१ उपोद्घातः

नमो बुद्धाय

सर्वदा सर्वथा सर्वे यस्य दोषा न सन्ति ह / सर्वे सर्वाभिसारेण यत्र चावस्थिता गुणाः //

तमेव शरणं गन्तुं तं स्तोतुं तमुपासितुम् / तस्यैव शासने स्थातुं न्याय्यं यद्यस्ति चेतना //

सवासनाश्च ते दोषा न सन्त्येकस्य तायिनः / सर्वे सर्वविदः सन्ति गुणास्ते चानपायिनः //

न हि प्रतिनिविष्टो ऽपि मनोवाक्कायकर्मसु / सह धर्मेण लभते कश्चिद्भगवतो ऽन्तरम् //

सो ऽहं प्राप्य मनुष्यत्वं ससद्धर्ममहोत्सवम् / महार्णवयुगच्छिद्रकूर्मग्रीवार्पणोपमम् //

अनित्यताव्यनुसृतां कर्मच्छिद्रससंशयाम् / आत्तसारां करिष्यामि कथं नेमां सरस्वतीम् //

इत्यसंख्येयविषयानवेत्यापि गुणान्मुनेः / तदेकदेशप्रणयः क्रियते स्वार्थगौरवात् //

स्वयम्भुवे नमस्ते ऽस्तु प्रभूताद्भुतकर्मणे / यस्य संख्याप्रभावाभ्यां न गुणेष्वस्ति निश्चयः //

इयन्त इति नास्त्यन्त ईदृशा इति का कथा / पुण्या इत्येव तु गुणान्प्रति ते मुखरा वयम् //

उपोद्घातस्तवो नाम प्रथमः परिच्छेदः /

हेतुस्तवः

विषह्यमविषह्यं वेत्यवधूय विचारणाम् / स्वयमभ्युपपन्नं ते निराक्रन्दमिदं जगत् //

अव्यापारितसाधुस्त्वं त्वमकारणवत्सलः / असंस्तुतसखाश्च त्वमनवस्कृतबान्धवः //

स्वमांसान्यपि दत्तानि वस्तुष्वन्येषु का कथा / प्राणैरपि त्वया साधो मानितः प्रणयी जनः //

स्वैः शरीरैःशरीराणि प्राणैःप्राणाः शरीरिणाम् / जिघांसुभिरुपात्तानां क्रीतानि शतशस्त्वया //

न दुर्गतिभ्यां नेष्टा[भ्या] मभिप्रार्थयता गतिम् / केवलाशयशुद्धयैव शोलं सात्मीकृतं त्वया //

जिह्माअनां नित्यविक्षेपादृजूनां नित्यसेवनात् / कर्मणां परिशुद्धानां त्वमेकायनतां गतः //

पीडयमानेन बहुशस्त्वया कल्याणचेतसा / क्लेशेषु विवृतं तेजो जनः क्लिष्टो ऽनुकम्पितः //

परार्थे त्यजतः प्राणान् या प्रीतिरभवत् तव / न सा नष्टोपलब्धेषु प्राणेषु प्राणिनां भवेत् //

यद्रुजा निरपेक्षस्य च्छिद्यमानस्य ते ऽसकृत् / वधकेष्वपि सत्त्वेषु कारुण्यमभवत् प्रभो //

सम्यक्सम्बोधिबीजस्य चित्तरत्नस्य तस्य ते / त्वमेव वीर सारज्ञो दूरे तस्येतरो जनः //

नाकृत्वा दुष्करं कर्म दुर्लभं लभ्यते पदम् / इत्यात्मनिरपेक्षेण वीर्यं संवर्धितं त्वया //

विशेषोत्कर्षनियमो न कदाचिदभूत् तव / अतस्त्वयि विशेषाणां छिन्नस्तरतमक्रमः //

सुसुखेष्वपि सङ्गो ऽभूत् सफलेषु समाधिषु / न ते नित्यानुबद्धस्य महाकरुणया हृदि //

त्वादृशान् पीडयत्येव नानुगृह्णाति तत् सुखम् / प्रणीतमपि सद्वृत्त यदसाधारणं परैः //

विमिश्रात् सारमादत्तं सर्वं पीतमकल्मषम् / त्वया सूक्तं दुरुक्तं तु विषवत् परिवर्जितम् //

क्रीणता रत्नसारज्ञ प्राणैरपि सुभाषितम् / पराक्रान्तं त्वया बोधौ तासु तासूपपत्तिषु //

इति त्रिभिरसंख्येयैरेवमुद्यच्छता त्वया / व्यवसायद्वितीयेन प्राप्तं पदमनुत्तरम् //

हेतुस्तवो नाम द्वितीयः परिच्छेदः /

३ निरुपमस्तवः

अकृत्वेर्ष्यां विशिष्टेषु हीनाननवमत्य च / अगत्वा सदृशैः स्पर्धां त्वं लोके श्रेष्ठतां गतः //

हेतुष्वभिनिवेशो ऽभूद् गुणानां न फलेषु ते / तेन सम्यक्प्रतिपदा त्वयि निष्ठां गुणा गताः //

तथात्मा प्रचयं नीतस्त्वया सुचरितैर्यथा / पुण्यायतनतां प्राप्तान्यपि पादरजांसि ते //

कर्शयित्वोद्धृता दोषा वर्धयित्वा विशोधिताः / गुणास्तेन सुनीतेन परां सिद्धिं त्वमध्यगाः //

तथा सर्वाभिसारेण दोषेषु प्रहृतं त्वया / यथैषामात्मसन्ताने वासनापि न शेषिता //

तथा संभृत्य संभृत्य त्वयात्मन्याहिता गुअणाः / प्रतिरुपकमप्येषां यथा नान्यत्र दृश्यते //

उपघातावरणवन्मितकालं प्रदेशि च / सुलभातिशयं सर्वमुपमावस्तु लौकिकम् //

अद्वन्द्विनामगम्यानां ध्रुवाणामनिवर्तिनाम् / अनुत्तराणां का तर्हि गुणानामुपमा ऽस्तु ते //

गोष्पदोत्तानतां याति गाम्भीर्यं लवणाम्भसः / यदा ते बुद्धिगाम्भीर्यमगाधापारमीक्ष्यते //

शिरीषपक्ष्माग्रलघु स्थैर्यं भवति पार्थिवम् / अकम्प्ये सर्वधर्माणां त्वत्स्थैर्ये ऽभिमुखीकृते //

अज्ञानतिमिरघ्नस्य ज्ञानालोकस्य ते मुने / न रविर्विषये भूमिं खाद्योतिमपि विन्दति //

मलिनत्वमिवायान्ति शरच्चन्द्राम्बराम्भसाम् / तव वाग्बुद्धिचेष्टानां शुद्धिं प्रति विशुद्धयः //

अनेन सर्वं व्याख्यातं यत् किञ्चित्साधु लौकिकम् / दूरे हि बुद्धधर्माणां लोकधर्मास्तपस्विनः //

यस्यैव धर्मरत्नस्य प्राप्त्या प्राप्तस्त्वमग्रताम् / तेनैव केवलं साधो साम्यं ते तस्य च त्वया //

आत्मेच्छाच्छलमात्रं तु सामान्योपांशु किंचन / यत्रोपक्षिप्य कथ्येत सा वक्तुरतिलोलता //

निरुपमस्तवो नाम तृतीयः परिच्छेदः /

४ अद्भुतस्तवः

प्रतन्विव हि पश्यामि धर्मतामनुचिन्तयन् / सर्वं चावर्जितं मारविजयं प्रति ते जगत् //

महतो ऽपि हि संरम्भात् प्रतिहन्तुं समुद्यताः / क्षमाया नातिभारो ऽस्ति पात्रस्थाया विशेषतः //

यत्तु मारजयान्वक्षं सुमहत्क्लेशवैशसम् / तस्यामेव कृतं रात्रौ तदेव परमाद्भुतम् //

तमोविधमने भानोर्यः सहस्रांशुमालिनः / वीर विस्मयमागच्छेत् स तीर्थ्यविजये तव //

सरागो वीतरागेण जितरोषेण रोषणः / मूढो विगतमोहेन त्रिभिर्नित्यं जितास्त्रयः //

प्रशंससि च सद्धर्मानसद्धर्मान् विगर्हसि / अनुरोधविरोधौ च न स्तः सदसतोस्तव //

नैवार्हत्सु न तीर्थ्येषु प्रतिघानुनयं प्रति / यस्य ते चेतसो ऽन्यत्वं तस्य ते का स्तुतिर्भवेत् //

गुणेष्वपि न संगो ऽभूत् तृष्णा न गुणवत्स्वपि / अहो ते सुप्रसन्नस्य सत्त्वस्य परिशुद्धता //

इन्द्रियाणां प्रसादेन नित्यकालानपायिना / मनो नित्यप्रसन्नं ते प्रत्यक्षमिव दृश्यते //

आबालेभ्यः प्रसिद्धास्ते मतिस्मृतिविशुद्धयः / गमिता भावपिशुनैः सुव्याहृतसुचेष्टितैः //

अद्भुतस्तवो नाम चतुर्थः परिच्छेदः /

५ रुपस्तवः

उपशान्तं च कान्तं च दीप्तमप्रतिघाति च / निभृतं चोर्जितं चेदं रुपं कमिव नाक्षिपेत् //

येनापि शतशो दृष्टं यो ऽपि तत्पूर्वमीक्षते / रुपं प्रीणाति ते चक्षुः समं तदुभयोरपि //

असेचनकभावाद्धि सौम्यभावाच्च ते वपुः / दर्शने दर्शने प्रीतिं विदधाति नवां नवाम् //

अधिष्ठानगुणैर्गात्रमधिष्ठातृगुणैर्गुणः / परया संपदोपेतास्तवान्योन्यानुरुपया //

क्वान्यत्र सुनिविष्टाः स्युरिमे ताथागता गुणाः / ऋते रुपात्तवैवास्माल्लक्षणव्यञ्जनोज्ज्वलात् //

धन्यमस्मीति ते रुपं वदतीवाश्रितान् गुणान् / सुनिक्षिप्ता वयमिति प्रत्याहुरिव तद्गुणाः //

रुपस्तवो नाम पञ्चमः परिच्छेदः /

६ करुणास्तवः

सर्वमेवाविशेषेण क्लेशैर्बद्धमिदं जगत् / त्वं जगत्क्लेशमोक्षार्थं बद्धः करुणया चिरम् //

कं नु प्रथमतो वन्दे त्वां महाकरुणामुत / ययैवमपि दोषज्ञस्त्वं संसारे धृतश्चिरम् //

विवेकसुखसात्म्यस्य यदाकीर्णस्य ते गताः / काला लब्धप्रसरया तत् ते करुणया कृतम् //

शान्तादरण्याद् ग्रामान्तं त्वं हि नाग इव ह्रदात् / विनेयार्थं करुणया विधयेवावकृष्यसे //

परमोपशमस्थो ऽपि करुणापरवत्तया / कारितस्त्वं पदन्यासं कुशीलवकलास्वपि //

ऋद्धिर्या सिंहनादा ये स्वगुणोद्भावनाश्च याः / वान्तेच्छोपविचारस्य कारुण्यनिकषः स ते //

परार्थैकान्तकल्याणी कामं स्वाश्रयनिष्ठुरा / त्वय्येव केवलं नाथ करुणा करुणाभवत् //

तथा हि कृत्वा शतधा धीरा बलिमिव क्वचित् / परेषामर्थसिद्धयर्थं त्वां विक्षिप्तवती दिशः //

त्वदिच्छयैव तु व्यक्तमनुकूला प्रवर्तते / तथा हि बाधमानापि त्वां सती नापराध्यते //

करुणास्तवो नाम षष्ठःपरिच्छेदः /

७ वचनस्तवः

सुपदानि महार्थानि तथ्यानि मधुराणि च / गूढोत्तानोभयार्थानि समासव्यासवन्ति च //

कस्य न स्यादुपश्रुत्य वाक्यान्येवंविधानि ते / त्वयि प्रतिहतस्यापि सर्वज्ञ इति निश्चयः //

प्रायेण मधुरं सर्वमगत्या किञ्चिदन्यथा / वाक्यं तवार्थसिद्धया तु सर्वमेव सुभाषितम् //

यच्छ्लक्षणं यच्च परुषं यद्वा तदुभयान्वितम् / सर्वमैवैकरसतां विमर्दे याति ते वचः //

अहो सुपरिशुद्धानां कर्मणां नैपुणं परम् / यैरिदं वाक्यरत्नानामीदृशं भाजनं कृतम् //

अस्मद्धि नेत्रसुभगादिदं श्रुतिमनोहरम् / मुखात् क्षरति ते वाक्यं चन्द्राद्द्रवमिवामृतम् //

रागरेणुं प्रशमयद्वाक्यं ते जलदातये / वैनतेयायते द्वेषभुजङ्गोद्धरणं प्रति //

दिवाकरायते भूयो ऽप्यज्ञानतिमिरं नुदत् / शक्रायुधायते मानगिरीनभिविदारयत् //

दृष्टार्थत्वादवितथं निष्क्लेशत्वादनाकुलम् / गमकं सुप्रयुक्तत्वात् त्रिकल्याणं हि ते वचः //

मनांसि तावच्छ्रोतॄणां हरन्त्यादौ वचांसि ते / ततो विमृश्यमानानि रजांसि च तमांसि च //

आश्वासनं व्यसनिनां त्रासनं च प्रमादिनाम् / संवेजनं च सुखिनां योगवाहि वचस्तव //

विदुषां प्रीतिजननं मध्यानां बुद्धिवर्धनम् / तिमिरघ्नं च मन्दानां सार्वजन्यमिदं वचः //

अपकर्षति दृष्टिभ्यो निर्वाणमुपकर्षति / दोषान् निष्कर्षति गुणान् वाक्यं ते ऽभिप्रवर्षति //

सर्वत्राव्याहता बुद्धिः सर्वत्रोपस्थिता स्मृतिः / अवन्ध्यं तेन सर्वत्र सर्वं व्याकरणं तव //

यन्नादेशे न चाकाले नैवापात्रे प्रवर्तसे / वीर्यं सम्यगिवारब्धं तेनामोघं वचस्तव //

वचनस्तवो नाम सप्तमः परिच्छेदः /

८ शासनस्तवः

एकायनं सुखोपायं स्वनुवन्धि निरत्ययम् / आदिमध्यान्तकल्याणं तव नान्यस्य शासनम् //

एवमेकान्तकान्तं ते दृष्टिरागेण बालिशाः / मतं यदि विगर्हन्ति नास्ति दृष्टिसमो रिपुः //

अनवभुङ्क्था यदस्यार्थे जगतो व्यसनं बहु / तत् संस्मृत्य विरुपे ऽपि स्थेयं ते शासने भवेत् //

प्रागेव हितकर्तुश्च हितवक्तुश्च शासनम् / कथं न नाम कार्यं स्यादादीप्तशिरसापि ते //

भुजिष्यता बोधिसुखं त्वद्गुणापचितिः शमः / प्राप्यते त्वन्मतात् सर्वमिदं भद्रचतुष्टयम् //

त्रासनं सर्वतीर्थ्यानां नमुचेरुपतापनम् / आश्वासनं नृदेवानां तवेदं वीर शासनम् //

त्रैधातुकमहाभौममसङ्गमनवग्रहम् / शासनेन तवाक्रान्तमन्तकस्यापि शासनम् //

त्वच्छासननयज्ञो हि तिष्ठेत् कल्पमपीच्छया / प्रयाति तत्र तु स्वैरी यत्र मृत्योरगोचरः //

आगमस्यार्थचिन्ताया भावनोपासनस्य च / कालत्रयविभागो ऽस्ति नान्यत्र तव शासनात् //

एवं कल्याणकलितं तदेवमृषिपुङ्गव / शासनं नाद्रियन्ते यत् किं वैशसतरं ततः //

शासनस्तवो नामाष्टमः परिच्छेदः /

९ प्रणिधिस्तवः

श्रवणं तर्पयति ते प्रसादयति दर्शनम् / वचनं ह्लादयति ते विमोचयति शासनम् //

प्रसूतिर्हर्षयति ते वृद्धिर्नन्दयति प्रज्ञाः / प्रवृत्तिरनुगृह्णाति निवृत्तिरुपहन्ति च //

कीर्तनं किल्बिषहरं स्मरणं ते प्रमोदनम् / अन्वेषणं मतिकरं परिज्ञानं विशोधनम् //

श्रीकरं ते ऽभिगमनं सेवनं धीकरं परम् / भजनं निर्भयकरं शंकरं पर्युपासनम् //

शीलोपसम्पदा शुद्धः प्रसन्नो ध्यानसम्पदा / त्वं प्रज्ञासम्पदा ऽक्षोभ्यो ह्रदः पुण्यमयो महान् //

रुपं द्रष्टव्यरत्नं ते श्रव्यरत्नं सुभाषितम् / धर्मो विचारणारत्नं गुणरत्नाकरो ह्यसि //

त्वमोघैरुह्यमानानां द्वीपस्त्राणं क्षतात्मनाम् / शरणं भवभीरुणां मुमुक्षूणां परायणम् //

सत्पात्रं शुद्धवृत्तत्वात् सत्क्षेत्रं फलसम्पदा / सन्मित्रं हितकारित्वात् सर्वप्राणभृतामसि //

प्रियस्त्वमुपकारित्वात् सुरतत्वान्मनोहरः / एकान्तकान्तः सौम्यत्वात् सर्वैर्बहुमतो गुणैः //

हृद्यो ऽसि निरवद्यत्वाद्रम्यो वागरुपसौष्ठवात् / धन्यः सर्वार्थसिद्धत्वान्माङ्गल्यो गुणसंश्रयात् //

प्रणिधिस्तवो नाम नवमः परिच्छेदः /

१० मार्गावतारस्तवः

स्थायिनां त्वं परिक्षेप्ता विनियन्तापहरिणाम् / समाधाता विजिह्मानां प्रेरको मन्दगामिनाम् //

नियोक्ता धुरि दान्तानां खटुङ्कानामुपेक्षकः / अतो ऽसि नरदम्यानां सत्सारथिरनुत्तरः //

आपन्नेष्वनुकम्पा ते प्रस्वस्थेष्वर्थकामता / व्यसनस्थेषु कारुण्यं सर्वेषु हितकामता //

विरुद्धेष्वपि वात्सल्यं प्रवृत्तिः पतितेष्वपि / रौद्रेष्वपि कृपालुत्वं का नामेयं तवार्यता //

गुरुत्वमुपकारित्वान्मातापित्रोर्यदीष्यते / केदानीमस्तु गुरुता त्वय्यत्यन्तोपकारिणि //

स्वकार्यनिरपेक्षाणां विरुद्धानामिवात्मनाम् / त्वं प्रपाततटस्थानां प्राकारत्वमुपागतः //

लोकद्वयोपकाराय लोकातिक्रमणाय च / तमोभूतेषु लोकेषु प्रज्ञालोकः कृतस्त्वया //

भिन्ना देवमनुष्याणामुपभोगेषु वृत्तयः / धर्मसम्भोगसामान्यात्त्वय्यसम्भेदमागताः //

उपपत्तिवयोवर्णदेशकालनिरत्ययम् / त्वया हि भगवन् धर्मसर्वातिथ्यमिदं कृतम् //

अविस्मितान् विस्मितवत्स्पृहयन्तो गतस्पृहान् / उपासते प्राञ्जलयः श्रावकानपि ते सुराः //

अहो संसारमण्डस्य बुद्धोत्पादस्य दीप्तता / मानुष्यं यत्र देवानां स्पृहणीयत्वमागतम् //

मार्गावतारस्तवो नाम दशमः परिच्छेदः /

११ दुष्करस्तवः

खेदः शमसुखज्यानिरसज्जनसमागमः / द्वन्द्वान्याकीर्णता चेति दोषान् गुणवदुद्वहन् //

जगद्धितार्थं घटसे यदसङ्गेत चेतसा / का नामासौ भगवति बुद्धानां बुद्धधर्मता //

कदन्नान्यपि भुक्तानि क्वचित्क्षुदधिवासिता / पन्थानो विषमाः क्षुण्णाः सुप्तं गोकण्टकेष्वपि //

प्राप्ताः क्षेपावृताः सेवा वेषभाषान्तरं कृतम् / नाथ वैनेयवात्सल्यात् प्रभुणापि सता त्वया //

प्रभूतमपि ते नाथ सदा नात्मनि विद्यते / वक्तव्य इव सर्वैर्हि स्वैरं स्वार्थे नियुज्यसे //

येन केन चिदेव त्वं यत्र तत्र यथा तथा / चोदितः स्वां प्रतिपदं कल्याणीं नातिवर्तसे //

नोपकारपरे ऽप्येवमुपकारपरो जनः / अपकारपरे ऽपि त्वमुपकारपरो यथा //

अहितावहिते शत्रौ त्वं हितावहितः सुहृत् / दोषान्वेषणनित्ये ऽपि गुणान्वेषणतत्परः //

यतो निमन्त्रणं ते ऽभूत् सविषं सहुताशनम् / तत्राभूदभिसंयानं सदयं सामृतं च ते //

अक्रोष्टारो जिताः क्षान्त्या द्रुग्धाः स्वस्त्ययनेन च / सत्येन चापवक्तारस्त्वया मैत्र्या जिघांसवः //

अनादिकालप्रहता बहृयः प्रकृतयो नृणाम् / त्वया विभावितापायाः क्षणेन परिवर्तिताः //

दुष्करस्तवो नामैकादशः परिच्छेदः /

१२ कौशलस्तवः

यत्सौरत्यं गतास्तीक्ष्णाः कदर्याश्च वदान्यताम् / क्रुराः पेशलतां यातास्तत् तवोपायकौशलम् //

इन्द्रियोपशमो नन्दे मानस्तब्धे च संनतिः / क्षमित्वं चाङ्गुलीमाले कं न विस्मयमानयेत् //

बहवस्तृणशय्यासु हित्वा शय्यां हिरण्मयीम् / अशेरत सुखं धीरास्तृप्ता धर्मरसस्य ते //

पृष्टेनापि क्वचिन्नोक्तमुपेत्यापि कथा कृता / तर्षयित्वा परत्रोक्तं कालाशयविदा त्वया //

पूर्वं दानकथाद्याभिश्चेतस्युत्पाद्य सौष्ठवम् / ततो धर्मो गतमले वस्त्रे रङ्ग इवार्पितः //

न सो ऽस्त्युपायः शक्तिर्वा येन न व्यायतं तव / घोरात् संसारपातालादुद्धर्तृं कृपणं जगत् //

बहूनि बहुरुपाणि वचांसि चरितानि च / विनेयाशयभेदेन तत्र तत्र गतानि ते //

विशुद्धान्यविरुद्धानि पूजितान्यर्चितानि च / सर्वाण्येव नृदेवानां हितानि महितानि च //

न हि वक्तुं च कर्तुं च बहु साधु च शक्यते / अन्यथानन्यथावादिन् दृष्टं तदुभयं त्वयि //

केवलात्मविशुद्धयैव त्वया पूतं जगद्भवेत् / यस्मान्नैवंविधं क्षेत्रं त्रिषु लोकेषु विद्यते //

प्रागेवात्यन्तनष्टानामनादौ भवसंकटे / हिताय सर्वसत्त्वानां यस्त्वमेवं समुद्यतः //

कौशलस्तवो नाम द्वादशः परिच्छेदः /

१३ आनृण्यस्तवः

न तां प्रतिपदं वेद्मि स्याद्ययापचितिस्तव / अपि ये परिनिर्वान्ति ते ऽपि ते नानृणा जनाः //

तव ते ऽवस्थिता धर्मे स्वार्थमेव तु कुर्वते / यः श्रमस्तन्निमित्तं तु तव का तस्य निष्कृतिः //

त्वं हि जागर्षि सुप्तानां संतानान्यवलोकयन् / अप्रमत्तः प्रमत्तानां सत्त्वानां भद्रबान्धवः //

क्लेशानां वध आख्यातो मारमाया विघाटिता / उक्तं संसारदौरात्म्यमभया दिग्विदर्शिता //

किमन्यदर्थकामेन सत्त्वानां करुणायता / करणीयं भवेद् यत्र न दत्तानुनयो भवान् //

यदि संचारिणो धर्माः स्युरिमे नियतं त्वया / देवदत्तमुपादाय सर्वत्र स्युर्निवेशिताः //

अत एव जगन्नाथ नेहान्यो ऽन्यस्य कारकः / इति त्वमुक्तवान् भूतं जगत् संज्ञापयन्निव //

चिराय भुवि सद्धर्मं प्रेर्य लोकानुकम्पया / बहूनुत्पाद्य सच्छिष्यांस्त्रैलोक्यानुग्रहक्षमान् //

साक्षाद्विनेयवर्गीयान् सुभद्रान्तान् विनीय च / ऋणशेषं किमद्यापि सत्त्वेषु यदभूत् तव //

यस्त्वं समाधिवज्रेण तिलशो ऽस्थीनि चूर्णयन् / अतिदुष्करकारित्वमन्ते ऽपि न विमुक्तवान् //

परार्थावेव मे धर्मरुपकायाविति त्वया / दुष्कुहस्यास्य लोकस्य निर्वाणे ऽपि निदर्शितम् //

तथाहि सत्सु संक्राम्य धर्मकायमशेषतः / तिलशो रुपकायं च भित्त्वासि परिनिर्वृतः //

अहो स्थितिरहो वृत्तमहो रुपमहो गुणाः / न नाम बुद्धधर्माणामस्ति किञ्चिदनद्भुतम् //

उपकारिणि चक्षुष्ये शान्तवाक्कायकर्मणि / त्वय्यपि प्रतिहन्यन्ते पश्य मोहस्य रौद्रताम् //

पुण्योदधिं रत्ननिधिं धर्मराशिं गुणाकरम् / ये त्वां सत्त्वा नमस्यन्ति तेभ्यो ऽपि सुकृतं नमः //

अक्षयास्ते गुणा नाथ शक्तिस्तु क्षयिणी मम / अतः प्रसङ्गभीरुत्वात् स्थीयते न वितृप्तितः //

अप्रमेयमसंख्येयमचिन्त्यमनिदर्शनम् / स्वयमेवात्मनात्मानं त्वमेव ज्ञातुमर्हसि //

न ते गुणांशावयवो ऽपि कीर्तितः परा च नस्तुष्टिरवस्थिता हृदि / अकर्शनेनैव महाह्रदाम्भसां जनस्य तर्षाः प्रशमं व्रजन्ति ह //

फलोदयेनास्य शुभस्य कर्मणो मुनिप्रसादप्रतिभोद्भवस्य मे / असद्वितर्काकुलमारुतेरितं प्रयातु चित्तं जगतां विधेयताम् //

आनृण्यस्तवो नाम त्रयोदशमः परिच्छेदः /

अध्यर्धशतकं समाप्तम् / कृतिराचार्यमातृचेटस्य //

ओम् नम आदिबुद्धाय

नमस्ते बुद्धरूपाय धर्मरूपाय ते नमः / नमस्ते संघरूपाय पञ्चबुद्धात्मने नमः //

पृथ्वीरूपायाब्रूपाय तेजोरूपाय ते नमः / नमस्ते वायुरूपायाकाशरूपाय ते नमः //

ब्रह्मणेसत्त्वरूपाय रजोरूपाय विष्णवे / तमोरूपमहेशाय ज्ञानरूपाय ते नमः //

प्रज्ञोपायात्मरूपाय गुह्यरूपाय ते नमः / दिग्रूपलोकपालाय विश्वरूपाय ते नमः //

चक्षूरूपाय कर्णाय घ्राणरूपाय जिह्वके / कायरूपाय श्रीधर्मरूपाय मनसे नमः //

नमस्ते रूपरूपाय रसरूपाय ते नमः / गन्धरूपशब्दरूपस्पर्शरूपाय ते नमः //

धर्मरूपधारकाय षडिन्द्रियात्मने नमः / मांसास्थिमेदमज्जानां संघातरूपिणे नमः //

रूपाय जङ्गमानां ते स्थावराणां च मुर्तये / तिरश्चां मोहरूपाय रूपायाश्चर्यमूर्तये //

सृष्टिकर्त्रे जन्मरूप कालरूपाय मृत्यवे / भव्याय वृद्धरूपाय बालाय ते नमो नमः //

प्राणापानसमानोदानव्यानमूर्तये नमः / वर्णापवर्णरूपाय भोक्त्रे तन्मूर्तये नमः //

दिनरूपाय सूर्याय चन्द्राय रात्रिरूपिणे / तिथिरूपाय नक्षत्रयोगवारादिमुर्तये //

बाह्याभ्यन्तररूपाय लौकिकाय नमोनमः / नैर्वाणाय नमस्तुभ्यं बहुरूपाय ते नमः //

आदिबुद्धद्वादशकं पुण्यं प्रातः पठिष्यति / यदिच्छति लभेन्नूनं मनुजो नित्यनिश्चयः //

श्रीमञ्जुश्रीकृतमादिबुद्धद्वादशकस्तोत्रं समाप्तम् //

ओम् नमो बुद्धाय

आकाशगर्भ सत्त्वार्थ महासत्त्व महाद्युते / महारत्न सुरत्नाग्र्य वज्ररत्न नमो ऽस्तु ते //

अभिषेकमहारत्न महाशुद्ध महाशुभ / बुद्धरत्न विशुद्धाङ्ग रत्नरत्न नमो ऽस्तु ते //

आकाशाकाशसंभूत सर्वाकाश महानभ / आकाशधातुसर्वाश सर्वाशाग्र्य नमो ऽस्तु ते //

रत्नसंभव रत्नोर्ण बुद्धोर्ण सुतथागत / सर्वरत्न सुसर्वाग्र्य रत्नकार्य नमो ऽस्तु ते //

रत्नरत्नाग्र्य रत्नोग्र रत्नसर्व तथागत / रत्नोत्तम महाकाश समाकाश नमो ऽस्तु ते //

अलङ्कारमहाशोभ शोभाकर सुशोभक / शुद्धसर्वार्थ शुद्धार्थ दानचर्य नमो ऽस्तु ते //

धर्मरत्न विशुद्धाग्र्य सङ्घरत्न तथागत / महाभिषेक लोकार्थ प्रमोदार्थ नमो ऽस्तु ते //

दान प्रदान दानाग्र्य त्याग त्यागाग्र्य दायक / सर्वसत्त्वार्थ तत्त्वार्थ महार्थार्थ नमो ऽस्तु ते //

चिन्ताराज महातेज दानपारमितानय / तथागत महासत्त्व सर्वबुद्ध नमो ऽस्तु ते //

तथागत महारत्न तथागत महाप्रभ / तथागत महाकेतो महाहास नमो ऽस्तु ते //

तथागताभिषेकाज्ञ महाभिषेक महाविभो / लोकनाथ त्रिलोकाग्र्य लोकसूर्य नमो ऽस्तु ते //

रत्नाधिकाधिकतर रत्नभूषण रत्नधृक् / रत्नालोक महालोक रत्नकीर्ते नमो ऽस्तु ते //

रत्नोत्कर सुरत्नोत्थ मणे वज्रमणे गुण / रत्नाकर सुदीप्ताङ्ग सर्वरत्न नमो ऽस्तु ते //

महात्मयष्टि रत्नेश सर्वाशापरिपूरक / सर्वाभिप्रायसंप्राप्तिरत्नराशि नमो ऽस्तु ते //

अभ्वग्र्य व्यापि सर्वात्म वरप्रद महावर / विभूते सर्वसंपत्ते वज्रगर्भं नमो ऽस्तु ते //

यः कश्चिद् धारयेन् नाम्नामिदन्ते ऽष्टशतं शिवम् / सर्वबुद्धाभिषेकं तु स प्राप्नोत्यनघः क्षणात् //

श्री आकाशगर्भनामाष्टशताध्येषणास्तोत्रं संपूर्णम् //

प्रणिपत्य मुनिं मूर्ध्ना सुप्रसन्नेन चेतसा / वक्ष्याम्यद्य च नामानि संबुद्धैरनुवर्णितम् //

सुरुपो रूपधारी च सर्वरूपो ह्यनुत्तरः / सर्वलक्षणसम्पूर्णो मञ्जुश्रीरुत्तमः श्रिया //

अचिन्त्यश्चिन्त्यविगतो ऽचिन्त्यो ऽद्भुतविक्रमः / अचिन्त्यः सर्वधर्माणामचिन्त्यो मनसस्तथा //

शून्यताभावितात्माकः शून्यधर्मसमन्वितः / शून्यस्त्वमधिमुक्तिश्च शून्यत्रिभवदेशकः //

सर्वज्ञः सर्वदर्शी च सर्वभूमिपतिर्विभुः / मञ्जुश्रीवशवर्ती च पद्माक्षः पद्मसंभवः //

पद्मकिञ्जल्कवर्णश्च पद्मपर्यङ्कवासनः / नीलोत्पलधरः पूतः पवित्रः शान्तमानसः //

प्रत्येकबुद्धो बुद्धस्त्वमादिबुद्धो निरुच्यसे / ऋद्धिमान् वशिताप्राप्तश्चतुःसत्योपदेशकः //

लोकपालः सहस्राक्ष ईश्वरस्त्वं प्रजापतिः / शिवस्त्वं सर्वभूतानां त्वं विभुर्गुणसागरः //

ऋषिस्त्वं पुण्यः श्रेष्ठश्च ज्येष्ठो जातिस्मरस्तथा / विनायको विनेता च जिनपुत्रो जिनात्मजः //

भानुः सहस्ररश्मिमस्त्वं सोमस्त्वं च बृहस्पतिः / धनदो वरुणश्चैव त्वं विष्णुस्त्वं महेश्वरः //

अनन्तो नागराजस्त्वं स्कन्दः सेनापतिस्तथा / वेमचित्रासुरेन्द्रस्त्वं भौमः शुक्रो बुधस्तथा //

सर्वदेवमयो वीरः सर्वदेवैर्नमस्कृतः / लोकधर्ममलातीतस्त्वं लोके चाग्रपुद्गलः //

लोकज्ञो लोकविज्ञातो ज्ञानिनां प्रवरो वरः / वरदो लयनं त्राणमधृष्यो मारकर्मिणाम् //

गम्भीरश्चानवद्यश्च कल्याणमित्रसंपदः / वैद्यस्त्वं शल्यहर्ता न नरदम्यः सुसारथिः //

मतिमान् गतिमांश्चैव बुद्धिमांश्च विचक्षणः / पुण्यवान् कल्पवृक्षश्च बोध्यङ्गपुष्पमण्डितः //

विमुक्तिफलसंपन्न आश्रयः सर्वदेहिनाम् / मनोहरो मनोज्ञश्च अनघो ब्रह्मचारिणाम् //

केतुस्त्वं ग्रहश्रेष्ठश्च ऋषिभिर्मुनिपुङ्गवः / युवराज्ञाभिषिक्तस्त्त्वं दशभूमीश्वरः प्रभुः //

सार्थवाहो गणश्रेष्ठो निर्वाणोत्तमदेशकः / खसमो मध्यकल्पस्त्वं त्वं तेजो वायुरेव च //

चिन्तामणिस्त्वं सत्त्वानां सर्वाशापरिपूरकः / नमो ऽस्तु ते महाविद्य सर्वभूतनमस्कृत //

श्रीआर्यमञ्जुश्रीनामाष्टोत्तरशतकस्तोत्रं समाप्तम् //

ओम् नमो भगवत्यै आर्यश्री-एकविंशतितारायै

नमस्तारे तुरे वीरे क्षणद्युतिनिभेक्षणे / त्रैलोक्यनाथवक्त्राब्जविकसत्कमलोद्भवे //

नमः शतशरच्चन्द्रसंपूर्णेव वरानने / तारासहस्रकिरणैः प्रहसत्किरणोज्ज्वले //

नमः कनकनीलाब्जपाणिपद्मविभूषिते / दानवीर्यतपःशा(क्षा)न्तितितिक्षाध्यानगोचरे //

नमस्तथागतोष्णीषविजयानन्तचारिणि / शेषपारमिताप्राप्तजिनपुत्रनिषेविते //

नमस्तुतारहुंकारपूरिताशादिगन्तरे / सप्तलोकक्रमाक्रा[न्ते] अशेषकरुणा(णे)क्षणे //

नमः शक्रानलब्रह्ममरुद्विश्वेश्वरार्चिते / भूतवेतालगन्धर्वगणयक्षपुरस्कृते //

नमः स्त्रदिति फट्कार परजत्र(यन्त्र)प्रमर्दिनि / प्रत्यालीढपदन्यासे शिखी(खि)ज्वालाकुलोज्ज्वले //

नमस्तुरे महाघोरे मालवीरविनाशिनि / भृकुटीकृतवक्त्राब्जसर्वशत्रुनिसुन्दनी(षूदिनि) //

नमः स्त्रीरत्नमुद्राङ्कहृदयाङ्गुलिभूषिते / भूषिताशेषदिक्चक्रनिकरस्वकराकुले //

नमः प्रमुदिताशेषमुक्ताक्षीरप्रसारिणि / हसत्प्रहसतुत्तारे मारलोलवशङ्करि //

नमः समन्तभूपालपत(ट)लाकर्षण(णे)क्षणे / चरभृकुटिहूंकारसर्वापदविमोचनी(चिनि) //

नमः श्रीखण्डखण्डेन्दु[सु]मुक्ताभरण(णो)ज्ज्वले / अमिताभजिताभारभासुरे किरणोद्ध्रुवे(द्धुरे) //

नमः कल्पान्तहुतभुगज्वालामालान्तरे(र)स्थिते / आलीढमुदि(द्रि)ताबद्धरिपुचक्रविनाशिनी(नि) //

नमः करतरा(ला)घाट(त)चरणाहतभूतले / भृकुटीकृतहुंकारसप्तपातालभेदिनी(नि) //

नमः शिवे शुभे शान्ते शान्तनिर्वाणगोचरे / स्वाहाप्रणवसंयुक्ते महापातकनाशनी(शिनि) //

नमः प्रमुदिताबद्धरिगात्रप्रभेदिनि / दशाक्षरपदन्यासे विद्याहुंकारदीपिते //

नम[स्तारे] तुरे पादघातहुंकारवीजिते / मेरुमण्डलकैलाशभुवनत्रयचारिणी(णि) //

नमः सुरे स(श)राकारहरिणाङ्ककरे(र)स्थिते / हरिद्विरुक्तफट्कार(रे) अशेषविषनाशिणी(नि) //

