༄༅༅། ། རྒྱ་གར་སྐད་དུ། ཨཱརྱ་པྲ་དཱི་པ་དཱ་ནཱི་ཡཾ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་མར་མེ་འབུལ་བ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ ལ་ཕྱག་འཚལ་ལོ། ། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ། མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་དཔག་ཏུ་མེད་པ་བཞི་པོ་འདི་དག་ནི་ལེགས་པར་ཡོངས་སུ་སྦྱངས་པའི་ཆོས་རྣམས་དང་ལྡན་པ། རྣམ་པར་སྨིན་པ་དཔག་ཏུ་མེད་པ། སྣང་བ་དཔག་ཏུ་མེད་པ། བསོད་ནམས་ལ་ཡང་དག་པར་གཞོལ་བ་དཔག་ཏུ་མེད་པ། གཟུགས་དཔག་ཏུ་མེད་པ། བདེ་བ་ལ་ ཡང་དག་པར་གཞོལ་བ་དཔག་ཏུ་མེད་པ་དག་སྟེ། དེ་དག་ནི་ཚུལ་ཁྲིམས་ལ་འཇུག་པ་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བ་ལ་འཇུག་པ་དང་། སོ་སོ་ཡང་དག་པར་རིག་པ་ལ་འཇུག་པ་དང་། ལེན་པ་ མེད་པར་ཟག་པ་ཟད་པར་འགྱུར་བ་དག་གོ། ། བཞི་གང་ཞེ་ན། ཤཱ་རིའི་བུ་འདི་ལྟ་སྟེ།

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བརྙེས་པས་བསམ་གཏན་པར་གྱུར་པ། ཤེས་རབ་ཀྱི་ཕ་རོལ་ཏུ་ཕྱིན་པ་བརྙེས་ པས་ཤེས་རབ་དཔག་ཏུ་མེད་པ་དང་ལྡན་པ། ཤེས་རབ་ཡངས་པ་དང་ལྡན་པ། ངེས་པར་འབྱེད་པའི་ཤེས་རབ་དང་ལྡན་པ། ཇི་ལྟ་བ་བཞིན་གྱི་ཤེས་རབ་དང་ལྡན་པ། གྲངས་མེད་པའི་ཤེས་རབ་དང་ལྡན་པ། རྣམ་པར་ངེས་པའི་ཤེས་རབ་དང་ལྡན་པ། རྣམ་པར་ངེས་ པ་གཟིགས་པ། མཆོག་ཏུ་རྣམ་པར་གྲོལ་ཞིང་ཤིན་ཏུ་རྣམ་པར་གྲོལ་བའི་ཐུགས་དང་ལྡན་པ། གཡོ་བ་མེད་པའི་ཐུགས་དང་ལྡན་པ། འཁྲུག་པ་མེད་པའི་ཐུགས་དང་ལྡན་པ། འཕྲིན་ལས་ལེགས་པར་མཛད་པའི་ཐུགས་དང་ལྡན་པ་དང་། ཤཱ་རིའི་བུ་དེ་ བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་མི་དགེ་བའི་ཆོས་ཐམས་ཅད་སྤངས་པ། དགེ་བའི་ཆོས་ཐམས་ཅད་དང་ལྡན་པ། སྤྱོད་པ་ཕུན་སུམ་ཚོགས་པ། ཡིད་ལ་མཛད་པ་དང་མ་བྲལ་བ། བདེན་པ་སྟོན་པ། བདེན་པ་གཟིགས་པ། སྣང་ བར་གྱུར་པ། དཔག་ཏུ་མེད་པ། ཚོགས་དཔག་ཏུ་མེད་པ། ཟིལ་གྱིས་གནོན་པ། ཟིལ་གྱིས་མི་གནོན་པའི་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་།

རྣམ་པར་གྲོལ་བའི་ཡེ་ཤེས་གཟིགས་པའི་སྟོབས་བསྐྱེད་པ་བརྙེས་པ། སྟོབས་ བཅུའི་སྟོབས་བསྐྱེད་པ་བརྙེས་པ། མི་འཇིགས་པའི་སྟོབས་བསྐྱེད་པ་བརྙེས་པ། སངས་རྒྱས་ཀྱི་ཆོས་ཀྱི་སྟོབས་བསྐྱེད་པ་བརྙེས་པ། བྱམས་པ་ཆེན་པོ་དང་སྙིང་རྗེ་ཆེན་པོའི་སྟོབས་བསྐྱེད་པ་བརྙེས་པ། སོ་སོ་ཡང་དག་པར་རིག་པའི་སྟོབས་བསྐྱེད་པ་བརྙེས་པ། སྔོན་གྱི་བསམ་ པ་ཕུན་སུམ་ཚོགས་པ། སྔོན་ཡོངས་སུ་སྦྱོང་བ་མཛད་པ། ཤེས་རབ་རིན་པོ་ཆེ་དང་ལྡན་པ། བརྩོན་པ་མ་བོར་བ། བརྩོན་འགྲུས་དཔག་ཏུ་མེད་པ། མྱ་ངན་དང་གནོད་པ་དང་བྲལ་བ། ཡོངས་སུ་འཛིན་པ་མི་མངའ་བ། ཐམས་ཅད་གཟིགས་པ། ཐམས་ཅད་མཁྱེན་པ། གླང་པོ་ཆེན་པོ། དཔག་ཏུ་མེད་པ། ཕུང་པོ་མི་མངའ་བ། བསོད་ནམས་ཀྱི་ཞིང་བླ་ན་མེད་པ་དང་། ཤཱ་རིའི་བུ་དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྐལ་པ་བྱེ་བ་ཁྲག་ཁྲིག་འབུམ་ཕྲག་དུ་མར་དགེ་བའི་རྩ་བ་ཡང་དག་པར་བསྒྲུབས་པ། རིག་པ་གསུམ་དང་ལྡན་པ། བསོད་ནམས་ཀྱི་ཞིང་གི་དེ་བཞིན་གཤེགས་པའི་མཆོད་རྟེན་ལ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་སེམས་དང་བ། བསོད་ནམས་དོན་དུ་གཉེར་བ། བསོད་ནམས་ལ་དམིགས་པ།

བསོད་ནམས་ཡོ་བྱད་དུ་ བྱེད་པ། བསོད་ནམས་འདོད་པ། རྣལ་འབྱོར་དང་འཐུན་པའི་རྗེས་སུ་དྲན་པ་ཡིད་ལ་བྱེད་པ། སྔོན་གྱི་སྦྱོར་བ་ཕུན་སུམ་ཚོགས་པས་ཐ་ན་མར་མེའི་སྙིང་པོ་ཆུང་ངུའམ་ངན་པ་ཞིག་འབྲུ་མར་གྱིས་བསྐུས་སམ་མར་གྱིས་བསྐུས་ཏེ་འབུལ་ལམ། ངེས་པར་འབུལ་ལམ། ཡོངས་སུ་ འབུལ་ལམ། འཇོག་པར་བྱེད་པ་དང་། དགེ་བ་དོན་དུ་གཉེར་བས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཕྱི་མའི་མཐའི་སྐྱེ་བའི་འཁོར་བ་སྤངས་པ། དེ་ལྟར་བྱུང་བ་ན་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་གཟིགས་པས་བཟུང་བ་ཉིད་ཡིད་ལ་བྱེད་དམ། དེ་ལས་ཡོན་ཏན་གང་ཡང་རུང་བ་ཞིག་ཡིད་ལ་བྱེད་དམ། དེ་བཞིན་གཤེགས་པའི་ཕྱིར་དང་གཞི་དེ་ལས་དེ་བཞིན་གཤེགས་པ་ཡིད་ལ་བྱེད་ཅིང་དེ་བཞིན་གཤེགས་པ་དགྲ་བཅོམ་ པ་ཡང་དག་པར་རྫོགས་པའི་སངས་རྒྱས་ཉིད་ཀྱི་ཕྱིར་དེ་བཞིན་གཤེགས་པ་ལ་མཆོད་པ་བྱ་བར་སེམས་བསྐྱེད་དེ། མར་མེ་འདི་འབར་བར་བྱ། རབ་ཏུ་འབར་བར་བྱ། དབུལ་བར་བྱ། ཡོངས་སུ་དབུལ་བར་བྱ། རབ་ཏུ་གཞག་པར་བྱའོ་སྙམ་པའམ།

སེམས་ཀྱི་རྒྱུད་དད་པར་གྱུར་ པས་ཚུལ་ཁྲིམས་ཡོངས་སུ་དག་པ། མི་མཉམ་པ་དང་མཉམ་པའི་ཚུལ་ཁྲིམས་དང་ལྡན་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔག་ཏུ་མེད་པ་བསོད་ནམས་མང་པོ་མངའ་བའི་དེ་བཞིན་གཤེགས་པའི་མཆོད་རྟེན་ལ་བསྙེན་བཀུར་བྱེད་དེ། དེ་ཙམ་མམ། {ཆུང་ཟད་,ཅུང་ཟད་}ཙམ་མམ། ཆུང་ངུ་ཞིག་གམ། དན་ངོན་ཙམ་ཞིག་གམ། གསོག་ཙམ་ཞིག་གམ། ཐ་ན་གློག་གི་རྒྱུན་ཙམ་ཞིག་ཀྱང་སྣང་བར་བྱེད་དམ། ཐ་ན་ཐེམ་སྐས་ཀྱི་གཞི་གཅིག་སྣང་བར་བྱེད་ན་ཡང་ཤཱ་རིའི་བུ་དེའི་རྣམ་པར་སྨིན་པ་ནི་ཉན་ཐོས་རྣམས་ཀྱིས་སམ། རང་སངས་རྒྱས་རྣམས་ཀྱིས་བསྟན་པར་མི་ནུས་སོ། ། ཤཱ་རིའི་བུ་གཞན་ཡང་ལན་ལ་ནི་མི་རེ་ཞིང་དད་པ་དང་། དགའ་བ་དང་། དང་བས་ཡོངས་སུ་བཏང་བའི་རྣམ་པར་སྨིན་པ་བསོད་ནམས་ཀྱི་རྣམ་པར་སྨིན་པ་དེ་ནི་དེ་བཞིན་གཤེགས་པས་སྟོན་པར་སྤྱོད་དོ། ། ཤཱ་རིའི་བུ་གཞན་ཡང་ དད་པ་དང་ལྡན་པ་གུས་པར་གནས་ཤིང་གཡོ་མེད་ལ་སྒྱུ་མེད་པ་སངས་རྒྱས་ཀྱི་ཡོན་ཏན་ལ་ངེས་པར་སེམས་པའི་རིགས་ཀྱི་བུའམ། རིགས་ཀྱི་བུ་མོ་དགེ་བའི་བསམ་པ་སྐྱེས་ནས་མར་མེ་{ཆུང་ཟད་,ཅུང་ཟད་}ཙམ་མམ།

ཆུང་ངུ་ཙམ་ཞིག་ཀྱང་སྣང་བར་བྱས་ཏེ་མར་མེ་སྣང་བར་བྱས་ པ་གང་གིས་དེ་བཞིན་གཤེགས་པའི་མཆོད་རྟེན་དེའི་ཐ་ན་ཐེམ་སྐས་ཙམ་སྣང་ངམ། བསྐོར་ས་ཙམ་སྣང་ངམ། སྨད་དམ། གདུགས་སམ། ཐམས་ཅད་སྣང་ངམ། ཐ་ན་བར་སྐབས་གང་ཡང་རུང་བ་ཞིག་སྣང་བའི་མར་མེ་དེ་མོད་ལ་མྱུར་དུ་ཤི་སྟེ། རླུང་གིས་བསྐྱོད་པས་སམ། ཆར་ པས་སམ། མར་ཟད་པས་སམ། སྙིང་པོ་ཟད་པས་ཤི་ལ། ཤཱ་རིའི་བུ་འདི་ལྟ་སྟེ། དཔེར་ན་ཀླུས་དཀྲུགས་པ་ན་སྤྲིན་སྟུག་པོའི་དྲ་བ་འཁྲིགས་པ་ལས་ནམ་མཁའ་ལས་གློག་བྱུང་ནས་ནུབ་ན། ཤཱ་རིའི་བུ་མྱུར་དུ་འབྱུང་བའི་རྗེས་སུ་འབྲང་བ་དེ་མཐོང་བས་སེམས་ཅན་རྣམས་ཀྱི་མིག་ ཐིབས་ཞེས་བྱེད་པ་དེ་ཙམ་དུ་ཤཱ་རིའི་བུ་དེ་བཞིན་གཤེགས་པའི་མཆོད་རྟེན་ལ་མར་མེ་འབུལ་བའི་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། དེ་ལས་གཞན་པ་སེམས་ཅན་བསླབ་པའི་གཞི་མ་བླངས་པ། དགེ་བའི་རྩ་བ་དོན་དུ་གཉེར་བ། སངས་རྒྱས་དང་། ཆོས་དང་། དགེ་འདུན་ལ་མངོན་པར་དད་པ། བདག་ཉིད་བསྐྱབ་པར་བྱ་བ་ལ་གནས་པ།

