BO༄༅༅། ། རྒྱ་གར་སྐད་དུ། ཤྲཱི་བཛྲ་མཱ་ལ་ཨ་བྷིདྷཱ་ན་མ་ཧཱ་ཡོ་ག་ཏནྟྲ་སརྦ་ཏནྟྲ་ཧྲྀ་ད་ཡ་ར་ཧ་སྱ་བི་བྷ་ད་ཀཾ་ཨི་ཏི། བོད་སྐད་དུ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་བརྗོད་པ་རྒྱུད་ཐམས་ཅད་ཀྱི་སྙིང་པོ་གསང་བ་རྣམ་པར་ཕྱེ་བ་ཞེས་བྱ་བ། འཕགས་པ་འཇམ་ དཔལ་གཞོན་ནུར་གྱུར་པ་ལ་ཕྱག་འཚལ་ལོ། ། བཅོམ་ལྡན་འདས་རྣམ་པར་སྣང་མཛད་ཆེན་པོ་ལ་ཕྱག་འཚལ་ལོ། ། དཔལ་རྡོ་རྗེ་མཁའ་འགྲོ་ལ་ཕྱག་འཚལ་ལོ། ། དཀོན་མཆོག་གསུམ་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་ བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་སྙིང་པོ་རྡོ་རྗེ་བཙུན་མོའི་བྷ་ག་རྣམས་ལ་ཚད་མེད་པའི་ཕྱག་རྒྱ་ཆེན་པོས་མངོན་པར་རྟོགས་པས་བཞུགས་ཏེ། དཔག་ཏུ་མེད་པའི་རྡོ་རྗེའི་རིགས་དང་འབྲེལ་བའི་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་དུ་མ་དང་ཐབས་ཅིག་ཏུ་ ཐམས་ཅད་ཀྱི་ཕྱག་རྒྱ་ཆེན་པོ་མངོན་པས་རྟོགས་པ་མངོན་དུ་བྱ་བ་ལ་བཞུགས་པ། གཉིས་སུ་མེད་པའི་བདེ་བ་ཆེན་པོ་ཉམས་སུ་མྱོང་བས་དགྱེས་པས་མཆོག་ཏུ་པདྨ་དགྱེས་པ།
BOཆོས་ཐམས་ཅད་ཀྱང་ཇི་ལྟ་བ་བཞིན་ཉམས་སུ་མྱོང་བ་མཐོང་བས་རྣམ་པར་མི་རྟོག་པའི་ཡེ་ཤེས་ཀྱི་དེ་ཁོ་ན་ཉིད་ལ་མངོན་ དུ་ཕྱོགས་པ། ། རྡོ་རྗེ་འཆང་ཆེན་པོའི་དམ་ཚིག་བླ་ན་མེད་པའི་དབང་དུ་གྱུར་པ་ལ་རབ་ཏུ་མཁས་པ་འདི་ལྟ་སྟེ། ། བྱང་ཆུབ་སེམས་དཔའ་སེམས་དཔའ་ཆེན་པོ་དམ་ཚིག་རྡོ་རྗེ་དང་། ། བྱང་ཆུབ་སེམས་དཔའ་སེམས་དཔའ་ཆེན་པོ་ཞེ་སྡང་རྡོ་རྗེ་དང་། ། བྱང་ཆུབ་སེམས་དཔའ་སེམས་དཔའ་ཆེན་པོ་ཆགས་པ་ རྡོ་རྗེ་དང་། ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ལས་དང་། ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ཡེ་ཤེས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ས་རྡོ་རྗེ་དང་། ། བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་རྡོ་རྗེ་དང་། ། བྱང་ཆུབ་སེམས་དཔའ་སེམས་ དཔའ་ཆེན་པོ་མེ་རྡོ་རྗེ་དང་། ། བྱང་ཆུབ་སེམས་དཔའ་སེམས་དཔའ་ཆེན་པོ་རླུང་རྡོ་རྗེ་དང་། དེ་ལྟ་བུ་རྣམས་གཙོ་བོར་གྱུར་པ་དམ་ཚིག་ཆེན་པོའི་རིགས་དང་འབྲེལ་བ་བྱང་ཆུབ་སེམས་དཔའ་སྟོང་ཕྲག་བདུན་ཅུ་རྩ་གཉིས་དང་། གཞན་ཡང་རིགས་ཆེན་པོ་དང་འབྲེལ་བའི་བྱང་ཆུབ་སེམས་དཔའ་ བྱེ་བ་ཁྲག་ཁྲིག་བརྒྱ་སྟོང་ལ་ནི་འདི་ལྟ་སྟེ།
BOབྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའ་ལ་འགྲོ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའ་རྣམ་པར་རྒྱས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་ཟླ་བ་དང་། བྱང་ ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་གཙུག་ཏོར་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཚམས་རྣམས་ཀྱིས་ངེས་པར་གྲོལ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་སེམས་དཔའ་དང་། བྱང་ཆུབ་སེམས་དཔའ་སེམས་དཔའ་ཆེན་ པོ་རྡོ་རྗེ་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་བློ་གྲོས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་རྒྱལ་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་དམ་ཚིག་ དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ཆོས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ལོངས་སྤྱོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་སྤྱི་བོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཀྱི་རྩལ་གྱིས་རྣམ་པར་གནོན་པ་དང་།
BOབྱང་ཆུབ་སེམས་དཔའ་སེམས་དཔའ་ཆེན་པོ་རྣམ་རྟོག་མེད་པའི་སྤྱི་གཙུག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་རྟོག་མེད་པའི་སྒྲ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་རྟོག་མེད་པའི་ཆོས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་རྟོག་མེད་ པའི་དམ་ཚིག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དགའ་བའི་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་དགའ་བའི་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྣ་ཚོགས་དགའ་བའི་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ ཆེན་པོ་ལྷན་ཅིག་སྐྱེས་པའི་རྡོ་རྗེ་དང་། གཞན་ཡང་དཔག་ཏུ་མེད་པའི་རྡོ་རྗེའི་ཐེག་པས་ལྷག་པར་གྲོལ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་ཐབས་ཅིག་ཏུ་བཞུགས་སོ། ། བཅོམ་ལྡན་འདས་དེ་ཡང་ཆོས་ཀྱི་འཁོར་ལོ་ནི་ཤིན་ཏུ་བསྐོར། སངས་རྒྱས་ཀྱི་མཛད་པ་ཤིན་ཏུ་ ཡོངས་སུ་མཐར་བྱིན། བསོད་ནམས་དང་ཡེ་ཤེས་ཀྱི་ཚོགས་ནི་ཤིན་ཏུ་ཡོངས་སུ་རྫོགས་པ་དེ་འཁོར་ལ་ཞལ་རབ་ཏུ་འཛུམ་པར་བཅས་པས་བཞུགས་སོ། ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་རྒྱ་ཆེན་པོ་རྣམས་ ལ་གཟིགས་ནས།
BOདེ་དག་སྣོད་དུ་རུང་བར་བྱ་བའི་ཕྱིར་རྡོ་རྗེ་ཕྲེང་བ་མངོན་པར་བྱང་ཆུབ་པའི་རྡོ་རྗེ་ཐེག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། བ་སྤུའི་བུ་ག་ཐམས་ཅད་ལས་འོད་ཟེར་གྱི་དྲ་བ་ཆེན་པོ་བཀྱེ་སྟེ་བཞུགས་སོ། ། འོད་ཟེར་གྱི་དྲ་བ་ཆེན་པོ་དེས་ཀྱང་བྱང་ ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ལ་རེག་པས་མཆོག་ཏུ་དགའ་བ་ཐོབ་པ་ནི་གཉིས་སུ་མེད་པའི་སྦྱོར་བ་དང་ལྡན་པའི་བཅོམ་ལྡན་འདས་རྡོ་རྗེ་འཆང་ཆེན་པོ་ཇི་ལྟ་བ་བཞིན་ནོ། ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཉིད་དགའ་བ་དང་བདེ་བ་དང་མཆོག་ཏུ་ མགུ་བ་སྐྱེས་ནས་བརྒྱལ་བར་གྱུར་ཏོ། ། དེ་ནས་ཡང་དེའི་དུས་སུ་བཅོམ་ལྡན་འདས་ཀྱི་མཛོད་སྤུར་འོད་ཟེར་གྱི་དྲ་བ་ཆེན་པོ་བསྡུས་པར་གྱུར་ཏོ། ། བསྡུས་པ་དེ་ཡང་རྡོ་རྗེའི་ལམ་ནས་ལྕགས་ཀྱུའི་རྣམ་པ་ཅན་གྱི་འོད་ཟེར་ཆེན་པོ་ཉེ་བར་ཕྱུང་བར་གྱུར་པ་དེས་བརྒྱལ་བ་དེ་དག་ལ་རེག་ ནས་རྡོ་རྗེ་ཕྲེང་བ་ལྟ་བུ་ཉིད་རྡོ་རྗེའི་ལམ་ནས་གཙུག་ཏོར་གྱི་འཁོར་ལོ་ལ་ཞུགས་ནས་གནས་སོ། ། སླར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་བདེ་བ་ཆེན་པོ་རྗེས་སུ་མྱོང་བར་གྱུར་ཏེ།
BOརྡོ་རྗེའི་ཡི་གེ་ཧཱུྃ་བརྗོད་པ་དེ་ཉིད་ཀྱིས་བདེ་བ་ཆེན་པོ་དེ་ཉིད་ཉམས་སུ་མྱོང་བ་ཉིད་ཀྱི་ཐུགས་ ཀའི་ལྟེ་བའི་རྩ་སྦུབས་ནས་འོད་ཟེར་ཆེན་པོ་ཕྱུང་སྟེ་རང་རང་གི་སྟན་ལ་འཁོད་པར་གྱུར་ཏོ། ། དེ་ནས་དེ་རྣམས་ཆུའི་གཏིང་ནས་འཐོན་པ་ལྟ་བུར་སེམས་དགའ་བ་སྐྱེས་ཏེ། བཅོམ་ལྡན་འདས་ཀྱི་ངོ་མཚར་ཆེན་པོའི་ཆོ་འཕྲུལ་མཐོང་ནས་ཤིན་ཏུ་མིག་གདངས་ཏེ། བཅོམ་ལྡན་འདས་ལ་ དབྱངས་གཅིག་གིས་ཡང་དག་པར་བསྟོད་དོ། ། བཅོམ་ལྡན་རོ་གཅིག་གྱུར་པ་ཡི། ། ལྷན་ཅིག་སྐྱེས་པའི་དགའ་བས་རྒྱས། ། བཅོམ་ལྡན་མཆོག་ཏུ་ངལ་བསོ་ཀྱེ། ། ངག་གི་ལམ་གྱི་སྤྱོད་ཡུལ་འདས། ། བཅོམ་ལྡན་ཉིད་ཀྱི་དགྱེས་ཉམས་ལྟར། ། འགྲོ་བ་གསུམ་པོ་ཡང་དག་ བདེ། ། ཨེ་མའོ་ལྷན་ཅིག་སྐྱེས་བདུད་རྩི། ། རོ་བསྟེན་ཐུགས་རྗེ་ཆེན་པོ་སྐྱེ། ། བཅོམ་ལྡན་སེམས་ཅན་ཐམས་ཅད་ཀྱི། ། སེམས་ཅན་དོན་ཀུན་གསལ་བར་མཛད། ། དེ་ཉིད་གསུམ་གྱི་རོ་གཅིག་པ། ། ཕྱག་རྒྱ་ཆེན་པོ་རབ་དབྱེ་བ། ། བཅོམ་ལྡན་རྣལ་འབྱོར་ཆེ་ལ་དགྱེས། ། འཆིང་བ་ ཐམས་ཅད་གཅོད་མཛད་ཀྱི། ། བཅོམ་ལྡན་དགྱེས་པ་ཆེར་མཛད་ཅིང་། ། འགྲོ་བ་སྐལ་བཟང་ངེས་པར་མཛད། ། ཨེ་མའོ་རྡོ་རྗེ་ཐེག་པ་བདེ། །
BOརབ་ཏུ་དགའ་ཞིང་མགུ་བ་སྩོལ། ། ཨེ་མའོ་སྔགས་ནི་རབ་རྒྱས་པ། ། རང་བྱུང་གོ་འཕང་སྒྲུབ་པ་པོ། ། ཨེ་མའོ་ཤིན་ཏུ་ཟབ་མོའི་ཆོས། ། དམིགས་པ་མེད་པར་སྟོན་པར་མཛད། ། ཨེ་མའོ་རྡོ་རྗེ་འཆང་ཆེན་གཙོ། ། གསང་བའི་བདག་པོ་ཤིན་ཏུ་གསང་། ། ཨེ་མའོ་མཆོག་ཏུ་བྱང་ཆུབ་པ། ། ཨེ་མའོ་སྤྲོས་པ་རྣམ་སྤངས་ཤིང་། ། བདེན་པའི་དོན་ནི་གསལ་མཛད་པ། ། ཐེག་པའི་སྒྲོན་མས་སྣང་བར་མཛད། ། མགོན་པོ་ བདག་ཅག་ཁྱེད་དྲིན་གྱིས། ། རྡོ་རྗེ་སེམས་དཔའི་གོ་འཕང་ཐོབ། ། མགོན་པོ་བདག་ཅག་ལམ་ལོག་ཞུགས། ། ཁྱེད་ཀྱིས་ཡང་དག་ལམ་ལ་བཀོད། ། མགོན་པོ་བདག་ཅག་མུན་པར་འཐོམས། ། ཡེ་ཤེས་སྣང་བ་ཐོབ་པར་མཛད། ། དམ་ཚིག་རྡོ་རྗེ་ཉི་མ་ཀྱེ། ། ཕྱག་རྒྱ་ཆེན་པོའི་དོན་ སྟོན་མཛད། ། བཅོམ་ལྡན་ཁྱོད་ལ་ཕྱག་འཚལ་བསྟོད། ། ཐུགས་རྗེའི་ཕྱག་རྒྱ་ཆེ་བདག་ཉིད། ། ཕྱག་འཚལ་གཉིས་མེད་དགའ་བའི་མཁའ། ། དགའ་བའི་ཟླ་བ་ཁྱེད་ལ་འདུད། ། ཅེས་བྱ་བ་ལ་སོགས་པའི་ཚིགས་སུ་བཅད་པས་བཅོམ་ལྡན་འདས་ལ་བསྟོད་པ་མཛད་ནས་སླར་ཡང་ འདུས་པར་གྱུར་ཏེ། རྡོ་རྗེའི་ཕྲེང་བ་མངོན་པར་བརྗོད་པ་ཞེས་བྱ་བ་ཤིན་ཏུ་ཕྲ་བའི་ས་ཇི་ལྟ་བའི་ངོ་བོ་འདྲི་བར་འདོད་ནས་ཡིད་ལ་བྱེད་པ་གཅིག་པ་དང་། །
BOསེམས་རྩེ་གཅིག་གིས་དགའ་བར་བྱེད་པའི་གསུང་ཉན་པར་འདོད་ནས་བ་སྤུ་ལྡང་བ་དང་དབུགས་གཡོ་བ་དང་བཅས་པས་ཡང་དང་ཡང་དུ་བཅོམ་ ལྡན་འདས་ལ་ཕྱག་བྱེད་ཅིང་རང་གི་སྟན་ལ་འཁོད་ནས་སེམས་རེ་དོགས་དང་བཅས་པས་གནས་སོ། ། བཅོམ་ལྡན་འདས་ཀྱིས་དེ་རྣམས་ཀྱི་དེ་ལྟ་བུའི་སེམས་ཀྱི་རྟོག་པ་ཐུགས་ཀྱིས་མཁྱེན་ནས་སླར་ཡང་རྡོ་རྗེའི་ཕྲེང་བ་མངོན་པར་བྱང་ཆུབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ ནས་གསང་བའི་རྡོ་རྗེ་ལས་རང་གི་རིག་མ་ཕྱུང་སྟེ། སྒེག་པ་ལ་སོགས་པའི་ཉམས་དང་ལྡན་པ་བདག་ཉིད་ཀྱིས་འདོད་ཆགས་དང་བྲལ་བའི་གཟུགས་སྤངས་ནས་སྒེག་པ་ལ་སོགས་པའི་ཉམས་དང་ལྡན་པའི་གཟུགས་བླངས་ནས་རང་རང་གི་རིག་མ་ལ་འཁྱུད་དེ། ཕྱག་རྒྱ་ ཆེན་པོའི་རྣལ་འབྱོར་ལ་རྗེས་སུ་ཞུགས་ནས། སླར་ཡང་དེ་དག་དེ་ལྟ་བུའི་གཟུགས་ཉིད་དུ་མཐོང་སྟེ་ངོ་མཚར་སྐྱེས་ནས་མིག་གདངས་ཏེ་རི་མོའི་བཀོད་པ་ལྟ་བུར་མཐོང་བ་ཉིད་ཀྱིས་ཅི་ཡང་མི་སྨྲ་བར་གྱུར་པས་དེ་ལ་འཁོར་རྣམས་ཡང་དག་པར་འཁོད་པར་གྱུར་ཏོ། ། དེ་ནས་བཅོམ་ལྡན་ འདས་རང་གི་རིག་མ་ཡང་དག་པར་བསྐུལ་ཏེ།
BOཕྱག་རྒྱ་ཆེན་པོའི་རྣལ་འབྱོར་དོར་ནས་ཉིད་ཀྱི་སྐུ་གསུང་ཐུགས་རྡོ་རྗེ་ལས་རྡོ་རྗེ་བཙུན་མོ་རྡོ་རྗེ་རིགས་ཀྱི་སྙིང་པོ་འདི་གསུངས་སོ། ། ཨོྃ་ཨཱཿཧཱུྃ། དེ་ནས་དེ་སྐད་དུ་གསུངས་མ་ཐག་ཏུ་བཅོམ་ལྡན་འདས་ཀྱི་བ་སྤུའི་བུ་ག་ལས་དེ་བཞིན་གཤེགས་ པ་ཐམས་ཅད་དང་། རིག་མ་དང་བྱང་ཆུབ་སེམས་དཔའ་དང་། ཁྲོ་བོའི་རྒྱལ་པོ་རྣམས་ཕྱུང་བར་གྱུར་ཏོ། ། ཕྱུང་ནས་ཀྱང་བཅོམ་ལྡན་འདས་ཀྱི་ཤར་ལ་སོགས་པའི་ཕྱོགས་སུ་རང་རང་གི་སྟན་ལ་གནས་པར་གྱུར་ཏེ། ཁ་ཅིག་ནི་རྣམ་པར་སྣང་མཛད་ཀྱི་གཟུགས་ཀྱིས་སོ། ། ཁ་ཅིག་ནི་ རིན་ཆེན་འབྱུང་ལྡན་གྱི་གཟུགས་ཀྱིས་སོ། ། ཁ་ཅིག་ནི་འོད་དཔག་ཏུ་མེད་པའི་གཟུགས་ཀྱིས་སོ། ། ཇི་སྲིད་གནོད་མཛེས་རྒྱལ་པོ་དང་། གཙུག་ཏོར་འཁོར་ལོས་སྒྱུར་བའི་རྒྱལ་པོའི་བར་གྱི་གཟུགས་ཀྱིས་སོ། ། དེ་ནས་བཅོམ་ལྡན་འདས་ཅུང་ཟད་ཅིག་ཅི་ཡང་མི་གསུང་བར་བཞུགས་ སོ། ། གང་གི་ཚེ་བྱང་ཆུབ་སེམས་དཔའ་དེ་དག་ཐམས་ཅད་ཀྱིས་དབྱངས་གཅིག་གིས་ཆེད་དུ་བརྗོད་ནས་སྨྲས་པ་ནི། ཨེ་མའོ་རྡོ་རྗེ་རིགས་ཆེན་པོ། ། རྡོ་རྗེ་ཕྲེང་བའི་དོན་སྟོན་མཛད། ། ཨེ་མའོ་རྡོ་རྗེ་ཐེག་གསལ་བ། ། ཆོས་ཀྱི་དབྱིངས་ཀྱི་དོན་སྟོན་མཛད། །
BOཅེས་ལན་གསུམ་བརྗོད་ནས་དེ་ དག་གིས་རྡོ་རྗེ་འཆང་ཆེན་པོ་ལ་ཕྱག་འཚལ་ནས་འདུག་པར་གྱུར་ཏོ། ། དེ་ནས་དེའི་ཚེ་སྐད་ཅིག་ཐང་ཅིག་ཡུད་ཙམ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་རྒྱ་ཆེན་པོ་འདུས་པ་དེ་དག་མཐོང་ནས་ཕྱག་ན་རྡོ་རྗེས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། ། བཅོམ་ལྡན་ཡེ་ཤེས་རྡོར་དབང་ཕྱུག ། གསང་བའི་པདྨའི་ནང་བཞུགས་པ། ། དམ་ཚིག་ཆེན་པོའི་རྣལ་འབྱོར་དབང་། ། ཐུགས་རྗེས་བདག་གི་ཚིག་གསོན་ཅིག ། བསྐལ་པ་བཟང་པོའི་སངས་རྒྱས་རྣམས། ། རྡོ་རྗེ་ཐེག་པ་མངོན་འདོད་པ། ། བྱང་ཆུབ་སེམས་དཔའ་སེམས་ དཔའ་ཆེ། ། འདི་དག་ལུས་ཀྱིས་ཕྱག་འཚལ་འཁོད། ། སྙིགས་མ་ལྔ་ཡི་དུས་ན་ནི། ། མ་འོངས་པ་ཡི་སེམས་ཅན་རྣམས། ། བརྩོན་འགྲུས་ཆུང་ཞིང་བསོད་ནམས་ཆུང་། ། ལྟ་བ་ངན་པ་མང་པོ་དང་། ། ཚེ་ཐུང་བ་ཡི་སེམས་ཅན་རྣམས། ། གོ་འཕང་མཆོག་ནི་ཐོབ་ཕྱིར་ཞུ། ། རྒྱལ་བའི་ སྲས་ནི་དེ་དག་དང་། ། མ་འོངས་པ་ཡི་སེམས་ཅན་རྣམས། ། འཁོར་བ་ལས་ནི་ཕ་རོལ་དུ། ། གང་གིས་མྱུར་དུ་ཐར་བར་འགྱུར། ། གཙོ་བོ་རྡོ་རྗེ་འཆང་ཆེན་ལ། ། འདི་ལྟར་བདག་ནི་གསོལ་བ་འདེབས། ། འགྲོ་བའི་གཙོ་བོ་ཁྱོད་དྲིན་གྱིས། །
BOདེ་ཉིད་མཆོག་ནི་བདག་གིས་འཚལ། ། སངས་རྒྱས་ཀུན་གྱི་གསང་བ་ཡི། ། རྒྱུད་རྣམས་ཀུན་གྱི་དོན་བསྡུས་པ། ། བླ་ན་མེད་པའི་རིམ་པ་གཉིས། ། རྡོ་རྗེ་ཕྲེང་བ་མངོན་རྟོགས་པ། ། ཅུང་ཟད་འདྲི་བར་འཚལ་ལགས་ཀྱིས། ། རྫོགས་པའི་རིམ་པའི་རྣལ་འབྱོར་ནི། ། ཁྱོད་ཀྱིས་བདག་ལ་བསྟན་དུ་གསོལ། ། དཔལ་ལྡན་ འདུས་པར་བརྡ་ཙམ་གང་། ། རྣལ་འབྱོར་བླ་ན་མེད་རྒྱུད་དུ། ། ཐུབ་པ་ཆེན་པོས་ཆོས་ཕུང་པོ། ། བརྒྱད་ཁྲི་དང་ནི་བཞི་སྟོང་ངོ་། ། དེ་སྐད་སྨྲས་ནས་མདུན་འདུག་སྟེ། ། ལུས་ཀྱིས་ཕྱག་ནི་བྱས་ནས་ཀྱང་། ། ཡེ་ཤེས་ཆེན་པོ་བཅོམ་ལྡན་འདས། ། རྡོ་རྗེ་སེམས་དཔའ་འགྲོ་བའི་བླ། ། རྡོ་རྗེ་ གསུམ་ནི་རོ་གཅིག་དོན། ། དེ་ཉིད་གསུམ་གྱི་གོ་འཕང་སྟོན། ། རྣལ་འབྱོར་རྒྱུད་ཀྱི་སྦས་པའི་དོན། ། བདག་ལ་བསྟན་པར་མཛད་དུ་གསོལ། ། རྡོ་རྗེ་ཕྲེང་བའི་མིང་ནི་ཅི། ། འདུས་པ་ཅི་ཞིག་སྟོང་བ་ཅི། ། ཐིག་ལེའི་དབྱེ་བ་དང་ནི་སྒྲ། ། གསང་བ་དང་ནི་དམ་ཚིག་དང་། ། སྡོམ་པ་དང་ནི་ སྒྲ་ཙམ་དང་། ། རླུང་གི་དེ་ཉིད་བདེ་ཆེན་ཅི། ། རྡོ་རྗེ་པདྨོ་མཉམ་སྦྱོར་དང་། ། སྔགས་ཀྱི་དེ་ཉིད་རྣལ་འབྱོར་པ། ། རླུང་རྣམས་དང་ནི་འཁོར་ལོ་དང་། །
BOགྲངས་ནི་ཅི་ཙམ་གང་དུ་གནས། ། རྣལ་འབྱོར་ལུས་ལ་རྩ་གང་ལགས། ། རྣམ་པ་སྣ་ཚོགས་སོགས་སྐད་ཅིག ། དགའ་བ་བཞི་དང་ རྫས་དང་ནི། ། སྔགས་དང་རླུང་དང་ཐིག་ལེ་དང་། ། ཡི་གེ་གསུམ་གང་དེ་ཉིད་གསུམ། ། དེ་བཞིན་སྣ་ཡི་རྩེ་མོ་གསུམ། ། ལུས་ཀྱི་སྟོང་ཉིད་ཡེ་ཤེས་དང་། ། ལྷ་རྣམས་ཀྱང་ནི་ཇི་ལྟར་གནས། ། དེ་རྣམས་ཀྱི་ནི་མིང་ནི་ཅི། ། འཆར་བ་དང་ནི་ནུབ་པ་ཅི། ། མགོན་ པོ་དགའ་རྣམས་ཇི་ལྟར་ནི། ། ཡང་དག་སྐྱེ་བ་གསལ་བར་གསུངས། ། སྔར་བཤད་རྩ་རྣམས་རྟག་ཏུ་ནི། ། རྡོ་རྗེའི་ལུས་ལ་ཇི་ལྟར་རྒྱུ། ། མཚམས་ཀྱི་རྩ་གསུམ་དེ་དག་ནི། ། གཙོ་བོ་རུ་ནི་ཇི་ལྟར་གསུངས། ། རླུང་རྣམས་ཇི་ལྟར་ལྡང་བ་དང་། ། གཙོ་བོ་དེ་རྣམས་ཇི་ལྟར་ཐིམ། ། དེ་ནི་མཁའ་འགྲོ་མར་སྡུད་པ། ། གཙོ་བོ་ཇི་ལྟར་ཡང་དག་འཐོབ། ། རྣམ་རྟོག་རླུང་ནི་རབ་བཅད་ནས། ། རྣམ་རྟོག་མེད་པར་ཇི་ལྟར་འཆར། ། རྩ་རྣམས་ཇི་ལྟར་ནུབ་པ་དང་། ། སྦྱོར་བ་དྲུག་གིས་ཇི་ལྟར་རྩོམ། ། དུས་ཀྱི་མཚན་ཉིད་ཇི་ལྟ་བུ། ། གསང་བའི་ཡང་ནི་འབྲས་བུ་ཅི། ། ཆོས་ཀྱི་དབྱིངས་ཀྱི་རྡོ་རྗེ་དང་། ། རིགས་ཀྱི་དབྱེ་བ་ཇི་ལྟ་བུ། ། ཕྱག་རྒྱའི་དབྱེ་བ་ཇི་ཙམ་ཞིག ། ཕུང་པོ་ལ་སོགས་སྐྱེ་མཆེད་དང་།
BO། ཕྱག་རྒྱ་ཆེན་པོའི་མིང་ནི་ཅི། ། རོ་རྣམས་ཀྱི་ནི་དབྱེ་བ་དང་། ། བདག་གི་སྒྲ་ནི་གང་ལ་གནས། ། སྟོང་ཉིད་དབྱེ་བ་བསྡུས་པ་དང་། ། སྟོང་པ་ཉིད་ནི་གང་ དུ་སྐྱེ། ། ཉིན་མོ་དང་ནི་མཚན་མོ་གང་། ། ཨཱ་ལི་ཀཱ་ལི་བརྡ་དང་ནི། ། མཚམས་ཀྱི་འཆར་བ་ཇི་ལྟ་བུ། ། རྒྱུད་གསུངས་སྔོན་ནི་བསྙེན་པ་སོགས། ། ཆོ་ག་ཉི་ཤུའི་ལས་དང་ནི། ། རྒྱུ་མཚན་ཅི་ཞིག་འབྲས་བུའང་ཅི། ། མཆོད་པའི་ཆོ་ག་ཇི་ལྟར་གསུངས། ། དེ་བཞིན་ལྷ་མོའི་རང་ བཞིན་དང་། ། ལྷ་མོའི་མིང་ནི་ཇི་ལྟར་གསུངས། ། རྒྱུད་དུ་ཐོག་མར་གསུངས་པ་ཡི། ། འདི་སྐད་བདག་སོགས་ཇི་ལྟ་བུ། ། འདི་སྐད་ཅེས་སོགས་དང་པོའི་དག ། དོན་རྒྱས་པར་ནི་ཇི་ལྟར་འགྱུར། ། ནང་གི་བདག་ཉིད་སྦྱིན་སྲེག་ཅི། ། བདུད་རྩི་ལྔ་ནི་བཟའ་བ་དང་། ། རྣལ་འབྱོར་ མ་ཚོགས་འདུས་པ་དང་། ། དེ་བཞིན་གསང་བའི་བརྡ་དང་ནི། ། སྐུ་གསུང་ཐུགས་ཀྱི་རྡོ་རྗེ་ཡི། ། དཀྱིལ་འཁོར་རྣམས་ནི་ཇི་ལྟར་གསུངས། ། སངས་རྒྱས་དམ་ཆོས་དགེ་འདུན་གྱི། ། མིང་རྣམས་བཤད་པ་ཇི་ལྟ་བུ། ། བླ་མ་སྟོན་པ་སློབ་དཔོན་དང་། ། རྡོ་རྗེ་འཆང་ནི་བཤད་པ་ཅི། ། སློབ་མའི་ཡོན་ཏན་གང་ལྡན་ན། ། རྣལ་འབྱོར་རྒྱུད་ཀྱི་སྣོད་དུ་འགྱུར། །
BOདེ་ཡི་སྤྱོད་པའི་དབྱེ་བ་དུ། ། དེ་ཡི་འབྲས་བུ་ཇི་ལྟ་བུ། ། ཞི་བ་རྒྱས་པ་དབང་དང་ནི། ། དེ་བཞིན་བསད་དང་བསྐྲད་པ་དང་། ། རེངས་པར་བྱེད་པ་ཉིད་དང་ནི། ། ཇི་ལྟར་བསྒྲུབ་པར་སྦྱོར་བ་དང་། ། བསྒྲུབ་བྱ་ལ་ནི་མངོན་སྤྱོད་དང་། ། སྔགས་ཀྱི་ཚིག་ནི་ཅི་ཞིག་དང་། ། མགོན་པོ་ཁྲོ་བོའི་བཟླས་པ་ཅི། ། དངོས་གྲུབ་བརྒྱད་ནི་ཐོབ་པ་དང་། ། མངོན་ཤེས་ལྔ་ནི་ཇི་ལྟར་ཐོབ། ། རྣལ་འབྱོར་རྣམས་ཀྱིས་དེ་ཉིད་མཐོང་། ། སྐད་ཅིག་གཅིག་ལ་མངོན་བྱང་ཆུབ། ། ལུས་བརྟན་ པ་དང་རྒས་པ་མེད། ། བཅུད་ཀྱིས་ལེན་གྱི་སྦྱོར་བ་དང་། ། གསེར་འགྱུར་སོགས་ཀྱི་སྦྱོར་བ་དང་། ། རྡོ་རྗེའི་ཕྱག་རྒྱ་དངོས་གྲུབ་ཆེ། ། འགྲོ་བའི་བླ་མ་ཇི་ལྟར་འཐོབ། ། ལུས་ཀྱི་རང་བཞིན་གཞལ་ཡས་ཁང་། ། དེ་ནི་རང་བཞིན་ཇི་ལྟ་བུ། ། འདིས་ནི་གནས་སོགས་ཇི་ལྟར་ གནས། ། ཐིམ་དང་ལོངས་སྤྱོད་བདག་པོ་དང་། ། རླུང་ནི་གང་གི་མཚན་ཉིད་ཅི། ། དེ་དག་འཇིག་པར་ཇི་ལྟར་འགྱུར། ། དེ་ལྟར་དྲི་ཚིག་རྫོགས་པ་དང་། ། ལག་ན་རྡོ་རྗེ་ཐལ་སྦྱར་ཏེ། ། འགྲོ་བའི་བླ་མའི་མདུན་འདུག་ནས། ། ལུས་ཀྱིས་ཕྱག་བྱས་དེ་ནས་ནི། ། གཙོ་བོས་རྡོ་ རྗེ་སེམས་དཔའ་ལ། །
BOལེགས་སོ་བྱ་བ་བྱིན་ནས་ནི། ། ཚངས་དབྱངས་ཟབ་མོ་སྙན་པ་ཡིས། ། འགྲོ་བའི་མགོན་པོས་གསུངས་པ་ཡིན། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་གསོལ་བ་གདབ་པ་དང་དྲི་བ་དང་། སློབ་མའི་ལས་ཉིད་ལ་སོགས་ པ་རྒྱུད་ཀྱི་གླེང་གཞིའི་ལེའུ་ཞེས་བྱ་བ་སྟེ་དང་པོའོ། ། ། ། དེ་ནས་བཅོམ་ལྡན་རྡོ་རྗེས་གསུངས། ། དེ་ཉིད་གསུང་གིས་འགྲོ་མགོན་གྱིས། ། ལག་ན་རྡོ་རྗེ་ལ་བོས་ཏེ། ། ཡང་དག་དྲིས་པ་ངེས་བཤད་པ། ། སྙིང་པོའི་དོན་ནི་དོན་བསྡུས་པ། ། དབྱེ་བར་དཀའ་བའི་དངོས་པོ་ ཀུན། ། ཁྱོད་ཀྱིས་དྲི་བར་བྱས་པ་རྣམས། ། རྡོ་རྗེ་དབང་ཕྱུག་གསང་ཆེན་བདག ། བྱ་བ་སྤྱོད་པའི་རྒྱུད་རྣམས་དང་། ། རྣལ་འབྱོར་རྒྱུད་ནི་གང་དུ་ཡང་། ། མཆོག་ཏུ་གསང་བ་མ་གསུངས་པ། ། རྡོ་རྗེའི་དབང་ཕྱུག་དེ་ཉིད་མཆོག ། དྲིས་པའི་ལན་རྣམས་གསལ་བོར་ནི། ། ངེས་ པར་ང་ཡིས་རབ་བཤད་བྱ། ། སྐད་ཅིག་གིས་ནི་སྤྱན་ཕྱེ་ལ། ། མཆོག་ཏུ་རྨད་བྱུང་སྟོན་མཛད་ལ། ། ཐུགས་རྗེས་ཁྱབ་པས་དེ་སྐད་གསུངས། ། དེ་ཕྱིར་ཁྱོད་ནི་ལེགས་པར་ཉོན། །
BOདེ་ནས་བཅོམ་ལྡན་འདས་ཐུགས་རྗེས་ཐུགས་བརླན་ཅིང་ཐེ་ཚོམ་ཐམས་ཅད་གཅོད་པ་ ལ་ཕྱག་ན་རྡོ་རྗེས་གསོལ་བ་བཏབ་སྟེ་མཆོག་ཏུ་གསང་བའི་ཚིག་གིས་བཤད་པ་གསུངས་པ་ནི། དབང་བསྐུར་བ་ནི་གཙོ་བོ་སྟེ། ། དངོས་གྲུབ་ཐམས་ཅད་རྟག་ཏུ་གནས། ། ང་ཡིས་ཇི་བཞིན་དོན་བཤད་ཀྱིས། ། དེ་ཕྱིར་ཐོག་མར་ཡང་དག་ཉོན། ། ཐོག་མར་སློབ་མ་གང་གི་ཚེ། ། བློ་ལྡན་ ཡང་དག་དབང་བསྐུར་ན། ། རྫོགས་པའི་རིམ་པའི་རྣལ་འབྱོར་ལ། ། དེ་ཡི་ཚེ་ན་སྣོད་དུ་འགྱུར། ། ཡང་དག་དབང་བསྐུར་གྱིས་དབེན་ན། ། སྒྲུབ་པོས་རྒྱུད་ཀྱི་དོན་ཤེས་ཀྱང་། ། སློབ་དཔོན་སློབ་མར་མཚུངས་པར་ནི། ། མི་བཟད་དམྱལ་བ་ཆེན་པོར་འགྲོ། ། དེ་ཕྱིར་ཡང་དག་བླ་མ་ ནི། ། རབ་ཏུ་གུས་པས་བསྙེན་བཀུར་བྱ། ། དབང་བསྐུར་ཐོབ་ཅིང་དེ་ཉིད་ཤེས། ། བློ་ལྡན་སྙིང་རྗེའི་བདག་ཉིད་ཅན། ། ཟབ་ཅིང་རྒྱ་ཆེ་དྲི་མ་མེད། ། གནོད་དང་འཚེ་བ་རྣམ་པར་སྤངས། ། སྐལ་བཟང་ལུས་ནི་རྫོགས་པ་དང་། ། མཚན་དང་དཔེ་བྱད་རྣམ་པར་བརྒྱན། ། ཆགས་པ་ཆེ་ ལ་གཅིག་ཏུ་དགའ། ། ཡུལ་ལ་ཕྲག་དོག་རྣམ་པར་སྤངས། ། བག་ཡོད་རྟག་ཏུ་དགའ་བ་དང་། ། རྣལ་འབྱོར་མ་ཡི་མངལ་ནས་སྐྱེས། ། རྡོ་རྗེ་ཐེག་པ་གཅིག་ཏུ་མོས། །
BOཐེག་པ་དམན་ལ་རྒྱབ་ཀྱིས་ཕྱོགས། ། དེ་ལ་སོགས་པའི་ཡོན་ཏན་ལྡན། ། བླ་མ་སློབ་མས་བསྙེན་ བཀུར་བྱ། ། ཡང་དག་བླ་མ་རྙེད་ནས་ནི། ། སློབ་མའི་རང་བཞིན་དྲི་མ་རྣམས། ། དག་དང་རྟོགས་དང་སྨིན་བྱས་ནས། ། ཇི་བཞིན་ཡེ་ཤེས་བཟང་དང་ལྡན། ། ཇི་ལྟར་རིན་ཆེན་བདར་བ་དང་། ། གསེར་ནི་བསྲེགས་དང་བཅད་པས་བརྟག ། དེ་བཞིན་དུ་ནི་སློབ་མ་ཡང་། ། ལོ་ནི་བཅུ་ གཉིས་བར་དུ་བརྟག ། དེ་ཕྱིར་ཕན་ཚུན་དེ་ལྟ་བུས། ། དུས་ཀུན་དུ་ནི་དེ་ལྟར་བརྟག ། གཞན་དུ་བགེགས་ནི་འབྱུང་འགྱུར་ཏེ། ། དངོས་གྲུབ་འཇོམས་ཤིང་སྡུག་བསྔལ་སྟེར། ། དུག་ནི་སྔགས་ཀྱིས་འཇོམས་པ་བཞིན། ། སྔགས་ཀྱི་དག་བྱས་བཅུད་ལེན་བྱེད། ། དེ་ཕྱིར་འབད་པ་ཐམས་ ཅད་ཀྱིས། ། སྔགས་ཀྱི་སློབ་མ་རྟོགས་བྱས་ནས། ། བླ་མ་དབང་བསྐུར་ལ་སོགས་ཀྱིས། ། དངོས་གྲུབ་ཕྱིར་ནི་ཇི་ལྟའི་དོན། ། དེ་ཕྱིར་དབང་བསྐུར་སློབ་མ་ནི། ། མ་དག་པ་ཡང་དག་པར་འགྱུར། ། རྡོ་རྗེ་སེམས་དཔའ་བདེ་ཆེན་ལ། ། དེ་ལ་ལག་ན་རྡོ་རྗེས་ཞུས། ། དབང་བསྐུར་ཇི་ལྟར་རྒྱུད་ དུ་ནི། ། གཙོ་བོ་རུ་ནི་གསུངས་པ་ལགས། ། རྡོ་རྗེ་སེམས་དཔའ་ཐམས་ཅད་མཁྱེན། ། ཐེ་ཚོམ་ཐམས་ཅད་གཅོད་མཛད་པ། ། དེ་ཁོ་ན་ཉིད་མཁྱེན་པས་ནི།
BO། ལག་ན་རྡོ་རྗེ་ལ་གསུངས་པ། ། དོན་དེ་ཇི་ལྟ་བ་བཞིན་དུ། ། ང་ཡིས་ཡང་དག་བཤད་ཀྱིས་ཉོན། ། དབང་བསྐུར་བ་ཡི་དབྱེ་བ་ ནི། ། དང་པོའི་དབང་ནི་གཙོ་བོ་སྟེ། ། གཉིས་པ་གསང་བའི་མིང་ཅན་ནོ། ། གསུམ་པ་ཀུན་ནས་སྦྱོར་བ་སྟེ། ། བཞི་པའི་དོན་ནི་དམ་པའོ། ། གཙོ་བོ་དབྱེ་བ་བཅུ་གཅིག་སྟེ། ། བཅུ་གཉིས་པ་ནི་གསང་བའོ། ། བཅུ་གསུམ་པ་ནི་ཡང་དག་སྦྱོར། ། བཅུ་བཞི་པ་ནི་དོན་དམ་སྟེ། ། དབང་ བསྐུར་རེ་རེས་རེའོ། ། རྣམ་པ་གསུམ་ནི་རྒྱུ་ཡི་དབང་། ། བཞི་པ་འབྲས་བུར་ཤེས་པར་བྱ། ། དགའ་བ་ལ་སོགས་རིམ་པ་ཡིས། ། ཐམས་ཅད་ལ་ནི་ང་ཡིས་ཁྱབ། ། མར་ངོ་ཡི་ནི་ཚེས་གསུམ་དང་། ། དེ་བཞིན་ཚེས་བཅུ་ཚེས་བཅུ་བཞི། ། ཡོན་ཏན་བཟང་ལྡན་སློབ་མ་ལ། ། བླ་མས་ ཆོ་ག་བཞིན་དབང་བསྐུར། ། ལུས་ཕྲ་ལོ་ནི་བཅུ་དྲུག་ལོན། ། གཟུགས་དང་སྐལ་བ་དག་གིས་བརྒྱན། ། སྔོ་བསངས་མིག་ནི་ཡངས་པ་དང་། ། སྙིང་རྗེའི་བསམ་ལྡན་ཡང་དག་མོས། ། ངག་སྙན་དབང་བསྐུར་ཐོབ་པ་དང་། ། རྣལ་འབྱོར་རྒྱུད་ལ་ལྷག་པར་མོས། ། ཡང་ན་ལོ་ནི་ཉི་ཤུ་ ལོན། ། ཉམས་དགའ་བདེ་བར་བྱེད་པ་སྟེ། ། དེ་ལས་ལྷག་པར་སྐལ་མེད་འགྱུར། ། དེ་ནི་དངོས་གྲུབ་རིང་དུ་བྱེད། །
BOལྷག་པར་འཇམ་པའི་བུ་མོ་ལ། ། ཆུང་མའམ་ཡང་ན་སྲིང་མོའམ། ། ཡང་ན་བུ་མོའམ་དད་པ་ཡིས། ། བླ་མ་ལ་ནི་དབུལ་བར་བྱ། ། གསེར་དང་རིན་ཆེན་གོས་ དང་ནི། ། མུ་ཏིག་ཕྲེང་བ་སྣ་ཚོགས་པས། ། མཆོད་ནས་བླ་མའི་མདུན་འདུག་ནས། ། སློབ་མ་ཡིས་ནི་འདི་སྐད་བརྗོད། ། དེང་ནས་བརྩམས་ཏེ་བདག་བྲན་དུ། ། གཙོ་བོས་བདག་ནི་མཆོད་པ་བཞེས། ། དེ་ལྟའི་རྣམ་པས་མཉེས་ནས་ནི། ། བདག་ཉིད་ཀུན་གྱིས་བླ་མ་མཆོད། ། བླ་མའི་ངོ་བོ་རྡོ་རྗེ་འཆང་། ། དེ་ཕྱིར་ཡང་དག་བླ་མ་མཆོད། ། དེ་ནས་བཅོམ་ལྡན་ཡུམ་ཕྱག་རྒྱ། ། ཡང་དག་མཆོད་ནས་བསྟེན་པར་བྱ། ། བསྟེན་པ་ལས་ནི་གང་བྱུང་བ། ། ལྟུང་བ་སྐལ་བཟང་ཁ་ལ་ནི། ། སྦོམ་པོ་ཐ་ལྟག་སྦྱོར་བ་ཡིས། ། ཡང་དག་པར་ནི་ལོངས་ སྤྱད་བྱ། ། དེ་ལས་སྐྱེས་པའི་ཡེ་ཤེས་ནི། ། བདེ་བ་ཆེན་པོ་རང་རིག་པ། ། དབྱུང་རྔུབ་པ་ནི་རོ་གཅིག་ཅིང་། ། རབ་ཏུ་དགའ་བས་མཆོད་པར་བྱ། ། ཧཱུྃ་ཕཊ་སྔགས་ཀྱི་ནོར་བུའི་སྒོར། ། བཀོད་དེ་རྡོ་རྗེ་རབ་བསྐྱོད་བྱ། ། དགའ་རྣམས་ཇི་ལྟ་བ་བཞིན་དུ། ། སྐད་ཅིག་དེ་ལ་སྐྱེས་གྱུར་པ། ། དགའ་བའི་སེམས་ཀྱིས་བདེ་བ་ལ། ། རྡོ་རྗེ་བཙུན་མོའི་ཁ་ནས་བརྗོད། ། དེ་ཡང་སློབ་མའི་ལག་ཏུ་ནི། །
BOགཏད་ནས་གསལ་བར་འདི་སྐད་བརྗོད། ། ཇི་ལྟར་པད་མཆོད་བྱ་བ་ནི། ། བྱོས་ལ་ཨེ་བྃ་མཆོག་གི་གདོང་། ། གང་ཕྱིར་རྡོ་རྗེ་དབྱིངས་དབང་ཕྱུག ། རང་ཉིད་འདི་ཡི་སྙིང་ལ་ཞུགས། ། ཐབས་གཞན་གྱིས་ནི་སངས་རྒྱས་ཉིད། ། རྣལ་འབྱོར་པ་ཡིས་ཐོབ་མི་འགྱུར། ། ཤིན་ཏུ་ཕྲ་བའི་དངོས་དེ་ཡང་། ། བདེ་ཆེན་རྣལ་འབྱོར་པ་ཡིས་རྟོགས། ། རབ་ཏུ་འབད་པས་བསྟེན་པར་བགྱིས། ། ལྷན་ཅིག་སྐྱེས་དགའི་མཚན་ཉིད་ནི། ། དབང་བསྐུར་གཙོ་བོར་གྱུར་པས་ན། ། ཐམས་ ཅད་ཇི་ལྟ་བ་བཞིན་ཐོབ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སློབ་དཔོན་དང་སློབ་མ་བརྟག་པ་དང་དབང་བསྐུར་བའི་ལེའུ་སྟེ་གཉིས་པའོ། ། ། ། དེ་ནས་དེ་ཉིད་གཞན་ཡང་ཉོན། ། རྡོ་རྗེ་ཕྲེང་བའི་དོན་གསལ་བ། ། རྒྱུད་རྣམས་ཀུན་དུ་སྦས་པ་ནི། ། དྲི་བ་གཞན་ལ་བརྗོད་མི་བྱ། ། རྡོ་རྗེ་ཕྲེང་བ་ཞེས་བྱའི་མིང་། ། དེ་ཡང་ས་ནི་བཅུ་གསུམ་པ། ། དགའ་བ་བཞི་ཡི་དོན་གྱི་གནས། ། ཐམས་ཅད་སྟོང་པ་དགའ་བ་སྟེ། ། ངག་གི་སྤྱོད་ཡུལ་རྣམས་ལས་འདས། ། གཉིས་པ་ཐམས་ཅད་རྣམ་པར་སྤངས། ། སྐལ་བཟང་རྣལ་འབྱོར་ཀུན་གྱི་ མཐའ། ། རྣལ་འབྱོར་མ་ཡི་ངག་གི་ཡུལ། །
BOསྟོང་ཉིད་ཡེ་ཤེས་རྡོ་རྗེ་དང་། ། རྡོ་རྗེ་ཕྲེང་བ་ཞེས་བཤད་དོ། ། སྟོང་ཉིད་རྡོ་རྗེ་གསང་པདྨ། ། རྩ་ནི་རྡོ་རྗེ་དབྱིངས་དབང་ཕྱུག ། ཡེ་ཤེས་མཆོག་ཏུ་བདེ་བ་ཆེ། ། ལྷན་ཅིག་སྐྱེས་དགའ་རྨད་བྱུང་བ། ། རྡོ་རྗེ་དེ་ཡང་རྣམ་རྟོག་རྣམས། ། འབིགས་པར་བྱེད་པར་ཡོངས་སུ་གྲགས། ། ཕྲེང་བ་དེ་རྣམས་ཀྱི་ཡང་རྒྱུན། ། བྱང་ཆུབ་སེམས་ཀྱི་རྡོ་རྗེ་རྣམས། ། མི་ཕྱེད་པས་ནི་རྡོ་རྗེར་གསུངས། ། རྒྱུད་རྣམས་ཀུན་དུ་སྦས་པ་ནི། ། གང་ཡང་རུང་བས་བརྗོད་མི་བྱ། ། དེ་ནི་དབུགས་སུ་ཡོངས་སུ་གྲགས། ། ཕྲེང་བ་རྒྱུན་ནི་མི་འཆད་པར། ། དགའ་བ་རབ་འབབ་བདག་ཉིད་ཀྱིས། ། རྣམ་རྟོག་རླུང་ཀུན་འབིགས་པར་བྱེད། ། རླུང་ལ་འབིགས་པར་མི་ནུས་སོ། ། ཉིན་དང་མཚན་མོ་རྟག་ཏུ་ནི། ། བརྒྱ་དང་བརྒྱད་ལྷག་གསལ་བར་ཡང་། ། རྣམ་རྟོག་རང་བཞིན་རླུང་རྣམས་ནི། ། འཆར་བ་དང་ནི་འཇོམས་པ་དག ། ཇི་ལྟ་ བ་བཞིན་རབ་དབྱེ་ཡིས། ། རླུང་རྣམས་ཀྱི་ནི་མིང་ཉོན་ཅིག ། བཏང་བཟུང་དང་ནི་དུང་ཕྱུར་དང་། ། མྱོས་པ་དང་ནི་བློ་ངན་དང་། ། བསིལ་བྱེད་དང་ནི་གཡའ་བ་དང་། ། ངར་སྣབས་དང་ནི་སྟ་རེ་དང་། ། གཟེགས་པ་ཆུ་སྲིན་ཛ་ཤ་དང་། ། རྣམ་པར་གཙིགས་དང་མྱོས་པའི་དུས། །
BOའདོད་མྱོས་ཆུ་བ་ཆུ་སྲིན་དང་། ། སྣ་ཚོགས་སྐྱེད་དང་འདུད་པ་དང་། ། སྙེམས་དང་རྔ་དང་སྒྲ་སྒྲོགས་དང་། ། རླུང་ལྷ་དང་ནི་གནད་འབིགས་དང་། ། མེ་དང་དུས་དང་ཅི་བགྱི་དང་། ། རྡོ་རྗེ་མཆོག་སྦྱིན་ཙུ་ཏ་དང་། ། སྦྲ་མ་དང་ནི་ཟླ་བའི་འོད། ། ཀམ་པོ་ཛ་དང་རལ་པ་ཅན། ། ཡུངས་ ནག་རབ་བཀྲམ་དུས་འགུགས་དང་། ། སྡིག་པ་དང་ནི་གཡོན་ཅན་སྟེན། ། གྲིམས་མོ་དང་ནི་མགྲིན་པ་དང་། ། གུན་སེལ་མཆོག་སྟེར་སྨྱོ་བྱེད་དང་། ། ང་རྒྱལ་མཚོ་དང་ཚོགས་བདག་དང་། ། རྩངས་པ་དང་ནི་ས་ཡི་བློ། ། ཐེག་པ་བཟང་དང་མཆོག་ཏུ་སྐྱེས། ། དྲི་མེད་ཕྲུ་གུ་ཉི་མ་ དང་། ། གསལ་བྱེད་དང་ནི་ཉི་མ་གནོན། ། སྟོབས་བཞིན་ང་རོ་དང་ནི་དུས། ། སྡོམ་པ་དང་ནི་མཆོངས་ནས་འགྲོ། ། སྦྲང་མ་ཁྱི་དང་མཚན་མ་དང་། ། ཐོད་དང་སྒུར་པོ་དྲང་པོ་དང་། ། ས་དང་ས་ལ་འགྲོ་མ་དང་། ། བྲམ་ཟེ་དང་ནི་སྣ་འགྱུར་གནས། ། མ་མོའི་རིགས་དང་ལྕེ་བསྐྱོད་ པ། ། མི་སྨྲ་དང་ནི་རྔ་སྒྲའི་སྤྲིན། ། དགའ་བར་བྱེད་དང་མིག་ཡངས་དང་། ། དྲི་མེད་འོད་སྲུང་ནེ་ཙོ་དང་། ། སྣ་ཚོགས་མཆུ་དང་མིག་མཉམ་དང་། ། མཛེས་དང་ཆོས་ཀྱི་དབྱིག་པ་དང་། ། འགྲོ་ཀུན་སྙིང་སྟོབས་བརྟན་པ་དང་། །
BOཟ་ཕོད་བོང་བུ་སྙོམ་ལས་དང་། ། ཁ་གདངས་ སྒྲ་ཆེན་སྟོབས་ཀྱིས་རྩེ། ། རྩ་བྲན་དབང་བྱེད་གཡོ་སྒྱུ་ཅན། ། གཙོ་བོ་ཆེ་དང་རྟག་ཏུ་དགའ། ། གློག་ཕྲེང་དང་ནི་དགའ་བྱེད་དང་། ། དབུགས་དབྱུང་ར་ག་ལྕེ་དང་ནི། ། བདེ་མཆོག་ཨུ་དུམ་བཱ་ར་རྨོངས། ། པདྨའི་དྲ་བ་པདྨ་བསྐོར། ། དགྲ་སྟ་རྨ་བྱ་རླུང་དང་ནི། ། རྡོ་རྗེ་ དབང་ཕྱུག་རླུང་གི་མིང་། ། དེ་ལྟར་ང་ཡིས་བསྟན་པ་ཡིན། ། བཅོམ་ལྡན་དྲིས་པའི་རླུང་རྣམས་ཀྱི། ། གནས་རྣམས་ཀྱི་ནི་དབྱེ་བ་ཡིས། ། དེ་དག་གང་ལས་ལྡང་བ་དང་། ། མཆེད་པ་རྣམས་སུ་བགྱིད་པ་ལགས། ། བཅོམ་ལྡན་རྡོ་རྗེ་ཅན་གྱིས་གསུངས། ། རླུང་གི་ཁམས་ཀྱི་ མཚན་ཉིད་ནི། ། འཁོར་ལོ་དྲུག་ལ་ཁྱབ་པའི་རླུང་། ། ཆོས་ཀྱི་འཁོར་ལོ་རྟག་ཏུ་གནས། ། སྲོག་ཅེས་བྱ་བས་འགྲོ་ལ་ཁྱབ། ། རྣམ་རྟོག་མེད་པ་མཚན་ཕྱེད་ན། ། ནམ་མཁའ་མཆོག་ལས་ཤར་ནས་ནི། ། རླུང་གི་རང་བཞིན་འཇོམས་པར་བྱེད། ། རླུང་དེ་དགུ་ཡི་རྣམ་པར་ རྒྱུ། ། ཆོས་ཀྱི་འཁོར་ལོའི་ཆ་ན་གནས། ། མཚན་ཕྱེད་དུས་ནས་བརྩམས་ནས་ནི། ། འཁོར་ལོ་དྲུག་ལ་དགུ་བདག་ཉིད། ། ཉི་མ་ཕྱེད་ཀྱི་མཐའ་རུ་ནི། ། རླུང་རྣམས་ཀྱང་ནི་ལྡང་བར་བྱེད། ། ཉི་མ་ཕྱེད་ནས་བརྩམས་ནས་ནི། །
BOའཁོར་ལོ་དྲུག་ལས་དགུ་བདག་ཉིད། ། མཚན་ཕྱེད་ཀྱི་ནི་དུས་ཀྱི་མཐར། ། རླུང་རྣམས་གསལ་བར་རྒྱུ་བ་ན། ། དེ་ཉིད་གནས་ཀྱི་དབྱེ་བ་ཡིས། ། སྣ་ཚོགས་པ་ཡི་རྟོག་པར་འགྲོ། ། རྣམ་པར་རྟོག་པ་རྣམས་ཕྱེ་ནས། ། དེ་དག་མིང་རྣམས་བཤད་པར་བྱ། ། འདོད་ཆགས་ཞེ་སྡང་གཏི་མུག་དང་། ། རྒྱགས་དང་ང་ རྒྱལ་མངོན་པར་ཞེན། ། ཕྲག་དོག་ཁྲོ་དང་སེར་སྣ་དང་། ། གཡོ་དང་སྒྱུ་ལ་ཆ་ལུགས་ངན། ། བློ་རྒོད་བརྐམ་ཆགས་གཉིད་དང་ནི། ། ཐེ་ཚོམ་དང་ནི་ངར་འཛིན་དང་། ། དགའ་དང་ཆགས་བྲལ་དྲེགས་པ་དང་། ། འཆབ་དང་སྲེད་དང་བག་ཆགས་དང་། ། སྒྱུ་དང་རྨོངས་དང་འདོད་ཆེན་ དང་། ། རྩོད་དང་རྩེ་འཇོ་སྤྱི་བརྟོལ་དང་། ། ཚུལ་འཆོས་དྲེགས་དང་ཀུན་ནས་གདུངས། ། རྣམ་འགྱུར་མ་ཞི་ཤེས་བཞིན་མེད། ། བེམས་པོ་ལོག་པའི་ང་རྒྱལ་དང་། ། འགྱོད་དང་ཁྲེལ་ནི་མེད་པ་དང་། ། གུས་པ་མེད་དང་ཆེས་པ་མེད། ། བློ་དམན་ངོ་ཚ་མེད་དང་འཆིང་། ། ངོ་ཚ་ཤེས་དང་ངོ་ཚ་དང་། ། མི་སྟེར་བ་དང་མྱ་ངན་དང་། ། ཡིད་གཉིས་དང་ནི་རློམ་སེམས་མེད། ། བསྒྲིམས་དང་ཐེ་ཚོམ་ངལ་བ་དང་། ། དབང་དང་འཁྲུལ་པའི་སྙིང་སྟོབས་དང་། ། སྙམ་སེམས་པ་དང་བརྒྱལ་བ་དང་། ། ཐིམ་པ་དང་ནི་མི་སྲུན་དང་། །
BOགྱ་གྱུ་སྙོམས་དང་མྱོས་ པ་དང་། ། རིག་བྱེད་མིན་དང་བག་ཡོད་དང་། ། གནས་ངན་ལེན་དང་ཉམ་ཆུང་ཉིད། ། ཡིད་མི་བདེ་དང་ལྷག་པར་རྟོག ། སྐྲག་དང་རྨུགས་དང་གཉིད་དང་ནི། ། བརྐམ་ཆགས་རོལ་པ་ཁྲུང་ཁྲུང་དང་། ། འཚེ་བ་ལེ་ལོ་ཡོན་པོ་ཉིད། ། བསམ་དང་སྤྱོད་དང་ཞུམ་པ་དང་། ། ཀུན་རྫོབ་དེ་ཉིད་དོན་ཡོད་དང་། ། སྟེར་དང་དགའ་བའི་འདོད་པ་དང་། ། འཇིགས་དང་འདར་དང་ཕྲ་བདག་ཉིད། ། གསལ་དང་རྣམ་གསལ་ལྷད་འཇུག་དང་། ། འབྲེལ་དང་རྟག་པའི་དེ་ཉིད་དང་། ། རུས་སྦལ་ངོམས་མེད་གནོད་པ་དང་། ། མི་གསལ་བ་དང་ཡིད་དུ་འོང་། ། གནས་ མེད་མང་དུ་སྨྲ་བ་དང་། ། བདག་ཉིད་སྐྱེས་བུ་ཉིད་དང་ནི། ། ཡ་མཚན་དགའ་དང་སྐྱེ་བོ་ངན། ། དམན་པའི་དེ་ཉིད་སྡུག་བསྔལ་གསུམ། ། འཁོར་བ་ལ་ནི་ཆགས་པ་དང་། ། རྟག་ཏུ་བརྒྱ་དང་བརྒྱད་ལྷག་པ། ། ཉིན་དང་མཚན་མོར་རྟག་ཏུ་ནི། ། རླུང་གི་རང་བཞིན་རྒྱུ་བ་ཡིན། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྡོ་རྗེ་ཕྲེང་བའི་ཚིག་དབྱེ་བའི་ལེའུ་སྟེ་གསུམ་པའོ། ། ། ། དེ་ནས་རྡོ་རྗེ་གསུམ་ཉི་མ། ། གསང་བའི་པདྨ་ཁ་འབྱེད་པ། ། བདེ་བ་ཆེན་པོའི་གོ་འཕང་བཞུགས། །
BOའདུས་པའི་མཆོག་དོན་རབ་གསུངས་པ། ། འདུས་པ་འདྲེས་པ་ཞེས་ནི་བཤད། ། འདྲེས་པ་ང་ཡིས་ཁྱོད་ལ་བཤད། ། འཁོར་ལོ་བཞི་དང་ཐ་མི་དད། ། སྔགས་ནི་ལྷན་ཅིག་ཆོ་ག་བཞིན། ། དཔའ་བོ་རྣལ་འབྱོར་མ་སྦྱོར་བ། ། གང་ཚེ་གསང་བའི་རྩ་གཉིས་ནི། ། ཡང་དག་སྦྱོར་བ་རེག་གྱུར་པ། ། དེ་ཚེ་ནམ་མཁའ་རྣམ་ རྒྱས་ཉིད། ། ནམ་མཁའ་ལས་ནི་སྐྱེས་པའི་རླུང་། ། དེ་ཡིས་མེ་ནི་རབ་ཏུ་འབར། ། རྩ་ནི་སྟོང་ཕྲག་བདུན་ཅུ་གཉིས། ། རྩ་རྣམས་རབ་སད་གཟི་བརྗིད་ཀྱིས། ། བདེ་བ་ཀུན་གྱི་གོ་འཕང་མཆོག ། བདེ་བ་ཆེན་པོའི་འཁོར་ལོར་ཁྱབ། ། བདེ་བ་ཆེན་པོའི་བྱང་ཆུབ་ སེམས། ། རྣམ་པར་ཞུ་ནས་རྩར་གནས་པར། ། རྡོར་གསུམ་རང་བཞིན་གཅིག་འགྱུར་ཕྱིར། ། ཁམས་རྣམས་རོ་གཅིག་གྱུར་པ་དང་། ། ཕུང་པོ་རྣམས་ནི་ཡོངས་ཟད་དང་། ། ངལ་བསོ་བ་ལ་རླུང་རྣམས་ནི། ། དགའ་བ་རྣམས་ནི་ཡང་དག་སྐྱེ། ། དེ་ནས་བྱང་ཆུབ་སེམས་ཀྱང་ནི། ། གནས་ཀུན་ནས་ནི་ཞུ་གྱུར་ནས། ། ངོ་བོ་གཅིག་ཏུ་གྱུར་པ་དང་། ། རྩ་ནི་གཅིག་གི་འབྲས་བུ་ནི། ། རོ་གཅིག་ཏུ་ནི་གྱུར་པ་ལ། ། འདྲེས་པ་ཞེས་ནི་དེ་ལ་གསུངས། ། ཕུང་པོ་ཁམས་དང་དབང་པོ་དང་། ། ཡུལ་རྣམས་སུ་ནི་སྦས་པ་རྣམས། །
BOརྣམ་རྟོག་ཀུན་ནས་ཟད་པ་ལས། ། བདེ་བ་ཆེན་པོ་ཡང་དག་སྐྱེ། ། རོ་གཅིག་པ་ནི་ངལ་བསོ་བ། ། དེ་ནི་འདུས་པ་འདྲེས་པ་སྟེ། ། དེ་ཁོ་ན་ཉིད་མཆོག་གསང་བ། ། རྡོ་རྗེ་སེམས་དཔའི་གོ་འཕང་གསུངས། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ འདུས་པའི་ཚིག་ལྷག་པར་བཤད་པའི་ལེའུ་སྟེ་བཞི་པའོ། ། ། ། དེ་ནས་གཞན་ཡང་དེ་ཉིད་ཉོན། ། སྟོང་ཉིད་དོན་ནི་རབ་རྒྱས་པ། ། སྟོང་པ་ཉིད་ནི་ཆོས་རྣམས་ཀུན། ། ནང་དུ་ཁྱབ་པའང་ཆོས་ཉིད་དེ། ། དེ་ཉིད་ཡང་དག་ཤེས་པ་ནི། ། དེ་བཞིན་ཉིད་དང་རྣམ་མི་རྟོག ། བདག་དང་གང་ཟག་ཆོས་རྣམས་ནི། ། བདག་མེད་རང་བཞིན་གཅིག་པ་ཉིད། ། སྟོང་པ་ཉིད་དང་རང་རིག་དང་། ། ཐམས་ཅད་བདག་ཉིད་རྟག་བཞུགས་པ། ། རྣལ་འབྱོར་གཅིག་པུས་རྟོགས་པ་སྟེ། ། རྟོག་གེ་པ་ཡི་སྤྱོད་ཡུལ་མིན། ། ཆོས་རྣམས་ཐམས་ཅད་མདོར་བསྡུས་ པ། ། འཁོར་ལོ་དྲུག་ཏུ་རྣམ་པར་བརྗོད། ། དེ་ནས་ནང་དུའང་ཁྱབ་པ་ནི། ། རྩ་ཡི་འཁོར་ལོ་ལེགས་རྒྱས་པ། ། དེ་ནི་ནམ་མཁའ་ཁྱབ་ཅིང་ཕྲ། ། ཁྱབ་བྱེད་ཞི་བའི་མཚན་ཉིད་ཅན། ། དམིགས་པ་མེད་ཅིང་རྟེན་པ་མེད། ། གཟུགས་མེད་ཉོན་མོངས་མེད་པ་དང་། ། རྣམ་པར་ མི་རྟོག་མཆོག་ཏུ་ཞི། །
BOརང་བཞིན་མེད་ཅིང་དྲི་མ་མེད། ། གཉིས་སུ་མེད་ཅིང་བྱ་བ་མེད། ། གཟུང་དང་འཛིན་པ་རྣམ་པར་སྤངས། ། དུས་དང་དཔེ་ལས་འདས་པ་སྟེ། ། ངག་གི་ལམ་གྱི་སྤྱོད་ཡུལ་བྲལ། ། ཆོས་ཉིད་ཆོས་ནི་ཐམས་ཅད་ཀྱིས། ། ཇི་ལྟ་བ་བཞིན་མངོན་པར་ བརྗོད། ། དངོས་དང་དངོས་མེད་རྣམ་པར་བྲལ། ། དགེ་དང་མི་དགེའི་སྲིད་ལས་གྲོལ། ། དེ་ནི་ཀུན་ནས་བསྒྲིབས་པ་མེད། ། ནམ་མཁའ་ལྟ་བུར་མཆོག་ཏུ་ཁྱབ། ། ཆོས་རྣམས་ཇི་ལྟ་བ་བཞིན་སྐྱེ། ། དེ་ནི་དེ་བཞིན་ཉིད་ཅེས་བརྗོད། ། གང་ནས་ཀྱང་ནི་མ་འོངས་ཤིང་། ། གང་དུ་ཡང་ ནི་འགྲོ་བ་མེད། ། རྨོངས་དང་འཁྲུལ་པ་གཅིག་པུ་ལས། ། དེ་ནི་རབ་ཏུ་སྤྲོ་བར་སྣང་། ། བདེ་བ་དང་ནི་སྡུག་བསྔལ་སྤངས། ། འདོད་ཆགས་ཞེ་སྡང་སོགས་མི་གོས། ། འཁྲུལ་དང་རྣམ་པར་འཁྲུལ་པར་འབྲེལ། ། རྟོག་པ་དང་བྲལ་དྲི་མ་མེད། ། བདག་དང་སྲོག་དང་སྐྱེ་བ་ པོ། ། སྐྱེས་བུ་དེ་བཞིན་གང་ཟག་དང་། ། ཤེད་ལས་སྐྱེས་དང་ཤེད་བུ་དང་། ། བྱེད་པ་པོ་དང་ཚོར་བ་པོ། ། ཤེས་པ་པོ་དང་མཐོང་བ་པོ། ། སྒྲོ་འདོགས་པ་ཡི་རྣམ་པར་སྤངས། ། ཕུང་པོ་སྐྱེ་མཆེད་ཁམས་ལ་སོགས། ། རྣམ་ཤེས་དང་ནི་གཟུང་བ་ཡིས། ། སྒྲིབ་པ་མེད་ ཅིང་མཆོག་ཏུ་ཕྲ། །
BOནམ་མཁའ་མཆོག་ལ་ཡང་དག་གནས། ། དེ་ལྟར་མ་ལུས་སྟོང་ཉིད་དོན། ། བརྗོད་དང་བརྗོད་བྱའི་དོན་དང་བྲལ། ། མིང་ཙམ་གཅིག་པུ་ཁོ་ན་ཡང་། ། རང་བྱུང་མཆོག་ཏུ་རྨད་བྱུང་བའོ། ། བརྗོད་པ་ཡི་ནི་ཀུན་རྫོབ་ཏུ། ། དེ་ནི་ང་ཡིས་ཡང་དག་བཤད། ། རང་རིག་ཤིན་ཏུ་ཕྲ་བའི་ཕྱིར། ། དེ་ཁོ་ན་ཉིད་མཐོང་བ་མེད། ། བདག་ཉིད་རང་གི་ངོ་བོར་རིག ། ཕ་རོལ་གཞན་གྱི་སྤྱོད་ཡུལ་མིན། ། དེ་ནི་རང་རིག་པར་བཤད་དོ། ། ཆོས་ཀུན་གནས་ནི་ཞི་བའོ། ། རྣམ་རྟོག་གིས་འཁྲུལ་རྟོག་གེ་གང་། ། མི་ཤེས་པ་ཡི་རྨོངས་པ་རྣམས། ། དོན་དམ་པར་ནི་མི་ཤེས་ཤིང་། ། ཀུན་རྫོབ་དགྲ་ཡི་མཛོད་འཛིན་པ། ། ཡེ་ཤེས་མཆོག་ནི་མི་ཤེས་ཤིང་། ། རྟོག་གེ་སྟོང་ཉིད་སྨྲ་བར་བྱེད། ། རྣལ་འབྱོར་བསམ་གཏན་རྣལ་འབྱོར་པས། ། དེ་ནི་མཆོག་ཏུ་ཕྲ་བར་སྤྱོད། ། སྟོང་ཉིད་ཡང་དག་ནམ་མཁའ་ཆེ། ། ཤེས་དང་ ཤེས་བྱ་རྣམ་པར་སྤངས། ། རྟོག་པའི་རྣམ་པ་རྣམས་དང་བྲལ། ། སྟོང་པ་ཉིད་ཀྱི་འཁོར་ལོར་བརྗོད། ། ཕུང་པོ་ལྔ་ཡི་བདག་ཉིད་ལུས། ། འཁོར་ལོ་དྲུག་གི་ཕུག་ནང་ན། ། ཟླ་བ་ཕྱེད་པའི་ཆ་ལྟ་བུ། ། སྟོང་ཉིད་རླུང་གི་འཁོར་ལོར་གནས། ། ཕྱེད་མིན་གང་བ་མེད་པ་ དང་། །
BOཇི་ལྟར་བག་ཆགས་ཆུ་ཟླ་བཞིན། ། རླུང་གི་འཁོར་ལོ་སྲོག་ཏུ་བཤད། ། མཚན་ཕྱེད་སྐད་ཅིག་མ་ལ་འཆར། ། དེ་ལྟར་ཡང་དག་བསྒོམ་པ་ནི། ། འདི་ནི་སྟོང་ཉིད་སྒོམ་བྱེད་པའོ། ། དོན་དམ་གཉིས་མེད་རྣལ་འབྱོར་གྱིས། ། ཡང་ན་རྒྱུ་འབྲས་སྦྱོར་ བའི་ཕྱིར། ། དེ་ནི་རང་བཞིན་འགྲུབ་པར་བསྒོམ། ། དོན་དམ་རང་གི་ངོ་བོར་ནི། ། ཀུན་རྫོབ་ཀྱང་ནི་དེ་བཞིན་དུ། ། བསྒོམས་པས་འཁོར་བ་འཇོམས་པར་འགྱུར། ། ཇི་ལྟར་ཏིལ་ལ་ཏིལ་མར་ནི། ། གནས་པ་ཉིད་ལ་མཐོང་མི་འགྱུར། ། དེ་བཞིན་ལུས་ལ་སྟོང་པ་ཉིད། ། གནས་ཀྱང་བསྒྲིབས་པས་མཐོང་བ་མེད། ། བླ་མའི་ཞལ་ལས་འདི་ཤེས་པར། ། ཡང་དག་རིག་པས་ཀུན་རྫོབ་སྤངས། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྟོང་པ་ཉིད་ཀྱི་དོན་བསྟན་པའི་ལེའུ་སྟེ་ལྔ་པའོ། ། ། ། དེ་ནས་གཞན་ཡང་བཤད་ ཀྱིས་ཉོན། ། ཐིག་ལེའི་དབྱེ་བ་བླ་ན་མེད། ། འཇིག་རྟེན་ཐིག་ལེ་དབྱེ་བས་དབེན། ། འཁོར་བར་ཡང་དང་ཡང་དུ་འཁོར། ། མཛོད་སྤུའི་དབུས་ན་གནས་པ་ནི། ། ཐིག་ལེ་རླུང་དུ་ཡང་དག་བཤད། ། སྔགས་ཀྱི་དེ་ཉིད་ཀྱིས་ནི་འབྱེད། ། རྣལ་འབྱོར་མདུད་པ་བཀྲོལ་ནས་ནི། ། རླུང་ གི་དེ་ཉིད་རིག་པ་དེ། །
BOམཆོག་ཏུ་འབྱེད་པའི་སྦྱོར་བ་ཡིས། ། སྦྱོར་བ་དེ་ཡང་མི་ཤེས་པར། ། རླུང་དང་སྔགས་ཀྱི་རྣལ་འབྱོར་གྱིས། ། བརྗོད་དང་བརྗོད་བྱའི་དཔེ་ལས་འདས། ། མིག་གསལ་ལོག་པར་མཐོང་རྣམས་ཀྱིས། ། བསམ་གཏན་བསྒོམ་བྱ་དང་བྲལ་བའི། ། སངས་རྒྱས་རྣམས་ནི་ཐོབ་པ་དཀའ། ། རྣལ་འབྱོར་མ་ཡི་དྲིན་གྱིས་ནི། ། ཞལ་ནས་ཞལ་དུ་བརྒྱུད་ནས་གནས། ། བཅོམ་ལྡན་བདེ་བ་ཆེན་པོ་ལ། ། རྡོ་རྗེ་སེམས་དཔས་སླར་ཞུས་པ། ། འགྲོ་བའི་མགོན་གྱིས་བསྟན་དུ་གསོལ། ། ཐིག་ལེའི་དབྱེ་བ་རིག་བཅས་པ། ། རྣལ་འབྱོར་ མཆོག་ནི་གང་གིས་ཤེས། ། སྦྱོར་བས་མདུད་པ་འབྱེད་པར་བྱེད། ། ཁམས་གསུམ་པ་ཡི་འགྲོ་བ་འདི། ། མྱུར་དུ་དངོས་གྲུབ་མཆོག་ཏུ་འགྲོ། ། དེ་སྐད་ཞུས་ནས་རྡོ་རྗེ་ཅན། ། རྡོ་རྗེ་དབང་ཕྱུག་ལ་གསུངས་པ། ། མཆོག་ཏུ་གསང་བ་འདི་ཉིད་ནི། ། གང་དུའང་གསལ་ བར་མ་གསུངས་པ། ། ཐིག་ལེའི་དབྱེ་བ་དེ་ཡང་ནི། ། ང་ཡིས་བཤད་ཀྱིས་དེ་ཉིད་ཉོན། ། སྙིང་གི་པད་སྦུབས་ནམ་མཁའ་ལ། ། ཡེ་ཤེས་རྡོ་རྗེ་རྟག་ཏུ་བཞུགས། ། སྟེང་དང་འོག་ལ་བརྟེན་ནས་ནི། ། སྲོག་དང་ཐུར་སེལ་རླུང་ཆེན་གནས། ། དེ་ཡང་དབྱེ་བར་དཀའ་བ་ཡི། ། དབུས་སུ་མདུད་པ་གསུམ་གྱིས་དཀྲིས། །
