོགས་རྡོ་རྗེའོ། ། དེ་ཉིད་ཀྱིས་ནི་རྡོ་རྗེ་ཡི། ། ར་བ་ཞེས་དང་དེ་བཞིན་དུ། ། ས་གཞི་རྡོ་རྗེ་འཆིང་བའོ། ། དང་པོར་སྟོང་པར་བསྒོམ་པར་བྱ། ། དེ་ནས་ཡི་གེ་ཨཾ་དམར་པོ་ཡོངས་སུ་ གྱུར་པ་ལས་ཉི་མའི་དཀྱིལ་འཁོར་རོ། ། དེའི་སྟེང་དུ་ཡི་གེ་ཧཱུྃ་དམར་པོའོ། ། དེའི་སྟེང་དུ་བརླན་དང་བཅས་པའི་མགོ་བོས་བརྒྱན་པའི་དབྱུག་པའི་དབུས་སུ་ཧུྃ་ཡིག་དམར་པོའོ། ། དེར་ཡང་ཉི་མ་ལ་ཧཱུྃ་ཡིག་གོ །
BOདེ་ལས་ངེས་པར་བྱུང་བའི་འོད་ཟེར་རྣམས་ཀྱིས་ ནམ་མཁའི་ཕྱོགས་སུ་དཔའ་བོའི་གཟུགས་དེ་ལ་འཇིག་རྟེན་གསུམ་པོ་ཐམས་ཅད་བསྡུས་ནས་སླར་ཡང་དེ་ཉིད་དུ་བཅུག་སྟེ། དཔལ་གཤིན་རྗེའི་གཤེད་དམར་པོའི་གཟུགས་སུ་བདག་ཉིད་བསམ་པར་བྱའོ། ། སྐུ་མདོག་དམར་པོ་གཡོན་བརྐྱང་ཞིང་རྣམ་པར་འགྱུར་བའི་ཞལ་མ་ཆེ་བ་ གཙིགས་པ། ལྗགས་འདྲིལ་བ་འཇིགས་པར་བྱེད་པ། ཀླུ་བརྒྱད་ཀྱིས་རྣམ་པར་བརྒྱན་པ། དབུ་སྐྲ་དམར་སེར་གྱེན་དུ་འབར་བ། རྐེདཔའི་ཕྱོགས་སུ་སྟག་གི་པགས་པ་འཛག་པས་རྣམ་པར་བརྒྱན་པ། མིའུ་ཐུང་གསུས་པ་འཕྱང་ཞིང་འཇིགས་པ། སྤྱན་གསུམ་པ་ཤིན་ ཏུ་འཇིགས་པར་བྱེད་པ་དམར་པོ་འབར་བའི་རྒྱུན་མི་ཟད་པ་འོད་ཟེར་སྣ་ཚོགས་ཀུན་ཏུ་འཁྲུགས་པ། གཡོན་པར་སྲེད་མེད་ཀྱི་བུ་ལ་སོགས་པའི་ཁྲག་གིས་གང་བའི་མིའི་ཐོད་པ་དང་། གཡས་པར་བདུད་བཞི་རྣམ་པར་འཇོམས་པར་བྱེད་པའི་དབྱུག་པ་དཀར་པོ་དང་ཀླུའི་རྒྱན་ལ་སོགས་པས་ སྤྲས་པ། རྡོ་རྗེ་རོ་ལངས་མས་ཕྲག་པར་འཁྱུད་པ། འདོད་ཆགས་ཆེན་པོ་གཅིག་ཏུ་ངེས་པར་རྒྱས་པ། རྗེ་བཙུན་གྱི་རང་བཞིན་ཇི་ལྟ་བ་དེ་བཞིན་དུ་རྗེ་བཙུན་མ་ཡང་སྟེ་མགོ་བོ་སྐམ་པོའི་རྒྱན་གྱིས་ཁྱད་པར་དུ་བྱས་པའོ། །
BOབཅོམ་ལྡན་འདས་དང་བཅས་པ་འཛག་པའི་མགོ་བོའི་རྒྱན་ ཡང་སྟེ། སྐ་རགས་འོག་པག་ས་ཀྱང་གྲོལ་བར་གྱུར་པའོ། ། མ་ཧེ་དམར་པོ་ལ་གནས་པའི་གཡོན་བརྐྱང་གི་ཞབས་ཀྱིས་བཞུགས་པའོ། ། ཕྱི་ནས་བཅོམ་ལྡན་འདས་ལས་སྐྱེས་པའི་རྩེ་གསུམ་པའི་དབྱུག་པ་དཀར་པོའི་དབུས་སུ་སླར་ཡངས་བོན་ཁ་དོག་དམར་པོར་བསམ་པར་བྱའོ། ། ཕྱི་ནས་བཅོམ་ལྡན་ འདས་ཀྱི་རྡོ་རྗེ་ཡང་ཧཱུྃ་ཡིག་ལས་སྐྱེས་པའོ། ། སླར་ཡང་བཅོམ་ལྡན་འདས་མའི་གསང་བའི་པདྨ་འདབ་མ་བརྒྱད་པ་སྦལ་མིག་འགྱུས་ཙམ་དང་བཅས་པ་ཨཿཡིག་གིས་རྫོགས་པར་མཚན་པའོ། ། དེའི་རྗེས་སུ་གསང་སྔགས་རྒྱལ་བའི་བདག་ཉིད་ཅན་ནི། ཨོྃ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་བ་ཨཱཏྨ་ཀོ྅་ཧཾ། ལྟེ་བའི་འོག་ཏུ་བརྗོད་པ་དེ་འདབ་མ་བརྒྱད་པ་ཁ་དོག་དམར་པོའོ། ། དེར་ཡི་གེ་ཧྲིཿདམར་པོ་ངེས་པར་སོན་པའོ། ། སྤྱི་བོར་སོན་པའི་རེ་ཁ་དཀར་པོ་སླར་ཡང་བསམ་པར་བྱ་ཞིང་བཅོམ་ལྡན་འདས་ཀྱི་དབུ་ལ་གཞུག་པར་བྱའོ། ། སླར་ཡང་རྡོ་རྗེའི་ལམ་དེར་སོན་པར་བློ་བཟང་པོས་བསམ་པར་བྱའོ། ། ཕན་ཚུན་གཉིས་གཉིས་སྙོམས་པར་ཞུགས་ པས་རོ་མཉམ་པའི་ས་བོན་གྱི་གཟུགས་ཅན་ནོ། ། ས་བོན་དེ་ལྷ་མོ་བཞེས་རང་བཞིན་ལས་བསླང་བ་ནི།
BOཤར་ལ་སོགས་པའི་ཕྱོགས་བཞི་རྣམས་ན་གནས་པའི་ལྷ་མོ་ཐམས་ཅད་ཡིད་གཙིགས་པས་རང་གི་བདག་པོ་ལ་བལྟ་ཞིང་བསླང་བའི་ཆེད་དུ་གླུའི་མཆོད་པ་བྱེད་པར་བལྟའོ། ། ཐུགས་རྗེའི་ཁྲོ་བོ་རྗེ་བཙུན་ཉིད་བཞེངས་ཤིག ། ས་གསུམ་མཐའ་དག་རྨོངས་པ་སོལ་མཛོད་ཅིག ། རྡོ་རྗེ་ཙརྩི་ཀཱ་ཡིས་སོ། ། ཇོ་བོ་བདུད་བཞི་པོ་ནི་ལས་རྒྱལ་བ། ། སེམས་ནི་གཡེངས་སོ་རྗེ་བཙུན་ཉིད་བཞེངས་ཤིག ། ཕག་མོ་ཡིས་སོ། ། འཇིག་རྟེན་མགྲོན་གཉེར་སྟོང་ཉིད་ བཞུགས་སམ་ཅི། ། རྗེ་བཙུན་འཇིག་རྟེན་བསོད་ནམས་ཉིད་ཀྱིས་བཞེངས། ། དབྱངས་ཅན་མ་ཡིས་སོ། ། བྱང་ཆུབ་རང་བཞིན་འཇིག་རྟེན་མགྲོན་གཉེར་ནས། ། ཁྱོད་ཉིད་སྟོང་ཉིད་སེམས་ཤིང་ཅི་ལ་བཞུགས། ། གཽ་རཱི་ཡིས་སོ། ། རབ་ཏུ་སད་པར་བྱས་ནས་སླར་ཡང་དེ་ལ་ རབ་ཏུ་བཞུགས་སོ། ། དེ་ནས་དེར་ཁུ་བ་ལས་བྱུང་བའི་བདག་ཉིད་ལྷའི་བདག་ཉིད་ཅན་མ་ཧེ་དམར་པོ་ལ་གནས་པ་གར་གྱི་ཉམས་དགུ་དང་ལྡན་པ་བན་དྷུ་ཀའི་མེ་ཏོག་ལྟ་བུ་དྲག་པོ་ཞལ་གཅིག་པ། ཕྱག་གཉིས་པ་མཆེ་བ་རྣམ་པར་གཙིགས་པས་མི་བཟད་པ། དམར་ལ་ཟླུམ་ པའི་སྤྱན་གསུམ་པ། སྨ་ར་དམར་སེར་འཇིགས་པར་བྱེད་པ། མིའུ་ཐུང་གསུས་པ་འཕྱང་ཞིང་འཇིགས་པ།
BOདབུ་སྐྲ་དམར་སེར་གྱེན་དུ་བརྫེས་པ། ལྗགས་འདྲིལ་ཞིང་ཁྲག་འཛག་པ། སྨིན་མ་འཁྱོག་ཅིང་དྲག་ཏུ་བཞད་པ། མགོ་བོས་མཚན་པའི་དབྱུག་པ་དཀར་པོ་ གཡས་པའི་ཕྱག་གིས་འཛིན་པ། གཡོན་པས་མྱོས་བྱེད་དང་ཁྲག་གིས་གང་བའི་ཐོད་པ་འཛིན་པ། ཉི་མ་བྱེ་བའི་གཟི་བརྗིད་དང་མཉམ་པ། གཡོན་བརྐྱང་བའི་ཞབས་ཀྱིས་གནས་པ། མ་ཧེའི་རྒྱབ་ནས་གཤིན་རྗེ་འཇིགས་ཤིང་བསྡིགས་པར་མཛད་པ། བརྒྱད་གཉིས་ ལོན་པའི་རྣམ་པ་ཅན། ཀླུ་བརྒྱད་ཀྱིས་རྣམ་པར་བརྒྱན་པ། མགོ་བོའི་ཕྲེང་བ་དབུ་ལ་བཅིངས་པ། མགོ་བོའི་ཕྲེང་བ་རབ་ཏུ་འཕྱང་བ། སྟག་གི་པགས་པའི་ཤམ་ཐབས་ཅན་གྱི་ལྷའོ། ། རྡོ་རྗེ་ཕག་མོས་འཁྱུད་པ་ནི་བཅོམ་ལྡན་འདས་ཀྱི་ གཟུགས་དང་ཁ་དོག་འདྲ་བ་ལ་གྲི་གུག་དང་ཐོད་པ་ཅན་ཕྱག་རྒྱ་ལྔས་རྣམ་པར་བརྒྱན་པའི་ལུས་ཅན་མར་བརྩོན་པའི་སེམས་ཀྱིས་བསྒོམ་པར་བྱའོ། ། དེ་ནས་ང་རྒྱལ་བྱས་ན་བདག་ཉིད་གྲུབ་པར་འགྱུར་བར་ཐེ་ཚོམ་མེད་དོ། ། དེ་ནས་བཛྲ་སྭ་བྷཱ་ཝ་ཨཱཏྨ་ཀོ྅་ཧཱཾ་གི་གསང་ སྔགས་བཀླག་པར་བྱའོ། །
BOདེ་ནས་བཅོམ་ལྡན་འདས་མས་རྗེས་སུ་ཆགས་པ་ཆེན་པོས་ཡན་ལག་དང་ཉིང་ལག་ཐམས་ཅད་རྣམ་པར་བལྟས་ནས་པདྨ་ར་རྡོ་རྗེ་གསོར་ཏེ་གཉིས་ཀའི་སྟག་ལྤགས་ཀྱི་ན་བཟའ་འཕྱར་བར་བསྒོམ་པར་བྱའོ། ། དེ་ལ་འདི་དག་རྗེས་སུ་ཆགས་ པར་བྱེད་དོ་ཞེས་བྱས་ནས་རྡོ་རྗེ་པདྨ་དག་སེམས་ལ་བྱིན་ནས་ཧཱུྃ་ཡིག་དམར་པོ་ཡོངས་སུ་གྱུར་པ་ལས་རྡོ་རྗེ་རྩེ་མོར་ཨོཾ་ཡིག་སེར་པོས་བྱིན་གྱིས་བརླབས་པ་རབ་ཏུ་བསྒོམ་པར་བྱའོ། ། ཨཱཿཡིག་དམར་པོས་པདྨ་དེའི་ཟེའུ་འབྲུ་ལ་ཨཱཿཡིག་གིས་བྱིན་གྱིས་བརླབས་པའོ། ། དེ་ནས་ཨོྃ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཏྨ་ཀོ྅་ཧཾ་ཞེས་བཀླགས་ནས། རྡོ་རྗེ་པདྨ་མཉམ་པར་སྦྱོར་བ་ལས་བཞེངས་པར་བ་དག་ཉིད་བསྒོམ་པར་བྱ་སྟེ། ཕྱི་རོལ་གྱི་གཉིས་གཉིས་བཞིན་ནོ། ། དེ་ནས་འཕོ་བའི་གནས་སྐབས་ན་བདག་ཉིད་དུ་བསྒོམས་ པའི་ལྷ་མོའི་པདྨའི་ཁོངས་སུ་དུས་མཉམ་པར་འཛག་པའི་ཁམས་གཉིས་འདྲེས་པར་བསྒོམ་པར་བྱའོ། ། དཀར་པོ་དང་དམར་པོ་དེ་དག་ཡོངས་སུ་གྱུར་པས་གཏི་མུག་གཤིན་རྗེའི་གཤེད་ལ་སོགས་པ་རྣམས་བདག་ཉིད་ཇི་ལྟ་བ་བཞིན་དུ་པདྨའི་དབུས་སུ་བསམས་ནས་ བཅོམ་ལྡན་འདས་མ་ལས་སྐྱེ་བར་བསྒོམ་པར་བྱའོ། །
BOདེའི་འོག་ཏུ་དེ་རྣམས་མདུན་དུ་བལྟས་ནས་རང་རང་གི་གནས་སུ་སོ་སོར་གནས་པར་བསམ་པར་བྱའོ། ། དེ་ནས་ཤར་གྱི་འདབ་མའི་ཉི་མ་ལ་གཏི་མུག་གཤིན་རྗེའི་གཤེད་ཙརྩི་ཀཱ་ནག་མོས་འཁྱུད་པའོ། ། ལྷོའི་འདབ་ མའི་ཉི་མ་ལ་ཕྲ་མ་གཤིན་རྗེའི་གཤེད་སེར་པོ་ཕག་མོ་སེར་མོས་འཁྱུད་པ་སྟེ་དེ་ཡང་ཕག་པའི་གདོང་པ་ཅན་ནོ། ། ནུབ་ཀྱི་འདབ་མའི་ཉི་མ་ལ་འདོད་ཆགས་གཤིན་རྗེའི་གཤེད་དམར་པོ་དབྱངས་ཅན་མ་དཀར་མོ་དང་སྦྱོར་བའོ། ། བྱང་གི་འདབ་མའི་ཉི་མ་ལ་ཕྲག་ དོག་གཤིན་རྗེའི་གཤེད་སྔོ་བསངས་གཽ་རཱི་མ་དང་སྙོམས་པར་འཇུག་པའོ། ། ཡང་ན་ཐམས་ཅད་ཀྱང་གཤིན་རྗེའི་གཤེད་དམར་པོ་དང་། རོ་ལངས་མ་དང་མཚུངས་པར་བསྒོམ་པར་བྱའོ། ། མེ་རུ་མུ་མེན་གྱི་བུམ་པ་བཞི་མཉམ་སྦྱར་བས་གང་བའོ། ། བདེན་བྲལ་དུ་གསེར་གྱི་བུམ་ པ་གླ་རྩིས་གང་བའོ། ། དེ་བཞིན་དུ་རླུང་དུ་བྱི་རུའི་བུམ་པསིཀླས་གང་བའོ། ། དབང་ལྡན་དུ་དངུལ་གྱི་བུམ་པ་ག་པུར་གྱིས་གང་བ་ཇི་ལྟ་བ་བཞིན་ནོ། ། ཐོད་པ་གང་བ་བལྟས་ནས་ཉི་མ་དང་ཟླ་བ་ཀུན་རྫོགས་པ་དག་ལའོ། ། འདི་ཉིད་བདེ་བ་ཆེན་པོ་དང་ཟུང་དུ་འཇུག་པ་མཆོག་ ལས་གཞན་པ་མ་ཡིན་པའོ། ། དེ་ནས་རང་གི་སྙིང་གར་པདྨ་དང་།
BOཉི་མ་ལ་གནས་པའི་ཧཱུྃ་ཡིག་ལས་སྐྱེས་པ་དེའི་འོད་ཟེར་རྣམས་ཀྱིས་དཀྱིལ་འཁོར་གྱི་འཁོར་ལོ་ལ་མཆོད་པ་ཀུན་གྱིས་མཆོད་ནས། ཛཿཧཱུྃ་བྃ་ཧོཿཞེས་པས་བདེན་པར་དགུག་པ་དང་། གཞུག་པ་ལ་སོགས་ པ་དང་མཆོད་པར་བྱའོ། ། སེམས་ཅན་རྣམས་ཐམས་ཅད་བླ་མའི་མན་ངག་ཇི་ལྟ་བ་ལས་སོ་ཞེས་པས་རྣལ་འབྱོར་གཉིས་སོ། ། དེས་ན་ཕྱོགས་བཅུར་བ་ཞུགས་པའི་རྣལ་འབྱོར་པ་དང་རྣལ་འབྱོར་མའི་ཚོགས་རྣམས་བློ་དང་ལྡན་པས་སྔ་མ་བཞིན་དུ་བཀུག་ནས་མཆོད་ཅིང་དབང་ བསྐུར་བ་ལ་སོགས་པ་རྣམས་སོ། ། དེ་བཞིན་གཤེགས་པ་རྣམས་དང་སྤྱན་མ་ལ་སོགས་པ་རྣམས་ཀྱིས་ཀུན་ཏུ་དགའ་བའི་ཐུགས་ཀྱིས་སྣ་ཚོགས་པར་གྱུར་པའི་གླུ་ལ་སོགས་པ་དང་གར་གྱིས་བདུད་རྩི་ལྔ་ཡིས་གང་བའི་བུམ་པ་རྣམས་ཀྱིས་དབང་བསྐུར་བཞིན་དུ། དབང་ བསྐུར་རིན་ཆེན་ཆེན་པོ་ལ། ། ཁམས་གསུམ་པ་ཡིས་ཕྱག་བྱས་པ། ། སངས་རྒྱས་ཀུན་གྱི་གསང་གསུམ་གྱི། ། གནས་ལས་བྱུང་བ་སྦྱིན་པར་བྱ། ། ཞེས་གསུང་ཞིང་བསྟོད་པས། དཀྱིལ་འཁོར་བ་ཐམས་ཅད་ཀྱི་དབུ་ལ་ཁུ་བ་སྟེང་དུ་བྱུང་བ་ལས། རྡོ་རྗེ་སེམས་ དཔས་རྒྱས་བཏབ་པར་བསམ་མོ། ། ཞེས་པ་ཡང་དག་པར་སྐྱེད་པའི་ཆོ་གའོ། ། གཏི་མུག་དང་། ཕྲ་མ་དང་། འདོད་ཆགས་དང་།
BOཕྲག་དོག་རྣམས་ཀྱིས། གསོལ་བ་འདེབས་པར་བྱེད་པ་ནི། ཀྱེ་ཀྱེ་གཤིན་རྗེའི་གཤེད་དམར་པོ། ། བླ་མ་ སྲིན་པོའི་གཟུགས་རང་བཞིན། ། ཁོ་བོས་ཁྱོད་མཐོང་རྣམ་པར་འཇིགས། ། བླ་མ་ཁྲོ་བོའི་རང་བཞིན་སྤོངས། ། ཁྱོད་ཀྱིས་གར་མཛད་ས་སྟེངས་དང་། ། ས་བླ་དང་ནི་ས་འོག་ག་གཡོ། ། ཆགས་པས་བརྒྱན་པའི་ཁྲོ་བོ་ཡི། ། གར་མཛད་ཁྱོད་ནི་རོ་ལངས་ལགས། ། སྐུ་ ནི་སྦོམ་ཐུང་དམར་པོ་སྟེ། ། རྣམ་པ་སྣ་ཚོགས་སྐུ་སྤྲུལ་པ། ། རྡོ་རྗེ་དབྱངས་ཅན་མ་ཡིས་བཏུད། ། གར་མཛད་ཁྱོད་ནི་བདེ་བ་ཆེ། ། ཧྲཱིཿཥྚྲིཿགསང་སྔགས་དག་གིས་ནི། ། ཁྱོད་ནི་ས་གསུམ་འཁྲུལ་པ་སེལ། ། རྗེ་བཙུན་སྙིང་རྗེའི་ཁྲོ་བོ་ལགས། ། གར་མཛད་ ཁྱོད་ནི་འགྲོ་ལ་གཟིགས། ། ཨོྃ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨཏྨ་ཀོ྅ཧཾ་ཞེས་སོ། ། དེ་ནས་སྔར་བཞིན་དུ་རླུང་གི་དཀྱིལ་འཁོར་གྱི་སྟེང་དུ་མེའི་དཀྱིལ་འཁོར། དེའི་སྟེང་དུ་ཨོཾ་ཡིག་ཡོངས་སུ་གྱུར་པའི་གསང་བའི་དཀྱིལ་འཁོར་གསུམ་གྱི་སྟེང་དུ་ཨཱཿཡིག་ཡོངས་ སུ་གྱུར་པ་ལས་ཐོད་པ་བསྒོམ་པར་བྱའོ་ཞེས་སོ། ། དེའི་དབུས་སུ་བདུད་རྩི་ལྔ་དང་། སྒྲོན་མ་ལྔ་དང་། ཞོ་དང་། འོ་མ་དང་། ཤ་དང་།
BOཉ་ལ་སོགས་པ་དབྱུག་པས་དཀྲུགས་པས་རོ་མཉམ་པར་བྱས་ལ་ཚོས་ནས་རྒྱ་སྐྱེགས་ཀྱི་ཁུ་བ་ལྟ་བུར་བལྟའོ། ། ཨོཾ་ཨཱཿཧཱུྃ་ཞེས་པ་འདིས་ བསིལ་བར་གྱུར་པར་བྱས་ནས་ཧཱུྃ་ཡིག་ཡོངས་སུ་གྱུར་པའི་ལྕེ་སྦུ་གུ་ཅན་བསམས་ནས་བཏུང་བར་བྱའོ། ། རང་རང་གི་ཁ་ཡིས་ནི་ལྷ་མོའི་ཁ་རུ་སྦྱིན་པར་བྱའོ། ། དཀྱིལ་འཁོར་པ་རྣམས་ཀྱིས་ཀྱང་བསམས་ནས་ཀུན་ཏུ་སྤྱད་པར་བྱའོ། ། དེ་ནས་བདུད་རྩི་མྱོངས་པས་ཡང་དག་པར་དགོས་པར་གྱུར་ནས་ཕྱི་ནས་གསང་སྔགས་ བཟླས་པར་བྱའོ། ། སྙིང་གར་གནས་པའི་ས་བོན་དང་མཚན་མ་བསྟན་པར་བྱས་ནས་གསང་སྔགས་བཟླས་པར་བྱའོ། ། ཨོཾ་ཧྲཱིཿཥྚྲཱིཿབི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་པས་ཇི་སྲིད་འདོད་པར་བསམས་ནས་བཟླས་པར་བྱའོ། ། ལྡང་བར་འདོད་ན་རང་གི་ལུས་ཀྱི་འོད་ཟེར་གྱིས་སེམས་ཅན་གྱི་དོན་བྱས་ནས་ཐམས་ཅད་ བདག་ལ་རབ་ཏུ་བཅུག་སྟེ་ཡིད་ཀྱིས་གཤིན་རྗེའི་གཤེད་ལྷན་ཅིག་སྐྱེས་པའི་རྣལ་འབྱོར་དག་གིས་ཇི་ལྟར་བདེ་བར་གནས་པར་བྱའོ། །
BOལྷན་ཅིག་སྐྱེས་པའི་གཤིན་རྗེའི་གཤེད་ཀྱི་རྣལ་འབྱོར་གྱི་གནས་སྐབས་ནི་བདག་ཉིད་ཀྱི་གཟུགས་ལྟ་བུ་རང་བཞིན་གྱིས་གྲུབ་པའི་གཤིན་རྗེའི་ གཤེད་དུ་ང་རྒྱལ་བྱེད་པར་བརྗོད་པར་བྱ་སྟེ། རང་བཞིན་གྱིས་གྲུབ་པའི་ཞལ་གཅིག་པ་ཕྱག་གཉིས་པ་གཤིན་རྗེའི་གཤེད་ཁོ་ན་ངའོ་ཞེས་སོ། ། རྣལ་འབྱོར་ཆེན་པོའོ། ། རྣལ་འབྱོར་བཞི་དང་ལྡན་པ་འདིས་ཐུན་གཉིས་ཀྱིས་སམ། ཐུན་བཞེས་ཀྱང་རུང་སྟེ། ད་ལྟར་མངོན་པར་ འདོད་པའི་དུས་སུ་རྟག་ཏུ་ཡོངས་སུ་རྫོགས་པའི་བར་ཇི་སྲིད་དུའོ། ། དེ་ནས་འབུམ་ཕྲག་གི་མཐར་མཚན་ཐོག་ཐག་ཏུ་བཟླས་པར་བྱ་སྟེ། སྔོན་དུ་བསྙེན་པ་བྱས་པར་འགྱུར་རོ། ། དེ་ནས་ལས་ཐམས་ཅད་པའི་ཐབ་ཀྱི་ཆོ་གས་མར་དང་སྦྲང་རྩི་དང་མེ་ཏོག་དམར་པོས་སྟོང་ཕྲག་བཅུར་ སྦྱིན་སྲེག་བྱ་སྟེ། རེ་རེ་ཞིང་གསང་སྔགས་བཀླགས་ནས་སོ། ། ཨོྃ་ཧྲཱིཿཥྚྲཱིཿབི་ཀྲྀ་ཏཱ་ན་ནམནྟྲ་སིདྡྷིམྨེ་དེ་ཧཱི་ཏི་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དེ་ནས་ལས་ཐམས་ཅད་པའི་དངོས་གྲུབ་ཀྱི་གསང་སྔགས་འགྲུབ་པར་འགྱུར་རོ། ། དམར་པོ་ཞེས་པའི་ལྷ་ལ་སོགས་པའི་ལེའུ་སྟེ་དང་ པོའོ། ། ། ། འདིར་བཅོམ་ལྡན་འདས་མས་གསོལ་པ། བཅོམ་ལྡན་འདས་ཀྱི་ཕྱག་རྒྱ་ཆེའི། །
BOདངོས་གྲུབ་ཇི་ལྟར་འགྱུར་བ་དང་། ། རྣམ་པ་ཅི་ཡིས་བསྒྲུབ་བྱ་བ། ། དེ་ཡང་བཅོམ་ལྡན་འདས་གསུང་གསོལ། ། ཁ་ཡིས་ཁ་ལ་འོ་བྱས་ནས། ། ཕན་ཚུན་ དམ་པོ་ཡིས་ནི་འཁྱུད། ། མཆོག་ཏུ་དགའ་བའི་གཟུགས་ཀྱིས་ནི། ། དགའ་མ་བཤད་པར་བྱ་ཡིས་ཉོན། ། གར་བྱེད་པའི་རྣམ་པའི་རྣལ་འབྱོར་བ་དག་ཉིད་ཀྱི་གཟུགས་གང་ཡིན་པ། བཅོམ་ལྡན་འདས་མཆོག་ཏུ་རྣམ་པར་མ་ཆད་པར་འབབ་པ་སྟེ། དཔེར་ན་ཆུ་ཀླུང་ གི་རྒྱུན་རབ་ཏུ་འབབ་པ་བཞིན་ནོ། ། འདིར་ཇི་སྲིད་དུ་བསྒོམས་པ་ལས་སྐྱོ་ན་སྔགས་བཟླས་པར་བྱའོ། ། བཅོམ་ལྡན་འདས་ཀྱི་གཟུགས་གལ་ཏེ་མྱུར་དུ་གྲུབ་པར་འགྱུར་གྱི་གཞན་དུ་མ་ཡིན་ནོ། ། ཇི་སྲིད་དུ། འདིའི་དངོས་གྲུབ་ཀྱང་ཕྱག་རྒྱ་ཆེན་པོའི་དངོས་གྲུབ་ཁོ་ན་དེའོ། ། འདི་རྣམས་ཀྱང་རྣལ་འབྱོར་གོམས་པ་ཁོ་ནས་ཐམས་ཅད་སྒྲུབ་པར་བྱེད་ཀྱི་གཞན་དུ་མ་ཡིན་ནོ། ། སྐྱེས་བུའི་གོམས་པའི་སྦྱོར་བས་ཐར་པའི་དོན་དང་འདོད་པའི་དོན་བྱུང་བ་དང་མ་བྱུང་བ་དང་སྔོན་དུ་གནས་པ་རྣམས་རྣམ་པ་སྣ་ཚོགས་པ་དང་སངས་ རྒྱས་ཉིད་ཀྱི་དངོས་གྲུབ་ཀྱང་སྐྱེ་བ་འདི་ཉིད་ལ་འགྱུར་རོ། ། ལས་ཐམས་ཅད་ཡོངས་སུ་སྤངས་ནས་དེར་སོན་པའི་ཡིད་དུ་གྱུར་ནས།
BOཇི་སྲིད་རང་ཉིད་འོངས་ནས་སྨྲ་བར་བྱེད་དེ། ཀྱེ་ཀྱེ་སྒྲུབ་པ་པོ་མཆོག་ཅི་ཡིན་པ་དེ་སྩལ་བར་བགྱིའོ། ། དེ་ནས་མཆོད་ཡོན་བྱིན་ནས་ཕྱག་ བྱས་ཏེ་དངོས་གྲུབ་བླང་བར་བྱས་པ་དེ་སྦྱིན་པར་བྱེད་དོ། ། ཨོྃ་ཧྲཱིཿཥྚྲཱིཿཔི་ཀྲྀ་ཏཱ་ན་ན་ཨཱ་གཙྪ་ཨཱ་གཙྪ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དེ་ནས་རྡོ་རྗེ་རོ་ལ་ངས་མ་སྒྲུབ་པར་འདོད་ན། རྡོ་རྗེ་རོ་ལངས་མའི་གཟུགས་བརྙན་བྱ་སྟེ། རས་སམ་འབྲས་བུ་ལ་བྱའོ། ། རྗེ་བཙུན་གྱི་ཁ་དོག་དང་ དབྱིབས་མདུན་དུ་ཡང་དག་པར་བཞག་ནས། ཇི་ལྟར་འབྱོར་པའི་མཆོད་པ་བྱས་ཏེ། དེ་དག་རང་རང་སོ་སོའི་གཟུགས་མ་འདྲེས་པས་ཀུན་ཏུ་མཐོང་བ་དེ་སྲིད་དུ་བཟླས་པར་བྱའོ། ། ཇི་སྲིད་དུ་འོངས་ནས་སྒྲུབ་པ་པོ་ལ་འཁྱུད་དེ་སྨྲས་པ། ཀྱེ་སྒྲུབ་པ་པོ་ཁྱེད་ཀྱི་བཀའ་བསྒོ་བ་ཅི་ ལགས། སྒྲུབ་པ་པོས་མཆོད་ཡོན་བྱིན་ནས་སྨྲ་བར་བྱ་སྟེ། བདག་གི་ཆུང་མར་འགྱུར་བའོ་ཞེས་པས་ཆུང་མར་འགྱུར་རོ། ། དེ་ལ་ལོངས་སྤྱད་པས་གཤིན་རྗེའི་གཤེད་ཀྱི་གཟུགས་སུ་གྲུབ་པར་འགྱུར་རོ། ། ཨོྃ་དྭེ་ཥ་ར་ཏི་ཨཱ་གཙྪ་ཨཱ་གཙྪ་ནུ་ད་ནུ་ད་ཏྲུ་ཊ་ཏྲུ་ཊ་ཧཱུྃ་ཛཿསྭཱ་ཧཱ། ཡང་ན་ཨོྃ་བཛྲ་བེཏྟ་ལི་ཨཱ་གཙྪ་ཨཱ་གཙྪ་ཧཱུྃ་ཛཿསྭཱ་ཧཱ།
BOགཞོན་ནུ་མ་ལོ་བཅུ་དྲུག་ལོན་པ་ཡན་ལག་བཟང་མོ་བག་མར་བླངས་པས་སམ། ཡང་དག་པར་བཟུང་ནས། བསྐྱེད་དེ་སྐལ་ལྡན་མར་བྱས་ཏེ། དབང་བསྐུར་བའི་རྣལ་འབྱོར་མ་སྔགས་ཀྱི་སྒོམ་པའི་ཚུལ་གྱིས་ ཡང་དག་པར་མཆོད་དེ། ལག་པ་གཡོན་པས་འཁྱུད་ལ་རྣལ་འབྱོར་མའི་གཟུགས་སུ་བསམས་ནས་ཇི་སྲིད་དུ་འབར་བར་གྱུར་པ་དེ་སྲིད་དུ་བཟླས་པར་བྱའོ། ། དེ་ནས་དེ་ལ་བཟུང་ནས་གཤིན་རྗེའི་གཤེད་ཀྱི་གཟུགས་སུ་གྲུབ་པར་འགྱུར་རོ། ། ཨོཾ་བཛྲ་བེཏྟ་ལི་ཛྭ་ལ་ཧཱུྃ་ཛཿསྭཱ་ཧཱ། ཞེས་བཟླས་པར་བྱའོ། ། དེ་ནས་གཏི་མུག་གཤིན་རྗེའི་གཤེད་སྒྲུབ་པར་འདོད་ན། གཏི་མུག་གཤིན་རྗེའི་གཤེད་ཀྱི་ཆ་ལུགས་སུ་བྱས་ནས་གཡས་པ་དང་ཅིག་ཤོས་ཀྱི་རྐང་པའི་མཐིལ་གྱིས་པདྨ་མནན་ཏེ། ཇི་སྲིད་དུ་ཀྱེ་སྒྲུབ་པ་པོ་ཞེས་བོས་ནས་བཀའ་བསྒོ་བ་ཅི་ལགས་ ཞེས་སྨྲ་བར་བྱེད་པ་དང་། ཅི་བགྱི་བར་འགྱུར་ཞེས་སྨྲ་བ་དེ་སྲིད་དུ་བཟླས་པར་བྱའོ། ། དེ་ནས་བརྩམས་ཏེ་འཇིག་རྟེན་གསུམ་གྱི་རྒྱལ་སྲིད་ཀྱང་སྟེར་རོ། ། དངོས་གྲུབ་གཞན་ལྟ་སྨོས་ཀྱང་ཅི་དགོས། དེ་བཞིན་དུ་ཕྲ་མ་གཤིན་རྗེའི་གཤེད་དང་། འདོད་ཆགས་གཤིན་རྗེའི་གཤེད།
BOཕྲག་དོག་གཤིན་རྗེའི་གཤེད་སྒྲུབ་པར་འདོད་ན་དེ་བཞིན་ཉིད་དུ་འབྲས་བུ་སྲུབ་པའི་གསང་སྔགས་ནི། ཨོྃ་མོ་ཧཱ་ཡ་མཱནྟ་ཀྲྀཏ་ཨ་གཙྪ་ཨཱ་གཙྪ་ཧཱུྃ་ཧཱུྃ་ཕཊ་ཕཊ། ཨོྃ་པི་ཤུན་ཡ་མཱནྟ་ཀྲྀཏ་ཨ་གཙྪ་ཨཱ་གཙྪ་ཧཱུྃ་ཧཱུྃ་ཕཊ་ཕཊ། ཨོྃ་རཱ་ག་ཡ་མཱནྟ་ཀྲྀཏ་ཨཱ་གཙྪ་ཨཱ་གཙྪ་ཧཱུྃ་ཧཱུྃ་ཕཊ་ཕཊ། ཨོྃ་ཨཱིརྵ་ཡ་མཱནྟ་ཀྲྀཏ་ཨཱ་གཙྪ་ཨཱ་གཙྪ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བཟླས་པར་བྱའོ། ། དེ་ནས་གཏི་མུག་དགའ་མ་སྒྲུབ་པར་འདོད་ན་གཏི་མུག་དགའ་མ་ལྟ་བུའི་སྔར་བརྗོད་པའི་ལྷ་མོའི་གཟུགས་མ་ཧེ་ལ་ཞོན་པ་བདག་ཉིད་དང་ལྷན་ཅིག་པ་བྱས་ནས་སྔར་བཞིན་དུ་མནན་ཏེ། ཇི་སྲིད་དུ་འོངས་ནས་ཅི་བགྱི་བར་འགྱུར་རོ་ཞེས་སྨྲ་བ་དེ་སྲིད་དུ་བཟླས་པར་བྱའོ། ། དེ་ནས་བརྩམས་ནས་སྒྲུབ་པ་པོ་མངོན་པར་འདོད་པ་ཕུན་སུམ་ཚོགས་པར་འགྱུར་རོ། ། དེ་བཞིན་དུ་ཕྲ་མ་དགའ་མ་དང་། འདོད་ཆགས་དགའ་མ་དང་། ཕྲག་དོག་དགའ་མ་བསྒྲུབ་པར་བྱའོ། ། དེ་ནས་སྔགས་ནི། ཨོྃ་མོ་ཧཱ་ར་ཏི་ཨཱ་གཙྪ་ཨཱ་གཙྪ་ཧཱུྃ་ཛཿ ཨོྃ་པི་ཤུ་ནཱ་ར་ཏི་ཨཱ་གཙྪ་ཨཱ་གཙྪ་ཧཱུྃ་ཛཿ ཨོྃ་རཱ་གཱ་ར་ཏི་ཨཱ་གཙྪ་ཨཱ་གཙྪ་ཧཱུྃ་ཛཿ ཨོྃ་ཨཱིཛྱ་ར་ཏི་ཨཱ་གཙྪ་ཨཱ་གཙྪ་ཧཱུྃ་ཛཿ ཞེས་བཟླས་པར་བྱའོ། ། ཡང་ན།
