BO༄༅༅། ། རྒྱ་གར་སྐད་དུ། ཤྲཱི་ཧེ་རུ་ཀཱ་བྷྱ་ད་ཡ་ནཱ་མ། བོད་སྐད་དུ། དཔལ་ཁྲག་འཐུང་མངོན་པར་འབྱུང་བ་ཞེས་བྱ་བ། དཔལ་ཧེ་རུ་ཀ་ལ་ཕྱག་འཚལ་ལོ། ། དེ་ནས་ཡང་དག་ བཤད་བྱ་བ། ། མཆོག་ཏུ་རྨད་བྱུང་གསེང་བ་ནི། ། གང་ཞིག་མིས་ནི་ཡང་དག་རིག ། སྒྲུབ་པོ་དངོས་གྲུབ་ཐོབ་པར་འགྱུར། ། ཚེས་གྲངས་མེད་ཅིང་སྐར་མའང་མེད། ། སྨྱུང་བ་མེད་པར་ བརྗོད་བྱ་སྟེ། ། དག་པ་དང་ནི་མི་གཙང་མེད། ། མི་སྨྲ་ཆུ་ཡི་བྱ་བ་མེད། ། དུས་དང་ཚོད་ལས་རྣམ་པར་གྲོལ། ། གཙང་སྦྲའི་སྤྱོད་པ་རྣམ་པར་སྤངས། ། དེ་ཡིས་གྲོང་པའི་ཆོས་མི་སྤྱད། ། རྩོད་ལྡན་དུས་སུ་དངོས་གྲུབ་འགྱུར། ། རྫོགས་ལྡན་ཡོན་ཏན་གཅིག་འགྲུབ་སྟེ། ། དེ་བཞིན་གསུམ་ལྡན་ཡོན་ཏན་གཉིས། ། གཉིས་ལྡན་ཡོན་ཏན་གསུམ་དུ་གསུངས། ། རྩོད་ལྡན་ ཡོན་ཏན་བཞི་ཉིད་དེ། ། དངོས་གྲུབ་ཉིད་དུ་ཐེ་ཚོམ་མེད། ། དཔལ་ཁྲག་འཐུང་མངོན་པར་འབྱུང་བ་ལས་འཇུག་པའི་ཆོ་གའི་ལེའུ་ཞེས་བྱ་བ་སྟེ་དང་པོའོ། ། ། ། དེ་ནས་གཞན་ནི་ རབ་བཤད་བྱ། ། རྒྱུད་རྣམས་ཀུན་ཏུ་སྦས་པ་སྟེ། ། དཔལ་ལྡན་ཁྲག་འཐུང་རྒྱུད་ཆེན་དུ། ། འདོད་པའི་དོན་ཀུན་སྒྲུབ་པར་བྱེད། ། ས་ཡི་ཆ་མཉམ་ཡིད་འོང་བར། །
BOདྲི་ཡི་ཆུ་ཡིས་ཉེར་བྱུགས་ཏེ། ། སྣ་ཚོགས་སྤོས་ནི་ཡིད་ འོང་དང་། ། མེ་ཏོག་སྣ་ཚོགས་གཅལ་དུ་བཀྲམ། ། གཙང་ཞིང་དབེན་པའི་ས་ཕྱོགས་སུ། ། སྔགས་ཤེས་པས་ནི་བསྲུང་བར་བྱ། ། ཕྱོགས་ནི་བཅིང་བར་བྱ་བའོ། ། དེ་ལྟར་ཆོ་ག་ཡང་དག་ལྡན། ། མཁས་པས་དགོད་བྱ་དགོད་པར་བྱ། ། སེམས་ནི་ ཤིན་ཏུ་དགའ་བ་ཡིས། ། ཀུན་ནས་ཀུན་ཏུ་ཆོ་ག་བསམ། ། བུད་མེད་ཕྱག་རྒྱ་གེ་སར་བཅས། ། དང་པོའི་ཚེག་དྲག་རྗེས་དབྱངས་དང་། ། རིང་དང་ཐུང་བར་རབ་ཏུ་གྲགས། ། གྲུ་གསུམ་གཉིས་ནི་ཡང་དག་ལྡན། ། དེ་བཞིན་མ་ནིང་བཞི་བོ་ དང་། ། བུད་མེད་སྐྱེས་བུ་རྣམ་པ་བཞི། ། དེ་བཞིན་གཉིས་པ་དང་པོའི་དབྱངས། ། རིང་དང་ཐུང་བར་ཤེས་བྱ་སྟེ། ། དབྱངས་ཀྱི་ཕྱི་མོ་དགོང་པར་བྱ། ། དབྱངས་ཀྱི་སྡེ་ནི་དང་པོར་དགོད། ། ལྕེ་རྩའི་དབྱངས་ནི་གཉིས་པར་དགོད། ། ཚེག་དྲག་ དབྱངས་ནི་གསུམ་པར་རོ། ། དབུས་སུ་པད་མ་བཞི་པར་རོ། ། ལྔ་པ་ཏ་ཡི་སྡེ་ཚན་ཏེ། ། དྲུག་པ་པ་ཡི་སྡེ་ཚན་ཡིན། ། ཨན་ཏསྠ་ནི་བདུན་པར་འདོད། ། དྲོ་བའི་ཡི་གེ་བརྒྱད་པ་སྟེ། ། མཐའ་མ་རུ་ནི་བསྡུས་པ་ཡིན། ། དེ་ལྟར་རིག་ ཅིང་རྣམ་ཤེས་པས། ། སྔགས་ཀྱི་གཙོ་བོ་ཉིད་ནི་བཏུ། །
BOབཀོད་པ་ལས་ནི་སྔགས་བཏུས་པས། ། མྱུར་དུ་དངོས་གྲུབ་འབྲས་བུ་འཐོབ། ། དཔལ་ཁྲག་འཐུང་མངོན་པར་འབྱུང་བ་ལས་སྔགས་དགོད་པའི་ཆོ་གའི་ལེའུ་ཞེས་བྱ་བ་སྟེ་གཉིས་པའོ། ། ། ། དེ་ནས་སྔགས་ཀྱི་ཆོ་ག་བཤད། ། འདོད་པའི་དངོས་གྲུབ་བསྒྲུབ་པའོ། ། གང་གིས་རྣམ་པར་ཤེས་ཙམ་གྱིས། ། སྒྲུབ་པོས་དངོས་གྲུབ་འཐོབ་འགྱུར་བའོ། ། ལྔ་པ་ཡི་ནི་ལྔ་པ་དང་། ། དྲུག་པ་ཡི་ནི་ལྔ་པ་ཉིད། ། དེ་ཉིད་ཀྱི་ནི་བཞི་པ་དང་། ། གཉིས་པ་ཡི་ནི་གསུམ་ པ་དང་། ། ཨན་ཏསྠ་ཡི་བཞི་པ་ཉིད། ། ལྔ་པ་ཡི་ནི་དང་པོ་དང་། ། ཨན་ཏསྠ་ཡི་བཞི་པ་ཉིད། ། དེ་ཉིད་ཀྱི་ནི་གཉིས་པ་དང་། ། ཨུཥྨ་ཎ་ཡི་དང་པོར་བརྗོད། ། ཨན་ཏསྠ་ཡི་དང་པོ་ཉིད། ། དྲུག་པ་ཡི་ནི་ལྔ་པ་དང་། ། ཨུཥྨ་ཎ་ཡི་བཞི་པ་ཉིད། ། གཉིས་པ་ཡིན་ནི་ དང་པོ་དང་། ། ཨན་ཏསྠ་ཡི་གསུམ་པ་ཉིད། ། གཉིས་པ་ཡི་ནི་གསུམ་པ་དང་། ། ཨུཥྨ་ཎ་ཡི་གསུམ་པ་ཉིད། ། ལྔ་པ་ཡི་ནི་ལྔ་པ་དང་། ། དྲུག་པ་ཡི་ནི་བཞི་པ་དང་། ། ཨན་ཏསྠ་ཡི་དང་པོར་བརྗོད། ། གསུམ་པ་ཡི་ནི་གསུམ་པ་དང་། ། བཞི་པ་ཡི་ནི་དང་པོར་བརྗོད། ། དྲུག་པ་ཡི་ནི་ལྔ་པ་ཉིད། ། དེ་བཞིན་དུ་ནི་བཅུ་བདུན་པ། ། ཉི་ཤུ་རྩ་བདུན་པ་ནི་མཆོག །
BOདེ་བཞིན་སུམ་ཅུ་རྩ་གཉིས་པ། ། ཉི་ཤུ་རྩ་བདུན་མཆོག་ཉིད་དང་། ། ཨན་ཏསྠ་ཡི་དང་པོར་བརྗོད། ། ལྔ་པ་ཡི་ནི་གསུམ་པ་དང་། ། ཨུཥྨ་ཎ་ཡི་གཉིས་པ་ཉིད། ། བཅུ་བདུན་ པ་ཡི་མཆོག་ཉིད་དོ། ། ཨན་ཏསྠ་ཡི་གཉིས་པ་དང་། ། དེ་བཞིན་དུ་ཡང་གསུམ་པའོ། ། དེ་ནས་བཅུ་དགུ་པ་ཡི་མཆོག ། དྲུག་པ་ཡི་ནི་གཉིས་པ་ཉིད། ། ཨུཥྨ་ཎ་ཡི་གཉིས་པ་དང་། ། སུམ་ཅུ་རྩ་གཅིག་དེ་ནས་བླང་། ། དྲུག་པ་ཡི་ནི་ལྔ་པ་དང་། ། ཡང་ན་{བཅྭ་,བཅོ་} བརྒྱད་པ་ཉིད་དང་། ། ཨན་ཏསྠ་ཡི་དང་པོར་བརྗོད། ། ཨུཥྨ་ཎ་ཡི་གསུམ་པ་དང་། ། དེ་ཉིད་ཀྱི་ཡང་བཞི་པ་ཉིད། ། དེ་བཞིན་དུ་ཡང་གསུམ་པ་ཉིད། ། དྲུག་པ་ཡི་ནི་བཞི་པ་དང་། ། གསུམ་པ་ཡི་ནི་གསུམ་པ་ཉིད། ། དྲུག་པ་ཡི་ནི་བཞི་པ་དང་། ། ཨུཥྨ་ཎ་ཡི་གསུམ་ པ་ཉིད། ། ཨན་ཏསྠ་ཡི་གཉིས་པ་དང་། ། དེ་ཉིད་ཀྱི་ནི་དང་པོ་ཉིད། ། དྲུག་པ་ཡི་ནི་དང་པོ་དང་། ། ཨན་ཏསྠ་ཡི་གཉིས་པ་ཉིད། ། འདི་ལྟར་དྲོད་ཀྱི་དང་པོ་དང་། ། དྲུག་པའི་དང་པོར་བརྗོད་པར་བྱ། ། ཨུཥྨ་ཎ་ཡི་དང་པོ་ཉིད། ། དེ་བཞིན་དྷྱ་ཡིག་རྣལ་འབྱོར་མ། ། ལྔ་པ་ཡི་ ནི་དང་པོ་དང་། ། ཨུཥྨ་ཎ་ཡི་དང་པོར་བརྗོད། ། ཨན་ཏསྠ་ཡི་གསུམ་པ་ཉིད། །
BOདེ་བཞིན་དུ་ནི་{བཅྭ་,བཅོ་}བརྒྱད་པ། ། བཞི་པ་ཡི་ནི་དང་པོ་དང་། ། གཉིས་པ་ཡི་ནི་གསུམ་པ་ཉིད། ། ལྔ་པ་ཡི་ནི་བཞི་པ་དང་། ། ཨན་ཏསྠ་ཡི་གཉིས་པ་ཉིད། ། བཞི་ པ་ཡི་ནི་ལྔ་པ་དང་། ། བྱཱ་ཡི་ཡི་གེ་དང་པོར་བརྗོད། ། དེ་ནས་ཉི་ཤུ་པ་ཉིད་དང་། ། དེ་བཞིན་ཉི་ཤུ་རྩ་བཞི་མཆོག ། ལྔ་པ་ཡི་ནི་ལྔ་པ་དང་། ། དྲུག་པ་ཡི་ནི་ལྔ་པ་ཉིད། ། ཨན་ཏསྠ་ཡི་གཉིས་པར་བརྗོད། ། ལྔ་པ་ཡི་ནི་བཞི་བ་དང་། ། ཨན་ཏསྠ་ཡི་དེ་བཞིན་ ཉིད། ། དེ་ཉིད་ཀྱི་ནི་དང་པོ་དང་། ། དྲུག་པ་ཡི་ནི་ལྔ་པ་ཉིད། ། དྲོད་ཀྱི་སྡེ་ཚན་བཞི་པ་དང་། ། ལྔ་པ་ཡི་ནི་བཞི་པ་ཉིད། ། འདི་ལྟར་དྲུག་པའི་ལྔ་པ་དང་། ། ལྔ་པ་ཡི་ནི་ལྔ་པ་དང་། ། དེ་བཞིན་མཁས་པས་བཅུ་བདུན་པ། ། ཨན་ཏསྠ་ཡི་གཉིས་པ་དང་། ། དེ་ཉིད་ཀྱི་ ཡང་བཞི་པ་ཉིད། ། དྲུག་པའི་དང་པོའང་བརྗོད་པར་བྱ། ། དྲོད་ཀྱི་སྡེ་ཚན་གཉིས་པ་དང་། ། ཨན་ཏསྠ་ཡི་དང་པོར་བརྗོད། ། ཀ་ར་ཀ་ར། ཀུ་རུ་ཀུ་རུ། བྷན་དྷ་བྷན་དྷ། ཏྲཱ་ས་ཡེ་ཏྲཱ་ས་ཡ། ཀྵོ་བྷ་ཡ་ཀྵོ་བྷ་ཡ། ཧྲཽཾ་ཧྲཽཾ། ཧྲཿཧྲཿ ཕཻྃ་ཕཻྃ། ཕཊ་ཕཊ། ད་ཧ་ད་ཧ། པ་ཙ་པ་ཙ། བྷ་ཀྵ་ བྷ་ཀྵ། བ་སུ་རུ་དྷི་ར་ཨནྟྲ་མཱ་ལཱ་བ་ལྃ་བི་ནེ། གྲྀཧྞ་གྲྀཧྞ།
BOསཔྟ་པཱ་ཏ་ལ་ག་ཏ་བྷུ་ཛྃ་གྃ་སརྦྦྃ་བཱ་ཏརྫྫ་ཡ་ཏརྫྫ་ཡ། ཨཱ་ཀཌ་ཌྷ་ཡ་ཨ་ཀཌ་ཌྷ་ཡ། ཧྲྃ་ཧྲྃ། ཛྷཽཾ་ཛྷཽཾ། ཀྵྨཱྃ་ཀྵྨཱྃ། ཧཱྃ་ཧཱྃ། ཧཱྃ་ཧཱྃ། ཧཱུྃ་ཧཱུྃ། ཀི་ལི་ཀི་ལི། སི་ལི་སི་ལི། ཧི་ལི་ཧི་ལི། དྷི་ལི་དྷི་ལི། ཧཱུྃ་ཧཱུྃ་ཕཊ། ཨོཾ་གྱི་ཡི་གེ་དང་པོ་ སྟེ། ། ཧཱུྃ་ཕཊ་ཡི་གེ་ཐ་མར་སྦྱར། ། རྩ་བའི་སྔགས་སུ་རབ་ཏུ་གྲགས། ། དཔལ་ཁྲག་འཐུང་མངོན་པར་འབྱུང་བ་ལས་ཡི་གེ་བཏུ་བའི་ཆོ་གའི་ལེའུ་ཞེས་བྱ་བ་སྟེ་གསུམ་པའོ། ། ། ། སྙིང་པོ་འདིར་ནི་བཤད་པར་བྱ། ། འདོད་པའི་དོན་ཀུན་སྒྲུབ་བྱེད་པའོ། ། ཁམས་གསུམ་ རྣམ་རྒྱལ་ཞེས་བྱ་བས། ། ཆོས་དོན་འདོད་དང་ཐར་བར་སྐྱེལ། ། དྲོད་ཀྱི་སྡེ་ཚན་གསུམ་པ་ལ། ། དབྱངས་ཀྱི་ལྔ་པ་སྦྱར་བར་བྱ། ། དང་པོ་རུ་ནི་ཡོངས་སུ་གྲགས། ། དྲུག་པ་ཡི་ནི་ལྔ་པ་ལ། ། དེ་ཉིད་ཀྱི་ནི་བཞི་པས་ནི། ། འོག་གི་ཆར་ནི་རྣམ་པར་བརྟག ། ལྔ་པ་ཡི་ནི་ལྔ་པ་ལ། ། དབྱངས་ཡིག་གསུམ་པར་སྦྱར་བ་ཡིན། ། དྲོད་ཀྱི་སྡེ་ཚན་གསུམ་པ་ལ། ། དབྱངས་ཡིག་ལྔ་པར་ཡང་དག་ལྡན། ། བཞི་པ་རུ་ནི་ཡོངས་སུ་གྲགས། ། དྲུག་པ་ཡི་ནི་ལྔ་པ་ལ། ། དེ་ཉིད་ཀྱི་ནི་བཞི་པས་ནི། ། འོག་གི་ཆར་ནི་ཐེ་ཚོམ་མེད། ། དྲོད་ཀྱི་སྡེ་ཚན་བཞི་པ་ལ།
BO། དབྱངས་ཡིག་ལྔ་པ་ཡང་དག་ལྡན། ། སྟེང་དུ་ནཱ་ད་སྦྱར་བ་ནི། ། དྲུག་པ་རུ་ནི་ཡོངས་སུ་གྲགས། ། དྲུག་པ་ཡི་ནི་གཉིས་པ་དང་། ། བཞི་པའི་དང་པོར་བརྗོད་པར་བྱ། ། དང་པོ་ཡི་ནི་ཚིག་རྐང་སྟེ། ། དངོས་གྲུབ་ཀུན་གྱི་འབྲས་བུ་སྟེར། ། གཅིག་མ་ཚང་བའི་ཉི་ཤུ་ལ། ། མེ་ཡི་བུས་ནི་དབྱེ་བར་བྱ། ། དབྱངས་ཡིག་གསུམ་པར་ཡང་དག་ལྡན། ། དང་པོ་རུ་ནི་ཡོངས་སུ་གྲགས། ། དྲོད་ཀྱི་སྡེ་ཚན་བཞི་པ་ལ། ། ལྔ་བའི་ལྔ་པ་ཡང་དག་ལྡན། ། ལན་གཉིས་སུ་ནི་ཡོངས་སུ་གྲགས། ། དྲོད་ཀྱི་སྡེ་ཚན་བཞི་པ་ལ། ། {བཅྭ་,བཅོ་}ལྔ་པ་ཡིས་ བརྒྱན་བྱས་ཏེ། ། བཞི་པའི་མཐའ་དང་ཡང་དག་ལྡན། ། ལྔ་པ་རུ་ནི་ཡང་དག་གྲགས། ། དྲུག་པ་ཡི་ནི་གཉིས་པ་དང་། ། བཞི་པ་ཡི་ནི་དང་པོ་སྟེ། ། ཐམས་ཅད་མཚན་ཉིད་ཡང་དག་སྟེར། ། ཚིག་རྐང་གཉིས་པར་བརྗོད་པའོ། ། གཉིས་པ་ཡི་ནི་གསུམ་པ་ལ། ། མེ་ཡི་ས་བོན་ཡང་དག་གནས། ། དབྱངས་ཡིག་གསུམ་པ་ཡང་དག་ལྡན། ། དང་པོ་རུ་ནི་ཡོངས་སུ་གྲགས། ། དྲོད་ཀྱི་སྡེ་ཚན་བཞི་པ་ལ། ། ལྔ་བའི་ལྔ་པ་ཡང་དག་ལྡན། ། དབྱངས་ཡིག་གཉིས་པར་སྦྱར་བ་སྟེ། ། དྲུག་པ་ཡི་ནི་དང་པོ་དང་། ། དེ་ལྟར་ཡང་ནི་གཉིས་ ལྡབ་བོ། ། དྲོད་ཀྱི་སྡེ་ཚན་བཞི་པ་ལ། །
BOབཞི་པའི་མཐའ་དང་ཡང་དག་ལྡན། ། དེ་ནས་{བཅྭ་,བཅོ་}ལྔ་པ་ཡིས་བརྒྱན། ། དྲུག་པ་ཡི་ནི་གཉིས་པ་དང་། ། བཞི་པ་ཡི་ནི་དང་པོ་དང་། ། ཚིག་རྐང་གསུམ་པར་བརྗོད་པ་ཡིན། ། འདོད་པའི་དོན་ཀུན་སྒྲུབ་པའོ། ། དང་པོ་ཡི་ནི་ གཉིས་པ་དང་། ། ལྔ་པ་ཡི་ནི་ལྔ་པ་དང་། ། ཨན་ཏསྠ་ཡི་དང་པོ་དང་། ། དྲོད་ཀྱི་སྡེ་ཚན་བཞི་པ་ལ། ། དབྱངས་ཡིག་བཅུ་གསུམ་ཡང་དག་ལྡན། ། མཆོག་ཏུ་དགེ་ཞིང་དམ་པའོ། ། དྲུག་པ་ཡི་ནི་བཞི་པ་དང་། ། གཅིག་མ་ཚང་བའི་ཉི་ཤུ་དང་། ། ཨན་ཏསྠ་ཡི་བཞི་པ་ལ། ། དབྱངས་ཡིག་གཉིས་པ་ཡང་དག་ལྡན། ། ཐིག་ལེ་ཡིས་ནི་སྟེང་དུ་བརྒྱན། ། ཨན་ཏསྠ་ཡི་བཞི་པ་དང་། ། ཉི་ཤུ་རྩ་བཞི་པ་ཉིད་ལ། ། མེ་ཡི་བུས་ནི་རྣམ་པར་དབྱེ། ། དྲོད་ཀྱི་སྡེ་ཚན་བཞི་པ་ལ། ། ལྔ་པ་ཡིས་ནི་ཡང་དག་བརྒྱན། ། སྟེང་དུ་སྟོང་ པས་རྣམ་པར་བརྒྱན། ། དྲུག་པ་ཡི་ནི་གཉིས་པ་དང་། ། བཞི་པ་ཡི་ནི་དང་པོ་སྟེ། ། འདི་རྣམས་རྐང་པ་བཞི་པ་ཡིན། ། འདོད་པའི་དོན་ཀུན་སྒྲུབ་པ་པོ། ། བཞི་པ་ཡི་ནི་སྔགས་འདི་དག ། མ་བྱུང་འབྱུང་བར་མི་འགྱུར་རོ། ། དཔལ་ཁྲག་འཐུང་མངོན་པར་འབྱུང་བ་ ལས་སྙིང་པོའི་སྔགས་བཏུ་བའི་ཆོ་གའི་ལེའུ་ཞེས་བྱ་བ་སྟེ་བཞི་པའོ། ། ། །
BOདེ་ནས་སྔགས་རྣམས་འདི་དག་ནི། ། དཔའ་བོ་རྣམས་ལ་སྦྱར་བྱ་བ། ། རྣལ་འབྱོར་མ་ནི་རྣམས་ཡིན་ཏེ། ། སྔགས་ཀྱི་ཆོ་ག་ཤེས་པས་བཟླས། ། གཉིས་མེད་དངོས་གྲུབ་རྣལ་འབྱོར་མ། ། གཉིས་པ་ཡི་ནི་ཡི་གེ་ལ། ། དབྱངས་ཡིག་བཅུ་གསུམ་པར་ནི་ལྡན། ། དྲུག་པའི་ཡི་གེ་བྱེ་བྲག་ཏུ། ། དབྱངས་ཡིག་བཅུ་གཅིག་པས་ནི་ལྡན། ། བདུན་པར་ཡོངས་སུ་གྲགས་པས་ནི། ། དབྱངས་ཡིག་བཞི་པས་ལྡན་པ་ཡིན། ། ཡི་གེ་བརྒྱད་པ་དག་ལ་ནི། ། དབྱངས་ ཡིག་བཅུ་གཉིས་ཡང་དག་ལྡན། ། ཡི་གེ་བཅུ་གཉིས་པ་དག་ནི། ། དབྱངས་ཡིག་གཉིས་པས་རྣམ་པར་དབྱེ། ། ཡི་གེ་བཅུ་གཉིས་ངག་ལ་ནི། ། དབྱངས་ཡིག་གཉིས་པས་ལྡན་བྱས་ཏེ། ། དྲུག་པའི་དང་པོ་ཉིད་ཀྱིས་ནི། ། འོག་གི་གནས་སུ་རབ་ཏུ་བརྟག ། ཡི་གེ་ བཅུ་བཞི་པ་དག་ནི། ། དབྱངས་ཡིག་གཉིས་པ་དག་དང་ལྡན། ། དགེ་ཞིང་མཆོག་ཏུ་ཕན་པ་ཡིན། ། ཡི་གེ་{བཅྭ་,བཅོ་}ལྔ་པའི་མཚན་ཉིད། ། དབྱངས་ཡིག་གསུམ་པར་ལྡན་བྱས་ཏེ། ། ལྔ་པ་ཡི་ནི་ལྔ་པས་ནི། ། འོག་གི་ཆ་རུ་ཡང་དག་ལྡན། ། དེ་བཞིན་ཡི་གེ་བཅུ་དྲུག་ ཉིད། ། སྟེང་དུ་ནཱ་དས་སྦྱར་བ་ཡིན། ། ཡི་གེ་བཅུ་བདུན་པ་ཉིད་ལ། ། དབྱངས་ཡིག་གསུམ་པས་ཡང་དག་ལྡན། །
BOཡི་གེ་{བཅྭ་,བཅོ་}བརྒྱད་པ་ལ་ནི། ། དབྱངས་ཡིག་གཉིས་པས་ཡང་དག་ལྡན། ། ཡི་གེ་ཉི་ཤུ་གཅིག་པ་ནི། ། དབྱངས་ཡིག་གཉིས་པར་ཡང་དག་ལྡན། ། ཡི་གེ་ཉི་ཤུ་རྩ་གསུམ་པ། ། དབྱངས་ཡིག་ལྔ་པས་མཉམ་པར་ལྡན། ། དབྱངས་ཡིག་བཅུ་གསུམ་པར་ལྡན་པ། ། ཡི་གེ་ཉི་ཤུ་རྩ་བཞི་ཡིན། ། གཉིས་པ་ཡི་ནི་དང་པོ་ཡིས། ། ཉི་ཤུ་རྩ་ལྔ་པ་དང་ལྡན། ། མཁས་པས་རྟག་ཏུ་ལྡན་པས་ནི། ། ཉི་ཤུ་རྩ་དྲུག་ པ་ལ་བརྗོད། ། དབྱངས་ཡིག་གཉིས་པས་ལྡན་པ་རུ། ། མཚོན་བྱེད་གཉིས་ནི་མཚོན་པར་བྱེད། ། ཡི་གེ་ཉི་ཤུ་རྩ་བརྒྱད་པ། ། དེ་བཞིན་{བཅྭ་,བཅོ་}ལྔ་པས་ནི་མཚོན། ། གཅིག་མ་ཚང་བའི་སུམ་ཅུ་ལ། ། བཞི་པའི་དང་པོ་སྦྱར་བ་དང་། ། དབྱངས་ཡིག་ གཉིས་པ་ཡང་དག་ལྡན། ། མེ་དང་ཡང་དག་ལྡན་པར་བྱ། ། དབྱངས་ཡིག་གཉིས་པས་ལྡན་པ་ནི། ། སུམ་ཅུ་རྩ་གཅིག་ཡི་གེ་ཡིན། ། སུམ་ཅུ་རྩ་གཉིས་ཡི་གེ་ལ། ། དབྱངས་ཡིག་བཅུ་གསུམ་པས་ནི་ལྡན། ། སུམ་ཅུ་རྩ་གསུམ་ཡི་གེ་ལ། ། ཉི་མ་ ཡིས་ནི་རབ་ཏུ་དབྱེ། ། སྔགས་རྣམས་ཀུན་གྱིས་གསལ་བ་སྟེ། ། དེ་ལྟར་ཐེ་ཚོམ་མེད་པ་ཡིན། ། སུམ་ཅུ་རྩ་བཞི་ཡི་གེ་ལ། ། དབྱངས་ཀྱི་བཞི་པས་ལྡན་པ་སྟེ། ། གོ་འཕང་མཆོག་ཏུ་དགེ་བ་ཡིན། །
BOདབྱངས་ཀྱི་ལྔ་པས་ལྡན་པ་ནི། ། དེ་བཞིན་སུམ་ཅུ་རྩ་ བདུན་ཡིན། ། སུམ་ཅུ་རྩ་བརྒྱད་ཡི་གེ་ལ། ། དབྱངས་ཀྱི་གཉིས་པས་ལྡན་པར་བྱ། ། དངོས་གྲུབ་ཐམས་ཅད་རྣམ་པར་ངེས། ། དེ་བཞིན་བཞི་བཅུ་རྩ་གཉིས་ལ། ། ཉི་མ་ཡིས་ནི་སྦྱར་བ་ཡིན། ། བཞི་བཅུ་རྩ་གསུམ་ཡི་གེ་ལ། ། དབྱངས་ཀྱི་ལྔ་པས་སྦྱར་བར་ བྱ། ། དེ་ཡང་དགེ་བའི་མཆོག་ཡིན་ནོ། ། བཞི་བཅུ་རྩ་ལྔ་རབ་གསུངས་པ། ། དབྱངས་ཡིག་གཉིས་པས་ལྡན་པར་བྱ། ། དེ་ལྟར་ཉིད་དུ་ཐེ་ཙོམ་མེད། ། དབྱངས་ཀྱི་ལྔ་པས་ལྡན་པ་ནི། ། དེ་བཞིན་བཞི་བཅུ་རྩ་དྲུག་པའོ། ། བཞི་བཅུ་རྩ་བདུན་པ་ཉིད་ལ། ། དབྱངས་ཀྱི་གཉིས་པས་མཉམ་པར་བྱ། ། དེ་བཞིན་ལྔ་བཅུ་རྩ་གཅིག་ལ། ། དབྱངས་ཀྱི་ལྔ་པས་སྦྱར་བར་བྱ། ། འདིས་ནི་ཐར་པ་གྲུབ་པ་ཉིད། ། དབྱངས་ཀྱི་གཉིས་པས་ལྡན་པ་ནི། ། མཁས་པས་ལྔ་བཅུ་རྩ་གཉིས་བརྗོད། ། དབྱངས་ཡིག་བཅུ་གསུམ་ པར་ལྡན་པ། ། ལྔ་བཅུ་རྩ་གསུམ་ཡི་གེ་ཡིན། ། ལྔ་བཅུ་རྩ་དྲུག་ཡི་གེ་ལ། ། དབྱངས་ཀྱི་དྲུག་པར་ལྡན་པ་ཡིན། ། གཅིག་མ་ཚང་བའི་དྲུག་ཅུ་ལ། ། ཨན་ཏསྠ་ཡི་བཞི་པར་སྦྱར། ། དབྱངས་ཀྱི་གཉིས་པ་སྦྱར་བར་བྱ། ། སྟེང་དུ་ནཱ་ དས་རྣམ་པར་བརྒྱན། ། དབྱངས་ཀྱི་གཉིས་པས་ལྡན་པ་ནི། །
BOདྲུག་ཅུ་རྩ་གཅིག་པ་ལ་སྦྱར། ། དབྱངས་ཀྱི་གསུམ་པས་ལྡན་པ་ནི། ། དྲུག་ཅུ་རྩ་གཉིས་བྱེ་བྲག་གོ། ། དབྱངས་ཡིག་བཅུ་གཅིག་ལྡན་པ་ནི། ། དྲུག་ཅུ་རྩ་གསུམ་མཁས་པས་བརྗོད། ། དབྱངས་ཡིག་ ལྔ་པས་སྦྱར་བ་ནི། ། ཡི་གེ་དྲུག་ཅུ་རྩ་བཞི་པའོ། ། དེ་བཞིན་དྲུག་ཅུ་རྩ་ལྔ་ལ། ། མེས་ནི་ངེས་པར་སྦྱར་བར་བྱ། ། དངོས་གྲུབ་ཐམས་ཅད་ཅེས་བྱ་བ། ། འཛིན་པ་རུ་ནི་ཐེ་ཚོམ་མེད། ། དབྱངས་ཀྱི་གསུམ་པས་ལྡན་པ་ནི། ། དྲུག་ཅུ་རྩ་དྲུག་ཕྱེ་བ་ཡིན། ། རིགས་ དང་རིགས་མིན་རབ་བསྒྲུབ་པའོ། ། དབྱངས་ཀྱི་གཉིས་པས་ཡང་དག་ལྡན། ། དྲུག་ཅུ་རྩ་བདུན་བཤད་པ་ནི། ། དཔའ་བོ་མཆོད་པ་ཞེས་ནི་བྱ། ། ཨན་ཏསྠ་ཡི་བཞི་པ་ཡིས། ། དྲུག་ཅུ་རྩ་བརྒྱད་རབ་ཏུ་གྲགས། ། བདུན་ཅུ་རྩ་གཅིག་ཡི་གེ་ལ། ། དབྱངས་ཀྱི་ གཉིས་པར་ལྡན་པར་བྱས། ། བདུན་ཅུ་རྩ་བཞི་ཡི་གེ་ལ། ། དེ་བཞིན་དབྱངས་ཡིག་གཉིས་པས་ལྡན། ། མཚོན་ཆ་རུ་ནི་རབ་ཏུ་གྲགས། ། བདུན་ཅུ་རྩ་ལྔ་པ་ཉིད་ལ། ། དབྱངས་ཀྱི་དྲུག་པས་སྦྱར་བ་ཡིན། ། དེ་ལྟར་དུ་ནི་གྱུར་པ་ཡིན། ། བདུན་ཅུ་རྩ་དྲུག་ཡི་གེ་ལ། ། དབྱངས་ཀྱི་ གཉིས་པས་ལྡན་བྱས་ཏེ། ། མེ་ཡི་བུས་ནི་རྣམ་པར་དབྱེ། ། ལྔ་པའི་བཞི་པས་སྦྱར་བར་བྱ། །
BOབདུན་ཅུ་རྩ་བདུན་ཡི་གེ་ལ། ། དབྱངས་ཡིག་གཉིས་པས་ལྡན་པ་ཡིན། ། བདུན་ཅུ་རྩ་བརྒྱད་མཁས་པས་བརྗོད། ། བརྒྱད་ཅུ་རྩ་གཅིག་དེ་བཞིན་མཆོག ། དབྱངས་ཀྱི་ལྔ་པས་སྦྱར་བ་ཡིན། ། བརྒྱད་ཅུ་རྩ་གཉིས་ཡི་གེ་ལ། ། དབྱངས་ཀྱི་གཉིས་པར་སྦྱར་བར་བྱ། ། ཆོས་དོན་འདོད་དང་ཐར་པ་སྟེར། ། དཔའ་བོ་རྣམས་ལ་ཕན་འདོད་པས། ། རིག་པའི་རྒྱལ་པོ་ཞེས་བཤད་དོ། ། དཔལ་ཁྲག་འཐུང་མངོན་པར་འབྱུང་བ་ལས་སྔགས་ བཏུ་བའི་ལེའུ་སྟེ་ལྔ་པའོ། ། ། ། དེ་ནས་དངོས་གྲུབ་གསང་ཆེན་གྱི། ། དེ་ཡི་སྙིང་པོ་ཉེ་སྙིང་པོ། ། སྔགས་ཀྱི་ཆོ་ག་ཤེས་པས་གསང་། ། ཟབ་པ་རྒྱ་མཚོ་ཆེན་པོ་བཞིན། ། ལྔ་བཅུ་པ་ཡི་དགུ་སྟེང་དུ། ། སུམ་ཅུ་རྩ་གསུམ་གནས་པ་སྟེ། ། {བཅྭ་,བཅོ་}ལྔ་ པས་ནི་རྣམ་པར་བརྒྱན། ། དབྱངས་ཀྱི་བཞི་པས་ཡང་དག་ལྡན། ། དངོས་གྲུབ་ཀུན་གྱི་གཞི་ཡིན་ནོ། ། རྣལ་འབྱོར་སྙིང་ལ་ཚད་མེད་པའོ། ། ཡི་གེ་རེ་རེ་གཉིས་གཉིས་ལ། ། དེ་བཞིན་དབྱངས་ནི་བཅུ་གཉིས་ལྡན། ། མཁའ་འགྲོ་ཆེན་མོ་ལམ་རྣམས་ཀྱི། ། ཀུན་ཏུ་ ཡོངས་སུ་བཟློག་པ་ཡིན། ། ཉེ་བའི་སྙིང་པོ་བརྗོད་པས་འགྲུབ། ། རྣལ་འབྱོར་རྒྱུད་ལས་རྙེད་དཀའ་བའི། ། ཕོ་ཉ་ཡི་ནི་དངོས་གྲུབ་པའོ། །
BOལྷན་ཅིག་སྐྱེས་པའི་དངོས་གྲུབ་ནི། ། རིམ་དང་རིམ་པ་མེད་པས་སྐྱེ། ། ཁྲག་འཐུང་རྒྱུད་ལས་གཞན་དུ་མིན། ། རྣལ་འབྱོར་ ཕྱག་རྒྱ་མཆོག་ཡིན་ཏེ། ། ཡེ་ཤེས་ཟླ་བ་མཆོག་ནི་བཏུ། ། ཁ་ཟས་མཆོག་ནི་བཟའ་བྱ་སྟེ། ། འདི་ནི་བསྟན་བཅོས་ངེས་པ་ཡིན། ། དཔལ་ཁྲག་འཐུང་མངོན་པར་འབྱུང་བའི་རྒྱུད་ལས་སྔགས་བཏུ་བའི་ལེའུ་ཞེས་བྱ་བ་སྟེ་དྲུག་པའོ། ། ། ། དེ་ནས་གཞན་ཡང་ མདོར་བསྡུས་པ། ། བརྡ་ཡི་ཆོ་གའི་མཚན་ཉིད་དག ། རྣལ་འབྱོར་པས་ནི་རྟག་བསྒྲུབས་ན། ། གྲོལ་བའི་དངོས་གྲུབ་སྐྱེ་བར་འགྱུར། ། དབང་ཆེན་དང་ནི་མེ་ཏོག་གིས། ། དེ་བཞིན་བདུད་རྩི་བསྐྱེད་པར་འགྱུར། ། ཞོ་དང་འོ་མར་ལྡན་པ་ཡིས། ། བཅུད་ལེན་མཆོག་ཏུ་ཕན་ པའོ། ། དཀྱིལ་འཁོར་འཁོར་ལོ་ཞེས་བརྗོད་ལ། ། ཐམས་ཅད་ཀུན་གྱི་འདུས་པ་ནི། ། ཚོགས་ཀྱི་འཁོར་ལོ་མཆོག་ཡིན་ཏེ། ། ཐམས་ཅད་མཛའ་བས་མཉམ་པར་འགྲོ། ། མ་དང་སྲིང་མོ་ཆུང་མ་དང་། ། བུ་མོ་དག་ནི་བཀུག་ནས་སུ། ། རྣལ་འབྱོར་རྗེས་སུ་འཇུག་པར་ བྱ། ། འདི་རྣམས་ལོངས་ནི་སྤྱད་བྱ་སྟེ། ། ཆོས་མ་ཡིན་པར་མི་འགྱུར་རོ། ། སྔགས་ཀྱི་རྒྱལ་པོ་འདི་དག་ནི། ། ལན་གཅིག་བཟླས་པས་བུད་མེད་རྣམས། ། ཕོ་ཉ་རྣམས་ནི་འགུགས་པར་བརྗོད།
