༄༅། ། རྒྱ་གར་སྐད་དུ། ཤྲཱི་དེ་བཱི་ཀཱ་ལི་པྲ་མ་རཱ་ཛ་ཏནྟྲ་ཀཱ་ལི། བོད་སྐད་དུ། དཔལ་ལྷ་མོ་ནག་མོའི་བསྟོད་པ་རྒྱལ་པོའི་རྒྱུད(,། ) རིག་སྔགས་དང་གསང་སྔགས་ཀྱི་མངའ་བདག་དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་གཅིག་ན། རི་རབ་ཀྱི་རྩེ་མོ་རྩུབ་འགྱུར་གྱི་ཚལ་ཆེན་པོ་ན་བཅོམ་ལྡན་འདས་དཔལ་དྲག་པོ་ཆེན་པོ་ཕྱག་ན་རྡོ་རྗེ་ལུས་བསྐལ་པའི་མེ་ལྟར་འབར་ བ། སྲིད་པ་གསུམ་ལས་རྣམ་པར་རྒྱལ་བ། ཉི་མ་སྟོང་གི་གཟི་བརྗིད་དང་ལྡན་ནས་བཞུགས་སོ། ། འཁོར་ནི་བརྒྱ་བྱིན་དང་། ཤ་ཟ་དང་། སྲིན་པོ་དང་། མ་མོའི་ཚོགས་བྱེ་བ་དུང་ཕྱུར་གྱིས་བསྐོར་ཏེ་བཞུགས་སོ། ། དེའི་ཚེ་ན་དཔལ་ཕྱག་ན་རྡོ་རྗེ་པདྨའི་གདན་ ལ་བཞུགས་ཏེ་བཀའ་སྩལ་པ། ངའི་འཁོར་དུ་གཏོགས་པའི་ལྷ་མ་སྲིན་སྡེ་བརྒྱད་ཉོན་ཅིག ། འདོད་པའི་ཁམས་འདི་ན་བདུད་ཀྱི་མ་གཤིན་རྗེའི་སྲིང་མོ་ཞེས་བྱ་བ་རྒྱལ་ཚབ་ཆེན་པོ་སངས་རྒྱས་ཐམས་ཅད་ཀྱི་བསྟན་པ་འཛིན་པ་ཅིག་ཡོད་ཀྱིས། ཁྱེད་ཀྱིས་དེ་ལ་མཆོད་པ་ གྱིས་ཤིག ། བསྟོད་པ་གྱིས་ཤིག ། ངས་ཀྱང་ཁྱོད་ལ་བྱིན་གྱིས་བརླབ་པོ་ཞེས་བཀའ་སྩལ་པ་དང་།

འཁོར་གྱི་ནང་ནས་ལྷའི་དབང་པོ་བརྒྱ་བྱིན་སྟན་ལས་ལངས་ཏེ་དཔལ་ལྷ་མོ་ནག་མོ་ལ་དགེ་བ་བཅུའི་སྒོ་ནས་བསྟོད་པ། སྔོན་འདས་བསྐལ་པ་དང་པོའི་ཕ་རོལ་ ན། ། དགེ་བཅུའི་ལས་ལ་སེམས་རབ་ཆེར་སྦྱངས་ནས། ། ལམ་གྱི་ཁྱད་པར་གོང་མ་རབ་རྫོགས་ཀྱང་། ། མཐོ་རིས་སྐྱེས་པ་རྣམས་ལ་དགེ་བ་བཅུའི། ། ཚུལ་གྱིས་དོན་མཛད་ཕྱི་རོལ་བསྒྱུར་བ་ཡི། ། དཔལ་ལྡན་ལྷ་མོ་ཁྱོད་ལ་ཕྱག་འཚལ་བསྟོད། ། འདས་ པའི་དུས་ན་སྲོག་གཅོད་རབ་སྤངས་པས། ། སྐུ་ཚེ་རིང་ཞིང་གཟུགས་བྱད་ཕུན་སུམ་ཚོགས། ། གཞན་གྱི་ལན་ཆགས་གནོད་པའི་རྐྱེན་དང་ལྡན། ། འཆི་བདག་འཇོམས་མཛད་ཁྱོད་ལ་ཕྱག་འཚལ་བསྟོད། ། མ་བྱིན་ལེན་སྤངས་ཚུལ་ལ་རབ་སྤངས་པས། ། བསོད་ ནམས་ཚོགས་ཀྱིས་ལོངས་སྤྱོད་ཕུན་སུམ་ཚོགས། ། གཏེར་གྱི་ལོངས་སྤྱོད་མི་འགྲིབ་རབ་བརྟན་བརྙེས། ། སྦྱིན་པའི་གཏེར་འཆང་ཁྱོད་ལ་ཕྱག་འཚལ་བསྟོད། ། མི་ཚངས་སྤྱོད་པའི་བཀའ་རྣམས་བསྲུང་བ་དང་། ། མངལ་གྱི་གྲོང་ཁྱེར་དམན་ལས་རྣམ་པར་ འཕགས། ། སྲིད་པའི་འདོད་ཆགས་རིང་དུ་སྤངས་པ་སྟེ། ། དགེ་སྦྱོང་ཆེན་མོ་ཁྱོད་ལ་ཕྱག་འཚལ་བསྟོད། ། ཉོན་མོངས་{བརྫུན་,རྫུན་}ཚིག་སྤངས་པའི་རྣམ་སྨིན་གྱིས། །

གསུང་གི་དངོས་གྲུབ་འཇིག་རྟེན་འདུལ་བའི་གཙོ། ། གསུང་མཆོག་རྣམ་དག་བརྙེས་པའི་རང་བཞིན་ཏེ། ། བདེན་པར་གསུང་བ་ཁྱོད་ལ་ཕྱག་འཚལ་བསྟོད། ། ཕྲ་མའི་སྐྱོན་སྤངས་མི་ཕྱེད་འཁོར་དང་ལྡན། ། ཉིད་ལ་རྣམ་པར་དུལ་བའི་འཁོར་གྱིས་བསྐོར། ། ལྷ་དང་ལྷ་མིན་བདེན་པས་འདུལ་མཛད་མ། ། དཀར་མོའི་འཁོར་ཚོགས་ཁྱོད་ལ་ཕྱག་འཚལ་བསྟོད། ། ངག་འཁྱལ་སྤངས་ པའི་ཡོན་ཏན་སྦྱིན་པ་ཡིས། ། ཏིང་འཛིན་རྩེ་གཅིག་མི་གཡོ་བར་ཆད་སྤངས། ། དགོས་འབྲེལ་ཚུལ་གྱིས་བསྟན་པ་སྐྱོང་མཛད་མ། ། བྱིས་པ་འདུལ་མཛད་ཁྱོད་ལ་ཕྱག་འཚལ་བསྟོད། ། ང་རྒྱལ་ཁེངས་སེམས་སྤངས་པའི་ཡོན་ཏན་གྱིས། ། ཞི་བའི་ཚིག་འཇམ་ལྷ་མོ་དབྱངས་ སྙན་མ། ། ཚིག་རྩུབ་གཤེ་བའི་གཉེན་པོ་བྱེད་པ་སྟེ། ། ངག་རྩུབ་འདུལ་མཛད་ཁྱོད་ལ་ཕྱག་འཚལ་བསྟོད། ། རང་སེམས་བརྣབ་སེམས་སྤངས་པའི་ཁྱད་པར་ནི། ། འཛིན་པའི་རྣམ་རྟོག་རྣམ་པར་སྤངས་པའི་རྟགས། ། བདག་མེད་རྟགས་སུ་སེང་གེས་རྣ་བ་བརྒྱན། ། བརྣབ་སེམས་སྤངས་པ་ཁྱོད་ལ་ཕྱག་འཚལ་བསྟོད། ། གཟུང་བའི་ཡུལ་ལ་གནོད་སེམས་རྣམ་པར་སྤངས། ། ཕྱི་རོལ་ཡུལ་འདི་གཉིས་མེད་ཆོས་སུ་གཟིགས། ། གང་ལ་གནོད་སེམས་ཡང་དག་སྤངས་པའི་རྟགས། །

