BO༄༅། ། རྒྱ་གར་སྐད་དུ། ཨཱརྱ་སརྦ་ནི་བ་ར་ཎ་བི་སྐཾ་བྷི་ནཱི་ནཱ་མཱ་ཥྚོཏྟ་ར་ཤ་ཏ་ཀ་དྷཱ་ར་ཎཱི་མནྟྲ་ས་ཧི་ཏ། བོད་སྐད་དུ། འཕགས་པ་སྒྲིབ་པ་ཐམས་ཅད་རྣམ་པར་སེལ་བའི་མཚན་བརྒྱ་རྩ་བརྒྱད་པ་གཟུངས་སྔགས་དང་བཅས་པ། བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་ པ་ཐམས་ཅད་རྣམ་པར་སེལ་བ་ལ་ཕྱག་འཚལ་ལོ། ། ཨོཾ་ཨ་མྲྀ་ཏ་བིནྡུ་ཛ་བ་མ་ཧཱ་སུ་ཁ་སྭཱ་ཧཱ། དེ་ནས་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་ཀྱིས་ཕྱག་གཡས་པ་བརྐྱང་སྟེ་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་ པར་སེལ་བ་ཚིམ་པར་མཛད་ནས་བཀའ་སྩལ་པ། ཡོན་ཏན་རིན་པོ་ཆེའི་ཚོགས་ཅན་ཁྱོད་ཀྱི་གཟུངས་སྔགས་འདི་ཕྱུང་བས་སེམས་ཅན་རྣམས་ཀྱི་བདེ་བ་ཆེན་པོ་བསྐྱེད་པ་ལེགས་སོ་ལེགས་སོ། ། ཀྱེ་རྒྱལ་བའི་སྲས་གང་ལ་ལ་གཟུངས་སྔགས་འདི་ཐོས་པ་དེ་ནི་དེ་བཞིན་ གཤེགས་པ་གང་གཱའི་ཀླུང་བཅུའི་བྱེ་མ་སྙེད་ཀྱི་སྤྱན་སྔར་དགེ་བའི་རྩ་བ་བསྐྱེད་པ་དང་ལྡན་པར་འགྱུར་རོ། ། གང་ལ་ལའི་རྣ་ལམ་དུ་གྲགས་པར་གྱུར་པ་དེ་ཡང་སྒྲིབ་པ་དང་བྲལ་བར་འགྱུར་རོ། ། སྐུ་གདུང་དང་ལྡན་པའི་མཆོད་རྟེན་གྱི་དྲུང་དུ་ཟླ་བ་ཡར་གྱི་ངོ་ཚེས་བརྒྱད་དམ།
BOཚེས་བཅོ་ལྔ་ལ་སྨྱུང་བར་འདུག་ཅིང་གསོ་སྦྱོང་དང་ལྡན་པར་བྱས་ཏེ། སྤོས་དང་། བདུག་པ་དང་། མར་མེ་དང་། མེ་ཏོག་དང་། མེ་ཏོག་ཕྲེང་དང་། བྱུག་པ་ལ་སོགས་པས་མཆོད་ལ་བསྐོར་བ་བྱས་ནས་བཟླས་བརྗོད་བྱས་ན་དམ་པ་ཅི་འདོད་པ་ཐོབ་པར་འགྱུར་ཏེ། སྡིག་པ་ ཐམས་ཅད་དང་སྡུག་བསྔལ་བ་དང་། འཇིགས་པ་ཐམས་ཅད་ལས་ཐར་བར་འགྱུར་རོ། ། བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་ལ་སྤོས་ལ་སོགས་པས་མཆོད་དེ་བཟླས་བརྗོད་བྱས་ན་རྨི་ལམ་དུ་སྟོན་པར་འགྱུར་ཏེ། བསམ་པ་ཐམས་ཅད་ཡོངས་ སུ་རྫོགས་པར་བྱེད་ཅིང་། ཉོན་མོངས་པ་དང་སྡུག་བསྔལ་བ་ཐམས་ཅད་སེལ་བར་བྱེད་དོ། ། དེ་ནས་རྡོ་རྗེ་མེ་ཏོག་ཐོད་ཆེན་པོ་ས་གསུམ་གྱི་དབང་ཕྱུག་དང་ཐབས་ཅིག་ཏུ་འཁོར་གྱི་དཀྱིལ་འཁོར་ཆེན་པོ་དེའི་ནང་ནས་སྟན་ལས་ལངས་ཏེ། བྱང་ཆུབ་སེམས་དཔའ་ཆེན་པོ་སྒྲིབ་པ་ ཐམས་ཅད་རྣམ་པར་སེལ་བ་ལ་བཏུད་ནས་མཚན་བརྒྱ་རྩ་བརྒྱད་ཀྱིས་མངོན་པར་བསྟོད་པ། སེམས་ཅན་ཀུན་གྱི་གཙོ་བོ་ཆེ། ། བྱང་ཆུབ་སེམས་དཔའི་ཚུལ་ཆེ་བ། ། ཉོན་མོངས་དྲི་མ་ཀུན་ལས་འདས། ། ཆོས་དབྱིངས་ཁྱོད་ལ་ཕྱག་འཚལ་ལོ། ། སྒྲིབ་པ་ཀུན་ལས་ངེས་ པར་གྲོལ། ། ཉོན་མོངས་ངས་དྲི་མ་ཀུན་སེལ་ཅིང་། །
BOཉེས་པ་ཀུན་ལས་རྣམ་པར་གྲོལ། ། སྐྱོན་བྲལ་ཁྱོད་ལ་ཕྱག་འཚལ་ལོ། ། ལམ་སྲང་གཅིག་བུའི་ཚུལ་སྟོན་ཅིང་། ། ཐེག་པ་གཅིག་པུའི་ཚུལ་གཅིག་པ། ། ཐེག་པ་ཆེན་པོའི་ཚུལ་བརྙེས་ཏེ། ། ཐེག་པ་དག་པ་ཁྱོད་ཕྱག་ འཚལ། ། སྣང་བ་ཆེན་པོ་སྣང་བ་བརྙེས། ། ཡོན་ཏན་དཀྱིལ་འཁོར་འཇིག་རྟེན་བདག ། ཟླ་བ་བཞིན་དུ་འོད་དཀར་བ། ། འཇིག་རྟེན་འདས་པ་ཁྱོད་ཕྱག་འཚལ། ། ཐེག་པ་ཆེན་པོ་དག་པ་ཆེ། ། སངས་རྒྱས་ཐེག་པ་རྟོག་གྱུར་ཅིང་། ། རྡོ་རྗེའི་དཀྱིལ་འཁོར་རྣམ་གྲགས་པ། ། རྡོ་རྗེ་ཆེན་པོ་ཁྱོད་ཕྱག་འཚལ། ། དཔའ་བོ་ཆེན་པོ་བདུད་ལས་རྒྱལ། ། དར་བ་ཆེན་པོ་ཉོན་མོངས་ཆོམས། ། བགེགས་ཐུབ་གཤིན་རྗེ་ཐུབ་པ་སྟེ། ། རིན་ཆེན་དྲ་བ་ཁྱོད་ཕྱག་འཚལ། ། ཟླ་བ་ཆེན་པོ་ཉི་མ་ཆེ། ། ལྷུན་པོ་ཆེན་པོ་དབང་ཕྱུག་ཆེ། ། ལྷ་ཆེན་མགོན་པོ་ཆེན་པོ་སྟེ། ། འབྱོར་པ་ཆེན་པོ་ཁྱོད་ཕྱག་འཚལ། ། སྒྲིབ་པ་ཐམས་ཅད་གཅོད་མཛད་ཅིང་། ། སྒྲིབ་པ་ཐམས་ཅད་སེལ་མཛད་པ། ། ཀུན་མཁྱེན་ཡོན་ཏན་བདག་ཉིད་ཆེ། ། རྣམ་སེལ་ཁྱོད་ལ་ཕྱག་འཚལ་ལོ། ། སངས་རྒྱས་སྤྱོད་ཡུལ་ཞུགས་པ་སྟེ། ། ཆོས་ཀྱི་སྤྱོད་ཡུལ་གཤེགས་པ་ ལགས། ། ཡེ་ཤེས་དབང་ཕྱུག་ཡེ་ཤེས་ཆེ། །
