BO༄༅༅། ། རྒྱ་གར་སྐད་དུ། སརྦ་མཎྜལ་སཱ་མཱ་ནྱ་བི་དྷི་ན་གུ་ཧྱ་ཏནྟྲ། བོད་སྐད་དུ། དཀྱིལ་འཁོར་ཐམས་ཅད་ཀྱི་སྤྱིའི་ཆོ་ག་གསང་བའི་རྒྱུད། ཐམས་ཅད་མཁྱེན་པ་ལ་ཕྱག་འཚལ་ལོ། ། དེ་ནས་གཞན་ཡང་གསང་བའི་རྒྱུད། ། དཀྱིལ་འཁོར་དག་ནི་ཐམས་ཅད་ ཀྱི། ། སྤྱི་ཡི་ཆོ་ག་རྒྱས་པ་དག ། མདོར་བསྡུས་རབ་ཏུ་བཤད་པར་བྱ། ། གཞན་གྱིས་མི་ཐུབ་ལ་སོགས་གང་། ། དེ་བཞིན་གཤེགས་པའི་དཀྱིལ་འཁོར་དང་། ། རབ་ཏུ་གནས་པ་ལ་སོགས་གང་། ། པདྨོ་རིགས་ཀྱི་ར་བཤད་པ་དང་། ། འཇིག་རྟེན་དག་ལ་བརྩེ་ཕྱིར་ངས། ། རྣམ་པར་གནོན་པ་ལ་སོགས་པ། ། དཀྱིལ་འཁོར་སུམ་སྟོང་དག་དང་ནི། ། ལྔ་བརྒྱར་བཤད་པ་གང་ཡན་པ། ། དཀྱིལ་འཁོར་དེ་དག་རྣམས་ཀྱི་སྤྱིའི། ། ཆོ་ག་འདི་ནི་ངས་བཤད་དེ། ། དེ་ལྟ་བས་ན་ཆོ་ག་འདིས། ། དཀྱིལ་འཁོར་ཐམས་ཅད་བྲི་བར་བྱ། ། སློབ་དཔོན་བསྟན་བཅོས་ ཀུན་ཤེས་པ། ། ཚུལ་ཁྲིམས་ལྡན་ཞིང་སྙིང་རྗེའི་བདག ། དྲང་ཞིང་བཟོད་ལ་གཙང་སྦྲ་ཅན། ། དད་དང་དྲན་ལྡན་སྙིང་སྟོབས་ལྡན། ། སྨྲ་མཁས་མི་འཇིགས་སྲན་ཐུབ་པ། ། སྒྱུ་རྩལ་དག་ལ་མཁས་ཤིང་གསལ། ། མཛེས་དང་ལྡན་ཞིང་དེ་བཞིན་དུ། ། གུས་ལྡན་དུལ་ལ་ཁོང་ གཟོ་བ། ། རྟག་ཏུ་དམ་པའི་ཆོས་ལ་དགའ། །
BOཐེག་པ་ཆེ་ལ་མོས་པ་ཅན། ། གསང་སྔགས་སྤྱོད་པ་ལ་བསླབས་ཤིང་། ། དཀྱིལ་འཁོར་དག་གི་བྱེ་བྲག་ཤེས། ། སློབ་མ་དག་གི་ཚུལ་ཤེས་ཤིང་། ། དེ་བཞིན་གསང་སྔགས་རྒྱུད་ཀྱང་འཛིན། ། རྗེས་སུ་གནང་ཞིང་དབང་བསྐུར་ལ། ། ཆོག་ ཤེས་བཟླས་བརྗོད་ལྷུར་ལེན་པ། ། སློབ་དཔོན་རིགས་ལ་བསྙེན་བཀུར་བྱས། ། དཀྱིལ་འཁོར་ཐམས་ཅད་ཁོང་དུ་ཆུད། ། གསང་སྔགས་ཀུན་དང་བླ་མ་དང་། ། དེ་བཞིན་གློ་བུར་འགྲོན་མཆོད་བྱེད། ། ཕྱག་རྒྱ་ལ་སོགས་བཅིང་བ་དང་། ། དཀྱིལ་འཁོར་བྲི་བའི་ལས་རྣམས་དང་། ། གསང་སྔགས་སྤྱོད་པའི་མཆོད་པ་ལ། ། སློབ་དཔོན་གྱིས་ནི་མཁས་པར་བྱ། ། དེ་ནས་གཞན་ཡང་བཤད་པ་ནི། ། ས་ཡི་ཕྱོགས་ཀྱི་མཚན་ཉིད་དེ། ། ས་གཞི་ཅི་འདྲ་བཟང་བ་དང་། ། མི་བཟང་བདག་བསྒྲགས་པའོ། ། མཐོན་དམན་ཅན་དང་ཚེར་མ་ཅན། ། གྱོ་མོ་དུམ་བུ་ཅན་དག་དང་། ། ངམ་ གྲོག་རུས་པ་སྡོང་དུམ་ཅན། ། གྲོག་མཁར་ཐལ་བ་ཚྭ་སྒོ་ཅན། ། གསེག་མ་རྡོ་དང་རྡུལ་དང་སྐྲ། ། སྲིན་བུ་གྲོག་སྤུར་ལ་སོགས་མང་། ། དེ་ལྟ་བུ་ཡི་ས་གཞི་ནི། ། མཁས་པས་ལས་རྣམས་ཀུན་ལ་སྤང་། ། མཐོན་དམན་སྙོམས་ཤིང་གཙང་ལ་སྣུམ། ། ཟུག་རྔུ་ཉེས་པ་རྣམ་པར་ སྤངས། ། ཤར་དང་བྱང་དུ་གཞོལ་བ་ཡི། །
BOས་གཞི་ལས་རྣམས་ཀུན་ལ་ཤིས། ། དང་པོར་པུས་ནུབ་ཙམ་བརྐོས་ལ། ། ས་དེ་ཉིད་ཀྱིས་དགང་བར་བྱ། ། གལ་ཏེ་ལྷག་པར་གྱུར་ན་ནི། ། དངོས་གྲུབདག་ནི་ཡོད་པར་བ་ཤད། ། དེ་ལས་བཟློག་པར་གྱུར་ན་ནི། ། སྒྲུབ་པ་པོས་ནི་ ལས་མི་བརྩམ། ། བརྩམས་ན་སྡུག་བསྔལ་མྱོང་འགྱུར་ཞིང་། ། ལེགས་པ་དག་ཀྱང་མི་འཐོབ་བོ། ། དཀྱིལ་འཁོར་ས་ནི་གང་དག་གི། ། ཉེ་འཁོར་དག་ན་ཆུ་མོད་པ། ། དེ་ནི་ཤིས་ཤིང་དངོས་གྲུབ་ཐོབ། ། ཆུ་དཀོན་པ་ནི་མཁས་པས་སྨད། ། ཁོ་ར་ཁོར་ཡུག་སྣ་ཚོགས་ ཤིང་། ། མེ་ཏོག་འབྲས་བུ་ལོ་མར་ལྡན། ། འོ་མ་ཅན་གྱི་ཤིང་ཡོད་པ། ། དཀྱིལ་འཁོར་དག་ལ་རབ་ཏུ་ཤིས། ། ཁོ་ར་ཁོར་ཡུག་ཤིང་ལྡན་པའི། ། ས་གཞི་ཡོན་ཏན་ཀུན་ལྡན་ཏེ། ། ཉེ་འཁོར་ན་ཡང་ཆུ་ཡོད་པ། ། དཀྱིལ་འཁོར་དག་ལ་ས་དེ་ཤིས། ། ཞི་བའི་ལས་ལ་ས་གཞི་ ནི། ། དཀར་པོ་དག་ཏུ་བརྟག་པར་བྱ། ། རྒྱས་པའི་ཆེད་དུ་དམར་སེར་བྱ། ། དྲག་ཤུལ་སྤྱོད་ལ་ནག་པོ་ཤིས། ། གང་དུ་ཆུ་ངོགས་པདྨོ་ཡི། ། མཚོ་དང་རྒྱ་མཚོ་ཉེ་འཁོར་དང་། ། ཆུ་ཡི་གླིང་ནི་ཉམས་དགའ་བར། ། ཞི་བའི་དཀྱིལ་འཁོར་བྲི་བར་བྱ། ། མ་མོའི་གནས་དང་དུར་ཁྲོད་ དང་། ། དབེན་པའི་གནས་དང་ཁང་སྟོང་དང་། །
BOཉམས་མི་དགའ་བའི་ཡུལ་གང་ཡིན། ། དེ་དག་ཏུ་ནི་མངོན་སྤྱོད་བྲི། ། རི་རྩེ་དང་ནི་བ་ལང་ལྷས། ། མཆོད་རྟེན་སྐུ་གཟུགས་ཁང་པ་དང་། ། དེ་ལ་སོགས་པའི་ཕྱོགས་དག་ཏུ། ། རྒྱས་པ་ཡི་ནི་དཀྱིལ་འཁོར་བྲི། ། མཆོད་རྟེན་ ཆེན་པོ་ཉམས་དགའ་དང་། ། དབེན་པ་ཆེན་པའི་གནས་དག་དང་། ། རི་བོའི་རྩེ་མོ་རྒྱ་ཆེན་གྱི། ། དངོས་གྲུབ་དཀྱིལ་འཁོར་བྲི་བར་བྱ། ། རི་རྩེ་དག་དང་རི་བོ་དང་། ། རི་ཡི་ཟོམ་དང་ཕུག་དག་ཏུ། ། ལྷ་མིན་དག་ནི་འདོད་པ་ཡིས། ། ས་འོག་རྡོ་རྗེ་དཀྱིལ་འཁོར་བྲི། ། པདྨའི་ཁ་ནི་བྱེ་བའི་ ཚལ། ། ངང་སྐྱ་དག་ནི་སྒྲ་སྒྲོགས་པར། ། རྒྱལ་སྲིད་འདོད་པའམ་ནོར་འདོད་པས། ། དཔལ་གྱི་དཀྱིལ་འཁོར་ཐམས་ཅད་བྲི། ། མ་མོའི་གནས་དང་རི་རྩེ་དང་། ། ལྷ་རྣམས་ཀྱི་ནི་གནས་དག་ཏུ། ། གདོན་དབབ་པ་དང་འཇོམས་བྱེད་པ། ། རྡོ་རྗེ་ལྕགས་ཀྱུའི་དཀྱིལ་ འཁོར་བྲི། ། ལམ་གྱི་བཞི་མདོ་ཆེན་པོ་དང་། ། མཆོད་རྟེན་ཕྱག་ན་རྡོ་རྗེ་ཡི། ། མདུན་དུ་སྒྲུབ་པ་པོ་ཡིས་ནི། ། ཁྲོ་རྒྱལ་དཀྱིལ་འཁོར་བགེགས་འཇོམས་བྲི། ། དེ་བཞིན་གཤེགས་པའི་དཀྱིལ་འཁོར་ནི། ། གནས་ནི་བཟང་པོ་གཞན་དུ་ཡང་། ། མཁས་པ་ཡིས་ནི་ཁྱད་པར་དུ། ། ཐམས་ཅད་བྲི་བར་བྱ་བ་ཡིན།
BO། རབ་ཏུ་གནས་སོགས་དཀྱིལ་འཁོར་ཀུན། ། མཁས་པ་ཡིས་ནི་ཁྱད་པར་དུ། ། པདྨའི་མཚོ་ཡི་ཉེ་འཁོར་དུ། ། ཆོ་ག་བཞིན་དུ་བྲི་བར་བྱ། ། རི་ཡེ་རྩེ་མོར་མཁས་པ་ཡིས། ། མདོ་ལས་བྱུང་བའི་ཆོ་ག་བཞིན། ། རྣམ་པར་གནོན་སོགས་དཀྱིལ་ འཁོར་ཀུན། ། ཁྱད་པར་དུ་ནི་བྲི་བར་བྱ། ། རྣམ་པར་ངེས་པའི་གནས་འདི་ནི། ། ཁྱད་པར་དུ་ནི་བསྟན་པ་ཡིན། ། རབ་ཏུ་བསྒྲིམས་ཏེ་ཐམས་ཅད་ལ། ། ས་ནི་རྣམ་གསུམ་ཡོངས་སུ་བརྟག ། ཁྱད་པར་ཕུན་སུམ་མ་ལྡན་ན། ། སྤྱི་ཡི་ལས་ཀྱིས་བྲི་བར་བྱ། ། ཕུན་སུམ་ཚོགས་པར་ཀུན་ བཟང་བའི། ། ཚོགས་པ་དག་ནི་རྙེད་པར་དཀའ། ། མདོར་ན་ས་གཞི་མཉམ་པ་དང་། ། མདངས་སྣུམ་ཤར་དུ་གཞོལ་བ་བཞེད། ། ཆུ་མང་ལྡན་པའི་གནས་དང་ནི། ། ལྗོན་ཤིང་བཟང་པོས་བརྒྱན་པ་དང་། ། བདག་གི་མིག་ཡིད་མགུ་བ་དང་། ། འཚེ་མེད་ཟུག་རྔུ་སྤངས་པ་ནི། ། དཀྱིལ་ འཁོར་གནས་སུ་ཤིས་པ་སྟེ། ། མི་ཡི་དངོས་གྲུབ་ཀུན་ཐོབ་བྱེད། ། དྲང་སྲོང་གནས་དང་བ་གླང་ལྷས། ། ཕུག་དང་རི་ཡི་རྩེ་མོ་དང་། ། ས་གཞི་གང་ན་འཐས་པ་དང་། ། ཁང་ཐོག་དང་ནི་རྡོ་ལེབ་དང་། ། མཆོད་རྟེན་དྲུང་དང་འབབ་ཆུའི་གླིང་། ། མཚོ་རྣམས་ཀྱི་ནི་འགྲམ་དག་ཏུ། ། ས་གཞི་ སྦྱང་ཞིང་བརྟག་པ་དང་།
BO། ནན་ཏན་དུ་ནི་བྱ་མི་དགོས། ། དེར་ནི་ཟུག་རྔུ་དབྱུང་མི་དགོས། ། འཐས་པར་བཅག་ཀྱང་དེར་མི་དགོས། ། མཐོན་དམན་ལ་སོགས་སྐྱོན་རྣམས་ཀྱང་། ། དེར་ནི་དོགས་པ་བསྐྱེད་མི་དགོས། ། གཉུག་མར་གནས་པའི་ས་གཞི་ལ། ། བྱི་དོར་ལེགས་པར་བྱས་ནས་ སུ། ། ལག་པས་བྲམ་ཞིང་གསང་སྔགས་བཟླས། ། དེ་ཡི་སྦྱང་བ་དེ་ཡིན་ནོ། ། ཟུག་རྔུའི་ཉེས་པ་ཐམས་ཅད་ནི། ། གལ་ཏེ་དབྱུང་བར་མི་ནུས་ན། ། དེར་ནི་གསང་སྔགས་ཁོ་ནས་ནི། ། སྦྱངས་པ་ལེགས་པར་བྱས་པར་འགྱུར། ། བརྟན་པར་འགྱུར་བའི་ལས་རྣམས་དང་། ། གདོན་ རྣམས་ཚར་གཅད་ལ་སོགས་དང་། ། དྲག་ཤུལ་སྤྱོད་པ་དག་ལ་ཡང་། ། ས་ནི་བརྟག་པར་བྱ་མི་དགོས། ། དཀྱིལ་འཁོར་ས་གཞི་ཆོ་ག་ལ། ། ཁྲོ་བོ་ཀཱི་ལི་ཀཱི་ལ་ཡིས། ། བ་ཡི་རྣམ་ལྔ་ལ་བཟླས་པའི། ། བསང་གཏོར་བྱས་ན་སྦྱངས་པར་འགྱུར། ། གཞན་གྱིས་མི་ཐུབ་ལ་སོགས་ པ། ། རྒྱལ་བའི་གཙུག་ཏོར་ཉིད་ཀྱིས་སྦྱང་། ། ཕྱག་ན་པདྨའི་དཀྱིལ་འཁོར་ཀུན། ། ས་གཞི་སྦྱང་བར་བྱ་བ་ནི། ། ཞི་བ་འདྲེན་པ་ཞེས་བྱ་ཡི། ། དཔལ་མོས་ཆོ་ག་བཞིན་དུ་སྦྱང་། ། ཕྱག་ན་རྡོ་རྗེའི་དཀྱིལ་འཁོར་རྣམས། ། ཁྱད་པར་དུ་ནི་ཁྲོ་བོས་སྦྱང་། ། ལས་སུ་བྱ་བ་ཐམས་ཅད་ཀྱང་། །
BOཆོ་ག་བཞིན་དུ་འདི་ཡིས་བྱ། ། རྒྱལ་བའི་གཙུག་དང་ཞི་བའི་འདྲེན། ། ཁྲོ་བོ་སྟོབས་ཆེན་ཞེས་བྱ་བ། ། འདི་གསུམ་རིགས་ནི་གསུམ་ཅར་གྱིས། ། ལས་རྣམས་ཀུན་ལ་སྦྱར་བྱས་ཏེ། ། ས་སྦྱང་བ་དང་བསྲུང་བ་དང་། ། སློབ་མ་སྟ་གོན་གནས་པ་དང་། ། བགེགས་རྣམས་བསལ་དང་དྲི་དག་ དང་། ། མེ་ཏོག་མངོན་པར་བསྔགས་པ་དང་། ། དེ་ལ་སོགས་པའི་ལས་ཀུན་ལ། ། བསྒྲིམས་ཏེ་སྦྱང་བར་བྱ་བ་ཡིན། ། སོ་སོའི་རྒྱུད་ལ་ལས་དང་ནི། ། གསང་སྔགས་རབ་ཏུ་བསྒྲགས་པ་གང་། ། སྟོན་ཟླ་འབྲིང་པོའི་ཉ་ནས་ནི། ། དཔྱིད་ཟླ་ཐ་ཆུང་ས་ཉ་ཡི་བར། ། འདི་ཡི་ནང་དུ་མཁས་ པ་ཡིས། ། དཀྱིལ་འཁོར་ཆོ་ག་བཞིན་དུ་བྲི། ། བགེགས་ཀྱི་དཀྱིལ་འཁོར་ནང་གཅད་དང་། ། དེ་བཞིན་བསྒྲུབ་པའི་དཀྱིལ་འཁོར་དག ། དཔྱད་མི་དགོས་པར་དབྱར་ཡང་ནི། ། མཁས་པས་དུས་བཞིན་བྲི་བར་བྱ། ། སློབ་མ་དབང་བསྐུར་ཆེད་དུ་ནི། ། དཀྱིལ་འཁོར་ཡོངས་སུ་བསྒྲགས་ གང་དང་། ། གནང་བའི་དཀྱིལ་འཁོར་གང་ཡིན་དང་། ། ད་མ་ཚིག་དཀྱིལ་འཁོར་གང་ཡིན་དང་། ། འབྱོར་པའི་ཆེད་དུ་བསྒྲུབ་པ་དང་། ། ཆེན་པོའི་དཀྱིལ་འཁོར་གང་ཡིན་པ། ། དེ་དག་ཐམས་ཅད་མཁས་པ་ཡིས། ། ཟླ་བ་བདུན་པོ་དག་ལ་བྱ། །
BOཡུལ་དང་དུས་དང་སློབ་མ་དང་། ། བདེག་ པའི་ཡོན་ཏན་ཤེས་བྱ་སྟེ། ། མཁས་པས་དབྱར་ཡང་དཀྱིལ་འཁོར་གྱི། ། ལས་ནི་ཆོ་ག་བཞིན་དུ་བྲི། ། དྲི་དང་མེ་ཏོག་བདུག་སྤོས་དང་། ། ལྷ་བ་ཤོས་སྦྱིན་སྲེག་ལས་ཀྱི་རྣམས། ། ཕོངས་པར་གྱུར་ཀྱང་མི་ད་བྲི་སྟེ། ། ཕྲི་ན་ངེས་པར་འཆི་བར་འགྱུར། ། ཚེས་གྲངས་ངན་ དང་དུས་མིན་དང་། ། གནས་མིན་ཆོ་ག་མི་ལྡན་པར། ། མཁས་པས་དཀྱིལ་འཁོར་མི་བྲིའོ། ། བྲིས་ན་དོགས་པ་མེད་པར་འཆི། ། མཁས་པས་ཇི་སྐད་བཤད་པ་ཡི། ། ཟླ་བ་ཡར་གྱི་ངོ་དག་ལ། ། ཟླ་བ་ཉ་འམ་བཅུ་གསུམ་མམ། ། ཚེས་བརྒྱད་དག་གམ་བཅུ་བཞི་འམ། ། ཚེས་བཅུ་དང་ ནི་བཅུ་གཅིག་གམ། ། ཡང་ན་ཡར་གྱི་ཚེས་གཅིག་གམ། ། ཚེས་ལྔའམ་ཡང་ན་ཚེས་བདུན་ནམ། ། ཡང་ན་ཚེས་གྲངས་གསུམ་ལའང་རུང་། ། ཉི་མ་བཅུ་པོ་འདི་དག་ལ། ། དཀྱིལ་འཁོར་རབ་ཏུ་བསྒྲིམས་ཏེ་བྲི། ། མར་གྱི་ངོ་ཡི་དུས་མཚམས་ལའང་། ། དཀྱིལ་འཁོར་བྲི་བ་འགལ་ བ་མེད། ། ཚེས་ལྔའམ་ཡང་ན་ཚེས་བདུན་ནམ། ། ཟླ་བ་ཉ་ལ་ཁྱད་པར་དུ། ། ཕྱག་ན་པདྨའི་དཀྱིལ་འཁོར་གྱི། ། ཆོ་ག་རྣམས་ནི་བྱ་བར་ཤིས། ། ས་ཡི་འོག་གི་དཀྱིལ་འཁོར་དང་། ། དྲག་ཤུལ་གྱི་ནི་ལས་རྣམས་དང་། ། ཁྲོ་བོ་རྣམས་ཀྱི་དཀྱིལ་འཁོར་གང་།
BO། དེ་དག་མར་ངོ་ལ་ཡང་ བྲི། ། ཟླ་བ་ཉ་ལ་ཁྱད་པར་དུ། ། རྒྱལ་བའི་དཀྱིལ་འཁོར་བྲི་བར་ཤིས། ། དཔྱིད་ཟླ་འབྲིང་དང་ཐ་ཆུང་ས་ལ། ། མཁས་པས་དཀྱིལ་འཁོར་ཆེན་པོ་བྲི། ། གང་ཚེ་ཡོ་བྱད་ལྡན་པ་དང་། ། གང་ཚེ་དད་པ་བདོ་བ་དང་། ། གང་ཚེ་ལས་ལ་བརྩོན་གྱུར་པ། ། དེ་ཡི་ཚེ་ཡང་དཀྱིལ་འཁོར་བྲི། ། གང་ཚེ་ འཚོ་བ་ཀུན་མོད་ཅིང་། ། མེ་ཏོག་མོད་པ་ལ་སོགས་པ། ། ཕུན་སུམ་ཚོགས་པའི་དུས་ཤེས་པའི། ། དེ་ཡི་ཚེ་ཡང་དཀྱིལ་འཁོར་བྲི། ། གང་ཚེ་སློབ་མའི་བསྙེན་བཀུར་གྱིས། ། བླ་མ་དག་ནི་མགུ་གྱུར་པ། ། དེ་ཚེ་དེ་ལག་ན་ང་བས་ན། ། དབང་བསྐུར་ཆེད་དུ་དཀྱིལ་འཁོར་བྲི། ། ཉི་མ་ཟླ་བ་ གཟས་ཟིན་དང་། ། ཡ་མཚན་ཆེ་ལྟས་བྱུང་བ་དང་། ། ཆོ་འཕྲུལ་གྱི་ནི་ཟླ་བ་ལ། ། བསྒྲིམས་ཏེ་དཀྱིལ་འཁོར་བྲི་བར་བྱ། ། སྔ་དྲོ་རྒྱས་པ་བསྐྱེད་པ་སྟེ། ། ཉི་མ་གུང་ལ་དྲག་ཤུལ་སྤྱད། ། དགོངས་ཀར་ཞི་བ་བློ་ཅན་གྱིས། ། ཆོ་ག་བཞིན་དུ་དཀྱིལ་འཁོར་བྲི། ། དཀྱིལ་འཁོར་དག་ནི་མ་ལུས་པ། ། ཉི་མ་ཙེར་ཙེས་ནུབ་ནས་བརྩམ། ། ཉི་མ་ཤར་བར་མ་གྱུར་པར། ། མཆོད་ནས་གཤེགས་སུ་གསོལ་བར་ཤིས། ། ཁྱད་པར་ཅན་གྱི་ཆོ་ག་ནི། ། ལྷ་དུས་བྱ་བ་དུས་བཞིན་བཤད། །
BOགཞན་དུ་ཆོ་ག་ཉམས་པའི་ཕྱིར། ། དངོས་གྲུབ་འབྱུང་བར་མི་འགྱུར་རོ། ། སྤྱི་ཡི་དཀྱིལ་འཁོར་བློ་ ལྡན་པས། ། ནམ་ཡང་ཉིན་པར་མི་བྲིའོ། ། ཉིན་པར་བྲིས་ན་དེ་དག་ཏུ། ། སྡུག་བསྔལ་ཉམས་སུ་མྱོང་བར་འགྱུར། ། དགོངས་མགོ་བཙུགས་ནས་ནམ་ཕྱེད་ན། ། དྲག་ཤུལ་སྤྱོད་པར་གྱུར་པ་ཡིན། ། མཚན་མོ་དུས་ལས་འདས་པས་ན། ། ཉེས་པ་མང་པོ་འབྱུང་བར་འགྱུར། ། མཚན་མོ་རབ་ཏུ་ཞི་བའི་ཕྱིར། ། སྤྱིར་ན་འདོད་པར་བྱ་བ་ཡིན། ། དམ་ཚིག་དག་ལ་སོགས་པའི་ལས། ། དེ་ལྟ་བས་ན་མཚན་མོ་བརྩམ། ། ཉི་མ་ནུབ་ན་ལྷ་རྣམས་ནི། ། ངེས་པར་བྱིན་གྱི་རླབས་ཀྱིས་འདུ། ། གཞན་དག་ཀྱང་ནི་ཁྱད་པར་དུ། ། བྱིན་གྱིས་རློབ་པར་བྱེད་པར་འགྱུར། ། ཆོ་ གས་སྤྱན་དྲངས་གསང་སྔགས་དང་། ། ལྷ་ཡང་ཉི་མ་ནུབ་པ་ན། ཕན་པར་བཞེད་པས་དཀྱིལ་འཁོར་དུ། ། ངེས་པར་བྱིན་གྱིས་རློབ་པར་མཛད། ། ཡང་དག་ཞི་བའི་སེམས་ཀྱིས་ནི། ། དུས་དང་ཆེས་གྲངས་ཞི་བ་ལ། ། སྔགས་ཀྱིས་སྤྱན་འདྲེན་བྱེད་པ་ནི། ། བསམས་པའི་ དངོས་གྲུབ་ཐོབ་པར་འགྱུར། ། ཕུར་བུ་དང་ནི་ཟླ་བ་དང་། ། པ་བ་སངས་དང་ཉི་མ་བཟང་། ། གཞན་ལ་རབ་ཏུ་དྲག་པོ་ཡི། ། ལས་ནི་ཀུན་དུ་བརྩམ་པར་བྱ། ། རྒྱལ་དང་སྐག་དང་ས་ག་དང་། །
BOམེ་བཞི་ནག་པ་ཐ་སྐར་དང་། ། སྣྲོན་ལ་སོགས་གསུམ་ས་ག་ནི། ། དཀྱིལ་འཁོར་ དག་ལ་རབ་ཏུ་ཤིས། ། དེ་ལ་སོགས་པའི་ཞི་བ་དང་། ། རྒྱུ་སྐར་དག་ནི་བཟང་པོ་ལ། ། བློ་དང་ལྡན་པས་དཀྱིལ་འཁོར་བྲི། ། དྲག་པོ་ལ་ནི་དྲག་པོ་བྲི། ། འབེབས་ལྡན་རྣམ་རྒྱལ་རྒྱལ་བྱེད་དང་། ། གསལ་དང་དམར་ལྡན་ནོར་ཅན་དང་། ། བཟང་མོ་ཆུ་ལྷ་ཚངས་མ་དང་། ། དེས་དང་བཀྲ་ ཤིས་ཁྱབ་འཇུག་དང་། ། སྐྱེ་དགུའི་བདག་དང་ཐ་སྐར་བྱམས། ། ཚིག་བཟང་པ་བ་སངས་པའོ། ། ཡུད་ཙམ་རྣམས་ཀྱི་རྒྱུད་ཀུན་གྱི། ། བྱ་བའི་ཆོ་ག་རྣམས་ལས་ཤིས། ། དེ་དག་ལ་སོགས་བཟང་པོ་དང་། ། བྱེད་པ་བཟང་ལ་རྟག་ཏུ་བྲི། ། མི་བཟང་བ་ལ་བརྩམས་པའི་ ལས། ། གང་དུ་ཅི་ཡང་མི་འགྲུབ་བོ། ། དེ་ལྟ་བས་ན་ཡུད་ཙམ་དང་། ། ཚེས་གྲངས་རྒྱུ་སྐར་བྱེད་པ་དང་། ། རྨི་ལམ་བཟང་པོ་བརྟག་པར་བྱ། ། བཟང་པོ་དག་ལ་ལས་བརྩམ་སྟེ། ། བཟང་པོ་མིན་ལ་བརྩམ་མི་བྱ། ། བཟང་པོ་མིན་པའི་ལས་རྣམས་ཀྱང་། ། བཟང་པོ་ ཉིད་ལ་བརྩམ་པར་བྱ། ། ལྟས་ནི་བཟང་དང་མི་བཟང་བས། ། གྲུབ་པ་དང་ནི་མི་གྲུབ་སྟོན། ། དེ་ལྟ་བས་ན་བརྩམས་པ་ལ། ། མཚན་མ་རབ་ཏུ་འབད་དེ་བརྟག ། དེ་ནས་གཞན་ཡངས་དག་ནི། ། སྦྱང་བར་བྱ་བར་རབ་ཏུ་བཤད། །
BOཞག་བདུན་གྱི་ནི་ནང་ལོགས་སུ། ། ཇི་ལྟར་རིགས་ པས་བསྲུང་བྱས་ཏེ། ། འཇོར་གྱིས་ས་ནི་བཟློག་བྱས་ཤིང་། ། དེ་ནས་ཟུག་རྔུ་དབྱུང་བར་བྱ། ། ཟུག་རྔུ་བཅས་པའི་ས་གཞི་ནི། ། ལས་བྱས་པ་དག་འགྲུབ་མི་འགྱུར། ། ཟུག་རྔུ་ཉེས་པ་རུས་པ་དང་། ། གྱོ་མོ་དང་ནི་ཐལ་བ་དང་། ། སྡོང་དུ་མ་དང་ནི་ཚེར་མ་དག ། རབ་ཏུ་བསྒྲིམས་ཏེ་ མ་ལུས་དབྱུང་། ། དེ་ནས་ཐོ་བས་བོང་བ་དག ། བཀྲུམ་ནས་ཞིབ་མོར་བྱས་ཏེ་བ་ཅག ། དེ་ནས་བ་ཡི་གཅིན་གྱིས་ནི། ། ཡང་ནས་ཡང་དུ་གདབ་བྱ་ཞིང་། ། ལག་མཐིལ་ལྟ་བུར་མཉམ་བྱས་ཤིང་། ། བ་ཡི་ལྕི་བ་ཆུར་སྦྱངས་ནས། ། ཤར་ཕྱོགས་ནས་ནི་མགོ་བཙུགས་ཏེ། ། བློ་དང་ལྡན་ པས་ལེགས་པར་བྱུག ། དེ་ནས་དེ་ཡི་དབུས་སུ་ནི། ། ཁུང་བུ་ཅུང་ཞིག་བརྐོས་ནས་དེར། ། འབྲུ་རྣམས་དང་ནི་རིན་ཆེན་ཀུན། ། སྔགས་ཀྱིས་བཏབ་སྟེ་གཞུག་པར་བྱ། ། དེ་ལྟར་སྦྱངས་ཤིང་དབྱིག་དག་གི། ། དབྱིག་དང་ལྡན་པར་བྱས་ནས་ནི། ། བློ་དང་ལྡན་པས་ཅི་རིགས་པར། ། ས་གཞི་ཡོངས་སུ་གཟུང་བྱ་བ། ། ཡང་དག་བསྡམས་པས་ཞག་གསུམ་ན། ། ལས་ཀུན་བྱེད་པའི་གསང་སྔགས་དང་། ། གང་གི་དཀྱིལ་འཁོར་གང་ཡིན་པ། ། དེ་དག་གིས་ནི་ཡོངས་གཟུང་བྱ། །