བསོད་ནམས་འདོད་པ་རྣམས་ཀྱིས་ཇི་ཙམ་དུ་ཆུང་བའི་མར་མེ་ཕུལ་བའི་བསོད་ནམས་ཀྱི་ཕུང་པོ་ཇི་ཙམ་དུ་དཔག་ཏུ་མེད་པ་ཡོངས་སུ་གཟུང་བར་འགྱུར་བའི་རྣམ་པར་སྨིན་པ་ནི་དེ་བཞིན་གཤེགས་པས་ མཁྱེན་ཏོ། ། ཤཱ་རིའི་བུ་མར་མེ་འབུལ་བ་{ཆུང་ཟད་,ཅུང་ཟད་}ཅིག་ཕུལ་བས་མར་མེ་ཕུལ་བ་ལས་མངོན་པར་གྲུབ་པའི་བསོད་ནམས་ཀྱི་ཕུང་པོ་དེའི་རྣམ་པར་སྨིན་པ་ནི་ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མ་གཏོགས་པར་ལྷ་དང་བཅས། ཚངས་པ་དང་ བཅས་པའི་འཇིག་རྟེན་དང་། དགེ་སྦྱོང་དང་བྲམ་ཟེར་བཅས་པའི་སྐྱེ་དགུས་བསྟན་པར་མི་ནུས་སོ། ། ཤཱ་རིའི་བུ་སངས་རྒྱས་བཅོམ་ལྡན་འདས་རྣམས་ཀྱི་ཡུལ་ནི་བསམ་གྱིས་མི་ཁྱབ་སྟེ། ཤཱ་རིའི་བུ་མར་མེ་འབུལ་བ་ཡོངས་སུ་ཕུལ་བ་དེས་བསོད་ནམས་ཀྱི་ཕུང་པོ་ཇི་ཙམ་དུ་དཔག་ཏུ་ མེད་གྲངས་མེད་པ་ཡོངས་སུ་བཟུང་བར་གྱུར་པའི་དོན་དེ་ནི་དེ་བཞིན་གཤེགས་པས་མཁྱེན་ཏེ། ཤཱ་རིའི་བུ་མར་མེ་དེ་ཙམ་དུ་ཆུང་ངུ་ཕུལ་བའི་རྣམ་པར་སྨིན་པ་ཡང་དཔག་ཏུ་མེད་ན། གང་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་དེ་བཞིན་གཤེགས་པའི་མཆོད་ རྟེན་ལ་མཆོད་པ་ཁྱད་པར་ཅན་བྱེད་དམ་བྱེད་དུ་འཇུག་སྟེ།

སྤོས་སམ། མེ་ཏོག་ཕྲེང་ངམ། གདུགས་སམ། བ་དན་རྣམས་སམ། གང་ཡང་རུང་བའི་མར་མེའི་ཕྲེང་བ་རྣམ་པ་མང་པོས་མཆོད་པ་ཁྱད་པར་ཅན་བྱེད་དམ་བྱེད་དུ་འཇུག་པ་ལྟ་སྨོས་ཀྱང་ཅི་དགོས། ཤཱ་རིའི་བུ་གཞན་ཡང་ ཆོས་འདི་བཞི་ནི་དད་པས་རྟོགས་པར་བྱ་བ་ཡིན་ཏེ། བཞི་གང་ཞེ་ན། སངས་རྒྱས་ཀྱི་ཆོས་རྣམས་ནི་དཔག་ཏུ་མེད་དོ་སྙམ་དུ་དད་པས་རྟོགས་པར་བྱ་བ་དང་། དགེ་བའི་རྩ་བ་ཇི་ལྟར་ཆུང་ངུའི་རྣམ་པར་སྨིན་པ་ཡང་དཔག་ཏུ་མེད་པར་འགྱུར་བ་དད་པས་རྟོགས་པར་བྱ་བ་དང་། དཀོན་མཆོག་ གསུམ་ལ་དད་པའི་ལས་མངོན་པར་འདུ་བྱེད་པའི་རྣམ་པར་སྨིན་པ་གང་ཡིན་པ་དེ་སྟོན་པ་མཐོང་བ། ཉན་ཐོས་ཁྱེད་ཀྱིས་ཀྱང་རྣམ་པ་ཐམས་ཅད་དུ་བསམ་པའམ། ཡོངས་སུ་བསམ་པར་མི་ནུས་ན། འཕགས་པའི་རིགས་ལ་མི་གནས་པ་གཞན་རྣམས་ཀྱིས་ལས་ཀྱི་རྣམ་པར་སྨིན་པ་ མངོན་སུམ་དུ་ཤེས་པའམ། ཁོང་དུ་ཆུད་པར་ནུས་པ་ལྟ་ཅི་སྨོས་ཏེ་དེ་ནི་གནས་མེད་དོ། ། གཞན་དུ་ན་དེ་ནི་དད་པས་རྟོགས་པར་བྱ་བ་ཡིན་པ་དང་། ཤཱ་རིའི་བུ་ཉན་ཐོས་རྣམས་ཀྱིས་སེམས་ཅན་ཐམས་ཅད་ཀྱི་ལས་ཀྱི་རྣམ་པར་སྨིན་པ་བསམ་པའམ་ཤེས་པར་མི་ནུས་ཏེ། ཤཱ་རིའི་ བུ་ཁྱེད་རྣམས་གནས་འདི་ལ་བསམ་པ་དང་བྲལ་བར་གྱིས་ཤིག །

དེ་ཅིའི་ཕྱིར་ཞེ་ན། ཤཱ་རིའི་བུ་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་བསམ་གྱིས་མི་ཁྱབ་བོ་ཞེས་དེ་བཞིན་གཤེགས་པས་གསུངས་པའི་ཕྱིར་རོ། ། ཤཱ་རིའི་བུ་སྔོན་གྱི་དེ་བཞིན་གཤེགས་པ་དགྲ་བཅོམ་ པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཀྱང་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་བསམ་གྱིས་མི་ཁྱབ་པོ་ཞེས་གསུངས་སོ། ། ཤཱ་རིའི་བུ་མ་འོངས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱང་སེམས་ཅན་རྣམས་ཀྱི་ ལས་ཀྱི་རྣམ་པར་སྨིན་པ་བསམ་གྱིས་མི་ཁྱབ་པ་ཉིད་དོ་ཞེས་སྟོན་པར་འགྱུར་རོ། ། ཤཱ་རིའི་བུ་སེམས་ཅན་གྱི་བསམ་པ་དང་། སེམས་དང་། ལྷག་མཐོང་ཡང་བསམ་གྱིས་མི་ཁྱབ་སྟེ། དད་པས་རྟོགས་པར་བྱ་བ་ཡིན་ནོ། ། ཤཱ་རིའི་བུ་འཕགས་པའི་རིགས་ལ་གནས་ པ་ཁྱེད་ཅག་ཉིད་ཀྱང་སེམས་ཅན་ཐམས་ཅད་ཀྱི་ཤེས་པ་དེ་ལ་མིག་དང་མཁས་པ་ལ་ཤེས་པ་མི་འཇུག་ན། སེམས་མ་དུལ་བ་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བ་དང་བྲལ་བ། བརྗེད་ངས་པ། མ་རིག་པའི་མུན་པས་མིག་བསྒྲིབས་པ་གཞན་གང་དག་བདག་ཅི་ཞིག ། བདག་སུ་ཞིག ། བདག་ཅི་འདྲ་བ་ཞིག །

བདག་གང་ནས། བདག་ཇི་ཙམ་ཞིག ། བདག་ཇི་ལྟ་བུ་ཞིག ། བདག་ལྡན་པའི་ངང་ཚུལ་ཅན་ནམ། བདག་མི་ལྡན་པའི་ངང་ཚུལ་ཅན་ནམ། བདག་བརྗེད་ངས་ པའམ། བདག་དྲན་པ་ཉེ་བར་གནས་པའམ། བདག་མཁས་པའི་ལས་བྱེད་པའམ། བདག་བྱིས་པའི་ལས་བྱེད་པའམ། བདག་གང་ནས་འོངས། བདག་གང་དུ་འགྲོ་ཞེས་རང་གི་ཆོས་ལ་ཤེས་པ་འཇུག་པ་ཡང་མེད་པ་རྣམས་ལྟ་ཅི་སྨོས། ཤཱ་རིའི་བུ་བྱིས་པ་སོ་སོའི་སྐྱེ་བོ་ནི་ བདག་ལ་ཤེས་པ་འཇུག་པ་ཡང་མེད་ན། ཕྱིན་ཅི་ལོག་གི་ལྟ་བ་ཅན་དེ་ལས་ཀྱི་རྣམ་པར་སྨིན་པ་ཤེས་པར་ལྟ་ག་ལ་འགྱུར་ཏེ་དེ་ནི་གནས་མེད་དོ། ། ཤཱ་རིའི་བུ་དེ་བཞིན་གཤེགས་པ་ནི་ཚུལ་ཁྲིམས་དང་བྲལ་བ་མ་ཡིན། ཏིང་ངེ་འཛིན་དང་བྲལ་བ་མ་ཡིན། ཤེས་རབ་དང་བྲལ་བ་ མ་ཡིན། རྣམ་པར་གྲོལ་བ་དང་བྲལ་བ་མ་ཡིན། རྣམ་པར་གྲོལ་བའི་ཡེ་ཤེས་མཐོང་བ་དང་བྲལ་བ་མ་ཡིན། རིག་པ་དང་བྲལ་བ་མ་ཡིན་ནོ། ། ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཚུལ་ཁྲིམས་དཔག་ཏུ་མེད་པའོ། ། ཚུལ་ཁྲིམས་ཆགས་པ་མེད་པའོ། ། ཚུལ་ཁྲིམས་བསམ་གྱིས་མི་ཁྱབ་པའོ། ། ཚུལ་ཁྲིམས་གཞལ་དུ་མེད་པའོ། ། ཚུལ་ཁྲིམས་རྫོགས་པའོ། ། ཚུལ་ཁྲིམས་རྣམ་པར་དག་པའོ། །

དེ་ལ་ལས་དང་ལས་ཀྱི་རྣམ་པར་སྨིན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། ། ཤཱ་རིའི་བུ་ཇི་ལྟར་ན་དེ་བཞིན་གཤེགས་པ་ལས་དང་ལས་ཀྱི་རྣམ་པར་སྨིན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། ཤཱ་རིའི་བུ་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། སེམས་ཅན་འདི་ནི་དགེ་བའི་ཆོས་རྣམས་ཡོངས་སུ་ཟད་ཅིང་། མི་དགེ་བའི་ཆོས་ རྣམས་ཀྱིས་གང་བའོ། ། སེམས་ཅན་འདི་ནི་དགེ་བའི་ཆོས་རྣམས་འབྱུང་བར་འགྱུར་ཞིང་། མི་དགེ་བའི་ཆོས་རྣམས་འགག་པར་འགྱུར་བའོ། ། སེམས་ཅན་འདི་ནི་མི་དགེ་བའི་ཆོས་རྣམས་སྐྱེ་བར་འགྱུར་ཞིང་། དགེ་བའི་ཆོས་རྣམས་འགག་པར་འགྱུར་བའོ་ཞེས་ཤཱ་རིའི་བུ་འཇུག་ པ་འདིས་དེ་བཞིན་གཤེགས་པ་སེམས་ཅན་དེ་དང་དེ་དག་གི་ལས་དང་ལས་ཀྱི་རྣམ་པར་སྨིན་པ་སྣ་ཚོགས་རྗེས་སུ་འཇུག་པ་རབ་ཏུ་མཁྱེན་ཏོ། ། ཤཱ་རིའི་བུ་དེ་ལ་སེམས་ཅན་རྣམས་མུན་པ་ཡོད་ཅིང་མཁས་པ་མེད་དེ་མཁྱེན་པ་དེ་ལྟ་བུ་དང་ལྡན་པ། མཁས་པ་དེ་ལྟ་བུ་དང་ལྡན་པ་དེས་ སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་བསམ་གྱིས་མི་ཁྱབ་པ་ལུང་སྟོན་ཏོ། །