BOདེ་ཡིས་མཆོག་དང་བཅོམ་བྱས་པས། ། སྟེང་དུ་འགྲོ་བ་ཐོབ་མི་བྱེད། ། དེས་བཅོམ་སླར་ཡང་རྣམ་ལྔ་རྒྱུ། ། སྲོག་དང་ཐུར་སེལ་གྱེན་རྒྱུ་དང་། ། ཁྱབ་བྱེད་དང་ནི་མཉམ་གནས་ཉིད། ། རྩེ་མོ་ལྔ་ལས་རྒྱུན་དུ་ནི། ། རྩ་ལྔ་ལ་ནི་ཡང་དག་ བརྟེན། ། རྒྱགས་དང་རྣམ་པར་རྒྱས་པ་དང་། ། མྱོས་དང་བཏུང་དང་མཛའ་བོ་སྟེ། ། དེ་དག་རྩ་ནི་ལྔར་ཤེས་བྱ། ། རྡོ་རྗེའི་འོག་ཏུ་གསལ་བར་ཁྱབ། ། སྟེང་གི་སྲོག་གི་དབུས་ན་ཡང་། ། རྡོ་རྗེའི་ལྟེ་བའི་མཁའ་དབྱིངས་འགྲོ། ། སྲོག་ཅེས་བྱ་བའི་རླུང་ཆེན་པོ། ། ལྟེ་བ་ མདུད་པ་དང་ཕྲད་པས། ། བཅོམ་ནས་ཀྱང་ནི་རྣམ་ལྔར་རྒྱུ། ། རྩེ་མོ་རྣམས་ལ་རྩ་ལྔར་ནི། ། ཟླ་བའི་ཆ་དང་སྣ་དང་ནི། ། བསྙེན་བཀུར་ལྐོག་ཤལ་མཆིན་པ་སྟེ། ། རྩ་ནི་ལྔ་ཡི་མིང་ཡིན་ནོ། ། རྩ་ནི་ལྔ་ལས་རྒྱུ་བའི་རླུང་། ། ཀླུ་དང་རུས་སྦལ་རྩངས་པ་དང་། ། ལྷ་སྦྱིན་དང་ནི་གཞུ་ ལས་རྒྱལ། ། དེ་ལྟར་རྩ་དེ་དང་བཅས་པ། ། ལུས་ཀྱི་ཐུར་དུ་འགྲོ་བས་ན། ། སྤྲུལ་པའི་འཁོར་ལོའི་རྩ་རྣམས་ནི། ། ཡང་དང་ཡང་དུ་བསྐུལ་བྱས་ནས། ། བསྐུལ་བས་ཀྱང་ནི་རྒྱས་པ་ན། ། གཏི་མུག་ཆེན་པོས་དབང་དུ་བྱེད། ། དེ་སྟེང་ཆོས་ཀྱི་འཁོར་ལོ་ན། །
BOགནས་ པའི་རྩ་ནི་བསྐུལ་བྱས་ནས། ། དེ་རྣམས་ལྷན་ཅིག་རྩ་དེ་དག ། ཞེ་སྡང་གིས་ནི་དབང་དུ་བྱེད། ། ཡང་དག་བསྐུལ་ནས་དེ་སྟེང་གི། ། ལོངས་སྤྱོད་མཆོག་ཏུ་ངོ་མཚར་སྐྱེ། ། རྩ་དེ་རྣམས་དང་ལྷན་ཅིག་ཏུ། ། ཆགས་པ་ཆེན་པོས་དབང་བྱས་ནས། ། བསྐུལ་བ་དང་ནི་དེ་སྟེང་གི། ། སྤྱི་བོའི་ འཁོར་ལོའི་བདེ་ཆེན་དུ། ། རྩ་དེ་རྣམས་དང་ལྷན་ཅིག་ཏུ། ། བྱང་ཆུབ་སེམས་ཀྱིས་གང་བར་བྱེད། ། རྣམ་རྟོག་རྣམ་པར་རྒྱུ་བྱེད་ཅིང་། ། སྣ་ཚོགས་དབྱེ་བ་ཐམས་ཅད་ལས། ། སྟེང་མ་རྣམས་ཀྱང་ཐུར་དུ་འགྲོ། ། སྲོག་གིས་རབ་ཏུ་བཅོམ་ནས་ནི། ། དེ་དག་ཐམས་ཅད་རྡོ་རྗེའི་རྩེར། ། ཞུགས་ ནས་ཐུར་དུ་ཁ་བལྟས་པའོ། ། དེ་ཡང་ཐུར་དུ་མི་འགྲོ་སྟེ། ། མ་རིག་མདུད་པའི་འཁོར་ལོ་ནི། ། རྣམ་པར་ཤེས་པའི་ཤིང་རྟའི་རླུང་། ། དེ་ནི་བག་ཆགས་དང་འདྲེས་པས། ། མིག་དང་རྣ་བ་དེ་བཞིན་སྣ། ། ལྕེ་སྟེ་རྣམ་པར་ཤེས་པ་བཞི། ། རྩེ་མོ་བཞི་ནས་ཕྱུང་ ནས་ནི། ། བག་ཆགས་རྣམ་ཤེས་དང་འདྲེས་ནས། ། རྣམ་ཤེས་དབང་པོ་ལྷན་ཅིག་ཏུ། ། དོན་ནི་རབ་ཏུ་རྒྱས་པར་བྱེད། ། སླར་ཡང་ལམ་དེ་ཉིད་ནས་ནི། ། ཇི་ལྟ་བ་ཡི་རིམ་པས་འཇུག ། དེ་ཡི་དངོས་ཉིད་དེ་སྦྱོར་བས། །
BOརྣམ་ཤེས་བསྟེན་པའི་སྐད་ཅིག་ལ། ། དེ་ཡི་བག་ ཆགས་བཅས་ཀྱིས་འཕེལ། ། འཁྲུལ་བཅས་འཁོར་བའི་འཁོར་ལོ་ལས། ། དེ་ལྟར་བག་ཆགས་ཀྱིས་བསླད་པའི། ། རྣམ་ཤེས་ལས་ཀྱི་ངོ་བོར་འགྲོ། ། དེ་ཉིད་ཀྱང་ནི་སྲོག་སྦྱོར་བས། ། ཁམས་གསུམ་པར་ནི་འཁྲུལ་པའོ། ། བྱེད་པོ་ལས་ཀྱི་འབྲས་བུར་མྱོང་། ། གཞན་ཉིད་ དུ་ནི་འཁོར་བ་མེད། ། དེ་ཕྱིར་འཁོར་བ་གཞོམ་དོན་དུ། ། ཐིག་ལེ་གོ་འཕང་གསལ་བར་དབྱེ། ། བསྒོམ་པ་ལ་ནི་འབད་པར་བྱ། ། མ་རིག་གཞན་ནི་མི་ཤེས་པ། ། དབུས་ཀྱི་མདུད་པ་དེ་ཡང་ནི། ། དེ་ཕྱེད་ན་ནི་དངོས་གྲུབ་འགྱུར། ། རྣལ་འབྱོར་རྣལ་འབྱོར་གྲུབ་པ་སྟེ། ། ཡེ་ཤེས་ལྔ་ནི་ཐོབ་ནས་ནི། ། མངོན་ཤེས་ལྔ་ནི་ཐོབ་པ་དང་། ། མཆོག་ཏུ་གསང་བ་ཐོབ་ནས་ནི། ། བློ་བཟང་ཇི་ལྟ་བ་བཞིན་གནས། ། ཕྲེང་བ་མི་དགོས་བསྒོམ་མི་དགོས། ། བྱ་བ་མི་དགོས་དགག་མི་དགོས། ། སྔགས་ཀྱི་དེ་ཉིད་གཅིག་པུ་ཡིས། ། ཡང་དག་རྫོགས་པའི་སངས་ རྒྱས་འཐོབ། ། ལས་ཆོས་དམ་ཚིག་ཕྱག་རྒྱ་ཡི། ། དབྱེ་བ་འདི་ནི་མ་གསུངས་སོ། ། འཁོར་ལོའི་དབྱེ་བས་མ་ཡིན་ཞིང་། ། དེ་བཞིན་དགའ་བ་སོགས་ཀྱིས་མིན། ། ཕྱག་རྒྱ་ཆེན་པོའི་གོ་འཕང་གསལ། ། སྔགས་ཀྱི་དེ་ཉིད་ཀྱིས་ནི་འཐོབ། །
BOསྟོང་ཉིད་ཡེ་ཤེས་རྡོ་རྗེ་དང་། ། གཉིས་ མེད་བདེ་བ་དེ་ཉིད་དང་། ། གསང་བའི་ཐིག་ལེའི་དབྱེ་བ་དང་། ། རྣལ་འབྱོར་གྲུབ་པའི་བདེ་ཆེན་པོ། ། མ་རིག་སྒོ་ངའི་སྦུབས་འབྱེད་ཅིང་། ། འཇིག་ཚོགས་ལྟ་བའི་རི་བོ་འཇོམས། ། ཕྱག་རྒྱ་ཆེན་པོའི་དངོས་གྲུབ་དང་། ། རབ་ཏུ་བྱེད་པ་མཆོག་ཏུ་བཤད། ། སྔགས་ཀྱི་དེ་ཉིད་ངེས་ སྦྱོར་བས། ། རིགས་ཤིང་ཡན་ལག་གསལ་བ་གང་། ། རྣལ་འབྱོར་མ་ཡི་བཀའ་དྲིན་དང་། ། བླ་མའི་ཞལ་ལས་ངེས་རྟོགས་འགྱུར། ། མན་ངག་མེད་པའི་བཟླས་པ་ནི། ། སྔགས་ཀྱི་རྒྱལ་པོ་བློ་རྨོངས་བྱེད། ། དེ་ཡིས་དཀའ་བ་གཅིག་པུ་དང་། ། ཆུ་བསྲུབས་མར་ནི་མི་འགྱུར་ལྟར། ། དེ་བཞིན་མན་ངག་དང་བྲལ་སྔགས། ། སྐྱེས་བུས་ཇི་སྲིད་འཚོ་ཡི་བར། ། བཟླས་ཀྱང་དེ་ཡི་འབྲས་བུ་ཡི། ། ཆ་ཙམ་ཐོབ་པར་མི་འགྱུར་རོ། ། མི་ཤེས་པ་ཡི་མི་འགའ་ཞིག ། རྒྱ་མཚོ་བཞི་ཡི་ཕ་མཐའ་ཡི། ། ས་ལ་ཤིན་ཏུ་འགྲོ་འདོད་པ། ། ལམ་ནི་གང་ཡིན་མི་འདྲི་གང་། ། དེ་ལྟར་ བདག་ཉིད་འགྲོ་བར་བྱེད། ། དེ་བཞིན་དཀའ་བ་ཆེར་བྱེད་པའི། ། མན་ངག་དང་བྲལ་སྒྲུབ་པ་པོ། ། འབྲས་བུ་མེད་ཅིང་མཁས་པ་ཡང་། ། སྒྲུབ་པ་པོ་ནི་ཁོང་ཁྲོ་སྐྱེ། ། ཁོང་ཁྲོ་སྐྱེས་པའི་སྐད་ཅིག་ལ། །
BOའབྲས་བུ་མེད་ཅིང་ངུ་འབོད་འགྲོ། ། དེ་ཕྱིར་འབད་པ་ཐམས་ཅད་ཀྱིས། ། དད་པས་ བླ་མ་བརྒྱུད་པ་ལས། ། མན་ངག་དག་ནི་བསླབ་པར་བྱ། ། གང་ཕྱིར་བརྒྱུད་པའི་ལུང་གིས་ཁྱབ། ། བརྒྱུད་པའི་རིམ་པས་གནས་པར་བྱེད། ། དེ་ནི་རྣལ་འབྱོར་མ་ཞལ་དང་། ། བླ་མའི་ཞལ་ལས་འབད་པ་ཡིས། ། དེ་ཉིད་མཆོག་ནི་བསླབ་པར་བྱ། ། སྔགས་ཀྱི་མན་ངག་བརྒྱུད་ པའི་ལུང་། ། དེ་ཐོས་ལག་ན་རྡོ་རྗེས་ཀྱང་། ། རྡོ་རྗེ་སེམས་དཔའ་བདེ་བ་ཆེ། ། ཐེ་ཚོམ་ཐམས་ཅད་གཅོད་པ་ལ། ། ཕྱག་བྱས་ནས་ནི་ཞུས་པ་ནི། ། ཁྱེད་ཀྱིས་བསྟན་པ་འདི་ཉིད་མཆོག ། བཅོམ་ལྡན་འདས་ཀྱིས་རྒྱལ་པོ་ནི། ། སྔགས་ཀྱི་དངོས་གྲུབ་བླ་ན་མེད། ། གང་བསླབས་ སྐད་ཅིག་དངོས་གྲུབ་འགྱུར། ། དེ་ནས་བཅོམ་ལྡན་རྡོ་རྗེས་གསུངས། ། སྔགས་ཀྱི་དེ་ཉིད་རབ་གསལ་བ། ། དེ་ཉིད་མཆོག་ཏུ་གསང་བ་ནི། ། གང་དུའང་ང་ཡིས་མ་བཤད་པ། ། སྐལ་པ་མེད་པ་བསམ་པའི་རྒྱུས། ། རྒྱུད་རྣམས་ཀུན་དུ་སྦས་བྱས་ལ། ། དེ་ནི་ང་ཡིས་བཤད་ཀྱིས་ ཉོན། ། སྔགས་ཀྱི་རྒྱལ་པོ་བླ་ན་མེད། ། སྔགས་ཀྱི་སྤྱད་པ་སྤྱོད་པ་ཡིས། ། གང་གི་མྱུར་དུ་དངོས་གྲུབ་འགྱུར། ། ཐོག་མར་ཨུཥྨའི་ཐ་མ་བྲི། ། དབྱངས་ཡིག་དྲུག་པས་རྣམ་པར་བརྒྱན། །
BOསྡེ་ཚན་ཐ་མའི་མཐའ་དང་ལྡན། ། དབྱངས་མེད་པ་ཡི་ཆ་དང་བཅས། ། ཨུཥྨའི་མཐའ་ ལ་དབྱངས་ཡིག་འདི། ། དགུ་པ་དང་ནི་ཡང་དག་ལྡན། ། མཐར་ནི་ཚེག་དྲག་མཆོག་གི་སྒྲ། ། སྔགས་ཀྱི་གཙོ་བོ་བཏུ་བར་བྱ། ། དེ་ལྟར་ཡི་གེ་གཉིས་ཀྱི་མིང་། ། སྔགས་ཀྱི་བརྡ་ནི་རྨད་བྱུང་བ། ། འཛིན་པ་ཐམས་ཅད་སྤངས་པའི་ཕྱིར། ། སྒྲ་དང་ཐིག་ལེའི་ མིང་དུ་བྱས། ། རླུང་གཉིས་ཀྱིས་ནི་ཕྱེ་ནས་ནི། ། མ་རིག་མདུད་པ་འབྱེད་པར་བྱེད། ། ཕྱག་རྒྱ་ཆེན་པོ་མཆོག་གི་རྒྱུ། ། མཆོག་ཏུ་ཞི་བའི་ཡི་གེ་གཉིས། ། མན་ངག་ཐོབ་པའི་འདོད་པའི་དོན། ། གང་གིས་ཟླ་བ་དྲུག་བཟླས་ན། ། ཐིག་ལེའི་སྒྲ་ཡི་གོ་འཕང་གསལ། ། འདོད་པའི་ དོན་ཀུན་སྒྲུབ་པར་བྱེད། ། སྐྱེ་བོས་དབེན་པ་ལྷ་ཡི་གནས། ། སྒྲ་ཡི་ཚེར་མ་རྣམས་དང་བྲལ། ། བགེགས་མེད་སྐལ་བཟང་ཉམས་དགའ་བ། ། སྐྱེད་མོས་ཚལ་གཞི་བདེ་བ་ཆེ། ། འདོད་པ་ལྔ་ལ་ལོངས་སྤྱོད་པས། ། སྔགས་ཀྱི་གཙོ་བོ་འགྲུབ་པར་འགྱུར། ། འདི་ནི་གཞན་ ཡང་བཤད་ཀྱིས་ཉོན། ། ཁྱིམ་དུ་བདེ་བའི་ཕྱག་རྒྱས་གནས། ། གང་གིས་དངོས་གྲུབ་མཆོག་ཏུ་འགྱུར། ། སྒྲུབ་པོ་བདེ་བའི་སྟན་འདུག་ནས། ། མིག་གཉིས་སྣ་རྩེར་གཏད་བྱས་ནས། ། སྣ་ནི་ལྕེ་ཡི་ཚད་དུ་བཞག །
BOཕྲག་གོང་བསྙམས་ལ་ལྕེ་རྐན་སྦྱར། ། སོ་དང་མཆུ་ནི་བདེ་བར་ བཞག ། དབུགས་ཀྱི་འབྱུང་རྔུབ་ཀློད་ནས་ནི། ། ཅུང་ཟད་ཅུང་ཟད་རྩོལ་བྲལ་ནས། ། ཇི་ལྟ་བ་བཞིན་འབྱུང་རྔུབ་ནི། ། རྡོ་རྗེ་སྐྱིལ་ཀྲུང་ལེགས་གནས་པས། ། དེ་ལྟར་ཕྱག་རྒྱ་དང་ལྡན་པས། ། ཡི་གེ་གཉིས་ནི་རྟག་ཏུ་བཟླས། ། ཐིག་ལེའི་དབྱེ་བས་བདེ་བ་ཆེ། ། ཟླ་བ་ དྲུག་གིས་རྣལ་འབྱོར་མཆོག ། ཐོབ་འགྱུར་འདི་ལ་ཐེ་ཚོམ་མེད། ། རྩ་བའི་རྒྱུད་ནི་དང་པོ་འདི། ། ཨ་བ་དྷཱུ་ཏཱི་དྲི་མེད་གནས། ། རླུང་གི་དེ་ཉིད་ཡེ་ཤེས་ཆེ། ། རྡོ་རྗེ་སེམས་དཔའ་ཡི་ནི་རྒྱུ། ། རིལ་བུ་རལ་གྲི་རོ་ལངས་དང་། ། རྒྱལ་པོ་མིག་སྨན་བཅུད་ཀྱིས་ལེན། ། དམག་ དཔུང་རེངས་དང་རྩིག་པ་འབིགས། ། རིག་འཛིན་གྱི་ནི་གོ་འཕང་མཆོག ། མི་སྣང་བ་དང་གཏེར་མཐོང་བ། ། འདོད་དགུར་བསྒྱུར་དང་གཟུགས་མཐོང་དང་། ། གསེར་འགྱུར་དང་ནི་དུག་ལས་རྒྱལ། ། མེ་ཡི་ནང་དུ་འཇུག་པ་དང་། ། མངོན་ཤེས་ལྔ་ཡི་གོ་འཕང་དང་། ། ཡེ་ཤེས་ ལྔ་ནི་ཐོབ་པར་འགྱུར། ། དེ་ལྟར་སྐད་ཅིག་གཅིག་ལ་ནི། ། བྱང་ཆུབ་མཚན་ཉིད་གོ་འཕང་ངོ་། ། དཀའ་བ་སྤྱོད་པ་སྤངས་ནས་ནི། ། ཤེས་རབ་སྙིང་རྗེ་ཡང་དག་ལྡན། ། བཤད་པའི་བདེ་བ་ཆེན་པོ་སྟེར།
BO། སྡོམ་པ་མི་དགོས་སྦྱིན་སྲེག་མིན། ། ཕྲེང་བ་མི་དགོས་བགྲང་མི་དགོས། ། འདི་ ནི་བསྐྱེད་རིམ་དབྱེ་མི་དགོས། ། གསུངས་པའི་དཀའ་ཐུབ་སོགས་མི་དགོས། ། སྔགས་ཀྱི་རྣལ་འབྱོར་གཅིག་པུ་ཡིས། ། བླ་མའི་ཞལ་ལས་བརྒྱུད་པ་དང་། ། ཟླ་བ་དྲུག་ཏུ་མངོན་སྦྱོར་བས། ། གོ་འཕང་མཆོག་ནི་ཐོབ་པར་འགྱུར། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་ བ་མངོན་པར་རྟོགས་པ་ལས་ཐིག་ལེའི་དབྱེ་བ་དང་རྣལ་འབྱོར་མཆོག་ཐོབ་པར་བྱེད་པའི་ལེའུ་སྟེ་དྲུག་པའོ། ། ། ། དེ་ནས་གཞན་ཡང་དེ་ཉིད་ཉོན། ། བླ་ན་མེད་པ་ནཱ་དའི་དོན། ། གང་གིས་ཤེས་པ་ཙམ་གྱིས་ནི། ། ཚེ་འདི་ཉིད་ལ་དངོས་གྲུབ་འགྱུར། ། སྒྲ་ཡང་མི་ཤིགས་ པར་ནི་བཤད། ། རང་བཞིན་འོད་གསལ་དྲི་མ་མེད། ། རྣམ་པ་ཀུན་ལས་རྣམ་པར་གྲོལ། ། ལྟེ་བ་སྤྲུལ་པ་ཡང་དག་གནས། ། སྦྲུལ་གྱི་ལྕེ་ལྟར་ཕྲ་བ་ནི། ། གཉིས་མེད་ཡེ་ཤེས་རྨད་བྱུང་བ། ། ཚངས་པ་ཁྱབ་འཇུག་དྲག་པོ་དང་། ། དབང་ཕྱུག་དང་ནི་རྟག་ཞི་བ། ། དེ་ དག་དེ་ལྟར་རིན་པོ་ཆེ། ། སྐྱེད་པ་པོ་ཡི་ཕ་དང་མས། ། ཡི་གེ་མེད་ཅིང་གོང་དུ་མེད། ། འབྱུང་བ་ཆེན་པོ་རྣམ་པར་སྤངས། ། དུས་དང་རྟོག་པ་རྣམས་ལས་གྲོལ། །
BOསྐྱེ་མེད་ཟད་མེད་རྨད་དུ་བྱུང་། ། འཛིན་པ་ཀུན་ལ་ཞེན་ལ་སོགས། ། སྤངས་ཤིང་ལྷག་མ་མེད་པ་དང་། ། མཆོག་གི་ མཆོག་སྟེ་ཞི་བ་མེད། ། དངོས་པོ་ཀུན་གྱི་དབུས་ན་གནས། ། རྣམ་རྟོག་མེད་ཅིང་བརྟེན་པ་མེད། ། ཀུན་གཞི་རྣམ་ཤེས་ཞེས་གསུངས་པ། ། ཉོན་མོངས་ཅན་གྱི་ཡིད་ཀྱིས་ནི། ། བེམས་པོ་རྣམས་ཀྱིས་སད་པར་བྱེད། ། མཆོག་ཏུ་གཉིས་མེད་རྣལ་འབྱོར་གྱིས། ། ཐོབ་པའི་ གོ་འཕང་བླ་ན་མེད། ། གཉིས་མེད་མཆོག་ཏུ་གསལ་བ་དང་། ། རླུང་གི་དེ་ཉིད་ཡང་དག་རྟེན། ། ཡི་གེ་ཧོཿཡིས་བསྐུལ་ནས་ནི། ། མེ་ཡི་འཁོར་ལོ་སད་པར་བྱེད། ། དེ་ལྟའི་ནཱ་དའི་གོ་འཕང་དོན། ། བླ་མའི་ཞལ་ལས་ཡང་དག་གནས། ། རྣལ་འབྱོར་ཆེན་པོའི་རྒྱུད་དཔལ་ རྡོ་རྗེ་ཕྲེང་བ་མངོན་པར་རྟོགས་པ་ལས་ནཱ་དའི་ཚིག་རྣམ་པར་བཤད་པའི་ལེའུ་སྟེ་བདུན་པའོ། ། ། ། དེ་ནས་གཞན་ཡང་གསང་བའི་དོན། ། བླ་ན་མེད་པ་བཤད་ཀྱིས་ཉོན། ། གསང་བ་བྷ་ག་ཞེས་སུ་གསུངས། ། བྷ་ག་དེ་བཞིན་ཆོས་འབྱུང་བ། ། བདེ་བ་ཆེན་ པོའི་གོ་འཕང་རྟེན། ། དགའ་བ་སྐྱེད་པར་བྱེད་པའི་རྒྱུ། ། རྡོ་རྗེ་སེམས་དཔའ་ཡི་ནི་གནས། ། ཡེ་ཤེས་ལྔ་ཡི་བདག་ཉིད་གསལ། ། ཡེ་ཤེས་ཆེན་པོ་སྤྲོས་པ་མེད། །
BOརྣམ་པར་རྟོག་པ་ཐམས་ཅད་སྤངས། ། བྲལ་དགའི་མཐའ་སྟེ་མཆོག་ཏུ་ཕྲ། ། ལྷན་ཅིག་སྐྱེས་དགའ་ ཀུན་བདག་གནས། ། དགའ་བྲལ་ལ་སོགས་སྐད་ཅིག་གནས། ། ཕྲ་བ་ཡང་དག་བྱང་ཆུབ་སེམས། ། སྲོག་ལ་ཕན་པར་འཚོ་བ་སྟེ། ། སྲང་མདའི་འཁྲུལ་འཁོར་ལྟ་བུར་གནས། ། དུས་བྲལ་རྣམ་རྟོག་མེད་པ་སྟེ། ། སྟོང་ཉིད་སྐྱེ་མེད་འཆི་བ་མེད། ། སྤྲུལ་པའི་འཁོར་ ལོར་ཐིམ་པ་དང་། ། བདེ་བ་ཆེན་པོའི་འཁོར་ལོ་སྐྱེ། ། བསམ་གྱིས་མི་ཁྱབ་ཞི་བ་སྟེ། ། ཆགས་བྲལ་འགྲོ་ཀུན་སྐྱེ་བ་མེད། ། རྡོ་རྗེ་པདྨ་མཉམ་སྦྱོར་བས། ། བདེ་བ་ཐམས་ཅད་སྟེར་བར་བྱེད། ། རླུང་གི་དེ་ཉིད་རིག་པ་ཡིས། ། རྩ་ཡི་དབུས་སུ་འཛིན་པར་བྱེད། ། གང་དེ་སྐྱེ་བ་ཉམས་ མྱོང་བར། ། གསང་བ་ཞེས་ནི་བྱ་བར་གྲགས། ། དེ་ཉིད་གསང་བ་ཡི་ནི་མཆོག ། བླ་མའི་ཞལ་ལ་ལྷག་པར་གནས། ། ཕན་ཚུན་བརྒྱུད་པའི་རིམ་པ་ཡིས། ། བླ་མ་བཟང་པོའི་ཞལ་ལས་ཤེས། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་གསང་བ་ཆེན་ པོའི་ཚོགས་མ་ལུས་པར་བསྟན་པ་ཞེས་བྱ་བའི་ལེའུ་སྟེ་བརྒྱད་པའོ། ། ། ། དེ་ནས་གཞན་གང་སྡོམ་པའི་དོན། ། དེ་ཁོ་ན་ཉིད་བཤད་ཀྱིས་ཉོན། ། སྡོམ་པ་སྲུང་བར་བྱེད་པ་གང་། །
BOདེ་ནི་བྱང་ཆུབ་སེམས་ཞེས་བརྗོད། ། རྡོ་རྗེའི་རྩེ་མོར་སེམས་འཛིན་པ། ། དེ་ནི་བསྲུང་བ་ཞེས་ནི་ གྲགས། ། དབང་པོ་རྣམས་ནི་ཡུལ་རྣམས་ལ། ། འཇུག་ཅིང་རྟག་ཏུ་གང་གནས་པ། ། དེ་ནི་སྡོམ་པ་བསྲུང་བ་དང་། ། དམ་ཚིག་བསྲུང་བར་བཤད་པ་ཡིན། ། གདུལ་དཀའ་ཚུལ་འཆོས་གཡོ་སྒྱུ་ཅན། ། རྨོངས་དང་སེམས་ཁྲོས་གཡོ་ཅན་དང་། ། དད་མེད་རྟོག་གེ་བ་ལྷན་ཅིག ། རྟགས་ཀྱིས་ཉེ་བར་འཚོ་བ་དང་། ། ཉན་ཐོས་ནོར་ལ་བརྐམ་ཆགས་ཅན། ། དེ་ཁོ་ན་ཉིད་སུན་འབྱིན་ཅིང་། ། དོན་དམ་པ་ནི་མི་ཤེས་པ། ། མེད་པར་ལྟ་དང་ཚུལ་ཁྲིམས་འཆལ། ། གཏམ་དང་ཚིག་ནི་ཀྱལ་པ་དང་། ། འདྲི་བ་ལ་སོགས་མི་བྱ་ཞིང་། ། སེ་གོལ་གཏོགས་པ་ ཙམ་དུ་ཡང་། ། དེ་དང་ལྷན་ཅིག་གནས་མི་བྱ། ། ལས་ཀྱི་ཕྱག་རྒྱ་ཉམས་དགའ་བ། ། གལ་ཏེ་བྱིས་པའི་སྐྱེ་བོ་དང་། ། དེ་དང་ལྷན་ཅིག་དམ་ཚིག་ནི། ། མི་བྱ་རྣལ་འབྱོར་ཉམས་པར་འགྱུར། ། སྐྱེད་ན་དམ་ཚིག་དབུས་ཞུགས་དང་། ། པད་སྣོད་ཕྱག་རྒྱ་སོགས་བརྟེན་དང་། ། བརྐམ་དང་འབྲེལ་པས་འཇུག་པ་དང་། ། དམ་ཚིག་ལ་ནི་འཇུག་མི་བྱ། ། སྣོད་དང་ཅང་ཏེའུ་གྲི་གུག་དང་། ། གླེགས་བམ་དང་ནི་བགྲང་ཕྲེང་དང་། ། དམ་ཚིག་མེད་པ་གཞན་དག་ལ། །
BOགང་དུའང་བསྟན་པར་མི་བྱའོ། ། དགེ་སློང་སྡོམ་ལ་གནས་པ་ལ། ། རྣལ་འབྱོར་སྤྱོད་ སོགས་བྱ་བ་དང་། ། མན་ངག་རྣམས་ནི་བསྟན་མི་བྱ། ། རས་རིས་ལ་སོགས་མི་བསྟན་ཅིང་། ། གང་གིས་དམ་ཚིག་ལྷན་ཅིག་ཏུ། ། ཇི་ལྟར་སྤྱོད་པ་ཡང་དག་སྤྱོད། ། བླ་མ་ལ་ཡང་སྨྲ་མིན་ན། ། གཞན་རྣམས་ལ་ནི་སྨོས་ཅི་དགོས། ། དབང་པོ་ཡུལ་ལ་སྤྱོད་པ་ནི། ། གང་ནས་ དེ་ནི་བསྡམས་ནས་ནི། ། སྟོང་ཉིད་གཉིས་མེད་སྒྱུ་མ་ལ། ། སོགས་པས་ཀུན་རྫོབ་ལྷག་སྤྱད་ན། ། ཤེས་རབ་ཡེ་ཤེས་དབང་བསྐུར་སོགས། ། ཉམས་སུ་མྱོང་བའི་བདེ་བ་ཡིས། ། བདེ་བ་ཆེན་པོའི་དྲན་པ་ཡིས། ། དབང་པོ་རྣམས་ནི་ཡུལ་ལས་ལྡོག ། བདག་བསྟོད་གཞན་ ལ་སྨོད་པ་དང་། ། ཡེ་ཤེས་སྙེམས་སོགས་ངེས་སྤངས་པ། ། བློ་ལྡན་རྡོ་རྗེ་དབང་ཕྱུག་གི། ། ཡང་དག་སྡོམ་པ་བཤད་པ་ཡིན། ། དེ་ལྟ་བུ་སོགས་དམ་ཚིག་ནི། ། རྣལ་འབྱོར་པ་ཡིས་རྟག་བསྲུང་བྱ། ། གཞན་དུ་རྣལ་འབྱོར་ཉམས་པར་འགྱུར། ། རྣལ་འབྱོར་ལྡན་པ་རྡོ་རྗེ་ཅན། ། བགྲང་ཕྲེང་དང་ནི་དབུ་རྒྱན་དང་། ། རུས་པའི་རང་བཞིན་ཕྱག་རྒྱ་དང་། ། གླེགས་བམ་བསམ་གཏན་རས་རིས་དང་། ། ཐོད་པ་ལ་སོགས་རྣལ་འབྱོར་མ། ། ཐམས་ཅད་དུ་ནི་དངོས་གྲུབ་ཕྱིར། །
BOབླ་མ་ལ་ཡང་སྦ་བར་བྱ། ། སྔགས་ནི་ཚིག་ཏུ་བརྗོད་མི་བྱ། ། མཆུ་འགུལ་བར་ཡང་ མི་མངོན་ཞིང་། ། ཅུང་ཟད་མགྲིན་པར་བརྗོད་བྱ་ཡིས། ། སྔགས་ཀྱི་རྒྱལ་པོ་དེ་ལྟར་བཟླས། ། གསང་ལས་དངོས་གྲུབ་མཚུངས་པ་མེད། ། གང་ཕྱིར་དེ་ནི་སྡོམ་པར་བཤད། ། སྣོད་མིན་ནོར་ནི་ཆེན་པོ་དང་། ། ལྡན་ཡང་རྒྱུད་ལས་སྐྱོན་དུ་གསུངས། ། བླ་མས་བླ་མེད་ དངོས་གྲུབ་ཕྱིར། ། འབད་པ་ཡིས་ནི་སྤང་བར་བྱ། ། བཟའ་བཏུང་གོས་ལ་སོགས་པ་དང་། ། ནོར་ནི་ཆེན་པོ་ལ་ཆགས་ཤིང་། ། སྣོད་མིན་སློབ་མ་མན་ངག་མཆོག ། རྨད་དུ་བྱུང་བ་སྨྲ་བ་གང་། ། རྣལ་འབྱོར་ཤེས་པ་ཚེ་འདི་ལ། ། དེ་ནི་དམྱལ་བ་ངུ་འབོད་འགྲོ། ། རྣལ་འབྱོར་ ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྡོམ་པའི་ཚིག་གཏན་ལ་དབབ་པའི་ལེའུ་སྟེ་དགུ་པའོ། ། ། ། དེ་ནས་གཞན་ཡང་དེ་ཉིད་ཉོན། ། དམ་ཚིག་དོན་ནི་བླ་ན་མེད། ། བཟའ་བ་ཡི་ནི་དམ་ཚིག་གང་། ། དེ་ནི་དེ་ཡི་དོན་བཤད་བྱ། ། བཟའ་བ་རུ་ནི་བཤད་པ་གང་། ། དེ་ནི་བདུད་རྩི་ལྔ་རུ་བརྗོད། ། རླུང་གི་དེ་ཉིད་སྦྱོར་བ་ཡིས། ། ཞུ་ནས་རོ་གཅིག་སླར་ཡང་ནི། ། རྡོ་རྗེ་ལམ་ནས་སྟེང་སོང་སྟེ། ། གཅིག་ཏུ་གྱུར་པ་བཟའ་བའོ། །
BOདམ་ཚིག་ལུས་དང་ངག་ཡིད་ཀྱིས། ། དེ་ཉིད་གསུམ་དང་གང་ཤར་དང་། ། འཁོར་ལོ་བཞི་པོ་རྣམས་ལ་ཡང་། ། བདེ་བ་ཉམས་སུ་མྱང་བ་གང་། ། དེ་དང་རོ་གཅིག་རྣལ་འབྱོར་པ། ། རྟག་ཏུ་སྤྱོད་པ་བཟའ་བའོ། ། བྱང་ཆུབ་སེམས་ཀྱི་དེ་ཉིད་མཆོག ། བདེ་བ་ཆེན་པོའི་གོ་འཕང་ཐིམ། ། ཞུ་བ་རླུང་གི་དེ་ཉིད་ཀྱིས། ། བཟའ་བ་བསམ་གཏན་བཟང་པོའོ། ། སྤྱི་བོ་ཐོད་པའི་སླད་ ནས་ནི། ། དེ་ཙམ་རྣལ་འབྱོར་པས་རྟག་ཏུ། ། དེ་ལ་སྙིང་རྗེ་བཏུང་བ་ནི། ། བྱང་ཆུབ་སེམས་དཔའ་བདེ་བ་ཆེ། ། སྣོད་མཆོག་གསང་བའི་པདྨར་བླུགས། ། རྟེན་ནི་བཟའ་བ་རབ་རྟོགས་བྱེད། ། སེམས་ཀྱིས་བདུད་རྩི་འཐུང་བྱེད་ན། ། བདུད་རྩི་ལྔ་ཡི་རོ་རྫས་འཐུང་། ། དེ་ཟ་བ་ནི་ རྡོ་རྗེ་འཆང་། ། གླང་མོ་རྟ་ཁྱི་བ་ལང་མི། ། བྱང་ཆུབ་སེམས་དང་བཅས་པའི་ཁྲག ། བསྲེས་ནས་སྐད་ཅིག་དེ་ལ་བཟའ། ། དེ་ནི་བདུད་རྩི་ལྔ་ཞེས་བརྗོད། ། རྣམ་རྟོག་དང་ནི་ཀུན་རྟོག་གི། ། སྟོང་པ་ཉིད་དུ་གསལ་བའི་སྣོད། ། རྡོ་རྗེ་ཅན་གྱིས་རྟག་ཏུ་བཟའ། ། སྟོང་ཉིད་ཡེ་ ཤེས་ཕ་རོལ་འགྲོ། ། དགའ་བ་གསུམ་པའི་བདེ་བ་ནི། ། ལྷན་སྐྱེས་ལྷན་ཅིག་སྣོད་དུ་ནི། ། རྡོ་རྗེ་ཅན་གྱིས་རྟག་ཏུ་བཟའ། །
BOབདེ་བ་ཆེན་པོའི་གོ་འཕང་གནས། ། རྣམ་རྟོག་རླུང་རྣམས་ཐམས་ཅད་ནི། ། ཞི་བའི་དེ་ཉིད་སྣོད་བཟང་པོར། ། རླུང་གི་དེ་ཉིད་ཤེས་པས་བཟའ། ། རྣམ་རྟོག་མེད་པའི་གོ་འཕང་གནས། ། ཕྱག་རྒྱ་གསུམ་དང་ཡང་དག་སྦྱོར། ། ཕྱག་རྒྱ་ཆེན་པོར་བཤད་སྣོད་དུ། ། རྣལ་འབྱོར་དེ་ཉིད་ཤེས་པས་བཟའ། ། སྲོག་དང་རྩོལ་བའི་གོ་འཕང་གནས། ། རྣམ་རྟོག་དང་ནི་ཀུན་རྟོག་གིས། ། སྒོམ་དང་སྒོམ་མིན་སོགས་འཁྲུལ་པ། ། སྲོག་ ཆེན་པོ་ཡི་སྣོད་དུ་ནི། ། རྣམ་རྟོག་དྲ་བའི་ས་བོན་སོགས། ། ཕུང་པོའི་བུད་ཤིང་སྣོད་བཟང་པོར། ། ཡེ་ཤེས་ཆེན་པོའི་མེ་ཡིས་མིན། ། སྔགས་ཀྱི་དེ་ཉིད་རྟོགས་པས་བཟའ། ། བདུད་བཞིའི་ཁྲོ་བོ་ཆེན་པོ་ཡི། ། སྟོབས་ཀྱི་རིག་པས་སྒྲུབ་པ་པོ། ། སྒྲུབ་པོས་ལེགས་པར་ མཉམ་གཞག་ནས། ། རྟག་ཏུ་རྣལ་འབྱོར་སྣོད་དུ་བཟའ། ། རླུང་དང་སྔགས་དང་རྫས་རྣམས་ཀྱི། ། ཐིག་ལེ་གསུམ་སྟེ་བླ་ན་མེད། ། མི་ཤིགས་གོ་འཕང་སྣོད་དུ་ནི། ། ཟོས་ན་རྣལ་འབྱོར་ཕ་རོལ་འགྲོ། ། སྟོང་ཉིད་ཡེ་ཤེས་མཚུངས་མེད་པ། ། སྙིང་རྗེའི་སྣོད་ཀྱིས་མཆོག་ཏུ་ནི། ། ཡེ་ཤེས་ཆེན་པོ་མཉམ་གཞག་ནས། ། བཏུང་ཞིང་རྟག་ཏུ་བཏུང་བའོ། ། ཕྱག་རྒྱའི་དམ་ཚིག་ཅེས་སུ་བཤད། །
BOརྡོ་རྗེ་པདྨ་ཡང་དག་སྦྱོར། ། དེ་ཁོ་ན་ཉིད་མཆོག་སྐྱེས་གང་། ། དེ་ནི་སྐལ་ལྡན་སྣོད་ལ་ནི། ། རྣལ་འབྱོར་པས་འཐུངས་ཉམས་དགའ་བ། ། བསྒྲུབ་པར་བྱ་བའི་དེ་ཉིད་ མཆོག ། ཉོན་མོངས་དང་བྲལ་ལྷན་ཅིག་སྐྱེས། ། ཕྱག་རྒྱ་ཆེན་པོའི་དོན་བསྒྲུབ་བྱ། ། དེ་ལྟ་བུ་སོགས་དམ་ཚིག་སོགས། ། གཞན་ནི་གང་དུའང་ངས་མ་བཤད། ། རྡོ་རྗེ་སེམས་དཔའི་གོ་འཕང་མཆོག ། བླ་མའི་ཞལ་ལས་གསལ་བར་རྟོགས། ། རྣལ་འབྱོར་ཆེན་པོའི་རྒྱུད་དཔལ་ རྡོ་རྗེ་ཕྲེང་བ་མངོན་པར་རྟོགས་པ་ལས་དམ་ཚིག་གི་དོན་གཏན་ལ་དབབ་པའི་ལེའུ་སྟེ་བཅུ་པའོ། ། ། ། དེ་ནས་གཞན་ཡང་བཤད་ཀྱིས་ཉོན། ། སྒྲ་ཙམ་དོན་ནི་བཤད་པར་བྱ། ། གང་གིས་ཤེས་པ་ཙམ་གྱིས་ནི། ། འཕོ་བ་མེད་པའི་གོ་འཕང་འཐོབ། ། ཆོས་ཀྱི་འཁོར་ལོའི་པད་ སྦུབས་སུ། ། སྒྲ་ཙམ་ཡང་དག་གནས་པ་ནི། ། ཆགས་མེད་སྣང་བ་མེད་པ་དང་། ། གཉིས་སུ་མེད་ཅིང་དྲི་མ་མེད། ། དཔེ་བྲལ་གཡོ་བ་མེད་པ་དང་། ། གཞི་མེད་བླ་གབ་མེད་པ་དང་། ། ལྷ་ཡི་དབང་ཕྱུག་ཡེ་ཤེས་མཆོག ། འབྱུང་དང་རྔུབ་པ་རྣམ་པར་ སྤངས། ། རྣལ་འབྱོར་རྣམས་ཀྱི་ལྷ་དབང་ཕྱུག ། དེ་ལྟ་བུ་ནི་རྙེད་པར་དཀའ། ། མཆོག་ཏུ་ཞི་བ་བདེ་བ་ཆེ། །
BOགཟུགས་མཆོག་འཆི་བ་མེད་པའི་མཆོག ། རྟེན་ཅིང་འབྲེལ་འབྱུང་རང་བཞིན་གྱིས། ། རྒུན་ཆང་རོ་ཡིས་མྱོས་པ་ལྟར། ། མཆོག་ཏུ་ནང་དུ་སོང་གྱུར་ནས། ། དེ་བཞིན་རྣམ་ པ་ཀུན་གྱི་གནས། ། སྔགས་ཀྱི་དེ་ཉིད་རིག་པའི་རྟེན། ། རང་གི་ཉམས་མྱོང་རྟོག་པའི་གནས། ། དེ་ནས་སྟོན་པ་བླ་མེད་པ། ། རྡོ་རྗེ་སེམས་དཔས་ཞུས་པ་ནི། ། བཅོམ་ལྡན་དེ་ཉིད་ཞི་བ་མཁྱེན། ། སྔགས་ཀྱི་དེ་ཉིད་རབ་དབྱེ་བ། ། གང་གིས་རྣམ་པར་ཤེས་ཙམ་གྱིས། ། དེ་ཁོ་ན་ཉིད་ འགྲུབ་པར་འགྱུར། ། དེ་ནས་རྡོ་རྗེ་ཅན་གྱིས་གསུངས། ། སྔགས་ཀྱི་དེ་ཉིད་བླ་ན་མེད། ། མཆོག་དང་རབ་མཆོག་ཕྲ་བ་དང་། ། ཡེ་ཤེས་ཆེན་པོ་མཆོག་ཆེན་པོ། ། སྙིང་པོ་ཡི་ཡང་སྙིང་པོ་མཆོག ། ཡང་དག་བཤད་ཀྱིས་མཉན་པར་གྱིས། ། རྒྱུད་རྣམས་ཀུན་དུ་སྦས་པ་རྣམས། ། གསང་བའི་གོ་འཕང་འཕོ་བ་མེད། ། ལྟེ་བའི་འཁོར་ལོ་དེ་ཉིད་མཆོག ། སྒྲ་ཙམ་དུ་ནི་ཡང་དག་གནས། ། སྟོང་ཉིད་ཆེན་པོའི་དབུས་སུ་ཐིམ། ། བདེ་བ་ཆེན་པོའི་གོ་འཕང་གསལ། ། གཉིས་མེད་འཇིགས་བྲལ་ཞི་བ་དང་། ། སྣང་བ་མེད་ཅིང་ཀུན་རྫོབ་མེད། ། གཉིས་མེད་ཏིང་ འཛིན་སྦྱོར་བ་ཡིས། ། སྔགས་ཀྱི་དེ་ཉིད་རབ་གསལ་བ། ། ཐོག་མ་མེད་ཅིང་ཞི་བ་དང་། །
BOདངོས་དང་དངོས་མེད་བདག་ཉིད་གཙོ། ། སྟོང་ཉིད་སྙིང་རྗེ་དབྱེར་མེད་པ། ། བྱང་ཆུབ་སེམས་ཀྱི་རང་བཞིན་ནི། ། དེ་ཚེ་ཐོག་མར་སྟོང་ཉིད་སྒོམ། ། སྣང་བ་མེད་པའི་གོ་འཕང་ཞི། ། རང་ བཞིན་མེད་གནས་ཉམས་དགའ་བ། ། རྣམ་རྟོག་མེད་ལ་མཆོག་ཏུ་བརྟེན། ། སྟོང་ཉིད་ཡེ་ཤེས་མཚུངས་པ་མེད། ། བྱང་ཆུབ་སེམས་ཀྱི་རྒྱུད་དང་ནི། ། ཡི་གེ་ཧཱུྃ་ལས་ཡང་དག་བྱུང་། ། རྣལ་འབྱོར་ཤེས་པ་རྨད་བྱུང་ཆེ། ། དེ་ཉིད་གསུམ་ནི་རོ་གཅིག་དོན། ། ཨ་བདྷཱུ་ཏཱིའི་ གོ་འཕང་གནས། ། སླར་ཡང་དགའ་བའི་སྦྱོར་བ་ཡིས། ། འཇུག་པ་ལ་སོགས་རྣམ་པར་སྤངས། ། བདེ་བ་ཆེན་པོའི་གོ་འཕང་ནི། ། བྱང་ཆུབ་སེམས་ནི་དྲི་མ་མེད། ། སྣ་ཚོགས་སྐད་ཅིག་དབྱེར་མེད་པ། ། བརྗོད་པའི་བདག་ཉིད་དབྱངས་བྲལ་བ། ། རྟག་ཏུ་གནས་པའི་ རྒྱུན་གྱིས་ཀྱང་། ། བྱང་ཆུབ་སེམས་ནི་འབབ་པ་ནི། ། སྔགས་ཀྱི་རྣལ་འབྱོར་གྱིས་ནི་ཐོབ། ། སྐྱེ་མེད་ཞི་བའི་ཐིག་ལེ་ཙམ། ། སྔགས་ཀྱི་སྤྱོད་པས་སྤྱད་པས་ན། ། ཡེ་ཤེས་མཆོག་ནི་རང་རིག་པའོ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྒྲ་ཙམ་ གྱི་དོན་གཏན་ལ་དབབ་པའི་ལེའུ་སྟེ་བཅུ་གཅིག་པའོ། ། ། །
BOདེ་ནས་རླུང་གི་དེ་ཉིད་མཆོག ། དོན་དམ་པ་ནི་བཤད་ཀྱིས་ཉོན། ། རྣལ་འབྱོར་པ་ཡིས་རླུང་བསྒོམས་ན། ། མྱུར་དུ་དངོས་གྲུབ་ཐོབ་པར་འགྱུར། ། རླུང་གི་ཐིག་ལེ་ཡེ་ཤེས་ཆེ། ། ཕྲ་ཞིང་དེ་ཉིད་གོ་འཕང་གསལ། ། དངོས་གྲུབ་ཀུན་བྱེད་ཉམས་དགའ་བ། ། གཉིས་མེད་རྣལ་འབྱོར་མི་ཟད་པ། ། སྐྱེ་མེད་ཀུན་འགྲོ་ཞི་བ་དང་། ། ལུས་རྣམས་ཀུན་ལ་ཁྱབ་པ་དང་། ། མ་ཕམ་སྟོང་པ་བསམ་མི་ཁྱབ། ། ཐམས་ཅད་བདག་ཉིད་རྟག་ཏུ་བཞུགས། ། སྒོམ་དང་བསམ་གཏན་རྣལ་འབྱོར་གྱིས། ། ཐིག་ ལེ་རང་གི་ངོ་བོ་ཤེས། ། ཆོས་རྣམས་གཅིག་ཏུ་གྱུར་པའི་གནས། ། སྔགས་ཀྱི་དེ་ཉིད་ཀྱི་ནི་རྒྱུ། ། བག་ཆགས་ཀུན་ལས་རྣམ་པར་གྲོལ། ། ཀུན་མཁྱེན་བདེ་བ་ཀུན་གསལ་བ། ། སྣ་ཡི་རྩེ་མོར་དེ་ཉིད་མཆོག ། འོད་ཟེར་ཐིག་ལེ་བསམ་པར་བྱ། ། སྲོག་དང་རྩོལ་བ་ཡང་དག་སྦྱོར། ། རྟོག་པ་རྣམས་ཀྱི་གྲངས་སྟེར་བ། ། སྐལ་བཟང་ཡེ་ཤེས་ལྔ་ཡི་བདག ། སངས་རྒྱས་ལྔ་ཡི་ཆོ་ག་ནི། ། རིན་ཆེན་ལྔ་ཡི་སྦྱོར་བའི་གཟུགས། ། འབྱུང་བ་ལྔ་ཡི་བདག་ཉིད་ཙམ། ། ཐོག་མ་ལུས་ཀྱི་ཕྱག་རྒྱའི་དངོས། ། ངག་གི་གྲངས་ཀྱི་ཟློས་མཚན་ཉིད། ། ཡིད་ཀྱི་རྣལ་འབྱོར་ཆེ་ལ་ ཞེན། ། སྒོམ་པའི་གོ་འཕང་མི་ཟད་པ། །
BOདབུགས་ཀྱི་ཚེགས་ནི་བགྲང་བ་དང་། ། རླུང་གི་རྣམ་པར་དཔྱད་པ་དང་། ། གནས་ཀྱི་དབྱེ་བ་རྩ་རྣམས་ཀྱི། ། དུས་ཀྱི་དབྱེ་བ་རྟོགས་པ་དང་། ། རླུང་རྣམས་ཀྱི་ནི་ཟློག་པ་དང་། ། རྟོག་པ་དང་བཅས་སྤངས་པ་སྟེ། ། དེ་ལྟར་མདོར་བསྡུས་རྣམ་ དྲུག་གིས། ། འབྱུང་དང་རྔུབ་པ་ཞེས་སུ་བརྗོད། ། ཐོག་མར་འབྱུང་དང་རྔུབ་པ་རྣམས། ། ཉི་ཁྲི་དང་ནི་ཆིག་སྟོང་དང་། ། དེ་བཞིན་གྲངས་ནི་བརྒྱ་ཕྲག་དྲུག ། ཉིན་དང་མཚན་མོ་ངེས་པ་ནི། ། ཇི་སྲིད་གྲངས་ནི་ཐོབ་པའི་གནས། ། ཉིན་ཞག་ཉི་ཤུ་རྩ་བདུན་དུ། ། གྲངས་ ཀྱི་རྗེས་སུ་སྦྱོར་བ་ཡིས། ། གྲངས་ནི་ཡང་དང་ཡང་དུ་བརྟག ། དུས་མཚམས་ཀྱི་ནི་རབ་དབྱེ་བས། ། དེ་ནས་རྗེས་སུ་ཟློས་པར་འགྱུར། ། ཐུན་ཚོད་སོ་སོར་སྲོག་རྣམས་དང་། ། རྩོལ་བ་རུ་ནི་བརྟག་པ་སྟེ། ། ཉིས་སྟོང་བདུན་བརྒྱའི་གྲངས་ཀྱིས་ནི། ། ཡང་དག་པར་ནི་ངེས་བཟུང་ མེད། ། ཡོངས་སུ་གསལ་བར་བཅད་ནས་ནི། ། ཉིན་ཞག་ཉི་ཤུ་རྩ་བདུན་ལ། ། འཁོར་ལོ་བཞི་ཡི་དབྱེ་བ་ཡིས། ། ཉིན་དང་མཚན་དུ་ངེས་པར་ནི། ། དེ་རྗེས་གནས་ཀྱི་རྩོལ་བ་ཡིས། ། ཐ་དད་དུ་ནི་རབ་ཏུ་བརྟག ། རྩ་ཡི་འཁོར་ལོ་རྒྱུ་བ་ཡིས། ། འབྱུང་དང་རྔུབ་པ་ངེས་ པར་ནི། །
BOངེས་པར་གཟུང་བའི་སྦྱོར་བ་ལས། ། རྩ་ཡི་འཁོར་ལོ་སྤྱད་པར་བྱ། ། དེ་ཡི་འཁོར་ལོའི་རྩ་དབྱེ་བས། ། ཉིན་ཞག་ཉི་ཤུ་རྩ་བདུན་ལས། ། དེ་རྗེས་གནས་ཀྱི་སྦོལ་པའི་ས། ། གནས་ཀྱི་དབྱེ་བས་བརྟག་པར་བྱ། ། གནས་ནི་སོ་སོར་བརྟགས་པ་ཡིས། ། བརྒྱ་དང་བརྒྱད་ནི་ ལྷག་པར་རྒྱུ། ། རྣམ་རྟོག་མེད་པའི་སྦྱོར་བ་མཆོག ། རྟོག་པ་སྤངས་པའི་མཚན་ཉིད་ཅན། ། དངོས་པོ་ཀུན་གྱི་རང་བཞིན་བདག ། བརྒྱ་དང་བརྒྱད་ནི་ལྷག་པར་རྒྱུ། ། འདི་ནི་ཡང་དག་རྣལ་འབྱོར་མཆོག ། ཉིན་ཞག་ཉི་ཤུ་རྩ་བདུན་གྱིས། ། མཚན་ཉིད་སྒོམ་པའི་རྣལ་འབྱོར་པ། ། ཇི་ལྟར་གནས་པར་རང་ངོ་བོ། ། རྟོག་དང་བཅས་པའི་རྣལ་འབྱོར་པ། ། དེ་ནས་རྣལ་འབྱོར་ལོག་ནས་ནི། ། རྟོག་པ་དང་བྲལ་རླུང་ཆེན་པོ། ། རྩ་ཡི་འཁོར་ལོ་རྣམ་པར་རྒྱུ། ། དེ་ཐོབ་ནས་ནི་ལོག་པ་དང་། ། ཀུན་ནས་ཉོན་མོངས་རྣལ་འབྱོར་པས། ། ངེས་པ་ལ་ནི་དོན་དམ་པ། ། ཉིན་ཞག་ཉི་ཤུ་རྩ་བདུན་ལས། ། ལས་དང་པོ་པའི་སྦྱོར་བ་ཡིས། ། བློ་དང་ལྡན་པ་ལོག་པ་ལས། ། དེ་ནས་དགག་པ་དེ་དག་ཀྱང་། ། ཡང་དག་རྣལ་འབྱོར་སྟོབས་ཀྱིས་ནི། ། སྲོག་དང་རྩོལ་བའི་རྣམ་རྟོག་རྣམས། ། ཀུན་ནས་རབ་ཏུ་སྤངས་ནས་ནི། །
BOརླུང་གི་དེ་ཁོ་ན་ཉིད་ རྒྱུ། ། རྣལ་འབྱོར་མཆོག་ནི་བསྒོམ་པར་བྱ། ། གཉིས་མེད་མཆོག་གི་རྣལ་འབྱོར་གྱིས། ། ཉིན་ཞག་ཉི་ཤུ་རྩ་བདུན་ལ། ། རླུང་གི་དེ་ཁོ་ན་ཉིད་རྟེན། ། འཁྲུལ་པའི་རྣལ་འབྱོར་དག་པ་ནི། ། དེ་ལ་རྩེ་གཅིག་སེམས་ཀྱིས་ནི། ། རྟོག་མེད་དེ་ཁོ་ན་ཉིད་ཀྱིས། ། རླུང་གི་དེ་ཉིད་རྣལ་འབྱོར་མཆོག ། ཡང་ དག་རྩོལ་ལ་བྱས་པ་གསལ། ། ཁང་{བཟངས་,བཟང་}བྱེད་པ་བཞིན་དུ་ནི། ། ཐོག་མར་ས་ནི་ཡོངས་སུ་སྦྱང་། ། དེ་སྟེང་བགེགས་དང་བྲལ་བྱས་ལ། ། གནས་ནི་ལེགས་པར་དག་པར་བྱ། ། ཁང་{བཟངས་,བཟང་}སྐལ་བ་ཉམས་དགའ་བ། ། བློ་ལྡན་ཇི་ལྟར་འདོད་པར་བྱ། ། དེ་བཞིན་རྣལ་འབྱོར་སྤྱོད་པས་ མཆོག ། རླུང་གི་དེ་ཉིད་རྣམ་པར་བསྒོམ། ། སྔ་མ་བཞིན་དུ་མཉམ་གཞག་ནས། ། སྲོག་དང་རྩོལ་བའི་སྦྱོར་བ་དང་། ། རྣལ་འབྱོར་མཆོག་གི་ཡེ་ཤེས་ཆེ། ། རྣལ་འབྱོར་རིག་པ་བསྒོམ་པར་བྱ། ། ཐོག་མར་རླུང་གི་དེ་ཉིད་དང་། ། དེ་ནས་སྔགས་ཀྱི་དེ་ཉིད་གསལ། ། དེ་ལ་རླུང་གི་འོད་ཟེར་ མཆོག ། གསལ་བ་ཆེན་པོའི་ཁ་དོག་ལྔ། ། དེ་བཞིན་གཤེགས་པ་ལྔ་རང་བཞིན། ། ཕུང་པོ་ལྔ་ཡི་རང་ངོ་བོ། ། དེ་ནི་ཡེ་ཤེས་ལྔ་དག་པ། ། རླུང་ལྔ་རུ་ནི་རྒྱུ་བར་བྱེད། །
BOམངོན་པར་བྱང་ཆུབ་རྣམ་པ་ལྔའི། ། དེ་ཉིད་མཚན་ཉིད་གོ་འཕང་མཆོག ། སྣ་ཡི་རྩེ་མོ་དེ་ཉིད་མཆོག ། རླུང་ལྔ་ དང་ནི་རང་ངོ་བོ། ། རླུང་གི་ཐིག་ལེ་ཞེས་ནི་བཤད། ། ཡང་དག་དེ་ཉིད་གསལ་བ་ཡང་། ། སྣ་རྩེར་ཡུངས་ཀར་དེ་ཡང་ནི། ། རྒྱུད་གཞན་རྣམས་སུ་གསུངས་པ་ནི། ། སྣ་རྩེར་ཡུངས་ཀར་དེ་ཡང་ནི། ། སྲོག་དང་རྩོལ་བའི་བརྟག་པ་སྟེ། ། སྲོག་དང་རྩོལ་བ་ལ་གནས་པ། ། འོད་ལྔ་སངས་ རྒྱས་རྣམས་སུ་བསྒོམ། ། སྟེང་གི་སྣ་ལས་ངེས་འབྱུང་བ། ། གཡས་དང་གཡོན་དང་གཉིས་ཀ་ཡང་། ། དལ་བར་རྒྱུ་དང་རྣམ་བཞིར་འགྱུར། ། ནང་གི་དུས་ནི་ཡིན་པར་བཤད། ། ལྐོག་མ་སྙིང་ག་ལྟེ་བ་དང་། ། གསང་བའི་པདྨར་འགྲོ་འོང་སྟོན། ། ཐུན་ཕྱེད་ཀྱི་ནི་དུས་དག་ཏུ། ། {གོ་རིམས་,གོ་རིམ་} ཇི་བཞིན་གནས་པས་བསྟན། ། གཡས་པ་ནས་ནི་འབྱུང་བའི་ཁམས། ། མེ་ཡི་དཀྱིལ་འཁོར་ཉིད་ཡིན་ཏེ། ། ཁ་དོག་དམར་ཞིང་གསལ་བ་ཉིད། ། པདྨའི་མགོན་པོ་རྒྱུ་བའོ། ། གཡོན་པ་ནས་ནི་འབྱུང་བའི་ཁམས། ། རླུང་གི་དཀྱིལ་འཁོར་ཞེས་བྱ་བ། ། ལྗང་སེར་དག་ཏུ་སྣང་ བ་སྟེ། ། ལས་ཀྱི་མགོན་པོ་རྒྱུ་བའོ། ། གཉིས་ཀ་ལས་ནི་འབྱུང་བའི་ཁམས། ། གསེར་གྱི་མདོག་ཏུ་སྣང་བ་སྟེ། །
BOདབང་ཆེན་གྱི་ནི་དཀྱིལ་འཁོར་ཉིད། ། རིན་ཆེན་མགོན་པོ་རྒྱུ་བའོ། ། དལ་ཞིང་རྒྱུ་བ་མེད་པའི་ཁམས། ། དག་པའི་ཤེལ་ལྟར་སྣང་བ་ནི། ། ཆུ་ ཡི་དཀྱིལ་འཁོར་ཉིད་ཡིན་ཏེ། ། རྡོ་རྗེ་མགོན་པོ་རྒྱུ་བའོ། ། ལུས་ཀུན་ལ་ནི་གནས་པའི་རླུང་། ། བྱ་བ་ཀུན་ལ་འཇུག་པའོ། ། འདི་ནི་རྣམ་སྣང་ངོ་བོ་སྟེ། ། འཆི་བའི་ལུས་ལ་འབྱུང་བར་འགྱུར། ། རླུང་གི་དེ་ཉིད་གསལ་བ་འདི། ། ཡེ་ཤེས་ལྔ་ཡི་རང་བཞིན་ཅན། ། རྣལ་འབྱོར་ བྱིས་པའི་ཡུལ་མིན་ཞིང་། ། རྟོག་གེ་པ་ཡིས་མི་ཤེས་སོ། ། དངོས་གྲུབ་ཐམས་ཅད་གསལ་བྱེད་པ། ། རྣལ་འབྱོར་ཀུན་གྱི་དངོས་གྲུབ་པ། ། དེ་ཉིད་ཀུན་གྱི་གོ་འཕང་གསལ། ། རྣལ་འབྱོར་ཀུན་གྱི་དོན་བསྡུས་པ། ། རྡོ་རྗེ་སེམས་དཔའི་གོ་འཕང་གསལ། ། ཐམས་ཅད་བདག་ ཉིད་རྟག་ཏུ་བཞུགས། ། དེ་ཉིད་མཆོག་ནི་ཤིན་ཏུ་ཕྲ། ། བླ་མའི་ཞལ་ལས་རྟོགས་པར་འགྱུར། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རླུང་གི་དེ་ཁོ་ན་ཉིད་བཤད་པའི་ལེའུ་སྟེ་བཅུ་གཉིས་པའོ། ། ། ། དེ་ནས་གཞན་ཡང་བཤད་ཀྱིས་ཉོན། ། བདེ་བ་ཆེན་པོ་གསལ་བའི་ཚིག ། རྡོར་སེམས་གོ་འཕང་མི་ཕྱེད་པ། ། རང་རིག་པས་ནི་མཆོག་གི་མཆོག །
BOཀུན་རྟོག་གིས་བརྟགས་ཀྱིས་སྟོང་པ། ། བདེ་བ་ཆེན་པོ་ཞེས་འདི་བརྗོད། ། ལྷན་ཅིག་སྐྱེས་པའི་དུས་སུ་ནི། ། གཟུང་དང་འཛིན་པ་རྣམ་པར་སྤངས། ། བདེ་དང་ སྡུག་བསྔལ་རྣམ་པར་སྤངས། ། ཞི་བ་གཉིས་མེད་རྣམ་པར་བྲལ། ། དངོས་པོ་ཀུན་གྱི་རང་བཞིན་བདག ། བདེ་ཆེན་ཞེས་ནི་འདི་ལ་བརྗོད། ། རྡོ་རྗེ་ཡེ་ཤེས་ལྔ་ཡི་དངོས། ། སངས་རྒྱས་ལྔ་ཡི་རང་བཞིན་ཅན། ། ལྔ་ནི་རྩ་ནས་འབབ་པའི་རྒྱུན། ། སྟོང་ཉིད་རྡོ་རྗེའི་གོ་འཕང་གསལ། ། རང་བཞིན་མེད་ཅིང་རྟེན་མེད་པ། ། གཉིས་མེད་དངོས་པོ་རྣམ་བྲལ་ཞིང་། ། ཆ་མེད་ཆ་ནི་རྣམ་པར་སྤངས། ། རྟག་ཏུ་རྟོག་པ་ཀུན་ལས་གྲོལ། ། འཕོ་བ་མེད་ཅིང་ཞི་བ་དང་། ། ཟད་མེད་བདེ་བ་ཐམས་ཅད་གསལ། ། ཉོན་མོངས་ཀུན་ལས་རྣམ་གྲོལ་བ། ། བདེ་བ་ཐམས་ ཅད་ལ་འཇུག་པ། ། སྟོང་པ་སྟོང་པ་ཆེན་པོ་དང་། ། ཤིན་ཏུ་སྟོང་པ་མཆོག་གི་མཆོག ། སྟོང་པ་དང་གཞན་སྟོང་པའི་གནས། ། ནམ་མཁའ་ལྔ་ཡི་ངོ་བོ་ཉིད། ། མི་ཆོད་མི་འགྱུར་ངོ་བོ་ཉིད། ། མི་ཚིག་པ་དང་མཆོག་ཏུ་འབིགས། ། སངས་རྒྱས་ལྔ་ཡི་ཡེ་ཤེས་མཆོག ། རང་བཞིན་རྡོ་རྗེ་ ཞེས་ནི་བརྗོད། ། སྙིང་རྗེ་རྣལ་འབྱོར་ཡང་དག་འདྲེས། ། མཆོག་ཏུ་སྐྱེ་བའི་བདེ་བ་འདི། །
BOདེ་ཉིད་གསུམ་པོ་རོ་གཅིག་པ། ། རྗོད་དང་བརྗོད་བྱ་རྣམ་པར་སྤངས། ། བདེ་ཆེན་ཞེས་བྱའི་འཁོར་ལོར་གནས། ། དབང་པོ་རྣམས་ཀྱི་སྤྱོད་ཡུལ་མིན། ། མཆོག་ཏུ་གཉིས་མེད་རྣལ་འབྱོར་ གྱིས། ། ཞི་བ་དགའ་བའི་མཚན་ཉིད་གཅིག ། འཁོར་ལོ་བཞི་ཡི་རིམ་གྱིས་ཐོབ། ། རྣལ་འབྱོར་བཞི་ཡི་གོ་འཕང་གསལ། ། སྟོང་ཉིད་ལྔ་ཡིས་ཀུན་ནས་གང་། ། ཆ་བཞི་ཡིས་ནི་རྣམ་བཀག་པ། ། རྡོ་རྗེ་མོར་ནི་འཛིན་པ་ནི། ། སེམས་དཔའ་ཞེས་བྱར་གཏན་ལ་དབབ། ། ནམ་མཁའ་ ལྔ་ཡི་ཆ་ཡིས་གང་། ། འདི་ནི་རྡོ་རྗེ་སེམས་དཔར་བརྗོད། ། དེ་ཉིད་བདེ་ཆེན་གོ་འཕང་སྟེ། ། བཞི་བ་དགའ་བ་ཀུན་ལ་ཁྱབ། ། དཔའ་བོ་རྣལ་འབྱོར་མ་སྦྱོར་སྐྱེས། ། མི་ཕྱེད་དབྱེ་བ་རྣམ་པར་སྤངས། ། དེ་ཡི་ངོ་བོ་དེ་ཉིད་དེ། ། རང་ཉིད་ཚོར་བ་རིག་པའོ། ། ཕ་རོལ་གཞན་གྱི་སྤྱོད་ ཡུལ་མིན། ། དཔེ་བྲལ་མཚོན་པར་དཀའ་བ་དང་། ། རང་གི་བློ་ལ་ཡང་དག་གནས། ། རང་རིག་པ་ཞེས་བཤད་པའོ། ། གཞོན་ནུ་མ་ཡི་རབ་དགའ་བཞིན། ། མཆོག་ཏུ་གསལ་བར་ཉམས་སུ་མྱོང་། ། དེ་ཉིད་མཆོག་དང་ཕ་རོལ་འགྲོ། ། མཆོག་ནི་ཐུབ་པ་ཀུན་ལ་སོགས། ། རྟོག་པ་གསལ་བའི་གོ་འཕང་ནི། ། དེ་ནི་མཆོག་དང་བདེ་བ་ཆེ། །
BOདེ་ཉིད་གསུམ་དུ་མཚན་ཉིད་གཅིག ། དངོས་དང་དངོས་མེད་ལས་གྲོལ་བདེ་བའི་བདག་ཉིད་འཁོར་བའི་སྡུག་བསྔལ་ལས་ནི་གྲོལ་བར་རྟོགས། ། གཉིས་དང་གཉིས་མེད་རྣམ་དཔྱོད་རང་བཞིན་དང་བྲལ་བློ་ནི་ཞི་བའི་བདག་ ཉིད་ཅན། ། གསུངས་པའི་ཉོན་མོངས་གཅོད་ཅིང་འཇིག་རྟེན་ཀུན་རྟོག་དང་ནི་བྲལ་བ་ཞེས། ། ཤེས་དང་ཤེས་བྱའི་རྣམ་རྟོག་དབེན་པ་སྤངས་ཤིང་བདེན་པའི་རང་བཞིན་དང་། ། མཐར་གྱུར་ཀུན་ཁྱབ་ཞི་བ་མཆོག་དང་མཆོག་རབ་དེ་ཉིད་འགྲོ་བ་བདེ་ལ་སྩོལ། ། དུས་ནི་དུས་ཀྱི་མཐའ་ཞེས་བརྗོད། ། བཞི་པའི་དུས་སྦྱོར་ཞེས་བྱ་བ། ། འཁོར་བ་འཁྲུལ་བའི་རྟོག་སྤངས་ཤིང་། ། མྱ་ངན་འདས་བ་ཐོབ་པ་སྤངས། ། མཉམ་པའི་ཉམས་ནི་ཆེན་པོར་མྱོས། ། མཉམ་ཉིད་ཡེ་ཤེས་མཚན་ཉིད་ཅན། ། གཟུང་བ་རྣམས་ཀྱི་ཡུལ་རྣམས་ཞེས། ། ཀུན་ནས་གཟུགས་ལ་སོགས་པ་ ལས། ། འཛིན་པ་དབང་པོ་རྣམ་ཤེས་རྣམས། ། མིག་ལ་སོགས་པའི་རང་བཞིན་གྱིས། ། དེ་དང་བྲལ་ཞིང་མཆོག་ཏུ་ཕྲ། ། ཡེ་ཤེས་བདེ་བ་ཀུན་གྱི་བདག ། སྡུག་བསྔལ་ཀུན་ལས་རྣམ་པར་གྲོལ། ། གཟུང་དང་འཛིན་པ་རྣམ་པར་སྤངས། ། བདེ་བ་སེམས་ནི་ཞི་བ་ཉིད། ། སྡུག་བསྔལ་ འཁོར་བའི་མཚན་ཉིད་དེས། ། དེ་ལས་རྣམ་གྲོལ་འཇིགས་པ་མེད། །
BOམི་གནས་མྱ་ངན་འདས་པ་པོ། ། སྟོང་ཉིད་ཡེ་ཤེས་ཆེན་པོའི་བདག ། འཁོར་བའི་སྡུག་བསྔལ་མི་འབྱུང་ཞིང་། ། ཐུགས་རྗེ་ཞི་བར་མཛད་པའི་ཕྱིར། ། མྱ་ངན་འདས་པའི་བདེ་མི་གནས། ། ཉན་ཐོས་ ཡེ་ཤེས་ཞི་བ་ཉིད། ། གཉིས་མེད་མཆོག་དང་བསེ་རུའོ། ། དེ་དག་བདེ་བ་རྟོགས་པ་ཡི། ། དེ་དང་བྲལ་བའི་བདེ་ཆེན་པོ། ། དགང་ཕྱིར་མཆོག་ཏུ་དཀའ་བའི་དུས། ། ཉན་ཐོས་ཡེ་ཤེས་ཞེས་བརྗོད་དོ། ། དེ་མཐའ་བྲལ་བའི་དགའ་བ་ནི། ། རང་རྒྱལ་མྱ་ངན་འདས་པ་དང་། ། དེ་ནི་གཉིས་ མེད་ཡེ་ཤེས་ཞི། ། བདེ་བ་ཡིས་ནི་བྱེ་བྲག་བྱས། ། དངོས་པོ་མཁྱེན་པའི་ཡེ་ཤེས་ཆེ། ། བྱང་ཆུབ་སེམས་ཀྱང་འཛིན་པར་བྱེད། ། རྩ་རྣམས་ཀུན་ལ་བདེ་བ་ནི། ། བདེ་བ་ཆེན་པོའི་གོ་འཕང་གནས། ། དེ་ཡི་བདག་ཉིད་དེ་ཉིད་ནི། ། བདེ་བ་ཆེན་པོ་ཞེས་ནི་བརྗོད། ། རྣལ་འབྱོར་ གཅིག་པུས་དེ་ཉིད་ནི། ། རྟོག་པ་རྣམ་རྟོག་བདག་ཉིད་མིན། ། བསྙེན་ནས་བཟླས་པ་སྦྱིན་སྲེག་མིན། ། བསམ་གཏན་རླུང་ནི་བགེགས་པས་མིན། ། བྱ་བ་མ་ཡིན་ཕྲེང་བས་མིན། ། བསྐྱེད་པའི་རིམ་པ་བསྒོམས་པས་མིན། ། ཅུང་ཟད་བཞི་པའི་དབང་བསྐུར་གྱིས། ། བླ་མ་དམ་པའི་ཞལ་ ནས་འཐོབ། ། རྣལ་འབྱོར་མ་ཀུན་ཀུན་སྤྱོད་ནི། །
BOམཆོག་གི་ཡེ་ཤེས་བདེ་བ་ཆེ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་བདེ་བ་ཆེན་པོའི་ཚིག་རྣམ་པར་བཤད་པའི་ལེའུ་སྟེ་བཅུ་གསུམ་པའོ། ། ། ། དེ་ནས་གཞན་ཡང་བཤད་ཀྱིས་ཉོན། ། རྡོ་རྗེ་ པདྨ་མཉམ་པར་སྦྱོར། ། གང་གིས་ཡང་དག་དངོས་གྲུབ་འགྱུར། ། ཚེ་འདི་ཉིད་ལ་རྣལ་འབྱོར་པ། ། མི་ཕྱེད་རྡོ་རྗེ་ཞེས་ནི་བརྗོད། ། དེ་ནི་རླུང་དུ་ཡང་དག་གྲགས། ། ཡི་གེ་ཨ་ནི་ཕྱེ་བ་ཡིས། ། རྣལ་འབྱོར་ཤེས་པས་རྟག་མཆོག་སྩོལ། ། དེ་རྟེན་སྙིང་གའི་པདྨ་ཡིས། ། འདབ་ མ་བརྒྱད་ཀྱིས་རྣམ་པར་བརྒྱན། ། ཆོས་ཀྱི་འཁོར་ལོ་སྐལ་བ་བཟང་། ། ཐམས་ཅད་བདག་ཉིད་རྟག་ཏུ་བཞུགས། ། དེ་ཡི་འདབ་མ་ལ་སྐྱེས་པ། ། རྣམ་ཤེས་བརྒྱད་ནི་ཀུན་རྫོབ་བོ། ། མིག་ལ་སོགས་པ་ཡང་དག་རྟེན། ། འགྲོ་བ་གསུམ་དུ་རྣམ་པར་སྤྱོད། ། དེ་དག་འཇོམས་པ་ རླུང་རྡོ་རྗེ། ། བགེགས་མཐར་བྱེད་པ་ཞེས་ནི་བརྗོད། ། རྣམ་ཤེས་རྣམས་དང་གང་དེ་ལ། ། འཇིག་རྟེན་སྐྱོང་བ་རྣམས་སུ་བརྗོད། ། འཇིག་རྟེན་གསུམ་དུ་ཀུན་ནས་ཁྱབ། ། འཇིག་རྟེན་པ་ཡི་ལྷ་རྣམས་གནས། ། སྐྱོང་བ་ཡང་ནི་ཐམས་ཅད་ཀྱིས། ། ཡུལ་ལ་སོགས་པའི་འབྲས་བུ་ གནས། །
BOདེ་ལ་རླུང་གིས་ཡང་དག་སྦྱོར། ། རྡོ་རྗེ་པདྨོ་ཞེས་ནི་བརྗོད། ། རྡོ་རྗེ་སྙིང་རྗེར་ཤེས་པར་བྱ། ། པདྨ་ཡང་ནི་སྟོང་པ་ཉིད། ། དེ་དག་སྦྱོར་བའི་མཆོག་ཏུ་ཤེས། ། རྡོ་རྗེ་པདྨ་མཉམ་སྦྱོར་བ། ། རྡོ་རྗེ་ཉི་མ་ཞེས་ནི་གསུངས། ། འོད་ཟེར་ཚོགས་ཀྱི་བདག་ཉིད་ཅན། ། དེ་རྣམས་ ཀྱིས་ནི་འབྱེད་པ་གང་། ། དེ་ནི་པདྨ་ཞེས་སུ་བརྗོད། ། དེ་ཡི་རྣལ་འབྱོར་མཆོག་ཏུ་ཤེས། ། རྡོ་རྗེ་པདྨ་མཉམ་སྦྱོར་བ། ། བྱང་ཆུབ་སེམས་ཀྱང་རྡོ་རྗེར་འགྱུར། ། བདེ་ཆེན་འཁོར་ལོ་པདྨའོ། ། དེ་ལའང་དེ་ཡི་སྦྱོར་བ་གང་། ། སྦྱོར་བ་མཆོག་ཏུ་རྨད་དུ་བྱུང་། ། བླ་མའི་གསུང་ནི་རྡོ་རྗེ་སྟེ། ། སློབ་ མ་བཟང་གིས་ཐོས་པའི་སྣོད། ། པདྨ་དེ་ཡི་གནས་དེ་ལ། ། དེ་ཡི་སྦྱོར་བའང་མཆོག་ཏུ་གསལ། ། ཞི་གནས་པདྨ་ཞེས་གསུངས་ལ། ། དེ་ལ་ལྷག་མཐོང་རྡོ་རྗེའོ། ། དེ་གཉིས་གཅིག་གྱུར་རྣལ་འབྱོར་ནི། ། སྒོམ་པ་ཡིས་ནི་དེ་ཉིད་མཐོང་། ། རྣལ་འབྱོར་མ་ཞལ་པདྨར་གནས། ། རྡོ་རྗེ་བདེ་ ཆེན་བླ་ན་མེད། ། པདྨ་སློབ་མ་བཟང་གི་ཁ། ། མན་ངག་གི་ནི་དོན་གྱི་སྣོད། ། དེ་གཉིས་རྣལ་འབྱོར་ཀུན་བདག་ཉིད། ། ཡང་དག་དེ་ཉིད་དོན་མཐོང་བྱེད། ། བློ་ལྡན་རྣམ་རྟོག་བྲལ་བ་ཡི། །
BOརྡོ་རྗེ་ལིངྒ་ཞེས་ནི་བཤད། ། རྣམ་རྟོག་བྲལ་བའི་བློ་ལྡན་གྱིས། ། བྷ་ག་པདྨ་ཞེས་ནི་བརྗོད། ། དམ་ཚིག་གིས་བརླན་རྣལ་འབྱོར་མ། ། དེ་གཉིས་དངོས་གཅིག་ཡང་དག་སྦྱོར། ། གཉིས་མེད་ཡེ་ཤེས་མཐོང་བར་བྱེད། ། སྟོང་ཕྲག་གཉིས་དང་བདུན་ཁྲི་ཡི། ། རྩ་རྣམས་རྡོ་རྗེ་ཞེས་ནི་བརྗོད། ། བྱང་ཆུབ་སེམས་ནི་འབབ་པའི་རྩ། ། པདྨ་ཞེས་ནི་ཡོངས་སུ་གྲགས། ། དེ་ ནི་ཀུན་དུ་སྦྱོར་བ་དེས། ། དགའ་བ་སྐྱེད་པར་བྱེད་པ་ཡིས། ། རྡོ་རྗེ་ཡི་ཡང་ཉམས་དགའི་སྟན། ། རང་རིག་རྡོ་རྗེ་འཆང་པདྨ། ། དེ་ལ་དེ་གཉིས་མཉམ་སྦྱོར་བ། ། སངས་རྒྱས་ཡེ་ཤེས་གོ་འཕང་གསལ། ། དབང་བསྐུར་མཆོག་ནི་རྡོ་རྗེ་སྟེ། ། བླ་མ་སློབ་མ་སྣོད་བཟང་པོ། ། དེ་གཉིས་ མཆོག་ཏུ་ཡང་དག་སྦྱོར། ། ཡང་དག་དེ་གཉིས་ཀྱི་ནི་རྒྱུ། ། ཨེ་ནི་པདྨ་ཞེས་སུ་བརྗོད། ། ཡི་གེ་བྃ་ནི་རྡོ་རྗེ་ཉིད། ། ཐིག་ལེ་དེ་ཉིད་མི་ཤིགས་པ། ། དེ་གཉིས་སྦྱོར་བའི་ངོ་མཚར་ནི། ། དེ་ལྟར་སྦྱོར་བ་མཆོག་ཏུ་ཤེས། ། རྡོ་རྗེ་པད་སྣོད་སྡོམ་པ་ནི། ། རྣལ་འབྱོར་མ་ཡི་མན་ངག་དང་། ། བླ་མའི་ དྲིན་གྱིས་ཡོངས་སུ་ཤེས། །
BOརྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྡོ་རྗེ་པདྨ་ཡང་དག་པར་སྦྱོར་བ་བཤད་པའི་ལེའུ་སྟེ་བཅུ་བཞི་པའོ། ། ། ། སྔགས་ཀྱི་དེ་ཉིད་ཡེ་ཤེས་མཆོག ། བཤད་ཀྱིས་རྡོ་རྗེ་ཅན་ནི་ཉོན། ། སྔགས་ཀྱི་སྤྱོད་པ་སྤྱད་པ་ཡིས། ། གང་གིས་དངོས་གྲུབ་མྱུར་འགྲུབ་འགྱུར། ། སྐུ་གསུང་ཐུགས་ཀྱི་རྡོ་རྗེ་རྣམས། ། སྔགས་ནི་གཟུངས་བཞིན་བཟླས་བརྗོད་བྱ། ། དེ་ཡིས་མྱུར་དུ་དངོས་གྲུབ་འགྱུར། ། རླུང་གི་དེ་ཉིད་ཕ་མཐར་ཕྱིན། ། རྡོ་རྗེའི་ཕྱག་རྒྱ་གོ་འཕང་ཞི། ། ཕྱག་རྒྱ་ཆེན་པོའི་སྡོམ་པའི་དོན། ། མཆོག་གི་དེ་ཉིད་ཡེ་ ཤེས་ཆེ། ། སྔགས་ཀྱི་དེ་ཉིད་བསྟན་པ་ཡིན། ། དམིགས་པ་མེད་པའི་གོ་འཕང་གསལ། ། རྡོ་རྗེ་སེམས་དཔའ་ངེས་པའི་རྒྱུ། ། སྔགས་ནི་ཡོན་ཏན་ཀུན་གྱིས་གསལ། ། ལུས་ངག་ཡིད་ཀྱི་སྡོམ་པའོ། ། དེ་ཉིད་དེ་སྐྱེས་ཡེ་ཤེས་མཆོག ། དེ་ཉིད་ཀུན་གྱི་དོན་བསྡུས་པ། ། སྙིང་གའི་པདྨར་མཆོག་ཏུ་ གསལ། ། དེ་ཉིད་ཡེ་ཤེས་བླ་ན་མེད། ། ཟླ་དྲུག་བཟླས་པས་འགྲུབ་པར་ནི། ། འགྱུར་ཏེ་གཞན་དུ་མ་ཡིན་ནོ། ། རྣལ་འབྱོར་མཆོག་གི་ཐབས་དང་ནི། ། རྣལ་འབྱོར་པས་ནི་ཡོངས་སུ་གྲགས། ། དམིགས་མེད་ཞེས་ནི་གང་གསུངས་པ།
BO། དེ་ནི་དོན་དམ་པར་ནི་བརྗོད། ། སྦྲུལ་སོགས་པ་ཡི་དབྱེ་ བ་ཡིས། ། སྔགས་མི་ཟློས་པ་གཉིས་སུ་མེད། ། འོན་ཀྱང་མི་ཕྱེད་དེ་ཉིད་གསུམ། ། སྔགས་ཀྱི་དོན་དམ་བསྡུས་པའོ། ། བཟླས་པའི་དངོས་གྲུབ་མཚུངས་པ་མེད། ། ཡང་དག་མཉམ་པར་གཞག་བཟླས་ན། ། དངོས་གྲུབ་མཚུངས་པ་མེད་པར་འགྲོ། ། རྣམ་དག་གོ་འཕང་བཟང་པོ་གསལ། ། གང་ཤེས་དེ་ནི་འགྲོ་བའི་བླ། ། སྔགས་དོན་སྔགས་དེ་ཉིད་དང་ནི། ། སྔགས་ཀྱི་མན་ངག་ཁ་བརྒྱུད་པ། ། སྔགས་ཀྱི་མན་ངག་མི་གསལ་བ། ། གང་ཤེས་དེ་ནི་འགྲོ་བའི་བླ། ། དེ་ནས་རྡོ་རྗེ་སེམས་དཔའ་ནི། ། ཀུན་མཁྱེན་འགྲོ་བའི་བླ་མ་ལ། ། རྡོ་རྗེ་སེམས་དཔས་ཡང་ནས་ཡང་། ། ཕྱག་བྱས་ ནས་ནི་ཡོངས་སུ་ཞུས། ། སྔགས་ཀྱི་མཚན་ཉིད་ཇི་ལྟ་བུ། ། བཅོམ་ལྡན་འདས་ཀྱིས་མིང་དང་དོན། ། རང་བཞིན་ཅི་ཞིག་རབ་གསལ་བ། ། སྔགས་ཀྱི་དེ་ཉིད་མན་ངག་ནི། ། སྔགས་ཀྱི་སྡོམ་དོན་ཇི་ལྟ་བུ། ། དེ་ནས་བཅོམ་ལྡན་རྡོ་རྗེས་གསུངས། ། རྣལ་འབྱོར་གསུམ་གྱི་འབྲས་བདག་ཉིད། ། སྔགས་ཀྱི་དོན་དང་མིང་མཆོག་དང་། ། གཉིས་མེད་ཡེ་ཤེས་མཚན་ཉིད་ཅན། ། དེ་ཁོ་ན་ཉིད་བཤད་ཀྱིས་ཉོན། ། སྙིང་པོའི་སྙིང་པོའི་དོན་བསྡུས་པ། ། ཐོག་མ་མེད་ཅིང་ཞི་བ་དང་། །
BOདངོས་དང་དངོས་མེད་བདག་ཉིད་གཙོ། ། སྟོང་ཉིད་སྙིང་རྗེ་དབྱེར་མེད་པ། ། སྔགས་དོན་རིག་པའི་མཚན་ ཉིད་ནི། ། ཉོན་མོངས་མེད་ཅིང་མི་གསལ་བ། ། རང་བཞིན་མེད་པའི་མཆོག་གི་མཆོག ། མིང་མེད་རང་བཞིན་མེད་པ་དང་། ། རྣམ་པ་མེད་པའི་ཆེན་པོའི་མཆོག ། གཉིས་པ་ཐམས་ཅད་རྣམ་པར་སྤངས། ། བདེ་བ་ཡང་དག་འཕེལ་བར་བྱེད། ། སྐལ་བཟང་བདེ་བ་འཕེལ་བར་བྱེད། ། ཐམས་ ཅད་ཤེས་ཤིང་ཆ་དང་བྲལ། ། གཉིས་མེད་ཡེ་ཤེས་རྣལ་འབྱོར་སྐྱེས། ། དེ་ཉིད་དེ་ནི་དོན་དམ་ཡང་། ། དེ་ཉིད་དེ་བཞིན་ཉིད་གཞན་མིན། ། དེ་ཉིད་རྡོ་རྗེ་འཆང་བའི་དངོས། ། ཡེ་ཤེས་ལྔ་ཡི་རང་བཞིན་ཉིད། ། ཁྱབ་པ་ཀུན་འགྲོ་སྟོང་པ་ཉིད། ། ཉོན་མོངས་ཐམས་ཅད་རབ་ཏུ་འཇོམས། ། དྲི་མེད་དྲི་བྲལ་དགའ་བ་དང་། ། རང་རིག་པ་ཡི་གོ་འཕང་མཆོག ། དང་པོའི་ལྷ་སྟེ་ཉམས་དགའ་བཟང་། ། ཆ་ཡི་ཚོགས་རྣམས་རྒྱས་པར་བྱེད། ། མན་ངག་གནས་ཀྱི་བྱེ་བྲག་གིས། ། འཁོར་ལོའི་དབྱེ་བས་བཏུ་བར་བྱ། ། རྩ་དང་མགྲིན་པ་སྙིང་ག་རྐན། ། རྩོལ་བ་ཇི་བཞིན་བརྗོད་པ་ཡི། ། དེ་ བཞིན་དུ་ནི་ལས་བྱ་བ། ། ཞི་བ་ལ་སོགས་{གོ་རིམས་,གོ་རིམ་}བཞིན། ། ཇི་བཞིན་དངོས་གྲུབ་ཡེ་ཤེས་དང་། ། ཇི་བཞིན་ཉམས་སུ་མྱོང་མཚན་ཉིད།
BO། རང་བཞིན་རྫོགས་པ་ཇི་ལྟ་བུ། ། རྒྱུན་གྱི་དབྱེ་བ་ཇི་ལྟ་བུ། ། རིག་པ་ཇི་བཞིན་སྦྱོར་ཇི་བཞིན། ། འབྲས་བུ་ཇི་ལྟ་བ་བཞིན་ གནས། ། ཡང་དག་བསམ་གཏན་ཕྱག་རྒྱའི་རིམ། ། གཟུགས་རྫོགས་པ་ལ་སོགས་པ་ཡི། ། བླ་མ་བརྒྱུད་པས་ཡང་དག་གནས། ། རབ་ཏུ་འབད་པས་བསླབ་པར་བྱ། ། གསེར་དང་དོ་ཤལ་གོས་དང་ནི། ། རིན་ཆེན་སྣ་ཚོགས་ཡོན་ཏན་མཆོག ། བྲན་དང་ལས་བྱེད་གྲངས་མེད་དང་། ། དད་ཅིང་གུས་པ་ལ་སོགས་ཀྱིས། ། ཇི་ལྟར་བཞེད་པ་སྟོན་པ་ལ། ། རྙེད་པར་དཀའ་བའི་དངོས་རྣམས་ཀྱིས། ། སྔགས་ཀྱི་དོན་སྟོན་བླ་མ་ནི། ། དགོངས་པ་ཡོངས་སུ་རྫོགས་པར་བྱ། ། ཕྱག་བྱས་དེ་རྗེས་སྔགས་པ་ཡིས། ། ཡང་དག་བཟུང་ནས་འབྲས་བུའི་དོན། ། མི་ཡི་རུས་པའི་སྨྱུ་ གུ་དང་། ། ས་གཞི་རིན་ཆེན་རབ་འབར་བ། ། ཡང་ན་དུར་ཁྲོད་ཐལ་བ་ནི། ། རབ་བརྡལ་དངོས་གྲུབ་སྟེར་བར་བྱེད། ། ཐོག་མར་དབང་བསྐུར་བླང་བྱས་ནས། ། མདུན་དུ་དཀྱིལ་འཁོར་ལ་སོགས་བྱ། ། བགེགས་མཐར་བྱེད་ལ་གཏོར་མ་ནི། ། ཆེན་པོ་གཙུག་ལག་ཁང་དུ་སྦྱིན། ། སྐུ་གསུང་ ཐུགས་ནི་སྒྲུབ་བྱེད་པའི། ། མཚུངས་པ་མེད་པའི་སྔགས་བཏུ་བྱ། ། དང་པོའི་ཡི་གེ་ཐོག་མར་བྲི། ། དབྱངས་ཡིག་ལྔ་པ་ཡང་དག་ལྡན། །
BOསྡེ་ཚན་ཐ་མའི་མཐའ་ཆ་ལྡན། ། སྐུ་ཡི་ས་བོན་དུ་ནི་བརྗོད། ། ཐོག་མའི་ཡི་གེ་ཉིས་འགྱུར་ལ། ། ཨུཥྨ་ཥ་ཡི་ཆ་དང་ལྡན། ། མཚུངས་པ་མེད་ པའི་སྔགས་བཏུ་བྱ། ། གསུང་གི་རྡོ་རྗེ་སྙིང་པོ་མཆོག ། ཨུཥྨ་ཥ་ཡི་ཆ་དང་བཅས། ། དབྱངས་ཡིག་དྲུག་པར་ཡང་དག་ལྡན། ། སྡེ་ཚན་མཐའ་ཡི་མཐའ་ཆར་བཅས། ། ཐུགས་ཀྱི་རྡོ་རྗེ་གོ་འཕང་གསལ། ། སྐུ་གསུང་ཐུགས་ཀྱི་དམ་ཚིག་གསུམ། ། འཇིག་རྟེན་གསུམ་ཡང་འགྲུབ་པར་ བྱ། ། རྣལ་འབྱོར་པ་ཡི་དེ་ཉིད་མཆོག ། སྔགས་བཏུ་བ་ནི་བླ་ན་མེད། ། དེ་ཉིད་དངོས་གྲུབ་ཐམས་ཅད་བྱེད། ། སྔགས་རྣམས་ཀུན་གྱི་དོན་བསྡུས་པ། ། སྔགས་ཀྱི་ཐེག་པ་ཀུན་ཡིན་ནོ། ། རྒྱུ་དང་མི་རྒྱུ་ས་ཉིད་ལ། ། དངོས་གྲུབ་རྣམས་ཀྱི་རྣལ་འབྱོར་མཆོག ། རྣལ་འབྱོར་ཡེ་ ཤེས་བླ་ན་མེད། ། རྡོ་རྗེ་སེམས་དཔའི་སྙིང་པོ་ནི། ། ཡེ་ཤེས་བླ་ན་མེད་པའི་མཆོག ། མན་ངག་ཇི་བཞིན་སྔགས་ཟློས་པ། ། དངོས་གྲུབ་ཕྱིར་ནི་ལུང་བཞིན་གྱིས། ། དེ་ཡི་དངོས་གྲུབ་རྒྱ་ཆེན་འགྲོ། ། ཚེ་འདི་ཉིད་ལ་སྔགས་ཤེས་པས། ། ཡེ་ཤེས་ཆེན་པོ་ཞེས་བཤད་པའི། ། སྐུ་གསུང་ ཐུགས་ཀྱི་རྣལ་འབྱོར་ཆེ། ། རབ་གསལ་སྔགས་ནི་མཚུངས་པ་མེད། ། འདོད་པ་ཀུན་ལ་ལོངས་སྤྱོད་བྱེད། །
BOགང་ཞིག་སྔགས་ནི་མགུལ་པ་རུ། ། རྟག་འཆང་དེ་ཁོ་ན་ཉིད་ཤེས། ། རྟོག་པ་ཀུན་ཡང་འགྲུབ་པར་བྱེད། ། དཀྱིལ་འཁོར་ཀུན་དུ་ཞུགས་པ་དང་། ། དམ་ཚིག་ཐམས་ཅད་ ཤེས་པ་དང་། ། བློ་བཟང་འཇིག་རྟེན་གསུམ་ཡང་འགྲུབ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྔགས་ཀྱི་དེ་ཁོ་ན་ཉིད་གསུངས་པའི་ལེའུ་སྟེ་བཅོ་ལྔ་པའོ། ། ། ། དེ་ནས་གཞན་ཡང་བཤད་ཀྱིས་ཉོན། ། གྲངས་ཀྱི་རིམ་པ་བླ་ན་མེད། ། ཇི་ ལྟར་གནས་པའི་རླུང་རྣམས་ཀྱི། ། རིམ་པ་ཇི་ལྟ་བ་བཞིན་དུ། ། གང་གིས་ཐོབ་པ་སྐལ་པ་བཟང་། ། སྲོག་ནི་ཐམས་ཅད་བདག་ཉིད་གནས། ། གང་གིས་ཡང་དག་ཡོངས་སུ་ཤེས། ། རྣལ་འབྱོར་མཆོག་ནི་ཐོབ་པར་བྱེད། ། རླུང་གི་མཚན་ཉིད་མི་ཤེས་པ། ། འཇིག་རྟེན་གསུམ་ དུ་རྣམ་པར་འཁོར། ། གོམས་པ་ཐོབ་པ་དེ་ཡང་ནི། ། བླ་མ་རྣལ་འབྱོར་དེ་ཤེས་བརྒྱུད། ། རླུང་གི་མཚན་ཉིད་ཇི་ལྟ་བུ། ། ལོ་ཚིགས་ཀྱི་ནི་མཚན་ཉིད་ནི། ། མདོར་བསྡུས་ནས་ནི་བཤད་པར་བྱ། ། སྤྲིན་གྱི་དཔལ་ལས་གསལ་བ་གང་། ། མདོར་བསྡུས་ནས་ནི་དུས་ནི་དྲུག ། ལོ་ཚིགས་སུ་ནི་ ཡོངས་སུ་གྲགས། ། སྦྱོར་བ་གཉིས་ནི་དུས་ཡིན་ཏེ། ། དུས་དེ་ཉིན་ཞག་དྲུག་ཅུའོ། །
BOཉིན་དང་མཚན་དུ་ངེས་པ་ལ། ། ཉིན་ཞག་གཅིག་ཅེས་ཡོངས་སུ་གྲགས། ། ཉིན་མཚན་ཆུ་ཚོད་དྲུག་ཅུ་སྟེ། ། དེ་བཞིན་དབྱུག་གུ་ཙ་ཤའོ། ། འབྱུང་དང་རྔུབ་པའི་དུས་དྲུག་ལ། ། ཙ་ཤ་ཞེས་ནི་ ཡོངས་སུ་གྲགས། ། སྐད་ཅིག་མ་དྲུག་ལ་ནི་དབུགས། ། དེ་ཉིད་སེ་གོལ་གཏོགས་པའི་ཚད། ། ཐང་ཅིག་གསུམ་ལ་སྐད་ཅིག་གོ། ། དེ་ལ་ཡུངས་ཀར་བསྐོར་བ་ཙམ། ། དབུགས་གསུམ་ལ་ནི་ཐང་ཅིག་གོ། ། ཐང་ཅིག་དེ་ནི་ཡུད་ཙམ་མོ། ། ཐང་ཅིག་གསུམ་ལ་མིག་བཙུམས་ ཏེ། ། དེ་ཡང་མིག་ནི་འཛུམས་པ་ཡི། ། ཙམ་གསུམ་ལ་ནི་མིག་བཙུམས་ཏེ། ། ཙམ་ནི་ཐལ་མོ་བརྡབས་པའོ། ། བདེ་བ་འཆར་བ་དེ་གསུམ་ཙམ། ། དེ་ནི་ཐིག་ལེ་འཕོ་བའོ། ། སྔགས་པ་གསུམ་ལ་བདེ་བར་གནས། ། དེ་ནི་རབ་འགྱེལ་འཇིགས་པར་བརྗོད། ། དུས་གསུམ་ ལ་ནི་འཇིགས་པར་བཤད། ། དུས་ནི་ཕྲ་བ་སྐད་ཅིག་བདག ། འདས་པ་དང་ནི་ད་ལྟར་དང་། ། མ་འོངས་པ་ཡི་མཚན་ཉིད་དོ། ། འདས་པའི་སྐད་ཅིག་གསུམ་དུ་གསུངས། ། ད་ལྟར་ཡང་ནི་སྐད་ཅིག་གསུམ། ། མ་འོངས་སྐད་ཅིག་གསུམ་དུ་བཤད། ། དེ་ལས་སླར་ཡང་སྐད་ཅིག་ གསུམ། ། དེ་ལྟར་སྐད་ཅིག་གསུམ་གྱི་ཆ། ། དེ་ལས་ཆ་གསུམ་དེ་ལས་ཆ། ། དེ་སྲིད་གྲངས་ནི་ཇི་སྲིད་དུ། །
BOརྟོག་པ་སྟོང་པ་གཉིས་སུ་མེད། ། རྣལ་འབྱོར་མཆོག་ནི་ཐོབ་པར་འགྱུར། ། སྲོག་གི་གནས་ནི་བླ་ན་མེད། ། ཕྱོགས་དང་དུས་ཀྱི་རྟོག་པ་བྲལ། ། རིགས་པའི་མཚན་ཉིད་ སྤངས་པ་དང་། ། དེ་ཡི་སྲོག་ནི་ཤར་ནས་ཐིམ། ། གཉིས་མེད་དེ་ནི་བསྡུས་པའོ། ། གཞན་ཡང་བཤད་པར་བྱ་ཡིས་ཉོན། ། སྲོག་ནི་ཐིམ་དང་འཆར་བ་ཡི། ། གང་ཚེ་སྐད་ཅིག་ལ་སོགས་རྟོགས། ། ཀུན་ནས་རབ་ཏུ་མ་ཞི་བ། ། དེ་སྲིད་སྲོག་ནི་རླུང་གི་གནས། ། གྲོལ་བའི་གནས་ ནི་མི་ཤེས་སོ། ། བཤང་སྒོ་གསང་བའི་དབུས་ན་གནས། ། མིང་ནི་མ་སྐྱེས་ཆ་ཆེན་པོ། ། དེ་ཡང་རྣམ་ཤེས་དང་བྲལ་བ། ། ཡེ་ཤེས་ལུས་ནི་བདག་མེད་པ། ། དེར་ནི་སྐྱེ་བ་མཆོག་གི་མཆོག ། སྲོག་ཆགས་རྣམས་ཀྱི་མཆོག་ཏུ་བརྗོད། ། རྣམ་པར་ཤེས་པའི་ངོ་བོ་སྟོན། ། ཐོག་མར་འབྱུང་ བ་བཞི་པོ་ལ། ། སྒྲོ་འདོགས་བསྐྱེད་པའི་ངོ་བོར་བྱེད། ། དེ་ཚེ་རང་གི་གནས་སུ་ཐིམ། ། རྣམ་ཤེས་ལས་ནི་སྐྱེ་བ་རླུང་། ། དེ་ལས་མེ་ནི་སྐྱེ་བར་འགྱུར། ། མེ་ལས་ཆུ་ནི་འབྱུང་བར་བྱེད། ། དེ་ལས་ས་ནི་ཡང་དག་སྐྱེ། ། དེ་དག་རྣམས་ལས་ཕུང་པོར་བྱུང་། ། དེ་ཕྱིར་སྐྱེ་མཆེད་རྣམས་དང་ནི། ། དེ་ལས་རྣམ་ཤེས་རང་བཞིན་མེད། །
BOབརྒྱ་དང་བརྒྱད་ཀྱིས་ལྷག་པའི་རིམ། ། ཇི་ལྟར་སྐྱེ་བོ་དེ་ཡི་གནས། ། ཐིམ་ནས་འགྲོ་བའི་རང་བཞིན་དུ། ། རྒྱགས་པ་བསྐྱེད་པའི་རླུང་ཆེན་པོ། ། ཉོན་མོངས་ཡིད་ནི་འདས་ནས་ནི། ། སྔགས་ཐོབ་ནས་ནི་རྣམ་རྒྱས་ཏེ། ། སྐྱེ་མཆེད་རྣམས་ནི་སྡུད་ པར་བྱེད། ། དེ་ལས་རྒྱགས་པ་ས་ཆུ་ཡི་རླུང་། ། རྒྱགས་པ་བསྐྱེད་པ་ཟ་བའི་ཕྱིར། ། ཕུང་པོ་རྣམས་ཀྱང་སྡུད་བྱེད་ཉིད། ། རིམ་གྱིས་ལུས་ཆེན་སྒྲ་སྒྲོགས་བྱེད། ། དེ་ལས་རྒྱགས་པའི་ཆ་ནི་འབྱུང་། ། རྒྱགས་པའི་ཆུ་ནི་སྡུད་བར་བྱེད། ། འབྱུང་བ་རྣམས་ཀྱིས་བསྡུས་ནས་ཀྱང་། ། {གོ་རིམས་,གོ་རིམ་} ཇི་ལྟ་བ་བཞིན་དུ། ། དེ་ལ་རླུང་ནི་བཏང་བཟུང་འབྱུང་། ། རྒྱགས་པའི་ཆ་ནི་ཟ་བར་བྱེད། ། དེ་ནས་ཀྱང་ནི་རླུང་ནི་སྡུད། ། ཁྱབ་ཅིང་ཕྲ་ལ་སྒྲིབ་པར་བྱེད། ། དེ་ལས་མི་ཟད་བཏང་བཟུང་དང་། ། རྣམ་ཤེས་སྐད་ཅིག་སྒྲིབ་པར་བྱེད། ། བསྒྲིབས་ནས་དེ་ལས་རྣམ་ཤེས་ཀྱང་། ། བེམས་པོར་ སོང་ནས་བརྒྱལ་བར་འགྱུར། ། སྐྱེ་མཆེད་ཆ་ནི་སྒྲིབ་པར་བྱེད། ། དག་པའི་ཡེ་ཤེས་མཆོག་གི་མཆོག ། དེ་ལས་ཐིམ་པར་གྱུར་པའི་སྲོག ། རྣམ་ཤེས་དང་ནི་མཚུངས་པར་ལྡན། ། དེ་ཉིད་མཆོག་ནི་དེ་ལྟར་བཤད། །
BOསྲོག་ནི་ཐིམ་ཞིང་འཆར་བ་དང་། ། ཇི་ལྟ་བ་བཞིན་ཡོངས་སུ་ ཤེས། ། བླ་མ་བརྒྱུད་པའི་རིམ་པ་འབྱུང་། ། རིགས་པ་གཞན་ཡང་བཤད་པར་བྱ། ། རྡོ་རྗེའི་སྐུ་ནི་བསྒྲུབ་པའི་ཕྱིར། ། འཆི་བ་མེད་པའི་བསྒྲུབ་པ་ནི། ། གང་གིས་འཆི་མེད་ལུས་མཆོག་ནི། ། ཐོབ་པ་ཡོན་ཏན་རྣམས་ཀྱི་རྟེན། ། གང་ཕྱིར་སེམས་ཅན་ཚེ་ཐུང་བས། ། འཆི་མེད་ གོ་འཕང་བསྒྲུབ་མི་ནུས། ། དེ་ཕྱིར་འབད་པ་ཐམས་ཅད་ཀྱིས། ། འཆི་བ་མེད་པར་རབ་བསྒྲུབ་བྱ། ། བཅོམ་ལྡན་མགོན་པོ་ཡེ་ཤེས་མཆོག ། རྣལ་འབྱོར་དེ་ཉིད་ཕ་རོལ་བྱོན། ། རྡོ་རྗེ་སེམས་དཔས་ཕྱག་བྱས་ཞུས། ། འཆི་བ་མེད་ཉིད་རིགས་པར་ནི། ། ཇི་ལྟར་ཡང་དག་ཐིམ་པ་ ལགས། ། དེ་ནས་བཅོམ་ལྡན་རྡོ་རྗེས་གསུངས། ། བྱ་བ་ཀུན་བསྒྲུབ་གོ་འཕང་ནི། ། འཆི་བ་མེད་པའི་རྣལ་འབྱོར་ཆེ། ། ཡང་དག་དེ་ཉིད་རྣམ་ངེས་པ། ། སེམས་ཅན་ཚེ་ནི་ཐུང་བ་ཡིས། ། དངོས་གྲུབ་འགྲུབ་པ་གང་ཡང་མེད། ། དེ་བས་རྣལ་འབྱོར་བཟང་པོ་རྣམས། ། ཚེ་རིང་ བ་ནི་དགེ་བའོ། ། དེ་ལ་ཐོག་མར་རྣལ་འབྱོར་མཆོག ། བློ་བཟང་ནང་གི་བདག་ཉིད་བསྒྲུབ། ། ལྕེ་ནི་རྐན་གྱི་དབུས་སྦྱར་བ། ། བྱས་ནས་དེ་ཁོ་ཉིད་ཚིག་བཟླ། ། སེམས་དཔའི་སྐྱིལ་ཀྲུང་བཅས་ནས་ནི། །
BOཡང་དག་རྣལ་འབྱོར་རྗེས་དྲན་བྱ། ། སྣ་རྩེར་དབུགས་ནི་རྒྱུ་བྱ་ཞིང་། ། ཁ་ནི་གསལ་བར་དགག་པར་བྱ། ། རྐན་གྱི་གནས་སོན་ཟླ་བ་ནི། ། སྔགས་ཀྱི་རྣལ་འབྱོར་གྱིས་ནི་ཞུ། ། ཞུ་བ་རླུང་གི་རྣལ་འབྱོར་གྱིས། ། རྟག་ཏུ་རྣལ་འབྱོར་གཙོ་བོས་བཏུང་། ། མཚན་ཕྱེད་ཀྱི་ནི་དུས་ཚོད་མཐར། ། ཇི་སྲིད་ཐུན་གཅིག་མ་ཆད་པར། ། དེ་སྲིད་རྣལ་ འབྱོར་པས་སྔགས་བཟླ། ། རྡོ་རྗེའི་ལུས་ནི་བྱེད་པར་འགྱུར། ། སྡེ་ཚན་གཉིས་པའི་གསུམ་པ་ལ། ། དབྱངས་བཅས་པ་དང་ཡང་དག་ལྡན། ། ཡན་ལག་མ་ཉམས་རྟག་ཏུ་བཟླ། ། སྒྲུབ་པ་པོ་ཡི་སྲོག་ནི་འགུགས། ། རྫས་ཀྱང་རྟག་ཏུ་བསྟེན་པར་བྱ། ། དེ་ཉིད་ལྔ་ཡི་རིམ་པས་སྐྱེ། ། བཟླས་པ་རྫོགས་ནས་རྟག་ཏུ་ནི། ། ལུས་ལ་འབྱུང་བའི་དྲི་མ་མེད། ། ལྕགས་ལྔའི་རང་བཞིན་སྣོད་དུ་ནི། ། བཞག་ནས་ཇི་སྲིད་ཉི་མ་ནི། ། འཆར་ཀར་དེ་ནས་དེ་ལ་ཡང་། ། ཡོ་ཥི་རག་གཏམ་བདེ་བ་ནི། ། བླུགས་ནས་རྟག་ཏུ་རྫས་ཀྱི་མཆོག ། བདུད་རྩི་བདུན་པའི་མིང་ཅན་ནོ། ། ཉལ་ ཀར་ཡང་ནི་དེ་འཐུངས་ན། ། རྫས་ཀྱིས་ཚེ་ནི་འཕེལ་བར་བྱེད། ། སྔགས་ཀྱི་རྒྱལ་པོ་ཨོྃ་ཨཱཿཧཱུྃ། ། དེ་ནས་ལན་བདུན་བཟླ་བར་བྱ། ། ལག་གཡས་བ་དན་གྱིས་མཚན་ལ། །
BOསྣོད་{བཟངས་,བཟང་}དེ་ལ་བཀབ་ནས་སུ། ། ཡི་གེ་བརྒྱ་པའི་སྔགས་ཀྱིས་ནི། ། ལན་གསུམ་དུ་ནི་དག་པར་བྱ། ། དེ་ཕྱིར་ བུད་མེད་གཞོན་ནུ་ནི། ། རྟག་ཏུ་འཁུར་བ་བཀང་ཞིང་བཏུད། ། དེ་ནི་བཟའ་བ་སྦྱིན་པ་ཡང་། ། མར་ལ་བཏགས་པའི་འབྲས་དང་ནི། ། མ་ཤ་དང་ནི་ཉི་དགའ་དང་། ། ར་ཡི་འོ་མ་ཁ་ར་ཀར། ། ཏིལ་རྣམས་ཆ་མཉམ་བྱས་ནས་ནི། ། མོས་པ་ཡིས་ནི་སྦྱིན་སྲེག་བྱ། ། ཉལ་ཀར་དེ་ ལ་བཟའ་བ་སྦྱིན། ། བླ་ན་མེད་པའི་བཟའ་བ་པོ། ། དེ་ལྟར་རིག་པས་ཆོག་ཤེས་ནས། ། སུ་ལའང་སྨྲ་བར་མི་བྱའོ། ། ཐམས་ཅད་སྔོན་བཞིན་ཞི་བ་ནི། ། མྱུར་དུ་དངོས་གྲུབ་སྟེར་བར་བྱེད། ། ཟླ་བ་དྲུག་ཏུའང་གང་བསྟེན་པ། ། དེ་ནི་རྡོ་རྗེའི་ལུས་སུ་འགྱུར། ། བཅུད་ཀྱིས་ལེན་དང་ གསེར་འགྱུར་སོགས། ། ཚེ་དགུག་པ་ནི་བླ་ན་མེད། ། རབ་ཏུ་འབད་པས་བསྟེན་པར་བྱ། ། ཕྱག་རྒྱ་ཆེ་དོན་སྒྲུབ་པ་པོས། ། རྒས་པ་མེད་ཅིང་སྲིན་ནད་མེད། ། སྙོམ་ལས་མེད་ཅིང་ལྐུགས་པ་མེད། ། གློ་སྐམ་རླུང་མཁྲིས་ནད་སོགས་མེད། ། ནད་དང་འབྲས་དང་འབྲུམ་བུ་དང་། ། ཤུ་བ་གཡན་པ་འབྲུམ་ཕྲན་མེད། ། མཛེ་ནད་མཚན་མར་རྡོལ་བ་མེད། ། དུང་དང་པད་དཀར་དཔལ་ལུས་ལྡན། ། འཛམ་བུ་ཆུ་བོའི་གསེར་ལྟར་འབར། །
BOརིག་པ་འཛིན་པའི་བུ་མོ་མཆོག ། དེ་ནི་རྟག་ཏུ་འགུགས་པར་བྱེད། ། དེ་ཡི་མཛའ་ཆེན་ལྷ་རྣམས་ཏེ། ། རྣལ་འབྱོར་མ་ རྣམས་སེམས་པར་བྱེད། ། ལུས་ཀྱི་རང་བཞིན་རྟག་ཏུ་ནི། ། ཕྱག་བྱ་བ་དང་མཆོད་པར་འགྱུར། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རླུང་གི་གྲངས་ཀྱི་རིམ་པའི་གནས་བསྟན་པའི་ལེའུ་སྟེ་བཅུ་དྲུག་པའོ། ། ། ། དེ་ནས་གཞན་ཡང་རྩ་རྣམས་ ནི། ། གྲངས་དང་གནས་ནི་བསྡུས་པ་ཉོན། ། འཁོར་ལོའི་གྲངས་ཀྱི་དབྱེ་བ་ཡིས། ། ཇི་བཞིན་རྨད་དུ་བྱུང་བའི་མཆོག ། འཁོར་ལོ་དྲུག་ལ་རྟེན་བཅུ་དྲུག ། ལུས་ལ་ལྷ་ཡི་གཞལ་ཡས་ཁང་། ། རྣལ་འབྱོར་ཇི་བཞིན་གནས་ཇི་བཞིན། ། མདོར་བསྡུས་ནས་ནི་བཤད་པར་བྱ། ། རླུང་གི་འཁོར་ལོར་གནས་པའི་རྩ། ། འདབ་དྲུག་རླུང་ནི་མཁའ་ལ་སྤྱོད། ། འདབ་གསུམ་མེ་ཡི་འཁོར་ལོར་བཤད། ། རྩ་གསུམ་གནས་ནི་རིམ་གྱིས་འཆར། ། དེ་བཞིན་ལོངས་སྤྱོད་འཁོར་ལོ་ཡང་། ། རྩ་ནི་བཅུ་དྲུག་ཡང་དག་བརྗོད། ། ཆོས་ཀྱི་འཁོར་ལོར་གནས་པའི་རྩ། ། བརྒྱད་ནི་ཀུན་ལ་ཁྱབ་པའོ། ། དེ་བཞིན་སྤྲུལ་པའི་འཁོར་ལོ་ཡང་། ། དྲུག་ཅུ་རྩ་བཞིར་འཆར་བར་བཤད། ། བདེ་བ་ཆེན་པོའི་འཁོར་ལོ་ཆེར། །
BOརྩ་ནི་སུམ་ཅུ་གཉིས་སུ་བཤད། ། དེ་ལྟར་མདོར་བསྡུས་རིམ་པ་ཡང་། ། བརྒྱ་དང་སུམ་ཅུ་གཅིག་ལྷག་པར། ། རྩ་རྣམས་སུ་ ནི་ཡང་དག་བཤད། ། གཞན་དག་ཏུ་ནི་རྒྱས་པར་ཡང་། ། རྩ་ནི་བདུན་ཁྲི་ཉིས་སྟོང་དུ། ། གནས་ཀྱི་དབྱེ་བས་ཕྱེ་བ་ནི། ། ངེས་པར་བརྗོད་པ་འབུམ་སྡེར་གསུངས། ། རྒྱུད་ནི་ཆུང་ངུའང་འདི་ཉིད་དུ། ། སྙིང་པོ་ལས་ནི་སྙིང་པོར་གསུངས། ། སྨིན་མའི་དབུས་གནས་རླུང་འཁོར་ལོ། ། བྱེ་བ་འཁྱིལ་པ་མི་བཟད་པ། ། མི་བཟང་བརྟན་དང་མཚན་ཉིད་ཅན། ། རྩ་ཐུང་དྲུག་གི་མཚན་ཉིད་དོ། ། འཛིན་པ་རྟོག་མེད་གང་བ་ནི། ། རྩ་གསུམ་གྲུ་གསུམ་མེ་དཀྱིལ་འཁོར། ། མགྲིན་པའི་འོག་ཏུ་བཤད་པ་ཡིན། ། དྲི་མ་དང་བྲལ་གསལ་བ་དང་། ། དྲག་པོ་ དང་ནི་གསུམ་ཡིན་ནོ། ། ཡང་དག་ཞུགས་དང་ཤིན་ཏུ་ཞུགས། ། ཤིན་ཏུ་བཟང་དང་བཟང་པོར་འགྲོ། ། སྟོབས་ཆེན་དང་ནི་མི་བཟད་ཆེ། ། མཛེས་ཆེན་མདུན་དུ་སྐྱེས་པ་ཆེ། ། རྒྱགས་པའི་རྟག་དང་རྒྱགས་པའི་ཆ། ། རྒྱགས་པའི་ཆུ་དང་རྒྱགས་སྨྱོ་བྱེད། ། རྒྱགས་དང་རྒྱགས་པའི་རྒྱུ་མཐུན་དང་། ། རྒྱགས་པའི་རླན་དང་རྒྱགས་པ་འཆང་། ། རྩུབ་དང་མཁའ་དང་འབྱུང་བརླང་དང་། ། དབུགས་མི་བདེ་དང་གཡའ་མཁའ་འགྲོ། །
BOའདབ་ཆགས་ཡན་ལག་ཁྭ་ཡི་གདོང་། ། ཟ་ཕོད་མི་བཟད་སྒྲ་སྒྲོགས་དང་། ། དྲི་ལྡན་རྡེག་དང་རྔུལ་བ་ དང་། ། དབྱངས་དང་དབྱངས་སྐྱེས་དང་ནི་སྤྲིན། ། ཆུ་བ་མཐོང་དང་རྒྱུན་ལྟར་སྔོ། ། ཡུད་ཙམ་གཙོ་བོ་ཡུད་མ་སྐྱེས། ། རྒྱབ་ཏུ་ཁ་བལྟས་དབྱུག་པ་དང་། ། དབྱུག་སྙེམས་དང་ནི་རྙིང་པ་དང་། ། ཚིགས་ཀྱི་ལྟོ་དང་ཚིགས་ཀྱི་ཚིག ། ཚིགས་ཀྱི་ཚད་དང་བརྟུལ་བ་དང་། ། ཚིགས་ ཀྱི་གནས་དང་ཚིགས་ཀྱི་གདོང་། ། ཚིགས་འོད་ཚིགས་ཀྱི་ལུ་གུ་རྒྱུད། ། དུལ་བྱེད་དུད་འགྲོ་གཟི་བརྗིད་དང་། ། དྲི་མེད་དུལ་བའི་སྙེམས་པ་དང་། ། ཆུ་འཕྱང་ལྟོ་དང་ཆུ་འཕྱང་ཆགས། ། ཆུན་འཕྱང་ཆུན་འཕྱང་ཕྱེད་སྦྲང་བུ། ། ཕྲུ་གུ་ཕྲུ་གུ་སྟེར་དྲི་བ། ། ལོ་མ་ལོ་མའི་མགྲིན་ པ་དང་། ། རབ་མཆོག་མ་དང་རབ་གསལ་ཏེ། ། དེ་ལྟར་དྲུག་ཅུ་རྩ་བཞིར་བཤད། ། ལྟེ་བ་སྤྲུལ་པའི་འཁོར་ལོ་གནས། ། བདུད་རྩི་མཆོག་གིས་ཡོངས་སུ་གང་། ། རིན་ཆེན་ཆེན་པོ་པདྨ་དང་། ། རྡོ་རྗེ་ཆེན་པོ་སྟོབས་པོ་ཆེ། ། མགོ་བོ་ཆེ་དང་སྒྲ་ཆེ་དང་། ། ཉེས་དགའ་ ཆེན་པོ་མྱོས་བ་ཆེ། ། འདི་བརྒྱད་ཆོས་ཀྱི་འཁོར་ལོའི་དབུས། ། སྙིང་གའི་པདྨར་ཡང་དག་གནས། ། ལོངས་སྤྱོད་ལོངས་སྤྱོད་སྟེར་ལྡན་དང་། །
BOཉི་འགྲོ་གསལ་དང་སྐལ་བ་དང་། ། སྒོམ་པ་དང་ནི་ཐལ་བའི་གདོང་། ། བཟའ་སྟེར་བཟའ་དང་བཀྲེས་པ་དང་། ། བཅུད་ལེན་ རོས་ནི་སྐྱུར་བ་དང་། ། རོ་འཇིགས་པ་དང་རོ་དང་ནི། ། ཁྲུང་ཁྲུང་ལོངས་སྤྱོད་འཁོར་ལོར་གནས། ། གྲངས་ནི་བཅུ་དྲུག་ཏུ་ནི་བརྗོད། ། དེ་སྟེང་རིམ་རིགས་འདོད་པ་ཅན། ། འདོད་ཅན་མ་དང་སྲོག་གི་ལུས། ། ཟླ་ཐུང་ཟླ་སྟེར་མཛེས་པ་ནི། ། འདོད་ཆགས་མིན་སྨྲ་ཀུ་ཤ་དང་། ། ཤ་བི་སྤོ་དང་དག་པ་དང་། ། མི་དང་མི་རོ་ནེ་ཙོ་དང་། ། གང་ལ་གཉིས་རོ་ལྡན་པ་དང་། ། ཀིས་རིང་ཆང་སྟེར་བདུད་རྩི་དང་། ། དུང་ཅན་དང་ནི་དུང་རྣ་དང་། ། དུག་གི་མིག་དང་དུག་གི་སྣ། ། རྒྱགས་དབང་རྒྱགས་པ་བརྐམ་པ་དང་། ། རྒྱགས་པས་བརྒྱལ་དང་ངོ་མཚར་རྒྱགས། ། སྙེམས་པ་དང་ནི་ཚོགས་ཀྱི་སྟེན། ། སུམ་ཅུ་རྩ་གཉིས་ཞེས་ནི་བརྗོད། ། བདེ་བ་ཆེན་པོའི་འཁོར་ལོ་ཆེ། ། མཆོག་ཏུ་དགའ་བ་སྟེར་བར་བྱེད། ། ཕྲ་དང་རེག་བྱ་མཆོག་ཏུ་ཕྲ། ། གཟུང་དང་འཛིན་པ་རྣམ་པར་སྤངས། ། རང་ཉིད་བདེ་ཆེན་རང་བཞིན་དང་། ། གཞན་དག་ལ་ ཡང་སྟེར་བར་བྱེད། ། དེ་ལྟར་ཡང་དག་རྩ་ཡི་རིམ། ། བླ་མའི་ཞལ་ལས་ཤེས་པར་བྱ། ། རྩ་ཡི་རིམ་མེད་ངེས་པར་ནི། ། ཕུང་པོ་ལ་སོགས་མི་འབྱུང་ངོ་།
BO། ཕུང་པོ་མེད་ན་ཡེ་ཤེས་ཆེ། ། རྣལ་འབྱོར་པ་ཡིས་ཐོབ་མི་འགྱུར། ། ཕུང་པོ་ལྔ་ཡི་བདག་ཉིད་ལུས། ། མཁའ་ འགྲོ་ལྔར་ནི་རབ་ཏུ་གྲགས། ། དེ་ཉིད་འབྱུང་བ་ལྔ་ཡིས་ནི། ། ཡེ་ཤེས་ལྔར་ནི་རྣམ་པར་གནས། ། དེ་ཕྱིར་འབད་པ་ཐམས་ཅད་ཀྱིས། ། རྩ་ཡི་འཁོར་ལོ་ཤེས་པར་བྱ། ། ཇི་ལྟར་ཆུ་ཡི་དབུས་ཀྱི་ཤིང་། ། མྱུར་དུ་ཡང་ནི་འཕེལ་ནས་འགྲོ། ། དེ་ལས་འབྲས་བུ་སོགས་ལྡན་ པ། ། སྟེར་བར་འདི་ལ་ཐེ་ཚོམ་མེད། ། དེ་བཞིན་ཕུང་པོ་ཤིང་ཞེས་བྱ། ། རྩ་ཡི་ཆུ་ཡིས་འཕེལ་ནས་ནི། ། འཕེལ་བས་ཡང་དག་འབྲས་བུ་ནི། ། ཐམས་ཅད་མཁྱེན་པ་ཉིད་སྟེར་བྱེད། ། ལྷ་ཡི་རྣམ་པའི་ངོ་བོ་ཡིས། ། རྩ་རྣམས་རང་བཞིན་བསྒོམ་པར་བྱ། ། གཉིས་ ཕྲད་པ་ལས་རེག་བྱ་གཉིས། ། གལ་ཏེ་རྡོ་རྗེ་ལྷག་གྱུར་ན། ། དེ་ཚེ་མེ་ནི་ཡང་དག་འབར། ། དེ་རྗེས་མེ་ཡི་འཁོར་ལོའི་དབུས། ། འཁོར་ལོའི་མིང་ཅན་པདྨ་རྣམས། ། རིམ་གྱིས་རིམ་གྱིས་བྱེ་བར་འགྱུར། ། འདི་ནི་རྩ་ལས་འབབ་དེ་ལས། ། བྱང་ཆུབ་སེམས་ནི་བདེ་ བ་ཆེ། ། སྤྲུལ་པའི་སྙིང་པོ་ཡང་དག་ཐོབ། ། ངོ་བོ་གཅིག་གྱུར་བསྡུས་ནས་ནི། ། འབབ་པའི་ཉི་མ་ཟླ་བའོ། ། མི་དབང་དཀྱིལ་འཁོར་དབུས་སུ་ཡང་། །
BOགང་ཕྱིར་སྲད་བུའི་རྣམ་པར་གནས། ། རྒྱུ་གཅིག་ཏུ་ཡང་ཤེས་ནས་ནི། ། དེ་ཉིད་འབྲས་བུ་རྣམ་པ་གཉིས། ། གཡས་པ་ཉི་མའི་རྣམ་པ་དང་། ། གཡོན་པ་ཟླ་བའི་རྣམ་པར་འབྱུང་། ། གང་ཚེ་གཡས་པའི་ཉི་མ་ནི། ། དེ་ཚེ་ཁྲག་འགྱུར་བདེ་བའོ། ། གང་ཚེ་གཡོན་པའི་ཟླ་བ་གསལ། ། བདེ་བ་ཀུན་ཀྱང་དེ་ལྟ་བུའོ། ། དེ་གཉིས་ཁོངས་སུ་ཆུད་པའི་མེ། ། ཡན་ལག་བདུན་ ཉིད་ཡང་དག་གནས། ། སྔོན་ལ་རླུང་གི་རྣམ་ཤེས་ནི། ། བརྒྱ་ལམ་གང་ཚེ་འཁྲུལ་གྱུར་ན། ། ཕ་ཡི་མཁའ་ལ་མཚུངས་པར་གནས། ། དེ་ཚེ་ཆགས་པའི་དབང་དུ་འགྱུར། ། གསང་གནས་ཟླ་མཚན་ལྡན་པའི་རྩ། ། མེ་དང་ཉི་མ་འཆར་བ་ན། ། དེ་ཚེ་ལྷག་པར་ཆགས་ པས་ནོན། ། ཆགས་པ་མཆོག་ཏུ་འདོད་པར་འགྱུར། ། རྡོ་རྗེ་པདྨ་འདྲེས་པའི་གདོང་། ། འཇུག་པ་ཕ་ཡི་ཁ་ཡི་རླུང་། ། དེ་ཚེ་ས་བོན་དུ་ནི་འགྱུར། ། ས་བོན་ལས་ནི་སེམས་ཅན་འབྱུང་། ། དེ་ཕྱིར་རྩ་ལས་ཡང་དག་འཆར། ། འབྲས་བུ་ངོ་མཚར་ཅན་ནི་སྐྱེ། ། དེ་ཉིད་བྱང་ ཆུབ་སེམས་ཀྱང་ནི། ། འཛིན་པ་སྲོག་ནི་བསྡུས་པའོ། ། ཡེ་ཤེས་མཆོག་དང་དེ་ཉིད་མཆོག ། མཆོག་ཏུ་བདེ་བ་རྨད་བྱུང་ཆེ། ། ཡེ་ཤེས་རྣལ་འབྱོར་ཐོབ་པ་ཡིས། ། མཆོག་ཏུ་བདེ་བ་བླ་ན་མེད། །
BOརྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྩའི་འཁོར་ལོའི་ གནས་ཀྱི་རིམ་པར་བསྟན་པའི་ལེའུ་སྟེ་བཅུ་བདུན་པའོ། ། ། ། དེ་ནས་གཞན་ཡང་བཤད་བྱ་བ། ། རྣལ་འབྱོར་ལུས་ལ་རིམ་ཇི་བཞིན། ། རྩ་རྣམས་རྟག་ཏུ་ཡང་དག་ནི། ། རྒྱུད་པ་ཡི་ནི་རིགས་ཀྱིས་སྐྱེ། ། གསལ་བ་རུ་ནི་མ་གསུངས་པ། ། དད་པའི་བསམ་པ་རྣམ་སྤངས་ པ། ། སྐྱེ་བོ་སྐལ་བ་མེད་དོན་དུ། ། གང་དུའང་གསལ་བར་མ་གསུངས་པ། ། སྙིགས་མ་ལྔ་ཞེས་བྱ་བའི་དུས། ། སེམས་ཅན་མྱུར་དུ་དངོས་གྲུབ་དོན། ། སྣོད་དུ་བྱ་བར་འདོད་པ་ཡིས། ། རང་བྱུང་ཡེ་ཤེས་རྨད་བྱུང་བ། ། རྣལ་འབྱོར་ལུས་ཀྱི་བདེ་ཆེན་པོའི། ། འཁོར་ལོའི་ རྩ་ནི་སུམ་ཅུ་གཉིས། ། བྱང་ཆུབ་སེམས་ནི་གསལ་འབབ་པའི། ། རྩ་རྣམས་ཡང་དག་རྣམ་བཤད་བྱ། ། དེ་ནི་བདེ་བ་ཆེན་པོའི་གནས། ། དེ་ནི་མཚན་ཉིད་བཤད་པར་བྱ། ། ཀ་ཙ་ཊ་ཏ་པའི་སྡེ་ཚན། ། ཡ་རལ་ཝ་ཥ་ཤ་ས། ། དེ་དག་རིམ་པར་ཤེས་པར་བྱ། ། སླར་ཡང་དེ་ དག་བསྡུས་ནས་ནི། ། སྡེ་ཚན་ཙམ་ནི་གཅིག་ཏུ་འགྲོ། ། དེ་ཡང་ཞི་བའི་ཡེ་ཤེས་མཆོག ། བྱང་ཆུབ་སེམས་ལ་ཐིམ་ནས་འགྲོ། ། ཀུན་རྟོག་ཐམས་ཅད་སྤངས་ནས་ནི། ། བདེ་བ་ཀུན་གྱི་གཞི་ཡི་མཆོག །
BOཤེས་དང་ཤེས་བྱ་རྣམ་པར་སྤངས། ། ཐམས་ཅད་བདག་ཉིད་རྟག་ ཏུ་བཞུགས། ། དེ་ལས་འཁོར་ལོ་གསུམ་དབྱེ་བས། ། རྩ་ནི་བརྒྱད་ཀྱི་དབྱེ་བ་ལས། ། སྐུ་གསུང་ཐུགས་ཀྱི་སྔགས་ཀྱིས་ནི། ། གསུམ་ཕྱེ་བདུན་ཅུ་རྩ་གཉིས་གསལ། ། དེ་ནི་སྟོང་དུ་རབ་ཕྱེ་བ། ། སོ་སོར་འཕྲོས་པའི་བདག་ཉིད་ཅན། ། སྟོང་ཕྲག་བདུན་ཅུ་རྩ་གཉིས་ཀྱིས། ། རྩ་ རྣམས་ཀྱི་ནི་གྲངས་ཞེས་བྱ། ། རླུང་དང་མཁྲིས་པ་བད་ཀན་ནི། ། ཁམས་གསུམ་གྱི་ནི་དབྱེ་བ་ཡིས། ། སྟོང་ཕྲག་ཉི་ཤུ་རྩ་བཞིར་ནི། ། འཁོར་ལོ་འཁོར་ལོའི་དབྱེ་བ་ཡིས། ། རྣལ་འབྱོར་ཆེན་པོའི་རྒྱུད་ཀྱི་ནི། ། ངེས་པའི་མན་ངག་རྗེས་འབྲངས་ནས། ། ཕྱག་རྒྱའི་རྣལ་འབྱོར་དེ་ཉིད་ མཆོག ། ལྷ་ཡི་རིམ་པའི་མཚན་ཉིད་ནི། ། རྩ་ནི་སོ་སོར་དབྱེ་བ་ཡིས། ། བླ་མའི་ཞལ་ལས་ཤེས་པར་བྱའོ། ། དེ་ལས་ཡང་ནི་སྡོམ་སྦྱོར་བར། ། སོང་ནས་ཕན་ཚུན་ཀུན་ནས་བརྟེན། ། སླར་ཡང་བདུན་ཅུ་རྩ་གཉིས་འགྲོ། ། བདེ་ཆེན་འཁོར་ལོ་རྩ་ཡི་གནས། ། རྩ་ནི་སུམ་ཅུ་རྩ་གཉིས་ ལས། ། དེ་ཡང་འཁོར་ལོ་སྡོམ་པར་འགྱུར། ། འཁོར་ལོ་རེ་རེའི་གཙོ་བོའི་རྩ། ། བརྒྱད་བརྒྱད་དུ་ནི་འགྱུར་བར་གསལ། ། རྣལ་འབྱོར་ལུས་ཀྱི་རྩ་མཆོག་ཅེས། །
BOརྨད་བྱུང་སུམ་ཅུ་རྩ་གཉིས་ནི། ། ཡི་གེ་སུམ་ཅུ་གཉིས་དབྱེ་བས། ། རྟག་ཏུ་རྣལ་འབྱོར་གཙོ་བོས་ཐོབ། ། ཕུང་པོ་ཁམས་དང་དོན་ཡུལ་ཉིད། ། དབང་པོའི་སྒོ་ནི་སྲུང་བའོ། ། སུམ་ཅུ་རྩ་གཉིས་དབྱེ་བདག་ཉིད། ། གསལ་བ་ཡི་ནི་དཀྱིལ་འཁོར་མཆོག ། ལུས་ཀྱི་གཞལ་ཡས་ཁང་དུ་ཡང་། ། དེ་ཉིད་ཀྱི་ནི་ནང་བཞུགས་པ། ། དེ་བཞིན་གཤེགས་དང་ལྷ་མོ་དང་། ། གཟུགས་ ལ་སོགས་དང་རྒྱལ་སྲས་རྣམས། ། ཁྲོ་བོ་བཅུ་ཞེས་བྱ་བ་ཡི། ། དེ་ཉིད་མཆོག་ནི་ཡང་དག་བཞུགས། ། སླར་ཡང་ཁྲོ་བོ་རྒྱལ་སྲས་ལ། ། ནང་དུ་མི་སྣང་བར་ནི་འགྲོ། ། རྒྱལ་སྲས་རྣམས་ནི་གཟུགས་ལ་སོགས། ། ལྷ་མོ་རྣམས་ལ་བསྡུས་ནས་ནི། ། དེ་རྣམས་ཀྱང་ནི་ ས་སོགས་འགྲོ། ། དེ་དག་དེ་བཞིན་གཤེགས་ལྔ་ལ། ། སྐུ་གསུང་ཐུགས་ཀྱི་རྡོ་རྗེ་ལ། ། དེ་དག་ལ་ཡང་བསྡུས་ནས་འགྲོ། ། དེ་ཁོ་ན་ཉིད་བདེ་གཅིག་པུ། ། དེ་ལ་ཡང་ནི་ཐིམ་ནས་འགྲོ། ། གཟུང་དང་འཛིན་པ་རྣམས་ལས་གྲོལ། ། བདེ་བ་ཀུན་རྟེན་པ་ཡི་ མཆོག ། དེ་ཡང་ཉམས་མྱོང་ཙམ་ལས་སླར། ། དེ་ནི་ཡི་གེ་ཙམ་ལ་ཐིམ། ། ཡི་གེ་ཙམ་ནི་ཐིག་ལེར་ཐིམ། ། ཐིག་ལེ་ཡང་ནི་སྒྲ་ལ་ཐིམ། ། སྒྲ་ཡང་སྒྲ་ཙམ་ལ་ནི་ཐིམ། ། སྒྲ་ཙམ་འོད་གསལ་བ་ལའོ། །
BOའོད་གསལ་གོ་འཕང་ཡང་དག་པར། ། སྤྲོ་དང་བསྡུ་བའི་མཚན་ ཉིད་དོ། ། རྣམ་པར་ཤེས་དང་ཆོས་དབྱིངས་དང་། ། དོན་དམ་པ་དང་བདེ་བ་ཆེ། ། གཟུང་དང་འཛིན་པ་ལས་གྲོལ་བ། ། བྱང་ཆུབ་སེམས་ནི་དྲི་མ་མེད། ། རྡོ་རྗེ་སེམས་དཔའི་ཞི་བ་ཆེ། ། གཉིས་མེད་ཡེ་ཤེས་རྨད་དུ་བྱུང་། ། དབང་བསྐུར་བཞི་པ་བདེ་བ་དང་། ། བཞི་བའི་ དགའ་བ་གོ་འཕང་མཆོག ། དེ་ལ་སོགས་མིང་བྱེ་བྲག་གིས། ། གོ་འཕང་མཆོག་ནི་གསུངས་པ་ཡིན། ། སྤྲོ་དང་བསྡུ་བའི་དབྱེ་བ་ཡིས། ། རིམ་པ་ཇི་ལྟ་བ་བཞིན་དུ། ། དེ་ལྟར་བསྐྱེད་དང་རྫོགས་པ་ཡི། ། རིམ་དོན་བླ་མ་བརྒྱུད་ལས་ཤེས། ། ཞི་བ་གཉིས་མེད་ མཚན་ཉིད་ཅན། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྣལ་འབྱོར་པའི་ལུས་ཀྱི་རྩ་བསྡུས་པའི་ལེའུ་སྟེ་{བཅྭ་,བཅོ་}བརྒྱད་པའོ། ། ། ། དེ་ནས་གཞན་ཡང་བཤད་བྱ་བ། ། སྣ་ཚོགས་ལ་སོགས་སྐད་ཅིག་བདག ། ཡང་དག་གཞུང་ལུགས་མཚན་ ཉིད་ནི། ། དེ་ཉིད་ཇི་ལྟ་བ་བཞིན་ཉོན། ། རྣམ་པ་སྣ་ཚོགས་རྣམ་པར་སྨིན། ། རྣམ་པར་འཇོམས་དང་མཚན་ཉིད་བྲལ། ། སྐད་ཅིག་མ་ནི་བཞི་ཞེས་གསུངས། ། རྣམ་པར་ཕྱེ་ནས་སླར་བཤད་བྱ། ། རྣམ་པ་སྣ་ཚོགས་མངོན་པར་འདོད། །
BOདེ་ཡི་སྐད་ཅིག་དབྱེ་བར་བྱ། ། ཨ་ལིད་ ག་ན་དང་། ཙུམྦ་ན་དང་། ཙུ་མ་ཤ་ན་དང་། ཀུ་ཙ་གྲ་ཧ་དང་། བུ་ལ་ཏྲ་ཏྲ་ཧ་ན་དང་། ད་ཤ་ན་དང་། ཁ་ད་ན་དང་། དོ་ལ་དང་། པུ་ཙི་ཙི་དང་། ཀུར་པ་ལ་སོགས་པའི་ཀ་ར་ན་དང་། ། རྣམ་པ་སྣ་ཚོགས་སྐད་ཅིག་གོ། ། ན་ལི་སྟོང་ཕྲག་བདུན་ཅུ་གཉིས། ། ལུས་ནི་བདེ་བ་རྒྱས་ པ་ན། མགྲིན་པ་དག་ཏུ་གང་ཕྱིན་པ། ། རྣམ་སྨིན་ཞེས་བྱ་སྐད་ཅིག་གོ། ། ལྷན་ཅིག་སྐྱེས་བའི་ཡེ་ཤེས་ནི། ། རྡོ་རྗེ་ཕྲེང་བའི་མཚན་ཉིད་ཅན། ། ཐམས་ཅད་མངོན་པར་བྱང་ཆུབ་པའི། ། རྣམ་པ་མེད་པའི་སྐད་ཅིག་གོ། ། ན་ལི་ལས་བྱུང་ཤུ་ཀྲ་འདས། ། རྣམ་པ་དང་བྲལ་སྐད་ཅིག་གོ། ། ཡེ་ཤེས་ བཞི་དང་སྟོང་བ་བཞི། ། སྐད་ཅིག་མ་ནི་བཞི་ལས་རྟོགས། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྐད་ཅིག་མའི་མཚན་ཉིད་རྒྱས་པར་བཤད་པའི་ལེའུ་སྟེ་བཅུ་དགུ་པའོ། ། ། ། དེ་ནས་གཞན་ཡང་བཤད་བྱ་བ། ། དགའ་བ་བཞི་ཡི་མཚན་ཉིད་ནི། ལུགས་ འབྱུང་ལུགས་ལས་བཟློག་པ་ཡི། ། ཇི་ལྟ་བ་ཡི་རིམ་པ་ཡི། ། དགའ་བའི་བདེ་བ་དང་པོ་སྟེ། ། མཆོག་ཏུ་དགའ་བ་གཉིས་པ་དང་། ། དགའ་བྲལ་ཞེས་པ་གསུམ་པ་དང་། ། བཞི་པ་ལྷན་ཅིག་སྐྱེས་པར་བཤད། །
BOསྤྲུལ་པའི་འཁོར་ལོར་དགའ་བ་དང་། ། མཆོག་དགའ་ཆོས་ཀྱི་འཁོར་ ལོར་གནས། ། ལོངས་སྤྱོད་བྲལ་བའི་དགའ་བ་དང་། ། ལྷན་ཅིག་སྐྱེས་དང་བདེ་བ་ཆེ། ། ལུགས་བཟློག་རིམ་པ་ཞེས་ནི་གསུངས། ། དེ་རྗེས་ལུགས་འབྱུང་བཤད་བྱ་སྟེ། ། བདེ་ཆེན་འཁོར་ལོ་སྤྱི་བོ་ལ། ། དེ་ནི་དགའ་བར་བཤད་པ་ཡིན། ། ལོངས་སྤྱོད་འཁོར་ལོར་མཆོག་དགའ་ དང་། ། དགའ་བྲལ་ཆོས་ཀྱི་འཁོར་ལོར་གནས། ། སྤྲུལ་པའི་འཁོར་ལོར་ལྷན་ཅིག་སྐྱེས། ། དགའ་བ་ཉམས་སུ་མྱོང་བར་བྱེད། ། བལྟ་དང་དགུག་དང་དེ་བཞིན་བརྡ། ། ཁ་ལ་ཙུམྦ་བྱེད་པ་ཡི། ། དགའ་བ་ཉམས་སུ་མྱོང་བར་ཤེས། ། རྣམ་པ་སྣ་ཚོགས་མཚན་ཉིད་དོ། ། རྣལ་ འབྱོར་རྣལ་འབྱོར་མ་མཆོག་ཏུ། ། དེ་བཞིན་སྐྲ་ལ་འཛིན་པ་དང་། ། རྡོ་རྗེ་པདྨར་བཞག་ནས་ནི། ། ཉམས་མྱོང་ས་ནི་སྐད་ཅིག་མཆོག ། རྣམ་སྨིན་ཞེས་བྱ་སྐད་ཅིག་ཉིད། ། དེ་ཉིད་རྒྱུར་ནི་རྣམ་པར་ཤེས། ། རྩ་ཡི་དབུས་ན་རབ་གསལ་གནས། ། གཏུམ་མོ་ཡང་ནི་རྣམ་རྟོག་ འཇོམས། ། བདེ་བ་ཆེན་པོའི་འཁོར་ལོ་ཆེ། ། མཆོག་གི་ཆ་ནི་ཞུ་བར་བྱེད། ། བྲལ་དགའི་གནས་སུ་མྱོང་བ་ནི། ། རྣམ་རྟོག་སྐད་ཅིག་མཚན་ཉིད་དོ། ། དེ་ལ་རོ་གཅིག་རང་བཞིན་ནི། ། རྩ་ནི་གཅིག་གི་རྒྱུན་ལ་རྟེན། །
BOབདེ་བ་ཆེན་པོའི་གོ་འཕང་ཞི། ། ལྷན་ཅིག་ སྐྱེས་པའི་མཚན་ཉིད་ནི། ། རྣམ་པ་སྣ་ཚོགས་སྐད་ཅིག་གསུངས། ། སྟོང་ཉིད་ཀུན་གྱི་གཞི་ཡི་མཆོག ། ཆོས་ཀྱི་འཁོར་ལོ་དེ་ལས་སྟེང་། ། རྣལ་འབྱོར་པ་ཡིས་བསྒྲུབ་བྱ་བ། ། ཉམས་སུ་མྱོང་བ་མཆོག་དགའ་སྟེ། ། རྣམ་སྨིན་སྐད་ཅིག་མཚན་ཉིད་དོ། ། ལོངས་སྤྱོད་འཁོར་ལོ་དེ་ལས་ནི། ། སྟེང་དུ་བྱེད་པའི་སྐད་ཅིག་ལ། ། ཉམས་མྱོང་བྲལ་བའི་དགའ་བ་ནི། ། རྣམ་འཇོམས་མཚན་ཉིད་སྐད་ཅིག་གོ། ། བདེ་བ་ཆེན་པོའི་འཁོར་ལོ་ཆེ། ། དེ་ཐོབ་མཚན་ཉིད་སྐད་ཅིག་མ། ། ལྷན་ཅིག་སྐྱེས་དགའི་ཉམས་མྱོང་བ། ། མཚན་ཉིད་དང་ བྲལ་སྐད་ཅིག་གོ། ། རྩ་གསུམ་ཀུན་གྱི་ནམ་མཁའ་ཆེ། ། རྣལ་འབྱོར་མ་ཚོགས་ཡང་དག་གཟུགས། ། དེ་ལས་རབ་སད་ཉམས་མྱོང་བ། ། མཚན་ཉིད་གཅིག་པར་རོ་མཚུངས་པ། ། རྣལ་འབྱོར་ཆེན་པོས་ཉམས་སུ་མྱོང་། ། སླར་ཡང་མཚན་ཉིད་མེད་པར་འགྲོ། ། རབ་ཏུ་ སད་པ་ཉམས་སུ་མྱོང་། ། སྟོང་ཕྲག་བཅུ་དྲུག་བདག་ཉིད་དོ། ། བདེ་ཆེན་གོ་འཕང་མི་ཕྱེད་པ། ། གཉིས་མེད་རྡོ་རྗེ་སེམས་དཔའི་གནས། ། དེ་ལྟར་འདི་ནི་དགའ་དབྱེ་བ། ། གཞན་དུ་གསལ་བར་མ་གསུངས་སོ། ། རྣལ་འབྱོར་མ་ཡི་བཀའ་དྲིན་གྱིས། །
BOབླ་མ་བརྒྱུད་ པ་ལས་ཤེས་བྱ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་དགའ་བའི་མཚན་ཉིད་རྣམ་པར་དབྱེ་བའི་ལེའུ་སྟེ་ཉི་ཤུ་པའོ། ། ། ། དེ་ནས་གཞན་ཡང་བཤད་ཀྱིས་ཉོན། ། ཐིག་ལེ་གསུམ་ནི་བླ་ན་མེད། ། གང་གིས་ཤེས་པ་ཙམ་གྱིས་ནི། ། རྣལ་འབྱོར་པ་ཡི་དངོས་གྲུབ་འགྱུར། ། རྩ་རྣམས་ཀུན་དུ་འབབ་པ་དང་། ། བྱང་ཆུབ་སེམས་ནི་ཞུ་བྱས་པ། ། རྡོ་རྗེ་འམ་ནི་པདྨའི་རྩེ། ། རླུང་ནི་བཟུང་བའི་སྐད་ཅིག་ལ། ། རྐན་དགུག་པ་ཡི་སྦྱོར་བ་དང་། ། ཀྵྨི་གྱི་སྔགས་ཀྱི་སྦྱོར་བ་ཡིས། ། རྣལ་འབྱོར་མཆོག་ནི་ཐོབ་པར་ བྱེད། ། བདེ་བ་ཀུན་གྱི་གཞི་ཡི་མཆོག ། ཆོས་ཀྱི་འཁོར་ལོ་དེ་ཉིད་མཆོག ། སྙིང་གའི་པདྨའི་ལྟེ་བ་ལ། ། དབུས་སུ་ཧཱུྃ་ནི་བཀོད་ནས་ནི། ། ཐམས་ཅད་སྟོང་པའི་མཚན་ཉིད་ནི། ། དངོས་དང་དངོས་མེད་རྣམ་པར་གྲོལ། ། དེ་ཁོ་ན་ཉིད་ལུས་སྐྱོབ་པ། ། ཕྱོགས་ཡུལ་ དུས་དང་རྣམ་པར་གྲོལ། ། སྟེང་དང་འོག་ནི་རྣམ་པར་སྤངས། ། སེམས་བྲལ་རང་གི་ངོ་བོར་གནས། ། ངག་གི་དྲ་བ་ཡོངས་སུ་སྤངས། ། རྒྱུད་དང་མཚན་མ་དང་བྲལ་ཞིང་། ། རྟོག་པའི་སྤྱོད་ཡུལ་རྣམས་དང་བྲལ། ། གཉིས་པ་ཀུན་ལས་རྣམ་པར་གྲོལ། །
BOམཆོག་ཏུ་རྟག་ཅིང་ཞི་ བའོ། ། རླུང་གི་ཐིག་ལེ་རྣལ་འབྱོར་མཆོག ། ཁ་དོག་ལྔ་པ་གསལ་བ་ཆེ། ། སྣ་རྩེར་སྦྱོར་བའི་རྣལ་འབྱོར་གྱིས། ། ཀུན་ནས་ཀྱང་ནི་བསྒོམ་པར་བྱ། ། ཡི་གེ་ཨོྃ་ནི་སྔགས་ཀྱི་མཆོག ། རྣལ་འབྱོར་བ་ཡིས་བཟླ་བར་བྱ། ། སྔ་མ་བཞིན་དུ་ཡེ་ཤེས་ལྔ། ། ཞི་བ་ལ་སོགས་ དེ་བཞིན་བསྒྲུབ། ། བག་ཆགས་རིམ་པའི་མཚན་ཉིད་ནི། ། སྐུ་གསུང་ཐུགས་ཀྱི་དབྱེ་བ་ཡིས། ། རྩ་ནི་གསུམ་པོ་འདི་ནི་མཆོག ། བསྡུས་ནས་སླར་ཡང་དབྱེ་བ་ནི། ། ཕན་ཚུན་དུ་ནི་སོ་སོར་འགྲོ། ། རྫས་ཀྱི་ཐིག་ལེ་ཁོང་ཆུད་པ། ། ཐིག་ལེ་གཉིས་ཏེ་སྔགས་དང་རླུང་། ། སྔགས་ཀྱི་ ཐིག་ལེ་དེ་ཉིད་མཆོག ། ཐིག་ལེ་གཉིས་ནི་འོད་དང་རྫས། ། སླར་ཡང་རླུང་གི་ཐིག་ལེ་ཡང་། ། ཐིག་ལེ་གཉིས་ཀྱི་ནང་དུ་འགྲོ། ། སྔགས་དང་རྫས་ཀྱི་བདག་ཉིད་ཅན། ། རྣལ་འབྱོར་པ་ཡིས་ཡང་དག་ཤེས། ། ཟླ་བ་ཉི་མ་མེ་ཡི་རྩ། ། གསུམ་ཞེས་བྱ་བའི་མཚན་ཉིད་དོ། ། ལ་ལ་ནཱ་དང་ར་ས་ནཱ། ། ཨ་བ་དྷཱུ་ཏཱི་ཞེས་བྱའི་མིང་། ། སྐུ་གསུང་ཐུགས་ཀྱི་རང་བཞིན་དང་། ། དེ་ཉིད་དུ་ནི་ཡོངས་སུ་གྲགས། ། སྟེང་དང་འོག་ཏུ་ཁྱབ་པ་ཉིད། ། སོ་སོར་ལུ་གུ་རྒྱུད་ཚུལ་དུ། ། རྩ་རྣམས་ཀུན་ལ་ཁྱབ་ནས་ནི། །
BOཡང་དག་མན་ངག་རིམ་པས་གནས། ། དེ་ལྟར་ རྣལ་འབྱོར་མཆོག་ཏུ་ཕྲ། ། ཤེས་དང་ཤེས་བྱ་རྣམ་པར་སྤངས། ། དངོས་གྲུབ་ཐམས་ཅད་ཀྱི་ནི་གཞི། ། རྣལ་འབྱོར་ཆེན་པོའི་རྨད་བྱུང་ཆེ། ། གསོ་སྦྱོང་གིས་མིན་བཟླས་པས་མིན། ། ཕྲེང་བས་མ་ཡིན་འགོག་པས་མིན། ། གྲངས་མིན་དུས་མིན་སྦྱིན་སྲེག་མིན། ། འབྱིན་བྱེད་ འགོགས་བྱེད་ཀྱིས་ནི་མིན། ། ཡེ་ཤེས་ཆེན་པོའི་གོ་འཕང་ཞི། ། རྣལ་འབྱོར་གཅིག་བུས་རྟོགས་པར་བྱེད། ། མངོན་པར་ཤེས་པ་ལྔ་དང་ནི། ། དེ་བཞིན་ཡེ་ཤེས་ལྔ་ཡི་མཆོག ། ཐིག་ལེ་གསུམ་ནི་རྣམ་སྒོམ་པ། ། ཞི་སོགས་བྱ་བ་ཡང་དག་ནི། ། རྣལ་འབྱོར་ མཆོག་གིས་འགྲུབ་པར་འགྱུར། ། སྟོང་ཉིད་ཡེ་ཤེས་མཚན་ཉིད་ནི། ། ཡེ་ཤེས་སེམས་དཔའ་རྡོ་རྗེ་སེམས། ། དམ་ཚིག་སེམས་དཔའ་ཞེས་བྱ་གསུངས། ། གནས་དང་གྲངས་ཀྱི་དབྱེ་བ་ཡིས། ། བླ་མ་བརྒྱུད་པ་ལས་ཤེས་བྱ། ། རྣལ་འབྱོར་ཆེན་པོའི་ རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཐིག་ལེ་གསུམ་རྣམ་པར་དབྱེ་བའི་ལེའུ་སྟེ་ཉི་ཤུ་གཅིག་པའོ། ། ། ། དེ་ནས་གཞན་ཡང་དེ་ཉིད་ཉོན། ། དེ་ཉིད་གསུམ་གྱི་གོ་འཕང་མཆོག ། སྐུ་གསུང་ཐུགས་ཀྱི་རྡོ་རྗེ་ཡི། ། སྙིང་པོ་བདག་ཉིད་དམ་ཚིག་ནི། །
BOཡི་གེ་གསུམ་ ནི་སྐུ་གསུང་ཐུགས། ། སྙིང་པོ་ཡང་ནི་བཤད་པར་བྱ། ། དེ་ནི་རྣམ་ཕྱེ་ཁྱོད་ཉོན་ཅིག ། དེ་ནི་ཇི་ལྟ་བ་བཞིན་བཤད། ། ཨོྃ་ནི་སྐུ་ཡི་རྡོ་རྗེ་ཡི། ། སྙིང་པོ་རུ་ནི་ཡང་དག་བཤད། ། ཡི་གེ་ཨ་དང་ཡི་གེ་ཨུ། ། ཡི་གེ་མ་ཞེས་བྱ་བ་གསུམ། ། ཨཱཿནི་ཆོས་འཁོར་པདྨ་ལ། ། རླུང་གི་ འཁོར་ལོ་ལ་ནི་ཁྱབ། ། སྒྲིབ་མེད་པ་ཡི་རླུང་ཆེན་པོ། ། སྲོག་ཏུ་གསུངས་པ་ཐམས་ཅད་བསྡུས། ། ཆ་མེད་ཆ་དང་བྲལ་བ་དང་། ། དངོས་པོ་དངོས་མེད་དབུས་ན་གནས། ། ཐིག་ལེ་འཁོར་ལོའི་ཆ་ལ་ཁྱབ། ། ནམ་མཁའི་ཁམས་ཀྱི་ཡི་གེ་མཆོག ། སྔགས་རྣམས་ ཀུན་གྱི་དོན་གྱི་གནས། ། སྔགས་རྣམས་ཐམས་ཅད་རབ་སད་བྱེད། ། སྔགས་རྣམས་ཀུན་གྱི་ཕན་བྱེད་ཅིང་། ། ངག་གི་འཁོར་ལོ་རབ་སད་བྱེད། ། དངོས་སུ་ལན་གསུམ་གྱི་ནི་གཞི། ། འབྱུང་བ་ཐམས་ཅད་དབང་དུ་བྱེད། ། ཟད་མེད་འཕེལ་བ་མེད་པའི་གནས། ། བྱང་ཆུབ་ ས་བོན་བདེ་བ་ཆེ། ། གཟུགས་མེད་ཁམས་སུ་ཡང་དག་བཤད། ། འཁོར་ལོ་བཞི་ཡི་དོན་བསྡུས་པའོ། ། ཨུ་ནི་ལོངས་སྤྱོད་འཁོར་ལོར་གནས། ། མེ་དང་ཉི་མ་འདྲ་བ་ཡི། ། མགྲིན་པའི་མཐའ་ནས་སྤྱི་གཙུག་མཐའ། ། ཁྱབ་པ་གཟི་བརྗིད་ཀྱི་ནི་ལུས། ། གཟུགས་ཀྱི་ཁམས་ ཞེས་བྱ་བར་ཤེས། །
BOགནས་རིས་བཅུ་བདུན་བདག་ཉིད་ཅན། ། བདེ་ཆེན་འཁོར་ལོ་ཞེས་བྱར་བཤད། ། ཡི་གེ་མ་ནི་ཐིག་ལེ་ཙམ། ། གདོང་ཚད་མཐའ་ཡི་སོར་བཞི་ཙམ། ། དགའ་བའི་གཙུག་ཏོར་གནས་ན་གནས། ། ཟླ་བའི་གཟུགས་དང་འདྲ་བ་ཡི། ། བདེ་བ་ཆེན་ བོའི་གོ་འཕང་ཞི། ། རྩ་ནི་ཀུན་ལ་ཁྱབ་པ་པོ། ། མི་ཕྱེད་ལུས་ཀྱི་གོ་འཕང་ནི། ། འདོད་པའི་ཁམས་ཞེས་བཤད་པ་ཡིན། ། བསྡུས་ན་གནས་རིས་ཉི་ཤུའོ། ། དེ་ལྟར་རླུང་ནི་གནས་གསུམ་གྱི། ། རྩ་གསུམ་གྱི་ནི་གནས་སུ་འདུས། ། ཡི་གེ་ཨོྃ་གྱི་བརྡ་ཤེས་ན། ། ཁམས་གསུམ་ རྣམ་པར་སད་པར་བྱེད། ། རྣམ་པར་སྣང་མཛད་འགྲོ་བའི་གཟུགས། ། སྤྲོ་བའི་བདག་ཉིད་ཅན་གྱི་རྒྱུ། ། རྣམ་པར་རྟོག་པའི་རླུང་གཉིས་ནི། ། སྣ་ཡི་བུ་ག་ནས་ནི་བྱུང་། ། ཡང་དག་ཉི་མ་ཟླ་བ་གཉིས། ། སྦས་པ་ནང་ནས་རྒྱུ་བར་བྱེད། ། མེ་ནི་འབར་བ་རྩེ་མོ་ལ། ། སྨིན་མའི་ དབུས་སུ་སྲོག་གི་རླུང་། ། དེ་ལྟར་གཅིག་པུའང་གསུམ་དུ་བཤད། ། གཏན་ལ་ཕབ་སྟེ་དེ་ཉིད་གསུམ། ། ཞི་བ་ཁམས་གསུམ་ལ་ཁྱབ་པ། ། སྐྱེ་བའི་ས་བོན་རྒྱས་པའོ། ། ཡི་གེ་ཨ་ནི་ཡེ་ཤེས་མཆོག ། གསུང་གི་རྡོ་རྗེ་སྙིང་པོ་མཆོག ། ཨ་ནི་གཉིས་དང་ཡི་གེ་ཧྃ། ། རིང་པོར་བྱས་ཏེ་དབྱེ་བ་གསུམ། །
