༄༅། ། རྒྱ་གར་སྐད་དུ། ཨཱརྱ་བཛྲ་ཀྲོ་དྷ་རཱ་ཛ་ཀལྤ་ལ་གྷུ་ཏནྟྲ་ནཱ་མ། བོད་སྐད་དུ། འཕགས་པ་རྡོ་རྗེ་ཁྲོ་བོའི་རྒྱལ་པོའི་རྟོག་པ་བསྡུས་པའི་རྒྱུད་ཅེས་བྱ་བ། དཔལ་འཇམ་པའི་དབྱངས་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གཞན་འཕྲུལ་ དབང་བྱེད་ཀྱི་ནམ་མཁའི་རླུང་གི་དཀྱིལ་འཁོར་རྡོ་རྗེ་སྙིང་པོར་བྱིན་གྱིས་བརླབས་པའི་སྟེང་དུ་རིན་པོ་ཆེ་སྣ་བདུན་ལས་གྲུབ་པ་ལྷའི་གཞལ་མེད་ཁང་བྱེ་བ་ཕྲག་བརྒྱད་ཅུས་བསྐོར་བའི་དབུས་སུ་དཔག་ཚད་འབུམ་ཕྲག་ཁྱབ་པའི་ཁང་པ་བརྩེགས་མ་ཤིན་ཏུ་མཐོ་བ། ཀུན་ཀྱང་རིན་པོ་ཆེ་དུ་མའི་ཁྲི་པདྨ་དང་། སེང་གེས་མ་ཐོ་བ། དབུ་རྩེ་རིན་པོ་ཆེའི་ཟུར་{མངས་ཀྱི་,མང་གི་}མཆོད་རྟེན་པདྨ་དང་། འཁོར་ལོ་དང་། གདུགས་མཐོ་བར་དྲངས་པ་ལ་དར་གྱི་དཔྱངས་ལྡིང་བ། དེའི་གྲིབ་མ་ས་གཞི་ལ་བཀོད་པ་ན་བྱང་ཆུབ་སེམས་དཔའི་ཚོགས་རྣམས་ལྷའི་བཞོན་པ་ལས་བབས་ནས་ནང་དུ་གཤེགས་པ། སྣ་ཚོགས་ པའི་དྲིལ་བུ་དང་། བ་དན་དང་། རིན་པོ་ཆེའི་མེ་ཏོག་གི་ཕྲེང་བ་དང་། དྲ་བ་དང་། དྲ་བ་ཕྱེད་པ་དང་། རྔ་ཡབ་དང་། ཟླ་བ་ཕྱེད་པ་དང་། རྡོ་རྗེ་ཕྱེད་པ་དང་། ཆུན་འཕྱང་ཤར་བུ་ལ་སོགས་པ་དུ་མས་མཛེས་པ།

སྒོ་ཁྱུད་ཁྱམས་དང་། སྒོ་གླེགས་དང་། རིན་པོ་ཆེའི་མེ་ལོང་དང་། གདུགས་ ལ་སོགས་པ་དུ་མས་ཁྱབ་པ། རིན་པོ་ཆེའི་ཕ་གུ་བརྩེགས་ཏེ་མཛེས་པར་བྱས་པ་དུ་མ་དེ་ཐམས་ཅད་ཀྱི་དབུས་སུ་འཁོར་གྱི་དཀྱིལ་འཁོར་ཆེན་པོ་དང་ལྷན་ཅིག་ཏུ་བཞུགས་སོ། ། དེ་ཡང་འདི་ལྟ་སྟེ། བྱང་ཆུབ་སེམས་དཔའི་ཚོགས་ནི་འཕགས་པ་སྤྱན་རས་གཟིགས་དབང་ཕྱུག་དང་། འཇམ་དཔལ་དང་། ཀུན་ཏུ་བཟང་པོ་དང་། བྱམས་པ་དང་། སྒྲིབ་པ་ཐམས་ཅད་རྣམ་པར་སེལ་བ་དང་། ཞི་བའི་བློ་གྲོས་དང་། སྣ་ཚོགས་བཀྲམ་པ་དང་། མཁའ་འོད་མེ་ཏོག་འཆང་དང་། ནམ་མཁའི་སྙིང་པོ་དང་། གཟུགས་མཛེས་དག་པ་དང་། སའི་སྙིང་པོ་དང་། ཕྱག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཕྲག་བདུན་དང་། ཤཱ་རིའི་བུ་དང་། མཽད་གལ་དང་། རྟ་ཐུལ་དང་། འོད་སྲུང་ལེ་སོགས་པ་བྱེ་བ་ཕྲག་བཞི་དང་། གྲགས་ཆེན་སྙན་པ་ཆེན་པོ་བརྒྱ་བྱིན་དང་། ཚངས་པ་དང་། ཁྱབ་འཇུག་དང་། དབང་ཕྱུག་ དང་། ལུས་ངན་དང་། གཤིན་རྗེ་དང་། དགའ་རབ་དབང་ཕྱུག་ལ་སོགས་པ་ལྷའི་རིགས་སུམ་བརྒྱ་དང་ལྷན་ཅིག་ཏུ་ཆོས་ཀྱི་རྣམ་གྲངས་གསང་སྔགས་ཞེས་བྱ་བ་ལ་འཇུག་པ་གང་ཞིག་བྱང་ཆུབ་སེམས་དཔའ་དང་། ཉན་ཐོས་དང་།

འཇིག་རྟེན་སྐྱོང་བ་ལ་སོགས་པ་རྣམ་པ་དུ་མ་དང་ལྡན་པའི་ འཁོར་རྣམས་ལ་དགོངས་པ་ཐ་དད་ཀྱི་བསམ་པ་དང་མཐུན་པའི་བཀོད་པ་ཆེན་པོ་བསྐྱེད་པ་དང་། ཆོ་འཕྲུལ་དུ་མ་བསྒྱུར་བ་དང་། འོད་ཟེར་དུ་མ་འགྱེད་ཅིང་ཐབས་ཅིག་ཏུ་བཞུགས་སོ། ། དེ་ནས་བཅོམ་ལྡན་འདས་ཀྱིས་འཛུམ་བཞིན་དུ་འཁོར་ལ་གཟིགས་ནས་ལྗགས་ཀྱི་དབང་པོ་བཀྲམ་སྟེ། བྱང་ ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ལ་བཀའ་སྩལ་པ། ཡི་གེ་མིང་ཚིག་ངག་གི་སྒོས། ། སྔགས་དབྱིབས་ཆོས་སུ་བྱིན་བརླབས་ཀྱིས། ། ཡི་གེ་སྒྲ་ཙམ་ཕྱེད་དམ་གཅིག ། མངོན་སུམ་རྗེས་འཇུག་རིང་ཐུང་དང་། ། དབྱངས་དང་གསལ་བྱེད་མཚན་མས་མཚོན། ། ས་བཅུ་ ཕ་རོལ་ཕྱིན་བཅུ་བདག ། དབང་བཅུ་དོན་བཅུ་རྣམ་པ་བཅུ། ། མི་འཇིགས་བཞི་དང་མ་འདྲེས་ཆོས། ། བྱམས་དང་ཐུགས་རྗེ་ཆེན་པོ་དག ། དབྱངས་གཅིག་གི་ནི་སྔགས་ཀྱིས་སུ། ། སྡུག་བསྔལ་སྣ་ཚོགས་རབ་ཞི་དང་། ། ཡིད་འཕྲོག་དཔལ་འབྱོར་དབང་ཕྱུག་དང་། ། མཐུ་སྟོབས་ དུ་མ་བསྐྱེད་པ་དང་། ། རྟག་གནས་ཐོབ་དང་དོན་ངེས་ཐོབ། ། རྡོ་རྗེ་བླ་ན་མེད་སེམས་བསྐྱེད། ། མདོར་ན་གང་གིས་གང་འདོད་པ། ། བསམ་པས་སེམས་རྣམས་རྫོགས་པའི་ཕྱིར། ། རྡོ་རྗེ་བླ་ན་མེད་པ་གསོར། །

ཆོས་སྒྲ་བླ་ན་མེད་པ་སྒྲོགས། འཁོར་ལོ་བླ་ན་མེད་པ་སྐོར། རལ་གྲི་ བླ་ན་མེད་བཟུང་། ། པདྨ་བླ་ན་མེད་པ་ཆོངས། ། རིན་ཆེན་བླ་མེད་གསལ་བར་གྱིས། ། དཀྱིལ་འཁོར་ཚུལ་དུ་སྤྲོས་ནས་ཀྱང་། ། མཆོད་རྟེན་ཚུལ་དུ་བསྡུ་བར་གྱིས། ། ལྷ་ཀླུ་གནོད་སྦྱིན་དྲི་ཟ་དང་། ། ལྷ་མིན་མཁའ་ལྡིང་མིའམ་ཅི། ། སྲིན་པོ་ཤ་ཟ་བརྗེད་བྱེད་ཚོགས། ། འཇིགས་ པ་དག་ཀྱང་འཇིགས་འགྱུར་བའི། ། རྣམ་འཕྲུལ་དུ་མ་འདི་སྒྱུར་ཅིག ། གསུང་མཆོག་དེ་སྐད་ཐོས་མ་ཐག ། ལག་ན་རྡོ་རྗེ་མཐུ་བོ་ཆེས། ། དགའ་མགུ་ཐལ་མོ་རབ་སྦྱར་ཏེ། ། སྙན་པའི་ཚིག་གིས་འདི་གསོལ་ཏོ། ། གསེར་དང་རིན་ཆེན་ལྔ་པོ་ལས། ། རབ་མཆོག་རི་བོར་གྱུར་ པ་ལས། ། འགྲོ་རྣམས་ཀུན་གྱི་རྟེན་གནས་དང་། ། རྟགས་སུ་ཡང་དག་འཛིན་པ་ལྟར། ། རྣམ་པར་ཤེས་དང་ཕུང་པོ་བཞི། ། འབྱུང་བ་རྣམ་པར་དག་བསྒྲུབས་པས། ། ལྷ་དང་ཕྱག་རྒྱ་ཕྲིན་ལས་སུ། ། སྔགས་ཤེས་རྣམས་ཀྱིས་བཟུང་བྱས་ནས། ། བརྟུལ་བའི་ཡེ་ ཤེས་བྱང་ཆུབ་རིམ། ། ཁྱད་པར་དེ་ལ་ལྡན་པར་འགྱུར། ། དེ་ནས་བཅོམ་ལྡན་ཐུབ་པ་ཆེ། ། ཀུན་མཁྱེན་ཡེ་ཤེས་གཙོ་བོ་ཆེས། ། སྐུ་ལས་སྣ་ཚོགས་མདངས་འོད་ཅན། ། འོད་ཟེར་དུ་མ་བྱུང་ནས་ཀྱང་། །

གཞི་དང་སྙིང་པོ་མེ་ཏོག་གིས། ། བརྒྱན་པའི་ཞིང་རྣམས་ཁྱབ་བྱས་ ཚེ། ། ས་ཡང་རྣམ་པ་དྲུག་ཏུ་གཡོས། ། འཇིག་རྟེན་སྐྱོང་དང་བདུད་ཀྱི་ཚོགས། ། མ་ལུས་པ་རྣམས་བརྒྱལ་བར་འགྱུར། ། ཉན་ཐོས་རང་རྒྱལ་འདར་བར་འགྱུར། ། བྱང་ཆུབ་སེམས་དཔའ་བློ་ལྡན་གྱི། ། ཚོགས་རྣམས་ཤིན་ཏུ་སྐྲག་པར་གྱུར། ། དེ་ཚེ་ཕྱོགས་བཅུའི་ཞིང་ རྣམས་ནས། ། སངས་རྒྱས་ཀུན་གྱི་མཛོད་སྤུ་ནས། ། ཁྲོ་བོ་ཆེན་པོའི་ཚོགས་བྱུང་བ། ། འོད་ཟེར་རྩེ་མོས་དྲངས་ནས་སུ། ། ཞིང་དབུས་དཀྱིལ་འཁོར་འདི་རུ་ལྷགས། ། འོད་ཟེར་ཚོགས་ཀྱང་རབ་འདུས་ནས། ། དཔལ་བེའུ་ཉིད་དུ་ཐིམ་པར་གྱུར། ། དེ་ཚེ་འོད་དེའི་བྱིན་ བརླབས་ལས། ། མཁའ་ལ་སྒྲ་འདི་གྲག་པར་གྱུར། ། ཤཱཀྱའི་མགོན་པོ་རྫོགས་སངས་རྒྱས། ། གང་དུ་གཟི་བརྗིད་ཆེ་བཞུགས་སླད། ། ཆོས་ཀྱི་དབྱིངས་ལས་བྱུང་བ་ཡི། ། རྒྱལ་བའི་སྲས་པོ་ཐམས་ཅད་གཤེགས། ། དྲི་མ་མེད་པའི་དམ་ཆོས་མཆོག ། གསང་སྔགས་ སྤྱོད་པའི་ཚུལ་དགེ་བ། ། ཐོས་ནས་བྱང་ཆུབ་འདུས་མ་བྱས། ། འཇིག་རྟེན་མགོན་པོ་བརྙེས་པར་གྱུར། ། དེ་ནས་ལག་ན་རྡོ་རྗེ་ཚོགས། ། འཁོར་གྱི་དཀྱིལ་འཁོར་ཐམས་ཅད་ཀྱང་། ། སྙིམ་པ་མེ་ཏོག་བཀང་བྱས་ཏེ། །

གཏོར་ནས་ཕྱག་འཚལ་བསྐོར་བ་བྱས། ། དང་ཞིང་ གུས་པའི་ཚུལ་གྱིས་སུ། ། པུས་བཙུགས་ཐལ་སྦྱར་གསོལ་བ་འདེབས། ། མི་གནས་ཡེ་ཤེས་ཆེ་བའི་མཆོག ། ཡོན་ཏན་རྒྱ་མཚོ་འབྱུང་བའི་གཙོ། ། མཚན་ཉིད་ཐམས་ཅད་རབ་བརྒྱན་པ། ། མཚན་མིན་སྤངས་པའི་ཐུབ་པ་ཆེ། ། དྲི་མེད་དགེ་བ་ཇི་ལྟར་ལགས། ། གསང་ སྔགས་ཚུལ་དུ་སྤྱོད་པ་ཅི། ། འདུས་མ་བྱས་པའི་བྱང་ཆུབ་གང་། ། འཇིག་རྟེན་མགོན་པོ་ཅི་ལྟར་འགྱུར། ། བདག་ཅག་རྣམས་ལ་སྨན་རབ་དང་། ། འགྲོ་ལ་ཐུགས་རྗེ་ཆེ་མཛད་ཕྱིར། ། མགོན་པོ་བཅོམ་ལྡན་ཐུབ་པ་ཆེས། ། ཡང་དང་ཡང་དུ་བཤད་དུ་གསོལ། ། དེ་ནས་ཡང་ དག་རྫོགས་སངས་རྒྱས། ། རྐང་གཉིས་གཙོ་བོས་བཀའ་སྩལ་པ། ། གསང་བའི་དབང་ཕྱུག་རྡོ་རྗེ་འཛིན། ། ཤེས་རབ་ཆེན་པོའི་སྤྱན་ལྡན་པས། ། བདག་གཞན་ཕན་དོན་ལ་བརྩོན་ཕྱིར། ། ལེགས་པར་ཉོན་ལ་ཡིད་ལ་ཟུང་། ། ཡང་དག་ཡང་དག་མཐའ་མིན་ཚུལ། ། དེ་ནི་ང་ཡིས་བཤད་པར་བྱ། ། སྲོག་གཅོད་མ་བྱིན་ལེན་{བརྫུན་,རྫུན་}འཁྲིག ། ཚིག་རྩུབ་དབྱེན་དང་ངག་ཀྱལ་སྨྲ། ། བརྣབ་སེམས་གནོད་སེམས་ལོག་ལྟ་ཆང་། ། དྲི་རོ་ངན་པའི་ཟས་སྐོམ་དང་། ། སྲོག་ཅན་ཤ་ཁྲག་ལོག་འཚོར་བཅས། ། སློབ་དཔོན་དགེ་འདུན་མཆོད་རྟེན་སོགས། །

ཁྱད་པར་ཡུལ་ཅན་ཡོ་བྱད་དང་། ། དམན་ཞིང་ཉམ་ཐག་ཕྲོག་དགུ་པ། ། གླེགས་བམ་འཚོང་དང་ཆོས་ཀྱི་ཟོང་། ། གཡངས་རལ་གྲི་སོ་དུག་སོགས། ། མེ་འོབས་ལྟར་མཐོང་སྤངས་ནས་ཀྱང་། ། རྣམ་པར་དཀར་ལ་སོགས་པར་བྱ། ། ཡི་གེ་འདྲི་མཆོད་སྦྱིན་སྩོལ་དང་། ། ཉན་དང་འཛིན་དང་ཀློག་པ་དང་། ། མཆོད་པ་དང་ནི་ཁ་ཏོན་དང་། ། དེ་དག་སེམས་དང་སྒོམ་པ་སྟེ། ། དཀར་བཅུ་ལམ་ལ་ཡུན་རིང་དང་། ། ནུས་བཅས་རྒྱུན་མི་འཆད་དུ་འབད། ། གཏན་པ་མེད་པའི་བྱང་ཆུབ་སེམས། ། ཤེལ་ལྟར་དྲི་མ་མེད་པའོ། ། མཆོག་འདི་སྤྱད་པས་སྡུག་ བསྔལ་ཚོགས། ། མྱུར་དུ་གཅོད་པས་དགེ་བའོ། ། ཆོས་བདག་མེད་དང་མཉམ་ཉིད་དང་། ། རང་སེམས་གདོད་ནས་དག་པ་གང་། ། རྒྱུ་འབྲས་འདུ་བྱེད་མེད་པ་དང་། ། ཟག་བཅས་བདེ་དང་བྲལ་བ་ལས། ། བྱང་ཆུབ་ཕྱོགས་ཆོས་མ་ལུས་པ། ། ཆོས་ཉིད་བདག་མེད་སྤྱོད་ པ་ནི། ། ཆོས་དབྱིངས་ཡེ་ཤེས་མངོན་བྱས་ནས། ། མ་འདྲེས་ཆོས་རྣམས་རྫོགས་གསལ་བ། ། འདུས་མ་བྱས་ཀྱི་བྱང་ཆུབ་སྟེ། ། ཆོས་རྣམས་ཀུན་གྱི་གཞི་ལུས་སོ། ། འདོད་པའི་ཁམས་སོགས་ཡོན་ཏན་ལ། ། ཤིན་ཏུ་བདེ་རོལ་སྤྱད་པ་སྤྱོད། ། སངས་རྒྱས་མུ་སྟེགས་ ཅན་རྣམས་ཀྱི། ། ལྐོག་ཏུ་གྱུར་པ་གསང་བ་སྟེ། །

བསྐལ་པ་བསམ་ཡས་དཔག་མེད་དུ། ། བསླབ་དཀའ་ཡངས་ཟབ་རྒྱ་ཆེན་རྣམས། ། སྔགས་དང་ཕྱག་རྒྱ་ཏིང་འཛིན་དུ། ། ལུས་ངག་ཡིད་ལ་གང་གནས་པ། ། དབྱེར་མེད་ཚུལ་དུ་སྐྱོབ་པས་ན། ། སངས་རྒྱས་ཀུན་གྱིས་ སྔགས་སུ་བརྗོད། ། མཚན་དང་དཔེ་བྱད་ལྡན་པའི་སྐུ། ། ཡོན་ཏན་མཐའ་དག་རྫོགས་པ་ནི། ། བདེན་པ་གཉིས་ལ་གནས་པ་ཡི། ། བྱང་ཆུབ་སེམས་དཔའ་རྣམས་ཀྱི་མགོན། ། ལ་ལ་འཁོར་ལོས་སྒྱུར་བའི་གཟུགས། ། ལ་ལར་དགེ་སྦྱོང་ཆེན་པོའི་གཟུགས། ། ལ་ལར་སྲིན་པོ་ སྲིན་མོའི་གཟུགས། ། ལ་ལར་འགྲོ་བ་བཟང་པོའི་གཟུགས། ། ཆོས་ཀྱི་འཁོར་ལོ་བསྐོར་བ་དང་། ། སེང་གེ་ལྟར་གཟིགས་མཛད་ལ་སོགས། ། སྣ་ཚོགས་དུ་མ་མཛད་པ་ནི། ། རྐང་གཉིས་ལྷ་མིན་རྣམ་གཉིས་སོགས། ། འགྲོ་བའི་མགོན་པོར་གྱུར་པའོ། ། རྟག་དང་འདྲ་ དང་ངེས་མེད་པའི། ། གཙོ་བོ་བསམ་པས་གྱུར་པ་རྣམས། ། འཇིག་རྟེན་ཕལ་པའི་མགོན་པོ་སྟེ། ། གཟུགས་བྱད་ཁ་དོག་ཐ་དད་པ། ། ཡུལ་དུས་རྣམ་པའི་བྱེ་བྲག་གིས། ། གྲངས་མ་བྱུང་བ་མཆོད་འོས་སོ། ། ཐུབ་པས་གསུངས་པའི་དེ་མ་ཐག ། རྡོ་རྗེ་ཅན་གྱིས་བཞེངས་ ནས་ཀྱང་། ། ཕྱག་འཚལ་བསྐོར་བ་བྱས་ནས་ནི། ། སྤྱན་སྔར་འདུག་ནས་འདི་སྐད་གསོལ། །

འདྲེན་པ་གཙོ་བོ་བཅོམ་ལྡན་འདས། ། སྔགས་ཞེས་པ་ནི་གང་གང་ཡིན། ། ཕྱག་རྒྱ་ཞེས་ནི་ཅི་ལྟ་བུ། ། ཏིང་འཛིན་ཞེས་ནི་ཇི་ལྟར་བཤད། ། ལུས་ངག་ཡིད་ལ་ཇི་ལྟར་གནས། ། དབྱེར་མེད་ཚུལ་དུ་ཇི་ལྟར་སྐྱོབ། ། བདག་ལ་ཕན་པའི་དོན་ཕྱིར་དང་། ། གཞན་ལ་བརྩེ་ཕྱིར་བཤད་དུ་གསོལ། ། དེ་ནས་རྒྱལ་བ་གཙོ་མཆོག་ནི། ། ལྗགས་ཀྱི་དབང་པོ་བཀྲམ་བྱས་ཏེ། ། ཚངས་པ་ཆེན་པོའི་གསུང་སྙན་གྱིས། ། རྣམ་རྟོག་ཟད་ཕྱིར་འདི་གསུངས་སོ། ། སྙིང་པོ་ཉེ་ སྙིང་རྩ་བའི་སྔགས། ། ལས་ཀྱི་སྔགས་སུ་གྱུར་པ་སྟེ། ། སྙིང་པོ་བརྗོད་དང་ས་བོན་ནོ། ། ཉེ་སྙིང་ཡེ་ཤེས་མཆོག་དང་ནི། ། གསང་བའི་སྙིང་པོ་ཞེས་གྲགས་སོ། ། ལས་ཀྱི་སྔགས་ནི་གཉིས་ཡིན་ཏེ། ། བདག་ཉིད་བརྟན་བྱེད་ལས་སྔགས་དང་། ། སྦྱོར་ཚོགས་གྲུབ་པར་བྱེད་ པའོ། ། ཕྱག་རྒྱ་ལག་པའི་འདུ་བྱེད་དང་། ། རྐང་པ་སྟབས་ཀྱི་འགྱུར་བའོ། ། རྟགས་སུ་མཚོན་དང་འདེབས་པ་དང་། ། འགྱུར་བ་མེད་པར་བྱེད་པས་ན། ། ཕྱག་རྒྱ་ཞེས་སུ་བཤད་པའོ། ། རང་གི་རྩེ་གཅིག་སེམས་བསྡུས་ན། ། སེམས་ལ་ལྷག་པའི་ཆོས་འབེབས་པ། ། དེ་ནི་ཏིང་ངེ་འཛིན་ཞེས་བྱ། ། དེ་ལྟར་དེ་དག་ལ་བརྟེན་ནས། ། སྔ་མའི་གནས་དེ་ཡོངས་གྱུར་ནས། །

སྒོ་ང་བྲལ་བའི་འདབ་{བཟངས་,བཟང་}ལྟར། ། ལུས་འདི་མཁའ་ལ་ཆེར་སོང་ནས། ། རྒྱལ་བའི་ཞིང་ཁམས་ཐམས་ཅད་དུ། ། རྒྱལ་ལ་དམ་ཆོས་མཉན་ནས་ཀྱང་། ། རྒྱལ་སྲས་ ཀུན་ལ་བཤད་པ་དང་། ། སྐད་ཅིག་མཁྱེན་པའི་ཤེས་པས་ཀྱང་། ། ཤེས་བྱ་མ་ལུས་ཕྱོགས་ཁྱབ་པ། ། ལུས་ངག་ཡིད་ལ་གནས་པའོ། ། སེམས་དང་ཡིད་ནི་འདྲེས་པའི་ཚེ། ། ཡེ་ཤེས་བདེ་བར་ཤར་བ་ནི། ། དུས་གསུམ་སངས་རྒྱས་ཐམས་ཅད་ཀྱི། ། དབྱེར་མེད་ ཚུལ་དུ་སྐྱོབ་ཅེས་གསུངས། ། འཕགས་པ་རྡོ་རྗེ་ཁྲོ་བོའི་རྒྱལ་པོའི་རྟོག་པ་བསྡུས་པའི་རྒྱུད་ལས་ལྷག་པར་གནས་པའི་དོན་ཡོངས་སུ་བཀོད་པའི་ལེའུ་སྟེ་དང་པོའོ། ། ། ། ཞི་བས་གདུལ་དཀའ་བགེགས་ཆེན་དང་། ། ལོག་འདྲེན་དེ་རྣམས་འདུལ་བའི་ཕྱིར། ། སེམས་ཀྱི་བྱེ་བྲག་ཐུགས་ཆུད་ནས། ། དེ་དང་གཟུགས་འདྲས་གཞོམ་པའི་ཕྱིར། ། རྟོག་མེད་ནམ་མཁའི་ལམ་གནས་ཏེ། ། རྫོགས་སངས་གདུལ་དཀའ་འདུལ་མཛད་སྐུ། ། རབ་འཕགས་ཁྲོ་བོ་སྟོབས་ཆེན་དཔལ། ། སངས་རྒྱས་ཀུན་གྱི་སྲས་ཀྱི་སྲས། ། མི་གཡོའི་མཚན་གྲགས་དེ་ལ་འདིར། ། རྒྱལ་དང་རྒྱལ་སྲས་རྟག་ཕྱག་འཚལ། ། ཚངས་སོགས་ལྷ་དང་ལུས་ཅན་ཀུན། ། དེ་ལ་རྟག་ཏུ་མཆོད་པར་བྱེད། ། རྒྱལ་བས་བྱས་གཟོ་རྒྱལ་སྲས་ཀྱི། །

