༄༅༅། ། རྒྱ་གར་སྐད་དུ། བྷ་ག་བཱ་ན་ནཱི་ལཱམྦ་ར་དྷ་ར་བཛྲ་པཱ་ཎི་ཏ་ནྟྲ་ན་མ། བོད་སྐད་དུ། བཅོམ་ལྡན་འདས་ཕྱག་ན་རྡོ་རྗེ་གོས་སྔོན་པོ་ཅན་གྱི་རྒྱུད་ཅེས་བྱ་བ། བཅོམ་ལྡན་འདས་དཔལ་ཕྱག་ན་རྡོ་རྗེ་གོས་སྔོན་པོ་ཅན་ལ་ཕྱག་ འཚལ་ལོ། ། སངས་རྒྱས་དང་བྱང་ཆུབ་སེམས་དཔའ་དུས་གསུམ་དུ་བཞུགས་པ་རྣམས་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མི་བསྐྱོད་པ་རྡོ་རྗེའི་རིགས་ཀྱི་སངས་རྒྱས་ལྕང་ལོ་ཅན་གྱི་ཕོ་བྲང་ན་བྱང་ཆུབ་སེམས་དཔའ་ཕྱག་ན་རྡོ་རྗེ་ དང་། རྡོ་རྗེ་སྡེ་དང་། རྡོ་རྗེ་ཀུན་ཏུ་འཛིན་པ་དང་། ། རྡོ་རྗེ་རབ་ཏུ་འདུལ་བྱེད་དང་། ། རྡོ་རྗེ་མི་བཟད་འཇོམས་དང་། རྡོ་རྗེ་གདུག་པ་ཀུན་འདུལ་དང་། རྡོ་རྗེ་དབྱིངས་ལས་རྒྱལ་བ་དང་། རྡོ་རྗེ་དགྱེས་གནས་སྐྱོབ་ལ་སོགས་པའི་འཁོར་བྱེ་བ་ཕྲག་སྙེད་རྣམས་དང་ཐབས་ཅིག་ཏུ་བཞུགས་ སོ། ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་ཉིད་ཀྱིས་རྡོ་རྗེ་ཐུགས་ཀར་ལན་གསུམ་གསོར་ཏེ། བཅོམ་ལྡན་འདས་ལ་བསྐོར་བ་ལན་གསུམ་བྱས་ནས་ཕྱག་འཚལ་ཏེ། པུས་མོ་གཡས་པའི་ལྷ་ངས་ལ་བཙུགས་ཏེ་འདི་སྐད་ཅེས་གསོལ་ཏོ། །

བཅོམ་ལྡན་ འདས་དེ་བཞིན་གཤེགས་པ་རྡོ་རྗེ་འཛིན་པ་ཆེན་པོ་འབྱུང་པོ་ཀུན་འདུལ་བར་བྱེད་ཅིང་། ས་འོག་གི་གདུག་པ་ཅན་འདུལ་བར་བྱེད་པའི་རྡོ་རྗེ་ཀུན་འདུལ་ཞེས་བྱ་བའི་རྒྱུད་ཆེན་པོ་བཤད་དུ་གསོལ། རྡོ་རྗེ་འཛིན་པ་ཆེན་པོ་བཤད་དུ་གསོལ་ཁྱབ་བདག་ཆེན་པོ་བཤད་དུ་གསོལ། གདུག་ པ་ཀུན་འདུལ་བར་བྱེད་པ་ཆེན་པོས་བཤད་དུ་གསོལ། མུན་པ་ཀུན་འཇོམས་པ་ཆེན་པོ་བཤད་དུ་གསོལ་ཞེས་ཕྱག་ན་རྡོ་རྗེས་གསོལ་བ་བཏབ་བོ། ། དེ་སྐད་ཅེས་གསོལ་པ་དང་བཅོམ་ལྡན་འདས་ཀྱིས་ཕྱག་ན་རྡོ་རྗེ་ལ་བཀའ་སྩལ་པ། རྡོ་རྗེ་འཆང་ཆེན་པོ་གསང་བ་པ་ཁྱོད་སེམས་ཅན་ རྣམས་ཀྱི་དོན་དུ་རྡོ་རྗེ་ཀུན་འདུལ་ཞེས་བྱ་བའི་རྒྱུ་དང་ལ་ཞུ་བ་ལེགས་སོ། ། གསང་བ་པའི་བདག་པོ་ལེགས་སོ། ། བྱང་ཆུབ་སེམས་དཔའ་ཆེན་པོ་ལེགས་སོ། ། དེའི་ཕྱིར་ལག་ན་རྡོ་རྗེའི་རིགས་རྣམས་ཁྱེད་རྗེས་སུ་ཉོན་ལ་ཡིད་ལ་ཟུང་ཤིག ། ངས་རྣམ་པར་ཕྱེ་སྟེ་རྡོ་རྗེ་ས་འོག་འབྱུང་པོ་ འདུལ་བ་རྡོ་རྗེ་ཞེས་བྱ་བའི་རྒྱུད་བཤད་ཀྱིས་རྗེས་སུ་ཟུང་ཤིག ། དེ་སྐད་ཅེས་བཀའ་སྩལ་ནས། བཅོམ་ལྡན་འདས་ཀྱིས་རྡོ་རྗེ་ཀུན་འདུལ་གྱི་ཏིང་ངེ་འཛིན་གྱིས་ས་འོག་གི་གདོན་དང་།

འབྱུང་པོ་ཀུན་འཇོམས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། ། བཅོམ་ལྡན་འདས་ཏིང་ ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་བཅོམ་ལྡན་འདས་ཀྱི་སྐུའི་བ་སྤུའི་བུ་ག་ཐམས་ཅད་ནས་ཁྲོ་བོ་གདུག་པ་ཀུན་འདུལ་བར་བྱེད་པ་དུ་མ་སྤྲོས་ཏེ། ས་འོག་ས་སྟེངས་ས་བླ་གསུམ་གང་བར་མཛད་དེ། ས་འོག་གི་ཀླུ་རྣམས་ཀྱི་གནས་རྣམས་གདུག་པའི་ཧཱུཾ་སྒྲས་ཀུན་ཏུ་གང་བར་བྱས་ནས་ ཀླུའི་རྒྱལ་པོ་བརྒྱད་པོ་འཁོར་དང་བཅས་པ་བཏུལ་ཏེ། བཅོམ་ལྡན་འདས་ཀྱི་སྤྱན་སྔར་བཀུག་གོ། ། དེ་ནས་ཀླུའི་རྒྱལ་པོ་མཐའ་ཡས་གདུག་པའི་སེམས་ལངས་ཏེ་དབུགས་ཤིན་ཏུ་ཚ་བར་གཏོང་བར་སེམས་པ་དེ་བཅོམ་ལྡན་འདས་ཀྱིས་མཁྱེན་ཏེ། གསང་བའི་ བདག་པོ་ལག་ན་རྡོ་རྗེ་ལག་ན་རྡོ་རྗེ་ལ་བྱིན་གྱིས་བརླབས་ནས་ཀླུ་ཐམས་ཅད་ཀྱི་ཞེ་སྡང་རབ་ཏུ་ཞི་བར་བྱེད་པ་ཞེས་བྱ་བའི་སྔགས་འདི་གསུངས་སོ། ། ཨོཾ་ནཱི་ལ་བཛྲ་ཀྲོ་དྷ་ནཱ་ག་ཧཱུྃ་ཕཊ་ཅེས་བཟླས་སོ། ། དེ་ནས་ཀླུ་མཐའ་ཡས་སེམས་རབ་ཏུ་ཞི་སྟེ་བྱང་ཆུབ་སེམས་དང་ལྡན་པར་གྱུར་པས་ཀླུ་ཐམས་ཅད་སེམས་ རབ་ཏུ་ཞིའོ། །

དེ་ནས་མཐའ་ཡས་ལ་སོགས་པའི་ཀླུའི་རྒྱལ་པོ་ཆེན་པོ་ས་འོག་ན་བཞུགས་པ་རྣམས་ཀྱིས་བཅོམ་ལྡན་འདས་རྡོ་རྗེ་འཛིན་པ་ཆེན་པོ་དེ་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས་ཕྱི་མའི་དུས་ན་སླད་མའི་ཚེ་སེམས་ཅན་རྣམས་ལ་ས་འོག་གི་གདོན་རྣམས་ཀྱིས་བར་དུ་ མི་གཅོད་ཅིང་དེ་དག་གི་གདུག་པ་ཞི་བར་བྱེད་པའི་ཆོ་ག་བཤད་དུ་གསོལ། བདག་ཅག་ཀླུའི་རྒྱལ་པོ་རྣམས་དང་བདག་ཅག་གི་འཁོར་རྣམས་ཀྱིས་སེམས་ཅན་ཆེན་པོ་དེ་ལ་བར་དུ་གཅད་པར་མི་ནུས་པ་བཤད་དུ་གསོལ། བདག་ཅག་ཀླུའི་རྒྱལ་པོ་རྣམས་ཀྱི་དོན་དུ་འགྱུར་བ་བཤད་དུ་ གསོལ་ཞེས་གསོལ་བ་བཏབ་བོ། ། དེ་ནས་བཅོམ་ལྡན་འདས་རྡོ་རྗེ་འཛིན་པ་ཆེན་པོས་ཀླུའི་རྒྱལ་པོ་ཆེན་པོ་རྣམས་ལ་ཅུང་ཟད་སྤྱན་གྱིས་གཟིགས་ནས་བཀའ་སྩལ་པ། ཀླུའི་རྒྱལ་པོ་དག་ལེགས་སོ། ། ཞུ་བའི་དུས་ལ་བབ་བོ། ། ངས་སེམས་ཅན་རྣམས་ཀྱི་དོན་དུ་རབ་ཏུ་ཕྱེ་སྟེ་བཤད་ ཀྱིས་ཉོན་ཅིག ། བཅོམ་ལྡན་འདས་ལེགས་སོ། ། ཞེས་གསོལ་ཏེ་ཀླུ་ལ་སོགས་པ་རྣམས་ལྟར་ཉན་ཏོ། ། དེ་ནས་བཅོམ་ལྡན་འདས་ཀྱིས་ཀླུ་འདུལ་བ་ཞེས་བྱ་བའི་ལེའུ་འདི་བཤད་དེ། ཧཱུྃ། སེམས་ཅན་ཀུན་གྱི་དོན་གྱི་ཕྱིར། ། རྡོ་རྗེ་འཛིན་ཆེན་སྟོན་པ་དེས། །

