༄༅། ། རྒྱ་གར་སྐད་དུ། ཨཱརྱ་ཏཱ་རཱ་བྷཊྚཱ་རི་ཀ་ནཱ་མ་ཨཥྚ་ཤ་ཏ་ཀཾ། བོད་སྐད་དུ། རྗེ་བཙུན་མ་འཕགས་མ་སྒྲོལ་མའི་མཚན་བརྒྱ་རྩ་ བརྒྱད་པ་ཞེས་བྱ་བ། རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། ། དཔལ་ལྡན་ཡིད་འོང་པོ་ཊ་ལ། ། སྣ་ཚོགས་ཁམས་ཀྱིས་རྣམ་པར་སྤྲས། ། སྣ་ཚོགས་ལྗོན་པ་བཀྲམ་པ་སྟེ། ། སྐྱེ་གཉིས་དུ་མ་སྒྲ་འབྱིན་པ། ། འབབ་ཆུ་སྣ་ཚོགས་ཀུ་ཅོ་ཆེ། ། {རི་དགས་,རི་དྭགས་}སྣ་ཚོགས་འཁྲུགས་པ་སྟེ། ། མེ་ཏོག་སྣ་ཚོགས་རིགས་རྣམས་ཀྱིས། ། ཀུན་ཏུ་དྲི་ཡིས་བཀང་བ་སྟེ། ། སྣ་ཚོགས་ཡིད་འོང་འབྲས་བུར་ལྡན། ། རྐང་པ་དྲུག་པ་གླུ་ཡི་སྒྲ། ། མིའམ་ཅི་ནི་གླུ་སྙན་ལེན། ། གླང་ཆེན་སྨྱོན་པས་ཡང་དག་ཁེངས། ། རིག་འཛིན་གྲུབ་པའི་ཚོགས་རྣམས་དང་། ། དྲི་ཟ་རྣམས་ཀྱང་གླུ་ལེན་པ། ། ཐུབ་པ་འདོད་ཆགས་བྲལ་རྣམས་དང་། ། བྱང་ཆུབ་སེམས་དཔའི་ཚོགས་གཞན་དང་། ། ས་བཅུའི་དབང་ཕྱུག་རྣམས་དང་ནི། ། འཕགས་མ་སྒྲོལ་སོགས་ལྷ་མོ་རྣམས། ། རིག་པའི་རྒྱལ་མོ་སྟོང་རྣམས་ཀྱིས། ། རྟག་ཏུ་ལེགས་པར་བསྟེན་པའོ། ། ཁྲོ་བོའི་རྒྱལ་པོའི་ཆོགས་གཞན་དང་། ། རྟ་མགྲིན་ལ་སོགས་ཀྱིས་བསྐོར་བ། ། སེམས་ཅན་ཀུན་ལ་ཕན་པར་བརྩོན། །

བཅོམ་ལྡན་འདས་ནི་སྤྱན་རས་གཟིགས། ། བཞུགས་ ཏེ་དེ་ཕྱིར་དཔལ་དང་ལྡན། ། པདྨའི་སྙིང་པོ་ཐུབ་པའི་གདན། ། དཀའ་ཐུབ་ཆེན་པོ་དང་ལྡན་པ། ། བྱམས་པ་དང་ནི་སྙིང་རྗེར་ལྡན། ། ལྷ་ཡི་འཁོར་ནི་ཆེན་པོ་ལ། ། ཆོས་གསུང་བར་ནི་ཡང་དག་བཞུགས། ། དེ་རུ་ཉེར་འདུག་ཡང་དག་ལངས། ། ཕྱག་ན་རྡོ་རྗེ་ སྟོབས་པོ་ཆེ། ། མཆོག་ཏུ་སྙིང་རྗེ་དང་ལྡན་པས། ། སྤྱན་རས་གཟིགས་ལ་ཞུས་པ་སྟེ། ། རྐུན་པོ་སྦྲུལ་དང་སེང་གེ་མེ། ། གླང་པོ་སྟག་དང་ཆུས་འཇིགས་པས། ། ཞི་མཛད་ཐུབ་པས་སེམས་ཅན་རྣམས། ། འཁོར་བའི་རྒྱ་མཚོར་བྱིང་པ་རྣམས། ། འཁོར་ བའི་ཞགས་པས་བཅིངས་པ་རྣམས། ། ཆགས་སྡང་གཏི་མུག་དྲི་མ་ལས། ། གང་གིས་སེམས་ཅན་གྲོལ་གྱུར་པ། ། དེ་གསུངས་བདག་ལ་ཐུབ་ཆེན་པོ། ། འཇིག་རྟེན་མགོན་པོས་འདི་སྐད་གསུངས། ། དཔལ་ལྡན་དེ་ནི་སྤྱན་རས་གཟིགས། ། ཕྱག་ན་རྡོ་རྗེ་རབ་ རྟོགས་བྱེད། ། སྙན་པའི་ཚིག་ནི་འདི་སྐད་གསུངས། ། ཉོན་ཅིག་གསང་བའི་རྒྱལ་དབང་པོ། ། སྐྱོབ་པ་འོད་དཔག་མེད་པ་ཡི། ། སྨོན་ལམ་སྟོབས་ཀྱིས་བྱུང་བ་སྟེ། ། ང་ཡིས་འཇིག་རྟེན་མ་རུ་ཤེས། ། སྙིང་རྗེ་ཆེན་པོ་དང་ལྡན་པའི། ། འགྲོ་བ་འདོན་པར་ བརྩོན་པ་མོ། ། ཉི་མ་ཤར་བ་དང་འདྲ་བ། །

ཟླ་བ་ཉ་འདྲ་བྱད་ཀྱི་འོད། ། ལྷ་བཅས་མི་དང་ལྷ་མིན་རྣམས། ། འདི་རྣམས་ཐམས་ཅད་གསལ་བར་བྱེད། ། འཇིག་རྟེན་གསུམ་པོ་གཡོ་བར་བྱེད། ། གནོད་སྦྱིན་སྲིན་པོ་འཇིགས་པར་བྱེད། ། ཕྱག་ན་ཨུཏྤལ་སྔོན་པོ་བསྣམས། ། མ་འཇིགས་མ་འཇིགས་ཞེས་བརྗོད་མ། ། བར་སྣང་དུ་ནི་འཕར་བར་གནས། ། འགྲོ་བ་ཡང་དག་བསྲུང་དོན་དུ། ། མཚོན་ཆའི་བསྐལ་པ་བྱུང་བ་དང་། ། འཇིགས་པ་སྣ་ཚོགས་འཁྲུགས་དོན་དུ། ། རྒྱལ་བ་རྣམས་ཀྱིས་བདག་བསྐྱེད་དེ། ། མིང་རྣམས་དྲན་པ་ཉིད་ཀྱིས་ཀྱང་། ། སེམས་ཅན་ཐམས་ཅད་བདག་གིས་བསྲུང་། ། སྣ་ཚོགས་འཇིགས་པའི་རྒྱ་མཚོ་ལས། ། སེམས་ཅན་ཐམས་ཅད་བདག་གིས་བསྒྲལ། ། དེས་ན་བདག་ལ་འཇིག་རྟེན་དུ། ། རྒྱལ་བའི་ཚོགས་ཀྱིས་སྒྲོལ་མར་བསྒྲགས། ། ཐལ་མོ་སྦྱར་བར་བྱས་ནས་ནི། ། སྤྱན་སྔར་ འདུག་སྟེ་འདི་སྐད་གསོལ། ། གུས་དང་བཅས་པས་ཡང་དག་གནས། ། གང་ཞིག་རྒྱལ་བས་སྔོན་བསྒྲགས་པ། ། གསུངས་ཤིག་མཚན་བརྒྱ་རྩ་བརྒྱད་པ། ། ས་བཅུའི་དབང་ཕྱུག་མགོན་པོ་རྣམས། ། བྱང་ཆུབ་སེམས་དཔའ་རབ་དགའ་བ། ། སྡིག་པ་སྤོང་བྱེད་བསོད་ ནམས་དང་། ། བཀྲ་ཤིས་གྲགས་པ་འཕེལ་བར་བྱེད། ། གཏེར་དང་ནོར་རྣམས་འཕེལ་བྱེད་ཉིད། །