BO། ཨོཾ་སརྦྦ་བཛྲ་ཀ་མི་ནཱི། ། སརྦྦ་བྷ་ཀྵ་ཤོ་དྷ་ཡ་གུ་ཧྱྃ་བཛྲི་ཎཱི་ཧཱུྃ་སྭཱ་ཧཱ། བུད་མེད་ཀྱིས་ནི་ཡོངས་བསྐོར་ནས། ། ཇི་ལྟར་བདེ་བ་ལོངས་སྤྱོད་ཅིང་། ། སངས་རྒྱས་ལ་འབུལ་མཆོད་པར་བྱ། ། དངོས་གྲུབ་ཐོབ་པ་ཞེས་སུ་བརྗོད། ། དཔལ་ལྡན་རྡོ་རྗེ་བཅོམ་ལྡན་ལ། ། མགོ་བོར་ཐལ་མོ་སྦྱར་ནས་ནི། ། གཏོར་མའི་ཆོ་ ག་ཀུན་གྱིས་མཆོད། ། གཡས་དང་གཡོན་པའི་ལག་གཉིས་ཀྱིས། ། འགྱིང་དང་བཅས་པའི་གར་བྱའོ། ། རྣལ་འབྱོར་པ་ཡིས་ཐམས་ཅད་མཆོད། ། བསོད་ནམས་ཆེན་པོ་སོགས་པ་ཡིན། ། དེ་ལྟར་མཆོད་པ་ཙམ་གྱིས་ནི། ། ཡང་དག་དངོས་གྲུབ་རིམ་པས་འཐོབ། ། གང་ཞིག་ཕྱག་རྒྱ་ཆེ་མི་མཆོད། ། དེ་བཞིན་གཤེགས་པ་ལ་མཆོད་པ། ། ངལ་བ་དོན་མེད་ཡོངས་སུ་བསྟེན། ། དེ་ཡིས་འབྲས་བུ་ཐོབ་མི་འགྱུར། ། གལ་ཏེ་བདག་ཉིད་དངོས་གྲུབ་འདོད། ། མཆོད་པས་དཔའ་བོ་མཆོད་པར་བྱ། ། གང་ཞིག་ཕྱག་རྒྱ་ཆེ་ལས་ སྡང་། ། འདོད་པའི་དོན་ཀུན་སྒྲུབ་པ་པོ། ། སྐྱེ་བ་སྟོང་ཕྲག་དུ་མ་རུ། ། བྱོལ་སོང་སྐྱེ་གནས་སྐྱེ་བར་འགྱུར། ། དཔལ་ལྡན་ཁྲག་འཐུང་ཇི་ལྟ་བར། ། ཡུལ་དུ་ངེས་པར་གནས་པ་སྟེ། ། གཏུམ་མོ་སྦོམ་མོའི་གནས་དག་ལ། ། དེ་ནི་ཡུལ་དུ་གྱུར་པ་ན། །
BOདེ་ཡི་ཡུལ་དུ་ གྱུར་པ་སྟེ། ། གང་ཡང་དེ་ཡི་བུ་དང་གཉེན། ། གང་ཞིག་དཔའ་བོ་རྣམས་མཆོད་པ། ། འདོད་པའི་དོན་ཀུན་སྒྲུབ་པ་པོ། ། དེ་ནི་དགྲ་ལ་འཇིགས་པ་མེད། ། རྒྱལ་པོའི་འཇིགས་པ་ལ་སོགས་མེད། ། དུས་མིན་འཆི་བར་མི་འགྱུར་རོ། ། མེ་དང་ངན་འགྲོའི་འཇིགས་ པ་མེད། ། རྟག་ཏུ་ཕྱག་རྒྱ་མཆོད་པར་བྱ། ། བསོད་ནམས་ལས་ནི་ཐོབ་པ་ཡིན། ། དཔའ་བོ་རྟག་ཏུ་དེར་གནས་བདག ། གུས་པས་མཆོད་པ་བཞེས་ནས་ནི། ། རྣལ་འབྱོར་ཆེན་པོ་བཞུགས་པ་ཡིན། ། དེ་ནི་མཆོད་ཅིང་བསྙེན་པར་བྱ། ། གསོལ་བ་ཡི་ནི་དོན་ཆེད་དུ། ། རྣལ་འབྱོར་གཞན་ལ་བརྟེན་བྱས་ན། ། ལོག་པར་ཡོངས་སུ་ལངས་ཤིང་ཟ། ། དེས་ནི་འབྲས་བུ་མི་འཐོབ་བོ། ། དཔའ་བོའི་རྗེས་སུ་བཟུང་བྱས་ན། ། རྩོད་པའི་དུས་སུ་དངོས་གྲུབ་ཐོབ། ། དཔའ་བོ་གང་ཞིག་ཕྱག་རྒྱ་བྲལ། ། སྒྲུབ་པོ་མཆོད་པར་བྱེད་པ་ནི། ། ཕུབ་མ་ འབྲུ་དང་མཚུངས་པ་སྟེ། ། ས་སྟེངས་སུ་ནི་རྣལ་འབྱོར་པ། ། ཆོམ་པོ་བ་རུ་གྱུར་པ་ཡིན། ། དཔལ་ལྡན་ཁྲག་འཐུང་རྣལ་འབྱོར་འཛིན། ། བདག་ཉིད་མཆོད་པར་བྱེད་པ་ལ། ། གྲོལ་བའི་ལམ་ནི་རྣམ་པར་སྟེར། ། དཔལ་ལྡན་ཁྲག་འཐུང་རྣལ་འབྱོར་ཆེ། ། བདག་གིས་བཟུང་བར་བྱས་པ་ཡིན། །
BOགང་ཞིག་གཉིས་མེད་མི་བསྟེན་པ། ། ཤི་ནས་དམྱལ་བར་འགྲོ་བར་འགྱུར། ། དེ་ལ་སྐྱོབ་པ་མེད་པ་ཡིན། ། རྣལ་འབྱོར་མེད་པར་རྣལ་འབྱོར་འཆོས། ། ཕྱག་རྒྱ་ལ་ནི་བགྲོད་འགྱུར་དང་། ། ཡེ་ཤེས་མེད་པར་ཡེ་ཤེས་ཚུལ། ། དམྱལ་ བར་འགྲོ་བར་ཐེ་ཚོམ་མེད། ། དཔའ་བོ་ཐོད་པའི་ཕྲེང་བ་ཅན། ། དེ་བཞིན་སྐུ་ལུས་དཀར་པོ་སྟེ། ། སངས་རྒྱས་ནོར་བུའི་གཙུག་ཏོར་ཅན། ། རྡོ་རྗེ་ཕག་མོ་གཡོན་དུ་བྱས། ། དེ་ཡི་ཕྱག་མཚན་ཁ་དོག་འཛིན། ། ཐོད་པ་གཅིག་ནི་གདན་དག་ལ། ། ས་དང་ནམ་མཁའ་ ཉིད་དག་དང་། ། གཉིས་པ་དག་དང་བཞི་པ་ནི། ། དཔལ་ལྡན་ཁྲག་འཐུང་ཕྱག་ན་བསྣམས། ། རྡོ་རྗེ་ཕག་མོ་གསུམ་པ་ཡིན། ། འགྲོ་བ་ཀུན་ནི་དེ་ལྟར་གནས། ། ལྷ་དང་ལྷ་མིན་མིར་བཅས་དང་། ། ས་ནི་ཐམས་ཅད་གདན་བྱས་ནས། ། དེ་ནས་ལས་ནི་མཉམ་པར་ བརྩམ། ། དཔལ་ཁྲག་འཐུང་མངོན་པར་འབྱུང་བ་ལས་ཁ་ཟས་གཉིས་སུ་མེད་པར་བསྒྲུབ་པ་ངེས་པའི་ཆོ་གའི་ལེའུ་ཞེས་བྱ་བ་སྟེ་བདུན་པའོ། ། ། ། དེ་ནས་རྣལ་འབྱོར་མ་སྔགས་འདིས། ། དངོས་གྲུབ་ཐམས་ཅད་རབ་སྟེར་བ། ། ཇི་ལྟར་རིགས་པར་རབ་བཤད་ བྱ། ། དཔའ་བོ་རྣལ་འབྱོར་གཉིས་མེད་དེ། ། དེ་ལ་མི་ཡིས་མཆོད་པར་བྱ། ། དཔའ་བོའི་སྔགས་ཀྱི་ཡིད་བསྒྲུབ་པའོ།
BO། ཨོཾ་ན་མོ་བྷ་ག་བ་ཏི་བཛྲ་བཱ་རཱ་ཧི་བཾ། ། ཨཱརྱཱ་བཱ་རཱ་ཛི་ཏེ། ། ཏྲཻ་ལོ་ཀྱ་མཱ་ཏེ་མ་ཧཱ་བིདྱཻ་ཤྭ་རི། ། སརྦྦ་བྷཱུ་ཏ་བྷ་ཡཱ་བ་ཧེ་མ་ཧཱ་བཛྲེ། ། བཛྲཱ་ས་ནེ་ཨ་ཛི་ཏེ་ ཨ་པ་རཱ་ཛི་ཏེ་བ་ཤྱཾ་ཀ་རི་ནེ་ཏྲ་བྷཱ་མ་ཎི། ཤོ་ཥ་ཎི་རོ་ཥ་ཎི། ཀྲོ་དྷ་ནི་ཀ་རཱ་ལི་ནི། ཏྲཱ་ས་ནི་མ་ར་ཎི་པྲ་བྷེ་ད་ནི་ཨ་པ་རཱ་ཛ་ཡེ་བི་ཛ་ཡེ་ཛམ་བྷ་ནི། སྟྃ་བྷ་ནི། མོ་ཧ་ནི། བཛྲ་བཱ་རཱ་ཧི། མ་ཧཱ་ཡོ་གི་ནི་ཀཱ་མཻ་ཤྭ་རི་ཁ་གེ ། ཏད་ཡ་ཐཱ་པྲོ་ཏྃ་གེ ། པྲོ་ཏྃ་གེ ། ཧེ་ན་ཧ་ན། པྲཱ་ཎཱྃ་ ཀིཾ་ཀི་ཎི་ཁིཾ་ཁི་ཎི། དྷུ་ན་དྷུ་ན། བཛྲ་ཧ་སྟེ་ཤོ་ཥ་ཡ་ཤོ་ཥ་ཡ། ཁ་ཊྭཱྃ་ག་ཀ་པཱ་ལ་དྷཱ་རི་ཎི། མ་ཧཱ་པི་ཤི་ཏ་མཱྃ་སཱ་ཤ་ཎི་མཱ་ནུ་ཥྱཱཾ་ཏྲ་པྲ་པྲྀཏྟེ་སཾ་ནི་དྷྱྃ་ན་ར་ཤི་རོ་མཱ་ལཱ་གྲཾ་ཐི་ཏ་དྷཱ་རི་ནི། སུྃ་བྷ་ནི་སུམ་བྷེ་ཧ་ན་ཧ་ན། པྲཱ་ཎཱྃ་སརྦྦ་པཱ་པ་སཏྭཱ་ནཱྃ་སརྦྦ་པ་ཤུ་ནཱྃ། མ་ཧཱ་ མྃ་སཙྪ་ད་ནི་མཱུར་ཏི་དྃ་ཥྚྲཱ་ཀ་ར་ལི་ནི། མ་ཧཱ་མུ་དྲེ་ཤྲཱི་ཧེ་རུ་ཀ་དེ་བ་སྱ། ཨ་གྲ་མ་ཧི་ཥི་ས་ཧ་སྲ་ཤི་རེ་ས་ཧ་སྲ་ཝཱ་ཧ་ཝེ་ཤ་ཏ་ས་ཧ་སྲ་ཨཱ་ན་ནེ། ཛྭ་ལི་ཏ་ཏེ་ཛ་སེ་ཛྭ་ལ་མུ་ཁི་པ་ག་ལ་ལོ་ཙ་ནེ། བཛྲ་ཤ་རཱི་རེ་བཛྲ་ཨཱ་ས་ནེ།
BOམི་ལི་ཏེ་ནི་མི་ལི་ཏཱེ་ཧེ་ཧེ་ཧ་ཧ་ཧཱུྃ་ཧཱུྃ་ཁ་ཁ་དྷུ་དྷུ། རུ་རུ། དྷུ་རུ་དྷུ་རུ། མུ་རུ་མུ་རུ། ཨ་དྭཻ་ཏེ། མ་ཧཱ་ཡོ་གི་ནཱི་པ་ཐི་ཏ། སིད་དྷི་དྲེཾ་དྷྲྃ་དྲེཾ་དྷྲྃ། གྲྃ་གྲྃ། ཧེ་ཧེ། ཧ་ཧ། བྷཱི་མེ་ཧ་ས་ཧ་ས་བཱི་རེ། ། ཧཱ་ཧཱ། ཧོ་ཧོ། ཧཱུྃ་ཧཱུྃ། ཏྲཻ་ལོ་ཀྱ། བི་ནཱ་ཤ་ནེ། ཤ་ཏ་ས་ཧ་སྲ་ཀོ་ཊི། ཏ་ཐཱ་ག་ཏ་པ་རི་བཱ་རི་ཏེ་ཧཱུྃ་ཧཱུྃ་ཕཊ། སིང་ཧ་རཱུ་པེ་ཁཿ། ག་ཛ་ རཱུ་པེ་གཿ། ཏྲཻ་ལོཀྱ་ཨུ་དྭ་རི། ས་མུ་དྲ་མེ་ཁ་ལེ་གྲ་ས་གྲ་ས་ཧཱུྃ་ཧཱུྃ་ཕཊ། པཱི་རཱ་དྭཻ་ཏེ་ཧཱུྃ་ཧཱུྃ་ཧ་ཧ་མ་ཧཱ་པ་ཤུ་མོ་ཧ་ནི། ཡོ་གཱི་ཤྭ་རི་སྟྭྃ་ཌཱ་ཀི་ནི། ལོ་ཀཱ་ནཱྃ་བནྡཱ་ནི་ས་ཏྱ་པྲ་ཏྱ་ཡ་ཀཱ་རི་ཎི་ཧཱུྃ་ཕཊ། བྷཱུ་ཏ་ཏྲཱ་ས་ནི། མ་ཧཱ་བཱི་རེ་པ་ར་མ་སིད་དྷེ། བི་དྱེ་ཡོ་གཱི་ཤྭ་རི་ཕཊ། ཧཱུྃ་ཧཱུྃ་ཕཊ་ ཕཊ་སྭཱ་ཧཱ། དཔལ་ཁྲག་འཐུང་མངོན་པར་འབྱུང་བ་ལས་དཔལ་རྡོ་རྗེ་ཕག་མོའི་རྩ་བའི་སྔགས་སུ་གསུངས་པའི་ཆོ་གའི་ལེའུ་ཞེས་བྱ་བ་སྟེ་བརྒྱད་པའོ། ། ། ། དེ་ནས་རྡོ་རྗེ་ཕག་མོ་ཡི། ། རྩ་བའི་སྔགས་ནི་མཆོག་གྲུབ་པ། ། ཧེ་རུ་ཀ་དང་ཕག་མོ་ནི། ། མ་བྱུང་ འབྱུང་བར་མི་འགྱུར་རོ། ། འདི་དང་འདྲ་བའི་གསང་སྔགས་ནི། ། འཇིག་རྟེན་གསུམ་ན་མེད་པ་སྟེ། །
BOའབུམ་དང་འབུམ་ཕྲག་གསུམ་དུ་གསུངས། ། རྒྱུད་ཀྱི་སྙིང་པོ་མཐའ་དག་བསྡུས། ། གང་གིས་ཆོ་ག་འདི་རྣམས་རིག ། ཐམས་ཅད་གཏོང་བ་ལོ་མ་བཞིན། ། བདག་གིས་ཕྱི་རུ་མ་བཟླས་ཀྱང་། ། ལས་རྣམས་ཀུན་ནི་འགྲུབ་པའོ། ། ཉོན་མོངས་ཀུན་ལས་ངེས་པར་གྲོལ། ། དངོས་གྲུབ་འབྲས་བུ་མྱུར་དུ་འཐོབ། ། ཤེས་ཤིང་དྲན་པ་ཙམ་གྱིས་ནི། ། དངོས་གྲུབ་ཐམས་ཅད་རབ་ཏུ་སྟེར། ། དེ་ཉིད་སྲོག་ཆགས་རྣམས་ཀྱི་ སྲོག། ། དེ་ཉིད་མཆོག་ཏུ་མི་འགྱུར་བ། ། ཀུན་ལ་ཁྱབ་པ་དེ་ཉིད་རྙེད། ། དེ་ནི་ལུས་ཀུན་ལ་ནི་གནས། ། དེ་ཉིད་སངས་རྒྱས་ཡེ་ཤེས་ཏེ། ། དཔལ་ལྡན་ཧེ་རུ་ཀ་ཡིས་གསུངས། ། སྔགས་འདི་དག་ནི་ཡང་དག་འབྱུང་། ། གང་ཞིག་ལ་ལར་རབ་ཏུ་གནས། ། བསྟན་ བཅོས་མཐའ་དག་ས་སྟེང་དུ། ། གྲུབ་མཐའ་ངེས་པ་ཡང་དག་གནས། ། འདི་ནི་ཤེས་པས་འགྲུབ་པ་སྟེ། ། སྔགས་རྣམས་ཀུན་ནི་ཐེ་ཚོམ་མེད། ། འཇིག་རྟེན་འདི་དང་ཕ་རོལ་ཏུ། ། དེ་མེད་པར་ཡང་དངོས་གྲུབ་མེད། ། གྲུབ་མཐའ་རིག་བྱེད་མཐའ་དག་ནི། ། སྙིང་པོ་ གཅིག་ཏུ་རབ་གྲགས་པ། ། བདག་ཉིད་ཀྱིས་ནི་འགྲུབ་པར་འགྱུར། ། རྣལ་འབྱོར་བདག་ཉིད་གཉིས་མེད་ཟློས། ། དངོས་གྲུབ་ཐམས་ཅད་ཐེ་ཚོམ་མེད། །
BOལས་རྣམས་ཀུན་གྱིས་གོས་མེད་དེ། ། རབ་འཕེལ་ཀུན་ཏུ་གཙོ་བོར་འགྱུར། ། ལུས་རྣམས་ཀུན་ལ་རྣམ་པར་གནས། ། དཔལ་ལྡན་ཁྲག་འཐུང་ལྷར་ཤེས་བྱ། ། རིགས་རྣམས་ཀུན་ལ་ཀུན་ཏུ་སྤྱད། ། ཁ་ཟས་ལ་ནི་བརྟག་མི་བྱ། ། འདི་ནི་དོན་དམ་ཡེ་ཤེས་ཏེ། ། འདི་ནི་གོ་འཕང་མཆོག་ཡིན་ནོ། ། སྔགས་རྣམས་སྙིང་པོ་འདི་དག་ནི། ། འཇིག་རྟེན་ཀུན་ལ་སྟེར་བ་ཡིན། ། དཔལ་ཁྲག་འཐུང་ མངོན་པར་འབྱུང་བ་ལས་རྡོ་རྗེ་ཕག་མོའི་རྩ་བའི་སྔགས་ཀྱིས་ཐམས་ཅད་དག་པའི་ལེའུ་ཞེས་བྱ་བ་སྟེ་དགུ་པའོ། ། ། ། དེ་ནས་སྔགས་འདི་ཐོབ་པ་ཡིས། ། རང་འདོད་དཀྱིལ་འཁོར་བྱས་ནས་ནི། ། རྡོ་རྗེ་ཕག་མོ་མ་དེ་གཞག ། རབ་ཏུ་འབད་པས་བཟླས་པ་བྱ། ། རང་ འབྱུང་རྡུལ་ནི་དམར་པོ་ཡིས། ། ཡུལ་ནས་རྙེད་པའི་རས་གཏུབ་ཅིང་། ། བྱི་ལ་ཡི་ནི་རྟུག་པ་ཉིད། ། དངོས་གྲུབ་འདོད་པས་སྤོས་སུ་བྱ། ། བཅོམ་ལྡན་འདས་ཀྱིས་བྱིན་གྱིས་རློབ། ། སྤོས་བཟང་འདི་ནི་སྔགས་རིག་གོ། ། རྡོ་རྗེ་ཕག་མོའི་ཕྱག་རྒྱ་ཡིས། ། ཐོད་པ་ཁ་སྦྱར་ བཅིང་བར་བྱ། ། སྐྲ་ཡི་སྦྱིན་སྲེག་བརྗོད་པ་སྟེ། ། དེ་ལྟར་མ་རྟོགས་མཉམ་བཤད་པའི། ། དམ་ཚིག་རབ་ཏུ་བསྐྱང་བར་བྱ། ། རྟག་ཏུ་ཕྱག་རྒྱ་མཆོད་བྱ་སྟེ། །
BOརྟག་ཏུ་བཟའ་བཏུང་བྱ་བ་ཡིན། ། འདི་ལྟར་སྔགས་ཞེས་བྱ་བ་ཡིན། ། དངོས་གྲུབ་ཐམས་ཅད་རབ་ཏུ་སྟེར། ། ཆང་དང་བ་ལང་ཤ་བསྒོས་ཏེ། ། ལག་པ་གཡོན་པས་སྦྱིན་སྲེག་བྱ། ། ལྷ་རྣམས་ཀུན་དང་སྐར་མ་དང་། ། ཀླུ་སོགས་སུམ་ཅུ་རྩ་གསུམ་གནས། ། སངས་རྒྱས་ཀྱང་ནི་དབང་འགྱུར་ན། ། ཕྲ་མོ་མི་རྣམས་སྨོས་ཅི་དགོས། ། ལྕེ་ཡི་དྲི་མ་སོ་ཤིང་དང་། ། དེ་བཞིན་རང་ལུས་དྲིལ་ཕྱིས་དང་། ། མི་དང་ཨ་ལཀྟ་དག་གི། ། སྦྱིན་སྲེག་དག་ནི་བྱས་པ་ཡིས། ། འཇིག་རྟེན་གསུམ་ནི་དབང་དུ་འགྱུར། ། རྡུལ་དང་རང་བྱུང་དམར་པོ་དང་། ། ཁ་ཟས་སྐྱུགས་པའི་བཟའ་བ་དང་། ། མི་ཡི་སྐྲ་དང་ཡང་དག་ལྡན། ། ལན་ཅིག་གིས་ནི་ འགུགས་པའི་མཆོག ། རང་ལུགས་མར་ནི་སྐྱུགས་པ་དང་། ། རང་གི་སྐྲ་ཡིས་སྦྱིན་སྲེག་བྱ། ། ནིམ་པའི་ཤིང་གི་མེ་སྦར་བས། ། ལན་ཅིག་གིས་ནི་སྡང་བའི་མཆོག ། བྱ་རོག་སྒྲོ་ཡིས་སྦྱིན་སྲེག་བྱ། ། སྨྱོ་བྱེད་མ་ལ་མཉམ་གཞག་པས། ། ཚ་བའི་མར་ཁུས་ ཡང་དག་ལྡན། ། སྐད་ཅིག་ཙམ་གྱིས་གསད་དང་བསྐྲད། ། སྟོང་ཕྲག་དགུ་རུ་དགང་བླུགས་དང་། ། སྦྱིན་སྲེག་དག་ནི་བྱ་བ་སྟེ། ། དུས་མི་རིང་བར་རྒྱལ་པོ་འཐོབ། ། གང་གིས་ཤ་ནི་བླུགས་པ་དང་། །
BOམཁས་པས་དགང་བླུགས་བརྒྱ་ཕྲག་གིས། ། དེ་ཡི་ཟླ་གསུམ་ ནང་དུ་ནི། ། སྐད་ཅིག་ཙམ་གྱིས་དབུལ་བ་ཟད། ། གང་གིས་རྟག་ཏུ་དྲན་པ་ཡིས། ། སྐྱེ་བོ་ཀུན་ལ་སྡུག་པར་འགྱུར། ། ཞག་ནི་ཉི་ཤུ་རྩ་གཅིག་གིས། ། འགྲུབ་པར་འགྱུར་ཏེ་ཐེ་ཚོམ་མེད། ། འདོད་པའི་ལྷ་འདྲ་བུད་མེད་མཆོག ། མྱོས་ཤིང་སྨྱོ་བ་བསྟེན་པར་བྱ། ། འདོད་པ་ཤིན་ཏུ་རྒྱས་པ་ཡིས། ། འཇིག་རྟེན་རྣམས་ལ་བརྩེ་བར་བྱ། ། ས་སྟེངས་རྣམས་སུ་དངོས་གྲུབ་ཐོབ། ། བུད་མེད་བྱེ་བས་ཡོངས་སུ་བསྐོར། ། དཔལ་ལྡན་རྡོ་རྗེ་ཕག་མོ་དང་། ། དཔལ་ལྡན་ཁྲག་འཐུང་མཉམ་སྦྱོར་ལ། ། དཔའ་བོ་ཀུན་གྱིས་ཕྱག་བྱས་ནས། ། འཇིག་ རྟེན་གསུམ་དུ་དངོས་གྲུབ་སྟེར། ། དམ་ཚིག་སྤྱོད་པ་བསྲུང་བར་བྱ། ། དཔལ་ཁྲག་འཐུང་མངོན་པར་འབྱུང་བ་ལས་དཔལ་རྡོ་རྗེ་ཕག་མའི་རྩ་བའི་སྔགས་ཀྱི་སྦྱིན་སྲེག་གི་ཆོ་གའི་ལས་ཀྱི་ལེའུ་ཞེས་བྱ་བ་སྟེ་བཅུ་བའོ། ། ། ། དེ་ནས་ལས་མཆོག་དམ་པ་དག ། དཔའ་ བོ་གཉིས་མེད་རྣལ་འབྱོར་ནི། ། རྟག་ཏུ་འཁྱུད་པས་གསང་མཆོད་བྱ། ། རྣལ་འབྱོར་མས་ནི་མཆོག་སྟེར་འགྱུར། ། སྒྲུབ་པ་པོས་ནི་ནུབ་ཀུན་ཏུ། ། དེ་ནས་ཕོ་ཉ་མཆོད་པར་བྱ། ། ཤ་ཟའི་རྩ་བ་ཁར་བཅུག་སྟེ། །
BOཇི་ཙམ་འདོད་པ་དེ་ཙམ་དུ། ། རྟགས་ནི་ལས་སུ་ འགྱུར་བ་སྟེ། ། ས་ཡི་དབུ་ནི་སྙིང་པོ་དག ། ཏིལ་གྱི་མར་ཁུར་བཙོས་ནས་ནི། ། རྐང་པའི་མཐིལ་ལ་བྱུག་པར་བྱ། ། དེ་ནས་རྟགས་སུ་གྱུར་པ་སྟེ། ། པ་ཏ་དང་ནི་ཀ་ཊུ་དང་། ། རོ་ཧི་ནི་དང་རྟ་ཡི་དྲི། ། འདི་རྣམས་ཆ་ནི་མཉམ་བྱས་ཏེ། ། ཨ་རྒའི་འོ་མར་བཏགས་ ནས་ནི། ། ལིང་ག་ལ་ནི་བསྐུས་བྱས་ནས། ། ཇི་ཙམ་ཚད་དུ་འདོད་པ་རུ། ། དེ་ཙམ་ཚད་དུ་འདོད་པ་ཡིན། ། མྱུར་དུ་ཆུ་ནི་དྲོན་མོ་ཡིས། ། བསྐུས་ན་སྔ་མ་བཞིན་དུ་འགྱུར། ། པད་མ་དཀར་པོ་གེ་སར་དག ། སྦྲང་རྩི་དག་དང་བཏགས་ནས་ནི། ། ལྟེ་བ་ལ་ནི་བསྐུས་ནས་ ནི། ། རྟགས་ནི་བརྟན་པར་འགྱུར་བ་ཡིན། ། པདྨ་དམར་པོ་གེ་སར་དང་། ། ཏིལ་ནི་དཀར་པོ་དག་དང་ནི། ། མ་ཧེའི་མར་ནི་མ་བསྐོལ་དང་། ། དཔའ་བོ་གཅིག་པའི་རྩ་བ་དང་། ། སྦྲང་རྩི་ལྷན་ཅིག་བཏགས་ནས་ནི། ། ལྟེ་བ་ལ་ནི་བྱུགས་བྱས་ན། ། དེ་སྲིད་རྟགས་ནི་ འགྱེས་མི་འགྱུར། ། རྡུལ་དང་ཡུང་བ་གཉིས་བླངས་ཏེ། ། བ་ཡི་དར་བ་བྲེ་དོ་ནི། ། ཇི་སྲིད་བྲེ་གང་གྱུར་ཙམ་དུ། ། དེ་སྲིད་བསྐོལ་བར་བྱས་པ་ཡིན། ། དེ་ལྟར་བཏུང་བར་བྱས་པ་ནི། ། ཉི་མ་བདུན་གྱིས་རྫོགས་པར་འགྱུར། །
BOབཅུད་ལེན་སྦྱོར་བ་ཡང་དག་པ། ། དཔའ་ བོ་ཡིས་ནི་གསུངས་པའོ། ། སྤྲེའུའི་མཆིལ་མ་བླངས་བྱས་ཏེ། ། ཕྱེ་མ་ཞིབ་མོར་བྱས་པ་དང་། ། རང་གི་དཔའ་བོའི་སྒོ་ནས་ནི། ། བྱུང་དང་ཡང་དག་ལྡན་བྱས་ནི། ། དབང་དུ་བྱེད་པའི་མཆོག་ཡིན་ནོ། ། རྡོ་རྗེ་ཕག་མོ་བཟླས་བྱས་ཏེ། ། ཡིད་ནི་གང་དང་གང་གནས་པ། ། ལན་ཅིག་བཟླས་པའི་སྡིགས་མཛུབ་ནི། ། ལག་པ་གཡོན་པ་བསྐོར་བྱས་ཏེ། ། གང་དང་གང་ལ་བསམས་པ་སྟེ། ། འཚོ་བ་གྲོ་དང་གསེར་དང་ནི། ། བཟའ་བའི་ཟས་དང་བཏུང་བ་དག ། དེ་དག་ཐམས་ཅད་བླངས་ནས་ནི། ། སྔགས་པའི་ཁྱིམ་ནི་ཡོངས་སུ་གང་། ། ཁྲག་ དང་རང་བྱུང་གཅིག་བྱས་ཏེ། ། སྒྲུབ་པོས་རིག་པ་ལན་བདུན་བཟླས། ། དེས་ནི་མི་ལ་རེག་བྱས་ན། ། རེག་པས་སྐྱེས་བུ་ཁྲག་འཛག་འགྱུར། ། ལན་ཅིག་བཟླས་པའི་རིག་པ་འདིས། ། ཆུས་ནི་ཡོངས་སུ་ཐར་བར་འགྱུར། ། དེ་ལྟར་སེམས་ཅན་གང་ གང་ནི། ། ཁྲག་དང་ཁྲག་ཆེན་པོ་དག་གིས། ། སྐུད་པ་སྦགས་ཏེ་བཅིང་བར་བྱ། ། ལན་བདུན་བཟླས་པ་དག་གིས་ནི། ། དེ་གཟུགས་འཛིན་པར་ཐེ་ཙོམ་མེད། ། ཀུན་ཏུ་ཆུ་ཡིས་གྲོལ་བར་འགྱུར། ། བལྟས་པས་བུད་མེད་གཟུགས་བཟང་དང་། ། རྒྱལ་པོ་རྣམས་དང་ ས་བདག་དག ། སྒྲུབ་པོས་མཐོང་དང་མ་མཐོང་བ། །
BOཐམས་ཅད་འགུགས་པར་འགྱུར་བ་སྟེ། ། ལན་བདུན་མངོན་པར་བསྔགས་བྱས་ནས། ། མདའ་ཡི་ཤུགས་ཀྱིས་འོང་བར་འགྱུར། ། ཉི་མ་བདུན་ན་ཐེ་ཙོམ་མེད། ། དཔལ་ཁྲག་འཐུང་མངོན་པར་འབྱུང་བ་ལས་དཔལ་ རྡོ་རྗེ་ཕག་མོའི་རྩ་བའི་སྔགས་ཀྱི་རྣལ་འབྱོར་གྱི་འདོད་པ་དང་། བཅུད་ཀྱིས་ལེན་དང་འགུགས་པའི་ཆོ་གའི་ལེའུ་ཞེས་བྱ་བ་སྟེ་བཅུ་གཅིག་པའོ། ། ། ། དེ་ནས་དངོས་གྲུབ་རྣལ་འབྱོར་ཆེ། ། འཇིགས་པ་ཐམས་ཅད་རྣམ་སྤངས་ཏེ། ། ཐང་ཀའི་གཟུགས་ཀྱི་རི་མོ་ནི། ། སྔགས་པས་ཆོ་ག་བཞིན་དུ་བྲི། ། རྣལ་འབྱོར་མ་ཡི་ལུས་གནས་པ། ། སྒྲུབ་པ་པོས་ནི་མཚན་པར་བྱ། ། བཅུ་བཞི་དང་ནི་ཚེས་བརྒྱད་དམ། ། ནག་པོའི་ཕྱོགས་ཀྱི་ཚེས་བཅུ་ལ། ། རིག་པས་ནུབ་མོ་མཆོད་པར་བྱ། ། སྒྲུབ་པོས་དྲི་དང་མེ་ཏོག་དང་། ། སྤོས་ནི་ཇི་ ལྟར་གསུངས་པ་དང་། ། དེ་བཞིན་ཡང་ནི་བཟའ་དང་བཏུང་། ། མར་མེ་ཕྲེང་བ་དབུལ་བ་དང་། ། དྲི་ཞིམ་སྤོས་ཀྱིས་མཆོད་པར་བྱ། ། སྟན་གཅིག་ལ་ནི་གནས་ནས་ནི། ། ལྷ་ལ་མངོན་པར་ཁ་བལྟས་ནས། ། སྔགས་པས་ཁ་ནི་ནུབ་ཏུ་བལྟ། ། སྒྲུབ་པ་པོས་ནི་ཐང་ ཀའི་གཟུགས། ། ཞལ་བཞི་ཕྱག་ནི་བཞི་པ་དང་། ། ཐོད་པ་དང་ནི་ཁ་ཊྭཱཾ་ག། ། མཛེས་པ་དག་ནི་གཟུང་བར་བྱ། །
BOལག་པས་ཞགས་པ་ལྕགས་ཀྱུ་བཟུང་། ། ཁ་དོག་ནག་པོ་འབར་བ་ཆེ། ། ཐོད་པའི་ཕྲེང་བ་བཅིངས་པ་དང་། ། སྟག་གི་བགས་པས་བླ་གོས་བྱས། ། སྟན་ལ་ གཡས་བརྐྱང་བ་ཡིས་གནས། ། རལ་པའི་ཅོད་པན་ཟླ་ཚེས་བརྒྱན། ། ཤིན་ཏུ་མཛེས་པའི་རུས་པས་བརྒྱན། ། ཆོ་གས་ཡང་དག་བསྒོམ་བྱས་ནས། ། དེ་ནས་ཕྲེང་བ་བླང་བར་བྱ། ། སྟན་གཅིག་ལ་ནི་གནས་ནས་ནི། ། དཔའ་བོ་ཆེན་པོ་འཇིགས་པ་ཡི། ། མེ་འདྲའི་ ལུས་ཀྱི་རིག་པ་བཟླས། ། སྒྲུབ་པ་པོས་ནི་སྙིང་པོ་ནི། ། མཚན་ནི་ཐོག་ཐག་བཟླས་པ་བྱ། ། དང་པོའི་ཐུན་ལ་ཧ་ཧ་རྒོད། ། སྤྱང་ཀི་ཡི་ནི་སྒྲ་སྒྲོགས་པ། ། སྒྲུབ་པོ་གཡོག་དང་བཅས་པ་ཡིས། ། དེ་མཐོང་འཇིགས་པར་མི་བྱའོ། ། གཉིས་པ་ཡི་ནི་ཐུན་དག་ལ། ། ནམ་མཁའི་སྟེང་དུ་འབར་བར་མཐོང་། ། མི་གཡོ་བས་ནི་བཟླས་པ་བྱ། ། འགྲོ་བ་ཐམས་ཅད་ཟ་འདྲ་ཡང་། ། སྲིན་པོའི་འཇིགས་པ་འགྱུར་བའི་ཞལ། ། ཐུན་གསུམ་པ་ལ་མཐོང་བ་ཡིན། ། ལྷར་བཅས་ལྷ་མིན་མིར་བཅས་རྣམས། ། ཐུན་བཞི་པ་ལ་འགྲུབ་པར་ འགྱུར། ། རྡོ་རྗེ་ཕག་མོ་མཆོག་སྟེར་ལག ། དཔའ་བོ་ཆེན་པོ་ལེགས་སོ་ལེགས། ། ང་ཡིས་མཆོག་ནི་སྦྱིན་ཞེས་སྨྲ། ། མཆོག་ཏུ་ས་འོག་འགྲོ་བ་དང་། ། རལ་གྲི་མིག་སྨན་འཁོར་ལོ་དང་། །