BOགཅིག་གིས་དྲི་ཡི་ཆུ་ཡིས་ནི། ། དངོས་སུ་བསང་གཏོར་བྱ་བ་སྟེ། ། ཅིག་ཤོས་ཀྱི་ ནི་ལག་པ་ཡིས། ། ས་ལ་བྲམ་སྟེ་མངོན་པར་བསྔགས། ། བླ་ཡིས་ཡོངས་སུ་གཟུང་བྱས་ན། ། གནས་ནི་ཡོངས་སུ་བཟུང་བ་ཡིན། ། ལས་ཀུན་བྱེད་པའི་གསང་སྔགས་ཀྱིས། ། དེ་ནས་སློབ་མ་ཡོངས་སུ་གཟུང་། ། བུ་མོ་གཞོན་ནུས་བཀལ་བའི་སྐུད། ། བླངས་ནས་བཞི་བཅུ་རྩ་ དགུ་བཟླས། ། སློབ་མ་རྣམས་ནི་བློས་བསམས་ནས། ། མཉམ་པར་གཞག་སྟེ་མདུད་པ་བོར། ། དེ་ནས་སློབ་མས་ཡོངས་བཟུང་ནས། ། ལས་ལ་བགེགས་ནི་མེད་པར་འགྱུར། ། སང་ནི་དཀྱིལ་འཁོར་བྲི་བའི་ཚེ། ། དོ་ནུབ་ལྟ་བུ་སྟ་གོན་གནས། ། ཐོག་མ་ཉི་མ་ཤར་བའི་ཚེ། ། ས་ཕྱོགས་ཀྱི་ནི་ཆད་ག་བརྟག ། དེ་ནས་དཀྱིལ་འཁོར་དགོད་པ་དག ། ཡིད་ཀྱིས་ལེགས་པར་ཡོངས་སུ་བརྟག ། སྔགས་རྒྱུད་དག་ལས་འབྱུང་བའི་ཟས། ། བཟང་ལ་གཙང་ཞིང་སྣུམ་བག་ཅན། ། རྗེས་སུ་མཐུན་ཞིང་ཡིད་འོང་བ། ། སློབ་མར་བཅས་པས་རན་པར་བཟའ། ། དེ་ནས་ནུབ་ཀར་ ཁྲུས་བྱས་ཤིང་། ། གཙང་ལ་གོས་ནི་དཀར་པོ་བགོས། ། བླ་མ་སློབ་མ་དང་བཅས་པར། ། དཀྱིལ་འཁོར་དྲུང་དུ་དོང་བར་བྱ། ། དཀྱིལ་འཁོར་བྲི་བའི་ས་གཞི་ནི། ། བྱི་དོར་ལེགས་བྱས་ལེགས་བྱུགས་ལ། །
BOཁྲོ་བོ་ཆེན་པོ་བཟླས་པ་ཡི། ། སྤོས་ཆུས་བསང་གཏོར་བྱས་པ་ལ། ། དབུས་ སུ་སྟ་གོན་གནས་པ་དག ། རིགས་རྣམས་ཀྱི་ནི་སྙིང་པོ་བཟླས། ། དཀྱིལ་འཁོར་བ་དག་པོའི་གསང་སྔགས་ཀྱིས། ། ལས་རྣམས་ཐམས་ཅད་བྱ་བ་བཤད། ། ས་གཞི་སྟེང་དུ་བྱུག་སྤོས་ཀྱིས། ། དཀྱིལ་འཁོར་སོར་གྲངས་བཅུ་གཉིས་བྱ། ། དཀྱིལ་འཁོར་གྱི་ནི་རིག་སྔགས་ཀྱིས། ། ལག་ པས་བྲམ་ཞིང་ལན་བདུན་བཟླས། ། དེ་ནས་གཙོ་བོ་ལྷ་རྣམས་ནི། ། མིང་གིས་ཡིད་ལ་བསམས་ནས་སུ། ། བྱུག་སྤོས་མེ་ཏོག་ལ་སོགས་པས། ། སྙིང་པོས་ཅི་རིགས་མཆོད་པར་བྱ། ། ལྷ་བཤོས་དག་ཀྱང་དབུལ་བར་བྱ། ། བདུག་སྤོས་མངོན་པར་བསྔགས་པའང་དབུལ། ། དེ་ནས་ཙནྡན་ སྦྱར་བ་ཡི། ། ཆུ་ལ་མངོན་པར་བསྔགས་བྱ་ཞིང་། ། དེ་ལ་མེ་ཏོག་གིས་གཏོར་ནས། ། ཆོ་ག་བཞིན་དུ་བདུག་པས་བདུག ། སོ་ཤིང་ཨུ་དུམ་བ་ར་འམ། ། ཨ་ཤྭཏྠ་ནི་རྨ་མེད་པ། ། ཧ་ཅང་མི་སྦོམ་མི་ཕྲ་བའི། ། སོར་གྲངས་བཅུ་གཉིས་ཚད་དུ་བྱ། ། སྤོས་ཀྱི་ཆུས་ནི་ལེགས་པར་བཀྲུས། ། སྐུད་པ་དག་གིས་རྣམ་པར་དཀྲིས། ། སྤོས་ཀྱིས་བྱུགས་ཤིང་བདུག་པས་བདུག ། ལག་པས་བྲམ་ཞིང་རིགས་ཀྱི་ནི། ། སྙིང་པོ་ལན་གྲངས་མང་པོའམ། ། ཡང་ན་ལན་བདུན་བཟླས་བརྗོད་བྱ། །
BOསློབ་མ་རྣམས་ཀྱི་གྲངས་ལས་ནི། ། སོ་ཤིང་ལ་སོགས་གསོག་པར་བྱ། ། སོ་ཤིང་མགོ་ཞབས་ བསྙམས་བྱས་ལ། ། ཐོར་ཏོ་གཅིག་ནི་མགོར་བྱས་ནས། ། རྩེ་མོ་ནས་ནི་བཅའ་བར་བྱ། ། དེ་ནས་མཁས་པས་གནས་དང་ནི། ། བདག་དང་སློབ་མ་བརྟན་བསྲུངས་ནས། ། ལྷ་རྣམས་ཐམས་ཅད་ལེགས་མཆོད་དེ། ། དང་པོར་བགེགས་ནི་ཞི་བའི་ཕྱིར། ། མར་ལས་ བཏགས་པའི་ཡམ་ཤིང་དང་། ། མར་དང་སྦྱར་བའི་ཏིལ་དག་དང་། ། མར་གྱི་སྲེག་བླུགས་སྦྱིན་སྲེག་བྱ། ། འབྲས་ཆན་ཞོར་སྦྱར་སྦྱིན་སྲེག་བྱ། ། དེ་ཡི་འོག་ཏུ་སྙིང་པོ་སྟེ། ། དེ་ནས་ཞི་བའི་སྦྱིན་སྲེག་ནི། ། ཞི་བའི་རིག་སྔགས་ཉིད་ཀྱིས་བྱ། ། དེ་ནས་སློབ་མ་ལེགས་བརྟགས་ཏེ། ། སྟ་ གོན་གནས་པ་ཚུལ་བཞིན་བྱ། ། སློབ་མ་རིགས་བཙུན་གཙང་སྦྲ་ཅན། ། སྙིང་སྟོབས་ཆེ་ཞིང་ཆོས་ལྷུར་ལེན། ། དད་པ་ཆེ་ཞིང་བཟོད་དང་ལྡན། ། དྲན་དང་ལྡན་ཞིང་མཁས་པ་སྟེ། ། དྲང་རྐན་ཆེ་ལ་མདོངས་གསོལ་ཅན། ། བརྟན་ཞིང་དུལ་ལ་སྙན་པར་སྨྲ། ། སྨྲ་མཁས་པ་ལ་ཟློ་བསྐྱེལ་ ཅན། ། ཡང་དག་ཤེས་ཤིང་བྱས་པ་གཟོ། ། བློ་དང་ལྡན་ཞིང་སྤོབས་པ་ཆེ། ། ཆེན་པོར་འདོད་ཅིང་ང་རྒྱལ་མེད། ། མདོག་དང་གཟུགས་དང་ན་ཚོད་བཟང་། ། བསྟན་བཅོས་དག་ལ་གོམས་པར་བྱས། །
BOཧ་ཅང་མི་རིང་མི་ཐུང་ལ། ། དེ་ལ་སོགས་པའི་ཡོན་ཏན་དང་། ། ལྡན་པའི་བློ་ཅན་ སློབ་མར་ཤིས། ། རང་བཞིན་ངན་གཏུམ་གཡོན་ཅན་དང་། ། སྙིང་རྗེ་མེད་ཅིང་ངན་པས་འཚོ། ། ཡན་ལག་ཉམས་དང་ཡན་ལག་ལྷག ། ཧ་ཅང་སྦོམ་དང་སྐེམ་དང་སྡར། ། མིག་དམར་གདོང་ནི་ཁྲོ་གཉེར་ཅན། ། ཁ་དོག་འབྱེས་ཤིང་ཡན་ལག་རྣམས། ། མཚན་དང་ལྡན་པ་མ་ཡིན་དང་། ། དེ་འདྲའི་སློབ་མ་སྐྱོན་མང་བ། ། སློབ་དཔོན་གྱིས་ནི་སྤང་བར་བྱ། ། ཤ་ཚུགས་མ་ལེགས་ཡོན་ཏན་མེད། ། རིགས་དམན་ཞིང་ནི་ངན་པས་འཚོ། ། ནད་བུ་ཅན་དང་དད་མེད་པའི། ། སློབ་མ་རྣམས་ནི་ཡོངས་སུ་སྤང་། ། བདག་ཉིད་ངན་པའི་མི་གང་དག ། སྨད་འཚོང་མ་ལ་རབ་གདུང་ ཞིང་། ། ཆང་དད་ཅན་དང་རྒྱན་ལ་སྲེད། ། དེ་དག་རྟག་ཏུ་ཡོངས་སུ་སྤང་། ། དཀོན་མཆོག་གསུམ་ལ་སེམས་དད་ཅིང་། ། ཚུལ་ཁྲིམས་ཀྱི་ནི་སྡོམ་པས་བསྡམས། ། ཐེག་པ་ཆེ་ལ་ལྷག་མོས་པའི། ། སློབ་མ་ཡོངས་སུ་གཟུང་བར་ཤིས། ། སློབ་མ་ཡན་ལག་མ་ཉམས་དང་། ། ལྷག་ པར་ཡོན་ཏན་ལྡན་པ་དང་། ། ནད་མེད་རིགས་ནི་བཙུན་པ་དང་། ། དད་ཅིང་བརྟུལ་ཞུགས་བརྟན་པར་དཀོན། ། དཀོན་མཆོག་གསུམ་ལ་གང་དད་ཅིང་། ། ཐེག་པ་ཆེན་པོའི་ལུགས་ལ་དགའ། ། བསོད་ནམས་འདོད་པའི་སེམས་ཅན་ནི།
BO། ཆེན་པོ་དེ་དག་མདོར་གཟུང་ངོ་། ། བདེར་གཤེགས་གསང་སྔགས་བསྒྲུབ་པ་ལ། ། དོན་གཉེར་བརྩོན་པའི་སློབ་མ་ནི། ། གཟུགས་ངན་ཡོན་ཏན་མི་ལྡན་ཡང་། ། བློ་དང་ལྡན་པས་གཞུག་པར་བྱ། ། དཀྱིལ་འཁོར་ཆོ་ག་འཁོར་བཞི་པོ། ། ཐེག་པ་ཆེ་ལ་དགའ་བའི་བད་ག ། རང་གི་བསླབ་པ་ལ་བརྩོན་པ། ། ཀུན་གྱི་ ཆོ་ག་ཡིན་པར་བཤད། ། ཁ་ཅིག་གསང་སྔགས་བསྒྲུབ་བྱའི་ཕྱིར། ། དེ་ལས་གཞན་པ་བསོད་ནམས་འདོད། ། གཞན་དག་འཇིག་རྟེན་ཕ་རོལ་དོན། ། འདི་ན་དཀྱིལ་འཁོར་འཇུག་པར་བྱེད། ། འཇིག་རྟེན་ཕ་རོལ་ཆེད་དུ་ནི། ། དད་པ་ཆེན་པོ་བསྐྱེད་བྱས་ནས། ། བློ་ལྡན་དཀྱིལ་འཁོར་ འཇུག་བྱ་ཡི། ། ཚེ་འདིའི་འབྲས་བུ་འདོད་མི་བྱ། ། འཇིག་རྟེན་ཕ་རོལ་དོན་དུ་ནི། ། སྐྱེས་བུ་ཚེ་འདི་འབྲས་རྒྱས་པ། ། དེ་ལྟར་ཚེ་འདི་འདོད་པ་ཡི། ། འཇིག་རྟེན་ཕ་རོལ་རྒྱས་མི་འགྱུར། ། མཁས་པས་སློབ་མ་གཅིག་གམ་གསུམ། ། ལྔའམ་ཡང་ན་བདུན་དག་གམ། ། ཉི་ཤུ་དག་ནི་ ལྔ་ཡི་བར། ། ཟུང་དུ་མ་གྱུར་སློབ་མ་གཟུང་། ། དེ་ལས་ལྷག་པའི་སློབ་མ་དག ། ཡོངས་སུ་གཟུང་བར་མི་ཤེས་སོ། ། མདོར་ན་སློབ་མ་ཕན་ཚུན་དུ། ། ནང་མི་གཤིན་པ་མི་བཟུང་ངོ་། ། གཅིག་ལ་གཅིག་ནི་སེམས་གཟུང་ཞིང་། །
BOཞི་དུལ་བླ་མ་ལ་ཕན་པ། ། འཕགས་པའི་ཡུལ་དང་རིགས་སྐྱེས་ པའི། ། སློབ་མ་མདོར་ན་གཟུང་བར་བྱ། ། དེ་དག་བསྲེག་པར་བྱ་བ་ཡིས། ། ཟས་ནི་ཟ་གཅིག་བཟའ་བར་བྱ། ། དེ་ཡི་ནུབ་མོ་ཅི་ནུས་པར། ། དེ་བཞིན་སྡོམ་པ་འཛིན་དུ་གཞུག ། གཙང་མ་གོས་དཀར་བགོས་པ་ཡི། ། སློབ་མ་དེ་ལྟ་བུ་དག་ག། ཤར་ཕྱོགས་ཁ་བལྟས་འཁོད་པ་ལ། ། སྟ་གོན་ གནས་པ་བརྩམ་པར་བྱ། ། དང་པོ་གསུམ་ལ་སྐྱབས་སུ་བཏང་། ། དེ་ནས་བླ་མས་བྱང་ཆུབ་སེམས། ། མ་བསྐྱེད་པ་ནི་བསྐྱེད་པར་བྱ། ། བསྐྱེད་པ་དག་ཀྱང་དྲན་པར་བྱ། ། དེ་ནས་ཁྲོ་བོ་བཟླས་པ་ཡིས། ། སྤོས་ཆུ་མགོ་ལ་གཏོར་བྱ་ཞིང་། ། མགོ་ལ་བྲམས་ཏེ་མཉམ་བཞག་ནས། ། ལན་ བདུན་དུ་ཡང་བཟླས་བརྗོད་བྱ། ། བྱུག་སྤོས་དག་གིས་བསྐུས་པ་ཡི། ། ལག་པས་མགོ་ལ་བཞག་བཞིན་དུ། ། མཁས་པས་རིག་པའི་རྒྱལ་པོ་ཡི། ། སྙིང་པོ་ཡང་ནི་ལ་ན་བདུན་བཟླས། ། རྒྱལ་བའི་རིགས་ལ་རིག་སྔགས་རྒྱལ། ། འཁོར་ལོས་སྒྱུར་བའི་ཡི་གེ་ གཅིག ། པདྨའི་རིགས་ལ་རིག་སྔགས་རྒྱལ། ། རྟ་མགྲིན་ཡི་གེ་བཅུ་པའོ། ། རྡོ་རྗེ་རིགས་ལ་རིག་སྔགས་རྒྱལ། ། དེ་བཞིན་གནོད་མཛེས་མཐུ་བོ་ཆེ། ། ཡི་གེ་ཧཱུྃ་ནི་བཞི་དང་ལྡན། ། ལས་རྣམས་ཀུན་ལ་རབ་ཏུ་དྲག །
BOཁྲོ་བོ་བདུད་རྩི་ཐབ་སྦྱོར་ནི། ། རིགས་གསུམ་དག་གི་སྤྱི་ལ་ཡང་། ། བགེགས་ རྣམས་ཐམས་ཅད་གཞོམ་པའི་ཕྱིར། ། གསང་བ་པ་ཡ་བདག་པོས་བཤད། ། དེ་ནས་ལ་ས་ཀུན་བྱེད་པ་ཡི། ། སྔགས་ཀྱིས་སྤྱི་བོར་བྲམ་ཞིང་བཟླས། ། དེ་ཉིད་ཀྱིས་ནི་བསང་གཏོར་བྱ། ། བདུག་སྤོས་དག་གིས་རབ་ཏུ་བདུག ། དབང་བསྐུར་བ་ཡི་བུམ་པ་ནི། ། འབྲུ་ལ་སོགས་པ་ཀུན་ ལྡན་པ། ། ཆུ་ནི་ཅུང་ཟད་བླུགས་ནས་སུ། ། རིག་པའི་རྒྱལ་པོས་མངོན་བསྔགས་ཏེ། ། སྤོས་ཆུའི་མཆོད་ཡོན་ཕུལ་ནས་ནི། ། ཆོ་ག་བཞིན་དུ་སྟ་གོན་བྱ། ། མེ་ཏོག་དག་ཀྱང་བླུགས་ནས་སུ། ། བདུག་སྤོས་དག་གིས་བདུག་པར་བྱ། ། ཕྱི་དེ་ཉིན་པར་དུས་གསུམ་དུ། ། མཁས་པས་བཟླས་ བརྗོད་ལེགས་པར་བྱ། ། དཀྱིལ་འཁོར་དུ་ཡང་བཟླས་ནས་ནི། ། དེ་ཡིས་མངོན་པར་དབང་བསྐུར་རོ། ། སློབ་མ་མཐུན་པར་ཚོགས་པ་རྣམས། ། བྱང་གི་ཕྱོགས་སུ་ཁ་བལྟས་ཤིང་། ། ཐལ་མོ་སྦྱར་ཏེ་འཁོད་པ་ལ། ། སོ་ཤིང་{གོ་རིམས་,གོ་རིམ་}བཞིན་དུ་སྦྱིན། ། སློབ་མ་ཤར་དུ་ཁ་བལྟས་ཏེ། ། མི་ སྨྲ་བར་ནི་སོ་ཤིང་བཅའ། ། བཅའ་བ་ཟིན་ནས་མི་དགོས་ཤིང་། ། ཕན་ཚུན་དུ་ཡང་མི་དོར་རོ། ། སོ་ཤིང་མདུན་དུ་དྲང་པོར་དོར། ། དེ་ཚེ་མདུན་དུ་ལྟ་བ་དང་། །
BOདེ་ཚེ་གྱེན་དུ་འགྲེང་འགྱུར་ན། ། དེ་ནི་དངོས་གྲུབ་མཆོག་ཅེས་བྱ། ། དེ་བཞིན་ཤར་དུ་ཁ་བལྟས་ན། ། དེ་ནི་དངོས་གྲུབ་འབྲིང་དུ་ བཤད། ། མཚམས་དང་བྱང་དུ་ཁ་བལྟས་ན། ། འཇིག་རྟེན་པ་ཡི་དངོས་གྲུབ་འགྲུབ། ། སོ་ཤིང་བོར་བ་བརྒྱ་ལམ་ན། ། གལ་ཏེ་ཐུར་དུ་ཁ་བལྟས་ན། ། དེ་ནི་ངེས་པར་ས་འོག་གི། ། དངོས་གྲུབ་དེ་ལ་ཐེ་ཚོམ་མ་མེད། ། སློབ་མ་ཉེ་རེག་བྱས་ནས་ནི། ། སྔ་མ་བཞིན་དུ་འཁོད་པ་ལ། ། རེ་རེ་ལ་ ཡང་བཏུང་བའི་ཕྱིར། ། བླ་མས་ལས་ཀུན་བྱེད་པ་ཡི། ། གསང་སྔགས་དག་གི་སྤོས་ཀྱི་ཆུས། ། ཁྱོར་བར་བླུགས་པས་ལན་བདུན་བླུད། ། དེར་ནི་འཐུངས་ཏེ་ལངས་ནས་སུ། ། ཕྱི་རོལ་དུ་ནི་ཁ་བཀྲུ་བྱ། ། དེ་ནས་མཆོད་པ་ཡང་བྱས་ནས། ། བདུག་སྤོས་ལག་ཏུ་ཐོགས་ནས་སུ། ། བློ་གྲོས་ཅན་གྱིས་ལྷ་རྣམས་ལ། ། གུས་པར་གསོལ་བ་གདབ་པར་བྱ། ། གང་གི་དཀྱིལ་འཁོར་ཡིན་པའི་སྔགས། ། དེ་ལ་ཐོག་མར་གདས་པར་གསོལ། ། {གོ་རིམས་,གོ་རིམ་}དེ་ཡི་ཚུལ་གྱིས་ནི། ། ལྷ་རྣམས་ཀུན་ལ་གདས་པར་གསོལ། ། འདི་ཞེས་བྱ་བའི་བཅོམ་ལྡན་འདས། ། རིག་ སྔགས་རྒྱལ་ལ་ཕྱག་འཚལ་ལོ། ། བདག་ནི་བརྩེ་བར་གྱུར་ནས་སུ། ། སློབ་མ་རྣམས་ལ་བརྩེ་བ་དང་། །
BOཁྱེད་རྣམས་ལ་ཡང་མཆོད་པའི་ཕྱིར། ། སང་ནི་དཀྱིལ་འཁོར་འདྲི་བར་འཚལ། ། བཅོམ་ལྡན་བདག་ནི་གུས་པ་ལ། ། དེ་བས་གནང་བ་མཛད་པའི་རིགས། ། སངས་རྒྱས་ འཇིག་རྟེན་མགོན་བརྩེ་དང་། ། བྱང་ཆུབ་སེམས་དཔའ་དགྲ་བཅོམ་དང་། ། གསང་སྔགས་ལྷ་གཞན་གང་ལགས་དང་། ། འཇིག་རྟེན་སྐྱོང་བའི་ལྷ་རྣམས་དང་། ། གང་ཡང་འབྱུང་པོ་མཐུ་ཆེན་དང་། ། གང་སུ་ལྷ་ཡི་སྤྱན་མངའ་བའི། ། སེམས་ཅན་བསྟན་ལ་དགའ་བ་རྣམས། ། བདག་ལ་དགོངས་པ་མཛད་དུ་གསོལ། ། བདག་མིང་འདི་ཞེས་བགྱི་བ་ཡིས། ། སང་གི་དཀྱིལ་འཁོར་བཟང་པོའི་མིང་། ། འདི་ཞེས་བགྱི་བ་ཅི་ནུས་ཀྱིས། ། ཆོ་ག་བཞིན་དུ་འདྲི་ལགས་ན། ། བདག་དང་སློབ་མར་བཅས་པ་ལ། ། ཐུགས་ནི་བརྩེ་བར་དགོངས་ནས་སུ། ། ཚོགས་ པ་ཐམས་ཅད་དཀྱིལ་འཁོར་དུ། ། བྱིན་གྱིས་བརླབ་པར་མཛད་དུ་གསོལ། ། དེ་ལྟར་ལན་གསུམ་སྨྲས་ནས་ནི། ། བསམ་པ་དག་པས་ཕྱག་བྱས་ཏེ། ། བསྟོད་པའི་ཚིག་ཀྱང་བརྗོད་ནས་སུ། ། དེ་ནས་སླར་ཡང་གཤེགས་སུ་གསོལ། ། འདོད་ཆགས་བྲལ་དང་ལྡན་པའི་ཆོས། ། སློབ་མ་རྣམས་ལ་བཤད་ནས་ནི། ། ཀུ་ཤ་བཏིང་བའི་ས་གཞི་ལ། ། ཤར་ཕྱོགས་སྔས་ལྟས་ཉལ་དུ་གཞུག ། དེ་ནས་ནང་པར་ནམ་ལངས་ནས། ། རྨི་ལམ་ཅི་མཐོང་དྲི་བར་བྱ། །
BOཐོས་ནས་བཟང་ངམ་མི་བཟང་བ། ། ཐེ་ཚོམ་མེད་པར་བཤད་པར་བྱ། ། རྨི་ལམ་སངས་རྒྱས་ མཐོང་ན་ནི། ། ཡོན་ཏན་རྒྱ་མཚོ་མངོན་སུམ་བཞིན། ། མཆོད་རྟེན་དང་ནི་སྐུ་གཟུགས་མཐོང་། ། དེ་ལ་མཆོད་པ་རྩོམ་པ་དང་། ། དགེ་སློང་དག་ལ་ཆོས་ཉན་ཏམ། ། ཡང་ན་གཞན་ལ་ཉན་ཀྱང་རུང་། ། ཆོས་ནི་རྣམ་པར་སྤྱོད་པ་དང་། ། དེ་བཞིན་གླེགས་བམ་ཀློག་པ་དང་། ། རྨི་ལམ་དགེ་འདུན་མཐོང་བ་དང་། ། ཡང་ན་དགེ་སློང་གཅིག་པོ་མཐོང་། ། དེ་དང་འགྲགས་ཤིང་གཏམ་ཟེར་དང་། ། ཡང་ན་དགེ་སློང་དངོས་པོར་གྱུར། ། གཙུག་ལག་ཁང་དག་མཐོང་བ་དང་། ། དེ་བཞིན་དགེ་སློང་མ་དག་མཐོང་། ། རྒྱལ་བའི་སྲས་དག་མཐོང་བ་དང་། ། དེ་བཞིན་ཕ་མ་ བླ་མ་དང་། ། མཛའ་བོ་རྣམ་པ་སྣ་ཚོགས་རྣམས། ། རྨི་ལམ་དུ་ནི་མཐོང་ན་ཤིས། ། རིག་སྔགས་དང་ནི་དངོས་གྲུབ་ཐོབ། ། དེ་བཞིན་བསླབ་པ་འཛིན་པ་དང་། ། ཀུན་དགའ་རྣམ་པ་སྣ་ཚོགས་དང་། ། འབབ་ཆུ་རྣམས་དང་རྒྱ་མཚོ་དང་། ། རི་དང་གླང་པོ་ཆེ་དག་ཀྱང་། ། མཐོང་ན་ཡང་ནི་ བཟང་བར་བསྒྲགས། ། རྒྱལ་པོ་དག་ནི་མཐོང་ན་ཤིས། ། བདེར་གཤགས་སྤྱོད་པ་མཐུན་པ་ཡི། ། དཀའ་ཐུབ་ཅན་དང་བྲམ་ཟེ་དང་། ། ཕྱུག་པོ་སྐྱེས་བུ་དམ་པ་དང་། ། བ་དང་རྟ་དང་ངང་པ་དང་། །
BOསེང་གེ་དང་ནི་{རི་དགས་,རི་དྭགས་}རྣམས། ། རྨི་ལམ་དུ་ནི་མཐོང་ན་ཤིས། ། བཀྲ་ཤིས་པ་ ཡི་བྱ་རྣམས་དང་། ། གསེར་དག་དང་ནི་གཏེར་རྣམས་དང་། ། རིན་པོ་ཆེ་དང་དངུལ་དག་དང་། ། ནོར་ནི་རྣམ་པ་སྣ་ཚོགས་དང་། ། མདོར་ན་འབྱུང་ཁུངས་རྣམ་པ་ཚོགས། ། མཚོན་ཆ་རྣམས་དང་འབྲུ་རྣམས་དང་། ། འབྲས་བུ་རྣམས་དང་མེ་ཏོག་དང་། ། རྒྱན་ནི་རྣམ་པ་སྣ་ཚོགས་དང་། ། ཁ་ཟས་ དང་ནི་གོས་རྣམས་དང་། ། བྱིས་པ་དང་ནི་གཞོན་ནུ་དང་། ། བུད་མེད་གཟུགས་ནི་བཟང་མོ་དག ། རྨི་ལམ་དུ་ནི་མཐོང་ན་བཟང་། ། ཡང་ན་ཐོབ་ཅིང་རེག་སྨྲ་དང་། ། རྨི་ལམ་དུ་ནི་དབང་བསྐུར་དང་། ། རྒྱལ་པོར་གྱུར་པའི་འབྱོར་པ་དང་། ། དམག་དཔོན་དུ་ནི་གྱུར་པ་དང་། ། གཡུལ་ལས་ རྒྱལ་དང་དགྲ་གསོད་དང་། ། གཉེན་དང་ལྷན་ཅིག་འགྲོགས་པ་དང་། ། ལྷ་རྣམས་དག་ནི་མཐོང་བ་དང་། ། ཐེག་པ་དང་ནི་ཤིང་རྟ་ཞོན། ། དེ་བཞིན་རི་དང་ཁང་ཐོག་འཛེག ། ངོ་མཚར་རྣམ་པ་སྣ་ཚོགས་དང་། ། རྨི་ལམ་དུ་ནི་མཐོང་ན་དགེ། ། ཡམ་ཤིང་མེ་ལ་སྦྱིན་སྲེག་བྱེད། ། བྱ་བ་བཟང་པོ་ དག་ལ་འཇུག ། ཆུ་ལས་རྐྱལ་ཏེ་རོང་ལས་རྒལ། ། རྐུན་པོ་དག་ནི་ཚར་གཅོད་པ། ། སྟོབས་འགྱེད་པ་ལས་རྒྱལ་བ་དང་། །
