༄༅༅། ། རྒྱ་གར་སྐད་དུ། ཙ་ཏུར་ཡོ་གི་ནཱི་སཾ་པུ་ཊ་ཏནྟྲ་ནཱ་མ། བོད་སྐད་དུ། རྣལ་འབྱོར་མ་བཞིའི་ཁ་སྦྱོར་གྱི་རྒྱུད་ཅེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། ། དེ་ནས་ཡང་དག་བཤད་བྱ་བ། ། རྣལ་འབྱོར་བཞི་ཡི་ཁ་སྦྱོར་ཏེ། ། ཞལ་བཞི་ཞེས་ནི་རྣམ་པར་བཤད། ། རྒྱུད་རྣམས་ཀུན་ཏུ་སྦས་པ་སྟེ། ། ཞལ་རྣམས་ཀྱང་ནི་ཁ་སྦྱོར་མ། ། འདི་རུ་རྒྱས་པར་བརྗོད་པ་ཡིན། ། འོག་དང་སྟེང་དུ་རྣམ་བཤད་དང་། ། དེ་བཞིན་གཡོན་དང་གཡས་པའོ། ། ཨཱ་ལི་ཀཱ་ལིའི་བྱེ་བྲག་གིས། ། ལྟེ་བའི་དབུས་སུ་རྣམ་པར་གནས། ། ཟླ་བ་ཉི་མར་རྣམ་པར་བཤད། ། ས་ དང་རླུང་གི་ཉིད་དག་དང་། ། ཆུ་མེ་དེ་བཞིན་ནམ་མཁའ་དང་། ། ཁམས་ལྔ་དག་དང་ཡང་དག་ལྡན། ། གཟུགས་དང་རེག་པ་དེ་བཞིན་སྒྲ། ། མིག་གཉིས་དང་ནི་སྣ་དག་དང་། ། ལུས་ཀྱི་སྟེང་འོག་ཏུ་ཡང་གསལ། ། རྟག་ཏུ་རྡོར་ཅན་རྣམ་པར་གནས། ། ཆ་དང་ཆ་ མིན་རྣམ་པར་གྲོལ། ། སྟོང་པའི་དང་ལས་ཡང་དག་གནས། ། ཡ་ཡི་སྡེ་མཐའ་ཡང་དག་རྫོགས། ། ཨུ་ཡིག་དག་ནི་ཐིག་ལེར་བཅས། ། འབྱར་ཞིང་གསལ་བར་འགྱུར་བ་སྟེ། ། ཁ་སྦྱོར་རྣམ་པ་རྣལ་འབྱོར་གྱི། ། རྡོར་ཅན་ཇི་ལྟར་ཆང་གིས་མྱོས། ། འཁོར་ནས་སེམས་ནི་ རྣམ་པར་གྲོལ། །

ཁམས་གསུམ་པོ་ནི་མ་ལུས་པ། ། རྡོ་རྗེའི་མིག་གིས་མཐོང་བར་འགྱུར། ། བདུན་གྱི་རྒྱལ་པོའི་དངོས་གྲུབ་ཀྱིས། ། མ་ལུས་ལུས་པ་མེད་པ་མཐོང་། ། ཚངས་པ་ཁྱབ་འཇུག་དབང་ལྡན་དང་། ། དབང་པོ་དེ་བཞིན་འདོད་དབང་ཕྱུག ། ཕ་རོལ་སྟོབས་ཀྱིས་ མནན་ནས་ནི། ། རྣལ་འབྱོར་དབང་ཕྱུག་གིས་ནི་མཆོད། ། ཚངས་པ་ལ་སོགས་ལྷ་རྣམས་ཀྱིས། ། དམ་ཚིག་སྒྲ་ཡིས་བཤད་པ་སྟེ། ། སྲོག་དང་རྩོལ་བ་ཀུན་ཏུ་བྱ། ། དེ་ཡིས་འདི་ནི་དམ་ཚིག་སྡོམ། ། དེ་ལ་ཁ་སྦྱོར་རྣམ་པ་བཤད། ། ཞལ་བཞི་རུ་ནི་རབ་ཏུ་གནས། ། རྣལ་ འབྱོར་མ་བཞི་སྡེ་ཞེས་བྱ། ། སྦྱོར་བ་བཞི་དང་ཡང་དག་ལྡན། ། གང་གང་དབང་པོའི་ལམ་ནས་བྱུང་། ། དེ་དང་དེ་ཡི་རང་བཞིན་ཉིད། ། འདོད་པ་ཀུན་ལས་ལོངས་སྤྱོད་པ། ། སངས་རྒྱས་ཀུན་གྱི་རང་བཞིན་འགྱུར། ། གཟུགས་ནི་ཇི་ལྟར་རྫོགས་པ་ལས། ། དེ་ལ་སྒོམ་པ་ཅི་ ལྟ་བུ། ། སྔགས་རྣམས་ཇི་ལྟར་བསྐྱེད་པར་བགྱི། ། རྫོགས་པར་ཡང་ནི་ཅི་ལྟར་འགྱུར། ། དེ་དག་ཐམས་ཅད་ཐ་སྙད་ཙམ། ། སྔགས་དང་རྒྱུད་རྣམས་ཡང་དག་འབྱུང་། ། བྱང་ཆུབ་སེམས་ནི་འདི་རུ་བསྔགས། ། འདོད་པ་ལྔ་དང་ཡང་དག་ལྡན། ། མཚོན་བྱ་མཚན་ཉིད་ཀྱིས་ ནི་མཚོན། ། མཚོན་བྱ་དུ་མའང་མཚོན་མི་བྱ། །

སྔགས་རྣམས་རྒྱས་པར་བཤད་ནས་ནི། ། ལྷ་རྣམས་ཀྱི་ནི་བསྒོམ་པ་ཉོན། ། སྟེང་གི་སྒོ་ནི་གསུམ་ཡིན་ཏེ། ། ལྟེ་བར་རླུང་གི་གཟུགས་ཅན་མ། ། དེ་ལ་དབུས་སུ་རྟག་ཏུ་སྟོང་། ། དག་པ་ཡི་ནི་ཤེལ་ལྟ་བུར། ། ལོངས་སྤྱོད་ཆེན་པོ་ ངེས་པར་འབྱུང་། ། དགུ་པ་བཅུ་ཡིས་ལྡན་པ་སྟེ། ། ཆ་བརྒྱད་དེ་ཡི་ཡན་ལག་གིས། ། སྒོ་དགུའི་ས་བོན་ཡིན་པ་སྟེ། ། ལུས་ལ་ས་བོན་རྗེས་སུ་བརྗོད། ། ཡེ་ཤེས་མཁའ་འགྲོ་བདག་ཉིད་ཀྱིས། ། སྟེང་གི་ཆར་ནི་ཤེས་རབ་སྟེ། ། རྡོ་རྗེ་འཛིན་དང་བཅས་པར་འབྱུང་། ། སེམས་ཀྱི་རྡོ་རྗེ་ཞེས་ནི་བཤད། ། འདིར་ནི་སྟེང་གི་པདྨར་བཤད། ། དེ་ལ་གནས་ནི་བྷ་གར་བཤད། ། ཤེས་རབ་དེ་ཉིད་རྡོར་ཅན་བཅས། ། རྟེན་དང་བརྟེན་པར་འབྱུང་བ་ཡིས། ། རྩ་རྣམས་ཀུན་ལ་རྣམ་པར་གནས། ། ཁུ་བའི་གཟུགས་སུ་གྱུར་པ་ཡིས། ། སྤྲོ་དང་ སྡུད་པར་བྱེད་པས་སོ། ། བསྐྱེད་པའི་རིམ་པའི་རྣལ་འབྱོར་གྱིས། ། བསྒོམ་པའི་རིམ་པ་ཕྱེད་པས་སོ། ། གདམས་ངག་རིམ་པའི་རྣལ་འབྱོར་གྱིས། ། ལྷ་རྣམས་བསྒོམ་པར་བརྗོད་པ་སྟེ། ། དེ་རྣམས་སྣ་ཚོགས་རྣལ་འབྱོར་གྱིས། ། ཟླ་བ་ཉི་མར་བཤད་པ་ཡིན། ། གཞན་ ཡང་གཞན་མིན་རྣམ་པར་གྲོལ། ། སངས་རྒྱས་གཟུགས་ནི་གཡོ་བ་མེད།

