འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་ཉི་ཤུ་དགུ་པ་སྟེ་བད་སའི་རྒྱལ་པོ་འཆར་བྱེད་ཀྱིས་ཞུས་པ། བམ་པོ་གཅིག་པ། རྒྱ་གར་སྐད་དུ། ཨཱརྱ་ཨུ་ད་ཡ་ན་བད་ས་རཱ་ཛ་པ་རི་པྲྀཙྪཱ་ནཱ་མ་པ་རི་བརྟ། བོད་སྐད་དུ། འཕགས་པ་བད་སའི་རྒྱལ་པོ་འཆར་བྱེད་ཀྱིས་ཞུས་པ་ཞེས་བྱ་བའི་ལེའུ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་ གཅིག་ན། བཅོམ་ལྡན་འདས་ཀཽ་ཤམྦཱི་ན། དབྱངས་ཅན་གྱི་ཀུན་དགའ་ར་བ་ན་དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་མང་པོ་དང་ཐབས་ཅིག་ཏུ་བཞུགས་ཏེ། དེའི་ཚེ་ན་མ་དུའི་བུ་མོ་བཙུན་མོ་དཔེ་ མེད་ཕྲག་དོག་དང་། སེར་སྣས་ཟིན་པས་བཙུན་མོ་སྔོ་སངས་ཅན་ལ་ལྷག་པར་དམིགས་ནས་བད་སའི་རྒྱལ་པོ་འཆར་བྱེད་ལ་ལྷ་མཁྱེན་པར་མཛད་དུ་གསོལ། བཙུན་མོ་སྔོ་སངས་ཅན་ལ་སོགས་པ་བུད་མེད་ལྔ་བརྒྱ་ནི་དགེ་སྦྱོང་གཽ་ཏ་མ་དང་ལྷན་ཅིག་ཏུ་རབ་ཏུ་སྐྱོན་ཆགས་པར་བགྱིད་ དེ།

དེའི་སླད་དུ་བདག་གིས་ལྷ་ལ་གསོལ་བ་ལགས་ཀྱིས་ཇི་ལྟར་མཁྱེན་པ་དེ་བཞིན་དུ་མཛད་དུ་གསོལ་ཞེས་{བརྫུན་,རྫུན་}གྱི་ཚིག་གིས་དབྱེན་བྱས་པར་གྱུར་ཏོ། ། དེ་ནས་བད་སའི་རྒྱལ་པོ་འཆར་བྱེད་མ་དུའི་བུ་མོ་བཙུན་མོ་དཔེ་མེད་ཀྱིས་དབྱེན་བྱས་པས་བཅོམ་ལྡན་འདས་དང་། ཉན་ ཐོས་ཀྱི་དགེ་འདུན་རྣམས་ལ་ཐ་བ་དང་། འཁྲུག་པ་དང་། ཁྲོ་བ་སྐྱེས་པར་གྱུར་ཏོ། ། དེ་ཡི་མ་རངས་ཤིང་ཁྲོ་བ་དང་། རྔམ་པས་ཟིལ་གྱིས་ནོན་པས་བཙུན་མོ་སྔོ་སངས་ཅན་གསད་པའི་ཕྱིར་གཞུ་བདུངས་ནས་མདའ་སྟེའུ་ཀ་ཉ་རྔ་མ་བླངས་ཏེ་འཕངས་སོ། ། དེ་ནས་དེའི་མོད་ལ་ བཙུན་མོ་སྔོ་སངས་ཅན་གྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱག་འཚལ་ལོ་ཞེས་བཅོམ་ལྡན་འདས་ལ་ཕྱག་བྱས་ཤིང་བཅོམ་ལྡན་འདས་ཀྱི་བསྔགས་པ་བརྗོད་ནས་བྱམས་པའི་ཏིང་ངེ་འཛིན་ལ་སྙོམས་པར་ཞུགས་སོ། དེ་ནས་འདི་ལྟར་སངས་རྒྱས་ཀྱི་མཐུས་མདའ་སྟེའུ་ཀ་ཉ་རྔ་མ་དེ་དེ་ནས་ཕྱིར་ལོག་སྟེ། བད་སའི་རྒྱལ་པོ་འཆར་བྱེད་དེ་ཉིད་ཀྱི་མགོའི་དྲང་ཐད་ཀྱི་སྟེང་གི་བར་སྣང་ལ་འབར། རབ་ཏུ་འབར།

ཀུན་ཏུ་རབ་ཏུ་མཆེད་དེ་འབར་ཞིང་མེ་ལྕེ་གཅིག་ཏུ་གྱུར་ཏེ་ཕར་འགྲོ་ཚུར་ འགྲོ་ཞིང་འདུག་འདུག་ནས། བད་སའི་རྒྱལ་པོ་འཆར་བྱེད་ག་ལ་བ་དེར་སོང་ནས་བད་སའི་རྒྱལ་པོ་འཆར་བྱེད་ཀྱི་གཡོན་རོལ་ལོགས་སུ་འདུག་པར་གྱུར་ཏེ། དེ་ལུས་ལ་ནི་མ་ཕོག་གོ ། ལན་གཉིས་ལན་གསུམ་དུ་དེ་ལྟར་གྱུར་པ་དང་། དེ་ནས་བཙུན་མོ་སྔོ་སངས་ཅན་གྱིས་བད་སའི་ རྒྱལ་པོ་འཆར་བྱེད་ལ་འདི་སྐད་ཅེས་སྨྲས་སོ། ། རྒྱལ་པོ་ཆེན་པོ་དེ་ལྟ་ལགས་པས་གལ་ཏེ་ཁྱོད་དེ་བཞིན་གཤེགས་པ་ལ་ཕྱག་འཚལ་ན་ཁྱོད་ལ་ཡང་བདེ་ལེགས་སུ་འགྱུར་ལགས་སོ། ། དེ་ནས་བད་སའི་རྒྱལ་པོ་འཆར་བྱེད་འཇིགས་ཤིང་དངངས་ལ་སྒྱིད་ལུག་ཅིང་སྤུ་ཟིང་ཞེས་བྱེད་པར་གྱུར་ཏེ་ ས་ལ་འགྱེལ་ནས་བཙུན་མོ་སྔོ་སངས་ཅན་ལ་ཚིགས་སུ་བཅད་དེ་སྨྲས་པ། ཁྱོད་ནི་ལྷ་མོ་འམ་དྲི་ཟ་མོ། ། ཤ་ཟ་མོ་འམ་སྲིན་མོའམ། ། ངས་ནི་ཇི་ལྟར་གཟུང་བར་བྱ། ། ང་ཡིས་དྲིས་པ་དེ་སྨྲོས་ཤིག ། གང་ལ་མཚོན་གྱིས་མི་གནོད་པའི། ། བུད་མེད་འགའ་ཡང་ཡོད་མིན་ཏེ། ། ངས་ ནི་འདི་ལ་གང་དུ་ཡང་། ། ཐོས་སམ་མཐོང་ངམ་ཤེས་པའང་མེད། ། ང་ནི་སྟོབས་ལྡན་བརྩོན་འགྲུས་ཅན། ། འཕོང་གི་ཤེས་པ་ལེགས་བསླབས་པས། ། ང་ཡི་མདའ་ནི་གདོན་མི་ཟ། །

ནམ་ཡང་མི་ཕོག་ཡོད་མིན་ཏེ། ། སྤྲེའུ་འམ་ཡང་ན་བྱ་དང་ནི། ། མིའམ་ཡང་ན་འབེམ་ཀྱང་རུང་། ། གང་ལ་ང་ཡིས་མདའ་འཕངས་པ། ། ནམ་ཡང་མི་ཕོག་ཡོད་མིན་ན། ། དེ་རིང་མདའ་འདི་འཕངས་པ་ནི། ། བཟློག་པའི་ཚུལ་དུ་ཕྱིར་འོངས་ཏེ། ། ལུས་ལ་གནོད་པ་མེད་པར་ནི། ། ང་ཡི་མདུན་དུ་འདུག་པར་འགྱུར། ། གཞན་གྱི་ཚིག་ནི་མཉན་ནས་ཀྱང་། ། ང་ནི་ཁྱོད་ལ་གསོད་འདོད་པ། ། ང་ནི་ཁྱོད་ལ་སྐྱབས་སུ་འགྲོ། ། སྡུག་བསྔལ་གྱུར་པ་ང་ལ་སྐྱོབས། ། ཕྱིན་ཅད་འདི་འདྲ་མི་བྱེད་ཀྱིས། ། སྡུག་བསྔལ་བ་ལ་དེང་བཟོད་ཀྱིས། ། ཁྱོད་སྔོན་དགའ་བ་དྲན་བྱོས་ལ། ། དང་བར་གྱིས་ཤིག་ཁྲོ་ཐུལ་ཅིག ། དེ་ནས་བཙུན་མོ་སྔོ་སངས་ཅན་གྱིས་བད་སའི་རྒྱལ་པོ་འཆར་བྱེད་ ལ་ཚིགས་སུ་བཅད་དེ་སྨྲས་པ། ། བདག་ནི་ལྷ་མིན་དྲི་ཟ་མིན། ། ཤ་ཟ་མོ་མིན་སྲིན་མོ་མིན། ། བདག་ནི་བཙུན་མོ་སྔོ་སངས་ཅན། ། འཇིག་རྟེན་མགོན་པོའི་ཉན་ཐོས་མ། ། ལྷ་ཁྱོད་ལ་ནི་སྙིང་བརྩེ་བས། ། བདག་གི་སེམས་ནི་མཉམ་བཞག་གིས། ། ཁྱབ་བདག་འཇིག་རྟེན་ མགོན་པོ་ལ། ། ཐུགས་ནི་རབ་ཏུ་དང་བར་མཛོད། ། བསྐལ་པ་བྱེ་བ་སྟོང་རྣམས་སུ། ། གང་གིས་བྱམས་པ་ལེགས་བསྒོམས་ཏེ། ། བྱམས་ལ་གནས་པའི་སྐྱེས་བུ་དང་། །

བུད་མེད་དག་ནི་མི་སོད་གསུངས། ། གང་ཞིག་ལོ་ཏོག་སྨིན་པ་ལ། ། སེར་ལྟར་ཡང་དག་ཇི་བཞིན་ མཁྱེན། ། བུད་མེད་རྣམས་ཀྱིས་གནོད་མེད་པ། ། དེ་ཡི་བསྟན་ལ་བདག་དགའ་ལགས། ། འཇིག་རྟེན་མགོན་པོ་ཐམས་ཅད་ཀྱིས། ། བུད་མེད་རྣམས་ནི་སྨད་པར་གསུངས། ། བུད་མེད་རྣམས་ལ་མི་ལྟ་བ། ། འཇིག་རྟེན་མགོན་པོ་རྣམས་ཀྱིས་བསྔགས། ། སངས་རྒྱས་ རྣམས་དང་རང་སངས་རྒྱས། ། བྱང་ཆུབ་སེམས་དཔའ་ཉན་ཐོས་རྣམས། ། བུད་མེད་བསྟེན་པར་མི་མཛད་དེ། ། དེ་ནི་བྱིས་པའི་སྤྱོད་ཡུལ་ལགས། ། བུད་མེད་རྣམས་ལ་བསྟེན་པ་ནི། ། ཀུན་ནས་བདུད་ཀྱི་ཞགས་པར་གསུངས། ། སྡིག་པ་རྣམས་ལ་ཆགས་པ་ནི། ། ཀུན་ འཇོམས་དཀྲུགས་པའི་ཤུལ་དང་འདྲ། ། མི་མཁས་བུད་མེད་ཆགས་པ་དང་། ། སྡིག་པའི་ལས་ནི་བགྱིས་པ་དང་། ། ཡེ་ཤེས་སྤོང་བར་འཚལ་བ་ཡིས། ། སེམས་ཅན་རྣམས་ནི་ངན་འགྲོར་ཁྲིད། ། མཁས་པ་ཐར་བར་འཚལ་བ་ཡིས། ། བུད་མེད་བསྟེན་པར་མི་བགྱི་སྟེ། ། ཞུགས་གཏམས་ངུ་བ་མ་མཆིས་པའི། ། དོང་དུ་མཆོངས་པ་མི་དངོ་ལགས། ། ཡིད་འོང་བཀའ་མཆིད་བགྱིས་པ་དང་། ། བལྟས་པས་ཀྱང་ནི་འཆིང་བགྱིད་ཅིང་། ། མི་བཟད་དམྱལ་བར་ལྟུང་བས་ན། ། ཁྱོད་ནི་བུད་མེད་ཚིག་མ་གསན། །