BOཨོྃ་བཛྲ་ཙརྩི་ཀེ་ཨ་གཙྪ་ཨཱ་ གཙྪ་ཧཱུྃ་ཛཿ དེ་བཞིན་དུ། བཛྲ་ཝཱ་རཱ་ཧཱི། བཛྲ་སྭ་ར་སྭ་སྟི། བཛྲ་གཽ་རཱི་ཞེས་བཟླས་པར་བྱའོ། ། དེ་ནས་གནོད་སྦྱིན་སྒྲུབ་པར་འདོད་ན། དེའི་ཚེ་འཇིག་རྟེན་གྱི་དངོས་གྲུབ་སྒྲུབ་པའི་འདུ་ཤེས་ཀྱིས་གནོད་སྦྱིན་གྱི་གཟུགས་བརྙན་བྱས་ཏེ། དེ་མནན་ཏེ་བསྒྲུབ་པར་བྱའོ། ། བཀའ་བསྒོ་བ་ཐམས་ཅད་ཕུན་སུམ་ཚོགས་པར་འགྱུར་རོ། ། དེ་བཞིན་དུ་གནོད་སྦྱིན་མོ་དང་། ཀླུ་དང་། ཀླུ་མོ་དང་། {ཡི་དགས་,ཡི་དྭགས་}དང་། {ཡི་དགས་,ཡི་དྭགས་}མོ་དང་། ཤ་ཟ་དང་། ཤ་ཟ་མོ་དང་། ལྷ་དང་། ལྷ་མོ་དང་། མི་དང་། མི་མོ་ཡང་ངོ་། ། གཞན་ཡང་མངོན་དུ་ བསྒྲུབ་པར་བྱས་ཏེ། ཨོྃ་ཧྲཱིཿཥྚྲིཿབི་ཀྲྀ་ཏཱ་ན་ན་ཆེ་གེ་མོ་སཱ་དྷ་ཡ་ས་དྷ་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བཟླས་པར་བྱའོ། ། དེ་ནས་རྡོ་རྗེ་ད་བྱུག་པ་སྒྲུབ་པར་འདོད་ན། སྐར་མ་རྒྱལ་ལ་རྡོ་རྗེའི་དབྱུག་པ་ཤིང་ལས་བྱུང་བ་སོར་མོ་སུམ་ཅུ་པའི་དབྱུག་པ་བྱས་ནས། བ་བྱུང་ལྔས་བྱུགས་ ཏེ། ཙནྡན་དང་། མེ་ཏོག་གི་ཕྲེང་བ་ས་ཉེ་བར་མཛེས་པར་བྱས་པའམ། ཡང་ན་གང་ཞིག་རྩེ་མོ་རལ་གྲིའི་ཚུལ་གྱིས་བཟུང་ནས་ཇི་སྲིད་དུ་འབར་བར་གྱུར་པ་དེ་སྲིད་དུ་བཟླས་པར་བྱའོ། །
BOདེ་ནས་དབྱུག་པ་འཛིན་པར་འགྱུར་ཏེ། གཤིན་རྗེའི་གཤེད་དང་མཚུངས་པར་ཕ་རོལ་གནོན་ཏོ། ། ཨོྃ་ཧྲཱིཿཥྚྲིཿ བི་ཀྲྀ་ཏཱ་ན་ན་བཛྲ་ད་ཎྜ་ཛྭཱ་ལ་ཡ་ཛྭཱ་ལ་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བཟླས་པར་བྱའོ། ། དེ་ནས་ཐོད་པ་སྒྲུབ་པར་འདོད་ན་བདུད་འཇོམས་པའི་གཟུགས་ཐོད་པ་སོར་མོ་སུམ་ཅུ་སོ་གཉིས་པ་བྱས་ནས་སྔར་བཞིན་དུ་ལག་པ་གཡོན་པར་བཞག་སྟེ། ལག་པ་གཡས་ པས་བཀབ་ནས་ཇི་སྲིད་དུ་འབར་བར་གྱུར་པ་དེ་སྲིད་དུ་བཟླས་པར་བྱའོ། ། འབྲས་བུ་ནི་དེ་ལྟ་བུ་ཁོ་ནའོ། ། སྔགས་ལ་ནི། ཀ་པཱ་ལཾ་ཛྭཱ་ལ་ཡ་ཞེས་པ་ཁྱད་པར་རོ། ། དེ་ནས་དབྱུག་པའི་ཕྱག་རྒྱ་བསྒྲུབ་པར་བྱ་སྟེ། དེའི་ཚེ་ལག་པ་གཡས་པ་ཁུ་ཚུར་བྱས་ནས་སྡིགས་མཛུབ་བརྐྱང་ བར་བྱའོ། ། དེའི་ཕྱག་རྒྱ་བཅིངས་ནས་ཇི་སྲིད་དུ་འབར་བར་གྱུར་པ་དེ་སྲིད་དུ་བཟླས་པར་བྱའོ། ། དེ་ནས་གཤིན་རྗེའི་གཤེད་ཀྱི་གཟུགས་ཀྱི་དངོས་གྲུབ་ཏུ་འགྱུར་རོ། ། སྔགས་ལ་ནི། དཎྜ་མུ་དྲཱཾ་ཛྭཱ་ལ་ཡ། ཞེས་པ་ཁྱད་པར་རོ། ། འདི་ནི་འདོད་པ་ལྔ་པོ་ཐམས་ཅད་ལ་ཉེ་བར་ ལོངས་སྤྱོད་པ་ཉིད་ཀྱིས་ཐམས་ཅད་བསྒྲུབ་པར་བྱའོ་ཞེས་ཏེ། ཇི་ལྟར་རྙེད་པའི་དམ་ཚིག་གི་རྫས་བསམ་པ་རབ་ཏུ་རྫོགས་པའི་དོན་དུ་བཟའ་བར་བྱ་ཞིང་།
BOབཏུང་བར་བྱའོ། ། ཡང་ནས་ཡང་དུ་གང་ཅི་འང་རུང་། ། དེ་ཀུན་གདོན་མི་ཟ་བར་ཡང་། ། བཟའ་བྱ་ཐམས་ཅད་བཏུང་བར་བར་བྱ། ། ཕུད་ཀུན་གཤིན་རྗེའི་གཤེད་ལ་དབུལ། ། ཞེས་པ་དངོས་གྲུབ་ཆེན་པོ་སྒྲུབ་པའི་ཆོ་གའི་ལེའུ་སྟེ་གཉིས་པའོ། ། ། ། དེ་ནས་དངོས་གྲུབ་ཕྲན་ཚེགས་སྒྲུབ་པར་འདོད་ན། དེ་ལ་ཞི་བ་ཅན་ལ་སོགས་པ་བསྒྲུབ་པར་བྱ་སྟེ། གྲོ་ག་ལ་ཡང་ལན་བརྒྱ་རྩ་བརྒྱད་དུ་ བསྔགས་པའི་འོ་མས་རྩིབས་བཅུ་གཉིས་པའི་འཁོར་ལོ་སོ་གོ་ཐ་དད་པ་མངོན་པར་བྲི་བར་བྱའོ། ། དེའི་ཤར་སྒོ་ནས་བརྩམས་ཏེ། གཡས་སྐོར་གྱིས་ཡི་གེ་བཅུ་གཉིས་བྲི་བར་བྱའོ། ། ཨོྃ་ཧྲཱིཿཥྚྲིཿབི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ། དབུས་སུ་ཆུའི་ས་བོན་བཾ་ཡིག་བྲི་བར་བྱ་སྟེ། རྃ་ཡིག་གཉིས་ཀྱི་ཁ་སྦྱར་ལ་བསྒྲུབ་བྱའི་མིང་དེའི་དབུས་སུ་བྲི་བར་བྱའོ། ། ཕྱི་རོལ་ཏུ་ཡི་གེས་བསྐོར་བར་བྱའོ། ། དེ་ནས་ཁ་སྦྱོར་དུ་བྱས་ནས་སྐུད་པ་དཀར་པོས་དཀྲིས་ནས་མྱོས་བྱེད་ཀྱིས་དཀྲིས་ཏེ་བརྒྱ་རྩ་བརྒྱད་དུ་བྱིན་གྱིས་བརླབས་ལ་འོ་མས་གང་བའི་བུམ་པ་བཅུག་སྟེ། སྔགས་བཟླས་པར་བྱའོ། ། ཇི་ལྟར་འབྱོར་བའི་མཆོད་པ་བྱས་ནས།
BOཨོྃ་ཧྲཱིཿཥྚྲིཿབི་ཀྲྀ་ཏཱ་ན་ན་བ་དེ་བ་དཏྟ་སྱ་ཤཱནྟིཾ་ཀུ་རུ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བཟླས་པ་བྱ་སྟེ་ཞི་བར་འགྱུར་རོ། ། འཇིག་རྟེན་པ་རྣམས་ཀྱིསྡིག་པ་དང་ནད་ལ་སོགས་པ་ཉེ་བར་འཚེ་བ་ལ་གྲོང་གི་ཕྱོགས་བཅུ་རྣམས་ སུ། ཨོྃ་ཧྲཱིཿཥྚྲིཿཔི་ཀྲྀ་ཏཱ་ན་ན་ཨ་མུ་ཀ་གྲུ་མ་སྱ་སརྦོ་པ་དྲ་ཝ་ཤཱནྟིཾ་ཀུ་རུ་ཀུ་རུ་ཧེ་ཧེ་བ་ལིཾ་གྲྀཧྞ་གྲྀཧྞ་ཕཊ་ཕཊ་སྭཱ་ཧཱ། ཞེས་པ་འདིས་ལན་བདུན་དུ་བྱིན་གྱིས་བརླབས་ནས་ཆོ་གས་གཏོར་མ་སྦྱིན་པར་བྱའོ། ། ཕྱི་རོལ་ལ་སོགས་པར་མདུན་དུ་བྱས་ཏེ་འོ་མས་སྦགས་པའི་སྦྱིན་སྲེག་ གྲོང་གི་དབུས་ཇི་སྲིད་པར་བྱས་ན་ཉེ་བར་འཚེ་བ་ཐམས་ཅད་ཞི་བར་འགྱུར་རོ། ། དེ་ནས་རྒྱས་པར་བྱ་བར་འདོད་ན་སྔར་བཞིན་དུ་རྡོ་རྗེ་གཉིས་མངོན་པར་བྲིས་ཏེ། ཡི་གེ་བཅུ་གཉིས་པོ་རྣམས་ཀྱི་དབུས་སུ་བྷྲུྃ་ཡིག་དཀྱིལ་འཁོར་གྱི་འཁོར་ལོའི་རྡོ་རྗེ་བྲི་བར་བྱའོ། ། དེའི་དབུས་སུ་ བསྒྲུབ་བྱའི་པཽ་ཥ་ཊ་གཉིས་ཁ་སྦྱར་བ་བྲི་བར་བྱའོ། ། ཕྱི་རོལ་ཏུ་གུར་གུམ་གྱིས་གྲུ་བཞི་པའི་རི་མོ་གསུམ་གྱིས་བསྐོར་བར་བྱའོ། ། དེ་སྐུད་པ་སེར་པོས་དཀྲིས་ནས་བརྒྱ་རྩ་བརྒྱད་དུ་མངོན་པར་བསྔགས་ཏེ།
BOམར་དང་སྦྲང་རྩིས་གང་བའི་བུམ་པར་བཅུག་ནས་སྔགས་བཟླས་ པར་བྱའོ། ། ཇི་ལྟར་འབྱོར་པའི་མཆོད་པ་བྱས་ནས་སྔགས་བཟླས་པར་བྱ་སྟེ། ཨོྃ་ཧྲཱིཿཥྚྲིཿབི་ཀྲྀ་ཏཱ་ན་ན་བྷྲུྃ་པཽ་ཥཊ་ལྷ་སྦྱིན་གྱི་པུཥྚིཾ་ཀུ་རུ་པཽ་ཥཊ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བཟླས་པར་བྱའོ། ། ཇི་སྲིད་དུ་ནོར་འཕེལ་ཞིང་རྒྱས་པར་གྱུར་གྱི་བར་དུའོ། ། སྔགས་བཟླས་པའི་བར་མ་ཆད་པར་ཞོའི་ཟན་གྱིས་སྦྱིན་སྲེག་བྱའོ། ། དེ་ནས་དབང་དུ་བྱེད་པར་འདོད་ན་སྔར་བཞིན་དུ་འཁོར་ལོ་གཉིས་ལ་སེ་ན་རྩིའི་ཁུ་བས་ཡི་གེ་བཅུ་གཉིས་པོ་རྣམས་མངོན་པར་བྲིས་ཏེ། དབུས་སུ་ཧྲིཿཡིག་ཀུ་རུ་ཀུམྦྷའི་ས་བོན་ནོ། ། དབུས་སུ་ཧོཿཡིག་གཉིས་ ཁ་སྦྱར་བ་ཀུན་ཏུ་བྲིའོ། ། ཕྱི་རོལ་ཏུ་གྲུ་གསུམ་པའི་རི་མོས་བསྐོར་བར་བྱའོ། ། དེ་ནས་སྲད་བུ་དམར་པོས་ཀུན་ཏུ་དཀྲིས་ནས་བརྒྱ་རྩ་བརྒྱད་དུ་བྱིན་གྱིས་བརླབས་ལ་མར་དང་སྦྲང་རྩིས་གང་བའི་ཁམ་ཕོར་ལ་རྒྱ་སྐྱེགས་ཀྱི་ཁུ་བས་བྲིས་ཏེ་བཅུག་ནས་ཇི་ལྟར་འབྱོར་པའི་མཆོད་པ་ བྱས་ནས་སྔགས་བཟླས་པར་བྱའོ། ། ཨོྃ་ཧྲཱིཿཥྚྲིཿབི་ཀྲྀ་ཏཱ་ན་ན་ཧྲཱིཿཧོཿ ལྷ་སྦྱིན་གྱིས་ལྷ་བྱིན་ལ། ཝ་ཤ་མ་ན་ཡ་ཧོཿཧཱུྃ་ཧཱུྃ་ཕཊ་ཕཊ་སྭཱ་ཧཱ།
BOཞེས་ཇི་སྲིད་དབང་དུ་གྱུར་གྱི་བར་དུ་བཟླས་པར་བྱའོ། ། སྔགས་བཟླས་པའི་མཐར་ནི་ལན་ཚྭ་དང་ལྷན་ཅིག་པའི་མེ་ཏོག་ཁ་ དོག་དམར་པོའི་སྦྱིན་སྲེག་བྱའོ། ། དེ་ནས་གོང་བུ་དགུག་པར་སེམས་ན་དུར་ཁྲོད་ཀྱིསོལ་བ་དང་སའི་གཟུགས་བརྙན་གྱི་དབུས་སུ་སྔགས་དང་དེ་ཉིད་ཀྱི་མིང་སྙིང་གར་བཅུག་སྟེ། རྐང་པའི་མཐེ་བོས་མན་ནས་བཟླས་པ་བྱ་སྟེ། འདི་ཁོ་ན་བསྒྲུབ་བྱའི་གོང་བུ་ཞེས་ཇི་སྲིད་དུ་གོང་བུ་ ཁུགས་པར་གྱུར་གྱི་བར་དུ་བཟླས་པར་བྱའོ། ། སྔགས་ལ་ནི། ཝ་ཤ་མཱ་ན་ཡའི་གནས་སུ་ཨཱ་ཀཪྵ་ཡ་ཧཱུྃ་ཞེས་པ་དང་། ཧོཿཡིག་གི་གནས་སུ་ཛཿཞེས་པ་ནི་ཁྱད་པར་རོ། ། ཨོཾ་མརྨེ་མརྨཱ་ཨ་བི་གྷཱ་ཏེ་ཨོཾ་ཙརྩི་ཀེ་ཧ་ར་ཧ་ར་པུཀྐཾ་མཱ་ར་ཡ་མཱ་ར་ཡ་ཆེ་གེ་མོའི་ཆེད་དུ་ཛཿ ཨོཾ་གཾ་བྷི་རེ་ཙརྩི་ཀེ་པདྨ་ (ཧུྃ་,ཧཱུྃ་)ཤོ་ཎི་ཏ་པྲཱི་ཡེ་གཾ་བྷཱི་རེ་ཆེ་གེ་མོ་ལ་ཛཿ། ཤིང་གཅིག་གམ། དུར་ཁྲོད་དམ། རི་བོ་རུ། ལྷོར་མངོན་པར་ཕྱོགས་པས་གཅེར་བུར་བྱུང་ནས་བརྒྱ་རྩ་བརྒྱད་དུ་བཟླས་པར་བྱའོ། ། དེ་ནས་འགྲུབ་པར་ཐེ་ཚོམ་མེད་དོ། ། བཅོམ་ལྡན་འདས་སྔགས་ཀྱི་ཆོ་ག་ཇི་ལྟ་བུ། བཅོམ་ ལྡན་འདས་ཀྱིས་བཀའ་སྩལ་པ།
BOདབེན་པར་གཅིག་པུ་ཅན་དུ་གྱུར་པས་རྗེ་བཙུན་གྱི་བྲིས་སྐུ་རབ་ཏུ་གསལ་བ་དང་ཕྱོགས་བཅུར་གནས་པའི་བླ་མ་དང་། སངས་རྒྱས་དང་། བྱང་ཆུབ་སེམས་དཔའ་རྣམས་མངོན་སུམ་དུ་བྱས་ནས་མིའི་རུས་པ་བཅད་པས ཁྲག་ཆེན་པོ་ དང་། བྱ་རོག་གི་ཁྲག་གིས་སོར་མོ་བཅུ་གཉིས་པའི་རྩིབས་བཅུ་གཉིས་པའི་རྣམ་པའི་འཁོར་ལོའི་དབུས་སུ་རླུང་གི་ས་བོན་ནོ། ། དེའི་ཁོངས་སུ་དགྲའི་མིང་རྣམ་པར་བཅད་པ་དང་བཅས་པ་ཁ་སྦྱར་ལ། བྱ་རོག་གི་མགྲིན་པ་ལ་བཅིངས་ནས་གལ་ཏེ་མ་བཀྲོལ་བ་དེའི་ཚེ་ཚར་གཅོད་ དོ། ། དེའི་ཚེ་ཚར་མ་ཆོད་ན་དེ་ལ་ས་བོན་བཅུ་གཉིས་བྲི་བར་བྱའོ། ། ཕཊ་ཕཊ་ཧཱུྃ་ཧཱུྃ་ན་ན་ཏ་ཀྲྀ་བི་ཥྚྲཱིཿཧྲཱིཿཨོཾ། ཇི་ལྟར་འབྱོར་པའི་མཆོད་པ་བྱས་ནས་སྟོབས་པོ་ཆེ་ཡིས་བདུག་པ་བྱིན་ནས་གལ་ཏེ་རྒྱུན་ལ་བསྐུར་བར་བྱའོ། ། གལ་ཏེ་མ་ཡིན་ན་ཁྭ་ཏའི་གཤོག་པ་ལ་ལན་ བདུན་དུ་བསྔགས་ཏེ་ཁྱིམ་གྱི་སྒོ་རུ་མིང་ནས་སྨོས་ན་འཕྲལ་དུ་སྐྲོད་པར་བྱེད་དེ་དེ་ཚར་གཅོད་དོ། ། དེ་བཞིན་དུ་རྩིབས་བཅུ་གཉིས་པའི་འཁོར་ལོའི་དབུས་སུ་ཚ་བ་གསུམ་དང་། དུག་དང་། སྐེ་ཚེ་དང་། རུས་པ་ཆེན་པོ་དང་།
BOབུད་ཤིང་གིས་མེའི་ས་བོན་གྱི་དབུས་སུ་རྣམ་པར་ བཅད་པ་དང་བཅས་པའི་ཡ་ཡིག་གཉིས་ཁ་སྦྱར་ལ་ཋ་ཡིག་གཉིས་ཀྱིས་ཕྱི་རོལ་ནས་བསྐོར་ཏེ་མེའི་ཤིང་གི་མེ་ལ་གདུང་བར་བྱའོ། ། དེའི་སྐད་ཅིག་ལ་བུ་དང་ཆུང་མ་དང་བཅས་པ་དང་། འཁོར་དང་བཅས་པ་འཆི་བར་འགྱུར་རོ། ། གལ་ཏེ་མ་ཡིན་ན་མིའི་རུས་པ་སོར་ བཞི་པ་ལ་ལན་བདུན་དུ་མངོན་པར་བསྔགས་པར་བྱས་ནས་དགྲའི་སྒོར་སྒོར་སྦ་བར་བྱས་ན། ། དེ་ཡི་རིགས་འཇོམས་པར་བྱེད་དོ། ། དེ་བཞིན་ཉིད་དུ་ས་བོན་བཅུ་གཉིས་ཡོངས་སུ་གྱུར་པས་རྩི་བས་བཅུ་གཉིས་པའི་འཁོར་ལོའི་དབུས་སུ་ཙནྡནལ་འཚོ་བའི་ཤིང་ངམ། གཞན་གྱིས་མི་ ཐུབ་པའི་འཁྲི་ཤིང་གིས་ཆུའི་ས་བོན་གྱི་དབུས་སུའོ། ། དེ་ཉིད་གཉིས་ཀྱིས་ཁ་སྦྱར་ལ་ཋ་ཡིག་གཉིས་ཀྱིས་ཕྱི་རོལ་དུ་བསྐོར་བར་བྱའོ། ། བརྒྱ་རྩ་བརྒྱད་བཟླས་པའི་འོ་མས་སྔ་མ་བཞིན་དུ་མེ་ཏོག་དམར་པོ་འབུམ་ཕྲག་གཅིག་གིས་རྒྱལ་པོ་འཆི་བར་བྱེད་ཅིང་དེ་ལས་གཞན་དུ་ཡང་ རྒྱལ་པོ་བྲན་གྱི་དངོས་པོར་མི་འགྲོ་བ། ། དེའི་ཚེ་བདག་ཉིད་མཚམས་མེད་པ་ལྔ་བྱེད་པར་འགྱུར་ཏེ་ངེས་པའོ། ། ཡང་ན་ཤིང་སེ་ཕ་ལི་ཀའམ། དེ་དང་འདྲ་བའི་མེ་ཏོག་དམར་པོ་རྣམས་ཀྱིས་སོ། །
BOདེ་བཞིན་ཉིད་དུ་ས་བོན་བཅུ་གཉིས་ཀྱིས་ཡོངས་སུ་ གང་བའི་ཁམ་ཕོར་དུ་བཞག་ནས་བཟླས་པར་བྱའོ། ། ལྷ་དང་། ལྷ་མ་ཡིན་དང་། མིའམ་ཅི་དང་། ལྟོ་འཕྱེ་ཆེན་པོ་དང་། སྦྲུལ་གདུག་པ་དང་། མཁའ་འགྲོ་དང་། མཁའ་འགྲོ་མ་དང་། གནོད་སྦྱིན་དང་། སྲིན་པོ་དང་། གདུལ་དཀའ་བའི་མི་དང་། མི་ བདག་རྒྱལ་པོ་ལ་སོགས་པ་རྣམས་འབངས་དང་འབངས་མོའི་དངོས་པོར་འགྲོ་བར་བྱེད་དོ། ། གཤིན་རྗེའི་གཤེད་དམར་པོའི་རྒྱུད་དུ་ཐུན་མོང་གི་ཞི་བ་ཅན་ལ་སོགས་པའི་ཆོ་གའི་ལེའུ་སྟེ་གསུམ་པའོ། ། ། ། དེ་ནས་མངའ་བདག་དམ་འཁྱུད་ཅིང་། ། ཚེམས་ཀྱིས་མ་མཆུ་བཙིར་མཛད་ནས། ། སེམས་ཅན་དོན་ཕྱིར་ཕན་པའི་དངོས། ། བདག་མེད་མ་ཡིས་ཞུས་པ་ནི། ། བཅོམ་ལྡན་ཇི་ལྟར་སེམས་ཅན་རྣམས། ། ཇི་ལྟར་རྒྱལ་པོ་རྣམས་སུ་འགྱུར། ། བཅོམ་ལྡན་འདས་ཀྱིས་བཀའ་སྩལ་པ། ། ངོ་མ་ཆོགས་ པའི་ཕྱིར་ལྷ་མོ་ཁྱོད་ལ་བཤད་པར་བྱའོ། ། ཨ་ཡིག་དང་བ་ཡིག་དག་ལས་ཀྱང་གཞན་དུ་མེ་ཏོག་བཞི་ལ་བ་ཊི་ཀ་བྱེད་དུ་བཅུག་ལ་སྐར་མ་རྒྱལ་ལ་ས་གསུམ་པོ་བསྒྲུབ་པར་བྱའོ། ། རྒྱལ་རིགས་ཀྱི་རིགས་ཀྱི་ཁྱིམ་ལྔ་རུ་གསང་སྔགས་སྟོང་ཕྲག་བཟླས་པར་བྱའོ། །
BOརྣལ་ འབྱོར་མའི་རྡོ་རྗེ་ཉི་མས་རང་གི་སྔགས་ཀྱིས་བསང་གཏོར་དང་། རང་གི་གསང་སྔགས་སྒྲུབ་པ་ནི་སྡོན་དུ་ཁྲི་བཟླས་པའི་སྒྲུབ་པ་ལས་སོ། ། གསེར་དང་། དངུལ་དང་། བྱི་རུ་དང་། བཻཌཱུརྱ་དང་། མཱ་ལི་ཀ་ལ་བསྙེན་པ་འབུམ་ཕྲག་གཅིག་བྱས་ནས། དེ་བཞིན་དུ་བཅུའི་ཆ་ཤས་ ཀྱི་སྦྱིན་སྲེག་བྱའོ། ། རྡོ་རྗེའི་ས་ལ་འབད་པ་ལས་སླར་ཡང་། རྟྃ་པྃ་ཙྃ་པྃ་རྃ། ཕྱོགས་རྣམས་སུ་རྣམ་པར་གཞག་པར་བྱའོ། ། དབུས་སུ་རྒྱན་ཐམས་ཅད་ཀྱིས་བརྒྱན་པ་གསང་སྔགས་ལ་བརྩོན་པ་མཉམ་པར་བཞག་པའི་རྣལ་འབྱོར་པས་གང་སྔགས་ཀྱི་ལྷའི་བདག་ཉིད་ རྣམས་ལ་ཉེར་སྤྱོད་ལྔའི་མཆོད་པ་རྣམས་ཀྱིས་དང་། ཕྱོགས་བཞིར་རྡོ་རྗེ་ཐོད་པ་རྣམས་སུ་ཡང་དག་པར་གང་བའི་གཏོར་མ་བྱས་ཏེ་ཕྱི་རོལ་ཏུ་ཕྱོགས་ཀྱི་གཏོར་མ་བཅུ་བྱས་ནས་དེ་བཞིན་དུ་མཆོད་སྦྱིན་གྱི་ཤིང་ལས་བྱུང་བའི་དབྱུག་པ་རྣམས་ཀྱིས་བགེགས་ལ་ཕུར་བུས་འདེབས་ ཤིང་འགྱིང་བ་དང་བཅས་པས་གསང་སྔགས་ཀློག་པའམ། ཕྱི་རོལ་དུ་ཡང་དེ་ཉིད་ཀྱི་ངོས་བཞིའི་ཕྱི་རོལ་དུ་ཨྃ་ཡྃ་བྲྃ་ཤྲྃའོ། ། གཏོར་མ་སྦྱིན་པ་སྔོན་དུ་འགྲོ་བས་དྲིལ་བུ་དཀྲོལ་ཏེ། དེ་བཞིན་དུ་ཀློག་པར་བྱེད་པའི་ཀློག་པ་པོ་དང་།
BOསྒྲུབ་པ་པོ་བཞི་ཡིས་གར་བྱེད་པ་ལ་བརྩོན་པའོ། ། ཤ་བཀག་པའི་ཕྱིར་བཟའ་བ་མ་ཡིན་པ་མེད་དོ་ཞེས་ས་ལུ་ལ་སོགས་པ་ལྔ་བཟའོ། ། བསོད་ནམས་རྣམ་པ་བཞི་ཞེས་ཤེས་པར་བྱ་སྟེ། ། དབྱེ་བ་ཇི་ལྟ་བ་ཤེས་པར་བྱའོ། ། ཡོངས་སུ་གང་བའི་ཐོད་པ་རུ་ཆང་གི་བཏུང་བ་ཅུང་ཟད་བྱའོ། ། ཐབ་ཏུ་ཡང་བློ་དང་ལྡན་པས་སྦྱིན་སྲེག་བྱའོ། ། ཇི་ ལྟར་གསང་སྔགས་མཉམ་པར་གཞག་པས་དཔའ་བོའི་དབང་པོ་ཉིད་བསྒྲུབ་པར་བྱའོ། ། དེ་ནས་སྦྱིན་སྲེག་འབུམ་ཕྲག་གཅིག་བྱས་ན་གལ་ཏེ་འདོད་ན་ཐུན་མོང་དུ་འཁོར་ལོས་སྒྱུར་བའི་རྒྱལ་སྲིད་ཐོབ་བོ། ། འདི་ཉིད་ཀྱིས་ཉིས་འགྱུར་གྱིས་འགྱུར་བ་འདིར་ཐེ་ཚོམ་མེད་དོ། ། དེ་ ནས་ལྷ་མོས་གསོལ་པ། ཕྲ་མོའི་རྒྱལ་སྲིད་ཐོབ་པ་ལ་དགྲ་འབྱུང་སྟེ། ཐབས་ཆེས་མང་པོ་ཅི་ཞིག་གིས་ལྷའི་དབང་པོ་ཡིད་ཀྱི་ཤིང་རྟ་ཡང་དག་པར་གང་བར་འགྲོ་བ་ལགས། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་སྙིང་རྗེ་དང་ལྡན་པས་སེམས་ཅན་ གྱི་བསམ་པ་ཡོངས་སུ་རྫོགས་པར་བྱེད་པར་འགྱུར་བ་དང་། གལ་ཏེ་དགེ་འདུན་མཆོད་པའི་ཚོགས་ཀྱི་བཟའ་བར་བྱ་བ་ཡང་རྗེས་སུ་ཉིན་རེར་བྱེད་པ་དང་། དེའི་དོན་ཡང་བྱ་སྟེ་སེམས་ཅན་མཆོད་པར་བྱས་པར་འགྱུར་རོ། །
BOསྔགས་ཀྱི་བསམ་གཏན་ལ་བརྩོན་པས་ དང་པོར་དབང་བསྐུར་བར་བྱ་སྟེ། རང་གི་སྙིང་པོ་དང་ཉེ་བའི་སྙིང་པོའི་གསང་བའི་སྔགས་རབ་ཏུ་སྦྱིན་པར་བྱའོ། ། ཐུན་མཚམས་གསུམ་དུ་གཏོར་མ་དྲུག་ཅུ་རྩ་བཞི་པ་བྱིན་ནས་ཇི་ལྟ་བ་བཞིན་དུ་བྱའོ། ། བྱ་བའི་རང་བཞིན་དེས་སེམས་ཅན་མཆོད་པ་ཇི་ལྟ་བ་བཞིན་དུ་འགྱུར་རོ། ། བཀད་ས་ལྔ་བྱས་ཏེ། གསང་བར་བྱས་ནས་རང་གི་མཆོད་སྦྱིན་གྱི་མཐར་གཏོར་མ་དབུལ་བར་བྱའོ། ། སྔགས་ཀྱི་བསམ་གཏན་ལ་བརྩོན་པས་སློབ་དཔོན་བཞི་དང་རྣལ་འབྱོར་མ་མང་པོ་དང་ལྡན་པས་ལེགས་པར་དབང་བསྐུར་བར་ཡང་བྱའོ། ། རྒྱན་ལྔ་ དང་ནི་ཡང་དག་ལྡན། ། རྟག་ཏུ་མྱོས་བྱེད་མང་པོ་དང་། ། གྲི་གུག་དང་ནི་ཐོད་པར་ལྡན། ། ཀུན་ཏུ་སྟག་ལྤགས་ཤམ་ཐབས་དང་། ། སཱ་ལི་རྣམས་ཀྱིས་ཁ་བཀང་ནས། ། ཁ་ནས་ཁ་ཡི་ནང་དུ་སྦྱིན། ། སྒྲུབ་པོ་གཅིག་ནི་རྒྱན་ཀུན་བརྒྱན། ། གཡོན་པས་དྲིལ་བུ་དཀྲོལ་ བྱེད་ཅིང་། ། གཡས་ཉིད་རྡོ་རྗེ་གསོར་བར་བྱེད། ། ཁྲུ་ལྔ་ཡི་ནི་ཚད་ཀྱིས་ནི། ། བྲིས་སྐུ་ལྔ་པོ་བྲི་བྱ་སྟེ། གཏི་མུག་ཕྲ་མ་འདོད་ཆགས་དང་། ། ཕྲག་དོག་ཁ་དོག་དབྱེ་བས་བྲི། ། དཀར་པོ་སེར་དམར་སྔོ་བསངས་རྣམས། ། རང་རང་གཟུགས་ཀྱིས་བྲི་བར་བྱ། །
BOདབུས་སུ་ གཤིན་རྗེའི་གཤེད་བྲིའོ། ། སྔགས་ལ་མཆོག་ཏུ་གཞོལ་བ་ཡིས། ། སྦྲང་ཆེན་སྣག་ཚ་བྱས་ནས་ནི། ། མཆོག་གི་རུས་པས་བྲི་བར་བྱ། ། ཨ་ཡིག་དང་ནི་བ་ཡིག་དག ། འབུམ་ཕྲག་བཞི་པོ་ཡང་དག་རྫོགས། ། ཐབ་ཁུང་གྲུ་གསུམ་པའི་དབུས་སུ། ། སྦྱིན་སྲེག་ སྔགས་ལ་མཆོག་གཞོལ་བ་ས། ། ཕྱི་རོལ་ཏུ་ནི་སློབ་དཔོན་གཞན། ། བཞི་པོ་རྣམས་ཀྱིས་དེ་བཞིན་དུ། ། ཐབ་ཏུ་འཁྲུལ་འཁོར་གསུམ་ཡང་བྱ། ། ཕྱི་ནས་ས་བོན་བཅུ་གཉིས་དང་། ། དེ་བཞིན་འཁོར་ལོ་བཅུ་གཉིས་ལ། དྲུག ། སྔགས་ཀྱིས་བོན་བྲི་བར་ བྱ། ། གྲོ་ག་སོར་བཅུ་དྲུག་ཉིད་ལའང་། ། མིང་མེད་ཀྱི་ནི་ཁྲག་ཉིད་ལ། ། སེན་རྩི་ཡིས་ནི་བསྲེས་པས་སམ། ། ཡང་ན་རྒྱ་སྐྱེགས་ཁུ་བས་སོ། ། ཡམ་རཱ་ཛ་ས་དོ་མེ་ཡ། ། ཡ་མེ་དོ་རུ་ཎ་ཡོ་ད་ཡ། ། ཡ་ད་ཡོ་ནི་ར་ཡ་ཀྵེ་ཡ། ཡཀྵེ་ཡཙྪ་ནི་རཱ་མ་ ཡ། ། ལྷ་མོ་གསང་སྔགས་རྙེད་དཀའ་འ་འདི། ། བདག་གིས་ངོ་མ་ཆོགས་པས་བཤད། ། འདི་ཡི་སྔགས་ཀྱི་མཐུ་སྟོབས་ཀྱིས། ། བདག་གིས་སངས་རྒྱས་ཉིད་སྒྲུབ་སྟེ། ། འཇིག་རྟེན་གསུམ་གྱི་དབང་ཕྱུག་འགྲོར། ། གསང་སྔགས་བརྩོན་པས་སྦྱར་བྱས་ན། ། སྡེ་དང་བཅས་པ་བར་སྣང་ལ། ། འགྲོ་འགྱུར་འདི་ནི་ཐེ་ཚོམ་མེད། །
BOགཤིན་རྗེའི་གཤེད་དམར་རྣལ་འབྱོར་པ། ། ཁ་ཅིག་རྟག་ཏུ་དམ་ཚིག་བརྩོན། ། རིགས་ལྔའི་བསྙེན་པ་ལྡན་པས་ཀྱང་། ། འབུམ་དུ་བཟླས་པས་བྲི་བར་བྱ། ། ཤར་དུ་བྱས་པའི་བཀད་ས་ རུ། ། ཁམ་ཕོར་གཉིས་ཀྱི་དབུས་སུ་མར་དང་སྦྲང་རྩིས་ཡང་དག་པར་གང་བ་ལ་བཞག་ནས་ཞོའི་ཟན་དང་། ཡུངས་ཀར་དཀར་པོ་དང་། ལན་ཚྭའི་སྦྱིན་སྲེག་བྱའོ། ། ནུབ་ཀྱི་འདབ་མ་ལ་དེ་དང་མཚུངས་པའི་ཁམ་ཕོར་ལ། མེ་ཏོག་དམར་པོ་དང་། སེན་རྩི་དང་། རྒྱ་ སྐྱེགས་ཀྱི་ཁུ་བ་བསྲེས་བས་སྦྱིན་སྲེག་བྱའོ། ། བྱང་ཕྱོགས་ཀྱི་འདབ་མ་ལ་སྦྲང་ཆེན་གྱིས་གང་བའི་ཁམ་ཕོར་ལ་ཡང་དག་པར་བཞག་ནས་ཐབ་ཁུང་གྲུ་གསུམ་དུ་ཤིང་སིཏྠ་ཀ་ཤུ་དང་། ཤིང་སཾ་ཀོ་ཙ་ཀཎྜ་ཀ་དང་། དུག་དང་། སྐེ་ཚེ་རྣམས་ཀྱིས་སྦྱིན་སྲེག་བྱའོ། ། དགུ་ཡི་བདག་ཉིད་ཅན་འབད་པས། ། དང་པོར་དམ་ཚིག་བྱས་ནས་ནི། ། རྒྱན་ལྔ་ཡིས་ནི་བརྒྱན་པ་ཡིས། ། རྣལ་འབྱོར་མ་ཡང་དེ་དང་མཚུངས། ། སྣ་ཚོགས་རིན་ཆེན་རང་བཞིན་བརྒྱན། ། རྔ་ཡབ་དཀར་པོས་བརྒྱན་པ་ཡི། ། རྡོ་རྗེ་དྲིལ་བུའི་ལག་དག་ གིས། ། ཡང་ནས་ཡང་དུ་གཏོར་མ་སྦྱིན། ། ཇི་ལྟར་འོས་པའི་ཡོན་ཕུལ་བྱ། ། གང་གིས་མཉེས་པར་འགྱུར་བ་ཡིན། ། དབུས་སུའང་དེ་དང་མཚུངས་པར་བྱ། །