ཉིད་ཀྱི་འཁོར་ ལ་རབ་གཟིགས་ཏེ། ། འོད་ཟེར་ཀུན་ཏུ་རབ་བཀྱེ་ནས། ། གདོན་རྣམས་རླག་བྱེད་ཐབས་གསུངས་པ། ། དཀར་པོའི་ཕྱོགས་ཀྱི་ཚེས་བརྒྱད་དང་། ། དེ་བཞིན་བཅུ་བཞི་{བཅྭ་,བཅོ་}ལྔ་ལ། ། རབ་ཏུ་དབེན་པའི་ས་ཕྱོགས་སུ། ། ཕྱག་ན་རྡོ་རྗེ་རབ་ཁྲོས་པ། ། གཞོན་ཚུལ་འགྱིད་བ་རབ་ བསམས་ལ། ། རིན་ཆེན་སྣོད་དམ་ཁམ་ཕོར་དུ། ། གསེར་ལ་སོགས་པའི་རིན་ཆེན་བདུན། ། དག་པར་བསྒྲུབས་ཏེ་རབ་བཅུག་ནས། ། གསང་སྔགས་བརྒྱ་རྩ་བརྒྱད་བཟླས་ཏེ། ། དཀོན་མཆོག་གསུམ་གྱི་བཀའ་བདེན་པས། ། འབྱུང་པོ་དེ་ལ་གཏོར་བྱིན་ཏེ། ། གང་གནས་ བརྟན་སར་རབ་སྦས་ལ། ། འབྱུང་པོ་ཀླུ་གདུག་ཞི་བར་འགྱུར། ། གང་ཚེ་ཞི་བས་མ་ཕན་ན། ། དེ་ཚེ་གདུག་པའི་མཚོན་ཆ་རྣམས། ། རང་གི་ཁང་པར་རབ་ཏུ་འབར། ། སྡུག་བསྔལ་མི་བཟད་དྲག་པོ་སྟེ། ། དེ་ཚེ་སྔོན་གྱི་སེམས་དྲན་པས། ། ཞི་བར་འགྱུར་བར་ཐེ་ཚོམ་མེད། ། དེ་ནས་འདིར་བཅོམ་ལྡན་འདས་ཀྱིས་ལས་ཀྱི་ལྷའི་ཆོ་ག་རབ་ཏུ་གསུངས་པ། རྟག་ཏུ་བྱང་ཆུབ་སེམས་ཐོབ་ཅིང་། ། དམ་ཚིག་སྡོམ་པ་ཀུན་ལྡན་པ། ། ཁྲུས་ཀྱི་ལས་རྣམས་ཀུན་བྱ་སྟེ། ། རྣམ་པར་དག་པའི་ས་གཞི་ལ། ། དཀྱིལ་འཁོར་ཇི་ལྟར་མཛེས་པར་བྱ། །

ཧཱུྃ་ ཡིག་ལས་བྱུང་ལྕགས་ཀྱུ་ཡིས། ། སངས་རྒྱས་བྱང་ཆུབ་སེམས་དཔའ་རྣམས། ། སྐད་ཅིག་མདུན་བསམས་མཆོད་སོགས་བྱ། ། ཨོྃཤཱུནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱ་ཏཱ་ཀོ྅ཧྃ། སྟོང་པའི་ཏིང་ངེ་འཛིན་རྣམས་བསྒོམ། ། ནམ་མཁའི་ཁམས་སུ་ཨ་དང་ནི། ། ཟླ་བ་དང་པོ་ཡི་ གེ་ཧཱུྃ། ། འོད་ཟེར་ཀུན་དུ་འབར་བར་བསྒོམ། ། འགྲོ་དྲུག་ཉོན་མོངས་ཀུན་སྦྱངས་ཏེ། ། རྣམ་གྲོལ་ས་ལ་ངེས་བཀོད་ནས། ། འོད་བསྡུས་ཧཱུྃ་གི་རྣམ་པར་བསམ། ། དེ་ཉིད་རྡོ་རྗེ་རྩེ་ལྔ་ཅན། ། འོད་ཟེར་ཕྲེང་བ་འཕྲོ་བར་བསམ། ། དེ་ཡི་འོད་ཀྱིས་སེམས་ཅན་རྣམས། ། རྡོ་རྗེའི་ངོ་བོར་ ཐིམ་པར་བྱ། ། དེ་ལས་ཁྲོ་བོ་ཆེན་པོའི་སྐུ། ། སྐུ་མདོག་སྔོན་པོ་ཆེར་འབར་བ། ། གཡོན་བརྐྱང་ན་ཚོད་བཅུ་དྲུག་འཆང་། ། མཐའ་ཡས་ལ་སོགས་བརྒྱད་ཀྱིས་བརྒྱན། ། སྐུ་མདོག་ནག་པོའི་གཟུགས་ཅན་དེ། ། ཞལ་གཅིག་ཕྱག་གཉིས་རྡོ་རྗེ་བསྣམས། ། ན་བཟའ་སྔོན་ པོའི་ཟེར་འཇོལ་ཅན། ། སྤྱན་གསུམ་དམར་མཛེས་གྱེན་དུ་འཇིལ། ། རལ་བ་གྱེན་བརྫེས་རྡོ་རྗེ་ཡི། ། དབུ་རྒྱན་ཅན་དུ་བསམ་པར་བྱའོ། ། དེ་ནས་ཡེ་ཤེས་ཁྲོ་བོ་ཆེ། ། སྤྱན་དྲངས་ཛཿཧཱུྃ་བྃ་ཧོཿས་གཞུག ། མགོ་དང་ལྐོག་མ་སྙིང་ག་རུ། །

ཨོྃ་ཨཱཿཧཱུྃ་གི་རྣམ་པ་ཡི། ། ཡི་གེ་ བཅུ་གསུམ་སྔགས་ཀྱིས་བརྒྱན། ། འཁོར་ལོ་པདྨ་རྡོ་རྗེ་བསམ། ། མི་བསྐྱོད་རྡོ་རྗེས་དབང་བསྐུར་ཏེ། ། ཀུན་འཇོམས་རྣམ་པར་དག་པར་བསམ། ། དེ་ནས་བཅོམ་ལྡན་འདས་ཀྱིས་འདིའི་རྩ་བའི་སྔགས་ལས་ཐམས་ཅད་པ་གསུངས་པ། ཨོྃ་ནཱི་ལཱྃ་བ་ར་དྷ་ར་བཛྲ་ པཱ་ཎི་ཧཱུྃ་ཧཱུྃ་ཕཊ། རབ་ཏུ་བརྗོད་པར་བྱའོ། ། སྔགས་ཀྱི་ཕྲེང་བ་དེ་དག་ཀྱང་། ། ཞི་ལ་རབ་དཀར་དབང་ལ་དམར། ། རྒྱས་ལ་སེར་པོ་དྲག་ལ་གནག ། རྟོག་པ་ཀུན་ཏུ་སྤངས་ཏེ་བཟླས། ། སྤྲོ་དང་བསྡུ་བའི་བྱེ་བྲག་གིས། ། ཇི་ལྟར་མོས་པའི་བསམ་གཏན་བྱ། ། མི་མོས་རྣལ་ འབྱོར་རབ་ཏུ་སྤང་། ། ཕྱག་ན་རྡོ་རྗེ་ཁྲོ་རྒྱལ་གྱིས། ། དགེ་ཀུན་རྟེན་པའི་ཡིད་འདི་ལ། ། གང་བརྩོན་པ་དེ་ཕན་ཡོན་ནོ། ། ཀུན་ཏུ་རབ་ཏུ་དགའ་སོགས་དག ། མི་སྣང་ལ་སོགས་རབ་ཏུ་འགྲུབ། ། ཀུན་རྟེན་རབ་ཏུ་སྤྱད་དགེ་ཅན། ། རྟེན་ཅན་སྦྱོར་བ་རབ་ཏུ་དབེན། ། དངོས་གྲུབ་མཆོག་ ཏུ་རབ་ཏུ་འགྲུབ། ། དཔལ་རྡོ་རྗེ་ས་འོག་གི་རྒྱུད་ལས་ཞི་བའི་ལས་སྒྲུབ་པ་དང་ལྷའི་ལེའུ་སྟེ་དང་པོའོ། ། ། ། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །

བཅོམ་ལྡན་སྟོན་པ་རྡོ་རྗེ་འཛིན། ། བར་ཆད་ ཞི་བྱེད་གཏོར་མ་ཡི། ། ཆོ་ག་མཆོག་ནི་བཤད་དུ་གསོལ། ། སེམས་ཅན་དོན་དུ་བརྩོན་ལྡན་བགྱི། ། ཞེས་གསོལ་ཏོ། ། དེ་ནས་བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་རྡོ་རྗེ་འཆང་བ་གཙོ། ། བར་ཆད་ཞི་བའི་ཆོ་ག་དང་། ། དངོས་གྲུབ་ཐབས་ཀྱི་ཆོ་ག་ནི། ། གཏོར་ མ་ཀུན་གྱི་གཏེར་འགྱུར་བཤད། ། རབ་ཏུ་མཛེས་པའི་སྣོད་མཆོག་ཏུ། ། བཟའ་དང་བཅའ་བ་ལ་སོགས་པའི། ། ཕུན་སུམ་ཚོགས་པ་རབ་ཏུ་བྱ། ། སྟོང་པའི་ཏིང་ངེ་འཛིན་འགྲོ་བས། ། བྲུྃ་ལས་མཛེས་པའི་སྣོད་བསྐྱེད་དེ། ། ཁྃ་ལས་ཁ་ཟས་ནམ་མཁའི་ཁམས། ། མཉམ་པར་ བསམས་ཏེ་སྔགས་འདི་བརྗོད། ། ཨོྃ་ཨ་ཀཱ་རོ་མུ་ཁྃ་སརྦྦ་དྷརྨྨཱ་ཎཱྃ་ཨཱ་དྱ་ནུ་ཏྤནྣ་ཏྭཱད་ཨོཾ་ཨཱཿཧཱུྃ་ཕཊ་སྭཱ་ཧཱ་ཞེས་བརྗོད་དོ། ། བདུད་རྩིར་བསམས་ཏེ་རབ་ཏུ་སྤེལ། ། སྤེལ་བ་གཉིས་ཀྱིས་རྣམ་པར་སྦྱང་། ། ནམ་མཁར་ཧྲཱིཿལས་པདྨ་བརྒྱད། ། དཔག་ཏུ་མེད་པ་བསམ་བྱ་སྟེ། ། གཙོ་བོ་མགོན་ པོ་རྣམ་ཐོས་བུ། ། གནོད་སྦྱིན་བྱེ་ཚོགས་ཀྱིས་བསྐོར་ཅིང་། ། ཀླུ་བརྒྱད་ཀྱིས་མཆོད་སྤྱན་དྲང་བྱ། ། གནོད་སྦྱིན་རྒྱལ་པོ་དེ་དག་ལ། ། རྨུགས་འཛིན་གང་བ་བཟང་པོ་དང་། །