ཤཱ་རིའི་བུ་དེ་ལ་གང་དག་དད་པ་དེ་དག་ནི་ཡིད་ཆེས་པར་འགྱུར་ལ་གང་དག་མ་དད་ཅིང་བསྟན་པ་འདི་ལས་ཉམས་པ་དེ་དག་ནི་སྨད་པར་འགྱུར་ཞིང་རྩོད་པར་འགྱུར་ཏེ། དེ་ནི་དེ་དག་ལ་ཡུན་རིང་པོར་ མི་ཕན་པ་དང་། དོན་མེད་པ་དང་། སྡུག་བསྔལ་བ་དང་། ལོག་པར་ལྟུང་བར་འགྱུར་བའོ། ། ཤཱ་རིའི་བུ་དེ་ལ་སེམས་ཅན་གང་དེ་བཞིན་གཤེགས་པའི་མཆོད་རྟེན་ལ་མར་མེ་འབུལ་བ་དེས་མར་མེ་འབུལ་བ་ཡོངས་སུ་ཕུལ་བ་དང་། ངེས་པར་ཕུལ་བ་དང་། དགེ་བའི་རྩ་བ་ བསགས་པའི་ལས་མངོན་པར་འདུས་བྱས་པ་དང་། རྣམ་པར་སྨིན་པའི་འབྲས་བུ་བདེ་བ་འདོད་པ་དང་། དགའ་བ་དང་། མཆོག་ཏུ་དགའ་བ་དང་ལྡན་པ་དང་། དད་པས་ཡོངས་སུ་ཕུལ་བ་བསགས་པས་ཚེ་འདི་ཉིད་ལ་སེམས་ཀྱི་ངེས་པར་སེམས་པ་གསུམ་འཐོབ་སྟེ། གསུམ་ གང་ཞེ་ན། དེ་འདི་སྙམ་དུ་སེམས་ཏེ། བདག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་མཆོད་པ་བྱས་ཏེ། ལུས་ཐོབ་པ་སྙིང་པོ་དང་སྙིང་པོ་མ་ཡིན་པའི་ལུས་ཤེས་པར་བྱས་ལ་སྙིང་པོ་སྦྱིན་པར་བྱའོ་སྙམ་ནས་ལོངས་སྤྱོད་རྣམས་ལ་ཉེས་ དམིགས་ཅན་དུ་ཤེས་ཏེ།

སྙིང་པོ་མེད་པའི་ལོངས་སྤྱོད་རྣམས་ལ་སྙིང་པོ་སྦྱིན་པར་བྱེད་པ་འདི་ནི་ཤཱ་རིའི་བུ་དེ་བཞིན་གཤེགས་པའི་མཆོད་རྟེན་ལ་མཆོད་པ་བྱས་པའི་སེམས་ཀྱི་ངེས་པར་སེམས་པ་དང་པོའོ། ། ཤཱ་རིའི་བུ་གཞན་ཡང་དེ་འདི་སྙམ་དུ་སེམས་ཏེ། བདག་ གིས་བསོད་ནམས་ཀྱི་ཞིང་བླ་ན་མེད་པའི་ཡོན་གནས་ཀྱི་སྦྱིན་པ་མཆོག་ལེན་པ་པོ་ལ་མཆོད་པ་བྱས་པས་བདག་ལ་སེམས་ཅན་དམྱལ་བའི་འཇིགས་པའམ། དུད་འགྲོའི་སྐྱེ་གནས་ཀྱི་འཇིགས་པའམ། གཤིན་རྗེའི་འཇིག་རྟེན་གྱི་འཇིགས་པ་མེད་དོ། ། བདག་གི་འགྲོ་བ་བདེ་བ་ ནི་ལྔ་སྟེ། མཐོ་རིས་འཐོབ་པའམ། མི་འཐོབ་པའམ། གཟུགས་འཐོབ་པའམ། ལོངས་སྤྱོད་འཐོབ་པའམ། བྱང་ཆུབ་འཐོབ་པོ་སྙམ་པ་དེ་ནི་ཤཱ་རིའི་བུ་དེ་བཞིན་གཤེགས་པའི་མཆོད་རྟེན་ལ་མཆོད་པ་བྱ་བའི་སེམས་ཀྱི་ངེས་པར་སེམས་པ་འཐོབ་པ་གཉིས་པའོ། ། ཤཱ་ རིའི་བུ་གཞན་ཡང་དེ་བཞིན་གཤེགས་པའི་མཆོད་རྟེན་ལ་མར་མེ་འབུལ་བ་ཡོངས་སུ་ཕུལ་བ་ལ་ཡང་དག་པར་གནས་པ་ཡིན་ཏེ། གལ་ཏེ་བདག་གིས་སྦྱིན་པ་བྱིན་ནོ། ། བདག་གིས་བསོད་ནམས་དག་ཀྱང་བྱས་སོ། ། བདག་གིས་སེར་སྣ་སྤངས་སོ་སྙམ་དུ་ཤེས་ཤིང་། དེ་འདི་ སྙམ་དུ་སེམས་ཏེ། བདག་ནི་སྦྱིན་པ་པོ་ཡིན་ལ།

བདག་གིས་ཀྱང་སྦྱིན་པ་བྱིན་ནོ་སྙམ་དུ། དེ་ལྟར་སེམས་ཤིང་གཏོང་བ་ལ་ཡོངས་སུ་གདུང་བ་མེད། བརྙས་པ་མེད་དེ། ཤཱ་རིའི་བུ་དེ་ནི་དེ་བཞིན་གཤེགས་པའི་མཆོད་རྟེན་ལ་མཆོད་པ་བྱས་པའི་སེམས་ཀྱི་ངེས་པར་སེམས་ པ་འཐོབ་པ་གསུམ་པའོ། ། ཤཱ་རིའི་བུ་རིགས་ཀྱི་བུའམ། རིགས་ཀྱི་བུ་མོ་དེ་བཞིན་གཤེགས་པའི་མཆོད་རྟེན་ལ་མར་མེ་འབུལ་བ་ཕུལ་བས། འཆི་བའི་དུས་ཀྱི་ཚེ་སྣང་བ་གསུམ་ཐོབ་སྟེ། གསུམ་གང་ཞེ་ན། དགེ་ལེགས་བྱས་པ་མངོན་དུ་འགྱུར་ཏེ། དྲན་པ་འཐོབ་ ཅིང་དགེ་བ་རྣམས་བརྗེད་པར་མི་འགྱུར་ཏེ། ཤཱ་རིའི་བུ་འདི་ལྟར་འཆི་བའི་དུས་ཀྱི་ཚེ། དེ་བཞིན་གཤེགས་པ་ལ་དགེ་བའི་རྩ་བ་བསྐྱེད་པ་རྣམས་རྗེས་སུ་དྲན་པ་འདི་ནི་སྣང་བ་དང་པོའོ། ། ཤཱ་རིའི་བུ་གཞན་ཡང་དེ་བཞིན་གཤེགས་པའི་མཆོད་རྟེན་ལ་མཆོད་པ་བྱས་པའི་སེམས་ ཅན་དེ་འཆི་བའི་དུས་ཀྱི་ཚེ་དྲན་པར་འགྱུར་ཏེ། བདག་གིས་སངས་རྒྱས་ལ་མཆོད་པ་བྱས་སོ་ཞེས་མཆོག་ཏུ་དགའ་བ་འཐོབ་སྟེ། ཤཱ་རིའི་བུ་འདི་ལྟར་སངས་རྒྱས་རྗེས་སུ་དྲན་པ་དང་བཅས་པའི་སེམས་བསྐྱེད་པ་འདི་ནི་སྣང་བ་གཉིས་པའོ། ། ཤཱ་རིའི་བུ་གཞན་ཡང་སེམས་ཅན་དེ་ འཆི་བའི་དུས་ཀྱི་ཚེ་སེམས་ཅན་གཞན་སྦྱིན་པ་གཏོང་བ་མཐོང་ན།

དེ་འདི་སྙམ་དུ་སེམས་ཏེ། བདག་གིས་མར་མེ་འབུལ་བ་ཕུལ་ལོ། ། ཕྱིས་ཀྱང་སྦྱིན་པ་བྱིན་ནོ་སྙམ་དུ་དེ་གཏོང་བའི་སེམས་སྐྱེས་ཤིང་སྡུག་བསྔལ་གྱི་ཚོར་བ་རྣམས་ཀྱིས་མི་འཕྲོགས་ལ། དེ་ལ་ཆོས་རྗེས་སུ་དྲན་ པ་དེ་ལྟ་བུ་འབྱུང་སྟེ། ཤཱ་རིའི་བུ་འདི་ལྟར། དགེ་བའི་རྩ་བ་ཇི་ལྟ་བ་བཞིན་དུ་ཡིད་ལ་བྱེད་པ་འདི་ནི་སྣང་བ་ཐོབ་པ་གསུམ་པ་ཡིན་ནོ། ། ཤཱ་རིའི་བུ་གཞན་ཡང་རིགས་ཀྱི་བུའམ་རིགས་ཀྱི་བུ་མོ་དེ་བཞིན་གཤེགས་པའི་མཆོད་རྟེན་ལ་མར་མེ་དབུལ་བ་ཕུལ་བ་དེ་འཆི་བའི་དུས་ཀྱི་ཚེ་སྣང་བ་ བཞི་འཐོབ་སྟེ། བཞི་གང་ཞེ་ན། མདུན་ན་ཉི་མའི་དཀྱིལ་འཁོར་འཆར་བ་མཐོང་བ་དང་། མདུན་ན་ཟླ་བ་ཉ་བའི་དཀྱིལ་འཁོར་འཆར་བ་མཐོང་བ་དང་། ལྷའི་འཁོར་གནས་པ་མཐོང་བ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ བྱང་ཆུབ་ཀྱི་སྙིང་པོ་ལ་བཞུགས་ཤིང་བྱང་ཆུབ་མངོན་པར་རྫོགས་པར་སངས་རྒྱས་པ་མཐོང་སྟེ། དེ་ལ་བདག་ཉིད་གུས་པར་བྱེད་པ་ལ་གནས་ཤིང་ཐལ་མོ་སྦྱར་བར་བྱས་པར་མཐོང་བ་སྟེ། ཤཱ་རིའི་བུ་དེ་བཞིན་གཤེགས་པའི་མཆོད་རྟེན་ལ་མར་མེ་དབུལ་བ་ཕུལ་བས། འཆི་ བའི་ཚེ་སྣང་བ་འདི་བཞི་འཐོབ་པར་འགྱུར་རོ། །

བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། དེ་བཞིན་དུ་སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། ། མཐའ་ཡས་ཆོས་བདག་དྲང་སྲོང་ཆེན་པོ་ཡི། ། མཆོད་ རྟེན་རྣམས་ལ་མཁས་པ་གང་ཞིག་གིས། ། མར་མེ་ཕུལ་བ་བྱས་པའི་ལས་དེ་ཡིས། ། བདེ་དང་དོན་དང་རྙེད་པ་མཐའ་ཡས་འཐོབ། ། དེ་ནི་འཆི་ཁར་དྲན་པ་ཉམས་མི་འགྱུར། ། མར་མེ་ཕུལ་བའང་བདག་ཉིད་མཐོང་བར་འགྱུར། ། ཟང་ཟིང་མེད་པའི་དགའ་བ་བཞི་ཡང་འཐོབ། ། འཆི་བའི་དུས་ཚེ་རྨོངས་པ་མེད་པར་འགྱུར། ། ཀུན་ནས་སྣང་བ་དག་ཀྱང་དེས་ཤེས་ཏེ། ། ཉི་མ་དང་ནི་ཟླ་བའང་མཐོང་བར་འགྱུར། ། བྱེ་བ་ཁྲག་ཁྲིག་ལྷ་རྣམས་དེས་མཐོང་འགྱུར། ། རྨོངས་པ་མེད་པར་སངས་རྒྱས་ཆོས་ཀྱང་སྨྲ། ། དེ་ལ་ཕ་མ་བུ་དང་རྩ་ལག་དང་། ། འཁོར་རྣམས་ཀུན་གྱིས་བསྐོར་ནས་ངུ་ན་ཡང་། ། དེ་རྣམས་ལ་ནི་མངོན་དུ་དེ་མི་ཕྱོགས། ། དེ་ཚེ་ནམ་ཡང་དྲན་པ་ཉམས་མི་འགྱུར། ། དེ་ཡི་མདུན་ན་གཞལ་མེད་ཁང་མཆོག་མཐོང་། ། འཇིགས་མེད་ལྷ་ཡི་བུ་མོ་རྣམས་ཀྱང་མཐོང་། ། སྐྱེད་མོས་ཚལ་བཞི་ཤིན་ཏུ་བརྒྱན་སྡུག་ཅིང་། ། འདོད་པའི་ཡོན་ཏན་ལྔ་ལྡན་མཐོང་བར་འགྱུར། །

ཐུབ་པའི་སྐྱེས་མཆོག་རྣམས་ལ་མཆོད་བྱས་པས། ། དེས་ནི་བྱང་ཆུབ་སྙིང་པོར་བདེ་གཤེགས་དང་། ། དེས་ནི་བདག་ཀྱང་ཐལ་མོ་སྦྱར་བྱས་ཤིང་། ། ལྷ་ཀླུ་ལྷ་མིན་རྣམས་ཀྱིས་མདུན་བདར་མཐོང་། ། གུས་དང་བཅས་པས་འཇིག་རྟེན་འདྲེན་ པ་མཐོང་། ། དེ་དེར་ཕྱིན་ཏེ་བདེ་བར་གཤེགས་མཐོང་ནས། ། དགའ་བས་དེ་ཚེ་སྤྱན་ཡང་འདྲེན་པར་བྱེད། ། དེ་ཡིས་གདུགས་ཚོད་སྦྱར་ལ་གནང་བར་མཛད། ། སོ་སོ་རྙེད་པའི་བདེ་བས་ཚིམ་གྱུར་ནས། ། འཆི་དུས་བྱས་ཚེ་སྡུག་བསྔལ་དེས་མི་མྱོང་། ། བྱང་ཆུབ་དམ་པ་མཆོག་ལ་སེམས་ ཀྱང་དགའ། ། དེ་ལ་འཆི་བའི་འཇིགས་ཆེན་འབྱུང་མི་འགྱུར། ། མར་མེ་ཕུལ་བའི་རྣམ་སྨིན་འདི་ཡིན་ཏེ། ། འཆི་དུས་བྱེད་ཚེ་དྲན་པ་ཉམས་མི་འགྱུར། ། དེ་ལ་ཕྱོགས་རྣམས་སྣང་བར་གྱུར་པར་འགྱུར། ། སྔོན་ཅད་མ་མཐོང་གཟུགས་བཟང་རྣམས་ཀྱང་མཐོང་། ། དེ་ནི་ཤི་ནས་མཐོ་རིས་ངེས་ འགྲོ་ཞིང་། ། ལྷ་ཡི་སྟན་ལ་དེ་ལུས་འདུག་པར་ཤེས། ། རྒྱལ་བ་ལ་ནི་མཆོད་པ་བྱེད་པའི་ཚེ། ། དེས་ནི་ཀུན་ནས་ལྷ་མོ་རྣམས་ཀྱང་མཐོང་། །

ཤཱ་རིའི་བུ་གཞན་ཡང་དེ་བཞིན་གཤེགས་པའི་མཆོད་རྟེན་ལ་མར་མེ་དབུལ་བ་ཕུལ་བས་སུམ་ཅུ་རྩ་གསུམ་དུ་སྐྱེས་ནས་ལྷའི་བུ་དེ་རྣམ་པ་ལྔ་ཡོངས་ སུ་དག་པ་དང་ལྡན་པར་འགྱུར་རོ། ། ཤཱ་རིའི་བུ་ལྷའི་བུ་དེ་རྣམ་པ་ལྔ་ཡོངས་སུ་དག་པ་དང་ལྡན་པ་ཇི་ལྟ་བུ་ཞེ་ན། དེའི་ལུས་ཡོངས་སུ་དག་པར་འགྱུར་བ་དང་། དེ་ལྷའི་མཐུ་རྒྱ་ཆེན་པོ་དང་ལྡན་པར་འགྱུར་བ་དང་། དེའི་དྲན་པ་དང་ཤེས་རབ་ཡོངས་སུ་དག་པར་འགྱུར་བ་དང་། དེའི་རྣ་བར་སྒྲ་སྙན་པ་ཐོས་པར་འགྱུར་བ་དང་། དེའི་འཁོར་ཡིད་བདེ་བ་མང་བ་དང་ལྡན་པར་འགྱུར་བའོ། ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། དེ་བཞིན་དུ་སྟོན་པས་གཞན་ཡང་འདི་སྐད་ཅེས་བཀའ་ སྩལ་ཏོ། ། དྲང་སྲོང་མཆོད་རྟེན་མར་མེ་ཕུལ་བས་ནི། ། དེ་ཡི་ལུས་ནི་རབ་ཏུ་འོད་གསལ་ཞིང་། ། གཞན་གྱིས་མི་ཚུགས་དཔལ་དང་ལྡན་པ་དང་། ། ལྷ་སྟོང་གི་ནི་གཙོ་བོར་དེ་འགྱུར་རོ། ། ལྷ་ཡི་སྒྲ་དབྱངས་སྙན་ཅིང་ཡིད་འོང་ཐོས། ། ཇི་ལྟར་ལྷ་གཞན་དེ་བཞིན་འདི་ཡང་མཆོག ། དྲན་ དང་བློ་མཆོག་དང་ནི་ལྡན་པ་དང་། ། འཁོར་མཆོག་ཕུན་སུམ་ཚོགས་པའང་འཐོབ་པར་འགྱུར། ། གང་དུ་ལྷ་བུ་དེ་ནི་འགྲོ་བ་དེར། །

དེ་འགྲོ་བ་ན་ལྷ་ཀུན་འདོང་བར་བྱེད། ། གང་གིས་དེ་ལུས་འདི་ལྟར་འོད་འབར་བ། ། སྔོན་གྱི་ལས་ཀྱི་འབྲས་བུ་དེ་འདྲའོ། ། སྐྱེད་མོས་ཚལ་གྱི་གཞི་ན་ ཤིང་གི་མིང་། ། ཟླ་མཆོག་ཅེས་བྱ་གཞལ་མེད་ཁང་གིས་བརྒྱན། ། ཟླ་བ་ཇི་ལྟར་ཀུན་ནས་གསལ་བ་ལྟར། ། དེ་ཡི་ཤིང་རྣམས་དེ་བཞིན་གསལ་བ་ཡིན། ། མར་མེ་རབ་འབར་ཇི་བཞིན་རྣམ་གསལ་ལ། ། ཡིད་འོང་དྲི་ངད་ཕྱོགས་རྣམས་གཏོང་བྱེད་པ། ། མེ་ཏོག་གསལ་བ་འདི་ནི་མིང་ ཅི་ཞེས། ། ལྷ་རྣམས་ངོ་མཚར་སྟོང་སྙེད་འཛིན་པར་འགྱུར། ། དེ་ཡི་འཁོར་ཚོགས་མེ་ཏོག་དེ་དག་གིས། ། བརྒྱན་པ་བྱས་པས་དེ་དག་མཛེས་པར་འགྱུར། ། བྱེ་བ་ཁྲག་ཁྲིག་ལྷ་ཡི་ནང་ན་དེ། ། ཉི་མ་ཤར་བ་བཞིན་དུ་རྣམ་པར་མཛེས། ། ཤཱ་རིའི་བུ་དེ་བཞིན་གཤེགས་པའི་མཆོད་རྟེན་ ལ་མར་མེ་དབུལ་བ་ཕུལ་བས་སུམ་ཅུ་རྩ་གསུམ་གྱི་ལྷའི་ནང་དུ་སྐྱེས་ནས། ལྷའི་བུ་དེ་དག་ཡུན་ཇི་སྲིད་ཅིག་ན་འཆི་འཕོ་བའི་ཆོས་སུ་འགྱུར་བ་བདག་ཉིད་ཀྱིས་ཤེས་ཏེ། ལྷའི་བུ་དེས་འཆི་བ་ན་རང་གི་འཁོར་དང་། ལྷའི་བུ་གཞན་དག་ཀྱང་ཆོས་ཀྱི་གཏམ་གྱིས་ཡང་དག་པར་དགའ་བར་བྱས་ ཡང་དག་པར་འཛིན་དུ་བཅུག་ནས་གནས་དེ་ནས་ཤི་འཕོས་ཏེ།

ཤི་འཕོས་ནས་ཀྱང་ལོག་པར་ལྟུང་བར་འགྲོ་བར་མི་འགྱུར་ཏེ། མིའི་འཇིག་རྟེན་དུ་སྐྱེས་ན་ཡང་རིགས་མཆོག་ཏུ་བཙུན་པ། དད་པ་དང་ལྡན་པ། སངས་རྒྱས་འབྱུང་བ་དང་ལྡན་པར་སྐྱེ་བར་འགྱུར་རོ། ། གལ་ཏེ་སངས་ རྒྱས་མི་འབྱུང་བ་ཞིག་ལ་བབ་ན་ཡང་དེ་སྡིག་པའི་ལྟ་བ་ཅན་མ་ཡིན་ཞིང་ཡ་མཚན་དུ་འཛིན་པ་དང་བྲལ་བའི་རིགས་སུ་སྐྱེ་བར་འགྱུར་རོ། ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། དེ་བཞིན་དུ་སྟོན་པས་གཞན་ ཡང་འདི་སྐད་ཅེས་བཀའ་སྩལ་ཏོ། ། ལྷ་ཡི་སྲིད་པར་བདག་ནི་ཡུན་རིང་དུ། ། གནས་པར་འགྱུར་ཞེས་དེ་ཡི་ཤེས་འདི་འཇུག ། ལྷ་གཙོ་དེ་ཡིས་དེ་ཡང་རབ་ཏུ་ཤེས། ། གང་ཚེ་འཆི་བའི་དུས་ནི་འབབ་འགྱུར་བ། ། དེ་ཚེ་མཚན་མ་ལྔ་དག་འབྱུང་འགྱུར་ཏེ། ། བྱེ་བ་ཕྲག་མང་ལྷ་དག་དེར་འདུ་ཞིང་། ། དེ་དག་མངོན་སུམ་དུ་ནི་ཆོས་ཀྱང་སྟོན། ། བདག་ནི་འདི་ནས་རིང་པོར་མི་ཐོགས་འཆི། ། སྲིད་པ་ཐམས་ཅད་མི་རྟག་བདེ་བ་མེད། ། གཞན་དག་འཆི་ཞིང་གཞན་དག་སྐྱེ་བར་འགྱུར། ། ཀྱེ་མ་བདག་ནི་འཆི་བར་འགྱུར་རོ་ཞེས། ། དེ་ནི་དབུས་འདུག་ཤིན་ཏུ་མི་བཟད་སྨྲ། ། དེ་ཡི་མངག་གཞུག་རྣམས་ ཀྱང་དེ་བཞིན་དུ། །