། དེར་ནི་གཟུང་བར་བྱ་བ་སྟེ། ། གང་ཞིག་དེ་རུ་ཇི་ལྟར་གནས། ། ཉིན་མོ་བཅོམ་ལྡན་རྡོ་རྗེ་ཅན། ། མཚན་མོ་ཤེས་རབ་ཏུ་ནི་བརྗོད། ། ནམ་མཁའི་ནང་སོང་མཆོག་ཏུ་ཞི། ། དག་ཅིང་དགེ་བ་ཡིད་དུ་འོང་། ། སངས་རྒྱས་ལ་སོགས་མུ་སྟེགས་ཀུན། ། ལྷ་མིན་གནོད་སྦྱིན་སྲིན་པོ་དང་། ། དེ་ཉིད་འདོད་ཆགས་ཆགས་བྲལ་དང་། ། འདོད་པས་ཐར་བར་གྱུར་པ་ཉིད། ། དེ་ཉིད་བུད་མེད་རྣམས་ལ་ཆགས། ། དེ་ཉིད་མངལ་ནི་རབ་ཏུ་ལེན། ། དེ་ཉིད་འཆི་སྟེ་རིལ་པོའིགནས། ། དེ་ཉིད་བསྐམས་ པས་མཐོང་བ་ཡིན། ། དེ་ཉིད་གོང་དུ་གྱུར་པ་སྟེ། ། དེ་ཉིད་དྲི་རུ་རྣམ་པར་གནས། ། དེ་ཉིད་སྡུག་བསྔལ་རིག་པ་སྟེ། ། རིག་པས་བདེ་བ་ཉིད་དག་ལ། ། དེ་ཉིད་གཅིག་པུས་ཁྱབ་པ་ཡིན། ། བདུད་རྩི་ཐིགས་པའི་གཟུགས་ཀྱིས་ནི། ། གཟུགས་བཟང་གཟུགས་དང་ལྡན་པའི་མཆོག ། སྣ་ཚོགས་གཟུགས་རྣམས་ཡིད་དུ་འོང་། ། གཟུགས་ཀུན་གསལ་བར་བྱེད་པའི་དཔལ། ། གཟུགས་བརྙན་མ་ལུས་འཆང་བའོ། ། བཅུ་དྲུག་ཕྱེད་ཕྱེད་དེ་ཡི་ཕྱེད། ། རྟག་ཏུ་དེ་ཉིད་རིག་པ་པོ། ། སྣ་ཚོགས་རྟག་ཏུ་ཞི་བའི་གཟུགས། ། ནམ་མཁའ་ལྔ་དང་ཡང་དག་ལྡན། ། དེ་ ཉིད་རབ་ཏུ་ཞུགས་པར་བརྗོད། ། འགྲོ་ལ་གསལ་བ་མར་མེ་བཞིན། །

སྣ་ཡི་རྩེ་མོར་རྣམ་པར་འབྱུང་། ། འབར་བའི་ཕྲེང་བའི་འོད་ཟེར་ཏེ། ། འདི་རྣམས་ཀུན་ནི་བདག་གིས་བརྗོད། ། རྟེན་དང་བརྟེན་པའི་མཚན་ཉིད་དུ། ། གང་གིས་ཤེས་པས་ཆོ་ག་ ཤེས། ། དེ་ཡི་དཔལ་ནི་རྒྱས་པར་འགྲུབ། ། གཞན་ཡང་སྔགས་ཀྱི་ཚོགས་བཤད་དེ། ། གསང་བའི་སྦྱོར་བ་སྦས་པ་སྟེ། ། སྡེ་ཚན་བརྒྱད་ཀྱི་མཐའ་མ་གཟུང་། ། ས་བོན་ལྔ་དང་ཡང་དག་ལྡན། ། དེ་བས་བྷུ་ཡིག་སྦྱིན་པར་བྱ། ། དང་པོར་ཨོཾ་ཡིག་ཡང་དག་ལྡན། ། ཨ་ནི་ ཡིག་འབྲུ་ཀུན་གྱི་མཆོག ། ཐིག་ལེ་ཆེན་པོ་ཡི་གེ་མེད། ། ནམ་མཁའ་ནམ་མཁའི་དབུས་གནས་པར། ། སྔགས་དང་རྒྱུད་ནི་ཡང་དག་འབྱུང་། ། ཅི་ལྟར་དེ་ལྟར་སྔགས་ཀྱང་ནི། ། དེ་བཞིན་ཉིད་ཀྱི་ཚུལ་ལྟ་བུར། ། ཡི་གེ་ཙམ་དང་ཡང་དག་ལྡན། ། དེ་ལ་དབུས་སུ་རབ་ཏུ་ གྲགས། ། སངས་རྒྱས་བྱང་ཆུབ་སེམས་དཔའ་དང་། ། གང་ཡང་གཞན་གྱི་ལྷ་ཚོགས་དང་། ། འབྱུང་པོ་མ་ལུས་ཐམས་ཅད་དང་། ། ལྷ་དང་ལྷ་མིན་གསང་བ་པ། ། དེ་ཡི་དབུས་སུ་ཡང་དག་རྫོགས། ། ཡི་གེ་ལ་སོགས་གཟུགས་ཅན་གྱིས། ། གཟུགས་ཅན་རྣལ་འབྱོར་ ལཱ་མ་དང་། ། དུམ་སྐྱེས་མ་ཡི་བྱེ་བྲག་གིས། ། ཞལ་བཞི་ཞེས་ནི་རྣམ་པར་བཤད། ། རྣལ་འབྱོར་བཞི་དང་ཡང་དག་ལྡན། །

ལྟེ་བ་དང་ནི་གེ་སར་ལྡན། ། འདབ་མ་བཞི་དང་ཡང་དག་ལྡན། ། དེ་ལ་དབུས་སུ་དཔའ་བོ་ཆེ། ། ཕྱག་བརྒྱད་ཀྱིས་ནི་རྣམ་པར་བརྒྱན། ། དང་པོ་ལ་ནི་ ཤ་ཡིས་གང་། ། གཉིས་པ་ཁྲག་གིས་བཀང་བ་ཉིད། ། གསུམ་པ་བཞི་པ་ལུས་ཕྱག་རྒྱ། ། ཁ་ཊྭཱཾ་ག་དང་ཌཱ་མ་རུ། ། དེ་བཞིན་ཁ་དོག་དཀར་པོ་འཕྲོ། ། དྲི་མེད་སྟོན་ཀའི་ནམ་མཁའ་བཞིན། ། དཀར་དང་དམར་དང་དེ་བཞིན་གནག ། ལྗང་གུའི་ཞལ་ཏེ་གཙིགས་པའོ། ། ཕྱག་རྒྱ་བརྒྱད་ནི་མདོ་རུ་བཤད། ། ཕྱག་གིས་མཚོན་ཆར་རབ་ཏུ་གྲགས། ། དང་པོར་འཇུག་པའི་ཕྱག་རྒྱ་སྟེ། ། གཉིས་པ་སྙིང་ནི་འབྱིན་པའོ། ། གསུམ་པ་རྨོངས་བྱེད་ཕྱག་རྒྱ་ཡིན། ། བཞི་པར་ལྟུང་བྱེད་དེ་བཞིན་ནོ། ། ལྔ་པར་གར་མའི་ཕྱག་རྒྱའོ། ། དྲུག་པར་གསོད་ བྱེད་མར་ནི་བརྗོད། ། བདུན་པར་ཟ་བྱེད་མའི་ཕྱག་རྒྱ། ། བརྒྱད་པར་སྟེང་དུ་ལེན་པར་ངེས། ། གཤིན་རྗེ་མོ་དང་སྐྲག་བྱེད་ད་དྲག ། གཏུམ་མོ་དང་ནི་བཟང་ཟ་དང་། ། བྷ་སུ་མ་དང་འདོད་པ་ཉིད། ། དེ་ཉིད་བརྒྱད་པོ་ཕག་མོ་ཉིད། ། མི་བཟད་རྣམ་པར་འགྱུར་བའི་གཟུགས། ། ཁྲག་དང་ཁུ་བ་ཟ་བ་མོ། ། འོད་ཟེར་འབར་བ་སྣ་ཚོགས་འབར། ། རྡོ་རྗེ་མཁའ་འགྲོ་མ་བསྒོམ་བྱ། ། མང་པོར་རྣམ་བཤད་ཡེ་ཤེས་ནི། །

དེ་ལ་དབུས་སུ་རྣམ་པར་འབྱུང་། ། དཔག་ཚད་འབུམ་གྱི་རྒྱ་ཁྱོན་དུ། ། དེ་ཡིས་གསལ་བར་བྱེད་པ་ཡིན། ། སེམས་ཅན་ཐོག་མ་ཐ་མ་མེད། ། རྡོ་རྗེ་སེམས་དཔའ་ཆགས་པ་ཆེ། ། ཐིག་ལེ་རྡོ་རྗེ་ཅན་དུ་འགྱུར། ། ཟླ་བ་ཕྱེད་པ་ལྟ་བུར་གསལ། ། གདན་ནི་པདྨ་ར་ག་སྟེ། ། རྒྱལ་པོའི་གཟུགས་ནི་གསལ་བ་ཡིན། ། རྒྱལ་པོ་ཉིད་ཅེས་རྣམ་པར་བཤད། ། སྟེང་དུ་འབྱུང་བར་རབ་ཏུ་གྲགས། ། ཡང་ནི་དགོད་པར་བྱ་བ་ སྟེ། ། རིགས་ཀྱི་དབྱེ་བས་བརྗོད་པའོ། ། ཤར་དུ་རྡོ་རྗེ་སེམས་དཔར་གྱུར། ། ལྷོ་རུ་རྣམ་པར་སྣང་མཛད་བརྗོད། ། ནུབ་ཏུ་རྟ་ཡི་རྒྱལ་པོའོ། ། བྱང་དུ་པདྨ་གར་དབང་སྟེ། ། འཁོར་ལོའི་དབུས་སུ་ཧེ་རུ་ཀ། ། སྟེང་གི་སྒྲ་ནི་རྟ་གདོང་ཡིན། ། འདི་རྣམས་འདི་རུ་དགོད་ པར་གསུངས། ། རིགས་ཀྱིས་དབྱེ་བས་རྣམ་པ་ལྔ། ། དེ་རུ་བསྒོམ་པར་བྱ་བ་ཡིན། ། གཞོམ་མེད་གཞིག་ཏུ་མེད་པ་སྟེ། ། དེ་ཡི་དབུས་སུ་ཡང་དག་རྫོགས། ། མགོན་པོ་རྣམ་པར་སྣང་མཛད་སོགས། ། རྣལ་འབྱོར་མ་བཞིའི་ཁ་སྦྱོར་ལས་ཚོགས་ཀྱིས་བསྒྱིངས་པའི་རྒྱུད་ ཆེན་པོ་ཞེས་བྱ་བ་སྟེ་བརྟག་པ་དང་པོའོ། ། ། ། དེ་ནས་རྡོ་རྗེ་ཕག་མོ་དེ། ། རྐང་རྒྱན་དང་ནི་དོ་ཤལ་རྒྱན། །