ནོར་{བཟངས་,བཟང་}ཀུ་བེ་ར་དང་ནི། ། ཡང་དག་འབྲོག་གནས་ལྔས་རྩེན་དང་། ། པི་ཙི་ཀུཎྜ་ལི་རྣམས་ནི། ། འཁོར་ གྱི་ཚུལ་གྱིས་གཙོ་ལ་བསྐོར། ། ཕྱོགས་དང་མཚམས་སུ་བསམ་པར་བྱ། ། བྱེ་བའི་འཁོར་ཚོགས་ཐུན་མོང་ཡིན། ། ཀླུ་བརྒྱད་གནོད་སྦྱིན་ཕྱི་ནའོ། ། དེ་ནས་ལྕགས་ཀྱུས་སྤྱན་དྲངས་ལ། ། མ་བྲལ་གཙོ་དང་ལྕགས་ཀྱུའོ། ། བཞོན་པ་སེང་གེ་རྟ་ཡི་ཚོགས། ། ཀུན་ཀྱང་ཞལ་གཅིག་ ཕྱག་གཉིས་པ། ། རིན་ཆེན་འབར་བའི་རྒྱལ་མཚན་དང་། ། ནོར་བུ་རིན་ཆེན་བུམ་པ་དང་། ། རིན་ཆེན་འབར་བ་རལ་གྲི་དང་། ། གྲི་མདུང་ཁང་བརྩེགས་རལ་གྲི་ཕུབ། ། མཚོན་ཆ་སྣ་ཚོགས་འཕྱར་བར་བསྒོམ། ། སྤྱན་འདྲེན་ཚེ་ན་རྔ་སོགས་དང་། ། དུང་ཆེན་འབྲས་སྤོས་དག་ནི་ དབུལ། ཨོྃ་བཻ་བ་ཤྲ་བ་ཎ་ས་པ་རི་བཱ་ར་ས་མཱ་ཛཿཛཿཧཱུྃ་བྃ་ཧོཿ། ཨོྃ་བཻ་སྭཱ་ཧཱ། ཨོྃ་བཻ་ཤྲ་བ་ཎ་ཨཱ་ཀཪྵ་ཡ་ཧཱུྃ་ཛཿ། ཞེས་སྤྱན་དྲང་བའི་སྔགས་སོ། ། ཨོྃ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། ཅེས་པ་ནི་བགེགས་བསྐྲད་པའི་སྔགས་སོ། ། དེ་ནས་མེ་ཏོག་ལ་སོགས་པས། ། མཆོད་པ་ དག་ནི་ནམ་མཁའ་རུ། ། རབ་ཏུ་མཆོད་དེ་སྤྲོ་བར་བྱ། ། ཨོྃ་ནཱི་ལཱྃ་པ་ར་དྷ་ར་བཛྲ་པཱ་ཎི་ཨཱ་ཛྙཱ་པ་ཡ་ཏི་ཨི་མྃ་བ་ལི་གྲྀཧྞ་ཏུ།

ས་མ་ཡ་རཀྵ་ནྡུ། མ་མ་སརྦྦ་སིདྡྷི་མྨེ་པྲ་ཡཙྪནྟུ་མ་མ་ཀརྨྨཱ་མོ་གྷ་སྭཱ་ཧཱ། ཨོྃ་བཻ་ཤྲ་བ་ཎཱ་ཡ་སྭཱ་ཧཱ། ཨོྃ་ཛམ་བྷ་ལཱ་ཡ་སྭཱ་ཧཱ། ཨོྃ་པཱུརྞ་བྷ་དྲཱ་ཡ་སྭཱ་ཧཱ། ཨོྃ་མ་ཎི་བྷ་དྲཱ་ ཡ་སྭཱ་ཧཱ། ཨོྃ་ཀུ་བཻ་རཱ་ཡ་སྭཱ་ཧཱ། ཨོྃ་སྃ་པྲ་ཛྙཱ་ནཱ་ཡ་སྭཱ་ཧཱ། ཨོྃ་གུ་ཧྱ་སྠཱ་ནཱ་ཡ་སྭཱ་ཧཱ། ཨོྃ་པཱཉྩི་ཀཱ་ཡ་སྭཱ་ཧཱ། ཨོྃ་ཙི་པི་ཀུཎྜ་ལི་ནེ་སྭཱ་ཧཱ། གཏོར་མ་དབུལ་བའི་སྔགས་སོ། ། དེ་ནས་མཆོད་དེ་མགྲོན་རྣམས་བཏང་། ། འོད་ཟེར་ལྕགས་ཀྱུ་བཀྲོལ་ནས་སུ། ། བཀྲོལ་བའི་དུས་ན་ གཤེགས་དང་མཉམ། ། མཉམ་ལངས་སྤྱོད་པའི་ཆོ་ག་བྱའོ། ། རྡོ་རྗེ་ས་འོག་གི་རྒྱུད་ལས་གཏོར་མའི་ལེའུ་སྟེ་གཉིས་པའོ། ། ། ། དེ་ནས་བཅོམ་ལྡན་འདས་ཀྱིས་འཇིག་རྟེན་པའི་དངོས་གྲུབ་བསྒྲུབ་པར་འདོད་པའི་དོན་དུ་འཇིག་རྟེན་པའི་འཁོར་ལོ་ཀུན་འབྱུང་བ་ཞེས་བྱ་བའི་ ཏིང་ངེ་འཛིན་ལ་སྙོམས་པར་ཞུགས་ནས་སྐུའི་བ་སྤུ་ནས་འོད་ཟེར་སྤྲོས་ཏེ། རྣམ་ཐོས་སྲས་འཁོར་བཅས་ཀྱི་ཐུགས་བསྐུལ་ནས་འཁོར་དེར་འདུས་ཏེ། བཅོམ་ལྡན་འདས་ལ་ཕྱག་འཚལ་ཏེ་རིན་པོ་ཆེའི་ཕྱེ་མས་གཏོར་ནས་འདི་སྐད་ཅེས་གསོལ་ཏོ། །

བཅོམ་ལྡན་འདས་ བདག་ནི་ཆོས་སྐྱོང་བའི་རྒྱལ་པོ་རྣམ་ཐོས་ཀྱི་བུ་ཞེས་བགྱི་བ་ལགས་ཏེ། བདག་གིས་ཆོས་དང་ལྡན་པ་རྣམས་ཀྱི་ཆོས་བསྲུང་ཞིང་ཡུན་རིང་དུ་གནས་པར་བྱ་བའི་ཕྱིར་བདག་ཉིད་ཀྱིས་གསང་བ་བཤད་ན་བཅོམ་ལྡན་འདས་ཀྱིས་སྐབས་དབྱེ་བར་ཅི་གནང་ཞེས་གསོལ་ཏོ། ། བཅོམ་ལྡན་ འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ལེགས་སོ། ། རང་གི་གསང་བ་ལེགས་པར་ཤོད་ཅིག ། ངས་ཀྱང་རྗེས་སུ་ཡི་རང་ཞིང་བྱིན་གྱིས་བརླབ་པར་བྱའོ། ། རྡོ་རྗེ་འཆང་བ་ཀུན་གྱིས་ཀྱང་བྱིན་གྱིས་རློབ་པར་འགྱུར་གྱིས་ཁྱོད་ཀྱིས་ལེགས་པར་སྨྲོས་ཤིག་ཅེས་བཀའ་སྩལ་ ཏོ། ། དེ་ནས་རྣམ་ཐོས་ཀྱི་བུ་རང་གི་སྟན་ལས་ལངས་ཏེ་བཅོམ་ལྡན་འདས་ལ་ཕྱག་འཚལ་ནས་རང་གི་རིག་པ་འདི་སྨྲས་སོ། ། ཨོྃ་བཻ་ཤྲ་བ་ཎཱ་ཡ་ཧཱུྃ་ཧཱུྃ། པ་ཙ་པ་ཙ། ཙྪིནྡ་ཙྪིནྡ་སྭཱ་ཧཱ། ཞེས་བརྗོད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་ གི་སྔགས་འདིའི་སྒྲུབ་པ་ནི་འདི་ལགས་ཏེ། གང་ཞིག་བདག་སྒྲུབ་པར་འདོད་པ་དེས་དུས་གསུམ་དུ་མཆོད་པ་རྒྱ་ཆེན་པོ་བཤམས་ཏེ། བདག་འཁོར་དང་བཅས་པ་མཆོད་ལ་སེམས་རྩེ་གཅིག་དང་ལྡན་པས་གནས་དབེན་པར་འདུག་སྟེ།

བཅོམ་ལྡན་འདས་ཕྱག་ན་རྡོ་རྗེ་སྒོམ་པ་པོས་ བདག་གི་སྔགས་དེ་ཁྲི་ཕྲག་གཅིག་བཟླས། དེ་ནས་ལས་རྣམས་བསྒྲུབ་པར་བྱའོ། ། དེ་ལྟར་བདག་སྒྲུབ་པ་དང་བདག་གི་ལས་སྒྲུབ་པ་པོ་དེས་བདག་འཁོར་དང་བཅས་པ་ལ་གཏོར་མ་དང་མཆོད་པ་རྒྱ་ཆེན་པོས་མཆོད་པར་བྱའོ། ། དེ་ལ་བདག་དང་བདག་གི་འཁོར་རྣམས་ལ་ མཆོད་པ་དང་གཏོར་མ་རྒྱ་ཆེན་པོ་དབུལ་བའི་སྔགས་ནི་འདི་རྣམས་ཡིན་ཏེ། ཨོྃ་བཻ་ཤྲ་བ་ཎཱ་ཡ་སྭཱ་ཧཱ། ཨོྃ་ཛམ་དྷ་ལཱ་ཡ་སྭཱ་ཧཱ ཨོྃ་པཱུརྞ་བྷ་དྲཱ་ཡ་སྭཱ་ཧཱ། ཨོྃ་མ་ཎི་པྷ་དྲཱ་ཡ་སྭཱ་ཧཱ། ཨོྃ་ཀུ་བེ་རཱ་ཡ་སྭཱ་ཧཱ། ཨོྃ་སྃ་པྲ་ཛྣཱ་ནཱ་ཡ་སྭཱ་ཧཱ། ཨོྃ་གུ་ཧྱ་སྠཱ་ནཱ་ཡ་སྭཱ་ཧཱ། ཨོྃ་པཱཉྩི་ཀཱ་ཡ་སྭཱ་ཧཱ། ཨོྃ་པི་ཙི་ཀུཎྜ་ལི་ནེ་སྭཱ་ཧཱ་ཞེས་པའི་སྔགས་དེ་རྣམས་ནི་བདག་གི་འཁོར་དང་བཅས་པ་ལ་མཆོད་པ་དང་གཏོར་མ་སྦྱིན་པའི་སྔགས་གཉིས་སུ་ཤེས་པར་བྱའོ། ། དེ་ནས་བདག་གི་ལས་སྒྲུབ་པ་ནི་བདག་གིས་བཤད་ཀྱིས་བཅོམ་ལྡན་འདས་ཀྱིས་བྱིན་གྱིས་བརླབ་ཏུ་གསོལ་ཞེས་གསོལ་ནས་ འདིའི་ལས་བཤད་པ་ནི། གང་ཟག་གང་གིས་སྒྲུབ་འདོད་པས། ། གསང་དང་སྦྱིན་སྲེག་མནན་པ་གསུམ། ། རིམ་པ་ཇི་བཞིན་ཤེས་པར་བྱ། ། བསྒྲུབ་བྱ་བསྟན་ལ་སྡང་བ་རྣམས། །