བདག་ནི་ཁྲོ་བ་མ་མཆིས་ཏེ། ། བདག་གི་ཡིད་ནི་རབ་ཏུ་དང་། ། ཁྱབ་བདག་འཇིག་རྟེན་མགོན་པོ་ལ། ། ཐུགས་ནི་རབ་ཏུ་དང་བར་མཛོད། ། རྒྱལ་པོ་ཆེན་པོ་བཞུད་མཛོད་དེ། ། ཁྱོད་ཀྱིས་རྐང་གཉིས་མཆོག་གཟིགས་ལ། ། དེ་ཡིས་ཆོས་ནི་གང་བསྟན་པ། ། གཡེལ་མ་མཆིས་པར་ཁྱོད་ཀྱིས་གསོན། ། དེ་ནས་ བད་སའི་རྒྱལ་པོ་འཆར་བྱེད་བཙུན་མོ་སྔོ་སངས་ཅན་གྱིས་བསྐུལ་བས་རྒྱལ་པོའི་མཐུ་ཆེན་པོ་དང་། རྒྱལ་པོའི་འབྱོར་པ་ཆེན་པོ་དང་། སྐྱེ་བོའི་ཚོགས་ཕལ་པོ་ཆེས་ཡོངས་སུ་བསྐོར་ཅིང་མདུན་དུ་བདར་ནས་བརྟད་ཅིང་མྱུར་བ་མྱུར་བས་བཅོམ་ལྡན་འདས་ཀྱི་སྤྱན་ སྔར་སོང་བ་དང་། དེ་ནས་བཅོམ་ལྡན་འདས་མཛེས་པ། དང་བར་འགྱུར་བ། དབང་པོ་ཞི་བ། ཐུགས་ཞི་བ། དུལ་བ་དང་། ཞི་གནས་ཀྱི་མཆོག་དམ་པའི་ཕ་རོལ་ཏུ་བྱོན་པ། བསམ་གཏན་དམ་པ་རྣམས་ཀྱི་ཕ་རོལ་དུ་གཤེགས་པ། གསེར་གྱི་མཆོད་སྡོང་ལྟར་མངོན་པར་ འཕགས་པ། དཔལ་གྱིས་མཛེས་ཤིང་། ལྷམ་མེ་ལྷན་ནེ་ལྷང་ངེ་སྟེ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་སྐུ་ལེགས་པར་བརྒྱན་པ། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། བྱང་ཆུབ་སེམས་དཔའི་དགེ་འདུན་གྱིས་ ཡོངས་སུ་བསྐོར་བ།

ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་རྣམས་ཀྱིས་མདུན་གྱིས་བལྟས་པ་མཐོང་བར་གྱུར་ཏོ། ། མཐོང་ནས་ཀྱང་བཅོམ་ལྡན་འདས་ ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་གིས་སྔོན་མ་མཐོང་བའི་རྨད་དུ་བྱུང་བ་ཞིག་མཐོང་བ་བཅོམ་ལྡན་འདས་ལ་གསོལ་བར་འཚལ་ན། བཅོམ་ལྡན་འདས་ཀྱིས་བདག་ ལ་སྐབས་དབྱེ་བར་ཅི་གནང་། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བད་སའི་རྒྱལ་པོ་འཆར་བྱེད་ལ་འདི་སྐད་ཅེས་བཀའ་སྩལ་ཏོ། ། རྒྱལ་པོ་ཆེན་པོ་ཁྱོད་ཀྱིས་ཇི་ལྟར་བཟོད་པ་དེ་ལྟར་སྨྲོས་ཤིག ། ཟློས་ཤིག ། དེ་ནས་བཅོམ་ལྡན་འདས་ལ་བད་སའི་རྒྱལ་པོ་འཆར་བྱེད་ ཀྱིས་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་འདོད་པའི་རྒྱུ་དང་། འདོད་པའི་གཞི་དང་།

འདོད་པ་ལ་ལྷག་པར་ཞེན་པས་དེང་མ་དུའི་བུ་མོ་དཔེ་མེད་ཀྱི་ཚིག་གིས་ཁྲོས་ཤིང་རྔམ་པས་ཟིལ་གྱིས་ནོན་ནས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ལ་ཐ་བ་དང་ཞེ་སྡང་གི་ སེམས་ཀྱང་བསྐྱེད། བཅོམ་ལྡན་འདས་བདག་གིས་མཆིས་བྲང་སྔོ་སངས་ཅན་དགུམ་པའི་སླད་དུ་མདའ་སྟེའུ་ཀ་ཉ་རྔ་མ་ཞིག་འཕངས་ན། དེ་བར་སྣང་ལ་འབར། རབ་ཏུ་འབར། ཀུན་ཏུ་རབ་ཏུ་མཆེད་དེ་འབར་ཞིང་མེ་ལྕེ་གཅིག་ཏུ་གྱུར་ནས་བཟློག་པའི་ཚུལ་དུ་སླར་ལོག་སྟེ་བདག་གི་ གཡོན་རོལ་ལོགས་སུ་མཆིས་པར་གྱུར་ཅིང་ལུས་ལ་ནི་མ་ཕོག་ནས། བཅོམ་ལྡན་འདས་བདག་གིས་མཆིས་བྲང་སྔོ་སངས་ཅན་གྱི་སུག་པ་རྐང་པ་གཉིས་ལ་གཏུགས་ཏེ། མཆིས་བྲང་སྔོ་སངས་ཅན་ལ་འདི་སྐད་དུ་ཁྱོད་ལྷ་མོ་ཞིག་གམ། འོན་ཏེ་ཀླུ་མོའམ། དྲི་ཟ་མོའམ། ཤ་ ཟ་མོའམ། སྲིན་མོའམ། སུ་ཞིག་ལགས་ཞེས་བགྱིས་པ་དང་། དེ་བདག་ལ་འདི་སྐད་དུ་རྒྱལ་པོ་ཆེན་པོ་བདག་ནི་ལྷ་མོ་ཡང་མ་ལགས། ཀླུ་མོ་ཡང་མ་ལགས། དྲི་ཟ་མོ་ཡང་མ་ལགས། ཤ་ཟ་མོ་ཡང་མ་ལགས། སྲིན་མོ་ཡང་མ་ལགས་ཀྱི། བདག་ནི་བཅོམ་ལྡན་འདས་དེ་ བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་ཉན་ཐོས་མ་ལགས་ཏེ།

ཁྱོད་ཉིད་ལ་སྙིང་བརྩེ་བའི་སླད་དུ་སེམས་མཉམ་པར་བཞག་པ་ལགས་སོ་ཞེས་མཆི་ནས། དེ་ནས་མཆིས་བྲང་སྔོ་སངས་ཅན་གྱིས་བཅོམ་ལྡན་འདས་ཀྱི་བསྔགས་པ་རྣམ་གྲངས་ དུ་མས་བརྗོད་པ་དང་། བཅོམ་ལྡན་འདས་དེ་ལ་བདག་འདི་སྙམ་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་ཉན་ཐོས་མ་འདི་ཡང་དེ་ལྟ་བུའི་སྙིང་རྗེའི་བསམ་པ་དང་། དེ་ལྟ་བུའི་བྱམས་པ་ཐོབ་པ་དང་། དེ་ལྟར་རྫུ་འཕྲུལ་ ཆེ་བ་དང་། དེ་ལྟར་མཐུ་ཆེ་བ་དང་། དེ་ལྟར་དབང་ཆེ་བར་གྲགས་པ་ལགས་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྟ་སྨོས་ཀྱང་ཅི་འཚལ་སྙམ་དུ་སེམས་པར་གྱུར་ལགས་ཏེ། བཅོམ་ལྡན་འདས་བདག་འདི་ལྟར་བྱིས་ པ་ལྟ་བུ་དང་། འདི་ལྟར་རྨོངས་པ་དང་། འདི་ལྟར་མི་གསལ་བ་དང་། འདི་ལྟར་མི་མཁས་པས་དེ་བཞིན་གཤེགས་པ་ཉན་ཐོས་ཀྱི་དགེ་འདུན་དང་བཅས་པ་ལ་བདག་གིས་ཐ་བ་དང་ཞེ་སྡང་གི་སེམས་བསྐྱེད་པ་དེ་བཅོམ་ལྡན་འདས་ལ་བཟོད་པར་གསོལ་ཞིང་ཉན་ཐོས་ཀྱི་དགེ་འདུན་གྱི་ མདུན་དུ་ཡང་ནོངས་པ་འཆགས་ཤིང་མཆིས་ན།

ཐུགས་བརྩེ་བའི་སླད་དུ་བདག་གིས་ནོངས་པ་ནོངས་པར་བཤགས་པ་དེ་བཅོམ་ལྡན་འདས་ཀྱིས་ལེགས་པར་རྗེས་སུ་གཟུང་བར་གསོལ། དེང་སླན་ཆད་ཀྱང་སྡོམ་པར་འཚལ་ལགས་སོ། ། བཅོམ་ལྡན་ འདས་ཀྱིས་རྒྱལ་པོ་ཆེན་པོ་ཁྱོད་ལོངས་ལ་རང་གི་སྟན་གང་ཡིན་པ་ལ་འདུག་ཤིག་ཅེས་བད་སའི་རྒྱལ་པོ་འཆར་བྱེད་ཀྱིས་ཉེས་པ་བཤགས་པ་རྗེས་སུ་གཟུང་བར་གནང་ངོ་། ། དེ་ནས་བད་སའི་རྒྱལ་པོ་འཆར་བྱེད་ཀྱིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ ཏེ་ཕྱོགས་གཅིག་ཏུ་འདུག་གོ ། ཕྱོགས་གཅིག་ཏུ་འདུག་ནས་ཀྱང་བཅོམ་ལྡན་འདས་ལ་བད་སའི་རྒྱལ་པོ་འཆར་བྱེད་ཀྱིས་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་ནི་གཏུམ་ཞིང་གཟུ་ལུམས་ཆེ་ལ་དྲག་ཤུལ་ཅན་ལགས་པས་བདག་གིས་བུད་མེད་ཀྱི་ཚིག་གིས་སྡིག་པའི་ སུག་ལས་མངོན་པར་འདུས་བགྱིས་པ་དེས་བཅོམ་ལྡན་འདས་བདག་སེམས་ཅན་དམྱལ་བར་མཆི་བར་བདག་གིས་ཡང་དག་པར་འཚལ་ན། བཅོམ་ལྡན་འདས་བདག་ལ་ཐུགས་བརྩེ་བའི་སླད་དུ་ཅི་ནས་ཀྱང་བདག་སླན་ཆད་བུད་མེད་ཀྱི་དབང་དུ་མཆིས་ནས་སྡིག་པའི་སུག་ ལས་མངོན་པར་འདུ་བགྱིད་པར་མི་འགྱུར་ཞིང་། སེམས་ཅན་དམྱལ་བར་མི་ལྟུང་བ་དང་། བདག་དང་སེམས་ཅན་ཐམས་ཅད་ལ་ཡུན་རིང་པོའི་དོན་དང་།

སྨན་པ་དང་། བདེ་བར་འགྱུར་བའི་སླད་དུ་བཅོམ་ལྡན་འདས་ཀྱིས་བུད་མེད་ཀྱི་སྐྱོན་དེ་དག་ལེགས་པར་ཡང་དག་པར་རབ་ཏུ་ བཤད་ཅིང་བུད་མེད་ཀྱི་སྤྱོད་པ་རྣམས་དང་། བུད་མེད་ཀྱི་མཚན་མ་རྣམས་དང་། བུད་མེད་ཀྱི་སྒྱུ་རྣམས་དང་། བུད་མེད་ཀྱི་གཡོ་རྣམས་དང་། བུད་མེད་ཀྱི་གྱ་གྱུ་རྣམས་དང་། བུད་མེད་ཀྱི་མི་བརྟན་པ་རྣམས་དང་། བུད་མེད་ཀྱི་འགྱུར་ལྡོག་རྣམས་དང་། བུད་མེད་ཀྱི་སྟེན་ པ་རྣམས་དང་། བུད་མེད་ཀྱི་ཚིག་རྣམས་དང་། བུད་མེད་ཀྱི་འཁྲུལ་པ་རྣམས་ཡང་དག་པར་རབ་ཏུ་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བད་སའི་རྒྱལ་པོ་འཆར་བྱེད་ལ་འདི་སྐད་ཅེས་བཀའ་སྩལ་ཏོ། ། རྒྱལ་པོ་ཆེན་པོ་གནས་དེ་ལྟ་བུ་ ཡོངས་སུ་ཞུས་པས་ཁྱོད་ལ་ཅི་ཞིག་བྱ། བཅོམ་ལྡན་འདས་ལ་བད་སའི་རྒྱལ་པོ་འཆར་བྱེད་ཀྱིས་ཡང་འདི་སྐད་ཅེས་གསོལ་ཏོ། ། བཅོམ་ལྡན་འདས་ཅི་ནས་བདག་བུད་མེད་ཀྱི་དབང་དུ་མཆིས་པར་གྱུར་ན་བུད་མེད་ནི་མ་རུངས་མ། འཁོན་ཅན། གཏུམ་མོ་དྲག་ཤུལ་ ཅན་ལགས་ཏེ། བཅོམ་ལྡན་འདས་བུད་མེད་དེ་ནི་བདག་སེམས་ཅན་དམྱལ་བར་མཆི་བར་བགྱིད་འཚལ་བ་ལགས་པས་བཅོམ་ལྡན་འདས་ལས་བདག་དོན་དེ་ཉིད་ཉན་པར་འཚལ་ལགས་སོ། །

དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བད་སའི་རྒྱལ་པོ་འཆར་ བྱེད་ལ་འདི་སྐད་ཅེས་བཀའ་སྩལ་ཏོ། ། རྒྱལ་པོ་ཆེན་པོ་ཁྱོད་ཀྱིས་ཇེ་རང་གི་སྐྱོན་རྣམས་ཡོངས་སུ་རྟོགས་ཤིག་དང་། དེ་ནས་ཕྱིས་བུད་མེད་ཀྱི་སྐྱོན་རྣམས་ཡོངས་སུ་རྟོགས་པར་འགྱུར་རོ། ། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བད་སའི་རྒྱལ་པོ་འཆར་ བྱེད་ཀྱིས་འདི་སྐད་ཅེས་གསོལ་ཏོ། ། བཅོམ་ལྡན་འདས་ལེགས་སོ་ལེགས་སོ། ། སྐྱེས་པ་སྐྱོན་ཇི་ལྟ་བུ་དག་དང་ལྡན་ན་སྐྱེས་པ་བུད་མེད་ཀྱི་དབང་དུ་མཆི་བར་འགྱུར་བའི་སྐྱེས་པའི་སྐྱོན་རྣམས་བཅོམ་ལྡན་འདས་ཀྱིས་བདག་ལ་ཡང་དག་པར་རབ་ཏུ་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བད་སའི་རྒྱལ་པོ་འཆར་བྱེད་ལ་འདི་སྐད་ཅེས་བཀའ་སྩལ་ཏོ། ། རྒྱལ་པོ་ཆེན་པོ་དེའི་ཕྱིར་ཁྱོད་ལེགས་པར་ཉོན་ལ་རབ་ཏུ་ཡིད་ལ་ཟུང་ཤིག་དང་ངས་ཁྱོད་ལ་བཤད་པར་བྱའོ། ། བད་སའི་རྒྱལ་པོ་འཆར་བྱེད་ཀྱིས་བཅོམ་ ལྡན་འདས་དེ་བཞིན་ནོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །

རྒྱལ་པོ་ཆེན་པོ་སྐྱེས་པ་སྐྱོན་གང་དག་དང་ལྡན་ན་སྐྱེས་པ་བུད་མེད་ཀྱི་དབང་དུ་འགྲོ་བར་འགྱུར་བའི་སྐྱེས་པའི་སྐྱེས་བུའི་སྐྱོན་ནི་བཞི་ པོ་འདི་དག་ཡིན་ནོ། ། བཞི་པོ་གང་ཞེ་ན། འདི་ལྟ་སྟེ། རྒྱལ་པོ་ཆེན་པོ་འདི་ལ་སྐྱེས་པ་འདོད་པ་རྣམས་ལ་ཆགས་པར་གྱུར་ཅིང་། དེ་འདོད་པ་རྣམས་ལ་བག་མེད་པར་གྱུར་ནས་ཕྱིར་ཞིང་བུད་མེད་ལ་ལྟ་འདོད་དེ། ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། ཤེས་ རབ་དང་ལྡན་པའི་དགེ་སྦྱོང་དང་བྲམ་ཟེ་དག་ལ་ལྟ་བར་མི་འདོད་ཅིང་། དེས་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། ཤེས་རབ་དང་ལྡན་པའི་དགེ་སྦྱོང་དང་བྲམ་ཟེ་དག་མཐོང་ན་སྙེན་པར་མི་བྱེད། སྟེན་པར་མི་བྱེད། བསྙེན་བཀུར་མི་བྱེད་པས་ དེ་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། ཤེས་རབ་དང་ལྡན་པའི་དགེ་སྦྱོང་དང་བྲམ་ཟེ་དག་གིས་ཡོངས་སུ་སྤངས་པས་དད་པ་ལས་ཡོངས་སུ་ཉམས། ཚུལ་ཁྲིམས་ལས་ཡོངས་སུ་ཉམས། གཏོང་བ་ལས་ཡོངས་སུ་ཉམས། ཤེས་རབ་ལས་ཡོངས་སུ་ཉམས་ ཤིང་དད་པ་དང་བྲལ་བ། ཚུལ་ཁྲིམས་འཆལ་བ། ཐོས་པ་ཉུང་བ། སེར་སྣ་ཅན་དུ་གྱུར་པ། {ཡི་དགས་,ཡི་དྭགས་}ཀྱི་ཡོན་ཏན་གྱི་ཆོས་ལ་ཀུན་ཏུ་སྤྱོད་པ། ཤེས་རབ་འཆལ་བ། རྨ་ལ་ཆགས་པ།

བཙོག་པའི་སྤྱོད་ཡུལ་ཅན། བཤུལ་བར་མནམ་པ་ལ་མངོན་པར་དགའ་ བ། མི་གཙང་བ་ལ་དགའ་བ། བུད་མེད་ལ་དད་ཆེ་བ། ཞི་བ་ཡོངས་སུ་མི་ཚོལ་བ་ཆགས་པའི་སྤྱོད་ཡུལ་ཅན། འགྲོ་བར་བྱ་བ་མ་ཡིན་པར་སོང་བ། སྨད་པར་འོས་པ། མི་གཙང་བའི་སྲིན་བུ་དང་འདྲ་བ། སྙིགས་མ་ལེན་པ། འདོད་པ་ལ་བརྐམ་པ། ཁྲེལ་ དང་ངོ་ཚ་བོར་བ། ལྷ་དང་མིའི་ཆོས་ལས་ཉམས་པ། ངན་པར་སྨད་པའི་འཚོ་བས་འཚོ་བ། མཁས་པས་སྨད་པ། བྱིས་པའི་སྐྱེ་བོ་ལ་སྟེན་པ། སྡིག་པའི་བསམ་པ་དང་ལྡན་པ། སྡིག་པའི་གྲོགས་པོ་ལ་སྟེན་པ། སྡིག་པ་ལ་ཀུན་ཏུ་འཇུག་པ། སྡིག་པ་ལ་གཞོལ་ བ། བུད་མེད་ཀྱི་ཐུལ་འོག་ཏུ་ཆུད་པ། བུད་མེད་ཀྱིས་འཁོལ་བ། བུད་མེད་ཀྱི་དབང་དུ་སོང་བ། བུད་མེད་ལ་གཞོལ་བ། བུད་མེད་དང་གནས་པ། རྨའི་སྒོའི་སྤྱོད་ཡུལ་ཅན། རྨའི་སྒོ་ལ་རྟེན་པ། རྨའི་སྒོ་ལ་གནས་པ། ཁ་ཆུ་དང་། སྣབས་དང་། མཆིལ་མ་ དང་། ངར་སྣབས་དང་། རྣག་དང་། ཤེའུ་རུལ་དང་། གླད་རྒྱས་དང་། མི་གཙང་བའི་སྤྱོད་ཡུལ་ཅན། ལུག་དང་། བ་ལང་དང་། བྱ་གག་དང་། ཁྱི་དང་། ཕག་པ་དང་། ཝ་དང་། བོང་བུའི་ཆོས་སྤྱོད་པ། གནོད་པས་འཚོ་བ། ཕ་མ་ལ་ཕངས་པར་མི་ འཛིན་པ། དགེ་སྦྱོང་དང་། བྲམ་ཟེ་དང་།

སྦྱིན་གནས་ལ་ཕངས་པར་མི་འཛིན་པ། སངས་རྒྱས་དང་། ཆོས་དང་། དགེ་འདུན་ལ་དད་པ་ཡོངས་སུ་ཉམས་པ། མྱ་ངན་ལས་འདའ་བ་ལ་ཡོངས་སུ་ཉམས་པ། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་ལ་ཞུགས་ཤིང་གཞོལ་བ། སེང་གེ་དང་། ནམ་མཁའ་ལྡིང་གི་ལུས་ལ་ཡང་དག་པར་ཞུགས་པ། ལྕགས་ཀྱི་ཤིང་ཤལ་མ་ལི་མཐོན་པོ་དང་། མེ་མ་མུར་ལ་གཞོལ་བ། སེམས་ཅན་དམྱལ་བ་ཡང་སོས་དང་། ཐིག་ནག་དང་། བསྡུས་འཇོམ་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པའི་སེམས་ཅན་དམྱལ་བ་ཆེན་པོར་ཞུགས་པ་ནི་བུད་མེད་ཀྱི་སྐྱོན་འདི་ལྟ་བུ་འདི་དག་ཐོས་ཀྱང་བུད་མེད་ལ་ཆགས་ཤིང་བུད་མེད་དང་སྟེན་པས་བགད་པ་དང་། ངུས་པ་དང་། ཅ་ཅོ་འདོན་འདོད་ པ་དང་། བྲོ་བརྡུངས་པ་དང་། གླུ་བླངས་པ་དང་། རོལ་མོ་བྱས་པ་དག་རྗེས་སུ་དྲན་པར་བྱེད་ཅིང་སྐྱོ་བ་མི་སྐྱེད་ཡིད་བྱུང་བར་མི་བྱེད་དེ། རྒྱལ་པོ་ཆེན་པོ་བྱིས་པའི་ཆོས་ལ་ཀུན་ཏུ་སྤྱོད་ཅིང་ཀུན་ཏུ་སྤྱོད་པ་དེ་དག་དང་ལྡན་པའི་སྐྱེས་པ་ནི་ངན་སོང་རྣམས་སུ་སྐྱེ་བར་འགྱུར་ཏེ། རྒྱལ་པོ་ཆེན་པོ་བུད་མེད་ཀྱི་དབང་དུ་སོང་ནས་འདོད་པ་ལ་རྟེན་ཅིང་།

ངན་འགྲོར་འགྲོ་བར་འཇུག་པ་དེ་ནི་སྐྱེས་པའི་སྐྱེས་བུའི་སྐྱོན་དང་པོ་ཡིན་ནོ། ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། ། འདོད་པ་དྲི་ང་མི་གཙང་སྨད་པར་འོས་པ་ དང་། ། མི་མཐུན་འཇིགས་བྱེད་མི་རྟག་ལས་བྱུང་སྡུག་བསྔལ་བྱེད། ། དོན་མེད་ཕུང་བར་བྱེད་ཅིང་དམན་པ་ཡིན་པས་ན། ། མཁས་པ་སུ་ཞིག་འདོད་པའི་སྐོམ་ལ་སྟེན་པར་བྱེད། ། བཙོག་པས་གང་བའི་ཆབ་ཁུང་དྲི་ང་ལྟ་བུ་དང་། ། མནམ་པར་གྱུར་ཅིང་རུལ་པའི་ཁྱིམ་ རྣམས་ཇི་བཞིན་དང་། ། ཤི་བ་དུར་ཁྲོད་ས་ན་ཤིན་ཏུ་སྨད་པ་ལྟར། ། དེ་བཞིན་འདོད་པ་རྣམས་ཀྱང་མཆོག་ཏུ་སྨད་པ་ཡིན། ། སྦྲང་བུ་རྨ་ཞིག་མཐོང་ནས་རྒྱུག་པ་ཅི་འདྲ་དང་། ། ཕག་ནི་ངན་སྐྱུགས་མཐོང་ནས་རྒྱུག་པ་ཅི་འདྲ་དང་། ། ཁྱི་ནི་ཤ་ཡི་དོན་དུ་ཤེན་སར་འགྲོ་བ་ལྟར། ། དེ་ བཞིན་མི་མཁས་བུད་མེད་དག་ལ་དགའ་བར་བྱེད། ། གྲགས་པ་མེད་ཅིང་མི་སྙན་ཡོན་ཏན་འབྲི་བ་དང་། ། དེ་ལས་ཚུལ་ཁྲིམས་དམ་པ་ཉམས་པར་འགྱུར་བ་དང་། ། མཐོ་རིས་ཉམས་ཤིང་དམྱལ་བ་དག་ཏུ་ལྟུང་བས་ན། ། མཁས་པ་སུ་ཞིག་འདོད་པའི་སྐོམ་ལ་རྟེན་པར་ བྱེད། ། ཇི་ལྟར་ཧ་ལ་ཧ་ལའི་དུག་ནི་ཟོས་པ་ན། །

