BO༄༅༅། ། རྒྱ་གར་སྐད་དུ། ཨཱརྱ་ཨ་ཙ་ལ་མ་ཧཱ་གུ་ཧྱ་ཏནྟྲ། བོད་སྐད་དུ། འཕགས་པ་མི་གཡོ་བའི་གསང་རྒྱུད་ཆེན་ པོ། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྣམ་པར་སྣང་མཛད་ཆེན་པོ་འོག་མིན་གྱི་གནས་ན་རབ་ཏུ་དགྱེས་ཤིང་བདུད་འཇོམས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ སོ། ། དེའི་ཚེ་ན་བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་དང་། རྡོ་རྗེ་ཆོས་དང་། ཕྱག་ན་རྡོ་རྗེ་དང་། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་དང་། རྡོ་རྗེ་གནོད་སྦྱིན་དང་། རྡོ་རྗེ་ཁུ་ཚུར་ལ་སོགས་ཏེ་རབ་ཏུ་དགའ་བའི་ཚོགས་དཔག་ཏུ་མེད་པ་དང་ཐབས་ ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ཀྱིས་བཛྲ་རཀྵ་རཀྵཾ་ཧཱུྃ་ཞེས་གསུངས་ཏེ་རྡོ་རྗེ་ཁྲོ་བོས་ཕྱོགས་མཚམས་གཏམས་སོ། ། བསྲུང་བའི་དོན་དུ་རབ་བརྩོན་ཞིང་། ། བགེགས་ཀྱི་སྦྱོར་བ་བརླག་པར་མཛད། ། ཧཱུྃ་ཕཊ་དེ་ནས་བཅོམ་ལྡན་འདས་ཀྱིས་ཧཾ་ཞེས་གསུངས་ཏེ་རང་ གི་ཐུགས་ཀ་ནས་ཁྲོ་བོའི་རྒྱལ་པོ་མི་གཡོ་བ་ཕྱུང་སྟེ། གཡས་ན་རལ་གྲི་གཡོན་སྡིགས་མཛུབ། ། ཆར་སྤྲིན་ལྟ་བུར་ཤིན་ཏུ་གནག །
BOསྦྲུལ་དང་ཐོད་པས་ཡང་དག་བརྒྱན། ། མི་བསྐྱོད་པས་ནི་བྱིན་བརླབས་ཤིང་། ། བདེ་གཤེགས་འོད་ཟེར་དཔག་མེད་འཕྲོས། ། དངོས་གྲུབ་བདེ་བ་ཀུན་སྩོལ་མཛད། ། ཨོཾ་བཛྲ་སིདྡྷི་ཧཱུྃ། དེ་ནས་ཡང་དག་བཤད་བྱ་བ། ། ཨཱ་ལི་ཀཱ་ལི་རབ་སྦྱོར་ཞིང་། ། ཟླ་བ་རྡོ་རྗེ་སྦྱོར་ལྡན་པས། ། ཡང་དག་རྫོགས་ཏེ་མངོན་སངས་རྒྱས། ། སྣ་ཚོགས་རྡོ་རྗེའི་དབུས་སུ་ནི། ། བརྐྱང་བསྐུམ་ཚུལ་དུ་ཡང་དག་གནས། ། དགའ་ བྱེད་མ་ནི་མདུན་དུ་སྟེ། ། རིན་ཆེན་ཕྲེང་མ་གཡས་སུ་དགོད། ། གླུ་མཁན་མོ་ནི་གཡོན་དུ་སྟེ། ། བརྩོན་འགྲུས་གར་བྱེད་རྒྱབ་ཏུ་གནས། ། འགུགས་བྱེད་མ་ནི་ཤར་དུ་སྟེ། ། རྣམ་པར་འཆིང་མ་ལྷོ་རུ་དགོད། ། གཉིས་མེད་མ་ནི་ནུབ་ཏུ་སྟེ། ། རྣམ་པར་འཕེལ་མ་བྱང་དུ་དགོད། ། འདི་དག་ནི་བཅོམ་ལྡན་འདས་སྐུ་ཡོངས་སུ་རྫོགས་པའི་དམ་ཚིག་གོ། ། འཕགས་པ་མི་གཡོ་བའི་རྒྱུད་གསང་བ་ཆེན་པོ་ལས་གླེང་གཞིའི་ལེའུ་སྟེ་དང་པོའོ། ། ། ། དེ་ནས་བཅོམ་ལྡན་འདས་ཀྱིས་དབང་བསྐུར་བའི་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ ཞུགས་ཏེ། དེ་ནས་བཅོམ་ལྡན་འདས་ཀྱི་ཐུགས་ཀ་ནས་འོད་ཟེར་སྤྲོས་ཏེ་ལྷ་ཐམས་ཅད་ཀྱི་དབུ་ལ་འོད་ཟེར་ཐིམ་པར་གྱུར་ཏེ།
BOརིགས་ཀྱི་བདག་པོས་དབུ་བརྒྱན་པར་གྱུར་ཏོ། ། དེ་ནས་ཡང་དག་བཤད་བྱ་བ། ། དཀྱིལ་འཁོར་ཆེན་པོ་དམ་པ་རུ། ། མཆོད་པའི་ཚོགས་ནི་རྣམ་ པར་བསྟིམ། ། གཟུགས་དང་སྒྲ་དང་དྲི་དང་རོ། ། རེག་བྱ་ལྷ་མོ་དཔག་མེད་དེ། ། མཆོད་པའི་ཚོགས་ཀྱིས་ཡང་དག་མཆོད། ། ཀྱེ་ཀྱེ་མཐའ་གཉིས་རྣམ་པར་མ་གཡོས་ཤིང་། ། སྤྲུལ་པའི་གཟུགས་ཀྱིས་འགྲོ་དོན་དཔག་མེད་མཛད། ། འཇིགས་བྱེད་ཆེན་པོ་འགྲོ་བ་ཀུན་སྒྲོལ་ ཞིང་། ། སྲིད་པ་གསུམ་ན་དགྱེས་པར་གར་མཛད་པ། ། སྲིད་པའི་ཆུ་བོ་སྐེམས་ཤིང་མི་མཐུན་བདུད་རྣམས་འཇོམས། ། སྲིད་པའི་རླུང་གིས་མ་གཡོས་ཐུགས་རྗེ་མི་གཡོ་མགོན། ། རབ་བརྗིད་མི་གཡོ་མགོན་ལ་ཕྱག་འཚལ་བསྟོད། ། བཅོམ་ལྡན་འདས་ཀྱི་བསྟོད་པ་ཆེན་པོའི་ དམ་ཚིག་གོ། ། དེ་ནས་ཡང་དག་བཤད་བྱ་བ། ། རྒྱལ་པོ་རྟག་ལྡན་ཐོད་པ་རུ། ། ལྕགས་ཀྱུ་ལྔ་སོགས་གཞག་པར་བྱ། ། རླུང་དང་མེ་ཡི་དཀྱིལ་འཁོར་བཞག ། ཐོད་པ་རུ་ནི་ཡང་དག་གནས། ། བཅོམ་ལྡན་འདས་ཀྱི་བདུད་རྩི་ཆེན་པོའི་དམ་ཚིག་གོ། ། དེ་ནས་ཡང་དག་བཤད་ བྱ་བ། ། ཚངས་པ་བརྒྱ་བྱིན་གཤིན་རྗེ་དང་། ། ཆུ་བདག་གནོད་སྦྱིན་ཁྱབ་འཇུག་སོགས། ། མེ་དང་སྲིན་པོ་རླུང་གི་ལྷ། ། འབྱུང་པོ་ས་ཡི་ལྷ་མོ་དང་།