BOངག་གིས་ཐམས་ཅད་འགྲུབ་པ་དང་། ། ཕྱག་རྒྱ་ཆེན་པོ་རྗེས་སུ་འགྲུབ། ། ཕྱག་རྒྱ་གང་གིས་སྒྲུབ་པ་པོ། ། དངོས་གྲུབ་ཐམས་ཅད་ཕུན་སུམ་ཚོགས། ། དཔལ་ལྡན་ཁྲག་འཐུང་དེས་མཆོད་བྱ། ། ཕྱག་རྒྱའི་ཡིད་དང་ལུས་དག་ལ། ། ཕྱག་རྒྱའི་མཆོད་པས་མཆོག་ནི་ཡོད། ། འདི་ནི་བསྟན་བཅོས་ངེས་པ་ཡིན། ། ཕྱག་རྒྱས་དངོས་གྲུབ་ཤེས་པ་ སྟེ། ། འཇིག་རྟེན་གསུམ་ན་ཡང་དག་གནས། ། དཔའ་བོ་རྣལ་འབྱོར་མས་བཤད་པ། ། མ་ལུས་ལུས་པ་མེད་པ་འགྲུབ། ། དཔལ་ཁྲག་འཐུང་མངོན་པར་འབྱུང་བ་ལས་ཕྱག་རྒྱ་ཆེན་པོ་བསྒྲུབ་པའི་ཐབས་ཀྱི་ཆོ་གའི་ལེའུ་ཞེས་བྱ་བ་སྟེ་བཅུ་གཉིས་པའོ། ། ། ། དེ་ནས་དགུག་པ་བཤད་པར་བྱ། ། སྐྱེ་བ་བདུན་པས་དངོས་གྲུབ་སྟེར། ། སྲིད་པར་དངོས་གྲུབ་དཔའ་བོ་ཆེ། ། ཐམས་ཅད་པས་ནི་ལུས་གནས་མཆོག ། ཀུན་ཏུ་ལག་པ་བརྐྱང་བའི་མཐའ། ། ཀུན་ཏུ་མིག་དང་སྤྱི་བོ་དང་། ། ཀུན་ཏུ་ཁ་དང་རྣ་བ་ཡིས། ། འཇིག་རྟེན་པ་ རྣམས་བསྐོར་ཏེ་གནས། ། དེ་ཕྱིར་མྱུར་དུ་བསྒྲུབ་པར་བྱ། ། གཉིས་མེད་ཡེ་ཤེས་སེམས་ཀྱིས་ནི། ། རང་གི་ལུས་ལ་དེས་ཕྱུང་བ། ། འོག་གི་ཆར་ནི་ཐེ་ཚོམ་མེད། ། དེ་རུ་བསྒྲུབ་བྱ་ལ་ནི་གཞུག ། རྩ་བའི་ལམ་ནས་རྣལ་འབྱོར་མ། །
BOཕྱུགས་ཀྱི་ས་བོན་ བླངས་ནས་ནི། ། བདག་གི་ལུས་ལ་གཞུག་པར་བྱ། ། རླུང་དང་མེ་ནི་ཡང་དག་འབྱུང་། ། བསྒྲུབ་བྱའི་ལུས་ནི་བཟའ་བ་ཡིན། ། མགྲིན་པ་ཞགས་པས་བཅིངས་ནས་ནི། ། ལྷ་མོའི་སྔགས་ཀྱིས་རྨོངས་བྱས་ཏེ། ། ཐམས་ཅད་འགུགས་པར་འགྱུར་བ་ཡིན། ། སྒྲུབ་པ་པོ་ཡིས་སྔགས་ལུས་ཀྱིས། ། བརྒྱལ་ཞིང་དྲན་མེད་རྨོངས་པ་དང་། ། རྡོ་རྗེ་ཕག་མོས་ཤིན་ཏུ་རྨོངས། ། དེ་ནི་རྟག་ཏུ་དབང་དུ་འགྱུར། ། འོང་ཞིང་རྗེས་སུ་འོང་བར་འགྱུར། ། དེ་ལྟ་ཉིད་དུ་བཀོད་ནས་ནི། ། བསམ་གཏན་དག་དང་ཡང་དག་ལྡན། ། བདག་ཉིད་ཆེན་པོས་ བརྒྱ་བྱིན་དང་། ། སྔོན་དུ་བརྒྱ་བྱིན་ཆུང་མ་བཀུག ། དེ་ནས་ཐབས་ནི་ཤེས་པར་བྱ། ། ཁམས་གསུམ་དག་ནི་མ་ལུས་དང་། ། རྒྱལ་བ་རྣམས་ཀྱང་དགུག་པར་བྱ། ། ཀུན་ཏུ་ཐབས་ནི་ཕན་པའི་མཆོག ། གང་ཞིག་རྒྱུད་རྣམས་ཀུན་ཏུ་སྦས། ། རྣལ་འབྱོར་སྔགས་ནི་ གསུངས་པའོ། ། བརྟུལ་ཞུགས་དང་ནི་བཟླས་པ་བྲལ། ། སྨྱུང་བ་ཅུང་ཟད་མི་དགོས་ཏེ། ། བསམ་གཏན་འདི་ཡིས་འགྲུབ་པར་འགྱུར། ། འགྲོ་བ་བལྟ་ཞིང་རབ་ཏུ་སྦྱར། ། དཔལ་ཁྲག་འཐུང་མངོན་པར་འབྱུང་བ་ལས་སྐྱེ་བ་བདུན་པ་ལ་སོགས་པ་ཐམས་ཅད་དགུག་པའི་ཆོ་ གའི་ལེའུ་ཞེས་བྱ་བ་སྟེ་བཅུ་གསུམ་པའོ།
BO། ། ། དེ་ནས་དཀྱིལ་འཁོར་ཆོ་ག་བཤད། ། དངོས་གྲུབ་ཐམས་ཅད་རབ་སྟེར་བ། ། འཁོར་ལོ་ཆེན་པོ་པད་མ་བཞིན། ། དཔའ་བོ་གཉིས་མེད་རྣལ་འབྱོར་མ། ། དཀྱིལ་འཁོར་རྒྱལ་པོ་མཐོང་བ་ཡིས། ། དངོས་གྲུབ་ཅི་སྟེ་སྐྱེ་མི་ འགྱུར། ། རིང་པོ་ནས་ནི་ཐོས་པ་དང་། ། རིང་པོ་རྣམས་ནི་མིག་གིས་མཐོང་། ། རྣལ་འབྱོར་མ་ཡིས་འདོད་ཆགས་དང་། ། ཞེ་སྡང་རྣམས་ནི་སྤོང་བ་ཡིན། ། གྲུ་བཞི་པ་ལ་སྒོ་བཞི་པ། ། པད་མ་བཞི་ནི་ཡང་དག་ལྡན། ། གྲུབ་པའི་སློབ་དཔོན་མཚན་ཉིད་ལྡན། ། དཀྱིལ་ འཁོར་ཐིག་ནི་གདབ་པར་བྱ། ། ས་ཡི་ཆ་མཉམ་ཡིད་འོང་བར། ། ཟུག་རྔུ་ཐམས་ཅད་རྣམ་སྤངས་ཏེ། ། ཚོན་སྣ་ལྔ་དང་ལྡན་པ་ཡིས། ། དཀྱིལ་འཁོར་མཆོག་ནི་བྲི་བ་ཡིན། ། དངོས་གྲུབ་འདོད་པས་མཉམ་བཞག་པས། ། ཕོ་ཉ་དག་ནི་མཆོད་པར་བྱ། ། དཔའ་བོའང་ མཆོད་པར་འགྱུར་བ་ཡིན། ། དེས་ནི་རྡུལ་ཚོན་བསྒྲུབ་པར་བྱ། ། རྡུལ་ཚོན་རྫོགས་པ་ཉིད་ཀྱིས་ནི། ། འདོད་པའི་དོན་ཀུན་ཐར་པ་སྟེར། ། མཐེ་ཆུང་གི་ནི་ཚད་ཙམ་དུ། ། རྡུལ་ཚོན་ཡང་དག་བྲི་བྱ་སྟེ། ། གལ་ཏེ་རེ་མིག་འདི་དག་ནི། ། དམའ་དང་ཆད་དང་འཁྱོག་པོར་གྱུར། ། དམའ་བའི་རེ་ཁཱས་དངོས་གྲུབ་མེད། ། འཁྱོག་པོས་ནད་ནི་བྱེད་པ་སྟེ། །
BOསློབ་དཔོན་སློབ་མ་གཉིས་ཀ་ནི། ། རི་མོ་ཆད་པས་འཆི་བར་འགྱུར། ། དེ་ལྟར་རི་མོའི་མཚན་ཉིད་ལྡན། ། ས་ཡི་དབུས་སུ་མཐོ་བ་བྲི། ། ཤར་དང་བྱང་དག་དམའ་བས་ནི། ། སྔགས་པས་དངོས་ གྲུབ་ཐོབ་པར་འགྱུར། ། ཤར་དང་བྱང་དག་དམའ་བ་དང་། ། དབུས་ནི་མཐོ་བས་རྒྱལ་པོར་འགྱུར། ། རིག་པ་འཛིན་པའི་གོ་འཕང་ང་ངེས། ། བྱང་མཐོ་བས་ནི་འཆི་བར་འགྱུར། ། ཡང་ན་ནོར་ནི་བརླག་པར་འགྱུར། ། ཇི་ལྟར་སྔོན་གསུངས་ཤར་མཐོ་བས། ། མྱུར་དུ་ རིགས་ནི་ཟད་པར་འོང་། ། ཇི་ལྟར་ས་ཡི་དབུས་དམའ་བས། ། སྒྲུབ་པ་པོ་ནི་གསོད་པ་ཡིན། ། དེ་ལྟར་རི་མོ་མཚན་ཉིད་ལྡན། ། ས་ལ་དཀྱིལ་འཁོར་ཀུན་ཏུ་བྲི། ། ཁྲུ་གང་ཁྲུ་གཉིས་ཁྲུ་བཞི་འམ། ། བརྒྱད་དམ་བཅུ་གཉིས་བཅུ་དྲུག་ཉིད། ། སྟེང་དང་འོག་ཏུ་བརྟག་པ་མེད། ། གལ་ཏེ་རྟོག་པ་མེད་ན་ནི། ། སློབ་དཔོན་ཡེ་ཤེས་རྙེད་པར་དཀའ། ། དམྱལ་བ་མི་བཟད་པར་ནི་འགྲོ། ། གང་ཞིག་དམན་པའི་མི་རུ་འགྱུར། ། དེ་ནས་དགོད་པའི་ཆོ་ག་བཤད། ། དཔའ་བོ་གཉིས་མེད་རྣལ་འབྱོར་མས། ། དཔལ་ལྡན་རྡོ་རྗེ་ཁྲག་འཐུང་ལྷ། ། དྲུག་ཅུ་རྩ་ བཞིའི་འཁོར་གྱིས་བསྐོར། ། གཤིན་རྗེ་མ་དང་སྐྲག་བྱེད་མ། ། ཙནྜི་ཀཱ་ནི་ཀུན་སྤྱོད་མ། །
BOནོར་མ་དཔའ་བོའི་བློ་མ་དང་། ། སྡུད་མ་འཇིགས་མ་བརྒྱད་པ་སྟེ། ། དངོས་གྲུབ་ཐམས་ཅད་རབ་སྟེར་བའོ། ། གཟུགས་ཅན་མ་དང་འོད་བྱེད་མ། ། ལཱ་མཱ་དང་ནི་རབ་འཕེལ་མ། ། སཱ་པ་ལི་ཀཱ་སླར་ལྡོག་མ། ། ཨི་ཧི་ཀཱ་དང་གར་དབང་ཕྱུག ། བརྒྱད་པ་རུ་ནི་བརྗོད་པ་སྟེ། ། རྣལ་འབྱོར་མ་ནི་ཡོངས་སུ་གྲགས། ། ཁྲོ་གཉེར་མ་དང་མཆེ་གཙིགས་མ། ། སྣ་ཆེན་མ་དང་བ་ལང་གདོང་། ། དྲི་ཆེན་མ་དང་གླང་ཆེན་ལྕེ། ། བ་ལང་རྣ་བ་གདོང་བཟང་ སྟེ། ། རྣལ་འབྱོར་སྤྱོད་པར་གྱུར་པའོ། ། དམར་བའི་གཏུམ་མོ་ཉིད་དང་ནི། ། ས་ནི་ལྗང་གུ་ཉིད་དག་དང་། ། སྟོབས་ཆེན་དཔག་ཚང་གསུམ་མ་དང་། ། རྩུབ་མོ་དང་ནི་བདེན་སྨྲ་མ། ། ཞལ་ནི་ཤིན་ཏུ་མཛེས་མ་དང་། ། ཐོད་པའི་དུམ་བུ་མ་དག་སྟེ། ། འདི་རྣམས་སྙིང་རྗེའི་དངོས་ གྲུབ་སྟེར། ། སྔོན་གྱི་རྡོ་རྗེ་ཕག་མོ་ཉིད། ། རང་ཉིད་ཀྱི་ནི་རིག་པ་ཡིན། ། རང་མིང་བརྗོད་པའི་སྔགས་དག་ལ། ། དང་པོར་ཨོཾ་གྱི་ཡི་གེ་ལ། ། ཧཱུྃ་ཧཱུྃ་ཕཊ་ཀྱིས་མཐའ་མར་སྦྱར། ། འདོད་པའི་དོན་ཀུན་སྒྲུབ་པ་པ་པོས། ། དེ་ནི་རྟག་ཏུ་མཆོད་པར་བྱ། ། དེ་ལྟར་ཐམས་ཅད་ཐེ་ཙོམ་ མེད། ། སྲིང་མོ་དང་ནི་བུ་མོ་དང་། ། ཆུང་མ་ཤིན་ཏུ་གཟུགས་བཟང་དང་། །
BOརྟ་དང་གླང་པོ་བ་ལང་དང་། ། ཞིང་དང་བྲན་ཕོ་བྲན་མོ་དང་། ། རིན་ཆེན་རྣམས་ནི་དབུལ་བར་བྱ། ། དེང་ནས་བརྩམས་ཏེ་བདག་ཉིད་འབངས། ། བདག་གིས་ལུས་ནི་ཕུལ་བ་ལགས། ། སློབ་མ་ དག་ནི་མི་འབུལ་ན། ། དངོས་གྲུབ་རིང་བར་ཐེ་ཚོམ་མེད། ། འཇིག་རྟེན་འདི་དང་ཕ་རོལ་ན། ། དེས་ནི་དངོས་གྲུབ་མི་འཐོབ་བོ། ། དཀྱིལ་འཁོར་མཐོང་བ་ཉིད་ཀྱིས་ནི། ། དངོས་གྲུབ་ཅི་སྟེ་སྐྱེ་མི་འགྱུར། ། སྡིག་པ་ཀུན་ལས་རྣམ་པར་གྲོལ། ། འབད་པས་སློབ་དཔོན་ དགྱེས་པར་བྱ། ། དེ་ཡིས་དངོས་གྲུབ་མྱུར་དུ་འགྱུར། ། དེ་བཞིན་གཤེགས་པའི་ལྷ་ཡིས་ནི། ། ཇི་ལྟ་བུ་རུ་གསུངས་པ་ཡི། ། ཇི་ལྟ་བཞིན་དུ་རྡུལ་ཚོན་ལྔས། ། དཀྱིལ་འཁོར་མཉམ་པར་བྲི་བར་བྱ། ། གདོང་ནི་གོས་ཀྱིས་བཅིངས་བྱས་ཏེ། ། ལྷོ་ཕྱོགས་སྒོར་ནི་དགུག་ པར་བྱ། ། མེ་ཏོག་སྙིམ་པས་གཏོར་བར་བྱ། ། མེ་ཏོག་གང་དུ་ལྷུང་བ་ཡི། ། གནས་ལ་སོགས་པ་བསྟན་པར་བྱ། ། ཨོཾ་ཤྲཱི་ཧེ་རུ་ཀཱ་ཡ་བིདྱཱ་མ་ཧེ་བིདྱཱ་རཱ་ཛཱ་ཡ་དྷཱིཿམ་ཧེ་སྭཱ་ཧཱ། བདག་གིས་དཔའ་བོ་རབ་ཏུ་བསྐུལ། ། བཀླགས་པས་ལས་ནི་ཐམས་ཅད་བྱེད། ། འཆི་བའི་ དུས་ཀྱི་དངོས་གྲུབ་ནི། ། འཆི་བ་ལ་ནི་བརྗོད་པར་འགྱུར། །
BOདངོས་གྲུབ་འདི་ཡི་བྱེ་བྲག་གིས། ། ཉི་མ་གཅིག་གིས་དངོས་གྲུབ་ཆེ། ། འཇིག་རྟེན་གསུམ་སྒྲུབ་བསྒོམ་པར་བྱ། ། སྒྲུབ་པའི་དབང་པོ་ཆོ་ག་ཤེས། ། དཔལ་ལྡན་ཧེ་རུ་ཀ་ཡི་ནི། ། བརྟུལ་ཞུགས་ལ་ནི་ནུབ་ གསུམ་གནས། ། ལྷ་ཡི་ལུས་སུ་སྐྱེ་བར་འགྱུར། ། ལྷ་ཡི་ཡེ་ཤེས་མཐོང་འགྱུར་ཏེ། ། དེ་བཞིན་ལྷ་ཡི་གཟུགས་སུ་འགྱུར། ། རྩོད་པ་ཀུན་ལས་རྒྱལ་བ་དང་། ། རྒས་དང་འཆི་བ་རྣམ་པར་སྤངས། ། སངས་རྒྱས་བཞིན་དུ་ལྷ་མོ་བསྟེན། ། དཔའ་བོ་བཞིན་དུ་ས་ལ་རྩེ། ། ཕྱག་རྒྱ་དང་ནི་བཅས་ཉིད་དུ། ། ཉི་མ་གསུམ་གྱིས་འགྱུར་བ་ཉིད། ། དཔལ་ཁྲག་འཐུང་མངོན་པར་འབྱུང་བ་ལས་ལྷ་དགོད་པ་དང་དབང་བསྐུར་བ་དང་། བླ་མ་མཆོད་པའི་ཆོ་གའི་ལེའུ་ཞེས་བྱ་བ་སྟེ་བཅུ་བཞི་པའོ། ། ། ། དེ་ནས་དཀྱིལ་འཁོར་བཤད་ པར་བྱ། ། དབང་བསྐུར་འཁོར་ལོ་མཆོད་པ་ནི། ། སློབ་མས་ཉི་མ་བཟང་པོ་འམ། ། ཇི་ལྟར་དུ་ནི་ནུབ་མོ་ལའོ། ། དེ་ནས་དཔའ་བོ་མཆོད་པར་བྱ། ། སྟན་གཅིག་ལ་ནི་གནས་ནས་ཀྱང་། ། ཕོ་ཉ་མོ་ནི་བཅུ་དྲུག་ཉིད། ། དཔའ་བོ་དང་ནི་གཉིས་མེད་གནས། ། དཔལ་ ལྡན་རྡོ་རྗེ་ཕག་མོ་ལ། ། སུམ་བྷ་ནི་ཡི་རིག་པ་ཡིས། ། ཕྱོགས་བཞི་རུ་ནི་མཆོད་པར་བྱ། །
BOདེ་ལྟར་རྣལ་འབྱོར་ཆེན་པོ་མཆོད། ། གཟུགས་བརྒྱད་པོས་ནི་རབ་ཏུ་བསྲུང་། ། སྔགས་དང་ཕྱག་རྒྱ་ཡོངས་རྫོགས་ནས། ། གཉིས་མེད་ཡེ་ཤེས་བརྩམ་པར་བྱ། ། ནུབ་མོ་ ཀུན་ཏུ་སྒྲུབ་པ་པོས། ། དེ་ནས་ཕོ་ཉ་མཆོད་པར་བྱ། ། དུས་མི་རིང་བར་རྒྱལ་པོ་འགྲུབ། ། འཁོར་ལོས་སྒྱུར་བ་སྟོབས་ཀྱི་རྒྱལ། ། སྒྲུབ་པོ་ཤིན་ཏུ་མཉམ་གཞག་པས། ། སྔགས་དང་ཕྱག་རྒྱ་སྦྱར་བར་བྱ། ། དམ་ཚིག་ཐམས་ཅད་བསྐྱང་བྱ་སྟེ། ། འཇིག་རྟེན་གསུམ་ན་ རྙེད་དཀའ་བ། ། གཡོན་ནས་སྐྱེས་པས་བྱེད་པ་ཡིན། ། དམ་ཚིག་སྤྱོད་པའི་མཚན་ཉིད་དང་། ། སྦྱོར་ཉིད་ཆོ་གའི་ཡེ་ཤེས་ནི། ། དེ་ནི་ང་ཡིས་བཤད་ཀྱིས་ཉོན། ། དབུགས་དབྱུང་མཆོག་གི་བར་དག་ནི། ། དྲི་ཡི་ཆུ་དང་བཅས་པ་དང་། ། རྟག་ཏུ་རིལ་བུ་བཟའ་བར་བྱ། ། མཆོད་ པའི་དུས་ཀྱི་བྱེ་བྲག་ལ། ། ཕོ་ཉས་ལྷན་ཅིག་སྐྱེས་དངོས་གྲུབ། ། དམན་པ་མཆོག་དང་འབྲིང་རྣམས་ཀྱི། ། དེ་ཡིས་སྦྱོར་བས་དངོས་གྲུབ་འགྱུར། ། འདོད་པའི་དོན་ཀུན་སྒྲུབ་པའོ། ། དཔལ་ལྡན་ཧེ་རུ་ཀ་ལས་བྱུང་། ། རང་བྱུང་མེ་ཏོག་ཉིད་དག་གིས། ། ཆོ་ ག་ཤེས་པས་ཀུན་ཏུ་སྤྱོད། ། བཟླས་དང་བསམ་གཏན་མཆོད་པ་དང་། ། མེ་ཏོག་གཅིག་དང་ཡང་དག་ལྡན། །
BOབློ་ལྡན་གྱིས་ནི་སྟོན་མོ་བསྒྲུབ། ། མ་ལུས་སྣོད་གཉིས་འདུས་བྱས་ཏེ། ། རྟོག་པ་མེད་པའི་ཤེས་རབ་ཆེ། ། སྔགས་དང་རྒྱུད་ཀྱི་ཚུལ་གྱིས་ནི། ། གང་ལྟར་ ཇི་ལྟར་རྙེད་པ་ལ། ། ཡིད་ཀྱིས་གུས་པས་མཆོད་པར་བྱ། ། གཉིས་དང་གཉིས་མེད་རྣལ་འབྱོར་བདག ། མཁའ་ལྡིང་ཁ་བཞིན་བཏུང་བར་བྱ། ། རིགས་ལྔ་གཅིག་ཏུ་ཡང་དག་འགྲུབ། ། སྟོན་མོ་བཟང་པོ་བརྩམ་པར་བྱ། ། རྟག་ཏུ་ནུབ་མོ་རྒྱ་ཆེ་བའི། ། མཆོད་པ་ བྱ་ཞིང་བརྩམ་པར་བྱ། ། གནས་དེར་མེ་ཡི་ལས་ཀྱིས་ནི། ། རྒྱུ་དང་མི་རྒྱུ་དཀྲུག་པར་བྱ། ། རྣལ་འབྱོར་གང་གིས་མེ་ཏོག་གནས། ། སྒྲུབ་པ་ཐམས་ཅད་སྤངས་པ་དང་། ། བྱོལ་སོང་རྣལ་འབྱོར་མཆོག་ཏུ་འགྲུབ། ། དམན་པ་འབྲིང་དང་མཆོག་རྣམས་ནི། ། ཅེ་སྤྱང་གཉིས་སྐྱེས་མིག་ཆེན་དང་། ། ཁྲུང་ཁྲུང་ས་ར་ས་དང་ཁྲ། ། ཕོ་རོག་འུག་པ་བྱ་རྒོད་ཀྱིས། ། དགང་བླུགས་ཀུན་གྱི་བྱེ་བྲག་གིས། ། མཁའ་འགྲོ་མ་ལ་གཏོར་མ་སྦྱིན། ། མཆོག་དང་དམན་པའི་དངོས་གྲུབ་སྟེར། ། དེ་ཡི་རྫས་ཀྱི་དངོས་གྲུབ་སྐྱེ། ། དེ་བཞིན་མཐོང་ དང་རེག་པ་དང་། ། རྟག་ཏུ་འོ་དང་འཁྱུད་པ་དང་། ། སྦྱོར་བའི་གནས་ཀྱི་བྱེ་བྲག་གིས། ། ཇི་སྲིད་རྣལ་འབྱོར་ཚོགས་ཀྱིས་ནི། །
BOདངོས་གྲུབ་ཀུན་གྱིས་བྱེད་པར་བརྗོད། ། སྔགས་ལས་འབྱུང་བ་སྦྱིན་པར་བྱ། ། གཞན་དུ་ནམ་ཡང་མ་ཡིན་ནོ། ། མ་དང་བུ་མོ་སྲིང་མོ་ དང་། ། ཆུང་མ་ཕོ་ཉ་མོར་གནས་པ། ། གང་གིས་རྟག་ཏུ་སྔགས་སྟེར་བ། ། དེ་ནི་དེ་ཡི་ཆོ་གར་བརྗོད། ། དེ་ནས་བདག་གིས་དམ་ཚིག་བཤད། ། གཡོན་ནས་འབྱུང་བ་མཆོག་ཡིན་ནོ། ། གང་ཞིག་མི་ཡི་བུ་མོ་ཐོབ། ། ཧེ་རུ་ཀ་ཡི་སྔགས་ཀྱིས་ནི། ། འདོད་པའི་དངོས་ གྲུབ་འཐོབ་པར་འགྱུར། ། རིང་པོ་ནས་ཀྱང་རྣམ་ཤེས་བྱ། ། ཁྱིམ་མམ་ཞིང་ལ་རྣམ་གནས་ནས། ། ཁྲག་འཐུང་རྣལ་འབྱོར་ལས་གཞན་མིན། ། སློབ་དཔོན་རྣལ་འབྱོར་མ་ཡིན་ཏེ། ། ཡིད་ཅན་གྱིས་ནི་རྒྱུད་འདི་རུ། ། རྣལ་འབྱོར་ཐམས་ཅད་ཤེས་པར་བྱ། ། གཞན་དུ་ནམ་ཡང་མ་ཡིན་ནོ། ། སྔོན་དུ་དང་བ་ལ་བརྟེན་ནས། ། གུས་པ་ཡིས་ནི་མཆོད་པར་བྱ། ། རྟག་ཏུ་མ་མོས་རྣམ་པར་གནས། ། གཉིས་སུ་མེད་དང་ངོ་ཚ་མེད། ། ཕྱག་རྒྱ་ཤིན་ཏུ་རྣལ་འབྱོར་ལྡན། ། ཚུལ་ཁྲིམས་ཡང་དག་བརྗོད་པ་ཡིན། ། སྐྱེ་བའི་ཡུལ་ ལས་སྐྱེས་པ་དང་། ། དམ་ཚིག་ཡང་དག་བསྲུང་བ་ཡིན། ། སེམས་ཀྱི་བདག་ཉིད་སྙིང་རྗེས་ཕན། ། དམ་ཚིག་ཅན་ལ་ཁྲོ་མིན་ཏེ། ། མ་གུས་པ་ལ་བཤད་མི་བྱ། ། མཚན་མོ་ཐོག་ཐག་བཟླས་པ་བྱ། །
BOརྣལ་འབྱོར་མ་ལ་མཆོད་པར་བྱ། ། བཅུ་དྲུག་གཉིས་མེད་ རྒྱལ་པོའི་དོན། ། ནུབ་མོ་རུ་ནི་དམ་ཚིག་སྟེ། ། དཔའ་བོ་རྟག་ཏུ་གཅེར་བུ་ཡིན། ། སྒྲུབ་པོས་སྔགས་དང་ཕྱག་རྒྱ་དང་། ། ཕྱག་རྒྱ་ལྔ་དང་ཡང་དག་ལྡན། ། སྒྲུབ་པོ་ལས་ནི་མཉམ་པར་བརྩམ། ། བདག་ཉིད་ཕོ་ཉ་མཆོག་ཀུན་དང་། ། རྣལ་འབྱོར་གཉིས་མེད་ གནས་ན་ནི། ། དེ་ལས་འབྱུང་བའི་རྫས་ཀྱིས་བསྒྲུབ། ། དེ་བཞིན་མཐོང་དང་རེག་པ་པོས། ། ཉིན་མོ་རྟག་ཏུ་གསང་བ་སྟེ། ། རྟག་ཏུ་ནུབ་མོ་གསལ་བར་བྱ། ། སྲོག་ཆགས་པགས་པས་ཤམ་ཐབས་བྱ། ། བདེ་བའི་དོན་དུ་བསྐྱོད་པར་བྱ། ། སྒྲུབ་པ་པོ་ནི་དངོས་གྲུབ་ཉིད། ། དག་པ་རྣམ་གསུམ་གྱིས་འགྲུབ་སྟེ། ། དཔལ་ལྡན་ཁྲག་འཐུང་གཉིས་མེད་གནས། ། ཞལ་ནི་དཀར་གནག་དང་སྨྲ་དང་། ། མི་སྨྲའི་དཀའ་ཐུབ་ལ་སོགས་སྤངས། ། དང་པོ་ཡི་ནི་དག་པ་ཡི། ། སྒྲུབ་ཐབས་ཀུན་གྱི་མཚན་ཉིད་དང་། ། བྱོལ་སོང་ཟོས་པས་བསོད་ནམས་སོག ། གཉིས་པའི་དག་པ་བརྗོད་བྱ་བ། ། ཟླ་བའི་ཆུ་ནི་འཐུངས་པ་ཉིད། ། གསུམ་པ་གཉིས་མེད་བརྗོད་པའོ། ། དཔལ་ཁྲག་འཐུང་མངོན་པར་འབྱུང་བ་ལས་ཚོགས་ཀྱི་དཀྱིལ་འཁོར་ལ་མཆོད་པ་དང་དབང་བསྐུར་བའི་ཆོ་གའི་ལེའུ་ཞེས་བྱ་བ་སྟེ་{བཅྭ་,བཅོ་}ལྔ་པའོ། །
BO། ། དེ་ནས་སྡོམ་པ་བཤད་པར་བྱ། ། རྣལ་འབྱོར་རྒྱུད་ལས་རྙེད་དཀའ་བ། ། མ་ལུས་ལུས་པ་མེད་པར་འགྲུབ། ། ཀུན་གྱི་རྒྱལ་པོར་གྲགས་པ་སྟེ། ། རྟག་ཏུ་ཕྱག་རྒྱ་བསྒྲུབ་པར་བྱ། ། འདོད་པའི་དངོས་གྲུབ་འབྲས་དོན་དུ། ། སྤུན་དང་སློབ་ དཔོན་མཆོད་པར་བྱ། ། དེ་ཉིད་གཉིས་མེད་རྣམས་གནས་སོ། ། སྤུན་དང་བུ་དང་ལྷན་ཅིག་ཏུ། ། བདེ་དང་སྡུག་བསྔལ་ཀུན་ཏུ་འབྱུང་། ། དེ་ལ་ཡེ་ཤེས་བསྟན་མི་བྱ། ། སྔགས་རྣམས་སུ་ནི་འབྱིན་པ་ཡིན། ། གཙང་ཞིང་དག་པ་བཟའ་བྱ་སྟེ། ། རྟག་ཏུ་དམ་ཚིག་ཡན་ལག་ གསང་། ། སྔགས་ནི་སུ་ལའང་མི་སྦྱིན་ཏེ། ། མན་ངག་རྣམ་པར་ཉམས་མི་བྱ། ། གང་གི་དོན་དུ་མན་ངག་རྣམས། ། དམ་ཚིག་སྲུང་བ་སྦྱིན་པར་བྱ། ། རྟག་ཏུ་འཇིག་རྟེན་གཡོན་ལ་སྤྱོད། ། རྐང་པ་གཡོན་པ་སྔོན་དུ་གཏང་། ། ཡན་ལག་གཡོན་པ་བསྒྱུར་བར་བརྩོན། ། གཡོན་པས་མཛུབ་གཏོར་བྱས་ལ་བཏུང་། ། ལག་པ་གཡོན་པས་བདག་ཉིད་མཆོད། ། འདི་རུ་གཡོན་པས་འཁྱུད་པ་དང་། ། གཡོན་པས་གུས་པར་མཆོད་པར་བྱ། ། གཡོན་ནས་ཀུན་ཏུ་བལྟ་བ་ཉིད། ། དེ་བཞིན་གཡོན་པས་འགྲོ་བྱས་ན། ། དངོས་གྲུབ་ཐམས་ཅད་ རབ་ཏུ་སྟེར། ། ཇི་ལྟར་བདག་ཉིད་གཡོན་པས་སྤྱོད། །
BOགཡོན་པས་ཐར་པའི་མཚན་ཉིད་དེ། ། ཅུང་ཟད་གསུངས་དང་མ་གསུངས་པ། ། དཔལ་ལྡན་ཁྲག་འཐུང་གཡོན་ལ་སྤྱོད། ། སྒྲུབ་པོས་ས་སྟེངས་གནས་ནས་ནི། ། བཟླས་དང་བརྟུལ་ཞུགས་བྲལ་བྱས་ཀྱང་། ། གཡོན་པས་དངོས་གྲུབ་འགྱུར་བ་ཡིན། ། དཔལ་ཁྲག་འཐུང་མངོན་པར་འབྱུང་བ་ལས་གཡོན་པའི་མཆོད་པ་དང་སྡོམ་པའི་ཆོ་གའི་ལེའུ་ཞེས་བྱ་བ་སྟེ་བཅུ་དྲུག་པའོ། ། ། ། དེ་ནས་རྣལ་འབྱོར་མ་ཡི་ནི། ། ལྟ་བས་རེངས་པའི་ཆོ་ག་བཤད། ། སྙིང་གོང་སྣ་རྩེར་བྱིན་གྱིས་ བརླབ། ། དེ་ལྟར་རླུང་ནི་གཡོ་མེད་པར། ། སྙིང་གི་གོང་བུས་སྐེ་བཅིངས་ཏེ། ། གཟུགས་བཟང་བ་ནི་མྱུར་དུ་འོང་། ། དེ་ནས་{ཡི་དགས་,ཡི་དྭགས་}མོ་བསྒྲུབ་པ། ། སྐྱེ་གནས་ལ་ནི་གི་ཝང་གཞུག ། སྔགས་པས་པདྨའི་སྟེང་གནས་ཏེ། ། བསམ་གཏན་བཟླས་པ་ཡང་དག་ བརྩམ། ། སྐྱོ་ཞིང་ཀུན་ཏུ་ངུ་བར་འགྱུར། ། ཐིག་ལེ་བྱས་ནས་གནས་པ་དང་། ། རྒོད་ཅིང་དགྱེས་པ་ཉིད་དག་གོ། ། དེ་ལྟར་གི་ཝང་དངོས་གྲུབ་ནི། ། གསང་བའི་རྒྱུད་ལས་ངེས་པར་འབྱུང་། ། ལྡོང་རོས་དང་ནི་མན་ཤིང་ལ། ། བུ་མོ་ལ་ནི་གཞུག་པར་བྱ། ། སེར་ ཞིང་ཟླུམ་པའི་མིག་ནས་ནི། ། མཆི་མར་བཅས་ཤིང་རྟག་ཏུ་ངུ་། ། འདི་རྣམས་ཀྱི་ནི་བཟླས་པར་གནས། །
BOདེ་བཞིན་སྙིང་པོ་ཉེ་སྙིང་པོ། ། རང་གི་སྲོག་བཞིན་ལེགས་པར་འཛིན། ། དེ་ལྟར་དཔའ་བོ་དངོས་གྲུབ་ཆེ། ། རྒྱུད་འདི་རུ་ནི་ཐེ་ཚོམ་མེད། ། རྩོད་པ་ཆེན་པོ་ འབྱུང་བ་ལ། ། ཡྃ་ཡིག་ཁ་དོག་སྔོན་པོ་ལ། ། རླུང་གི་ཤུགས་ཀྱིས་བསྐོར་བར་བྱ། ། འཁྲུགས་པ་ཆེན་པོ་གཞན་གྱི་སྡེ། ། ཐམས་ཅད་རེངས་ཤིང་བརླག་པར་བྱ། ། ཚེག་དྲག་ཡི་གེས་མཚོན་ཆ་བྱ། ། ཉོན་མོངས་མེད་པར་སྦྱར་བྱ་སྟེ། ། དེ་མ་ཐག་ཏུ་ཐམས་ཅད་ བརླག ། དེ་ནི་མི་ཡི་སྡེ་ཀུན་ཏེ། ། གང་ཞིག་ཅུང་ཟད་མཚན་མཆོག་གིས། ། བྱ་བ་ལ་སོགས་བྱེད་པ་ཡིན། ། གཟའ་དང་དུག་དང་མེ་དང་དགྲ། ། སེར་བ་རླུང་དང་མཚོན་ཆའི་ཆར། ། དཔལ་ཁྲག་འཐུང་མངོན་པར་འབྱུང་བ་ལས་གཟུགས་བཟང་མ་བལྟ་བ་དང་གི་ ཝང་དང་གཞན་གྱི་སྡེ་རེངས་པའི་ཆོ་གའི་ལེའུ་ཞེས་བྱ་བ་སྟེ་བཅུ་བདུན་པའོ། ། ། ། དེ་ནས་གཞན་ཡང་བཤད་བྱ་བ། ། རོ་ལངས་ཀྱི་ནི་སྒྲུབ་པའི་ཐབས། ། ཆོ་ག་ཡོངས་རྫོགས་རྣལ་འབྱོར་བདག ། འགྲུབ་པར་འགྱུར་ཏེ་ཐེ་ཚོམ་མེད། ། སྔགས་པས་ཇི་ལྟར་རྙེད་ པ་ཡི། ། རོ་ནི་ནད་མེད་གས་པ་མེད། ། དེ་ནི་བླངས་ཏེ་བསྒྲུབ་པར་བྱ། ། རྣལ་འབྱོར་ཀུན་ལ་དངོས་གྲུབ་སྟེར། ། བ་ནག་མོ་ཡི་འོ་མ་དང་། །