སྤྲ་ཚིལ་ལ་སོགས་གཟུགས་བྱས་ལ། ། དགུག་དང་གཞུག་སོགས་དབང་དུ་བྱ། ཡིག་འབྲུ་{བཅྭ་,བཅོ་}བརྒྱད་སྔགས་ཀྱིས་ནི། ། དུས་གསུམ་བརྡེག་པར་རབ་བྱས་ནས། ། འཕྲལ་དུ་ཡིད་ཆེས་འཇོམས་པ་སྟེ། ། བསྒྲུབ་བྱ་གསོད་པར་ཐེ་ཚོམ་མེད། ། གལ་ཏེ་སྦྱིན་སྲེག་བྱེད་པ་ན། ། ཞི་རྒྱས་དབང་དང་མངོན་སྤྱོད་ལས། ། འདིར་ནི་དྲག་པོས་བསྒྲལ་བར་བྱ། ། ནེར་ སྤ་ཚ་ལ་རབ་བསྲེག་བྱ། ། ཐབ་ཁུང་རབ་དང་འབྲིང་ཐ་མ། ། རབ་ཀྱིས་མཐོ་གསུམ་འབྲིང་གིས་དོ། ། ཐ་མས་མཐོ་གང་ཚད་དུ་བྱ། ། བུད་ཤིང་ཚེར་མ་ཅན་ཤིང་གིས། ། ཀུན་ཏུ་དྲག་པོ་རབ་ཏུ་བསྒྲུབ། ། བག་ཟན་ཡུངས་ཀར་མེར་བསྲེག་ཅིང་། ། སྡང་བའི་ལུས་ངག་ཡིད་གསུམ་ རྣམས། ། རྫས་ལ་བསྟིམས་ཏེ་སྦྱིན་བསྲེག་བྱ། ། འཁོར་བཅས་གནོད་སྦྱིན་མེར་བསམས་ཏེ། ། བསྲེག་པའི་རྫས་ཀྱིས་མཆོད་པའམ། ། ལས་མེ་གནོད་སྦྱིན་རྫས་ཀྱིས་བྲབ། ། གང་ལྟར་བྱས་ཀྱང་འགྲུབ་པར་འགྱུར། ། དེ་ཚེ་བསྟོད་པ་འདིས་ཀྱང་ནི། ། རྩེ་གཅིག་སེམས་ ཀྱིས་བསྟོད་པར་བྱ། ། ཧཱུྃ་ཀུན་འདུལ་མི་བཟད་གནོད་སྦྱིན་སོགས། ། གདུག་པ་དཔལ་ཚ་རབ་ཏུ་འཇིགས། ། ཁྲོ་བོ་རྔམ་པ་ཆེར་སྒྲོགས་པ། ། འཁོར་བཅས་རྣམས་ལ་ཕྱག་འཚལ་བསྟོད། །

ཨོྃ་བཻ་ཤྲ་བ་ཎ་པུ་ཥྤེ་ཧཱུྃ་སྭཱ་ཧཱ། ཨོྃབཻ་ཤྲ་བ་ཎ་དྷུ་པེ་ཧཱུྃ་སྭཱ་ཧཱ། ཨོྃ་བཻ་ཤྲ་བ་ཎ་དཱི་པྃ་ཧཱུྃ་ སྭཱ་ཧཱ། ཨོྃ་བཻ་ཤྲ་བ་ཎ་གན་དྷེ་ཧཱུྃ་སྭཱ་ཧཱ། ཨོྃ་བཻ་ཤྲ་བ་ཎ་ནཻ་བི་དྱེ་ཧཱུྃ་སྭཱ་ཧཱ། གཙོ་བོ་མཆོད་ཅིང་འཁོར་ཀྱང་མཆོད། ། དེ་ནས་རིམ་པས་མཆོད་པ་ནི། ། གསང་སྔགས་ཀུན་ཏུ་སྤེལ་ཏེ་བཟླས། ། སྤྲོ་དང་བསྡུ་བ་ཀུན་དུ་བྱ། ། སྤེལ་བྱེད་ཀུན་གྱི་ཐུན་མོང་ཡིན། ། ཨོྃ་བཻ་ཤྲ་ཝ་ཎཱ་ཡ་ཆེ་གེ་ མོ་མཱ་ར་ཡ་ཕཊ་སྭཱ་ཧཱ། གཙོ་བོ་ཇི་ལྟར་འཁོར་ཀྱང་དེ། ། རང་གི་རིག་པས་མཆོད་པར་བྱ། ། རིག་པ་ཀུན་ཏུ་བརྟན་བྱས་ནས། ། རྡུལ་ཕྲན་བཞིན་དུ་བརླག་པར་བསམ། ། ཕྲིན་ལས་བཅོལ་ལ་གཏོར་མ་བཏང་། ། གཏོར་དང་གཏོར་མའི་རིམ་པ་ནི། ། {གོ་རིམས་,གོ་རིམ་}བཞིན་ དུ་དབུལ་བར་བྱ། ། ཞི་བའི་ལས་ཀྱི་རིམ་པ་ནི། ། ཐབ་ཁུང་མཐོ་གང་ཚད་ཉིད་ལ། ། བསྲེག་རྫས་ལ་སོགས་རབ་ཏུ་དབུལ། ། ལུས་ངག་ཡིད་གསུམ་སྡིག་བཅོམ་ནས། ། ཡེ་ཤེས་མེ་ཡི་ངོ་བོར་བྱ། ། སྣོད་དང་ཐབ་ནི་དོར་བར་བྱ། ། དེར་ནི་གདོན་རྣམས་ཀུན་སྲེག་ཅིང་། ། བགེགས་ ཆེན་ཞི་བའི་ཡས་ཀྱང་བྱ། ། རྒྱས་དང་དབང་དུ་བྱ་བ་ལ། ། ལས་དང་བྱེ་བྲག་རིམ་པ་རྣམས། ། སྔར་བཤད་པ་ཡི་ལས་བཞིན་དུ། །

ཐབ་དབྱིབས་བྱེ་བྲག་ཤེས་པར་བྱ། ། སེར་དང་དམར་བའི་བུད་ཤིང་སོགས། ། རིམ་པ་རྫས་ལྡན་དབུལ་བ་ནི། ། ཨོྃ་བཻ་ཤྲ་བ་ཎཱ་ཡ་དྷ་ནྃ་པུཥྚིྃ་ཀུ་རུ་ ཡེ་སྭཱ་ཧཱ། ཨོྃ་བཻ་ཤྲ་བ་ཎ་བ་ཤྃ་ཀུ་རུ་སྭཱ་ཧཱ། ཨོྃ་བཻ་ཤྲ་བ་ཎཱ་ཡེ་ཤཱིནྟ་ཀུཾ་རུ་སྭཱ་ཧཱ། གཙོ་བོ་ཇི་བཞིན་འཁོར་བཅས་ནི། ། རིག་པའི་རྫས་ཀྱིས་མཆོད་པར་བྱ། ། བསྲེག་པའི་རྫས་ནི་བག་ཟན་དང་། ། ཡུངས་ཀར་མངར་སོགས་རིམ་པས་མཆོད། ། ཕྲིན་ལས་རྣམ་བཞི་ཀུན་འགྲུབ་སྟེ། ། བརྩེ་བར་བརྩོན་པས་ཉེ་བར་འགྲུབ། ། འབྲིང་དང་ཐ་མས་འབྲིང་དང་ནི། ། ཐ་མ་ཉིད་དུ་ཤེས་པར་གྱིས། ། དེ་ནས་བཅོམ་ལྡན་འདས་ལ་རྣམ་ཐོས་ཀྱི་བུ་འཁོར་དང་བཅས་པ་རྣམས་ཀྱིས་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་ཅག་རྣམས་ཀྱིས་བཤད་པའི་ལས་འདི་རྣམས་སྒྲུབ་ པ་པོ་དེས་དུས་རྒྱུན་དུ་བཅོམ་ལྡན་འདས་ཕྱག་ན་རྡོ་རྗེ་དང་། གནོད་སྦྱིན་རྣམས་ལ་དཀར་གསུམ་གྱིས་མཆོད་པར་བྱའོ། ། ཆང་ཀུན་ཏུ་སྤང་བར་བགྱིའོ། ། ཤ་རྣམས་ནི་འོས་པ་དང་ཤིས་པ་དྲང་བར་བྱའོ། ། དེ་ལྟར་རྩེ་གཅིག་གིས་བདག་ཅག་སྒྲུབ་པ་དེ་རྣམས་ཀྱི་ཕྲིན་ལས་ཇི་ལྟ་བ་བཞིན་དུ་ བདག་ཅག་གིས་མ་བསྒྲུབས་ན་བདག་ཅག་གིས་བཅོམ་ལྡན་འདས་ལ་འཁུས་པར་གྱུར་ཅིང་།

བདག་ཅག་གིས་ཆོས་མ་བསྐྱངས་པར་བྱས་པ་ཡིན་ནོ། ། དེ་ལ་བདག་གི་བྲོ་ཚིག་ནི་འདི་ཡིན་ནོ། ། ཨོྃ་བཻ་ཤྲ་བ་ཎ་ཨར་ཐ་ཁ་ཐམ་ཞེས་པའོ། ། དེ་ནས་བཅོམ་ལྡན་འདས་ཀྱིས་བཀའ་སྩལ་པ། རྣམ་ཐོས་ཀྱི་བུ་ཆེན་པོ་ལེགས་སོ། ། ཤིན་ཏུ་རབ་ཏུ་ལེགས་སོ། ། མ་འོངས་པའི་གང་ཟག་གི་དོན་དུ་རང་གི་གསང་བ་སྨྲས་པ་ནི་དོན་ཆེན་པོ་དང་ལྡན་ནོ། ། ངས་ཀྱང་དེ་རྣམས་ཀྱི་དོན་ངེས་པར་འགྲུབ་པར་བྱ་བའི་ཕྱིར་སྔགས་འདི་བཤད་ཀྱིས་ཉོན་ཅིག ། བཅོམ་ལྡན་འདས་ལ་ལེགས་སོ་ ཞེས་རྣམ་ཐོས་ཀྱི་བུ་ལ་སོགས་པ་རྣམས་ལྟར་ཉན་ནོ། ། དེ་ནས་བཅོམ་ལྡན་འདས་ཀྱིས་བཀའ་སྩལ་པ། ཨོཾ་བཛྲ་པཱ་ཎི་ནཱི་ལཱྃ་བ་རདྷ་ར་བཛྲ་སྥོ་ཊ་ཧཱུྃ་ཕཊ་སྭཱ་ཧཱ། རིག་པ་འདི་ནི་ལས་ཐམས་ཅད་དབང་དུ་སྡུད་པའི་སྔགས་སོ། ། རྣམ་ཐོས་ཀྱི་བུ་ཆེན་པོས་ཇི་ལྟར་ཁས་བླངས་པ་ལྟར་གསང་བ་ དང་ལྡན་པར་བྱེད་པའོ། ། དེ་བཞིན་གྱུར་ཞེས་སྨྲས་ནས་གནོད་སྦྱིན་མི་སྣང་བར་གྱུར་ཏོ། ། རྡོ་རྗེ་ས་འོག་གི་རྒྱུད་ལས་རྣམ་ཐོས་སྲས་ཀྱི་ལེའུ་སྟེ་གསུམ་པའོ། ། ། ། དེ་ནས་ཡང་བྱང་ཆུབ་སེམས་དཔའ་ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །

བཅོམ་ ལྡན་འདས་མ་འོངས་པའི་སེམས་ཅན་རྣམས་ཀྱི་དོན་དུ་གདུག་པ་ཅན་ལ་བསྣུན་པའི་འཁོར་ལོ་བཤད་དུ་གསོལ་ཞེས་གསོལ་བ་བཏབ་བོ། ། དེ་ནས་བཅོམ་ལྡན་འདས་ཀྱིས་ཅང་མི་གསུང་བར་ཐུགས་ཀྱིས་གནང་ནས་རང་གི་ཐུགས་ཀ་ནས་འོད་ཟེར་ཀུན་ཏུ་ཁྱབ་པར་སྤྲོས་ཏེ། སེམས་ཅན་ ཐམས་ཅད་འཁྱམས་པས་ཁྱབ་པར་མཛད་ནས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་ངས་ས་འོག་གི་བགེགས་ལ་བསྣུན་པའི་འཁོར་ལོ་བཤད་ཀྱིས་ཁྱོད་རྩེ་གཅིག་ཏུ་ཉོན་ཅིག་དེ་ལྟར་འཚལ་ལོ་ཞེས་ལྟར་ཉན་ནོ། ། བཅོམ་ལྡན་འདས་ཀྱིས་བཀའ་སྩལ་པ། གང་ཞིག་ འཁྲུལ་འཁོར་བྱེད་འདོད་པས། ། ཉམས་དགའ་དབེན་པའི་གནས་དག་ཏུ། ། ཕྱག་ན་རྡོ་རྗེའི་རྣལ་འབྱོར་བྱ། ། སྣོད་བཅུད་རྡོ་རྗེ་གཏུམ་པོར་བསྒོམ། ། རླུང་ནས་རི་རབ་མཐར་ཐུག་པ། ། རྡུལ་སྙེད་གྲངས་ཀྱི་སྐུ་རུ་བསམ། ། དབུས་ན་ཕྱག་རྡོར་རྣལ་འབྱོར་བསྒོམ། ། རི་བོང་ འཛིན་པ་ཞབས་ཀྱིས་བརྡེབས། ། སྟོང་གསུམ་ཚད་ཀྱི་ཟླ་བ་ལ། ། བགེགས་ཆེན་ཀུན་ཏུ་འདར་བར་བསྒོམ། ། སྐུ་ལ་ཉི་མ་སྟོང་ལྡན་པའི། ། གཟི་བརྗིད་བཟོད་དཀའི་འོད་ཟེར་གྱིས། ། བགེགས་རྣམས་མ་ལུས་འཚིག་པར་བསྒོམ། ། ལྗགས་ལས་བཟླས་པའི་སྔགས་ཕྲེང་ གིས། །

སྟོང་གསུམ་གང་བར་རབ་ཏུ་བསྒོམ། ། རྒྱན་དུ་བྱས་པའི་ཀླུ་བརྒྱད་ཀྱིས། ། ཁ་རླངས་ཆེན་པོ་བཏང་བ་ལས། ། ལྷ་ཀླུ་ཐམས་ཅད་སྐྲག་པར་འགྱུར། ། ཐུགས་ལས་ཁྲོ་སྤྲོས་དེ་དག་གིས། ། བསྐལ་པའི་རླུང་ལྟར་འཐོར་བར་འགྱུར། ། ཕྱག་གིས་རྡོ་ རྗེ་རབ་བསྣུན་པས། སྒྱོགས་གཟེར་བཞིན་དུ་བསྣུན་པར་འགྱུར། ། ཧཱུྃ་ཧཱུྃ་འབྲུག་ལྟར་རབ་ཏུ་སྒྲོགས། ། སྐད་ཀྱིས་ཀུན་ཏུ་བཀུག་པར་བསམ། ། དེ་ལྟར་བྱས་འགྱུར་ཐམས་ཅད་འགྲུབ། ། ལས་ཀྱིས་མནར་བ་འཇིག་པར་འགྱུར། ། ཕྱག་ན་རྡོ་རྗེ་མི་ཤེས་པར། ། གང་ཞིག་གཞན་བསྒྲུབ་ སྐལ་དམན་པར། ། འདི་ལ་གང་འགྲུབ་ཐམས་ཅད་འགྲུབ། ། མཆོག་དང་ཐུན་མོང་བྱེ་བྲག་གོ། ། རྡོ་རྗེ་ས་འོག་གི་རྒྱུད་ལས་བསྣུན་པའི་འཁོར་ལོ་སྟེ་ལེའུ་བཞི་པའོ། ། ། ། དེ་ནས་གཞན་ཡང་འཁྲུལ་འཁོར་གྱི། ། ཆོ་ག་རྡོ་རྗེ་འཛིན་པས་གསུངས། ། གྲོ་གའམ་ཤིང་ ཤུན་དག་ལ་ནི། ། རེའུ་མིག་ཉི་ཤུ་རྩ་གཅིག་པའི། ། འཁོར་ལོ་དག་ནི་རབ་བྲིས་ཏེ། ། ཟླ་བ་ཡར་གྱི་ངོ་ལ་བརྩམ། ། རྩེ་གཅིག་སེམས་ཀྱིས་རབ་ཏུ་བྲི། ། དབུས་སུ་དྲག་པོའི་ཡི་གེ་དགོད། ། གཉིས་པར་ནོར་འཛིན་ཡི་གེ་སྟེ། ། གསུམ་པ་བཛྲ་ཞེས་པ་དང་། ། བཞི་པར་ཆུ་ཡིག་དང་པོ་ དགོད། །

ལྔ་པར་ཎི་ནི་རབ་ཏུ་དགོད། ། མཚམས་བཞིར་བསྒྲུབ་བྱའི་གསོད་སྙིང་བྲི། ། དེ་ནི་ནང་གི་རེའུ་མིག་གོ། ། ཕྱི་ཡི་རེའུ་མིག་བཅུ་གཉིས་ལ། ། ཨོཾ་སྤངས་ཡི་གེ་བཅུ་གཉིས་ལ། ། དེ་ཡི་གསང་སྔགས་འདི་ཡིན་ཏེ། ། ནཱི་ལཱྃ་བ་ར་དྷ་ར་བཛྲ་པཱ་ཎི་ཧཱུྃ་ཕཊ་ཞེས་བྱའོ། ། རབ་ཏུ་རྫོགས་ པའི་འཁོར་ལོ་སྟེ། ། བསྒྲུབ་བྱའི་སྙིང་གར་དྲིལ་དེ་གཞུག ། དང་པོའི་མཐའ་ནས་དྲིལ་བར་བྱ། ། དེ་ནས་སྦྱིན་སྲེག་ཆོ་ག་བྱ། ། གལ་ཏེ་མནན་པ་བྱེད་འདོད་པས། ། སྔར་བཞིན་འཁྲུལ་འཁོར་རྫོགས་བྱས་ནས། ། མཐའ་རུ་མནན་པའི་ཆོ་ག་བྱ། ། ཁམ་ཕོར་གསར་པ་ཁ་སྦྱར་དུ། ། བཅུག་ ནས་རྡོ་རྗེ་རྒྱ་གྲམ་བྲི། ། རྡོ་ཡི་སྦྱིན་གྱིས་རབ་སྦྱར་ནས། ། གཙུག་ལག་ཁང་སོགས་མནན་པར་བྱ། ། གལ་ཏེ་རེའུ་མིག་མི་འདོད་ན། ། རྩིབས་བཅུ་གཉིས་པའི་འཁོར་ལོ་བྱ། ། ལྟེ་བར་ཧཱུྃ་དང་བསྒྲུབ་བྱའི་མིང་། ། སྤེལ་ལ་རབ་དུ་དགོད་པར་བྱ། ། ལྷག་མ་བཅུ་གཉིས་རྩིབས་ལ་དགོད། ། བྲི་བ་རྫོགས་ན་སྙིང་གར་གཞུག ། དགུག་དང་གཞུ་གསོགས་བྱས་ལ་བསྲེག ། མི་འདོད་མནན་པའི་ཆོ་ག་བྱ། ། མར་གྱི་དུས་ལ་ཤིས་པ་ཡིན། ། འཁྲུལ་འཁོར་ཇི་ལྟར་བྲིས་པ་ལྟར། ། གང་འདོད་ལས་ལ་ཐེ་ཚོམ་མེད། །

དཔེར་ན་མེ་ལྕེས་རྩྭ་བསྲེགས་འདྲ། ། གང་ཡིན་གནས་ པར་མི་འགྱུར་རོ། ། དཔལ་རྡོ་རྗེ་ས་འོག་གི་རྒྱུད་ལས་བྲི་བའི་འཁྲུལ་འཁོར་གྱི་ཆོ་ག་སྟེ་ལེའུ་ལྔ་པའོ། ། ། ། དེ་ནས་ཡང་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས་ཐམས་ཅད་ཟབ་མོའི་སྤྱོད་ཡུལ་ལགས་པས་སྦྱིན་སྲེག་ལ་སོགས་ པས་གྲོལ་བར་ཅང་འགྱུར་ལགས་སམ། བདག་གི་ཐེ་ཚོམ་བསལ་དུ་གསོལ་ཞེས་ཞུས་སོ། ། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་སྙིང་རྗེ་ཆེ། ། དད་པའི་ཤུགས་ཀྱིས་རབ་ཉམས་ཏེ། ། དཀྱིལ་འཁོར་རྫས་ཀྱི་སྦྱོར་ལྡན་ཞིང་། ། སྦྱིན་སྲེག་ལས་དང་དེ་ཉིད་ ཤེས། ། སྡོམ་པར་དམ་ཚིག་རྒྱུད་ལྡན་ན། ། མཚན་མས་གྲོལ་བར་འགྱུར་བ་སྟེ། ། དཀྱིལ་འཁོར་སྦྱིན་སྲེག་རྫས་ལ་སོགས། ། མེད་ན་དངོས་གྲུབ་མི་འགྲུབ་པས། ། སྦྱིན་སྲེག་ལས་ནི་འབད་པས་བརྩམ། ། ཕྲིན་ལས་བཞི་ཡི་སྦྱིན་སྲེག་ལས། དྲག་པོའི་རིམ་པ་བྱ་བ་ནི། ། ཁྲུ་བཞི་པ་ཡི་ དཀྱིལ་འཁོར་ལ། ། དབུས་སུ་ཟུར་གསུམ་ཁྲུ་རེ་ཚད། ། ཟབས་སུ་ཁྲུ་ཕྱེད་བརྐོ་བར་བྱ། ། ཕྱི་རོལ་རིམ་པ་གསུམ་ལྡན་པ། ། དབུས་སུ་རྡོ་རྗེའི་མཚན་མ་བྲི། ། རིམ་པ་གསུམ་ལ་རྡོ་རྗེ་ཡི། །

