༄༅། ། རྒྱ་གར་སྐད་དུ། བྷ་ག་བཱན་བཛྲ་པཱ་ཎི་གུ་ཧྱ་ཨ་བྷི་དེ་ཤ་ཏནྟྲ་རཱ་ཛ་ནཱ་མ། བོད་སྐད་དུ། བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ཞེས་ བྱ་བ། དཔལ་གསང་བའི་བདག་པོ་ཕྱག་ན་རྡོ་རྗེ་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ལྕང་ལོ་ཅན་གྱི་ཕོ་བྲང་ན། སངས་རྒྱས་གང་གཱའི་ཀླུང་གི་བྱེ་མ་དང་མཉམ་པའི་ཚོགས་དང་བྱམས་པ་ལ་སོགས་པ་བྱང་ཆུབ་སེམས་དཔའི་ ཚོགས་དང་རིག་པའི་ཁྲོ་བོའི་ཚོགས་དཔག་ཏུ་མེད་པ་དང་། ལྷ་མ་ཡིན་གྱི་ཚོགས་དང་། གནོད་སྦྱིན་ལྔ་བརྒྱ་དང་བཅས་ཏེ་ཐབས་ཅིག་ཏུ་བཞུགས་སོ། ། དེའི་ཚེ་བཅོམ་ལྡན་འདས་བདུད་ཐམས་ཅད་འཇོམས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། ། དེ་ནས་ བྱང་ཆུབ་སེམས་དཔའ་ལག་ན་རྡོ་རྗེས་བླ་གོས་ཕྲག་པ་གཅིག་ལ་གཟར་ཏེ། ཕྱག་འཚལ་ནས་འདི་སྐད་ཅེས་གསོལ་ཏོ། ། ཀྱེ་མ་གསང་བའི་རྡོ་རྗེ་འཛིན། ། ཏིང་འཛིན་རྒྱལ་པོ་མི་གཡོ་ལས། ། ཅིག་ཅར་བཞེངས་ཏེ་གསང་བའི་མཆོག ། ཡེ་ཤེས་ལྔ་ཡི་སྤྱོད་ཡུལ་གྱི། ། སྐུ་ གསུང་ཐུགས་ཀྱི་གསང་བ་མཆོག ། ཇི་ལྟར་བསྒྲུབ་པའི་རིམ་པ་དང་། ། ལས་ཀྱི་བྱ་བ་མདོར་བསྡུས་ཏེ། །

གང་ཟག་ཇི་ལྟ་བུས་སྒྲུབ་ཅིང་། ། རིག་པའི་རྒྱལ་པོ་མཆོག་གྱུར་པ། ། བཅོམ་ལྡན་འདས་ཀྱིས་ལེགས་པར་གསུངས། ། ཞེས་ཞུས་པ་དང་། བཅོམ་ལྡན་འདས་ མཉམ་པར་བཞག་པ་ལས་ལངས་ཏེ། ཐུགས་ཀར་ཡེ་ཤེས་ལྔ་མི་ཕྱེད་པའི་རྡོ་རྗེ་ལན་གསུམ་དུ་གསོར་བས་འཇིག་རྟེན་གྱི་ཁམས་ཐམས་ཅད་འགུལ་བ་དང་། ལྡེག་པ་ལ་སོགས་པ་ཀུན་ཏུ་འཁྲུགས་ཏེ། གདུག་པ་ཅན་འདུལ་བ་ཞེས་བྱ་བའི་འོད་ཟེར་བཀྱེ་ནས་སླར་ ཐུགས་ཀར་ཐིམ་པ་ལས་རྡོ་རྗེའི་ལྟེ་བ་ནས་ཡུམ་དཔའ་མོ་རྡོ་རྗེ་བདེ་མ་ཞེས་བྱ་བ་བྱུང་སྟེ། རང་གི་སྟོན་པ་ལ་གཡས་ཕྱོགས་སུ་བསྐོར་བ་ལན་གསུམ་བྱས་ནས། ། ཕྱག་བྱས་ཐལ་མོ་སྦྱར་ཏེ་འདི་སྐད་ཅེས་གསོལ་ཏོ། ། ཁྱོད་ཀྱི་སྐུ་གསུང་ཐུགས་ཀྱི་ནི། ། གསང་བ་དམ་པ་ གང་ཡིན་པ། ། རྡོ་རྗེ་འཛིན་པས་ལེགས་པར་གསུངས། ། འདི་ནི་རྙེད་དཀའ་རྒྱུད་ཆེན་ཏེ། ། རིན་ཆེན་ལྟ་བུར་འདོད་འབྱུང་བ། ། གྲངས་མེད་ཚོགས་ལས་བྱུང་བ་འདི། ། ཐུགས་རྗེའི་རང་བཞིན་སྟོང་པ་ལས། ། བཅོམ་ལྡན་ཁྱོད་ཀྱིས་བཤད་དུ་གསོལ། ། ཞེས་ཞུས་པ་ དང་། ཞལ་འཛུམ་པ་མཛད་ནས་བྱམས་པ་རྣམ་པར་འཕྲུལ་པ་ཞེས་བྱ་བའི་འོད་ཟེར་གྱིས་འཇིག་རྟེན་གྱི་ཁམས་ཁྱབ་པར་བྱས་ཏེ།

ཚུར་འདུས་ནས་རང་གི་ཞལ་དུ་ཐིམ་པ་དང་། དཔའ་མོ་རྡོ་རྗེ་བདེ་མ་ཁྱོད། ། སྟོང་པའི་རང་བཞིན་བདག་མེད་མས། ། ཇི་ལྟར་ཞུས་བཞིན་ བཤད་པར་བྱ། ། གུས་པར་ཉོན་ལ་ལེགས་པར་ཟུང་། ། རྡོ་རྗེ་འཆང་གི་སྐུ་གསུང་ཐུགས། ། མི་ཕྱེད་སྟོང་པའི་རང་བཞིན་ལས། ། ཐུགས་རྗེ་སྣ་ཚོགས་ཐབས་ཚུལ་ཏེ། ། འདི་ནི་རབ་ཏུ་རྟོགས་དཀའ་བས། ། འདས་དང་ད་ལྟར་བཞུགས་པ་དང་། ། མ་འོངས་སངས་རྒྱས་སྤྱོད་ཡུལ་ ཡིན། ། བསམ་གྱིས་མི་ཁྱབ་རྣམ་པར་དག ། བརྗོད་མེད་མི་གཡོ་འདུས་མ་བྱས། ། ནམ་མཁའ་དྲི་མེད་ཆོས་ཀྱི་སྐུ། ། དུས་གསུམ་དུས་མེད་རྟོགས་པའི་མཆོག ། འདི་ལ་ཇི་ལྟར་བསྟན་དུ་ཡོད། ། འོན་ཀྱང་སྙིང་རྗེའི་རང་བཞིན་པས། ། ཐབས་དང་ཤེས་རབ་རང་བཞིན་ནི། ། གཉིས་མེད་གཉིས་ཀྱི་ཐབས་ཚུལ་རིག ། འདི་ནི་གསང་བ་དམ་པ་སྟེ། ། དེ་ཉིད་གཞན་ལ་མངོན་བསྟན་པས། ། གདུལ་བྱ་ཚིམ་འགྱུར་རྒྱལ་པོ་བཞིན། ། རང་འདོད་འབྲས་བུ་འབྱུང་འགྱུར་བས། ། གསང་བ་མངོན་པར་བསྟན་པ་ཡི། ། རྒྱུད་ཆེན་རྒྱལ་པོ་བཤད་པར་བྱ། ། ཨེ་མ་ཧོ་མི་ཕྱེད་རྡོ་རྗེ་གསང་བའི་མཆོག ། ཨེ་མ་ཧོ་ཐབས་དང་ཤེས་རབ་གཉིས་མེད་པའི། ། སྣ་ཚོགས་ནོར་བུ་རྒྱུད་ཆེན་འདི། ། རང་གི་གསང་བ་དམ་པ་ཡིན། །

བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་རབ་ཏུ་དགའ་བའི་གླེང་གཞིའི་ ལེའུ་སྟེ་དང་པོའོ། ། ། ། དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་ཆེན་པོ་ཁྱོད་བསྒྲུབ་པའི་གང་ཟག་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། མཛེས་མ་ཁྱོད་ཀྱིས་ཞུས་པ་ལེགས། ། ཟག་མེད་བདེ་བའི་རྒྱུ་འབྱུང་མ། ། བདག་ མེད་ཤེས་རབ་མ་ཡི་མཆོག ། ཁྱོད་ལ་བཤད་ཀྱིས་ལེགས་པར་ཉོན། ། ང་ཉིད་སྒྲུབ་པའི་གང་ཟག་ནི། ། སྙིང་རྗེ་ལྡན་ཞིང་ཤེས་རབ་ཆེ། ། བཟོད་ལྡན་བརྩོན་འགྲུས་ཕུན་སུམ་ཚོགས། ། བསླབ་པ་གསུམ་ལྡན་དད་པས་བརྒྱན། ། དཔའ་ཞིང་གསང་བའི་སྤྱོད་པ་ཤེས། ། གུས་ ཤིང་གཡོ་མེད་སྐྱབས་གནས་གསུམ། ། རྟག་ཏུ་མཆོད་ཅིང་ཡེངས་པ་མེད། ། ལྷག་པའི་ལྷ་ལ་ཡིད་ཆེས་ཤིང་། ། ཕྱི་ནང་གསང་བའི་དབང་ཐོབ་ལ། ། དམ་ཚིག་བརྡ་དོན་ངེས་པར་འཛིན། ། དེ་ལྟས་སྒྲུབ་པ་བྱས་གྱུར་ན། ། ཡུན་མི་རིང་བར་ང་ཉིད་ཀྱི། ། གསང་གསུམ་ ལ་ནི་མཁས་འགྱུར་ཏེ། ། འབད་པས་ཐོབ་པའི་འབྲས་བུ་ནི། ། སྐལ་ལྡན་དེ་ཡི་སྙིང་ལ་གནས། ། ཞེས་གསུངས་སོ། །

བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་སྒྲུབ་པ་པོའི་གང་ཟག་བསྟན་པའི་ལེའུ་སྟེ་གཉིས་པའོ། ། ། ། དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་ཁྱེད་སྒྲུབ་པའི་གནས་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། མཛེས་མ་ཁྱོད་ཀྱིས་ཞུས་པ་ལེགས། ། ཟག་མེད་བདེ་བའི་རྒྱུ་འབྱུང་མ། ། བདག་མེད་ཤེས་རབ་མ་ཡི་མཆོག ། ཁྱོད་ལ་བཤད་ ཀྱིས་ལེགས་པར་ཉོན། ། ང་ཉིད་སྒྲུབ་པའི་གནས་མཆོག་ནི། ། དུར་ཁྲོད་བརྒྱད་དམ་ཉེ་བའི་གནས། ། དུར་ཁྲོད་ནགས་ཀྱི་ནང་དུ་ནི། ། རི་རྩེ་བྲག་རི་སྔོན་པོའི་མདོག ། ཁྲོས་པའི་གཟུགས་འདྲ་བྱང་ལྟ་བ། ། མེ་ཏོག་སྔོན་པོ་མཛེས་པ་དང་། ། ནེའུ་གསིང་དང་ཨུཏྤལ་ནགས། ། དབེན་ཞིང་ཡིད་འོང་ཉམས་དགའ་བ། ། བཀྲ་ཤིས་དཔལ་འཕེལ་དབང་ཡང་འཛིན། ། ལྕང་ལོ་ཅན་དང་མིང་མཐུན་པ། ། སྣ་ཚོགས་སྒྲུབ་པའི་གནས་སུ་ཤིས། ། ཚྭ་སྒོ་ཆུ་མེད་ཨུ་མའི་གནས། ། རྒྱལ་པོའི་ཕོ་བྲང་ཚོང་དུས་དང་། ། ཉན་ཐོས་ལ་སོགས་འདུག་གནས་སུ། ། ང་ཉིད་ སྒྲུབ་པར་མི་བྱའོ། ། སྨིན་པའི་གང་ཟག་རྣམས་ལ་ནི། ། གནས་སོགས་བརྟགས་པས་ཅི་ཞིག་བྱ། ། ཐམས་ཅད་བདེ་ཆེན་སངས་རྒྱས་ཀྱི། །

ཞིང་ཁམས་རོལ་པས་གནས་པ་ཡིན། ། དེ་བས་རིགས་ཀྱིས་བརྟག་པར་བྱ། ། བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་ པའི་རྒྱུད་ཀྱི་རྒྱལ་པོ་ལས་སྒྲུབ་པའི་གནས་བསྟན་པ་ཞེས་བྱ་བའི་ལེའུ་སྟེ་གསུམ་པའོ། ། ། ། དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་ཁྱོད། སྒྲུབ་པའི་ཐབས་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ། མཛེས་མ་ཁྱོད་ཀྱིས་ཞུས་ པ་ལེགས། ། ཟག་མེད་བདེ་བའི་རྒྱུ་འབྱུང་མ། ། བདག་མེད་ཤེས་རབ་མ་ཡི་མཆོག ། ཁྱོད་ལ་བཤད་ཀྱིས་ལེགས་པར་ཉོན། ། ང་ཉིད་སྒྲུབ་པའི་རིམ་པ་ནི། ། སྙིང་རྗེ་ཆེན་པོས་སྔོན་འགྲོ་ཞིང་། ། གཞན་གྱི་དོན་ལ་བསླབ་པར་བྱ། ། ནམ་མཁའ་རྡོ་རྗེ་ཅན་ དམིགས་ལ། ། བདེ་བ་ཆེན་པོས་རྣམ་པར་མཆོད། ། རྒྱུད་སྦྱང་སངས་རྒྱས་ཚོགས་དག་ལ། ། འགྱོད་པ་སྤངས་ཏེ་རྗེས་ཡི་རང་། ། མྱ་ངན་འདས་ལ་གསོལ་བར་བྱ། ། དམ་པའི་དོན་ལ་བསྐུལ་བྱ་ཞིང་། ། རིགས་ཀྱིས་བོན་ཆེར་བསྐྱེད་ལ། ། ཀུན་ལ་ཁྱབ་བྱེད་གཞན་དོན་བསྒྲུབ། ། བདག་གི་སྡུག་བསྔལ་མི་བལྟ་ཞིང་། ། གཞན་དག་བདེ་ལ་དགོད་པར་བྱ། ། མེ་འོབས་ལྟ་བུར་གནས་པ་ཡི། ། སེམས་ཅན་ཀུན་ལ་སྙིང་རྗེ་བསྒོམ། །

སྤྲོས་བྲལ་གཉིས་འཛིན་སྤངས་པ་ཡི། ། ཚུལ་ལ་ཡང་དག་བསླབ་པར་བྱ། ། སངས་རྒྱས་སེམས་ཅན་གཉིས་མེད་ཅིང་། ། དང་པོ་སྟོང་ཞིང་བདག་དང་བྲལ། ། སྣང་ཞིང་སྲིད་པའི་ཆོས་རྣམས་ཀུན། ། ངོ་བོ་ཉིད་ཀྱིས་རྣམ་པར་དག ། འཐབ་བྲལ་མཁའ་འདྲ་དབུ་མའི་དོན། ། དེ་ལྟ་བུ་ཡི་ཆོས་ཉིད་ལ། ། སེམས་ཀྱི་རང་བཞིན་གཉིས་སུ་མེད། ། མ་རྟོགས་ལོག་པའི་སེམས་ཅན་ལ། ། སྡུག་བསྔལ་ཀུན་ དང་བྲལ་བའི་ཕྱིར། ། སྙིང་རྗེ་ཆེན་པོ་བསྒོམ་པར་བྱ། ། རང་གི་སེམས་ཉིད་ཡི་གེ་ཧཱུྃ། ། སངས་རྒྱས་ཐམས་ཅད་བསྐྱེད་པའི་མ། ། ཆུ་སྐྱེས་ཐབས་དང་ཤེས་རབ་ལྡན། ། མཐའ་གཉིས་སྤངས་པ་གདན་དང་བཅས། ། གཉིས་མེད་རྡོ་རྗེའི་རང་བཞིན་ཏེ། ། སྙིང་རྗེས་སྦྱངས་ནས་ གསུམ་པ་རྫོགས། ། སྐུ་མདོག་ནག་པོ་ཞལ་གཅིག་པ། ། ཕྱག་གཉིས་གཡས་པ་རྡོ་རྗེ་འཛིན། ། སྣུན་པའི་སྟོབས་ཅན་རྡོ་རྗེ་འབར། ། གཡོན་པས་དྲིལ་བུ་དཀུར་བརྟེན་ཏེ། ། སྒེག་པའི་ཚུལ་ཅན་ནམ་མཁར་གདེངས། ། རིན་ཆེན་ཆུ་འཛིན་རྒྱན་དང་ལྡན། ། སྟག་ལྤགས་དར་གྱིས་ སྐུ་ལ་བརྒྱན། ། གཡས་བསྐུམ་གཡོན་བརྐྱང་བདུད་ལ་བརྫིས། ། སྤྱན་གསུམ་གདུག་པའི་མཆེ་བ་གཙིགས། ། བསྐལ་བའི་མེ་འོད་ནང་དུ་བཞུགས། །

ཡི་གེ་གསུམ་གྱི་གནས་གསུམ་པོ། ། ལྷར་བྱས་སྐྱེ་མཆེད་བྱིན་གྱིས་བརླབ། ། གནས་སུ་ཁྲོ་བོའི་ཡིག་འབྲུ་བསྐྱེད། ། སྤྲུལ་ པ་དཔག་མེད་ཕྱོགས་བཅུར་འགྱེད། ། ཡི་གེ་བཞི་ཡིས་ཡེ་ཤེས་དབབ། ། རིགས་བདག་ལ་སོགས་སངས་རྒྱས་ཀྱིས། ། དབང་བསྐུར་བྱིན་བརླབས་ཅོད་པན་བསམ། ། དེ་ཡི་ཏིང་འཛིན་འབྱུང་བའི་རྒྱུ། ། ཆོ་ག་གསུམ་པའི་སེམས་དཔའ་ཡིས། ། གཞན་དོན་རྒྱུན་མི་འཆད་ པར་བསྒོམ། ། ཡང་ན་གསུང་གི་ཡིག་འབྲུས་མཚན། ། ཕྲིན་ལས་ཐོགས་མེད་རྣལ་འབྱོར་བཟླས། ། འདི་ནི་རྣམ་དག་རིག་པ་སྟེ། ། རྟག་ཏུ་མ་ཉམས་འབྲས་བུར་ལྡན། ། བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་དཔའ་བོ་གཅིག་པ་ བསྒྲུབ་པའི་ལེའུ་སྟེ་བཞི་པའོ། ། ། ། དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་དཀྱིལ་འཁོར་བསྒོམ་པའི་ཐབས་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ། མཛེས་མ་ཁྱོད་ཀྱིས་ཞུས་པ་ལེགས། ། ཟག་མེད་བདེ་བའི་རྒྱུ་འབྱུང་ མ། ། བདག་མེད་ཤེས་རབ་མ་ཡི་མཆོག ། ཁྱོད་ལ་བཤད་ཀྱིས་ལེགས་པར་ཉོན། ། སྐད་ཅིག་མ་ཡིས་ལྷར་བསམས་ནས། ། སྙིང་གར་ཉི་མའི་རིག་པ་ཧཱུྃ། །

འོད་ཀྱི་རང་བཞིན་སྣོད་བཅུད་རྣམས། ། སྦྱངས་ཏེ་སངས་རྒྱས་ས་ལ་གཞག ། འོད་ཟེར་གཉིས་པས་སངས་རྒྱས་ དང་། ། བྱང་སེམས་དཀྱིལ་འཁོར་དགུག་བྱ་སྟེ། ། ཕྱག་བྱ་ཧཱུྃ་ལས་ལྷ་མོ་བསམ། ། མེ་ཏོག་ལ་སོགས་པས་མཆོད་ལ། ། ཐ་དད་པ་ཡི་མཆོད་པ་ཆེ། ། དེ་འོད་དཔག་མེད་ལྷ་མོ་ཡིས། ། རེག་བྱ་ཐ་མི་དད་པས་མཆོད། ། སྡིག་བཤགས་རྗེས་སུ་ཡི་རང་དང་། ། གསོལ་ཞིང་ སྐྱབས་འགྲོ་བདག་ལུས་དབུལ། ། སེམས་བསྐྱེད་དགེ་བ་བསྔོ་བར་བྱ། ། དེ་རྗེས་དང་པོ་བྱམས་པ་སྟེ། ། གཉིས་པ་སྙིང་རྗེ་གསུམ་པ་དགའ། ། ཀུན་གྱི་མཐའ་ལ་བཏང་སྙོམས་སོ། ། སྦྱང་གཞི་སྔགས་ཀྱིས་ཕྱི་ནང་ཀུན། ། སྟོང་པར་བྱས་ཏེ་རང་ལུས་ཀྱང་། ། དབང་པོའི་ གཞུ་འདྲ་སྲིད་འཛིན་གྱི། ། གནས་སུ་ཧཱུྃ་བསམ་དེ་འོད་བཅས། ། ཙྃ་ལས་བྱུང་བའི་འཁོར་ལོ་སྟེ། ། རྩིབས་བཅུ་ལ་ནི་ཉི་མ་བསམ། ། དབུས་སུ་ཧཱུྃ་ལས་གནོད་མཛེས་བསྐྱེད། ། དེ་ལས་ཧཱུྃ་འཕྲོས་ཁྲོ་བཅུ་ཡང་། ། རང་རང་ས་ལ་གསལ་བར་བསྐྱེད། ། སྔགས་པས་ བགེགས་མེད་གྱིས་ཤིག་པར། ། དེ་ལ་བཀའ་ལུང་བསྒོ་བར་བྱ། ། ཞལ་བཞིའི་གསང་སྔགས་དྲན་པ་ཡིས། ། མཐེ་བོང་སྡིགས་མཛུབ་སྦྱར་ནས་ནི། ། ཕྱོགས་བཅུར་བརྡ་ནི་བསྟན་པར་བྱ།

ཨོཾ་སུྃ་བྷ་ནི་སུྃ་བྷ་ནི་ཧཱུྃ་ཧཱུྃ་ཕཊ། ཨོཾ་གྲིཧྞ་གྲྀཧྞ་ཧཱུྃ་ཧཱུྃ་ཕཊ། ཨོཾ་གྲྀཧྞཱ་ པ་ཡ་གྲྀཧྞཱ་པ་ཡ་ཧཱུྃ་ཧཱུྃ་ཕཊ། ཨོཾ་ཨཱ་ན་ཡ་ཧོ་བྷག་བཱན་བིདྱ་རཱ་ཛ་ཡ་ཧཱུྃ་ཧཱུྃ་ཕཊ། སྔགས་ཀྱི་རྒྱལ་པོ་འདི་བརྗོད་པས། ། ལུས་ངག་སེམས་ལས་བྱུང་བ་ཡི། ། བགེགས་ཀུན་གྱི་ནི་མགོ་སྟེངས་སུ། ། རྡོ་རྗེ་ཕུར་པ་གཟུགས་པར་བྱ། ། ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ་སརྦ་དུཥྚཱན་བིགྷྣན་ཧཱུྃ་ ཧཱུྃ་ཕཊ། ཀཱི་ལ་ཡ་ཀཱི་ལ་ཡ་སརྦ་པཱ་པྃ་ཨཱཛྙཱ་པ་ཡ་ཏི་ཀཱ་ཡ་པཱ་ཀ་ཙིཏྟ་བཛྲ་ཀཱི་ལ་ཡ་ཧཱུྃ་ཕཊ། རྡོ་རྗེ་ཐོ་བས་བརྡུང་བྱ་སྟེ། ཨོཾ་བཛྲ་མུངྒ་ར་བཛྲ་ཀཱི་ལ་ཡ་ཨཱ་ཀོ་ཊ་ཡ་ཧཱུྃ་ཕཊ། སྤྱི་བོར་བཏབ་པས་ངེས་པར་བརླག ། སླད་འདུས་ཕྱོགས་མཚམས་མ་ལུས་པར། ། ས་གཞི་ར་བ་དྲ་བ་དང་། ། གུར་བཅིང་བ་དང་བླ་རེ་དང་། ། མདའ་དང་མེ་ཡི་འོད་འབར་བསྒོམ། ། ཨོཾ་བཛྲ་མེ་དི་ནཱི་བཛྲི་བྷཱ་བ་བཛྲ་བནྡྷ་བནྡྷ་ཧཱུྃ། ཨོཾ་བཛྲ་པྲཱ་ཀཱ་ར་ཧཱུྃ་ལྃ་ཧཱུྃ། ཨོཾ་བཛྲ་བི་ཏཱ་ན་ཧཱུྃ་ཁྃ་ཧཱུྃ། ཨོཾ་བཛྲ་ཤ་ར་ཛཱ་ལ་ཏྲྃ་སྃ་ཏྲྃ། ཨོཾ་བཛྲ་ཛྭཱ་ལ་ཨ་ན་ལཱརྐ་ཧཱུྃ་རྃ་ཧཱུྃ། རིམ་པས་བརྗོད་ལ་སྙིང་རྗེ་ཡི། ། བདག་ཉིད་གཞན་ལ་ཕན་འདོད་པ། ། སྨོན་ལམ་ལས་འབྱུང་རྫུ་འཕྲུལ་མཆོག །