नमः सुरासुरगणयक्षकिन्नरसेविते / अबुद्धमुदिताभोगकरी(रि) दुःस्वप्ननाशिनी(नि) //

नमश्चन्द्रार्कसम्पूर्णनयनद्युतिभास्वरे / ताराद्विरुक्ततुत्तारे विषमज्वल(र)नाशिनि //

नमः स्त्रीतत्त्वविन्यासे शिवशक्तिसमन्विते / ग्रहवेतार(ल)यक्षोष्मनाशिनि प्रवरे तुरे //

मन्त्रमूलमिदं स्तोत्रं नमस्कारैकविंशतिः(ति) / यः पठेत्प्रातः(पठेत् प्रयतः) धीमान् देव्याभक्तिसमन्विते(तः) //

सायं वा प्रातरुत्थाय स्मरेत् सर्वाभयप्रदम् / सर्वपापप्रशमनं सर्वदुर्गतिनाशनम् //

अभिषिक्तो भवेत् तूर्णं सप्तभिर्जिनकोटिभिः / मासमात्रेण चैवासौ सुखं बौद्धपदं व्रजेत् //

विषं तस्य महाघोरं स्थावरं चाथ जङ्गमम् / स्मरणान्न पदं याति खादितं पि(पी)तमेव वा //

ग्रहजो(जा)लविषार्तानां परस्त्रीविषनाशनम् / अन्येषां चैव सत्त्वानां द्विसप्तमभिवर्तितम् //

पुत्रकामो लभेत् पुत्रं घनकामो लभेद्धनम् / सर्वकामानवाप्नोति न विघ्नैः प्रतिहन्यते //

इति श्रीसम्यक्संबुद्धवैलो(रो)चनभाषितं भगवत्यार्यतारादेव्या नमस्कारैकविंशतिनामाष्टोत्तरशतकं बुद्धभाषितं परिसमाप्तम् //

नमस्तारायै बालार्कालोकताम्रप्रवरसुरशिरश्चारुचूडामणिश्री- सम्पत्संपर्करागानतिचिररचितालक्तकव्यक्त भक्ती / भक्त्या पादौ तवार्ये करपुटमुकुटाटोपभुग्नोत्तमाङ्ग- स्तारिण्यापच्छरण्ये नवनुतिकुसुमस्रग्भिरभ्यर्चयामि //

दुर्लङ्ध्ये दुःखवह्नौ विनिपतिततनुर्दुर्भगः कांदिशीक किं किं मूढः करोमीत्यसकृदपि कृतारम्भवैयर्थ्यखिन्नः / श्रुत्वा भूयः परेभ्यः क्षतनयन इव व्योम्नि चन्द्रार्कलक्ष्मी- मालोकाशानिबद्धः परगतिगमनस्त्वां श्रये पापहन्त्रीम् //

सर्वस्मिन् सत्त्वमार्गे ननु तव करुणा निर्विशेषं प्रवृत्ता तन्मध्ये तद्ग्रहेण ग्रहणमुपगतं मादृशस्याप्यवश्यम् / सामर्थ्यं च द्वितीयं सकलजगदघध्वान्ततिग्मांशुबिम्बं दुःख्येवाहं तथापि प्रतपति धिगहो दुष्कृतं दुर्विदग्धम् //

धिग्धिङ् मां मन्दभाग्यं दिवसकररुचाप्यप्रणूतान्धकारं तृष्यन्तं कूलकच्छे हिमशकलशिलाशीतले हैमवत्याः / रत्नद्वीपप्रतोल्या विपुलमणिगुहागेहगर्भे दरिद्रं नाथीकृत्याप्यनाथं भगवति भवतीं सर्वलोकैकधात्रीम् //

मातापि स्तन्यहेतोर्विरुवति तनये खेदमायाति पुत्रे क्रोधं धत्ते पितापि प्रतिदिवसमसत्प्रार्थनासु प्रयुक्तः / त्वं तु त्रैलोक्यवाञ्छाविपुलफलमहाकल्पवृक्षाग्रवल्ली सर्वेभ्यो ऽभ्यर्थितार्थान् विसृजसि न च ते विक्रिया जातु काचित् //

यो यः क्लैशौघवह्निज्वलिततनुरहं तारिणी तस्य तस्ये- त्यात्मोपज्ञं प्रतिज्ञां कुरु मयि सफलां दुःखपातालमग्ने / वर्धन्ते यावदेते परुषपरिभवाः प्राणिनां दुखवेगाः सम्यक्संबुद्धयाने प्रणिधिधृतधियां तावदेवानुकम्पा //

इत्युच्चैरुर्ध्ववाहौ नदति नुतिपदव्याजमाक्रन्दनादं नार्हत्यन्यो ऽप्युपेक्षां जननि जनयितुं किं पुनर्यादृशी त्वम् / त्वत्तः पश्यन् परेषामभिमतविभवप्रार्थनाः प्राप्तकामा दह्ये सह्येन भूयस्तरमरतिभुवा सन्ततान्तर्ज्वरेण //

पापी यद्यस्मि कस्मात्त्वयि मम महती बर्द्धते भक्तिरेषा श्रुत्या स्मृत्या च नाम्नाप्यपहरसि हठात्पापमेका त्वमेव / त्यक्तव्यापारभारा तदसि मयि कथं कथ्यतां तथ्यकथ्ये पथ्यं ग्लाने मरिष्यत्यपि विपुलकृपः किं भिषग् रोरुधीति //

मायामात्सर्यमानप्रभृतिभिरधमैस्तुल्यकालक्रमाच्च् स्वैर्दोषैर्वाह्यमानो मठकरभ इवानेकसाधारणांशः / युष्मत्पादाब्जपूजां न क्षणमपि लभे यत्तदर्थे विशेषा- देषा कार्पण्यदीनाक्षरपदरचना स्यान्ममावन्ध्यकामा //

कल्पान्तोद्भ्रान्तवातभ्रमितजलचलल्लोलकल्लोलहेला- संक्षोभोत्क्षिप्तवेलातटविकटचटत्स्फोटमोट्टाट्टहासात् / मज्जद्भिर्भिन्ननौकैः सकरुणरुदिताक्रन्दनिष्पन्दमन्दैः स्वच्छन्दं देवि सद्यस्त्वदभिनुतिपरैस्तीरमुत्तीर्यते ऽब्धेः //

धूमभ्रान्ताभ्रगर्भोद्भवगगनगृहोत्सङ्गरिङ्गत्स्फुलिङ्ग- स्फूर्जज्ज्वालाकरालज्वलनजवविशद्वेश्मविश्रान्तशय्याः / त्वय्याबद्धप्रणामाञ्जलिपुटमुकुटा गद्गदोद्गीतयाच्षाः प्रोद्यद्विद्युद्विलासोज्ज्वलजलदजवैराध्रियन्ते क्षणेन //

दानाम्भःपूर्यमाणोभयकटकटकालम्बिरोलम्बमाला- हूङ्काराहूयमानप्रतिगजजनितद्वेषवह्नेर्द्विपस्य / दन्तान्तोत्तुङ्गदोलातलतुलिततनुस्त्वामनुस्मृत्य मृत्युं प्रत्याचष्टे प्रहृष्टः पृथुशिखरशिरःकोटिकोट्टोपविष्टः //

प्रौढप्रासप्रहारप्रहतनरशिरःशूलवल्ल्युत्सवाया शून्याटव्यां कराग्रग्रहविलसदसिस्फेटकस्फीतदर्पान् / दस्यून् दास्ये नियुङ्क्ते सभृकुटिकुटिलभ्रूकटाक्षेक्षिताक्षां- श्चिन्तालेखन्यखिन्नस्फुटलिखितपदं नामधाम श्रियां ते //

वज्रकूरप्रहारप्रखरनखमुखोत्खातमत्तेभकुम्भ- श्च्योतत्सान्द्रास्रधौतस्फूटविकटसटासङ्कटस्कन्धसन्धिः / क्रुध्यन्नापित्सुरारादुपरि मृगरिपुस्तीक्ष्णदंष्ट्रोत्कटास्य- स्त्रस्यन्नावृत्य याति त्वदुचितरचितस्तोत्रदिग्धार्थवाचः //

धूमावर्तान्धकाराकृतिविकृतफणिस्फारफूत्कारपूर- व्यापारव्याप्तवक्त्रस्फुरदुरुरसनारज्जुकोनाशपाशैः / पापात्सम्भूय भूयस्तवगुणगणनातत्परस्त्वत्परात्मा धत्ते मत्तालिमालावलयकुवलस्रगविभूषां विभूतिम् //

भर्तृभ्रूभेदभीतोद्भटकटकभटाकृष्टदुःश्लिष्टकेश- श्चञ्चद्वाचाटचेटोत्कटरटितकटुग्रन्थिपाशोपगूढः / क्षुत्तृट्क्षामोपकण्ठस्त्यजति स सपदि व्यापदं तां दुरन्तां यो यायादार्यताराचरणशरणतां स्निग्धबन्धूज्झितो ऽपि //

मायानिर्माणकर्मक्रमकृतविकृतानेकनेपथ्यमिथ्या- रूपारम्भानुरूपप्रहरणकिरणाडम्बरोड्डामराणि / त्वत्तन्त्रोद्धार्यमन्त्रस्मृतिहृतदुरितस्यावहन्त्यप्रधृष्यां प्रेतप्रोतान्त्रतन्त्रीनिचयविरचितस्रञ्जि रक्षांसि रक्षाम् //

गर्जज्जीमूतमूर्तित्रिमदमदनदीबद्धधारान्धकार् विधुद्द्योतायमानप्रहरणकिरणे निष्पतद्बाणवर्षे / रुद्धः सङ्ग्रामकाले प्रबलभुजबलैर्विद्विषद्भिर्द्विषद्भि- स्त्वद्दत्तोत्साहपुष्टिः प्रसभमरिमहीमेकवीरः पिनष्टि //

पापाचारानुबन्धोद्धृतगदविगलत्पूतिपूयास्रविस्र- त्वङ्मांसासक्तनाडीमुखकुहरगलज्जन्तुजग्धक्षताङ्गाः / युष्मत्पादोपसेवागदवरगुटिकाभ्यासभक्तिप्रसक्ता जायन्ते जातरूपप्रतिनिधिवपुषः पुण्डरीकायताक्षाः //

विश्रान्तं श्रौतपात्रे गुरुभिरुपहृतं यस्य नाम्नायभैक्ष्यं विद्वद्गोष्ठीषु यश्च श्रुतधनविरहान्मूकतामभ्युपेतः / सर्वालङ्कारभूषाविभवसमुदितं प्राप्य वागीश्वरत्वं सो ऽपि त्वद्भक्तिशक्त्या हरति नृपसभे वादिसिंहासनानि //

भूशय्याधूलिधूम्रः स्फुटितकटितटीकर्पटोद्द्योतिताङ्ग् यूकायूंषि प्रपिंषन् परपुटपुरतः कर्परे तर्पणार्थी / त्वामाराध्याध्यवस्यन् वरयुवतिवहच्चामरस्मेरचार्वी- मूर्वी धत्ते मदान्धद्विपदशनघनामुद्धृत्तैकातपत्राम् //

सेवाकर्मान्तशिल्पप्रणयविनिमयोपायपर्यायखिन्नाः प्राग्जन्मोपात्तपुण्योपचितशुभफलं वित्तमप्राप्नुवन्तः / दैवातिक्रामणीं त्वां कृपणजनजनन्यर्थमभ्यर्थ्य भूमेर् भूयो निर्वान्तचामीकरनिकरनिधीन् निर्धनाः प्राप्नुवन्ति //

वृत्तिच्छेदे विलक्षः क्षतनिवसनया भार्यया भर्त्स्यमानो दूरादात्मम्भरित्वात् स्वजनसुतसुहृद्बन्धुभिर्वर्ज्यमानः / त्वय्यावेद्य स्वदुःखं तुरगखुरमुखोत्खातसीम्नां गृहाणाम् ईष्टे स्वान्तःपुरस्त्रीवलयझणझणाजातनिद्राप्रबोधः //

चङ्क्रद्दिक्चक्रचुम्बिस्फुरदुरुकिरणा लक्षणालङ्कृता स्त्री- षट्दन्तो दन्तिमुख्यः शिखिगलकरुचिश्यामरोमा वराश्वः / भास्वद्भास्वन्मयूखो मणिरमलगुणः कोषभृत् स्वर्णकोषः सेनानीर्वीरसैन्यो भवति भगवति त्वत्प्रसादांशलेशात् //

स्वच्छन्दं चन्दनाम्भःसुरभिमणिशिलादत्तसङ्केतकान्तः कान्ताक्रीडानुरागादभिनवरचितातिथ्यतथ्योपचारः / त्वद्विद्यालब्धसिद्धिर्मलयमधुवनं याति विद्याधरेन्द्रः खङ्गांशुश्यामपीनोन्नतभुजपरिघप्रोल्लसत्पारिहार्यः //

हाराक्रान्तस्तनान्ताः श्रवणकुवलयस्पर्द्धमानायताक्ष्यो मन्दारोदारवेणीतरुणपरिमलामोदमाद्यद्द्विरेफाः / काञ्चीनादानुबन्धोद्धततरचरणोदारमञ्जीरतूर्यास् त्वन्नाथान् प्रार्थयन्ते स्मरमदमुदिताः सादरा देवकन्याः //

रत्नच्छन्नान्तवापीकनककमलिनीवज्रकिञ्जल्कमालाम् उन्मज्जत्पारिजातद्रुममधुपवधूद्धूतधूलीवितानाम् / वीणावेणुप्रवीणामरपुररमणीदत्तमाधुर्यतूर्यां कृत्वा युष्मत्सपर्यामनुभवति चिरं नन्दनोद्यानयात्राम् //

कर्पूरैलालवङ्गत्वगगुरुनलदक्षोदगन्धोदकायां / कान्ताकन्दर्पदर्पोत्कटकुचकुहरावर्तविश्रान्तवीच्याम् / मन्दाकिन्याममन्दच्छटसलिलसरित्क्रीडया सुन्दरीभिः क्रीडन्ति त्वद्गतान्तःकरणपरिणतोत्तप्तपुण्यप्रभावाः //

गीर्वाणग्रामणीभिर्विनयभरनमन्मौलिभिर्वन्दिताज्ञः स्वर्गोत्सङ्गे ऽधिरूढः सुरकरिणि झणद्भूषणोद्भासिताङ्गे / शच्या दोर्दामदोलाविरलवलयितोद्दामरोमाञ्चमूर्तिः पूतस्त्वद्दृष्टिपातैरवति सुरमहीं हीरभिन्नप्रकोष्ठः //

चूडारत्नावतंसासनगतसुगतव्योमलक्ष्मीवितानं प्रोद्यद्बालार्ककोटीपटुतरकिरणापूर्यमाणत्रिलोकम् / प्रौढालीढैकपादक्रमभरविनमद्ब्रह्मरुद्रेन्द्रविष्णुं त्वद्रूपं भाव्यमानं भवति भवभयच्छित्त्ये जन्मभाजाम् //

पश्यन्त्येके सकोपं प्रहरणकिरणोद्गीर्णदोर्दण्डखण्ड- व्याप्तव्योमान्तरालं वलयफणिफणादारुणाहार्यचर्यम् / द्विष्टव्यत्रासिहासोड्डमरडमरुकोड्डामरास्फालवेला- वेतालोत्तालतालप्रमदमदमहाकेलिकोलाहलोग्रम् //

केचित्त्वेकैकरोमोद्गमगतगगनाभोगभूभूतलस्थ- स्वस्थब्रह्मेन्द्ररुद्रप्रभृतिनरमरुत्सिद्धगन्धर्वनागम् / दिक्चक्राक्रामिधामस्थितसुगतशतानान्तनिर्माणचित्तं चित्रं त्रैलोक्यवन्दयं स्थिरचररचिताशेषभावस्वभावम् //

लाक्षासिन्दूररागारुणतरकिरणादित्यलौहित्यमेके श्रीमत्सान्द्रेन्द्रनीलोपलदलितदलक्षोदनीलं तथान्ये / क्षीराब्धिक्षुब्धदुग्धाधिकतरधवलं काञ्चनाभं च केचित् त्वद्रूपं विश्वरूपं स्फटिकवदुपधायुक्तिभेदाद् विभिन्नम् //

सार्वज्ञज्ञानदीपप्रकटितसकलज्ञेयतत्त्वैकसाक्षी साक्षाद्वेत्ति त्वदीयां गुणगणगणनां सर्ववित् तत्सुतो वा / यस्तु व्यादाय वक्त्रं वलिभुजरटितं मादृशो रारटीति व्यापत् सा तीव्रदुःखज्वरजनितरुजश्चेतसो हास्यहेतुः //

यन्मे विज्ञाप्यमानं प्रथमतरमदस्त्वं विशेषेण वेत्त्री तद्वयाहारातिरेकश्रमविधिरबुधस्वान्तसन्तोषहेतुः / किन्तु स्निग्धस्य बन्धोर्विषमिव पुरतो दुःखमुद्गीर्य वाचां ज्ञातार्थस्यापि दुःखी हृदयलघुतया स्वस्थतां विन्दतीव //

कल्याणानन्दसिन्धुप्रकटशशिकले शीतलां देहि दृष्टिं पुष्टिं ज्ञानोपदेशैः कुरु धनकरुणे ध्वंसय ध्वान्तमन्तः / त्वत्स्तोत्राम्भःपवित्रीकृतमनसि मयि श्रेयसः स्थानमेकं दृष्टं यस्मादमोघं जगति तवगुणस्तोत्रमात्रं प्रजानाम् //

संस्तुत्य त्वद्गुणौघावयवमनियतेयत्तमाप्तं मया य पुण्यं पुण्यार्द्रवाञ्छाफलमधुररसास्वादमामुक्तिभोग्यम् / लोकस्तेनार्यलोकेश्वरचरणतलस्वस्तिकस्वस्तिचिह्ना- मह्नायायं प्रयायात् सुगतसुतमहीं तां सुखावत्युपाख्याम् //

श्री सर्वज्ञमित्रविरचितमार्यतारास्रग्धरास्तोत्रं समाप्तम् //

ओम् नमः श्री आर्यतारायै /

श्रीमत्पोतलके रम्ये नानाधातुविराजिते / नानाद्रुमलताकीर्णे नानापक्षिनिकूजिते //

नानानिर्झरभाङ्कारैर्नानामृगसमाकुले / नानाकुसुमजातीभिः समन्तादधिवासिते //

नानाहृद्यफलोपेतषट्पदोद्गीतनिःस्वनैः / किन्नरैर्मधुरोद्गीतैर्मत्तरवारणसंकुलैः //

सिद्धविद्याधरगणैर्गन्धर्वैश्च निनादिते / मुनिभिर्वीतरागैश्च सततं सुनिषेविते //

बोधिसत्त्वगणैश्चान्यैर्दशभूमीश्वरैरपि / आर्यतारादिभिर्देवैर्विद्याराज्ञीसहस्रकैः //

क्रोधराजगणैश्चान्यैर्हयग्रीवादिभिर्वृते / सर्वसत्त्वहिते युक्तो भगवानवलोकितः //

व्याजहार ततः श्रीमान् पद्मगर्भासने स्थितः / महता तपसा युक्तो मैत्र्या च कृपयान्वितः //

धर्मं दिदेश तस्यां च महत्यां देवपर्षदि / तत्रापविद्धमागम्य वज्रपाणिर्महाबलः //

परया कृपया युक्तः पप्रच्छ चावलोकितम् / तस्करोरगसिंहोग्रगजव्याघ्रादिसंकुले //

सीदन्त्यमी मुने सत्त्वा मग्नाः संसारसागरे / बद्धाः सांसारिकैः पाशै रागद्वेषतमोमयैः //

मुच्यन्ते येन सत्त्वास्ते तन्मे ब्रूहि महामुने / एवमुक्तो जगन्नाथः स श्रीमानवलोकितः //

उवाच मधुरां वाणीं वज्रपाणिं प्रबोधिनीम् / शृणु गुह्यकराजेन्द्र अमिताभस्य तायणीः(णीम्) //

प्रणिधानवशोत्पन्नां ममाज्ञां लोकमातरम् / महाकरुणयोपेतां जगदुद्धरणोद्धृताम् //

उदितादित्यसंकाशां पुर्णेन्दुवदनप्रभाम् / भाषयन्तीमिमां तारां सदेवासुरमानुषान् //

कम्पयन्तीं च त्रीन् लोकान् त्रासयन्तीं यक्षराक्षसान् / नीलोत्पलकरां देवीं मा भैर्मा भैरिति ब्रुवन् //

जगत्संरक्षणार्थयाहमुत्पादिता जिनैः / कान्तारे शस्त्रसंपाते नानाभयसमाकुले //

स्मरणादेव नामानि सत्त्वान् रक्षाम्यहं सदा / तारयिष्याम्यहं सत्त्वान् नानाभयमहार्णवात् //

तेन तारेति मां लोके गायन्ति मुनिपुंगवाः / कृताञ्जलिपुटो भूत्वा ततः सादरसाध्वसः //

ज्वलयत्यन्तरिक्षे तामिदं वचनमब्रवीत् / नामाष्टशतकं ब्रूहि यत्पुरा कीर्तितं जनैः //

दशभूमीश्वरैर्नाथैर्बोधिसत्त्वैर्महर्द्धिकैः / सर्वपापहरं पुण्यं माङ्गल्यं कीर्तिवर्द्धनम् //

धनधान्यकरं चैव आरोग्यं पुष्टिवर्धनम् / आयुरारोग्यजनकं सर्वसत्त्वसुखावहम् //

लक्ष्म्याः श्रियः स्थापकं च सर्वसत्त्वविवर्द्धनम् / मैत्रीमालम्ब्य सत्त्वानां तत्कीर्तय महामुने //

एवमुक्ते जगन्नाथः प्रहसन्नवलोकितः / व्यवलोक्य दिशः सर्वा मैत्रीस्फरणया दृशा //

दक्षिणं करमुद्धृत्य पुण्यलक्षणमण्डितम् / तमुवाच महाप्राज्ञः साधु साधु महातप //

नामानि शृणु महाभाग सर्वसत्त्वैकवत्सरे / यानि संकीर्त्य मनुजा सम्पदा स्युर्धनेश्वराः //

सर्वव्याधिविनिर्मुक्ताः सर्वैश्वर्यगुणान्विताः / अकालमृत्युनिर्दग्धाश्च्युता यान्ति सुखावतीम् //

तान्यहं सम्प्रवक्ष्यामि देवसंघाः शृणुत मे / अनुमोदध्वमेतद्वा भविष्यध्वं सुनिर्वृताः //

ओम् लोचने सुलोचने तारे तारोद्भवे सर्वसत्त्वानुकम्पिनि सर्वसत्त्वतारिणि सहस्रभुजे सहस्रनेत्रे / ओम् नमो भगवते अवलोकय अवलोकय मां सर्वसत्त्वांश्च हुं हुं फट् फट् स्वाहा / ओम् शुद्धे विशुद्धे सुगतात्मजे

मैत्रीहृदये निर्मले श्यामे श्यामरूपि महाप्राज्ञे प्रबलवरभूषिते / अपराजिता महारौद्री विश्वरूपी महाबला / ओम् सुश्रिये //

ओम् कल्याणी महातेजा लोकधात्री महायशाः / सरस्वती विशालाक्षी प्रज्ञा श्रीर्बुद्धिवर्धिनी //

धृतिदा पुष्टिदा स्वाहा ओम्कारा कामरूपिणी / सर्वसत्त्वहितोद्युक्ता संग्रामोत्तारिणी जया //

प्रज्ञापारमिता देवी आर्यतारा मनोरमा / दुन्दुभी शङ्खिनी पूर्णा विद्याराज्ञी प्रियम्वदा //

चन्द्रानना महागौरी अजिता पीतवाससा / महामाया महाश्वेता महाबलपराक्रमा //

महारौद्री महाचण्डी दुष्टसत्त्वनिषूदिनी / प्रशान्ता शान्तरूपा च विजया ज्वलनप्रभा //

विद्युन्मारी ध्वजी खङ्गी चक्री चापोद्यतायुधा / जम्भनो स्तम्भनी काली कालरात्रिर्निशाचरी //

रक्षणी मोहनी शान्ता कान्तारी द्रावणी शुभा / ब्रह्माणी वेदमाता च गुह्या च गुह्यवासिनी //

माङ्गल्या शाङ्करी सौम्या जातवेदा मनोजवा / कपालिनी महावेगा सन्ध्या सत्या ऽपराजिता //

सार्थवाहकृपादृष्टिर्नष्टमार्गप्रदर्शिनी / वरदा शासनी शास्त्री सुरूपा ऽमृतविक्रमा //

शर्वरी योगिनी सिद्धा चण्डारी(ली)अमृता ध्रुवा / धन्या पुण्या महाभागा शुभगा प्रियदर्शना //

कृतान्तत्रासिनी भीमा उग्रा उग्रमहातपा / जगद्धिते सदोद्युक्ता शरण्या भक्तवत्सला //

वागीश्वरी शिवा सूक्ष्मा नित्या सर्वक्रमानुगा / सर्वार्थसाधनी भद्रा गोप्त्री धात्री धनप्रदा //

अभया गौतमी पुण्या श्रीमल्लोकेश्वरात्मजा / तारानामगुणानन्ता सर्वाशापरिपूरका //

ओम् तारे कृपावरे श्रीक्लेशश्रवणीये स्वाहा / नाम्नामष्टोत्तरशतं ह्येतद्यत्कीर्तितं मया / रहस्यभूतं गुह्यं च देवानामपि दुर्लभम् //

सौभाग्यभोगकरणं सर्वकिल्विषनाशनम् / सर्वव्याधिप्रशमनं सर्वसत्त्वसुखावहम् //

त्रिकालं यः पठेद्धीमान् शुचिस्थाने समाहितः / सो ऽचिरेणैव कालेन राज्यश्रियमवाप्नुयात् //

दुःखी स्यात्तु सुखी नित्यं दरिद्रो धनवान् भवेत् / पुत्रो भवेन्महाप्राज्ञो मेधावी च न संशयः //

बन्धनान्मुच्यते बद्धो व्यवहारे जयोअ भवेत् / शत्रवो मित्रतां यान्ति शृङ्गिणः शुनका अपि //

संग्रामे संकटे दुर्गे नानाभयसमुच्छ्रिते / स्मरणादेव नामानि सर्वान्भयानपोहति //

नाकालमृत्युर्भवति प्राप्नोति विपुलाशयम् / मानुष्ये सफलं जन्म तस्यैकस्य महात्मनः //

यश्चेदं प्रातरुत्थाय मानवः कीर्तयिष्यति / स दीर्घकालमायुष्मान् श्रियं च लभते नरः //

देवा नागास्तथा यक्षा गन्धर्वा कठपूतनाः / पिशाचा राक्षसा भूता मातरो रौद्रतेजसाः //

डाकिन्यस्तारकाः प्रेताः स्कन्दोमाद्या महाग्रहाः / छायापस्मारकाश्चैव खेटका खार्दकादयः //

वेतालाश्चिंचका प्रेष्या ये चान्ये दुष्टचेतसः / छायामपि न लङ्घन्ति किं पुनस्तस्य विग्रहम् //

दुष्टसत्त्वा न बाधन्ते व्याधयो नाक्रमन्ति च / सर्वैश्वर्यगुणैर्युक्तो वंशवृद्धिश्च जायते //

जातिस्मरो भवेद् धीमान् कुलीनः प्रियदर्शनः / प्रीतिमांश्च महावाग्मी सर्वशास्त्रविशारदः //

कल्याणमित्रसंसेवी बोधिचित्तविभूषितः / सदा ऽविरहितो बुद्धैर्यत्र यत्रोपपद्यते //

श्रीआर्यताराभट्टारिकाया नामाष्टोत्तरशतं बुद्धपरिभाषितं परिसमाप्तम् //

नमस्तारायै

सुखदचक्रचारुचूडामणिरुचिरमरीचिसंचय- प्रचुरशिखाप्रचारपरिचुम्बितचर्चितचरणचन्द्रके / जगति चराचरे ऽपि साचीकृतचकितकृपालुलोचने स्तुतिवचनोपचारमुचिताचरतिं रचयामि देवि ते //

नखरकठोरकोटिकुट्टितकरिकटतटपाटनोत्कटाः प्रविकटरुधिरपटलपटपालिता अटवीविलुण्ठकाः / विकटसटाट्टहासघटितावटतटघटानोद्भटास्त्वज्जुषि झटिति यान्ति सटिनः कुण्ठादपि कुण्ठशक्तिताम् //

मलिनमहाकपोलतलविगलितमदजलमलनविह्वलाः स्खलदलिजालबहलकोलाहललितविलासलासिनः / विचलितकर्णतालपवनाहतललितविलेपधूलयः पथि न गजाश्चलन्ति कुलशैलतुलास्तव ला(ना)मलालिताः //

मारुतघातजातरभसोच्छलदनलशिखाकदम्बक- प्रतिहतपुरपुरन्ध्रिहाहारवत्वरितदिगन्तभैरवः / उद्धतधूम्रधूमधूलिधुतबद्धघनान्धकारकं त्वन्नतिनीतिगतिरेति शमं बहुशो हुताशनः //

चलितलतावितानकुटिलोद्गमदुर्गमगहनवर्तिन सपदि पुरो नरस्य तारेति मनागपि नामधारिणः / स्फीतफणौघघोरफूत्कारपरिस्फुरतानलस्फुट- स्फुरदुरुविस्फुलिङ्गविस्फारिणि फणिनि विषं विनश्यति //

क्षणकृतकोपकम्पकरकर्षितखरकरवालनिर्मल- व्यतिकरकरकरवालविकरालमहाबलभुजार्गलः / प्रस्थितपथिकनिकटकटविघटनपटुरतिनिष्ठुराशयो भगवति भक्तिवन्तुमुपसर्पति तव न वने ऽपि तस्करः //

यो ऽपि नरेन्द्रवीरहुङ्कारकचग्रहनिग्रह् ग्रहग्रस्त इव रज्जुहिञ्जीरवजर्जरिताङ्गपञ्जरः / प्रतिपदखनखनायमानमुखरीकृतखरखरशृङ्खलावलि- स्त्वच्चरणारविन्दमभिवन्द्य स नन्दति मुक्तबन्धनः //

कलकलकलिललोलकल्लोलजलोल्ललत्कालिकानिला- स्फालितविपुलबहलवेलाकुलकूलतमालपल्लवात् / सरभसमकरनिकरखरनखरसुदुस्तरतो ऽपि सागरात् तारिणि तरलतारतरतारकमातुरमेत्य रक्षसि //

सूक्ष्मविरावसारसरघोत्करनिर्भरघोरघर्घरघ्राणा घृणाङघ्रिपाण्यस्रविस्रीकृतक्वथितशरीरपञ्जरा / यत्क्षणमहाप्रसादावेशत्वत्प्रणता तारिणि कामरूपिणा तत्क्षणलब्धलोलकिरणमणिकुण्डलमण्डितगण्डमण्डला //

यूकविकीर्णशीर्णपटकर्पटकटितटवेष्टनोद्भटः संकटपेट्टपूरमात्रार्जनपरपुरपिण्डतर्कणः / यदि तव नामकं हृदि करोति हि राक्षसैककः प्रौढवधूविधूतचामीकरखचितविचित्रचामरम् //

श्रीचन्द्रदासविरचितार्यतारास्तुतिः समाप्ता //

ओम् नमः श्रीविघ्नेश्वराष्टमातृकाभ्यः /

विघ्नेश्वर महावीर सिद्धिरूपाय वृद्धये / विघ्ननाशाय देवाय गणेशाय नमाम्यहम् //

पूर्वे ब्रह्माणी देवी हंसमारुह्य संस्थिता / पीतवर्णप्रभा देवी श्रीब्रह्माणि नमो ऽस्तु ते //

दक्षिणे श्रीवाराही महिषासनसंस्थिता / रक्तवर्णा ऽङ्कुशहस्ता श्रीवाराहि नमो ऽस्तु ते //

पश्चिमे चेन्द्राणी देवी गजमारुह्य संस्थिता / कुङ्कुमाभा वज्रहस्ता श्रीइन्द्राणि नमो ऽस्तु ते //

उत्तरे माहेश्वरी देवी वृषमारुह्य संस्थिता / श्वेतवर्णप्रभा देवी माहेश्वरि नमो ऽस्तु ते //

आग्नेये बालकौमारी मयूरकान्तिपूरणी / रक्तवर्णा शक्तिहस्ता श्रीकौमारि नमो ऽस्तु ते //

नैरृत्ये वैष्णवी देवी श्यामाभा गरुडासना / शङ्खचक्रधरा देवी नारायणि नमो ऽस्तु ते //

वायव्ये चामुण्डा देवी सिंहमारुह्य संस्थिता / ककारमूर्तिधारी च खड्गहस्तां नमाम्यहम् //

ईशाने चण्डिका देवी धूम्रवर्णा प्रज्वालिनी / कर्तिमुण्डधरा देवी महालक्ष्मि नमो ऽस्तु ते //

अष्टपीठस्थिता देवीरष्टवृक्षनिवासिनीः / अष्टभैरवसंयुक्ता अष्टमातृका नमाम्यहम् //

सूर्यः सोमो महीपुत्रो बुधो देवासुरगुरू / शनिश्च राहुः केतुश्च यमाय च नमो नमः //

श्री अष्टमातृकास्तोत्रं समाप्तम् //

ओम् नमो लोकनाथाय

आराधितो ऽसि भुजगासुरलोकसंघैर्गन्धर्वयक्षमुनिभिः परिवन्दिताय / द्वात्रिंशदादिवरलक्षणभूषिताय नित्यं नमामि शिरसा करुणामयाय //

बालार्ककोटिसमतेजकलेवराय आलोकिते सुगतशेखरधारिताय / शुभ्रांशुमौलितिलकाय जटधराय नित्यं नमामि शिरसा करुणामयाय //

अम्भोजपाणिकमलासनसंस्थिताय यज्ञोपवीतफणिराजसुमण्डिताय / रत्नादिहारकनकोज्ज्वलभूषिताय नित्यं नमामि शिरसा करुणामयाय //

उत्पादभङ्गभवसागरतारकाय दुर्ग्राहदुर्गतिभुवां परिमोचकाय / रागादिदोषपरिमुक्त सुनिर्मलाय नित्यं नमामि शिरसा करुणामयाय //

मैत्र्यादिभिश्चतुरब्रह्मविहारणाय धारामृतैः सकलसत्त्वसुपोषणाय / मोहान्धकारकृतदोषविदारणाय नित्यं नमामि शिरसा करुणामयाय //

दैत्येन्द्रवंशवलितारणमोक्षदाय सत्त्वोपकारत्वरितकृतनिश्चयाय / सर्वज्ञज्ञानपरिपूरितदेशनाय नित्यं नमामि शिरसा करुणामयाय //

अष्टादशनरकमार्गविशोधनाय अज्ञानगाढतिमिरपरिध्वंसनाय / ज्ञानैकदृष्टिव्यवलोकितमोक्षदाय नित्यं नमामि शिरसा करुणामयाय //

त्वं लोकनाथ भुवनेश्वर सुप्रदाय दारिद्रयदुःखमयपञ्जरदारणाय / त्वत्पादपङ्कजयुगप्रतिवन्दिताय नित्यं नमामि शिरसा करुणामयाय //

मार्तण्डमण्डलरुचिस्तथतास्वभावं त्वां नौम्यहः सुफलदः विमलप्रभावम् / चिन्तामणिं सुसदृशं त्वतिदुर्भगो ऽहं नित्यं नमामि शिरसा करुणामयाय //

यद्भक्तितो दशनखाञ्जलिसोत्तमाङ्गमष्टाङ्गकैः प्रणमितं तव पादपद्म / दुःखार्णवे पतितमुद्धर मां कृपालो नित्यं नमामि शिरसा करुणामयाय //

सप्ताष्टभूतगतमाधवशुक्लपक्षे तारापुनर्वसु सहे भृगुसूनुवारे / श्रीक्रौंचदारणतिथौ च स्तुतिं करोमि मे देहि वाञ्छितफलं भुवनैकनाथ //

ये पठन्ति महापुण्यं पवित्रं पापनाशनम् / सर्वकामार्थसिद्धिं च गमिष्यन्ति सुखावतीम् //

श्रीमदार्यावलोकितेश्वरभट्टारकस्यावधानस्तोत्रं समाप्तम् //

नमो रत्नत्रयाय / नम आर्यावलोकितेश्वराय बोधिसत्त्वाय महासत्त्वाय महाकारुणिकाय / नमः सर्वसत्त्वव्यसनघातिने / नमः सर्वसत्त्वव्यसनावहारिणे / नमः सर्वसत्त्वभयोत्तारणाय / नमः सर्वभवप्रशमनकराय / नमः सर्वसत्त्वबोधिचिकित्संकराय / नमः सर्वबन्धनच्छेदनपराय / नमः सर्वदुःखप्रमोक्षणकराय / नमः सर्वान्धकारविधमनकराय / नमः सर्वविद्याराजवशप्राप्तये महायोगयोगीश्वराय /

तस्मै नमस्कृत्वा इदमार्यावलोकितेश्वरमुखोद्गीर्णम् / ऋषिविददादेवनागयक्षराक्षसशक्रब्रह्मलोकपालविष्णुमहेश्वरनारायणस्कन्दकुबेरासुरेन्द्रमातृगण नमस्कृतं वज्रक्षुरमहीयं हयग्रीवब्रह्मपरमहृदयमावर्तयिष्यामि / अप्रमेयार्थसाधकम् असह्यं सर्वभूतानां सर्वविघ्नविनाशकम् / अमोघं सर्वकर्मणां विषाणाञ्च विनायनम् / तद् यथा

ओम् तरुल तरुल वितरुल वितरुल सर्वविषघातक सर्वभूतविद्रावक ज्वलितानलविस्फुलिङ्गाट्टहास केसरातोपाप्रवितकाय वज्रक्षुरनिर्गतित चलितवसुधातल बज्रोदश्वसत हासितमरुतक्षतिप्रशमनकर परदुष्टविघ्नान् संभक्षणकर स्वविद्योपदेशकर परमशान्तिकर बुद्ध बुद्ध बोधयामिति /