སྨོན་རྫོགས་བསམ་གྱིས་མི་ཁྱབ་པའི། ། ཡེ་ཤེས་རྫོགས་ནས་མི་གཡོའི་ ས། ། ཐོབ་པས་མི་གཡོ་བ་ཞེས་བྱ། ། ཕས་ཀྱི་རྒོལ་འཇོམས་དཔའ་བོ་སྟེ། ། ཚར་གཅོད་པ་ནི་ཁྲོ་བོ་ཡིན། ། སྔགས་ཀྱི་བདེན་ཚིག་མི་སླུ་བས། ། ཉན་ཐོས་བདུད་ཚོགས་གྱིས་མི་གཡོ། ། རྟོག་མེད་བདུད་ལ་ཁྲོ་བས་རྒྱལ། ། རྫུ་འཕྲུལ་བསྐྱོད་མེད་མི་གཡོ་བ། ། དེ་ བཞིན་ཉིད་ཀྱི་སྙིང་པོ་མཆོག ། སྟོང་ཉིད་ལས་བྱུང་རྒྱལ་བའི་སྐུ། ། ཆོས་དབྱིངས་བདག་ཉིད་ལ་བཞུགས་ནས། ། སྤྲུལ་འདིས་སྲིད་པའི་ཁམས་སྦྱོང་མཛད། ། མཁའ་ལྟར་དྲི་མེད་སྤྲོས་བྲལ་བས། ། དུས་གསུམ་སངས་རྒྱས་ཐམས་ཅད་འབྱུང་། ། སྤྲོས་མེད་ནམ་མཁའི་ རང་བཞིན་ལ། ། ཐ་སྙད་ཙམ་དུ་གསང་སྔགས་ཞེས། ། བརྗོད་ཀྱང་ངག་གི་སྤྱོད་ཡུལ་འདས། ། སྐྱོབ་པས་ཐ་སྙད་རྟོགས་ཕྱིར་གསུངས། ། སེམས་མེད་རང་བཞིན་མེད་སྟོང་ཉིད། ། སྒྱུ་འདྲར་ཡིད་ཀྱིས་བསྒོམ་པ་ཡིན། ། དངོས་མེད་མཉམ་མཛེས་འདོད་དོན་རྣམས། ། གསང་སྔགས་ མགོན་འདི་བརྗོད་པས་སྩལ། ། མུ་སྟེགས་བདག་དང་སྲོག་གང་ཟག ། གཙོ་བོ་སྐྱེས་བུ་ཁྱབ་གནས་པས། ། འཁོར་བ་རྟག་འདོད་ང་རྒྱལ་རྨོངས། ། ལོག་པའི་ཞགས་བཅིངས་སྡུག་བསྔལ་བསྐྱེད། །

བདག་མེད་སྲོག་མེད་སེམས་ཅན་མེད། ། བྱེད་པོ་མེད་ཅིང་གཙོ་བོ་མེད། ། ཁྱབ་ གནས་མེད་ཅིང་དངོས་པོ་མེད། ། རྫས་ལ་རྫོགས་པའི་རང་བཞིན་མེད། ། ལོག་རྟོག་སྲིད་འཆིང་ཞགས་བཅད་ཕྱིར། ། དངོས་མེད་སྣ་ཚོགས་གཟུགས་བསྒོམས་པས། ། དངོས་གྲོལ་སྟོང་ཉིད་གོ་འཕང་འཐོབ། ། ཕྱི་ནང་ཁྱད་པར་དེར་གོམས་པའོ། ། དབུ་བ་ཆུ་བུར་སྒྱུ་འདྲར་བསྒོམ། ། སྟོང་ཉིད་ལས་ལྡང་ཏིང་འཛིན་གྱིས། ། རྣམ་རྟོག་སྡིག་བཅིངས་ལས་གྲོལ་ནས། ། འཆི་མེད་ཡེ་ཤེས་གོ་འཕང་འཐོབ། ། ཕུང་པོ་ཁམས་དང་སྐྱེ་མཆེད་མེད། ། ཀུན་གཞི་མེད་དེ་གང་ཟག་མེད། ། གཟུང་འཛིན་མེད་དེ་བཅིངས་མེད་པར། ། རྒྱལ་བ་རྣམས་ཀྱིས་རྟག་ཏུ་བཤད། ། ཀུན་མེད་ཀུན་བྲལ་ཀུན་སྤངས་པའི། ། སྟོང་ཉིད་བྱང་སེམས་སྒྱུ་འདྲ་བར། ། བག་ཡོད་པས་ནི་རྟག་བསྒོམས་ན། ། བྱང་ཆུབ་སེམས་ཀྱི་མྱུ་གུ་འཆར། ། ཡིད་བཞིན་ནོར་འདྲ་རྫུ་འཕྲུལ་ཆེ། ། མཁའ་ལྟར་གོས་པ་མེད་པའི་སྐུ། ། སྔགས་སྤྱོད་བྱང་ཆུབ་སེམས་དཔའ་ཡིས། ། བྱང་ ཆུབ་སེམས་ཀྱི་སྒོམ་པ་འཐོབ། ། ངོ་མཚར་གསུངས་ཏེ་ཐོས་མ་ཐག ། ཁྲོ་བོ་རྣམས་ཀྱི་གཙོ་ལ་བསྟོད། ། རྟག་ཏུ་དག་ཅིང་དྲི་མེད་པ། ། རྣམ་རྟོག་རྒྱུན་འགགས་ཀུན་རྟོག་མེད། །

བརྟག་རྟོག་མེད་ལ་ཞུགས་པ་ཡི། ། དཔའ་བོ་ཆེན་པོ་ཕྱག་འཚལ་བསྟོད། ། ཆོས་ཀུན་གཡོ་ བ་མེད་པ་ཁྱོད། ། སྤྱོད་ཡུལ་ཀུན་ཏུ་ལེགས་སྦྱར་བས། ། ཀུན་མཁྱེན་གཡོ་བ་མེད་པ་རྟག ། རང་བཞིན་སྤྲོས་བྲལ་ཁྱོད་ཕྱག་འཚལ། ། སེམས་ཅན་སྣ་ཚོགས་ཕན་དོན་དུ། ། མཛད་སྤྱོད་སྣ་ཚོགས་གསུངས་པའོ། ། དག་པའི་ལམ་རྣམས་ཡང་དག་འབྱུང་། ། རྣམ་དག་སེམས་ལ་ ཕྱག་འཚལ་བསྟོད། ། མུན་པ་ཕྲ་རབ་རྡུལ་སྤངས་པའི། ། སྤྲིན་བྲལ་ནམ་མཁའ་དག་པ་ལྟར། ། མགོན་པོ་ཁྱོད་སྐུ་ཤེལ་སྒོང་ལྟར། ། ཀུན་རྟོག་སྤངས་ལ་ཕྱག་འཚལ་བསྟོད། ། སྤྲོས་མེད་ནམ་མཁའ་ལྟ་བུ་ལ། ། དངོས་པོ་ཐམས་ཅད་དང་བྲལ་བས། ། ཕུང་ཁམས་སྐྱེ་མཆེད་ཤིན་ ཏུ་དག ། ཡེ་ཤེས་རྒྱ་མཚོ་ཕྱག་འཚལ་བསྟོད། ། མཁའ་ལ་འཇའ་ཤར་སྣ་ཚོགས་ལྟར། ། གཙོ་ཁྱོད་དག་པའི་སེམས་ཅན་གཟིགས། ། ངན་འགྲོ་ཀུན་སྒྲོལ་དཔའ་ཆེན་འཁྲུངས། ། གོ་ཆ་ཆེན་པོ་ཕྱག་འཚལ་བསྟོད། ། ཆོས་ཉིད་ལས་བྱུང་སྙིང་པོ་ནི། ། ཡི་གེ་གཅིག་པ་གཟི་བརྗིད་ཆེ། ། སེམས་ཅན་སྡུག་བསྔལ་ས་གཞི་ལ། ། མུན་འཁྲིགས་སེལ་ལ་ཕྱག་འཚལ་བསྟོད། ། སྔགས་མཆོག་གཙོ་བོའི་གསང་བ་འདིས། ། རྒྱལ་སྲས་ཆོས་འཕེལ་ཤེས་རབ་བསྐྱེད། ། བླ་མེད་གོ་འཕང་མྱུར་འགྲོ་གསུངས། །

གཙོ་བོ་ཁྱོད་ལ་ཕྱག་འཚལ་བསྟོད། ། དངོས་ཀུན་གྱུར་དང་བཅས་ པ་ཡི། ། ལས་དང་སྐྱེ་ལས་རྣམ་པར་གྲོལ། ། རྒྱལ་བ་རྒྱུ་མེད་བདག་ཉིད་འཁྲུངས། ། གཙོ་མཆོག་ཁྱོད་ལ་ཕྱག་འཚལ་བསྟོད། ། དངོས་མེད་ཡེ་ཤེས་མེ་ལྕེ་ཡིས། ། འདུས་བྱས་རི་བོ་ཀུན་བསྲེགས་ནས། ། ཆོས་དབྱིངས་རང་བཞིན་གཅིག་ཏུ་རྒྱལ། ། བླ་མེད་སྐུ་ལ་ཕྱག་འཚལ་བསྟོད། ། བསྟོད་པའི་དོན་དེ་ཐུགས་ཆུད་ནས། ། འགྲོ་ལ་ཕན་ཕྱིར་ཆོ་ག་གསུངས། ། གསང་སྔགས་ལོག་པར་སྤྱོད་པ་དང་། ། སེར་སྣ་ལོག་པར་གོམས་པ་ལས། ། འདོད་པས་ནོན་པའི་སེམས་རྟོག་གིས། ། སྔགས་པ་{ཡི་དགས་,ཡི་དྭགས་}གནས་སུ་སྐྱེ། ། དང་པོས་མར་མེ་མེ་ཏོག་དང་། ། ཞལ་ཟས་ གཏོར་མ་ཕྲེང་བ་སོགས། ། མཆོད་པའི་རྫས་དང་ཡོ་བྱད་དང་། ། མི་ཡི་ལུས་དང་ཁ་ཟས་ལ། ། འཚེ་ཞིང་སྒྲུབ་པའི་བར་དུ་གཅོད། ། མི་སྡུག་ནད་བསྐྱེད་ལོ་ཏོག་འཚེ། ། གཉིས་པ་གནོད་སྦྱིན་དྲག་གྱུར་ནས། ། ཤ་ཁྲག་ཆང་ལ་སྣོམ་ཞིང་རྒྱུག ། ཐོས་བསམ་ བསྒྲུབ་པའི་བར་གཅོད་ཅིང་། ། ནད་བསྐྱེད་ཚེ་ལེན་ལོག་ལྟ་བསྐྱེད། ། རིག་སྔགས་འཆང་གི་གདོན་གཞོམ་ཕྱིར། ། སྒྲུབ་པོས་འབད་དེ་སྔགས་བརྗོད་བྱ། ། སྔགས་མཐུ་བསྐྱེད་པ་གཏོར་མ་དང་། །

སྦྱིན་སྲེག་ཕྱག་རྒྱ་སྔགས་བཅས་དང་། ། མནན་པའི་ལས་ཀྱིས་ ནགས་མེ་ལྟར། ། ཐོགས་པ་མེད་པར་འཇོམས་པར་འགྱུར། ། དེ་དག་བརྟན་བྱེད་ལྷ་ཡིན་ཏེ། ། དེ་གསལ་བྱེད་པར་ས་རིས་ཡིན། ། དེ་ཀུན་རྣམ་དག་གསོལ་བྱེད་པ། ། བྱང་ཆུབ་སེམས་མཆོག་ཞི་བ་ནི། ། ལོག་རྟོག་འཁོར་བའི་ཟོ་ཆུན་ལ། ། རལ་གྲི་རྣོན་པོའི་སྟ་རེ་ལྟར། ། འཕགས་པ་རྡོ་རྗེ་ཁྲོ་བོའི་རྒྱལ་པོའི་རྟོག་པ་བསྡུས་པའི་རྒྱུད་ལས་དེ་བཞིན་ཉིད་ཀྱི་ལེའུ་སྟེ་གཉིས་པའོ། ། ། ། དེ་ནས་སྔགས་དང་ཕྱག་རྒྱ་དག ། འབྱུང་བར་རབ་ཏུ་བཤད་པར་བྱ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ་ཧཱཾ། སྙིང་པོ་དམ་པའོ། ། ན་མཿསརྦཱ་ ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ་ཙཎྜ་མ་ཧཱ་རོ་ཥ་ཎ་སྥོ་ཊ་ཡ་ཧཱུཾ། ཊ་ཏ་ཧཾ་མཾ་སྙིང་པོའོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ་ཧྲ་ཏ་ཨ་མོ་གྷ། ཙཎྜ་མ་ཧཱ་རོ་ཥ་ཎ་སྥོ་ཊ་ཡ་ཧཱུཾ། ཏྲ་མ་ཡ་ཧཱུཾ། ཊ་ཊ་ཧཾ་མཾ་ཉེ་བའི་སྙིང་པོའོ། ། ན་མཿསརྦཱ་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ་ཨ་ཙ་ལཱརྐ་ན། ནཊྚ་ནཊྚ། མོཊྚ་མོཊྚ། སཊྚ་སཊྚ། ཏཊྚ་ཏཊྚ། ཏིཥྛ་ཏིཥྛ། ཨཱ་བེ་ཤ་ཨཿ། མཊྚ།

མ་ལ་ཀ ། དྷ་ཎ་དྷ་ཎ། ཏི་ཎི་ཏི་ཎི། ཁཱ་ད་ཁཱ་ད། བིགྷྣཱ་ན། མཱ་ར་མཱ་ར་དུཥྚན། རཀྵ་རཀྵ་ས་ཏྲཾ། ཀུ་རུ་ཀུ་རུ། ཀི་རི་ཀི་རི། མ་ཧཱ་བི་ཛ་ཡ་བཛྲ་ཕཊ་ཧཱུཾ་ཧཱུཾ་ཧཱུཾ། ཏྲི་བི་ལ་ཏ་ར་ ག། ། ནརྟ་ཀ ། ཧཾ་ཧཾ་ཧཾ། ཨ་ཙ་ལ། ཏེ་ཙེ། ཕཊ་ཕཊ། ཨ་ཧཱུཾ། ཨ་ས་མནྟ་ཀ ། ཊ་ཊ། མ་ཧཱ་བ་ལ་ས་ཏཱ་མ་ན་ཡ། ཏྲཾ་མཾ་ཧཾ། ཤུ་རྱ་དུ་ལོ་ཀ ། ཏུ་ཥྱན་ཏུ་ལོ་ཀ་བཛྲཱི་ན་མཿསྭཱ་པྲ་ཏི་ཧ་ཏ་བ་ལེ་བྷྱོ། ། ཛ་ལ་མ་ཏྲ་ཏ། ཨ་ས་ཏ་ན་མཿསྭཱ་ཧཱ། གསང་བའི་སྙིང་པོའོ། ། དེ་ནས་ཕྱག་རྒྱ་སྟང་སྟབས་ཀྱི། ། སྔགས་བརྗོད་པ་ནི་འདིར་གསུངས་སོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་ཧ་ན་ཧ་ན་མཱ་ར་མཱ་ར་ཡ་ཛྙཱ་ན། ཁཌྒ་ཧཱུཾ་ཕཊ། རལ་གྲིའི་ཕྱག་རྒྱའི་སྔགས་སོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་གྲྀཧྞ་གྲྀཧྞ། ཁཱ་ད་ཁཱ་ད། པཱ་ཤ་ན། བནྡྷ་བནྡྷ། མ་ཧ་ཏེ། དྷརྨ་ཏེ་སྭཱ་ཧཱ། ཞགས་པའི་འོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐ། ཨོཾ་རཀྵ་རཀྵ། ཧ་ན་ཧ་ན། ཀུཊྚ་ཀུཊྚ། མཱ་ར་ཡ་དུཥྚ་བི་ནཱ་ཡ་ཀཾ་ཧཱུཾ་ཛ། གོ་ཆའིའོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ།

སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་དྷ་ར་དྷ་ར་བཛྲ་ན་ལི། ཁ་ཊྭཱཾ་ག་པཱ་ཤ་དྷ་ར་སྭཱ་ཧཱ། གཙུག་ཏོར་གྱིའོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་བྷཉྫ་བནྡྷ་ད་ཧ་པ་ཙ་བྷ་སྨི་ཀུ་རུ་ཀུ་རུ་ཧ་ན་ཧ་ན་བཛྲ། གྲྀཧྞ་གྲྀཧྞ་ཕཊ། ཐོ་བའིའོ། ། ན་མཿསརྦཱ་ས་པ་རི་པཱུ་ར་ཀེབྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་ཥྚ་ན་ཏ་མུརྟི། ད་ཧ་ད་ཧ། སཱདྷ་ཡ་སཱདྷ་ཡ། བི་ཛ་ཡ་བི་ཛ་ཡ། བི་ཛ་ཡ་ཀཱིརྟི་སཱ་ཧཱ། མགོ་བོའི་ཕྱག་རྒྱའོ། ། ན་མཿསརྦཱ་ས་པ་རི་པཱུ་ར་ཀེ་བྷཿ། སརྦ་ཏ་ཐ་ག་ཏེ་བྷྱཿ། སརྦ་ཐ། ཨོཾ་བྷུ་དྷ་ར་དྷ་ར། ཨ་ཙིན་དྱ་བ་ལ་བི་ཀྲ་མ་ཎཾ། བུ་ར་བུ་ས་ལ་ཡ། རཀྵ་རཀྵ་སརྦ་སྭཱ་ཧཱ། རྡོ་བའི་ཕྱག་རྒྱའོ། ། ན་མཿསརྦཱ་ས་པ་རི་པཱུར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་བཛྲ་ཧྲྀ་ད་ཡ། བཛྲ་མ་ཏཾ་གི་སྭཱ་ཧཱ། སྙིང་གའི་ཕྱག་རྒྱའོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་ཧཱུཾ་ད་ཧ་ད་ཧ། ཀིན་ཙི་རཱ་ཡ་སི། ཨཱ་ན་ཡ་ཤཱི་གྷྲཾ། རཀྵ་རཀྵ། བནྡྷ་བནྡྷ། དུཥྚཾ། ད་མ་ད་མ་སྭཱ་ཧཱ། ཕྱོགས་བཅིང་བའོ། ། ན་མཿསརྦཱ་ས་བ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ།

ཨོཾ་དུ་ན་དུ་ན་མ་ཧཱ་པཱ་ཤ་ཁཌྷ་དྷ་རཱ་ས་པ་རི་པཱུ་ར་ཀེ་སྭཱ་ཧཱ། བཀའ་རྟགས་ཀྱིའོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་ག་ག་ན་གནྡྷོད་ བྷ་བ། མ་ཧཱ་ས་མ་ཡ། པ་རི་པཱུ་ར་ཀེ་སྭཱ་ཧཱ། དྲིའི་ཕྱག་རྒྱའོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་བི་ཤུདྷཱ་ཛྙཱ་ན་རཱ་ཛི་སཾ་བྷ་བེ་ག་ག་ནཱ་ནཱཾ་ཧཱཿསྭཱ་ཧཱ། མ་མོའི་ཕྱག་རྒྱའོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་ཤུདྡྷ་ དྷརྨ་ཏེ། ཤུདྡྷ་ཤུདྡྷ། གྲྀཧྞ་གྲྀཧྞ། སརྦཱ་ས་པ་རི་པཱུ་ར་ཀེ་བྷྱཿསྭཱ་ཧཱ། གཏོར་མའི་ཕྱག་རྒྱའོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་ཤུདྡྷ་མ་ཧཱ་ཛྙཱ་ན་སྭ་བྷཱ་བེ། ཏིཥྛ་ཏིཥྛ། མ་ཧཱ་ན་ཡེ་སྭཱ་ཧཱ། བདུག་པའི་འོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་ག་ག་ན་བི་ཀྲཱནྟ་གཱ་མ་ནི་མ་ཧཱ་ཤུདྡྷ་ན་ཡེ་སྭཱ་ཧཱ། མེ་ཏོག་གིའོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་ཧ་ན་ཧ་ན། པ་ར་མ་བི་ཤུདྡྷེ་དྷརྨ་ན་ཡ་པ་རི་པཱུ་ར་ཀེ་བྷྱཿསྭཱ་ཧཱ།

ཞལ་ཟས་ཀྱིའོ། ། ན་མཿསརྦཱ་ས་པ་རི་པཱུ་ ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་ཨ་བྲ་ཏི་ཧི་ཏོ་ནདྱ་ཏ། ད་མ་ད་མ། སརྦ་ཐཱ། ས་པ་རི་པཱུ་ར་ཀེ་བྷྱཿསྭཱ་ཧཱ། དཔའ་བོ་སྤྱན་དྲང་བའིའོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་པི་ཤུདྡྷ་བི་ཤུདྡྷ། ས་ཀྲ་སྭ་བྷཱ་བེ་ཨཱ་ན་ཡ། མ་ཧཱ་ན་ཡེ་སྭཱ་ཧཱ། བྱང་ཆུབ་སེམས་དཔའ་སྤྱན་དྲང་བའོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་བི་ཤུདྡྷ་སྭཱ་ཧཱ། ཧ་ན་ཧ་ན། ད་མ་ད་མ། མ་ཧཱ་ན་ཡེ་སྭཱ་ཧཱ། ཉན་ཐོས་སྤྱན་དྲང་བའི་འོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་བཛྲཱ་ཀརྵ་ཡ། ཤཱིགྷྲཾ། ད་ཧ་ད་ཧ། པ་ཙ་པ་ཙ། མ་ཧཱ་པ་རི་ཝཱ་ར་སྭཱ་ཧཱ། ཕོ་ཉ་ཕོ་མོ་སྤྱན་དྲང་བའོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་མ་ཐཱ་མ་ཐཱ། ཨཱ་ན་ཡ་ཨཱ་ན་ཡ། པྲ་བེ་ཤ་ཡ། པྲ་བེ་ཤ་ཡ། སརྦ་ཏ་ཐཱ་ག་ཏ་སརྦ་དེ་བཾ་ཏ་མ་ཏ་མ། མ་ཧཱ་ན་ཡ་པ་རི་ཝཱ་རི་ཧཱུཾ་སྭཱ་ཧཱ། འཇིག་ རྟེན་པ་རྣམས་སྤྱན་དྲང་བའོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ།

ཨོཾ་ས་ཏྱ་ས་ཏྱ། མ་ཧཱ་སཱ་དྷྱ་ཡ། ད་མ་ད་མ། མ་ཧཱ་ད་མ། ཨཱ་ཀརྵ་ཡ་ཨཱ་ཀརྵ་ཡ། ཨ་དྱ་བ་མ་ཧཱ་ན་ཡ་ཤུདྡྷེ་སྭཱ་ཧཱ། དྲང་སྲོང་སྤྱན་དྲང་བའོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་ བྷྱཿ། སརྦ་ཐཱ། ཨོཾ་ཛ་ཡ་ཛ་ཡ། བི་ཛ་ཡ་བི་ཛ་ཡ། མ་ཧཱ་ས་ཏྱ་པ་དི་ནི། སརྦ་ཧཱི་ཏེ་སྭཱ་ཧཱ། སྲིང་མོ་རྣམས་སྤྱན་དྲང་བའོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་ཧྲི་ཧཱ་དཱ། མ་ཐ་མ་ཐ། ད་མ་ད་མ། ཧ་ན་ཧ་ན། མ་ཧཱ་ན་ཡེ། མ་ར་མ་ར། ཧ་སྭཱ་ཧཱ། མ་མོ་ རྣམས་སྤྱན་དྲང་བའོ། ། ན་མཿསརྦཱ་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་ཧ་ན་བཛྲ་ཧཱུཾ་ཕཊ། སརྦ་དུཥྚ་གྲ་ཧཾ། མ་ཐ་མ་ཐ། བྷཉྫ་བྷཉྫ། སརྦ་གིགྷྣཱཾ། ད་མ་ད་མ། སརྦ་དུཥྚཾ་ཨོཾ་ཧཱུཾ་ཕཊ་སྭཱ་ཧཱ། རྐང་སྟབས་ཚམ་ངམ་གྱི་སྔགས་སོ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་ཨཱཿཧཱུཾ། ཨཱ་ཀཱ་ཤ་ག་ག་ན་སྥ་ར་ཎ་ཁཾ་སྭཱ་ཧཱ། འོ་ཐུག་ཁུར་བ་འབྲུ་སྣ་ཚོགས། ། སྤོས་དང་མེ་ཏོག་ལ་སོགས་པ། ། ཅི་འབྱོར་འབྱོར་པའི་གཏོར་མ་ནི། ། སྔགས་དེས་སྤྲོ་ཞིང་སྤེལ་བར་བྱ། ། ན་མཿསརྦཱ་ས་པ་རི་པཱུ་ར་ཀེ་བྷྱཿ།

སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་སྭ་བྷཱ་བ་སརྦ་ཐཱ་བྷྱོ་བཱཾ་སྭཱ་ཧཱ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་ལནྡྷེ་སརྦ་ག་ག་ན་ལབྡྷ་ཡ་སྭཱ་ཧཱ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨོཾ་སརྦ་སིདྷི་དྭཱ་དྷ་མི་ཧཾ་སྭཱ་ཧཱ། བྱིན་བརླབས་བཞིན་དུ་བསྒྱུར་བ་དང་། ། ཀུན་གྱིས་ ཐིམ་པར་བྱ་བ་དང་། ། འདོད་པའི་ལས་རྣམས་གང་དང་གང་། ། གྲུབ་པར་བྱ་བའི་སྔགས་ཡིན་ནོ། ། གཟའ་ཆེན་བརྒྱད་དང་རྒྱུ་སྐར་དང་། ། ཉི་ཤུ་རྩ་བརྒྱད་རྣམས་ཀྱི་སྔགས། ། ན་མཿསརྦཱ་ས་པ་རི་པཱུ་ར་ཀེ་བྷྱཿ། སརྦ་ཏ་ཐཱ་ག་ཏེ་བྷྱཿ། སརྦ་ཐཱ། ཨཱ་དི་དྱ། སོ་མ། ཨཾ་གཱ་རཿབུདྷཿ བྲྀ་ཧསྤ་ཏི། ཤུ་ཀྲཿ། ཤ་ནཻཤྩ་རཿ། རཱ་ཧུཿ། ཀེ་ཏུཿ། ཀྲྀཏྟི་ཀཱ། རཽ་ཧི་ཎཱི། མྲྀ་ག་ཤི་རཱ། ཨར་དྲ་པུ་ན་རྦ་སུ། པུཥྱ། ཨ་ཤླེ་ཥཱ། མ་གྷཱ་པུརྦཱ་ཕལྒུ་ནཱི་ཨུཏྟ་ར་ཕལྒུ་ཎཱི། ཧསྟཱ། ཙི་ཏྲཱ་སྭ་སྟི། བི་ཤཱ་ཁཱ། ཨ་ནུ་རཱ་དྷཱ། ཛྱེཥྛ་མཱུ་ལ། པཱུརྤཱ་ཥཱ་ཌྷཱ། ཨུཏྟ་རཱ་ཥཱ་ཌྷཱ་ཤྲ་བ་ཎཱ་ཨ་བྷི་ཛི་ཏ། ཤཏ་བྷི་ ཥཱ། དྷ་ནིཥྛ། པཱུརྦ་བྷ་དྲ་པ་དཱ། ཨུཏྟ་ར་བྷ་དྲཱ། རཻ་བ་ཏཱི། ཨ་ཤྭ་ནཱི། བྷ་ར་ནཱི། ཨོཾ་དང་སྭཱ་ཧཱར་བཅས་པ་ནི།