ཡཾ་ལས་བྱུང་བ་གཞུ་འདྲ་བ། ། སྔོན་པོ་བ་དན་ལྡན་པ་བསམ། ། དེ་སྟེང་རྃ་བྱུང་རྒོད་མའི་ཁ། ། གྲུ་གསུམ་དམར་པོ་འོད་འབར་བ། ། བྃ་ལས་སྐྱེས་པ་ཟླུམ་པོ་སྟེ། ། དཀར་པོ་འཁྱིལ་པའི་ཚུལ་དུ་ བསམ། ། དེ་ལས་སྐྱེས་པ་དབང་ཆེན་ཏེ། ། ལྃ་སྐྱེས་སེར་པོ་རྡོ་རྗེའི་རྒྱུ། ། གྲུ་བཞི་འོད་ཟེར་འབར་བ་བསམ། ། དེ་སྟེང་ཙྃ་ལས་ཆོས་ཀྱི་འཁོར། ། ལྟེ་བར་བྲུྃ་ལས་གཞལ་ཡས་ཁང་། ། གྲུ་བཞི་སྒོ་དང་རྟ་བབས་བཅས། ། དྲ་བ་ཕྱེད་དང་དྲ་བས་བརྒྱན། ། ཕྲེང་བ་རིན་ཆེན་རྡོ་རྗེ་དང་། ། མཛེས་པའི་བ་དན་བཅས་པ་བསམ། ། དེ་ནང་པྃ་ལས་ཆུ་སྐྱེས་ནི། ། གེ་སར་འདབ་མར་བཅས་པའི་སྟེང་། ། ཉི་མ་ཀཱ་ལི་འོད་འབར་ཚ། ། སྟེང་དུ་ཟླ་བ་ཨཱ་ལི་བསིལ། ། ཁ་སྦྱར་བར་དུ་ཧཱུྃ་དང་ཨཱ། ། གནག་ཅིང་དམར་བའི་རྣམ་པ་ལ། ། དེ་ལས་པདྨ་རྡོ་རྗེ་བསམ། ། སླར་ཡང་ཡི་ གེས་འགྲོ་བ་སྦྱངས། ། ཧཱུྃ་གིས་མི་བསྐྱོད་ཐུགས་རྣམས་བསྡུ། ། ཨ་ཡིས་འོད་དཔག་གསུང་བསྡུས་ལ། ། གཉིས་མེད་ཞུ་བས་སྤྲུལ་པ་བསྡུ། ། རྡོ་རྗེ་ལས་ནི་ཁྲོ་བོ་སྟེ། ། པདྨས་ཁྲོ་མོའི་རྣམ་པར་བསྐྱེད། ། ཁྲོ་བོ་མཐིང་ག་ཞལ་གཅིག་པ། ། རང་འོད་ལས་བྱུང་ཕྱག་གཉིས་འཁྱུད། ། རྡོ་རྗེ་དྲིལ་བུ་ཐབས་ཤེས་རབ། །

གཡས་དང་གཡོན་དུ་བསམ་པར་བྱ། ། དབུ་རྒྱན་ལ་སོགས་རིན་ཆེན་ལྡན། ། དབུ་སྐྲ་ཁམ་སེར་གྱེན་དུ་འབར། ། ནག་པོ་སྦྲུལ་ལུས་ཀླུ་ཆེན་བརྒྱད། ། སྐུ་སྨད་སྟག་གི་པགས་པས་དཀྲིས། ། ཆོས་གོས་སྔོན་པོས་སྐུ་སྟོད་དཀྲིས། ། མཆེ་བ་གཙིགས་ ཤིང་སྤྱན་གསུམ་དམར། ། འདོད་དགུར་སྒྱུར་ཞིང་བརྐྱང་བསྐུམ་ཞབས། ། མཐའ་གཉིས་སྤངས་པའི་སྟེང་དུ་བཞུགས། ། དེ་ཡུམ་རྡོ་རྗེ་བདེ་མ་ཁྲོ། ། དམར་ལྗང་ཞལ་གཅིག་ཕྱག་གཉིས་མ། ། གཡས་པ་གྲི་གུག་ཡབ་ལ་འཁྱུད། ། གཡོན་པ་ཐོད་པ་བདེ་བ་སྟེར། ། གཉིས་ མེད་གཡོན་གྱི་ཕྱོགས་ནས་འཁྲིལ། ། རྡོ་རྗེས་སྦྱོར་བའི་སྒྲས་བསྐུལ་ཏེ། ། ཤར་ཕྱོགས་པདྨར་ཉི་ཟླ་ལ། ། ཧཱུྃ་ལས་ཁམས་གསུམ་རྣམ་པར་རྒྱལ། ། དཀར་པོ་ཞལ་གཅིག་ཕྱག་བཞི་པ། ། གཡས་པ་རྡོ་རྗེ་རྩེ་གསུམ་འཛིན། ། གཡོན་པ་དྲིལ་བུ་བེ་ཅོན་ཏེ། ། ཁྲོ་བོའི་རྒྱན་ ལྡན་བསམས་ནས་ཀྱང་། ། འབྱུང་པོའི་ནུས་པ་འཇོམས་པར་བྱེད། ། ལྷོ་ཕྱོགས་ཉི་མ་རོ་སྟེངས་སུ། ། ཧཱུྃ་ལས་བྱུང་བའི་ལེགས་ལྡན་གནག ། གཡས་པ་གྲི་གུག་གཡོན་ཐོད་པ། ། ཞབས་གཉིས་བརྐྱང་བསྐུམ་ཐོད་ཕྲེང་ལྡན། ། དགྲ་བོ་གསོད་པའི་ལས་ལ་བརྩོན། ། ནུབ་ ཏུ་ཀླུ་འདུལ་བདུད་རྩི་འཁྱིལ། །

ལྗང་གུ་ཞལ་གཅིག་ཕྱག་བཞི་ཁྲོ། ། གཡས་པ་རྡོ་རྗེ་བྱ་ཁྱུང་དང་། ། གཡོན་པ་དབྱུག་ཏོ་ཕུར་བུ་བསྣམས། ། ས་འོག་ཀླུ་སོགས་ཟས་སུ་གསོལ། ། བྱང་དུ་ཀྵ་ལས་རྣམ་ཐོས་བུ། ། ཞལ་གཅིག་ཕྱག་གཉིས་བུམ་སྟེངས་སུ། ། མདོག་སེར་ གཡས་པ་རྒྱལ་མཚན་བསྣམས། ། གཡོན་པས་ནོར་སྦྱིན་བཟུང་བ་སྟེ། ། དབུལ་བ་སེལ་བའི་དོན་ལ་བརྩོན། ། སྒོ་མཚམས་ལྷ་ཡི་རང་བཞིན་ལ། ། ཡེ་ཤེས་སྤྱན་དྲངས་མཆོད་ལ་གཞུག ། དེ་ནི་ཡི་གེ་བཞི་སྦྱོར་ཡིན། ། ལུས་ངག་སེམས་ལ་ཡི་གེ་ཡི། ། ལྷ་ཡི་མཚན་ མ་གདབ་པར་བྱ། ། སྐྱེ་མཆེད་ལྷར་བྱས་ཏིང་འཛིན་གྱི། ། ནུས་པ་མི་ཤིགས་ལྷར་བལྟས་ལ། ། ཡེ་ཤེས་ལྔ་འདུས་ཡི་གེ་བསམ། ། དེ་ཡི་འོད་ཀྱིས་སྤྱན་དྲངས་པའི། ། རིགས་ལྔ་སྙོམས་འཇུག་བྱིན་རླབས་ཀྱིས། ། མི་བསྐྱོད་རྡོ་རྗེ་དབང་བསྐུར་ཏེ། ། གསང་ བ་ཤེས་རབ་ཡེ་ཤེས་ཀྱིས། ། རྒྱས་གདབ་རིགས་ལ་བཞི་པ་ཡི། ། ཕྱག་རྒྱ་ཆེ་ལ་རིགས་མེད་དོ། ། འདི་ནི་གསང་ཆེན་སྐུ་སྒྲུབ་པ། ། རིམ་གྱིས་གསལ་ཞིང་རྣམ་པར་དག ། རྡོ་རྗེ་འཛིན་པའི་སྐུ་ཐོབ་པ། ། ཚེ་གཅིག་ཉིད་ལ་འགྱུར་བ་ཡིན། ། རྟག་ཏུ་གོམས་པའི་སྦྱོར་བ་ཡིས། ། ས་སོགས་འཇིག་རྟེན་མ་ལུས་ཀུན། ། སྐད་ཅིག་ཉིད་ལ་དབང་དུ་འགྱུར།

། གཙུག་ན་རིན་ཆེན་ལ་སོགས་པའི། ། གདུག་པ་ཅན་རྣམས་སྙིང་ཡང་འབྱིན། ། དགའ་བོ་ལ་སོགས་ཀླུ་ཆེན་རྣམས། ། རྟག་ཏུ་དེ་ལ་འདུད་པར་འགྱུར། ། ནད་ཀྱི་རིགས་ཀུན་མ་ལུས་འཇོམས། ། གནོད་ སྦྱིན་མ་ལུས་བཀའ་ཉན་ཅིང་། ། ལྷ་སྲིན་མ་ལུས་བྲན་དུ་འགྱུར། ། འདི་ནི་གསང་བ་དམ་པ་སྟེ། ། མཛེས་མ་ཁྱོད་ལ་བཤད་པ་ཡིན། ། བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་དཀྱིལ་འཁོར་བསྐྱེད་པའི་ལེའུ་སྟེ་ལྔ་བའོ། ། ། ། དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་རིག་པའི་གསང་སྔགས་ཀྱི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ། མཛེས་མ་ཁྱོད་ཀྱིས་ཞུས་པ་ལེགས། ། ཟག་མེད་བདེ་བའི་རྒྱུ་འབྱུང་མ། ། བདག་མེད་ཤེས་རབ་མ་ཡི་མཆོག ། ཁྱོད་ལ་བཤད་ཀྱིས་ལེགས་པར་ཉོན། ། གསང་བ་མཆོག་གི་གསང་བ་སྟེ། ། ཕྲིན་ལས་ཐམས་ཅད་རྫོགས་བྱེད་ཅིང་། ། སྡུག་བསྔལ་ཀུན་ལས་སྐྱོབ་བྱེད་པའི། ། ཨཱ་ལི་ཀཱ་ལི་མཉམ་སྦྱོར་ལས། ། ཐབས་དང་ཤེས་རབ་མཉམ་མེད་པའི། ། སྔགས་ཀྱི་དོན་ནི་རྣམ་པ་ལྔ། ། སྐུ་ གསུང་ཐུགས་ཀྱི་རིག་པ་དང་། ། ཕྲིན་ལས་སྣ་ཚོགས་རིག་པ་དང་། ། འཁོར་གྱི་ལས་ཀྱི་རིག་པ་དང་།

། འབྱུང་པོ་དགུག་དང་གསད་པ་དང་། ། གཏོར་མ་གཏང་བའི་རིག་པའོ། ། ཨོཾ་བཛྲ་པཱ་ཎི་ཧཱུྃ་ཕཊ་སྭཱ་ཧཱ། ཨོཾ་བཛྲ་ཀྲོདྷ་ན་ནཱི་ལཱྃ་བ་ར་དྷ་ར་བཛྲ་པཱ་ཎི་ཧཱུྃ་ཕཊ་སྭཱ་ཧཱ། ཨོཾ་བཛྲ་ཙཎྜ་མ་ ཧཱ་རོ་ཥ་ཎ་ཧཱུྃ་ཕཊ་སྭཱ་ཧཱ། ཏདྱ་ཐཱ་བྷོ་བྷོ་པཱནྣཱ་ག་ཨ་དྷི་པ་ཏ་ཡེ། ཨི་དཾ་ནཱི་ལཱམྦ་ར་དྷ་ར་ཤ་རཱི་རྃ། བཛྲ་པཱ་ཎི་ཧྲྀ་ད་ཡཾ། ཡཿས་མཱ་ཏི་ཀྲ་མ་ཐ། མཱ་ཀུ་ལ། ཨུཏ་སཱ་ད་ནཱཾ། བྷ་བི་ཥྱནྟི། ཏདྱ་ཐཱ་བུདྡྷ་བུདྡྷ་བི་བུདྡྷ་བི་བུདྡྷ་མ་ཧི་པྲཱ་པ་ཏ། ཧ་ར་ཧ་ར་ནཱ་གཱ་ནཱྃ། པྲཱ་ཧ་ར་པྲཱ་ཧ་ར་ནཱ་གཱ་ནཱྃ། ཙྪིནྡ་ཙྪིནྡ་ནཱ་ག་ ཧྲྀ་ད་ཡཱ་ནི། བྷིནྡ་བྷིནྡ་ནཱ་ག་དྷ་རྨ་ཎི། བི་ཤཱིརྱནྟུ་ནཱ་ག་ཤ་རཱི་རཱྃ། བི་སྥོ་ཊ་ཡ་ནཱ་ག་ནཱ་ནི། ཏདྱ་ཐཱ། ཨོཾ་ཨཱཿཧཱུྃ་ཕཊ། ནཱ་ག་བི་དཱ་ར་ཎཱ་ཡ་ཧཱུྃ་ནཱ་གོ་ཏ་སཱ་ད་ནཱ་ཡ་ཧཱུྃ་ཕཊ། ནཱི་ལཱྃ་བཱས་ནཱ་ཡ་ཧཱུྃ་ཕཊ། ཨ་པྲ་ཏི་ཧ་ཏ་བ་ལ་པ་རཱ་ཀྲ་མཱ་ཡ་ཧཱུྃ་ཕཊ། ཀྲྀ་ཏཱན་ཏཱ་ཡ་ཕཊ། ཀྲྀ་ཏཱན་ཏ་རཱུ་པཱ་ཡ་ཕཊ། རོ་ཥ་ ཎཱ་ཡ་ཕཊ། ཏྲཱ་ས་ནཱ་ཡ་ཕཊ། ཀུཥྨ་ཎྚོཏ་སཱ་ད་ནཱ་ཡ་ཕཊ། པྲེ་ཏ་པི་ཤཱ་ཙ་བི་ནཱ་ཤ་ཀ་རཱ་ཡ་ཕཊ། ཡཀྵ་ཨ་པསྨ་རཱ་བི་ནཱ་ཤ་ཀ་རཱ་ཡ་ཕཊ། ཧ་ས་ཧ་ས། ད་ར་ད་ར། མཱ་ར་ཡ་མཱ་ར་ཡ། ནཱ་ཤ་ཡ་ནཱ་ཤ་ཡ།

སརྦ་བིགྷྣན་བི་ནཱ་ཤ་ཀ་རཱ་ཡ་ཕཊ། སརྦ་ཤ་ཏྲཱུྃ་སཾ་གྷ་བི་ནཱ་ཤ་ཀ་རཱ་ཡ་ཕཊ། ནཱི་ལཱྃ་བ་ར་དྷ་ར་བཛྲ་པཱ་ཎི་རཱཛྙཱ་པ་ཡ་ཏི་སྭཱ་ཧཱ། ཨོཾ་བཛྲ་ཏྲཻ་ལོཀྱ་བི་ཛ་ཡ་ཧཱུྃ་ཕཊ། ཨོཾ་བཛྲ་ཏྲཻ་ལོཀྱ་བི་ཛ་ཡ་བསྨིཾ་སྭཱ་ཧཱ། མཱ་ར་ཡ་ཙིཏྟ་རྦད་རྦད། ཨོཾ་བཛྲ་ཀྲོ་དྷ་མ་ཧཱ་ཀཱ་ལཱ་ཡ་ཧཱུྃ་ཕཊ། ཨོཾ་མ་ཧཱ་ཀཱ་ལ་གུ་ཎ་ཧྲྀ་ད་ཡ་ཧཱུྃ་ཕཊ། ཙིཏྟ་ཀྲོ་དྷི་དུཉྫ་ཛཿ ཨོཾ་བཛྲ་ཀྲོ་དྷ་ཨ་མྲྀ་ཏ་ནཱ་ག་ཧཱུྃ་ཕཊ། ཨོཾ་ཨ་མྲྀ་ཏ་ཀུཎྜ་ལི་སི་ཁྃ་ཀུ་རུ་ཧཱུྃ་ཕཊ། མཱ་ར་ཡ་རཀྟ་རྡུབས་རྡུབས། ཨོཾ་བཛྲ་ཀྲོ་དྷ་ཀུ་བེ་ར་རཱ་ཛ་ཡ་ཧཱུྃ་ཕཊ། ཨོཾ་ཨཱརྱ་ཛཾ་བྷ་ལ་ཛ་ལེནྡྲཱ་ཡ་ཧཱུྃ་ཕཊ་སྭཱ་ཧཱ། མཱ་ར་ཡ་ཀེ་ཆོཾ་ཆོཾ། མ་ཧཱ་དེ་བ་མཱ་ར་ཡ་སོད་སོད། མ་ཧཱ་ནཱ་ག་མཱ་ར་ཡ་ཛ་ཛྭཿ། མ་ཧཱ་དེ་བི་མཱ་ར་ཡ་ཧ་ན་ཧ་ན། མ་ཧཱ་མ་ནུ་མཱ་ར་ཡ་གཏུབས་གཏུབས། ། མ་ཧཱ་ གྲུབ་པ་མཱ་ར་ཡ་ཏིཥྛ་ཏིཥྛ། མ་ཧཱ་ཡཀྵ་མཱ་ར་ཡ་བྷིནྡ་བྷིནྡ་མ་ཧཱ་གན་དྷརྦ་མཱ་ར་ཡ་ཁོས་ཁོས། མ་ཧཱ་མ་རི་ནི་མཱ་ར་ཡ་ནཱྃ། མ་ཧཱ་ནཱི་ལཱྃ་བ་ར་དྷ་ར་བཛྲ་པཱ་ཥི་ཡཀྵ་ཧཱུྃ། མུ་རུ་ཏ་མུ་རུ་ཏ་ཧཱུྃ་ཕཊ། མཱ་ར་ཎ་སོད་སོད། མཱ་ར་ཎ་བྱིང་བྱིང་། མཱ་ར་ཎ་རྨུགས་རྨུགས། མཱ་ར་ཎ་ཧལ་ཧལ། མཱ་ར་ཎ་མྱོས་མྱོས། མཱ་ར་ཎ་མྱོས་བྱིང་།

མཱ་ར་ཎ་ཐུམ་རིལ་ཛ་ཛཿ། ཀ་ཀ་རཀྵྃ་ཧཱུྃ་ཧཱུྃ་སྟྭྃ་བྷྱོ་ཛྭ་ཁ་ཁཱ། ཏེ་ཤེ་རཀྵ་ཧཱུྃ་ཧཱུྃ། སྟྭྃ་བྷྱོ་ཛྭཿ། ཁ་ཁཱ། ཙ་པ་རཀྵ་ཧཱུྃ་ཧཱུྃ་སྟྭྃ་བྷྱོ་ཛྭ་ཁ་ཁཱ། ཙ་ཀ་རཀྵ་ཧཱུྃ་ཧཱུྃ་སྟྭྃ་བྷྱོ་ཛྭ་ཁ་ཁཱ། མུན་དུ་རཀྵ་ཧཱུྃ་ཧཱུྃ་སྟྭྃ་བྷྱོ་ཛྭ་ཁ་ཁཱ། ཀ་ཀ་རཀྵ་ས་མ་ཡ་བུདྡྷཱ་ཡ་སྤུ་ཏ་ར། ཏེ་ཤ་རཀྵ་ ས་མ་ཡ་བུདྡྷཱ་ཡ་སྤུ་ཏ་ར་ཙ་པ་རཀྵ་ས་མ་ཡ་བུདྡྷཱ་ཡ་སྤུ་ཏ་ར་ཙ་ཀ་རཀྵ་ས་མ་ཡ་བུདྡྷཱ་ཡ་སྦུ་ཏ་ར། མུན་དུ་རཀྵ་ས་མ་ཡ་བུདྡྷཱ་ཡ་སྦུ་ཏ་ར། ཧཱུྃ་ཧཱུྃ་ཧྲིལ་ཧྲིལ། དིམ་དིམ། ཕོབ་ཕོབ། ཤར་ཤར། དི་རི་དི་རི་རྦད་རྦད། ཁ་ཐྃ་ཁ་ཐྃ། ཐུྃས། ཐུྃས། ཛ་རེ་ཛ་རེ་བྷྱོ། ཧ་ས་ཧ་ས། ཏེ་པ་ཏེ་པ། ཀྲི་ཏ་ཧ་ཀྲི་ཏ་ཧ། ཀྲི་ཁུག་ཀྲི་ཁུག ། ཚལ་པ་ཚལ་པ། རྦད་ལིང་རྦད་ལིང་། སྲོག་ཚིག་ནན་རྦད། ལུས་དུལ་མཱ་ར་ཡ་རྦད། རྃ་རྃ་ཛྭཱ་ལ་ཛྭཱ་ལ་ཤི་ཤི། རྡུལ་བུན་རྦད་སོད། ། ནཱ་ག་མཱ་ར་ཡ་ཧཱུྃ་ཕཊ། ཛཿཧཱུྃ་བྃ་ཧོཿདྷརྨྨཱ་ཀ་ཀ་ཀི་ཏི་ར། དྷརྨྨ་ཏེ་ཤ་ ས་མུཉྫ། དྷརྨྨ་ཏེ་ཤ་ཏ་ཀ་ར། དྷརྨྨ་ཏེ་ཤ་ཙ་ཀ་ར། དྷརྨྨ་ཏེ་ཤ་ས་མ་ཡ། བུདྡྷཱ་ཡ་པུ་ཏ་ར། ཏེ་པ་ཏེ་པ་ཁ་ཁཱ་རི། ཏེ་པ་ཏེ་པ་ཀ་ཙ་རི། ཏེ་པ་ཏེ་པ་མུནྡུ་རི། ཏེ་པ་ཏེ་པ་པུསྟྭྃ་ཧ་ར། ཏེ་པ་ཏེ་པ་ས་ཛ་ས་མུཉྫ།

ཙ་ཀ་ར་མུནྡུ་ར་ཁེ། བཛྲ་ཙ་མཾ་རན་ཛཱ་ཛཱ། ཏེ་ཤ་རྃ། མུ་ནྡུ་ནན། བཛྲ་ཛུ་རུ་ཛུ་རུ་རྃ། ཛུ་རུ་ཛུ་རུ་ས་མུཾ་ཛ་ཛཱ་ཧཱྃ། བཛྲ་གྷེ་ནེ་ཁེ་ཛ། བཛྲ་པཱུརྞི་ཁེ་ཛ། བཛྲ་མུཎྜ་རེ་ཁེ་ཛ། ཁ་ཛ་རཱ་ཛ་མུནྡུ་ར་ཁེ། ཁ་ཛ་རཱཛྫཱ་མུནྡུ་ར་ས་མུྃ་ཁེ། པདྨ་ར་ཎི་ཁ་ཛ་རཱ་ཛ་མུནྡུ་རཱ་ཛཱ་ཁེ། ཁ་ཛ་རཱ་ཛ་མུ་ནྡུ་ར་ས་མུཉྫར་ཁེ་ཛུ་ཛུ་ཛ་ཛ་ཁཱ་ཧི་ཛ། ཨོཾ་ཀཱ་ཡ་ཝཱ་ཀ་ཅིཏྟ་ཨི་དྃ་བ་ལིང་། བུཉྫ་ཛི་གྷ་ཕུལླ་དྷཱུ་བ་ མཱྃ་ས་སེ། ས་ཁནྟི་ཁུན་ཎི་ཕཊ་གཱ་ཏ། ཨོཾ་ཨ་མྲི་ཏ་པྲ་ཏི་ཛ་ཀས་ཀ་རུ་པཱུ་ཛཱ་ཁཱ་ཧི། རཀྟ་བི་བ་ཏ་ཀ་སེ་རུ་པཱུ་ཛ་ཁཱ་ཧི། དྷཱུ་པེ། པུཥྦེ། ཨ་ལོ་ཀེ ། གན་དྷེ། ནཻ་བེ་དྱེ། ཀ་ས་ཀ་རུ་པཱུ་ཛ་ཁཱ་ཧི། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱྃ། ཨཱདྱ་ནུད་པན་ན་ཏྭཱཏ་ཨོཾ་ཨཱཿཧཱུྃ། འདི་ནི་རིན་ཆེན་སྔགས་ཀྱི་མཆོག ། མ་ ལུས་དགོས་འདོད་འབྱུང་བའི་དཔལ། ། གཟུངས་མ་ཁྱོད་ལ་ཉེར་བཤད་པས། ། འདི་ནི་མི་འདའི་དམ་ཚིག་ཡིན། ། བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་གསང་སྔགས་བསྟན་པའི་ལེའུ་སྟེ་དྲུག་པའོ། ། ། ། དཔའ་མོ་རྡོ་རྗེ་བདེ་ མས་གསོལ་པ། བཅོམ་ལྡན་འདས་རྡོ་རྗེ་འཆང་གི་འཁོར་ཇི་ལྟ་བུ་ལགས།