དེ་ཡི་དཀྱིལ་འཁོར་ལ་གར་བྱེད། ། དབང་བསྐུར་བ་ནི་སྟེར་བ་ཡིན། ། དམ་ཚིག་ལ་ནི་ལེགས་གཞག་ཕྱིར། ། ཕག་མོས་དེ་བཞིན་རྡོ་རྗེ་ཅན། ། ཅི་འདོད་དེ་ བཞིན་རྡོ་རྗེ་ཅན། ། དྲི་ཆེན་དྲི་ཆུ་ཟ་བ་དང་། ། ཁྲག་དང་ཁུ་བ་དེ་བཞིན་ཤ། ། རྟག་ཏུ་བུད་མེད་དང་ནུས་སམ། ། བྷ་གའི་པདྨར་འོ་བྱེད་དམ། ། སྨྲོས་ཤིག་རྡོར་ཅན་བདེ་བ་ཆེ། ། དེ་ནས་བཅོམ་ལྡན་རྡོ་རྗེ་ཅན། ། བཞད་པར་གྱུར་ནས་འདི་དག་སྨྲས། ། ལྷ་མོ་ཅི་སྟེ་བདག་མི་སྤྲོ། ། ཁྲག་དང་ ཁུ་བ་ལ་སོགས་བཟའ། ། རྟག་ཏུ་བུད་མེད་གུས་པར་བགྱི། ། བྷ་གའི་པདྨར་འོ་བགྱིད་དོ། ། ཡང་ནི་ལེགས་སོ་ལེགས་སོ་བྱིན། ། སྒོ་སྐྱོང་དེ་བཞིན་རྡོ་རྗེ་ཅན། ། ཐོད་པ་ཡང་དག་བླངས་ནས་ནི། ། རྡོ་རྗེ་ཅན་ལ་བཟའ་བ་དབུལ། ། ཞི་ཞིང་གཅེར་བུར་འདུག་ པ་དང་། ། རྡོ་རྗེ་ཅན་ནི་སྐྲ་གྲོལ་བས། ། ལེགས་པར་དབང་བསྐུར་སྟེར་བར་བྱེད། ། བྷ་གར་འོ་བྱེད་རྡོ་རྗེ་ཅན། ། དེ་ནས་བརྩམས་ཏེ་རྡོ་རྗེ་ཁྱོད། ། སེམས་ཅན་དོན་གྱིས་བརྟུལ་ཞུགས་བཟང་། ། བཟའ་བ་དྲི་ཆེན་དྲི་ཆུ་དང་། ། ཁྲག་དང་ཁུ་བ་ཤ་དག་གོ། ། བྷ་གའི་པདྨར་འོ་ བྱ་སྟེ། ། བདུད་རྩི་རྣམས་ནི་བསྒྲུབ་པར་བྱ། ། རྡོ་རྗེ་རྣལ་འབྱོར་ཕོ་ཉ་མོས། །

དེ་ནས་རྟག་ཏུ་དབང་བསྐུར་རོ། ། ཧཱུྃ་ཧཱུྃ་ཧཿཧཿཨཿཨཿཧྲཱིཿཧྲཱིཿསྭཱ་ཧཱ། ། དེ་ནས་དེ་མ་ཐག་ཏུ་ཀུན། ། རྡོ་རྗེ་མཁའ་འགྲོ་མ་ཉིད་ཀྱིས། ། སྒྲ་ཆེན་པོ་ནི་རབ་ཏུ་བསྒྲགས། ། རྡོ་རྗེ་ཅན་དེ་དབང་ བསྐུར་རོ། ། སྣ་ཚོགས་གཟུགས་ཅན་དྲག་པོ་ཆེ། ། ཐོད་པའི་གདན་ལ་ཡང་དག་བཞུགས། ། ཤ་དང་ཁྲག་དག་འཐུང་བ་སྟེ། ། གསང་བའི་དཀྱིལ་འཁོར་དུ་ནི་སྦྱོར། ། ལ་ལ་རོལ་མོའི་ཆ་བྱད་བརྡུང་། ། པ་ཊ་ཧ་སོགས་མུ་ཀུ་ཎ་ཌ། ། ལ་ལ་རབ་ཏུ་གླུ་ལེན་ཅིང་། ། ལ་ལ་པི་ཝང་བསྒྲེང་བ་སྟེ། ། ལ་ལ་རྡོར་ཅན་གར་བྱེད་དོ། ། ལ་ལ་དྲིལ་བུའི་སྒྲ་སྒྲོགས་བྱེད། ། ལ་ལ་སྒྲ་དག་རབ་ཏུ་སྒྲོགས། ། ཕྱོགས་བཅུར་ཕེཾ་གྱི་སྒྲ་དག་གོ། ། ལ་ལ་གར་དག་རབ་ཏུ་བྱེད། ། ལ་ལར་དཀྱིལ་འཁོར་དུ་གླུ་ལེན། ། ལ་ལ་མེ་ཏོག་རབ་ཏུ་འགྲེམས། ། དེ་ཡིས་རྡོར་ཅན་ལ་དབང་བསྐུར། ། ལ་ལ་སྤོས་ཀྱིས་རབ་སྦྱིན་བྱེད། ། ལ་ལ་དྲི་ཡིས་དེ་བཞིན་ནོ། ། འདི་ལྟར་གྱུར་པའི་མཆོད་པ་ཡིས། ། གསང་བའི་དཀྱིལ་འཁོར་ལ་ནི་བྱ། ། དེ་ནས་རྡོར་ཅན་ལྷ་མོ་དེ། ། ཚིག་འདི་དག་ནི་བརྗོད་པ་སྟེ། ། ཚོགས་ཀྱི་དཀྱིལ་འཁོར་ཉིད་ དག་དང་། ། དབང་དག་ལེགས་པར་བརྗོད་ནས་ནི། ། ང་ཡིས་གཞན་ཡང་བཤད་བྱ་བ། །

ལྷ་རྣམས་དགོད་པ་མཆོག་དག་གོ། ། རྒྱ་རུ་ཀུན་ཏུ་ཁྲུ་བརྒྱད་དེ། ། གྲུ་བཞི་པ་ལ་སྒོ་བཞི་པ། ། སྔགས་པས་དེ་ཡི་ཉིས་འགྱུར་(དབྱད,དཔྱད)། ། གང་དུ་མཁའ་འགྲོའི་ཚོགས་འགྱིང་བ། ། ནམ་མཁའ་འོད་ཀྱིས་རྒྱ་ཁྱབ་པར། ། གང་དེ་དཀྱིལ་འཁོར་མཆོག་ཡིན་ནོ། ། དབུས་སུ་འཁོར་ལོ་ཡང་དག་བྲི། ། ལྟེ་བ་དག་ནི་གེ་སར་ལྡན། ། འདབ་མ་བཞི་དང་ཡང་དག་བཅས། ། ཁ་དོག་དཀར་པོར་ཡང་དག་ལྡན། ། དེ་ལ་དབུས་སུ་དཔའ་བོ་དགོད། ། དག་པའི་ཤེལ་ བཞིན་དྲི་མ་མེད། ། དང་པོའི་ཞལ་ནི་རྣམ་པར་བཞད། ། དང་པོའི་སྤྱན་གྱིས་རྣམ་པར་གཟིགས། ། སྨིན་མ་ཁྲོ་གཉེར་རབ་ཏུ་གསལ། ། མཆེ་བ་གཙིགས་ཤིང་འཇིགས་པ་ནི། ། ལྷོ་རུ་བལྟས་པའི་ཞལ་དག་གོ། ། གཡོན་པ་རྨད་དུ་བྱུང་བ་སྟེ། ། རྒྱབ་ནི་འཇིགས་པ་ཆེན་པོ་ ཡིན། ། མདུན་རྒྱབ་རྟ་ཡི་ཞལ་གྱིས་བརྒྱན། ། དཀར་པོ་དམར་པོ་དེ་བཞིན་གནག ། ལྗང་གུ་ཡ་ནི་ཁ་དོག་གོ། ། ཕྱག་བརྒྱད་ཀྱང་ནི་བྲི་བར་བྱ། ། ཐོད་པའི་ཕྲེང་བས་རྣམ་པར་བརྒྱན། ། དཔལ་ལྡན་མགོ་བོའི་ཕྲེང་བ་འཛིན། ། འཇིགས་བྱེད་ལྗགས་ནི་འདྲིལ་བ་སྟེ། ། འཇིག་དུས་ཆེན་པོའི་མེ་དང་མཚུངས། ། དུར་ཁྲོད་ལྟ་བུར་འཇིགས་སུ་རུང་། ། བརྩེགས་པར་རྒོད་ཅིང་བཞད་པ་ཆེ། །