། རང་རང་སྙིང་པོའི་སྔགས་ཡིན་ཏེ། ། གང་འདོད་ལས་ཀྱང་སྦྱར་བར་བྱ། ། མཆོད་པའི་རིགས་ཀྱང་ཐ་དད་བྱ། ། ན་མཿས་མནྟ་ཀཱ་ཡ་བཱཀྩིཏྟ་བཛྲཱ་ཎཱཾ། ཨོཾ་ཨ་ཙ་ལ་ ཀ་ཎ་ཙཎྜ་མ་ཧཱ་རོ་ཥ་ཎ་སྥོ་ཊ་ཡ་ཏྲ་ཀ་ཁ་ཧཾ་མཾ། ན་མཿས་མནྟ་ཀཱ་ཡ་བཱཀྩིཏྟ་བཛྲཱ་ཎཱཾ། ཨོཾ་བཛྲ་ཀ་པ་ཙ་དུཾ་བཾ། ཨོཾ་ན་མཿསརྦ་ཏ་ཐཱ་ག་ཏེ་བྷྱཿ། སརྦ་བྷ་ཡ་བི་ག་ཏེ་བྷྱཿ། བི་ཤྭ་མུ་ཁེ་བྷྱཿ། སརྦ་ཐཱ་ཁཾ་རཀྵ། མ་ཧཱ་བ་ལི། སརྦ་ཏ་ཐཱ་ག་ཏེ་པུ་ཎྱ་ནི་རྫ་ཏེ་ཧཱུཾ་ཧཱུཾ་ཏྲ་ཐཱ་ཨ་པྲ་ཏི་ཧ་ཏེ་སྭཱ་ཧཱ། ཁྲོ་བོ་སྤྱན་ གཅིག་དྲག་ཤུལ་ཅན། ། སྲུང་དང་བཅས་པར་མཆོད་པ་དང་། ། སྔགས་བཟླས་དངོས་གྲུབ་བླངས་པས་འགྲུབ། ། ཅི་འདོད་ལས་ལ་ཆོ་གས་སྦྱར། ། ལག་གཡས་གུང་མཛུབ་གཤིབས་ཏེ་བརྐྱང་། ། སྲིན་ལག་མཐེ་ཆུང་མཐེ་བོས་མནན། ། ཤུགས་དྲངས་ཚུལ་ཕྱུང་ མཁའ་ལ་འཕྱར། ། རལ་གྲི་ཕྱག་རྒྱས་བདུད་ཚོགས་འཇོམས། ། གཡོན་པ་ཁུ་ཚུར་སྡིགས་མཛུབ་བསྒྲེང་། ། སླར་བསྒྱུར་བྱེད་པ་ཞགས་པའི་རྒྱ། ། གུང་མོ་མཐེའུ་ཆུང་སོ་སོར་སྤྲད། ། མཛུབ་མོ་མིང་མེད་ནང་དུ་དགུག ། མཐེ་བོ་གཤིབས་པ་གུང་འགྲམ་སྦྱར། ། སྙིང་ ག་བཀོད་དེ་གོ་ཆའི་རྒྱན། ། སོར་འཁྱུད་ཁུ་ཚུར་ནང་དུ་བསྡམ། །

མཐེབ་གཉིས་ཅུང་བསྒྱུར་མགོ་ཐོད་རྒྱ། ། གཡོན་པའི་ཁུ་ཚུར་མཐེ་བ་ནི། ། གཡས་པའི་ཁུ་ཚུར་ནང་བཅུག་ནས། ། མཐེ་བོང་གཡས་བསྒྲེང་ཐོ་བའི་རྒྱ། ། ཕྱོགས་བཅུར་བརྡུངས་པ་ལྟར་བྱའོ། ། གཡས་ པ་ཁུ་ཚུར་གུང་མོ་བསྒྲེང་། ། སྤྱི་གཙུག་ཕྱག་རྒྱ་གཙུག་ཏུ་བཞག ། གཡོན་པ་ཁུ་ཚུར་གུང་མཛུབ་བསྒྲེང་། ། བཀའ་རྟགས་ཕྱག་རྒྱ་རྟག་ཏུ་ཕྱར། ། ཁུ་ཚུར་གཉིས་གཤིབས་ལྟོ་སྦྱར་བ། ། རྡོ་བ་ལྟ་བུའི་ཕྱག་རྒྱའོ། ། གཡས་པའི་ཁུ་ཚུར་སྙིང་གར་བཞག ། སྙིང་ག་ བརྒྱན་པའི་ཕྱག་རྒྱའོ། ། ལག་གཉིས་སོར་མོ་སོ་སོར་བརྐྱང་། ། ཕྱོགས་བཅུ་བཅིང་བའི་ཕྱག་རྒྱའོ། ། ལག་སྦྱར་གུང་གཉིས་ནང་བཅུག་པ། ། དྲི་ཡི་ཕྱག་རྒྱར་བཤད་པའོ། ། ཁུ་ཚུར་རྒྱབ་སྤྲད་གུང་མཐེ་བོང་། ། མཐེ་བོང་གུང་མཛུབ་སྤྲད་དང་འཁྱུད། ། གཏོར་མ་སྦྱིན་ པའི་ཕྱག་རྒྱའོ། ། ཐལ་མོ་ཁོང་སྟོང་ཤུབས་ལྟར་གདོན། ། བདུག་སྤོས་འབུལ་བའི་ཕྱག་རྒྱའོ། ། ལག་གཉིས་སོ་སོར་གུང་སྲིན་བཀུག ། མཐེབ་མནན་བཞག་{བརྐྱང་མ,རྐྱང་མ}ེ་ཏོག་རྒྱ། ། ཐལ་སྦྱར་གུང་སྲིན་མཛུབ་མོ་བཀུག ། མཐེའུ་ཆུང་མཐེབ་བརྐྱང་ཞལ་ཟས་རྒྱ། ། སྐྱིལ་ཀྲུང་འདུག་སྟེ་སྙིམ་པ་ཟེད། ། མཐེ་བོ་གཉིས་ནི་ནང་དུ་བཀུག །

སོར་གཤིབས་ནས་གཡབ་བྱེད་པ་ནི། ། དཔའ་བོ་གཙོ་བོ་སྤྱན་དྲང་རྒྱ། ། ཐལ་སྦྱར་མཛུབ་བཀུག་མཐེ་བོས་མནན། ། བྱང་ཆུབ་སེམས་ཚོགས་འགུགས་པའི་རྒྱ། ། སྙིམ་བསྐྱེད་མཐེའུ་ཆུང་གཤིབས་ཏེ་ བརྐྱང་། ། ལྷག་མ་བརྒྱད་པ་སོ་སོར་དགུག ། ཉན་ཐོས་རང་རྒྱལ་རྫུ་འཕྲུལ་ཅན། ། མ་ལུས་ཐམས་ཅད་འགུགས་པའི་རྒྱ། ། ཁུ་ཚུར་གཡས་པ་གཡོན་སྟེང་བཞག ། མཛུབ་གཉིས་བརྐྱང་སྟེ་སོ་སོར་དགུག ། ཅུང་ཟད་སྐྱེད་པར་བྱེད་པ་ནི། ། ཕོ་ཉ་ཕོ་མོ་འགུགས་པའི་རྒྱ། ། ཁུ་ ཚུར་རྒྱབ་སྤྲད་གུང་མཛུབ་ནི། ། སོ་སོར་དྲང་པོར་གཤིབས་ཏེ་བརྐྱང་། ། མཐེབ་གཉིས་ཅུང་ཟད་སྤྲད་དེ་དགུག ། འཇིག་རྟེན་པ་རྣམས་འགུགས་པའི་རྒྱ། ། གཡོན་མིན་གཡས་པས་དེ་ལྟར་བྱ། ། བརྟུལ་ཞུགས་དྲང་སྲོང་འགུགས་པའི་རྒྱ། ། གཡོན་པ་ཁུ་ཚུར་གུང་མོ་བསྒྲེང་། ། དངོས་གྲུབ་ སྲིང་མོ་འགུགས་པའི་རྒྱ། ། ལག་གཡས་བཀན་ཏེ་བརྐྱང་ནས་ཀྱང་། ། མཐེ་བོས་མཛུབ་མནན་གསུམ་པོ་གཡབ། ། མ་བདུན་ལ་སོགས་མ་མོ་རྣམས། ། ལས་ཀྱི་དུས་སུ་འགུགས་པར་འགྱུར། ། རེས་ཀྱིས་བཏེག་ཅིང་དྲང་པོ་ཡི། ། པུས་མོ་དག་ལ་རྐང་མཐིལ་སྦྱར། ། སྤྱི་བོར་མེ་ཏོག་ ཐལ་སྦྱར་ཡང་། ། ཕྱོགས་དེར་གཡོབ་ཅིང་འབྲུ་ཚུགས་བལྟ། །

ཟླུམ་པའི་སྟབས་ཀྱིས་འདི་ཀུན་གྱིས། ། བགེགས་ཚོགས་འཇོམས་ཤིང་རྣལ་འབྱོར་བསྲུང་། ། ལག་པ་གཡས་ནི་གྱེན་དུ་བརྐྱང་། ། གཡོན་པ་སྙིང་གར་སྡིགས་མཛུབ་སྟེ། ། རྐང་གཉིས་སྤྲད་ནས་རྟིང་པ་རྡེབས། ། ཧཱུཾ་ བརྗོད་དྲག་སྐད་མདུན་དུ་ལྟ། ། ས་གསུམ་གཡོ་བྱེད་ཟླ་གམ་སྟབས། ། རྐང་གཡོན་བརྐྱང་བའི་སྟབས་དང་ནི། ། ཧ་ཧ་བརྗོད་ཅིང་ཞབས་རྒྱ་བཅིང་། ། ཕན་ཚུན་བསྣོལ་ནས་བགེགས་ལ་བསྣུན། ། འཁོར་ལོ་ཕྱག་རྒྱ་ཕྱེ་མར་བྱ། ། རྐང་གཡས་བརྐྱང་བའི་སྟབས་དང་ནི། ། རྡོ་རྗེ་ ཐལ་མོ་མཁའ་ལ་བསྣུན། ། ཁྲོ་གཉེར་མིག་ཅན་མ་མཆུ་མནན། ། ཡན་ལག་གཉིས་གཉིས་མེ་ལྟར་སྤྲད། ། རྐང་པ་མཉམ་སྟབས་ཧཱུཾ་སྒྲ་ཅན། ། ལག་གཉིས་སྡིགས་མཛུབ་ཕྱག་རྒྱའོ། ། རྐང་གཉིས་མཉམ་དུ་བཞག་པ་ལས། ། གཡས་ཀྱི་གཡོན་བསྐོར་ལྟེ་བ་ཡིན། ། མདུན་དུ་གཡས་ཏེ་རྒྱབ་ཏུ་གཡོན། ། གྱ་ཚོམ་གསུམ་གསུམ་མནན་པ་ནི། ། རྩེ་གསུམ་ཡིན་ཏེ་རྩེ་གསུམ་རྒྱ། ། ལག་པ་སྟེང་བརྐྱང་དབྱིག་བསྒྲེང་ལྟར། ། བགེགས་ལ་བསྣུན་ཞིང་འབྲུ་ཚུགས་བལྟ། ། གཡས་སུ་ཐོ་བ་ཧཱུཾ་བརྗོད་བརྡེག ། གཡོན་པ་སྙིང་གའི་སྡིགས་མཛུབ་ སྟེ། ། གཉིས་ཀ་བགྲད་པ་འཁོར་ལོ་བྱ། ། ནུབ་བལྟས་རྐང་པ་མཉམ་བཞག་ནས། །

མདུན་གཡས་རྒྱབ་དང་གཡོན་ཕྱོགས་སུ། ། གཡོན་པས་བགེགས་གསུམ་མནན་བྱ་ཞིང་། ། རིམ་པས་མེ་དང་རལ་གྲི་དང་། ། སྡིགས་མཛུབ་ཞགས་པ་ཕྱོགས་བཞིར་བཅིང་། ། ཧ་ཧཱུཾ་ དྲག་བརྗོད་བརྗིད་གནོན་རྒྱ། ། རྐང་གཉིས་པུས་འཁྱུད་ལག་པ་གཉིས། ། གྲུ་མོ་བསྒྱུར་ན་ཐིག་གིས་མནན། ། བགེགས་བསྐྲད་ཕྱིར་ནི་འབྲུ་ཚུགས་བལྟ། ། རྩེ་གཅིག་རྡོ་རྗེ་སྟབས་སུ་བཅད། ། རྐང་པ་གཡས་གཡོན་རེས་ཀྱིས་བསྐོར། ། ལྷོ་བྱང་གཡོན་ཏེ་ཤར་ནུབ་གཡས། ། བརྐྱང་ཞིང་དྲག་ཏུ་བརྡབ་པར་བྱ། ། རྒྱབ་ནས་དྲང་དང་ཐོ་བ་དང་། ། རྡོ་རྗེ་དང་ནི་ཞགས་པའི་རྒྱ། ། ཕྱོགས་བཞིར་བྱ་སྟེ་འཁོར་ལོའི་སྟབས། ། ཕྱག་རྒྱ་དང་ནི་སྟང་སྟབས་ཀྱིས། ། ཕྱོགས་སྐྱོང་རྣམས་ཀྱང་སྐྲག་བྱེད་ན། ། འབྱུང་པོའི་ཚོགས་འཇོམས་སྨོས་ཅི་དགོས། ། ཐམས་ཅད་དབང་ དུ་སྡུད་པར་བྱེད། ། དེ་ནས་ཕྱོགས་བཅུ་བཅིང་བ་ཡི། ། རྐང་སྟབས་ཁྱད་པར་བཤད་པར་བྱ། ། ཤར་དུ་རྐང་པ་མཉམ་པ་ཡིས། ། རྡོ་རྗེ་ཐལ་མོ་གྱེན་དུ་བརྡེག ། ལྷོར་ནི་རྐང་རྟིང་སྤྲད་དེ་ག་དང་། ། ཧཱུཾ་སྒྲོགས་ཐལ་མོ་མདུན་རྒྱབ་སྦྱར། ། ནུབ་ཏུ་རྐང་སྤྲད་ལག་པ་གཉིས། ། སོ་སོར་སྡིགས་ མཛུབ་གྱེན་དུ་བརྐྱང་། ། བྱང་དུ་རལ་གྲིའི་ཕྱག་རྒྱ་དང་།

། རྐང་པ་ཡ་གཅིག་ས་ལ་བསྒྲེང་། ། ཁུ་ཚུར་མཛུབ་སྦྱར་དཔྲལ་བར་བཟློག ། རྐང་གཉིས་མཉམ་བྱས་རེས་ཀྱིས་ཕྱར། ། མཆེ་གཙིགས་ཧཱུཾ་སྒྲགས་ཁྲོ་གཉེར་བལྟ། ། བྱང་ཤར་ཐིག་ལེར་གྲགས་པའི་རྒྱ། ། ཁུ་ཚུར་མཐེའུ་ ཆུང་མཆེ་བའི་རྒྱ། ། རྐང་པ་རེས་བཏེག་ཤར་ལྷོར་ཕྱེ། ། ལྷོ་ནུབ་རྐང་གཉིས་རེས་ཀྱིས་བརྡབ། ། ཞགས་པས་འདེབས་དང་རལ་གྲིས་གཅོད། ། ནུབ་བྱང་རྐང་གཉིས་བརྡབ་པ་དང་། ། ལག་གཉིས་མཐེབ་སྤྲད་འཁོར་ལོ་བསྐོར། ། ཡང་ན་ཚེ་གཅིག་ཕྱག་རྒྱས་གདབ། ། སྟང་སྟབས་ཐམས་ཅད་ཧ་ཧཱུཾ་སྒྲོགས། ། དེ་ནས་རིག་སྔགས་བཟློག་པ་ཡི། ། ཕྱག་རྒྱ་ཆོ་ག་བཤད་པར་བྱ། ། ཁུ་ཚུར་གུང་མོ་བརྐྱང་རྩེ་སྤྲད། ། མཛུབ་གཉིས་དེ་ཡི་འགྲམ་དུ་བཅང་། ། སྔགས་དང་ཕྱག་རྒྱ་ཐམས་ཅད་ཀྱིས། ། ལྷ་ཀླུ་སྲིན་པོ་གནོད་སྦྱིན་དང་། ། མཁའ་ འགྲོ་འབྱུང་པོ་མི་མ་ཡིན། ། གསོད་དང་སྐྲོད་དེ་མེ་ལྟར་མཛད། ། འཕགས་པ་རྡོ་རྗེ་ཁྲོ་བོའི་རྒྱལ་པོའི་རྟོག་པ་བསྡུས་པའི་རྒྱུད་ལས་སྔགས་དང་ཕྱག་རྒྱའི་ལེའུ་སྟེ་གསུམ་པའོ། ། ། ། བླ་ན་མེད་པའི་རས་རིས་སྐུ། ། ཆོ་ག་དེ་ནས་བཤད་པར་བྱ། ། བྲིས་སྐུ་འདོད་པས་ ཐམས་ཅད་དུ། ། དགེ་བའི་རས་{བཟངས་,བཟང་}བཙལ་ནས་ཀྱང་། །

བཀྲུས་ཏེ་སྔགས་ཀྱིས་བསྲུང་བྱས་ལ། ། ངུར་སྨྲིག་ཏུ་ནི་བསྒྱུར་བར་བྱ། ། རྒྱུད་{བཟངས་,བཟང་}དལ་ཞིང་དུལ་བག་ཡོད། ། ཆོས་ཐོས་རི་མོ་མཁས་ལ་སྒྲིན། ། སྲེད་ཆུང་ཡིད་གཞུངས་ཁྲོ་མེད་པས། ། སེན་རྩི་ཤུན་ ཀན་ཚ་ལ་སྦྱར། ། སྤོང་དང་མུ་ཟི་ཀན་ལྟར་ལྗང་། ། བ་བླ་ཀྲ་ནི་བླ་ན་སེར། ། ལི་ཁྲི་སྒོ་ང་མཚལ་སྤགས་དམར། ། རམས་དང་མཐིང་ཤུན་བྲུ་ནིར་སྔོ། ། སྦྱིག་དང་ཨཉྫ་ནག་པོ་སྟེ། ། ཤེ་ཏྭ་དག་ཀྱང་དཀར་པོར་འགྱུར། ། ས་སྣོད་སོ་བཏང་སྐགས་སྙིགས་བྱུག ། པིར་ འཇམ་རབ་འབྲིང་ཐ་མ་བྲི། ། རྒྱལ་དང་ས་རི་ནམ་གྲུ་དང་། ། སྣྲོན་སྣྲུབས་སྨིན་དྲུག་ལྷ་མཚམས་ཤིས། ། དེ་ནས་ཡང་དག་རབ་བཤད་པ། ། ཐུབ་པའི་དགེ་བ་རས་རིས་ལ། ། དབུས་སུ་བྱང་ཆུབ་ཤིང་མཆོག་དྲུང་། ། གསེར་མདོག་འཁོར་ལོ་སྒྱུར་བའི་ཆས། ། ཆོས་འཆད་ཕྱག་རྒྱ་ངུར་སྨྲིག་མནབས། ། ལོགས་སུ་འདབ་{བཟངས་,བཟང་}རྒྱལ་པོ་གཉིས། ། སྙིམ་པ་མེ་ཏོག་བཀང་བའི་གཟུགས། ། གཡས་སུ་འཇིག་རྟེན་དབང་པོ་དཀར། ། ངུར་སྨྲིག་གྱོན་པས་ཐལ་མོ་སྦྱར། ། དེ་ཡི་ཞབས་སུ་མི་གཡོ་བ། ། སྤྱན་གསུམ་ ཁྲོས་པ་ཀླུ་ཡིས་བརྒྱན། ། ན་རའི་སྟོད་གཡོགས་སྟག་སྨད་དཀྲིས། ། རིན་ཆེན་རྒྱན་ཅན་དོ་ཀེར་ཅན། །

རྡོ་བ་དམར་པོའི་ཁྲི་སྟེང་ན། ། རལ་གྲི་དང་ནི་ཞགས་པ་དང་། ། གཡོན་པ་ཅུང་ཟད་བརྐྱང་སྟེ་བཞེངས། ། གཙོ་བོའི་གཡོན་གྱི་ཕྱོགས་ཆ་ལ། ། རྡོ་རྗེ་འཛིན་སྔོ་ ངུར་སྨྲིག་ཅན། ། རྡོ་རྗེ་དང་ནི་ཞགས་པ་འཆང་། ། དེ་ཡི་འོག་ཏུ་སྒྲུབ་པོ་ནི། ། པུས་བཙུགས་སྤོས་ཀྱི་ཁང་བུ་འཛིན། ། གཙོ་བོའི་ཞབས་སུ་ཁྲོ་བོ་ཆེ། ། ནག་པོ་ཁམས་གསུམ་བརྟན་པ་ཡི། ། ལག་གཉིས་རིན་ཆེན་ཁྲི་ལ་བཏེག ། གཙོ་བོ་སྣ་ཚོགས་པདྨ་སྟེ། ། འཇིག་རྟེན་དབང་དང་ཁྲོ་བོ་ཡི། ། རྡོ་རྗེ་འཛིན་དང་བསྒྲུབ་པའི་སྔོ། ། ཡན་ལག་ལྔ་པ་སྡོང་པོ་གཅིག ། ཀླུ་ཡི་བུ་མོ་མཛེས་མ་གཉིས། ། པང་གིས་འཁྱུད་དེ་འཛིན་པར་མཛད། ། ཞི་བ་རྒྱས་པ་དབང་གི་ཕྱིར། ། དེ་ནས་བྲིས་སྐུ་ཡང་དག་བཤད། ། དབུས་སུ་ཤཱཀྱ་ཐུབ་ པ་དང་། ། གཡས་སུ་འཕགས་པ་འཇམ་དཔལ་ཏེ། ། གཡོན་དུ་ཕྱག་ན་རྡོ་རྗེའོ། ། བསྙེན་པའི་དོན་དུ་རས་རིས་ནི། ། ཤིན་ཏུ་བལྟ་དཀའ་གསུས་པོ་ཆེ། ། ཞལ་གཅིག་ཕྱག་བཞི་ཀླུ་ཡིས་བརྒྱན། ། ཁ་ནས་ཁྲག་འཛག་ལྕེ་འདྲིལ་བ། ། མཆེ་གཙིགས་ཧྲིཿསྒྲ་ ཆེར་སྒྲོགས་པ། ། སྤྱན་གསུམ་ཉི་མ་ཤར་ཀའི་འོད། ། ངུར་སྨྲིག་མན་བས་པ་ཆར་སྤྲིན་མདོག ། སྐུ་ལ་ཐོད་རློན་ཕྲེང་བ་ཅན། །

དབུ་ལ་ཐོད་པ་ཚར་བཞིས་བརྒྱན། ། གཡོན་དུ་རིན་ཆེན་ཟུར་ཕུད་འཕྱང་། ། བསྐལ་པའི་མེ་འོད་འབར་བ་ཡིས། ། ཕྱོགས་ཀྱི་བགེགས་ ཚོགས་སྲེག་པར་མཛད། ། གཡས་ཀྱི་དང་པོ་རྡོ་རྗེ་སྟེ། ། གཉིས་པས་རལ་གྲི་འོད་འབར་འཆང་། ། གཡོན་གྱི་དང་པོ་རྡོ་རྗེ་ཞགས། ། གཉིས་པ་སྡིགས་མཛུབ་བརྐྱང་སྟེ་མཛད། ། རིན་ཆེན་རྡོ་ཡི་ཁྲི་སྟེངས་སུ། ། བགེགས་ཀྱི་རྒྱལ་པོ་མནན་ནས་ཀྱང་། ། གཡོན་བརྐྱང་ པ་ཡི་གར་གྱིས་གནས། ། དེ་ཡི་མདུན་དུ་ཞི་བའི་བྱེད། ། སྤོས་ཁང་བཟུང་བའི་སྒྲུབ་པོ་བྲི། ། ཅི་འབྱོར་རྒྱུན་དུ་མཆོད་པར་བྱ། ། མངོན་སྤྱོད་བསྒྲུབ་པའི་རས་རིས་ནི། ། དེ་ནས་ཡང་དག་བཤད་པར་བྱ། ། དུར་ཁྲོད་རས་ལ་མི་གཡོ་བ། ། མདོག་ནག་སྤྱན་གསུམ་ཟུར་མིག་ལྟ། ། ངུར་སྨྲིག་གོས་གྱོན་ཁྲོ་གཉེར་ལྡན། ། རལ་གྲི་དང་ནི་ཞགས་པ་འཆང་། ། བྲིས་ནས་བདག་གི་ཁྲག་གིས་ནི། ། སྤྱན་ཕྱེ་གསོལ་བ་བཏབ་པར་བྱ། ། རི་མོ་འདི་ནི་རིག་འཛིན་ཀྱང་། ། སྒྲུབ་པོ་མངོན་སྤྱོད་སྨོས་ཅི་དགོས། ། ཡང་ན་སྣ་ཚོགས་ལས་ཀྱི་ཕྱིར། ། མཐིང་ག་ན་རའི་ རྒྱན་ཅན་ནི། ། བརྐྱང་བསྐུམ་རྡོ་རྗེ་དྲིལ་བུ་འཛིན། ། པདྨ་ཟླ་བ་ལ་བཞུགས་བྲི། ། དམག་དཔུང་རེངས་པའི་རས་རིས་ནི། །

