༄༅༅། ། རྒྱ་གར་སྐད་དུ། མཻ་ཏྲི་སཱུ་ཏྲ། བོད་སྐད་དུ། བྱམས་པའི་མདོ། འཕགས་ པ་དཀོན་མཆོག་གསུམ་ལ་གུས་པས་ཕྱག་འཚལ་ལོ། ། སྟོན་པ་དུས་གཅིག་ན་སེར་སྐྱའི་གཞི་དང་། ནྱ་གྲོ་དྷའི་ཀུན་དགའ་ར་བ་དང་། ཆུ་ཀླུང་རོ་ཧི་ནིའི་འགྲམ་ན་བཞུགས་སོ། ། དེ་ནས་ཚེ་དང་ལྡན་པ་ཤཱ་རིའི་བུས་མ་འོངས་པའི་རྒྱལ་བ་དེའི་ཕྱིར་བཅོམ་ལྡན་འདས་ལ་ཞུས་པ། ཁྱེད་ཀྱི་རྗེས་བསྟན་བློ་ བརྟན་ནི། ། ཅི་འདྲའི་སངས་རྒྱས་སུ་འགྱུར་བར། ། སྤྱན་ལྡན་ཡོངས་སུ་རྒྱས་པར་ནི། ། བདག་ནི་རབ་ཏུ་ཉན་པར་འདོད། ། གནས་བརྟན་ཞུས་པ་གསན་ནས་ནི། ། བཅོམ་ལྡན་འདས་ཀྱིས་འདི་སྐད་གསུངས། ། བསོད་ནམས་ཕུང་པོ་མི་ཉུང་བའི། ། གྲགས་པ་ཆེན་པོ་མི་ཕམ་པའི། ། ཡོན་ ཏན་ཐམས་ཅད་བརྗོད་མི་ནུས། ། མདོར་བསྡུས་ནས་ནི་ལེགས་བཤད་པ། ། ཕྱོགས་གཅིག་ཙམ་ནི་བསྟན་པར་བྱ། ། ཤཱ་རིའི་བུ་ཉོན་ང་ཡི་ཚིག ། འདི་ནི་བསྐལ་པ་བཟང་པོ་སྟེ། ། སྐྱེ་བ་བྱེ་བའི་ལོ་རུ་ནི། ། བྱམས་པ་ཞེས་པའི་མིང་ཉིད་ཀྱིས། ། རྐང་གཉིས་མཆོག་གི་སངས་རྒྱས་སོ། ། ཇི་ལྟར་ང་འདས་ནས་དང་པོར་དུས་ལྔ་འབྱུང་སྟེ། འབྲས་བུའི་བར་གྱི་དུས་དང་། བསྒྲུབ་པའི་བར་གྱི་དུས་དང་། ལུང་གི་བར་གྱི་དུས་དང་།

རྟགས་ཙམ་གྱི་བར་གྱི་དུས་དང་། སྐུ་གདུང་གི་བར་གྱི་དུས་སོ། ། དེ་ལ་འབྲས་བུའི་བར་གྱི་དུས་ནི། སངས་རྒྱས་ཡོངས་སུ་མྱ་ངན་ལས་འདས་ནས། ལོ་སྟོང་ཕྲག་གཅིག་གི་ནང་དུ་རྟོགས་པ་བསྐྱེད་པར་ནུས་སོ། ། དེ་སོང་ཞིང་སོང་བའི་དུས་སོ། ། ཕྱིར་མི་འོང་བ་རྣམས་དང་། ལན་ཅིག་ཕྱིར་འོང་བ་དང་། རྒྱུན་དུ་ཞུགས་པའོ། ། དེ་རྣམས་ཡོད་པ་ན་འབྲས་བུའི་བར་གྱི་དུས་མེད་ཅེས་བརྗོད་པར་མི་བྱའོ། ། ལྷག་མ་ནི་རྒྱུན་དུ་ཞུགས་པ་ སྟེ། དེ་འདས་ནས་འབྲས་བུའི་བར་གྱི་དུས་ནུབ་པ་ཞེས་བྱའོ། ། འདི་ནི་འབྲས་བུའི་བར་གྱི་དུས་ནུབ་པ་ཞེས་བྱ་བ་ཡིན་ནོ། ། བསྒྲུབ་པའི་བར་གྱི་དུས་ཞེས་བྱ་བ་ནི། ཞི་གནས་དང་ལྷག་མཐོང་གི་ལམ་གྱི་འབྲས་བུ་བསླབ་པར་མི་ནུས་པར། ཕམ་པ་བཞི་པོ་བསྲུང་བར་ནུས་པ་ཙམ་མོ། ། སོང་ཞིང་སོང་བའི་དུས་སུ། ཕམ་པ་བཞི་པོ་ཉིད་བསྲུང་བ་ཙམ་མོ། ། ཕམ་པ་བཞི་པོ་སྲུང་བར་བྱེད་པ་ནི། དགེ་སློང་རྣམས་སྟོང་ཕྲག་གཅིག་གི་ནང་ན་བརྒྱ་ཙམ་ཡོད་ན་ཡང་བསྒྲུབ་པའི་བར་གྱི་དུས་ནུབ་པ་ཞེས་མི་བྱའོ། ། བརྒྱའི་ནང་ན་དགེ་སློང་གཅིག་ཙམ་ཡོད་པ་ལས་སྡོམ་པ་ ཞིག་པ་དང་། ཤི་བ་ན་བསྒྲུབ་པའི་བར་གྱི་དུས་ནུབ་པ་ཞེས་བྱའོ། །

འདི་ནི་བསྒྲུབ་པའི་བར་གྱི་དུས་ནུབ་པ་ཞེས་བྱའོ། ། ལུང་གི་བར་གྱི་དུས་ནུབ་པ་ཞེས་བྱ་བ་ནི། སངས་རྒྱས་ཀྱི་གསུང་རབ་སྡེ་སྣོད་གསུམ་པོའི་དོན་མི་གོ་ཞིང་སྒྲ་ཙམ་ཀློག་པ་དང་། པོ་ཏི་ཡོད་པའི་བར་ནི་ལུང་གི་བར་གྱི་དུས་ཡོངས་ སུ་རྫོགས་པ་ཞེས་བྱའོ། ། སོང་ཞིང་སོང་བའི་དུས་སུ་རྩོད་པའི་དུས་ཀྱི་རྒྱལ་པོ་རྣམས་ཆོས་མ་ཡིན་པ་བྱེད་པར་འགྱུར་རོ། ། བློན་པོ་ལ་སོགས་པ་རྣམས་ཀྱང་ཆོས་མ་ཡིན་པ་བྱེད་པར་འགྱུར་ཏེ། དེ་ནས་ཡུལ་འཁོར་རྣམས་དང་། ལྗོངས་རྣམས་ཀྱང་དེ་བཞིན་ནོ། ། དེ་རྣམས་ཀྱི་ཆོས་མ་ཡིན་ པའི་རྒྱུ་ཡིས་ལྷ་རྣམས་ཆར་ལེགས་པར་མི་འབེབས་སོ། ། འབྲུ་རྣམས་ལེགས་པར་མི་སྨིན་ནོ། ། དེ་རྣམས་ཀྱི་འབྲུ་མ་སྨིན་པས་དགེ་སློང་གི་དགེ་འདུན་ལ་བཟའ་བ་སྟེར་མི་ནུས་སོ། ། དགེ་སློང་རྣམས་ཀྱིས་ཁ་ཟས་མ་རྙེད་པས་སློབ་མ་དང་ཡང་སློབ་རྣམས་འཛིན་པར་མི་ནུས་སོ། ། སོང་ཞིང་ སོང་བའི་དུས་སུ་ལུང་གི་བར་གྱི་དུས་དམན་པའོ། ། དང་པོ་ནི་རབ་ཏུ་བྱེད་པ་ཆེན་པོ་ཉམས་པར་འགྱུར་རོ། ། དེ་ནུབ་ནས་ཡ་མ་ཀྃ་གི་ཚིགས་སུ་བཅད་པ་དང་། གཞི་དང་གང་ཟག་དང་གདགས་པ་དང་། སྐུ་གདུང་གི་གཏམ་དང་། རྣམ་འབྱེད་དང་།