BOགྱད་སྟོབས་རྡེབ་ཅིང་འགྱིང་བ་དང་། ། རྩེད་མོ་སྣ་ཚོགས་རྨི་བ་དང་། ། དེ་བཞིན་རྩལ་སྦུངས་བྱེད་པ་དང་། ། བཀྲ་ཤིས་དག་ནི་ཐམས་ཅད་ཀྱང་། ། མཐོང་ན་རབ་ཏུ་དགེ་བར་བཤད། ། གསང་སྔགས་ཆོ་ག་ཉན་པ་དང་། ། དགའ་སྟོན་དགེ་བ་མཐོང་བ་དང་། ། བསྒྲུབ་པ་བཟང་པོ་རྩོམ་པ་དང་། ། སྒྲུབ་པ་པོ་དག་མཐོང་བ་དང་། ། དེ་ལ་སོགས་པའི་ལྷ་རྣམས་ནི། ། དགེ་བ་རྣམ་པ་དུ་མ་དག ། བློ་ཡིས་རྣམ་པར་དཔྱད་བྱ་ཞིང་། ། དེ་ ལས་བཟློག་པ་སྤང་བར་བྱའོ། ། དགེ་བ་རྣམས་ནི་འགྲུབ་པར་འགྱུར། ། མི་དགེ་རྣམས་ནི་མི་འགྲུབ་བོ། ། མི་དགེ་བ་དག་ཤེས་ནས་སུ། ། དེ་དག་མཁས་པས་སྤང་བར་བྱ། ། དགེ་བ་ཡི་ནི་ལྟས་རྣམས་ནི། ། རབ་དང་འབྲིང་དང་ཐ་མ་ལས། ། གསང་སྔགས་དངོས་གྲུབ་རྣམ་གསུམ་ པོ། ། རབ་དང་འབྲིང་དང་ཐ་མ་འགྲུབ། ། མི་དགེ་བ་ལ་ཞི་བ་ཡི། ། སྦྱིན་སྲེག་ཞི་བའི་གསང་སྔགས་ཀྱིས། ། བ་ཡི་མར་ལ་བརྒྱ་རྩ་བརྒྱད། ། ཆོ་ག་བཞིན་དུ་ཞི་བར་བྱ། ། དེ་ནས་སློབ་མ་སྡིག་བྲལ་ཞིང་། ། རྣམ་པར་དག་པ་དེ་དག་ལ། ། རྗེས་སུ་བརྩེ་བར་བྱ་བའི་ཕྱིར། ། ཅི་འདོད་པར་ནི་གཟུང་བར་བྱ། ། དཀྱིལ་འཁོར་གྱི་ནི་གསང་སྔགས་ཀུན། ། ནང་པར་རྗེས་སུ་དྲན་བྱས་ནས། །
BOགོས་དཀར་བགོས་ཤིང་མ་ཡེངས་པར། ། དཀྱིལ་འཁོར་གྱི་ནི་དྲུང་དུ་འགྲོ། ། ལས་ཀུན་བྱེད་པའི་གསང་སྔགས་ཀྱིས། ། ཐོག་མ་ཉིད་དུ་བསང་གཏོར་བྱ། ། ཚོན་སྣ་ལྔ་ ཡི་སྲད་བུ་ལ། ། དེ་དག་ཉིད་ཀྱིས་བརྒྱར་བཟླས་ཏེ། ། བཟང་པོའི་ལྟས་དང་སྦྱར་ནས་ནི། ། མཁས་པས་དཀྱིལ་འཁོར་ཟིག་གདབ་བོ། ། ཐིག་སྐུད་ཀྱི་ནི་ཚོན་སྣ་ལྔ། ། དཀར་དང་དམར་དང་དེ་བཞིན་སེར། ། སྔོ་དང་ལྔ་པ་ནག་པོ་སྟེ། ། ཚོན་རྩི་རྣམས་ཀྱང་དེ་དང་འདྲ། ། དཀོན་མཆོག་ གསུམ་ལ་མཆོད་བྱ་ཞིང་། ། ལྷ་རྣམས་གནས་ལའང་ཕྱག་བྱས་ནས། ། མཁས་པས་སྲད་བུ་བྲི་བར་བྱ། ། ནང་པར་ཉི་མ་ཤར་བའི་ཚེ། ། བློ་ཡིས་ཕྱོགས་ཆ་ལེགས་བརྟགས་ལ། ། དང་པོར་ཤར་ནས་བསྙམས་ཏེ་གཟུང་། ། སློབ་དཔོན་བྱང་དུ་ཁ་བལྟས་ཏེ། ། སྲད་བུ་འཛིན་པ་དེ་ལ་ བལྟ། ། དེ་ནས་གཡས་ཕྱོགས་བསྐོར་ནས་ནི། ། བདག་ཉིད་ནུབ་ཕྱོགས་ཁ་བལྟས་ཏེ། ། དེ་ནས་སྲད་བུ་ནུབ་ཕྱོགས་སུ། ། བདག་ཉིད་ཀྱིས་ནི་བྲེ་བར་བྱ། ། དེ་ཡི་འོག་ཏུ་བྱང་ཕྱོགས་སུ། ། མཁས་པས་སྲད་བུ་བྲེ་བར་བྱ། ། དང་པོར་བདག་ཉིད་མེ་ཕྱོགས་སུ། ། འདུག་ནས་ཕྱོགས་གཉིས་བརྟག་པར་བྱ། ། དེ་ཡི་འོག་ཏུ་རླུང་ཕྱོགས་སུ། ། ཕྱོགས་གཉིས་ནས་ནི་སྲད་བུ་བྲེ། །
BOབདེན་བྲལ་དབང་ལྡན་གྲ་གཉིས་ནས། ། སྲད་བུ་འཛིན་པ་བལྟ་བར་བྱ། ། གྲུ་བཞི་ལྷ་མ་པར་བསྙམས་ནས་སུ། ། རྒྱ་གྲམ་དུ་ནི་སྲད་བུ་བྲེ། ། རྒྱ་གྲམ་ཐམས་ཅད་ མཉམ་པར་བསྙམས། ། དེ་ལྟར་སྲད་བུས་གཏན་ལ་དབབ། ། བསྙམས་ནས་དེ་ཡི་དཀྱིལ་དུ་ནི། ། ཕུར་བུ་གཅིག་ཀྱང་གདབ་པར་བྱ། ། དེ་ནས་དེ་ཡི་འོག་ཏུ་ཡང་། ། གྲྭ་བཞིར་ཕུར་བུ་བཞི་གདབ་བོ། ། དེ་བཞིན་དཀྱིལ་འཁོར་གཉིས་པ་དང་། ། གསུམ་པ་ལེགས་པར་གྲྭ་དག་ ནས། ། ཆེ་ཆུང་དག་ཀྱང་རིམ་པ་བཞིན། ། ཡོངས་སུ་བརྩམ་པར་བྱ་བར་བཤད། ། རིམ་གྱིས་ཕྱེད་ཕྱེད་ད་བྲི་བར་བར་བྱ། ། དེ་ལས་གཞན་པའི་འཁོར་གྱི་ནི། ། དཀྱིལ་འཁོར་བཤད་པ་གང་ཡིན་པ། ། དེ་ཀུན་ཕྱེ་མ་དཀར་པོ་ཡིས། ། ཆིག་རྐྱང་དུ་ནི་བྲི་བར་བ་ཤད། ། དཀྱིལ་འཁོར་ཉིས་ རིམ་སུམ་རིམ་མམ། ། བཞི་འམ་མང་པོར་བྱ་བ་ལ། ། ཕྱི་རིམ་གང་ཡིན་དེ་ལ་ནི། ། སྒོ་གཅིག་པ་དང་རྒྱ་ཆེར་བྱ། ། གཞན་ནི་ཕྱོགས་ཀྱི་ཆ་བཞིན་དུ། ། སྒོ་བཞི་སྒོ་ཁྱུད་བཅས་པར་བྱ། ། ཡང་ན་ཐམས་ཅད་དོགས་མེད་པར། ། སྒོ་རེ་རེ་བཞི་བྱ་བ་ཡིན། ། སྙིང་པོ་དཀྱིལ་འཁོར་ངེས་པར་ ནི། ། རབ་ཏུ་བཟང་པོ་སྒོ་བཞིར་བྱ། ། ནུབ་ཕྱོགས་སྒོ་འམ་ཡང་ན་ནི། །
BOགང་ལས་ཇི་སྐད་བཤད་པར་དབྱེ། ། ལྷག་མ་རྣམས་ནི་དཀར་པོ་ཡི། ། ཕྱེ་མས་གཅད་པར་བྱ་བ་ཡིན། ། དཀྱིལ་འཁོར་རྣམ་གསུམ་དགོད་པ་ཡིས། ། དཀྱིལ་འཁོར་རབ་ཏུ་མང་བཤད་ཀྱང་། ། དེ་ནི་དཀྱིལ་ འཁོར་མང་པོ་དག ། རྣམ་པར་དགོད་པ་བཤད་པ་གང་། ། དེ་དག་རྣམས་ནི་ཐམས་ཅད་ཀྱི། ། རྣམ་པར་དབྱེ་བ་ཡིན་པར་གྲགས། ། ལྷ་ཡི་གཙོ་བོར་གྱུར་པ་རྣམས། ། རྟག་ཏུ་དཀྱིལ་དུ་དགོད་པར་བྱ། ། དེ་ཡི་ལྷག་མའི་དཀྱིལ་འཁོར་ནི། ། གཉིས་པ་དག་ཏུ་དགོད་པར་བྱ། ། འཇིག་རྟེན་སྐྱོང་བ་ལ་སོགས་པ། ། དཀྱིལ་འཁོར་གསུམ་པ་བསྡུ་བར་བཤད། ། དེ་ལས་གཞན་རྣམས་ཇི་སྐད་དུ། ། བཤད་པ་དེ་བཞིན་ཁོ་ནར་དགོད། ། དཀྱིལ་འཁོར་ཐིག་གདབ་ཐིག་སྐུད་ནི། ། ཁ་བསྒྱུར་གཙང་མ་སྲ་ཞིང་ཕྲ། ། དེ་བཞིན་བུ་མོ་གཞོན་ནུས་བཀལ། ། སར་པ་ཤིན་ ཏུ་གཙང་མ་དང་། ། མཛེས་ཤིང་ཤིན་ཏུ་རན་པ་དག ། དྲི་ཞིམ་རེག་ན་བདེ་བ་དང་། ། ལེགས་པར་བཀལ་དང་སྲ་བ་དང་། ། སྦོམ་ཕྲ་ལ་སོགས་བཀལ་ལེགས་དང་། ། འཇུར་མདུད་མེད་པར་གྱུར་པ་ཡི། ། ཐིག་སྐུད་མེ་ཏོག་སྤོས་མཆོད་པས། ། ཤེས་རབ་ཅན་གྱིས་ཐིག་གདབ་བོ། ། མཆོད་སྦྱིན་ཤིང་གི་ཕུར་བུ་དག ། ཐུར་དུ་རྩེ་བསྟན་མངོན་བསྔགས་པ། །
BOདཀྱིལ་འཁོར་བྲི་བའི་ཆོ་ག་ལ། ། ཕྱོགས་བཞི་དག་ཏུ་གདབ་པར་བྱ། ། ལྟས་ངན་བྱུང་ན་དངོས་མི་འགྲུབ། ། སྲད་བུ་ཆད་ན་བླ་མ་འཆི། ། རིང་ཐུང་ཁྱེར་ན་ནད་ཀྱིས་འདེབས། ། ཕྱོགས་འཁྲུལ་སློབ་མ་ མྱོས་པར་འགྱུར། ། དེ་བས་ཐམས་ཅད་ནན་ཏན་དུ། ། མཁས་པས་ལེགས་པར་ཐིག་གདབ་བོ། ། ། ། ཁྱིམ་སའི་དཔྱད་ལ་ས་ཅི་བྱུང་བའི། ། ས་ཡི་ངེས་པ་དེ་དང་འདྲ། ། དེ་ནས་བླ་མས་ཅི་འབྱོར་པས། ། འཕགས་པའི་དགེ་འདུན་ཆོས་སྟོན་གསོལ། ། ཡང་ན་བླ་མས་བསྒོས་པ་ ཡི། ། སློབ་མ་རྣམས་ཀྱིས་ཆོས་སྟོན་གསོལ། ། གལ་ཏེ་མི་འབྱོར་དགེ་འདུན་གྱིས། ། བསྐོས་པའི་དགེ་སློང་ཆོས་སྟོན་སྦྱིན། ། ཡང་ན་སངས་རྒྱས་མཆོད་པའམ། ། དགེ་འདུན་དག་ལ་ཡོན་ཡང་དབུལ། ། བླ་མ་སློབ་མ་དང་བཅས་པར། ། ཁྲོ་བོ་རྒྱལ་པོ་རྗེས་དྲན་ཞིང་། ། སྐྱུ་རུ་ར་ ལ་སོགས་པ་ཡིས། ། ཕྱི་དྲོ་ཚུལ་བཞིན་ཁྲུས་བྱའོ། ། ཁྲུས་བྱས་གཙང་ཞིང་གོས་དཀར་བགོས། ། ཡོ་བྱད་རྣམ་པ་ཀུན་དང་ལྡན། ། བྱམས་པའི་སེམས་ནི་ཉེར་བཞག་ནས། ། དཀྱིལ་འཁོར་གྱི་ནི་དྲུང་དུ་འདོང་། ། བླ་མས་ཚོགས་རྣམས་ཀུན་བསགས་ཤིང་། ། ལྟ་བ་ངན་པ་ཐམས་ཅད་ སྤངས། ། དཀྱིལ་འཁོར་བྲི་བ་ཐམས་ཅད་ལ། ། བླ་མས་མཁས་པ་དག་ཏུ་བྱ། །
BOདང་པོར་དཀྱིལ་འཁོར་ས་གཞི་ལ། ། བ་ཡི་གཅིན་དང་བསྲེས་པ་ཡི། ། བ་ཡི་ལྕི་བས་བསྐུ་བྱ་ཞིང་། ། དེ་ནས་སྤོས་ཆུས་བསང་གཏོར་བྱ། ། ས་གཞི་ཁོ་ར་ཁོར་ཡུག་ཏུ། ། ཆག་ཆག་གདབ་ཅིང་ཕྱག་དང་ བྱ། ། ཡིད་ནི་མོས་པར་བྱ་བའི་ཕྱིར། ། མེ་ཏོག་སིལ་མ་གཏོར་བར་བྱ། ། སྲད་བུ་དག་གིས་ཡོངས་སུ་བསྐོར། ། རྒྱལ་མཚན་རྟ་བབས་དག་གིས་མཚན། ། བརྒྱུས་པའི་ཕྲེང་བ་རྣམས་བྲེ་ཞིང་། ། བཀྲ་ཤིས་ཆོ་གར་བསྟན་པར་བྱ། ། དེ་ནས་བྱང་གི་ཕྱོགས་གཅིག་ ཏུ། ། ཡོ་བྱད་ཐམས་ཅད་གསོག་པར་བྱ། ། ཁྲོ་བོའི་རྒྱལ་པོས་བསྲུངས་ནས་སུ། ། བློ་དང་ལྡན་པས་དགོད་པར་བྱ། ། གནས་ནི་བསང་གཏོར་བྱ་བ་དང་། ། བགེགས་རྣམས་བསལ་བར་བྱས་ནས་ནི། ། བདག་དང་དཀྱིལ་འཁོར་དག་ཀྱང་ནི། ། དང་པོར་ཀུན་ནས་བསྲུང་བྱ་སྟེ། ། བཀྲ་ཤིས་ལྟས་དང་སྦྱར་ནས་ནི། ། མོས་པའི་སེམས་ནི་བསྐྱེད་བྱ་ཞིང་། ། མཚམས་ཀྱི་དུས་སུ་བབ་པ་ཡི། ། སྲོད་ཀྱི་དུས་ལ་བརྩམ་པར་བྱ། ། ལྟས་དང་མི་ལྡན་གྱུར་ན་ཡང་། ། སེམས་ནི་ཞུམ་པར་མི་བྱ་བར། ། རིགས་གསུམ་དག་ལ་ཕྱག་བྱས་ནས། ། དལ་གྱིས་ལེགས་ པར་བརྩམ་པར་བྱ། ། ལྟས་ངན་དག་ནི་ཡང་དང་ཡང་། ། བསྟུད་མར་བྱུང་བར་གྱུར་ན་ནི། །
BOདེ་ན་དངོས་གྲུབ་མེད་གྱུར་གྱིས། ། དེ་ཚེ་བརྩམ་པར་མི་བྱ་ཡི། ། ཡང་ན་དེ་ནི་ཞི་བའི་ཕྱིར། ། ཡམ་ཤིང་མེ་ནི་འབར་བ་ལ། ། བ་ཡི་མར་ལས་བརྒྱ་རྩ་བརྒྱད། ། ཞི་བའི་ཕྱིར་ནི་སྦྱིན་སྲེག་ བྱ། ། དེ་བཞིན་གཤེགས་པའི་རིགས་ལ་ནི། ། སངས་རྒྱས་སྤྱན་གྱིས་ཞི་བར་བྱ། ། པདྨའི་རིགས་ལ་གྲགས་ལྡན་མ། ། རྡོ་རྗེའི་རིགས་ལ་མཱ་མ་ཀཱི། ། རིགས་གསུམ་དག་གི་སྤྱི་ལ་ཡང་། ། རིག་སྔགས་ཆེན་མོ་མ་མ་ཀ། ། བློ་དང་ལྡན་པས་ལས་ཀུན་ལ། ། དེ་བས་དེས་ནི་ཞི་བར་བྱ། ། དཀྱིལ་འཁོར་བ་དག་པོ་ཆོ་ག་བཞིན། ། དེ་ནས་མཆོད་ཡོན་དབུལ་བར་བྱ། ། སྣོད་ནི་གསེར་དང་དངུ་ལ་དག་དང་། ། ཟངས་ལ་བྱས་པའམ་དུང་ཡང་རུང་། ། ཤིང་ལ་བྱས་པའམ་རྡོ་དག་གམ། ། ཁམ་པ་སར་པའི་གཙང་མའང་རུང་། ། དེར་ནི་མེ་ཏོག་དཀར་པོ་བླུགས། ། བདུག་སྤོས་ཀྱིས་ ཀྱང་བདུག་པར་བྱ། ། དེ་ནས་དྲི་ཞིམ་ཆུ་བླུགས་ནས། ། བློ་ལྡན་ལ་ག་གི་བྲམ་བྱ་ཞིང་། ། བདུག་སྤོས་ཀྱིས་ནི་བདུག་བཞིན་དུ། ། ཡིད་ཀྱིས་རབ་ཏུ་བཟླས་བརྗོད་བྱ། ། དེ་ནས་བློ་དང་ལྡན་པ་ཡིས། ། རྩ་བའི་གསང་སྔགས་ཟློས་བྱེད་ཅིང་། ། ས་ཡི་དབུས་ཀྱི་ཕྱོགས་སུ་ནི། ། པུས་ མོ་གཉིས་བཙུགས་མཆོད་ཡོན་དབུལ། །
BOཡང་ན་དཀྱིལ་འཁོར་ཐམས་ཅད་ཀྱི། ། ལས་ལ་མཆོད་ཡོན་དོན་དུ་ནི། ། མེ་ཏོག་དཀར་པོའམ་བདུག་སྤོས་ནི། ། བཟང་པོའམ་དྲི་ཞིམ་བྱུག་སྤོས་དབུལ། ། བདུག་སྤོས་དག་དང་བྱུག་སྤོས་ནི། ། སྲོག་ཆགས་ཡན་ལག་བཅས་པ་སྤང་། ། ལས་སུ་བྱ་བ་ཐམས་ཅད་ལ། ། ཆུ་ནི་གཙང་མ་བཙག་པར་བྱ། ། དཀྱིལ་འཁོར་དག་ཏུ་ཚིག་རྐྱང་བའི། ། བྱུག་སྤོས་དག་གམ་བདུག་སྤོས་དག ། མེ་ཏོག་སྐམ་ལས་སྐྱེས་པ་ནི། ། དྲི་ཞིམ་པ་དང་དཀར་པོ་ཤིས། ། དེ་ནས་སློབ་མ་བསོགས་ནས་ནི། ། སྤོས་ཀྱི་ཆུ་ཡིས་བསང་གཏོར་བྱ། ། ཚོགས་པ་བསྲུང་བ་བྱས་པ་རྣམས། ། ཕྱོགས་གཅིག་ཏུ་ནི་བཀོད་ནས་སུ། ། ཤེས་རབ་ཕ་རོལ་ཕྱིན་བཀླགས་ཏེ། ། གུས་པར་ཡང་ནི་ཕྱག་བྱས་ནས། ། འཕགས་པའི་ཚོགས་ཀུན་བསམས་ནས་སུ། ། དེ་ནས་དཀྱིལ་འཁོར་བྲི་བར་བྱ། ། མཁས་པས་ལྕགས་ནི་རྣམ་ལྔའམ། ། ཕྱེ་མ་ དཀར་པོ་ལ་སོགས་པའམ། ། དད་ཅིང་ཡོན་ཏན་ལྡན་པ་ཡི། ། སློབ་མས་རིན་ཆེན་ཕྱེ་མས་བྲི། ། རིན་ཆེན་ལྕགས་རྣམས་མ་འབྱོར་ན། ། ས་ལུ་བཏགས་པའི་ཕྱེ་མས་བྱ། ། ཚོན་རྩི་ལྔར་བཤད་ཞིབ་མོ་དང་། ། འབྱུང་ཁུངས་ནས་བྱུང་ཕྱེ་མ་དང་། ། རྡོ་ཡི་ཁམས་ནི་སྣ་ཚོགས་ དག ། ཕྱེ་མའི་ལས་ལ་སྦྱར་བར་བྱ། ། དེ་ལྟར་རྣམ་པ་བཞི་པོ་དག །
BOཕྱེ་མའི་རྒྱུར་ནི་བསྒྲགས་པ་ཡིན། ། ལྕགས་རྣམས་ཀུན་དང་རིན་ཆེན་དང་། ། འབྱུང་ཁུངས་ས་དང་འབྲས་བཏགས་པ། ། དཀྱིལ་འཁོར་ཀུན་གྱི་ལས་རྣམས་ལ། ། ཕྱེ་མའི་དོན་དུ་སྦྱར་བར་བྱ། ། ཡང་ན་ལས་ ཀྱི་ཆོ་ག་ལ། ། ཕྱེ་མ་དམར་པོ་སོ་ཕག་བསྲེགས། ། ནག་པོ་ཐལ་བ་དཀར་པོ་ནི། ། ནས་དང་གྲོ་ལས་བྱས་པ་གནང་། ། བྱ་བ་རིངས་པ་འབྱུང་བ་དང་། ། བགེགས་རྣམས་ཚར་གཅད་བྱ་བ་དང་། ། དྲག་ཤུལ་སྤྱད་པའི་ལས་དག་གི། ། དཀྱིལ་འཁོར་ལས་ལ་ཐལ་བ་གནང་། ། དཀྱིལ་འཁོར་གྱི་ནི་ཆོ་ག་ལ། ། ཕྱེ་མའི་རྒྱུ་ནི་སྔར་བཤད་པ། ། ཀུན་ཀྱང་རུང་སྟེ་ཁྱད་པར་དུ། ། དང་པོ་ལ་སོགས་རིམ་བཞིན་ཤིས། ། ད་མ་ཚིག་ལས་ལ་ལྕགས་ཀྱི་བཟང་། ། རིན་ཆེན་ལས་བྱུང་དབང་བསྐུར་ལ། ། སཱ་ལུའི་ཕྱེ་མ་ཞི་བ་ལ། ། འབྱུང་ཁུངས་ལས་བྱུང་རྒྱས་པ་ལ། ། དྲག་ཤུལ་སྤྱོད་ལ་ཁྱད་པར་དུ། ། ཐལ་བ་ལ་སོགས་བྱ་བར་ཤིས། ། དེ་ནི་ཕྱེ་མའི་ཆོ་གའི་རིམ། ། ཁྱད་པར་དང་བཅས་བསྟན་པ་ཡིན། ། བྱང་ཤར་མཚམས་ནས་བརྩམས་ནས་སུ། ། རྡོ་རྗེ་ཁུ་ཚུར་སྦྱོར་བའམ། ། ཡང་ན་ལྕགས་ཀྱུའི་ཕྱག་རྒྱ་འམ། ། ལྷུང་བཟེད་རྒྱ་ཡི་སྦྱོར་བའམ། ། ཡང་ན་རིག་བྱེད་ལག་པས་བྲི། ། དཀར་པོ་དང་པོར་དགྱེ་བར་བྱ། །
BOདེ་ཡི་འོག་ཏུ་དམར་པོ་དགྱེ། ། དེ་ནས་སེར་པོ་དགྱེ་བར་བྱ། ། དེ་ཡི་འོག་ཏུ་ལྗང་གུ་དགྱེ། ། སྔགས་པས་ཀུན་གྱི་ཕྱི་རོལ་དུ། ། ཚོན་རྩི་ནག་པོ་དགྱེ་བར་བྱ། ། གཡས་སུ་བསྐོར་ ཞིང་རྒྱུན་མི་བཅད། ། ཐམས་ཅད་མཉམ་ཞིང་བར་ཆད་མེད། ། ངན་པ་དང་ནི་ཉམས་པ་དང་། ། མ་སྙོམས་པ་དང་བར་ཆད་ན། ། གནོད་པ་མང་པོ་འབྱུང་བར་འགྱུར། ། དེ་བས་ནན་ཏན་ཆེར་བྱས་ཏེ། ། མཁས་པས་ཕྱེ་མ་དགྱེ་བར་བྱ། ། ཕྱོགས་རྣམས་ཀུན་དུ་མཁས་པ་ཡིས། ། དབུས་སུ་སྒོ་ནི་གདོད་པར་བྱ། ། ངོས་གཉིས་སུ་ནི་ཚ་དག་ཀྱང་། ། བཞི་བཞི་དག་ནི་དོར་བར་བྱ། ། ཆབ་སྒོ་ཆེན་པོ་སྟེགས་བུར་བཅས། ། {ཆུང་ཟད་,ཅུང་ཟད་}གཅིག་ནི་ལྷག་པར་བྱ། ། ཆབ་སྒོ་གཞན་རྣམས་བཅད་པར་ནི། ། ཕྱེ་མ་དཀར་པོ་དག་གིས་ནི། ། སྒོ་ཡི་དབུས་ཀྱི་ཆ་དག་ཏུ། ། རི་མོ་ཕྲ་ མོ་བྲི་བར་བྱ། ། ཡང་ན་སྒོ་ཡི་ཕྱག་རྒྱའམ། ། སྒོ་སྲུངས་ཇི་ལྟར་འདོད་པར་བྲི། ། དང་པོ་ཚོན་རྩི་སྣ་ལྔས་བྲི། ། དཀྱིལ་འཁོར་གཉིས་པ་སྣ་གསུམ་གྱིས། ། གསུམ་པ་ཕྱེ་མ་དཀར་པོ་ཡིས། ། གཅིག་རྐྱང་དུ་ནི་བྲི་བར་བྱ། ། གཞན་ཡང་ཁ་ཅིག་གང་བཤད་པ། ། དེ་ཡི་རི་མོ་གཅིག་ རྐྱང་ཉིད། ། ཐལ་ཕྱེར་བཤད་པ་གང་ཡིན་པ། །
BOདེ་དག་ཐམས་ཅད་རི་མོ་གཅིག ། དེ་ལྟར་དཀྱིལ་འཁོར་བྲིས་ནས་སུ། ། ཆ་གསུམ་དུ་ནི་ལེགས་བརྟགས་ལ། ། ཆུ་ཞེང་དག་ནི་ཆ་གཉིས་ཀྱང་། ། ཤིན་ཏུ་ལེགས་པར་ངེས་པར་བྱ། ། རྣམ་པར་དབྱེ་བ་འདི་དག་ནི། ། རིགས་གསུམ་ དག་གིས་སྤྱིར་བསྟན་ནོ། ། ཡང་ན་སོ་སོ་རྒྱུད་རྣམས་ལས། ། {གོ་རིམས་,གོ་རིམ་}ཇི་སྐད་བཤད་བཞིན་བྱ། ། ལྷ་ཡི་གནས་ཀྱི་ས་གཞི་རྣམས། ། བ་གླང་ལྕི་བས་བསྐུ་བར་བྱ། ། དེ་ཡི་འོག་ཏུ་ཁྱད་པར་དུ། ། བ་ཡི་རྣམ་ལྔའི་ཆུ་ཡིས་བསྐུ། ། ཐམས་ཅད་སྤོས་ཀྱི་ཆུས་གཏོར་ནས། ། དེ་ཡི་འོག་ཏུ་ ཕྱེ་མ་དགྱེ། ། རིག་སྔགས་རྒྱལ་པོས་མངོན་བསྔགས་པའི། ། སྤོས་ཀྱི་ཆུ་ཡིས་གཏོར་བར་བྱ། ། དཀྱིལ་འཁོར་དག་གི་ཆོ་ག་ནི། ། རྣམ་པ་གསུམ་པོ་མ་ལུས་ལ། ། ལྷ་རྣམས་ཐམས་ཅད་དགོད་པ་ནི། ། རྣམ་པ་གསུམ་དུ་རབ་ཏུ་བཤད། ། དང་པོ་གཟུགས་སུ་བྲི་བར་བཤད། ། གཉིས་པ་དག་ནི་ཕྱག་རྒྱ་བྲི། ། གསུམ་པ་སྟན་དང་གནས་དག་ཏུ། ། བྲི་བའི་ཆོ་ག་ཡོངས་སུ་བསྒྲགས། ། བློ་དང་ལྡན་པས་གཟུགས་ཀྱི་ཚུལ། ། བྲི་བ་དེ་ལ་མཁས་པར་བྱ། ། གཙང་མས་བསྒྲིམས་ཏེ་རང་གི་ནི། ། ངོ་བོ་ཇི་སྐད་བཤད་བཞིན་བྲི། ། གཟུགས་དང་འཚམ་པར་ཡན་ ལག་གདགས། །
BOགསལ་ཞིང་རྣམ་པར་འབྱེས་པར་བྲི། ། གཟུགས་ཀྱང་དཀྱིལ་འཁོར་རྣམས་ཀྱི་ནི། ། ཚད་དང་སྦྱར་ཞིང་བྱ་བར་བསྒྲགས། ། རང་གི་ལུང་ལས་ཁ་དོག་གཟུགས། ། འབྱུང་བ་བཞིན་དུ་གཟུགས་བྲིས་ཏེ། ། ཅི་ནས་ཡན་ལག་མ་ཉམས་ཤིང་། ། རང་བཞིན་ཞི་ བའི་གཟུགས་སུ་བྲི། ། གསང་སྔགས་ཆོ་ག་ཤེས་པ་ཡིས། ། ཆོ་ག་འདི་ཡིས་དཀྱིལ་འཁོར་བྲི། ། བློ་དང་ལྡན་པ་མ་བསླབས་པས། ། ཕྱག་རྒྱ་རྣམས་སུ་དགོད་པར་བྱ། ། བསླབས་པས་ཀྱང་ནི་ཕྱེ་མ་ཡིས། ། ཡན་ལག་རྫོགས་པར་རབ་ཏུ་དཀའ། ། ཡན་ལག་རྫོགས་ཤིང་རྒྱས་ བྱ་ན། ། ཆོ་གའི་ལས་ལ་རིང་དུ་ཐོགས། ། གཟུགས་རྣམས་ལེགས་པར་བསྒྲུབས་ན་ནི། ། མང་པོ་རྣམས་ནི་ཟིན་མི་འགྱུར། ། ཡན་ལག་ཉམས་ན་བྱིན་མི་རློབ། ། དངོས་མི་འགྲུབ་པར་རབ་ཏུ་བཤད། ། དེ་ལྟ་བས་ན་མཁས་པ་ཡིས། ། ཕྱག་རྒྱའི་གཟུགས་སུ་ལྷ་རྣམས་ དགོད། ། ཡང་ན་རིགས་གསུམ་བདག་པོ་རྣམས། ། ཅི་འདོད་པར་ནི་གཟུགས་སུ་དགོད། ། དེ་ལ་ས་སངས་རྒྱས་བཅོམ་ལྡན་གྱི། ། ཕྱག་རྒྱ་གཙུག་ཏོར་{གོ་རིམས་,གོ་རིམ་}བཞིན། ། ཡིད་ལ་དེ་ཡི་སྔགས་ཟློས་ཤིང་། ། ཕྱེ་མ་དཀར་པོས་བྲི་བར་བྱ། ། འཕགས་པ་སྤྱན་རས་གཟིགས་དབང་གི། ། ཕྱག་རྒྱ་པདྨར་རབ་ཏུ་བསྒྲགས། །