གསེར་མདོག་ཁྲོ་བོ་མི་གཡོ་བ། ། མི་སྡུག་མཆེ་བ་གཙིགས་པའི་སྐུ། ། འབར་ཕྲེང་འཁྲིགས་པའི་འོད་ལྡན་པ། ། ཞལ་བཞི་ཕྱག་ཀྱང་བཞི་པ་སྟེ། ། རལ་གྲི་ཞགས་པ་དང་པོར་འཛིན། ། རིན་པོ་ཆེ་དང་སྡིགས་མཛུབ་འོག ། ཞབས་བཞི་བདུད་བཞི་སྙིང་གར་རོ། ། དེ་ནས་རིག་འཛིན་དངོས་གྲུབ་ཀྱི། ། རས་རིས་བྲི་བ་ཡང་དག་བཤད། ། མི་གཡོ་ཁྲོ་བོ་ཞལ་གཅིག་པ། ། མདངས་བཟང་ཟར་མའི་མེ་ཏོག་མདོག ། རལ་གྲི་ ཞགས་པ་སྡིགས་མཛུབ་ཅན། ། པུས་མོ་གཡས་བཏེག་གཡོན་པ་ནི། ། ས་ལ་ཅུང་ཟད་བཙུགས་པར་མཛད། ། མཁའ་ལ་ལྷ་ཡི་བུ་གཉིས་ཀྱིས། ། དབུགས་འབྱིན་མཛད་པ་ཉམས་དགའི་གཟུགས། ། གཡས་སུ་རྣམ་སྣང་མཛད་བྲི་སྟེ། ། གཡོན་དུ་འོད་དཔག་མེད་པའོ། ། དེ་མདུན་སྒྲུབ་པོ་ཉིད་ཀྱང་བྲི། ། གང་ཡང་རིག་མ་ཐམས་ཅད་ལ། ། མཆོད་དེ་མེ་ཏོག་གཏོར་ནས་ཀྱང་། ། སྤྱན་ཕྱེ་ན་བཟའ་གསོལ་བྱས་ཏེ། ། རྟེན་འབྲེལ་སྔགས་ཀྱིས་རབ་གནས་བྱ། ། དེ་རྗེས་སྨོན་ལམ་གདབ་པ་ནི། ། ཨོཾ་ལྡན་བདག་གིས་བསགས་པ་ཡི། ། བསོད་ནམས་ གྲངས་མེད་གཞལ་མི་ལང་། ། དེས་ནི་འགྲོ་བ་མ་ལུས་པ། ། བླ་མེད་གོ་འཕང་ཐོབ་པར་ཤོག ། སེམས་ཅན་དམྱལ་བ་དུད་འགྲོ་དང་། ། {ཡི་དགས་,ཡི་དྭགས་}གང་དག་གྲངས་མེད་རྣམས། །

བདག་གི་བསོད་ནམས་མཐུ་ཡིས་ནི། ། ཐམས་ཅད་བདེ་དང་ལྡན་གྱུར་ཅིག ། གང་ཡང་ ལྷ་མི་དབུལ་ཕོངས་དང་། ། མི་ནད་མུ་གེ་དགྲ་ཆོམ་སོགས། ། བདག་གི་བསོད་ནམས་མཐུ་ཡིས་ནི། ། དེ་དག་ཐམས་ཅད་བྲལ་གྱུར་ཤོག ། ཇི་སྙེད་སེམས་ཅན་ཐམས་ཅད་རྣམས། ། དེ་སྙེད་སྡུག་བསྔལ་རྒྱ་མཚོ་ཀུན། ། སྣ་ཚོགས་དེ་དག་ཀུན་ཞི་ནས། ། འགའ་ཡང་སྡུག་ བསྔལ་མེད་པར་ཤོག ། སེམས་ཅན་གང་དག་ལུས་ངག་ཡིད། ། མི་དགེ་སྤྱོད་པ་བྲལ་གྱུར་ནས། ། དགེ་བ་ཕུན་ཚོགས་སྤྱོད་གྱུར་ཏེ། ། ཀུན་ཀྱང་བདེ་ལྡན་ཐོབ་གྱུར་ཤོག ། དེ་ནས་རྒྱལ་སྲས་ཀུན་བཏུད་དེ། ། ལག་ན་དྲི་དང་མེ་ཏོག་སོགས། ། མཆོད་པའི་ཡོ་བྱད་ ཀུན་ཐོགས་ནས། ། བླ་འོག་ཐ་དད་གསལ་བྱའི་ཕྱིར། ། བདེ་གཤེགས་བསྡུ་དོན་འདི་སྐད་བརྗོད། ། ཨོཾ་བདེ་བར་གཤེགས་པའི་བཅོམ་ལྡན་འདས། ། སྐྱོབ་པ་དངོས་སུ་བཞུགས་པ་རྣམས། ། བདག་ལ་སླར་ཡང་བརྩེ་བའི་ཕྱིར། ། རྒྱལ་བ་སྲས་བཅས་ལ་མི་ མངའ། ། བདག་དོན་གྲུབ་པར་འགྲོ་བ་ལ། ། བརྩེ་ཕྱིར་སླར་ཡང་བྱོན་པར་མཛོད། ། དེ་ནས་གཏོར་མ་མེ་ཏོག་དྲི། ། དཀྱིལ་འཁོར་རྒྱན་དང་རྡུལ་ཚོན་རྣམས། ། དངོས་གྲུབ་དམ་ཚིག་གནོད་སྤང་ཕྱིར། ། ལག་པས་རེག་པར་མི་བྱ་སྟེ། །

གོས་ཀྱི་ཕུར་མ་ལ་ སོགས་པ། ། ཅི་བདེ་པས་ནི་ཕྱགས་ནས་ཀྱང་། ། སྐྱེ་འགག་མེད་པའི་སྔགས་བརྗོད་ནས། ། ཆུ་བོ་ལ་ནི་དོར་བར་བྱ། ། འབྲས་དང་འོ་མ་ཤ་ཁ་ར། ། མར་དང་བཅས་པ་བསྐོལ་བྱས་ཏེ། ། འབྲས་ཟན་དང་ནི་ལྷན་ཅིག་ཏུ། ། དགའ་བསྐྱེད་ཕྱིར་དུ་དགེ་འདུན་དང་། ། བྲམ་ཟེ་ལ་ནི་སྟོན་མོ་བྱ། ། དེ་ནས་བྲིས་སྐུ་བརྟན་པར་ནི། ། གསང་བའི་གནས་སུ་མཆོད་པར་བྱ། ། ཁྱད་པར་ཚེས་བརྒྱད་དུས་སུ་མཆོད། ། བླ་མ་ལ་ནི་ཡོན་དབུལ་ཞིང་། ། རྟག་ཏུ་སྔགས་འཛིན་ཐམས་ཅད་ཀྱང་། ། མཉེས་པར་བྱ་ཞིང་ཁྲོས་པ་མིན། ། སེམས་ ཅན་མ་མོས་སྤང་བར་བྱ། ། དཀོན་མཆོག་གསུམ་ལ་ངེས་བསྐྱེད་དེ། ། ཐེ་ཚོམ་ལེ་ལོ་སྤང་བར་བྱའོ། ། རང་གི་ཕུང་པོ་བསྙེན་བཀུར་ཕྱིར། ། ཁྲུས་དང་གཙང་སྦྲ་ལྡན་བྱས་ནས། ། གོས་སྦྲ་དྲི་མ་མེད་པ་བགོ། ། ཟས་ཀྱང་འབྲས་སོགས་དྲི་མེད་ལ། ། ཉུང་དུ་ བཟའ་ཞིང་བཏུང་བར་བྱ། ། {མངས་,མང་}པས་གཉིད་དང་ལེ་ལོ་དང་། ། དྲི་ང་བ་ནི་བསྐྱེད་པར་འགྱུར། ། ཐོ་རངས་དང་པོར་ལངས་ནས་ནི། ། སྲོད་ཐལ་བར་དུ་བརྩོན་པར་བྱ། ། ནམ་གྱི་གུང་ལ་གཉིད་པའི་ཚེ། ། འགྲོ་ལ་ཕན་བྱའི་སེམས་ཀྱིས་ཉལ། །

འཕགས་ པ་རྡོ་རྗེ་ཁྲོ་བོའི་རྒྱལ་པོའི་རྟོག་པ་བསྡུས་པའི་རྒྱུད་ལས་བྲིས་སྐུའི་ལེའུ་སྟེ་བཞི་པའོ། ། ། ། དེ་ནས་ཡང་དག་བཤད་བྱ་སྟེ། ། ལྷ་བསྒོམ་པ་ཡི་རིམ་པ་ནི། ། རང་གཟུགས་སྟོང་པར་བྱས་ནས་སུ། ། ཡི་གེ་ཕྲེང་བའི་འཁོར་ལོ་ལས། ། སྒྲ་གྲགས་པ་ན་རིག་ པ་ཆེ། ། ཟླ་བའི་གཟུགས་བརྙན་ལྟ་བུར་སྣང་། ། དེར་སོན་པ་ནི་རྡོ་རྗེ་སོགས། ། རང་གི་ཕྱག་རྒྱ་ཉིད་ཡིན་ནོ། ། དེ་ལས་གྱུར་པའི་སྐུ་མཆོག་ནི། ། འཇའ་ཚོན་ཤར་བ་ཇི་ལྟ་བར། ། མཚན་དཔེ་མདངས་འོད་ཡང་དག་ལྡན། ། བརྗིད་ཅིང་དགྱེས་པའི་མདངས་དང་ ལྡན། ། སྒེག་ཅིང་རོལ་པའི་ཆ་བྱད་ནི། ། བྱིས་པ་གཞོན་ནུའི་ལང་ཚོ་འདྲ། ། རིན་ཆེན་རྒྱན་དང་ན་བཟའ་ནི། ། གཟུགས་མཛེས་ལྷ་ཡི་ཅི་ལྟ་བ། ། ཁྲོས་པའི་སྲིན་པོ་ལྟ་བུ་སྟེ། ། སྐྲ་དང་ཁ་སྤུ་ལ་སོགས་པ། ། སྤུ་སོགས་སེར་ཞིང་རྩུབ་ལ་འཁྱིལ། ། སྣ་ ཚོགས་དུར་ཁྲོད་རྒྱན་རྣམས་ནི། ། རྩུབ་ཅིང་བློ་ལྡན་རབ་ཏུ་ཁྲོས། ། ན་བཟའ་རློན་པ་ཁྲག་ཅན་ནི། ། སྟེང་གི་ཁྱམས་སུ་ཡོད་པར་མཛད། ། ཧ་ཧ་ཧཱུཾ་ཧཱུཾ་ཕཊ་ཕཊ་ཀྱི། ། ངར་སྐད་འབྲུག་སྒྲ་སྤྱུགས་གླུ་ནི། ། རི་རབ་འབུམ་བསྙིལ་ཆལ་ཆོམ་ལྟར། ། ལུས་རབ་ལྟོས་འགྲོས་ བརྒྱན་པ་ནི། །

གཟི་ལྡན་འཁྱུད་ཅིང་ཕུཊ་སྒྲ་འདོན། ། འཕྲོ་འདུ་འོད་ཀྱི་དཀྱིལ་འཁོར་ནི། ། ཉི་འབུམ་དུས་མེའི་བསྐལ་པ་འདྲ། ། རབ་གདུག་མཚོན་ཆ་དུ་མ་ནི། ། ལྷ་མིན་དུས་ཀྱི་འཁྲུག་པའི་ཆ། ། ཁྲོ་བོ་ཁྲོ་མོའི་ཚོགས་འབྱུང་བ། ། ཐམས་ཅད་ཡི་གེ་ཧཱུཾ་སྒྲ་ཅན། ། མ་མོ་དང་ནི་མཁའ་འགྲོ་རྣམས། ། བྷྱོ་ཡིག་དྲག་པོའི་བདག་ཉིད་ཅན། ། ཐུབ་པ་ཡི་གེ་མུྃ་ལས་བསྐྱེད། ། རྒྱལ་སྲས་རིག་མ་ཉན་ཐོས་དང་། ། འཇིག་རྟེན་སྐྱོང་རྣམས་སྔགས་འདིས་བསྐྱེད། ། ན་མཿསརྦ་ཏ་ཐཱ་ག་ཏེ་བྷྱཿ། ས་པ་རི་པཱུ་ར་ཀེ་བྷྱཿ། སརྦ་ཐཱ། ཨོཾ་སརྦ་སཾ་སྐ་ར་ པ་རི་ཤུདྡྷེ། དྷརྨ་ཏེ་ག་ག་ན་ས་མུད་ག་ཏེ་སྭ་བྷཱ་བ་པ་རི་ཤུདྡྷེ། མ་ཧཱ་ན་ཡ་པ་རི་ཝཱ་རེ་སྭཱ་ཧཱ། རང་གི་ལུས་ལ་སེམས་བཅུག་ནས། ། སྡིག་པ་ཐམས་ཅད་རབ་ཏུ་ཞི། ། ངང་ཚུལ་བཟང་པོར་ཡང་དག་བྱུང་། ། རིག་པར་གྱུར་པའི་སེམས་ལྡན་ནས། ། དྲང་སྲོང་རྫུ་འཕྲུལ་ ཅན་དུ་འགྱུར། ། གཞན་ཡང་སྡུག་བསྔལ་ཞི་ནུས་ན། ། རང་གི་བདེ་ཐོབ་སྨོས་ཅི་དགོས། ། རང་རང་རིགས་ཀྱི་ལྷ་རྣམས་ཀྱི། ། གཟུགས་བརྙན་ཕྱག་མཚན་ཁ་དོག་ནི། ། དཀྱིལ་འཁོར་རམ་ནི་རིས་མ་ལས། ། གསུང་བ་ཇི་ལྟར་བསྒོམ་པར་བྱ། ། དེ་ནས་ མི་གཡོ་ཁྲོ་བོ་ཆེ། །

རྡོ་རྗེ་འཛིན་པ་ཕྱག་འཚལ་ནས། ། དག་ཅིང་གསལ་ལ་སྙན་པ་ཡིས། ། ཚིག་གི་ཡང་ནི་འདི་གསོལ་ཏོ། ། རྡོ་རྗེ་འཛིན་པ་བཅོམ་ལྡན་འདས། ། གཏུམ་མོ་མཚན་ཉིད་རབ་ལྡན་པའི། ། ང་ཡི་མཚན་ཉིད་ཁྱོད་བཤད་ནས། ། དེ་ཚེ་རྡོ་རྗེ་ འཛིན་རྒྱལ་པོས། ། གཏུམ་མོའི་ཆ་བྱད་ལྡན་བྱས་ནས། ། རང་གཟུགས་སྔགས་དང་བཅས་པ་ཡིས། ། གསང་ཆེན་བརྡ་འདི་བཀའ་སྩལ་ཏོ། ། དག་པའི་སེམས་ཉིད་ཧཱུཾ་རྡོ་རྗེ། ། མཐིང་གའི་མདོག་ལས་རྡོ་རྗེ་འཛིན། ། མཐིང་ག་བརྐྱང་བསྐུམ་ཁྲོ་སེམས་ཅན། ། ན་རའི་རྒྱན་བཅས་འཇིགས་བྱེད་སྐུ། ། གྱེན་སྐྲ་ཁ་སྤུ་གྱོན་སེར་དམར། ། པདྨ་ཟླ་བའི་སྟེང་དུ་ནི། ། མེ་ཡི་ནང་བཞུགས་རྡོར་དྲིལ་འཆང་། ། རྣམ་སྣང་འཛིན་དང་གཉིས་དང་པོ། ། བཞི་པའི་ལྔ་པ་དེའི་གསུམ་པ། ། ལྔ་པའི་ལྔ་པ་བདུན་པའི་བཞི། ། མེ་ ཡི་ས་བོན་དགུག་པས་མནན། ། བདུན་པའི་དང་པོ་གསུམ་པ་ཡིན། ། གསུམ་པས་བཏེག་གོ་ཧཱུྃ་ཕཊ་བཅས། ། གསང་སྔགས་རྒྱལ་པོ་བླ་མེད་འདི། ། དགོས་པ་ཐམས་ཅད་འགྲུབ་པ་དང་། ། ཁྱད་པར་དུ་ནི་འབྱུང་པོ་སེལ། ། ཀླུ་འདུལ་བ་ནི་དཀར་པོ་ཆེ། ། ནམ་མཁའ་ ལྡིང་གི་ཆ་བྱད་ཆེ། ། གྲུབ་པའི་གཏེར་གྱི་དོན་དུ་ནི། ། སེར་པོ་འོད་དང་ལྡན་པ་ཡི། །

དམར་པོ་དག་ནི་ལྗང་ནག་དག ། དྲག་པོའི་གདོན་རྣམས་སེལ་བ་དང་། ། ཚེ་རིང་བ་ལ་ཤིས་པའོ། ། ལྷག་པ་བསྐྱེད་པའི་སྐུ་མཆོག་ནི། ། འབྱུང་བར་གྱུར་པ་དེ་མ་ཐག ། ས་སྟེང་ཐམས་ཅད་ མུན་ནག་འཁྲིགས། ། བདུད་རྣམས་ཐམས་ཅད་རབ་ཏུ་ཚིག ། ཡེ་ཤེས་མེ་འོད་ཆེན་པོ་འདི། ། བཟོད་པར་སླ་ལ་གཅིག་མ་མཆིས། ། བགེགས་ཆེན་ལོག་པར་འདྲེན་པ་རྣམས། ། དོགས་པའི་སེམས་ཀྱི་ཐག་རིང་འབྲོས། ། གསང་སྔགས་ཡི་གེ་ཧཱུྃ་སྒྲ་ཅན། ། གློག་ འཁྲུག་པ་ཡི་འོད་ཟེར་འདྲ། ། ཀླད་པར་ཡི་གེ་ཧྃ་གི་གཟུགས། ། གྲུ་གསུམ་མེ་ཡི་གཟུགས་བརྙན་ཅན། ། འོད་དམར་ཚལ་པ་རབ་འཐོར་བས། ། བགེགས་ཚོགས་སྲེག་ཅིང་བྲོས་པར་བྱེད། ། བོང་བུ་རྔ་མོ་ཁྱི་སྤྲེའུ་གཟུགས། ། རོ་ལངས་མ་ལུས་ ཐམས་ཅད་ཀུན། ། ཧ་ཧ་བརྗོད་ཅིང་བྲོས་པར་བྱེད། ། རླུང་གིས་གཡེངས་པའི་རྡུལ་དང་མཚུངས། ། གྱེན་ཐུར་ཧཱུྃ་གི་འཕྲོ་འདུ་དང་། ། ཁྲོ་བཅུ་ས་བོན་ཡི་གེ་ཧཱུྃ། ། མེ་དང་རླུང་གི་ཚུལ་དུ་འབར། ། མངོན་སུམ་རྩྭ་ལ་མེ་བཞིན་དུ། ། སྙིང་གི་ཧཱུྃ་གིས་འདས་ ནས་ཀྱང་། ། ཀླད་པའི་ཧཱུྃ་གིས་སྲེག་པར་བྱེད། ། འོད་དང་ཕྱག་རྒྱ་ལྷ་ཡི་སྐུ། ། བསྐྲད་དང་བཅིང་དང་མྱོས་བྱེད་བསམ། །

སེང་གེ་དང་ནི་གླང་ཆེན་འབྲུག ། དྲག་པོའི་སྒྲ་སྐད་ཅི་འདྲ་བར། ། རྩ་བའི་གསང་སྔགས་ཟློས་པ་ནི། ། བགེགས་དང་ལོག་འདྲེན་ མ་ལུས་པ། ། སྲེག་ཅིང་ཕྱེ་མ་རྡུལ་དུ་རློག ། སྙིང་ནང་སྙིང་པོ་བསྟན་པ་ནི། ། འོད་འབར་འོད་ཀྱིས་སྡིག་པའི་ཚོགས། ། དུ་མ་རྣམས་ཀྱང་ཟད་པར་མཛད། ། ལུས་ངག་ཡིད་བརྟན་འཁོར་ལོ་སྔགས། ། ཨོཾ་དང་ཨཱཿདང་ཧཱུཾ་སྦྱོར་གྱིས། ། དཔལ་འཕེལ་དབང་ཕྱུག་བསྐྱེད་པ་དང་། ། གོ་ཆ་ཆེན་པོ་ བསྐོན་པར་བྱེད། ། ན་མ་སྟྲཻ་ཡ་དྡྷཱི་ཀཱ་ནཱཾ། ཏ་ཐཱ་ག་ཏཱ་ནཱཾ་ཧཾ། གོ་ཆ་ཆེན་པོའི་གསང་སྔགས་འདི། ། རྒྱལ་སྲས་རྣམས་ཀྱང་འདར་འགྱུར་ན། ། བགེགས་རྣམས་སྲེག་པ་སྨོས་ཅི་དགོས། ། ས་མ་ཡ་སྟྭཾ་ཨ་ཧཾ་གིས། ། ཡེ་ཤེས་ལྷ་དང་འབྲེལ་པར་བྱ། ། རྒྱལ་བས་དབང་བསྐུར་སྦྱོར་བས་ནི། ། ཡེ་ཤེས་དབུ་རྒྱན་བརྟག་པར་བྱ། ། གཙོ་ལ་མི་བསྐྱོད་དབུ་རྒྱན་ཅན། ། འཁོར་ཀུན་མི་གཡོས་རྒྱས་གདབ་བྱ། ། བདག་ཉིད་ཡི་གེར་བྱས་ནས་སུ། ། མེ་གཟུགས་ཤིན་ཏུ་ཕྲ་བས་ནི། ། མཚན་མོ་དུས་སུ་ཉམས་པར་བྱ། ། སྡང་བ་ཧཱུཾ་གི་སྒྲ་ལས་སོ། ། འཕགས་པ་རྡོ་རྗེ་ཁྲོ་བོའི་རྒྱལ་པོའི་ རྟོག་པ་བསྡུས་པའི་རྒྱུད་ལས་ལྷ་འབྱུང་བའི་ལེའུ་སྟེ་ལྔ་པའོ། ། ། །

དེ་ནས་ཡང་དག་བཤད་བྱ་བ། ། སྔགས་སྤྱོད་ཚུལ་གྱི་ཆོ་ག་ཉོན། ། དད་པ་དང་ཡང་མི་ལྡན་ཞིང་། ། བྱང་ཆུབ་སེམས་ཀྱང་མ་བསྐྱེད་དེ། ། དབང་བསྐུར་རྗེས་གནང་མ་ཐོབ་ལ། ། སྡོམ་ཚུལ་དམ་ཚིག་བྲལ་བའི་མི། ། གསང་སྔགས་རང་ཉིད་ལེན་པ་ནི། ། བྱིས་པ་ལྕགས་བསྲེགས་མིད་པ་འདྲ། ། ཐོག་མ་མེད་སྒྲིབ་བཀྲུ་བའི་ཕྱིར། ། རྡོ་རྗེ་སློབ་དཔོན་འདི་སྐད་བརྗོད། ། ཨོཾ་སྔགས་མཆོག་ཏིང་འཛིན་རྣམ་དག་ཆུ། ། བསྐལ་པ་དུ་མར་བསགས་པ་ཡི། ། སྡིག་པའི་ཚོགས་རྣམས་དག་གྱུར་ནས། ། རང་བཞིན་དག་ པའི་སེམས་སུ་བྱེད། ། ཨོཾ་སརྦ་ཏ་ཐཱ་ག་ཏ་བཛྲ་ཨ་དྷིཥྛཱ་ན་ཀཱ་ཡ་བཱ་ཀ་ཙིཏྟ་བི་ཤོ་དྷ་ན་ཨ་བྷི་ཥིཉྩ་ཧཱུཾ། ཨོཾ་སངས་རྒྱས་ཀུན་གྱིས་རབ་བསྔགས་པའི། ། རིན་ཆེན་སྔགས་ལས་བྱུང་བ་ཡི། ། དབུ་རྒྱན་ལྷ་རྫས་ཅོད་པན་འདིས། ། དབང་བསྐུར་རིན་ཆེན་མཆོག་ཏུ་འགྱུར། ། ཨོཾ་བཛྲ་དྷ་ར་ཤྲཱི་བཛྲ་ས་མ་ཡ་སྟྭཾ་ཨ་ཧཾ། རཏྣ་ མུ་ཀུ་ཊ་ཨ་བྷི་ཥིཉྩ་ཧཱུཾ། རྡོ་རྗེ་ཆེན་པོ་བླ་ན་མེད། ། བཟུང་བས་ཕྱོགས་ལས་རྒྱལ་གྱུར་ཏེ། ། རྡོ་རྗེ་ལྟ་བུར་བརྟན་བྱེད་པས། ། ཁྱོད་ཀྱིས་ཀྱང་ནི་རྟག་ཏུ་ཟུང་། ། ཨོཾ་སརྦ་བཛྲ་ཨ་བྷི་ཥཉྩི་ཧཱུཾ། དྲིལ་བུ་དབྱངས་སྙན་བླ་ན་མེད། །

སྐུ་ཡི་རྡོ་རྗེ་རབ་བསྐྱེད་པས། ། ཁྱོད་ཀྱིས་ཀྱང་ནི་རྟག་ཏུ་ཟུང་། ། ཁམས་ གསུམ་སྲིད་པའི་རྒྱལ་པོར་འགྱུར། ། ཨོཾ་ས་མ་ཡ་གྷཎྚ་བཛྲ་ཨ་བྷི་ཥིཉྩ་ཧཱུཾ། ཨོཾ་སྙིང་རྗེ་ཤེས་རབ་དབྱེར་མེད་རྒྱ། ། གང་གིས་ཐོས་པ་ནང་གི་སུ། ། དེ་ཡི་མིང་མཚན་བདག་པོར་འགྱུར། ། རྟག་པའི་ངང་གནས་བླང་བར་མཛོད། ། ཨོཾ་བཛྲ་ནཱ་མ་ཨ་བྷི་ཥེ་ཀ་ཏ། ཐོག་མཐའ་མེད་ པའི་སེམས་དཔའ་ནི། ། རྡོ་རྗེ་སེམས་དཔའ་དགའ་བ་ཆེ། ། ཀུན་ཏུ་བཟང་པོ་ཀུན་བདག་ཉིད། ། རྡོ་རྗེ་སྙེམས་བདག་བདག་མཛོད་ཅིག ། སངས་རྒྱས་ཀུན་གྱི་དྲིལ་བུ་རྒྱ། ། ཤེས་རབ་དབྱངས་ཀྱི་རྗེས་འགྲོར་བཤད། ། རྟག་ཏུ་ཁྱོད་ཀྱིས་བཟུང་བྱས་ན། ། བྱང་ཆུབ་མཆོག་ཐོབ་རྒྱལ་བས་ གསུངས། ། ཨོཾ་ཤེས་རབ་རལ་གྲི་བླ་ན་མེད། ། གང་གིས་འཆང་བ་རྒྱལ་འགྱུར་ཏེ། ། བདུད་ཀྱི་དཔུང་ནི་གཤེགས་ནས་ཀྱང་། ། མཁའ་ལ་ཡེ་ཤེས་འོད་འབར་འགྱུར། ། ཨོཾ་སརྦ་ཏ་ཐཱ་ག་ཏཱ་བཛྲ་ཛྙཱ་ན་ཁཌྒ་ཨ་བྷི་ཥིཉྩ་ཧཱུཾ། ཨ་རྡོ་རྗེ་ཞགས་པ་ཐུགས་རྗེ་ཅན། ། ཉོན་མོངས་སྲིད་པའི་སྡོང་པོ་ རྣམས། ། ཐབས་ཀྱི་ཞགས་པས་བཅིངས་ནས་ཀྱང་། ། སྲིད་པའི་འཆིང་བ་ལས་གྲོལ་མཛོད། ། ཨོཾ་སརྦ་ཏ་ཐཱ་ག་ཏཱ་བཛྲ་པཱ་ཤེ་ན་ཨ་བྷི་ཥིཉྩ་ཧཱུཾ།