ཆོས་བསྡུ་བ་ནུབ་པར་འགྱུར་ བའོ། ། ཆོས་མངོན་པའི་སྡེ་སྣོད་ནུབ་ནས། མདོ་སྡེའི་སྡེ་སྣོད་ནུབ་པར་འགྱུར་རོ། ། དེ་ནས་ཨྃ་ག་ཕྱི་མའི་སྡེ་པ་ནུབ་པར་འགྱུར་རོ། ། ཨྃ་ག་ཕྱི་མའི་སྡེ་པ་ནུབ་ནས། ཡང་དག་པར་ལྡན་པའི་སྡེ་པ་ནུབ་པར་འགྱུར་རོ། ། བར་མའི་སྡེ་པ་དང་རིང་པོའི་སྡེ་པ་ནུབ་པར་འགྱུར་རོ། ། རིང་པོའི་སྡེ་པ་ ནུབ་ནས་འདུལ་བ་དང་བཅས་པའི་སྐྱེས་རབས་གནས་སོ། ། འདུལ་བའི་སྡེ་སྣོད་ལ་ཡང་ངོ་ཚ་དང་ལྡན་པ་ཙམ་འཛིན་ནོ། ། སོང་ཞིང་སོང་བའི་དུས་སུ་སྐྱེས་པའི་རབས་ཙམ་ཡང་འཛིན་པར་མི་ནུས་སོ། ། དང་པོ་ཐམས་ཅད་སྒྲོལ་གྱི་སྐྱེས་པའི་རབས་ནུབ་པར་འགྱུར་རོ། ། ཐ་མར་ལོ་མ་མེད་པའི་སྐྱེས་པའི་ རབས་ནུབ་པར་འགྱུར་རོ། ། སྐྱེས་རབས་རྣམས་ནུབ་ནས་འདུལ་བའི་སྡེ་སྣོད་འབའ་ཞིག་འཛིན་ནོ། ། སོང་ཞིང་སོང་བའི་དུས་སུ། མི་གང་ཞིག་གིས་སངས་རྒྱས་ཀྱི་གསུང་རབ་ཀྱི་ཚིགས་སུ་བཅད་པ་གཅིག་ཙམ་དར་བར་བྱེད་ན། ལུང་གི་བར་གྱི་དུས་ནུབ་པ་མེད་དོ། ། གང་ཞིག་རྒྱལ་པོ་ཆོས་ལ་ དད་པའི་དུས་སུ་གླང་པོ་ཆེའི་རྒྱབ་ཏུ་གསེར་གྱི་ཟ་མ་ཏོག་གཅིག་བཞག་སྟེ།

ནོར་སྟོང་ཕྲག་གཅིག་དེ་རུ་བཅུག་ནས་སངས་རྒྱས་ཀྱིས་གསུངས་པའི་ཚིགས་སུ་བཅད་པ་གཅིག་གང་གིས་ཤེས་པ་དེས་ནོར་སྟོང་ཕྲག་དེ་ལོང་ཞེས་གྲོང་ཁྱེར་གྱི་དབུས་སུ་རོལ་མོའི་སྒྲ་ལན་གསུམ་བསྒྲགས་ནས་དེ་ སྐད་བརྗོད་དེ། དེ་ལེན་པར་མི་ནུས་པ་ན་ནོར་སྟོང་ཕྲག་དེ་རྒྱལ་པོའི་མཛོད་དུ་ཡང་འཇོག་གོ། ། དེའི་དུས་ནི་ལུང་གི་བར་གྱི་དུས་ནུབ་པའི་དུས་སུ་འགྱུར་རོ། ། འདི་ནི་ལུང་གི་བར་གྱི་དུས་ནུབ་པའི་དུས་ཞེས་བྱ་བ་ཡིན་ནོ། ། སོང་ཞིང་སོང་བའི་དུས་སུ། ཆོས་གོས་འཛིན་པ་དང་། ལྷུང་ བཟེད་འཛིན་པ་དང་། གཅེར་བུ་པའི་དགེ་སྦྱོང་དང་འདྲ་བར་ཆག་ཚང་ཀུ་བའི་སྣོད། སློང་བའི་སྣོད་དང་། ལག་པའི་རྩེ་མོ་ལ་འཕྱང་བའི་ཚུལ་དང་འདྲ་བ་དང་། དྲ་བའི་ནང་དུ་ཁྱེར་ནས་འགྲོ་བའོ། ། སོང་ཞིང་སོང་བའི་དུས་སུ། གོས་ངུར་སྨྲིག་གིས་བདག་ལ་ཅི་བྱེད། ཅུང་ ཟད་ཆོས་སུ་བྱས་པའི་དུམ་བུ་ལག་པའམ། མགྲིན་པའམ། རྣ་བ་རྣམས་སུ་འམ། སྐྲ་རྣམས་ལ་འགེབས་སོ། ། བག་མ་ལེན་པ་དང་། སོ་ནམ་དང་། ཚོང་ལ་སོགས་པ་བྱས་ནས། འཚོ་བའི་ཕྱིར་དུ་སྤྱོད་ཅིང་འགྲོ་བར་བྱེད་དོ། ། དེའི་ཚེ་ཡོན་སྟེར་ཅིང་དགེ་ འདུན་གྱི་ཆེད་དུ་དེ་ཐམས་ཅད་སྟེར་བར་བྱེད་དེ།

དེའི་ཚེ་ངས་ཀུན་དགའ་བོ་དགེ་འདུན་གྱི་ཡོན་གྱི་འབྲས་བུ་ནི་གྲངས་མེད་པར་བཤད་དོ། ། སོང་ཞིང་སོང་བའི་དུས་སུ། འདི་ཅི་བདག་གི་དོན་དུ་ངུར་སྨྲིག་གི་དུམ་བུ་བཏོགས་ནས་དགོན་པའམ་ནགས་ཚལ་དུ་སྐྱུར་བར་བྱེད་དོ། ། དེ་ རྣམས་ཀྱི་དུས་སུ་རྟགས་ཙམ་འཛིན་པའི་བར་གྱི་དུས་ནུབ་པར་འགྱུར་རོ། ། འདི་ནི་རྟགས་ཙམ་འཛིན་པའི་བར་གྱི་དུས་ནུབ་པའི་དུས་ཞེས་བྱ་བ་ཡིན་ནོ། ། དེ་ནས་ཡང་དག་པར་རྫོགས་པའི་སངས་རྒྱས་ཀྱི་བསྟན་པ་ལོ་སྟོང་ཕྲག་ལྔ་པ་ལ་རྙེད་པ་དང་བཀུར་སྟི་ལ་སོགས་པའི་རྙེད་པ་ཆུང་ ངོ་། ། སྐུ་གདུང་རྣམས་རྙེད་བཀུར་བྱེད་པའི་གནས་སུ་འགྲོ་བར་བྱེད་དོ། ། སོང་ཞིང་སོང་བའི་དུས་སུ། གནས་ཐམས་ཅད་དུ་བཀུར་སྟི་དང་བསྟི་སྟང་མ་ཐོབ་ནས། བསྟན་པ་ཐ་མའི་དུས་སུ་ཀླུའི་ཡུལ་དང་། ལྷའི་འཇིག་རྟེན་དང་། ཚངས་པའི་འཇིག་རྟེན་གྱི་གནས་ཐམས་ཅད་ནས་ འོངས་ནས། སྐུ་གདུང་ཐམས་ཅད་བྱང་ཆུབ་ཀྱི་སྙིང་པོ་ཁོ་ནར་བསྡུས་ཏེ་སངས་རྒྱས་ཀྱི་སྐུ་རུ་གྱུར་ནས། གཤིན་རྗེ་རྫུ་འཕྲུལ་དུ་མ་སྟོན་པ་དང་འདྲ་བར་གཞན་ལ་སྟོན་ནོ། ། དེའི་གནས་སུ་སེམས་ཅན་མིར་གྱུར་པའི་མིང་ཡང་མེད་དོ། །