BOསྲན་གྲེའུ་འབྲས་དང་ལྡན་པ་ཡི། ། ཐུག་པ་རོ་ཡི་ཁ་རུ་ནི། ། འཇིགས་པ་མེད་པར་བླུག་པར་བྱ། ། ཇི་སྲིད་རོ་ནི་ལངས་ཀྱི་ བར། ། བདག་གིས་ཅི་བགྱི་ཞེས་ནི་སྨྲ། ། རིལ་བུ་མིག་སྨན་དངོས་གྲུབ་དང་། ། མཆིལ་ལྷམ་རྒྱལ་པོ་རལ་གྲི་དང་། ། སྦྱིན་དང་དགྲ་བོ་བརླག་པ་དང་། ། རྐང་བྱུག་དང་ནི་བཅུད་ཀྱིས་ལེན། ། དོན་མཆོག་གཅིག་ནི་བྱིན་ནས་ནི། ། འགྲུབ་འགྱུར་གཞན་དུ་མ་ཡིན་ནོ། ། དེ་ལྟར་ཆོ་གའི་རིམ་པ་ནི། ། མཚན་ཉིད་ཀུན་ལ་བྲལ་གྱུར་ན། ། སྡིག་པ་དང་ནི་ཡང་དག་ལྡན། ། དངོས་གྲུབ་རབ་ཏུ་བརླག་པར་འགྱུར། ། རྟོག་པ་འདི་ཡི་ཚད་མ་རྣམས། ། སྙིང་པོ་རུ་ནི་རབ་ཏུ་སྒྲོགས། ། ཁྱབ་འཇུག་དྲག་པོ་དབང་པོ་ དང་། ། ཚངས་པ་ལ་སོགས་པ་དག་དང་། ། བྱང་ཆུབ་སེམས་དཔའ་རྣམས་དང་ནི། ། དྲང་སྲོང་སྣ་ཚོགས་དག་པ་དང་། ། ཀླུ་དང་དྲི་ཟ་ལྷ་རྣམས་ཏེ། ། རོ་ལངས་ནམ་མཁའ་ལྡིང་ལ་སོགས། ། དྲག་པོ་ལྷ་མིན་མི་འམ་ཅི། ། ཤ་ཟ་དང་ནི་སྲིན་པོ་སོགས། ། ཉི་མ་ ཟླ་བ་སྐར་མ་བཅས། ། འཇིག་རྟེན་སྐྱོང་བ་བགེགས་ཀྱི་རྒྱལ། ། མ་མོའི་དཀྱིལ་འཁོར་རྣལ་འབྱོར་མ། ། མཁའ་འགྲོ་མ་ནི་སྣ་ཚོགས་དང་། ། ལཱ་མ་དང་ནི་དུམ་སྐྱེས་མ། ། གཟུགས་ཅན་མ་ནི་སླར་ལྡོག་མ། །
BOའདོད་མ་སངས་རྒྱས་དབང་དང་ནི། ། གྲུབ་པའི་རིག་ པ་འཛིན་པ་དང་། ། གནོད་སྦྱིན་ཕོ་དང་གནོད་སྦྱིན་མོ། ། ཕྱོགས་ཆེན་དཔའ་མོ་ཨུ་མ་ལ། ། ཇི་ལྟར་བདེ་བར་རྩེ་ཞིང་རྩེ། ། དེ་ནས་གྲུབ་པའི་དཔའ་བོ་ཆེ། ། སྔགས་རྣམས་ཀྱིས་ནི་འདི་དག་གིས། ། དེ་ལྟར་གྲུབ་པའི་སྔགས་ཆེན་པོ། ། རིག་པ་ཡིས་ནི་རྣལ་འབྱོར་སྐྱེ། ། དཔལ་ཁྲག་འཐུང་མངོན་པར་འབྱུང་བ་ལས་རོ་ལངས་ཆེན་པོ་བསྒྲུབ་པའི་ཐབས་ལྷ་ཐམས་ཅད་དང་རྩེ་ཞིང་བདེ་བའི་ཆོ་གའི་ལེའུ་ཞེས་བྱ་བ་སྟེ་{བཅྭ་,བཅོ་}བརྒྱད་པའོ། ། ། ། དེ་ནས་ཡང་དག་བཤད་བྱ་བ། ། སྙིང་པོའི་སྔགས་སོགས་བཟླས་པ་ལ། ། ཕྲེང་བའི་རིགས་དང་ གྲངས་དག་དང་། ། ཆོ་གས་རྣལ་འབྱོར་བཟླས་པ་བྱ། ། ཤེལ་དང་ཉ་ཕྱིས་མུ་ཏིག་དང་། ། རུ་དྲཱ་ཀྵ་ནི་མཛེས་པ་ཡིན། ། རྡོ་རྗེའི་མིག་གིས་དངོས་གྲུབ་སྟེར། ། པུ་ཏྲ་ཛཱི་བ་ཀུན་ལ་བཤད། ། ནི་བར་ཏ་དང་ལུང་ཐང་དང་། ། ཚེ་རིང་ནད་མེད་འཕེལ་བ་ཡིན། ། དབང་ དུ་བྱེད་དང་ཞི་འདོད་དང་། ། ནོར་འཕེལ་བ་ནི་བྱེད་པ་ཡིན། ། བྱི་རུ་ཡིས་ནི་འཕེལ་བ་དང་། ། རིན་ཆེན་ཕྲེང་བས་མཛེས་པ་ཡིན། ། གསེར་གྱི་ཕྲེང་བ་དག་དང་ནི། ། སྒྲུབ་པོས་རིན་ཆེན་ཕྲེང་བ་བསྲེལ། །
BOརྒྱལ་པོའི་དོན་དུ་སྔགས་པས་བཟླས། ། དཔལ་ནི་ཆེ་བ་ཉིད་དུ་ཐོབ། ། དངོས་གྲུབ་ཐམས་ཅད་ཡོད་པ་དང་། ། ས་ཡི་དབང་པོར་ཐེ་ཚོམ་མེད། ། འབྱུང་པོའི་མཚན་ཉིད་དབང་དུ་བྱེད། ། ནོར་རྣམས་འགུགས་པར་བྱེད་པའོ། ། བྱ་རོག་སྒྲོ་ཡིས་བསྐྲད་པ་ཉིད། ། བོང་བུ་ཡིས་ནི་སྡང་བའོ། ། ཁྱི་དང་རྟ་ཡི་ཕྲེང་བ་ལ། ། སྒྲུབ་པོས་མེ་ ཏོག་གིས་ནི་མཆོད། ། རོ་ཡི་སྐྲ་ཡི་སྐུད་པ་དང་། ། བོང་བུའི་སྤུ་དང་ཡང་དག་ལྡན། ། སྐུད་པ་འདི་ཡིས་སྡང་བ་དང་། ། ཁྱི་ཡི་སྤུ་དང་བསྲེས་པས་ནི། ། དངོས་གྲུབ་ཐམས་ཅད་བྱེད་པ་ཡིན། ། གསེར་གྱི་སྐུད་པས་ཞི་བར་འགྱུར། ། ཡང་ན་རས་ཀྱི་སྐུད་པ་ནི། ། གཞོན་ནུ་མ་ཡིས་བཀའ་བ་ཡིན། ། གཟུགས་མཛེས་ཡོངས་སུ་རྫོགས་པ་དང་། ། གཙང་ཞིང་དྲན་ལྡན་འཇམ་པར་སྨྲ། ། དེ་ལྟའི་སྐུད་པའི་ཕྲེང་བས་ནི། ། གྲོལ་བའི་དངོས་གྲུབ་སྟེར་བར་འགྱུར། ། དཔལ་ལྡན་ཁྲག་འཐུང་མཆོད་པར་བྱ། ། སྤྱི་བོར་རི་བོང་ཅན་ གྱིས་མཚན། ། ཞི་ཞིང་ཞལ་ནི་བཞི་པ་སྟེ། ། འདོད་པ་ཀུན་གྱི་གཟུགས་བཟང་བ། ། དཔའ་བོ་ཐོད་པའི་ཕྲེང་བ་ཅན། ། སངས་རྒྱས་ནོར་བུས་གཙུག་ཕུད་བྱས། ། ལག་པས་ཁ་ཊྲཱྃ་ག་ནི་བཟུང་། ། མདུང་དང་རལ་པའི་ཅོད་པན་བྱས། །
BOརྒྱན་རྣམས་ཀུན་གྱིས་ རྣམ་པར་བརྒྱན། ། བརྒྱ་ཕྱེད་ཕྲེང་བས་མཚན་པ་སྟེ། ། ལྷ་ཆེན་ཆུང་མར་བཅས་པ་ཡི། ། སྟེང་ནས་མཉམ་པར་གནས་པ་ཡིན། ། སྟེང་ནས་གདུགས་དཀར་པོས་གཡོགས་ཏེ། ། ལྷ་ཡི་དྲི་ཡིས་བྱུགས་པ་དང་། ། ལྷ་ཡི་མེ་ཏོག་ལུས་ལ་མཆོད། ། ཕྱག་ནི་ འབུམ་ཕྲག་དང་ལྡན་པ། ། ལྷ་ཡི་ག་བུར་དྲི་ཡིས་ནི། ། ལུས་ལ་བདུག་ཅིང་བྱུགས་པའོ། ། མཁའ་འགྲོ་མ་ནི་སྣ་ཚོགས་པས། ། རྔ་ཡབ་གྱིས་ནི་གཡོབ་པ་ཡིན། ། རྣལ་འབྱོར་མས་ནི་མཉམ་པར་བསྐོར། ། ལཱ་མ་དང་ནི་དུམ་སྐྱེས་མ། ། རྡོ་རྗེ་ཕག་མོ་གཡོན་ལ་གནས། ། དཔལ་ནི་སྐྱེད་ཚལ་པདྨ་ནི། ། རྟག་ཏུ་མེ་ཏོག་འབྲས་བུ་གནས། ། འདོད་པའི་ཤིང་ལ་ལྕུག་མ་རྒྱས། ། ལྷ་དང་ལྷ་མིན་ཚོགས་ཀྱི་གནས། ། འདོད་པའི་རྗེས་ཆགས་སྐྱེ་བ་སྟེ། ། སྐྱེད་མོས་ཚལ་ན་དཔལ་མཆོག་སྟེ། ། སྤྲིན་གྱི་ཕྲེང་བ་ཕྱེད་ཀྱིས་བཀབ། ། འདོད་ པའི་རོ་ཡི་ཆར་པ་འབབ། ། འདོད་པའི་གནས་ནི་མཆོག་ཡིན་ཏེ། ། ཆགས་དང་བྱམས་པས་ཀུན་ཏུ་གང་། ། ཕོ་ཉ་ཀུན་དང་མཉམ་པར་སྤྱོད། ། དཔའ་བོ་དང་ནི་ཡང་དག་ལྡན། ། ནགས་ཀྱི་དབུས་ན་རྩེ་བ་སྟེ། ། དཔལ་ལྡན་རྡོ་རྗེ་འཆང་དབང་ཕྱུག ། གླུ་དང་གླིང་བུ་གར་ལ་སོགས། །
BOཟངས་དུང་སྒྲ་ནི་མཉམ་པའི་རིགས། ། རྔ་རིང་གི་ནི་སྒྲ་ལ་སོགས། ། ཆ་ལང་སྒྲ་ནི་ཆེན་པོ་དང་། ། རྫ་རྔར་བྱས་པའི་སྒྲ་དག་དང་། ། པ་ཊ་ཧ་ནི་བརྡུངས་པའི་སྒྲ། ། པི་ཝང་དགུ་པོ་རྒྱུད་མང་སྒྲ། ། རོལ་མོ་ཀུན་གྱི་སྒྲ་ཆེན་པོས། ། དཔལ་ཆེན་ བཅས་པར་རྩེ་བ་སྟེ། ། ཀུན་ཏུ་ཡོངས་སུ་ཁེངས་པ་ཡིན། ། དེ་ཡིས་སྦྱོར་བའི་དངོས་གྲུབ་འགྱུར། ། ཇི་སྲིད་སྙིང་པོ་སྐྱེས་ཀྱི་བར་དུའོ། ། དཔལ་ཁྲག་འཐུང་མངོན་པར་འབྱུང་བ་ལས་བཟླས་པའི་མཚན་ཉིད་དང་། ། མཆོད་པ་དང་རྩེ་བའི་རྩེད་མོའི་ཆོ་གའི་ལེའུ་ཞེས་བྱ་བ་ སྟེ་བཅུ་དགུ་པའོ། ། ། ། དེ་ནས་དངོས་གྲུབ་རྣལ་འབྱོར་ཆེ། ། སྦྱིན་སྲེག་ལས་ནི་རབ་བསྒྲུབ་པ། ། དངོས་གྲུབ་ཀུན་གྱི་དབང་ཕྱུག་རྒྱལ། ། སྦྱིན་སྲེག་གཉིས་མེད་དགང་བླུགས་ཀྱིས། ། མཉམ་མེད་སྐལ་བཟང་དེ་ཡི་ནི། ། དངོས་གྲུབ་ཀུན་ནི་སྐྱེ་བ་སྟེ། ། སྐྱེ་ཤི་རྒ་ དང་མྱ་ངན་དབུལ། ། མྱུར་བ་ཉིད་དུ་བརླག་པར་འགྱུར། ། རྒྱལ་པོའི་དོན་དུ་སྒྲུབ་པ་པོས། ། སྟོང་ཕྲག་བཅུ་ཡི་སྔགས་ནི་བཟླས། ། ཕོ་ཉའི་སྟེང་དུ་གནས་ནས་ནི། ། སྦྱིན་སྲེག་སྟོང་ཕྲག་ལྔ་རུ་བྱ། ། ཤ་ཆེན་དང་ནི་འོ་མར་བསྣོས། ། སྦྱིན་སྲེག་དགང་བླུགས་རིམ་པ་ཡིས། །
BOདཔག་ཚད་འབུམ་ཕྲག་བརྒྱ་ཡི་བར། ། གཡོག་འཁོར་ཕུན་སུམ་ཚོགས་པར་འགྱུར། ། དངོས་གྲུབ་ཆེན་པོ་རྒྱལ་དབང་དཔལ། ། མ་ཉམས་ཀུན་ཏུ་ཁྱབ་ཅིང་འགྲོ། ། སྔགས་པས་དུས་བཞི་རུ་ནི་གསོན། ། དེ་ལ་སུས་ཀྱང་གནོད་མི་ནུས། ། གཉིས་མེད་ཡེ་ཤེས་རྣལ་འབྱོར་གྱིས། ། སྟོང་ཕྲག་སུམ་ཅུ་རྩ་གཉིས་བཟླས། ། བ་ལང་ཤ་དང་ཤ་ཆེན་དང་། ། ཅེ་སྤྱང་ཤ་ཡིས་དགང་བླུགས་ནི། ། ཆང་དང་འོ་མ་མཉམ་པར་བསྣོས། ། སྦྱིན་སྲེག་འབུམ་ཕྲག་གཅིག་ཏུ་བྱ། ། གླིང་བདུན་གྱི་ནི་རྒྱལ་དབང་པོར། ། འདི་ཡིས་དཔལ་ཆེན་ལོངས་སྤྱོད་འགྱུར། ། ཇི་སྲིད་ སྙིང་པོ་རྒྱས་ཀྱི་བར། ། དེ་ནས་དངོས་གྲུབ་སྔགས་ཆེན་པོ། ། བརྒྱད་ལྷག་པ་ཡི་བརྒྱ་ནི་བཟླས། ། རྫས་དང་ཆོ་ག་རྫོགས་པ་ཡིས། ། དགང་བླུགས་སྟོང་ཕྲག་ལྷག་པར་བྱ། ། དཔའ་བོ་རྩ་བའི་སྔགས་ཀྱིས་ནི། ། འདི་ཉིད་དུ་ནི་དགང་བླུགས་བརྒྱ། ། བཟླས་པ་རབ་ཏུ་ སྦྱིན་བྱ་སྟེ། ། དཔའ་བོ་རྣལ་འབྱོར་མ་བཞིན་སྤུན། ། དེ་ལྟར་སྦྱིན་སྲེག་ཆོ་ག་བརྗོད། ། དེ་ནས་རབ་འཕེལ་སྔགས་ཤེས་པས། ། ས་སྟེང་གང་གིས་འགྲུབ་པར་འགྱུར། ། བསྐལ་པ་ཆེན་པོ་སྟོང་ཕྲག་གམ། ། དེ་བཞིན་བསྐལ་པ་སྟོང་ཕྲག་ཏུ། ། མ་ཉམས་སྔགས་པ་ཀུན་ ཁྱབ་སྤྱོད། །
BOཇི་ལྟར་ཇི་བཞིན་འགྲོ་བ་ཉིད། ། སྒྲུབ་པོས་ཉི་མ་རེ་རེ་རུ། ། རྟག་ཏུ་དགང་བླུགས་ལྔ་ཡིས་མཆོད། ། རྒྱལ་པོ་ཡུལ་འཁོར་དབང་དུ་འགྱུར། ། བཅུ་ཡིས་མི་དབང་རྒྱལ་པོ་དང་། ། སྡེ་ནི་སྟོབས་དང་བཅས་པ་ཀུན། ། དེ་རྣམས་མྱུར་དུ་དབང་དུ་འགྱུར། ། སྣ་ཚོགས་བདག་ཉིད་ནོར་དང་ནི། ། ས་ནི་སུམ་ཅུ་ཐམས་ཅད་དང་། ། གླིང་བདུན་རྣམས་ཀྱང་དབང་དུ་འགྱུར། ། རྒྱ་མཚོ་བདུན་ནི་མཐའ་གཏུགས་པར། ། ལོངས་སྤྱོད་ས་ནི་གསེར་རང་བཞིན། ། སུམ་ཅུ་ལྔ་ཡི་སྦྱིན་སྲེག་གིས། ། ས་འོག་བདུན་གྱི་ལྷ་མ་ཡིན། ། སྒྲུབ་ པོས་ཆུང་མར་བཅས་པ་ནི། ། མྱུར་བར་དབང་དུ་བྱེད་པར་འགྱུར། ། དེ་ལྟར་དངོས་གྲུབ་རྣལ་འབྱོར་ཆེ། ། དཔའ་བོ་དབང་ཕྱུག་དག་གིས་གསུངས། ། དེ་ནས་ཤ་ཡི་དགང་བླུགས་འབུལ། ། ཡང་ན་ཤ་ཆེན་དག་གིའོ། ། ཆང་དང་བཅས་ནས་བསྲེས་ནས་ནི། ། པདྨ་གཅིག་ཏུ་ སྦྱིན་སྲེག་བྱ། ། སྔགས་པས་ཡུལ་ནི་རྙེད་པར་འགྱུར། ། སུམ་བརྒྱ་ཡ་ནི་ཚད་ཀྱིས་སོ། ། འབུམ་ཕྲག་གསུམ་གྱི་སྦྱིན་སྲེག་གིས། ། འཛམ་བུ་གླིང་ནི་ཀུན་ཏུ་འཐོབ། ། འབུམ་ཕྲག་ལྔ་ཡི་དགང་བླུགས་ཀྱིས། ། གླིང་བདུན་དེ་ཡིས་ལོངས་སྤྱོད་འགྱུར། ། རྩེ་ཞིང་དངོས་གྲུབ་རྒྱལ་དབང་ པོ། །
BOཇི་སྲིད་སྙིང་པོ་རྒྱས་ཀྱི་བར། ། རྟག་པར་གསུང་བའི་ཆོ་གར་གནས། ། སྐལ་དམན་གྱིས་ཀྱང་འགྲུབ་པར་འགྱུར། ། དེ་ལྟར་གསུངས་པའི་སྦྱིན་སྲེག་ནི། ། སྔགས་དང་རྒྱུད་ཀྱི་བདག་ཉིད་ཆེ། ། དཔལ་ཁྲག་འཐུང་མངོན་པར་འབྱུང་བ་ལས་གླིང་བདུན་གྱི་འཁོར་ལོས་སྒྱུར་ བའི་རྒྱལ་པོའི་སྦྱིན་སྲེག་གི་ཆོ་གའི་ལེའུ་ཞེས་བྱ་བ་སྟེ་ཉི་ཤུ་པའོ། ། ། ། དེ་ནས་མངོན་སྤྱོད་ཀྱི་ནི་ལས། ། འདོད་པས་དཔའ་བོ་རྣམས་ནི་བསྟེན། ། དུག་ཁྲག་ཚ་བའི་མར་ཁུ་དང་། ། མི་ཡི་རུས་པས་སྦྱིན་སྲེག་བྱ། ། ཚེར་མའི་མེ་ནི་རབ་ཏུ་ སྦར། ། དེ་བཞིན་འབྲས་བུ་ཕུབ་མར་ལྡན། ། ཁྲོ་བ་རྒྱས་ཤིང་སྐྲ་ཡང་གྲོལ། ། གཅེར་བུ་ཁ་ཡང་ལྷོ་རུ་བལྟས། ། སྔགས་པས་གོས་ནི་ནག་པོ་བྱས། ། ཉི་མ་ཕྱེད་ན་མེ་ལ་ནི། ། དྲག་པོ་ལས་ཀྱི་སྦྱིན་སྲེག་བྱ། ། གཏུམ་པོའི་མེ་ལ་སེམས་གཅིག་གིས། ། ཇི་ལྟར་ནུབ་ མོའང་བྱ་བ་ཡིན། ། སྔགས་ཀྱི་མཐའ་ནི་མིང་དང་སྦྱར། ། ནུས་པ་གྲོལ་ཞིང་མྱུར་བར་དགུག ། སྟོབས་ལྡན་སྡེ་དང་བཅས་པ་ནི། ། མངོན་སྤྱོད་ཀྱིས་ནི་གསད་པར་བྱ། ། ཕོ་ཉ་དེ་ཉིད་རྣལ་འབྱོར་བདག ། འགྲུབ་པར་འགྱུར་བར་ཐེ་ཚོམ་མེད། ། འདི་ནི་གསད་པའི་ལས་ཡིན་ ཏེ། །
BOཕྱི་ནས་ལྷ་ལ་བཟོད་པར་གསོལ། ། འོ་མ་བིལ་བ་སྦྲང་རྩི་མར། ། ཏིལ་དང་ལྡན་པས་དགང་བླུགས་བྱ། ། དེ་ལྟར་དཔའ་བོ་རབ་ཏུ་ནི། ། ཡང་དང་ཡང་དུ་སྔགས་འདི་བཟླས། ། དེ་ནས་བསྐྲད་པ་རབ་ཏུ་བཤད། ། ཉི་མ་གཞན་ལ་ལས་བརྩམས་ཏེ། ། བྱ་རོག་སྒྲོ་ ཡིས་སྦྱིན་སྲེག་བྱ། ། དྲི་ཆེན་རོ་ནི་རྒྱ་ཆེན་དང་། ། ཤ་ཟའི་ཤིང་གིས་མེ་སྦར་ཏེ། ། རླུང་ཕྱོགས་ཁ་ནི་བལྟས་ཏེ་བསྐྲད། ། བདག་ཉིད་དུ་ནི་གནས་ནས་ནི། ། ཞག་བདུན་གྱིས་ནི་ཐེ་ཙོམ་མེད། ། རྣམ་པར་སྡང་བ་བཤད་པར་བྱ། ། སྔགས་པས་ནིམ་པའི་འདབ་མ་དང་། ། སྦྲུལ་གྱི་པགས་བརྗེས་ཡང་དག་ལྡན། ། བྱ་རོག་འུག་པའི་ཚང་དག་དང་། ། སྨྱོ་བྱེད་མེ་ནི་རབ་སྦར་ཏེ། ། བརྒྱད་ལྷག་བརྒྱ་ནི་གཞུག་པར་བྱ། ། འཇིགས་པ་ཐམས་ཅད་རྣམ་པར་དབྱེ། ། གཉེན་དང་བཤེས་རྣམས་གཏོང་བར་འགྱུར། ། དགུག་པའི་དོན་དུ་སྦྱིན་སྲེག་ནི། ། མཚན་གྱིས་འདི་བཞིན་བསམ་གཏན་བྱ། ། སེང་ལྡེང་མེ་ནི་རབ་ཏུ་སྦར། ། དུས་གསུམ་དུ་ནི་སྦྱིན་སྲེག་སྤྱོད། ། དེ་ཡི་མིང་ནི་ལན་ཅིག་བླང་། ། དེ་ལ་སྔགས་ཀྱིས་སྦྱོར་བ་སྟེ། ། རྟག་ཏུ་སྔགས་པས་སྦྱིན་སྲེག་བྱ། ། ངེས་པར་ཐམས་ཅད་འགུགས་པ་ཡིན། ། སྔགས་ པས་ནུབ་མོ་སྦྱིན་སྲེག་བྱ། །
BOའདོད་པས་ཕོ་ཉ་བཅས་པ་རུ། ། དེ་ཡིས་ཐམས་ཅད་འགྲུབ་པར་འགྱུར། ། ཕྱག་རྒྱ་ཡི་ནི་རྗེས་འཇུག་པས། ། ཕྱག་རྒྱ་ཡི་ནི་སྦྱོར་བར་འགྲུབ། ། རྟག་ཏུ་རྒྱལ་པོ་དབང་པོ་དང་། ། ཡང་དག་སངས་རྒྱས་ཕ་རོལ་གནོན། ། ཡེ་ཤེས་ གཟུགས་ནི་རྣལ་འབྱོར་ཆེ། ། འདོད་གཟུགས་མར་ནི་གྱུར་པ་སྟེ། ། ལྷ་མོ་ཆེན་མོ་ལྷ་མ་ཡིན། ། ཀླུ་མོ་ཉིད་ཀྱི་བུ་མོར་འདོད། ། སྲིན་མོ་དང་ནི་ཉེ་སྲིན་མོ། ། དྲི་ཟ་དང་ནི་གནོད་སྦྱིན་མོ། ། མི་རྣམས་ཉིད་ནི་ཐམས་ཅད་དུ། ། འཇིག་རྟེན་གསུམ་ནི་དབང་དུ་འགྱུར། ། དྲུག་ ཅུ་རྩ་བཞི་རབ་སྦྱར་བས། ། རྣལ་འབྱོར་ཕྱག་རྒྱ་ལ་ནི་རྩེ། ། བཟའ་དང་བཏུང་དང་རྙེད་དང་འཇིགས། ། འདི་རྣམས་ཀུན་ནི་ཡོངས་སུ་གཏང་། ། དེ་ཉིད་དོན་དམ་ཡེ་ཤེས་ཏེ། ། དེ་ཉིད་དོན་དམ་གོ་འཕང་ཡིན། ། དེ་ཉིད་དོན་དམ་སངས་རྒྱས་ཉིད། ། དེ་ཉིད་དོན་དམ་བདེ་བ་སྟེ། ། གཞན་དུ་ཡོད་པར་མི་བརྗོད་དོ། ། དམ་ཚིག་ཉེ་བར་སྤྱད་པ་ཡིན། ། རྟག་ཏུ་གཉིས་མེད་ཕྱག་རྒྱར་བཅས། ། ཕོ་ཉ་མཆོད་པས་རབ་ཏུ་འཕེལ། ། སྒྲུབ་པོས་མཆོད་པ་ཙམ་གྱིས་ནི། ། དངོས་གྲུབ་ཀུན་ནི་ཤིན་ཏུ་བྱེད། ། ཕོ་ཉ་སྨད་པར་མི་བྱ་སྟེ། ། སྒྲུབ་པོས་ཐམས་ཅད་ འགུགས་པ་ཡིན། །
BOརྒྱབ་དང་སྨད་དང་བཅས་པ་དང་། ། ལོངས་སྤྱོད་སྡིག་པས་གོས་མི་འགྱུར། ། ཕོ་ཉས་ལྷན་ཅིག་སྐྱེས་དངོས་གྲུབ། ། གསང་བའི་མཆོད་པ་རབ་ཏུ་འཕེལ། ། རྣལ་འབྱོར་སྦྱོར་བྲལ་མི་བྱ་སྟེ། ། འདི་རྣམས་སྔགས་ནི་སྨྲས་པ་ཡིན། ། དཔལ་ཁྲག་ འཐུང་མངོན་པར་འབྱུང་བ་ལས་ཕྲིན་ལས་བཞིའི་སྦྱིན་སྲེག་གི་ཆོ་གའི་ལེའུ་ཞེས་བྱ་བ་སྟེ་ཉི་ཤུ་རྩ་གཅིག་པའོ། ། ། ། དེ་ནས་ཡང་དག་བཤད་པར་བྱ། ། རོ་ལངས་ཆེན་པོ་སྒྲུབ་པའི་ཐབས། ། དཔལ་ལྡན་ཁྲག་འཐུང་རྣལ་འབྱོར་ཆེ། ། འཁོར་ལོ་ཀུན་ལ་རྣམ་པར་ གནས། ། མི་ཡི་མར་ཁུ་དེ་ཡི་ཤ། ། སྲེག་བླུགས་བརྒྱ་རྩ་བརྒྱད་བླུགས་བྱ། ། དེ་རུ་རྡོ་རྗེ་ཕག་མོ་བྱིན། ། མཁའ་འགྲོ་མ་ཡི་འཁོར་གྱིས་བསྐོར། ། རོ་ལངས་སྲིན་པོས་ཡང་དག་གང་། ། བསྲེགས་པ་རྒོད་ཅིང་འཇིགས་པར་བྱེད། ། ཅེ་སྤྱང་སྣ་ཚོགས་ང་རོ་ཆེ། ། ཡོངས་སུ་ བསྐོར་ནས་འཇིགས་པར་སྒྲོགས། ། སྲིན་པོས་བཀྲམ་ནས་སྡིགས་པར་བྱེད། ། འཇིགས་པའི་དབྱངས་ཀྱིས་སྡིགས་པར་བྱེད། ། དེ་མཐོང་འཇིགས་པར་མི་བྱ་སྟེ། ། ལུས་ཀྱི་སྔགས་ཀྱི་ང་རྒྱལ་བྱ། ། དཔའ་བོ་ཆེན་པོ་ལེགས་ཞེས་བརྗོད། ། བདག་ཉིད་ རྡོ་རྗེ་སེམས་བརྟུལ་ཞུགས། ། སྒྲུབ་པོ་ཡིད་ལ་ཅི་འདོད་པའོ། །
BOདེ་ལ་མཆོག་ནི་བརྒྱ་སྟེར་ཏེ། ། དེ་ཡི་གནས་སུ་དཔའ་བོ་འགྲོ། ། རྣལ་འབྱོར་མ་ཡིས་ཡོངས་སུ་བསྐོར། ། དེ་ནས་དེ་མ་ཐག་ཉིད་དུ། ། འཇིག་རྟེན་གསུམ་ལ་སྤྱོད་པར་འགྱུར། ། རང་ཉིད་ལྷ་ཡི་ལུས་སུ་སྐྱེ། ། དཔལ་ ཆེན་སྐལ་བཟང་འདོད་པའི་གཟུགས། ། རྟག་ཏུ་དེ་བཞིན་གཤེགས་པ་ཀུན། ། ནམ་མཁར་ཀུན་ཏུ་སྤྱོད་པ་ཉིད། ། ནད་དང་འཆི་བ་རྣམ་པར་སྤང་། ། གནས་ཀུན་ལ་ནི་སྤྱོད་པ་སྟེ། ། འདི་རྣམས་ལས་ནི་དམ་པ་མཆོག ། རྣལ་འབྱོར་མ་དང་དཔའ་བོས་བཤད། ། གནས་ ལས་རྣམ་པར་རྒྱལ་བར་འགྲུབ། ། དེ་ནས་དཔལ་ཆེན་ལས་རྒྱས་བྱས། ། རྡོ་རྗེ་སེམས་དཔའ་བདག་ཉིད་ཆེ། ། རྡོ་རྗེ་སེམས་དཔའི་གོ་འཕང་འཐོབ། ། དེ་ཡི་ལས་ནི་རབ་ཏུ་འགྲུབ། ། གང་གིས་བཟླས་མེད་རྒྱུད་ཀྱང་མེད། ། སྤྱོད་པ་མེད་ཅིང་སྨྱུང་བ་མེད། ། ཡིད་ཀྱིས་མ་ལུས་ པར་བྱས་ནས། ། སེམས་དཔའ་ཆེན་པོ་འགྲུབ་པར་འགྱུར། ། དཔལ་ཁྲག་འཐུང་མངོན་པར་འབྱུང་བ་ལས་རོ་ལངས་ཆེན་པོའི་སྒྲུབ་ཐབས་ཀྱི་ཆོ་གའི་ལེའུ་ཞེས་བྱ་བ་སྟེ་ཉི་ཤུ་རྩ་གཉིས་པའོ། ། ། ། དེ་ནས་དགུག་པ་བཤད་པར་བྱ། ། མདོར་བསྡུས་པ་སྟེ་རྒྱས་པར་མིན། ། བདག་ཉིད་ཁྲག་འཐུང་རྣལ་འབྱོར་གྱིས། ། འགྲུབ་པར་འགྱུར་ཏེ་ཐེ་ཙོམ་མེད། །
BOཐོད་པ་དུམ་བུ་གཅིག་པ་སྟེ། ། སྐྱོན་ཀུན་མེད་ཅིང་མཛེས་པ་ལ། ། བསྒྲུབ་བྱའི་ལུས་ནི་བྲི་བར་བྱ། ། དེ་བཞིན་བརྒྱ་ཕྱེད་འདབ་མ་ལ། ། སྔགས་དང་མིང་ནི་ལྷན་ཅིག་ཏུ། ། ཁྲག་ཆེན་དང་ནི་ མཉེས་ནས་སུ། ། གསེར་གྱི་སྨྱུ་གུས་ནང་དུ་བྲི། ། སྔགས་ནི་གི་ཝང་ཁུ་བས་སོ། ། སྟེང་ནས་འཁོར་ལོ་ཁ་སྦྱོར་ཡིན། ། སྙིང་པོ་བཟློག་སྟེ་བསྒྲུབ་པར་བྱ། ། སྔགས་ནི་བཟླས་ཤིང་གཞུག་པར་བྱ། ། སྔགས་པས་ནམ་ཕྱེད་དུ་གནས་ཏེ། ། འདབ་མ་གཅིག་ནི་ཡང་དག་ བླང་། ། ལུས་ཀྱི་སྔགས་ཀྱི་ང་རྒྱལ་གྱིས། ། འདབ་མ་བརྒྱ་ནི་སྦྱིན་སྲེག་བྱ། ། སེམས་ཀྱིས་ཡིད་ལ་ཅི་འདོད་པ། ། སྦྱིན་སྲེག་ཕོ་ཉའི་ཡེ་ཤེས་དང་། ། གཏོར་མ་སྦྱིན་པའི་བྱེ་བྲག་དང་། ། གཉིས་མེད་ཡེ་ཤེས་རྣལ་འབྱོར་གྱིས། ། ཕྱག་རྒྱ་བཅིང་བ་བསམ་པར་བྱ། ། བསྒྲུབ་བྱ་དེ་ཡིས་འགུགས་པར་འགྱུར། ། རྒྱལ་པོའི་བུ་མོ་བུད་མེད་མཆོག ། འཁོར་ལོས་སྒྱུར་བར་བཅས་པ་དང་། ། གཞན་དུ་བྱ་བ་བརྟག་མི་དགོས། ། དངོས་གྲུབ་འདི་རྣམས་མཆོག་ཏུ་གསང་། ། རྣལ་འབྱོར་མཆོག་ནི་མངོན་དུ་བསྒྲུབ། ། མདུན་དུ་དགྱེས་བྱེད་ མཆོག་གིས་སོ། ། ཡང་ན་ལས་མཆོག་དམ་པ་དག ། སྒྲུབ་པོས་བསྒྲུབ་བྱའི་ལུས་དག་ནི། །
BOཙན་དན་དམར་པོའི་རང་བཞིན་ལས། ། གཟུགས་བརྙན་དག་ནི་རབ་ཏུ་བྱས། ། རང་གི་ཁྲག་དང་གི་ཝང་གིས། ། མངོན་པར་བྲིས་ཏེ་སྙིང་གར་གཞག ། ཚ་བ་གསུམ་གྱིས་ ལུས་ནི་བྱུག ། ཟངས་ཀྱི་ཁབ་ཀྱིས་བསྒྲུབ་བྱ་ཡི། ། སྙིང་དང་ལྟེ་བ་གསང་བ་རུ། ། གནས་གསུམ་དག་ནི་ཕུག་པ་སྟེ། ། ནམ་ཕྱེད་ཀྱི་ནི་དུས་དག་ཏུ། ། སྙིང་པོའི་སྔགས་ནི་གོ་བཟློག་བཟླས། ། གང་འདོད་དེ་ནི་འགུགས་པར་འགྱུར། ། སེང་ལྡེང་མེ་ལ་དེ་སྲིད་ གདུང་། ། སྔགས་ནི་རྗེས་སུ་དྲན་པ་ཡིས། ། བསྒྲུབ་བྱ་མྱུར་དུ་འོང་བར་འགྱུར། ། གནས་དེར་སངས་རྒྱས་འཇིག་རྟེན་སོགས། ། རྡོ་རྗེ་སེམས་དཔའ་དག་ཀྱང་ནི། ། རླུང་གི་ཤུགས་ཀྱིས་འོང་བར་འགྱུར། ། སྔགས་འདི་དག་ནི་དྲན་ཙམ་གྱིས། ། འཇིག་རྟེན་ གསུམ་ནི་དབང་དུ་འགྱུར། ། ནམ་མཁའི་བྱ་ཡང་ལྷུང་བར་འགྱུར། ། ཤིང་རྣམས་ཀྱང་ནི་གུས་པར་འགྱུར། ། ཆུ་ནི་རྒྱུན་ལས་ལྡོག་པ་སྟེ། ། འཁྲུལ་འཁོར་དང་ནི་གླང་ཆེན་དང་། ། རྟ་དང་སྦྲུལ་དང་སྤྲེའུ་དག་དང་། ། མཚོ་ཡི་རླབས་ནི་འཆིང་བར་བྱེད། ། ཇི་ལྟར་ཐང་ལ་ འགྲོ་བ་བཞིན། ། དེ་ལྟར་ཆུ་ལ་འགྲོ་བར་འགྱུར། ། གསེར་གྱི་བཙག་གིས་བྷ་ག་བྲི། ། དེ་སྟེང་ལག་པ་གཡོན་པ་ནི། །