བཅོམ་ལྡན་འདས་ཀྱིས་བཀའ་སྩལ་པ། ། མཛེས་མ་ཁྱོད་ཀྱིས་ཞུས་པ་ལེགས། ། ཟག་མེད་བདེ་བའི་རྒྱུ་འབྱུང་མ། ། བདག་མེད་ཤེས་རབ་མ་ཡི་མཆོག ། ཁྱོད་ལ་བཤད་ཀྱིས་ལེགས་པར་ཉོན། ། ང་ ཡི་འཁོར་ནི་བསམ་མི་ཁྱབ། ། འདི་ཙམ་གྲངས་ནི་སངས་རྒྱས་ཀྱིས། ། བསྐལ་པར་བགྲངས་ཀྱང་ཤེས་མི་འགྱུར། ། དེ་བས་ནམ་མཁའི་ཚད་དང་མཚུངས། ། མདོར་བསྡུས་ནས་ནི་བཤད་པར་བྱ། ། སྐུ་ཡི་འཁོར་ནི་ཁྲོ་བོ་བཅུ། ། རིགས་ལྔའི་ངོ་བོ་སྐུ་གསུང་ཐུགས། ། མི་འགྱུར་ གདུག་པ་འདུལ་བ་ཡིན། ། ཐུགས་ཀྱི་འཁོར་ནི་རིགས་བརྒྱ་སྟེ། ། མདོར་བསྡུས་སྤྲུལ་པའི་ཁྲོ་བོ་བཞི། ། གསུང་གི་འཁོར་ནི་དཔག་མེད་ཀྱང་། ། རིགས་དྲུག་འདུལ་བའི་ཁྱུང་ཆེན་ཡིན། ། སྣ་ཚོགས་བསམ་གྱིས་མི་ཁྱབ་པོ། ། གདུལ་བྱའི་འཁོར་ནི་ཀླུ་ཆེན་བརྒྱད། ། གསུང་ གིས་དེ་རིགས་འདུལ་བ་ཡིན། ། གནོད་སྦྱིན་ལག་ན་རྡོ་རྗེའི་ཚོགས། ། ལྔ་བརྒྱ་རིགས་བསྡུས་སྐུ་ཡིས་འདུལ། ། ཐུགས་ཀྱིས་ལྷ་སྲིན་གདུག་པ་འདུལ། ། བྱམས་པའི་ཏིང་ངེ་འཛིན་གྱིས་འདུལ། ། འདི་ལ་འདིས་འདུལ་སྤྲུལ་པའི་ཚོགས། ། སྨོན་ལམ་དབང་གིས་བྱུང་བ་སྟེ། ། བསམ་གྱིས་མི་ཁྱབ་དེས་འདུལ་བ། ། རིགས་ལ་བརྗོད་པར་ག་ལ་ནུས། །

མདོར་བསྡུས་མཛེས་མ་ཁྱོད་ལ་བསྟན། ། བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་འཁོར་ངེས་པར་བསྟན་པའི་ལེའུ་སྟེ་བདུན་པའོ། ། ། ། དཔའ་མོ་ རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་ལས་སྒྲུབ་པའི་རིམ་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། མཛེས་མ་ཁྱོད་ཀྱིས་ཞུས་པ་ལེགས། ། ཟག་མེད་བདེ་བའི་རྒྱུ་འབྱུང་མ། ། བདག་མེད་ཤེས་རབ་མ་ཡི་མཆོག ། ཁྱོད་ལ་བཤད་ཀྱིས་ ལེགས་པར་ཉོན། ། གདུག་པའི་ཀླུ་རྣམས་འདུལ་འདོད་པའི། ། རྡོ་རྗེ་ཁྱུང་ཆེན་སྟོབས་ཆེན་འདུལ། ། ང་ཡི་གསུང་གི་སྤྲུལ་པ་སྟེ། ། མཆེ་བ་རྣོ་དཔལ་དྲག་པོ་གཙིགས། ། བྃ་ལས་རྒྱ་མཚོའི་རི་རབ་སྟེང་། ། ཡི་གེ་ཧཱུྃ་ལས་བྱུང་བ་ཡི། ། དཔའ་བོ་ཀླུ་འདུལ་བསྒོམ་པར་བྱ། ། སྐུ་ མཆོག་ནག་པོ་ཞལ་དགུར་ལྡན། ། རྩ་ཞལ་མཐིང་ནག་གཡས་པ་དཀར། ། གཡོན་པ་དམར་པོ་དེ་སྟེང་དུ། ། དབུས་དམར་གཡས་པ་ལྗང་བ་སྟེ། ། གཡོན་པ་བཙོ་མ་གསེར་དང་འདྲ། ། དེ་སྟེང་དབུས་དཀར་གཡས་པ་གནག ། གཡོན་པ་བཻ་ཌཱུརྱ་ལྟར་སྟོ། ། ཐམས་ ཅད་སྤྱན་གསུམ་རྡོ་རྗེའི་མཆུ། ། སྤྱི་གཙུག་རིན་ཆེན་རྡོ་རྗེའི་རྭ། །

ཕྱག་ནི་{བཅྭ་,བཅོ་}བརྒྱད་གཡས་པ་ན། ། རྡོ་རྗེ་རལ་གྲི་དགྲ་སྟ་ཞགས། ། མདུང་དང་ལྕགས་ཀྱུ་མདའ་དང་ནི། ། རྩེ་གསུམ་ལས་ཀྱི་བྱ་ཁྱུང་བསྣམས། ། རིམ་བཞིན་ཆུ་བདག་མཐའ་ཡས་དང་། ། ནོར་རྒྱས་སྟོབས་རྒྱུ་དུང་སྐྱོང་དང་། ། པདྨ་པད་ཆེན་རིགས་ལྡན་དང་། ། འཇོག་པོ་ཀླུ་དགུ་རོ་སྟོད་ལྷ། ། ཐལ་སྦྱོར་གཙོ་ལ་རིན་ཆེན་སྟོབས། ། མཇུག་མ་ཕྱག་ལ་དཀྲིས་མཛད་དེ། ། ཀུན་ཀྱང་རང་རང་ཁ་དོག་འཛིན། ། སྦྲུལ་མགོ་བདུན་པ་སྤྲིན་བཞིན་གཏིབས། ། གཡོན་པ་དྲིལ་བུ་བེ་ཅོན་དང་། ། འཁོར་ལོ་རྒྱ་གྲམ་ཐོད་དབྱུག་ཆེ། ། སྦྲུལ་གྱི་རྒྱལ་མཚན་གཞུ་དང་ནི། ། གཏུམ་ཆུང་ཕུར་དང་ཁྱུང་ཕུར་རོ། ། རིམ་བཞིན་རླུང་འབྱིན་དགའ་མ་དང་། ། མཛེས་ལྡན་དཔའ་མོ་འོད་བྱེད་མ། ། གྲུབ་མ་བརྟན་མ་དགེ་མ་དང་། ། གསལ་བྱེད་རིམ་བཞིན་ཡབ་དང་འདྲ། ། ཐལ་སྦྱར་གཙོ་ལ་པདྨ་ འབུལ། ། གདེངས་ཀ་གསུམ་གྱིས་འདུད་བྱེད་མ། ། གཡོན་དུ་རིམ་བཞིན་བསམ་པར་བྱ། ། ཞབས་བཞི་ཆུ་སྲིན་རུ་སྦལ་དང་། ། ཕག་དང་ལྟོ་འཕྱེའི་སྟེང་ན་བཞུགས། ། གཤོག་པ་རིགས་བཞིའི་རྡོ་རྗེ་སྟེ། ། མཇུག་མ་རལ་གྲི་རིགས་བཞིར་ལྡན། ། སྡེར་ཆེན་པགས་ལ་མེ་འབར་ བས། ། རབ་ཏུ་གཏུམ་ཞིང་ས་བདག་དང་། །

ཀླུ་རིགས་མ་ལུས་བརླག་མཛད་པ། ། འོག་མིན་གནས་སུ་སླེབས་པར་བསམ། ། དེ་རྗེས་གནས་གསུམ་ཡི་གེས་བརྒྱན། ། ཨོཾ་ཨཱཿཧཱུྃ་དཀར་དམར་ཞིང་གནག ། སྤྲུལ་པ་གོ་ཆའི་སྔགས་བསམ་པ། ། ཨོཾ་ཧཱུྃ་ཧྲཱྃ་ཧྲཱི་ཨཱ། སྦྱི་བོ་མགྲིན་པ་སྙིང་ ག་དང་། ། ལྟེ་བ་གསང་གནས་བསམ་པར་བྱ། ། ཨེ་བྃ་མ་ཡཱ་དཔུང་པ་དང་། ། དཔྱི་ཡི་སྟེང་དུ་བསམ་པར་བྱ། ། ཧཱུྃ་སཱ་ཧཱི་ཨ་བྲང་དང་ནི། ། སོག་དཔྲག་ལྟོང་མོ་ལྟེ་ལྐོག་བསམ། ཛཿཧཱུྃ་བྃ་ཧོཿསྒོ་བཞིར་བསམ། སྟཾ་ཛ་ཡ་ཨ་སྤྲུལ་པ་དང་། ། ཡང་སྤྲུལ་བསམ་གྱིས་མི་ཁྱབ་བསམ། ། དེ་ནས་གསང་བའི་སྔགས་བསྟན་པ། ། ལས་ཀྱི་ཁྱུང་ཆེན་དྲག་པོའི་སྔགས། ། སངས་རྒྱས་ཀུན་གྱི་མཐུ་བསྡུས་པ། ། ཨོཾ་བཛྲ་ཁྱུང་ཀར་ཁྱུང་ཀར་བཛྲ་ག་རུ་ཌ་ཙ་ལེ་ཙ་ལེ་ཧཱུྃ་ཕཊ། སྐུ་ཡི་གསང་བའི་སྔགས་སུ་བསྟན། ། ཨོཾ་བཛྲ་ག་རུ་ཌ་ཧཱུྃ་སྲོག་ཚིག་ནན་རྦད། ལུས་དུལ་ནཱ་ག་མཱ་ར་ཡ་ ཕཊ། ། རཾ་རཾ་ཛྭ་ལ་ཛྭ་ལ་ཞི་ཞི་རྡུལ་བུན་རྦད་ཕཊ། གསུང་གི་རིག་པ་དམ་པའོ། ། ཨོཾ་བཛྲ་ཙཎྜ་ག་རུ་ཌ་ཧཱུྃ་མཱ་ར་ཡ་མཱ་ར་ཡ། སྥོ་ཊ་ཡ་སྥོ་ཊ་ཡ། བཛྲ་བ་ཏི་ག་རུ་ཌ་བེ་གེ་ཧཱུྃ་ཛེ་ཛ་རི་ཛ་པྲི་ཛ་ཧཱུྃ་ཕཊ། ཐུགས་གསང་རྡོ་རྗེ་གཏུམ་པོའི་སྔགས། །

དྲག་བྱེད་ཐམས་ཅད་རླག་པར་ བྱེད། ། ཀླུ་རྣམས་སྙིང་ཁྲག་འཐིག་པ་ཡིན། ། རྡོ་རྗེ་འཛིན་པའི་དམ་ཚིག་འདི། ། རིན་ཆེན་བཞིན་དུ་རྙེད་དཀའ་བས། ། འདི་ལ་རྟག་ཏུ་འབད་པར་བྱ། ། མཐུན་པའི་རྫས་ཀྱི་གཏོར་མ་སྦྱིན། ། དེ་ཡི་ནང་དུ་གནོད་པ་དགུག ། ཨོཾ་བཛྲ་ཤྲཱི་མ་མཱ་ནཱ་ག་ས་བི་ཏ་ཆོ་ག་ཁུག་མྃ་ལིྃ་དྷིྃ་སྭཱ་ཧཱ། འདིས་ནི་བཀུག་ལ་ལྷ་ལ་འབུལ། ། གལ་ཏེ་གསད་པར་འདོད་པས་ན། སྐུ་གསུང་ཐུགས་ཀྱི་རིག་པ་ལ། ། ཕུར་བུ་གཉིས་པའི་དྲག་སྔགས་དང་། ། གསད་པ་སྤྱི་ཡི་ཤམ་བུར་གདགས། ། གཟུགས་བརྙན་ཕུར་བུས་བཏབ་པར་བྱ། ། ཚངས་པ་ཡིན་ཡང་ངེས་པར་བརླག ། ཨོཾ་ བཛྲ་ཙཎྜ་མ་ཧཱ་རོ་ཥ་ཎ་བཛྲ་ཀཱི་ལཱ་ཡ་སརྦ་བིགྷྣཱ་ན་མུངྒ་ར་ཀཱི་ལཱ་ཡ་ཨཱ་ཀོ་ཊ་ཡ་ཧཱུྃ་ཕཊ། ཨོཾ་བཛྲ་ཙཎྜ་ག་རུ་ཌ་ཀཱི་ལི་ཀཱི་ལ་ཡ་སརྦ་བིགྷྣཱ་ན་མུངྒ་ར་ཀཱི་ལཱ་ཡ་ཨཱ་ཀོ་ཊ་ཡ་ཧཱུྃ་ཕཊ། གཏུམ་ཆུང་ཕུར་བུས་བཏབ་པའི་སྔགས། ། དེ་རྗེས་གཟུགས་བརྙན་མ་ལུས་པ། ། དྲག་པོའི་ཐབ་ཏུ་བསྲེག་པར་ བྱ། ། ཚེར་མ་ཅན་གྱི་མེ་སྦར་ལ། ། ཁྱུང་ཆེན་གཏུམ་པོའི་ང་རྒྱལ་གྱིས། ། ནཱ་ག་བྷཱུ་མི་པ་ཏི་སརྦ་ཀཱ་ཡ་ཝཱ་ཀ་ཙིཏྟ་བཛྲ་ཛྭཱ་ལ་ཨ་ན་ལཱརྐ་ཧཱུྃ། ཅི་རིགས་སྔགས་ཀྱིས་བསྲེག་པ་དང་། །

ཐལ་བ་དཀར་གསུམ་སྦྱར་བྱ་སྟེ། ། རྒྱ་མཚོར་འབབ་པའི་ཆུ་ལ་དོར། ། དེ་ལྟར་ལས་ཀྱི་སྦྱོར་བ་དེ། ། ལན་བདུན་བྱས་པར་གྱུར་ན་ནི། ། ཀླུ་ཆེན་དུག་གིས་སྙིང་ལ་ཟིན། ། ངེས་པར་སོས་པར་འགྱུར་བ་ཡིན། ། གལ་ཏེ་མི་གཏོང་ཀླུ་ཆེན་གྱི། ། ལུས་དང་ཁང་པར་བཅས་པ་ལ། ། མེ་དང་རྡོ་རྗེའི་ཆར་པ་ཡིས། ། སྐད་ཅིག་ཉིད་ལ་འཚིག་པར་འགྱུར། ། དེ་བས་དམ་ཚིག་མི་འདའ་བས། ། ལས་འདི་མྱུར་བར་མི་བྱའོ། ། ལས་ཀྱི་གཏུམ་པོ་ཁྱུང་སྒྲུབ་པ། ། མཛེས་མ་ཁྱོད་ལ་བསྟན་པ་ཡིན། ། བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས། ལས་སྒྲུབ་པའི་ལྷ་རྡོ་རྗེ་གཏུམ་པོ་ཁྱུང་གི་བསྒྲུབ་པ་བསྟན་པའི་ལེའུ་སྟེ་བརྒྱད་པའོ། ། ། ། དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་སྐུའི་སྤྲུལ་པ། ཕོ་ཉ་གནོད་སྦྱིན་ནག་པོའི་སྒྲུབ་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། མཛེས་མ་ཁྱོད་ཀྱིས་ཞུས་པ་ལེགས། ། ཟག་མེད་བདེ་བའི་རྒྱུ་འབྱུང་མ། ། བདག་མེད་ཤེས་རབ་མ་ཡི་མཆོག ། ཁྱོད་ལ་བཤད་ཀྱིས་ལེགས་པར་ཉོན། ། ང་ཡི་གནོད་སྦྱིན་ནག་པོ་འདི། ། བྱ་བའི་ལས་ཀུན་ཐོགས་པ་མེད། །

ཁྱད་པར་དྲག་པོའི་ཕྲིན་ལས་འགྲུབ། ། དུར་ཁྲོད་བྲག་རྫོང་ནགས་ཕུག་ཏུ། ། ནག་པོའི་ས་ལ་དཀྱིལ་འཁོར་བྱ། ། པདྨ་འདབ་ བརྒྱད་སྒོ་དང་བཅས། ། མཐིང་ནག་གྲུ་གསུམ་མེ་འོད་ལྡན། ། སུྃ་ལས་རི་རབ་སྟེང་དུ་ཧཱུྃ། འོད་ཟེར་འཕྲོ་འདུས་རྡོ་རྗེར་བསམ། ། དེ་ལས་གནོད་སྦྱིན་ནག་པོ་ནི། ། ཞལ་གསུམ་ཕྱག་དྲུག་ཞབས་གསུམ་ལྡན། ། གཡས་པ་འཇིགས་པ་སྟག་གི་ཞལ། ། གཡོན་པ་སྟོབས་ཆེན་ སེང་གེ་སྟེ། ། ཕྱག་གཡས་དང་པོ་རྡོ་རྗེ་འཛིན། ། གཉིས་པ་རྩེ་གསུམ་གསུམ་པ་ཕུར། ། གཡོན་པ་དྲིལ་ཆེན་ལྕགས་ཀྱུ་དང་། ། ཐོད་པ་ཁྲག་གིས་བཀང་བ་ཡིན། ། གཡས་པ་གཏུམ་པས་བདུད་མོ་བརྫིས། ། གཡོན་པས་བདུད་ཕོ་ཉི་གདོང་མནན། ། ཕུར་ཞབས་དམར་པོ་ མེ་འབར་བས། ། གནོད་བྱེད་བགེགས་ཀྱི་མགོ་ལ་བཏབ། ། ཐོད་ཕྲེང་མི་ཡི་པགས་པ་གྱོན། ། དུར་ཁྲོད་རུས་པའི་རྒྱན་དང་ལྡན། ། དབུ་སྐྲ་དམར་པོ་ཐུར་དུ་འཕྱང་། ། སྤྱན་གསུམ་མཆེ་བ་རབ་ཏུ་གཙིགས། ། ཧ་ཧར་དགོད་ཅིང་གདུག་པ་འདུལ། ། སྤྲུལ་པའི་གནོད་སྦྱིན་སྟོང་ དང་བཅས། ། རྡོ་རྗེ་འཆང་གི་བཀའ་བཞིན་སྒྲུབ། ། དེ་ཡིས་རིག་པ་ཕུལ་བ་ནི། ཨོཾ་བཛྲ་ཡཀྵ་ཀཱ་ལ་ཙཎྜ་ནཱི་ལཱྃ་པ་ར་དྷ་ར་ཤ་རཱི་ར་ཧཱུྃ་ཕཊ།

རྩ་བའི་གསང་སྔགས་འབུམ་དུ་བཟླས། ། གྲུབ་པར་གྱུར་ནས་གང་དམིགས་ལ། ། རྗེས་སུ་ཚ་བའི་འབྲུ་དང་ནི། ། ཚྭ་ལས་ལིང་གར་ འཁོར་ལོ་གཞུག ། དམིགས་པ་བསྟིམས་ལ་འགྲུབ་གནས་གཞུག ། དེ་སྟེང་ཡུངས་ཀར་ཟི་ར་དང་། ། དུག་གི་རིགས་ཀྱིས་བྲབ་པར་བྱ། ། གསང་བ་དྲག་པོའི་སྔགས་འདི་བཟླས། ། ཨོཾ་བཛྲ་ཡཀྵ་ཀཱ་ལ་ཙཎྜ་ནཱི་ལཱྃ་བ་ར་དྷ་ར་སརྦ་ཤ་ཏྲཱུྃ་བི་དྷཱ་རཱ་ཡ་ཕཊ། ཧ་ར་ཧ་ར་ཕཊ། པྲ་ཧ་ ར་པྲ་ཧ་ར་ཕཊ། ཙྪིནྡ་ཙྪིནྡ་ཕཊ། བྷིནྡ་བྷིནྡ་ཕཊ། བི་སྥོ་ཊ་ཡ་བི་སྥོ་ཊ་ཡ་ཕཊ། སརྦ་ཤ་ཏྲཱུྃ་ཀཱ་ཡ་ཝཱཀ་ཙིཏྟ་བི་ནཱ་ཤ་ཀ་ར་ཡ་ཕཊ། ཇི་སྲིད་མ་ཤིའི་བར་དུ་བྲབ། ། གྲུབ་ནས་རིགས་མེད་ཐོད་པར་གཞུག ། ཙེ་ཏི་ཆེན་པོའི་འོག་ཏུ་སྦ། ། སྟེང་དུ་རི་རབ་རྡོ་རྗེ་ཡིས། ། མནན་པ་བྱས་པས་ངེས་ པར་བརླག ། ཡང་ན་གནོད་སྦྱིན་ཆེན་པོ་དེ། ། དུར་ཁྲོད་རས་ལ་བྲིས་བྱས་ལ། ། དེ་ཡི་སྙིང་གར་སྔགས་འདི་བྲི། ། ཨེ་ཡི་ནང་དུ་ཆུད་པར་ནི། ། ཨོཾ་བཛྲ་ཡཀྵ་ཀཱ་ལ་ཙཎྜ་ས་མ་ཡ་མ་ནུ་སྨ་ར་སིདྡྷི་ཧཱུྃ། ཕྱག་ལ་ཡཀྵ་པ་ཏ་ལི། ། ཞབས་ལ་ཀྃ་མྃ་བྷ་ར་བྲི། ། དེ་ཉིད་གཏོར་མ་ཆེན་པོ་ལ། ། བཅུག་སྟེ་སྔོན་པོའི་དར་གྱིས་དགབ། ། དེ་སྟེང་རས་སམ་ཤིང་ལོ་ལ། །

གནོད་སྦྱིན་སྲོག་གི་འཁོར་ལོ་ནི། ། ལྟེ་བ་རྩིབས་བཅུ་མུ་ཁྱུད་བཅས། ། ཡང་རྩིབས་བཅུ་དང་མུ་ཁྱུད་ལྡན། ། མེ་འོད་ལྡན་པ་བྲི་བྱས་ཏེ། ། སྔགས་ཀྱི་འཁྲུལ་འཁོར་བཀོད་ནས་ཀྱང་། ། ལས་ཀྱི་མིང་དང་སྤེལ་ བ་བྲི། ། འདི་ནི་གནོད་སྦྱིན་སྲོག་ཡིན་ཏེ། ། མི་འདའ་བཀའ་ཡི་དམ་ཚིག་ཡིན། ། ལས་རྣམས་གང་བཅོལ་སྐུ་ཡིས་བྱེད། ། ཡང་ན་རྒྱལ་རིགས་ཐོད་པ་ལ། ། གནོད་སྦྱིན་བྲིས་ལ་ཚ་བའི་མར། ། ཆང་དང་བསྲེས་ལ་བྱུག་བྱ་སྟེ། ། ཉིན་རེ་གང་འདོད་ལས་དང་སྦྱར། ། མེ་ ཏོག་ཁ་དོག་མཐུན་པས་བྲབ། ། བསྒོ་བའི་ཕྲིན་ལས་འགྲུབ་པར་འགྱུར། ། ཆུ་དར་སྔོན་པོའི་གཞི་མ་ལ། ། གསེར་གྱིས་འཁོར་ལོ་བྲི་བར་བྱ། ། ལྟེ་བ་རྩིབས་བརྒྱད་མུ་ཁྱུད་ལྡན། ། ཕྱི་མ་རེའུ་མིག་བཅུ་དྲུག་པར། ། ས་བོན་སྔགས་དང་སྤེལ་བྱས་ཏེ། ། ཀུན་གྱི་མཐའ་རུ་ ཕྲིན་ལས་སྔགས། ། བྲིས་པ་མགུལ་དུ་བཏགས་པ་ཡིས། ། མི་མཐུན་ཕྱོགས་རྣམས་བསྲུང་འགྱུར་ཏེ། ། བུང་བ་མེ་ལ་བྱ་བ་བཞིན། ། ཁྱི་ཤ་བཏགས་པའི་རིལ་བུའི་ནང་། ། དགྲ་ཡི་གཟུགས་བྲིས་སྔགས་དང་སྤེལ། ། ཉི་ནུབ་བྱ་རོག་ལ་བྱིན་ཏེ། ། སྔགས་བཟླས་ཕྱིར་ ཞིང་ལན་གྲངས་ནི། ། བརྒྱ་འམ་སྟོང་དུ་བྱས་གྱུར་ན། །

གང་ཡིན་གནས་ནས་བསྐྲད་པར་འགྱུར། ། ཁྱི་འབྲེལ་སྤུ་ལ་སྲད་བུ་བྱས། ། མདུད་པ་བརྒྱ་རྩ་བརྒྱད་བྱས་ཏེ། ། སྔགས་རེ་ཞིང་ཡང་གནོད་སྦྱིན་རེ། ། འབྲས་ཀྱི་ནང་དུ་བསྐྱུར་བ་ན། ། ཕུབ་མ་འབྲལ་བར་མི་འགྱུར་རོ། ། དེ་བཞིན་ཁྱིམ་དུ་བཅངས་པ་ན། ། མི་ཕྱུགས་ལ་སོགས་འཁྲིག་པ་ན། ། ཁྱི་དང་འདྲ་བར་འབྲེལ་པར་འགྱུར། ། ཁྱི་ནག་སྙིང་དུ་གནོད་སྦྱིན་གྱི། ། སྙིང་དང་སྐུ་དང་སྔགས་བཅུག་ནས། ། བཅངས་པ་ཙམ་གྱིས་གནོད་སྦྱིན་ཉིད། ། ལུས་དང་གྲིབ་མར་འདྲ་ བར་འགྱུར། ། སྐད་ཅིག་ཙམ་ཡང་སྒྲུབ་པ་པོ། ། དེ་ཡིས་གཏོང་བར་མི་བྱེད་དོ། ། དེ་ལ་སོགས་པའི་ལས་ཀྱི་རིམ། ། མཛེས་མ་ཁྱོད་ལ་བཤད་པ་ཡིན། ། བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་གནོད་སྦྱིན་ནག་པོ་སྒྲུབ་པའི་ལེའུ་སྟེ་ དགུ་པའོ། ། ། ། དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་རྣལ་འབྱོར་བསམ་གྱིས་མི་ཁྱབ་པའི་རྫོགས་པའི་རིམ་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ། མཛེས་མ་ཁྱོད་ཀྱིས་ཞུས་པ་ལེགས། ། ཟག་མེད་བདེ་བའི་ རྒྱུ་འབྱུང་མ། ། བདག་མེད་ཤེས་རབ་མ་ཡི་མཆོག །