སྦྲུལ་གྱི་རྣ་རྒྱན་ཅན་ལ་ཕྱག་འཚལ་བསྟོད། ། ལོག་ པར་ལྟ་བའི་ཆོས་ཕྱོགས་རྣམ་སྤངས་ཏེ། ། སངས་རྒྱས་ཆོས་ལས་འཁྲུངས་པའི་གཟུགས་བརྙན་ཁྱོད། ། ལྟ་བ་རྣམ་པར་དག་པའི་ངང་ཚུལ་ཅན། ། སྤྲོས་བྲལ་དོན་དམ་སྟོན་ལ་ཕྱག་འཚལ་བསྟོད། ། འཇིག་རྟེན་འདི་ན་ལས་གཉིས་དག་མ་དག ། མ་དག་མི་དགེ་བཅུ་ལས་ངན་ སོང་གྲུབ། ། དག་པའི་དགེ་བ་བཅུ་ལས་མཐོ་རིས་གྲུབ། ། ལས་འདི་དགེ་བ་དང་པོར་རབ་སྦྱངས་པས། ། གོང་ནས་གོང་མའི་ས་ལ་རབ་གནས་ཀྱང་། ། དགེ་བཅུའི་རྟགས་ནི་དམན་པའི་ཞིང་འདིར་བསྟན། ། གདུག་པའི་ཚུལ་ཅན་འགྲོ་བ་འདྲེན་མཛན་མ། ། བསྟོད་པར་ འོས་པ་ཁྱོད་ལ་ཕྱག་འཚལ་བསྟོད། ། དེ་ནས་དཔལ་ལྷ་མོ་ནག་མོ་ཆེན་མོ་ལ། གནོད་སྦྱིན་གྱི་རྒྱལ་པོ་རྣམ་ཐོས་སྲས་ཀྱིས་ལམ་རྣམ་པ་ལྔའི་ཚུལ་གྱིས་བསྟོད་པ། དམ་པ་རྣམས་ཀྱིས་བགྲོད་པའི་ཁྱད་པར་ནི། ། ཚོགས་ཀྱིས་སྦྱངས་ནས་དོན་དམ་མཐོང་བ་ཡི། ། གཉེན་པོ་ཡེ་ཤེས་ རིམ་པར་སྒོམ་པ་ལ། ། མཐར་ཕྱིན་པ་ལ་གཤེགས་པའི་དོན་མཆོག་ལགས། ། དེ་བས་ལྷ་མོ་ཁྱོད་ཀྱི་མཚན་ཉིད་ནི། ། འདི་ལྟར་རབ་ལྡན་ཁྱོད་ཀྱི་ཁྱད་པར་ཏེ། ། དང་པོའི་ཚོགས་ལས་ཡང་དག་རབ་བསགས་པས། ། དང་པོའི་ས་ལས་སྦྱོར་བའི་ཏིང་འཛིན་ བརྙེས། །

རབ་ཏུ་དགའ་བའི་ས་ལ་དོན་དམ་ནི། ། རྣམ་པར་མི་རྟོག་སྐྱེ་མེད་ཚུལ་གྱིས་གཟིགས། ། དཔལ་ལྡན་བྱང་ཆུབ་སེམས་དཔའི་ཁྱད་པར་ནི། ། རང་སེམས་ས་གཉིས་དག་ལ་རབ་བརྟེན་ནས། ། དེ་བཞིན་ས་གསུམ་དག་པའི་ཕ་རོལ་སོན། ། རང་སེམས་བཞི་བའི་ས་ ལ་ཆེར་བསྒོམས་པས། ། ལྔ་པའི་ས་ལ་བསམ་གཏན་ཕ་རོལ་སོན། ། རང་སེམས་དྲུག་པའི་ས་ལ་ཆེར་སྦྱངས་པས། ། བདུན་པ་ལ་ནི་ཐབས་ཀྱི་ཕ་རོལ་སོན། ། རང་སེམས་བརྒྱད་པ་ཉིད་ལ་ཆེར་བསྒོམས་པས། ། དཔལ་ལྡན་ལྷ་མོ་ནག་མོ་སྨོན་ལམ་ཉིད། ། དགུ་པ་ལ་ ཡང་སྟོབས་ཀྱི་ཡོན་ཏན་སྒྲུབ། ། དེ་ཡི་སྟོབས་ཀྱིས་ཡེ་ཤེས་འཕེན་པར་འགྲུབ། ། འདི་དག་རྣམ་པར་རྫོགས་པར་བྱས་ནས་ནི། ། སངས་རྒྱས་ས་ལ་སྨིན་པའི་སྨོན་ལམ་ཅན། ། ས་བརྒྱད་ནོན་པས་གཞོན་ནུའི་ཚུལ་འཆང་མ། ། འགྲོ་བ་འདུལ་ཕྱིར་དྲག་མོའི་ཚུལ་སྟོན་ ཅིང་། ། གདུག་པ་འདུལ་མཛད་ཁྱོད་ལ་ཕྱག་འཚལ་བསྟོད། ། བདག་ཀྱང་ཁྱོད་ཀྱི་ལམ་ལྟར་མྱུར་འགྲུབ་ཤོག ། དེ་ནས་མིའམ་ཅིའི་རྒྱལ་པོ་ལྗོན་པ་རྟ་མགོ་ཅན་གྱིས་དཔལ་ལྷ་མོ་ནག་མོ་ཆེན་མོ་ལ་གཉིས་སུ་མེད་པའི་སྒོ་ནས་བསྟོད་པ། དཔལ་ལྡན་ལྷ་མོ་གཉིས་ སུ་མེད་པ་སྟེ། ། དོན་དམ་སྤྲོས་བྲལ་ཆོས་ཉིད་འདི་ལས་བཙལ། །

དོན་དམ་ཀུན་རྫོབ་གཉིས་སུ་མེད་པས་བདེན། ། འཁོར་བ་མྱང་འདས་གཉིས་སུ་མེད་པས་ཟབ། ། སེམས་ཅན་སངས་རྒྱས་གཉིས་སུ་མེད་པས་འཕགས། ། ལས་དང་རྣམ་སྨིན་གཉིས་སུ་མེད་ པས་བསྟོད། ། རྒྱུ་དང་འབྲས་བུ་གཉིས་སུ་མེད་པས་སྨིན། ། ཡུལ་དང་ཡུལ་ཅན་གཉིས་མེད་གཅིག་གི་དང་། ། སྤྲོས་དང་སྤྲོས་མེད་དོན་དམ་དབྱིངས་ཀྱིས་བསྡུས། ། བསོད་ནམས་ཡེ་ཤེས་གཉིས་མེད་ཚོགས་ཆེན་ཏེ། ། མཐོང་དང་དམ་པ་གཉིས་མེད་དག་པས་བསྟོད། ། བདག་དང་གཞན་གྱི་ཆོས་ནི་ངང་ཚུལ་གཅིག ། གཟུང་དང་འཛིན་པ་གཉིས་མེད་ཟབ་མོའི་མཐུ། ། མཐོ་རིས་ངན་སོང་གཉིས་བྲལ་དག་པའི་ཞིང་། ། བཟང་ངན་གཉིས་མེད་རང་བཞིན་གཅིག་གིས་བསྟོད། ། བསྐྱེད་མེད་རྫོགས་པ་གཉིས་མེད་ལྷུན་གྲུབ་མཆོག ། སེམས་དང་ཕུང་པོ་གཉིས་མེད་སེམས་ཉིད་དེ། ། སྒྲུབ་དང་བསྒྲུབ་བྱ་གཉིས་མེད་གྲུབ་པའི་ངང་། ། བདག་གཞན་གཉིས་མེད་ཚུལ་མཆོག་གཅིག་གིས་བསྐྱོད། ། ཡབ་དང་ཡུམ་མཁའ་གཉིས་མེད་བྱང་ཆུབ་སེམས། ། ཐབས་དང་ཤེས་རབ་གཉིས་སུ་མེད་པའི་ དོན། ། སྟོང་དང་མི་སྟོང་གཉིས་མེད་ཞི་བའི་ངང་། ། གྱུར་དང་འགྱུར་མེད་རྩོལ་བྲལ་ཕྱག་འཚལ་བསྟོད། ། སྒྲ་ཚིག་གཉིས་མེད་བརྗོད་པ་མེད་པའི་ངང་། །