BO། ལྷ་མ་ཡིན་སོགས་འཁོར་བཅས་དགུག ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱ་དྱ་ནུཏྤེནྣ་ཏྭཏ་སྭ་ཧཱ། ཨོཾ་ཁཱ་ཧི་ཁཱ་ཧི་ཕེཾ་ཕེཾ་ སྭཱ་ཧཱ། བདུད་རྩི་ཤ་དང་ཁྲག་ལ་སོགས། ། གཏོར་མ་ཐམས་ཅད་སྦྱིན་པར་བྱ། ། འཕགས་པ་མི་གཡོ་བའི་རྒྱུད་གསང་བ་ཆེན་པོ་ལས་མངོན་པར་རྟོགས་པའི་ལེའུ་སྟེ་གཉིས་པའོ། ། ། ། དེ་ནས་ཡང་དག་བཤད་བྱ་བ། ། ཐུགས་ཀྱི་དཀྱིལ་འཁོར་དམ་པ་ནི། ། ཁྲུ་ བཞི་པ་ཡི་ཚད་དུ་བྱ། ། སར་པ་ལས་ནི་བཀལ་ནས་ཀྱང་། ། དཀྱིལ་འཁོར་ཉིས་འཁོར་རིང་ཐུང་ལ། ། མཁས་པས་དཀྱིལ་འཁོར་ཐིག་གདབ་བོ། ། འཁོར་ལོ་ལྟ་བུར་བྱས་ནས་ཀྱང་། ། རྡོ་རྗེ་ཕྲེང་བས་ཡོངས་སུ་བསྐོར། ། གྲུ་བཞིར་བགྱི་ཞིང་སྒོ་བཞིར་བགྱི། ། རྟ་བབས་བཞི་ དང་ཡང་དག་ལྡན། ། དབུས་སུ་རལ་གྲི་ཆེན་པོ་དགོད། ། ཤར་དུ་རྡོ་རྗེ་ཡང་དག་དགོད། ། ལྷོ་རུ་རིན་ཆེན་ཕྲེང་བ་སྟེ། ། ནུབ་ཏུ་ཆོས་ཀྱི་པི་བང་སྟེ། ། བྱང་དུ་རྡོ་རྗེ་རྩེ་གསུམ་མོ། ། སྒོར་ནི་ལྕགས་ཀྱུ་ཞགས་པ་དང་། ། ལྕགས་སྒྲོག་དྲིལ་བུ་མཁས་པས་བཞག ། བཅོམ་ལྡན་འདས་ ཀྱི་དཀྱིལ་འཁོར་ཆེན་པོ་དགོད་པའི་དམ་ཚིག་གོ། ། དེ་ནས་ཆར་པ་མི་འབབ་ན། ། སྟེགས་བུ་གྲུ་བཞིའི་སྟེང་དུ་ཡང་། །
BOདངུལ་གྱི་གཞོང་པ་བཞག་ནས་ཀྱང་། ། བག་ཟན་ལས་ནི་བྱས་པའི་གཟུགས། ། པདྨ་སུམ་བརྩེགས་དག་ཏུ་བྱ། ། སྟེང་དུ་ཀླུ་ཡི་གཟུགས་བཞག་ལ། ། གུར་ གུམ་གྱིས་ནི་བྱུགས་བྱས་ལ། ། མཚམས་སུ་ཨོཾ་དང་པྃ་བཀོད་དེ། ། ཙནྡན་དཀར་པོས་སྦྱིན་བསྲེག་བྱ། ། ཁ་དོག་མང་པོ་སྦྱོར་ལྡན་པས། ། ཀླུ་ཡི་གཟུགས་ནི་ངེས་པར་དགུག ། དེས་ཀྱང་འབབ་པར་མ་གྱུར་ན། ། ཁམ་པའི་གབ་ཚེ་དཀར་པོ་རུ། ། པྲི་ཡང་ཀུ་ཡི་ཁུ་བ་ཡིས། ། རལ་གྲི་བརྒྱད་པའི་འཁོར་ལོ་བྲི། ། རྒྱ་མཚོའི་ངོས་ལས་ས་བླངས་ལ། ། ཀླུ་ཡི་གཟུགས་ནི་མངོན་བྱས་ཏེ། ། ནམ་མཁའ་ལྡིང་གི་ཁུ་བས་བྱུག ། ཏིལ་མར་ལ་ནི་སྦྱིན་བསྲེག་བྱ། ། དེ་ནས་ཡང་དག་བཤད་བྱ་བ། ། ཁམ་ཕོར་སེར་པོའི་ནང་དུ་ནི། ། བསྒྲུབ་བྱ་གཟུགས་ གཞུག་ལྡོང་རོས་ཀྱིས། ། རི་རབ་རྩེ་མོ་བརྒྱད་པ་བྲི། ། དེས་ནི་ཡང་དག་གནས་པར་བྱ། ། ཤིན་ཏུ་རྣོ་བའི་ལྕགས་དག་ལ། ། ཁྲུ་དོ་ཚད་ཀྱི་རལ་གྲི་བྱ། ། མཎྜལ་དཀར་པོའི་སྟེང་དུ་བཞག ། ཟླ་བ་དྲུག་ནི་རིག་པ་བཟླས། ། ཏིལ་མར་གྱིས་ནི་བསྐུས་བྱས་ནས། ། ཟླ་བ་གཟས་ཟིན་ཚེ་ན་ བསྒྲུབ། ། ཐོགས་པའི་མཁའ་ལ་ལྡིང་བར་འགྱུར། ། བདུད་རྩི་ལྔ་དང་ཤ་སྣ་ལྔ། ། གྲིབ་མ་དག་ལ་བསྐམས་བྱས་ཏེ། །
BOལྕགས་གསུམ་དག་གིས་དཀྲིས་བྱས་ཏེ། ། ཤར་བལྟས་ཟས་ནི་སྨྱུང་བར་གནས། ། གཟས་ཟིན་ཚེ་ན་ཁར་གཞུག་བྱ། ། མཉམ་པར་གཞག་སྟེ་ཉི་ཤུ་བཟླས། ། ཁར་བཅུག་གཞན་གྱིས་མངོན་མི་འགྱུར། ། བཅོམ་ལྡན་འདས་དངོས་གྲུབ་ཆེན་པོའི་དམ་ཚིག་གོ། ། དེ་ནས་ཡང་དག་བཤད་བྱ་བ། ། ས་གཞི་དཀར་ལ་ཟླུམ་པ་ལ། ། ཙནྡན་དཀར་པོའི་མེ་སྦར་ཏེ། ། སེར་སྐྱའི་མར་གྱིས་སྦྱིན་བསྲེག་བྱ། ། དངོས་གྲུབ་ཆེན་པོ་ཐོབ་པར་ འགྱུར། ། ཡུངས་ཀར་གྱིས་ནི་སྦྱིན་བསྲེག་བྱ། ། རིག་པ་འཛིན་པའི་དངོས་གྲུབ་འཐོབ། ། ཏིལ་ནག་པོས་ནི་སྦྱིན་བསྲེག་བྱ། ། སྡིག་པ་ཐམས་ཅད་ཞི་བར་འགྱུར། ། དཱུར་བའི་མྱུ་གུས་སྦྱིན་བསྲེག་བྱ། ། ཚེ་ཡི་རིག་འཛིན་ཐོབ་པར་འགྱུར། ། སེང་ལྡེང་དག་ལ་ཕུར་ བ་བྱ། ། གསང་སྔགས་ཉི་ཤུ་གཅིག་བཟླས་ནས། ། འདོད་པའི་གཟུགས་ལ་དབབ་པར་བྱ། ། དགྱེས་པས་དངོས་གྲུབ་སྟེར་བར་འགྱུར། ། འཕགས་པ་མི་གཡོ་བའི་རྒྱུད་གསང་བ་ཆེན་པོ་ལས་དངོས་གྲུབ་ཀྱི་ལེའུ་སྟེ་གསུམ་པའོ། ། ། ། དེ་ནས་བཅོམ་ལྡན་འདས་ ཡོངས་སུ་དགྱེས་ནས་འཇམ་དཔལ་ལ་སོགས་པ་རྣམས་ལ་རྣམ་པར་གཟིགས་ནས། ཨོཾ་ཨཱཿཧཱུྃ་ཞེས་བྱ་བའི་སྒྲ་གསུངས་ཏེ་མི་སྣང་བར་གྱུར་ཏོ། །