BOབཞག་སྟེ་བརྒྱ་རྩ་བརྒྱད་བཟླས་བྱ། ། གང་གི་མིང་ནི་གཟུང་ན་ནི། ། དེ་ནི་དེ་མ་ཐག་ཏུ་འོང་། ། རང་གི་མལ་སྟན་ལ་གནས་ཏེ། ། ལག་པ་གཡོན་པར་རང་ རྟགས་གཟུང་། ། གང་གི་མིང་བརྒྱ་རྩ་བརྒྱད་བཟླས། ། དེ་ནི་དེ་མ་ཐག་ཏུ་ནི། ། སངས་རྒྱས་དཀར་མོ་དེ་བཞིན་དུ། ། རབ་ཏུ་འདོད་པར་འགྱུར་བ་ཡིན། ། དཔལ་ལྡན་རྡོ་རྗེ་ཕག་མོ་ནི། ། དྲན་པས་འཇིགས་པར་འགྱུར་བ་སྟེ། ། བཟླས་ཤིང་བརྩེ་བས་སྦྱར་ བས་ནི། ། རིག་པ་ཀུན་ཡང་རྨོངས་པར་བྱེད། ། གང་གིས་རིག་པ་སྦྱོར་དན་པས། ། འཇིག་རྟེན་གསུམ་ནི་དཀྲུག་པར་བྱ། ། རིག་པ་འདི་རྣམས་ཞེས་བྱ་བ། ། དཔལ་ལྡན་ཕག་མོ་ཞེས་བྱ་བ། ། རྨོངས་དང་དབྱེ་བ་འདི་རྣམས་ནི། ། ཁམས་གསུམ་དབང་དུ་བྱེད་པའོ། ། བཀླགས་ཤིང་བཤད་པས་དངོས་གྲུབ་སོགས། ། དངོས་གྲུབ་ཀུན་བྱེད་འཇིགས་པ་ཡིན། ། བཤེས་དང་བུ་མོ་རིགས་སེགས་ལ། ། སྔགས་འདི་བརྗོད་པར་མི་བྱའོ། ། ཐམས་ཅད་ཅི་བགྱིར་འགྱུར་བ་སྟེ། ། སྒྲུབ་པོ་མཐོང་བས་ངེས་པར་ལྟུང་། ། མི་མོའི་མཚམས་ལས་འཛག་ འགྱུར་ཏེ། ། རྟག་ཏུ་ངོ་ཚ་བཏང་བར་འགྱུར། ། གོས་མེད་སྐྲ་ནི་གྲོལ་བ་དང་། ། ནུ་མཁྲང་བདག་ཉིད་གཞན་དབང་འགྱུར། ། ལུས་ལ་རེག་པ་མཐའ་དག་དགོད། །
BOདེ་བཞིན་གཤེགས་པ་དང་མཉམ་འགྱུར། ། དཔལ་ཁྲག་འཐུང་མངོན་པར་འབྱུང་བ་ལས་དཔལ་རྡོ་རྗེ་ཕག་ མོའི་རྩ་བའི་སྔགས་ཀྱིས་དགུག་པའི་ཆོ་གའི་ལེའུ་ཞེས་བྱ་བ་སྟེ་ཉི་ཤུ་རྩ་གསུམ་པའོ། ། ། ། དེ་ནས་ཀུན་ཏུ་འབད་པ་ཡིས། ། ཕྱག་རྒྱ་ཆེན་པོ་རབ་སྒྲུབ་པ། ། གང་གིས་རྣམ་པར་ཤེས་ཙམ་གྱིས། ། སྒྲུབ་པོས་དངོས་གྲུབ་ཐོབ་པར་འགྱུར། ། མཆེ་གཙིགས་མ་ཡི་ཕྱག་རྒྱ་ཡིས། ། སྒྲུབ་པོ་འདོད་པའི་ཚུལ་གྱིས་སུ། ། ས་རྣམས་ཀུན་ལ་ངེས་པར་སྤྱོད། ། ལྷ་དང་ལྷ་མིན་མི་རྣམས་ནི། ། ཐམས་ཅད་དཀྲུགས་ནས་དེ་ཡིས་ནི། ། འདོད་པའི་དངོས་གྲུབ་རབ་ཏུ་སྟེར། ། བརྟུལ་ཞུགས་མེད་ཅིང་སྨྱུང་བ་མེད། ། བསམ་གཏན་དང་ནི་ལྡན་པ་མེད། ། རྗེས་སུ་ དྲན་པ་ཙམ་གྱིས་ནི། ། འཇིག་རྟེན་གསུམ་ནི་དབང་དུ་འགྱུར། ། གང་གིས་སྐྱེ་བའི་གོ་འཕང་མཐོང་། ། ལུས་ལ་ས་བོན་བཀོད་པས་ནི། ། འཇིགས་ཤིང་སྐྲག་ལ་བརྒྱལ་བར་འགྱུར། ། རྣམ་པར་རྨོངས་ཤིང་འཛུམ་པ་སྟེ། ། འདོད་པས་མྱོས་པའི་སྐྱེ་བོ་རྣམས། ། བུད་མེད་ ཉིད་དུ་གྱུར་པ་ནི། ། སྒྲུབ་པོས་མཐོང་བས་དགྱེས་པར་འགྱུར། ། སེམས་ནི་རབ་ཏུ་མྱོས་པར་སོང་། ། རིག་པ་འདི་ཞེས་བྱ་བ་ནི། ། དཔལ་ལྡན་རྡོ་རྗེ་ཕག་མོ་ལས། །
BOངེས་པ་རུ་ནི་འབྱུང་བ་སྟེ། ། སེམས་ཅན་ཐམས་ཅད་དཀྲུག་པ་ཡིན། ། རང་འབྱུང་སངས་ རྒྱས་ཀྱིས་ནི་གསུངས། ། སྣ་ཚོགས་རིག་པ་དེ་ཡིས་ནི། ། ལན་ཅིག་བཟླས་ཤིང་བསྒྲུབ་པར་བྱ། ། དེ་བཞིན་གཤེགས་པ་འདྲ་བར་ནི། ། འཇིག་རྟེན་པ་ཡིས་མཐོང་བར་འགྱུར། ། རིག་པས་འགུགས་ཤིང་དེ་ནས་འོང་། ། དེ་མ་ཐག་ཏུ་བརྒྱལ་བ་དང་། ། ལྟུང་ཞིང་འཆི་ བར་འགྱུར་བ་ཡིན། ། གསུངས་པའི་འདབ་མ་ཡང་དག་བླང་། ། འཁོར་ལོ་བདག་གིས་མངོན་པར་བྲི། ། བྱ་རོག་སྒྲོ་ཡི་སྨྱུ་གུས་ནི། ། མིག་གི་ཆུ་ཡིས་ཡང་དག་བྲི། ། གང་གིས་རླུང་གིས་འཐོར་བ་རུ། ། སྙིང་པོ་བཟློག་ལ་བཟླས་པ་བྱ། ། སྟེང་དུ་རླུང་གི་འཁོར་བ་སྟེ། ། བརྒྱ་བྱིན་ཡང་ནི་སྐྲག་པར་འགྱུར། ། དགྲ་བོ་ལ་ནི་མངོན་སྤྱོད་དོ། ། དཔལ་ཁྲག་འཐུང་མངོན་པར་འབྱུང་བ་ལས་རྡོ་རྗེ་ཕག་མོའི་གོ་བཟློག་པའི་སྙིང་པོའི་དགུག་པ་དང་བསྐྲད་པའི་ཆོ་གའི་ལེའུ་ཞེས་བྱ་བ་སྟེ་ཉི་ཤུ་རྩ་བཞི་པའོ། ། ། ། དེ་ནས་མཁའ་འགྲོ་མ་ཡི་ནི། ། མཚན་ མ་རུ་ནི་འགྱུར་བ་སྟེ། ། པྲོ་ཏང་གི་ནི་ཕྱག་རྒྱ་ཞེས། ། གཉིས་པ་པྲ་ཏི་པྲོ་ཏང་གི། ། བདེ་འམ་ཞེས་ནི་བྱ་བ་ཡིན། ། ཕྱག་རྒྱར་ཡང་ནི་འགྱུར་བ་སྟེ། །
BOདཔའ་བོ་ཆེན་པོའི་བརྡ་ཡིན་ནོ། ། ག་མིན་ཞེས་བྱ་བ་ནི་འགྲོ་བ་ཡིན་ནོ། ། ཨཱ་ག་མ་ཞེས་བྱ་བ་ནི་འོང་བའོ། ། དེ་ཧི་ཞེས་བྱ་ བ་ནི་ཆང་གི་བཏུང་བའོ། ། གྲི་ཧྱཾ་ནི་གནས་སོ། ། ཙ་རུ་ཀ་ནི་སྟོན་མོ་མེད་ཅེས་བྱའོ། ། བྲུ་ཙ་ནཾ་ཞེས་བྱ་བ་ནི་གཏོར་མའོ། ། ཙ་རུ་ཀ་ནི་ཁྱིམ་འདི་ཞེས་བྱ་བའོ། ། ན་ཞེས་བྱ་བ་བཟང་བའོ། ། པུ་ཏ་ཀ་ཞེས་བྱ་བ་གཏོར་མའོ། ། བུན་ཛནྟི་ཞེས་པ་ཀུན་ཏུ་མཛེས་པའོ། ། ཙ་ར་ཀ་ནི་ མཉམ་པར་འགྲོ་བའོ་ཞེས་བྱ་བར་གསུངས་སོ། ། སྨ་ར་ན་མ་ནི་ངག་གིས་བཤིག་པའོ། ། ཀ་ཏྱ་ནི་བུ་མོའོ། ། ཌ་ཧ་ནི་འོ་བྱེད་པའོ། ། གྷ་དྷ་ནི་གཡོགས་པའོ། ། སྭ་ར་ཤ་ནི་གཡོན་པའོ། ། ཨེ་ཏད་ཏ་ནི་བཟའ་བ་དང་བཅའ་བའོ། ། བལ་ནི་ཀ་ནི་དམ་ཚིག་གོ། ། སི་ར་ནི་མཆོད་ པའོ། ། ཨཱ་ལི་ཀཾ་བདེན་པར་གསུངས་པའོ་ཞེས་གསུང་བར་འགྱུར་བའོ། ། ལཱ་ལ་ནི་ཁྲོ་བ་ཞེས་གསུང་བར་འགྱུར་རོ། ། ས་སྲ་བ་ཎཾ་རྣ་བ་ཞེས་གསུངས་སོ། ། ས་ཏ་ནི་སྲོག་ཅེས་སུ་ཤེས་པར་འགྱུར་རོ། ། ཤཱ་སྟྲི་ནི་ཆུང་མ་ཞེས་སུ་གསུངས་སོ། ། བྷ་གི་ནི་ བུ་མོ་དང་སྦྱོར་བར་འགྱུར་རོ་ཞེས་སུ་བརྗོད་པར་འགྱུར་རོ། ། ཨ་ཤྭ་ཏཱཾ་ནི་བུད་མེད་ཀྱི་ནུ་མའོ། ། བ་ལཿཏ་ཀ་ནི་སྐྱེས་བུའོ། །
BOབ་ལ་ཧ་ཀ་ནི་དེ་དག་འཁྲུད་པའོ། ། ཀཱ་ན་ཏཱ་ནི་མའོ། ། ཏཱ་ལི་ཀ་ནི་མཁའ་འགྲོ་མའོ། ། ཀ་ནྱ་ནི་འདོད་པའི་སྐྱེས་བུའོ། ། མེ་ར་ནི་ཡོད་པའོ། ། བཱ་ས་ཀ་ནི་ དཀྱིལ་འཁོར་རོ། ། ན་ར་ཀ་ཞེས་པ་དུར་ཁྲོད་དོ། ། ཀ་ཁཱི་ནི་སྒོའོ། ། ཤབ་ནི་བྲམ་ཟེའོ། ། བི་ར་དྷི་ནི་རྒྱལ་རིགས་སོ། ། ཙ་ར་དྷི་ནི་རྗེ་རིགས་སོ། ། ཀུ་ར་ནི་དམངས་རིགས་སོ། ། ཨན་ཏ་སྠཾ་ནི་གཏུམ་མོའོ། ། གྲྀ་ཧེ་ནི་ཕྱུགས་སོ། ། ཧི་ཧི་ཞེས་པ་གསོད་པའི་སྟོན་མོའོ། ། ཌཱ་ཀི་ནི་འདུས་པའོ། ། ཨུ་ད་ཀཾ་ནི་ཟླ་བའི་བཏུང་བའོ། ། གྲྀཧྞ་ནི་ཕྱག་རྒྱ་རྣམས་སོ། ། ཛི་ཧྭ་ནི་རོའོ། ། སོ་ལ་རེག་པ་ནི་ལྟོགས་པ་ཞེས་བརྗོད་པའོ། ། ཨན་ཏྲཾ་ཞེས་པ་ནི་འགྲངས་པའོ། ། གནྡ་བ་སི་ནི་གནས་པའོ། ། བི་མ་ལ་ཞེས་པ་ནི་ཆེ་གེ་མོའི་གནས་སོ། ། ཀིར་ཎ་ནི་ མེ་ཏོག་གོ། ། རྒོད་པ་ནི་ཁྲོ་བར་བརྗོད་པའོ། ། ལཾ་པོ་ད་རཿསོ་ཞེས་པར་གསུང་བར་འགྱུར་རོ། ། མུ་ཁ་ནི་ཚོས་མཁན་དུ་འགྱུར་རོ། ། ཛི་ཧྭ་ནི་མི་འཇིགས་པར་གསུངས་སོ། ། ཨ་ད་ན་ནི་སོའི་ཕྲེང་བའོ། ། དྷཱ་ཛ་ནི་ཚན་དྷོ་ཧའོ། ། ཙ་ལ་ནི་རླུང་ངོ་། ། པ་ཤུ་ནི་{རི་དགས་,རི་དྭགས་}སོ། ། མཱི་ས་ཡན་ཏི་ནི་དཀྱིལ་འཁོར་རོ། །
BOས་མཾ་ནི་བཞི་མདོའོ། ། གོ་ཏ་ནི་ཁྲག་གོ། ། མ་ཧཱ་ཥ་བ་ས་ནི་མི་འགྱུར་བ་ཆེན་པོའོ། ། ཨ་ཧི་ཞེས་བྱ་བ་ནི་དབང་ཕྱུག་ཆེན་པོའོ། ། སི་དྷ་ནི་རྣམ་གྲངས་སོ། ། ཁ་ལ་རེག་ན་ལྟོགས་པ་ཞེས་པའོ། ། སོ་ལ་རེག་པ་ནི་ཚིམ་ཞེས་པའོ། ། ཨཌྷྱ་ནི་དབུལ་པོ་ཞེས་སུ་གསུངས་སོ། ། གསང་བར་རེག་ན་འཁྲིག་པའོ། ། བརླ་ལ་རེག་ན་གྱིས་ཞེས་པའོ། ། འོག་ཏུ་བལྟས་ན་མེད་ཅེས་པའོ། ། སྟེང་དུ་ཅེས་པའོ། ། མཁའ་འགྲོ་མ་རྣམས་ཀྱི་མཚན་མའོ། ། དཔལ་ཁྲག་འཐུང་མངོན་པར་འབྱུང་བ་ལས་ གསང་བའི་བརྔའི་ཆོ་གའི་ལེའུ་ཞེས་བྱ་བ་སྟེ་ཉི་ཤུ་རྩ་ལྔ་པའོ། ། ། ། དེ་ནས་མཆོད་པའི་བྱེ་བྲག་རྣམས། ། གཡོན་ནས་བྱུང་བས་བྱ་བ་སྟེ། ། ཆོ་ག་ཤེས་ནས་ཕྱག་གི་ལན། ། དཔའ་བོ་རྣལ་འབྱོར་མ་ལས་བྱུང་། ། ས་ནི་སྤྱན་མར་བཤད་པ་ཡིན། ། ཆུ་ཁམས་མཱ་ མ་ཀཱི་རུ་བརྗོད། ། གོས་དཀར་མོ་དང་སྒྲོལ་མ་ནི། ། མེ་དང་རླུང་དུ་རྣམ་པར་གནས། ། འོ་བྱེད་མ་ནི་སྟོང་པའོ། ། དེ་བཞིན་ཕ་རོལ་ཕྱིན་པའོ། ། མཛུབ་མོའི་ལྕགས་ཀྱུའི་སྤྱན་མ་སྟེ། ། མཐེ་བོང་མཱ་མ་ཀཱི་རུ་བརྗོད། ། གུང་མོ་གོས་དཀར་མོ་རུ་བརྗོད། ། མཐེའུ་ཆུང་ ལ་ནི་སྒྲོལ་མར་སྦྱར། ། མིང་མེད་ལ་ནི་ཕ་རོལ་ཕྱིན། །
BOདཔའ་བོ་རྣལ་འབྱོར་དབུས་སུ་མཐོང་། ། གནས་ལ་སོགས་པའི་རྣལ་འབྱོར་མ། ། ཐམས་ཅད་རྒྱབ་ཏུ་གཤེགས་སུ་གསོལ། ། དེ་ལྟར་གཡོན་པ་ཁྱད་པར་ཅན། ། སློབ་མ་རྣམས་ནི་བདག་ཉིད་ཆེ། ། རྡོ་རྗེ་ སེམས་དཔའ་ཐབས་ཆེན་དང་། ། དེ་བཞིན་གཤེགས་པ་རྣམ་སྣང་མཛད། ། གསུམ་པ་པདྨ་གར་དབང་ཕྱུག ། བཞི་པ་ཧེ་རུ་ཀ་རུ་བརྗོད། ། ལྔ་པ་ནམ་མཁའི་སྙིང་པོ་སྟེ། ། དྲུག་པ་ལ་ནི་རྟ་མགྲིན་ནོ། ། དེ་བཞིན་ཁྲོ་བོའི་རྡོ་རྗེ་མཆོག ། འཁོར་ལོའི་གནས་ ལ་བལྟ་བར་བྱ། ། བྱ་བ་ཐམས་ཅད་སྒྲུབ་པ་ལ། ། རང་མིང་བརྗོད་པའི་སྔགས་དང་ནི། ། ཧཱུྃ་ཧཱུྃ་ཕཊ་ཡིག་སྦྱར་བ་ཡིན། ། གཤིན་རྗེའི་ཕྱོགས་ནས་བརྩམས་ནས་ནི། ། ཇི་སྲིད་བདེན་བྲལ་གྱི་ནི་བར། ། གཡོན་པའི་ཀུན་སྤྱོད་འདི་རྣམས་འདོད། ། མཁའ་འགྲོ་མ་ནི་མཉམ་པར་གནས། ། འདི་རྣམས་རང་གི་རིགས་དང་ནི། ། ཕྱག་རྒྱ་དང་ནི་ཁ་དོག་རིགས། ། རིགས་ཀྱི་རིག་པ་ཡི་གེ་ཉིད། ། གང་ཕྱིར་དེ་ཡི་རིགས་སུ་འགྱུར། ། རང་གི་ཕྱག་རྒྱ་བཅིངས་པ་ཡིན། ། སྨྲ་བ་རང་གི་རིགས་ནི་བརྗོད། ། བུད་མེད་གང་ཞིག་གཡོན་དུ་འགྲོ། ། རྟག་ཏུ་མཁའ་འགྲོ་མ་ནི་གཡོན། ། ངག་ནི་རབ་ཏུ་ཆེན་པོར་སྨྲ། ། གཡོན་པའི་ལྟ་བས་ཀུན་ཏུ་བལྟ། །
BOབུད་མེད་རྣམས་ལ་དགྱེས་པར་སྨྲ། ། དེ་ནི་དམ་ཚིག་ཞེས་སུ་བརྗོད། ། བུད་མེད་རྣམས་ལ་གསོལ་བ་གདབ། ། རིགས་ཀྱི་ས་བོན་རབ་ཏུ་བརྗོད། ། རིགས་ཀྱི་བྱ་བ་གཏང་མི་བྱ། ། རང་གི་བསྟན་བཅོས་བརྗོད་ མི་དོར། ། རང་གི་རིགས་ཀྱི་རིག་པ་བཟླས། ། དེ་བཞིན་དུ་ནི་དམ་ཚིག་བསྟན། ། གང་ཞིག་ཕྱག་ནི་བྱེད་པ་ནི། ། རྟག་ཏུ་གཡོན་པ་ཡིས་ནི་བྱ། ། བུད་མེད་རྣམས་དང་མཐུན་པར་བྱ། ། དེ་ཡིས་ངེས་པར་བདེན་པར་འབྱུང་། ། རྐང་པ་གཡོན་པའི་མཐེ་བོང་ གིས། ། ས་ལ་བརྐོ་ཞིང་རི་མོ་འདྲི། ། ལག་པ་གཡོན་པ་རང་ཕྱོགས་ཀྱི། ། སྤྱི་བོ་ལ་ནི་འདྲུད་པར་བྱེད། ། དེ་ཡིས་རང་གི་རིག་པ་དྲན། ། སྒྲུབ་པོའི་ལུས་ལ་ཕན་པ་ཡིན། ། མཁུར་ཚོས་དང་ནི་ཀོས་ཀོ་དང་། ། སྣ་ལ་སྙིམ་པས་རེག་པ་ཡིན། ། ལོགས་སུ་བལྟ་ཞིང་སྔགས་ བཟླས་དང་། ། ལན་ཅིག་རིག་པ་ལ་ནི་བལྟ། ། རྣལ་འབྱོར་མ་ནི་བདེ་བར་འགྲོ། ། གང་གི་དམ་ཚིག་ངེས་པ་ཡི། ། མཁའ་འགྲོ་མ་རྣམས་རྙེད་པར་དཀའ། ། རྣལ་འབྱོར་མ་རྣམས་དེ་བཞིན་ནོ། ། བདུད་རྩི་ལྔ་ནི་བདེན་པར་འགྱུར། ། དངོས་གྲུབ་ཀུན་བྱེད་མཛེས་པའོ། ། མཁའ་ འགྲོ་མ་རྣམས་རིགས་དང་ནི། ། འདི་རུ་དཔའ་བོ་ལ་སོགས་མཚན། ། ཐོད་པ་བླ་རེ་མཆེ་བ་དང་།
BO། འཁོར་ལོ་རྒྱལ་མཚན་རལ་གྲི་དང་། ། རྩེ་གཅིག་ཏུ་ནི་བརྒྱད་པར་བརྗོད། ། མཁའ་འགྲོ་མ་ཡི་རིགས་ཕྱག་རྒྱ། ། དཔའ་བོ་སྒྲུབ་པ་རབ་ཏུ་གྲགས། ། དཔལ་ལྡན་རྡོ་རྗེ་ཕག་ མོ་ཡི། ། རིགས་ལས་ཡང་དག་བྱུང་བ་ཡིན། ། རྣལ་འབྱོར་ཆེན་པོ་དབང་ཕྱུག་གཙོ། ། གང་ཞིག་རྟག་ཏུ་ཤ་ལ་སྲེད། ། མཁའ་འགྲོ་ཐབས་ཀྱི་ང་རྒྱལ་གྱིས། ། ཟད་པ་མེད་ཅིང་ཁྱད་པར་མེད། ། དེ་བཞིན་གཤེགས་པའི་རིགས་སུ་འབྱུང་། ། འཇིགས་པ་མེད་ཅིང་ངོ་ཚ་ མེད། ། ཐམས་ཅད་དུས་སུ་འགྱོད་པ་མེད། ། མཆོད་པ་བྱེད་པར་འདོད་པ་སྟེ། ། སྒྲུབ་པོས་མཚན་ནི་ཐོག་ཐག་ཏུ། ། གཞན་ལ་ནམ་ཡང་བཤད་མི་བྱ། ། དཔལ་ལྡན་ཁྲག་འཐུང་མངོན་པར་འབྱུང་། ། ཞེས་བྱ་གང་གིས་བཀླགས་པས་འགྲུབ། ། སྒྲུབ་པོས་དཀའ་བ་མེད་ པ་རུ། ། ས་འོག་ཏུ་ནི་འགྲོ་བར་འགྱུར། ། སེམས་ཅན་ལ་ནི་ཕན་དང་གནོད། ། ཡུལ་ཀུན་ལ་ནི་སྐྱེས་པ་ལ། ། ཇི་ལྟར་རིམ་པ་ཞི་དང་རྒྱས། ། དཔལ་ཁྲག་འཐུང་མངོན་པར་འབྱུང་བ་ལས་ལག་པའི་བརྡ་དང་རྣལ་འབྱོར་མའི་མཚན་མ་དང་། ། ཕྱག་རྒྱའི་མཚན་མའི་ཆོ་གའི་ ལེའུ་ཞེས་བྱ་བ་སྟེ་ཉི་ཤུ་རྩ་དྲུག་པའོ། ། ། ། དེ་ནས་ཡང་དག་བཤད་བྱ་བ། ། མངོན་སུམ་དངོས་གྲུབ་སྟེར་བ་དང་། །
BOགང་གིས་བྲིས་པ་ཙམ་གྱིས་ནི། ། རྡོ་རྗེ་སེམས་དཔའང་བརླག་པར་འགྱུར། ། རོ་དང་བཙུན་མོའི་འཛག་པ་ལས། ། རབ་དང་འབད་པས་ ཡང་དག་བླང་། ། བཅུ་བཞི་དང་ནི་ནག་པོའི་བརྒྱད། ། རོ་བསྲེགས་ཁུང་བུའི་སོལ་བ་ཡིས། ། ཐམས་ཅད་རྡོ་རྗེ་ཞལ་བཞི་པའི། ། སྔགས་ནི་རབ་ཏུ་ཆུད་པར་བྱ། ། སྒྲུབ་པོས་གང་ཞིག་གནས་སུ་ནི། ། ལན་བདུན་བཟླས་ལ་བརྐོས་ལ་གཞུག ། ཉི་མ་བདུན་གྱིས་ ངེས་པར་འགྱུར། ། གཤིན་རྗེའི་གནས་སུ་འགྲོ་བར་འགྱུར། ། དེ་བཞིན་རིག་པའི་སྟོབས་ཀྱིས་ནི། ། ལུས་ལ་མངོན་པར་བརྒྱན་བྱས་པ། ། དེ་ཡང་ཡིད་ཀྱི་རྣལ་འབྱོར་གྱིས། ། མངོན་སྤྱོད་ཀྱིས་ནི་འཆི་བར་འགྱུར། ། དེ་ལྟར་ཆོ་ག་ཡང་དག་ལྡན། ། ཐམས་ ཅད་ལས་ནི་བསྒྲུབ་པར་འགྱུར། ། རང་ཉིད་ཀྱིས་ནི་སྔགས་གཟུང་ན། ། བསྐལ་པ་བྱེ་བ་བརྒྱར་ཡང་ནི། ། འགྲུབ་པ་དག་ཏུ་ཡང་མི་འགྱུར། ། དེ་ཁོ་ན་ཉིད་བསྡུས་པ་དང་། ། དཔལ་མཆོག་དང་པོའི་འཁོར་ལོ་སྡོམ། ། རྡོ་རྗེ་འཇིགས་བྱེད་ལ་སོགས་པར། ། མན་ངག་ ཉེ་བར་འགྲོ་བ་ནི། ། ལུས་ཀྱི་དབུས་ན་ཡོད་པ་སྟེ། ། རྡོ་རྗེ་ཁྲག་འཐུང་ཡེ་ཤེས་ནི། ། སྒྲུབ་པོས་གང་གིས་མི་ཤེས་པ། ། གང་ཞིག་བརྟུལ་ཞུགས་ཡུན་རིང་ཡང་། །
BOདེ་ལས་དངོས་གྲུབ་མེད་པར་འགྱུར། ། འདི་རུ་ལས་མཆོག་ཤེས་པར་བྱ། ། སྔགས་གཞན་རྒྱས་པ་ཅི་ཞིག་དགོས། ། འདི་རྣམས་ཀུན་ནི་ཡོངས་སུ་བཏུས། ། རབ་ཏུ་འབད་པས་འདི་རུ་གཟུང་། ། སྒྲུབ་པོས་གང་དང་གང་གིས་ནི། ། བསྒོམ་དང་བཟླས་པ་བརྩམས་པ་ཡིན། ། དེ་དང་དེ་ཡིས་རྣལ་འབྱོར་བདག ། འདོད་པའི་འབྲས་བུ་ཐོབ་པར་འགྱུར། ། ཇི་ལྟར་ནོར་བུ་དང་བདག ། རྫས་ལ་ བརྟེན་ནས་གཟུགས་ནི་འཛིན། ། དེ་ལྟར་དཔལ་ལྡན་ཁྲག་འཐུང་རྒྱལ། ། བསམ་གཏན་ཡང་དག་མཆོག་ཏུ་འགྱུར། ། དངོས་པོ་གང་དང་གང་དག་ལ། ། མི་རྣམས་ཡིད་ནི་ཡང་དག་སྦྱོར། ། དེ་དང་དེ་ཡི་རང་བཞིན་འགྲོ། ། སྣ་ཚོགས་གཟུགས་ཅན་ནོར་བུ་འདྲ། ། སྒྲུབ་པོ་རྣལ་ འབྱོར་གཞོན་ལ་འདོད། ། བསྐལ་པ་བྱེ་བ་བརྒྱས་མི་འགྲུབ། ། བྱ་བའི་རྒྱུད་ཀྱིས་བསྒྲུབ་པ་ལ། ། དཔའ་བོས་རབ་ཏུ་སྦྱོར་བ་སྦས། ། ཇི་སྲིད་སྙིང་པོ་རྒྱས་ཀྱི་བར། ། དེ་དང་དེ་ནི་ཉོན་མོངས་འགྱུར། ། དཔལ་ཁྲག་འཐུང་མངོན་པར་འབྱུང་བ་ལས་ ནང་གི་བསམ་གཏན་དང་བཟླས་པ་རྣམ་པར་དག་པའི་ཆོ་གའི་ལེའུ་ཞེས་བྱ་བ་སྟེ་ཉི་ཤུ་རྩ་བདུན་པའོ། ། ། ། དེ་ནས་སྔགས་ཤེས་ཤིན་ཏུ་གསང་། ། སྦྱོར་ཤེས་དེ་ཉིད་རྣལ་འབྱོར་བརྩམ། །
BOའགྲོ་བ་ཀུན་ནི་རྨོངས་པས་ཁྱབ། ། ཀྲྀ་ཡའི་ལམ་ལ་སྒྲུབ་པ་ཡིས། ། བསྐལ་པ་ བྱེ་བ་བརྒྱ་ཡིས་ཀྱང་། ། དེ་ལ་འབྲས་བུ་ཐོབ་པ་མེད། ། སྔགས་རྣམས་འདི་ནི་ཐམས་ཅད་ནི། ། དཔའ་བོ་དག་གིས་སྦས་པ་སྟེ། ། དེ་ནས་རྣལ་འབྱོར་ཤེས་པས་སྔགས། ། གཅིག་མིན་ཡི་གེ་མ་ལུས་པས། ། སྦས་ནས་ཡང་ནི་ཐམས་ཅད་ལ། ། བརྩོན་འགྲུས་ སྟོབས་ཀྱིས་ཕ་རོལ་གནོན། ། དཔལ་ལྡན་ཁྲག་འཐུང་མཉམ་བཀུག་སྟེ། ། སློབ་དཔོན་བདག་ཉིད་ཆེན་པོས་ནི། ། མྱུར་དུ་དངོས་གྲུབ་སྐྱེ་བར་འགྱུར། ། དེ་ལྟར་རྟགས་ནི་སྟོན་པའོ། ། ཕྱག་རྒྱ་དང་སྦྱོར་སྒྲུབ་བ་པོས། ། ཉོན་མོངས་མེད་ལས་འགྲུབ་པར་འགྱུར། ། དམ་ ཚིག་མེད་པས་བཀླགས་པ་དང་། ། གང་གིས་ནམ་ཡང་ཉན་པ་དེ། ། ངན་པའི་བདག་ཉིད་ཅན་གྱིས་འཇོམས། ། རྣལ་འབྱོར་ངན་འགྲོའི་ལམ་དུ་འགྲོ། ། འཇིག་རྟེན་གཡོན་ལ་སྤྱོད་པས་དྲན། ། གཡོན་པའི་སྔགས་ལས་ཀུན་ཏུ་དམིགས། ། ཐམས་ཅད་གཡོན་པས་ཀུན་ཏུ་བྱ། ། དངོས་གྲུབ་ཀུན་ནི་རབ་ཏུ་སྟེར། ། རྣལ་འབྱོར་ཡེ་ཤེས་སྦས་ནས་ནི། ། ཀྲྀ་ཡའི་བསྟན་བཅོས་ལ་ནི་འཇུག ། རབ་ཏུ་འབད་པས་སྒྲུབ་པ་པོས། ། དེ་དང་དེས་ནི་འགྲུབ་པར་འགྱུར། །
BOདཔལ་ཁྲག་འཐུང་མངོན་པར་འབྱུང་བ་ལས་སྦས་པའི་སྔགས་དང་དམ་ཚིག་སྲུང་བའི་ཆོ་གའི་ ལེའུ་ཞེས་བྱ་བ་སྟེ་ཉི་ཤུ་རྩ་བརྒྱད་པའོ། ། ། ། དེ་ནས་གསང་བའི་གནས་བཞི་དག ། ཡང་དག་བསྡུས་ཏེ་བཤད་པ་ཡིན། ། བ་ལང་ལྕི་བ་སྐམ་པོ་དང་། ། དེ་བཞིན་ལྷག་མ་མགོ་སྐམ་དང་། ། རོ་བསྲེགས་བཞི་ཡི་མགོ་རི་དང་། ། འབྱུང་བ་ཆེན་པོ་བཞི་པའོ། ། འབུམ་ལ་ཕྱེད་དང་བརྒྱ་ཡིས་དམན། ། དཀྱིལ་འཁོར་དག་ནི་བཞེངས་པ་སྟེ། ། གསུམ་མཐའི་ཐིག་ལེའི་སྟེང་དུའོ། ། བཞི་པའི་མཐའ་ནི་རབ་ཏུ་སྦྱར། ། འབུམ་མཐར་ཉི་ཤུ་རྩ་བཞིའི་ཕྱེད། ། བདེན་པ་གཉིས་ལ་མཉམ་པར་བརྟེན། ། རྟག་ཏུ་དྲུག་ཅུ་རྩ་བཞི་མཆོད། ། འདོད་ པའི་དོན་ཀུན་འགྲུབ་པར་འགྱུར། ། འཇིག་རྟེན་དབང་ཕྱུག་ཐང་ཤིང་ལ། ། མི་གང་མཉམ་པར་སྤྱོད་པའི་མཆོག ། སྡིག་ཀུན་རྣམ་དག་བདག་ཉིད་དོ། ། འཇིག་རྟེན་འདི་དང་ཕ་རོལ་དུ། ། སངས་རྒྱས་ཉིད་མཐོང་སྐད་ཅིག་གིས། ། ཧ་གཉིས་ཐོག་མར་དབང་ཕྱུག་དང་། ། ཧ་ གཉིས་བཞི་ཡི་ཁྲོ་བོ་སྟེ། ། ས་ར་ས་ནི་ཉིད་དག་དང་། ། ངང་པ་དང་ནི་ཀ་རན་དང་། ། ཁྲུང་ཁྲུང་དང་ནི་ཆུ་སྐྱར་དག ། སྔགས་བྱ་ཆེན་པོར་བརྗོད་པ་སྟེ། ། མཁའ་འགྲོ་མ་ཡི་གཏོར་མ་སྤྱོད། །
BOདཀྱིལ་འཁོར་ལ་ནི་དངོས་གྲུབ་སྒྲུབ། ། སྔགས་པས་ལན་ཅིག་ཏུ་ནི་བརྗོད། ། གཟུགས་ ཅན་མི་ནི་མྱུར་དུ་འོང་། ། དགུག་ཅིང་དབང་དུ་འགྱུར་བ་སྟེ། ། ཇི་སྲིད་འཚོ་བར་འགྱུར་བ་སྟེ། ། བུད་མེད་སྟོང་གིས་ཡོངས་བསྐོར་ནས། ། སྒྲུབ་པོས་ས་ཡི་སྟེང་དུ་རྩེ། ། དཔལ་ལྡན་རྡོ་རྗེ་ཕག་མོ་ནི། ། གྲོ་གར་གི་ཝང་གིས་བྲིས་ཏེ། ། རྟག་ཏུ་སྒྲུབ་པོའི་སྤྱི་བོར་བཏགས། ། ཀུན་གྱི་ཁྲག་ འཐུང་འདྲ་བར་མཐོང་། ། གོས་དམར་ཡོངས་སུ་བགོས་ནས་ནི། ། སྒྲུབ་པོས་མཚན་ནི་ཐོག་ཐག་ཏུ། ། ཆུ་ལ་ཡོངས་སུ་བཟླས་ནས་ནི། ། ཤིང་ལ་བསྣུན་ན་མེ་ཏོག་ལྷུང་། ། སྐྱེས་པ་བུད་མེད་ཕྲག་པ་ལ། ། ལག་པ་བཞག་སྟེ་བཟླས་ནས་ནི། ། རྡོ་རྗེ་ཕག་མོ་དབང་དུ་འགྱུར། ། མན་ཤིང་ ལ་ལན་ཉི་ཤུ་བཟླས། ། རྐང་པ་ལ་བྱུགས་མགོ་གནོན་འགྱུར། ། གོ་རོ་ཙ་ན་ལ་ལན་ཉི་ཤུར་མངོན་པར་བཟླས་པ་བྱས་ནས་གང་ཐིག་ལེར་བྱས་པ་དེ་ཐམས་ཅད་སྐྱེ་བོ་ཀུན་གྱིས་བྱམས་པར་འགྱུར། ། རྒྱལ་རིགས་ནང་དུ་འཇུག་ན་སྐུ་དྲིན་ཆེན་པོར་འགྱུར་རོ། ། མིག་སྨན་ལ་ལན་བརྒྱད་ བརྒྱར་བསྔགས་ཏེ། མིག་ལ་མིག་སྨན་བྱུགས་ན་མི་སྣང་བར་འགྱུར་རོ། ། ཡུངས་ཀར་ལ་ལན་བདུན་མངོན་པར་བསྔགས་ཏེ།