སྟོང་ཕྲག་བཅུའི་ལྷའི་འཇིག་རྟེན་གྱི་ཁོར་ཡུག་གི་བར་ ཐམས་ཅད་འདུས་ནས། དེ་རིང་སྟོབས་བཅུ་པ་ཡོངས་སུ་མྱ་ངན་ལས་འདའ་བར་བྱེད་དོ། ། དེང་ནས་བཟུང་ནས་མུན་ནག་ཏུ་གྱུར་ཏོ། ། ཞེས་ངུ་བར་བྱེད་དོ། ། སྐུ་གདུང་ཐམས་ཅད་ལ་མེའི་ཁམས་ལངས་ནས་དེའི་སྐུ་ལུས་ལྷག་མ་མེད་པར་སྲེག་པར་བྱེད་དོ། ། འདི་ནི་སྐུ་གདུང་གི་བར་ གྱི་དུས་ནུབ་པ་ཞེས་བྱ་བ་ཡིན་ནོ། ། དེ་ནས་ལོ་སྟོང་ཕྲག་ལྔ་པོ་འདིར་བསྟན་པ་ནུབ་པར་གྱུར་ནས་འཇིག་རྟེན་པ་རྣམས་ལ་མི་དགེ་བ་ལྷག་པར་འཕེལ་བར་བྱེད་དོ། ། ཞེས་བྱ་བའི་དོན་ནོ། ། མི་རྣམས་ལ་ངོ་ཚ་དང་ཁྲེལ་མེད་པར་འགྱུར་ཞིང་མ་དང་། བུ་མོ་དང་། སྲིང་མོ་ལ་སོགས་པའི་ འདུ་ཤེས་མེད་པར་འགྱུར་རོ། ། ཕག་དང་ཅེ་སྤྱང་ལ་སོགས་པ་དང་འདྲ་བར་ངོ་ཚ་མེད་པར་འགྱུར་རོ། ། དེ་ནས་མི་དགེ་བ་ལ་སྦྱོར་ཞིང་ཚེ་བྲི་ནས་ཚེ་ལོ་བཅུ་པར་འགྱུར་རོ། ། ལོ་ལྔ་པའི་ཁྱེའུ་ལ་ལོ་ལྔ་པའི་བུ་མོ་བག་མར་ལེན་ནོ། ། ཡང་ལོ་ལྔའི་ནང་ཉིད་དུ་བུ་དང་བུ་མོ་དང་ཚ་བོ་དང་ ཚ་མོའང་འབྱུང་ངོ་། ། དེའི་དུས་སུ་མཚོན་གྱི་བསྐལ་པ་བར་མ་འབྱུང་བར་འགྱུར་རོ། ། བསྐལ་པ་བར་མ་གསུམ་སྟེ། མུ་གེའི་བསྐལ་པ་བར་མ་དང་། ནད་ཀྱི་བསྐལ་པ་བར་མ་དང་།

མཚོན་གྱི་བསྐལ་པ་བར་མའོ། ། དེ་ལ་གང་གི་ཚེ་འཇིག་རྟེན་གྱི་སེམས་ཅན་རྣམས་ལ་འདོད་པ་ ལྷག་པར་སྐྱེས་ནས་མུ་གེའི་བསྐལ་པ་བར་མར་འགྱུར་རོ། ། གང་གི་ཚེ་གཏི་མུག་ལྷག་པར་ཆེ་སྟེ། ནད་ཀྱི་བསྐལ་པ་བར་མར་འགྱུར་རོ། ། གང་གི་ཚེ་སྐྱོན་དུ་གྱུར་པ་དེའི་དུས་སུ་མཚོན་གྱི་བསྐལ་པ་བར་མར་འགྱུར་རོ། ། མུ་གེའི་བསྐལ་པ་བར་མས་སེམས་ཅན་རྣམས་བརླག་པར་བྱས་ནས་ {ཡི་དགས་,ཡི་དྭགས་}སུ་སྐྱེ་བར་འགྱུར་རོ། ། ནད་ཀྱི་བསྐལ་པ་བར་མས་སེམས་ཅན་རྣམས་བརླག་པར་བྱས་ནས་དུད་འགྲོར་སྐྱེ་བར་བྱེད་དོ། ། མཚོན་གྱི་བསྐལ་པ་བར་མས་སེམས་ཅན་རྣམས་བརླག་པར་བྱས་ནས་དམྱལ་བར་སྐྱེ་བར་འགྱུར་རོ། ། དེའི་ཚེ་མི་རྣམས་ཕན་ཚུན་དུ་{རི་དགས་,རི་དྭགས་}ཀྱི་འདུ་ཤེས་དང་ བཅས་པ་ཐོབ་པར་གྱུར་ནས་མཚོན་སོ་གཅིག་པ་དང་། མཚོན་སོ་གཉིས་པ་དང་། སྤུ་གྲིའི་སོ་དང་འདྲ་བའི་མཚོན་ཆ་རྣམས་བཟུང་ནས་ཕན་ཚུན་གསོད་པར་བྱེད་དོ། ། དེ་རྣམས་སུ་མཁས་པ་གང་ཞིག་དེས་འཇོམས་པར་ཐོས་ནས་རིའི་སུལ་ལ་སོགས་པར་ཞག་བདུན་གྱི་ཁ་ཟས་བཟུང་སྟེ་ ཡིབ་ནས་སྡོད་དོ། ། དེ་རྣམས་སུ་མ་ཡིབ་པའི་སེམས་ཅན་ལྷག་མ་རྣམས་ཕན་ཚུན་དུ་རྡེག་ཅིང་གསོད་དོ། །

ས་གཞི་ཐམས་ཅད་ཤ་དང་ཁྲག་ཏུ་འགྱུར་རོ། ། དེའི་དུས་སུ་སྤྲིན་ཆེན་པོ་འདུས་ནས་ཆར་འབེབས་པར་བྱེད་དོ། ། ལྷ་ཡིས་ཆར་བབ་པའི་རྗེས་སུ་དྲི་ཞིམ་པའི་ཆར་འབབ་ཅིང་ འབབ་པར་བྱེད་དོ། ། དེ་རྣམས་ཀྱི་དུས་སུ་གནས་ཐམས་ཅད་ཡིད་དུ་འོང་བར་འགྱུར་རོ། ། གནས་ཐམས་ཅད་དག་པར་གྱུར་ནས་འབྲས་ཤུན་པ་ཅན་གྱི་ཆར་འབབ་ཅིང་འབབ་པར་འགྱུར་རོ། ། འབྲས་ཤུན་པ་ཅན་གྱི་ཆར་ཕབ་པའི་རྗེས་སུ་འབྲས་ཤུན་པ་མེད་པའི་ཆར་འབབ་ཅིང་འབབ་པར་ འགྱུར་རོ། ། དེའི་རྗེས་སུ་གོས་དང་རྒྱན་གྱི་ཆར་འབབ་ཅིང་འབབ་པར་བྱེད་དོ། ། དེའི་མཐར་པུས་མོ་ནུབ་ཙམ་གྱི་ཚད་དང་མཉམ་པའི་རིན་པོ་ཆེ་སྣ་བདུན་གྱི་ཆར་འབབ་ཅིང་འབབ་པར་བྱེད་དོ། ། དེའི་ཕྱིར་བཅོམ་ལྡན་འདས་ཀྱིས་བཀའ་སྩལ་པ། དྲི་ཞིམ་པ་ཡི་ཆར་འབབ་ཅིང་། ། ཤུན་ ཅན་ཤུན་མེད་འབྲས་ཀྱི་ཆར། ། གོས་དང་རྒྱན་གྱི་ཆར་འབབ་པ། ། དེ་ལྟར་དགའ་ཚལ་མཛེས་པ་བཞིན། ། རིན་ཆེན་སྣ་བདུན་མ་ལུས་པའི། ། དེ་ཡི་གནས་སུ་ཆར་འབབ་བོ། ། གནས་ཀུན་གང་བར་བྱས་ནས་ནི། ། དེ་ཚེ་དགའ་ཚལ་མཛེས་པ་བཞིན། ། དེ་རྣམས་འདས་ ནས་མི་ཡིབ་པ་རྣམས་འཐོན་ཏེ། དེ་རྣམས་འཐོན་ནས་ཕན་ཚུན་དུ་འཁྱུད་པ་དང་། ངུ་བ་དང་།