དབང་དང་རྗེས་གནང་མ་ཐོབ་ཅིང་། ། དམ་ཚིག་སྡོམ་པ་མི་ལྡན་ལ། ། བླ་མ་མཉེས་པར་མི་བྱེད་ན། ། སྒྲུབ་པ་འབྲས་མེད་ངན་སོང་འགྲོ། ། ལོག་ལྟ་ཅན་གང་བླ་མ་འཚེ། ། དམྱལ་བའི་གནས་སུ་འགྲོ་བར་ངེས། ། འདིར་ཉམས་པས་ནི་ནད་ཡམས་དང་། ། དགྲ་བོ་མུ་གེས་རྟག་ཏུ་འཚེ། ། དཀྱིལ་འཁོར་ས་གཞི་ཉམས་དགའ་བ། ། ཆུ་ཀླུང་མཚོ་འགྲམ་རི་ལྗོངས་དང་། ། འབྲས་བུ་མེ་ཏོག་སྐྱེད་མོས་ཚལ། ། ཀུན་དགའ་ར་བ་ཁང་ {བཟངས་,བཟང་}མཆོག ། བཞི་མདོ་རི་སུལ་ཤིང་གཅིག་དྲུང་། ། ཕྱུགས་ལྷས་ཁང་བརྩེགས་གླང་ཆེན་བྲེས། ། གཙུག་ལག་ཁང་དང་དགོན་པ་དང་། ། ཆུ་གླིང་མཚེའུ་འགྲམ་ནེའུ་གསིང་དུ། ། བསྙེན་དང་དབང་བསྐུར་བྱེད་པ་དང་། ། དུར་ཁྲོད་སོགས་སུ་ལས་རྣམས་བསྒྲུབ། ། ལས་ཀྱི་དཀྱིལ་འཁོར་ཁྲུ་ གང་སྟེ། ། དབང་གི་དཀྱིལ་འཁོར་ཆེན་པོ་ལ། ། ཐུབ་པའི་དཀྱིལ་འཁོར་གྲུ་བཞི་པ། ། ཡང་ན་དྲུག་གམ་བརྒྱད་ཀྱང་བྱ། ། གཞན་ནི་ཁྲུ་གསུམ་ཚད་དུ་བྱ། ། ཡང་ན་ལྔའམ་བདུན་དུ་བྱ། ། གཟའ་ཡི་དཀྱིལ་འཁོར་ཁྲུ་གཉིས་ཏེ། ། ཡང་ན་ཕྱེད་དང་གསུམ་པར་བྱ། ། ཀུན་དུ་བཞི་ཆ་ཕོ་བྲང་ སྟེ། ། ཁང་པས་ཚད་ཀྱི་ཕྱེད་ཡིན་ཏེ། ། ཁང་པ་གཉིས་པ་ཆ་གསུམ་པ། ། རྟ་བབས་རྡོ་རྗེ་པདྨའོ། །

ལྷ་སྣམ་བཞི་ཆ་དག་ཏུ་འགྱུར། ། ཐུབ་པའི་སྒོ་ནི་བཞི་ཡིན་ཏེ། ། གཞན་དུ་སྒོ་གཅིག་པ་ཉིད་ཤིས། ། འཇམ་པའི་དབྱངས་ནི་བྱང་གི་སྒོ། ། ཆོས་ནི་ནུབ་སྒོ་རྡོ་རྗེ་ལྷོ། ། གཟའ་དང་འཇིག་རྟེན་སྐྱོང་ སོགས་ཤར། ། དབང་སྒྱུར་ལྷ་ཡི་གནས་རྣམས་སུ། ། བུམ་པ་ཕྱག་རྒྱར་བཅས་པའམ། ། སྐུའམ་རང་རང་ཕྱག་རྒྱ་གཞག ། ཐུབ་པའི་དཀྱིལ་འཁོར་དབུས་སུ་ནི། ། བད་དཀར་སྟེང་དུ་ལྷུང་བཟེད་དོ། ། གཙོ་བོའི་ས་ནི་སོར་དྲུག་སྟེ། ། ལྷག་མ་རྣམས་ནི་སོར་བཞིའོ། ། རིགས་ཀྱི་མཚན་མས་ ཡང་ཡང་བསྐོར། ། བྱང་དུ་འཇིག་རྟེན་དབང་སྡུད་ནི། ། པད་དཀར་རྡོ་རྗེ་གདེངས་པོར་བཅས། ། དབང་ལྡན་སྤྱི་བླུགས་བྱམས་པའིའོ། ། ཤར་དུ་འཇམ་དཔལ་ཨུཏྤལ་སྔོ། ། མེར་ནི་ཀུན་བཟང་ཡིད་བཞིན་ནོར། ། ལྷོར་ནི་རྡོ་རྗེ་རྡོ་རྗེ་འཛིན། ། བདེན་བྲལ་མཁའ་སྙིང་པད་དཀར་ཏེ། ། ནུབ་ཏུ་པད་སེར་ རྡོ་རྗེ་ཆོས། ། ནུབ་བྱང་ས་སྙིང་པདྨ་དམར། ། གཙུག་ཏོར་གནོད་མཛེས་སྟེང་འོག་ཆར། ། གཙུག་ཏོར་དང་ནི་གཏུན་ཤིང་ངོ་། ། ཤར་དུ་རྣམ་རྒྱལ་ཐོད་པ་སྟེ། ། མེར་ནི་འདོད་རྒྱལ་རྩེ་གསུམ་མོ། ། རྡོ་རྗེ་རྩེ་གཅིག་གཤིན་གཤེད་ལྷོར། ། བདེན་བྲལ་རལ་གྲི་སྟོབས་པོ་ཆེ། །

ནུབ་ཏུ་རྟ་ མགྲིན་པདྨ་སྟེ། ། བྱང་དུ་བགེགས་དགྲ་རྡོ་རྗེ་རྒྱ། ། ནུབ་ཏུ་དབྱུག་པ་སྔོན་པོ་སྟེ། ། དབང་ལྡན་དུ་ནི་མི་གཡོ་བ། ། དེ་ཡི་རྒྱབ་ཏུ་ཉན་ཐོས་ནི། ། ཤཱ་རིའི་བུ་དང་རབ་འབྱོར་དང་། ། མཽད་གལ་བུ་དང་འོད་སྲུང་དང་། ། རྒྱལ་མཆོག་དང་ནི་ས་སྟེང་སྐྱོང་། ། རྟ་ཐུལ་དང་ནི་བ་གླང་བདག ། དྲག་ཤུལ་དབང་ཆེན་ཆངས་བུ་ཅན། ། བྷ་ར་དྷྭ་ཛ་ལྟེང་རྒྱས་དང་། ། དགའ་བོ་ཉེ་དགའ་སྒྲ་གཅན་ནོ། ། དེ་ལྟར་བཅུ་དྲུག་ཕྱག་རྒྱའོ། ། པདྨའི་སྟེང་དུ་ལྷུང་བཟེད་དོ། ། དེ་ནས་ཡང་དག་བཤད་བྱ་བ། ། འཇམ་དཔལ་དཀྱིལ་འཁོར་བཟང་པོ་ཡི། ། དབུས་སུ་རལ་གྲི་ མེ་འོད་ཅན། ། རིན་ཆེན་རྡོ་བྲག་སྟེང་དུ་བྲི། ། བྱང་དུ་རྡོ་རྗེས་མཚན་པ་ཡི། ། བུམ་པ་བྲི་བ་བྱམས་པའོ། ། ཤར་དུ་ཀུན་ཏུ་བཟང་པོ་ཡི། ། རྡོ་རྗེ་དཀར་པོ་བྲི་བར་བྱ། ། ལྷོར་ནི་མེ་འོད་ལྡན་པ་ཡི། ། ལག་ན་རྡོ་རྗེའི་རྡོ་རྗེ་བྲི། ། ནུབ་ཏུ་འཇིག་རྟེན་དབང་པོ་སྟེ། ། བད་དཀར་འོད་དང་ལྡན་པ་བྲི། ། ཡིད་བཞིན་ནོར་འཛིན་མཛེས་གཟུགས་ཅན། ། རིན་ཆེན་རྡོ་སྟེང་དབང་ལྡན་བྲི། ། མེར་ནི་རབ་འབར་རྡོ་རྗེ་ཡི། ། བགྲང་ཕྲེང་པདྨ་ལ་གནས་བྲི། ། བདེན་བྲལ་དུ་ནི་རབ་བརྗིད་པའི། །

གོ་ཆ་འབར་བ་བྲི་བར་བྱ། ། རླུང་དུ་ མཛེས་པ་གཞོན་ནུའི་ལྷ། ། རིན་ཆེན་སྒྲོམ་ནི་བྲི་བར་བྱ། ། སྟེང་དུ་བརྟུལ་ཕོད་ཅེས་ཁྲོ་བོའོ། ། པདྨའི་སྟེང་དུ་ཁྲོ་བོ་ཡི། ། འོག་ཏུ་ཁྲོ་རྒྱལ་མངག་གཞུག་གི། ། རྡོ་རྗེ་བྲག་སྟེང་ཞགས་པ་བྲི། ། ཁྲོ་བོ་ལྷག་མ་སྔོན་གྱི་ནི། ། ཚུལ་གྱིས་རྒྱལ་བར་དགོད་པར་བྱ། ། བརྟན་པ་ ཞེས་པའི་ཕོ་ཉ་མོའི། ། ཆུ་གྲི་བྱང་དུ་བྲི་བར་བྱ། ། ཟླ་བའི་དཀྱིལ་འཁོར་འཆང་བ་ཡི། ། མཁའ་སོར་མ་ནི་ཤར་དུའོ། ། ཉི་མའི་དཀྱིལ་འཁོར་འཆང་བ་ཡི། ། རྣམ་འཇིགས་མ་ནི་ལྷོ་རུའོ། ། ནུབ་ཀྱི་ཕྱོགས་སུ་བྲི་བར་བྱ། ། མཛོད་སྤུ་མ་ཞེས་རིན་ཕྲེང་འཛིན། ། རིན་ ཆེན་རྡོ་སྟེང་ཤར་ལྷོར་བྲི། ། ཤར་ལྷོར་བགེགས་འཛིན་མ་ཞེས་པ། ། འཁོར་ལོ་མེ་འབར་རྡོ་རྗེ་བྲི། ། འབར་བའི་གཏུན་ཤིང་བདེན་བྲལ་དུ། ། འཇོམས་པའི་ཐོ་བ་རླུང་དུ་བྲི། ། ཐལ་སྦྱར་གུང་མོ་ནང་དུ་བཅུག ། པདྨ་མཛོད་ཀྱི་ཕྱག་རྒྱ་དང་། ། སྔགས་འདིས་དཀྱིལ་ འཁོར་བྱིན་གྱིས་བརླབ། ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། ཧཱུཾ་ཧཱུཾ་བ་མཾ་མཾ་སྭཱ་ཧཱ། སྤྱན་དྲངས་གཤེགས་སུ་གསོལ་བ་དང་། ། སྲུང་བ་མཆོག་གི་སྔགས་ཡིན་ནོ། ། ན་མཿསརྦ་ཏ་ཐཱ་ག་ཏེ་བྷྱཿ།

སརྦ་བི་ཤྭ་མུ་ཁེ་བྷྱཿ། ཧེ་ཧེ་ཧེ། ཨཱ་ཛྙཱ་པ་ར་མ་ར་ག་ག་ན་ ཨཱ་གཙྪཱ་གཙྪ་བྷ་ག་བཱ་ན་ཤཱི་གྷྲཾ་སྭཱ་ཧཱ། བསྙེན་པ་འབུམ་ལ་བྱིན་བརླབས་དང་། ། ལྷ་བསྒྲུབ་པ་དང་མཆོད་པའོ། ། དེ་ནས་ཡང་དག་བཤད་བྱ་བ། ། རྡོ་རྗེ་ཆོས་ཀྱི་དཀྱིལ་འཁོར་ནི། ། དབུས་སུ་འཇིག་རྟེན་དབང་སྡུད་ཉིད། ། པདྨ་དམར་པོ་འཆང་བའོ། ། ཤར་དུ་དོན་ ཡོད་ཞགས་པ་ནི། ། བགྲང་ཕྲེང་སྔོན་པོ་འཆང་བའོ། ། ལྷོར་ནི་ནམ་མཁའ་དྲི་མེད་དེ། ། རྡོ་རྗེ་སྔོན་པོ་འཆང་བའོ། ། ནུབ་ཏུ་གར་གྱི་དབང་པདྨ། ། བྱང་དུ་ཐུགས་རྗེ་ཤུགས་པོ་ཆེ། ། རྡོ་རྗེ་ནག་པོ་འཛིན་པ་བྲི། ། སྒྲོལ་མ་ཁྲོ་གཉེར་རལ་གཅིག་དང་། ། ཡིད་{བཟངས་,བཟང་}མ་ནི་ མཚམས་སུ་བྲི། ། ཁྲོ་བོ་དང་ནི་ཕོ་ཉ་མོ། ། འཇམ་པའི་དབྱངས་ཀྱིས་རིམ་པས་དགོད། ། དེ་ནས་ཕྱག་ན་རྡོ་རྗེ་ཡི། ། དཀྱིལ་འཁོར་ཡང་དག་བཤད་པར་བྱ། ། དབུས་སུ་ཕྱག་ན་རྡོ་རྗེ་ཉིད། ། རྡོ་རྗེ་དཀར་པོ་འཆང་བའོ། ། ཤར་དུ་སངས་རྒྱས་སྤྱན་མ་ཡིན། ། ལྷོར་ནི་པད་འཛིན་ མཱ་མ་ཀཱི། ། ནུབ་ཏུ་གོས་འཆང་ན་བཟའ་དཀར། ། བྱང་དུ་སྒྲོལ་མ་ཨུཏྤལ་འཆང་། ། ཕྱོགས་བཞིར་ནམ་མཁའ་དྲི་མེད་དང་། ། ཤུགས་པོ་ཆེ་དང་རྡོ་རྗེ་ཏོག །

སྙེམས་ཚུལ་ཆེན་པོ་ཞེས་པ་རྣམས། ། རིགས་ཀྱི་མཚན་མ་འཛིན་པའོ། ། དེར་ཡང་སྔོན་ལྟར་ཁྲོ་བོ་རྣམས། ། རིམ་པ་བཞིན་དུ་བྲི་བར་བྱ། ། དེ་ཡི་ཆ་རྒྱབ་དཀྱིལ་འཁོར་ལ། ། དྲག་པོ་ལྷ་རྣམས་བཀོད་པ་ནི། ། དཔུང་{བཟངས་,བཟང་}ལ་སོགས་རྡོ་རྗེ་ཅན། ། བརྒྱད་པོ་བྱང་གི་ཕྱོགས་སུ་བྲི། ། ཚོགས་འཆང་བཤེས་གཉེན་འགྲོ་སྐྱོང་དང་། ། མཐོང་དཀར་རིག་བྱེད་བདེན་བྲལ་མེད། ། ངན་ སྤོང་བརྒྱད་དེ་དྲང་སྲོང་ཤར། ། ལྷོར་ནི་རྡོ་རྗེ་དགྲ་སྟ་མ། ། རྡོ་རྗེ་ཐོ་བ་དྲག་ཤུལ་མ། ། རྟ་རྣ་མ་དང་ཁྲོ་གཉེར་མ། ། རོ་ལངས་མ་དང་ལྕགས་སྒྲོག་མ། ། མཐོང་དཀར་མ་སྟེ་བརྒྱད་པོ་བྲི། ། དུག་སེལ་རྨ་བྱ་འོད་ཟེར་ཅན། ། ནོར་རྒྱུན་རལ་གཅིག་དཔུང་རྒྱན་མ། ། དབྱངས་ ལྡན་དྲིལ་སྒྲོལ་བརྒྱད་ནུབ་ཕྱོགས། ། ཀུན་ཀྱང་རང་རིག་ཕྱག་རྒྱ་ཅན། ། སྒོ་ཡི་ཕྱོགས་སུ་དགོད་བྱ་བ། ། ཐུབ་པའི་འཇིག་རྟེན་སྐྱོང་བ་བཞི། ། བརྒྱ་བྱིན་ཁྱབ་འཇུག་དབང་ཕྱུག་ཆེ། ། ཚངས་པ་འཇམ་དཔལ་དཀྱིལ་འཁོར་ལའོ། ། རྒྱལ་དང་རྣམ་རྒྱལ་མི་ཐུབ་མ། ། གཞན་མི་ཐུབ་ མ་སྤྱན་རས་གཟིགས། ། ནག་མོ་ཆེ་དག་ཨུཙྪུཥྨ། གཞོན་ནུ་འཕྲོག་མོ་གཏེར་འཛིན་གྱི། ། ཁྲོ་བོ་མི་གཡོ་སྒོ་བཞི་ལ། །

ནག་པོ་ཆེ་དང་དགའ་བྱེད་དང་། ། ངན་སྤོང་དང་ནི་ཚོགས་བདག་གོ། ། མི་གཡོ་དབང་བསྐུར་དགྱེས་པ་ཡི། ། དབུས་སུ་ཁྲོ་བོ་མི་གཡོ་བའི། ། རལ་གྲི་མེ་འོད་འབར་བའོ། ། ཕྱོགས་ བཞིར་ཁྲོ་བོ་མདོག་བཞིའོ། ། འཁོར་ལོས་སྒྱུར་བའི་ཆ་བྱད་ཅན། ། རྡོ་རྗེ་རིན་ཆེན་པདྨ་དང་། ། རྒྱ་གྲམ་གཡས་པའི་ཕྱག་ཏུ་འཆང་། ། གཡོན་པ་སྡིགས་མཛུབ་ཞགས་པ་འཆང་། ། རིན་ཆེན་བྲག་ལ་སྐུ་བཞུགས་ནས། ། ཞབས་གཉིས་པདྨའི་སྟེང་དུའོ། ། མཚམས་སུ་ཁྲོ་མོ་བཞི་པོ་ཡང་། ། གཙོ་བོ་དང་ མཚུངས་སྒེག་པའི་ཉམས། ། དེ་རྒྱབ་སྔོན་ལྟར་ཁྲོ་བོ་བཅུ། ། སྐུ་འམ་ཕྱག་རྒྱའི་ཕྲེང་བ་བྲི། ། དཀྱིལ་འཁོར་ཆ་ཡི་རྒྱབ་ཏུ་ནི། ། འཇིག་རྟེན་སྐྱོང་བཅུ་དྲག་ཤུལ་ཅན། ། ཁྲོས་པས་རང་རིག་འཁོར་བཅས་བྲི། ། བུམ་པ་ཚད་ལྡན་རས་ཀྱིས་དཀྲི། ། དྲི་{བཟངས་,བཟང་}ཆུས་བཀང་ལྷ་གྲངས་སམ། ། བཅུ་གཉིས་སམ་ནི་དྲུག་ཀྱང་རུང་། ། ཁ་རྒྱན་དང་བཅས་གཞག་པར་བྱ། ། བླ་རེ་བ་དན་གདུགས་རྒྱལ་མཚན། ། ཡོན་ཆབ་བདུག་སྤོས་མེ་ཏོག་དང་། ། སྒྲོན་མ་བྱུག་ཆབ་ཞལ་ཟས་དང་། ། གླིང་བུ་སིལ་སྙན་ན་བཟའི་ཚོགས། ། གཏོར་མའི་དྲི་{བཟངས་,བཟང་}སྨན་དང་བཅས། ། ཡིད་འོང་དྲི་ཞིམ་ཟས་སྐོམ་ ཚོགས། །

དཀྱིལ་འཁོར་སྤྲོས་ནས་མཆོད་པར་བྱ། ། ས་ལ་པུས་མོ་ཚད་བརྐོས་ནས། ། འབུ་སྲིན་ཤིང་རྡོ་དུམ་བུ་སོགས། ། སྐྱོན་མང་བྲལ་ནས་ས་ཡིས་དགང་། ། བ་ཡི་རྣམ་ལྔས་བྱུགས་པའི་སར། ། མེ་ཏོག་གཅལ་བཀྲམ་མཆོད་སོགས་བཀོད། ། ལྷ་ནི་སྤྱན་དྲངས་མཆོད་ནས་ཀྱང་། ། དགེ་མི་ དགེ་བའི་རྨི་ལམ་བརྟག ། རྨི་ལམ་བཟང་ན་སྤྲོ་གྱུར་ནས། ། ས་བདག་མོ་ལ་གསོལ་བ་གདབ། ། ཁྱད་པར་དུ་ཡང་གཏོར་མས་མཆོད། ། བུ་ཚུར་ཤོག་ཅེས་ཐེག་ཆེན་གྱི། ། ཚུལ་ཆེན་ཁྱོད་ནི་སྣོད་ཡིན་པས། ། གསང་སྔགས་སྤྱོད་ཚུལ་ཆོ་ག་རྣམས། ། ཁྱོད་ལ་ཡང་དག་བསྟན་པར་བྱ། ། དུས་ གསུམ་སངས་རྒྱས་འབྱུང་བ་རྣམས། ། མི་གཡོ་མགོན་པོར་རབ་བསྒོམས་པས། ། ཡེ་ཤེས་མཚུངས་པ་མེད་པ་བརྙེས། ། སྐྱོབ་པ་ཤཱཀྱ་སེང་གེས་ཀྱང་། ། གསང་སྔགས་སྦྱོར་བ་མཉམ་མེད་འདིས། ། བདུད་སྡེ་ཤིན་ཏུ་མི་བཟད་པ། ། དཔུང་ཆེན་རྣམས་ཀྱང་དཔའ་བོས་བཅོམ། ། འཇིག་རྟེན་ འདུལ་ཕྱིར་ཆོས་རྣམས་ཀྱི། ། འཁོར་ལོ་བསྐོར་ནས་མྱ་ངན་འདས། ། དེ་འདྲ་ཀུན་མཁྱེན་ཐོབ་བྱའི་ཕྱིར། ། བུ་ཁྱོད་བློ་གྲོས་འདི་གྱིས་ཤིག ། ཨུ་དུམ་བཱ་རའི་མེ་ཏོག་ལྟར། ། བརྒྱ་ལམ་ན་ནི་རེ་འགའ་ཞིག ། འབྱུང་འགྱུར་ཡང་ནི་མི་འབྱུང་སྟེ། །

སྐྱོབ་པ་འཇིག་རྟེན་མགོན་པོ་ཆེ། ། རྙེད་དཀའ་ རྙེད་པར་གྱུར་ན་ཡང་། ། གསང་སྔགས་སྐྱོབ་པའི་ཚུལ་འབྱུང་བ། ། ཤིན་ཏུ་དཀའ་སྟེ་རྨད་བྱུང་ཕྱིར། ། སྡུག་བསྔལ་ཤིན་ཏུ་མི་བཟད་པ། ། འཁོར་བའི་རྒྱ་མཚོ་ཆེར་འཇིགས་ལས། ། མྱུར་དུ་སྒྲོལ་བ་གསང་སྔགས་ལས། ། ས་སྟེང་གསང་སྔགས་ནོར་བུ་འདྲ། ། རྒ་ནད་འཆི་འཇིགས་ སྤོང་བ་དང་། ། ཉེས་མཛད་གྲོགས་གཅུགས་མཐུན་འདོད་དང་། ། མུ་གེ་དགྲ་ཆོམ་བྲལ་བདེ་དང་། ། ཟས་སྐོམ་གོས་རྒྱན་ལོངས་སྤྱོད་རྟག ། བདེ་བསྐྱེད་དཔལ་འབྱོར་ཐོབ་པ་དང་། ། མྱུར་དུ་སངས་རྒྱས་འདོད་པ་ཡི། ། གསང་སྔགས་ཐབས་ལ་མྱུར་བརྩོན་བསྒྲུབས། ། ཇི་ལྟར་དུས་ གསུམ་མགོན་པོ་རྣམས། ། བྱང་ཆུབ་ཏུ་ནི་ངེས་མཛད་པའི། ། བྱང་ཆུབ་སེམས་ནི་བླ་མེད་པ། ། དམ་པ་བདག་གིས་བསྐྱེད་པར་བྱ། ། སྡོམ་པ་ཡི་ནི་ཚུལ་ཁྲིམས་དང་། ། དགེ་བའི་ཆོས་ནི་སྡུད་པ་དང་། ། སེམས་ཅན་དོན་བྱེད་ཚུལ་ཁྲིམས་གསུམ། ། དེང་ནས་མཆོག་ཏུ་བརྟན་པར་བཟུང་། ། འགྲོ་ ལ་ལྷག་པའི་སེམས་བསྐྱེད་ནས། ། བླ་མ་ལ་ནི་ཡོན་ཕུལ་ཞུ། ། ཡིད་བཞིན་ནོར་འདྲ་བླ་མེད་སྐུ། ། ཞི་བ་སངས་རྒྱས་གོ་འཕང་ཐོབ། ། སྲོག་གཅོད་རྐུ་{བརྫུན་,རྫུན་}མི་ཚངས་སྤྱོད། །

མྱོས་བྱེད་འཐུང་དང་གླུ་གར་རོལ། ། རྒྱན་བྱུག་མལ་ཆེན་མཐོ་བ་དང་། ། ཕྱི་དྲོ་ཁ་ཟས་སྤངས་པ་སྟེ། ། བརྒྱད་དང་བཅུ་ གཅིག་བཅོ་ལྔ་དང་། ། ཁྱད་པར་དུ་ནི་གནམ་སྟོང་ལ། ། དལ་འབྱོར་ཐོབ་པ་ཤིན་ཏུ་དཀོན། ། སངས་རྒྱས་བསྟན་པ་ཤིན་ཏུ་དཀོན། ། སྡོམ་པ་བླངས་ནས་སྲོག་བཞིན་དུ། ། གཡེང་མེད་བསྡམས་ཏེ་བསྲུང་བར་བྱ། ། གསུམ་ལ་རྟག་ཏུ་སྐྱབས་འགྲོ་བྱ། ། ལྷ་མི་བདེ་ལྡན་ལུས་ཐོབ་ནས། ། དམྱལ་བ་དུད་འགྲོ་ཡི་ དགས་གནས། ། ཐོབ་ནས་སྤང་དཀའ་དེ་དག་ནི། ། ནམ་ཡང་ཐོབ་པར་མི་བྱའོ། ། བདག་ནི་དཔའ་བོ་རལ་གྲི་འཆང་། ། གསང་བའི་འཁོར་ལོ་སྦྱོར་བྱེད་པས། ། བཀའ་ལས་འདས་པའི་གདུག་ཅན་རྣམས། ། དུམ་བུ་ཕྱེ་མར་འགས་པར་འགྱུར། ། སློབ་མ་གཟུང་ཕྱིར་ཐོག་མར་ནི། ། བསྙེན་པས་སྔགས་ཀྱི་མཐུ་ བསྐྱེད་བྱ། ། ལོངས་སྤྱོད་འཕེལ་ཕྱིར་གཏོར་མ་གཏང་། ། བསོད་ནམས་འདོད་ཕྱིར་མཆོད་པ་བརྩོན། ། བླ་མ་ཐོས་བསམ་སྒོམ་ལ་གནས། ། གཏོང་ཕོད་དུལ་ཞིང་ཆོས་སྤྱོད་མཁས། ། ནད་མེད་བཟོད་དེས་སྙིང་རྗེ་ཆེ། ། སྔགས་སྒྲུབ་བརྩོན་དཔའ་ཤེས་རབ་ཅན། ། བརྟགས་ནས་སློབ་མ་ལྔ་འམ་བདུན། ། དད་བརྩོན་ ཞི་དུལ་བླ་མ་བཀུར། ། སྡིག་འཇིགས་ནད་མེད་དབང་པོ་ཚང་། །