ལུས་ངག་གཉིས་མེད་སེམས་ཉིད་གཅིག་གི་ཚུལ། ། རྩོལ་བྱེད་རྩོལ་བྱ་གཉིས་མེད་དོན་གཅིག་པས། ། རྣམ་པར་སྤྲོས་མེད་དོན་དམ་དབྱིངས་ཀྱིས་བསྟོད། ། མུ་སྟེགས་སངས་རྒྱས་གཉིས་མེད་ཚུལ་གཅིག་པས། ། དབྱིངས་དང་ཡེ་ཤེས་གཉིས་མེད་དོན་རྟོགས་ཏེ། ། སྲིད་དང་རྣམ་གྲོལ་ཡང་དག་དོན་གཅིག་པས། ། ཐམས་ཅད་གཉིས་མེད་སྐུ་ལ་ཕྱག་འཚལ་ བསྟོད། ། ཕྱི་དང་ནང་མེད་གཉིས་མེད་གཅིག་གི་ངང་། ། སེམས་ལྡན་སེམས་མེད་རྣམ་དག་ཞི་བའི་ཚུལ། ། སྣང་དང་མི་སྣང་གཉིས་མེད་གཅིག་གིས་མཐོང་། ། གཉིས་མེད་དོན་མཆོག་ཁྱོད་ལ་ཕྱག་འཚལ་བསྟོད། ། འདི་དག་རྣམས་ནི་དོན་དམ་ཟབ་མོའི་ཚུལ། ། སྤྲོས་ པ་མེད་པའི་དོན་དང་འབྲེལ་པ་སྟེ། ། འདི་རྣམས་ལྷ་མོ་ཁྱོད་ཀྱི་ཐུགས་ལ་གསལ། ། འདི་ལྟར་བསྟོད་པས་བདག་ཀྱང་ཁྱོད་ལྟར་ཤོག ། དེའི་ཚེ་དེའི་དུས་ན་དྲི་ཟའི་རྒྱལ་པོ་ཟུར་ཕུད་ལྔ་པས་དཔལ་ལྷ་མོ་ལ་ཕྲིན་ལས་ཀྱི་སྒོ་ནས་བསྟོད་པ། སེམས་ཉིད་ཕྲིན་ལས་རྣམ་ བཞིའི་ཁྱད་པར་ནི། ། སེམས་ཉིད་གུད་ན་མེད་ཅིང་སེམས་ཀྱང་མེད། ། དོན་དམ་སྤྲོས་བྲལ་ཁ་དོག་གཟུགས་ཀྱང་མེད། ། ཀུན་རྫོབ་སྒྱུ་མ་ཙམ་དུ་རང་གི་སེམས། ། མཐུན་པར་བསྟན་པའི་ཞི་བའི་དཔལ་ལྷ་མོ། །

ཞི་མཛད་ཞི་འགྱུར་ཞི་བའི་ངང་ཚུལ་ཅན། ། ཞི་བའི་ འཁོར་གྱིས་བསྐོར་བའི་གཙོ་མོ་ནི། ། རྟགས་ཀྱི་སྐུ་མདོག་དཀར་མོ་ཤིན་ཏུ་དངས། ། ཀུན་དུ་ཞི་མཛད་ཁྱོད་ལ་ཕྱག་འཚལ་བསྟོད། ། བདག་གི་དགྲ་དང་ནད་རྣམས་ཞི་བར་མཛོད། ། མཐུན་པར་བསྟན་པའི་རྒྱས་པའི་དཔལ་ལྷ་མོ། ། རྒྱས་མཛད་རྒྱས་ འགྱུར་རྒྱས་པའི་ངང་ཚུལ་ཅན། ། རྒྱས་པའི་འཁོར་གྱིས་བསྐོར་བའི་གཙོ་མོ་ནི། ། རྟགས་ཀྱི་སྐུ་མདོག་སེར་མོ་ཤིན་ཏུ་བརྗིད། ། ཀུན་དུ་རྒྱས་མཛད་མ་ལ་ཕྱག་འཚལ་བསྟོད། ། བདག་གི་བསོད་ནམས་ཡེ་ཤེས་རྒྱས་པར་མཛོད། ། མཐུན་པར་བསྟན་པའི་དབང་ མོ་དཔལ་ལྷ་མོ། ། དབང་མཛད་དབང་བསྒྱུར་དབང་གི་ངང་ཚུལ་ཅན། ། དབང་གི་འཁོར་གྱིས་བསྐོར་བའི་གཙོ་མོ་ནི། ། རྟགས་ཀྱི་སྐུ་མདོག་དམར་མོ་ཤིན་ཏུ་བརྗིད། ། ཀུན་དུ་དབང་མཛད་ཁྱོད་ལ་ཕྱག་འཚལ་བསྟོད། ། བདག་གི་ནད་དང་དགྲ་རྣམས་དབང་དུ་མཛོད། ། མཐུན་པར་བསྟན་པའི་དྲག་མོ་དཔལ་ལྷ་མོ། ། དྲག་མཛད་དྲག་འགྱུར་དྲག་མོའི་ངང་ཚུལ་ཅན། ། དྲག་མོའི་འཁོར་གྱིས་བསྐོར་བའི་གཙོ་མོ་ནི། ། རྟགས་ཀྱི་སྐུ་མདོག་ནག་མོ་ཤིན་ཏུ་བརྗིད། ། ཀུན་དུ་དྲག་མཛད་ཁྱོད་ལ་ཕྱག་འཚལ་བསྟོད། ། བདག་གི་ནད་དང་དགྲ་ རྣམས་དྲག་མོས་སོད། །

ཁྱོད་ཀྱི་རང་བཞིན་ཅིར་ཡང་མ་གྲུབ་ལ། ། འདི་ལྟར་འཛིན་ཉིད་ཅིར་ཡང་སྣང་བ་ནི། ། ཕྲིན་ལས་རྣམ་བཞིས་འགྲོ་དོན་མཛད་པ་ལགས། ། བདག་ཀྱང་ལས་བཞི་རང་བཞིན་ལྷུན་གྲུབ་ནས། ། ཁྱོད་ལྟར་གཞན་གྱི་དོན་ལ་བརྩོན་པར་ཤོག ། དེ་ནས་དཔལ་ལྷ་མོ་ནག་མོ་ལ་ཀླུའི་རྒྱལ་པོ་དགའ་བོས་སྐུའི་ཡོན་ཏན་གྱི་སྒོ་ནས་བསྟོད་པ། གསང་སྔགས་རྣལ་འབྱོར་གྲུབ་པའི་བདག་ཉིད་མ། ། ཡོན་ཏན་རྣམས་ཀྱི་སྐུ་མདོག་ཕྱག་མཚན་ནི། ། དོན་དུ་སྣང་བ་མེད་ཀྱང་གདུལ་བྱའི་ཕྱིར། ། རྟགས་ཀྱི་ཕྱག་རྒྱ་འདི་ལྟར་ བསྟན་པའོ། ། ཁམས་གསུམ་གདུལ་ཕྱིར་གདན་དུ་བོང་བུ་ཞོན། ། མྱ་ངན་མི་འདའི་རྟགས་སུ་ལྕགས་སྒྲོག་མངའ། ། བདག་དོན་ལྷུན་གྲུབ་གླང་ཆེན་ཀོ་བས་བརྒྱན། ། གཞན་དོན་ཕུན་སུམ་ཚོགས་ཕྱིར་རེ་ལྡེས་དཀྲིས། ། བྱང་ཆུབ་སེམས་ལྡན་སྤྱི་གཙུག་ཟླ་རྒྱས་ གསལ། ། ཤེས་རབ་རྟོགས་ཕྱིར་ལྟེ་བ་ཉི་མས་བརྒྱན། ། དུག་གསུམ་སྡོང་པོ་གཅོད་པའི་རལ་གྲི་དང་། ། བསོད་ནམས་གཏེར་གྱི་ཕྱག་མཚན་ནེའུ་ལེ་བསྣམས། ། དབང་དྲག་རྫོགས་ཕྱིར་རལ་པ་ཁམ་ནག་སྤྲུག ། ཉོན་མོངས་འདྲེན་ཕྱིར་རྣོ་དཔལ་མཆེ་བ་གཙིགས། ། འཁོར་བ་ལྗགས་ལ་གཏར་ཕྱིར་རྐན་སྒྲ་བརྡེབ། །