ནད་རྣམས་ཐམས་ཅད་རླག་བྱེད་པ། ། དཔལ་ལྡན་ཤིས་པ་འཇོག་བྱེད་པ། ། ནད་མེད་ཚེ་ནི་འཕེལ་བར་བྱེད། ། སེམས་ཅན་རྣམས་ལ་བྱམས་ བསྒོམས་ནས། ། དེ་དག་སྒྲོགས་ཤིག་ཐུབ་ཆེན་པོ། ། འདི་སྐད་ཞུས་ནས་བཅོམ་ལྡན་འདས། ། སྤྱན་རས་གཟིགས་དབང་རབ་ཏུ་བཞད། ། ཕྱོགས་རྣམས་ཐམས་ཅད་རབ་གཟིགས་ནས། ། འདི་ལྟ་བུ་ཡི་བྱམས་པ་སྤྲོས། ། ཕྱག་ནི་གཡས་པས་ཕྱག་ཐབས་ མཛད། ། བསོད་ནམས་མཚན་ཉིད་ལྡན་པ་ཡི། ། དེ་གསུངས་ཤེས་རབ་ཤིན་ཏུ་ཆེ། ། ལེགས་སོ་ལེགས་སོ་དཀའ་ཐུབ་ཆེ། ། སེམས་ཅན་ཀུན་ལ་གཅིག་ཏུ་བརྩེ། ། སྐལ་བ་ཆེན་པོའི་མི་རྣམས་ཉོན། ། མི་རྣམས་གང་ཞིག་འདི་སྒྲོགས་པ། ། ནོར་གྱི་དབང་ཕྱུག་ ཡང་དག་འགྱུར། ། ནད་རྣམས་ཅད་རྣམ་པར་གྲོལ། ། དབང་ཕྱུག་ཀུན་དང་ཡང་དག་ལྡན། ། དུས་མིན་འཆི་བ་ངེས་པར་འཇོམས། ། འཆི་བ་བདེ་བ་ཅན་འགྲོ་བ། ། དེ་རྣམས་བདག་གིས་བཤད་པར་བྱ། ། ལྷ་ཡི་དགེ་འདུན་བདག་ལ་ཉོན། ། འདི་ལ་རྗེས་སུ་ ཡི་རང་གིས། ། ལེགས་པར་བསྡམས་པར་འགྱུར་ལ་བསྟོད། ། ཨོཾ་དགེ་བ་ཅན་ནི་གཟི་བརྗིད་ཆེ། ། འཇིག་རྟེན་གསོ་བྱེད་སྙན་པ་ཆེ། ། དབྱངས་ཅན་མ་ནི་སྤྱན་ཡངས་མ། ། ཤེས་རབ་དཔལ་དང་བློ་འཕེལ་མ། ། གསོ་བྱེད་མ་དང་རྒྱས་བྱེད་མ། །

སྭཱ་ཧཱ་ཨོཾ་གྱི་རྣམ་པ་ འདོད་གཟུགས་མ། ། སེམས་ཅན་ཀུན་ལ་ཕན་པར་བརྩོན། ། གཡུལ་ལས་སྒྲོལ་བྱེད་རྒྱལ་བ་མོ། ། ལྷ་མོ་ཤེས་རབ་ཕ་རོལ་ཕྱིན། ། འཕགས་མ་སྒྲོལ་མ་ཡིད་འོང་མ། ། རྫ་རྔ་དུང་ཅན་རྒྱས་པ་མོ། ། རིག་པའི་རྒྱལ་མོ་ཚིག་སྙན་མ། ། ཟླ་བའི་གདོང་ཅན་དཀར་ མོ་ཆེ། ། མི་ཕམ་གོས་ནི་སེར་མོ་ཅན། ། སྒྱུ་མ་ཆེན་མོ་དཀར་མོ་ཆེ། ། སྟོབས་པོ་ཆེ་ལ་ཕ་རོལ་ཕྱིན། ། རྩུབ་མོ་ཆེན་མོ་གཏུབ་ཆེན་མོ། ། སྡང་བའི་སེམས་ཅན་རླག་བྱེད་མ། ། རབ་ཏུ་ཞི་བ་ཞི་བའི་གཟུགས། ། རྣམ་པར་རྒྱལ་བ་འབར་བའི་འོད། ། གློག་གི་ཕྲེང་བའི་རྒྱལ་ མཚན་ཅན། ། རལ་གྲི་འཁོར་ལོ་གཞུ་ཐོགས་མཚོན། ། འཚོལ་བྱེད་རེངས་བྱེད་ནག་མོ་ཆེ། ། མཚན་མོ་ནག་མོ་མཚན་སྤྱོད་མ། ། སྲུང་བྱེད་རྨོངས་བྱེད་ཞི་བ་མོ། ། མཛེས་མ་དགེ་མ་དྲ་བའི་ལྡིང་། ། ཚངས་པ་མོ་དང་རིག་བྱེད་མ། ། གསད་པ་མོ་ནི་བྲག་ཕུག་གནས། ། བཀྲ་ཤིས་དོན་བྱེད་ཞི་བ་མོ། ། སྐྱེ་གནས་རིག་བྱེད་ཡིད་མགྱོགས་མ། ། ཐོད་པ་ཅན་ནི་ཤུགས་ཆེན་མོ། ། ཚངས་མ་བདེ་མ་གཞན་མི་རྒྱལ། ། དེད་དཔོན་ཆེན་པོ་སྙིང་རྗེ་གནས། ། ཆུད་ཟོས་ལམ་ནི་རབ་སྟོན་མ། ། མཆོག་སྟེར་སྟོན་བྱེད་སྟོན་པ་མོ། །

བུད་མེད་གཟུགས་ ལ་དཔག་མེད་གནོན། ། རི་ཁྲོད་མ་དང་རྣལ་འབྱོར་མ། ། གྲུབ་མ་གཏུམ་མོ་བདུད་རྩི་མ། ། དེས་མ་ནོར་སྦྱིན་བསོད་ནམས་མ། ། སྐལ་ཆེན་སྐལ་བཟང་མཛེས་སྟོན་མ། ། མཐར་བྱེད་སྐྲག་བྱེད་འཇིགས་བྱེད་མ། ། དྲག་དང་བརྟུལ་ཞུགས་ཆེན་མོ་མ། ། འགྲོ་ལ་གཅིག་ ཏུ་ཕན་པར་བརྩོན། ། སྐྱབས་བྱེད་གུས་ལ་གསོང་པོ་མ། ། ངག་གི་དབང་ཕྱུག་ཞི་ཕྲ་མ། ། རྟག་པར་ཀུན་འགྲོ་རྗེས་འགྲོ་མ། ། དོན་ཀུན་གྲུབ་བྱེད་བཟང་པོ་མ། ། གསད་བྱེད་གསོ་བྱེད་ནོར་སྟེར་མ། ། མི་འཇིགས་བསོད་ནམས་གཽ་ཏ་མ། ། སྤྱན་རས་གཟིགས་དབང་བདག་ ཉིད་སྐྱེས། ། མཚན་བརྒྱ་རྩ་བརྒྱད་འདི་དག་ནི། ། ཕན་པར་བྱེད་པར་གྲགས་པ་སྟེ། ། མཆོག་ཏུ་རྨད་བྱུང་གསང་བ་མོ། ། ལྷ་ཡུལ་ན་ཡང་རྙེད་དཀའ་བའི། ། སྐལ་བཟང་སྐལ་བ་དང་ལྡན་བྱེད། ། དུག་ནི་ཐམས་ཅད་ཉམས་བྱེད་པ། ། ནད་རྣམས་ཐམས་ཅད་ཞི་བྱེད་མ། ། སེམས་ཅན་ཀུན་ལ་བདེ་སྟེར་མ། ། བློ་ལྡན་གང་ཞིག་ལན་གསུམ་ཀློག ། མཉམ་གཞག་གཙང་སྦྲ་བྱས་པ་ཡིས། ། དེས་ནི་དུས་མི་རིང་བ་རུ། ། རྒྱལ་སྲིད་དཔལ་ཡང་ཐོབ་པར་འགྱུར། ། རྟག་ཏུ་སྡུག་པ་བདེ་བར་འགྱུར། ། བཀྲེན་པ་ཕྱུག་པོར་འགྱུར་བའོ། ། རྨོངས་ པ་ཤེས་རབ་ཆེན་པོར་འགྱུར། །