ཚུལ་ཁྲིམས་ལྔ་ལ་སོགས་པའི་དགེ་བའི་ཆོས་རྣམས་རྗེས་སུ་དྲན་པར་བྱས་ནས་རྫོགས་པར་རྩོམ་མོ། ། དེ་ནས་ཚེ་ལོ་བཅུ་པའི་མི་རྣམས་ལས་སྐྱེས་པའི་བུ་དང་བུ་མོ་ཚེ་ལོ་ཉི་ཤུ་པར་ འཕེལ་ལོ། ། དེ་ནས་མི་རྣམས་ལ་ལྷག་པར་ཆོས་འཕེལ་བས་{གོ་རིམས་,གོ་རིམ་}བཞིན་དུ་ཚེ་འཕེལ་ཏེ་ཚེ་ལོ་གྲངས་མེད་པར་འགྱུར་རོ། ། དེའི་ཚེ་སེམས་ཅན་རྣམས་ལ་རྒས་པ་དང་འཆི་བ་མི་མཐོང་བར་འགྱུར་རོ། ། དེ་ལྟར་སེམས་ཅན་གཞན་ཡང་བག་ཡོད་པར་འགྱུར་ཏེ། དམྱལ་བའི་སྡུག་ བསྔལ་ཞེས་བྱ་བ་ནི་ཅི་ཞེས་སེམས་ཅན་རྣམས་སེམས་པ་མེད་དོ། ། དེ་ནས་ཚེ་ལོ་གྲངས་མེད་པ་རྣམས་འབྲི་བར་བྱེད་དོ། ། སྔར་བཞིན་དུ་བྲི་ནས་ཚེ་ལོ་བརྒྱད་ཁྲི་པར་འགྱུར་རོ། ། དེའི་དུས་སུ་འཛམ་བུའི་གླིང་ཐམས་ཅད་དུ་ལྷའི་བུ་མོའི་སྐལ་བ་དང་འདྲ་བར་བུད་མེད་དང་། དེ་ལྟར་ སྐྱེས་པ་དང་བཅས་པས་གང་བར་འགྱུར་རོ། ། ལྷའི་ཆར་པ་ཟླ་བ་ཕྱེད་དུ་འབབ་པ་དང་། ཞག་བཅུ་དང་། ཞག་ལྔ་དང་། ཉིན་ཞག་ཕྱེད་དུ་སའི་བཅུད་འཕེལ་བར་འགྱུར་རོ། ། དེའི་ཚེ་ས་གཞི་ཐམས་ཅད་ཀྱི་ཆ་མཉམ་པ་དང་། ཚེར་མ་དང་ཤིང་རད་རོད་མེད་ཅིང་། གྲོང་ཁྱེར་ལ་ ཕྱོགས་བཞིའི་སྒོ་དང་ལྡན་པ་དང་།

གྲོང་ཁྱེར་གྱི་དབུས་སུ་དཔག་བསམ་གྱི་ཤིང་སྐྱེ་བར་འགྱུར་རོ། ། དེའི་ཕྱིར་གསུངས་པ། དེ་ནས་དེ་ཡི་གྲོང་ཁྱེར་ནི། ། སྣ་ཚོགས་ཚོང་འདུས་སོ་སོ་དང་། ། ལེགས་པར་རབ་བྱུང་རྫིང་བུ་དང་། ། དགའ་ཞིང་རབ་ཏུ་གནས་པ་དང་། ། དྲི་མ་མེད་ པའི་ཆུ་ཆེན་པོ། ། ཤིན་ཏུ་གྲང་ཞིང་དྲི་བཟང་ལྡན། ། རྙོག་མེད་མཉམ་ཞིང་ཚིམ་པ་དང་། ། དེ་ནས་རྙོག་མ་ཡང་དག་གནས། ། པད་མ་ཨུད་པལ་གྱིས་གང་ཞིང་། ། དབའ་རླབས་དང་ནི་རྙོག་པ་མེད། ། ཏཱ་ལའི་ཕྲེང་བ་བདུན་གནས་ཞིང་། ། རིན་ཆེན་ རང་བཞིན་གྱིས་ཁེབས་པ། ། ལྕགས་རི་བདུན་དང་ལྡན་པ་དང་། ། གྲོང་ཁྱེར་ཐམས་ཅད་འབྲེལ་བ་དང་། ། རྩྭ་ཅན་རྒྱལ་པོའི་ཕོ་བྲང་ནི། ། དེ་ཚེ་ཏོག་དང་ལྡན་པར་འགྱུར། ། གྲོང་ཁྱེར་ཕྱོགས་ཀྱི་སྒོ་བཞི་རུ། ། དཔག་བསམ་ཤིང་ནི་སྐྱེ་བར་འགྱུར། ། སྔོན་པོ་སེར་པོ་ དམར་པོ་དང་། ། དཀར་པོ་རབ་ཏུ་གསལ་བའི་འོད། ། ལྷ་ཡི་གོས་ནི་སྐྱེ་བར་འགྱུར། ། ལྷ་ཡི་དྲིན་གྱིས་རྒྱན་དང་ནི། ། ལོངས་སྤྱོད་ཉེ་བར་སྤྱོད་པ་རྣམས། ། ཐམས་ཅད་སྟེང་ནས་འཕྱང་བ་ཡིན། ། དེ་ནས་གྲོང་ཁྱེར་དབུས་སུ་ནི། ། ཁང་དམིག་བཞི་དང་ལྡན་པ་ཡིན། ། བསོད་ནམས་ལས་ཀྱིས་གྲུབ་པ་ནི། །

དཔག་བསམ་ཤིང་གི་སྟེང་ནས་འབྱུང་། ། རས་བལ་རས་ནི་བཟང་པོ་དང་། ། ཀོ་མ་ཨུ་དུམ་བཱ་རའི་རས། ། བསོད་ནམས་ལས་ཀྱིས་གྲུབ་པ་ནི། ། དཔག་བསམ་ཤིང་གི་སྟེང་ནས་འབྱུང་། ། མྲྀ་དྃ་ག་ནི་ལག་པས་རྡུང་། ། མུ་ར་རྫ་དང་ ཨ་ལམ་བྷ། ། བསོད་ནམས་ལས་ལས་བྱུང་བ་ནི། ། དཔག་བསམ་ཤིང་གི་སྟེང་ནས་འབྱུང་། ། དཔུང་རྒྱན་དག་གི་རྒྱན་དང་ནི། ། དཔུང་རྒྱན་དང་ནི་དོ་ཤལ་དང་། ། རིན་ཆེན་རང་བཞིན་མགུལ་པའི་རྒྱན། ། བསོད་ནམས་ལས་ལས་བྱུང་བ་ནི། ། དཔག་བསམ་ཤིང་ གི་སྟེང་ནས་འབྱུང་། ། དཔྲལ་བ་ཁ་ཡི་རྒྱན་དང་ནི། ། ནོར་བུ་འོག་པག་ལུས་ལ་ལྡན། ། བསོད་ནམས་ལས་ལས་བྱུང་བ་ནི། ། དཔག་བསམ་ཤིང་གི་སྟེང་ནས་འབྱུང་། ། གཞན་ཡང་རྣམ་པ་སྣ་ཚོགས་པའི། ། རྒྱན་རྣམས་ཀུན་གྱིས་རྣམ་པར་བརྒྱན། ། བསོད་ནམས་ ལས་ལས་གྲུབ་པ་ནི། ། དཔག་བསམ་ཤིང་གི་སྟེང་ནས་འབྱུང་། ། མ་རྨོས་མ་བཏབ་རང་བྱུང་བའི། ། བསོད་ནམས་ལས་ཀྱིས་སྐྱེས་པ་ནི། ། མ་ཞིག་སྦུན་མེད་དྲི་མ་མེད། ། འབྲས་ཀྱི་འབྲས་བུ་དྲི་ཞིམ་ལྡན། ། འབྲས་རྣམས་བེད་པར་བཙོས་པ་ན། ། མི་རྣམས་ཡོངས་ སུ་ལོངས་སྤྱོད་དོ། ། དེ་ཡི་འབྲས་ལ་ཟལ་ཟེལ་མེད། ། སྟོང་ཕྲག་བརྒྱ་ནི་འབྱུང་བ་ཡིན། །

འབྲས་ཀྱི་མྱུ་གུ་སྐྱེ་བ་ནི། ། ཐམས་ཅད་དུ་ནི་ཁྱབ་པར་གནས། ། འབྲས་སྙེ་རེ་རེ་སྐྱེ་བ་ལ། ། ཕུལ་ནི་རེ་རེ་འབྱུང་བར་འགྱུར། ། མི་རྣམས་ཀྱི་ནི་འབྲས་ཀྱི་དྲི། ། ཐམས་ཅད་དུ་ནི་ ལོངས་སྤྱོད་དོ། ། སྟོང་ཕྲག་གཉིས་ཀྱི་ཤིང་རྟའི་ཚད། ། ཤིང་རྟ་བརྒྱ་ཡི་ཚད་ཙམ་དང་། ། ཤིང་རྟ་སུམ་ཅུ་རྩ་དགུ་དང་། ། བྲེ་ཆེན་བཅུ་དྲུག་པ་ཡི་ཁལ། ། དེ་ནས་ཡང་ནི་ཀུ་བ་གཉིས། ། དེ་ལྟ་བུ་ཡི་འབྲས་འབྱུང་ངོ་། ། ས་བོན་གཅིག་ལ་སྐྱེ་བ་ནི། ། སྐྱེ་བོ་རྣམས་ཀྱི་བསོད་ནམས་ལས། ། གང་ཞིག་ཏོག་དང་ལྡན་པར་གནས། ། དུང་གི་རྒྱལ་པོ་མི་ཡི་བདག ། དེ་ཡི་ཚེ་ན་དེ་ལྟར་འགྱུར། ། ཡོན་ཏན་གྱི་ནི་དཔུང་རྒྱན་འཛིན། ། བསམ་པ་ཐམས་ཅད་ཡོངས་སུ་རྫོགས། ། བཞིན་ལེགས་རྣ་བའི་རྒྱན་དང་ལྡན། ། ཧ་རི་ཙན་དན་ལུས་ལ་བྱུགས། ། ཀ་ཤིའི་གོས་ནི་མཆོག་ཏུ་ གྱོན། ། ནོར་ནི་རྒྱ་ཆེར་མང་བ་དང་། ། ཏིང་ཅག་པི་ཝང་གིས་སད་བྱེད། ། རྟག་ཏུ་ཤིན་ཏུ་སྐྱིད་པ་དང་། ། དེ་ཡི་ལུས་དང་སེམས་བདེ་ཞིང་། ། དཔག་ཚད་སྟོང་ཕྲག་བཅུ་རུ་ནི། ། འཛམ་བུ་གླིང་ནི་གནས་པ་ཡིན། ། ཚེར་མ་མེད་ཅིང་ཤིང་མེད་པ། ། མཉམ་ཞིང་འཇམ་ལ་སྔོ་ བསངས་གནས། ། དེ་ལ་ནད་ནི་གསུམ་འབྱུང་སྟེ། །