BOཕྱག་ན་རྡོ་རྗེའི་ཕྱག་རྒྱ་ནི། ། རྡོ་རྗེ་རྣོན་པོ་རྩེ་གསུམ་འབར། ། ལྷ་རྣམས་གཞན་གྱི་ཕྱག་རྒྱ་ནི། ། ལུང་ལས་ཇི་སྐད་བཤད་པ་བཞིན། ། ཡང་ན་རིགས་ཀྱི་བདག་པོའི་རྒྱ། ། དེ་དང་དེར་ནི་སྤྱི་ཡི་ཡིན། ། ལྷ་རྣམས་གང་དང་གང་དག་གི། ། མཚན་མ་གང་ དང་གང་ཡིན་པ། ། དེ་དང་དེ་དག་དེ་ཡི་རྒྱ། ། འདི་ནི་མ་ནོར་མདོར་བཤད་བྱ། ། དྲག་པོའི་ཕྱག་རྒྱ་རྩེ་གསུམ་རྣོ། ། དཀའ་ཟློག་ཕྱག་ན་རྩེ་གསུམ་གདེངས། ། ཁྱབ་འཇུག་གི་ནི་འཁོར་ལོ་རྣོ། ། སྡེ་ཆེན་གྱི་ནི་མདུང་ཐུང་ཡིན། ། ཚངས་པའི་པདྨ་ཡིན་པར་བཤད། ། བརྒྱ་བྱིན་གྱི་ནི་རྡོ་རྗེར་གསུངས། ། མེ་ལྷའི་ཕྱག་རྒྱ་ཞུགས་ཐབ་ཡིན། ། གཤིན་རྗེའི་ཕྱག་རྒྱ་བེ་ཅོན་ཡིན། ། བདེན་བྲལ་གྱི་ནི་རལ་གྲི་ཡིན། ། ཆུ་བདག་གི་ནི་ཞགས་པར་བཤད། ། རླུང་གི་ཕྱག་རྒྱ་རྒྱལ་མཚན་ཡིན། ། ཀུ་བེ་ར་ཡི་དབྱུག་ཏོ་སྟེ། ། དབང་བདག་གི་ནི་རྩེ་གསུམ་ གསུངས། ། འདི་བརྒྱད་ཕྱོགས་ཀྱི་ལྷ་བརྒྱད་ཀྱིའོ། ། ས་ཡི་ཕྱག་རྒྱ་བུམ་པ་ཡིན། ། ཉི་ཟླའི་ཕྱག་རྒྱ་ཟླུམ་པོར་བྱ། ། ལྷ་རྣམས་སོ་སོའི་བྱེ་བྲག་ལས། ། སྭ་སྟི་ཀ་ལ་སོགས་པའི་རྒྱ། ། མཁས་པས་ཇི་སྐད་བཤད་བཞིན་བྲི། ། ཡང་ན་ཀུན་གྱི་ཟླུམ་པོར་བྲི། །
BOགང་དུ་ལྷ་རྣམས་གཟུགས་ དག་ཏུ། ། དགོད་པ་བཤད་པ་དེར་ཡང་ནི། ། ཕྱག་རྒྱ་དག་གམ་ཡང་ན་ནི། ། སྟན་དུ་དགོད་པ་རྣམ་པར་བཤད། ། དེ་ལ་སོགས་པའི་ཕྱག་རྒྱ་རྣམས། ། ཇི་སྐད་བཤད་པའི་ཆོ་ག་བཞིན། ། དཀྱིལ་འཁོར་དག་ཏུ་མ་སྨོས་ཀྱང་། ། ཆོ་ག་བཞིན་དུ་བྲི་བར་བཤད། ། དེ་ལྟར་ཕྱག་རྒྱ་དགོད་པ་ འདིས། ། དགོད་པ་གཉིས་པར་བཤད་པ་ཡིན། ། སྟན་དུ་དགོད་པའི་ཆོ་ག་ནི། ། འདི་ལས་གཞན་པ་གསུམ་པར་བཤད། ། དཀྱིལ་འཁོར་དག་གི་ནང་དུ་ནི། ། ཚོན་རྩི་ཕྱེ་མའི་ཐིག་ལེར་བྲི། ། དཀྱིལ་འཁོར་དག་གི་ཚད་ལས་ནི། ། ཁོ་ར་ཁོར་ཡུག་རྒྱ་ཆེར་བསྐོར། ། རིགས་ཀྱི་བདག་པོའི་ལྷ་ རྣམས་ནི། ། {གོ་རིམས་,གོ་རིམ་}བཞིན་དུ་དེ་ལྟར་བྲི། ། ལྷ་རྣམས་གཞན་ནི་གདན་རྣམས་ཀྱི། ། སྤྱི་ཡི་ཆོ་ག་བཤད་པ་ཡིན། ། ཟླུམ་པོའམ་ཡང་ན་གྲུ་བཞི་རུང་། ། ཐོག་མ་སྟན་ནི་དགོད་པར་བྱ། ། ཡིད་ལ་དེ་ཡི་སྔགས་ཟློས་ཤིང་། ། དེ་ཡི་སྟེང་དུ་མཁས་པས་དགོད། ། ཕྱི་རོལ་དུ་ནི་ཐིག་ལེ་ལ། ། མཁས་པས་ལྷ་རྣམས་མིང་གིས་དགོད། ། ཐམས་ཅད་ཐིག་ལེར་གནས་བྱས་ནས། ། སྤྱན་དྲང་བར་ནི་བརྩམ་པར་བྱ། ། འདི་དག་སྟན་དུ་དགོད་པ་སྟེ། ། གསུམ་པ་ཡོངས་སུ་བསྒྲགས་པ་ཡིན། །
BO{རིངས་སམ་,རིང་ངམ་}ཡང་ན་མི་ནུས་ན། ། སྟན་དུ་དགོད་པའི་དཀྱིལ་འཁོར་བྱ། ། ཡང་ན་ཆོ་ག་ཤེས་ པ་ཡིས། ། གསུམ་པོ་འདི་ཡི་ཆོ་ག་ནི། ། རེ་རེའམ་གཉིས་སམ་གསུམ་ཆར་རམ། ། བསྲེས་ནས་དཀྱིལ་འཁོར་ལེགས་པར་བྲི། ། རིགས་ཀྱི་བདག་པོ་གསུམ་རྣམས་ཀྱི། ། གསང་སྔགས་ཐོག་མར་བཀོད་ནས་སུ། ། དཀྱིལ་འཁོར་ནང་དུ་མཁས་པ་ཡིས། ། ལྷག་མ་རྣམས་ཀྱི་ ཕྱག་རྒྱ་བྲི། ། ཕྱི་རོལ་དུ་ནི་སྟན་རྣམས་བྲི། ། འདི་ནི་སྤྱི་ཡི་ཆོ་ག་སྟེ། ། དཀྱིལ་འཁོར་དག་ལ་ཁྱད་པར་དུ། ། བར་མ་རབ་ཏུ་བསྔགས་པ་ཡིན། ། གཟུགས་རྣམས་ལེགས་པར་མ་རྫོགས་ན། ། ཉེས་པ་སྔར་ནི་བཤད་པ་བཞིན། ། གནས་རྣམས་སྟོང་པར་འགྱུར་བས་ན། ། ཆོ་ག་ཐ་མ་མི་ཤེས་ སོ། ། ཕྱག་རྒྱ་རྣམ་གསུམ་གང་བཀོད་པ། ། བར་མ་རབ་ཏུ་བསྒྲགས་པ་ཡིན། ། ཁྱད་པར་དུ་ནི་དེ་བསྔགས་ཏེ། ། དེ་ལ་བྱིན་གྱིས་རློབ་པར་འགྱུར། ། ཕྱག་རྒྱ་བྲི་ན་བདེ་བ་སྟེ། ། ཕྱག་རྒྱ་གང་ཡིན་དེ་ཉིད་ལྷ། ། དེ་བས་མཁས་པས་ནན་ཏན་དུ། ། དཀྱིལ་འཁོར་དག་གི་ཕྱག་རྒྱ་བྲི། ། དཀྱིལ་འཁོར་མ་ལུས་པ་རྣམས་སུ། ། མ་བཤད་ཀྱང་ནི་དོགས་མེད་པས། ། སངས་རྒྱས་བཅོམ་ལྡན་འོག་ལོགས་སུ། ། གཞན་གྱིས་མི་ཐུབ་ལྷ་མོ་བྲི། །
BOདབུས་ཀྱི་སྟོང་པ་གང་ཡིན་པ། ། དེར་ཡང་བུམ་པའི་སྟེང་དུ་ནི། ། ཤེས་རབ་ཕ་རོལ་ཕྱིན་པ་གཞག ། དེར་ཡང་མཆོད་ཅིང་ བཀླག་པར་བྱ། ། ལ་ལ་དག་ཏུ་མ་གསུངས་ཀྱང་། ། འཕགས་པ་སྤྱན་རས་གཟིགས་དབང་གི། ། དྲུང་དུ་བློ་དང་ལྡན་པ་ཡིས། ། གོས་དཀར་ཅན་ནི་རྟག་ཏུ་བྲི། ། ཕྱག་ན་རྡོ་རྗེའི་དྲུང་དུ་ནི། ། བདུད་རྩི་ཐབ་སྦྱོར་ཀུན་དུ་བྲི། ། བརྩོན་འགྲུས་ཆེན་མོ་མཱ་མ་ཀཱི། ། ཕྱག་རྒྱ་ཆེན་མོ་ བྲི་བར་བྱ། ། ཆོ་ག་ཤེས་པས་སྒོ་དྲུང་དུ། ། དགའ་བོ་དེ་དང་བསྙེན་དགའ་བྲི། ། མཁས་པས་ཇི་སྐད་བཤད་པ་ཡིས། ། འཕྲོག་མ་དེ་བཞིན་མདུན་དུ་བྲི། ། སྒོ་རྣམས་ཀུན་དུ་རྡོ་རྗེ་བྲི། ། ཕྱོགས་སྐྱོང་ཕྱག་རྒྱའང་ལུགས་བཞིན་དུ། ། སོ་སོ་སོ་སོར་དྲག་པོའི་གཟུགས། ། སོ་སོའི་ཕྱོགས་ཀྱི་གནས་སུ་བྲི། ། གནོད་སྦྱིན་ནོར་བུ་བཟང་ལ་སོགས། ། བསྟན་པ་ལ་ནི་གང་དགའ་བ། ། སྒོ་ཡི་བྱང་གི་ཕྱི་རོལ་གྱི། ། ཕྱི་རོལ་དུ་ཡང་དེ་དགོད་དོ། ། གང་དག་ཏུ་ཡང་མ་བཤད་ཀྱང་། ། ཤར་དུ་སངས་རྒྱས་ཐམས་ཅད་དང་། ། དེ་བཞིན་ཆོས་དང་དགེ་འདུན་ལ། ། གུས་ པར་དཀྱིལ་འཁོར་བྱས་ནས་མཆོད། ། འཇམ་དཔལ་གཞོན་ནུར་གྱུར་པ་དང་། ། རྒྱལ་སྲས་མཐུ་ཆེན་ཐོབ་པ་དང་། །
BOནམ་མཁའི་སྙིང་པོ་དོན་གྲུབ་དང་། ། དྲི་མ་མེད་པའི་བློ་གྲོས་དང་། ། དེ་ལ་སོགས་པའི་སེམས་དཔའ་ཆེ། ། དཀྱིལ་འཁོར་གྱི་ནི་ཕྱི་རོལ་ དགོད། ། བསྐལ་པ་བཟང་པོའི་གྲོགས་པོ་ནི། ། བྱམས་པ་ལ་སོགས་ཐམས་ཅད་དགོད། ། རྡོ་རྗེ་སྡེ་དང་ལག་{བཟངས་,བཟང་}དང་། ། དེ་བཞིན་བགེགས་ཀྱི་སྡེ་དཔོན་དང་། ། དབང་ཕྱུག་ཆེན་པོ་ཆུང་མར་བཅས། ། ཚངས་པ་ཆེན་པོ་མེས་པོ་བྲི། ། རིག་སྔགས་འཆང་གི་རྒྱལ་པོ་ཡང་། ། གླང་པོ་ཆེ་ཞེས་བྱ་བ་དང་། ། ཡན་ལག་བཀྲམ་འབྱིན་རྩེ་བྲན་ཅན། ། གཡོན་ཕྱོགས་ཅོད་པན་མི་བཟད་དང་། ། སྣ་ཚོགས་འོད་དང་ལེགས་པར་འགྲུབ། ། རིག་སྔགས་འཆང་བདུན་བདག་པོ་སྟེ། ། བདུན་པོ་འདི་དག་རིགས་ཀྱི་གཅོ། ། དངོས་གྲུབ་པ་སྟེ་མཐུ་ཅན་རྣམས། ། དཀྱིལ་ འཁོར་དག་ནི་ཐམས་ཅད་ཀྱི། ། ལྷོ་ཡི་ཕྱོགས་སུ་ལེགས་པར་དགོད། ། མ་མོ་རྣམས་དང་སྣ་ཡོན་དང་། ། དེ་བཞིན་གཟའ་རྣམས་སྣ་ཚོགས་དང་། ། སྒྲ་གཅན་སྟོབས་ཅན་རབ་སིམ་དང་། ། རྣམ་པར་སྣང་བྱེད་ལ་སོགས་དང་། ། ནོར་རྒྱས་ལ་སོགས་ཀླུ་རྣམས་དང་། ། དེ་དག་ནུབ་ཀྱི་ ཕྱོགས་སུ་དགོད། ། ཤར་དུ་རྡོ་རྗེ་ཕྱག་རྒྱ་ནི། ། བརྒྱ་བྱིན་ལྷ་དང་བཅས་པ་དང་། ། དེ་བཞིན་གནས་གཙང་ལྷ་རྣམས་ཀྱང་། །
BOགུས་པར་ཡང་ནི་མཆོད་པར་བྱ། ། ཉི་ཟླ་གཉིས་ཀྱི་དཀྱིལ་འཁོར་ནི། ། དཀར་དང་དམར་བའི་བྱེ་བྲག་གིས། ། ཤར་དང་ནུབ་ཏུ་བྲིས་ནས་ནི། ། དེ་ནས་དེ་གཉིས་ མཁས་པས་མཆོད། ། མེ་ཡི་ཕྱོགས་སུ་ཞུགས་ཐབ་རྒྱ། ། མེ་ལྷ་དྲང་སྲོང་འཁོར་བཅས་བྲི། ། ལྷོ་ཕྱོགས་བེ་ཅོན་ཕྱག་རྒྱ་ནི། ། གཤིན་རྗེ་{ཡི་དགས་,ཡི་དྭགས་}ལ་སོགས་བཅས། ། བདེན་བྲལ་ཕྱོགས་སུ་རལ་གྲིའི་རྒྱ། ། བདེན་བྲལ་བ་ནི་སྲིན་པོར་བཅས། ། ཆུ་ལྷའི་ཕྱོགས་སུ་ཞགས་པའི་རྒྱ། ། ཆུ་ལྷ་ཀླུ་དང་ལྷན་ཅིག་ཏུ། ། རླུང་གི་ཕྱོགས་སུ་རྒྱལ་མཚན་རྒྱ། ། རླུང་གི་ལྷ་ནི་རླུང་དང་བཅས། ། བྱང་དུ་དབྱུག་ཏོའི་ཕྱག་རྒྱ་ཡང་། ། ཀུ་བེ་ར་ཡང་གནོད་སྦྱིན་བཅས། ། དབང་ལྡན་ཕྱོགས་སུ་རྩེ་གསུམ་རྒྱ། ། དབང་ལྡན་ཚོགས་དང་ལྷན་ཅིག་ཏུ། ། འོག་ཏུ་བུམ་པའི་ཕྱག་རྒྱ་ནི། ། ས་ཡི་ལྷ་མོ་ལྷ་མིན་བཅས། ། ཕྱོགས་སྐྱོང་རྣམས་ནི་{གོ་རིམས་,གོ་རིམ་}བཞིན། ། དེ་ལྟར་གནས་སུ་དགོད་བྱས་ནས། ། བྱུག་སྤོས་མེ་ཏོག་ལ་སོགས་པས། ། མཁས་པས་སོ་སོར་འཁོར་བཅས་མཆོད། ། མཛོད་སྤུ་དང་ནི་མདུང་ཐུང་དང་། ། འཁོར་ལོས་སྒྱུར་བ་ཆེར་འབྱུང་བཅས། ། རིག་ སྔགས་ཆེན་མོ་སྤྱན་དང་ནི། །
BOཡིད་བཞིན་ནོར་བུའི་རྒྱལ་མཚན་དང་། ། མངག་གཞུག་བརྩོན་འགྲུས་ཆེན་པོ་དང་། ། དེ་བཞིན་གཞན་གྱིས་མི་ཐུབ་པ། ། དེ་བཞིན་གཤེགས་པའི་རིགས་དག་གི། ། དཀྱིལ་འཁོར་ཀུན་ལ་དགོད་པར་བྱ། ། གྲགས་ལྡན་མ་དང་དཀར་ཆེན་མོ། ། དེ་བཞིན་ གོས་དཀར་ཅན་དང་ནི། ། རྟ་མགྲིན་དང་ནི་རལ་པ་གཅིག ། སྒྲོལ་མ་དཀར་ཤམ་དཔལ་མོ་ཆེ། ། འདོད་པ་འབྱོར་བྱེད་གསང་སྔགས་དག ། འཕགས་པ་སྤྱན་རས་གཟིགས་དབང་གི། ། དཀྱིལ་འཁོར་མ་ལུས་པ་རྣམས་སུ། ། མཁས་པས་ཆོ་ག་བཞིན་དུ་དགོད། ། རྡོ་རྗེ་ལྕགས་ཀྱུ་ ཁུ་ཚུར་དང་། ། རིག་པའི་རྒྱལ་པོ་ཕྱག་རྒྱར་བཅས། ། ཁྲོ་བོ་ཆེན་པོ་ཐབ་སྦྱོར་དང་། ། གོམ་པ་དོར་བ་ཉིད་དང་ནི། ། རྡོ་རྗེ་ལུག་རྒྱུད་བེ་ཅོན་དང་། ། ཁྲོ་བོ་འཆོལ་པ་ཞེས་བྱ་དག ། ཕྱག་ན་རྡོ་རྗེའི་དཀྱིལ་འཁོར་དུ། ། མ་སྨོས་ཀྱང་ནི་དེ་དག་དགོད། ། དཀྱིལ་འཁོར་དང་པོའི་ནང་དུ་ ནི། ། ཇི་སྐད་སྨོས་པའི་ལྷ་བཀོད་ནས། ། དེ་ནས་མཁས་པས་དཀྱིལ་འཁོར་ནི། ། གཉིས་པར་རིམ་པ་ཇི་བཞིན་དུ། ། མ་སྨོས་པ་དང་འདོད་པ་ཡི། ། གསང་སྔགས་རྣམས་ཀྱང་དགོད་བྱ་ཞིང་། ། འཁྲུལ་པ་མེད་པར་གསུམ་པ་ཡང་། ། བྱེ་བྲག་ཏུ་ནི་དགོད་པར་བྱ། ། ཕྱོགས་བཞིར་ ཆོས་ཀློག་བཞི་བཞག་ནས།
BO། དེ་ལ་ཤར་གྱི་ཕྱོགས་སུ་ནི། ། ཤེས་རབ་ཕ་རོལ་ཕྱིན་པ་བཞག ། བྱང་གི་ཕྱོགས་སུ་བཞག་པ་ནི། ། གསེར་འོད་དམ་པའི་མདོ་སྡེ་ཡིན། ། ནུབ་ཀྱི་ཕྱོགས་སུ་བཞག་པ་ནི། ། དེ་བཞིན་གཤེགས་པའི་གསང་བའི་མདོ། ། ཐེག་པ་ཆེན་པོ་སྡོང་པོས་ བཤད། ། ལྷོ་ཡི་ཕྱོགས་སུ་བཞག་ནས་སུ། ། གུས་པར་དེ་དག་མཆོད་པར་བྱ། ། རྒྱུད་ཀུན་གྱི་ནི་གསང་སྔགས་བདག ། ཡོངས་སུ་མཉེས་པར་བྱ་བའི་ཕྱིར། ། མཁས་པས་དཀྱིལ་འཁོར་ཕྱི་རོལ་དུ། ། སྤྱི་ཡི་ཆོ་ག་གཞན་འདིའང་བྱ། ། བྱང་དང་ལྷོ་དང་ཤར་ཕྱོགས་ཀྱི། ། ཕྱོགས་གསུམ་དུ་ནི་སྟེགས་བུ་གསུམ། ། བྱས་ཏེ་རིགས་གསུམ་བསམས་ནས་སུ། ། སྤྱན་དྲང་བ་ཡི་ཆོ་ག་བྱ། ། དེ་བཞིན་གཤེགས་པའི་རིགས་རྣམས་ཀྱི། ། གསང་སྔགས་ཀུན་ལ་དབུལ་ལོ་ཞེས། ། མེ་ཏོག་སྤོས་ཆུས་བཀང་བ་ཡི། ། མཆོད་ཡོན་དག་ནི་ དབུལ་བར་བྱ། ། སངས་རྒྱས་པ་ལ་ཤར་ཕྱོགས་སུ། ། པདྨ་འཛིན་ལ་བྱང་ཕྱོགས་སུ། ། གསང་བའི་བདག་པོས་བཤད་པ་ཡི། ། གསང་སྔགས་རྣམས་ལ་ལྷོ་ཕྱོགས་སུ། ། དེ་ལྟར་བྱས་ན་རིགས་གསུམ་གྱི། ། གསང་སྔགས་འཁོར་དང་བཅས་པ་ཀུན། ། མཆོད་པ་བྱས་ པ་འདི་རུ་ནི། ། དགྱེས་པར་གྱུར་པ་གདོན་མི་ཟ། ། ཆོ་ག་འདི་ཡིས་ནུབ་ཕྱོགས་སུ། །
BOའཇིག་རྟེན་པ་ཡི་ལྷ་རྣམས་ནི། ། ཀུན་ལ་དབུལ་ལོ་ཞེས་བརྗོད་ཅིང་། ། ཕྱི་རོལ་སྟེགས་བུ་སྟེང་དུ་མཆོད། ། ཞི་བ་དག་གི་ཆོ་ག་ལ། ། བྱང་ཆུབ་སེམས་དཔའ་དཀོན་མཆོག་གསུམ། ། གཙང་ མའི་གནས་ན་འཁོད་པ་ཡི། ། ལྷ་རྣམས་ཀྱང་ནི་དགོད་པར་བྱ། ། རྒྱས་པ་ལ་ནི་ཁྱད་པར་དུ། ། རིག་སྔགས་གསང་སྔགས་ཐམས་ཅད་དང་། ། བསྟན་པ་ལ་ནི་དགའ་བ་ཡི། ། གནོད་སྦྱིན་རྣམས་ཀྱང་དགོད་པར་བྱ། ། དྲག་ཤུལ་སྤྱོད་པའི་དཀྱིལ་འཁོར་དུ། ། ཁྲོ་བོ་རྣམས་ཀྱི་ ཕྱག་རྒྱ་ནི། ། དྲག་ཤུལ་ཆེན་པོའི་རྣམ་དག་དང་། ། མངག་གཞུག་ཕོ་མོ་མང་པོ་དགོད། ། དཀྱིལ་འཁོར་དག་ནི་ཐམས་ཅད་ལའང་། ། ལས་རྣམས་གསུམ་དུ་ཤེས་པར་བྱ། ། དེ་བས་ཆོ་ག་འདི་རྣམས་ཀྱིས། ། དཀྱིལ་འཁོར་རྣམ་པ་གསུམ་དུ་བརྟགས། ། དཀྱིལ་འཁོར་དག་གི་ དབུས་དག་ན། ། ས་སྟོང་གར་ཡང་མ་གཏོགས་པ། ། གང་ན་ཡོད་པ་དེ་རུ་ནི། ། ཤེས་རབ་ཕ་རོལ་ཕྱིན་པ་བཞག ། ཡང་ན་སྒོ་ཡི་གཡས་རོལ་དུ། ། སློབ་མ་བཟང་པོའི་སྟེང་དུ་བཞག ། གཡོན་གྱི་ཕྱོགས་སུ་སྦྱིན་སྲེག་ཕྱིར། ། མེ་ནི་ཡམ་སྲེག་ཤིང་གིས་སྦར། ། ཡང་ན་ཤར་ ལྷོ་མཚམས་དག་ཏུ། ། མེ་ནི་རབ་ཏུ་སྦར་བར་བྱ། ། ཡང་ན་ལས་ཀྱི་རྗེས་མཐུན་པར། །
BOཕྱོགས་ཀྱི་{གོ་རིམས་,གོ་རིམ་}བཞིན་དུ་བཞག ། དྲི་གཙང་ཁང་ངམ་གནས་ཁང་ངམ། ། ཕུག་གམ་ཡང་ན་གོ་སྐབས་དག ། དོག་པ་བཞིན་དུ་བྱེད་ན་ནི། ། དེར་ནི་ཇི་ལྟར་འདོད་པར་བྱ། ། གོ་སྐབས་དོག་ པ་དག་ཏུ་ནི། ། བསྒྲུབས་པའི་དཀྱིལ་འཁོར་མ་གཏོགས་པ། ། སློབ་དཔོན་གྱིས་ནི་གཞན་མི་བྲི། ། བྲིས་ན་མོད་ལ་འཆི་བར་འགྱུར། ། དཀྱིལ་འཁོར་དག་ནི་མ་ལུས་པར། ། གོ་སྐབས་ཡངས་པའི་ཕྱོགས་སུ་ཤིས། ། ཁང་{བཟངས་,བཟང་}དག་གམ་ཁྱམས་སུ་ཡང་། ། གོམས་པ་ ཡིས་ནི་ཅི་བདེར་བྲི། ། རད་རོད་དག་གམ་སྡོང་དུམ་དག ། ལྗོན་ཤིང་དག་དང་རྡོ་བ་ནི། ། རབ་ཏུ་བསྒྲིམས་ནས་དབྱུང་བྱ་སྟེ། ། དེ་དག་ཟུག་རྔུ་ཡིན་པར་བཤད། ། མཁས་པས་དེ་དབྱུང་ཐབས་མེད་ན། ། ཞི་བའི་ཆོ་ག་བྱས་ཏེ་བཞག ། སྙིང་པོའི་དཀྱིལ་འཁོར་དུ་ནི་དེ། ། བག་མེད་ ནམ་ཡང་མི་བཞག་གོ། ། རད་རོད་ལ་སོགས་བྱེ་བྲག་དག ། དཀྱིལ་འཁོར་དབུ་མ་མ་གཏོགས་པར། ། གནས་ཁང་ལ་སོགས་ཉེས་མེད་དེ། ། དེ་དག་དེ་ན་རང་བཞིན་གནས། ། ཁང་{བཟངས་,བཟང་}དག་ལ་སོགས་པར་ནི། ། བསང་གཏོར་བྱས་པས་དག་པར་བཤད། ། རི་ལ་ས་གཞི་ མཉམ་པ་དང་། ། རྡོ་པའི་ཟུག་རྔུ་བརྟག་མི་དགོས། ། གལ་ཏེ་གནས་ཀྱི་དབང་གིས་སུ། །
BOལྷ་རྣམས་ཕྱོགས་ལོགས་འགོད་བྱེད་ན། ། མཁས་པས་ཞི་བ་བྱས་ཏེ་གཞག ། སྙིང་པོར་ནམ་ཡང་མི་བྱའོ། ། བྱ་བའི་དབང་གིས་དེ་ལ་སོགས། ། འགལ་བ་གང་དང་གང་བྱེད་པ། ། དེ་ དང་དེར་ནི་མཁས་པ་ཡིས། ། ཐམས་ཅད་ཞི་བའི་ལས་ཀྱིས་བསལ། ། བློ་དང་ལྡན་པས་ཆོ་ག་འདིས། ། དཀྱིལ་འཁོར་རྫོགས་པར་བྲིས་ནས་ནི། ། ཡིད་ནི་ལེགས་པར་མཉམ་བཞག་ནས། ། དེ་ཡི་འོག་ཏུ་ཡང་བརྟགས་ཏེ། ། བརྒྱ་ལ་འགའ་ཞིག་མ་ལེགས་ན། ། དེ་ནི་ཕྱིར་ཡང་ བཅོས་པར་བྱ། ། མཁས་པས་རང་གི་གསང་སྔགས་སམ། ། སློབ་མའི་སྔགས་ཀྱང་འདོད་ནད་གོད། ། སློབ་མ་བརྟགས་པ་ལ་ལ་ཞིག ། གལ་ཏེ་དབང་ནི་བསྐུར་འདོད་ན། ། དབང་བསྐུར་དོན་དུ་དཀྱིལ་འཁོར་ནི། ། ཕྱེ་མ་དཀར་པོས་བྲི་བར་བྱ། ། དཀྱིལ་འཁོར་དག་དང་ རྗེས་མཐུན་པར། ། སྟེགས་བུ་གྲུ་བཞི་བྱས་ནས་སུ། ། དེ་ཡི་དབུས་སུ་ཚོན་སྣ་ལྔས། ། པདྨ་ཡོངས་སུ་རྫོགས་པར་བྲི། ། བཀྲ་ཤིས་ལ་སོགས་མཚན་མ་རྣམས། ། དེ་ནི་ཇི་ལྟར་འདོད་པ་བྲི། ། བཀྲ་ཤིས་ཕྱིར་ནི་གང་བསྟན་པ། ། ཡང་ན་དེ་ནི་དངོས་སུ་དགོད། ། མཁས་ པས་གཡོས་རྣམས་གང་བཞག་པའི། ། ས་རིས་རྣམས་ཀྱང་ཕྱེ་མས་བཅད། ། གཡོས་སུ་བྱས་པའི་རྣམ་པ་ཀུན། ། བསོགས་ནས་དེར་ནི་དགོད་པར་བྱ། །
BOབུམ་པ་དག་དང་རྒྱལ་མཚན་དང་། ། རྟ་བབས་བཞག་པའི་ས་རིས་དང་། ། ཕྱི་རོལ་མཛེས་པར་ བྱ་བ་ཡང་། ། ཇི་ལྟར་འདོད་པ་ཕྱེ་མས་བྱ། ། དེ་ནས་གཞན་ཡང་ལྷ་རྣམས་ནི། ། སྤྱན་དྲང་བ་ཡི་ཆོ་ག་དང་། ། མཆོད་པ་{གོ་རིམས་,གོ་རིམ་}ཇི་བཞིན་དུ། ། ཡང་དག་མདོར་བསྡུས་བཤད་པར་བྱ། ། དཀྱིལ་འཁོར་ཆོ་ག་བཞིན་བྲིས་ནས། ། ཉེ་རེག་བྱས་ཤིང་གཙང་བར་བར་བྱ། ། ལྷ་རྣམས་ ལ་ཡང་ཕྱག་བྱས་ནས། ། བཟང་ངམ་མི་བཟང་བརྟག་པར་བྱ། ། ཕྱི་རོལ་ཤར་ཕྱོགས་ཁ་བལྟས་ནས། ། ཡིད་ལ་དཀྱིལ་འཁོར་བ་དག་པོ་ཡི། ། སྙིང་པོའམ་གསང་སྔགས་ཀུན་ཟློས་ཤིང་། ། མཚན་མ་དག་ནི་བརྟག་པར་བྱ། ། ཇི་སྲིད་ལྟས་ནི་བཟང་པོ་དག ། འགའ་ཞིག་ འབྱུང་བར་འགྱུར་གྱི་བར། ། དེ་ཉིད་བསྒྲིམས་ཏེ་ཡིད་གཅིག་ཏུ། ། བཟླས་བརྗོད་བྱེད་ལ་འབད་ཅིང་བསྡད། ། དེ་མཐོང་བློ་ལྡན་རངས་འགྱུར་བས། ། ལས་ཀུན་བྱེད་པའི་གསང་སྔགས་སམ། ། བདག་གིས་གང་ཞིག་བཟླས་པ་ཡིས། ། བསྲུང་བ་ལེགས་པར་སྦྱར་བར་ བྱ། ། ཡང་ན་རྒྱུད་རྣམས་ཀུན་གྱི་སྤྱིར། ། བགེགས་རྣམས་ཐམས་ཅད་བཟློག་པ་ལ། ། རྡོ་རྗེ་བེ་ཅོན་བརྩོན་འགྲུས་ཆེ། ། ཁྲོ་བོ་བདུད་རྩི་ཐབ་སྦྱོར་དང་། ། མགོ་ལ་རྡོ་རྗེ་སྨོས་པ་ཡིས། །