ཕེཾ་གྱི་སྒྲ་ནི་སྒྲོགས་པའོ། ། ཞལ་གཅིག་ཕྱག་ནི་གཉིས་པ་རུ། ། ལྷ་བཞི་རྣམས་ནི་བརྗོད་པར་བྱ། ། ཁ་ཊྭཱཾ་ག་དང་ཐོད་པའི་ལག ། ཁྲག་དང་ ཁུ་བ་དག་འཐུང་ངོ་། ། འཁོར་ལོ་གཉིས་པ་ཡང་དག་བཤད། ། ཟླ་བའི་དཀྱིལ་འཁོར་ཟླུམ་པོ་ལ། ། འཁོར་ལོ་ཆེན་པོ་ཡི་གེ་བརྒྱད། ། འོད་ཟེར་དམར་པོ་འབར་བ་སྟེ། ། གཟུགས་ཅན་མ་དང་འོ་བྱེད་མ། ། ལམ་མཆོག་འཕེལ་དང་ས་མ་ལི། ། ཕྱིར་མི་ལྡོག་དང་ཨེ་ཧི་ཀི། ། རྡོར་ཅན་བརྒྱད་པར་བརྗོད་པ་ཡིན། ། ལྷ་མོ་བརྒྱད་པོ་འདི་རུ་དགོད། ། ཁ་དོག་དཀར་པོ་ཤིན་ཏུ་འབར། ། ལག་པས་ཁ་ཊྭཱཾ་ག་གཟུང་ཞིང་། ། ཐོད་པ་ཁྲག་གིས་བཀང་བའོ། ། ཕྱི་རོལ་འཁོར་ལོ་ཡང་དག་བརྗོད། ། ལྷ་རྣམས་བཀོད་པ་མཆོད་དང་ནི། ། སཾ་ཁི་ནཱི་དང་པུཀྐ་ སི། ། གསོད་མ་དཀར་མོ་སྒྲོག་མ་དང་། ། གཏུམ་མོ་རི་ཁྲོད་མ་ཉིད་དང་། ། སྒྲོལ་མ་དེ་བཞིན་ཁྲོ་གཉེར་མ། ། ཁམས་གསུམ་རྣམ་རྒྱལ་གླང་ཆེན་མོ། ། དེ་བཞིན་གྷསྨ་རཱི་དག་དང་། ། དུརྒ་ཙ་མུཎྜ་དག་དང་། ། དེ་བཞིན་ཚངས་མ་ཁྱབ་འཇུག་མ། ། སྒོ་སྐྱོང་ ཡང་དག་བཤད་པ་ནི། ། སྒོ་བཞི་དག་ཏུ་སྦྱར་བར་བྱ། ། འཁོར་ལོ་ཆེན་པོ་ཁ་དོག་སྔོ། ། འབར་བའི་ཕྲེང་བའི་ཚོགས་ཀྱི་འོད། །

ལྷ་མོ་ཆེན་མོ་ཁ་དོག་དཀར། ། ཁ་ཊྭཱཾ་ག་དང་ཉ་ཕྱིས་འཛིན། ། དཀྱིལ་འཁོར་འདི་ནི་རྒྱལ་པོ་སྟེ། ། རྣལ་འབྱོར་ མ་བཞིའི་སྡོམ་པ་ནི། ། རང་གི་རྒྱུད་དུ་ཐུན་མོང་སྟེ། ། དཀྱིལ་འཁོར་བླ་མའི་བླ་མ་ཡིན། ། སྲུབ་པ་ཆེན་པོའི་སྡོམ་པ་ནི། ། དེ་ཡི་བླ་མ་ཞེས་སུ་གསུངས། ། རྣལ་འབྱོར་མ་བཞིའི་ཁ་སྦྱོར་ལས་དཀྱིལ་འཁོར་གྱི་བརྟག་པ་ཞེས་བྱ་བ་སྟེ་གཉིས་པའོ། ། ། ། དེ་ ནས་གཞན་ཡང་བཤད་བྱ་བ། ། དམ་ཚིག་ཆེན་པོའི་སྒྲུབ་ཐབས་སོ། ། གླང་པོ་རྟ་དང་བོང་བུ་དང་། ། བ་ལང་རྔ་མོ་དག་དང་ནི། ། ཁྱི་ཡི་སྒྲོན་མ་རབ་ཏུ་འབྱུང་། ། སྒྲོན་མ་ཆེན་མོ་རབ་ཏུ་བཤད། ། འགྲོ་བ་དགའ་བས་གསལ་བར་བྱེད། ། བྱ་རོག་འུག་པ་ཁྲ་དང་ནི། ། ཆུ་སྐྱར་བྱ་རྒོད་ལྔ་པོ་ཡི། ། སྤོས་ཆེན་པོ་ནི་རབ་ཏུ་བཤད། ། སྤོས་སུ་འབུལ་བར་བྱེད་པའོ། ། འདི་རྣམས་དབང་དུ་བྱེད་པར་འགྱུར། ། ས་གསུམ་པོ་རུ་རྣམ་པར་སྤྱོད། ། ཅི་སྲིད་སྦྱོར་བ་ཚོགས་པ་ཡིས། ། དངོས་གྲུབ་ཐམས་ཅད་བྱེད་པའི་མཆོག ། བདུད་རྩི་ལྔ་ ནི་རྣམ་བརྗོད་པ། ། འཆི་མེད་དངོས་པོ་མེད་པའོ། ། རྟོག་པ་མེད་པར་བཟའ་བར་བྱ། ། བློ་ལྡན་རང་བཞིན་མེད་པས་སོ། ། སྡེ་ཚན་ཐ་མའི་སྔགས་བཏུས་ཏེ། །

བཅུ་དྲུག་ཆ་ཡིས་ཡང་དག་ལྡན། ། པྲ་ཎ་བ་སྦྱོར་སྟེང་དུ་སྟེ། ། ཐིག་ལེས་གནོན་ཅིང་བརྒྱན་པ་ཡིན། ། དྲི་ཞེས་ཀུན་ཏུ་བརྗོད་པ་ཡིན། ། ཀུན་ནས་ཐུགས་ཀྱི་དཀྱིལ་འཁོར་ལོ། ། ཉི་ཤུ་བདུན་པ་འོག་ཏུ་སྦྱིན། ། སྔགས་ལ་སོགས་པས་ཕྱེ་བ་ཡིན། ། སྤྱི་བོ་དེ་རུ་ཡང་དག་སྦྱར། ། ཡི་གེ་ལྷ་ཡི་གཟུགས་ཀྱིས་ནི། ། ཉི་ཤུ་རྩ་དྲུག་ཡང་ནི་སྦྱར། ། དབྱངས་ཡིག་གཉིས་ པས་བརྒྱན་པ་ཡིན། ། ཉི་ཤུ་རྩ་གསུམ་ཡང་ནི་བླང་། ། འོག་གི་ཆར་ནི་སྦྱར་བར་བྱ། ། དབྱངས་ཀྱི་གསུམ་པ་ཡང་དག་ལྡན། ། བཞི་པས་སྦྱར་བར་བྱ་བ་ཡིན། ། དེ་ཡི་དབུས་སུ་ཡང་དག་གསུངས། ། ཡི་གེ་དབང་ཕྱུག་གིས་ནི་བརྒྱན། ། བཅུ་དྲུག་མཐའ་ནི་ཡང་དག་ བཤད། ། སྟེང་དང་འོག་ཏུ་ཁྱབ་པ་ཡིན། ། དེ་ལ་དབུས་སུ་ཡང་དག་གསུངས། ། སྟོང་པ་ཆེན་པོའི་ཡི་གེ་སྟེ། ། རྡོ་རྗེ་སེམས་དཔའ་གཞིག་ཏུ་མེད། ། དག་པ་ཡི་ནི་ཤེལ་ལྟ་བུར། ། རྫས་འདི་རྣམས་ནི་བཟའ་བ་ཡིན། ། རྣལ་འབྱོར་འདི་རྣམས་མཆོག་ཡིན་ཏེ། ། རྣལ་འབྱོར་ཀུན་ལས་མཆོག་ཏུ་འཕགས། ། ཁྱོད་ལ་མདོ་རུ་བསྡུས་པར་བཤད། ། བཟའ་བ་རྣམས་ནི་ཡང་དག་བརྗོད། ། གང་གི་རིགས་པས་ཐམས་ཅད་བཟའ། ། དངོས་པོ་རོ་མཉམ་བསྲེས་ནས་ནི། །

དག་དང་མ་དག་མི་བྱེད་པར། ། དེ་བཞིན་ཉིད་རྣམས་ ཐམས་ཅད་དང་། ། བཟའ་བ་ཐམས་ཅད་བཟའ་བར་བྱ། ། དེ་ཉིད་བཅུ་ཡིས་རབ་དབྱེ་བས། ། གཟུང་དང་འཛིན་པ་རྣམ་པར་གྲོལ། ། སྦྱིན་པའི་སྙིང་པོ་སྦྱིན་པར་བྱ། ། སེམས་ཀྱིས་རྣལ་འབྱོར་རྫོགས་ནས་ནི། ། ཐམས་ཅད་རྩྭ་སོགས་བཞིན་དུ་བཏང་། ། སངས་ རྒྱས་རྣམས་ཀྱི་ཚུལ་ཁྲིམས་གྱུར། ། དེ་ཉིད་ཀུན་གྱིས་མི་འཇིགས་པ། ། སྐྱེ་བོ་ཐམས་ཅད་འཚེ་མི་བྱེད། ། དང་པོར་སྙིང་རྗེ་བླ་ན་མེད། ། བཟོད་པ་ཚུལ་ཁྲིམས་བགེགས་མེད་དང་། ། གཞན་གྱི་གནོད་པ་འགེགས་པ་སྟེ། ། གུར་དང་ཕུར་བུ་དྲ་བ་དག ། གདུག་ པའི་བདུད་ནི་འཇོམས་པ་སྟེ། ། བདུད་མེད་འཆི་བ་མེད་པ་ཡིན། ། བདག་གི་སེམས་ནི་བཅིང་བར་བྱ། ། གང་གིས་རང་སེམས་གདུལ་བ་ཡིས། ། བདུད་ཀྱིས་གནོད་པ་སྨོས་ཅི་དགོས། ། མཉམ་པའི་སེམས་ཀྱི་དྲི་ཡིས་ནི། ། གྲུ་བཞི་པ་རུ་ཡང་དག་བྲི། ། ལུས་ལ་ སྟེའུ་དང་ཙན་དན་དང་། ། སེམས་ཀྱིས་མཉམ་པར་གནས་པ་ན། ། མཉམ་པ་ཉིད་ཀྱི་ཡེ་ཤེས་བརྗོད། ། དངོས་པོ་བདག་མེད་བསྲེས་པ་སྟེ། ། གང་ཞིག་རྣལ་འབྱོར་རྒྱལ་བར་འགྱུར། ། གང་དག་རྣལ་འབྱོར་མ་ཡི་ནི། ། ཞུ་བ་རྣམས་ལ་ཟ་བ་དག། ། དེ་ཡིས་ས་ སྟེངས་མཐའ་དག་ཏུ། །