ཁྱོད་ལ་བཤད་ཀྱིས་ལེགས་པར་ཉོན། ། བསམ་གྱིས་མི་ཁྱབ་རྫོགས་པ་ཆེ། ། ལྷ་ཡི་བྱ་བ་སྔོན་སོང་སྟེ། ། བསྐྱེད་ལ་དམིགས་པ་ཐོབ་ནས་ནི། ། སྙིང་གར་ཡེ་ཤེས་སེམས་དཔའ་བསམ། ། དེ་ཡི་རང་བཞིན་སྙིང་ ནང་དུ། ། པདྨ་འདབ་བཞིའི་ཐིག་ལེས་བརྒྱན། ། ཉི་ཟླའི་བར་དུ་རྒྱ་སྲན་ཚད། ། དེ་ཡི་ནང་དུ་གནས་པའི་སྲོག ། ཨ་ཤད་མར་མེའི་རྩེ་ལྟར་སྒོམ། ། དེ་ལ་དམིགས་པ་བརྟན་པ་དང་། ། ཅི་ཡང་བསམ་པར་མི་བྱ་སྟེ། ། བསམ་གྱིས་མི་ཁྱབ་དེ་བསམས་ན། ། དེ་ལས་ཡེ་ཤེས་སྐྱེ་ བར་འགྱུར། ། གསལ་ཞིང་མི་རྟོག་རིག་པའི་སྐུ། ། ཡེ་ཤེས་ཞེས་ནི་དེ་ལ་བྱ། ། རྟེན་མེད་རྣམ་དག་གསལ་བ་ཡིན། ། རྟོག་པ་རྟེན་ཅན་བསྒོམ་འདོད་པས། ། སྐུ་ཡི་གནས་སུ་འཁོར་ལོ་ནི། ། དཀར་པོ་རྩ་འདབ་སུམ་ཅུ་གཉིས། ། མཚན་གྱི་ཐབས་ཀྱིས་ཆས་བརྒྱན་པ། ། གསུང་ གི་གནས་སུ་རྩ་འདབ་ནི། ། བཅུ་དྲུག་དམར་པོ་ཤེས་རབ་སྟེ། ། དེ་ལ་ཐབས་ཀྱིས་ངེས་པར་བརྒྱན། ། ཐུགས་ཀྱི་གནས་སུ་དུས་སྦྱོར་བརྒྱད། ། གཙོ་བོའི་ཡི་གེ་བརྒྱད་གནས་པ། ། ཕྲིན་ལས་བྱ་བའི་གནས་དག་ཏུ། ། དབྱུག་གུའི་གྲངས་ཀྱི་རྩ་གནས་པ། ། ཤེས་རབ་གཉིས་འགྱུར་ ཁ་དོག་དམར། ། དེ་དབུས་གཉིས་མེད་གཡས་དང་གཡོན། །

ཐབས་དང་ཤེས་རབ་རྣམ་པར་དབྱེ། ། རྟོག་པ་སད་པའི་འཁོར་ལོ་ནི། ། ཐབས་ལ་དྲུག་དང་ཤེས་རབ་དྲུག ། ཐ་མ་བདེ་བ་འཛིན་པའི་ས། ། མི་རྟོག་དཔའ་བོ་གནས་པ་ཡིན། ། ཡི་གེ་བཞི་ཡིས་རྒྱན་མཛད་དེ། ། བདེ་འཛིན་འཁོར་ལོར་ཡི་གེ་མེད། ། བརྗོད་པ་ཐམས་ཅད་སྤངས་པ་སྟེ། ། འདུས་མ་བྱས་པའི་རང་བཞིན་མཆོག ། ཁུ་བ་ཁྲག་དང་ཆུ་སེར་གནས། ། འདི་ནི་ལམ་གསུམ་འཇོམས་བྱེད་པའོ། ། སྐད་ཅིག་རླུང་གི་རྟ་ཡིས་ནི། ། ཐབས་དང་ཤེས་རབ་གཉིས་བསྐུལ་ནས། ། གཉིས་མེད་ཡེ་ཤེས་སྐྱེ་བར་འགྱུར། ། ཡེ་ཤེས་ཀྱིས་ནི་རྟོག་པ་བསྲེག ། ཐལ་བའང་དམིགས་པར་མི་འགྱུར་བའི། ། རྟགས་ལྔ་རིམ་པར་འབྱུང་བར་འགྱུར། ། དེ་ནས་དཔལ་གྱི་ཡོན་ཏན་ཏེ། ། ཡང་ནས་ཡང་དུ་གོམས་པར་བྱ། ། སྡེ་པ་བཞི་ཡི་ལོངས་སྤྱོད་ནི། ། གནས་ སུ་ཡང་དག་སྐྱེ་བར་འགྱུར། ། གཉིས་མེད་བདེ་བའི་གནས་ཐོབ་ནས། ། སྐྱེ་འཆི་ལ་སོགས་རྒྱུན་ཆད་དེ། ། འདི་ནི་རྣམ་དག་ལེགས་པའི་གནས། ། ཐོབ་པར་འགྱུར་བ་སྨོས་ཅི་དགོས། ། འདི་ལྟར་རྣམ་པར་དག་པ་ནི། ། ཉིན་མཚན་ཆ་ཡི་དབྱེ་བ་ཡིས། ། དབྱུག་གུ་ཆུ་ཚོད་ དུས་སྦྱོར་སོགས། ། བརྩི་བས་རྣལ་འབྱོར་ངལ་བའི་རྒྱུ། ། ཐམས་ཅད་གཅིག་ཏུ་བསྡོམས་གྱུར་ན། །

མི་རྟོག་མཉམ་ཉིད་ནམ་མཁར་དག ། འབད་མེད་ཡེ་ཤེས་ལྷུན་གྱིས་གྲུབ། ། དང་པོའི་སངས་རྒྱས་ཡེ་ཤེས་ཆེ། ། ཁམས་གསུམ་ཐམས་ཅད་སྒྲོལ་མཛད་མ། ། ཤེས་རབ་ ཡུམ་ལ་ཕྱག་འཚལ་ལོ། ། མི་གནས་སྤྲོས་བྲལ་འདུས་མ་བྱས། ། ལེགས་རྟོགས་བླ་མ་མཆོག་ལ་འདུད། ། བརྗོད་པར་དཀའ་བའི་རྣལ་འབྱོར་འདི། ། མཛེས་མ་ཁྱོད་ལ་བཤད་པ་ཡིན། ། དཔའ་བོ་བརྟན་པར་མ་གྱུར་ན། ། ཡི་གེ་ཧཱུྃ་གི་སྦྱོར་བ་ཡིས། ། འཇིག་རྟེན་ཁམས་ ཀུན་འཇིག་པར་འགྱུར། ། མེ་ཡིས་བུད་ཤིང་སྲེག་མཛད་དེ། ། ཤིང་མེད་མེ་ཡང་ཇི་ལྟར་གནས། ། བརྟན་གཡོ་ཉམས་པར་གྱུར་པ་ན། ། མི་ཤིགས་ཡི་གེ་རྣམ་པར་དག ། འདི་ནི་གསང་བ་དམ་པ་སྟེ། ། གསང་བ་བླ་ན་མེད་པ་འདི། ། བདག་མེད་རྟོགས་པ་ཁྱོད་ལ་བཤད། ། གཞན་དུ་ གང་གཱའི་བྱེ་མ་དང་། ། མཉམ་པའི་སངས་རྒྱས་རྣམས་ཀྱིས་ཀྱང་། ། བརྗོད་པར་ནུས་པ་ག་ལ་ཡོད། ། བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་བསམ་གྱིས་མི་ཁྱབ་པ་རྫོགས་པའི་རིམ་པ་བསྟན་པའི་ལེའུ་སྟེ་བཅུ་ པའོ། ། ། ། དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་རིགས་དག་པ་ལ་དབང་བསྐུར་བ་ཇི་ལྟ་བུ་ལགས།

བཅོམ་ལྡན་འདས་ཀྱིས་བཀའ་སྩལ་པ། ། མཛེས་མ་ཁྱོད་ཀྱིས་ཞུས་པ་ལེགས། ། ཟག་མེད་བདེ་བའི་རྒྱུ་འབྱུང་མ། ། བདག་ མེད་ཤེས་རབ་མ་ཡི་མཆོག ། ཁྱོད་ལ་བཤད་ཀྱིས་ལེགས་པར་ཉོན། ། དང་པོར་སློབ་དཔོན་མཚན་ཉིད་ཀྱང་། ། མཛེས་ཤིང་དུལ་ལ་བྱམས་སེམས་ལྡན། ། སྔགས་དང་རྒྱུད་ཀྱི་དེ་ཉིད་མཁས། ། སྙན་པར་སྨྲ་ཞིང་གཏོང་ལ་དགའ། ། བརྟན་ཞིང་བདེན་སྨྲ་བྱམས་སེམས་ལྡན། ། བསམ་པ་ཤེས་ཤིང་གསོང་པོར་སྨྲ། ། དམ་ཚིག་ལྡན་ཞིང་སྔགས་ཚུལ་མཁས། ། ཕྱག་རྒྱ་དཀྱིལ་འཁོར་བརྡ་རྣམས་མཁས། ། དེ་ཉིད་བཅུ་ཤེས་སྙིང་རྗེར་ལྡན། ། འཇིག་རྟེན་པ་ཡི་རྣམ་སྤངས་པ། ། མཁས་པས་དེ་ཉིད་ཤེས་ནས་ཀྱང་། ། དེ་ནི་སངས་རྒྱས་ཀུན་རང་བཞིན། ། བྱང་ཆུབ་སེམས་དང་དགྲ་བཅོམ་དང་། ། ཉན་ཐོས་རང་རྒྱལ་གོང་ན་མེད། ། དེ་ལྟའི་བླ་མ་སྲོག་ལྟར་བསྟེན། ། གལ་ཏེ་སློབ་དཔོན་སྨོད་པ་ལ། ། དངོས་གྲུབ་རྨི་ལམ་དུ་ཡང་མེད། ། དེ་བས་བླ་མ་མཉེས་བྱས་ལ། ། བླ་གོས་ཕྲག་པ་ལ་གཡོགས་ཏེ། ། པུས་བཙུགས་ཐལ་སྦྱར་མེ་ ཏོག་ཐོགས། ། དཀྱིལ་འཁོར་བྲི་བར་གསོལ་བར་བྱ། ། གྲོང་དང་ཚོང་དུས་དུར་ཁྲོད་དང་། ། ཚལ་དང་ལྷ་ཁང་གྲོང་ཁྱེར་ཏེ། ། བྱང་ཤར་དངོས་གྲུབ་གཞན་གཉིས་སྤངས། །

རོ་ཧི་ཏ་སོགས་ཟླ་བ་ཡི། ། ལྟོ་འཕྱེའི་ལྟོ་བར་ཤེས་པར་ཡིན། ། གཞན་དུ་ཉེས་པ་འབྱུང་བར་འགྱུར། ། མཁས་པས་ཉེས་པ་མེད་པར་བྱ། ། ས་བསླང་བ་དང་བརྟག་པ་ནི། ། རིམ་བཞིན་གཙུག་ལག་ཁང་པ་དང་། ། ཚལ་དང་རྡོ་ལེབ་ཁང་{བཟངས་ཏེ,བཟང་སྟེ}། ། ཀུན་ལ་བརྟག་པ་སྤང་བར་བྱ། ། སློབ་དཔོན་སྨིན་པས་སློབ་མ་རྣམས། ། ཕུང་པོ་ལྔ་པོ་དག་པར་བྱ། ། ས་ཡི་ཉེས་པ་ཀུན་བསལ་ ནས། ། ལྃ་ལས་བྱུང་བའི་ལྷ་མོ་ནི། ། རྒྱན་ལྡན་བུམ་པ་ཕྱག་ན་བསྣམས། ། དེ་ལ་མཆོད་ཅིང་གསོལ་བར་བྱ། ། ཨོཾ་ཚུར་སྤྱོན་ཚུར་སྤྱོན་ས་ཡི་ནི། ། ལྷ་མོ་ཆེན་མོ་འཇིག་རྟེན་ཡུམ། ། རིན་ཆེན་ཀུན་གྱིས་རབ་གང་མ། ། བཟང་པོའི་རྒྱན་གྱིས་རྣམ་བརྒྱན་མ། ། དོ་ཤལ་རྐང་གདུབ་ སྒྲ་ལྡན་མ། ། རྡོ་རྗེ་སེམས་དཔའ་རབ་མཆོད་པར། ། མཆོད་ཡོན་འདི་ནི་བཞེས་ནས་ཀྱང་། ། དཀྱིལ་འཁོར་ལས་ནི་ལེགས་སྒྲུབ་མཛད། ། ཨོཾ་ཧི་ཧི་ཧི་ཧི་ཧཱུྃ་སྭཱ་ཧཱ། ། གནང་བས་ས་ལ་སླར་ཐིམ་བསམ། ། སླར་སྦྱངས་བསང་ཞིང་གཙོ་བོ་ལ། ། དྲི་ཡི་གདན་ཆེན་གྲུ་བཞི་སྟེ། ། འཁོར་ ལོ་སུམ་ཆ་དོར་བས་ཟླུམ། ། མེ་ཏོག་སྔོན་པོའི་གདན་ལ་བསམ། ། རིན་པོ་ཆེ་འམ་ས་ཡང་རུང་། ། བུམ་པ་ནག་པོའི་སྐྱོན་སྤངས་ཏེ། །

བྱཱ་གྷྲི་སེང་གྷྲི་དབྱུག་པ་ཡི། ། ཨུཏྤལ་གཞན་གྱིས་མི་ཐུབ་པ། ། ཧ་ས་དེ་བས་ནད་རྣམས་སྦྱོང་། ། དངུལ་དང་མུ་ཏིག་མུ་མེན་དང་། ། བྱེ་རུ་ གསེར་གྱིས་ཡེ་ཤེས་འཕེལ། ། ནས་གྲོ་ཏིལ་དང་སྲན་མ་དང་། ། མུད་ག་ཡིས་ནི་ལམ་ལྔ་དག ། ག་པུར་གུར་གུམ་ཛཱ་ཏི་དང་། ། ཙན་དན་ཨ་ག་རུ་ཡིས་ནི། ། གཞན་དོན་ཕྲིན་ལས་ལྔ་འགྲུབ་བོ། ། ཆུ་དང་སྙིང་པོ་ལྔ་ཡིས་ནི། ། རྣལ་འབྱོར་ཕུན་སུམ་ཚོགས་གྱུར་པས། ། མགྲིན་ པ་གོས་ཀྱིས་དཀྲིས་པ་དང་། ། འབྲས་ལྡན་ཤིང་གིས་ཁ་ཡང་བརྒྱན། ། ཀུ་ཤ་ལ་འདུག་མཚན་མ་ཅན། ། རང་རང་ཕྱོགས་སུ་གཞག་པར་བྱ། ། བདུག་སྤོས་ཐོགས་ལ་གསོལ་བ་གདབ། ། བཅོམ་ལྡན་རྡོ་རྗེ་འཛིན་པའི་རྒྱལ། ། བདག་ལ་དགོངས་ནས་གཟིགས་སུ་གསོལ། ། སློབ་མ་རྣམས་ཀྱི་དོན་ཕྱིར་དང་། ། ཁྱེད་རྣམས་ལ་ཡང་མཆོད་པའི་ཕྱིར། ། བདག་ནི་དཀྱིལ་འཁོར་འདྲི་བར་འཚལ། ། རིན་པོ་ཆེ་ཡི་མཐུ་བཞིན་དུ། ། བཀའ་དྲིན་རྗེས་སུ་གནང་བ་ཡིས། ། སང་ནི་བྱོན་པར་མཛད་དུ་གསོལ། ། ལན་གསུམ་བར་དུ་གསོལ་བར་བྱ། ། སློབ་ མ་རྣམས་ལ་རྗེས་བརྩེ་བས། ། སྡོམ་གཟུང་གསོལ་ཞིང་སྲུང་བ་དང་། ། སློབ་དཔོན་རྡོ་རྗེ་ཅན་དམིགས་ལ། ། གང་ཡང་གསང་སྔགས་ལྷ་ཀུན་དང་། །

འཇིག་རྟེན་སྐྱོང་བ་མ་ལུས་པ། ། རྫོགས་པའི་བྱང་ཆུབ་ལ་ཞུགས་དང་། ། སངས་རྒྱས་བསྟན་དགའི་འབྱུང་པོ་དང་། ། གང་ དག་རྡོ་རྗེའི་སྤྱན་ལྡན་རྣམས། ། རྡོ་རྗེ་འཆང་གི་དཀྱིལ་འཁོར་མཆོག ། དེང་བདག་འདྲི་བར་འགྱུར་བ་ལ ། ། བདག་དང་སྐལ་ལྡན་སློབ་མ་ལ། ། བྱིན་གྱིས་རླབས་ཕྱིར་བསྲུང་བར་མཛོད། ། སྲད་བུ་ཡེ་ཤེས་ལྔ་ཡི་དངོས། ། རེ་རེའང་རིགས་ལྔ་རྣམ་དག་སྟེ། ། ཆོས་ཀུན་ངོ་བོ་ཉིད་མེད་པས། ། ཕན་ཚུན་སྔགས་བཟླས་བསྒྲིལ་བར་བྱ། ། དཀྱུས་སུ་འཁོར་ལོའི་ཉིས་འགྱུར་ལ། ། སྦོམས་སུ་སྒོ་ཡི་བཅུ་གཉིས་ཚད། ། ཧཱུྃ་བརྗོད་བདུད་རྩི་ལྔ་བྱུགས་ལ། ། ཛྫ་ཛྫ་སྒྲ་བརྗོད་ལྟེ་བར་གཟུང་། ། སླར་ཡང་དེ་བཞིན་ཡེ་ཤེས་ཀྱི། ། ཐིག་ཆེན་ནམ་མཁར་ གདབ་པར་བྱ། ། དེ་བཞིན་ཆ་ལྡན་གཉིས་པ་ཡིས། ། གཙང་ཞིང་རྡོ་རྗེ་འཛིན་བསམས་ཏེ། ། ཚངས་པའི་ཐིག་ཆེན་གདབ་པར་བྱ། ། གཉིས་པ་ཟུར་ཐིག་ལ་སོགས་པར། ། ནུབ་དང་ལྷོར་ནི་སློབ་དཔོན་ལ། ། བྱང་ཤར་སློབ་མའི་གནས་ས་སྟེ། ། གཡས་ཀྱིས་བསྐོར་བ་མ་ གཏོགས་པར། ། གཡོན་དུ་ནམ་ཡང་མ་ཡིན་ནོ། ། དེ་ལྟར་ཆ་ཡིས་རྣམ་པར་དབྱེ། ། ཐིག་སྐུད་ཆད་ན་བླ་མ་འཆི། ། དམན་དང་ལྷག་པས་ནད་དུ་འགྱུར། །

ཕྱོགས་འཁྲུལ་ན་ནི་སློབ་མ་རྨོངས། ། དེ་བས་མཁས་པས་སྐྱོན་མེད་བྱ། ། རིན་ཆེན་ལྔ་འམ་འབྲུ་ཡི་ཕྱེ། ། ཡང་ན་ འབྱུང་ཁུངས་ལས་བྱུང་བ། ། ཡི་གེ་བཅུ་ཡིས་བྱིན་བརླབས་ཏེ། ། རིགས་ལྔ་རྣམ་པར་དག་པ་ལས། ། དཀར་སེར་དམར་ལྗང་ནག་པོ་དང་། ། དབང་ལྡན་ཕྱོགས་ནས་བྲི་བར་བྱ། ། གལ་ཏེ་ཚོན་རྩི་མི་མཉམ་ཞིང་། ། ཡོ་དང་དམའ་བར་གྱུར་ན་ནི། ། དངོས་གྲུབ་མེད་ཅིང་རྩོད་ལ་གདུང་། ། སྦོམ་པས་ནད་འབྱུང་ཕྲ་བས་ནི། ། ནོར་ཉམས་གལ་ཏེ་ཆད་པས་ནི། ། འཆི་འགྱུར་གཡས་སྐོར་མ་བྲིས་ན། ། ཕུར་བུས་བཏབ་པ་ཡིན་ཞེས་བྱ། ། ཤར་ཕྱོགས་དཀར་ལ་ལྷོ་ནུབ་བྱང་། ། སེར་དམར་ལྗང་ཁུར་བྲི་བར་བྱ། ། དབུས་ནི་བཻ་ཌཱུརྱ་ལྟ་བུ། ། པདྨ་ཕྱོགས་ཀྱི་རྣམ་པ་ སྟེ། ། མཚམས་ནི་མཛེས་ཚོན་བུམ་པས་བརྒྱན། ། སྒོ་ལ་སོགས་པའི་རྒྱན་རྣམས་དང་། ། དུར་ཁྲོད་ར་བའི་ནང་དུ་བྲི། ། གཏུམ་དྲག་ལ་སོགས་ཕྱོགས་མཚམས་དགོད། ། དབུས་མཐོ་ཤར་དང་བྱང་གཞོལ་ཞིང་། ། མཐོ་ཞིང་མ་འདྲེས་དྲང་བར་བྲི། ། དེ་ནས་རྡོ་རྗེ་འཛིན་ དམིགས་ལ། ། གུས་པས་མེ་ཏོག་དང་བཅས་ནས། ། གསོལ་བ་འདི་ལྟར་གདབ་པར་བྱ། ། དཔལ་ལྡན་རྡོ་རྗེ་འཛིན་པ་ཆེ། ། བྱང་ཆུབ་ཆེན་པོའི་ཚུལ་བསྟན་པ། །

མགོན་པོ་ཆེན་པོ་བདག་འཚལ་ལོ། ། དམ་ཚིག་དེ་ཉིད་བདག་ལ་སྩོལ། ། བྱང་ཆུབ་སེམས་མཆོག་བདག་ལ་སྩོལ། ། སངས་རྒྱས་ཆོས་དང་དགེ་འདུན་ཏེ། ། སྐྱབས་གསུམ་དག་ཀྱང་བདག་ལ་སྩོལ། ། ཐར་བ་ཆེན་པོའི་གྲོང་མཆོག་ཏུ། ། མགོན་པོས་བདག་ནི་གཞུག་པར་མཛོད། ། ཅེས་པ་ལན་གསུམ་བར་དུ་བྱ། ། བུ་ཚུར་ཐེག་པ་ཆེན་པོ་ཡི། ། ཚུལ་ཆེན་སྣོད་ནི་ཁྱོད་ཡིན་ཏེ། ། གསང་སྔགས་ སྤྱོད་ཚུལ་ཆོ་ག་མཆོག ། ཁྱོད་ལ་ཡང་དག་བཤད་པར་བྱ། ། རྡོ་རྗེ་མི་ཕྱེད་མཐུ་ཡིས་ནི། ། མཉམ་མེད་པ་ཡི་ཡེ་ཤེས་འཐོབ། ། དེ་བས་ཀུན་མཁྱེན་ཐོབ་འདོད་པས། ། བུ་ཡིས་བློ་གྲོས་འདི་གྱིས་ཤིག ། བླ་མ་སངས་རྒྱས་ཀུན་མཆོད་ཅིང་། ། རྩ་བ་ཡན་ལག་ ཉེས་པ་སྤོང་། ། མ་གྲོལ་འཁོར་བའི་སེམས་ཅན་ལ། ། སྙིང་རྗེ་ཆེན་པོ་རབ་བསྐྱེད་ནས། ། བསྒྲལ་ཞིང་གྲོལ་བའི་ལམ་ལ་དགོད། ། བདེ་བར་དབུགས་ནི་དབྱུང་བར་བྱ། ། དེ་དག་རིམ་དང་རིམ་མིན་པ། ། སློབ་མའི་རིམ་པ་རྣམ་པར་བརྟག ། ཁྲུས་བྱ་སོ་ཤིང་སྦྱིན་པར་བྱ། ། ཕྲིན་ལས་ཕྱོགས་དང་དངོས་གྲུབ་ཀྱི། ། རིམ་པར་རྣམ་པར་བརྟག་པར་བྱ། ། སྲུང་སྐུད་གདགས་དང་ཀུ་ཤ་སྦྱིན། ། རྨི་ལམ་བརྟགས་ལ་ངན་པ་ན། ། ཞི་བའི་མེ་ཡིས་བཟློག་པར་བྱ། །