BOཆོས་ཀྱི་དབྱིངས་ཀྱི་དོན་བསྡུས་པ། ། ཡི་གེ་ཨཱཿནི་སྔར་བཤད་ཟིན། ། གཉིས་པ་ཡང་ནི་སྲོག་གི་རླུང་། ། སྟོང་ཉིད་ཡེ་ཤེས་མིང་ཅན་ཏེ། ། སྲོག་དང་རྩོལ་བ་གཉིས་སུ་རིགས། ། ཡུལ་དང་དབང་པོ་བསྡུས་པའོ། ། ཀུན་གཞི་དང་ནི་ཉོན་ མོངས་ཡིད། ། གཟུང་དང་འཛིན་པའི་ངོ་བོ་ཉིད། ། ངོ་བོ་གཅིག་ཏུ་གྱུར་ནས་ནི། ། གསུང་གི་རྡོ་རྗེ་བརྗོད་པའི་མཆོག ། ཨཱཿནི་ཆོས་འཁོར་པདྨ་ལས། ། མགྲིན་པར་ཡི་གེ་ཨཱཿཉིད་འགྱུར། ། སྲོག་ཉིད་དང་ནི་ཐུར་སེལ་དང་། ། ཡི་གེ་ཧ་ཡིས་ཀུན་ནས་ནི། ། མགྲིན་པའི་ དབུས་ན་གནས་པ་བཅིངས། ། ཨ་ཧྃ་ཁ་ནས་གསལ་བར་བརྗོད། ། རོ་འབབ་པ་ཡི་ཁྲུང་ཁྲུང་ནི། ། རོ་སྐྱུར་པ་ཞེས་བྱ་བར་གསུངས། ། བཀུག་ནས་རྟག་ཏུ་ཁྱབ་པར་བྱེད། ། གཟུགས་ཀྱི་ཁམས་ནི་འབར་བའོ། ། ཧ་དང་དེ་བཞིན་ཡི་གེ་ཨཱུ། ། དེ་ནི་ཡི་གེ་མ་དང་གསུམ། ། རྐང་ པ་ནས་ནི་མགོ་མཐའི་བར། ། འཁོར་ལོ་བཞི་ཡི་དོན་བསྡུས་པ། ། ཧ་ནི་ཐུར་སེལ་མིང་ཅན་རླུང་། ། བཤང་སྒོ་གསང་བའི་དབུས་ན་གནས། ། ཡི་གེ་ཨུ་ནི་ཁྱབ་བྱེད་རླུང་། ། མགྲིན་པ་པདྨའི་དབུས་ན་གནས། ། ཡི་གེ་མ་ནི་སྲོག་རླུང་ཡིན། ། དཔྲལ་བ་རླུང་གི་འཁོར་ལོ་ ལ། ། དེ་དག་གཅིག་གྱུར་སྙིང་ག་ནས། །
BOཐུགས་ཀྱི་ས་བོན་དུ་ནི་བརྗོད། ། མི་བསྐྱོད་སྙིང་པོ་ཁ་དོག་གནག ། གཟུགས་མེད་ཁམས་ཀྱི་མིང་ཅན་ནོ། ། སྐུ་གསུང་ཐུགས་ཀྱི་རྡོ་རྗེ་ཡི། ། སྙིང་པོ་གསུམ་དུ་རབ་ཏུ་བཤད། ། ལག་ན་རྡོ་རྗེས་ཐལ་སྦྱར་ནས། ། སླར་ཡང་ཐམས་ཅད་མཁྱེན་ལ་ཞུས། ། རྡོ་རྗེ་གསུམ་གྱི་སྔགས་དོན་དང་། ། གནས་ཀྱི་དབྱེ་བ་འཚལ་ལགས་ན། ། འདི་རྣམས་དབུས་ན་བདག་པོ་གང་། ། ཇི་ལྟ་བུ་ཞིག་གཙོ་བོས་གསུངས། ། གཙོ་བོ་རྡོ་རྗེ་འཆང་བ་ཆེ། ། བཅོམ་ལྡན་འདས་ཀྱིས་སླར་གསུངས་པ། ། གསང་ བའི་མཆོག་ཏུ་གསུངས་པ་ཡི། ། སྦས་པའི་དོན་ནི་ཁྱོད་འདྲི་བ། ། རྒྱུད་རྣམས་ཀུན་དུ་མ་གསུངས་པ། ། རབ་ཏུ་བཤད་ཀྱིས་མཉན་པར་གྱིས། ། ཐུགས་ཀྱི་ས་བོན་བདག་པོ་སྟེ། ། ཀུན་གྱི་ནང་ན་རྣམ་རྟོག་མེད། ། གང་ཕྱིར་གཙོ་བོས་གཞན་རྣམས་ནི། ། སྒྲིབ་དང་དེ་བཞིན་འཕྲོག་ པ་དང་། ། རྣམ་པར་རྟོག་པའི་རླུང་གཉིས་ནི། ། ལུས་ཀུན་ལ་ནི་ཁྱབ་པར་བྱེད། ། སྣ་ཡི་བུ་ག་ལས་ནི་རྒྱུ། ། ལུས་ལ་རྟག་ཏུ་འབྱུང་བར་བྱེད། ། འགྲོ་བ་དྲུག་གི་འཁོར་ལོའི་ལམ། ། གང་གི་སྟོབས་ཀྱིས་ཁྱབ་པར་བྱེད། ། གསུམ་པ་རྣལ་འབྱོར་པ་ཡིས་རྟོགས། ། རྣམ་ རྟོག་མེད་པར་རྨད་བྱུང་ཆེ། །
BOརླུང་རྣམས་ཐམས་ཅད་འགགས་པས་ན། ། སྐྱེས་པ་དེ་ཉིད་རྟོགས་པའོ། ། རླུང་ནི་ཐམས་ཅད་འགོག་པ་ཡང་། ། ཡང་དག་རིགས་པར་ང་ཡིས་བཤད། ། སྤྲུལ་པའི་ཆོས་ཀྱི་འཁོར་ལོའི་དབུས། ། རྒྱུད་འདི་པདྨ་གཉིས་སུ་གསུངས། ། དྲུག་ཅུ་རྩ་ བཞི་བརྒྱད་འདབ་གཉིས། ། སྟེང་དང་འོག་ཏུ་ཁ་བལྟས་ནས། ། སླར་ཡང་ཁ་སྦྱོར་ཚུལ་དུ་གནས། ། སྲོག་དང་ཐུར་སེལ་རྒྱུ་བར་བྱེད། ། དེ་ཉིད་རྟོག་པ་དང་བཅས་པ། ། རླུང་གཉིས་སུ་ནི་གསལ་བར་གསུངས། ། སྐུ་དང་གསུང་གི་སྙིང་པོ་གཉིས། ། ལ་ལ་ནཱ་དང་ར་ས་ནཱ། ། ཨ་བ་དྷཱུ་ ཏཱི་མཆོག་གི་གནས། ། དེ་གཉིས་དབུས་ན་མཆོག་གི་མཆོག ། རྣམ་རྟོག་མེད་བ་རླུང་གི་རླུང་། ། རྟག་ཏུ་རྒྱུ་ཞིང་ཀུན་ལ་ཁྱབ། ། རྣམ་རྟོག་གང་ཐོབ་རྟག་ཏུ་ནི། ། ལས་ཀུན་བྱེད་ཅིང་མཁས་པར་འགྱུར། ། རླུང་གི་རང་བཞིན་བྱེ་བྲག་ནི། ། བརྒྱ་དང་བརྒྱད་ལས་གང་རྒྱལ་བ། ། དུས་ཀུན་དུ་ནི་འཕེལ་བར་རིགས། ། རྣལ་འབྱོར་བྱིས་པས་མི་ཤེས་པ། ། སྐད་ཅིག་གཅིག་མངོན་རྫོགས་བྱང་ཆུབ། ། དེ་ཡིས་ཐོབ་པར་རྒྱུད་འདིར་གསུངས། ། དེ་ནི་གང་ཚེ་སྐད་ཅིག་ཐོབ། ། དེ་ནི་སྐད་ཅིག་མཆོག་ཏུ་གསུངས། ། དེ་ཡང་ཇི་ལྟར་ཐོབ་པར་བྱེད། ། དེ་ལ་ རིགས་པ་རུ་ནི་བརྗོད། །
BOཐོག་མར་རྣལ་འབྱོར་པ་ཆེན་པོ། ། བློ་བཟང་གིས་ནི་ཞི་གནས་བསྒོམ། ། བསྐྱེད་པའི་རིམ་པའི་སྦྱོར་བ་ཡིས། ། ཁྲོ་བོའི་ཕྱག་རྒྱ་བྱས་ནས་ཀྱང་། ། དབང་པོ་ཡི་ནི་སྒོ་དགུ་ལ། ། ཐམས་ཅད་དུ་ནི་ཀུན་རྫོབ་པ། ། ཧཱུྃ་བཟླས་པ་ནི་མཚུངས་པ་མེད། ། མཆོག་ཏུ་རྒྱུན་མི་འཆད་ པར་ནི། ། ཟླ་བ་གཅིག་ཏུ་བཟླས་བྱས་ན། ། དེ་རྗེས་སྐད་ཅིག་དེ་ལ་ཐོབ། ། གང་ཕྱིར་དེ་ནི་བཟླས་བྱས་ན། ། སྙིང་གའི་པདྨའང་སྟེང་བལྟས་འགྲོ། ། དེ་ནས་གསང་བའི་པདྨ་ལས། ། ཁ་སྦྱོར་བ་ནི་དེ་བས་ཀྱང་། ། རྣམ་པར་རྟོག་པའི་རླུང་གཉིས་ནི། ། དེ་ལས་རྣམ་པར་བཅས་ནས་འགྲོ། ། རྣམ་རྟོག་མེད་པའི་རླུང་ཆེན་པོ། ། སྐུ་གསུང་རྡོ་རྗེ་བཅད་ནས་ནི། ། རྣམ་རྟོག་མེད་པའི་བདེ་བ་སྟེར། ། སྔགས་ཀྱི་དེ་ཉིད་ཀྱིས་ནི་འཐོབ། ། ཨ་བ་དྷཱུ་ཏཱིའི་རྒྱུན་ལ་གནས། ། སྨིན་དབུས་རླུང་ནི་བཅད་བྱས་པ། ། དེ་ཐོབ་ཐོབ་བྱས་དགའ་བ་ནི། ། རྒྱུན་དུ་འཆང་ཞིང་མི་བཟད་པ། ། ཆགས་སོགས་བྲལ་ཞིང་ཞི་བ་དང་། ། རང་ རིག་བདེ་བ་ཆེན་པོའོ། ། འདིར་ནི་རྒྱུ་མཚན་བཤད་པར་བྱ། ། སྔགས་གྲུབ་པ་ཡི་རྣལ་འབྱོར་པས། ། འདར་དང་རྡུལ་དང་བ་སྤུ་ལངས། ། རྟག་ཏུ་དགའ་བའི་བསམ་པ་དང་། །
BOགདོང་ནི་ཟངས་མདོག་ཡིད་དུ་འོང་། ། ཀུན་གྱིས་མཐོང་དང་དགའ་བ་དང་། ། གྲངས་ལྷག་ཆད་པ་ལ་ སོགས་དང་། ། འཇིག་རྟེན་ཆོས་དང་དེ་བཞིན་གནས། ། རྣལ་འབྱོར་སྔགས་ཀྱི་དེ་ཉིད་ནི། ། གནོད་པ་ཉིད་དུ་མི་འགྱུར་རོ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྐུ་གསུམ་གྱི་སྙིང་པོ་བཤད་པའི་ལེའུ་སྟེ་ཉི་ཤུ་གཉིས་པའོ། ། ། ། དེ་ནས་གཞན་ཡང་ བཤད་ཀྱིས་ཉོན། ། དེ་ཉིད་གསུམ་གྱི་ཚིག་བསྟན་བྱ། ། བདག་ཉིད་སྔགས་སོགས་བྱེད་པ་ཡིས། ། ཇི་ལྟ་བ་བཞིན་རིམ་པ་རྣམས། ། བདག་གི་དེ་ཉིད་རྣལ་འབྱོར་མཆོག ། རྡོ་རྗེ་སེམས་དཔའ་ཉིད་ཀྱི་རྒྱུ། ། སངས་རྒྱས་ཀུན་གྱི་རང་བཞིན་བདག ། སངས་རྒྱས་ཀུན་གྱི་སྐུ་གཅིག་བུ། ། ཀུན་མཁྱེན་གོ་འཕང་མི་གསལ་བྱེད། ། རིགས་ཀྱི་དབྱེ་བས་རབ་གསལ་བྱེད། ། རིགས་ནི་ལྔ་ཡི་རྣམ་པ་གང་། ། དེ་ནི་ཕུང་པོའི་མཚན་ཉིད་དོ། ། ཕྲ་རགས་ལ་སོགས་དབྱེ་བ་ཡིས། ། ཐོགས་བཅས་ཐོགས་མེད་མཚན་ཉིད་དང་། ། འབྱུང་བ་ཆེན་པོ་བཞི་ཡི་དངོས། ། འདི་ནི་གཟུགས་ཀྱི་ཕུང་བོར་གསུངས། ། དེར་ནི་རྣམ་སྣང་ངོ་བོ་དང་། ། ཐམས་ཅད་སྤྲོ་བར་བྱེད་པའི་རྒྱུ། ། བདེ་དང་སྡུག་བསྔལ་མཆོག་ཏུ་ཞི། །
BOགྲང་དང་དྲོ་བ་མཆོག་གི་མཆོག ། གང་གིས་ཤིན་ཏུ་རིག་པ་ནི། ། དེ་ནི་ཚོར་བའི་ཕུང་པོར་བཤད། ། རིན་ཆེན་འབྱུང་ལྡན་ཉིད་ཀྱི་ མཚན། ། དེ་བཞིན་གཤེགས་པའི་སྤྲོས་བདག་ཉིད། ། གླང་པོ་བོང་བུ་ཅེ་སྤྱང་དང་། ། རྟ་དང་{རི་དགས་,རི་དྭགས་}དང་ནི་ཕག ། ཕ་དང་མ་དང་ཕ་ཡི་སྤུན། ། མཛའ་པོ་སྣག་གི་གཉེན་ཚན་སོགས། ། གང་གིས་ཡང་དག་ཤེས་པ་ནི། ། འདུ་ཤེས་ཕུང་པོའི་མཚན་ཉིད་ནི། ། དེ་བཞིན་ གཤེགས་པ་འོད་དཔག་མེད། ། དེ་ནི་སྤྲོས་པ་ཀུན་ནས་གསལ། ། འགྲོ་བ་ཁྱབ་པར་ཡོངས་སུ་ཤེས། ། དགེ་དང་མི་དགེའི་ལས་འབྲས་བུ། ། གཞན་ཡང་ལུང་དུ་མ་བསྟན་མིན། ། དེ་ཡི་འདུ་བྱེད་དུ་ནི་བཤད། ། དོན་ཡོད་སྤྲོ་བའི་རང་བཞིན་ཅན། ། འཁོར་བ་དངོས་དང་ དངོས་མེད་སོགས། ། ཀུན་རྟོག་འབྱུང་བའི་བདག་ཉིད་ཅན། ། རྣམ་ཤེས་ཞེས་ནི་རྣམ་པར་ཤེས། ། མི་བསྐྱོད་སྤྲོ་བའི་བདག་ཉིད་ཅན། ། དེ་ལྟར་ཕུང་པོ་ཡོངས་ཤེས་ན། ། ལུང་དང་རིགས་པའི་ཤེས་པ་སྐྱེ། ། ཛི་ན་ཛིཀ་དང་རཏྣ་དྷྲྀཀ ། ཨཱ་རོ་ལིཀ་དང་པྲཛྙཱ་དྷྲྀཀ ། བཛྲ་ དྷྲྀཀ་ཅེས་བྱ་བའི་སྔགས། ། ཅི་རིགས་པར་ནི་རིམ་བཞིན་ཤེས། ། སྤྱན་ལ་སོགས་པ་བཞི་པོ་གང་། ། དེ་ནི་ཁམས་གསུམ་ཡོངས་སུ་བརྟག །
BOསྲ་བ་ལ་སོགས་བཞིར་ཕྱེ་བས། ། ས་ཡི་ཁམས་སུ་ཡོངས་སུ་བརྟག ། གཏི་མུག་དགའ་བར་མངོན་པར་བརྗོད། ། དེ་ཡི་ སྤྱན་དུ་ཡོངས་སུ་གྲགས། ། ཞུ་བ་ཅི་མཆི་ཁུ་བ་སོགས། ། རྫས་ཀྱི་བྱེ་བྲག་ཡང་དག་བསྟེན། ། ཆུ་ཡི་ཁམས་སུ་རྣམ་པར་ཤེས། ། མཱ་མ་ཀཱི་ཡི་བདག་ཉིད་ཅན། ། དྲོ་བ་བཟའ་བཏུང་སྨིན་པ་དང་། ། གཟི་བརྗིད་འཕྲོ་བ་ཉིད་ཐམས་ཅད། ། མེ་ཡི་ཁམས་སུ་ཤེས་པར་བྱ། ། གོས་དཀར་སྤྲོ་བའི་བདག་ཉིད་ཅན། ། འབྱུང་བ་རྔུབ་པ་རབ་ཏུ་འཕེལ། ། རླུང་རྣམས་ཀྱི་ནི་ཚོགས་ཀྱི་མཆོག ། བརྐྱང་བ་དང་ནི་བསྐུམ་པ་དང་། ། སྟེང་དང་འོག་ཏུ་བྱེད་པ་དག ། དེ་ནི་རླུང་གི་ཁམས་སུ་ཤེས། ། སྒྲོལ་མ་སྤྲོ་བའི་བདག་ཉིད་ཅན། ། དེ་ལྟར་འབྱུང་བ་བཞི་པོ་ཡང་། ། རྣལ་ འབྱོར་མཆོག་ཉིད་རྣམ་པར་ཤེས། ། མོ་ཧར་ཏི་དྭེ་ཥ་ར་ཏི། ། རཱ་ག་ར་ཏི་བཛྲ་ར་ཏི། ། དེ་ལྟར་རིམ་པས་སྔགས་རྣམས་ནི། ། དེ་དག་མངོན་སུམ་ཆོ་ག་ཡིས། ། གཟུགས་ལ་སོགས་པ་ཡུལ་གྱི་ཚོགས། ། ལྷ་མོའི་གཟུགས་ཀྱི་མཚན་ཉིད་དུ། ། རྣལ་འབྱོར་མཆོག་གིས་རྣམ་ པར་ཤེས། ། སྟོང་ཉིད་གཅིག་པུ་རྒྱུ་གཅིག་པུ། ། སྔོ་སེར་སོགས་ཀྱི་དབྱེ་བ་དང་། ། རིང་དང་ཐུང་བའི་རྣམ་པ་ཡིས། ། ལྷ་མོ་དེ་གཟུགས་རྡོ་རྗེ་མ།
BO། ཕྱི་རོལ་གཟུང་བའི་རང་བཞིན་ཅན། ། འཁར་རྔ་སིལ་སྙན་སྦུབས་རོལ་མོ། ། དེ་བཞིན་རྔ་སྙན་པི་བང་དང་། ། བསྟོད་དང་ སྨད་སོགས་སྒྲ་དག་ནི། ། སྒྲ་ཡི་རྡོ་རྗེ་མ་ཞེས་བྱ། ། གཟུང་བ་དང་ནི་རང་བཞིན་མཆོག ། རྣམ་པར་ཤེས་པ་སད་པར་བྱེད། ། དྲི་ང་བ་དང་དྲི་བཟང་དང་། ། སྦྱར་བའི་དྲི་ཡི་མཆོག་རྣམས་ནི། ། དྲི་རྡོ་རྗེ་མར་དེ་ཤེས་བྱ། ། གཟུང་བའི་རྣམ་པར་ཆེར་དམར་བ། ། རོ་དྲུག་མཆོག་ཏུ་ལྡན་ པ་ནི། ། ལན་ཚྭ་སྐྱུར་ལ་སོགས་དབྱེ་ཡིས། ། རྡོ་རྗེ་རོ་མར་དེ་ཤེས་བྱ། ། ཀུན་ཀྱང་གཟུང་བའི་རྣམ་པའོ། ། མིག་སོགས་དབང་པོ་ལ་བརྟེན་པ། ། རྣམ་པར་ཤེས་པའི་ཚོགས་བརྒྱད་ནི། ། རིམ་པ་ཇི་ལྟ་བ་བཞིན་དུ། ། བྱང་ཆུབ་སེམས་དཔའ་བརྒྱད་དུ་ཤེས། ། བྱང་ཆུབ་ སེམས་དཔའི་བདག་ཉིད་ཆེ། ། མིག་གཉིས་ས་ཡི་སྙིང་པོར་གསུངས། ། གཟུགས་ལ་སོགས་པ་ཅི་རིགས་པར། ། རང་གི་ངོ་བོ་སྤྲོ་བར་བྱེད། ། སྒྲ་ཡི་རྣམ་པ་ཐམས་ཅད་ནས། ། བྱེ་བྲག་སོ་སོ་ཅི་རིགས་པར། ། སྒྲ་ཡི་རྣམ་པར་ཤེས་པ་ནི། ། ཕྱག་ན་རྡོ་རྗེར་ཡང་དག་བཤད། ། དྲི་ ཡི་བྱེ་བྲག་ལ་སྤྱོད་པ། ། སོ་སོར་ཇི་ལྟར་རིགས་པར་ནི། ། སྣ་ཡི་རྣམ་ཤེས་མཚན་ཉིད་ནི། ། ནམ་མཁའི་སྙིང་པོ་རྣམ་པར་ཤེས། །
BOརོ་ཡི་བྱེ་བྲག་ལ་སྤྱོད་པ། ། དབྱེ་བ་སོ་སོའི་{གོ་རིམས་,གོ་རིམ་}བཞིན། ། ལྕེ་ཡི་རྣམ་ཤེས་མཚན་ཉིད་ནི། ། འཇིག་རྟེན་དབང་ཕྱུག་ཏུ་ནི་ཤེས། ། རེག་བྱའི་ བྱེ་བྲག་ལ་སྤྱོད་པ། ། བྱེ་བྲག་སོ་སོའི་{གོ་རིམས་,གོ་རིམ་}བཞིན། ། རེག་བྱའི་རྣམ་ཤེས་མཚན་ཉིད་ནི། ། སྒྲིབ་པ་རྣམ་པར་སེལ་བར་ཤེས། ། ཡིད་ཀྱི་བྱེ་བྲག་ལ་སྤྱོད་པ། ། དབྱེ་བ་སོ་སོའི་{གོ་རིམས་,གོ་རིམ་}བཞིན། ། ཡིད་ཀྱི་རྣམ་ཤེས་ཞེས་གསུངས་པ། ། འཇམ་དཔལ་ཞེས་ བྱའི་མིང་ཅན་ནོ། ། རྒྱུས་པ་ཀུན་ལ་ཡང་དག་སྦྱོར། ། དབྱེ་བ་སོ་སོའི་{གོ་རིམས་,གོ་རིམ་}བཞིན། ། བག་ཆགས་ཡུལ་གྱི་བདག་ཉིད་ཅན། ། བྱམས་པ་རུ་ནི་རྣམ་པར་ཤེས། ། རྩ་རྣམས་སོ་སོའི་མཚན་ཉིད་ཅན། ། བདེ་བ་ཀུན་གྱི་གཞི་ཡི་མཆོག ། དངོས་པོ་ཀུན་གྱི་རང་བཞིན་ ཅན། ། འདི་ནི་ཀུན་དུ་བཟང་པོར་བཤད། ། དེ་ལྟར་རྣམ་ཤེས་ཚོགས་བརྒྱད་མཆོག ། ཡང་དག་དེ་ཉིད་བླ་ན་མེད། ། མིག་སོགས་དབང་པོའི་རྣམ་ཤེས་ནི། ། གཟུགས་སོགས་མཐོང་བའི་རང་བཞིན་ནོ། ། རྗེ་ངར་དཔུང་པ་བརླ་ཐལ་གོང་། ། སྒོ་གཉིས་དང་ནི་ཐམས་ཅད་ཀྱི། ། ཤེས་པ་བཅུ་ཡི་མཚན་ཉིད་ནི། ། ཁྱབ་པ་རྣམས་སུ་ཡོངས་སུ་ཤེས། །
BOགཤིན་རྗེ་མཐར་བྱེད་ཤེས་མཐར་བྱེད། ། པདྨ་མཐར་བྱེད་བགེགས་མཐར་བྱེད། ། འདོད་པའི་རྒྱལ་པོ་མི་གཡོ་བ། ། དབྱིག་སྔོན་དང་ནི་སྟོབས་པོ་ཆེ། ། གནོད་མཛེས་གཙུག་ཏོར་འཁོར་ལོ་སྒྱུར། ། དེ་ལྟར་ དེ་རྣམས་གནས་དབྱེ་བས། ། ཡེ་ཤེས་གསུམ་གྱིས་ཡོངས་སུ་གསལ། ། ངོ་བོ་གཅིག་ཏུ་གྱུར་ནས་ནི། ། ཡང་དག་དེ་ཁོ་ན་ཉིད་རྟེན། ། གང་གིས་དེ་ཉིད་ཆོ་ག་བཞིན། ། བླ་མ་བརྒྱུད་པ་ལས་ཤེས་བྱ། ། སྔགས་ཀྱི་དེ་ཉིད་རྣལ་འབྱོར་མཆོག ། ཡེ་ཤེས་ཆེན་པོ་ལེགས་རྒྱས་ པ། ། སྐྱེ་མེད་ཟད་མེད་མི་གསལ་དང་། ། འགྱུར་བ་མེད་ཅིང་སྒྲིབ་པ་མེད། ། གཉིས་མེད་འཇིགས་བྲལ་ཞི་བ་དང་། ། བདེ་བ་ཆེན་པོའི་གོ་འཕང་མཆོག ། སྦྲུལ་དང་བཏུས་དང་མཐའ་མེད་དང་། ། མགོ་མེད་ཡོངས་སུ་དབྱེ་བ་ཡིས། ། ཨོཾ་དང་ཧཱུྃ་ཕཊ་སྭཱ་ཧཱའི་མཐའ། ། སྦྲུལ་ཞེས་བྱ་བ་མངོན་པར་བརྗོད། ། རང་མིང་ཡོན་ཏན་དང་ནི་གཟུགས། ། བཏུས་པའི་མཚན་ཉིད་མིང་ཅན་ནོ། ། ཨོྃ་ལ་སོགས་པ་ཞབས་མེད་པ། ། མཐའ་མེད་ཅེས་བྱའི་མིང་ཅན་ནོ། ། སྭཱ་ཡི་མཐའ་ཅན་ཨོྃ་མེད་པ། ། མགོ་མེད་ཅེས་ནི་བཤད་པ་ཡིན། ། ཐམས་ཅད་ཡོད་ལ་ཨོྃ་མེད་པ། ། མགོ་མེད་ཅེས་ནི་བཤད་པ་ཡིན། ། དེ་ལྟར་མཚན་ཉིད་ཤེས་ནས་ནི། །
BOསྔགས་ཀྱི་དེ་ཉིད་བླ་ན་མེད། ། རྩ་བའི་རྒྱུད་ཀྱི་རྗེས་འབྲངས་ནས། ། འདི་ཡི་རྒྱ་ཆེན་དོན་ཤེས་བྱ། ། ཡེ་ཤེས་དེ་ཉིད་རྣལ་འབྱོར་མཆོག ། གཉིས་པ་ཐམས་ཅད་རྣམ་པར་ སྤངས། ། དབང་པོ་ཐམས་ཅད་མཉམ་པར་སྦྱོར། ། དངོས་པོ་ཐམས་ཅད་གཅིག་པུའི་ལུས། ། ངག་གི་རྣམ་རྟོག་ཀུན་སྤངས་པ། ། སྣང་བ་ཐམས་ཅད་རྣམ་སྤངས་པ། ། བདག་བྱིན་བརླབ་པའི་རང་བཞིན་ཅན། ། ཀུན་ལ་ཁྱབ་པ་རྨད་དུ་བྱུང་། ། རང་རིག་པ་ཡི་རྣལ་ འབྱོར་མཆོག ། སྐད་ཅིག་བཞི་ཡི་མཚན་ཉིད་ནི། ། ཆ་བྲལ་ཀུན་འགྲོ་ཁྱབ་པ་དང་། ། རྣལ་འབྱོར་བྱིས་པས་མི་ཤེས་ཤིང་། ། ཀུན་རྫོབ་ཡོངས་སུ་མི་ཤེས་པ། ། དོན་དམ་རང་གི་ངོ་བོ་ནི། ། རྫོགས་པའི་རིམ་པས་དབྱེ་བ་དང་། ། སྔགས་ཀྱི་དེ་ཉིད་རབ་ཏུ་གསལ། ། ཨ་ནི་དེ་ཉིད་མཐའ་ཐིག་ལེར། ། ཡང་དག་ཐིམ་པ་རྣམ་པར་བསྒོམ། ། ཐིག་ལེ་ཡི་གེ་ཨ་ལ་ཐིམ། ། ཨ་ནི་མཐའ་ཡི་ཧ་ཙམ་ལའོ། ། ཧ་ཡང་ཡི་གེ་ཧཱུྃ་ལའོ། ། ཡི་གེ་ཨཱུ་ནི་ཧྃ་ལའོ། ། ཡི་གེ་ཧྃ་ཡང་ཨོྃ་ལ་ཐིམ། ། ཡི་གེ་ཨ་ནི་ཐིག་ལེ་ཙམ། ། ཐིག་ལེ་ཡང་ནི་སྒྲ་ལ་ ཐིམ། ། སྒྲ་ཡང་སྒྲ་ཙམ་ལ་ནིའོ། ། སྒྲ་ཙམ་མཆོག་ནི་ནམ་མཁའ་ལའོ། ། དེ་ཡང་འོད་གསལ་བ་ལ་ཐིམ། ། འོད་གསལ་གོ་འཕང་གསལ་བ་ནི། །
BOཤིན་ཏུ་རྣམ་དག་ཆོས་དབྱིངས་ཏེ། ། གཉིས་སུ་མེད་པའི་ཡེ་ཤེས་མཆོག ། རབ་ཏུ་སད་ཅིང་རབ་ཏུ་འཆར། ། ངག་གི་སྤྱོད་ པ་རྣམས་དང་བྲལ། ། གཉིས་པ་ཐམས་ཅད་རྣམ་པར་སྤངས། ། ཕུང་པོ་ལྔ་ནི་གཅིག་པུའི་གཞི། ། འབྱུང་བ་ལྔ་ནི་ཡང་དག་བསྟེན། ། རྣམ་ཤེས་བརྒྱད་ཀྱི་ཚོགས་དབེན་པ། ། ཕྱི་ཡི་ཡུལ་དྲུག་བསྡུས་པ་ནི། ། རླུང་བཅུས་ཤེས་པ་བཅུ་བསྡུས་པ། ། དེ་ལྟར་མཚན་ཉིད་ཀུན་བསྡུས་ པའོ། ། ཀུན་ནས་སྤྲོ་བའི་རྣལ་འབྱོར་གྱིས། ། གང་གིས་བཞུགས་གནས་སྲིད་པ་གསུམ། ། དངོས་གྲུབ་ཀུན་བྱེད་དཔལ་དང་ལྡན། ། སྐལ་བ་བཟང་པོ་ཀུན་འཕེལ་བ། ། རྡོ་རྗེ་དེ་ནི་རྡོ་རྗེ་སེམས། ། རྡོ་རྗེ་འཇིགས་བྱེད་དབང་ཕྱུག་དང་། ། ཧེ་རུ་ཀ་དང་དུས་འཁོར་ལོ། ། དང་ པོའི་སངས་རྒྱས་ཐུབ་པ་ཆེ། ། ཀུན་དུ་བཟང་པོ་འཇམ་དཔལ་དང་། ། སྣ་ཚོགས་སྤྲོ་བའི་བདག་ཉིད་ཅན། ། སྣ་ཚོགས་ཡོན་ཏན་ཚོགས་ཀྱི་གཞི། ། ཀུན་ནས་སྤྲོ་བའི་རྣལ་འབྱོར་ནི། ། རྣལ་འབྱོར་ཆེན་པོ་དྲི་མ་མེད། ། ཡེ་ཤེས་དེ་ཉིད་གསལ་བ་ནི། ། རྟོག་ པ་མེད་ཅིང་གནས་པ་མེད། ། ཆོས་དབྱིངས་འཕོ་བ་ཞེས་བཤད་དོ། ། བསྐྱེད་དང་རྫོགས་པའི་མཚན་ཉིད་དག ། སྐྲ་ཡི་རྩེ་མོ་བརྒྱད་སྟོང་འདྲ། །
BOཤིན་ཏུ་གསལ་ཞིང་འོད་གསལ་བ། ། ལུང་དང་རིགས་པའི་དབྱེ་བ་ཡིས། ། བླ་མ་བརྒྱུད་པ་ལས་ནི་ཤེས། ། དེ་ལྟར་དེ་ཉིད་གསུམ་ དེ་མཆོག ། ཞལ་ནས་བརྒྱུད་པའི་རིམ་པ་སྐྱེ། ། གསང་བ་ཡི་ནི་ཡེ་ཤེས་མཆོག ། བཞི་པའི་མཚན་ཉིད་སྐད་ཅིག་མཆོག ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་དེ་ཁོ་ན་ཉིད་གསུམ་གྱི་དམ་ཚིག་གཏན་ལ་དབབ་པའི་ལེའུ་སྟེ། ཉི་ཤུ་གསུམ་ པའོ། ། ། ། དེ་ནས་ཡང་དག་བཤད་ཀྱིས་ཉོན། ། སྣ་རྩེ་གསུམ་གྱི་མཚན་ཉིད་ནི། ། གསང་བ་སྙིང་ག་གདོང་སྣའི་མིང་། ། གསུམ་པོ་རྒྱུད་ལས་གསལ་བ་ནི། ། འཁོར་ལོ་གསུམ་གྱི་དབྱེ་བ་ཡིས། ། རྣལ་འབྱོར་པ་ཡིས་བསྒོམ་པའི་རིམ། ། ཤིན་ཏུ་ཆགས་ པའི་དབང་སོང་བའི། ། སེམས་ཀྱི་བདེ་བ་སྟེར་བར་བྱེད། ། རླུང་གི་དེ་ཉིད་སྦྱོར་བ་ཡིས། ། རྩ་ཡི་འཁོར་ལོ་སད་པར་བྱེད། ། བདེ་བ་ཆེན་པོ་ཀུན་ནས་སྐྱེ། ། ཁམས་གསུམ་རོ་གཅིག་གྱུར་ནས་ནི། ། དགུག་དབང་ཆོ་ག་བཞིན་དུ་བྱ། ། བྱང་ཆུབ་སེམས་ནི་བདེ་བ་ཆེ། ། ལྷན་ སྐྱེས་སྐད་ཅིག་མཚན་ཉིད་ནི། ། རྡོ་རྗེ་རྩེ་མོར་གཟུང་བར་བྱ། ། དེ་ཉིད་བདེ་བ་ཆེན་པོ་སྟེ། ། ཡེ་ཤེས་ལྔ་ཡི་རང་བཞིན་ཅན། །
BOཀུན་རྟོག་ཐམས་ཅད་རྣམ་པར་སྤངས། ། གསང་བའི་སྣ་རྩེར་རྫས་ཐིག་ལེ། ། ཡང་དག་གཟུང་བའི་བདག་ཉིད་ཅན། ། ཆགས་ཆེན་ སེམས་ནི་གཅིག་པུ་ཡིས། ། རྣལ་འབྱོར་མཆོག་ཏུ་ཤེས་པར་བྱ། ། པད་འདབ་དྲུག་ཅུ་རྩ་བཞི་ལ། ། རྩ་ཡི་འཁོར་ལོ་རིམ་བཞིན་འཆར། ། དེ་ཡི་ལྟེ་བ་སྣར་ནི་བཤད། ། གསང་བ་བདེ་བ་ཐམས་ཅད་སྟེར། ། སྙིང་གའི་པདྨ་འདབ་མ་བརྒྱད། ། དེ་ཡང་ལྟེ་བ་སྣར་ནི་བརྗོད། ། ཞེ་སྡང་ཉིད་ཀྱི་སེམས་ནི་བསྒོམ། ། གསང་སྔགས་འབར་བའི་ཡེ་ཤེས་སེམས། ། ཡང་དག་སྤྲོ་བར་བྱེད་པའི་རྒྱུ། ། ངག་གི་རྟོག་པ་ཀུན་སྤངས་པ། ། རྨད་བྱུང་ཆེན་པོ་ཡེ་ཤེས་མཆོག ། རྟག་ཏུ་སྔགས་ནི་ནཱ་ད་འབྱུང་། ། རྣམ་རྟོག་མེད་པའི་བདེ་བ་ཆེ། ། བསམ་གཏན་ལ་ སྦྱོར་བདེ་བའི་མཆོག ། མན་ངག་ཐོབ་པས་བདེ་བ་རྒྱལ། ། ཞེ་སྡང་མྱུར་དུ་དབང་བྱས་ནས། ། ཞི་བའི་དེ་ཉིད་རྒྱུ་གཅིག་ནི། ། ཟླ་བ་ཉི་མ་མེ་དང་གསུམ། ། ལམ་གསུམ་གྱི་ནི་དབུས་ནས་ཁྱབ། ། གདོང་གི་སྣ་ནི་ཞེས་བྱར་བཤད། ། རླུང་རྣམས་གནས་ཀྱི་མཚན་ཉིད་ དང་། ། དེ་ལ་གནས་པའི་ཡེ་ཤེས་ཆེ། ། ཐིག་ལེ་གཏི་མུག་གིས་གནོན་ཡིས། ། བསམ་གཏན་གཏི་མུག་མཆོག་ལས་རྒྱལ། ། དངོས་པོ་ཐམས་ཅད་རྣམ་པར་སྤངས། །
BOཡེ་ཤེས་ལྔ་ཡི་བདག་ཉིད་གསལ། ། དེ་ཁོ་ན་ཉིད་ལྔ་བརྟེན་མཆོག ། དེ་ཡི་འོད་ཟེར་ཐིག་ལེ་ཙམ། ། གདོང་གི་སྣ་རྩེར་ཡང་དག་བརྟེན། ། རྣལ་འབྱོར་མཆོག་ནི་བསྒོམ་པར་བྱ། ། གཏི་མུག་རྒྱ་མཚོ་ལས་ནི་རྒྱལ། ། དེ་ཉིད་དམ་ཚིག་སེམས་དཔའ་ཡི། ། མིང་ཅན་དུ་ནི་ཡང་དག་བཤད། ། སངས་རྒྱས་ཀུན་གྱི་དམ་ཚིག་ནི། ། ཡེ་ཤེས་ལྔ་ཡི་མཚན་ཉིད་ཅན། ། རྣལ་འབྱོར་ མཁས་པ་རྣམས་ཀྱིས་ནི། ། གཏི་མུག་མུན་པ་རྣམ་འཇོམས་པ། ། ཀུན་མཁྱེན་རྟོགས་པའི་མཚན་ཉིད་ནི། ། སངས་རྒྱས་ལྔ་ཡི་རིགས་གནས་ན། ། སྣ་རྩེ་བུ་ག་ལས་བྱུང་ཞིང་། ། རླུང་ལྔ་སྟེང་དུ་ཡང་དག་རྒྱུ། ། ལུས་ལ་རྟག་ཏུ་སྤྱོད་པར་འགྱུར། ། ཀུན་རྫོབ་སྣར་ནི་རྒྱུ་བ་ ཡི། ། སྒོ་དེ་ལས་ནི་རྣམ་པར་བྱུང་། ། གཡོན་དང་གཡས་དང་གཉིས་ཀ་དང་། ། དལ་བར་རྒྱུ་དང་རྣམ་པ་བཞི། ། གཡས་པ་ལས་ནི་འབྱུང་བའི་ཁམས། ། མེ་ཡི་དཀྱིལ་འཁོར་ཉིད་ཡིན་ཏེ། ། ཁ་དོག་དམར་པོ་བཟང་པོ་འདི། ། པདྨ་མགོན་པོ་རྒྱུ་བའོ། ། གཡོན་ པ་ནས་ནི་འབྱུང་བའི་ཁམས། ། རླུང་གི་དཀྱིལ་འཁོར་དང་འདྲེས་པ། ། ལྗང་སེར་དག་ཏུ་སྣང་བ་སྟེ། ། ལས་ཀྱི་མགོན་པོ་རྒྱུ་བའོ། ། གཉིས་ཀ་ལས་ནི་འབྱུང་བའི་ཁམས། །
BOགསེར་གྱི་མདོག་ཏུ་སྣང་བ་སྟེ། ། དབང་ཆེན་གྱི་ནི་དཀྱིལ་འཁོར་ཉིད། ། རིན་ཆེན་མགོན་པོ་རྒྱུ་ བའོ། ། དལ་ཞིང་རྒྱུ་བ་མེད་པའི་ཁམས། ། དག་པའི་ཤེལ་ལྟར་སྣང་བ་ནི། ། འདི་ནི་ཆུ་ཡི་དཀྱིལ་འཁོར་ཏེ། ། རྡོ་རྗེ་མགོན་པོ་རྒྱུ་བའོ། ། ཁམས་གསུམ་ལས་ནི་ཡང་དག་བྱུང་། ། རྟེན་དང་བརྟེན་པར་བཟུང་བ་ནི། ། རྣམ་པར་སྣང་མཛད་རང་བཞིན་ཏེ། ། འཆི་ བའི་མཐར་ནི་འབྱུང་བར་འགྱུར། ། དཀྱིལ་འཁོར་བཞི་པོ་དེ་དག་ནི། ། རྣམ་པར་བཞག་པས་རྟག་ཏུ་ཟློས། ། སྔགས་བཟླས་པ་ཡི་གྲངས་ཀྱིས་ནི། ། ཉིན་མཚན་རྟག་ཏུ་ཟློས་པ་ཡིན། ། དེ་ལྟར་རླུང་ནི་སྣ་རྩེར་ནི། ། ཁ་དོག་ལྔ་པར་རྣམ་པར་བསྒོམ། ། གཉིས་མེད་ མཆོག་གི་རྣལ་འབྱོར་གྱིས། ། འོད་ཟེར་ཚོགས་ནི་དྲི་མ་མེད། ། དེ་ཡིས་ཞི་སོགས་བྱ་བ་ནི། ། རིམ་གྱིས་སྦྱོར་བས་འགྲུབ་པར་འགྱུར། ། རྡོ་རྗེ་སེམས་དཔར་འགྲོ་བར་འགྱུར། ། རྡོ་རྗེ་སེམས་དཔའ་འགྲོ་མགོན་ལ། ། དེ་ནས་ལག་ན་རྡོ་རྗེས་ཞུས། ། ཐིག་ལེ་གསུམ་གྱི་ གཞུང་ལུགས་ནི། ། ཁྱོད་ཞབས་བསྙེན་བཀུར་གྱིས་འཚལ་ན། ། འདི་ལ་ཅུང་ཟད་ཐེ་ཚོམ་མཆིས། ། སྲིད་པ་མཐར་མཛད་གསལ་བར་མཛད། ། རྫས་དང་སྔགས་དང་དེ་བཞིན་རླུང་། །
BOཐིག་ལེ་གསུམ་ནི་བསྒོམས་པ་ན། ། རྣལ་འབྱོར་པ་གཅིག་ཉིད་དམ་ནི། ། ཡང་ ན་རྣལ་འབྱོར་སོ་སོར་བསྒོམ། ། དེ་ལ་ཐེ་ཚོམ་ཀུན་གཅོད་གཙོ། ། བཅོམ་ལྡན་རྡོ་རྗེ་སེམས་དཔས་གསུངས། ། ཡུན་{རིངས་,རིང་}ཆགས་ཆེན་དབང་སོང་བས། ། སྲིད་པ་གསུམ་དུ་སྐྱོབ་པ་རྣམས། ། དེ་དག་དགྲོལ་བའི་དོན་དུ་ནི། ། རྫས་ཀྱི་ཐིག་ལེ་གསུངས་པ་ཡིན། ། ཞེ་སྡང་ཆེན་པོ་དབང་སོང་བ། ། མི་གང་མི་སྲུན་པ་ཡི་ལུས། ། དེ་རྣམས་མྱུར་དུ་གྲོལ་དོན་དུ། ། སྔགས་ཀྱི་ཐིག་ལེར་གསུངས་པ་ཡིན། ། གཏི་མུག་ཆེན་པོས་ཀུན་ནས་འཁྲུལ། ། སྲིད་པའི་རྒྱ་མཚོ་ལས་སྐྱོབ་གང་། ། དེ་དག་དངོས་གྲུབ་བརྒྱད་འབྲས་བུ། ། ཐོབ་ཕྱིར་ ཡེ་ཤེས་རྒྱ་མཚོ་ནི། ། རླུང་གི་ཐིག་ལེར་གསུངས་པ་ཡིན། ། ཡང་དག་དེ་ཉིད་སྤྲོས་པ་ནི། ། དེ་ལྟར་ཡང་དག་ཐིག་ལེ་གསུམ། ། བསམ་པ་ཇི་བཞིན་སྦྱོར་ཇི་བཞིན། ། ཚེ་འདི་ཉིད་ལ་གྲུབ་དོན་དུ། ། སྒྲིབ་པ་ཐམས་ཅད་དག་པའི་ཕྱིར། ། རྩེ་གཅིག་པ་ཡི་ སེམས་ཀྱིས་ནི། ། ཡེ་ཤེས་གསུམ་གནས་ཉམས་དགའ་བ། ། མེ་ཏོག་འབྲས་བུ་ཆུ་ཡིས་བརྒྱན། ། སྐྱེ་བོས་དབེན་པའི་རི་ཡི་རྩེར། ། དངོས་གྲུབ་ཐམས་ཅད་བསྡུས་པ་ནི། ། འབད་པ་ཡིས་ནི་བསྒྲུབ་པར་བྱ། །
BOརྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་ པ་ལས་སྣའི་རྩེ་མོ་གསུམ་གཏན་ལ་ཕབ་པའི་ལེའུ་སྟེ་ཉི་ཤུ་བཞི་པའོ། ། ། ། དེ་ནས་ཡང་དག་བཤད་ཀྱིས་ཉོན། ། སྟོང་ཉིད་ཡེ་ཤེས་མཚན་ཉིད་ནི། ། ལུས་ལ་གནས་པ་དེ་ཉིད་མཆོག ། ཐམས་ཅད་བདག་ཉིད་རྟག་ཏུ་བཞུགས། ། ཆོས་རྣམས་ཐམས་ཅད་སྣང་ བར་བྱེད། ། མཚན་ཉིད་སྟོང་པ་ཉིད་དུ་འདོད། ། དེ་ལས་ཡེ་ཤེས་བདེ་བ་ཆེ། ། འོད་གསལ་བ་ནི་རྣམ་དག་པ། ། གང་ཕྱིར་ཨ་བ་དྷཱུ་ཏཱིར་ཞུགས། ། ཡང་དག་སྟོང་པ་ཉིད་དུ་འདོད། ། ཆོས་རྣམས་རྣམ་རྟོག་སྣང་བ་མཆེད། ། ཀུན་རྟོག་ཐམས་ཅད་གཅོད་པར་བྱེད། ། རྣམ་ རྟོག་རླུང་གི་ངལ་བསོ་བ། ། དེ་ནི་སྟོང་པ་ཉིད་དུ་བཤད། ། གཙོ་བོ་ཆེན་པོ་མི་བསྐྱོད་པའི། ། འཇིག་རྟེན་ཁམས་ནི་དེ་ཉིད་དོ། ། དེར་ནི་རྟག་ཏུ་བཞུགས་པའི་ས། ། སྲོག་གི་ཡེ་ཤེས་མིང་ཅན་ཏེ། ། གཟུགས་མེད་དྲག་པོ་ཆེན་པོ་ཡི། ། ཞི་བའི་རང་བཞིན་མཚན་ ཉིད་ཅན། ། དེ་ལ་ཡེ་ཤེས་བདེ་བ་ཆེ། ། བྱང་ཆུབ་སེམས་ཀྱིས་གང་བ་ཉིད། ། དེ་ཉིད་བདེ་ཆེན་གོ་འཕང་གནས། ། ཡེ་ཤེས་ཡང་དག་བྱང་ཆུབ་སེམས། ། དེ་ལ་སོགས་པ་མིང་གི་སྒྲས། ། བརྗོད་བྱ་གཅིག་པུ་བདེ་བ་ཆེ། །
BOདངོས་པོ་གཅིག་དང་ལྡན་པ་ཉིད། ། སྟོང་ ཉིད་ཡེ་ཤེས་ཞེས་ནི་བརྗོད། ། བདེ་བ་ཅན་ཞེས་དེ་ལ་བཤད། ། བདེ་བ་དགེ་བའི་ཐོབ་མཚན་ཉིད། ། གང་དེ་བདེ་བར་གནས་པ་ནི། ། དེ་ནི་བདེ་བ་ཅན་ཞེས་བརྗོད། ། ཚེ་དཔག་མེད་པའི་ཞིང་ཁམས་ན། ། བདེ་བ་ཀུན་གྱི་གཞི་ཡི་མཆོག ། བྱང་ཆུབ་སེམས་ནི་ཚེ་ དཔག་མེད། ། དེ་ལས་བྱུང་ཞིང་སྐྱེ་བའི་འོད། ། དེ་ཕྱིར་འོད་དཔག་མེད་དུ་ཤེས། ། བདེ་བ་ཀུན་གྱི་གཞི་ཡི་མཆོག ། སྟོང་ཉིད་རྡོ་རྗེ་དབྱིངས་དབང་ཕྱུག ། ཡེ་ཤེས་རྡོ་རྗེའི་དབང་ཕྱུག་དང་། ། དེ་ཉིད་མཉམ་པར་སྦྱོར་བ་ནི། ། སྟོང་ཉིད་ཡེ་ཤེས་ཞེས་ནི་བརྗོད། ། ཤེས་ རབ་པདྨ་ལ་ལ་ནཱ། ། ཟླ་མཚན་ཉི་མ་འབབ་པ་ན། ། དེ་ཡང་སྟོང་པར་རྣམ་པར་ཤེས། ། གཉིས་པ་ཐམས་ཅད་རྣམ་པར་སྤངས། ། ཐབས་ཀྱི་རྡོ་རྗེ་ར་ས་ནཱ། ། ཟླ་བ་ཤུ་ཀྲ་རབ་ཏུ་འབབ། ། དེ་ནི་ཡེ་ཤེས་མཆོག་ཏུ་གསུངས། ། བདེ་བ་ཆེན་པོའི་གོ་ འཕང་མཆོག ། དེ་གཉིས་སྦྱོར་བ་མཆོག་ཏུ་ཤེས། ། སྟོང་ཉིད་ཡེ་ཤེས་མི་ཟད་པ། ། ཟླ་བ་ཉ་དང་དེ་ཉིད་ཡིན། ། རྣལ་འབྱོར་མ་ཡི་ཞལ་ལས་ཤེས། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྟོང་པ་ཉིད་ཀྱི་ཚིག་བཤད་པའི་ལེའུ་སྟེ།
BOཉི་ཤུ་ལྔ་ པའོ། ། ། ། དེ་ནས་གཞན་ཡང་བཤད་ཀྱིས་ཉོན། ། ལུས་ནི་སྟོང་པ་ཉིད་ཀྱི་གནས། ། ལུས་ནི་གང་གིས་ཤེས་པ་ནི། ། ལྷ་རྣམས་ཀུན་གྱི་ཕོ་བྲང་མཆོག ། ལོངས་སྤྱོད་ཆོས་དང་སྤྲུལ་པ་དང་། ། བདེ་བ་ཆེན་པོ་ཡི་ནི་རྟེན། ། འཁོར་ལོ་ཡང་ནི་གང་བཤད་པ། ། རིམ་ པ་ཇི་བཞིན་མ་ལུས་པ། ། དེ་ལྟར་རྟག་ཏུ་ཡང་དག་བཞུགས། ། ཐིམ་དང་ལོངས་སྤྱོད་བདག་པོ་ནི། ། ལྷ་ཉིད་མཆོག་ཏུ་གཉིས་སུ་མེད། ། ཡང་དག་ངོ་བོའི་གོ་འཕང་རྟེན། ། ཡེ་ཤེས་ཆེན་པོའི་གོ་འཕང་ཕྱིར། ། བདེ་བ་ཆེན་པོའི་ཡང་དག་རྟེན། ། ཞེ་སྡང་ཆེ་དང་གཏི་མུག་ཆེ། ། ཕྲག་ དོག་ཆེ་དང་ཆགས་དངོས་ཀྱིས། ། ཁྲོ་བོ་ཆེ་དང་རྣམ་པའི་མཆོག ། འཁོར་བའི་མདུད་པ་ངེས་གཅོད་པ། ། ས་དང་ཆུ་དང་དེ་བཞིན་མེ། ། རླུང་དང་ནམ་མཁའི་དབྱེ་བ་ཡིས། ། གཟུགས་དང་སྒྲ་དང་དེ་བཞིན་དྲི། ། རོ་དང་རེག་བྱ་ཉིད་དང་ནི། ། ཆོས་ཀྱི་དབྱིངས་དང་མིག་{བཟངས་,བཟང་}དང་། ། རྣ་བ་སྣ་དང་ལྕེ་དང་ནི། ། ལུས་ཀྱི་རྣམ་ཤེས་ཆོས་དང་ནི། ། ཀུན་གཞི་ཉོན་མོངས་ཅན་གྱི་ཡིད། ། དད་དང་བརྩོན་འགྲུས་དྲན་ཏིང་འཛིན། ། ཤེས་རབ་དབང་པོའི་དབྱེ་བ་ཡིས། ། དད་སྟོབས་བརྩོན་འགྲུས་སྟོབས་དང་ནི། །
BOདྲན་པའི་སྟོབས་དང་ཏིང་འཛིན་སྟོབས། ། ཤེས་རབ་ སྟོབས་ནི་བླ་ན་མེད། ། ཇི་བཞིན་གནས་སུ་ཡང་དག་ཤེས། ། ལུས་ཀྱི་ལྷ་རུ་གསལ་བ་ཡིན། ། སྔོན་བཞིན་མིང་གི་དབྱེ་བ་ཡིས། ། སྔགས་ཀྱི་དབྱེ་བས་རིམ་པ་དང་། ། སྔགས་དགོད་པ་ཡི་རྣལ་འབྱོར་གྱིས། ། རིམ་བཞིན་གནས་ཀྱི་དབྱེ་བ་ཡིས། ། ལུང་གིས་རྣམ་པར་ངེས་ བྱས་པའི། ། ཡང་དག་གནས་ཀྱི་དབྱེ་བ་དང་། ། ལྷ་མོ་རྟག་ཏུ་རྣལ་འབྱོར་པས། ། བདག་ལ་བྱིན་རླབས་གོ་འཕང་གནས། ། འདོད་པ་ལྔ་ལ་ལོངས་སྤྱོད་ཅིང་། ། རབ་ཏུ་འབད་དེ་མཆོད་པ་བྱ། ། ། རྡོ་ཤིང་ས་ཡི་རང་བཞིན་གྱི། ། ཕྱི་རོལ་ལྷ་ལ་ཕྱག་མི་བྱ། ། བདག་ལ་བྱིན་རླབས་རིམ་དེ་ ཉིད། ། གཞན་དུ་སྲིད་པ་གསུམ་ན་མེད། ། དེ་ཁོ་ན་ཉིད་རྣལ་འབྱོར་མཆོག ། བདག་ལ་བྱིན་རླབས་སྒྲིབ་མེད་པ། ། སྔགས་དང་ཕྱག་རྒྱའི་རིམ་པ་སོགས། ། ཕྱི་ཡི་དངོས་པོ་མི་བགྲང་སྟེ། ། དེ་ཉིད་ཐོབ་པའི་རྣལ་འབྱོར་པ། ། རྣལ་འབྱོར་མ་ལ་མཆོག་ཏུ་ནི། ། འབད་པས་བྱིན་གྱིས་ བརླབ་པར་འདོད། ། བདག་བྱིན་རློབ་ཐབས་མཚན་ཉིད་དོ། །
BOརྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ལུས་ཀྱི་ལྷ་ཡེ་ཤེས་ཀྱི་མཚན་ཉིད་ཀྱི་ལེའུ་སྟེ་ཉི་ཤུ་དྲུག་པའོ། ། ། ། དེ་ནས་གཞན་ཡང་ལྷ་མོ་ཡི། ། དེ་རྣམས་ཀྱི་ནི་མིང་བཤད་བྱ། ། འཁོར་ ལོ་བཞི་ཡི་དབྱེ་བ་ཡིས། ། རྩ་ཡི་རིམ་པའི་གྲངས་ཀྱིས་ནི། ། ལས་དང་རྡོ་རྗེ་པདྨ་དང་། ། འཁོར་ལོ་ལ་སོགས་རིགས་དབྱེ་བས། ། རིམ་པ་བཞི་ཡི་དབྱེ་བ་ཡིས། ། རྩ་ཡི་རིམ་པས་ཡང་དག་བཞུགས། ། འདིར་ནི་རིགས་ནི་ལྔ་པར་ཡང་། ། དེ་ཁོ་ན་ཉིད་ཉམས་མྱོང་མཆོག ། ཚོར་བ་ཉམས་སུ་མྱོང་བ་ཡི། ། ཐམས་ཅད་ལ་ནི་ཁྱབ་པར་གནས། ། སྤྲུལ་པ་རང་གི་རིགས་ལས་སྐྱེས། ། ལྷ་མོ་འདི་དག་ཡང་དག་ཞུགས། ། མཁྱེན་མ་གཏུམ་མོ་དཔའ་མོ་མ། ། ལས་སྒྲོལ་མ་དང་ཡིད་གཅུགས་མ། ། འཁྲུལ་འཁོར་མ་དང་འབུད་མ་དང་། ། དེ་བཞིན་ རླུང་རྒྱུ་མ་དང་ནི། ། སྙིང་སྟོབས་ཡང་དག་སངས་རྒྱས་མ། ། རབ་དང་མ་དང་ཡིད་འོང་མ། ། གྲུབ་མ་སྤྲུལ་འཚོ་སྒྲ་མ་དང་། ། གཏེར་འཛིན་ལྷ་ཡི་དབང་ཕྱུག་མ། ། གེ་སར་པདྨ་དྲི་མེད་མ། ། རླུང་གི་ལུ་གུ་རྒྱུད་བྱེད་མ། ། བཟང་མོ་དང་ནི་ཁྭ་ཡི་གདོང་། ། གཉིད་ལོག་མ་དང་ མི་འཕེལ་མ། ། འཕར་མ་སྔོ་བསངས་དུས་མཚན་མ། །
BOརྩེ་འཇོ་མ་དང་སྐལ་བཟང་འཕེལ། ། ན་ར་ཛ་ན་ཁྱི་གདོང་མ། ། ཆགས་མ་དགའ་མ་རྣམ་སྒེག་མ། ། བརྩོན་འགྲུས་འཕེལ་དང་དཀར་མོ་དང་། ། བདུད་རྩི་ལྔ་ནི་འཕེལ་བ་མ། ། དངོས་འབེབས་ཤིན་ཏུ་དཔའ་མོ་དང་། ། པདྨ་རྔ་དང་འདོད་མ་དང་། ། སྒྱུ་མ་ཡིད་འོང་མཛའ་མོ་དང་། ། སྐྱུར་དང་ཆང་གི་དབང་ཕྱུག་མ། ། མི་བཟད་ཆེ་དང་ལས་སྐལ་བཟང་། ། མེ་ཏོག་བཟང་མོ་གདུག་རྨོངས་མ། ། སྟེང་གཟིགས་ཞལ་དང་རྩེ་གསུམ་མཚན། ། མཛེས་མ་དང་ནི་ལྗགས་བསྐྱོད་ མ། ། རྟག་བམ་མ་དང་གར་མ་དང་། ། {རི་དགས་,རི་དྭགས་}མིག་དང་ཆགས་དགའ་མ། ། སྣ་ཚོགས་རྨོངས་པར་རོལ་པ་མོ། ། དཀར་མོ་འཇིག་རྟེན་གསུམ་པ་མོ། ། རོ་བླན་དྲི་མེད་འགྲོ་བསྟུན་མ། ། རལ་ག་རྣམས་ནི་ཡང་དག་བཞུགས། ། རྟག་ཏུ་བརྒྱད་དང་བརྒྱད་སྤེལ་གྲངས། ། ཞལ་ གསུམ་ཕྱག་དྲུག་དྲི་མ་མེད། ། རིགས་ཀྱི་ཕྱག་རྒྱ་དབྱེ་བ་ཡིས། ། མཚོན་ཆ་རྣམས་ཀྱིས་ཡང་དག་བརྒྱན། ། དེ་དག་སྣ་ཚོགས་རྡོ་རྗེ་གཡས། ། གཡོན་པ་འགྱིང་བས་ཨུཏྤལ། ། གཡས་ན་འཁོར་ལོ་རིན་ཆེན་དང་། ། དེ་བཞིན་རལ་གྲི་ཆོས་འབྱུང་ནི། ། གཡོན་གྱི་ ཕྱག་གཉིས་ལ་ནི་འགྱུར། ། སེམས་དཔའི་སྐྱིལ་ཀྲུང་གིས་ལེགས་བཞུགས། ། ཞལ་ནི་ལྗང་ཁུ་སྤྱན་གསུམ་པ། །
BOདོན་ཡོད་གྲུབ་པའི་ཅོད་པན་ཅན། ། ཞལ་རྣམས་བཞད་པར་བསྒོམ་པ་དང་། ། བདེ་བ་ཐམས་ཅད་འཕེལ་བར་བྱེད། ། རང་གི་མིང་གི་དབྱེ་བ་ཡིས། ། ཡི་ གེ་གསུམ་དང་རྣམ་པར་སྤེལ། ། སྔགས་ཀྱིས་ཀྱང་ནི་ཡང་དག་མཆོད། ། འདོད་པའི་དེ་ཉིད་རབ་སྩོལ་མཛད། ། ཆོས་ཀྱི་འཁོར་ལོ་རྩིབས་བརྒྱད་དབུས། ། ལྷ་འདི་དག་ནི་ཡང་དག་བཞུགས། ། རྡོར་དབྱིངས་དབང་ཕྱུག་ལཱ་མ་དང་། ། རྡོ་རྗེ་ཕྱག་རྒྱ་སྟོབས་ཆེན་མོ། ། རྡོ་རྗེ་སྒེག་ མོ་རྡོ་རྗེ་གདོང་། ། རྡོ་རྗེ་ཆོས་མ་རྡོ་རྗེ་བཟང་། ། རྡོ་རྗེ་རོལ་མོར་ཤེས་པར་བྱ། ། ཆོས་ཀྱི་འཁོར་ལོར་དགུ་བདག་ཉིད། ། ཞལ་གསུམ་ཕྱག་དྲུག་རྣམ་པ་དང་། ། སེམས་དཔའི་སྐྱིལ་ཀྲུང་གིས་ལེགས་བཞུགས། ། རྡོ་རྗེ་འཁོར་ལོ་རིན་ཆེན་དང་། ། གཡས་པ་ཡི་ནི་ཕྱག་ ན་འཛིན། ། གཡོན་ན་རལ་གྲི་པདྨ་དང་། ། དྲིལ་བུ་འཛིན་པ་བླ་ན་མེད། ། སྐུ་མདོག་སྔོན་པོ་སྤྱན་གསུམ་པ། ། ཞལ་གྱི་མཆེ་བ་ཅུང་ཟད་གཙིགས། ། རང་མིང་ཡི་གེ་གསུམ་དང་སྤེལ། ། སྔགས་ཀྱིས་དེ་དག་རབ་ཏུ་མཆོད། ། ལོངས་སྤྱོད་འདབ་མ་བཅུ་དྲུག་ལ། ། པདྨའི་ དབུས་ན་ལྷ་རྣམས་བཞུགས། ། པདྨའི་སྒྲོལ་མ་པད་དཀར་མོ། ། པདྨ་ཀུ་མུ་ད་འཕེལ་མ། ། པདྨའི་སྤྱན་དང་པད་གཙུག་ཕུད། །
BOཔདྨའི་ཕྲེང་བ་པད་སྐྱེས་མ། ། པད་གདན་པདྨའི་དྲ་བ་མ། ། དེ་བཞིན་པདྨའི་འོད་དང་ནི། ། པདྨའི་སྤྱན་དང་པད་{བཟངས་སམ,བཟང་ངམ}། ། པདྨའི་ནང་བཞུགས་པད་སྐྱེས་མ། ། པདྨའི་གེ་སར་པདྨ་མ། ། དེ་ལྟར་འདི་ནི་ཡང་དག་བཤད། ། ཞལ་གསུམ་ཕྱག་དྲུག་རྣམ་པ་ཅན། ། སེམས་དཔའི་སྐྱིལ་ཀྲུང་གིས་ལེགས་བཞུགས། ། གཡས་ན་པདྨ་འཁོར་ལོ་དང་། ། རྡོ་རྗེ་ཡང་ནི་འདེབས་པར་མཛད། ། གཡོན་ན་རལ་གྲི་དྲིལ་བུ་དང་། ། རིན་པོ་ཆེ་ཡིས་རྣམ་པར་སྒེག ། སྤྱན་གསུམ་རྣམ་པར་འཆར་བ་དང་། ། པདྨ་དམར་པོའི་མདོག་ལྟར་དམར། ། ཉི་མའི་དཀྱིལ་འཁོར་ཉེར་བཞུགས་ཤིང་། ། སེམས་དཔའི་སྐྱིལ་མོ་ཀྲུང་གིས་བཞུགས། ། རང་མིང་ཡི་གེ་གསུམ་དང་བཅས། ། འདི་རྣམས་སྔགས་ནི་བླ་ན་མེད། ། བདེ་བ་ཆེན་པོའི་འཁོར་ལོ་ཆེ། ། པད་འདབ་སུམ་ཅུ་རྩ་གཉིས་ལ། ། རྟག་ཏུ་ལྷ་མོ་རྣམས་ནི་བཞུགས། ། རབ་ཏུ་སད་པ་འབད་པ་ཅན། ། འཁོར་ལོའི་ཤུགས་མ་རྡོ་རྗེ་ལྡན། ། རིན་ཆེན་སྒྲོལ་མ་པད་ཞུགས་མ། ། སྣ་ཚོགས་ལས་མ་གཏི་མུག་དགའ། ། ཞེ་སྡང་རྡོ་རྗེ་དགའ་ཆགས་མ། ། རྡོ་རྗེ་ལས་ཆགས་གཟུགས་ རྡོ་རྗེ། ། སྒྲ་ཡི་རྡོ་རྗེ་རོ་རྡོ་རྗེ། ། རེག་བྱ་རྡོ་རྗེ་ཆོས་དབྱིངས་མ། །
BOསྤྱན་འོད་མ་དང་ཐོད་དབྱངས་མ། ། སྣ་ཡི་སྣང་བ་རོ་དགའ་མ། ། སྐུ་ཡི་རྒྱལ་མཚན་ཡིད་དགའ་མ། ། ཁམས་བཅས་མ་དང་རྒྱུ་འབབ་མ། ། གཤིན་རྗེ་འཇོམས་པའི་བློ་ཡི་ནི། ། བྱེ་བྲག་རྣམ་པར་རྒྱས་མ་དང་། ། པདྨའི་རལ་པ་གྱེན་དུ་བརྫེས། ། བགེགས་རྣམས་ཐམས་ཅད་འཇོམས་པ་མོ། ། སྦས་པའི་མཐིལ་དང་དབྱུག་སྔོན་མ། ། ཤིན་ཏུ་བརྟན་མ་སྟོབས་ཆེན་མ། ། རང་བྱུང་མ་དང་འཁོར་ལོའི་གཙུག ། དེ་ལྟར་རྩ་ཡི་དབུས་ནས་ཤར། ། སླར་ཡང་ལྷ་མོ་ཞལ་གསུམ་དང་། ། ཕྱག་ དྲུག་བདེ་བ་འཕེལ་བ་ཅན། ། ཟླ་བའི་དཀྱིལ་འཁོར་ལ་ཡང་བཞུགས། ། དྲི་མེད་པདྨ་དཀར་མོའི་མདོག ། ཞི་བ་ཞལ་གསུམ་སྤྱན་གསུམ་པ། ། གཡས་པའི་ཕྱག་ན་བསྣམས་པ་ནི། ། འཁོར་ལོ་ལྕགས་ཀྱུ་རྡོ་རྗེ་རིམ། ། དེ་བཞིན་གཡོན་པའི་ཕྱག་གསུམ་ལ། ། པདྨ་ ཞགས་པ་རིན་པོ་ཆེ། ། འཆར་དང་འདེབས་དང་སྒེག་པར་མཛད། ། པདྨ་དཀར་པོ་འདྲ་བའི་འོད། ། སྤྱི་བོར་རྣམ་པར་སྣང་མཛད་འཆང་། ། རང་གི་མིང་དང་ཡིག་གསུམ་མིང་། ། འདི་དག་སྔགས་ནི་{གོ་རིམས་,གོ་རིམ་}བཞིན། ། དེ་ཉིད་མཆོག་ནི་རབ་ཏུ་གསལ། ། སྐུ་གསུང་ཐུགས་ཀྱི་སྡོམ་པ་ནི། ། དེ་ལྟ་བུ་ཡི་སྡོམ་པ་མཆོག ། ལྷ་མོ་རྣམས་ཀྱི་དེ་ཉིད་མཆོག །
BOརྟག་ཏུ་གཉིད་ལོག་ལུས་ལ་གནས། ། འདོད་པ་ལྔ་ཡི་ལོངས་སྤྱོད་བསྟེན། ། མཆོད་པ་ཉིད་ཀྱིས་ཡང་དག་མཉེས། ། རྡོ་རྗེ་པདྨའི་བདེ་བས་མྱོས། ། རྡོ་རྗེ་སེམས་དཔའི་ གོ་འཕང་མཆོག ། མཉེས་ནས་སླར་ཡང་གསོ་བར་བྱེད། ། དེ་ཡི་ཞི་སོགས་བྱ་བ་རྣམས། ། འགྲུབ་འགྱུར་འདི་ལ་ཐེ་ཚོམ་མེད། ། བསམ་གཏན་རྣལ་འབྱོར་སོགས་སྤྱོད་དང་། ། སྔགས་དབྱིབས་ལ་སོགས་བྱ་བ་ནི། ། དགོས་མེད་མཆོག་ཏུ་ཅུང་ཟད་ནི། ། བླ་མའི་ལུང་ལས་ ཡང་དག་སྐྱེས། ། དེ་ཕྱིར་རྡོ་རྗེ་སློབ་དཔོན་ནི། ། འབད་པས་དངོས་གྲུབ་ཀྱིས་མཉེས་བྱ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་འཁོར་ལོ་བཞིའི་ལྷ་མོ་བཞི་རིམ་པ་རྣམ་པར་ཕྱེ་བའི་ལེའུ་སྟེ་ཉི་ཤུ་བདུན་པའོ། ། ། ། དེ་ནས་གཞན་ཡང་བཤད་བྱ་ བ། ། འཆར་དང་ནུབ་པའི་མཚན་ཉིད་ནི། ། རྩ་རྣམས་ཀྱིས་ནི་རྣལ་འབྱོར་མཆོག ། དངོས་གྲུབ་ཐམས་ཅད་ཀྱི་ནི་གནས། ། མདུན་གནས་པ་ཡི་ཡུལ་རྣམས་ལས། ། ཡིད་ལ་བྱེད་པས་དེར་མི་འགྲོ། ། སྔོན་གྱི་བག་ཆགས་ནང་གནས་པ། ། དེ་ཚེ་དབང་པོ་རབ་ཏུ་གསལ། ། དེ་ཡིས་དེ་ནི་རབ་ཏུ་སད། ། དེ་རྣམས་རྩ་ལ་རིམ་བཞིན་གནས། ། རབ་སད་དེ་ཡིས་སད་བྱས་ནས། །
BOལྷ་མོ་རང་ཡང་འཁོར་ལོ་ལས། ། དེ་ཡིས་འཆར་བའི་རིམ་པར་གསུངས། ། ནུབ་པ་ཡང་ནི་བཤད་པར་བྱ། ། ཡུལ་རྣམས་ཀྱང་ནི་དངོས་བྲལ་མེད། ། ཡིད་ལ་ བྱེད་ནས་གཞན་དུ་གནས། ། བག་ཆགས་ཀྱང་ནི་སད་མི་སད། ། རྩ་རྣམས་འཆར་བར་མི་འགྱུར་ཞིང་། ། ལྷ་རྣམས་ཡང་དག་སད་པར་ནི། ། དེ་ཡི་ཕྱིར་ནི་མི་འགྱུར་ཏེ། ། སྙིང་གི་དབུས་ནས་བདེ་བའི་དངོས། ། སངས་རྒྱས་ཉི་མ་གསལ་བའི་འོད། ། གཟུང་དང་འཛིན་ པའི་གཟུགས་ཀྱིས་ཀྱང་། ། དེ་ནི་འོད་ཟེར་བཅུ་གཉིས་ཏེ། ། འོད་འཕེལ་འོད་ཟེར་གཟི་བརྗིད་མ། ། གསལ་བ་འབར་མ་འོད་འབར་མ། ། མིག་ལ་སོགས་པ་ལ་བརྟེན་ནས། ། ཕྱི་རོལ་གཟུགས་སོགས་འཛིན་པའོ། ། མུན་སེལ་འོད་མ་སྣང་བ་མོ། ། གསལ་མཛེས་གསལ་འོད་ཉི་མ་ གསལ། ། ཕྱི་རོལ་གཟུགས་སོགས་རྣམ་པའོ། ། དྲུག་པོ་འདི་དག་འོག་ཏུ་འདོད། ། ལྷ་མོ་རྣམས་ནི་གང་འཆར་བའང་། ། ཡེ་ཤེས་ཉི་མ་འཆར་བ་ཡིན། ། དེ་ཡང་ཡང་དག་ནུབ་པ་ནི། ། དེ་ཡང་མཆོག་ཏུ་ནུབ་པའོ། ། འཆར་བ་ནུབ་པ་རྣམས་ཆད་པ། ། གོ་འཕང་མཆོག་ ཏུ་ཤེས་པར་བྱ། ། རྣལ་འབྱོར་ཆེན་པོ་ལེགས་པར་སད། ། སངས་རྒྱས་ཉི་མ་སྡོམ་པའོ། ། འདི་ནི་རྣལ་འབྱོར་དེ་ཉིད་མཆོག ། འཆར་དང་ནུབ་པའི་མཚན་ཉིད་དོ། །
BOརྡོ་རྗེ་གསང་བའི་རྗེས་འབྲངས་ནས། ། བླ་མ་བརྒྱུད་པ་ལས་ཤེས་བྱ། ། རྣལ་འབྱོར་ཆེན་པོའི་རྒྱུད་དཔལ་ རྡོ་རྗེ་ཕྲེང་བ་མངོན་པར་རྟོགས་པ་ལས་འཆར་བ་དང་ནུབ་པའི་ལེའུ་སྟེ་ཉི་ཤུ་བརྒྱད་པའོ། ། ། ། དེ་ནས་གཞན་ཡང་བཤད་ཀྱིས་ཉོན། ། དགའ་བ་སྐྱེས་པའི་མཚན་ཉིད་ནི། ། གང་གིས་ཡང་དག་ཤེས་པ་ཡིས། ། རྡོ་རྗེ་སེམས་དཔའི་གོ་འཕང་མཆོག ། དེ་ནི་རྩ་ཡི་འཁོར་ ལོ་ལ། ། སླར་ཡང་རྒྱས་དང་བསྡུས་པ་ཡིས། ། འཁོར་ལོ་བཞི་ཡི་ཡང་དག་སྦྱོར། ། རྩ་རྣམས་བརྒྱད་དང་གཉིས་ལྷག་པ། ། མཚམས་ཀྱི་རྩ་ཡི་རིམ་པ་ཡང་། ། རྩ་ནི་བཅུ་དྲུག་ལ་ཡང་བརྟེན། ། བཞི་དང་བཞི་ཡིས་རྟག་ཏུ་ཁྱབ། ། དེ་རྣམས་དགའ་བའི་རིམ་པའོ། ། ཆུ་ཁམས་ ཁོང་དུ་ཆུད་པ་ཅན། ། པདྨའི་སྣལ་མ་ལྟ་བུ་ཡི། ། དེ་ནས་དེ་ཡིས་ཁྱབ་བྱས་ཤིང་། ། བདེ་བ་ཆེན་པོ་ཕན་པར་བྱེད། ། འཁོར་ལོ་སོ་སོའི་དབྱེ་བ་ཡིས། ། ཆ་བཞི་པ་ཡི་ཡི་གེ་ཧ། ། ཤིན་ཏུ་ཕྲ་བའི་ཆ་དག་ཏུ། ། ཁྱབ་པ་བརྟེན་གྱི་ཚུལ་དུ་གནས། ། རིམ་པ་བཞི་ཡི་དབྱེ་བ་ལས། ། རིམ་པ་བཅུ་དྲུག་དབྱེ་བས་འཐོབ། ། ཕྲེང་བའི་བདག་ཉིད་རྨད་བྱུང་བའོ། ། རོ་གཅིག་པ་ཡི་གོ་འཕང་འཐོབ། ། རིམ་གྱིས་སོ་སོར་ཉམས་མྱོང་ལས། །
BOསྣ་ཚོགས་ཆུ་ཡི་སྦྱོར་བ་ལས། ། རིམ་གྱིས་རྒྱ་མཚོ་ཆུ་བཞིན་དུ། ། སྦྱོར་བ་བཞི་ཡི་འཁོར་ལོའི་དུས། ། དགའ་བ་ བཞི་ནི་དེ་ལ་བརྗོད། ། རྣལ་འབྱོར་མ་རྒྱུད་སྤྱོད་པ་ལས། ། གོ་འཕང་མཆོག་ནི་ཐོབ་པར་འགྱུར། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་དགའ་བ་བསྐྱེད་པའི་མཚན་ཉིད་ཀྱི་ལེའུ་སྟེ་ཉི་ཤུ་དགུ་པའོ། ། ། ། དེ་ནས་གཞན་ཡང་ཡང་དག་ ཉོན། ། རྡོ་རྗེ་བརྟན་པའི་ལུས་ཀྱིས་ནི། ། རྟག་ཏུ་རྩ་རྣམས་ཀྱི་ནི་རྒྱུན། ། དེ་ཁོ་ན་ཉིད་ངས་བཤད་བྱ། ། སྟོང་ཕྲག་ཉི་ཤུ་རྩ་བཞི་ནི། ། རྩ་ནི་རྟག་ཏུ་རྨད་བྱུང་བ། ། བྱང་ཆུབ་སེམས་ནི་འབབ་པར་ཤེས། ། བདེ་བ་ཐམས་ཅད་རབ་ཏུ་འཕེལ། ། རྟག་ཏུ་རྨད་དུ་བྱུང་བའི་རྩ། ། སྟོང་ ཕྲག་ཉི་ཤུ་རྩ་བཞི་ནི། ། ཁྲག་འབབ་པར་ནི་ཤེས་པར་བྱ། ། ཉི་མ་འཕོ་བའི་བདག་ཉིད་ཅན། ། རྟག་ཏུ་རྨད་དུ་བྱུང་བའི་རྩ། ། སྟོང་ཕྲག་ཉི་ཤུ་རྩ་བཞི་ནི། ། རླུང་རྒྱུ་བར་ནི་ཤེས་པར་བྱ། ། རྒྱ་མཚོ་ཆེན་པོའི་རྒྱུད་ལས་ནི། ། ལུས་ཀྱི་གནས་ནི་དབྱེ་བ་ཡིས། ། དེ་ཉིད་ཉི་ཤུ་རྩ་ བཞིར་བརྗོད། ། ཐིམ་དང་ལོངས་སྤྱོད་བདག་པོ་ཉིད། ། གྲངས་ནི་བདུན་ཅུ་རྩ་གཉིས་བརྗོད། །
BOརེ་རེའང་འཁོར་ལོ་སྟོང་སྟོང་ངོ་། ། ཐིམ་པ་ལོངས་སྤྱོད་བདག་འདོད་པ། ། གཙོ་བོ་ཡང་ནི་བསྡུས་པ་ལས། ། གནས་རྣམས་ཀྱི་ནི་གྲངས་སུ་འགྱུར། ། སླར་ཡང་བསྡུས་ནས་འགྲོ་བ་ ན། ། གསུམ་པོ་བརྒྱད་བརྒྱད་དབྱེ་བའང་ནི། ། ཉིན་དང་མཚན་མོའི་དབྱེ་བ་དང་། ། ཐུན་ཚོད་སྐད་ཅིག་སྦྱོར་བ་ཡིས། ། རྩ་རྣམས་གོང་ནས་གོང་དུ་ནི། ། ནང་དུ་འགྲོ་བར་ཤེས་པར་བྱ། ། གཡོན་པ་བྱང་ཆུབ་ཟླ་བ་འབབ། ། གཡས་པ་ཁྲག་དང་ཉི་མ་འབབ། ། དབུས་ནི་རླུང་རྒྱུ་ བ་ཡིས་ནི། ། མི་སད་བྱེད་པར་ཤེས་པར་བྱ། ། ལ་ལ་ནཱ་དང་ར་ས་ནཱ། ། ཨ་བ་དྷཱུ་ཏཱི་ཞེས་བྱའི་མིང་། ། དེ་རྣམས་སྤྲོ་བའི་སྦྱོར་བ་ཡིས། ། རེ་རེའི་རིམ་གྱིས་ཐུན་བརྒྱད་བརྒྱད། ། གསུམ་པོ་ཉི་ཤུ་རྩ་བཞི་འགྲོ། ། ཐིམ་དང་ལོངས་སྤྱོད་བདག་པོའི་ཕྱིར། ། རིམ་གྱིས་གྲངས་ནི་ བདུན་ཅུ་གཉིས། ། སླར་ཡང་དེ་སྤྲོ་སྦྱོར་བ་ཡིས། ། རེ་རེ་འང་སྟོང་སྟོང་དབྱེ་བ་ཡིས། ། རྟག་ཏུ་གྲངས་ཉིད་འགྱུར་བ་ནི། ། སྟོང་ཕྲག་བདུན་ཅུ་རྩ་གཉིས་སོ། ། གཙོ་བོ་གསུམ་པོ་སླར་ཡང་ནི། ། སྦྱོར་བས་གཅིག་པ་ཉིད་དུ་འགྲོ། ། དང་པོ་ལས་ནི་རྣལ་འབྱོར་ཕས། ། ཕྲ་བ་ དེ་ནི་ཤེས་པར་དཀའ། ། བསམ་གྱིས་མི་ཁྱབ་མཆོག་ཏུ་ནི། །