འདོད་དང་ཞེན་དང་རྒས་པའོ། ། ལྔ་བརྒྱའི་ལོ་ལོན་བུད་མེད་ནི། ། རྒན་དང་གཞོན་པ་བག་མར་ལེན། ། གཏན་དུ་གཉིས་ཀ་བདེ་བ་ཡིན། ། རྩོད་པ་མེད་པར་འགྱུར་བ་ཡིན། ། འབྲས་བུ་ལོ་ཏོག་ཕུན་སུམ་ཚོགས། ། འཁྲི་ ཤིང་གེལ་པ་ཤིང་གི་ཚལ། ། རྩྭ་ནི་སོར་བཞི་པ་རུ་སྐྱེ། ། ཤིན་ཏུ་འཇམ་པའི་ཤིང་བལ་འདྲ། ། ཧ་ཅང་མི་གྲང་མི་དྲོ་ཞིང་། ། ཆར་ནི་མཉམ་པར་འབབ་པ་དང་། ། རླུང་ནི་ཤིན་ཏུ་ཆུང་བ་དང་། ། དུས་ཚོད་མཉམ་པར་ལྡན་པ་དང་། ། ཆུ་ཀླུང་ཏཱ་ལ་མི་དམན་ཞིང་། ། དེ་དང་དེ་ཡི་ ས་ཡི་ཆ། ། ས་ལ་རྡོ་ནི་ཆུང་ལྡན་ལ། ། སྲན་ནག་སྲན་ཆུང་ཚད་ཙམ་མོ། ། མུ་ཏིག་འདྲ་བས་ཡོངས་སུ་གང་། ། རྒྱན་རྣམས་སྐྱེད་མོས་ཚལ་དང་འདྲ། ། དགའ་ཞིང་ཡིད་དུ་འོང་བར་འགྱུར། ། གྲོང་དང་གྲོང་རྡལ་མང་པོས་གང་། ། དེ་དང་དེ་ནི་ཉེ་བ་རུ། ། འོད་མ་སྨྱུག་ཕྲན་ཚལ་བཞིན་ནོ། ། བྱ་གག་འཕུར་བ་ཙམ་ཉིད་དོ། ། དགེ་ཞིང་རྒྱས་ལ་རྫུ་འཕྲུལ་ལྡན། ། ལུགས་ལ་ཉེ་བར་འཚེ་བ་མེད། ། རྟག་ཏུ་རྩེ་ཞིང་དགའ་བ་དང་། ། གཅིག་ཏུ་བདེ་བས་ཚིམ་པ་དང་། ། རྒྱུ་སྐར་བདེ་བས་བསྐོར་བ་དང་། ། དགའ་ཞིང་ཚིམ་ལ་རབ་ཏུ་དགའ། ། བཟའ་དང་ བཏུང་བ་མང་པོ་ཟ། ། ཤ་ཆང་ཆུ་བཞིན་མང་བ་ནི། །

ལྷ་ཡི་ཕོ་བྲང་ལྕང་ལོ་བཞིན། ། ཁང་{བཟངས་,བཟང་}རྒྱལ་པོའི་ཕོ་བྲང་ནི། ། ཉམས་དགའ་སྒྲ་མི་སྙན་བཞིན་ནོ། ། འཛམ་བུའི་གླིང་ཡང་དེ་བཞིན་གྱུར། ། དེའི་དུས་སུ་བྱང་ཆུབ་སེམས་དཔའ་བྱམས་པ་འདི་ནི་བསྐལ་པ་གྲངས་མེད་ པ་བཅུ་དྲུག་དང་བསྐལ་པ་འབུམ་ཕྲག་གཅིག་ལྷག་ཙམ་དུ་སྦྱིན་པའི་ཕ་རོལ་དུ་ཕྱིན་པ་དང་། ཕ་རོལ་དུ་ཕྱིན་པ་སུམ་ཅུ་རྫོགས་པར་བྱས་ནས་ཐམས་ཅད་སྒྲོལ་བཞིན་དུ་སྐྱེ་བ་ལྷག་མའི་ལུས་སྦྱིན་པ་ཆེན་པོར་བྱས་ཤིང་། ཕ་རོལ་དུ་ཕྱིན་པ་ཡོངས་སུ་རྫོགས་པར་བྱས་ཏེ། དེའི་ལུས་ ཞིག་ནས་དགའ་ལྡན་དུ་སྐྱེ་བ་རྫོགས་པར་བྱས་ནས། སངས་རྒྱས་བྱོན་པར་འགྱུར་རོ་ཞེས་སྒྲོགས་སོ། ། སྟོང་ཕྲག་བཅུའི་འཁོར་ཡུག་གི་ལྷ་རྣམས་ནི་སངས་རྒྱས་བྱོན་པར་འགྱུར་རོ་ཞེས་དམ་འཆའོ། ། ཕྱོགས་ལྔར་གཟིགས་ཏེ་དགའ་ལྡན་གྱི་ལྷའི་ཚོགས་རྣམས་ཀྱི་འཁོར་གྱིས་བསྐོར་ ལ། དགའ་ལྡན་ནས་བྱོན་ཏེ། ཏོག་ལྡན་ཞེས་བྱ་བའི་རྒྱལ་པོའི་ཕོ་བྲང་དུ། དུང་གི་རྒྱལ་པོའི་ཚངས་བཟང་མདུན་ན་འདོན་བྲམ་ཟེའི་རིགས་ཀྱི་ཚངས་ལྡན་མའི་རུམ་དུ་ཞུགས་ཏེ། འཇིག་རྟེན་གྱི་ཁམས་སྟོང་ཕྲག་བཅུ་གཡོས་སོ། །

ཟླ་བ་བཅུ་འདས་ནས་དྲང་སྲོང་ལྟུང་བ་དང་རི་ དགས་རྒྱུ་བའི་གནས་སུ་མའི་རུམ་ནས་འཐོན་ཏེ་རིམ་པ་བཞིན་དུ་ཤེས་པ་དང་ལྡན་པར་གྱུར་ཏེ། བདག་ཉིད་ཀྱི་བསོད་ནམས་ཀྱི་མཐུས་ས་གཞི་བརྟོལ་ནས་སྟེང་དུ་འོངས་ཏེ་རིན་པོ་ཆེ་སྣ་བདུན་གྱི་ཁང་{བཟངས་,བཟང་}བཞིར་རང་ཉིད་ཀྱི་ལྷ་བཞིན་དུ་ལྷ་མོ་ཟླ་བའི་གདོང་ཅན་མ་ལ་སོགས་པ། ལྷའི་བུ་མོ་ བཞིན་དུ་བུད་མེད་མང་པོ་དེ་རྣམས་དང་འགྲོགས་ནས། ལོ་སྟོང་ཕྲག་གཅིག་ལྷ་བཞིན་དུ་རྗེས་སུ་མྱོང་བར་གྱུར་ཏེ། དེའི་ཉིན་པར་རབ་ཏུ་བྱུང་བའི་གཟུགས་གཅིག་མཐོང་ནས་གསེར་གྱི་གཟེབ་ལ་མི་དགའ་བ་སེང་གེའི་རྒྱལ་པོ་བཞིན་དུ་དཔལ་འབྱོར་མ་ལུས་པ་རྫོགས་པ་རིན་པོ་ ཆེའི་ཁང་{བཟངས་,བཟང་}རྣམས་ལ་ཤིན་ཏུ་མི་དགའ་བར་གྱུར་ནས་ངེས་པར་འབྱུང་བའི་འདོད་པ་སྐྱེས་སོ། ། ཐམས་ཅད་སྟོང་ཕྲག་བཅུའི་ཁོར་ཡུག་གི་ལྷ་རྣམས་ལྷའི་མེ་ཏོག་ལ་སོགས་པ་ལག་པས་བླངས་ནས་འཇིག་རྟེན་གྱི་འཁོར་ལོ་འདི་གཅིག་ཏུ་འདུས་ཏེ། དུང་གི་རྒྱལ་པོ་ལ་སོགས་པའི་ སྐྱེ་བོ་ཆེན་པོས་བཟུང་ནས་དྲི་བཟང་དང་ཕྲེང་བ་དང་བདུག་སྤོས་ལ་སོགས་པས་ཁང་{བཟངས་,བཟང་}ལ་བསྐོར་ནས་འདུག་གོ། །