རྩེ་གསུམ་ཕྲེང་གིས་བསྐོར་བ་བྲི། ། མཚམས་སུ་ལྕགས་ཀྱུ་བྲི་བར་བྱ། ། ཚེར་མ་ཅན་གྱི་ཤིང་ བུ་ནི། ། ཁྲུ་གང་ཚད་ཀྱིས་རབ་ཏུ་ཤིས། ། དུག་དང་ཁྲག་དང་སྐེ་ཚེ་སོགས། ། རྫས་ནི་རིམ་པར་ཤེས་པར་བྱ། ། བདག་ཉིད་ལྷ་ཡི་རྣལ་འབྱོར་གྱིས། ། ཡེ་ཤེས་ཁྲོ་བོ་སྤྱན་དྲངས་ཏེ། ། འཇིག་རྟེན་གསུམ་འདུལ་གཟུགས་སུ་བསམ། ། མཆོད་པའི་རིམ་པ་རབ་ཏུ་དབུལ། ། དེ་ལ་སྦྱིན་སྲེག་ གི་སྔགས་གསུངས་པ་འདི་ཡིན་ཏེ། ཨོཾ་ནཱི་ལཱྃ་བར་དྷ་ར། ཨོཾ་བཛྲ་ཛྭ་ལ་ཨ་ན་ལ་ཧ་ན་སརྦཱ་དུཥྚ་སརྦྦ་བྷི་རྨྨྃ་ཀུ་རུ་ནཱི་ལཱྃ་བར་དྷ་ར་བཛྲ་པཱ་ཎི་ཆེ་གེ་མོ་མཱ་ར་ཡ་ཧཱུྃ་ཕཊ་ཅེས་པས་རྫས་རྣམས་བསྲེག་གོ། ། དུག་ཁྲག་སྐེ་ཚེ་ལན་ཚྭ་ལས། ། གཟུགས་བྱས་རབ་ཏུ་བསྒྲུབས་ཏེ་བསྲེག ། ཨོཾ་ནཱི་ལཱྃ་བ་ ར་དྷ་ར་བཛྲ་པཱ་ཎི་ཡཀྵ་ཁཱ་ད་ཡ་ཁཱ་ད་ཡ་བན་དྷ་ཡ་བན་དྷ་ཡ་མོ་ཧ་ཡ་མོ་ཧ་ཡ་ཤ་ཏྲཱུཾ་ཨཱ་ན་ཡ་ཧཱུྃ་ཕཊ། གཟུགས་ལ་བྲབ་པའི་སྔགས་སོ། ། ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་ཤ་ཏྲཱུཾ་གྲྀ་ཧྞ་ཨཱ་ཀཪྵ་ཡ་ཧཱུཾ་ཛཿཛཿ། འགྲོ་བ་དགུག་པའི་སྔགས་སོ། ། དེ་ལྟར་སྦྱིན་སྲེག་རབ་བྱས་ ནས། ། ཆུ་བོ་སྐམས་དང་ཀླུ་ཤིང་གཅད། ། གླང་ཆེན་གཡང་ལྟུང་མེ་ཆེན་འབར། །

ནད་དང་ཡམས་སོགས་བྱུང་བའི་ཚེ། ། ཞི་བ་མཆོག་གི་ལས་བསྒྲུབས་ཏེ། ། ཐབ་ཁུང་ཟླུམ་པོ་རབ་དཀར་བ། ། རིམ་པ་གསུམ་ལྡན་ཁྲུ་གང་ཚད། ། ཟབས་སུ་ཁྲུ་ཕྱེད་བརྐོས་བྱས་ནས། ། ཞི་བའི་ལས་ཀྱི་ཆོ་ག་བྱ། ། དེ་ལྟར་བྱས་ན་མཚན་མ་ཡི། ། དངོས་གྲུབ་ཐོབ་པར་ཐེ་ཚོམ་མེད། ། ལག་ན་རྡོ་རྗེ་རྡོ་རྗེ་འཛིན། ། གུས་པས་རྒྱུད་དོན་རབ་ཏུ་ཟུང་། ། འགྲོ་བའི་དོན་ལ་རབ་བརྩོན་གྱིས། ། ཀྱེ་མ་རྒྱུད་ཆེན་མཆོག་ཏུ་གསང་། ། བྱིན་རླབས་སྔོན་དུ་ཆེར་འབྱུང་བ། ། སྟོན་ པ་རྡོ་རྗེ་འཆང་གིས་གསུངས། ། རབ་ཏུ་འབད་པས་བསྒྲུབ་པར་གྱིས། ། དཔལ་རྡོ་རྗེ་ས་འོག་གི་རྒྱུད་ལས་སྦྱིན་སྲེག་གི་རིམ་པ་སྟེ་ལེའུ་དྲུག་པའོ། ། ། ། དེ་ནས་སྟོན་པ་རྡོ་རྗེ་འཆང་། ། དཔལ་ཆེན་གདན་ལ་རབ་བཞེངས་ནས། ། ལག་ན་རྡོ་རྗེ་ལ་གཟིགས་ནས། ། ལས་ཀྱི་ཆོ་ག་བཤད་པར་བྱ། ། དུག་ལ་སོགས་པའི་རྫས་རྣམས་ལ། ། གང་འདོད་པ་ཡི་གཟུགས་བྱས་ཏེ། ། སྙིང་གར་འཁྲུལ་འཁོར་རབ་ཏུ་གཞུག ། བདག་ཉིད་ལས་ཀྱི་ལྷར་གསལ་བས། ། ག་འུ་ནང་དུ་རབ་བཅུག་སྟེ། ། ཚོན་གྱི་ཐ་གུ་སྣ་ལྔ་དཀྲི། ། སྙིང་གའི་ལྕགས་ ཀྱུས་རབ་བཀུག་ནས། ། ཡི་གེ་བཅུ་གསུམ་འཁྲུལ་འཁོར་བཟླས། །

འགུལ་གཡོ་ཡི་ནི་རྟགས་བྱུང་ནས། ། ཆུ་ཆེན་གཞུང་ལ་གཏང་བར་བྱ། ། གལ་ཏེ་རྟགས་དེ་མ་བྱུང་ན། ། དྷ་རུ་ར་ཡི་ཁུ་བ་དང་། ། ཁྲག་དང་དུག་བསྲེས་རབ་བྱུགས་ཏེ། ། ཚེར་མ་ཅན་གྱི་ཤིང་མེས་བསྲེག ། ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་སྟམ་བྷ་ཡ་མོ་ཧ་ཡ་བན་དྷ་ཡ་ད་ཧ་ན་ཡ་ཧཱུྃ་ཧཱུྃ་ཕཊ། དུས་གསུམ་དག་དུ་བདུགས་བྱས་ནས། ། སྐད་ངན་སྣ་ཚོགས་གདོན་པར་བྱེད། ། དེ་ནས་སྔགས་འདིས་ཆུ་ལ་དོར། ། ཨོཾ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། ། ཚོན་གྱིས་དྲིལ་ནས་རབ་ཏུ་བོར། ། བསམ་པས་ བ་ཚྭའི་རྒྱ་མཚོར་སྐྱུར། ། དེ་ནས་མི་ལྡོག་བྱ་བའི་ཕྱིར། ། སྔགས་འདི་རྒྱུན་དུ་བཟླ་བར་བྱ། ། ཨོཾ་ནཱི་ལཱྃ་བ་ར་དྷ་ར་བཛྲ་པཱ་ཎི་ཧཱུྃ་ཧཱུྃ་སྟམ་བྷ་ཡ་ནན་ཕཊ་ཅེས་རྒྱུན་དུ་བཟླ་བར་བྱའོ། ། དེ་ནས་ལས་དེ་ངེས་པར་འགྲུབ་བོ། ། རྡོ་རྗེ་ས་འོག་གི་རྒྱུད་ལས་བསྐྲད་པའི་འཁོར་ལོའི་ལེའུ་སྟེ་ བདུན་པའོ། ། ། ། དེ་ནས་བཅོམ་ལྡན་འདས་རྡོ་རྗེ་འཛིན་པས་སེམས་ཅན་རྣམས་ཀྱི་དོན་དུ་སྔགས་ཀྱི་ལེའུ་འདི་གསུངས་སོ། ། ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་ཧཱུྃ་ཧཱུྃ་ཕཊ། བཅོམ་ལྡན་འདས་ཀྱི་རྩ་བའི་སྔགས་ལས་ཐམས་ཅད་སྒྲུབ་པའོ། །

འདི་ནི་སངས་རྒྱས་ཐམས་ཅད་ ཀྱི་ཐུགས་ཀྱི་གསང་བའོ། ། འདིས་ནི་མ་བསྒྲུབས་པར་ཡང་ལས་ཐམས་ཅད་འགྲུབ་སྟེ། ཕྱག་རྒྱ་ཐམས་ཅད་འཆིང་བསྒྲུབ་པ་ལ་ནི་རྡོ་རྗེ་ཁུ་ཚུར་གྱིས་སོ། ། དམ་ཚིག་ཐམས་ཅད་སྒྲུབ་པ་ལ་ནི་རྡོ་རྗེ་རབ་ཏུ་གདེངས་པས་སོ། ། སེམས་ཅན་ཐམས་ཅད་རྗེས་སུ་ཆགས་པར་བྱ་བ་ལ་ནི་རྡོ་རྗེ་ བཞད་པས་སོ། ། ཐམས་ཅད་ལྐུགས་པར་བྱ་བ་ལ་ནི་རྡོ་རྗེ་ཧཱུྃ་སྒྲས་སོ། ། ནམ་མཁའ་ལ་འཕྲོ་བའི་དངོས་གྲུབ་ལ་ནི་རྡོ་རྗེ་ཀུ་མུ་དས་བྱའོ། ། ཀླུ་ཐམས་ཅད་འདུལ་བ་ལ་ནི་རྨ་བྱའི་མཇུག་སྒྲོས་བྱའོ། ། དགྲ་ཐམས་ཅད་གསད་པ་ལ་ནི་འཁྲུལ་འཁོར་གྱིས་སོ། ། ནོར་བསྒྲུབ་པར་འདོད་ན་ཛམ་བྷ་ ལའི་ཆུ་སྦྱིན་གྱིས་བྱའོ། ། བགེགས་འཕང་བར་འདོད་ན་ཏིང་ངེ་འཛིན་གྱིས་བྱའོ། ། ཐམས་ཅད་འགུགས་པ་ལ་ནི་རྡོ་རྗེ་ལྕགས་ཀྱུས་བྱའོ། ། རིམས་བསྲུང་བ་ལ་ནི་རྩྭ་ཀུ་ཤའི་འབྲུམ་བུས་བྱའོ། ། ཀླུ་སྒྲུབ་པར་འདོད་ན་མཚར་བུའི་ལྕུག་མ་དང་བདུད་རྩི་ཆུས་བྱའོ། ། ཕ་རོལ་གྱི་དཔུང་ འཇོམས་པར་འདོད་ན་གུ་གུལ་གྱིས་བྱའོ། ། ལས་རྣམས་ལ་སྔགས་འབུམ་གྱིས་བྱའོ། ། རྡོ་རྗེ་ས་འོག་གི་རྒྱུད་ལས་སྔགས་ཀྱི་ལེའུ་སྟེ་བརྒྱད་པའོ། ། ། ། དེ་ནས་གཞན་ཡང་བཟླས་པ་ཡི། །