ལྷ་གཞན་དུ་མ་སྡུག་བསྔལ་ཉམ་ཐག་གོ། ། དེ་ནས་བདག་གིས་ལྟས་ནི་ལྔ་མཐོང་ནས། ། དེ་ནི་རང་གི་སྟན་ལ་དགའ་མི་འཐོབ། ། གནས་དེ་ནས་ནི་ལངས་ཏེ་འགྲོ་བར་བྱེད། ། གཞལ་མེད་ཁང་གི་གནས་སུའང་དགའ་མི་སྐྱེ། ། བདག་ཅག་འདི་མཐོང་ཐ་མ་འདི་ཡིན་ཞེས། ། དེ་བཞིན་ལྷ་མང་དུ་མ་མྱ་ངན་བྱེད། ། དེ་ཡི་སྟན་མཆོག་དམ་པ་གང་ཡིན་པ། ། དེ་ནི་ལྷ་ཡི་བུ་མོས་བླངས་ཏེ་འབུལ། ། སྟན་དེ་མཐོང་ནས་དེ་ནི་རང་སྟན་ལ། ། དགའ་བ་ཐོབ་པར་མ་གྱུར་དེ་ནས་ཤི། ། ལྷ་ཡི་དབང་པོ་ལྷ་གནས་ཤི་འཕོས་ནས། ། མི་ཡི་འཇིག་རྟེན་དུ་ནི་མངོན་པར་འགྲོ། ། དེ་ཡི་རང་ལ་ ཡོད་པའི་དྲན་མི་ཉམས། ། དེར་ཡང་བདེ་བར་འགྱུར་གྱི་སྡུག་བསྔལ་མིན། ། སྐྱེས་ནས་ཚེ་རབས་རབ་ཏུ་དྲན་གྱུར་ཏེ། ། སྐྱེས་མ་ཐག་ཏུ་སྔོན་གྱི་སྲིད་པ་ཤེས། ། ཉོན་མོངས་རྣམས་ཀྱིས་བདག་ལ་གནོད་འགྱུར་ཞེས། ། ཤིན་ཏུ་སྡུག་བསྔལ་དེར་ཡང་དགའ་བ་མེད། ། ལྷ་ཡི་འཇིག་རྟེན་ཐོབ་པའི་དཔལ་ དྲན་ནས། ། མི་ཡི་འཇིག་རྟེན་ལ་ནི་བདེ་མི་རྙེད། ། མཐོ་རིས་སྡུག་བསྔལ་མི་ཡུལ་སྨོས་ཅི་དགོས། ། སྲིད་པ་ཐམས་ཅད་སྙིང་པོ་མེད་ཅིང་གཡོ། ། གང་དང་གང་ཚེ་ལུས་སྟོབས་ཉམས་གྱུར་པ། ། དེ་ཚེ་དེ་ནི་རབ་ཏུ་འབྱུང་བར་ངེས། །

འདི་ཡང་དེ་ཡི་རྣམ་སྨིན་འགྱུར་བ་སྟེ། ། རྣམ་རྟོག་སྤྱོད་པར་ ནམ་ཡང་མི་འགྱུར་རོ། ། དེ་ནི་དེ་ཡི་མར་མེ་ཕུལ་བའི་འབྲས། ། དེ་དང་དེར་ནི་ཚེ་རབས་དེས་དྲན་འགྱུར། ། བྱ་བའི་འོས་མིན་ལས་ནི་དེ་མི་སྤྱོད། ། གདོན་མི་ཟ་བར་དེ་ནི་ཁྱིམ་ནས་འབྱུང་། ། ལོང་བར་མི་འགྱུར་ཞ་བོར་མི་འགྱུར་ཞིང་། ། དེ་ཡི་མིག་ནི་མེད་པར་འགྱུར་མ་ཡིན། ། ནད་ཅན་མ་ཡིན་ འཇིགས་རུང་སྒྲ་ལྡན་མིན། ། བླུན་པོར་མི་འགྱུར་མི་ཤེས་མི་འགྱུར་རོ། ། མིག་མེད་པར་ནི་ནམ་ཡང་མི་འགྱུར་ཞིང་། ། དེ་ཡི་མིག་ནི་ན་བར་འགྱུར་མ་ཡིན། ། མིག་གཅིག་མ་ཡིན་ཁོག་ལོང་མིག་མ་ཡིན། ། དེ་ཡི་མིག་ལ་མི་གསལ་མེད་པར་འགྱུར། ། མིག་ནི་རིང་ཞིང་དཀར་གནག་རྣམ་པར་གསལ། སྲིད་པར་དེ་ཡི་མིག་ནི་དག་པར་འགྱུར། ། ནོར་བུ་འོད་{བཟངས་,བཟང་}ལྟར་ནི་དོན་ཞིབ་རྟོགས། ། བསྐལ་པ་གྲངས་མེད་དག་ཏུ་ནམས་ཀྱང་དེའི། ། ཤ་ཡི་མིག་ནི་ཡོངས་སུ་ཉམས་མི་འགྱུར། ། དེ་ལ་མིག་ནད་དག་ནི་མི་འབྱུང་སྟེ། ། མར་མེ་ཕུལ་བའི་རྣམ་སྨིན་དེ་ཡིན་ནོ། ། དེ་བཞིན་ལག་རྩིས་གཟུགས་ དང་རྟོག་གེ་རྣམས། ། རྟོག་པར་ཁོང་ཆུད་བཟོད་ལྡན་འཇིགས་པ་མེད། ། དེ་ནི་མཛངས་ལ་བློ་དང་ལྡན་པར་འགྱུར། །

བློ་ནི་ཤིན་ཏུ་ཆ་ཕྲ་དོན་དམ་མཐོང་། ། སྲིད་པ་དག་ལ་བྱེད་པ་མེད་པར་ལྟ། ། རྒྱལ་བའི་བསྟན་ལ་སྣང་བ་ཐོབ་པར་འགྱུར། ། དེ་བཞིན་འཇིག་རྟེན་འདྲེན་པ་སངས་རྒྱས་མཐོང་། ། མཐོང་ནས་དད་པས་མཆོད་པ་རབ་ཏུ་བྱེད། ། གཟུགས་ཀྱི་དངོས་པོ་བཟང་དང་མཛེས་པར་འགྱུར། ། མཛའ་བཤེས་དང་ནི་རྩ་ལག་སྐྱེ་བོ་དགའ། ། ཕྱུག་ཅིང་སྟོབས་ལྡན་ནོར་ནི་མང་བར་འགྱུར། ། མི་ཕྱེད་འཁོར་ནི་ཕུན་སུམ་ཚོགས་པ་འཐོབ། ། ཇི་ལྟར་མར་མེས་མུན་པ་བསལ་ནས་སུ། ། ཀུན་ལ་འོད་ཀྱིས་སྣང་བ་ཁྱབ་པ་ལྟར། ། དེ་བཞིན་ཀུན་སྣང་བྱས་ནས་ལྷང་ངེའོ། ། མུན་པའི་དབང་དུ་ངེས་པར་དེ་མི་འགྲོ། ། སངས་རྒྱས་མཆོད་རྟེན་ལ་ནི་མི་གང་གིས། ། སེམས་ནི་དད་པས་མར་མེའི་ཕྲེང་བ་འབུལ། ། མར་མེ་ཕུལ་བའི་སེམས་ནི་རྣམ་དག་ཅིང་། ། དེ་ནི་འཇིག་རྟེན་ རིགས་པའི་མཆོག་ཏུ་འགྱུར། ། བལྟ་ན་སྡུག་ཅིང་རབ་ཏུ་མཛེས་པར་འགྱུར། ། འཇིག་རྟེན་ཀུན་གྱི་དགའ་བ་སྐྱེ་བར་འགྱུར། ། ལྟད་མོ་མི་འདོད་བཀྲ་ཤིས་འདོད་མ་ཡིན། ། གཡོན་ཕྱོགས་ལམ་ལ་དེ་ནི་བསྟེན་མི་འགྱུར། ། དེ་ནི་འཇིག་རྟེན་ལོག་ལྟ་གང་དག་དང་། ། ལམ་གོལ་གང་དག་ཡིན་ པ་དེར་མི་མོས། ། རྒྱལ་ཕྲན་ཙམ་གྱིས་ཆོག་པར་དེ་འཛིན་ཅིང་། །

སུ་དང་ཡང་ནི་འཐབ་ཏུ་འགྲོ་མི་བྱེད། ། ཚེགས་འབྱུང་མེད་ཅིང་མྱ་ངན་མེད་པར་འགྱུར། ། དེ་ཡི་སེམས་ལ་ཡོངས་སུ་ཡི་ཆད་མེད། ། དེ་ལ་ཡིད་མི་ཆེས་པར་མི་འགྱུར་རོ། ། བསམ་པ་ངན་དང་གནོད་པ་བྱེད་ པ་མེད། ། རྒྱལ་པོའི་ཕོ་བྲང་གང་དུ་དེ་སྨྲ་བ། ། རྒྱལ་པོ་དང་ནི་རྒྱལ་འཁོར་གྲགས་པར་འགྱུར། ། སྐྱ་རྦབ་ནད་ཀྱིས་ནམས་ཀྱང་དེ་མི་ཐེབས། ། ཟ་མར་མི་འགྱུར་མ་ནིང་འགྱུར་མ་ཡིན། ། ལེགས་པར་གནས་ཤིང་བདེ་དང་ལྡན་འགྱུར་ལ། ། དེ་ཡི་ལུས་ལ་ནད་རྣམས་འབྱུང་མི་འགྱུར། ། རྨི་ ལམ་དུ་ནི་སྡིག་པ་མི་རྨི་ལ། ། དེས་ནི་ཇི་ལྟར་སྟོན་པ་དེ་ཚེ་ཤེས། ། དེས་ནི་ཡང་དང་ཡང་དུ་གཏེར་རྙེད་དེ། ། བདེ་གཤེགས་མཆོད་རྟེན་མཆོད་པས་དེ་ལྟར་འགྱུར། ། དེ་བཞིན་གཤེགས་པའི་མཆོད་རྟེན་ལ་མར་མེ་དབུལ་བ་ཕུལ་བས། སེམས་ཅན་དེ་ནི་འདུན་པ་བཞི་འཐོབ་སྟེ། བཞི་ གང་ཞེ་ན། ལུས་ཀྱི་འདུན་པ་དང་། ལོངས་སྤྱོད་ཀྱི་འདུན་པ་དང་། རིགས་བཙུན་པར་སྐྱེ་བའི་འདུན་པ་དང་། ཤེས་རབ་འཐོབ་པ་སྟེ། ཤཱ་རིའི་བུ་དེ་བཞིན་གཤེགས་པའི་མཆོད་རྟེན་ལ་མར་མེ་དབུལ་བ་ཕུལ་བས་འདུན་པ་བཞི་པོ་དེ་དག་འཐོབ་པར་འགྱུར་རོ། ། བཅོམ་ལྡན་འདས་ཀྱིས་ དེ་སྐད་ཅེས་བཀའ་སྩལ་ཏེ།