भगवन् हयग्रीव सर्वविद्याहृदयमावर्तयिष्यामि / खाद खाद महारौद्रमन्त्रेण / रक्ष रक्ष आत्मस्वहितान् मन्त्रेण / सिध्य सिध्य सर्वकर्मसु मे सिद्धे देहि देहि / आवेश आवेश प्रवेश प्रवेश सर्वग्रहेषु अप्रतिहत / धुन धुन विधुन विधुन मथ मथ प्रमथ प्रमथ सर्ववरोपग्रम / कृतकखोर्दो / दुर्लङ्घित मूषिक / विषकर विषद्रंष्ट्र विषचूर्णयो अभिचारविषकरण / सिध्य अञ्जन चक्षुर्मोहन / चित्तविक्षोभणकर / नित्यापरप्रेक्षण त्रासय त्रासय महाबोधिसत्त्व ऋद्धदंष्ट्रणेन सर्वभयेभ्यः सत्त्वानां रक्ष रक्ष / मम बुद्धधर्मसंघानुज्ञातं मे कर्म शीघ्रं कुरु कुरु फट् / हयग्रीवाय फट् / बज्रक्षुराय फट् / वज्रदंष्ट्रोत्कटभयभैरवाय फट् / परमन्त्रणनाशनकराय फट् / परदुष्टविघ्नान् संभक्षणकराय फट् / सर्वग्रहोत्सादनकराय फट् / सर्वग्रहेषु

अप्रतिहताय फट् / पटलमुखाय फट् / ये केचित् मम अहितेषिणः काये क्रमन्ति मन्त्रयण यमन्ति जुह्वानति काखोर्दं कुर्वन्ति / तेन सर्वेणाभिमुखेन वाक्रीहाय फट् / नमः सर्वदुष्टग्रहोत्सादनाय हयग्रीवाय सिध्यन्तु मन्त्रपदैः स्वाहा / ओम् अमितोद्भवाय हुं फट् फट् स्वाहा / ओम् नमो हयाय स्वाहा / ओम् नमो विश्वमूर्तये स्वाहा / नमः सर्वसत्त्वानां सिध्यन्तु मन्त्रपदाय स्वाहा //

ओम् नमो ऽवलोकितेश्वराय

स्तुत्वा गुणैरनुपमैरनुबिन्दुपात्रं स्तोत्रं मया कृतमिदं जडवालिशेन / लोकेश्वरं गुणनिधिं गुणसागरं च नित्यं नमामि शिरसाञ्जलिसंपुटेन //

प्राणेषु यन् स्रवति येन रसाम्बुपारान् क्षुत्तृष्णदुःखपरिपीडितसर्वसत्त्वान् / एवंविधं जगदिदं परिपालनाय तस्मै नमो ऽस्तु सततं हि यथार्थनाम्ने //

सत्कुङ्कुमात्तमरुणाङ्कसमानवर्णं द्वात्रिंशलक्षणविभूषितगात्रशोभम् / सर्वेषु यस्य करुणामयवत्सलत्वं तस्मै नमामि भवते करुणामयाय //

संसारसागरमहालयनाशदक्ष एकस्त्वमेव शरणं भुवि नैकनाथ / केनापि त्वद्गुणगणा गणने न शक्यास्तं लोकनाथमवलोकितनामसंज्ञम् //

नानाविधाभरणमण्डितदिव्यरुपं बालेन्दुलग्नजटभूषितलोकनाथम् / वामे च मण्डलधरं वरदं च सव्ये त्वां लोकनाथ शरणं प्रव्रजामि नित्यम् //

ब्रह्मादिभिः परिवृतं सुरसिद्धसंघैर्गन्धर्वकिन्नरमहोरगनागयक्षैः / नाथस्य यस्य भवतश्चरणाम्बुजं च तं लोकनाथचरणं शरणं व्रजामि //

भूतैः पिशाचगरुडोरगराक्षसीभिः कुम्भाण्डपूतनमहल्लकराजराजैः / वैश्वानरासुरशतैः परिवारभूतं तं लोकनाथचरणं शरणं गतो ऽस्मि //

अब्धिर्दिवाकरकरैर्नहि शोषमेति तद्वत्कवीश्वरशतैर्गुणसागरस्ते / लोकेश्वर प्रथितकीर्तिनिधानभूतो न क्षीयते गुणनिधिर्गुणसागरस्य //

श्लोकाष्टकं प्रतिदिनं खलु ये पठन्ति ते प्राप्नुवन्ति सहसा धनपुत्रमोक्षान् / कुष्ठादिरोगनिकरं क्षमतां प्रयाति वन्दामहे च नितरां तव पादयुग्मे //

श्री आर्यावलोकितेश्वरस्य श्लोकाष्टकं समाप्तम् //

ओम् नमो ऽवलोकितेश्वराय

भुवनत्रयवन्दितलोकगुरुम् अमराधिपतिस्तुतब्रह्मवरम् / मुनिराजवरं द्युतिसिद्धिकरं प्रणमाम्यवलोकितनामधरम् //

सुगतात्मजरुपसुरुपधरं बहुलक्षणभूषितदेहवरम् / अमिताभतथागतमौलिधरं कनकाब्जविभूषितवामकरम् //

कुटिलामलपिङ्गलधूम्रजटं शशिबिम्बसमुज्ज्वलपूर्णमुखम् / कमलायतलोचनचारुवरं हिमखण्डविपाण्डुरगण्डयुगम् //

अधरं जितपङ्कजनाभिसमं शरदम्बुदगर्जितमेघरुतम् / बहुरत्नविभूषितबाहुयुगं तनुकोमलशाद्वलपाणितलम् //

मृगचर्मविवेष्टितवामतनुं शुभकुण्डलमण्डितलोलधरम् / विमलं कमलोदरनाभितलं मणिमण्डितमेखलहेमवरम् //

कटिवेष्टितचित्रसुवस्त्रधरं जिनबोधिमहोदधिपारगतम् / बहुपुण्यमुपार्जितलब्धवरं ज्वरव्याधिहरं बहुसौख्यकरम् //

शुभशान्तिकरं त्रिभवास्यकरं सचरं खचरं स्तुतिदेहधरम् / विविधाकुलनिर्जितमारबलं दशपारमितापरमार्थकरम् //

चतुरस्रविहारविवेकपरं तथताद्वयबोधविबोधकरम् / मणिनूपुरगर्जितपादयुगं गजमन्दविलम्बितहंसगतिम् //

परिपूर्णमहामृतलब्धधृतिं क्षीरोदजलार्णवनित्यगतिम् / श्रीपोतलकाभिनिवासरतिं करुणामयनिर्मलचारुदृशम् //

श्रीमदार्यावलोकितेश्वरभट्टारकस्य चन्द्रकान्ताभिक्षुणीविरचितः स्तवः समाप्तः //

ओम् नमो ऽवलोकितेश्वराय

देवमनुष्यासुरनुतचरणः प्रतिहतजन्मजरारुजमरणः / लोकेश त्वं मामशरण्यं रक्ष कृपालो कुरु कारुण्यम् //

संसारोदधिमध्यनिमग्नं क्लेशमहोर्मिसमाहितभग्नम् / मामवधारय मा विरुवन्तं त्राहि महाकृप नौमि भवन्तम् //

तृष्णातिमिरोपद्रुतनेत्रं मरणमहाभयविह्वलगात्रम् / पालय भगवन्नवलोकय मां यावदवीचिं यामि न विषमाम् //

कृतमन्यस्त्रीग्रहणमजस्रं हतमज्ञेयं प्राणिसहस्रम् / नाथ मया कृतपापमशेषं नाशय संप्रति कायिकदोषम् //

यज्जोवितसत्कारनिमित्तं लोकान् नित्यं भणितमसत्यम् / तल्लोकेश्वर शमय समस्तं वाचिकनरकं चिरमभ्यस्तम् //

सत्त्वानामिह चिन्तितमहितं स्वयमनुमोदितमपि नरविहितम् / अधुना तन्मम मानसपापं स्फोटय नाथ करोमि विलापम् //

देवमनुष्यासुरजातीनां तिर्यःनारकप्रेतगतीनाम् / सत्त्वा ये निवसन्ति सदार्ता रक्षसि तानिति तव मयि वार्ता //

तेन ममोपरि सृज कारुण्यं वीक्ष्य शरीरगतं तारुण्यम् / इति शृणु भगवन् भवति भणामि यावन्नरकं नैव विशामि //

किं चोपेत्य करोषि परार्थं मुञ्चसि भगवन् मामकृतार्थम् / अथवा प्रेक्ष्य कृपा तव पुण्यं जनयसि दृष्टं कथमविपन्नम् //

स्मरणेनापि भवसि परितुष्टः क्षिपसि च कलुषं किमिति न दृष्टः / यस्माद् भगवन् परहितदक्ष क्षेपं मा कुरु मामिह रक्ष //

दन्तितुरङ्गमपुत्रकलत्रं राज्यमकण्टकवेश्मविचित्रम् / अस्थिशिरो ऽसृङ्मांसपर्यन्तं भवतार्थिभ्यो दत्तमनन्तम् //

अञ्जनगुटिकापादुकसिद्धिः सिद्धौषधिमणिमन्त्रविशुद्धिः / सिद्धयति यक्षस्त्रीपुरवेशः तुष्यसि यस्य त्वं लोकेश //

ये करचरणविलोचनहीना विविधव्याधिमहाभयदीनाः / ते त्वयि तुष्टे पुष्टशरीरा विलसन्त्यरुजो गुणगम्भीराः //

गरलं व्याधिर्ग्रहडाकिन्यः शान्तिं यान्ति सदा योगिन्यः / सरति न तस्य पुरो यमदूतः प्रोतो यस्य च त्वं जिनभूतः //

इति लोकेश्वर किं क्रियमाणं मुञ्चसि भगवन् मामत्राणम् / रौम्यहमनुदिनमुद्यतपाणिर्नाशय त्राससमाकुलवाणिः //

यद्विषयेन्द्रियचञ्चलमनसा कृतबहुपापं व्याकुलमनसा / नीतं जन्म मया ऽस्मिन् सकलं जठरनिमित्तं भ्रमता विकलम् //

तत्कुरु संप्रति मम लोकेश प्रणतो विविधाञ्जलिरहमेषः / येनाभुक्त्वापायिकदोषं सुगतिं भवतो यामि न मोक्षम् //

मोहद्वेषविनाशनहेतुस्त्वं संसारमहोदधिसेतुः / पतितस्त्रस्तोत्थापितबाहुस्त्वं गुरुदुरितनिशाकरराहुः //

देशितसुगतानुत्तरतत्त्वस्त्वं पालितबहुदुःखितसत्त्वः / निर्जितदुर्जयमन्मथमारस्त्वं संतीर्णभवार्णवपारः //

सकलालाननिकृन्तनदेहस्त्वं परिभावितजगतसुदेहः / भगवन्ननुपमकरुणासिन्धुस्त्वं जनविदितो ऽकारणबन्धुः //

लीलाविदलितकर्मविभङ्गस्त्वं परहितविषयव्यासङ्गः / दिव्यध्यानसमाहितचित्तस्त्वं याचकसाधारणचित्तः //

परमपकुर्वंन्नपि करुणावान् मयि परितोषं न करोषि भवान् / कथमिह मोहमहोरगदष्टं विषयशरीरमकुशलं भ्रष्टम् //

सकलजनार्थं प्रति या करुणा सा किं भवतो नियतस्फरणा / येन न रक्षसि किल्विषवन्तं भवतः पुरतो मां विरुवन्तम् //

नाथ कृपा ते व्योमविशाला सत्त्वेषु हि यथाम्बुदधारा / स्थलजलनिम्नोन्नतबहुदेशे सरति निरन्तरमनिशमशेषे //

इति भगवत्स्मरणाद्यत्पुण्यं मम तेनेदं जगदक्षुण्णम् / लभतां श्रीपोतलकाचलवासं जनयतु सुन्दरविविधविलासम् //

श्रीमदार्यावलोकितेश्वरभट्टारकस्य चरपतिपादविरचितं स्तोत्रं समाप्तम् //

ओम् नमो ऽवलोकितेश्वराय

जटाधरं सौम्यविशाललोचनं सदाप्रसन्नाननचन्द्रमण्डलम् / सुरासुरैर्वन्दितपादपङ्कजं नमामि नाथं मणिपद्मसंभवम् //

सरोजपत्रायतदिव्यलोचनं कुदृष्टिसंशोधितशुद्धलोचनम् / कृपामृतार्द्रं जगदेकलोचनं नमामि नाथं मणिपद्मसंभवम् //

हारेन्दुहारार्धहिमाधिकोज्जवलं निघृष्टगण्डामललोलकुण्डलम् / गभस्तिमालाकुलकोटिसंकुलं नमामि नाथं मणिपद्मसंभवम् //

प्रबुद्धधर्माध्वनि धर्मधातुकं सहस्रबाहुं द्विचतुश्च षड्भुजम् / खधातुना तुल्यमनन्तबाहुकं नमामि नाथं मणिपद्मसंभवम् //

उपायप्रज्ञोदधिमन्थनोद्भवं त्रिधातुसंरक्षणहेतुसंभवम् / जिनेन्द्रमौलिं जिनधातुसंभवं नमामि नाथं मणिपद्मसंभवम् //

पद्मोपरि गतं नाथं पद्महस्तं जटाधरम् / आर्यावलोकितं वन्दे सर्वसत्त्वानुकम्पकम् //

श्रीवासुकिनागराजकृतमार्यावलोकितेश्वरस्तोत्रं समाप्तम् //

ओम् नमो ऽवलोकितेश्वराय

पद्मसत्त्व महापद्म लोकेश्वर महेश्वर / अवलोकितेश धीराग्र्य वज्रधर्म नमो ऽस्तु ते //

धर्मराज महाशुद्ध सत्त्वराज महामते / पद्मात्मक महापद्म पद्मनाथ नमो ऽस्तु ते //

पद्मोद्भव सुपद्माभ पद्मशुद्ध सुशोधक / वज्रपद्म सुपद्माङ्क पद्मपद्म नमो ऽस्तु ते //

महाविश्व महालोक महाकाय महोपम / महाधीर महावीर महाशौरे नमो ऽस्तु ते //

सत्त्वाशय महायान महायोग पितामह / शम्भु शङ्कर शुद्धार्थ बुद्धपद्म नमो ऽस्तु ते //

धर्मतत्त्वार्थ सद्धर्म शुद्धद्धर्मं सुधर्मकृत् / महाधर्म सुधर्माग्र्य धर्मचक्र नमो ऽस्तु ते //

बुद्धसत्त्व सुसत्त्वाग्र्य धर्मसत्त्व सुसत्त्वधृक् / सत्त्वोत्तम सुसत्त्वज्ञ सत्त्वसत्त्व नमो ऽस्तु ते //

अवलोकितेश नाथाग्र्य महानाथ विलोकित / आलोकलोक लोकार्थ लोकनाथ नमो ऽस्तु ते //

लोकाक्षराक्षर महा अक्षराग्र्याक्षरोपम / अक्षराक्षर सर्वाक्ष चक्राक्षर नमो ऽस्तु ते //

पद्महस्त महाहस्त समाश्वासक दायक / बुद्धधर्म महाबुद्ध बुद्धात्मक नमो ऽस्तु ते //

बुद्धरूप महारूप वज्ररूप सुरुपवित् / धर्मालोक सुतेजाग्र्य लोकालोक नमो ऽस्तु ते //

पद्मश्रीनाथ नाथाग्र्य धर्मश्रीनाथ नाथवान् / ब्रह्यनाथ महाब्रह्म ब्रह्मपुत्र नमो ऽस्तु ते //

दीप दीपाग्र्य दीपोग्र दीपालोक सुदीपक / दीपनाथ महादिप बुद्धदीप नमो ऽस्तु ते //

बुद्धाभिषिक्त बुद्धाग्र्य बुद्धपुत्र महाबुध / बुद्धाभिषेकमुर्द्धाग्र्य बुद्धबुद्ध नमो ऽस्तु ते //

बुद्धचक्षो महाचक्षो धर्मचक्षो महेक्षण / समाधिज्ञानसर्वस्व वज्रनेत्र नमो ऽस्तु ते //

एवं सर्वात्मना गौणं नाम्नामष्टशतं तव / भावयेत् स्तुनुयाद्वापि लोकैश्वर्यमवाप्नुयात् //

आर्यावलोकितेश्वरनामाष्टोत्तरशताध्येषणास्तोत्रं समाप्तम् //

अथ खलु समन्तभद्रो बोधिसत्त्वो महासत्त्वः एवमेव लोकधातुपरम्परानभिलाप्यानभिलाप्य बुद्धक्षेत्रपरमाणुरजःसमान् कल्पान् कल्पप्रसरानभिद्योत्यमानो भूयस्या मात्रया गाथाभिगीतेन प्रणिधानमकार्षीत् -

यावत केचि दशद्दिशि लोके सर्वत्रियध्वगता नरसिंहाः / तानहु वन्दमि सर्वि अशेषान् कायतु वाच मनेन प्रसन्नः //

क्षेत्ररजोपमकायप्रमाणैः सर्वजिनान करोमि प्रणामम् / सर्वजिनाभिमुखेन मनेन भद्रचरीप्रणिधानबलेन //

एकरजाग्रि रजोपमबुद्धा बुद्धसुतान निषण्णकु मध्ये / एवमशेषत धर्मतधातुं सर्वधिमुच्यमि पूर्णजिनेभि //

तेषु च अक्षयवर्णसमुद्रान् सर्वस्वराङ्गसमुद्ररुतेभिः / सर्वजिनान गुणान् भणमानस्तान् सुगतान् स्तवमी अहु सर्वान् //

पुष्पवरेभि च माल्यवरेभिर्वाद्यविलेपनछत्रवरेभिः / दीपवरेभि च धूपवरेभिः पूजन तेष जिनान करोमि //

वस्त्रवरेभि च गन्धवरेभिश्चूर्णपुटेभि च मेरुसमेभिः / सर्वविशिष्टवियूहवरेभिः पूजन तेष जिनान करोमि //

या च अनुत्तरपूज उदारा तानधिमुच्यमि सर्वजिनानाम् / भद्रचरी अधिमुक्तिबलेन वन्दमि पूजयमी जिनसर्वान् //

यच्च कृतं मयि पापु भवेय्या रागतु द्वेषतु मोहवशेन / कायतु वाच मनेन तथैव तं प्रतिदेशयमी अहु सर्वम् //

यच्च दशद्दिशि पुण्य जगस्य शैक्ष अशैक्षप्रत्येकजिनानाम् / बुद्धसुतानथ सर्वजिनानां तं अनुमोदयमी अहु सर्वम् //

ये च दशद्दिशि लोकप्रदीपा बोधिविबुद्ध असंगतप्राप्ताः / तानहु सर्वि अध्येषमि नाथान् चक्रु अनुत्तरु वर्तनतायै //

ये ऽपि च निर्वृति दर्शितुकामास्तानभियाचमि प्राञ्जलिभूतः / क्षेत्ररजोपमकल्प निहन्तु सर्वजगस्य हिताय सुखाय //

वन्दनपूजनदेशनताय मोदनध्येषणयाचनताय / यच्च शुभं मयि संचितु किंचिद्बोधयि नामयमी अहु सर्वम् //

पूजित भोन्तु अतीतक बुद्धा ये च ध्रियन्ति दशद्दिशि लोके / ये च अनागत ते लघु भोन्तु पूर्णमनोरथ बोधिविबुद्धाः //

यावत केचि दशद्दिशि क्षेत्रास्ते परिशुद्ध भवन्तु उदाराः / बोधिद्रुमेन्द्रगतेभि जिनेभिर्बुद्धसुतेभि च भोन्तु प्रपूर्णाः //

यावत केचि दशद्दिशि सत्त्वास्ते सुखिता सद भोन्तु अरोगाः / सर्वजगस्य च धर्मिकु अर्थो भोन्तु प्रदक्षिणु ऋध्यतु आशाः //

बोधिचरिं च अहं चरमाणो भवि जातिस्मरु सर्वगतीषु / सर्वसु जन्मसु च्युत्युपपत्ती प्रव्रजितो अहु नित्यु भवेय्या //

सर्वजिनानुशिक्षयमाणो भद्रचरिं परिपूरयमाणः / शीलचरिं विमलां परिशुद्धां नित्यमखण्डमछिद्र चरेयम् //

देवरुतेभि च नागरुतेभिर्यक्षकुम्भाण्डमनुष्यरुतेभिः / यानि च सर्वरुतानि जगस्य सर्वरुतेष्वहु देशयि धर्मम् //

ये खलु पारमितास्वभियुक्तो बोधियि चित्तु न जातु विमुह्येत् / ये ऽपि च पापक आवरणायास्तेषु परिक्षयु भोतु अशेषम् //

कर्मतु क्लेशतु मारपथातो लोकगतीषु विमुक्तु चरेयम् / पद्म यथा सलिलेन अलिप्तः सूर्यशशी गगनेव असक्तः //

सर्वि अपायदुखां प्रशमन्तो सर्वजगत् सुखि स्थापयमानः / सर्वजगस्य हिताय चरेयं यावत क्षेत्रपथा दिशतासु //

सत्त्वचरिं अनुवर्तयमानोइ बोधिचरिं परिपूरयमाणः / भद्रचरिं च प्रभावयमानः सर्वि अनागतकल्प चरेयम् //

ये च सभागत मम चर्याये तेभि समागमु नित्यु भवेय्या / कायतु वाचतु चेतनतो चा एकचरि प्रणिधान चरेयम् //

ये ऽपि च मित्रा मम हितकामा भद्रचरीय निदर्शयितारः / तेभि समागमु नित्यु भवेय्या तांश्च अहं न विरागयि जातु //

संमुख नित्यमहं जिन पश्ये बुद्धसुतेभि परीवृतु नाथान् / तेषु च पूज करेयु उदारां सर्वि अनागतकल्पमखिन्नः //

धारयमाणु जिनान सद्धर्मं बोधिचरिं परिदीपयमानः / भद्रचरिं च विशोधयमानः सर्वि अनागतकल्प चरेयम् //

सर्वभवेषु च संचरमाणः पुण्यतु ज्ञानतु अक्षयप्राप्तः / प्रज्ञौपायसमाधिविमोक्षैः सर्वगुणैर्भवि अक्षयकोशः //

एकरजाग्रि रजोपमक्षेत्रा तत्र च क्षेत्रि अचिन्तियबुद्धान् / बुद्धसुतान निषण्णकु मध्ये पश्यिय बोधिचरिं चरमाणः //

एवमशेषत सर्वदिशासु बालपथेषु त्रियध्वप्रमाणान् / बुद्धसमुद्र थ क्षेत्रसमुद्रानोतरि चारिककल्पसमुद्रान् //

एकस्वराङ्गसमुद्ररुतेभिः सर्वजिनान स्वराङ्गविशुद्धिम् / सर्वजिनान यथाशयघोषान् बुद्धसरस्वतिमोतरि नित्यम् //

तेषु च अक्षयघोषरुतेषु सर्वत्रियध्वगतान जिनानाम् / चक्रनयं परिवर्तयमानो बुद्धिबलेन अहं प्रविशेयम् //

एकक्षणेन अनागतसर्वान् कल्पप्रवेश अहं प्रविशेयम् / ये ऽपि च कल्प त्रियध्वप्रमाणास्तान् क्षणकोटिप्रविष्ट चरेयम् //

ये च त्रियध्वगता नरसिंहास्तानहु पश्यिय एकक्षणेन / तेषु च गोचरिमोतरि नित्यं मायगतेन विमोक्षबलेन //

ये च त्रियध्वसुक्षेत्रवियूहास्तानभिनिर्हरि एकरजाग्रे / एवमशेषत सर्वदिशासु ओतरि क्षेत्रवियूह जिनानाम् //

ये च अनागत लोकप्रदीपास्तेषु विबुध्यन चक्रप्रवृत्तिम् / निर्वृतिदर्शननिष्ठ प्रशान्तिं सर्वि अहं उपसंक्रमि नाथान् //

ऋद्धिबलेन समन्तजवेन ज्ञानबलेन समन्तमुखेन / चर्यबलेन समन्तगुणेन मैत्रबलेन समन्तगतेन //

पुण्यबलेन समन्तशुभेन ज्ञानबलेन असङ्गगतेन / प्रज्ञौपायसमाधिबलेन बोधिबलं समुदानयमानः //

कर्मबलं परिशोधयमानः क्लेशबलं परिमर्दयमानः / मारबलं अबलं करमाणः पूरयि भद्रचरीबल सर्वान् //

क्षेत्रसमुद्र विशोधयमानः सत्त्वसमुद्र विमोचयमानः / धर्मसमुद्र विपश्ययमानो ज्ञानसमुद्र विगाहयमानः //

चर्यसमुद्र विशोधयमानः प्रणिधिसमुद्र प्रपूरयमाणः / बुद्धसमुद्र प्रपूजयमानः कल्पसमुद्र चरेयमखिन्नः //

ये च त्रियध्वगतान जिनानां बोधिचरिप्रणिधानविशेषाः / तानहु पूरयि सर्वि अशेषात् भद्रचरीय बिबुध्यिय बोधिम् //

ज्येष्ठकु यः सुतु सर्वजिनानां यस्य च नाम समन्ततभद्रः / तस्य विदुस्य सभागचरीये नामयमी कुशलं इमु सर्वम् //

कायतु वाच मनस्य विशुद्धिश्चर्यविशुद्ध्यथ क्षेत्रविशुद्धिः / यादृशनामन भद्रविदुस्य तादृश भोतु समं मम तेन //

भद्रचरीय समन्तशुभाये मञ्जुशिरिप्रणिधान चरेयम् / सर्वि अनागत कल्पमखिन्नः पूरयि तां क्रिय सर्वि अशेषाम् //

नो च प्रमाणु भवेय्य चरीये नो च प्रमाणु भवेय्य गुणानाम् / अप्रमाणु चरियाय स्थिहित्वा जानमि सर्वि विकुर्वितु तेषाम् //

यावत निष्ठ नभस्य भवेय्या सत्त्व अशेषत निष्ठ तथैव / कर्मतु क्लेशतु यावत निष्ठा तावत निष्ठ मम प्रणिधानम् //

ये च दशद्दिशि क्षेत्र अनन्ता रत्नअलंकृतु दद्यु जिनानाम् / दिव्य च मानुष सौख्यविशिष्टां क्षेत्ररजोपम कल्प ददेयम् //

यश्च इमं परिणामनराजं श्रुत्व सकृज्जनयेदधिमुक्तिम् / बोधिवरामनुप्रार्थयमानो अग्रु विशिष्ट भवेदिमु पुण्यम् //

वर्जित तेन भवन्ति अपाया वर्जित तेन भवन्ति कुमित्राः / क्षिप्रु स पश्यति तं अमिताभं यस्यिमु भद्रचरि प्रणिधानम् //

लाभ सुलब्ध सजीवितु तेषां स्वागत ते इमु मानुषजन्म / यादृशु सो हि समन्ततभद्रस्ते ऽपि तथा नचिरेण भवन्ति //

पापक पञ्च अनन्तरियाणि येन अज्ञानवशेन कृतानि / सो इमु भद्रचरिं भणमानः क्षिप्रु परिक्षयु नेति अशेषम् //

ज्ञानतु रूपतु लक्षणतश्च वर्णतु गोत्रतु भोतिरूपेतः / तीर्थिकमारगणेभिरधृष्यः पूजितु भोति स सर्वत्रिलोके //

क्षिप्रु स गच्छति बोधिद्रुमेन्द्रं गत्व निषीदति सत्त्वहिताय / बुद्ध्यति बोधि प्रवर्तयि चक्रं धर्षति मारु ससैन्यकु सर्वम् //

यो इमु भद्रचरिप्रणिधानं धारयि वाचयि देशयितो वा / बुद्धविजानति यो ऽत्र विपाको बोधि विशिष्ट म काङ्क्ष जनेथ //

मञ्जुशिरी यथ जानति शूरः सो च समन्ततभद्र तथैव / तेषु अहं अनुशिक्षयमाणो नामयमी कुशलं इमु सर्वम् //

सर्वत्रियध्वगतेभि जिनेभिर्या परिणामन वर्णित अग्रा / ताय अहं कुशलं इमु सर्वं नामयमी वर भद्रचरीये //

कालक्रियां च अहं करमाणो आवरणान् विनिवर्तिय सर्वान् / संमुख पश्यिय तं अमिताभं तं च सुखावतिक्षेत्र व्रजेयम् //

तत्र गतस्य इमि प्रणिधाना आमुखि सर्वि भवेय्यु समग्रा / तांश्च अहं परिपूर्य अशेषान् सत्त्वहितं करियावत लोके //

तहि जिनमंडलि शोभनिरम्ये पद्मवरे रूचिरे उपपन्नः / व्याकरणं अहु तत्र लभेय्या संमुखतो अमिताभजिनस्य //

व्याकरणं प्रतिलभ्य च तस्मिन् निर्मित कोटिशतेभिरनेकैः / सत्त्वहितानि बहून्यहु कुर्यां दिक्षु दशस्वपि बुद्धिबलेन //

भद्रचरिप्रणिधान पठित्वा यत्कुशलं मयि संचितु किंचित् / एकक्षणेन समृध्यतु सर्वं तेन जगस्य शुभं प्रणिधानम् //

भद्रचरिं परिणाम्य यदाप्तं पुण्यमनन्तमतीव विशिष्टम् / तेन जगद्वयसनौघनिमग्नं यात्वमिताभपुरिं वरमेव //

श्री भद्रचरीप्राणिधानस्तोत्रं समाप्तम् //

नमस्तस्मै भगवते ऽर्हते सम्यक्संबुद्धाय

ज्ञानं यस्य समस्तवस्तुविषयं यस्यानवद्यं वचो यस्मिन् रागलवो ऽपि नैव न पुनर्द्वेषो न मोहस्तथा / यस्याहेतुरनन्तसत्त्वसुखदा ऽनल्पा कृपामाधुरी बुद्धो वा गिरिशो ऽथवा स भगवान् तस्मै नमस्कुर्महे //

देवः शम्भुर्न वैरी हरिरपि न रिपुः केवली नो सपत्नो नोदासीनः स्वयम्भुर्न च पुनरपरे ते परे वासवाद्याः / शास्ता बुद्धो न बन्धुर्जगति न जनको नैकगोत्रैकजातिः किन्त्वेषां वीतरागो भवति सकलविद् यः सुधीभिः स सेव्यः //

ब्रह्मा विद्याभिभूतो दुरधिगममहामाययालिङ्गितो ऽसौ विष्णू रागातिरेकान्निजवपुषि धृता पार्वतौ शङ्करेण / वीताविद्यो विमायो जगति स भगवान् वीतरागो मुनीन्द्रः कः सेव्यो बुद्धिमद्भिर्वदत वदत मे भ्रातरस्तेषु मुक्त्यै //

ब्राह्मं वैष्णवमैश्वरञ्च बहुधा लब्ध्वा पदं हेतुतैः (तः) संसारे वत संसरन्ति पुनरप्येकान्तदुःखास्पदे / किन्तैर्देहभृतामपायबहलैराद्यन्तवद्भिः पदैस् तस्मान्नित्यमनादिमध्यनिधनं बौद्धं पदं प्रार्थ्यताम् //

चिदाकारं सूक्ष्मं विभुविशदमाकाररहितं निरीहं नीरूपं निरवधिकृपाबीजमजरम् / समस्तज्ञं सर्वोपधिरहितमैश्यादमृतदं जितानङ्गैः सेव्यं भवतु मम तद्वस्तु शरणम् //

अणीयो ऽणोः क्लेशाप्रतिहतमनन्तं च महतो महीयो माहात्म्यप्रविजितजगद्भूरिकरुणम् / द्विबाहुं निर्बाहुं द्विपदमपदं सत्रिवदानम् द्विनेत्रं निर्नेत्रं सगुणमगुणं तत्तु शरणम् //

सदानन्दं तथ्यं सरसहृदयं सूक्तिसदनं सतां सेव्यं सम्यक्समधिगततत्त्वं सममनः / स्वतः सिद्धं साध्यं सकलफलदं सौम्यवदनं सदीयं सर्वीयं भवतु मम तद् वस्तु शरणम् //

स्वयम्भूताभिज्ञं भवभयहरं भीतिरहितं स्फुरद्भाग्यो भोगोज्झितमहतवीर्यं मदनजित् / चतुर्मार्गं शुद्धप्रकृति च तथाकर्तृकमिदं मुदं लोकोत्कृष्टामतनु तनुतां वस्तु जगताम् //

क्वचिन्नीलं पीतं क्वचिदपि च रक्तं क्वचिदप् क्वचिच्चन्द्रच्छायं क्वचिदपि च माञ्जिष्ठरुचिरम् / क्वचित् प्राभास्वर्य्यं यदयति च वर्णव्यतिकरा- च्छिखाषट्कं तैस्तैर्दधदुपरि तद्वस्तु शरणम् //

पराभेद्यं जाम्बूनदरूचिरवर्णं त्रिशरणं त्रियानं त्रिप्रज्ञं त्रिभुवनशरण्यं त्रिवचनम् / कृपापात्रं मन्दस्मितमरुणसच्चीवरधरं कृतध्यानं सिद्धासनघटितपाद् वस्तु शरणम् //

प्रसन्नं फुल्लेन्दीवरनयनयुग्मं त्रिपिटकं मुहुर्व्याकुर्वाणं सुरनरगणेभ्यः करुणया / परं शान्तं स्वर्णोपलरजतलोष्ट्रेषु च समं दृशां नव्यातिथ्यं भवतु मम तद् वस्तु शरणम् //

शरणमिति सदग्रं साधु गच्छामि बुद्धं शरणमिति विरागाग्रीयमन्वेमि धर्मम् / शरणमिति गणानामग्रियं यामि संघं शरणमिति पुनस्त्रिं द्वित्रिवारं व्रजामि //

पुनरपि शरणं व्रजामि बुद्धं पुनरपि लोकगुरुं गुरुं करोमि / पुनरपि कथयामि नौमि वन्दे, त्वयि मम गौतम नैव तृप्तिरास्ते //

त्रिभुवनमसकृन्निरूप्य युष्मत्पदसरसीरुहरेणुमाश्रितो ऽहम् / शरणमयमयञ्च दैवतम्मे गतिरपरा मम नास्ति नास्ति नास्ति //

अनित्यमखिलं दुःखमनात्मेति प्रवादिने / नमो बुद्धाय धर्माय सङ्घाय च नमो नमः //

भो वीतराग भगवंस्तव पादमेव वन्दे मुनीन्द्र मुहुरेवमिमं प्रवन्दे / भूयः पुनः पुनरिमं परतः परस्तात् पार्श्वद्वयोरुपरि दिक्षु विदिक्षु वन्दे //

गतमिह भवता पथा च येन स्थितमपि यत्र च यत्र वा निषण्णम् / शयितमपि मुनीन्द्र यत्र योगात् तदपि शतं प्रणमामि पुण्यतीर्थम् //

समजनि भगवान् स्वयं स्म यस्मिन् सकलमबोधि च यत्र धर्मचक्रम् / विशदतरमदीपि यत्र यस्मिन्नमृतमपूरि तदप्यहं नमामि //

सर्वज्ञचक्रसरसीरुहराजहंस कुन्देन्दुसुन्दररुचिं सुरवृन्दवन्द्यम् / सद्धर्मचक्रसहजं जनपारिजातं श्रीदन्तधातुममलं प्रणमामि भक्त्या //

नागालयोपरि धरालयचक्रवालमूर्ध्नि त्रिकूटगतकाञ्चनशैलशृङ्गे / बोधिद्रुमूलनिहिताक्षयधातुबिम्बं विभ्रन्नमामि शिरसा जिनचैत्यमग्रम् //

हैमालवालवलयान्तरत्नवेधी वज्रासनोल्लसितमूलमगेन्द्रबोधम् / यं प्राप्य मारविजयानुपदं प्रपेदे सर्वज्ञतां स भगवान् तमहं नमामि //

मूर्द्धन् बुद्धं नम त्वं श्रवण शृणु सदा धर्ममद्वैधवादि प्रोक्तं सर्वत्र रूपं नयन निरुपमं पश्य जिघ्राङघ्रिपद्मम् / घ्राण त्वं चार्कबन्धोः स्तुहि सखि रसने श्रीघनं पूजयेथाः सिद्धं पाणे व्रजाङ्घ्रे जिनसदनमदस्मद्गुणं चित्त चिन्त्य //

बुद्धो धर्मश्च संघस्त्रितयमिति महानर्घरत्नं मुमुक्षो- रद्यारभ्याहमस्मै त्रिभवभयभिदे सन्ददाम्यात्मभाजम् / एषो ऽहं तत्परः स्याम्परमयनमितो नास्ति मे सत्यमेतत् स्यामस्याहन्तु शिष्यस्त्रिदशनुतमिदं कोटिकृत्वो नमामि //

नाहं लाभार्चनार्थी न च भयचकितो नापि सत्कीर्तिकामो न त्वं धर्मांशुवंशप्रभव इति मुने नापि विद्याशया ते / पारम्पर्यान्नच त्वां शरणमुपगतः किन्तु ते सार्वजन्यं सम्यग्ज्ञानं समीक्ष्य त्वयि भवजलधिं सन्तरीतुं प्रवृत्तः //

त्वद्वैराग्यसमस्तभूतकरुणा प्रज्ञादिनानागुण- स्फूर्ज्जच्चन्दनपङ्कसिन्धुपतितो गन्तुं क्षमो नान्यतः / भूपा वा यदि दण्डयन्ति विबुधा निन्दन्ति वा बान्धवा मुञ्चन्ति क्षणमप्यहं जिन पितर्जीवामि न त्वां विना //

स्वर्गे वा वसतिर्ममास्तु निरये तिर्यक्षु किं वासुरे प्रेतानां नगरे ऽथवा नरपुरे क्वाप्यन्यतः कर्मणा / भो सर्वज्ञ ततस्ततस्तव गुणान् कर्णामृतस्यन्दिनो निष्पापानवलम्बतां मम मनो नान्या सुखप्रार्थना //

तवैवाहं दासो गुणपणगृहीतो ऽस्मि भवता तवैवाहं शिष्यः स्ववचनविनीतो ऽस्मि भवता / तवैवाहं पुत्रः स्मृतिकृतसुखस्तद्गतिगतो गुरो बुद्धस्वामिन् मम जनक मां पाहि भवतः //

पिता माता भ्राता त्वमसि भगिनी त्वं च विपदि स्थिरं मित्रं बन्धुः प्रभुरमृतदीक्षागुरुतमः / त्वमैश्वर्य्यं भोगो त्वमसि धनधान्यं च महिमा यशो विद्या प्राणस्त्वमसि मम सर्वज्ञ सकलम् //

वीतराज मुनीन्द्र दयाम्बुधे सुगत भग्नबृहद्भवपञ्जर / अधिगतामृत बुद्ध मनो ऽम्बुजं मम तवानघ गन्धकुटीयताम् //