BOཕུར་བུ་ར་བ་དྲ་བ་གསུམ། ། བློ་དང་ལྡན་པས་ལྔ་པོ་དག ། ཆོ་ག་བཞིན་དུ་སྦྱར་བར་ བྱ། ། བསྲུང་བ་རྩ་བའི་གསང་སྔགས་སམ། ། ཡང་ན་དེ་ཡི་སྙིང་པོས་བྱ། ། སློབ་མ་རྣམས་ལ་ཡིད་ཀྱིས་སུ། ། བསྲུང་བ་སྔ་མ་བཞིན་དུ་བྱ། ། བསྲུང་བ་བྱས་ནས་དེ་འོག་ཏུ། ། མཁས་པས་དཀྱིལ་འཁོར་འཇུག་པར་བྱ། ། ཞུགས་ནས་མཆོད་ཡོན་སྣོད་ཐོགས་ཏེ། ། མཆོད་ ཡོན་དག་ཀྱང་དབུལ་བར་བྱ། ། མཆོད་ཡོན་སྣོད་ནི་གསེར་དངུལ་ལམ། ། ཟངས་སམ་ཤེལ་ལམ་ནོར་བུ་འམ། ། མཆིང་བུ་དཀར་པོ་ལས་བྱས་པ། ། ཤིང་ངམ་དེ་བཞིན་རྡོ་ལས་བྱས། ། དུང་ངམ་ལོ་མ་སྐྱོངས་བུ་འམ། ། ཉ་ཕྱིས་དག་གམ་ཁམ་ཕོར་ནི། ། སར་པ་ཡན་ ལག་མ་ཉམས་པ། ། དག་པར་བྱས་ལ་བླང་བར་བྱ། ། དེར་ནི་ཁྲོ་རྒྱལ་བཟླས་པ་ཡི། ། མེ་ཏོག་དག་ཀྱང་བཅུག་ནས་སུ། ། མཉམ་པར་བཞག་སྟེ་དཀྱིལ་འཁོར་གྱི། ། གསང་སྔགས་ལན་བདུན་བཟླས་ནས་ནི། ། སྔ་མ་བཞིན་དུ་དྲི་ཆུ་ཡི་ས། ། མཆོད་ཡོན་གུས་ པར་དབུལ་བར་བྱ། ། དཀྱིལ་འཁོར་དབུ་མར་ཕུལ་ནས་ནི། ། ལྷག་མ་རྣམས་ལ་གཏོར་བར་བ་ཤད། ། དཀྱིལ་འཁོར་ཐམས་ཅད་བསང་གཏོར་བྱས། ། དེ་ནས་ཆོ་ག་འདི་བྱའོ། ། བུམ་པ་ནག་པོ་ར་རི་མེད། ། གཟུགས་བཟང་ཁ་དོག་རབ་ཏུ་དམར། ། གསར་ལ་ མ་ཆག་མ་གས་པ།
BO། ཡང་དག་དབྱིབས་ནི་ལེགས་ཤིང་ཟླུམ། ། བཟླས་བརྗོད་དག་ཀྱང་ལན་བདུན་བྱས། ། སྤོས་ཆུ་དག་གིས་བཀང་བ་ལ། ། འབྲུ་རྣམས་ཀུན་དང་ལྡན་བྱས་ཤིང་། ། སྨན་རྣམས་དང་ཡང་ལྡན་པ་དང་། ། རིན་ཆེན་ཀུན་དང་རབ་ཏུ་ལྡན། ། མགུལ་པར་ རས་སར་རངས་པས་དཀྲིས། ། མེ་ཏོག་ཕྲེང་བ་ས་རྣམ་པར་བརྒྱན། ། ཁ་རྒྱན་ལྡུམ་བུ་བཟང་པོས་བྱ། ། ཤིང་ཏོག་བཀྲ་ཤིས་ཁར་བླུགས་པ། ། འབྲས་བུ་མེ་ཏོག་སིལ་མར་ལྡན། ། སྤོས་ཀྱིས་བྱུག་ཅིང་བདུག་པས་བདུག ། ཐམས་ཅད་བཀྲ་ཤིས་དང་ལྡན་པ། ། བཟླས་ བརྗོད་ལན་བདུན་བྱས་པ་དག ། བཀྲ་ཤིས་དོན་དུ་གཉེར་བ་ཡིན། ། ཕྱོགས་དང་མཚམས་རྣམས་དག་ཏུ་དགོད། ། ཡོན་ཏན་ཀུན་དང་ལྡན་པ་ཡི། ། བུམ་པ་འདི་ཀུན་མ་འབྱོར་ན། ། དབང་བསྐུར་ཕྱིར་ནི་འབྲིང་པོ་གཅིག ། ནན་ཏན་བསྐྱེད་དེ་ལེགས་པར་གཞག ། གྲྭ་དང་ སྒོར་ནི་མ་ལུས་པར། ། བུམ་པ་དག་ཀྱང་བཞག་ནས་ནི། ། བར་སྒོ་ཆེན་པོ་གཉིས་གཉིས་ཤིག ། ཁྱད་པར་དུ་ནི་གཞག་པར་བྱ། ། བུམ་པ་གཅིག་ནི་ཕྱི་སྒོ་ཡི། ། དྲུང་དུ་མངོན་པར་གཞག་པར་བྱ། ། མང་པོ་འབྱོར་པར་མ་གྱུར་ན། ། བརྒྱད་དམ་ཡང་ན་བཞི་བཞག་གོ། ། ཉུང་ངུ་རྣམས་ནི་ཁྱད་པར་དུ། ། ཕ་རོལ་དག་ཏུ་དགོད་བྱ་སྟེ། །
BOསྒོ་ཡི་དྲུང་དུ་གཅིག་བཞག་པ། ། དེ་ནི་ངེས་པར་བྱ་དགོས་སོ། ། འབྲས་ཀྱི་སོབ་མོན་སྲན་གྲེའུ། ། ནས་དང་གྲོ་དང་ཏིལ་དང་ལྔ། ། འབྲུ་རྣམས་ཀུན་ཞེས་བྱ་བ་ནི། ། ལས་རྣམས་ཀུན་ལ་འདི་དག་གཟུང་། ། སིང་གྷྲི་བྱཱ་གྷྲི་ཀར་ཎི་ཀ། ། ཧ་ས་ཧ་ས་དེ་བ་སྟེ། ། སྨན་རྣམས་ཀུན་ཅེས་བྱ་བ་ལ། ། ལྔ་པོ་འདི་དག་ཤེས་པར་བྱ། ། བྱི་རུ་གསེར་གྱི་ས་ལེ་སྦྲམ། ། དུང་དང་མུ་ཏིག་ནོར་བུ་སྟེ། ། རིན་ཆེན་ཀུན་ཅེས་བྱ་བ་ལ། ། ལྔ་པོ་འདི་དག་ཤེས་པར་བྱ། ། རྒྱལ་མཚན་ སར་པ་སྣ་ཚོགས་དང་། ། བརྒྱད་ནི་ཁོ་ར་ཁོར་ཡུག་ཏུ། ། ཡུ་བ་དྲང་པོ་རིང་པོ་ལ། ། དཔྱངས་ནས་ཉེ་བར་བཟུང་བྱས་ཏེ། ། དཀར་པོ་ཤར་གྱི་ཕྱོགས་སུ་གཟུགས། ། ཤར་ལྷོ་མཚམས་སུ་ལེ་བརྒན་གཟུགས། ། ལྷོ་ཡི་ཕྱོགས་སུ་ནག་པོ་གཟུགས། ། ལྷོ་ནུབ་མཚམས་སུ་ དུད་ཁ་གཟུགས། ། ནུབ་ཀྱི་ཕྱོགས་སུ་དམར་པོ་གཟུགས། ། ནུབ་བྱང་མཚམས་སུ་ཁྲ་བོ་གཟུགས། ། བྱང་གི་ཕྱོགས་སུ་སེར་པོ་གཟུགས། ། བྱང་ཤར་མཚམས་སུ་ལྗང་སེར་གཟུགས། ། དེ་ལྟར་རྒྱལ་མཚན་བརྒྱད་པོ་རྣམས། ། {གོ་རིམས་,གོ་རིམ་}བཞིན་དུ་གཟུགས་པར་བྱ། ། རྒྱལ་མཚན་ རྣམས་ཀྱི་རྩེ་མོ་ལ། ། ཏོག་ནི་རྨ་བྱའི་མདོངས་ཀྱིས་བརྒྱན། །
BOརྒྱལ་མཚན་རྣམས་ནི་མ་རྙེད་ན། ། ཐམས་ཅད་ཐལ་ཀར་གཅིག་པུའམ། ། ཡང་ན་དེ་བས་མང་ཡང་རུང་། ། ཤར་གྱི་ཕྱོགས་སུ་གཟུགས་པར་བྱ། ། པོག་ཕོར་ཁམ་པ་ལས་བྱས་པ། ། སོ་མ་བཏང་བ་དཀར་ པོ་བཅུ། ། བྱས་ནས་ཕྱོགས་དང་ཕྱོགས་མཚམས་ནི། ། རྒྱབ་དང་དེ་བཞིན་མདུན་དུ་དགོད། ། པོག་ཕོར་དག་ཏུ་མ་འབྱོར་ན། ། ཁམ་པའི་ཕོར་བུའི་ནང་ནས་དབུལ། ། དེ་དག་ཀྱང་ནི་མ་འབྱོར་ན། ། གཅིག་ཅིག་སྒོར་ནི་བཞག་ནས་དབུལ། ། མེ་ཏོག་ཕྲེང་བས་བརྒྱན་པ་ ཡི། ། རྟ་བབས་དག་ཀྱང་ཕྱོགས་བཞིར་བྱ། ། ནས་དང་གྲོ་དང་འབྲུ་རྣམས་ཀྱི། ། མྱུ་གུ་ལེགས་པར་བསྐྱེད་པ་དགོད། ། དྲིལ་བུ་གདུགས་དང་རྔ་མ་དང་། ། སྲད་བུ་དག་ཀྱང་ཕྱོགས་བཞིར་ནི། ། རྟ་བབས་སོགས་ལས་ཕྱི་རོལ་ཏུ། ། མཛེས་པར་བྱ་ཕྱིར་མཁས་པས་གདགས། ། འབྲས་ཡོས་འབྲུ་དང་བཅས་པ་ཡིས། ། མེ་ཏོག་སིལ་མ་རབ་ཏུ་དགྲམ། ། དཀྱིལ་འཁོར་དག་གི་ཕྱི་རོལ་ཏུ། ། ཕྱེ་མས་དཀྱིལ་འཁོར་སྡུག་གུ་བྲི། ། འཇིག་རྟེན་འདི་ན་གྲགས་པ་ཡི། ། བཀྲ་ཤིས་ལ་སོགས་གང་ཡིན་རྣམས། ། དཀྱིལ་འཁོར་དག་གི་ཕྱི་རོལ་ཏུ། ། ཕྱོགས་ བཞི་དག་ཏུ་མཁས་པས་དགོད། ། དེ་ལྟར་རྒྱས་དང་མདོར་བསྡུས་ལ། ། ཅི་ནུས་སུ་ནི་སྦྱར་བ་དག །
BOཆོ་ག་བཞིན་དུ་བྱས་ནས་སུ། ། དེ་ནས་སྤྱན་དྲང་བརྩམ་པར་བྱ། ། མཆོད་ཡོན་ཆོ་ག་སྔ་མ་བཞིན། ། མ་ཡེངས་པར་ནི་སྦྱར་ནས་སུ། ། སོ་སོ་སྔགས་ཀྱིས་ཅི་རིགས་པར། ། མཁས་པས་སྤྱན་ནི་དྲང་བར་བྱ། ། དཀྱིལ་འཁོར་བདག་པོའི་གསང་སྔགས་སམ། ། ཡང་ན་ཐམས་ཅད་སྙིང་པོས་བྱ། ། སྔགས་རྒྱུད་ལས་ནི་ཅི་བཤད་པ། ། དེ་བཞིན་དུ་ནི་སྤྱན་དྲང་བའོ། ། མཁས་པས་དེ་བཞིན་གཤེགས་རིགས་ལ། ། འཁོར་ལོས་སྒྱུར་བས་སྤྱན་ དྲང་ངོ་། ། ཡང་ན་སྤྱན་དྲང་ཆོ་ག་ནི། ། སངས་རྒྱས་སྤྱན་གྱིས་བྱར་ཡང་རུང་། ། ཕྱག་ན་པདྨོའི་རིགས་ཀུན་ལ། ། རིག་པའི་རྒྱལ་པོས་སྤྱན་དྲང་བྱ། ། ཡང་ན་སྤྱན་དྲང་ཆོ་ག་ལ། ། དཔལ་མོས་ལས་ཀུན་བྱེད་པས་བྱ། ། མཁས་པས་རྡོ་རྗེ་འཛིན་རིགས་ལ། ། གནོད་མཛེས་ ཞེས་བྱའི་གསང་སྔགས་སམ། ། མ་ཡེངས་པར་ནི་མཱ་མ་ཀཱིས། ། སྤྱན་དྲང་བ་ཡི་ཆོ་ག་བྱ། ། སྔགས་རྒྱུད་བདག་པོའི་སྔགས་གང་ཡིན། ། དེ་འམ་དེ་ཡི་སྙིང་པོ་ཡིས། ། ལྷ་རྣམས་ཀྱི་ནི་མིང་སྨོས་ཏེ། ། མཁས་པས་སྤྱན་དྲང་ཆོ་ག་བྱ། ། ཡང་ན་རང་གི་རིགས་ཀྱི་སྔགས། ། གང་ཡིན་དེ་འམ་དེ་སྙིང་ངམ། ། ཆོ་ག་ཇི་སྐད་གསུངས་པས་ཀྱང་། ། སྤྱན་དྲང་བ་ནི་མཁས་པས་བྱ། ། ཡང་ན་ཆོ་ག་ཅི་གསུངས་པས། །
BOཡང་ན་ཕྱི་འམ་ནང་དག་གི། ། རང་གི་གསང་སྔགས་གང་ཡིན་པ། ། དེ་དག་གིས་ནི་སྤྱན་དྲང་བའམ། ། ཇི་ལྟར་ལོབས་པར་བྱར་ཡང་རུང་། ། མཆོད་ཡོན་གྱི་ནི་ཆོ་ག་བཞིན། ། དེ་ལྟར་སྤྱན་དྲང་བྱས་ནས་ནི། ། མཆོད་ཡོན་ཉིད་ཀྱིས་ལན་རེ་ཞིང་། ། དེ་ནས་ཞབས་བཀྲུའི་ཆོ་ག་བྱ། ། བདེ་བར་གཤེགས་ཞེས་བྱ་ལ་སོགས། ། ཕྱག་ཀྱང་གུས་པར་འཚལ་བ་དག ། {གོ་རིམས་,གོ་རིམ་}བཞིན་དུ་བྱས་ནས་ནི། ། མཁས་པས་དེ་དག་མཆོད་ པ་བརྩམ། ། དང་པོ་བྱུག་སྤོས་དབུལ་བྱས་ཏེ། ། དེ་ཡི་འོག་ཏུ་མེ་ཏོག་དབུལ། ། དེ་ནས་ལེགས་པར་མཉམ་བཞག་ནས། ། བདུག་སྤོས་ལྷ་བཤོས་དག་ཀྱང་དབུལ། ། ཙནྡན་ཨ་ཀར་གུར་གུམ་དང་། ། ཨུཏྤལ་རྒྱ་སྤོས་པྲི་ཡང་ཀུ། ། ལི་ཤི་ཤིང་ཚ་སྤང་སྤོས་སྨྲིག ། ནཱ་ག་ པུཥྤ་གཱ་ནཱམ་བུ། ། གྲན་ཏེ་སུག་སྨེལ་པ་ཏྲ་དང་། ། ལ་ནི་སྠོའུ་ནེར་སར་ལྡན། ། རྡོ་དྲེག་ཤ་ཏ་པུཥྤ་དང་། ། སྣ་མའི་ལོ་མ་ཙ་རོང་དང་། ། ཀོ་འུན་ཏིམ་འདུ་རི་ཀ་དང་། ། ངྷྱན་ནྱ་ཀ་ཙོ་ལ་སོགས་བཟང་། ། འབྲས་བུ་ཐང་ཆུའི་ཚོགས་རྣམས་ནི། ། མཁས་པ་རྣམས་ཀྱིས་ འདི་སྦྱར་ནས། ། མཁས་པ་བློ་དང་ལྡན་པ་ཡིས། ། ཕྱི་དང་ནང་གི་ལྷ་ཀུན་ལ། ། {གོ་རིམས་,གོ་རིམ་}བཞིན་དུ་གསང་སྔགས་ཀྱིས། །
BOམངོན་པར་བསྔགས་ནས་བྱུག་སྤོས་འབུལ། ། སྲོག་ཆགས་ཡན་ལག་སྦྱར་མི་རུང་། ། རྒྱ་སྐྱེགས་ཆང་སོགས་སྦྱར་མི་རུང་། ། རྫས་ངན་དག་དང་ སྦྱར་མི་རུང་། ། རྩ་བས་དང་སྦྱར་བའང་མི་རུང་ངོ་། ། སངས་རྒྱས་ལ་ནི་ཁྱད་པར་དུ། ། བྱུག་སྤོས་གུར་གུམ་ལ་བྱས་པའམ། ། ཨ་ཀར་ནག་པོ་དྲི་ཞིམ་པ། ། དྲི་ཞིམ་གྱིས་བསྒོས་དབུལ་བར་བྱ། ། འཕགས་པ་སྤྱན་རས་གཟིགས་དབང་ལ། ། ཙནྡན་དཀར་པོ་རབ་ཏུ་ དབུལ། ། ཕྱག་ན་རྡོ་རྗེ་འཁོར་བཅས་ལ། ། ཙནྡན་དམར་པོ་དབུལ་བར་བྱ། ། ལྷག་མ་རྣམས་ལ་བྱུག་སྤོས་དག ། ཇི་ལྟར་རིགས་པས་སྤྱིར་ཕུལ་ནས། ། མེ་ཏོག་སྐམ་ལས་སྐྱེས་པ་དང་། ། ཆུ་ལས་སྐྱེས་པས་མཆོད་པར་བྱ། ། མ་ལི་བ་ཀུན་ཀུན་ད་དང་། ། མི་ལ་ཀི་ནམ་ ལི་ཀ། ། ཙམ་པ་ཀ་ཤོ་པུ་ན་ཀ། ། པྲི་ཡང་ཡུ་ནི་ཨུ་ར་ན། ། གེ་སར་ས་ལ་ཏི་ལ་ཀ། ། ཤིང་གི་ཨུཏྤ་ལ་ཀར་ཎི་ཀ། ཏ་ཀར་ཀ་ར་བི་ར་དང་། ། ཨ་ཛི་དོག་པ་ཀ་དམ་དང་། ། བིན་ཏི་རི་དང་ཀ་ཏ་ར། ། ཀན་ཙ་ན་དང་པ་ཏ་ལ། ། ཤི་ཏ་གན་ཏི་ཀུ་ར་བ། ། བ་ན་དང་ནི་གིང་ཤུ་ཉིད། ། ཆོ་ག་ཤེས་པས་དེ་ལ་སོགས། ། སྐམ་ལས་སྐྱེས་པ་{གོ་རིམས་,གོ་རིམ་}བཞིན། ། ནན་ཏན་དུ་ནི་དབུལ་བྱ་ཞིང་། ། ངན་པ་དག་ནི་རྣམ་པར་སྤངས། །
BOགན་དང་ཀུ་ཡ་ཤིག་མུ་དང་། ། པུ་ཤ་པ་ཏི་མུག་ཏ་ཀ། ། ཨ་གོལ་དྲང་ཀ་ནི་པ་དང་། ། ཀེ་ཏ་ཀ་དང་མ་ན་ཡན། ། ཀུ་རན་ཏ་དང་འདའ་མ་ ཀ། ། ཀུ་ཏི་བ་ལ་མ་ལི་ཀ། དེ་ལ་སོགས་པ་མི་ཤིས་པ། ། དྲག་ཤུལ་སྤྱོད་ལ་སྦྱར་བར་བྱ། ། པདྨ་དཀར་དང་པདྨ་དམར། ། ཨུཏྤལ་རིགས་ནི་སྣ་ཚོགས་དང་། ། ཀུ་མུ་ད་སོགས་ཆུ་སྐྱེས་རྣམས། ། དཀྱིལ་འཁོར་ལས་ལ་སྦྱར་བྱ་སྟེ། ། དེ་ཡང་ཀུ་མུ་ད་དམར་དང་། ། དེ་བཞིན་སེའུ་ གན་ཏི་དཀར་དང་། ། དྲི་མི་ཞིམ་པ་གཞན་དག་ཀྱང་། ། དྲག་ཤུལ་སྤྱོད་ལ་སྦྱར་བར་བྱ། ། གེ་སར་ཀྲ་ནི་ཀ་ར་དང་། ། མ་ལ་ཏི་དང་མེ་ཏོག་དཀར། ། དྲི་ཞིམ་པ་དག་ཁྱད་པར་དུ། ། དེ་བཞིན་གཤེགས་པའི་རིགས་ལ་དབུལ། ། པདྨ་ལ་སོགས་ཆུ་སྐྱེས་རྣམས། ། མཁས་པས་པདྨའི་རིགས་ལ་དབུལ། ། ཨ་ཤོ་ཀུ་ཏི་ཏི་ལ་ཀ། ། དེ་བཞིན་ན་པ་མ་ལི་ཀ ། པྲི་ཡང་ཀུ་དང་ཏ་པ་ར། ། ཀ་ར་བཱི་ར་ཏྲག་ཏྲ་ཀ། ། ཨུཏྤལ་སྔོན་པོ་ཉིད་དག་ཀྱང་། ། རྡོ་རྗེའི་རིགས་ལ་དབུལ་བར་བྱ། ། དེ་བཞིན་གཤེགས་པའི་རིགས་ལ་ཡང་། ། ཙནྡན་ཨ་གར་ བདུག་སྤོས་དབུལ། ། མཁས་པས་ཤི་རི་བི་སྟ་སོགས། ། ཐང་ཆུ་པདྨའི་རིགས་ལ་དབུལ། ། ཨ་གར་ནག་པོ་གུ་གུལ་གྱི། ། བདུག་སྤོས་རྡོ་རྗེའི་རིགས་དགྱེས་སོ། །
BOབདུག་སྤོས་དག་ནི་སྤྱིར་བཤད་ན། ། སྲོག་ཆགས་ཡན་ལག་སྤངས་པའི་རྫས། ། ཙནྡན་ག་པུར་ཨ་ གར་དང་། ། ཏུ་རུ་སྐ་དང་པོག་དཀར་དང་། ། ཤི་རི་བེ་སྟ་སྲ་རྩི་བོབ། ། ར་ས་གུ་གུལ་ཤལ་ལ་ཀི། ། ཨུ་ཤི་ར་དང་ལ་བ་ཀ། ། སྤང་སྤོས་གླ་སྒང་ག་པུར་དང་། ། དེ་བ་ད་རུ་ཐང་ཤིང་དང་། ། དེ་ལ་སོགས་པའི་རྫས་རྣམས་ནི། ། ཇི་སྙེད་པ་དག་བསྡུ་བྱས་ནས། ། བློ་དང་ལྡན་ པས་བུ་ར་མ་དང་། ། ལྷན་ཅིག་ཏུ་ནི་སྦྱར་བར་བྱ། ། དེ་ལྟ་བུ་ཡི་བདུག་སྤོས་ནི། ། ལྷ་ལ་{གོ་རིམས་,གོ་རིམ་}བཞིན་དུ་དབུལ། ། དེ་དག་གང་ཡང་རུང་བ་དང་། ། གཞན་ཡང་དྲི་ཞིམ་བཤད་པ་གང་། ། རྫས་མང་དག་དང་སྦྱར་བ་ཡི། ། བདུག་སྤོས་དཀྱིལ་འཁོར་དག་ལ་དབུལ། ། དཀྱིལ་འཁོར་ གྱི་ནི་ཆོ་ག་བཞིན། ། ར་བ་དང་སེམས་ཀྱིས་ཅི་འབྱོར་པ། ། བདུག་སྤོས་མེ་ཏོག་ལ་སོགས་པ། ། བྱ་བ་དག་ནི་ལེགས་པར་བྱ། ། མེ་ཏོག་དེ་དག་བརྒྱུད་མཁན་གྱིས། ། བརྒྱུས་པ་ཞིག་ན་ངན་པ་ནི། ། ཉུང་ཤས་ཡོད་ན་མི་འགལ་ཏེ། ། དེ་མང་ན་ནི་རྣམ་པར་སྤངས། ། མི་ཤེས་པ་ཡི་ བྱུག་སྤོས་དག ། མཁས་པས་དཀྱིལ་འཁོར་དབུལ་མི་བྱ། ། སྲོག་ཆགས་ཡན་ལག་གིས་གཏུགས་པ། ། དེ་ཡིས་གཞན་དག་བདུག་མི་བྱ། །
BOརྒྱ་སྐྱེགས་ལ་སོགས་བདུག་སྤོས་ནི། ། དགེ་བའི་ལས་ལ་དབུལ་མི་བྱ། ། དེ་འདྲའི་ཆོ་ག་འདི་ཤེས་ནས། ། ཆོ་གའི་ལས་ལ་འབད་ པར་བྱ། ། ཕྱི་རོལ་བཞག་པའི་པོག་ཕོར་ནང་། ། ཁམ་ཕོར་ནང་དུ་བསྒྲགས་པ་གང་། ། དེ་དག་ཏུ་ནི་ཅི་འདོད་པར། ། སྲོག་ཆགས་ཡན་ལག་སྦྱར་བའང་བཞག ། དཀྱིལ་འཁོར་ཕྱི་རོལ་འཇིག་རྟེན་པའི། ། ལྷ་ནི་གང་དག་འདྲི་བྱེད་པ། ། དེ་ ཡང་མཁས་པས་དེ་བཞིན་དུ། ། བདུག་སྤོས་བྱུག་སྤོས་ཅི་དགར་དབུལ། ། རིགས་ཀྱི་བདག་པོ་རྣམས་ལ་ནི། ། མཆོད་པ་ཁྱད་པར་ཅན་དུ་བྱ། ། དེ་ཡི་འོག་ཏུ་ལྷ་ཀུན་ལ། ། གྲལ་རིམ་བཞིན་དུ་མཆོད་པར་བྱ། ། རིགས་ཀྱི་བདག་པོ་རྣམས་ལ་ནི། ། བདུག་ སྤོས་སྣོད་ཀྱང་རྣམ་གསུམ་གཞག ། དབུས་སུ་བདུག་སྤོས་སྣོད་གཅིག་ནི། ། བདུག་སྤོས་འཐུལ་བ་རྒྱུན་མི་འཆད། ། དཀྱིལ་འཁོར་རིམ་པ་རེ་རེ་ལ། ། བདུག་སྤོས་སྣོད་ནི་རེ་རེ་བཞག ། དེ་ཉིད་ནས་ནི་ཐམས་ཅད་དུ། ། རྟག་པར་བདུག་སྤོས་དབུལ་བར་བྱ། ། ཡང་ན་ཐམས་ཅད་སྤྱི་ལ་ནི། ། བདུག་སྤོས་སྣོད་ནི་གཅིག་བཞག་སྟེ། ། བསང་གཏོར་ཡང་དང་ཡང་བྱས་ནས། ། དེ་ནས་བདུག་སྤོས་དབུལ་བར་བྱ། ། དེ་ཡི་འོག་ཏུ་དཀྱིལ་འཁོར་དུ། ། ལྷ་རྣམས་ཀུན་ལ་མཆོད་ཡོན་དབུལ། །
BOདེ་ནས་ཡིད་ལ་སྔགས་ཟློས་ཤིང་། ། ལྷ་ བཤོས་དབུལ་བ་ལེགས་པར་བྱ། ། ལྷ་བཤོས་དབུལ་བ་འབྱོར་པ་དང་། ། གཙང་ཞིང་ཆ་ཡང་མཉམ་པ་རུ། ། དཀྱིལ་འཁོར་གྱི་ནི་{གོ་རིམས་,གོ་རིམ་}བཞིན། ། མཁས་པས་ནན་ཏན་བསྐྱེད་དེ་བྱ། ། རིགས་ཀྱི་བདག་པོ་རྣམས་ལ་ནི། ། དབུལ་བ་ཁྱད་པར་ཅན་དུ་བྱ། ། དཀྱིལ་ འཁོར་གྱི་ནི་བདག་པོ་ལ། ། ལྷ་བཤོས་དག་ནི་ཉིས་འགྱུར་དབུལ། ། འོག་མ་རྣམས་ལ་{གོ་རིམས་,གོ་རིམ་}བཞིན། ། མཁས་པས་དེ་བས་ཆུང་ངུ་དབུལ། ། ལྷ་བཤོས་དབུལ་བ་བར་བར་དུ། ། ཅི་དགར་ཁྱད་པར་ཅན་གྱིས་བྱ། ། མཆོད་པའི་བཤོས་ནི་བཟང་པོ་དག ། གཙང་ ཞིང་རབ་ཏུ་རྒྱ་ཆེ་ཞིང་། ། དཀྱིལ་འཁོར་དག་ཏུ་ལྷ་རྣམས་ཀུན། ། རབ་ཏུ་མཉེས་ཤིང་འགོ་བར་འགྱུར། ། དབུལ་བར་བྱ་བ་རྣམས་ལ་ནི། ། བར་དུ་ཁ་ཅིག་ཆད་འགྱུར་ན། ། དེ་ལས་གཞན་པ་དག་ལ་ནི། ། མཁས་པས་ལྷ་བཤོས་ལྷགས་ཏེ་དབུལ། ། འབུལ་བ་ཧ་ ཅང་ཉུང་བ་གང་། ། རིགས་ཀྱི་བདག་པོར་དབུལ་བར་བྱ། ། ཡང་ན་སྙིང་པོར་དཀྱིལ་འཁོར་དུ། ། ཀུན་གྱི་སྤྱི་ལ་མ་ལུས་དབུལ། ། ཡང་ན་གང་དང་གང་བཤམས་ན། ། དེ་དེ་མཁས་པས་ཐམས་ཅད་དུ། ། དཀྱིལ་འཁོར་དང་པོའམ་གཉིས་པའམ། ། གསུམ་པ་དག་ཏུ་དབུལ་བྱས་ནས། །