གདུག་པ་ཞེ་ལ་གནོད་ཕྱིར་སྡང་མིག་བགྲད། ། ཐམས་ཅད་དབང་དུ་སྡུད་ཕྱིར་སྤྱན་རྩ་དམར། ། སྙོམས་པའི་ཚོགས་མཆོག་མི་འགྱུར་སྐུ་མདོག་གནག ། མ་མོ་འདུལ་ཕྱིར་དུར་ཁྲོད་རྒྱན་གྱིས་བརྒྱན། ། སྐུ་གསུང་ ཐུགས་རྟགས་ཕྱག་རྒྱ་ཁ་ཊྭཱྃ་གསོར། ། སྐུ་གསུམ་རྫོགས་བྱེད་ཐོད་པའི་ཕྲེང་བས་བརྒྱན། ། དྲག་པོ་མྱུར་མགྱོགས་བསྟན་ཕྱིར་ཚུབ་མས་བརྒྱན། ། ཉོན་མོངས་སྲེག་ཕྱིར་མེ་དཔུང་ནང་ན་བཞུགས། ། འདོད་ཁམས་སྐྱོང་ཕྱིར་ཡོངས་འདུའི་ཤིང་ལ་བརྟེན། ། ལྷ་མིན་འདུལ་ ཕྱིར་རྫོང་གི་དཀའ་ཟློག་མ། ། དཔའ་བརྟན་བསྟན་ཕྱིར་སྟག་གི་ཤམ་ཐབས་བསྣམས། ། བསྟན་པ་བསྲུང་ཕྱིར་དྲག་མོའི་ཆ་ལུགས་རྫོགས། ། ང་རྒྱལ་དབང་བསྡུད་བདག་མེད་སྒྲ་སྒྲོགས་ཕྱིར། ། ཐབས་ཀྱི་སྙན་ཆ་གཡས་པ་སེང་གེས་བརྒྱན། ། ཞེ་སྡང་དབང་འདུལ་ དུག་ཆེན་འདུལ་བའི་ཕྱིར། ། ཤེས་རབ་སྙན་ཆ་གཡོན་པ་སྦྲུལ་གྱིས་བརྒྱན། ། འདུ་བྱེད་མི་རྟག་རྟགས་སུ་དྲིལ་བུ་སྒྲོགས། ། ཆགས་ཕྱིར་རྔམ་མཛད་རཀྟའི་རྦ་ཀློང་འཐུང་། ། དམ་ཚིག་བསྲུང་ཕྱིར་ཞིང་ལྤགས་རྒྱན་དུ་མཛད། ། ཐ་དད་ལས་རྣམས་འདུལ་ཕྱིར་རྨ་བྱའི་འཕྲུ། ། ཉོན་མོངས་སྒྲིབ་པའི་ཚོགས་རྣམས་རབ་སྦྱངས་ནས། །

ཡེ་ཤེས་རིག་པའི་ཚོགས་རྣམས་ཤར་བའི་ཕྱིར། ། རང་བཞིན་གནས་མཆོག་བྱང་ཤར་མཚམས་ན་བརྟེན། ། དབུ་མའི་ས་ལ་གནས་ཕྱིར་དྲེའུ་ལ་ཞོན། ། ཉོན་མོངས་གདུག་པ་འདུལ་ཕྱིར་མ་ཡི་ཚུལ། ། མཁའ་ འགྲོ་མ་མོ་ཁྱོད་ལ་ཕྱག་འཚལ་བསྟོད། ། དེ་ནས་གྲུལ་བུམ་གྱི་རྒྱལ་པོ་སྦྲུལ་མགོ་དགུ་པས་དཔལ་ལྷ་མོ་ནག་མོ་ལ་སྐུ་གསུང་ཐུགས་ཀྱི་སྒོ་ནས་བསྟོད་པ། དོན་དམ་གཉིས་མེད་བྱང་ཆུབ་སེམས་ཡིན་ཡང་། ། སྲིད་གསུམ་གདུལ་ཕྱིར་རྟགས་ཀྱི་ཕྱག་རྒྱ་ནི། ། རང་སེམས་ རྣམ་དག་དྲག་པོའི་གཞལ་ཡས་ཁང་། ། རཀྟ་ཁྲག་གི་རྒྱ་མཚོ་འཁྱིལ་པ་ལས། ། ཀེང་རུས་ཐོད་ཕྲེང་ཞིང་གི་པགས་པས་བརྒྱན། ། སྐུ་མདོག་གནག་ལ་རབ་འཇིགས་ཁྲོ་མོ་རྒྱལ། ། སྔོན་མོ་རལ་པ་འཛིངས་མའི་སྤྲུལ་པ་འགྱེད། ། སྐུ་ཡི་སྤྲུལ་པ་ དཔལ་ལྡན་རེ་མ་ཛུ། ། གྲུ་གསུམ་སེར་ནག་ཞལ་གྱི་དབྱིངས་སུ་བཞེངས། ། ཡོན་ཏན་རྒྱས་མཛད་སེར་མོ་མཁའ་ལ་བཞད། ། ཕྲིན་ལས་རྒྱས་པ་ཐམས་ཅད་ཉེ་བར་མཛོད། ། གསུང་གི་སྤྲུལ་པ་དཔལ་ལྡན་རེ་མ་ཏི། ། གྲུ་གསུམ་དམར་ནག་ཞལ་གྱི་དབྱིངས་ནས་བཞེངས། ། དམར་མོ་ཆེན་མོ་དམར་ཆེན་གཏུམ་མ་སྟེ། ། དབང་གི་ཕྲིན་ལས་ཐམས་ཅད་གྲུབ་པར་མཛོད། ། སྐུ་གསུང་ཐུགས་ལྡན་སྤྲུལ་པ་རྒྱ་མཚོ་མ།

། དྲག་པོ་འཇོམས་མཛད་བདུད་དཔུང་ཟིལ་གྱིས་གནོན། ། འགྲོ་དྲུག་སྒྲོལ་མཛད་སེམས་ཅན་ཀུན་གྱི་མ། ། བསྟན་པ་ རྒྱས་མཛད་མ་ལ་ཕྱག་འཚལ་བསྟོད། ། བདག་གི་ལུས་ངག་ཡིད་གསུམ་བྱིན་གྱིས་རློབས། ། དེ་ནས་དཔལ་ལྷ་མོ་ལ་ལྷ་མ་ཡིན་གྱི་རྒྱལ་པོ་ཐགས་ཟངས་རིས་ཀྱིས་དོན་དམ་པའི་སྒོ་ནས་བསྟོད་པ། སྤྲོས་བྲལ་འོད་གསལ་ཡང་དག་ཞི་བའི་ངང་། ། ཐུགས་ཀྱི་ ཐུགས་མཆོག་རྣམ་དག་བདེན་པའི་ཡུམ། ། གདོད་ནས་གཉིས་མེད་ནམ་མཁའི་སྙིང་པོ་ནི། ། དཔལ་ལྡན་ཁྱོད་ཀྱི་རང་བཞིན་ཁྱད་པར་གསལ། ། འདི་ལྟར་རྣམ་དག་བརྗོད་མེད་ངོ་བོ་ལ། ། བྱིས་པ་རྣམས་ཀྱིས་བསྟོད་པ་བྱེད་པ་ལྟུང་། ། བླུན་པོ་རྣམས་ཀྱིས་དངོས་པོར་ རབ་བརྟགས་ནས། ། གཟུགས་ཅན་ཚུལ་དུ་གང་ཞིག་བསྟོད་པའི་ཚིག ། རྒྱལ་བའི་དོན་ཡང་ཐུགས་ཆུད་ཁྱོད་ཉིད་ལ། ། ཚིག་དང་ཡི་གེའི་སྒོ་ནས་བསྟོད་པ་རྣམས། ། ནམས་ཀྱང་གྲོལ་བར་འགྱུར་བའི་ཆོས་ཉིད་མིན། ། གདོད་ནས་གཉིས་མེད་བདེ་ཆེན་མ་རྟོགས་ པར། ། ཁྱོད་ཀྱི་སྨོན་ལམ་རྟགས་ཀྱི་ཆོ་འཕྲུལ་ལ། ། དོན་དུ་བཟུང་ནས་གང་ཞིག་བསྟོད་པ་རྣམས། ། ཁྱོད་ལ་བརྟེན་ནས་ཐམས་ཅད་ལྟུང་བར་འགྱུར། ། གང་ཞིག་སྐྱེ་བ་མེད་པར་ཤེས་པ་དང་། །