ལུས་དག་རྨྱ་ཞིང་རྨོངས་པ་སྐྱེ་བ་འགྱུར་བ་ལྟར། ། དེ་བཞིན་འདི་ན་བྱིས་པ་རྣམས་ནི་འདོད་པའི་རྒྱུས། ། རང་གི་ལུས་ཀྱི་དབྱིབས་ནི་དུག་ཏུ་མི་རིག་གོ ། ཇི་ལྟར་སྒྱུ་མ་ཤིན་ཏུ་བསླབ་པའི་མི་ཞིག་གིས། ། རྣམ་པར་འཕྲུལ་པས་སེམས་ཅན་ བརྒྱ་དག་དགའ་བྱེད་ལྟར། ། དེ་བཞིན་བྱིས་པ་བདག་ལ་བདེ་བར་འདོད་པ་རྣམས། ། འདོད་ལ་དགའ་བའི་རྒྱུ་ལས་ངན་འགྲོར་རབ་ཏུ་ལྟུང་། ། ཟས་སྐོམ་སྟོན་མོ་བཟང་པོ་ཐ་དད་པ་དག་དང་། ། གླུ་བྲོ་སིལ་སྙན་བཟང་པོ་ཐ་དད་པ་དག་གིས། ། ཁང་པ་མཆོག་ནས་བྱུང་བའི་ཆུང་མ་ལེན་པ་ ནི། ། གནོད་པ་རྙེད་པ་ཡིན་ཞིང་སྡུག་བསྔལ་སོགས་པ་ཡིན། ། འདོད་པའི་དགའ་ལ་བརྐམ་པ་དག་ནི་གནོད་ཡིན་ཏེ། ། མི་གཙང་མཚོན་འདྲ་རྨོངས་གྱུར་དག་ལ་བསྔགས་པ་རྗོད། ། འདོད་པ་དམན་པ་དག་ལ་བསྔགས་ཤིང་བསྟེན་པས་ནི། ། དམན་པ་དེ་དག་ངན་འགྲོར་རབ་ཏུ་ལྟུང་ བར་འགྱུར། ། གནོད་པ་འདོད་པ་དག་གིས་ཡུལ་རྣམས་རབ་བསྔགས་ཤིང་། ། འདོད་པ་གནོད་པ་ཡིད་ལ་དགའ་བའི་བྱིས་པ་རྣམས། ། དེ་དག་དོན་མེད་འཚོ་བ་རྣམ་པར་སྤངས་ནས་ནི། ། མི་བཟད་གཡང་ས་ཆེན་པོར་རབ་ཏུ་ལྟུང་བར་འགྱུར། ། ང་རྒྱལ་རྨོངས་པས་བཅོམ་པའི་སྐྱེས་བུ་ འདི་དག་ནི། །

རྒྱ་མཚོའི་ཕ་རོལ་མ་མཐོང་བ་ཡི་བྱ་བཞིན་དུ། ། ལྕགས་ཀྱི་མེ་ལྕེ་ལྔ་པོ་དག་ལ་ཆགས་གྱུར་ན། ། བྱིས་པ་རྣམས་ནི་རབ་ཏུ་འབར་ཞིང་འཁྱམ་པར་འགྱུར། ། འདི་ནི་བྱིས་པ་མྱོས་ཤིང་ཤིན་ཏུ་རྨོངས་པ་རྣམས། ། ཤེལ་དུ་མི་མཐོང་སྣོད་མཆོག་ཡིན་པར་སེམས་པ་ ལྟར། ། ལམ་ལ་རྣམ་པར་རྨོངས་རྣམས་འདོད་པའི་ཆེད་ཀྱི་ཕྱིར། ། རྟག་ཏུ་འདིར་གནས་འདི་ནི་གྱ་ནོམ་ཡིན་ཞེས་འཛེར། ། གང་ཕྱིར་རྣམ་པ་སྣ་ཚོགས་ལས་དག་མི་ཤེས་པས། ། འགྲོ་བ་ཐམས་ཅད་རབ་ཉམས་གུས་པ་ཡོད་མིན་པས། ། ཕ་དང་མ་དང་བུ་དང་བུ་མོ་དག་ལ་ནི། ། དོན་ གྱིས་མཆོད་པ་མི་བྱེད་གནོད་པ་ཐོབ་པ་ཡིན། ། དེ་དག་རྟག་ཏུ་བུད་མེད་འདྲིས་པ་རྗོད་བྱེད་ཅིང་། ། དེ་འདྲའི་ལས་ཀྱི་ཚུལ་ལ་རབ་ཏུ་འཇུག་པར་བྱེད། ། དེ་དག་གཏི་མུག་དྲ་བ་སྡིག་པ་རབ་སོགས་ཤིང་། ། ངན་སོང་འགྲོ་བར་འགྱུར་བའི་ལམ་ཡང་སོགས་པར་བྱེད། ། མི་རྣམས་དེ་དག་དེར་ ཆགས་བདེ་བར་འདུ་ཤེས་ཤིང་། ། ཕ་དང་མ་ཡང་ཡོངས་སུ་རབ་ཏུ་སྤོང་བར་བྱེད། ། དེ་དག་མཆོད་འོས་རྣམས་ལ་མཆོད་པ་མི་བྱེད་ཅིང་། ། སྨད་པར་འོས་པའི་འདོད་པ་དག་ལ་སྟེན་པར་བྱེད། ། ཕན་ཚུན་གདུངས་པར་འགྱུར་བ་ལ་ནི་གཞོལ་བྱེད་ཅིང་། །

རྣམ་རྟོག་མུ་ཡིས་ངེས་བཅོམ་ མི་རྣམས་ཉོན་མོངས་པ། ། བཀུར་སྟི་ཡོངས་སུ་ཚོལ་ལ་དགའ་ཞིང་མ་འཕགས་རྣམས། ། ཆོས་མ་ཡིན་པར་འཇིག་རྟེན་རབ་ཏུ་འཛུད་པར་བྱེད། ། གཞི་དེ་ལས་ནི་མཚོན་ཆ་དག་དང་ལྕགས་རྣམས་དང་། ། དེ་བཞིན་བཅིང་བ་དང་ནི་འཐབ་ཅིང་རྩོད་པ་དང་། ། ངེས་པར་འཆི་བའི་སྡུག་ བསྔལ་རབ་ཏུ་མྱོང་བར་འགྱུར། ། ཤི་འཕོས་ནས་ནི་མནར་མེད་འཇིགས་སུ་རུང་བར་འགྲོ། ། ཚེ་འདི་ཉིད་ལ་དེ་བཞིན་སྡུག་བསྔལ་འབྱུང་འགྱུར་ཞིང་། ། ནོར་ཉམས་སྙིང་དུ་སྡུག་པ་རབ་ཏུ་འཇིག་འགྱུར་ལ། ། མཐོ་རིས་ཉམས་ཤིང་དམྱལ་བར་རབ་ཏུ་ལྟུང་བས་ན། ། མཁས་པ་སུ་ཞིག་འདོད་ པའི་འདུ་ཤེས་སྐྱེད་པར་བྱེད། ། ལྕགས་ལས་གྲུབ་པའི་ནགས་ཚལ་སྔོན་པོའི་ཁྲོད་དག་ཏུ། ། མཁས་པས་བདག་ཉིད་རབ་ཏུ་བོར་བ་དེ་བླ་ཞིང་། ། མཛངས་པ་སྤུ་གྲིའི་སོ་ཡིས་བཅད་པ་བྱས་བླ་ལ། ། རལ་གྲི་དག་གི་ཁྲོད་དུ་མལ་ཡང་བཅས་སླ་ཞིང་། ། རབ་ཏུ་མེ་འབར་ཐུ་ལུམ་བཟུང་ བ་དེ་སླ་ལ། ། དེ་བཞིན་ལྕགས་ཀྱི་ཐུ་ལུམ་འབར་བ་ཟ་སླ་ཞིང་། ། མེ་དོང་འཇིགས་སུ་རུང་བ་རྣམས་ལ་རེག་སླ་ཡི། ། ལག་པ་གཉིས་ཀྱིས་ནམ་ཡང་བུད་མེད་རེག་མི་བྱ། ། མིས་ནི་ཇི་ལྟ་ཇི་ལྟར་འདོད་པ་རྣམ་སྟེན་པ། །

དེ་ལྟ་དེ་ལྟར་བདེ་བ་ཐམས་ཅད་རབ་སྤོང་ཞིང་། ། འདི་ལྟར་འདོད་ རྣམས་གཅིག་ཏུ་སྡུག་བསྔལ་མི་གཙང་བས། ། འདོད་པ་སྡུག་བསྔལ་མི་གཙང་བ་དག་རྣམ་པར་སྤོངས། ། འདོད་པ་སྡུག་བསྔལ་ཀུན་གྱི་གཞི་བོར་གྱུར་པ་དང་། ། གང་ཕྱིར་ནོར་ནི་ཆུད་ཟད་འགྱུར་བར་བྱེད་པ་དང་། ། ཡིད་འོང་སྐྱེ་བོ་རྣམས་ཀྱི་ཉམས་པའི་རྩ་བ་བས། ། བུད་མེད་ངེས་པར་སྟེན་ པ་གནོད་པ་ཐོབ་པ་ཡིན། ། སྐྱེས་བུ་གང་གིས་དེ་འདྲའི་ཆོས་ཚུལ་རིག་ནས་ནི། ། བུད་མེད་རྣམས་ལ་རབ་ཏུ་བག་མེད་མི་འགྱུར་བ། ། དེས་ནི་རྟག་ཏུ་མཐོ་རིས་ལམ་ཡང་རྣམ་སྦྱངས་ཤིང་། ། དེས་ནི་བྱང་ཆུབ་དམ་པ་རྙེད་པར་དཀའ་མ་ཡིན། ། རྒྱལ་པོ་ཆེན་པོ་གཞན་ཡང་ མིའི་ཕ་མ་དག་ནི་དཀའ་བ་བྱེད་པ་དག་ཡིན་ཏེ། ཟླ་བ་དགུ་འམ་ཟླ་བ་བཅུར་མངལ་ན་བཟུང་སྟེ་ཤིན་ཏུ་སྡུག་བསྔལ་བར་གསོས་ཤིང་། གཅིན་དང་ཕྱི་ས་ཡང་འཕྱི་བར་བྱེད། པང་དུ་བླངས་ནས་ནུ་ཞོ་ལྡུད་པར་བྱེད། ཕུང་པོ་རྣམས་སྐྱེད་པར་བྱེད། ཁམས་རྣམས་གསོ་བར་བྱེད། འཇིག་ རྟེན་སྟོན་པར་བྱེད། འཛམ་བུའི་གླིང་སྣ་ཚོགས་སྟོན་པར་བྱེད། དོན་དུ་འདོད། ཕན་པར་འདོད། གྲུབ་པ་དང་བདེ་བར་འདོད། འཇིག་རྟེན་ལ་ཡང་ཕན་པར་འདོད་པ་སྟེ། སྦྱིན་པའི་གནས་ཡིན་ལ།

