BO༄༅༅། ། རྒྱ་གར་སྐད་དུ། ཤྲཱི་སཱུརྱ་ཙཀྲ་ཏནྟྲ་རཱ་ཛ་ནཱ་མ། བོད་སྐད་དུ། དཔལ་ཉི་མའི་འཁོར་ལོའི་རྒྱུད་ཀྱི་རྒྱལ་པོ་ཞེས་བྱ་བ། དཔལ་བདེ་བ་ཆེན་པོ་ལ་ཕྱག་འཚལ་ལོ། ། ཨ་ལ་ལ་ཧོ་དཔའ་བོ་གྱེ། ། ངོ་མཚར་རྨད་དུ་བྱུང་བ་ཡི། ། བསྐྱེད་དང་རྫོགས་པ་ཆེན་པོ་སྟེ། ། མ་སྤངས་པ་ དང་ངེས་པ་དག ། མགོན་པོས་བདག་ལ་བཤད་དུ་གསོལ། ། བཅོམ་ལྡན་འདས་ཀྱིས་བཀའ་སྩལ་པ། ། དང་པོ་མ་སྤངས་བཤད་བྱ་སྟེ། ། ཕུང་པོ་ཁམས་དང་སྐྱེ་མཆེད་དག ། བསྐྱེད་པའི་རིམ་པའི་རྒྱུ་མ་སྤངས། ། ཕྱག་མཚན་ཉི་ཟླ་ཡིག་འབྲུ་དག ། བླ་མའི་མན་ངག་རྐྱེན་མ་སྤངས། ། ལུས་ ངག་སྒོ་བསྡམས་དམ་ཚིག་ལས། ། སྐུ་གཉིས་འབྱུང་བ་འབྲས་མ་སྤངས། ། ཞེ་སྡང་རུ་དྲར་སྐྱེ་བའི་ལས། ། ཞེ་སྡང་རང་རིག་བསྐྱེད་པ་དང་། ། ལུས་ཀྱི་དྲི་མ་འཁྲུད་པ་ལས། ། ལས་ཀྱི་དབྱེ་བ་མ་སྤངས་པའོ། ། པུལླི་ར་དང་ཛཱ་ལན་སོགས། ། ནང་དུ་སྤྱི་བོ་སྤྱི་གཙུག་སོགས། ། གནས་ཀྱི་དབྱེ་ པ་མ་བསྐངས་པའོ། ། ཤར་སོགས་བདུད་ཀྱི་སྙིང་ག་རུ། ། ཞབས་གནས་གནས་ཆེན་མ་སྤངས་པ། ། གནས་དེ་ཕྱི་དང་ནང་དུ་ཤེས། ། གནས་ཀྱི་དབྱེ་བ་མ་སྤངས་པའོ། ། གསེར་འགྱུར་རྩི་ཡི་རྣམ་པ་བཞིན། ། ཕུང་སོགས་ལྷ་རུ་འཕོ་བྱེད་པ།
BO། འདི་ནི་འཕོ་བ་མ་སྤངས་པའོ། ། རྒྱུ་ཡི་གནས་ནི་ སྙིང་ག་སྟེ། ། འབྲས་བུའི་གནས་ནི་ཕུང་སོགས་ཏེ། ། མ་སྤངས་པ་ནི་གཉིས་སུ་ཤེས། ། ཕུང་སོགས་སྒྱུ་མར་འཛིན་བྱེད་པ། ། འདི་ནི་རྟེན་པ་མ་སྤངས་པའོ། ། གལ་ཏེ་ནང་དུ་མ་ཟིན་ན། ། ཕྱི་རུ་དེ་ཉིད་ངོ་བོར་བསྒོམ། ། དེ་ཉིད་ཤོར་བ་མ་སྤངས་པའོ། ། གཉེན་པོ་མ་སྤངས་སྒྱུ་མར་བསྒོམ། ། ཕུང་སོགས་ལ་བརྟེན་ལྷ་རྣམས་ལ། ། སྒོ་གསུམ་ངོ་བོ་མ་སྤངས་པ། ། ཐ་མལ་པ་དང་བསྐྱེད་རིམ་གཉིས། ། གོང་འོག་ཁྱད་པར་ཤེས་བྱ་སྟེ། ། སྒྱུ་མས་གཉེན་པོ་མ་སྤངས་པའོ། ། བདུན་པོ་རྣམ་དག་ལ་སོགས་པ། ། སྔོན་དུ་འགྲོ་བ་མ་སྤངས་པའོ། ། ཕུང་སོགས་རྟོག་ པ་ལས་ལོག་ནས། ། ཕྲ་བའི་གནས་སུ་གནས་བྱེད་པ། ། གནས་ཀྱི་ཁྱད་པར་མ་སྤངས་པའོ། ། ལྷ་ཡི་རྣམ་པར་འཇུག་པ་དང་། ། གོང་དུ་སྒྱུ་མར་བཟློག་པ་གཉིས། ། འཕོ་བའི་ཁྱད་པར་མ་སྤངས་ཉིད། ། ཡེ་ཤེས་མེ་ནི་ཆེར་འབར་ཏེ། ། ཕུང་སོགས་སྒྱུ་མར་གང་འཛིན་པ། ། རྟེན་གྱི་ ཁྱད་པར་མ་སྤངས་པའོ། ། མཉམ་གཞག་རྗེས་ཐོབ་ཀུན་འགགས་ཏེ། ། ཐམས་ཅད་རྟེན་དང་བརྟེན་པར་སྣང་། ། ངོ་བོའི་ཁྱད་པར་མ་སྤངས་པའོ། ། དེ་ཉིད་སྒྱུ་མ་རང་བཞིན་མེད། །