རྒ་དང་ན་བ་རྣམ་པར་འཇོམས། ། རྣལ་འབྱོར་མ་བཞིའི་ཁ་སྦྱོར་ལས་དམ་ཚིག་ཆེན་པོའི་བདུད་རྩི་ལྔ་ཞེས་བྱ་བའི་བརྟག་པ་སྟེ་གསུམ་པའོ། ། ། ། དེ་ནས་ཡང་དག་བཤད་བྱ་བ། ། སྦྱོར་བ་དང་པོའི་སྒྲུབ་ཐབས་ཏེ། ། སྦྱོར་བ་རྣམ་བཞིར་ཤེས་ པར་བྱ། ། དམ་ཚིག་བཞི་ནི་བསྒྲུབ་པ་སྟེ། ། དང་པོ་ཁུ་བ་རྣམས་ཤེས་བྱ། ། གཉིས་པ་དེ་བཞིན་ཁྲག་ཉིད་དོ། ། རྡོ་རྗེ་ཆུ་དང་དྲི་ཆེན་ནི། ། དམ་ཚིག་བཞི་ནི་བསྟེན་པ་སྟེ། ། འདོད་ཆགས་ཁུ་བར་རྣམ་པར་བཤད། ། ཕྲག་དོག་ཁྲག་ནི་ཉིད་དག་གོ། ། གཏི་མུག་རྣམ་སྣང་རྒྱལ་པོ་སྟེ། ། ཞེ་སྡང་དྲི་ཆུར་བཅས་པ་ཡིན། ། དམ་ཚིག་བཞི་ཡི་རྣལ་འབྱོར་གྱིས། ། དམ་ཚིག་བཞི་ལ་སྤྱོད་པ་པོས། ། དང་པོ་སྦྱོར་བ་འགྲུབ་འགྱུར་ཞིང་། ། རྡོ་རྗེ་སེམས་དཔའ་དང་མཉམ་འགྱུར། ། བྲིས་སྐུ་གཞུག་པའི་རྣལ་འབྱོར་གྱིས། ། དམ་ཚིག་དེ་ཉིད་བསྒྲུབ་བྱ་སྟེ། ། སྟོང་པའི་རྡོ་རྗེ་བརྗོད་བྱ་སྟེ། ། ཡེ་ཤེས་སེམས་དཔའ་རྣམ་པར་བསམ། ། མདོར་བསྡུས་པ་ནི་སྔགས་བཟླས་བྱ། ། ཧཱུྃ་དག་སྔགས་ནི་བརྗོད་པར་བྱ། ། དངོས་པོས་བསྒོམ་པས་བསྒོམ་པར་བྱ། ། སྤྲོ་དང་སྡུད་པར་བྱེད་པའོ། ། བདུད་བཞི་གཞན་ལས་རྒྱལ་བ་ཡི། །

གོ་ཆ་མཚོན་ཆ་འདི་ཡིས་བཅིང་། ། ར་བ་ཕུར་བུ་གུར་སོགས་ཀྱིས། ། ཕྱོགས་བཞི་ལ་སོགས་བཅིང་བར་བྱ། ། ཁམས་བཞི་པོར་ནི་ཡང་དག་འབྱུང་། ། བདུད་བཞི་པོ་ནི་རྣམ་པར་བརྗོད། ། བད་ཀན་ཤ་དང་རྐང་དག་དང་། ། རུས་པའི་ ཁམས་ལ་ཡང་དག་འབྱུང་། ། སྤྱན་དང་བདག་མ་སྒྲོལ་མ་དང་། ། གོས་དཀར་ལ་སོགས་བཞི་པའོ། ། ཁམས་བཞི་དག་ནི་རྣམ་དག་པ། ། སྦྱོར་བ་དང་པོར་བརྗོད་པའོ། ། བརྩོན་ཆེན་ཞེས་སུ་རྣམ་བཤད་པ། ། རླུང་དང་མེ་ནི་མཆོག་ཡིན་ཏེ། ། དེ་ལ་དབུས་སུ་ཡང་དག་ གནས། ། ཛཱ་ཏ་རི་ཡི་རང་བཞིན་མིང་། ། དབྱིབས་དང་ཁ་དོག་སྣ་ཚོགས་པ། ། ཁ་དོག་མེད་པར་རབ་ཏུ་གྲགས། ། དབྱངས་དང་ཡི་གེའི་ཚུལ་དག་ཏུ། ། དབྱངས་མེད་ཡི་གེ་མེད་པའོ། ། ཚངས་མིན་ཁྱབ་འཇུག་དྲག་པོ་མིན། ། ནམ་མཁའ་མིན་ཞིང་འདོད་པ་མིན། ། ཟླ་ བ་མིན་ཞིང་སྐར་མ་མིན། ། ཉི་མ་མིན་ཞིང་རླུང་ཡང་མིན། ། གནོད་སྦྱིན་སྲིན་པོ་ལྷ་མིན་མིན། ། འབྱུང་པོ་{ཡི་དགས་,ཡི་དྭགས་}ཉིད་མིན་ཅིང་། ། སྣོད་དང་བཅུད་ནི་སྣ་ཚོགས་དང་། ། ཁམས་གསུམ་པོ་ནི་མ་ལུས་ལ། ། བདག་ཉིད་ཆེན་པོ་དེ་ཡིས་ཁྱབ། ། བེམས་པོ་ཉིད་ལ་ཡིད་ཀྱིས་ རྟོགས། ། དེ་ཉིད་འཇིག་རྟེན་པ་རུ་འགྱུར། །

ཚངས་པ་ཁྱབ་འཇུག་དབང་ཕྱུག་ཆེ། ། ཟླ་བ་གཟའ་ཟིན་སྐར་མ་ལྷ། ། དེ་ཉིད་ཐམས་ཅད་བདེ་བ་ཆེ། ། རྡོ་རྗེ་འཛིན་པ་རྣམ་སྣང་མཛད། ། པདྨ་ཉི་མ་ཁྲག་འཐུང་རྟ། ། རྡོ་རྗེ་རྣལ་འབྱོར་ཕོ་ཉ་མོ། ། དེ་ཉིད་རྡོ་རྗེ་བདེ་ཆེན་པོ། ། རྡོ་རྗེ་ རྡོ་རྗེ་འཛིན་པ་ཉིད། ། དེ་བཞིན་པདྨ་པདྨ་འཛིན། ། ནོར་བུ་ནོར་བུ་འཛིན་པ་ཉིད། ། རིགས་འདི་རྣམས་སུ་བསྒྱུར་བའོ། ། དེ་ཉིད་དཀྱིལ་འཁོར་བྲི་བ་ཉིད། ། རྡུལ་ཚོན་ཁ་དོག་ལྔ་པའོ། ། དེ་ཉིད་སྔགས་སུ་རབ་ཏུ་བྱ། ། ཧཱུྃ་ཧཱུྃ་ཕཊ་ཀྱི་ཡི་གེ་ཉིད། ། དམྱལ་བ་དུད་འགྲོ་ཡི་ དགས་དང་། ། ལྷ་དང་མི་དང་ལྷ་མིན་དང་། ། རྨོངས་པའི་སེམས་སུ་གྱུར་པ་ཡིས། ། འཁོར་བ་འདི་རུ་འཁོར་བར་འགྱུར། ། རྣལ་འབྱོར་ཆེན་པོ་མདོར་བསྡུས་པ། ། རྡོ་རྗེ་ཅན་ལ་གནས་པའོ། ། ལྷ་མོ་ཆེན་མོ་སླར་ཡང་དྲི། ། འགྲོ་དང་འོང་བ་ཇི་ལྟར་འགྱུར། ། གནས་ ནས་འདི་ཡི་སེམས་དག་ནི། ། སྐྱེ་བ་ཇི་ལྟར་བརྗོད་པ་ཡིན། ། ཁུ་བ་ཇི་ལྟར་གཟུགས་སུ་འགྱུར། ། སྐྱེ་བོའི་སྐྱེ་བ་ཇི་ལྟར་ཡིན། ། དེ་ཡི་གཟུགས་ཀྱི་སྐྱེ་མལ་ནི། ། ཁྲག་ལས་ཇི་ལྟར་འབྱུང་བ་ལགས། ། འབྱུང་བ་རྣམས་ཀྱི་འབྱུང་བ་ཅི། ། དེ་ཡི་སྐྱེ་བ་ཇི་ལྟར་ལགས། །