BOདེ་ནས་རབ་ཏུ་དགའ་བའི་ཚོགས་ཀྱིས་རང་གི་བདག་པོ་མཐོང་བར་མ་གྱུར་ཏེ། ཕྱོགས་བཞི་ནས་མངོན་དུ་ཕྱོགས་ནས་འདི་ཡིས་ གསོལ་བ་བཏབ་བོ། ། ཨེ་མ་བཅོམ་ལྡན་ངོ་མཚར་ཆེ། ། སྟོང་པའི་ངང་ལ་ཅི་སྟེ་བཞུགས། ། བདག་ནི་ཚངས་སྤྱོད་བྱམས་པ་སྟེ། ། མྱ་ངན་འདས་པ་ཀུན་ནས་སློང་། ། ཨེ་མའོ་བདེ་བ་ཆེན་པོའི་སྐུ། ། ཚིག་ཀུན་གྱིས་ནི་མ་སྤྲོས་པ། ། བདག་ནི་རྗེས་ཆགས་སྙིང་རྗེ་ཆེ། ། འགྲོ་བ་ ཡང་དག་སྒྲོལ་བར་མཛད། ། ཨེ་མ་དྲི་མེད་དག་པའི་སྐུ། ། སྟོང་པའི་ངང་ལ་མ་བཞུགས་པར། ། རབ་ཏུ་དགའ་བས་བདག་ལ་རོལ། ། འགྲོ་བའི་དོན་ལ་རྗེས་ཆགས་བརྗོད། ། ཨེ་མའོ་དོན་ཀུན་གྲུབ་མཛད་པ། ། དག་པའི་ཡེ་ཤེས་དྲི་མེད་སྐུ། ། བདག་གིས་འགྲོ་ཀུན་གཟུང་ བའི་ཕྱིར། ། གཙོ་བོ་ཁྱོད་ནི་ཡང་དག་བཞེངས། ། དེ་ནས་བཅོམ་ལྡན་འདས་རབ་ཏུ་དགྱེས་ཏེ་སྐུ་ཡོངས་སུ་རྫོགས་པར་མཛད་ནས་གསང་སྔགས་ཀྱི་རྒྱལ་པོ་འདི་དག་གསུངས་སོ། ། ཨོཾ་ཨཱརྱ་ཨ་ཙ་ལ་ཧཱུྃ་ཕཊ། ཨོཾ་བཛྲ་ཀཱི་ལི་ཀཱི་ལ་ཡ། སརྦ་བིགྷྣཱན་བན་དྷ་ཡ་ཧཱུྃ་ཕཊ། གསང་ སྔགས་དང་ཕུར་བུའི་སྔགས་སོ། ། ཨོཾ་ན་མཿས་མནྟ་བཛྲ་ཎཱྃ་བཛྲ་ཙཎྜ་མ་ཧཱ་རོ་ཥ་ཎ་སྥོ་ཊ་ཡ། ཧཱུྃ་ཧཱུྃ་ཧཱུྃ་ཏྲ་ཊ་ཧཱུཾ། མྃ་པྃ་ཧྃ་མྃ་ཏ་ཤ་ཧཱུྃ།
BOམ་མ་ཧཱུྃ་ཕཊ་སྭཱ་ཧཱ། ཤིན་ཏུ་རྣོ་བའི་སྔགས་ཏེ་ལས་ཐམས་ཅད་པའོ། ། དེ་ནས་འཁོར་རྣམས་ཀྱིས་གསང་སྔགས་ཀྱི་དོན་ཁོང་དུ་ཆུད་པར་གྱུར་ཏོ། ། འཕགས་པ་མི་གཡོ་བའི་རྒྱུད་གསང་བ་ཆེན་པོ་ལས་གསང་སྔགས་ཀྱི་ལེའུ་སྟེ་བཞི་པའོ། ། ། ། འཕགས་པ་མི་གཡོ་བའི་རྒྱུད་གསང་བ་ཆེན་པོ་རྫོགས་སོ། ། ། །
Sutraya