གདོད་ནས་གཉིས་མེད་སྙིང་པོ་བསྒོམས་ནུས་ན། ། གང་ཟག་དེས་ ནི་ཁྱོད་ཉིད་བསྟོད་པ་ཡིན། ། ཁྱོད་ཀྱི་གཟུགས་དང་ཁ་དོག་འཛིན་པ་ཡིས། ། བསྐལ་པ་གྲངས་མེད་འདས་པར་རབ་བལྟས་ཀྱང་། ། ཁྱོད་ཀྱི་གཟུགས་དང་ཁ་དོག་མཐོང་མི་ནུས། ། གང་ཞིག་གཟུགས་སུ་མི་འཛིན་རྣམས་ཀྱིས་མཐོང་། ། སྒྲ་དང་ཚིག་དང་བརྗོད་པ་ ཐམས་ཅད་ཀྱིས། ། ཁྱོད་ནི་བོས་ཀྱང་བསྐལ་པར་མི་ཐོས་ཏེ། ། འདི་དག་སྤངས་པའི་རྣལ་འབྱོར་དེ་ཡིས་ནི། ། ཁྱོད་ཀྱང་བོས་ལ་དེ་ཡང་ཁྱོད་ཀྱིས་ཐོས། ། གང་ཞིག་ལུས་ངག་དགེ་བས་ཁྱོད་བསྒྲུབས་པའི། ། བླུན་པོ་དེ་ཡིས་ནམས་ཀྱང་ཁྱོད་ཉིད་སྤངས། ། ལུས་ངག་སྤངས་པའི་སེམས་ཀྱིས་ཁྱོད་མཆོད་ནས། ། མཆོད་ན་དངོས་གྲུབ་དེ་ཡིས་གཏེར་ཐོབ་འགྱུར། ། ཁྱོད་ནི་རྒྱལ་པོ་མང་པོའི་ཡོན་ཏན་སྡུད། ། ཆོས་ཀྱི་དབྱིངས་ན་རྒྱལ་བ་རྣམས་དང་མཇལ། ། ཟབ་མོ་དབུ་མའི་རང་བཞིན་སྟོན་པའི་ཕྱིར། ། མི་མཇེད་ འཇིག་རྟེན་ཤིན་ཏུ་རྩུབ་པ་འདིར། ། ཕྱི་རོལ་ཚུལ་གྱིས་ཐམས་ཅད་འདྲེན་མཛད་མ། ། ཁྱོད་ཀྱི་སྐུ་ནི་འདི་ལྟར་རབ་བརྟགས་པ། ། སྒྲིབ་པ་མང་པོ་སྟོང་ཉིད་ངང་དུ་གཤེགས། ། སྟོང་ཉིད་དམ་པ་སྟོང་པ་ཡང་དག་ཁྱོད། །

སྟོང་པ་གཉིས་མེད་ཤེས་པ་རྣམས་ཀྱིས་བསྟོད། ། འདི་ལྟར་བསྟོད་ན་བསྟོད་པར་འགྱུར་གྲང་བས། ། ཁྱོད་ནི་བསྟོད་པའི་ཡུལ་ཅན་མ་ཡིན་ཡང་། ། བྱིས་པ་དྲང་ཕྱིར་དོན་ལ་འདི་ལྟར་བསྟོད། ། དེ་ནས་ནམ་མཁའ་ལྡིང་གི་རྒྱལ་པོ་རྡོ་རྗེ་གསེར་མིག་ཅན་གྱིས་དཔལ་ལྷ་མོ་ལ་བསྟོད་པ། དཔལ་ལྡན་ལྷ་མོ་དཔག་པར་ དཀའ་བའི་དོན། ། ཐབས་ཀྱི་ཆོ་འཕྲུལ་ནམ་མཁའི་མཁའ་ལ་སྤྱོད། ། བྱང་ཆུབ་སེམས་དཔའི་སྤྲུལ་པ་ཁྱོད་ཉིད་ལ། ། སྒོ་གསུམ་རྡུལ་སྙེད་དབྱངས་ཀྱིས་ཕྱག་འཚལ་བསྟོད། ། བདག་གིས་ཁྱོད་ནི་མཆོད་པས་མ་བསྒྲིབས་ཀྱང་། ། དཔལ་ལྡན་དངོས་གྲུབ་ དམ་པ་ཐོབ་བྱའི་ཕྱིར། ། འདོད་པའི་ཡོན་ཏན་མཁའ་ལ་ཆར་འབབ་པས། ། མཆོད་པའི་ཚོགས་འདིས་དབང་པོ་རྒྱལ་གྱུར་ཅིག ། དཔལ་ལྡན་ཁྱོད་ནི་དགེ་སྡིག་བདག་པོ་སྟེ། ། བདག་གི་ལུས་ངག་ཡིད་ཀྱི་སྡིག་པའི་ཚོགས། ། ཁྱོད་ཀྱི་ཐད་དུ་འགྱོད་པས་རབ་ བཤགས་ན། ། ཐུགས་རྗེའི་ཤུགས་ཀྱིས་སྒྲིབ་པ་བྱང་བར་མཛོད། ། ཁྱོད་ཀྱི་ཁྱད་པར་ཡོངས་སུ་འཕགས་པ་ནི། ། འགྲོ་བའི་དོན་མཛད་བདག་དོན་ཕུན་སུམ་ཚོགས། ། དགའ་མཐུན་ཕྲག་དོག་མེད་པའི་སྤྲོས་པ་ནི། ། རྗེས་སུ་ཡི་རང་ཁྱོད་ཀྱི་རྒྱུད་ ལ་འབུལ། །

འདི་ལྟར་ཡོན་ཏན་ལྡན་པའི་སྐུ་མཆོག་ནི། ། ནག་མོ་བཟང་པོ་འཇིགས་པའི་མཐུ་སྟོབས་ཀྱིས། ། ཕྱོགས་བཅུ་དུས་གསུམ་ཀུན་དུ་འགྲོ་དོན་ལ། ། སྒྱུ་འཕྲུལ་དྲ་བའི་ཚུལ་གྱིས་བསྐུལ་བར་སྤོབས། ། ཡང་དག་ཁྱོད་ཀྱི་ཡོན་ཏན་སྐུ་མཆོག་ནི། ། གདུག་པ་འདུལ་ཞིང་བསྟན་པ་བསྲུང་བའི་ཕྱིར། ། སེམས་ཅན་ཟད་པར་མ་གྱུར་བར་དུ་ནི། ། མྱ་ངན་མི་འདའ་བཞུགས་པར་གསོལ་བ་གདབ། ། འདི་ལྟར་ཕྱག་འཚལ་མཆོད་ནས་བཤགས་པ་དང་། ། རྗེས་སུ་ཡི་རང་བསྐུལ་ཞིང་གསོལ་བཏབ་ནས། ། དགེ་བ་འདི་ ཡིས་ངན་སོང་སྟོངས་གྱུར་ཏེ། ། ཐམས་ཅད་ཚོགས་རྫོགས་བྱང་ཆུབ་ཆེན་པོར་བསྔོ། ། དེ་ནས་དཔལ་ལྡན་ལྷ་མོ་ལ་ནམ་མཁའི་ལྷ་བྲན་རྣམས་ཀྱིས་བསྟོད་པ། བསྐལ་པ་མེ་ལྟར་འབར་བའི་ཀློང་དཀྱིལ་ན། ། རླུང་ནག་དགུ་པའི་ཀློང་འཁྱིལ་ཕོ་བྲང་ནས། ། མ་གཅིག་ འདོད་པའི་ཁམས་ཀྱི་དབང་ཕྱུག་མ། ། བདུད་ཀྱི་ཡུམ་ལ་གཤིན་རྗེའི་ལྕམ་གཅིག་མ། ། དཔལ་ལྡན་ལྷ་མོ་ནག་མོ་རེ་མ་ཏི། ། ནག་མོ་ཟ་བྱེད་རྔམ་པའི་མཆེ་བ་ཅན། ། མཐིང་ནག་གཅེར་བུ་ཁྲག་གི་རལ་པ་ཅན། ། ཁྱོད་ཀྱི་སྐུ་མདོག་ནག་མོར་བཞུགས་པ་ནི། ། དོན་ དམ་དབྱིངས་ཀྱིས་བསྐྱོད་པ་མེད་པའི་རྟགས། ། དབུ་སྐྲ་གཡས་ནས་གཡོན་དུ་འཁྱིལ་པ་ནི། །