ས་དང་ཆུ་དང་དེ་བཞིན་མེ། ། རླུང་དང་ནམ་མཁའ་ཉིད་དང་ནི། ། སྐྱེ་གནས་ཀུན་ལ་ཆགས་པ་ནི། ། དངོས་པོ་རྣམ་པ་ཇི་ལྟར་ཁྱབ། ། ཞི་བའི་གཟུགས་ནི་ཇི་ལྟར་ཡིན། ། ཐམས་ཅད་དུ་ནི་ཇི་ལྟར་སྐྱེ། ། འདི་རྣམས་ཡང་དག་བཤད་པ་ནི། ། ལྷ་མོ་བདེན་པར་བདག་ལ་གསུངས། ། ཇི་ལྟར་དེ་བཞིན་རྡོ་རྗེ་ཉོན། ། སེམས་ཅན་ཀུན་གྱི་སྐྱེད་པ་དག ། འཁོར་བར་ཡང་དག་བསྲུབས་པ་ལས། ། {དིང་,དེང་}འདིར་ཐབས་ཀྱིས་འདི་འགྱུར་རོ། ། ཐོག་མ་ཐ་མ་མེད་དུས་སུ། ། སེམས་ཅན་ཐམས་ཅད་ཡང་དག་འབྱུང་། ། རྒྱ་མཚོ་འཁྲུགས་སོགས་གཏིང་གི་བར། ། བློ་ གྲོས་ཆེན་པོ་འགྲུབས་པ་ཡིན། ། དེ་ལས་དེ་དག་སྐྱེ་བར་འགྱུར། ། ས་ཡི་ཁམས་དང་ཡང་དག་ལྡན། ། མེ་ཡིས་མཉམས་པར་ངེས་པར་བསྲུབས། ། ཆུ་དང་རླུང་གི་བྱེ་བྲག་གོ། ། ཡིད་ཀྱིས་དེ་རུ་རབ་ཞེན་པ། ། མངལ་ནི་བཟུང་ཞིང་བླངས་པ་སྟེ། ། དེ་ནི་འཁོར་བར་འཁོར་བར་ འགྱུར། ། དགའ་བ་མྱ་ངན་ལྡན་པ་སྟེ། ། དེ་ལས་འབྱུང་བར་འགྱུར་བ་ནི། ། སོ་སོར་སྐྱེ་བ་སྨྲ་བ་སྟེ། ། དེ་བཞིན་ཆོས་དག་ཟབ་མོ་ཉིད། ། སངས་རྒྱས་རྣམས་ཀྱིས་སངས་རྒྱས་བརྗོད། ། དེ་ཉིད་འདི་རྣམས་མཉམ་བཤད་པ། ། སུམ་ཅུ་པ་སྟེ་ རྙེད་པར་དཀའ། །

རྣལ་འབྱོར་མ་བཞིའི་ཁ་སྦྱོར་ལས་དེ་ཁོ་ན་ཉིད་ཀྱི་མན་ངག་སྦྱོར་བ་བཞིའི་ཆ་ཞེས་བྱ་བ་སྟེ་བརྟག་པ་བཞི་པའོ། ། ། ། དེ་ནས་ཡང་དག་བཤད་བྱ་བ། ། སྦྱིན་སྲེག་ལས་ནི་རབ་ཏུ་བསྒྲུབ། ། སྦྱིན་སྲེག་རྣམ་པ་གཉིས་སུ་གསུངས། ། ཕྱི་དང་ནང་དུ་ཡང་ དག་གནས། ། ཕྱི་རུ་ཇི་ལྟར་གསུངས་པ་ལགས། ། ནང་དུ་ཡང་ནི་ཇི་ལྟར་འགྱུར། ། ཉོན་ཅིག་རྡོ་རྗེ་ནང་གི་ནི། ། ཇི་བཞིན་སྦྱིན་སྲེག་རབ་བསྒྲུབ་བྱ། ། མེ་ཆེན་པོ་དག་རབ་ཏུ་སྦར། ། རྣམ་རྟོག་མེད་པའི་སྦྱིན་སྲེག་བྱ། ། བཟའ་བ་བཏུང་བ་གང་ཡང་རུང་། ། དེ་རུ་ཐམས་ཅད་ སྦྱིན་སྲེག་བྱ། ། སྲེག་རྫས་རང་བཞིན་གསུངས་པ་དག ། གཟུགས་ཕུང་ལ་སོགས་ལྔ་པོ་དག ། རྣམ་རྟོག་མེད་པའི་སྦྱིན་སྲེག་བྱ། ། དེ་དག་ཐམས་ཅད་སེམས་ལས་བྱུང་། ། ཁྲག་དང་ཁུ་བ་དེ་བཞིན་ཤ། ། དྲི་ཆེན་དྲི་ནུ་ལྔ་པོ་དག ། རྣམ་རྟོག་མེད་པར་བཟའ་བར་བྱ། ། བློ་ལྡན་རང་བཞིན་མེད་པས་སོ། ། གཏི་མུག་ང་རྒྱལ་དེ་བཞིན་ཆགས། ། ཞེ་སྡང་དེ་བཞིན་འདོད་ཆགས་ཉིད། ། ཕྲག་དོག་སེར་སྣ་ཕྲ་མ་དག ། དམ་ཚིག་དེ་ཉིད་དྲི་མ་མེད། ། ཇི་ལྟར་ཉི་མ་འབར་བ་བཞིན། ། དེ་ལྟར་དྲི་མ་མེད་པར་འགྱུར། ། ཇི་ལྟར་སྟོན་གྱི་ཟླ་གསལ་བ། །

དེ་ལྟར་འདི་ཡི་དབུས་གསལ་ཡིན། ། འདོད་ཆགས་ཆེན་པོར་འགྱུར་བ་ཡིན། ། རྡོ་རྗེ་སྣང་བྱེད་སྒྲོན་མ་བཞིན། ། དེ་ཉིད་ཐར་པར་གསུངས་པ་སྟེ། ། བླ་མེད་གོ་འཕང་ཐོབ་པར་འགྱུར། ། སྦྱིན་སྲེག་འདི་ལ་རབ་གནས་ན། ། ལྷ་རྣམས་དགའ་བས་ཚིམ་པ་ཡིན། ། སྦྱིན་སྲེག་ལས་ ནི་རབ་གསུངས་ནས། ། རབ་གནས་དག་ནི་བརྗོད་པར་བྱ། ། སྔོན་གྱི་རྣལ་འབྱོར་ལ་གནས་ནས། ། དེ་ནས་རབ་གནས་བྱ་བ་སྟེ། ། རབ་གནས་སྐུ་སོགས་ཐང་ཀ་དང་། ། རྣལ་འབྱོར་ཅན་གྱིས་གླེགས་བམ་སྟེ། ། དཔལ་ལྡན་གཡོན་གྱིས་དྲིལ་བུ་འཛིན། ། གཡས་ཀྱིས་རྡོ་རྗེ་ཡོངས་སུ་ གཟུང་། ། ། དོན་ཀུན་རྣལ་འབྱོར་ཀུན་གྱིས་ནི། ། མཛེས་པར་སྐུ་གཟུགས་མཆོད་པར་བྱ། ། ཤ་དང་ཆང་དག་རབ་ཏུ་བཀང་། ། རོ་ཡི་སྟེང་དུ་ཡང་དག་གནས། ། པར་པ་ཊི་ཀཱ་ཤཾ་ཀུ་ལི། ། མཆོད་པ་ཀུན་གྱིས་དགྱེས་པར་བྱ། ། མེ་ཏོག་སྤོས་དང་མར་མེ་དང་། ། དྲི་ཉིད་དང་ནི་ རྣམ་པ་བཞི། ། གླུ་དབྱངས་དེ་བཞིན་གར་དག་དང་། ། སྒྲུབ་པོས་པ་ཊ་ཧ་སོགས་ཏེ། ། སྐུ་ལ་སོགས་པ་འདི་རྣམས་ལ། ། རབ་གནས་ཆེན་པོ་བྱ་བ་ཡིན། ། ཡ་ཨིྃ་ཨཾ་ཧིཾ་ཡ་ཨི་ཨཾ། ། ཛེ་ཨིཛྫ་ཨི་མཱ་ཨ་ཨུཾ། ། མཱ་ཨ་ཨུཾ་མཱ་ཨདྷ་མྨུ་པཱ། ། པིཛྫ་ཨི་ཙིཏྟ་ཡཾ་མུ། །

ཙིཎྚིཛྫ་ ཨཻ་ས་ཨེ་ལ། ། སཏྟྲཱཏྠུ་ཀི་རི་ཛྫ་ཨི། ། གླུ་འདི་དག་ནི་བླངས་པ་ཡིས། ། དབང་རྣམས་ཀུན་ཀྱང་བླང་བ་སྟེ། ། ཆོས་རྣམས་ཐམས་ཅད་ཡང་དག་རྫོགས། ། དེ་བཞིན་གཤེགས་པ་ཀུན་གྱི་གཞི། ། མཆོད་པ་ཀུན་གྱི་སྤྲིན་ཆེན་མོ། ། སྤྲོ་ཞིང་བསྡུ་བར་བརྗོད་པའོ། ། ང་ཡིས་རབ་གནས་བཤད་པ་ནི། ། རྒྱུད་གཞན་ལས་ནི་རྙེད་པར་དཀའ། ། རྣལ་འབྱོར་མ་བཞིའི་ཁ་སྦྱོར་ལས་སྦྱིན་སྲེག་རབ་གནས་ཀྱི་བརྟག་པ་སྟེ་ལྔ་པའོ། ། ། ། དེ་ནས་མདོར་བསྡུས་རབ་བཤད་པ། ། དེ་ཉིད་གཏན་ལ་དབབ་པའི་མཆོག ། རྟག་ཏུ་སེམས་ ནི་རྣམ་རྟོག་མེད། ། རྣམ་རྟོག་བཅས་པས་ཅི་ལྟར་འགྱུར། ། ཅི་ལྟར་མེ་དག་རབ་འབར་བ། ། རྟག་ཏུ་ཤིང་རྣམས་ཚིག་པར་བརྗོད། ། དེ་ལ་ཚིག་པ་ཤིང་རྣམས་ཏེ། ། འདི་ཡིས་ཚིག་པར་མཐོང་བ་ཡིན། ། དེ་ཡིས་ཚིག་པ་ཇི་བཞིན་དུ། ། བློ་ལྡན་རྣམ་རྟོག་མེད་པ་ཡིས། ། ཕུང་པོ་ལྔ་ཡི་ཤིང་རྣམས་ཏེ། ། དེ་བཞིན་གཟུགས་ཀྱི་ཕུང་པོ་ཉིད། ། རུས་པ་རྐང་དང་བད་ཀན་དང་། ། ཁྲག་དང་ཁུ་བ་དྲི་ཆེན་དག ། མིག་གཉིས་དེ་བཞིན་རྣ་བ་དང་། ། དེ་བཞིན་དུ་ནི་སྣ་ཉིད་དང་། ། ས་དང་ཆུ་དང་དེ་བཞིན་མེ། ། རླུང་དང་ནམ་མཁའ་ཉིད་དག་དང་། ། འབྱུང་ པ་ལྔ་པོ་ཐམས་ཅད་ལ། །