BOམཐའ་རུ་བཞི་འགྱུར་དུ་བྱའོ། ། དགེ་འདུན་བཟའ་བ་ཡང་བྱའོ། ། དམན་དང་ཞན་ལ་རྗེས་བརྩེ་བ། ། སོ་སོར་བ་དག་ནི་དམ་ཚིག་མཆོད། ། ཤེས་རབ་བཅས་ཤིང་ཡོན་དང་བཅས། ། རིགས་ནི་ལྔ་པོ་རྣམས་ཀྱི་ནི། ། བསྒྲུབས་པའི་བཟའ་བ་དེ་དག་གིས། ། མེ་ལ་སྦྱིན་སྲེག་བྱ་བ་སྟེ། ། བློ་བཟང་འབད་པས་བཞག་མི་བྱ། ། དབྱུག་གུར་བབ་པས་དེ་སྒོ་བཞིར། ། རྔ་བོ་ ཆེ་ཡི་སྒྲ་བྱའོ། ། གང་དང་གང་དུ་སྒྲ་ཐོས་པའི། ། ཕ་རོལ་སྡེ་ནི་རབ་བྲོས་ནས། ། རྣ་བ་རྣམས་ནི་དགས་པར་བྱེད། ། མིག་གིས་མཐོང་བར་མི་བྱེད་ཅིང་། ། སྡེ་རྣམས་དབང་དུ་བྱེད་པ་དང་། ། མགོ་ལ་ཟུག་རྔུར་འགྱུར་བ་དང་། ། སྐྲིད་པ་དག་ནི་བྱེད་པ་ཡིན། ། ཡང་ན་བྱའི་གཤོག་པ་ལ་བཅིངས་ནས་གཏོང་བར་བྱ་སྟེ། གང་དང་གང་དུ་འགྲོ་བ་དེ་དང་དེ་ཉིད་དུ་ཕ་རོལ་གྱི་སྡེ་རྣམས་ནི་རང་གི་ཆུང་མ་ཡང་ཡོངས་སུ་དོར་ནས་སྨྱོ་བར་འགྱུར་རོ། ། བདག་ཉིད་གཡུལ་ལ་མཆོག་ཏུ་གཞོལ་བར་འགྱུར་རོ། ། གླང་པོ་ཆེ་རྣམས་དང་། རྟ་ལ་སོགས་པ་རྣམས་ལྡོག་སྟེ་བདག་ཉིད་ཀྱི་སྡེ་ཡིས་འགྲོ་བར་བྱེད་དོ། ། གང་གི་ཚེ་སྡེ་ལས་བརྒལ་བའི་གཡུལ་བྱས་ནས་དུམ་བུ་དུམ་བུར་ལྟུང་བར་བྱེད་དོ། །
BOཕོ་ཉ་གཅིག་པུས་གནས་པས་ཇི་ལྟ་བ་བཞིན་དུ་འཚོ་བཅོམ་གྱིས་འཚོ་བར་བྱེད་དོ། ། དེའི་ཐལ་བས་ ཕ་རོལ་གྱི་སྡེའི་རྒྱལ་མཚན་རླུང་གིས་ཀུན་ཏུ་བསྐོར་བས་སྒྲིབ་པར་བྱེད་དོ། ། ཀློ་བུར་དུ་གླང་པོ་ཆེའི་ཚད་ཀྱི་རྡོ་བ་འབེབ་པར་བྱེད་དོ། ། ཆར་ཆེན་པོ་འབེབ་པར་འགྱུར་རོ། ། ཀླུའི་ཚུལ་གྱི་སྒྲུབ་པས་སྦྱིན་སྲེག་འབུམ་གྱིས་འདོད་པ་རྙེད་དོ། ། ཤི་བའི་ཕ་རོལ་ཏུ་ཡང་དགྲ་བོ་ དེ་རྣམས་འབངས་སུ་འགྱུར་རོ། ། འདིས་ནི་སུམ་འགྱུར་གྱིས་ས་དང་འཇིག་རྟེན་གསུམ་ལ་དབང་བྱེད་པར་འགྱུར་རོ། ། དེ་ནས་ཤིང་སེ་ཕཱ་ལི་ཀཱའི་འབྲས་བུ་འབུམ་ཕྲག་གཅིག་གིས་དེའི་འབྲས་བུར་འགྱུར་རོ། ། ཞེས་པ་གཤིན་རྗེའི་གཤེད་དམར་པོའི་རྒྱུད་དུ་དངོས་གྲུབ་ ཕྲན་ཚེགས་ཀྱི་ལས་རབ་འབྱམས་ཀྱི་ལེའུ་སྟེ་བཞི་པའོ། ། ། ། དེ་ནས་བཅོམ་ལྡན་འདས་མས་གསོལ་པ། དེ་ནས་བྷ་ག་ལ་རྟགས་ཡང་དག་པར་སྦྱོར་བའི་ཁུ་བ་འདི་ནུ་མ་རབ་ཏུ་འཕེལ་བར་བྱ་བ་ལ་ནད་ཉམས་པ་ལས་དང་། ཡིད་བུད་མེད་ཀྱི་དབང་དུ་ གྱུར་པ་མེད་པ་ལས་དང་། དེ་འཆིང་བར་བྱེད་པ་ལས་ཀྱང་ཁུ་བ་ཡིས་ནུ་མ་ལ་བསྲུང་བ་དང་བསྐྱབ་པའི་སྦྱོར་བ་བཤད་དུ་གསོལ། དེ་ནས་བཅོམ་ལྡན་འདས་ཀྱིས་བཀའ་སྩལ་པ།
BOཁྱོད་ཀྱིས་ང་ལ་ཞུས་པ་ལེགས་སོ་ཞེས་གནང་ནས། དང་པོར་ཕུང་པོ་སྦྱང་བྱ་སྟེ། ། ཕྱིས་ནས་རབ་འབྱམས་ལས་བརྩམ་བྱ། ། འབྲས་བུ་གསུམ་གྱི་ཕྱེ་མ་གཟུང་། ། ཡ་བཀྵ་ར་པཱ་ལཱ་ཤ། ། ཟོས་ནས་བུ་རམ་འཐུངས་པ་ལས། ། སྲིན་དང་འཁོགས་པ་རབ་ཏུ་འཇོམས། ། ཏིལ་མར་ཀྃ་ཏ་ཀའི་ཁུ་བ། ། ཧི་ལ་མོ་ཙེའི་ཁུ་བ་ དང་། ། རྒྱམ་ཚ་འཐུངས་ཤིང་བྱུགས་པ་དེས། ། དྲག་མོ་ཤིག་རྣམས་འཇོམས་པར་འགྱུར། ། ཏིལ་མར་ཀཾ་ཏ་ཀའི་ཁུ་བ། ། ཏྲ་ལན་ཚྭ་ཡང་དག་ལྡན་འཐུང་ཞིང་། ། དྲག་མོ་བྷྲ་མ་ཎ་སྦྱོར་བས། ། ལན་ཚྭ་ཡི་ནི་འཇོམས་བྱེད་འགྱུར། ། ཧི་ལ་མོ་ཙིའི་ཁུ་བ་དང་། ། རྒྱམ་ཚ་ཅུང་ཟད་ཡང་དག་ལྡན། ། གྲིབ་མར་རབ་ཏུ་བཅུག་བྱས་ནས། ། འཐུངས་ན་མཁྲིས་པ་འཇོམས་པར་བྱེད། ། ཏིལ་མར་ཀ་ཏ་ཀའི་ཁུ་བ། ། རྒྱ་སྐྱེགས་རྩ་བར་སྦས་བྱས་ནས། ། འཐུང་བའི་སྦྱོར་བས་ཏིལ་མར་འཇོམས། ། ཀུཥྨཱཎྜ་ཡི་རྐང་མར་ཁུ། ། ལན་ཚྭ་ ཡང་དག་ལྡན་འཐུངས་ན། ། ཕྱེ་མ་འཇོམས་ཤིང་འཐུངས་པ་ལས། ། བད་ཀན་རྣམས་ཀྱི་མངར་བ་འཇོམས། ། ཉི་མ་རེ་རེར་བྱ་བའོ། ། ཕྱི་ནས་སྨན་ནི་བརྩམ་པར་བྱའོ། ། དེས་ནི་འབྲས་བུ་བརྟན་པ་སྦྱིན། ། གཞན་དུ་འབྲས་བུ་མེད་ལ་དགའ། ། ཤཱ་ལ་མ་ལཱི་ཤུན་ ཕྱེ་མ་ནི། །
BOབསྐམས་པ་ཉིང་ཁུས་བཟའ་བར་བྱ། ། རྣམ་པ་བདུན་དུ་བསྔགས་བྱས་ཏེ། ། ཐོ་རངས་བཟའ་བ་ཟ་བྱེད་ན། ། སླར་བ་དག་ཇི་སྲིད་འཚོ་ཡི་བར། ། ཁྲག་དང་ཁུ་བ་འཕེལ་བར་བྱེད། ། ཨོྃ་ཙཎྜ་མ་ཧཱ་རོ་ཥ་ཎ་ཨི་མཾ་དི་བྱ་ཨ་མྲྀ་རྟྃ་མེ་ཀུ་རུ་ཧཱུྃ་ཕཊ། སཱ་ ཊ་ཏི་དང་མ་ཧི་ཥཾ། ། ན་རི་ཀེ་ལ་དག་ལ་ཡང་། ། ཝཱ་ཤཱིའི་ཉིང་ཁུ་ཡང་དག་ལྡན། ། ཕག་ལས་བྱུང་བའི་ཆིལ་བུ་ཡིས། ། རྟགས་དང་རྣ་བ་ནུ་མ་དང་། ། བྷ་ག་ཡང་ནི་རྣམ་པར་མཉེས། ། ལུས་ཀུན་རྣམ་པར་མཉེས་པ་ཡིས། ། འཕེལ་བར་འགྱུར་བར་ཐེ་ཚོམ་ མེད། ། སེན་མོ་མེད་པའི་མཛུབ་མོ་ནི། ། བཀྲུ་བར་བྱས་ནས་དེ་ཉིད་ཀྱིས། ། སྐྱེ་གནས་དབུས་སུ་རབ་གཞུག་བྱ། ། དགས་པས་སྐྱེ་གནས་འཕེལ་བར་འགྱུར། ། སེ་འབྲུའི་པགས་པ་སྙིགས་མ་ནི། ། ཡུངས་ཀར་སྣུམ་ལ་བཙོ་བར་བྱ། ། ནུ་མ་མཉེས་ པས་འཕེལ་བར་བྱེད། ། མགོ་སྐྱེས་འགྱུར་བ་ཉམས་པར་བྱེད། ། ཡུངས་ཀར་དཀར་པོ་ཤུ་དག་དང་། ། དྲི་བཟང་པྲྀ་ཧ་ཏཱི་བྱས་པའི། ། སྙིགས་མས་མཉེས་པས་ལིང་ག་འཕེལ། ། ནུ་མ་རྣ་བ་འཕེལ་བར་འགྱུར། ། གཞན་གྱིས་མི་ཐུབ་དཀར་པོ་དང་། ། ལག་ལྡན་པི་པི་ ལིང་བྱས་པས། ། མ་ཧེ་ཡི་ཡང་མར་སར་བཅས། ། འཐུངས་པས་ལིང་ག་འཕེལ་བར་བྱེད། །
BOད་དྷུར་ཁུ་བར་ཨ་ཤྭ་གན། ། རྩ་བ་བཅུག་ནས་མ་ཧེ་ཡི། ། མར་གསར་དང་ནི་བསྲེས་པ་དང་། ། ད་དྷུར་འབྲས་བུ་གོ་ཌ་ཀར། ། ཉིན་དང་ མཚན་དུ་གདུང་བར་བྱ། ། དེ་ནས་མ་ཧེའི་སཾ་གུ་ཌྷ་མཉེས་ནས་སྔར་བརྗོད་པས་མཚན་མོ་གསུམ་དུ་བྱུགས་ནས་མཉེས་པར་བྱ་སྟེ་འཕེལ་བར་འགྱུར་རོ། ། ལྷམ་བུ་ཆུ་ཤེལ་གྱི་ཕྱེ་མ་ཡིས་མར་བསྒྲུབས་ནས་བཙུན་མོའི་སྐྱེ་གནས་ཀྱི་ནང་དུ་བྱུགས་པར་བྱའོ། ། སྐྱེ་གནས་ལྷོད་པ་དམ་པོར་འགྱུར་རོ། ། པདྨའི་ས་བོན་དང་། ཨུཏྤ་ལའི་ས་བོན་དང་། པདྨའི་རྩ་ལག་དང་། པུ་ཤེལ་ཙེ་དང་། གླ་སྒང་རྣམས་ཏིལ་གྱི་ཏིལ་མར་ལ་བཙོ་བར་བྱའོ། ། དེས་བྷ་ག་ལ་བསྐུས་པ་ལས་དྲི་ངན་པ་དང་། ལྷོད་པ་དང་། ཉམ་ང་བ་དང་། གཟིར་ བ་ལ་སོགས་པ་འཇོམས་པར་བྱེད་དོ། ། ནི་མྦའི་ཤུན་པ་བསྐོལ་བ་ཡིས་བྷ་ག་བཀྲུ་བར་བྱའོ། ། ནི་མྦའི་ཤུན་པས་བདུག་པར་བྱའོ། ། གཞོན་ནུ་མ་བཟང་མོ་ཉིད་དྲི་བཟང་པོ་ཅན། བྷ་ག་བཟང་མོ་ལ་སོགས་པའི་ཡོན་ཏན་དང་ལྡན་པར་འགྱུར་རོ། ། བ་བླ་ཆ་ཤས་ ལྔ་དང་། ཀི་ཤུ་ཀའི་ཤིང་གི་འགྱུར་བྱེད་ཆ་ཤས་གཅིག་དང་། ཆུ་ཤིང་གི་འགྱུར་བྱེད་ཆ་ཤས་གཅིག་ཆུ་ཡིས་བཏགས་ནས་བྱུགས་པ་ཙམ་གྱིས་བྷ་ག་དང་། མཆན་ཁུང་དང་།
BOརྟགས་རྣམས་ཀྱིསྤུ་རྣམས་འབྱི་བར་བྱེད་དོ། ། ཧ་ལཱ་ཧ་ལ་དང་། གསེར་གྱི་ཕུད་ བུ་བསྲེས་པ་ཚ་བའི་ཏིལ་མར་དུ། ཞག་བདུན་དུ་བཞག་པ་དེས་ལིང་ག་ལ་སོགས་པ་ལ་བྱུག་པར་བྱ་སྟེ། སླར་ཡང་སྒྲ་རྣམས་འབྱུང་བར་འགྱུར་རོ། ། མ་ཧེ་དང་། ཕག་པ་དང་། གླང་པོ་ཆེ་དང་། ཁྱིམ་བྱ་རྣམས་ཀྱི་མར་ཁུ་དག་གིས་མཉེས་པས་ནུ་མ་ ལ་སོགས་པ་རྣམས་འཕེལ་ལོ། ། ཛཱ་ཏིའི་མེ་ཏོག་ཏིལ་མར་གྱིས་བཏགས་པས་མཉེས་ན་བྷ་ག་འཕེལ་བར་འགྱུར་རོ། ། མ་ཧེའི་མར་གསར་དང་། ཤུ་དག་དང་། ཤིང་ཀུ་ཊ་རྣམས་ལྟེ་བར་མཉེ་བར་བྱ་སྟེ་ནུ་མ་འཕེལ་བར་འགྱུར་རོ། ། ཆུ་དྲོན་མོས་བཀྲུས་པ་ལས་ལིང་ག་འཕེལ་བར་འགྱུར་བ་དེ་དང་འདྲ་འོ། ། ད་ཎྜོད་པ་ལའི་རྩ་བ་དང་། བ་ལས་བྱུང་བའི་མར་གྱིས་བཏུང་བར་བྱ་སྟེ། སྦྲུམ་པར་འགྱུར་རོ། ། བ་ལ་དང་། ཨ་ཏི་བ་ལ་དང་། ཤརྐ་རཱ་དཀར་པོ་དང་། ཏིལ་དང་། སྦྲང་བུའི་སྦྲང་རྩི་དང་ལྡན་པ་བཏུང་བར་བྱ་སྟེ། སྦྲུམ་པར་འགྱུར་རོ། ། བ་ལཱའི་རྩ་བའི་ཆུས་བཏགས་ནས་འཐུངས་ན། ཁྲག་འབབ་པ་འཇོམས་པར་བྱེད་དོ། ། ནས་ཀྱི་ཕྱེ་མ་དང་། བ་ལང་གི་གཅིན་དང་། སྲ་རྩི་པོག་དང་། ཤིང་མངར་དང་། མར་གྱི་དྲིལ་ཕྱིས་བྱས་ན་ལུས་ཐམས་ཅད་བཟང་པོར་འགྱུར་རོ། །
BOཟླ་མཚན་གྱི་དུས་སུ་ཕག་གནོན་པའི་རྩ་བ་རྣ་བ་ལ་བཅིང་བ་ལས་སྦྲུམ་པར་འགྱུར་རོ། ། ཀ་ལམྦཱིའི་ལྡུམ་བུ་ བཟའ་བར་བྱས་ན་ཁུ་བ་འཕེལ་ལོ། ། ལི་ཁྲི་དང་། ཞོ་ཟོས་པས་ཁུ་བ་འཕེལ་ལོ། ། བུད་མེད་ཀྱི་བཤང་བ་དང་། བུད་མེད་ཀྱི་གཅི་བ་སྦགས་ནས་བཏུང་བར་བྱ་སྟེ་ཁུ་བ་འཕེལ་ལོ། ། སྐྱུ་རུ་ར་འི་ཕྱེ་མ་ཆུའམ་མར་རམ། སྦྲང་རྩིས་ཐ་མའི་དུས་སུ་བཟའ་བར་བྱའོ། ། མིག་ ལ་སྡུག་པ་དང་། ལང་ཚོ་དང་། ཤེས་རབ་ཀྱང་སྐྱེ་བར་བྱེད་དོ། ། སྐྱུ་རུ་ར་འི་ཕྱེ་མ་དང་། འོ་མ་ལ་སོགས་པས་བཟའ་བར་བྱ་སྟེ། ལོའི་སྦྱོར་བས་ཚེ་བརྒྱ་འོ། ། སྐྱུ་རུ་ར་འི་ཁུ་བ་སྲང་གཅིག་དང་། ཝཱ་གུ་ཙཱིའི་ཕྱེ་མ་ཞོ་གཅིག་བཏུང་བར་བྱའོ། ། འཁོགས་པ་ལ་ཐོ་ རང་ས་འོ་མ་ཟླ་བ་གཅིག་ཏུ་ཟོས་ན་ལོ་ལྔ་བརྒྱའི་ཚེ་རུ་འགྱུར་རོ། ། ཝཱ་གུ་ཙཱི་ཞོ་གཅིག་དང་། དར་བ་དང་། ཆུ་དང་། ཕབས་དང་། འོ་མས་ཀྱང་རུང་སྟེ་འཐུངས་ན་ཟླ་བ་དྲུག་གིས་ལང་ཚོ་ལ་སོགས་པ་དང་ལྡན་ནོ། ། མུཎྜི་ར་འི་ཕྱེ་མ་མར་གྱིས་བཟའ་བར་བྱ་སྟེ། ཉི་མ་ཉི་ ཤུ་རྩ་གཅིག་གིས་ལོ་བཅུ་དྲུག་གི་རྣམ་པར་བྱེད་དོ། ། ཥ་ཎའི་ས་བོན་གྱི་ཕྱེ་མ་སྲང་གཅིག་དང་།
BOསཱ་ལུ་དམར་པོ་སྲང་གཅིག་པ་ཁ་དོག་གཅིག་པའི་འོ་མ་ཁམ་ཕོར་གཉིས་ཀྱིས་བཟའ་བར་བྱ་སྟེ། ཐོག་མར་འོ་མ་ཁམ་ཕོར་གཅིག་ཟད་པར་འཐུངས་ནས་པ་ཎ་ལ་སོགས་ པ་དེ་ལ་བྱིན་ནས་བཏུང་བར་བྱའོ། ། དེ་ནས་བཟའ་བར་བྱའོ། ། འཁོགས་པས་འོ་མས་བཏུང་བར་བྱ་སྟེ། ཉི་མ་བདུན་ཕྲག་གསུམ་གྱི་བར་ཇི་སྲིད་བར་རླུང་དང་ཚད་པ་སྤང་ངོ་། ། བྱ་བ་ཇི་ལྟ་བའི་བྱ་བ་ཕྱི་མ་དེ་ལྟ་བུས་དེའི་སྐྲ་ལ་སོགས་པ་ལྟུང་བར་བྱེད་དོ། ། དེ་ནས་སྐྲ་དཀར་ དང་གཉེར་མ་སྤངས་ཏེ་ལོ་བརྒྱ་ཕྲག་ལྔར་འཚོ་བར་བྱེད་དོ། ། ཁྲག་སྐྲོད་པའི་རྩ་བ་མར་དང་སྦྲང་རྩིས་བྱི་ལའི་རྐང་པ་ཙམ་བཟའ་བར་བྱ་སྟེ། འབྲས་བུ་ནི་དེ་ལྟ་བུ་ཁོ་ནའོ། ། སྐྱུ་རུ་ར་དང་། ཨ་རུ་ར་དང་། བུང་བའི་རྒྱལ་བ་དང་། པི་པི་ལིང་དང་། ན་ལེ་ཤམ་དང་། ལྕགས་ ཀྱི་ཕྱེ་མ་རྣམས། སྦྲང་རྩི་དང་། ཤ་ཁ་ར་དག་གིས་ཨུ་དུམ་བཱ་རའི་འབྲས་བུའི་ཚད་ཀྱི་རིལ་བུར་བྱའོ། ། དེ་ནས་རིལ་བུ་བཟའ་བར་བྱ་སྟེ། ཟླ་བས་ཚེ་ལོ་སུམ་བརྒྱར་འགྱུར་རོ། ། ཀུ་མཱ་རཱིའི་འབྲས་བུ་སྲང་གཅིག ། མར་དང་། ཞོ་དང་ལྡན་པས་བཟའ་བར་བྱ་སྟེ། སྟོབས་ཆེན་པོར་འགྱུར་རོ། ། བྷ་དྲཱ་ལཱི་དང་། ལི་ག་དུར་སུམ་འགྱུར་གྱི་ཨ་རུ་ར།
BOཆུ་ཆ་གཅིག་ལ་སོགས་པས་ཟོས་པས་སྟོབས་ཆེན་པོར་འགྱུར་རོ། ། ཐམས་ཅད་དུ་བདག་ཉིད་ལྷའི་རྣམ་པས་བཟའ་བར་བྱའོ། ། སྔགས་ཀྱིས་ཆུ་བྱིན་གྱིས་བརླབ་པར་བྱའོ། ། ཁུ་བ་རེངས་པའི་ལེའུ་སྟེ་ལྔ་པའོ། ། ། ། དེ་ནས་དན་དའི་ཤིང་གི་རྩ་བ་ཕབས་ཀྱིས་བཏགས་ནས་མགོ་ལ་མཉེ་བར་བྱ་སྟེ། མགོ་བོའི་གཟེར་འཇོམས་པར་བྱེད་དོ། ། སྦྲང་དང་། མར་དག་གིས་མིག་སྨན་དུ་བྱ་སྟེ། མཚན་མོ་ལོང་བ་འཇོམས་སོ། ། ཤིང་སེ་ཕཱ་ལི་ཀཱའི་རྩ་བ་ཟོས་པ་ལས་ལྦ་བ་འཇོམས་པར་བྱེད་དོ། ། ལ་ཕུག་གི་ས་བོན་དང་། པྲི་ཡང་ཀུ་དང་། ཙནྡན་དམར་པོ་དང་། རུ་རྟ་བཏགས་ནས་དྲིལ་ཕྱིས་བྱས་པ་ལས་སྤྲེའུ་ལ་སོགས་པ་རྣམ་པར་འཇོམས་སོ། ། རི་དྭགས་ཀྱི་ཤ་སྐམ་པོ་ར་འི་འོ་མས་བཏུང་བར་ བྱ་སྟེ། གཟའ་རྣམས་འཇོམས་སོ། ། སྐྱུ་རུ་ར་དང་། པི་པི་ལིང་དང་། ཙི་ཏྲ་ཀ་དང་། སྒེའུ་གཤེར་དང་། བུ་རམ་རྙིང་པ་དང་། མར་དང་སྦྲང་རྩི་མཉམ་པར་བཟའ་བར་བྱ་སྟེ། དུས་མ་ཡིན་པའི་ལུད་པ་དང་དབུགས་མི་བདེ་བ་འཇོམས་སོ། ། སྒེའུ་གཤེར་དང་། ཟི་ ར་ནག་པོ་དག་ཞོའི་ཉིང་ཁུས་ཀྱང་རུང་སྟེ། ལན་ཚྭ་དང་ལྷན་ཅིག་ཏུ་བཏུང་བར་བྱའོ། ། དེས་ཁྲག་སྲི་བ་རྣམ་པར་འཇོམས་སོ། ། ལི་ཁར་དང་།
BOཡ་བཀྵཱ་ར་མཉམ་པར་བཟའ་བར་བྱའོ། ། སོ་བྷཱཉྫ་ན་བསྐོལ་བ་བཏུང་བར་བྱ་བ་འམ། ཡང་ན་རྡེའུ་འཇོམས་པ་བཏུང་བར་ བྱའོ། ། ཨ་རུ་ར་དང་། ཙི་ཏྲ་ཀ་ཆུས་བཏུང་བར་བྱ་སྟེ། མཆིན་པའི་ནད་འཇོམས་སོ། ། ཟི་ར་ནག་པོ་བུ་རམ་གྱིས་བཟའ་བར་བྱ་སྟེ། རིམས་འཁོར་མ་འཇོམས་སོ། ། ཡ་བཀྵཱ་རའམ། ཞོ་བཏུང་བར་བྱ་སྟེ། རླུང་ནད་རྣམ་པར་འཇོམས་སོ། ། ཚ་བའི་ཏིལ་མར་ལ་ བྱི་ཏང་ཀ་དང་། རྒྱམ་ཚ་བྱིན་ནས་ཅུང་ཟད་བསྲོས་པའི་ཉིང་ཁུ་བཏུང་བར་བྱ་སྟེ། མེ་སྦར་ཞིང་། སྲིན་བུ་རྣམས་རྣམ་པར་འཇོམས་སོ། ། ཨ་རུ་ར་དང་བུ་རམ་གྱིས་བཟའ་བར་བྱ་སྟེ། ཁྱི་རྔོ་རྣམ་པར་འཇོམས་སོ། ། ཨ་རུ་ར་དང་། སྒ་སྐྱ་བཟའ་བར་བྱ་སྟེ། རླུང་ནད་ འཇོམས་སོ། ། རྩྭ་དུར་བ་ལ་ཡུང་བས་བཏགས་ནས་བྱུག་པར་བྱ་སྟེ་རྔོ་འཇོམས་སོ། ། འདི་ཉིད་ཀྱིས་ཀུཀྐ་ར་དང་། ཤུ་བ་དང་། འབྲུམ་བུ་དང་། ཀུ་རཱ་འཇོམས་པ་ལ་སོགས་པ་རྣམས་འཇོམས་སོ། ། བུ་རམ་དང་ཚ་བའི་ཏིལ་མར་བཏུང་བར་བྱ་སྟེ། དབུགས་མི་བདེ་བ་ རྣམ་པར་འཇོམས་སོ། ། ཨརྫུ་ན་དང་། ཤིང་ཚ་མར་ལ་སོགས་པ་རྣམས་ཀྱིས་བཟའ་བར་བྱ་སྟེ། སྙིང་གི་ཟུག་རྔུ་འཇོམས་སོ། ། བིལ་བ་བསྲེགས་པ་བུ་རམ་གྱིས་བཟའ་བར་བྱ་སྟེ། ཁྲག་འབྱམས་པ་འཇོམས་སོ།
BO། བུ་རམ་དང་མར་བཟའ་བར་བྱ་སྟེ། རླུང་དང་། མཁྲིས་པ་དང་། བད་ཀན་དང་། མཛེ་ལ་སོགས་པ་རྣམས་འཇོམས་པར་བྱེད་དོ། ། འབྲས་བུ་གསུམ་གྱི་ཕྱེ་མ་དང་། མར་དང་སྦྲང་རྩི་རྣམས་བཏུང་བར་བྱ་སྟེ། ནད་ཐམས་ཅད་འཇོམས་སོ། ། ཨ་རུ་ར་འི་ཕྱེ་མ་དང་། མར་དང་སྦྲང་རྩི་དུས་གསུམ་ཀུན་ཏུ་བཟའ་བར་བྱ་སྟེ། རླུང་དང་། བད་ཀན་རྣམ་པར་འཇོམས་སོ། ། བ་ཤ་ཀའི་ཡན་ལག་ལྔ་དང་། ཤུ་དག་དང་། ཚངས་མའི་ཤིང་དང་། པི་པི་ལིངསྐམ་པོ་ཕྱེ་མར་བྱས་ནས་རྒྱམ་ཚ་དང་སྦྲང་རྩི་ཡིས་ཝ་ཌྷི་རུ་བྱ་སྟེ། དེ་ནས་བཟའ་བར་བྱའོ། ། དུས་མ་ཡིན་པའི་རླུང་དང་བད་ཀན་འཇོམས་ སོ། ། ཤཱལྨཱ་ལི་དཀར་པོའི་ཤིང་ཤུན་ཕྱེ་མར་བྱས་ནས་པདྨའི་ས་བོན་དང་། ཀུ་མུ་དའི་འབྲས་བུ་ལྷན་ཅིག་གཅིག་ཏུ་བྱས་ནས་བཏགས་ཏེ། རྩ་བའི་སྔགས་སྟོང་ཕྲག་གཅིག་ཏུ་བཟླས་ནས་ལ་དུའི་རིལ་བུའི་ཚད་ཀྱི་རིལ་བུ་བྱས་ཏེ། གྲིབ་བསྐམས་བྱས་ནས་བན་པོ་ ཌུའི་ཁུ་བས་བསྐམ་པར་བྱའོ། ། ཐོ་རངས་ཐོས་ནས་ཇི་སྲིད་འདོད་པར་བཏུང་བར་བྱ་སྟེ། རྨོངས་བྱེད་མེད་པར་འགྱུར་རོ། ། དབྱངས་ཀྱང་སྙན་པར་བྱེད་དོ། ། ཚངས་མའི་ཤིང་དང་། ཤུ་དག་དང་། སྒ་སྐྱ་དང་། པི་པི་ལིང་དང་། ཨ་རུ་ར་དང་། བ་ཤ་ཀ་ དང་།
BOསེང་ལྡེང་རྣམས་སྦྲང་རྩིས་རིལ་བུར་བྱས་ནས་བཟའ་བར་བྱ་སྟེ་འབྲས་བུ་ནི་དེ་ཁོ་ན་བཞིན་ནོ། ། གཤིན་རྗེ་མོ་དང་། ཨ་རུ་ར་དང་། སྒ་སྐྱ་དང་། རྒྱམ་ཚ་དང་། མཱ་ནས་མ་ན་རྣམས་བཟའ་བར་བྱ་སྟེ། འཁོགས་པ་ཐམས་ཅད་འཇོམས་སོ། ། སླེ་ཏྲེས་ཀྱི་ཁུ་བ་དང་། སྦྲང་རྩི་བཏུང་བར་བྱ་སྟེ་གཅིན་ནད་འཇོམས་སོ། ། མཱ་ཏྲ་ལ་འོ་མ་དང་། པི་པི་ལིང་གི་ཕྱེ་མ་དང་། མར་དང་སྦྲང་རྩི་རྣམས་བཏུང་བར་བྱ་སྟེ། རིམས་ཕྲ་མོ་དང་ལུདཔལ་སོགས་པ་རྣམ་པར་འཇོམས་པར་བྱེད་དོ། ། ངོ་ཚ་ཅན་དང་། དེ་བཞིན་དུ་མདའ་ལྟོང་དག་གི་རྩ་བ་ མིག་ཆུའི་ཆུ་ཡིས་བཏོགས་ནས་རབ་ཏུ་བྱུག་པར་བྱའོ། ། སླེ་ཏྲེས་ཀྱི་རྩ་བ་ཡང་བཟའ་བར་བྱ་སྟེ། རྩའི་རྨ་འཇོམས་པར་བྱེད་དོ། ། སྒ་སྐྱ་ཡ་བཀྵཱ་ར་ཡིས་བཟའ་བར་བྱ་སྟེ། དང་ཁ་བདེ་བར་འགྱུར་རོ། ། ཛ་ཡན་ཏིའི་ས་བོན། ན་ལེ་ཤམ་དང་ལྷན་ཅིག་བཏུང་བར་བྱ་སྟེ། སྡིག་པའི་ནད་འཇོམས་སོ། ། འབྲས་བུ་གསུམ་དང་། བོ་ལི་ཀ་ནག་པོ་དང་། སའི་འཇིམ་པ་དང་། དྷྲྀངྒ་རཱ་ཛ་དང་། ས་ཧ་ཀཱ་ར་འི་ས་བོན་དང་། ལྕགས་ཕྱེ་དང་། ཙབ་མོ་སྟེ་འདི་རྣམས་ཀྱིས་བསྡམ་པར་བྱའོ། ། དེ་ནས་གུ་གུལ་གྱིས་སྐྲ་ལ་བདུགས་ནས་དེས་དེས་མཉེ་ བར་བྱའོ། །
BOདེ་ནས་ཉི་མ་བདུན་དུ་བཅིངས་ནས་གདུང་བར་བྱ་སྟེ། སྐྲའི་མིག་སྨན་ནོ། ། རྨ་བྱའི་མཁྲིས་པ་དང་། བྷྲྀངྒ་རཱ་ཛ་ད་ག ། བ་ལས་བྱུང་བའི་མར་ལ་བཅོས་ནས་སྣ་ལ་སྦྱིན་པར་བྱ་སྟེ། སྐྲའི་མིག་སྨན་ནོ། ། སའི་རྣམ་འཇོམས་ཤིང་དང་། ཚ་བ་གསུམ་ཆ་ མཉམ་པར་ཕྱེ་མར་བྱས་ནས་ལུག་ཀོང་གི་དབུས་སུ་སྐུར་ཞིང་རིམ་པས་ལུག་ཀོང་ཁ་སྦུབ་བོ། ། ཀ་པིཏའི་ཏིལ་མར་བཟུང་ནས་རྟག་ཏུ་ཐིགས་པ་གཉིས་སྣར་བླུགས་པས་གཉེར་མ་དང་སྐྲ་དཀར་པོ་སྤོང་ངོ་། ། འདིས་མཉེས་པའི་ཁུ་བས་མཛེ་ལ་བྱུགས་པས་ཞི་བར་ འགྱུར་རོ། ། འཕྲལ་གྱི་མར་གསར་གྱིས་མ་ཉེས་པའི་མུ་ཟི་དང་། མཱ་ས་ཀཱ་ལྷན་ཅིག་པའི་ཁུ་བ་ཏོ་ལ་གཅིག་དང་། འབྲས་སཱ་ལུ་དང་། ཙཱི་ལོ་ནི་ཨཱ་སའི་གོང་བུས་བུམ་པའི་འཁྲུལ་འཁོར་གྱི་བུམ་པའི་ནང་དུ་མཱུ་ཥི་ཀཱ་ཡིས་བཀབ་ལ་བྱེ་མ་དང་ལྷན་ཅིག་མེ་ལ་བྱིན་པ་ ལས་རོ་འཆིང་ངོ་། ། ཟ་བ་ལས་ནི་ཉི་མའི་ཚོགས་ཀྱི་བེའུའི་བྲུན་བཟུང་ནས་རིལ་བུར་བྱའོ། ། རྒྱ་སྤོས་ཀྱི་རྩ་བས་བསབ་ཏགས་ནས་དཀྲི་བར་བྱའོ། ། རིལ་བུ་རེ་རེ་ཟོས་ནས་དུག་བཟའ་སྟེ། དུག་རབ་ཏུ་མེད་པར་འགྱུར་རོ། ། ཞེས་པ་རྒས་པ་འཇོམས་པའི་ལེའུ་སྟེ་དྲུག་པའོ། །
BOཀྱེ་བཅོམ་ལྡན་འདས་དབང་དུ་བྱེད་པའི་ཆོ་ག་གསུངས་ཤིག ། བཅོམ་ལྡན་འདས་ཀྱིས་བཀའ་སྩལ་པ། གཞན་གྱིས་མི་ཐུབ་པ་དཀར་པོའི་རྩ་བ་ལ་ཁུ་བས་བ་ཌྷི་ཀཱ་བྱས་པའི་ཐིག་ལེས་བུད་མེད་དབང་དུ་བྱེད་པར་འགྱུར་རོ། ། ཚངས་པའི་དབྱུག་པ་དང་། ཤུ་དག་དང་། རུ་རྟ་ དང་། སྦྲང་རྩིས་བཏགསལ་དྲིལ་ཕྱིས་བྱས་ན་གང་འདོད་པ་དེ་དབང་དུ་འགྱུར་རོ། ། ད་ཎྜོད་པ་ལའི་རྩ་བ་དང་ཏམྦུ་ལ་ཡིས་སྦྱིན་པར་བྱའོ། ། དེ་བཞིན་དུ་ཚངས་པའི་དབྱུག་པ་དང་། ཤུ་དག་དང་། རུ་རྟ་དང་། ནག་གེ་སར་དང་། ཏམྦུ་ལ་བྱིན་ན་དབང་དུ་འགྱུར་རོ། ། གི་ཝཾ་དང་རང་བྱུང་གི་མེ་ཏོག་གི་ཐིག་ལེས་སྐལ་བ་དང་ལྡན་པ་དབང་དུ་འགྱུར་རོ། ། གི་ཝཾ་དང་། ཤི་ཤུ་ལོ་ལ་དང་། བྷྲྀངྒ་རཱ་ཛས་ལྷན་ཅིག་སྐར་མ་རྒྱལ་ལ་ཝ་ཌྷི་ཀ་བྱ་སྟེ་ཐིག་ལེས་དབང་དུ་བྱེད་པར་འགྱུར་རོ། ། བྷྲྀངྒ་རཱ་ཛའི་རྩ་བ་ལ་བདག་ཉིད་ཀྱི་ཁུ་བས་མིག་སྨན་ བྱའོ། ། དེ་བཞིན་དུ་རྨ་བྱའི་གཙུག་ཕུད་དང་། ཤི་བའི་ཕྲེང་བ་དང་། ཁྭ་ཏའི་ལྕེ་སྐམ་པོའི་ཕྱེ་མ་གང་གི་མགོ་ལ་བྱིན་པ་དེ་དབང་དུ་འགྱུར་རོ། ། བ་ལང་གི་སོ་དང་བཟའ་བ་དང་བཏུང་བ་བཏགས་ནས་བྱིན་ན་དབང་དུ་འགྱུར་རོ། །