གདོང་གཡོགས་བཅིངས་ལ་ཡེ་ཤེས་དབབ། ། དཀྱིལ་འཁོར་དམ་པར་གཞུག་ པའི་ཕྱིར། ། སྔོན་བསགས་སྡིག་པ་མ་ལུས་ལས། ། དཀྱིལ་འཁོར་མཐོང་བ་ཙམ་གྱིས་འབྱང་། ། བུ་ཁྱོད་སུ་ཡིན་ཅི་དགའ་བ། ། བདག་ནི་སྐལ་བཟང་རིགས་ཡིན་པས། ། རྡོ་རྗེ་འཛིན་པ་ཁྱོད་ལ་དགའ། ། མིག་དབྱེ་དཀྱིལ་འཁོར་ལྷ་ཡང་བསྟན། ། དམ་ཚིག་ཆུ་སྦྱིན་མནའ་ ཡང་བསྒྲག ། མེ་ཏོག་དོར་ལ་ལྷ་ངོ་བསྟན། ། གང་དང་གང་དུ་བབ་གྱུར་པའི། ། རིགས་ཀྱིས་དེ་ལ་སྤྲོ་བར་བྱ། ། ཆུ་དང་ཅོད་པན་རྡོ་རྗེ་དེ། ། དྲིལ་བུ་མིང་གིས་དབང་བསྐུར་ཏེ། ། རིགས་ལྔའི་བདག་ཉིད་ཡེ་ཤེས་ལྔ། ། བརྟུལ་ཞུགས་ལུང་བསྟན་རྗེས་གནང་སྦྱིན། ། དབུགས་དབྱུང་རྡོ་རྗེ་སློབ་དཔོན་བསྒྲུབ། ། གསང་བ་ཤེས་རབ་ཡེ་ཤེས་དང་། ། བཞི་པ་བརྗོད་མེད་དབང་བསྐུར་བ། ། གསང་བ་མཆོག་གི་དཀྱིལ་འཁོར་དུ། ། མཆོག་ཏུ་རབ་ཞུགས་མཐོང་བས་ན། ། དེང་ཁྱོད་སྡིག་པ་མ་ལུས་ལས། ། རྣམ་ གྲོལ་རིགས་སུ་སྐྱེས་པས་ན། ། སངས་རྒྱས་ཀུན་དང་མཉམ་གསུངས་པའི། ། རྗེས་སུ་གནང་བས་དབུགས་ཕྱིན་འགྱུར། ། དངོས་གྲུབ་རྒྱུ་ཡི་དམ་ཚིག་ནི། ། བུ་ཡིས་རྟག་ཏུ་བསྲུང་བར་གྱིས། ། སློབ་མས་བླ་མ་ལ་བཏུད་ནས། ། གཙོ་བོས་ཇི་ལྟར་བཀའ་སྩལ་ པ། །

དེ་ལྟར་བདག་གིས་བསྒྲུབ་པར་བགྱི། ། བཅོམ་ལྡན་འདས་ཀྱིས་བཤད་པ་ལྟར། ། རྒྱན་དང་ན་བཟའ་རིན་ཆེན་དང་། ། རྒྱལ་སྲིད་བུ་དང་ཆུང་མ་དང་། ། རང་གི་ལུས་ཀྱང་བླ་མ་ལ། ། བསྙེན་བཀུར་ཚིམ་པ་མེད་པར་བྱ། ། དེང་དུ་བདག་ཚེ་འབྲས་བུ་ཡོད། ། བདག་ནི་གསོན་པ་འབྲས་བུ་ཆེ། ། དེ་རིང་སངས་རྒྱས་རིགས་སུ་སྐྱེས། ། སངས་རྒྱས་སྲས་སུ་བདག་གྱུར་པས། ། སེམས་ཅན་དོན་ནི་མཉམ་མེད་བྱ། ། ཞི་བའི་སྦྱིན་སྲེག་དངོས་གྲུབ་གྲོགས། ། ཚོགས་ཀྱི་འཁོར་ལོ་དགེ་འདུན་མཆོད། ། ནད་པའམ་མགོན་མེད་ ཕོངས་པ་ཀུན། ། ཁ་ཟས་ཀྱིས་ནི་ཚིམ་པར་བྱ། ། ཞིང་སྐྱོང་གཏོར་མས་མཉེས་བྱས་ལ། ། རང་འདོད་འབྲས་བུ་གསོལ་བ་གདབ། ། རྗེས་སུ་དམ་ཚིག་སྤྱོད་པ་དང་། ། སྐྱེད་པ་ལ་སོགས་རྒྱུན་མི་ཆད། ། རྣལ་འབྱོར་པས་ནི་བསམ་པར་བྱ། ། འདི་ནི་རིགས་མཆོག་ དབང་བསྐུར་བླ་ན་མེད། ། མཛེས་མ་ཁྱོད་ལ་སྐལ་ལྡན་བསྒྲུབ་ཕྱིར་བསྟན། ། གཞན་དུ་རིགས་མེད་དུག་ལ་དེ་ཡིས་སླར་ཞིང་གནོད། ། དེ་ཕྱིར་འདི་ནི་དམ་ཚིག་རྡོ་རྗེའི་བཀོད་པ་ཡིན། ། བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་སློབ་མ་ དབང་བསྐུར་བའི་ལེའུ་སྟེ་བཅུ་གཅིག་པའོ། ། ། །

དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་འཁོར་ཀླུ་སྒྲུབ་པའི་ཐབས་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ། མཛེས་མ་ཁྱོད་ཀྱིས་ཞུས་པ་ལེགས། ། ཟག་མེད་བདེ་ བའི་རྒྱུ་འབྱུང་མ། ། བདག་མེད་ཤེས་རབ་མ་ཡི་མཆོག ། ཁྱོད་ལ་བཤད་ཀྱིས་ལེགས་པར་ཉོན། ། གདུལ་བྱའི་རིགས་སུ་སྐྱེས་པ་ཡི། ། གདུག་པའི་ཀླུ་ཆེན་རྣམ་པ་བརྒྱད། ། རིགས་བསྡུས་ཆུ་བདག་བ་རུ་ཎ། ། དམ་ཚིག་ལ་གནས་སོག་མ་མེད། ། འདི་དག་བསྒྲུབ་ པར་འདོད་པས་ནི། ། མཛེས་པའི་དཀྱིལ་འཁོར་རྣམ་ལྔས་བྱུག ། པདྨ་ལྷ་སྣམ་སྒོ་དང་བཅས། ། སྒོ་རྒྱན་ལྟོས་འགྲོས་རབ་ཏུ་མཛེས། ། ལྟེ་བར་རྡོ་རྗེ་འཛིན་པ་བསམ། ། མདུན་དུ་ལས་ཀྱི་བཀའ་ཉན་བསྐྱེད། ། པདྨ་བརྒྱད་ལ་ཀླུ་ཆེན་བརྒྱད། ། གདེངས་ཀ་བདུན་ལྡན་ཐལ་ སྦྱར་བསམ། ། ལྷ་རྣམས་རིགས་བཞིའི་ས་བདག་སྟེ། ། སྒོ་དང་གྲུ་ཆད་རིགས་ཀྱི་རིམ། ། མཆོད་རྫས་ཀླུ་ཡི་རྩི་སྨན་བསམ། ། དེ་རྗེས་རྡོ་རྗེ་འཛིན་བསམས་ལ། ། ཀླུ་ཆེན་གནས་ནས་སྤྱན་དྲངས་ཏེ། ། ཨེ་ཧྱེ་ཧི་ནཱ་ག་རཱ་ཛས་པ་རི་བཱ་ར་ས་མ་ཡ་ཛཿཛཿ། རང་རང་སྟན་ལ་ བཞུགས་པར་བྱ། ། པདྨའི་ལྟེ་བར་ཆུ་བདག་དང་། ། དམ་ཚིག་སོག་མེད་དཀར་དང་སེར། །

ཐལ་སྦྱར་སྦྲུལ་གྱི་ཞབས་སུ་འཁྱིལ། ། གཙོ་བོ་རྡོ་རྗེ་འཆང་ལ་འདུད། ། ཤར་ཕྱོགས་མཐའ་ཡས་སྔོན་པོ་སྟེ། ། ལྷོ་ཕྱོགས་ནོར་རྒྱས་སེར་པོ་ཆེ། ། ནུབ་ཕྱོགས་འཇོག་པོ་ ཁ་དོག་དམར། ། བྱང་ཕྱོགས་སྟོབས་རྒྱུ་ནག་པོ་སྟེ། ། ཤར་ལྷོར་པདྨ་དུང་དང་འདྲ། ། ལྷོ་ནུབ་པད་ཆེན་སེར་བ་སྟེ། ། ནུབ་བྱང་དུང་སྐྱོང་བཙོད་དང་འདྲ། ། བྱང་ཤར་རིགས་ལྡན་དཱུར་བའི་མདོག ། མཇུག་མ་འཁྱིལ་བས་གཙོ་ལ་འདུད། ། སྣ་ཚོགས་གཟུགས་ནི་རིགས་བཞི་ དང་། ། ས་བདག་སྣ་ཚོགས་གཟུགས་ཀྱིས་བསྐོར། ། དེ་དག་སྔགས་ཀྱི་རིམ་པ་ནི། ། ཨོཾ་བཛྲ་ཙཎྜ་མ་ཧཱ་རོ་ཥ་ཎ་བཛྲ་པཱ་ཎི་ཧྲྀ་ད་ཡཾ། ནཱ་ག་ཡ་ས་མཱ་ཏི་ཀྲཱ་མ་ཐ་ཨུད་སཱ་ད་ནྃ་བྷ་བི་ཥྱ་ཏི་སྭཱ་ཧཱ། རྡོ་རྗེ་འཆང་གིས་ཀླུ་དམ་ཚིག་ལ་གཞག་པའོ། ། ཨོཾ་བ་རུ་ཎཱ་ཡ་ཧཱུྃ་ཕུཿསྭཱ་ཧཱ། ཨོཾ་སྥུ་ ཊ་སྥུ་ཊ་མ་ཧཱ་ནཱ་ག་རཱ་ཛ་ཀྲོ་དྷ་ཧཱུྃ། སིདྡྷི་སིདྡྷི་སྥོ་ཊ་ཡ་ཧཱུྃ་ཕུཿསྭཱ་ཧཱ། ཨོཾ་ཨ་ནན་ཏ་ཧཱུྃ་ཕུཿསྭཱ་ཧཱ། ། ཨོཾ་བཱ་སུ་ཀི་ཧཱུྃ་ཕུཿསྭཱ་ཧཱ། ཨོཾ་ཏཀྵ་ཀ་ཧཱུྃ་ཕུཿསྭཱ་ཧཱ། ཨོཾ་ཀ་ར་ཀོ་ཊ་ཧཱུྃ་ཕུཿསྭཱ་ཧཱ། ཨོཾ་པདྨ་ཧཱུྃ་ཕུཿསྭཱ་ཧཱ། ཨོཾ་མ་ཧཱ་པདྨ་ཧཱུྃ་ཕུཿསྭཱ་ཧཱ། ཨོཾ་ཤཾ་ཁ་པཱ་ལ་ཧཱུྃ་ཕུཿསྭཱ་ཧཱ།

ཨོཾ་ཀུ་ལི་ཀ་ཧཱུྃ་ཕུཿསྭཱ་ཧཱ། འདི་དག་ཀླུའི་རྒྱལ་པོ་རྣམས་ཀྱི་སྔགས་སོ། ། རིམ་པས་མཆོད་ཅིང་གསོ་བ་བྱ། ། མཛེས་པའི་རྒྱ་མཚོ་གཏོར་མ་ཡིས། ། ཀླུ་རྣམས་ཚིམ་པས་གདུག་སེམས་ཞི། ། དེ་རྗེས་བསྟོད་པ་བརྗོད་པར་བྱ། ། ཧཱུྃ་ཆུ་བདག་ཆེན་པོ་སྤྲུལ་པའི་དམ་ཚིག་ཅན། ། མཐའ་ཡས་ ནོར་རྒྱས་ལ་སོགས་ཀླུ་དབང་རྣམས། ། རྒྱ་མཚོ་ཆུ་གཏེར་ཟབ་པའི་མཇིང་ཆེན་གནས། ། རིན་ཆེན་སྣ་ཚོགས་ཡིད་འོང་སྤྲས་པ་ཡི། ། གཞལ་ཡས་འབྱོར་པ་ཕུན་སུམ་གནས་ན་བཞུགས། ། སྦྲུལ་མགོའི་གདེངས་ཀ་རབ་འབར་རིན་ཆེན་གསལ། ། ཡིད་འོང་ནོར་བུ་འདོད་ པ་ཀུན་སྒྲུབ་པ། ། རང་གཞན་ཕུན་ཚོགས་དོན་རྣམས་སྟེར་བའི་དཔལ། ། འོད་འབར་ས་འོག་མུན་པ་མ་ལུས་སེལ། ། དུ་མའི་བསྐལ་པར་ཡོན་ཏན་སྦྱངས་པ་ཡིས། ། ཀླུ་རྒྱལ་འབྱོར་པ་མཆོག་ལ་མངའ་བརྙེས་པ། ། བསམ་གྱིས་མི་ཁྱབ་རྫུ་འཕྲུལ་མཆོག་བརྙེས་པའི། ། ཡོན་ཏན་བསམ་གྱིས་མི་ཁྱབ་ཁྱོད་ལ་བསྟོད། ། སངས་རྒྱས་བཀའ་ཐོབ་དད་པའི་སྟོབས་འཕེལ་བ། ། སངས་རྒྱས་སར་གནས་སྒྲུབ་ལ་ནན་ཏན་བྱེད། ། ཐབས་དང་ཤེས་རབ་འབྲེལ་བས་གཞན་དོན་མཛད། ། བདག་གཞན་དོན་སྒྲུབ་ཁྱོད་ལ་ཕྱག་འཚལ་ལོ། ། བདེ་གཤེགས་ སྤྱན་སྔར་ཁས་བླངས་དམ་བཅས་ཏེ། །

བསྟན་པ་བསྲུང་ཞིང་འགྲོ་རྣམས་བསྐྱང་བའི་ཕྱིར། ། ཁས་བླངས་མནའ་ཕུལ་དམ་ཚིག་དྲན་གྱིས་ལ། ། ཕྲིན་ལས་དོན་གྱིས་བདག་གཞན་དོན་གྲུབ་མཛོད། ། གཞན་ཡང་འཇིག་རྟེན་པ་རྣམས་ལ། ། ཨོཾ་མཐའ་ཡས་དང་ནི་འཇོག་པོ་ དང་། ། སྟོབས་ཀྱི་རྒྱུ་དང་རིགས་ལྡན་དང་། ། ནོར་རྒྱས་བུ་དང་དུང་སྐྱོང་དང་། ། པདྨ་དང་ནི་ཆུ་ལྷ་དང་། ། རྒྱ་མཚོ་རྒྱ་མཚོ་ཆེན་པོ་དང་། ། དཔལ་གྱི་འོད་དང་འོད་པོ་ཆེ། ། གཟུགས་ཆེ་ལྟོ་འཕྱེ་སྦྲུལ་ཆེན་པོ། ། ཀླུ་ཆེན་འཁོར་དང་བཅས་པ་ལ། ། མཐུན་པའི་དམ་རྫས་ཡིད་ འོང་བ། ། དཀར་གསུམ་མངར་གསུམ་གསོ་བའི་སྨན། ། རིན་ཆེན་དར་དང་ཟ་འོག་དང་། ། དཔག་བསམ་ཤིང་དང་འདོད་འཇོའི་བ། ། སྣ་ཚོགས་ཁྱེད་ལ་ཕུལ་བ་ཡིས། ། ཀླུ་ཡི་ནད་རྣམས་མེད་པར་མཛོད། ། ཕྱིས་ཀྱང་མི་ཕྱེད་དམ་ཆོས་ལ། ། སོ་སོའི་གནས་སུ་འགྲོ་བར་ གྱིས། ། འདི་ནི་རྡོ་རྗེ་འཆང་གི་བཀའ། ། འདི་ལས་འདས་ན་ཀླུ་རྒྱལ་རྣམས། ། སྙིང་འཚིག་མགོ་བོ་འགས་འགྱུར་ཏེ། ། ལུས་ལ་བསྐལ་པའི་མེ་འབར་ནས། ། སྡུག་བསྔལ་གྱུར་ན་མ་ལེགས་པས། ། དམ་ལས་འདའ་བར་མ་བྱེད་ཅིག ། ནཱ་ག་རཱ་ཛ་ས་མ་ཡ་ཨ་བྷི་ཥིཉྩ་ བཛྲ་ཙཎྜ་མ་ཧཱ་རོ་ཥ་ཎ་བཛྲ་པཱ་ཎི་ཧཱུྃ་ཕཊ།

ཀླུ་རྣམས་དམ་ཚིག་སྒྲུབ་པའོ། ། དེ་བཞིན་བྱས་ན་ཀླུ་ནད་རྣམས། ། སྐད་ཅིག་ཉིད་ལ་བྱང་འགྱུར་ཏེ། ། སྒྲུབ་པོ་བདེ་བར་འགྱུར་བ་ཡིན། ། དེ་བས་འདི་ལ་བརྩོན་པར་གྱིས། ། མཛེས་མ་ཁྱོད་ཀྱིས་ཞུས་པ་བཞིན། ། གཏན་ལ་ ཕབ་པས་རབ་ཏུ་བཤད། ། བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་ཀླུ་སྒྲུབ་པའི་ལེའུ་སྟེ་བཅུ་གཉིས་པའོ། ། ། ། དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་འཁོར་ཀླུ་གདུག་པ་ཅན་རྣམས་ཀྱི་ ནད་འབྱུང་བའི་རྟགས་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ། མཛེས་མ་ཁྱོད་ཀྱིས་ཞུས་པ་ལེགས། ། ཟག་མེད་བདེ་བའི་རྒྱུ་འབྱུང་མ། ། བདག་མེད་ཤེས་རབ་མ་ཡི་མཆོག ། ཁྱོད་ལ་བཤད་ཀྱིས་ལེགས་པར་ཉོན། ། ཀླུ་ལ་རིགས་དྲུག་ལ་སོགས་ པ། ། སྣ་ཚོགས་རིགས་སུ་ཡོད་གྱུར་ཀྱང་། ། འབྱུང་བ་ལྔ་ཡི་རང་བཞིན་ཏེ། ། ནོར་རྒྱས་དུང་སྐྱོང་རྒྱལ་རིགས་ཡིན་ཏེ་མཐོང་བའི་དུག ། སེར་པོ་ས་ལ་དབང་སྟེ་ལྕི་འཐིབས་ལུས་པོ་སྦོ། ཤ་བབས་ར་བ་བཞི་ལ་ཁྱད་པར་ན་བ་ཡིན། ། {བཅྭ་,བཅོ་}ལྔ་ཉིན་གུང་རྒྱུ་བའི་དུས་ལ་ན། ། ནད་ཀྱི་ གནས་ནི་སྤྱི་བོར་ངེས་པར་འབབ། །

རླུང་རྩ་བབས་ལ་ཤ་རུས་བར་དུ་ན། ། སྐྲ་འབྱི་གླང་ཐབས་བྱས་ནས་ན་སྟེ་རྣ་བ་དང་། ། གློ་བར་འབྲེལ་པས་ཤ་རོ་གློ་ལུ་འབྱུང་བ་ཡིན། ། དགའ་བོ་རིགས་ལྡན་བྲམ་ཟེ་ཡིན་ཏེ་བསམས་པའི་དུག ། དམར་པོ་མེ་ལ་དབང་བ་ཡིན་ཏེ་ཚ་ཞིང་གདུང་། ། ལུས་དམར་སྐྱི་ཆུང་ཐང་ལ་མིག་རྩ་ལུས་པོ་སྐམ། ། འབྲིང་པོ་བབས་ས་ཉི་ནུབ་དགོངས་མོའི་དུས་སུ་ན། ། གནམ་སྟོང་{བཅྭ་,བཅོ་}ལྔ་རྒྱུ་བའི་དུས་ཏེ་དེ་ལ་ན། ། སྙིང་གར་བབས་པ་སྙིང་མི་དགའ་ཞིང་དྲན་པ་ཉམས། ། མཇུག་ཏུ་མགོ་དང་ལུས་ལ་བབས་ཏེ་ན་ཚ་ཆེ། ། ཤ་རོ་སྙིང་ལ་འོང་བས་ ལྕེ་ཡིས་རོ་མི་ཚོར། ། པདྨ་འཇོག་པོ་རྗེ་རིགས་ཡིན་ཏེ་ཁ་རླངས་དུག ། དཀར་པོ་ཆུ་ལ་དབང་བས་གྲང་ཞིང་བསིལ་བར་ན། ། ལུས་མདོག་དཀར་ལ་པགས་པའི་སྤྲིས་མ་འཆགས། ། ཐ་{ཆུངས་,ཆུང་}བབས་པ་ཡིན་ཏེ་ཚེས་བརྒྱད་{བཅྭ་,བཅོ་}བརྒྱད་ན། ། སྔ་དྲོ་ཐོ་རངས་ མི་བདེ་སྐེ་དང་དཔུང་པ་གཡས། ། བྲང་ན་ཐ་མ་མཆིན་པར་བབས་པའི་ས་ཡིན་ནོ། ། ཕོ་བས་ཟས་མི་འཇུ་ཞིང་མིག་གིས་གཟུགས་མི་འཛིན། ། ཤ་བྲུལ་ཚོར་བ་མེད་དེ་ཅུང་ཟད་ཤ་ལྤགས་དམར། ། པད་ཆེན་སྟོབས་རྒྱུ་དམངས་རིགས་ཡིན་ཏེ་རེག་པའི་དུག ། ནག་པོ་རླུང་ལ་ དབང་པས་ཡང་ཞིང་གཡོ། །

ལུས་འདར་སེམས་རྒོད་ཤ་འཕར་ཕུ་ཤུས་འདེབས། ། ཡན་ལག་ཚིགས་བཞི་ན་ཞིང་ཕོལ་དང་བད་ཀན་སྐྱེ། ། སྒྲེགས་དང་རོ་སྟོད་ན་ཞིང་སྣ་ཁྲག་དག་ཀྱང་འབྱུང་། ། འབྱང་ཞིང་ལུས་ངལ་དགོངས་དང་སྲོད་ལ་ན། ། ཐ་{ཆུངས་,ཆུང་}ཞག་ལ་འབས་ཏེ་ཚེས་ གསུམ་བཅུ་གསུམ་ན། ། འདི་ནི་འགོང་རིགས་རྩུབ་པས་སྨྱོ་འབོག་བཙན་ཐབས་གསོད། ། ཐ་མ་མཁལ་མར་འབབ་སྟེ་རྣ་བས་སྒྲ་མི་ཐོས། ། ཁུ་ཆུ་ཉམས་པས་ཆུ་སྲི་སོར་མོ་ཕྲ། ། ཆུ་ལྷ་དམ་ཚིག་ནམ་མཁའ་ཡིན་པས་ཀུན་ལ་ཁྱབ། ། གོང་མ་ཅི་རིགས་འབྱུང་ཞིང་དུས་མེད་ཤེས་ པ་ཞུམ། ། ལུས་ཀྱི་ཤེད་ཉམས་བྲལ་ཏེ་སྣ་ཚོགས་སྟོན་པ་སྟེ། ། འདི་ནི་བཅོས་པར་དཀའ་སྟེ་གཏན་ལ་ཕེབས་པར་བྱ། ། ཁྱད་པར་མཆེར་བ་ན་ཞིང་གདོང་ལ་སྨེ་བ་འབྱུང་། ། ལུས་ལ་ཤིག་མང་ཀོ་དྲི་རྭ་གཞོབ་མནམ་པ་དང་། ། ཐུར་སེལ་རླུང་ལ་རུལ་བའི་དྲི་མ་བྲོ་གྱུར་ལ། ། འདི་ནི་མཆེར་བར་འབབ་སྟེ་ཆུ་ལ་ཁྲག་ཀྱང་འབྱུང་། ། སོ་སོའི་རྟགས་སུ་མཁས་པས་ཤེས་པར་གྱིས། ། སྤྱིར་ནི་ལྔ་པོ་གང་ཞུགས་ཀྱང་། ། རིམ་པས་འདི་ལྟར་འབྱུང་བར་འགྱུར། ། མེ་དང་གྲོག་པོ་ཕུགས་རྡུགས་དང་། ། རི་ཕུག་དོག་པའི་སྒོ་དང་དོང་། ། ལྷ་ཁང་འདམ་ རྫབ་མི་སྡུག་གཟུགས། །

དུད་འགྲོའི་ཚོགས་དང་མཚོ་རི་གཟར། ། སྙིང་མི་དགའ་ཞིང་འཚིག་པ་ནི། ། དང་པོ་འབྱུང་བར་ཤེས་པར་བྱ། ། གླུ་ལེན་ནུབ་མོ་ན་དང་ཤེས་པ་ལྕི། ། ཡན་ལག་མི་བདེ་ཤུ་བ་གཡན་པ་དང་། ། བས་ལྡགས་འབྲུམ་ཆུང་དམར་སིབ་འོང་། ། འཕྲུག་ ཅིང་ཟ་འཕྲུག་ཤ་མདོག་ཉམས། ། མེ་རིས་ཆུ་གྲང་བླུགས་ལྟར་གྲང་། ། གྲང་སིབ་ཚ་ཐིག་ཤ་བཀྲ་ཆེ་ཆུང་བྱེད། ། ཤ་འཕྲིག་བེམ་དང་སྦྲིད་ཅིང་འཁོལ། ། མིག་ཟླུམ་ཚ་ཞིང་སྨིན་མ་བྱི། ། ལག་སོར་སེན་མོ་ཉམས་པས་ཕྲ། ། ལུས་ལ་དྲི་ང་ཆུ་བུར་དང་། ། ཉ་སྒངས་གནག་ ཆུ་རུལ་དྲི་མནམ། ། སྟོད་གཟེར་སྨད་དུ་འཁྲུ་བར་བྱེད། ། ཕྱི་ཡི་ཤ་སྐམས་མདོག་ཉམས་དྲི་མ་བྲལ། ། བུག་པའི་སྒོ་ཡོ་བདུད་རྩི་དུས་མེད་པ། ། ཡང་ཅིག་མདོར་བསྡུས་བཤད་པ་ནི། ། དབང་པོ་གསལ་བའི་འབྲས་བུ་ནི། ། མཆིན་པའི་སྒོ་ཡིན་མིག་ལ་བརྟག ། རྒྱལ་མོ་འཁོར་ ལོ་གཡང་ར་ཡིན། ། གནས་པ་རུས་པའི་འབྲས་བུ་ནི། ། མཛེས་པ་སོ་ཡི་མཁར་ཡིན་པས། ། ཁ་དོག་རྐང་བུ་ནུས་པ་བལྟ། ། ནུས་པ་ཆུ་བའི་འབྲས་བུ་ནི། ། ཟངས་མདོག་སེན་མོའི་ཚོགས་ཡིན་པས། ། སྐྱེ་ལུགས་ཁ་དོག་རྩ་བ་བརྟག ། མདོངས་དང་ཤ་ཡི་འབྲས་བུ་ ནི། ། ཁྱབ་པ་དྲེག་པ་ཡིན་པས་ན། །