ཡུམ་གྱི་མཁའ་ལ་སྤྲུལ་པ་འགྱེད་པའི་རྟགས། ། དབུ་གཙུག་རལ་པ་གཅིག་ཏུ་འཁྱིལ་པ་ནི། ། དོན་དམ་དགོངས་སྤྱོད་གཅིག་ཏུ་མཛད་པའི་རྟགས། ། རལ་པའི་ གསེབ་ནས་མེ་སྟག་འཕྲོ་བ་ནི། ། ཐུགས་ཀྱི་སྤྲུལ་པ་ཕྱོགས་བཅུར་འགྱེད་པའི་རྟགས། ། དབུ་ལ་ཐོད་རློན་ཕྲེང་བ་བཅིངས་པ་ནི། ། ཐུགས་རྗེས་སྤྲུལ་སྐུས་འགྲོ་དོན་མཛད་པའི་རྟགས། ། སྙན་ཆ་གཡས་ན་སེང་གེ་མཆོང་བ་ནི། ། སྨན་མོ་ཐམས་ཅད་ཟིལ་ གྱིས་གནོན་པའི་རྟགས། ། གཡོན་ན་སྦྲུལ་མགོའི་གདེངས་ཀ་འཕྱར་བ་ནི། ། ཞེ་སྡང་མ་སྤངས་དབྱིངས་སུ་དག་པའི་རྟགས། ། སྙན་ཆ་གསེར་གྱི་དྲིལ་བུ་འཁྲོལ་བ་ནི། ། སངས་རྒྱས་ཀུན་ལ་བསྙེན་སྒྲུབ་བྱེད་པའི་རྟགས། ། སྤྱན་རྩ་དམར་ལ་སྡང་མིག་ བགྲད་པ་ནི། ། སྲིད་གསུམ་རྣལ་འབྱོར་དམ་ཚིག་གཟིགས་པའི་རྟགས། ། ཞལ་གྱི་དྲག་པོ་ཧོམ་ཁུང་གདེངས་པ་ནི། ། བསྟན་པ་འཇིག་པའི་རུ་དྲ་སྒྲོལ་བའི་རྟགས། ། རྣོ་གདུག་མཆེ་བ་ཟུར་གསུམ་གཙིགས་པ་ནི། ། བསྒྲལ་བའི་ཞིང་བཅུ་ས་ལ་སྒྲོལ་བའི་ རྟགས། ། སྐུ་ལ་ཞིང་ལྤགས་གཡང་གཞི་གསོལ་བ་ནི། ། ཡང་དག་ཆོས་དང་དོན་དང་ལྡན་པའི་རྟགས། ། གླང་ཆེན་ཀོ་རློན་སྣམ་ཕྱེད་དཀྲིས་པ་ནི། ། ཐེག་པ་མཆོག་གི་དོན་དང་ལྡན་པའི་རྟགས། །

རེ་ལྡེ་ནག་པོ་སྣམ་ཕྱེད་དཀྲིས་པ་ནི། ། འཇིག་རྟེན་འདི་ན་ཆེ་བཙན་ ལྡན་པའི་རྟགས། ། ལྟེ་བའི་ཁུང་ནས་ཉི་མ་འཆར་བ་ནི། ། སྡུག་བསྔལ་རྒྱ་མཚོ་གཏིང་ནས་སྐེམས་པའི་རྟགས། ། སྤྱི་བོ་གཙུག་ནས་ཟླ་བ་འཆར་བ་ནི། ། དུག་གསུམ་མ་རིག་མུན་པ་སེལ་བའི་རྟགས། ། ཞབས་ལ་དབང་གི་ལྕགས་སྒྲོག་འཁྲིལ་བ་ནི། ། ཐབས་ དང་ཤེས་རབ་ཟུང་དུ་འབྲེལ་བའི་རྟགས། ། ཕྱག་གཡས་ཤང་ལང་ནག་པོ་བསྣམས་པ་ནི། ། སྡུག་བསྔལ་སྐྱེ་ཤི་རྩད་ནས་གཅོད་པའི་རྟགས། ། ཕྱག་གཡོན་ཐོད་རློན་དམར་ཆེན་འཐུང་བ་ནི། ། འཁོར་བའི་སྡུག་བསྔལ་ཁྲག་ལྟར་འཐུང་བའི་རྟགས། ། བོང་བུ་གྭ་ པ་ཕྱིན་ཕྱོགས་ཞོན་པ་ནི། ། ལོག་པར་ལྟ་བའི་སེམས་ཅན་སྒྲོལ་བའི་རྟགས། ། སྲིན་པོའི་ཨོག་མས་སྔ་རུ་བྱས་པ་ནི། ། སྲིན་ཡུལ་ལང་ཀ་པུ་ར་འདུལ་བའི་རྟགས། ། སྦྲུལ་ནག་ཆུན་པོས་གོང་སྨེད་བྱས་པ་ནི། ། ཞེ་སྡང་དབང་གིས་བགེགས་རིགས་འཇོམས་པའི་ རྟགས། ། རུ་སྦལ་ནག་པོའི་ཕོག་བུ་བཏང་བ་ནི། ། ཀླུ་བདུད་ནག་པོ་དམ་ལ་བཏགས་པའི་རྟགས། ། སྔ་ཤ་གཡས་པ་བདུད་ཀྱི་ཁྲམ་བམ་ནི། ། དམ་ཚིག་ཉམས་པ་ཁྲམ་ལ་འདེབས་པའི་རྟགས། ། ཕྱི་ཤར་ནད་ཀྱི་རྐྱལ་པ་བཏགས་པ་ནི། ། བསྟན་པ་འདི་ལ་གནོད་ པའི་དགྲ་བོ་ལ། །