BOཐིག་ལེ་ནཱ་ད་རྣམ་པར་སྤངས། ། བདེ་བ་ཀུན་གྱི་གཞི་གསང་བ། ། སྲོག་གི་རྟེན་གྱི་མཚན་ཉིད་དང་། ། རྡོ་རྗེ་དབྱིངས་ཀྱི་དབང་ཕྱུག་དང་། ། དུས་ཀྱི་རྩ་ནི་རྣམ་པར་བཤད། ། རོ་གཅིག་གོ་འཕང་བདག་ཉིད་ཅན། ། རྣལ་ འབྱོར་མ་ཡི་རྒྱུད་ལས་ཤེས། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྩ་འབབ་པའི་མཚན་ཉིད་ཀྱི་གོ་ཆ་ཞེས་བྱ་བའི་ལེའུ་སྟེ་སུམ་ཅུ་པའོ། ། ། ། དེ་ནས་གཞན་ཡང་བཤད་ཀྱིས་ཉོན། ། མཚམས་ཀྱི་རྩ་ཡི་ངོ་བོ་ཉིད། ། རྩ་རྣམས་སྡོམ་པ་ འཆར་བ་ནི། ། གང་གིས་ཤེས་ན་རྟག་ཏུ་ནི། ། མཆོག་ཏུ་དགའ་བ་ཉམས་མྱོང་བ། ། ལྷ་ཡི་ཡེ་ཤེས་གསལ་བར་བྱེད། ། ལྷ་ཡི་སྔགས་སུ་ཡང་དག་སྦྱོར། ། ལྷ་ཡི་རྣལ་འབྱོར་དོན་ངེས་པ། ། དེ་ཉིད་གསུམ་སྦྱོར་དྲི་མ་མེད། ། དེ་གསུམ་ཅིག་ཆར་བདག་ཉིད་སྡོམ། ། འཇིག་རྟེན་གསུམ་དུ་ཁྱབ་ཅིང་ཕྲ། ། ལུས་ཀུན་ལ་ནི་ཡང་དག་བརྟེན། ། ཡེ་ཤེས་སེམས་དཔའ་རྡོ་རྗེ་སེམས། ། གང་ཕྱིར་དམ་ཚིག་སེམས་དཔའ་བདེ། ། རྣལ་འབྱོར་མཆོག་ཏུ་ཤེས་པར་བྱ། ། ཁྱབ་པའི་དེ་ཉིད་རྨད་བྱུང་བ། ། མཆོག་རབ་མཆོག་དང་ཕྲ་བ་ དང་། ། རང་བྱུང་ཡེ་ཤེས་མི་ཟད་པ། ། བྱང་སེམས་སུམ་ཅུ་རྩ་གཉིས་འབབ། །
BOརྩ་ནི་ཐམས་ཅད་མཆོག་ཏུ་རྒྱས། ། བདེ་བ་ཆེན་པོའི་འཁོར་ལོར་གནས། ། ཆ་ཀུན་བདག་ཉིད་རྩ་བ་ནི། ། དེ་ཡི་དབུས་སུ་རྩ་གསུམ་སྟེ། ། གཙོ་བོ་ཡང་ནི་ཡང་དག་བཤད། ། ཟླ་བ་ ཉི་མ་མེ་རྒྱུ་བ། ། འབྱུང་བ་ཐམས་ཅད་ལ་ནི་ཁྱབ། ། ཇི་ལྟར་ཤིང་རྩ་ཅུང་ཟད་ཅིག ། ས་ལ་བརྟན་པར་གནས་པ་ན། ། སྡོང་བུ་ཡལ་ག་འདབ་ཕྲེའུ། ། སོགས་པ་ཡིས་ནི་ཀུན་ནས་ཁྱབ། ། དེ་བཞིན་སྐྱེས་བུ་མགོར་ལྡན་པས། ། ཕུང་པོ་ཁམས་ལ་སོགས་ཚོགས་ ལ། ། མཆོག་ཏུ་ཀུན་ནས་ཁྱབ་པའོ། ། རྣམ་པར་ཐར་པའི་སྒོ་གསུམ་དངོས། ། དེ་ཁོ་ན་ཉིད་གསུམ་སྡོམ་པ། ། འདོད་ཆགས་ཞེ་སྡང་གཏི་མུག་དང་། ། རང་བཞིན་མཚན་ཉིད་དབྱེ་བ་གསུམ། ། མཚན་མོ་ཉིན་མོ་མཚམས་ཀྱིས་ཀྱང་། ། དམ་ཚིག་མཚན་ཉིད་རྣམ་པ་ གསུམ། ། སངས་རྒྱས་དམ་ཆོས་དགེ་འདུན་ནི། ། གསུམ་ཕྱེ་དམ་ཚིག་མཚན་ཉིད་དང་། ། སྟོང་ཉིད་ཡེ་ཤེས་རྡོ་རྗེ་ནི། ། རྣམ་གསུམ་དེ་ཉིད་མཚན་ཉིད་དོ། ། རྒྱུ་དང་འབྲས་བུ་ཉེ་འཁོར་ནི། ། རྣལ་འབྱོར་གསུམ་གྱི་མཚན་ཉིད་དོ། ། རླུང་དང་བད་ཀན་མཁྲིས་ པ་ནི། ། གསུམ་ཕྱེ་ཁམས་ནི་བསྡུས་པའོ། ། འདོད་ཁམས་གཟུགས་ཁམས་གཟུགས་མེད་ཁམས། ། འཇིག་རྟེན་གསུམ་པོའི་མཚན་ཉིད་དོ། །
BOརྩ་བ་གསུམ་དང་འབྲས་བུ་གཅིག ། རིམ་བཞིན་གྱུར་ནས་ཆོས་འཁོར་འགྲོ། ། དེ་ནི་སྤྲུལ་པ་གསུམ་དུ་གསལ། ། སྐུ་གསུང་ ཐུགས་ཀྱི་རང་བཞིན་གྱིས། ། གང་ཚེ་དེ་ལ་དེ་སྦྱོར་བ། ། དེ་ནི་གཟས་ཟིན་མཚན་ཉིད་དོ། ། གང་ཚེ་ཅུང་ཟད་སྦྱོར་བ་ན། ། དེ་ཚེ་ཕྱེད་འཛིན་མཚན་ཉིད་དོ། ། གང་ཕྱིར་སྲོག་གི་རླུང་བཅོམ་ན། ། དེ་ཚེ་འཆི་བའི་མཚན་ཉིད་ཡིན། ། རྩ་ཡི་གཙོ་བོའང་ཉིད་རྣམས་ནི། ། གསུམ་པོ་ངེས་པ་ ཞེས་ནི་བྱ། ། རྒྱས་པར་རྣལ་འབྱོར་མ་རྒྱུད་ལས། ། རྣལ་འབྱོར་པ་ཡིས་གསལ་པོར་ཤེས། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་མཚམས་ཀྱི་རྩ་གསུམ་གྱི་ངེས་པའི་ལེའུ་སྟེ་སུམ་ཅུ་གཅིག་པའོ། ། ། ། དེ་ནས་གཞན་ཡང་བཤད་ཀྱིས་ ཉོན། ། རླུང་སྐྱེ་བ་ཡི་མཚན་ཉིད་ནི། ། དུས་ཀྱི་གླགས་ནི་བཙལ་བ་ན། ། ཇི་ལྟར་དངོས་སུ་ཡང་དག་ཤེས། ། བག་ཆགས་ཉོན་མོངས་ཅན་གྱི་ཡིད། ། རང་གི་ངོ་བོ་གཟུགས་གཞན་མཐོང་། ། དོན་ནི་ཤེས་པར་མི་ཤེས་ཤིང་། ། རླུང་ཙམ་གཅིག་པུས་རྨོངས་པའོ། ། ཀུན་ གཞི་རྣམ་ཤེས་བཀུག་ནས་ནི། ། བག་ཆགས་ནང་དུ་རྣམ་པར་སྤྱོད། ། བག་ཆགས་ཀྱིས་ནི་རྣམ་ཤེས་བཟུང་། ། བག་ཆགས་དང་འདྲེས་རིམ་པ་ལས། །
BOནང་གི་བག་ཆགས་བསྒོས་པ་ཡིས། ། དེ་རྣམས་ཟླ་མཚན་དུས་སུ་ནི། ། མངལ་གྱི་རྩལ་འཇུག་པ་ན། ། རྡོ་རྗེ་ཁུ་ ཁྲག་ཞུ་ཐིག་ལེ། ། འདྲེས་པ་རུ་ནི་གྱུར་པ་དང་། ། ཀུན་གཞི་ལས་ནི་རྣམ་ཤེས་སྐྱེ། ། ཇི་ལྟར་ཆང་རོས་མྱོས་པ་བཞིན། ། ཀུན་གཞི་རྣམ་ཤེས་བག་ཆགས་ལས། ། རྣམ་པར་ཤེས་པའི་རྒྱུན་ནི་སྐྱེ། ། ཉོན་མོངས་ཅན་ཉིད་སྲོག་རླུང་ཉིད། ། སྐད་ཅིག་གཅིག་ལ་ཡང་དག་འགྲོ། ། ཐོག་མར་འཕོ་བའི་དུས་སུ་ནི། ། ཉ་ཡི་རྣམ་པ་ལྟ་བུར་འགྱུར། ། འཕོ་བ་གཉིས་པའི་དུས་སུ་ནི། ། སླར་ཡང་ཁྲག་དང་འདྲེས་པ་ནི། ། སྟེང་དང་འོག་གི་དབྱེ་བ་ཡིས། ། སྲོག་གི་རླུང་ནི་གཉིས་སུ་འགྲོ། ། ཐུར་སེལ་རླུང་གི་འགྲོ་འོང་ལ། ། རུས་སྦལ་རྣམ་པར་འཛིན་པར་འགྱུར། ། དེ་ནས་འཕོ་བ་གསུམ་པ་ལ། ། ཁྲག་དང་ཁུ་བ་ཟོས་པ་ན། ། ཐུར་དུ་སེལ་བའི་རླུང་གི་ཚོགས། ། བསྐམས་ནས་ཀུན་དུ་རླུང་ནི་འབྱུང་། ། སྟེང་དུ་ཁ་བལྟས་ནས་ནི་གནས། ། ཕག་རྒོད་འདྲ་བའི་ལུས་འཆང་འགྱུར། ། སླར་ཡང་འཕོ་བ་བཞི་པ་ལ། ། ཁྲག་དང་ཁུ་བ་ བསྒོས་པ་ནི། ། གྱེན་དུ་རྒྱུ་བའི་རླུང་བཀུག་ནས། ། འོག་ཏུ་ཁ་བལྟས་ནས་ནི་འགྲོ། ། སེང་གེའི་རྣམ་པ་ཡིས་ཀྱང་ནི། ། ཁྱབ་བྱེད་རླུང་ནི་སྤྲོ་བར་བྱེད། །
BOདེ་ནས་འཕོ་བ་ལྔ་པ་ལ། ། ཁྲག་དང་ཁུ་བ་འཕེལ་ནས་ནི། ། མཉམ་གནས་རླུང་ནི་འདར་ནས་ནི། ། མེ་ཡི་གཟུགས་ རེད་རིམ་བཞིན་འགྲོ། ། མཉམ་གནས་རླུང་གིས་ཁྱབ་བྱེད་སྤྲོ། ། གང་གིས་འགུལ་དང་འདར་བར་འགྱུར། ། ཕུང་པོ་ལྔ་ནི་རྫོགས་པ་ན། ། དེ་ལྟར་གསུངས་པ་དེ་ལས་སླར། ། འཕོ་བ་དྲུག་པའི་དུས་ཚོད་ལ། ། ས་ཡི་ཁམས་དང་མིག་གཉིས་དང་། ། ཁྱབ་བྱེད་རླུང་གིས་ ཀླུ་རླུང་སྤྲོ། ། རླུང་གི་དངོས་པོ་འཕེལ་བར་བྱེད། ། དེ་ནས་འཕོ་བ་བདུན་པ་ལ། ། ཆུ་ཡི་ཁམས་དང་སྣ་བུག་དོད། ། ཀླུ་ཡི་རླུང་གིས་རུས་སྦལ་རླུང་། ། སྤྲོས་ནས་གཉིས་སུ་མེད་པར་སྤྲོད། ། དེ་ནས་འཕོ་བ་བརྒྱད་པ་ལ། ། མེ་དང་སྣ་ཡི་བུ་ག་འབྱུང་། ། རུས་སྦལ་རླུང་ གིས་རྩངས་རླུང་སྤྲོ། ། རང་གི་རང་བཞིན་ཤེས་པར་བྱེད། ། དེ་ནས་འཕོ་བ་དགུ་པ་ལ། ། རླུང་གི་ཁམས་དང་རོ་ནི་ཚོར། ། རྩངས་པ་ཞེས་བྱའི་རླུང་ཆེན་པོས། ། ལྷ་སྦྱིན་རླུང་ནི་སྤྲོ་བར་བྱེད། ། དེ་རྗེས་འཕོ་བ་བཅུ་པ་ལ། ། ལྷ་སྦྱིན་རླུང་གིས་གཞུ་རྒྱལ་སྤྲོ། ། རླུང་ཀུན་བསྡུས་ པའི་མཚན་ཉིད་ཅན། ། དགུ་པའི་དབུས་ན་ཁྱབ་པའི་ཁམས། ། ཕྲ་ཞིང་ཐོགས་མེད་མཚན་ཉིད་ཅན། ། རྩ་དང་རྒྱུ་མ་རྒྱུས་པའི་སྦུབས། །
BOསྒོ་ནི་དགུ་པོ་རྒྱས་པར་བྱེད། ། ལུས་ཀྱི་མཆོག་ཏུ་ཚོར་བ་དང་། ། གཅིག་ཏུ་རེག་པའི་མཚན་ཉིད་འཛིན། ། རབ་སད་མཆོག་ནི་ ནམ་མཁའ་ལ། ། འོད་གསལ་བཟང་པོ་ཡང་དག་གནས། ། སངས་རྒྱས་རྣམས་ཀྱི་ཤེས་པ་བཅུ། ། དེ་ལྟ་བུ་ཉིད་བཤད་པར་བྱ། ། འཕོ་བ་བཅུ་ནི་ས་བཅུ་སྟེ། ། རིམ་པ་ཡི་ནི་རྣམ་པར་ཤེས། ། མ་ནི་ཤེས་རབ་ཕ་རོལ་ཕྱིན། ། བྷ་ག་ཕྱག་རྒྱ་ཆེན་པོར་ བརྗོད། ། བྱིས་པ་ཡང་དག་རྫོགས་སངས་རྒྱས། ། ཐམས་ཅད་མཁྱེན་ཅིང་ཐམས་ཅད་གཟིགས། ། མགོ་བོའི་སྐྲ་ནི་བྲེགས་པ་དང་། ། ཕྲུ་མའི་ཆོས་གོས་དམར་པོ་བགོས། ། དཔལ་དང་ལྡན་པ་ཐལ་མོ་སྦྱར། ། སྤྱི་བོ་ས་ལ་གཏུགས་པ་ཕྱག ། མཚན་ནི་སུམ་ཅུ་རྩ་གཉིས་ འཆང་། ། དཔེ་བྱད་བཟང་པོ་བརྒྱད་ཅུས་བརྒྱན། ། ཡེ་ཤེས་ཆེན་པོ་ལེགས་པར་སད། ། འདུ་བྱེད་ཐོབ་པ་གྲོལ་དང་བཅས། ། དཔའ་བོ་ཆེན་པོ་རྣམ་རྟོག་མེད། ། སྐྱེད་བྱེད་ཤ་ནི་འཇིག་པར་བྱེད། ། བདུད་རྩི་ལྔ་ནི་ཡེ་ཤེས་ཆེ། ། རྟག་ཏུ་བདུད་རྩི་ལྔ་མྱོང་བྱེད། ། དངོས་པོ་ ཐམས་ཅད་རྣམ་སྤངས་པ། ། རྣལ་འབྱོར་སེང་གེ་བཞིན་དུ་སྤྱོད། ། འདི་གཉིས་མཆོག་ནི་གསང་བ་སྟེ། ། གང་དུ་ཡང་ནི་མ་གསུངས་སོ། ། རླུང་སྐྱེས་པ་ཡི་ངེས་པ་ནི། །
BOབླ་མ་བརྒྱུད་པ་ལས་ཤེས་བྱ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རླུང་ གིས་བསྐྱེད་པ་སྐྱེས་བུ་སྐྱེ་བ་འཇུག་པའི་ལེའུ་སྟེ་སུམ་ཅུ་གཉིས་པའོ། ། ། ། དེ་ནས་གཞན་ཡང་བཤད་བྱ་བ། ། རླུང་རྣམས་མཆོག་ཏུ་ནུབ་པ་ནི། ། གང་གིས་ཡང་དག་ཤེས་པ་ཡིས། ། འཆི་བའི་སྐད་ཅིག་མཚན་ཉིད་ནི། ། ཕན་ཚུན་དུ་ནི་ཡང་དག་སད། ། སྐྱེ་བའི་རིམ་ལྟར་ ཐིམ་པར་འགྱུར། ། རླུང་རྣམས་ཡང་དག་སྐྱེ་བ་ནི། ། ཕན་ཚུན་ནུབ་པའི་ཉི་མ་བཞིན། ། ཐོག་མར་ལོ་བཅུ་ལོན་ནས་ནི། ། རྒྱགས་པས་མྱོས་པའི་རླུང་སྐྱེས་ན། ། གཞུ་ལས་རྒྱལ་བའི་རླུང་ཟོས་ཏེ། ། རིམ་གྱིས་སྒྲ་གཅན་ཟླ་བ་བཞིན། ། དེ་རྗེས་ལོ་བཅུ་ཕྱིན་པ་ནི། ། རྒྱགས་ཆུ་ རླུང་གིས་ཡང་དག་སྐྱེ། ། ལྷ་སྦྱིན་ཞེས་བྱའི་རླུང་ནི་ཟ། ། རླུང་གི་རིམ་པ་སྔ་མ་བཞིན། ། གཞན་ཡང་ལོ་བཅུ་ཕྱིན་པ་ན། རྒྱགས་པའི་ཆུ་རླུང་སྐྱེ་བར་འགྱུར། ། རྩངས་པ་ཞེས་བྱའི་རླུང་ནི་ཟ། ། དེ་ནས་གཞན་ཡང་ལོ་བཅུ་ཕྱིན། ། ལོ་ལས་སྐྱེས་པའི་རིམ་པ་ཡིས། ། བཏང་ བཟུང་རླུང་ནི་ཆེན་པོ་ཡིས། ། རུས་སྦལ་རླུང་ནི་ཟ་བར་བྱེད། ། ཀླུ་ཡི་རླུང་དང་བཏང་བཟུང་རླུང་། །
BOསྟོབས་དང་གཟི་བརྗིད་མཚུངས་པའི་ཕྱིར། ། དུས་གཞན་ལོ་བཅུར་ཕྱིན་པ་ན། ། གནོད་པར་བྱེད་པར་མི་ནུས་ཏེ། ། སྟོབས་དང་ནུས་པ་མཚུངས་པའི་ཕྱིར། ། གང་གིས་གང་ལ་ གནོད་པ་ནི། ། བྱེད་པ་ཉིད་དུ་མི་ནུས་སོ། ། བཅུ་དེ་གཞན་དུ་ཕྱིན་པའོ། ། ལོང་བ་བཏང་བཟུང་སྟོབས་ཆེན་ཐོབ། ། ཀླུ་ཡི་རླུང་ནི་རིམ་གྱིས་ཟ། ། དེ་ནས་བཅུ་པ་གཞན་ཕྱིན་ན། ། ཁྲག་དང་ཤ་ནི་རྣམ་པར་འཕེལ། ། རྒྱགས་ཤིང་མྱོས་པའི་རིམ་པ་ཡིས། ། བཏང་བཟུང་ རླུང་ནི་ཟ་བར་བྱེད། ། དེ་རྗེས་ལོ་བཅུ་ལོན་པ་ན། ། མྱོས་ཆུ་རླུང་ནི་བཀུག་ནས་ནི། ། ཚིལ་དང་ཁ་ཆུ་རྣམ་པར་འཕེལ། ། དེ་ཡི་བཏང་བཟུང་ཀླུ་ཟ་བྱེད། ། དེ་ནས་བཅུ་པ་གཞན་ཕྱིན་པའི། ། ལོ་ལ་བཏང་བཟུང་རླུང་སྟོབས་སྐྱེས། ། མྱོས་པའི་དུས་རླུང་ཟ་བར་བྱེད། ། མེ་དང་རླུང་ནི་འཕེལ་བར་བྱེད། ། བཏང་བཟུང་རླུང་ཉིད་རྣམ་གྱུར་ནས། ། ལོངས་སྤྱོད་ཆེན་པོ་འཕེལ་གྱུར་ནས། ། དེ་ནས་ལོ་བཅུ་གཞན་ལོན་ནས། ། རླུང་གིས་ལུས་རྒྱས་ལྕི་བར་འགྱུར། ། ཆུ་དང་རླུང་ནི་འདྲེས་པ་ན། ། ཁྱབ་ཅིང་སྒྲིབ་བྱས་རིམ་པ་ལས། ། དེ་ལས་ལོ་བཅུ་གཞན་ དུ་ཕྱིན། ། ཆུ་ཤིང་འབྲས་བུ་བཞིན་དུ་མེད། ། རྩ་བ་དང་བཅས་མེད་པར་འགྱུར། །
BOལས་ཀྱི་རྣམ་སྨིན་མཐའ་ཡིས་ནི། ། དེ་ལྟར་རིམ་པ་བཅུ་པ་ཡིས། ། ཟླ་བའམ་ནི་ཉིན་ཞག་གཞན། ། ཚེ་ནི་ཉུང་ངུར་བྱས་ནས་ནི། ། སྲོག་ཟད་པར་ནི་ཤེས་པར་བྱ། ། མཁའ་འགྲོ་སྡུད་པའི་ རྒྱུད་ལས་ནི། ། ཤིན་ཏུ་རྒྱས་པར་ཤེས་པར་བྱ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རླུང་གི་རིམ་པས་སྲོག་ཟད་པ་རྒྱས་པར་བཤད་པའི་ལེའུ་སྟེ་སུམ་ཅུ་གསུམ་པའོ། ། ། ། དེ་ནས་གཞན་ཡང་བཤད་ཀྱིས་ཉོན། ། མཚན་ཉིད་ཆེན་པོ་ཡེ་ ཤེས་མཆོག ། བསྡུ་བའི་མཁའ་འགྲོ་རྣལ་འབྱོར་མཆོག ། སྙིང་པོས་སྙིང་པོའི་དོན་བསྡུས་པ། ། གང་ཕྱིར་མཁའ་འགྲོ་མས་བསྡུས་པ། ། དེ་ཕྱིར་བསྡུས་པའི་མཁའ་འགྲོ་བརྗོད། ། ལྟེ་བའི་དབུས་ན་རྟག་བཞུགས་པ། ། ཉི་མ་སྟོང་དང་མཚུངས་པའི་འོད། ། ཡེ་ཤེས་ཆེན་ པོའི་མེ་འབྱུང་བ། ། ཀུན་རྟོག་ཐམས་ཅད་འཇོམས་པར་བྱེད། ། འཆར་བས་ཕུང་པོ་རྣམ་རྟོག་ནི། ། བསྲེགས་བྱས་བར་ཆད་མེད་པའི་ལུས། ། རྡོ་རྗེ་ཁམས་ཀྱི་རྣམ་རྟོག་ནི། ། བསྡུས་ནས་སླར་ཡང་རང་བཞིན་གྱིས། ། གཟུང་དང་འཛིན་པའི་རྣམ་རྟོག་ནི། ། སྙིང་ རྗེས་དེར་ནི་སླར་ཡང་སྡུད། ། དེ་ལྟར་གང་ལ་ཕྱེ་ལེབ་བཞིན། ། འཆིང་བ་ཐམས་ཅད་སྲེག་པར་བྱེད། །
BOརླུང་གི་དེ་ཉིད་མངོན་སྦྱོར་བས། ། སྔགས་ཀྱི་ལུས་ཀྱི་སྦྱོར་བ་ཡིས། ། རྣམ་པར་རྟོག་པ་ཙམ་ཡང་ནི། ། སྲེག་པ་ཉིད་དུ་ཐེ་ཚོམ་མེད། ། མཁའ་འགྲོ་སྡུད་པའི་རྒྱུད་ ལས་ནི། ། རྣལ་འབྱོར་མཆོག་གི་རིམ་ཤེས་ན། ། མཁའ་འགྲོ་ཡེ་ཤེས་རྒྱས་པར་ནི། ། རྣལ་འབྱོར་བསྟེན་པས་རིག་པར་བྱ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་མཁའ་འགྲོ་མ་སྡུད་པའི་ལེའུ་སྟེ་སུམ་ཅུ་བཞི་པའོ། ། ། ། དེ་ནས་གཞན་ཡང་ བཤད་ཀྱིས་ཉོན། ། རྣམ་རྟོག་རླུང་ནི་རྣམ་པར་གཅོད། ། ཉིན་དང་མཚན་དུ་ཤེས་པར་ནི། ། བརྒྱ་དང་བརྒྱད་ནི་ལྷག་པར་རྒྱུ། ། རླུང་རྣམས་དེ་ནི་རྣམ་རྟོག་ནི། ། གང་ཕྱིར་རྣམ་པར་གཅོད་པར་བྱེད། ། རྣལ་འབྱོར་དེ་ནི་མཆོག་ཏུ་ཞི། ། ཐམས་ཅད་སྟོང་པའི་ངོ་བོར་བྱེད། ། ཐེ་ ཚོམ་ཐོག་མར་སྦྱོར་བ་དྲུག ། རྣལ་འབྱོར་རིག་པས་མཆོག་ཏུ་བསྒྲུབ། ། དེ་ནས་དབྱངས་མེད་ཡི་གེ་ཧ། ། ཤིན་ཏུ་རྒྱ་ཆེ་བཟླས་པར་བྱ། ། གང་ཕྱིར་མདུད་པ་འཇོམས་བྱེད་ཅིང་། ། བདེ་བ་སྐྱེ་བ་སྟེར་བར་བྱེད། ། དེ་ཡིས་རྣམ་རྟོག་ཐམས་ཅད་ནི། ། སྐད་ཅིག་གིས་ནི་གཅོད་པར་ བྱེད། ། རྣལ་འབྱོར་རྗེས་སུ་རྣལ་འབྱོར་དང་། །
BOཤིན་ཏུ་རྣལ་འབྱོར་རྣལ་འབྱོར་ཆེ། ། དེ་ཡི་དབྱེ་བ་{བཅྭ་,བཅོ་}བརྒྱད་ཀྱིས། ། དང་པོ་སྦྱོར་བ་བསྒོམ་པར་བྱ། ། བཅུ་བདུན་རྗེས་སུ་རྣལ་འབྱོར་སོགས། ། དེ་ལས་དཀྱིལ་འཁོར་རྒྱལ་མཆོག་ནི། ། རྣལ་འབྱོར་མཆོག་ལ་དབྱེ་བ་ལྔ། ། དེ་ལས་ཀྱང་ནི་ལས་རྒྱལ་མཆོག ། རྣལ་འབྱོར་དབྱེ་བ་བཅུ་གཉིས་སོ། ། དེ་ཉིད་དབྱེ་བ་བཞི་བཅུ་དགུ། ། བསྐྱེད་པའི་རིམ་པ་བསྡུས་པ་ཡིས། ། མངོན་སུམ་བྱེད་པའི་རྣལ་འབྱོར་རོ། ། དེ་ལ་རྡོ་རྗེ་བཟླས་རིམ་མཆོག ། རྫོགས་རིམ་རྣལ་འབྱོར་ཡན་ལག་ནི། ། རྣམ་པར་རྟོག་ པ་འཇོམས་བྱེད་པ། ། ཕྲ་བའི་དེ་ཉིད་བླ་ན་མེད། ། ཆོ་ག་ཇི་བཞིན་རྣལ་འབྱོར་པ། ། བློ་དང་ལྡན་པས་སྔོན་བཞིན་བསྒོམ། ། སྲིད་པའི་འཆིང་བ་གཅོད་པར་བྱེད། ། རྣལ་འབྱོར་ཆེན་པོ་ཡེ་ཤེས་ཆེ། ། དེ་ཉིད་ཆེན་པོ་རྨད་འབྱུང་ཆེ། ། ངེས་པར་བསྒོམས་པས་ཡང་དག་ནི། ། རྣམ་ རྟོག་རླུང་ནི་འཇོམས་པར་བྱེད། ། དོན་གྱི་རྗེས་འགྲོ་བཟླས་པ་ཡིས། ། དངོས་མེད་ངོ་བོ་གཅིག་པ་དང་། ། སྟོང་ཉིད་བསྟེན་པ་མངོན་པར་ཞེན། ། སྒོམ་པ་ངེས་པར་བརྟན་པར་བྱེད། ། སྒྲུབ་པོས་ཡང་དག་བསྒོམས་བྱས་ན། ། རྡོ་རྗེ་བཟླས་རིམ་བླ་ན་མེད། །
BOདེ་ཡི་རིམ་བཞིན་ ཡེ་ཤེས་མཆོག ། ཐོབ་འགྱུར་འདི་ལ་ཐེ་ཚོམ་མེད། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྣམ་པར་རྟོག་པའི་རླུང་གཅོད་པའི་མཚན་ཉིད་ཀྱི་ལེའུ་སྟེ་སུམ་ཅུ་ལྔ་པའོ། ། ། ། དེ་ནས་གཞན་ཡང་བཤད་ཀྱིས་ཉོན། ། རྣམ་རྟོག་མེད་པའི་ རླུང་ཤར་ན། ། གང་ཤེས་རྡོ་རྗེ་སེམས་དཔའ་ཡི། ། རང་དངོས་གོ་འཕང་བཟང་པོ་འཐོབ། ། རྣམ་རྟོག་མེད་པའི་རླུང་ཆེན་པོ། ། གཉིས་པ་ཐམས་ཅད་རྣམ་པར་སྤངས། ། དངོས་པོ་ཀུན་གྱི་རང་བཞིན་བདག ། སྒོམ་དང་སྒོམ་མིན་གོ་འཕང་བྲལ། ། རྣལ་འབྱོར་ཆེན་པོའི་ ཡེ་ཤེས་ཆེ། ། གནས་པ་མེད་ཅིང་དྲི་མ་མེད། ། ཕྲ་བའི་ཆ་ཀུན་དབུས་ན་གནས། ། ཐིག་ལེ་ནཱ་ད་རྣམ་པར་སྤངས། ། ཀུན་ལ་ཁྱབ་ཅིང་ཞི་བ་དང་། ། བདག་བྱིན་བརླབ་པའི་མཚན་ཉིད་གཅིག ། མཚན་གཞི་མཚན་ཉིད་རྣམས་ལས་གྲོལ། ། བག་ཆགས་རྣམ་རྟོག་ རྣམ་པར་སྤངས། ། ཚིགས་དང་མདུད་པའི་ལམ་དང་ནི། ། སྒོམ་དང་བསྒོམ་བྱ་རྣམ་པར་སྤངས། ། སྟོང་ཉིད་ཡེ་ཤེས་མཚན་ཉིད་དོ། ། སྔགས་དང་ཕྱག་རྒྱའི་རྣམ་པའི་ཆ། ། རྣམ་པའི་སྤྱོད་པ་རྣམ་པར་སྤངས། ། བྱ་བ་སྤྱོད་པ་རྣལ་འབྱོར་གྱི། ། རྒྱུད་རྣམས་ལ་ ཡང་བཀླག་མི་བྱ། །
BOརྣལ་འབྱོར་ཆེན་པོའི་རྒྱུད་ཆེན་པོ། ། བཤད་པར་བྱ་བ་དམ་ཚིག་མཆོག ། མན་ངག་ཇི་བཞིན་ཆོ་ག་བཞིན། ། ཐོག་མ་ཉིད་དུ་བཤད་པར་རིགས། ། དེ་ཡི་རིམ་པའི་རྗེས་འགྲོ་ཤེས། ། བླ་མ་བརྒྱུད་པའི་གོ་འཕང་མཆོག ། རྣལ་འབྱོར་ཆེན་ པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྣམ་རྟོག་མེད་པའི་མཚན་ཉིད་ཀྱི་ལེའུ་སྟེ་སུམ་ཅུ་དྲུག་པའོ། ། ། ། དེ་ནས་རྡོ་རྗེ་ཅན་གྱིས་གསུངས། ། རྩ་རྣམས་ནུབ་པའི་རྣལ་འབྱོར་ནི། ། དེ་ཁོ་ན་ཉིད་བཤད་ཀྱིས་ཉོན། ། ཡུལ་དང་དབང་པོ་ཡང་དག་སྦྱོར། ། རྩ་རྣམས་ཀྱང་ནི་འཆར་བར་འགྱུར། ། ཤར་ནས་སྔོན་བཞིན་སོང་ནས་ནི། ། བསྐྱེད་པའི་རིམ་པ་བླ་ན་མེད། ། རྣམ་རྟོག་སྐྱེ་བ་དེ་ཡི་ཕྱིར། ། བརྒྱ་དང་བརྒྱད་ཀྱིས་ལྷག་པའི་རིམ། ། དེ་ལས་སྐྱེ་དང་རྒ་དང་ན། ། འཆི་ཞིང་སླར་ཡང་ལྡོག་པར་འགྱུར། ། ཡུལ་རྣམས་དངོས་པོ་ མེད་པ་ཡིས། ། སྦྱངས་པའི་ཡེ་ཤེས་དེ་ཉིད་ཕྱིར། ། དེ་ཉིད་འདི་ལ་སྤྱོད་པའི་ཕྱིར། ། དངོས་སུ་ཡུལ་རྣམས་དངོས་མེད་ཕྱིར། ། དབང་པོ་རྣམས་ནི་སྐྱེ་བ་མིན། ། དེ་ལས་གཉིས་གཉིས་ཡང་དག་སྦྱོར། ། དངོས་དང་དངོས་མེད་སྟོང་པ་ཉིད། ། དེ་ནས་རྩ་རྣམས་ནུབ་འགྱུར་ ཏེ། །
BOའཁོར་ལོའི་རིམ་པ་ལ་ཡང་རྟོན། ། དེ་རྣམས་ནུབ་པ་ལས་ནི་ཞི། ། སྟོང་ཕྲག་བདུན་ཅུ་རྩ་གཉིས་ནི། ། ཀུན་ཀྱང་རྩ་ཡི་འཁོར་ལོར་འགྱུར། ། དེ་ཉིད་ཀུན་ཆོས་ནང་དུ་ཁྱབ། ། སྟོང་ཉིད་བསྒོམ་པ་རྣལ་འབྱོར་ལས། ། ཡུལ་རྣམས་ཀྱི་ནི་ངོ་བོ་ཉིད། ། ངེས་པ་རུ་ནི་ ཤེས་པ་ཞེས། ། རིག་པའི་རྡོ་རྗེ་རྣམ་པར་འཇོམས། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྩ་རྣམས་ནུབ་པའི་སྦྱོང་བའི་ལེའུ་སྟེ་སུམ་ཅུ་བདུན་པའོ། ། ། ། དེ་ནས་གཞན་ཡང་བཤད་ཀྱིས་ཉོན། ། སྤྱོད་དྲུག་གོ་འཕང་མཚན་ཉིད་ནི། ། ཇི་ལྟ་ཇི་ལྟ་བ་བཞིན་སྦྱོར། ། ཇི་ལྟར་འདོད་པའི་ཡན་ལག་བརྟེན། ། རྣམ་པ་དྲུག་པོ་དེ་ལས་ཕྱེད། ། དེ་བཞིན་བརྒྱད་བརྒྱད་དེ་ལས་ལྷག ། བརྒྱད་གཉིས་བརྒྱད་ཕྲག་བཞི་དང་ནི། ། དེ་ལྟར་གྲངས་ཀྱིས་སྦྱོར་བ་གསལ། ། ཟླ་བ་ཕྱེད་པའི་ཆ་ལྟ་བུ། ། སྟོང་ཉིད་རླུང་གི་ འཁོར་ལོར་གནས། ། ཕྱེད་པ་མ་ཡིན་རྫོགས་པ་མིན། ། ཆུ་ཡི་ཟླ་བ་ལྟ་བུར་སྣང་། ། སྒྱུ་མ་ཆེན་པོ་འགྲོ་བའི་མ། ། ཐམས་ཅད་རྟེན་པའི་མཚན་ཉིད་ནི། ། རླུང་གི་འཁོར་ལོ་སྲོག་ཅེས་བཤད། ། མཁས་པ་རྣམས་ཀྱི་སྤྱོད་ཡུལ་མིན། ། མེ་ཡི་འཁོར་ལོ་ སྟོང་ཉིད་ཁྱབ། །
BOདབུས་ན་ཐིག་ལེ་ལྟ་བུ་ནི། ། མི་འགྱུར་ཀུན་དུ་འགྲོ་བ་དང་། ། རང་བྱུང་ཀུན་ལ་ཁྱབ་པ་དང་། ། བདེ་བ་ཡང་དག་འཕེལ་བར་བྱེད། ། དབྱངས་དང་གསལ་བྱེད་རྣམ་པར་སྤངས། ། འཇིག་རྟེན་གསུམ་ནི་མ་ལུས་པ། ། གཅིག་ཏུ་བྱས་ན་སྐྱེད་པར་ བྱེད། ། མི་ཤིགས་ནཱ་དའི་གོ་འཕང་ཅན། ། རྣམ་པ་ཐམས་ཅད་རྣམ་པར་སྤངས། ། སྦྲུལ་གྱི་ལྕེ་ལྟར་གཡོ་བ་དང་། ། ཚངས་པ་ལ་སོགས་ཕ་མེས་དང་། ། འཇིགས་པ་མ་ཡིན་གཡོ་བ་མིན། ། ཡི་གེ་དང་ནི་ཚིག་མ་ཡིན། ། འབྱུང་བའི་ཚོགས་ནི་རྣམ་པར་སྤངས། ། གྲངས་བྲལ་ཟད་མེད་སྐྱེ་བ་མེད། ། ལྟེ་བ་སྤྲུལ་པའི་འཁོར་ལོར་གནས། ། ཆོས་ཀྱི་འཁོར་ལོའི་དབུས་གནས་པ། ། སྒྲ་ཙམ་དྲི་མ་དང་བྲལ་བ། ། ཆགས་བྲལ་ཆགས་པ་མེད་པ་དང་། ། བྱ་བ་བྱེད་དང་གནས་མེད་པ། ། དཔེ་མེད་གནས་པ་མེད་པ་དང་། ། སྲོག་དང་ རྩོལ་བ་རྣམ་པར་སྤངས། ། ལྷ་ཡི་དབང་ཕྱུག་ཡེ་ཤེས་མཆོག ། དེ་ལྟ་བུ་ཡང་རྙེད་པར་དཀའ། ། ལོངས་སྤྱོད་འཁོར་ལོ་མཆོག་ཏུ་གནས། ། འཆིང་བ་མེད་པའི་རྣམ་པ་མཆོག ། མཆོག་ཏུ་ཁོང་དུ་ཆུད་གྱུར་པ། ། རྣམ་པ་ཀུན་གྱིས་ཡང་དག་བཞུགས། ། རྟེན་ཅིང་ འབྲེལ་འབྱུང་རང་བཞིན་གྱི། ། ཆང་གི་རོ་ཡིས་མྱོས་པ་བཞིན། ། མཆོག་ནི་དང་པོ་མ་ལུས་པ། །
BOདངོས་པོ་ཀུན་གྱི་ནང་ན་གནས། ། ཐོག་མ་ཐ་མ་ལྷག་པར་གནས། ། མཚན་ཉིད་མེད་ཅིང་སྣང་བ་མེད། ། མཚན་ཉིད་ཐམས་ཅད་རྣམ་པར་སྤངས། ། ཞི་བ་མི་འཇིགས་ བརྗོད་དུ་མེད། ། རང་བཞིན་ཉམས་མྱོང་རང་ངོ་བོ། ། བདེ་བ་ཆེན་པོའི་འཁོར་ལོར་གནས། ། བླ་མ་བརྒྱུད་པ་ལས་ནི་ཐོབ། ། དེ་ལྟར་ཡེ་ཤེས་བྱེ་བྲག་ཆེ། ། རང་གི་ངོ་བོ་རྣམ་ཤེས་དྲུག ། སྟེང་དང་འོག་ཏུ་ཡང་དག་སྦྱོར། ། རྣལ་འབྱོར་ཞེས་ནི་རབ་ཏུ་གྲགས། ། རྣལ་ འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་འཁོར་ལོ་དྲུག་སྒོམ་པའི་ལེའུ་སྟེ་སུམ་ཅུ་བརྒྱད་པའོ། ། ། ། དེ་ནས་བཅོམ་ལྡན་རྡོ་རྗེས་གསུངས། ། དུས་ཀྱི་མཚན་ཉིད་སྡོམ་པ་ནི། ། རྣལ་འབྱོར་གང་གིས་རྣམ་པར་ཤེས། ། གྲངས་ཀྱི་རྣལ་འབྱོར་བླ་ ན་མེད། ། དུས་ནི་དུས་ཚོད་ཞེས་ནི་བཤད། ། བསམ་དང་བསམ་བྲལ་རང་དངོས་ནི། ། དུས་བཟང་དང་ནི་དུས་ངན་དང་། ། རྣམ་པ་གཉིས་ལ་ཡང་དག་གནས། ། སྣ་ཡི་བུ་ག་ལས་བྱུང་ནས། ། ཕྱི་ཡི་སྒོ་ལས་རྟག་ཏུ་འཆར། ། ནང་དུ་སྡུད་པར་དུས་བཟང་ གསུངས། ། འབྱུང་བ་ཡང་ནི་དུས་ངན་འདོད། ། དུས་ངན་ལས་ནི་གཞན་པ་མཆོག ། དུས་བཟང་མཆོག་སྟེ་རང་ཉིད་ནི། ། རྫོགས་ལྡན་དང་ནི་གསུམ་ལྡན་དང་།
BO། གཉིས་ལྡན་དང་ནི་དུས་བཟང་པོ། ། རྩོད་པའི་དུས་ནི་ངན་པ་སྟེ། ། དེ་ལྟར་གསུངས་པའི་དུས་མཚན་ཉིད། ། དགའ་དང་མཆོག་ཏུ་དགའ་བ་དང་། ། ལྷན་ཅིག་སྐྱེས་པ་དུས་བཟང་སྟེ། ། དགའ་དང་བྲལ་བ་ངན་དུས་སོ། ། དུས་ཀྱི་མཚན་ཉིད་དེ་ལྟར་བཤད། ། འཇུག་པ་དང་ནི་གནས་པའི་དུས། ། དུས་བཟང་པོར་ནི་ཡོངས་སུ་གྲགས། ། ལྡང་བ་ཡང་ནི་དུས་ངན་ཏེ། ། དེ་ལྟར་ དུས་ཀྱི་མཚན་ཉིད་དོ། ། དུས་ནི་ཁམས་རྣམས་ཐམས་ཅད་དེ། ། མཉམ་པ་རོ་གཅིག་གོ་འཕང་མཆོག ། ཡེ་ཤེས་རྣམ་ཤེས་རྣམ་སྤངས་ཏེ། ། དུས་ནི་གཅིག་ནི་བརྗོད་པ་ཡིན། ། དངོས་དང་དངོས་མེད་སྤྲོས་བྲལ་བ། ། བཞི་པའི་སྐད་ཅིག་མཚན་ཉིད་ནི། ། བརྗོད་བྱ་ རྗོད་བྱེད་ལས་གྲོལ་བ། ། དུས་གཅིག་ཞེས་ནི་བརྗོད་པ་ཡིན། ། ཆགས་དང་ཆགས་བྲལ་ངེས་གྲོལ་བ། ། བདེ་བ་ཆེན་པོ་གོ་འཕང་སྤངས། ། ཕྱག་རྒྱ་ཆེན་པོའི་དོན་གྱི་གཞི། ། དུས་གཅིག་ཞེས་ནི་བརྗོད་པ་ཡིན། ། མཚན་ཉིད་མེད་ཅིང་སྣང་བ་མེད། ། གྲངས་ནི་རྣལ་ འབྱོར་རྣམ་པར་སྤངས། ། དེ་ཉིད་དུས་སུ་ངེས་བཤད་དེ། ། བླ་མ་བརྒྱུད་པ་ལས་ཤེས་བྱ། །
BOརྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་དུས་དང་དུས་ཚད་རྣམ་པར་བཤད་པའི་ལེའུ་སྟེ་སུམ་ཅུ་དགུ་པའོ། ། ། ། དེ་ནས་གཞན་ཡང་བཤད་བྱ་ བ། ། གསང་བའི་འབྲས་བུ་མཆོག་ཉོན་ཅིག ། གང་གིས་དངོས་གྲུབ་མཆོག་ཏུ་འགྲོ། ། ཕྱག་རྒྱ་ཆེན་པོ་ཡང་དག་བསྟེན། ། གསང་བ་སྦས་པ་ཞེས་ནི་བཤད། ། རྣལ་འབྱོར་བྱིས་པས་མི་ཤེས་ཤིང་། ། བཞི་པའི་དབང་ཞེས་བྱ་བའི་མིང་། ། ཞལ་ནས་བརྒྱུད་ པའི་རིམ་པ་རྣམས། ། མཆོག་ཏུ་ཞི་བའི་ཡེ་ཤེས་ཆེ། ། རྣམ་རྟོག་ཐམས་ཅད་རྣམ་པར་སྤངས། ། ཕྱག་རྒྱ་ཆེན་པོའི་དངོས་གྲུབ་ཆེ། ། རྣལ་འབྱོར་ཆེན་པོའི་དོན་བསྡུས་པ། ། རྣལ་འབྱོར་མ་རྒྱུད་ལས་བསླབས་པ། ། མཆོག་ཏུ་རྨད་བྱུང་ངོ་བོ་ཉིད། ། ཡེ་ཤེས་ ཆེན་པོའི་རོ་འབེབས་པ། ། དེ་ཉིད་ཆེན་པོའི་ཡོན་ཏན་ལྡན། ། ནམ་མཁའ་མཆོག་ལ་གནས་པའི་ས། ། རྡོ་རྗེ་སེམས་དཔའ་རང་ངོ་བོ། ། བདེ་བ་རྣམས་ནི་འཕེལ་བར་བྱེད། ། བདེ་བ་ཆེན་པོའི་གོ་འཕང་འདས། ། ཤེས་དང་ཤེས་བྱ་རྣམ་པར་བྲལ། ། སྒོམ་དང་ བསྒོམ་བྱ་རྣམ་པར་སྤངས། ། སྔགས་དང་རྒྱུད་ཀྱི་བྱ་བས་སྟོང་། ། ཀུན་དུ་རྟོག་པ་ཐམས་ཅད་སྤངས། ། དངོས་པོ་ཀུན་གྱི་གོ་འཕང་གསལ། །
BOའཇིག་རྟེན་གསུམ་གྱི་རྣམ་པའི་མི། ། ཆགས་དང་ཆགས་བྲལ་རྣམ་པར་སྤངས། ། དམ་ཚིག་ཆེན་པོ་ལ་གནས་པ། ། གྲངས་ མེད་འཇིག་རྟེན་གསུམ་གཅིག་དངོས། ། དངོས་གྲུབ་དེ་ཁོ་ན་ཡི་རྒྱུད། ། དེ་ལྟར་གསང་བའི་འབྲས་བུ་གསལ། ། གཞན་ནི་གང་དུའང་མ་གསུངས་པ། ། རྣལ་འབྱོར་མཆོག་གི་ཡེ་ཤེས་མཆོག ། རྣལ་འབྱོར་མ་རྒྱུད་ལས་ཤེས་བྱ། ། རྣལ་འབྱོར་ཆེན་པོའི་རྒྱུད་དཔལ་ རྡོ་རྗེ་ཕྲེང་བ་མངོན་པར་རྟོགས་པ་ལས་གསང་བའི་འབྲས་བུ་ཞེས་བྱ་བའི་ལེའུ་སྟེ་བཞི་བཅུ་པའོ། ། ། ། དེ་ནས་བཅོམ་ལྡན་རྡོ་རྗེས་གསུངས། ། ཆོས་ཀྱི་དབྱིངས་ཀྱི་གོ་འཕང་མཆོག ། ཆོས་ཀྱི་དབྱིངས་ནས་ཁྱབ་པའི་ཁམས། ། ཆོས་ཀྱི་དབྱིངས་ཀྱིས་དེ་ལ་བརྗོད། ། ཀུན་ཁྱབ་མཆོག་ཏུ་ཕྲ་བ་དང་། ། ཀུན་འགྲོ་རྟག་ཏུ་འཆར་བ་དང་། ། ཕུང་པོ་ལྔ་ཉིད་འབྱུང་བ་ལྔ། ། ཡུལ་དང་སྐྱེ་མཆེད་རྣམ་ཤེས་དང་། ། དེ་དག་ཡང་དག་ལྡན་ཆོས་ཀུན། ། བཤད་དེ་གསང་བའི་དབང་ཕྱུག་སྟེ། ། དེ་དག་དབུས་ན་གནས་པའི་ཁམས། ། ཁྱབ་ཅིང་ སྤྱོད་ཡུལ་མ་ཡིན་པ། ། ཇི་ལྟར་ཏིལ་གྱི་ཏིལ་མར་དང་། ། ཇི་ལྟར་ཤིང་ལ་མེ་བཞིན་དུ། ། དེ་བཞིན་ཆོས་རྣམས་ཐམས་ཅད་ལ། ། ཁྱབ་ཀྱང་མཐོང་བ་མ་ཡིན་ནོ། ། ནམ་མཁའ་བཞིན་དུ་དྲི་མ་མེད།
BO། ཆོས་ཀུན་གྱི་ནི་གཞི་ཡི་མཆོག ། གཟུང་དང་འཛིན་ པའི་ཀུན་རྟོག་གིས། ། ཁྱབ་ཀྱང་མཐོང་བ་མ་ཡིན་ནོ། ། སྟོང་ཉིད་ཡེ་ཤེས་རྣལ་འབྱོར་གྱིས། ། རྣལ་འབྱོར་པ་ཡིས་གསལ་བར་མཐོང་། ། ཆོས་དབྱིངས་བྷ་ག་ཞེས་ནི་བརྗོད། ། བྷ་ག་རིན་ཆེན་ཟ་མ་ཏོག ། གང་ཕྱིར་དབང་ཕྱུག་སོགས་ཡོན་ཏན། ། ལྡན་པ་དེ་ཕྱིར་བྷ་ག་བརྗོད། ། བྷ་ག་ཆོས་རྣམས་སུ་ཡང་བཤད། ། དབྱིངས་ནི་བྱང་ཆུབ་སེམས་སུ་གསུངས། ། ཁམས་གསུམ་པ་ཡི་འགྲོ་བ་ཡི། ། རྒྱུ་ནི་བྷ་ག་ཞེས་བྱར་བཤད། ། དབྱིངས་ནི་ཡང་དག་སྦྱོར་དངོས་ཀྱིས། ། ཆུ་ཟླ་བཞིན་དུ་ཡང་དག་གནས། ། དོན་དམ་ གཅིག་པུའི་དེ་ཉིད་ཤེས། ། ལག་མཐིལ་སྐྱུ་རུ་བཞག་པ་བཞིན། ། མཆོག་གི་དེ་ཉིད་ལྟར་ནི་སྣང་། ། རང་རིག་ཤིན་ཏུ་དྲི་མ་མེད། ། དངོས་དང་དངོས་མེད་ཟད་ནས་ནི། ། རྟག་ཏུ་དེ་ཉིད་མཐོང་ཞིང་སྣང་། ། ཆོས་ཀྱི་དབྱིངས་ཀྱི་གོ་འཕང་གསལ། ། དེ་ལྟར་ཤིན་ཏུ་ རྒྱས་པར་བཤད། ། གཟུང་དང་འཛིན་པ་དང་བྲལ་བས། ། སྦྱོར་བྲལ་ཤེས་པ་རྨད་དུ་བྱུང་། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཆོས་ཀྱི་དབྱིངས་ཀྱི་དོན་བཤད་པའི་ལེའུ་སྟེ་བཞི་བཅུ་གཅིག་པའོ། ། ། །
BOདེ་ནས་བཅོམ་ལྡན་རྡོ་ རྗེས་གསུངས། ། རྡོ་རྗེ་ཡི་ནི་མཚན་ཉིད་མཆོག ། དེ་ཡི་དོན་དུ་བཤད་ཀྱིས་ཉོན། ། ཇི་ལྟ་བ་བཞིན་བཤད་པར་བྱ། ། རྡོ་རྗེ་མི་ཕྱེད་ཞེས་ནི་གསུངས། ། ཡེ་ཤེས་ལྔ་ཡི་བདག་ཉིད་མཆོག ། རྩ་ལྔ་ཡི་ནི་ནམ་མཁར་རྟེན། ། རྩེ་མོ་ལྔ་ཡི་རང་ངོ་བོ། ། ས་དང་ཆུ་ དང་དེ་བཞིན་མེ། ། རླུང་དང་ནམ་མཁའ་ཉིད་དང་ནི། ། རྩ་ཡི་ནམ་མཁའི་ཆ་ཡི་གཟུགས། ། བླ་མ་བརྒྱུད་ལས་ཤེས་པར་བྱ། ། ཨྃ་རྃ་ལྃ་བྃ་ཡྃ་ས་བོན། ། བརྗོད་པ་རྩེ་ནི་ལྔ་རྣམས་ཏེ། ། འབད་པ་ཡིས་ནི་ཤེས་པར་བྱ། ། རྡོ་རྗེས་སྐྱེ་བའི་མཚན་ཉིད་ནི། ། པདྨ་ ལྟེ་བའི་དབུས་གནས་པ། ། ཐིག་ལེར་བཤད་པ་འགྲོ་བ་མེད། ། དམ་ཚིག་གནས་ནི་ཤེས་པ་དང་། ། བདུད་རྩི་མཆོག་གིས་རབ་ཏུ་གང་། ། རྣམ་པ་ཀུན་ལྡན་རྣམ་པ་མེད། ། དེ་ནི་རྡོ་རྗེར་ཡོངས་སུ་གྲགས། ། མེ་ལོང་མཉམ་ཉིད་ཡེ་ཤེས་དང་། ། སོ་སོར་རྟོག་དད་ བྱ་ནན་ཏན། ། རྣམ་པར་དག་པ་ཆོས་ཀྱི་དབྱིངས། ། ཡེ་ཤེས་ལྔ་ཡི་རང་བཞིན་ནོ། ། དེ་ཡི་ངོ་བོ་ཡོངས་སུ་ཤེས། ། རྡོ་རྗེ་རང་ཉིད་ཉམས་མྱོང་མཆོག ། ནམ་མཁར་ཆེར་གནས་ཞི་བ་དང་། ། རྟོག་པ་མེད་ཅིང་ཉོན་མོངས་མེད། ། རྡོ་རྗེ་སེམས་དཔའ་ཡང་དག་གཞི། །
BOབླ་མ་བརྒྱུད་པ་ལས་ཤེས་བྱ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྡོ་རྗེ་བཤད་པའི་ལེའུ་སྟེ་བཞི་བཅུ་གཉིས་པའོ། ། ། ། དེ་ནས་བཅོམ་ལྡན་རྡོ་རྗེས་གསུངས། ། རིགས་ཀྱི་དབྱེ་བ་དོན་བསྡུས་པ། ། དེ་ཚེ་རིགས་ནི་རྣམ་ པ་ལྔ། ། རྩ་བའི་རྒྱུད་དུ་གསལ་བར་གསུངས། ། རྣལ་འབྱོར་སྤྲོས་པ་དབྱེ་བ་ཡིས། ། རྣལ་འབྱོར་ཆེན་པོའི་དམ་ཚིག་གོ། ། རྒྱུད་དུ་གྲགས་པ་དབྱེ་བ་ཡི། ། མཐར་ཐུག་དེ་ནི་ཡང་དག་གསུངས། ། དེ་ཉིད་ལས་ནི་བསྡུས་ནས་ཀྱང་། ། རིགས་ཀྱི་དབྱེ་བ་ བརྒྱ་རུ་གསུངས། ། སྣ་ཚོགས་སྤྲོས་པའི་རྣལ་འབྱོར་གྱིས། ། རྡོ་རྗེ་སེམས་དཔའ་ཞེས་ནི་བརྗོད། ། གང་གིས་དེ་ཡི་རྣམ་པ་མཐོང་། ། སྣ་ཚོགས་ནོར་བུ་ཇི་བཞིན་ནོ། ། སེམས་ཅན་མོས་པ་སྣ་ཚོགས་དང་། ། སྣ་ཚོགས་བསམ་པའི་བྱེ་བྲག་གིས། ། སྣ་ཚོགས་ ཉོན་མོངས་མནན་ནས་ནི། ། འགྲོ་བའི་བླ་མས་གྲོལ་བའི་ཕྱིར། ། གཞུང་ནས་གང་གིས་དེ་ཡིས་ནི། ། སྣ་ཚོགས་སྤྲོ་བའི་ངོ་བོ་ཉིད། ། གྲངས་མེད་པ་ཡི་དབྱེ་བ་ཡིས། ། དབྱེ་བ་གྲངས་མེད་སྦྱོར་བ་ཡིས། ། དོན་དམ་རིགས་ཀྱི་དབྱེ་བ་ཉིད། ། རྒྱུད་གཞན་ རྣམས་སུ་གསུངས་པ་ཡི། །
BOསེམས་ཅན་བསམ་པའི་བྱེ་བྲག་གིས། ། དེ་ནི་བསྡུས་ན་དབྱེ་བར་འགྱུར། ། རྩ་ཡི་འཁོར་ལོའི་རིམ་པ་ཡིས། ། སྟོང་ཕྲག་བདུན་ཅུ་རྩ་གཉིས་པའོ། ། དེ་ལ་སྟོང་ཕྲག་སུམ་ཅུ་དྲུག ། ལུས་ཀྱི་རྫས་དང་གནས་སོགས་ཀྱིས། ། རིམ་ པའི་དབྱེ་བ་དེ་ལས་ཀྱང་། ། སྟོང་ཕྲག་ཉི་ཤུ་རྩ་བཞིའོ། ། དེ་རྗེས་བརྒྱ་ཡིས་མཆོག་ཏུ་གང་། ། བདུན་ཅུ་རྩ་གཉིས་དྲུག་ཅུ་བཞི། ། སུམ་ཅུ་རྩ་དྲུག་བསྡུས་པ་ལས། ། ཉི་ཤུ་རྩ་བཞི་དེ་ལས་ཀྱང་། ། སུམ་ཅུ་དང་ནི་དགུ་ཡང་ངོ་། ། དེ་ལས་ལྔ་དང་དེ་ཕྱིར་གསུམ། ། གསུམ་ཡང་བསྡུས་ན་གཅིག་ཉིད་དེ། ། རྫོགས་པའི་རིམ་པའི་སྦྱོར་བ་ཡིས། ། གཞན་ནས་གཞན་དུ་འདྲེས་ནས་འགྲོ། ། དེ་ཡང་འོད་གསལ་གོ་འཕང་ལའོ། ། རྣམ་རྟོག་མེད་པའི་བདེ་བ་ཆེ། ། གཉིས་མེད་ཡེ་ཤེས་དྲི་མ་མེད། ། ཆོས་ཀྱི་དབྱིངས་ཀྱི་ བདག་ཉིད་མཆོག ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རིགས་ཀྱི་དབྱེ་བའི་དོན་བསྡུས་པ་ཞེས་བྱ་བའི་ལེའུ་སྟེ་བཞི་བཅུ་གསུམ་པའོ། ། ། ། དེ་ནས་བཅོམ་ལྡན་རྡོ་རྗེས་གསུངས། ། ཕྱག་རྒྱའི་དབྱེ་བ་བླ་ན་མེད། ། ཆོས་དང་ལས་དང་ དམ་ཚིག་དང་། ། ཕྱག་རྒྱ་ཆེན་པོ་མངོན་པར་བརྗོད། །
BOལས་ཀྱི་རྣམ་སྨིན་ངེས་པ་ཡིས། ། ཀུན་ནས་རྒྱས་བཏབ་ལྟ་བུར་གནས། ། གང་ཡང་འདི་ནི་ལས་གང་གིས། ། དེ་འབྲས་ཇི་ལྟ་བ་བཞིན་འགྱུར། ། ཆོས་རྣམས་རང་བཞིན་མེད་པ་ཉིད། ། རང་བཞིན་གྱིས་ནི་རྒྱས་བཏབ་ ནས། ། དམ་ཚིག་རང་གི་ཡོན་ཏན་དངོས། ། རྒྱལ་སྲས་རྣམས་ཀྱི་རྒྱས་བཏབ་པ། ། སྟོང་དང་སྙིང་རྗེ་མི་ཕྱེད་པ། ། སངས་རྒྱས་ཞིང་ནི་རྣམ་སྦྱོང་བ། ། དེ་བཞིན་གཤེགས་པའི་དམ་ཚིག་ནི། ། ཡོངས་སུ་དག་པའི་མཛད་པ་ཡིས། ། དེ་ཡི་རང་བཞིན་རང་བཞིན་མེད། ། ཕྱག་ རྒྱ་ཆེན་པོ་ཞེས་ནི་བརྗོད། ། ལས་ཀྱི་ཕྱག་རྒྱ་ཡོངས་ཤེས་ན། ། སྔགས་པ་ལས་ནི་ཐོབ་པར་སྐྱེ། ། བླ་མས་ཤེས་རབ་དབང་བསྐུར་ན། ། ཇི་ལྟར་མཐོང་བའི་མཚན་ཉིད་ནི། ། རྡོ་རྗེ་སེམས་དཔའ་རང་དངོས་དོན། ། སྙིང་རྗེའི་བསམ་པས་གསལ་བ་ནི། ། དེ་ལས་ངེས་ པར་ཐོབ་ནས་ནི། ། ཆོས་ཉིད་སྒོ་ནས་ངེས་པར་བྱེད། ། དེ་ལྟར་དེ་ཉིད་དེ་ཡེ་ཤེས། ། དེ་ལྟར་རྣལ་འབྱོར་མ་མཚན་ཉིད། ། དམ་ཚིག་ལ་ཞེན་མཁས་པ་དང་། ། རླུང་གིས་དེ་ཉིད་ཕ་རོལ་སོན། ། དཔལ་ལྡན་འདུས་པའི་དོན་བསླབ་པ། ། ངག་འཇམ་ཤེས་རབ་ལྡན་མ་དང་། ། མིག་ཡངས་མ་ཡི་བུ་མོ་རྙེད། ། གཟུགས་དང་ལང་ཚོས་རྣམ་པར་བརྒྱན། །
BOཇི་བཞིན་རྣལ་འབྱོར་དམ་ཚིག་ལ། ། ཕྱག་རྒྱས་ལྷན་ཅིག་སྒྲུབ་པར་བྱེད། ། དེ་ནས་དེ་ཉིད་ཐོབ་པ་ན། ། ཕྱག་རྒྱ་ཆེན་པོའི་མཚན་ཉིད་དོ། ། དེ་ཉིད་བདེ་ཆེན་གོ་འཕང་ནི། ། ཀུན་དུ་རྟོག་པ་ ཐམས་ཅད་སྤངས། ། སྟོང་ཉིད་ཡེ་ཤེས་དྲི་མ་མེད། ། ཆོས་ཀྱི་དབྱིངས་ཀྱི་གོ་འཕང་གསལ། ། དེ་ནས་གཞན་ཡང་བཤད་བྱ་བ། ། ཕྱག་རྒྱའི་དབྱེ་བ་བླ་ན་མེད། ། རིགས་དང་ཕ་རོལ་ཕྱིན་དབྱེ་བས། ། ཕྱག་རྒྱ་དྲུག་ཏུ་ཡང་དག་བཤད། ། ཡྃ་རྃ་ལྃ་བྃ་ཨྃ་ཧྃ་དང་། ། ལྷ་མོ་རྣམས་ ཀྱི་རིམ་པ་ལས། ། མཆོད་པའི་རིམ་པ་རོ་གཅིག་པ། ། རྟག་ཏུ་ཡང་ནི་མཆོད་པར་བྱ། ། གདོལ་པ་མོ་དང་ཁྲུས་མཁན་མོ། ། སྨེ་ཤ་ཅན་དང་གར་མཁན་མ། ། རོ་བསྲེགས་མོ་དང་བྲམ་ཟེ་མོ། ། གྲུབ་འགྱུར་དོན་དུ་རྣལ་འབྱོར་པས། ། བདག་ཉིད་རོལ་ཅིང་གནས་པར་བྱ། ། ཁྲུས་མཁན་རིན་ཆེན་རིགས་ལས་སྐྱེས། ། གདོལ་པ་པདྨའི་རིགས་ལས་སྐྱེས། ། དེ་བཞིན་གར་མཁན་ལས་ཀྱི་རིགས། ། རོ་བསྲེགས་མ་ནི་འཁོར་ལོའི་རིགས། ། སྨེ་ཤ་ཅན་ནི་རྡོ་རྗེའི་རིགས། ། ཡེ་ཤེས་ཕྱག་རྒྱ་བྲམ་ཟེ་མོ། ། རྡོ་རྗེ་སེམས་དཔའི་རིགས་སུ་བརྗོད། ། འདི་ནི་ རིགས་ནི་དྲུག་ཏུ་འགྱུར། ། བྲམ་ཟེ་མོ་ནི་མ་ཡིན་ཏེ། །
BOཁྲུས་མཁན་མོ་ནི་སྲིང་མོར་བརྗོད། ། གར་མཁན་མོ་ནི་བུ་མོར་ཤེས། ། སྨེ་ཤ་ཅན་ནི་ཆུང་མར་གྲགས། ། རོ་བསྲེགས་མོ་ནི་མནའ་མ་སྟེ། ། སྒྱུག་མོ་གདོལ་བ་མ་ཞེས་བྱ། ། ཤེས་རབ་ཐབས་ཀྱི་ཆོ་ག་ཡིས། ། རྣམ་རྟོག་ མེད་པས་བརྗོད་པར་བྱ། ། གང་ཕྱིར་རྣམ་རྟོག་མེད་གྱུར་ན། ། དངོས་གྲུབ་ཀུན་ལ་དུས་ཀུན་དུ། ། སེམས་ནི་མ་རུ་གྱུར་ནས་ནི། ། སྲིང་མོ་དག་ཏུ་ཡང་དག་བཤད། ། ལུས་ནི་བུ་མོར་ཤེས་པར་བྱ། ། སྲོག་ནི་ཆུང་མར་རབ་ཏུ་གསལ། ། མནའ་མ་ཐུར་དུ་སེལ་བའི་རླུང་། ། དབུ་མའི་རླུང་ ནི་སྒྱུག་མོར་བརྗོད། ། མ་ནི་རྒྱགས་པའི་རྩ་ཡི་ཆ། ། སངས་རྒྱས་རིན་ཆེན་ཟ་མ་ཏོག ། སྲིང་མོ་ཁུ་བ་འབབ་པའི་རྩ། ། སྤྱི་བོའི་གནས་ན་ཡང་དག་གནས། ། བུ་མོ་ཁྲག་རྒྱུ་བ་ཡི་རྩ། ། དེ་ནི་ཕྱེད་ཕྱེད་ལྷག་པར་གནས། ། ཆུང་མ་གཅིན་ནི་འབབ་པའི་རྩ། ། དེ་ཉིད་ཀྱི་ནི་དབུས་ན་ གནས། ། མནའ་མ་མཆི་མ་འཛག་པའི་རྩ། ། མགྲིན་པའི་གནས་སུ་ལྷག་པར་གནས། ། མ་ནི་ས་རུ་ཡང་དག་བཤད། ། ཆུ་ཡི་ཁམས་ནི་སྲིང་མོར་བརྗོད། ། མེ་ནི་བུ་མོར་ཤེས་པར་བྱ། ། རླུང་ནི་ཆུང་མར་རབ་ཏུ་གྲགས། ། མནའ་མ་ནམ་མཁའ་རུ་ནི་བཤད། ། སྒྱུག་མོ་ནམ་མཁའ་ཆེན་པོའོ། །
BOམངར་བར་གྱུར་པས་མ་དང་ནི། ། སྐྱུར་བ་སྲིང་མོ་རུ་ནི་བརྗོད། ། ཁ་བ་རང་གི་བུ་མོ་དང་། ། ལན་ཚྭ་ཆུང་མར་ཡོངས་སུ་གྲགས། ། བསྐ་བ་སྒྱུག་མོར་ཤེས་པར་བྱ། ། ཚ་བ་མནའ་མར་ཡོངས་སུ་གྲགས། ། དེ་དག་འབད་པས་འདོད་ བྱ་ཞིང་། ། དངོས་གྲུབ་འདོད་པས་བསྟེན་པར་བྱ། ། ལས་ཀྱི་ཕྱག་རྒྱ་དབྱེ་བ་འདི། ། དེ་ཡི་ཡོན་ཏན་བསྟེན་པའི་མཆོག ། དམ་ཚིག་དེ་དང་རྟོག་པར་འཇུག ། ཕྱག་རྒྱ་ཆེན་པོའི་བདེ་བ་ཆེ། ། རྡོ་རྗེ་སེམས་དཔའི་གོ་འཕང་ཞི། ། ཡེ་ཤེས་མཆོག་ནི་བླ་ན་མེད། ། དེ་ལྟར་ཕྱག་རྒྱའི་གོ་ འཕང་གསལ། ། རྣལ་འབྱོར་མ་རྒྱུད་སྤྱོད་ཡུལ་ལོ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཕྱག་རྒྱའི་དབྱེ་བ་རྒྱས་པར་བཤད་པའི་ལེའུ་སྟེ་བཞི་བཅུ་བཞི་པའོ། ། ། ། དེ་ནས་གཞན་ཡང་ཡང་དག་བཤད། ། ཕུང་སོགས་སྐྱེ་མཆེད་མཚན་ཉིད་ ནི། ། རྒྱལ་བ་རྒྱལ་ནི་གཟུགས་ཞེས་བཤད། ། རྡོ་རྗེ་འཛིན་ནི་རྣམ་ཤེས་དང་། ། རིན་ཆེན་འཛིན་ལ་ཚོར་བར་གསུངས། ། འཁོར་བ་ལས་བརྒལ་འདུ་ཤེས་གསུངས། ། ཤེས་རབ་འཛིན་ནི་འདུ་བྱེད་དང་། ། དེ་ལྟར་ཕུང་པོར་རབ་ཏུ་གྲགས། ། ས་ནི་གཏི་མུག་དགའ་མར་ བཤད། ། དེ་བཞིན་ཆུ་ནི་ཞེ་སྡང་དགའ། །
BOམེ་ནི་ཆགས་ལ་དགའ་བ་དང་། ། དེ་བཞིན་རླུང་ནི་རྡོ་རྗེ་དགའ། ། ནམ་མཁའ་རྡོ་རྗེ་དབྱིངས་དབང་ཕྱུག ། གཟུགས་ནི་གཟུགས་ཀྱི་རྡོ་རྗེ་དང་། ། སྒྲ་ནི་སྒྲ་ཡི་རྡོ་རྗེ་སྟེ། ། དྲི་ནི་དྲི་ཡི་རྡོ་རྗེ་དང་། ། རོ་ནི་རོ་ཡི་རྡོ་རྗེར་བཤད། ། རེག་བྱའི་རྡོ་རྗེ་ རེག་བྱར་འགྱུར། ། ཆོས་ཀྱི་དབྱིངས་ཀྱི་དབང་ཕྱུག་མ། ། མིག་གཉིས་ས་ཡི་སྙིང་པོ་དང་། ། རྣ་བ་ཕྱག་ན་རྡོ་རྗེ་དང་། ། སྣ་ནི་ནམ་མཁའི་སྙིང་པོ་དང་། ། ལྕེ་ནི་འཇིག་རྟེན་མགོན་པོ་དང་། ། ལུས་ནི་སྒྲིབ་པ་རྣམ་སེལ་བརྗོད། ། ཡིད་ནི་ཀུན་དུ་བཟང་པོ་དང་། ། རྩ་ནི་བྱམས་པ་ རུ་ནི་བརྗོད། ། ཡེ་ཤེས་མཆོག་ནི་འཇམ་དཔལ་ཉིད། ། ཁྱབ་པ་རུ་ནི་ཡང་དག་བཤད། ། དེ་བཞིན་ལུས་ཀྱི་ཆོས་རྣམས་ནི། ། ཁྲོ་བོ་བཅུར་ནི་ཡང་དག་བཤད། ། དེ་ལྟར་ལུས་ཀྱི་དཀྱིལ་འཁོར་གསུངས། ། ཕུང་པོ་ལ་སོགས་སྐྱེ་མཆེད་སོགས། ། རྣལ་འབྱོར་གཉིས་མེད་མཆོག་ དེ་ནི། ། བླ་མ་བརྒྱུད་པ་ལས་ཤེས་བྱ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཕུང་པོ་ལ་སོགས་པ་དང་སྐྱེ་མཆེད་ཀྱི་མཚན་ཉིད་ཀྱི་ལེའུ་སྟེ་བཞི་བཅུ་ལྔ་པའོ། ། ། ། དེ་ནས་གཞན་ཡང་བཤད་བྱ་བ། །
BOཕྱག་རྒྱ་ཆེན་པོའི་དོན་མཚན་ཉིད། ། རྣལ་འབྱོར་ཆེན་པོའི་འབྲས་བུ་ཞི། ། ཡེ་ཤེས་ཆེན་པོའི་དོན་བསྡུས་པ། ། བདེ་བ་ཆེན་པོའི་སྐལ་བ་ཆེ། ། རོ་མཆོག་ཆེན་པོའི་བདག་ཉིད་ཅན། ། སྒྱུ་མ་ཆེན་མོ་མཆོག་ཏུ་ཕྲ། ། ཆེན་པོའི་ཆེན་པོ་ནམ་མཁའ་ཆེ། ། ཕྱག་རྒྱ་དེ་བཞིན་གཤེགས་ཡེ་ཤེས། ། རྣམ་རྟོག་ མེད་པའི་གོ་འཕང་སྟེ། ། མི་ཕྱེད་རྡོ་རྗེ་སེམས་དཔའི་གནས། ། རྣམ་རྟོག་མེད་པའི་བདེ་བ་ཆེ། ། ནམ་མཁའ་བཞིན་དུ་གོས་པ་མེད། ། རང་བཞིན་མེད་ཅིང་གཞི་དང་བྲལ། ། གཉིས་མེད་བདག་མེད་བརྗོད་དུ་མེད། ། རྣལ་འབྱོར་རྣམས་ནི་རང་རིག་པ། ། ཕུང་པོ་ཁམས་དང་ སྐྱེ་མཆེད་ཆའི། ། ཀུན་རྟོག་ཆོས་ནི་ཡོངས་སུ་སྤངས། ། སྒོམ་དང་བསྒོམ་བྱ་སྙོམས་འཇུག་དང་། ། རིམ་པ་གཉིས་ནི་རྣམ་པར་སྤངས། ། རྣམ་ཤེས་ཡེ་ཤེས་དང་བྲལ་བ། ། སྔགས་དང་བཟླས་བརྗོད་བསྙེན་པ་སྤངས། ། དངོས་པོ་ཀུན་གྱི་གནས་ལས་བརྒལ། ། ཡེ་ཤེས་ཆེན་པོ་ རབ་གསོལ་བ། ། དངོས་གྲུབ་ཆེན་པོ་འདིར་ཤེས་བྱ། ། ཕྱག་རྒྱ་ཆེན་པོ་བླ་ན་མེད། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཕྱག་རྒྱ་ཆེན་པོའི་དོན་རྣམ་པར་ངེས་པའི་ལེའུ་སྟེ་བཞི་བཅུ་དྲུག་པའོ། ། ། །
BOདེ་ནས་བཅོམ་ལྡན་རྡོ་རྗེས་གསུངས། ། ཉམས་ཀྱི་མཚན་ཉིད་དབྱེ་བ་ནི། ། གང་གིས་ཡོངས་ཤེས་རྣལ་འབྱོར་པ། ། རྣལ་འབྱོར་ཆེན་པོ་དག་ཤེས་པར། ། གྱུར་ནས་ཀྱང་ནི་ཡེ་ཤེས་ཆེ། ། དེ་ཉིད་རྣལ་འབྱོར་ཀུན་ལས་བསྒྱིངས། ། འདར་དང་རྡུལ་དང་བ་སྤུ་ལངས། ། དབྱངས་འགྱུར་བ་དང་ལྡིབས་པ་དང་། ། མདོག་ འགྱུར་མཆི་འཛག་ཐིམ་པ་དང་། ། སྙིང་སྟོབས་ཅན་གྱིས་འདི་བརྒྱད་ཉམས། ། དགའ་བ་རྒྱས་པའི་རྩ་ཡི་ཆུ། ། རྒྱགས་པའི་ཆ་ཡི་རྩ་དགའ་ནི། ། ཁོང་སྟོང་འདར་བར་སྐྱེད་པར་བྱེད། ། རྒྱགས་པའི་ཆུ་ཡི་རྩ་སད་ན། ། རབ་ཏུ་རྔུལ་བྱེད་སྐྱེད་པར་བྱེད། ། དེ་བཞིན་རྒྱགས་པས་གཡེངས་ པའི་རྩ། ། ཁོང་སྟོང་བ་སྤུ་ལྡང་བར་བྱེད། ། དེ་བཞིན་ན་ས་ར་ཡི་རྩ། ། ཁོང་སྟོང་ཚེག་ནི་ལྡིབ་པར་བྱེད། ། རུས་སྦལ་ཆེན་པོའི་རྩ་རྒྱས་ན། ། ཁ་དོག་འགྱུར་བ་སྐྱེ་བར་བྱེད། ། མགོ་བོ་ཆེན་པོའི་རྩ་རྒྱས་ན། ། བརྒྱལ་ཞིང་སྡུག་བསྔལ་བཅས་པར་ བྱེད། ། འུར་འུར་ཆེན་པོའི་རྩ་བྱེ་ན། ། བ་སྤུ་ལངས་པ་སྐྱེད་པར་བྱེད། ། དགའ་བ་ཆེན་པོའི་རྩ་རྒྱས་ན། ། ཁོང་སྟོང་མཆི་མ་འཛག་པར་བྱེད། ། མྱོས་པ་ཆེན་པོའི་རྩ་བྱེ་ན། ། སྲོག་གི་རླུང་ནི་ཐིམ་པར་བྱེད། །
BOབརྒྱལ་དང་སེམས་མེད་བདེ་བ་ཆེ། ། དེ་ནས་དྲན་པ་ཉམས་ པར་འགྱུར། ། སྒེག་པ་ལ་སོགས་ཉམས་སུ་ཤེས། ། སྔར་བཤད་རིམ་པས་སད་པར་བྱེད། ། ཛཿཧཱུྃ་བྃ་ཧོཿདེ་བཞིན་དུ། ། ཨ་ལ་ལ་ལ་ལ་ཧོ་སྔགས། ། རབ་ཏུ་བསྐུལ་བས་རྒྱས་ནས་སུ། ། ཉམས་ནི་སོ་སོའི་དབྱེ་བས་ཤེས། ། དེ་ལྟར་དེ་ནི་དབྱེ་བརྒྱུད་པའོ། ། རྣལ་ འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཉམས་ཀྱི་དབྱེ་བ་བཤད་པའི་ལེའུ་སྟེ་བཞི་བཅུ་བདུན་པའོ། ། ། ། དེ་ནས་བཅོམ་ལྡན་རྡོ་རྗེས་གསུངས། ། བདག་ཅེས་བྱ་བ་སྒྲ་ཡི་རྟེན། ། གང་གིས་ཡང་དག་ཤེས་པ་ཡིས། ། སྲིད་པའི་འཆིང་བའི་ མཚན་ཉིད་ནི། ། ཨ་ཧྃ་འཁོར་ལོའི་འཆིང་བ་དག ། དེ་ནི་ཡོངས་ཟད་གྲོལ་བའོ། ། ཨ་ནི་དངོས་པོ་ཀུན་གྱི་མཆོག ། ལུས་རྣམས་ཀུན་ལ་ལྷག་པར་གནས། ། རྣམ་པ་ཀུན་གྱི་མཆོག་དང་ལྡན། ། ཀུན་ཁྱབ་ཀུན་མཁྱེན་ཟད་པ་མེད། ། ཐོགས་མེད་སྙིང་སྟོབས་ཞེས་བྱ་བ། ། ཐབས་ཅིག་ཏུ་ནི་སྐྱེ་བར་བྱེད། ། སྲིད་དང་སྲིད་རྩེ་བརྩེ་བ་མེད། ། སྤྲུལ་པའི་སྐུ་ཡི་མཆོག་དང་ནི། ། དོན་ཀུན་བྱེད་པ་ལ་མཁས་པ། ། དེ་བཞིན་གཤེགས་པའི་དབུགས་འབྱུང་བའོ། ། ཧྃ་ནི་དངོས་པོ་དང་བྲལ་བ། །