བདེ་བར་གཤེགས་པས་དེ་སྐད་གསུངས་ནས། དེ་བཞིན་དུ་སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། ། དྲང་སྲོང་ཆེན་པོའི་མཆོད་རྟེན་མར་མེ་ཕུལ། ། དེ་ཡི་ལུས་རྫོགས་པ་དང་སྟོབས་ཆེར་འགྱུར། ། དེ་ནི་ནམས་ཀྱང་རྩོད་པ་སྟེན་མི་བྱེད། ། དབང་ཕྱུག་ཚུགས་པ་མེད་པ་ཕྱོགས་བཅུར་སྤྱོད། ། དྲང་སྲོང་ཆེན་པོའི་མཆོད་རྟེན་མར་མེ་ཕུལ། ། རྣམ་པར་གྲགས་པའི་ལོངས་སྤྱོད་ལྡན་པ་དང་། ། ཡོན་ཏན་མཆོག་ལྡན་རབ་མཆོག་ཁྱིམ་དུ་སྐྱེ། ། སྐྱེས་ནས་ཚེ་རབས་དྲན་པ་ཉིད་དུ་འགྱུར། ། གཡོག་འཁོར་ཕུན་སུམ་ཚོགས་པ་མཆོག་ ལྡན་འགྱུར། ། སྲོག་ཆགས་རྣམས་ལ་རྟག་ཏུ་སྙིང་བརྩེ་བྱེད། ། རྟག་ཏུ་མི་འཚེ་ཤིན་ཏུ་དེས་པར་འགྱུར། ། རྣམ་ལྟུང་འགྲོ་བའི་ཁྱིམ་དུ་དེ་མི་སྐྱེ། ། ཤཱ་རིའི་བུ་དེ་བཞིན་གཤེགས་པའི་མཆོད་རྟེན་ལ་མར་མེ་དབུལ་བ་ཕུལ་བས་ཡོངས་སུ་དག་པ་བཞི་འཐོབ་སྟེ། བཞི་གང་ཞེ་ན། ལུས་ ཡོངས་སུ་དག་པ་དང་། ངག་ཡོངས་སུ་དག་པ་དང་། ཡིད་ཡོངས་སུ་དག་པ་དང་། མཛའ་བཤེས་ཡོངས་སུ་དག་པའོ། ། ཤཱ་རིའི་བུ་རིགས་ཀྱི་བུའམ། རིགས་ཀྱི་བུ་མོ་དེ་སྐྱེ་བའི་གནས་དེ་དང་། དེ་དག་ཏུ་སྐྱེས་པ་ན་སྲོག་གཅོད་པ་སྤོང་བར་འགྱུར་ཏེ།

དེ་སྲོག་གཅོད་ པར་མི་བྱེད་དོ། ། མ་བྱིན་པར་མི་ལེན་ཏོ། ། འདོད་པས་ལོག་པར་གཡེམ་པ་སྤོང་བར་འགྱུར་ཏེ། རང་གི་ཆུང་མ་ལ་ཡང་ལོག་པར་མི་སྟེན་ཏོ། ། འབྲུའི་ཆང་དང་། བཅོས་པའི་ཆང་བཏུང་བ་སྤོང་བར་བྱེད་དོ། ། སེམས་ཅན་གང་ལ་ཡང་དབྱུག་པའམ། མཚོན་ནམ། བོང་བའམ། ཁུ་ཚུར་རམ། མཚོན་ཆར་གྱུར་པ་གང་ཡང་རུང་བས་རྣམ་པར་འཚེ་བར་མི་བྱེད་ཅིང་། དེ་སྡིག་པ་མི་དགེ་བའི་ཆོས་རྣམས་ལས་ལྡོག་པར་འགྱུར་ཏེ། ཤཱ་རིའི་བུ་དེ་དག་ནི་ལུས་ཀྱི་ཡོངས་སུ་དག་པ་ཞེས་བྱའོ། ། དེ་ལ་ངག་གི་ཡོངས་སུ་དག་པ་གང་ཞེ་ན། དེ་{བརྫུན་,རྫུན་}དུ་སྨྲ་བ་སྤངས་ པ་ཡིན་ཏེ། དེ་མ་མཐོང་བའམ། མ་ཐོས་པ་རྗོད་པར་མི་བྱེད་ལ། མཐོང་བ་དང་། ཐོས་པ་དྲིས་པ་ཡང་དུས་མ་ཡིན་པར་སྨྲ་བར་མི་བྱེད་དེ། དེ་མཐོང་བའམ། ཐོས་པ་དྲིས་ན་ཡང་དག་པར་སྨྲ་བར་བྱེད་དེ། དེ་བདག་གི་དོན་ནམ། གཞན་གྱི་དོན་དུ་ཡང་རུང་སྟེ་ལོག་པར་ མི་སྨྲའོ། ། གཞན་དག་གིས་{བརྫུན་,རྫུན་}དུ་སྨྲ་བ་བཅོལ་བའི་ཚེ་ཡང་དག་པར་ཤེས་ན་བདེན་པ་སྲུང་བར་བྱེད་དེ། ངག་གི་ཡོངས་སུ་མ་དག་པ་དེ་དག་སྤོང་བར་བྱེད་དོ། ། དེ་དེ་དག་དབྱེ་བའི་ཕྱིར་འདི་ནས་ཐོས་པ་ཕ་བིར་མི་སྙོད།

དེ་དག་དབྱེ་བའི་ཕྱིར་ཕ་བི་ནས་ཐོས་པ་འདིར་མི་སྙོད་དེ། འཐུན་པ་རྣམས་ནི་གཅུགས་པར་བྱེད་ཅིང་། བྱེ་བ་རྣམས་ལ་ནི་སྡུམས་བྱེད་དོ། ། དེ་ངག་རྩུབ་པོ་སྤངས་པ་ཡིན་ཏེ། ངག་གང་ཞེར་འདེབས་པ། བརླང་བ། གཞན་ལ་རྩུབ་པ། གཞན་ལ་མི་བདེ་བ། མི་སྡུག་པ། མི་འདོད་པ། མི་དགའ་བ། ཡིད་དུ་མི་འོང་བ། གཞན་ལ་གནོད་པ། ཁོན་དུ་འཛིན་པའི་ངག་དེ་ལྟ་བུ་སྤངས་ནས། ངག་མཉེན་པ། འཇམ་པ། ཡིད་དུ་འོང་བ། བདེན་པ། རྣར་སྙན་པ། སྙིང་དུ་སྡུག་པ། མཛའ་བར་འགྱུར་བ། སྐྱེ་བོ་མང་པོ་མགུ་བ། སྐྱེ་བོ་མང་པོ་འདོད་པ། དགའ་བ། ཡིད་དུ་འོང་བ། དགྲ་ཐམས་ཅད་རབ་ཏུ་ཞི་བར་བྱེད་པ་དེ་ལྟ་བུའི་ངག་སྨྲའོ། ། དེ་ཚིག་ཀྱལ་པ་སྤངས་པ་ཡིན་ཏེ། དེ་སྤང་བར་བྱ་བ་གཞན་དང་མི་སྨྲ་བ་ཡིན། དེ་གཞན་གྱི་ལག་རྩིས་དང་བརྡ་སྦེད་པར་བྱེད་དོ། ། དེ་མང་དུ་སྨྲ་བར་མི་བྱེད། དུས་མ་ཡིན་པར་སྨྲ་བར་མི་བྱེད་ལ། མྱ་ ངན་ལས་འདས་པ་དང་མི་ལྡན་པའི་ཚིག་མི་སྨྲ་སྟེ། དེ་ལྟར་དེ་དག་གི་ལས་ཡོངས་སུ་མ་དག་པ་སྤོང་བ་འདི་ནི། ཤཱ་རིའི་བུ་ངག་གི་ལས་ཡོངས་སུ་དག་པ་ཞེས་བྱའོ། ། དེ་ཡིད་ཀྱི་ལས་ཡོངས་སུ་མ་དག་པ་སྤོང་བ་ཡིན་ཏེ། དེ་བརྣབ་སེམས་སུ་མི་བྱེད་ཅིང་།

དེ་གཞན་གྱི་ནོར་ དང་། གཞན་གྱི་རྫས་དང་། གཞན་གྱི་ཡོ་བྱད་དག་ལ་བརྣབ་སེམས་མི་སྐྱེད་དོ། ། དེ་གནོད་སེམས་མི་བྱེད་དེ། གནོད་སེམས་སྤོང་བ་ཡིན་ནོ། ། ལོག་པར་ལྟ་བ་ཡང་སྤོང་སྟེ། སྡིག་པའི་ལྟ་བ་ཅན་མ་ཡིན་ནོ། ། དེ་ལྟར་ཡིད་ཀྱི་ལས་ཡོངས་སུ་མ་དག་པ་སྤོང་བ་འདི་ནི་ཡིད་ ཀྱི་ལས་ཡོངས་སུ་དག་པ་ཞེས་བྱའོ། ། མཛའ་བཤེས་ཡོངས་སུ་དག་པ་ཡང་འཐོབ་སྟེ། གང་དག་{བརྫུན་,རྫུན་}དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་བཏུང་བ་སྤོང་བ་དང་། མི་རྩུབ་པ་དང་། མི་བརླང་བ་དང་། ལེགས་པར་སྡོམ་པ་དང་། ཡང་དག་པའི་ལྟ་བ་ཅན་ དེ་དག་ལ་སྟེན་ཅིང་གང་དུ་ཡང་སངས་རྒྱས་བཅོམ་ལྡན་འདས་རྣམས་དང་། བྱང་ཆུབ་སེམས་དཔའ་རྣམས་དང་། རང་སངས་རྒྱས་དང་། ཉན་ཐོས་རྣམས་ལ་ཡང་སྟེན་ཅིང་སྙེན་ལ་བསྙེན་བཀུར་བྱེད་དེ། ཤཱ་རིའི་བུ་འདི་ནི་ཡོངས་སུ་དག་པ་བཞི་པ་སྟེ། མཛའ་བཤེས་ ཡོངས་སུ་དག་པ་ཞེས་བྱའོ། ། ཤཱ་རིའི་བུ་དེ་བཞིན་གཤེགས་པའི་མཆོད་རྟེན་ལ་མར་མེ་དབུལ་བ་ཕུལ་བས། ཡོངས་སུ་དག་པ་བཞི་པོ་དེ་དག་འཐོབ་པར་འགྱུར་རོ། ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས།

དེ་ བཞིན་དུ་སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། ། རྣམ་པར་སྦྱང་ཕྱིར་བདེ་གཤེགས་གསུངས་པ་ལ། ། ལུས་དང་ངག་དང་ཡིད་ཀྱིས་ཤིན་ཏུ་བསྡམས། ། ལྟ་བ་མ་རྙེད་ཚུལ་ཁྲིམས་རྣམ་པར་དག ། དེ་ཡི་མིག་ནི་ཡིད་ལས་བྱུང་བ་ཡིན། ། ཉི་བཞིན་ཕྱོགས་རྣམས་ སུ་ནི་ཤིན་ཏུ་གསལ། ། དེ་ཡིས་ཟག་པ་ཟད་པ་མྱུར་དུ་ཤེས། ། དེ་ཡི་བློ་ནི་རྫུ་འཕྲུལ་ཆེ་བར་འགྱུར། ། ལྷ་མིག་རྡུལ་དང་བྲལ་ཞིང་ཟག་པ་མེད། ། བློ་ལྡན་དེ་ཡིས་འཇིག་རྟེན་སེམས་རྣམས་དང་། ། ལྷ་ཡི་མངོན་ཤེས་སོ་སོ་རིག་པ་ཤེས། ། འདོད་ན་ཉན་ཐོས་བྱང་ཆུབ་རྙེད་མི་དཀའ། ། མར་མེ་ཕུལ་བའི་རྣམ་སྨིན་དེ་ཡིན་ནོ། ། དྲང་སྲོང་ཆེན་པོའི་མཆོད་རྟེན་མར་མེ་ཕུལ། ། གལ་ཏེ་སངས་རྒྱས་བྱང་ཆུབ་འདོད་ནའང་བླ། ། བློ་ལྡན་པ་ལ་གསུམ་ཆར་ཉམས་པ་མེད། ། ཤེས་རབ་མིག་ལྡན་ལོངས་སྤྱོད་ཆེན་པོར་འགྱུར། ། ཤཱ་རིའི་བུ་ཐེག་པ་ཆེན་པོ་ལ་ཡང་དག་པར་ཞུགས་པའི་ རིགས་ཀྱི་བུའམ། རིགས་ཀྱི་བུ་མོས་དེ་བཞིན་གཤེགས་པའི་མཆོད་རྟེན་ལ་མར་མེ་དབུལ་བ་ཕུལ་ན། སྐྱེ་བའི་གནས་དེ་དང་དེ་དག་ཏུ་འདུན་པར་འགྱུར་བའི་ཆོས་ཀྱི་མཆོག་བརྒྱད་འཐོབ་སྟེ། བརྒྱད་གང་ཞེ་ན། ཤའི་མིག་མཆོག་འཐོབ་པ་དང་།