ཡིད་གཞུངས་འགྱུར་བར་ཐེ་ཙོམ་མེད། ། བཅིངས་པ་འཆིང་ལས་གྲོལ་བར་འགྱུར། ། ཐ་སྙད་ལས་ཀྱང་རྒྱལ་བར་འགྱུར། ། དགྲ་བོ་བཤེས་པོར་འགྱུར་བའོ། ། རྭ་ཅན་དང་ནི་མཆེ་བ་ཅན། ། དོག་པའི་འཐབ་མོ་རྒྱལ་དཀའ་བ། ། སྣ་ཚོགས་ འཇིགས་པ་འཁྲུགས་པ་ལས། ། མཚན་ནི་འདི་རྣམས་དྲན་པ་ཡིས། ། འཇིགས་པ་ཀུན་ལས་གྲོལ་བར་བྱེད། ། དུས་མིན་འཆི་ལས་གྲོལ་བྱེད་པ། ། སྐྱེས་བུ་སྙན་པ་ཐོབ་པར་འགྱུར། ། མིར་ནི་སྐྱེ་བ་དོན་དང་བཅས། ། དེ་གཅིག་པུ་ཡི་ཕན་ཡོན་གྱིས། ། གང་ཞིག་འདིར་ནི་སྔར་ལངས་ནས། ། སྐྱེས་བུ་གང་ཞིག་སྒྲོགས་བྱེད་པ། ། དེ་ནི་དུས་རིང་ཚེ་དང་ལྡན། ། མི་ཡི་དཔལ་ནི་དགའ་འགྱུར་ཏེ། ། ལྷ་དང་ཀླུ་དང་གནོད་སྦྱིན་དང་། ། དྲི་ཟ་དང་ནི་ལུས་སྲུལ་པོ། ། འབྱུང་པོ་གཤེད་བྱེད་སྲིན་པོ་དང་། ། མ་མོ་རྩུབ་པའི་ སེམས་ལྡན་པ། ། གནོད་སྦྱིན་མོ་དང་{ཡི་དགས་,ཡི་དྭགས་}བྱེད། ། སྨྱོ་བྱེད་དང་ནི་གནོད་བྱེད་རྣམས། ། གྲིབ་གནོན་དང་ནི་བརྗེད་བྱེད་དང་། ། ཤ་ཟ་ལ་ནི་སོགས་པ་རྣམས། ། རོ་ལངས་སྣ་ཚོགས་ལ་སོགས་དང་། ། སྐུལ་བྱེད་མ་དང་སེམས་སྡང་རྣམས། ། གྲིབ་མ་ ལ་ཡང་འགོམ་མི་བྱེད། ། ཇི་ལྟར་སླར་ནི་མཆོད་པར་འགྱུར། །

སྡང་བའི་སེམས་ཅན་འཆིང་བར་བྱེད། ། ནད་ལ་སོགས་པས་ཐེབས་མི་འགྱུར། ། ཕྱུག་ཅིང་ལོངས་སྤྱོད་ཡོན་ཏན་ལྡན། ། བུ་དང་ཚ་བོ་འཕེལ་བར་འགྱུར། ། རིགས་དང་ལྡན་ཞིང་མཐོང་དགར་ འགྱུར། ། གཟི་བརྗིད་ལྡན་ཞིང་ཚིག་གསལ་བ། ། བློ་ལྡན་སྐྱེ་བ་དྲན་པར་འགྱུར། ། བསྟན་བཅོས་ཐམས་ཅད་རིག་པར་འགྱུར། ། དགེ་བའི་བཤེས་གཉེན་ཡང་དག་ལྡན། ། བྱང་ཆུབ་སེམས་ཀྱིས་ཡང་དག་བརྒྱན། ། གང་དང་གང་དུ་སྐྱེས་པ་དེར། ། རྟག་ ཏུ་སངས་རྒྱས་ཀྱིས་མི་སྤོང་། ། རྗེ་བཙུན་མ་འཕགས་མ་སྒྲོལ་མའི་མཚན་བརྒྱ་རྩ་བརྒྱད་པ། འཕགས་པ་སྤྱན་རས་གཟིགས་དབང་ཕྱུག་གིས་གསུངས་པ་རྫོགས་སོ། །