དེ་ཉིད་ཉི་ཤུ་རྩ་ལྔ་དག ། དེ་ཡི་གནས་ནི་བྱེ་བྲག་ཏུ། ། ང་ཡིས་བྱེ་བྲག་བརྗོད་པ་སྟེ། ། ལྟེ་བར་གནས་པའི་འཁོར་ལོ་ཆོས། ། འདབ་མ་དྲུག་ཅུ་བཞི་དང་ལྡན། ། ཤེས་རབ་གནས་སུ་རབ་ཏུ་གསུངས། ། ཟླ་བའི་གཟུགས་བཞིན་གསལ་བ་སྟེ། ། དེ་ ཡི་དབུས་སུ་གནས་པ་དག ། མེ་ལྟ་བུར་ནི་འབར་བ་ཡིན། ། མེ་ཆེན་དེ་ནི་འབར་བ་སྟེ། ། དེ་ཡི་རྩེ་མོ་མཐོང་བ་ནི། ། དེ་ཡིས་དེ་ནི་གཟུགས་མཐོང་ཡིན། ། དངོས་པོ་ཐམས་ཅད་གཟུགས་འཛིན་པ། ། བློ་ཡི་གནས་སུ་གསུངས་ཤིང་ བརྗོད། ། ཧཱུྃ་ཡིག་ང་རོ་ཚུལ་འཛིན་པ། ། རྡོ་རྗེ་ཅན་ནི་རྟག་ཏུ་འབྱུང་། ། རྡོ་རྗེ་འཛིན་ཆེན་གཟུགས་བཞིན་ནོ། ། རླུང་གིས་བསྐྱོད་པ་མེ་ཡིན་ཏེ། ། དེ་ཡི་དབུས་སུ་རབ་ཏུ་གྲགས། ། གང་ཞིག་རི་བོང་ཅན་གཟུགས་གསུངས། ། ཤེས་རབ་དེ་ཉིད་མདོར་བསྡུས་སོ། ། ཇི་ལྟར་ཉི་མར་ རབ་ཏུ་བརྗོད། ། རྡོ་རྗེ་འཛིན་དང་བཅས་པར་འགྱུར། ། སྡེ་ཚན་བརྒྱད་ཀྱི་ཐ་མ་གཟུགས། ། ཐིག་ལེ་དང་ནི་ཞབས་ཀྱུར་བཅས། ། དེ་ཉིད་ཉི་མ་ཞེས་སུ་གསུངས། ། འོད་ཟེར་འབར་བའི་ཕྲེང་བ་ཅན། ། དེ་ཡི་དབུས་སུ་ཡང་དག་འབྱུང་། ། རྡོ་རྗེ་ཅན་གནས་མཉམ་པར་འགྱུར། ། ཇི་ལྟར་གཉིད་ཀྱིས་གཟུང་བ་ནི། །

ཅུང་ཟད་ཀྱང་ནི་མཐོང་བ་མེད། ། གཟུགས་ལ་སོགས་པའི་གཟུང་བ་དག ། ལངས་ན་རྟག་ཏུ་མཐོང་བ་ཡིན། ། དེ་རུ་ཐབས་ནི་བསྒོམ་པ་ཡིན། ། དེ་ཡི་རང་བཞིན་མཆོག་ཏུ་གྲགས། ། སེམས་ཅན་ཐོགས་མེད་བདེ་ཆེན་བརྗོད། ། དེ་རུ་དེར་ གནས་དངོས་པོ་ཡིས། ། ཤེས་རབ་ཕ་རོལ་ཕྱིན་པ་གསལ། ། དེ་ཕྱིར་དེ་ཉིད་དངོས་པོ་ཡིས། ། བློ་ལྡན་སེམས་ཀྱིས་དེ་ཉིད་གསུངས། ། སེམས་ནི་རྣམ་པར་དག་པ་སྟེ། ། འཁོར་བའི་རྒྱ་མཚོར་འཁྱམ་པར་འགྱུར། ། སྔགས་པ་གར་འདོད་འགྲོ་བ་ཡིན། ། སྐད་ཅིག་ གིས་ནི་གནས་པར་འགྲོ། ། འདོད་ཆེན་རྣམས་ནི་ཆགས་པར་འགྱུར། ། དྲག་པོ་རྣམས་ལ་དྲག་པོ་མཚོན། ། ཞི་བ་རྣམས་ལ་ཞི་བ་སྟེ། ། འདི་ནི་མདུན་རྒྱབ་རྒྱལ་བ་རིམ། ། ཇི་ལྟར་འདི་རུ་པདྨ་རིམ། ། འདོད་ཆགས་སྐྱོན་གྱིས་གོས་མི་འགྱུར། ། སྣ་ཚོགས་བག་ཆགས་སྐྱོན་ མི་ཆགས། ། ཁམས་གསུམ་པོ་ནི་དེ་བཞིན་དག ། སྟོང་པ་མ་ཡིན་མི་སྟོང་མིན། ། དབུ་མ་ཉེ་བར་ཐོབ་པའོ། ། ཤེས་རབ་ཕ་རོལ་ཕྱིན་རྣལ་འབྱོར། ། ཐབས་ནི་སྙིང་རྗེའི་བདག་ཉིད་དོ། ། འདི་ནི་བྱང་ཆུབ་སེམས་རྡོ་རྗེ། ། སེམས་དང་སེམས་བྱུང་རང་བཞིན་གྱིས། ། དངོས་པོ་ མེད་པར་སྒོམ་པའི་དངོས། ། དེ་ལ་བསྒོམ་པར་བརྗོད་པ་མིན། །

ཕྲེང་བ་མེད་ཅིང་བྱ་བ་མེད། ། སྤུངས་པ་མེད་པར་བརྗོད་པ་སྟེ། ། རྣལ་འབྱོར་འདི་ལ་གནས་པ་ནི། ། དབུ་མའི་མཆོག་གི་གོ་འཕང་ངོ་། ། བླ་ན་མེད་པའི་ཡེ་ཤེས་ནི། ། བླ་མེད་ཞེས་ནི་རིམ་པ་མེད། ། འདིས་ ནི་འཁོར་བ་རྣམ་པར་གྲོལ། ། ཕྱིར་མི་ལྡོག་པའི་གོ་འཕང་མཆོག ། རྡོ་རྗེ་སེམས་དཔའ་ཞེས་སུ་གསུངས། ། དེ་ཡིས་རྡོ་རྗེ་སེམས་དཔའ་འགྲུབ། ། སྐྱེ་བ་འདི་ལ་གྲུབ་པ་སྟེ། ། རྡོ་རྗེ་སེམས་དཔའ་དང་མཉམ་འགྱུར། ། ཁྲག་དང་ཁུ་བ་བཟའ་བ་སྟེ། ། དྲི་ཆེན་དྲི་ཆུ་ཤ་དང་ ལྔ། ། དེ་ཡི་ཚེ་ནི་རྒྱས་པར་འགྲོ། ། རྡོ་རྗེ་སེམས་དཔའ་དང་མཉམ་འགྱུར། ། བ་ཧཱུ་བི་ཧ་ཧཱུྃ་ཀཱ་ར་ག་ཏི་བ་ཧཱུྃ་བི་ཧ། ། རཱུ་པ་དྷཱ་རི་ཎེ་བ་ཧཱུྃ་བི་དྷནཱ་ནཱ་རཉྫི་ཧ། བ་ཧཱུ་བི་ཧ་བྲྀ་ཏྱ་གཱི་ཏཏྱ། ། བ་ཧུ་བི་ཧ་ཛི་བ་སནྟ་ཏྱ་ཤེ། ། ཥཿནི་ཤེ་ཥ་ས་ཏྭ་བི་ན་ཡ་བི་དིགྦྷན་ས་མ་ར་སྟུ་བི་ཤུདྡྷེ་ཧཿཧཿཧཿཧཿཧོཿ། ཨ་ ཧཻ་སམྦ་རེ་སིཛྫྷ་མ་ཧཱུྃ་ཨ་ཧོ། ། ཤུཾ་ཧ་ཧཱུྃ་རེ་ཨུ་པ་རཱུ་ཨ་ལ་ལ་ལ་ལ་ཧོཿ། གླུ་འདི་དག་ནི་བླངས་པ་སྟེ། ། བརྟག་པ་ཀུན་གྱི་བླ་ན་མེད། ། དེ་ཡི་ཚེ་ནི་རྒྱས་པར་འགྲོ། ། རྡོ་རྗེ་སེམས་དཔའ་དང་མཉམ་འགྱུར། །