ཆགས་ལུགས་ཁ་དོག་འགྱུར་བ་བལྟ། ། དྲོད་བརྟེན་ཁྲག་གི་འབྲས་བུ་ནི། ། བུད་མེད་གསང་སྒོའི་ཆུ་ཡིན་པས། ། ཁ་དོག་ཀུ་ཡ་གཟུགས་ལ་བརྟག ། རྐང་མར་བཅུད་ཀྱི་འབྲས་བུ་ནི། ། རྩ་བ་གནས་ལུགས་སྐྱེ་ས་བརྟག ། དེ་རྣམས་ ཐམས་ཅད་རྟགས་ལྡན་ན། ། ངས་ཀྱང་གསོ་བར་ག་ལ་ནུས། ། གསུམ་བཞི་ལྔ་ལ་སོགས་པ་ཡི། ། རིམ་པ་རྣམས་དང་ལྡན་པ་ན། ། སྔགས་དང་སྨན་གྱིས་གསོ་བར་བྱ། ། ཕྱི་ནང་འབྲེལ་བའི་བབས་ས་ཡིས། ། ལེགས་པར་བརྟགས་ཏེ་གསོ་བར་བྱ། ། བཅོམ་ལྡན་ འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་ཀླུའི་ནད་ཞུགས་པ་བརྟག་པའི་ལེའུ་སྟེ་བཅུ་གསུམ་པའོ། ། ། ། དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་ཀླུའི་ནད་གསོ་བའི་ཆོ་ག་ཇི་ལྟ་བུ་ལགས། བཅོམ་ལྡན་འདས་ ཀྱིས་བཀའ་སྩལ་པ། ། མཛེས་མ་ཁྱོད་ཀྱིས་ཞུས་པ་ལེགས། ། ཟག་མེད་བདེ་བའི་རྒྱུ་འབྱུང་མ། ། བདག་མེད་ཤེས་རབ་མ་ཡི་མཆོག ། ཁྱོད་ལ་བཤད་ཀྱིས་ལེགས་པར་ཉོན། ། བྱོལ་སོང་ཀླུ་ཡིས་ཟིན་པ་ལ། ། འཚོ་དང་མི་འཚོ་གཉིས་ཡིན་ཏེ། ། ངེས་པའི་རྟགས་ཆེན་ དྲུག་ཚང་ན། ། དེ་ལ་མཁས་པས་ཅི་བྱར་ཡོད། ། རྣམ་སྨིན་ལས་ལས་བྱུང་བ་ཡིན། །

གཞན་རྣམས་གསོ་བར་འདོད་པ་ལ། ། དཀའ་དང་སླ་བ་གཉིས་ཡིན་ཏེ། ། དང་པོ་སྔགས་ཀྱི་རིམ་པ་ཡིན། ། གཉིས་པ་རྫས་དང་འབྲེལ་བ་ཡིན། ། དང་པོ་སྔགས་ ཀྱི་སྦྱོར་བ་ནི། ། དབང་བསྐུར་ཚོགས་བསགས་རྒྱུད་སྦྱངས་ལ། ། རིམ་པ་གསུམ་གྱིས་བསྙེན་པར་བྱ། ། ཁ་ཅིག་དེ་ཙམ་གྱིས་ཀྱང་ཞི། ། གལ་ཏེ་ནུས་པ་ཆེ་བ་ན། ། གསང་པ་དྲག་པོའི་ཤམ་བུ་གདགས། ། ཁ་ཅིག་དེ་ཡིས་འཚོ་བ་ཡིན། ། གལ་ཏེ་གནོད་ཚབས་ཆེ་བ་ན། ། ཀླུ་ ཡི་རང་གཤེད་བཟླས་པ་ཙམ། ། ནམ་མཁའི་ཀླུ་ཡིས་སྙིང་ནས་གཟིར། ། རིག་པ་གཉིས་པ་གཤམ་དུ་སྦྲེལ། ། རྡོ་རྗེ་ལྟེ་བར་འཁོར་ལོ་བྲི། ། དེ་ལ་དམིགས་ཏེ་བསྒྲུབ་པར་བྱ། ། དུག་རིགས་གསལ་བར་གྱུར་ན་ནི། ། ས་དུག་ངོས་ཟིན་རྡོ་རྗེའི་ནང་། ། དགའ་བོ་རིགས་ལྡན་མེ་ ཡི་སྔགས། ། བྲམ་ཟེའི་འཁྲུལ་འཁོར་ཤིས་པ་ཡིན། ། མེ་ལ་ཆུ་ཡི་འཁྲུལ་འཁོར་ཏེ། ། དེ་ཡི་སྔགས་ཀྱིས་གསད་པར་བྱ། ། བང་ཆེན་སྟོབས་རྒྱུ་རླུང་ཡིན་པས། ། ས་ཡི་འཁྲུལ་འཁོར་ལྟེ་བར་བཅས། ། པདྨ་འཇོག་པོ་ཆུ་ཡིན་པས། ། རླུང་གི་འཁོར་ལོས་གསད་པར་ བྱ། ། རང་རང་ཁ་དོག་གཤེད་དུ་སྦྱར། ། གཞི་སྙིང་སྔགས་རྣམས་དྲིལ་ལ་བཟླས། ། གཉེན་པོ་མི་མཐུན་རྫས་དང་སྦྱར། །

གཉེན་པོ་གང་ཡིན་ལྷ་ཡི་གཤེད། ། མན་ངག་བཞིན་དུ་ཤེས་པར་བྱ། ། འཁྲུལ་འཁོར་ཚང་ནས་མ་བདེ་ན། ། རྒྱལ་པོའི་སྡོང་ཟླ་དབྱེ་བར་བྱ། ། དུས་ཚོད་ཞག་གྲངས་རིམ་པ་ནི། ། རྟགས་དང་སྦྱར་ལ་ཤེས་པར་བྱ། ། རྟགས་རྗེས་རྗེས་སུ་ལོག་པ་ན། ། སྦྱིན་སྲེག་ཅི་རིགས་མཁས་པས་བྱ། ། ཕྱི་རྗེས་དྲག་པོས་བཅད་པ་དང་། ། ལྷ་དང་རྫས་ཀྱི་སྔགས་ཀྱིས་བཅད། ། མནན་པས་ལས་མཐའ་བརྟུལ་བར་བྱ། ། ཞི་བ་དྲག་པོའི་རིམ་པ་ནི། ། མཁས་པས་བརྟགས་ལ་བརྟེན་པར་བྱ། ། བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་ཀླུའི་ནད་བསལ་བའི་ལེའུ་སྟེ་བཅུ་བཞི་པའོ། ། ། ། དཔའ་མོ་རྡོ་རྗེ་བདེ་མས་གསོལ་པ། རྡོ་རྗེ་འཆང་ གི་གཏོར་མ་བྱ་བའི་རིམ་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ། མཛེས་མ་ཁྱོད་ཀྱིས་ཞུས་པ་ལེགས། ། ཟག་མེད་བདེ་བའི་རྒྱུ་འབྱུང་མ། ། བདག་མེད་ཤེས་རབ་མ་ཡི་མཆོག ། ཁྱོད་ལ་བཤད་ཀྱིས་ལེགས་པར་ཉོན། ། དཀྱིལ་འཁོར་འདྲི་ དང་སྦྱིན་སྲེག་དང་། ། བཟླས་པ་ཐུན་མཚམས་རབ་གནས་དང་། ། དབང་བསྐུར་བསྐྲད་ཅིང་གསད་པ་དང་། ། འབྱུང་པོ་ཁྱུང་དང་གནོད་སྦྱིན་དང་། ། ཀླུ་དང་གནས་སྐྱོང་མཆོད་པ་ནི། །

གཏོར་མ་མེད་པར་གང་སྤྱད་པ། ། ལས་དེ་འབྲས་བུ་མེད་པའམ། ། བར་ཆད་ ཉེ་བར་སྐྱེ་འགྱུར་བས། ། གཏོར་མའི་ཆོ་ག་བསྟན་པར་བྱ། ། ལྷ་ཡི་རྣལ་འབྱོར་ལྡན་པ་ཡིས། ། ཕུན་སུམ་ཚོགས་པའི་འབྱོར་པ་བསག ། གཏོར་མའི་འོག་ཏུ་རླུང་ལྷ་ཡི། ། ས་བོན་ལས་སྐྱེས་ཁ་དོག་སྔོ། ། གཡོ་བའི་རླུང་ཡབ་དང་བཅས་པ། ། དེ་སྟེངས་རྒོད་མའི་ ཁ་བསམས་ཏེ། ། དམར་པོ་རླུང་ལས་སྐྱེས་པ་བསམ། ། གྲུ་གསུམ་ཧཱུྃ་ལས་རྡོ་རྗེ་གསུམ། ། སྐུ་གསུང་ཐུགས་ཀྱིས་བརྟན་པོར་བྱ། ། དེ་སྟེང་ཨ་ལས་པདྨ་ཆེ། ། ཡངས་ལ་དཀར་ཞིང་ཅུང་ཟད་དམར། ། ཆོས་དབྱིངས་སྣོད་ཀྱི་གཞལ་ཡས་ཡིན། ། དེ་ནས་སྦྱང་བའི་ ས་བོན་ལས། ། བྲུྃ་ཨྃ་ཛྲྃ་བྃ་ཧཱུྃ་བསམས་ཏེ། ། སླར་ཡང་ཤ་ལྔ་སྦྱངས་པ་ལས། ། མཱྃ་ལཱྃ་པཱྃ་ཏཱྃ་བཱྃ་བསམས་ཏེ། ། ཡུམ་ལྔའི་ཡེ་ཤེས་རྣམ་པར་དག ། བདུད་རྩི་ཡེ་ཤེས་རྣམ་དག་འདི། ། སྦྱང་དང་སྤར་རྟོགས་སྦྱོར་བ་ཡིས། ། ཡི་གེ་གསུམ་གྱི་སྒྲ་ལྡན་པ། ། བདེ་བའི་རོ་ཆེར་ ཉི་མར་གསལ། ། འཆར་བའི་ཁ་དོག་འདྲ་བར་འགྱུར། ། རྡོ་རྗེ་ལས་བྱུང་དངུལ་ཆུའི་མདོག ། གཉིས་མེད་ཐབས་དང་ཤེས་རབ་ཡིན། ། ས་བོན་ལས་བྱུང་པདྨའི་གདན། ། ཡངས་པར་རྡོ་རྗེ་འཛིན་པ་དང་། །

ཕྱོགས་སྐྱོང་ལ་སོགས་བཀུག་ལ་བསྟིམ། ། མཛུབ་མདུད་ གུང་མོ་རྩེ་མོ་སྦྱོར། ། མཐེ་བོང་རྡོ་རྗེ་བརྟན་པར་གནས། ། རང་འདོད་དངོས་གྲུབ་སར་བཞག་ལ། ། ཧཱུྃ་སྒྲ་ལྡན་པས་སྔགས་འདིས་སྦྱིན། ཨོཾ་ཨིནྡ་ཛ་མ་ཛ་ལ། ཛཀླ་བྷུ་ཏ་བཧྣི། བ་ཨུ་རཀྑ། ཅནྡ་སུཛྫ། མ་ད་པ་པྤ། ཏ་ལ་བ་ཏཱ་ལེ། ཨཊྛ་སབྤ་སྭཱ་ཧཱ། ཨི་དཾ་བ་ ལི་བྷུྃ་ཛི་གྷ་ཕུལླ། དྷཱུ་པ། མཱྃ་ས། པྃ་ག ། ཨ་མྦྷ། ཀཛྫ། སཔྤ་སཱ་ཧ། ཁཎ་ཏི་ཁུ་ཎི་ཕེ་ཌ་ག་ད་སྭཱ་ཧཱ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨཱདྱཱ་ནུདྤནྣ་ཏྭཱད་ཨོཾ་ཨཱཿཧཱུྃ་ཕཊ་སྭཱ་ཧཱ། འཁོར་རྣམས་རྟོགས་པར་བྱ་བའོ། ། ལྷག་པར་ཁྱུང་ཆེན་མཆོད་པ་ནི། ། ཉ་ཤ་བྷྲེང་གི་ལ་དུ་དང་། ། འོ་མ་སྦྲུལ་གྱི་ཤ་ཡིས་མཆོད། ། གནོད་སྦྱིན་དག་ལ་ཤ་རློན་དང་། ། ཆང་ནི་མེད་དུ་མི་རུང་ངོ་། ། ར་ཁྲག་ཤིང་ཐོག་རྣམས་ཀྱིས་སོ། ། ཀླུ་ལ་དཀར་གསུམ་མངར་གསུམ་དང་། ། རྩི་སྨན་དར་ཟབ་སྣ་ཚོགས་མཆོད། ། རང་གི་རིག་པ་ཕུལ་བྱས་ ལ། ། བསྟོད་ཅིང་གསོལ་བ་གང་ཡིན་བྱ། ། ཧཱུྃ་ཁྱེད་ཀྱིས་སེམས་ཅན་དོན་ཀུན་མཛད། ། རྗེས་སུ་མཐུན་པའི་དངོས་གྲུབ་སྩོལ། ། རང་གི་གནས་སུ་གཤེགས་ནས་ཀྱང་། ། སླར་ཡང་སྤྱན་དྲངས་ཚེ་ན་སྤྱོན། །

ཨོཾ་བཛྲ་ས་མ་ཡ་མུཿཞེས་བརྗོད། ། མཆོད་སྦྱིན་འདི་ དང་མ་བྲལ་ན། ། ཞི་སོགས་གྲུབ་པ་བརྒྱད་གང་ཡིན། ། མཆོག་གི་འབྲས་བུ་ཐོབ་པར་འགྱུར། ། བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ཞེས་བྱ་བ་ལས་གཏོར་མའི་ཆོ་ག་བསྟན་པའི་ལེའུ་སྟེ་{བཅྭ་,བཅོ་}ལྔ་པའོ། ། ། ། དཔའ་ མོ་རྡོ་རྗེ་བདེ་མས་གསོལ་པ། རྡོ་རྗེ་འཆང་ལ་ཞུ་བ་གསོལ་བ་བདག་གི་སྒྲུབ་པའི་ཆོ་ག་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ། མཛེས་མ་ཁྱོད་ཀྱིས་ཞུས་པ་ལེགས། ། ཟག་མེད་བདེ་བའི་རྒྱུ་འབྱུང་མ། ། བདག་མེད་ཤེས་རབ་མ་ཡི་མཆོག ། ཁྱོད་ ལ་བཤད་ཀྱིས་ལེགས་པར་ཉོན། ། དུས་གསུམ་སངས་རྒྱས་བསྐྱེད་པའི་མ། ། རྡོ་རྗེ་བདེ་ཆེན་སྟོང་པ་ཉིད། ། ཁྱོད་ཀྱི་སྒྲུབ་པ་བཟང་པོ་ནི། ། འདས་པའི་སངས་རྒྱས་རྣམས་ཀྱིས་བཤད། ། ད་ལྟར་བྱུང་བའང་དེ་འཆད་དེ། ། མ་འོངས་རྣམས་ཀྱང་འཆད་འགྱུར་ལ། ། ང་ཡིས་ཀྱང་ནི་འདིར་བཤད་དེ། ། བྱང་ཆུབ་སེམས་ལྡན་གང་ཟག་གིས། ། རབ་དབེན་པ་ཡི་ས་ཡི་ཆར། ། མཆོད་ཅིང་བསྟན་དགའ་བསྙེན་བྱས་ལ། ། སངས་རྒྱས་རྡོ་རྗེ་ཅན་མཆོད་བྱ། ། རིམ་པས་ཚངས་པའི་གནས་བཞི་བསྒོམ།

ཨོཾ་སྭ་བྷཱ་བ་ཤུད་དྷཱཿསརྦ་དྷརྨཱཿསྭ་བྷཱ་བ་ཤུད་ བྷོ྅ཧཾ། རང་བཞིན་རྣམ་པར་དག་པ་བསྒོམ། ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧྃ། བརྗོད་མེད་ཡེ་ཤེས་དག་པར་བསྒོམ། ། བསྲུང་ཞིང་གཞལ་ཡས་ཁང་པ་དེར། ། མཛེས་པའི་པདྨ་ལ་གནས་པ། ། ཆོས་འབྱུང་རྣམ་དག་ཕོ་བྲང་དུ། ། ཉི་མ་ཟླ་བ་ རྣམ་དག་དཔལ། ། བྃ་ལས་བྱུང་བའི་ལྷ་མོ་ནི། སྐུ་མདོག་དམར་ལྗང་ཞལ་གཅིག་མ། ། ཕྱག་གཉིས་གྲི་གུག་ཐོད་པ་འཛིན། ། གར་སྟབས་རྒྱན་གྱིས་མཛེས་མ་སྟེ། ། ཐོད་པ་སྐམ་པོའི་ཕྲེང་བས་བརྒྱན། ། ཤར་དུ་མཱ་མ་ཀཱི་བསམས་ཏེ། ། སྔོན་མོ་ཞལ་གཅིག་ ཕྱག་གཉིས་མ། ། གཡས་པ་རྡོ་རྗེ་གཡོན་ཐོད་པ། ། གཡས་སུ་སངས་རྒྱས་སྤྱན་སེར་ཏེ། ། ཞལ་གཅིག་ཕྱག་གཉིས་གཡས་པ་ན། ། རིན་ཆེན་གཡོན་པས་ཐོད་པ་འཛིན། ། གཡོན་དུ་དམ་ཚིག་སྒྲོལ་མ་ལྗང་། ། གཡས་པ་ཨུཏྤལ་ཐོད་པ་འཛིན། ། རྒྱབ་ཏུ་གོས་དཀར་ དམར་སེར་ཏེ། ། པདྨ་ཐོད་པ་བསྣམས་པའི་ཕྱག ། ཀུན་ཀྱང་ཁྲོ་ཞིང་གར་སྟབས་བཞུགས། ། རུས་པ་རིན་ཆེན་རྒྱན་དང་ལྡན། ། མཆོག་སྒྲུབ་ནད་རྣམས་སྦྱང་བ་དང་། ། བསྲུང་ཞིང་འདོད་པ་ཞི་རྒྱས་དང་། ། རང་གི་སྲོག་འཛིན་ཕྲིན་ལས་དབང་། ། རྟག་ཏུ་ཡེ་ཤེས་ པ་ཡང་མཆོད། །

རིག་པ་ངེས་པར་བསྟན་པ་ནི། ། ཨོཾ་བཛྲ་སུ་ཁཱ་བུདྡྷ་སརྦ་པ་ཤྃ་ཀུ་རུ་སུ་ར་ཀ་ཧཱུྃ་ཕཊ་སྭཱ་ཧཱ། ཨོཾ་ཤང་ཀ་རེ་ཤཱནྟི་ཀ་རེ། གྷུཊྚ་གྷུཊྚ་གྷུཊྚི་ནི་གྷཱ་ཏ་ཡ། གྷཱ་ཏ་ཡ། གྷུཊྚི་ནི་སྭཱ་ཧཱ། ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷ་ལོ་ཙ་ནི་སརྦ་ཨརྠ་སཱ་དྷ་ནི་སྭཱ་ཧཱ། ཨོཾ་ཨ་ཀ་ཊེ་ བི་ཀ་ཊེ་ནི་ཀ་ཊེ་ཀ་ཊྃ་ཀ་ཊེ་ཀ་རོ་ཊྃ་བཱི་རྱཻ་སྭཱ་ཧཱ། ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་ཨཱ་ཡུ་ཥེ་སྭཱ་ཧཱ། རང་རང་ལས་དང་འབྲེལ་པ་ནི། ། འབུམ་འགྱུར་སྔགས་ཀྱིས་འགྲུབ་པར་འགྱུར། ། ལས་གཞན་དངོས་གྲུབ་མ་བསྒྲུབས་པར། ། ལྷ་མོ་ཁྱོད་ཀྱིས་བྱེད་པ་ཡིན། ། འདི་ནི་གསང་ བ་དམ་པ་སྟེ། ། ཆེས་གསང་བས་ཀྱང་མཆོག་ཡིན་ནོ། ། དེ་བས་མཛེས་མ་ཁྱོད་ལ་བཤད། ། བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་ཡུམ་བསྒྲུབ་པ་རྣམ་པར་ཕྱེ་བའི་ལེའུ་སྟེ་བཅུ་དྲུག་པའོ། ། ། ། དཔའ་མོ་ རྡོ་རྗེ་བདེ་མས་གསོལ་པ། ། རྡོ་རྗེ་འཆང་གི་ལས་སྣ་ཚོགས་པ་སྒྲུབ་པ་ཇི་ལྟ་བུ་ལགས། ། བཅོམ་ལྡན་འདས་ཀྱིས་བཀའ་སྩལ་པ། ། མཛེས་མ་ཁྱོད་ཀྱིས་ཞུས་པ་ལེགས། ། ཟག་མེད་བདེ་བའི་རྒྱུ་འབྱུང་མ། ། བདག་མེད་ཤེས་རབ་མ་ཡི་མཆོག །

ཁྱོད་ལ་བཤད་ཀྱིས་ལེགས་པར་ཉོན། ། སྒྲུབ་པོ་ཕུན་སུམ་ཚོགས་འདོད་པས། ། ང་ཉིད་ཐོག་མར་མཉེས་བྱ་སྟེ། ། འདོད་པའི་རྫས་ལ་འཁོར་ལོ་བྲི། ། དེ་ཡི་ནང་དུ་ཆུད་པ་ཡི། ། ལོངས་སྤྱོད་མིང་དང་སྤེལ་བྲིས་ནས། ། དགུག་ལ་བཅུག་ལ་སྔགས་འདི་བཟླས། ། ཨོཾ་ཙཎྜ་མ་ཧཱ་རོ་ཥ་ཎ། ཏདྱ་ཐཱ། ཨོཾ་ཙ་ལེ་པྲ་ཙ་ལེ་ལ་ལཱ་ལུ་ཏེ་ཡཱ། དེ་བ་ཀཱ་མ་ཧཱ་ཀཱ་ལ་ཨ་ན་ཚ་ར་ཡ་བི་སཱི་སྭཱ་ཧཱ། ཁྲི་བཟླས་པས་རང་ཅི་འདོད་པ་འོང་བར་འགྱུར་ཏེ། ། གོང་བུ་དགུག་པའོ། ། རང་ཉིད་རྡོ་རྗེ་འཛིན་དུ་བསམས་ལ་ཏ་ལའི་ལོ་མ་ལ་རི་རབ་ཀྱི་འཁོར་ལོ་བྱས་ཏེ། ། ཟུར་ དུ་ཧཱུྃ་དང་ཧྲཱིའི་བར་དུ་བསྒྲུབ་བྱའི་མིང་བྲིའོ། ། ལྟེ་བར་སྔགས་བྲི། རྩིབས་ལ་ཡང་སྔགས་བྲིས་ཏེ། ། རྐང་པ་གཡོན་པས་མནན་ཅིང་། ། ཨོཾ་ཙཎྜ་མ་ཧཱ་རོ་ཥ་ཎ་ཙ་མུཎྜི་དུ་མ་ཀེ་ཤི་ཧྲཱི། ཧ་ན་ཧ་ན་ཧྲི། པ་ཙ་པ་ཙ་ཧྲི། དེ་བ་དད་ཏ་ཆེ་གེ་མོ་མེ་པ་ཤི་རི་སྭཱ་ཧཱ། ཞེས་ཁྲི་བཟླས་པས་རྐང་པ་ དགུག་པའོ། ། ཨོཾ་ཙཎྜ་མ་ཧཱ་རོ་ཥ་ཎ་ག་ག་ཨ་རིག་རྐ་ཐ་ཏ་རི་སྭཱ་ཧཱ། སྔགས་འདི་བཟླས་ལ་ཁ་བཀྲུས་ལ། ཁྱུ་མཆོག་གི་ལྕི་བ་དང་། ལྡོང་རོས་བསྲེས་ལ་རྡོ་རྗེའི་གཟུགས་བྱས་ཏེ།