BOཁྱབ་འཇུག་གནོན་པའི་རྩ་བ་ རྟགསལ་བྱུགས་ནས་དགའ་བར་བྱེད་པས་དེ་བཞིན་ནོ། ། སྐར་མ་རྒྱལ་ལ་ད་དྷུ་ར་འི་འབྲས་བུ་བཟུང་ནས་སྐར་མ་སྐག་ལ་ཤིང་ཤུན་ནོ། ། མེ་བཞི་ལ་འདབ་མའོ། ། ནག་པ་ལ་མེ་ཏོག་གོ ། སྣྲུབས་ལ་རྩ་བའོ། ། ཆ་མཉམ་པའི་ཕྱེ་མ་ལ་སྦྲང་རྩིས་བ་ཌྷི་ཀཱ་རུ་བྱའོ། ། རས་བལ་ལ་བཏུམས་ནས་བསྐམ་པར་བྱས་ཏེ། ཏམྦུ་ལ་ལ་བྱིན་ནས་དུང་གི་ཕྱེ་མས་དབང་དུ་འགྱུར་རོ། ། ཤིང་ཨརྐའི་སོལ་བ་དང་། ཁྱི་སྨྱོན་གྱི་རྐང་པ་གཡས་པའི་མཐེ་བོས་གང་གི་མིང་བྲིས་ཏེ་ཆེ་གེ་མོ་ཤོག་ཅིག ། ཅེས་བརྗོད་པས་འོང་ བར་བྱེད་དོ། ། དུ་བ་མེད་པའི་མེ་ལ་གདུང་བར་བྱའོ། ། སྐར་མ་རྒྱལ་ལ་མིའི་སྣུམ་གྱིས་གཞན་གྱིས་མི་ཐུབ་པའི་རྩ་བ་བསྐྱེད་དེ་མར་ཁུས་དེ་ལ་བསྐུས་ནས་ཐོད་པ་རུ་དུད་པ་ཆགས་པར་བྱའོ། ། མིག་སྨན་དེས་བུད་མེད་དང་སྐྱེས་པ་དབང་དུ་བྱེད་དོ། ། རྒྱ་སྤོས་དང་། བྱི་ ཏང་ཀ་དང་། སེང་ལྡེང་དང་རུ་རྟ་བྱིན་ན་མི་འདོད་པ་འཇོམས་པར་བྱེད་དོ། ། པྲི་ཡང་ཀུ་དང་། གི་ཝཾ་དང་། ལྡོང་རོས་དང་། ནཱ་ག་གེ་སར་གྱིས་མིག་ལ་མིག་སྨན་དུ་བྱས་ན་དབང་དུ་བྱེད་དོ། ། གླ་རྩི་དང་། ངོ་ཚ་ཅན་དང་། ད་དྷུ་ར་དང་། ས་ཧ་དེ་བ་རྣམས་དང་བཅས།
BOཚ་ བའི་ཏིལ་མར་གྱིས་དབང་དུ་བྱེད་དོ། ། ན་མཤྩཎྜཱ་ལཱི་ཆེ་གེ་མོ་མེ་ཝ་ཤ་མཱ་ན་ཡ་སྭཱ་ཧཱ། སྟོང་ཕྲག་བཅུ་བཅུ་བཟླས་པས་སྔོན་དུ་བསྙེན་པ་བྱས་ནས་བསྙེན་པ་ཁྲིའོ། ། དུར་ཁྲོད་ཀྱི་ཐལ་བ་ལ་བཅུ་བཞི་ལ་བརྒྱ་རྩ་བརྒྱད་དུ་མངོན་པར་བསྔགས་ཏེ། བུད་མེད་ཀྱི་མགོ་ལ་བྱིན་ན་ དབང་དུ་འགྱུར་ཏེ། རྟག་ཏུ་ངེས་པར་སེམས་པས་སླར་ཡང་དགའ་བཞིན་པའི་སེམས་དང་ལྡན་ནོ། ། ཁུ་བ་རེངས་པའོ། ། ཤིང་ཁུ་བྱུག་གི་མིག་དང་། ཤི་ཏའི་རྩ་བ་དང་། ད་དྷུ་ར་དང་། གཞན་ཡང་བྱང་གི་མུཀྟ་ཤི་ཁ་རྐེདཔལ་བཅིངས་ན་ཁུ་བ་རེངས་པར་ བྱེད་དོ། ། སྲ་རྩི་པོག་དང་། ཝཱ་མཱ་དཱ་ཏི་དང་། ཡང་ནམདའ་ལྟོང་དཀར་པོའི་རྩ་བས་ཀྱང་འཁྲིག་པ་ལས་ཁུ་བ་རེངས་པར་བྱེད་དོ། ། འཇམ་འབྲས་ལ་སྦུབས་བྱས་ནས་དངུལ་ཆུས་བཀང་སྟེ་སྲད་བུས་རྐེདཔལ་བཅིངས་ན་ཁུ་བ་འཛིན་ནོ། ། ཕག་པའི་སྣུམ་ དང་། རྒྱ་སྐྱེགས་དང་། ར་ཉྫི་ཏ་དང་། ཨརྐ་དཀར་པོའི་ཤིང་བལ་གྱིས་དཀྲིས་ནས་སྦར་ན་ཁུ་བ་རེངས་སོ། ། སའི་འཁྲི་ཤིང་གི་ཕྱེ་མའི་དབུས་སུ་བཅུག་ནས་ཏིལ་གྱི་ཏིལ་མར་གྱིས་བསྲེག་པར་བྱ་སྟེ། ཁུ་བ་རེངས་སོ། ། ཏིལ་གྱི་ཏིལ་མར་དང་། སའི་འཁྲི་ཤིང་ ཕྱེ་མར་བྱས་ནས་སམ།
BOམེ་ཏོག་གི་མར་ཁུ་བཏུང་བར་བྱའོ། ། དེས་རྐང་པའི་མཐིལ་ལ་བསྐུས་ན་ཁུ་བ་རེངས་སོ། ། ཁྭ་ཏ་དཀར་པོའི་རྗེ་ངར་གྱི་རྩ་བ་དང་། པདྨ་དཀར་པོའི་གེ་སར་དང་། སྦྲང་རྩི་རྣམས་ཀྱིས་ལྟེ་བར་བྱུགས་ན་ཁུ་བ་རེངས་སོ། ། པདྨའི་འདབ་མས་ཁྱབ་འཇུག་ གནོན་པའི་རྩ་བར་འདབ་མས་དཀྲིས་ནས་ཝ་ཌྷི་དཀྲི་བར་བྱ་སྟེ། ཁུ་བ་རེངས་སོ། ། པ་བླའི་ཁུ་བའི་མིག་སྨན་དང་། དངུལ་ཆུ་དང་། པི་པི་ལིང་དང་། རྒྱམ་ཚྭ་དང་། རུ་རྟ་དང་། ཕུག་རོན་གྱི་བྲུན་རྣམས་ཀྱིས་ལིང་ག་ལ་བསྐུས་ནས་དྲིལ་ཕྱིས་བྱས་པ་ལས་ཁུ་བ་རེངས་སོ། ། གླང་གི་རྭ་བཟུང་ནས་བྱུགས་ན་སྟེང་དུ་འགྱུར་རོ། ། ཤིང་ཀ་པི་ཏའི་རྩ་བ་དང་། དརྦི་དང་། རའི་གཅིན་གྱིས་བཏགས་ནས་ལིང་ག་ལ་བྱུགས་ནས་པདྨ་དབྱེ་བར་བྱ་སྟེ། ལན་གསུམ་དུ་སྟེང་དུ་འགྱུར་རོ། ། བྷ་གའི་ཆུ་ཡིས་བཀྲུས་ན་རབ་ཏུ་ཞི་བར་བྱེད་དོ། ། འགྲོན་བུའི་ནང་དུ་ དངུལ་ཆུས་བཀང་ནས་ཁ་རུ་བཞག་ན་ཁུ་བ་རེངས་སོ། ། ར་འི་གཅིན་གྱིས་དབང་པོ་ཆུ་ལྷ་མོ་ལ་ཉི་མ་བདུན་དུ་བགོ་བར་བྱའོ། ། དེས་དྲིལ་ཕྱིས་བྱས་པ་ལས་ལིང་ག་རེངས་པར་འགྱུར་རོ། ། ད་དྷུ་ར་འི་རྩ་བ་དང་། ཀ་མཱ་ཙཱིའི་རྩ་བ་དང་། ཨོ་ཥ་ཎའི་རྩ་བ་དང་།
BOག་བུར་ གྱི་ཁུ་བས་བསབ་ཏགས་ནས་ལིང་ག་ལ་བྱུགས་ན་འདོད་པའི་བུད་མེད་འཛག་པར་བྱེད་དོ། ། རྒྱམ་ཚྭ་དང་། ཚ་ལ་དང་། ག་བུར་དང་། གྷོ་ཥའི་ཕྱེ་མ་སྦྲང་རྩིས་བཏགས་ནས་ལིང་ག་ལ་བྱུགས་ནའང་དེ་བཞིན་ནོ། ། ཕུག་རོན་གྱི་བྲུན་སྦྲང་རྩིས་བཏགས་ནས་ལིང་ག་ ལ་བསྐུས་ན་འདོད་པའི་བུད་མེད་འཛག་པར་བྱེད་དོ། ། ཀཱ་མཱ་ཙཱིའི་རྩ་བ་དང་། ཏམཱུ་ལ་ཤིན་ཏུ་དགའ་བའི་དུས་སུ་ཟོས་ན་བུད་མེད་དེ་འཛག་པར་བྱེད་དོ། ། ཏིནྟི་ཌཱི་སྨིན་པ་དང་མལླི་ཀཱ་རྒྱམ་ཚྭ་བསྲེས་པར་བྱས་ནས་རང་གི་མཛུབ་མོའི་སོར་མོར་བགོས་ཏེ། དེའི་བྷ་གར་ བཅུག་ནས་རྡོ་རྗེ་དབྱིངས་ཀྱི་དབང་ཕྱུག་མའི་རྩ་ཇི་སྲིད་དུ་དེ་འཛག་པར་བྱེད་ཀྱི་བར་དུ་བསྐྱོད་པར་བྱའོ། ། ག་བུར་དང་། དངུལ་ཆུ་དང་། ཚ་ལ་དང་། གླང་པོའི་པི་པི་ལིང་དང་། སྦྲང་རྩི་རྣམས་ཀྱིས་བྱུགས་ན་བུད་མེད་འཛག་པར་བྱེད་དོ། ། ཤིང་ཛ་ཡནྟིའི་རྩ་བས་ བཏགས་ནས་འབྲས་ཐུག་པོ་ཆེ་དང་། ཆུ་བསྲེས་པ་ཟླ་མཚན་གྱི་དུས་སུ་དེའི་སྐྱེ་གནས་ལ་རབ་ཏུ་བྱུགས་ན་བུད་མེད་མོ་ཤམ་དུ་འགྱུར་བར་ཐེ་ཚོམ་མེད་དོ། ། པཱ་ལ་ཤའི་ས་བོན་བཏགས་ནས་བྱུག་པར་བྱ་ཞིང་། མར་དང་།
BOསྦྲང་རྩི་འཐུངས་ པ་ལས་ཁྲག་གི་མཚན་མའི་བུད་མེད་མོ་ཤམ་དུ་འགྱུར་རོ། ། ཆ་ག་པ་དང་། ཕྱེ་མ་ལེབ་ཀྱི་ཕྱེ་མ་སྐྱེ་གནས་ལྷོ་དཔལ་བྱིན་ན་དམ་པོར་འགྱུར་རོ། ། ཁུ་བ་རེངས་པའི་ལེའུ་སྟེ་བདུན་པའོ། ། ། ། མགྲིན་པ་བཏེག་ནས་དམ་འཁྱུད་ཅིང་། ། ལྷ་ལ་ཡང་ ཡང་འོ་བྱས་ནས། ། རྒྱལ་པོའི་དངོས་པོར་བྱས་པ་གཅིག ། འཁོར་ལོས་སྒྱུར་བར་ཇི་ལྟར་འགྱུར། ། གང་ཞིག་གིས་ནི་ཉེར་ཞུགས་ནས། ། གནས་ཅིག་ཏུ་ནི་རྒྱལ་སྲིད་འགྱུར། ། དགྲ་བོ་གཡོ་མེད་འགྱུར་བ་དང་། ། དགའ་ཞིང་ཞབས་ལ་འདུད་པ་འམ། ། ཀུན་དུ་ འགུགས་ཤིང་འདྲེན་པ་དང་། ། མངའ་བདག་དེ་བཞིན་དེར་རྒྱལ་བ། ། སེམས་ཅན་དོན་དུ་བདག་ལ་ཤོད། ། བཅོམ་ལྡན་འདས་ཀྱིས་བཀའ་སྩལ་པ། ། བྲིས་སྐུ་དང་ནི་གཟུགས་བརྙན་ལ། ། ཉེར་སྤྱོད་ལྔ་རྣམས་ཀྱིས་མཆོད་ནས། ། དྲུག་ཅུ་རྩ་བཞི་ཡོངས་རྫོགས་པའི། ། གཏོར་མ་ཐུན་མཚམས་གསུམ་དུ་སྦྱིན། ། གསེར་བུམ་དེ་བཞིན་ཁམ་ཕོར་བརྒྱད། ། འཁྲུལ་འཁོར་རྒྱས་པའི་སྦྱོར་བ་ཡིས། ། དེ་བཞིན་བསྔགས་ལ་མཆོག་གཞོལ་བ། ། སླར་ཡང་ཤིང་རྟ་ཁམ་ཕོར་སོགས། ། མར་དང་སྦྲང་རྩིས་བཀང་བྱས་ནས། ། གཙོ་བོ་དཔལ་གྱི་ ཁྱིམ་དུ་ནི། ། གཙུག་ཏུ་བཅིང་བྱ་རྫས་མེད་པའི། །
BOཕོ་བྲང་དུ་ནི་ཧྲཱིཿཥྚྲཱི་སོགས། ། སྔགས་རིག་བློ་ལྡན་དུས་གསུམ་མཆོད། ། ཀ་ཌ་ཀ་ཡི་བྱང་གི་ཆར། ། འདུན་ཁང་ལྔ་པོ་བྱས་ནས་ནི། ། ལེགས་པར་དཀྲི་བ་བྱིན་ནས་ནི། ། འབད་པས་ས་ཀུན་སྦྱང་བར་བྱ། ། ས་གཞི་ཡོངས་སུ་བཟུང་བྱས་ནས། ། དཀྱིལ་འཁོར་མཆོག་ནི་བྱ་བ་ཡིན། ། རྡུལ་ཚོན་མཛེས་པས་བྲི་བའམ། ། ཡང་ན་འབྲས་ནི་ཐུག་པོ་ཆེ། ། ཁ་དོག་ལྔ་པོ་དེ་བཞིན་ལྡན། ། དེ་བཞིན་སློབ་དཔོན་ལྔ་རྣམས་ཀྱིས། ། ཅུང་ཟད་མྱོས་བྱེད་འཐུངས་ནས་ནི། ། སྟེང་གི་རི་ མོའི་སྟེང་དུ་ནི། ། དགུ་བདག་དཀྱིལ་འཁོར་ཡིད་འོང་བ། ། གྲྭ་བཞི་རུ་ནི་ཐོད་པའོ། ། རང་གི་འདོད་ལྷའི་རྣལ་འབྱོར་ལྡན། ། སྲད་བུས་ཐིག་གདབ་ཤེས་རབ་ཅན། ། ལྷ་མོའི་དཀྱིལ་འཁོར་ཆེས་མང་བ། ། རྣམ་པ་ཇི་བཞིན་མངོན་བྲི་བྱ། ། འདབ་བཞིར་དེ་བཞིན་བྲི་ བྱ་བ། ། ཁྱད་པར་དབྱུག་པ་དཀར་པོའོ། ། དབུས་སུ་དབྱུག་པ་དཀར་པོ་ནི། ། སྣ་ཚོགས་རྡོ་རྗེ་བཞིན་བྲི་བྱ། ། རིགས་ནི་ལྔ་པོ་མཚུངས་པར་བྱ། ། སྐལ་ལྡན་ལེགས་པར་བསླབ་བྱས་ནས། ། རྒྱུད་ལ་སོགས་པའི་སྦྱོར་བས་འདིར། ། རབ་ཏུ་འབད་པས་དབང་བསྐུར་སྦྱིན། ། སློབ་དཔོན་གསང་བ་ཤེས་རབ་དང་། ། བཞི་པ་དེ་སླར་དེ་བཞིན་ནོ། །
BOསློབ་དཔོན་བཞི་པོ་རྣམས་ཉིད་ཀྱིས། ། ཡང་དང་ཡང་དུ་གཏོར་མ་སྦྱིན། ། དྲིལ་བུ་རྡོ་རྗེ་མཉམ་པར་གནས། ། སྣ་ཚོགས་རྒྱན་གྱིས་བརྒྱན་པ་ཡི། ། ཀུན་ཏུ་སེར་པོའི་གོས་ཉིད་དང་། ། མི་ཡི་རྒྱན་ གྱིས་བརྒྱན་པའོ། ། གསེར་དངུལ་ཟངས་ལྕགས་བཞི་ཡིས་ནི། ། བུམ་པ་དཀྱིལ་འཁོར་ཡང་དག་དགོད། ། དབུས་སུ་གསེར་གྱི་བུམ་པ་ཡང་། ། སྣ་ཚོགས་རིན་ཆེན་ལེགས་པར་མཛེས། ། གསེར་དངུལ་ཟངས་ལྕགས་ལས་བྱུང་བ། ། འཁྲུལ་འཁོར་བཞི་པོ་ རྣམས་དང་ནི། ། དབུས་སུ་གསེར་གྱི་འཁྲུལ་འཁོར་ནི། ། མེ་ཏོག་དམར་པོས་ལེགས་མཛེས་པའོ། ། སླར་ཡང་ཕྱིར་གཞན་དཀྱིལ་འཁོར་བཞིར། ། སྡོང་པོ་བཀོད་སོགས་འབད་པས་བཀླག ། ཕྱི་རུ་ཟས་ཀྱི་ཁང་པ་མལ། ། བཟའ་བ་འདུས་པའི་ལོངས་སྤྱོད་ ཀྱང་། ། དེ་བཞིན་ཁུར་བ་དང་བཅས་གཞན། ། ཡོན་བཅས་དགེ་འདུན་བཟའ་བ་ཡང་། ། བློ་བཟང་འབད་པས་བྱ་བ་ཡིན། ། ཤར་དུ་ཝ་ཊ་ལྷོ་རུ་ནི། ། ཨ་ཤྭ་ཏྠ་ནུབ་བ་ཀུ་ལ། ། བྱང་དུ་ནག་གེ་སར་རོ། ། ཤར་དུ་མེ་ཏོག་དཀར་ལྷོར་སེར། ། དེ་བཞིན་ནུབ་དམར་ བྱང་དུ་ཡང་། ། ལྗང་གུ་དེ་བཞིན་སྟེང་དུ་ཡང་། ། མ་རུ་ལ་ཌ་རྗེ་རིགས་དང་། ། བྲམ་ཟེ་རྡོ་རྗེ་རིན་ཆེན་དབྱིག ། ཤར་སོགས་གཡས་བསྐོར་བགྲོད་པ་ཡིས། །
BOའདི་དག་ས་ག་ཟླ་བ་ལ། ། སྣ་ཚོགས་རྒྱན་ཀུན་གྱིས་བརྒྱན་པའི། ། མི་བདག་གིས་ནི་ངོས་བཞི་རུ། ། བཞི་འགྱུར་འདྲེན་པ་རྣམས་དང་ནི། ། ལྷན་ཅིག་མཆོད་སྦྱིན་འདུན་ས་རུ། ། བརྒྱ་རྩ་བརྒྱད་དུ་བསྐོར་བྱས་ནས། ། པུས་མོ་གཡས་པའི་ལྷ་ང་ནི། ། སར་བཙུགས་ལག་པ་སྦྱར་བྱས་ནས། ། སྣ་ཚོགས་རིན་ཆེན་ལ་སོགས་རྒྱན། ། སྤྲས་ པའི་སྣོད་ནི་གསེར་གྱིས་ཀྱང་། ། བཀང་བའི་སྣོད་བཅས་དེས་བརྗོད་པ། ། ས་སྟེང་ཐམས་ཅད་གནོད་མེད་པའི། ། ལྷ་ཡི་རྒྱལ་སྲིད་བདག་ལ་སྩོལ། ། འཁོར་ལོས་སྒྱུར་བའི་རྒྱལ་སྲིད་དང་། ། དབང་པོ་ཉིད་ཀྱང་བདག་ལ་གསོལ། ། དེ་ནས་དཔལ་ལྡན་གཤིན་རྗེའི་གཤེད། ། དམར་པོའི་སློབ་དཔོན་བདེན་པ་ཡིས། ། འདི་ལྟར་རྒྱལ་པོ་ཆེན་པོ་ཡི། ། ཡིད་ཀྱི་ཤིང་རྟ་རྫོགས་པར་བགྱི། ། འོན་ཀྱང་བློ་ལྡན་གུས་པས་ཉོན། ། གཤིན་རྗེའི་གཤེད་ཀྱི་རྣལ་འབྱོར་པ། ། སྔགས་དང་བསམ་གཏན་མཆོག་གཞོལ་བས། ། ཤེས་རབ་ཕ་རོལ་ཕྱིན་པ་བཀླག ། ཛམྦྷ་ལ་ལ་ཆུ་སྦྱིན་དང་། ། ཡི་དྭགས་གཏོར་མ་དེ་བཞིན་སྟོན། ། བརྩེ་བའི་ངང་ཚུལ་འཇིག་རྟེན་སྐྱོང་། ། དེས་ཁྱོད་ལ་སོགས་བརྗོད་པར་བྱ། ། མི་བདག་བདག་ལ་བདེན་པར་སྨྲོས། ། མངའ་བདག་བདེན་ལས་གཞན་མིན་པས། །
BOམི་བདག་གིས་བདེན་བརྗོད་པར་བྱ། ། མགོ་དང་སྙིང་གར་རྡོ་རྗེ་ནི། ། ལན་གསུམ་བྱིན་ནས་རྒྱལ་སྲིད་བྱ། ། དཀྱིལ་འཁོར་བསྟན་པར་བྱ་བའོ། ། སྡུག་གུ་བདག་ལ་སྨྲ་བར་བར་བྱོས། ། དེང་བདག་སྐྱེ་བ་འབྲས་བུར་བཅས། ། མི་ཡི་འགྲོ་བ་ལེགས་པར་ཐོབ། ། དེང་ནས་དཔལ་ལྡན་གཤིན་རྗེའི་གཤེད། ། དམར་ པོའི་རྣལ་འབྱོར་པ་བདག་ནི། ། འཇིག་རྟེན་གསུམ་རྒྱལ་སྲིད་བྱས་ནས། ། ཕྱིས་ནས་དབང་པོ་ལ་སོགས་པ། ། བཟློག་པ་བདག་གིས་བྱེད་པ་ཡིན། ། དེ་བཞིན་སླར་ཡང་ཀི་ལཱ་ཤར། ། བུད་མེད་རྒྱལ་སྲིད་བྱས་ནས་ནི། ། རྒྱལ་སྲིད་འབྱོར་གྲུབ་ཆེས་མང་དང་། ། མཐའ་ དག་རྒྱལ་སྲིད་ཁུར་བཟུང་ནས། ། མི་བདག་འཕྲོག་བྱེད་ཟླ་བ་ལྟར། ། སངས་རྒྱས་ཀུན་དང་དངོས་གྲུབ་ཀུན། ། གང་གིས་མྱུར་དུ་འབྱུང་འགྱུར་བ། ། ད་ལྟར་ལྷ་ཡིས་དེ་མཛོད་ལ། ། མངའ་བདག་བདག་ལ་མཆོག་སྩོལ་ཅིག ། དེ་བཞིན་ཁོ་ནར་བདེན་དང་བདེན། ། མཉེན་གཤིན་པས་ནི་ཕྱག་བྱས་ནས། ། བཟོད་པར་གསོལ་ནས་ཁྱིམ་འགྲོ་བྱ། ། དེ་བཞིན་སྣ་ཚོགས་གླུ་དང་ནི། ། རོལ་མོ་ལ་སོགས་པ་རྣམས་ཀྱིས། ། སྤྲོ་བར་བཅས་པས་སྦྱིན་སྲེག་བྱ། ། ཉི་མ་སོ་སོར་ཉེར་སྤྱོད་བཅས། ། མཚན་མོ་བྱེད་ནས་ཚོགས་འཁོར་དང་། །
BOཤེས་རབ་བཅས་ཤིང་ཡོན་དང་བཅས། ། རིམ་འདིས་ཉི་མ་ཉི་ཤུ་ལྡན། ། ཟླ་བ་དྲུག་གིས་མཆོད་སྦྱིན་རྫོགས། ། དེ་བཞིན་མི་བདག་ཡང་དག་འོངས། ། གླང་པོ་རྟ་ལ་སོགས་པའི་ཡོན། ། བྱིན་ནས་མཆོག་ནི་སློང་བར་བྱེད། ། ཡང་ནས་ཡང་དུ་མི་བདག་རྣམས། ། གང་ གང་དེ་ལ་སོགས་པས་སོ། ། གཞན་དུ་ཕོ་ཉར་རབ་ཏུ་འཇོག ། རྒྱལ་སྲིད་བདག་གིས་བཟུང་བ་ཉིད། ། གལ་ཏེ་མིན་ན་ཆད་པ་ལ། ། རབ་ཏུ་བཞག་ནས་སྦྱིན་པར་བྱེད། ། སྣ་ཚོགས་རིན་ཆེན་ལ་སོགས་པ། ། མྱུར་འགྲོ་རྣམས་ནི་འབུལ་བར་བྱེད། ། རང་ཕན་སྐལ་བ་ བཟང་པོ་ལ། ། གལ་ཏེ་འཇོག་པར་བྱེད་འདོད་ན། ། དེ་ཡིས་རྒྱལ་སྲིད་སྦྱིན་པར་བྱེད། ། གང་གང་འོང་བར་མི་བྱེད་ན། ། དེ་ཡི་མིང་གིས་འཁྲུལ་འཁོར་ནི། ། སེང་ལྡེང་མེ་ལ་གདུང་བར་བྱ། ། སྐད་ཅིག་དེ་ལ་དེ་རྨོངས་ཏེ། ། གཞན་གྱི་ཡུལ་དུ་འགྲོ་བར་འགྱུར། ། གཙོ་ བོའི་ཐབ་ཀྱི་ཐལ་བ་གང་། ། གང་གི་ནད་སོགས་ལ་བྱིན་པ། ། དེ་དག་ཉེ་བར་ཞི་བར་བྱེད། ། གལ་ཏེ་གསོ་སྦྱོང་བྱས་པ་ཡིས། ། འདི་ལྟར་བཞི་འགྱུར་སྦྱིན་སྲེག་གིས། ། དབང་པོ་ཉིད་ནི་ཐོབ་པར་བྱེད། ། བཅོམ་ལྡན་འདས་མ་ཀྱ་ཁྱོད་ལ། ། ངོ་མ་ཆོགས་པས་བཤད་པ་ ཡིན། ། ཅི་ཞིག་རྒྱུད་ཀྱི་མཆོག་འདི་ནི། །
BOའཇིག་རྟེན་གསུམ་དུ་རྙེད་པར་དཀའ། ། ལྷ་མོ་དཔལ་ལྡན་ཀྱེ་རྡོ་རྗེར། ། ཐར་པ་མཆོག་ནི་བསྟན་པ་སྟེ། ། དཔལ་ལྡན་བདེ་མཆོག་རྒྱུད་དུ་ཡང་། ། རྣལ་འབྱོར་མ་ཡི་འཁོར་ལོ་རྒྱས། ། ལྷ་མོ་དཔལ་ལྡན་འདུས་པ་དང་། ། རྣལ་འབྱོར་རྒྱུད་དུའང་རྒྱས་པའོ། ། དགའ་མ་གཤིན་རྗེའི་གཤེད་དམར་པོའི། ། རྒྱུད་དུ་གངྒཱའི་ཀླུང་གི་ནི། ། བྱེ་སྙེད་དངོས་གྲུབ་ཆེས་མང་ངོ་། ། ལྷ་མོ་གུས་དང་བཅས་པས་ཉོན། ། ལྷ་མོ་བདག་ནི་མྱ་ངན་འདས། ། དབང་པོ་སོགས་ཀྱིས་མི་མཐོང་ངོ་། ། བི་རཱུ་པཱ་ཀྵ་རྣལ་འབྱོར་དབང་། ། བྲམ་ཟེའི་རིགས་སུ་འབྱུང་བར་འགྱུར། ། བརྩོན་འགྲུས་ཆེན་པོ་སྟོབས་ཆེན་ལྡན། ། བདག་གི་ཆོས་ནི་སྟོན་པ་པོ། ། འགའ་ཞིག་གིས་ནི་སྦས་པའི་རྒྱུད། ། འདི་ནི་ཐོབ་ནས་ལེགས་སྦེད་ཅིང་། ། གསང་སྔགས་འབུམ་ཕྲག་གཅིག་ཅིག་བཟླས་ནས། ། བདག་ནི་སྒྲུབ་པར་བྱེད་པར་འགྱུར། ། འཛམཱུའི་གླིང་ན་སྣ་ཚོགས་པའི། ། དངོས་གྲུབ་རབ་ཏུ་སྟེར་བར་བྱེད། ། ཀྲྀ་ཤུ་བཱི་ཛཾ་མཱས་ཀཾ། ། འདི་དག་བདུན་གྱི་རྣལ་འབྱོར་པས། ། ཉེ་བར་དམིགས་པར་བྱེད་པར་འགྱུར། ། སླར་ཡང་རྩོདཔའི་དུས་སུ་ནི། ། བཱ་ལའི་རིགས་ ལ་ས་སྤྱོད་ཀྱིས། ། རྙེད་ནས་བྲན་ལ་སོགས་པ་རྣམས། །
BOརྣལ་འབྱོར་ཅན་རྣམས་འབྱུང་བར་འགྱུར། ། ཀ་ལིངྒ་དང་བངྒ་དང་། ། གོ་ཌ་དང་ནི་མ་ག་དྷ། ། སུ་ར་ཀ་རྒྱལ་ཨུ་བི་ཀྲྀ། ། བི་ཛི་ཀ་ལའི་རྒྱལ་པོ་དང་། ། གོ་ད་ར་མ་ཀ་ལིངྒ། ། བི་མོ་ཛི་ཞེས་བྱ་སོགས་ཀྱི། ། རྒྱལ་པོ་དཔལ་ལྡན་གཤིན་རྗེའི་གཤེད། ། དམར་པོའི་རྣལ་འབྱོར་པ་འབྱུང་འགྱུར། ། འགའ་ཞིག་གཟི་བརྗིད་ལྡན་པ་དང་། ། འགའ་ཡང་བརྩོན་འགྲུས་ལྡན་པ་དང་། ། འགའ་ཡང་ཕ་རོལ་གནོན་པ་ཆེ། ། འགའ་འདིར་དང་པོར་འཇིག་རྟེན་པ། ། སླར་ཡང་སྔགས་ ལ་མཆོག་གཞོལ་པས། ། སླར་ཡང་རྒྱལ་སྲིད་དབང་པོ་སོགས། ། འཁོར་ལོས་སྒྱུར་བར་འགྱུར་བ་ཡིན། ། གསང་སྔགས་ཆེན་པོ་ལེགས་སྦས་པ། ། བྱིས་པའི་རྣལ་འབྱོར་ལ་མི་བསྟན། ། བདེན་པར་སངས་རྒྱས་ཉིད་འདོད་པ། ། རྒྱུད་ལ་འཇུག་པ་ལ་བསྟན་ བྱ། ། བདག་གིས་བཤད་པའི་རྒྱུད་འདི་ལ། ། དང་པོར་དབང་བསྐུར་བྱ་བ་སྟེ། ། ཕྱི་ནས་འདི་ནི་བསྟན་པར་བྱ། ། རྒྱུད་རྒྱལ་རྒྱུད་ཀྱི་མཆོག་གྱུར་པ། ། སྔགས་དང་བསམ་གཏན་བརྗོད་ཉུང་བ། ། བཀླག་པ་ཙམ་གྱིས་འགྲུབ་པར་འགྱུར། ། གང་སྡིག་ལས་ལ་དགའ་ བ་དང་། ། དད་པ་དམན་པས་འགྲུབ་མི་འགྱུར། ། གང་ཡང་སྡིག་པ་བྱེད་པ་ཡང་། ། བསླབ་པ་འཛིན་པར་བྱེད་ན་ནི། །
BOའབད་མེད་དངོས་གྲུབ་ཉིད་འགྲུབ་པར། ། འགྱུར་བར་འདི་ནི་ཐེ་ཚོམ་མེད། ། དགེ་བ་བཅུ་ལས་བརྩམས་ནས་ནི། ། ཕྱི་ནས་ཆོས་ནི་རབ་གསལ་བྱ། ། དེ་བཞིན་དེ་ཡི་བྱ་བ་ནི། ། ཇི་ལྟ་བ་བཞིན་འགྱུར་བ་ཡིན། ། ཞེས་པ་རྒྱལ་སྲིད་ཀྱི་བསླབ་པའི་ལེའུ་སྟེ་བརྒྱད་པའོ། ། ། ། བཅོམ་ལྡན་འདས་ཀྱེ་རྒྱལ་པོ་རུ། ། གྱུར་པ་ཆོས་ལྡན་ལེགས་འགྱུར་ན། ། ཆོས་དེ་ཡང་ནི་བདག་ལ་གསུངས། ། སྔགས་ཀྱི་དེ་ཉིད་ མི་ཤེས་དང་། ། འདིར་མི་བསམ་གཏན་མེད་ཉིད་ཀྱི། སེམས་ཅན་ཐམས་ཅད་བསྒྲལ་དོན་དུ། ། སྔགས་ཀྱི་དེ་ཉིད་རབ་གསལ་བྱས། ། བསམ་གཏན་མེད་པར་འགྲུབ་མི་འགྱུར། ། བསམ་གཏན་མེད་ན་དེ་ཉིད་ལས། ། རྣམ་པ་གཞན་དུ་རྒྱུར་འགྱུར་བ། ། བྱིས་པ་རྣམས་ནི་སྐྱོ་ བར་བྱེད། ། དང་པོ་ལྷ་ཡི་གཟུགས་ཀྱིས་ནི། ། ལུས་ནི་རྣམ་པར་དག་པར་བྱ། ། གཉིས་པར་གསང་སྔགས་བཟླས་པ་སྟེ། ། ཨཱ་ལི་ཀཱ་ལི་བཟླས་པ་དང་། ། སྐུ་གསུང་ཐུགས་ཀྱི་དབྱེ་བ་ཡིས། ། བློ་ལྡན་ཡི་གེ་གསུམ་བཟླས་བྱ། ། དེ་བཞིན་བློ་ལྡན་ཁྲི་ཕྲག་གཉིས། ། བརྒྱ་ ཕྲག་བཅུ་དྲུག་བཟླས་པར་བྱ། ། ཉིན་དང་མཚན་མོའི་གྲངས་ཀྱིས་ནི། ། གསང་སྔགས་བཟླས་པ་བྱེད་པ་ཡིན། ། དེ་ནས་དེ་ལ་སྣ་ཡི་རྩེ། །
BOཁོ་ནར་ས་བོན་མཚན་མའི་རིམ། ། ཡུངས་ཀར་དུ་ཡང་བསམ་པར་བྱ། ། རྡོ་རྗེ་སྐྱིལ་ཀྲུངསྦྱོར་བ་ལས། ། སེམས་ནི་བརྟན་པར་ བྱས་ཉིད་ཀྱིས། ། རང་བྱིན་རློབ་པར་ཡང་འགྱུར་རོ། ། ཇི་ལྟར་སྒྱུ་མ་ཇི་ལྟར་རྨི། ། དེ་བཞིན་སླར་ཡང་ཆུའི་ཟླ་བ། ། ཇི་ལྟར་བླ་མའི་མན་ངག་ལས། ། འདི་ལྟ་བུ་ཡི་རང་བཞིན་བསྒོམ། ། ཆུ་ལ་ཆུ་ནི་འཕྲད་པ་བཞིན། ། ཆུ་དང་ཆུ་འདུས་གཅིག་པ་བཞིན། ། སྒྱུ་མ་སྟོང་པ་ གཅིག་སྦྱོར་བས། ། གཉིས་པོ་འདི་དག་སྦྱོར་བ་ཡིས། ། ཟུང་དུ་འཇུག་པ་རབ་སྒྲུབ་བྱེད། ། རྣལ་འབྱོར་ཅུང་ཟད་བསམ་མི་བྱ། ། བཏང་སྙོམས་མཆོག་ཏུ་འགྱུར་བ་ཡིན། ། ཅུང་ཟད་བསམ་པ་མེད་ཉིད་ལས། ། རང་གི་དེ་ཉིད་གསལ་བར་འགྱུར། ། བསམ་བྱ་མེད་ཅིང་ བསམ་མེད་གང་། ། དེ་ཡང་གང་དུ་ཡོད་མ་ཡིན། ། དེ་འདིར་བསམ་མི་ཁྱབ་པར་བརྗོད། ། སྲིད་པའི་ཤིང་གི་སྟ་རི་སྟེ། ། ལ་ལར་རྒོད་དང་བརྗོད་དང་གནས། ། ལ་ལར་རབ་ཏུ་འཇུག་པར་བྱ། ། སྒོམ་པར་མི་ནུས་པའི་སེམས་ནི། ། ཇི་ལྟའི་དབྱེ་བ་ཤེས་མ་ཡིན། ། སྣ་ཚོགས་དངོས་གྲུབ་སྒྲུབ་བྱེད་པ། ། དེ་བཞིན་རྣལ་འབྱོར་རིམ་པས་འགྱུར། ། རང་བློ་གཡོ་བས་འཇིག་རྟེན་པ། ། འདོད་པས་མཐོ་རིས་རབ་ཏུ་སྐྱེ། །