अनात्मन्यनित्ये ऽशुभे दुःखदुःखे दुरन्ते ऽत्र संसारचक्रे भ्रमन्तम् / त्वमेकोसि मां त्रातुमीशो दयाब्धे प्रभो ऽतः प्रसीद प्रसीद प्रसीद //

प्रसीदेश देवेश लोकेश जिष्णो जगद्वन्द्य मद्वन्द्य सद्वन्द्य बुद्ध / अघोरे भवारे स्मरारे तमोरे तवैवास्मि भक्तो वपुर्वाङ्मनोभिः //

स तव कुलसुतः स एव भक्तः स भवति शासनधूर्वहः स शिष्यः / स च शरणगतः स एव दासः कथमपि यो न विलङ्घयेत् तवाज्ञाम् //

जगदुपकृतिरेव बुद्ध! पूजा तदपकृतिस्तव लोकनाथ! पीडा / जिन जगदपकृत् कथं न लज्जे गदितुमहं तव पादपद्मभक्तः //

धनजनविभवासुदेहराज्यं यदुपकृते शतधा त्वया प्रदत्तम् / तमहितमपकर्त्तुरस्य लोकं क्व मम कृपा मुदिता क्व वा च मैत्री //

उपपतिमसतीव चित्तवृत्तिर्व्रजति भवन्तमपास्य पञ्चकामम् / अपि च विषयिणो न मोक्षसिद्धिः किमु करवाणि मुनीन्द्र देहि दास्यम् //

प्रियतम पुरुषोत्तमाग्रबुद्ध श्रमहर सिद्ध जगत्प्रसिद्धकीर्ते / भव शरणमनुत्तरप्रसादिन् प्रतिपदमस्मि तवैव दासदासः //

दशबल कलिकालदुर्बलो ऽहं चिरदुरितार्णवतुङ्गभङ्गमग्नः / तव कथमनुयामि धर्मनावं जिन मम देहि कृपाकरावलम्बम् //

प्रणतिरियमनेकशस्तवाहं बहु भवदुःखमवेक्ष्य भीतिभीतः / धर गुरुतरतृष्णया पतन्तं जिन मम देहि कृपाकरावलम्बम् //

जगति तव कृपा हि निर्विशेषा प्रपवतया जिन मां च दोषदुष्टम् / अलमहमिअह नो सुखी भवेन्दुर्न समकरश्चरतीव साध्वसाध्वे(ध्वोः) //

उपचितबहुमोहजातमन्धं विगतदयं विगतात्मबन्धुगन्धम् / अपगतगुणविद्यमुद्गताघं जनमविवेकमवाशु दीनबन्धो //

अकरवमुरुदुष्कृतं पुरा यद् मम वपुषा मनसा च चेतसा च / अनुकलमखिलं प्रलीयतां तत् तव चरणस्मरणेन सर्ववेदिन् //

सुगत तव पुरः पुरः पृथिव्यां मधुरमते पतितो ऽस्मि दण्डनत्या / अकुशलमखिलं तवानुभावात् प्रपततु नोत्पततात् पुनः सहैव //

तव चरणसरोजमेव वन्दे तव पदपङ्कजमेव पूजयामि / तव पदयुगमेव भावये ऽहं तव पदमेव सदैव दैवतं मे //

कमपि न कथयामि नार्चयामि कमपि न नौमि न चिन्तयामि नेहे / कमपि न शरणं व्रजामि हित्वा तव चरणं पितरस्मि किङ्करस्ते //

सदसि सदसि वाचि सिद्धं पथि पथि सद्मनि सद्मनीह बुद्धम् / भुवि भुवि मम वारि वारि चेतः कलयतु नित्यमिमं हि लोकनाथम् //

अविरतमवलोकयामि बुद्धं गतरजसा मनसापि चक्षुषेव / स्वपिमि निशि निधाय यद्धृदि त्वां न मम समं विरहस्त्वया त एव //

मम तदिह दिनं हि दुर्दिनं स्याद् अशितघनस्थगितं न दुर्दिनं मे / यदमृतसमबुद्धरत्ननाम स्मृतिरहितं दिनमस्य मा तदस्तु //

अमृतद षडभिज्ञ धर्मराज त्रिभुवनवन्द्य मुनीन्द्र गोतमेति / अहरहरनुकीर्त्त्यते नृभिर्यैरहमहितानपि तान्नमामि धन्यान् //

दशबल जिन सिद्ध वज्रबुद्धे सुगत तथागत बुद्ध शाक्यसिंह / इति निगदति यः क्वचित् कदाचित् तमभिनमाम्यपि दासवंशजातम् //

मदनजित पराजितेभ्य शास्तर्विभव विनायक विश्वविद्वरेण्य / कविवर वदतांवरेश शुद्धोदनसुत शाक्यमुने मुने प्रसीद //

अमृतमपि निपीय निर्जरेन्द्र पुनरपि ते ऽपि शुनीस्तनं धयन्ति / सकृदपि तव वाक्सुधारसज्ञो न विशति जातु स मातुरेव गर्भम् //

अहमिह भगवन्नलं न सोढुं जननजरामरणा(म)यादिबाधाम् / कुरु मम करुणं दिशो न जाने गुरु तदवेक्ष्य च तिर्यगादिदुःखम् //

तदुपरि परिचिन्त्य वृद्धकाले करचरणादिदृगादिपारवश्यम् / अगतिकमतिवेपते मनो मे जिन किमहं करवै प्रभो प्रसीद //

श्रवणपथगते ऽप्यदृष्टपूर्वे सुखकृति वस्तुनि यत्तनोमि तृष्णाम् / अविरतमत एव शान्तिबीजे त्वयि वलते रमते ममात्र चेतः //

सविपदि रमते न मे मनो ऽतः सुरनरशर्मणि पूर्वपूर्वभुक्ते / अनुदिनमनुभूय शर्करायामपि विरतिं कुरुते हि दृष्टदोषः //

करतलगतमप्यमूल्यचिन्तामणिमवधीरयतीङ्गितेन मूर्खः / कथमहमपहाय बुद्धरत्नं जगति धनी गुणवांश्च पण्डितश्च //

स भवति मतिमान् स नाकुलीनः स च गुणवान् स च कीर्तिमान् स शूरः / स जगति महितः सुखी स एव त्वयि जिन यस्य सुनिश्चलास्ति भक्तिः //

अपि सकलमधीतमत्र तेन श्रुतमपि सर्वमनुष्ठितं च तेन / अपि जितमजितेन तेन विश्वं त्वयि जिन यस्य सुनिश्चलास्ति भक्तिः //

त्यजति निजपरम्परादरेणेतरसमयस्य जनो न दृष्ट दृष्टिम् / असुहरमपि गौरवेण मातुर्न खलु शिशुर्विषमोदकं तु मुञ्चेत् //

कविवरमहमस्मि पण्डितस्ते जिन न जहामि कथन्नु कुर्गृहीतम् / नुदति हि तमसन्ततिं प्रवृत्तां मिहिरमरीचिसहायिनी सुदृष्टिः //

सुगतपदपराङ्मुखस्य पुंसः किमु तपसा यशसा च किं किमन्यैः / सुगतपदपराङ्नुखस्य पुंसः किमु तपसा यशसा च किं किमन्यैः //

सुगतपदि न भक्तिरस्ति येषामजननिरेव महीतले ऽस्तु तेषाम् / कथितमिह कृतागसां नराणां निरयगतिर्नियतं न चान्यतो यत् //

विदितसकलशास्त्रमुन्नतानां कुलभवमुत्तमरुपयौवनाद्यम् / जिन भवदनुपासकं नृपासं त्यजतु मनो मल नीचवत्तु जात्या //

परिहृतमदमानमत्सरादिः सकरुणशीलसमाधिमान् विवेकी / तव पददृढभक्तिरन्त्यजो ऽपि प्रतिभवमस्तु नरोत्तमः सखा मे //

विहितजिनपदार्चनस्य भक्तुर्दशदिवसानपि जीवितं प्रशस्तम् / न तु नियुतसहस्रकल्पकोटीरकृतमुनीन्द्रपदाब्जपूजनस्य //

स भवति सुरसुन्दरीसखो ऽन्यैः कृतमभिनन्दति वार्चनं च भक्त्या / त्रिदशनरगुरो त्वदीयपूजामगतितया यदि कर्तुमक्षमः स्यात् //

सुरुचिरमतिचित्रचित्ररूपं नयनपथं नयतीह यस्तवार्चाम् / रहयति पुरुषं तमप्युदारं चिरतरसञ्चितदुष्कृतं कवीन्द्र //

मणिकनकशिलादिनिर्मितां यः प्रणमति ते प्रतिमां तयोश्च तुल्यम् / फलमिह मनसश्च सम्प्रसादादनुपरतं जिन यो ऽग्रतो नमेत् त्वाम् //

सकृदपि तव पादपद्मपूजा वनकुसुमैरपि यः करोति धीमान् / अवनतसुरसंघमौलिमालोज्ज्वलममलं श्रयते तमाधिपत्यम् //

यदि भवति सरूपमेकचित्तक्षणशरणोद्भवपुण्यवृन्दमुच्चैः / गणशरण समन्तभद्रसाधो ऽखिलनभसो ऽप्यतिरिच्यते तदा तत् //

तव गुणकथने तु यः प्रसन्नस्तमनुविशन्ति मुने गुणास्त्वदीयाः / उदयति शशिनि प्रसन्नमिन्दूपलमिव तत्किरणावलीतुषारः //

सकृदपि समदायि देव किञ्चिद् भवरतिमुत्सृजता जनेन तुभ्यम् / सुगत तदखिलान् लुनाति धारा वदसिरिव द्रुममाश्रवादिदोषान् //

कृतमिह सुकृतं मृषादृशा यज्जनयति तत् किल तस्य दुर्विपाकम् / क्षितिसलिलरसं स्वतिक्तभावं नयति यथा पिचुमर्दबीजमुप्तम् //

तव पदनलिने निपत्य भूयो निपतति नैव चतुर्ष्वपायकेषु / नहि कुशलकरो नरः कदापि क्वचिदपि दुर्गतिमेति नाथ कश्चित् //

इति भवदुपदेशतो विदित्वा तव पदपङ्कजपूजने रतो ऽस्मि / दृढयतु भगवान् युगे युगे मे कुमतिमुदस्य भवे भवे ऽर्यभक्तिम् //

स्थिरमपि भगवन् क्षणं तवोक्तौ करचरणानि दृगादि वैरिवर्गः / व्यथयति हृदयं बलाद्विचाल्य त्वमिदमनाथमनीश पाहि पाहि //

यदि नयनमयं वशे विधातुं यतति तदा द्रवति श्रवो यदा तत् / तदनु रसन-नासिकाशरीराण्यहह परस्परदुर्ग्रहाणि चैवम् //

गतिरतिचपलस्य चेतसः स्यादिह नभसीव नभस्वतो ऽसुरोधा / कभमपि भजते क्रमेण धैर्यं चिअरमिदमभ्यसनेन संविरक्त्या //

विशदमपि मनः स्वभावतो मे चिरकृतकिल्विषकालिमाहृतं स्यात् / कुशलजललवैः कथन्नु धौतं भवति मयेदृशचेतसार्जितैस्तैः //

शुचितरवचनामृतप्रवाहैः रघमलिनीकृतचित्तसन्ततिं माम् / अनधिवर नितान्तमाधितप्तं सपदि विशोधय दण्डवन्नमामि //

सति सकलगुरो मुने प्रसन्ने किमिह दुरापममुत्र किं दुरापम् / यदमलमनसस्त्वदीयदासाः सुरपतितां मनसापि नाद्रियन्ते //

विदधति भयमिन्द्रियाणि भूम्ना विषयविषग्रहणेषु दोषदृष्ट्या / नहि सुविदितभाविदाहदोषः शिशुरपि दीपशिखाग्रसङ्गृही स्यात् //

न भवति जिन यावदेष जीर्णो विषयपिशाचनिषेवणेन तावत् / झटिति सुकृतकर्मणि प्रयोज्य स्वव शरणागतवत्सलागतं माम् //

इअदमपि यदि वेद्मि पुत्रदारस्वतनुगृहादि मरीचिकाम्बुतुल्यम् / स्थगयति ममता च मामहन्ता तदपि हि मोहविजृम्भितं गरीयः //

अजनि च निजकारणेन सर्वं निरसति जीर्यति नश्यति स्वहेतोः / अहमपि हि तथैव धातुपुञ्जः कथमहमस्य कथं मुने ममेदम् //

आत्मबुद्धिरिह यस्य जायते सा च तस्य जनयेदहङ्कृतिम् / सा तनोति सुतरां भवस्पृहां सैव मोहजननी मुहुर्मुहुः //

तेन कर्म कुरुते शुभाशुभं तद्धि दुःखजनकं भवत्रये / दुःखमूलमत एव सात्मधीः तां लुनीहि जिन मे वचो ऽसिना //

अथ सकलविदं दयासमुद्रं त्रिभुवनकारणकारणं कुलीनम् / निखिलगतमनन्तमस्तिशान्तिं मुनिजनमानसहंसमीशमीडे //

स्नाने कर्मणि भोजने वितरणे घ्राणे तथाकर्णने ध्यानस्पर्शनदर्शनादिषु तथा सम्भाषणादावपि / प्रातः सायमथो दिवा च निशि च त्वत्पादपद्मे विभो चित्तं मे रमतां मुनीन्द्र सततं यूनां युवत्यामिव //

मत्स्वामिन् मदभीष्टकल्पविटपिन् मद्देवते मद्गुरो मन्मातर्मदुपास्य मत्प्रियसखे मत्सद्गते मत्पितः / मद्विद्ये मदशेषदुःखशमकृद् मद्भावने मन्निधे मन्मुक्ते मदुदारभाग्य मदसो मद्बुद्ध मां पालय //

ब्रह्मा जिह्माननो ऽभूद् गुरुरगुरुरहर्णायको ऽनायको ऽसौ विष्णुस्तृष्णां प्रपेदे कविरकविरभूदीश्वरो ऽनीश्वरो ऽपि / शेषः शेषानुभावस्तव सुगत नुतौ खण्डिताखण्डलोक्तिः को ऽहं मूढो वराकस्त्रिदशनरपते कीर्त्तने ते गुणानाम् //

दशद्वयधिकविंशतिस्फुरदशीत्यनुव्यञ्जनैः महापुरुषलक्षणं वपुषि यस्य देदीप्यते / कलामपि न षोडशीं भजति तस्य पुण्यात्मनश् चतुर्मुखमुखो गणो दिविषदां नृणां का कथा //

महेन्द्रनवचापवत् कनकपर्वते सर्वतः सदा तव मनोहरं स्फुरति सुप्रभामण्डलम् / दृशो भवति गोचरं तदिह यस्य तस्य त्वरान् तमस्ततिमनुत्तमां हरति दूरमन्तर्बहिः //

रूपं लोचनलोभनं श्रवणयोरानन्दसन्दोहदा वाणी विश्वविमोहकृत् तव कृपावेशो ऽतिशान्तस्तव / पाण्डित्यं प्रथितं जगत्सु भगवन् सर्वज्ञनाम्नैव ते साम्राज्यस्य च यौवने निरसनं वैराग्यसीमा स्फुटम् //

शौर्यं त्वद्विषमेषु दर्पदलनादङ्गीकृतं दैवतैः यद्वाणैः स सुरासुरः प्रविजितो लोको ऽयमोशत्करम् / वीर्यं ते प्रकटीचकार नितरां निर्वाणसाक्षात्कृतिः किं ब्रूमो बलवैभवं भगवतस्तत्ते जगद्दुर्वहम् //

यत्र च्छागतुरङ्गमारणविधिर्वेदे ऽपि तं निन्दसि प्रेम्णा प्राणभृतामतः सकरुणस्त्वत्तो महान्नापरः / एवं ते गुणसम्पदो न विषया बुद्धेरसूयात्मनां ते मूढाः प्रलपन्ति हन्त सुगतो मद्वेदनिन्दीत्ययम् //

निर्मज्जत्सुरसुन्दरीकुचचलन्निर्मन्दमन्दाकिनी- फेणक्षीरसमुद्रकैरवसखी सत्कीर्तिलक्ष्मीस्तव / यन्नालिङ्गति मन्दभाग्यमधुना भूयान्न तेनापि मे सङ्गः सङ्गगदादिवैद्य भगवन्नेषापि मे प्रार्थना //

ये त्वां गच्छन्ति बुद्धं शरणमिति न ते दुर्गतिं यान्ति सन्तस् त्यक्त्वा कायान्मनुष्यान्निरतिशयसुखान् ते लभन्ते ऽथ दिव्यान् / दुःस्वप्नो दुर्निमित्तं दुरहिदुरहिता दुर्ग्रहा दुष्टसत्त्वा दुःखं दुर्व्याधयो ऽपि क्वचिदिह कुशलान् नोपसर्पन्ति चैवम् //

छत्रं ब्रह्मा व्यधात्ते मणिमयममलं चामरं चक्रपाणि- स्तोतारो गद्यपद्यैर्हरगुरुफणिनः शाङ्खिको ऽभून्महेन्द्रः / अन्ये दीपोदकुम्भध्वजकुसुमलसत्पाणयो भक्तिनम्रास् तस्थुर्व्याख्याय धर्मं भुवमवरुहतः स्वर्गतस्ते मुनीन्द्र //

मातेवासीत् परस्त्री भवति परधने न स्पृहा यस्य पुंसो मिथ्यावादी न यः स्यान्न पिबति मदिरां प्राणिनो यो न हन्यात् / मर्यादाभङ्गभीरुः सकरुणहृदयस्त्यक्तसर्वाभिमानो धर्मात्मा ते स एव प्रभवति भगवन् पादपूजां विधातुम् //

सर्वप्राणातिपातात् परधनहरणात् सङ्गमादङ्गनाया मिथ्यावादाच्च मद्याद्भवति जगति यो ऽकालभुत्क्तेर्निवृत्तः / सङ्गीतस्रक्सुगन्धाभरणविलसितादुच्चशय्यासनाद् अप्यासीद्धीमान् स एव त्रिदशनरगुरो त्वत्सुतो नात्र शङ्का //

श्रोतापत्त्यादिमार्गाः सदवयवयुता घ्नन्ति रागादिदोषान् दोषास्ते छिन्नमूला हतभवगतयस्तत्फलैर्यान्ति शान्तिम् / मार्गाणां क्लेशहानिः सदमृतमजरं कारणं स्यान्नवानां धर्माणां हेतुरेषां तव जिन वचनं तस्य हेतुस्त्वमेव //

विंशत्सत्कायदृष्टिक्षितिधरममलज्ञानवज्रेण भित्त्वा रागद्वेषादिपापान्तदुदितमखिलं कर्म चोन्मूलयन्तः / चत्वारो लब्धमार्गास्तदनुगुणफलास्ते ऽपि चत्वार एवं त्वतश्चाष्टार्यसङ्घः पृथगिति न पुनश्चिन्तयामो मुनीन्द्र //

अपि गगणमनन्तं सर्वसत्त्वो ऽप्यनन्तः सकलमिदमनन्तं चक्रवालं विशालम् / वदसि जिन विदित्वानन्तया ज्ञानगत्या तव च गुणमनन्तं वेदसी बुद्ध चैवम् //

भगवति भवतीति ध्वंसकारिण्यमोघे भवतु भवतु भक्तिर्जन्मजन्मान्तरे ऽपि / भवतु भवतु धर्मः सर्वथा मे ऽनुशास्ता भवतु भवतु संघो ऽनुत्तरा पुण्यभूमिः //

त्रिभुवनमहनीयं त्वामभिष्टुत्य बुद्धं विशदतरमदभ्रं पुण्यमत्रार्जितं यत् / जगति सकलसत्त्वास्तेन सम्बुद्धबोधिं विधुतविविधपापा भावनाभिर्व्रजन्तु //

भास्वद्भानुकुलाम्बुजन्ममिहिरे राजाधिराजेश्वरे श्रीलङ्काधिपतौ पराक्रमभुजे नीत्या महीं शासति / सद्गौडः कविभारतिक्षितिसुरः श्रीरामचन्द्रः सुधीः श्रीतृणामकरोत् स भक्तिशतकं धर्मार्थमोक्षप्रदम् //

श्रीशाक्यमुनेर्भगवतः सर्वज्ञस्य परमोपासकेन गौडदेशीयश्रीबौद्धागमचक्रवर्त्तिना भूसुरेणाचार्येण महापण्डितेन

विरचितं भक्तिशतकं समाप्तम् /

नृपः पराक्रान्तिभुजो महीभुजो शिरोमणिः पण्डितमण्डलीसखः / स रामचन्द्रं कविभारतिद्विजं चकार बौद्धागमचक्रवर्तिनम् //

बुद्धो मे जयतां जिनः स भगवान् तद्देशना निर्मला स्थेयात् सत्त्वहिताय भातु भणिता सङ्घस्तदाधारकः / लङ्केशप्रमुखाश्चिअरं वसुमतीं रक्षन्तु नित्यं नृपा वर्षन्तु स्तनयित्नवश्च समये मैत्रीं लभन्तां प्रजाः //

तीर्थग्रामपतेर्यतेस्त्रिपिटकाचार्यस्य भूपान्वया- चार्यश्रेष्ठमुनीश्वरस्य सुगिरः श्रीराहुलस्वामिनः / शिष्यो यो ऽवरजः सुमङ्गलमुनिर्धीमान् स्वया भाषया कारुण्येन मुनीन्द्रभक्तिशतकव्याख्यानमाख्यातवान् //

नमो बुद्धाय गुरवे नमो धर्माय शासिने / नमः सङ्घाय महते त्रिभ्यो ऽपि सततं नमः //

सिद्धिः //

ओम् नमो बुद्धाय

संबुद्धं पुण्डरीकाक्षं सर्वज्ञं करुणात्मकम् / समन्तभद्रं शास्तारं शाक्यसिंहं नमाम्यहम् //

श्रीघनं श्रीमतिं श्रेष्ठं शीतराशिं शिवंकरम् / श्रीमन्तं श्रीकरं शान्तं शान्तमूर्तिं नमाम्यहम् //

नैरात्म्यवादिनमिन्दुं निरवद्यं निराश्रयम् / श्रुतिज्ञं निर्मलात्मानं निस्थूलकं नमाम्यहम् //

निरोधकं नित्यज्ञानं निर्विकल्पं तथागतम् / नियतं निधिनाकेशं निष्प्रपञ्चं नमाम्यहम् //

विश्वेश्वरं विमुक्तिज्ञं विश्वरुपं विनायकम् / विश्वब्रह्म सुसम्पन्नं वीतरागं नमाम्यहम् //

विद्याचरणसंपन्नं विश्वेशं विमलप्रभम् / विनिमज्ञं सविष्टम्भं वीतमोहं नमाम्यहम् //

दुर्दान्तदमकं शान्तं शुद्धं शौद्धोदनिं मुनिम् / सुगतं सुगतिं सौम्यं शुभ्रकीर्तिं नमाम्यहम् //

योगेश्वरं दशबलं लोकज्ञं लोकपूजितम् / लोकाचार्यं लोकमूर्तिं लोकनाथं नमाम्यहम् //

कनकमूर्तिं कर्माब्धिमकलङ्कं कलाधरम् / कान्तमूर्तिं दयापात्रं कनकाभं नमाम्यहम् //

महामतिं महावीर्यं महाविज्ञं महाबलम् / महामहं महाधैर्यं महाबाहुं नमाम्यहम् //

आद्यं पवित्रं तद्ब्रह्ममपराजितमद्भुतम् / आर्यं परहितं नाथममिताभं नमाम्यहम् //

देवदेवं महादेवं दिव्यं वन्दितमव्ययम् / प्रमाणभूतं देवेशं दिव्यरूपं नमाम्यहम् //

परमार्थं परज्योतिं परमं परमेश्वरम् / भावाभावकरं श्रेष्ठं भगवन्तं नमाम्यहम् //

चतुर्मारादिविजितं तत्त्वज्ञं शंकरं शिवम् / तत्त्वसारं सदाचारं सार्थवाहं नमाम्यहम् //

जितेन्द्रियं जितक्लेशं जिनेन्द्रं पुरुषोत्तमम् / उत्तमं सत्पदं ब्रह्म पुण्यक्षेत्रं नमाम्यहम् //

एतैः स्तुत्वा मुनिश्रेष्ठं नरा विगतकल्मषाः / प्राप्नुवन्ति पदं मोक्षं दिव्यं त्वथ सनातनम् //

यस्त्विदं पठते नित्यं प्रातरूत्थाय पण्डितः / नाम्नामष्टोत्तरशतं पवित्रं पापनाशनम् //

लभते चेप्सितान् भोगान् सौमनस्येन वर्णितान् / व्याधयो ऽपि न बाध्यन्ते पातकं च विनश्यति //

आयुरारोग्यमैश्वर्यसर्वमोक्षसमन्वितः / मेधावी च तथा वाग्मी जायते जन्मजन्मनि //

बुद्धभट्टारकस्य ब्रह्माविरचितं स्तोत्रं समाप्तम् //

यः पूर्वं बोधिमूले रविगमनपथे मारगान्नृत्यगीतान् गंगौ गंगौ गगंगौ घघनघनमृदुद्वन्द्वमन्त्रैरजस्रैः / यः स्त्रीभिर्दिव्यरूपैरुपरतरभितुं दूदुभिर्दुर्भिदूर्भिः क्षोभं नैवाभियातः सुरनरनमितः पातु वः शाक्यसिंहः //

यः कन्दर्पाङ्गनानां ककहकहकहा हाहहेति प्रहासै- र्यः स्फीताडम्बराणां तटिति तटतटा तातटीति प्रलापैः / कुत्कुद् बुद्बुद् कुकूचित् कुकुहकुहकुहैः किङ्कराणां च वाग्भि- र्नो त्रस्यः सो ऽस्तु सौम्यः श्रुतसकलमलः शान्तये वो मुनीन्द्रः //

भ्रूक्षेपापाङ्गभङ्गैः स्मरशरविलसत्पक्ष्मताराक्षिपातै प्रौढानङ्गाङ्गनानां ललितभुजलतालास्यलीलायिताङ्गैः / सव्रीडैः सस्मितोक्तैः कलमृदुमधुरामोदरम्यैर्वचोभि- र्भ्रान्तिं चेतो न चित्रं स्मरबलजयिनो यस्य तस्मै नमो ऽस्तु //

उर्वीं सञ्चालयन्तः खरशरनिकरैश्छादयन्तोःन्तरीक्षं ज्वालाभिः क्रोधंवह्नेर्ज्वलितदशदिशः क्षोभयन्तो ऽम्बुराशिम् / हेलोत्खातासिचक्रक्रकचपटुरवाराविणो मारवीराः मैत्रीशस्त्रेण येन प्रसभमभिजिताः पातु वः सो मुनीन्द्रः //

विस्फूर्जज्जातकोपप्रकटितविकटाटोपनिर्घोषघोरं गर्जज्जीमूतजालप्रकटगजघटाटोपबद्धान्धकारम् / कन्दर्पोद्दामवह्निस्फुरदसिकिरणोद्भासिताशेषविश्वं पुष्पेषोः सैन्यमुच्चैर्झटिति विघटितं येन बुद्धः स वो ऽव्यात् //

दिव्यैराकणंपूरैः कमलदलनिभैः पक्ष्मलैर्लोलतारैर् भावस्निग्धैर्विदग्धैः प्रचलितललितैः सस्मितैर्भ्रूविलासैः / नेत्रैर्माराङ्गनानां परिगतवलयैर्लोहितान्तैरशान्तैर् नाकृष्टः सर्वथा यस्तमहमृषिवरं वान्तदोषं नमामि //

नोद्भ्रान्तं यस्य चित्तं स्फुटविकटसटान्तोत्कटैर्लोलजिह्वैर् मारैः शूलाग्रहस्तैर्गजतुरगमुखैः सिंहशार्दूलवक्त्रैः / प्रद्युम्नः कामदेवस्तृणवदगणितो येन संरम्भभीरुः संबुद्धः पातु युष्मान् व्यपगतकलुषो लोकनाथो मुनीन्द्रः //

अक्षोभ्या यस्य बुद्धिर्धरणिनगनदीसागराम्भोधरद्भिर् गर्जद्भिर्मारवीरैर्विविधमुखशतैर्घोररूपैरनन्तैः / येनासौ पुष्पकेतुस्तृणवदगणितः सर्वविद् वीतरागः स श्रीमान् बुद्धवीरः कलुषभयहरः पातु वो वीतरागः //

मारानीकैर्महोग्रैरसिपरशुधनुःशक्तिशूलाग्रहस्तैर् उल्कापातैरनेकैर्गहनपटुरवैर्भीषणैर्भीमनादैः / न क्षुब्धं यस्य चित्तं गिरिसममचलं गाढपर्यङ्कबन्धं तं वन्दे वन्दनीयं त्रिभवभयहरं बुद्धवीरं प्रवीरम् //

उच्चैरट्टाट्टहासैः प्रकटपटुभटाबद्धघण्टै रणद्भिः साटोपास्फोटटङ्कस्फुटजटिलजटैः किङ्करैः कोटराक्षैः / भग्नं कर्तु न शक्ताः पटुपटहपटस्फालनैर्यस्य बोधौ दृप्तानां गृध्रकूटे पटुपटहपटुः सो ऽस्तु वो बुद्धवीरः //

कोकण्डं रामकण्डं प्रतिभयकुहरं दर्पदर्पं रणाण्डं डिम्बं डिम्बं डडिम्बं डुह डुहक डुहं तृंखलस्तृंखलस्तृम् / झिम्बं झिम्बं झझिम्बं खमु खमु खमुखं मंखु मंखुः खुमंखुर् एभिर्ध्वानैर्न भीतः सुरवरनमितः पातु वः शाक्यसिंहः //

यं माराङ्गारधाराधरसमयसमारम्भसंरम्भयुक्तं नक्तं माराङ्गनानां मुखकमलवनश्रीविपक्षैकपक्षा / सम्यक्संबोधिलक्ष्मीः शशिनमिव शरत्कौमुदी संप्रपेदे तस्येयं धर्मदूती ध्वनति भगवतो धर्मराजस्य गण्डी //

निघ्नन्नप्राप्तदृष्टिः क्षणमपि च चिरादन्तको यद् दुरन्तं तस्मिन्निक्षिप्तचित्ताः कुरुत सुचरितेष्वादरं सर्वकाले / इत्थं रत्नत्रयाज्ञामिव वदति मुहुः प्राणिनां यस्य सैषाम् एषा शब्दायमाना प्रथितमुखरदिङ्मण्डला धर्मगण्डी //

मार्तण्डमण्डलमिवोडुगणं विजित्य भातीह तीर्थिकजनं जिनशासनं च / रंरम्यते धरणिमण्डलमण्डनस्य गण्डी यमस्य जयडिण्डिमवत्प्रचण्डा //

यस्यात्यन्तं दृढत्वं जमि जमि डुडुभं रञ्जितेनालिनालिं डिम्बं डिम्बं डिडिम्बं डुभडुभडुडुभं नाडिवन्नाडिभण्डम् / रुण्डं रुण्डं रुरुण्डं यरलव खखुमं मंखुमंखुः खुमंखुः पश्य त्वं जीवलोके दशबलबलिनः पीड्यते मारसैन्यम् //

भूकम्पोत्कम्पजाता प्रचलितवसुधा कम्पते मेरुराज उत्त्रस्ता देवसंघा ग्रहगणसहिता नागराजाः समस्ताः / श्रुत्वा गण्डीं प्रचण्डां विविधभयकरीं त्रासनीं तैर्थिकानां बौद्धानां शान्तिहेतोः प्रतिरणति महीं रावयन्तीव सद्यः //

एषा विहारशिखरे प्रविरौति गण्डी मेघस्वनेन कुरुते च मनोज्ञघोषान् / मातेव वत्सलतया सुबहिर्गतांश्च पुत्रान् समाह्वयति भोजनकालगण्डी //

संसारचक्रपरिवर्तनतत्परस्य बुद्धस्य सर्वगुणरत्नविभूषितस्य / नादं करोति सुरदुन्दुभितुल्यघोषा गण्डी समस्तदुरितानि निवारयन्ती //

एषा हि गण्डी रणते नराणां संबोधिनी देवनरासुराणाम् / भद्राः शृणुध्वं सुगतस्य गण्डीमापूरितां भिक्षुगणैः समग्रैः //

नागैः संवर्तकालक्षुभितजलधराकारवद् व्योम्नि कीर्णैः क्वास्मिन् विघ्वंसशङ्का भयचकितजनैस्तत्प्रतीकारहेतोः / कुर्वन्त्यद्यापि यस्या ध्वनिमुपशमिताशेषतीर्थ्यावलेपं सा गण्डी पातु युष्मान् सकलमुनिवरैः स्थापिता धर्मवृद्ध्यै //

एषा सुरासुरमहोरगसत्कृतस्य शान्तिं परामुपगतस्य तथागतस्य / गण्डी रणत्यमरदुन्दुभितुल्यघोषान् कृत्वान्यतीर्थ्यहृदयानि विदारयन्ती //

पुण्ये तत्परमानसा भवत भोः स्वर्गापवर्गप्रदे पापं दुर्गतिदायकं कुरुत मा लोकाश्चलं जीवितम् / इत्थं मध्यविलीनभृङ्गविरुतं यत्नान्निवार्यं मया मारारेश्चरणाब्जयोर्विनिहितः पुष्पाञ्जलिः पातु वः //

मुञ्जद्भिः कुसुमानि तूर्यरणितैरापूरयद्भिर्दिशो जोजोकारपुरःसरैः सुरगणैः शक्रादिभिः सादरैः / स्वर्गाद् यस्य भुवं किलावतरतो दत्तानुयात्रा चिरं तस्याव्यात् करुणानिधेर्भगवतो गण्डी प्रचण्डा जगत् //

गत्वा सप्त पदानि मातुरुदरान्निष्क्रान्तमात्रः स्वयं संसारश्रवसं ममेति वचनं प्रोवाच यो ऽनन्यधीः / यस्मिन्नात्मभुवे पुनस्त्रिभुवनं भ्राजिष्ण्वभिव्याहृतं कुर्याद्वः सुगतस्य तस्य जयिनो गण्डी तमःखण्डिनी //

जित्वा मारबलं महाभयकरं कृत्वा च दोषक्षयं सर्वज्ञं पदमाप यत् सुरुचिरं तत्रैव रात्रौ बहिः / तस्याशेषगुणाकरस्य सुधियो बुद्धस्य शुद्धात्मनो गण्डी खण्डितचण्डकिल्विषहरा भूयाद् विभूत्यै नृणाम् //

ब्रह्मा जिह्म इवाभवत् सुरगुरुर्गर्वं जहौ सर्वथा शर्वः खर्वमतिर्बभूव भगवान् विष्णुश्च तूष्णीं स्थितः / इत्थं यद्गुणकीर्तनेषु विबुधा याता ह्रिया मूकतां गण्डी तस्य मुनेरियं जयति वः पायादपायाज्जगत् //

ब्रह्मादित्यशशाङ्कशङ्करशताक्षोपेन्द्रयक्षादयो गन्धर्वोरगकिन्नरासुरसमीरप्रेतपीडाम्बराः / ये तिष्ठन्त्यमरा नरा क्षितितले पाताललोकेषु च श्रोतुं धर्ममिमं तथागतगुरोः सर्वे समायान्तु ते //

यस्या जन्मनि दीनहीनमतयः प्रापुः शुचं तीर्थिकाः हर्षोत्कर्षविशेषवर्धितधियो बौद्धा धृतिं लेभिरे / यामासाद्य गुणाः प्रयान्ति विततिं दोषा व्रजन्ति क्षयं सा गण्डी कलिकालकल्मषहरा भूयाद् भवद्भूतये //

यां नत्वा विधिवद् विशुद्धमतयो गच्छन्ति तुङ्गां गतिं यस्याः क्षिप्रतरं प्रयान्ति विवशाः सर्वे विपक्षाः क्षयम् / ध्वस्तव्यस्तसमस्तमोहपटला सा धर्मगण्डी मुनेः संभूयाद् भवभाविसाध्वसभिदे युष्माकमायुष्मताम् //

श्रुत्वा यां पतिता महीतलमलं ब्रह्मादयः स्वर्भुवः कम्पन्ते धरणीधराः क्षितिरपि क्षिप्रं गता क्ष्मातलम् / तीर्थ्यानां भयकारिणी परहितायारम्भशुद्धात्मनां बौद्धानामुपशान्तये सपदि सा संताड्यतां गण्डिका //

प्रौढालीढाभिरुढो गुरुतरचरणक्रान्तगौरीस्तनाग्रं सर्वज्ञस्योत्तराङ्गं स्फुटविकटशता गर्जयन् वज्रमुख्या / ज्वालामालोज्ज्वलाङ्गं त्रिभुवनविवरव्याप्तहुंकारभीमो बद्धव्याबद्धमौलिर्जयति सुरनरादित्यचन्द्रासुरेन्द्रः //

पीनोत्तुङ्गस्तनीनां हरिणदृशदृशां हंसलीलागतीनां दं दं दं दं द दं दं तनि तनि तनितस्तालिका कामिनीनाम् / तुं तुं तुं तुं ततुं तुं नकटिनमभितो गीतितो गीतवाद्यैः टुं टुं टुं टुं टुटुं टुं टुमिति मितनता हन्यते गण्डिकेयम् //

बुद्धगण्डी समाप्ता / कृतिरियमाचार्यश्री-अश्वघोषपादानाम् //

ओम् नमो बुद्धाय

नमो ऽस्तु बुद्धाय विशुद्धबोधये विशुद्धधर्मप्रतिभासबुद्धये / सद्धर्मपुण्योपगतानुबुद्धये भवाग्रशून्याय विशुद्धबुद्धये //

अहो अहो बुद्धमनन्ततेजसं अहो अहो सागरमेरुगुल्मम् / अहो अहो बुद्धमनन्तगोचरम् औदुम्बरं पुष्पमिवातिदुर्लभम् //

अहो महाकारुणिकस्तथागतः अहो अहो शाक्यकुलस्य केतुः / अहो प्रणम्यः स नरेन्द्रसूर्यो येनेदृशं भाषितसूत्रमुत्तमम् //

अनुग्रहार्थं स हि सर्वसत्त्वान् सद्धर्मचर्यामुपदिश्य नूनम् / शान्तेश्वरः शाक्यमुनिस्तथागतः सत्त्वोत्तमः शान्तपुरं प्रविष्टः //