དབྱིབས་སྡུག་སྙིང་རྗེར་ལྡན་པ་གཟུང་། ། འཕགས་པ་རྡོ་རྗེ་ཁྲོ་བོའི་རྒྱལ་པོའི་རྟོག་པ་བསྡུས་པའི་རྒྱུད་ལས་སྐྱེ་བོ་གཟུང་བའི་ཐབས་ཀྱི་ལེའུ་སྟེ་དྲུག་པའོ། ། ། ། དེ་ནས་ཡང་དག་བཤད་བྱ་བ། ། རིག་འཛིན་པ་ཡི་དངོས་གྲུབ་ཆེ། ། གཞན་དུ་མེད་ པ་ཕུལ་བྱུང་བ། ། རྒྱུད་འདིར་བཤད་པ་མཉན་པར་བྱོས། ། མི་ནི་རིན་ཆེན་དང་པོ་སྟེ། ། གང་གང་བསྒྲུབ་པ་དེ་དང་དེ། ། འགྲུབ་པར་འགྱུར་གྱི་གཞན་དུ་མིན། ། རལ་གྲི་ལྕགས་སམ་ཤིང་ཉིད་ལ། ། སོར་བཞི་པའམ་སོར་བརྒྱད་བྱ། ། ཡུ་བར་རིགས་ཀྱི་རྒྱ་ལྔ་བྲི། ། བ་ཡི་རྣམ་ལྔ་དྲི་ཞིམ་ཆུས། ། བཀྲུས་ ཏེ་དྲི་དང་མེ་ཏོག་མཆོད། ། ཟླ་དྲུག་སྔགས་བཟླས་ཁྲོ་བོ་སྒོམ། ། རལ་གྲི་དུད་འཐུལ་འོད་དུ་འབར། ། བླངས་པས་མཁའ་སྤྱོད་ཡུལ་འགྲོ་འགྱུར། ། ཚེ་ནི་བར་གྱི་བསྐལ་པ་སྟེ། ། ལྷ་ཡི་བཞོན་པ་སྣ་ཚོགས་བཅིབས། ། སངས་རྒྱས་ཞིང་རྣམས་འགྲོ་བར་འགྱུར། ། གསེར་དངུལ་ཟངས་ཀྱི་ཞགས་པའམ། ། ཤིང་གི་ཞགས་པའང་དེ་ལྟར་འགྲུབ། ། རྒྱལ་མཚན་ནོར་བུ་གིའུ་ཝང་གདུགས། ། ལྕགས་ཀྱུ་རྣམས་ཀྱང་དེ་བཞིན་བསྒྲུབ། ། ལྷ་རྣམས་བསྒྲུབ་ན་ཐང་ཤིང་ལ། ། གང་འདོད་ལྷ་ཡི་གཟུགས་བྱས་ཏེ། །

སྔགས་བཟླས་ཙམ་གྱིས་མདུན་དུ་འོང་། ། ཅི་འདོད་གསོལ་འདེབས་འདོད་པ་སྨྲ། ། ཀླུ་ལ་ནཱ་ག་གེ་ སར་ཤིང་། ། གནོད་སྦྱིན་ལ་ནི་གསེར་ལས་གཟུགས། ། དྲི་ཟ་ལ་ནི་འོ་མའི་ཤིང་། ། མཁའ་ལྡིང་འཇིམ་པའི་གཟུགས་ཀྱིས་སོ། ། སྲིན་པོ་ལ་ནི་དུར་ཁྲོད་ཤིང་། ། གང་ཡང་གཟུགས་བྱས་རྐང་པ་ནི། ། གཡོན་པས་དེ་ཡི་སྐེ་མནན་ཏེ། ། སུམ་འབུམ་བཟླས་ན་མདུན་དུ་འོང་། ། ཅི་འདོད་སྨྲ་ཚེ་དགོས་པ་བླང་། ། ཤར་དུ་རས་རིས་ཁ་སྤྲད་དྲུང་། ། དུས་གསུམ་ཁྲུས་བྱ་གོས་རློན་གྱོན། ། སུམ་འབུམ་བཟླས་ན་མར་ངོ་ཡི། ། བརྒྱད་ལ་འབྱུང་པོ་གཏོར་མ་སྦྱིན། ། མཎྜལ་སྟེང་དུ་རོ་བཞག་ནས། ། རང་ཉིད་རིན་ཆེན་ཁྲི་སྟེང་དུ། ། སྙིང་པོ་ཁྲི་བརྗོད་རོ་འགུལ་འགྱུར། ། མི་སྐྲག་ཁ་ཡི་ནང་དུ་ལྕེ། ། པདྨ་ཁ་ཕྱེ་ལྟེ་ཅན་མཐོང་། ། བཅད་ན་རལ་གྲི་རིག་འཛིན་འགྱུར། ། ལྷ་ཡི་གཟུགས་ཀྱིས་ཚངས་པ་ཡི། ། འཇིག་རྟེན་ཁམས་ཀྱི་གནས་རྣམས་རྒྱུ། ། གིའུ་ཝང་བདུན་བཟླས་ཐིག་ལེས་ནི། ། སྐྱེ་བོ་ཀུན་གྱིས་མི་མཐོང་ངོ་། ། མི་གཡོ་པུས་མོ་བཙུགས་པའམ། ། འཇམ་དཔལ་རིས་མའི་དྲུང་དུ་ནི། ། འཇམ་དཔལ་སྔགས་འདི་ས་ ཡ་བཟླས། ། ཉ་ལ་ཁྱད་པར་མཆོད་པ་བྱ། ། མཚན་རངས་བཟླས་པའི་ཐོ་རངས་ནས།

། དང་པོ་རྟགས་ས་གཡོ་བར་འགྱུར། ། གཉིས་པ་ཉི་མ་འགྱུར་ལྡོག་བྱེད། ། ཕྱོགས་བཞིར་མཁའ་ལ་སྒྲ་ཆེན་པོ། ། ཧ་ཧ་འབྲུག་སྐད་གྲག་པར་འགྱུར། ། གསུམ་པར་མཁའ་ལ་རིག་འཛིན་རྣམས། ། མེ་ཏོག་ ཆར་འབེབས་ཆུན་འཕྱང་སྒྲེང་། ། དེ་རྗེས་རིག་འཛིན་མ་ལུས་དང་། ། འཇིག་རྟེན་སྐྱོང་བས་རབ་བསྐོར་ནས། ། ཁྲོ་རྒྱལ་བྱོན་ནས་གསུང་སྙན་གྱིས། ། ཅི་འདོད་བུ་ཁྱོད་གསུང་བར་འགྱུར། ། རིག་འཛིན་རྒྱལ་པོ་མི་སྣང་སོགས། ། ཅི་འདོད་པར་ནི་སྨྲ་བར་བྱ། ། འགྲུབ་ནས་བརྒྱད་གཉིས་ཆ་བྱད་ཅན། ། རྒྱན་བཟང་ལག་ན་རལ་གྲི་ཐོགས། ། ལྷ་ཡི་བཞོན་པ་ལ་བཅིབས་ནས། ། རིག་འཛིན་ཚོགས་མང་ལྷན་ཅིག་ཏུ། ། སངས་རྒྱས་ཞིང་མང་ཕྱིན་པའི་ཚེ། ། རྒྱལ་སྲས་རྣམས་ཀྱིས་ཕྱག་བྱས་ནས། ། མཆོད་པ་ཆེན་པོ་ཐོབ་འགྱུར་ཏེ། ། བསྐལ་པ་དུ་མར་ཚེ་གནས་འགྱུར། ། ཨུཏྤལ་སྔོན་ པོ་ལིག་བུ་མིག ། རུ་རྟ་ཟངས་སྣོད་རིལ་བུ་གཞག ། ཟླ་བ་གཟས་ཟིན་པར་བཟླས་ནས། ། མིག་བསྐུས་འདོད་པའི་ཁམས་གསལ་འགྱུར། ། བདག་ནི་སུས་ཀྱང་མི་མཐོང་ངོ་། ། གནམ་ལྕགས་རྡོ་རྗེ་སོར་བཅུ་དྲུག ། ངོས་གཉིས་རྩེ་གསུམ་དབྱིབས་ཅན་ཏེ། ། ཙནྡན་དམར་དང་དྲི་{བཟངས་,བཟང་} བྱུག ། ཆོ་འཕྲུལ་ཚེས་གཉིས་ཉ་ཡི་བར།

། མཆོད་ཅིང་བཟླས་ན་ཐ་མར་ནི། ། མར་མེ་བརྒྱ་སོགས་ཀྱིས་མཆོད་དེ། ། ཀུ་ཤ་ཁྲེས་ཀྱི་སྟེང་འདུག་ནས། ། རྡོ་རྗེ་ལག་གཉིས་གཟུང་མ་ཐག ། དུད་འཐུལ་འོད་དུ་འབར་ནས་ཀྱང་། ། འཁོར་བཅས་རིག་པ་འཛིན་པ་ཡི། ། འཁོར་ལོས་སྒྱུར་ བ་ཐོབ་པར་འགྱུར། ། འཁོར་ལོ་བདུན་སོགས་མཚོན་ཆ་དང་། ། གསེར་དང་མལ་ལྷམ་ཚངས་སྐུད་སོགས། ། དགོས་པ་ཐམས་ཅད་དེ་ལྟར་སྒྲུབ། ། སྔོན་གྱི་ཚུལ་དུ་དངོས་གྲུབ་འབྱུང་། ། ཚེས་གཅིག་ཉིན་པར་སྐུ་གཟུགས་ཀྱི། ། མཐེ་བོར་ཛ་ཏི་སྔགས་བརྗོད་བརྡེག ། སྟོང་ཕྲག་བརྒྱད་ ཀྱིས་མཐེ་བོ་ལས། ། འོད་ཟེར་ཕྱུང་ནས་རེག་མ་ཐག ། དབུ་སྐྲ་ལྕང་ལོ་འཁྱིལ་གྱུར་ནས། ། འཁོར་བཅས་རིག་འཛིན་རྒྱལ་པོ་འཐོབ། ། སུས་ཀྱང་མི་ཐུབ་ལུས་གྲུབ་འགྱུར། ། ཚེ་ནི་བསྐལ་པའི་བར་དུ་གནས། ། ས་ལ་པད་འདབ་བརྒྱད་པ་བྲི། ། བུམ་པ་སྐུད་པ་ནག་པོས་དཀྲི། ། ཙནྡན་གྱིས་ བྱུགས་དྲིས་ཀྱང་དགང་། ། པདྨའི་སྟེང་བཞག་པད་སྟེང་འདུག ། སྟོང་ཕྲག་བརྒྱད་བཟླས་ས་གཞི་གས། ། པདྨར་སྣང་ཞིང་ས་གཞིར་སྣང་། ། ཆུ་དེས་གཏོར་ལ་ཁྲུ་གང་བརྐོ། ། བླངས་པས་བསྐལ་བའི་ཚེ་ཚད་འཐོབ། ། གྲོག་མཁར་ས་ལ་སེང་གེ་བྱ། ། གིའུ་ཝང་གིས་བྱུགས་དཀྱིལ་འཁོར་ གཞག །

གཡོ་འགུལ་བར་དུ་མཆོད་ཅིང་བཟླ། ། སེང་གེར་གྱུར་ནས་རྒྱབ་ཞོན་ནས། ། འདོད་གཟུགས་ལྷ་གནས་ཀུན་དུ་འགྲོ། ། སངས་རྒྱས་ཞིང་ཡང་མཐོང་བར་འགྱུར། ། ཚེ་ལོ་ཁྲི་ཕྲག་གཅིག་བསྐོར་ནས། ། རིག་འཛིན་ཆེན་པོའི་གནས་སུ་འགྲོ། ། འདིར་གསུངས་པའམ་ མ་གསུངས་པ། ། སྔགས་དང་ལྷ་འདི་བསྒྲུབས་པ་ཡིས། ། རིག་འཛིན་གྲུབ་པར་གྲགས་པ་རྣམས། ། མ་ལུས་ཐམས་ཅད་འགྲུབ་པར་འགྱུར། ། འཕགས་པ་རྡོ་རྗེ་ཁྲོ་བོའི་རྒྱལ་པོ་ཆེན་པོའི་རྟོག་པ་བསྡུས་པ་ལས་རིག་འཛིན་བསྒྲུབ་པའི་ལེའུ་སྟེ་བདུན་པའོ། ། ། ། དེ་ནས་ཡང་དག་བཤད་བྱ་བ། ། ཕྲན་ཚེགས་ལས་ཀྱི་སྦྱོར་བ་གཙོ། ། གཟའ་ཡི་ཆོ་ག་འདི་ཡིན་ཏེ། ། གནོད་པ་སེལ་དང་ཕན་སྐྱེད་མཛད། ། བ་ཡི་རྣམ་ལྔས་བྱུགས་པ་ཡི། ། དཀྱིལ་འཁོར་དབུས་སུ་པདྨ་ནི། ། ཁ་དོག་སྣ་ཚོགས་ཉིས་བརྩེགས་ཀྱི། ། དབུས་སུ་སངས་རྒྱས་དེ་བཞིན་ལྷོར། ། ཆོས་ནི་རྡོ་རྗེ་ཆོས་དཀར་ པོ། ། ཤར་དུ་དགེ་འདུན་ལྗང་གུའོ། ། ནུབ་ཏུ་འཇིག་རྟེན་དབང་ཕྱུག་དམར། ། བྱང་དུ་ཕྱག་ན་རྡོ་རྗེ་སྟེ། ། བྱང་ཤར་དུ་ནི་འཇམ་དཔལ་སེར། ། མེར་ནི་གཤིན་རྗེའི་གཤེད་ངོ་གནག ། དབྱུག་འཆང་མ་ཧེ་ཞོན་པའོ། ། མི་གཡོ་མགོན་པོ་སྲིན་པོ་ཕྱོགས། །

རྟ་མགྲིན་རླུང་གི་ཕྱོགས་སུའོ། ། དཀོན་མཆོག་ གསུམ་པོ་ཆོས་འཆད་རྒྱ། ། སེམས་དཔའ་ཁྲོ་བོ་རང་རྟགས་སོ། ། ཀུན་ཀྱང་རིན་ཆེན་ཁྲི་ལ་བཞུགས། ། དེ་རྒྱབ་ཆ་ལ་གཟའ་རྣམས་ཏེ། ། ཤར་དུ་ཉི་མ་དཀར་སེར་ནི། ། རྟ་ལ་ཞོན་ཏེ་པདྨ་འཆང་། ། ནུབ་ཏུ་ཟླ་བ་དཀར་པོ་ནི། ། ཀུ་མུ་ད་འཆང་ངང་པ་ཞོན། ། ལྷོར་ནི་མིག་དམར་ཁ་དོག་དམར། ། རིལ་ བའི་སྟེང་བཞུགས་མེ་སྒྲོན་བསྣམས། ། ལག་པ་མདོག་སེར་ཨུཏྤལ་འཆང་། ། བྱང་དུ་པད་སྟེང་བཞུགས་པ་ཡི། ། ཕུར་བུ་མདོག་སྔོན་གླེགས་བམ་ཐོགས། ། ཤར་ལྷོ་ཕྱོགས་སུ་ཀླུ་ལ་བཅིབས། ། པ་ཝ་སངས་དཀར་ཤིང་ཐོག་འཆང་། ། ལྷོ་ནུབ་གསེར་གྱི་ཁྲི་ལ་བཞུགས། ། བྱང་ཤར་སྤེན་པ་ མདོག་ནག་ནི། ། ཚངས་པའི་སྟེང་ན་དབྱུག་པ་ཐོགས། ། ནུབ་བྱང་སྒྲ་གཅན་དུད་ཀ་ནི། ། སྦྲུལ་གྱི་སྟེང་ན་འཁོར་ལོ་འཛིན། ། རྣོན་པོ་ལྗང་གུ་རལ་གྲི་འཆང་། ། གཙོ་བོའི་དྲུང་དུ་པད་སྟེང་བཞུགས། ། ན་མཿསརྦ་ཏ་ཐཱ་ག་ཏེ་བྷྱཿ། སརྦཱ་པ་རི་པཱ་ར་ཀེ་བྷྱཿ། སརྦ་ཐཱ། ཨོཾ་བྷ་གི་ནཱཾ་སྭཱ་ཧཱ། ཉི་མའི་སྙིང་པོའོ། ། ན་མཿསརྦ་ཏ་ཐཱ་ག་ཏེ་བྷྱཿ། སརྦཱ་པ་རི་པཱུ་ར་ཀེ་བྷྱཿ སརྦ་ཐཱ། ཨོཾ་སརྦ་ཏྲ་ཡཾ་ཨ་སྭཱ་ཧཱ། ཟླ་བའི་འོ། ། ན་མཿསརྦ་ཏ་ཐཱ་ག་ཏེ་བྷྱཿ།

སརྦཱ་པ་རི་པཱུ་ར་ཀེ་བྷྱཿ སརྦ་ཐཱ། ཨོཾ་ཨ་བྷིརྱ་ཡ་སྭཱ་ཧཱ། རྣོན་པའི་འོ། ། ན་མཿསརྦ་ཏ་ཐཱ་ག་ཏེ་བྷྱཿ། སརྦཱ་པ་རི་པཱུ་ར་ཀེ་བྷྱཿ སརྦ་ཐཱ། ཨོཾ་སུབྷི་ཤུདྡྷཱ་སྭཱ་ཧཱ། མིག་ དམར་གྱིའོ། ། ན་མཿསརྦ་ཏ་ཐཱ་ག་ཏེ་བྷྱཿ། སརྦཱ་པ་རི་པཱུ་ར་ཀེ་བྷྱཿ སརྦ་ཐཱ། ཨོཾ་བི་སུ་ཏྲ་པ་ཀཱ་ཡ་སྭཱ་ཧཱ། གཟའ་ལྷག་གིའོ། ། ན་མཿསརྦ་ཏ་ཐཱ་ག་ཏེ་བྷྱཿ། སརྦཱ་པ་རི་པཱུ་ར་ཀེ་བྷྱཿ སརྦ་ཐཱ། ཨོཾ་བྷི་ཀ་མྱ་དྷཱ་ཡ་སྭཱ་ཧཱ། ཕུར་བུའིའོ། ། ན་མཿསརྦ་ཏ་ཐཱ་ག་ཏེ་བྷྱཿ། སརྡཱ་པ་རི་པཱུ་ར་ཀེ་བྷྱཿ སརྦ་ཐཱ། ཨོཾ་སུ་དྷརྨཱརྞ་ ར་ཧོ་སྭཱ་ཧཱ། ། པ་བ་སངས་ཀྱིའོ། ། ན་མཿསརྦ་ཏ་ཐཱ་ག་ཏེ་བྷྱཿ། སརྦཱ་པ་རི་པཱུ་ར་ཀེ་བྷྱཿ སརྦ་ཐཱ། ཨོཾ་ཀྲྀཥྞ་བརྞ་ཕ་ཀ་སྭཱ་ཧཱ། སྦེན་པའི་འོ། ། ན་མཿསརྦ་ཏ་ཐཱ་ག་ཏེ་བྷྱཿ། སརྦཱ་པ་རི་པཱུ་ར་ཀེ་བྷྱཿ། སརྦ་ཐཱ། ཨོཾ་བི་ཀྲྀ་ཏ་ལ་ཀུ་རུ་ཙི་སྭཱ་ཧཱ། སྒྲ་གཅན་གྱིའོ། ། སྔགས་རེ་བརྒྱད་སྟོང་བརྒྱད་བརྒྱ་བཟླས། ། ཅི་ འབྱོར་མཆོད་དེ་གསོལ་བ་གདབ། ། ལོངས་སྤྱོད་སྤེལ་ཅིང་འཇིགས་པ་སེལ། ། ནད་མེད་བགེགས་རིགས་འཇོམས་པར་འགྱུར། ། རིམས་སོགས་གཟས་ཟིན་ནད་ལ་ཡང་། ། སྐུ་ཡི་དྲུང་དུ་གསོལ་བཏབ་སེལ། ། ཞི་རྒྱས་དབང་དྲག་གང་སྦྱར་བ།

། དེ་དག་ཐམས་ཅད་འགྲུབ་ པར་འགྱུར། ། མི་དང་བྱ་རྒོད་སྦྲུལ་རུས་པ། ། སྐབས་སུ་བཏུམས་ནས་དགྲ་ཁྱིམ་སྦ། ། དགྲ་བོ་ནད་བསྐྱེད་ནོར་རྣམས་བརླག ། རྟག་ཏུ་འཐབ་མོ་འབྱུང་བར་ངེས། ། སྟག་སྤུ་ཐོད་རུས་འུག་པའི་སྤུ། ། དགྲ་བོའི་སྒོར་སྦས་སྐྲོད་པར་བྱེད། ། ནེའུ་ལེ་ནག་པོ་ཝ་སྦལ་རུས། ། རང་ཁྲག་རྩངས་པའི་མགོ་བོ་རྣམས། ། གོང་བུ་མིང་བཅས་དགྲ་སྒོར་སྦ། ། དགྲ་བོ་འཁོར་བཅས་ཤི་བར་འགྱུར། ། མི་ཚིལ་དུར་ཐལ་རྒྱ་སྐྱེགས་ནི། ། ཐོད་པ་སོ་ཅན་ནང་བླུགས་ནས། ། གང་གི་སྒོར་བཞག་ཁང་པ་འཇིག ། ཀུ་ཤའི་གཟུགས་བརྙན་རྐང་པས་མནན། ། དབང་སྦྱར་འདོད་པའི་སྔགས་བཟླས་ན། ། རྒྱལ་པོ་ཆེ་ཡང་དབང་འགྱུར་ན། ། འབྱུང་པོ་གཞན་ལྟ་སྨོས་ཅི་དགོས། ། བུད་མེད་སྐྱེས་ཕྱུགས་ལ་སོགས་ལ། ། རང་མིང་ལྡན་པའི་གཟུགས་བྱས་ཏེ། ། རྐང་པ་གཡོན་མནན་མིང་བཅས་བཟླ། ། གང་དང་གང་ཡང་ངེས་པར་འགྲུབ། ། ས་ལ་བགེགས་ཀྱི་གཟུགས་བྲིས་ཏེ། ། སྔགས་ཀྱིས་བརྡུངས་ན་བརླག་པར་འགྱུར། ། འཇིམ་པས་བགེགས་ཀྱི་གཟུགས་བྱས་ཏེ། ། གདབ་ཅིང་བརྡུངས་ན་སེལ་བར་ངེས། ། ཕུར་བུ་གདབ་དང་མཚོན་ཆས་བྲབ། ། རྡོ་རྗེ་རི་རབ་ཅོག་བརྒྱད་ལྡན། ། ས་ལ་བྱས་པའི་ཐེམ་བར་དུ། །

གཟུགས་བརྙན་བཅུག་སྟེ་རྐང་པས་མནན། ། གཟས་ཟིན་ནུབ་མོ་བའི་མཎྜལ། ། དྲི་{བཟངས་,བཟང་}མེ་ཏོག་སིལ་མ་བཀྲམ། ། ཕ་རོལ་ཕྱིན་པའི་གླེགས་བམ་བཞུགས། ། ཟངས་མའི་སྣོད་དུ་མར་བཞག་སྟེ། ། སེང་ལྡེང་མེས་ནི་བསྐོལ་བར་བྱ། ། དངོས་གྲུབ་རྣམ་གསུམ་འགྲུབ་པ་དང་། ། གཏེར་མཐོང་ བར་ཡང་འདི་འགྱུར་རོ། ། ཁྲོས་པས་སྤྱན་གྱི་ཕྱག་རྒྱ་བྱ། ། ཧཱུཾ་མཐའ་གསང་སྔགས་དྲག་ཏུ་བརྗོད། ། དུར་ཁྲོད་ཐལ་བ་གང་བྱིན་པ། ། གདོན་གྱིས་འཛིན་ནམ་བྲན་དུ་འགྱུར། ། དེ་ནས་མི་གཡོ་སྤྱན་གཅིག་པའི། ། སྔགས་ཀྱི་ཆོ་ག་བཤད་པར་བྱ། ། རིས་མའི་དྲུང་དུ་འབུམ་ཕྲག་གསུམ། ། བརྗོད་པས་འདི་ཡི་བསྙེན་པ་རྫོགས། ། དབེན་པར་ཟན་གྱི་ཆང་བུ་སྦྱིན། ། དེས་ན་རྟག་ཏུ་འབྲེལ་བར་འགྱུར། ། མཛུབ་མོའི་རྩེ་ལ་ཧཱུཾ་བཀོད་ནས། ། བརྗོད་པས་སྤྲིན་རྣམས་འདྲལ་བར་བྱེད། ། དགྲ་བོ་ལྷར་བཅས་གཟུགས་བརྙན་ལ། ། རྐང་གཡོན་མནན་བཟླས་ལྕགས་ཕུར་གདབ། ། བཀའ་ ཉན་འགྱུར་རོ་གཏུབས་ན་ཤི། ། སྐུད་པ་སེར་པོས་བཅིང་ནད་དག ། སྤང་ལེབ་མནན་ན་མནན་པར་འགྱུར། ། ར་ལྤགས་བྲབས་ན་བཀའ་ཉན་འགྱུར། ། སྲད་བུ་ཡུངས་ཀར་ལ་བཟླས་ཏེ། ། འཆང་ན་གང་འདོད་སྲུང་བར་བྱེད། ། ན་མཿསརྦ་ཏ་ཐཱ་ག་བྷྱཿ།