BOགཉེན་པོའི་ཁྱད་པར་མ་སྤངས་པའོ། ། ཤེས་རབ་ཕག་མོ་མ་སྤངས་པ། ། ཕྱག་རྒྱ་མ་སྤངས་པ་རུ་ འདོད། ། མ་སྤངས་གཅིག་ནི་གཞན་དང་འདྲ། ། གོང་འོག་ལས་ཀྱི་ཁྱད་པར་རོ། ། ཞེ་སྡང་ཐུགས་ལ་འདོད་ཆགས་གསུང་། ། གཏི་མུག་སྐུ་ཡི་ཕྱག་རྒྱ་སྟེ། ། ཕྱག་རྒྱའི་དབྱེ་བ་མ་སྤངས་པ། ། སྐུ་དང་གསུང་དང་ཐུགས་འཁོར་ལོ། ། བདེ་བ་ཆེན་པོའི་འཁོར་ལོ་དག ། འཁོར་ལོའི་དབྱེ་བ་ མ་སྤངས་པའོ། ། དང་པོ་སྒྱུ་མའི་ཡེ་ཤེས་མེ། ། གཉིས་པ་སྒྱུ་མ་ལྟར་སྣང་མེ། ། གཏུམ་མོའི་དབྱེ་བ་མ་སྤངས་པའོ། ། ཕུང་སོགས་སྒྱུ་མ་ལས་གཡོ་ཞིང་། ། ཕུང་སོགས་སྒྱུ་མས་ཡང་དག་བསྲེག ། ཀུན་རྫོབ་རྟོགས་པའི་རྐྱེན་ཡིན་ཏེ། ། སྒྱུ་མ་ལྟར་སྣང་ལས་གཡོ་ཞིང་། ། སྒྱུ་མ་དེ་ཉིད་སླར་ བསྲེགས་པ། ། དོན་དམ་གཉིས་མེད་རྐྱེན་ཡིན་ཏེ། ། རྐྱེན་གྱི་དབྱེ་བ་མ་སྤངས་པའོ། ། འཁོར་བ་སྤེལ་ཞིང་རྣམ་རྟོག་བསྐྱེད། ། ཀུན་རྫོབ་བདེན་པ་སེམས་ཀྱི་ལས། ། འཁོར་བར་མི་འཁོར་རང་རིག་བསྐྱེད། ། དོན་དམ་སེམས་ཀྱི་ལས་ཡིན་ཏེ། ། ལས་ཀྱི་དབྱེ་བ་མ་སྤངས་པ། ། འདི་དག་མ་སྤངས་ཉི་ ཤུ་བརྒྱད། ། བུམ་པའི་དབང་དང་འབྲེལ་པའོ། ། གསང་དབང་བླ་མའི་ཞལ་ནས་བླང་། ། ཤེས་རབ་ཡེ་ཤེས་གཞན་དུའོ། །
BOབཞི་པའི་མ་སྤངས་ཉི་ཤུ་བརྒྱད། ། རང་རིག་ལྷན་ཅིག་སྐྱེས་པ་ཡི། ། ཆོས་ཉིད་མ་དག་བཞི་པའི་རྒྱུ། ། ཞལ་གྱི་མན་ངག་རྐྱེན་མ་སྤངས། ། འགྲོ་བའི་ཆོས་རྣམས་རང་རིག་མེས། ། བསྲེགས་པ་ལས་མ་སྤངས་པ་ཡིན། ། གོང་འོག་རིམ་པས་དབྱེ་མ་སྤངས། ། ཨ་བདྷཱུ་ཏཱི་ལོག་མིན་གནས། ། གནས་དང་གནས་ཆེན་མ་སྤངས་པ། ། དེ་ཉིད་ཕྱི་དང་ནང་དུ་ངེས། ། ཕྱི་ནང་དབྱེ་བ་མ་སྤངས་པའོ། ། སྟོང་པ་དང་ནི་གཟུང་འཛིན་ཆར། ། འཕོ་བ་མ་སྤངས་ཨ་དང་ཧྃ། ། རྟེན་མ་སྤངས་ ཏེ་རྟོག་པ་ལ། ། སེམས་འཕྲོས་དེ་ཉིད་རང་རིག་སྒོམ། ། ཤོར་བ་མ་སྤངས་པར་རིག་ལ། ། དབང་པོའི་སྒོ་བསྡུ་ངོ་མ་སྤངས། ། རྟོག་བཅོམ་གཉེན་པོ་མ་སྤངས་པའོ། ། རང་རིག་སྤྱི་ལ་སེམས་པ་ལས། ། སྔོན་འགྲོ་མ་སྤངས་མ་སྤངས་བརྒྱད། ། བླ་མའི་ཞལ་ནས་ཤེས་པར་བྱ། ། སྤྱི་དང་རང་གི་མཚན་ ཉིད་ལ། ། འཕོ་བ་མ་སྤངས་རང་རིག་བསྒོམ། ། ཕྱག་རྒྱ་མ་སྤངས་རང་རིག་ལས། ། ཕྲིན་ལས་ཉི་ཤུ་རྩ་བཞི་འབྱུང་། ། ལས་མ་སྤངས་ཏེ་གཞན་རྣམས་ནི། ། བླ་མའི་ཞལ་ནས་ཤེས་པར་བྱ། ། དད་མེད་བླ་མ་མ་བསྟེན་དང་། ། བླ་མ་དམ་པ་མ་རྙེད་དང་། ། མ་སྤངས་ངོ་བོ་མ་ཤེས་པར། ། རང་རིག་ འབྲས་བུ་གང་འདོད་པ། །
BOདེ་དག་མི་ཤེས་དྲི་མས་བསྒྲིབས། ། དཔེར་ན་སྦྲུལ་གྱི་འོ་མ་བཞིན། ། དེ་ནས་ངེས་པ་{བཅྭ་,བཅོ་}ལྔ་ཡང་། ། རྒྱུ་དང་རྐྱེན་དང་གནས་དང་ཡང་། ། གཏད་པ་{གོ་རིམས་,གོ་རིམ་}གྲངས་དང་རིམ། ། ངེས་པ་བདུན་ནི་གཞན་དུ་གསུངས། ། སྔགས་ནི་སྤྲོས་བཅས་སྤྲོས་མེད་ངེས། ། རྐྱེན་ནི་ཡེ་ཤེས་ མེ་རླུང་ངེས། ། རྒྱུ་འབྲས་གནས་ནི་ཨ་ཧྃ་ངེས། ། དབང་བཞི་གོང་འོག་ཁྱད་པར་ངེས། ། སུན་འབྱིན་གཉེན་པོ་ངེས་པ་དང་། ། ངོ་བོ་ངེས་དང་དབྱེ་བ་ངེས། ། ལས་ངེས་པ་དང་{བཅྭ་,བཅོ་}ལྔ་སྟེ། ། དེ་ལས་བྱུང་བའི་ངེས་པ་དག ། བཅུ་བདུན་བླ་མའི་ཞལ་ནས་ཤེས། ། མ་སྤངས་པ་དང་ངེས་པ་ཡི། ། མཚན་ཉིད་ ཡོངས་སུ་ཤེས་གྱུར་ན། ། འཁྲུལ་པ་དང་ནི་འཁྲུལ་པའི་གཞི། ། ཐམས་ཅད་འདི་ཡིས་སྤོང་བར་བྱེད། ། འཇིག་རྟེན་འཇིག་རྟེན་འདས་པ་ཡི། ། དངོས་གྲུབ་ཐམས་ཅད་འདི་ལས་འབྱུང་། ། གོང་བུ་ཆུ་དང་གཟུགས་སུ་གནས། ། དེ་བཞིན་གཟུགས་ལས་འདས་པ་སྟེ། ། གནས་པ་རྣམ་པ་བཞི་རུ་ཡང་། ། རྒྱུད་ནི་ངེས་པ་ཁོ་ན་སྟེ། ། རྒྱུད་ནི་དབང་པོའི་ངོ་བོར་གནས། ། དེ་ཕྱིར་དངོས་གྲུབ་འདོད་པས་ཀྱང་། ། འབད་པས་བླ་མ་མཉེས་བྱ་སྟེ། ། རྒྱུད་ཀྱི་ངོ་བོ་དབང་རྣམས་དང་། །
BOདེ་ཡི་མན་ངག་ཤེས་པར་བྱ། ། བླ་མ་མཉེས་པར་མ་བྱས་ཤིང་། ། དབང་རྣམས་ཐོབ་པར་མ་བྱས་པར། ། ཉན་པ་ལ་སོགས་བྱེད་ པ་ནི། ། འབྲས་བུ་མེད་ཅིང་བརླག་པར་འགྱུར། ། དེ་བས་འབད་དེ་ནན་ཏན་བྱ། ། དཔལ་ཉི་མའི་འཁོར་ལོའི་རྒྱུད་ཀྱི་རྒྱལ་པོ་རྫོགས་སོ། ། ། ། རྒྱ་གར་གྱི་མཁན་པོ་ག་ཡ་དྷ་ར་དང་། ལོཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་ཅིང་ ཞུས་ཏེ་གཏན་ལ་ཕབ་པ། །
Sutraya