गम्भीरशान्तं विरजासमाधिपदं प्रविष्टे जिनबुद्धगोचरे / शून्याश्च कायास्त्वथ श्रावकाणां शून्या विहारा द्विपदोत्तमानाम् //

ते सर्वधर्मा प्रकृतिश्च शून्या सत्त्वा हि शून्या नहि जातु विद्यते //

नित्यं च नित्यं च जिनं स्मरामि नित्यं च शोचामि जिनस्य दर्शनम् / नित्यं च नित्यं प्रणिधिं करोमि संबुद्धपूज्यस्य च दर्शनार्थम् //

स्थाप्येह नित्यं धरणीषु जानु शोकाभितप्तो जिनदर्शनाय / ओदन्तकारुण्यविनायकस्त्वमतीव तृष्णा सुगतस्य दर्शने //

सतां वरो यद्विजहार नित्यं ददाहि मे दर्शनतोयशीतलम् / सत्त्वाः सतृष्णास्तव रूपदर्शने प्रह्लादयैनान् करुणाजलेन //

कारुण्यभावं कुरु नाथ नायक ददाहि मे दर्शनं सौम्यरूपम् / त्वं पाहि त्रातर्जगदेकदेशिता शून्याश्च कायास्त्वथ श्रावकाणाम् //

आकाशतुल्या गगनस्वभावा मायामरीच्योदकचन्द्रकायाः / सर्वे च सत्त्वाः सुखितस्वभावा भवन्तु भो नायक त्वत्प्रसादात् //

बोधिसत्त्वसमुच्चयानाम कुलदेवताविरचितं

बुद्धस्तोत्रं समाप्तम् //

जातिं बोधिं प्रबलमतुलं धर्मचक्रमरण्ये चैत्ये चार्यं त्रिभुवननमितं श्रीमतं प्रातिहार्यम् / स्थाने चैत्ये गिरिनगरनिभे देवदेवावतारं वन्दे भक्त्या प्रणमितशिरसा निर्वृता येन बुद्धाः //

वैशाल्यां धर्मचक्रे प्रथितजिनवरे पर्वते गृध्रकूटे श्रावस्त्यां लुम्बिकायां कुशिनगरवरे कापिलाख्ये च स्थाने / कौशल्यां स्थूलकूटे मधुरवरपुरे नन्दगोपासराते ये चान्ये धातुचैत्या दशबलबलिता तान् नमस्यामि बुद्धान् //

कैलाशे हेमकूटे हिमवति निलये मन्दरे मेरूशृङ्गे पाताले वैजयन्ते धनपतिनिलये सिद्धगन्धर्वलोके / ब्रह्माण्डे विष्णुभूम्यां पशुपतिनगरे चन्द्रसूर्यातिरेके ये चान्ये धातुचैत्या दशबलवलिता तान् नमस्यामि बुद्धान् //

काश्मीरे चीनदेशे खसतवरपुरे बल्कले सिंहले वा राताद्ये सिंहपोटे सततमविरतं वल्लखे कापिलाख्ये / नेपाले कामरूपे कुवसवरपुरे कान्तिशोभासराते ये चान्ये धातुचैत्या दशबलवलिता तान् नमस्यामि बुद्धान् //

ये च स्युर्धातुगर्भा दशबलतनुजाः कुम्भसंज्ञाश्च चैत्याः अङ्गाराः क्षारस्थाने हिमरजतनुमास्तूपरत्नप्रकाशम् / पाताले ये च भूम्यां गिरिशिखरगता ये च वित्ताः समन्ताद् बुद्धानां ये च विम्बाः प्रतिदिनसुकृतस्तान् नमस्यामि बुद्धान् //

श्री चैत्यवन्दना समाप्ता //

ओम् नमः श्रीचक्रसंवराय

श्रीहेरुकं महावीरं चक्रसंवरसंवरम् / नमामि मारजेतारं डाकिनीजालमा(ना)यकम् //

वन्दे तां वज्रवाराहीं महारागानुरूपिणीम् / डाकिनीं च तथा लामां खण्डरोहां च रूपिणीम् //

चत्वारो(त्वरे ऽ)मृतभाण्डां च बोधिचित्तेन पूरिताम् / पुल्लीरमलयशिरसि प्रचण्डां वज्रडाकिनीम् //

जालन्धरशिखां चैव चण्डाक्षीं गतकिल्विषाम् / ओडियानाह्वये सर्वे श्रोत्रे देवीं प्रभावतीम् //

अर्बुदे पृष्ठवंशे तु महानासां नमाम्यहम् / गोदावरीं पुरे वामे कर्णे वीरमतीं शुभाम् //

रामेश्वरीं भ्रुवोर्मध्ये खर्वरीं वरवर्णिनीम् / देवीकोट्टे स्थितां मैत्रे श्रीमल्लङ्केश्वरीप्रभाम् //

मालवे स्कन्धदेशे तु द्रुमच्छायां नमाम्यहम् / कामरूपे कक्षद्वये देवीमैरावतीं शुभाम् //

ओड्रे स्तनद्वये वापि श्रीमहाभैरवां सतीम् / त्रिशकुन्याह्वये नाभौ वायुवेगां मनोरमाम् //

कोशले नासिकाग्रे वा सुराभक्षीं नमाम्यहम् / कलिङ्गे वदने रम्ये श्यामादेवीं सनातनीम् //

लम्पाके कण्ठदेशे तु सुभद्रां वरसुन्दरीम् / काञ्चीप्रेतहृदये हयकर्णां मनोरमाम् //

हिमालये पुरे मेढ्रे नमस्यामि खगाननाम् / प्रेतपुर्यां तथा लिङ्गे कौबेर्यां शस्यनीश्वरीम् //

गृहदेवता गुदे स्थाने खण्डरोहां मनोहराम् / सौराष्ट्रे ऊरुयुगले शौण्डिनो सुखदायिनीम् //

सुवर्णद्वीपे जंघायां संस्थितां चक्रवर्मिणीम् / नगरे चाङ्गुलीस्थाने सुवीरां वरयोगिनीम् //

सिन्धौ च पादयोः पृष्ठे स्थितां देवीं महाबलाम् / मरौ चाङ्गुष्ठयुगले च संस्थितां चक्रवर्तिनीम् //

कुलताजानुद्वये देवीं महावीर्या नमाम्यहम् / खण्डकपालवीराद्यां स्वप्रज्ञाशिष्टविग्रहाम् //

मम भक्त्या महावीरां कायवाकचित्तचक्रगाम् / काकतुण्डीमुलूकास्यां श्वानास्यां शूकराननाम् //

यमदाढीं यमदूतीं यमदंष्ट्रीं यमान्तिकाम् / एता देवीर्नमस्यामि दिग्विदिक्षु च संस्थिताः //

वीरवीरेश्वरीनाथं हेरुकं परमेश्वरम् / स्तुत्वेदं देवतीचक्रं यन्मयोपार्जितं शुभम् // तेन पुण्येन लोको ऽस्तु वज्रडाको जगद्गुरुः //

श्रीचक्रसंवरस्य स्तुतिः समाप्ता //

ओम् नमः श्रीचण्डिकायै ऊं ऊं ऊं उग्रचण्डं चचकितचकितं चंचरा(ला) दुर्गनेत्रं हूं हूं हूंकाररूपं प्रहसितवदनं खङ्गपाशान् धरन्तम् / दं दं दं दण्डपाणिं डमरुडिमिडिमां डण्डमानं भ्रमन्तं भ्रं भ्रं भ्रं भ्रान्तनेत्रं जयतु विजयते सिद्धिचण्डी नमस्ते //

घ्रं घ्रं घ्रं घोररूपं घुघुरितघुरितं घर्घरीनादघोषं हुं हुं हुं हास्यरूपं त्रिभुवनधरितं खेचरं क्षेत्रपालम् / भ्रूं भ्रूं भ्रूं भूतनाथं सकलजनहितं तस्य देहा (?) पिशाचं हूं हूं हूंकारनादैः सकलभयहरं सिद्धिचण्डी नमस्ते //

व्रं व्रं व्रं व्योमघोरं भ्रमति भुवनतः सप्तपातालतालं क्रं क्रं क्रं कामरूपं धधकितधकितं तस्य हस्ते त्रिशूलम् / द्रुं द्रुं द्रुं दुर्गरूपं भ्रमति च चरितं तस्य देहस्वरूपं मं मं मं मन्त्रसिद्धं सकलभयहरं सिद्धिचण्डी नमस्ते //

झं झं झंकाररूपं झमति झमझमा झंझमाना समन्तात् कं कं कंकालधारी धुधुरितधुरितं धुन्धुमारी कुमारी / धूं धूं धूं धूम्रवर्णा भ्रमति भुवनतः कालपास्त्रिशूलं तं तं तं तीव्ररूपं मम भयहरणं सिद्धिचण्डी नमस्ते //

रं रं रं रायरुद्रं रुरुधितरुधितं दीर्घजिह्वाकरालं पं पं पं प्रेतरूपं समयविजयिनं सुम्भदम्भे निसुम्भे / संग्रामे प्रीतियाते जयतु विजयते सृष्टिसंहारकारी ह्रीं ह्रीं ह्रींकारनादे भवभयहरणं सिद्धिचण्डी नमस्ते //

हूंकारी कालरुपी नरपिशितमुखा सान्द्ररौद्रारजिह्वे हूंकारी घोरनादे परमशिरशिखा हारती पिङ्गलाक्षे / पङ्के जाताभिजाते चुरु चुरु चुरुते कामिनी काण्डकण्ठे कङ्काली कालरात्री भगवति वरदे सिद्धिचण्डी नमस्ते //

ष्ट्रीं ष्ट्रीं ष्ट्रींकारनादे त्रिभुवननमिते घोरघोरातिघोरं कं कं कं कालरूपं घुघुरितघुरितं घुं घुमा बिन्दुरूपी / धूं धूं धूं धूम्रवर्णा भ्रमति भुवनतः कालपाशत्रिशूलं तं तं तं तीव्ररूपं मम भयहरणं सिद्धिचण्डी नमस्ते //

झ्रीं झ्रीं झ्रींकारवृन्दे प्रचरितमहसा वामहस्ते कप्ःलं खं खं खं खङ्गहस्ते डमरुडिमडिमां मुण्डमालासुशोभाम् / रुं रुं रुं रुद्रमालाभरणविभूषिता दिर्घजिह्वा कराला देवि श्री उग्रचण्डी भगवति वरदे सिद्धिचण्डी नमस्ते //

आरुणवर्णसङ्काशा खड्गफेटकबिन्दुका / कामरूपी महादेवी उग्रचण्डी नमो ऽस्तुते //

श्री चण्डिकादण्डकस्तोत्रं समाप्तम् //

श्रीहेरुकं महावीरं विशुद्धं कुलिशेश्वरम् / नमामि सर्वभावेन डाकिनीगणभूषितम् //

संवराय नमस्तुभ्यं द्वयाकाराय नमो नमः / चक्रस्थिताय देवाय चक्रसंवर ते नमः //

मेषवक्त्र नमस्ते ऽस्तु शिवशक्तिस्वरूपिणे / महाक्रोधस्वरूपाय मेषसंवर ते नमः //

अश्वाननाय देवाय रतिकर्मरताय च / भुक्तिमुक्तिप्रदात्रे च अश्वसंवर ते नमः //

व्याघ्रास्याय नमस्तुभ्यं शक्तियुक्ताय वै नमः / सुरामांसरतो नित्यं व्याघ्रसंवर ते नमः //

कूर्मास्याय नमस्तुभ्यं सुरते संरताय च / नमो देवाधिदेवाय कूर्मसंवर ते नमः //

नमामि मत्स्यवक्त्राय मानवानां हिताय वै / नमो नमस्ते देवेश मत्स्यसंवर ते नमः //

मकराकारवक्त्राय महाशक्तिधराय च / मनोवाञ्छाप्रदात्रे च मकरसंवर ते नमः //

संवरायोष्ट्रवक्त्राय शक्तिकालिङ्गणाय च / मैथुने तत्परायाथ उष्ट्रसंवर ते नमः //

नमामि गजवक्त्राय योनौ लिङ्गप्रदाय च / नमो भगवते तुभ्यं गजसंवर ते नमः //

मण्डूकानननाथाय त्रैलोक्येशाय ते नमः / नमो देवाधिदेवाय मण्डूकसंवराय च //

नमामि चाविवक्त्राय नित्यं रतिरताय च / नमस्ते देवदेवेश अहिसंवर ते नमः //

शुकाननाय देवाय द्वयाकाराकारशोभिने / नमो नमस्ते भीमाङ्ग शुकसंवर ते नमः //

संवराय नमस्ते ऽस्तु शक्तियुक्ताय वै नमः / सिंहाननाय वै नित्यं सिंहसंवर ते नमः //

मर्कटाननदेवाय शक्तिचुम्बनरताय च / नमस्ते ऽस्तु नमस्ते ऽस्तु हरिसंवर ते नमः //

श्वानवक्त्र नमस्ते ऽस्तु शक्तिचुम्बनकारिणे / नमस्ते भगवन् देव श्वानसंवर ते नमः //

वराहास्यवरेवान भगक्रीडनकारक / नमामि शक्तियुक्ताय घृष्टिसंवर ते नमः //

जम्बुकास्याय देवाय शक्तिकालिङ्गणाय च / सर्वपापहरायैव शिवासंवर ते नमः //

नमामि गृध्रवक्त्राय दुःखनाशाय ते नमः / द्वयाकारसिद्धिदेवाय गृध्रसंवर ते नमः //

काकाननाय शुद्धयक्ष शृङ्गाररूपधारिणे / नमो भगवते तुभ्यं काकसंवर ते नमः //

उलूकवक्त्रिणे तुभ्यं महासौख्यप्रदाय च / योनिमैथुनकृद्देवोलूकसंवर ते नमः //

तार्क्ष्याननाय देवाय तारिणे भवसागरात् / नमस्तुभ्यं नमस्तुभ्यं नमो गरुडसंवर //

गोवक्त्राय नमस्तुभ्यं गोहत्यापापहारिणे / गोत्रवृद्धिप्रदात्रे च धेनुसंवर ते नमः //

गर्दभाकारवक्त्राय गतागतक्षयाय ते / गणेश्वराय देवाय खरसंवर ते नमः //

महिषास्याय देवाय महाप्रलयकारिणे / शक्तियुक्ताय देवाय नमओ महिषसंवर //

विडालास्य नमस्तुभ्यं मूत्रकूण्डप्रक्रीडिने / श्रेष्ठाय परमेशाय नमो मार्जारसंवर //

नमामि शाल्ववक्त्राय द्वयङ्गमेकेव शोभितम् / नमामि देवदेवेश नमः शरभसंवर //

सिद्धाय सिद्धरूपाय गुणाय गुणवर्तिने / क्रौञ्चास्याय नमस्तुभ्यं क्रौञ्चसंवर ते नमः //

उल्काननाय शुद्धाय उत्तमाय नमो नमः / उग्राय भीमरूपाय उल्कसंवर ते नमः //

हंसवक्त्र नमस्ते ऽस्तु हंसस्वरस्वरूपिणे / हंसःसो ऽहंस्वरूपाय हंससंवर ते नमः //

मृगवक्त्राय देवाय नमामि परमेश्वर / ऋद्धिसिद्धिप्रदात्रे च मृगसंवर ते नमः //

शक्तियुक्त नमस्ते ऽस्तु चक्रवाकाननाय च / नमस्ते चकवाकाख्यसंवराय नमो नमः //

अजाननाय वीराय अविद्यानाशिने नमः / अपवर्गफलाप्त्यर्थमजसंवर ते नमः //

कुक्कुटास्याय देवाय कुलवृद्धिकराय च / नमस्ते कौटुकेशाय तुभ्यं कुक्कुटसंवर //

कृष्णसारसवक्त्राय नमस्ते कर्मसम्भव / कालनाशाय देवाय एणसंवर ते नमः //

मूषाननाय पूर्णाय ज्ञानदाय नमो नमः / सर्वदैत्यविनाशय मूषसंवर ते नमः //

सालूकास्य नमस्ते ऽस्तु मानादिवरदाय च / सिद्धिबुद्धिप्रदात्रे च नमः सालूकसंवर //

नमः कपोलवक्त्राय प्रज्ञोपायात्मरूपिणे / नमस्ते ऽस्तु महावीर कपोतसंवराय च //

नमामि ग्राहवक्त्राय भुक्तिमुक्तिप्रदाय च / नमो ऽस्तु सर्वभूतेश ग्राहसंवर ते नमः //

नमस्ते चिह्लवक्त्राय नमस्ते मैथुने रत / नमस्ते भगवन् देव चिह्लसंवर ते नमः //

चटकास्याय देवाय नमस्ते ऽस्तु जगद्गुरो / नमस्ते ऽस्तु गुणाधीश चटकसंवर ते नमः //

सारसास्य नमस्तुभ्यं नमस्ते गुणसागर / नमो भगवते तुभ्यं सारससंवराय च //

खञ्जनास्याय देवाय महादेवाय ते नमः / निर्वाणपददात्रे खञ्जरीटसंवराय च //

नमस्ते क्षेमकर्यास्य भुक्तिमुक्तिप्रदाय च / नमो भगवते देव क्षेमकरिसंवराय ते //

शशकास्य नमस्तुभ्यं नमस्ते भुवनेश्वर / कर्मप्रदाय ते नित्यं नमः शशकसंवर //

नमो भल्लूकवक्त्राय रतिक्रीडापराय च / कार्यसिद्धिप्रदात्रे च नमो भल्लूकसंवर //

पिकास्याय नमस्तुभ्यं मन्त्रसिद्धिकराय च / त्रिलोकेशाय सर्वाय पिकसंवर ते नमः //

नमामि वकवक्त्राय शक्तियुक्तगणाधिप / नमामि देवदेवेश वकसंवर ते नमः //

खङ्गिवक्त्राय देवाय सर्वदा शिरसा नमः / नमो ऽस्तु परमेशाय खङ्गिसंवर ते नमः //

कर्कटास्य नमस्तुभ्यं नमः संसारहेतवे / पापपुञ्जविनाशाय नमः कर्कटसंवर //

नमः शल्लकिवक्त्राय सर्वदोषनिवारिणे / संसारपाशनाशाय नमः शल्लकिसंवर //

वृश्चिकास्य नमस्तुभ्यं बलकल्याणदाय च / नमो नमस्ते देवाय नमो वृश्चिकसंवर //

अलिवक्त्राय देवाय अलिमोदाय ते नमः / अलिलोकविनाशाय अलिसंवर ते नमः //

जाहकास्य नमस्ते ऽस्तु जनमोहकृताय वै / जयकल्याणदात्रे च नमो जाहकसंवर //

चमरीवक्त्र ते नित्यं चातुर्यफलदायिने / चतुर्वर्गप्रदात्रे च नमश्चमरिसंवर //

सीम्निवक्त्रनमस्तुभ्यं सिद्धित्वफलदायिने / नमो भगवते नित्यं सीम्निसंवर ते नमः //

नमामि गोधवक्त्राय नमस्ते भीमविक्रम / नमस्ते दिव्यनेत्राय गोधासंवर ते नमः //

चकोरास्य नमस्तुभ्यं चाञ्चल्यदोषनाशक / नमो भगवते तुभ्यं चकोरसंवराय च //

गोधिकास्याय सततं सृष्टिसंहारकरिणे / नमस्ते परमानन्द गोधिकासंवराय च //

मधुमाक्षिकवक्त्राय नमस्ते मानदायक / सर्वज्ञाय परेशाय नमो माक्षिकसंवर //

पतङ्गवक्त्र ते नित्यं परमेश नमः सदा / दिव्याय दिवसेशाय नमः पतङ्गसंवर //

नरवक्त्राय देवाय नरकध्नाय ते नमः / नानारूपदधानाय नरसंवर ते नमः //

सृष्टिरूप जगद्धाम सृजते सर्वभूतकम् / नमो नमस्ते सततं सृष्टिसंवर ते नमः //

स्थितिरूपाय देवाय गुणाय गुणवर्तिने / नमः सारविनाशाय स्थितिसंवर ते नमः //

सर्वलोकस्य संहारकर्त्रे ते परमेश्वर / तस्मादहं नमस्यामि नमः प्रलयसंवर //

ज्योतिर्वक्त्र परं धाम नमस्ते जगदीश्वर / परात्परतरं सूक्ष्म ज्योतिःसंवर ते नमः //

इतीदं संवरस्तोत्रं त्रिषु लोकेषु दुर्लभम् / परात्परतरं स्तोत्रं चतुःषष्टिप्रमाणकम् //

चतुःषष्टिप्रमाणेषु आद्यमाद्यं तु वक्त्रितम् / भूयो ग्रन्थमयाच्चात्र आद्यमात्रं प्रचोदितम् //

कन्यार्थी लभते कन्यां धनार्थी लभते धनम् / विद्यार्थी लभते विद्यां मोक्षार्थी मोक्षमाप्नुयात् //

वशीकरणमुच्चाटं मारमोहनस्तम्भनम् / आकर्षणं च विद्वेषं धातुवादं रसायनम् //

गुटिकां पादुकासिद्धिं खङ्गसिद्धिं तथैव च / खेचरीसिद्धि वैद्याङ्गं मन्त्रसिद्धिं च वाक्पटुः //

परकायप्रवेशं च द्रव्याकर्षणमेव च / लभते स्तोत्रराजेन सत्यं सत्यं मयोदितम् //

दुर्भिक्षं चापदि पाठं कुरुते शुभमाप्नुयात् / अतिवृष्टावनावृष्टौ महामारीसमुद्भवे //

राज्यभ्रंशे ज्ञानभ्रंशे स्त्रीभ्रंशे च धनक्षये / कलहे च विवादे च पठते स्तोत्रमुत्तमम् //

भिक्षुकेभ्यः सहस्रेभ्यः तुल्यं दानकृतं फलम् / बहुनात्र किमुक्तेन ब्रह्माण्डदानजं फलम् //

श्रीसंवरागमे महातन्त्रे अमिताभवैरोचनसंवादे श्रीचक्रसंवरादिचतुःषष्टिसंवरस्तोत्रं समाप्तम् //

शमदमनिरतानां शान्तदान्ताशयानां खगपथसदृशानामन्तरीक्षसमानाम् / खिलमलविधुतनां मार्गज्ञानस्थितानां शृणुत वरविशेषं बोधिसत्त्वांश्च श्रेष्ठान् //

कुशलसतसहस्रं संचितं कल्पकोटया सुबुद्धशतसहस्रं पूजयित्वा गृहीतम् / प्रत्येकजिनवरान्वै पूजयित्वा त्वनन्तान् सकलजगहिताय जायते बोधिचित्तम् //

उत तपतपितानां क्षान्तिपारंगतानां हृतश्रितचरितानां पुण्यज्ञानोद्गतानाम् / विपुलगतिमतीनां पुण्यज्ञानाशयानां दशबलसमतुल्यं जायते बोधिचित्तम् //

प्रमुदितसुमतीनां दानधर्मे रतानां सकलजगहितार्थं नित्यमेवोद्यतानाम् / जिनगुणनिरतानां सत्त्वरक्षाव्रतानां त्रिभुवनहितकर्तृ जायते बोधिचित्तम् //

अकुशलविरतानां शुद्धमार्गे स्थितानां व्रतनियमरतानां शान्तसौम्येन्द्रियाणाम् / जिनशरणगतानां बोधिचर्याशयानां त्रिभुवनहितसाध्यं जायते बोधिचित्तम् //

अनुगतकुशलानां क्षान्तिस्वारस्यभाजां विदितगुणरसानां त्यक्तमानोत्सवानाम् / निहितशुभमतीनां दानसौम्याशयानां सकलहितविधानं जायते बोधिचित्तम् //

प्रचलति शुभकार्ये धीरवीर्याः सहाया निखिलजनहितार्थं प्रोद्यते मानसिंहः / अविरतगुणसाध्या निर्जितक्लेशसंधा झटिति मनसि तेषां जायते बोधिचित्तम् //

सुसमवहितचित्ता ध्वस्तमोहान्धकारा विगलितमदमाना त्यक्तसंक्लिष्टमार्गाः / समसुखनिरता ये त्यक्तसंसारसंगा झटिति मनसि तेषां जायते बोधिचित्तम् //

विमलखसमचित्ता ज्ञानविज्ञानविज्ञा निहतनमुचिमारा वान्तक्लेशाभिमानाः / जिनपदशरणस्था लब्धतत्त्वार्थकाये सपदि मनसि तेषां जायते बोधिचित्तम् //

त्रिभुवनशिवसाध्योपायविज्ञानधीराः करिबलपरिहारोपायविदृद्धिमन्तः / सुगतगुणसमीहा ये च पुण्यानुरागा सपदि मनसि तेषां जायते बोधिचित्तम् //

त्रिभुवनहितकामा बोधिसंभारपूर्त्यै प्रणिहितमनसा ये दुष्करे ऽपि चरन्ति / अविरतशुभकर्म प्रोद्यतां बोधिसत्त्वाः सपदि मनसि तेषां जायते बोधिचित्तम् //

दशबलगुणकामा बोधिचर्यानुरक्ता विजितकरिबलौघास्त्यक्तमानानुषङ्गाः / अनुगतशुभमार्गा लब्धधर्मार्थकामा झटिति मनसि तेषां जायते बोधिचित्तम् //

इति गणितगुणांशा बोधिचर्याश्चरन्तु जिनपदप्रणिधाना सत्समृद्धिं लभन्तु / त्रिभुवनपरिशुद्धा बोधिचित्तं लभन्तु त्रिशरणपरिशुद्धा बोधिसत्त्वा भवन्तु //

दशपारमिताः पूर्य दशभूमीश्वरो भवेत् / भूयो ऽपि कथ्यते ह्येतच्छृणुतैवं समासतः //

बोधिचित्तं यदासाद्य संप्रदानं करोति यः / तदा प्रमुदितां प्राप्तो जम्बूद्वीपेश्वरो भवेत् //

तत्रस्थः पालयेत् सत्त्वान् यथेच्छप्रतिपादनैः / स्वयं दाने प्रतिष्ठित्वा परांश्चापि नियोजयेत् //

सर्वान् बोधौ प्रतिष्ठाप्य संपूर्णदानपारगः / एतत्कर्मानुभावेन संवरं समुपाचरेत् //

सम्पच्छीलं समाधाय संवरं कुशली भवेत् / ततः स विमलां प्राप्तश्चातुर्द्वीपेश्वरो भवेत् //

तत्रस्थः पालयेत् सत्त्वानकुशलं निवारयेत् / स्वयं शीले प्रतिष्ठित्वा परांश्चापि नियोजयेत् //

सर्वान् बोधौ प्रतिष्ठाप्य सम्पूर्णकुशली भवेत् / एतद्धर्मविपाकेन क्षान्तिव्रतमुपाश्रयेत् //

सम्यक् क्षान्तिव्रतं धृत्वा क्षान्तिभृत् कुशली भवेत् / ततः प्राभाकरीं प्राप्तस्त्रयस्त्रिंशाधिपो भवेत् //

तत्रस्थः पालयेत् सत्वान् क्लेशमार्गनिवारणैः / स्वयं क्षान्तिव्रते स्थित्वा परांश्चापि नियोजयेत् //

सत्त्वान् बोधौ प्रतिष्ठाप्य शान्तिपारंगतो भवेत् / एतत्पुण्यविपाकेन वीर्यबलमुपाश्रयेत् //

सम्यग् वीर्यं समाधाय वीर्यभृत्कुशली भवेत् / ततश्चार्चिष्मतीं प्राप्य सुधामाधिपतिर्भवेत् //

तत्रस्थः पालयन् सर्वान् कुदृष्टीः संनिवारयेत् / सम्यग्दृष्टौ प्रतिष्ठाय बोधयित्वा प्रयत्नतः //

स्वयं ध्यानव्रते स्थित्वा परांश्चापि नियोजयेत् / सर्वान् बोधौ प्रतिष्ठाप्य ध्यानपारंगतो भवेत् //

एतत्पुण्यविपाकेन ध्यानपारं समारभेत् / सर्वक्लेशान् विनिर्जित्य समाधिसुस्थितो भवेत् //

सम्यग्ध्यानं समाधाय समाधिकुशली भवेत् / ततः सुदुर्जयां प्राप्तः स तुषिताधिपो भवेत् //

तत्रस्थः पालयेत्सत्त्वांस्तीर्थ्यमार्गनिवारणैः / सत्त्वधर्मं प्रतिष्ठाप्य बोधयित्वा प्रयत्नतः //

स्वयं ध्यानव्रते स्थित्वा परांश्चापि नियोजयेत् / सर्वान् बोधौ प्रतिष्ठाप्य ध्यानपारंगतो भवेत् //

एतत्पुण्यविपाकेन प्रज्ञाव्रतमुपाश्रयेत् / सर्वान्मारान् विनिर्जित्य प्रज्ञाभिज्ञासमृद्धिमान् //

सम्यक् प्रज्ञां समाधाय स्वाभिज्ञाकुशली भवेत् / ततश्चाभिमुखीं प्राप्तः सुनिर्मिताधिपो भवेत् //

तत्रस्थः पालयेत् सत्त्वानभिमाननिवारणैः / शून्यतां सुप्रतिष्ठाप्य बोधयित्वा प्रयत्नतः //

स्वयं प्रज्ञाव्रते स्थित्वा परांश्चापि नियोजयेत् / सर्वान् बोधौ प्रतिष्ठाप्य प्रज्ञापारंगतो भवेत् //

एतत्पुण्यविपाकैश्च समुपायव्रतं चरेत् / सर्वदुष्टान् विनिर्जित्य सद्धर्मकुशली सुधीः //

समुपायविधानेन सत्त्वान् बोधौ नियोजयेत् / ततो दूरङ्गमां प्राप्तो वशवर्तीश्वरो भवेत् //

तत्रस्थः पालयेत्सत्त्वानभिसमयबोधनैः / बोधिसत्त्वनियामेषु प्रतिष्ठाय प्रबोधयेत् //

तत्रोपाये स्वयं स्थित्वा परांश्चापि नियोजयेत् / सर्वान् बोधौ प्रतिष्ठाप्य उपायपारगो भवेत् //

एतत्पुण्यानुभावश्च सुप्रणिधीनुपाश्रयेत् / मिथ्यादृष्टिं विनिर्जित्य सम्यग्दृष्टिः कृतो बुधैः //

सुप्रतिष्ठितचित्तेन सम्यग्बोधौ प्रतिष्ठितः / ततश्चाप्यचलां प्राप्तो बुद्धया साहस्रिकाधिपः //

तत्रस्थः पालयेत्सत्त्वान् त्रिपानं संपिबेत् शनैः / लोकधातौ परिज्ञाने प्रतिष्ठाप्य प्रबोधयेत् //

सुप्रणिधौ स्वयं स्थित्वा परांश्चापि नियोजयेन् / सर्वान् बोधौ प्रतिष्ठाप्य प्राणिषु पारगो भवेत् //

एतत्पुण्यानुसारैश्च बलव्रतमुपाश्रयेत् / सर्वदुष्टान् विनिर्जित्य सम्बोधिकृतनिश्चयः //

सम्यग्यत्नसमुत्साहैः सर्वतीर्थ्यान् विनिर्जयेत् / ततः साधुमतीं प्राप्तो महाब्रह्मा भवेत् कृती //

तत्रस्थः पालयन् सत्त्वान् बुद्धयानोपदेशनैः / सत्त्वासमपरिज्ञाने सम्यग्बोधौ प्रबोधयेत् //

स्वयं बले प्रतिष्ठित्वा परांश्चापि नियोजयेत् / सर्वान् बोधौ प्रतिष्ठाप्य बलपारंगतो भवेत् //

एतत्पुण्यविपाकैश्च ज्ञानव्रतमुपाश्रयेत् / चतुर्मारान् विनिर्जित्य बोधिसत्त्वगुणाकरः //

सम्यग्ज्ञानं समाधाय सद्धर्मकुशलो भवेत् / धर्ममेघां ततः प्राप्तो महेश्वरो भवेत् कृती //

तत्रस्थः पालयन् सर्वान् सर्वाकारानुबोधनैः / सर्वाकारवरे ज्ञाने प्रतिष्ठाप्य प्रबोधयेत् //

स्वयं ज्ञाने प्रतिष्ठित्वा परांश्चापि नियोजयेत् / सर्वान् बोधौ प्रतिष्ठाप्य ज्ञानपारंगतो भवेत् //

एतत्पुण्यानुभावैश्च दशभूमीश्वरो जिनः / सर्वाकारगुणाधारः सर्वज्ञो धर्मलाभवित् //

इति मत्वा भुवभिश्च सम्बुद्धपदलब्धये / दशपारमितारूपे चरितव्यं समाहितैः //

तथा बोधिं शिवां प्राप्य चतुर्मारान् विनिर्जयेत् / सर्वान् बोधौ प्रतिष्ठाप्य निर्वृतिं समवाप्स्यथ //

एतज्ज्ञात्वा परिच्छायां चरध्वं बोधिशासने / निर्विध्नं बोधिमासाद्य लभध्वं सौगतं पदम् //

एतास्ता खल्वाह जिनपुत्रो दशबोधिसत्त्वभूमयः समासतो निर्दिष्टाः सर्वाकारवरोपेताः सर्वज्ञानानुगता द्रष्टव्याः / तस्यां वेलायामयं त्रिसाहस्रलोकधातुषड्विकारं प्राकम्पत विविधानि च पुण्यानि वियत्तो न्यपतन् / दिव्यमानुषकाणि च भूतानि संप्रवादितान्यभूवन्, अनुमोदनांशगेन च यावदकनिष्ठभुवनं विज्ञप्तमभूत् //

श्रीबोधिसत्त्वचर्याप्रस्थानाद् दशभूमीश्वरो नाम महायानसूत्ररत्नराजस्तोत्रं समाप्तम् //

वं कारं वज्रसत्त्वं च वज्रासनसदास्थितम् / वारुणमण्डलव्यापि वैरोचन नमो ऽस्तु ते //

अकारमादिस्वभावमाकाशे व्यापितं तथा / अर्कनीलसमस्तेज अक्षोभ्यश्री नमो ऽस्तु ते //

रकारं लक्ष्मीस्वभावं नानारत्नमनेकधा / रं व्यापितं च पृथ्वीं रत्नसंभव नमो ऽस्तु ते //

अकारमस्थिरं भावं पद्मनागसमप्रभम् / अग्नितेजःसमाधिस्थं अमिताभ नमो ऽस्तु ते //

अकारं तत्स्वभावं च गन्धवाहसमप्रभम् / अकारविश्ववज्रं च अमोधसिद्धि नमो ऽस्तु ते //

धकारं धर्मस्वभावं धर्मसंघस्वरूपकम् / धात्वष्टकं कीर्तितं च धर्मधातु नमो ऽस्तु ते //

सकारं सर्वसम्पत्तिः सर्वमङ्गलमर्थनम् / सर्वसिद्धिस्त्वमेवाथ सिद्धिवज्र नमो ऽस्तु ते //

श्री धर्मधातुनामस्तवः समाप्तः //

मञ्जुश्रियं महावीरं सर्वमारविनाशनम् / सर्वसिद्धीश्वरं नाथं वागीश्वरं नमाम्यहम् //

मञ्जुघोषं महावीरं सर्वमारविनाशनम् / सर्वाकारप्रदातारं धर्मधातुं नमाम्यहम् //

महोष्णीषं सितच्छत्रं तेजोराशिं जयोदितम् / विकिरणोद्गतं चैव महोग्रतेजसं नमे //

अक्षोभ्यं च महाबोधिं वज्रसत्त्वं नमाम्यहम् / वज्रराजं वज्ररागं वज्रसाधुं नमाम्यहम् //

श्रीरत्नसम्भवं नाथं वज्ररत्नं नमाम्यहम् / वज्रसूर्यं वज्रकेतुं वज्रहासं नमे सदा //

अमिताभं महाराजं वज्रधर्मं नमाम्यहम् / वज्रतीक्ष्णं महाकेतुं वज्रभाषं नमे नमे //

अमोघसिद्धिं सिद्धेशं वज्रकर्म नमाम्यहम् / वज्ररक्षं वज्रयक्षं वज्रसन्धिं नमे सदा //

लोचनाख्यां महादेवीं पाण्डराख्यां नमाम्यहम् / मामकीं चैव देवीं तां तारादेवीं नमे नमे //

वज्राङ्कुशं महावीरं वज्रपाशं महत्प्रभम् / वज्रस्फोटः महानाथं वज्रावेशं नमे नमे //

अधिमुक्तीश्वरीं भूमिं प्रमुदितां नमाम्यहम् / विमलाख्यां महाभूमिं प्रभाकरीं नमे नमे //

अर्चिष्मतीं सुदुर्जयां चाभिमुखीं नमाम्यहम् / दूरङ्गमामचलाख्यां साधुमतीश्वरीं नमे //

धर्ममेघां महामेघां समताख्यां प्रभां नमे / रत्नपारमितां देवीं दानपारमितां नमे //

शीलपारमितां देवीं क्षान्तिपारमितां नमे / वीर्यपारमितां देवीं ध्यानपारमितां श्रये //

प्रज्ञापारमितां देवीम् उपायाख्यं नमाम्यहम् / प्रणिधानबलं चैव ज्ञानपारमितां सदा //

कर्मपारमितां देवीं नमामि सततं तथा / आयुश्चित्तपरिष्कारं कर्मोपपत्तिकां नमे //

ऋद्ध्याख्यामधिमुक्तिं च प्रणिधानां नमाम्यहम् / ज्ञानाख्यवशितां देवीं धर्माख्यवशितां नमे //

तथतां च महादेवीं बुद्धबोधिं नमाम्यहम् / वसुमतीं महालक्ष्मीं रत्नज्वालां नमे नमे //

उष्णीषविजयां देवीं मारीचीं पर्णशाबरीम् / जाङ्गुलिं धारणीं वन्दे अनन्तमुखधारणीम् //

चुन्दां प्रज्ञां च पद्मां च सर्वावरणशोधनीम् / अक्षयज्ञानकारण्डं धर्मकायवतीं नमे //

धर्मप्रतिविदं देवमर्थं च प्रतिसंविदम् / निरुक्तिसंविदं देवं प्रतिभानाख्यसंविदम् //

वज्रलास्यां वज्रमालां वज्रगीतां नमे सदा / वज्रनृत्यां महादेवीं नमामि सततं मुदा //

समन्तभद्रं बोधीशमक्षयतां मतिं नमे / क्षितिगर्भं खगर्भं च बोधिसत्त्वं नमाम्यहम् //