། སརྦ་བི་ཤྭ་མུ་ཁེ་བྷྱོཿ། སརྦ་ཐཱ། ཨོཾ་ཙཎྜ་ མ་ཧཱ་རོ་ཥ་ཎ་ཧཱུཾ་ཏྲཾ་ཐཱ་མ་ཧཱ་ཙཎྜ། ཨ་ཙ་ལ་ཀ་ན་ཧཱུཾ་ཧཱུཾ་ཧཱུཾ་ཨ་པྲ་ཏི་ཧ་ཏ། ཏ་ཐཱ་ག་ཏ་ཛྙཱ་སྨ་ར་ཧཱུཾ་ཧཱུཾ་ཕཊ་སྭཱ་ཧཱ། རྒྱ་མཚོར་འབབ་པའི་ཆུ་ཀླུང་དུ། ། ཙནྡན་སྦགས་པའི་པདྨ་ནི། ། སྔགས་བཅས་ཅི་ཙམ་བསྒྱུར་བའི་གྲངས། ། གསེར་གྱི་དོང་ཙེ་རྙེད་པར་འགྱུར། ། བྲམ་ཟེ་འམ་ནི་དགེ་འདུན་ རས། ། རྒྱལ་པོ་རས་སམ་གྲོ་ག་ལ། ། པདྨ་མུ་ཁྱུད་གཉིས་ལྡན་བྲི། ། ལྟེ་བར་ཨོཾ་ཧཱུྃ་མིང་དང་བཅས། ། ཙཎྜ་མ་ཧཱ་རོ་ཥ་ཎ། ། ཕཊ་དང་བཅས་པ་འདབ་མར་བཀོད། ། མུ་ཁྱུད་དང་པོར་རྩ་སྔགས་ཏེ། ། གཉིས་པ་འཇམ་དཔལ་སྔགས་ཉིད་བྲི། ། དྲི་དང་མེ་ཏོག་སོགས་མཆོད་ ནས། ། སྐབས་ཀྱིས་དྲིལ་ནས་ལུས་ལ་བཅངས། ། གདོན་དང་ནད་དང་མུ་གེ་སེལ། ། གཡུལ་དུ་ཕྱིན་ན་རྒྱལ་བར་འགྱུར། ། ཡང་ན་རལ་གྲི་སོར་བཞིར་བྲི། ། འོད་ཀྱི་རི་མོ་ནང་ཆུད་པ། ། ཡེ་དྷརྨཱ་ལ་སོགས་ཀྱིས་བསྐོར། ། དབུས་སུ་མིང་དང་བཅས་པ་ཡི། ། སྙིང་པོ་སྔགས་ནི་ ཁྲིགས་སུ་བྲི། ། འདིས་ཀྱང་སྔོན་གྱི་ཡོན་ཏན་འགྱུར། ། མཐོ་ལྔས་འཁོར་བའི་པར་བུ་ནི། ། མཐོ་གང་འཕང་དུ་ཡོད་པར་བྱ། ། ནང་དུ་མཚལ་གྱིས་འཇམ་དཔལ་སྔགས། །

མགོ་ནི་གྱེན་དུ་བལྟས་པ་བྲི། ། ཁ་ལ་ཉེ་བར་རྟེན་འབྲེལ་སྔགས། ། སྤྲ་ཚིལ་ལས་བྱས་དགྲ་ཡི་ གཟུགས། ། དུག་དང་གྲི་ཁྲག་གིས་བྲིས་ནས། མིང་ཡིག་བསོད་པར་བཅས་པ་ནི། ། ལིང་གའི་སྙིང་གར་བཅུག་བྱས་ཏེ། ། དཀྱིལ་འཁོར་གྲུ་གསུམ་ནག་པོ་ཡི། ། དབུས་སུ་མཐོ་གང་བྲུས་བྱས་ཏེ། ། ནང་བཞག་སྟེང་དུ་པར་བུ་སྦུབ། ། ཅི་སྲིད་མར་གྱི་ཚེས་གཅིག་ནས། ། ཟླ་བ་མི་སྣང་ཞག་བར་དུ། ། ཉིན་མོ་རྟེན་འབྲེལ་སྔགས་བཟླས་ཏེ། ། མཚན་དུས་ཁྲོ་བོ་སྤྱན་གཅིག་པའི། ། སྔགས་ནི་དྲག་ཏུ་བརྗོད་པར་བྱ། ། མཚམས་དང་ཅི་སྲིད་མཚམས་བར་དུ། ། གཡོན་དུ་བསྐོར་ཞིང་རྩ་བའི་སྔགས། ། དྲུག་ཅུ་རྩ་བཞིའི་གྲངས་སུ་བརྗོད། ། འཇམ་ དཔལ་སྔགས་ཀྱིས་ཆོས་གོས་སྲུང་། ། བདེ་གཤེགས་ཡི་གེ་བརྒྱ་པས་ནི། ། མཆོད་རྟེན་ལ་ནི་གསེག་ཤང་བསིལ། ། སངས་རྒྱས་བསྟན་པ་འཇིག་པ་དང་། ། སྔགས་ལ་འཕྱ་ཞིང་སེམས་ཅན་འཚེ། ། ལོག་ལྟ་ལོག་པར་སྤྱོད་བྱེད་ཅིང་། ། སེམས་ཅན་ལ་འཚེ་བྱེད་པ་ནི། ། རྒྱལ་པོ་ཁྲོ་བོ་ཆེ་བཅུ་དང་། ། འཇིག་རྟེན་སྐྱོང་དང་རྒྱལ་ཆེན་བཞི། ། མ་ཚོགས་གཟའ་དང་རྒྱུ་སྐར་ཚོགས། ། བསྟན་དགའ་རྣམས་ཀྱིས་མྱུར་དུ་སྒྲོལ། ། རྒྱུད་གཞན་དག་ལ་གྲགས་པ་ཡི། །

བདེན་པའི་མཐུ་ཡང་དུ་མ་བརྗོད། ། དུར་ཁྲོད་ས་ལ་མཆོད་རྟེན་ནི། ། ནག་པོ་གྲུ་གསུམ་ཁྲུ་གང་བའི། ། སྲོག་ཤིང་ནག་པོ་གྲུ་གསུམ་ལ། ། བདེ་གཤེགས་ཡི་གེ་བརྒྱ་པས་དཀྲི། ། གུར་ཀུམ་ལི་ཁྲིས་བྲིས་པའོ། ། མྱ་ངན་མེད་ཤིང་གྲུ་གསུམ་ལ། ། རྒྱ་གྲམ་དབང་ཆེན་རིམ་པར་བཅའ། ། ལྃ་དང་སྟཾ་བྷ་ཡ་ནན་བརྒྱད། ། ཕྱོགས་བརྒྱད་བྲི་བའི་ རྭ་དབུས་ལ། ། ཉེ་སྙིང་མིང་དང་བཅས་པ་བྲི། ། དེ་ཡི་ལྟེ་བར་སྙིང་པོ་ནི། ། བསད་པ་མིང་བཅས་བྲི་བའོ། ། ཚོགས་ཀྱི་བདག་པོ་གཏོར་མས་མཆོད། ། མ་མོ་རྣམས་དང་ལེགས་ལྡན་སྲས། ། ཤ་ཁྲག་མེ་ཏོག་ནག་པོས་མཆོད། ། ཇི་སྲིད་གསུམ་དང་བདུན་བར་དུ། ། ལེ་ལོ་མེད་ པར་བྱས་གྱུར་ན། ། དགེ་སློང་དགེ་ཚུལ་བསྙེན་ལྡན་གང་། ། སྡོམ་བརྩོན་དེ་ནི་ལྡན་གྱུར་ཏེ། ། སྡིག་ལྡན་མྱུར་དུ་ཤི་བར་འགྱུར། ། དེ་ནས་ཡང་དག་བཤད་བྱ་བ། ། གཏུམ་པོ་རྡོ་རྗེ་འཛིན་པ་ཡི། ། སྣ་ཚོགས་ལས་རྣམས་ཐུན་མོང་སྟེ། ། ཁྱད་པར་སྦྱོར་བ་ཅུང་ཟད་བཤད། ། ཡུངས་ཀར་ བསྣུན་པས་འབྱུང་པོ་འབྲོས། ། སེར་བ་བསྲུང་ན་འཁོར་ལོའམ། ། རྔ་དང་དུང་ལ་བྲི་བར་བྱ། ། གཡུལ་དུ་འཇུག་ན་རལ་གྲི་སོགས། ། ནད་ལ་འཁོར་ལོ་ཆུ་ཡུངས་ཀར། །

ཐོད་ལོ་ཀོར་གྱིས་ས་ཕོར་ལ། ། བྲིས་ཏེ་སྒོར་དབྱངས་སྲིའུ་བསྲུང་། ། སྤྲ་ཚིལ་གཟུགས་བརྙན་སོར་བཞི་པ། ། དུར་ཁྲོད་ ཐལ་བཟླས་སྒོ་སྟེང་བཞག ། ནད་པ་གདོན་ལས་བསྲུང་བར་ངེས། ། སྙིང་གར་མིང་སྔགས་སྤེལ་བཅུག་ནས། ། ཚེར་མ་ཁར་བཙུགས་ངག་རེངས་བྱེད། ། སྙིང་ལ་བཙུགས་ན་ཁྲོས་པ་ཞི། ། ནན་ཏན་སེམས་ཀྱིས་གསོད་པར་ངེས། ། ལིང་གས་རྟགས་ཀྱི་ནུས་པ་མེད། ། ཡང་ན་རབས་ཆད་ཐོད་ པ་ལ། ། མིང་སྔགས་བྲིས་ཏེ་མི་ཁྲག་བཀང་། ། རབས་ཆད་དུར་སྦས་རིགས་རྒྱུད་འཆད། ། ཁྱི་ནག་ཐོད་པར་མིང་སྔགས་བཅས། ། དུག་བཀང་ཀླུ་གནས་སྦས་མཛེས་འཛིན། ། དགྲ་ཡི་སྒོར་སྦས་འབྱེད་པར་བྱེད། ། ཞིང་དུ་སྦས་ན་ལོ་ཉིས་བྱེད། ། ཕྱུགས་གནས་གོད་འབྱུང་ཟླ་དང་འབྱེད། ། ཆུ་དོང་ སྦས་ན་ཆུ་སྐེམས་འགྱུར། ། མེ་དུར་སྦས་ན་རིམས་ཀྱིས་འཛིན། ། ཡང་ན་དགྲ་མིང་ཁྲག་གིས་བྲི། ། སྤྲ་ཚིལ་གཟུགས་ཀྱི་སྙིང་གར་བཅུག ། མཆོད་རྟེན་ནག་པོ་མཐོ་གང་བའི། ། ནང་བཅུག་དོང་བཞག་ལྷུང་བཟེད་སྦུབ། ། བྲམ་ཟེ་རིགས་བཞིས་སྔགས་བརྗོད་ཅིང་། ། ནག་པོ་ཚེས་ནས་ཕྱིས་ བསྐོར་ཞིང་། ། བདེན་པའི་མཐུ་བརྗོད་གཟུགས་བརྙན་བསྲེག ། དགྲ་བོ་ཤི་འགྱུར་ཐེ་ཚོམ་མེད། །

གྲི་ཁྲག་བྱ་རོག་འུག་པའི་ཁྲག ། ཀ་ཏ་ཡི་ལྟེ་བ་ལ། ། ཀ་རོ་ཀ་ཡི་དུས་སུ་ནི། ། གཟུགས་ལ་མིང་དང་སྔགས་བཅས་བྲིས། ། རྐང་པས་མཉེས་ན་རྡུལ་དུ་འགྱུར། ། རྡོ་རྗེ་འཛིན་པའི་བཀའ་བཞིན་ ནོ། ། མཚོན་གྱིས་བསད་པའི་ཐོད་པ་ལ། ། སྔགས་དང་ཡུལ་ལྷའི་མིང་སྤེལ་བྲི། ། ལྷ་ཡི་གནས་བཅུག་དེ་སྟེང་དུ། ། སྔགས་བཟླས་ཕུར་པ་སྙིང་གར་གདབ། ། གདུག་པའི་ཚེར་མའི་ཧོམ་སྦར་ཏེ། ། མི་རྟ་བ་ལང་ཁྱི་མ་ཧེ། ། སྣ་ཚོགས་ཁྲག་བསྲེས་འདི་སྐད་བརྗོད། ། ལྷ་ཁྱོད་ཡུལ་འདིར་ཐོག་སེར་ ཕོབ། ། མེད་ན་བསྐལ་བར་ཁྱོད་ཉིད་སྲེག ། དེ་རྗེས་དཀར་དང་མངར་མཆོད་དོ། ། འཕགས་པ་རྡོ་རྗེ་ཁྲོ་བོའི་རྒྱལ་པོ་ཆེན་པོའི་རྟོག་པ་བསྡུས་པའི་རྒྱུད་ལས་སྦྱོར་བ་ཕྲན་ཚེགས་ཀྱི་ལེའུ་སྟེ་བརྒྱད་པའོ། ། ། ། དེ་ནས་སྦྱིན་སྲེག་ལས་རྣམས་ཀུན། ། མྱུར་འགྲུབ་ཐབས་ནི་བཤད་པར་བྱ། ། མངར་ གསུམ་དཱུར་བ་བསྲེགས་པ་ཡིས། ། གནོད་རིགས་ཐམས་ཅད་སེལ་བར་བྱེད། ། ཡམ་ཤིང་འབྲས་བུ་གསུམ་བསྲེགས་ཤིང་། ། གདོན་ནད་ཐམས་ཅད་ཞི་བར་བྱེད། ། འོ་མ་ཅན་གྱི་ཡམ་ཤིང་ལ། ། འོ་མ་དཱུར་བ་ཏིལ་དང་འབྲས། ། སྙིང་རྗེའི་སེམས་ཀྱིས་བརྒྱ་བསྲེགས་ན། ། གནོད་པ་ཐམས་ཅད་ ཞི་བར་འགྱུར། །

ག་བུར་མངར་གསུམ་འབྲུ་ཐམས་ཅད། ། དཱུར་བ་དཀར་པོའི་ཡམ་ཤིང་རྣམས། ། འོ་མ་ཅན་གྱི་ཤིང་ལ་བསྲེག ། ནད་དང་གདོན་རྣམས་ཐམས་ཅད་ཞི། ། འོ་མ་སྦྱིན་སྲེག་བརྒྱ་རྩ་བརྒྱད། ། ཕྱུགས་ངས་ཆེན་པོ་ཞི་བར་འགྱུར། ། དཱུར་བ་མངར་གསུམ་མིང་བཅས་པས། ། བསྲེགས་པས་རྟ་ཕྱུགས་ནད་ཞི་བྱེད། ། ཤར་ལྷོ་ནུབ་བྱང་ཕྱོགས་ཀྱི་ནི། ། དཀར་ནག་དམར་སེར་ཁ་དོག་འགྲུབ། ། ཁྲུ་གང་ཁྲུ་གཉིས་ཚད་ཀྱི་ཐབ། ། སོར་བཞི་ཁ་ཁྱེར་རིམ་པས་བཏང་། ། སེམས་དཔའ་པདྨའི་རྡོ་རྗེ་དང་། ། གཅིག་པུས་ཞི་རྒྱས་དབང་དྲག་འགྲུབ། ། དེ་ནས་རྒྱས་པའི་ སྦྱིན་སྲེག་ནི། ། ཅི་འདོད་ཐོབ་པ་བཤད་པར་བྱ། ། པདྨའི་ཆུ་ལ་འབུམ་ཕྲག་གཅིག ། རྒྱལ་པོ་འཐོབ་སྟེ་བློན་པོ་ནི། ། ཀུ་མུ་ད་ལ་འབུམ་ཕྲག་གསུམ། ། ཞོ་དང་མངར་གསུམ་དང་བཅས་པའོ། ། ཨ་པ་མརྒའི་འབྲས་བུ་དང་། ། མངར་གསུམ་འབུམ་གྱིས་ཡུལ་བདག་འཐོབ། ། རིགས་ བཟང་འབུམ་ཕྲག་བདུན་གྱིས་ནི། ། ཡིད་ལ་ཅི་འདོད་ཐོབ་པར་འགྱུར། ། དཱུར་བ་ཏིལ་དང་འབྲས་སོགས་བསྲེག ། བུད་མེད་བུ་བཟང་ཐོབ་པར་འགྱུར། ། ནོར་འདོད་པས་ནི་རྐུན་པོ་ཡི། ། ལག་པ་གཡས་པ་མཛོད་བཞག་ནས། ། མཆོད་ཅིང་གསོལ་བ་བཏབ་པས་ནི། །

ནོར་ རྣམས་མྱུར་དུ་ཐོབ་པར་འགྱུར། ། ཡང་ན་རྒྱ་ཡི་པགས་པ་ལ། ། གུར་གུམ་གིའུ་ཝང་ཡུང་བས་ནི། ། བྱི་བ་ཆེར་བརྗིད་སེར་པོ་བྲི། ། ཤར་ན་མཛོད་ཕུགས་བལྟས་པར་གཞག ། ཟས་ཀྱི་ལྷག་མས་མཆོད་བྱ་ཞིང་། ། གསོལ་བ་བཏབ་པས་ནོར་རྙེད་འགྱུར། ། པདྨའི་ཟེ་བ་ཀ་ལི་ཀ། ། པྲི་ཡང་ཀུ་ནི་ནོར་རྙེད་དོ། ། འབྲས་བསྲེགས་པས་ཀྱང་ནོར་ཆེན་འཐོབ། ། ཀུ་མུ་ད་ཡི་འབྲས་སོགས་བསྲེགས། ། ལོངས་སྤྱོད་ཆེ་དང་ས་གཞི་འཐོབ། ། པདྨ་ཞོ་དང་སྦྲང་རྩི་མར། ། སྦྱིན་སྲེག་འབུམ་གྱིས་མཆོག་སྩོལ་བ། ། གསུམ་པ་དག་ཀྱང་མཐོང་བར་འགྱུར། ། བིལ་བའི་འབྲས་བུ་མངར་ གསུམ་བཅས། ། འབུམ་ཕྲག་གསུམ་དུ་བསྲེགས་པས་ནི། ། རང་ཉིད་རྒྱལ་པོ་ཆེན་པོར་འགྱུར། ། མར་དང་ཡུངས་ཀར་དཀར་པོས་ནི། ། ནིམ་པའི་ཤིང་ལ་འབུམ་བསྲེགས་ན། ། སྙིང་པོ་རྙིང་པ་རྒྱས་པར་འགྱུར། ། ནས་ལ་སོགས་པ་འབྲུ་རིགས་རྣམས། ། གང་བསྲེགས་གསོལ་བཏབ་ དེ་རྒྱས་འགྱུར། ། གང་འདོད་གོས་ཀྱི་ཁ་དོག་ཅན། ། མེ་ཏོག་བསྲེགས་ན་གོས་རྙེད་འགྱུར། ། སྤོས་ཤིང་བསྲེགས་ན་འཁོར་གཡོག་འཕེལ། ། ཞོ་མར་སེང་ལྡེང་མེ་ལ་སྟོང་། ། བསྲེགས་ན་ནོར་རྣམས་རྙེད་པར་འགྱུར། ། དེ་ནས་དབང་གི་བསྲེག་ལུགས་བཤད། །

ཏིལ་དང་འབྲས་ སོགས་ཕུབ་མ་བསྲེགས། ། བུད་མེད་དབང་དུ་བྱེད་པའོ། ། པྲི་ཡང་ཀུ་ཡི་སྦྱིན་སྲེག་གིས། ། བྱིས་པ་རྣམས་ནི་དབང་དུ་འགྱུར། ། འོ་མ་སྦྲང་རྩི་ཨ་རུ་རའི། ། ཤིང་ལ་བསྲེགས་ན་ལྷ་དབང་བྱེད། ། གསུམ་པོ་དེ་དང་གུ་གུལ་བསྲེགས། ། གནོད་སྦྱིན་རྣམས་ནི་དབང་དུ་འགྱུར། ། མྱ་ངན་ མེད་པའི་ཡམ་ཤིང་གིས། ། གནོད་སྦྱིན་མོ་རྣམས་དབང་དུ་འགྱུར། ། རྒྱལ་པོའི་ཡུངས་ཀར་ཡུངས་མར་བཅས། ། བསྲེགས་པས་རྒྱལ་པོ་དབང་དུ་འགྱུར། ། དེ་ནས་དྲག་པོའི་ལས་གྲུབ་པའི། ། སྦྱིན་སྲེག་ཡང་དག་བཤད་པར་བྱ། ། མིང་བཅས་ཚད་དང་ནིམ་པ་བསྲེགས། ། བསྟན་ སྡང་དགྲ་བོ་མྱུར་དུ་འཆི། ། དགྲ་མིང་དུག་གིས་ནིམ་པ་ལ། ། བྲིས་ཏེ་དུག་དང་ལྷན་ཅིག་ཏུ། ། སྦྲུལ་ཤུན་ཐུམ་པོ་ལྔ་བྱས་ནས། ། ཐོད་པ་ལྔ་ཡི་ནང་བཞག་སྟེ། ། ལྔ་པོ་ཡུངས་མར་གྱིས་བཀང་ནས། ། གསུམ་ནི་སྒྱེད་པུ་གཉིས་བརྩེག་ལ། ། ཁྲོས་པས་གཅིག་ཏུ་སྐྲ་གྲོལ་བས། ། སྔགས་བརྗོད་ཐལ་བར་གྱུར་པར་དུ། ། ཉིན་ཕྱེད་བསྲེགས་ན་དགྲ་འཆི་ངེས། ། འཆི་ལྟས་འདབ་མ་རྩ་བ་ཤུན། ། ར་ཁྲག་ཡུངས་མར་ཚྭ་རྒྱ་སྐྱེགས། ། ཚ་བའི་བུད་ཤིང་ཡམ་ཤིང་ལ། ། བདུན་ཕྲག་མིང་དང་བཅས་པ་བསྲེགས། །

སྟོང་ཕྲག་གཉིས་ཀྱིས་རྟ་ཕྱུགས་འཆི། ། བཞིས་ནི་ བུ་དང་ཆུང་མ་འཆི། ། དྲུག་གིས་ཉེ་དུ་གཉེན་འདུན་བརླག ། བརྒྱད་ཀྱིས་དགྲ་ཡི་རང་སྲོག་འཆད། ། གལ་ཏེ་སྐྱབས་སུ་འོང་གྱུར་ན། ། འོ་མ་སྟོང་བསྲེགས་རྣལ་དུ་སོས། ། ཁྲག་དང་དུག་ཕྱེ་ནིམ་པའི་འབྲས། ། ཡུངས་མར་ལ་སྦགས་བརྒྱ་རྩ་བརྒྱད། ། མྱོས་བྱེད་ལ་བསྲེགས་དགྲ་བོ་འཆི། ། ཡང་ན་རུས་ཕྱེ་ནིམ་པའི་ལྔ། ། རང་གི་ཁྲག་གམ་ཡུངས་མར་སྦག ། ཡང་ན་སྐེ་ཆེ་དུག་དང་ནི། ། ནིམ་བའི་འབྲས་བུས་གསད་པར་བྱ། ། ཡང་ན་གྲི་ཁྲག་གིས་བསྲེགས་པས། ། བྱད་མ་མྱུར་དུ་གསོད་པར་འགྱུར། ། ནིམ་པའི་ལྔ་དང་ར་ཁྲག་དུག ། དྲི་མ་ལྔ་བཅས་གཟུགས་སྙིང་ གར། ། མིང་ཡིག་བཅུག་ནས་ཕུར་བུས་གདབ། ། རིག་སྔགས་བྱད་མ་ཉིད་ལྡོག་འགྱུར། ། རྒྱ་སྐྱེགས་མི་རུས་ཕྱེ་མ་ཡིས། ། མི་ལྤགས་རློན་ལ་དགྲ་གཟུགས་བྲི། ། དུག་དང་སྐེ་ཚེ་ཅུང་ཟད་བྱུགས། ། ནིམ་པའི་མེ་ལ་ཁྲོས་པས་བསྲོ། ། བསྲེགས་པས་ཚ་བའི་རིམས་ཀྱིས་འཆི། ། དཱུར་བ་འོ་མས་སོས་པར་འགྱུར། ། དུག་དང་ནིམ་པ་སྒོག་སྐྱ་དང་། ། མི་རུས་ཕྱེ་བསྲེགས་ཕྱུགས་རྣམས་བརླག ། ཚ་གསུམ་ལན་ཚྭ་དཱུར་རང་སྐྱུར། ། ཡུངས་མར་རོ་སྐྲ་སྦྲུལ་ཤུན་དང་། །

ནིམ་པའི་ལྔ་དང་མི་རུས་ཕྱེ། ། སྐྱེ་ཚེ་དུག་ཕྱེ་སྒོག་བཙོང་དང་། ། སྒོག་སྐྱ་ཚེར་མའི་མེ་ལ་ བསྲེགས། ། དགྲ་བོ་ཁྲག་ཏུ་སྐྱུག་སྟེ་འཆི། ། རྒྱ་སྐྱེགས་ལན་ཚྭ་བ་ལང་མཁྲིས། ། བསྲེགས་ན་མཆིན་གས་ནད་ཀྱིས་འཆི། ། སྒེའུ་གཤེར་ལན་ཚྭ་ཚ་བ་གསུམ། ། གཟུགས་བརྙན་དུར་ཁྲོད་མགལ་དུམ་ལ། ། མགོ་ནས་རྐང་པའི་བར་དུ་བསྲེགས། ། ཐིག་ནག་གིས་ནི་གསོད་ པར་འགྱུར། ། འོ་མ་ཅན་གྱི་ཡམ་ཤིང་ལ། ། དཀར་གསུམ་བསྲེགས་ན་སོས་པར་འགྱུར། ། དྲི་ཆུས་སྤངས་པའི་ས་ལས་ནི། ། ཐབ་ཁུང་བྱས་ཏེ་དུག་གིས་བྱུགས། ། ནིམ་པའི་འདབ་མར་དགྲ་བོའི་མིང་། ། ར་ཁྲག་གིས་བྲིས་རྒྱུས་པས་དཀྲིས། ། ཚ་གསུམ་ཤིང་གི་མེར་ བསྲེགས་པས། ། རྒྱལ་པོ་མྱུར་དུ་འཆི་བར་ངེས། ། དུག་ཁྲག་ལན་ཚྭ་ཚ་བ་གསུམ། ། མིང་བཅས་གཟུགས་བརྙན་ནི་མ་པའི་མེར། ། བསྲེགས་ན་དགྲ་བོ་དམུ་རྫིང་ངམ། ། མཛེ་ནད་ཀྱིས་ནི་གསོད་པར་འགྱུར། ། ཚ་གསུམ་ནི་མ་པ་དུག་དང་དཱུར། ། ཁྲག་ དང་ལན་ཚྭའི་གཟུགས་བརྙན་ནི། ། ལན་ཚྭ་ནི་མ་པ་ཚ་བའི་མར། ། བྱུགས་ནས་ཨརྒའི་ཤིང་ལ་བསྲེགས། ། མཛེ་ནད་ཆེན་པོས་བཟུང་ནས་འཆི། ། ར་ཁྲག་ཚ་གསུམ་ཡུངས་མར་སྤོས། ། ནིམ་པའི་ལོ་མ་ན་ལེ་ཤམ། །