ལྟེ་བར་འཁྲུལ་འཁོར་བཅུག་ལ་དགྲའི་སྒོར་སྦས་ན་འཆི་བར་འགྱུར་རོ། ། བཀླགས་པས་ འགྲུབ་འགྱུར་ནུས་པ་འདི། ། རྡོ་རྗེ་འཛིན་པར་རབ་ཞུགས་ནས། ། རྫ་མཁན་ལག་པའི་འདག་པ་ལ། ། རྡོ་རྗེའི་རྣམ་པར་འཁྲུལ་འཁོར་བཅའ། ། ཨོཾ་ཙཎྜ་མ་ཧཱ་རོ་ཥ་ཎ་ཆེ་གེ་མོ་མུ་ཁ་ཏེ་ཐཱཾ་ཏི་ས་གྷ་ཚཱ་ན་ཏིང་གྷན་ད་ན་ཏིང་ལཾ་གྷཱཾ་མུ་ཏྲ་མུ་རཱི་ཥེ་ནཾ་ཆེ་གེ་མོ་བྷནྡྷཱ་མི་སྭཱ་ཧཱ། སྔགས་འདི་ ཁྲི་བཟླས་ཁང་པར་མནན། ། ངེས་པར་ཤགས་ལས་རྒྱལ་བར་འགྱུར། ། ཨོཾ་བཛྲ་ཙཎྜ་མ་ཧཱ་རོ་ཥ་ཎ་ན་མ་ནི་ཁ་བེ་རཱ་ཡ་ཅི་རི་ཙི་རི་ཀརྟ་ཏུ་བེ་ན་མུ་ཤི་ཏུན་ཏེ་བནྡྷཱ་སི་རི་ཁ་ལི་སྭཱ་ཧཱ། ། རྡོ་རྗེ་ལ་ནི་ཁྲག་གིས་བྲི། ། གང་གིས་ཕྱོགས་མཚམས་སྦས་པ་ན། ། བྱི་བ་ཁ་ནི་འཆིང་བ་ ཡིན། ། ཨོཾ་ཙཎྜ་མ་ཧཱ་རོ་ཥ་ཎ་ནཾ་ཏུ་ན་ཏེ་སི་རི་སི་རི་ཁི་ལི་ཁི་ལི་སྭཱ་ཧཱ། སྟག་གི་པགས་པ་ལ་བྲིས་ཏེ། ། གང་ལ་བཏགས་པའི་སྤྱང་ཀི་བསྲུང་། ། ཨོྃ་ཙཎྜ་མ་ཧཱ་རོ་ཥ་ཎ་མྃ་ར་རཀྵ་ཏོ། ནཱ་ཤ་ཀ་རཱ་ཡ་སྭཱ་ཧཱ། ཤིང་ཐོག་ལ་བཟླས་ར་བར་སྦས། ། སྤྲེའུའི་གནོད་པ་བཟློག་པར་ འགྱུར། ཨོཾ་ཙཎྜ་མ་ཧཱ་རོ་ཥ་ཎ་སརྦ་སྟྃ་བྷ་ཡ་དུྃ་བྷེ་སྭཱ་ཧཱ། སྦྲང་རྩི་བུ་རམ་ཁུ་བ་ལ། ། འདི་བཟླས་བྱུག་པས་དོམ་འབྲོས་སོ།

ཨོྃ་ཙཎྜ་མ་ཧཱ་རོ་ཥ་ཎཱ་པཱ་རཱ་ཧ་དྷི་ནྃ་དྲུྃ་དྲུྃ་དྟེ་སྭཱ་ཧཱ། དུག་དང་ལན་ཚྭ་སྐེ་ཚེ་དང་། ། ཡུངས་ཀར་ལ་ཕུག་ས་བོན་དང་། ། དྷ་དུ་ར་དང་ཀལ་བི་དང་། ། མ་ཧེ་ཕག་དང་ཅེ་སྤྱང་ཁྲག ། སྦྲུས་ལ་རྡོ་རྗེ་བརྒྱད་བྱས་ལ། ། ཕྱོགས་མཚམས་སྦས་ན་གནོད་པ་ཞི། ། མཚམས་བཅད་པ་ཡི་དམ་པ་ཡིན། ། ཨོཾ་བཛྲ་ཙཎྜ་མ་ཧཱ་རོ་ཥ་ཎ་བྷི་དྷ་ཧཱི་ནི་ཀྃ་བྷེ་སྭཱ་ཧཱ། སྔགས་ནི་བརྒྱ་རྩ་བརྒྱད་བཟླས་ན། ། བསྲུང་བ་འདི་ཡང་མཚམས་གཅད་ ཡིན། ཨོཾ་བི་ཏི་པི་ན་ཧཱི་བྷྲིཾ་པི་ཊ་བི་ཊ་ཧཱུྃ་ཧཱུྃ་སྭཱ་ཧཱ། སྔགས་འདི་གང་ཡིན་ལྕི་བ་ལ། ། བཟླས་ཏེ་མ་ཧེ་འཐུང་བའི་ཆུ། ། ནང་བཅུག་ཞོ་རྣམས་བརླག་པར་འགྱུར། ། གསེར་མེ་ལ་མ་རེག་པ། གཡུ་མིག་མ་ཕུག་པ། མུ་ཏིག་མུ་མེན། གསེར་གྱིས་བྲིས་པའི་ཁྲོྃ། བ་བླ་ མུ་ཟི། བཙན་དུག་གུ་གུལ་གི་ཝང་སྤྲེའུའི་སྤུས་གཏུམས་ལ། ཨོཾ་བཛྲ་ཙཎྜ་མ་ཧཱ་རོ་ཥ་ཎ་ག་རུ་ཌ་ཙ་ལེ་ཙ་ལེ་བདུད་རུ་དྲཱ་མཱ་ར་ཡ། བཛྲ་བྷ་ཏི་ག་རུ་ཌ་བེ་གེ་ཧཱུྃ་རི་ཛ་པྲི་ཛ་ནཱ་ག་རཱ་ཛ་མཱ་ར་ཡ་ཧཱུྃ་ཕཊ། སྔགས་ཁྲི་བཟླས་ཏེ་ལུས་ལ་བཅངས་ན་ཀླུ་ཐམས་ཅད་འབྲོས་པར་འགྱུར་རོ། ། ཨོཾ་པདྨཱ་ཀྵ་པདྨཱ་ཀྵ་བ་རུ་ནི་ཧཱུྃ་ཕཊ་སྭཱ་ཧཱ།

ཆུ་གཙང་མ་ལ་བཟླས་ཏེ་མིག་བཀྲུས་ན་མིག་ནད་ཐམས་ཅད་འབྱང་བར་འགྱུར་རོ། ། སུག་སྨེལ་དང་། ཛཱ་ཏི་དང་། ནཱ་ག་གེ་སར་དང་། ཨ་ཤོ་ཏ་ཀའི་འབྲས་བུ་རྣམས་ལ་སྔགས་འདི་བཟླས་ཏེ་དཔྲལ་བར་ཤུ་ཏྲས་ཐིག་ལེ་བྱས་ན་ཀུན་ གྱི་ཡིད་དུ་འོང་བར་འགྱུར་རོ། ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཛྃ་བྷེ་མོ་ཧ་ཡ་ཧྲཱི་སྭཱ་ཧཱ། བརྒྱ་རྩ་བརྒྱད་བཟླས་སོ། ། བྱིས་པ་གསར་བཙས་བསྲུང་བ་ན། ། ཁམ་ཕོར་ནང་དུ་རྡོ་རྒྱུས་ཀྱིས། ། རྡོ་རྗེ་རྒྱ་གྲམ་ལྟེ་བའི་ནང་། ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཆེ་གེ་མོ་ལ་རཀྵ་རཀྵ་སྭཱ་ཧཱ། ཧཱུྃ་བཅུ་ བྲིས་ཏེ་ལྷ་བསྟིམས་ལ། ། མཆོད་སྦྱིན་གཏོར་མ་སྦྱིན་བྱས་ཏེ། ། དེ་ཡི་སྟེང་དུ་སྦྱང་བར་བྱ། ། ལུས་ལ་གུར་གུམ་ཆུས་བྲིས་པའི། ། འཁོར་ལོ་གཉིས་པས་བསྲུང་བར་བྱ། ། ཨོཾ་བཛྲ་ཙཌྞ་མ་ཧཱ་རོ་ཥ་ཎ་བ་ས་ཧ་དོ་ལཱ་ཡཱི་སྭཱ་ཧཱ། མེ་དོ་ཡཱ་སཱ་བ་ཙི་ན་མོ་ཧ་ཡི་ སྭཱ་ཧཱ། ཨེས་བ་ཛི་ཧཱ་ཡི་ན་མཱ་ཏ་ཡི་སྭཱ་ཧཱ། སྔགས་འདི་མེ་ཏོག་དང་། གོས་དང་། ཟས་དང་། རྒྱན་ལ་མངོན་པར་བསྔགས་ཏེ་བྱིན་ན་དབང་དུ་འགྱུར་རོ། ། ཨོྃ་བཛྲ་ཙཎྜ་མ་ཧཱ་རོ་ཥ་ཎ་ན་མ་ས་ར་ནཱ་མཏདྱ་ཐཱ། དྷ་ར་ད་མ་ཧཱ་དྷ་ན་དྷ་དྷ་ཌ་དུ་ཌེ་དེ་སྭཱ་ཧཱ།

བྱེ་མ་དང་ཐལ་ཆེན་ལ་བསྔགས་ ཏེ་ཞིང་ལ་གཏོར་ན་སྲོག་ཆགས་ཀྱིས་ཟ་བར་མི་འགྱུར་རོ། ། ཨོྃ་བཛྲ་སུ་ཥ་དྷེ་བྷི་ཤུདྡྷ་ཨལླཱི་བ་བ་ར་ཙུ་ལི་ཙེ་ར་ས་ག་གནྡྷ་སཱ་པ་མི་ཧ་བནྡྷ་ལི་ས་སྭཱ་ཧཱ། སྔགས་འདི་རྡོ་རྗེའི་ཤིང་དང་། ད་ལིས་དང་། ཨརྒ་གསུམ་ལ་ལན་བདུན་བདུན་བཟླས་ཏེ། ། རྣ་བའི་འོག་ཏུ་བཅུག་ན་ཙཽ་ར་བ་ ཐམས་ཅད་ཀྱིས་གནོད་པར་བྱ་བར་མི་ནུས་སོ། ། མི་རུས་ལ་བྱས་ཕུར་བུ་ནི། ། བགེགས་ཀྱི་ལུས་ཅན་ཞལ་གཅིག་པ། ། ཕྱག་བཞི་ཐོ་བ་ཞགས་པ་དང་། ། དགྲ་སྟ་རྩེ་གསུམ་བསྣམས་པ་སྟེ། ། དུག་ཁྲག་ལན་ཚྭ་སྐེ་ཚེ་དང་། ། རྒྱ་ཚྭ་མར་ནག་ནང་དུ་བཙོ། ། སྟོབས་ཆེན་ སྔགས་བྲིས་རས་མས་གཏུམ། ། ཁྱིམ་སྒོར་སྦས་ན་འཆི་བར་འགྱུར། ། ཨོྃ་བཛྲ་ཀྲོ་དྷ་མ་ཧཱ་བ་ལ་ཧ་ན་ད་ཧ་པ་ཙ་བིདྷ་ནྶ་ཡ། ཨུད་སཱ་ད་ཡ་མཱ་ར་ཡ་ཧཱུྃ་ཕཊ། སྦྲུལ་མགོ་གཉིས་པའི་ཐོད་པར་ཁྱི་སྨྱོན་པའི་ལྕེ་ལ་དགྲའི་ལིང་ག་བྲིས་ཏེ་རྟའི་རྨིག་པའི་འོག་ཏུ་བཅུག་ལ་སྔགས་འདི་ བཟླས་ནས་གང་གི་སྒོར་སྦས་ན་བསྐྲད་པའམ་སྨྱོ་བར་འགྱུར་རོ། ། ཨོྃ་བཛྲ་ཙཎྜ་མ་ཧཱ་རོ་ཥ་ཎ་ཆེ་གེ་མོ་མུ་པྟ་ཡ་ཕཊ་ཅེས་ཁྲི་བཟླས་སོ། །

ཤིང་ལོ་དང་སྟག་པ་ལ་རྡོ་རྗེའི་རྣམ་པར་བྱས་ལ་ལྟེ་བར་ལས་ཀྱི་རིག་པ་བཅུག ། དཔའ་བོ་གཡུལ་དུ་ཤི་བའི་སྐྲའི་ཐེ་གུས་རྐེད་པར་བཏགས་ ལ་ཀླད་ལ་བསྐོར་ན་བགེགས་འབྲོས་པར་འགྱུར་རོ། ། གྲོ་གའི་འདབ་མ་ལ་རྡོ་རྗེའི་ནང་དུ་ཆུད་པའི་ལྟེ་བར་སྐུ་གསུང་ཐུགས་ཀྱི་སྔགས་དང་བསྲུང་བྱ་བྲི། ། དེའི་མཐའ་མར་ལས་རབ་འབྱམ་བྲི། དེའི་ཉེ་བར་བསྟན་པའི་འཁོར་གྱི་སྔགས་བྲི། དེའི་མཐའ་མར་ཤེས་རབ་ཀྱི་ སྔགས་བྲི། དེའི་མཐའ་མར་མེའི་ཚོགས་བྲིས་ཏེ་དྲིལ་ལ་ལུས་ལ་བཅངས་ན་གདོན་ཐམས་ཅད་ཀྱིས་གླགས་མི་རྙེད་དོ། ། བྱི་ཁུང་ཤར་བལྟས་ས་དང་ནི། ། འུག་ཆུང་རུས་པ་ལང་ཀའི་རྩྭ། ། སྒོ་ལྕགས་ཁུང་བུར་བླུགས་བྱས་ཏེ། ། ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཀུར་ཏྲི་ས་ནཱ་ ཀར་ཏི་ཚུམས་དང་ཕུཊ་ཕུཊ་སྭཱ་ཧཱ། སྔགས་དེ་བརྒྱ་དང་བརྒྱད་བཟླས་ན། ། སྨྱིག་མས་ཡང་ཡང་དཀྲོག་པ་ནི། ། སྒོ་ལྕགས་འབྱེ་བར་ཐེ་ཚོམ་མེད། ། དུར་ཁྲོད་སོལ་བས་བསྲེགས་པས་ནི། ། སླར་ཡང་སྔ་མ་དག་ཏུ་འགྱུར། ། རྒྱ་གྲམ་ནང་དུ་ཆུད་པ་ཡི། ། དམག་ གི་གཙོ་བོ་བྲི་བྱ་སྟེ། ། སྔགས་དང་སྤེལ་ནས་སྙིང་ག་རུ། ། སིང་ལྡེང་ཕུར་པ་བཏབ་ན་ནི། ། ངེས་པར་དེ་ཉིད་རེངས་པར་འགྱུར། །

བྱི་བ་ནག་པོའི་རྟུག་པ་དང་། ། ཤ་ཅན་ར་ཡི་རྭ་དང་ནི། ། ཁྱི་ནག་སྤུ་དག་བསྲེགས་གྱུར་ན། ། འབྲུ་ཡི་རྣམ་པ་འཕེལ་བར་འགྱུར། ། དེ་སོགས་ལས་ཀྱི་རིམ་པ་ནི། ། བསམ་གྱིས་མི་ཁྱབ་ཇི་སྙེད་པ། ། ཁྱོད་ལ་བསྟན་པར་མི་ནུས་པས། ། སྔགས་གྲུབ་དེ་ཡིས་རྟོགས་པར་འགྱུར། ། བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་ལས་སྣ་ཚོགས་བསྟན་པའི་ ལེའུ་སྟེ་བཅུ་བདུན་པའོ། ། ། ། དཔའ་མོ་རྡོ་རྗེ་བདེ་མས་གསོལ་པ། རྡོ་རྗེ་འཆང་གི་ཆར་དབབ་པའི་ཆོ་ག་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ། མཛེས་མ་ཁྱོད་ཀྱིས་ཞུས་པ་ལེགས། ། ཟག་མེད་བདེ་བའི་རྒྱུ་འབྱུང་མ། ། བདག་མེད་ཤེས་རབ་མ་ཡི་མཆོག ། ཁྱོད་ལ་བཤད་ཀྱིས་ལེགས་པར་ཉོན། ། ཆུ་བདག་གནས་པའི་ས་ཡི་ཆར། ། དཀྱིལ་འཁོར་པདྨ་བརྒྱད་པ་ལ། ། སྒོ་དང་རྟ་བབས་སྦྲུལ་གྱིས་བརྒྱན། ། མེ་ཏོག་མཆོད་པས་མཉེས་བྱ་བ། ། བྲམ་ཟེའི་ཐོད་པ་གཙང་མ་ གཉིས། ། ཆུ་བདག་དམ་ཚིག་ཀླུ་ཡི་གཟུགས། ། གུར་གུམ་བཟང་པོས་བྲི་བར་བྱ། ། ཁ་སྦྱར་བར་དུ་རྡོ་རྗེ་འཛིན། ། ཞལ་བཞི་པ་ལ་ཕྱག་བརྒྱད་པ། ། བཻ་ཌཱུརྱ་ལྟར་གནས་པ་ནི། ། ཆུ་དར་ཡང་ན་རས་ལ་བྲི། །

རྩ་བ་ཁྲོ་བོ་གཡས་གཡོན་རྒྱབ། ། དཀར་དམར་དེ་ བཞིན་ལྗང་ཁུ་སྟེ། ། རྩ་བ་ཁྱུང་ཆེན་ཟིལ་གྱིས་གནོན། ། གཡས་ཀྱི་ཕྱག་ན་རིམ་པ་ལྟར། ། རྡོ་རྗེ་འཁོར་ལོ་རལ་གྲི་དང་། ། ལྕགས་ཀྱུ་རིགས་ལྡན་པདྨ་དང་། ། པད་ཆེན་དུང་སྐྱོང་ཡུམ་དང་བཅས། ། གཡོན་པ་དྲིལ་བུ་རྩེ་གསུམ་དང་། ། ཕུར་བུ་སྤྲིན་གྱི་ཞགས་པ་སྟེ། ། མཐའ་ཡས་ནོར་རྒྱས་འཇོག་པོ་དང་། ། སྟོབས་རྒྱུ་ཡུམ་གྱིས་བཅིངས་པ་ནི། ། ཐམས་ཅད་གཙོ་ལ་ཐལ་སྦྱར་ཏེ། ། སྦྲུལ་མགོ་སྤྲིན་ཆེན་བཞིན་དུ་གཏིབས། ། འདབ་མར་ཀླུ་ཆེན་བརྒྱད་བསྐྱེད་ལ། ། སྤྱན་དྲངས་མཆོད་ པ་བྱས་ནས་ཀྱང་། ། ཆར་གྱི་རྒྱུན་ཆེན་འབབ་པར་བསམ། ། ཀླུ་ཆེན་རྩ་བའི་སྔགས་རྣམས་ལ། ། བྷ་རི་ཤ་ཡ་བཏགས་ཏེ་བཟླས། ངེས་པར་ཆར་རྒྱུན་འབབ་པར་འགྱུར། ། གལ་ཏེ་འབབ་པར་མ་གྱུར་ན། ། གུ་གུལ་དུད་པས་གཟིར་བྱས་ནས། ། ཕྲིན་ ལས་སྔགས་ཀྱིས་སྲོག་ཀྱང་གཡོ། ། གལ་ཏེ་མ་བབ་ན་རྡོ་རྗེ་འཛིན་པ་ཕྱུང་ལ་ཚ་བའི་མར་ནག་གིས་བླུགས་ལ་སྔགས་བཟླས་ན་འབབ་པར་འགྱུར་རོ། ། ཡང་ན་ཁམ་ཕོར་ལ་སྦྲུལ་མགོ་གཉིས་པའི་ཁྲག་དང་ཤས་སྔར་ལྟར་བྱས་ལ་སྐྱེར་པའི་སོལ་བའི་མེ་ལ་སྔར་ལྟར་ བསྲོ་བར་བྱ་སྟེ། དེས་ངེས་པར་འབབ་པར་འགྱུར་རོ། །

ཡང་ན་གཏུམ་པའི་འབྲས་བུ་ལ། ། སྔགས་ཀྱིས་བཏབ་སྟེ་ཀླུ་ཡི་ཁྱིམ། ། སྦྱིན་སྲེག་བྱས་པས་འབབ་པར་འགྱུར། ། དེས་ཀྱང་འབབ་པར་མ་གྱུར་ན། ། ཡུངས་ཀར་སྐྱེ་ཚེ་སྦྲང་རྒོད་དང་། ། བྲ་མའི་མེ་ ཏོག་ཕྱེ་མར་བྱས། ། ར་ཡི་འོ་མས་རིལ་བུ་སྦྱར། ། སྔགས་བཟླས་མཚོ་འམ་ཆུ་མིག་ཏུ། ། བརྒྱ་དང་བརྒྱད་དུ་བསྐྱུར་ན་འབབ། ། དེས་ཀྱང་འབབ་པར་མ་གྱུར་ན། ། སྟ་རུའི་ཁུ་བས་རིལ་བུ་བྱས། ། མཚོར་བསྐྱུར་ངེས་པར་འབབ་པ་ཡིན། ། གལ་ཏེ་དེས་ཀྱང་མ་བབ་ན། ། པདྨ་ཨུཏྤལ་སྔོན་པོ་དང་། ། ཡུངས་ཀར་ཟངས་ཕྱེ་བ་བླ་དང་། ། དབང་པོ་ལག་པ་རྒྱ་སྐྱེགས་ཤིང་། ། བུ་རམ་ར་ཡི་འོ་མས་བསྡུས། ། རྒྱ་ཤུག་འབྲུ་ཙམ་རིལ་བུ་ལ། ། ལན་བདུན་བསྔགས་ཏེ་མཚོར་བསྐྱུར་ན། ། ཆར་རྒྱུན་མཚུངས་པ་མེད་པར་འབབ། ། མི་འབེབས་ཀླུ་རྣམས་ མགོ་གས་ཏེ། ། ལུས་ནི་བསྐམས་ཏེ་འཚིག་པར་འགྱུར། ། ང་ཡི་བཀའ་ལས་གང་འདའ་བ། ། སྐད་ཅིག་ཉིད་ལ་བརླག་པར་འགྱུར། ། བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་ཆར་དབབ་པའི་ལེའུ་སྟེ་{བཅྭ་,བཅོ་}བརྒྱད་པའོ། ། ། ། དཔའ་མོ་རྡོ་རྗེ་བདེ་མས་གསོལ་པ།

རྡོ་རྗེ་འཆང་གི་སྦྱིན་སྲེག་གི་ཆོ་ག་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ། མཛེས་མ་ཁྱོད་ཀྱིས་ཞུས་པ་ལེགས། ། ཟག་མེད་བདེ་བའི་རྒྱུ་འབྱུང་མ། ། བདག་མེད་ཤེས་རབ་མ་ཡི་མཆོག ། ཁྱོད་ལ་བཤད་ཀྱིས་ ལེགས་པར་ཉོན། ། ཐབ་དང་རྫས་དང་ལྷ་དང་ནི། ། སྔགས་ཀྱི་རིམ་པ་ཕན་ཡོན་རྣམས། ། རིམ་པས་མཛེས་མ་ཁྱོད་ལ་བསྟན། ། སྦྱང་བའི་ལས་ནི་སྔོན་འགྲོ་བས། ། སོར་ནི་ཉི་ཤུ་རྩ་བརྒྱད་དང་། ། བཅུ་དྲུག་བཅུ་བཞི་བཅུ་གཉིས་དང་། ། བཅུ་དང་བརྒྱད་ལས་ཆུང་ བ་སྤང་། ། རིམ་བཞིན་ནད་རྣམས་ཞི་ཞིང་ནོར་འཕེལ་དང་། ། རིམས་རྣམས་ཞི་ཞིང་ཞི་ལས་འགྲུབ། ། དབང་དུ་བསྡུ་དང་རྒྱས་པ་དང་། ། གསོད་པའི་ཐབས་སུ་ཤེས་པར་བྱ། ། ཐུར་དུ་རྐོ་བ་སུམ་གཉིས་ཏེ། ། ཁ་ཁྱེར་བརྒྱད་ཆ་མཐོ་བའོ། ། རིམ་བཞིན་ཕྱེད་ཕྱེད་ རྡོ་རྗེས་མཚན། ། དཀར་སེར་དམར་ནག་ལྗང་ཁུ་སྟེ། ། ལས་དང་འབྲེལ་བ་ཤེས་པར་བྱ། ། མཆོད་པའི་རྫས་དང་ཡམ་ཤིང་དང་། ། དཱུར་བ་ལ་སོགས་བསྲེག་པའི་རྫས། ། གཡས་དང་གཡོན་གྱི་རིམ་པ་ཡིན། ། རང་ཉིད་རྡོ་རྗེ་འཛིན་པར་བསྐྱེད། ། རྒྱས་ལ་དགའ་དང་ཞི་ ལ་ཞི། ། དབང་ལ་ཆགས་པ་ཁྲོ་ལ་བསད། ། གཞན་རྩུབ་བསྐྲད་པ་ལ་སོགས་ཡིན། །

དམར་བ་མེ་ཕྱོགས་གདུང་བའི་ལས། ། བསྐྲད་པ་རླུང་སྟེ་གནོན་པ་ནི། ། བདེན་བྲལ་དབང་དང་དགུག་པ་ཡང་། ། ལྷོ་ཡི་ཕྱོགས་སུ་ལྟ་བ་ཡིན། ། གསད་དང་དབྱེ་བའང་དེ་བཞིན་ ཏེ། ། ཤར་ཞི་བྱང་ཕྱོགས་རྒྱས་པ་ཡིན། ། ཧཱུྃ་ལས་སྐྱེས་པ་ཁ་དོག་དམར། ། མཛེས་པའི་ཞལ་གདངས་ཅུང་ཟད་གནག ། དབྱུག་གུ་རིལ་བ་སྤྱི་བླུགས་དང་། ། བགྲང་ཕྲེང་གཡོན་དང་གཡས་སུ་བསམ། ། རལ་པའི་ཅོད་པན་གསུས་པོ་ཆེ། ། རྒྱན་དང་ལྡན་པ་ བསམས་ལ་བསྟིམ། ། བསང་གཏོར་འཐོར་འཐུང་མཆོད་ཡོན་དང་། ། ཞབས་བསིལ་ལ་སོགས་དབུལ་བར་བྱ། ། མེ་ཏོག་ལ་སོགས་རིམ་པ་སྟེ། ། གཟར་བུ་གཉིས་ཀྱིས་དགང་བླུགས་དབུལ། ། ཨོྃ་ཨགྣ་ཡེ་སྭཱ་ཧཱ། དེ་རྗེས་མེ་ཡི་མཚན་མ་བརྟག ། མདོག་དང་སྒྲ་དང་དྲི་དང་རོ། ། དབྱིབས་དང་ཁ་དོག་བལྟ་བར་བྱ། ། མེ་ནི་རྩེ་གཅིག་འབར་གྱུར་ན། ། བསམ་པ་ཐམས་ཅད་འགྲུབ་པར་སྟོན། ། གཉིས་འབར་རྩེ་གསུམ་མི་གཡོ་ན། ། འབར་བའི་འབྲས་བུ་ཐམས་ཅད་འཛིན། ། རྩེ་བཞི་མཉམ་ཉིད་བརྟན་པ་སྟེ། ། རྒྱས་ པའི་ལས་ལ་འབྲས་བུ་ཡོད། ། ཟླ་འདྲ་སྣུམ་ལ་དྲི་མ་མེད། ། དུ་བ་མེད་ཅིང་བཻ་ཌཱུ་ར་འདྲ། ། ནད་མེད་རིགས་རྣམས་རྒྱས་པར་བྱེད། ། ཆུ་ཤེལ་ནོར་བུ་སྤུང་པ་དང་། །