BOརིགས་དག་རྣམས་དང་ཁྱད་མེད་པའི། ། ཉེས་པ་འགའ་ཡང་ཡོད་མིན་པས། ། དཀྱིལ་འཁོར་དག་ནི་མ་བརྩམས་པར། ། བག་དང་ཆས་ཏེ་བརྟག་པར་བྱ། ། དང་པོ་ཆུ་ཤིང་པདྨོ་སོགས། ། ལོ་མའམ་འདབ་མ་བཏིང་བྱས་ ནས། ། སྭ་སྟི་ཀ་ལ་སོགས་པ་ཡི། ། བཅའ་བ་དག་ནི་དབུལ་བྱ་ཞིང་། ། དེ་བཞིན་འབྲས་ཆན་ལ་སོགས་པ། ། བཟའ་བ་དག་ཀྱང་རིམ་བཞིན་དབུལ། ། དེ་ཡི་འོག་ཏུ་རྡོ་གུ་དང་། ། རྩ་བ་འབྲས་བུ་ལ་སོགས་འབུལ། ། གཏོར་མ་གང་ཡིན་ལས་དག་ལ། ། བཅའ་ བ་རྣམ་པ་སྣ་ཚོགས་པ། ། ནས་དང་གྲོ་ལས་བྱས་པ་ཡི། ། དྲི་ཞིམ་པ་དང་ལེགས་པའང་དབུལ། ། ཧྭགས་ནི་རྣམ་པ་སྣ་ཚོགས་དང་། ། ལ་དུ་དག་དང་ལ་བ་ནི། ། པེ་ན་མ་དུ་ཤིར་ཤ་དང་། ། སྣུམ་ཁུར་ཨ་ཤོ་བར་ཏ་དང་། ། ཤྲི་ཀ་ད་ཚིལ་ཀ་དང་། ། པར་པ་ཏ་དང་ པར་པ་ནི། ། ར་ཙ་ཧ་ས་གུ་ཧ་དང་། ། ཀར་པོད་ཀ་རི་ཀ་ཉིད་དང་། ། པུ་ཤ་པར་ཏ་ཧ་བི་དང་། ། པུརྞ་དེ་བཞིན་ཞི་ཐེའུ་དང་། ། བར་ཏི་པུཥྤ་བེ་ཏི་མ། ། བིཏྟ་ཁ་དང་ཁ་རྫུ་བ། ། ས་རྫ་ཀ་དང་མན་ད་ཀ། ། ཛ་ལི་ཏི་བི་ཀ་དང་ནི། ། ཤས་ཀུ་ལ་དང་མོ་ཏ་ཀ། ། སྣུམ་ཚོས་ སྣ་ཚོགས་ཁར་ར་བཅས། ། ཨུ་ལོ་བི་ག་ཀུ་ལ་དང་། ། དེ་བཞིན་དུ་ནི་གླང་སྣ་དང་། ། མ་ཤའི་ཁུར་བ་ལ་སོགས་དང་། །
BOཤུས་ཀ་ཀ་དང་ལོ་མའི་དབྱིབས། ། བ་རྟ་ཀ་དང་བེ་རེག་དང་། ། སྭ་ཡ་ལི་ཀ་དྭ་ཙེ་དང་། ། དེ་ལ་སོགས་ཏེ་སྣ་ཚོགས་པའི། ། བཅའ་བ་དག་ ནི་འདིར་དབུལ་ལོ། ། ཀྲི་ས་ར་དང་འོ་ཐུག་དང་། ། འབྲས་ཐུག་ཆུ་དང་སྦྱར་བ་དང་། ། ཞོ་དང་དར་བ་ནས་ཐུག་དང་། ། ཁ་དོག་དམར་དང་སེར་སོགས་འགྱུར། ། ལོ་མ་བཏིང་བ་འདི་དག་ནི། ། ཁམ་ཕོར་དག་ནས་དབུལ་བར་བྱ། ། དེ་ནས་ས་ལུའམ་དྲུག་ཅུ་ཡི། ། འབྲས་ཆན་བུངས་ནི་མི་ཆུང་དབུལ། ། དེ་ནས་ཚོད་མ་སྣ་ཚོགས་པ། ། གཡོས་ལེགས་པ་ལ་དྲི་ཞིམ་པ། ། སྲན་ཆུང་ཚོད་མ་ལ་སོགས་པའི། ། ཚོད་མ་རྣམ་པ་སྣ་ཚོགས་དབུལ། ། འབྲས་ཆན་ཞོ་སྦྱར་བུ་རམ་ཆན། ། ཁམ་ཕོར་དག་ནས་དབུལ་བར་ བྱ། ། མཁས་པས་ཟས་རྣམས་བཟང་པོ་དག ། གང་ཡང་རུང་བས་ལྷ་བཤོས་དབུལ། ། ཆོ་ག་ཤེས་པས་ཟས་རྣམས་ནི། ། དཀར་གསུམ་འབྱུང་པོ་ཐམས་ཅད་ལ། ། རྒྱ་ཆེན་པོ་ནི་སྣ་ཚོགས་པ། ། ཇི་ལྟར་རིགས་པར་སྦྱར་བར་བྱ། ། འབྲས་ཆན་མར་ཞོ་འོ་མར་སྦྱར། ། དཀར་ གསུམ་ཞེས་བྱ་འོ་ཐུག་དང་། ། ཀྲི་སར་སྲན་ཚོད་དང་སྦྱར་བ། ། དེ་མིང་འབྱུང་པོ་ཐམས་ཅད་པའི། ། བཅའ་བ་མང་བཅས་རྒྱ་ཆེན་དེ། ། ནས་ཐུག་དང་སྦྱར་སྣ་ཚོགས་པའོ། ། དེ་ལྟར་ཁ་ཟས་རྣམ་པ་དྲུག །
BOཅི་ནུས་པར་ནི་དབུལ་བར་བྱ། ། དྲི་མི་ཞིམ་དང་བསྐ་བ་ དང་། ། ཁ་བ་དང་ནི་ཚ་བ་དང་། ། ཚོད་མ་ཞག་ཏུ་ལོན་པ་དང་། ། བཀྲ་མི་ཤིས་པ་རྣམ་པར་སྤངས། ། ཚོད་མ་རྣམས་ནི་མ་འབྱོར་ན། ། སྲན་ཚོད་གཅིག་པུ་དབུལ་བར་བྱ། ། ཞོ་ནི་ཀུན་དུ་འབྲས་ཆན་གྱི། ། སྟེང་དུ་བསྒོས་ཏེ་བླུག་པར་བྱ། ། འོ་ཐུག་མ་ཤའི་སྲན་ཚོད་དང་། ། ཞོ་དང་འབྲས་ཆན་སྭ་སྟི་ཀ། ཀྲི་ས་ར་དང་དྲུག་པོ་དག ། གཏོར་མའི་ལས་ལ་རྟག་མི་སྤང་། ། དབུལ་པོའི་གཏོར་མའི་ལས་ལ་ནི། ། དྲུག་པོ་ཁོ་ན་བརྗོད་པར་བྱ། ། དེ་དག་གང་ཡང་རུང་བ་ཞིག ། ཉམས་ན་གཏོར་མའི་ལས་ཉམས་སོ། ། འོ་ཐུག་ནང་དུ་སྦྲང་རྩི་གདབ། ། དེ་ བཞིན་ཞོ་དང་བུ་རམ་གདབ། ། སྲན་ཚོད་ནང་དུ་མར་མི་གདབ། ། བདོག་ན་སྒེའུ་གཤེར་དག་ཀྱང་གདབ། ། འབྲས་ཆུ་དག་དང་རྩ་བ་དང་། ། རྣམ་པ་སྣ་ཚོགས་བསྒྲིམས་ཏེ་གདབ། ། ལྷ་རྣམས་དང་ནི་གསང་སྔགས་དང་། ། ཁྱད་པར་དུ་ཡང་དེ་ལ་དགྱེས། ། ཨ་མྲ་འབྲ་གོ་བལ་པོ་ སེའུ། ། རྒུན་འབྲུམ་རྒྱ་ཤུག་ཏིན་ཏུ་ཀ། ། ཀ་པིད་བཱི་ཛ་པུར་དང་། ། ན་རང་ཀ་དང་པ་ན་ས། ། སྐྱུར་ཤིང་ལ་ཀུ་ཆུ་ཤིང་འབྲས། ། བྷ་བྱ་བ་ར་བ་རྟ་དང་། ། ཤི་རི་འཛམ་བུ་སྐྱུ་རུ་ར། ། ཀ་ར་མ་ཏ་བ་རི་ཡ། །
BOདེ་ལ་སོགས་པའི་འབྲས་བུ་ནི། ། རྣམ་པ་སྣ་ཚོགས་སྨིན་པ་དག ། མཁས་པས་གཏོར་མའི་ལས་ལ་ནི། ། གུས་པ་དག་ཏུ་དབུལ་བར་བྱ། ། ན་རི་ཀེ་ར་བིལ་བའི་འབྲས། ། ཏ་ལ་དང་ནི་སེའུ་འབྲུ་དང་། ། དེ་ལ་སོགས་པའི་གེལ་པ་ཡི། ། འབྲས་བུ་དག་ནི་རྣམ་པར་སྤང་། ། རྡོ་བའི་རྡོ་གུ་དག་དང་ནི། ། བི་ཏ་རལ་སོགས་པ་ཡི། ། ལྡུམ་བུ་བཤུས་པ་བཟང་པོ་དག ། ཐམས་ཅད་དུ་ནི་དབུལ་བར་བྱ། ། སུ་རན་ཡི་རྩ་བ་དང་། ། ཀརྱ་དུ་ཏན་ཏ་ཉིད་དང་། ། དེ་ལ་སོགས་པའི་རྡོ་གུ་ནི། ། མི་ཤེས་པ་དག་རྣམ་པར་སྤང་། ། འབྲས་བུའི་མཆོག་ནི་བལ་པོའི་སེའུ། ། རྡོ་གུའི་མཆོག་ནི་བི་དི་རི། ། དེ་དག་བློ་དང་ལྡན་པ་ཡིས། ། བསྒྲིམས་ཏེ་དཀྱིལ་འཁོར་དག་ཏུ་དབུལ། ། སྲན་ཆན་རྣམ་པ་སྣ་ཚོགས་དང་། ། ཏིལ་ནི་ཁ་ཚོས་དང་བསྲེས་པ། ། དེ་དག་དཀྱིལ་འཁོར་ཕྱི་རོལ་གྱི། ། ལྷ་ལ་{གོ་རིམས་,གོ་རིམ་}བཞིན་དུ་དབུལ། ། དེ་ནས་མེ་ཏོག་དཀར་པོ་དང་། ། ཏིལ་ དང་འབྲས་ཡོས་དཀྱིལ་འཁོར་དགྲམ། ། མ་ཐར་ཕྱོགས་ཀྱི་གཏོར་མ་ནི། ། རྒྱ་ཆེན་ཕྱོགས་རྣམས་ཀུན་དུ་སྦྱིན། ། འབྲས་ཡོས་དང་ནི་ཏིལ་དུ་བཅས། ། འབྲས་ཆན་མེ་ཏོག་ཆུ་དང་བཅས། ། སྲན་ཆན་བཅས་ཤིང་མང་དུ་བྱ། ། མར་དང་ཚག་ཚིག་བཅས་པ་ཡི། །
BOགཏོར་མ་འདི་འདྲ་སློབ་དཔོན་གྱི། ། ལག་ཏུ་བླངས་ཏེ་བཀའ་བཞིན་དུ། ། ཕྱོགས་མཚམས་ཀུན་དུ་གསུམ་གསུམ་དབུལ། ། མཆོད་ཡོན་དང་ནི་བདུག་པའང་སྦྱིན། ། སྲིན་པོ་རྣམས་དང་ཤ་ཟ་དང་། ། འབྱུང་པོ་རྣམས་དང་ཤ་རྗེན་ཟ། ། སེམས་ཅན་རྣམ་པ་སྣ་ཚོགས་ལ། ། མཁས་པས་གཏོར་མ་ཕྱོགས་སུ་གཏོར། ། སེམས་ལ་གང་དང་གང་དྲན་པ། ། དེ་དག་ཀུན་ལ་གཏོར་མ་སྦྱིན། ། ས་ཕྱོགས་དེ་ཡི་སེམས་ཅན་ནི། ། ལྗོན་ཤིང་གེལ་པར་གནས་རྣམས་ལ། ། སྦྱིན་བྱ་གལ་ཏེ་འཐོར་བའི་ཚེ། ། བློ་བུར་ཅེ་སྤྱང་སྒྲ་གྲག་ན། ། དེར་ནི་ མཉམ་གཞག་མ་འཁྲུལ་བར། ། གཏོར་མ་ཡང་དང་ཡང་དུ་སྦྱིན། ། ཅེ་སྤྱང་སྒྲ་དང་སྒྲ་ཆེན་དང་། ། འབྱུང་པོ་དག་ནི་སྣང་བ་དང་། ། ལྗོན་ཤིང་ཡལ་ག་ཆག་སོགས་དང་། ། འབྲུག་གི་སྒྲ་ནི་གྲག་པ་དང་། ། དེ་ལ་སོགས་པ་ཡ་མཚན་ལྟས། ། གལ་ཏེ་དེར་ནི་འབྱུང་གྱུར་ ན། ། གཏོར་མ་ཇི་ལྟར་རིགས་བྱིན་ནས། ། བསྲུང་བའི་ལས་ནི་བྱ་བར་བྱ། ། ཅི་ཐོས་ཇི་ལྟར་ཤེས་པ་དང་། ། ཅི་མཐོང་རིམ་པ་ཅི་ལྟ་བར། ། ལྷ་རྣམས་ཀུན་ལ་ཕྱོགས་དག་ཏུ། ། དེ་བཞིན་གཏོར་མ་སྦྱིན་པར་བྱ། ། དེ་ལྟར་ཕྱོགས་ཀྱི་གཏོར་མ་དག ། བྱིན་ནས་ལེགས་པར་ལག་བཀྲུས་ཏེ། ། ཉེ་རེག་བྱས་ནས་ཕྱི་རོལ་ཏུ། །
BOམཁས་པ་ཡིས་ནི་བདུག་སྤོས་སྦྱིན། ། དེ་ནས་ནང་དུ་ཞུགས་ནས་ནི། ། མཆོད་ཡོན་སྔ་མ་བཞིན་ཕུལ་ནས། ། བདུག་སྤོས་དག་གིས་བདུགས་ནས་སུ། ། ཡིད་ཀྱིས་མཆོད་པའི་བཤོས་རྣམས་ དབུལ། ། དཀྱིལ་འཁོར་དབུ་མའི་ལྷ་རྣམས་ནི། ། ཐམས་ཅད་ལ་ཡང་ནན་ཏན་དུ། ། རས་ནི་དཀར་ལ་ཕྲ་བ་དག ། རེ་རེ་ལ་ཡང་ཟུང་རེ་དབུལ། ། འབྱོར་ན་ལྷ་རྣམས་ཐམས་ཅད་ལ། ། རས་ནི་ཟུང་རེ་དབུལ་བར་བྱ། ། མ་འབྱོར་ན་ཡང་རིགས་གསུམ་གྱི། ། བདག་པོ་ རྣམས་ལ་ཟུང་རེ་དབུལ། ། ཡང་ན་ཆོ་ག་ཤེས་པ་ཡིས། ། དཀྱིལ་འཁོར་དབུས་སུ་རས་ཕྲན་ནི། ། ཟུང་གཅིག་སློབ་མའི་སྟེང་བཞག་སྟེ། ། ཕུལ་ནས་ཀུན་ལ་བསྔོ་བར་བྱ། ། དེ་ནས་སོ་སོའི་གསང་སྔགས་ནི། ། རེ་རེའང་བདུན་བདུན་བཟླས་བརྗོད་བྱ། ། དཀྱིལ་འཁོར་བ་དག་ པོའི་གསང་སྔགས་ཀྱང་། ། བརྒྱ་རྩ་བརྒྱད་དུ་བཟླས་པར་བྱ། ། ཡང་ན་རིགས་ཀྱི་སྙིང་པོ་རྣམས། ། རེ་རེ་ཞིང་ཡང་བརྒྱ་བརྒྱ་བཟླས། ། དེ་ནས་སོ་སོའི་ཕྱག་རྒྱ་རྣམས། ། བཟླས་བརྗོད་གསུམ་བྱས་རིམ་བཞིན་བཟླས། ། ཡང་ན་སྤྱི་ཡི་ཕྱག་རྒྱ་ནི། ། རེ་རེ་ལ་ཡང་སོ་སོར་བསྟན། ། དེ་ལྟར་བྱས་ན་མཉེས་པ་དང་། ། བྱིན་གྱིས་ལོབ་ཅིང་དངོས་གྲུབ་སྩོལ། ། ཐལ་མོ་སྦྱར་བ་བཀན་པ་ལས། །
BOམཛུབ་མོ་གཉིས་ནི་ཅུང་ཟད་བཀུག ། འདི་ནི་དེ་བཞིན་གཤེགས་རིགས་ཀྱི། ། དམ་ཚིག་ཕྱག་རྒྱར་ཤེས་པར་བྱ། ། ཐལ་མོ་ལེགས་པར་སྦྱར་བ་ལས། ། སོར་ མོ་དབུ་མ་གསུམ་འགྱེད་པ། ། འདི་ནི་པདྨོའི་ཕྱག་རྒྱ་སྟེ། ། པདྨོ་ཁ་བྱེའི་མཚན་ཉིད་དེ། ། ལག་པ་གཉིས་ནི་རྒྱབ་བསྣོལ་ཏེ། ། མཐེའུ་ཆུང་གཉིས་དང་མཐེབ་གཉིས་དཀྲ། ། འདི་ནི་རྡོ་རྗེའི་ཕྱག་རྒྱ་སྟེ། ། རྡོ་རྗེའི་རིགས་ལ་བཤད་པ་ཡིན། ། དཀྱིལ་འཁོར་རྣམས་ནི་ཐམས་ ཅད་ལ། ། དམ་ཚིག་གསུམ་གྱི་ཕྱག་རྒྱ་རྒྱ་རྣམས། ། རིགས་གསུམ་དག་ལ་བཤད་པ་སྟེ། ། སྤྱི་ཡི་ཡིན་པར་རབ་ཏུ་བསྒྲགས། ། བསྲུང་བའི་ལས་དང་ཕྱོགས་བཅིང་བ། ། ལྷ་རྣམས་ལ་ནི་བསྐུལ་བ་དང་། ། དབང་བསྐུར་བ་ཡི་ཆོ་ག་དང་། ། བགེགས་རྣམས་ དག་ནི་བཟློག་པ་དང་། ། མེ་ཏོག་སོགས་ལ་གདབ་པ་དང་། ། དེ་བཞིན་དགྲ་རྣམས་ཞི་བྱ་དང་། ། གདོན་རྣམས་ཚར་གཅད་བྱ་བ་དང་། ། བཅིང་བ་དང་ནི་དགྲོལ་བ་དང་། ། ཕྱག་རྒྱ་ཕྱག་རྒྱ་ལེའུ་ལས་ནི། ། རྒྱས་པར་ཡང་དག་བཤད་པ་ཡིན། ། དེ་དག་གི་ནི་དཀྱིལ་ འཁོར་དུ། ། རྣམ་པར་དབྱེ་སྟེ་ལས་རྣམས་བྱ། ། གསང་སྔགས་གང་རྣམས་སྔར་བཤད་པ། ། དེ་དག་ཐམས་ཅད་རྒྱར་བཅས་ཏེ། ། བསྲུང་བ་དག་ལ་སོགས་པ་ལ། །
BOའདིར་ནི་ཆོ་ག་བཞིན་དུ་སྦྱར། ། གདོན་ལ་སོགས་པ་ཁྱད་པར་དུ། ། རྡོ་རྗེ་ཐོ་བས་མཚམས་ གཅད་དོ། ། གདོན་གྱི་དཀྱིལ་འཁོར་དག་ཏུ་གང་། ། ཕྱག་རྒྱ་{བཅྭ་,བཅོ་}བརྒྱད་བཤད་པའང་སྦྱར། ། རྡོ་རྗེ་ལྕགས་ཀྱུས་དགུག་པར་བྱ། ། བཅིང་བ་རྡོ་རྗེ་ལྕགས་སྒྲོག་གིས། ། རྡོ་རྗེ་ཁུ་ཚུར་འདུལ་བ་ལ། ། རྡོ་རྗེ་སྡེར་མོ་སྡིགས་པ་ལ། ། ཁྲོ་བོ་ཆེན་པོ་སྟོབས་པོ་ཆེ། ། དམ་ ཚིག་འཛིན་དུ་གཞུག་ལ་སྦྱར། ། རིག་སྔགས་རྒྱལ་པོ་གནོད་མཛེས་ནི། ། ཕྱག་རྒྱར་བཅས་ལ་གདོན་རྣམས་འཇོམས། ། རབ་ཏུ་དྲག་པོའི་གདོན་རྣམས་ལ། ། རྡོ་རྗེ་ཐོ་བ་སྦྱར་བ་ནི། ། བརྩོན་འགྲུས་མཐུ་རྩལ་ཆེན་པོ་སྟེ། ། གཅིག་པུས་ཀྱང་ནི་ལས་རྣམས་འགྲུབ། ། གདོན་ལས་སྦྱར་བའི་ཕྱག་རྒྱ་ནི། ། མ་ལུས་པ་དག་འབར་འགྱུར་ཞིང་། ། དེ་དག་གི་ནི་མཐུ་སྟོབས་ཀྱང་། ། དེར་ནི་ལྷག་པར་མངོན་པར་འགྱུར། ། དེ་བས་གདོན་རྣམས་ཚར་བཅད་པར། ། ཕྱག་རྒྱ་དག་ནི་འབད་དེ་སྦྱར། ། ལས་ལ་ཇི་ལྟར་མཐོང་བ་བཞིན། ། གཞན་ དག་ཀྱང་ནི་སྦྱར་བར་བྱ། ། དེ་ནས་ཡམ་ཤིང་དག་གིས་ནི། ། སྦར་བའི་མེ་ལ་སྦྱིན་སྲེག་བྱ། ། ཤར་དུ་ཁ་བལྟས་ཀུ་ཤ་ཡི། ། ཁྲེས་ལ་འདུག་སྟེ་མཉམ་གཞག་སྟེ། ། ཀུ་ཤ་དགྲམ་དང་བསང་བ་ཡང་།
BO། གཡས་ཕྱོགས་དག་ནས་བསྐོར་བྱ་ཞིང་། ། མཆོད་སྦྱིན་ ཡམ་ཤིང་མེ་ལ་སྦར། ། ཐོག་མ་དང་ནི་ཐ་མར་ཡང་། ། མར་གྱི་སྲེག་བླུགས་དགང་བླུགས་ཀྱིས། ། སོ་སོ་དག་ཏུ་དབུལ་བར་བྱ། ། གང་དུ་བཟླས་བརྗོད་ཇི་སྐད་བཤད། ། སྦྱིན་སྲེག་དག་ཀྱང་དེ་བཞིན་བསྒྲགས། ། ཡང་ན་རེ་རེའི་ཆེད་དུ་ཡང་། ། ཞི་བའི་སྔགས་ཀྱིས་སོ་སོར་བྱ། ། གསང་སྔགས་ཐམས་ཅད་རིམ་བཞིན་དུ། ། རེ་རེ་ནས་ཀྱང་དྲན་བྱས་ལ། ། སྲེག་བླུགས་བདུན་བདུན་བསྲེག་བྱ་ཞིང་། ། ཡང་ནས་ཡང་དུ་བསང་གཏོར་བྱ། ། དེ་ནས་མཇུག་ཏུ་མེ་བསངས་ནས། ། ཞི་བ་ཡི་ནི་གསང་སྔགས་ཀྱིས། ། སྲེག་ བླུགས་བརྒྱ་རྩ་བརྒྱད་ཕུལ་ནས། ། ལྷ་རྣམས་ཀུན་ལ་བཟོད་པར་གསོལ། ། སེམས་ནི་རབ་ཏུ་དད་བྱས་ལ། ། དཀྱིལ་འཁོར་དུ་ནི་བདུག་སྤོས་དབུལ། ། དེ་ནས་རིགས་ཀྱི་བདག་པོ་ལ། ། བསྟོད་པ་དག་ནི་ལེགས་པར་བྱ། ། སྡིག་པ་རྣམས་ཀྱང་གུས་པར་བཤགས། ། བསོད་ནམས་རྗེས་སུ་ཡི་རང་བྱ། ། དེ་ལྟར་བསླབས་ཤིང་ཅི་འདོད་པ། ། སྨོན་ལམ་དག་ཏུ་བཏབ་ནས་སུ། ། དཀོན་མཆོག་གསུམ་ལ་སྐྱབས་འགྲོ་བ། ། ཡང་དང་ཡང་དུ་གུས་པར་བྱ། ། ཕྱིར་མི་ལྡོག་པའི་དགེ་འདུན་དང་། ། རིག་སྔགས་གསང་སྔགས་ཚོགས་ལ་ ཡང་། །
BOཡིད་ལ་བསམས་ཏེ་ཡང་དང་ཡང་། ། བྱང་ཆུབ་ཏུ་ནི་སེམས་ཀྱང་བསྐྱེད། ། དེ་ལྟར་བྱས་ནས་དེ་འོག་ཏུ། ། གླེགས་བམ་ཅུང་ཟད་བཀླག་པར་བྱ། ། དཀྱིལ་འཁོར་དག་ཏུ་སྤྱན་དྲང་བའི། ། ཆོ་ག་ལེགས་པར་བྱས་ནས་ནི། ། བདུག་སྤོས་རྒྱུན་མི་འཆད་པར་ དབུལ། ། ཡང་དང་ཡང་དུ་མཆོད་ཡོན་གསོལ། ། དེ་ལྟར་ཆོ་ག་འདི་བྱས་ནས། ། ལྷ་རྣམས་ལ་ཡང་ཕྱག་བྱས་ཏེ། ། བློ་དང་ལྡན་པས་ཆོ་ག་འདིས། ། སློབ་མ་རྣམས་ནི་ལེགས་པར་གཟུང་། ། སློབ་མ་རེ་རེ་ནས་དགུག་སྟེ། ། བསང་གཏོར་སྔ་མ་བཞིན་བྱས་ནས། ། བྱུག་ སྤོས་ལ་སོགས་བྱིན་ནས་སུ། ། སྙིང་པོས་མངོན་པར་བསྔགས་ནས་ནི། ། ལས་ཀུན་བྱེད་པའི་གསང་སྔགས་ཀྱིས། ། བཏབ་པའི་གོས་ཀྱིས་གདོང་གཡོགས་ཏེ། ། སྔར་བསྟན་པ་ཡི་ཕྱག་རྒྱ་ལ། ། མེ་ཏོག་དག་ནི་བཞག་ནས་སུ། ། དེ་ནས་དཀྱིལ་འཁོར་བདག་པོའི་སྔགས། ། ཕྱག་རྒྱར་ བཅས་པ་སྤྱི་བོར་གཞག ། གསང་སྔགས་ལན་གསུམ་བཟླས་བྱས་ནས། ། ཉིད་ཀྱི་བདེན་པའི་བྱིན་བརླབས་གསོལ། ། འདི་ལྟར་བདག་གིས་སློབ་མ་འདི། ། དཀྱིལ་འཁོར་དུ་ནི་ལེགས་བཙུད་ནས། ། ལྷ་ཡི་རིགས་ཀྱི་རིམ་པ་དག ། འདི་ཡི་བསོད་ནམས་ཅི་འདྲ་ལས། ། དེ་བཞིན་དུ་ནི་འབབ་གྱུར་ཅིག །
BOའདིས་ནི་དངོས་གྲུབ་གང་འགྲུབ་དང་། ། རིགས་ནི་གང་གི་སྣོད་དུ་འགྱུར། ། བསོད་ནམས་མཐུ་ནི་ཅི་ཡོད་པ། ། དཀྱིལ་འཁོར་འདིར་ནི་དེ་བཞིན་འགྱུར། ། དེ་སྐད་བརྗོད་ནས་དེ་འོག་ཏུ། ། དེ་ནས་སྒོ་ཡི་ཕྱོགས་སུ་དེ། ། བཞག་སྟེ་མེ་ཏོག་ གཏོར་དུ་གཞུག ། གང་དུ་མེ་ཏོག་བབ་གྱུར་པ། ། དེ་ནི་དེ་ཡི་རིགས་སུ་གསུངས། ། དེ་ནས་གདོང་གཡོགས་བཀྲོལ་ནས་ནི། ། དཀྱིལ་འཁོར་བཟང་པོ་བསྟན་པར་བྱ། ། དེ་ནས་བླ་མ་དགའ་འགྱུར་ནས། ། སློབ་མ་དེ་ལ་འདི་སྐད་བསྒོ། ། དཀྱིལ་འཁོར་བཟང་པོ་འདི་ལ་ལྟོས། ། ད་ནི་དད་པ་རབ་ཏུ་བསྐྱེད། ། ཁྱོད་ནི་སངས་རྒྱས་རིགས་སུ་སྐྱེ། ། སྔགས་དང་རིག་པས་བྱིན་གྱིས་བརླབས། ། འགྲོ་བ་ཕུན་སུམ་དངོས་གྲུབ་ཀྱང་། ། ཐམས་ཅད་ཁྱོད་ལ་མངོན་དུ་འགྱུར། ། དངོས་གྲུབ་ཕྱིར་ནི་དམ་ཚིག་སྲུངས། ། གསང་སྔགས་དག་ལའང་བརྩོན་པར་གྱིས། ། དེ་ནས་སློབ་མ་བདག་ཉིད་ཀྱིས། ། མེ་ཏོག་སྙིམ་པ་བཀང་ནས་ནི། ། རིགས་གསུམ་དག་ལ་བསྔོས་ནས་སུ། ། ཕྱག་འཚལ་ལན་གསུམ་གཏོར་བར་བྱ། ། དེ་ནས་དེ་ཚེ་སློབ་དཔོན་གྱིས། ། དཀྱིལ་འཁོར་དེར་ནི་རང་སྔགས་སམ། ། སྙིང་པོ་སྦྱིན་བྱ་དེས་ཀྱང་དེ། ། མནོས་ ནས་དཀྱིལ་འཁོར་གཉིས་པོར་བཟླས། །
BOདངོས་གྲུབ་རབ་འབྲིང་རྣམ་གསུམ་ནི། ། མེ་ཏོག་བབ་པ་ལས་བརྟགས་ཏེ། ། ལྷ་རྣམས་ཀྱི་ནི་ཁྱད་པར་དང་། ། གནས་ཀྱི་ཁྱད་པར་དག་ལས་བརྟག ། གང་ཚེ་སངས་རྒྱས་བཅོམ་ལྡན་གྱི། ། དབུ་ལ་མེ་ཏོག་བབ་གྱུར་ན། ། དེ་ཚེ་ གཙུག་ཏོར་མཛོད་སྤུ་དག ། གདོན་མི་ཟ་བར་འགྲུབ་པར་འགྱུར། ། སྤྱན་ལ་སོགས་པའི་སྔགས་རྣམས་ཀྱང་། ། ཞལ་དུ་བབ་ན་འགྲུབ་པར་འགྱུར། ། སྟོད་དུ་བབ་ན་མཆོག་རྣམས་འགྲུབ། ། རྐེད་དུ་བབ་ན་འབྲིང་རྣམས་འགྲུབ། ། རོ་སྨད་ཕྱོགས་སུ་བབ་ན་ནི། ། དངོས་ གྲུབ་ཕལ་རྣམས་འགྲུབ་པར་འགྱུར། ། བར་གྱི་སྐུ་ལ་བབ་ན་ནི། ། སྙིང་པོ་ལ་སོགས་འགྲུབ་པར་འགྱུར། ། སྨད་དུ་བབ་པར་གྱུར་ན་ནི། ། མངག་གཞུག་ལ་སོགས་འགྲུབ་པར་འགྱུར། ། རིམ་དེས་པདྨ་རྡོ་རྗེ་ཡི། ། རིགས་ཀུན་ལ་ཡང་བསྒྲེ་བར་བྱ། ། དེ་བཞིན་ལྷ་གཞན་རྣམས་ལ་ཡང་། ། དངོས་གྲུབ་རྣམ་པ་གསུམ་དུ་བཤད། ། གལ་ཏེ་ལྷ་ཡི་གཟུགས་དག་ལས། ། རིང་དུ་མེ་ཏོག་ལྷུང་གྱུར་ན། ། དེ་ཡི་དངོས་གྲུབ་ཡུན་རིང་འགྱུར། ། ཉེ་ན་དངོས་གྲུབ་མྱུར་དུ་འགྲུབ། ། གསང་སྔགས་ཀྱི་ནི་མཆོད་པ་དག ། གང་དུ་ བཀྲམ་པ་ཚུན་ཆད་ནི། ། དེ་ཡི་ས་རིས་དེ་ཡིན་ཏེ། ། མེ་ཏོག་དེར་ལྷུང་དེ་ཡི་རིགས། །