དྲན་པ་སྤྱི་ གཙུག་བལྟར་མི་མཐོང་བ་འཐོབ་པ་དང་། བསྒོམ་པ་ཡོངས་སུ་རྫོགས་པར་ངེས་པར་འབྱེད་པའི་ཆ་དང་འཐུན་པའི་ལྷའི་མིག་མཆོག་འཐོབ་པ་དང་། ཤེས་རབ་ཡོངས་སུ་རྫོགས་པས་ཚུལ་ཁྲིམས་ཉམས་པ་མེད་པ་འཐོབ་པ་དང་། སྔོན་བསོད་ནམས་བྱས་པས་མཐོ་རིས་འཐོབ་པ་དང་། བསོད་ནམས་ལེགས་པར་བྱས་པས་དལ་བ་ཕུན་སུམ་ཚོགས་པ་འཐོབ་པ་དང་། སེམས་ཅན་ཐམས་ཅད་ཀྱི་མིག་ཏུ་གྱུར་པས་སངས་རྒྱས་འབྱུང་བ་མཉེས་པར་བྱེད་པ་དང་། ཤཱ་རིའི་བུ་རིགས་ཀྱི་བུའམ། རིགས་ཀྱི་བུ་མོས་མར་མེ་ཕུལ་བའི་དགེ་བའི་རྩ་བ་དེས་འཁོར་ལོས་སྒྱུར་བའི་རྒྱལ་ སྲིད་འཐོབ་སྟེ། དེ་ལ་ཡང་ཞེ་འགྲས་པ་མེད་པའི་ཡིད་དང་ལྡན་ཞིང་མཆོག་ཏུ་བལྟ་ན་སྡུག་པའམ། ལྷའི་དབང་པོ་བརྒྱ་བྱིན་རྫུ་འཕྲུལ་ཆེན་པོ་ཐོབ་ཅིང་མིག་སྟོང་དང་ལྡན་པར་འཐོབ་པར་འགྱུར་བའམ། ཚངས་པའི་གནས་ལ་མཁས་པའི་ཚངས་པར་ཡང་འགྱུར་ཏེ་གྲགས་པའི་བསམ་ གཏན་འཐོབ་པར་འགྱུར་བ་སྟེ། དགེ་བའི་རྩ་བ་བྱང་ཆུབ་ཏུ་ཡོངས་སུ་བསྔོས་པས་འདུན་པར་འགྱུར་བའི་ཆོས་ཀྱི་མཆོག་བརྒྱད་པོ་དེ་དག་འཐོབ་བོ། ། གཞན་ཡང་ཆོས་བརྒྱད་འཐོབ་སྟེ། བརྒྱད་གང་ཞེ་ན། སངས་རྒྱས་ཀྱི་སྤྱན་དཔག་ཏུ་མེད་པ་འཐོབ་པ་དང་།

སངས་རྒྱས་ཀྱི་སྤོབས་ པ་དཔག་ཏུ་མེད་པ་འཐོབ་པ་དང་། སངས་རྒྱས་ཀྱི་རྫུ་འཕྲུལ་དཔག་ཏུ་མེད་པ་དང་། སངས་རྒྱས་ཀྱི་ཚུལ་ཁྲིམས་དཔག་ཏུ་མེད་པ་དང་། སངས་རྒྱས་ཀྱི་ཏིང་ངེ་འཛིན་དཔག་ཏུ་མེད་པ་དང་། སངས་རྒྱས་ཀྱི་ཤེས་རབ་དཔག་ཏུ་མེད་པ་དང་། སངས་རྒྱས་ཀྱི་རྣམ་ པར་གྲོལ་བ་དཔག་ཏུ་མེད་པ་དང་། སེམས་ཅན་གྱི་སེམས་དང་བསམ་པ་དཔག་ཏུ་མེད་པ་ལ་འཇུག་པ་འཐོབ་སྟེ། ཤཱ་རིའི་བུ་མར་མེ་ཕུལ་བས་དེ་ལྟར་རྣམ་པར་སྨིན་པ་དཔག་ཏུ་མེད་པ་ཡོངས་སུ་བཟུང་བ་ཡིན་ནོ། ། ཤཱ་རིའི་བུ་གཞན་ཡང་སེམས་ཅན་གང་དག་དེ་བཞིན་གཤེགས་པ་ ཆོས་འཆད་པ་ན། ཀྱེ་ཨེ་མ་ཧོ་ཆོས་འཆད་དོ། ། ཀྱེ་ཨེ་མ་ཧོ་ཆོས་རབ་ཏུ་སྟོན་ཏོ་ཞེས་མར་མེ་དབུལ་བ་ཕུལ་བའི་མར་མེ་དེ་ཏིལ་གྱི་མར་མེར་རྗེས་སུ་བཟུང་བས། ཆོས་ཀྱི་མར་མེ་རྗེས་སུ་འཛིན་པར་བྱེད་དོ། ། དེ་མར་མེ་ཕུལ་བའི་དགེ་བའི་རྩ་བ་དེས་ཚོགས་དཔག་ཏུ་མེད་པ་བརྒྱད་འཐོབ་ སྟེ། བརྒྱད་གང་ཞེ་ན། དྲན་པའི་ཚོགས་དཔག་ཏུ་མེད་པ་འཐོབ་པ་དང་། དེ་བཞིན་དུ་སྦྱར་ཏེ། བློ་གྲོས་ཀྱི་ཚོགས་དང་། དད་པའི་ཚོགས་དང་། བརྩོན་འགྲུས་ཀྱི་ཚོགས་དང་། ཤེས་རབ་ཀྱི་ཚོགས་དང་། ཏིང་ངེ་འཛིན་གྱི་ཚོགས་དང་། སྤོབས་པའི་ཚོགས་དང་།

བསོད་ ནམས་ཀྱི་ཚོགས་དཔག་ཏུ་མེད་པ་འཐོབ་སྟེ། ཚོགས་དཔག་ཏུ་མེད་པ་བརྒྱད་པོ་དེ་དག་འཐོབ་པར་འགྱུར་རོ། ། སོ་སོ་ཡང་དག་པར་རིག་པ་བཞི་ཡང་འཐོབ་སྟེ། རིམ་གྱིས་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་འཐོབ་པར་འགྱུར་རོ། ། ཤཱ་རིའི་བུ་གཞན་ཡང་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ། དེ་དང་བའི་སེམས་ཀྱིས་ཐལ་མོ་སྦྱར་བ་བྱས་པའི་དགེ་བའི་རྩ་བ་དེས་ཆོས་མཆོག་ཏུ་བྱུང་བ་བརྒྱད་འཐོབ་སྟེ། བརྒྱད་གང་ཞེ་ན། གཟུགས་མཆོག་ཏུ་བྱུང་བ་འཐོབ་པ་དང་། གཡོག་འཁོར་མཆོག་ཏུ་བྱུང་ བ་འཐོབ་པ་དང་། ཚུལ་ཁྲིམས་མཆོག་ཏུ་བྱུང་བ་དང་། ལྷ་དང་མི་རྣམས་སུ་སྐྱེ་བ་མཆོག་ཏུ་བྱུང་བ་དང་། དད་པ་མཆོག་ཏུ་བྱུང་བ་དང་། སྤོབས་པ་མཆོག་ཏུ་བྱུང་བ་དང་། ཀུན་ནས་ཉོན་མོངས་པ་མེད་པའི་འཕགས་པའི་ལམ་འཐོབ་པ་དང་། བླ་ན་མེད་པ་ཡང་དག་པར་ རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའོ། ། ཤཱ་རིའི་བུ་དེ་ཅིའི་ཕྱིར་དཔག་ཏུ་མེད་པ་ཞེས་བྱ་ཞེ་ན། དེ་བཞིན་གཤེགས་པ་ལ་དེས་མཆོད་པའི་འབྲས་བུ་དཔག་ཏུ་མེད་པའི་ཕྱིར་ཏེ། ཕན་ཡོན་དཔག་ཏུ་མེད་པ་ཡིན་ནོ། ། དེ་ནས་དེའི་ཚེ་བཅོམ་ལྡན་འདས་ཀྱིས་འདི་སྐད་དུ།

བརྩམ་བྱོས་མངོན་པར་འབྱུང་བར་གྱིས། ། སངས་རྒྱས་བསྟན་ལ་བརྩོན་པར་བྱོས། ། འདམ་བུའི་ཁྱིམ་ལ་གླང་ཆེན་བཞིན། ། འཆི་བདག་སྡེ་རྣམས་གཞོམ་པར་བྱོས། ། ཞེས་ཆེད་དུ་བརྗོད་པ་དེ་ཆེད་དུ་བརྗོད་པ་མཛད་དོ། ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་ སྩལ་པ། ཤཱ་རིའི་བུ་ཆོས་ལྔ་པོ་འདི་དག་ནི་མཆོག་ཏུ་རྙེད་པར་དཀའ་བ་སྟེ། ལྔ་གང་ཞེ་ན། མིར་སྐྱེ་བ་འཐོབ་པ་དང་། དེ་བཞིན་གཤེགས་པའི་བསྟན་པ་ལ་རབ་ཏུ་འབྱུང་བ་དང་། དེ་ལ་མངོན་པར་དགའ་བ་དང་། ཚུལ་ཁྲིམས་ཡོངས་སུ་རྫོགས་པ་དང་། ཟག་པ་ཟད་པ་སྟེ། ཤཱ་རིའི་ བུ་ཆོས་ལྔ་པོ་དེ་དག་ནི་སེམས་ཅན་ཐམས་ཅད་ཀྱིས་མཆོག་ཏུ་རྙེད་པར་དཀའ་བ་ཡིན་ཏེ། དེ་དག་ནི་ཁྱེད་རྣམས་ཀྱིས་ཐོབ་ཟིན་ཏོ། ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། དེ་བཞིན་དུ་སྟོན་པ་གཞན་ཡང་འདི་སྐད་ཅེས་ བཀའ་སྩལ་ཏོ། ། བྱང་ཆུབ་དོན་ཕྱིར་སེམས་ཅན་ཕན་འདོགས་པས། ། བདེ་གཤེགས་མཆོད་རྟེན་དབུལ་བ་འདིར་ཕུལ་བས། ། མཁས་པ་དེ་ཡིས་བྱས་པའི་ལས་དེས་ནི། ། ཚེ་རབས་ཀུན་དུ་ཁྱད་པར་ཅན་དུ་འགྱུར། ། འདི་ནས་ཤི་འཕོས་ལྷ་མིས་བསྔགས་པ་ཡི། །

ཡང་སྲིད་དམ་པ་དེ་ནི་ འཐོབ་པར་འགྱུར། ། རི་རབ་བཞིན་དུ་དེ་ནི་མི་གཡོ་ལ། ། འོད་ཟེར་དག་གིས་ཕྱོགས་ཀུན་སྣང་ཞིང་མཛེས། ། ལྷ་ཚོགས་རྣམས་ཀྱིས་མཐོང་ནས་གུས་དང་བཅས། ། མཆོག་ཏུ་གུས་པས་དེ་ལ་དགའ་བ་སྐྱེད། ། སྟོད་པ་བྱེད་ཅིང་དེ་ལ་མཆོད་པ་བྱེད། ། ཡང་དང་ཡང་དུ་ལྟ་བས་ངོམས་པ་མེད། ། བསོད་ནམས་མཚན་བྱས་དེ་ནི་ལྷས་མཆོད་འོས། ། ཚངས་པའི་གནས་ན་ཚངས་པ་མཛེས་པ་འདྲ། ། ཅི་ཡི་ལས་ཤིག་ངེས་པར་དེས་བསྟེན་ན། ། གང་གིས་དེ་ཡི་ལུས་ནི་ཤིན་ཏུ་མཛེས། ། འདི་ན་བསོད་ནམས་མི་འདོད་སུ་ཞིག་ཡོད། ། འཕགས་པའི་ཚུལ་ཁྲིམས་མཁས་པ་སུ་མི་སྟེན། ། ཐུབ་པ་ མཐོང་ན་ལྟ་བས་མི་ངོམས་ཏེ། ། ཆོས་ཐོས་ནས་ནི་སུ་ཞིག་བག་མི་བྱེད། ། མི་ཡི་འཇིག་རྟེན་གནས་ཚེ་དེ་ཡིས་ནི། ། བདེ་གཤེགས་མཆོད་རྟེན་མར་མེ་ཕུལ་བྱས་ཤིང་། ། བདེ་བར་གཤེགས་ཀྱི་བསྟན་ལ་གནས་བྱས་པས། ། འདི་ན་ལྷ་མཆོག་རྙེད་པ་ལེགས་པར་རྙེད། ། མི་ཡི་ལུས་ནི་ བདག་གིས་ཐོབ་གྱུར་ཅིག ། རྒྱལ་བའི་བསྟན་ལ་དད་པ་མཆོག་ཐོབ་ཤོག ། གལ་ཏེ་བག་མེད་གྱུར་ན་ལུས་འདོར་གྱི། ། ཆོས་ཀྱི་དམ་པ་འདོར་བར་ཡོད་མ་གྱུར། ། མི་ལུས་རྙེད་པར་དཀའ་བ་ཐོབ་གྱུར་ནས། །