BOསྐྱེས་བུ་ལ་བསྣུན་ན་ཤིང་དུ་འགྱུར་རོ། ། ཡིད་ཀྱིས་ནི་གྲོལ་བར་འགྱུར་རོ། ། ཆུ་ལ་ཡོངས་སུ་བཟླས་ནས་བསྣུན་ན་ཁྲག་འཛག་པར་འགྱུར་རོ། ། སྒྲུབ་ པ་པོ་ཡི་སྔགས་འདི་ཡིས། ། སྟོན་མོའི་བྱ་བ་བཟའ་སྟོན་མོ། ། ཀུན་ནས་ཀུན་ཏུ་ཐམས་ཅད་དུ། ། རྣལ་འབྱོར་མ་ནི་དགྱེས་པར་འགྱུར། ། ཐལ་བ་ལ་ཡོངས་སུ་བཟླས་ནས་གཞན་གྱི་རིགས་ལ་བསྣུན་ན་རེངས་པར་འགྱུར་རོ། ། གོས་ལ་བརྒྱད་བརྒྱར་ཡོངས་ སུ་བཟླས་ཏེ་མདུད་པ་བཅིངས་ན་གོས་ཤིན་ཏུ་མང་བར་འགྱུར་རོ། ། དེ་ལྟར་ནོར་དང་གོས་དང་། གཞན་ཡང་བཏུང་བ་ལ་སོགས་པ་མང་པོར་འགྱུར་རོ། ། ཆུ་ལ་བཟླས་ཏེ་ཆུར་བླུགས་ན་ཆུ་སྐམ་པར་འགྱུར་རོ། ། ཐལ་བ་ལ་ཡོངས་སུ་བཟླས་ཏེ་ཞོ་ལ་བསྣུན་ན་ཁྲག་ཏུ་འགྱུར་རོ། ། ཡིད་ ཀྱིས་བཟླས་ན་ཐམས་ཅད་གྲོལ་བར་འགྱུར་རོ། ། དུར་ཁྲོད་ཀྱི་ཐལ་བ་ལ་བརྒྱད་བརྒྱར་མངོན་པར་བསྔགས་ཏེ་ཐིག་ལེ་བྱས་ན་མི་སྣང་བར་འགྱུར་རོ། ། མར་ལ་ཡོངས་སུ་བཟླས་ཏེ་མཉེས་ནས་སྒོ་ལ་རེག་ན་སྒོ་རང་འབྱེད་པར་འགྱུར་རོ། ། བུམ་པ་ལ་ཡོངས་སུ་བཟླས་ཏེ་ཆུས་བཀང་ན་ མི་མཐོང་བར་འགྱུར་རོ། ། ཡིད་ཀྱིས་ནི་གྲོལ་བར་འགྱུར་རོ། ། ལྕགས་ཀྱི་ཕུར་བུ་ལ་མངོན་པར་བསྔགས་ཏེ།
BOའོ་མ་ཅན་གྱི་ཤིང་བཅད་ནས་ཡམ་ཤིང་ལ་ལན་ཅིག་བྱས་ཏེ། གང་གི་མིང་དང་སྔགས་བརྒྱད་བརྒྱར་བཟླས་ཏེ་བསྲེགས་ནས། དེའི་ཐལ་བ་བླངས་ཏེ་སྐྱེས་ པ་ལ་བྱུགས་ན་བུད་མེད་དུ་འགྱུར་རོ། ། ཙན་དན་ལ་ཡོངས་སུ་བཟླས་ཏེ་བསྣུན་ན་བརླག་པར་འགྱུར་རོ། ། ལན་ཚ་ལ་ཡོངས་སུ་བཟླས་ཏེ་སྐྱེས་པས་བུད་མེད་ལ་བྱིན་ན་དེ་དབང་དུ་འགྱུར་རོ། ། མེ་ཏོག་ལ་ཡོངས་སུ་བཟླས་ཏེ་མི་ཡི་ལུས་པོ་ལ་བསྣུན་ན་སྨྱོན་པར་འགྱུར་རོ། ། ཐལ་བ་ལ་ཡོངས་སུ་བཟླས་ཏེ་ཐིག་ལེ་བྱས་ན་གོས་དང་བྲལ་བར་འགྱུར་རོ། ། ཡིད་ཀྱིས་ནི་གྲོལ་བར་འགྱུར་རོ། ། སྐྱེས་པའམ་བུད་མེད་གང་གི་རྐང་པ་གཡོན་པའི་རྐང་རྗེས་ཀྱི་རྡུལ་བླངས་ཏེ་གོས་ལ་བཅིངས་ནས་གང་གི་མིང་བཀོད་དེ་སྦས་ན་བཅིངས་པར་འགྱུར་རོ། ། སྐུད་པ་ལ་ཡོངས་སུ་བཟླས་ཏེ་མདུད་པ་གསུམ་བྱས་ནས་ལན་བདུན་མངོན་པར་བསྔགས་པ་དགྲ་བོའི་དབུས་སུ་བཅུག་ན་སྦྲུལ་དུ་འགྱུར་ཏེ། དེའི་མཆེ་བས་བཏབ་ནས་མི་གསོད་པར་འགྱུར་རོ། ། སླར་ཡང་བརྒྱད་བརྒྱར་བཟླས་ན་འཚོ་བར་འགྱུར་རོ། ། མེ་ཏོག་ལ་མངོན་ པར་བསྔགས་པ་བྱས་ནས་སྤྱི་བོར་བཟུང་ན་མི་སྣང་བར་འགྱུར་རོ། ། མི་སྣང་བར་གྱུར་ཀྱང་བུད་མེད་ཐམས་ཅད་ཀྱིས་མཆོད་པར་འགྱུར་རོ། །
BOམེ་ཏོག་ལ་མངོན་པར་བཟླས་ཏེ་མངོན་པར་གཏོར་ན་དེ་ཉིད་དུ་གནས་པར་འགྱུར་རོ། ། ཡིད་ཀྱིས་ནི་གྲོལ་བར་འགྱུར་རོ། ། འཛིམ་ (བའི་,ཕའི་)གོང་བུ་ལ་ཡོངས་སུ་བཟླས་ཏེ་སྤྱི་བོར་བཟུང་ན་སྤྱི་བོ་མི་མཐོང་བར་འགྱུར་རོ། ། ཡིད་ཀྱིས་ནི་གྲོལ་བར་འགྱུར་རོ། ། དཔའ་བོའི་ཆུ་ལ་ཡོངས་སུ་བཟླས་ཏེ་བསྣུན་ན་འགྱེལ་བར་འགྱུར་རོ། ། ཡིད་ཀྱིས་ནི་གྲོལ་བར་འགྱུར་རོ། ། ཕྱག་རྒྱ་ཡོངས་སུ་བརྗེ་ཞིང་བསྒོས་ན་ གཟུགས་ཡོངས་སུ་བརྗེ་བར་འགྱུར་རོ། ། ཛཱ་ཏི་དང་ཙམ་པ་ཀའི་མེ་ཏོག་རྣམས་ལ་རྟག་ཏུ་མངོན་པར་བསྔགས་པ་བྱས་ནས་གན་ཏི་ཀ་དང་སྦྱར་བའི་དྲིས་འགུགས་པར་འགྱུར་རོ། ། ཆང་ཡང་དྲི་ཆེན་དུ་དྲི་འགྱུར་བར་ཐེ་ཚོམ་མེད་དོ། ། དཔལ་ཁྲག་འཐུང་མངོན་པར་ འབྱུང་བ་ལས་དཔལ་རྡོ་རྗེ་ཕག་མོའི་སྙིང་པོའི་སྔགས་ཀྱི་ཆོ་གའི་ལེའུ་ཞེས་བྱ་བ་སྟེ་ཉི་ཤུ་རྩ་དགུ་པའོ། ། ། ། དེ་ནས་གསང་བ་ཐམས་ཅད་ཀྱི། ། ཡིད་འོང་སྟོན་མོ་ལ་འདུས་པ། ། གང་ཞིག་ཡང་དག་ཤེས་པ་ནི། ། གཉིས་མེད་ཡེ་ཤེས་རྣལ་འབྱོར་ར་རྣམས། ། ཤ་དང་ཆང་ དུ་ལྡན་པ་ཡི། ། སྟོན་མོ་སྣ་ཚོགས་ཀྱིས་ནི་འགྲུབ། ། སྐལ་ལྡན་མཛའ་བའི་ལོངས་སྤྱོད་ཀྱིས། ། ཚེ་འདི་དམ་པར་འགྲུབ་པར་འགྱུར། །
BOསྐྱེས་པ་དང་བུད་མེད་ཀྱི་གན་དུ་སོང་སྟེ་རིན་པོ་ཆེ་རྣམས་སྡུད་པར་བྱེད་དོ། ། དེ་ཕྱིར་བླ་མེད་དཀོན་མཆོག་གསུམ། ། ཤེས་པར་ བྱ་སྟེ་འགྲུབ་པར་འགྱུར། ། ཀ་བ་གཅིག་དང་སྒོ་དགུ་དང་། ། སྐུད་པ་གསུམ་དང་ལྷ་རྣམས་ནི། ། ཐམས་ཅད་གཉིས་མེད་རྣལ་འབྱོར་གྱིས། ། རབ་ཏུ་འགྲུབ་པར་ཐེ་ཚོམ་མེད། ། ཆུ་ལ་ཡོངས་སུ་བཟླས་ཏེ་ཟླ་བའི་བཏུང་བ་ལ་བླུགས་ན་མེར་འགྱུར་རོ། ། ཡིད་ཀྱིས་ནི་ གྲོལ་བར་འགྱུར་རོ། ། ལས་རྣམས་ཐམས་ཅད་སྒྲུབ་པ་པོས། ། དེ་ནས་རི་ཡི་ཆུ་བླངས་ཏེ། ། ཙན་དན་དམར་པོ་ཉིད་ལ་ཟླ་བ་དྲུག་ཏུ་ཉེ་བར་ལོངས་སྤྱད་ན་ནད་ཐམས་ཅད་རྣམ་པར་སྤོང་ཞིང་། ། ལོ་སྟོང་ཕྲག་གཅིག་ཏུ་གསོན་ཞིང་སྐྲ་དཀར་དང་གཉེར་མ་རྣམས་སྤོང་ངོ་། ། ས་བོན་ནག་པོ་བླངས་ཏེ་སྔགས་པས་དངོས་པོ་ཀུན་གྱི་སྣར་བླུགས་ནས། རྣལ་འབྱོར་པས་བཟླས་ན་གཉེར་མ་དང་སྐྲ་དཀར་དང་མཆི་མ་རྣམས་ཀྱིས་མི་ཚུགས་སོ། ། ཚེ་ཉམས་པ་དང་སྐལ་བ་ངན་པ་རྣམ་པར་སྤོང་ངོ་། ། ནད་ཐམས་ཅད་ རྣམ་པར་སྤངས་ཤིང་ལོ་སྟོང་ཕྲག་གཅིག་ཏུ་གསོན་པར་འགྱུར་རོ། ། དོན་རྣམས་ཀུན་གྱི་སྒྲུབ་པ་པོས། ། དེ་ལྟར་ཆོ་ག་ཡང་དག་ལྡན། ། བཅོམ་ལྡན་མོ་ཡི་ལུས་གཟུགས་ཀྱིས། །
BOབཟླས་དང་བརྟུལ་ཞུགས་བྲལ་བས་ཀྱང་། ། མཆོག་ཏུ་འགྲུབ་པར་འགྱུར་བ་ཡིན། ། བླ་མའི་སྤྱོད་པ་སངས་རྒྱས་མཉམ། ། བརྩོན་འགྲུས་ལྡན་ཞིང་ཕ་རོལ་གནོན། ། གྲུ་གསུམ་གྱི་ནི་དཀྱིལ་འཁོར་དུ། ། གལ་ཏེ་རྒྱལ་པོ་དེ་མཆོད་བྱེད། ། སེམས་ཅན་རྗེས་སུ་གཟུང་བའི་ཕྱིར། ། དེ་རུ་རྟག་ཏུ་ང་འདུག་སྟེ། ། རང་བྱུང་མེ་ཏོག་ལ་སོགས་པས། ། རྟག་ཏུ་བདག་ཉིད་མཆོད་པར་བྱ། ། དཔའ་བོས་ཟླ་བ་གཅིག་གིས་འགྲུབ། ། ཇི་ལྟར་རང་བཞིན་དེ་བཞིན་འགྱུར། ། དེ་ཡི་སྐུ་དྲིན་མཆོག་དེ་ཉིད། ། རྡོ་རྗེ་ཕག་མོའི་རྣལ་འབྱོར་མ། ། རྣལ་འབྱོར་ཆེན་པོའི་དབང་ཕྱུག་སྟེ། ། ཆུང་མ་དགའ་བ་མེད་པར་འགྱུར། ། ཡིད་ ཀྱིས་སྔགས་ནི་ཡོངས་བཟླས་ན། ། གཉིས་མེད་ཡེ་ཤེས་རྣལ་འབྱོར་གྱིས། ། སེམས་ཅན་ཐམས་ཅད་དབང་འགྱུར་ཞིང་། ། དངོས་གྲུབ་ཐམས་ཅད་ཐེ་ཚོམ་མེད། ། དཔལ་ཁྲག་འཐུང་མངོན་པར་འབྱུང་བ་ལས་རྣལ་འབྱོར་མ་རྣམས་ཀྱི་ཚེ་འཕེལ་བ་དང་། མཆོད་པའི་ ཆོ་གའི་ལེའུ་ཞེས་བྱ་བ་སྟེ་སུམ་ཅུ་བའོ། ། ། ། དེ་ནས་གསེར་ལ་སོགས་པ་ནི། ། ཐམས་ཅད་དགུག་པའི་མཆོག་ཡིན་ནོ། ། སྔགས་རྣམས་ཀུན་ནས་སྦས་པ་སྟེ། ། རྣལ་འབྱོར་རྒྱུད་གཅིག་རྣལ་འབྱོར་ལྡན། །
BOནོར་གྱི་བདག་པོའི་ཁྱིམ་སོང་སྟེ། ། གསེར་གྱི་ཆུ་ ལ་ལན་བདུན་དུ། ། མངོན་པར་བསྔགས་པ་བྱས་ནས་ནི། ། གང་གི་ཁྱིམ་དུ་གཏོར་བྱས་ཏེ། ། ལྷག་མས་བདག་ཉིད་དབང་བསྐུར་ན། ། ཉིན་ཞག་བདུན་ན་གསེར་རྣམས་འགུགས། ། དཔག་ཚད་སྟོང་ཕྲག་གཅིག་གི་ས། ། ཐིག་ལེ་བྱས་ན་བསྒྲུབ་བྱ་འགུགས། ། ཆུ་ ཡིས་སླར་ཡང་གྲོལ་བའོ། ། ཁ་ཊྭཱཾ་ག་ལ་ལན་བདུན་མངོན་པར་བསྔགས་པ་བྱས་ནས་དེ་ལ་འདུག་ན་དཔག་ཚད་བརྒྱར་འགྲོ་བ་དང་འོང་བར་འགྱུར་རོ། ། དུར་ཁྲོད་ཀྱི་ཐལ་བ་ལ་ལན་བདུན་མངོན་པར་བསྔགས་པ་བྱས་ནས་གང་བླུགས་པ་དེ་དབང་དུ་འགྱུར་རོ། ། ཕཊ་ཡིག་དང་ བཅས་པས་རྒྱས་བཏབ་པར་འགྱུར་ཞིང་རེངས་པར་འགྱུར་རོ། ། དེ་ནས་བཅོམ་ལྡན་འདས་མ་དཔལ་རྡོ་རྗེ་ཕག་མོའི་ཡིད་ཀྱིས་འདོད་པ་བཞིན་བཟླས་ན། འདོད་པ་ཐམས་ཅད་ཇི་ལྟར་བསམ་པ་བཞིན་འོང་བར་འགྱུར་རོ། ། ཉིན་ཞག་བདུན་ལ་འབུམ་ཕྲག་སྟོང་གི་སྦྱིན་སྲེག་གིས་ དཔལ་འོང་བར་འགྱུར་རོ། ། རིགས་ཅན་རྣམས་ལ་སྦྱིན་པ་སྟེར་བར་འགྱུར་རོ། ། མན་ཤིང་སྲང་གཅིག་བླངས་ཏེ། ནག་པོའི་ཕྱོགས་ཀྱི་བཅུ་བཞིའི་ནམ་ཕྱེད་ན་མཆོད་པ་བྱས་ཏེ། མར་མེ་ཆེན་པོར་སྦར་ཞིང་གཏོར་མ་དང་ལྷ་བཤོས་ཕུལ་ཏེ། །
BOབརྒྱད་བརྒྱར་མངོན་ པར་བསྔགས་ནས་ཨཉྫ་ན་བསྐུས་ན་མི་སྣང་བར་འགྱུར་རོ། ། དཔག་ཚད་སྟོང་ཕྲག་གཅིག་ཏུ་འགྲོ་ཞིང་འོང་བར་འགྱུར་རོ། ། དེ་ནས་ཀ་ར་བཱི་རའི་མེ་ཏོག་སྟོང་ཕྲག་གཅིག་ཏུ་སྦྱིན་སྲེག་བྱས་ན་ནམ་མཁར་ལྷ་མོ་གནས་ཤིང་བུད་མེད་ཐམས་ཅད་དབང་དུ་འགྱུར་རོ། ། ཆུའི་ནང་དུ་ཞུགས་ཏེ་མར་དང་སྦྲང་རྩི་ལ་སྟོང་ཕྲག་བརྒྱད་དུ་བཟླས་ནས་ཇི་སྲིད་འདོད་པ་དེ་སྲིད་དུ་སྦྱིན་སྲེག་བྱས་ན་དེ་ནས་འདོད་པ་ཐམས་ཅད་འགྲུབ་པར་འགྱུར་རོ། ། རྐུན་མོ་དང་རྒྱལ་རིགས་ཀྱིས་ངེས་པར་འཚེ་བ་དང་། རྡོ་རྗེ་སེམས་དཔའ་ཡང་ཡིད་ཀྱིས་བཟླས་ནས་རྡོ་ རྗེས་ངེས་པར་འགྱུར་རོ། ། དཔལ་ཁྲག་འཐུང་མངོན་པར་འབྱུང་བ་ལས་རྡོ་རྗེ་ཕག་མོའི་ཡི་གེ་དྲུག་གི་སྔགས་ཀྱི་ལས་ཐམས་ཅད་ཀྱི་ཆོ་གའི་ལེའུ་ཞེས་བྱ་བ་སྟེ་སུམ་ཅུ་གཅིག་པའོ། ། ། ། དེ་ནས་གསང་ཆེན་ཐམས་ཅད་ནི། ། གཟུགས་ནི་ཡོངས་སུ་བརྗེ་བ་སྟེ། ། རྒྱུད་ རྣམས་ཀུན་ལ་གསང་བ་ནི། ། འདི་རུ་གསང་བའི་བྱ་བ་གསུངས། ། བ་ལང་གི་སྤུ་ལས་ཐག་པ་བྱས་ཏེ་ལན་བདུན་མངོན་པར་བསྔགས་ནས། གང་གི་སྐེ་ལ་བཅིངས་པ་དེ་ཡང་བ་ལང་དུ་འགྱུར་རོ། །
BOདེ་ལྟར་སེམས་ཅན་གྱི་སྐེ་ལ་བཅིངས་པར་གྱུར་པ་དེ་ནི་དེ་དང་འདྲ་བར་ འགྱུར་རོ། ། སོ་བ་ལ་མངོན་པར་བསྔགས་ཏེ་སོ་བའི་བདག་པོའི་ཁྱིམ་དུ་གཏོར་ནས་ལྷག་མས་བདག་ཉིད་དབང་བསྐུར་བར་འགྱུར་རོ། ། ཉིན་ཞག་བདུན་གྱི་སོ་བ་ཐམས་ཅད་དང་ནོར་གཞན་ཀུན་འགུགས་པར་འགྱུར་རོ། ། དུར་ཁྲོད་ཀྱི་ཤིང་ལ་མཆིལ་ལྷམ་ བྱས་ཏེ་མངོན་པར་བསྔགས་ནས། དེ་ལ་མངོན་པར་གནས་ན་གང་དུ་འདོད་པ་དེར་འགྲོ་ཞིང་སླར་ཡང་འོང་བར་འགྱུར་རོ། ། བཅོམ་ལྡན་འདས་མའི་སྙིང་པོའི་ཡི་གེ་དྲུག་པ་ཟློས་ཤིང་རྐང་རྗེས་ཀྱི་རྡུལ་དང་ཐལ་བར་བཅས་པ་ལ། ལན་བདུན་མངོན་པར་བསྔགས་པ་བྱས་ ནས་གང་ལ་བྱུགས་པ་དེ་རྒྱས་བཏབ་པར་འགྱུར་རོ། ། ཡིད་ཀྱིས་ནི་གྲོལ་བར་འགྱུར་རོ། ། སྔགས་བཟླས་ཤིང་སྤྱི་བོར་བཅིངས་ན་གང་གིས་ཀྱང་མི་མཐོང་བར་འགྱུར་རོ། ། གང་དུ་འདོད་པ་དེར་འགྲོ་བར་འགྱུར་རོ། ། ཉི་མ་ལ་མངོན་པར་བལྟས་ཏེ་མིང་དང་སྔགས་བཟླས་ན་ དེ་འགུགས་པར་འགྱུར་རོ། ། ཞག་གཅིག་གིས་དཔག་ཚད་གཅིག་ཚུན་ཆད་དབང་དུ་འགྱུར་རོ། ། ཞག་གསུམ་གྱིས་དཔག་ཚད་བཅུ་ཚུན་ཆད་དོ། ། ཞག་བདུན་གྱིས་དཔག་ཚད་ཉི་ཁྲི་ཚུན་ཆད་འགུགས་པར་འགྱུར་རོ། །
BOབྱི་ལའི་སྤུ་དང་གང་གི་མིང་དང་ལྷན་ཅིག་སྦྱིན་སྲེག་ བྱེད་ན་དེ་གཟའ་ཆེན་པོས་གཟུང་བར་འགྱུར་རོ། ། གང་ལ་དེས་བཅིངས་པ་དེ་བྱི་ལར་འགྱུར་རོ། ། དེ་ལྟར་ཁྱི་དང་བྱ་རོག་གི་རྒྱུས་པས་སྲད་བུ་བྱས་ཏེ་མངོན་པར་བསྔགས་ན་དེ་བྱ་རོག་ཏུ་འགྱུར་རོ། ། དེ་ལྟར་སེམས་ཅན་གང་གི་སྲད་བུ་བླངས་ཏེ་མངོན་པར་བསྔགས་ནས་མགྲིན་པ་ བཅིངས་ན་དེ་ནི་དེ་དང་འདྲ་བར་འགྱུར་བར་ཐེ་ཚོམ་མེད་དོ། ། བཀྲོལ་བས་ནི་གྲོལ་བར་འགྱུར་རོ། ། སྐྱེས་པའི་སྐྲའི་སྲད་བུ་ལ་ལན་བདུན་མངོན་པར་བསྔགས་པ་བྱས་ནས་བུད་མེད་གང་གི་མགྲིན་པ་ལ་བཅིངས་ན་དེ་ནི་སྐྱེས་པར་འགྱུར་རོ། ། དེ་ལྟར་བུད་མེད་ཀྱི་སྐྲ་ལ་སྲད་བུ་ བསྒྲིལ་ཏེ་ལན་བདུན་མངོན་པར་བསྔགས་ནས་སྐྱེས་པ་གང་གི་མགྲིན་པར་བཅིངས་པ་དེ་ནི་བུད་མེད་དུ་འགྱུར་རོ། ། ལག་པ་ལ་ལན་བདུན་མངོན་པར་བསྔགས་པ་བྱས་ནས་རེག་ན་མངལ་འཕོ་བར་འགྱུར་རོ། ། བཀྲོལ་བས་ནི་གྲོལ་བར་འགྱུར་རོ། ། དེ་ནས་བཅོམ་ལྡན་འདས་ མ་ཡིད་ཀྱིས་བཟླས་ན་རིགས་ཐམས་ཅད་དབང་དུ་འགྱུར་རོ། ། རྟག་ཏུ་བཟླས་ན་དཔལ་མོ་སྐྱེ་བར་འགྱུར་རོ། ། དཔལ་ཁྲག་འཐུང་མངོན་པར་འབྱུང་བ་ལས་དེ་ཉིད་སྔགས་ཀྱིས་གཟུགས་ཐམས་ཅད་ཡོངས་སུ་བརྗེ་བ་དང་།
BOདབང་དུ་བྱེད་པའི་ཆོ་གའི་ལེའུ་ཞེས་བྱ་བ་སྟེ་སུམ་ཅུ་ རྩ་གཉིས་པའོ། ། ། ། དེ་ནས་ཕུར་བུའི་ཆོ་ག་བཤད། ། བྲམ་ཟེའི་དམོད་པ་འདྲ་བ་ཡི། ། རྣལ་འབྱོར་ཡན་ལག་ཡང་དག་བླངས། ། གསང་བའི་ལས་ནི་སྐྱེ་བར་འགྱུར། ། སྤྲེའུའི་རུས་པའི་རང་བཞིན་ལས། ། ཕུར་བུ་སོར་ནི་དྲུག་པར་བྱ། ། ལན་བདུན་དུ་ནི་ མངོན་བསྔགས་ཏེ། ། གང་གི་སྒོ་རུ་སྦས་པ་ནི། ། དེ་ཡི་རིགས་ནི་འཆད་པར་འགྱུར། ། བ་ལང་གླང་ཆེན་རྟ་དང་ནི། ། བོང་བུ་རྔ་མོ་མ་ཧེ་ཤ། ། གནས་པའི་ས་དེར་སྦས་ན་ནི། ། དེ་རྣམས་བརླག་པར་འགྱུར་བ་ཡིན། ། མདོར་བསྡུས་ནས་ནི་གསུངས་པ་ཡིན། ། གང་ཞིག་རྟག་ཏུ་འདི་བསྒོམ་པ། ། རྟག་ཏུ་མིག་མི་འཛུམས་པར་བལྟ། ། གང་ལ་བཟླས་པར་གྱུར་པ་ཡིས། ། དེ་ཡི་མིག་ནི་ལྟུང་བར་འགྱུར། ། གང་གི་མིང་དང་སྔགས་སུ་བཟླས། ། དེ་ཡི་ཁྲག་ནི་འགུགས་པར་འགྱུར། ། ཐམས་ཅད་བདག་ཉིད་བཅོམ་ལྡན་མོ། ། རིག་པའི་མཆོག་ནི་ཉེར་སྤྱོད་ཀྱིས། ། ལས་ནི་ཀུན་ཏུ་བྱ་བ་ཡིན། ། ཇི་ལྟར་འདོད་པ་དཔལ་ཁྲག་འཐུང་། ། རྡོ་རྗེ་ཕག་མོའི་སྙིང་པོ་དང་། ། དེ་བཞིན་ཉེ་བའི་སྙིང་པོའོ། །
BOདཔལ་ཁྲག་འཐུང་མངོན་པར་འབྱུང་བ་ལས་ལས་ཀྱི་ཆོ་གའི་ལེའུ་ཞེས་བྱ་བ་སྟེ་སུམ་ཅུ་རྩ་གསུམ་ པའོ། ། ། ། དེ་ནས་ཡང་དག་བཤད་བྱ་བ། ། རྣལ་འབྱོར་མ་རྣམས་མཆོག་ཏུ་མཛེས། ། གསང་བའི་བླ་མ་བླ་མེད་སྔགས། ། ལྷ་རྣམས་ཀྱིས་ཀྱང་རྙེད་པར་དཀའ། ། ལྷ་མོ་ཀུན་གྱི་སྙིང་པོ་ནི། ། འདོད་པའི་དོན་ཀུན་སྒྲུབ་པར་བྱེད། ། བྷ་ཡིག་བདག་གིས་རབ་ཏུ་ གསུངས། ། ཨོཾ་ཡིག་ས་བོན་ཞེས་སུ་བརྗོད། ། ཇི་ལྟར་ཨེ་ཡིག་ས་བོན་ལ། ། མེ་ཡི་བུ་ནི་གསུམ་པས་དབྱེ། ། ཧཱུྃ་ཕཊ་ཡི་གེ་མཐའ་རུ་སྦྱར། ། འདི་རྣམས་ཡི་གེ་དྲུག་པའི་སྔགས། ། མདོར་བསྡུས་ནས་ནི་གསུངས་པ་ཡིན། ། གང་ཞིག་རྟག་ཏུ་འདི་བསྒོམས་པ། ། རྣལ་ འབྱོར་དངོས་གྲུབ་འབྲས་སྐལ་ལྡན། ། རྟག་ཏུ་དེ་ལ་བུད་མེད་བཟང་། ། སྒྲུབ་པོ་ལ་ནི་འོང་བར་འགྱུར། ། འདོད་པས་བརྒྱལ་བར་གྱུར་ན་ནི། ། སྣ་ཚོགས་ཀུན་ཏུ་འཛག་པ་སྟེ། ། སེམས་ནི་འདོད་པས་དགྱེས་ནས་སུ། ། དེ་རྣམས་ཀུན་ནི་འོང་ བར་འགྱུར། ། རྟག་ཏུ་བཟླས་ན་བུད་མེད་རྣམས། ། རྒན་དང་གཞོན་པ་དབང་དུ་འགྱུར། ། བྱིན་གྱིས་རློབ་པ་བྱེད་པར་འགྱུར། ། རང་གི་ཁྱིམ་དུ་ཞུགས་ནས་ནི། ། ཇི་ལྟར་འདོད་པ་བཞིན་བརྟག་པའི་ལས་འདི་ཉེ་བར་སྤྱད་པ་ནི།
BOལས་ཀུན་བྱེད་པར་འགྱུར་རོ། ། མཚན་ཐོག་ ཐག་ཏུ་བཟླས་པ་བྱས་ཏེ། སྒྲུབ་པ་པོ་ཤིན་ཏུ་མཉམ་པར་གཞག་པས་ཕོ་ཉ་སྒྲུབ་བོ། ། དེའི་ལག་མཐིལ་དུ་སོང་བའི་དཔལ་སུས་ཀྱང་འཕྲོག་པར་མི་ནུས་སོ། ། ཁང་སྟོང་དུ་ཞུགས་ནས་ནུབ་ཏུ་ཁ་བལྟས་ཏེ། སྟན་ལ་འདུག་ནས་གོས་ཀྱིས་ཡོལ་བར་བྱས་ཏེ། དེ་ལ་བཟའ་ བ་དང་བཏུང་བའི་སྟོན་མོ་བྱིན་ཏེ། སྨན་རྣམ་པ་ལྔས་སྤོས་བྱས་ཏེ་མར་ཁུ་ཆེན་པོས་མེ་མར་རབ་ཏུ་སྦར་ལ་སྟོང་ཕྲག་གཅིག་ཏུ་བཟླས་པ་བྱས་ཏེ། དེ་ནས་རྣལ་འབྱོར་མ་ཐམས་ཅད་འོངས་ནས་དཀྱིལ་འཁོར་ལ་ཞུགས་ཏེ་སྒྲུབ་པ་པོ་ལ་འདས་པ་དང་། མ་འོངས་པ་དང་། ད་ལྟར་བྱུང་བ་ཐམས་ཅད་སྟོན་པར་འགྱུར་རོ། ། ཤ་དང་ཁ་ཟས་ཀྱི་ལྷག་མས་རྣལ་འབྱོར་མ་རྣམས་ལ་གཏོར་མ་བྱིན་ཏེ། གིའུ་ཝང་ལ་བརྒྱད་བརྒྱར་མངོན་པར་བསྔགས་ནས་མིག་ལ་ཨཉྫ་བྱུགས་ན་མི་སྣང་བར་འགྱུར་རོ། ། གང་གིས་ནམ་ཡང་འདི་དམ་ཚིག་མེད་ པ་ལ་བརྗོད་པར་མི་བྱ་སྟེ། རྣལ་འབྱོར་མ་ཐམས་ཅད་ཀུན་ནས་འགྲོ་བར་འགྱུར་རོ། ། ཇི་ལྟར་དཔལ་ཧེ་རུ་ཀ་ལ་མཆོད་པ་བཞིན། དེ་ལྟར་སློབ་དཔོན་རབ་ཏུ་འབད་པས་མཆོད་དོ། །
BOཆོ་ག་བཞིན་དུ་དགྱེས་པར་བྱས་ཏེ་དཔལ་ཧེ་རུ་ཀ་དགྱེས་པར་བྱས་ནས་རྣལ་འབྱོར་མ་ རྣམས་འདིས་དགྱེས་ནས་མཆོག་སྟེར་ཞིང་། སློབ་དཔོན་དགྱེས་ནས་ཐམས་ཅད་དགྱེས་པར་ཐེ་ཚོམ་མེད་དོ། ། དཔལ་ཁྲག་འཐུང་མངོན་པར་འབྱུང་བ་ལས། དཔལ་རྡོ་རྗེ་ཕག་མོའི་ཉེ་བའི་སྙིང་པོའི་སྔགས་བཏུ་བའི་ལས་ཀྱི་ཆོ་གའི་ལེའུ་ཞེས་བྱ་བ་སྟེ་སུམ་ཅུ་རྩ་བཞི་པའོ། ། ། ། དེ་ནས་ཡང་དག་བཤད་བྱ་བ། ། ཕྱག་རྒྱ་ཆེན་པོ་རབ་བསྒྲུབ་པ། ། སྔོན་བཞིན་ཐད་ཀའི་མདུན་དུ་ནི། ། གང་གིས་མྱུར་དུ་དེ་འགྲུབ་འགྱུར། ། ཡིད་ཀྱིས་དབང་བསྐུར་ཐོབ་པ་ནི། ། རྣལ་འབྱོར་ཆེན་པོ་ལ་གནས་ཏེ། ། དངོས་གྲུབ་ཀུན་ཀྱང་ཕྱག་རྒྱ་སྟེ། ། སྒྲུབ་པོས་ཡང་ དག་མཆོད་པར་བྱའོ། ། དཔལ་ཧེ་རུ་ཀ་དང་རྡོ་རྗེ་མཁའ་འགྲོ་མ་རྣམས་འོངས་ནས་མཆོག་སྟེར་བར་བྱེད་དོ། ། དེ་ལ་ཨརྒྷ་ཕུལ་ཏེ་པུས་མོ་ས་ལ་བཙུགས་ནས་ལག་པ་ཐལ་མོ་སྦྱར་ཏེ། སྒྲུབ་པའི་མཆོག་གིས་མཆོད་པར་བྱའོ། ། སྒྲུབ་པ་པོའི་ལུས་ལ་འཇུག་པར་ཐེ་ ཚོམ་མེད་དོ། ། དཔའ་བོའི་མིག་ནི་རབ་ཏུ་གདངས་པ་དང་། ཐམས་ཅད་ཤེས་ཤིང་གཙོ་བོ་ཐམས་ཅད་བྱེད་པ་དང་། དེ་ནས་སྒྲུབ་པ་པོ་མཆོག་འཇིག་རྟེན་གསུམ་དུ་ཐམས་ཅད་དུ་འགྲོ་བའོ། །
BOདཔའ་བོ་འདི་རྣམས་ཡེ་ཤེས་ཆེ། ། གཉིས་པ་ཐམས་ཅད་རྣམ་པར་ སྤངས། ། གང་གིས་རྣམ་པར་ཤེས་ཙམ་གྱིས། ། ས་དང་རྒྱ་མཚོ་སྐ་རགས་ཏེ། ། ལྷ་དང་ལྷ་མིན་མིར་བཅས་པ། ། མྱུར་དུ་དབང་དུ་བྱེད་པར་འགྱུར། ། ཨོཾ་ཤྲཱི་ཧེ་རུ་ཀཱ་ཡ་བིད་མ་ཧེ་བིདྱཱ་རཱ་ཛཱ་ཡ་དྷི་མ་ཧེ་སྭཱ་ཧཱ། བསྒྲུབ་བྱའི་སྤྱི་བོ་ལ་སྔགས་ཀྱི་རྒྱལ་པོ་འདི་བཀོད་པས་ རེངས་པར་འགྱུར་རོ། ། སྔགས་འདི་རྣམས་རྣམ་པར་ཤེས་ནས་སྟེངས་སུ་སྟོབས་འཛིན་པར་འགྱུར་རོ། ། རྒྱ་མཚོའི་རླབས་དང་། གླང་པོ་ཆེ་དང་། སྤྲེའུ་དང་། འཁྲུལ་འཁོར་དང་། རྟ་དང་། དེ་བཞིན་དུ་དམག་མི་རྣམས་འདིར་ལུས་ལ་བཀོད་ན་རེངས་པར་འགྱུར་རོ། ། དེ་ལྟར་ཡོངས་སུ་བཀོད་པ་ཡིས། ། གྲུ་གསུམ་དཀྱིལ་འཁོར་ཡང་དག་ལྡན། ། དཔལ་ལྡན་རྡོ་རྗེ་འཛིན་པ་ཡང་། ། སྐད་ཅིག་ཙམ་གྱིས་འོང་བར་འགྱུར། ། ཁ་ཡི་དབུས་སུ་རྣམ་པར་བཀོད། ། དེ་བཞིན་ལྕེ་དང་རྐན་ལའོ། ། དེ་ནི་མྱུར་དུ་དགེ་བར་འགྲོ། ། རྡོ་རྗེ་སེམས་ དཔའ་མཉམ་པ་ཡང་། ། སྐད་ཅིག་གིས་ནི་མི་སྨྲ་འགྱུར། ། ལྕེ་ཡི་རྩེ་ནས་རིག་པ་འཕྲོག ། འདི་རུ་བཀོད་པས་འགྲུབ་པར་འགྱུར། ། སྔགས་ཀྱི་རྒྱལ་པོ་སྙིང་གར་དགོད། ། སེམས་ནི་འཕྲོག་པར་བྱེད་པ་ཡིན། །