गगणगञ्जनाथेशं रत्नपाणिं नमे नमे / सागरमतिं बोधीशं वज्रगर्भं नमाम्यहम् //

लोकेश्वरं महासत्वं स्थानप्राप्तं नमाम्यहम् / चन्द्रप्रभं महातेजं वन्दे ऽहं जालिनीप्रभम् //

अमितप्रभबोधोशं श्रीपतिं भानुकूटकम् / सर्वशोकतमोद्घाटविष्कम्भिनं नमाम्यहम् //

यमान्तकं महावीरं प्रज्ञान्तकं नमे नमे / पद्मान्तकं महावीरं विघ्नान्तकं नमाम्यहम् //

त्रैलोक्यविजयं वीरं वज्रज्वालां नमाम्यहम् / हेरुकं वज्रवीरेशं परमेशं नमाम्यहम् //

चक्रवर्त्तीश्वरं वन्दे सुम्भराजं नमाम्यहम् / पुष्पां धूपां महादीपां गन्धां देवीं नमाम्यहम् //

वज्ररूपां वज्रशब्दां रसवज्रां नमाम्यहम् / वज्रस्पर्शां महादेवीं विश्ववर्णां नमे सदा //

इन्द्रयमजलेशांश्च कुबेरमीश्वरं नमः / अग्निं नैरृत्यनाथं च वायुराजं नमाम्यहम् //

ब्रह्माणं विष्णुदेवं च महेश्वरं कुमारकम् / ब्रह्माणीं च महादेवीं रुद्राणीं वैष्णवीं नमे //

कौमारीं रक्तवर्णां च महेन्द्राणीं नमाम्यहम् / वाराहीं कालिकां चण्डीं भृङ्गिणं गणनायकम् //

महाकालं महाभीमं नन्दिकेशं रविं नमे / चन्द्रं भौमं बुधं वन्दे गुरुं शुक्रं शनैश्चरम् //

राहुं केतुं बलभद्रं जयकरं नमे सदा / मधुकरं वसन्तं च अनन्तं वासुकिं नमे //

तक्षं कर्कोटकं पद्मं महापद्मं नमाम्यहम् / शङ्खपालं च कुलिकं वेमचित्रं वलिं नमे //

प्रह्लादं च महादैत्यं वैरोचनं नमे सदा / गुरुडेन्द्र सुम्भराजं पंचशिखं नमाम्यहम् //

सर्वार्थसिद्धिं विघ्नेशं पूर्णभद्रं नमाम्यहम् / मणिभद्रं महायक्षं धनदं च महेश्वरम् //

वैश्रवणं महावीरं चिविकुण्डलिनं नमाम्यहम् / केलिमालिं सुखेन्द्रं च चलेन्द्रं च नमाम्यहम् //

हारतीं यक्षिणीं देवीं बहुपुत्रवतीं नमे / अश्विनीं भरणीं तारां कृत्तिकां रोहणीं तथा //

मृगशीर्षां तथैवार्द्रां पुनर्वसुं नमाम्यहम् / पुष्यमाश्लेषकातारां मघां च पूर्वाफाल्गुनीम् //

उत्तराफाल्गुनीं हस्तं चित्रां स्वातिं विशाखकाम् / अनुराधां तथा ज्येष्ठां मूलतारां नमाम्यहम् //

पूर्वाषाढोत्तराषाढां श्रवणां च नमाम्यहम् / धनिष्ठां शतभिषां च पूर्वोत्तराभाद्रपदाम् //

रेवतीं च महाताराम् अभिजितं नमाम्यहम् / वज्राङ्कुशं महावीरं वज्रपाशं नमाम्यहम् //

वज्रस्फोटं महाभीमं वज्रांशं वै नमे नमे / वागीश्वरं महाबोधिं सर्वविघ्नविनाशकम् //

सर्वज्ञं ज्ञानदातारं धर्मधातुं नमाम्यहम् / मञ्जुश्रियं महाज्ञानं सर्वविद्याप्रदेश्वरम् / सर्वाकारस्वरूपं च वादिराजं नमाम्यहम् //

श्री धर्मधातुवागीश्वरमण्डलस्तोत्रं समाप्तम् //

आपातालान्तदेवाः सुरनरगरूडा दैत्यगन्धर्वयक्षाः सिद्धा विद्याधराद्या जलधितटगता नागसत्त्वाः समग्राः / गण्डीशब्दं समन्ताद् रभसितमनसः स्वासने ऽस्मिन् प्रसन्नाः श्रोतुं[साधो]रधीरा विमलगुणगणस्यास्य त्रैलोक्यबन्धोः //

लीलावासितचामरैश्चलदहो काञ्चीप्रपञ्चालस प्राञ्चत्काञ्चनकिङ्किणीभिररणत् स्वासीवहंसस्वनाः / तारुण्यामलनीलनीरजदल श्यामाङ्कमाराङ्गना- श्चक्रूर्यस्य न मानसस्य विकृतिं बुद्धाय तस्मै नमः //

येषामस्ति प्रसादो भगवति सुगते मारभिद्योगयुक्ते ये वा सद्यः प्रसन्नाः सुगतसुतकृते स्वस्ति येषां च भक्तिः / गण्डीमाहत्य चास्मिन् जगति शुभकरां शाक्यसिंहस्य शास्तुः कृत्वा शुद्धान्तसंस्थां सुविहितमनसः श्रोतुमायान्ति सर्वे //

बुद्धं त्रैलोक्यनाथं सुरनरनमितं पारसंसारतीरं धीरं गम्भीरवन्तं सकलगुणनिधिं धर्मराज्याभिषिक्तम् / तृष्णामारान्तकारं कलिकलुषहरं कामलोभान्तवन्तं तं वन्दे शाक्यसिंहं प्रणमितशिरसा सर्वकालं नमामि //

ऋम्पं ऋम्पं ऋऋम्पं टम टम टटमं तुन्दतुन्दं तुतुन्दं सं सं सं सं सं सं सं समसममसमं दुर्म दुर्म द्रुदुर्मम् / नागिर्नागिर्ननागिस्तखितखितखितस्तत्यजुर्ये रणे वै कैः कैः कैः कैश्च कैः कैर्जगति भयहरा कीर्त्यते धर्मगण्डी //

कुरुत कुरुत श्रीपं ध्यानसन्नाहमग्नं ग्रसति न खलु यावद् दुर्निवारः कृतान्तः / इति वदति जनौघे बोधिता भिक्षुसङ्घाः क्षपितदुरितपक्षाकीर्णनिःशेषदोषाः //

यस्मिन्नभ्युदिते ऽखिलं त्रिभुवनं यात्यस्तमस्तङ्गते येन ज्ञानगभस्तिहस्तविसरैर्हस्तं यतस्तन्यते / सद्धर्मामलमण्डलो दशबलः संसाररात्र्यन्तकः पायाद्वै मुनिभास्करः सुरगणान् बुद्धः प्रजाबान्धवः //

चित्तं येन जितं गजेन्द्रचपलं ज्ञानाक्षरैर्नाङ्कुशै- र्नष्टं रागतमो ऽन्धकारपटलं ज्ञानाग्निना नाग्निना / ध्वस्तं मारबलं प्रशान्तमतिना क्षान्त्यायुधैर्नायुधै- स्तं वन्दे प्रणतार्तिनाशनपटुं बुद्धं प्रबुद्धं मुनिम् //

तीर्थ्यानामाशु सैन्यं झटिति विघटयन् नाकनिष्ठप्रतिष्ठं भूयिष्ठाभिः प्रभाभिर्भुवनमवतरंस्त्रासयन् भासुराभिः / लक्ष्मीः पातालमूले स्थितकनकमहागर्भसिंहासनस्था गीतज्योतिः स्वयं वो दिशतु दशबलो दर्शितप्रातिहार्यः //

पादाङ्गुष्ठे निविष्टां क्षिपति पृथुशिलाद्यैः स राजातिगुर्वी चोग्रं ग्रीष्मप्रतापप्रशममुपगतो वल्गुना मन्त्रपूताम् / तामेव त्रास्यमानो विघटयति सुखं श्वासनिःश्वासवातान् लोकं सिद्धाः प्रणेमुः स दिशतु भगवान् सम्पदं सर्वदर्शी //

भग्ना मारादिरूपाः प्रलयभयकरा बद्धसन्नद्धकक्षा नाना तीक्ष्णाग्रहस्ताः करितुरगमुखाः सिंहनादं नदन्तः / बुद्धत्वं येन नीताः कुवलयदलदृशा[प्रेक्षिता] भिक्षुसङ्घाः धर्मं कान्तं[नितान्त]मघदलनपटुं तीर्थिकाणां शृणुध्वम् //

चित्तं यस्याङ्गनाया रतितरलदृशा ऽपाङ्गभङ्गैः सुभङ्गैः क्षोभं नैवाशु नीतं कुचकलशभरैर्हारलीढैः सुलीढैः / तस्यैषा धर्मगण्डी मधुरकलरवं रावते भिक्षुसङ्घं धर्मं कान्तं तदीयं परमभयकरं तीर्थिकाणां शृणुध्वम् //

यः श्रीमान् धर्मचक्रे प्रमुदितमनसा धर्मरत्नैकमौलि- र्भूयांसं पूर्णदेहं विकसितवदनं धर्मरत्नोदगिरन्तम् / सिंहाक्रान्तासनस्थः कनकगिरिनिभो धर्मनादं नदन्तं तस्येयं धर्मगण्डी प्रणदति सततं संशृणुध्वं जिनस्य //

मा मा मा मीयकण्ठैर्डिमडिमगगता गागगागैर्गलन्तैः ना ना ना नोपनीतं ननु ननु ननु मा धुर्यमाधुर्यकान्तैः / गीतैः कामाङ्गनानां प्रचलितमभवद् यस्य चेतो न शर्मि तस्यैषा धर्मकेतोः पटुपटहरवा रारटीत्युग्रगण्डी //

किं संवर्तप्रदत्तप्रसववनचरा दीर्घसंरम्भनादाः किं वा निर्वाटघातः किमुत भगवती हुकृतिर्वज्रपाणेः / तत्सर्वं वै जनानां प्रवचनमतयो द्रष्टुमन्तःप्रवृत्ता बुद्धस्योदारमूर्तेस्त्रिदशभयकरो गण्डिवादः स एषः //

ऊर्जासंघातिमारा विकृतनखमुखा रौद्रसिंह[स्व]रूपाः पाताले रत्नदीपे प्रकटमणिगणाः शब्दिताः पर्वतेन्द्राः / देवेन्द्रैर्मौलिरत्नैः प्रणमितचरणस्यास्य विश्वैकबन्धो रौत्येषा हन्यमाना यतिषु शुभविदः शाक्यसिंहस्य गण्डी //

कीर्तिर्नाथ प्रमथकमनङ्गो ऽस्तु वा तत्त्वदीया दीनानाथोद्धरण पुरतो गीयते मारशत्रोः / खिन्दं खिन्दं खिखिन्दं खुद खुद सुखदं दत्तके दत्तुतुन्दं तुन्दं तुन्दं तुतुन्दं ध्वनिपटुपटहैः सिद्धगन्धर्वनागैः //

मारैर्नानाप्रकारैर्विकृतशतमुखैर्भूरिवक्त्रैर्ज्वलद्भि- र्भीमैरट्टाट्टहासैः पललकवलितैः सिंहनादं नदद्भिः / कालाकारैरनेकैर्गहनभयकरैः सर्वतो भीषयद्भि- र्व्याप्तं चेतो न यस्य क्षणमपि नियतं मारभङ्गः स वो ऽव्यात् //

राजा निष्कण्टराज्यो भवतु वसुमती सर्वसस्याभिपुर्ण् काले वर्षन्तु मेघा व्यपगतविपदः सन्तु लोकाः समस्ताः / वीहारे कर्मपूर्णं यदखिलनृणां सर्वविध्नोपशान्ति- रन्योन्यप्रीतिभावाद् भवतु सुखमयो वीतरागार्यसङ्घः //

शास्तुः सद्धर्मरत्नं सुगतवरसुतान् प्रेरयन्ती विशुद्धयेद् रागद्वेषैर्विमूढान् विषमपथगतान् रावयन्ती जयन्ती / सत्त्वानुत्तारयन्ती प्रशमशरशतैर्विद्यमानार्थवन्तं शास्तुः संप्रीतिहार्यं विविधवररुतैः शान्तिकारी जनस्य //

स्फेटन्तं वारनार्या विकटगणघटाट्टाट्टहासं नदन्तं खेलन्तं विस्फुरन्तं ज्वलदनलशिखाकान्तलीलां ददन्तम् / भन्तं प्रेमप्रकामं स्फुटदुरुवचसं कामधात्वीश्वरत्वं तं वन्दे वन्दनीयं सकलभयहरं बुद्धवीरं सुवीरम् //

संपन्ने ऽङ्गुष्ठपद्मे झटिति हृदि तथा कण्ठ एवोपकण्ठे ढक्कासंकाशतालैःकलपटुपटहैः शङ्खनिर्घोषिघोषैः / हा हा हुं हूं कृता ये झटिति कटकटैर्भीमनादानुमोदैः क्षुद्रं चेतो न चैतत् सुरवरजयिनो यस्य तस्मै नमो ऽस्तु //

गर्जन्तं वाग्विशेषं प्रकटपटुरवैर्दिव्यगान्धर्वशब्दै- र्नानानागेन्द्रयक्षैः स्तुतिचटुलशतैः पूज्यमाना महद्भिः / सांख्ये माहेश्वरीयानसुरगुरुतम् मारभन्ती करकमलगता शान्तिमारारटीति //

दत्त्वा सर्वस्वदानी क्रतुकनकमयं वाराणानां शतं वा राज्यं पुत्रं कलत्रं स्वतनुमपि शिरश्चक्षुषां वा सहस्रम् / येनाभिरपि शतैर्वत्सराणां व्ययत्वात् सम्यक्सम्बोधिरग्रा स जयति सुगतः शान्तये सज्जनानाम् //

नानारूपविरूपदृश्यविकृतेर्भूयो ग्रसेद् भूतिभि- र्बोधैर्योषिति रोधनप्रजनितज्योतिर्ज्वल[द्बन्ध]नैः / मारस्यानुचरैर्न यस्य सुधियः किञ्चिन्मनः कम्पितं नृत्यैर्वा सुगतस्य मारजयिनो गण्डी रणत्यद्भूतम् //

यस्या नादं निशम्य श्रवणसुखकरं यान्ति तृप्तिं समन्तात् प्रेता भूमीमुखाद्याः पृथुतरवपुषः क्षुत्पिपासाभिभूताः / सम्यगभक्त्या प्रसन्नैः सुरनरवपुषैः श्रूयते चातुरैर्या सा गण्डी पातु विश्वं दशबलबलिनस्तस्य माना मनोज्ञा //

नानावाद्यकरीन्द्रवाजिमहिषव्याघ्रादिशब्दैर्युतं चञ्चत्कुन्तसुबाणतोमरगदाचक्रादिशस्त्रोद्यतम् / भग्नं सैन्यमनेन योधसहितं मारस्य येन क्षणात् तस्येयं करुणानिधेर्भगवतः पायाज्जगद् गण्डिका //

धर्मे संरम्भचित्ताः प्रभवहतविधिः पापतः सर्वदैव दाने शीले क्षमायां पठति सकरुणे सज्जनाः संयताः स्युः / इत्येवं सर्वसत्त्वान् सुमधुररणितैर्बोधयन्ती विशुद्धा तन्नः पुण्यैर्वचोभिस्त्रिजगति सकलं बुद्धवीरस्य गण्डी //

शृण्वन्ती सावधाना प्रशमततशराभ्यासनैर्नैव शब्द सेन्द्रादानन्दवज्री स्वभुवननृपतेस्तुङ्गवेलेव देवान् / वन्दीभूतान् मुनीन्द्रान् प्रवचनपटुताकारसंरम्भशब्दै- र्या गण्डी दण्डघातक्रममनुरणनाद् दुन्दुभीवद् धुनोति //

हुंकारी पद्मयोनिस्त्रिपुरविजयिनो वल्लभः शूलपाणि- र्विष्णुर्यद् वज्रपाणिः सुरपतिरसुरध्वंसनश्चक्रपाणिः / ये वा चान्ये स्तुवन्ति प्रमतनिजरवे क्षोभभावे किमास्ते सर्वे तस्याङघ्रिमूले विनयमुपगता गेयमन्त्रं स्तुवामि //

अज्ञान् सर्वज्ञनाथान् मुनिपदसहितान् भ्रामयन्ती त्रिलोकं मारांश्चान्यप्रकारैर्विविधभयकरान् त्रासयन्ती समस्तान् / पापान् प्रोत्सारयन्ती विषयरतिधियः पण्डितान् बोधयन्ती प्रोच्चैः संरुद्धबोध्यान् प्रवदति भुवने शाक्यसिंहस्य गण्डी //

व्याघ्रयै दत्त्वा स्वदेहं गुणशतनिवहं पुण्यसम्भारलब्ध बुद्धत्वं यः प्रयातः प्रतिहतदुरितो मन्मथोन्मादनार्थी / शास्ता यश्चाद्वितीयो भवभयभिदुरो भिन्नपापाभिसन्धि- स्तस्येयं वै विचित्रा स्तनति भगवतः शाक्यसिंहस्य गण्डी //

मायादेव्याश्च कुक्षौ जनितजिनवरः शाक्यसिंहो मुनीन्द्र् भूम्नि प्रायात्तु मध्ये प्रवरसुमुनिना लोकवृक्षस्य मूले / देवेन्द्रब्रह्मरुद्रासुरनरविबुधैः स्नापितो यः स देव- स्तं वन्दे भक्तिरत्नैः शशधरकिरणाक्षोदिदेहं मुनीन्द्रम् //

मारैर्नानाप्रकारैरसिपरशुधनुर्बाणहस्तैर्ज्वलद्भि- र्भीमास्यैर्दुष्टदंष्ट्रैर्गजभुजगमुखैः सिंहवक्त्रैः श्ववक्त्रैः / प्रत्यञ्चेनोनमस्य क्षणमपि शमितस्तस्य बुद्धस्य पादौ गन्तुं लोको ऽपि सर्वो ध्रुवमिति गतभीश्चैषु गण्डी निनाद्या //

श्री गण्डीस्तवः समाप्तः / कृतिरियम् आचार्य-आर्यदेवपादानाम् //

खर्वं स्थूलतरं गजेन्द्रवदनं लम्बोदरं सुन्दरं विध्नेशं मधुगन्धलुब्धमधुपव्यालोलगण्डस्थलम् / दन्तोद्घाटविदारिताहितजनं सिन्दूरशोभाकरं वन्दे शैलसुतासुतं गणपतिं सिद्धिप्रदं कामदम् //

हेरम्बः परमो देवः कार्यसिद्धिविधायकः / सैभाग्यरुपसम्पन्नां देहि मे सुखसम्पदम् //

एकदन्तं महाकायं लम्बोदरं गजाननम् / सर्वसिद्धिप्रदातारं गङ्गापुत्रं नमाम्यहम् //

वन्दे तं गणनाथमार्यमनघं दारिद्रयदावानलं शुण्डादण्डविधूयमानशमलं संसारसिन्धोस्तरिम् / यं नत्वा सुरकोटयः प्रभुवरं सिद्धिं लभन्ते परां सिन्दूरारूणविग्रहं परिपतद्दानाम्बुधाराहृतम् //

उच्चैर्ब्रह्माण्डखण्डद्वितयसहचरं कुम्भयुग्मं दधान प्रेषन्नागारिपक्षप्रतिभटविकटश्रोत्रतालाभिरामः / देवः शम्भोरपत्यं भुजगपतितनुस्पर्द्धिवर्धिष्णुहस्त- स्त्रैलोक्याश्चर्यमूर्तिर्जयति त्रिजगतामीश्वरः कुञ्जरास्यः //

गणपतिश्च हेरम्बो विध्नराजो विनायकः / देवीपुत्रो महातेजा महाबलपराक्रमः //

महोदरो महाकायश्चैकदन्तो गजाननः / श्वेतवस्त्रो महादीप्तस्त्रिनेत्रो गणनायकः //

अक्षमालां च दन्तं च गृह्णन् वै दक्षिणे करे / परशुं मोदकपात्रं च वामहस्ते विधारयन् //

नानापुष्परतो देवो नानागन्धानुलेपनः / नागयज्ञोपवीताङ्गो नानाविध्नविनाशनः //

देवासुरमनुष्याणां सिद्धगन्धर्ववन्दितम् / त्रैलोक्यविध्नहर्तारमाख्वारूढं नमाम्यहम् //

सुमुखश्चैकदन्तश्च कपिलो गजकर्णकः / लम्बोदरश्च विकटो विध्नराजो विनायकः //

धूम्रकेतुर्गणाध्यक्षो भालचन्द्रो गजाननः / वक्रतुण्डः शूर्पकर्णो हेरम्बः स्कन्दपूर्वजः //

षोडशैतानि नामानि यः पठेच्छुणुयादपि / विद्यारम्भे विवाहे च प्रवेशे निर्गमे तथा //

संग्रामे संकटे चैव विध्नस्तस्य न जायते / विध्नवल्लीकुठाराय गणाधिपतये नमः //

श्रीगणेशस्तोत्रं समाप्तम् //

भगवति बहुरूपे निर्विकारे निरञ्जे निमितनिखिलरूपे निश्चयातीतरूपे / अखिलनिगमपारे नित्यनित्यस्वभावे चरणकमलयुग्मं नौमि देवि त्वदीयम् //

हसितमुखशशाङ्कं ज्योत्स्नया रात्रिभूतं दशशतकिरणोद्यद्वक्त्रमाध्यन्दिनं ते / अरुणवदनशोभा औदयी चास्तकाले चरणकमलयुग्मं नौमि देवि त्वदीयम् //

गलजठरपदेषु स्वर्गमर्त्याहिलोकाः सकलभगणदन्ता रोमराजी द्रुमास्ते / गिरय इव नितम्बा रक्तशुक्लाः समुद्राश् चरणकमलयुग्मं नौमि देवि त्वदीयम् //

पवनदहनवेगाः श्वासप्रश्वास एव प्रलयप्रभवकालो मीलनोन्मीलनाभ्याम् / द्विदशतपनभूता भीमवक्त्रास्त्वदीयाश् चरणकमलयुग्मं नौमि देवि त्वदीयम् //

अनुपमतनुदेहं व्याप्यमानं समन्तान् निखिलनिगमसारं दर्शयन् देवि दिव्यम् / त्रिभुवनमखिलं ते दर्शितुमेति बुद्धिश् चरणकमलयुग्मं नौमि देवि त्वदीयम् //

विधिमुखविबुधास्ते किंकराः पादसंस्था मुकुटविधृतबुद्धे सर्वमार्गा हि शुद्धे / किमु तव महिमानं वर्णये गुह्यदेवि चरणकमलयुग्मं नौमि देवि त्वदीयम् //

अनुपठति समाप्तौ पूजने भक्तिमान् यो नुतिमति वितगोति स्पष्टमेवास्य बुद्धिः / सकलजनजनन्या भक्तिसम्पत्तिमुच्चैः करतलवशगास्ताः सिद्धिपुष्टयौ लभन्ते //

श्री स्वयंभूपुराणोद्धृतं मञ्जुनाथकृतं गुह्येश्वरीस्तोत्रं समाप्तम् //

ओम् नमोरत्नत्रयाय

तृष्णाजिह्वमसद्विकल्पशिरसं प्रद्वेषचञ्चत्फलं कामक्रोधवितर्कदर्शनमथो रागप्रचण्डेक्षणम् / मोहास्यं स्वशरीरकोटिशतचिन्तातिगं दारुणं प्रज्ञामन्त्रबलेन यः शमितवान् बुद्धाय तस्मै नमः //

बुद्धं प्रबुद्धं वरधर्मराजं शान्तं विशुद्धं समकीर्तिदं तं / गुणाकरं सत्त्वमुनीन्द्रराजं श्रीमन्महाबोधिमहं नमामि //

इति बुद्धरत्नस्तोत्रम् /

यो जात्यादिकदुःखतप्तमहसां चक्षुः सतां प्राणिनां यस्त्रैधातुकपञ्जरादहरहः सत्त्वान् समाकर्षति / अत्राणं च जगत्समुद्धरति यः संक्लेशदुःखार्णवात् संबुद्धांश्च पुनश्च्युताच्च महते धर्माय तस्मै नमः //

या सर्वज्ञतया नयत्युपशमं शान्तैषिणः श्रावकान् या मार्गज्ञतया जगद्धितकृता लोकार्थसम्पादिका / सर्वाकारमिदं वदन्ति मुनयो विश्वस्य या संगता तस्यै श्रावकबोधिसत्त्वगणिनो बुद्धस्य मात्रे नमः //

इतिधर्मरत्नस्तोत्रम् /

चत्वारः प्रत्युत्पन्नगा भवसुखे सुस्वादविद्वेषिण- श्चत्वारश्च फले स्थिताः शमरताः शान्ता महायोगिनः / इत्यष्टौ वरपुंगला भगवता यस्मिन् गणे व्याकृताः प्रज्ञाशीलसमाधितप्तवपुषा संघाय तस्मै नमः //

बुद्धं नमामि सततं वरपद्मपाणिं मैत्र्यात्मकं गगनगंजसमन्तभद्रम् / यक्षाधिपं परिहितोद्धृतमञ्जुघोषं विष्कम्भिणं क्षितिगर्भं प्रणमामि भक्त्या //

इति संघरत्नस्तोत्रम् /

गुरुर्बुद्धो गुरुर्धर्मो गुरुः संघस्तथैव च / गुरुर्वज्रधरः श्रीमान् तस्मै श्रीगुरवे नमः //

श्री गुरुरत्नत्रयस्तोत्रं समाप्तम् //

श्री हारतीदेव्यैः नमः

कुन्दप्रसूनसदृशीं रुचिराङ्गरागां नानाविभूषणविभूषितवज्रदेहाम् / सव्येन हस्तकमलेन भयार्तिहन्त्रीं यक्षेश्वरीं बहुसुतां प्रणमामि भक्त्या //

आलिङ्गितां निजमसव्यभुजेन पुत्रान् नेत्रैस्त्रिभिश्च परिशोभितचारुदेहाम् / नानाविधैर्मणिगणै रचितं किरीटं यक्षेश्वरीं बहुसुतां प्रणमामि भक्त्या //

तां वह्निमण्डलगतां वसुपत्रपद्मे श्रीरत्नपीठ उपरिस्थितपादपद्माम् / यक्षादिभिः परिवृतां ललितासनस्थां यक्षेश्वरीं बहुसुतां प्रणमामि भक्त्या //

लोकत्रयार्तिशमनीं शिशुजीवदात्रीं श्रीहारतीं करुणया निजभक्तदक्षाम् / दुःखापहां जनमनोहरभोगभाजां यक्षेश्वरीं बहुसुतां प्रणमामि भक्त्या //

संत्रासिनीं पिशुनवृत्तिवतां जनानां विस्फोटकादिरुजराशिविनाशकर्त्रीम् / भक्तेषु धातृसदृशीं च सुशीतलाङ्गीं यक्षेश्वरीं बहुसुतां प्रणमामि भक्त्या //

बुद्धानुशासनरतामतिसूक्ष्मरूपां लोकत्रयार्चितपदां करुणार्चिभूताम् / गन्धर्वकिन्नरगणैः परिसेव्यमानां यक्षेश्वरीं बहुसुतां प्रणमामि भक्त्या //

केयूरकुण्डलसुकङ्कणनूपुराढ्यां नानाविचित्रवसनप्रदधानशीलाम् / संरक्षणीं शिशुगणान् परिपालयन्तीं यक्षेश्वरीं बहुसुतां प्रणमामि भक्त्या //

स्वर्भूरसातलमवस्थितभुक्तिदान- संसक्तपूर्णहृदयां त्रिगुणात्मरूपाम् / तां संस्मराम्यहरहः शरणं प्रपद्ये यक्षेश्वरीं बहुसुतां प्रणमामि भक्त्या //

रक्षाकरीं स्तुतिमिमां प्रपठेन्मनुष्यः श्रीहारतीं निजगृहे शिशुरक्षणाय / वाचं श्रियं सुविपुलं च सुखादि सर्वं दात्री त्रिकं पठति यः प्रयतः प्रभाते //

श्रीभवरत्नविनिर्गतं बालरक्षाकरं हारतीस्तोत्रं समाप्तम् //

श्रीमानाद्यः स्वयम्भूरमितरुचिरमोघाभिघो ऽक्षोभ्यबुद्धः श्रीमान् वैरोचनाख्यो मणिभवमुनिराड् वज्रसत्त्वः सुसत्त्वः / श्रीप्रजा वज्रधात्वी सकलशुभकरी आर्यतारादिकास्ताः कल्याणं वः क्रियासुः क्वचिदपि सरतां तिष्ठतां नौम्यहं ताः //

देवी सम्पत्प्रसादा गणपतिहृदया वज्रविद्राविणो सा उष्णीषापर्णदेवी किटिवरवदना मातृका खेचराणाम् / कोटोलक्षाक्षदेवो स्वगणपरिवृता पञ्चरक्षा सुरक्षा कल्याणं वः क्रियासुः क्वचिदपि सरतां तिष्ठतां नौम्यहं ताः //

रत्ने दीपङ्कराख्यो मणिकुसुमजिनः श्रीविपश्यी शिखी च विश्वम्भुः श्रीककुत्सः स च कनकमुनिः काश्यपः शाक्यसिंहः / प्रत्युत्पन्नाभ्यभूतः सकलदशबलो पारमाहात्म्यसिन्धुः कल्याणं वः क्रियासुः क्वचिदपि सरतां तिष्ठतां नौम्यहं ताः //

श्रीमानार्यावलोकेश्वरजिनजवरो मैत्रेयानन्तगञ्जो बुद्धः सामन्तभद्रः कुलिशवरधरो मञ्जुनाथो महेशः / सर्वाघोरीक्षितिज खगर्भाभिधानौ महान्तौ कल्याणं वः क्रियासुः क्वचिदपि सरतां तिष्ठतां नौम्यहं ताः //

बुद्धाधिष्ठानकन्दोद्भववरकमलो नागदासाभिधानः सत्यां तां यौवनाथो निजवरभुवनाज्ज्योतिरेकं ससर्ज / एकांशं पञ्च भूत्वा विहरति सततं पञ्चबुद्धात्मको ऽसौ कल्याणं वः क्रियासुः क्वचिदपि सरतां तिष्ठतां नौम्यहं ताः //

या प्रज्ञा गुह्यरूपा त्रिदलकमलजा सन्तु देवप्रसादा नैरात्मा पीठरूपा बहुविहितहिता ब्रह्मविष्ण्वीशवन्द्या / दुर्गायां मार्गकृत्स्ने कृतनतिवरदा प्रादुरासीदगाधैः कल्याणं वः क्रियासुः क्वचिदपि सरतां तिष्ठतां नौम्यहं ताः //

मैत्रीयांशादभूद् यो वनमहदुपरे रत्नचूडास्यरत्नं ज्योतिः संगम्य भव्यं भवजलधितरी रत्नलिङ्गेश्वराख्यः / श्रीवत्सो वीतरागाष्टककृतमहिमा व्यक्तरूपाः(पः)स्वयम्भूः कल्याणं वः क्रियासुः क्वचिदपि सरतां तिष्ठतां नौम्यहं ताः //

त्रातुं गोकर्णदुष्टं जपसि धृतमतिं लोकनाथाज्ञया ऽभूत् पद्माकारं खगञ्जाभिधजिनतनयो वाग्मतीपूरतीरे / श्रीगोकर्णेश्वरः स पितृजनहतकृद् वाग्मतीसंगमे ऽस्मिन् कल्याणं वः क्रियासुः क्वचिदपि सरतां तिष्ठतां नौम्यहं ताः //

क्रुद्धं नागाधिराजं कुलिकसमविधं त्रासयन् कीलवद् यो लोकानां भद्रहेतोः गमनवदुपरि श्रीगिरौ वीतरागः / श्री सामन्ताद्यभद्रो ध्वजकृतिरभवत् कालिनामा महेशः कल्याणं वः क्रियासुः क्वचिदपि सरतां तिष्ठतां नौम्यहं ताः //

पातुं तं सर्वपादं कमलधरगिरा वज्रपाणिर्जिहीते लोकानां रक्षणार्थं पुनरपि कलशाकारतांशादभूत् सः / श्रीमान् सर्वेश्वराख्यो जिनवरतनयो दण्डशूलौ दधानः कल्याणं वः क्रियासुः क्वचिदपि सरतां तिष्ठतां नौम्यहं ताः //

दुर्बोधं मञ्जुगर्तव्यजनसुखरतं कमिनीसुप्रबोधं कृत्वा प्राज्ञं महान्तं कविवरमकरोन्मञ्जुदेवस्ततो ऽपि / श्वासं संधाय भव्यं सकलगुणपदं प्राप्य गर्तेशसंज्ञाः कल्याणं वः क्रियासुः क्वचिदपि सरतां तिष्ठतां नौम्यहं ताः //

मत्स्याकाराभिरासीत् सकलवरणविष्कम्भिनामा सुसत्त्वः सालङ्कारः फणीन्द्रैरदददखिलकात् योडियाख्यो ययासौ / निष्काश्याशं फणीन्द्रेश्वर इति समभूद् वीतरागो ऽप्यरागः कल्याणं वः क्रियासुः क्वचिदपि सरतां तिष्ठतां नौम्यहं ताः //

स श्रीमानोडियाने व्यततपतपसा सातपत्रः सुतीरे पृथ्वीगर्भाख्यबौद्धोझटिति तं स्थापयामास वासम् / गन्धेशो वीतरागो ऽभवदखिलसुहृल्लोकनाथाग्रतस्थः कल्याणं वः क्रियासुः क्वचिदपि सरतां तिष्ठतां नौम्यहं ताः //

शंखं दध्मौ सहर्षः स्मरदमितसुतं विक्रमात् प्राप्तसिद्धिः यस्माल्लोकेश्वराज्ञाविनिहितहरयः प्रादुरासीत् खगर्भः / यः स्वाशं स्थापयित्वा निजपुरमगमद् विक्रमेशाभिधानं कल्याणं वः क्रियासुः क्वचिदपि सरतां तिष्ठतां नौम्यहं ताः //

नागस्तार्क्ष्येण यस्मादलभदनुसुखं पुण्यनामा सुतीर्थः पार्वत्या यत्र तेपे कलहनिवसने शान्ततीर्थः प्रशान्तः / तप्तं रुद्रेण दुर्गाभिलषितमनसा शङ्कराख्यस्त्रिवेणः कल्याणं वः क्रियासुः क्वचिदपि सरतां तिष्ठतां नौम्यहं ताः //

तीर्थो राजाभिधानो यदलभदवनीपालराज्यं विरूपो व्याधश्चैतश्च यस्मात् सुरपतिसदनं प्रागमत् कामतीर्थः / वज्राचार्येण पश्यं यदभिषवकृतः संगमो निर्मलाख्यः कल्याणं वः क्रियासुः क्वचिदपि सरतां तिष्ठतां नौम्यहं ताः //

दीनैराप्तं निधानं यदपचितिपरैराकराख्यो हि तीर्थो ज्ञैर्लब्धं ज्ञानमस्माद् यदुदकमतिभिर्ज्ञानसंज्ञैकतीर्थः / चिन्तामण्याख्यतीर्थाभिधवदभिषवैर्यत्र प्राप्तो ऽभिलाषः कल्याणं वः क्रियासुः क्वचिदपि सरतां तिष्ठतां नौम्यहं ताः //

यत्र स्नातैर्मुदाप्तेतिसमभिधमभूद् यश्च प्रामोदतीर्थः प्रादात् सल्लक्षणं यः स्वपयसि सरतां तीर्थसल्लक्षणाख्यः / यत्र स्नात्वा बलाख्यः सुरपतिरजयद् द्वीपमाख्यंभतीर्थः कल्याणं वः क्रियासुः क्वचिदपि सरतां तिष्ठातां नौम्यहं ताः //

विद्याधर्याख्यदेवी गगनपथगता योगिनी वज्रपूर्वा हारीतः श्रीहनूमान् सगणपतिमहाकालचूडाख्यवन्द्याः / ब्रह्माण्याद्याश्च देव्यः सहरिसुखवरक्षारनास्कन्दयुक्ताः कल्याणं वः क्रियासुः क्वचिदपि सरतां तिष्ठतां नौम्यहं ताः //

वाग्मत्या मूलपुच्छप्रभृतय उपतीर्थास्तथा केशचैत्याः शङ्खोच्चस्थाश्च जातोच्चयगिरिललितश्चैत्यभट्टारको ऽसौ / फुल्लोच्चो द्रष्टदेवी तदनु भगवतीध्यानप्रोच्चादिसंस्थाः कल्याणं वः क्रियासुः क्वचिदपि सरतां तिष्ठतां नौम्यहं ताः //

मञ्जुश्रीपर्वतस्थो ऽनुचरविरचितो मञ्जुशोभाख्यचैत्यः शान्तश्रीनिर्मितेषु प्रकृतवसतयः पञ्चदेवापुरेषु / पुच्छाग्रश्चैत्यवर्यो ऽभ्यकथदनुपमं यत्र शाकेत्पुराशं कल्याणं वः क्रियासुः क्वचिदपि सरतां तिष्ठतां नौम्यहं ताः //

आधाराख्यो हृदिस्थः सगणफणिपतिर्विध्नराजान्तकश्च नागश्चानन्दलोके हरिहरिहरिवाहाख्यत्रैलोक्यवंशे / लोकेशायाक्षमत्वस्तदनु सफलयाशाभिलोकैकनाथः कल्याणं वः क्रियासुः क्वचिदपि सरतां तिष्ठतां नौम्यहं ताः //

हेवज्रः संवरो ऽसौ सपरिजनगणश्चण्डवीरस्त्रिलोकी वीरो योगाम्बरो ऽसौ यमनिधनकराद्या दशक्रोढ(ध)राजाः / गुह्या बाह्याश्च सर्वे परिमितप्रमुखा नामसंगीतिव्याख्या कल्याणं वः क्रियासुः क्वचिदपि सरतां तिष्ठतां नौम्यहं ताः //

शीर्षे प्रागात् पयो ऽसौ सहितपरिजनश्चन्द्रसाहोसिताद्रिः छित्वा शोषे ह्रदे ऽस्मिन् पुरवरकमलो लोकवासाः परस्य / स्वस्थीभूताम्बुसंस्थः सकलजिनवरं प्राभजन्मञ्जुनाथः कल्याणं वः क्रियासुः क्वचिदपि सरतां तिष्ठतां नौम्यहं ताः //