BOལུས་ལ་གནས་ཀྱང་ལུས་བསྐྱེད་མིན། ། དབང་པོ་ ལས་འདས་མི་གསལ་བ། ། རྣམ་པ་ཐམས་ཅད་རྣམ་པར་སྤངས། ། དངོས་དང་དངོས་མེད་ལས་གྲོལ་ཞིང་། ། གང་ལའང་ལྷག་པར་གང་གནས་པ། ། དངོས་པོ་ཐམས་ཅད་ནུབ་པ་དང་། ། ཆོས་ཀྱི་སྐུ་ཡི་ངོ་བོ་ཉིད། ། སེམས་ནི་རྡོ་རྗེ་འཆང་དབུགས་ཕྱུང་། ། དོན་ཀུན་ བྱེད་པ་དང་བྲལ་བ། ། སྟོང་པའི་རང་བཞིན་མྱ་ངན་འདས། ། ཡེ་ཤེས་སྐུ་ཡི་རང་བཞིན་ཉིད། ། རྗོད་དང་བརྗོད་བྱ་རྣམ་པར་གྲོལ། ། དེ་ཡང་ཡི་གེ་ཧྃ་དུ་གྲགས། ། ཐམས་ཅད་ཨ་ཧྃ་ཀུན་ལ་ཁྱབ། ། ཐམས་ཅད་བདག་ཉིད་རྟག་ཏུ་བཞུགས། ། ཨ་ཧྃ་དངོས་པོ་ཐམས་ཅད་ལ། ། ཁྱབ་པའི་ས་ནི་ལྷག་པར་གནས། ། ཨ་ཧྃ་དང་བྲལ་སྐྱེས་བུ་ནི། ། རྩ་བ་བཅད་པའི་ཤིང་བཞིན་ནོ། ། ཧྃ་ནི་དཔྲལ་བའི་སྐྲ་མཚམས་ན། ། ཨ་ནི་ལྟེ་བར་ཡང་དག་གནས། ། འདིར་ནི་ཨ་ལས་ཟླ་བར་བཤད། ། འོད་ཟེར་སྟོང་འགྱེད་པ་ཡི་ཧྃ། ། འདིར་ཡང་ཨ་ཡི་མིང་ལ་བརྟེན། ། རྟེན་ པའི་ཧྃ་དུ་རབ་ཏུ་གྲགས། ། ཨ་ནི་སྲོག་གི་རླུང་དུ་བཤད། ། དེ་བཞིན་ཐུར་སེལ་ཧྃ་དུ་བརྗོད། ། དེ་གཉིས་གཅིག་གྱུར་འཁོར་བ་སྟེ། ། དེས་ན་ཨ་ཧྃ་ཞེས་པར་གྲགས། ། རྣམ་རྟོག་བྲལ་བའི་གནས་པ་ནི། ། ཨ་ཧྃ་གང་དུ་གནས་པ་མེད། །
BOགཞན་ནི་འགའ་ཞིག་འདི་ལ་ ཡང་། ། དོན་དམ་པར་ནི་དམིགས་སུ་མེད། ། དེ་ལྟར་ཨ་ཧྃ་ང་ཡིས་བཤད། ། རྒྱུད་རྣམས་ཀུན་དུ་རྙེད་པར་དཀའ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཨ་ཧྃ་གི་སྒྲའི་དོན་བཤད་པའི་ལེའུ་སྟེ་བཞི་བཅུ་བརྒྱད་པའོ། ། ། ། དེ་ནས་ བཅོམ་ལྡན་རྡོ་རྗེས་གསུངས། ། སྟོང་ཉིད་དབྱེ་བ་བསྡུས་པ་ནི། ། རྣལ་འབྱོར་པ་ནི་གང་གིས་ཤེས། ། སྟོང་ཉིད་དེ་ནི་ཤེས་པར་འགྱུར། ། མི་མཐུན་པ་དང་གཉེན་པོའི་ཕྱིར། ། སྟོང་ཉིད་བསྒོམ་པར་ཡོངས་སུ་གསུངས། ། ནང་གི་བདག་ཉིད་ཆོས་རྣམས་ནི། ། ཀུན་དུ་རྟོག་ པའི་གཉེན་པོ་དང་། ། ཕྱིན་ཅི་ལོག་ནི་རྣམ་དག་པ། ། ཕྱི་ནས་སྟོང་པ་ཉིད་དུ་འདོད། ། ཕྱི་རོལ་དམིགས་པ་དང་བྲལ་བ། ། ནང་གི་བདག་ཉིད་ཆོས་རྣམས་དང་། ། ཕྱི་རོལ་དུ་ཡང་མི་རྟོག་པ། ། འདིར་ནི་ཕྱི་དང་ནང་གི་ནི། ། སྟོང་པ་ཉིད་དུ་ཡང་དག་བཤད། ། སྣོད་ཀྱི་འཇིག་རྟེན་དང་ བྲལ་བ། ། ཆེན་པོ་སྟོང་པ་ཉིད་དུ་བརྗོད། ། ཡེ་ཤེས་གང་གིས་དེ་སྟོང་པར། ། མཐོང་བ་དེ་ཡང་སྟོང་པར་བརྗོད། ། མེ་ལོང་ཡེ་ཤེས་རྫོགས་པ་ལ། ། རྗེས་སུ་དམིགས་པར་བྱེད་ཕྱིར་རོ། ། དེ་ཡི་མི་མཐུན་ཕྱོགས་སྟོང་པ། །
BOདངོས་མེད་སྟོང་པ་ཉིད་སྟོང་ཉིད། ། དོན་དམ་པར་ ནི་{བརྫུན་,རྫུན་}པའི་དངོས། ། ཤེས་པ་དོན་དམ་སྟོང་པ་ཉིད། ། འདུས་བྱས་སྦྱིན་པ་ལ་སོགས་ཀྱི། ། དགེ་བ་དམིགས་སུ་མེད་པའི་ཕྱིར། ། རང་གི་རྣམ་རྟོག་མཚན་ཉིད་སྤྱོད། ། འདུས་བྱས་སྟོང་པ་ཉིད་དུ་བཤད། ། ཡང་དག་བྱང་ཆུབ་འདུས་མ་བྱས། ། རྒྱུ་ མཚན་ཡང་ནི་དམིགས་སུ་མེད། ། དངོས་དང་དངོས་མེད་རྣམ་པར་སྤངས། ། འདུས་མ་བྱས་པའི་སྟོང་ཉིད་གསུངས། ། སེམས་ཅན་དོན་དུ་སྨོན་ལམ་སོགས། ། རང་དགའ་སོགས་པ་དམིགས་པ་མེད། ། ཤིན་ཏུ་སྟོང་པ་ཉིད་དུ་བཤད། ། ཀུན་རྟོག་ཐམས་ཅད་རྣམ་ པར་སྤངས། ། མཐའ་ལས་འདས་པའི་སྟོང་ཉིད་གསུངས། ། ཐོག་མཐའ་མེད་པའི་འཇིག་རྟེན་གྱི། ། འགྲོ་བའི་ཕྱིར་ནི་སྨོན་ལམ་ཉིད། ། རློམ་སེམས་མེད་པར་དེ་བརྗོད་དོ། ། ཐོག་མཐའ་མེད་པའི་སྟོང་པ་ཉིད། ། མྱ་ངན་འདས་ལ་དམིགས་པ་མེད། ། དགེ་བའི་ བདག་ཉིད་མི་སྟོང་བ། ། རློམ་སེམས་མེད་པ་ཞེས་བཤད་དོ། ། དོར་བ་མེད་པ་སྟོང་པ་ཉིད། ། འདོད་ཆགས་ལ་སོགས་དྲི་མ་ནི། ། བདག་ནི་རང་བཞིན་གྱིས་དག་པའི། ། དེ་ལྟར་རློམ་སེམས་མེད་གསུངས་པ། ། རང་བཞིན་སྟོང་པ་ཉིད་དུ་གསལ། ། མཚན་དང་དཔེ་བྱད་ ལ་སོགས་པ། །
BOསྐྲུ་གཟུགས་དེ་ཡི་ཡོན་ཏན་ནི། ། གཞན་རྣམས་ལ་ཡང་མི་དམིགས་པ། ། རང་གི་མཚན་ཉིད་སྟོང་པ་ཉིད། ། བྱང་ཆུབ་ཕྱོགས་ཀྱི་ཆོས་རྣམས་ཉིད། ། སྤྱོད་པ་ལ་ཡང་རློམ་སེམས་མེད། ། ཆོས་རྣམས་ཐམས་ཅད་སྟོང་པར་བཤད། ། བདག་དང་སྐྱེས་ བའི་ཆོས་རྣམས་ནི། ། སྒྲོ་བཏགས་དངོས་པོ་མེད་པའི་མཆོག ། འཆིང་བ་ཐམས་ཅད་རྣམ་པར་གཅོད། ། དངོས་མེད་སྟོང་པ་ཉིད་དུ་གསུངས། ། ཇི་ལྟར་སྔོན་གསུངས་སྟོང་པ་ཉིད། ། དེ་ལྟར་དངོས་པོ་མེད་ཤེས་པ། ། སླར་ཡང་མི་དམིགས་པ་ཉིད་ནི། ། དངོས་པོ་མེད་ པ་སྟོང་ཉིད་འདོད། ། དེ་ལྟར་སྟོང་ཉིད་དབྱེ་བ་ཡང་། ། བག་ཆགས་རྣམས་ཀྱི་གཉེན་པོའི་ཕྱིར། ། རྒྱུ་ཡི་གཉེན་པོ་མི་མཐུན་ཕྱོགས། ། བླ་མ་བརྒྱུད་པ་ལས་ཤེས་བྱ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྟོང་པ་ཉིད་ཀྱི་མཚན་ཉིད་ཀྱི་ལེའུ་སྟེ་བཞི་བཅུ་ དགུ་བའོ། ། ། ། དེ་ནས་བཅོམ་ལྡན་རྡོ་རྗེས་གསུངས། ། སྟོང་པ་ཉིད་ནི་སྐྱེ་བའི་རྒྱུ། ། རྣམ་པ་མེད་པའི་ཉམས་མྱོང་དངོས། ། ལུས་རྣམས་ལ་ནི་ཁྱབ་པ་དང་། ། ཕུང་པོ་ལྔ་ནི་རང་བཞིན་ལུས། ། འཁོར་ལོ་དྲུག་ལ་ཁྱབ་པ་དང་། ། ཆོས་རྣམས་ཀུན་གྱི་དབུས་གནས་ཕྱིར། །
BOརིང་ བ་མ་ཡིན་ཉེ་བ་མིན། ། དེ་ནི་ཀུན་རྫོབ་དང་དབྱེར་མེད། ། སྟོང་པ་ཉིད་ནི་དོན་དམ་མོ། ། རྡོ་རྗེ་ཕྲེང་བ་དེ་ལྟར་བཤད། ། སྲོག་གི་རྟེན་གྱི་མཚན་ཉིད་ནི། ། སྐུ་མདོག་སྔོན་པོ་ཞལ་གསུམ་པ། ། སྤྱན་གསུམ་པོ་ལ་ཕྱག་དྲུག་མཆོག ། རྡོ་རྗེ་འཁོར་ལོ་ནོར་བུ་གཡས། ། གཡོན་པ་ དྲིལ་བུ་པདྨ་དང་། ། རལ་གྲི་ཤིན་ཏུ་རྣོན་པོ་དང་། ། ཕྱར་བ་{གོ་རིམས་,གོ་རིམ་}བཞིན་དུ་བསྣམས། ། ཨཱ་ལི་ཀཱ་ལི་ལས་བྱུང་བ། ། ཟླ་བ་ཉི་མའི་གདན་ལ་བཞུགས། ། སྣ་ཚོགས་པད་རྒྱས་གདན་ལ་ནི། ། སེམས་དཔའི་སྐྱིལ་མོ་ཀྲུང་གིས་བཞུགས། ། ཧཱུྃ་གི་ས་བོན་རྫོགས་པ་དང་། ། རྡོ་རྗེ་ ཆེན་པོའི་རིགས་ལས་བྱུང་། ། ཀུན་རྟོག་རྣམས་ནི་བསྐྱེད་པའི་རླུང་། ། རྣམ་པར་གཅོད་ཅིང་ཐིམ་པར་བྱེད། ། གནོད་བྱེད་དེ་དག་སེལ་བར་བྱེད། ། གཉིས་པ་ཐམས་ཅད་རྣམ་པར་གཅོད། ། སྒྱུ་མ་ཆེན་མོ་སྟོང་བ་ཆེ། ། སངས་རྒྱས་ས་ནི་རྨད་དུ་བྱུང་། ། སངས་རྒྱས་ ཉིད་ཀྱི་འབྲས་སྟེར་བའོ། ། འདི་ཡི་སྔགས་ནི་བརྗོད་པར་བྱ། ། ཨོྃ་དང་བཛྲ་མཱ་ལེ་དང་། ། དེ་བཞིན་ཨཱཿདང་ཧཱུྃ་དང་གཉིས། ། ཕཊ་དང་སྭཱ་ཧཱ་ཡང་དག་ལྡན། ། སྔགས་མཆོག་བཏུས་པ་བླ་ན་མེད། ། རླུང་འཕྲོག་དེ་ཁོ་ན་ཉིད་ཀྱིས།
BO། ཡིད་ཀྱི་རྣམ་རྟོག་སེལ་བར་བྱེད། ། ཞི་བའི་གནས་དང་ཆུ་འགྲམ་དང་། ། ཤིང་གཅིག་ལམ་གྱི་བཞི་མདོ་དང་། ། ཡང་ན་སུམ་མདོར་འབུམ་ཕྲག་བཅུ། ། གསལ་བར་ཡང་ནི་བཟླས་པར་བྱ། ། དེ་ནི་དངོས་གྲུབ་མཆོག་ཏུ་འགྲོ། ། རྫོགས་པའི་རིམ་པའི་རྣལ་འབྱོར་གྱིས། ། དེ་ཡི་ཡོན་ཏན་གསལ་བར་ འབྱུང་། ། ཞི་བ་ལ་སོགས་འབད་མི་དགོས། ། སྐད་ཅིག་གཅིག་ལ་མངོན་པར་རྟོགས། ། དེ་ནི་དེ་ཉིད་རིགས་མཆོག་ཤེས། ། དཔའ་བོ་གཅིག་བུའི་ཆོ་ག་འདི། ། དཔའ་མོ་གཅིག་པུ་ཉིད་བསྒྲུབ་པ། ། དེ་ཡི་མཚན་ཉིད་སྒོམ་པ་གང་། ། རྣམ་རྟོག་སྤངས་པའི་རྣལ་འབྱོར་ པ། ། ཤིན་ཏུ་རྣམ་དག་མཁའ་ཡི་དངོས། ། རང་གི་དངོས་གྲུབ་མཆོག་ཏུ་འགྲོ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྟོང་པ་ཉིད་ཀྱི་རྡོ་རྗེའི་ཕྲེང་བ་བསྐྱེད་པའི་མཚན་ཉིད་ཀྱི་ལེའུ་སྟེ་ལྔ་བཅུ་པའོ། ། ། ། དེ་ནས་བཅོམ་ལྡན་རྡོ་རྗེས་ གསུངས། ། མཚན་མོ་ཉིན་མོའི་མཚན་ཉིད་ནི། ། མཚན་མོ་ཤེས་རབ་ཤེས་པར་བྱ། ། འབྱུང་པོ་ཐམས་ཅད་ཐིམ་ནས་འགྲོ། ། མཚན་མོའི་ཆ་ནི་ཟླ་བར་འགྱུར། ། ཟླ་བ་མྱ་ངན་འདས་མཚན་ཉིད། ། ཀུན་རྫོབ་དང་ནི་དོན་དམ་གྱི། ། ཤེས་རབ་རྣམ་པ་གཉིས་ཞེས་བྱ། །
BOཀུན་རྫོབ་ ཤེས་བྱར་ཤེས་པར་བྱ། ། དོན་དམ་རེག་བྱ་རྣམ་པར་སྤངས། ། རེག་བྱ་དང་བྲལ་བདེ་བ་གང་། ། བདེ་བ་མཆོག་དེ་ཐོབ་པར་དཀའ། ། ཉིན་མོ་སླར་ཡང་ཐབས་སུ་བཤད། ། ཐབས་ནི་ཉིན་མོར་གྱུར་པ་དང་། ། གང་ཚེ་དངོས་ལས་སྐྱེས་ཉི་མ། ། རྟག་ཏུ་བྷ་གའི་བདག་པོར་ འགྱུར། ། འཁོར་བའི་རྣམ་པ་ཉི་མར་འགྱུར། ། ཉི་མ་ལས་ནི་ཟླ་བ་སྐྱེ། ། དེ་ལས་གཉིས་མེད་ངོ་བོར་བཤད། ། འབར་བའི་ཕྱིར་ནི་ཉི་མར་འགྱུར། ། རྣམ་པར་དཔྱད་པའི་དོན་དམ་དང་། ། ཆགས་བྲལ་མཆོག་ཏུ་ཕྲ་བ་དང་། ། མི་སྣང་བ་དང་སྟོང་པའི་ལུས། ། འོད་གསལ་བ་ ཡི་གོ་འཕང་ཞི། ། གང་དུ་ཡང་དག་མི་གནས་སོ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་མཚན་མོ་ཉིན་མོ་རྒྱས་པར་བཤད་པའི་ལེའུ་སྟེ་ལྔ་བཅུ་གཅིག་པའོ། ། ། ། དེ་ནས་བཅོམ་ལྡན་རྡོ་རྗེས་གསུངས། ། ཨཱ་ལི་ཀཱ་ལིའི་དམ་ཚིག་ནི། ། རྒྱུད་ རྣམས་གཞན་དུ་མ་གསུངས་པའི། ། རྒྱལ་སྲས་རྣམས་ལ་དགོངས་པ་ཡི། ། འོད་གསལ་གོ་འཕང་ལས་སྐྱེས་པའི། ། སྣང་བ་མཆེད་པའི་མཚན་ཉིད་ནི། ། གསལ་བྱེད་སུམ་ཅུ་རྩ་གསུམ་ལྡན། ། ཀཱ་ལིའི་དཀྱིལ་འཁོར་རྒྱས་པའོ། ། སྣང་བ་མཆེད་པའི་གོ་འཕང་ནི། །
BOསྣང་བ་ ལས་བྱུང་ཟད་པ་མེད། ། དབྱངས་ནི་བཅུ་དྲུག་དང་ལྡན་པ། ། ཨཱ་ལིའི་དཀྱིལ་འཁོར་རྒྱས་པའོ། ། དེ་གཉིས་གསང་བའི་སྦྱོར་བ་ལས། ། དབུས་སུ་སྐྱེས་པའི་བདེ་བ་ཆེ། ། ཨཱ་ལི་ཀཱ་ལིའི་དམ་ཚིག་ཅེས། ། དགོངས་པའི་ཚིག་གིས་བྱེ་བྲག་བྱས། ། ཤིན་ཏུ་ཕྲ་བའི་ཡེ་ ཤེས་མཆོག ། བླ་མ་བརྒྱུད་ལས་ཤེས་པར་བྱ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཨཱ་ལི་ཀཱ་ལི་རྒྱས་པར་བཤད་པའི་ལེའུ་སྟེ་ལྔ་བཅུ་གཉིས་པའོ། ། ། ། དེ་ནས་གཞན་ཡང་བཤད་ཀྱིས་ཉོན། ། མཚམས་ཀྱི་མཚན་ཉིད་བླ་ན་མེད། ། སྣང་ དང་མི་སྣང་བྲལ་བའི་མཚམས། ། ཤེས་རབ་རྡོ་རྗེ་ལས་བྱུང་བ། ། གཉིས་མེད་འདྲེས་པའི་དབུས་ན་གནས། ། འབགས་ཤིང་གོས་པ་རྣམ་པར་སྤངས། ། རྡོ་རྗེ་པདྨ་འཆི་མེད་སྐྱེས། ། ཟླ་བ་ཉི་མ་ཡང་དག་འདྲེས། ། མཐར་ནི་ཡང་དག་མི་འགྲོ་གང་། ། མཚམས་མེད་ འཁོར་བ་དག་པར་བྱེད། ། རང་གི་ངོ་བོ་རྣམ་པ་མཆོག ། ཕྲ་བའི་མཚན་ཉིད་བསམ་མི་ཁྱབ། ། སེམས་ཅན་ཀུན་གྱི་མཚམས་ཀྱི་ནི། ། རྡོ་རྗེ་འཆང་གི་བཙུན་མོ་དང་། ། འཆར་བ་མཆོག་ཏུ་དག་པར་བཤད། ། དགའ་བྲལ་ལ་སོགས་རྣམ་པར་སྤངས། ། མདུད་ པའི་རྩེར་གནས་མཆོག་ཏུ་ཞི། །
BOཙ་ན་ཀ་ཡི་ཚིག་གུ་ཙམ། ། མཚན་མོ་བདག་པོ་དེ་ཤར་བ། ། གང་ཕྱིར་སྟེང་གི་གོ་འཕང་གནས། ། ལ་ལ་ཐིག་ལེའི་རང་ངོ་བོར། ། རྣམ་པ་བཞི་ཡིས་ཡང་དག་གནས། ། ལ་ལར་ཐོག་མ་ལ་སོགས་སྤངས། ། ལ་ལར་དེ་ཡང་ དམིགས་སུ་མེད། ། གང་ཕྱིར་རང་གི་བདག་ཉིད་ཅན། ། དེ་ཕྱིར་བརྗོད་དུ་མེད་པའོ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་མཚམས་ཀྱི་འཆར་བའི་མཚན་ཉིད་ཀྱི་ལེའུ་སྟེ་ལྔ་བཅུ་གསུམ་པའོ། ། ། ། དེ་ནས་བཅོམ་ལྡན་རྡོ་རྗེས་གསུངས། ། རྣམ་པ་ཉི་ཤུའི་མིང་ཙམ་ནི། ། སློབ་དཔོན་ལས་སུ་ཡོངས་སུ་བཤད། ། སྔགས་ཀྱི་རྣལ་འབྱོར་ལེགས་རྒྱས་པ། ། སྔོན་དུ་བསྙེན་པ་ས་སྦྱང་དང་། ། འབྱུང་པོ་བསྐྲད་པ་ཉིད་དང་ནི། ། ས་གཟུང་ཉིད་དང་ཐིག་སྐུད་ནི། ། སྦྱང་དང་ལྷག་པར་གནས་པ་དང་། ། བགེགས་བསྐྲད་དེ་བཞིན་དཀྱིལ་འཁོར་ གྱི། ། ཐིག་ནི་རབ་ཏུ་གསལ་བ་དང་། ། ཕུར་བུས་ཡང་དག་གདབ་པ་དང་། ། བུམ་པ་བྱིན་གྱིས་བརླབས་པ་དང་། ། བཅོམ་ལྡན་འདས་ཀྱི་ལྷག་གནས་དང་། ། ཁྲུས་དང་རབ་ཏུ་སྦྱང་བ་དང་། ། མཆོད་པ་རབ་གནས་གཏོར་མ་དང་། ། སློབ་མ་ལྷག་པར་གནས་པ་དང་། ། མེ་ལ་སྦྱིན་སྲེག་ཆོ་ག་བཞིན། །
BOདབང་བསྐུར་བ་དང་གཤེགས་སུ་གསོལ། ། དེ་ལྟར་ཆོ་ག་ཉི་ཤུའི་ལས། ། གང་གིས་དེ་ཤེས་འགྲོ་བའི་བླ། ། དགེ་སློང་རྡོ་རྗེ་འཛིན་པས་བྱ། ། བདུད་ལས་སྡིགས་མཛུབ་དེ་ནི་མཆོག ། ཡི་གེ་གསུམ་ཟློས་པ་ལ་ཞེ་ན། ། རྡོ་རྗེ་ ཐེག་པ་ལྷག་པར་གྲོལ། ། ཞི་བ་ལ་སོགས་ལས་གང་གིས། ། རྟག་ཏུ་ལག་པའི་མཐིལ་ལ་གནས། ། དེ་ཡི་ཡང་དག་ཆོ་ག་ཡིས། ། ཆོ་ག་མཆོག་ནི་བྱ་བ་ཡིན། ། རྣལ་འབྱོར་རྗེས་སུ་རྣལ་འབྱོར་སོགས། ། ཆོ་ག་ལ་སོགས་བརྩམ་པར་བྱ། ། བགེགས་མཐར་བྱེད་པའི་སྙིང་པོའི་ སྔགས། ། ཡི་གེ་ཉི་ཤུ་རྩ་བཞི་མཆོག ། སྟོང་ཕྲག་བཅུ་ནི་ཡོངས་སུ་བཟླ། ། ཐོག་མར་མཁས་པ་ཇི་བཞིན་དུ། ། བགེགས་རྣམས་ཐམས་ཅད་བསལ་བའི་ཕྱིར། ། སྔོན་དུ་བསྙེན་པ་ཞེས་ནི་བཤད། ། དེ་འོག་ཡི་གེ་གསུམ་ཁྲིར་ནི། ། བསམ་པ་ཀུན་གྱིས་བཟླས་བྱས་ན། ། ཡིད་ལ་ འདོད་པའི་དངོས་གྲུབ་སྟེར། ། སློབ་མ་རྣམས་ཀྱི་དངོས་གྲུབ་རྒྱུར། ། སྐྱེ་བོས་དབེན་པའི་ཕྱག་དར་བྱས། ། ས་བཟུང་ཆུ་ནི་ཉེ་བར་བཅས། ། གྲོང་དང་ཧ་ཅང་མི་ཉེ་ཞིང་། ། རིང་པོར་ཡང་ནི་བརྩམ་མི་བྱ། ། ཤིན་ཏུ་འཇམ་ཞིང་སྲོག་ཆགས་མེད། ། རྒྱལ་པོའི་ཕོ་བྲང་ཤིན་ཏུ་རིང་། ། ཁང་ཁྱིམ་ཚོང་དུས་ལས་རྒྱང་རིང་། །
BOཡང་ན་བདེ་གཤེགས་རྟེན་ལ་ནི། ། ཐོག་མར་སོར་མོ་རྣམས་ལ་ནི། ། བདེ་བར་གཤེགས་པའི་སྔགས་དགོད་བྱ། ། ཁྲུ་གང་སོར་ནི་བཞི་པ་ཡིས། ། སེང་ལྡེང་ཕུར་པ་བྱས་ནས་ནི། ། ཡི་གེ་གསུམ་སྔགས་ཆུ་ཡིས་བཀྲུ། ། ཡི་གེ་བརྒྱ་ པ་ལན་བདུན་དང་། ། ཡི་གེ་གསུམ་གྱི་སྔགས་ཀྱིས་བརྐོ། ། ས་ནི་ཆུ་ཡི་མཐར་ཐུག་པ། ། ཡང་ན་ཁྲུ་ནི་ཕྱེད་དང་གསུམ། ། ཡང་ན་སེམས་ཀྱིས་སྦྱང་བར་བྱ། ། དེ་ལ་གནས་པའི་འབྱུང་པོ་ནི། ། ཡང་དག་འགྲོར་ནི་འཇུག་པར་བྱ། ། ཨོྃ་མ་ཧཱ་ཀྲོ་དྷ་ཛྭ་ལཱརྐ། ། ཧཱུྃ་ཕཊ་ མཐའ་དང་ཡང་དག་ལྡན། ། དེ་ལྟར་ལག་མཐིལ་སྔགས་བཀོད་ལ། ། འབྱུང་པོ་རྣམས་ནི་བསྐྲད་པར་བྱ། ། ས་ལ་ཐལ་མོ་ལན་གསུམ་དུ། ། བརྡབ་པ་བྱས་ནས་སྔགས་བཟླས་ཏེ། ། ཨུད་གཙྪད་ལན་གཉིས་བརྗོད། ། སརྦ་བྷུ་ཏ་གྲ་ཧ་ཨུ་ད་གཙྪ། ། ཡི་གེ་གསུམ་ནི་མཐའ་རུ་ བརྗོད། ། བཛྲ་ས་ཏྭ་བེ་ཤད་དེ། ། ལས་ནི་ཐམས་ཅད་པར་གསུངས་པའི། ། གཏོར་མ་བྱིན་ནས་འགྲོ་རུ་གཞུག ། ས་ནི་ཡོངས་སུ་བཟུང་རྗེས་ལ། ། རྡོ་རྗེ་སློབ་དཔོན་གྱིས་བརྩམ་བྱ། ། ཚ་སྒོ་མེད་ཅིང་དྲི་མ་བསལ། ། མཉམ་ཞིང་ཟུག་རྔུ་མེད་པ་དང་། ། མེ་ལོང་ལྟ་བུར་འཇམ་པ་ དང་། ། མཉམ་པ་ཡང་ནི་མཁས་པས་བྱ། །
BOབ་ཡི་ལྕི་བ་ལ་སོགས་པ། ། རྣམ་པ་ལྔ་ཡིས་བྱུག་པར་བྱ། ། བྱུགས་ནས་དེ་རྗེས་ཁྲུས་བྱས་ལ། ། སློབ་དཔོན་ཁྲོ་བོའི་སྐུ་དང་ནི། ། དཀྱིལ་འཁོར་འཇམ་པའི་རྡོ་རྗེ་ཡི། ། མཆོག་ཏུ་མི་གཡོ་གཟུགས་ཀྱིས་ནི། ། འཇམ་པ་དང་ ནི་སུམ་སྒྲིལ་གྱིས། ། རས་སམ་ཡང་ན་གསོ་མ་ཡིས། ། ཡི་གེ་གསུམ་གྱིས་རྣམ་པར་སྦྱང་། ། ཐིག་སྐུད་གྱིས་ནི་ཀུན་ནས་མཉམ། ། གྲུ་བཞི་པར་ནི་བྱས་ནས་ཀྱང་། ། རྡོ་རྗེ་ཅན་གྱིས་ཁྲུ་གསུམ་གསུམ། ། གྲུ་བཞི་པར་ནི་གཟུང་བར་བྱ། ། དེ་ཡི་དབུས་སུ་ལྟེ་བའི་ཆ། ། སྒྲིབ་པའི་སྐྱོན་ ནི་སྤང་བར་བྱ། ། སྐུ་གདུང་དང་ནི་རིན་ཆེན་གཞུག ། ལེགས་པར་བསངས་ནས་བྱིན་གྱིས་བརླབ། ། ཡི་གེ་གསུམ་ཡང་སྭཱ་ཧཱའི་མཐའ། ། ཕཊ་ཀྱི་དབུས་སུ་ཡང་དག་སྦྱར། ། སྔགས་འདི་ཡང་ནི་བཟླས་པར་བྱ། ། བརྒྱ་དང་བརྒྱད་ཀྱིས་ལྷག་པར་གསལ། ། ཚངས་པའི་ ཐིག་ནི་བཏབ་ནས་ནི། ། ཡི་གེ་བརྒྱ་པ་བཟླ་བར་བྱ། ། དེ་རྗེས་དེ་ལ་མེ་ཏོག་ཆར། ། སྔགས་ནི་བརྗོད་ནས་གཏོར་བར་བྱ། ། ཨོྃ་དང་ཨ་མོ་གྷཱ་པདྨོ། ། དེ་བཞིན་དུ་ནི་ཕྱི་ནས་སུ། ། བྷ་སུ་དྷ་རི་དྷ་ར་གཉིས། ། དྷ་ར་ཎི་མཎྜ་ལི་ཧཱུྃ། ། ཡི་གེ་བརྒྱ་པའི་སྔགས་དང་ནི། ། ལན་ གསུམ་བར་དུ་ཐིག་སྐུད་ལ། །
BOཞབས་བསིལ་ཆུ་ཡིས་བསང་བར་བྱ། ། ཡི་གེ་གསུམ་གྱིས་ཐིག་གདབ་བྱ། ། ཟུར་བཞི་པ་ལ་སྒོ་བཞི་པ། ། རྡོ་རྗེ་ཅན་གྱིས་མཚམས་བཞི་པ། ། ཐོག་མར་ཤར་དང་བྱང་དང་ནི། ། ཇི་སྲིད་ལྷོ་དང་ནུབ་དག་དང་། ། མཚམས་སུ་ཡང་དག་ཐིག་སྐུད་དང་། ། སླར་ཡང་ཡང་དག་གདབ་པར་བྱ། ། ཤར་དང་ལྷོ་ཡི་མཚམས་དང་ནི། ། ནུབ་དང་བྱང་གི་མཚམས་སུ་ནི། ། ཐིག་སྐུད་གྱིས་ནི་ཚད་གཞལ་བྱ། ། ཟུར་བཞི་དང་ནི་ཐིག་སྐུད་བྱ། ། སྐོར་ཐིག་གསུམ་ནི་སྒོ་བཞི་པ། ། རྡོ་རྗེ་ཕྲེང་བ་གསུམ་གྱིས་མཛེས། ། ཚངས་པའི་ཐིག་ གཉིས་བཏབ་ནས་ནི། ། དེ་ལས་དབང་པོའི་ཕོ་བྲང་ནི། ། རྣམ་པ་ཀུན་གྱིས་ཡང་དག་ཐིག ། རྒྱལ་བ་ཀུན་གྱི་བཞུགས་གནས་གསལ། ། དེ་ལ་རིག་པ་འཛིན་པ་བྲི། ། སླར་ཡང་རིན་ཆེན་ཕྱེ་མའམ། ། ཚོན་སྣ་ལྔ་རྣམས་མེ་ཏོག་དང་། ། རྫས་སམ་ལས་ཀྱི་སྦྱོར་ བ་ལས། ། རིམ་པ་ཇི་ལྟ་བ་བཞིན་དུ། ། མཚན་མའི་ཕྱག་རྒྱ་ལ་སོགས་བྲི། ། མི་བསྐྱོད་སྐུ་མདོག་ཕྱག་རྒྱ་སོགས། ། རིགས་ནི་དབུས་སུ་དགོད་པར་བྱ། ། རྒྱལ་བ་རྒྱལ་དང་རིན་ཆེན་འཆང་། ། འཁོར་བ་འདས་དང་ཤེས་རབ་འཆང་། ། རིམ་བཞིན་སྐུ་མདོག་དབྱེ་བ་ཡིས། ། ཤར་ལ་སོགས་པའི་ཕྱོགས་སུ་དགོད། ། གཏི་མུག་ཞེ་སྡང་ཆགས་པ་དང་། །
BOརྡོ་རྗེ་དགའ་སོགས་རིམ་པ་བཞིན། ། མེ་ལ་སོགས་པའི་མཚམས་རྣམས་སུ། ། ཇི་ལྟ་བ་བཞིན་དགོད་པར་བྱ། ། སྣ་ཚོགས་པདྨ་ཟླ་བ་ཡི། ། གདན་བདུན་གཞན་གྱི་ཉི་མ་གཉིས། ། འཁོར་དགའ་ཞེ་སྡང་ དགའ་བར་བཅས། ། ཀ་ཡི་ཕྲེང་གིས་རྣམ་པར་བརྒྱན། ། ཞལ་གསུམ་ཕྱག་དྲུག་རྣམ་པ་ཅན། ། གཡོན་ན་ཤེས་རབ་རལ་གྲི་བསྣམས། ། གཟུགས་དང་དབྱིབས་རྣམས་ཇི་བཞིན་དུ། ། དབུས་ཀྱི་དཀྱིལ་འཁོར་མཆོད་པར་བྱ། ། ཕྱི་རོལ་གཟུགས་ཀྱི་རྡོ་རྗེ་སོགས། ། མཚམས་ ཀྱི་ཆར་ནི་རྣམ་པར་དགོད། ། ཤར་ལ་སོགས་པའི་སྣམ་བུ་ལ། ། བྱམས་པ་ས་ཡི་སྙིང་པོ་ཤར། ། འཇམ་དཔལ་ཕྱག་ན་རྡོ་རྗེ་ལྷོར། ། མཁའ་སྙིང་འཇིག་རྟེན་དབང་ཕྱུག་ནི། ། ཀུན་ནས་ནུབ་ཏུ་བསྒོམ་པར་བྱ། ། སྒྲིབ་པ་རྣམ་པར་སེལ་བ་དང་། ། ཀུན་དུ་བཟང་པོ་བྱང་དུ་དགོད། ། ཞལ་ གསུམ་ཕྱག་དྲུག་རྣམ་པ་ཅན། ། གཡོན་ན་རལ་གྲི་དགོད་པ་དང་། ། ཕྱག་ན་རྡོ་རྗེ་དྲི་མེད་པའི། ། ཉི་མའི་དཀྱིལ་འཁོར་གྱི་ནི་གདན། ། ལྷ་མོ་རྣམས་ལ་ཟླ་བའི་གདན། ། སྣ་ཚོགས་པདྨའི་སྟེང་ན་གསལ། ། རྣམ་པར་སྣང་མཛད་རིགས་ལས་བྱུང་། ། མཚན་མའི་ཕྱག་རྒྱ་ལ་ སོགས་དགོད། ། ཤར་ལ་སོགས་པའི་སྒོ་རྣམས་སུ། ། གཤིན་རྗེ་གཤེད་ལ་སོགས་པ་དགོད། །
BOཞལ་གསུམ་ཕྱག་དྲུག་རྣམ་པ་ཅན། ། དེ་བཞིན་རལ་གྲི་གཡོན་ན་འཛིན། ། མི་གཡོ་ལ་སོགས་མཚམས་རྣམས་སུ། ། གཤིན་རྗེ་གཤེད་ཀྱི་རང་ངོ་བོ། ། ཞལ་གསུམ་ ཕྱག་དྲུག་རྣམ་པ་ཅན། ། གཡོན་ན་རལ་གྲི་རྣམ་པར་བསམ། ། གང་ཕྱིར་ཤེས་རབ་རང་བཞིན་གཡོན། ། དེ་བཞིན་གཡོན་ནས་རལ་གྲི་བརྗོད། ། གནོད་མཛེས་དེ་བཞིན་གཙུག་ཏོར་ནི། ། འོག་དང་སྟེང་དུ་རྣམ་པར་དགོད། ། ཁྲོ་བོ་རྣམས་ནི་ཉི་མར་བཞུགས། ། དེ་བཞིན་སྣ་ཚོགས་ པདྨའི་གདན། ། དེ་བཞིན་ཕྱག་རྒྱ་དབྱུག་ལ་སོགས། ། ཉེ་བར་མཚོན་ནས་དགོད་པར་བྱ། ། དེ་བཞིན་གཤེགས་པ་རྣམ་དག་པའི། ། རི་མོ་ལྔ་ནི་རྣམ་པར་དགོད། ། དེ་ལ་རྡོ་རྗེ་འབར་བའི་ཕྲེང་། ། ར་བ་ཡིས་ནི་ཡོངས་སུ་བསྐོར། ། རིན་ཆེན་དྲ་བ་རྔ་མ་དང་། ། ལྷ་མོ་རྣམས་ཀྱི་ སྣམ་བུ་ཡིས། ། ཀ་བ་རྟ་བབས་འཁོར་ལོར་མཚན། ། {རི་དགས་,རི་དྭགས་}རྣམས་ཀྱི་མཚན་པས་བརྒྱན། ། གདུགས་དང་རྒྱལ་མཚན་བ་དན་སོགས། ། རྔ་ཡབ་མེ་ལོང་ལ་སོགས་ཀྱིས། ། བརྒྱན་པ་རུ་ནི་རྣམ་པར་བཤད། ། སངས་རྒྱས་རྣམས་ཀྱིས་ཡང་དག་བརྟེན། ། སློབ་དཔོན་ མཆོག་གི་དཀྱིལ་འཁོར་ནི། ། རང་གི་ལུས་ཀྱི་གཟུགས་བརྙན་ནོ། ། རྡོ་རྗེ་སློབ་དཔོན་གྱིས་བྱ་བ། །
BOབགེགས་བསྐྲད་པ་ནི་སྔོན་སོང་བས། ། སུམྦྷའི་སྒྲ་དང་ནི་སུམྦྷ། ། ཐོག་མར་ཨོྃ་དང་ངོ་མཚར་ཆེ། ། ཧཱུྃ་གཉིས་ཕཊ་ཀྱི་མཐའ་དང་ལྡན། ། ཤར་གྱི་སྒོ་རུ་དགོད་པར་བྱ། ། ཨོྃ་དང་གྲྀཧྞ་གྲྀཧྞ་ཞེས། ། ཧཱུྃ་གཉིས་ཕཊ་དང་ཡང་དག་ལྡན། ། བློ་དང་ལྡན་པས་ལྷོ་རུ་དགོད། ། ཨོྃ་དང་གྲྀཧྞཱ་པ་ཡ་གཉིས། ། ཧཱུྃ་གཉིས་ཕཊ་ཀྱི་མཐའ་དང་ལྡན། ། ནུབ་ཏུ་ཡང་དག་སྤྲོ་བར་བྱ། ། ཨོྃ་ཨཱ་ན་ཡ་ཧོ་བྷ་ག ། བཱན་དང་བིདྱཱ་རཱ་ཛ་དང་། ། ཧཱུྃ་གཉིས་དང་ནི་ཕཊ་མཐར་ དགོད། ། དེ་རྗེས་ཡང་ནི་བྱང་དུ་དགོད། ། འདི་ཡིས་གདུག་པ་བཀུག་ནས་ནི། ། དེ་ནས་སྔགས་པས་ཕུར་པ་གདབ། ། སེང་ལྡེང་ལས་ནི་བྱས་པ་ཡི། ། ཕུར་བུ་སོར་ནི་བཅུ་གཉིས་ཚད། ། ཟུར་གསུམ་ཡི་གེ་གསུམ་གྱིས་མཚན། ། ཡི་གེ་བརྒྱ་པ་སོ་སོར་བཟླས། ། སྔགས་ཀྱི་ ཆུ་ཡིས་བསངས་ནས་ནི། ། ཕྱོགས་དང་མཚམས་སུ་དགོད་པར་བྱ། ། ཨོྃ་དང་ཡི་གེ་གྷ་ལན་གཉིས། ། དེ་བཞིན་གྷཱ་ཏ་ཡ་ནི་གཉིས། ། སརྦ་དཥྚཱཾ་ཕཊ་ཞེས་དང་། ། དེ་བཞིན་ཀཱི་ལ་ཡ་གཉིས་དང་། ། སརྦ་པཱ་པཾ་ཕཊ་དང་ནི། ། ཧཱུྃ་གསུམ་བཛྲ་ཀཱི་ལ་ཡ། ། བཛྲ་དྷ་ར་ཨཱཛྙཱ་པ་ ཡ་ཏི། ། ཀཱ་ཡ་བཱཀྩིཏྟ་བཛྲ་དང་། ། ཀཱི་ལ་ཡ་ཧཱུྃ་ཕཊ་ཡི་གེའི། །
BOམཐའ་ཅན་གྱི་ནི་ཕུར་བུས་གདབ། ། ཨོྃ་དང་བཛྲ་མུཏྒ་ར། ། བཛྲ་ཀཱི་ལ་ཡ་ཨཱ་ཀོ་ཊ། ། ཡ་དང་ཧཱུྃ་གཉིས་ཕཊ་མཐའ་དང་། ། སྔགས་དང་ཕུར་བུས་བརྡུང་བ་བརྗོད། ། དེ་རྗེས་བགེགས་ནི་ འཇུག་ལ་སོགས། ། བསྐྲད་དོན་རྡོ་རྗེ་ར་བ་དང་། ། སྟེང་དུ་མདའ་ཡི་དྲ་བ་དང་། ། འོག་ཏུ་སྣ་ཚོགས་རྡོ་རྗེ་དང་། ། གཙུག་ཏོར་གནོད་མཛེས་སྔགས་ཀྱིས་ནི། ། བྱིན་གྱིས་བརླབ་པའི་ཆོ་ག་ཡིས། ། བུམ་པ་བཅུ་འམ་ཡང་ན་དྲུག ། རིན་ཆེན་ལས་བྱས་རྣམ་དག་པ། ། སྨན་ལྔ་ དང་ནི་འབྲས་བུ་ལྔ། ། འབྲུ་ལྔ་ལ་སོགས་ཀྱིས་གང་བ། ། རིན་ཆེན་ལྔ་དང་སྣ་མ་སོགས། ། ལོ་མ་ལྔ་ཡིས་རྣམ་པར་བརྒྱན། ། གུར་གུམ་གླ་རྩི་ག་པུར་དང་། ། ཙནྡན་ཆུ་ཡིས་གང་བར་བྱ། ། མེ་ཏོག་ལ་སོགས་ཀྱིས་མཆོད་བྱ། ། རང་རང་སྔགས་ཀྱིས་བྱིན་གྱིས་བརླབ། ། བཛྲ་དྷྲྀག་དང་ཛི་ ན་ཛིག ། རཏྣ་དྷྲྀག་དང་ཨཱ་རོ་ལིཀ། ། དེ་བཞིན་པྲཛྙཱ་དྷྲྀཀ་སྔགས་དང་། ། ལྕགས་ཀྱུའི་རྣམ་པའི་འོད་ཟེར་གྱིས། ། འོག་མིན་འཇིག་རྟེན་ཁམས་ནས་ནི། ། བུམ་པ་རང་གིས་བསྐུར་བྱས་པ། ། དེ་ནས་སྤྱན་དྲངས་ནས་ནི་གཞུག ། དེ་ནས་ལྷ་མོའི་གཟུགས་སྤྲོས་ནས། ། དེ་རྗེས་ གཞན་ལ་དགོད་པར་བྱ། ། ཨོྃ་དང་རུ་རུ་སྥུ་རུ་དང་། །
BOདེ་ནས་ཛྭ་ལ་ཏིཥྛ་གསལ། ། དེ་བཞིན་སིད་དྷ་ལོ་ཙ་ནི། ། སརྦ་ཨརྠ་སཱ་དྷ་ནེ། ། སྭཱ་ཧཱ་ཞེས་ནི་དེ་ལ་བཟླས། ། སྤྱན་གྱི་རྣམ་པ་རྫོགས་ནས་ནི། ། བུམ་པའི་དབུས་སུ་མཆོད་པར་བྱ། ། ཨོྃ་དང་ཤཾ་ཀ་རེ་དང་ཡང་། ། དེ་ལས་ ཤཱནྟིཾ་ཀུ་རུ་དང་། ། དེ་བཞིན་གྷུཊྚི་གྷུཊྚེ་དང་། ། གྷུཊྚི་ནེ་དང་གྷུཊྚི་ནེ། ། གྷཱ་ཏ་ཡ་ནི་ལན་གཉིས་བརྗོད། ། སྭཱ་ཧཱའི་མཐའ་ཅན་སྔགས་བརྗོད་བྱ། ། མཱ་མ་ཀཱི་ཡི་རྣམ་པ་རྫོགས། ། བུམ་པའི་དབུས་སུ་མཆོད་པར་བྱ། ། ཨོྃ་དང་ཀ་ཊེ་བི་ཀ་ཊེ། ། ནི་ཀ་ཊེ་ཀ་ཊཾ་ཀ་ཊེ། ། ཀ་རོ་ཊ་ བཱིརྱེ་སྭཱ་ཧཱ། ། གོས་དཀར་རྣམ་པར་རྫོགས་ནས་ནི། ། བུམ་པའི་དབུས་སུ་མཆོད་པར་བྱ། ། ཨོྃ་དང་ཏཱ་རེ་ཏུཏྟཱ་རེ། ། ཏུ་རེ་སྭཱ་ཧཱ་དགོད་པར་བྱ། ། སྒྲོལ་མའི་རྣམ་པ་རྫོགས་ནས་ནི། ། བུམ་པའི་དབུས་སུ་མཆོད་པར་བྱ། ། གཤིན་རྗེ་གཤེད་སོགས་གཞན་རྣམས་ ལ། ། གཅིག་ལ་ལས་ནི་ཐམས་ཅད་པ། ། ཨོཾ་ན་མཿས་མནྟ་ཀཱ་ཡ་བཱཀྩིཏྟ་བཛྲཱཎཱཾ། ན་མོ་བཛྲ་ཀྲོ་དྷཱ་ཡ། མ་ཧཱ་དཾཥྚྲོ་ཏ་ཀ་ཊ་བྷཻ་ར་ཝཱ་ཡ། ཨ་སི་མུ་ས་ལ། ། བ་ར་ཤུ་པཱ་ཤ་ཧསྟཱ་ཡ། ། ཨོྃ་ཨ་མྲྀ་ཏ་ཀུཎྜ་ལི། ཁ་ཁ་ཁཱ་ཧི་ཁཱ་ཧི། ཏིཥྠ་ཏིཥྠ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། གརྫྫ་གརྫྫ།
BOབི་སྥོ་ཊ་ཡ་བི་སྥོ་ཊ་ཡ། སརྦ་བིགྷྣཱཾ་བི་ནཱ་ཡ་ཀཱན། མ་ཧཱ་ག་ཎ་པ་ཏི། ། ཛཱི་བི་ཏ་ཨནྟ་ཀ་རཱ་ཡ་ཧཱུྃ་ཕཊ་སྭཱ་ཧཱ། སྔགས་འདི་ལན་བདུན་བར་དུ་ནི། ། ལས་ནི་ཐམས་ཅད་པ་ཡིན་ཏེ། ། སྙིང་པོའི་སྔགས་ནི་བཟླས་བྱས་ལ། ། རིགས་ཀྱི་དབང་ཕྱུག་མཆོད་པར་བྱ། ། ཡི་ གེ་བརྒྱ་པའི་སྔགས་ཀྱིས་ནི། ། ལན་བདུན་བར་དུ་བསྒོམ་པར་བྱ། ། བརྒྱ་དང་རྩ་བརྒྱད་རིམ་པ་ཡིས། ། ཡི་གེ་གསུམ་ཡང་བཟླས་པ་ནི། ། དེ་ནས་རང་ལྷའི་རྣལ་འབྱོར་གྱིས། ། མཆོད་ཡོན་སྣོད་དུ་མཆོད་པར་བྱ། ། དེ་ནས་དུ་གུ་ལ་རས་ནི། ། ག་པུར་ཨ་ག་རུས་བདུགས་པ། ། བཀབ་ ནས་རང་རང་སྔགས་དང་ནི། ། དེ་ལ་རིམ་བཞིན་ལྷག་གནས་བྱ། ། ཞལ་གསུམ་ཕྱག་དྲུག་རྣམ་པ་ཅན། ། སྤྲིན་བྲལ་ནམ་མཁའ་ལྟ་བུའོ། ། དེ་ལྟ་བུ་ཡི་སྐུ་མདོག་ཕྱག ། རང་སྣང་བ་ཡི་སྐུ་ལ་འཁྱུད། ། ཨཱ་ལི་ཀཱ་ལི་ལས་བྱུང་བ། ། སྣ་ཚོགས་པདྨའི་གདན་ལ་བཞུགས། ། གཞལ་ཡས་ཁང་དབུས་ཉམས་དགའ་བའི། ། འོག་མིན་ཞིང་ཁམས་ན་བཞུགས་པའི། ། དཀྱིལ་འཁོར་འཁོར་དང་བཅས་པར་ནི། ། སངས་རྒྱས་ལྔ་ཡི་ཅོད་པན་ཅན། ། བསྒོམས་ནས་དེ་ལས་འོད་ཟེར་སྤྲོ། ། ཁ་དོག་ལྔ་དང་ལྕགས་ཀྱུ་ཡི། ། དེ་ཡི་སྤྱན་དྲངས་ སློབ་དཔོན་གྱིས། །
BOསྔགས་བརྗོད་ནས་ནི་སྤྱན་དྲང་བྱ། ། ཨེ་ཧྱེ་ཧི་དང་བྷ་ག་བཱ་ན། ། ས་མ་ཡ་མ་ནུ་སྨྲ་ར། ། ཏིཥྛ་གཉིས་དང་ས་མ་ཡ། ། དེ་ལ་ཨ་ནུ་སྨ་ར་གཉིས། ། སྐུ་གསུང་ཐུགས་ཀྱི་རྡོ་རྗེ་དང་། ། སྭཱ་ཧཱའི་མཐའ་ཅན་ལན་གསུམ་བརྗོད། ། འཇམ་པའི་རྡོ་རྗེ་ སྤྱན་དྲང་བྱ། ། དཀྱིལ་འཁོར་བ་དང་ཡང་དག་ལྡན། ། དཀྱིལ་འཁོར་དབུས་སུ་སྤྱན་དྲང་བ། ། རང་གི་གདན་གྱི་དབྱེ་བ་ལ། ། བཞུགས་ཤིང་ཡང་དག་མཆོད་པར་བྱ། ། རང་རང་སྔགས་དང་རིམ་ཇི་བཞིན། ། ལྷ་ཡི་མེ་ཏོག་སོགས་ཀྱིས་མཆོད། ། འཁོར་ལོ་ མཆོག་ནི་མཆོད་པར་བྱ། ། བདག་མིང་འདི་ཞེས་བགྱི་བ་འདིར། ། ཆོས་ཀྱི་དབྱིངས་ཀྱི་རང་བཞིན་གྲོང་། ། ཡོ་བྱད་ཅི་འབྱོར་པ་ཡིས་ནི། ། དཀྱིལ་འཁོར་མཆོད་པ་བགྱི་བར་འཚལ། ། ཐུགས་ཀྱིས་བརྩེ་བར་ཉེར་དགོངས་ཏེ། ། མགོན་པོས་མཆོད་པ་འདི་བཞེས་ཤིག ། ཨོྃ་སརྦ་ཏ་ཐཱ་ག་ཏཱ་ནཱཾ། ། བཱུ་ཛོ་པ་སྦྲཱ་ན་ཡཱ་ཨཱཏྨ་ནཾ་ནི་རྱཱ་ཏ་ཡཱ་མི། བླ་མས་ཡི་གེ་གསུམ་ནི་བརྗོད། ། ལྷ་ཡི་རྣམ་པར་བྱས་ནས་ནི། ། དེ་རྗེས་བདག་ལ་མཆོད་པར་བྱ། ། ཨོྃ་སརྦ་ཏ་ཐཱ་ག་ཏ། ། པཱུ་ཛཱ་བཛྲ་སྭ་བྷཱ་བ། ། ཨཱཏྨ་ཀོ྅་ཧཾ་ཞེས་ནི་བརྗོད། ། རང་ལྷའི་ང་རྒྱལ་བྱས་ནས་ ནི། །
BOཇི་ལྟར་བསྐྱེད་པའི་ཡུལ་རྣམས་དང་། ། གནོད་བྱེད་ཁ་ན་མ་ཐོ་མེད། ། ཞེ་སྡང་ཆེན་པོའི་རིགས་ལས་བྱུང་། ། དཀྱིལ་འཁོར་དབང་ཕྱུག་མཆོད་བྱ་ཞིང་། ། དེ་ནས་ལྷ་རྣམས་ལྷག་གནས་བྱ། ། ཡིད་འཕྲོག་སྣ་ཚོགས་ལྷ་ཡི་གོས། ། ག་པུར་ཨ་ཀ་རུ་ཡིས་བདུག ། སྔགས་ཀྱིས་དག་བྱས་དགབ་པར་བྱ། ། ཨོྃ་དང་ཏིཥྛ་བཛྲ་ཧོཿ། ། བརྗོད་ནས་དཀྱིལ་འཁོར་ལྷག་གནས་བྱའོ། ། ཨོྃ་དང་སྥ་ར་བཛྲ་ཧོཿ། ། བློ་དང་ལྡན་པས་སྔགས་འདི་བརྗོད། ། མེ་ཏོག་སྤར་བས་གཏོར་ནས་ནི། ། ལྷག་གནས་དེར་ནི་གཤེགས་པར་བྱ། ། རྣམ་པ་ ཀུན་དང་ཡང་དག་ལྡན། ། དཀྱིལ་འཁོར་མཆོག་ནི་མཐོང་བར་བྱ། ། རིགས་ལྔའི་རང་བཞིན་བཟང་པོ་ཡིས། ། བཅོམ་ལྡན་གཟུགས་བརྙན་བསྒོམས་ནས་ནི། ། མེ་ལོང་སོགས་ལ་ཁྲུས་བྱ་ཞིང་། ། དེ་བཞིན་རྫས་དང་འོ་མ་སོགས། ། ཇི་ལྟར་བལྟམས་པ་ཙམ་གྱིས་ ཀྱང་། ། དེ་བཞིན་གཤེགས་ཀུན་ཁྲུས་གསོལ་བ། ། དེ་བཞིན་བདག་གི་སྐུ་ཁྲུས་གསོལ། ། ཅོད་པན་དབང་ཕྱུག་རྡོ་རྗེ་སེམས། ། དབུས་སུ་ཡི་གེ་གསུམ་དང་སྤེལ། ། སྭཱ་ཧཱའི་མཐའ་ཅན་བརྗོད་པར་བྱ། ། ལས་ཀྱི་དེ་ཉིད་ཆོ་ག་ཤེས། ། དེ་རྗེས་སྦྱར་བའི་གཏོར་མ་བྱ། ། ཨོྃ་ སརྦ་ཨཱ་བ་ར་ཎ། ། ཤུདྡྷ་སརྦ་པཱ་པཾ་དང་། །
BOབི་ཤུདྡྷ་བཛྲ་ཧཱུྃ་ཕཊ། ། སྭཱ་ཧཱའི་མཐའ་ཅན་སྔགས་བརྗོད་བྱ། ། པདྨ་བསྐོར་བའི་ཕྱག་རྒྱ་དང་། ། ཡུངས་ཀར་དཀར་པོ་བསྲེགས་བྱས་ནས། ། ཉོན་མོངས་པ་ནི་སེལ་བར་བྱེད། ། འཁྱུད་ཅིང་བསྐོར་བས་དོར་བར་བྱ། ། དེ་ནས་ཆོ་ག་ བཞིན་ལེགས་མཆོད། ། སིལ་སྙན་གླུ་ལ་སོགས་པ་དང་། ། བཅོམ་ལྡན་འདས་ལ་དབུལ་བར་བྱ། ། རང་རང་སྔགས་དང་{གོ་རིམས་,གོ་རིམ་}བཞིན། ། ཨོྃ་སརྦ་ཏ་ཐཱ་ག་ཏ། ། བུཥྤ་པཱུ་ཛཱ་མེ་གྷ་དང་། ། ས་མུ་དྲ་དང་སྥ་ར་ཎ། ། ས་མ་ཡ་དང་ཤྲི་ཡེ་ཨཱཿ། ། ཧཱུྃ་གི་སྔགས་ནི་རྗེས་སུ་བརྗོད། ། རྫས་རྣམས་ཀུན་ལ་རང་མིང་ནི། ། གཟུགས་ལ་སོགས་པ་སྔ་མ་བཞིན། ། ཆོ་ག་བཞིན་དུ་ཡང་དག་བརྗོད། ། རྡོ་རྗེ་སེམས་དཔའ་ལེགས་བསྒྱིངས་པ། ། རྡོ་རྗེ་སློབ་དཔོན་ཆོ་ག་ཤེས། ། སྔགས་འདི་ཡིས་ནི་རབ་གནས་བྱ། ། ཨོྃ་དང་སུ་པྲ་ཏིཥྛ་དང་། ། བཛྲ་སྭཱ་ཧཱའི་མཐའ་ཅན་བཟླས། ། ཡི་གེ་གསུམ་གྱི་སྙིང་པོ་ནི། ། སྐུ་གསུང་ཐུགས་ལ་བཀོད་ནས་ནི། ། མེ་ཏོག་ཆར་ནི་དབབ་པར་བྱ། ། སློབ་དཔོན་སློབ་མའི་ཚོགས་དང་བཅས། ། གླུ་ཡིས་ཡང་དག་བསྐུལ་ནས་ནི། ། སད་པ་ན་ནི་ཕྱག་ཀྱང་བྱས། ། ལས་ཀུན་བདག་ཉིད་རྣལ་འབྱོར་བདག ། གཏོར་མ་དོན་ཀུན་ གྲུབ་པར་བྱེད། །
BOལས་ལ་བྱང་ཞིང་མཁས་པ་དང་། ། ཆོ་ག་བཞིན་དུ་བསྒྱིངས་བཅས་དང་། ། ཆང་དང་སྣ་ཚོགས་ཤ་དང་ནི། ། དེ་བཞིན་ལ་དུ་འོ་མ་དང་། ། འབྲས་ཆན་ཕྱེ་ཡི་ཁུར་བ་དང་། ། སྲན་ཁུར་བྱེ་བ་མང་པོ་དང་། ། མཆོད་ཡོན་མེ་ཏོག་སོགས་ཀྱིས་མཆོད། ། སྣོད་ བཅུ་ཆུ་ཡིས་གང་བ་ལའོ། ། གསུངས་པའི་ཁྲོ་བོ་བཅུ་སྔགས་ཀྱིས། ། སྔ་མ་བཞིན་དུ་ཆོ་ག་ཡིས། ། དེ་དབུས་འབྱུང་པོ་ཀུན་ལ་ནི། ། ངོ་མཚར་ཆེན་པོའི་གཏོར་མ་སྦྱིན། ། སྔ་མ་བཞིན་དུ་ཆོ་ག་ཡིས། ། ཏིལ་བསྲེགས་བཟའ་བས་ཁྱད་པར་དུ། ། བློ་དང་ལྡན་པས་སྔགས་བཟླས་བྱ། ། འདི་ནི་དོན་ཀུན་སྒྲུབ་བྱེད་པ། ། ཨོྃ་བྲཧྨ་དེ་བ་ཏཱ་སརྦ། ཨིནྡྲ་ད་ཤ་ལོ་ཀ་རཀྵ་ཀ། ནཱ་ག་གན་དྡརྦྦ་ཀུཾ་བྷཱཎྜ། ཡཀྵ་བྷཱུ་ཏ་ག་ཎཱཿ། ཏ་ཐཱ་བྲེ་ཏ་ཨུཏྒ་ཏ། པི་ཤཱ་ཙི་ཨ་པ་སྨཱ་ར། ཌཱ་ཀི་ནཱི་གྲ་ཧ། ། བིགྷྣཱཾ་མཱ་ཏྲྀ་ག་ཎཱ། སརྦྦ་ཏ་ཐཱ་ག་ཏ་ཨག་ནི་མ་ར་གྲ་ཧཱ། ། ཨོྃ་ཛོ་བྷཀྵ་མ་ཧཱ་ཏེ་ཛ། མ་ནུ་ཥྱ་ནཱ་མ། བི་ཧིཾ་ ས་ཀ། ། མུ་དྲཱ་མནྟྲ་ཨ་དྷི་དྷོ་བྷྱཿཙ། གྲ་ཧཱ་ནཀྵ་ཏྲ་མ་ནུ་ཥྱ། ཨི་མཾ་བ་ལིཾ། པྲ་གྲྀ་ཧྣནྟུ། སིདྡྷི་མྨེ་པྲ་ཡཙྪནྟུ་མེ་སན་དྷ། ས་ཏྱ་མ་ནེ་ཥུ་ཀར་མེ་ཥུ། སཏ་ས་ཧ་ཡ་བྷ་བན་ཏུ་ཙེ། དྷཱ་ན་དྷཱ་ན། སུ་པར་ནཉྩ།
BOདྷ་ཌཱནྟུ་མ་མ་ཏོ་ཥི་ཏ། ཨི་ཏི་ཨུ་པཱ་ཏྲཱ་ཎ་ཏྲོ་ཥ་ཎི་སཏྭཱ་ཏ་ནཱ་མ་ནཱ་ཤ་ཡནྟུ་ཙེ། ཐོག་མར་ཨོྃ་ དང་ཨཱཿཧཱུྃ་ཕཊ། ། སྭཱ་ཧཱའི་མཐའ་ཅན་ལས་ཀུན་བྱེད། ། དེ་ལྟར་སྔགས་འདི་སྣོད་ལ་བཟླས། ། རྡོ་རྗེ་སེམས་དཔའ་རྣམ་པར་རོལ། ། སློབ་མ་ལྷག་པར་གནས་པར་བྱ། ། མཚན་ཉིད་ཡོན་ཏན་གྱིས་བརྒྱན་པ། ། ཙནྡན་ག་པུར་གླ་རྩི་ཡི། ། ཆུ་ཡིས་ཀྱང་ནི་ཁྲུས་ བྱས་ཏེ། ། དད་པའི་ཆུ་ནི་འཆང་བ་ཡིས། ། སེམས་ཀྱི་དྲི་མ་རྣམ་པར་འཁྲུད། ། བདོག་བ་ཐམས་ཅད་གཏོང་བར་བྱེད། ། གོས་གཙང་བ་ནི་མཆོག་ཏུ་བགོ། ། ཁང་པ་བརྩེགས་མ་བྱས་ནས་ནི། ། རས་ཀྱི་ཡོལ་བ་ཀུན་ནས་བྲེ། ། ཡི་གེ་གསུམ་དང་ཡང་དག་ལྡན། ། རྡོ་ རྗེ་ཅན་གྱིས་སྔགས་ཆུ་ནི། ། ལན་བདུན་གདོང་ལ་གཏོར་བ་ཡིས། ། ལས་སྐྱེས་དྲི་མ་སྦྱོང་བར་བྱེད། ། དེ་ནས་ས་ཡི་སྙིང་པོ་སོགས། ། མིག་ལ་སོགས་ལ་རྣམ་པར་དགོད། ། སོར་མོ་དབུ་མ་གཉིས་ཀྱིས་ནི། ། དབང་པོ་སོ་སོ་ལ་རེག་པས། ། སྔགས་བརྗོད་བྱ་ཞིང་བྱིན་ གྱིས་བརླབ། ། ལུས་ཀྱི་དཀྱིལ་འཁོར་རྣལ་འབྱོར་གྱིས། ། ཨོྃ་དང་ཙཀྵུ་ཙཀྵུཿདང་། ། ས་མནྟ་དང་ཅཀྵུཿབཟླས། ། མཻ་ཏྲི་སཏྭ་ལོ་ཙ་ནེ། ། སརྦ་ཨརྠ་སཱ་དྷ་ནི། ། སྭཱ་ཧཱའི་མཐའ་དང་སྔགས་འདི་བརྗོད།
BO། མཐེ་བོ་གུང་མོ་ཡང་དག་སྦྱར། ། ཞབས་བསིལ་ཆུ་དང་མཉེས་ནས་ ནི། ། སྔགས་དེ་ལན་གསུམ་བཟླས་པར་བྱ། ། སློབ་མའི་མིག་ལ་སོ་སོར་ནི། ། མཐེ་བོའི་ཕྱག་རྒྱས་རེག་པར་བྱ། ། ཁྲུ་གང་བ་ལ་སོར་བཞི་པའི། ། སྐུད་པ་ཞགས་པ་འདྲ་པ་ལ། ། ཡི་གེ་བརྒྱ་པའི་སྔགས་ལན་གསུམ། ། བཟླས་ནས་ཞབས་བསིལ་ཆུས་བསང་བྱ། ། སྐུད་པ་ལན་གསུམ་དཀྲིས་པ་ནི། ། རྡོ་རྗེ་གསུམ་ནི་མདུད་པར་ལྡན། ། དཔུང་བ་གཡོན་པར་བཅིངས་པ་ནི། ། སྔགས་འདི་ལན་གསུམ་བརྗོད་པར་བྱ། ། ཨོྃ་དང་ལོ་ཙ་ནེ་ཡི་སྒྲ། ། ཡ་ཏ་ཏྭད་ཏཾ་སཾ་པྲ་ཏཾ། ། མི་བྷ་བི་ཤུདྡཱི་ཡི་སྒྲ། ། རྃ་དང་རཏྣ་ཏྲ་ཡཱ་ཡ། ། སིདྡྷི་ན་ནི་ད་ད་ཤ། ། ཡ་སྭཱ་ཧཱ་ཡི་སྔགས་འདི་ནི། ། ཐེག་པ་བླ་མེད་ལན་བདུན་བཟླས། ། སློབ་མ་ལ་ནི་མེ་ཏོག་གཏོར། ། དེ་ནས་རྡོ་རྗེ་འཆང་གིས་ནི། ། སོར་ནི་བཅུ་གཉིས་གཞལ་བ་ཡི། ། ཟུར་ནི་གསུམ་དུ་ཡོངས་སུ་བྱ། ། ཡི་གེ་གསུམ་གྱིས་བྱིན་བརླབ་བསྒོམ། ། སློབ་མའི་ལག་ཏུ་གཏད་ པར་བྱ། ། ཨོྃ་དང་པྲ་ཏི་བཛྲ་དང་། ། ས་མནྟ་དང་ཨི་ཤྭ་རི། ། ཨཱཿཧཱུྃ་སྭཱ་ཧཱའི་མཐའ་ཅན་སྔགས། ། བཟླས་ནས་སློབ་མས་དོར་བར་བྱ། ། སར་འབབ་པ་ཡི་ཕུར་བུ་སྟེ། ། ཕྱོགས་ནི་གང་དུ་ལྟ་བ་ཉིད། །
BOསློབ་དཔོན་དང་ནི་སློབ་མ་ཡིས། ། དེ་ཡི་ཕྱོགས་བལྟས་ཉལ་བར་བྱ། ། ནམ་ལངས་ཡང་དག་བླ་མ་ལ། ། ཇི་ལྟར་མཐོང་བའི་དོན་ཀུན་ཞུ། ། དེ་ལ་དམིགས་ནས་སྦྱིན་སྲེག་ནི། ། ཞི་བ་ལ་སོགས་རབ་དབྱེ་བས། ། ལས་ནི་ཐམས་ཅད་པ་ཉིད་དམ། ། བགེགས་ཞི་བ་ཡི་དོན་དུ་བྱ། ། རྡོ་རྗེ་སེམས་དཔའ་བསྒྱིངས་བཅས་པས། ། རྣལ་འབྱོར་ཇི་བཞིན་ ཆོ་ག་བཞིན། ། སྔར་བཞིན་འདིར་ཡང་གཏོར་མ་ནི། ། བགེགས་རྣམས་ཞི་ཕྱིར་སྦྱིན་པར་བྱ། ། དེ་ནས་གསོལ་འདེབས་སློབ་མ་ནི། ། རྡོ་རྗེ་སློབ་དཔོན་ཐུགས་རྗེས་ཁྱབ། ། ཐལ་མོ་སྦྱར་བར་བྱས་ནས་ནི། ། མདུན་དུ་འདུག་ནས་ཕྱག་བྱས་ཏེ། ། དགའ་ཆེན་ཁྱོད་བདག་སྟོན་པ་ བས། ། སློབ་དཔོན་ཁྱོད་ནི་དགོངས་སུ་གསོལ། ། བྱང་ཆུབ་ཆེན་པོའི་ཚུལ་བསྟན་པ། ། མགོན་པོ་ཆེན་པོ་བདག་འཚལ་ལོ། ། དམ་ཚིག་དེ་ཉིད་སྩལ་དུ་གསོལ། ། སྡོམ་པ་རྣམས་ཀྱང་བདག་ལ་སྩོལ། ། ཐར་པ་ཆེན་པོའི་གྲོང་མཆོག་ཏུ། ། མགོན་པོ་བདག་ནི་འཇུག་པར་ འཚལ། ། དེ་ནས་བླ་མས་དེ་ལ་ཡང་། ། བྱ་དང་མི་བྱ་གསུངས་པ་ནི། ། སེམས་ཅན་ལས་ཀྱི་སྲད་བུས་གདབ། ། རྡུལ་ཚོན་བཀྱེ་བའི་རིམ་པ་དགྱེ། ། འགྲོ་བ་འདི་དག་དཀྱིལ་འཁོར་ཏེ། ། རང་བཞིན་དག་པ་གཉིས་མེད་པའོ། །
BOཐོག་མར་དཀྱིལ་འཁོར་རྣལ་འབྱོར་བདག ། རྡོ་རྗེ་ སློབ་དཔོན་རང་ཉིད་བསྒོམ། ། སློབ་མ་བདག་ཉིད་འདྲར་དམིགས་ནས། ། དེ་འོག་ཐམས་ཅད་རབ་བསྒྲུབ་བྱ། ། བླ་མ་བཟང་ལ་དབང་བསྐུར་ཕྱིར། ། སློབ་མས་དེ་རྗེས་གསོལ་བ་གདབ། ། འདི་ནས་འཁོར་བའི་རྒྱ་མཚོ་ལ། ། ཉོན་མོངས་ཆུ་སྲིན་ན་ཀྲས་ཁྱབ། ། ལས་ཀྱི་རླུང་གིས་ དབའ་ཀློང་འཁྲུགས། ། བདག་བྱིན་ཐུགས་རྗེའི་རྒྱ་མཚོ་ཀྱེ། ། མི་ཤེས་ལིང་ཏོག་གིས་བསྒྲིབས་མིག ། ཉོན་མོངས་དབང་དུ་བྱ་བ་ནི། ། བདེ་བ་སྡུག་བསྔལ་འཇིགས་ལས་སྐྱོབ། ། ཐུགས་རྗེའི་རྒྱ་མཚོས་བདག་སྐྱབས་མཛོད། ། དེ་འདྲ་ཚིག་གསན་རྡོ་རྗེ་ཅན། ། ཐུགས་རྗེའི་ ཐུགས་ནི་ཡོངས་སུ་གང་། ། སློབ་མ་ལ་ནི་ཡོངས་སུ་གསུངས། ། བུ་ཁྱོད་དུས་འདི་ནས་བཟུང་སྟེ། ། རྡོ་རྗེ་ཐེག་པའི་གཞུང་ལུགས་བསྟན། ། རྣལ་འབྱོར་མཆོག་ནི་ཁྱོད་ཀྱིས་ཟུང་། ། རྡོ་རྗེ་སེམས་དཔའི་སྤྱོད་པའི་གནས། ། བུ་ཁྱོད་འདི་ནི་བདུད་རྩི་སྟེ། ། སྲུངས་ ཤིག་མ་སྲུང་ན་ནི་སྲེག ། བསྲུངས་ན་དངོས་གྲུབ་ཀུན་འགྲུབ་འགྱུར། ། ཉོན་མོངས་ཐམས་ཅད་སེལ་བའི་ཀླུང་། ། ཨོྃ་དང་པཉྩ་ཨ་མྲྀ་ཏ། ། ཨུ་ད་ཀ་དང་ཨཱཿཧཱུྃ་ཋ། ། སློབ་མས་བདུད་རྩི་ལྔ་བཏུང་བྱ། །
BOརྡོ་རྗེ་ཡེ་ཤེས་རྨད་བྱུང་བའོ། ། གསང་བ་དྲན་ན་སྐྱོན་འགྱུར་ཕྱིར། ། རྡོ་རྗེ་སློབ་མ་ལ་ནི་དབབ། ། དྲི་ཆེན་དྲི་ཆུ་ལ་སོགས་པ། ། མཚལ་ཆེན་འབབ་པའི་བུ་མོའི་གོས། ། ཁྲག་དང་ཁུ་བས་ཡང་དག་བསྒོས། ། གུ་གུལ་དང་ནི་རྣམ་པར་བསྲེས། ། {ཡི་དགས་,ཡི་དྭགས་}མེ་ནི་བླངས་ནས་སུ། ། པདྨའི་སྣོད་དུ་བཞག་ནས་ནི། ། དེར་ནི་ཐམས་ཅད་གཞུག་པར་བྱ། ། ཁྲོ་བོ་རྡོ་རྗེ་ གསུམ་བདག་ཉིད། ། གཡས་བརྐྱང་བ་ཡི་གནས་པས་གནས། ། རྡོ་རྗེ་འཆང་དབང་སློབ་མ་ལ། ། རྨད་བྱུང་ཆེན་པོའི་བདུག་པས་བདུགས། ། འབབ་པར་འགྱུར་བར་ཐེ་ཚོམ་མེད། ། ཨོྃ་ཏིཥྛ་མ་ཧཱ་ཀྲོ་དྷ། ། དེ་བཞིན་ཨཱ་བེ་ཤ་ཡ་ཧཱུྃ། ། རྣལ་འབྱོར་པ་ཡིས་སྔགས་འདི་བརྗོད། ། སློབ་མ་ལ་ནི་གསལ་བར་དབབ། ། བཛྲ་ས་ཏྭ་ཧི་མ་ཧེ། ། བིདྱ་རཱ་ཛ་ཡ་བིདྱ་མ་ཧེ། ། དེ་ལྟར་སྔགས་ནི་འདི་ཡིས་ཀྱང་། ། སླར་ཡང་སློབ་མ་དབང་བསྐུར་ནས། ། རང་བཞིན་གྱིས་དག་རང་གི་ལུས། ། དཀྱིལ་འཁོར་མཆོག་འདི་མཐོང་བ་ན། ། དེ་བཞིན་གཤེགས་དང་ལྷ་མོ་དང་། ། རྒྱལ་ བའི་སྲས་ཀྱི་ཡང་དག་གཞི། ། ཁྲོ་བོ་ཁྱབ་པའི་གསང་བའི་མཆོག ། རྡོ་རྗེ་སེམས་དཔའ་རྟེན་དང་ནི། ། ཕྱི་དང་ནང་གི་དཀྱིལ་འཁོར་ནི། །
BOགཉིས་པོ་དེ་ལ་བསྟན་པར་བྱ། ། སླར་ཡང་སློབ་མས་གསོལ་བ་གདབ། ། བདག་ལ་དབང་བསྐུར་མཛད་དུ་གསོལ། ། རྣམ་རྒྱལ་བུམ་པ་ བླངས་ནས་ནི། ། པདྨའི་སྣོད་ནི་བཟང་པོ་ལ། ། དེ་ཡི་དབུས་སུ་བློ་བཟང་པོ། ། ཧཱུྃ་རྡོར་ལས་བྱུང་མི་བསྐྱོད་བསྒོམ། ། རང་ཉིད་ཡེ་ཤེས་ས་བོན་གྱི། ། འོད་ཟེར་ཡང་དག་བསྐུལ་བས་བྱུང་། ། སླར་ཡང་ཡེ་ཤེས་སེམས་དཔའ་བསྒོམ། ། མི་བསྐྱོད་པ་ཡི་རྣམ་པ་མཆོག ། མི་བསྐྱོད་ངོ་བོ་དེ་ཉིད་ཀྱིས། ། རྣམ་པར་ཤེས་པའི་ཕུང་པོ་བསྒོམ། ། སློབ་མའི་མགོ་བོར་ལག་པ་བཞག ། རྡོ་རྗེ་སློབ་དཔོན་ཐུགས་རྗེས་ཁྱབ། ། ཨོྃ་དང་མ་ཧཱ་ས་ཏྭ་དང་། ། དེ་བཞིན་ཨཱི་ཤྭ་ར་ཏཾ་དང་། ། ཨ་བྷིཥཱི་ཉྩ་མི་སྭཱ་ཧཱ། ། ཨོྃ་སརྦ་ཏ་ཐཱ་ག་ཏ། ། ཨ་བྷི་ཥེ་ཀ་ས་མ་ཡ། ། ཤྲི་ཡེ་ ཨཱཿཧཱུྃ་དེ་ནས་བཟླ། ། ཆུ་ཡི་གཏིང་ནས་སློབ་མ་ལ། ། དབུ་རྒྱན་དབང་བསྐུར་དོན་དུ་ནི། ། ཅོད་པན་འཇིག་རྟེན་གསུམ་རྒྱལ་པོ། ། སེམས་ཅན་ཀུན་གྱི་དོན་སྒྲུབ་པ། ། སྙིང་རྗེས་ཁྱབ་པ་ངས་བྱིན་གྱིས། ། རྡོ་རྗེ་སེམས་དཔའི་ཡོན་ཏན་གནས། ། ས་བོན་ཏྲྃ་ལས་བྱུང་བ་ཡི། ། རིན་ཆེན་ འབྱུང་ལྡན་བསྒོམས་ནས་ནི། ། རི་མོ་དར་སོགས་ཅོད་པན་ཡང་། ། སློབ་མའི་མགོ་ལ་སྦྱིན་པར་བྱ།
BO། ཨོྃ་སརྦ་ཏ་ཐཱ་ག་ཏ། ། རཏྣ་མུ་ཀུ་ཊ་སྒྲ་དང་། ། དེ་བཞིན་སྒྲ་དང་པཱུ་ཛ་ཡ། ། ཨ་ཏིཥྛ་དང་ཨཱཿཧཱུྃ་དང་། ། སྔགས་འདི་དག་ནི་བརྗོད་ནས་ནི། ། མེ་ཏོག་མགོ་ལ་སྦྱིན་པར་བྱ། ། སློབ་ མ་རྡོ་རྗེ་དབང་བསྐུར་ཕྱིར། ། སླར་ཡང་བླ་མ་ལ་གསོལ་གདབ། ། ཡེ་ཤེས་ལྔ་ཡི་རང་བཞིན་དངོས། ། རྡོ་རྗེ་བརྟུལ་ཞུགས་ངས་བྱིན་གྱིས། ། གང་གིས་མ་རིག་སྒོ་ང་འབྱེད། ། ཡེ་ཤེས་ཐོབ་འགྱུར་ང་ཡིས་བྱས། ། ཧྲཱིཿལས་པདྨ་རྫོགས་པར་ནི། ། འོད་དཔག་མེད་དུ་རྣམ་པར་ བསྒོམ། ། རྡོ་རྗེ་ལག་པ་གཡས་པར་སྦྱིན། ། སློབ་མ་ལ་ནི་འདི་སྐད་བརྗོད། ། ངས་ཁྱོད་དེ་རིང་དབང་བསྐུར་བྱ། ། འདི་དེ་སངས་རྒྱས་ཐམས་ཅད་དེ། ། ཀུན་དུ་བཟང་པོའི་བརྟུལ་ཞུགས་བརྟན། ། དངོས་གྲུབ་བཟང་ཕྱིར་རྡོ་རྗེ་ཡོང་། ། ཁྃ་ལས་བྱུང་བའི་རལ་གྲིའམ། ། དོན་ཡོད་གྲུབ་ པའི་རང་ངོ་བོ། ། རྫོགས་པར་ལག་པ་གཡོན་པར་ནི། ། སློབ་མ་བསྒྱིངས་པའི་ཕྱག་རྒྱ་འཛིན། ། འདི་ནི་སངས་རྒྱས་ཐམས་ཅད་ཀྱི། ། དྲིལ་བུ་སྒྲ་ཡི་རྗེས་འགྲོར་བརྗོད། ། ཁྱོད་ཀྱིས་ཀྱང་ནི་རྟག་ཏུ་བཅང་། ། བྱང་ཆུབ་མཆོག་ནི་རྒྱལ་བའི་གཞི། ། རྡོ་རྗེ་དྲིལ་བུ་བཟུང་རྗེས་ལ། ། རྡོ་རྗེ་ སེམས་དཔའ་རང་ངོ་བོ། །
BOརང་བཞིན་ཡོན་ཏན་རྣམས་ཀྱིས་གང་། ། བདག་པོ་ཡི་ནི་རྣལ་འབྱོར་འགྱུར། ། རྣམ་པར་སྣང་མཛད་རང་ངོ་བོ། ། སློབ་མའི་མགོ་ལ་ལག་བཞག་སྟེ། ། རྡོ་རྗེ་ཅན་གྱིས་མིང་དབང་བསྐུར། ། གཟུགས་ཀྱི་ཕུང་པོ་རྣམ་པར་བསྒོམ། ། ཨོྃ་སརྦ་ཏ་ ཐཱ་ག་ཏ། ། ཆེ་གེ་མོ་ཞེས་བཛྲ་ས་ཏྭཾ། ། ཨ་བྷི་ཥཱིཉྩ་མི་སྭཱ་ཧཱ། ། ཕུང་པོ་ལྔ་ཡི་རྣམ་དག་པས། ། ཐོག་མར་ཆུ་ནས་མིང་གི་མཐར། ། དབང་བསྐུར་བ་ནི་མཆོག་ཏུ་ཤེས། ། རྨད་བྱུང་ཆེན་པོ་བཤད་པར་བྱ། ། སངས་རྒྱས་ལྔ་ནི་དག་པ་འདི། ། དབང་བསྐུར་ལྔ་ནི་ཐོབ་ བར་འགྱུར། ། མ་རིག་པ་ནི་བསལ་ནས་ནི། ། ཡེ་ཤེས་ལྔ་ནི་ཐོབ་པར་འགྱུར། ། དེ་ནས་རྡོ་རྗེ་སེམས་དཔའ་ཡི། ། སློབ་མ་འདོད་དོན་སྔགས་དབང་སྦྱིན། ། སྔགས་ཀྱི་དབང་བསྐུར་ཡེ་ཤེས་མཆོག ། ངས་བྱིན་དངོས་གྲུབ་སྟེར་བར་བྱེད། ། དེ་ནས་ཡི་གེ་དྲུག་སྔགས་ཕཊ། ། སྭཱ་ཧཱའི་མཐའ་ཅན་ཡི་གེ་གསུམ། ། ཁ་ནི་དམ་ཚིག་གིས་བཀང་ནས། ། སྔགས་ཀྱི་སྐུ་ཡིས་དག་པ་དང་། ། བླ་མའི་ཞལ་ལས་ཡང་དག་བརྗོད། ། བླ་མས་དངོས་གྲུབ་སྦྱིན་བྱའི་ཕྱིར། ། འདི་ནི་སངས་རྒྱས་ཐམས་ཅད་ཀྱི། ། སྙིང་པོ་ཡི་ནི་ཡེ་ཤེས་མཆོག ། སངས་རྒྱས་ཐམས་ཅད་ བསྡུས་པ་ནི། །