བུ་ལ་ཕན་པ་དང་བདེ་བར་འདོད་པས་དེ་དག་གིས་རང་གི་ནོར་གྱི་ཚོགས་ཀྱིས་ གཞན་གྱི་ཁྱིམ་ནས་གཞན་གྱི་བུ་མོ་བླངས་པ་དང་། དེ་དེ་ལ་ཆགས་ཤིང་མྱོས་ལ་འཆུམས་ཤིང་བརྒྱལ་བ་དང་། ལྷག་པར་ཞེན་པ་དང་། ལྷག་པར་ཞེན་ཅིང་འདུག་པར་གྱུར་ནས། གཞན་གྱི་ཁྱིམ་ནས་བླངས་པའི་བུད་མེད་དེ་ལ་ཆགས་ཤིང་མྱོས་པས་སྦྱིན་པའི་གནས་ཕ་མ་རྒས་ འཁོགས་པ། གཏུགས་ལ་ལུས་ཉམ་ཆུང་ཞིང་མིག་མི་མཐོང་བ་དག་ལ་བརྙས་ཤིང་ལོངས་སྤྱོད་མེད་པ་དང་། ནོར་མེད་པར་བྱས་ནས་རང་གི་ཁྱིམ་ནས་ཕྱུང་སྟེ་སྐྲོད་པར་བྱེད་དོ། ། རྒྱལ་པོ་ཆེན་པོ་འདི་ལྟར་ཕ་མ་དགའ་བ་བྱེད་བྱེད་པ་སྦྱིན་པའི་གནས་ལ་རྟག་ཏུ་རྒྱུན་མི་འཆད་པར་ཡང་དག་པའི་ བདེ་བས་བསྟི་སྟང་དུ་བྱ། བླ་མར་བྱ། བརྗེད་པར་བྱ། མཆོད་པར་བྱ་བའི་རིགས་ན། དེས་དེའི་ཚེ་ཕ་མ་དག་རང་གི་ཁྱིམ་ནས་ཕྱུང་སྟེ་བསྐྲད་ནས་གཞན་གྱི་ཁྱིམ་ནས་བླངས་པའི་བུད་མེད་ལ་བཟའ་བ་དང་། བཏུང་བ་དང་། གོས་རྣམས་ཀྱིས་བསྙེན་བཀུར་བྱེད་ཅིང་བསྟི་སྟང་དུ་བྱེད། གཅེས་སུ་བྱེད། རིམ་གྲོ་བྱེད་ལ་མཆོད་པ་བྱེད་ཅིང་ཡང་དག་པའི་བདེ་བས་བསྙེན་བཀུར་བྱེད་ཀྱི་ཕ་མ་ལ་ནི་མི་བྱེད་པའི་མི་སྙིང་བརྩེ་བ་མེད་པ་དང་། མི་ལྟ་བ་དང་།

ངན་པའི་སེམས་དང་ལྡན་པ་ལ་ལྟོས། རྒྱལ་པོ་ཆེན་པོ་དེས་བདེ་འགྲོར་འགྲོ་བའི་ཆོས་གང་ཡིན་པ་དེ་ནི་སྤངས་ལ། ངན་(འགྲོང་,འགྲོར་)འགྲོ་བའི་ཆོས་གང་ཡིན་པ་དེ་ནི་ཡང་དག་པར་བླངས་ཏེ་འདུག་པའི་མི་དེ་ལ་ཡང་ལྟོས། རྒྱལ་པོ་ཆེན་པོ་བུད་མེད་ཀྱི་དབང་དུ་སོང་ནས་འདོད་པ་རྣམས་ལ་སྟེན་ཅིང་ཕ་མ་ལ་བརྙས་པ་དང་། ངན་འགྲོར་འགྲོ་བར་འཇུག་པ་དེ་ནི་སྐྱེས་པའི་སྐྱེས་བུའི་སྐྱོན་གཉིས་པ་ཡིན་ནོ། ། དེ་ ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། ། གང་དག་ཕ་མ་རྒས་པ་གསོ་བར་བྱེད་པ་ནི། ། དེ་དག་རྟག་ཏུ་བདེ་ཞིང་ཡིད་ཀྱང་བདེ་འགྱུར་ལ། ། འདི་ལ་ལྷ་དང་བཅས་པ་དང་ནི་དབང་པོ་དང་། ། དེ་བཞིན་འདི་ལ་ཚངས་པར་བཅས་པའི་རིགས་སུ་ འགྱུར། ། གང་དག་ཕ་མ་རྒས་པ་གསོ་བར་བྱེད་པ་ནི། ། དེ་དག་སོང་ན་ཕྱིར་འོང་བ་ཡང་འགྲུབ་འགྱུར་ཞིང་། ། རྒྱ་མཚོ་ཆེན་པོ་ནས་ཀྱང་བདེ་ཞིང་ལེགས་འོང་སྟེ། ། དེ་ལྟར་བྱེད་པ་དག་ནི་རབ་མཆོག་རྙེད་པ་ཡིན། ། གང་དག་ཕ་མ་རྒས་པ་གསོ་བར་བྱེད་པ་ཡི། ། ཚོང་པ་དེ་དག་ཡོན་ ཏན་ཀུན་གྱི་གཙོར་འགྱུར་ཞིང་། ། དེ་བཞིན་ཞིང་ལས་འབྲས་བུ་ཕུན་སུམ་ཚོགས་འབྱུང་སྟེ། །

བསོད་ནམས་བགྲང་བའི་དོན་དུ་བརྗོད་པར་མི་ནུས་སོ། ། གང་དག་ཕ་མ་རྒས་པ་གསོ་བར་བྱེད་པ་ནི། ། དེ་དག་ཁུར་རྣམས་ཁྱེར་བའི་རྔ་མོ་རྣམས་དང་ཡང་། ། ཡང་ན་གླང་དང་བོང་བུ་ དག་ཏུའང་མི་འགྱུར་ཏེ། ། མི་རྣམས་དེ་དག་སྤུ་གྲིའི་སོ་ལ་རྫི་མི་འགྱུར། ། གང་དག་ཕ་མ་རྒས་པ་གསོ་བར་བྱེད་པ་ནི། ། དེ་དག་ཆུ་བོ་རབ་མེད་དང་ནི་མེ་མུར་དང་། ། སྤུ་གྲིའི་སོ་དང་ལྡན་པ་ལ་ཡང་(མེ་,མི་)རྒལ་ཏེ། ། དེ་དག་ཟངས་ཁུ་བསྐོལ་བ་འཐུངས་པར་ཡོང་མི་འགྱུར། ། གང་ དག་ཕ་མ་རྒས་པ་གསོ་བར་བྱེད་པ་ནི། ། དེ་དག་ནོར་དང་འབྲུ་ནི་མི་ཉུང་བ་དག་དང་། ། ཆུང་མ་དང་ནི་བུ་དང་བུ་མོ་དག་དང་ཡང་། ། བཻ་དཱུརྱ་དང་རིན་ཆེན་ས་ལེ་སྦྲམ་ཡང་རྙེད། ། གང་དག་ཕ་མ་རྒས་པ་གསོ་བར་བྱེད་པ་ནི། ། དེ་དག་རབ་འཕྲུལ་ལྷའི་ཕོ་བྲང་དག་དང་ནི། ། རྩུབ་ འགྱུར་དང་ནི་འདྲེས་པའི་ཚལ་ཡང་མཐོང་འགྱུར་ཏེ། ། ལྷ་རྣམས་དུ་མས་རྟག་ཏུ་མདུན་དུ་བདར་བར་འགྱུར། ། མི་ཡི་གཙོ་བོར་གྱུར་ཅིང་ལྷ་ཡི་ལྷར་གྱུར་པ། ། ཐུབ་པ་ཆེན་པོ་འདི་འདྲའི་གསུང་ནི་ཐོས་གྱུར་ན། ། རྒས་ཤིང་དབང་པོ་ཤིན་ཏུ་ཉམ་ཆུང་གྱུར་པ་ཡི། ། ཕ་མ་སྦྱིན་ གནས་དམ་པ་སུ་ཞིག་གསོ་མི་བྱེད། །

རྒྱལ་པོ་ཆེན་པོ་གཞན་ཡང་སྐྱེས་བུ་དམ་པ་མ་ཡིན་པ་ནི་སྐྱེས་བུ་དམ་པ་མ་ཡིན་པའི་ལས་བྱེད་ཅིང་ལོག་པར་ལྟ་བ་ལ་མངོན་པར་ཞེན་པ་ཡིན་ཏེ། དེ་ནི་དགེ་བ་དང་མི་དགེ་བ་གང་ཡིན་ཞེས་བདག་གི་དོན་མི་ཤེས་ཤིང་མི་བརྟན་ པ་ཡིན་པས་སྐྱེ་བོ་མང་པོ་རྣམས་མི་དགའ་ཞིང་བྱིས་པའི་སྐྱེ་བོས་བསྔགས་པ་ལ་མངོན་པར་དགའ་བ་དང་། འདོད་ཆགས་དང་ཞེ་སྡང་དག་གིས་རྨོངས་པར་གྱུར་པ་དང་། སྐྱེས་བུ་མཛངས་པ་དག་གིས་སྨད་པ་དང་། ཁྲོ་བས་ཟིལ་གྱིས་ནོན་ཅིང་སྡིག་པའི་ལས་བྱེད་པ་དང་། སངས་ རྒྱས་དང་། བྱང་ཆུབ་སེམས་དཔའ་རྣམས་ཀྱིས་ཡོངས་སུ་སྤངས་པ་དང་། ལོངས་སྤྱོད་ཀྱི་རྒྱགས་པས་མྱོས་པ་དང་། སེར་སྣ་ཅན་དུ་གྱུར་པ་དང་། གཞན་ལ་གནོད་པར་མངོན་པར་དགའ་ཞིང་ཆོས་སྒོམ་པར་མི་དགའ་བ་ཡིན་ཏེ། རྒྱལ་པོ་ཆེན་པོ་སྐྱེས་བུ་དམ་པ་མ་ཡིན་པ་སྐྱེས་བུ་ དམ་པ་མ་ཡིན་པའི་ལས་ལ་མངོན་པར་དགའ་ཞིང་སྐྱེས་བུ་དམ་པའི་ལས་ལ་མི་དགའ་བ་དེ་ལ་ལྟོས། རྒྱལ་པོ་ཆེན་པོ་འདོད་པ་རྣམས་ལ་སྟེན་ཅིང་ངན་འགྲོར་འགྲོ་བར་འཇུག་པ་དེ་ནི་སྐྱེས་པའི་སྐྱེས་བུའི་སྐྱོན་གསུམ་པ་ཡིན་ནོ། ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་ དག་བཀའ་སྩལ་ཏོ། །

འདོད་པ་རྣམས་ཀྱི་གཞིས་ནི་སྐྱེས་བུ་རྣམ་ཉམས་ཤིང་། ། གཞི་དེ་ལས་ནི་སྡིག་པ་དག་ཀྱང་རབ་ཏུ་བྱེད། ། ལོག་པར་ལྟ་བས་རྨོངས་ནས་འདིར་ནི་འཁྱམ་འགྱུར་ཞིང་། ། དེ་ནི་རྣམ་པར་འཁྲུལ་པས་ངན་འགྲོར་འགྲོ་བར་འགྱུར། ། ལོག་དང་ལྡན་པས་ཡོན་ཏན་ ཀུན་གྱིས་རྣམ་སྤངས་ཤིང་། ། དེ་ནི་རྟོག་པ་མེད་ཅིང་བློ་ཡང་ནོར་པ་ཡིན། ། གང་དག་ཆུ་ཀླུང་དག་ཏུ་ཨུད་པལ་རྩྭ་ཚོལ་ལྟར། ། ལོག་པར་ལྟ་བས་ཡོངས་སུ་འཁོར་བར་བྱེད་པ་ཡིན། ། བདེ་བའི་དོན་དུ་བདག་ཉིད་ཡོངས་སུ་སྐྱོང་བྱེད་ཅིང་། ། ཆོས་མ་ཡིན་ལ་ཆགས་པའི་ མི་རྣམས་མང་པོ་དག ། དེ་བཞིན་བདེ་བའི་རྒྱུ་ཕྱིར་འདོད་པ་རྣམས་ཚོལ་བ། ། དེ་དག་གཏི་མུག་རྨོངས་པས་སེམས་ཅན་དམྱལ་བར་འགྲོ། ། གང་དག་འདོད་པ་རྣམས་ཀྱི་དོན་དུ་རྟག་ཏུ་ནི། ། དེ་བཞིན་སེམས་ལ་གཅགས་པའི་སྐྱེས་བུ་ཐ་མ་དང་། ། འདོད་པའི་བདག་ཉིད་ཅན་དང་སྐྱེ་ བོ་སྡིག་ཅན་དང་། ། འདུ་ཤེས་ལོག་པ་དག་ལ་བདེ་བ་ག་ལ་ཡོད། ། མི་རྣམས་དེ་དག་བྱས་པ་མི་གཟོ་སྡིག་བཅས་ཤིང་། ། དད་པ་རྣམ་ཉམས་ཚུལ་འཆོས་གུས་པ་མེད་པ་དང་། ། འཕགས་པའི་ཚོགས་ཀྱིས་རྟག་ཏུ་རྣམ་པར་སྤངས་པས་ན། ། དམྱལ་བ་བཟོད་བརླག་ཤིན་ཏུ་ འཇིགས་སུ་རུང་བར་ལྟུང་། །