BOརྐང་པའི་མཐིལ་ནས་མགོ་ཡི་བར། ། ནག་པོའི་གཟུགས་ ནི་རྣམ་པར་དགོད། ། དབང་པོ་ཐམས་ཅད་འཕྲོག་པ་རུ། ། བྱེད་པ་རུ་ནི་ཐེ་ཚོམ་མེད། ། ལས་འདི་ཐམས་ཅད་བྱེད་པར་འགྱུར། ། འདོད་པའི་དངོས་གྲུབ་རབ་ཏུ་སྟེར། ། འདི་རྣམས་དེ་ཡི་དཔའ་བོས་གསུངས། ། འདོད་པས་ས་སྟེངས་ རྙེད་པར་དཀའ། ། བདག་ཉིད་ཡིད་བཞིན་ནོར་བུ་ཉིད། ། དེ་ཉིད་བསྡུས་པར་རྣམ་བཤད་པ། ། འདི་ཡི་སྔགས་དང་འདྲ་བ་མེད། ། འདི་ཡི་ལས་དང་མཉམ་པ་མེད། ། རྣམ་པར་མི་ཤེས་པ་ཡིས་ནི། ། ཅུང་ཟད་ལས་ནི་འགྲུབ་པ་མེད། ། སྔགས་ཀྱི་རྒྱལ་པོ་རྣམ་པར་ ཤེས། ། དངོས་གྲུབ་ཐམས་ཅད་མཛེས་པར་བྱེད། ། རང་གི་ལུས་ལ་རྣམ་པར་དགོད། ། སྒྲུབ་པོ་ཤིན་ཏུ་མཉམ་གཞག་པས། ། དེས་ནི་བལྟས་པས་དབང་དུ་འགྱུར། ། ཐམས་ཅད་སྒྲུབ་པོའི་གཙོ་བོ་ཡིས། ། རབ་ཏུ་ཁྲོས་པས་གསོད་པར་འགྱུར། ། བརྟུལ་ བཞིན་རྣམ་པར་ཁྲོས་པ་ཡིས། ། ཆུ་བོ་དང་ནི་རྒྱ་མཚོ་དང་། ། འཁྲུག་པ་དང་ནི་རྒྱལ་རིགས་དང་། ། རྐུན་པོ་མེ་ཡི་འཇིགས་པ་ལས། ། དེ་ཡིས་རྡོ་རྗེ་ཐོག་ཏུ་འགྱུར། ། གང་དེར་ཡང་དག་བྲིས་པ་ཡིས། ། འཇིག་རྟེན་གསུམ་ཡང་གཡོ་བ་དང་། ། དངོས་གྲུབ་ ཐམས་ཅད་ཐོབ་པར་འགྱུར། ། སྒྲུབ་པོ་མཆོག་ཏུ་གྱུར་པ་ཡིས།
BO། དབང་དང་དགུག་དང་རེངས་པ་ཡིས། ། རྣམ་པར་སྡང་བ་བསྐྲད་དང་གསད། ། གང་དུ་མིང་གིས་བྲིས་ཏེ་གཟུང་། ། ཐམས་ཅད་དུ་ནི་འགྲུབ་པར་འགྱུར། ། རྡོ་རྗེ་སེམས་དཔའ་ལ་སོགས་ལྷ། ། མཁས་པ་ཡིས་ནི་མྱུར་བ་རུ། ། སྐལ་མེད་ཀྱིས་ཀྱང་འགྲུབ་པ་ཡིན། ། སྒྲུབ་པོས་རབ་ཏུ་འབད་པ་ཡིས། ། འདི་ནི་རྟག་ཏུ་སྐྱེ་བར་འགྱུར། ། འཁྲུག་པ་དགྲ་དང་གཡང་ས་དང་། ། རྐུན་པོ་སྟག་དང་གླང་ཆེན་དང་། ། སེང་སྦྲུལ་རྟ་དང་མཚོན་ཆའི་བར། ། གཟའ་ནི་སྣ་ ཚོགས་འཇིགས་པ་ལས། ། ཐམས་ཅད་དུ་ནི་རྒྱལ་བར་འགྱུར། ། དེ་ནི་རྩོད་པ་མེད་འདོད་ན། ། སྔགས་པས་བྲི་བར་བྱ་བ་ཡིན། ། དཔལ་ཁྲག་འཐུང་མངོན་པར་འབྱུང་བ་ལས་ཕྱག་རྒྱ་ཆེན་པོ་སྒྲུབ་པའི་ཀླུའི་ལས་ཀྱི་ཆོ་གའི་ལེའུ་ཞེས་བྱ་བ་སྟེ་སུམ་ཅུ་རྩ་ལྔ་པའོ། ། ། ། དེ་ནས་བསྐྲད་པ་ཡང་དག་བཤད། ། དགྲ་བོ་སྟོབས་ཀྱིས་དྲེགས་པས་ན། ། སྟེང་དུ་འཁོར་བའི་འདབ་མ་ལ། ། མཁས་པས་བྱ་རོག་སྒྲོ་ཡིས་བྲི། ། སྙིང་པོ་གོ་བཟློག་ཡང་དག་ལྡན། ། འབྱུང་པོའི་ཞག་ལ་བརྒྱ་རུ་བཟླས། ། སྟེང་དུ་འཁོར་ཞིང་ལྡིང་བ་ཡི། ། འདབ་ མ་ཕྱེད་དང་གཉིས་ལས་ནི། ། བསྒྲུབ་བྱ་མྱུར་དུ་སྐྲོད་པར་འགྱུར། ། གཙོ་བོ་རྡོ་རྗེ་སེམས་དཔའ་སྐྲོད། །
BOནིམ་བ་པ་ཏྲའི་ཁུ་བར་ལྡན། ། བསྒྲུབ་བྱའི་མིང་དང་དམ་ཚིག་དང་། ། སྙིང་དུ་སྔགས་ཀྱིས་ཆུད་པར་བྱ། ། མ་ལ་སྦྱིན་སྲེག་བྱ་བ་སྟེ། ། བརྒྱད་ལྷག་བརྒྱ་ནི་ ཡོངས་སུ་བཟླས། ། གོ་བཟློག་པ་ཡི་སྙིང་པོ་ཡིས། ། ཉི་མ་ཕྱེད་དམ་ནམ་ཕྱེད་ན། ། ཕོ་ཉ་འཁོར་ཞིང་སྔགས་ནི་བཟླས། ། སྙིང་པོ་གཉིས་བརྒྱད་ལྷག་པའི་བརྒྱས། ། འདི་རྣམས་འཁོར་བར་བྱ་བ་ཡིན། ། ཡིད་ཀྱིས་བརྒྱད་བརྒྱས་དགྲ་རྣམས་ནི། ། འཁྲུལ་ འཁོར་དག་ནི་གཞུག་པར་བྱ། ། སྔགས་ཀྱི་ཞགས་པས་བཅིངས་པ་དང་། ། སྤྱི་བོར་དབྱུག་པ་ཡིས་ནི་བརྡུང་། ། ཚངས་པ་དབང་པོ་དྲག་པོ་དང་། ། མིང་དང་དགྲ་རྣམས་གསོད་པ་ཡིན། ། ཟླ་བ་དག་ནི་ཕྱེད་པ་ལ། ། བསྒྲུབ་བྱའི་སྤྱི་བོར་ཡང་དག་བྲིས། ། ཐོང་པ་ཁྲག་གིས་བཀང་བ་ནི། ། གང་གི་གནས་སུ་དེ་ཉིད་སྦས། ། དེ་མ་ཐག་ཏུ་ཁྲག་ནི་འཛག ། སྔགས་ལ་སུན་ནི་འབྱིན་པ་དེ། ། དེ་ཉིད་ཀྱིས་ནི་འཆི་བར་འགྱུར། ། འདོད་པའི་འཁྲུལ་འཁོར་དང་པོའི་དགྲ། ། འདི་ཉིད་སྟོང་པ་ཆེན་པོ་སྟེ། ། དངོས་གྲུབ་ཀུན་ བྱེད་མཛེས་པ་ཡིན། ། འདི་ནི་ཁྲག་འཐུང་གིས་ནི་བརྗོད། ། སྔོན་དང་ཕྱི་མ་དབུས་དག་ཏུ། ། མཁས་པས་འཇིག་རྟེན་སྤྱོད་པར་ཤེས། །
BOདཔལ་ཁྲག་འཐུང་མངོན་པར་འབྱུང་པ་ལས་གདུག་པ་ཐམས་ཅད་ཀྱི་བསམ་གཏན་གྱི་ཆོ་གའི་ལེའུ་ཞེས་བྱ་བ་སྟེ་སུམ་ཅུ་རྩ་ དྲུག་པའོ། ། ། ། དེ་ནས་ཆར་པ་དབབ་པ་བཤད། ། དཔའ་བོ་གཉིས་མེད་རྣལ་འབྱོར་པས། ། གང་གིས་མྱུར་དུ་ཆར་འབེབ་པ། ། ཀླུ་བརྒྱད་པོས་ནི་ཐེ་ཚོམ་མེད། ། མཐའ་ཡས་དང་ནི་ནོར་རྒྱས་དང་། ། དེ་བཞིན་འཇོག་པོ་སྟོབས་ཀྱིས་རྒྱུ། ། པདྨ་དང་ ནི་པད་ཆེན་དང་། ། དུང་སྐྱོང་དང་ནི་རིགས་ལྡན་བརྗོད། ། སོ་སོ་ཞིང་ནི་རེ་རེ་ཡི། ། སྔགས་དང་རང་མིང་བརྗོད་པར་བྱ། ། སྡེ་ཚན་དྲུག་པའི་གཉིས་པ་ལ། ། དབྱངས་ཀྱི་ལྔ་པས་དབྱེ་བ་བྱ། ། བཅུ་དྲུག་པས་ནི་མཉམ་པར་བརྟེན། ། ཐོག་མ་ཐ་མ་མཉམ་ལྡན་ བརྟག ། སྔགས་འདི་དག་ནི་མཉམ་པར་སྦྱོར། ། མཐའ་ཡས་ལ་སོགས་བརྒྱད་པོ་ནི། ། རྒྱ་མཚོར་འབབ་པའི་ཆུ་བོ་ཡི། ། འཇིགས་པས་གཟུགས་བརྙན་བྱ་བ་ཡིན། ། ཕྱོགས་ཀྱི་མདོག་ཏུ་གདེངས་ཀ་བདུན། ། སྔགས་ཀྱིས་བསྐུལ་བས་ཡང་དག་ལྡན། ། དེ་ཡི་སྙིང་ གར་གཞུག་པར་བྱ། ། པདྨ་འདབ་བརྒྱད་དགོད་བྱས་ལ། ། གཞག་སྟེ་ཉིན་བདུན་མཆོད་པར་བྱ། ། མཐའ་དག་ཆུ་ཡིས་རྒྱས་པར་བྱ། ། མྱུར་དུ་ཆར་ནི་མི་འབེབ་ན། ། ལས་གཞན་དག་ནི་སྦྱར་བར་བྱ། །
BOདུར་ཁྲོད་ཀྱི་ནི་རས་དག་ལ། ། དུག་དང་སྐེ་ཚེ་དག་དང་ནི། ། ནིམ་ པའི་འདབ་མའི་ཁུ་བ་ཡིས། ། སྔགས་འདི་དག་ནི་ཡང་དག་བྲི། ། སྦུ་གུ་ལ་སོགས་པར་ནི་གཞུག ། འབྲས་ཕུབ་མེ་ལ་གདུང་བར་བྱ། ། ཆར་ནི་འབབ་པར་འགྱུར་བའོ། ། ཡང་ན་ཀླུ་ནོར་རྒྱས་ཀྱི་གཟུགས་བརྙན་མགོ་དགུ་པ་བྱས་ལ་དེའི་སྙིང་གར་བཅུག་ལ་གདུང་བར་ བྱའོ། ། ཆར་པའི་རྒྱུན་ཆེན་པོ་འབབ་པར་འགྱུར་རོ། ། འཛམ་བུའི་གླིང་ཀུན་ཏུ་རྒྱས་པར་འགྱུར་རོ། ། དཔལ་ཧེ་རུ་ཀའི་བཀའ་ཉན་པར་བྱེད་པ་དང་། ཀླུ་ལ་ཀླུས་ཞི་བར་འགྱུར་རོ། ། དེ་ནས་དཔལ་ལྡན་སྦྱིན་སྲེག་གིས། ། གཟའ་དགུ་པོ་ནི་ཞི་བ་ཡིན། ། མིག་དམར་ མཇུག་{རིངས་,རིང་}ལ་སོགས་པར། ། སྔགས་ཀྱི་ཆོ་ག་བཞིན་དུ་སྦྱར། ། ཉི་མ་དང་ནི་ཟླ་བ་འཛིན། ། མིག་དམར་དང་ནི་གཟའ་ལྷག་དང་། ། དེ་བཞིན་ཕུར་བུ་པ་བ་སངས། ། དེ་བཞིན་དུ་ནི་སྤེན་པ་མཆོག ། སྒྲ་གཅན་མཇུག་{རིངས་,རིང་}མཉམ་པར་བཤད། ། རང་མིང་བརྗོད་པ་ཡི་ ནི་སྔགས། ། དང་པོ་ཨོཾ་གྱི་ཡི་གེ་དང་། ། ཐ་མར་སྭཱ་ཧཱ་སྦྱར་བ་ཡིན། ། དབང་པོ་མེ་དང་གཤིན་རྗེ་དང་། ། དེ་བཞིན་བདེན་བྲལ་ཆུ་བདག་དང་། ། རླུང་ལྷ་དང་ནི་གནོད་སྦྱིན་དང་། ། དབང་ལྡན་དུ་ནི་རབ་ཏུ་གྲགས། །
BOདེ་བཞིན་འཇིག་རྟེན་སྐྱོང་བ་དང་། ། སྦྱོར་བའི་ལམ་ ལ་རབ་ཏུ་འཇུག ། རང་མཚན་བཞོན་པ་ཁ་དོག་དང་། ། འཇིག་རྟེན་སྐྱོང་བ་བདག་ཉིད་ཆེ། ། ཁྲོ་བོ་གཉིས་དང་ཡང་དག་ལྡན། ། བསྒྲུབ་བྱ་ལ་ནི་སྦྱོར་བ་ཡིན། ། ཉིན་ཞག་བདུན་གྱི་སྦྱིན་སྲེག་གིས། ། སྒྲུབ་པོ་ཅི་བགྱི་འགྱུར་བ་ཡིན། ། ཞལ་བཞི་པ་ཡི་སྔགས་ཀྱིས་ནི། ། ཕྱོགས་དང་མཚམས་སུ་གསུངས་པ་སྟེ། ། འབྲུ་རྣམས་ཐམས་ཅད་བསྲེས་ནས་ནི། ། ཉི་ཁྲི་རུ་ནི་བསྔགས་ནས་ཀྱང་། ། གྲངས་ནི་བརྒྱད་དང་དགུ་པོ་བསྒྲུབ། ། འདི་རྣམས་འཇིག་རྟེན་པ་ཡིན་ཏེ། ། རྣལ་འབྱོར་པས་ནི་སྒྲུབ་པ་པོ། ། ས་ཡི་སྟེང་དུ་རྣམ་པར་སྤྱོད། ། དཔལ་ལྡན་ཁྲག་འཐུང་འཇིག་རྟེན་འགྱུར། ། ཐམས་ཅད་མཁྱེན་པའི་ཡེ་ཤེས་མཆོག ། སེམས་ཅན་རང་བཞིན་སངས་རྒྱས་ཀུན། ། རྡོ་རྗེ་སེམས་དཔའ་བདེ་བའི་མཆོག ། སྔགས་དང་ཕྱག་རྒྱ་མཉམ་པར་བྱ། ། དཔལ་ལྡན་ཁྲག་འཐུང་མཆོད་པ་དང་། ། མཐོ་རིས་ཀྱི་ནི་ དོན་ཆེད་དུ། ། ཞི་བའི་དངོས་གྲུབ་འོང་བ་སྟེ། ། རྟག་ཏུ་དྲུག་ཅུ་རྩ་བཞི་མཆོད། ། དབང་པོ་གཉིས་ཀྱི་རབ་སྦྱོར་བས། ། རང་བྱུང་ཡེ་ཤེས་ཀྱི་ནི་གཞི། ། ཐམས་ཅད་མཁྱེན་པའི་ཡེ་ཤེས་མཆོག །
BOདཔལ་ཁྲག་འཐུང་མངོན་པར་འབྱུང་བ་ལས་ཆར་དབབ་པ་དང་། གཟའ་རྒྱུ་བ་དང་། འཇིག་རྟེན་སྐྱོང་བ་བརྒྱད་ཀྱི་སྒྲུབ་ཐབས་ཀྱི་ཆོ་གའི་ལེའུ་ཞེས་བྱ་བ་སྟེ་སུམ་ཅུ་རྩ་བདུན་པའོ། ། ། ། དེ་ནས་གཞན་ན་མེད་པ་ཡི། ། ཕོ་ཉ་ཀུན་གྱི་དབང་ཕྱུག་མཆོག ། ཞལ་བཞི་ཡི་ནི་ཧཱུྃ་ཡིག་དང་། ། ཇི་ལྟར་འདོད་པར་ལས་ཀྱིས་དབྱེ། ། ལྷ་ དང་མི་ཡི་བདེ་བ་ནི། ། གཅིག་ཏུ་བསྡུས་ནས་བལྟས་པ་ཡིས། ། ཁྲག་འཐུང་གཉིས་མེད་བདེ་བ་ལ། ། བཅུ་དྲུག་ཆར་ཡང་མི་ཕོད་དོ། ། གོས་ཆེན་དང་ནི་ཤ་ཆེན་དང་། ། དབང་ཆེན་དང་ནི་སྦྲང་རྩི་ཆེ། ། ཐམས་ཅད་དུར་ཁྲོད་ནས་བྱུང་བ། ། ཕྱག་རྒྱ་འདི་ཡི་དབང་ཕྱུག་ མཆོག ། བྱ་བ་ཀུན་ལ་དངོས་གྲུབ་སྟེར། ། ཇི་སྲིད་མདུན་དུ་དགྲ་བོ་བསྒོམ། ། ཞགས་པ་ནག་པོས་མགྲིན་པ་བཅིངས། ། འདོད་པས་དབྱུག་པས་བརྡུང་བར་བྱ། ། ཆོ་ག་བཞིན་དུ་སྔགས་པས་བསམ། ། ལྷོ་ཕྱོགས་སུ་ནི་བསྒྱེལ་བར་བྱ། ། དགར་བ་ཡིད་དང་ལྟུང་བ་ དང་། ། ཡང་དང་ཡང་དུ་བསྐྲད་པ་དང་། ། ལྟེ་བ་རུ་ནི་བཀག་པ་ཉིད། ། ཡང་དང་ཡང་དུ་བརྒྱལ་བར་འགྱུར། ། ཉི་མ་ཕྱེད་དང་ནམ་ཕྱེད་ན། ། གཟུགས་བརྙན་གྱི་ནི་སྦྱིན་སྲེག་བྱ། ། ཉི་མ་གསུམ་པ་ཀུན་ཏུ་བྲི། །
BOའཆི་བར་འགྱུར་ཞིང་མགོ་བོ་ལྟུང་། ། སྔགས་ཀྱི་ཆོ་གས་འཆི་བ་ནི། ། ས་སྟེངས་མཆེ་བས་བཏབ་པ་སྟེ། ། རྣལ་འབྱོར་མ་ཡི་སྔགས་ཀྱིས་ནི། ། རྣལ་འབྱོར་པ་ལ་དངོས་གྲུབ་སྟེར། ། སྙིང་པོས་མི་ལ་བསྡུས་ནས་སུ། ། ཕྱི་ནས་ཡང་ནི་ལྟུང་བ་ཡིན། ། ཕྱག་རྒྱ་ཆེན་པོའི་སྙིང་པོ་རུ། ། ཡོན་པོ་ཞེས་བར་རབ་ཏུ་ གྲགས། ། སྒྲུབ་པོས་འཇིག་རྟེན་གསུམ་པོ་ཡང་། ། འདི་ཡིས་ཐམས་ཅད་བསྡུས་པ་ཡིན། ། དེ་ནས་བསྐྲད་པ་བཤད་པར་བྱ། ། དགྲ་བོ་རྣམས་ཀྱིས་སྟོབས་དྲེགས་དང་། ། སྔགས་པས་སྔོན་གསུངས་ཆོ་ག་བཞིན། ། ནིམ་པའི་འདབ་མའི་ཁུ་བ་དང་། ། བྱ་རོག་སྒྲོ་ ཡི་བྱེ་བྲག་གིས། ། སྒྲུབ་པོས་རབ་ཏུ་འབད་པ་མཆོག ། བློ་ལྡན་རང་གི་གནས་ལ་སྤྱོད། ། དེ་ནི་ས་སྟེང་འཁོར་ལོས་སྒྱུར། ། ཉི་མ་བདུན་གྱིས་ལྷ་ཉིད་དང་། ། ཟླ་བ་ཡིས་ནི་འཇིག་རྟེན་པ། ། ལོ་ཡིས་སངས་རྒྱས་བྱང་ཆུབ་སེམས། ། དྲན་པས་ཕལ་ཆེའི་མི་རྣམས་ སོ། ། ཟླ་བ་ཕྱེད་ཀྱིས་ལྷ་མ་ཡིན། ། སྲིན་པོ་དང་ནི་གནོད་སྦྱིན་མོ། ། ཀླུ་དང་དྲི་ཟ་དག་དང་ནི། ། མི་འམ་ཅི་ལ་སོགས་སྐད་དུ། ། སྔགས་དང་ཕྱག་རྒྱ་འདི་རྣམས་ཀྱིས། ། སྒྲུབ་པོས་ས་སྟེང་རྙེད་པར་དཀའ། ། རྣལ་འབྱོར་འདི་ནི་དངོས་གྲུབ་ཆེ། །
BOརྣལ་འབྱོར་ཀུན་ལ་འདི་ མཆོག་ཡིན། ། རྣལ་འབྱོར་འདི་ནི་དཔལ་ཆེན་པོ། ། སུམ་ཅུ་པས་ནི་མཆོད་པ་ཡིན། ། འདི་དང་འདྲ་བ་གཞན་ན་མེད། ། ཅུང་ཟད་མཛེས་པ་གསང་བ་རྒྱས། ། འཇིག་རྟེན་གསུམ་ལས་རྣམ་པར་རྒྱལ། ། གསང་བའི་མིང་དང་མཁའ་འགྲོ་མ། ། གང་ཞིག་ཅུང་ཟད་པས་ རབ་སྐྱེ། ། མི་ཡི་འཇིག་རྟེན་ན་ནི་ཡོད། ། དེ་ཀུན་ལྷོ་རུ་ཁ་བལྟས་པའོ། ། དཔལ་ཁྲག་འཐུང་མངོན་པར་འབྱུང་བ་ལས་བསྐྲད་པ་དང་གསང་པའི་སྔགས་ཀྱི་ལས་ཀྱི་ཆོ་གའི་ལེའུ་ཞེས་བྱ་བ་སྟེ་སུམ་ཅུ་རྩ་བརྒྱད་པའོ། ། ། ། དེ་ནས་ཡང་དག་བཤད་བྱ་བ། ། འཁོར་ལོས་ སྒྱུར་བ་དྲུག་གི་སྔགས། ། ཆོ་ག་ཤེས་པས་སྔགས་ནི་གསང་། ། འདོད་པའི་དངོས་གྲུབ་འོང་བར་འགྱུར། ། སེམས་ནི་ཤིན་ཏུ་རྣམ་དག་བྱས། ། དེ་ནས་རྫ་རྔ་བཅིང་བར་བྱ། ། ཤིན་ཏུ་མཉམ་པར་གཞག་པ་ཡིས། ། དབྱངས་ཀྱི་ཡི་གེ་དགོད་པར་བྱ། ། རེའུ་མིག་དགུ་ནི་ བཅིང་བྱ་སྟེ། ། མཉམ་པར་ཡི་གེ་བཞི་བཅུ་དགུ། ། གནས་དེར་བློ་ལྡན་གྱིས་ནི་བཏུ། ། དང་པོ་རྡོ་རྗེ་སེམས་དཔའ་སོགས། ། རྫ་རྔའི་རྣམ་པ་དཔའ་བོ་ཆེ། ། དཔའ་བོ་ཆེན་པོའི་ཞལ་ནི་བསྒྱུར། ། ཇི་ལྟར་རིགས་པ་དེ་ལྟར་བྱས། ། མཐའ་དག་རབ་ཏུ་ཞི་བ་ཡིན། །
BOསྡེ་ ཚན་དབྱེ་བ་ཤེས་བྱས་ནས། ། མཁས་པས་ཕྱི་མོ་ལས་ནི་བཏུ། ། བཞི་བཅུ་རྩ་བརྒྱད་པ་བླངས་ཏེ། ། དབྱངས་ཀྱི་ལྔ་པས་ཡང་དག་ལྡན། ། དང་པོ་ཡི་གེར་གྱུར་པ་ཡིན། ། དེ་ནས་བཞི་བཅུ་རྩ་གཅིག་བླང་། ། བཞི་བཅུ་པ་ཡིས་སྦྱར་བ་ཡིན། ། གཉིས་པར་ཡོངས་སུ་གྲགས་ པའོ། ། དེ་ནས་སུམ་ཅུ་སོ་དྲུག་བླང་། ། དབྱངས་ཀྱི་གསུམ་པ་སྦྱར་བ་ཡིན། ། གསུམ་པའི་ཡི་གེར་གྱུར་པའོ། ། དྲོད་ཀྱི་ཡི་གེ་གསུམ་པ་ལ། ། དབྱངས་ཀྱི་ལྔ་པ་ཡང་དག་ལྡན། ། བཞི་པའི་ཡི་གེར་གྱུར་པའོ། ། དྲུག་པ་ཡི་ནི་ལྔ་པ་ལ། ། དེ་ཉིད་ཀྱི་ནི་བཞི་པར་ལྡན། ། ལྔ་པའི་ཡི་གེར་གྱུར་པ་སྟེ། ། རྡོ་རྗེ་སེམས་བདག་ཉིད་ཆེན་པོ། ། དེ་བཞིན་བཞི་བཅུ་རྩ་དགུ་བླང་། ། དབྱངས་ཀྱི་ལྔ་པས་སྦྱར་བ་སྟེ། ། སྟེང་དུ་ནཱ་དས་སྦྱར་བ་ཡིན། ། ཡི་གེ་དྲུག་པ་རུ་ནི་བརྗོད། ། ཨོྃ་གྱི་ཡི་གེ་དང་པོ་སྟེ། ། ཕཊ་ཀྱི་ཡི་གེ་ཐ་མར་རོ། ། རྡོ་རྗེ་སེམས་དཔའ་རབ་ཏུ་གྲགས། ། དེ་བཞིན་ གཅིག་དམན་ལྔ་བཅུ་ལ། ། དབྱངས་ཀྱི་གཉིས་པ་སྦྱར་བ་ཡིན། ། ཡ་ཡི་སྡེ་ཚན་བརྒྱད་པ་ལ། ། མེ་ཡི་བུས་ནི་སྦྱར་བ་ཡིན། ། དབྱངས་ཀྱི་བཞི་པས་སྦྱར་བ་སྟེ། ། གཉིས་པའི་ཡི་གེ་མཆོག་ཡིན་ནོ། །
BOསྟེང་དུ་ན་དས་སྦྱར་བའོ། ། ཡི་གེ་གཅིག་དམན་ཉི་ཤུ་ལ། ། སྐྱེ་བར་བྱེད་པས་ཡང་དག་གནས། དབྱངས་ཀྱི་གསུམ་པས་སྦྱར་བ་མིས། ། ཡི་གེ་གསུམ་པར་གྱུར་པ་ཡིན། ། གཅིག་གིས་དམན་པའི་ལྔ་བཅུ་བླང་། ། སུམ་ཅུ་རྩ་དྲུག་ཡང་དག་བླང་། ། ཡི་གེ་བཞི་པ་བརྗོད་པའོ། ། ལན་གཉིས་སུ་ནི་བརྗོད་པར་བྱ། ། དེ་བཞིན་བཞི་བཅུ་ཞེ་བརྒྱད་པ། ། གཟུགས་ཀྱིས་རབ་ཏུ་དབྱེ་བ་ཡིན། ། {བཅྭ་,བཅོ་} ལྔ་པ་ནི་ཡང་དག་བླང་། ། ཡི་གེ་བདུན་པ་རུ་ནི་བརྗོད། ། འདོད་པའི་དོན་ཀུན་སྒྲུབ་པ་པོས། ། ཨོཾ་གྱི་ཡི་གེ་དང་པོ་སྟེ། ། ཧཱུྃ་ཕཊ་ཡི་གེ་མཐའ་རུ་སྦྱར། ། རྣམ་སྣང་མཛད་དུ་གྱུར་པའོ། ། འདིས་ནི་དངོས་གྲུབ་ཐམས་ཅད་སྟེར། ། དབྱངས་ཀྱི་ གཉིས་པ་ཉིད་དག་དང་། ། ཨནྟ་སྠ་ཡི་གཉིས་པ་ལ། ། དབྱངས་ཀྱི་བཅུ་གསུམ་པ་ཡིས་སྦྱར། ། གཉིས་པའི་ཡི་གེར་གྱུར་པའོ། ། བཞི་བཅུ་རྩ་བཞི་ཡང་དག་ལྡན། ། དབྱངས་ཀྱི་གསུམ་པས་སྦྱར་བ་སྟེ། ། ཡི་གེ་གསུམ་པར་གྱུར་པའོ། ། ཨོྃ་ཡིག་དང་པོར་ སྭཱ་ཧཱ་མཐར། ། པད་མ་གར་གྱི་དབང་ཕྱུག་གོ། ། འདི་རྣམས་རང་གི་སྔགས་བཤད་པའོ། ། དེ་བཞིན་གཅིག་དམན་ལྔ་བཅུ་བླང་། ། དབྱངས་ཡིག་བཅུ་གཅིག་པ་ཡིས་སྦྱར། །
BOདང་པོའི་ཡི་གེ་བརྗོད་པར་བྱ། ། དྲོད་ཀྱི་ཡི་གེ་བཞི་པ་ལ། ། དབྱངས་ཀྱི་བཅུ་གཅིག་ གིས་ནི་སྦྱར། ། གཉིས་པའི་ཡི་གེ་བརྗོད་པར་བྱ། ། ཨནྟ་སྠ་ཡི་གཉིས་པ་ལ། ། དབྱངས་ཀྱི་ལྔ་པས་སྦྱར་བ་ཡིན། ། ར་ཡིག་དག་དང་བཅུ་བདུན་པ། ། ལྔ་པ་ཡིས་ནི་མཉམ་པར་ལྡན། ། {བཅྭ་,བཅོ་}ལྔ་པ་ཡིས་མཆོད་པར་བྱ། ། ཨོྃ་གྱི་ཡི་གེ་དང་པོ་སྟེ། ། ཧཱུྃ་ཧཱུྃ་ཕཊ་ནི་ མཐའ་མར་ཡིན། ། འདོད་པའི་དོན་ཀུན་སྒྲུབ་པའོ། ། དཔལ་ལྡན་ཁྲག་འཐུང་དཔའ་བོ་ཆེ། ། རྣལ་འབྱོར་དབང་ཕྱུག་ཀུན་གྱི་དབང་། ། དེ་ནས་{བཅྭ་,བཅོ་}བརྒྱད་པ་ནི་བླང་། ། དྲོད་ཀྱི་ཡི་གེ་དང་པོ་ལ། ། དབྱངས་ཡིག་བཅུ་གསུམ་པ་ཡིས་སྦྱར། ། གཉིས་པ་རུ་ནི་རབ་ཏུ་ གྲགས། ། ཨན་ཏསྠ་ཡི་གསུམ་པ་ལ། ། བཅུ་གསུམ་པ་ཡིས་སྦྱར་བ་ཡིན། ། དབྱངས་ཀྱི་གཉིས་པ་ཉིད་དག་དང་། ། མཁས་པས་གསུམ་པ་རུ་ནི་བརྗོད། ། བཞི་བཅུ་རྩ་གཉིས་ཡང་དག་བླང་། ། གཅིག་གིས་མ་ཚང་ལྔ་བཅུ་ལ། ། དབྱངས་ཀྱི་ལྔ་པས་སྦྱར་ བ་ཡིན། ། སྟེང་དུ་ན་དས་སྦྱར་བར་བྱ། ། ཨོྃ་གྱི་ཡི་གེ་དང་པོ་སྟེ། ། ཕཊ་ཀྱི་ཡི་གེ་ཐ་མར་ཡིན། ། དེ་ལྟ་ཉིད་དུ་ཐེ་ཚོམ་མ་མེད། ། འདི་ནི་རྡོ་རྗེ་ཉི་མར་གྱུར། ། དངོས་གྲུབ་སྟེར་ཞིང་ཐར་བ་སྟེ། །
BOཡི་གེ་བཞི་བཅུ་པ་ཉིད་དང་། ། དེ་ཉིད་ལ་ནི་དབྱངས་ཡིག་དང་། ། བཅུ་གསུམ་ པ་ཡིས་སྦྱར་བ་ཡིན། ། དེ་ནི་གཉིས་ལྡན་དུ་ནི་བྲི། ། འོན་ཀྱང་རིག་པ་ཅུང་ཟད་མེད། ། གཅིག་གིས་མ་ཚང་ཉི་ཤུ་དང་། ། ཨན་ཏསྠ་ཡི་བཞི་པ་དང་། ། དབྱངས་ཡིག་གཉིས་པས་ཡང་དག་ལྡན། ། དེ་བཞིན་{བཅྭ་,བཅོ་}ལྔ་པ་ཡིས་སྦྱོར། ། བཞི་པའི་ཡི་གེར་བརྗོད་ པའོ། ། དབྱངས་ཡིག་གི་ནི་གཉིས་པ་དང་། ། དེ་བཞིན་བཅུ་དྲུག་པ་ཉིད་དང་། ། དཔའ་བོ་ཉི་ཤུ་དྲུག་པ་བཏུ། ། ཡི་གེ་བདུན་པས་བརྗོད་པའོ། ། ཨོྃ་གྱི་ཡི་གེ་དང་པོ་སྟེ། ། ཧཱུྃ་ཕཊ་ཐ་མར་སྦྱར་བ་ཡིན། ། དཔའ་བོ་ཆེན་པོ་རྟ་མགྲིན་ཏེ། ། དངོས་གྲུབ་ཀུན་གྱི་གཙོ་ བོ་ཡིན། ། དཔལ་ཁྲག་འཐུང་མངོན་པར་འབྱུང་བ་ལས་འཁོར་ལོ་སྒྱུར་བ་དྲུག་གི་བསམ་གཏན་དང་སྔགས་བཏུ་བའི་ཆོ་གའི་ལེའུ་ཞེས་བྱ་བ་སྟེ་སོ་དགུ་པའོ། ། ། ། དེ་ནས་ཡང་དག་གནས་པའི་སྔགས། ། དཔའ་བོ་གཉིས་མེད་རྣལ་འབྱོར་མ། ། སྙིང་ ག་མགོ་བོ་སྤྱི་གཙུག་དང་། ། གོ་ཆ་མིག་ལ་སོགས་པ་རུ། ། རྡོ་རྗེ་སེམས་དཔའ་ལ་སོགས་སྦྱར། ཆོ་ག་བྱས་ཤིང་རབ་ཏུ་བསྲུང་། ། རྡོ་རྗེ་སེམས་དཔའ་སྙིང་ལ་སྦྱར། ། དངོས་གྲུབ་ཐམས་ཅད་རབ་ཏུ་སྟེར། །
BOརྣམ་པར་སྣང་མཛད་མགོ་བོར་དགོད། ། དེ་ལྟར་ ཡོན་ཏན་ཁྱད་པར་ཅན། ། སྤྱི་གཙུག་པད་མ་གར་དབང་ཕྱུག ། ཕྲག་པར་ཁྲག་འཐུང་དགོད་པ་སྟེ། ། མིག་གཉིས་རྡོ་རྗེ་ཉི་མ་ཡིན། ། ཡན་ལག་ཀུན་ལ་རྟ་མགྲིན་ཏེ། ། དེ་ལྟར་གོ་ཆ་བགོས་པ་ཡིན། ། ཐམས་ཅད་ལས་ནི་སྒྲུབ་པར་བྱེད། ། ལག་པར་དགོད་པ་ ཡང་ནི་བྱ། ། ལག་པའི་བརྡ་ནི་བསྟན་བྱ་སྟེ། ། རྡོ་རྗེ་སེམས་དཔའ་མཐེ་བོར་གནས། ། དེ་བཞིན་རྣམ་སྣང་མཛུབ་མོ་སྟེ། ། གུང་མོ་པད་མ་གར་དབང་ཕྱུག ། མིང་མེད་དཔལ་ལྡན་ཁྲག་འཐུང་སྟེ། ། མཐེའུ་ཆུང་རྡོ་རྗེ་ཉི་མའོ། ། སེན་མོའི་ངོས་ལ་རྟ་མཆོག་ཡིན། ། ལག་ པའི་མཐིལ་དུ་དཔའ་བོ་ཆེ། ། གཉིས་མེད་རྡོ་རྗེའི་རྣལ་འབྱོར་མ། ། རྒྱབ་ཏུ་རྣལ་འབྱོར་མ་རྣམས་ཀུན། ། འདི་རྣམས་ལག་པ་ལ་ནི་དགོད། ། ཀུན་གྱིས་སྟུག་པར་མཉམ་པ་ནི། ། དེ་ལྟར་ཆོ་ག་བཞིན་དུ་ནི། ། དཔའ་བོ་རྣལ་འབྱོར་མ་མཆོད་བྱ། ། གཤིན་རྗེའི་ཕྱོགས་ནས་ བརྩམས་ནས་ནི། ། ཇི་སྲིད་བདེན་བྲལ་གྱི་ནི་བར། ། དུས་དྲུག་ཉིས་འགྱུར་དུ་ནི་བྱས། ། མཁའ་འགྲོ་དྲ་བའི་སྡོམ་པ་མཆོད། ། ཚེས་དང་དབྱངས་དང་དུས་ཤེས་བྱ། ། དུས་བཞི་སུམ་འགྱུར་ཤེས་པར་བྱ། ། དཀྱིལ་འཁོར་དབུས་སུ་ཧེ་རུ་ཀ། །