BOསྲེད་བྲལ་ཁྱོད་ལ་ཕྱག་འཚལ་ལོ། ། སྐུ་མཛེས་ཡོན་ཏན་སྙིང་པོ་མཁྱེན། ། རྡོ་རྗེ་ཡི་ནི་དཀྱིལ་འཁོར་བརྒྱན། ། སངས་རྒྱས་ལམ་སྟེ་དོན་ཡོད་ཆེ། ། ཡེ་ཤེས་དག་པ་ཁྱོད་ཕྱག་འཚལ། ། བསྟེན་པ་གནས་པ་ དབང་དག་པོ། ། བདེ་མཛད་ཐུགས་ཀྱང་ཞིབ་སྟེ། ། ཡངས་པ་དྲི་མེད་ཤེས་རབ་ཅན། ། སྣང་བ་དག་པ་ཁྱོད་ཕྱག་འཚལ། ། ཟབ་ཅིང་བརྟན་ལ་རྣམ་པར་གནོན། ། ཞི་ལ་འཇིག་རྟེན་དག་པར་མཛད། ། སྟོན་པ་སྐྱབས་འོས་སྲིད་གསུམ་ན། ། དཔའ་བཙན་ ཁྱོད་ལ་ཕྱག་འཚལ་ལོ། ། སྐལ་བ་ཆེན་པོ་ཉོན་མོངས་བཅོམ། ། འཁོར་བའི་དཀྱིལ་འཁོར་འཇོམས་པ་སྟེ། ། ཞི་བ་ཞི་མཛད་བདེ་འབྱུང་བ། ། ཆུ་བོ་ཞི་མཛད་ཁྱོད་ཕྱག་འཚལ། ། ཐར་པའི་རྒྱུ་སྟེ་ཆོས་ལུགས་ཆེ། ། བདེ་འགྲོར་གནས་པ་དྲི་མ་མེད། ། རྣམ་དག་ཐུགས་མངའ་ ཞི་བ་མཁྱེན། ། ཉེས་སེལ་ཁྱོད་ལ་ཕྱག་འཚལ་ལོ། ། རྩེ་མོ་ཡངས་པར་རྣམ་པར་གྲགས། ། སྔགས་ཆེན་མང་པོས་འདུལ་མཛད་པ། ། སྙིང་པོ་ཆེན་པོ་དཀྱིལ་འཁོར་མཆོག ། དཀྱིལ་འཁོར་མཁྱེན་པ་ཁྱོད་ཕྱག་འཚལ། ། སྡུག་བསྔལ་གསུམ་སེལ་གསུམ་གྱི་མཆོག ། དཀོན་མཆོག་གསུམ་དང་སྤྱོད་ཡུལ་འདྲ། ། རྣམ་གསུམ་མཁྱེན་པ་རྙེད་པའི་བདག ། རྣམ་ཐར་གསུམ་ཁྱོད་ཕྱག་འཚལ་ལོ། །
BOབྱང་ཆུབ་སེམས་དཔའ་ཡོན་ཏན་གྱི། ། འབྱོར་པ་བརྙེས་ཤིང་མཉམ་ཉིད་བརྙེས། ། བསྐལ་པ་དག་ནི་གྲངས་མེད་པར། ། ཚོགས་ཆེན་ བསགས་པ་ཁྱོད་ཕྱག་འཚལ། ། ས་ལ་གནས་པ་ས་ཆེན་བརྙེས། ། ས་ཡི་འབྲས་བུ་ཕུན་སུམ་ཚོགས། ། ཡང་དག་ས་འཛིན་ལས་བྱུང་བ། ། ཡེ་ཤེས་ས་ཁྱོད་ཕྱག་འཚལ་ལོ། ། ཏིང་ངེ་འཛིན་ལ་མངའ་བརྙེས་པ། ། ཉེས་གསུམ་སྤངས་ཤིང་སྡིག་པ་སེལ། ། ཏིང་འཛིན་མཁྱེན་ཅིང་རྒྱ་ཆེ་བ། ། མཉམ་པ་ཉིད་མཉམ་ཁྱོད་ཕྱག་འཚལ། ། མགོན་པོ་ཆེན་པོ་སྣང་བ་ཆེ། ། སྡུག་བསྔལ་ཆེན་པོའི་དྲི་མ་སེལ། ། ཞི་གྱུར་མ་ལུས་ཞི་མཛད་པ། ། ཡོན་ཏན་ཕ་མཐའ་ཁྱོད་ཕྱག་འཚལ། ། སངས་རྒྱས་ཀུན་མཚུངས་གསུང་ལྡན་པ། ། ཆོས་ ཀུན་ཞི་བ་ཕུན་སུམ་ཚོགས། ། དཀོན་མཆོག་གསུམ་རིགས་དཔེ་མེད་པ། ། རིན་ཆེན་མཐའ་ཡས་ཁྱོད་ཕྱག་འཚལ། ། རྡོ་རྗེ་ཆེན་པོ་དྲི་མེད་མཆོག ། རྡོ་རྗེའི་མཚོན་བསྣམས་སྡིག་མི་མངའ། ། ནམ་མཁའ་མ་ལུས་ཡུལ་དང་ལྡན། ། ཡེ་ཤེས་སྤྱོད་ཡུལ་རྒྱ་མཚོ་མངའ། ། དེ་བཞིན་གཤེགས་དང་ཡུལ་གཅིག་པ། ། སེལ་བ་པོ་སྟེ་དྲི་མ་སྦྱོང་། ། ཤེས་རབ་ཆེན་པོ་རྒྱལ་བའི་སྲས། ། སྲེད་གཅོད་ཁྱོད་ལ་ཕྱག་འཚལ་ལོ། ། རྡོ་རྗེའི་དཀྱིལ་འཁོར་རྡོ་རྗེའི་མཆོག །
BOརྡོ་རྗེས་འདུལ་བ་རྡོ་རྗེ་འཆང་། ། རྡོ་རྗེ་རྩལ་ཅན་རྣམས་ཀྱི་རྩལ། ། རྡོ་རྗེ་སྣང་བ་ཁྱོད་ ཕྱག་འཚལ། ། རིན་ཆེན་ཆེན་པོ་རིན་ཆེན་བློ། ། རིན་ཆེན་རྡོ་རྗེ་འོད་ཆེ་བ། ། རིན་ཆེན་འོད་མཛེས་རིན་ཆེན་འབྱུང་། ། རིན་ཆེན་བསྟན་པ་སྲུང་མཛད་པ། ། སྟོང་པ་ཉིད་ཀྱི་ཡུལ་བརྙེས་པ། ། ཡེ་ཤེས་སྟོང་པ་ཉིད་ཀྱིས་སྟོན། ། སྟོང་ཉིད་ལོངས་སྤྱོད་ཡུལ་དང་ལྡན། ། སྟོང་ཉིད་ མཆོག་ཁྱོད་ཕྱག་འཚལ་ལོ། ། ཤེས་རབ་མཚུངས་མེད་ཤེས་རབ་ཅན། ། དགེ་བ་རྣམ་དག་ས་དང་བྲལ། ། ཆོས་གཅིག་ལས་བྱུང་སྣང་པ་པོ། ། འཇིག་རྟེན་འདས་པའི་ཚུལ་ཆེན་ལགས། ། འཇིག་རྟེན་སྣང་མཛད་སྨྲ་མཁས་པ། ། འཇིག་རྟེན་ཆོས་ལས་རྣམ་པར་ འདས། ། འཇིག་རྟེན་མཁྱེན་པའི་ཡོན་ཏན་བརྙེས། ། བརྒྱན་པར་མཛད་པ་དཀྱིལ་འཁོར་དག ། ཉེས་པ་མ་ལུས་སེལ་བ་སྟེ། ། ཕལ་ཆེན་སྐྱེ་བོ་ཀུན་ལ་ཕན། ། ས་འཛིན་རྣམ་པར་གྲགས་པ་པོ། ། ཀུན་མཁྱེན་ཁྱོད་ལ་ཕྱག་འཚལ་ལོ། ། དགའ་མཁྱེན་དགའ་ ལ་ལོངས་སྤྱོད་པ། ། དགའ་བའི་རིག་མཆོག་རྣམས་ཀྱི་མཆོག ། དགའ་བར་མཛད་པའི་རྟོག་པ་ཅན། ། དགའ་ལ་སྣང་བ་ཁྱོད་ཕྱག་འཚལ། ། སྒེག་ཆེན་འཇོམ་ཞིང་དགོངས་པར་ལྡན། ། རྣམ་པར་སྒེག་ལ་སྤྱོད་པ་བརྟན། །