གཟུགས་དང་སྒྲ་དང་རོ་ལ་ཆགས་པའི་མི་རྣམས་ནི། ། བྱང་ཆུབ་སེམས་དཔའ་རྣམས་དང་མཁས་པ་མི་མཆོད་ཅིང་། ། ལོག་པར་ལྟ་བས་ཆོས་ཀྱང་ཉན་པར་མི་བྱེད་ལ། ། ལན་འགའ་འང་དགེ་འདུན་ལེགས་པར་མཆོད་པར་མི་བྱེད་པས། ། འཕགས་པ་ རྣམས་ཀྱིས་རྣམ་སྤངས་ངན་སོང་ལྟུང་བས་ན། ། དེ་ཕྱིར་མིའི་སྲིད་པ་འདི་ནི་རྙེད་པ་ལ། ། སྦྱིན་དུལ་ཡང་དག་སྡོམ་ལ་ངེས་པར་སྟེན་ཅིག་དང་། ། དེ་ལས་བྱང་ཆུབ་དམ་པ་མཆོག་ཀྱང་ཐོབ་པར་འགྱུར། ། རྒྱལ་པོ་ཆེན་པོ་གཞན་ཡང་སྐྱེས་པ་ནི་བཟོའི་གནས་སྣ་ཚོགས་དང་། ལས་ ཀྱི་གནས་སྣ་ཚོགས་འདི་དག་གིས་འཚོ་བར་བྱེད་དེ། རྒྱལ་པོ་ཆེན་པོ་འདི་ལྟར་ཡི་གེའམ། ། རྩིས་སམ། གྲངས་སམ། ལག་རྩིས་སམ། མཚོན་ཆའམ། རྒྱལ་པོ་ལ་ཞོ་ཤས་འཚོ་བའམ། ཞིང་ལས་སམ། ཚོང་བྱེད་པའམ། བ་ལང་འཚོ་བའམ། དེ་ལྟ་བུའི་བཟོའི་ གནས་སྣ་ཚོགས་དང་། ལས་ཀྱི་གནས་སྣ་ཚོགས་དག་གིས་འཚོ་བར་བྱེད་ཅིང་འདི་ལྟ་སྟེ། ནོར་གྱི་ཕྱིར་ལམ་མ་ཡིན་པར་ཡང་འགྲོ་བར་བྱེད། ལམ་ངན་པར་ཡང་འགྲོ་བར་བྱེད། གཅོང་རོང་དང་ཆུ་ཀླུང་ཅན་གྱི་ལམ་དུ་ཡང་འགྲོ་བར་བྱེད། མཚོན་ཆའི་ལམ་དུ་ཡང་འགྲོ་བར་བྱེད། རྒྱ་མཚོར་འཇུག་པར་ཡང་འཇུག་པར་བྱེད།

གྲང་བའི་དུས་ན་ཡང་ལྷགས་པས་གནོད་པར་བྱེད། དྲོ་བའི་དུས་ན་ཡང་ཚ་བས་གནོད་པར་བྱེད་ཅིང་བཀྲེས་པ་དང་། སྐོམ་པ་དག་གིས་གནོད་བཞིན་དུ་འགྲོ་བ་ལ་ཡང་སྤྲོ་བར་བྱེད་དེ། ལོངས་སྤྱོད་ཡོངས་སུ་ཚོལ་བ་ན་དེ་ལྟ་བུའི་སྡུག་བསྔལ་ དག་གིས་ལོངས་སྤྱོད་ཡོངས་སུ་བཙལ་ནས་ཀྱང་རང་གི་འཚོ་བ་དག་གི་ཕྱིར་ཉེ་བར་སྒྲུབ་པར་བྱེད་པས་དགེ་སྦྱོང་དང་བྲམ་ཟེ་དག་དང་། བཀྲེན་པ་དང་། སྡུག་ཕོངས་པ་དང་། སློང་མོ་བ་དག་ལ་སྦྱིན་པ་སྦྱིན་པར་མི་བཟོད་ཅིང་བུད་མེད་རྣམས་ཀྱིས་དབང་དུ་བྱས་པ་དང་། བུད་མེད་རྣམས་ ཀྱིས་ཐུལ་འོག་ཏུ་ཆུད་པ་དང་། བུད་མེད་རྣམས་ཀྱིས་བསྐོལ་བ་དང་། བུད་མེད་རྣམས་ལ་བྱམས་པ་དེ་ཉིད་ཀྱིས་བུད་མེད་དེ་དག་ཉིད་གསོ་བའི་ཕྱིར་སྦྱིན་པ་སྦྱིན་པ་དང་། ཚུལ་ཁྲིམས་ཡང་དག་པར་ལེན་པར་མི་ནུས་ཤིང་དེ་དེ་ལ་ཆགས་ལ་བུད་མེད་རྣམས་ཀྱིས་སྤྱོས་ པ་བཟོད་པར་བྱེད་ཅིང་བུད་མེད་ཀྱིས་བསྡིགས་པ་དང་། བལྟས་པ་དང་། བརྒྱབ་པ་དག་ཀྱང་བཟོད་པར་བྱེད་དེ། དེ་སྐྱེས་པར་གྱུར་ཀྱང་བུད་མེད་ཀྱིས་བསྡིགས་པ་དང་དུ་ལེན་ཅིང་། མི་དགའ་བ་མེད་པར་དེའི་ངོར་ལྟ་བར་བྱེད་པ་ནི་འདོད་པའི་གཞིས་བུད་མེད་ཀྱི་དབང་དུ་སོང་བ་ཡིན་ཏེ།

རྒྱལ་པོ་ཆེན་པོ་བུད་མེད་ལ་སྟེན་ཅིང་ངན་འགྲོར་འགྲོ་བར་འཇུག་པ་དེ་ནི་སྐྱེས་པ་བུད་མེད་ལ་བརྐམ་ཞིང་ངན་སྐྱུགས་ཀྱི་སྒོ་ལ་གདུ་བ་དང་། མི་གཙང་བ་ལ་དགའ་བ་དང་། ཤེས་བཞིན་མེད་པར་སྤྱོད་པའི་སྐྱེས་བུའི་སྐྱོན་བཞི་པ་ཡིན་ཏེ། རྒྱལ་པོ་ཆེན་པོ་སྐྱོན་དེ་དག་དང་ལྡན་པའི་སྐྱེས་པ་ ནི་འདོད་པ་རྣམས་ཀྱི་དབང་དུ་འགྲོ་བ་ཡིན་ནོ། ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། ། འདོད་པ་རྣམས་ནི་ཚོལ་བ་དང་། ། རབ་ཏུ་མྱོས་པ་ག་ལ་བདེ། ། འདོད་པ་དམན་པ་རྣམས་སྟེན་པ། ། དེ་ནི་གང་གིས་བདེ་བར་འགྱུར། ། སྐྱེས་ བུ་དམ་པ་མ་ཡིན་པའི། ། ལས་རྣམས་བྱེད་ཅིང་མི་སྡོམ་ལ། ། འདོད་པའི་འདོད་ཆགས་ཚོལ་བྱེད་པ། ། དེ་དག་རབ་ཉམས་ཆུད་ཀྱང་ཟ། ། མི་རྣམས་གང་དག་མི་མཁས་པ། ། རྔ་མོ་བོང་བུའི་ཆོས་སྤྱོད་ཅིང་། ། བུད་མེད་མཐོང་ན་རབ་སྙེགས་པ། ། ངན་སྐྱུགས་གནས་ལ་ཕག་ རྣམས་བཞིན། ། གང་ལ་བྱིས་པ་གུས་བཅས་པའི། ། འདོད་རྣམས་དྲི་ང་མི་གཙང་ཡང་། ། འདོད་པའི་སྐྱོན་རྣམས་མི་མཐོང་བ། ། ས་ཡི་སྟེང་ན་དམུས་ལོང་བཞིན། ། གཟུགས་ཀྱི་འཆིང་བས་བཅིངས་པ་རྣམས། ། འདོད་པའི་འདུ་ཤེས་རབ་ཏུ་འཇུག །

བྱིས་པ་འདོད་རྣམས་ སྟེན་པ་དག ། ཁྱི་དང་ཝ་རྣམས་ཇི་བཞིན་ནོ། ། སྒྲ་དྲི་རོ་དང་རེག་རྣམས་ཀྱིས། ། གང་ལ་སོ་སོའི་སྐྱེ་བོ་རྣམས། ། བྱིས་པ་འཁོར་བ་ཡོངས་འཁོར་བ། ། སྤྲེའུ་རྣམས་ཕུར་ལ་བཏགས་པ་བཞིན། ། བྱིས་པ་མ་རིག་ཁེབས་པ་རྣམས། ། མུན་པའི་ཕུང་པོས་བསྒྲིབས་གྱུར་ཅིང་། བུད་མེད་རྣམས་ལ་ཆགས་པ་ནི། ། མི་གཙང་གནས་ལ་ཁྭ་བཞིན་ནོ། ། གང་གིས་ངན་འགྲོར་རབ་འཇུག་པ། ། དེ་ནི་བདུད་ཀྱི་སྤྱོད་ཡུལ་ཡིན། ། རོ་མྱང་འདུ་ཤེས་ཆགས་གྱུར་པ། ། ངན་སྐྱུགས་གནས་ལ་སྲིན་བུ་བཞིན། ། གསང་བའི་གཤེད་མ་རྣམས་ཀྱིས་ནི། ། ཇི་ལྟར་མི་ ཞིག་བོར་བ་ལྟར། ། ཤེས་ན་ཐར་པ་ཐོབ་འགྱུར་ཞིང་། ། བུད་མེད་དབང་དུ་འགྲོ་མི་འགྱུར། ། འདོད་པ་བུད་མེད་ལྟ་བྱེད་པའི། ། ཀུན་ཏུ་སྦྱོར་ལས་འཇིགས་པ་སྐྱེ། ། བྱིས་པ་མཚན་མར་འཛིན་པ་རྣམས། ། འདོད་པའི་སྲེད་པ་རབ་ཏུ་འཕེལ། ། སོས་ཀའི་དུས་ན་མི་ཞིག་ནི། ། དགོན་པ་ཆེན་པོར་སོང་གྱུར་ནས། ། བྱིས་པས་ལན་ཚྭའི་ཆུ་འཐུངས་ན། ། སྐོམ་པ་ཕྱིར་ཞིང་རབ་སྐྱེད་ལྟར། ། དེ་བཞིན་བདེན་པ་མ་མཐོང་བའི། ། བྱིས་པ་རྨོངས་པས་འཚོ་བ་རྣམས། ། འདི་ན་ཕྱིར་ཞིང་བུད་མེད་ལ། ། འདོད་པའི་སྲེད་པ་བརྟན་པར་འགྱུར། །

ཇི་ལྟར་མི་ལུས་ མཛེ་ཅན་ལ། ། སྲོག་ཆགས་རྣམས་ནི་ཟ་བ་ལྟར། ། འདོད་བརྐམ་སོ་སོའི་སྐྱེ་བོ་རྣམས། ། དེ་བཞིན་བུད་མེད་རྣམས་ཀྱིས་ཟོས། ། མི་གཙང་བུམ་པ་ཁྲ་བོ་ཞིག ། ཁ་དོག་ལྡན་པར་སྣང་མོད་ཀྱི། ། ནང་ན་ཧ་ལ་ཧ་ལའི་དུག ། དྲག་པོ་ཆེན་པོ་ཡོད་པ་ལྟར། ། དེ་ བཞིན་བུད་མེད་བརྒྱན་པ་དག ། གང་དང་གང་ན་སྣང་བ་ཡང་། ། གཅིན་དང་ཕྱི་སས་གང་བ་ཡི། ། རྐྱལ་བ་རླུང་གིས་གང་བ་བཞིན། ། འབྲུ་མར་གྱིས་ནི་བདར་བའི་མཚོན། ། གོས་ཀྱིས་དཀྲིས་པ་ཇི་བཞིན་དུ། ། དེ་བཞིན་བུད་མེད་བརྒྱན་པ་ཡང་། ། རལ་གྲི་རླིང་བ་ གཡོགས་པ་བཞིན། ། ཇི་ལྟར་མེ་དོང་གང་གྱུར་ལ། ། དུ་བ་མེད་ཅིང་འབར་ལྡན་ལྟར། ། བུད་མེད་དེ་བཞིན་མེ་འདྲ་ཞིང་། ། སྲིན་བུ་གཏུམ་པོ་བཞིན་དུ་གཡོ། ། སྲེག་པའི་བསྐལ་པ་འདིར་བྱུང་ན། ། ས་འདི་ཀུན་ཏུ་འབར་གྱུར་ལ། ། རྩྭ་དང་གེལ་པ་འཇིག་འགྱུར་ཞིང་། ། ཆུ་ཀླུང་དག་ཀྱང་སྐམས་པར་འགྱུར། ། འབྱུང་པོ་ཆེན་པོའི་གནས་གྱུར་པ། ། རྒྱ་མཚོ་ཡང་ནི་སྐམ་འགྱུར་ཞིང་། ། རི་བོ་ཆེན་པོ་རྣམས་སྲེག་ལ། ། དེ་བཞིན་ལྷུན་པོའང་འཇིག་པར་འགྱུར། ། རྒྱལ་ཆེན་འབྱུང་པོ་འཛིན་པ་ཡི། ། ས་འདིའང་རྣམ་པར་འཇིག་འགྱུར་ཞིང་། །