ནམ་མཁའི་ལྷ་རྣམས་ཀྱིས་ལྷའི་མེ་ཏོག་ལག་པས་བཟུང་ནས་ལེགས་སོ་ཞེས་བྱ་བའི་སྒྲ་གཅིག་ཏུ་འབྱིན་པར་བྱེད་དོ། ། འོག་མིན་གྱི་བར་དུ་ཐམས་ཅད་སྒྲ་གཅིག་ཏུ་བྱེད་ཅིང་ གནས་སོ། ། དེའི་དུས་སུ་རིན་པོ་ཆེའི་ཁང་{བཟངས་,བཟང་}རྫ་མཁན་གྱི་འཁོར་ལོ་ལྟར་འཁོར་ཞིང་ནམ་མཁའ་ལ་འགྲོའོ། ། ཟླ་བ་ཉ་བ་ལ་རྒྱུ་སྐར་གྱི་ཕྲེང་བས་བསྐོར་བ་བཞིན་ནོ། ། བྱང་ཆུབ་སེམས་དཔའི་བཙུན་མོ་ཆེན་མོ་ལ་སོགས་པ་ནམ་མཁའ་ལ་བཞུད་དོ། ། གང་ཞིག་སེམས་དཔའ་ ཆེན་པོ་དང་འགྲོགས་ནས་འགྲོ་བའི་སེམས་ཀྱིས་དེ་རྣམས་ཀྱིས་རང་རང་གི་ནམ་མཁའ་མཐོང་སྟེ་ཚངས་པ་ཆེན་པོས་དཔག་ཚད་གསུམ་གྱི་ཚད་དང་མཉམ་པའི་གདུགས་དཀར་པོ་འཛིན་ནོ། ། བརྒྱ་བྱིན་ལྷའི་རྒྱལ་པོས་དུང་ལ་སོགས་པ་བཟུང་ནས་འབུད་དོ། ། དེ་ལྟར་དཔལ་དང་སྐལ་བ་ བཟང་པོ་དང་ལྡན་པའི་ལྷ་དང་མིའི་ཚོགས་ཀྱིས་བསྐོར་ནས་ཁང་{བཟངས་ཀྱི་,བཟང་གི་}ཀླུ་ཤིང་བྱང་ཆུབ་ཤིང་དྲུང་དུ་གཤེགས་སོ། ། དེའི་ཚད་ནི། ཁྲུ་བརྒྱ་ཉི་ཤུ་ཡལ་གའི་བར། ། ཡལ་གའི་མཐོ་ཚད་དེ་དང་མཉམ། ། འཁྲིལ་ནས་སྟེང་ནས་འོག་ཏུ་འཕྱང་། ། རྨ་བྱའི་གདུགས་བཞིན་མཛེས་ པའོ། ། རྟག་ཏུ་རྩེ་མོར་མེ་ཏོག་གསལ། ། ལྷ་ཡི་དྲི་བཟང་བསུང་ལྡན་ཞིང་། །

གེ་སར་ཕུལ་ལུ་གང་ཙམ་མོ། ། མེ་ཏོག་བཟང་པོ་འཁོར་ལོ་ཙམ། ། ཕྱོགས་ཕྱོགས་རླུང་གིས་འཁྱེར་བར་བྱེད། ། དཔག་ཚད་བཅུ་རུ་ཁྱབ་པའོ། ། སྟེང་གི་མེ་ཏོག་འོག་ཏུ་ལྷུང་། ། བྱང་ཆུབ་ སྙིང་པོར་མེ་ཏོག་བརྩེགས། ། དེའི་དུས་སུ་ནམ་མཁའ་ལ་འགྲོ་བའི་བྱ་རྣམ་པ་སྣ་ཚོགས་པའི་ཚོགས་ཀྱིས་སྒྲ་སྙན་པས་མཆོད་དེ། དེ་ལྟར་ཀླུ་ཤིང་གི་བྱང་ཆུབ་ཀྱི་ཤིང་དྲུང་དུ་གཤེགས་ཏེ་ནམ་མཁའ་ལ་འཕྱང་ཞིང་སའི་ཆ་ཐམས་ཅད་ཉམས་དགའ་བའི་གནས་སུ་སྡོད་དོ། ། དེ་ལ་ཞག་ བདུན་དུ་དཔལ་གྱི་སྙིང་པོར་དཀའ་བ་སྤྱོད་དོ། ། ཚངས་པ་ཆེན་པོས་བླངས་ནས་དངོས་པོ་རྣམས་བཟུང་ནས་རབ་ཏུ་བྱུང་ངོ་། ། ཇི་སྙེད་པའི་འཁོར་ཐམས་ཅད་ཀྱང་རབ་ཏུ་བྱུང་ངོ་། ། དེ་ནས་གཞན་ཡང་། སྟོང་ཕྲག་བརྒྱད་ཅུ་རྩ་བཞི་ཡིས། ། བྲམ་ཟེའི་རིག་བྱེད་མཆོག་ཤེས་ ཤིང་། ། བྱམས་པ་རབ་ཏུ་བྱུང་བར་གྱུར། ། དེ་དང་དེ་ནི་རབ་ཏུ་བྱུང་། ། དེ་ལ་རབ་ཏུ་བྱུང་ནས་ཟླ་བའི་གདོང་ཅན་གྱི་ལྷ་མོས་ཤིན་ཏུ་མངར་བའི་འོ་ཐུག་ཕུལ་ལོ། ། ཡོངས་སུ་ལོངས་སྤྱད་ནས་སྲོད་ཀྱི་ཐུན་ལ་བྱང་ཆུབ་ཀྱི་ཤིང་དྲུང་དུ་ས་བསྙམས་ནས་སྐྱིལ་ཀྲུང་གིས་མ་ཕམ་པ་བཞུགས་སོ། །

ཤར་གྱི་འཇིག་རྟེན་གྱི་ཁམས་ཀྱི་ཕྱོགས་སུ་གཟིགས་ཤིང་བཞུགས་སོ། ། རིམ་པ་བཞིན་དུ་དུས་ལ་ཐམས་ཅད་མཁྱེན་པའི་ཡེ་ཤེས་སོ་སོར་རྟོགས་སོ། ། འདི་སྐད་གསུངས་པ། འཁོར་བའི་སྐྱེ་བོ་མ་ལུས་པ། ། དུག་མེད་པ་ནི་བཙལ་བའི་ཕྱིར། ། དུག་མེད་ཁྱིམ་ནི་བྱེད་པ་ནི། ། ཡང་ ཡང་སྐྱེ་བ་སྡུག་བསྔལ་བ། ། ཁྱིམ་ནི་བྱེད་པ་མཐོང་བར་འགྱུར། ། ཁྱིམ་ནི་གཞན་ནི་བྱེད་པ་མེད། ། སྡུག་བསྔལ་ཐམས་ཅད་གཞིག་པ་དང་། ། དུག་ལྡན་ཁྱིམ་ནི་གཞིག་པའོ། ། སེམས་ཀྱི་དུག་ནི་སྤོང་བ་དང་། ། སྲེད་པ་ཟད་ནས་གྲོལ་བར་འགྱུར། ། ཆེད་དུ་བརྗོད་པ་གསུངས་པའོ། ། བྱང་ཆུབ་ཀྱི་ཤིང་གི་དྲུང་དུ་ཞག་བཞི་བཅུ་རྩ་དགུ་བཞུགས་ནས་ཚངས་པས་གསོལ་བ་འདེབས་པའི་ཕྱིར། ཆོས་ཀྱི་འཁོར་ལོ་བསྐོར་བའི་ཆེད་དུ་དྲང་སྲོང་ལྷུང་བའི་གནས་སུ་གཤེགས་པ་དང་། དེ་ནས་དེར་གཤེགས་པ་ན། ཞབས་ནི་བཏེག་དང་བཞག་པ་ན། ། མེ་ཏོག་པད་མ་སྐྱེས་པར་ གྱུར། ། འདབ་མཉམ་ཁྲུ་ནི་སུམ་ཅུ་པ། ། འདབ་ཆུང་ཁྲུ་ནི་ཉི་ཤུ་ལྔ། ། གེ་སར་ཁྲུ་ནི་ཉི་ཤུ་པ། ། ལྟེ་བ་ཁྲུ་ནི་བཅུ་དྲུག་པ། ། གེ་སར་རྣམས་ནི་ཁྱབ་པར་གནས། ། པད་མ་མཛོད་སྤུ་ཐམས་ཅད་དུའོ། །