བླུན་རྣམས་ཅི་ཕྱིར་རང་གི་དོན་མི་བྱེད། ། བདེ་གཤེགས་བསྟན་ལ་གནོད་བྱེད་སེམས་ལྡན་ན། ། ཤི་ནས་གཡང་ས་ཆེན་པོར་ལྟུང་བར་འགྱུར། ། དེ་ཡིས་འབྱོར་བ་རྒྱ་ཆེན་ལྷས་ཐོས་ནས། ། སྐྱོ་བ་སྐྱེས་ཏེ་སྨོན་ལམ་འདེབས་བྱེད་པ། ། མི་ཡི་ལུས་ནི་བདག་གིས་ཐོབ་གྱུར་ཅིག ། ལེགས་དོན་གྱུར་ནས་ཚངས་སྤྱོད་བདག་སྟོན་ཤོག ། འཆི་བའི་དུས་བྱེད་ཚེ་ཡང་དེ་བཞིན་དུ། ། ཆོས་ལ་ཕན་ཞིང་སེམས་ལ་གསལ་ གྱུར་ཅིང་། ། ལྷ་སྟོང་བྱེ་བ་ལྷ་མོ་རྣམས་བཅས་པས། ། དེ་ནི་བདག་གི་ཡིན་ཞེས་དགའ་བར་བྱེད། ། ལྷ་ཡི་བུ་མོ་ཡིད་འོང་བརྒྱན་པ་རྣམས། ། སྐྱེད་མོས་ཚལ་བཞིར་དེ་ནི་རྩེ་བྱེད་འཇུག ། ཡིད་དུ་འོང་བའི་སྤོས་ངད་ཀུན་ནས་ལྡང་། ། གླུ་དབྱངས་སྙན་པའི་སྒྲ་ཡང་ཐོས་པར་འགྱུར། ། བསྔགས་པའི་ལྷ་དེ་ག་ ལས་གར་འགྲོ་བ། ། དེ་དང་དེར་ནི་གཟུགས་བཟང་རྣམས་ཀྱང་མཐོང་། ། མི་སྡུག་གཟུགས་ངན་རྣམས་ཀྱང་མི་མཐོང་སྟེ། ། རྒྱལ་བའི་མཆོད་རྟེན་མར་མེ་ཕུལ་བས་འགྱུར། ། དེ་ནས་ཤི་འཕོས་མི་ཡི་སྲིད་པ་འདིར། ། དྲན་དང་ལྡན་བཞིན་མ་ཡི་མངལ་ན་གནས། ། བཙས་ནས་གང་ནས་ཤི་འཕོས་ཚེ་ རབས་དྲན། ། འཕགས་པའི་ཡེ་ཤེས་སྟོབས་ལས་ཉམས་མི་འགྱུར། །

བདེ་གཤེགས་མཆོད་རྟེན་མར་མེ་ཕུལ་བྱས་པས། ། དེ་ཡིས་ལས་བྱས་པ་ནི་དེ་ཉིད་ཀྱིས། ། འཁོར་ལོས་སྒྱུར་བ་མི་བདག་སྟོབས་ཆེན་ལྡན། ། ཡིད་འོང་གཟུགས་བཟང་བལྟ་ན་དགའ་བར་འགྱུར། ། དེ་ཡིས་ལས་བྱས་པ་དེས་ཚེ་ རིང་འགྱུར། ། གཅིག་ཏུ་དག་པ་ཉིད་ཀྱི་བདེ་དང་ལྡན། ། དེ་ཡི་ལུས་ནི་ནད་ཀྱིས་ཉོན་མི་མོངས། ། མར་མེ་ཕུལ་བའི་རྣམ་སྨིན་དེ་ཡིན་ནོ། ། བདེ་བར་གཤེགས་ལ་མར་མེས་མཆོད་བྱས་པས། ། རྐུན་པོའི་གནོད་མེད་རྒྱལ་པོའི་ཆད་པ་མེད། ། གཤེད་མ་མེད་ཅིང་ཆུང་མ་བྱི་ཕོ་མེད། ། དེ་ཡི་ལས་ཀྱིས་ ནམས་ཀྱང་གཙེ་མི་འགྱུར། ། བདེ་ཞིང་ལོ་ལེགས་གང་དུའང་འཇིགས་པ་མེད། ། རྟག་ཏུ་འབྱོར་ཅིང་ལེགས་འབྱོར་ནོར་འབྲུ་ལྡན། ། དེ་ཡི་སྐྱེད་མོས་ཚལ་མཆོག་ཕྲེང་བ་དང་། ། ཚལ་དང་ཤིང་ཕྲན་ལོ་མ་སྣ་ཚོགས་བརྒྱན། ། དེ་ཡིས་འཇིག་རྟེན་གཙོ་བོ་སངས་རྒྱས་མཐོང་། ། མཐོང་ནས་ཀྱང་ནི་མཆོག་ཏུ་ དགའ་འགྱུར་ཏེ། ། དེ་དག་རྣམས་ལ་གུས་པར་དེ་མཆོད་བྱེད། ། རྒྱལ་སྲིད་སྤངས་ནས་དགེ་སློང་ཉིད་ལ་སྟེན། ། བསྔགས་པ་མཐའ་ཡས་གཟིགས་པ་མཐའ་ཡས་ཤིང་། ། མཐའ་ཡས་བློ་ལྡན་བདེ་གཤེགས་མཆོད་རྟེན་ལ། ། མར་མེ་ཕུལ་བས་མཐའ་ཡས་བློ་ལྡན་འགྱུར། །

མར་མེ་བཞིན་དུ་ ཕྱོགས་རྣམས་ཀུན་དུ་གསལ། ། མར་མེ་ཆེན་པོས་སྐྱེས་མཆོག་ཐུབ་པ་ཡི། ། མཆོད་རྟེན་གསལ་བྱས་རྣམ་དག་མིག་གིས་ནི། ། བྱང་ཆུབ་རྡུལ་བྲལ་ཟག་པ་མེད་ཐོབ་ནས། ། དེ་ཕྱོགས་ཀུན་དུ་མར་མེ་བཞིན་དུ་གསལ། ། བདེ་གཤེགས་མཆོད་རྟེན་མར་མེ་ཕུལ་བས་ན། ། རྣམ་གྲོལ་བློ་ མངའ་སྟོབས་བཅུ་རྣམས་ལྡན་ཞིང་། ། དེ་བཞིན་མ་འདྲེས་ཆོས་ཀྱི་ཕ་རོལ་བྱོན། ། ཀུན་ནས་སྤྱན་ལྡན་བདེ་བར་གཤེགས་པར་འགྱུར། ། ཕྱོགས་རྣམས་དག་ན་བགྲང་བྱས་འཇིག་རྟེན་ཁམས། ། གང་དག་ཇི་སྙེད་ཡོད་པ་མ་ལུས་པ། ། མར་མེ་ལྟ་བུར་མེ་ཡི་རྒྱུ་ཡིས་ནི། ། མ་ལུས་པ་དག་རྟག་ ཏུ་སྣང་བྱས་འགྱུར། ། བདག་ཉིད་ཆེ་ལ་མར་མེ་ཕུལ་བ་ལས། ། མཐུ་འབྱུང་གང་ཡིན་དེ་ནི་དེ་ཡིན་ནོ། ། མར་མེ་འདྲ་བ་དག་ལ་སེམས་ཅན་ཀུན། ། ལྷག་བྱས་གལ་ཏེ་མཐུ་ཆེན་དོན་དམ་མཐོང་། ། རང་རྒྱལ་རྣམས་སུ་གྱུར་ལ་དེ་མཆོད་ཕྱིར། ། གཅིག་འགས་མར་མེ་འབར་བར་བྱས་གྱུར་ལ། ། མར་མེའི་སྙིང་པོ་རི་རབ་ཙམ་བྱས་ཤིང་། ། དེ་ཡིས་འཇིག་རྟེན་མ་ལུས་སྣང་བྱེད་ལ། ། རྣམ་པ་དེ་འདྲས་མཐའ་ཡས་ཕྱོགས་ཀུན་དུ། ། གལ་ཏེ་མར་མེ་འབུལ་བར་བྱེད་གྱུར་ལ། ། རང་རྒྱལ་བྱང་ཆུབ་ཏུ་ནི་སྨོན་སེམས་ཀྱིས། །

བསྐལ་པ་བརྒྱ་ཕྲག་མཐའ་ཡས་འབར་བྱེད་པས། ། གང་ཞིག་ བྱང་ཆུབ་ཕྱིར་ནི་སྨོན་སེམས་ཀྱིས། ། མཆོད་རྟེན་མཆོག་ལ་རྩྭ་མེས་གསལ་བྱེད་ན། ། དེ་བས་དེ་མཆོག་འབྲས་བུ་ཆེས་ཆེ་ཞེས། ། དོན་དམ་གཟིགས་པ་སངས་རྒྱས་རྣམས་གསུང་ངོ་། ། ཕྱོགས་བཅུའི་སྐྱེ་བོ་གང་དག་དཔག་མེད་པ། ། རང་སངས་རྒྱས་ཉིད་མངོན་པར་འདོད་པའི་ཕྱིར། ། རེ་རེས་དེ་བཞིན་མར་མེ་རྣམས་ཕུལ་ཞིང་། ། བསྐལ་པ་གྲངས་མེད་དེ་དག་འབར་བྱེད་ལ། ། འཇིག་རྟེན་ཆེད་དུ་བདེ་གཤེགས་ཉིད་འདོད་ཅིང་། ། གང་ཞིག་འཇིག་རྟེན་དམ་པའི་མཆོད་རྟེན་ལ། ། མར་མེ་འབུལ་ལམ་ལན་ཅིག་ཕྱག་འཚལ་ན། ། དེ་བས་འདི་བསོད་འབྲས་བུ་ཁྱད་པར་ འཕགས། ། སངས་རྒྱས་སྤྱོད་ཡུལ་མཐོང་དཀའ་བསམ་མི་ཁྱབ། ། ཐོས་ནས་དད་དང་དགའ་བ་སྐྱེད་པར་བྱེད། ། དད་མེད་ཆོས་མཆོག་མ་ཐོབ་བྱིས་པ་རྣམས། ། ཞུམ་ཞུམ་པོར་ནི་ཤིན་ཏུ་བྱེད་པར་འགྱུར། ། དེ་ཕྱིར་འཇིག་རྟེན་ཀུན་མགོན་གང་ཡིན་པ། ། དག་ཆོས་སྤྱོད་ཡུལ་ཅན་རྣམས་རྙེད་དཀའ་ བས། ། ཐུབ་རྣམས་སྤྱན་སྔར་ཤིན་ཏུ་དང་སེམས་ཀྱིས། ། སངས་རྒྱས་ཉིད་ཀྱི་ཆེད་དུ་སྨོན་ལམ་ཐོབ། ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཤཱ་རིའི་བུ་དང་།

ཐམས་ཅད་དང་ལྡན་པའི་འཁོར་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་ བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། ། ། ། འཕགས་པ་མར་མེ་འབུལ་བ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ། ། ། ། རྒྱ་གར་གྱི་མཁན་པོ་པྲཛྙ་བརྨ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེ་ལ་སོགས་ པས་བསྒྱུར་ཅིང་ཞུས་ཏེ་གཏན་ལ་ཕབ་པ། །