ངེས་པ་འདིར་ནི་བཤད་པར་བྱ། ། གང་ཞིག་དངོས་གྲུབ་སྒྲུབ་ འདོད་པས། ། དམ་ཚིག་སྡོམ་དང་རབ་ལྡན་པས། ། བདག་ཉིད་ལས་ཀྱི་ལྷར་བསྒོམས་ཏེ། ། ཡེ་ཤེས་ཁྲོ་བོ་སྤྱན་དྲངས་ཏེ། ། ཛཿཧཱུྃ་བྃ་ཧོཿདགུག་སོགས་བྱ། ། རང་སྙིང་ཟླ་བར་སྔགས་ཀྱི་ཕྲེང་། ། དངུལ་སྦྲམ་ལྟ་བུར་རབ་བསམས་ཏེ། ། མྱུར་དལ་གསལ་དང་མི་ གསལ་སྤང་། ། ཡིད་ཀྱིས་བསྒྲིམ་པའི་བཟླས་པ་བྱ། ། མཆོད་པ་རྣམ་པ་ལྔས་ཀྱང་མཆོད། ། རབ་ཏུ་བསྒྲིམ་པའི་བཟླས་པ་འདིས། ། གང་འདོད་དངོས་གྲུབ་ངེས་པར་འགྲུབ། ། ཨོཾ་ཨཱཿཧཱུྃ་སྐུ་གསུང་ཐུགས་བྱིན་གྱིས་བརླབ་པའི་སྔགས་སོ། ། ཨོཾ་བཛྲ་པཱ་ཎི་ཨ་བྷི་ཥིཉྩ་ མཱཾ། དབང་བསྐུར་བའི་སྔགས་སོ། ། ཨོཾ་བཛྲ་པཱ་ཎི་ཏིཥྛ་ཧཱུཾ། ཐུགས་བརྟན་པའི་སྔགས་སོ། ། སྐུ་དང་ཐུགས་ཀྱི་གསང་བ་དང་། ། གསུང་གི་གསང་བ་མ་ལུས་པས། ། མྱུར་དུ་བྱང་ཆུབ་ལ་རེག་འགྱུར། ། གང་ཚེ་སྒྲུབ་ལ་བརྩོན་ལྡན་པ། ། ཚེ་གཅིག་འབྲས་བུ་མྱུར་ཐོབ་འགྱུར། ། གཉིས་མེད་རང་བཞིན་རྡོ་རྗེ་ཅན། ། མཁའ་དབྱིངས་རྡོ་རྗེ་ཀུན་ཏུ་ཁྱབ། ། བརྗོད་མེད་རྟོག་བྲལ་དེ་ཉིད་དོན། ། ལྷུན་གྲུབ་དང་ལ་རབ་ཏུ་གཞག ། ཧཱུྃ་དང་ཨ་ཡི་རྣམ་པ་ཅན། ། ཇི་ལྟར་ཆུ་ཡི་ཟླ་བ་བཞིན། །

མ་ཡེངས་སེམས་ཀྱིས་རྒྱུན་དུ་བསྒོམ། ། ཨེ་མ་ཧོ་མགོན་པོ་བཅོམ་ལྡན་འདས། ། མཆོག་ལས་མཆོག་ཏུ་རྣམ་པར་རྒྱལ། ། ཨེ་མ་ཧོ་སྤྲུལ་པའི་རྣམ་པ་སྐུ། ། སྒྲ་ལ་རབ་ཏུ་དམིགས་པ་མེད། ། དགྱེས་ཆེན་ཀུན་གྱི་སྤྱོད་ཡུལ་ཡིན། ། རང་གསལ་ཉིད་ལ་རྣམ་པར་དག ། མཆོག་གི་བྱང་ཆུབ་ཚུལ་དུ་གནས། ། རྡོ་རྗེ་ས་འོག་གི་རྒྱུད་ལས་ངེས་པ་དང་རྣམ་པར་དག་པའི་ ལེའུ་སྟེ་དགུ་པའོ། ། ། ། དེ་ནས་སྟོན་པ་རྡོ་རྗེ་འཆང་། ། འགྲོ་བའི་མགོན་ལ་རབ་གཟིགས་ཏེ། ། བསྲུང་བའི་ཆོ་ག་རབ་ཏུ་གསུངས། ། ལག་ན་རྡོ་རྗེ་རབ་ཏུ་ཉོན། ། འགྲོ་བ་གདུག་པས་ཟིན་འགྱུར་བ། ། ཟངས་མ་དག་ལ་དུད་འགྲོའི་གཟུགས། ། ལེགས་པ་དག་ཏུ་རབ་བྱས་ ཏེ། ། ཁོང་པ་དངུལ་ལ་སོགས་པས་དགང་། ། གང་ནས་འདོད་པའི་ས་ཕྱོགས་སམ། ། རང་ལུས་དག་ལ་ལེགས་སྦས་ནས། ། བསྲུང་བ་དམ་པར་འགྱུར་བའོ། ། བདེ་གཤེགས་སྐུ་གདུང་རིང་བསྲེལ་ཅན། ། རབ་ཏུ་གནས་པ་ལེགས་བྱས་ཏེ། ། གང་གནོད་སར་ནི་རབ་སྦས་ན། ། བདེན་ སྟོབས་བརྗོད་པས་ཞི་བར་འགྱུར། ། བྱ་ལ་སོགས་པའི་བྱོལ་སོང་ཚོགས། ། ཡིད་འོང་མཛེས་པའི་དུད་འགྲོ་ལ། ། སངས་རྒྱས་གང་གཱའི་བྱེ་ཚོགས་ཀྱིས། ། གསུངས་པའི་གཟུངས་སྔགས་དག་གིས་ནི། །

སྐུད་པ་སྔོན་པོ་དག་དང་ནི། ། དར་ལ་བརྒྱ་རྩ་བརྒྱད་བསྔགས་ཏེ། ། བདེན་པ་བདར་ ལ་རབ་ཏུ་བསྔོས། ། གཏོར་མ་གཏང་ན་ཞི་བར་འགྱུར། ། ཁམ་པོར་ལ་སོགས་སྣོད་གཙང་མར། ། སྨན་དང་དར་སོགས་བར་བཅུག་སྟེ། ། མེ་ཏོག་བདུག་སོགས་མཆོད་བྱས་ཏེ། ། ས་ལ་སྦས་ན་གནོད་པ་རྣམས། ། ཞིབ་བ་དག་ཏུ་འགྱུར་བ་ཡིན། ། སྐུད་པ་དཀར་པོ་ལུས་བསྒྲིལ་ལ། ། མདུད་པ་ཉི་ཤུ་རྩ་གཅིག་བྱ། ། སྒྲུབ་དང་བསྒྲུབ་པའི་མཆོད་པ་བྱ། ། རྒྱལ་ལ་རབ་ཏུ་མགུལ་དུ་བཏགས། ། བར་ཆད་ཟློག་པར་འགྱུར་བར་ངེས། ། ཡུངས་ཀར་མར་དང་མུ་ཟི་རྣམས། ། ཆ་སྙོམས་ལུས་ལ་རབ་བྱུགས་ན། ། གདུག་པས་ཟིན་ལས་ཐར་བར་འགྱུར། ། བ་སུ་ན་དའི་ མེ་ཏོག་དང་། ། འདའ་ཧུ་ན་དའི་འབྲས་བུ་ལ། ། སྨིན་དྲུག་དུས་སུ་རབ་བསྒྲུབས་ན། ། གདུག་པ་ཕྱོགས་སུ་མི་གནས་སོ། ། སྟག་དང་དྲེད་དང་འཇའ་ཐར་གྱི། ། སྤུས་ནི་གདུག་པ་ལས་གྲོལ་འགྱུར། ། འབབ་ཆུ་རྒྱ་མཚོ་ལ་སོགས་པ། ། ལུས་བསྲུང་བྱ་བ་མཐར་ཕྱིན་པར། ། བྱས་ ན་མཆོག་ཏུ་བསྲུང་བར་འགྱུར། ། རྡོ་རྗེ་འཆང་བ་ཁྱོད་ཀྱིས་ཟུང་། ། མཐར་ཕྱིན་ཟླ་བ་སྤྲིན་གཟའ་ལས། ། གྲོལ་བ་ལྟ་བུར་འགྱུར་བ་ཡིན། །

དཔལ་རྡོ་རྗེ་ས་འོག་གི་རྒྱུད་ལས་བསྲུང་བའི་ལེའུ་སྟེ་བཅུ་པའོ། ། ། ། ལག་ན་རྡོ་རྗེས་ལེགས་སྨྲས་པ། ། བཏུབ་སྔགས་ ཀྱི་ཆོ་ག་ནི། ། ཇི་ལྟར་ལེགས་སོ་རྡོ་རྗེ་འཆང་། ། ཁྱེད་ལ་རབ་ཏུ་ཉན་པར་འཚལ། ། ཉོན་ཅིག་རྡོ་རྗེ་འཆང་བ་ཁྱོད། ། སྔགས་བཏུ་ཁྱོད་ལ་བཤད་པར་བྱ། ། གྲུ་གསུམ་དཀྱིལ་འཁོར་ཉམས་དགའ་བར། ། པདྨ་འདབ་མ་བརྒྱད་པ་བྲི། ། འདོད་དོན་ཐམས་ཅད་རབ་འགྲུབ་པ། ། དེར་ ནི་གསང་སྔགས་བཏུ་བར་བྱ། ། དབུས་སུ་ཡི་གེའི་བདག་པོ་གཞག ། བཞི་པ་ཡི་ནི་ལྔ་པ་ལ། ། ཡི་གེ་ཨི་ནི་རབ་ཏུ་སྦྱར། ། མཐར་གནས་པ་ཡི་གསུམ་པ་ལ། ། ལྔ་པ་ཡི་ནི་མཐའ་དང་སྦྱར། ། དེ་ནས་ལྔ་པའི་བཞི་པ་གཞག ། དེ་ནས་མཐར་གནས་གཉིས་པ་གཞག ། དེ་ནས་ བཞི་པའི་བཞི་པ་གཞག ། དེ་ནས་མཐར་གནས་གཉིས་པ་གཞག ། དེ་ནས་ལྔ་པའི་གསུམ་པ་དང་། ། གཉིས་པ་ཡི་ནི་གསུམ་པ་ལ། ། ར་དང་བཅས་པ་གཞག་པར་བྱ། ། དེ་ནས་ལྔ་པའི་དང་པོ་ལ། ། ཨཱ་ཡིག་རབ་ཏུ་སྦྱར་བར་བྱ། ། དེ་ནས་གསུམ་པའི་ཐ་མ་ལ། ། ཨི་ནི་ རབ་ཏུ་སྦྱར་ཏེ་གཞག ། བདུན་པ་ཡི་ནི་བཞི་པ་ལ། ། ཡི་གེ་ཨཱུ་ནི་རབ་ཏུ་སྦྱར། ། སྟོང་པས་མནན་པས་ཉིས་འགྱུར་དང་། ། ལྔ་པ་ཡི་ནི་གཉིས་པ་ལ། ། གསུམ་པ་ཡི་ནི་དང་པོ་སྦྱར། །

