༄༅། ། རྒྱ་གར་སྐད་དུ། བཛྲ་སཱུ་ཀྵྨ་ཨ་པྲ་ཏི་ཧ་ཏ་ནཱ་མ་དྷཱ་ར་ཎཱི། བོད་སྐད་དུ། རྡོ་རྗེ་ཕྲ་མོ་ཐོགས་པ་མེད་པ་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ རྡོ་རྗེ་རིགས་པའི་ཏིང་ངེ་འཛིན་ལ་སྙོམས་པར་ཞུགས་སོ། ། སངས་རྒྱས་ཀྱི་མཐུས་གསང་བ་པའི་བདག་པོ་རྡོ་རྗེ་ཧཱུྃ་ཞེས་བྱ་བས་བཞིན་རབ་ཏུ་འབར་བ་བསྟན་ཏེ། བཅོམ་ལྡན་འདས་ཀྱི་ཐད་དུ་འདུག་གོ། ། དེའི་ཚེ་བཅོམ་ལྡན་འདས་ཀྱི་ཐུགས་ཀྱི་སྤྲུལ་པ་ལས་བྲམ་ཟེའི་ཁྱེའུ་ཅིག་བྱུང་སྟེ། གསང་བ་པའི་བདག་པོ་ལ་འདི་སྐད་ཅེས་སྨྲས་སོ། ། གསང་བ་པའི་བདག་པོ། རིག་པའི་བདག་པོ། གཟུངས་ཀྱི་བདག་པོ། ལྷ་གནས་གསུམ་པོ་དག་ན་ལྷ་ཉམ་ཆུང་བ་དང་། ཀླུ་ཉམ་ཆུང་བ་ལ་ཟིལ་གྱིས་གནོན་པ་དྲག་པོས་རབ་ཏུ་གཞོམ་པའི་གསང་སྔགས་དང་རིག་སྔགས་ གཟུངས་སྔགས་རྣམས་རབ་ཏུ་བརྗོད་དུ་གསོལ། ལག་ན་རྡོ་རྗེས་སྨྲས་པ། བྲམ་ཟེའི་ཁྱེའུ་རབ་ཏུ་ཉོན་ལ་ཡིད་ལ་ཟུང་ཤིག་དང་། ང་ཡིས་བདེ་གཤེགས་ཁྲོ་བོ་ཐམས་ཅད་ཀྱིས་རྟག་ཏུ་བརྗོད་པའི་ཡང་སྙིང་འདི་རབ་ཏུ་སྨྲས་སོ། ། ན་མོ་རཏྣ་ཏྲ་ཡཱ་ཡ། ན་མ་ཤྩཎྜ་བཛྲ་པཱ་ཎ་ཡེ།

མ་ཧཱ་ ཡཀྵ་སེ་ནཱ་པ་ཏ་ཡེ། ཏདྱ་ཐཱ། ཨོྃ་ཧཱ་ར་ཧ་ར་བཛྲ། མ་ཐ་མ་ཐ་བཛྲ། དྷུ་ན་དྷུ་ན་བཛྲ། ད་ཧ་ད་ཧ་བཛྲ། པ་ཙ་པ་ཙ་བཛྲ། དྷ་ར་དྷ་ར་བཛྲ། དཱ་ར་ཡ་དཱ་ར་ཡ་བཛྲ། དཱ་རུ་ཎ་དཱ་རུ་ཎ་བཛྲ། ཙྪིནྡ་ཙྪིནྡ་བཛྲ། བྷིནྡ་བྷིནྡ་བཛྲ་ཧཱུྃ་ཕཊ། ན་མ་ཤྩཎྜ་བཛྲ་ཀྲོ་དྷཱ་ཡ། ཧུ་ལུ་ཧུ་ལུ། ཏིཥྛ་ཏིཥྛ། བན་དྷ་བན་དྷ། ཧ་ན་ཧ་ན། ཨ་མྲྀ་ཏེ་ཧཱུྃ་ཕཊ། བྲམ་ཟེའི་ཁྱེའུ་གང་ལ་ལ་ཞིག་གིས་བདེ་གཤེགས་བདུད་རྩི་འཁྱིལ་པའི་ཆ་བཟུང་སྟེ། ཁྲོ་བོ་ཐམས་ཅད་ཀྱི་རྡོ་རྗེའི་ཚིག་འདི་རབ་ཏུ་སྨྲ་ཞིང་། བ་སྤུའི་བུ་ག་ཐམས་ཅད་ནས་རྡོ་རྗེ་ཕྲ་མོ་གྲངས་མེད་པ་སྤྲུལ་ཏེ་ཕྱོགས་བཅུར་སྤྲོས་ན། སེམས་ཅན་ཐམས་ཅད་ཀྱི་བག་ཆགས་ངན་པ་བྱང་། ཚེ་དང་བསོད་ནམས་རབ་ཏུ་རྒྱས་ཏེ། དགྲ་དང་། དུག་དང་། དུས་མ་ཡིན་པར་འཆི་བ་ལས་རྣམ་པར་ཐར་ནས། གང་ཞིག་གིས་དམིགས་པའི་རྒོལ་བ་ངན་པ་ལ་རྩི་མ་གི་ཏ་སྤྲིན་གྱིས་བཤིག་པའམ། སྐྱུ་རུ་ར་རློན་པ་གསེར་ གྱིས་གཞིབས་པ་བཞིན་དུ་དམིགས་ཏེ། རྡོ་རྗེའི་ཚིག་འདི་སྨྲ་ཞིང་། རྡོ་རྗེ་ཕྲ་མོ་སྤྲོས་པས་དེ་དག་གི་ཕུང་པོ་ལྔ་དབང་པོ་ལྔ་མྱུར་དུ་བརླག་པར་འགྱུར་རོ། ། ལྷས་སྨྲས་ན་ལྷའི་ཟླ་བ་གཅིག་གམ།

ལོ་ལྔ་ན་ལྷ་མ་ཡིན་མགོ་འགས་པར་འགྱུར་རོ། ། དགེ་སློང་གིས་སྨྲས་ན་བདུད་ཀྱི་ མཚོན་ཆ་རྣམས་མྱུར་དུ་བཏུལ་བར་འགྱུར་རོ། ། མིས་བརྗོད་ན་གང་ལ་དམིགས་པ་དེ་མིའི་ཟླ་བ་གཅིག་གམ། མིའི་ལོ་ལྔ་ན་ངེས་པར་བརླག་པར་འགྱུར་རོ། ། བཅོམ་ལྡན་འདས་ཀྱིས་ལག་ན་རྡོ་རྗེ་དང་། བྲམ་ཟེའི་ཁྱེའུ་ལ་ལེགས་སོ་ཞེས་བྱ་བ་བྱིན་ནས་མི་སྣང་བར་གྱུར་ཏོ། ། དེ་ནས་ བྲམ་ཟེའི་ཁྱེའུ་དེས་ཚངས་པའི་སྐད་ཕྱུང་སྟེ། རྡོ་རྗེའི་ཚིག་འདི་ལྷ་གནས་གསུམ་པོར་བསྒྲགས་སོ། ། རྡོ་རྗེ་ཕྲ་མོ་ཐོགས་པ་མེད་པ་ཞེས་བྱ་བའི་གཟུངས་རྫོགས་{སྷོ,སོ}། །