BOསྤྱན་དྲངས་ནས་ནི་མཆོད་པ་འཕེལ། ། རྟག་ཏུ་རྣལ་འབྱོར་དབང་ཕྱུག་ལ། ། མཆོད་པས་དབུལ་བར་མི་འགྱུར་རོ། ། མཁའ་འགྲོ་མ་དང་ལཱ་མ་དང་། ། དུམ་སྐྱེས་མ་དང་གཟུགས་ཅན་མ། ། འདི་རྣམས་དཔའ་བོའི་སྲིང་མོ་ཡིན། ། འདོད་པའི་དོན་ཀུན་སྒྲུབ་པ་ཡིན། ། དཔལ་ ཁྲག་འཐུང་མངོན་པར་འབྱུང་བ་ལས་དཔའ་བོ་དྲུག་གི་གོ་ཆ་དང་། ལྷའི་གྲངས་དང་ལག་པའི་མཆོད་པའི་ཆོ་གའི་ལེའུ་ཞེས་བྱ་བ་སྟེ་བཞི་བཅུ་པའོ། ། ། ། དེ་ནས་གཞན་ཡང་བཤད་བྱ་བ། ། དུས་བཞི་མཐའ་ཡི་རྣལ་འབྱོར་ལ། ། གསང་བའི་མཆོད་པའི་གསང་བ་ནི། ། དཔའ་བོ་གཉིས་མེད་བསྟན་པར་བྱ། ། རྫོགས་ལྡན་འདི་རུ་མ་ཡིན་ཏེ། ། གསུམ་ལྡན་ལ་ནི་སྲིང་མོར་བརྗོད། ། གཉིས་ལྡན་ལ་ནི་བུ་མོར་ཤེས། ། རྩོད་ལྡན་ཆུང་མའི་ཕོ་ཉར་གནས། ། དེ་ལྟར་ཆོ་ག་ཤེས་བྱས་ནས། ། དངོས་གྲུབ་འབྲས་བུ་སྐལ་ལྡན་འགྱུར། ། དཔའ་བོ་ ཀུན་གྱི་རྗེས་བསྒོམས་ནས། ། འདོད་པའི་དངོས་གྲུབ་ཡོད་པ་ཡིན། ། ཕྱག་རྒྱ་ཆེན་པོའི་ཐེག་པ་ཆེ། ། རྣལ་འབྱོར་མ་རྣམས་དངོས་གྲུབ་སྟེར། ། ཕྱག་རྒྱ་ཆེན་པོ་གཞན་ན་མེད། ། རྣལ་འབྱོར་ཀུན་ལ་སྒྲུབ་པ་པོས། ། འཇིག་རྟེན་པ་དང་འཇིག་རྟེན་འདས། ། གཞན་ཡང་ རིག་བྱེད་སྨྲ་བ་དང་། །
BOདཔྱོད་པ་པ་དང་གྲངས་ཅན་དང་། ། གཞན་ཡང་བྱེ་བྲག་སྨྲ་བ་ལྟར། ། ཚངས་པ་ཁྱབ་འཇུག་ལྷ་ཆེན་གྱི། ། ཀུན་ཏུ་དངོས་གྲུབ་མཆོད་པ་སྟེ། ། དངོས་གྲུབ་ཡང་དག་ཡེ་ཤེས་ཉིད། ། ཐམས་ཅད་པས་ནི་མཆོག་ཡིན་ནོ། ། ས་ལས་རིན་ཆེན་བཞི་ ཡིན་ཏེ། ། དེ་བཞིན་མཆོག་གི་མཆོག་ཉིད་དོ། ། མཁའ་འགྲོ་མ་དང་རིག་པ་ཆེ། ། དཔལ་ལྡན་ཁྲག་འཐུང་རྒྱལ་པོ་དང་། ། སྡོམ་པའི་བདག་ཉིད་ཆེན་པོ་དང་། ། རྣལ་འབྱོར་འདི་རྣམས་ཤེས་པ་མཆོག ། རིག་བྱེད་བཞི་ལ་ང་མི་བྱམས། ། ང་ལ་གུས་པས་ང་བྱམས་སོ། ། དེ་ ལ་ང་སྟེར་དེ་རྗེས་གཟུང་། ། ཇི་ལྟར་བདག་ཉིད་ཀུན་ཏུ་མཆོད། ། ཐམས་ཅད་གཉིས་སུ་མེད་པ་སྟེ། ། ཀུན་ནས་ཀུན་ཏུ་རྣལ་འབྱོར་བསྒྲུབ། ། དཔལ་ལྡན་ཁྲག་འཐུང་དཔའ་བོ་མཆོག ། མཛའ་བ་ཐམས་ཅད་འདུས་པ་ཡིན། ། ཟླ་བའི་བཏུང་བས་དངོས་གྲུབ་འགྱུར། ། རྟག་པ་ཡི་ནི་གོ་འཕང་མཆོག ། མཁའ་འགྲོ་མ་ཡི་དྲ་བ་སྡོམ། ། མཁའ་དང་མཉམ་ལས་བཏུས་པ་ཡིན། ། ཀུན་མཁྱེན་ཡེ་ཤེས་དེ་རང་བཞིན། ། ཁྲག་འཐུང་མངོན་པར་འབྱུང་ཞེས་པ། ། ཐར་པའི་དངོས་གྲུབ་མཆོག་ཏུ་སྟེར། ། དཔལ་ལྡན་ཁྲག་འཐུང་ཇི་ལྟར་འཐོབ། ། ཡོན་ཏན་གཞན་ནི་རྩྭ་བཞིན་བཏང་། ། སྤྱན་མ་མཐེ་བོང་ལ་ནི་གནས། །
BOམཛུབ་མོ་མཱ་ལ་ཀཱི་རུ་བརྗོད། ། གུང་མོའི་རྩེ་མོར་སྒྲོལ་མ་ཡིན། ། མིང་མེད་ལ་ནི་འོད་བྱེད་མ། ། མཐེ་ཆུང་ཕ་རོལ་ཕྱིན་མ་དགོད། ། ལག་པའི་མཐིལ་དུ་མཉམ་པར་སྦྱོར། ། རྒྱབ་ཏུ་ གཤེགས་སུ་གསོལ་བ་སྟེ། ། དེ་ལྟར་ཉིད་དུ་ཐེ་ཚོམ་མེད། ། དཔལ་ཁྲག་འཐུང་མངོན་པར་འབྱུང་བ་ལས་དུས་བཞིའི་མཐའི་རྣལ་འབྱོར་མ་དང་ལག་པའི་བརྡའི་ཆོ་གའི་ལེའུ་ཞེས་བྱ་བ་སྟེ་བཞི་བཅུ་རྩ་གཅིག་པའོ། ། ། ། དེ་ནས་གཞན་ཡང་བཤད་བྱ་བ། ། སྐྱེ་བ་བདུན་ པའི་སྒྲུབ་པ་པོ། ། བསྡུས་པས་མྱུར་དུ་འགྲུབ་པར་འགྱུར། ། སྔགས་དང་རྣལ་འབྱོར་རབ་འབད་པས། ། འབྲས་དཀར་བཏགས་པའི་རང་བཞིན་ལས། ། སྔགས་པས་བྱོལ་སོང་གཟུགས་དང་ནི། ། གྲོ་ག་ལ་སོགས་ཡང་དག་བླང་། ། སྒྲུབ་པོས་གང་ལྟ་ཇི་ལྟ་བར། ། དེ་ཡི་གཟུགས་ལ་གཞག་བྱ་བ། ། མིང་ནི་སྔགས་ཀྱི་ནང་ཆུད་བྱ། ། ལུས་ནི་ཙན་དན་དམར་པོས་བྱུག ། ཤིན་ཏུ་མཉམ་པར་བཞག་པས་བསྒོམ། ། གང་གིས་ནུབ་མོ་ཅི་ནུས་བཟླས། ། བྱུག་པའི་མཆོད་པའི་བྱེ་བྲག་དང་། ། དེ་ནི་ཟོས་པ་ཙམ་གྱིས་ནི། ། མི་རྣམས་དམ་ ཚིག་ཅན་དུ་འགྱུར། ། ཅེ་སྤྱང་ཤ་དང་ཆང་གིས་ནི། ། ཕྱི་ནང་བདག་ཉིད་མཆོད་པར་བྱ། ། ཅེ་སྤྱང་སྦྱིན་སྲེག་བྱས་པ་ལས། །
BOདེ་ལ་དངོས་གྲུབ་ཐམས་ཅད་གནས། ། འདི་རུ་ཅེ་སྤྱང་སྦྱིན་སྲེག་བྱ། ། ནོར་གྱི་ལྷ་དང་འདྲ་བར་འགྱུར། ། དེ་ནས་གཏོར་མ་སྦྱིན་པར་བྱ། ། མཁའ་འགྲོ་མ་ཀུན་དགྱེས་པར་འགྱུར། ། ཇི་སྲིད་ཡོངས་སུ་རྒྱས་པ་རུ། ། དེ་ཡི་སྔགས་ཀྱིས་འགྲུབ་པར་འགྱུར། ། ཡང་དག་བརྟག་པའི་ཚོགས་ཀྱིས་གང་། ། རྣལ་འབྱོར་བཞི་སོགས་ཕྱག་རྒྱ་དང་། ། རང་གི་མདོག་དང་ཕྱག་མཚན་དབྱིབས། ། དངོས་ གྲུབ་ཐམས་ཅད་རབ་སྟེར་བ། ། ཐིག་ལེ་དང་ནི་ནཱ་དས་སྦྱར། ། རྣལ་འབྱོར་ཆེ་ལ་རྣམ་པར་གནས། ། ལས་ཀྱི་དབྱེ་བས་ཧཱུྃ་ཡིན་ནོ། ། འབད་པས་ཐར་པ་བསྒོམ་པར་བྱ། ། ལྟེ་སྙིང་མགྲིན་པ་སྣ་ཡི་རྩེར། ། ཧཱུྃ་གི་ཡི་གེ་རྣམ་པ་བཞི། ། འཕར་བ་དང་ནི་རིང་ཐུང་དང་། ། རྣམ་བཅད་ ལས་ནི་དབྱེ་བ་སྟེ། ། འཕར་བ་ཡིས་ནི་ཐར་བར་འགྱུར། ། རིང་བས་རྒྱས་པ་རབ་ཏུ་བརྗོད། ། ཐུང་བས་མི་མཐོང་བ་རུ་འགྱུར། ། རྣམ་པར་བཅིང་བས་གསོད་པར་བྱེད། ། ལྟེ་བ་དྲིལ་བུའི་སྒྲ་དང་མཉམ། ། སྙིང་གར་འབྲུག་གི་སྒྲ་འདྲ་སྟེ། ། མགྲིན་པར་བ་ལང་གི་ནི་སྒྲ། ། སྣ་ རྩེར་ཡུངས་ཀར་འཕར་བ་འདྲ། ། ཧཱུྃ་ཡིག་བཞི་པོ་རྒྱལ་པོ་ཆེ། ། འཇིག་རྟེན་གསུམ་ཡང་སྒྲུབ་པ་པོ། །
BOཔུ་ཛ་ཨོ་ཨ་གོ་ར་དེ་མཱ་ཀཱ་ཨོ་ཏྲི་ཀོ་ཀ་ལ་ཀ་ཧི་པྲེ་གྲི་སཽ་སུ་ན་སི་མ་ཀུ། ཕྱི་ནང་བདག་ཉིད་རྣལ་འབྱོར་པས། ། པུ་ཡིག་ལ་སོགས་རྣམ་པར་གནས། ། རྣམ་ཤེས་ཡེ་ཤེས་གཟུང་ བར་བྱ། ། རབ་ཏུ་འབད་པས་བླ་མ་བསྟོད། ། ཕྱི་ཡི་ལམ་ནས་བསྟེན་པ་སྟེ། ། བསྟན་བཅོས་རྣམས་ཀྱང་རིང་བ་ཡིན། ། ཐབས་ཀྱི་རྣལ་འབྱོར་མ་ནི་རྣམས། ། འབད་པས་བླ་མའི་བསྙེན་བཀུར་བྱ། ། བསྟན་བཅོས་མཚན་ཉིད་མདོར་བསྡུས་པའོ། ། དེ་ཉིད་སྟོན་པའི་དཔའ་ བོ་ཡིན། ། སྐད་ཅིག་གིས་ནི་རྣལ་འབྱོར་བ་དག ། སྐད་ཅིག་གིས་ནི་ཕྱག་རྒྱ་སྦྱིན། ། ཀུན་ནས་ཀུན་ཏུ་སྐད་ཅིག་སྟེ། ། སྐད་ཅིག་སྔགས་དང་རྣལ་འབྱོར་རིག ། དཔལ་ཁྲག་འཐུང་མངོན་པར་འབྱུང་བ་ལས་སྐྱེ་བ་བདུན་པའི་བསྒྲུབ་བྱ་དང་། ཧཱུྃ་ཡིག་བཞི་རྣམ་པར་དག་པའི་ཆོ་གའི་ ལེའུ་ཞེས་བྱ་བ་སྟེ་བཞི་བཅུ་རྩ་གཉིས་པའོ། ། ། ། དེ་ནས་དཔལ་ལྡན་རྒྱལ་ཆེན་དང་། ། དཔའ་བོ་ཕན་པར་འདོད་པ་ཡིས། ། པུས་མོ་ས་ལ་བཙུགས་ནས་ནི། ། ཡིད་ཀྱིས་ཀུན་ནས་ཕྱག་འཚལ་ཏེ། ། སེམས་ཅན་རྣམས་ལ་ཕན་འདོད་པ། ། གསང་བ་ཆེན་པོ་དག་ནི་ ཞུས། ། ཀུན་གྱི་རྣམ་པ་རྒྱས་པ་རུ། ། བཅོམ་ལྡན་འདས་ཀྱིས་བཤད་དུ་གསོལ། ། གང་ནི་གནས་སུ་གནས་པ་ཡིན། །
BOརྒྱུ་དང་མི་རྒྱུ་རྣམས་ལ་བརྩེ། ། ཉོན་ཅིག་མན་ངག་ཇི་བཞིན་བཤད། ། རྟག་པ་བསམ་གྱིས་མི་ཁྱབ་གཟུང་། ། གང་གིས་ཇི་ལྟར་སྔོན་དུ་གསུང་། ། ཐམས་ ཅད་བདག་ཉིད་རྟག་ཏུ་གནས། ། ལུས་ཀྱི་དཀྱིལ་འཁོར་ཞེས་སུ་བརྗོད། ། སྒོ་དགུ་རུ་ནི་གྱུར་པ་སྟེ། ། ལྟེ་བའི་དབུས་ན་པདྨ་ཆེ། ། ཐམས་ཅད་མཁྱེན་པའི་ཡེ་ཤེས་གྲགས། ། དེ་ཡི་གནས་ན་དཔའ་བོ་བཞུགས། ། ཆ་མེད་ཆ་ནི་རྣམ་པར་སྤངས། ། ལུས་རྣམས་ཀུན་གྱིས་རྣམ་ པར་བརྩེ། ། ལུས་བྲལ་དྲི་མ་མེད་པ་སྟེ། ། ལ་ལར་གཟུགས་ཀྱི་གནས་ན་བཞུགས། ། ལ་ལར་སྣ་ཡི་གནས་ན་བཞུགས། ། ལ་ལར་མིག་གི་སྒོ་ན་གནས། ། ལ་ལར་སྒྲ་ཡི་སྒོ་ན་བཞུགས། ། ལ་ལར་བཤང་གཅིའི་སྒོ་ན་གནས། ། ལ་ལར་སེམས་དང་རྣམ་ཤེས་བཅས། ། ལ་ལར་སྲེད་དང་ལྟོགས་དང་སྐོམ། ། ལ་ལར་ཁྲོ་དང་ལ་ལར་ཞི། ། ལ་ལར་ལྟོགས་དང་བཅས་པའི་གདོང་། ། ལ་ལར་བུད་མེད་མཆོག་གི་ལུས། ། ལ་ལར་གསོད་ཅིང་བརྡེག་པ་དང་། ། ལ་ལར་སྨྲ་བ་བཞིན་དུ་གནས། ། ལ་ལར་མེ་ཏོག་འབྲས་ལ་གནས། ། ལ་ལར་རྩེ་ཞིང་ ལོངས་སྤྱོད་ག་ནས། ། ལ་ལར་དྲི་ལ་རྣམ་པར་གནས། ། ལ་ལར་འབྱུང་བ་ཆེན་པོ་ལྔ། ། ས་དང་ཆུ་དང་མེ་དག་དང་། ། ལ་ལར་རིགས་ཀྱི་དབྱེ་བ་ཡིས། །
BOགཏུམ་མོ་དང་ནི་སྦོམ་པོ་དང་། ། ལ་ལར་མ་དང་སྲིང་མོ་ཡིན། ། ལ་ལར་ཆུང་མ་བུ་མོ་དང་། ། ལ་ལར་ཚངས་པ་དབང་ཕྱུག་དང་། ། ཉི་མ་དང་ནི་འཕྲོག་མ་དང་། ། ལ་ལར་ཟླ་བ་སྐར་མ་དང་། ། ལ་ལར་ནུབ་མོ་ཉིན་མོ་དང་། ། ལ་ལར་ཁམས་གསུམ་པ་ཡིན་ཏེ། ། ལ་ལར་ཐམས་ཅད་མེད་ཟད་རྒྱལ། ། ལ་ལར་རོ་དང་བག་ཆགས་ནུབ། ། ཆ་མེད་སྟོང་པ་ཀུན་མི་གསལ། ། ལ་ལར་བྱང་ཆུབ་གཟིགས་མོ་ཆེ། ། ལ་ལར་ བདུད་ལས་རྒྱལ་བ་ཡིན། ། ལ་ལར་ཆོས་ཀྱི་འཁོར་ལོ་ཆེ། ། དེ་བཞིན་ལ་ལར་འཆི་འཕོ་སྟེ། ། ལ་ལར་དཀའ་བ་སྤྱོད་པ་ཡིན། ། ལ་ལར་དགེ་སློང་ཚུལ་དུ་གནས། ། ལ་ལར་བྱིས་པ་ཡི་ནི་གཟུགས། ། ལ་ལར་རྒས་ཤིང་འཁོགས་པ་དང་། ། ལ་ལར་ན་བས་ཟོས་པ་དང་། ། ལ་ལར་སྣོད་དང་བཅུད་དག་དང་། ། ལ་ལར་སྔོ་ཞིང་དམར་བ་དང་། ། ལ་ལར་དཀར་ཞིང་སེར་བ་དང་། ། ལ་ལར་སངས་རྒྱས་རྣམ་སྣང་མཛད། ། ལ་ལར་སྒྲོན་མ་གོས་དཀར་མོ། ། ལ་ལར་སྤྱན་མ་མཱ་ལ་ཀཱི། ། ལ་ལར་ཀུན་ཏུ་ཞི་བར་འགྱུར། ། ལ་ ལར་བྱ་ཡི་མངལ་དུ་འགྲོ། ། ནམ་མཁའ་རུ་ནི་འགྲོ་བ་ཉིད། ། ལ་ལར་གླང་ཆེན་ང་རྒྱལ་ཏེ། ། ལ་ལར་སྨད་འཚོང་མར་ནི་འགྱུར། ། ལ་ལར་རྨི་ལམ་མཐོང་བར་འགྱུར། ། ལ་ལར་གཉིད་ནི་ལོག་པར་གནས། །
BOལ་ལར་རླུང་དང་མཁྲིས་པ་དང་། ། ལ་ལར་ཁྲག་དང་ པགས་པ་དྲི། ། ལ་ལར་ངུ་ཞིང་མྱ་ངན་བྱེད། ། ལ་ལར་མི་རྣམས་ཟ་བ་དང་། ། ལ་ལར་བསྐལ་པར་གསུང་བ་དང་། ། ཇི་ལྟར་ཀུན་ཏུ་རྣམ་པར་དབྱེ། ། ལྷ་ཡིས་ཇི་སྲིད་གསུངས་པ་ཀུན། ། གང་དེ་ཐམས་ཅད་བདག་ཉིད་གནས། ། དཔའ་བོ་འདི་རྣམས་གསང་ཆེན་པོ། ། ཕྱི་དང་ནང་དུ་ཡང་དག་གནས། ། ཀུན་ལ་ཁྱབ་ཅིང་རྟག་ཏུ་སྟོད། ། སྲིད་པ་གཟུང་ཞིང་དྲི་མ་མེད། ། རྣལ་འབྱོར་བས་ནི་འདི་ལྟར་བསྒོམ། ། གཉིས་མེད་ཡེ་ཤེས་ཉིད་དང་ཡང་། ། དེ་དང་འདྲ་བར་སྟོང་པར་འགྱུར། ། བདག་ཉིད་ལ་ནི་རྣམ་པར་བསྒོམ། ། དེ་ལ་བརྟུལ་ཞུགས་ བཤད་པ་མེད། ། ཕྲེང་བ་དང་ནི་སྔགས་ཀྱང་མེད། ། གཟུངས་དང་སྦྱིན་སྲེག་ལས་མེད་དེ། ། མི་གཡོ་གོ་ཆའི་བྱ་བ་མེད། ། ལག་པ་ཕྱག་རྒྱའི་སྦྱོར་བ་དང་། ། གཡོན་བརྐྱང་རྐང་སྟབས་ལ་སོགས་མེད། ། དཔའ་བོ་ཆེན་པོས་སྲིད་པ་གཟུང་། ། རང་བྱུང་མཆོག་ནི་བྱེད་པའོ། ། དགག་པ་རུ་ནི་མི་བྱ་སྟེ། ། བདག་ཉིད་ངེས་པར་མཆོད་པར་བྱ། ། ཟླ་བའི་དབུས་སུ་ཐིག་ལེ་བསྒོམ། ། བརྒྱ་ཡི་ཕྱེད་ཀྱིས་རྣམ་པར་བརྒྱན། ། དེ་ཡི་དབུས་སུ་རབ་བསམས་ཏེ། ། གཞོན་མེད་ཐིག་ལེར་བཅས་པ་ཡིན། ། དེ་ཡི་ལུས་ནི་འབྲལ་འགྱུར་ཏེ།
BO། བསྒོམ་དུ་མེད་ ཅིང་བསམ་དུ་མེད། ། དཔལ་ཁྲག་འཐུང་མངོན་པར་འབྱུང་བ་ལས་ཀུན་གྱི་རྣམ་པའི་སྒྱུ་མ་ལྟར་བསྟན་པའི་ལེའུ་ཞེས་བྱ་བ་སྟེ་བཞི་བཅུ་རྩ་གསུམ་པའོ། ། ། ། དེ་ལྟར་སྒྱུ་མའི་ཆོ་ག་དང་། ། གོང་གི་ཆ་ནི་རྣམ་པར་སྤངས། ། རྟག་ཏུ་སྙིང་གའི་དབུས་ན་གནས། ། འདི་ལྟར་ གསང་བ་ཆེན་པོའོ། ། ལྟེ་བའི་རྩ་བར་པདྨ་གནས། ། གེ་སར་བཅས་ཤིང་འོད་དང་ལྡན། ། རང་བཞིན་ཀུན་ནི་ཤེལ་དག་ལྟར། ། བཅུ་དྲུག་ལ་སོགས་ཀྱིས་ནི་བསྐོར། ། ཡི་གེ་མཉམ་པར་སྦྱོར་བ་སྟེ། ། ནམ་མཁའ་སྦྱར་བའི་བདག་ཉིད་དོ། ། དེ་ཉིད་དབུས་སུ་ སྟོང་པ་ཆེ། ། སྤྲོ་དང་སྡུད་པར་བྱེད་པ་ཡིན། ། གང་གིས་མིང་ནི་ཀུན་རང་བཞིན། ། གང་གིས་ཡོངས་སུ་གྲགས་པའོ། ། ཉི་མ་ཟླ་བ་རྣམ་དག་སྟེ། ། འཆར་དང་ནུབ་པར་བསྟན་པ་ཡིན། ། སྡིག་པ་ཀུན་ལས་རྣམ་པར་གྲོལ། ། བསོད་ནམས་ཐམས་ཅད་རྣམ་པར་ འཕེལ། ། པདྨའི་སྣ་རྩེར་ཡུངས་ཀར་ཙམ། ། རྒྱུ་དང་མི་རྒྱུའི་རང་བཞིན་ཀུན། ། ཡིད་ཀྱིས་བཟླས་པར་ཡང་དག་ལྡན། ། ཕྱི་ཡི་དབྱངས་ནི་རྣམ་པར་སྤངས། ། དེ་ཡི་ཡེ་ཤེས་སངས་རྒྱས་ཏེ། ། གཞན་གྱིས་སངས་རྒྱས་མི་འགྱུར་རོ། ། རྟག་ཏུ་སེམས་དཔའ་དངོས་པོ་ ཤེས། ། ཁྲུས་མེད་དྲི་མ་མེད་པ་སྟེ།
BO། བདེ་བའི་ཆོས་ནི་དེ་བཞིན་གཤེགས། ། ལོངས་སྤྱོད་རྫོགས་པའི་སྐུ་རང་བཞིན། ། ཐམས་ཅད་མེ་ཡི་རྣམ་པ་རུ། ། མཐོང་བ་མཚན་མ་དང་པོའོ། ། སྲིན་བུ་མེ་ཁྱེར་རྣམ་པ་ཡི། ། མཚན་མ་གཉིས་པར་མཚོན་པ་ནི། ། རྡུལ་ ཕྲན་དཀར་པོའི་རྣམ་པ་རུ། ། ཕྱོགས་བཅུར་འཇིག་རྟེན་མཐོང་བ་ཡིན། ། ཉོན་མོངས་འདོན་པའི་ལས་རྣམས་ནི། ། རྣལ་འབྱོར་པ་ཡི་མཚན་ཉིད་དང་། ། འདོད་པ་ལྷ་ཡི་ལོངས་སྤྱོད་མྱང་། ། བཞི་པ་མཐོང་བར་བསྟན་པའོ། ། ལྷ་གཟུགས་མཐོ་རིས་ལྷ་རྣམས་ནི། ། གང་ལ་མཐོང་བར་སེམས་པའོ། ། དྲུག་པ་འཇིགས་པ་ལོངས་སྤྱོད་དོ། ། བདུན་པ་ཆོས་ཀྱི་དབྱིངས་ཉིད་དེ། ། བརྒྱད་པར་འདོད་པའི་སངས་རྒྱས་ཉིད། ། རྣལ་འབྱོར་རྣམས་ཀྱིས་འབྲས་བུ་འཐོབ། ། སྐྲ་ཡི་རྩེ་མོ་བརྒྱར་གཤགས་ཆ། ། རྡུལ་ཕྲན་ཤིན་ཏུ་བསམ་པར་བྱ། ། སྟོང་པ་ལ་སོགས་ དམིགས་མི་བྱ། ། གཟུགས་ལ་སོགས་པ་མི་བལྟ་སྟེ། ། རྡུལ་མེད་ས་བོན་མེད་པ་བཞིན། ། གཟུགས་མེད་མཚན་ཉིད་མེད་པའོ། ། རྣམ་ཤེས་ཡེ་ཤེས་གཟུང་མ་ཡིན། ། རྣམ་ཤེས་དེ་ཡི་རང་བཞིན་ཏེ། ། མངོན་ཤེས་བརྒྱད་པོ་ཡང་དག་འཐོབ། ། ཀུན་མཁྱེན་ཀུན་བྱེད་གཙོ་བོ་སྟེ། ། ཡེ་ཤེས་ སྐུ་ནི་དྲི་མ་མེད། །
BOསྐྱེ་བ་འདི་ལ་ཐོབ་པར་འགྱུར། ། གཟི་བརྗིད་སྟོབས་དང་ལྡན་པ་ཡིན། ། སྡུག་ཅིང་སྐལ་བ་བཟང་པོར་སྟོན། ། དཔག་བསམ་ཤིང་ནི་ཡང་དག་བྱུང་། ། རྟག་ཏུ་བསྒོམ་ཞིང་བཟླས་པས་ནི། ། ཇི་སྲིད་ལུས་ནི་བསྒུལ་བསྐྱོད་དང་། ། ངག་གི་སྨྲ་ བ་ཐམས་ཅད་ནི། ། དེ་སྙེད་སྔགས་དང་ཕྱག་རྒྱ་སྟེ། ། དཔལ་ལྡན་ཁྲག་འཐུང་གོ་འཕང་གནས། ། པདྨ་བཞི་དང་འཁོར་ལོ་ཆེ། ། དེ་བཞིན་དངོས་གྲུབ་ཀུན་གྱི་གཞི། ། དཔའ་བོ་བྱེ་བ་རྣམས་དང་ནི། ། སངས་རྒྱས་བྱེ་བས་ལེགས་པར་གསུངས། ། དཔལ་ཁྲག་འཐུང་མངོན་ པར་འབྱུང་བ་ལས་ཐམས་ཅད་སོ་སོར་གསལ་བའི་མངོན་པར་ཤེས་པ་བརྒྱད་ངེས་པར་བསྟན་པའི་ཆོ་གའི་ལེའུ་ཞེས་བྱ་བ་སྟེ་བཞི་བཅུ་རྩ་བཞི་པའོ། ། ། ། དེ་ནས་གཟུགས་བརྙན་གྱིས་ཞི་བ། ། འདི་རུ་ཡིད་ལྡན་དོན་དུ་གསུངས། ། གང་གིས་མྱུར་དུ་དེ་འགྲུབ་པ། ། ནད་པ་ཞི་ བར་བྱེད་པ་ནི། ། ཕོ་མོ་རྒྱལ་པོ་བྱིས་པ་རྣམས། ། སུས་ཀྱང་ཆོ་ག་ཤེས་བྱ་བ། ། སྤང་ལེབ་ཁྲི་སོགས་སྟན་རྣམས་ནི། ། འབྲས་དང་སྲན་ཆུང་ཡང་དག་བསྲེས། ། ཤིན་ཏུ་བཙོས་ནས་བསྣོས་བྱས་ཏེ། ། ཉ་དང་ཤ་དང་ཁྲག་གིས་ནི། ། གཟུགས་བརྙན་དག་ནི་བཅའ་བ་སྟེ། བུ་མོས་བཀལ་བའི་སྐུད་པ་ནི། །
BOསྐྲ་ཡི་ཚད་དུ་བྱ་བ་ཡིན། ། སྔགས་ཀྱི་ཡི་གེས་བསྐུལ་བར་བྱ། ། དྲུག་དང་བཅུ་གཉིས་ཡི་གེས་སོ། ། བླ་རེ་དག་ནི་བྲེ་བ་དང་། ། སྣ་ཚོགས་གོས་དང་རྒྱལ་མཚན་མཆོག ། དྲི་དང་སྤོས་དང་མེ་ཏོག་སོགས། ། གསང་སྔགས་ཀྱིས་ནི་ བསྐུལ་བར་བྱ། ། སྲུང་བ་ཆེན་པོའི་གོས་ཀྱིས་ནི། ། སྨད་གཡོགས་དང་ནི་སྟོད་གཡོགས་བྱས། ། གང་གིས་ཅུང་ཟད་ནད་པ་ཡི། ། སྤྱོད་ལུགས་ཇི་ལྟར་ཡིན་པ་བཞིན། ། རོ་རུ་སོང་ནས་བསྐྱལ་བར་བྱ། ། རོལ་མོ་སྣ་ཚོགས་གླུ་དབྱངས་དང་། ། དེ་བཞིན་གཞུག་པ་བྱ་བ་སྟེ། ། གཟུགས་བརྙན་ལ་ནི་གདགས་པར་བྱ། ། དཔུང་རྒྱན་ལག་གདུབ་མགུལ་རྒྱན་དང་། ། གོས་ལ་སོགས་པ་རྣམས་ཀྱིས་བརྒྱན། ། རྐེད་པ་ལ་ནི་མཚོན་ཆས་བཅིངས། ། ལག་པར་རལ་གྲི་འཛིན་པ་སྟེ། ། སྤྱི་བོར་བཅིང་ཞིང་གོ་ཆ་བགོས། ། སྙིང་རྗེ་ལ་སོགས་ཕན་པའི་སེམས། ། དཔལ་ལྡན་ཁྲག་འཐུང་རྣལ་འབྱོར་ཆེ། ། གོ་ཆ་གསུམ་གྱིས་རྣམ་པར་བརྒྱན། ། དུར་ཁྲོད་དུ་ནི་འགྲོ་བ་སྟེ། ། རྣལ་འབྱོར་མ་དང་དཔའ་བོས་བསྐོར། ། འདུ་བྱེད་རྣམས་ནི་དང་པོར་བྱས། ། དཀྱིལ་འཁོར་མཛེས་པར་བྲི་བ་སྟེ། ། མ་མོ་རྣམས་དང་རྣལ་འབྱོར་མ། ། བསྒོམ་ ཞིང་ཕྱོགས་དང་ཕྱོགས་མཚམས་དགོད། །
BOདེ་རུ་ལྷ་རྣམས་ཡང་དག་གཞག ། གཟུགས་བརྙན་ལུས་ནི་ལྷོ་ཕྱོགས་སུ། ། སྔགས་པས་མགོ་བོ་བསྟན་པར་བྱ། ། ཇི་ལྟར་མཛེས་པས་བསྒྲུབ་བྱ་བསྒོམ། ། ནད་རྣམས་ཀུན་ལས་རྣམ་པར་གྲོལ། ། གཡས་ བརྐྱང་གིས་ནི་ཡང་དག་གནས། ། རྩ་བའི་སྔགས་སོགས་ཀྱིས་ནི་བསྲུང་། ། སྔགས་པས་ཁ་ནི་ཤར་དུ་བལྟས། ། ལག་པས་ཤེས་རབ་ཁ་ཊྭཱཾ་ག། ། གྲིབ་མ་བགོམ་པར་བྱས་ནས་ནི། ། ལྟེ་བའི་ཕྱོགས་སུ་བརྡེག་པར་བྱ། ། ཇི་ལྟར་སྡུག་བསྔལ་བར་ནི་ གཏུབ། ། ལྷ་སྦྱིན་ནད་ནི་ཞི་བར་འགྱུར། ། དབང་པོ་ལ་སོགས་ཤར་ཕྱོགས་གཞག ། སྔགས་ཀྱིས་བསྐུལ་བར་བྱ་བ་སྟེ། ། ཇི་ལྟར་ཅུང་ཟད་གཞུག་བར་བྱ། ། སློབ་དཔོན་གྱིས་ནི་མཛེས་པར་བརྟག ། ཁྱེའུས་ཁྱེའུ་གྲོལ་བ་སྟེ། ། བུ་མོས་བུ་ མོ་གྲོལ་བ་ཡིན། ། ཐམས་ཅད་ཁྲུས་དང་གཙང་སྦྲ་དང་། ། མཛེས་ཤིང་ཞི་བར་བྱ་བ་སྟེ། ། ཕྱི་ནས་སློབ་དཔོན་དགྱེས་པར་བྱ། ། གོས་དང་རྒྱན་ལ་སོགས་པ་ཡི། ། གཞན་ཀུན་ལ་ཡང་མཆོད་པར་བྱ། ། བཟའ་བ་བཏུང་སོགས་གོས་ཀྱིས་སོ། ། གསང་བ་ཆེན་པོས་ ཞི་བར་བྱ། ། དཔལ་ཁྲག་འཐུང་མངོན་པར་འབྱུང་བ་ལས་འབུམ་ཕྲག་གསུམ་ལས་བཏུས་པ། བསྟན་བཅོས་ཐམས་ཅད་ཀྱི་རྒྱལ་པོ་དཔལ་ཁྲག་འཐུང་ཆེན་པོ་བཀླགས་པས་འགྲུབ་པ།
BOཐམས་ཅད་མཁྱེན་པའི་ཡེ་ཤེས་གཞན་ལས་རྒྱལ་བ་དང་པོའི་སྒྲུབ་པའི་རྒྱུད་ཀྱི་ཕྱི་མ། དཔལ་ཁྲག་ འཐུང་མངོན་པར་འབྱུང་བ་རྣལ་འབྱོར་མའི་རྒྱུད་ཀྱི་རྒྱལ་པོ་རྫོགས་སོ། ། ། ། རྒྱ་གར་གྱི་མཁན་པོ་པཎྜི་ཏ་ཆེན་པོ་ཨ་དྭ་ཡ་བཛྲ་དང་བོད་ཀྱི་ལོ་ཙྪ་བ་ཆིངས་ཡོན་ཏན་འབར་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། ། ། །
Sutraya