ཡི་གེ་བཅུ་གསུམ་རིག་པའི་སྔགས། ། བརྩེ་བས་བརྩོན་པར་རབ་བཟླས་ ན། ། གང་འདོད་དངོས་གྲུབ་ངེས་པར་འགྱུར། ། ཀྱེ་མ་ཧོ་རྡོ་རྗེ་ཅན་གྱིས་གསུངས། ། སྔགས་ཀྱི་རྒྱལ་པོ་བླ་མེད་ལམ། ། ཕྱག་ན་རྡོ་རྗེའི་དངོས་གྲུབ་ཐོབ། ། དཔལ་རྡོ་རྗེ་ས་འོག་གི་རྒྱུད་ལས་སྔགས་བཏུ་བའི་ལེའུ་སྟེ་བཅུ་གཅིག་པའོ། ། ། ། དེ་ནས་སྟོན་པ་རྡོ་རྗེ་འཆང་། ། སྤྱན་མིག་འོད་ཟེར་སྤྲུལ་མཛད་ནས། ། སློབ་མ་རབ་ཏུ་སྨིན་བྱའི་ཕྱིར། ། དབང་བསྐུར་ཆོ་ག་རབ་ཏུ་བཤད། ། རྡོ་རྗེ་སློབ་དཔོན་དཀའ་ཐུབ་ཆེ། ། གསང་དང་ལྡན་པ་དབང་ཐོབ་ཅིང་། ། དུལ་དང་དྲང་དང་ཤེས་ཉེན་ཆེ། ། གཡོ་ཆུང་ངང་བཟང་བྱང་སེམས་ཐོབ། ། དཀྱིལ་འཁོར་ཆོ་ ག་རབ་མཁས་པ། ། སློབ་མ་དམ་པ་དབང་བསྐུར་ཕྱིར། ། ཡིད་འོང་གཙུག་ལག་ཁང་སོགས་སུ། ། བརྟུལ་ཞུགས་སྔོན་དུ་ལེགས་སྤྱད་ནས། ། དེ་ནས་ས་ཡི་ཆོ་ག་བྱ། ། བརྟག་དང་སྦྱང་ཞིང་བསླང་བ་དང་། ། མཆོད་དང་གསོལ་བ་གདབ་པ་དང་། ། རྨི་ལམ་མཚན་མའི་སྒོ་ ནས་བརྟག ། ཞི་བའི་ཚོགས་སྤྱན་སྲེག་ནི། ། བརྒྱ་རྩ་བརྒྱད་ཀྱི་ཆོ་ག་བྱ། ། འབྱུང་པོ་རྣམས་ལ་མཆོད་ཅིང་བསྒོ། ། དཀྱིལ་འཁོར་དབུས་སུ་རབ་གནས་ཏེ། ། ཧཱུྃ་ལས་རྡོ་རྗེ་ཆེན་པོ་བསྒོམ། །

བྲུྃ་ལས་གཞལ་ཡས་ཁང་ཆེན་བསྒོམ། ། སྤྱན་གཉིས་ཉི་ཟླའི་འོད་ཟེར་གྱིས། ། བགེགས་ རྣམས་མ་ལུས་ཚར་གཅོད་དོ། ། རྡོ་རྗེ་ཆེན་པོ་གར་འགྲོས་ཀྱིས། ། ས་གཞི་ལན་གསུམ་བསྐོར་བར་བྱ། ། བ་ཡི་རྣམ་ལྔས་ལེགས་བྱུགས་ཏེ། ། ཚོམ་བུ་གཅིག་གིས་ལྷ་དགོད་བྱ། ། མཆོད་དང་བསྟོད་དང་སྙན་གསན་དབབ། ། བུམ་པ་ལྷག་པར་གནས་པར་བྱ། ། སློབ་མ་ཚོ་ གསར་བ་སྨིན་བྱ། ། ཐིག་དང་ཚོན་གྱི་ཆོ་ག་ནི། ། ལས་ཀྱི་ཆོ་ག་བཞིན་དུ་བྱ། ། གདོང་གཡོགས་དར་ནི་སྔོན་པོ་ཡིས། ། སློབ་མ་དག་ནི་གཞུག་པར་བྱ། ། སྡོམ་ལྡན་དབང་བསྐུར་རྣམ་ལྔས་བསྐུར། ། བུམ་པ་དང་པོ་རྡོ་རྗེ་དང་། ། དྲིལ་བུ་དབུ་རྒྱན་མིང་གི་དབང་། ། ལས་ཀྱི་ཆོ་ག་ཇི་ བཞིན་ནོ། ། ཚེས་བཅུ་བཞི་དང་བཅུ་གསུམ་ལ། ། སློབ་མ་ལས་ལ་གཟུད་པར་བྱ། ། བྱིན་རླབས་རིམ་པས་འཕོ་བ་དང་། ། འཕྲལ་དུ་ཡིད་ཆེས་བསྐྱེད་པར་བྱ། ། རིན་ཆེན་སྙིང་པོ་དྲི་མེད་རྒྱུད། ། རྒྱུད་རྣམས་ཀུན་གྱི་རྩ་བར་ནི། ། འདིར་དབང་བསྐུར་བ་དམ་པ་ཡིན། ། སྨིན་ པའི་ལས་ལ་བརྟེན་པ་ཡི། ། དབང་བསྐུར་མཆོག་གི་རྒྱུད་གསུངས་པས། ། རབ་གནས་དགེ་བསྡོམ་པ་ལྡན། ། དམ་པ་ཡོན་གྱིས་མཉེས་པར་བྱ། ། གྲོལ་བ་མཐར་ཕྱིན་རབ་ཏུ་གནས། །

སློབ་མ་སྨིན་པའི་ཆོ་གའོ། ། རྡོ་རྗེ་ས་འོག་གི་རྒྱུད་ལས་སློབ་མ་ལ་དབང་བསྐུར་བའི་ ལེའུ་སྟེ་བཅུ་གཉིས་པའོ། ། ། ། དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས་སེམས་ཅན་རྣམས་ཀྱི་དོན་དུ་ཐུགས་ཀྱི་གསང་བ་བཤད་དུ་གསོལ་ཞེས་གསོལ་བ་བཏབ་བོ། ། བཅོམ་ལྡན་འདས་ཀྱིས་ བཀའ་སྩལ་པ། ལག་ན་རྡོ་རྗེ་མི་བཟད་ཁྱོད། ། གཞན་དོན་བག་བརྩོན་ལེགས་སོ་ལེགས། ། གང་ཞིག་དུས་ཀྱི་སྙིགས་མ་ལ། ། གདུལ་དཀའི་སེམས་ཅན་འདུལ་འདོད་པས། ། དང་པོར་བྱང་ཆུབ་སེམས་བསྐྱེད་ལ། ། ཚོགས་གཉིས་ཀུན་རྫོགས་མཐར་ཕྱིན་པས། ། རིན་ཆེན་ སྣོད་དུ་པདྨའི་གཏེར། ། དབུས་སུ་གསང་བའི་བདག་པོ་ཅན། ། འདབ་མ་བརྒྱད་ལ་ཀླུ་ཆེན་བརྒྱད། ། སྦྲུལ་མགོས་བརྒྱན་པ་དགོད་པར་བྱ། ། ཁྲུས་དང་གཙང་སྦྲ་དང་ལྡན་པས། ། ལས་ཀྱི་ལྷ་ཡི་རྣལ་འབྱོར་གྱིས། ། དང་པོ་སྤྱན་དྲངས་རབ་མཆོད་ནས། ། བདག་དང་ལྷ་གཉིས་ འཕྲོ་འདུར་བཟླས། ། ཀླུ་བརྒྱད་ཞི་བར་འགྱུར་སེམས་ཀྱིས། ། ཧཱུྃ་དང་ཧཱུྃ་གི་ཐག་པ་ལས། ། བསྒྲུབ་བྱ་འོད་ཀྱི་ཕུང་པོར་བྱ། ། སྐད་ཅིག་མས་ནི་ཧཱུྃ་དུ་བསླང་། ། ཨོཾ་བཛྲ་ཀྲོ་དྷ་ཨ་ཧཱི་ཙཎྜ་ཕཊ།

ཁྲི་བཟླས་གདོན་ལས་ངེས་གྲོལ་འགྱུར། ། ལག་ན་རྡོ་རྗེ་ཁྱོད་ཀྱིས་ནི། ། ཐུགས་ཀྱི་ འཕྲོས་འདུ་གསང་བ་ཡིན། ། བསྒྲུབ་བྱའི་ལུས་ནི་ཚོན་གྱིས་དཀྲི། ། ཧཱུྃ་ཆེན་ཕྲེང་བའི་འཕྲོ་འདུས་གཅད། ། རྫས་ཆེན་རྣམས་ལ་རབ་བརྟགས་ན། ། ངེས་པར་གདོན་ལས་གྲོལ་བར་འགྱུར། ། གལ་ཏེ་དེས་ཀྱང་མ་གྲུབ་ན། ། སྔགས་ཀྱི་ཕྲེང་བ་བཟློག་སྟེ་བཟླས། ། རྡོ་རྗེ་ཕྲེང་བས་རབ་ བཅད་ནས། ། ཐེ་ཚོམ་མེད་པར་འགྲུབ་པར་འགྱུར། ། འོག་གི་བགེགས་བཟློག་ཆོ་ག་མཆོག ། ཡིད་བཞིན་ནོར་ལྟར་འབྱུང་བ་ཡིན། ། ཐེག་པ་གསུམ་ལས་ངེས་རྒྱལ་བའི། ། རྒྱུད་ཆེན་གསང་བ་མཐར་ཐུག་པ། ། སྐྱོབ་པའི་ཐུགས་ཀྱི་དམ་པ་ཡིན། ། དེ་ནས་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་མ་ཐག་ཏུ། ལག་ན་རྡོ་རྗེ་ལ་སོགས་པའི་རིགས་ཀྱི་འཁོར་རྣམས་དང་། ལྷའི་ཚོགས་ཐམས་ཅད་ཡི་རངས་ཏེ། བཅོམ་ལྡན་འདས་རྡོ་རྗེ་འཆང་གིས་གསུངས་པ་ལ་མངོན་པར་བསྟོད་དོ། ། དཔལ་རྡོ་རྗེ་ས་འོག་གི་རྒྱུད་ལས་ གསང་བ་གཏན་ལ་དབབ་པའི་ལེའུ་སྟེ་བཅུ་གསུམ་པའོ། ། ། ། ཁ་ཆེའི་པཎྜི་ཏ་ཙེ་ལུ་དང་། བོད་ཀྱི་ལོ་ཙྪ་བ་འཕགས་པ་ཤེས་རབ་ཀྱིས་བསྒྱུར་བ་རྫོགས་སོ། །