བྲག་ཆེན་རྣམས་ནི་འཇིག་འགྱུར་ཡང་། ། སྐྱོབ་པར་བྱེད་པ་ཡོད་མ་ཡིན། ། ཇི་ལྟར་མེ་ཡིས་རིར་བཅས་དང་། ། རྒྱ་མཚོར་བཅས་པ་སྲེག་པ་ལྟར། ། དེ་བཞིན་བུད་མེད་མེ་འདྲ་སྟེ། ། གཏུམ་ཞིང་སྐྱེས་བུ་གཡོ་བར་བྱེད། ། སྣབས་དང་མཆིལ་མ་ཁ་ཆུ་ དང་། ། ཀླད་རྒྱས་རུལ་པའི་ཀླད་པ་དང་། ། ལུས་ལས་དྲི་ང་འཛག་དེ་ལ། ། བྱིས་པ་རྣམས་ནི་སྦྲང་རྩི་བཞིན། ། ཁ་སྒོ་རུས་པས་གང་བ་དང་། ། ཤ་དང་ལྤགས་ལ་སོགས་བསགས་ཤིང་། ། དེ་བཞིན་ལུས་ནི་འབྲས་འདྲ་སྟེ། ། དྲི་ང་སྨད་པར་བྱ་བ་ཡིན། ། མི་གཙང་སྣ་ ཚོགས་གང་བ་དང་། ། འབྲས་ནི་སྨིན་པར་གྱུར་པ་ལྟར། ། དེ་ལྟར་ལུས་འདི་མི་གཙང་བ། ། སྣ་ཚོགས་རྣམས་ཀྱི་སྣོད་ཡིན་ནོ། ། ལྟོ་ནི་གཉེ་མ་མཚེར་པ་དང་། ། གློ་བས་གང་ཞིང་མཁལ་མ་དང་། ། ཁྲག་དང་མཁྲིས་པས་གང་གྱུར་ལ། ། ཀླད་རྒྱས་ཀྱིས་ནི་ཀླད་པ་གང་། ། ཁོང་པའི་ནང་ན་སྲིན་བུའི་རིགས། ། བརྒྱད་ཁྲི་པོ་དག་གནས་གྱུར་ཀྱང་། ། གཏི་མུག་དྲ་བས་བསྒྲིབས་པ་ཡི། ། བྱིས་པ་རྣམས་ཀྱིས་མི་མཐོང་ངོ་། ། རྨ་སྒོ་དགུ་ནས་རྟག་ཏུ་ནི། ། མི་གཙང་རུལ་བ་ཟག་གྱུར་ཀྱང་། ། སྨྲ་བ་དག་དང་ལྟ་བ་ལ། ། བྱིས་པ་རྣམས་ནི་མཚན་ མར་འཛིན། །

གང་ཞིག་ཀུན་གྱིས་སྨད་པའི་ཡུལ། ། ཆགས་པ་རྣམས་ཀྱིས་ཕྱིས་མི་ཤེས། ། མི་གཙང་སྤྱོད་ཡུལ་བྱིས་པ་རྣམས། ། སྣབས་དང་མཆིལ་མ་ཟ་བར་བྱེད། ། སྨད་པར་འོས་ལ་ཆགས་བྱེད་པ། ། སྦྲང་བུ་རྣམས་ཀྱིས་རྨ་མཐོང་བཞིན། ། མཆན་ ཁུང་དག་ནས་རྡུལ་འཛག་ཅིང་། ། སྨད་པའི་དྲི་ནི་འབྱུང་བར་འགྱུར། ། བྱིས་པ་སྡུག་བསྔལ་ཆགས་བྱེད་པ། ། དེ་དག་བདག་ལ་གནོད་ཕྱིར་གཡོ། ། དེས་ནི་མྱུར་དུ་ཕོངས་གྱུར་ཏེ། ། ཉ་རྣམས་ཆུ་ནས་བཏོན་པ་བཞིན། ། འཇིགས་རུང་ལག་ན་མཚོན་ཐོགས་ཀྱིས། ། ཇི་ལྟར་མི་ཞིག་གཙེས་པ་ལྟར། ། མཚོན་འདྲའི་བུད་མེད་སྡིག་ཅན་གྱིས། ། འདོད་ལ་ཆགས་རྣམས་དེ་བཞིན་ནོ། ། རྣམ་རྒྱལ་ལག་ན་མཚོན་ཐོགས་པས། ། ཇི་ལྟར་རྒྱལ་པོ་གཙེས་པ་ལྟར། ། འདོད་ཆགས་མེ་དང་འདྲ་བ་ཡིས། ། འདོད་ལ་ཆགས་རྣམས་དེ་བཞིན་ སྲེག ། ཤེན་པའི་གནས་ལ་ཁྱི་རྣམས་ལྟར། ། མྱང་བར་འདུ་ཤེས་བྱིས་པ་རྣམས། ། ཇི་ལྟར་སྒྲ་ཡིས་སྐྲག་པ་ལྟར། ། མྱུར་དུ་སྡུག་བསྔལ་མྱོང་བར་འགྱུར། ། རང་གི་ལས་ཀྱི་ཉེས་པ་ཡིས། ། དེ་ལ་སྐྱོབ་པ་མེད་པ་ལྟར། ། དེ་བཞིན་བདག་གི་ ཉེས་པ་ཡིས། ། སེམས་ཅན་རྣམས་ནི་ངན་འགྲོར་འགྲོ། ། དེ་དག་སངས་རྒྱས་ཆོས་སྤངས་ནས། །

བུད་མེད་རྣམས་ཀྱི་རྣག་ལ་སྟེན། ། སེམས་ནི་རོ་ལ་ཆགས་གྱུར་པ། ། དེ་ཡིས་ངན་འགྲོར་འགྲོ་བར་འགྱུར། ། ཇི་ལྟར་སྤྲེའུ་ཞིག་ཤིང་ལས་ནི། ། ཤིང་གཞན་དུ་ནི་རྒྱུ་བའི་ཚེ། ། དེ་ནི་གནས་དེར་གཙེས་གྱུར་ན། ། དེ་ཉིད་དུ་ནི་སྡུག་བསྔལ་འགྱུར། ། དེ་བཞིན་འདོད་ལ་བརྐམ་པ་དང་། ། སྡུག་བསྔལ་འདོད་ཆགས་སྟེན་པ་དང་། ། གཏི་མུག་རྒྱ་ལ་ཐོགས་པ་རྣམས། ། དུས་ནི་ཡང་དང་ཡང་དུ་ འདའ། ། མི་བཀྲེན་རྣམས་ནི་གསལ་ཤིང་ལ། ། རབ་ཏུ་བཙུགས་ནས་འཕྱང་བ་ལྟར། ། དེ་བཞིན་འདོད་ལ་ཆགས་པ་རྣམས། ། ཤལ་མ་ལི་ནི་མཐོ་ལ་འཕྱང་། ། ཇི་ལྟར་མོན་སྲན་སྡེའུ་དང་གྲེའུ། ། ལྕགས་ཟངས་རྣམས་སུ་བླུགས་བྱས་ནས། ། མེས་ནི་རབ་ཏུ་བསྲེགས་པ་ན། ། དབུ་བར་བཅས་ཤིང་ཁོལ་བ་ལྟར། ། དེ་བཞིན་དགེ་བ་མ་མཐོང་ཞིང་། ། འདོད་ལ་ཆགས་པའི་སྐྱེ་བོ་རྣམས། ། ཤི་ནས་ངན་སོང་འགྲོ་འགྱུར་ཞིང་། ། ལྕགས་ཟངས་རྣམས་སུ་བཙོ་བར་འགྱུར། ། མི་རྣམས་གང་དག་ སྡིག་བྱེད་པའི། ། སེམས་ཅན་སྡིག་པ་རྣམས་ཀྱི་གནས། ། ཟངས་ནི་བྱེ་བ་དྲུག་ཅུ་དང་། ། གཞན་ཡང་བཞི་པོ་དག་ཡིན་ནོ། ། ཟངས་ནི་སོ་སོ་རེ་རེ་ལ། ། ཚད་ནི་དམིགས་སུ་ཡོད་མིན་ཞིང་། ། མེ་ཡི་ཕུང་པོར་ལྡན་རྣམས་སུ། །

བསྐལ་པ་དུ་མར་ བཙོ་བར་འགྱུར། ། ཁ་ཅིག་ཟངས་རྣམས་དེ་དག་ཏུ། ། རང་གི་ལས་ཀྱིས་བསྐལ་བརྒྱ་འམ། ། ཉིས་བརྒྱ་སུམ་བརྒྱ་ཚང་བར་འཚེད། ། ཡང་ན་བཞི་བརྒྱར་བཙོ་བར་འགྱུར། ། ཕྲ་སྐམ་རྣོན་པོ་རྣམས་ཀྱིས་ནི། ། བཟུང་ཞིང་ཡང་དང་ཡང་སྨྱུགས་པས། ། དེ་དག་ཤ་ནི་ཡོད་མིན་ཞིང་། ། དུང་ལྟར་དཀར་བ་རྣམས་སུ་འགྱུར། ། ལྕགས་ཀྱི་གཞོང་པར་འཇུག་ནས་ནི། ། རབ་ཏུ་ཚ་ཞིང་འདྲེན་པ་མེད། ། ཤི་ཞིང་ཤི་ཞིང་སྐྱེ་འགྱུར་ཏེ། ། རང་གི་ལས་ཀྱིས་གནས་པར་འགྱུར། ། གང་ཚེ་དམྱལ་བའི་སྲུངས་རྣམས་ཀྱིས། ། ངན་པའི་མི་རྣམས་དེ་དག་ནི། ། གཏུན་ལ་སོགས་པས་བརྡུངས་པས་ནི། ། ཤ་རྐང་རུས་པ་ཕྱེ་མར་འགྱུར། ། དེ་ཡིས་ཚེ་ན་དེ་དག་ལ། ། ཤིན་ཏུ་གྲང་བའི་རླུང་ཡང་ལྡང་། ། དེས་ནི་དམྱལ་བའི་སེམས་ ཅན་རྣམས། ། སྡུག་བསྔལ་གྱུར་པ་དེ་ལས་འཚོ། ། མི་རྣམས་གང་དག་སྡིག་བྱེད་པ། ། གཏུན་བུ་དྲག་པོ་རྣམས་ཀྱིས་འཇོམས། ། སྟ་རེ་རྣམས་ཀྱིས་གཤེག་པ་དང་། ། དེ་བཞིན་གསལ་ཤིང་འཛུགས་པར་འགྱུར། ། མི་རྣམས་གང་ དག་སྡིག་བྱེད་པའི། ། སེམས་ཅན་རྣམས་ཀྱི་ལུས་ལ་ནི། ། ལྕགས་མདུང་རྩེ་མོ་བཞི་པ་དང་། ། རྩེ་གསུམ་པ་དང་རྩེ་ལྔ་འབབ། ། མི་རྣམས་གང་དག་སྡིག་བྱེད་པ། །