BOབཙུན་མོ་ཐམས་ཅད་དགའ་བར་བྱེད། ། སྲུང་བ་སོགས་ཀྱི་ཉི་མ་མཆོག ། ལ་ལར་རྒྱན་མང་ ཟླ་བ་ཡིས། ། ལུས་བྱུགས་ཁ་ཅིག་འདམ་གྱིས་བྱུགས། ། ལ་ལར་རྒྱན་མང་ཅི་སྒྲུབ་ཅེས། ། འདི་ལས་གནས་པ་རབ་དགའ་དང་། ། ཐེ་ཚོམ་བྱེད་རྣམས་སྡུག་བསྔལ་དང་། ། བདེ་བས་གནོད་པ་མེད་པ་ཡིན། ། དེ་རྣམས་འདོད་ན་རྣལ་འབྱོར་པས། ། རྣམ་དཔྱོད་ མེད་པར་དེ་བྱའོ། ། འདོད་པ་ལྔ་ལ་ལོངས་སྤྱོད་ཅིང་། ། འདོད་པའི་ཡོན་ཏན་ལྔ་རྣམས་ལྡན། ། རྟག་ཏུ་རྩེ་བར་བྱ་བ་སྟེ། ། འཁོར་བར་འགྲོལ་ཞིང་གྲོལ་བའོ། ། དངོས་དང་དངོས་མེད་རྣམ་པར་གྲོལ། ། ངོ་ཚའི་བྱ་བ་རྣམ་པར་སྤངས། ། བློ་གྲོས་སྦྱོར་བ་ལས་འདས་ པ། ། ལས་རྣམས་ཐམས་ཅད་རིག་པའི་མཆོག ། ཅེས་པ་དེ་ཁོ་ན་ཉིད་ཀྱི་ལེའུ་སྟེ་དགུ་པའོ། ། ། ། ཀྱེ་བཅོམ་ལྡན་འདས། མངོན་པར་དབང་བསྐུར་ཇི་ལྟ་ཞིག ། མངའ་བདག་བདག་ལ་དེ་གསུངས་ཤིག ། དགའ་མ་དབང་བསྐུར་རྣམ་པ་བཞི། ། སེམས་ཅན་སྒྲོལ་བྱེད་དེ་ཉོན་ཅིག ། གཏོར་བས་དྲི་མ་མེད་བྱེད་ཕྱིར། ། རྡོ་རྗེ་སྐྱིལ་མོ་ཀྲུང་འཆིང་བྱེད། ། དེ་ནི་ཡང་དག་འདོད་པ་ཡིན། ། འཛག་མེད་ལ་སོགས་བདེ་བས་གང་། ། འདི་དག་ཇི་སྲིད་དྲི་མེད་གྱུར། ། བྱང་ཆུབ་སེམས་ནི་སྤོང་བྱེད་པ། །
BOཇི་སྲིད་རྣལ་འབྱོར་པས་ མི་བྱ། ། སྐྱེ་གནས་ཕྱིན་པ་རྣམ་པར་གཅོད། ། ཇི་སྲིད་ཀུན་ཏུ་དགའ་བའི་མཆོག ། བདེ་བའི་གཟུགས་ནི་དེ་ཉིད་ཀྱིས། ། ཡང་དག་ལྡན་པའི་སངས་རྒྱས་གཟུགས། ། ཇི་སྲིད་ཁུ་བ་བརྟན་གྱུར་པར། ། བདག་ཉིད་རྟག་ཏུ་བསྒོམ་པར་བྱ། ། དེ་ནི་འཇིག་རྟེན་བདེན་པར་གྲག ། དམ་པའི་དོན་ནི་དེ་མ་ཡིན། ། ཅི་ཕྱིར་བཞི་པ་སླར་སྦྱིན་ཕྱིར། ། འདིར་ནི་ཤེས་རབ་ཡེ་ཤེས་གང་། ། དེ་ཉིད་དབང་བསྐུར་བཞི་བ་རུ། ། བྱིས་པའི་སྐྱེ་བོ་སྨ་བར་འགྱུར། ། དེ་ནི་སླར་ཡང་དེ་བཞིན་ཞེས། ། བཞི་པ་དེ་ཉིད་གསུམ་པ་རུ། ། དེ་བཞིན་བྱས་པར་མི་འགྱུར་ཏེ། ། དང་པོའི་ཡན་ལག་ལས་སླར་ཡང་། ། སྨོས་པ་སྐྱོན་འགྱུར་དེ་བཞིན་དུ། ། བྱིས་པ་རྣམས་ཀྱི་རྒྱུ་གསུམ་པ། ། གང་ཡིན་འབྲས་བུ་བཞི་པ་སྟེ། ། རྒྱུ་འབྲས་དབྱེ་བ་མེད་པའི་ཕྱིར། ། བཞི་པའང་གསུམ་པར་གྲུབ་པོ་ཞེས། ། སྔར་བརྗོད་དོན་དམ་བདེན་པ་ཉིད། ། གང་ལས་ཕྱག་རྒྱ་གསུམ་གྱིས་ནི། ། འབྲས་བུ་གསུམ་ནི་སྒྲུབ་པའི་ཕྱིར། ། གསང་སྔགས་ཚུལ་འདིར་སྦྱིན་སྲེག་འབྲས། ། ཕྱག་རྒྱ་གཉིས་དང་བྲལ་བ་རྨད། ། ཕྱག་རྒྱ་གཉིས་ཀྱི་འབྲས་སྒྲུབ་ལ། ། ལས་རྒྱ་ཡེ་ཤེས་ཕྱག་རྒྱ་ནི། །
BOརྒྱུ་རུ་མི་འགྱུར་རོ་ཞེས་པ། ། ལས་རྒྱ་ཡེ་ཤེས་ཕྱག་རྒྱ་ནི། ། སྒོམ་པ་ཡོངས་སུ་སྤངས་པ་ལས། ། ཕྱག་རྒྱ་ཆེན་པོ་ངེས་པར་སྒོམ། ། འདི་ནི་དབང་པོ་གཉིས་སྦྱོར་བདེ། ། འདོད་པ་ཀུན་སྤྱོད་བདེ་བ་ཞེས། ། འཛག་དང་མི་འཛག་མཚན་ཉིད། ། ངོ་བོའི་ཀུན་སྤྱོད་བདེར་མི་འགྱུར། ། གསུམ་པ་རྒྱུ་ཡིས་བསྐྱེད་པ་ཡི། ། རིགས་ཀྱི་འཛག་པ་གསུམ་པའི་འབྲས། ། དོན་དམ་བཞི་པར་མི་འགྱུར་རོ། ། ཞེས་པས་ཁོང་དུ་ཆུད་པར་བྱའོ། ། དབང་བསྐུར་བའི་ཆོ་གའི་ལེའུ་སྟེ་བཅུ་པའོ། ། ། ། བཅོམ་ལྡན་འདས་བྲིས་སྐུའི་ཆོ་ག་གསུང་དུ་ གསོལ། ། བཅོམ་ལྡན་འདས་ཀྱིས་བཀའ་སྩལ་པ། དམར་ཞིང་དཀར་བའི་བུད་མེད་དེ་ལ་འབད་པས་མཆེད་པ་བྱའོ། ། སྐར་མ་རྒྱལ་ལ་བརྩམ་པར་བྱ་སྟེ། དེ་ཡང་མངོན་པར་དབང་བསྐུར་བར་བྱའོ། ། དེ་ལ་དོག་པ་དམར་ཞིང་དཀར་བ་ཐག་པས་འབད་པས་འཐག་པའི་རྒྱུ་དང་ སྤུན་དེ་ལ་སྦྱིན་པར་བྱའོ། ། ཉི་མ་སོ་སོར་དམ་ཚིག་བསྟེན་པས་ཤེས་རབ་དང་བཅས་པས་བཏགས་ནས། རས་དེ་དམར་ཞིང་དཀར་བའི་བུད་མེད་རྡུལ་དང་ལྡན་པའི་དུས་སུ་མ་ལ་ཆར་སྦྱིན་པར་བྱའོ། ། ཉི་མ་གསུམ་གྱི་ཕྱི་ནས་རི་མོ་མཁན་དམ་ཚིག་དང་ལྡན་པ་མངོན་པར་བོས་ ཏེ།
BOདཔའ་བོའི་ཚོང་གི་གང་སྨྲ་བར་བྱེད་པ་དེ། དེ་ལ་སྦྱིན་པར་བྱའོ། ། སྦྲང་རྩི་ཆེན་པོས་སྣག་ཚ་བྱས་ནས་མིའི་རུས་པའི་སྨྱུ་གུས་བྲི་བར་བྱའོ། ། ཇི་སྲིད་འདྲི་བར་བྱེད་པ་དེ་སྲིད་དུ་མྱོས་བྱེད་ཅུང་ཟད་འཐུངས་ནས་ཉི་མ་སོ་སོར་ཐུན་མཚམས་བཞིར་གཏོར་མ་དང་། གསང་ སྔགས་བརྒྱ་ཕྲག་གཅིག་ཏུ་བཟླས་པར་བྱའོ། ། རིགས་རྣམས་དམ་ཚིག་གིས་གཅིག་ཏུ་གདོན་མི་ཟ་བར་བྱའོ། ། དཔའ་བོའི་རིམ་པས་ཤིན་ཏུ་གསང་ལ་རབ་ཏུ་གནས་པ་ཡང་ངོ་ཞེས་སོ། ། དེའང་གཤིན་རྗེའི་གཤེད་ཀྱི་རྣལ་འབྱོར་ པ་དམ་ཚིག་དང་ལྡན་པས་གྲོ་ག་ལ་གླེགས་བམ་སོར་བཅུ་གཉིས་པ་བྱའོ་ཞེས་སོ། ། ཞེས་པ་བྲིས་སྐུ་དང་གླེགས་བམ་གྱི་ཆོ་གའི་ལེའུ་སྟེ་བཅུ་གཅིག་པའོ། ། ། ། མངའ་བདག་རླུངསྦྱོར་བདག་ལ་གསུངས། ། བཅོམ་ལྡན་འདས་ཀྱིས་བཀའ་སྩལ་ པ། ། སྙིང་གར་སྲོག་དང་ཐུར་སེལ་བཤད། ། ལྟེ་བའི་ཕྱོགས་སུ་མཉམ་གནས་སོ། ། མགྲིན་པའི་ཕྱོགས་ན་གྱེན་རྒྱུ་སྟེ། ། ལུས་ཀུན་སོན་པ་ཁྱབ་བྱེད་དོ། ། འདི་རྣམས་དབུས་སུ་གཙོ་བོ་གང་། ། སྲོག་རླུང་སྙིང་གར་གནས་པའོ། ། དབུགས་དབྱུང་དབུགས་རྔུབ་དབྱེ་བ་ ཡིས། ། འཚོ་བ་འཕོ་བ་བཅུ་དྲུག་གོ ། སྦྱོར་བས་སོ་སོ་རེ་རེ་ལ། །
BOདཀྱིལ་འཁོར་བཞི་སྟེ་རེ་རེ་ལ། ། དབྱུ་གུ་རེ་རེ་འབབ་པ་ཡིས། ། ཉི་ཁྲི་བརྒྱ་ཕྲག་བཅུ་དྲུག་གོ ། གཡས་ནས་རེག་ཅིང་འབབ་པ་ཡིས། ། མི་ཡི་དཀྱིལ་འཁོར་བརྗོད་བྱ་སྟེ། ། གཡོན་དང་གཡས་ ལ་རེག་པ་ལས། ། དབང་ཆེན་གྱི་ནི་འཁོར་ལོར་འགྱུར། ། བརྟན་ཐོབ་དལ་བའི་དཀྱིལ་འཁོར་འགྱུར། ། རྐྱང་མ་དང་ནི་རོ་མ་དག ། གཡོན་དང་གཡས་སུ་གནས་པའོ། ། ཀུན་འདར་མ་ནི་དབུས་ཕྱོགས་སུ། ། ལྷན་ཅིག་སྐྱེས་པ་རྗེས་སུ་བྱེད། ། འཇུག་པར་འགྱུར་དང་ འབྱིན་པ་དང་། ། གནས་པ་གཡོ་མེད་ངོ་བོ་ལ། ། རྣམ་འཇོམས་ཞེས་པ་སྲད་བུའི་རླུང་། ། ཇི་སྲིད་འཚོ་བར་འཇུག་པར་འགྱུར། ། འཇུག་པ་བུམ་པ་ཅན་ཞེས་བྱ། ། དེ་ཡི་འཛིན་ལས་གང་བ་ཅན། ། དབྱུང་བ་རེ་ཙ་ཀར་ཤེས་བྱ། ། གཡོ་མེད་བུམ་པ་ཅན་དུ་འགྱུར། ། རླུང་ནི་རབ་ཏུ་འཇུག་པའི་ཚོགས། ། སྟོང་ཕྲག་བརྒྱ་ལ་སོགས་པའི་གྲངས། ། སངས་རྒྱས་མགོན་པོའི་གསུང་ཇི་བཞིན། ། སྐད་ཅིག་དེ་ལས་འགྲུབ་པར་འགྱུར། ། རླུང་ཚོགས་གཅིག་གྱུར་གང་ཡིན་ནི། ། ཤེས་རབ་ལ་ནི་དམ་འཁྱུད་པས། ། ཟླ་ཕྱེད་ཙམ་གྱིས་འགྲུབ་ པར་འགྱུར། ། རང་གི་ལྷག་པའི་ལྷ་སྦྱོར་བས། ། སངས་རྒྱས་ཡེ་ཤེས་ཡང་དག་ལྡན། ། མངོན་ཤེས་ལྔ་ནི་ཤེས་པར་འགྱུར། །
BOརང་གི་ལྷག་པའི་ལྷ་སྦྱོར་བས། ། རང་གི་བུད་མེད་དམ་དུ་འཁྱུད། ། སྙིང་ག་ཡིས་ནི་སྙིང་ག་རུ། ། གསང་བར་གསང་བས་ཡང་དག་སྦྱོར། ། ཁ་ཡིས་ཀྱང་ནི་ཁར་བྱས་ནས། ། བྱེད་པ་མེད་པ་ལྷུར་ལེན་པས། ། སྙིང་གར་གནས་པའི་ས་བོན་བཞི། ། ཀུན་ཏུ་གང་བར་བསྒོམ་པར་བྱ། ། དེར་ནི་བརྟན་གང་དེ་ཉིད་ཀྱིས། ། མིས་ནི་ཐམས་ཅད་ཤེས་པར་འགྱུར། ། ཀུན་ཏུ་དགོངས་པ་ཙམ་གྱིས་ནི། ། བྱུང་དང་འབྱུང་ འགྱུར་ད་ལྟ་བ། ། ཕ་རོལ་སེམས་ཀྱང་ཤེས་པར་བྱེད། ། བདེན་པ་བདེན་པར་སྨྲ་བར་བྱེད། ། དེ་བཞིན་སྦྱོར་བ་དེ་ཉིད་ཀྱིས། ། རྣ་བ་ལ་ནི་རྣམ་བསྒོམ་བྱ། ། དྲུང་ན་གནས་པའི་སྒྲ་ཇི་བཞིན། ། ཕྱོགས་གནས་ཐམས་ཅད་ཉན་པར་བྱེད། ། དེ་བཞིན་མིག་ལ་རབ་བསྒོམས་ནས། ། འཇིག་རྟེན་གསུམ་ཡང་ངེས་ལྟ་བྱེད། ། སྣ་ལ་དེ་བཞིན་བསམས་ནས་ནི། ། དྲི་རྣམས་ཐམས་ཅད་ཤེས་པར་བྱེད། ། ལྕེ་ལ་དེ་བཞིན་བསམས་ནས་ནི། ། ཐག་{རིངས་,རིང་}མྱང་བྱ་རབ་རྟོགས་བྱེད། ། རང་གི་རྟགས་རྩེར་དེ་བཞིན་བསམ། ། རེག་བྱ་ཐམས་ཅད་ཤེས་པར་བྱེད། ། དེ་ བཞིན་མགོ་བོའི་དབུས་བསམས་ནས། ། ནུས་པ་ཐམས་ཅད་རབ་འཕེལ་བྱེད། ། གང་དང་གང་དུ་རླུང་གནས་པ། ། རོ་མཉམ་གྱུར་པར་བྱས་པས་ནི། །
BOདེ་དང་དེ་ཉིད་ལ་འགགས་པ། ། དེ་ཉིད་སོ་སོར་རྟོགས་པར་བྱེད། ། ཞི་དང་རྒྱས་པ་ཅན་དང་དབང་། ། དེ་བཞིན་ འགུགས་དང་གསོད་པ་དང་། ། སྐྲོད་པར་བྱེད་དང་ཐམས་ཅད་ཉིད། ། སྒོམ་པ་ཁོ་ནས་རབ་སྒྲུབ་བྱེད། ། བུམ་པ་ཅན་སོགས་རབ་སྦྱོར་བས། ། ལྟ་སྟངས་བཞི་ནི་ངེས་སྦྱོར་བྱ། ། གཡོན་དུའང་ལྟ་བའི་ལྟ་སྟངས་ནི། ། བུམ་པ་ཅན་གྱིས་དབང་དུ་བྱེད། ། གཡས་ནས་དགུག་ པར་ཤེས་བྱ་སྟེ། ། གང་བ་ཅན་གྱིས་ངེས་པར་སྦྱོར། ། དཔྲལ་བར་གནས་པའི་ལྟ་སྟངས་གང་། ། རེ་ཙ་ཀ་ཡིས་གསོད་པར་བྱེད། ། སྣ་རྩེར་གནས་པའི་ལྟ་སྟངས་ནི། ། བུམ་པ་ཅན་གྱིས་རེངས་པར་བྱེད། ། གཡོ་བའི་མེ་ཏོག་བུམ་པ་ཅན། ། སྣུ་ཧཱིའི་ཤིང་ལའང་རེ་ཙ་ཀས། ། མཉམ་པར་ཟོས་ལ་རེ་ཙ་ཀས། ། གཡོ་བཅས་རྩ་ལ་བུམ་པ་ཅན། ། སྔོན་དུ་ལྟ་སྟངས་ངེས་སྦྱོར་བ། ། ཟླ་བ་དྲུག་ཏུ་བསམ་པར་བྱ། ། ཀུན་གྱི་ནུས་པ་ལྡན་པ་ནི། ། སེམས་འགོག་པ་ལས་འགྲུབ་པར་བྱེད། ། སེམས་འགོག་པ་ལས་རླུང་འགོག་སྟེ། ། འགོག་ལས་སེམས་ཀྱང་འགོག་ པར་འགྱུར། ལྟ་བས་བཅས་མཐོང་ལ་ཞེས་འབྱུང་། ཕན་ཚུན་སེམས་པར་བྱེད་པའོ། ། ཤེས་རབ་ཐབས་ཀྱི་རྡོ་རྗེ་དང་། ། པདྨ་གཅིག་ཏུ་འཕྲད་པའི་ཚ། ། འགོག་པའི་བདེ་བ་ལོངས་སྤྱད་པས། །
BOཐམས་ཅད་ཡང་དག་གྲུབ་པར་འདོད། ། ཚངས་པ་ཁྱབ་འཇུག་ལ་སོགས་ལྷ། ། སྔགས་པ་དེ་ཡི་གྲོགས་ བྱེད་དེ། ། འཇིག་རྟེན་པ་ཀུན་སླར་ཡང་ཅི། ། དེ་རྣམས་ཅི་བགྱིར་འགྱུར་བ་ཡིན། ། རྣལ་འབྱོར་རྣལ་འབྱོར་མ་རྒྱུད་དུ། ། ཐམས་ཅད་མཁྱེན་པས་གསུངས་པ་ཡང་། ། རྩོད་ལྡན་དུས་སུ་རབ་ཏུ་སྤྱོད། ། དངོས་གྲུབ་མེད་པར་མི་བལྟ་སྟེ། ། རྫོགས་ལྡན་གསུམ་ལྡན་ གཉིས་ལྡན་ལའང་། ། དངོས་གྲུབ་རབ་ཏུ་བྱུང་བ་རྣམས། ། སླར་ཡང་རྩོདཔའི་དུས་སུ་དེ། ། ལྷ་མོ་མཆོག་གྲུབ་བལྟ་བར་བྱ། ། སྦས་པ་ཀུན་མཁྱེན་སྤྱོད་ཡུལ་བ། ། དེ་དོན་ཁྱོད་ལ་ང་ཡིས་བཤད། ། གཤིན་རྗེའི་གཤེད་དཔལ་མི་ཤེས་གང་། ། དེ་ཡི་ངལ་བ་འབྲས་ བུ་མེད། ། ཅེས་སོ། ། གཤིན་རྗེའི་གཤེད་དམར་པོའི་རྒྱུད་དུ་རླུང་གི་དེ་ཉིད་ཅེས་བྱ་བའི་ལེའུ་སྟེ་བཅུ་གཉིས་པའོ། ། ། ། བཅོམ་ལྡན་གཤིན་རྗེའི་གཤེད་ཀྱི་མིང་། ། དམར་པོ་བརྗོད་པའི་མིང་ཅན་ལ། ། ཡ་ཡིག་གིས་ནི་ཅི་ཞིག་བརྗོད། ། དེ་བཞིན་མ་ཡིག་ གིས་ཀྱང་ཅི། ། སླར་ཡང་དེ་ཡི་ཨ་ཡིག་གིས། ། རི་ཡིག་གིས་ཅི་བརྗོད་པར་བྱ། ། རཀྟ་ཉིད་ནི་ཅི་ཡི་མིང་། ། མངའ་བདག་བདེན་པས་གསུང་དུ་གསོལ། ། ལེགས་སོ་ལེགས་སོ་གང་དྲིས་པ། །
BOདེ་ནི་བཤད་ཀྱིས་ཉོན་ཅིག་དང་། ། ཡ་ཡིག་གིས་ནི་རླུང་ཡང་སྟེ། ། གཤིན་ རྗེའི་གཤེད་དམར་པོར་བརྗོད་བྱ། ། དེ་ནས་ཡ་ཡིག་མཆོག་ཏུ་དགའ། ། མ་ཡིག་གཉིས་པར་བརྗོད་པར་བྱ། ། ཨཱ་རི་དགའ་བ་གསུམ་པའོ། ། རཀྟ་བཞི་པའི་མིང་ཅན་ནོ། ། ཡང་ན་རླུང་དང་ལྡན་པ་ལ། ། དེ་ཡི་ཐབས་ནི་ཨ་ཡིག་སྟེ། ། ཨི་ཡིག་རེག་པའི་དབང་པོའོ། ། རཀྟ་གཉིས་མེད་སྦྱོར་བའོ། ། ཡང་ན་རཀྟ་འདོད་ཆགས་རྒྱལ། ། རླུང་གིས་མདའ་བསྐུལ་དེར་སོན་སེམས། ། ཨཱ་རི་སྟོང་ཉིད་སྙིང་རྗེ་གཅིག ། རཀྟ་ཡ་མཱ་རི་ཞེས་བརྗོད། ། དགའ་བ་བཞི་ཡི་མིང་ལྔ་པོ། ། སྐད་ཅིག་བཞི་རུ་ཤེས་པར་བྱ། ། དེ་ནས་གཏི་མུག་ལ་སོགས་པའི། ། དོན་ནི་མངའ་བདག་ཁྱོད་གསུངས་ཤིག ། གཏི་མུག་གཤིན་རྗེ་མཐར་བྱེད་ནི། ། རྣམ་སྣང་མཛད་དོ་ཕྲ་མ་ཡི། ། གཤིན་རྗེ་མཐར་བྱེད་རིན་ཆེན་འབྱུང་། ། འདོད་ཆགས་གཤིན་རྗེ་མཐར་བྱེད་ནི། ། སྣང་མཐའ་ཕྲག་དོག་གཤིན་མཐར་བྱེད། ། དོན་གྲུབ་དབུས་སུ་མི་བསྐྱོད་ པ། ། གཤིན་རྗེ་མཐར་བྱེད་དམར་པོའོ། ། ཙརྩི་ཀཱ་སོགས་ངོ་བོ་ཅི། ། ས་ཁམས་སྤྱན་མ་ཙརྩི་ཀཱ། ། ཆུ་ཁམས་མཱ་མ་ཀཱི་ཕག་མོ། ། མེ་ཁམས་དཀར་མོ་དབྱངས་ཅན་མ། ། རླུང་ཁམས་སྒྲོལ་མ་གཽ་རཱིའོ། །
BOམཁའ་ཁམས་རྡོ་རྗེ་རོ་ལངས་མ། ། བཅོམ་ལྡན་ འདས་ལ་འཁྱུད་པའོ། ། འདོད་ཆགས་ཆེན་པོའི་རྗེས་ཆགས་ལས། ། བདེ་བ་ཆེན་པོའི་རོ་ཡིས་ནི། ། གཉིས་མེད་ངོ་བོ་དཔའ་བོ་སྟེ། ། བཅུ་དྲུག་ཆ་རྫོགས་ཟླ་བ་བཞིན། ། ཞེས་པ། གཤིན་རྗེའི་གཤེད་དམར་པོའི་རྒྱུད་དུ་མིང་མདོར་བསྟན་པའི་ལེའུ་སྟེ་བཅུ་གསུམ་ པའོ། ། ། ། རོ་ལངས་མས་ནི་དམ་འཁྱུད་ནས། ། ཚེམས་ཀྱིས་མ་མཆུ་བཙིར་བྱས་ནས། ། སེམས་ཅན་དོན་ཕྱིར་གཏོར་མ་ཆེ། ། ལྷ་མོ་དེ་ཡིས་དེ་ལ་ཞུས། ། བཅོམ་ལྡན་འདས་ཀྱིས་བཀའ་སྩལ་པ། དཔལ་གཤིན་རྗེའི་གཤེད་དམར་པོའི་ང་རྒྱལ་བྱས་ནས། སྟེང་དུ་བླ་རེ་དང་། རྔ་ཡབ་དཀར་པོ་དང་། ཕྱི་རོལ་ཏུ་གར་དང་། གླུས་ཉེ་བར་མཛེས་པར་བྱས་པ། རྒྱན་ཐམས་ཅད་ཀྱིས་བརྒྱན་པ། གཡོན་པ་དང་ཅིག་ཤོས་དྲིལ་བུ་དང་རྡོ་རྗེའི་སྒྲ་དབྱངས་ཀྱིས་ཡོངས་སུ་གང་ལ་འབར་ཞིང་གསལ་ལ་རྒྱས་པའི་སྣོད་ཀྱི་གཏོར་མ་དོར་བར་ བྱ་སྟེ་སྣོད་གཉིས་གཞག་པར་བྱའོ། ། སྣོད་གཅིག་ཏུ་གོ་ཀུ་ད་ཧ་ན་དང་། བི་ར་ཤུ་མཱ་མུ་བདུད་རྩི་ལྔ་དང་བཅས་པའི་ཤ་དང་། ཞོ་དང་། ཉ་ཤས་ཡང་དག་པར་གང་བར་བྱའོ། ། གཞན་དུ་ཁྱིམ་ལ་སོགས་པའི་ལྷ་རྣམས་གཞག་པར་བྱས་ནས།
BOཨོཾ་ཧྲཱིཿཥྚྲཱིཿབི་ཀྲྀ་ཏཱ་ནན་ཧཱུྃ་ སརྦ་བིགྷཱ་ག་ཎཱཾ་ས་པ་རི་ཝཱ་རཱ་ན་ཨཱ་ཀཪྵ་ཡ་ཛཿ། ཞེས་པའི་སྔགས་འདིས་ཤར་ཕྱོགས་ཀྱི་ཆ་པ་རྣམས་ལ་བཀའ་བསྒོ་བ་དང་། རང་ཉིད་སོང་ནས་བགེགས་ཀྱི་ཚོགས་རྣམས་ཀྱི་མགྲིན་པར་ཞགས་པས་བཅིངས་ནས། སྙིང་གར་ལྕགས་ཀྱུས་ ཕུག་སྟེ་འགུགས་བཞིན་པར་བསམ་པར་བྱའོ། ། དབང་པོ་དཀར་པོ་སྤྱན་སྟོང་པ་ཕྱག་ན་རྡོ་རྗེ་འཛིན་པས་སྲུང་དཀར་པོ་ལ་ཞོན་པའོ། ། ལྷོ་རུ་གཤིན་རྗེ་ནག་པོ་ལག་ན་དབྱུག་པ་ཅན་མ་ཧེ་ལ་ཞོན་པའོ། ། ནུབ་ཏུ་ཆུ་ལྷ་དཀར་པོ་ཆུ་སྲིན་མ་ཀ་ར་ལ་ཞོན་པ་ལག་ན་ཀུ་མུ་ད་ ཅན་ནོ། ། བྱང་གི་འདབ་མར་གནོད་སྦྱིན་སེར་པོ་མི་ལ་ཞོན་པ་ལག་ན་དཔལ་འབྲས་ཐོགས་པའོ། ། འདི་རྣམས་ཐམས་ཅད་རྒྱན་ཐམས་ཅད་ཀྱིས་བརྒྱན་པ་རིན་པོ་ཆེའི་ཅོད་པན་ཅན། གཤིན་རྗེ་ནི་ཉི་མའི་གདན་དང་ཉི་མའི་འོད་ཅན་ནོ། ། ལྷག་མ་རྣམས་ཟླ་བའི་གདན་ དང་ཟླ་བའི་འོད་ཅན་ནོ། ། དབང་ལྡན་གྱི་འདབ་མར་འབྱུང་པོའི་བདག་པོ་དཀར་པོ་མིག་གསུམ་པ་རལ་པའི་ཅོད་པན་ཅན་ཁྱུ་མཆོག་ལ་ཞོན་པ། ལག་ན་མདུང་ཐོགས་པ་སྟག་གི་པགས་པའི་གོས་འཛིན་པ་ལུས་ཐལ་བས་བྱུགས་པ། རུས་པའི་རྒྱན་ཐམས་ཅད་ཀྱིས་ བརྒྱན་པ། ཟླ་བའི་གདན་དང་ཟླ་བའི་འོད་དོ། །
BOམེའི་འདབ་མ་ལ་མེ་ལྷ་སེར་པོ་བོང་ཐུང་ཞིང་གསུས་པ་འཕྱང་བར་ལ་ཞོན་པ་བགྲང་ཕྲེང་དང་རིལ་པ་སྤྱི་བླུགས་འཛིན་པ། རལ་པའི་ཅོད་པན་ཅན་ཉི་མའི་གདན་དང་ཉི་མའི་འོད་དཔའ་བོའི་གོས་སོ། ། བདེན་བྲལ་གྱི་ འདབ་མ་ལ་སྲིན་པོ་སྐྲ་གྲོལ་བ་ཅན། ལག་ན་ཐོད་པའི་ཕྲེང་བ་འཛིན་པ། ཁྲོས་པ་སྨིན་མ་ཁྲོ་གཉེར་དང་བཅས་པ་ནག་པོ་རོའི་སྟེང་ན་ཉི་མའི་གདན་དང་ཉི་མའི་འོད་མངའ་བའོ། ། རླུང་ཕྱོགས་ཀྱི་འདབ་མ་ལ་རླུང་ལྷ་ལྗང་ཞིང་དམར་བ་ལག་ན་བ་དན་ཐོགས་པ། རིན་ པོ་ཆེའི་ཅོད་པན་ཅན། རི་དྭགས་ལ་ཞོན་པ། ཟླ་བའི་གདན་དང་ཟླ་བའི་འོད་ཅན། རྒྱན་ཐམས་ཅད་འཛིན་པའོ། ། ལྟེ་བ་ལ་སའི་ལྷ་མོ་སེར་མོ་ལྷའི་གོས་དང་རྒྱན་ཐམས་ཅད་ཀྱིས་བརྒྱན་པ། ཟླ་བའི་གདན་དང་ཟླ་བའི་འོད་ཅན། ཡི་དྭགས་དང་སའི་ལྷས་ ཀུན་ནས་བསྐོར་ཏེ་གནས་པའོ། ། དབང་པོ་ལ་སོགས་པ་རྣམས་གཡོན་ན་ཀླུའི་ཞགས་པ་འཆང་བ་ཐམས་ཅད་ཀྱང་གཡོན་བརྐྱང་བའི་ཞབས་ཀྱིས་གནས་པའོ། ། སྟེང་དུ་ཆོས་འབྱུང་ལ་གནས་པའི་པདྨ་འདབ་མ་བརྒྱད་ལ། ཤར་གྱི་འདབ་མ་ལ་ཟླ་བ་དཀར་པོ་རྟ་ ལ་ཞོན་པ། ། རིན་པོ་ཆེ་དཀར་པོའི་ཅོད་པན་ཅན་ཟླ་བའི་འོད་དོ། ། ལྷོའི་འདབ་མ་ལ་ཉི་མ་དམར་པོ་ཕྱག་གཉིས་པ་པདྨ་འཛིན་པ།
BOརྟ་ལྗང་གུ་ལ་ཞོན་པ། རིན་པོ་ཆེའི་ཅོད་པན་དང་རྒྱན་ཐམས་ཅད་དང་ལྡན་པ་འོད་སྔོ་བསངས་ཅན་ནོ། ། ནུབ་ཀྱི་འདབ་མ་ལ་ལྷག་པ་ སེར་པོ་ཁྱུ་མཆོག་ལ་ཞོན་པ། ཉི་མའི་གདན་དང་ཉི་མའི་འོད་ཅན་རྩེ་གསུམ་འཛིན་པའོ། ། རླུང་གི་འདབ་མ་ལ་སྒྲ་གཅན་དང་མཇུག་{རིངས་,རིང་}ཉི་མའི་གདན་དང་། ཉི་མའི་འོད་ཅན་ཆེར་གནག་པ་དང་དུ་བའི་མདོག་ཅན་འཁོར་བའི་འཁོར་ལོ་བཀུག་ནས་ཟ་བའི་ཚུལ་འཛིན་ པའི་སྒྲ་གཅན་དང་ཐལ་མོ་སྦྱར་བ་འཛིན་པའི་མཇུག་{རིངས་སོ,རིང་ངོ་}། ། དེའི་དབུས་ཀྱི་ལྟེ་བ་ལ་ཚངས་པ་གདོང་བཞི་པ་ལག་པ་བཞི་པ་དབྱུ་གུ་གསུམ་འཆང་བ་དང་། མི་འཇིགས་པའི་ཕྱག་ཅན་ཕྱག་ལྷག་མ་དག་གིས་བགྲང་ཕྲེང་དང་རིལ་པ་སྤྱི་བླུགས་འཆང་བ་སེར་པོ་ངང་པ་ལ་ཞོན་པ། ཟླ་བའི་གདན་དང་ཟླ་བའི་འོད་ཅན་མཆོད་ཕྱིར་ཐོགས་པ་ཅན་རལ་པ་སེར་པོ། གཟུགས་ཐུང་བ་ཚངས་པའི་བུ་ཡིས་བསྐོར་བ་སྟེ། ཚངས་རིས་ཀྱི་ལྷ་དང་། ཚངས་པ་མདུན་ན་འདོན་དང་། མཚེ་མ་དང་། དགའ་ལྡན་དང་། འཕྲུལ་དགའ་དང་། འོག་མིན་ལ་ སོགས་པའི་མིང་ཅན་རྣམས་སོ། ། འོག་གི་ཆོས་འབྱུང་གི་ཕྱོགས་ཀྱི་འདབ་མ་ལ། ནོར་རྒྱས་ཀྱི་བུ་སེར་པོ། ཀླུ་པདྨ་དཀར་པོ། ཀླུ་སྟོབས་ཀྱི་རྒྱུ་དམར་པོ། ཀླུ་འཇོག་པོ་ནག་པོ།
BOཀླུ་དུངསྐྱོང་རྣམས་མིའི་གདོང་པ་ཅན། རྒྱན་ཐམས་ཅད་འཆང་བ། མགོ་བོར་གདེངས་ ཀ་དང་བཅས་པས་མཚན་པ། ལྷ་མ་ཡིན་དང་དམྱལ་བའི་སེམས་ཅན་དང་ལྷན་ཅིག་པའོ། ། ལྟེ་བ་ལ་ལྷག་མ་ཅན་དཀར་པོ་རིན་པོ་ཆེའི་ཅོད་པན་ཅན། མིའི་གདོང་པ་ཅན་ནོ། ། འདི་ལྟར་གདེངས་ཅན་འདི་དག་བརྟན་པར་བྱས་ནས་སླང་དེ་དག་ཡོངས་སུ་གྱུར་པས་དཔལ་ གཤིན་རྗེ་མཐར་བྱེད་ཀྱི་གཟུགས་ཀྱིས་རྫོགས་པར་བྱས་ཏེ། སྐུ་གསུང་ཐུགས་ཀྱི་རབ་ཏུ་སྦྱོར་བ་ལས་སྟེང་དུ་གནས་པ་ནི་སྐུའི་རྣམ་པའོ། ། དབུས་སུ་གནས་པ་ནི་སླར་ཡང་མི་བསྐྱོད་པའི་རྣམ་པའོ། ། འོག་ཏུ་གནས་པ་ནི་གསུང་རྡོ་རྗེའི་རྣམ་པར་ བལྟ་བར་བྱའོ། ། ལས་ཐམས་ཅད་ཀྱི་དོན་དུ་སླར་ཡང་ཕྱག་དང་ཞལ་ཇི་ལྟ་བ་དེ་ལྟ་བུའི་ང་རྒྱལ་ཇི་ལྟར་རིགས་པར་བྱའོ། ། ཡང་ན་ཐམས་ཅད་དུ་བདག་ཉིད་ཀྱི་གཟུགས་ཇི་ལྟ་བ་དེ་བཞིན་ནོ། ། དེའི་རྗེས་སུ། ཨོྃ་ཨརྒྷཾ་པྲ་ཏཱིཙྪ་སྭཱ་ཧཱ། མཆེ་བའི་ཕྱག་རྒྱས་ཞབས་དག་ལ་ ཞབས་བསིལ་ཕུལ་ནས་སྔར་བརྗོད་པའི་བདུད་རྩི་མྱང་བས་གཏོར་མའི་ཀུན་སྤྱོད་བྱའོ། ། ཨོྃ་ར་ཀྟ་མུ་ཀུ་ཊཱ་ཡ། རཀྟ་ཛ་ཊཱ་ཡ། རཀྟ་མུ་ཁཱ་ཡ། ར་ཀྟ་བྷུ་ཛཱ་ཡ། ར་ཀྟ་ཤ་རཱི་རཱ་ཡ། རཀྟ་མུཎྜ་མཱ་ལཱ་བྷ་ར་ཎཱ་ཡ། ར་ཀྟ་པདྨཱ་ས་ནཱ་ཡ།