BOཁྱོད་ཀྱིས་ཀྱང་ནི་རྟག་ཏུ་བཅང་། ། དེ་ནས་སློབ་མ་སྤྱོད་བརྟུལ་ཞུགས། ། སྣ་ཚོགས་བསམ་པའི་བྱེ་བྲག་གིས། ། གང་གི་སྤྱོད་པ་རྣམ་དག་པ། ། འདོད་ལ་ཐུགས་རྗེའི་གཙོ་བོ་ཡིས། ། སེམས་ཅན་དོན་ནི་བྱེད་པའི་ཐབས། ། ང་ཡིས་སྤྱོད་པའི་བརྟུལ་ཞུགས་སྦྱིན། ། དེ་ ནས་གླེགས་བམ་དུང་ལ་སོགས། ། མདའ་གཞུ་རལ་གྲི་འཁོར་ལོ་དང་། ། སྔོན་བཞིན་སྔགས་ཀྱིས་དག་པར་བྱེད། ། སློབ་མའི་ལག་ཏུ་རིམ་བཞིན་སྦྱིན། ། འདི་ནི་ཀུན་བཟང་སྤྱོད་བརྟུལ་ཞུགས། ། བསམ་པ་སྣ་ཚོགས་རྣམ་དག་བྱེད། ། ཁྱོད་ཀྱིས་ཀྱང་ནི་རྟག་ཏུ་བཅང་། ། སེམས་ ཅན་ཀུན་གྱི་དོན་གྱིས་བྱོས། ། ཨོཾ་སརྦ་ཏ་ཐཱ་ག་ཏ། ། དེ་བཞིན་དྷྲཱི་ཊ་ར་ཏྭྃ་དང་། ། དྷ་རྱ་མི་ཨཱཿཧཱུྃ་དང་། ། དེ་ལྟར་སྔགས་འདི་དགོད་པར་བྱ། ། དེ་ནས་ལུང་བསྟན་ཐོབ་དོན་དུ། ། བསམ་པ་དང་བས་བླ་མ་ལ། ། ད་ལྟར་སངས་རྒྱས་རིགས་སུ་འཇུག ། ཁྱེད་ཀྱིས་བདག་ལ་ལུང་བསྟན་གསོལ། ། དོན་ཡོད་རྡོ་རྗེ་ཞེས་བྱ་ཁྱོད། ། རིགས་ཀྱི་དབང་ཕྱུག་ལུང་བསྟན་བྱ། ། དེ་ནས་སློབ་མ་དབུགས་དབྱུང་འདོད། ། བླ་མའི་ཞལ་སྔ་ནས་ནི་སྐྱེ། ། མགོན་པོ་ཡང་དག་བདག་དབུགས་ཕྱུང་། ། བྱང་ཆུབ་སྤྱོད་པའི་བརྟུལ་ཞུགས་བརྟན། །
BOདེ་ནས་རྡོ་རྗེ་ཆོས་གོས་མཐའ། ། གཡོན་པའི་ལག་ པས་བཟུང་ནས་ནི། ། གཡས་པ་མི་འཇིགས་སྦྱིན་བྱས་ལ། ། དབུགས་དབྱུང་བ་ཡི་མཆོག་བྱ་བ། ། ང་ཡིས་རྡོ་རྗེ་གསུང་བདག་ཁྱོད། ། སངས་རྒྱས་ཀུན་གྱི་གོ་འཕང་མཆོག ། རྡོ་རྗེ་སེམས་དཔའ་མངོན་པར་བརྗོད། ། ཁམས་གསུམ་གྱི་ནི་རྒྱལ་པོ་ཆེ། ། དཔལ་ལྡན་ཡོན་ཏན་ འབྱུང་གནས་བདག ། བདུད་ཀྱི་སྟོབས་ནི་ཀུན་ལས་རྒྱལ། ། གྲོང་ཁྱེར་མཆོག་ཏུ་ཁྱོད་ཞུགས་སོ། ། དེ་ནས་སློབ་མ་དོན་འདོད་ལ། ། ཕྱིར་མི་ལྡོག་པའི་དབང་བསྐུར་བྱ། ། ཕྱིར་མི་ལྡོག་པའི་དབང་བསྐུར་ཆེ། ། རྡོ་རྗེ་སེམས་དཔའ་བདག་ལ་སྩོལ། ། དེ་ནས་ཡེ་ཤེས་རྡོར་དབང་ ཕྱུག ། ཡེ་ཤེས་སེམས་དཔའི་འོད་ཟེར་གྱིས། ། སྤྱན་དྲངས་སངས་རྒྱས་ལྔ་ལ་སོགས། ། ལྷ་མོའི་འཁོར་ལོ་རིམ་བཞིན་འབྱུང་། ། དེ་ཡིས་ཡེ་ཤེས་ཆུས་བཀང་པའི། ། བུམ་པ་ཕྱག་བསྣམས་དེ་བཞིན་གཤེགས། ། རྡོ་རྗེ་འཛིན་དང་རྒྱལ་བ་རྒྱལ། ། རིན་ཆེན་འཛིན་དང་ འཁོར་བ་སྒྲོལ། ། ཤེས་རབ་འཆང་ནི་རིམ་པ་བཞིན། ། གཏི་མུག་ཞེ་སྡང་འདོད་ཆགས་ལ། ། དེ་བཞིན་རྡོ་རྗེ་དགའ་མ་སོགས། ། གཤིན་རྗེ་མཐར་བྱེད་ཤེས་མཐར་བྱེད། ། པདྨ་མཐར་བྱེད་བགེགས་མཐར་བྱེད། །
BOའདི་ཡིས་ཀུན་ནས་དབང་བསྐུར་བས། ། རྡོ་རྗེ་སློབ་མ་རྣམ་པར་ བསམ། ། དབང་བསྐུར་བ་ནི་རྡོ་རྗེ་ཆེ། ། ཁམས་གསུམ་ཀུན་གྱིས་ཕྱག་བྱས་པ། ། གསང་བ་གསུམ་གྱི་གནས་ལས་བྱུང་། ། སངས་རྒྱས་ཀུན་ནི་ང་ཡིས་སྦྱིན། ། དེ་ནས་དེ་བཞིན་གཤེགས་ལྷ་མོ། ། ཁྲོ་བོ་རང་གི་གནས་སུ་དགོད། ། འཇམ་དཔལ་རྣམ་པར་བསྒོམས་ནས་ནི། ། ཡེ་ ཤེས་རྡོ་རྗེས་རྣམ་པར་བརྒྱན། ། ཨོྃ་དང་སུ་པྲ་ཏིཥྛ་དང་། ། བཛྲ་སྭཱ་ཧཱ་ཞེས་ནི་དགོད། ། བློ་བཟང་གིས་ནི་སྔགས་བརྗོད་ནས། ། སློབ་མ་ལ་ནི་མེ་ཏོག་གཏོར། ། དེ་ནས་མེ་ཏོག་སོགས་ཀྱིས་མཆོད། ། སློབ་མའི་དཀྱིལ་འཁོར་འཁོར་ལོ་འདྲ། ། ཐུགས་རྗེས་ཁྱབ་པའི་ བླ་མ་ཡིས། ། དེ་ནས་སློབ་མ་རྗེས་གནང་བྱ། ། དེ་ཉིད་ཤེས་པའི་རྣལ་འབྱོར་པས། ། མི་བྱ་བ་ནི་ཅི་ཡང་མེད། ། དཔལ་ཆེན་ཁྱོད་ཀྱིས་བཀའ་དྲིན་གྱིས། ། ད་ནི་འདོད་ཡོན་ལྔ་ལ་སྤྱོད། ། སྒྱུ་མ་རྨི་ལམ་འདྲར་ཤེས་ནས། ། རྟེན་འབྲེལ་ལས་བྱུང་ཆོས་རྣམས་ནི། ། གཟུགས་བརྙན་ལྟ་བུར་ཤེས་ནས་ནི། ། སེམས་ཅན་དོན་ནི་མཉམ་མེད་བྱོས། ། བྱ་བ་བྱས་པའི་སློབ་མ་ནི། ། ཅི་བདེ་བར་ནི་བསྒྲུབ་པར་གྱིས། ། དེ་ནས་བླ་མ་ལ་ཡོན་དབུལ། ། བསྟོད་ཅིང་ཀུན་ནས་ཕྱག་ཀྱང་བྱ། །
BOསྐྱེ་བོ་བཟང་དང་ལྷན་ཅིག་ཏུ། ། དེ་ནས་བླ་མ་གསང་ དོན་གཉེར། ། ཐུར་དུ་ཁ་བལྟས་ཁ་སྦྱར་ཏེ། ། ཇི་ལྟར་བདག་ཉིད་ཆེན་པོ་ཁྱེད། ། བདག་ཀྱང་དེ་དང་འདྲ་བར་མཛོད། ། དེ་ནས་རིགས་ལྔ་ལས་བྱུང་བའི། ། ལས་དང་ཆོས་སོགས་དབྱེ་བ་ཡིས། ། སྔགས་ཀྱི་ཐེག་པས་ལྷག་པར་གྲོལ། ། སྐལ་ལྡན་བུད་མེད་ཕྱག་རྒྱར་བཤད། ། སྐྱེ་ བོས་དབེན་པའི་མཚན་ཕྱེད་ན། ། རོ་ཡི་གཞི་ཡི་གནས་སོང་ནས། ། ཐུགས་རྗེ་ཆེན་པོས་ཁྱབ་པ་ཡི། ། རྡོ་རྗེ་སློབ་དཔོན་ཡོན་ཏན་འབྱུང་། ། ཇི་ལྟར་དེ་ལྟར་རྙེད་ཕྱག་རྒྱ། ། སྙོམས་འཇུག་ལ་ནི་གང་བྱུང་བའི། ། བླ་ན་མེད་པའི་རང་བཞིན་གྱི། ། སངས་རྒྱས་ཐམས་ཅད་འདུས་པ་ནི། ། རྣལ་འབྱོར་མ་ཡི་ཡང་དག་ལྟུང་། ། ཀུན་རྫོབ་བྱང་ཆུབ་སེམས་གང་ཡིན། ། གསང་བ་དེ་ཡིས་དབང་བསྐུར་བྱ། ། འདི་དེ་སངས་རྒྱས་ཐམས་ཅད་ཀྱི། ། དམ་ཚིག་ཆེན་པོ་རྣམ་བྱུང་བ། ། ཁམས་ལྔ་ལས་བྱུང་བཅུད་ཀྱིས་ལེན། ། བདེ་བ་ཆེན་པོས་མྱོང་བར་གྱིས། ། སློབ་མ་ རྟོག་པ་དང་བྲལ་བས། ། པདྨ་ལ་གནས་དེ་མྱང་གྱིས། ། འདས་པའི་རྡོ་རྗེ་འཆང་བ་ཡིས། ། རྒྱལ་སྲས་ཇི་ལྟར་དབང་བསྐུར་བ། ། བྱང་ཆུབ་སེམས་ཀྱི་ཆུ་ཡིས་ནི། ། བུ་ཁྱོད་དེ་བཞིན་དབང་བསྐུར་བྱ། །
BOདེ་ནས་ཤེས་རབ་དབང་བསྐུར་ཕྱིར། ། བླ་མས་དོན་འདོད་སློབ་མ་ལ། ། དངོས་ གྲུབ་ཐམས་ཅད་བསྡུས་པ་ནི། ། བདག་ལ་ཁྱེད་ཀྱིས་དབང་བསྐུར་སྩོལ། ། དེ་ནས་སློབ་དཔོན་བདག་ཉིད་ཆེ། ། ཕྱག་རྒྱ་ཡང་དག་བྱིན་གྱིས་རློབ། ། མཆོག་ནི་ཐོབ་པར་བྱ་བའི་ཕྱིར། ། དེ་འོག་སློབ་མ་ལ་ནི་སྦྱིན། ། ལྷ་མོ་ཕྱག་རྒྱ་ཆེན་པོ་འདི། ། དཔག་མེད་བདེ་བ་རབ་སྟེར་བ། ། བུ་ཡིས་ཀུན་ནས་བླངས་ནས་ནི། ། བླ་ན་མེད་པའི་མཆོད་པ་གྱིས། ། དེ་ནས་ཤེས་རབ་ཡེ་ཤེས་དེའི། ། སྒྲུབ་པོ་མཆོག་ཏུ་འདོད་པའི་དོན། ། ལྷ་མོའི་ཡེ་ཤེས་དེ་ཉིད་མཆོག ། དངོས་གྲུབ་དོན་དུ་ང་ཡིས་སྦྱིན། ། ལྷ་མོས་དེ་ལ་བཀའ་བསྒོ་བ། ། དཔའ་བོའི་བུ་ནི་བླ་ན་མེད། ། དཔའ་ བོ་ཁྱོད་ནི་སྤྲོའམ་ཅི། ། བྱང་ཆུབ་སེམས་ནི་ཟ་ནུས་སམ། ། ཡང་དག་དེ་ནི་ངེས་པར་ནི། ། ཇི་ལྟར་འདོད་པ་བཞིན་དུ་སྨྲོས། ། ཇི་ལྟར་གསུངས་པའི་དམ་ཚིག་མཆོག ། ལྷ་མོ་ཅི་ཕྱིར་བདག་མི་ནུས། ། དེ་ནས་ལྷ་མོ་དེ་དགྱེས་ནས། ། སྐྲ་བཀྲོལ་གོས་ནི་བོར་ནས་ཀྱང་། ། པདྨ་དག་ནི་ འབྱེད་བྱེད་ཅིང་། ། བྷཉྫ་མོ་ཀྵ་ཧོ་ཞེས་གསུངས། ། བྷ་གའི་པདྨའི་དབུས་གནས་པ། ། བདེ་བ་ཀུན་དུ་རྒྱུ་བའི་རྩ། ། སོར་མོས་བསྐུལ་ནས་དགའ་བར་བྱ།
BO། ཛི་ཧྭས་ཀྱང་ནི་རོལ་བར་བྱ། ། ལྷན་ཅིག་སྐྱེས་པའི་བདེ་བྱེད་པ། ། འདི་ཉིད་རིག་པ་བཟང་བསྟེན་ན། ། མཆོག་ཏུ་དགའ་ བས་ཉམས་མྱོང་ནས། ། ལྷུང་བའི་བདེ་བས་དེ་མྱང་བྱ། ། དེ་ནས་བཅོམ་ལྡན་མ་དགྱེས་ནས། ། བྷཉྫ་མོཀྵའི་སྔགས་གསུང་ཞིང་། ། རྐང་པ་གཡོན་པ་མགོ་ལ་བཞག ། བཀའ་ཡིས་དེ་ཉིད་ཡང་དག་བསྟན། ། དེ་རིང་ཕན་ཆད་བུ་ཁྱོད་ཀྱིས། ། ཇི་སྲིད་བྱང་ཆུབ་སྙིང་པོའི་བར། ། རྨི་ལམ་བཞིན་དུ་སེམས་ཅན་གྱི། ། བླ་ན་མེད་པའི་དོན་བྱོས་ཤིག ། བསྐྱེད་པའི་རིམ་པ་བསྒོམ་པ་ཡི། ། མན་ངག་ལས་ནི་འདི་མི་ཤེས། ། རིག་པ་འདི་ནི་དོར་བྱས་ན། ། ཐབས་གཞན་གྱིས་ནི་སངས་མི་རྒྱ། ། བརྟུལ་ཞུགས་རྣམས་ཀྱི་མཆོག་གི་མཆོག ། རིག་པའི་བརྟུལ་ ཞུགས་བུ་ཡིས་སྤྱོད། ། དེ་ལྟར་འདི་ནི་བྱང་ཆུབ་མཆོག ། རྡོ་རྗེ་རྣལ་འབྱོར་རྣལ་འབྱོར་མ། ། རིམ་པ་བཞིན་དུ་ཡོངས་ཤེས་བྱ། ། རྡོ་རྗེ་སེམས་དཔའི་གོ་འཕང་རྟེན། ། བདག་ལ་གོ་འཕང་མཆོག་སྩོལ་ལགས། ། ཏིང་འཛིན་ཀུན་གྱིས་འབྲས་བུ་གསལ། ། སེམས་ཅན་ཀུན་ལ་ ཅི་འདོད་པར། ། དངོས་གྲུབ་བླ་ན་མེད་པ་གསོལ། ། སླར་ཡང་གཤེགས་པར་མཛད་པའི་ཕྱིར། ། རང་གི་གནས་གཤེགས་བཛྲ་མུཿ། ། དེ་ནས་ལྷག་མའི་གཏོར་མ་སྦྱིན། །
BOའཁོར་ལོ་ལྷག་པར་འབྱུང་བའི་རིམ། ། ཨུ་ཙྪིཥྚ་ཀྵེ་ཏྲ་པ་ལ། ། ཨ་ཏི་ཙཀྲ་ཨུ་ཙྪིཥྚ། ། སུ་བྷོ་ཛ་ནྃ་བི་བ་གཉིས། ། བྷུཀྵ་གཉིས་དང་སརྦ་དང་། ། སིད་དྷིཾ་པྲ་ཡཙྪ་མེ་དང་། ། ཨོྃ་སྔོན་ཨཱཿཧཱུྃ་ཕཊ་སྭཱ་ཧཱ། ། དེ་ཡི་རྗེས་ལ་བརྗོད་པར་བྱ། ། རྡོ་རྗེ་དྲིལ་བུ་འཆང་འགྱུར་བ། ། གཡོན་བརྐྱང་བ་ཡི་གནས་པས་གནས། ། ཁམས་གསུམ་རྣམ་རྒྱལ་རང་བཞིན་དང་། ། རྡོ་རྗེ་སློབ་དཔོན་རང་བཞིན་ནི། ། ཁམས་ གསུམ་རྣམ་རྒྱལ་རང་བཞིན་འཆང་། ། དེ་ལྟར་ཆོ་ག་ཉི་ཤུ་ལས། ། བསྐྱེད་པའི་རིམ་པའི་མཚན་ཉིད་བསྟན། ། དེ་ཉིད་མང་དུ་ཤེས་པ་ཡིས། ། བླ་མ་དགེ་བའི་ལས་བཟང་པོ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཆོ་ག་ཉི་ཤུའི་ ལས་རྒྱས་པའི་ལེའུ་སྟེ་ལྔ་བཅུ་བཞི་པའོ། ། ། ། དེ་ནས་གཞན་ཡང་བཤད་བྱ་བ། ། དེ་ཡི་རྒྱུ་མཚན་འབྲས་བུ་ནི། ། ལས་ནི་ཆོ་ག་ཉི་ཤུར་བཤད། ། དབང་ཕྱུག་ཆེན་པོའི་རྒྱུ་མཚན་ཅི། ། དེ་ཡི་འབྲས་བུ་ཅི་ཞིག་འགྱུར། ། ཆེན་པོའི་ཆེན་པོ་ཇི་སྐད་གསུངས། ། དེ་ནས་བཅོམ་ ལྡན་རྡོ་རྗེས་གསུངས། ། ལས་ཀྱི་རྒྱུ་མཚན་འབྲས་བུ་དང་། ། སྔོན་དུ་བསྙེན་པའི་ལས་ཀྱིས་ནི། །
BOརྒྱུ་མཚན་འཇིག་རྟེན་དངོས་གྲུབ་བརྒྱད། ། སེར་སྣ་ལ་སོགས་བསལ་བའི་ཕྱིར། ། སངས་རྒྱས་མཆོད་པ་རྣམ་བསྒོམ་ཞིང་། ། སྦྱིན་པ་ཚུལ་ཁྲིམས་བཟོད་པ་དང་། ། བརྩོན་ འགྲུས་བསམ་གཏན་རབ་ཏུ་རྫོགས། ། ཤེས་རབ་ཡེ་ཤེས་དབང་བསྐུར་གྱིས། ། ཤེས་རབ་ཕ་རོལ་ཕྱིན་པ་རྫོགས། ། གསང་བ་ལ་སོགས་ལ་གནས་པ། ། སྐྱེ་བོ་ཆགས་པའི་རྒྱུ་མཚན་ནོ། ། ཀུན་དུ་སྤྱོད་པའི་ཆོས་རྣམས་ཀྱིས། ། མཉམ་ཉིད་ཡེ་ཤེས་རྒྱུ་ཡིས་ནི། ། བླ་མ་དད་པས་ མཆོད་པ་ནི། ། རྡོ་རྗེ་སེམས་དཔའི་གོ་འཕང་དོན། ། ཆུ་སོགས་མིང་ནི་མཐར་ཐུག་པ། ། ཡེ་ཤེས་ལྔ་ཡི་རྣམ་དག་ཕྱིར། ། སྤྱོད་པ་ཕྱིར་མི་ལྡོག་པའི་མཐའ། ། སེམས་ཅན་བསམ་པ་རྣམ་དག་ཕྱིར། ། ཤེས་རབ་བརྟུལ་ཞུགས་སོགས་ཀྱི་མཐའ། ། དཔེ་ཡིས་བདེ་བ་བསྟན་པའི་ ཕྱིར། ། དཀྱིལ་འཁོར་ས་ཚོན་ཕྲ་རབ་དང་། ། མཚུངས་པ་དེ་བཞིན་གཤེགས་པ་ཀུན། ། མཆོད་པ་ཉིད་དུ་འགྱུར་བ་དང་། ། དེ་ལྟར་འབྲས་བུ་འཁོར་ལོ་འཇུག ། སངས་རྒྱས་ཐམས་ཅད་མཆོད་པ་ནི། ། ལས་ཀྱི་སྒྲིབ་པ་དག་པར་འགྱུར། ། ཤིན་ཏུ་རྣམ་དག་ཆོས་ཀྱི་དབྱིངས། ། དབང་ བསྐུར་བ་ནི་ཐོབ་པ་དང་། ། དངོས་པོའི་ངོ་བོ་ཇི་བཞིན་དུ། ། ཤེས་རབ་ཡེ་ཤེས་ཀྱིས་ནི་ཐོབ། །
BOབླ་མ་ཡིས་ནི་སྒྲུབ་པ་ཡང་། ། མཆོད་པ་དེ་ཡི་གོ་འཕང་མཆོག ། དེ་ལྟར་ཡུན་མི་རིང་བར་འཐོབ། ། དག་པའི་སྤྱོད་པ་བརྟུལ་ཞུགས་མཆོག ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ ཕྲེང་བ་མངོན་པར་རྟོགས་པ་ལས་ཆོ་ག་ཉི་ཤུ་པའི་རྒྱུ་མཚན་དང་འབྲས་བུ་བསྟན་པའི་ལེའུ་སྟེ་ལྔ་བཅུ་ལྔ་པའོ། ། ། ། དེ་ནས་རྡོ་རྗེ་སེམས་དཔས་གསུངས། ། མཆོད་པའི་ཆོ་ག་བླ་ན་མེད། ། གཉིས་མེད་མཉམ་པའི་རྣལ་འབྱོར་གྱིས། ། ལུས་ལ་མཆོད་པའི་ཆོ་གའི་རིམ། ། རྡོ་ཤིང་ ས་དང་གསེར་གྱི་ནི། ། སྐུ་གཟུགས་ལ་ནི་ཕྱག་མི་བྱ། ། རབ་གནས་དཀྱིལ་འཁོར་སྦྱིན་སྲེག་དང་། ། དེ་ནས་ནམ་ཡང་མི་བྱའོ། ། དྲི་ཆེན་རྡོར་ཆུ་དཀོན་མཆོག་སོགས། ། བདག་ཉིད་ལྔ་ནི་རྟག་ཏུ་མཆོད། ། དེ་ཕྱིར་དེ་ལ་མངོན་ཞུགས་པའོ། ། ཐུགས་ཀྱི་རྡོ་རྗེ་རང་ཉིད་གཙོ། ། སེམས་ དེ་ཡང་ནི་དེ་དངོས་མེད། ། གང་ཕྱིར་སྟོང་ཉིད་མཚན་ཉིད་ནི། ། སྟོང་ཉིད་ཀྱང་ནི་རྣམ་པ་མེད། ། དེ་ཕྱིར་ཐམས་ཅད་ནམ་མཁའ་འདྲ། ། དེ་ལྟར་རྣམ་དག་རྣམ་ཤེས་ཀྱང་། ། རྩ་ནི་གསུམ་ལའང་མཆོད་པར་བྱ། ། གང་ཕྱིར་སེམས་ཀྱི་རང་བཞིན་ཀུན། ། སེམས་ལས་གཞན་པ་ཡོད་ མ་ཡིན། ། རང་ཉིད་རྡོ་རྗེ་སེམས་དཔའ་དང་། །
BOསེམས་ཀྱི་རང་བཞིན་ལ་ནི་གནས། ། ལྷ་ཡི་གཟུགས་ནི་བླ་མེད་པ། ། སེམས་མ་གཏོགས་པ་གཞན་ནི་མེད། ། དེ་ཕྱིར་དེ་ལྟར་རྣམ་དཔྱོད་པ། ། རང་ལུས་གཅིག་བུ་རྟག་ཏུ་མཆོད། ། རིགས་ལྔ་དག་ཏུ་རྟག་སྤྱོད་པས། ། རིགས་ གཅིག་ཏུ་ནི་རྣམ་པར་བརྟག ། འདོད་དང་མི་འདོད་དབྱེ་བ་དང་། ། བཏུང་དང་མི་བཏུང་རྣམ་པར་སྤངས། ། རྣལ་འབྱོར་སྐལ་ཡོད་སྐལ་མེད་ཅེས། ། ནམ་ཡང་སྨྲ་བར་མི་བྱའོ། ། ཕྱག་རྒྱའི་རྣམ་པ་སྔོན་པོ་སོགས། ། དེ་བཞིན་གཟུགས་ལའང་དབྱེ་བ་གསུམ། ། གཟུགས་རྡོ་རྗེ་མ་ བཀུག་ནས་སུ། ། ས་སྙིང་ལ་ནི་དབུལ་བར་བྱ། ། ཡང་དག་གླུ་དང་བརྗོད་བྲལ་དབྱངས། ། དེ་བཞིན་སྒྲ་ལའང་དབྱེ་བ་གསུམ། ། སྒྲ་རྡོ་རྗེ་མ་ཡང་དག་དགུག ། ཕྱག་ན་རྡོ་རྗེ་ལ་ནི་དབུལ། ། ག་པུར་ཨ་གར་ཛཱ་ཏི་སོགས། ། དེ་བཞིན་དྲི་ཡང་དབྱེ་བ་གསུམ། ། དྲི་རྡོ་རྗེ་མ་ཡང་དག་ དགུག ། ནམ་མཁའི་སྙིང་པོ་ལ་ཡང་དབུལ། ། འོ་བྱེད་པ་དང་འཇིབ་པ་དང་། ། རོ་དྲུག་དེ་བཞིན་དབྱེ་བ་གསུམ། ། རྡོ་རྗེ་རོ་མ་ཡང་དག་དགུག ། འཇིག་རྟེན་དབང་ཕྱུག་ལ་ནི་དབུལ། ། རྡོ་རྗེ་པདྨ་ཡང་དག་སྦྱོར། ། གོས་དང་འཁྱུད་པའི་དབྱེ་བ་གསུམ། ། རེག་བྱ་རྡོ་རྗེ་ཡང་ དག་དགུག །
BOསྒྲིབ་སེལ་ལ་ནི་དབུལ་བར་བྱ། ། ཕྱི་ཡི་ཆོས་རྣམས་འདི་དག་ཀུན། ། བརྟགས་པ་དང་ནི་མ་བརྟགས་པའང་། ། ཆོས་དབྱིངས་རྡོ་རྗེ་ཡང་དག་དགུག ། འཇམ་པའི་རྡོ་རྗེ་ལ་ནི་དབུལ། ། དེ་བཞིན་ཕྱི་དང་ནང་དང་ནི། ། གཉིས་ཀ་ཡང་ནི་མི་དམིགས་ པ། ། གཟུགས་ལ་གསུམ་དུ་བྱས་ནས་ནི། ། ལྷ་རྣམས་ལ་ནི་དབུལ་བར་བྱ། ། ཡུལ་ནི་ལྔ་ནི་ངེས་གནས་ཏེ། ། རྒྱུད་ལྔར་ངེས་པར་འབྱུང་བ་ནི། ། རྨི་ལམ་རླུང་དང་ལྡན་པ་རུ། ། འདོད་པ་ལྔ་རྣམས་སྤྱོད་པར་བྱེད། ། དབང་པོ་གང་དང་གང་ལམ་གྱིས། ། སྒྲུབ་པ་པོ་ནི་ཡུལ་འཐོབ་བོ། ། དེ་དག་ཐམས་ཅད་ཐུགས་རྗེ་ཆེ། ། མཉེས་པའི་ཕྱིར་ནི་དབུལ་བར་བྱ། ། ཡང་དག་དགའ་བའི་མེ་ཏོག་གིས། ། རྡོ་རྗེ་ཉི་མ་པདྨ་འབྱུང་། ། མེ་ཏོག་བདག་ཉིད་ལ་མཆོད་པ། ། རྡོ་རྗེ་གསུམ་གྱི་དམ་ཚིག་མཆོག ། རྣམ་རྟོག་ཚུལ་གྱི་ཡུལ་མིན་ཞིང་། ། དེ་ལྟར་གཏུམ་མོའི་མེ་ཡིས་ནི། ། ངེས་པར་བསྲེགས་པ་དེ་ནི་སྤོས། ། ཐུགས་ཀྱི་རྡོ་རྗེ་ལ་ནི་དབུལ། ། རྡོ་རྗེ་པདྨ་ཡང་དག་པར། ། ཞུགས་པ་ལ་སོགས་རིམ་ལས་བྱུང་། ། རྣལ་འབྱོར་པ་ཡི་མི་ཤིགས་སྒྲ། ། ཐུགས་རྡོ་རྗེ་ལ་དབུལ་བར་བྱ། ། ཡི་གེ་ཧཱུྃ་ལས་ཡང་དག་བྱུང་། ། སྔགས་ཀྱི་འོད་ཟེར་ཤིན་ཏུ་གསལ།
BO། མར་ མེ་འབར་བའི་ཡང་དག་འོད། ། ཐུགས་ཀྱི་རྡོ་རྗེ་ལ་དབུལ་བྱ། ། བདེ་བ་ཆེན་པོ་ནམ་མཁར་གནས། ། བྱང་ཆུབ་སེམས་ནི་སད་པ་དང་། ། དེ་ཉིད་ཀྱིས་ཀྱང་བྱུགས་པ་ནི། ། ཐུགས་ཀྱི་རྡོ་རྗེ་ལ་དབུལ་བྱ། ། འདིར་ནི་གང་དང་གང་ལོངས་སྤྱོད། ། དབང་པོ་ཐམས་ཅད་ཡང་དག་བསྟེན། ། དེ་དག་ ཐམས་ཅད་ཐུགས་རྡོ་རྗེ། ། བཟའ་བའི་སྣོད་དུ་མཆོད་པར་བྱ། ། དགོད་དང་སྒེག་དང་རྩེ་འཇོ་ནི། ། སྣ་ཚོགས་ཀྱིས་ནི་སེམས་དགའ་བྱེད། ། རྣམ་པར་ཐར་པའི་སྒོ་དག་དང་། ། ཐུགས་ཀྱི་རྡོ་རྗེ་ལ་ནི་དབུལ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ནང་གི་བདག་ཉིད་ མཆོད་པའི་ཆོ་གའི་རྣམ་པར་དབྱེ་བའི་ལེའུ་སྟེ་ལྔ་བཅུ་དྲུག་པའོ། ། ། ། དེ་ནས་བཅོམ་ལྡན་རྡོ་རྗེས་གསུངས། ། ལྷ་མོ་ཡི་ནི་མཚན་ཉིད་མཆོག ། རྣལ་འབྱོར་བདེ་ལ་རྟོག་པ་རྣམས། ། རྩ་དབྱེ་བ་ཡི་རང་བཞིན་གྱིས། ། རྟག་ཏུ་ལུས་ཀྱི་རྩེ་འཇོ་བྱ། ། དེ་ཡི་ལྷ་རྣམས་སུ་ནི་བཤད། ། རྟག་ཏུ་བདེ་བ་ཀུན་གྱིས་དགའ། ། ཀུན་ནས་རྣམ་པར་སྒེག་པའི་ལུས། ། བདེ་བ་ཆེན་པོས་ཀུན་དུ་ཁྱབ། ། ལྷ་ཉིད་དུ་ནི་ཡང་དག་བརྗོད། ། དགའ་དང་མཆོག་ཏུ་དགའ་བ་དང་། །
BOབྲལ་བ་ལྷན་ཅིག་སྐྱེས་སྐད་ཅིག ། ཆར་པ་དང་ནི་རྩེ་འཇོ་དང་། ། ཀུན་ནས་ལྷག་པར་སྒེག་པ་དང་། ། བརྒྱལ་དང་ སད་པར་གྱུར་པ་དང་། ། དེ་རྣམས་ལྷ་མོ་རུ་ནི་བཤད། ། ཕྱི་རོལ་དུ་ནི་བྱུང་བ་ན། ། གང་ཕྱིར་ཡང་དག་སྦྱོར་བར་འགྱུར། ། ལུས་ཀྱི་རྩ་རྣམས་ཡང་དག་སད། ། དེ་ཕྱིར་རྣལ་འབྱོར་མར་ནི་བཤད། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ལྷ་མོའི་མཚན་ཉིད་ཀྱི་ལེའུ་ སྟེ་ལྔ་བཅུ་བདུན་པའོ། ། ། ། དེ་ནས་བཅོམ་ལྡན་རྡོ་རྗེས་གསུངས། ། ཨེ་བྃ་ཞེས་བྱ་ཡི་གེ་གཉིས། ། ཨེ་ནི་སྟོང་པ་ཉིད་དུ་བཤད། ། དེ་བཞིན་བྃ་ནི་ཐུགས་རྗེ་དང་། ། ཐིག་ལེ་དེ་གཉིས་སྦྱོར་ལས་བྱུང་། ། དེ་ནི་རྣལ་འབྱོར་རྨད་མཆོག་བྱུང་། ། ཨེ་བྃ་གཉིས་ནི་སངས་རྒྱས་དང་། ། མདོར་བསྡུས་ཆོས་ཀྱི་ཕྱག་རྒྱའོ། ། རྒྱལ་པོ་ཆེན་པོ་ཕྱག་རྒྱ་གཉིས། ། རྒྱུད་རྣམས་སུ་ནི་ཐོག་མར་གསུངས། ། ཨེ་ནི་བྷ་གའི་མཚན་ཉིད་དོ། ། པདྨའི་རྟེན་དུ་ཤེས་པར་བྱ། ། རྟེན་པ་རྡོ་རྗེ་ཞེས་ནི་གསུངས། ། བརྟན་པ་རྡོ་རྗེ་འཆང་བ་ཡི། ། དེ་ལ་གནས་པའི་ཐིག་ལེའི་གཟུགས། ། སྣ་ ཚོགས་སྤྲུལ་པ་སྟོན་པར་བྱེད། ། བདེ་བ་ཀུན་གྱི་གཞི་ཡི་གནས། །
BOརྡོ་རྗེ་སེམས་དཔའ་བདེ་བ་ཆེ། ། ཨེ་ནི་གསང་བའི་མཁའ་དབྱིངས་སམ། ། བྷ་ག་ཆོས་འབྱུང་པདྨ་ལ། ། རྣལ་འབྱོར་སེང་གེའི་གདན་ལ་བཞུགས། ། མཆོག་ཏུ་རྨད་བྱུང་སྟོན་པར་མཛད། ། རྡོ་རྗེ་སེམས་དཔའ་བྃ་རྡོ་རྗེ། ། རྡོ་རྗེ་འཇིགས་བྱེད་དབང་ཕྱུག་དང་། ། ཧེ་རུ་ཀ་དང་དུས་འཁོར་ལོ། ། དང་པོ་སངས་རྒྱས་ལ་སོགས་མཚན། ། ཨེ་བྃ་དེ་བཞིན་གཤེགས་པའི་རྒྱ། ། གཉིས་སུ་མེད་པའི་བདེ་མཆོག་དང་། ། སྟོང་ཉིད་སྙིང་རྗེ་དབྱེར་མེད་དང་། ། གང་ལ་དེ་ཉིད་མངོན་པར་བརྗོད། ། དེ་ལ་དེ་བཞིན་གཤེགས་ པའི་རྒྱ། ། གཉིས་མེད་ཡེ་ཤེས་མཚན་མ་ནི། ། རྒྱུད་ཀུན་གྱི་ནི་གླེང་གཞིར་གསུངས། ། རྒྱུད་ཀུན་གྱི་ནི་དོན་བསྡུས་པ། ། སྟོང་ཉིད་སྙིང་རྗེ་མི་ཕྱེད་པ། ། གང་ལ་དེ་ཉིད་མངོན་པར་བརྗོད། ། ཨེ་བྃ་ཞེས་བྱའི་ཡི་གེ་གཉིས། ། གང་ལ་འདི་ཉིད་མེད་པ་ནི། ། དེ་ལ་དེ་ཁོ་ན་ཉིད་ མེད། ། གང་ལ་དེ་ཉིད་ཡོངས་ཤེས་པ། ། བཙོ་མའི་གསེར་ལྟར་གསལ་པོར་ནི། ། རྒྱུད་ནི་ལེགས་བཤད་དེ་ཉིད་ཤེས། ། སྔགས་ཀྱི་སྤྱོད་པ་ལ་གནས་པར། ། དེ་ལྟར་འདི་ནི་དེ་ཉིད་མཆོག ། ཨེ་པྃ་དོན་ནི་རྣམ་པར་ངེས། ། ཆོས་ཀྱི་ཕྱག་རྒྱ་ཡི་གེ་གཉིས། ། དང་པོའི་ ངག་ཏུ་ཡང་དག་བཤད། །
BOརྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཨེ་བྃ་ཞེས་བྱ་བ་དང་པོའི་ངག་བཤད་པ་དང་རྒྱུ་མཚན་བསྟན་པའི་ལེའུ་སྟེ་ལྔ་བཅུ་བརྒྱད་པའོ། ། ། ། དེ་ནས་གཞན་ཡང་བཤད་ཀྱིས་ཉོན། ། ཨེ་བྃ་ལ་སོགས་དོན་རྒྱས་པ། ། གང་ གིས་ཡང་དག་ཡོངས་སུ་ཤེས། ། ཆོས་ཀྱི་དེ་ནི་ཡང་དག་རྟོགས། ། ཨེ། ཨེ་ནི་ཤེས་རབ་དམ་པ་སྟེ། ། འདོད་ཆགས་བྲལ་སོགས་སྐད་ཅིག་བདག ། སྲིད་པ་གསུམ་ན་ཡོངས་ཤེས་པ། ། འདི་ནི་རྩ་བར་རྣམ་པར་བསྟན། ། བྃ། འོད་མ་བསྒྲེང་བ་ལྟར་མཛེས་ཤིང་། ། ཆགས་ལ་ སོགས་པ་རབ་བསྐྱེད་ལྡན། ། སྣང་བ་གསལ་བ་རྣམ་པར་ཤེས། ། མིང་ནི་ཐབས་ཤེས་བྱ་བ་ཡིན། ། མ། རིག་ཆེན་རང་ཉིད་རྩ་བ་སྟེ། ། མ་རིག་པ་ནི་ཟློག་པ་ཡིན། ། མ་རིག་པ་ལས་འདི་འབྱུང་བས། ། དེ་བས་སྣང་བ་འབྱུང་བའོ། ། ཡཱ། འགྲོ་བ་རྣམ་ཤེས་གསུམ་དང་པོའི། ། དེ་ མིང་སྣང་བ་གསལ་བ་སྟེ། ། དེ་ནི་སྟོང་པ་ཆེར་འགྱུར་ལ། ། དེ་ཡང་འོད་གསལ་བར་འགྲོའོ། ། ཤྲུ། སྣང་བ་གསུམ་གྱི་མཚན་ཉིད་ཅན། ། གང་འདི་རྣམ་ཤེས་གསུམ་ཐོབ་པ། ། སེམས་ཅན་ཁམས་ནི་མ་ལུས་པའི། ། རང་བཞིན་རྩ་བ་འདི་ཡིན་ནོ། ། ཏྃ། དེ་ནི་རེ་རེའི་དོན་སྣང་བ། །
BOརླུང་ གིས་བླངས་ནས་འཛིན་བྱེད་པ། ། ལྃ། རླུང་དང་ལྡན་པའི་རྣམ་ཤེས་ནི། ། ཀུན་དུ་འགྲོ་ལ་གནས་པར་འགྱུར། ། ཨེ། འདི་ནི་རླུང་ཁམས་ཆེན་པོ་སྟེ། ། རྣམ་ཤེས་གསུམ་གྱི་བཞོན་པ་ཡིན། ། དེ་ཡིས་རང་བཞིན་དག་ཏུ་ནི། ། ཇི་ལྟ་ཇི་ལྟར་འགྲོ་བར་འགྱུར། ། ཀ། སྲ་བའི་ས་ཁམས་ཆུ་ ཉིད་དང་། ། དེ་བཞིན་མེ་དང་རླུང་དག་ནི། ། རྣམ་པར་ཤེས་པར་བླངས་ནས་སུ། ། སྲིད་གསུམ་གནས་སུ་སྐྱེ་བར་འགྱུར། ། སྨི། འདི་ནི་ཕུང་པོ་ལྔ་རྣམས་སུ། ། འབྱུང་བ་འདུས་བྱས་མཚན་ཉིད་ནི། ། གཟུགས་ཚོར་འདུ་ཤེས་འདུ་བྱེད་དང་། ། རྣམ་ཤེས་ཉིད་ནི་ལྔ་པའོ། ། ས། མཉམ་ ཉིད་སོ་སོར་རྟོག་པ་དང་། ། བྱ་བ་གྲུབ་པ་ཉིད་དང་ནི། ། མེ་ལོང་དང་ནི་ཆོས་ཀྱི་དབྱིངས། ། འདི་ནི་ཡེ་ཤེས་ལྔ་པོ་ཡིན། ། མ། ཡིད་ཀྱི་སྐྱེ་མཆེད་ཉིད་དང་ནི། ། མིག་དང་དེ་བཞིན་རྣ་བ་དང་། ། སྣ་དང་ལྕེ་དང་ལུས་རྣམས་ཏེ། ། འདི་ནི་སྐྱེ་མཆེད་རྣམས་འབྱུང་བའོ། ། ཡེ། གང་ཡང་ཁམས་ གསུམ་སེམས་ཅན་རྣམས། ། སྲོག་དང་རྩོལ་བ་ལ་བརྟེན་པ། ། གསང་སྔགས་རྒྱལ་པོ་ཟློས་བཞིན་དུ། ། མི་ཤེས་བསམ་གཏན་ཀློག་པ་སྤངས། ། བྷ། འདི་ལས་རང་བཞིན་ཆགས་པ་དང་། ། ཆགས་མེད་ལ་སོགས་པར་ཡང་འགྱུར། །
BOདེ་ལས་དགེ་དང་མི་དགེའི་ལས། ། དེ་ལས་སྐྱེ་ བ་འབྱུང་བ་ཡིན། ། ག། འགྲོ་བ་འབྱུང་བའི་ཕུང་པོ་རྣམས། ། སངས་རྒྱས་ལྔ་ཡི་བདག་ཉིད་དེ། ། མངོན་པར་བྱང་ཆུབ་རྣམ་ལྔ་ཞེས། ། མིང་གིས་རབ་ཏུ་བསྐུལ་བ་ཡིན། ། བཱན། རླུང་དང་ཆུ་དང་མེ་དང་ས། ། སྤྱན་ལ་སོགས་པ་བཞི་པོ་སྟེ། ། ཡེ་ཤེས་བདག་ཉིད་ཅན་གསུམ་དུ། ། ཤེས་བྱ་སངས་རྒྱས་བྱང་ཆུབ་སྟེར། ། ས། ཐམས་ཅད་དེ་བཞིན་གཤེགས་པའི་སྐུར། ། ཕྱག་རྒྱ་བཞིས་ནི་རྒྱས་བཏབ་ཅིང་། ། མིག་ལ་སོགས་པའི་བདག་ཉིད་དེར། ། ས་སྙིང་ལ་སོགས་རྒྱལ་སྲས་སོ། ། ཧ། རོལ་པས་དགའ་བ་གང་ཡིན་པའི། ། ཁྲོ་བོའི་རྒྱལ་པོ་སྟོབས་ཆེན་རྣམས། ། དེ་ཡི་ཕྱོགས་མཚམས་ངོ་བོ་རུ། ། དཔུང་པ་ཡན་ལག་རྣམས་སུ་བརྟག ། ཏ། དེ་དང་དེ་ཡི་རིགས་ལས་བྱུང་། ། ལྷ་དང་ལྷ་མོ་ཐ་དད་པ། ། དེ་ནི་ཡོད་མིན་དེ་དག་ཀྱང་། ། འགྲོ་བའི་དོན་ཕྱིར་སྟོན་པ་ཡིན། ། ཐཱ། འདི་ལས་གཉིས་མེད་མཐོང་བ་ཡི། ། རྣལ་འབྱོར་པ་ནི་ཡེ་ཤེས་གསུམ། ། མཐོང་ ཕྱིར་དམན་དང་བར་མ་དང་། ། དམ་པའི་ཡུལ་ལ་གཞག་པར་བྱ། ། ག། དབང་པོ་རང་ཉིད་རང་ཡུལ་ལ། ། འགྲོ་བར་འགྱུར་བ་དེ་དང་དེ། ། དབང་པོའི་སྤྱོད་ཡུལ་གང་དང་གང་། ། དེ་དང་དེ་སྣང་ཙམ་ཉིད་དོ། ། ཏ།
BOདབང་པོ་དེ་ཡི་ལམ་ནས་ནི། ། སྒྲུབ་པ་པོས་ནི་ཡུལ་ཐོབ་པ། ། དེ་བཞིན་ དེ་ལས་མ་གསུངས་པར། ། ཚིམ་པར་བྱ་ཕྱིར་དབུལ་བར་བྱ། ། ཀཱ། སྐུ་གསུམ་དག་ནི་ཐ་དད་པར། ། སྐྱོབ་པ་ཡིས་ནི་ཡང་དག་བསྟན། ། རྫོགས་པའི་རིམ་གྱིས་སྦྱོར་བ་ཡིས། ། གཅིག་ཏུ་ཡང་ནི་འགྱུར་བ་ཡིན། ། ཡ། གང་ཞིག་སངས་རྒྱས་སྐུ་མཚན་ཉིད། ། ཀུན་རྫོབ་བདེན་པར་གསུངས་པ་ ནི། ། དེ་ཉིད་རྫོགས་རིམ་སྦྱོར་བ་ཡིས། ། འོད་གསལ་བར་ནི་རྣམ་དག་འགྱུར། ། བཱཀ། ཚིག་གི་ལམ་གྱི་ཡུལ་འདི་ཉིད། ། གཙོ་བོ་ཡེ་ཤེས་སྐུ་རང་བཞིན། ། སེམས་ཅན་ཀུན་ལ་ཕན་པའི་ཕྱིར། ། འཇའ་ཚོན་བཞིན་དུ་སྣང་བ་ཡིན། ། ཙིཏ། ། སེམས་དང་སེམས་བྱུང་མ་ རིག་པ། ། ཤེས་རབ་ཐབས་དང་ཉེར་ཐོབ་དང་། ། སྟོང་དང་ཤིན་ཏུ་སྟོང་པ་དང་། ། སྟོང་ཆེན་ཞེས་ཀྱང་རབ་ཏུ་བརྗོད། ། ཏ། རང་བཞིན་སྣང་བའི་དབྱེ་ཤེས་ན། ། དེ་ནས་སྤྱོད་པ་རབ་ཏུ་བྱ། ། ལས་ཀྱི་ལུས་ནི་ཡོངས་སྤངས་ནས། ། རྡོ་རྗེ་སྐུ་ཉིད་ཐོབ་པར་འགྱུར། ། ཧྲྀ། ཐུགས་ལ་འཇིག་ རྟེན་པ་རྣམས་ཀྱི། ། དོན་སྤྱོད་བཞག་ནས་དེ་བཞིན་གཤེགས། ། ཀུན་རྫོབ་ཏུ་ནི་སྦུལ་སྐུར་གནས། ། ཇི་ལྟ་ཇི་ལྟར་འདོད་པ་སྤྱོད། ། ད། ཡིད་བཞིན་ནོར་བུ་མཆོག་བཞིན་དུ། །
BOའདོད་པ་ཐམས་ཅད་སྟེར་བར་འགྱུར། ། སངས་རྒྱས་རྣམས་ཀྱི་ཕུན་ཚོགས་ཀྱང་། ། སྟོབས་ཀྱིས་བླངས་ ནས་སྤྱོད་པར་འགྱུར། ། ཡ། རྣལ་འབྱོར་དབང་པོ་གང་གང་འདོད། ། དེ་ནི་སྒྲིབ་པ་མེད་པར་བྱ། ། མཉམ་པར་མ་བཞག་རྣལ་འབྱོར་གྱིས། ། རྟག་ཏུ་མཉམ་པར་འཇོག་པར་འགྱུར། ། བ། རྡོ་རྗེ་པདྨོ་མཉམ་སྦྱོར་བས། ། ཡེ་ཤེས་གསུམ་གྱི་ཆ་རིག་པ། ། བློ་ལ་གོས་དང་མ་གོས་པ། ། དེར་ནི་བདེ་བས་རྟག་ཏུ་གནས། ། ཛྲ། སྒྱུ་མ་ལྟ་བུའི་ཏིང་འཛིན་གྱིས། ། དངོས་དག་ཀུན་ལས་རྣམ་པར་རོལ། ། སངས་རྒྱས་མཛད་པ་བྱེད་བཞིན་དུ། ། གཏན་ལ་ཕབ་པའི་གཞི་ལ་གནས། ། ཡོ། རྣལ་འབྱོར་ལྷག་པའི་རྣལ་འབྱོར་དང་། ། རྣལ་འབྱོར་ཆེན་པོ་རང་ཉིད་འགྱུར། ། རྡོ་རྗེ་ཅན་ དང་མཁའ་འགྲོ་མ། ། གང་ཡང་རྣལ་འབྱོར་དེ་རང་ཉིད། ། ཥཱི། དགག་པ་དག་ཀྱང་བྱེད་པས་ན། ། བྱ་དང་བྱ་མིན་རྣམ་སྤངས་ཏེ། ། པདྨ་ལ་ནི་འདམ་གྱིས་བཞིན། ། ངོ་བོ་ཉིད་ཅེས་གོས་མི་འགྱུར། ། བྷ། ཡོན་ཏན་བརྒྱད་དང་ཉེར་ལྡན་པས། ། སེམས་ཅན་ཐམས་ཅད་རིགས་འགྱུར་ཞིང་། ། འཇིག་རྟེན་ཁམས་ནི་མ་ལུས་པར། ། བདག་ཉིད་ཡེ་ཤེས་ལུས་ཀྱིས་སྤྱོད། ། གེ། གཙོ་བོ་གང་དུ་སྤྱོད་པ་ཡི། ། དེ་ཡི་ཁྱིམ་ནི་ནམ་མཁའ་ཉིད། །
BOབདེ་བ་ཆེན་པོའི་ཏིང་འཛིན་གྱིས། ། དེ་ཉིད་དུ་ནི་རྟག་ཏུ་རོལ། ། ཥཱ། འདི་ལ་སྣང་བ་དབྱེ་བ་ལ། ། ཐུན་མཚམས་ཉིན་མོ་མཚན་མོ་ཡི། ། འཇིག་ རྟེན་ཐ་སྙད་བྱས་པ་ཡིས། ། ཡེ་ཤེས་གསུམ་ནི་མཐོང་ཕྱིར་རོ། ། བི། སྣ་ཚོགས་པ་ཡི་ཐ་སྙད་དག ། འཇིག་རྟེན་པས་ནི་ཡོངས་བརྟགས་པ། ། ལམ་གསུམ་གྱི་ནི་དབྱེ་བ་ཡིས། ། ཡེ་ཤེས་གསུམ་ལས་བྱུང་བའོ། ། ཛ། སྐྱེ་དང་གནས་དང་འཇིག་པ་དང་། ། སྲིད་པ་བར་མར་གནས་པ་ སྟེ། ། ཇི་སྙེད་འཇིག་རྟེན་གྱིས་བརྟགས་པ། ། སེམས་ཀྱི་རླུང་ནི་རྣམ་འཕྲུལ་ལོ། ། ཧ། དགོད་དང་རྩེད་མོ་བྱེད་པ་དང་། ། གར་གྱི་ཉམས་དགུར་ལྡན་པ་དང་། ། སྔགས་དང་ཕྱག་རྒྱ་རྣམ་རྟོག་པ། ། རྡོ་རྗེ་སེམས་དཔའི་སྤྱོད་པའོ། ། ར། བདག་བྱིན་རླབས་ཆེན་མ་གཏོགས་པ། ། རིན་ཆེན་གཞན་དག་འདི་ན་མེད། ། མེ་ཡིས་སྦྱངས་པའི་ནོར་བུ་བཞིན། ། རང་བཞིན་འོད་གསལ་རྣམ་པའོ། ། འདི་སྐད་ལ་སོགས་དང་པོའི་ངག ། མཆོག་ཏུ་གསུངས་པའི་དོན་རྒྱས་པ། ། གསང་བ་འདུས་པའི་རྩ་བའི་མདོ། ། དེ་ཉིད་བཤད་པ་བསྡུས་པ་ནི། ། རིམ་པ་ཇི་ལྟ་ བ་བཞིན་ཤེས། ། སྒྲུབ་པོའི་དེ་ཉིད་ཤེས་པ་ནི། ། ཡེ་ཤེས་མཆོག་གི་མཚན་ཉིད་ཀྱིས། ། གང་དུ་གསལ་བར་མ་གསུངས་སོ། །
BOརིམ་པ་འདི་ཡིས་རྣལ་འབྱོར་པས། ། དཔལ་ལྡན་འདུས་པ་རྒྱས་བཏབ་པ། ། དེ་ལྟར་རིམ་པ་འདི་ཡིས་ཤེས། ། སེམས་ཅན་ཀུན་ལ་ཕན་སྐྱེད་པའོ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཨེ་བྃ་མ་ཡཱ་ཞེས་བྱ་བ་དང་པོའི་ངག་བཤད་པའི་ལེའུ་སྟེ་ལྔ་བཅུ་དགུ་པའོ། ། ། ། དེ་ནས་གཞན་ཡང་བཤད་ཀྱིས་ཉོན། ། ནང་གི་བདག་ཉིད་སྦྱིན་སྲེག་མཆོག ། ནང་དུ་རྒྱུ་བའི་འབྱུང་བ་རྣམས། ། གང་ གིས་ཐིམ་པར་གྱུར་པ་དང་། ། རྣམ་རྟོག་བག་ཆགས་ས་བོན་ནི། ། ཕུང་པོ་ལྔ་ཡི་བུད་ཤིང་དང་། ། རྣལ་འབྱོར་ཡེ་ཤེས་ཆེན་པོའི་མེས། ། རྟག་ཏུ་སྦྱིན་སྲེག་རྨད་བྱུང་བྱ། ། ལྟེ་དབུས་གནས་པའི་སྒྲ་ཙམ་ནི། ། སྒྲ་ཙམ་ཕྱི་རོལ་གསང་པདྨ། ། དེ་ལ་རང་རྒྱུད་རླུང་གིས་ནི། ཡོངས་སུ་བསྐུལ་བའི་མེ་ཡིས་ནི། ། དབང་པོ་གཉིས་ནི་ཡང་དག་སྦྱོར། ། གཟི་བརྗིད་གསལ་བར་རབ་ཏུ་འབར། ། གང་ཚེ་མར་གང་གསང་པདྨ། ། དེ་ལ་འདི་ནི་སྣོད་དུ་བརྗོད། ། ཧཾ་ནི་བླུགས་གཟར་ཞེས་བྱར་གསུངས། ། རྡོ་རྗེ་དགང་གཟར་དུ་ནི་བརྗོད། ། བྷ་ག་ཐབ་ཁུང་ཞེས་ནི་ བཤད། ། དབང་པོ་ལྔ་ཡི་བསྲེག་རྫས་དང་། ། ཕུང་པོ་ཡམ་ཤིང་དུ་ནི་གྱུར། ། མར་ནི་བྱང་ཆུབ་སེམས་སུ་བཤད། །
BOགནམ་སྟོང་ནས་བརྩམས་ཉ་ཡི་བར། ། ཇི་སྲིད་བྱེད་པ་གཤེགས་སུ་གསོལ། ། མེ་ཐབ་ཐིག་ལེ་ཙམ་དུ་གསུངས། ། བླུགས་གཟར་ནམ་ཡང་ མི་འཕོ་བ། ། སངས་རྒྱས་གཏི་མུག་དགའ་ལ་སོགས། ། གཟུགས་རྡོ་རྗེ་སོགས་རྒྱལ་སྲས་རྣམས། ། ཁྲོ་བོའི་རྒྱལ་པོ་བཅུ་ལ་ནི། ། རྟག་ཏུ་སྦྱིན་སྲེག་གིས་ཚིམ་བྱ། ། རྡོ་རྗེ་སེམས་དཔའི་མཆོད་པ་གང་། ། དེ་ཡང་དགང་བླུགས་སུ་ནི་བརྗོད། ། ཧུྃ་ཕཊ་ཡང་དག་ལྡན་སྔགས་ ཀྱིས། ། ཆོ་ག་བཞིན་དུ་སྲེག་བླུགས་དབུལ། ། དེ་ཡིས་ལུས་གནས་མཉེས་འགྱུར་ན། ། ལྷ་ཡི་དམ་ཚིག་བླ་ན་མེད། ། ཡིད་ལ་ཇི་ལྟར་འདོད་པ་རྣམས། ། དེ་ལྟར་དངོ་གྲུབ་སྩལ་ནས་ནི། ། སྦྱིན་སྲེག་འདི་ནི་མཆོག་ཏུ་གསུངས། ། དངོས་གྲུབ་ཀུན་གྱི་འབྲས་བུ་སྩོལ། ། རྣལ་འབྱོར་ ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ནང་གི་བདག་ཉིད་ཀྱི་སྦྱིན་སྲེག་གི་ལེའུ་སྟེ་དྲུག་ཅུ་པའོ། ། ། ། དེ་ནས་བཅོམ་ལྡན་རྡོ་རྗེས་གསུངས། ། བདུད་རྩི་ལྔ་ནི་བཟའ་བ་ནི། ། དངོས་གྲུབ་ཀུན་བྱེད་དེ་ཉིད་མཆོག ། ཇི་ལྟར་རིགས་པའི་རིམ་པ་བཞིན། ། རྣམ་སྣང་ མཛད་དང་མི་བསྐྱོད་དང་། ། དོན་ཡོད་གྲུབ་དང་འོད་དཔག་མེད། ། རིན་ཆེན་རྒྱལ་མཚན་ལྔ་པོ་ནི། །
BOབདུད་རྩི་ལྔ་ཡི་མཚན་ཉིད་དོ། ། ཁྲག་ནི་རིན་ཆེན་དབང་ཕྱུག་དང་། ། བྱང་ཆུབ་སེམས་ནི་འོད་དཔག་མེད། ། དེ་བཞིན་དོན་ཡོད་གྲུབ་པ་ཤ། ། མི་བསྐྱོད་དེ་བཞིན་རྡོ་རྗེ་ཆུ། ། དྲི་ཆེན་རྣམ་སྣང་མཛད་དུ་བཤད། ། དེ་དག་བདུད་རྩི་ལྔ་ནི་མཆོག ། བས་མཐའ་ཉམས་དགའ་སྐྱེ་བོས་དབེན། ། སྐྲ་ཡི་ཚེར་མ་རྣམ་པར་སྤངས། ། དེ་ལ་ཁང་པ་བྱ་བ་ནི། ། ཁང་པ་གཉིས་བརྩེགས་སྒོ་དང་བཅས། ། ས་འོག་ཁང་པ་གཅིག་བྱ་ཞིང་། ། གཞན་དག་དེ་ཡི་སྟེང་དུ་ བྱ། ། གཞན་ནི་གསངས་ནས་བྱ་བ་སྟེ། ། འཇིག་རྟེན་པ་ནི་གཅིག་ཏུ་ཤེས། ། སྒྲུབ་པོས་དེ་ཉིད་ཀུན་ཤེས་ཤིང་། ། སྔགས་ཤེས་བསམ་པ་རྒྱ་ཆེ་བ། ། བརྟན་ཞིང་སྙིང་རྗེ་མཁས་པ་དང་། ། ཡུལ་ལ་ཕྲག་དོག་རྣམ་པར་སྤངས། ། སྒྲུབ་པོ་གཙོ་བོའི་ཡོན་ཏན་གང་། ། དེ་ལྟ་བུ་ ཉིད་སྒྲུབ་གྲོགས་མཆོག ། ཆགས་དང་ཆགས་བྲལ་རྣམ་པར་སྤངས། ། བརྩོན་ཞིང་བརྐམ་ཆགས་མེད་པ་དང་། ། ཁྲོ་མེད་དང་བཅས་དཔའ་བ་དང་། ། མང་དུ་ཐོས་ཤིང་ཡོད་པར་ལྟ། ། ཐོག་མ་གཉིས་ཀ་ཡི་ནི་ལུས། ། འབྲས་བུ་སོགས་ཀྱིས་དག་བྱ་བ། ། གནོད་མཛེས་སྐུལ་བྱེད་ འབུམ་ཕྲག་གཅིག ། དེ་རྗེས་སྔགས་པས་བཟླ་བར་བྱ། ། ཨོཾ་སུམྦྷ་ནི་སུམྦྷ་ཧཱུྃ་ཧཱུྃ་ཕཊ། །
BOཨོྃ་གྲྀཧྞ་གྲྀཧྞ་ཧཱུྃ་ཧཱུྃ་ཕཊ། ཨོྃ་གྲྀཧྞཱ་བ་ཡ་གྲྀཧྞཱ་པ་ཡ་ཧཱུྃ་ཧཱུྃ་ཕཊ། ཨོཾ་ཨན་ཡ་ཧོ། བྷ་ག་བཱ་ན་བིདྱཱ་རཱ་ཛ་ཧཱུྃ་ཧཱུྃ་ཕཊ། དེ་ནས་ཟླ་གཅིག་ཡི་གེ་གསུམ། ། སྒྲུབ་པོས་མི་སྨྲ་བཟླས་པར་བྱ། ། ཀུན་དུ་བཟང་པོ་ འགྲོ་བའི་གཙོ། ། དེ་ནི་སྐད་ཅིག་རྨི་ལམ་མཐོང་། ། དེས་ནི་བཀའ་ཡིས་བསྒོ་བ་ནི། ། ཀ་ནྱ་མཆོག་ནི་བསྟེན་གྱིས་ལ། ། སེམས་ཅན་དོན་ནི་མཚུངས་མེད་བྱོས། ། ཇི་ལྟར་དེ་ཉིད་རྡོ་རྗེ་འཆང་། ། བུ་མོ་སྐལ་ལྡན་མིག་ཡངས་མ། ། གཟུགས་དང་ལང་ཚོས་རྣམ་པར་བརྒྱན། ། བརྐམ་ ཆགས་མེད་ཅིང་ཆགས་བཅས་སེམས། ། སྒེག་པས་མྱོས་ཤིང་བསྒྱིངས་དང་བཅས། ། ནུ་རྒྱས་སྔོ་བསངས་ཉམས་དགའ་བ། ། རྣམ་རྟོག་མེད་ཅིང་མང་དུ་ཐོས། ། སྒྲུབ་པོས་དེ་སྲིད་འདོད་པར་བྱ། ། ཇི་སྲིད་ཁུ་བ་དང་བཅས་གྱུར། ། དེ་ནས་གདོང་ནི་པདྨ་གཉིས། ། གཉིས་ ཀ་འབྱུང་བ་བླངས་ནས་ནི། ། པདྨའི་སྣོད་དེར་གཞག་པར་བྱ། ། མཚན་ཉིད་བཟང་པོར་ཞག་བདུན་དུ། ། གླང་པོ་རྟ་ཁྱི་བ་ལང་མི། ། དཔྱིད་ཟླ་ཐ་{ཆུངས་,ཆུང་}གཉིས་ཀ་ཤར། ། སྐྱེ་གནས་ནས་ནི་བླངས་ནས་ནི། ། དེ་བཞིན་དེ་རུ་རིམ་པ་བཞིན། ། པད་སྣོད་དེ་ཉིད་ལ་ནི་དེར། ། ཞག་ བདུན་བར་དུ་གཞག་པར་བྱ། །
BOཉིན་ཞག་ཉི་ཤུ་རྩ་གཅིག་ཏུ། ། ཡི་གེ་གསུམ་ནི་སྔགས་བཟླས་བྱ། ། འདུ་འཛི་མེད་ཅིང་དབེན་པའི་གནས། ། ཙནྡན་བཟང་པོ་བྱུགས་ནས་ནི། ། ཛཿཧཱུྃ་བྃ་ཧོཿའི་སྔགས་བཀོད་པའི། ། པདྨོའི་སྣོད་ལ་གཞག་པར་བྱ། ། ར་ཡི་འོ་མ་ཏིལ་གྱི་མར། ། མར་དང་ལི་ཁ་དཀར་པོ་དང་། ། ཆ་བསྙམས་བསྐོལ་བ་བྱས་ནས་ནི། ། དེ་དང་ལྷན་ཅིག་སྣོད་བཞག་བསྲེ། ། རྒྱ་ཤུག་ཚིག་གུ་ཚད་ཙམ་གྱིས། ། བློ་དང་ལྡན་པས་རིལ་བུ་བྱ། ། གྲིབ་མ་ལ་ནི་བསྐམ་བྱས་ནས། ། རིམ་གྱིས་བསྐྱེད་ཅིང་བཟའ་བར་བྱ། ། རྡོ་རྗེ་མིང་སྲིང་སྤུན་དང་ནི། ། རྣལ་ འབྱོར་མ་དང་ལྷན་ཅིག་བཟའ། ། ཟླ་བ་གཅིག་ནས་དེ་ནས་ལྷག ། མཛའ་བོ་རྣམས་དང་ཡང་དག་བསྒོ། ། མར་ངོའི་ཚེས་བརྒྱད་ཚེས་བཅུ་འམ། ། ཡང་ན་བཅུ་བཞི་ནས་བརྩམས་ཏེ། ། དེ་ལ་གཏོར་མ་བྱ་བ་ནི། ། ལས་ཀུན་ལ་ནི་བླ་ན་མེད། ། དེ་ལས་ཀྱང་ ནི་དངོས་གྲུབ་སྐྱེ། ། ཕྱག་རྒྱ་ཆེན་པོ་མངོན་རྫོགས་དང་། ། དངོས་གྲུབ་རྒྱས་དང་ཞི་བ་སོགས། ། དེ་ཡིས་འབད་མི་དགོས་པར་འཐོབ། ། རླུང་གི་དེ་ཉིད་ཡང་དག་སློབ། ། མཁའ་སྤྱོད་ཉིད་ནི་ཐོབ་པར་འགྱུར། །
BOརྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ ལས་བདུད་རྩི་ལྔ་བཟའ་བའི་ཆོ་གའི་ལེའུ་སྟེ་དྲུག་ཅུ་གཅིག་པའོ། ། ། ། དེ་ནས་གཞན་ཡང་བཤད་ཀྱིས་ཉོན། ། ཚོགས་ཀྱི་འཁོར་ལོ་ཆོ་ག་མཆོག ། གང་གིས་མཆོད་པ་ལས་བྱུང་བ། ། རྒྱལ་སྲས་རྣམས་ཀྱི་དངོས་གྲུབ་མཆོག ། རྣལ་འབྱོར་ཆེ་དང་ལྷན་ཅིག་ཏུ། ། སྒྲུབ་པའི་ཕྱིར་ནི་ཡང་དག་གནས། ། ཕྱག་རྒྱ་བརྡ་ནི་ཡོངས་ཤེས་ཤིང་། ། དེ་དང་དམ་ཚིག་ལ་ནི་འཇུག ། དེ་རྣམས་ཚོགས་ནི་རབ་མཆོག་དང་། ། ཚོགས་ཀྱི་འཁོར་ལོ་ཞེས་ནི་བརྗོད། ། ཀུན་ཀྱང་དམ་ཚིག་ལ་གནས་པ། ། རྟོག་པ་ཐམས་ཅད་རྣམ་པར་སྤངས། ། བླ་མ་ལ་ དད་དམ་ཚིག་གནས། ། གཏོང་སོགས་ཡོན་ཏན་རྣམས་ཀྱིས་བརྒྱན། ། ཐབས་ཞེས་བྱ་བ་བགེགས་མེད་ན། ། ཚོགས་ཀྱི་འཁོར་ལོ་ལ་ནི་འཇུག ། གཞན་དུ་སྐྱོན་ནི་འབྱུང་འགྱུར་ཏེ། ། འཁོར་ལོ་ལ་ཡང་འགྲུབ་མི་འགྱུར། ། ཤེས་རབ་ཀྱང་ནི་ཐབས་དང་མཚུངས། ། མཛའ་ བོ་བཟང་དང་རབ་ཏུ་མཁས། ། ལོ་ནི་ཉི་ཤུ་རྩ་ལྔ་ལོན། ། ལྷག་མ་ཡོངས་སུ་སྤངས་ནས་ནི། ། ཐབས་དང་སོ་སོར་ཤེས་རབ་དང་། ། ཀུན་ལ་གཅིག་ནི་ཕན་ཡོན་མེད། ། ཐོག་མ་ཡིད་འོང་ཉམས་དགའ་བར། ། མེ་ཏོག་གི་ནི་དཀྱིལ་འཁོར་བྱ། །
BOདེ་ཉིད་སྣ་ཚོགས་མཆོད་ པ་ནི། ། ལེགས་པར་མཉམ་པར་བཞག་ནས་མཆོད། ། གཙོ་བོ་དངོས་པོ་ཀུན་གྱིས་ནི། ། རྡོ་རྗེ་སེམས་དཔའ་བཞིན་དུ་མཆོད། ། ཚོགས་ཀྱི་མཆོད་པ་བྱས་རྗེས་ལ། ། དཀྱིལ་འཁོར་ལུགས་འབྱུང་ལུགས་བཟློག་པས། ། དད་པ་དངོས་པོས་ཀུན་ནས་ནི། ། མཉམ་པས་བལྟ་ བས་བསྒོམས་ནས་ནི། ། བསྟན་བཅོས་ཉམས་མྱོང་འཇིག་རྟེན་དང་། ། འགལ་བ་དེ་ནི་གཞུག་མི་བྱ། ། གཞན་ཡང་བསྟན་བཅོས་ལས་གསུངས་པ། ། མཚན་ཕྱེད་ནི་ནི་དགུག་པར་བྱ། ། སློབ་དཔོན་མགོན་ལ་ཡང་དག་མཆོད། ། ཇི་ལྟར་གདན་སྟེངས་བཞུགས་གསོལ་ནས། ། གདན་ནི་རྡོ་རྗེ་སེམས་དཔའ་ཡི། ། ཕྱག་རྒྱ་ཆེན་པོ་ཡང་དག་ལྡན། ། རྡོ་རྗེ་སློབ་དཔོན་དེ་ཉིད་ཀྱང་། ། མཁྱེན་པ་འཁོར་ལོའི་དབུས་ན་བཞུགས། ། དཀྱིལ་འཁོར་པ་ནི་གཞན་རྣམས་དང་། ། དེ་བཞིན་འཁོར་ལོ་གནས་པ་གཞན། ། དཀྱིལ་འཁོར་པ་བཞིན་ཤེས་པར་བྱ། ། ཚོགས་ཀྱི་འཁོར་ལོར་གཏམ་སྨྲ་དང་། ། རྩོད་དང་དེ་བཞིན་སྒྲུབ་པ་དང་། ། མཆིལ་སྣབས་དོར་ཞིང་དགོད་པ་དང་། ། རྐང་པ་ལ་སོགས་རྐྱོང་བ་དང་། ། ཡང་དང་ཡང་དུ་ལྡང་བ་ནི། ། དེ་ལ་དུས་ཀུན་དུ་མི་བྱ། ། ཕྱག་རྒྱ་བརྡ་ཡི་ཚོགས་རྣམས་ཀྱིས། ། བྱ་ཞིང་བྱ་བར་ཤེས་པར་བྱ། །
BOཤེས་བཞིན་དུ་ནི་གར་དང་གླུ། ། ཚོགས་ཀྱི་དཀྱིལ་འཁོར་དུ་ནི་བྱ། ། གཙོ་བོ་ལ་ནི་སྣོད་ཀྱི་མཆོག ། དུམ་བུ་གཅིག་པ་མཚན་ཉིད་བཟང་། ། དེ་མེད་དུམ་བུ་གསུམ་པ་ལ། ། མེ་ཏོག་སྣ་ཚོགས་རྣམས་ཀྱིས་མཆོད། ། ལྷ་ཡི་ཆང་ལ་སོགས་པ་གང་། ། ལེགས་པར་མཉམ་པར་ གཞག་སྟེ་དབུལ། ། ཚོགས་རྣམས་ལ་ཡང་སོ་སོར་སྣོད། ། མེ་ཏོག་ཚོགས་ཀྱིས་ཡོངས་གང་བ། ། ཐོག་མར་གཏོར་མ་ཆེན་པོ་སྦྱིན། ། སྔོན་བཞིན་བཟའ་བ་ལ་སོགས་ལྡན། ། གང་གིས་དགའ་བ་རྣམས་ཉམས་པ། ། དེ་འདྲ་བཏུང་བར་མི་བྱའོ། ། ཡང་དང་ཡང་དུ་ཕྱག་བྱས་ ནས། ། ཕྱག་རྒྱ་བཅིངས་ནས་བཏུང་བར་བྱ། ། དེ་ནས་བཟའ་བ་ཐམས་ཅད་ནི། ། སྦྱང་བྱ་སོགས་ཀྱིས་ཡང་དག་སྦྱངས། ། ཨོྃ་དང་ཨཱཿདང་ཧཱུྃ་གིས་ནི། ། སྦྱང་དང་སད་དང་རྟོགས་པར་བྱ། ། གུར་གུམ་ཙནྡན་དཔའ་བོ་དང་། ། གངས་དང་{རི་དགས་,རི་དྭགས་}ལྟེ་བ་དང་། ། འདི་ནི་དག་བྱེད་ བདུད་རྩི་ལྔ། ། བཟའ་བ་འདི་རྣམས་རབ་ཏུ་སྤྱོད། ། སྦོམ་པོ་མིང་མེད་སྦྱོར་བ་ཡིས། ། དཔའ་བོ་རྣལ་འབྱོར་མ་རིམ་བཞིན། ། རང་གི་ལྕེ་ཡིས་མྱང་བར་བྱ། ། དཔའ་བོ་དབུས་སུ་དུས་ཀུན་དུ། ། ཁ་ལ་དཔའ་བོ་རྣམ་པར་དགོད། ། བླ་ན་མེད་པའི་མཆོད་པ་བྱ། །
BOཔདྨའི་ལྟེ་ བའི་དབུས་ལ་ནི། ། དཔའ་བོ་རྣམས་ཀྱི་གདན་དུ་བརྗོད། ། གལ་ཏེ་དཔའ་བོས་མ་ཤེས་ན། ། དཔའ་བོ་དོན་གྱི་མཚན་ཉིད་རྣམས། ། དངོས་གྲུབ་ཐམས་ཅད་སྩོལ་བ་ཡི། ། འཁོར་ལོ་དེ་ཡི་འབྲས་བུ་མེད། ། དེ་ལྟའི་འབྲས་བུ་ཅུང་ཟད་གང་། ། ཕྱི་ ནང་བདག་ཉིད་ཡང་དག་སྤྱོད། ། དེ་ཡིས་རྣམ་དག་དངོས་གྲུབ་འགྱུར། ། ཚོགས་ཀྱི་འཁོར་ལོའི་འབྲས་བུ་སྟེར། ། རྣལ་འབྱོར་མ་དང་ལྷན་ཅིག་འདྲེས། ། རབ་ཏུ་བཤད་ཀྱིས་དེ་ཉིད་ཉོན། ། འདུལ་བའི་མཁའ་འགྲོ་མ་འགའ་ཞིག ། སེམས་རྟོག་མེད་པའི་ཕྱིར་འོངས་ ནས། ། དེ་ལ་དེ་ཚེ་སྨྲ་བ་ཡང་། ། སྒྲུབ་པ་པོས་ནི་མི་བྱ་ཞིང་། ། ཚིག་ཙམ་གྱིས་ནི་ལན་མི་གདབ། ། བདེ་བར་འོངས་སམ་ཕྱག་རྒྱས་བྱ། ། དེ་ལ་ཅུང་ཟད་བྱ་སྨྲ་གང་། ། སློབ་དཔོན་རང་ཉིད་ཀྱིས་ནི་བྱ། ། ཡང་ན་བྱ་བ་ཐམས་ཅད་ནི། ། ལས་ཀྱི་རྡོ་རྗེས་ཡང་དག་སྦྱར། ། གང་ཕྱིར་རང་ཉིད་རྡོ་རྗེ་སེམས། ། ལས་ཀྱི་རྡོ་རྗེ་གཞན་དགའ་མིན། ། སྣ་ཚོགས་གཟུགས་ཀྱི་རྣལ་འབྱོར་མ། ། ཡང་དང་ཡང་དུ་དགུག་པར་བྱ། ། དེ་ལ་གཡོ་བའི་སྤྱོད་པ་མེད། ། སློབ་དཔོན་དཔའ་བོ་བཞིན་དུ་སྤྱོད། ། གང་ཡང་སྐྱོན་གྱི་སྤྱོད་པས་ནི། ། དེ་ཡི་ལུས་ནི་ ལྟུང་བར་འགྱུར། །
BOཤིན་ཏུ་དགའ་བ་ཡང་དག་སྐྱེས། ། བཀའ་བསྒོ་གར་གྱི་སྤྱོད་པ་བྱ། ། རྡོ་རྗེ་བཅིང་བ་དེ་ཡང་བྱ། ། ལྷ་རྣམས་ཇི་ལྟར་མཉེས་པ་ཉིད། ། མའམ་སྲིང་མོ་བུ་མོའམ། ། གལ་ཏེ་མཆོད་པར་འདོད་པ་ན། ། ཤེས་རབ་ཐབས་ཀྱི་ཆོ་ག་ཡིས། ། རྟོག་པ་ མེད་པས་བསྟན་པར་བྱ། ། རབ་མཆོག་དེ་ཡི་དངོས་གྲུབ་ནི། ། ཐོབ་པར་འདི་ལ་ཐེ་ཚོམ་མེད། ། ལྷག་མའི་གཏོར་མ་བླངས་ནས་ནི། ། དགོན་པ་ཆེན་པོར་སོང་ནས་དོར། ། ཀྵྨཱིཾ་ཨུ་ཙྪིཥྚ་ཀྵེ་ཏཱ་པཱ། ། ལཱ་ཡ་སྭཱ་ཧཱ་སྔགས་བརྗོད་བྱ། ། གལ་ཏེ་དེ་ལྟར་རབ་བྱེད་པའི། ། རྣལ་ འབྱོར་པ་ཡིས་སླར་ཡང་མཐོང་། ། དེ་ལྟར་དེ་ནི་ཡོངས་ཤེས་ནས། ། རྣལ་འབྱོར་པ་ཡི་མཚན་ཉིད་མཆོག ། གང་གིས་གདོང་ནི་འབར་བའི་འོད། ། ཟླུམ་ཞིང་འཇམ་ལ་མཛེས་པ་དང་། ། སྨིན་མ་རིང་བ་དེ་ཤེས་བྱ། ། འོད་དཔག་མེད་ཀྱི་རིགས་ལས་བྱུང་། ། དེ་ལས་པདྨའི་ ཕྱག་རྒྱ་བསྟན། ། རུས་སྦལ་ཕྱག་རྒྱ་ལན་ཡིན་ནོ། ། མཆུ་རླེ་མིག་དཀྱུས་རིང་བ་དང་། ། ཁ་དོག་སེར་མོ་ཡིད་འཕྲོག་མ། ། འདི་ཡི་དཔྲལ་བར་རི་མོ་གསུམ། ། ཇི་སྲིད་སྐྲ་མཚམས་བར་དུ་གནས། ། གཡུལ་དུ་འཆི་བ་རྣམས་ཀྱིས་ནི། ། གཏམ་དག་ལ་ནི་རབ་ཏུ་ཉན། ། འདི་འདྲའི་ཉན་པ་མ་མཐོང་ནས། །
BOམདུང་གི་ཕྱག་རྒྱ་བསྟན་པར་བྱ། ། རྐང་བ་གཡོན་པ་བསྐུམ་པ་དང་། ། དེ་ནི་གར་བྱེད་རབ་ཏུ་སྟོན། ། གཡོན་པ་ཡོངས་སུ་བསྐོར་ནས་ནི། ། ཕྱག་རྒྱའི་ལན་ནི་བསྟན་པར་བྱ། ། སྣ་ཚོགས་པ་ཡི་གོས་ལ་དགའ། ། རིན་ཆེན་འབྱུང་ ལྡན་རིགས་ལས་བྱུང་། ། ཁ་དོག་གནག་ཅིང་གོས་ཀྱང་གནག ། སྐྲ་ནི་འཁྱིལ་ཅིང་དར་གྱིས་བཅིངས། ། དཔྲལ་བར་གཞུ་ཡི་རྣམ་པ་ཡི། ། དེ་འདྲའི་མཚན་མ་མཐོང་ན་ནི། ། རྟག་ཏུ་དེ་ཡི་སེམས་གཡོ་བ། ། མ་མོ་ཞེས་ནི་རབ་ཏུ་གྲགས། ། དྲིལ་བུའི་ཕྱག་རྒྱ་ བསྟན་པར་བྱ། ། དེ་ཡི་གཡོན་པས་ཕྱག་རྒྱ་སྟོན། ། མི་བསྐྱོད་རིགས་ལས་བྱུང་བར་ཤེས། ། མཚན་མོ་འོངས་ནས་འགྲོ་བ་མཆོག ། ཐུང་ངུ་ལྟོ་སྦོམ་ཁ་དོག་དཀར། ། བྱིན་པ་སྦོམ་ཞིང་ཤིན་ཏུ་མཛེས། ། ས་སྤྱོད་མར་ནི་ཤེས་པར་བྱ། ། དུང་གི་ཕྱག་རྒྱ་ལན་ཡིན་ནོ། ། རྣམ་པར་སྣང་མཛད་རིགས་ལས་བྱུང་། ། མིག་ཡངས་རྫི་མ་སྟུག་པ་དང་། ། ཡན་ལག་ཀུན་ལ་བ་སྤུས་ཁྱབ། ། སྔོ་བསངས་མིག་ནི་དམར་བ་དང་། ། ཡན་ལག་ཕྲ་ཞིང་དཔུང་པ་རིང་། ། དེ་ནི་མཁའ་འགྲོ་མ་རུ་གྲགས། ། དོན་ཡོད་གྲུབ་པའི་རིགས་ལས་བྱུང་། ། དེ་འདྲ་བ་ ནི་རབ་མཐོང་ན། ། བ་དན་གྱི་ནི་ཕྱག་རྒྱ་དང་། །