སྟོབས་བཅུ་པའི་འོད་ཀྱིས་ཉིན་མོར་བྱེད་པའི་འོད་ཟིལ་གྱིས་མནན་ནོ། ། ཉིན་མོ་དང་མཚན་མོ་མི་ཕྱེད་པར་གྱུར་ཏོ། ། དེ་ལ་སྲོད་དང་ཐོ་རངས་བྱ་རྣམས་སྐད་སྒྲོགས་སོ། ། མེ་ཏོག་ཁ་ཟུམ་པ་དང་བྱེ་བས་མཚན་མོ་དང་ཉིན་མོར་ཤེས་པར་བྱེད་དོ། ། གང་དང་གང་དུ་ཆོས་སྟོན་པར་བྱེད་པ་དེ་དང་དེ་རུ་ཆོས་ཀྱི་སྒྲ་སྒྲོགས་སོ། ། དེའི་ཕྱིར་གསུངས་པ། འོད་དང་ འོད་ཟེར་ཚད་རྣམས་ནི། ། དབྱངས་དང་དབྱངས་ཀྱི་ཚད་ཙམ་མོ། ། གཟི་བརྗིད་གཟི་ཡི་ཚད་རྣམས་ནི། ། བསོད་ནམས་བསོད་ནམས་ཀྱི་ནི་ཚད། ། ཤེས་རབ་ཤེས་རབ་ཀྱི་ནི་ཚད། ། གྲགས་པ་གྲགས་པ་ཡི་ནི་ཚད། ། ཁ་དོག་ཁ་དོག་གི་ནི་ཚད། ། ཆོས་ནི་ཆོས་རྣམས་ཀྱི་ ནི་ཚད། ། དེ་ནས་སྟོང་ཕྲག་བརྒྱད་ཅུ་རྩ་བཞིའི་བྲམ་ཟེ་དང་། བྱེ་བ་ཕྲག་{བཅྭ་,བཅོ་}བརྒྱད་ཀྱི་ཚངས་པ་རྣམས་ཀྱིས་བདུད་རྩིའི་བཏུང་བ་འཐུངས་ནས། ཇི་ལྟར་བཅོམ་ལྡན་འདས་བསོད་ནམས་ཀྱི་མཐུ་ཡིས་རྣམ་པ་བརྒྱ་ཕྲག་དུ་མའི་འོད་ཟེར་འཕྲོ་ཞིང་།

རྣམ་པ་བརྒྱ་ཕྲག་དུ་མའི་མཚན་རྫོགས་པ་ མཚན་སུམ་ཅུ་རྩ་གཉིས་མཆོག་དང་ལྡན་པ་དཔེ་བྱད་བཟང་པོ་བརྒྱད་ཅུ་དང་ལྡན་པ་བརྒྱ་ཕྲག་དུ་མའི་སྐུ་མདོག་རྣམ་པ་དུ་མའི་ཡ་མཚན་དང་ལྡན་པར་གྱུར་པ་བརྒྱ་ཕྲག་དུ་མའི་འོད་ཟེར་དེའི་སྐུ་ལས་འཐོན་པར་གྱུར་ཏོ། ། དེ་ནི་ཁ་དོག་སྔོན་པོ་དང་ཁ་དོག་སེར་པོ་དང་། ཁ་དོག་དམར་པོ་དང་། ཁ་ དོག་དཀར་པོ་དང་། བཙོད་ཀྱི་མདོག་ལྟ་བུའི་འོད་ཟེར་དང་ལྡན་པའི་སྐུ་མདོག་ཅན་ནོ། ། དེའི་སྐུ་ལུས་ལ་བྱུང་བ་ནི་ཤིང་ཏཱ་ལའི་ཚད་ཙམ་གྱི་འོད་ཟེར་འཕྲོའོ། ། དུས་དང་དུས་མ་ཡིན་པ་དང་། ཟུང་དང་ཟུང་མ་ཡིན་པ་དང་། ཕུང་པོ་དང་ཕུང་པོ་མ་ཡིན་པ་ནི། བཅོམ་ལྡན་འདས་ཀྱི་སྐུ་ལུས་ ལ་ལན་གསུམ་བསྐོར་བ་བྱས་ནས་རྒྱང་རིང་དུ་འགྲོ་བ་དང་ཐུང་དུ་འགྲོ་བའོ། ། བཅོམ་ལྡན་འདས་དེའི་སྐུ་ལུས་ནི་མཐོ་ཚད་དུ་ཁྲུ་བརྒྱད་ཅུ་རྩ་བརྒྱད་པར་འགྱུར་རོ། ། ཞབས་ཀྱི་འོག་ནས་པུས་མོའི་བར་དུ་ཁྲུ་ཉི་ཤུ་རྩ་གཉིས་སོ། ། པུས་མོ་ནས་ལྟེ་བའི་བར་དུ་ཁྲུ་ཉི་ཤུ་རྩ་གཉིས་སོ། ། ལྟེ་བ་ནས་ སྒྲོག་རུས་ཀྱི་བར་དུ་ཁྲུ་ཉི་ཤུ་རྩ་གཉིས་སོ། ། སྒྲོག་རུས་ནས་སྤྱི་གཙུག་གི་བར་དུ་ཁྲུ་ཉི་ཤུ་རྩ་གཉིས་སོ། །

དཔུང་པ་གཉིས་ཀྱི་བར་དུ་ཁྲུ་ཉི་ཤུ་རྩ་ལྔའི་ཚད་དོ། ། སྒྲོག་རུས་རེ་རེའི་དཀྱུས་ནི་ཁྲུ་ལྔ་ལྔའོ། ། སྙན་གཉིས་ཀྱི་རྩེ་མོ་ནས་རྩ་བའི་བར་ལ་ཁྲུ་བདུན་བདུན་ནོ། ། སྤྱན་རེ་རེའི་མཆུ་རུ་ཁྲུ་ ལྔ་ལྔའོ། ། སྨིན་མ་གཉིས་ཀྱི་དཀྱུས་སུ་ཁྲུ་ལྔ་ལྔའོ། ། སྨིན་མ་གཉིས་ཀྱི་དབུས་ཀྱི་བར་ཞེང་ལ་ཁྲུ་ལྔའོ། ། ཤངས་ལ་ཁྲུ་བདུན་ནོ། ། ཡ་མཆུ་མ་མཆུ་གཉིས་ཀྱི་མཆུ་རུ་ཁྲུ་བཅུ་བཅུའོ། ། ལྗགས་ཀྱི་ཟླུམས་སུ་ཁྲུ་ལྔའོ། ། གཙུག་ཏོར་ལ་ཁྲུ་ལྔའོ། ། གསེར་གྱི་མེ་ལོང་དང་འདྲ་བའི་ ཞལ་གྱི་དཀྱིལ་འཁོར་ལ་ཁྲུ་ཉི་ཤུ་རྩ་ལྔའོ། ། མགུལ་པ་ལ་ཁྲུ་ལྔའོ། ། ཕྱག་གཉིས་ཀྱི་རིང་དུ་ཁྲུ་བཞི་བཅུ་རྩ་བཞི་པ་རྩ་བཞི་པ་ཡིན་ནོ། ། དེ་ནི་འདི་བཞིན་དུ་དཔེ་མེད་པའི་སངས་རྒྱས་ཀྱི་དཔལ་མཐའ་ཡས་པའི་སངས་རྒྱས་ཀྱི་རོལ་པའོ། ། སྟོང་ཕྲག་བཅུའི་འཇིག་རྟེན་ གྱི་ཁོར་ཡུག་ཐམས་ཅད་ཀྱི་ལྷ་རྣམས་དང་། དེའི་རྗེས་སུ་མི་རྣམས་ཀྱི་ནང་དུ་གནས་ནས་ཆོས་ཀྱི་འཁོར་ལོ་བསྐོར་རོ། ། ཆོས་སྟོན་པའི་གནས་དང་བྱེ་བ་འབུམ་ཕྲག་གཅིག་གི་ལྷ་དང་། མིའི་འཆིང་བ་གྲོལ་བ་དང་། ཆོས་ཀྱི་དང་པོ་ཐོབ་པ་དང་།