BOརགྟཱ་བྷཱ་ར་ཎ་བྷུ་ཥ་ཎཱ་ཡ། ཨི་མཾ་ བ་ལིཾ་གྲྀཧྞ་གྲྀཧྞ་ཙ་ཏུ་རྨྨཱ་རཱནྣིབཱ་ར་ཡ་ནི་བཱ་ར་ཡ། ཏྲཱ་ས་ཡ་ཏྲཱ་ས་ཡ། ཙྪིནྡ་ཙྪིནྡ། བྷིནྡ་བྷིནྡ། ནཱ་ཤ་ཡ་ནཱ་ཤ་ཡ། ཤོ་ཥ་ཡ་ཤོ་ཥ་ཡ། ཙྪེ་ད་ཙྪེ་ད། བྷེ་ད་བྷེ་ད། ཧཱུྃ་ཧཱུྃ་ཕཊ་ཕཊ་སྭཱ་ཧ། ཨོཾ་ཨིནྡཱ་ཡ་ཧྲཱིཿ། ཡ་མཱ་ཡཥྚྲིཿ། བ་རུ་ཎཱ་ཡ་བི། ཀུ་བེ་རཱ་ཡ་ཀྲྀ། ཨཱི་ ཤ་ནཱ་ཡ་ཏ། ཨནྒ་ཡེ་ཨཱ། ནཻརྀ་ཏྱཱ་ཡ་ན། བཱ་ཡ་བེ་ན། ཙནྡཱ་ཡ་ཧུྃ། ཨརྐ་ཡ་ཧཱུྃ། བྲཧྨ་ཎེ་ཕཊ། བ་སུནྡྷ་རཱ་ཡི་ཕཊ། བེ་མ་ཙི་ཏྲི་ཎེ་སྭཱ། སརྦ་བྷུ་ཏེ་བྷྱོ་ཧཱ། ཧཱ་ཧཱ་ཧཱ་ཧཱི་ཧཱི་ཧཱི་ཧཱུྃ་ཧཱུྃ་ཧཱུྃ། ཕེཾ་ཕེཾ་ཕེཾ་ཕཊ་སྭཱ་ཧཱ། ཨོྃ་མོ་ཧ་ཡ་མཱནྟ་ཀཱ་ཡ་སྭཱ་ཧཱ། ཨོྃ་པི་ཤུ་ན་ཡ་མཱནྟ་ ཀཱ་ཡ་སྭཱ་ཧཱ། ཨོྃ་རཱ་ག་ཡ་མཱནྟ་ཀཱ་ཡ་སྭཱ་ཧཱ། ཨོྃ་ཨཱིརྵྱ་ཡ་མཱནྟ་ཀཱ་ཡ་སྭཱ་ཧཱ། ཨོྃ་བཛྲ་ཙརྩི་ཀཱ་ཡེ་སྭཱ་ཧཱ། ཨོཾ་བཛྲ་བཱ་རཱཧྱི་སྭཱ་ཧཱ། ཨོྃ་བཛྲ་སྭ་ར་སྭ་ཏྱཻ་སྭཱ་ཧཱ། ཨོྃ་བཛྲ་གཽ་རྱཻ་སྭཱ་ཧཱ། ཨོྃ་བཛྲ་བེཏྟཱ་ལི་བ་ལི་པྲ་ཏཱིཙྪ་སྭཱ་ཧཱ། གཏི་མུག་རྡོ་རྗེའི་རང་བཞིན་ཁྱོད། ། གཤིན་རྗེའི་གཤེད་པོ་ཤིན་ཏུ་འཇིགས། ། སྟོན་པ་སངས་རྒྱས་ཀུན་རང་བཞིན། ། སྐུ་ཡི་རྡོ་རྗེ་ཁྱོད་ཕྱག་འཚལ། ། ཕྲ་མ་རྡོ་རྡོ་རྗེའི་རང་བཞིན་ཁྱོད།
BO། གཤིན་རྗེའི་གཤེད་པོ་ཤིན་ཏུ་འཇིགས། ། ཐུགས་ཀྱི་རྡོ་རྗེ་རབ་གསལ་བ། ། རྡོ་རྗེ་རིན་ཆེན་ཁྱོད་ཕྱག་འཚལ། ། འདོད་ཆགས་རྡོ་རྗེའི་རང་བཞིན་ཁྱོད། ། མངའ་བདག་ཆགས་པའི་ཆོས་འབྱུང་གནས། ། དབྱངས་མཆོག་ཀུན་གྱི་མཆོག་གི་མཆོག ། གསུང་གི་རྡོ་རྗེ་ཁྱོད་ཕྱག་འཚལ། ། ཕྲག་དོག་རྡོ་རྗེའི་རང་བཞིན་ཁྱོད། ། གཤིན་རྗེའི་གཤེད་པོ་ལས་ཀུན་བྱེད། ། སྐུ་ཡི་རྡོ་ རྗེ་རབ་གསལ་བ། ། ཕྱག་ན་རལ་གྲི་ཁྱོད་ཕྱག་འཚལ། ། སངས་རྒྱས་ཀུན་གྱི་རང་བཞིན་ཁྱོད། ། སངས་རྒྱས་ཐམས་ཅད་གཅིག་བསྡུས་པ། ། སངས་རྒྱས་ཀུན་རབ་མཆོག་གི་མཆོག ། དཀྱིལ་འཁོར་དབང་ཕྱུག་ཁྱོད་ཕྱག་འཚལ། ། ཧོ་བྷ་ག་ཝཱན་ཏྭེ་ནོ་པ་ཏིཥྛ་དྲྀ་ ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། སུ་པོ་ཥྱོ་མེ་བྷ་བ། ཨ་ནུ་ར་ཀྟོ་མེ་བྷ་བ། སརྦ་སིདྡྷི་མྨེ་པྲ་ཡཙྪ་སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿཀུ་རུ་ཧཱུྃ། ཧ་ཧ་ཧ་ཧ་ཧོ། བྷ་ག་བཱན། བཅོམ་ལྡན་འདས་སྐུ་བཞི་པོ་གསུང་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ། ཉོན་ ཅིག་བྷ་གར་འཇིག་རྟེན་འདས། ། སངས་རྒྱས་ཀྱི་ནི་སྐུ་བཞི་པོ། ། འཇིག་རྟེན་རྣམས་ལ་ཕན་དོན་དུ། ། ཧེ་རུ་ཀ་ངས་བསྟན་པ་ཡིན། ། བླ་མ་དམ་པའི་གདམས་པས་དམན། །
BOསངས་རྒྱས་སྐུ་ནི་རྣམ་པར་སྤངས། ། རྡོ་རྗེ་ཐེག་པས་རྣམ་དམན་པ། ། དེ་རྣམས་རྒྱུད་ འདིར་ཁ་ཕྱིར་ཕྱོགས། ། གང་གིས་ཧོ་ཡིག་མི་ཤེས་པ། ། སྲིད་པར་འདུས་པའི་རྣལ་འབྱོར་པས། ། བཤད་པའི་རྒྱུད་ཀྱི་རྗེས་འབྲངས་ནས། ། རྣལ་འབྱོར་པ་ཉིད་གཤིན་རྗེའི་གཤེད། ། དམར་པོའི་རྒྱུད་ཆེན་ཚིག་ཉུང་བ། ། མི་ཤེས་གང་དེ་ཡོངས་སུ་ངལ། ། ཅི་ ཕྱིར་དེ་ཡི་བདེ་བ་ཆེ། ། བདེ་བ་ཐམས་ཅད་ཀུན་བསྡུས་པའོ། ། པད་འདབ་དྲུག་ཅུ་རྩ་བཞི་པ། ། རྒྱུ་བཅས་ཆེད་དུ་རྣལ་འབྱོར་མའི། ། ལོངས་སྤྱོད་རྫོགས་ལས་བདེ་བ་ཐོབ། ། སྤྱོད་ཅིང་སྤྱོད་ལ་དེ་རྩེའོ། ། སྐད་ཅིག་གཅིག་མངོན་རྫོགས་བྱང་ཆུབ། ། སྲིད་གསུམ་ སྤྱོད་པས་སྤྱོད་པར་བྱེད། ། འདི་ནི་སྐུ་ནི་བཞི་བོ་སྟེ། ། སངས་རྒྱས་རྣམས་ཀྱི་འངསྤྱོད་ཡུལ་མིན། ། འཇིག་རྟེན་འདས་པའི་ཐ་སྙད་ཀྱིས། ། རྣལ་འབྱོར་དམ་པའི་རྣམ་པས་བསྟན། ། འཁོར་ལོ་བཞི་ཡི་རྣམ་པ་ཡིས། ། ཀྱེ་ཡི་རྡོ་རྗེར་བདག་གིས་བསྟན། ། སྒོམ་པའི་སྦྱོར་བ་འདུས་པ་རུ། ། རྩ་རྣམས་མཁའ་འགྲོ་མ་ཀུན་གྱིས། ། འབྲས་བུའི་སྒྲུབ་ཐབས་ཀྱེ་རྡོ་རྗེར། ། གང་དུ་རླུང་གི་སྒྲུབ་ཐབས་ནི། ། ཉིན་དང་མཚན་མོའི་རབ་དབྱེ་ལས། །
BOའདབ་མ་དྲུག་ཅུ་བཞིར་དབྱུ་གུ། ། ཞེས་པ་ འདི་དག་ཐུན་མོང་གི ། རབ་ཏུ་དབྱེ་བས་བརྗོད་པར་བྱ། ། ལྷ་ཡི་གཟུགས་ཀྱི་བདག་ཉིད་ཅན། ། སླར་ཡང་སྐུ་གསུང་ཐུགས་དབྱེ་བས། ། ཡིག་གསུམ་ཉིད་ཀྱི་མཉམ་བཞག་པའི། ། ཡིད་ཀྱིས་ཁོང་དུ་ཆུད་པར་བྱ། ། ཨོཾ་ཡིག་གིས་ནི་འཇུག་པ་དང་། ། ཨཱཿ ཡིག་གིས་ནི་དེ་བཞིན་གནས། ། ཧཱུྃ་ཡིག་གིས་ནི་དབྱུང་བ་ཡང་། ། རྣལ་འབྱོར་མན་ངག་ལས་བྱའོ། ། ཨོྃ་ཨཱཿཧཱུྃ་ཞེས་བྱ་བ་འདིས། ། གཡོ་ཞིང་གཡོ་བ་བརྟན་པར་འགྱུར། ། དེ་ལས་ས་བོན་མཚན་མའང་སླར། ། སྣ་རྩེར་མཆོག་ཏུ་བསམ་པར་བྱ། ། འོད་གསལ་བ་ཡི་རང་བཞིན་བྱ། ། དེ་བཞིན་བདག་གཞན་མཉམ་པ་ཉིད། ། བྱེད་མེད་གཟུགས་ནི་ཀུན་དམིགས་ན། ། ཡང་ཡང་སྐད་ཅིག་སྐད་ཅིག་མ། ། གཅིག་ལས་སླར་ཡང་ལྡང་ནས་ནི། ། སྔགས་པས་གྲིབ་མ་སྒྱུ་མ་ལྟའི། ། དབྱེ་བས་ཀུན་ཏུ་བསམ་ པར་བྱ། ། དག་པའི་སྐུ་འདི་ཡིས་ནི་གང་། ། ཡེ་ཤེས་བརྩོན་པས་བསྒོམ་པར་བྱ། ། དེས་ནི་སེམས་ཅན་ཐམས་ཅད་ལ། ། ཆོས་ཉིད་དུ་ནི་བྱེད་པ་སྟེ། ། ལྷ་ཡི་རྣལ་འབྱོར་འདི་ཉིད་ནི། ། བླ་མའི་མན་ངག་ལས་རྟོགས་བྱ། ། སླར་ཡང་སྔགས་པས་འཇིག་རྟེན་ དོན། ། སླར་ཡང་ཡི་གེ་བསྒོམ་པར་བྱ། །
BOལན་གྲངས་ཀུན་ཏུ་རྒྱུན་ཆགས་སུ། ། བཅིང་བྱ་ལོངས་སྤྱོད་རྫོགས་པའི་སར། ། ལག་པས་ངེས་སྦྱར་སྟེང་གི་ནི། ། ཡི་གེ་བརྟན་པའི་འཁྲུལ་འཁོར་ལས། ། རྐྱང་མ་དང་ནི་རོ་མ་ཡི། ། དབུས་སུ་གཡོ་མེད་འཇུག་པར་ གྱིས། ། སྐུ་གསུང་ཐུགས་སུ་ངེས་སྦྱར་ནས། ། ཕྱག་རྒྱ་མཆོག་ཏུ་བསམ་པར་བྱ། ། སྐད་ཅིག་དེ་ལས་ལྷན་སྐྱེས་འཆར། ། བསྒོམ་བྱ་འདིར་ནི་ཐེ་ཚོམ་མེད། ། དོན་འདི་གང་གིས་ཤེས་བྱེད་པ། ། བློ་བཟང་ཡིད་ནི་མཉམ་པར་གཞག ། ཆོས་རྣམས་ཐམས་ཅད་དེས་ཤེས་བྱེད། ། སངས་རྒྱས་ལམ་གྱི་མན་ངག་གོ ། འཇུག་ངོགས་ཆེན་པོར་དེས་བཀྲུས་ཏེ། ། དེ་བཞིན་གཤེགས་པས་མངོན་དབང་བསྐུར། ། དེ་ཡང་གང་དང་གང་འགྲོ་བ། ། དེར་ནི་སངས་རྒྱས་འོང་བར་བྱེད། ། ཀུན་ཏུ་བྱང་ ཆུབ་སེམས་དཔའ་ཉིད། ། སྣ་ཚོགས་སེམས་ཅན་ཕན་པར་བྱེད། ། ཧཱ་ཧཱའི་ཡི་གེ་སྒྲོགས་བྱེད་ཅིང་། ། ཡང་ནས་ཡང་དུ་ཅི་ཞེས་པས། ། ཕྱོགས་བཅུར་རྣམ་པར་གནས་པ་ཡི། ། བདུད་རྣམས་ཀུན་ཏུ་འབྲོས་པར་བྱེད། ། ཐལ་མོ་སྦྱར་བར་བྱས་ནས་དེའི། ། ཞབས་ལ་ཀུན་གྱིས་འདུད་པར་བྱེད། ། སྣ་ཚོགས་གཟུགས་འཆང་བུད་མེད་ནི། ། སྣ་ཚོགས་འདོད་པས་གླག་ཚོལ་ཏེ། ། ཆུ་ཤིང་ཏིལ་མཆོག་མ་ལ་སོགས། །
BOབཀུག་ནས་རྫོགས་པར་ལོངས་སྤྱོད་བྱེད། ། ཅེས་པ་གཤིན་རྗེའི་གཤེད་དམར་པོའི་རྒྱུད་དུ་རླུང་ གི་དེ་ཉིད་དེ་ལེའུ་བཅུ་བཞི་པའོ། ། ། ། དེ་ནས་རླུང་གི་རྣམ་གྲངས་ནི། ། བཅོམ་ལྡན་འདས་ཀྱིས་བསྟན་དུ་གསོལ། ། རབ་ཏུ་ཕྱེ་ནས་བཤད་ཀྱིས་ཉོན། ། རིགས་ཀྱི་དབྱུ་གུ་སོ་གཉིས་ལ། ། ཐུན་ཚོད་བཞི་རུ་འགྱུར་བ་ཡིན། ། བཅུ་དྲུག་གཉིས་ཀྱིས་ རྣམ་པར་འགྱུར། ། ཐུན་གཅིག་དབྱུ་གུ་ལྷག་པ་ལ། ། ཐུན་ཕྱེད་དབྱུ་གུ་བཞི་ཡིན་ཏེ། ། དེས་ན་རིམ་པ་བཞིན་འགྱུར་རོ། ། ཉིན་དང་མཚན་མོར་རིམ་པས་ཀྱང་། ། འཕོ་བ་བཅུ་དྲུག་རབ་ཏུ་བརྗོད། ། མེ་དང་རླུང་དང་ཆུ་དང་ནི། ། དབང་ཆེན་དཀྱིལ་འཁོར་བཞི་ པོ་ནི། ། འབབ་པས་དབྱུ་གུ་བཞིར་རབ་གྲགས། ། རླུང་ནི་བཞི་པོ་རྣམ་འཕེལ་ལས། ། འཁོར་ལོ་བཞི་རུ་རབ་ཏུ་བརྗོད། ། རྣམ་པ་སྣ་ཚོགས་ལ་སོགས་བཞི། ། སྐད་ཅིག་ཐང་ཅིག་སོགས་དབྱེ་ལས། ། རྣམ་པ་བཞི་རུ་དེ་བརྗོད་དོ། ། དེ་བཞིན་དགའ་བ་བཞི་པ་སྟེ། ། གནས་ནི་བཞིར་ཡང་རབ་ཏུ་བརྗོད། ། སྐུ་གསུམ་དེ་ལ་སྐུ་བཞི་པ། ། དེ་བཞིན་ཐམས་ཅད་བཞི་རུ་ཡང་། ། ཕྱི་སོགས་རིམ་པ་དེ་བཞིན་ནོ། ། རྣལ་འབྱོར་བཞི་དང་བཞི་པ་ནི། ། སྐུ་ནི་བཞི་རུ་ཡང་དག་བརྗོད། །
BOའདིས་ནི་དབྱུ་གུ་བཞིར་འགྱུར་ཏེ། ། རབ་ཏུ་དབྱེ་བས་དྲུག་ཅུ་བཞི། ། ཀྱེ་ཡི་རྡོ་རྗེར་བསྟན་དང་འདིར། ། དེ་བཞིན་ངེས་བསྟན་ལུས་ཀྱི་ནི། ། གཞི་ལ་འཁོར་ལོ་བཞི་ཡོད་དེ། ། དེ་ཡང་སྐུ་ནི་བཞི་པོ་ཡིན། ། དགའ་བ་བཞི་ཡིས་དགའ་བ་ཡང་། ། སྐུ་བཞི་པོར་ནི་རབ་ཏུ་བརྗོད། ། དཔལ་གཤིན་རྗེའི་གཤེད་དམར་པོའི་རྒྱུད་མདོར་ བསྟན་པ་སྟེ་ལེའུ་བཅོ་ལྔ་པའོ། ། ། ། བཅོམ་ལྡན་འདས་ཀྱིས་བཀའ་སྩལ་པ། ། སྲིད་པའི་འཁོར་ལོར་བརྗོད་བྱ་ཅི། ། ལྷ་ཡི་གསང་ལས་ཆེས་གསང་དྲིས། ། སྲིད་གསུམ་སེམས་ཅན་རྨོངས་པ་རྣམས། ། ཉམས་བྱེད་སྙིང་པོ་འདི་ཉོན་ཅིག ། འདིས་ནི་བདུད་རྣམས་ངེས་འཇོམས་ཞེས། ། རྟག་ཏུ་སངས་རྒྱས་ཉིད་སྒྲུབ་པ། ། དེ་ལྟར་རྣལ་འབྱོར་འཁོར་བར་འཁྱམ། ། འཁོར་བར་མཆོག་ཏུ་རྩེ་བར་བྱེད། ། ཆུ་ལ་པདྨའི་འདབ་མ་བཞིན། ། སྐྱོན་གྱིས་ཅི་ཡང་གོས་པ་མེད། ། བཅུ་གཉིས་རྣམ་པའི་ འཁོར་ལོ་འདི། ། བཅུ་གཉིས་དོན་ཞེས་རབ་ཏུ་གནས། ། འཁོར་ལོ་འདི་ཉིད་ཁོ་ན་ཡང་། ། ཡན་ལག་བཅུ་གཉིས་རབ་ཏུ་གྲགས། ། གང་གིས་འཁོར་ལོ་འདི་ཤེས་བྱེད། ། སངས་རྒྱས་ཀུན་གྱིས་རབ་གྲགས་པའི། ། ཆོས་རྣམས་མ་ལུས་ཤེས་བྱེད་ཅིང་། །
BOཆོས་ཀྱི་འཁོར་ལོ་རབ་བསྐོར་བྱེད། ། དེ་ཕྱིར་ཡན་ལག་བཅུ་གཉིས་པའི། ། ཆོས་ཀྱི་འཁོར་ལོ་རབ་བསྐོར་བ། ། བདག་གིས་བཤད་པར་བྱ་ཡིས་ཉོན། ། མ་རིག་པ་དང་། འདུ་བྱེད་དང་། རྣམ་པར་ཤེས་པ་དང་། མིང་དང་གཟུགས་དང་། སྐྱེ་མཆེད་དྲུག་ དང་། རེག་པ་དང་། ཚོར་བ་དང་། སྲེད་པ་དང་། ཉེ་བར་ལེན་པ་དང་། སྲིད་པ་དང་། སྐྱེ་བ་དང་། རྒ་ཤི་ཞེས་བྱ་བ་ཡན་ལག་བཅུ་གཉིས་རྣམས་སོ། ། མ་རིག་པ་ནི་སྔོན་གྱི་ཉོན་མོངས་པའོ། ། འདུ་བྱེད་ནི་སྔོན་གྱི་ལས་རྣམས་སོ། ། རྣམ་པར་ཤེས་པ་ ནི་སྔོན་གྱི་སོ་སོར་ཀུན་ཏུ་རྟོག་པའོ། ། མིང་དང་གཟུགས་ནི་ནུར་ནུར་པོ་དང་། མེར་མེར་པོ་དང་། གོར་གོར་པོ་དང་། ན་ར་ན་ར་པོ་དང་། རྐང་ལག་འགྱུས་པའི་གནས་སྐབས་ལྔའོ། ། སྐྱེ་མཆེད་དྲུག་ནི་མངལ་ནས་ངེས་པར་བྱུང་བའི་མིག་ལ་སོགས་ སོགས་པའི་དབང་པོ་དྲུག་རྫོགས་པའོ། ། རེག་པ་ནི་ཡུལ་དང་། དབང་པོ་དང་། རྣམ་པར་ཤེས་པ་གསུམ་འདུས་པ་ལས་སོ། ། ཚོར་བ་ནི་བདེ་བ་དང་། སྡུག་བསྔལ་དང་། བཏང་སྙོམས་ཀྱི་མཚན་ཉིད་ལས་དོན་རྣམ་པ་གསུམ་དུ་ དབྱེའོ། ། སྲེད་པ་ནི་འཁྲིག་པའི་འདོད་ཆགས་སོ། ། ཉེ་བར་ལེན་པ་ནི་འདོད་པའི་ཡུལ་ཡོངས་སུ་འཛིན་པའོ། །
BOསྲིད་པ་ནི་འབྱུང་འགྱུར་གྱི་སྲིད་པ་ལས་ཀྱི་འབྲས་བུའོ། ། སྐྱེ་བ་ནི་སླར་ཡང་ཕུང་པོ་ལ་ཉིང་མཚམས་སྦྱོར་བའོ། ། རྒ་ཤི་ནི་མིང་དང་གཟུགས་ ལ་སོགས་པའི་ཡན་ལག་བཞིའོ་ཞེས་སོ། ། ཡན་ལག་བཅུ་གཉིས་ཁྱད་པར་ལས། ། ཐུབ་པས་རྟེན་ཅིང་ཀུན་འབྱུང་བསྟན། ། ཇི་སྲིད་ཉོན་མོངས་ལས་དང་ནི། ། སྡུག་བསྔལ་གསུམ་དུ་དེ་རྣམས་འདུས། ། དང་པོ་བརྒྱད་པ་དགུ་ཉོན་མོངས། ། གཉིས་པ་བཅུ་པ་ལས་སུ་འགྱུར། ། ལྷག་མ་བདུན་ནི་སྡུག་བསྔལ་ཡིན། ། བཅུ་གཉིས་པོ་ནི་གསུམ་འདུས་ཕྱིར། ། ཆོས་གསུམ་པོ་ནི་བསྟན་པར་འགྱུར། ། ཟུང་དང་ཟུང་ལས་དེ་འབྱུང་སྟེ། ། བདུན་བདུན་དག་ཏུ་འབྱུང་བ་ཡིན། ། དེ་ཉིད་ཡང་ཡང་ དེ་འཁོར་ཞིང་། ། འཁོར་བས་སྲིད་པའི་འཁོར་ལོའོ། ། འགྲོ་བ་ཕན་ཚུན་རྒྱུ་དང་འབྲས། ། འགའ་ཞིག་འདིར་མེད་སེམས་ཅན་སྟོང་། ། དེ་ལྟར་སྟོང་ལས་ཆོས་རབ་འབྱུང་། ། ཆོས་ལས་འཕོ་བའང་ཡོད་མིན་ཏེ། ། ལེགས་པར་ཀློག་དང་མར་མེ་ རྒྱ། ། མེ་ལོང་སྒྲ་དང་མེ་ཤེལ་དང་། ། ས་བོན་ལས་ནི་ཕུང་པོ་འདི། ། མཚམས་སྦྱོར་པ་དང་འཕོ་བ་མེད། ། རིག་ལྡན་རྣམས་ཀྱིས་གཟུང་བྱ་བ། ། འདུལ་བ་ཡང་དག་རྟོགས་ནས་ནི། ། ཡན་ལག་བཅུ་གཉིས་ཁྱད་པར་གང་། །
BOའདི་ནི་ཐུབ་པས་མདོར་བསྟན་ བཤད། ། ཇི་ལྟར་རྟེན་ཅིང་ཡང་དག་འབྱུང་། ། དེ་རྣམས་བསྡུས་པར་ཤེས་པར་བྱ། ། སོ་སོར་ངེས་བསྟན་ཉན་པར་འདོད། ། དེ་དེ་སངས་རྒྱས་སྤྱོད་ཡུལ་ཞེས། ། སློབ་དཔོན་འདི་བརྗོད་སྙིངསྡུག་དེར། ། ཉོན་མོངས་ལས་དང་སྡུག་བསྔལ་རྣམས། ། ཞེས་པས་ཇི་སྲིད་བསྡུས་པའོ། ། དེ་ལ་གཉིས་དག་གིས་ལྷག་པའི་བཅུ་སོ་སོར་བསྟན་པ་ལ། ཡན་ལག་ཅེས་པ་འདི་དག་གི་ཆ་ཤས་ཀྱི་ཁྱད་པར་རོ། ། དཔེར་ན་ཨཾ་ག་དང་བཾ་གའི་དངོས་པོ་བཞིན་ནོ། ། ཁྱད་པར་གསུམ་ཞེས་པ་ཡན་ལག་གི་ཁྱད་པར་ཏེ། ལུས་དང་། ངག་དང་། ཡིད་ སྦྱོར་བས་ཐུབ་པ་སྟེ། ཐུབ་པ་དེས་བསྟན་ཅིང་གསུངས་པའོ། ། རབ་གྲགས་པ་ཞེས་པ་ནི་རྣམ་གྲངས་སོ། ། དེ་རྣམས་ཀྱང་གཙོ་བོ་དང་། རང་བཞིན་དང་། དབང་ཕྱུག་ཏུ་ངེས་པ་དང་། ཕྱོགས་སྐྱོང་བ་དང་། ངོ་བོ་ཉིད་ལ་སོགས་པ་མ་ཡིན་གྱི། གང་ཞིག་ཡན་ལག་བཅུ་གཉིས་ ཀྱི་ཁྱད་པར་རོ། ། དེ་ལྟ་མོད་ཀྱི་ཉོན་མོངས་པ་རྣམས་ལ། ལས་དང་སྡུག་བསྔལ་རྣམས་སུ་སྟེ། ཕན་ཚུན་བརྟེན་པ་དབྱུག་གུ་གསུམ་གྱི་ཚུལ་གྱིས་གསུམ་རྣམས་སུ་ཇི་སྲིད་དུ་འདུས་ནས་འགྲོ་སྟེ། དཔེར་ན་ཆུ་བཞིན་ནོ། ། སླར་ཡང་ཉོན་མོངས་པ་རྣམས་དང་། ལས་རྣམས་ དང་།
BOསྡུག་བསྔལ་ཏེ་དེ་རྣམས་ཇི་ལྟ་བ་བཞིན་དུ་འདི་གསུམ་བསྡུས་ནས་ཇི་ལྟར་འགྲོ་ཞེ་ན། བརྗོད་པར་བྱ་སྟེ། དང་པོ་བརྒྱད་པ་དགུ་ཉོན་མོངས། ཞེས་པ་སྟེ། ཡན་ལག་བཅུ་གཉིས་པོ་འདི་རྣམས་ཀྱི་ཁྱད་པར་གྱི་ནང་ནས། དང་པོ་མ་རིག་པ་དང་། བརྒྱད་པ་སྲེད་པ་དང་། དགུ་པ་ཉེ་བར་ལེན་པ་ཞེས་པ་གསུམ་པོ་འདི་རྣམས་རྐྱེན་ཉོན་མོངས་པ་རྣམས་སུ་རྟོགས་པར་བྱའོ། ། གཉིས་པ་བཅུ་པ་ལས་སུ་འགྱུར། ། ཞེས་པ་ཅི་ཞེ་ན། འདུ་བྱེད་ནི་གཉིས་པའོ། ། སྲིད་པ་ནི་བཅུ་པའོ། ། འདི་དག་ལས་སུ་བསྡུས་པར་རིག་པར་བྱའོ། ། ལྷག་མ་བདུན་ནི་ སྡུག་བསྔལ་ཡིན། ། ཞེས་པ། ཉོན་མོངས་པ་དང་ལས་སུ་བསྡུས་པ་འདི་རྣམས་ཀྱི་ལྷག་མ་གང་ཡིན་པའི་ཡན་ལག་གི་ཁྱད་པར་བདུན་ནི་སྡུག་བསྔལ་དུ་བསྡུས་པར་རིག་པར་བྱའོ། ། འདི་ལྟ་སྟེ། རྣམ་པར་ཤེས་པ་དང་། མིང་དང་། གཟུགས་དང་། སྐྱེ་མཆེད་དྲུག་དང་། རེག་ པ་དང་། ཚོར་བ་དང་། སྐྱེ་བ་དང་། རྒ་ཤི་ཡང་ངོ་ཞེས་པ་སྟེ། ཡང་གི་སྒྲ་རབ་ཏུ་སྦྱོར་བ་ནི་བསྡུ་བ་ཡང་དག་པར་རབ་ཏུ་སྦྱོར་བ་སྟེ། མ་རིག་པ་ལ་སོགས་པ་རྣམས་སྡུག་བསྔལ་དུ་ཡང་དག་པར་སྡུད་པར་བྱེད་དོ། ། དེ་བཞིན་ཆོས་བཅུ་གཉིས་པོ་འདི་རྣམས་ཐམས་ཅད་ནི་ཉོན་ མོངས་པ་དང་།
BOལས་དང་། སྡུག་བསྔལ་ཞེས་བྱ་བ་གསུམ་དུ་བསྡུས་ཏེ། དམན་པ་དང་ལྷག་པ་ཡོད་པ་མ་ཡིན་པར་ཤེས་པར་བྱེད་པའི་དོན་ལས་སོ། ། ནིའི་སྒྲ་ནི་རེ་ཞིག་འདི་རྣམས་མདོ་རུ་ངེས་པར་བསྟན་པ་སྟེ། འདི་ལས་གཞན་ཡོད་དོ་ཞེས་ཡོངས་སུ་བགྲངས་པ་ འདིར་མེད་པས་འདི་བརྗོད་དོ། ། འདི་རྣམས་ལས་དང་ཉོན་མོངས་པ་རྣམས་ཀྱིས་དང་། ལས་དང་། སྡུག་བསྔལ་རྣམས་ཀྱིས་ཅིའི་ཕྱིར་ཅི་ཞིག་ཏུ་འགྱུར་ཞེ་ན། བརྗོད་པར་བྱ་སྟེ། གསུམ་པོ་རྣམས་ཟུང་ངུ་འགྱུར་ཞིང་། ཟུང་ལས་བདུན་དུ་འགྱུར་རོ། ། ཉོན་མོངས་པ་ཞེས་བྱ་ བ་གསུམ་ལས་ཟུང་འབྱུང་སྟེ། ལས་ཞེས་བྱ་བ་ནི་ཟུང་ཡིན་ནོ། ། ཟུང་ལས་སྡུག་བསྔལ་ཞེས་བྱ་བ་བདུན་པོ་ཉིད་རབ་ཏུ་འབྱུང་སྟེ། སྔར་བཞིན་དུ་ངེས་པར་བསྟན་པ་ལས་བདུན་ལས་གསུམ་འབྱུང་ངོ་། ། སྡུག་བསྔལ་ཞེས་བྱ་བ་རྣམས་སུ་ཉོན་མོངས་པ་ཞེས་བྱ་བ་ གཉིས་པོ་དེ་ཉིད་ནི་རབ་ཏུ་འཁོར་བར་བྱེད་པས་སྲིད་པའི་འཁོར་ལོའོ། ། དེ་ལ་ལས་ཀྱི་གཟུགས་ཀྱིས་བསྒྲགས་པའི་སྲིད་པ་དེ་རྣམས་གསུམ་གྱི་མིང་ཅན་གྱི་འཁོར་ལོར་གྱུར་ནས་དེ་བདུན་དུ་འཇིག་རྟེན་ཡོངས་སུ་འཁོར་བར་བྱེད་དོ། ། ནིའི་སྒྲ་ནི་ངེས་པའི་དོནོ། །
BOདཔེར་ན་ཟླ་བ་ ཤར་དུ་ཡོངས་སུ་འཁོར་བར་བྱེད་པ་བཞིན། སྲིད་པའི་འཁོར་ལོའོ། ། དེ་བཞིན་དུ་རྫོགས་པར་འབྱུང་བ་ནི་མ་ཡིན་ནོ། ། དེ་ལྟ་མོད་ཀྱི་ངེས་པ་ནི་མེད་དོ། ། ཞེས་པས་ནིའི་སྒྲའོ། ། དེ་ནས་ད་ནི་ལུས་ཐམས་ཅད་ཀྱི་དབང་ཕྱུག་སེམས་ཅན་སུ་ཞིག ། སུ་ཞིག་གིས་བྱས་ཞེ་ ན་བརྗོད་པར་བྱ་སྟེ། འགྲོ་བ་ཐམས་ཅད་ཕན་ཚུན་དུ་རྒྱུ་དང་འབྲས་བུ་ཡང་འགའ་ཞིག་ཀྱང་སེམས་ཅན་འདིར་མེད་དེ། གཞན་དུ་ཉེ་བར་བཏགས་པ་ལས་སོ། ། རྒྱུས་ཀྱང་འདི་ཡོངས་སུ་བསྡུས་པ་ལ་རྒྱུར་ཉེ་བར་བཏགས་པ་ཙམ་མོ། ། དེའི་ཕྱིར་རྫས་གཞན་ལ་དོན་ལས་ སེམས་ཅན་དུ་ཡོད་དོ་ཞེས་སོ། ། དེ་ནས་ད་ནི་གནས་པའི་འཇིག་རྟེན་ལས་ཕ་རོལ་གྱི་འཇིག་རྟེན་དུ་རྗེས་སུ་འགྲོ་བ་ཅི་ཞེ་ན་བརྗོད་པར་བྱ་སྟེ། འཇིག་རྟེན་ཕ་རོལ་གྱི་དོན་ཙམ་ཡང་དངོས་པོར་འཕོ་བ་ནི་མེད་དོ། ། འོན་ཀྱང་སྟོང་པ་ཁོ་ན་ལས་སྟོང་པའི་ཆོས་རྣམས་རབ་ཏུ་འབྱུང་སྟེ། འཕོ་བ་ཡང་མེད་དོ། ། བདག་གི་བ་མེད་པའི་ཆོས་ཉོན་མོངས་དང་ལས་ཀྱི་མིང་ཅན་ལྔ་པོ་རྣམས་ལས་བདག་དང་བདག་གི་བས་སྟོང་པའི་འབྲས་བུའི་མིང་ཅན་བདུན་པོའི་ཆོས་རྣམས་རབ་ཏུ་འབྱུང་སྟེ། འཕོ་བ་ཡང་མེད་དོ། །
BOཞེས་པ་དེ་ལྟ་བུར་འཛིན་པའི་རང་བཞིན་དུ་བདག་ཏུ་གནས་པ་རྣམས་ལས་རང་བཞིན་ དང་བྲལ་བའི་སྟོང་པའི་ཆོས་བདུན་པོ་རྣམས་རབ་ཏུ་འབྱུང་སྟེ། འཕོ་བ་ཡང་མེད་དོ། ། དེའང་འདི་དག་བསྟན་པ་ཅི་ཞེ་ན། འདིར་བརྗོད་པར་བྱ་སྟེ། ལེགས་པར་ཀློག་དང་མར་མེ་རྒྱ། ། མེ་ལོང་སྒྲ་དང་མེ་ཤེལ་དང་། ། ས་བོན་ལས་འདི་ངེས་བསྟན་པ། ། ཞེས་པ་སྟེ་དེ་ཁོ་ན་ཉིད་ལས་འགྲོ་བ་མེད་པ་ཉིད་དང་། རང་ བཞིན་གྱིས་བདག་ཀྱང་མེད་དེ། ཐ་སྙད་དུ་འཇིག་རྟེན་ཕ་རོལ་ཡོད་དོ། ། ཞེས་པའོ། ། དཔེར་ན་བླ་མ་ལས་ཀློག་པར་བྱེད་པ་ནི་འཕོ་བ་ཡང་མེད་དེ། དེའི་དངོས་པོ་བླ་མ་ལས་ཀློག་པར་བྱེད་པ་མ་ཡིན་ལ། སློབ་མས་ཀློག་པར་བྱེད་པ་ཡང་མ་ཡིན་ནོ། ། སློབ་མས་ཀློག་པ་ལས་གཞན་ཡང་མ་ ཡིན་ནོ། ། དེ་བཞིན་དུ་ཀུན་ཏུ་འབྱུང་བར་བྱེད་ན་རྒྱུ་མེད་པ་ཅན་གྱི་ཉེས་པར་ཐལ་བར་འགྱུར་བའི་ཕྱིར་རོ། ། དེ་བཞིན་དུ་འཆི་བར་བྱེད་པའི་ཐ་མའི་སེམས་ནི་འཇིག་རྟེན་ཕ་རོལ་ཏུ་འགྲོ་བ་མེད་དེ། རྟག་པའི་ཉེས་པར་ཐལ་བའི་ཕྱིར་རོ། ། འཇིག་རྟེན་ཕ་རོལ་གཞན་ཁོ་ན་ལས་ འབྱུང་བ་མ་ཡིན་ཏེ། རྒྱུ་མེད་པའི་ཉེས་པར་ཐལ་བའི་ཕྱིར་རོ། །