BOརྡོ་རྗེའི་རིག་པ་སྒེག་པའི་མཆོག ། སྒེག་ ཆེན་ཁྱོད་ལ་ཕྱག་འཚལ་ལོ། ། སངས་རྒྱས་བྱང་ཆུབ་སེམས་དཔའི་མཆོག ། རྡོ་རྗེ་མཆོག་གི་དཀྱིལ་འཁོར་ཆེ། ། ཐེག་པ་ཆེན་པོའི་ཚུལ་ལ་གནས། ། བླ་མེད་མཆོག་ཁྱོད་ཕྱག་འཚལ་ལོ། ། དཔའ་བོ་བྱང་ཆུབ་སེམས་དཔའི་མཆོག ། སྒྲིབ་པ་ཐམས་ཅད་སེལ་ མཛད་ལ། ། རྡོ་རྗེའི་དཀྱིལ་འཁོར་འཁོར་རྣམས་ཀྱིས། ། མིང་བརྒྱ་རྩ་བརྒྱད་ཀྱིས་བསྟོད་ནས། ། རྡོ་རྗེའི་བསྟན་པ་རྣམ་གྲགས་པ། ། བཅོམ་ལྡན་རྡོ་རྗེ་ཅན་གྱིས་གསུངས། ། ཀྱེ་མ་འབྱོར་ཆེན་སྣང་བ་ཡི། ། དཀྱིལ་འཁོར་རྒྱལ་བའི་དཀྱིལ་འཁོར་བ། ། གང་ཞིག་མིང་ བརྒྱ་རྩ་བརྒྱད་པ། ། འདི་དག་སོ་སོར་རྗོད་བྱེད་ན། ། ང་ནི་ཉེས་པ་ཀུན་ཟློག་ཅིང་། ། རྟག་ཏུ་དེ་ཡི་ཕྱི་བཞིན་འབྲང་། ། ནང་པར་ལངས་ནས་གཙང་མ་ཡིས། ། སྒྲིབ་པ་ཐམས་ཅད་སེལ་བ་ལ། ། བློ་ལྡན་གང་ཞིག་སྟོད་བྱེད་པ། ། དེ་ཡི་སྡིག་པ་མེད་པར་ འགྱུར། ། གང་ཞིག་མིང་བརྒྱ་རྩ་བརྒྱད་མཆོག ། ནང་པར་ལངས་ནས་རྗོད་བྱེད་པ། ། སྡང་བ་ཐམས་ཅད་དེ་དབང་འགྱུར། ། བགེགས་རྣམས་ཀྱིས་ཀྱང་ཡོངས་སུ་གཏོང་། ། སྡིག་པ་དག་པ་འཐོབ་པ་དང་། ། དེ་བཞིན་བསོད་ནམས་འཕེལ་བ་དང་། ། ཡེ་ཤེས་རྒྱ་མཚོ་ ལོངས་སྤྱོད་ཅིང་།
BO། ས་མཆོག་ཆེན་པོ་ཐོབ་པར་འགྱུར། ། གང་ཞིག་ངེས་པར་གནས་བྱས་ལ། ། མིང་བརྒྱ་རྩ་བརྒྱད་མཆོག་འདོན་པ། ། དེས་ནི་འབྱོར་ཆེན་སངས་རྒྱས་ས། ། རིང་པོར་མི་ཐོགས་ཐོབ་པར་འགྱུར། ། རྒྱུད་ཆེན་ལྡན་ཞིང་བློ་ཆེ་བ། ། གང་ཞིག་ མིང་མཆོག་འདོན་པ་ནི། ། རྡོ་རྗེའི་དཀྱིལ་འཁོར་བསྟན་པ་ལ། ། རིང་པོར་མི་ཐོགས་འཇུག་པར་འགྱུར། ། བྱང་ཆུབ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བའི་མཚན་བརྒྱ་རྩ་བརྒྱད་པ་གཟུངས་སྔགས་དང་བཅས་པ་རྫོགས་སོ། ། ། །
Sutraya