BOལྷ་གཉིས་ཀྱི་ནི་བར་དག་ཏུ། ། གལ་ཏེ་མེ་ཏོག་བབ་གྱུར་ན། ། གང་ལ་ཉེ་བར་གྱུར་ན་ནི། ། དེ་ནི་དེ་ཡི་རིགས་སུ་བཤད། ། གལ་ཏེ་ལ་ལའི་མེ་ཏོག་དག ། དཀྱིལ་འཁོར་དང་པོ་འདས་ ལྷུང་ན། ། དེ་ལ་དངོས་གྲུབ་ཕལ་འགྲུབ་ཅིང་། ། དེ་ནི་དད་པའང་རབ་ཏུ་ཆུང་། ། གལ་ཏེ་མེ་ཏོག་བོར་བ་དག ། ར་བའི་རི་མོ་ལ་བབ་ན། ། ཞི་བ་བྱས་ནས་དེ་ནས་གདོད། ། ནན་ཏན་བསྐྱེད་དེ་འདོར་དུ་གཞུག ། དེ་ཚེ་ཐེ་ཚོམ་གྱུར་ན་ནི། ། མཁས་པས་བཟླས་ཏེ་འདོར་མི་ གཞུག ། དེར་ནི་གང་ཡང་ངེས་མེད་པས། ། དེས་ནི་དངོས་གྲུབ་ཐོབ་མི་འགྱུར། ། གཉིས་ཀྱི་བར་དུ་མཉམ་པ་དང་། ། དོན་མེད་ཕྱི་རོལ་ལྷུང་བ་ནི། ། ཞི་བའི་སྦྱིན་སྲེག་བྱས་རྣམས་ཀྱིས། ། དེ་ནས་མེ་ཏོག་འཐོར་དུ་གཞུག ། སྙིང་པོར་མེ་ཏོག་བབ་ན་ནི། ། རྟག་ཏུ་ དོན་མེད་མི་འགྱུར་བཤད། ། སྲད་བུ་དག་གི་ཆོ་ག་བཞིན། ། དེ་ཡིས་ས་འཁོར་ཤེས་པར་བྱ། ། རིགས་གསུམ་ལ་ཡང་ཆོ་ག་བཞིན། ། དཀྱིལ་འཁོར་རྣམ་པ་གསུམ་དུ་བརྟག ། ཇི་ལྟར་གནས་པའི་ཚུལ་དག་ལས། ། གཙོ་བོ་རྣམས་ཀྱི་རིམ་གྱིས་བསྐྱེད། ། ཤེས་རབ་ ཕ་རོལ་ཕྱིན་དབུས་སམ། ། དཀྱིལ་འཁོར་གྱི་ནི་གཙོ་བོ་དང་། ། སྒོ་སྲུང་གཉིས་ལ་མཚུངས་གྱུར་ན། །
BOད་ལྟ་སྙིང་པོ་སྤྱོད་ཡུལ་ལེགས། ། གལ་ཏེ་མེ་ཏོག་བོར་བ་དག ། མཆོད་པའི་སྟེང་དུ་བབ་འགྱུར་ན། ། དེ་ནི་རྒྱས་པའི་བསྒྲུབ་པ་དག ། ཁྱད་པར་དུ་ནི་ཤེས་པར་བྱ། ། དཀྱིལ་ འཁོར་གྱི་ནི་བདག་པོ་ལ། ། གང་གི་མེ་ཏོག་བབ་གྱུར་ན། ། དེས་ནི་དེ་ཡི་ལས་རྣམས་ཀུན། ། མྱུར་དུ་འགྲུབ་ཅིང་མཆོག་ཏུ་འགྱུར། ། སངས་རྒྱས་བཅོམ་ལྡན་འདས་ལ་ནི། ། གང་གི་མེ་ཏོག་བབ་གྱུར་པ། ། དེ་ལ་རིགས་གསུམ་གསང་སྔགས་ཀུན། ། གདོན་མི་ཟ་བར་ འགྲུབ་པར་འགྱུར། ། པདྨ་འཛིན་ལ་རིགས་གཉིས་འགྲུབ། ། རྡོ་རྗེ་འཛིན་ལ་རང་རིགས་འགྲུབ། ། ཡང་ན་ལྷ་ནི་བསྙེན་པ་བཞིན། ། གསང་སྔགས་འགྲུབ་པར་ཤེས་པར་བྱ། ། གང་གིས་གཉིས་དང་གསུམ་པ་ལས། ། འདས་ཏེ་སོང་བར་གྱུར་ན་ནི། ། དཀྱིལ་འཁོར་ དེ་ནས་དབྱུང་བར་བྱ། ། ཡང་ན་དཀྱིལ་འཁོར་གཞན་དུ་གཞུག ། དེ་ལ་སོགས་པའི་རྣམ་པ་ཡིས། ། མེ་ཏོག་རྣམས་ནི་བོར་བ་ལས། ། བདག་གི་མདུན་དུ་གང་ལྷུང་བ། ། དེ་ལ་ཞི་བ་བརྩམ་པར་བྱ། ། སྦྱིན་སྲེག་གིས་ནི་ཞི་བྱས་ནས། ། དེ་ནི་སླར་ཡང་འདོར་དུ་ གཞུག ། ལན་གསུམ་སྤོགས་ཏེ་མ་བབ་ན། ། རེ་ཐག་བཅད་དེ་སླར་གཏང་ངོ་། ། བློ་དང་ལྡན་པས་ཆོ་ག་འདིས། ། སློབ་མ་ཐམས་ཅད་གཟུང་བར་བྱ། །
BOབཙུད་ནས་མེ་ཏོག་དྲི་ལ་སོགས། ། དཀྱིལ་འཁོར་དུ་ནི་དབུལ་བར་བྱ། ། སློབ་མ་གཅིག་ནས་བཀུག་ནས་ནི། ། ཆོ་ ག་བཞིན་དུ་ཡོན་ཕུལ་ཏེ། ། ཆོ་ག་ཤེས་པས་བསང་གཏོར་བྱ། ། གཡོན་གྱི་ཕྱོགས་སུ་བཞག་ནས་ནི། ། དེ་ཡི་ལག་གཡས་མཐེ་བོང་ནས། ། ལག་པ་གཡོན་གྱིས་བཟུང་ནས་ནི། ། དཀྱིལ་འཁོར་བདག་པོའི་གསང་སྔགས་ཀྱིས། ། མཁས་པས་སྲེག་བླུགས་བདུན་བདུན་བྱ། ། དེ་ནས་ཞི་བའི་གསང་སྔགས་ཀྱིས། ། མར་གྱི་སྲེག་བླུགས་ལན་བདུན་བྱ། ། དེ་ནས་སློབ་མ་བླུགས་གཟར་གྱིས། ། བསྐོར་ཞིང་ལན་བདུན་སྲེག་བླུགས་བྱ། ། དེ་ནས་སྲད་བུས་བཅིངས་ནས་ནི། ། བསང་གཏོར་སྔ་མ་བཞིན་བྱས་ནས། ། སྙིང་གར་བྲམ་ཞིང་སྔགས་བཏབ་ལ། ། ཇི་ལྟར་འདོད་པ་ སླར་གཏང་ངོ་། ། སློབ་མ་རྣམས་ནི་ཐམས་ཅད་ལ། ། ཆོ་ག་འདི་ནི་བཤད་པ་ཡིན། ། སྦྱིན་སྲེག་ལས་ནི་བ་མར་གྱིས། ། བླུགས་གཟར་ཉིད་ཀྱིས་དེ་བཞིན་དུ། ། ཀུ་ཤའི་ཆུ་དང་ཀུ་ཤའི་སྟན། ། དེ་བཞིན་ཀུ་ཤའི་བསང་བྱེད་དང་། ། ཀུ་ཤའི་དགྲམ་པ་དག་ཀྱང་ནི། ། སྦྱིན་སྲེག་ལས་ལ་རབ་ཏུ་བྱ། ། མཆོད་སྦྱིན་ཤིང་གི་བུད་ཤིང་ནི། ། བ་མར་བསྐུས་པས་མེ་སྦར་ཏེ། ། དེ་ལ་ཡམ་ཤིང་རློན་བསྲེག་པ། ། སྦྱིན་སྲེག་དག་ལ་དེ་ལྟར་བསྲེག །
BOམར་གྱི་སྦྱིན་སྲེག་ཇི་སྙེད་པ། ། ཏིལ་གྱི་སྦྱིན་སྲེག་དེ་སྙེད་བྱ། ། འབྲས་ཆན་ཅི་དགར་བསྲེགས་ནས་ནི། ། ཐ་ མར་དགང་བླུགས་དེ་བཞིན་བྱ། ། མེ་ནི་འབོད་དང་གཏང་བ་དག ། རང་གི་གསང་སྔགས་དག་གིས་བྱ། ། དེ་ཡི་བསང་གཏོར་ལས་ཀུན་པའི། ། གསང་སྔགས་དག་གིས་བྱ་བ་ཡིན། ། དཀྱིལ་འཁོར་དུ་ནི་སྦྱིན་སྲེག་ལ། ། གསང་སྔགས་བཤད་པ་གང་ཡིན་པ། ། དེ་ དག་གིས་ནི་ཆོ་ག་བཞིན། ། མཁས་པས་དེར་ནི་སྦྱིན་སྲེག་བྱ། ། དེ་ནས་གཞན་ཡང་ཞི་བ་དང་། ། རྒྱས་པ་དང་ནི་དེ་བཞིན་དུ། ། དྲག་ཤུལ་སྤྱོད་པའི་སྦྱིན་སྲེག་ལས། ། ཁྱད་པར་དུ་ནི་བཤད་པར་བྱ། ། ལས་དང་ཇི་ལྟར་རྗེས་མཐུན་པར། ། དཀྱིལ་འཁོར་ཆོ་ག་ བཞིན་བྲིས་ནས། ། མཉམ་གཞག་རྫས་ནི་འདི་དག་གིས། ། སྦྱིན་སྲེག་ལས་ནི་རབ་ཏུ་དབྱེ། ། བྱང་དུ་ཁ་བལྟས་ཞི་བའི་ཕྱིར། ། ཤར་དུ་ཁ་བལྟས་རྒྱས་པའི་ཕྱིར། ། ལྷོ་ཕྱོགས་ཁ་བལྟས་དྲག་པོ་ཡི། ། སྦྱིན་སྲེག་ལས་ནི་བརྩམ་པར་བྱ། ། ལས་རྣམས་ཀུན་ལ་ཁ་རན་ ནི། ། ཟླུམ་པོ་དང་ནི་གྲུ་བཞི་དང་། ། གྲུ་གསུམ་ཡིན་ཏེ་དཀར་པོ་དང་། ། སེར་པོ་ནག་པོ་གསུམ་དུ་བསྒྲགས། ། ཞི་བའི་ལས་ནི་པདྨོའི་སྟན། ། རྒྱས་པའི་ལས་ནི་ཀུ་ཤའི་ཁྲེས། །
BOདྲག་ཤུལ་སྤྱོད་ལ་སྟན་མེད་པར། ། རྐང་པ་རྐང་པས་མནན་ཏེ་བྱ། ། ལས་གསུམ་ དག་ལ་ཞི་བ་དང་། ། དགའ་དང་དེ་བཞིན་ཁྲོ་བྱ་སྟེ། ། མཁས་པས་མདོ་ལས་ཇི་སྐད་དུ། ། འབྱུང་བའི་ཆོ་ག་དེ་བཞིན་བྱ། ། ཞི་ལ་ཡམ་ཤིང་རྩེ་མོ་སྟེ། ། དབུས་ཀྱི་ལས་ནི་རྒྱས་པ་ལ། ། དྲག་ཤུལ་ཀུན་ལ་རྩ་བ་སྟེ། ། ཡམ་ཤིང་རྣམ་པ་གསུམ་དུ་བཤད། ། ཞི་བའི་ ལས་ནི་ཀུ་ཤ་དང་། ། ལོ་མ་ལ་སོགས་གྱོན་ནས་བྱ། ། རྒྱས་པ་དུ་གུ་ལ་ལ་སོགས། ། རས་ཕྲན་སེར་པོར་ཡོངས་སུ་གྲགས། ། མངོན་སྤྱོད་གོས་ནི་ནག་པོ་ལ། ། ཁྲག་གིས་བཏབ་པས་བྱ་བ་ཡིན། ། ཡང་ན་གོས་རྙིང་དྲི་མ་ཅན། ། བགོ་བའམ་གཅེར་བུར་བརྩམ་པར་བྱ། ། ནས་དང་སྦྲང་རྩི་འོ་མ་དང་། ། མར་དང་འབྲས་ཡོས་འོ་ཐུག་དང་། ། དུར་བ་མྱུ་གུ་ཀུན་དད་དང་། ། ཙུ་ཏའི་ལོ་མ་ཙནྡན་དང་། ། ཨུ་དུམ་ཨ་ཤྭད་པ་ལ་ཤ། ། དེ་བཞིན་ཤ་མྱའི་ཡམ་སྲེག་ཤིང་། ། དེ་ལ་སོགས་པ་ཐམས་ཅད་ནི། ། ཞི་བའི་སྦྱིན་སྲེག་རྫས་ཡིན་ནོ། ། འོ་ ཐུག་ཞོ་དང་ལག་པན་དང་། ། འོ་མ་དང་ནི་ནས་དཀར་ཅན། ། ཏིལ་ནི་རྣམ་པ་གསུམ་སྦྱར་དང་། ། སྒྲོན་ཤིང་ཤུ་ཏེ་ཉེའུ་ཤིང་དང་། ། ནག་པུཥྤ་བིལ་བའི་འབྲས། ། འབྲུ་རྣམས་དང་ནི་ཡམ་སྲེག་ཤིང་། །
BOདེ་ལ་སོགས་པའི་རྫས་རྣམས་ནི། ། རྒྱས་པའི་སྦྱིན་སྲེག་རྣམས་ལ་ བཤད། ། ཡུངས་ཀར་དང་ནི་སྐེ་ཚེ་ཁྲག ། ཡུངས་ཀར་མར་དང་དེ་བཞིན་དུ་ག ། རུས་ཕྱེ་དུར་ཁྲོད་ཐལ་བ་དང་། ། དེ་བཞིན་སྐྲ་ནི་གཏུབས་པ་དང་། ། ཀོ་བི་ད་ར་མགལ་དུམ་དང་། ། སེང་ལྡེང་དང་ནི་ཨ་རི་སྟ། ། ཡམ་ཤིང་ཚེར་མ་ཅན་ལ་སོགས། ། དྲག་ཤུལ་ཅན་གྱི་ རྫས་སུ་བཤད། ། སྔགས་ཀྱི་རྒྱུད་ལས་མ་གསུངས་ཀྱང་། ། བློ་དང་ལྡན་པས་རྫས་འདི་རྣམས། ། རབ་ཏུ་དྲག་པོའི་ལས་དག་ལ། ། ཆོ་ག་བཞིན་དུ་སྦྱར་བར་བྱ། ། སྦྱིན་སྲེག་ཆོ་ག་བྱས་ནས་ནི། ། སློབ་མ་དབང་བསྐུར་འོས་རིག་ནས། ། ཆོ་ག་བཞིན་དུ་ནན་ཏན་དུ། ། དབང་བསྐུར་བ་ཡི་ཆོ་ག་བྱ། ། ལས་ཀུན་བྱེད་པའི་གསང་སྔགས་ཀྱིས། ། བཏབ་པའི་སྟན་ནི་གསར་བཞག་སྟེ། ། བཀྲ་ཤིས་ལ་སོགས་ཀུན་བྱས་ལ། ། བསྲུང་བ་ནན་ཏན་ཆེར་བྱས་ཏེ། ། དཀྱིལ་འཁོར་གྱི་ནི་སྔགས་བཟླས་ཤིང་། ། སྤྱི་བོར་གདུགས་དཀར་བཟང་ པོ་ལ། ། མེ་ཏོག་ཕྲེང་བ་དཀར་པོས་བརྒྱན། ། རས་ཕྲན་དཀར་པོ་དཔྱངས་པ་གཟུང་། ། སློབ་མ་ཡོན་ནི་ཆེར་ཕུལ་ཞིང་། ། བླ་མ་བསྙེན་བསྐུར་བྱས་པ་དག ། སྟན་ལ་དེ་ནི་བཞག་ནས་སུ། ། སྔགས་ཀྱིས་སྐྱོན་བསལ་བཀྲ་ཤིས་བྱ། །
BOབདུག་པ་ལེགས་པར་སྦྱར་བ་ ཡི། ། བདུག་པ་ཁྲོ་བོའི་རྒྱལ་པོས་བདུག ། རྔ་ཡབ་ལ་སོགས་གཟུང་བ་དང་། ། སྤྱི་བོ་སྟེང་དུ་གདུགས་ཀྱང་གཟུང་། ། རྔ་མའི་བསིལ་ཡབ་བདུག་སྤོས་དང་། ། ཞྭ་དང་གོས་ཀྱིས་སློབ་མ་དག་བ། ། འདི་དག་དང་ནི་དེ་བཞིན་དུ། ། བུམ་པ་བཞི་ཡང་བཤམས་ཏེ་དགོད། ། ཤིན་ཏུ་བཀྲ་ཤིས་ཚིགས་བཅད་བསྒྲགས། ། དེ་བཞིན་བཀྲ་ཤིས་རྒྱ་ཆེར་གདོན། ། འབྱོར་པར་འགྱུར་བའི་སིལ་སྙན་དང་། ། གླུ་དབྱངས་དག་དང་རྔ་སྒྲ་བསྒྲགས། ། མདོར་ན་དེ་ལ་སོགས་པ་ཡི། ། ཆོ་ག་རྒྱས་པ་བྱས་ནས་སུ། ། ཡིད་ཀྱིས་ དཀྱིལ་འཁོར་ལྷ་ཀུན་ལ། ། མཁས་པས་གསོལ་བ་བཏབ་ནས་ནི། ། བུམ་པ་བཟླས་བརྗོད་བརྒྱར་བྱས་ལ། ། དེ་ནི་ལེགས་པར་བླངས་ནས་སུ། ། དཀྱིལ་འཁོར་དལ་བུས་ལན་གསུམ་བསྐོར། ། རྩ་བའི་གསང་སྔགས་ཀུན་འདོན་ཅིང་། ། བློ་དང་ལྡན་པས་དབང་ བསྐུར་བྱ། ། དེ་ནས་ཕྱག་རྒྱ་བཅིངས་ནས་སུ། ། གསང་སྔགས་བློས་ནི་སྤྱི་བོས་གཏུགས། ། གསང་སྔགས་རྒྱུད་ནི་འཛིན་འགྱུར་བ། ། བློ་དང་ལྡན་པས་དབང་བསྐུར་རོ། ། སློབ་མ་ཡོན་ཏན་ཀུན་ལྡན་པ། ། ནུབ་ཕྱོགས་ཁ་བལྟས་ཆོ་ག་བྱ། ། བྱང་ཕྱོགས་ཁ་བལྟས་ ཞི་བའི་ཕྱིར། ། རྒྱས་པའི་ཆོ་ག་ཤར་དུ་བལྟས། །
BOདྲག་ཤུལ་སྤྱོད་པ་དེ་བཞིན་དུ། ། ལྷོ་ཕྱོགས་ཁ་བལྟས་བརྩོན་དེ་བྱ། ། དེ་ལྟར་དབང་བསྐུར་བྱས་ནས་ནི། ། དེ་ལ་སར་པའི་གོས་རྣམས་བསྐོན། ། མེ་ཏོག་དྲི་ལ་སོགས་པས་མཆོད། ། མཆོད་ཕྱིར་ཐོགས་ དང་གདུ་བུར་བཅས། ། དེ་ནས་བླ་མ་བདག་ཉིད་ཀྱིས། ། དེ་ཡི་སྤྱི་བོར་གདུགས་ཀྱང་གཟུང་། ། ཐལ་མོ་སྦྱར་བ་བྱས་ནས་ནི། ། དཀྱིལ་འཁོར་ལེགས་པར་བསྐོར་དུ་གཞུག ། གདུགས་དང་བཅས་པས་སྒོ་ཕྱོགས་སུ། ། སྤྱི་བོ་བཏུད་དེ་ཕྱག་འཚལ་གཞུག ། གསང་སྔགས་རྒྱུད་ནི་འཛིན་འགྱུར་བའི། ། སློབ་མ་འདི་ནི་ཕུལ་བ་ལགས། ། མཁན་པོས་དེ་སྐད་སྨྲས་ནས་སུ། ། གདུགས་བཞག་ནས་ནི་སློབ་མ་དེ། ། ལག་པས་ལེགས་པར་བླངས་ནས་སུ། ། དེ་ནས་འདི་སྐད་བསྒོ་བར་བྱ། ། ད་ནི་དཀྱིལ་འཁོར་སློབ་དཔོན་ འགྱུར། ། གསང་སྔགས་རྒྱུད་ཀྱང་འཛིན་པར་འགྱུར། ། སངས་རྒྱས་བྱང་ཆུབ་སེམས་དཔའ་དང་། ། ལྷ་རྣམས་ཀྱང་ནི་ཀུན་གྱིས་བཀུར། ། སེམས་ཅན་རྣམས་ལ་སྙིང་བརྩེའི་ཕྱིར། ། ཁྱོད་ཀྱིས་དཀྱིལ་འཁོར་ཆོ་ག་བཞིན། ། ནན་ཏན་བསྐྱེད་དེ་བྲི་བར་བྱོས། ། སྒྲུབ་པ་པོ་ཡང་རྒྱུད་ལ་སྦྱོར། ། དེ་སྐད་བསྒོ་ནས་དེ་འོག་ཏུ། ། དེ་ནས་སློབ་མ་དེ་ཡི་ཕྱིར། ། སྦྱིན་སྲེག་ཆོ་ག་སྔོན་བཞིན་བྱ།
BO། ཡམ་སྲེག་ཤིང་གི་མེ་ལ་ནི། ། དཀྱིལ་འཁོར་བདག་པོའི་གསང་སྔགས་ཀྱིས། ། མར་གྱི་སྦྱིན་སྲེག་བརྒྱ་དག་བྱ། ། དེ་བཞིན་ཞི་བའི་གསང་ སྔགས་ཀྱིས། ། ཞོ་དང་སྦྲང་རྩི་མར་སྦྱར་བའི། ། ཏིལ་གྱི་སྲེག་བླུགས་བརྒྱ་ཡང་བྱ། ། སྦྱིན་སྲེག་ཟིན་ནས་སྤྱི་བོར་ནི། ། ཆུ་དེ་ཉིད་ཀྱིས་བསང་གཏོར་བྱ། ། དེ་ནས་དེ་ལ་དཀྱིལ་འཁོར་ནི། ། རབ་ཏུ་རྒྱས་པར་བསྟན་པར་བྱ། ། ཕྱག་རྒྱ་ཆེན་པོ་དག་ཀྱང་བསྟན། ། རིག་སྔགས་རྒྱལ་པོ་ཀློག་ཏུ་གཞུག ། བླ་མས་དེ་ལ་ཅི་ནུས་པར། ། ཆོ་ག་བཞིན་དུ་ཟློས་སུ་གཞུག ། དེ་ནས་སློབ་མ་བློ་ལྡན་པས། ། མེ་ཏོག་སྙིམ་པ་བཀང་ནས་སུ། ། བདག་གིས་སྔགས་དང་ལྷ་རྣམས་ཀྱང་། ། {གོ་རིམས་,གོ་རིམ་}བཞིན་དུ་མཆོད་བྱས་ནས། ། སློབ་དཔོན་ སྦྱིན་སྲེག་གནས་འདུག་ལ། ། དགའ་ཞིང་གུས་པས་དྲན་བྱས་ལ། ། དེ་ཚེ་བླ་མ་ཅི་འདོད་པའི། ། ཡོན་ནི་ཕྱག་རྒྱས་དབུལ་བར་བྱ། ། བདག་དང་བདོག་པ་ཀུན་བཅས་པར། ། སློབ་དཔོན་ལ་ནི་དབུལ་བར་བྱ། ། བདག་ཉིད་དབང་བའི་སྐྱེ་བོ་ཀུན། ། ནོར་དང་བཅས་ཤིང་ རྐང་འགྲོས་བཅས། ། གཞན་ཡང་ནོར་གྱིས་མགུ་བའམ། ། ཡང་ན་གང་ལ་དགའ་ཡང་རུང་། ། ཡང་ན་བདག་ལ་ཅི་འདོད་པ། ། བླ་མ་ལ་ནི་དེ་དབུལ་ལོ། །
BOཡང་ན་དབུལ་པོས་བླ་མ་ལ། ། བཀུར་སྟི་དག་གིས་མགུ་བར་བྱ། ། སློབ་དཔོན་དག་ནི་ཐམས་ཅད་ལ། ། བཀུར་ སྟི་བྱ་བ་ཡོན་དུ་བཤད། ། དང་པོར་རས་ཟུང་གཅིག་ཕུལ་ནས། ། ཕྱི་ནས་ཆོ་ག་འདི་ཀུན་བྱ། ། སློབ་མས་གསང་སྔགས་གྲུབ་འདོད་པས། ། བླ་མ་མཆོད་པ་བྱ་བའི་ཕྱིར། ། སློབ་མ་དམ་ཚིག་བསྲུང་བ་ཡིས། ། གོས་དང་གསེར་དང་བདག་ཉིད་དང་། ། བུ་དང་བདོག་ པ་ཐམས་ཅད་ནི། ། བླ་མ་དག་ལ་ཡོན་དུ་དབུལ། ། དེ་ནས་བླ་མས་སློབ་མ་རྣམས། ། མ་ཡེངས་ལེགས་པར་བཀོད་ནས་སུ། ། ཤེས་རབ་ཕ་རོལ་ཕྱིན་བཀླགས་ཏེ། ། དམ་ཚིག་འདི་ལ་བསྒོ་བར་བྱ། ། དེ་རིང་ཕྱིན་ཆད་ཁྱེད་རྣམས་ཀྱིས། ། སངས་རྒྱས་ཆོས་དང་དགེ་ འདུན་དང་། ། བྱང་ཆུབ་སེམས་དཔའ་རྣམས་དང་ནི། ། རིག་སྔགས་གསང་སྔགས་ཚོགས་རྣམས་ལ། ། དད་པས་རབ་ཏུ་བརྟེན་པར་བྱ། ། རྟག་པར་ཕྱག་རྒྱ་ཆེན་པོ་ལ། ། ཁྱད་པར་དུ་ནི་མོས་པར་བྱ། ། དམ་ཚིག་ཅན་དང་མཛའ་བོ་དང་། ། བླ་མ་ལ་ཡང་གུས་ པར་བྱ། ། ལྷ་རྣམས་ཀུན་ལ་སྡང་མི་བྱ། ། དུས་མཚམས་དག་ཏུ་མཆོད་པར་བྱ། ། སྟོན་པ་གཞན་གྱི་གཞུང་མི་མཆོད། ། རྟག་ཏུ་གློ་བུར་འགྲོན་མཆོད་བྱ། ། སྲོག་ཆགས་རྣམས་ལ་བྱམས་པའི་སེམས། ། རབ་ཏུ་བརྟན་པ་ཉེ་བར་གཞག །
BOཐེག་པ་ལ་ནི་དགའ་རྣམས་ཀྱི། ། བསོད་ ནམས་དག་ལ་ནན་ཏན་བསྐྱེད། ། བཟླས་བརྗོད་བྱེད་ལ་འབད་པ་ཡིས། ། གསང་སྔགས་སྤྱོད་ལ་བརྩོན་པར་བྱ། ། གསང་སྔགས་རྒྱུད་ལས་བསྟན་པ་ཡི། ། དམ་ཚིག་རྣམས་ཀྱང་བསྲུང་བར་བྱ། ། དམ་ཚིག་མེད་པ་རྣམས་ལ་ནི། ། སྔགས་དང་ཕྱག་རྒྱ་མི་སྦྱིན་ནོ། ། གསང་སྔགས་ རྒྱུད་ནི་ལེགས་བསྲུང་ཞིང་། ། དེ་ཡང་བདག་གིས་རྟོགས་པར་བྱ། ། དེ་ལྟར་དམ་ཚིག་བསྒོ་ནས་ནི། ། ཉིད་ཀྱི་ཕྱག་རྒྱ་རྣམས་བསྟན་ལ། ། ཉིད་ཀྱི་རིགས་ཀྱི་རིག་པ་སྦྱིན། ། དཀྱིལ་འཁོར་དག་ཀྱང་བཤད་པར་བྱ། ། དེ་ནས་ཁ་ལག་བཀྲུས་ནས་སུ། ། ལྷ་ལ་མཆོད་ཡོན་ཕུལ་ནས་ནི། ། {གོ་རིམས་,གོ་རིམ་}བཞིན་དུ་ཐམས་ཅད་ལ། ། བདུག་སྤོས་ཆོ་ག་བཞིན་དུ་དབུལ། ། དེ་ནས་དཀྱིལ་འཁོར་རིག་སྔགས་ཀྱིས། ། སྦྱིན་སྲེག་བརྒྱ་རྩ་བརྒྱད་དུ་དབུལ། ། ཞི་བའི་སྔགས་ཀྱིས་བརྒྱ་རྩ་བརྒྱད། ། སྙིང་པོ་ཡིས་ནི་ཉི་ཤུ་གཅིག ། ཇི་ལྟར་བསྟན་པའི་གསང་སྔགས་ཀྱིས། ། མར་གྱིས་ སྦྱིན་སྲེག་སོ་སོར་བྱ། ། དེ་ཡི་འོག་ཏུ་རང་སྔགས་ཀྱིས། ། སྦྱིན་སྲེག་ཇི་ལྟར་འདོད་པར་བྱ། ། དེ་ནས་ཕྱོགས་ཀྱི་གཏོར་མ་སྦྱིན། ། བསྡམ་ཞིང་ཁ་ལག་ཡང་བཀྲུས་ནས། ། མེ་ཏོག་དྲི་ལ་སོགས་པ་ཡིས། །
BOསློབ་མས་ཇི་ལྟར་འདོད་པར་མཆོད། ། སློབ་མ་དང་བཅས་མ་ཡེངས་པར། ། མགོ་ བོས་གུས་པར་ཕྱག་འཚལ་ཏེ། ། སྣོད་དུ་བཤད་པ་གང་ཡིན་པ། ། དེ་ནས་སྤོས་ཆུ་ཕུལ་ནས་སུ། ། སོ་སོའི་སྔགས་ཀྱིས་ཅི་རིགས་པར། ། དེ་ནས་སླར་ནི་གཤེགས་སུ་གསོལ། ། དམན་མ་རྣམས་ནི་ཕྱགས་ནས་སུ། ། མཚོ་ཆེན་ནང་དུ་དོར་བར་བྱ། ། བཟའ་བ་དང་ནི་བཅའ་བ་རྣམས། ། ཅི་དགར་ཕོངས་པ་རྣམས་ལ་སྦྱིན། ། ཁྱི་དང་བྱ་རོག་ལ་སོགས་ལ། ། ཅུང་ཟད་ཙམ་ཡང་མི་སྦྱིན་ནོ། ། ཡོ་བྱད་རྫས་རྣམས་ཐམས་ཅད་ནི། ། སློབ་དཔོན་དག་གིས་བསྡུས་ནས་སུ། ། བདག་རང་ཉིད་ཀྱིས་སྤྱད་པར་བྱ། ། སློབ་མ་རྣམས་ལ་བགོར་མི་རུང་། ། དཀྱིལ་འཁོར་ གྱི་ནི་ཡོ་བྱད་ཀུན། ། སློབ་དཔོན་བདག་ཉིད་དབང་བར་བཤད། ། དེ་ནས་སློབ་མས་སྤྱད་ན་ནི། ། ད་མ་ཚིག་ལས་ནི་ཉམས་པར་འགྱུར། ། གང་ཞིག་སྤྱོད་པར་མི་འདོད་ན། ། དེ་ཡི་ཆོ་ག་ཏྭ་རིམ་འདིའོ། ། དཀོན་མཆོག་གསུམ་གྱི་ཡོ་བྱད་དུ། ། དེ་དག་ཆོ་ག་བཞིན་དུ་དབུལ། ། གདུགས་དང་རྔ་ཡབ་དྲིལ་བུ་སོགས། ། སངས་རྒྱས་ཉིད་ལ་དབུལ་བར་བྱ། ། གདན་དང་བདུག་སྤོས་དྲི་ལ་སོགས། ། དམ་པའི་ཆོས་ལ་དབུལ་བར་བྱ། ། གོས་དང་ཡོ་བྱད་སྣོད་ལ་སོགས། ། དགེ་འདུན་རྣམས་ལ་དབུལ་བར་བྱ།