BOདཔེར་ན་བླ་མ་ལས་ཀློག་པར་བྱེད་པའི་རྒྱུ་མཚན་ཅན་ནི་སློབ་མའི་ཀློག་པར་བྱེད་པའོ། ། དེ་ཉིད་དེ་ལས་གཞན་མ་ཡིན་པ་དེ་བཞིན་དུ་དེའོ་ཞེས་མངོན་པར་བརྗོད་པར་ནུས་སོ། ། དེ་བཞིན་དུ་དེ་འཆི་བའི་མཐར་ཐུག་པའི་ སེམས་ལ་བརྟེན་ནས་སྐྱེ་བའི་ཆ་ཤས་ཅན་གྱི་སེམས་དེ་ཉིད་གཞན་མ་ཡིན་ནོ། ། དེ་བཞིན་དེ་ཡང་མངོན་པར་བརྗོད་པར་ནུས་སོ། ། དཔེར་ན་མར་མེ་ལས་མར་མེའོ། ། རྒྱ་ལས་ཕྱིར་རྒྱའོ། ། བཞིན་ལས་མེ་ལོང་གི་གཟུགས་བརྙན་ནོ། ། སྒྲ་ལས་སྒྲ་བརྙན་ནོ། ། ཉི་མ་དང་། ནོར་བུའི་འོད་དང་། བུད་ཤིང་རྣམས་ལས་མེའོ། ། ས་བོན་ལས་མྱུ་གུའོ། ། དཔེར་ན་ཤུ་ཀའི་འབྲས་བུ་ཟོས་པའི་རྒྱུ་མཚན་གྱིས་གཞན་གྱི་ཁ་འཛག་པ་ནི་གཞན་ལ་གཞན་འཕྲད་པ་མ་ཡིན་ནོ། ། ཞེས་རབ་ཏུ་ཤེས་པར་བྱའོ། ། དེ་བཞིན་དུ་ཕུང་པོ་ལས་ཕྱིར་ཕུང་པོ་འཕོང་ པ་མེད་པ་ཡང་མཁས་པ་རྣམས་ཀྱིས་ངེས་པར་བཟུང་ངོ་། ། ཞེས་སོ། ། དེ་ལ་ཕུང་པོ་ནི་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་མིང་ཅན་རྣམས་སོ། ། འདི་རྣམས་ཀྱི་ཕུང་པོ་ཉིང་མཚམས་སྦྱོར་བ་འདི་དག་ཕུང་པོ་ལྔ་པོ་རྣམས་སུ་ ངེས་པར་བརྟག་པར་བྱ་སྟེ།
BOརྒྱུ་མེད་པ་ཅན་ཡང་མ་ཡིན་ལ་གཞན་ལས་འབྱུང་བ་ཡང་མ་ཡིན་ནོ། ། འཇིག་རྟེན་འདི་ལས་འཇིག་རྟེན་ཕ་རོལ་མ་ཡིན་ནོ། ། དེ་ནས་འདིར་ཡང་མ་ཡིན་ལ་དངོས་པོ་འཕོ་བ་མེད་དོ། ། འདི་ནི་རེ་ཞིག་འཁོར་བའི་འཁོར་ལོའི་རིམ་པའོ། ། ཡང་གི་ སྒྲས་ནི་ལྡོག་པ་ཡང་སྟེ། དེ་ལས་ཕྱིན་ཅི་ལོག་ཏུ་རྟོགས་པར་བྱའོ། ། གང་གི་ཕྱིར་རྟག་ཏུ་སྡུག་བསྔལ་སྟོང་པའི་བདག་ཉིད་ཅན་གྱི་དངོས་པོ་ཡིན་པ་དེའི་ཕྱིར། སོ་སོར་ཀུན་ཏུ་རྟོག་པའི་དངོས་པོ་ལ། ཀུན་ཏུ་རྨོངས་པར་མི་འགྱུར་རོ། ། རྨོངས་པ་མེད་པའི་ཡིད་རྟག་ཏུ་སྐྱེ་བར་མི་ བྱེད་དོ། ། སྲུང་བ་མེད་པས་ཉེས་པར་མི་འགྱུར་རོ། ། གདུག་པ་མེད་པས་རྟག་ཏུ་སྡིག་པའི་ལས་སུ་མི་འགྱུར་རོ། ། ལས་སུ་གྱུར་པའི་དངོས་པོ་ཉེ་བར་མི་ལེན་ནོ། ། ཉེ་བར་ལེན་པ་མེད་པ་དང་མངོན་པར་འདུ་བྱེད་པ་མེད་དོ། ། དངོས་པོ་དང་དངོས་པོ་མེད་པ་གདགས་པ་མེད་དོ། ། མ་སྐྱེས་པའི་ཕུང་པོ་ལ་ཡིད་རྣམས་སྡུག་བསྔལ་རྣམས་སུ་མི་འགྱུར་རོ། ། དེ་བཞིན་དུ་འདིར་རྣམ་པ་ལྔ་པོ་འདིའི་རྒྱུ་རྗེས་སུ་བྱིན་པ་ལས་འདིར་འབྲས་བུ་རྣམ་པ་བདུན་ཐོབ་ཀྱི་གཞན་མེད་པ་ལས་མི་འབྱུང་ངོ་། ། དེ་ཡང་ཐར་པ་ཞེས་བརྗོད་པར་བྱའོ། །
BOདེ་བཞིན་དུ་དད་པ་དང་། རྟག་པ་དང་། ཆད་པ་དང་། འཕོ་བ་ལ་སོགས་པའི་ལྟ་བ་ངན་པ་དང་གྱ་ནོམ་པ་རྣམས་མི་འབྱུང་ངོ་། ། བཅོམ་ལྡན་འདས་ཀྱིས་ཀྱང་འདིར་ཚིགས་སུ་བཅད་པ། རྐྱེན་ལས་འབྱུང་བ་མ་མཐོང་ཞིང་། ། དོན་ཉིད་ཀྱིས་ནི་བྱས་པ་མེད། ། ཕྲ་མོ་ལ་ཡང་རྣམ་བསྒོམས་པ། གང་གིས་འབྱུང་བར་རྣམ་པར་བརྟགས། ། འདི་ལ་བསལ་བྱ་ཅི་ཡང་མེད། ། གཞག་པར་བྱ་བ་ཅུང་ཟད་མེད། ། ཡང་དག་ཉིད་ལ་ཡང་དག་ལྟ། ། ཡང་དག་མཐོང་ན་རྣམ་པར་གྲོལ། ། རྟེན་ཅིང་འབྲེལ་པར་འབྱུང་བའི་ལེའུ་སྟེ་བཅུ་དྲུག་པའོ། ། ། ། ཁ་སྦྱོར་གྱི་ ཚུལ་གྱིས་ཀྱང་གནས་པ་ལ་འཛམྦུའི་གླིང་པའི་འཇིག་རྟེན་འཛག་པའི་བདེ་བ་ཅན་དེ་རྣམས་ལོ་བརྒྱའི་ཚེ་རྣམས་སོ། ། བཅོམ་ལྡན་འདས་བུད་མེད་མེད་པ་ལས་ཅི་ལྟར་ཁུ་བ་རེངས་པར་འགྱུར། ཁུ་བ་རེངས་པ་དང་བྲལ་བས་ཚེ་རིང་པོར་རྗེས་སུ་འགྲོ་བ་མེད་ དོ། ། ལྷ་མོ་དེའི་ཕྱིར་འོག་དང་སྟེང་དུ་རླུང་གི་རྒྱུ་བ་རྗེས་སུ་བཅིང་བར་བྱེད་པ་ལས། སྲོག་བརྟན་པར་བྱས་པ་ལ་ལུས་ལ་རྒས་པ་དང་འཆི་བ་མི་འབྱུང་ངོ་། ། དང་པོར་ལུས་དག་པར་གྱུར་ནས་ཆོས་ཀྱི་ཕྱག་རྒྱ་རབ་ཏུ་བསྒྲུབ་པར་བྱའོ། ། ཕྱིའི་དགའ་བ་ཇི་འདྲ་བ་དེ་དང་འདྲ་བར་ བསྒོམ་པར་བྱའོ། །
BOདེ་བཞིན་དུ་སླར་ཡང་རྣལ་འབྱོར་པས་ལས་ཀྱི་ཕྱག་རྒྱའི་དགའ་བ་རྩོམ་པར་བྱའོ། ། རྐང་པ་གཡོན་པས་ཚངས་པའི་སྐུད་པ་ཀུན་ཏུ་བཙིར་ནས་ཁ་སྟེང་དུ་བྱས་ནས་ཧཱ་ཡིག་རྣམ་པར་བསམ་པར་བྱའོ། ། སླར་ཡང་སཱི་ཏ་ཡིག་བྱས་ནས་ཧཱུྃ་ཡིག་སྙིང་ གར་གནས་པའོ། ། ཨཱཿཡིག་སླར་ཡང་བསྒོམ་པར་བྱའོ། ། འདབ་མ་བརྒྱད་པ་གེ་སར་དང་བཅས་པ་དེའི་དབུས་སུ་ཧྲཱིཿཡིག་འབར་བ་དེ་ལ་འོད་ཟེར་དང་བཅས་པའོ། ། དེ་ལས་འཐོན་པའི་རི་མོ་དཀར་པོ་ངེས་པར་བྱུང་བ་སླར་ཡང་འོངས་ཏེ་པདྨ་འདབ་མ་དྲུག་ཅུ་རྩ་བཞི་ པའི་དབུས་སུ་སོ་ན་པར་བསམ་པར་བྱའོ། ། སླར་ཡང་ཨཿཡིག་བསམ་པར་བྱ་སྟེ། རྣལ་འབྱོར་པས་སྲོག་གི་རླུང་སླར་ཡང་བཅིང་བར་བྱའོ། ། དེའི་ཕྱོགས་སུ་ལྷ་མོས་ཕྱེ་བའི་ཚངས་པའི་མདུད་པ་ངེས་པར་བྱུང་ནས་བྷ་ག་དང་སྙིང་གར་ཡང་ལྡན་པར་བསམ་པར་ བྱའོ། ། པདྨ་འདབ་མ་བརྒྱད་པ་དེ་ལ་ཕྱོགས་སུ་དམར་པོར་བསམ་པར་བྱའོ། ། མེའི་ཟུར་དུ་མེ་དང་དེ་བཞིན་དུ་སླར་ཡང་རླུང་དུའོ། ། དབང་ལྡན་དུ་སྔོན་པོ་ཡང་ངོ་། ། དེ་བཞིན་དུ་སྲིན་པོའི་ཐུར་དུའོ། ། དེའི་དབུས་སུ་སོན་པའི་ཧཱུྃ་ཡིག་ཁ་དོག་ནག་པོ་འོད་ཟེར་དང་ བཅས་པའོ། །
BOདེ་ལས་ངེས་པར་བྱུང་བའི་རི་མོ་སྤྱི་བོར་སོན་པ་རྣམ་པར་བསམ་པར་བྱའོ། ། འོག་དང་སྟེང་དུ་ཧཱུྃ་ཡིག་ཁ་དོག་ནག་པོ་འོད་ཟེར་དང་བཅས་པ་དེར་སོན་པར་བསམ་པར་བྱའོ། ། རི་མོ་འབར་བར་བྱེད་པ་ནི་ཡང་ནས་ཡང་དུ་དེ་བཞིན་ནོ། ། དེའི་ཚེ་ཁྱོ་གིས་བྱ་ བའི་སྒོམ་པ་བླ་མའི་མན་ངག་ལས་སོ། ། དེའི་ཚེ་གཏུམ་མོ་འབར་བས་དེ་བཞིན་གཤེགས་པ་ཐམས་ཅད་བསྲེགས་ཏེ། རི་བོ་ཅན་འཛག་པ་འོག་གི་བྷ་ག་ལ་དགའ་བ་ཆེན་པོའི་བདེ་བར་འགྱུར་རོ། ། སླར་ཡང་གཉིས་གཉིས་སྟེང་དུ་འགྲོ་བའི་དོན་དུ་སྲོག་དང་ཐུར་སེལ་འགོག་ པ་ལས་སེམས་སྟོང་པ་ལ་ངེས་པར་སྦྱར་ནས་མྱོས་པར་བྱེད་དོ། ། སླར་ཡང་སེམས་མྱོས་པར་གྱུར་པ་ཇི་སྲིད་དུ་འཁྱིལ་བ་བཅིང་བའི་སྦྱོར་བ་ལས་སོ། ། དེའི་ཚེ་བཅུད་གཡོ་བ་འབད་པས་གཡས་སུ་བསྐོར་ཏེ། སླར་ཡང་ཁེ་ཊའི་སྒྲས་ཉེ་བར་གནས་སོ། ། ཆོས་ཀྱི་ འཁོར་ལོ་ལ་ཧཱུྃ་ཡིག་གི་ནཱ་དས་སླར་ཡང་གནས་སུ་རབ་ཏུ་བཀུག་ནས་ལོངས་སྤྱོད་རྫོགས་པའི་འཁོར་ལོ་ལ་རྩ་གཉིས་རབ་ཏུ་གཡོ་བར་བྱས་ནས། སླར་ཡང་བརྟན་པར་བཅིང་བར་བྱའོ། ། གཡོན་པ་གཉིས་པོ་དེ་ཞུ་བར་གྱུར་པ་དེའི་ཚེ་འོང་བར་འགྱུར་རོ། ། དེ་ལ་ཡང་ དག་པར་སྦྱོང་བར་འགྱུར་རོ། །
BOསླར་ཡང་ཡེ་ཤེས་ཀྱི་འཁོར་ལོ་ལ་སྲུབ་པར་བྱེད་པ་དང་། འོ་བྱེད་པ་ནི་བླ་མའི་མན་ངག་ལས་སོ། ། སླར་ཡང་འཁོར་ལོ་གསུམ་པོ་རྨྱོས་པར་བྱེད་པའི་སྦྱོར་བས་སྦྱང་བར་བྱའོ། ། སྟེང་དུ་སོང་བ་དེ་ལ་བདེ་བ་ཆེན་པོ་བརྟན་པར་འགྱུར་ རོ། ། འདི་རྣམས་ལམ་གྱི་མཆོག་སྟེ་ལྷའི་གཙོ་བོ་རྣམས་ཀྱི་ཡང་སྤྱོད་ཡུལ་མ་ཡིན་ནོ། ། གང་ཞིག་ཤེས་པ་བསོད་ནམས་དང་ལྡན་པ་དང་། འཇིག་རྟེན་གསུམ་དང་བཅས་པས་མཆོད་པར་འགྱུར་རོ། ། ལོ་གཅིག་ཏུ་གོམས་པས་ཆེས་ཕྲ་བའི་ལུས་སུ་འགྱུར་ཞིང་། སྒྲ་ཆེན་པོའི་རང་བཞིན་རབ་ཏུ་སྨྲ་བ་དང་། དེ་བཞིན་དུ་སེམས་ཕྲ་བའི་རང་བཞིན་དུ་འགྱུར་རོ། ། འདོད་པས་སྒྲོལ་ཞིང་། དུས་སུ་རྒྱ་མཚོ་དང་ནམ་མཁའ་ལ་ཡང་འགྲོའོ། ། གང་འདོད་པ་དེ་བྱེད་དོ། ། བློ་བཟང་རྩེ་བར་བྱེད་ཅིང་དགའ་བར་བྱེད་དོ། ། ཞེས་གཤིན་རྗེའི་ གཤེད་དམར་པོའི་རྒྱུད་དུ་གོམས་པའི་ལེའུ་སྟེ་བཅུ་བདུན་པའོ། ། ། ། བཅོམ་ལྡན་འདས་མས་གསོལ་པ། བཅོམ་ལྡན་འདས་ཀྱེ་ལྟད་མོ་ལ་སོགས་པ་མངའ་བདག་གསུང་དུ་གསོལ། སྦྱོར་བ་སྣ་ཚོགས་མ་ལུས་ཉིད། ། དེ་བཞིན་དུས་ཀྱི་མཚན་ཉིད་དང་། ། རང་ གཟུགས་ལུས་ཀྱི་འཁྲུལ་འཁོར་ནི། ། ད་ལྟ་བཀའ་དྲིན་མཛད་དུ་གསོལ། །
BOདེ་ནས་བཅོམ་ལྡན་འདས་ཀྱིས་བཀའ་སྩལ་པ། ལྷ་མོ་ལེགས་སོ་ལེགས་པར་བྱས། ། མ་བརྗོད་པ་དེ་ངེས་བཤད་བྱ། ། ཨོྃ་ཛྭཱ་ལ་ཀ་རཱ་ལ་བ་དནེ་སརྦ་སཏྭ་ཧ་ལཱ་ ཧ་ལ་བཛྲེ་སུ་བཛྲེ་སྥ་ར་སྥ་ར་སྥ་ར་ཡ་སྥཱ་ར་ཡ་སརྦ་མེ་གྷ་བཱ་ཏ། བྲྀཥྚི་སྟམྦྷ་ཡ་སྥོ་ཊ་ཡ་སྥོ་ཊ་ཡ་གྷཿགྷཿགྷཿ། སརྦ་པཱ་ནཱི་ཡཾ་ཤོ་ཥ་ཡ་ཧཱུྃ་ཕཊ། གསང་སྔགས་འདི་དག་བཟླས་པར་བྱ་ཞིང་ཁྲོ་བོའི་ལྟ་སྟངས་ཀྱིས་ནམ་མཁའ་ལ་བལྟ་བར་བྱའོ། ། རླུང་དང་སྤྲིན་ལ་སོགས་པ་ འཇོམས་པར་བྱེད་དོ། ། ཨོྃ་ཕེཊ་ཀཱ་ར་ཕེཾ་ཧ་ཧ་ཧཱ་ཧཱ་ཕཊ་ཕཊ། ཨོཾ་ཧྲཱིཿཥྚྲཱིཿབི་ཀྲྀ་ཏཱ་ན་ན་སརྦ་ཀྲོ་དྷཱ་ན་ཀཱི་ལ་ཡ་ཀཱི་ལ་ཡ་བཛྲ་དཎྜེ་ན་ཨཱ་ཀོ་ཊ་ཡ་ཨཱ་ཀོ་ཊ་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཧྲཱིྃ་བརྗོད་ནས་ལྷའི་བདག་ཉིད་ཀྱི་རྡུལ་རྣམ་པ་བདུན་སྦྱིན་པར་བྱ་སྟེ་སྦྲུལ་འབྲོས་པར་བྱེད་དོ། ། ཨོྃ་ཡ་མཱནྟ་ཀ་ཧྲཱིཿཥྚྲཱིཿཧཱུྃ་ཧཱུྃ་ཕཊ་ཕཊ་ཏྲཱ་ས་ཡ་ཏྲཱ་ས་ཡ་ཙཎྜ་ཙཎྜ་པྲ་ཙཎྜ་པྲ་ཙཎྜ་ཧཱུྃ་ཕཊ། ཅེས་པས་མ་ཧེ་འབྲོས་པར་བྱེད་དོ། ། ཨོྃ་ཡ་མ་མརྡ་ནེ་མརྡ་ཡ་མརྡ་ཡ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། ཅེས་པ་འདིས་སྡིག་པའི་ནད་འཇོམས་སོ། ། ཨོྃ་ཀྲོ་དྷ་ནེ་སཾ་ཀྲོ་དྷ་ཡ་སཾ་ཀྲོ་ དྷ་ཡ་སྭཱ་ཧཱ།
BOཞེས་པ་གཤིན་རྗེའི་གཤེད་དམར་པོའི་རྒྱུད་ཀྱི་རྒྱལ་པོར་སྔགས་ཀྱི་ལས་རབ་འབྱམས་ཀྱི་ལེའུ་སྟེ་{བཅྭ་,བཅོ་}བརྒྱད་པའོ། ། ། ། ལྷ་མོས་གསོལ་པ། ཀྱེ་བཅོམ་ལྡན་འདས་གཏུམ་པོ་ཆེན་པོ་ཁྲོས་པ་ཞེས་བྱ་བའི་ཁྲོ་བོ་ཆེན་པོའི་དབང་ཕྱུག་དེའི་སྔགས་ ཀྱི་ལས་རབ་འབྱམས་གསུང་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། མིག་ཡོན་པོ། འཇིགས་པའི་ཡང་འཇིགས་པར་བྱེད་པ། རྒྱན་ཐམས་ཅད་ཀྱིས་བརྒྱན་པའི་དཔའ་པོ། རལ་གྲི་དང་སྡིགས་མཛུབ་འཆང་བ་གཏུམ་པོ་ཁྲོས་པ་ཆེན་པོའི་ང་རྒྱལ་དུ་ བྱས་ནས་སྔགས་བཟླས་པར་བྱའོ། ། ཨོྃ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། ཅེས་པའི་གསང་སྔགས་ཆེན་པོ་གང་གི་དཔུང་པར་སོ་ན་ཅིང་གནས་པ་དེ་བདུད་ཐམས་ཅད་ལས་ངེས་པར་རྒྱལ་བར་འགྱུར་རོ། ། ཨོཾ་ཀྲོ་དྷ་ནེ་སཾ་ཀྲོ་ཥ་ཎེ་བྷེ་ད་ནེ་ཧཱུྃ་ཕཊ། ཆུ་ལ་མངོན་པར་བསྔགས་ ནས་སྦྱིན་པར་བྱ་སྟེ་གཟེར་སེལ་བར་འགྱུར་རོ། ། ཨོཾ་སནྟྲཱས་ནེ་ཨོ་ཧཱ་ཡ་ཧཱུྃ་ཕཊ་ཅེས་པ་འདིས་སྤྱི་གཙུག་ཏུ་བཅིངས་ན་སྲུང་ངོ་། ། ཨོཾ་ཨ་ཙ་ལེ་སཉྩ་ལེ་ཆེ་གེ་མོའི་མུ་ཁཾ་ཀཱི་ལ་ཡ་ཧཱུྃ་ཕཊ། རྨྱོས་བྱེད་ལ་གཟུགས་བརྙན་བྱས་ནས་གྲོ་ག་ལ་བ་བླས་བྲིས་ནས་དེའི་ཁར་ བཅུག་སྟེ།
BOཕུར་བུས་བཏབ་ལ་ལམ་བཞི་མདོར་སྦ་བར་བྱ་སྟེ། ཕྱིར་རྒོལ་བའི་ཁ་ལ་ཕུར་བུས་གདབ་བོ། ། ། ། ཨོཾ་སརྦྦ་མཱ་ར་བྷཉྫ་ནེ་ཆེ་གེ་མོའི་པཱ་དཽ་ཀཱི་ལ་ཡ་ཧཱུྃ་ཕཊ། སྔར་བཞིན་དུ་སྙིང་གར་བཅུག་ནས་རྐང་པ་དག་ལ་ཕུར་བུས་གདབ་པར་བྱ་སྟེ། འགྲོ་བ་དང་འོང་བ་ རེངས་པར་བྱེད་དོ། ། ཨོྃ་བི་ཀྲྀ་ཏཱ་ནནེ་པར་བ་ལ་བྷཉྫ་ནེ་ཛམྦྷ་ཡ་ཛམྦྷ་ཡ། སྟམྦྷ་ཡ་སྟམྦྷ་ཡ་བཛྲ་པཱ་ཤེ་ན་ཆེ་གེ་མོ་སེ་ནྱཾ་བནྡྷ་བནྡྷ། ཨོྃ་ཧཱུྃ་ཕཊ་ཁཿཤཿཧཱ་ཧཱ་ཧཱི་ཧཱི་ཕེཾ་ཕེཾ་ཨོྃ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། སྔར་བཞིན་དུ་བཅུག་ནས་སྡེའི་བདག་པོའི་མཚོན་ཆ་ལ་ཕུར་བུས་ གདབ་པ་སྟེ། གཟུགས་བརྙན་ཁ་འོག་ཏུ་བྱས་ཏེ་སྦ་བར་བྱའོ། ། ཕ་རོལ་གྱི་སྡེ་འོང་བ་རེངས་པར་བྱེད་དོ། ། ཨོྃ་ད་ཧ་ད་ཧ། པ་ཙ་པ་ཙ། མ་ཐ་མ་ཐ། ཛྭ་ལ་ཛྭ་ལ། ཛྭཱ་ལ་ཡ་ཛྭཱ་ལ་ཡ། གྲྀཧྞ་གྲྀཧྞ་ཛྭ་ལ་ཛྭ་ལ་ཧཱུྃ་ཨོཾ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། དུར་ཁྲོད་ཀྱི་གོས་ལ་དུག་ དང་སྐེ་ཚེས་སོར་མོ་བརྒྱད་ཀྱི་ཚད་ཀྱི་ལྷས་བྱིན་མངོན་པར་བྲིས་ནས་ཕྲེང་བའི་སྔགས་ཀྱིས་བསྐོར་ཏེ་མྱོས་བྱེད་གཟུགས་བརྙན་གྱི་སྙིང་གར་བཅུག་ནས་རེའུ་མིག་ཏུ་གཞག་པར་བྱའོ། །
BOདེ་ནས་ཨོཾ་ཙཎྜ་མ་ཧཱ་རོ་ཥ་ཎ་ཆེ་གེ་མོ་ལ་ཛྭ་རེ་ཎ་གྲྀཧྞ་པ་ཡ་ཧཱུྃ་ཕཊ། ཅེས་བཟླས་ནས་ དུར་ཁྲོད་ཀྱི་མེ་ལ་གདུང་བར་བྱའོ། ། སེང་ལྡེང་དང་རྒྱ་ཤུག་གི་མེ་ལའོ། ། དགྲ་རྣམས་ལ་རིམས་བྱེད་དོ། ། ཨོྃ་ཛ་ཡ་ཛ་ཡ་པརཱ་ཛ་ཡ་ནི་རྫི་ཏ་ཡནྟྲེ་ཧཱི་ཧཱི་སྥོ་ཊ་ཡ་སྥོ་ཊ་ཡ་ཨུཙྪཱ་ད་ཡ་ཨུཙྪཱ་ད་ཡ། ཤཱི་གྷྲཾ་ཀརྨ་ཀུ་རུ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། དུར་ཁྲོད་ཀྱི་རས་ལ་བྲིས་ནས་ སྐུད་པ་སྔོན་པོས་དཀྲིས་ནས་དཔུང་པའམ། མགུལ་ལམ། མགོ་བོའམ། རྐེད་པར་འཆང་བར་བྱེད་ན་གཞན་གྱི་སྔགས་རབ་ཏུ་མི་འབྱུང་ངོ་། ། ཨོྃ་ཙཎྜ་མ་ཧཱ་སེ་ན་གྲ་ས་གྲ་ས་ཁ་ཁ་ཁཱ་ཧི་ཁཱ་ཧི། ཤོ་ཥ་ཡ་ཤོ་ཥ་ཡ། མ་ར་མ་ར་མཱ་ར་ཡ་མཱ་ར་ཡ་ཆེ་གེ་མོ་ཨོཾ་ཕཊ། དུར་ཁྲོད་ཀྱི་ རས་ལ་བྲིས་ནས་སྔར་བཞིན་དུ་གཟུགས་བརྙན་དུ་བཅུག་སྟེ་སོར་མོའི་ཚད་ཀྱི་རུས་པའི་ཕུར་པས་སམ། ལྕགས་ཀྱི་ཕུར་པས་ཕུར་བུས་བཏབ་ནས་དུར་ཁྲོད་དུ་ཁ་འོག་ཏུ་བྱས་ནས་སྦས་ན་ཉི་མ་བདུན་གྱིས་འཆི་བར་བྱེད་དོ། ། ཨོྃ་ཙཎྜ་མ་ཧཱ་རོ་ཥ་ཎ་ཆེ་གེ་མོ་ ཨུ་ཅྩཱ་ཊ་ཡ་ཧཱུྃ་ཕཊ། ནི་མ་པའི་ཤིང་བྱ་ཁྭ་ཏའི་ཚང་ན་གནས་པ་བླངས་ཏེ། དུར་ཁྲོད་ཀྱི་མེས་བསྲེག་པར་བྱའོ། ། དེའི་ཐལ་བ་ལ་བརྒྱ་རྩ་བརྒྱད་དུ་མངོན་པར་བསྔགས་ཏེ།
BOཁྱིམ་དང་། གོས་ལ་གཏོར་རོ། ། རྔ་མོ་ལ་ཞོན་པ་གཡོན་པར་བྱེད་པའི་ཞགས་པས་བཅིངས་ནས། ལྷོའི་ ཕྱོགས་སུ་དྲངས་པར་ཡིད་ཀྱིས་བསམ་པར་བྱ་སྟེ། སྐྲོད་པར་བྱེད་དོ། ། ཨོྃ་དྭེ་ཥ་དྭེ་ཥ་བཛྲེ་ཆེ་གེ་མོ་དང་ཆེ་གེ་མོ་པི་དྭེ་ཥ་ཡ་ཨོྃ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། འཐབ་བཞིན་པའི་གླང་པོ་དག་གི་རྡུལ་བཟུང་ནས་བསྒྲུབ་བྱའི་གཟུགས་བརྙན་གཉིས་བྱས་ནས་བསྣུན་པར་བྱའོ། ། ཕན་ཚུན་ སྡང་བར་བྱེད་དོ། ། ཨོྃ་ཙཎྜ་མ་ཧཱ་རོ་ཥ་ཎ་ཧྲིྃ་ཧྲིྃ་ཧྲོྃ་གྷོ་ར་རཱུ་པེ་ཎ་ཙ་ཊ་ཙ་ཊ་པྲ་ཙ་ཊ་པྲ་ཙ་ཊ། ཧ་ན་ཧ་ན་གྷ་ཏ་ཡ་གྷ་ཏ་ཡཱ་ཀཌྜྷཱ་ཀཌྜྷཱ་པྲ་སྥུ་ར་པྲ་སྥུ་ར། པྲ་སྥཱ་ར་ཡ་པྲ་སྥཱ་ར་ཡ། ཀཱི་ལ་ཡ་ཀཱི་ལ་ཡ། ཛམྦྷ་ཡ་ཛམྦྷ་ཡ། སྟམྦྷ་ཡ་སྟམྦྷ་ཡ་ཆེ་གེ་མོ་ལ་ཧཱུྃ་ཕཊ། གྲོ་ག་ལ་ཏཱ་ལའི་ སྨྱུ་གུས་རུས་སྦལ་སོར་དྲུག་པར་མཉམ་པར་བྲིས་ནས་རྐང་པ་བཞི་ལ་ཧྲཱིཾ་གི་ཡི་གེ་དང་། ཥྚྲིཾའི་ཡི་གེས་ཁའི་དབུས་སུ་སོན་པར་དཀྲིས་པར་བྲིས་ནས། དེ་ནས་སྒྲུབ་པ་པོས་དེའི་རྒྱབ་ཏུ་སྔགས་ཀྱི་ཕྲེང་བ་གཞན་གྱིས་ཀུན་ཏུ་དཀྲིས་ཏེ་མཆོད་ཅིང་། དེ་ནས་བརྩམ་པར་བྱའོ། ། སོ་ཕག་གི་སྟེང་དུ་བཞག་ནས་རུས་སྦལ་མང་པོས་འགེབས་སོ། །
BOསྲད་བུ་དམར་པོས་ཀུན་ཏུ་དཀྲིས་ནས་རྐང་པ་རབ་ཏུ་བསྡུས་ནས་མི་འདེགས་པར་བྱས་ལ། རྐང་པ་གཡོན་པས་བརྡེག་པར་བྱའོ། ། ཆེ་གེ་མོ་མེ་བས་མཱ་ན་ཡ་ལན་བདུན་གྱིས་དགྲའི་ཁ་རེངས་པར་བྱེད་དོ། ། ཨོྃ་ ཙི་ལི་ཙི་ལི། མི་ལི་མི་ལི་མཱ་ལི་ཏེ་ཧཱུྃ་ཕཊ། མིག་འཛུམས་པ་ཉམས་པར་བྱེད་དོ། ། ཨོཾ་ཙྪྲཱིཾ་ཙྪྲིཾ་ཙྪྲིུཾ་ཤོ་ཥ་ཡ་ཤོ་ཥ་ཡ། དྷ་ར་དྷ་ར། བནྡྷ་བནྡྷ། ཨོྃ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། བ་ལང་གི་རུས་པའི་ཕུར་པ་སོར་བརྒྱད་པའི་ཚད་ལ་བརྒྱ་རྩ་བརྒྱད་དུ་མངོན་པར་བསྔགས་ནས་བ་ལང་གི་ གནས་སུ་སྦས་ནའོ་མ་མི་འཛག་གོ ། ཨོྃ་བ་ལི་པཏྟཾ་པ་ཏ་ཡ་སུ་ར་པ་ཏི་མཱ་ཛྙཱ་པ་ཡ་ཏི་ཛྭཱ་ལ་ཡ་ཛྭཱ་ལ་ཡ། ཨོྃ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། གྲོག་མཁར་གྱི་སའི་རྡོ་རྗེ་ལ་བརྒྱ་རྩ་བརྒྱད་དུ་མངོན་པར་བསྔགས་ཏེ། ཚོང་པའི་ཁྱིམ་དུ་སྦ་བར་བྱ་སྟེ། ཟོང་མི་བྲི་ནོ། ། ཨོྃ་ཧྲཱིཾ་ཧྲིཾ་ཏྲཾ་པྲཾ་ཡམ་མ་ཐ་ ནེ་ཨཱ་ཀཌྜྷྱཨཱ་ཀཌྜྷྱ་ཀྵོ་བྷ་ཡ་ཀྵོ་བྷ་ཡ། སརྦ་ཀཱ་མ་པྲ་སཱ་དྷ་ནེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། གྲོ་གའི་འདབ་ལ་གུར་གུམ་དང་ཡང་དག་པར་ལྡན་པས་ལྷ་ཕྱག་གཉིས་པ་ལག་ན་ཞགས་པ་དང་ལྕགས་ཀྱུ་ཅན་འདོད་པ་དྲག་ཅིང་འཇིགས་པར་བྱེད་པ་བྲིས་ལ། གླང་པོ་ཆེའི་ཆང་དང་།
BOཟླ་མཚན་དང་། མེ་ ཏོག་གིས་སྔགས་ཀྱི་ཡི་གི་རྣམས་སྤེལ་བར་བྱའོ། ། ཨོྃ་སྤྱི་བོར་རོ། ། ཧཱུྃ་སྙིང་གར་རོ། ། ཧྲཱིཾ་ལྟེ་བར་རོ། ། ཏྲཾ་མིག་ཏུའོ། ། དེ་ལ་ཕྲེང་བའི་སྔགས་ཀྱིས་བསྐོར་ནས་ཕྱེ་མ་དམར་པོས་བགོས་ནས། སྐྱེས་པའི་ཐོད་པར་བཅུག་ནས། མར་དང་། སྦྲང་རྩི་དང་། མྱོས་བྱེད་ཀྱིས་བཀང་སྟེ་ སྲད་བུ་དམར་པོས་དཀྲིས་ནས། མགོ་བོའི་གནས་སུ་སྦ་བར་བྱའོ། ། རྐང་པ་གཡོན་པས་མནན་ནས་བཟླས་པར་བྱ་སྟེ། སྟོང་ཕྲག་ཉི་ཤུ་རྩ་ལྔས་གྲོང་གཡོ་བར་འགྱུར་རོ། ། ཨོྃ་ཨཱ་ཀཌྜྷྱ་ཨཱ་ཀདྦྷྱ་མོ་ཧ་ཡ་མོ་ཧ་ཡ་ཆེ་གེ་མོ་མེ་བ་ཤཱི་བྷ་བ་ཏུ་སྭཱ་ཧཱ། ལྟོ་བའི་སྲིན་བུ་ཕྲ་མོའི་ཕྱི་མ་ དང་། ཁུ་བ་དང་། མིང་མེད་ཀྱི་ཁྲག་དག་གིས་བ་ཌི་ཀ་བྱས་ནས་མངོན་པར་བསྔགས་ཏེ། བཟའ་བ་དང་། བཏུང་བ་ལ་སྦྱིན་པར་བྱའོ། ། གྱེན་དུ་འཁོར་བའི་འདབ་མ་དག་དང་། བུང་བའི་གཤོག་པ་དག་དང་། རྒྱལ་པོ་གཉིས་ཀྱི་སོ་དག་དང་། ཤི་བའི་ཕྲེང་བའི་ཕྱེ་མ་འདིས་རྣམ་ པར་བཏགས་པས་བརྒྱ་ལ་བའི་ལུས་ཅན་ལུས་ཅན་གྱི་རྗེས་ནས་རྗེས་སུ་རྒྱུག་གོ ། ཨོྃ་ཤྭེ་ཏེ་གྲྀ་དྷྲྀ་ཎཱི་ཁཱ་ཧི་པཉྩ་རཱུ་པཱི་ཎྱ་ཁཿཁཿཧཿ ཧཿསཿསཿཙཎྜ་མ་ཧཱ་རོ་ཥ་ཎ་སེ་ན་ཨཱ་ཛྣྭ་པ་ཡ་ཏི་སྭཱ་ཧཱ།