ཆོས་ཀྱི་དང་པོ་མ་ཐོབ་པ་རྣམས་མཐོ་ རིས་སུ་སྐྱེ་བར་འགྱུར་རོ། ། དེ་ལྟར་མཆོག་དང་ལྡན་པའི་བྱམས་པ་སུ་ཞིག་གིས་མི་མཐོང་། ང་ནི་མ་བསད་པ་དང་། ཕ་བསད་པ་དང་། དགེ་སློང་མ་སུན་ཕྱུང་བ་དང་། དགེ་འདུན་གྱི་དབྱེན་བྱས་པ་དང་། མཚམས་མེད་པ་ལྔའི་ལས་བྱས་པ་དང་། མཆོད་རྟེན་བཤིག་པ་དང་། བྱང་ཆུབ་ཀྱི་ཤིང་བཅད་པ་དང་། བྱང་ཆུབ་སེམས་དཔའ་བསད་པ་དང་། དགེ་འདུན་གྱི་ཁ་ཟས་བརླག་པར་བྱས་པ་དང་། ཤིན་ཏུ་སེར་སྣ་ཆེ་བ་དང་། ལོག་པར་ལྟ་བར་ངེས་པ་དང་། འཕགས་པའི་གང་ཟག་ལ་སྐུར་པ་འདེབས་པ་དང་། གཅེར་བུ་པའི་རིགས་ཏེ་དེ་རྣམས་ཀྱིས་མི་མཐོང་ངོ་། ། ཚིགས་བཅད་སྟོང་ཕྲག་གཅིག་གིས་སོ་སོར་བརྒྱན་པ་འདི་ཐམས་ཅད་སྒྲོལ་གྱི་སྐྱེས་རབས་ཆེན་པོ་ཉི་མ་གཅིག་ལ་སྐྱེ་བོ་རྣམས་ཀྱིས་བཤད་པ་དང་མཉན་པ་དང་། མར་མེ་སྟོང་ཕྲག་གཅིག་གམ། སྟོང་ཕྲག་གཅིག་གི་མེ་ཏོག་ཕལ་པའམ། སྟོང་ཕྲག་གཅིག་གི་ཨུད་པ་ལ་སྔོན་པོའི་མེ་ ཏོག་གམ། མཆོད་རྟེན་བྱེད་པའམ། སངས་རྒྱས་ཀྱི་སྐུ་གཟུགས་བྱེད་པའམ། དེ་ལ་མཆོད་པ་བྱེད་པས་ནི་བྱམས་པ་སངས་རྒྱས་པའི་དུས་སུ། དེའི་དྲུང་དུ་དང་པོའི་ཆོས་ཐོབ་ཅིང་སྐྱེ་བར་འགྱུར་རོ། །

སེམས་ཅན་ལྷག་མ་རྣམས་ཀྱིས་སྦྱིན་པ་བྱིན་པ་དང་། ཚུལ་ཁྲིམས་བསྲུངས་ པ་དང་། གཙུག་ལག་ཁང་སྦྱངས་པ་དང་། བྱང་ཆུབ་ཀྱི་ཤིང་བསྐྲུན་པ་དང་། མཆོད་རྟེན་བྱས་པ་དང་། མཆོད་རྟེན་དང་བྱང་ཆུབ་ཀྱི་ཤིང་ལ་རིམ་གྲོ་བྱས་པ་དང་། སྐྱེད་མོས་ཚལ་བསྐྲུན་པ་དང་། ཟམ་པ་བཙུགས་པ་དང་། ལམ་བཅོས་པ་དང་། འགྲོན་ཁང་བྱས་པ་དང་། ཁྲོན་པ་བྱས་པ་དང་། བསྟན་པའི་བྱ་བ་བྱས་པ་དང་། ཆོས་ཀྱི་གནས་ལ་བྱི་དོར་བྱས་པ་དང་། དྲི་དང་ཕྲེང་བ་ལ་སོགས་པས་མཆོད་པར་བྱེད་པ་དང་། གུས་པར་བྱས་ནས་ཆོས་མཉན་པ་དང་། ཁ་ཟས་ཙམ་གྱི་སྦྱིན་པ་དགེ་འདུན་ལ་གཏོང་བ་དང་། ཕ་དང་མ་ལ་བསྙེན་བཀུར་ བྱེད་པ་དང་། རིགས་ཀྱི་གཙོ་བོ་ལ་བསྙེན་བཀུར་བྱེད་པ་དང་། གསོ་སྦྱོང་ལ་གནས་པ་ལ་ཁ་ཟས་སྟེར་བ་དང་། བློ་བུར་བའི་བཙུན་པ་ལ་སྦྱིན་པ་སྟེར་བ་དང་། བསོད་སྙོམས་པ་ལ་སྟེར་བ་དང་། སྟན་འབུལ་བའི་སྐྱེ་བོས་ཡང་དག་པར་རྫོགས་པའི་སངས་རྒྱས་བྱམས་པ་མཐོང་བར་འགྱུར་རོ། ། ཐ་ན་མེ་ཏོག་སྙིམ་པ་གང་ཙམ་མམ། མར་མེ་གཅིག་ཙམ་འབུལ་བའམ། གཞན་བསོད་ནམས་བྱེད་པ་རྣམས་ལ་རྗེས་སུ་ཡི་རང་བ་དང་།

ལྷ་འམ་མི་རྣམས་ཀྱི་དགེ་བ་འདི་རྣམས་བྱེད་པ་ནི་དེའི་དུས་སུ་བྱོན་པའི་ཡང་དག་པར་རྫོགས་པའི་སངས་རྒྱས་བྱམས་པ་མཐོང་བར་འགྱུར་རོ། ། དེ་ལ་ཡང་དག་པར་རྫོགས་པའི་སངས་རྒྱས་བྱམས་པ་མཐོང་བར་འདོད་པ་རྣམས་ཀྱིས་སྦྱིན་པ་གཏོང་བ་དང་། ཚུལ་ཁྲིམས་བསྲུང་བ་དང་། གསོ་སྦྱོང་གི་ལས་བྱེད་པ་དང་། སྒོམ་པར་བྱེད་པ་དང་། དགེ་བའི་ལས་ཀྱི་བག་ཡོད་པར་གྱུར་ན་གདོན་མི་ཟ་བར་མཐོང་ངོ་། ། གང་ཞིག་ ཚངས་པར་སྤྱད་པ་སྤྱོད། ། ཐུབ་པའི་གསུང་རབ་ཐོས་པ་དང་། ། དེ་རྣམས་འཁོར་བ་ལས་གྲོལ་ཞིང་། ། བླ་མེད་མཆོག་གྱུར་འཆི་བ་མེད། ། ཚངས་པར་སྤྱད་པ་སྤྱོད་བྱེད་ཅིང་། ། མཆོད་འོས་རྣམས་ལ་སྟེར་བ་དང་། ། གསོ་སྦྱོང་རྣམས་ལ་གནས་པ་དང་། ། ལེགས་པར་བྱམས་ པ་བསྒོམ་པར་གྱིས། ། བག་ཡོད་པར་ནི་འགྱུར་བ་དང་། ། རྟག་ཏུ་བསོད་ནམས་བྱ་བ་བྱེད། ། དགེ་བ་འདི་རྣམས་བྱས་པ་ཡིས། ། སྡུག་བསྔལ་མཐར་ནི་བྱེད་པའོ། ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་བཅོམ་ལྡན་འདས་ཀྱིས་གསུངས་ པ་ལ་མངོན་པར་བསྟོད་དོ། ། ། ། བྱམས་པའི་མདོ་རྫོགས་{སྷོ,སོ}། ། ། ། པཎྜི་ཏ་ཆེན་པོ་ཨཱ་རནྡ་ཤྲཱིའི་ཞལ་སྔ་ནས།

མང་དུ་ཐོས་པའི་ལོ་ཙཱ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས། སྐད་གཉིས་སྨྲ་བ་རྣམས་ཀྱི་གདན་ས་གཙུག་ལག་ཁང་ཆེན་པོ་དཔལ་ཐར་པ་གླིང་དུ་ བསྒྱུར་ཅིང་ཞུས་ཏེ་གཏན་ལ་ཕབ་པའོ། ། ། ། སའི་སྟེང་དུ་ཉི་མ་དང་ཟླ་བ་ལྟར་གྱུར་ཅིག།