सौखावत्याश्च वङ्गं तदनु जनहिते पोतले प्रागमद् यः शान्तो ऽवग्राहदोषे ललितपुरवरं प्राविशन् देवहूतः / स श्रीमान् वज्रपाणिः सजटधरहयग्रीवपार्षद्गणेशः कल्याणं वः क्रियासुः क्वचिदपि सरतां तिष्ठतां नौम्यहं ताः //

श्री स्वयम्भुपुराणोद्धृता कल्याणपञ्चविंशतिस्तुतिः समाप्ता //

एवंकारसमापन्ना कायवाकचित्तबुद्धितः / करोमि सततं तस्या नुतिं पूजां प्रदक्षिणाम् //

या देवी सर्वसत्त्वानां सृष्टिसंहारकारिणी / नमस्तस्यै नमस्तस्यै नमस्तस्यै नमो नमः //

या देवी सर्वभूतानां प्रतिपाले प्रतिष्ठिता / नमस्तस्यै नमस्तस्यै नमस्तस्यै नमो नमः //

या देवी देवदेवीनां देवतारूपिणी स्थिता / नमस्तस्यै नमस्तस्यै नमस्तस्यै नमो नमः //

या देवी दैत्यदुर्दान्तदाहरूपा भयानका / नमस्तस्यै नमस्तस्यै नमस्तस्यै नमो नमः //

या देवी सर्वनागानां सहस्रमुखनागिनी / नमस्तस्यै नमस्तस्यै नमस्तस्यै नमो नमः //

या देवी सप्तपाताले शान्तरूपेण संस्थिता / नमस्तस्यै नमस्तस्यै नमस्तस्यै नमो नमः //

या देवी नरनारीणां वेदमाता चिदम्बिका / नमस्तस्यै नमस्तस्यै नमस्तस्यै नमो नमः //

या देवी क्षत्रिणीवैश्याशूद्रीजातिप्रपूजिता / नमस्तस्यै नमस्तस्यै नमस्तस्यै नमो नमः //

या देवी प्रेतलोकानां पालनाय महर्द्धिका / नमस्तस्यै नमस्तस्यै नमस्तस्यै नमो नमः //

या देवी सर्वतिर्यक्षु तारिणी तापनाशिनी / नमस्तस्यै नमस्तस्यै नमस्तस्यै नमो नमः //

या देवी नारकीयाणां दुःखभाजां च मातृका / नमस्तस्यै नमस्तस्यै नमस्तस्यै नमो नमः //

या देवी षोडशसंख्यनरकाणां विनाशिनी / नमस्तस्यै नमस्तस्यै नमस्तस्यै नमो नमः //

या देवी द्वेषिरागीणां मोहिनां दुर्दुरीकृता / नमस्तस्यै नमस्तस्यै नमस्तस्यै नमो नमः //

या देवी कामक्रोधाभ्यां क्रोधरूपेण संस्थिता / नमस्तस्यै नमस्तस्यै नमस्तस्यै नमो नमः //

या देवी लोभलाभानां लङ्घनाय विलम्बिता / नमस्तस्यै नमस्तस्यै नमस्तस्यै नमो नमः //

या देवी मायाया माता मातॄणां वज्रयोगिणी / नमस्तस्यै नमस्तस्यै नमस्तस्यै नमो नमः //

या देवी राजचौराग्निसिंहशत्रुविनाशिनी / नमस्तस्यै नमस्तस्यै नमस्तस्यै नमो नमः //

या देवी जलनागाहिदुर्भिक्षभयतारिणी / नमस्तस्यै नमस्तस्यै नमस्तस्यै नमो नमः //

या देवी पञ्चभूतानां चन्द्रे सूर्ये प्रतिष्ठिता / नमस्तस्यै नमस्तस्यै नमस्तस्यै नमो नमः //

या देवी भौतिकी वेला आलिकालिविचारिणी / नमस्तस्यै नमस्तस्यै नमस्तस्यै नमो नमः //

या देवी सर्वपीठेशी क्षेत्ररूपोपछन्दिका / नमस्तस्यै नमस्तस्यै नमस्तस्यै नमो नमः //

या देवी पीलवाख्याता उपपीलवमीलिता / नमस्तस्यै नमस्तस्यै नमस्तस्यै नमो नमः //

या देवी द्वादशे चक्रे राशिलग्नविभूषिणी / नमस्तस्यै नमस्तस्यै नमस्तस्यै नमो नमः //

या देवी षडंगे देशे प्रोद्बुद्धमुखचन्द्रिका / नमस्तस्यै नमस्तस्यै नमस्तस्यै नमो नमः //

या देवी चण्डचक्रेषु गामिनी परमेश्वरी / नमस्तस्यै नमस्तस्यै नमस्तस्यै नमो नमः //

या देवी कायवाकचित्ते मन्त्ररूपेण गामिनी / नमस्तस्यै नमस्तस्यै नमस्तस्यै नमो नमः //

या देवी निर्मलात्मा श्रीरृद्धिसिद्धिबलप्रदा / नमस्तस्यै नमस्तस्यै नमस्तस्यै नमो नमः //

या देवो सर्वजन्तूनां सदा मङ्गलकारिणी / नमस्तस्यै नमस्तस्यै नमस्तस्यै नमो नमः //

य इदं पठते धीमान् देव्या भक्तिसमन्वितः / बुद्धत्वं लभते शीघ्रं कल्याणं मङ्गलं शिवम् //

श्री त्रिकायनिवासिनीवज्रदेव्याः कल्याणत्रिंशतिकास्तोत्रं समाप्तम् //

अथ खलु कमलवने सर्वतथागतस्तवेनातीतानागतप्रत्युत्पन्नानां बुद्धानां भगवतो ऽत्यस्तावीत्

ये जिनपूर्वकाये भवन्ति ये च ध्रियन्ति दशदिशि लोके / तान् हि जिनांश्च करोमि प्रणामं तं जिनसंघमहं प्रभिजष्ये //

शान्तप्रशान्तविशुद्धमुनीन्द्रं स्वर्णसुवर्णप्रभासितगात्रम् / सर्वसुरासुरसुस्वरघोषं ब्रह्मरुतस्वरगर्जितघोषम् //

षट्पदभौंरमहीरुहकेशं नीलसुकुञ्चितकाशनिकाशम् / शङ्खतुषारसुपाण्डरदन्तं हेमविराजितभाषितनाभम् //

नीलविशालविशुद्धसुनेत्रं नीलमिवोत्पलफुल्लितक्षेत्रम् / पद्मसुवर्णविभान्तसुजिह्वं पद्मप्रभाषितपद्मसुखाभम् //

शङ्खमृणालनिभं सुखतार्णं दक्षिणवर्तितवेडुलितर्णम् / सूक्ष्मनिशाकरक्षीणशशीव मात्रसुमन्त्रसरोजसुनाभम् //

काञ्चनकोटिसुवर्णसुनासमुन्नतमृदुतरपादपपत्रम् / अग्रधराग्रविशिष्टनासाग्रं मृदुकरसर्वजिनं सततं तम् //

एकसमेकतरोममुखाग्रं बालसुरोमप्रदक्षिणवर्तम् / नीलनिभोज्ज्वलकुण्डलजातं नीलविराजितमौलसुग्रीवम् //

जातसमानप्रभाषितगात्रं पूजितसर्वदशदिशि लोके / दुःखमनन्तं प्रशमितलोकं सर्वसुखेन च तर्पितलोकम् //

नरकस्थासु च तिर्यग्गतिषु प्रेतसुरासुरमनुजगतीषु / सर्वपिशाचसुखार्पितसत्त्वं सर्वप्रशान्तमपायगतीषु //

वर्णसुवर्णं कनकनिभासं काञ्चनतप्तप्रभासितगात्रम् / सौम्यशशाङ्कसुविमलवक्त्रं विकसितराजितसुविमलवदनम् //

तरुणरुहाग्रककोमलगात्रं सिंहविवादकविक्रमनादम् / लम्बितहस्तप्रलम्बितबाहुं मारुतप्रेरितसाललजिह्वम् //

व्योमप्रभोज्ज्वलमुंचितरश्मिं सूर्यमिव प्रभया प्रतपन्तम् / निर्मलगात्रवरेभि मुनीन्द्रं सर्वप्रभासितक्षेत्रमनन्तम् //

चन्द्रनिशाकरभास्करजालं क्षेत्रमनन्तसहस्रगतेषु / ते ऽपि च निश्चितसर्वि बभूव बुद्धप्रभासविरोचनतायै //

बुद्धदिवाकरलोकप्रदीपं बुद्धदिवाकररश्मिसहस्रम् / क्षेत्रमनन्तसहस्रगतेषु पश्यतु लोकतथागतसूर्यम् //

पुण्यशतानि सहस्र च कृत्वा सर्वगुणेभिरलंकृतगात्रम् / सौरगजेन्द्रनिभं जितबाहुं विमलरक्षितमण्डितबाहुम् //

भूमितलोपम शालिततुल्यं सूक्ष्मरजोपममागतबुद्धाः / सूक्ष्मरजोपम ये च भवन्ति सूक्ष्मरजोपम ये तिष्ठन्ति //

तांश्च जिनान् प्रकरोमि प्रणामं कायेन वाचा मनसा प्रसन्ना / पुष्पप्रदान सुगन्धप्रदानैर्वर्णशतेन शुचिश्च स्मरामि //

जिह्वशतैरपि बुद्धगुणानां कल्पसहस्रशतेन हि वक्तुम् / ये च सुनिर्वृतसाधुजिनानां सा च ललाट विचित्र अनेकैः //

एकजिनस्य गुणान् नहि शक्यो जिह्वसहस्रेण भाषितु किंचित् / काममशक्ति हि सर्वजिनानां एकगुणस्य हि विस्तरवक्तुम् //

सर्व सदेवकुलोक्तसमूहः सर्वभवाग्र भवजलपूर्णान् / ये जलग्रहणतु शक्यप्रमाणं नैव तु एकगुणा सुगतान्तम् //

वर्णितु सुस्तुतमज्जिनसर्वं कायतु वाच प्रसन्नमनेन / प्रमेय संचित पुण्यफलाग्रं तेन च सत्त्व प्रभोतु जिनत्वम् //

एव तु विश्वं नरपतिबुद्धं एव करोमि नृपःप्रणिधानम् / यत्र च कुत्र चि मभ्यभवेत जाति अनागत कल्पमनन्ता //

ईदृशभेरी पश्यमि स्वप्ने ईदृशनादं तत्र शृणोमि / ईदृश जिनस्तुति कमलाकरेण जाति जरास्मर तत्र लभेयम् //

बुद्धगुणानि अनन्तमतुल्यं ये ऽपि च दुर्लभ कल्पसहस्रम् / अनुश्रुत ये च स्वप्नगते ऽपि तेषु च देशयि दिवसगतो ऽपि //

दुःखसमुद्र विमोचयि सत्त्वा पूरयि षडभिः पारमिताभिः / बोधिमनुत्तर पुण्य लभेयं क्षत्रभवेत्तमभासमपत्थ्या //

भेरिप्रदानविपाकफलेन सर्वजिनान च संस्तुतिहेतोः / संमुखपश्यमि शाक्यमुनीन्द्रं व्याकरणं ह्यहु तत्र लभेयम् //

यौ इम दारकद्वौ मम पुत्रौ कनकेन्द्र कनकप्रभाश्वरौ / तौ उभि दारक तत्र लभेयं बोधिमनुत्तरव्याकरणं च //

ये पि च सत्त्व अनेकमनन्ता शरणविहीना व्यसनगताश्च / तेषु भवेय अनागत सर्वत्राणपरायण शरणप्रदश्च //

दुःखसमुद्भव संक्षयकर्ता सर्वसुखस्य च आकरभंत / कल्प अनागत बोधि चरेयं यत्तहु पूर्वं कोटि गताश्च //

स्वर्णप्रभासोत्तमदेशनताय पापसमुद्रं शोषतु मह्यम् / कर्मसमुद्र विकीर्यतु मह्यं क्लेशसमुद्र विछिद्यतु मह्यम् //

पुण्यसमुद्रं पूर्यतु मह्यं ज्ञानसमुद्र विशोध्यतु मह्यम् / विमलज्ञान प्रभासवरेण काम प्रभा च भविष्यतु मह्यम् //

पुण्यप्रभास विलोचनता च सर्वत्रिलोकि विशिष्ट भवेयम् / पुण्यवरेण समन्वित नित्यं दुःखसमुद्र उत्तारयिता च //

सर्वसुखस्य च सागरकल्पं कल्पमनागत बोधि चरेयम् / यत्नत पूर्वक कोटिगताया ईदृशक्षत्रविशिष्ट त्रिलोके //

श्रीसुवर्णप्रभोक्तं कमलाकरसर्वतथागतस्तोत्रं समाप्तम् //

कल्पादिके भवसि को हि ममागभाव सर्वस्वसार करुणामय विश्वमूर्ते / कार्यादिके प्रणमतीति समन्तकं त्वां श्रीलोकनाथ तव पादयुगं नमे ऽहम् //

आकृष्णकेन रजसा विनिवर्तमानश्चायासि सौम्य सकलः प्रतिवासरे च / हेमस्वरूपरथकेन समुज्ज्वलेन श्रीलोकनाथ तव पादयुगं नमे ऽहम् //

ब्रह्मा त्वमेव हि स विप्रकुलप्रसिद्धो विष्णुश्च वैष्णवमते वरधर्मकेतुः / सर्वज्ञको ऽसि विमते प्रभवो ऽव्ययश्च श्रीलोकनाथ तव पादयुगं नमे ऽहम् //

बौद्धान्वये भवसि वज्रकसूर्यरूपो योगेश्वरो हि शुभयोगकमार्गकेषु / गङ्गाधरो भवभयस्य विनाशकारि श्रीलोकनाथ तव पादयुगं नमे ऽहम् //

कारुण्यभावहृदयः सहजः सरोचिर्विच्छिन्नकल्मषचयो गुणसागरश्च / चिन्तामणिस्त्वमसि लोकगुरुः कृपेश श्रीलोकनाथ तव पादयुगं नमे ऽहम् //

बन्धूकवर्ण बहुरूप विशालनेत्र सर्वप्रसूतिकृतनिष्कृतिकः सुदन्त / त्वं पद्मपाणि विमलोत्तम मित्ररूपः श्रीलोकनाथ तव पादयुगं नमे ऽहम् //

तव बहुलचरित्रं कः समर्थो ऽस्ति वक्तुं तदपि मुखरभावैः स्तूयसे त्वं मयात्र / यदपि पदमशुद्धं सर्वमेतत् क्षमस्व स्तुतिरिति कुसुमस्रक् भक्तिमात्रार्चनं स्यात् //

श्रीमदार्यावलोकितेश्वरभट्टारकस्य स्तोत्रं समाप्तम् //

लोकातीत नमस्तुभ्यं विविक्तज्ञानवेदिने / यस्त्वं जगद्धितायैव खिन्नः करुणया चिरम् //

स्कन्धमात्रविनिर्मुक्तो न सत्त्वो ऽस्तीति तेन तम् / सत्त्वार्थं च परिखेदमगमस्त्वं महामुने //

ते ऽपि स्कन्धास्त्वया धीमन् धीमद्भयः संप्रकाशिताः / मायामरीचिगन्धर्वनगरस्वप्नसन्निभाः //

हेतुतः संभवो येषां तदभावान्न सन्ति ये / कथं नाम न तत्स्पष्टं प्रतिबिम्बसमागताः //

भूतान्यचक्षुर्ग्राह्याणि तन्मयं चाक्षुषं कथम् / रूपं त्वयैवं ब्रुवता रूपग्राहो निवारितः //

वेदनीयं विना नास्ति वेदना ऽतो निरात्मिका / तच्च वेद्यं स्वभावेन नास्तीत्यभिमतं तव //

संज्ञार्थयोरनन्यत्वे मुखं दह्येत वह्निना / अन्यत्वे ऽधिगमाभावस्त्वयोक्तो भूतवादिना //

कर्ता स्वतन्त्रः कर्मा ऽपि त्वयोक्तं व्यवहारतः / परस्परापेक्षिकी तु सिद्धिस्ते ऽभिमता ऽनयोः //

न कर्ता ऽस्ति न भोक्ता ऽस्ति पुण्यापुण्यं प्रतीत्यजम् / यत्प्रतीत्य न तज्जातं प्रोक्तं वाचस्पते त्वया //

अज्ञाप्यमानं न ज्ञेयं विज्ञानं तद्विना न च / तस्मात् स्वभावतो न स्तो ज्ञानज्ञेये त्वमूचिवान् //

लक्ष्याल्लक्षणमन्यच्चेत् स्यात्तल्लक्ष्यमलक्षणम् / तयोरभावो ऽनन्यत्वे विस्पष्टं कथितं त्वया //

लक्ष्यलक्षणनिर्मुक्तं वागुदाहारवर्जितम् / शान्तं जगदिदं दृष्टं भवता ज्ञानचक्षुषा //

न सन्नुत्पद्यते भावो नाप्यसन् सदसन्न च / न स्वतो नापि परतो न द्वाभ्यां जायते कथम् //

न सतः स्थितियुक्तस्य विनाश उपपद्यते / नासतो ऽश्वविषाणेन समस्य समता कथम् //

भावान्नार्थान्तरं नाशो नाप्यनर्थान्तरं मतम् / अर्थान्तरे भवेन्नित्यो नाप्यनर्थान्तरे भवेत् //

एकत्वे नहि भावस्य विनाश उपपद्यते / पृथक्त्वेन हि भावस्य विनाश उपपद्यते //

विनष्टात् कारणात्तावत् कार्योत्पत्तिर्न युज्यते / न वा ऽविनष्टात् स्वप्नेन तुल्योत्पत्तिर्मता तव //

निरुद्धाद्वा ऽनिरुद्धाद्वा बीजादङ्कुरसंभवः / मायोत्पादवदुत्पादः सर्व एव त्वयोच्यते //

अतस्त्वया जगदिदं परिकल्पसमुद्भवम् / परिज्ञातमसद्भूतमनुत्पन्नं न नश्यति //

नित्यस्य संसृतिर्नास्ति नैवानित्यस्य संसृतिः / स्वप्नवत् संसृतिः प्रोक्ता त्वया तत्त्वविदांवर //

स्वयं कृतं परकृतं द्वाभ्यां कृतमहेतुकम् / तार्किकैरिष्यते दुःखं त्वयातूक्तं प्रतीत्यजम् //

यः प्रतीत्यसमुत्पादः शून्यता सैव ते मता / भावः स्वतन्त्रो नास्तीति सिंहनादस्तवातुलः //

सर्वसङ्कल्पहानाय शून्यतामृतदेशना / यस्य तस्यामपि ग्राहस्त्वया ऽसाववसादितः //

निरीहावशिकाः शून्या मायावत् प्रत्ययोद्भवाः / सर्वधर्मास्त्वया नाथ निःस्वभावाः प्रकाशिताः //

न त्वयोत्पादितं किञ्चिन्न किञ्चिच्च निरोधितम् / यथा पूर्वं तथा पश्चात् तथतां बुद्धवानसि //

आर्यैर्निषेवितामेतामनागम्य हि भावनाम् / अनिमित्तस्य विज्ञानं भवतीह कथंचन //

अनिमित्तमनागम्य मोक्षो नास्ति त्वमुक्तवान् / अतस्त्वया महायाने तत् साकल्येन दर्शितम् //

यदवाप्तं मया पुण्यं स्तुत्वा त्वां स्तुतिभाजनम् / निमित्तबन्धनापेतं भूयात् तेनाखिलं जगत् //

श्रीलोकातीतस्तवः समाप्तः //

ओम् नमो लोकनाथाय /

भास्वन्माणिक्यभासो मुकुटभृति नमन्नाकनाथोत्तमाङ्गे भक्तिप्रह्वे सरोजासनशिरसि हसन्मालतीमालिकाभः / मौलौ मीलन्मृगाङ्गामकृशकपिशतां शाम्भवे शातयन्त्यो लोके लोकेशपादामलनखशशभृत्कान्तयः सन्तु शान्त्यै //

निर्धूता धूर्जटीन्दोर्न खलु पटु जटापिङ्गमासङ्गशारैः सारैरारान्मयूखैर्न च हरिमुकुटामन्दमाणिक्यभाभिः / कालिम्नो नापि लीना विबुधगणललत्कुन्तलालीनलीनाल् लोकेश्वर्यो ऽनिवार्याश्चरणनखरुचः सन्तु वो ध्वान्तशान्त्यै //

पर्याप्तोदारकोषस्फुटतरकमलाभोगसंपत्तिहेतुर् दूरीभूतप्रियाणामपहृतविषमातङ्कशङ्का जनानाम् / न क्षिप्तालङ्घनैरप्युपशमिततमोदुर्ग्रहोद्भूतभीतिर् लोकेशाङ्घ्र्योरपूर्वा नखशिशिररूचां चन्द्रिका वः पुनातु //

निःशेषं क्लेशराशीन्धनदहनमहापावकोच्चैः शिखा वो लीलालोकास्त्रिलोक्यामपहृतगहनाबद्धमोहान्धकाराः / वह्निस्कन्धेष्वबन्ध्या नरकभुवि सुधावारिविस्तारधाराः संसारीं संहरन्तां नखनिवहरुचः पद्मभृत्पादजाताः //

स्वच्छन्दच्छेदिवाञ्च्छावितरणचतुराचिन्त्यचिन्तामणीनाम् उद्गाढातङ्कशङ्कोद्गमशमनमनोहारिणी हारभासाम् / स्पष्टाविर्भूतनानागुणनिवहधृतादर्शबिम्बच्छवीनां छाया वः पातु लोकेश्वरचरणभुवामुन्मयूउखा नखानाम् //

नाथस्योदञ्चदुच्चामितरुचिरुचिभी रोचमानोरुचूडा- रोचिष्णोरुच्चकासच्चरणनखरुचां संचयो ऽसौ चिरं वः / अत्युच्चीयात् तदर्चाचतुरसुरशिरश्चारुरत्नोच्चयोच्चैर् नानानिश्चारिरोचिश्चयरचितशचीरुच्यचापोपचारः //

श्रीमद्भोगोन्नतीनामभिमतविषयप्राप्तिदानादहीनां सेवाभाजां समन्तादविचलितरुचः प्रीतिमुत्पादयन्तः / वैमल्यातुल्यबिम्बोपहसितशशिनः शातितध्वान्तदोषास् तोषं माणिक्यदीपा इव ददतु नखाः पद्मपाणेः पदोर्वः //

राजद्राजीवपाणेर्नखनिवहरुचां पादपद्मोद्भवानाम् उद्भेदो भेदको ऽसौ भवतु भवभियां निर्भराणां भरं वः / जातस्तद्देहभूमेचविरतकरुणावारिदत्तोपकारो यो ऽनल्पः कल्पवृक्षाङ्कुरनिकर इवोपात्तविज्ञानबीजः //

लोकेशस्याङ्घ्रिपद्मप्रभवनखरुचो दत्तमारारिसेना- संत्रासाः शोणतूणोन्मुखनिहितफलामोघबाणांशुशोभाः / शश्वत्संसारघोरावटपतितजनोत्तारणासज्जरज्जु- प्रारोहा रोहयन्तां दुरधिगममहासंपदुच्चैः पदं वः //

भास्वन्तः क्लेशकर्मश्रमविवशजगत्तापविच्छेदशूरां दूराद्दोषोपलब्धेः पटुबुधगुरवस्तारका ये जनस्य / सान्द्रानन्दं ददानाः सकलशशधरश्रीभृतो निष्कलङ्कास् ते वश्चिन्तामचिन्त्याः कमलकरनखाः पादजाता जयन्तु //

भास्वत्खण्डेन्दुखण्डैरपचितिरचना किं कृता शम्भुनेयं न्यस्ता रत्नावली वा किमु निरतिशयोत्कण्ठया बोधिलक्ष्म्या / देवैर्दिव्याद्भुतानामसमसुमनसां लम्बिता मालिका नु प्रीयात्पङ्क्तिर्नखानामिति जनितमतिर्लोकनाथाङ्घ्रिजा वः //

क्वायं राजीवजन्मा नमदमरशिरस्तुङ्गमाणिक्यशय्या- शश्वत्सुप्ताङ्घ्रिरेणुः क्व च धरणितलालम्बमौलिप्रणामः / इत्थं संजातहासा इव रुचिनिचयैर्दन्तुरा ये दुरन्ता ध्वान्तच्छेदाय लोकेश्वरचरणभवास्ते नखा वो भवन्तु //

शूरास्तापापहारे शिशिरतरसुधाशीकरासारकाराः प्राकाराः क्रूरदूरप्रसरदुरुशरासारमारापकारे / संसाराकारकारागृहबृहदुदरोदारदुःखप्रकारं घोरं वः संहरन्तां चरणनखरुचः श्रीकराः पद्मपाणेः //

भासो लोकेशपादप्रभवनखभुवां दूरदुर्वारमार- व्यामुक्तव्यापिबाणावरणजवनिकाभ्रान्तिमुत्पादयन्त्यः / संक्लेशानीकनाशस्फुटपिशुनमहाकेतुसंघातकल्पास् त्रैलोक्याशक्यशक्तित्रिभवजयबृहद्वैजयन्त्यो जयन्ति //

सम्यक्संबोधिचेतः शशिन इव समुद्भासिभासां समूहो निर्दग्धक्लेशभूतिप्रचय इव बृहन्मुक्तिमार्गानिलास्तः / विन्यस्तादभ्रशुभ्रोपलफलक इव क्रूरमारैरभेद्यः पायादुत्प्रेक्षितो वो नखरुचिनिकरः पादजः पद्मपाणेः //

वैलक्ष्येणेक्षणीयाः क्षणमसमतमःक्षेपदक्षाः क्षपाणा नाथेनाक्षुण्णपक्षक्षतिनिजविपदा निष्कलङ्काक्षया ये / अक्षीणारातिपक्षक्षपणपटुजगद्रक्षणाक्षुण्णदीक्षा- रक्षा रक्षन्तु लोकेश्वरचरणनखास्ते ऽक्षणक्षेपतो वः //

सत्संपत्साधनस्य प्रवरकमलभृत्पाददुर्गाश्रयस्य त्रैलोक्यश्रीजिगीषोर्नखरुचिनिवहस्यातुलो ऽभ्युच्चयो वः / मित्रेणाप्तोदयेन स्फुटमनुवलतालम्भितात्यन्तवृद्धेः पायात् सापायसर्वव्यसनरिपुमहायानसंसिद्धिहेतुः //

अव्रीडश्चूडया ऽसौ वहति पशुपतिः काममर्धेन्दुभूषां शौरेः शोभाभिलाषः कथमपि कृतिनः कौस्तुभेनास्तमेति / दृष्टे ऽस्मिन् सो ऽपि मोघो मघवमणिमहामौलिरित्याप्तचित्तैर् यत्कान्त्याचिन्ति लोकैश्चरणनखगणः पद्मपाणेः स जीयात् //

आरादुच्चैरुदञ्चत्कृतविततिरधस्तारको नारकाणाम् / उद्यन्नीहाररोचिः शुचिररिवदनश्यामतापातहेतुः / दुर्विज्ञेयानुभावो निखिलजगदतिस्पष्टदृष्टिप्रकाशः पादाम्भोजावलम्बी नखकिरणचयः पातु वो बुद्धमौलेः //

दृष्टो हृष्टामरेशार्चनचतुरवधूमुक्तकर्पूरपांशु- प्रोद्भासो भक्तिभारप्रवणहरजटाभूतिविभ्रान्तभूमिः / पूजाविक्षिप्तलक्ष्मीकरकमलगलत्केशराग्राणुरेणु- च्छायः पायादपायान्नखकरविसरः पद्महस्ताङ्घ्रिजो वः //

मेरौ निष्पीतपीतद्युतिरमरकरिस्फारसिन्दूरधूली- शोणश्रीशान्तशूरो हरितहरिहयाहीनहारित्यहारी / मीलन्नीलावभासो नखरुचिविसरः पद्मभृत्पादपद्माद् उद्यद्दुग्धाब्धिवृद्धित्रसदमरवधूवीक्षितो रक्षताद् वः //

शोभा संभाव्यते ऽस्मिन् हिमकरधवलैर्नामरैश्चामरैर्वा भक्त्यारम्भेण रम्भे परिकिरसि मुधा किं नु कर्पूरधूलीः / किं ते पुष्पैः प्रकीर्णैः शचिशुचिभिरिति स्वामिना स्वर्भुवां वः पूजायामब्जपाणेर्नखरुचिनिवहः पादजो वर्णितो ऽव्यात् //

कैलासोद्भासिविन्ध्ये कवलितबलिजित्कायकालिम्नि काली- लीलालावण्यलेपे विहतहरितिमश्वेतपूषाश्वरश्मौ / लोकेशाङ्घ्रेर्नखानामुरुकरनिकरे किं मयेतीव शीर्णं शीतांशोः पातु पूजाचतुरसुरजनाकीर्णकुण्डच्छलाद् वः //

पादाः पादोद्भवानामतिविततिभृतां बुद्धमौलेर्नखाना पारे संसारयादःपतिगमनमहासेतुबन्धायमानाः / उद्यद्दुर्वारदुःखानलशमनमहापुण्यसंभारवारि- स्वच्छन्दाच्छच्छटाभा झटिति विघटनं कुर्वतां वो भवस्य //

कालीकान्तेन्दुकान्तेः परिभवविधृतिर्भूरिकैलासभूभृद्- भासां हासावगीतिर्हतिरपि हिमवद्गौरतागौरवस्य / क्षीराकूपारपूरप्लुतिरपि ककुभां नाकनागीयदन्त- च्छेदच्छायाक्षतिर्वो नखरुचिविततिः पातु लोकेश्वराङ्घ्र्योः //

यत्पूजापारिजाते वलितमलिकुलं मीलति श्रीसरोजे सेवासक्तः स्वयंभूर्मुकुलितनलिनाद् दुःस्थितो यत्र तस्थौ / येनाश्यामा दिनश्रीः शमितसुरवधूक्लान्तिदोषा निशा ऽभूत् पादो ऽसौ पद्मपाणेर्नखविधुविलसच्चन्द्रिकः पातु युष्मान् //

कान्तो विभ्रान्तकान्तामरयुवतिजनैरर्चितो दृष्टिपातैः शुभ्रं विभ्राण्मृणालीनिकरमिव नखोद्योतनोद्भूतशोभः / कामीवानल्पकामप्रसरपरवशानेकचर्याप्रवृत्तः पादो वः पद्मपाणेरवतु सुरपुरीचन्दनामन्दचर्चः //

आनन्दामन्दभारोल्लसदमरकरैः पारिजाते विकीर्णे कालीयः कालकूटोत्कटपटल इव प्रोल्लसद्भृङ्गसार्थे / श्रेयो वः श्रीर्विधत्तामलममलनखद्योतदुग्धाब्धिमध्याद् उद्यन्ती पद्मपाणेश्चरणसरसिजस्याच्युतप्रीतिहेतोः //

वाञ्छाविच्छित्तिखेदोच्छलदनलशिखाछेदकच्छोच्छ्र्यो वः पद्मच्छायानुकारच्छलितमधुकराच्छादनाच्छादितश्रीः / स्वच्छन्दानच्छमूर्छच्छुचिनखकिरणोच्छूनगुच्छैरतुच्छो देयात् पादो ऽब्जकान्तिच्छुरितकररूचो ऽच्छिन्नमिच्छामकृच्छ्रात् //

उद्भूतोद्भासिचक्रद्युतिरमलनखैरद्वितीयोदितश्रीर् बिभ्राणो लक्षणानां गणमतुलगुणागण्यपुण्योपनीतम् / निःशेषद्वीपदीपप्रभवदतिमहद्वैभवो बुद्धमौलेः पायात् पादो नमस्यद्भुवनपतिशिरश्चक्रवर्ती चिरं वः //

कीर्णैराकाशगङ्गाकनककमलिनीकुड्मलैः को गुणो ऽस्मिन् किं गीतैर्गीतमेव स्फुटसरसिरूहभ्रान्तिभृङ्गावलीभिः / शक्यं माणिक्यदाम्नामिह रूचिरनखे शोभितुं नेत्यवादीद् यत्पूजायां सुरेशः स जयति चरणो वारिजव्यग्रपाणेः //

यो नाथस्यैव नासीदपि खलु सुगतेः कारणं जन्मभाजां यस्मिन् पद्माभिलाषी न मधुपनिवहः पक्षपाती जनो ऽपि / येनोर्वी नातिगुर्वी नतिमतिगुरुणा लम्भितापि त्रिलोकी लोकं पादः स पायात् सुगतशशधरद्योतविद्योतमौलेः //

यो ऽलीनां पानदानादकृत धृतमुदं संहतिं सेवकानां यस्मिन्नालं विहीनं न खलु हरिततात्यन्तशोभोपधानम् / देयाद्वो लौकनाथिश्चिरममरशिरःशायिरेणूत्करो ऽसौ श्रेयः श्रीवासभूमिर्नखकिरणहसत्केशरः पादपद्मः //

देहद्रोहावहोग्राहितहतिविहितो देहिनां हेतिरीहा- सिद्धेराहूतिराहो हृतिरतिमहतो बृंहतांहोमहिम्नः / क्लेशव्यूहाहितेहाहुतिविहितबृहद्द्रोहिदुःखाग्निदाह- व्यापोहा वाहिनी स्ताद्वहुविहितहिता पद्महस्ताङघ्रिभावः //

बुद्धालंकारमौलेरविकलकमलभ्रान्तिभृद्भृङ्गमाला वाचाला निर्विचारा रचयतु चरणोत्सर्पिणी संपदं वः / सत्त्वत्राणैककार्या स्थिरतरसुचिरावस्थितिस्थापनार्थं विन्यस्ता शृङ्खलेव प्रचुरकरुणया स्थूलकालायसस्य //

राजीवान्तःपलाशावलिरुचिरमृदुर्वज्रसारो विसारो क्रुध्यद्वैरिप्रमुक्तप्रहरणनिवहस्योद्भवद्भङ्गभूमिः / रक्तो रागोपशान्तेरतिशयबलवत्कारणं तारणायां संसाराम्भोनिधेर्वः सुगतशशिभृतो ऽपास्तखेदो ऽस्तु पादः //

जम्भारेर्जृम्भिताम्भोरुहरुचिरचये चापलेनाप्यलीन् नालं लोलापि लोला हरकरविहितानन्दकुन्दोत्करे ऽपि / भ्राजिष्णौ विष्णुकीर्णे परिमलिनि पुरः पारिजाते ऽप्यजात- प्रीतिर्यत्रालिमाला रमति जिनभृतः सो ऽङघ्रिपद्मो ऽवताद् वः //

भूयादुद्भूतभूरिद्युतिनिवहलसत्केशरोद्भासुरो वो रक्तच्छायानुविद्धोन्मुखनखदशनोद्भासिकान्त्या करालः / त्रस्यद्दुर्वृत्तवैरिद्विपतरलचलल्लोचनालोकनीयो लोकेशस्याङघ्रिसिंहः कमलभवजटारण्यशायी शिवाय //

अच्छीयानप्यनच्छो लघुरपि न लघुर्लङ्घने दिङ्मुखानां त्रैलोक्यानन्दनो ऽपि प्रबलपरपुरव्यापिसन्तापहेतुः / लावण्यालेपलिप्तो ऽप्यतिशयमधुरो वैधुराधेर्निरोद्धा पादोद्द्योतः क्रियाद् वो जिनरूचिविकसन्मालिकाशेखरस्य //

राजीवै राजराजो हरिरपि हरितैर्हारिभिः पारिजातैः कुन्दैः सानन्दमिन्दुर्बहुवसुविसरैर्वासवो भासमानैः / प्रीतः पाशी पलाशैरिति विबुधजनः प्राज्यपूजाविशेषं यत्रानुप्रासकाव्यायितमतत स वः पातु पादो ऽब्जपाणेः //

भानुर्भासां विकाशे नुतिमकृत नखेषून्मुखो नाकनाथः शर्वः शाखाग्रपर्वण्यविचलनयनो ऽप्यन्तकः प्रान्तकान्तौ / यस्यासामान्यशोभाविषयमतिशयं द्रष्टुमासीदनीशो निःशेषं दिव्यलोकः स जयति चरणो बुद्धबिम्बाङ्कमौलेः //

सम्यक्संबुद्धभानुस्फुटविकटजटापुञ्जकुञ्जोरुमूर्तेः संसाराम्भोधिमज्जद्गुरुतरजनतामेदिनीस्तम्भनस्य / भूयाद् भद्राय पादः कमलधरगिरेः सेवितः सिद्धसार्थैः पर्यन्तोद्वान्तकान्तिस्रवदरुणमहाधातुमन्निर्झरो वः //

संसाराध्वप्रबन्धश्रमसकलजगत्क्लान्तिसंशान्तिहेतु- च्छायस्येच्छाफलस्य स्फुटनखकुसुमोद्भासिशाखाभृतो वः / लोकेशाङघ्रिद्रुमस्य प्रणतसुरजनैर्मौलिमालालवाले मूले संपादितो ऽव्यान्मणिकलशभृतः स्वच्छधामाम्बुसेकः //

संमूलक्लेशजालप्रबलरिपुबलोन्मूलनस्थूललाभा- ल्लब्धोल्लासो विलासी बलविजयिलसन्मौलिलीलालयो वः / पाद पायादतुल्यामलकमलभृतो ऽलीकफुल्लाब्जलोभ- व्यालोलानल्पलापोल्लसदलिपटलाल्लुप्तसंगीतिलोलः //

त्रैलोक्यैश्वर्यलक्ष्मीचपलकरिवधूसंयमालानदण्डः कष्टक्लेशाहिदष्टस्खलदखिलजगत्पालने दक्षतर्क्षः / दुर्वारान्तःप्रवेशाकृशनरकपुरे द्वारगाढार्गलो वो भूत्यै लोकेशपादो भवजलधिसमुल्लङ्घनैकप्लवो ऽस्तु //

इति पादुकादेशना वृत्तो नृत्तप्रकारः सपदि विघटिता वाद्यविद्यानवद्या नो गीतं नावगीतं कृतरसरचनैर्नैव भावैरभावि / इत्यन्तः स्मेरशाक्रे सदसि न शकिता यत्र पूजाप्सरोभिः कर्तुं भावातुराभिः स जयति जनितातृप्तिरूपः सरोजी //