BOཡང་ན་ཨོྃ་སཾ་ཀཱ་རི་ཎི་ཙཾ་བཾ་ཧཱཾ་ཧཾ་ཧཱུྃ་ཧཿ། དུག་ཐམས་ཅད་འཇོམས་པར་བྱེད་དོ། ། ཨོྃ་ནཱ་ གཱ་རི་དྷཱ་མ་ནེ་ཧ་ར་ཧ་ར་ཕཊ་ཕཊ། ས་ལས་འདས་པའི་སྒོ་ལ་ཙཱི་ར་ཀ་ར་ཛའི་གོས་བཟུང་ནས་འཇུག་གོ ། ཨོྃ་ཨཱ་ནེ་ཀཱ་ཎེ་ཆེ་གེ་མོ་བ་ཤཱི་ཀུ་རུ་སྭཱ་ཧཱ། དྲི་བཟང་པོ་ཅན་གྱི་མེ་ཏོག་དཀར་པོ་སྦྱིན་པ་ལས་དབང་དུ་བྱེད་དོ། ། ན་མོ་བཱི་ཏ་རཱ་གཱ་ཡ་མཻ་ཏྲི་སིདྡྷ་ལོ་ཙི་ནི་སྭཱ་ཧཱ། ཆུ་ལ་མངོན་པར་ བསྔགས་ནས་དེས་མིག་བཀྲུས་པ་ལས་རབ་རིབ་འཇོམས་པར་བྱེད་དོ། ། ཨོྃ་ས་བ་ན་ཁ་ཁ་ཙཱུརྞུ་ཁཱ་ད་ནཱ་ཏྲ་ན་པྲ་བྷ་བ་ཏི། ཨཱ་དིཏྱར་ཐ་བེ་གེ་ན་བཱ་སུ་དེ་བ་ལེན་ཙ། ག་རུ་ཌ་བཱཀྵི་པཱ་ཏེ་བྷཱུ་མྱཱཾ་གཙྪ་བི་ཥཾ་སྭཱ་ཧཱ། སྦྲུལ་དང་། སྡིག་པ་དང་། ཀརྐ་ཊ་ལ་སོགས་ པའི་དུག་འཇོམས་པར་བྱེད་དོ། ། ཨོྃ་ཙཱ་མུཎྜེ་ཨ་ཛི་ཏེ་ཨ་པ་རཱ་ཛི་ཏེ་ཕུ་ཕུ་རཀྵ་རཀྵ་སྭཱ་ཧཱ། བོང་བ་ལ་ལན་བདུན་མངོན་པར་བསྔགས་ནས་ཕྱོགས་བཞིར་འཕང་བར་བྱའོ། ། དེ་བཞིན་དུ་གཅིག་གཞག་པར་བྱའོ། ། ཨོྃ་ཛམྦྷ་ནཱི་སྟ་མྦྷ་ནཱི་མོ་ཧ་ནཱི་སརྦ་དུཥྚ་པྲ་ཤ་མ་ནཱི་སྭཱ་ཧཱ། ཆོམ་ རྐུན་མི་འབྱུང་ངོ་། །
BOཨོྃ་ནམཤྩཎྜ་ཀྲོ་དྷཱ་ཡ་ཧུ་ལུ་ཧུ་ལུ་ཏིཥྛ་ཏིཥྛ་བནྡྷ་བནྡྷ་མོ་ཧ་ཡ་མོ་ཧ་ཡ་ཧ་ན་ཧ་ན་ཧཱུྃ་ཕཊ། མེ་ཏོག་ལ་སོགས་པ་ལ་ཡོངས་སུ་བཟླས་ཏེ། བྱིན་པ་ལས་དབང་དུ་བྱེད་དོ། ། ན་མོ་ར་ཏྣ་ཏྲ་ཡཱ་ཡ། ཨོཾ་ཊཿསུཿབིསྨ་རེ་སྭཱ་ཧཱ། ཀེ་ཏ་ཀཱིའི་འདབ་མ་ལུས་ལ་བཅངས་ ན་རིམས་ཐམས་ཅད་འཇོམས་པར་བྱེད་དོ། ། ཞེས་པ་གཤིན་རྗེའི་གཤེད་དམར་པོའི་རྒྱུད་དུ་དཔའ་བོ་གཅིག་པའི་སྒྲུབ་ཐབས་ལ་སོགས་པ་འཁྲུལ་འཁོར་དང་། སྔགས་ཀྱི་ལེའུ་སྟེ་བཅུ་དགུ་པའོ། ། ། ། བཅོམ་ལྡན་འདས་མས་གསོལ་པ། ཀྱེ་བཅོམ་ལྡན་འདས་ ལྟད་མོ་ཉན་པར་འཚལ་ལོ། ། ཤཱ་ཁོ་ཊ་ཀའི་རྩ་བ་དང་། བ་རུ་ར་འི་རྩ་བ་གཅིག་ཏུ་བྱས་ནས་ཁྱིམ་དུ་གཞག་པར་བྱ་སྟེ་རྩོད་པར་འགྱུར་རོ། ། ད་དྷུ་རའི་མེ་ཏོག་གི་དབུས་སུ་གནས་པའི་གུཎྜ་ཀ་དྲི་བཟང་པོའི་མེ་ཏོག་གི་དབུས་སུ་བཅུག་པ་བསྣོམས་པ་ཙམ་གྱིས་མགོ་ལ་གཟེར་འབྱུང་ངོ་། ། རྩ་བ་མོ་སྣར་བཅུག་པས་གྲོལ་ལོ། ། ཁྱི་མོའི་མངལ་གྱི་མལ་སྟན་དེ་ཡིས་བདུགས་ཏེ། བསྐོར་ལ་རྨ་བྱའི་མཇུག་མས་གཡས་སུ་བསྐོར་བས་རི་མོ་འཕྲོག་གོ ། གཡོན་དུ་བསྐོར་བས་ཐར་རོ། །
BOཁྭ་ཏའི་སྙིང་ཁྲག་གིས་ཤིང་ཨ་མྲའི་འདབ་མ་ལ་དེའི་འདབ་མའི་སྙུག་གུས་བྲིས་པའི་ འཁྲུལ་འཁོར་གང་གི་བཤང་བ་ལ་བཞག་པ་དེ་ཁྭ་ཏས་ཟ་བར་བྱེད་དོ། ། བྷ་གའི་རྣམ་པའི་དོང་བྱས་ནས་བུ་ད་མེད་ཀྱི་བཤང་བ་དང་། སྡིག་པ་དང་། བཏྟྲི་ཀ་དང་ལྡན་པ་བཅུག་ནས་བྱུག་པར་བྱ་སྟེ། དེའི་ཚེ་ལམ་དུ་གནོད་པར་བྱེད་དོ། ། ཤིང་སྣུ་ཧིའི་འོ་མས་བསྒོས་པའི་ཏིལ་གྱི་ ཏིལ་མར་བསྐུས་པ་ལས་མགོ་སྐྱེས་དཀར་པོར་འགྱུར་རོ། ། སྐྲ་བཞར་བ་ཡིས་ཐར་རོ། ། བྱི་ལ་མོའི་ཕྲུ་མ་དང་། མི་མོའི་ཕྲུ་མ་དག་གིས་བདུགས་པ་ལས་བརྩིགས་པའི་རི་མོ་མི་མཐོང་བར་བྱེད་དོ། ། སྦྲང་རྩིའི་བདུགས་པས་ཐར་རོ། ། རྔ་མོའི་ཐོད་པ་དང་། དབྱུག་པ་དཀར་པོ་དང་། སྐུད་པ་ལ་བབ་ལས་བསྒོས་ནས་ལག་པ་ལ་བ་སྐུས་ནས་བཀུག་པར་བྱས་ན་རི་མོ་མི་མཐོང་ངོ་། ། ལག་པ་བཀྲུས་པ་ལས་ཐར་རོ། ། བུད་མེད་ཀྱི་ཕྲུ་མའི་བདུགས་པ་ལས་རི་མོ་འགེབས་པར་བྱེད་དོ། ། གུ་གུལ་གྱིས་བདུགས་པ་ལས་ཐར་རོ། ། སྦལ་བའི་ཞུན་མར་གྱི་མིག་ སྨན་ལས་ཁྱིམ་དུ་ཡོད་པའི་སྦྲུལ་མཐོང་ངོ་། ། མར་མེ་མནལ་བའི་མེ་ལ་མུ་ཟིའི་ཕྱེ་མ་བྱིན་པ་ལས་འབར་བར་བྱེད་དོ། །
BOཤིང་སྣུ་ཧིའི་རྩ་བ་དང་བུ་རམ་ཟོས་ན་གཉིད་མེད་པར་འགྱུར་རོ། ། ཀཱ་མཱ་ཙིའི་རྩ་བ་གཙུག་ཏོར་དུ་བཅིང་བར་བྱ་སྟེ་གཉིད་མེད་པར་འགྱུར་རོ། ། ཀླུ་འདུལ་བར་ བྱེད་པ་དང་ཀ་དྲོ་ཎིའི་མེ་ཏོག་གི་རྩ་བ་དང་། ཡུང་བ་དང་། འབྲས་ཐུག་པོ་ཆེ་བཏགས་ནས་དྲིལ་ཕྱིས་བྱས་པ་ལ་ས་ཆུ་ཡོངས་སུ་ཟད་པ་ལས་རྒྱལ་ལོ། ། ཤིང་ཤཱ་ལ་མ་ལིའི་རྩ་བ་ལ་མཚལ་དང་ལྡན་པ་ཟོས་པ་ལས་མེ་ཏོག་ལྟུང་བར་བྱེད་དོ། ། ཀཱ་ཀུཥྛ་དང་། མཱ་དིར་སྦྱིན་པར་བྱ་བ་འམ། ཡང་ན་ཏཱམྦཱུ་ལ་ཡིས་རྡུལ་དང་བྲལ་བར་འགྱུར་རོ། ། ཤིང་སྣུ་ཧིའི་ལོ་མ་དང་། མརྐ་ཊའི་ས་བོན་དང་། ཤིང་སྲིན་གྱི་ཕྱེ་མ་བུ་རམ་དང་ལྷན་ཅིག་ཟོས་པ་ལས་ཁྲག་ལྟུང་ངོ་། ། ཏེའུ་ལོའི་ཕྱེ་མས་རྟའི་སྣ་ལ་བཀུས་ན་ཟས་མི་བྱེད་དོ། ། ཙནྡན་གྱིས་བཀྲུས་པ་ལས་ཐར་རོ། ། ཤིང་ཀེ་ཏ་ཀཱིའི་ རྩ་བ་མགོ་ལ་བཅིང་བར་བྱ། ཤིང་འབྲ་གོའི་རྩ་བ་ལག་པ་ལ། ཏཱམྦཱུལའི་རྩ་བ་ཁ་རུའོ། ། སྐར་མ་རྒྱལ་ལ་གདོན་པར་བྱའོ། ། བྱང་ཕྱོགས་སུ་བལྟས་ཏེ་གཅེར་བུ་སྐྲ་གྲོལ་བར་གྱུར་ནས་གསུམ་པོ་རྣམས་ཅུང་ཟད་བཏགས་ནས་བཏུང་བར་བྱ་སྟེ། མཚོན་ཆས་འཇོམས་པར་ མི་འགྱུར་རོ། ། ཤོ་ནཱ་ཀཱ་དང་།
BOབཱི་ཛ་བཱུ་ར་ཀ་རྐང་པའི་ཚད་གཉིས་པོ་ཤ་བའི་པགས་པའི་ཁུད་དུ་མཉེས་ཏེ། ཨོ་ཥ་ཎཱི་ཟོས་ནས་ལྕེའི་མཐིལ་དུ་བཞག་པ་ལས། འབྲས་བུ་གདུང་བར་འགྱུར་ཞིང་སྐྱེ་བར་མི་བྱེད་དོ། ། ཞེས་གཤིན་རྗེའི་གཤེད་དམར་པོའི་རྒྱུད་དུ་ཐུན་མོང་གི་ སྨན་གྱི་ལེའུ་སྟེ་ཉི་ཤུ་པའོ། ། ། ། ཀྱེ་བཅོམ་ལྡན་འདས་སེམས་ཅན་རྣམས་དུས་བྱེད་པ་ངེས་པར་བྱེད་པའི་མཚན་མ་རྣམས་བཅོམ་ལྡན་འདས་ཀྱིས་བསྟན་དུ་གསོལ། རྐང་པ་དང་རྐན་ལ་ཕུག་ནས་མིག་ཏུ་ཟུག་པ་ལས་ཟླ་བ་གསུམ་ གྱིས་གྲུབ་བོ། ། རྣ་བར་ཕུག་པས་ཟླ་བ་བཞེས་སོ། ། མཛོད་སྤུར་ཟུག་པ་ལས་ཉི་མ་གཅིག་གིས་སོ། ། རྐང་པ་དང་རྐན་ལ་ཕུག་ནས་ལྟེ་བར་ཟུག་པ་ལས་ཟླ་བ་གསུམ་གྱིས་འཆིའོ། ། རྐང་པ་དང་རྐན་ལ་ཕུག་ནས་སྣ་ལ་ཟུག་པ་ལས་ཟླ་བ་གསུམ་གྱིས་སོ། ། བཤང་ བ་རབ་ཏུ་འཛག་པའི་དུས་མཚུངས་པར་སྦྲིད་པ་བྱུང་ན་ལོ་གཅིག་གིས་སོ། ། ཆགས་པ་སྤྱོད་པའི་དབུས་སམ། མཐར་སྦྲིད་པ་བྱུང་བས་དེ་དང་འདྲ་འོ། ། མཐེའུ་ཆུང་ཐམས་ཅད་དུ་ཟུག་པ་ལས་ཟླ་བས་སོ། ། སྙིང་དང་། མགྲིན་པར་ཟུག་པ་ལས་ཕྱོགས་གསུམ་ གྱིས་སོ། ། མཚུངས་པར་རྐན་ལ་གསུམ་ཟུག་པ་ལས་ཉི་མ་གསུམ་གྱིས་སོ། །
BOརྐང་པའི་མཐེ་བོང་ནས་བརྩམས་ནས་ལྟེ་བའི་མཐར་ཐུག་པར་ཟུག་པ་ལས་ཟླ་བ་དྲུག་གིས་སོ། ། སྣའི་རྩེ་མོའི་ཤ་ལྷོད་པར་གྱུར་ན་མཚན་མོ་བདུན་གྱིས་སོ། ། ཆགས་པ་སྤྱོད་ པའི་དུས་སུ་རྣ་བདག་གི་དྲིལ་བུའི་སྒྲ་ལས་ཟླ་བ་གསུམ་གྱིས་སོ། ། རྣ་བའི་རྩ་བ་དང་། སྨིན་མའི་དབུས་དང་། མགོ་བོའི་རྩེ་མོ་རྣམས་སུ་སོ་སོ་སོ་སོར་ཟུག་པ་ལས་ཉི་མ་གཅིག་གིས་སོ། ། སེན་མོ་ལ་དམར་བ་མི་མཐོང་བ་ལས་ཟླ་བ་དྲུག་གིས་སོ། ། སོ་བསྐམས་པ་ ལས་ཟླ་བ་དྲུག་གིས་སོ། ། འགོག་མེད་མ་མ་མཐོང་ན་ཟླ་བ་དྲུག་གིས་སོ། ། ལྟེ་བ་ཕྱིན་ཅི་ལོག་པ་ལས་སོ། ། བུ་ག་ཐམས་ཅད་མཐོང་བ་ལས་ཕྱོགས་གསུམ་གྱིས་སོ། ། ཧ་འདེབས་པ་གྲང་བར་ཚོར་ན་ཞག་བདུན་གྱིས་སོ། ། མིང་མེད་ཀྱི་རྩ་བར་རི་མོ་ནག་པོ་ མཐོང་བ་ལས་ཉི་མ་{བཅྭ་,བཅོ་}བརྒྱད་ནའོ། ། ཡན་ལག་ཐམས་ཅད་བསིལ་བར་མཐོང་བ་ལས་ཉི་མ་བཅུ་ཡིས་སོ། ། ཁྲུས་བྱས་པ་བྱས་མ་ཐག་བསྐམས་པ་ན་ཟླ་བ་གཉིས་ནའོ། ། ལུས་དྲི་ངན་པ་ལས་མཚན་མོ་གསུམ་གྱིས་སོ། ། གཅིན་གཡོན་དུ་འཁོར་བ་ལས་ཟླ་བ་ དྲུག་གིས་སོ། ། ལུས་དང་མིག་རེངས་ན་ཉི་མ་གཅིག་གིས་སོ། ། སྣའི་རྩེ་མོ་མ་མཐོང་བ་ལས་ཟླ་བ་ཕྱེད་ཀྱིས་སོ། །
BOའདི་དག་དེ་བཞིན་རྣལ་འབྱོར་པས། ། ཤེས་ནས་བསམ་གཏན་སྒོམ་ལ་འབད། ། རྣལ་འབྱོར་པས་ནི་ཀློག་པ་དང་། ། སྔགས་བཟླས་པ་ལ་ བརྩོན་པར་བྱ། ། སྲུང་བ་ལྔ་སོགས་བཀླག་པ་ཡང་། ། རང་ངམ་གཞན་གྱིས་བྱ་བའོ། ། ཉིན་རེར་ཚོགས་ལ་ཟས་དང་ནི། ། དགེ་འདུན་ཟས་དང་དེ་བཞིན་གཞན། ། དམན་དང་ཞན་ལ་རྗེས་བརྩེ་བས། ། སེམས་ཅན་རྣམས་ལ་རྟག་ཏུ་བྱ། ། ཞེས་པ་སྣ་ཚོགས་རྒྱུད་དུ་གསུངས། ། ཞེས་སོ། ། དེ་ནས་བཅོམ་ལྡན་འདས་མ་ཡིས། ། བཅོམ་ལྡན་འདས་ལ་དམ་པོ་ཡིས། ། འཁྱུད་ནས་པདྨས་རྡོ་རྗེ་ནི། ། རྒྱས་པར་བྱས་ནས་རབ་གསོལ་བ། ། རྫོགས་པའི་རིམ་པའི་རྣལ་འབྱོར་ལ། ། སྒོམ་པ་ཇི་ལྟ་བུ་ཞིག་འགྱུར། ། རྣལ་འབྱོར་པ་རྣམས་ཕན་དོན་དུ། ། ཞུས་པ་འབྲས་བུར་བཅས་པར་མཛོད། ། བཀའ་སྩལ་པ། རྫོགས་པའི་རིམ་པའི་རྣལ་འབྱོར་གང་། ། རྣལ་འབྱོར་བརྩོན་པའི་རྣལ་འབྱོར་པ། ། ཉིན་མཚན་མཉམ་པའི་ཚུལ་དུ་ནི། ། སེམས་གཅིག་གིས་ནི་བསྒོམ་པར་བྱ། ། རེ་ཞིག་རང་གི་བུད་མེད་བསམ། ། སྲིད་ པའི་ངོ་བོས་ངེས་པར་རྒྱས། ། ཤིན་ཏུ་བརྟན་ཞིང་མངོན་སྦྱོར་བས། ། ཇི་བཞིན་ཁོ་ནར་གསལ་བར་འགྲོ། ། དེ་ནས་མ་དང་བུ་མོའམ། ། རྣལ་འབྱོར་མ་དང་ཚ་མོ་དང་། །
BOགཞན་ཡང་ཉེ་དུ་མོ་རྣམས་ཀུན། ། གཏུམ་མོ་དེ་བཞིན་བྲམ་ཟེ་མོ། ། དེ་སོགས་མི་མོའི་ཚོགས་པ་ ཀུན། ། ཆོ་ག་བཟང་པོས་བསྙེན་པར་བྱ། ། ཇི་ལྟར་དབྱེ་བ་མི་ཤེས་པ། ། དབྱེ་བས་རྗེ་བཙུན་ཆོག་ཤེས་པ། ། སྒྲུབ་པོ་མནར་མེད་འཁྲིད་པར་བྱེད། ། འཇིག་རྟེན་འདིར་ནི་འགལ་བ་ཉིད། ། འཇིག་རྟེན་ཕ་རོལ་བདེན་པ་བཅོམ། ། དེ་ཕྱིར་ཀུན་ཏུ་རབ་འབད་པས། ། བློ་ བཟང་ལེགས་སྦས་ཡང་དག་བརྩམ། ། མཁའ་འགྲོ་མ་སྔགས་བཞིན་སྦས་ནས། ། ཇི་ལྟར་སངས་རྒྱས་ཀྱིས་གསུངས་པའི། ། ཡིད་དང་རྗེས་མཐུན་ཕྱོགས་སུ་ནི། ། ཉེ་བར་འཚེ་བ་ཀུན་སྤངས་ཏེ། ། རང་སེམས་དགའ་བའི་འདོད་པ་མོ། ། རབ་དང་དེ་དག་ཡང་དག་ བླངས། ། དབེན་ཞིང་དུབ་པ་མེད་བྱས་ནས། ། ཇི་ལྟར་རྙེད་པའི་དངོས་པོ་ནི། ། གཉིས་ཀྱིས་བརྟན་པ་བསྒོམ་པར་བྱ། ། བློ་བཟང་ཕན་ཚུན་སྦྱོར་བ་ལས། ། བུད་མེད་རང་ལ་མངོན་ཕྱོགས་བྱས། ། ཞུགས་ནས་གཉིས་དག་ཕན་ཚུན་དུ། ། ཆགས་པས་བརྟན་པོར་བལྟ་བར་བྱ། ། དེ་ནས་བཞིན་ལ་བལྟ་བསམས་ནས། ། རྩེ་གཅིག་ཡིད་ཀྱིས་གནས་པར་བྱ། ། དེ་བཞིན་བདེ་བ་སྦར་བྱེད་པའི། ། ཚིག་ནི་དེ་ཉིད་ལ་བརྗོད་བྱ། ། དེ་ཡི་བུ་དང་ཁྱིམ་ཐབ་ཁྱོད། ། བདག་གིསྤུན་དང་མེས་པོའོ། །
BOཁྱོད་ངའི་མ་དང་ཆུང་མ་སྟེ། ། རྣལ་འབྱོར་མ་དང་ཚ་མོའོ། ། སྐྱེས་བུ་བདུན་གྱི་འབངས་པ་ཡིན། ། ཁྱོད་ཞལ་ཉིད་ཀྱི་འབངས་དང་བྲན། ། བདེ་བ་སྦར་བར་བྱེད་པའི་མཆོག ། དེ་འདྲའི་ཚིག་ནི་བརྗོད་པར་བྱ། ། ཁྱོད་ངའི་ཕ་མ་ཆུང་མ་དང་། ། རྣལ་འབྱོར་མ་དང་ཚ་མོ་སྟེ། ། ང་ནི་ཁྱོད་ཀྱི་དུས་ཀུན་འབངས། ། ནུས་པ་རྣོན་པོར་ཤིན་ཏུ་ཆགས། ། བརྩེ་བའི་མ་ཡིས་བདག་ལ་གཟིགས། ། མཛའ་བའི་ལྟ་བས་ངེས་བལྟས་ནས། ། དེར་བ་དག་སྐྱེས་བུ་ལ་འཁྱུད་དེ། ། ཡང་དང་ཡང་དུ་འོ་བྱས་ ནས། ། ཡི་གེ་གསུམ་ནི་སྟེར་བར་བྱེད། ། དེ་ནས་དེ་ལ་བརྟན་བལྟས་ནས། ། དེ་མཆུ་སོ་ཡིས་བཙིར་བྱས་ཏེ། ། རྣལ་འབྱོར་པ་ཤཱི་ཏ་སྒྲོགས་བྱེད་ཅིང་། ། དེ་ལའངསྟ་ཟུར་དུ་བྱ་བ་ས། ། རང་བདེ་འབྱུང་བ་བཅིང་བར་བྱ། ། ས་མ་ དམྦྷ་ཀ་ཉིད་ཀྱང་། ། བཅིངས་པ་འངས་ཚོགས་མིང་ཅན་ནོ། ། བུང་བའི་དྲ་བ་བཅིངས་པ་ཡང་། ། རྐང་པ་སྟེང་ནས་འཛེག་འཁྲུལ་འཁོར། ། དེ་བཞིན་ཁོ་ནར་རུས་སྦལ་གྱི། ། བཅིངས་པ་འང་ཀུན་ཏུ་བཟང་པོ་ཉིད། ། དེ་ལ་སྐྱིལ་ཀྲུང་ དབུས་སུ་ནི། ། ལྔ་གསུམ་ཙོག་པུའི་གདན་དུ་ནི། ། བྱས་ནས་དཔུང་ཟུང་ཕྲག་པར་རོ། ། རྡོ་རྗེར་ཁྲག་ནི་མཉམ་པར་ཏེ། །
BOཔདྨས་སྦྲང་རྩི་འཇིབས་པར་བྱ། ། དེ་མཐོང་ནས་ནི་མིག་གཡོ་ཞིང་། ། གདོང་ཡང་དྲི་ཡིས་བྱུགས་བྱས་ནས། ། དེ་ནས་ ནུ་མར་བཙིར་བར་བྱ། ། བརྟན་པར་ཕྱོགས་ནས་དེ་ཡི་ཁར། ། རེག་ནས་ཁ་རུ་སྦྱིན་པར་བྱེད། ། སྐྱོད་ཅིག་ཅེས་ཀྱང་སྨྲ་བར་བྱ། ། དེ་ཡིས་འདི་འདྲར་བརྗོད་པར་བྱ། ། བདག་གི་བཟའ་བ་རྣམ་སྣང་མཛད། ། བྱས་པ་ཤེས་པར་འགྱུར་བ་ཉིད། ། རྡོ་རྗེ་ སྐྱེས་བདེ་བདག་ལ་སྩོལ། ། འདམ་སྐྱེས་འདབ་མ་གསུམ་པ་ནི། ། གེ་སར་སྦྲང་རྩིས་བརྒྱན་པ་ལྟོས། ། ཨེ་མ་བདེ་བ་ལྡན་པའི་ཞིང་། ། ཆགས་པ་སངས་རྒྱས་ཉེ་བར་མཛེས། ། ཆགས་ཅན་རྣམས་ཀྱི་བདེ་སྟེར་ཞི། ། རྟོག་པ་ཐམས་ཅད་རྣམ་ པར་སྤངས། ། ཡིད་ནི་འདོད་ཆགས་ཀྱིས་དཀྲུགས་པས། ། བུད་མེད་གན་རྐྱལ་བསྒྱེལ་ནས་ནི། ། ཕྲག་པར་རྐང་པ་ཟུང་བྱིན་ནས། ། འོག་དང་སྟེང་དུ་ངེས་བརྟགས་ནས། ། དེ་ཡི་པདྨ་རྒྱས་པ་ཡི། ། པདྨའི་བུ་གར་འཇུག་པར་བྱེད། ། པདྨའི་འདབ་ མར་ཤའི་སྙིང་པོ། ། ལྡན་པར་རྡོ་རྗེ་དེ་བཅུག་ནས། ། ཇི་ལྟར་བདག་གིས་བྱེ་བ་ནི། ། ཉིས་སྟོང་འབུམ་དང་དུང་ཕྱུར་བར། ། དབུས་སུ་སེམས་ལ་རབ་མཆོད་བྱ། ། བདག་ལ་རླུང་པད་སྙིང་པོ་ལས། ། སྙིང་པོ་བླ་མེད་རྡོ་རྗེའི་རྩེར། །
BOརཀྟ་བན་དྷུ་ཀ་མཚུངས་ པ། ། རྫོགས་པའི་སངས་རྒྱས་རྗོད་པར་བྱེད། ། བློ་ལྡན་རྩེ་གཅིག་སེམས་ཀྱིས་དེར། ། ཡང་ནས་ཡང་དུ་བསམ་གཏན་བྱ། ། གཡོ་མེད་བརྟན་པའི་སེམས་ཀྱིས་ནི། ། འཁོར་ལོའི་བདེ་བ་ཉིད་བསྒོམ་བྱ། ། དེ་ལས་སོ་སོར་མཆོག་བྱིན་ནས། ། དགའ་ བའི་སྐད་ཅིག་ཉིས་འགྱུར་ཉིད། ། ཇི་སྲིད་རབ་བརྗོད་འདི་ལྟ་བུའི། ། གཟུགས་སུ་སྐད་ཅིག་ཙམ་བསམ་བྱ། ། བུད་མེད་རི་མོ་བསྐྱེད་མ་ཡང་། ། འགྲོ་གསུམ་རྣམས་ཀྱི་བདེ་བ་གཅིག ། སྦྱིན་མ་ཞི་མ་འདིར་སྡང་བས། ། ཚིག་རྩུབ་པ་ཡི་སྡིག་པའི་ལས། ། ཡང་དག་གནས་ཤིང་ཟད་མ་ཡིན། ། དེ་ཉིད་ཀྱིས་དེ་གཏིང་དཔག་པར། ། དཀའ་བའི་དམྱལ་བ་ངུ་འབོད་དུ། ། རྟག་ཏུ་སྡུག་བསྔལ་འོ་དོད་འབོད། ། མང་པོར་ལུས་ནི་སྲེག་བྱེད་ཅིང་། ། བསྐལ་པ་གསུམ་དུ་གནས་པར་འགྱུར། ། བུད་མེད་ཡོན་ཏན་བརྗོད་ཅི་དགོས། ། སྙིང་རྗེས་ཉིན་མོར་བྱེད་པ་ལས། ། སེམས་ཅན་ཀུན་ལ་ཡོངས་སུ་འཛིན། ། བུད་མེད་སེམས་ཀྱིས་སོ་སོར་གནས། ། ནུབ་པར་གྱུར་ནས་སྐྱེ་བོ་བཟང་། ། འཁོར་བཅས་ཟས་ཀྱིས་རྣམ་པར་གསོ། ། གལ་ཏེ་དེ་ལྟའི་གཟུགས་ གཞན་མིན། ། རྡོ་རྗེ་རྣལ་འབྱོར་མ་དཔལ་ལོ། ། ས་དང་ས་ལ་རིང་མོ་ནས། །
BOདེ་ཡི་ནུབ་དང་མཐོང་བ་ནི། ། གང་གིས་དྲན་པར་བྱེད་ཙམ་གྱིས། ། སྐད་ཅིག་དེ་ལས་བདེ་བ་མྱོང་། ། ཕྱོགས་གཅིག་ཡུལ་ལ་བུད་མེད་རྣམས། ། ལྷ་རྫས་གཟུགས་ཀྱིས་ ཡང་དག་གནས། ། ཕྱག་རྒྱ་དེ་ལ་ཕན་བྱས་ནས། ། མི་རྣམས་བདེ་ལ་གནས་པར་བྱེད། ། དེ་ཕྱིར་སྐྱོན་ལས་རྣམ་པར་གྲོལ། ། ཡོན་ཏན་དམ་པ་ཀུན་ལ་མཁས། ། བསོད་ནམས་བསོད་ནམས་བསོད་ནམས་ཆེ། ། བདག་གི་འདོད་ལ་བཀའ་དྲིན་གྱུར། ། གཤིན་རྗེའི་གཤེད་དམར་པོའི་རྒྱུད་དུ་ལེའུ་ཉི་ཤུ་གཅིག་པའོ། ། ། ། ཀྱེ་བཅོམ་ལྡན་འདས། མུ་སྟེགས་བྱེད་པ་རྣམས་ཐམས་ཅད་དུ་སྙིང་བརྩེ་བ་མེད་པར་འདོད་པའི་དོན་ལྷུར་ལེན་པ་དང་། གང་ཞིག་ངག་གདུག་པས་ཐམས་ཅད་དུ་གསོད་པ་ལྷུར་ལེན་པ་དེ་ རྣམས་ཀྱི་བསམ་པ་ལ་ཐུགས་བརྩེ་བར་གྱུར་པས་དེ་དག་མངའ་བདག་གིས་བདག་ལ་གསུང་དུ་གསོལ། ། དང་པོར་གསོ་སྦྱོང་སྦྱིན་པར་བྱ། ། ཕྱི་ནས་བསླབ་པའི་གནས་ལྔ་སྦྱིན། ། བྱེ་བྲག་སྨྲ་བ་འབད་པས་བསླབ། ། མདོ་སྡེ་པ་ཡང་དེ་བཞིན་ནོ། ། དགེ་བ་ བཅུ་ལ་གོམས་གྱུར་ཅིང་། ། བླ་མ་ལ་གུས་འདུལ་ལ་མོས། ། དབུ་མའང་སློབ་ཏུ་བཅུག་ནས་ནི། ། སྔགས་འདི་ཀུན་ཏུ་བརྩམ་པར་བྱ། ། གསང་ལས་ཤིན་ཏུ་གསང་བའི་རྒྱུད། །
BOམྱུར་དུ་ཕུན་སུམ་ཚོགས་པའི་རྒྱུ། ། ཆོ་གའི་སྦྱོར་བ་འདིས་མྱུར་དུ། ། བསླབ་ པ་ཐོས་ནས་སྤྱོད་ཡུལ་བཟང་། ། བདུད་བཞི་རྣམ་སྤངས་རྣལ་འབྱོར་པས། ། ལྷ་ཡི་སྦྱོར་བས་གནས་པར་བྱ། ། སྟྭ་རེས་གཅོད་པ་དང་ཐོད་ལེ་ཀོར་བྱས་ནས་ཉི་མ་གཟས་ཟིན་པའི་དུས་སུ་མི་བསྐྱོད་པས་གཏོར་ཏེ། དེ་ནས་རྐང་པ་གཉིས་ཀྱིས་མནན་ནས་སྔགས་བཟླས་པར་བྱའོ། ། གསང་སྔགས་འབུམ་ཕྲག་གཅིག་བཟླས་ནས་ཐིག་ལེ་བྱའོ། ། སྟོབས་མཚུངས་པར་འགྲོ་སྟེ་དེ་གསལ་བར་བྱེད་དོ། ། བདག་གི་ལྟེ་བར་བསྒོམ་པའི་མན་ངག་གོ ། གང་གང་སྐད་ཅིག་ལས་བརྩམས་ཏེ། ། དེ་དོན་ཉི་མས་བསྒྲུབ་པར་བྱ། ། ཉི་མ་ལྔ་ཡི་མཐར་ཐུག་བྱ། ། བདག་གིས་ལོག་སྨྲའི་འཇིག་རྟེན་ལ། ། ལེགས་སྦས་རབ་ཏུ་གསལ་བ་ནི། ། དེ་ཉིད་འདུས་པའི་རྣལ་འབྱོར་མཆོག ། རྣལ་འབྱོར་མ་ཀུན་དེ་ཉིད་བསྟན། ། བཟླས་བརྗོད་འབུམ་ཕྲག་གཅིག་ཏུ་བརྗོད། ། རྟུལ་པོ་ཡིས་ནི་འབུམ་ཕྲག་ལྔ། ། གང་ཞིག་རྒྱུད་དུ་ གསུངས་རང་གི། ། རང་བཞིན་ལས་ནི་འབུམ་ཕྲག་བཞི། ། དེ་བས་ཤིན་ཏུ་ཉུང་ངུ་འདི། ། ལྷ་མོ་དེ་ཀུན་གསལ་བར་བསྟན། ། དཔལ་ལྡན་གཤིན་རྗེའི་གཤེད་དམར་པོའི་རྒྱུད་ཀྱི་རྒྱལ་པོ་ལེའུ་ཉི་ཤུ་རྩ་གཉིས་པའོ། ། ། །
BOརང་གི་རྒྱུད་འདི་མི་ཤེས་པར། ། རྒྱུད་དང་རྒྱུད་དུ་ངེས་བརྗོད་པ། ། གལ་ཏེ་འཚོ་བའི་བསམ་པ་ཡིས། ། སྟོང་པའི་ས་ལ་དེ་འཁོར་རོ། ། དཔལ་ལྡན་གཤིན་རྗེའི་གཤེད་དམར་པོའི་རྒྱུད་ཀྱི་རྒྱལ་པོ་རྫོགས་སོ། ། ། ། སྐད་གཉིས་སྨྲ་བ་ཆེན་པོ་ཐར་པ་ལོཙྪ་བའི་བཀའ་དྲིན་གྱིས་བསྐྱངས་པ། བོད་ཀྱི་ལོ་ཙྪ་བ་ཤཱཀྱའི་དགེ་སློང་རིན་ཆེན་གྲུབ་ཀྱིས། ཆོས་ཀྱི་རྗེ་ཁྲོ་ཕུ་ལོཙྪ་བའི་གདན་ས་གནས་གསར་དགོན་པར་བསྒྱུར་ཅིང་ཞུས་ཏེ་གཏན་ལ་ཕབ་པ། ། ། ། རྒྱུད་འདི་འགྱུར་ལས་འབད་པའི་བསོད་ནམས་ཀྱིས། ། ནག་པོའི་རྩ་ལག་མ་ལུས་ཀུན་བཅོམ་སྟེ། ། བསྟན་པའི་བྱ་བ་ཡིད་བཞིན་འགྲུབ་པ་དང་། ། མཐར་ཐུག་འཇམ་པའི་རྡོ་རྗེ་ཉིད་གྱུར་ཅིག ། རྒྱུད་ཀྱི་རྒྱལ་པོ་ཆེན་པོ་འདི་སྔར་བུ་སྟོན་རིན་ཆེན་གྲུབ་ཀྱིས་རང་འགྱུར་དུ་མཛད་པ་ལ། རྒྱུད་ཀྱི་དོན་ལ་མཁས་པའི་དམ་པ་འགའ་ཞིག་གིས་གཞུང་འཁྲུག་པ་དང་འགྱུར་མ་བདེ་བའི་དོགས་གནས་ དཔྱད་གཞིར་མཛད་པར་བརྟེན། རྒྱ་དཔེ་རྙེད་ན་འགྱུར་བཅོས་བྱེད་དགོས་དཔལ་རིག་པ་འཛིན་པའི་དབང་ཕྱུག་མཆོག་གི་བཀས་བསྐུལ་ཏེ། ནེ་པཱ་ལའི་ཡུལ་ནས་རྒྱ་དཔེ་བཙལ་ནས།
BOའགྱུར་རྙིང་ལ་རྒྱ་དཔེར་ཚིགས་བཅད་ཡོད་པ་ཚིག་ལྷུག་ཏུ་བྱས་པ་འགའ་ཞིག་དང་། ཚིག་ མི་བདེ་བ་ལྟར་སྣང་ཡང་དོན་ལ་མི་འགལ་བ་རྣམས་རང་སོར་བཞག་ཅིང་། འཁྲུག་སྡེབ་པར་འོས་པ་འགའ་ཞིག་སྣང་ཡང་རྒྱུད་གཉེན་པོར་གྱུར་པས་མཆན་བཀོད་ཙམ་ལས་རྔོ་མ་ཐོགས། གཞན་མི་བཅོས་སུ་མི་རུང་བ་རྣམས་བློ་ནུས་དང་ཇི་ ལྟར་འཚམ་པར་ལེགས་པར་བཅོས་ཤིང་གཏན་ལ་ཕབ་སྟེ། ཐུབ་བསྟན་ཆོས་འཁོར་གྱི་དགོན་པར་ཆོས་སྨྲ་བ་བསྟན་པའི་ཉིན་བྱེད་ཀྱིས་ཞུ་ཆེན་བགྱིས་པ་ཚུལ་བཞིན་མ་རྟོགས་པ་སོགས་ཀྱིས་ནོངས་པ་མཆིས་ན་འཇམ་པའི་རྡོ་རྗེ་ཉིད་ལ་བཤགས་ཤིང་། དགེ་བས་ དཔལ་ལྡན་བླ་མའི་ཞབས་པད་བརྟན་ཅིང་། བདག་ཀྱང་འཆི་བདག་གི་བདུད་ལས་རྣམ་པར་རྒྱལ་ཞིང་བསྟན་པའི་བྱ་བ་མཐར་ཕྱིན་པ་དང་། མཐར་ཐུག་དཔལ་ལྡན་དུས་དགྲའི་དབང་པོའི་གོ་འཕང་མྱུར་དུ་ཐོབ་པར་གྱུར་ཅིག། ། །
Sutraya