རྣལ་འབྱོར་མ་བཞིའི་ཁ་སྦྱོར་ལས་དེ་ཁོ་ན་ཉིད་གཏན་ལ་དབབ་པ་ཞེས་བྱ་བ་སྟེ་ བརྟག་པ་དྲུག་པའོ། ། ། ། དེ་ནས་ཡང་དག་བཤད་བྱ་བ། ། དེ་ཉིད་རྣལ་འབྱོར་ཐམས་ཅད་ནི། ། སྦྱིན་དང་ཚུལ་ཁྲིམས་བརྩོན་དེ་བཞིན། ། བསམ་གཏན་བཟོད་པ་ཤེས་རབ་དང་། ། སྟོབས་དང་དེ་བཞིན་ཐབས་དང་ནི། ། སྨོན་ལམ་ཡེ་ཤེས་ཡང་དག་འབྱུང་། ། ཕ་རོལ་ ཕྱིན་པ་བཅུ་རྫོགས་པ། ། བྱང་ཆུབ་སེམས་དཔའི་སྡོམ་པ་ཡི། ། སྦྱིན་པ་རྣམ་པ་བཞི་རུ་གསུངས། ། ཚུལ་ཁྲིམས་གསུམ་གྱི་ངོ་བོ་ཉིད། ། བསམ་གཏན་རྣམ་བཞིར་གསུངས་པ་སྟེ། ། བརྩོན་འགྲུས་རྣམ་པ་ལྔ་རུ་འགྱུར། ། བཟོད་པ་རྣམ་པ་བཅུར་ཤེས་བྱ། ། ཤེས་རབ་རྣམ་ པ་དྲུག་ཏུ་འགྱུར། ། སྟོབས་ནི་རྣམ་བཅུ་རབ་ཏུ་གསུངས། ། ཐབས་ནི་རྣམ་པ་ལྔར་འགྱུར་ཏེ། ། སྨོན་ལམ་གཉིས་སུ་ཤེས་བྱ་སྟེ། ། ཡེ་ཤེས་རྣམ་ལྔར་གནས་པའོ། ། ཆོས་དང་མི་འཇིགས་རྫས་དང་བྱམས། ། སྦྱིན་པ་རྣམ་པ་བཞི་པོ་ནི། ། སྦྱིན་པའི་ཕ་རོལ་ཕྱིན་པའོ། ། ངར་འཛིན་མེད་ཅིང་ཁེངས་པ་བྲལ། ། བདེན་པ་གཉིས་མེད་གནས་པ་ནི། ། ཚུལ་ཁྲིམས་རྣམ་གསུམ་བརྗོད་པ་ནི། ། ཚུལ་ཁྲིམས་ཕ་རོལ་ཕྱིན་པར་གསུངས། ། གང་གིས་རྣལ་འབྱོར་མ་གཉིས་དང་། །

ཕྱི་ཡི་རྣམ་པ་གཉིས་སུ་གསུངས། ། བསམ་ གཏན་ཕ་རོལ་ཕྱིན་པ་ནི། ། དྲི་ཆེན་དྲི་ཆུ་དེ་བཞིན་ཤ། ། ཁྲག་དང་ཁུ་བར་ཡང་དག་འབྱུང་། ། འདི་རྣམས་བརྩོན་འགྲུས་ལྔ་པོ་ནི། ། དམ་ཚིག་སྒྲ་ཡིས་བརྗོད་པའོ། ། ཚིག་རྩུབ་{བརྫུན་,རྫུན་}དང་ངག་འཁྱལ་དང་། ། ཆགས་སྡང་ཞེ་སྡང་ཕྲག་དོག་དང་། ། ང་རྒྱལ་ཁྲོ་དང་དེ་བཞིན་དབྱེན། ། འདི་བཅུ་རྣམ་པར་བཤད་པ་ནི། ། རྡོ་རྗེ་ཅན་ནི་བཟོད་བཅས་འགྱུར། ། ཡང་དག་ལྟ་བ་ཡང་དག་རྟོག ། ཡང་དག་ངག་དང་ཡང་དག་ལས། ། ཡང་དག་འཚོ་དང་ཡང་དག་རྩོལ། ། བདག་གིས་མདོ་རུ་བསྡུས་ནས་ནི། ། ཤེས་རབ་རྣམ་པ་དྲུག་ཏུ་བརྗོད། ། དད་པའི་སྟོབས་ དང་དྲན་པའི་སྟོབས། ། ཏིང་འཛིན་སྟོབས་དང་ཤེས་རབ་སྟོབས། ། ལུས་ཀྱི་སྟོབས་དང་ངག་གི་སྟོབས། ། ཡེ་ཤེས་སྟོབས་དང་སྨོན་ལམ་སྟོབས། ། བརྩོན་འགྲུས་ཀྱི་ནི་སྟོབས་རྣམས་ཏེ། ། འདི་རྣམས་སྟོབས་ནི་བཅུ་པའོ། ། མ་སྐྱེས་པ་ཡི་དགེ་བ་བསྐྱེད། ། སྐྱེས་པའི་ མི་དགེ་ཡང་དག་སྤོང་། ། མི་དགེ་མ་སྐྱེས་མི་སྐྱེད་དང་། ། དགེ་བ་སྐྱེས་པ་འཕེལ་བ་སྟེ། ། བཞི་པོ་ཐམས་ཅད་ཆོས་རྣམས་ཀྱི། ། དགེ་བའི་ཆོས་རྣམས་གསུངས་པ་ནི། ། རྫོགས་པར་བྱེད་པ་ཉིད་དག་གོ། །

སྨོན་ལམ་རྣམ་པ་གཉིས་སུ་གནས། ། མེ་ལོང་མཉམ་ཉིད་སོ་སོར་ རྟོག ། བྱ་གྲུབ་ཆོས་དབྱིངས་རྣམ་པར་དག ། ཡེ་ཤེས་རྣམ་པ་ལྔ་རུ་འགྱུར། ། འདི་རྣམས་བཅུ་བཞི་པོ་དག་ནི། ། ཕ་རོལ་ཕྱིན་པ་མདོར་བསྡུས་པ། ། བདག་གིས་དེ་ཉིད་བརྗོད་པ་སྟེ། ། རྡོར་ཅན་ཉོན་ཅིག་གཏན་ལ་དབབ། ། བཅུ་གཉིས་མཐའ་དང་དགུ་ཡི་མཐའ། ། མགོ་ནས་ རྐང་པའི་མཐིལ་བར་དུ། ། དེ་ཡི་དབུས་སུ་ངེས་འགྱུར་བ། ། ལྟེ་བའི་དབུས་སུ་རྣམ་པར་གནས། ། རྟག་ཏུ་ཤར་བར་འགྱུར་བ་སྟེ། ། འདི་རུ་རྡོ་རྗེ་ཅན་གྱིས་མཐོང་། ། ལུས་ངག་སེམས་ཀྱི་དབུས་དག་ཏུ། ། འབར་བའི་ཕྲེང་བ་འབར་བའོ། ། སྟེང་གི་སྒོ་རུ་རྟག་གནས་པའོ། ། ཉི་ མའི་འོད་ཟེར་ཕྲེང་བ་ཅན། ། ཅུང་ཟད་ལུས་ལས་མཐོང་བ་མེད། ། མགལ་མེའི་འཁོར་ལོའི་གཟུགས་ཅན་ཏེ། ། དེ་ཉིད་རྣལ་འབྱོར་ལམ་གྱིས་ནི། ། རྟག་པའི་དུས་སུ་རྣམ་པར་གནས། ། དེ་ལ་དབྱར་གྱི་དུས་མེད་ཅིང་། ། དཔྱིད་མེད་སྟོན་ཡང་ཡོད་མ་ཡིན། ། དགུན་མེད་ སོས་ཀྱང་མེད་པ་རུ། ། རྣལ་འབྱོར་པས་ནི་རྟག་ཏུ་བསྒོམ། ། སྔགས་པས་སེང་གེ་བཞིན་དུ་སྤྱོད། ། སྔགས་དང་རྒྱུད་ལ་ཇི་ལྟར་གནས། ། ཉ་དང་ཤ་ནི་བཟའ་བར་བྱ། ། ཆང་གི་བཏུང་བ་མཆོག་ཡིན་ནོ། །

བཅུད་ཀྱིས་ལེན་གྱི་ཆོ་ག་ཡིས། ། སྔགས་ནི་བརྗོད་པར་མི་བྱའོ། ། མཚོན་ ཆའི་གནས་ལ་དུས་རྟག་ཏུ། ། མཚོན་བྱའི་མཚན་ཉིད་མཚོན་པར་བྱ། ། བཅོམ་ལྡན་འདས་ཀྱིས་དེ་སྐད་ཅེས་གསུངས་པ་ལ་འཁོར་ལྷ་དང་མི་དང་ལྷ་མ་ཡིན་དང་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། ། ། ། རྣལ་འབྱོར་མ་བཞིའི་ཁ་སྦྱོར་ཞེས་བྱ་བ་རྒྱུད་ཀྱི་རྒྱལ་པོ་ཆེན་པོ་རྫོགས་སོ། ། ། ། དཔལ་ཨོཊྜྻཱན་ནས་ངེས་པར་འབྱུང་བའི་རྣལ་འབྱོར་མའི་རྒྱུད་ཆེན་པོ་སྟོང་ཕྲག་བཅུ་གཉིས་པ་ལས་འཇིག་རྟེན་པ་དང་འཇིག་རྟེན་ལས་འདས་པའི་རྒྱལ་པོ་ཆེན་པོ་དཔལ་ཨིནྡྲ་བྷཱུ་ཏིའི་ཞབས་ཀྱིས་ བཀོལ་ཅིང་གསལ་བར་མཛད་པའོ། ། བོད་ཀྱི་ལོཙྪ་བ་ལ་ཆིངས་ཡོན་ཏན་འབར་གྱིས་བསྒྱུར་ཏེ། ། སླད་ཀྱིས་དེ་ཉིད་ཀྱི་ཚེ་པཎྜི་ཏ་གཉིས་ལ་ཡང་གཏུགས་ཏེ་གཏན་ལ་ཕབ་པ། །