པདྨ་རཱ་ག་གསལ་བ་ནི། ། སྡིག་པ་མ་ལུས་ཟད་པར་འགྱུར། ། དམར་སེར་པུཎྜ་རཱི་ཀ་དང་། ། བན་ དུ་ཁ་དོག་གསལ་བ་ན། ། རྒྱལ་སྲིད་དཔལ་རྣམས་འབྱོར་པ་ཡིན། ། ཨུཏྤལ་མ་ལི་ཨུ་ཤིའི་དྲི། ། ཙམ་པ་ཀ་དང་སིག་ཀར་དྲི། ། ག་པུར་ཨ་ག་རུ་ཡི་དྲིས། ། དགེ་ཞིང་ཚེ་རིང་དཔལ་གྱི་གནས། ། ཟབ་པའི་སྐད་དང་དུང་དང་ནི། ། རྫ་རྔ་པི་ཝང་ཌཱ་མ་རུ། ། དེ་ཡི་སྒྲས་ནི་བདེ་ བ་འཕེལ། ། དཔལ་བེའུ་བཀྲ་ཤིས་གཟུགས་སུ་འཆར། ། རྒྱལ་མཚན་རྔ་ཡབ་ཕྱག་མཚན་རྣམས། ། རིན་ཆེན་གདུགས་ཀྱི་དབྱིབས་སུ་འཆར། ། དགེ་བ་མེ་ཡི་དབྱིབས་སུ་བསྟན། ། ངན་པ་དེ་ལས་ཅི་རིགས་བཟློག ། དེ་རྗེས་རྫས་ཀྱི་རིམ་པ་ནི། ། ཨོཾ་ཨགྣ་ ཡེ་ཨ་མུ་ཀ་སྱ་ཤཱནྟིཾ་ཀུ་རུ་ཡེ་སྭཱ་ཧཱ། བསྲེག་བླུགས་སོ། ། ཨོྃ་བོ་དྷི་བྲྀཀྵཱ་ཡ་སྭཱ་ཧཱ། ཨ་ཤྭད་ཐའི་འོ། ། ཨོྃ་བཛྲ་ཏ་ལཱ་ཡ་སྭཱ་ཧཱ། བླག་ཤའིའོ། ། ཨོྃ་བཛྲ་ཀུ་བེ་ར་ཡེ་སྭཱ་ཧཱ། འོ་མ་ཅན་གྱི་ཤིང་གིའོ། ། ཨོྃ་བཛྲ་ཤ་མ་ཛྭཱ་ལཱ་ཡ་སྭཱ་ཧཱ། ཨུ་དུམ་ཝཱ་རའིའོ། ། ཨོྃ་སརྦ་བཱ་པཾ་ ད་ཧ་ན་བཛྲ་སྭཱ་ཧཱ། ཏིལ་གྱིའོ། ། ཨོྃ་བཛྲ་དུཥྚ་ཡེ་སྭཱ་ཧཱ། འབྲས་སོ་བའི་འོ། ། ཨོྃ་བཛྲ་སྃ་པ་དེ་སྭཱ་ཧཱ། ཞོ་དང་ཟན་གྱིའོ། ། ཨོྃ་བཛྲ་ཨཱ་ཡུ་ཥེ་སྭཱ་ཧཱ།

དཱུར་བའིའོ། ། ཨོྃ་བཛྲ་པྲ་ཏི་ཧ་ཏ་བཛྲཱ་ཡ་སྭཱ་ཧཱ། ཀུ་ཤའིའོ། ། རྫས་རྣམས་རང་སྔགས་ཅི་རིགས་དབུལ། ། བསྟོད་ ཅིང་གསོལ་བའི་ལས་བྱ་སྟེ། ། མེ་ཡི་སྙིང་གར་དཀྱིལ་འཁོར་མཆོད། ། གསད་ལ་སོགས་པ་རིམ་པ་བཞིན། ། སྔར་བསྟན་པ་ལས་ཤེས་པར་བྱ། ། དེ་རྗེས་ལྷག་མས་ཅི་རིགས་མཆོད། ། ཞུ་བ་ལ་སོགས་རྫས་རྣམས་ནི། ། ལྷ་ཡི་ཞལ་དུ་མཆོད་པར་བྱ། ། ཡམ་ ཤིང་ཀུ་ཤ་ལ་སོགས་པ། ། འོད་ལ་མཆོད་པར་བྱ་བ་ཡིན། ། ཕྱག་ཏུ་ཞལ་ཟས་འཐོར་འཐུང་དབུལ། ། མེ་ཏོག་བདུག་པ་དབུ་དང་འོད། ། ཐིག་ལེ་སྙིང་ག་བསང་གཏོར་ཡང་། ། སྐུ་ལ་ཕུལ་ཏེ་ཞབས་བསིལ་ཞབས། ། མར་མེ་ལ་སོགས་རིམ་བཞིན་གནས། ། དཀྱིལ་འཁོར་བསྡུ་གཤེགས་རིམ་པ་རྣམས། ། མཁས་པས་ཉེ་བར་བརྟགས་ཏེ་བྱ། ། དཀྱིལ་འཁོར་ལྷས་ནི་མཆོག་སྟེར་ལ། ། མེ་ཡིས་འདོད་པའི་དོན་སྒྲུབ་བྱེད། ། ལག་པན་གྱིས་ནི་བདེ་བ་འབྱིན། ། འོ་མ་སྦྲང་རྩིས་རིག་པ་འཕེལ། ། གྲོ་དང་སྲན་མས་ ནད་ཀུན་སེལ། ། དཱུར་བས་སྲོག་ནི་འཛིན་པར་བྱེད། ། ནས་ཀྱིས་བརྩོན་འགྲུས་ལ་དབང་སྟེ། ། སྟོབས་འཕེལ་མཱ་ཤཱ་ཀ་ཡིན་ནོ། ། འབྲུ་འཕེལ་སོ་བའི་ལས་ཡིན་ཏེ། ། སྡིག་པ་འདག་པ་ཏིལ་ཡིན་ནོ། ། འབྲས་ཀྱིས་ནུས་པ་འཕེལ་བྱེད་པ། །

ཞི་ལ་ཡུངས་ཀར་ ཀུ་ཤས་བསྲུང་། ། དཔལ་བསྐྱེད་པ་ནི་བུད་ཤིང་སྟེ། ། ཡམ་ཤིང་གཟི་བྱིན་སྟེར་བར་བྱེད། ། འབྱོར་པ་འཕེལ་བ་མར་ཡིན་ནོ། ། སྦྱིན་བདག་བཀྲ་ཤིས་ཐབ་ཡིན་ཏེ། ། དངོས་གྲུབ་ཀུན་སྟེར་མཆོད་པའི་རྫས། ། ཐབས་དང་ཤེས་རབ་གཟར་བུ་སྟེ། ། བདུད་རྩི་མར་གྱིས་ཚིམ་ བྱེད་པ། ། མཆོད་པ་གཞན་གྱིས་ཅི་ཞིག་བྱ། ། འདི་ནི་མཛེས་མའི་ཡུལ་ཡིན་གྱིས། ། གཞན་གྱིས་རྟོགས་པར་ག་ལ་འགྱུར། ། བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་སྦྱིན་སྲེག་གི་ཆོ་ག་བསྟན་པའི་ལེའུ་སྟེ་བཅུ་དགུ་པའོ། ། ། ། དཔའ་མོ་རྡོ་རྗེ་བདེ་མས་གསོལ་པ། རྡོ་རྗེ་འཆང་ཁྱོད་ཀྱི་གསང་བའི་མཚན་ཉི་ཤུ་རྩ་གཅིག་གི་བསྟོད་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ། མཛེས་མ་ཁྱོད་ཀྱིས་ཞུས་པ་ལེགས། ། ཟག་མེད་བདེ་བའི་རྒྱུ་འབྱུང་མ། ། བདག་མེད་ཤེས་རབ་མ་ཡི་མཆོག ། ཁྱོད་ལ་བཤད་ཀྱིས་ལེགས་པར་ཉོན། ། ང་ཡི་མིང་ནི་ཉི་ཤུ་གཅིག ། དུས་གསུམ་སངས་རྒྱས་རྣམས་ཀྱིས་གསུང་། ། མི་འགྱུར་གཡུང་དྲུང་དབང་བསྐུར་ཏེ། ། འདི་དག་མཛེས་མ་ཁྱོད་ལ་བསྟན། ། ན་མོ་ནཱི་ལཱཾ་བ་ར་དྷ་ར་བཛྲ་པཱ་ཎི་ཙཎྜ་བཛྲ།

ན་མོ་གྷ་ཛ་ཀརྞྞོ་ བྷོ་ཙཎྜ་བཛྲ་ན་མཿསུ་བྷུ་ཥ་ནི་ས་བྷྱོ་ཙཎྜ་བཛྲ། ན་མོ་རཏྣ་གུ་ཎ་ཀ་ར་སི་ཙཎྜ་བཛྲ། ན་མོ་བྷ་ག་བན་པྲཛྙཱ་དྷ་སཱི་ར་ཙཎྜ་བཛྲ། ན་མཿཨཱརྱ་གྷོ་ཥ་སཱནྣི་ཙཎྜ་བཛྲ། ན་མཿཔྲ་ས་རཱ་ཡི་ཏོ་སཱི་ཙཎྜ་བཛྲ། ན་མོ་བཛྲ་ལ་ཨར་ཙི་ཤི་སཱི་ཙཎྜ་བཛྲ། ན་མཿསཱ་རཱུ་པ་ནོ་ཕ་ལ་ཙཎྜ་བཛྲ། ན་མོ་དུར་དཱན་ཏ་ད་མ་ཀ་མ་བ་ རཿཙཎྜ་བཛྲ། ན་མཿབྷེ་ར་བ་བྷ་ས་ཏྭ་རཱུ་པི་བྷིཿཙཎྜ་བཛྲ། ན་མོ་དྲོ་མོ་ཀྲོ་དྷ་བི་གྲ་ཧ་རཱུ་པི་བྷིཿཙཎྜ་བཛྲ། ན་མཿཙ་ཏུར་སྨཱ་རཱ་རྀ་ཥྀ་སིནྣ་ཙཎྜ་བཛྲ། ན་མོ་མ་ཧཱ་བ་ལ་པ་རཱ་ཀྲ་མ་ཙཎྜ་བཛྲ། ན་མོ་ནི་རཱཏྨ་སིདྷ་ནིརྣ་ཏཱ་ཙཎྜ་བཛྲ། ན་མ་ན་མོ་ཨ་མོ་གྷ་ཛ་ག་དརྠ་ཀྲིད་ཙཎྜ་བཛྲ། ན་མོ་ད་ཤཱ་དིག་བི་ཤྭ་ནི་ར་མཱ་ཎཾ་ ཙཎྜ་བཛྲ། ན་མོ་ཧ་ཧཱ་སཏྭ་སོ་ནིར་གྷོ་ཥ་ཙཎྜ་བཛྲ། ན་མོ་ཨ་ཙ་ལོ་ཧི་ཀ་ཛ་ཏ་ཏོ་ཙཎྜ་བཛྲ། ན་མཿཔཉྩ་བུདྡྷཱུ་ཏ་མ་མུ་ཀུ་ཊ་ཙཎྜ་བཛྲ། ན་མོ་བཛྲ་མ་ཧཱ་བྷེ་ཤ་ཡུདྡྷ་རོད་ཙཎྜ་བཛྲ། རྡོ་རྗེ་གཏུམ་པོའི་མཚན་ཉི་ཤུ་རྩ་གཅིག་པོ་འདི་འཛིན་པ་དང་། འཆང་བ་དང་། ཀློག་པ་དང་། ཡིད་ལ་བྱེད་པ་དང་། འདྲི་བ་དང་། འདྲིར་འཇུག་པ་དང་།

གླེགས་བམ་དུ་བྱས་ཏེ་འཆང་བ་ལ་ནི་ཕྱོགས་བཅུའི་སངས་རྒྱས་ཐམས་ཅད་ཀྱིས་རྗེས་སུ་སྐྱོང་བར་འགྱུར་རོ། ། སྲུང་བར་འགྱུར་རོ། ། སྦེད་པར་འགྱུར་རོ། ། སྐྱོབ་པར་འགྱུར་རོ། ། མཚན་འདི་རྣམས་འཛིན་པ་དེ་མཚམས་མེད་པ་ལྔ་བྱས་ པའི་སྡིག་པ་ཡང་བྱང་བར་འགྱུར་རོ། ། ལན་ཅིག་ཙམ་བརྗོད་པས་ཀྱང་བསྐལ་པ་བྱེ་བ་ཕྲག་དགུ་བཅུའི་བར་དུ་སེམས་ཅན་དམྱལ་བ་རྣམས་སུ་མི་སྐྱེའོ། ། ངན་འགྲོ་གཞན་ཡང་སྤངས་པ་ཡིན་ནོ། ། ཚེ་རབས་ཐམས་ཅད་དུ་སྐྱེ་བ་དྲན་པར་འགྱུར་རོ། ། རྡོ་རྗེ་འཆང་ལྔ་ བརྒྱ་ཡང་རྟག་ཏུ་མཚན་འདི་འཛིན་པའི་ཕྱི་བཞིན་རྗེས་སུ་འབྲང་ངོ་། ། གདུག་པ་ཅན་གྱི་ཀླུ་རྣམས་ཀྱིས་མི་འཚེ་ཞིང་སླར་ལོངས་སྤྱོད་སྣ་ཚོགས་སྦྱིན་ནོ། ། འཆི་བའི་དུས་སུ་ཡང་བཻ་དཱུརྱ་ལྷ་བུའི་སྐུ་ལུས་བསྟན་ཏེ། རང་གི་གནས་སུ་ཁྲིད་པར་འགྱུར་རོ། ། མཚན་འདི་ གནས་པའི་ས་དེ་ནི་ལྕང་ལོ་ཅན་དང་མཚུངས་པ་ཡིན་ནོ། ། མི་དང་མི་མ་ཡིན་པ་གདུག་པ་ཅན་རྣམས་ཀྱིས་ནམ་ཡང་གནོད་པ་བྱེད་པར་མི་འགྱུར་རོ། ། གྲུབ་པ་བརྒྱ་དང་སངས་རྒྱས་ཀྱང་སྟེར་བར་བྱེད་ན། གཞན་ལྟ་ཡང་ཅི་སྨོས་ཏེ། མཚན་འདི་དག་རིན་པོ་ཆེ་ དང་འདྲ་བར་བལྟ་བར་བྱའོ། །

འདི་ནི་དུས་གསུམ་སངས་རྒྱས་ཀྱིས། ། ཆེད་དུ་བརྗོད་པ་རིན་པོ་ཆེ། ། གདུག་པ་ཐམས་ཅད་འཇོམས་པར་བྱེད། ། དཔལ་དང་གཟི་བརྗིད་འཕེལ་བ་ཡིན། ། ཕྲིན་ལས་སྒོ་རྣམས་ཐོགས་པ་མེད། ། འདི་ནི་རྡོ་རྗེ་འཆང་ཡིན་པས། ། ཉིན་མཚན་དུས་གསུམ་ཀློག་པ་ཡི། ། ཕྱི་བཞིན་རྟག་ཏུ་སྲུང་བར་བྱེད། ། ནད་དང་གདོན་རྣམས་ཀུན་ལས་ཐར། ། སྨན་ཆེན་ཉེས་པ་ཐམས་ཅད་འཇོམས། འབྱུང་པོ་ཀུན་གྱིས་བཀུར་བ་སྟེ། ། མཛེས་མ་ཁྱོད་ལ་བསྟན་པ་ཡིན། ། འདི་ནི་རྣམ་དག་ལེགས་པའི་ལམ། ། སུ་ འཆང་ལག་ན་དཔལ་གནས་ཏེ། ། རྟག་ཏུ་མཚན་འདི་བརྗོད་པར་གྱིས། ། བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་མཚན་ཉི་ཤུ་རྩ་གཅིག་གིས་བསྟོད་པའི་ལེའུ་སྟེ་ཉི་ཤུ་པའོ། ། ། ། དཔའ་མོ་རྡོ་རྗེ་བདེ་མས་གསོལ་པ། རྡོ་རྗེ་འཆང་གི་རྒྱུད་འདི་བཤད་པ་དང་། སྦ་བ་དང་། ཇི་ལྟར་གཟུང་བའི་ཆོ་ག་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ། མཛེས་མ་ཁྱོད་ཀྱིས་ཞུས་པ་ལེགས། ། ཟག་མེད་བདེ་བའི་རྒྱུ་འབྱུང་མ། ། བདག་མེད་ཤེས་རབ་མ་ཡི་མཆོག ། ཁྱོད་ལ་ བཤད་ཀྱིས་ལེགས་པར་ཉོན། ། ཕྱི་མའི་དུས་སུ་ང་ཡི་རྒྱུད། ། གསང་བ་སྐུ་གསུང་ཐུགས་ཀྱི་གཏེར།

། བླ་མེད་རྒྱུད་རྒྱལ་རིན་ཆེན་འདི། ། བྱང་ཆུབ་སེམས་ལྡན་སྙིང་རྗེ་ཆེ། ། ཐོས་མང་ཤེས་རབ་མཆོག་ཏུ་གསལ། ། དད་པ་ཆེ་ཞིང་ལྷ་ལ་གུས། ། བླ་མ་བསྟེན་ཅིང་ དབང་བསྐུར་ཐོབ། ། དམ་ཚིག་སྡོམ་པ་མ་ལུས་ལྡན། ། བརྩོན་འགྲུས་ཆེ་ལ་གཞན་དོན་དཔའ། ། འཇིག་རྟེན་བདེ་ལ་མ་ཆགས་པས། ། རྒྱུད་འདི་མཉན་དང་བཤད་པར་བྱ། ། དེ་ལས་བཟློག་པའི་གང་ཟག་ལ། ། མིང་ཙམ་བསྟན་པར་མི་བྱའོ། ། གལ་ཏེ་བསྟན་པར་ གྱུར་པ་ན། ། སྔགས་པ་དམ་ཚིག་ཉམས་གྱུར་ཏེ། ། ནད་གདོན་འབྱུང་པོ་མ་ལུས་པས། ། ཉེ་བར་གཙེས་ཏེ་འཆི་བར་འགྱུར། ། དེ་ནས་མནར་མེད་སྡུག་བསྔལ་ནི། ། གྲངས་མེད་འདས་ཀྱང་ཐར་མི་འགྱུར། ། དེ་བས་གསང་བ་སྐུ་གསུང་ཐུགས། ། སྙིང་པོ་ དམ་པ་འདི་དག་ལ། ། རྒྱ་ཡིས་བཏབ་སྟེ་མཆོད་པ་དང་། ། བསྟོད་ཅིང་སྦ་བ་བྱས་གྱུར་ན། ། ཡིད་ལ་རེ་བ་ཀུན་རྫོགས་ཤིང་། ། འཇིག་རྟེན་ཐམས་ཅད་བདེ་བར་འགྱུར། ། གླེགས་བམ་སོར་ནི་བཅུ་དྲུག་ལ། ། རིམ་བདུན་བརྒྱ་ཡིས་བཏབ་ནས་ཀྱང་། ། རྟག་ཏུ་སྤྱི་བོའི་ གཙུག་ཏུ་གཟུང་། ། འདི་དང་བྲལ་བར་མ་གྱུར་ན། ། བསྙེན་པ་དེ་ཡིན་བསྒྲུབ་པ་དེ། ། སྒྲུབ་པ་ཆེན་པོའང་དེ་ཡིན་ཏེ། ། སྔགས་ཀྱང་དེ་ཡིན་ལྷ་ཡང་དེ། །

བླ་མ་དེ་ཡིན་སློབ་དཔོན་ཡང་། ། སངས་རྒྱས་ཆོས་དང་དགེ་འདུན་ཡང་། ། དེ་ཡིན་བསྐྱེད་དང་རྫོགས་པ་དེ། ། མ་ ལུས་དབང་ཡང་དེ་ཡིན་ཏེ། ། འཇིག་རྟེན་བྱ་བ་ཀུན་སྤངས་ནས། ། འདི་ལ་མཆོད་པར་གྱུར་པ་ནི། ། ཚོགས་གཞན་ཅི་ཡོད་རྨོངས་པའི་རྒྱུ། ། ཅི་ཕྱིར་འདི་ལ་འབད་མི་བྱེད། ། ཅེས་བཅོམ་ལྡན་འདས་ཀྱིས་གསུངས་ཏེ། ཡུམ་ལ་རྗེས་སུ་གཏད་པའི་དོན་བསྟན་པ་ནི། ། སངས་ རྒྱས་ཀུན་གྱི་ཡུམ་ཆེན་མོ། ། རྡོ་རྗེ་བདེ་མ་བདེ་སྟེར་མ། ། རྟོག་པ་གཅོད་མཛད་ཡུམ་ཁྱོད་ལ། ། རྒྱུད་འདི་གཏད་ཀྱིས་ལེགས་པར་ཟུང་། ། གཟུངས་མ་ཡིད་འོང་རྒྱལ་བའི་ས། ། རྣམ་དག་མཆོད་ཅིང་སྡུག་བསྔལ་འཇོམས། ། མ་ལུས་འགྲོ་བ་འདྲེན་པའི་དཔལ། ། རྡོ་རྗེ་ བདེ་མ་ཕྱག་འཚལ་ལོ། ། ཞེས་བསྟོད་ནས་རྒྱུད་གཏད་དོ། ། དེ་ནས་ཡུམ་གྱིས་རྗེས་བཟུང་སྟེ། ། དུས་གསུམ་བདེ་གཤེགས་མ་ལུས་པའི། ། ཐུགས་ཀྱི་སྲས་པོ་སྡེ་དཔོན་ཆེ། ། འཇིག་རྟེན་ཐམས་ཅད་འདུལ་མཛད་པ། ། དཔའ་བོ་ཁྱོད་ལ་ཕྱག་འཚལ་ལོ། ། གཏུམ་པོ་ དཔའ་བོ་འཇིགས་པར་བྱེད། ། ཀླུ་འདུལ་གཞན་གྱིས་མི་ཐུབ་པ། ། དྲག་པོ་འཇིགས་པར་བྱེད་པའི་ལྷ། ། རྡོ་རྗེ་གཏུམ་པོ་ཁྱོད་ཕྱག་འཚལ། །

ཞེས་བསྟོད་ནས་ཕྱག་དང་བསྐོར་བས་མཉེས་པར་བྱས་ནས། སླར་ཡབ་ཀྱི་ཐུགས་ཀའི་རྡོ་རྗེའི་ལྟེ་བར་ཐིམ་པར་གྱུར་ཏོ། ། དེ་ནས་ འཁོར་ཐམས་ཅད་ཀྱིས་མཆོད་པས་མཆོད་ཅིང་བསྟོད་པས་བསྟོད་དེ། གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་གསུངས་པ་ལེགས་སོ་ལེགས་སོ། ། ཞེས་མངོན་པར་མགྲིན་གཅིག་ཏུ་ཆེད་དུ་བརྗོད་པ་ཆེད་དུ་བརྗོད་དེ། རྡོ་རྗེ་འཆང་ཆེན་པོས་གསུངས་པ་ལ་མངོན་པར་ དགའ་ནས་ཡི་རངས་ཏེ་མངོན་པར་བསྟོད་པར་གྱུར་ཏོ། ། བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས། རྒྱུད་ཇི་ལྟར་བསྟན་ཅིང་སྦ་བ་དང་རྗེས་སུ་ཡི་རང་བའི་ལེའུ་སྟེ་ཉི་ཤུ་རྩ་གཅིག་པའོ། ། ། ། བཅོམ་ལྡན་འདས་ཕྱག་ན་རྡོ་རྗེ་ གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ཞེས་བྱ་བ་རྫོགས་སོ། ། ། ། རྒྱ་གར་གྱི་མཁན་པོ་ཝ་ལ་ཙནྡྲ་གུ་རུ་ཆེན་པོ་དང་། བོད་ཀྱི་ལོ་ཙྪ་བ་གླན་ཆུང་དར་མ་ཚུལ་ཁྲིམས་ཀྱིས་བྱང་ཕྱོགས་ཤམྦྷ་ལའི་དཔེ་དང་བསྟུན་ཏེ་བསྒྱུར་བའོ། ། སླད་ཀྱིས་ཡུལ་དབུས་ཀྱི་དཔེ་ དང་། ཁ་ཆེ་ནས་བྱུང་བ་དང་བསྟུན་ནས་ལེགས་པར་གཏན་ལ་ཕབ་པའོ། །