BOགཡོན་པའི་ཕྱག་རྒྱ་ལན་ཡིན་ནོ། ། དེ་ལྟར་འབད་པས་ཤིས་ནས་ནི། ། མཁས་པས་མཚན་མོ་སོང་ནས་ནི། ། དེ་ལ་ཅུང་ཟད་འཇིགས་མི་བྱ། ། གང་ཕྱིར་དེ་ཉིད་མཆོད་པར་བྱ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་ བ་མངོན་པར་རྟོགས་པ་ལས་ཚོགས་ཀྱི་འཁོར་ལོའི་མཆོད་པ་དང་། རྣལ་འབྱོར་མ་དང་འདྲེས་པའི་ལེའུ་སྟེ་དྲུག་ཅུ་གཉིས་པའོ། ། ། ། དེ་ནས་གཞན་ཡང་བཤད་ཀྱིས་ཉོན། ། གསང་བའི་ཚིག་ནི་བཤད་པ་ནི། ། རྡོ་རྗེའི་གནས་སོགས་གནས་རྣམས་སུ། ། རིགས་ ཀུན་ལས་བྱུང་རྣལ་འབྱོར་མ། ། མཚན་མོ་འདུ་བའི་དམ་ཚིག་ནི། ། འདི་འདྲ་བ་ཡི་ཚིག་རྣམས་དང་། ། དེ་ལྟ་བུ་ཡི་གསང་བ་ནི། ། བཤད་ཀྱིས་དད་པ་ཡིས་ནི་ཉོན། ། སྃ་པོ་དང་ཀྃ་ཆང་འཐུང་བ། ། བྲི་རྃ་ཤ་རུ་རྣམ་པར་བརྗོད། ། ནི་ལ་ནཱ་བླ་ཏྲྃ་ཐོད་པ། ། གུ་ལང་མི་ཡི་ཐོད་པས་བརྒྱན། ། ཀུན་དུ་རྃ་འདོད་ཡང་དག་སྤྱོད། ། ཚ་དྲུྃ་རོ་དྲུག་བཟའ་བ་པོ། ། སུྃ་སུ་ཊཱྃ་དབང་གཉིས་སྦྱོར་བ། ། ཨ་ལོ་ཀྃ་ཡོད་པ་ཡི་མིང་། ། ཤྃ་རིམ་ག་སྐམ་སྐལ་ཡོད་ཤེས། ། ཙ་ཀྲ་ཀ་ནི་སྐལ་མེད་བརྗོད། ། ཏུྃ་ཤཱྃ་རྃ་ནི་ཁུ་ཚུར་ཤེས། ། མེ་ ཀ་མ་ཏྲྃ་གཅིག་ཏུ་བརྗོད། ། ཙནྡྲ་མ་ནི་ཁྲག་ཏུ་བཤད། །
BOག་ནྃ་བཤང་བར་ཡོངས་སུ་གྲགས། ། གྷ་ནྃ་ཤ་ཆེན་དུ་ནི་བཤད། ། ནི་ཛྃ་དྷ་དུ་ར་རུ་བརྗོད། ། བྷ་ས་ནྃ་ནི་ཆུ་རུ་བཤད། ། བ་ཀྵྃ་ཡན་ལག་རབ་ཏུ་བཤད། ། ཤུ་པྃ་བཟང་པོ་ཞེས་ནི་བརྗོད། ། ཧོ་ནི་ཚིམ་པ་ཞེས་ ནི་གྲགས། ། མརྒ་ལྟོགས་པ་རུ་ནི་བརྗོད། ། གྷྲི་ཏྃ་ལམ་དུ་བཤད་པ་དང་། ། བྱོ་མ་གྃ་ནྃ་ཕ་རོལ་དཔུང་། ། ཀ་མ་ཡ་ནི་གྱིས་ཤིག་བརྗོད། ། ན་ག་རྃ་ནི་བདག་ལུས་བརྗོད། ། བ་ཏ་ཀ་ནི་ཉོས་ཞེས་བརྗོད། ། ཨ་ཛྃ་ཡ་ནི་མེ་ཞེས་བརྗོད། ། ཤ་ཁམ་ཟ་བ་ཞེས་ནི་བརྗོད། ། ར་གམ་འདོར་ནི་ཆོ་ག་བརྗོད། ། ཤ་ཏ་ཀྃ་མི་བཟའ་བར་བརྗོད། ། ཅི་འདྲ་བ་ནི་སྔགས་ཞེས་བརྗོད། ། ཤ་རྃ་ཁྱི་འཚེད་ཤ་ཞེས་བརྗོད། ། རྃ་པ་ཀ་ནི་བླ་མར་བཤད། ། ཀ་ཡ་འདིར་ནི་རྒྱལ་རིགས་བརྗོད། ། ར་གྃ་རྗེ་རིགས་ཞེས་ནི་བཤད། ། བེ་རྃ་རྒྱ་ནི་དམངས་རིགས་ བརྗོད། ། ཙ་བྃ་རིགས་ངན་ཞེས་ནི་བརྗོད། ། ཤ་རྃ་སྨེ་ཤ་ཅན་དུ་བརྗོད། ། བྷ་བ་ཙ་ཀྲྃ་ཀོ་ལྤགས་མཁན། ། ཁད་ཀོམ་རོ་སྲེག་མ་རུ་བཤད། ། ས་མུན་ཏྲ་ནི་རྒྱལ་པོར་བརྗོད། ། མི་རྃ་མ་ཡི་རིང་དུ་བརྗོད། ། བྷ་ར་ཧ་གང་ཞེས་ནི་བཤད། ། བིམྑྱ་ཕག་ཅེས་བརྗོད་པར་བྱ། ། པ་ལྃ་ཤ་ནི་ཉ་ཞེས་བརྗོད། ། དི་ན་མར་སྐྱེས་སུ་ནི་བཤད། །
BOནག་ཏུྃ་སྦྱིན་སྲེག་ཏུ་ནི་བཤད། ། མརྟ་ཨཧྣ་ནི་འདབ་ཆགས་བརྗོད། ། ཧི་ར་ཕྱུ་ནི་མེ་ཏོག་བརྗོད། ། ཤ་དྲུལ་ལྃ་ནི་སྤོས་སུ་བཤད། ། མཱ་ལ་ཏྲི་ནི་དྲི་རུ་བཤད། ། ཤ་ཀུ་ནི་ཀ་མར་མེར་བརྗོད། ། ཀ་ཤི་ ཀྃ་ནི་གོས་སུ་བཤད། ། ཀེ་སེ་ར་ནི་གདོང་དུ་བརྗོད། ། བྃ་ཏྲྃ་དཔྲལ་བ་ཞེས་སུ་བཤད། ། མ་ལ་སྨིན་མར་ཡང་དག་གྲགས། ། ཀོ་བལ་ཡྃ་ནི་མིག་ཏུ་ཤེས། ། ཨ་ད་ར་ནི་སོ་རུ་བརྗོད། ། པལ་ལ་པོ་ནི་མཆུ་རུ་ཤེས། ། པ་ཤ་མགྲིན་པ་རུ་ནི་གྲགས། ། ཧཱུྃ་སོ་འཕྲག་པ་ རུ་ནི་བཤད། ། ཨ་གུ་རོ་ནི་དཔུང་པར་བརྗོད། ། སོ་སོ་རུ་ནི་ལག་པར་བཤད། ། ཤྲི་པང་ལེ་ནི་ནུ་མར་བརྗོད། ། ཛ་ཏིྃ་ཕ་ལྃ་རྐང་པར་བརྗོད། ། ད་ལ་ནྃ་ནི་ལྟེ་བར་བརྗོད། ། པདྨ་ཛ་ལམ་གསང་བའི་གནས། ། ཀ་ཏྃ་བ་ཀྃ་བརླ་གཉིས་སོ། ། བེ་སྃ་རྗེ་ངར་དུ་ནི་བཤད། ། ཚཱ་ག་ན་ནི་རྐང་པར་བརྗོད། ། པ་ར་ཨ་ཀ་ཀེ་ས་ར། ། སེན་མོ་ཞེས་ནི་ཡད་དག་བཤད། ། པདྨ་གར་ནི་ག་ནི་སྣང་། ། ཤ་ཀྲ་ཀུ་སུ་ལྃ་མལ་སྟན། ། ཤག་ཏུ་བུ་ཞེས་བྱ་བར་བརྗོད། ། ན་ལ་ནི་ནཱ་ལམ་སྟོན་མེད། ། གོ་བག་ཥྨ་ལམ་ཐམས་ཅད་བརྗོད། ། སཱ་ག་རྃ་ནི་རྒས་ པར་བཤད། ། ས་ལྃ་རོ་ནི་ཞིམ་པོར་བརྗོད། ། ཨ་ཀྵོ་རྃ་རིམ་མི་ཞིམ་བཤད། །
BOམྲྀ་གྃ་མི་སྨྲ་བར་ནི་བཤད། ། པ་གོ་ལ་མུ་དྃ་གླུ་ལེན། ། མི་ཏྲ་གར་ཞེས་བྱ་བར་བརྗོད། ། ཤ་བྟ་ཚུལ་འཆོས་སུ་ནི་བཤད། ། སྤར་ཤ་ཞགས་པར་རབ་ཏུ་གྲགས། ། ར་ས་སྒེག་མོའི་ རོ་འབེབས་མ། ། རུ་པྃ་རི་ཡི་རྩེ་མོའོ། ། ཏྭ་ནེ་ཧ་ནི་བསད་པར་བཤད། ། པཱ་རཱ་པ་ཏ་འཆི་བར་བརྗོད། ། ཏ་མ་ལཱ་ཀོ་སེ་མ་ཡུལ། ། ཕ་ལྃ་གྲོང་ཁྱེར་དུ་ནི་བརྗོད། ། པྲ་ན་གྲོང་དུ་བཤད་པ་ཡིན། ། ཐྱ་ནྱ་སྲོག་ཅེས་བྱ་བར་བཤད། ། ཀུ་རུ་ཏ་ར་མཁས་པར་བཤད། ། ན་ཡ་ན་ནི་རྣམ་ཤེས་བརྗོད། ། ཨ་བི་ན་པྃ་དགོད་པར་བཤད། ། རུ་ཏི་ར་ནི་འཆང་བར་བརྗོད། ། ཀུ་མུ་ར་ནི་ཉིན་མོར་བཤད། ། ཀན་ཉ་མཚན་མོར་རབ་ཏུ་གྲགས། ། ད་ས་ཉི་མ་ཕྱེད་དུ་བཤད། ། ད་པི་མཚན་གྱི་ཆ་རུ་གྲགས། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ ཕྲེང་བ་མངོན་པར་རྟོགས་པ་ལས་གསང་བའི་ཚིག་བཤད་པའི་ལེའུ་སྟེ་དྲུག་ཅུ་གསུམ་པའོ། ། ། ། དེ་ནས་གཞན་ཡང་བཤད་ཀྱིས་ཉོན། ། སྐུ་གསུང་ཐུགས་ཀྱི་དཀྱིལ་འཁོར་ནི། ། སྐུ་ནི་མགོ་བོར་གནས་པ་སྟེ། ། སུམ་ཅུ་རྩ་གཉིས་བྱང་སེམས་འབབ། ། དེ་ནི་སོ་སོར་རབ་ཕྱེ་བས། ། སྐུ་ཡི་འཁོར་ལོ་རུ་ཞེས་བྱ། ། ཡི་གེ་ཕྱི་མོའི་དབྱེ་བ་ཡིས། ། གསུང་ལ་གནས་པར་རབ་ཏུ་ཤེས། །
BOཆགས་སོགས་བག་ཆགས་དབྱེ་བ་ཡིས། ། ཐུགས་ཀྱི་འཁོར་ལོ་རུ་ནི་ཤེས། ། སྐུ་གསུང་ཐུགས་ཀྱི་བཤད་པ་ནི། ། སེམས་ དཔའ་ཆེན་པོ་ཁྱོད་ཉོན་ཅིག ། རྡོ་རྗེ་སློབ་དཔོན་སྐུ་ལ་ནི། ། རྒྱལ་བའི་སྐུ་ནི་རིམ་བཞིན་གནས། ། དང་པོ་སྐུ་ཡི་རྡོ་རྗེ་ནི། ། གཟུགས་ཕུང་ལ་ནི་ཡང་དག་བཞུགས། ། དེ་རྗེས་ནམ་མཁའ་རྡོ་རྗེ་ནི། ། ཚོར་བ་ཡི་ནི་ཕུང་པོར་བཞུགས། ། བཅོམ་ལྡན་གསུང་གི་རྡོ་རྗེ་ནི། ། འདུ་ ཤེས་ཀྱི་ནི་ཕུང་པོར་བཞུགས། ། ལས་རྣམས་ཀྱི་ནི་རྡོ་རྗེ་ནི། ། འདུ་བྱེད་ཀྱི་ནི་ཕུང་པོར་བཞུགས། ། བཅོམ་ལྡན་ཐུགས་ཀྱི་རྡོ་རྗེ་ནི། ། རྣམ་ཤེས་ཕུང་པོར་ཡང་དག་བཞུགས། ། ཡང་འདིའི་ཤ་སོགས་ས་ཁམས་ལ། ། བཅོམ་ལྡན་འདས་ཡུམ་སྤྱན་བཞུགས་སོ། ། ཁྲག་སོགས་ཆུ་ཡི་ཁམས་ལ་ནི། ། བཅོམ་ལྡན་འདས་ཡུམ་མཱ་མ་བཞུགས། ། དྲོ་བ་ལ་སོགས་མེ་ཁམས་ལ། ། བཅོམ་ལྡན་འདས་ཡུམ་གོས་དཀར་བཞུགས། ། མི་བསྐྱོད་ལ་སོགས་རླུང་ཁམས་ལ། ། བཅོམ་ལྡན་འདས་ཡུམ་སྒྲོལ་མ་བཞུགས། ། དེ་མིག་དབང་ པོ་གཉིས་ལ་ནི། ། དེ་བཞིན་གཤེགས་པ་ས་སྙིང་པོ། ། དེ་ཡི་རྣ་བའི་དབང་གཉིས་ལ། ། བདེ་གཤེགས་ཕྱག་ན་རྡོ་རྗེའོ། ། དེ་ཡི་སྣ་བུག་གཉིས་ལ་ནི། ། དེ་བཞིན་གཤེགས་པ་ནམ་མཁའི་མཛོད།
BO། དེ་བཞིན་གཤེགས་པ་འཇིག་རྟེན་དབང་། ། དེ་ཡི་ལྕེ་ཡི་དབང་ ལ་གནས། ། དེ་ཡི་ཡིད་ཀྱི་དབང་པོ་ལ། ། དེ་བཞིན་གཤེགས་པ་འཇམ་དབྱངས་བཞུགས། ། ཁམས་བཞིའི་རང་བཞིན་གོང་བུ་ནི། ། ལུས་ཞེས་བྱ་བར་བརྟགས་པ་ལ། ། སྒྲིབ་པ་ཐམས་ཅད་རྣམ་སེལ་བ། ། དེ་བཞིན་གཤེགས་པ་དེ་བཞུགས་སོ། ། ལུས་ཀྱི་ ཚིགས་ནི་ཐམས་ཅད་ལ། ། དེ་བཞིན་གཤེགས་པ་ཀུན་དུ་བཟང་། ། ལུས་ཀྱི་རྩ་རྒྱུས་ཐམས་ཅད་ལ། ། དེ་བཞིན་གཤེགས་པ་བྱམས་པའོ། ། ལག་པ་གཡས་པའི་རྩ་བར་ནི། ། དེ་བཞིན་གཤེགས་པ་གཤིན་རྗེའི་གཤེད། ། ལག་པ་གཡོན་པའི་རྩ་བར་ནི། ། དེ་ བཞིན་གཤེགས་པ་གཞན་མི་ཐུབ། ། ཁ་ཡི་པདྨར་བཞུགས་པ་ནི། ། དེ་བཞིན་གཤེགས་པ་རྟ་མགྲིན་ནོ། ། གསང་བའི་གནས་སུ་བཞུགས་པ་ནི། ། དེ་བཞིན་གཤེགས་པ་བདུད་རྩི་འཁྱིལ། ། དཔུང་པ་གཡས་པར་བཞུགས་པ་ནི། ། དེ་བཞིན་གཤེགས་པ་མི་གཡོ་ བ། ། དཔུང་པ་གཡོན་པར་བཞུགས་པ་ནི། ། དེ་བཞིན་གཤེགས་པ་འདོད་པའི་རྒྱལ། ། པུས་མོ་གཡས་པར་བཞུགས་པ་ནི། ། དེ་བཞིན་གཤེགས་པ་དབྱིག་པ་སྔོ། ། པུས་མོ་གཡོན་པར་བཞུགས་པ་ནི། ། དེ་བཞིན་གཤེགས་པ་སྟོབས་པོ་ཆེ། ། རང་གི་མགོ་ སྟེངས་བཞུགས་པ་ནི། ། དེ་བཞིན་གཤེགས་པ་འཁོར་ལོས་སྒྱུར། །
BOརྐང་པའི་འོག་ཏུ་བཞུགས་པ་ནི། ། དེ་བཞིན་གཤེགས་པ་གནོད་མཛེས་ཏེ། ། ལུས་ནི་འདི་ཉིད་ཀུན་ལ་འདིར། ། དེ་བཞིན་གཤེགས་པ་ཐམས་ཅད་བཞུགས། ། སྐུ་ཡི་དཀྱིལ་འཁོར་ཞེས་བརྗོད་པ། ། རྡོ་རྗེ་སེམས་དཔའ་ཉིད་ཀྱི་སྐུ། ། རྡོ་རྗེ་སེམས་དཔའི་དབྱེ་བ་ཡིས། ། རྫོགས་པའི་སངས་རྒྱས་མ་ལུས་འདི། ། ལུས་པ་མེད་པ་སངས་རྒྱས་སྐུ། ། སྐྱེ་བ་འདི་ལ་རྣལ་འབྱོར་པ། ། མྱ་ངན་འདས་པ་མྱུར་དུ་འཐོབ། ། ཁྱོད་ཀྱི་དགེ་བ་ཡོངས་སྦྱིན་པ། ། དེ་བས་རྡོ་རྗེ་སློབ་དཔོན་ གྱི། ། ལུས་ལ་རྒྱལ་བ་ཐམས་ཅད་བཞུགས། ། མཐོང་ན་དོན་ནི་ཡོད་པ་ཀྱེ། ། ཕྱི་མའི་དུས་ན་སེམས་དཔའ་ཆེ། ། དེ་བས་སེམས་ཅན་ཐམས་ཅད་ཀྱི། ། ལྷ་ཡི་མཆོད་པའི་ཡོ་བྱད་ཀྱིས། ། རབ་ཏུ་འབད་དེ་བླ་མ་བསྟེན། ། དེ་ནས་མཐོང་བ་དོན་ཡོད་བཅས། ། བྱང་ ཆུབ་སེམས་དཔའ་གྲགས་པ་ཆེ། ། དགའ་ཞིང་མགུ་བས་ཕྱག་བྱས་ནས། ། བཅོམ་ལྡན་འདས་ལ་མཆི་མ་བླགས། ། གསུང་དང་ཐུགས་ཀྱི་དཀྱིལ་འཁོར་བཞུགས། ། ལེགས་སོ་བྱ་བ་བྱིན་ནས་ནི། ། བཅོམ་ལྡན་འདས་ཀྱིས་འདི་སྐད་གསུངས། ། ཨ་ཨཱ་ཨི་ཨཱི་ཨུ་ ཨཱུ་དང་། ། རྀ་རཱྀ་ལྀ་ལཱྀ་ཨེ་ཨཻ་དང་། ། ཨོ་ཨཽ་ཨཾ་ཨཿདབྱངས་ཞེས་བྱ། ། ཀ་ཙ་ཊ་ཏ་པ་སྡེ་ཚན། ། ཡ་ར་ལ་ཝ་ཤ་ཥ་ས།
BO། ཧ་དང་གསུང་གི་དཀྱིལ་འཁོར་ཤེས། ། ངག་ཀུན་རབ་ཏུ་སྤྲོ་དང་ལྡན། ། འདོད་ཆགས་ལ་སོགས་བག་ཆགས་ཀྱང་། ། གྲངས་ནི་ཉི་ ཤུ་བརྒྱད་ཀྱིས་སོ། ། ཐུགས་ཀྱི་དཀྱིལ་འཁོར་ལེགས་རྒྱས་པ། ། དཔལ་མཆོག་ལས་ནི་ཤེས་པར་བྱ། ། དེ་ལྟར་འདུས་པའི་རྣལ་འབྱོར་རྣམས། ། རྡོ་རྗེ་གསུམ་ནི་དམ་ཚིག་མཆོག ། མཆོག་ཏུ་རྨད་བྱུང་རྒྱས་པ་ནི། ། སྒྲུབ་པའི་དབང་པོས་ཡང་ དག་ཤེས། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྐུ་གསུང་ཐུགས་ཀྱི་དཀྱིལ་འཁོར་བཤད་པའི་ལེའུ་སྟེ་དྲུག་ཅུ་བཞི་པའོ། ། ། ། དེ་ནས་བཅོམ་ལྡན་རྡོ་རྗེས་གསུངས། ། སངས་རྒྱས་དམ་ཆོས་དགེ་འདུན་དང་། ། བླ་མ་སྟོན་པ་ སློབ་དཔོན་དང་། ། རྡོ་རྗེ་འཆང་དང་སློབ་མ་ཡི། ། མཚན་ཉིད་ཐམས་ཅད་བསྡུས་པ་ནི། ། དྲི་མེད་སེམས་ནི་སངས་རྒྱས་འགྱུར། ། ཆོས་ནི་ངག་ཏུ་ཡང་དག་གསུངས། ། སྐུ་ནི་དགེ་འདུན་ཞེས་བྱ་སྟེ། ། བྱང་ཆུབ་སེམས་དཔའི་ཚོགས་ཀྱི་གནས། ། སངས་རྒྱས་ཡི་གེ་ཧཱུྃ་དུ་ བཤད། ། གསུང་ནི་ཡི་གེ་ཨཱཿརུ་བརྗོད། ། དགེ་འདུན་ཞེས་བྱ་ཡི་གེ་ཨོཾ། ། ཀུན་ནས་འཕྲོ་བའི་བདག་ཉིད་དོ། ། སངས་རྒྱས་ཨ་བ་དྷཱུ་ཏཱིར་འགྱུར། ། ཆོས་ཀྱང་ལ་ལ་ནཱ་རུ་བརྗོད། །
BOདགེ་འདུན་ར་ས་ནཱ་རུ་བརྗོད། ། འདི་ནི་གསུམ་པོའི་མཚན་ཉིད་དོ། ། གཟུགས་མེད་ཁམས་ནི་སངས་རྒྱས་འགྱུར། ། གཟུགས་ཀྱི་ཁམས་ནི་ཆོས་དང་ནི། ། འདོད་ཁམས་དེ་བཞིན་དགེ་འདུན་ཏེ། ། དེ་ལྟར་ཁམས་གསུམ་མཚན་ཉིད་མཆོག ། སྙིང་པོར་གྱུར་པ་རང་སྲོག་ལས། ། ཁམས་གསུམ་ན་ནི་གཞན་མེད་དེ། ། སྒྱུ་མ་རླུང་གི་ཁམས་གསུམ་པ། ། རྨི་ལམ་རྨི་བ་བཞིན་དུ་མཐོང་། ། ཁམས་གསུམ་བདག་ཉིད་དེ་བཞིན་ཉིད། ། གཅིག་པུར་མྱུར་བར་མཐོང་བར་འགྱུར། ། བྱིན་གྱིས་བརླབས་ནས་དེ་བཞིན་ཉིད། ། དངོས་གྲུབ་མྱུར་དུ་ཐོབ་པར་འགྱུར། ། སངས་རྒྱས་ལོངས་སྤྱོད་རྫོགས་པའི་སྐུ། ། དམ་པའི་ཆོས་ནི་ཆོས་ཀྱི་སྐུ། ། དགེ་འདུན་སྤྲུལ་པའི་སྐུར་ ནི་འགྱུར། ། དེ་ནི་སྐུ་གསུམ་བདག་ཉིད་ཅན། ། སྣང་བ་སངས་རྒྱས་ཀྱི་ནི་གཟུགས། ། ཆོས་ནི་སྣང་བ་ཐོབ་པའོ། ། དགེ་འདུན་སྣང་བ་མཆེད་པར་འགྱུར། ། དེ་ནི་སྣང་བ་གསུམ་མཚན་ཉིད། ། ཞི་བ་ལ་སོགས་ལས་ལ་བྱང་། ། སྔགས་དང་རྣལ་འབྱོར་ཆེ་རྣམས་ ཤེས། ། ཆོ་ག་ཉི་ཤུ་བྱ་བ་བསླབས། ། དེ་ནི་བླ་མར་མངོན་པར་བརྗོད། ། ཚུལ་ཁྲིམས་དག་ཅིང་སྦྱིན་པ་གཏོང་། ། བཟོད་དང་བརྩོན་འགྲུས་མཆོག་ཏུ་ལྡན། ། ཉིན་དང་མཚན་དུ་སྒོམ་ལ་ཞེན། །
BOཤེས་རབ་ལྡན་ཞིང་བཟོ་ལ་མཁས། ། བླ་མའི་སྤྱིར་ནི་ཡོན་ཏན་ཚོགས། ། དཔལ་ལྡན་སློབ་དཔོན་ཞེས་ནི་བརྗོད། ། ནང་གི་གསང་འདུས་ལ་རབ་དགའ། ། ཕྱི་རོལ་ཉན་ཐོས་ལ་སྤྱོད་པ། ། དེ་ལྟའི་མན་ངག་རིམ་པ་ཡིས། ། སློབ་མ་རྣམས་ལ་རྗེས་སུ་བསླབ། ། དེ་ནི་སྟོན་པར་ཡོངས་སུ་གསུངས། ། དེ་སྐད་སྨྲས་པ་དེ་བཞིན་བྱེད། ། རྟོག་པ་ རྣམས་དང་དཀྱིལ་འཁོར་ཚོགས། ། དམ་པའི་དོན་གྱི་བྱ་བ་དང་། ། སླར་ཡང་སྣང་བ་གསུམ་དང་ནི། ། རྣལ་འབྱོར་མཆོག་གི་སྤྱོད་པ་ལ། ། སློབ་ཅིང་གཞན་ཡང་སློབ་ཏུ་འཇུག ། དེ་ནི་སློབ་དཔོན་ཞེས་བྱའོ། ། དེ་ཉིད་བཅུ་ནི་ཡོངས་ཤེས་ནས། ། དཀྱིལ་འཁོར་ ལ་སོགས་བྱ་བ་ཤེས། ། སློབ་མ་རྗེས་སུ་ནུས་པ་དང་། ། གསང་བའི་དབང་ནི་བསྐུར་བ་དང་། ། ཤེས་རབ་སྙིང་རྗེ་ཡང་དག་ལྡན། ། རྒྱུད་ཀྱི་མན་ངག་ལ་མི་འཇིགས། ། ཟབ་ཅིང་རྒྱ་ཆེར་ཡང་དག་ལྡན། ། རྡོ་རྗེ་སེམས་དཔའ་གཉིས་པ་མཆོག ། ཚར་གཅོད་ཕན་ འདོགས་པ་ལ་མཁས། ། དེ་ནི་རྡོ་རྗེ་འཆང་དུ་བཤད། ། དད་ཅིང་བླ་མ་ལ་ཡང་གུས། ། རྟག་ཏུ་དགེ་བའི་ལས་ལ་གནས། ། གཉིས་མེད་སྒྱུ་ཡང་མེད་པ་དང་། ། རྟོག་པ་ངན་པ་རྣམ་པར་སྤངས། ། ལུང་ནི་མང་དུ་ཐོས་པ་དང་། ། གསོད་པ་དང་ནི་འཚེ་བ་སྤངས། །
BOསེམས་ ཅན་རྣམས་ནི་འདོན་པའི་བློས། ། ཀུན་དུ་བརྩོན་དང་ཡང་དག་ལྡན། ། དེ་ལ་སོགས་པའི་ཡང་དག་ལྡན། ། དད་པ་ཆེན་པོའི་སློབ་མ་བཟང་། ། སྟོང་ཉིད་སྙིང་རྗེ་དབྱེར་མེད་པ། ། གང་ལ་དེ་ཉིད་ངེས་ཤེས་བྱ། ། གོང་ན་མེད་པའི་སྤྱོད་རབ་མཆོག ། སྔགས་དང་རྣལ་ འབྱོར་རིམ་པ་སོགས། ། ཡེ་ཤེས་ལྔ་ནི་རྣམ་དག་དང་། ། སངས་རྒྱས་ལྔ་ནི་རང་བཞིན་ཉིད། ། མངོན་པར་བྱང་ཆུབ་རྣམ་ལྔ་ཡིས། ། སྣང་བ་གསུམ་གྱི་མཚན་ཉིད་དང་། ། ཆོས་དང་ལོངས་སྤྱོད་སྤྲུལ་པ་དང་། ། སྐུ་གསུམ་རྣམ་པར་བསྒོམ་པ་དང་། ། བདེ་ཆེན་ ཡོན་ཏན་མཚན་ཉིད་ནི། ། དགའ་བ་ལ་སོགས་དབྱེ་བ་དང་། ། དེ་བཞིན་སྒེག་སོགས་ཉམས་དང་ནི། ། རྣལ་འབྱོར་རྗེས་སུ་རྣལ་འབྱོར་དང་། ། ཤིན་ཏུ་རྣལ་འབྱོར་རྣལ་འབྱོར་ཆེ། ། དང་པོ་སྦྱོར་བ་མདོར་བསྡུས་པས། ། དེ་བཞིན་དཀྱིལ་འཁོར་རྒྱལ་པོ་ མཆོག། ། ལས་ཀྱི་རྒྱལ་པོ་རྣལ་འབྱོར་མཆོག ། འཇུག་དད་གནས་དང་ལྡང་བ་ནི། ། རྫོགས་པའི་རིམ་པའི་རྣལ་འབྱོར་དང་། ། བདེ་གཉིས་དབུགས་འབྱུང་གཉིས་ལ་སོགས། ། གང་ལ་རྒྱས་བཤད་དེ་ཉིད་རྒྱུད། ། རྣལ་འབྱོར་ཆེན་པོའི་རྒྱུད་དུ་བརྗོད། ། ཡོན་ཏན་ ཇི་ལྟ་བུ་ཡི་རྒྱུད། ། ཐོས་སོགས་ཡོན་ཏན་མཆོག་གི་ནི། །
BOརྟེན་དང་སྣོད་ཅེས་བྱ་བར་གསུངས། ། མཚན་རྣམས་ཀུན་གྱིས་བརྒྱན་པ་དང་། ། ཇི་ལྟར་སེང་གེའི་འོ་མ་ནི། ། ས་ཡི་སྣོད་དུ་བཞག་མི་བྱ། ། དེ་བཞིན་རྣལ་འབྱོར་ཆེན་པོའི་རྒྱུད། ། སྣོད་མིན་དག་ལ་སྦྱིན་མི་ བྱ། ། སློབ་མ་སྐད་ཅིག་དེ་ལ་འཆི། ། འདི་དང་ཕ་རོལ་དུ་ནི་ཕུང་། ། སྣོད་མིན་མན་ངག་རབ་བཤད་ན། ། སློབ་དཔོན་དངོས་གྲུབ་ཉམས་པར་འགྱུར། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས། སངས་རྒྱས་དང་དམ་པའི་ཆོས་དང་དགེ་འདུན་ ལ་སོགས་པའི་མཚན་ཉིད་ཀྱི་ཚིག་རྒྱས་པའི་ལེའུ་སྟེ་དྲུག་ཅུ་ལྔ་པའོ། ། ། ། དེ་ནས་བཅོམ་ལྡན་རྡོ་རྗེས་གསུངས། ། སློབ་མའི་བྱ་བའི་སྤྱོད་པ་ནི། ། ཞི་བ་ལ་སོགས་བྱ་བ་ཡང་། ། སྔགས་དང་རྣལ་འབྱོར་རིམ་པ་ཡི། ། ལྷམ་དང་གདུགས་དང་གཙུག་ཏོར་ དང་། ། སོ་རྩི་ལ་སོགས་མྱང་བ་དང་། ། སྣབས་ཀྱི་གོང་བུ་མཆིལ་མ་སོགས། ། འདོར་ཞིང་རྐང་པ་རྐྱོང་བ་དང་། ། གཞན་དུ་ལྟ་དང་སྤྱི་བརྟོལ་སྨྲ། ། ནོར་གྱིས་སྙེམས་དང་ངར་འཛིན་དང་། ། རྒྱན་ལ་སོགས་པ་བལྟབ་པ་དང་། ། བག་མེད་པར་ནི་སྨྲ་བ་དང་། ། བླ་མའི་ གྲིབ་མ་འགོམ་པ་དང་། ། དེ་ལ་སོགས་པ་སྐྱོན་གྱི་ཚོགས། །
BOབླ་མའི་མདུན་དུ་རྣམ་པར་སྤངས། ། འཇིགས་པས་ཐལ་མོ་སྦྱར་ནས་ནི། ། སྤྱི་བོར་ཕྱག་རྒྱ་བཀའ་ལུང་ནོད། ། རབ་བདོག་ཀུན་གཏོད་དམ་བཅས་པས། ། ངོ་ཚ་བཅས་ཤིང་གདོང་སྨད་པས། ། སློབ་མས་ བླ་མའི་མདུན་གནས་བྱ། ། གལ་ཏེ་དངོས་གྲུབ་མཆོག་འདོད་ན། ། བླ་མའི་མདུན་དུ་སློབ་མ་རྣམས། ། དེ་ལྟ་བུ་སོགས་སྤྱོད་ཅེས་བྱ། ། དམ་ཚིག་སྡོམ་པ་སྔར་བཤད་པ། ། དེ་རྣམས་སློབ་མའི་སྤྱོད་པའོ། ། དེ་ཡི་ཞི་སོགས་བྱ་བ་ནི། ། བླ་མས་བསྟན་པར་བྱ་བའི་རིགས། ། དེ་ལ་མདོར་བསྡུས་བཤད་པར་བྱ། ། ཐུན་མོང་ཆོ་གའི་མཚན་ཉིད་ནི། ། ཞི་བ་དང་ནི་རྒྱས་པ་གཉིས། ། ཟླ་བ་ཡར་གྱི་ངོ་ལ་བྱ། ། དབང་དང་མངོན་སྤྱོད་ཀྱི་ནི་ལས། ། ཟླ་བ་མར་གྱི་ངོ་ལ་བརྩམ། ། བྱང་དུ་ཁ་བལྟས་ཞི་བ་ལ། ། དེ་བཞིན་རྒྱས་པ་ཤར་དུ་བལྟ། ། དྲག་པོའི་ ལས་ལ་ལྷོ་ཕྱོགས་སུ། ། དབང་གི་ལས་ལ་ནུབ་ཏུ་བལྟ། ། གསོད་པ་ཉིད་ལ་མེ་ཡི་ཕྱོགས། ། སྡང་བར་བྱ་ལ་བདེན་བྲལ་དུ། ། གནས་ནས་བསྐྲད་ལ་རླུང་གི་ཕྱོགས། ། རེངས་པ་ལ་ནི་དབང་ལྡན་ཕྱོགས། ། ཞི་བའི་ཁ་དོག་དཀར་པོ་སྟེ། ། རྒྱས་པ་ལ་ནི་སེར་པོ་བྱ། ། དབང་དང་དགུག་པ་ལ་ནི་དམར། ། ཁ་དོག་ནག་པོ་གསོད་པ་ལའོ། ། བྱམས་པའི་སེམས་ཀྱིས་ཞི་བ་ལ།
BO། དགའ་བའི་སེམས་ཀྱིས་རྒྱས་པ་ལ། ། ཆགས་པའི་སེམས་ཀྱིས་དབང་དག་ལ། ། ཁྲོ་བའི་སེམས་ཀྱིས་གསོད་པའོ། ། ཞི་ལ་ཕལ་ཆེར་ཐོ་རངས་བྱ། ། དེ་བཞིན་རྒྱས་པ་སྔ་དྲོ་བྱ། ། དབང་དང་མངོན་ སྤྱོད་དག་གི་ལས། ། ཉི་མ་གུང་དང་མཚན་ཕྱེད་ལའོ། ། དེ་ལྟར་རིགས་པར་ཡང་དག་བཤད། ། སྔགས་ཀྱི་རྒྱུད་གསུངས་མཚན་ཉིད་ཀྱིས། ། ཞི་བ་ལ་སོགས་དངོས་གྲུབ་བརྒྱད། ། བློ་ལྡན་ཆོ་ག་བཞིན་དུ་བསྒྲུབ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་ པར་རྟོགས་པ་ལས། སློབ་མའི་སྤྱོད་པ་རྣམ་པར་དག་པ་དང་། ཞི་བ་ལ་སོགས་པའི་ལས་ཀྱི་འབྲས་བུ་བསྟན་པའི་ལེའུ་སྟེ་དྲུག་ཅུ་དྲུག་པའོ། ། ། ། དེ་ནས་གཞན་ཡང་བཤད་ཀྱིས་ཉོན། ། ཁྲོ་བོ་བཟླས་པའི་མཚན་ཉིད་ནི། ། གང་གིས་རྣལ་འབྱོར་དངོས་ གྲུབ་བརྒྱད། ། ཐོབ་འགྱུར་འདི་ལ་ཐེ་ཚོམ་མེད། ། ཁྲོ་བོའི་སེམས་ཀྱི་བཟླས་པ་ནི། ། ཁྲོ་བོའི་བཟླས་པ་ཞེས་ནི་བརྗོད། ། ཡང་ན་ཁྲོ་བོའི་རྒྱལ་པོ་རྣམས། ། སྔགས་བཟླས་པ་ཡི་སྦྱོར་བ་ཡིས། ། ཁྲོ་བོའི་བཟླས་པ་དེ་ཤེས་བྱ། ། དངོས་གྲུབ་བརྒྱད་ཀྱི་འབྲས་བུ་ སྩོལ། ། འཇིགས་སུ་རུང་བའི་དུར་ཁྲོད་དུ། ། འཇིགས་པ་འཇིགས་པར་བྱེད་པའི་གནས། །
BOསྐྱེས་བུ་ཐོད་པའི་ཁྲག་གིས་གོས། ། རྨ་མེད་པ་ཡི་མཚན་ཉིད་བླང་། ། སྐྱེས་བུའི་ཁུ་བ་ཟླ་མཚན་དང་། ། བསྲེས་ནས་བྲི་བར་བྱ་བ་ནི། ། དེ་ན་བསྒྲུབ་བྱའི་ རྣམ་པ་དང་། ། གསལ་དང་འཇིགས་པ་སྐྲག་པ་དང་། ། གཡོན་བརྐྱང་བ་ཡིས་མནན་ནས་ནི། ། ཞག་བདུན་བར་དུ་དུས་གསུམ་དུ། ། གཤིན་རྗེའི་གཤེད་ཀྱི་སྔགས་འདིས་ནི། ། དངོས་གྲུབ་རྒྱུར་ནི་བཟླས་པར་བྱ། ། ན་མཿས་མནྟ་ཀཱ་ཡ་བཱཀྩིཏྟ་བཛྲཱ་ཎཱཾ། ཨོྃ་ཁ་ཁ་ ཁཱ་ཧི་ཁཱ་ཧི། སརྦ་དུཥྚ་སཏྭ་དམ་ཀ། ཨ་སི་མུ་ས་ལ་པ་ར་ཤུ་པཱ་ཤ་ཧ་སྟ། ཁཌྒ་བཱ་མ་ཏ་ར་ཙ་ནི་ཧཥྛ། ཙ་ཏུར་མུ་ཁ། ཙ་ཏུར་བྷུ་ཛ། ཥ་ཌ་ཙ་ར་ཎ། ཨཱ་གཙྪ་ཨཱ་གཙྪ། སརྦ་དུཥྚ་པྲཱ་ཎ་ཨ་པ་ཧ་རི་ཎེ། མ་ཧཱ་བིགྷ་ནཱཾ་གྷཱ་ཏ་ཀ། བིཀྲྀ་ཧ་ཨཱ་ནན། སརྦ་བྷཱུ་ཏ་བྷ་ཡྃ་ཀ་ ར། ཨཊྚ་ཨཊྚ་ཧཱ་ས་ནཱ་དི་ནེ། བྱཱ་གྷྲ་ཙ་རྨཱ་ནི་བཱ་ས་ན། ཀུ་རུ་ཀུ་རུ། སརྦ་ཀརྨཱ་ཎི། ཙྪིནྡ་ཙྪིནྡ། སརྦ་མན་ཏྲཱན། བྷིན་དྷ་བྷིན་དྷ། པ་ར་མུ་དྲཱ་ན། ཨཱ་ཀརྵ་ཡ་ཨཱ་ཀརྵ་ཡ། སརྦ་བྷཱུ་ཏཱ་ན། མ་ཐ་མ་ཐ། ནི་ར་མ་ཐ་ནི་ར་མ་ཐ། སརྦ་དུཥྚཱ་ན། པྲ་བེ་ཤ་ཡ་པྲ་བེ་ཤ་ ཡ། མཎྜལ་མ་དྷྱེ། བཻ་བ་ཤྭ་ཏ། ཛཱི་བི་ཏ་ཨནྟ་ཀ་ར། ཀུ་རུ་ཀུ་རུ། ཧ་ན་ཧ་ན། ད་ཧ་ད་ཧ། པ་ཙ་པ་ཙ།
BOམཱ་བི་ལམྦ་མཱ་བི་ལམྦ། ས་མ་ཡ་མ་ནུ་སྨ་ར། ཧཱུྃ་ཧཱུྃ། ཏརྫ་ཡ། བྷེ་གཱ་ནཱཾ། ཕཊ་ཕཊ། སྥོ་ཊ་ཡ་སྥོ་ཊ་ཡ། ཀཱ་ར་ཀཱ་ར། སརྦཱ་ཤ་པ་རི་པཱུ་རཱ་ཡ་ ཧེ་ཧེ་བྷ་ག་བཱན། ཀིཉྫི་རཱ་ཡ་སིན། ནམཿསརྦཱ་རྠ་སཱ་དྷ་ཡ་ཧཱུྃ་ཕཊ་སྭཱ་ཧཱ། ཐོག་མར་ཁྲོ་བོའི་བཟླས་པ་འདི། ། དབང་དུ་བྱ་དང་དགུག་པའི་མཆོག ། བསྐྲད་པ་རབ་ཏུ་བཤད་པར་བྱ། ། ཁྲོ་བོ་གཉིས་པའི་བཟླས་པ་ཡང་། ། སྐྱེ་ཚེ་ལན་ཚྭ་ཡུངས་མར་དང་། ། དུག་དང་དྷ་དུ་རའི་ ཁུ་བ། ། སྡིགས་མཛུབ་ཁྲག་དང་བསྲེས་ནས་སུ། ། དུར་ཁྲོད་རས་དང་བྱ་བ་ནི། ། ཟླ་བ་ཕྱེད་པ་ལྟ་བུ་མཆོག ། རླུང་གི་དཀྱིལ་འཁོར་བྲི་བར་བྱ། ། ལོགས་གཉིས་རྡོ་རྗེས་མཚན་པར་བྱ། ། དེ་དབུས་བསྒྲུབ་བྱའི་མིང་བྲིས་ལ། ། གཡོན་བརྐྱང་བར་ནི་གནས་ནས་ནི། ། སྔགས་འདི་ཡོངས་སུ་བཟླ་བར་བྱ། ། སྔར་བཞིན་བསྒྲུབ་བྱའི་མིང་བཀུག་ནས། ། མཚན་ཕྱེད་ཀྱི་ནི་དུས་སུ་ནི། ། ཀུན་ནས་ཞག་བདུན་བསྒྲུབ་པར་བྱ། ། བསྐྲད་པར་ཡང་ནི་འགྲུབ་པར་འགྱུར། ། ན་མཿས་མནྟ་ཀཱ་ལ་བཱཀྩིཏྟ་བཛྲཱ་ཎཱཾ། ན་མོ་བཛྲ་ཀྲོ་དྷཱ་ཡ། མ་བཱ་དཾ་ཥྚོ་ཏ་ ཀ་ཊ་བྷཻ་ར་ཝཱ་ཡ། ། ཨ་སི་མུ་ས་ལ་བར་ཤུ་པཱ་ཤ་ཧ་སྟཱ་ཡ། ། ཨོྃ་ཨ་མྲྀ་ཏ་ཀུ་ཎྜ་ལི། ཁ་ཁ་ཁཱ་ཧི་ཁཱ་ཧི།
BOཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། གརྫ་གརྫ། སྥོ་ཊ་སྥོ་ཊ། ། བི་སྥོ་ཊ་ཡ་བི་སྥོ་ཊ་ཡ། སརྦ་བིགྷ་ནཱཾ་བི་ནཱ་ཡ་ཀཱནྨ་ཧཱ་ག་ཎ་པ་ཏི། ཛཱི་བི་ཏཱ་ནྟི་ ཀ་རཱ་ཡ་ཧཱུྃ་ཕཊ་སྭཱ་ཧཱ། སྔགས་འདིས་གདུག་པའི་སེམས་ཅན་ནི། ། བསྐྲད་པའི་དོན་དུ་བྱས་པ་ཡིན། ། ཞི་བའི་ལས་ནི་བཤད་བྱ་བ། ། གཞན་གྱིས་མི་ཐུབ་མིང་དང་ནི། ། ཁྲོ་བོ་གསུམ་པ་བཟླས་ནས་ནི། ། མེ་དང་སྦྲུལ་སོགས་ཞི་བར་བྱེད། ། ལག་པ་གཉིས་ལ་ ཉི་མ་གཉིས། ། དེ་ལ་ཧཱུྃ་གཉིས་བསྒོམ་པར་བྱ། ། བསྒྲུབ་པའི་མགོ་ལ་ལག་གཉིས་ཀྱིས། ། བྲབས་ལ་དེ་ལ་ཞུགས་ནས་ནི། ། བསྒྲུབ་བྱའི་སྙིང་ལ་དེ་གཉིས་ཀྱིས། ། འབྱུང་པོ་བསྲེག་པར་བསམ་པར་བྱ། ། མེ་དང་འབྱུང་པོ་འཇིགས་བྱེད་པའི། ། འདི་ཡི་སྔགས་ནི་ བཤད་པར་བྱ། ། ན་མཿས་མནྟ་ཀཱ་ཡ་བཱཀྩིཏྟ་བཛྲཱ་ཎཱཾ། ཨོྃ་ཨ་པ་རཱ་ཇཱི་ཏི་རི་ཛི་ཧཱུྃ་ཕཊ། ཆེ་གེ་མོ་འབྱུང་པོའི་གདོན་ལས་གྲོལ་བར་མཛོད་ཅིག ། དྷྲཱྀཿདུག་སེལ་བའི་སྔགས་ཀྱིས་ནི། ། བཞི་པ་བཤད་ཀྱིས་དེ་ཉོན་ཅིག ། ཁྲོ་བོ་རྟ་མགྲིན་བཟླས་པས་ནི། ། ཡང་དག་མི་ མཚུངས་པ་ཡི་མཆོག ། བསྒྲུབ་བྱ་སེམས་དཔའ་སུམ་བརྩེགས་བསྒོམ། ། སྙིང་གར་ཟླ་གནས་ཡེ་ཤེས་སེམས། །
BOདེ་ཡི་འོད་ཟེར་གྱིས་རབ་གང་། ། བསྒྲུབ་བྱའི་ལུས་ལ་མཆོག་ཏུ་བསམ། ། རབ་ཏུ་འབར་བ་དེ་ཡིས་དུག ། དེ་ནས་ལག་གཡས་བསམ་པ་ནི། ། ཟླ་ བ་ཧཾ་གིས་རྣམ་པར་བརྒྱན། ། ཁ་དོག་དཀར་པོར་སོར་མོར་དགོད། ། དེ་ལྟར་སྒྲུབ་པ་པོ་ལ་བྱ། ཧཱུྃ་དྷྲཱྀཿཛི་ཀྵཱིྃ་སཱ་དྷ་དགོད། ། ལས་རྣམས་ཀུན་ནི་འགྲུབ་པར་བྱེད། ། བསྒྲུབ་བྱའི་མགོ་བོ་ནས་བརྩམས་ཏེ། ། རྐང་པའི་མཐའ་ཡི་བར་དུ་བསྒོམ། ། ཆུ་རྒྱུན་རྒྱུན་མི་འཆད་ པ་ནི། ། དུག་ནི་འོག་བཏང་རིམ་པ་ཡིས། ། འདིར་ནི་སྔགས་འདི་བཟླས་བྱ་སྟེ། ། རྟ་མགྲིན་དུ་ནི་མངོན་པར་བརྗོད། ། ན་མཿས་མནྟ་ཀཱ་ཡ་བཱཀྩིཏྟ་བཛྲཱ་ཎཱཾ། ཨོཾ་ཧཱུྃ་ཧཱུྃ་ཧཱུྃ། ཏ་རཱུ་ལ་བི་རཱུ་ལ། སརྦ་བི་ཥ་གྷཱ་ཏ་ཀ་ཏ་ཀ་ཛྭཱ་ལི་ཏ་བི་སྥུ་ལིངྒ། ཨཊྚཱ་ཊྚ་ཧཱ་ས་ནཱ་ད་ས་ཧཱི་ ཏ། ཀ་ས་རི་ས་ཧོ་བ་ཏཾ་ཨད་དེ་བ་བཛྲ་ཁུ་ར་གྷ་ཏ་ན། ཙ་ཏ་པ་སུ་དྷ་ཏ་ལ་ནི་ཤྭཱ་ས་མ་རུ་ཏ་ཨུཏ་ཀྵི་པྟ་དྷ་ར་ཎི་དྷ་ར། པི་ཥ་ན་ཨཊྚ་ཧཱ་ས་ཨ་པ་རི་མི་ཏཱ་བ་ལ་པ་རཱ་ཀྲ་མ་ཨཱརྱ་ག་ཎ་བྷཱི་ཏ། བུདྡྷ་བུདྡྷ། ཧ་ཡ་གྲཱི་བ་ཁ་ཁ། ཙྪིནྡ་ཙྪིནྡ། ཨཱ་བེ་ཤ་ཡ། སརྦ་གྲ་ཧེ་ཥྭ། པྲ་ཏི་ཧ་ཏོ་བྷ་བ། བཛྲ་དཾཥྚྲི་ཀིཉྩི་རཱ་ཡ་སི་ཨི་དཾ་དུཥྚ་གྲ་ཧཾ་དཾཥྚ་སརྦྦཾ་བཱ།
BOདྷུ་ན་དྷུ་ན། མཱ་ཐ་མཱ་ཐ། མརྡ་མརྡ། བུདྡྷ་དྷརྨ་ར་དྷ། བུདྡྷ་དྷརྨ་སཾ་གྷ་ཨ་ནུ་ཛྙཱ་ན་ཀཪྻཾ་ཀུ་རུ་སྭཱ་ཧཱ། ཆེ་གེ་མོའི་དུག་ལ་སོགས་པ་སེལ་བར་མཛོད་ཅིག་ཧཱུྃ་ཞེས་བྱ་བ་དང་སྔགས་སྤེལ་ལོ། ། རྩ་བའི་རྒྱུད་ཀྱི་རྗེས་འབྲངས་ཏེ། ། ལྷག་མ་རྒྱས་པར་ཤེས་པར་བྱ། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཁྲོ་བོའི་བཟླས་པ་དང་ཞི་བ་ལ་སོགས་པའི་དངོས་གྲུབ་བརྒྱད་ཀྱི་ལེའུ་སྟེ་དྲུག་ཅུ་བདུན་པའོ། ། ། ། དེ་ནས་གཞན་ཡང་བཤད་པར་བྱ། ། དངོས་གྲུབ་ཐམས་ཅད་ བསྡུས་པ་ནི། ། སངས་རྒྱས་རྣམས་ཀྱི་ཡེ་ཤེས་མཆོག ། དངོས་གྲུབ་ལ་སོགས་མཚན་ཉིད་ནི། ། ས་སྙིང་ཕྱག་ན་རྡོ་རྗེ་དང་། ། འཇམ་དཔལ་སྒྲིབ་པ་སེལ་བ་དང་། ། བྱམས་པ་ལྔ་པོ་འདི་དག་དང་། ། ཡི་གེ་གསུམ་དང་རྣམ་པར་སྤེལ། ། མིག་དང་རྣ་བ་ཡིད་དང་ལུས། ། རྩ་ཡི་འཁོར་ལོ་བྱིན་གྱིས་བརླབ། ། མཚན་གསུམ་ཉིན་མོ་དེ་དང་འདྲ། ། མངོན་ཤེས་ལྔ་ཉིད་ཐོབ་པར་བྱེད། ། བཞི་པ་ཡི་ནི་དབང་བསྐུར་བས། ། བློ་ལྡན་དེ་ཉིད་མཐོང་བར་འགྱུར། ། སྣང་བ་མཚན་མོའི་ཆ་རུ་འགྱུར། ། ཉིན་མོ་སྣང་བ་མཆེད་པའོ། ། མཚམས་ནི་སྣང་བ་ཐོབ་ པའོ། ། དེ་ལྟར་སྣང་ལ་སོགས་མཚན་ཉིད།
BO། མཚན་མིན་མཚམས་དང་ཉིན་མོ་མིན། ། ཀུན་རྟོག་རླུང་ནི་སྤོང་བར་བྱེད། ། དེ་ནི་སྐད་ཅིག་མངོན་བྱང་ཆུབ། ། མཚན་ཉིད་སྐད་ཅིག་མར་ནི་བརྗོད། ། ཐ་མར་འབྱུང་དང་ཐོག་མར་འབྱུང་བའམ། ། དབུས་མི་འབྱུང་བའང་དབུས་སུ་འབྱུང་ བའམ། ། མཐའ་མིན་འབྱུང་བའང་མཐར་ནི་འབྱུང་བའམ། ། དེ་ནི་ཐམས་ཅད་སྟོང་པའི་སྐད་ཅིག་གཅིག་ཏུ་གསུངས། ། གང་དུ་འགྲོ་བ་དང་ནི་འོང་མེད་ཅིང་། ། ཟད་མེད་འཕེལ་མེད་དངོས་དང་དངོས་མེད་མིན། ། ངོ་མཚར་གཟུགས་ཅན་ཡིན་ཞིང་ངོ་མཚར་མིན། ། གནས་ པར་འགྱུར་མིན་མྱུར་དུ་འགྲོ་བ་མིན། ། གང་ཞིག་ཡོད་དང་མེད་པའི་ཐ་སྙད་རྣམས་དང་བྲལ། ། བསོད་ནམས་གཟུགས་མིན་སྡིག་པའི་གཟུགས་མ་ཡིན། ། བསོད་ནམས་སྡིག་གི་བདག་མིན་མཆོག་གྱུར་པ། ། དེ་ནི་ཐམས་ཅད་སྟོང་པའི་སྐད་ཅིག་གཅིག་ཏུ་གསུངས། ། སྐད་ ཅིག་གཅིག་ལ་མངོན་བྱང་ཆུབ། ། མཚན་ཉིད་འདི་ནི་སྐད་ཅིག་མཆོག ། རྡོ་རྗེ་རྩེ་མོ་བྱང་སེམས་ནི། ། འཛིན་པས་ལུས་ཀྱི་བརྟན་པ་ཉིད། ། དེ་ཡིས་དེ་ཉིད་བྱང་སེམས་ནི། ། རླུང་གི་དེ་ཉིད་རབ་སྦྱོར་བས། ། རིགས་པས་སྟེང་དུ་བྱེད་པ་ནི། ། རྒས་པ་མེད་པར་ཐེ་ཚོམ་མེད། ། ཧཱུྃ་ཧོཿརིམ་བཞིན་ཤེས་པ་ནི། །
BOའཛིན་པ་སྟེང་དུ་རྣམ་པར་སྤེལ། ། སྔར་བཤད་པ་ཡི་བདུད་རྩི་ལྔ། ། འདི་ནི་བཅུད་ཀྱིས་ལེན་དུ་བརྗོད། ། འདི་ཉིད་ཀྱིས་ནི་གྲུབ་པར་བྱེད། ། ལྕགས་ཀྱི་གསེར་འགྱུར་བྱས་ནས་ནི། ། རྡོ་རྗེ་ཕྱག་རྒྱ་དངོས་གྲུབ་ཆེ། ། ཟུང་དུ་འཇུག་པས་ཐོབ་ པར་འགྱུར། ། བསྐྱེད་པའི་རིམ་པའི་སྦྱོར་བ་དང་། ། དེ་བཞིན་རྫོགས་པའི་རིམ་པ་ཡང་། ། གང་ལ་དེ་གཉིས་གཅིག་འགྱུར་བ། ། དེ་ནི་ཟུང་དུ་འཇུག་པར་བཤད། ། འཁོར་བ་དང་ནི་མྱ་ངན་འདས། ། རྟོག་པ་གཉིས་པོ་སྤངས་པས་ནི། ། གང་དུ་དངོས་པོ་གཅིག་འགྱུར་ བ། ། ཟུང་དུ་འཇུག་ཅེས་དེ་ལ་བཤད། ། ཀུན་རྫོབ་དང་ནི་དོན་དམ་དག ། རྟོག་པ་གཉིས་དང་རྣམ་པར་བྲལ། ། གང་དུ་ཡང་དག་འདྲེས་གྱུར་པ། ། དེ་ནི་ཟུང་དུ་འཇུག་པར་བཤད། ། རྡོ་རྗེ་བཟླས་པའི་རབ་སྦྱོར་བས། ། རླུང་གི་མཚན་ཉིད་ཤེས་ནས་ནི། ། རྣམ་རྟོག་རླུང་ རྣམས་རྣམ་པར་གཅོད། ། སེམས་ལ་དམིགས་པ་འཐོབ་པར་འགྱུར། ། བདག་ལ་བྱིན་བརླབས་རིམ་པས་ཀྱང་། ། དངོས་གྲུབ་བརྒྱད་ནི་ཐོབ་པར་འགྱུར། ། སྣང་བ་ལ་སོགས་དབྱེ་བ་ཤེས། ། མངོན་པར་བྱང་ཆུབ་རིམ་པ་ཐོབ། ། ཟུང་འཇུག་རིམ་པ་ལ་གནས་པ། ། དངོས་གྲུབ་ཐམས་ཅད་བསྡུས་པ་ནི། །
BOཚེ་འདི་ཉིད་ལ་འགྲུབ་པར་འགྱུར། ། རྣལ་འབྱོར་པ་ཡིས་ཐེ་ཚོམ་མེད། ། ཕྱག་རྒྱ་ཆེན་པོའི་དངོས་གྲུབ་ཆེར། ། ཟུང་དུ་འཇུག་པའི་ཏིང་འཛིན་གྱིས། ། རྣམ་རྟོག་མེད་པར་ཞུགས་ནས་ནི། ། ཐོབ་པ་འདི་ལ་ཐེ་ཚོམ་མེད། ། ལུས་ནི་གཞལ་ཡས་ཁང་དུ་འགྱུར། ། སངས་རྒྱས་ཀུན་གྱིས་ཡང་དག་བརྟེན། ། ཟུར་བཞི་པ་ཡི་མདུན་རྒྱབ་དང་། ། གཡས་དང་གཡོན་གྱི་དབྱེ་བས་སོ། ། སྟེང་འོག་སྒོ་ཡི་དབྱེ་བ་ཡིས། ། སྒོ་བཞི་ཞེས་ནི་བཤད་པ་ཡིན། ། སྣ་རྩེ་བཞི་ཡི་དབྱིབས་ཀྱིས་ནི། ། རྟ་བབས་བཞི་ ནི་བརྗོད་པར་བྱ། ། དྲ་བ་ཆུ་བར་ཡང་དག་བཤད། ། རྒྱུས་པར་གྱུར་པ་དྲ་བ་ཕྱེད། ། ཆ་ནི་ཟླ་བ་ཕྱེད་པ་དང་། ། བུམ་པ་ལྟོ་བར་ཡང་དག་ཤེས། ། རྗེ་ངར་བརླ་དཔུང་ལག་ངར་ནི། ། ཀ་བ་བརྒྱད་དུ་ཡང་དག་བཤད། ། མིག་གི་རྣམ་ཤེས་མེ་ལོང་སོགས། ། སྒྲ་ཡི་རྣམ་ཤེས་རོལ་མོ་དང་། ། སྣ་ཡི་རྣམ་ ཤེས་མེ་ཏོག་ཕྲེང་། ། རིན་ཆེན་ཕ་གུ་ལྕེ་རྣམ་ཤེས། ། ལུས་ཀྱི་རྣམ་ཤེས་རས་འཕན་དང་། ། ཡིད་ཀྱི་རྣམ་ཤེས་{རི་དགས་,རི་དྭགས་}སོ། ། མིག་ནི་འཁོར་ལོའི་མཚན་མ་དང་། ། རྣ་བ་ཀུན་ནས་རྡོ་རྗེ་རྣམས། ། སྣ་ནི་བ་དན་དུ་ནི་བཤད། ། ལྕེ་ ནི་དྲིལ་བུ་རུ་ནི་གསུངས། །
BOརྔ་ཡབ་ལ་སོགས་རྣམ་དག་པ། ། ལུས་ཀྱི་ཚོགས་ཞེས་བྱ་བར་བཤད། ། ཡིད་ནི་དབུས་ཀྱི་པདྨར་གསུངས། ། རྣམ་རྟོག་རླུང་ནི་ཡང་དག་བརྟེན། ། ཡེ་ཤེས་ལྔ་ནི་རྣམ་དག་པ། ། རེ་ཁཱ་ལྔར་ནི་ཡང་དག་བརྗོད། ། ཕུང་པོ་ལྔ་ནི་རྣམ་དག་ ལྔ། ། རྣམ་དག་ཁ་དོག་ལྔ་ནི་དབྱེ། ། དེ་དག་གཞལ་ཡས་ཁང་དུ་བསྒོམ། ། དང་པོ་སྦྱོར་བར་ཤེས་པར་བྱ། ། མངོན་པར་བྱང་ཆུབ་རྣམ་པ་ལྔ། ། རིགས་ཀྱི་དབྱེ་བ་རང་ངོ་བོ། ། དེ་ཉིད་ཕྱི་རོལ་གནས་པར་བརྗོད། ། དཀྱིལ་འཁོར་རྣམ་པར་དག་པའོ། ། ཁམས་ བཞིའི་རང་བཞིན་བདག་ཉིད་ནི། ། གཟུགས་ཀྱི་ཕུང་པོ་མདོར་བསྡུས་ན། ། གཟུགས་ཀྱི་ཕུང་པོ་རྣམས་དང་ནི། ། མིག་གི་རྣམ་ཤེས་ས་སྙིང་པོ། ། ཕྱི་རོལ་གཟུགས་ཀྱི་རྡོ་རྗེར་བཤད། ། བྱམས་པ་རྩ་རྒྱུས་དབུས་ན་བཞུགས། ། དེ་བཞིན་ཁྲོ་བོའི་རྒྱལ་པོ་གཉིས། ། ཤར་ དང་ལྷོ་ཡི་མཚམས་སུ་ནི། ། མེ་ལོང་ཡེ་ཤེས་སུ་ནི་བཤད། ། རྣམ་པར་སྣང་མཛད་རྣམ་དག་ཉིད། ། བདེ་དང་སྡུག་བསྔལ་འཇིགས་དང་སྐྱོ། ། ཚོར་བའི་མཚན་ཉིད་དུ་ནི་འདོད། ། ཚོར་བ་ཆུ་ཡི་ཁམས་དང་ནི། ། ཕྱི་རོལ་སྒྲ་ནི་རྡོ་རྗེ་དང་། ། རྣ་བ་ཕྱག་ན་རྡོ་རྗེར་བཤད། ། རིགས་ནི་གཉིས་པོ་འདྲེས་པ་ཉིད། །
BOདྲི་ཡི་རྡོ་རྗེ་ཕྱི་རོལ་འགྱུར། ། སྣ་ཡི་རྣམ་ཤེས་མཁའ་སྙིང་བོ། ། ཁྲོ་བོ་གཉིས་པོ་རྣམ་པར་ཤེས། ། མཉམ་ཉིད་རིན་ཆེན་འབྱུང་བ་དང་། ། དངོས་དང་དངོས་མེད་སོགས་འདུ་ཤེས། ། སྔ་མ་རྗེས་དྲན་མཚན་ཉིད་ཅན། ། འདུ་ཤེས་ཕུང་ པོ་མེ་ཁམས་དང་། ། ཕྱི་རོལ་དྲི་ཡི་རྡོ་རྗེ་དང་། ། ལྕེ་ཡི་རྣམ་ཤེས་འཇིག་རྟེན་མགོན། ། དེ་བཞིན་ཁྲོ་བོའི་རྒྱལ་པོ་གཉིས། ། དེ་ནི་སོ་སོར་རྟོག་ཡེ་ཤེས། ། འོད་དཔག་མེད་ཀྱི་རིགས་ལས་བྱུང་། ། དགེ་དང་མི་དགེའི་ལས་རྣམས་ཀྱིས། ། བག་ཆགས་འདུ་བྱེད་ མཚན་ཉིད་ནི། ། འདུ་ཤེས་ཕུང་པོ་རླུང་གི་ཁམས། ། ཕྱི་རོལ་རོ་ཡི་རྡོ་རྗེ་དང་། ། ལུས་ཀྱི་རྣམ་ཤེས་སྒྲིབ་རྣམ་སེལ། ། ཀུན་བཟང་ཚིགས་ཀྱི་མཚམས་དབུས་བཞུགས། ། དེ་བཞིན་ཁྲོ་བོའི་རྒྱལ་པོ་གཉིས། ། བྱ་བ་ནན་ཏན་གྲུབ་ཡེ་ཤེས། ། དོན་ཡོད་གྲུབ་པའི་ རིགས་ལས་བྱུང་། ། དངོས་པོ་ཀུན་གྱི་རང་བཞིན་ནི། ། ཡེ་ཤེས་མཚན་ཉིད་རྣམ་ཤེས་བརྗོད། ། རྣམ་པར་ཤེས་པ་ནམ་མཁའི་ཁམས། ། ཡིད་ཀྱི་རྣམ་ཤེས་འཇམ་རྡོ་རྗེ། ། དེ་བཞིན་ཁྲོ་བོའི་རྒྱལ་པོ་གཉིས། ། ཤིན་ཏུ་རྣམ་དག་ཆོས་ཀྱི་དབྱིངས། ། མི་བསྐྱོད་པ་ཡི་ རིགས་ལས་བྱུང་། ། མངོན་པར་བྱང་ཆུབ་རྣམ་པ་ལྔ། །
BOགཞལ་ཡས་ཁང་ན་འདི་དག་བཞུགས། ། དེ་ཉིད་ཁམས་ཀྱི་དབྱེ་བ་ཡིས། ། རིམ་པ་ཇི་བཞིན་བཤད་པར་བྱ། ། སྐྲ་རུས་ཕྱི་ས་མཆིལ་མ་སྙིང་། ། ས་ནི་རྣམ་སྣང་བདག་ཉིད་དོ། ། སྤུ་དང་རྣག་དང་ཉེ་བའི་ སྙིང་། ། སེན་མོ་ཆུ་ཡི་ཁམས་སུ་ཤེས། ། རིན་ཆེན་འབྱུང་ལྡན་བདག་ཉིད་ཀྱི། ། རིགས་ཀྱི་རྟེན་དུ་ཤེས་པར་བྱ། ། སོ་དང་པགས་པ་ཤ་དང་སྙིང་། ། མེ་ཡི་ཁམས་ཞེས་བྱ་བར་བརྗོད། ། འོད་དཔག་མེད་ཀྱི་རང་བཞིན་དང་། ། རིགས་ཀྱི་དབྱེ་བར་ཤེས་པར་བྱ། ། རྒྱུས་པ་ཤ་དང་རྩིབ་ལོགས་སྙིང་། ། རླུང་ནི་དོན་ཡོད་གྲུབ་པའོ། ། དྲི་མ་རྒྱུས་པ་མཁྲིས་པ་སྙིང་། ། དེ་ནི་ནམ་མཁའི་ཁམས་སུ་གྲགས། ། མི་བསྐྱོད་པ་ཡི་རང་བཞིན་དང་། ། སྙིང་ནི་རྣམ་ཤེས་ལྔ་ཞེས་བྱ། ། རེ་རེ་ལ་ཡང་སོ་སོར་ནི། ། རྣམ་པ་ ལྔ་ནི་སྤྲོ་བ་ཤེས། ། དེ་བཞིན་གཤེགས་པའི་ཕུང་པོ་ལྔ། ། ནང་གི་བདག་ཉིད་རྫས་བྱེ་བ། ། ཤ་རྩ་རྒྱུས་པ་ཤ་ཁམ་ཚད། ། ཀླད་པ་དང་ནི་ཀླད་རྒྱས་དང་། ། རུས་པ་རྐང་དང་སྙེ་མ་དང་། ། མཁལ་མ་སྙིང་དང་ལྟོ་བ་དང་། ། གློ་བ་མཚེར་པ་གཅིན་དང་ནི། ། བཤང་ བ་ཕོ་བ་ལོང་ཀ་དང་། ། ཞག་དང་ཆུ་སེར་རྣག་དང་ནི། ། ཁྲག་དང་མཁྲིས་པ་བད་ཀན་དང་། །
BOངར་སྣབས་སྐྲ་དང་ཁ་སྤུ་དང་། ། སེན་མོ་སྤུ་དང་པགས་པ་དང་། ། ལག་པ་རྐང་མིག་ཡན་ལག་སོགས། ། མཚོག་མ་དཔུང་བ་ཞེས་ནི་བརྗོད། ། དེ་དག་རིམ་པར་ཤེས་ པར་བྱ། ། གཞལ་ཡས་ཁང་ནི་རྣམ་དག་པས། ། དེ་ལ་གནས་ཀྱི་དབྱེ་བ་ནི། ། མདོར་བསྡུས་ནས་ནི་བཤད་པར་བྱ། ། པཱུ་ལླི་ར་ནི་མགོ་བོར་ཤེས། ། སྤྱི་གཙུག་ཛཱ་ལན་དྷ་ར་དང་། ། རྣ་བ་གཡས་པར་ཨོ་ཌྱན་དང་། ། སྤྱི་བོའི་རྒྱབ་ནི་ཨརྦུ་ད། ། གོ་དཱ་བ་རི་རྣ་བ་ གཡོན། ། རཱ་མེ་ཤྭ་རི་སྨིན་མའི་དབུས། ། མིག་གཉིས་དེ་བི་ཀོ་ཊི་དང་། ། མཱ་ལ་ཝེ་ནི་དཔུང་པའི་རྩ། ། ཀཱ་མ་རཱུ་པ་མཆན་ཁུང་གཉིས། ། ཨོ་ཌེ་ནུ་མ་གཉིས་སུ་གྲགས། ། ཀོ་ས་ལ་ནི་ལྟེ་བར་ཤེས། ། ཏྲི་ས་ཀཱུ་ནེ་སྣ་ཡི་རྩ། ། ཁ་ཡི་པདྨ་ཀ་ལིང་ག། ། མགྲིན་པ་ ལམ་པཱ་ཀར་ནི་བརྗོད། ། སྙིང་ནི་ཀཱཉྩིར་ཤེས་པར་བྱ། ། ཧི་མ་ལ་ཡ་མདོམས་སུ་ཤེས། ། མཚན་མ་གྲྀ་ཧ་དེ་ཝ་དང་། ། བྲེ་ཏ་པུ་རི་བཤང་བའི་ལམ། ། བརླ་གཉིས་སུ་ཝརྞྞ་དྭཱི་པ། ། སཽ་རཥྚྭ་ནི་བྱིན་པ་གཉིས། ། རྐང་པའི་བོལ་ནི་སིན་དྷཱའི་ཡུལ། ། སོར་མོ་རྣམས་ལ་ནཱ་ ག་ར། ། མཐེ་བོང་གཉིས་ནི་མ་རུར་ཤེས། ། ཀུ་ལུ་ཏཱ་ནི་རྐང་པའི་མཐིལ། ། དེ་ལྟར་གནས་ཀྱི་རྣམ་དག་དང་། །
BOས་བཅུ་རྣམ་པར་དག་པ་ཉིད། ། དེ་ཉིད་དང་ལྡན་ཤེས་པར་བྱ། ། ཐིམ་དང་ལོངས་སྤྱོད་བདག་པོ་ཉིད། ། འཇུག་པ་ལ་སོགས་བྱེ་བྲག་གིས། ། རིམ་གྱིས་རྡོ་རྗེ་ སེམས་དཔའ་ཉིད། ། དེ་ནས་གཞན་ཡང་རབ་བཤད་པ། ། རླུང་རྣམས་ཀྱི་ནི་མཚན་ཉིད་མཆོག ། སྲོག་གི་རླུང་ནི་སྙིང་གར་གནས། ། མི་བསྐྱོད་བྱེ་བྲག་རིགས་ལས་སྐྱེས། ། མདོམས་ན་གནས་པའི་ཐུར་སེལ་ནི། ། རིན་ཆེན་འབྱུང་ལྡན་བྱེ་བྲག་སྐྱེས། ། སྟོད་དུ་རྒྱུ་བ་ལྐོག་ མཐར་གནས། ། འོད་དཔག་མེད་པའི་རང་བཞིན་ནོ། ། མེ་དང་མཉམ་གནས་ལྟེ་བར་གནས། ། དོན་ཡོད་གྲུབ་པའི་རང་བཞིན་ནོ། ། ཁྱབ་བྱེད་ཡན་ལག་ཀུན་ལ་གནས། ། རྣམ་སྣང་མཛད་ཀྱིས་བྱིན་གྱིས་བརླབས། ། དབང་པོའི་སྒོ་ཡི་རྒྱུན་ལས་ནི། ། སྲོག་དང་རྩོལ་ བ་རྒྱུན་འདི་དང་། ། དུས་ཀུན་དུ་ནི་རྒྱུ་བ་ནི། ། སྲོག་ཅེས་བྱ་བ་ཡིན་པར་བཤད། ། སྲོག་དང་རླུང་དང་ཕྱི་ས་དང་། ། དེ་བཞིན་དུ་ནི་ཁུ་བ་སོགས། ། འོག་འདྲེན་འདི་ནི་ཐུར་སེལ་རླུང་། ། རྟག་ཏུ་རྣལ་འབྱོར་བས་ཤེས་བྱ། ། དགོད་དང་ཟ་དང་ལྷག་པ་དང་། ། ཀུན་དུ་འཐུང་དང་ འཇིབ་པ་དང་། ། གང་ཞིག་རྟག་ཏུ་མཉམ་གནས་པ། ། མཉམ་དུ་གནས་པ་ཞེས་བྱར་བརྗོད། ། གྱེན་དུ་འགྲོ་ཞིང་སྡུད་པ་དང་།
BO། བཟའ་དང་མྱང་བ་ལ་སོགས་པ། ། ཤེས་ནས་ལྷན་ཅིག་འབྱོར་པ་དག ། གྱེན་རྒྱུའི་ལས་སུ་ཤེས་པར་བྱ། ། ཁྱབ་དང་འཛིན་པ་ཉིད་དང་ནི། ། དེ་བཞིན་འགྲོ་དང་ལྡོག་པ་སོགས། ། ཚིགས་ཀུན་དུ་ནི་ཁྱབ་པའི་ཕྱིར། ། ཁྱབ་བྱེད་ཅེས་ནི་བྱ་བར་བཤད། ། རླུང་གི་མཚན་ཉིད་བཤད་པ་ནི། ། དེ་ནས་དེ་ཡི་འཇིགས་པར་བརྗོད། ། སྔ་མ་བཞིན་དུ་བཏང་བཟུང་སོགས། ། ཕན་ཚུན་དུ་ནི་གནོད་པར་བྱེད། ། གཞན་ནི་ གཞན་ལ་འཚེ་བ་ཡིན། ། སྟོབས་ནི་ཐོབ་པའི་རང་བཞིན་གྱིས། ། གཅིག་ནི་གཅིག་ལ་ཐིམ་པར་འགྲོ། ། ཇི་ལྟར་ཟླ་བ་གཟས་བཟུང་ལ། ། རླུང་རྣམས་རིམ་གྱིས་ཉམས་འགྱུར་བ། ། སྔ་མ་བཞིན་དུ་གོང་ནས་གོང་། ། རང་གི་བདག་ཉིད་ལ་ཐིམ་པར། ། བཏང་བཟུང་སླར་ཡང་ འགྲོ་བར་བྱེད། ། ཇི་ལྟར་མེས་བསྲེགས་དངོས་མེད་དང་། ། རྒྱུ་མེད་པར་ནི་ཐིམ་པར་འགྲོ། ། སླར་ཡང་སྲོག་གི་རླུང་ཤར་བ། ། ལས་ཀྱི་རླུང་ནི་སྣ་ཚོགས་པ། ། དེ་ནི་ལྷན་ཅིག་རྣམ་ཤེས་དང་། ། སླར་ཡང་འཇིག་རྟེན་གསུམ་དུ་གནས། ། དེ་ལས་ལས་དང་དེ་ལས་སྐྱེས། ། དེ་ལས་ཆགས་སོགས་བག་ཆགས་དང་། ། དེ་ལས་སླར་ཡང་འཆི་དང་སྐྱེ། ། དེ་ལྟར་འཁོར་ལོ་བསྐོར་བ་འདྲ། ། སྔོན་བཞིན་རྡོ་རྗེ་བཟླས་ལ་སོགས། །
BOརིམ་གྱིས་དེ་ཡི་དབྱེ་བར་འགྱུར། ། དེ་ནས་སེམས་དཔའ་ཆེན་པོ་ཀུན། ། དེ་ཉིད་མིག་སྨན་ཐུར་མ་ ཡིས། ། ཐམས་ཅད་འཁྲུལ་པའི་ལོང་བ་བསལ། ། ཡང་དག་དངོས་པོ་ཉིད་ནི་མཐོང་། ། དེ་ནས་ཡང་ཡང་ཕྱག་བྱས་ཏེ། ། མཆི་བཅས་མིག་གིས་བཅོམ་ལྡན་ལ། ། ལན་གསུམ་དུ་ནི་བསྐོར་བྱས་ནས། ། རྡོ་རྗེ་འཆང་ལ་ཡང་དག་བསྟོད། ། ཨེ་མའོ་ཀུན་འགྲོ་ཀུན་དབང་ ཕྱུག ། ནམ་མཁའ་དང་ནི་མཚུངས་པ་བརྙེས། ། ཨེ་མའོ་དམ་ཚིག་དེ་ཉིད་གསུམ། ། མཆོག་ཏུ་རྨད་བྱུང་སྟོན་པར་མཛད། ། ཁམས་གསུམ་ལས་ནི་རྣམ་པར་གྲོལ། ། ཆོས་ཀྱི་དབྱིངས་ཀྱི་ངོ་བོ་ཉིད། ། འདོད་པ་རྣམས་ཀྱིས་མ་གོས་པ། ། དམིགས་མེད་ཁྱོད་ལ་ཕྱག་ འཚལ་ལོ། ། ཕུང་པོ་རྣམས་དང་ཁམས་རྣམས་དང་། ། སྐྱེ་མཆེད་རྣམས་ལ་མི་རྟེན་ཅིང་། ། སྲིད་དང་མྱ་ངན་འདས་ལས་གྲོལ། ། དམིགས་མེད་ཁྱོད་ལ་ཕྱག་འཚལ་བསྟོད། ། དེ་ལྟར་ནམ་མཁའ་གནས་མེད་ཅིང་། ། སྤྲོས་པ་མེད་ཅིང་གོས་པ་མེད། ། མཁའ་དང་ མཉམ་པའི་ཐུགས་མངའ་བ། ། དམིགས་མེད་ཁྱོད་ལ་ཕྱག་འཚལ་བསྟོད། ། དེ་ནས་བཅོམ་ལྡན་འདས་ཀྱི་སྐུ། ། འཇིག་རྟེན་གསུམ་ལས་རྒྱལ་གྱུར་པ། ། འཇིག་རྟེན་གསུམ་འདི་རྣམ་པར་གཡོས། ། བདུད་རྣམས་བཅོམ་པར་མཛད་ནས་ནི། །
BOའཇིག་རྟེན་གསུམ་ནས་ ལྷ་ལས་རྒྱལ། ། ཁྲོ་བོ་བཅུ་ནི་ཀུན་ནས་ནི། ། འཇིག་རྟེན་གསུམ་རྒྱལ་གཙོ་བོ་ཡིས། ། འདི་ལྟར་བཀའ་ནི་བསྒོ་བར་འགྱུར། ། ས་ཡི་ཆ་ནི་གང་ན་འདི། ། རྡོ་རྗེ་ཕྲེང་བར་མངོན་བརྗོད་པའི། ། རྣལ་འབྱོར་ཆེན་པོའི་དམ་ཚིག་རྒྱུད། ། དུས་ཀུན་དུ་ནི་སྤྱོད་འགྱུར་ཞིང་། ། རྒྱུན་དུ་དེ་ཉིད་རང་ཉིད་ཀྱིས། ། ཁྲོ་བོ་བཅུ་ཡིས་དེ་ལས་ནི། ། རྟག་ཏུ་ཕུར་བུས་བགེགས་ཀུན་ལ། ། བསྲུང་བའི་དོན་དུ་ཡུལ་འཁོར་དང་། ། རང་རང་ཕྲེང་བའི་སྔགས་ཀྱིས་ནི། ། དེ་རྣམས་ལ་ནི་གཏོར་མ་དབུལ། ། སེམས་ཅན་ཡོངས་སུ་གཟུང་བའི་ཕྱིར། ། སྣ་ཚོགས་སྤྲུལ་ པ་བསྟན་ནས་ནི། ། རྡོ་རྗེ་སེམས་དཔའ་དུས་ཀུན་དུ། ། ཉིན་དང་མཚན་དུ་བཞུགས་པར་འགྱུར། ། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་དངོས་གྲུབ་ཐམས་ཅད་བསྡུས་པའི་ལེའུ་སྟེ་དྲུག་ཅུ་བརྒྱད་པའོ། ། ། ། རྣལ་འབྱོར་ཆེན་པོའི་རྒྱུད་ དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྒྱུད་ཐམས་ཅད་ཀྱི་སྙིང་པོ་གསང་བ་རྣམ་པར་ཕྱེ་བ་ཞེས་བྱ་བ་རྫོགས་སོ། ། ། །
BOཐུགས་དམ་སའི་སྙིང་པོ་ཐོ་ལིང་སྙིང་པོ་དཔལ་དཔེ་མེད་ལྷུན་གྱིས་གྲུབ་པའི་གཙུག་ལག་ཁང་དུ་རྒྱ་གར་གྱི་མཁན་པོ་སུ་ཛ་ན་ཤྲཱི་ཛྙཱ་ན་དང་། སྒྲ་བསྒྱུར་གྱི་ ལོ་ཙཱ་བ་ཆེན་པོ་བོད་ཀྱི་ལྷ་བཙན་པོ་བླ་མ་དགེ་སློང་ཞི་བའི་འོད་ཀྱི་ཞལ་སྔ་ནས་བསྒྱུར་ཅིང་ཞུས་ཏེ་གཏན་ལ་ཕབ་པ། །
Sutraya