ནད་ཀ་འབེབས་ཤིང་དལ་ཁ་སྒྱུར་བའི་རྟགས། ། དོན་དམ་བཅུད་ཀྱི་རྟགས་སུ་ཞག་གི་ཟོར་རིས་བཏང་། ། ཐུགས་རྗེ་ཆགས་པའི་རྟགས་སུ་རཀྟའི་ཐིག་ལེས་བརྒྱན། ། འདུལ་བྱེད་ཕྲིན་ལས་རྟགས་སུ་ཐལ་བའི་མཚན་མས་བཏབ། ། མ་མོ་ འབུམ་ཕྲག་བྲན་དུ་འཁོལ་བ་ནི། ། ཁམས་གསུམ་ཁྱབ་པར་ཕྲིན་ལས་མཛད་པའི་རྟགས། ། མ་གཅིག་ཁ་ནས་མེ་འབར་རྒྱ་མཚོ་སྐེམས། ། རྡོ་རྗེ་འཕྱར་བས་རི་རབ་ཚོགས་བོར་འཕེན། ། བདག་གིས་བརྩོན་པར་ལྷ་མོ་ཁྱོད་ལ་བསྟོད། ། དེ་ནས་ཡང་གཤིན་རྗེ་ནག་ པོས་དཔལ་ལྷ་མོ་ལ་ཆེ་བའི་ཡོན་ཏན་གྱི་སྒོ་ནས་བསྟོད་པ། ལྷ་མོ་དཔལ་ལྡན་མཁའ་འགྲོ་ནག་མོ་ཁྱོད་ལ་ནི། ། རྒྱུན་དུ་ཏིལ་མར་གྱིས་བྱུགས་ལན་བུ་གཅིག་མ་སྟེ། ། རོ་ཉེ་རྣ་ཆས་བསྒྱིངས་ཤིང་ཆ་ལུགས་མང་པོ་འཆང་བྱེད་མ། ། རྒྱན་དུ་རྐང་སྒྲོག་ལྕགས་ལ་བྱས་པ་ གཅིག་གིས་རྐང་ལ་མཛེས་པར་བརྒྱན་པ་སྟེ། ། མཚན་མོ་བོང་བུ་ཞོན་ནས་འགྲོ་བ་དེ་ནི་ནག་མོ་ཁྱོད་ཉིད་ཡིན་པར་ཤེས། ། རལ་པས་བདག་ཉིད་མཛེས་པར་བརྒྱན་ཏེ་ཁྱོད་ཀྱི་སྤྱོད་པ་མཚོ་ཆེན་དོན་དག་སུ་ཡིས་ཤེས། ། འཁོར་བ་འཇིག་པའི་ཚེ་ན་མི་རུས་དག་ལ་ཁྲག་ དང་ཞག་འཛག་དུ་བ་ཐུལ་བ་ན། །

ནག་མོ་མཆེ་བ་མི་བཟད་ཁྱོད་ཀྱི་ཞལ་དུ་འགྲོ་ཀུན་སྐད་ཅིག་ཙམ་དུ་ཞུགས་པར་འགྱུར། ། ལྷ་མོ་ལག་ན་མི་ཐོད་ཐོགས་པ་ཁྱོད་ནི་རྣལ་འབྱོར་གྲུབ་པའི་རྣལ་འབྱོར་ཅན་དུ་དུར་ཁྲོད་དགྱེས། ཁྱོད་ནི་གཡོག་བཅས་མྱ་ངན་མེད་ཅིང་འཆི་ བའི་འཇིགས་པ་མེད་པར་དྲིལ་བུའི་སྒྲ་ཡང་སྒྲོགས། ། ཁྱོད་ནི་དཔའ་བོ་དག་གི་མགོ་བཅད་གཡུལ་དུ་མཚོན་གྱིས་བསད་པ་ཡི། ། མགོ་ཕྲེང་ལག་ན་ཐོགས་ཤིང་གར་སྟབས་སྐོར་ཞིང་ལག་པ་བརྐྱང་བསྐུམ་ཆེ། ། རྐུབ་ཚོས་ཆེ་ལ་ཀླུ་དབང་གཤིབས་པའི་སྐ་རགས་བཅིངས་ ཤིང་ལག་ན་མདུང་དང་བ་དན་ཐོགས། ། ཁྲག་གི་ཆང་གིས་ར་རོ་མྱོས་ཏེ་མིག་རྩ་དམར་པོར་བྱས་ནས་མཚན་མོ་དུར་ཁྲོད་རྒྱུ་བ་འབྱུང་པོ་ཕལ་ཆེན་ཀུན་གྱིས་མཐོང་། ། རྐང་པའི་གོས་ནི་ཀོ་རློན་མཚན་པས་དྲངས་པས་སྣམ་གྱི་ཕྱེད་ནི་རེ་ལྡེས་དཀྲིས། ། མི་ཡི་རྒྱུ་མ་སར་ པའི་སྦུབས་ཀྱིས་ཞལ་གྱི་ཟླ་བ་བརྒྱན་ཅིང་ཁྲག་དང་ཞག་གི་ཚོམ་བུས་ཐིག་ལེར་བརྒྱན། ། མི་ཡི་ཤ་ལ་སོ་སོར་ཆེམ་ཆེམ་ཟ་ཡིན་མི་རོ་དག་གི་ཅོད་པན་མགོ་ལ་བརྒྱན་པ་སྟེ། ། བདག་ལ་སྐྱོབ་པའི་དྲག་མོ་མི་ཤ་ཐོགས་པ་ཁྱོད་ནི་སྔ་ནས་མ་མཐོང་གཟོད་མཐོང་ ན། །

བདུད་དང་སྲིན་མོ་མ་མོ་རྣམས་ཀྱང་མིག་རྩ་རིག་རིག་དངང་ཞིང་ཁྱོད་ལ་འདུད། ། ལྷ་མོ་བཟང་མོ་ལུས་མདོག་གནག་ཅིང་བཟོད་པར་དཀའ་བ་ཁྱོད་ལ་བརྒྱ་བྱིན་ལ་སོགས་པས། ། བསྟོད་པ་བྱེད་པའི་གཤིན་རྗེའི་རྒྱལ་པོ་ཉིད་ཀྱང་རྟག་ཏུ་འདུད། ། ལྷ་རྣམས་ དང་ནི་འགྲོ་བ་མ་ལུས་འཇུག་བརྟུལ་བས་ན་རྣ་བ་ཡ་གཅིག་ལ། ། བྲང་གིས་འགྲོ་བ་སྦྲུལ་མགོ་གདེངས་ཀ་སྟོང་དང་ལྡན་ཞིང་གཅིག་གིས་རྒྱབ་ནས་རྒྱན་དུ་བྱས། ། ཡ་གཅིག་ལ་ནི་སེང་གེ་མཚུངས་མེད་ཐོགས་ཤིང་རྒྱ་མཚོ་བསྐོར་ཞིང་ས་གཞི་གནོན་པ་ས་སྟེང་གི། ། ཕྱོགས་ ནས་རྒྱུ་བའི་ཉི་མ་ཟླ་བ་ལྷ་མོ་ཁྱོད་ཀྱི་ལྟེ་ནས་འཆར་ཞིང་སྲིད་གསུམ་ཟིལ་གྱིས་གནོན། ། རྒྱ་མཚོ་ཀློང་ནས་མེ་འབར་ཆུ་རྣམས་སྐེམས་པར་བྱེད་པར་ནུས་པའི་བུད་མེད་ཐམས་ཅད་ཞི་མཛད་མ། ། ལྷ་ཆེན་སྐུ་དང་འཚམ་པར་བཞུགས་པའི་དཀའ་ཟློག་ནག་མོ་མི་ནད་ཕྱུགས་ ནད་ཀུན་ལ་འཇིགས་པ་མེད། ། མ་གཅིག་ཁྱོད་ཉིད་ལ་ནི་བདག་ནི་གུས་པར་ཕྱག་འཚལ་མཆོད་ཅིང་བསྟོད་པར་བགྱི། ། དེ་ནས་དཔལ་ལྷ་མོ་ནག་མོ་ལ་བྲམ་ཟེ་མཆོག་སྲེད་ཀྱིས་ཀུན་རྫོབ་ཀྱི་བདེན་པ་བརྟེན་པར་བསྟོད་པ། མ་གཅིག་ལྷ་མོ་དཔལ་ལྷ་མོ། ། རྡོ་རྗེ་ལྷ་མོ་ནག་མོ་ཆེ། །