རལ་གྲིའི་མཆུ་ཅན་ཁྭ་རྣམས་ཀྱིས། ། མགོ་དང་{གླད་པ་,ཀླད་པ་}བཏོགས་འགྱུར་ཞིང་། ། ཝ་དང་སྤྱང་ཀིས་ཟོས་པར་འགྱུར། ། མི་རྣམས་གང་དག་སྡིག་བྱེད་པ། ། ངན་སྐྱུགས་རུལ་པ་དྲི་ང་ཞིང་། ། ཀུན་གྱིས་སྨད་པར་ལྟུང་འགྱུར་ལ། ། སྤུ་གྲིའི་ཆུ་ཀླུང་རྣམས་སུ་ལྟུང་། ། མི་རྣམས་གང་དག་སྡིག་བྱེད་པ། ། རབ་ཏུ་ཚ་བར་སྲེག་ འགྱུར་ཞིང་། ། ངུ་འབོད་དང་ནི་ངུ་འབོད་ཆེ། ། ཐིག་ནག་ཏུ་ཡང་སྲེག་པར་འགྱུར། ། མི་རྣམས་གང་དག་སྡིག་བྱེད་པ། ། ཐིག་ནག་ཏུ་ནི་སྐྱེས་ནས་ཀྱང་། ། ཡང་དང་ཡང་དུ་མེ་མུར་དང་། ། སྤུ་གྲིའི་ཆུ་ཀླུང་རྣམས་སུ་ལྟུང་། ། གང་ཚེ་ལྕགས་ ཀྱི་ཟངས་པོ་ཆེར། ། མི་རྣམས་དེ་དག་འཚེད་པ་ན། ། ཁྱི་རྣམས་ཀྱིས་ནི་གཙེས་གྱུར་ནས། ། དེ་དག་བདེ་བ་ཚོལ་བར་བྱེད། ། མི་རྣམས་གང་དག་སྡིག་བྱེད་པ། ། དམྱལ་བ་དྲག་པོ་ཆེན་པོར་ནི། ། ལྷུང་ནས་དཔུང་གཉེན་ཡོད་མིན་ཞིང་། ། ལྕགས་ཀྱི་ཐུ་ལུམ་ཟ་བར་འགྱུར། ། མི་རྣམས་སྡིག་པ་བྱེད་པ་དག ། ལྕགས་ལས་གྲུབ་པའི་བྲག་ཆེན་དང་། ། མི་སྡུག་རི་བོ་རྣམས་ཀྱིས་ནི། ། དེ་ཚེ་ཀུན་ནས་ལུས་འཇོམས་བྱེད། ། དེས་ནི་རང་གིས་ལས་བྱས་པའི། ། འབྲས་བུ་དེ་འདྲ་ཐོབ་གྱུར་ ཅིང་། །

དེ་ཡིས་ཚོར་བ་མྱོང་བས་ན། ། དེ་ལ་སྐྱོབ་པ་འགའ་ཡང་མེད། ། ཇི་སྙེད་རྟེན་པ་ཐམས་ཅད་ནི། ། བདག་གི་མདུན་དེར་འགའ་ཡང་མེད། ། དེར་ནི་མགོན་མེད་བདག་གཅིག་པུ། ། སྡུག་བསྔལ་ཚོར་བ་མྱོང་བར་བྱེད། ། གང་དག་བདེ་ ཕྱིར་དོན་མིན་པར། ། སྔན་ཆད་ཉེས་པར་སྤྱད་བྱས་ཀྱང་། ། ཕ་མ་དེ་དག་དེ་རིང་ནི། ། རྣམ་པར་གྲོལ་བའི་མཐུ་ཡང་མེད། ། གང་དག་བདེ་ཕྱིར་དོན་མིན་པ། ། སྔན་ཆད་ཉེས་པར་སྤྱད་བྱས་ཀྱང་། ། བུ་དང་བུ་མོ་ཆུང་མ་རྣམས། ། དེ་རིང་ བདག་ལ་འགྲོལ་མི་ནུས། ། གང་དག་བདེ་ཕྱིར་དོན་མིན་པར། ། སྔན་ཆད་ཉེས་པར་སྤྱད་བྱས་ཀྱང་། ། མཛའ་བཤེས་ཉེ་དུ་དེ་དག་ཀུན། ། རྣམ་པར་དགྲོལ་བར་ཡོང་མི་ནུས། ། གང་དག་བདེ་ཕྱིར་དོན་མིན་པར། ། སྔན་ཆད་ཉེས་པར་སྤྱད་བྱས་ཀྱང་། ། བདག་གི་རྩ་ལག་དེ་དག་ཀུན། ། དེ་རིང་འགྲོལ་བར་མི་ནུས་སོ། ། འདོད་པ་དམན་པ་རྣམས་སྟེན་ཅིང་། ། དམན་པའི་ཆོས་རྣམས་བསྟེན་ནས་ནི། ། ཉེས་པའི་ལས་རྣམས་བྱེད་པ་དག ། དེ་ཡིས་ངན་འགྲོར་འགྲོ་བར་འགྱུར། ། ཤེས་རབ་འཆལ་ པ་མནར་མེད་པར། ། སོང་ནས་སྡུག་བསྔལ་ཚོར་བ་མྱོང་། ། སངས་རྒྱས་རྣམས་ཀྱིས་བུད་མེད་དག ། ཕྱི་སའི་དྲི་ལྟར་དམན་པར་བསྒྲགས། །

དེ་ཕྱིར་དམན་པ་རྣམས་དང་ནི། ། དམན་པའི་བུད་མེད་རྣམས་སྟེན་པ། ། བྱིས་པ་དེ་ནི་ཕྱི་ས་ཡི། ། རྐྱལ་པ་བཟུང་ནས་གནས་པ་ཡིན། ། ཅི་འདྲའི་ལས་ནི་བྱེད་པ་ལྟར། ། དེ་འདྲའི་འབྲས་བུ་ཐོབ་འགྱུར་ཏེ། ། རྒྱལ་པོ་ཡི་ནི་ཆད་པ་དང་། ། སྡུག་བསྔལ་བཅིང་བའང་མྱོང་བར་འགྱུར། ། བུད་མེད་གཞི་ལས་སྐྱེས་པ་ཡང་། ། གསང་དང་བཅིང་བ་མྱོང་ འགྱུར་ཞིང་། ། དམྱལ་སྲུངས་རྣམས་ཀྱིས་སྲེག་པ་དང་། ། ངེས་པར་འཆིང་བའང་མྱོང་བར་འགྱུར། ། བུད་མེད་རྣམས་ལ་བརྐམ་པ་ཡི། ། བློ་ངན་དེ་དག་བདེ་མི་འགྱུར། ། གསལ་ཤིང་མཐོན་པོ་རྣམས་སུ་ནི། ། བཙུགས་ཤིང་ཆུར་ཡང་བཅུག་པར་འགྱུར། ། ས་ཡི་སེར་ཀར་བཅུག་ནས་ནི། ། དེ་བཞིན་རལ་གྲིས་གདབ་པར་འགྱུར། ། དེ་འདྲ་བ་དག་ཐོས་ནས་ནི། ། དེ་དག་ཡི་ཆད་བདེ་མི་འགྱུར། ། རྨོངས་པ་བུད་མེད་ལྷན་ཅིག་ཏུ། ། ཡང་དང་ཡང་དུ་འདུ་ འཛི་བྱེད། ། སྡུག་བསྔལ་འདོད་པ་རྣམས་སྟེན་ཅིང་། ། སྨད་པ་རྣམས་ཀྱང་སྨྲ་བར་བྱེད། ། རྨོངས་པ་རྣམས་ཀྱིས་ཆོས་ཐོས་ནས། ། དགེ་བར་གསུངས་ཞེས་རྗོད་བྱེད་ཀྱང་། ། དེ་སེམས་བུད་མེད་ཕྱི་བཞིན་སོང་། ། བྱི་བ་ལ་ནི་བྱི་ལ་བཞིན། ། རྒྱལ་བས་གསུངས་པ་ཐོས་གྱུར་ནས། །

ཡུད་ཙམ་ཞིག་ནི་ཡིད་བྱུང་ཡང་། ། ཧ་ལ་ཧ་ལའི་དུག་འདྲ་བའི། ། འདོད་ཆགས་ཀྱིས་ནི་དེ་ཡང་འཁྲུགས། ། ཇི་ལྟར་ཕག་ནི་ཡུད་ཙམ་ཞིག ། དངངས་ཤིང་སྐྲག་པར་བྱུང་གྱུར་ཀྱང་། ། དེས་ནི་ ཕྱི་ས་མཐོང་ན་ཡང་། ། ཆགས་པ་སྐྱེད་པར་བྱེད་པ་ལྟར། ། དེ་བཞིན་བྱིས་པ་བདེ་འདོད་རྣམས། ། རྒྱལ་བའི་བསྟན་པ་སྤངས་ནས་ནི། ། འདོད་པ་དམན་པ་རྣམས་བསྟེན་པས། ། དེས་ནི་ངན་འགྲོར་འགྲོ་བར་འགྱུར། ། འདོད་པ་རྣམས་ལ་ ཆགས་མྱོས་ནས། ། ཤིན་ཏུ་སྡིག་པའི་ལས་བྱས་ཤིང་། ། ཚུལ་ཁྲིམས་ཅན་དག་བསླུས་བྱས་ནས། ། ཕྱིས་ནི་ངན་འགྲོར་འགྲོ་བར་འགྱུར། ། ཤེས་རབ་ཅན་གྱིས་དལ་རྙེད་ཅིང་། ། དེ་འདྲའི་ཆོས་ནི་ཐོས་གྱུར་ནས། ། འདོད་ཀུན་སྤངས་ནས་འདི་ལ་ ནི། ། མཁས་པ་མངོན་པར་རབ་བྱུང་ཤིག ། རྒྱལ་པོ་ཆེན་པོ་སྐྱེས་པ་འདོད་པ་ལ་སྟེན་པ་རྣམས་ཀྱི་སྐྱོན་ནི་དེ་དག་ཡིན་ཏེ། འདོད་པའི་གཞི་དང་། འདོད་པའི་རྨ་དང་། འདོད་པ་ལ་ལྷག་པར་ཞེན་པ་རྣམས་ནི་སེམས་ཅན་དམྱལ་བ་པ་རྣམས་ཀྱི་ཚོར་བ་ མྱོང་བར་འགྱུར་རོ། ། རྒྱལ་པོ་ཆེན་པོ་དེ་ལྟ་བས་ན་ཁྱོད་ཀྱིས་རྟག་པར་རྒྱུན་ཏུ་སངས་རྒྱས་རྗེས་སུ་དྲན་པ་བསྒོམ་པར་བྱའོ། །

ཁྱོད་ཀྱིས་ལུས་སུ་གཏོགས་པའི་སེམས་རྗེས་སུ་དྲན་པ་བསྒོམ་པར་བྱའོ། ། དེ་ལྟར་བཅོམ་ལྡན་འདས་ཀྱིས་བད་སའི་རྒྱལ་པོ་འཆར་ བྱེད་ལ་དེ་ལྟ་དེ་ལྟར་ཆོས་བསྟན་པར་མཛད་དེ། ཆོས་བསྟན་པ་དེས་བད་སའི་རྒྱལ་པོ་འཆར་བྱེད་དེ་བཞིན་གཤེགས་པ་ལ་དགའ་བ་དང་། རབ་ཏུ་དགའ་བ་དང་། མཆོག་ཏུ་དགའ་བ་ཐོབ་པར་གྱུར་ཏོ། ། དེ་ནས་བཅོམ་ལྡན་འདས་ལ་བད་སའི་རྒྱལ་པོ་འཆར་བྱེད་ ཀྱིས་འདི་སྐད་ཅེས་གསོལ་ཏོ། ། བཅོམ་ལྡན་འདས་ཇི་ཙམ་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སྐྱེས་པ་དང་། བུད་མེད་རྣམས་ཀྱི་སྐྱོན་བསམ་གྱིས་མི་ཁྱབ་པའི་བར་དེ་དག་བཀའ་སྩལ་ཅིང་ལེགས་པར་ གསུངས་པ་ནི་ངོ་མཚར་ལགས་སོ། ། བཅོམ་ལྡན་འདས་བདག་ནི་བཅོམ་ལྡན་འདས་དང་། ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་སྟེ། མཚོན་ཆ་སྤངས་ཤིང་དབྱུག་པ་སྤངས་ལ་ངོ་ཚ་མཆིས་ཤིང་སྲོག་ཆགས་འབྱུང་པོ་ཐམས་ཅད་ལ་སྙིང་བརྩེ་བར་ ཞུགས་པ་ལགས་ཀྱིས། བཅོམ་ལྡན་འདས་ཀྱིས་བདག་དགེ་བསྙེན་དུ་གཟུང་དུ་གསོལ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བད་སའི་རྒྱལ་པོ་འཆར་བྱེད་དང་། དགེ་སློང་དེ་དག་དང་།

བྱང་ཆུབ་སེམས་དཔའ་དེ་དག་དང་། ལྷ་དང་མི་དང་ ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། ། ། ། འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་བད་སའི་རྒྱལ་པོ་འཆར་བྱེད་ ཀྱིས་ཞུས་པའི་ལེའུ་ཞེས་བྱ་སྟེ་ཉི་ཤུ་རྩ་དགུ་པ་རྫོགས་སོ། ། ། ། རྒྱ་གར་གྱི་མཁན་པོ་ཛི་ན་མི་ཏྲ་དང་། སུ་རེན་དྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ། ། ། །