BO། དེ་དག་ལ་ནི་སློབ་མ་ཡིས། ། ཅུང་ཟད་ ཙམ་ཡང་མི་བཀུར་རོ། ། དགེ་འདུན་མེད་ན་དགེ་སློང་སྦྱིན། ། ཡང་ན་དགེ་སློང་མ་ལ་སྦྱིན། ། གལ་ཏེ་བདག་ཉིད་མི་འདོད་ན། ། དགེ་བསྙེན་དག་ལ་སྦྱིན་པར་བྱ། ། དེ་ནས་དེ་ཡི་ཕྱི་དེ་ཉིན། ། ཉེས་བྱས་ལྷག་མ་ཞི་བའི་ཕྱིར། ། མཁས་པ་ཡིས་ནི་ཞི་བ་ཡི། ། སྦྱིན་སྲེག་བརྒྱ་རྩ་ བརྒྱད་བྱའོ། ། དེ་ནས་གཞན་ཡང་རྒྱུད་ཀུན་ལས། ། དཀྱིལ་འཁོར་ཇི་ལྟར་རྒྱས་བཤད་པའི། ། ཆོ་ག་ལྷག་མ་ལུས་པ་དག ། འདིར་ནི་ལྷག་པར་རབ་ཏུ་བཤད། ། སློབ་དཔོན་གསང་སྔགས་རྒྱུད་ལ་མཁས། ། སྙིང་རྗེའི་བདག་ཉིད་ཚུལ་ཁྲིམས་ལྡན། ། དཀྱིལ་འཁོར་བྲི་བ་ལ་མཁས་ ཤིང་། ། དྲང་ལ་གཙང་སྦྲ་ཆེ་བ་ཤིས། ། ཁང་སྟོང་རྡོ་ཐལ་གྱིས་བྱུགས་པ། ། གཙང་མ་བཟང་པོ་ཡངས་པ་དང་། ། ལྷ་ཁང་དུ་ཡང་དཀྱིལ་འཁོར་ནི། ། ཇི་སྐད་བཤད་པ་ལེགས་པར་བྲི། ། ཇི་ལྟར་ཆུ་ན་སྤྱོད་པ་ཡི། ། ཁང་ཁྱིམ་བྱེད་པ་དེ་བཞིན་དུ། ། ཆུ་སྟེང་སྤང་ལེབ་བཟང་ པོ་ཡིས། ། བསྡམས་པ་དག་ཏུ་བྲི་བར་བྱ། ། མཆོད་སྦྱིན་ས་དང་གྲོང་གི་ས། ། མི་གཙང་བ་ཡིས་གང་བ་དང་། ། གཞན་དུ་དཀྱིལ་འཁོར་དུ་སྤྱད་པའི། ། ས་ནི་འབད་དེ་སྤང་བར་བྱ། ། ལ་ལ་དཀྱིལ་འཁོར་བ་དག་པོ་ནི། །
BOགཅིག་པུ་ཁོ་ནར་ལས་བྱར་བསྒྲགས། ། དེ་ཉིད་ ཀྱིས་ནི་བྱ་བ་སྟེ། ། ས་འོག་དཀྱིལ་འཁོར་ལྟ་བུ་ཡིན། ། ཁ་ཅིག་ཏུ་ནི་འཁོར་ཚོགས་ཀྱིས། ། ལས་རྣམས་བྱ་བདག་ཏུ་བཤད། ། དེ་ཡང་དེ་ཉིད་ཀྱིས་བྱས་ཏེ། ། ཁྲོ་བོའི་དཀྱིལ་འཁོར་ལྟ་བུ་ཡིན། ། གང་དུ་ལས་ནི་ཡོད་འགྱུར་ལ། ། རང་གི་ལས་ ཀྱི་ཆོ་ག་མེད། ། དེར་ནི་མཁས་པས་སྤྱི་རྒྱུད་ལས། ། གསུངས་པའི་ལས་རྣམས་བྱ་བ་ཡིན། ། དཀྱིལ་འཁོར་དུ་ནི་དགོད་པའི་སྔགས། ། གང་དག་ཡོངས་སུ་བསྒྲགས་པ་ནི། ། ཐོག་མར་དེ་དག་རེ་རེ་ལ། ། བཟླས་བརྗོད་ཁྲི་ཁྲི་བྱ་བར་བཤད། ། མཁས་པས་ དཀྱིལ་འཁོར་གང་བྲིས་པ། ། དེ་དག་རྒྱས་པར་བཟླས་ནས་ནི། ། དྲན་པར་བྱ་བའི་ཕྱིར་ཡང་ནི། ། གླེགས་བམ་དེར་ཡང་ཉེ་བར་བཞག ། ཁྲུས་ལ་སོགས་པ་བྱེད་པའི་ཚེ། ། དཀྱིལ་འཁོར་ལྟ་བ་གཞན་བཞག་སྟེ། ། དཀྱིལ་འཁོར་འདྲི་བའི་ཚེ་ན་ནི། ། ནམ་ཡང་སྟོང་ པར་མི་གཞག་གོ། ། ཐིག་འདེབས་དུས་ལ་བབ་པའི་ཚེ། ། སློབ་མ་གལ་ཏེ་མེད་ན་ཡང་། ། དེ་ནི་ཕུར་བུ་ཆོ་ག་ཡིས། ། བདག་རང་ཉིད་ཀྱིས་ཐིག་གདབ་བོ། ། དཀྱིལ་འཁོར་དག་གི་ལས་དག་ལ། ། གལ་ཏེ་གྲོགས་ཤིག་མེད་ན་ཡང་། ། དེར་ནི་མཁས་པ་བདག་ཉིད་ ཀྱིས། ། རྣམ་པ་དེ་བཞིན་ལས་བྱའོ། །
BOན་དབུ་ཅན་དང་ཚུལ་ཉམས་དང་། ། གཙང་སྦྲ་ཆུང་ཞིང་མ་བསླབས་པ། ། དེ་ལྟ་བུ་དག་རྒྱུད་མཐོང་ཡང་། ། གྲོགས་སུ་གཟུང་བར་མི་བྱའོ། ། བདེར་གཤེགས་ཆོས་ནི་མི་བྱེད་པ། ། ལ་ལ་རིགས་བཙུན་དད་ཅིང་དྲང་། ། དཀྱིལ་འཁོར་ ཐོས་ན་དད་འགྱུར་ཏེ། ། གལ་ཏེ་འཕྲལ་ལ་འོངས་ན་ནི། ། དེ་ཡི་དད་པ་བརྟན་ཤེས་ནས། ། དཀྱིལ་འཁོར་དག་ནི་བྲིས་ནས་ཀྱང་། ། བདག་གིས་བསྟན་ལ་གཞུག་པའི་ཕྱིར། ། དེ་ནི་གཅིག་པུ་གཞུག་པར་བྱ། ། དེ་ཡི་སྟ་གོན་གནས་པ་ཡང་། ། དེ་དག་ཉིད་ནི་མོད་ལ་བྱ། ། སློབ་མ་ནང་མི་མཐུན་པ་དང་། ། ཆོ་གའི་ཚུལ་ནི་མེད་པ་ལ། ། ཇི་སྐད་བཤད་པའི་ཞི་བ་བྱ། ། རྒྱལ་པོའི་མི་ནི་དཔའ་སྙིང་ཅན། ། ལག་ན་མཚོན་ཐོགས་པས་བསྲུང་ཞིང་། ། ས་ཡི་བདག་པོས་གནང་ནས་ནི། ། སློབ་དཔོན་གྱིས་ནི་དཀྱིལ་འཁོར་བྲི། ། སློབ་མ་ཡོངས་སུ་གཟུང་ བ་གང་། ། སྟ་གོན་གནས་ཚེ་མེད་ན་ནི། ། དེ་ཡི་གཟུགས་བརྙན་བྱས་ནས་སུ། ། ཇི་སྐད་བཤད་པའི་ལས་རྣམས་བྱ། ། སློབ་མ་ཡོངས་སུ་གཟུང་བ་གང་། ། གལ་ཏེ་རྐྱེན་འགའ་ཞིག་གིས་ནི། ། དེར་ནི་འོངས་པར་མ་གྱུར་ན། ། གཞན་དག་དེ་ཡི་སྐྱིན་པར་གཞུག ། སྟ་གོན་གནས་པར་བྱས་པ་ལས། ། གལ་ཏེ་རྐྱེན་གྱིས་མ་འོངས་ན། །
BOབླ་མ་བློ་ལྡན་མཁས་པ་ཡིས། ། དེར་ནི་སློབ་མ་གཞན་མི་གཟུང་། ། སྟ་གོན་གནས་པར་བྱས་པ་ལས། ། བླ་མ་གལ་ཏེ་དཀྱིལ་འཁོར་དུ། ། གང་ཞིག་འོངས་པར་མ་གྱུར་ན། ། ནད་ཀྱིས་བཏབ་ནས་ངེས་པར་ འཆི། ། རྐྱེན་འགའ་ཞིག་གིས་བསྐལ་ནས་སུ། ། གལ་ཏེ་ཉིན་གཅིག་བར་ཆད་ན། ། དེ་ཡི་ཉིན་པར་ཞི་བྱས་ནས། ། སླར་ཡང་སྟ་གོན་གནས་པར་བྱ། ། ཡོ་བྱད་གཅེས་པ་མ་འབྱོར་ཡང་། ། བཤོལ་བ་དག་ནི་ཡོང་མི་བྱ། ། གལ་ཏེ་བཤོལ་ན་བླ་མ་ལ། ། གནོད་པ་ མང་པོ་འབྱུང་བར་འགྱུར། ། དཀྱིལ་འཁོར་འདྲི་བའི་ཚེ་ན་ནི། ། གནོད་པ་འགའ་ཞིག་འབྱུང་འགྱུར་ན། ། བཤད་པའི་སྔགས་ཀྱི་སྟོབས་ཀྱིས་སུ། ། དེ་ནི་སླར་ཡང་བཟློག་པར་བྱ། ། དེས་ཀྱང་བཟློག་པར་མ་ནུས་ན། ། མཆོད་པའི་ཡོ་བྱད་ཐམས་ཅད་ནི། ། བསང་གཏོར་བྱས་ཏེ་ ཕུལ་ནས་སུ། ། མཆོད་ཡོན་ཕུལ་ཏེ་སླར་གཤེགས་གསོལ། ། བློ་དང་ལྡན་པས་ཕྱི་དེ་ཉིན། ། དཀྱིལ་འཁོར་སྔ་མ་བཞིན་དུ་བྲི། ། ཡང་ན་མཁས་པས་སྦྱིན་སྲེག་གི། ། ལས་ཀྱིས་ཞི་བར་རབ་ཏུ་བྱ། ། མ་བདུན་གྱི་ནི་དཀྱིལ་འཁོར་དང་། ། གནོད་སྦྱིན་དཀྱིལ་འཁོར་བཤད་པ་ གང་། ། དེ་ལ་སོགས་པ་དགོད་པ་ནི། ། ཉེས་པ་རིམ་བཞིན་བརྟག་མི་དགོས། ། དེ་དག་ཏུ་ནི་དེ་བཞིན་དུ། །
BOདཀྱིལ་འཁོར་དགོད་པ་རྒྱས་པར་བྱ། ། ཆོ་གར་བྱས་པ་གཞན་དག་ལས། ། ཆོ་ག་འདི་ནི་ཅི་རིགས་སྦྱར། ། མདོར་བསྡུས་བཤད་པ་གང་ཡིན་དང་། ། རྒྱས་ པར་བཤད་པ་གང་ཡིན་དང་། ། ཟུར་གྱིས་བསྟན་དང་མདོ་ལས་ནི། ། སྤྱིར་བསྟན་པ་ནི་གང་ཡིན་པ། ། དེ་རྣམས་བྱ་བའི་ཆོ་ག་ལ། ། རྒྱུད་འདིར་རྒྱས་པར་བཤད་པ་ཡིན། ། མཁས་པས་ཆོ་ག་འདི་ཡིས་ནི། ། དཀྱིལ་འཁོར་ཐམས་ཅད་བྲི་བར་བྱ། ། དཀྱིལ་འཁོར་ཆེན་ པོའི་མདོ་ལས་ནི། ། ཅི་བཤད་ཆོ་ག་རྒྱས་པར་བྱ། ། བླ་མས་ཇི་སྐད་བསྟན་པ་དང་། ། རྟོག་པ་དག་ལས་ཅི་གསུངས་དང་། ། གསང་སྔགས་ཀུན་གྱི་འདུལ་བ་ལས། ། ཆོ་ག་རིམ་པ་ཅི་བཤད་པ། ། དཀྱིལ་འཁོར་གྱི་ནི་ཆོ་ག་ལ། ། མཁས་པས་ ཆོ་ག་དེ་བཞིན་སྦྱར། ། གསང་སྔགས་ཀྱི་ནི་ཚད་དག་ལས། ། བུམ་པ་ལ་སོགས་བསྟན་བྱས་པ། ། དེར་ཡང་ཆོ་ག་འདི་ཡིས་ནི། ། ལྷག་པར་བྱས་ལ་ཉེས་པ་མེད། ། དེ་བཞིན་གསང་སྔགས་ཆོ་ག་ལ། ། ལྷ་གཞན་གྱི་ནི་གཏོར་མ་ཡང་། ། དཀྱིལ་འཁོར་དག་ཏུ་ བཤད་པ་ལས། ། ལྷག་པར་བྱས་ཀྱང་ཉེས་པ་མེད། ། དེ་བས་གང་དུ་ཅུང་ཟད་ཅིག ། བཀླགས་ཏེ་བཤད་པ་གང་ཡིན་པ། ། དེར་ནི་དོགས་པ་མེད་སེམས་ཀྱིས། ། ཐམས་ཅད་དེ་བཞིན་ཁོ་ནར་བྱ། ། ལ་ལར་སློབ་མ་དང་བཅས་ཏེ། །
BOབདུག་སྤོས་དང་ནི་མར་ མེ་དག ། ལག་ཏུ་ཐོགས་ཏེ་མཉམ་པར་ནི། ། དཀྱིལ་འཁོར་བསྐོར་བར་བ་ཤད་པ་དང་། ། ད་མ་ཚིག་སྟོན་ཚེ་སློབ་མ་རྣམས། ། ལས་ཀྱི་གྲྭར་ནི་ཞུགས་ནས་སུ། ། མེ་ཏོག་འདོར་བར་བྱའོ་ཞེས། ། ཁྱད་པར་བཤད་པ་གང་ཡིན་དང་། ། དེ་ལ་སོགས་པའི་ཆོ་ག་ དག ། གང་དུ་ཅུང་ཟད་བཤད་པ་ནི། ། དེར་ནི་དགའ་མགུ་ཉིད་དུ་བྱའི། ། ཀུན་ལ་དེ་ཀུན་སྦྱར་མི་བྱ། ། ལྷ་ཡི་རིགས་རྣམས་མཐོང་བ་ལས། ། དབང་བསྐུར་བ་ནི་རྣམ་པ་བཞི། ། བླ་མ་མཉམ་པར་བཞག་པ་ཡིས། ། དེ་དག་ཤེས་ནས་ཅི་རིགས་བྱ། ། སློབ་དཔོན་གོ་ འཕང་ཐོབ་པའི་ཕྱིར། ། དང་པོ་ཡོངས་སུ་བསྒྲགས་པ་ཡིན། ། རིག་སྔགས་རྣམས་ནི་བསྒྲུབ་བྱའི་ཕྱིར། ། གཉིས་པ་ལེགས་པར་བཤད་པ་ཡིན། ། བགེགས་རྣམས་རབ་ཏུ་གཞོམ་པའི་ཕྱིར། ། གསུམ་པ་རབ་ཏུ་བསྒྲགས་པ་ཡིན། ། བཞི་པ་འབྱོར་པ་ཐོབ་པའི་ཕྱིར། ། ཆོ་ག་རྒྱས་པ་དེ་བཤད་དོ། ། དང་པོ་ཆོ་ག་རྒྱས་པར་ནི། ། ང་ཡིས་ཐོག་མར་བཤད་པ་ཡིན། ། རིགས་གསུམ་དབང་བསྐུར་ཆོ་ག་ཡང་། ། མདོར་བསྡུས་ནས་ནི་འདིར་བཤད་དོ། ། སློབ་མ་ལྷ་ཡི་རིགས་མཐོང་བ། ། རིག་སྔགས་གང་ལ་ཟློས་འདོད་པ། ། དེ་ཡིས་བརྒྱ་རྩ་བརྒྱད་ བཟླས་པའི། ། བུམ་པས་མངོན་པར་དབང་བསྐུར་བྱ།
BO། དེ་ཉིད་ཀྱིས་ཀྱང་སྦྱིན་སྲེག་བྱ། ། དེ་ཉིད་དུ་ནི་དེ་ཡང་བཟླས། ། དེ་ལྟར་གང་ཞིག་དབང་བསྐུར་བ། ། དབང་བསྐུར་ཆོ་ག་གཉིས་པ་ཡིན། ། སེམས་ནི་བགེགས་ཀྱིས་བརླམས་པ་དག ། ཞི་བར་བྱ་བ་གང་ ཡིན་པ། ། དེ་ནི་དབང་བསྐུར་གསུམ་པ་སྟེ། ། ཕན་དང་བདེ་བ་ཐོབ་པར་བཤད། ། དཔལ་ལ་སོགས་པའི་དཀྱིལ་འཁོར་དུ། ། རྒྱལ་སྲིད་ཐོབ་ཕྱིར་དབང་བསྐུར་དང་། ། བྱུར་ནི་མེད་པར་བྱ་བ་དང་། ། དཔལ་ཡང་བསྐྱེད་པར་བྱ་བ་དང་། ། ནོར་དང་བུ་ཚ་འཕན་པ་ དང་། ། དེ་ལ་སོགས་པ་དབང་བསྐུར་གང་། ། དེ་ནི་བཞི་པའི་མི་རྣམས་ལ། ། འབྱོར་པ་སྦྱིན་པར་ཤེས་པར་བྱ། ། དབང་བསྐུར་དང་པོ་ཐོབ་པ་ནི། ། སངས་རྒྱས་རྣམས་ཀྱང་དགོངས་པར་འགྱུར། ། དེའི་སྲས་གསང་སྔགས་སྤྱོད་པ་ལ། ། བརྩོན་པ་རྣམས་ཀྱིས་བཀུར་ བར་འགྱུར། ། རིག་སྔགས་གསང་སྔགས་མང་པོ་དང་། ། འཕགས་པ་སྤྱན་རས་གཟིགས་དབང་དང་། ། དཔའ་བོ་རྡོ་རྗེ་འཛིན་པ་དག ། ཉིད་ཀྱིས་བྱིན་གྱིས་བརླབས་པར་འགྱུར། ། དེ་ཡིས་སྦྱར་ན་སྒྲུབ་པ་པོ། ། ལས་རྣམས་ཐམས་ཅད་འགྲུབ་པར་འགྱུར། ། དེ་ནི་ ཅིས་ཀྱང་མི་ཚུགས་ཤིང་། ། ལྷ་རྣམས་ཀྱིས་ཀྱང་མཆོད་པར་འགྱུར། ། འཁོར་བ་ན་ནི་འཁོར་བ་ན། །
BOདེ་ནི་ངན་སོང་ལྟུང་མི་འགྱུར། ། ཡན་ལག་ཉམས་དང་དབུལ་བ་དང་། ། སྨད་པ་རྣམས་སུ་སྐྱེ་མི་འགྱུར། ། ཚེ་རབས་དྲན་ཞིང་ལོངས་སྤྱོད་ཆེ། ། ཚུལ་ཁྲིམས་ ལྡན་ཞིང་གཟུགས་ཀྱང་བཟང་། ། རྟག་ཏུ་ལྷ་དང་མི་རྣམས་ཀྱི། ། མཐོ་རིས་རྣམས་སུ་སྐྱེ་བར་འགྱུར། ། དེ་ཡི་བསོད་ནམས་མཐུ་ཡིས་ནི། ། སངས་རྒྱས་བྱང་ཆུབ་ལས་མི་ལྡོག ། དེས་ནི་རིང་པོ་མི་ཐོགས་པར། ། བྱང་ཆུབ་ཚོགས་ནི་རྫོགས་པར་འགྱུར། ། དེ་ལ་སོགས་ པའི་ཡོན་ཏན་ནི། ། མང་པོ་རྒྱ་ཆེན་དག་དང་ལྡན། ། རིག་སྔགས་རྣམས་ཀྱི་རིགས་སྐྱེ་ཞིང་། ། དེ་ནི་བྱང་ཆུབ་སྤྱད་པ་སྤྱོད། ། དེ་ལྟར་མངོན་པར་དབང་བསྐུར་ཞིང་། ། བློ་ལྡན་རྒྱུད་ནི་མཐོང་བ་ལ། ། བླ་མ་ལས་ནི་ལུང་ཐོབ་པས། ། དཀྱིལ་འཁོར་དག་ནི་བྲི་བར་བྱ། ། ཡོན་ཏན་འདི་དང་མི་ལྡན་པར། ། གང་ཞིག་དཀྱིལ་འཁོར་འདྲི་བྱེད་པ། ། དེ་ནི་མི་བཟད་སེམས་དམྱལ་ལྟུང་། ། སློབ་མ་རྣམས་ཀྱང་དོན་མེད་འགྱུར། ། མུ་གེ་དང་ནི་ནད་མང་དང་། ། ཐན་པ་དང་ནི་འཚེ་བ་འབྱུང་། ། རྒྱལ་པོ་རྣམས་ཀྱང་འཐབ་པ་དང་། ། ཆོམ་རྐུན་ལ་སོགས་འཇིགས་པ་འབྱུང་། ། དེ་དང་དེ་ཡི་རྒྱུ་རྣམས་ཀྱིས། ། སློབ་མ་རྣམས་ཀྱང་ཕུང་བར་འགྱུར། །
BOདཀྱིལ་འཁོར་ཆོ་ག་མི་ལྡན་པར། བྲིས་ན་བླ་མ་ངེས་པར་འཆི། ། དེ་བཞིན་གཤེགས་རིགས་དཀྱིལ་འཁོར་དུ། ། གང་ཞིག་ལེགས་པར་དབང་ བསྐུར་བ། ། དེ་ནི་རིགས་རྣམས་གསུམ་ཆར་གྱི། ། དཀྱིལ་འཁོར་ལ་སོགས་སློབ་དཔོན་འགྱུར། ། འཕགས་པ་སྤྱན་རས་གཟིགས་དབང་གི། ། དཀྱིལ་འཁོར་དུ་ནི་དབང་བསྐུར་བ། ། དེ་ནི་རིགས་གཉིས་དཀྱིལ་འཁོར་གྱི། ། སློབ་དཔོན་དུ་ནི་དབང་བསྐུར་འགྱུར། ། ཕྱག་ན་རྡོ་རྗེ་གཟི་ཆེན་གྱི། ། དཀྱིལ་འཁོར་དུ་ནི་དབང་བསྐུར་བ། ། དེ་ནི་རྡོ་རྗེ་རིགས་གཅིག་གི། ། དཀྱིལ་འཁོར་གྱི་ནི་སློབ་དཔོན་འགྱུར། ། མ་མོ་གནོད་སྦྱིན་དྲག་པོ་ཡི། ། དཀྱིལ་འཁོར་གང་དག་ཅི་བཤད་པ། ། ཐམས་ཅད་དེ་དག་ཀུན་གྱིས་ཀྱང་། ། དོགས་པ་ མེད་པར་བྲི་བར་བྱ། ། བླ་མས་སློབ་མ་གཅིག་པུ་ནི། ། དཀྱིལ་འཁོར་དག་ཏུ་དབང་བསྐུར་བྱ། ། མཁས་པས་ཅིག་ཆར་སློབ་མ་གཉིས། ། དབང་བསྐུར་བ་ནི་ཡོང་མི་བྱ། ། གཉིས་སམ་གསུམ་མམ་བཞི་ཡང་རུང་། ། བླ་མས་དབང་བསྐུར་བྱ་བ་ནི། ། ཡོ་བྱད་སར་པ་གཞན་རྣམས་ ཀྱིས། ། ཐམས་ཅད་སོ་སོ་སོ་སོར་བྱ། ། རིག་སྔགས་དབང་ནི་ཐོབ་པ་ལ། ། བསྒྲུབ་པའི་དཀྱིལ་འཁོར་དབང་བསྐུར་བྱ། ། དབང་བསྐུར་བ་ཡི་ཆོ་ག་དང་། །
BOབསྒྲུབ་པའི་ཆོ་གའང་དེ་བཞིན་སྦྱིན། ། སློབ་མ་དམ་ཚིག་ཤེས་པ་ནི། ། གཞན་རྣམས་ལ་ནི་རང་གི་སྔགས། ། ཆོ་གར་བཅས་ ཤིང་ཕྱག་རྒྱར་བཅས། ། ཆོ་ག་རྒྱས་དང་བཅས་པར་སྦྱིན། ། དཀྱིལ་འཁོར་ལེགས་པར་མ་མཐོང་བར། ། གང་ཞིག་ཇི་སྟེ་སྔགས་ཟློས་ན། ། དེས་ནི་དངོས་གྲུབ་ཐོབ་མི་འགྱུར། ། ཤི་ན་ངན་སོང་ལྟུང་བར་འགྱུར། ། སྔགས་དང་ཕྱག་རྒྱ་ཆོ་ག་དག ། གང་ཞིག་དེ་ལ་སྟོན་པ་ཡང་། ། དེ་ནི་དམ་ཚིག་ཉམས་ གྱུར་ནས། ། ངུ་འབོད་སེམས་ཅན་དམྱལ་བར་འགྲོ། ། ཇི་སྐད་བཤད་པའི་དམ་ཚིག་རྣམས། ། གལ་ཏེ་ཉམས་པར་གང་གྱུར་པ། ། དེས་ནི་རང་གི་སྙིང་པོའི་སྔགས། ། གཅིག་འབུམ་དུ་ནི་བཟླས་བརྗོད་བྱ། ། ཡང་ན་མེས་རྨོངས་བྱེད་པའི་གཟུངས། ། སྟོང་དུ་བཟླས་བརྗོད་བྱས་ཀྱང་ རུང་། ། ཡང་ན་ཞི་བའི་སྦྱིན་སྲེག་བྱ། ། ཡང་ན་དཀྱིལ་འཁོར་དུ་ཡང་འཇུག ། གཏི་མུག་དབང་གིས་མི་ཤེས་པར། ། མི་གང་དཀྱིལ་འཁོར་འདྲི་བྱེད་པ། ། དེ་ནི་མཚམས་མེད་ལྔ་རྣམས་དང་། ། འདྲ་བའི་གནས་སུ་འགྲོ་བར་འགྱུར། ། གང་ཞིག་བསོད་ནམས་ལས་བྱེད་པ། ། ཆོ་ག་ལེགས་པར་འདྲི་ ན་ནི། ། བྱང་ཆུབ་སེམས་དཔའ་མཐུ་ཆེན་ཏེ། ། འདོད་པའི་གནས་ནི་དམ་པར་སྐྱེ། །
BOགཤེད་བྱེད་རྣམས་དང་རོ་ལངས་དང་། ། ཤ་ཟ་ལྟོ་འཕྱེ་ཆེན་པོ་དང་། ། རྣམ་པ་སྣ་ཚོགས་གདོན་རྣམས་དང་། ། འཇིགས་པར་འགྱུར་བའི་བགེགས་རྣམས་ཀྱིས། ། ལྷ་ཡི་རིགས་མཐོང་དམ་ཚིག་ཤེས། ། རྟག་ཏུ་ཚུགས་པར་མི་འགྱུར་ཞིང་། ། དེ་ཡི་མི་དགེའི་ལས་འབྱང་ཞིང་། ། ངན་སོང་དུ་ཡང་ཡོང་མི་ལྟུང་། ། དེ་ཡིས་བསྒྲུབས་ན་ངེས་པར་ནི། ། གསང་སྔགས་ཐམས་ཅད་འགྲུབ་པར་འགྱུར། ། དེ་ལ་བྱང་ཆུབ་ས་བོན་ནི། ། བརྟན་པར་འགྱུར་བར་དོགས་པ་མེད། ། སློབ་དཔོན་བློ་གྲོས་ཆེན་པོ་ཡིས། ། གསང་སྔགས་རྒྱུད་ནི་འཛིན་པ་པོ། ། སློབ་མ་བསྡམས་པ་སྙིང་རྗེ་ཅན། ། གཅིག་ནི་ནན་ཏན་བསྐྱེད་དེ་བསྒྲུབ། ། དཀྱིལ་འཁོར་རྣམས་ནི་ཐམས་ཅད་ཀྱི། ། ཆོ་ག་འདི་ནི་དམ་པ་སྟེ། ། བློ་དང་ལྡན་པས་ཆོ་ག་འདིས། ། དཀྱིལ་འཁོར་རྣམས་ནི་བྲི་བར་བྱ། ། རིག་སྔགས་རྒྱལ་དང་ཕྱག་རྒྱ་ཆེ། ། དཀྱིལ་འཁོར་རྣམས་ནི་ཐམས་ཅད་ཀྱང་། ། སློབ་མ་ལ་ནི་སྔགས་བྱིན་ནས། ། དེ་ནས་བླ་མས་རྒྱུད་འདི་བྱིན། ། དབང་གི་དཀྱིལ་འཁོར་གཤེགས་སུ་གསོལ། ། བསྒྲུབ་པ་ཆེན་པོ་བྱ་བའི་རྒྱུད་ཀྱི་བཞེད་ལུགས་ཀྱིས་དཀྱིལ་འཁོར་གྱི་མཛད་བྱང་མ་ལུས་པར་ཡོངས་སུ་རྫོགས་ པར་བསྟན་པ་ཡིན་ནོ། ། ། །
BOདཀྱིལ་འཁོར་ཆེན་པོ་བཀོད་པ་རིམ་པར་ཕྱེ་བ། ཕྱག་ན་རྡོ་རྗེ་དབང་ཕྱུག་ཆེན་པོ་བདག་ཉིད་ཀྱིས་བསྟན་པ་ལས། དཀྱིལ་འཁོར་ཐམས་ཅད་ཀྱི་སྤྱིའི་ཆོ་ག་གསང་བ་སྤྱིའི་རྒྱུད་རྫོགས་{སྷོ,སོ}། ། ། །
Sutraya