उद्दामस्थामवामक्रमविषममिलन्मारमानप्रमाथी मध्यादुन्माथिमोहोद्गमममितमहोमौलिरायामभीमम् / श्रीमन्निःसीमभूमासममहिममहाकामधामातिभूमौ सत्त्वप्रेमप्रकामप्रथितमृदुमना निर्विरामाश्रयो वः //

सारप्राकारघोरावरणनिवरणो बन्धनक्रूरदूर- स्फारावारातिरौद्रे नरकनगरिकाकारधारिण्यरीणाम् / कारागारोदरे यः स्मरणशरणतां कारणाकातराणां यातः सत्कारकारी गुरुतरकरुणः पातु लोकेश्वरो वः //

कल्पान्तोल्लासिहेलाचलदनिलचलोल्लोलकल्लोलमाला- वाचाले नक्रजालाकुलकलिलजले वारिधावुल्ललन्तः / आलम्बे यस्य नीलोत्पलविमलमहाकुट्टिमालीनलीलाम् आलीयन्ते लधीयः स जगति कमली पालनायाल मस्तु //

धूमौघोबन्धबन्धीकृतविधुरविधुब्रध्ननिर्बन्धधामा नीरोधोद्भेदबाधाबुधविबुधवधूधीरतोद्धारधुर्यः / यन्नामाधीतिधाराधरविधृतिकृतामेति धूमध्वजो ऽपि प्रध्वंसं साधु धेयान्निरवधि स विधिं बुद्धधारो धृतेर्वः //

क्रोधादुत्क्षिप्तकालायुधकरनिकरः क्रूरसूत्कारकारी दानक्लिद्यत्कपोलाकुलमधुपकुलाकाण्डकालोरुकायः / क्रान्तो यन्नामकष्टाङ्कुशहतिकृपणः कातरेण करीन्द्रो लोकेशः स प्रकामोपकरणकरुणः कामकृत्यं क्रियाद् वः //

सूत्कारिश्वासपोषाकृशविषवमथुप्लोषिरोषाश्रयाशा दंशाशादर्शितास्या भृशततशिरसो नाशने दन्दशूकाः / यन्नामाशीविषेशद्विषि विशति विषां धीषु नश्यन्त्यनीशा लोकेशः सो ऽस्तु विश्वश्रयदतिविषमक्लेशराशेः शमाय //

गन्धोद्गारोरुगर्वग्रहणगजगणग्रासगीतोग्रवेगः सावेगोदग्रगामी गलगहनगुहागाढगम्भीरगर्जः / योगैर्युग्योपयोगानगमि मृगपतिर्यद्गणोद्गीतियोगाद् दुर्योगं वः स योगी स्थगयतु सुगतासङ्गितुङ्गोत्तमाङ्गः //

भूयो ऽपायानुमेयः क्षतदयहृदयो भीविधायी विहाय स्थेयान् शैलोपमेयः श्रयदलिगवयच्छायकायो निकायः / सद्योगोपायमायामय इव विलयं यातवान् यातवीर्यो यत्पादध्यायिनेयः स सुगतनिलयो जायतां वो जयाय //

संत्रासावासभूमिं कलिविसरसरद्यादसं भास्वरासि- प्रासप्रोल्लासिभङ्गं प्रसृतसितलसत्केतुसत्फेनहास्याम् / यत्सेवासाधुनावा द्विषदसमसमित्सारसेनास्रवन्तीं सोत्साहाः संचरन्ते सुखमसुखमसौ संह्रियाद् वः सरोजी //

भूभृत्संभारभेदप्रभुकरविभवो भूरिभूभोगभीमं बिभ्राणश्चित्रभानुं भवदतिभरभीसंभ्रमोद्भ्रान्तिभूतः / दम्भोलिर्भीतिभाजामभवदभिपतन्नाशुनाभावभूमिर् भक्तेर्यस्य प्रभावात् स भवतु भवभिद्वो भृताम्भोजशोभी //

आबाधाधूतधैर्यश्च्युतिविधिसविधो दुर्विधक्रोधवेध् बाधादुःसाधरोधोद्धुरबहुविविधव्याधिसंबाधदेहः / यस्य ध्यानावधानादधिकधृतिसुधाधानसंधारितासु- र्धीमान्नाधेर्विधेयो धियमवतु स वो बोधये बुद्धमूर्धा //

आरादाहूतियातृक्षितिपतिरतुलारातिशातिप्रताप- प्रोद्गीतिर्दण्डनीतिप्रथितपितृपतिख्यातिजिद्दण्डनीतिः / यत्पादाधीतिशक्तेः कुपितमतिरतिप्रीतिमायाति भूतेर् व्याघातोद्भूतिहेतुर्जिनवृषवसतिः संह्रियाद् वः स भीतिम् //

ब्रह्मा जिह्मायितो ऽभूदगुरुरपि गुरुः खण्डिताखण्डलोक्तिर् विष्णुस्तूष्णीमधृष्टो वचनविरचने वीतगर्वो ऽपि शर्वः / तुष्टास्तुष्टूषवो ऽपि स्फुटमिति विबुधा नो बुधा यद्गुणोक्तौ स श्रीमानब्जपाणिर्जयति जिनमनोगोचरान्तर्गुणौघः //

धात्रा चित्रं चरित्रं सुररिपुरिपुणा सत्रिनेत्रेण नेत्र् गोत्रामित्रेण गोत्रं गतिरपि गुरुणा रात्रिपेणापि गात्रम् / मैत्रं मित्रेण पुत्रीयितसकलजगत्प्रेम पुत्रेण चात्रे- र्यत्रेदं स्तोत्रपात्रं स्तुतमवतु स वो ऽमात्रसत्तो ऽब्जपाणिः //

यस्मिन् ब्रह्मा बहुत्वं बहुबहुमतवानाननानां निजाना स्कन्दो ऽप्यानन्दगर्भं नुतिषु नतिकृतौ नागनाथो ऽपि मूर्ध्नः / शक्रः श्लाघ्यामनैषीन्नयनदशशतां यं विलोक्य त्रिलोकी- लोकेशो निर्विरामानतिनयनरतिस्तोत्रपात्रं स पायात् //

खेदी खे दीप्तरश्मिः किल विफलमसावध्वनीनोध्वनीनो लोकालोकार्थमास्ते ननु कमलभृतो दीप्ततापः प्रतापः / धीरैर्धीरैरकारि स्तुतिरिति विहितोल्लासभासां सभासां यस्यार्यस्यास्तु तस्माज्जगति कृतरिपुक्षिप्रसादः प्रसादः //

न्यस्ता यस्मिन्नमस्ये नतिरपि नितरामुन्नतिः पुण्यधाम्नां निःसामान्यैकमान्ये ऽपचितिरुपचितिर्भूयसी भक्तिभाजाम् / ध्यानस्थानस्य यस्य स्मृतिरपि सहसा विस्मृतिर्भूतभीतेः सो ऽनन्ताचिन्त्यलोके विहितहितपथो लोकनाथो ऽवताद्वः //

दम्भो दम्भोलिरैन्द्रः क्वचिदकृत सुरारातिशातो ऽतिशात् हारी हारीरणासौ बलवति विफलाभीषु राजीषु राजी / चक्रे चक्रेण नार्थं हरिरिति जनता नूनमाहेति हेति- व्यासव्यासक्तिमुक्तान् जयति रिपुजनोल्लासरोजी सरोजी //

लोकातोतं दधानः सुखमपि जगतां तीव्रदुःखेन दुःखी नित्यं नित्यानुरक्तो ऽप्यशरणकृपणप्राणभृद्योगयुक्तः / त्रैलोक्यस्यैकनाथो ऽप्यसमरुचिजनाराधनाबन्धुरो यः सो ऽव्यात् संबुद्धमौलिर्विहितविसदृशाचिन्त्यचर्यश्चिरं वः //

निर्विच्छेदत्रिलोकीनिहितनिरुपमस्नेहयोगानुयोगा निर्वाणो न प्रकम्प्यो बलवदलघुभिस्तीर्थिकोन्मत्तवातैः / जीयाल्लोकेशदीपः स भुवनभवनोद्भूतमोहान्धकार- ध्वंसो ऽविध्वंसधामा परहितकरणोद्योगसंवृत्तवर्त्तिः //

क्वासौ सर्वत्र मैत्री क्व विषमबहलक्लेशविद्वेषिदाहः क्व प्रौढा मुक्तिशक्तिः क्व च दृढकरुणापाशनिष्पन्दबन्धः / क्वोपेक्षापक्षपातः क्वपरहितकृतिव्यग्रता तद्विचित्रं चित्रं राजीवपाणेश्चरितमतिजगज्जायतां ज्योतिजिद्वः //

सर्वाग्रः सर्वरूपप्रथनपृथुनयः सर्वदा सर्वनाथः सर्वेषां सर्वथा यो विनयविधिमहासर्वगुर्वर्थसिद्ध्यै / सर्वैः सातोतगर्वैर्गुरुमहिमगुणैः खर्वयन् सर्वगर्वान् सर्वः सर्वप्रदो वः सफलयतु रूचीः सर्वविन्मौलिरुर्वीः //

ईशः स्वामी प्रजानां पतिरमरगुरुर्लोकपालो महेन्द्रो भास्वान् दत्तारिदण्डः परजयबलिजिद् वित्तदो जैत्रपाशः / इत्यन्तर्हासगर्भं भणति परिजने ऽन्वर्थनाम्नां निजानां पात्रे यत्रानुलज्जैर्नतममरगणैरब्जपाणिः स जीयात् //

वर्यार्याणां वरेण्यो वरपरविधुरोत्सारणा संवरो व् दुर्वारैः सारमारैरमितकरधरो दुर्धरो वैरिवीरैः / वीरो वीरारिवारी प्रचुरतरवरोदारसंभारवारि- स्फारासारोरुधाराविसरवितरणाधीरधाराधरः स्यात् //

नित्योद्युक्ते ऽतिशक्ते प्रभवति नलिनोद्भासि हस्ते समस्तो नाथी संसारयादःपतिपथपथको लोक इत्याकलय्य / यस्मिन् विन्यस्य भारं लघुरलघुकृपो विश्वदीपं प्रपेदे बुद्धो ऽवन्ध्यप्रतिज्ञाकृतधृतिविधृतिर्निर्वृतिं सो ऽवताद्वः //

उच्चैरूढो गरीयान् सुगत इव जगत्कार्यसंभारभारो न्यस्ता हस्ते प्रशस्ता निज इव कमलालंकृतिर्भक्तिभाजाम् / निर्वाणं नारकाग्नेर्निचय इव चिरं प्रापितः सत्त्वसार्थः तीव्रक्लेशप्रबन्धो जन इव शमितो येन पायात् स युष्मान् //

यो नानानन्तरूपप्रकटनपटिमख्यातमायो ऽप्यमायः संशान्ताशेषभीरप्यतिकरुणतया कातराचारकारी / वीतक्रोधो ऽपि दुष्टाशयदमनबुधक्रोधनित्यानुबन्धः संबुद्धोद्भासिमौलिः स जयति महतां चिन्तनीयो ऽप्यचिन्त्यः //

धत्ते नैवोत्तमाङ्गं परमपितु वपुर्यो ऽमिताभाभिरामं सन्नालं नारविन्दं गुरुभयविधुरा वैरिसेनापि यस्य / येनाबद्धा जटा नो जगदहितहतिव्यापृतेनापि कक्षा दक्षो ऽसौ रक्षताद्वः कुपितयममुखालोकनाल्लोकनाथः //

शेषाशङ्की चकम्पे भवसलिलनिधिः क्लेशसार्थैः प्रलीन विश्रान्तं बोधिसत्त्वैर्मुनिरपि शुशुभे श्लाघ्यनिर्वाणलीलः / यस्मिन्नाबद्धकक्षे प्रसरति परितो ऽशेषसत्त्वार्थकार्य- व्यायामे स प्रकामं शमयतु सुगतावासमौलिर्मलं वः //

इति भगवद्वर्णना /

प्रत्यूहव्यूहबाधाविघटनविषमे मानसस्याप्यभूमौ कर्मण्येकान्तशर्मच्छिदि जगदहितोच्छित्तये पद्मपाणिः / निघ्नः क्रीतो ऽथ भीतो बलवदिव यया निर्विकारो नियुक्तः सा नाथस्यातिगुर्वी प्रभुरवतु कृपा निष्कृपादन्तकाद्वः //

भूमिर्नैवाभिभूतेर्मृदुतरमपि यल्लोकधातूननन्तान् अत्यन्तावीर्यवीर्यं युगपदपि भृशं भासयंस्त्रासशान्त्यै / खद्योतोद्योतलेशानुकृतिविलिसिताशेषतेजस्वितेजस् तेजो लोकेश्वरं वो हरतु हृदि भवद्भूरिमोहान्धकारम् //

निःशेषाकाशधातुर्जन इव जनितापूरिताशः समन्तात् प्रारब्धः सर्वभासामिव निरतिशयापायराशेर्विलोपः / सार्धं सान्द्रान्धकारैः शममगमि महानृद्धिमान्मानिमारो येनोद्भासः स भूयात् सरसिरूहभृतो भूतये जायतां वः //

ईशो ऽन्यद्योतनाशो बलभिदितरभादुःशमध्वान्तराशेः सत्त्वद्रोहाशयानामनुपमतपनो यो ऽच्युतश्चित्रभानुः / नानानन्ताचलादिव्यवहितविषयोद्भासने शक्तिधारी लोकेशोद्भास एकोप्यमरगणनिभो भीभिदे वः स भूयात् //

संपन्नाशेषसत्त्वप्रचुरजलचरेच्छासुखं यत्र दूरं दुर्लङ्घये यान्त्यधस्ताद् गिरय इव जनानर्थदुस्तीर्थ्यसार्थाः / दुर्वारो ऽसौ समन्तात् पृथुभवभुवनाभावसंरम्भजृम्भी भीदावाग्निप्रशान्त्यै करकमलविभाम्भोनिधिर्जृम्भताद्वः //

निर्वाणो नारकाग्निः किमिति यदि विनेयेषु धर्मामृतौघो- राशिर्बद्धो जटानां यदि गतिरहितः किं समहो रिपूणाम् / मर्धागारे गरीयान् यदि वसति जिनो बन्धुरा किं त्रिलोकी नाथस्येत्थं विचित्रा व्यवहृतिरहितं हन्तु वो लोकबन्धोः //

मूर्च्छत्येकापि सत्त्वाशयवशविहिताकारभेदाभिराम् दुर्भेदाभूतकल्पा चलदचलमहारम्भदम्भोलिकोटिः / लौकेशी सन्मनीषाकुमुदशशिरुचिस्तीर्थिकानर्थकोटि- ध्वान्तान्तर्धानभानुर्भवतु भवभिदे देशना शासनी वः //

दुर्वादोन्मादनादिप्रचुरमदकणादाक्षपादादिवादि- प्रोद्यन्नानाविवादास्पदमदसदसां सापवादो विवादः / उत्सादः सप्रमादोन्मदजनविपदां कोविदानां प्रसादो भावानुत्पादवादो जयति जिनवपुः पादसंपादमौलेः //

त्रस्तव्यस्तारिशस्त्रं त्रयि जगति चकास्ति स्तुतो यद्गभस्ति- स्तोमो विस्तीर्णतोयं मरुनिलयसदां विस्तरध्वस्ततापः / स स्तादस्ताहितास्त्रो बलिवलिकुलिशः पद्महस्तस्य हस्तो- ऽनापास्त्यैः वं समस्तत्रिभुवनविकसत्साध्वसापास्तिशस्तः //

संवर्तोद्वृत्तवातव्यतिकरविषयोत्तुङ्गशैलद्रुमाली- निर्मूलोन्मूलनाय प्रभुररिकरिणां शातितानल्पदर्पः / भद्रो लोकेश्वरस्य प्रणयिमधुकराकर्षदानौघवर्षी हस्तस्तम्बेरमो वो भवरिपुनगरीभञ्जनायालमस्तु //

सत्कोषं सन्निधानं घनरुचिजिनतावाञ्छिताच्छेदसिद्धौ यद्यातं शातकोटिमनुकृतिमहितत्रासिसत्पत्रकोटि / सम्यक्संबोधिलक्ष्मीकृतवसतिगुणश्लाघयैवाविमुक्तं मुक्तेस्तत्कारणं वः करकमलमलं लोकनाथस्य भूयात् //

शश्वद्वर्धिष्णुतृष्णाविकलगलदरीविह्वलप्रेतराशेर् आह्लादोत्पादि सत्यं कमलमधिवसद्बोधिलक्ष्मीकमब्जम् / सत्पद्मं भूतिवाञ्च्छाविनिहितमनसां साधुसेवापदं यत् तल्लोकेशस्य युष्मान् पटुरुचिपटलीराजिराजीवमव्यात् //

नानादुःखप्रतानां तनुकिरणघनोत्तापनक्लेशभानु- म्लानं दीनाननं यज्जनमनुजनयत्यातपत्रोपमानम् / ग्लानिं मा गादहीनं तदखिलभुवनान्यूनभानूद्वितानं लीनं लोकेशपाणौ नलिनममलिनं म्लानिमेनो नयेद्वः //

स्थाम्नः स्थानं महिम्नो महदुदयपदं धामधाम्नां प्रथिम्नस् त्रासावासो रिपूणां दुरभिभवभवाद्भीभिदोद्भूतिभूमिः / कान्तं शोभानिशान्तं वसतिरतिजगद्वीर्यविस्तारिराशेर् लोकेशस्यास्तु बाहुर्बहुजगदहितोच्छेदनाचण्डदण्डः //

यल्लावण्यामृतौघं क्षरदपि जनितातङ्कमेवाहितानां तृप्तिं नैव प्रयच्छत्यथ पुनरतनुप्रीणनं लोचनानाम् / शोभागारं विशोभीकृतसकलजगद्भूषणं भूषणानां तद्भुयादेकचीरं सुखमसुखनुदे भास्वदम्भोजिनो वः //

म्लानं रूपाभिमानैर्जगति सफलतां लोचनैः पुण्यभाजां यातं घातं तु तृष्णाततितरलतरैर्यत्र लावण्यसिन्धौ / मन्ये ऽसंख्यैः शशाङ्कप्रभृतिभिरतुलं कान्तिमद्भिः कृतं स्याद् एकं यद्यास्यमस्याप्यतिजयि जयतां तन्मुखं पद्मपाणेः //

यस्मिन् विद्वेषभाजामविरतविलसत्कान्तितोयौघमेघैः संवृत्तं दाहदायि स्फुटतरमसकृद्दुर्दिनं देहिनां तु / धौता ध्वस्तानुबन्धा बहुलमलमषीपङ्कलेपप्रबन्धाः तद्बुद्धागारमूर्द्धामुखमतिसुखदं स्ताद्विचित्रक्रियं वं //

इष्टाब्जाक्लिष्टपाणेः स्फुटविकटकुटीकुट्टिमान्तोपविष्ट- स्पष्टश्लिष्टामिताभद्युतिपटुपटलापाटलाभापटिम्नः / शोभाविष्टैरदृष्टोपरिघनघटनस्योत्कटाटोपबन्धः कूटस्याव्याज्जटानां कटुरकटसुहृत्संकटात्कङ्कटो वः //

अत्यन्ताह्लादहेतोरविरतविस्तृतस्यामिताभप्रभाम्भ संभारस्यैव सेकान् निरतिशयमृजासुन्दरो लब्धवृद्धिः / उद्दामामोदिदिव्याद्भुतकुसुमचयैरर्चितश्चिन्तितार्थ- प्राप्तेः संपत्तये स्तान्नलिनधरजटाकल्पवल्लीचयो वः //

यासां बद्धो विमुक्तिं गमयति नियतामुज्झितान्याधिवासो निःसामान्यां विभूषां जनयति वपुषा यासु नाथो ऽमिताभः / सर्वामोदच्छिदो या निरुपमवहलामोदलिप्ताखिलाशा लौकेश्यो ऽवश्यलभ्यां मृतिमतिविकटास्ता जटा वो हरन्तु //

संघातो नो जटानामखिलजनमनोबन्धने पाशराशिर् लावण्यं नापि दुःखानलविकलजगज्जीवनीयो ऽमृतौघः / नाम्भोजं दुष्टदम्यान्तकतुरगकशाक्लेशदोषातिमोषः प्रत्याशा पोषसिद्धिं दिशतु जिनशशिश्लेषिकेशः श्रियो वः //

उद्दामापिङ्गतेजःप्रसरविरचिताशेषदिग्दाहमोह- त्रस्तात्राणात्रिलोकीकवलनरभसोल्लासिकालाग्निकल्पम् / दष्टौष्ठं दुष्टदृष्टिज्वलितमनुहयग्रीवमाबद्धलक्ष्म्या जाता लोकेश्वरी वः क्षणमतुलकृपाकातरा दृष्टिरव्यात् //

लोपं लोकः प्रयाति स्फुटमखिलमहाभूभृतामद्य तूर्ण चूर्णीभावो धराणामपि जलनिधयः शोषमायान्त्यनन्ताः / इत्थं यस्यान्तकोपभ्रुकुटिभरभवद्भङ्गभीमाल्ललाटा- न्निर्यान्तीं वीक्ष्य देवीमतुलभुजबलैस्त्रस्तमब्जी स जीयात् //

स्तुत्यैः स्तुत्या गुरूणामपि जगति गुरुर्वन्दिता वन्दनीयैर् मूर्तेवानल्पकल्पार्जितसकलजगत्त्राणनिर्व्याजशक्तिः / लोकस्यार्तिच्छिदा यैः स्वयमतुलकृपैवाब्जिनो निर्गता स्तात् तारा संसारकारोदरगुरुविलसत्कारणाहारिणी वः //

गीर्वाणग्रामगीतो गुरुगणनगुणो गीष्पतेरग्रगाभिर् ग्राह्योनुद्गाढवर्गस्फुटगतिगहनो हंसगाम्युग्रगाभिः / गम्भीरोद्गारिणीभिर्निगदितगरिमागेयपूगाल्पभागः सम्यग्गम्यः समग्रो ऽवतु सुगतगिरामब्जिनो वो गुणौघः //

कविरपि जन्मनि जन्मनि भक्तश्चरणे ऽवलोकितेश्वरस्य / प्रकृतिशरणगोत्तरधीः परहितगुरुकार्यकार्यः स्याम् //

महाक्षपटलिकश्रीवज्रदत्तकविविरचितं श्रीलोकेश्वरशतकं समाप्तम् //

नानाकृतिं सुकृतिनं जगतः शरण्यं लोकेशकेशवहरात्मधरैरवश्यम् / संसारसागरतरं कमलायताक्षं श्रीलोकनाथविबुधं शुभदं भजामि //

रक्षाकरं सकलभीतिवतां जनानां वामाननं कनककुण्डलचारुकर्णम् / ग्रैवेयकादिमणिकाभरणेन शोभं श्रीलोकनाथविबुधं शुभदं भजामि //

भक्त्या नतस्य मनुजस्य विपद्विरामं स्वर्गापवर्गफलदं वरदं दयालुम् / देवाधिदेवममरं जिनसंघवन्तं श्रीलोकनाथविबुधं शुभदं भजामि //

सन्तप्तरूपतिलकं तिलकं सुराणां रत्नाकरं कनककुन्तकशोभहस्तम् / भ्राजिष्णुमाभरणधारणदिक्प्रदं तं श्रीलोकनाथविबुधं शुभदं भजामि //

दुर्गन्धदुर्गतिहरं दुरितापहारं दुर्भिक्षनाशकरणं करुणाकरं तम् / विद्याप्रदं गुणनिधिं शुभशुद्धदेहं श्रीलोकनाथविबुधं शुभदं भजामि //

इत्थं वरं सकलभूतगणाधिनाथं त्रैलोक्यनाथममरैरपि वन्द्यमानम् / एवं क्वचिद् रथवरे सुखसंप्रविष्टं श्रीलोकनाथविबुधं शुभदं भजामि //

यक्षादिकिन्नरनरैर्मुनिभिश्च नागैर्विद्याधरैः सुरगणैर्दनुजैः पिशाचैः / सर्वोपकारनमितं पुटिता ग्रहस्तैः श्रीलोकनाथविबुधं शुभदं भजामि //

गन्धादिचन्दनयुतं मृगनाभिभिश्च कर्पूरकुङ्कुमवरैर्हरिचन्दनैश्च / तस्यानुलेपनकृतेन सुशोभिताङ्गं श्रीलोकनाथविबुधं शुभदं भजामि //

रोगादिनाशनकरं भजतां सुनाम शोकादिदुःखहरणं सुखचिन्तनीयम् / पीयूषतुल्यवचनं मृदुजातगात्रं श्रीलोकनाथविबुधं शुभदं भजामि //

आजानुलम्बितकरं गजराजमध्यं सौन्दर्यकुण्डशिखरं स्फटिकाभदन्तम् / अत्यन्तसुन्दरतनुं शुभलक्षणाङ्गं श्रीलोकनाथविबुधं शुभदं भजामि //

ये लोकनाथस्य सदा सुरभ्यं स्तोत्रं पठिष्यन्ति जना सभावाः / श्रीलोकनाथो ऽपि तदीप्सितार्थं स्वहस्तग्रस्तस्त्वरितं ददाति //

श्रीलोकेश्वरस्तोत्रं समाप्तम् //

यद्बुद्धैरिह शासनं नवविधं सूत्रादि संकीर्तितं लोकानां चरितानुरोधनिपुणं सत्यद्वयापाश्रयम् / तस्मिन् रागनिराकृतौ नहि कथा द्वेषक्षये जायते द्वेषस्यापि निराकृतौ नहि कथा रागक्षये जायते //

मानादेरपि यत् क्षयाय वचनं नान्यं मलं हन्ति तत् तस्माद्वयापितरं न तत्र च पुनस्तास्ता महार्थाः कथाः / मा मोहस्य परिक्षयाय तु कथा क्लेशानशेषानसौ हन्यान्मोहसमाश्रिता हि सकलाः क्लेशा जिनैर्भाषिताः //

मोहस्यास्य परिक्षयाय च यतो दृष्टाः प्रतीत्यादय- स्तत्त्वं तत् प्रतिपच्च सैव सुगतैः संकीर्तिता मध्यमा / कायो धर्ममयो मुनेः स च यतः सा शून्यतेत्युच्यते बुद्धानां हृदयं स चापि महती विद्येति संकीर्त्यते //

यस्मात्सर्वगुणाकरो ऽयमुदितो बुद्धैरतस्तत्कथा शास्त्रे मध्यमके ऽथ विस्तरतरा मुख्यात्मना वर्णिता / कारुण्यद्रुतचेतसा प्रवचनं बुद्ध्वा यथावस्थितं बुद्धानां तनयेन तेन सुधिया नागार्जुनेनादरात् //

गम्भीरं जिनशासनं न हि जनो यो वेत्ति तत्संविदे मौनीन्द्राद् वचसः पृथङ्निगदितुं वाञ्छन्ति तत्त्वं च ये / अन्ये ये ऽपि कुबुद्धयः प्रवचनं व्याचक्षते चान्यथा तेषां चापि निराकृतौ कृतमिदं शास्त्रं हतान्तर्द्वयम् //

स्पष्टं राहुलभद्रपादसहितो नागार्जुनो तन्मत देवेनाप्यनुगम्यमानवचनः कालं चिरं दिष्टवान् / तच्छास्त्रप्रविवेकनिश्चितधियस्तीर्थ्यान् विजित्याखिलां- स्तच्छिष्या अपि शासनं मुनिवरस्यादिष्टवन्तश्चिरम् //

आयाताय शिरो ऽर्थिंने करुणया प्रोत्कृत्य दत्त्वा शिरः संयाते तु सुखावतीं जिनसुते नागार्जुने तत्कृताः / ग्रन्थाः शिष्यगणाश्च ते ऽपि बहुना कालेन नाशं गताः तत्त्वार्के ऽस्तमिते ऽधुना न हि मतं स्पष्टं तदस्ति क्वचित् //

उत्प्रेक्षा रचितार्थमात्रनिपुणे दुरंगते सत्पथाद् उन्मत्ते ऽथ निपीय तर्कमदिरां लोके ऽधुना भूयसा / सर्वज्ञोदिततत्त्वबोधरहिते बौद्धे मते व्याकुले धन्यो ऽसौ क्षणमप्यपास्य विमतिं यः शून्यतां गाहते //

भीत्या वस्तुनिबन्धनोपरचितैर्यः शास्त्रपाशैर्वृत- श्चित्त्वोत्प्लुत्य च याति वस्तुपरिखां चैको मृगो ऽसौ महान् / तं प्रत्यद्य न चिन्तया मम गुणश्चैकस्तु यो नाधुना तं प्रत्येव तदन्यशास्त्रमथनी वृत्तिः कृतेयं मया //

दृष्ट्वा सूत्रसमुच्चयं परिकथां रत्नावलीं संस्तुती- रभ्यस्यातिचिरं च शास्त्रगदितास्ताः कारिका यत्नतः / युक्त्याख्यामथ षष्टिकां सविडलां तां शून्यतासप्ततिं या चासावथ विग्रहस्य रचिता व्यावर्तिनी तामपि //

दृष्ट्वा तच्छतकादिकं बहुविधं सूत्रं गभीरं तथा वृत्तिं चाप्यथ बुद्धपालितकृतां सूक्ष्मां च यद्भाविना / पारम्पर्यसमागतं प्रविचयाच्चासादितं यन्मया पिण्डीकृत्य तदेतदुन्नतधियां तुष्टौ समावेदितम् //

चिन्तामण्डल एष तर्कमथनः साक्षादिहावस्थितान् अर्थान् सम्यगनाकुलान् पटुधियां वागांशुभिर्भासयन् / वृत्तिं स्पष्टतरामिमां च विदधच्चन्द्रो ऽधुना कीर्तिमान् लोकानामुदितो निहन्ति विमतीः सान्द्रान्धकारैः सह //

कृत्वा वृत्तिमिमामनाकुलपदां सत्प्रक्रियामादरा श्राद्धानां सुधियां न निश्चयविधौ युक्त्यागमापाश्रयाम् / यत्पुण्यं मम शून्यतेव विपुलं तेनैव लोको ऽखिल- स्त्यक्त्वा दृष्टिगणं प्रयातु पदवीं सर्वप्रपञ्चच्छिदाम् //

शास्तारं प्रणिपत्य गौतममहं तद्धर्मतावस्थितान् सम्बुद्धान् सकलं जिनात्मजगणं धर्मं च तैर्भाषितम् / चक्षुर्भूतमनन्तबुद्धवचनस्यालोचने देहिनाम् यो ऽमुं मध्यमकं चकार कृपया नागार्जुनस्तं नमे //

श्री चन्द्रकीर्तिकृता मध्यमकशास्त्रस्तुतिः समाप्ता //

ओम् नमः शाक्यसिंहाय

सिद्धं प्रसिद्धं विजितामरं च शान्तं विरागं सुविशुद्धशीलम् / विश्वेश्वरं सर्वगुणाकरं वै श्रीशाक्यसिंहं प्रणमामि नित्यम् //

छत्राभशीर्षं वरनीलकेशं चोर्णासुशोभं हि महाललाटम् / नीलोत्पलाभं नयनं विशालं श्रीशाक्यसिंहं प्रणमामि नित्यम् //

उत्तुङ्गनासं भरपीनगण्डं बिम्बौष्ठकल्पं मृगराजवक्षसम् / उत्तप्तहेमाभसुवर्णवर्णं श्रीशाक्यसिंहं प्रणमामि नित्यम् //

पायोधकोषं शुभकर्णशोभं गण्डस्त्रिरेखावरचैलभूषम् / प्राजानुबाहुं द्विपनासकल्पं श्रीशाक्यसिंहं प्रणमामि नित्यम् //

विचित्रपुष्पैर्नरयाक्षमानं श्रीवत्सभद्रद्विगणोपयुक्तम् / अशीतिसुव्यञ्जनगात्रशोभं श्रीशाक्यसिंहं प्रणमामि नित्यम् //

शास्तारमग्र्यं नरवीरवीरं मायासुतं कारुणिकं जिनेन्द्रम् / शौद्धोदनिं लोकविदं मुनीन्द्रं श्रीशाक्यसिंहं प्रणमामि नित्यम् //

चक्राङ्कपाणिं नवपल्लवाभं मत्तेभलीलागमनं विराजम् / देवासुरैर्वन्दितपादयुग्मं श्रीशाक्यसिंहं प्रणमामि नित्यम् //

त्रैदुःखदुःखाद् भयवेदिलोकान् त्राणं च नीतुं वरबोधिमात्रैः / जिह्वा च मत्तेहि सुचक्षु सर्वं श्रीशाक्यसिंहं प्रणमामि नित्यम् //

महाबोधिभट्टारकस्तोत्रं समाप्तम् //

ओम् नमो बुद्धाय

सौवर्णवर्णं कलविङ्कघोषं ब्रह्मस्वरं कारुणिकं सुसेव्यम् / नरोत्तमं शीलविशुद्धदेहं श्रीमन्महाबोधिमहं नमामि //

शाक्येन्द्रवंशोद्भवदिव्यदेहं तृष्णाच्छिदं मारभिदं जिनेशम् / ज्ञानास्पदं क्लेशभिदं दिनेशं श्रीमन्महाबोधिमहं नमामि //

समन्तभद्रं वरलक्षणाङ्गं सत्त्वार्थसिद्धिं सुकृतैः प्रणम्यम् / श्रेयस्करं सत्त्वहितैकचित्तं श्रीमन्महाबोधिमहं नमामि //

धर्मोदकं यः कृपयोत्ससर्ज रागाग्निसन्दीपितपुद्गलानाम् / सुखाय संबोधिपयोमुचं तं श्रीमन्महाबोधिमहं नमामि //

भवाब्धिनिस्तारणसेतुभूतं तथागतं तत्त्वविदं नृसिंहम् / त्रैलोक्यनाथं वरबोधिरत्नं श्रीमन्महाबोधिमहं नमामि //

पदार्थसम्पादनसुव्रतस्थं मायासुतं मारभिदं जितारिम् / शास्तारमग्र्यं वरबोधिसत्त्वं श्रीमन्महाबोधिमहं नमामि //

लोकेशनाथं हरिनाथनाथं भूतेशनाथं सुरनाथनाथम् / कृतान्तनाथं नरनाथनाथं श्रीमन्महाबोधिमहं नमामि //

स बुद्धरूपः स हि धर्मरूपः स एव संघो ऽपि विनेयकानाम् / अभूच्छरण्यः शरणागतानां श्रीमन्महाबोधिमहं नमामि //

श्रीमन्महाबोधिवन्दनाष्टकं समाप्तम् //

वज्रसत्त्व महावज्र वज्रनाथ सुसाधक / वज्राभिषेक वज्राभ वज्रकेतु(तो) नमो ऽस्तु ते //

हासवज्र महाधर्म वज्रकोश महावर / सर्वमण्डलराजाग्र्य निष्प्रपञ्च नमो ऽस्तु ते //

वज्रकर्म महारक्ष चण्डयक्ष महाग्रह / वज्रमुष्टि महामुद्र सर्वमुद्र नमो ऽस्तु ते //

बोधिचित्त महाबोधे बुद्ध सर्वतथागत / वज्रयान महाज्ञान महायान नमो ऽस्तु ते //

सर्वार्थ सर्वतत्त्वार्थ महासत्त्वार्थ सर्ववित् / सर्वज्ञ सर्वकृत् सर्व सर्वदर्शि नमो ऽस्तु ते //

वज्रात्मक सुवज्राग्र्य वज्रवीर्य सुवज्रधृक् / महासमय तत्त्वार्थ महासत्य नमो ऽस्तु ते //

वज्राङ्कुश महाकाम सुरते सुमहाप्रभ / वज्रप्रभ प्रभोद्योत बुद्धप्रभ नमो ऽस्तु ते //

वज्रराजाग्र्य वज्राग्र्य विद्याग्र्याग्र्य नरोत्तम / वज्रोत्तम महाग्र्याग्र्य विद्योत्तम नमो ऽस्तु ते //

वज्रधातो महागुह्य वज्रगुह्य सुगुह्यधृक् / वज्रसूक्ष्म महाध्यान वज्रकार्य नमो ऽस्तु ते //

बुद्धाग्र्य बुद्धवज्राग्र्य बुद्धबोधे महाबुध / बुद्धज्ञान महाबुद्ध बुद्धबुद्ध नमो ऽस्तु ते //

बुद्धपूजा-महापूजा-सत्त्वपूजासुपूजक / महोपाय महासिद्धे वज्रसिद्धि नमो ऽस्तु ते //

तथागत महाकाय तथागतसरस्वते / तथागतमहाचित्त वज्रचित्त नमो ऽस्तु ते //

बुद्धाधिप जिनाज्ञाकृद् बुद्धमित्र जिनाग्रज / महावैरोचन विभो शान्तरौद्र नमो ऽस्तु ते //

तथागतमहातत्त्व भूतकोटे महानय / सर्वपारमिताज्ञान परमार्थ नमो ऽस्तु ते //

समन्तभद्र चर्याग्र्य मार मारप्रमदर्क / सर्वाग्र्य समताज्ञान सर्वत्रग नमो ऽस्तु ते //

बुद्धहुंकर हुंकार वज्रहुंकर दामक / विश्ववज्राड्ग वज्रोग्र वज्रपाणे नमो ऽस्तु ते //

वन्दयः पूज्यश्च मान्यश्च सत्कर्तव्यस्तथागतैः / यस्माद् वज्रदृढं चित्तं वज्रसत्त्वस्त्वमुच्यसे //

त्वदधीना हि संबोधिः पिता त्वं सर्वदर्शिनाम् / संभूताः संभविष्यन्ति त्वामासाद्य तथागताः //

अनेन स्तोत्रराजेन यः स्तुयाद्बै सुभक्तितः / यो गायंस्तु स्तुयात् सो ऽपि भवेद्वज्रधरोपमः //

अध्येषयामस्त्वां नाथ सर्वबुद्धवशंकरम् / सर्वसत्त्वार्थकार्यार्थमुत्पादय स्वकं कुलम् //

महाचक्रवर्तिनामाष्टोत्तरशताध्येषणास्तोत्रं सम्पूर्णम् //

नमस्यामि महाकालं सर्वसम्पत्तिदायकम् / खर्वं लम्बोदरं नीलमष्टनागविभूषितम् //

द्विभुजैकमुखं वीरं कपालकृतशेखरम् / व्याघ्रचर्मकटीवेष्टं शतार्धमुण्डमालिनम् //

भावाभावपरिच्छिन्नं जगत्संबोधकारकम् / सर्वभावात्मकं नाथं जगन्नाथ नमो ऽस्तु ते //