ཡུངས་མར་དུག་བསྲེགས་ཚ་བས་འཆི། ། ན་ལེ་ཤམ་མམ་དུག་དང་ཚྭ། ། དྷ་དུ་ར་ལྔ་ཚ་བ་གསུམ། ། སོལ་བ་ལ་ནི་དགྲ་གཟུགས་བྱ། ། ཡུངས་མར་བྱུགས་ཏེ་བསྲེགས་ན་འཆི། ། ཚ་གསུམ་པ་ཡི་འབྲས་བུ་ཡིས། ། ནིམ་པའི་འདབ་མ་དགྲ་མིང་བྲི། ། ཐོད་པར་དུག་ཡུངས་ལྷན་ཅིག་བཞག ། དྷ་དུ་ར་ལྔ་བཙོས་ ནས་འཆིང་། ། རིག་མ་བྱང་དུ་བལྟས་ནས་ཀྱང་། ། རང་ཉིད་ལྷོ་ཕྱོགས་བལྟ་བར་བྱ། ། ཚངས་པ་ལ་སོགས་ལྷ་ཚོགས་དང་། ། འཇིག་རྟེན་སྐྱོང་བ་རྫུ་འཕྲུལ་ཅན། ། མ་མོ་མཁའ་འགྲོ་ཤ་ཟ་སོགས། ། ས་བཅུའི་དབང་ཕྱུག་བྱང་ཆུབ་སེམས། ། རིག་འཛིན་ཁྲོ་བོའི་རྒྱལ་ པོ་དང་། ། སངས་རྒྱས་དཀྱིལ་འཁོར་ལྷ་རྣམས་གསོན། ། སྡིག་ཅན་ང་རྒྱལ་གདུག་ཅིང་ཁྲོ། ། ཆད་ལྟ་སྔགས་འཕྱ་དཀོན་མཆོག་བཅོམ། ། བསྟན་ལ་སྡང་ཞིང་སེམས་ཅན་འཚེ། ། མཚམས་མེད་ཅན་འདི་བསྒྲལ་དུ་གསོལ། ། རླུང་གིས་འདར་ཞིང་ཆར་གྱིས་གཤེར། ། མེས་གདུང་རྡུལ་ཚུབ་སྐམ་འདིར་སྐྱེ། ། སེང་གེ་མཁའ་ལྡིང་སྟག་ཁྲོ་བོས། ། བཅོམ་ཞིང་འབུ་སྦྲང་བུང་རྒོད་ཀྱིས། ། ཁྲག་འཇིབ་བྱ་ཚོགས་མཁའ་ལ་ཁྱེར། ། མངོན་སྤྱོད་ལས་ཀྱི་བསམ་གཏན་ནོ། ། དེ་ནས་སྣ་ཚོགས་ལས་བཤད་པ། ། མི་རུས་ཕྱེ་མ་ཚེ་སྐྱེ་ཚེ། །

གནོད་སྦྱིན་ འཁྲིག་པ་དུག་ཤིང་ལ། ། ཐ་དད་མིང་བཅས་བསྲེགས་པས་ནི། ། བསྐྲད་དང་དབྱེ་དང་སྨྱོ་བར་བྱེད། ། དཱུར་བ་འོ་མར་བཅས་པས་སོས། ། དྷ་དུར་ཡན་ལག་ལྔ་འབྲས་བུ། ། ཚེར་མའི་མེས་བསྲེགས་སྨྱོ་བར་བྱེད། ། ཚ་གསུམ་ལན་ཚྭས་ཚ་རིམས་བསྐྱེད། ། ཡང་ན་ཤིང་སྐམ་ ལྟ་བུར་སྐམས། ། ཛམ་བའི་ར་དང་རང་སྐྱུར་བཅས། ། དགྲ་བོ་གྲང་བའི་རིམས་ཀྱིས་འདེབས། ། ཁྭའི་སྒྲོ་ཨེ་རཎྜའི་མར་ཁུས། ། བྱུགས་པ་དྷ་དུར་མ་ལ་བསྲེགས། ། ལག་སྟོབས་ཁྭ་ཏ་ལྟ་བུར་ནི། ། དགྲ་བོས་མཐའ་ཀུན་ཏུ་འཁྱམ། ། སྐེ་ཚེ་མི་རུས་ལན་ཚྭ་དུག ། ཡུངས་མར་ ནིམ་པའི་མེ་ལ་བསྲེགས། ། དགྲ་བོ་རྟག་ཏུ་འཐབ་པ་དང་། ། ནད་རྣམས་ཀུན་གྱིས་འདེབས་པར་འགྱུར། ། དུར་ཁྲོད་ཐལ་བ་སོལ་བར་བཅས། ། དགྲ་བོའི་གཟུགས་བྱས་དུམ་བུར་གནོན། ། ཚམ་ངམ་ཕུར་བུར་འདེབས་པ་ནི། ། ཕོལ་མིག་ནད་ངན་སྐྱེད་པར་བྱེད། ། བྱ་རྒོད་ འུག་པ་བྱི་ལ་ཤ། ། ནེའུ་ལེའི་སྤུ་རྣམས་ཁྱེར་བའི་མེར། ། དྲུག་ཅུ་རྩ་བརྒྱད་བསྲེགས་པ་ཡིས། ། ཐུན་གཉིས་མྱུར་དུ་འབྱེད་པར་ངེས། ། ཁྲག་ཅན་རས་ལ་གཟུགས་བྲིས་ན། ། རྐང་གཡོན་སྐེར་མནན་ཚམ་ངམ་བཅས། ། འདོད་བཅས་སྔགས་ནི་དྲག་པོ་ཡིས། །

བརྒྱལ་དང་ རིམས་ནད་མཆེར་ནད་བསྐྱེད། ། དགྲ་ཡི་སྐྲ་དང་རྐང་རྗེས་ས། ། དགྲ་གཟུགས་དུག་དང་སྐེ་ཚེས་བྱུགས། ། ཚེར་མེས་བསྲེགས་ན་རེངས་པར་འགྱུར། ། དགྲ་ཡི་ཕ་རུས་དུག་རང་སྐྱུར། ། གཟུགས་བྱད་ནིམ་པའི་མེར་བསྲེགས་ན། ། དགྲ་བོ་གདོན་ཆེན་ནད་ཀྱིས་འདེབས། ། ཕག་ རྟུག་སྣུ་ཧ་ཨརྒའི་ཤིང་། ། ཚེར་མེས་བསྲེགས་ན་མགོ་འཁོར་འགྱུར། ། ནེའུ་ལེ་བྱི་ལ་བྱི་ཚེར་སྤུ། ། བསྲེགས་ན་བུད་མེད་བུ་བརླག་འགྱུར། ། མི་དང་ནེའུ་ལེ་ཁྭ་རུས་པ། ། ཡུངས་མར་ནིམ་པའི་མེ་ལ་བསྲེགས། ། གྲོང་དང་གྲོང་ཁྱེར་སྐྲོད་པར་བྱེད། ། སྟག་སྤུ་ཐོད་རུས་ འུག་པའི་སྤུ། ། ས་ཧ་མེ་ཏོག་ན་ལེ་ཤམ། ། ནིམ་པའི་ལོ་མ་དུག་བསྲེགས་བྱེད། ། ནིམ་པའི་འབྲས་བུ་དུག་ལན་ཚྭ། དྷ་དུར་འབྲུ་བསྲེགས་ནད་སྐྱེད་བྱེད། ། དུག་ཁྲག་དྷ་དུར་འབྲས་བུ་ཡིས། ། ནིམ་པའི་ཤིང་ལ་དགྲ་མིང་བྲི། ། ཚ་གསུམ་ལན་ཚྭ་ཁྲག་གིས་བྱུགས། ། ལྕགས་སྣོད་ཡུངས་མར་ནང་བཞག་ནས། ། ནིམ་པའི་ཤིང་གི་མེ་ཡིས་བཙོ། ། དགྲ་བོ་ལྷ་དང་འབྱེད་པར་འགྱུར། ། མི་ཁྱི་བྱ་རྒོད་རུས་ཕྱེ་དུག ། སྐེ་ཚེ་ཡུངས་མར་སྦྲུལ་ཤུན་དང་། ། ནིམ་པའི་ལྔ་དང་སྐགས་ལན་ཚྭ། ། ཚེར་མེས་བསྲེགས་ན་ནད་ཀྱིས་འདེབས། །

སྐེ་ཚེ་དུག་ སྐེགས་སྦྲུལ་ཤུན་ཚ་བའི་མར། ། གཟུགས་བྱས་ཚ་བའི་མེ་ལ་གདུང་། ། ཆར་ཆེས་པ་དང་ཐོག་འབབ་འགྱུར། ། འཕགས་པ་རྡོ་རྗེ་ཁྲོ་བོའི་རྒྱལ་པོའི་རྟོག་པ་བསྡུས་པའི་རྒྱུད་ལས་སྦྱིན་སྲེག་གི་ལེའུ་སྟེ་དགུ་པའོ། ། ། ། དེ་ནས་ཚངས་པ་ཁྱབ་འཇུག་སོགས། ། འཁོར་གྱི་དཀྱིལ་འཁོར་ ཐམས་ཅད་ཀྱིས། ། བཞེངས་ཏེ་ཐལ་མོ་སྦྱར་ནས་ཀྱང་། ། སྙན་པས་ཆེད་དུ་འདི་བརྗོད་དོ། ། ཨེ་མ་སངས་རྒྱས་ཐམས་ཅད་ལ། ། ཐབས་དང་ཤེས་རབ་བསམ་དུ་མེད། ། ཐུགས་རྗེས་གྱུར་པའི་ཐུགས་ཀྱིས་ནི། ། མཚུངས་མེད་རྒྱ་ཆེ་དམ་ཆོས་གསུངས། ། དུག་གི་འཇིགས་པས་ས་སྟེང་འཁྲིགས། ། ཉོན་མོངས་མུན་འཇིགས་མེད་པ་ཡི། ། བདུད་རྩི་འོད་བཟང་འདིར་གུས་ན། ། ངན་འགྲོའི་འཇིགས་པ་སྟོང་བར་འགྱུར། ། དེ་ནས་ཚངས་སོགས་འཇིག་རྟེན་སྐྱོང་། ། རྫུ་འཕྲུལ་ལྡན་རྣམས་ཀུན་འདུས་ནས། ། ངོམ་ཞིང་ཆེད་དུ་བརྗོད་པ་འདི། ། སྙན་པའི་ཚིག་གིས་རབ་ཏུ་གསོལ། ། ཨེ་མ་སངས་རྒྱས་ཆེ་བའི་བདག ། སེམས་ཅན་ཀུན་ལ་སྨན་པར་དགྱེས། ། སྐྱོབ་ཆེན་འཇིག་རྟེན་མགོན་པོ་ཡི། ། མཚུངས་མེད་བསམ་གྱིས་མི་ཁྱབ་ཐབས། ། གསུངས་པ་འདི་ལ་གང་གནས་པ། ། འཁོར་བའི་སྡུག་བསྔལ་རྒྱ་མཚོ་སྦྱོང་། །

འགྲོ་ལ་སྨན་མཐོང་བསྒྲུབས་པས་ནི། ། ལྷག་པའི་ བདེ་བ་འབྱུང་བར་འགྱུར། ། དེ་ནས་རྡོ་རྗེ་འཛིན་པ་སོགས། ། བྱང་ཆུབ་སེམས་དཔའི་ཚོགས་རྣམས་ཀྱིས། ། ངོ་མཚར་སྤྱན་ནི་གདངས་ནས་སུ། ། ཆེད་དུ་བརྗོད་པ་འདི་བརྗོད་དོ། ། ཨེ་མ་སངས་རྒྱས་བསམ་མི་ཁྱབ། ། གདོད་ནས་ཐུགས་སུ་འགྲོ་དོན་ཆུད། ། རྟོག་མེད་རང་བཞིན་ལས་གྲོལ་ ནས། ། བསམ་མི་ཁྱབ་པའི་གོ་འཕང་གསུངས། ། འཆང་བྱེད་དང་པོ་ངན་འགྲོ་གཅོད། ། གཉིས་པ་མཐོང་ཆོས་དངོས་གྲུབ་བྱེད། ། དེ་རྗེས་འཇིགས་མེད་ང་ཡི་མེད། ། དོགས་པ་སྤངས་ན་ཟད་པར་གྱི། ། ས་ལ་བཞུགས་ནས་སེམས་ཅན་དོན། ། མ་བསམས་ཐོགས་པ་མེད་པར་བྱེད། ། གསང་ སྔགས་རྒྱལ་པོ་སྐྱོབ་ཀུན་ལ། ། སྦྱངས་ནས་འདོད་དོན་ཀུན་གྲུབ་སྟེ། ། ནམ་མཁའ་ཆུ་གསེར་དག་པ་ལྟར། ། བསྒོམ་པ་བླ་མེད་ཡིད་རྒྱས་བྱེད། ། དེ་ནས་རིག་པ་འཛིན་པའི་ཚོགས། ། མ་ལུས་པ་རྣམས་འདུས་ནས་ཀྱང་། ། གཙོ་ལ་མེ་ཏོག་གཏོར་བྱས་ཏེ། ། ཆེད་དུ་བརྗོད་པ་འདི་བརྗོད་ དོ། ། ཨེ་མ་སངས་རྒྱས་བསམ་མི་ཁྱབ། ། དམ་པའི་ཆོས་ཀྱང་བསམ་མི་ཁྱབ། ། འགྲོ་ལ་ཕན་དང་དོན་བྱེད་པའི། ། ཆོ་གའི་མིང་དང་ཤེས་རབ་དང་། ། སྙིང་རྗེའི་དབྱེ་བས་རྒྱས་གྱུར་ནས། །

མནར་མེད་ལ་སོགས་ངན་འགྲོ་ཡི། ། འཇིགས་རྣམས་ལས་བརྒལ་པདྨ་ལྟར། ། རྣལ་འབྱོར་ཅན་དེ་མཛེས་པར་ སྤྱོད། ། དེ་ནས་མཐུ་སྟོབས་ཆེར་ལྡན་པའི། ། ཕྱོགས་བཅུའི་ཁྲོ་བོ་ཀུན་འདུས་ནས། ། ཤིན་ཏུ་ངོམ་པས་སྙན་ཚིག་གིས། ། ཆེད་དུ་བརྗོད་པ་འདི་བརྗོད་དོ། ། ཨེ་མ་སངས་རྒྱས་ཆོས་ཆེན་དང་། ། དགེ་འདུན་དཀོན་མཆོག་བསམ་མི་ཁྱབ། ། འཁོར་བའི་མུན་པ་ཆེན་པོར་ནི། ། བྱིང་བས་བལྟ་དཀའ་རྟོགས་ པ་ཡིས། ། སྔགས་དང་ཕྱག་རྒྱ་བསམ་མི་ཁྱབ། ། མཐོང་དང་ཐོས་པ་ཙམ་གྱིས་ཀྱང་། ། བལྟ་དཀའ་འབྱུང་པོ་དྲག་པོ་རྣམས། ། ལྷག་པའི་སེམས་ནི་སྐྱེས་པར་འགྱུར། ། དེ་ནས་རིག་པའི་ལྷ་མོ་ཆེ། ། སྤྱན་ལ་སོགས་པ་རྒྱ་ཆེན་རྣམས། ། ངོ་མཚར་གྱུར་ནས་སྤྱན་གདངས་ཏེ། ། སྙན་པས་ཆེད་དུ་འདི་བརྗོད་དོ། ། ཨེ་མ་སངས་རྒྱས་རྨད་དུ་བྱུང་། ། ཨེ་མ་སངས་རྒྱས་དཔའ་བོ་ཆེ། ། ཨེ་མ་སངས་རྒྱས་རབ་ཏུ་ཟབ། ། ཆོས་རྣམས་སྐྱེ་མེད་འགག་པ་མེད། ། སྒྱུ་འཕྲུལ་སྣ་ཚོགས་རོལ་བ་ལྟར། ། སྒྱུ་མ་གདུལ་བྱ་ཚིམ་མཛད་པ། ། སྤྲོས་པ་དང་བྲལ་སྤྲོས་པ་བྲལ། ། སྒྱུ་མ་རབ་ཏུ་འཕེལ་བར་མཛད། ། དེ་ནས་ཕྱོགས་བཅུའི་ སངས་རྒྱས་རྣམས། ། སྟོང་གསུམ་མི་མཇེད་འཇིག་རྟེན་ཁམས། །

གདུལ་བ་དག་ལ་རབ་གཟིགས་ནས། ། འདུལ་མཛད་རྡོ་རྗེ་འཆང་བ་ལ། ། ངོ་མཚར་རྨད་ཀྱི་གསུང་གིས་ནི། ། ཆེད་དུ་བརྗོད་པ་འདིས་བསྟོད་དོ། ། ཨོཾ་ཞེས་དང་པོ་ཕྱག་འཚལ་བཀྲ་ཤིས་སྟེར་བྱེད་པ། ། སེར་སྣ་རྣམ་པར་དག་ནས་ཡོ་ བྱད་དབང་ཐོབ་དང་། ། གནས་དང་གནས་མ་ཡིན་པ་མཁྱེན་པའི་སྟོབས་དང་ནི། ། རབ་དགའ་ཡེ་ཤེས་ཁྲོ་བོ་ཁམས་གསུམ་རྣམ་རྒྱལ་འདུད། ། ཙཎ་ཡིག་དྲི་{བཟངས་,བཟང་}ཙནྡན་བྱུགས་དང་ངང་ཚུལ་མཚུངས། ། ཚུལ་ཁྲིམས་རྣམ་པར་དག་པས་ཚེ་ལ་དབང་བ་དང་། ། ལས་དང་རྣམ་པར་སྨིན་པ་ མཁྱེན་པའི་སྟོབས་དང་ནི། ། དྲི་མེད་ཡེ་ཤེས་ཁྲོ་རྒྱལ་མི་གཡོ་ཕྱག་འཚལ་ལོ། ། ཌ་ཡིག་ཉོན་མོངས་སྒྲིབ་པ་གཏོར་བའི་ཞི་གནས་དང་། ། བཟོད་པ་དག་པ་སྐྱེ་བ་ལ་དབང་ཐོབ་པ་དང་། ། མོས་པ་སྣ་ཚོགས་མཁྱེན་པ་ཞེས་པའི་སྟོབས་དང་ནི། ། འོད་འཕྲོ་ཡེ་ཤེས་ཁྲོ་བོ་དབྱུག་སྔོན་ཕྱག་ འཚལ་ལོ། ། མ་ཡིག་སྒྱུ་འཕྲུལ་ཆེན་པོ་ལྷག་མཐོང་ཆེ་བའི་བདག ། བརྩོན་འགྲུས་དག་པས་སེམས་ལ་ཡང་དག་དབང་ཐོབ་དང་། ། ཁམས་ཀྱི་རྣམ་པ་སྣ་ཚོགས་མཁྱེན་པའི་སྟོབས་དང་ནི། ། འོད་བྱེད་ཡེ་ཤེས་གཤིན་རྗེ་གཤེད་པོ་ཕྱག་འཚལ་ལོ། ། ཧཱ་ཡིག་མ་ཆགས་ ཤེས་བྱའི་སྒྲིབ་འཕྲོག་སྦྱངས་པ་ཆེ། །

བསམ་གཏན་དག་པས་རྫུ་འཕྲུལ་ལ་ནི་དབང་ཐོབ་དང་། ། ཐམས་ཅད་དག་ཏུ་འགྲོ་བའི་ལམ་དག་སྟོབས་དང་ནི། ། སྦྱང་དཀའ་ཡེ་ཤེས་རྟ་མགྲིན་ཁྲོ་བོ་ཕྱག་འཚལ་ལོ། ། རོ་ཡིག་འཁོར་འདས་ནད་བྲལ་ཤེས་དག་ལས་དབང་ཐོབ། ། བསམ་ གཏན་རྣམ་ཐར་ཏིང་འཛིན་དང་ནི་སྙོམས་ཞུགས་པའི། ། ཀུན་ནས་ཉོན་མོངས་རྣམ་བྱང་ལྟ་བ་ཀུན་མཁྱེན་སྟོབས། ། མངོན་གྱུར་ཡེ་ཤེས་འདོད་པའི་རྒྱལ་པོ་ཕྱག་འཚལ་ལོ། ། ཥ་ཡིག་མཉམ་ཉིད་སྡོམ་ཆེན་དབང་ཕྱུག་ཆེན་པོ་རྒྱལ། ། སྟོབས་ཆེན་དག་ལས་མོས་པ་ལ་ནི་དབང་ཐོབ་དང་། ། སྔོན་གྱི་གནས་རྣམས་རྗེས་སུ་དྲན་པ་མཁྱེན་པའི་སྟོབས། ། རིང་དུ་སོང་བའི་ཡེ་ཤེས་བདུད་རྩི་འཁྱིལ་ལ་འདུད། ། ཎ་ཡིག་སྐྱེས་བུ་ཆེན་པོ་སྒྲ་ཆེན་ཀླུ་མཆོག་གཙོ། ། སྨོན་ལམ་དག་པས་སྨོན་ལམ་ཆེ་ལ་དབང་ཐོབ་དང་། ། དབང་པོ་མཆོག་དང་མཆོག་མ་ཡིན་པ་མཁྱེན་པའི་སྟོབས། ། མི་གཡོ་ཡེ་ཤེས་ཁྲོ་བོ་སྟོབས་ཆེན་ཕྱག་འཚལ་ལོ། ། ཧཱུཾ་ཡིག་ཧུ་ལུ་སྤྲིན་གདེངས་འབྲུག་སྒྲ་གད་རྒྱངས་ཅན། ། ཐབས་དག་པས་ནི་ཡེ་ཤེས་ཆེ་ལ་དབང་ཐོབ་དང་། ། འཆི་འཕོ་དང་ནི་གང་ཞིག་སྐྱེ་བ་མཁྱེན་པའི་སྟོབས། ། ལེགས་པའི་བློ་གྲོས་ཡེ་ཤེས་ཁྲོ་བོ་ཧཱུཾ་མཛད་འདུད། །

ཕཊ་སྒྲས་བག་ཆགས་ཀུན་གཏོར་དག་པས་ཤེལ་དང་མཚུངས། ། ཡེ་ཤེས་དག་པས་ཆོས་ལ་དབང་ནི་ཐོབ་པ་དང་། ། ཟག་པ་ཐམས་ཅད་ཡང་དག་ཟད་པས་མཁྱེན་པའི་སྟོབས། ། ཆོས་ཀྱི་སྤྲིན་གྱི་ཡེ་ཤེས་ཁྲོ་བོ་གནོད་མཛེས་འདུད། ། དེ་ནས་ཆོས་རྗེ་ཐུབ་པས་ནི། ། ལྗགས་ཀྱི་དབང་པོ་བཀྲམ་བྱས་ནས། ། འཛུམ་པ་མཛད་པས་རབ་གཟིགས་ཏེ། ། འཁོར་གྱི་དཀྱིལ་འཁོར་ཆེན་པོའི་དབུས། ། ལག་ན་རྡོ་རྗེ་མཐུ་ཆེན་ལ། ། སྙན་པའི་གསུང་གིས་བཀའ་སྩལ་པ། ། མཆོག་ཏུ་བརྟན་པར་རབ་བསྔགས་པ། ། རྡོ་རྗེ་ཐེག་པ་བླ་ ན་མེད། ། མི་གང་བསོད་ནམས་དམན་པའམ། ། མཚམས་མེད་ལ་སོགས་བྱེད་པ་ཡང་། ། རྒྱུད་འདིར་ཞུགས་པའི་དེ་མ་ཐག ། གསེར་འགྱུར་གྱི་ནི་རྩི་བཞིན་དུ། ། ལོག་རྟོག་མ་ལུས་དག་ནས་ཀྱང་། ། རྟོག་མེད་བདེ་བའི་སྐུར་བྱུང་སྟེ། ། རྨི་ལམ་བཟང་པོའི་སེམས་བཞིན་ དུ། ། རྣམ་འཕྲུལ་སྣ་ཚོགས་ཅིར་ཡང་སྣང་། ། མུ་མཐའ་མེད་པའི་འཁོར་བའི་མཚོ། ། བརྒལ་བའི་གཟིངས་ཆེན་བླ་མེད་འདི། ། ཆགས་གསང་མེད་པའི་ཚུལ་དུ་ནི། ། ཁྱོད་ཀྱིས་རྟག་ཏུ་གཟུང་བར་བྱ། ། ལག་ན་རྡོ་རྗེ་སྟོབས་པོ་ཆེས། ། སྟོན་པ་ལ་ནི་འདི་གསོལ་ ཏོ། ། རྒྱུད་འདི་ཕྱུང་མ་ཐག་ཏུ་ནི། ། གདུལ་དཀའ་བ་ནི་རབ་ཏུ་ཞི། །

ས་སྟེང་ནད་དང་གདོན་མུ་གེ ། བར་ཆད་གནོད་པ་ཀུན་དང་བྲལ། ། སླར་ཡང་བསྟན་པ་འཕེལ་བའི་ཕྱིར། ། བརྟན་པོར་བདག་གིས་གཟུང་བར་བགྱི། ། དཔའ་བོ་མཁའ་འགྲོ་དྲག་པོ་རྣམས། ། ཡིད་ཀྱིས་བརྟུལ་ཞུགས་ ཕྱུང་ནས་ཀྱང་། ། རྒྱུད་འདི་འཛིན་པའི་རྗེས་སུ་འབྲང་། ། ལྷ་དང་འཇིག་རྟེན་པ་དང་ནི། ། མ་མོ་སྲིན་མོ་མཁའ་འགྲོ་མ། ། ཤ་ཟ་གནོད་སྦྱིན་སྲིན་མོ་རྣམས། ། རྒྱུད་འདི་འཛིན་པ་སྐྱོང་བར་བྱེད། ། རྒྱུད་འཛིན་ལོངས་སྤྱོད་སྤེལ་བར་བྱེད། ། སྟོན་པས་གསུངས་པ་རྡོ་རྗེ་འཛིན། ། ལེགས་སོ་ ཤིན་ཏུ་ཆེར་ལེགས་སོ། ། རྒྱུད་འཛིན་རྣལ་འབྱོར་ཅན་ཆེན་དེ། ། རྒྱུན་དུ་བསྲུང་ཞིང་བློ་འཕེལ་མཛོད། ། དེ་སྐད་ཀྱི་ནི་གསུང་ཐོས་ནས། ། བྱང་ཆུབ་སེམས་དཔའ་ཉན་ཐོས་དང་། ། མཁའ་འགྲོ་མ་མོ་འཇིག་རྟེན་སྐྱོང་། ། ལྷ་ཀླུ་གནོད་སྦྱིན་དྲི་ཟར་བཅས། ། ཐམས་ཅད་ ལྡན་པའི་འཁོར་དེ་རྣམས། ། དགྱེས་ཏེ་ཐལ་སྦྱར་མངོན་པར་དགའི། ། མི་གཡོ་ཐུགས་རྗེའི་ལྕགས་ཀྱུ་བཟུང་བས་འཁོར་བའི་བཙོན་ར་ནས། ། ལྷ་ཀླུ་འབུམ་ཕྲག་འཚེ་བྲལ་དཀར་པོ་དགེ་བའི་ཀུན་སློང་སེམས། ། སྐྱེ་གནས་བྱང་ཆུབ་རིན་ཆེན་ནོར་ཐོབ་མཛད་པས་རྨད་ བྱུང་མཚར། །

རྒྱལ་བའི་ཚུལ་བསྡུས་བསྟན་པའི་ཆོས་འདི་དམན་ལ་ཤིན་ཏུ་གསང་། ། འཕགས་པ་རྡོ་རྗེ་ཁྲོ་བོའི་རྒྱལ་པོའི་རྟོག་པ་བསྡུས་པ་ལས་མངོན་པར་དགའ་བའི་ལེའུ་སྟེ་བཅུ་པའོ། ། ། ། འཕགས་པ་རྡོ་རྗེ་ཁྲོ་བོའི་རྒྱལ་པོའི་རྟོག་པ་བསྡུས་པ་རྫོགས་སོ། ། ། །