མཐུ་ཆེན་ཁྱོད་ལ་ཕྱག་འཚལ་བསྟོད། ། བདག་གིས་བཙུན་པར་ཁྱོད་བསྟོད་ཀྱིས། ། བཀྲ་ཤིས་མཆོག་གྲུབ་སེམས་གཏེར་གནས། ། ཡིད་མྱུར་གཟུགས་ཆེན་ཀུན་དུ་གྲགས། ། མ་མོར་གྲགས་ཤིང་འཇིག་རྟེན་སྐྱོང་། ། དཔའ་བརྟུལ་དྲག་ སྤྱོད་བརྩོན་འགྲུས་ཆེ། ། འཐབ་མོ་གཡུལ་ལས་རྟག་ཏུ་རྒྱལ། ། གཤིན་རྗེའི་སྲིང་མོ་ཡིན་པར་བསྟོད། ། གོས་སུ་དར་གོས་སྔོན་པོ་གསོལ། ། སྡུག་དང་མི་སྡུག་ཆ་ལུགས་འཆང་། ། སྤྱན་མིག་མཐོང་ན་མི་སྡུག་ཀུན་དུ་སྡང་། ། དད་ཅིད་ཚོགས་པའི་མི་རྣམས་སྡུད། ། རེས་འགའ་རི་བྲག་ཟབ་མོར་གནས། ། རེས་འགའ་ཚལ་དང་ཤིང་ལ་གནས། ། རེས་འགའ་དུར་ཁྲོད་དབུས་ན་གནས། ། ལྷ་མོའི་གནས་རྟེན་དེ་རུ་འཆའ། ། གནས་དེ་རི་དང་ཚལ་དགོན་དུ། ། རྟག་ཏུ་ལྷ་མོ་ཁྱོད་ བསྟོད་ན། ། དེ་ཡིས་དགོངས་པ་སྐོང་བར་བྱེད། ། བདག་གིས་རྟག་ཏུ་བསྟོད་བྱས་ན། ། བདག་གི་བསམ་པ་འགྲུབ་པར་མཛོད། ། རྨ་བྱའི་སྒྲོ་ལ་རྒྱལ་མཚན་བྱས། ། གང་ཞིག་རྟག་བསྟེན་སྲུང་བར་བྱེད། ། གནག་ལུག་ཕྱུགས་རྣམས་འཕེལ་བར་བྱེད། ། སེང་གེ་ སྟག་དང་སྤྱང་ཀི་ཡིས། ། རྟག་ཏུ་ཀུན་ནས་བསྐོར་ནས་ཀྱང་། ། རྡོ་རྗེ་དྲིལ་ཆེན་སྙན་པར་སྒྲོགས། ། བྱིན་ཏེ་དྲིལ་ཆེན་སྙན་པར་སྒྲོགས། །

ལན་འགའ་ལག་ན་ཏྲི་ཤཱུ་ལ་ཐོགས། ། ལན་འགའ་ཉི་ཟླའི་རུ་མཚོན་ཕྱར། ། མར་གྱི་ཚེས་དགུ་བཅུ་གཅིག་ན། ། དེ་ཡི་དུས་ སུ་མཆོད་བྱས་ན། ། ལྷ་མོ་ཁྱོད་ལས་ལྷག་པ་མེད། ། བདུད་འདུལ་ལྷ་མིན་སྲིན་མོར་སྟོན། ། དགྲ་དང་འཐབ་ཚེ་རྒྱལ་བར་བྱེད། ། བུད་མེད་ནང་ན་མཆོག་ཡིན་ཏེ། ། ཚིག་དབང་འཇིག་རྟེན་མགོན་པོ་འདྲ། ། རྒྱལ་པོའི་ཁབ་ན་པདྨ་འདྲ། ། ཞལ་བཟང་ཟླ་བ་ཉ་བ་ འདྲ། ། ཆུ་ལ་རྒལ་ན་གྲུ་ཟམ་འདྲ། ། ཕོངས་པ་རྣམས་ཀྱི་གཉེན་བཤེས་འདྲ། ། ལྷ་དང་ལྷ་མིན་གཡུལ་འགྱེད་ཚེ། ། ལྷ་མོ་ཁྱོད་ཀྱི་ལྟེ་བ་ལ། ། ལྷ་རྣམས་ཀུན་གྱི་རྫོང་བཅས་ནས། ། ལྷ་དམག་དཀར་པོ་རྒྱལ་བར་བྱས། ། ལྷ་མ་ཡིན་རྣམས་ཕམ་པར་བྱེད། ། ལག་ན་མདུང་དམར་ཆེམས་སེ་ཆེམས། ། རུ་མཚོན་བ་དན་མེ་ལྟར་འབར། ། དགྲ་འདུལ་གཡུལ་བཟློག་ཁྱེད་ལ་བསྟོད། ། དེ་ནས་དྲང་སྲོང་ཆེན་པོ་ཀོའུ་དི་ནྱས་དཔལ་ལྷ་མོ་ལ་དཔེ་བྱད་ཀྱི་སྒོ་ནས་བསྟོད་པ། འཇིག་རྟེན་གཙོ་ལ་རྟག་ཏུ་གུས་ཕྱག་འཚལ། ། མ་རྣམས་ ནང་ན་ཁྱོད་ནི་རྟག་ཏུ་མཆོག་ཡིན་ཏེ། ། འཇིག་རྟེན་གསུམ་པོ་ཐམས་ཅད་ཁྱོད་ལ་བསྟོད། ། བྱད་བཞིན་སྡུག་མཛེས་ཀུན་གྱིས་བལྟ་བར་མོས། ། ཡོན་ཏན་རྣམ་པ་སྣ་ཚོགས་ལུས་རབ་བརྒྱན། །

མིག་ཡངས་འདམ་སྐྱེས་སྔོན་པོའི་འདབ་མ་འདྲ། ། བསོད་ནམས་ཡེ་ ཤེས་སྣང་བ་གྲགས་པས་བརྒྱན། ། དཔེར་ན་རིན་ཐང་མེད་པའི་ནོར་བུ་འདྲ། ། དེང་བདག་པདྨོ་ཁྱོད་ལ་བསྔགས་པས་ཀྱང་། ། སེམས་ལ་བསམ་པ་ཐམས་ཅད་འགྲུབ་པར་འགྱུར། ། ཡང་དག་ཡེ་ཤེས་གྱ་ནོམ་བཀྲ་ཤིས་པ། ། པདྨ་ལྟ་བུར་ཤིན་ཏུ་རྣམ་པར་དག ། ལུས་མདོག་རབ་མཛེས་ཀུན་གྱིས་ལྟ་བར་མོས། ། མཚན་མ་ཡོན་ཏན་རྣམ་པ་སྣ་ཚོགས་བརྒྱན། ། དྲི་མེད་ཡེ་ཤེས་ཀུན་ཏུ་རབ་མཛེས་པ། ། དྲན་པ་རྣམས་ཀྱི་ནང་ན་མཆོག་ཏུ་གྱུར། ། ཅི་ལྟར་སེང་གེ་གཅན་གཟན་མཆོག་གྱུར་བཞིན། ། བསྔགས་བསྟོད་ཚིག་ནི་འདི་ ལས་འབྱུང་བ་ཡིས། ། བསམ་པའི་དངོས་པོ་ཐམས་ཅད་གྲུབ་པར་ཤོག ། ཅེས་བསྟོད་དོ། ། དེ་ནས་དཔལ་ཕྱག་ན་རྡོ་རྗེས་འདུས་པ་རྣམས་ལ་བཀའ་སྩལ་པ། ཁྱེད་ཀྱིས་དཔལ་ལྷ་མོ་ལ་བསྟོད་པ་ལེགས་སོ། ། ང་ཡང་བསྟོད་པ་འདི་དག་གི་དོན་སྒོམས་ཤིག ། ཡིད་ལ་རྟག་ཏུ་ཟློས་ཅིག ། ལྷ་མོ་འདི་ལ་བསྟོད་པ་ནི་ང་ལ་བསྟོད་པ་ཡིན་ནོ། ། སངས་རྒྱས་ཐམས་ཅད་ལ་བསྟོད་པ་ཡིན་ནོ། ། ལྷ་མོ་དེས་ཀྱང་མི་འདི་སྲུང་བར་བྱེད་དོ། ། སྐྱོབ་པར་བྱེད་དོ། ། ཅི་འདོད་པའི་དངོས་གྲུབ་སྟེར་རོ་ཞེས་བཀའ་སྩལ་པ་དང་།

འཁོར་དེ་རྣམས་ རབ་ཏུ་དགའ་ནས་བཅོམ་ལྡན་འདས་ཕྱག་ན་རྡོ་རྗེ་ལ་རྒྱན་གྱི་ཆར་ཆེན་པོ་ཕབ་ནས་སོ་སོའི་གནས་སུ་འཁོད་དོ། ། བསྟོད་པའི་རྒྱལ་པོའི་རྒྱུད་རྫོགས་སོ། །